اللهجة الحجازية على مر العصور - الصفحة 4

30-12-07, 02:17 AM

المشاركة رقم: 16

المعلومات
الكاتب:	Toleen
اللقب:	^_^ عضو قمة عضوة بمنظمة الاكاتسوكي

البيانات
التسجيل:	Jun 2006
العضوية:	6270
المشاركات:	4,201
الجنس	أنثى
معدل التقييم:
نقاط التقييم:	146

االدولة

مدونتي

الإتصالات
الحالة:
وسائل الإتصال:

كاتب الموضوع : vueleve المنتدى : الارشيف

اقتباس :- المشاركة الأصلية كتبت بواسطة vueleve
اللهجة الحجازية : هي لهجة أهل المنطقة الغربية في السعودية وتتمركز بالذات في مكه وجده والمدينة والمدن القريبة منها اكثر من باقي المدن اللي في الغربية وهي لهجة تأخذ من اللهجة البدوية و اللهجة المصرية ولكنها تميل الى المصرية والسبب انه ايام العثمانيين كان فيها مصارية كتير قد الجبل وطبعا تختلف لهجة العجايز عن الجيل الحاضر .. لهجة العجايز تحسوها معتقة ومصطلحاتها القديمة ما تنفهم وما يستخدموها الا عتقية البلد اما الشباب حقون دحين ما عاد صار يستخدموها . وكمان ما ننسى ان اللهجة الحجازية فيها الكثير من الأمثال القيمة وبسم الرحمن نبدأ في بعض ما تختص بيه لهجتنا الحجازية الغاليه مصطلحاتنا : في كثير من المصطلحات الحجازية اللي من الصعب انو اي واحد غير حجازي يفهمها واتفضلوا هذي بعضها : اندر بره : اخرج العن سنسفيلك : اهزأك اديلو : اعطيه الدهليز : مدخل البيت الكرتة : الفستان الكنتره : الجزمة اكرمكم الله القنعه : العبايه الكرويتة : دكة خشبية الزقاق : الشارع الضيق وأعتقد أنها أصبحت كلمة معروفة بفعل النزح المكاوي على المدن الأخرى، وهو المعروف عند أهل نجد بالدعتسوس الداعوس <---- زقاق أهون وربي دندرمة : ايس كريم و تراها مي سبّة تراها كلمه معروفة جداً، وبعد دخول التطور إلى الحواري المكّاوية أصبحت تعرف بالآيس كريم دحديرة : نزلة او منحدر الدبش : اغراض العروسة قبل لا تتزوج( جهاز العروسه) القابلة : بكره = اللي تولد الحوامل (الدايه) المملك : المأذون الشرعي الدقيسي : الفراغ اللي تحت الدرج أو المخزن المرقعة : الدلع والمياعه في الكلام والتصرف يتتريق : يستهزء اللغوصة : نقل الكلام وتسبيب المشاكل الدحلسة : اذا كنت بتتمصلح مع واحد عشان تبغى منه شي تقول يدحلس . هججوني : ازعجوني دوشوني قوامن : بسرعه , حالاً مضليون : طبعاً الكلمة هذي تحفة اللهجة المكاوية، وكانت النساء تتفاخر بمن تملك فيهن مضليونحتى أن أحدهن قالت : وي يا فايقة يا أختي .. والله جوزي صدقة جابلي مضليون والمضليون هو البروش الذهب الحرمصة: يقولك في غابر الغابرين ( واحد متحرمص على نتيجته) والمعنى العلمي لها هو عدم الاستقرار النفسي أو انتظار الشيء على أحر من الجمر المرمشه: بفتح الميمين هي نهش ما على العظام من اللحم، أو نهش ما على أي شيء من أي شيء الزبلحة: ياساتر على الكلمات اللي تودي في داهية، المهم الزبلحة هي قلة الأدب والتواقح في الكلام العكننه : وهي التنكيد على شخص معين، و في مصطلحات كتيرررررررررر غيرها . كمان الحجازيين فيهم اخلاق و احترام مافي بعدها لما يطلب منك سكينه ايش يقول ؟ يقولك الله يخليك اديني سكينة في قلب العدو لما يقلك كنت ب أكل يقلك كنت ب أتعشى مثلاً فضله خيرك اشياء وتراجمها : بيت الما: وهو ما يعرف حاليا (بدورة المياه) وقد سماه الجيل الصاعد المكاوي الآن (الطهارة) وقد ورد انه تم التسمية هذه على أساس انه مكان كبير في البيت يوجد فيه الماء فسمي بـ بيت الما. المركّب: بتشديد الكاف، وهو ما يسميه جميع الناس الآن (المطبخ) والى الآن يعتبر علماء اللغة العربية هذه التسمية من عجائب التسميات لأنه لا يوجد سبب معروف للتسميه هذه إلى الآن!!!! الدقيسي: بتشديد الدال وكسرها وكسر السين، وهو ما يعرف بالمستودع ، يقول الكاتب المكاوي (محمد يواد فلاته) أن التسمية تعود إلى الحرب العالمية الأولى حيث استخدم أول مره كمخزن للذخائر وسمي في مكة بالدقيسي ، وقد قام جيل 2000 من شباب وشابات مكة بتسميته بالمخزن بدافع التطور. القرندي: بفتح القاف والراء وتسكين النون وكسر الدال <<<مشوار ها؟ وهذا نوع من أنواع مداعبة الأب المكاوي لابنه فعندما يناديه ويتأخر 3 ثواني يقله (بسرعة عساك القرندي) ويفسر علماء الجن أن القرندي نوع من أنواع الجن وببساطه يدعي الأب على ابنه بالقرندي <<شفتو اللطافه. الفقده: مفعول عشانه من فعل يفقد، وهذا نوع آخر من أنواع المداعبة وهي الخاصة بالأم المكاويه.حيث تداعب أولادها بـ (تعال الله يفقدك) توتوا: وهو نوع من أنواع المعادن المكتشفة في الاوديه المكاويه. ويستخدمونها المكاوية في تصنيع نوعين من الأشياء اللي تنحط فيها مويه للشرب وهو ما يسمونها زينا (الكاسه) ومو زينا (المغراف). المغراف: هو نوع من أنواع الكاسات التوتوا ، في حين انه تمت إضافة معلومة من علماء الجن المذكورين سابقا انه في مرة من المرات قامت أم تداعب ولدها لصغير (الشقي) اللي يلعب يالمغراف وقالتله الله يفقدك بس وبعدين قالت خلاص يامغراف خده وفي لمح البصر اختفى الولد ، والمغراف هو نوع من أ نواع الجن وكان بالصدفة متواجد في مكة هذا الجني ههههههههههههههههههههه على فكرة عندنا منطقة كمان في مكة اسمها محبس الجن<<<الله أعلم ايش قصدهم باسمها على طبطابي: يعني على مزاجي مِرَسْتَكَه : يعني متأنتكه يعني مرة شياكة .. ومرتبّة وايق : .... يعني طالع .... يعني مثلاً تقول .. : ( ياواد وايق زي الناس لا اهبدك باتقل شي قدامي ..و لا أهبدك اللين أجددايمانك) تزل : يعني تمر مرحبمبك: يعني مرحبا بك .. بس باختصار شوية باطِرمَة: يعني جلسة ... كنب حاجة زي كده ... كَرَاوِيتَه : حاجة خشب كده ... يحطوا عليها الباطرمة .... مَدَارِيْه : ...... مراجيح ... ندرت عينك من حُقّها: يعني خرجت عينك من محلها شَلْمَه: يعني فجعه .. يعني مثلاً تقول ( اشبك ياواد مشلوم كده عالاكل ؟؟ ) قيّسْتَك : ... يعني حسّبتك .... توقعتك .... هقيتك يعني مثلاً .. ( قيستك ياواد حتزل على عمتك فتّو ) ... وه ياستيته .. بُخْنُق: اللي يتلبس في الراس ويكون مخيّط على قده مِدَهْمَلْ : .... يعني مبهدل .... يعني مثلاً ( اشبك ياواد مدهمل كده لاتكون كنت بتلعب في المداريه ) ؟؟ دهليز : يعني محل كده زي اللي يكون قدام ابواب العماير من جوّه .. سيب: يعني (... سيب وانا اسيب ..... اترك) زنبيل : ... يعني كيس ... زلطة : سَلطة بعد التعديل ... يدعك : ... يعني يفرك ... يعني مثلا .. ( ايش بتسوي يابت بادعك الاسورة : .. روحي يابت عساكي بداعوك يدعك مصارين شيطانك غسلي الصحون بدل مانتي قاعدتلي كده لاشغله ولا مشغله) مجغجغ : مليان مويه - أمثال حجازية إذا جيت رايح كتر من الفضايح. او إذا جيت رايح كتر من الملايح بعد ما أكل واتكا قال ريحته مستكا. حاجه ما تهمك وصي عليها جوز أمك. ست وجاريتين على قلي بيضتين. أعمى ويلضم خرز. دلع الكبار زي الشقدف على الحمار. اللي ماله أم حاله يغم. على قد زيتوا سرجلوا. الخايبه تتعلق بالحبال الدايب. عقربه في الغار ولا ضره في الدار. خاتم بفصو وكل شي ترصوا. أهري وانكتي يا جاره وأنا ثابته زي العماره. شايل لنا طيران عبد القادر لو لك شي عند الكلب قول له يا سيدي لا تقرصيني يا نحله ما أبغالك