اليوم: الاحد..
المكان: ايطاليا/روما..
الوقت: الخامسة والنصف مساءا..
--------------------------------
(مهرة)...

ماتوقعت ايطاليا تكون بهالروعه.. خصوصا هالوقت من السنه اللي يعتبر ربيع بالنسبه لايطاليا..
وكل مكان تلتفت له تشوف ورد اشكال وانواع..والجو حلو ومنعش..
صحيح تعب السفر مازال فينا انا وناصر...
لكن انتعشنا يوم شفنا المناظر هني وقررنا نتمشى على ريولنا في شوارع روما ..
روما اللي مليانه شواهد تاريخية.. من شتى الانواع..
واكثر شي لفت انتباهنا انا وناصر كانت التماثيل..
حدث ولا حرج...كلها تماثيل مفاصيخ..
كنا كل ما نمر عدال نافوره او تمثال ما ادرى بعمري الا وبايد ناصر على عيوني...
وهذي يمكن سادس مره يسويها...!
مهرة: ناصر..!!!
ناصر: عيب عيب عيب..!
مهرة: شمعنى يعني انته تشوف وانا لا...
ناصر: انا ريال ..انتي بريئه زياده عن اللزوم ماريد عيونج تتفتح على هالمناظر..!
مهرة: ياسلام عالمنطق..شو نسوي يعني يوم روما كلها جذي..!
ومسكت ايده وسحبتها عن عيني...
وبدال ما التفت للتماثيل التفت لويه ناصر وانا ابتسم..
مهرة: يعني ليش ما اغطي عينك انا يوم نمر على تماثيل حريم؟؟
ابتسم ناصر وصد بعينه صوب ثاني..
ناصر: انا هالمناظر مب يديده علي ..
فتحت حلجي وانا اشهق من جرأة اللي قاله ناصر لي...
مهرة: والله بكل جرأة قاعد تعترف.!!!
ناصر: ههههههههههههههه..
مهرة: جب انزين... طفس..!

كان ناصر مسند ايده على كتوفي بعفويه.. قربني منه يوم حس اني ببتعد عنه...
ناصر: مهرووه..!
جاوبته بدلع..
مهرة: هاااااه..!
ناصر: تحبيني؟..
ابتسمت..
مهرة: مايخصك..!
ابتعدت عنه وتجدمت شوي بالخطوات ورجعت اصد صوبه ...
كان شكل ناصر يشرح صدري..
وينعش حواسي..
هو صحيح مب جميل ... لكن فيه نوع من الوسامه والرزة الملفتة للنظر..
كان ملاحظ اني قاعده اتامل فيه وهو ساكت عني ويبتسم لي ابتسامه بريئه ممزوجه بخبث ومكر..
دايما نظرته تحسسني انه يعرف عني شي انا نفسي ما اعرفه..!!!
يوترني..!

مهرة: شوفيك؟
ناصر: انتي شوفيج؟.
ابتسمت...
مهرة: حلو شكلك بالجاكيت الطويل..
ناصر: عيونج الحلوه ..
مهرة: شمعنى في تركيا ماكشخت جذي؟..والا كاشخ للايطاليات؟..
وغمزت له ...
ناصر: هههههههه دام عيبتج انتي كفاية علي..!
مهرة: لاااااه..علينا هالكلاااااااام..
ناصر: المشكله انج فاهمتني.. دامج كاشفتني عيل خلاص اختاريلي وحده..
مهرة: هممممم المشكله ما شفتهن حلوات احسهن دفشات..!
ناصر: هههههههه اشتغلت الغيره..
مهرة: ناصر بشوتك..ترا انا من طيبي مب قاعده اغايظك والا اعرف بغيرتك كيف..
ناصر: جربي وشوفي..
رد ناصر سحبني من ايدي عشان ارجع امشي عداله.. وتم ماسك ايدي طوال الفتره..

في الكوفي شوب كنا قاعدين نشرب عصير ...
حسيت بنفسي اسال ناصر بدون تفكير..
مهرة: ناصر انت مستانس؟
ناصر: وايد مهرة... وانتي؟
مهرة: انا عمري ماحسيت بهالسعاده من قبل..
ابتسم ناصر وهو يطالع فعيوني...
ناصر: اوعدج باكثر واكثر يا مهرة...
مهرة: الله لا يحرمني منك ان شاء الله..
ناصر: ولا منج غناتي..!

ابتسمت وانا اصد بعيني واتامل الناس..
غصبن عني افكر بنفسي مب باي حد ثاني...
اخيرا بديت احس بالسعاده اللي يتكلمون عنها الناس ..واشوفها فعيونهم..وابتساماتهم..
حب..استقرار عاطفي..نفسي.. اجتماعي..
هذي نعمة من رب العالمين..قليل من يحصلها..
احس بكل شي فنفسي تغير..
معقول الانسان اللي خربط لي حياتي فيوم من الايام ..يكون هو نفس الانسان اللي يرتبها لي ويبعث فيني مشاعر عمري ماحسيت فيها فحياتي؟
معقول اللي كنت اكرهه كره ماتخيلت نفسي اني قادره عليه...صرت احبه اكثر من أي شخص ثاني؟
اللي كنت اخاف منه...هو الوحيد اللي حسسني بالامان..!

ناصر: بشو تفكرين مهاري.!! مخلنج من عشر دقايق تفكرين بس ماقدر اصبر اكثر لين اعرف..!
رجعت اصد صوب ناصر وعطيته احلى ابتساماتي...
مهرة: كنت افكر شكثر صرت احبك وما اتخيل حياتي بدونك ..!

هاليوم كان احلى الايام من بداية زواجنا... وكان بدون شك نقطة تحول بعلاقتي مع ناصر..!

-------------------------------------------

بعد مرور ثلاثة اشهر..

-------------------------------------------
اليوم: الخميس..
المكان: سيارة يوسف..
الوقت: السابعة مساءا..
-------------------------------------------
(يوسف)...


