‏

السلام عليكم
شلونك ام أحمد ان شاء الله في احسن حال
طولتي الغيبه عسى المانع خير
في انتظارك😟

احياننا العقل والعمر يكونان خطان متوازيان لا يلتقيان

(12)

الو السلام عليكم اشلونج ام دانيال
قلت وانا اعيد النظر الى شاشة هاتفي ليتضح لي الرقم الغريب لهذا الصوت النسائي الواثق: وعليكم السلام
اجابت بثقة : اني عمة دانيال طبعا ادري الوقت مو مناسب للاتصال بس حبيت اسمع صوتج واطمنج على داني
قلت بامتنان : لا ابدا الوقت كلش،مناسب والحمد لله على سلامتهم اذا ممكن احجي وي دنيال
اتاني صوته فرحا : هلو ماما .
قلت بحب : هلوات عيون ماما حبيبي روح نام اكيد تعبان
اجاب بمرح : اي والله ماما الطريق كلش طويل تعبت صدك
قلت بمودة :روح نام وما اريد شغل عناد وسهر على الموبيال اريد تسمع كلام جدك وبيبيتك زين حبيبي
اجاب بفرح :ماما بيبي كلش حلوة وعمه امنية هم كلش حلوة
ضحكت على تعليقات دانيال وقلت : روح نام هسة حتى تكدر تزور بابا الصبح
اجاب بهدوء : اوكي هاي عمة امنية تريد تحجي وياج
قالت بود : المفروض نجي وي بابا بس هو مقبل وما انطانا خبر الا بعد ما طلع اصلا من البصرة اني من زمان اريد اتعرف عليج
استغربت كلامها وقلت بذهول:من زمان
اجابت بهدوء : اني اعرف كل شي بس خالد كان مربط ادي كان يريد هو يجيكم
قاطعتها بضحكة متهكمة خرجت دون ارادتي
لترد عليها بقولها: يمكن تكلين هاي تريد اطلع اخوها احسن واحد صدكي خالد غلطان وهو يعترف بغلطه واني هواي لمته على غلطة وماكو سبب لهاي الغلط احنه نتشرف بنسبكم انتو اصداقائنا ومشفنا منكم غير كل خير اتمنى نعيد هاي الصداقة واذا ممكن اكون صديقتج
وبعدها قالت بحماس :ترة صفحتج على الفيس اني متابعتها وكلش تعجبني الموديلات الي تعرضبها وبس اتصير عدنا مناسبة اني معليه اريد تصميم هدية
قلت بود :ادليلي
اعجبتني عفويتها واخذها الموضوع ببساطة وتلقائية
هاي منو النحجين وياها
قلت بهدوء :عمة دانيال
اجابت وعينيها تحمل نظرة :خبيثة خوش تمهيد
قلت وانا اتصل بمهند لكي يرجعني للبيت فقد تاخر
الوقت : ماكو كل تمهيد يمكن اكو مشاعر داخلي لخالد بس ماكو صور بخيالي تجمعنا بيت واحد
وقبل ان تتفوه سمعت صوت هاتفي واسرعت الخطى الى سيارة عمي