عسل.. يحسدوا الفقير على موتت الجمعه سكتنا له دخل بحمارووو ما يقدروا على الحمار يقدروا على البردعة اذا حلقوا لغيرك بل راسك واستنى ايش عرف الحمير بأكل الجنزبيل البيض الفاسد يدحرج على بعضه اذا تعاندوا الحمير يا بخت الركاب البيضه ما تخابط حجر حبيبك يمضغ لك الزلط وعدوك يعد لك الغلط حمارتك العرجة تغنيك عن سؤال اللئيم داخل لبيت العروسه نادر من بيت العريس ياريتني بيضه وعرجه اصلوا البياض فرجه(بضم الفا). يااخد القرد بماله يروح المال ويبقا القرد على حالو الله من محبته في عبيدو جعل العمر والرزق بيدو. اللي يشوفني بعين اشوفوا باتنين. اللي ماله ام حاله يغم. كنس بيتك ورشه ماتدري مين يخشوا. كل حبه مسوسه لها كيال اعور مين يشوفك يالي في الضلام تغمز ماتعرف خيري لين ماتجرب غيري عقربة في الغار ولا ضُرة في الدار فقير اتجوز فقيرة خلفوا وجع القلب كبيرهم فلفل وصغيرهم زنجبيل واللي في الكوفلة يقول من العايدين خشوني لاتنسوني ولعوا الشمعة وشوفوني عمية تحفف مجنونة وتقولها حواجبك سودا ومقرونة الصرمة والقبقاب صاروا أصحاب يا داق الموية في المهراس يا مربي وليد الناس كل عيش البخيل ولا تأكل عيش المنان أدب ولدك وان زعلت امه يابخت من بكاني وبكى الناس عليه ولا من ضحكني وضحك الناس عليه. رضينا بالهم والهم ما رضي بينا اتملت العدوة وقلت المروه أكلوا الملوخية وصاروا أفندية لمن كنا ما كانوا ولمن رقدنا قاموا قالوا متى طلعت القصر قالوا أمس العصر العروسه للعريس والجري للمتاعيس سلامتك والهيل والقرنفل قمامتك اللي يشيل قربه مخروقه تنقط على راسه الحجر من الارض والدم من راسك أخوانك من أمك زي الدهب في كمك و أخوانك من أبوك زي القوم لما ينهبوك اذا اتغيرت المخدة راحت المودة من بيت أصقع لبيت أرقع مطبق العاده و معصوب كل يوم ههههههههههههههههههههههههه في كل محضر بالتوب الاخضر باب المجلس يقول باب السطوح .. اللي يجي يجي .. واللي يروح يروح خليها في القلب تجرح و لاتخرج بره ترمح الحر من غمزة والحمار من رفزه يضرب هذا المثل لايضاح الفرق بين النبيه والبليد. حمار الحكومة حكومة يضرب هذا المثل للموظف الصغير المتسلط على الناس خطبوها اتعززت تركوها اتندمت يضرب لمن يتظاهر بعدم الرغبة حينما يعرض عليه امر ولكنه يندم بعد فوات الاوان دلع الكبار زي الشقدف على الحمار يضرب هذا المثل لخروج العجوز عن وقاره وجديته والشقدف عشان الاسئلة بس:ما كان يوضع على الجمل ليجلس فيه المسافرون قلبي على ولدي انفطر وقلب ولدي عليا حجر. الا ساكت سمه ناكت و لا تنسوا ارضى بقردك لايجيك اللي أقرد منوو أنا وأخويا على ابن عمي وأنا وابن عمي على الغريب آخر الزمر طيط.. انت تفكر وربك يدبر.. تلقط الكبابة من فم القدر<<<إضافة من عندي لأني أحب أقول الأمثال المكاوية داااااايما الالقااااااااااااااب : عندنا في الحجاز وخصوصا مكه في اسماء يعطوها كنيه او لقب على سبيل المثال واحد اسمو عبد الله يقولولو أبو عابد ... ودي بعضها : عمر : أبوسراج حسن : أبو على حسين : أبو هلال يوسف : أبو يعقوب عبدالله : عبادي او ابو عابد عبدالرحمن : الوجيه عبد الرحيم : أبو رحمه فيصل : أبو عبدالله عبد العزيز : عزيز أو ابوسعود فاطمة : فتو مريم : منّة ابراهيم : أبو خليل ياللا ياتولين قولي رأيك في الموضوع ما هو انتي تموووووووتي على هادي الأشياء و إذا في شيء مكرر نبهيني عشان أعدله وأي إستفسار للجميع أنا جاهزة تراني خبرة في دي الأشياء ههههههههههههههههه وخاااااااااالص سلاااااااااامي لأهل مكة خااااااصة وأهل الحجاز بصفة عااااامة من ايميلي