يوسف: وشوو بالضبط هذا المكسار؟؟؟
ام محمد: ماشي..هذا احتفال بسيط للعايله والقرايب يسوونه هل العروس.. يعرضون فيه زهاب بنتهم وتجهيزاتها وبالمره يكون عزومه عشا.. والعروس ماتطلع فيه..
يوسف: بس؟؟؟ دام العروس مابتطلع فيه عيل مايسوى تحظرونه..!
وقعدت اضحك على نظره امي بسبب تعليقي...
يلوموني؟.. ماحد يقدر يمنعني من الاحساس بالفرح...
كنة صارت حرمتي ابتداءا من امس..
صحيح الملجه كانت سكاتي حالي حال ناصر لكن المهم انها صارت حرمتي وانتهينا..
ومحد يقدر يحرمني من هالشعور..
نقزت شما اختي من وراي تقول..
شما: يوم يقولون العروس ماتطلع معناته ماتنزل بس محد يقول انه مانقدر نسيرلها فوق..
يوسف: عادي احضر..!!
منى: ههههههههههههههههههههه والله عرفت انك بتقول جي !!
ام محمد: ويدي يا ولدي شبلاك.!!. شو مسوتبك بنت عمك هالكثر مب رايم تصبر حاشرنا من ثلاث شهور !
منى: مسوتله عمل اامايه..!
ام محمد: حشى عليها ماظنتي..الا هذا اخوج اروحه متخبل..
شما: شمعنى انا ريلي عقل يوم عرس وماتخبل شرات يوسف.!!
منى: حتى راشد كان وايد عاقل..!!
يوسف: قل اعوذ برب الفلق..!!!!.. قولن ماشاء الله يالحاسدات..!

وصلنا بيت يدوه اللي كان واضح عليه حتى في الحوش انهم مرتبينه ترتيب معين ومستغلين الجو الحلو في هالوقت من السنه..
خارجيا كانوا حاطين الطاولات والبوفيه وكل شي مرتب ...
الظاهر الصالة الداخلية مستغلينها لعرض الزهاب...
ااخ خاطري لو ادخل اشوف كنه..!
مب حرام؟ ملجت عليها ولا شفتها ولا كلمتها مثل الاوادم؟؟؟
قسسسسسم بالله اني مظلوووم ومأكول حقي !!

نزلت امايه وشما ..اما انا زقرت منى ..
منى: آمر يالمعرس..!
يوسف: منى..دخييييييييييييييييييييل والديج صوريها لي..!
منى: شو شو شو؟؟؟..
يوسف: منى عن النحاسه وتذكري شكثر انا ساعدتج يوم عرستي براشد..انا اخوج!!
منى: بس كنه يمكن ماتطيع..!
يوسف: ماعليج منها..انا احين ريلها .. وسوي عمرج انتي تصورين العزيمه وجي بس لا تقصرين بتصوير كنه ..بترياج في الليل وماريد نقاش..!
منى : همممم اووكيه كسرت خاطري.. يالله روح هذي مهرة يت ويا ناصر..روح روح روح..!
التفت وانا اشوف ناصر وقف سيارته عدال سيارتي ومهرة تنزل منها..
وسمعتها تطلب من ناصر انها تشل مايد معاها بس هو رفض ..
ناصر: خليه عندي انتي ..بيلعوزج داخل وانا ماعندي شغل برايه عندي..!!
مهرة: على راحتك..
ناصر: اتصلوبي يوم تبون تون..
مهرة: ان شاء الله..مع السلامه..
دخلت مهرة مع منى للبيت ..وانا تقربت من ناصر وهو فسيارته..
يوسف: وين بتسير؟..
ناصر: ابويه قال فضوا بيت يدتك للحريم وتعالوا بيتنا.. يعني اظني عشا الرياييل عندنا في البيت..
يوسف: خلاص عيل بنسير هناك.. تباني اركب لك كرسي مايد جدام؟

كان ناصر متوهق ومب قادر يركب كرسي مايد ....

ناصر: بتسوي خير فيني...

بعد ما انتهينا رجعت لسيارتي..وبدون احساس مني رفعت عيني لدريشه كنه في الطابق الفوقي..
تنهدت وانا خاطري اكون هناك...
بس الصبر يمدحونه..
باقي كم يوم بس...وتكون عندي للابد..
---------------------------------
اليوم: الخميس..
المكان: غرفة كنة ..
الوقت: الثامنة والنصف مساءا..
---------------------------------
(كنة)...


مسكت منى ايدي الثنتين وبعدتهم عن جسمي وهي تتامل بشكل يضحك...
منى: واو كنووه..! اللبس الهندي فظيع عليج يجنن..
كنة: هههههه عيونج الفظيعه ..اوه اقصد..عيونج الحلوه حبيبتي...
تقربت مني مهرة وباستني...
مهرة: مبروك يا كنة ..الف مبروك عالملجه..وان شاء الله نفرح فيج يوم الثلاثا..
كنة: الله يبارك فحياتج ان شاء الله... وينج عنا من الصبح؟
مهرة: كنت تحت عند الحريم.. توهن بس اطلقن سراحي..!
كنة: بعدج انتي عروس يديده حتى عقب اربع شهور !!..شكلي مول مابغطي عليج...
مهرة: هههههههههه لا حبيبتي غطيتي من الحين لا تحاتين..
كنة: انتي شو تصورين؟...
التفت لمنى اللي حاطه كاميرا الفيديو فويهي ..
كنة: والله شكلج حشرية..بنديها والا روحي صوري شي ثاني..!
منى: ماشي يستاهل التصوير حبيبتي كثرج..جييييييييييز!!!
كنة: شو جيز بعد لا يكون بعدج تتوحمين عالجبن وبطنج جدامج؟..
منى: شكلي انا غلطت مب انتي العروس..صراحه تصرفاتج ماتدل لا على مستحى عروس ولا على انوثه..
كنة: خليت المستحى جدام العيايز..عندكن عادي..
مهرة: ههههههه يعني؟؟؟..وجدام يوسف ماشي مستحى؟..
على طول حسيت بويهي ولع..
يلست عالشبريه وانا العب بطرف فستاني بتصنع...
كنة: عاااااااااد لا تحرجوووووني ..!!!..
منى: كنة شو كان شعورج في المحكمة امس.!!.
ابتسمت وانا اتنهد واذكر امس بكل مشاعر الخوف اللي حسيت فيها..
كنة: بندي الكاميرا بعدين بقولج...

كانت غرفتي مثل بيت النمل...حد داخل وحد طالع.. بنات عمي وبنات خالي وخالاتي وحد من حريم العايله يروح ويرد علي... وعلى ما اعتقد انه الكل سلم علي ماعدا الغرب..
هذا اذا كان فيه غرب..
اصلا زين حصلت وقت اتعدل كنت طول اليوم مشغوله بتجهيز قاعة الزهاب...
التنسيق بروحه كان يباله وقت طويل..
واضطرينا نطلب مساعده من محل الورد عشان يرتبون معانا ..
والكل في البيت كان يشتغل حتى يدوه عطت رايها الحكيم في بعض السوالف...
لكن رغم الانشغال التام..
كان فكري مشغول لدرجه اني ماكنت اسمع اصوات اللي حوالي...
معقوله؟..
خلاص يعني صرت زوجه يوسف شرعا .!!
حلم الطفوله والمراهقة والشباب صار واقع...
بس اللي خوفني..
معظم القصص اللي سمعتها..
عن حالات مشابهه... حب لسنوات وتكلل بالزواج واخرتها ما اتوفقوا مثل ماكانوا متوقعين..
ياما سمعت عن زواج ثاني..او هجر..او طلاق...
انقبض قلبي وانا اتذكر...
خايفه..!!
ليتني اشوفه ...ليتني اقدر اكلمه عشان يطمني..
ويقول لي انه بنتوفق وانه ماشي بيفرق بينا غير الموت...
ليش كثرت الحواجز بينا بعد شرعية العلاقه؟
شو هالتخلف؟ انا احين زوجته وحتى مايسمحون لي اشوفه واكلمه على انفراد..
امس..
كل اللي قلناه لبعض هو كلمه "مبروك" ..
وبعدها اسحبوني انا لسياره..ولبيت ثاني..ويوسف راح مكان ثاني..
ليش مايحسون..بالمخاوف اللي احس فيها..
ليش ما يفهمون بانه محد يقدر يطمني غير يوسف نفسه...
يعني لازم اصبر لين يوم الثلاثاء... عشان انفرد به ويطمني..
ويزيح عني مخاوفي..

الله يصبرني لين يوم الثلاثاء...
-----------------------------------
اليوم: الجمعة..
المكان: بيت بو حمد..
الوقت: الثانية عشره والنصف ظهرا..
------------------------------------
(مهرة)...

ركبت درج البيت بحذر وانا اسمع كلام شيخه عن دوامها وعن نقلها لقسم يديد المديره المباشره لها كانت حرمه..
مهرة: يعني انتي مرتاحه معاها؟..مادري احس المواطنات يوم يستون مسؤولات وماسكات منصب يستون نحيسات وماينطاقن..!!
شيخه: لا حليلها بالعكس وايد زينه .. واحسها توكلني بامور ماتأمن عليها باقي الموظفات..يعني وايد مرتاحه معاها..
مهرة: الحمد لله.. المهم انتي مرتاحه..
شيخه: انتي خلج من خرابيط دوامي وتعالي براويج كيف رتبنا الاقسام فوق...
مهرة: التوسعة اللي بنوها ورا البيت حق حمد وعفرا طلعت وايد مرتبه.. غلبوكم..
شيخه: حلال عليهم.. هم احوج منا.. عندهم بنت ماشاء الله ...
مهرة: الله بيرزقكم انتوا بعد يا شيخه..لا تستعيلين بعدج عروس حبيبتي..
شيخه: وييييين بكمل سنه وتقولين عروس..!
مهرة: وييه لا يكون يأستي ويا ويهج؟..شوفي غيرج يكملن بالسنوات الخمس والعشر والله يرزقهن بالاخير.. كل شي فوقته حلو شويخ..
شيخه: ونعم بالله وانا مب مستعيله الحمد لله.. ادري انه الله بيرزقني متى مانكون انا وسهيل مستعدين لهالشي..
مهرة: ان شاء الله.. يعني انتوا ضميتوا غرفة قوم حمد لغرفتكم وسويتوها صاله؟..
شيخه: هيه تعالي شوفي.. طبعا باقي شوي ازيد عليها اثاث..