وي وي وي وي ياقلبييييييييييي
رحت فيها
الحقووووووووووني ههههههههههههههههههههههه

والله يا فيوليف من يوم ماشفت الموضوع جيت جري
واااااااااااااخ ع الهرج المكاوي ياقلبي عليه

ومرحبمبك بالقسم العام .. ياشيخه احلى الهررررررررروج الهرج المكاوي

وحديث اهل مكه عشقي .. عشقا لا يكاد قلبي منوا يتوبوا

والله محتاره بإيش أرد
والله شي جووووونااااان

وبصراحه غرت من البنوتات ..
كولهم منزلين عن الحجاز وانا مانزلت لالالا
مو انا بنت المكاوويين اللي ماانزل ..

دحيييييييييييين انزلكم عن الرقص .. ( واديلووووووووووووا )

رقص المزمار .. ^_*

يسلموووووووو فيوليف .. والله زمااااااان عن المواضيع اللي ترد النفس

30-12-07, 02:35 AM

المشاركة رقم: 17

المعلومات
الكاتب:	فتاة الجليد الأحمر
اللقب:	عضو مميز

البيانات
التسجيل:	Oct 2007
العضوية:	50932
المشاركات:	4,897
الجنس	أنثى
معدل التقييم:
نقاط التقييم:	48

االدولة

مدونتي

الإتصالات
الحالة:
وسائل الإتصال:

كاتب الموضوع : vueleve المنتدى : الارشيف

هاد وحدة من العادات القديمة عند اهل الحجاز....

لكن ... قدييمة جدا.... كانت موجوده ايام..زماااان...

ايام الحواري (جمع حارة)...

والبيوت الشعبية المخشخشة>>>(مخشخشة::: يعني ::داخلة جوا ومو واضحة عالشارع)

(( والان ماصارت موجوده... الان *فلل ودنيا*...))

كانوا ليلة 15 من شهر شعبان....

يروحو البزورة >>>>( البزورة::::هم::: الاطفال الصغار ...اولاد وبنات.. )

يدق البيبان ( جمع باب)....على الجيران ... اللي في الحارة...

ويقولوا هالانشودة .... ولمن يقولهايقوموا ستات البيوت يعطوهم

فشار ومشبك ... وحلويات ...الخ

الانشودة..

*********************************************

سيدي شاهين يا شربيت ..... خرقة مرقة يا اهل البيت..

يا اما تواب......والا جواب..... والا نكسر هادا الباب..

ليلة خواجه ماجينا .....ولو طاحت كوافينا....

الساده والعادة....

ستي سعادة هاتي العادة ...

سيدي سعيد هات العيد ...

يا اما مشبك ولا فشار ........<<<<<<وهم يبغو هادا الشي..

والا عروسة من((..............نسيتت الكلمة ^_*................))

والا عريس من الدهليس.....

وسيدي شاهين..... )) هههههههههه حلوة مو؟ هههههههه

***************************************

واذا اعطوهم يقولوا بطريقة فيها لحن....

(( تفاحة يا تفاحة .... ست البيت فواحة ))

واذا ما اعطوهم يقولوا ....

(( كبريته يا كبريته ..... ست البيت عفريته ))......لكن عموما كان فيه احترام جدا....**********************************************

وطبعا ما انسى اقلكم...

كانوا .... زمااااااااان .....ايام ستي وسيدي ..>>>(ستي: يعني جدتي )

(سيدي: يعني جدي)

كان فيه احترام شديد وكان هذا الشي الاساسي في البيت..

... وكانوا الرجل في البيت ((شي)).... ومانقدر نحط عيننا في عينه...

كان(( سي السيد))...وكانت الحرمة>>>( بمعنى المراءة .... وهنا مقصود زوجته)

وكانت الحرمة... ست البيت .. ماتتعب .. ولافي شي اسمه خدّامة...تشتغل في بيتها

وتصحى من ظهرية ربنا...>>>>هادا كمان اسلوبهم في الكلام بمعنى( تصحى من الظهر )

وكان يقدرها زوجها....