دخلت قسم شيخه وسهيل اليديد..وبصراحه كان حلو ومرتب.. ماتوقعت انه البيت بيتغير جذي للاحسن..كنت اتحسب ترتيبنا الاولي هو احسن ترتيب.. لكن حمد اخوي الظاهر عنده خبره بهالسوالف..!
مهرة: وايد حلوووو...
شيخه: عيونج الحلوه..تعالي شوفي قسم سيف كيف سووه..
مهرة: استحوذ على حجرتي الحرامي .!!
شيخه: هههههه هيه.. لو تشوفينه شو مسوي فيها ..تعالي تعالي...
دخلت غرفتي اللي تحولت لصالة عزوبي كاملة التأثيث من حيث نظام دي في دي السينمائي والتلفزيون البلازما اللي شكبره والسماعات والاثاث الجلدي الرجالي الغريب...
مهرة: شو هذا؟؟؟
شيخه: ذوق سيف.. وهو دافع طبعا من فلوسه... صار يقعد في البيت اكثر احينه ...مستانس بالصاله.. والحمام الله يعزج خلاه مطبخ تحضيري..!! ثلاجه وماكرويف وكل انواع المعلبات وعين الغاز ..تعالي شوفي...!
مهرة: وااااعليه عليج يا حجرتي البنوتية الحبيبه رااااااحت خلاص بححح...حسبي الله عليك يا سواف !
شيخه:.. نحن الحريم نقول جي...سهيل وحمد وايد عيبتهم صالته..حتى انهم سهروا عنده كم من مره...
مهرة: شو هالتطورات هاي..!! اتطورت العزبه والله..!! وسيفوه صار له مطبخ تحضيري بعد؟؟.. شعنده بو هناد حاط عينه على بنت بيعرس والا شو سالفته..!!!
شيخه: مايندرابه اخوج ....وانتي محد قال لج ماتزورينا من ثلاث اسابيع..!!
مهرة: ناصر كان مشغول فبوظبي ماقدرنا ني العين..
تقربت ودخلت الصالة اكثر (حجرتي سابقا)..وقعدت على واحد من الكراسي الجلدية مالت سيف ..واول ماقعدت عليه (اختفيت) فيه...!!
مهرة: سرطني الكرسي..!!! كيف يقعدون عليه هذا.!!
قعدت شيخه على كرسي ثاني...
شيخة: شو امورج مع ناصر؟
مهرة: كل شي زين الحمد لله.. مرتاحه اخر راحه..!
رفعت عيني يوم انتبهت لحركه عند الباب...وتصادمت نظرتي مع نظرة حمد اخوي..
حمد: هاه انتي هني .!!
قمت من الكرسي ورحت وايهت حمد..
قلت له ببرود..
مهرة: شحالك حمد..؟
حمد: بخير انتي شحالج؟.
مهرة: الحمد لله..مرتاحه..
حمد: وين ريلج؟
مهرة: وصلني وراح..مشغول ويا اهلة..
حمد: عشان عرس اخوه..!
مهرة: اكيد..
تقرب حمد وقال..
حمد: دامج عندنا عيل زين ابا ارمسج فموضوع..
غصبن عني حسيت بقلبي تتسارع دقاته..
حمد يباني فموضوع؟
شو يبا مني الحين ؟؟؟
شيخه: عن اذنكم..
طلعت شيخه وخلتنا بروحنا..
مهرة: تفضل حمد..عسى ماشر..
حمد: مامن شر.. بس انا فكرت وايد بالحساسيات اللي بينا وشفت انه الموضوع يحتاج نتكلم فيه..
مهرة: حساسيات.. قصدك سوء ظنك الدايم بي..!
غصبن عني حسيت بحرقه بعيني..بس ماسمحت لنفسي باني اصيح جدامه..
نزلت عيني لحظني وسكت..
حمد: ماكان سوء ظن كثر ماكان خوف عليج... يمكن اساليبي كانت غلط بس كل شي كان نابع من خوفي عليج..
مهرة: حتى يوم طلعتني من الجامعه وحرمتني من اني اكمل دراستي..
حمد: كنت خايف لا تنخرطين مع بنات شواذ يخربنج ...
مهرة: حمد انا متربية فنفس البيت اللي انته متربي فيه .. لكن انته فضلت تصدق كلام وحده صايعه كانت تلعب بمشاعرك وتحاول تخرب بينك وبين زوجتك على انك تصدقني انا اختك..!!!
حمد: وانتي شو دراج بهالشي؟؟؟؟
مهرة: سالفه طويله مايحتاج اقولها... بس صدقني انت كنت منعمي..
سكت حمد شوي.. وتنفس بحدّة..
حمد: ادري اني كنت منعمي.. بس العصبية احيانا تعمي.. تخيلي موقفي يوم سمعت هالشي عنج ..امي الله يرحمها موصتنا عليج وعلى سيف..
مهرة: ويوم غصبتني عالعرس؟ وظربتني..
حمد: كنت اشوفه مناسب لج بالنسبه للظروف اللي كنتي تمرين فيها...
مهرة: ويوم اكتشفت عنه شي مايسرك...ييت تبا تفرقني عنه بالغصب...
حمد: بس انتي ماطعتي.. لا يكون بتلوميني بعد..!
مهرة: طبعا مابطيع.. يوم ارتحت له وحسيت بقيمتي وذاتي بزواجي منه ..ييت تبا تفرقني عنه بكل بساطه؟..حمد ... انا مش لعبه فايدك..!
حمد: محد قال انج لعبه بايدي.. بس انا كنت ابا مصلحتج على حسب وجهة نظري..
مهرة: نظرك انت مب نظري انا...
حمد: وهني صار بينا الاختلاف..انا كنت متسلط وماشاورتج فشي ولا سمعت رايج.. كنت ومازلت اظن انه رايي انا هو الاصح والانسب... لكن حياتج وقراراتج طلعت من ايدي حتى لو انا اخوج العود بس انتي ماسويتيلي أي حشمه واحترام وفضلتيه عليه ...
مهرة: حمد..!..لين متى بسويلك حشمه واحترام على حساب راحتي وسعادتي انا.؟؟.
حمد: حتى انا كنت ابا سعادتج وراحتج..
مهرة: لا..انته كان همك الناس وكلام الناس وكيف الامور طالعه جدام الناس "ظاهريا"..ماهمك اللي فخاطر اختك .. بشو تحس وبشو تفكر..
حمد: ماكنت اتوقع انه بيكون لج راي وشور غير عن رايي وشوري انا... عالعموم.. انا يمكن كنت متسلط شوي.. كنت ومازلت اشوفج اختي الصغيره اللي اخاف عليها وفنظري انتي ماكبرتي ابدا حتى لو كان عمرج 30 .. وانا ماريد الحساسيات تستمر.. لانه هالوضع مضايق ابويه واخواني وايد..

سكت شوي وانا اتامل فويه حمد..
انا اعرف كبرياء حمد زين مازين.. اعرف انه نادر مايطلع اللي فخاطره ..
تعود حمد انه يأمر بدون مايفسر..
في النهاية هو الاخو العود وله مكانه ماياخذها الا الاخو العود.. وتربى عالحزم والشدة..
وانا مقدره صعوبه قعدته معاي هني واعترافه باخطاءه ولو كان اعترافه هذا مغلف بكبرياء ماينكسر..

مهرة: حمد... انته اخويه العود وانا احبك واحترمك.. وماكان ودي كل هالحساسيات تصير بينا ..لكن تقدر تقول اني وصلت مرحلة ماقدر اتحمل فيها اكثر دور المغلوب على امرها.. كلكم تحكمتوا فحياتي وبقراراتي لين زهقت... انا اسفه اذا جرحت كبرياءك او حسستك بعدم اهميتك عندي لانه هالشي مب صحيح انته وايد عزيز علي... بس انته يوزتني ريال وانا على ذمته الحين...خل المحبة والاحترام بينا بدون ماتدخلون فحياتي.. الله يخليك... انا وايد مرتاحه مع ناصر... وهو وايد يعزكم.. ويتريا اليوم اللي تتصلح فيه العلاقه بينا..

ابتسم حمد ابتسامه غريبه... فيها حزن وندم وظيق..
حمد: ان شاء الله مابيصير الا اللي فيه الخير.. خلي ناصر ايي يتعشى عندنا اذا يقدر..
ابتسمت انا بعد براحه..
مهرة: ان شاء الله بقوله..
قام حمد من الكرسي وقال بطريقه مازحه..
حمد: وهاتي ولدج اللي ماشفناه..
بدل ما اتظايق واتحسس...ظحكت...
مهرة: ههههه ان شاء الله بييبه..

طلع حمد من صالة سيف اليديده.. وخلاني بروحي اراجع اللي انقال..
ياترى قسيت عليه؟
والا كان ظروري اذكره بكل اللي صار..! وبظلمه لي..!
بس بغض النظر..
اللي صار خطوه كبيره لحمد..
مابيخطيها الا بعد احساسه بالذنب وهذا شي اكيد..

تساندت عالكرسي وانا اتنهد وابتسم..
احس بحمل ثقيل انزاح عن ظهري..
والا سيف صار عنده مطبخ تحضيري..!!!.. خل اشوف شو عنده هالتعبان..!
نقزت من الكرسي وكملت استكشافي لقسم "المثقف" سيف..!
-----------------------------------

اليوم: الجمعة..
المكان: شقة مبارك..
الوقت: السابعة والنصف بتوقيت بريطانيا..
---------------------------------------
(مبارك)..

يلست عالكرسي اللي في الصاله وانا اخش ريولي في جوتي الرياضه..
ابتسمت وانا اسمع سيف من السماعه...
سيف: بفتك من ويهه الخايس يوم الثلاثا...
مبارك: اخر امتحان؟..
كان سيف يتحرطم على استاذ الـ ICDL في المعهد... اللي ماكان سيف يطيقه..لكن متحمل عشان الشهادة..
سيف: هيه ..بيكون امتحان اكسيس... بخلص الامتحان من صوب وبسير عرس يوسف من صوب ثاني..
مبارك: حليله يوسف..يستاهل مسكين..
سيف: بعدك ماحصلت اجازه عشان تينا؟..
مبارك: لا والله سيف...I have exams.. وهذيلا ماشي تفاهم عندهم ومايتساهلون مع حد..
سيف: خساره يعني مابتحظر العرس..
مبارك: استسمح لي من يوسف وبارك له بالنيابه عني..
سيف: خير ان شاء الله... على فكره تسلم عليك مهروه..
ابتسمت...
مبارك: الله يسلمك وياها من الشر...شو اخبارها العيوز..!
سيف: تشقح.. اقولك بخليك احينه ..وادخل النت اكثر دومك تخليني اتصلبك..!
مبارك: هههههه ادخل وماحصلك..!
سيف: ادخل اوقات معقوله انزين..
مبارك: والله اني مشغول الفتره الاخيره بس ان شاء الله بدخل فالك طيب...سلم على الاهل كلهم..
سيف: ان شاء الله..وانته سلم على ريتشارد وربعه ..
مبارك: هههههههه ان شاء الله...مع السلامه

سكرت عن سيف وانا اضحك.. يلست اربط احزمه الجوتي..
عقب ثلاث شهور فراق...توها افتكرت ترسل لي سلام؟؟؟؟
ياترى مشغوله بحياتها لهالدرجه؟؟؟ والا ماعدت مهم خلاص؟..
اختفت ابتسامتي وانا افكر بهالافكار السوداوية..
مقهور من نفسي..
انا اعرف اني مب في حاله حب مع مهرة...
كل الموضوع هو اني احس بالفقد..احس اني فقدتها..وفقدت معزتها لي..
احس انه حبها واحلامها كانت لي ...وفقدتهم..
متى بتقبل هالخساره.؟ الله اعلم...

انتبهت على صوت المسج من تيلفوني..رفعته وفتحت المسج حصلت مها مطرشه لي صوره ايدها الملفوفه بالشاش... وكاتبه تحتها تعليق " look what I've done to my hand.. I'm so stupid "

عقدت حواجبي وتظايقت من شوفة ايد مها بهالحالة..! رديت ارسلت لها مسج..
مبارك: "How?"
مها: " I was playing volleyball with my father hehehe"
ابتسمت على خبال هالبنت..
مبارك: " I will kill you.. Take care next time please"
مها:" will you write my homework's again?"
غصبن عني ضحكت بروحي بصوت عالي...
مبارك: " ahaaa, so that's what it's all about.. No. mob kel yoom al3aid, ana baser alnadi now"
مها: " I hate you"
مبارك: " you broke my heart!"

حطيت تيلفوني فمخباي وانا اضحك وشليت شنطتي الرياضية وطلعت من الشقة...
الحمد لله انه مها ارسلت لي رساله...
لو ما اشغلت عقلي عن مهرة...جان مابقدر العب رياضه بمزاج..
ركبت دراجتي ورحت صوب النادي والابتسامه ماتفارق ويهي...
من بعد اعتذاري لمها ذاك اليوم في المطعم والعلاقه بينا تتحسن يوم عن يوم..
نتلاقى في الجامعه بشكل شبه يومي...
ونسلم على بعض..
لين وصلنا لدرجه اني عطيتها رقمي وعطتني رقمها...
لو يسمعني سيف احين بيقول اني طيحت البنت...
لكن في الحقيقه كل اللي بينا هو صداقه لا اكثر ولا اقل...
وماكد صار بينا كلام اعمق من مجرد صداقه..
هني المجتمع اللي عايشين فيه مختلف...
و الزماله الدراسية بين العرب في الغربه مقبوله عندنا وشي عادي..
وهذا حال العلاقه بيني وبين مها... صداقه وزماله لا اكثر ولا اقل...
صحيح انه مانسولف دايما عن الدراسه... بس ماتخطينا حدود الادب..
وما اتوقع الحال بينا بيتغير.. لانه هالوضع مريحني ومريحها.. صارت اشاعات وتلميحات بين ربعها وربعي لكن تغلبنا على هالموضوع بتجاهلنا له..وصداقتنا صارت شي عادي بالنسبه للجميع..
عالاقل خبالها وخراشها وسوالفها الهبلا اللي ابدا شكلها البريء والطفولي مايعبر عنها...صارت تساعدني بانه يومي يمر بشكل اسرع..
واحساسي بالوقت الثقيل صار اخف وارحم علي من اول...
------------------------------------
بعد ثلاثة ايام..
------------------------------------
اليوم: الثلاثاء..
المكان: صالة الافراح/العين..
الوقت: الحادية عشره مساءا..
-----------------------------------
(منى)...


مشيت بخطوات سريعه متجهة للغرفة الصغيره المخصصة للعروس في الصالة...
فتحت الباب وانا اشوف كنه معاها ميثا حرمه محمد اخوي وهي توها تعدل طرحتها...
منى: تاخرتوا وايد يا ميثا..شو صار عليكم؟؟
ميثا: بنت عمج كل شوي وسيحت المكياج من كثر ماعينها تدمع...انا بخليكن بسير اشوف امايه..يلسي عندها...
التفت لكنة اللي برغم جمال طلتها فهالليله ..الا انه القلق بادي عليها...
منى: كنة حبيبتي..شفيج؟..
كنة: خايفه يا منى...وايد خايفه احس اني بموت..
منى: بسم الله عليج ..اذكري الله حبيبتي مابيصير الا كل خير انتي عروس وهذي ليلتج لا تخلين شي يخرب عليج فرحتج...
كنة: احاول... بس ماقدر.