وحتى البزورة .. كانوا يحترمو والديهم جدا....

وكان الشخص اللي بيتزوج يشتغل من عرق جبينه وبكذا يكون رجال بجد.... ولذلك كان يحس بقيمة زوجته

ومايطلقها ابداً...

لكن دحين قولي عالدنيا السلام.... جيل جديد.... ماعنده مباديء ولا اسس صحيحة في التربية

((( ولكل قاعدة شواذ..... وانا اتكلم عن الاغلبية الجديدة......)))

وطبعا كاتن فيه تعاون...

مثلا جارتين .... تلاقي الوحدة والحرمة لمن تطبخ ترسل غدا لجارتها...

والثانية لو يوم شافت انه جارتها تعبانه ... تلاقيها تزورها.... وتشتغل عنها...

واحيانا في الصباح ... يجتمعوا ويفطروا مع بعض..

ويقوموا يغسلو ملابس البيت وهم مع بعض....يشتغلوا ويهرجوا ...

كانت حياتهم بسيطة وواضحة .... وحلوة....

............................................................ ...

راح اروح وراجعة ...

اجبلكم حاجات حلوة عننا...ههههههههه

بتمنى تكون قصصي عجبتكم وحتى عاداتنا...

30-12-07, 02:42 AM

المشاركة رقم: 18

المعلومات
الكاتب:	vueleve
اللقب:	روح ليلاس عضو فخري

البيانات
التسجيل:	Jun 2007
العضوية:	32520
المشاركات:	33,441
الجنس	أنثى
معدل التقييم:
نقاط التقييم:	7999

االدولة

مدونتي

الإتصالات
الحالة:
وسائل الإتصال:

كاتب الموضوع : vueleve المنتدى : الارشيف

اقتباس :- المشاركة الأصلية كتبت بواسطة Toleen
وي وي وي وي ياقلبييييييييييي رحت فيها الحقووووووووووني ههههههههههههههههههههههه والله يا فيوليف من يوم ماشفت الموضوع جيت جري واااااااااااااخ ع الهرج المكاوي ياقلبي عليه ومرحبمبك بالقسم العام .. ياشيخه احلى الهررررررررروج الهرج المكاوي وحديث اهل مكه عشقي .. عشقا لا يكاد قلبي منوا يتوبوا والله محتاره بإيش أرد والله شي جووووونااااان وبصراحه غرت من البنوتات .. كولهم منزلين عن الحجاز وانا مانزلت لالالا مو انا بنت المكاوويين اللي ماانزل .. دحيييييييييييين انزلكم عن الرقص .. ( واديلووووووووووووا ) رقص المزمار .. ^_* يسلموووووووو فيوليف .. والله زمااااااان عن المواضيع اللي ترد النفس

ههههههههههه
أنا قلت حتنهبلي يوم تشوفي الموضوع

انتي عليك المزمار

ولا تنسي أغاني أبو سراج كمان
ههههههههههههههه

30-12-07, 02:42 AM

المشاركة رقم: 19

المعلومات
الكاتب:	Toleen
اللقب:	^_^ عضو قمة عضوة بمنظمة الاكاتسوكي

البيانات
التسجيل:	Jun 2006
العضوية:	6270
المشاركات:	4,201
الجنس	أنثى
معدل التقييم:
نقاط التقييم:	146

االدولة

مدونتي

الإتصالات
الحالة:
وسائل الإتصال:

كاتب الموضوع : vueleve المنتدى : الارشيف

يووووووووووووه يا فتاه الجليد الاحمر
خطااااااااااره وربي
وي منجد حاجات حلوة راحت مع الزمن
والله لو اهلي شافوها لا ينبسطوا اااخر بسطه

30-12-07, 02:44 AM

المشاركة رقم: 20

المعلومات
الكاتب:	Toleen
اللقب:	^_^ عضو قمة عضوة بمنظمة الاكاتسوكي

البيانات
التسجيل:	Jun 2006
العضوية:	6270
المشاركات:	4,201
الجنس	أنثى
معدل التقييم:
نقاط التقييم:	146

االدولة

مدونتي

الإتصالات
الحالة:
وسائل الإتصال:

كاتب الموضوع : vueleve المنتدى : الارشيف

ههههههههههههههههههههههههههههه
ولا يهمك فيوليف اغاني ابو سراااج
وكل اللفرق
بس خلووني افضى وانزلكم شي وشويااات

^_*