دخلت مهرة بفستانها السماوي المدموج مع بيج وبشعرها المفتوح...
مهرة: اللــــــــه يا كنه ربي يحفظج من العين شو هالزين شو هالزين..!
كنة: يعلني ماخلى يا مهرة تسلمين فديتج..
مهرة: هاااه شو النفسية؟ (تقربت مهرة ومسكت ايد كنه)...واااي عليج يا كنه شفيج تتنافظين.!!
منى: تقول خايفه..!
ابتسمت مهرة لكنة بتعاطف...
مهرة: ماظني بتخافين الخوف اللي انا خفته فعرسي بس عدت الحمد لله..عالاقل انتي تعرفين يوسف زين مازين الحمد لله.. ليش الخوف.!
كنة: مادري والله..
مهرة: يابنت الحلال لا تحاتين... شفتي بنت عمج كيف طلع فستانها مال الحوامل؟..وتقول مقهوره مني لاني لابسه مخصر.!
منى: خلي هالليله تعدي على خير يا مهره.. الوحيده اللي احوط بكرشتي في العرس..!!
كنة: وهذا اللي يخليج مميزه...فديتج والله شكلج وايد كيوت بفستان حوامل..!
منى: هيه جاملي..
مهرة: مب قاعدين نجامل يابنت الحلال..

حاولنا انا ومهرة نرفع معنويات كنه بسوالفنا.
بس الظاهر انها كانت ظاهريا تسولف معانا لكنها من داخل خايفه ومرعوبه..!..
من شو بس يا كنة خايفه؟..
هذا يوسف!!! والا نسيتي؟..

ماقدرنا نقضي مع كنه وقت طويل.. على طول يتها امها واختها يجهزونها للزفه..

كنا واقفين عدال الشاشه اللي تنقل الاحداث الخارجية في عرس الرياييل وكنت ابتسم واحيانا اضحك بروحي ومهرة تطالعني باستغراب..
مهرة: ليش تضحكين؟..
منى: اتذكر... مامر علينا عرس وحطينا فيه شاشه الا وارتزت كنه جدامها عشان تشوف يوسف وهو مايدري..والحين الشاشه مرتزه ولا حد قاعد يتطالعها...محد حاس بقيمتها الا كنه...
مهرة: هههههههههه شكلي ببدا احس بقيمتها..شوفي شوفي هالمزيون..
التفت للشاشه وشفت ناصر اخوي يسولف ويضحك مع واحد من الشواب..
منى: ايواااااااااااا زين عيل ماراحت موضة الشاشات بعدهن لهن فايده..
مهرة: هههههههههه.. بدت الزفه...ويييه تذكرت زفتي شكثر كنت خايفه لا اطيح على ويهي..!!
منى: نفس االاحساس.. فديتج يا كنوه شوفي محلاها طالعها..!
مهرة: ماشاء الله عليها... الله يهدي بالها بس...
منى: آمييين..

مشت كنه بكل ثقة بابتسامه هادية.. اللي يشوفها يقول هذي واثقة من نفسها وبشدة..
لكن انا اعرفها زين هذي ابتسامه خوف...
لكن دام انه محد يعرف بهالحقيقه فلا باس...
المهم انه كنه قدرت تخلص الجزء الاكثر صعوبه بنجاح تام...
ركبت عندها عالكوشه...
منى: كنتي تجننييين رهيييبه...
كنة: ..........
منى: على فكرة.. صارلهم ساعه حاطين الكاميرا على يوسف في الشاشه...
هالمره حصلت تجاوب..
رفعت كنه عينها لي بلهفة..
كنة: قولي والله؟؟؟ ااخ يالقهر حيسوا الشاشه هالصووب ابا اشوف..
منى: هههههههههههههههه توني يالسه اقول حق مهرة..محد حاس بقيمه الشاشه غير كنه..
كنة: وكيف كان شكله؟.
منى: شاق الحلج مستانس...معرس شعليه.. حد يعرس بكنييييييييينه ولا يستانس ويشق الحلج؟؟؟
ابتسمت كنه وهزت راسها..
كنة: والله انج يا منى..!..
منى: انتي خايفه لانج ماكلمتيه من فتره طويله صح؟
هزت راسها كنه بصمت علامة موافقة..
منى: هانت حبيبتي.... انا مقدره خوفج لكن صدقيني..يوسف بيحطج بعيونه ولا بيفرط فيج ابد.. وانتي تعرفين يوسف عاقل .. لا تخافين وتكدرين ليلتج...
ابتسمت كنه بارتياح...
كنة: ان شاء الله..

بعدها ماقدرت اختلي بكنه لنفسي..الكل يبا يسلم عليها والكل يبا يكلمها..
اكتفيت بمراقبتها...
الحمد لله شوي شوي بدت تبتسم اكثر وتسترخي..
كنة تستاهل كل خير... الله يسعدها مع اخوي ان شاء الله
---------------------------------
اليوم: الثلاثاء..
المكان: صالة الافراح/ العين..
الوقت: الثانية عشره مساءا..
---------------------------------
(يوسف) ..


حطيت ايدي فمخباي وانا احس بالبرد يتسلل لاطرافي..وبالايد الثانيه كنت ماسك التيلفون بشده غير مطلوبه..!
لكن من زود توتري..
يوسف: اكيد يا منى؟..
منى: انته ليش تحاتي..انا كلمتها والحمد لله شوي هدت وخف عنها الخوف...
يوسف: منى يمكن غيرت رايها وماتباني..!
منى: يوسف انته لو شفت عيونها يوم طريتك لها.جان ماقلت هالكلام..!
حسيت بقلبي يذوب..
يوسف: ظنج؟..
منى: انا متاكده من هالشي... هي بس خايفه لانها ماكلمتك من زمان وتحس انها مبتعده عنك .. تبا تطمن منك انته مب منا نحن هذي كل السالفه...
يوسف: شو اسوي باهلج يوم انهم واقفين بينا وحارميني من شوفتها والكلام معااها..!
منى: مب مشكله يا يوسف هانت ماباقي غير ساعه او ساعتين وينتهي كل شي.. طول بالك على كنه وحاول تهديها ولا تعصب من شكوكها.. هي بس بحاجه انك تطمنها...
تنهدت..
يوسف: ان شاء الله...

انهيت المكالمه مع منى وانا افكر برساله كنه اللي طرشتها لي على ايميلي امس...
كانت تقول فيها انها خايفه وساورتها شكوك مالها عدد..وسالتني اذا كنت مازلت ابا اتزوجها واكون معاها او لا...
طبعا باطباعي المعتاده قابلت رسالتها هذي بالتجاهل التام جني ما استلمتها...
عيل شو تقصد بالله برساله مثل هذي ترسلها لي قبل زواجنا بيوم؟؟؟
لكن من راحت عني العصبية... تلبسني هم كنة ومحاتاة وضعها النفسي..
ليش هالشكوك بعد كل هالحب وهالصبر؟..
ليش يا كنه؟..
احس انه حد سمم لها افكارها...
لا يكون نوره؟؟؟؟؟
صدقوني ارتكب جريمه اذا كانت هيه السبب..!!
بس ما اعتقد..لانها من ذاك اليوم وهي ماتدخل ابدا بامور كنه...

بس ماعليه..ان شاء الله من اختلي بكنه بكلمها وبهدي بالها...
وكل شي بيمر على خير...

رجعت لخالد وانشغلت معاه لين نهاية العرس..
اللي اقل شي اقدر اقوله عنه انه كان ناجح ومشرف بمعنى الكلمه...
حسيت انه الكل مستانس ... والكل استمتع بوقته...
بعد ساعتين
انتهى العرس وماتم حد موجود غير العايلتين... انا واخواني وابوي ومايد ولد عمي والحريم..

مايد: يالله يوسف ..ادخل سلم على حرمتك...
يوسف: يالله...
خليت ابوي ومايد يتجدموني للغرفه الصغيره اللي فيها كنه ..
دخلت وانا احس قلبي يسبقني لداخل الغرفه..
دخلت وشفت كنه يلفها البياض السكري..
ملت عيني لدرجه انه اللي في الغرفه من حريم كلهم كانوا ضباب..!
وقفت عدالها على مسافه بسيطه ... وحسيت رغم انه ماتلامسنا..بارتجافها..
تعالت الاصوات حوالينا من ضحك وتباريك ...
اصوات بعيده..
رفعت ايدي..وباطراف صبوعي رفعت ويه كنه لي..وبستها بين عيونها...

غمضت عينها والمستحى يطغى عليها..
وهم يضحكون... علينا..
ومحد حاس فيها غيري...
يوسف: مبروك يا كنه.. والله وتوهقتي وصرتي حرمتي !!!!
نجحت الخطه يوم ضحكت كنه وهي تنزل راسها وتبتعد عني شوي خطوات لورا..!

بعد جلسات التصوير المملة اللي خذت حوالي ساعه ونص...
ام مايد: عاد نحن مجهزين غرفة المعاريس عندنا في البيت.. بدل ماتتلعوزون بالفنادق..ليلتكم عندنا ان شاء الله..
انا كنت اعرف بهالمعلومه من قبل...خبرتني امي.. بالتالي شنطتي كانت موجوده في السياره ..
غرفة المعاريس على قولتهم كانت غرفة الضيوف في بيت يدوه.. وهي نوعا ما بعيده عن غرف اهل البيت وفيها خصوصية تامه....

بالتالي تحركنا كلنا للسيارات.. العروس شلها اخوها للبيت مع امه ويدوه .. وانا رديت خواتي البيت..منى وشما... امي راحت مع ابوي..وناصر شل حرمته وراحوا البيت.. ومحمد شل حرمته وخوات حرمته (بنات عمي) ووداهم كلهم بيت يدوه...
انا وصلت خواتي البيت ورجعت اروح بيت يدوه..لانهم يتريوني هناك..
كان ترتيب غريب بس الليله عدت على خير...
القهر انهم كانوا يقدرون يبسطونها اكثر بانهم يخلوني اشل حرمتي واتوكل ...
لكن طبعا حبوا يقهروني... وامنعوني عنها حتى في التوصيله..!!!...
لكني ماحبيت اناقش...

بعد حوالي اربعين دقيقه اتركوني اخيرا على انفراد مع كنه...
اول شي سويته اني قفلت الباب...
رفعت عينها كنه لي باستغراب...
يوسف: أي حد يدق الباب...نحن مب هني!!!
كنة: هههههه مطفريبك اهلي لهالدرجه..
تقربت ويلست عدالها عالكرسي..
اتامل فيها وبنعومتها...
فكره انها حلالي خلتها تحلى بعيني اكثر واكثر واكثر...
يوسف: احس اني ماشفتج ولا كلمتج من زمان... اشتقت لج كنه..
نزلت كنه عيونها..وتوترت ملامحها..
يوسف:انا وايد فرحان اليوم.. بس اللي مكدرني هو خوفج...
كنة: ........... غصبن عني يوسف..
يوسف: عمرها المسافات مابتبعدني عنج كنه...حتى لو امنعوني عنج وامنعوج عني... انتي تعرفين انج دايما موجوده فقلبي وفبالي..
رفعت عينها لي...تتامل بعيوني واسكتت..
يوسف: صارحيني كنه... من شو خايفه؟
كنة: اوعدني انه مهما صار بينا ...مابنفترق..
ابتسمت ومسكت على ايدها..
يوسف: اوعدج... انا ثلاث شهور مارمت اصبر ...فكره الفراق غير واردة ولا تفكرين فيها..
كنة: اكيد يوسف؟.. انا وايد خايفه انه مانتوفق..
يوسف: كنه حبيبتي..خلي باجر لباجر...وعيشي اليوم... وبعدين ليش مانتوفق؟.. الايام بتثبت لج انه زواجنا بيكون احسن زواج ان شاء الله..
ابتسمت كنه..
كنة: صدق؟
يوسف: هيه..وبذكرج بعد.. انتي يا كنه وايد غاليه عندي.. انتي من دمي... ومستحيل افرط فيج حتى لو انتي طلبتي فراقي...
كنة: ههههههه لا تتامل وايد...هاليوم مابيي..!
يوسف: ههههههه هيه هاي كنوه اللي اعرفها...
حطيت ايدي حوالي رقبتها وسحبتها صوبي وبست خدها بقوو
تمت كنه تضحك وتصارخ ...
وانا اغلس عليها اكثر...
احبها يا ناس..!
واخيرا صارت حرمتي..!
--------------------------------
اليوم: الاربعاء..
المكان: غرفة ناصر ومهرة/بيت بو محمد..
الوقت: الحادية عشره صباحا..
--------------------------------
(مهرة)...

طلعت من الحمام بهدوء وانا انشف شعري بالفوطه...
وقفت عدال الشبريه اتامل بويه ناصر اللي نايم بعمق..
ابتسمت وانا امشي صوب منز مايد و أوايج عليه واتطمن انه نايم هو الثاني..!
ابتسمت ابتسامه اوسع وانا اشوف مايد نايم نفس ابوه...على بطنه..
سبحان الله..!
حطيت ايدي على بطني والابتسامه مافارقتني..
ياترى..
اللي فبطني بعد بيشبه ناصر؟؟؟؟

صديت صوب ناصر.. وتمددت عداله عالشبريه بهدوء..
متى بيقوم.؟
ابا اخبره...ماصدقت اتاكد من الخبر..
مافيني صبر ابا اخبره...!

مديت ايدي وقعدت العب بشعر ناصر اللي بدا يطول شوي ويباله قص..
مهرة: ناصر حبيبي..
ناصر: همممم.!
مهرة: قوم الغالي.. اليوم صباحية اخوك ومايصير تتخلف..
ناصر: كم الساعه؟..
مهرة: همم 11..
ناصر: على بالج بينشون هذيلا قبل 12...
انجلب ناصر اللي كان عاطني ظهره..وجابلني.. حط راسه على بطني وهو يحظني كعادته يوم يتدلع...
ناصر: خليني ارقد شويه..!

بعد حوالي نص ساعه... طلع ناصر من الحمام والفوطه على كتفه ويفرك بطرفها شعره عشان ينشفه..
وقف جدام الكبت يطلع له ملابس...
وقفت انا بينه وبين الكبت بدلع...
مهرة: مستعيل عالطلعه؟؟؟
تقرب مني ناصر وهو يبتسم...
ناصر: الا جان عندج خطط ثانيه...
مهرة: ههههه عندي...ابا اقول لك شي مهم..اجلته يوم كامل بس عشان ما اسرق الاضواء في عرس اخوك..
ناصر: ول ول ول...تسرقين الاضواء عن معاريس مره وحده ...قولي... شو هالشي الخطير..

حسيت بايدي تلتف حوالي بطني بدون احساس...
تاملني ناصر للحظه وتغيرت ملامحه...
كأنه حس باللي بقوله...
ناصر:.. مهرة .!!
مهرة:.. انا حامل..

مرت دقيقه بدون ماينطق ناصر بشي..
كانت عيونه تلمع كانها احتوت كل نجوم السما...
ناصر: صدق؟...صدق مهرة؟
هزيت راسي وانا ابتسم ..واحاول قد ما اقدر اني امنع دموعي الخاينه دايما بالنزول..
ضحك ناصر..
ناصر: من متى؟
مهرة: شهر واسبوعين..
حظني ناصر بكل قوته وبكل حبه ومشاعره ..وفرحته...
حسيت بقلبه يضرب بقوه ... وانفاسه المتلاحقه.. وارتجاف ايده...
ناصر: اباها بنت... دخيلج قولي انج بتيبين بنت...
مهرة: ههههههههه ناصر شدراني انا... اللي ايي من عند الله حياه الله...
ناصر: مالي خص اباها بنت...بروح اخبر امايه..!!!

تركني وركظ للباب..
مهرة: ناصر.!!!.تلبس اول..!
رد ناصر من عند الباب يدور كندوره عالسريع..
ناصر: هي صح...
مهرة: وبعدين لا تخبر حد احين .. تريا شويه..
لبس ناصر كندورته عالسريع ..
ناصر: والله بخبرهم الحين مالي خص..
طلع ناصر من الغرفه بشكل خلاني اضحك.. اضحك مع دموع فعيني...
ناصر فرحان وايد..!!
الحمد لله اني قدرت احسسه بهالسعاده...
ابتسمت ومسحت دموعي وسكرت الباب اللي تركه ناصر مفتوح من كثر وناسته واستعجاله انه يبشر الكل..
وصلت لمنز مايد اللي كان فاتح عيونه وبعده متكاسل عن النشـّـة..
مهرة: صباح الخير حبيبي... تبا اخت والا اخو؟.
مديت ايدي لمايد وخذته بحظني...
ورحت للدريشه اوايج منها للحوش...
اراقب السيايير اللي بدت توصل ... من خوات ناصر وعيال عمه وبنات عمه ..واخر سياره وصلت سيارة المعاريس..
التفت لمايد اللي بدا يلعب باذني كعادته بصبعه الصغير...
كانت نظرته لي حلوه.. والحلو اللي فيه انه يرد لي ابتسامتي بابتسامه احلى منها...
مهرة: حبيبي... لا تخاف انته دايما بتم ولدي العود..!

خذت ولدي العود وتجهزنا عشان ننزل وننضم لباقي العايله...
بنشوف منو بياكل الجو.. انا وولدي العود والا المعاريس..!!






»•¤©§| ( النـــهايـــــة ) |§©¤•«

معقولة مافيه أحد متابع القصة ولا الجميع داري بالتكمله (( أتمنى الثانية لانه قهر أحد يقرأ هالقصة الروعة ومايكملها وأنا ماحطيت التكمله الأ لاني أنقهرت أنها كملت وأنا مادريت فأحبيت أفيد الكل خصوصا العيناوية كانت تقول حاولوا تنشروا خبر التكمله لان كثير مايعرفوا عن القروب ))
تحياتي

باين على القصه روعه بس ان شاء الله اقرأها الاجزاء الاولى هيه مو موجوده بالم امارات ولايهمك احب القصص الاماراتيه انشاء الله اقراها

القصة بصراحه مو روعة أكثر شوي
بصراحة قصة تعالج مشاكل أجتماعية بأسلوب أكثر من رائع يعني مو بنت عم تحب ولد عمها وخربطة يعنى كاتبة من الدرجة الأولى والقصة من أفضل قصصها .
((بدون مبالغة أعتبرها أفضل القصص الأمارتية بالنت))
والقصة معروفه كتبتها العيناوية بالأول في الم الأمارات قبل ثلاث سنين بعدين حذفوها لها وكملتها في موقعها بعدين تهكر موقعها وتسكر حوالي سنه بعدين فتحته وكملت جزء بعدين تقفل وفي الأخير كونت لها قروب خاص وكملتها فعشان كذا أنا متحمسة للي متابعين القصة يعرفون نهايتها لأني مادريت بالتكملة الأ صدفة فاحبيت الكل يعرف.