***********************************
هل تصدقون بعد وفاة كاظم اصبح نومي ثقيلا ومريحا انام من اعماق قلبي المندهش بانني انام ولا اصحوا الا بعد ان ينتصف النهار سامحني الله على صلاة الفجر التي اخسرها بهذا النوم الثقيل كنت في زمن مضى اصحوا علىصوت الجامع القريب اليوم اصحوا على صوت الجامع القريب ولكن وهو يؤذن لصلاة الظهر
نهضت من سريري وذهبت الى غرفة عمتي ولم اجدها وسمعت صوت ياتي من غرفة الضيوف ذهبت على مهل خشيت ان يكون ابو ياسمين او اخ كاظم ولكن الصوت نسائي وانا اعرفه
دخلت وقلت :السلام عليكم
اجابت صاحبة الصوت بنغزة: صح النوم
لتردعليها خالتي : خليها يمة تنام براحتها ولدها متخلص طلباتهم وهي واكفة على رجليها اليوم كله بيني وبينهم
استغربت المبالغة في كلامي خالتي التي غادرت المكان بكل لطف لتتركني مع زوجة اخي
قالت :اكول بس لا ازعلين
قلت بضجر: كولي
قالت وهاي تنظر لي من فوق الى تحت: موتت كاظم ذبت عليج حسن
قلت بهدوء: حكمت ربج وعطيته اعترض
قالت بسرعة :لا يمعودة ونعم بالله بس دا اكول
قلت بهدوء: من شوكت انتي هنا
اجابت بتذمر: من التسعة انتظر العروس تكعد
قلت بضجر : بلا تصنيف شكو
اجابت بسرعة : انخطبتي مو اكلج موتت كاظم ذبت عليج خير
قلت باستنكار : ليش اكو وحدة تنخطب وهي بعدها بالعدة شبيكم تخبلتوا حتى دينكم نسيتوا
اجابت باستنكار : هسة اني كتلج كومي ازفج اكلج اكو واحد اجه لاخوج وكله تخلص العدة بعد سنة سنتين اني شاريها ويريدج تفكرين
استغربت الطرح والالحاح وقلت: منو هذا
اجابت بحالمية :العاشق الولهان ابن عمج الهمام
قلت بسرعة : صخام من ضيم لضيم ليش شبية ميتة جوع اخذ واحد اذا ضاج ازوج واذا حب يغير بحياته يطلك وبطله صديقه الوحيد
قالت باستغراب : هاي شبيج مو هذا الي في يوم من الايام كلتي لو ماخذته احسن من عيشتي وي كاظم
قلت بهدوء: الله يرحمه صح كلتها بس كنت بوضع ما اعرف شحجي وما اعرف اشلون اتصرف وكلمة لو ما كانت تفارك لساني هسة اني غير شكل اذا فكرت ازوج اريد رجال يسعدني
قالت باستهزاء :وهسة صار سلام موخوش
قلت بثقة :لا مو هذا القصد اني اتغيرت اريد حياة مستقرة مو تعالي ازوجي للزواج نفسه ورجال اشلون ماكان لا على الاقل اريد رجال يعرف شنو يعني استقرار بحياته مو واحد ميعرف اصلا شنو معنى الحياة
اجابت بهدوء: انتي تعرفين سلام ليش صار هشكل هو حبج من كل قلبه وامج الله يرحمها لان ما حبت بيت عمج طلعت الف عذر بسلام واكلج شغلة ولا ازعلين منو من اخوتج قبل الزواج ماكان يشرب ويعرف بنات بس رجال يكلون يزوج ويعقل
قلت بسرعة: وسلام ازوج وما عقل زاد اخباله
اجابت بحدة: لان ما ازوج الي يريده
قلت بثقة :يعني اخوتي الي عاشو وي نسوانهم قصة روميو جوليت ترة ابو طبع اسئلي على سلامته والي يريد يتغير يتغير لروحه المرة مسؤليتها تربى اولاده من هم صغار ومو تربي اولاد غيرها وهم شواربهم ترس وجهم
قالت بجد : صدكي يتغير
قلت بجد : اني ما الي خلق اغير اني اريد اغير نفسي واعدل نفسيتي ما ناقصني واحد اعوج اضيع وقتي عليه
اجابت بتملل:هسة شكول لاخوتج
قلت بثقة :كولي لا
قالت بعتب :انتي ليش بايعة اخوتج هشكل اعتبري هذا الموضوع ترضية الهم ميصير
قلت بحدة :اني بشنو مزعلتهم كافية خيري شري وعايشة بيتي
قالت بحدة :مو بيتج بي عيالج وعيب علينة بعدج صغيرة والعين عليج نبقيج بيت عيالج انتي وعمتج المرة ا لجبيرة طفر عليكم واحد شنكول
قلت بلا مبالاة : ترة كاظم كان يجي مرتين او ثلاث بالسنة وما طفر علينه احد
اجابت بحدة :هسة الوضع يختلف اريد ردج الاخير حتى نعرف اشلون نتصرف
قلت باصرار :لا
اجابت بحدة :انسي عندج اخوة هاي كانت محاولة وانتي ردتي تخسريهم هاي رسالتهم الج
وارتدت عبائتها وغادرت المكان
ذهبت الى غرفة عمتي وقد اصابتني حالة من عدم المبلاة غريبة
وجدتها تستغفر الله وحبات المسبحة تتسابق بين يديها وضعت رأسي في حجرها
قلت بهدوء وهي تضع يدهاعلى رأسي : شتريد
قلت بتلقائية : يردون يزوجوني
اجابت بمودة :شكو بيها بعدج صغيرة والف واح يتمناج واذا على الولد لا تشيلين هم يبقون يمي سنتين ويصيرون زلم حتى زواجهم لا تشيلين هم
قبلت يدها قلت بصدق : اللهلا يحرمني منج لو امي بعدها طيبة كان ما سوت الي تسوي وياي
اجابت بمحبة :لان اني عرفتج اكثر من امج عرفتج بساعة الشدة وبساعة الشدة ينعرف معدن الانسان
ازلت دمعة تسللت من عيني على وجنتي ولا زلت متمسكة بيدها
قالت بصدق: ليش ما تقبلين
قلت بجد : تعرفين سلام ابن عمي
شهقت وهي تفول: لا ادكولين اخوتج يردون يزوجوج لسلام
نهضت من حجرها وقلت : اي يردوني اعدل من اخلاقياته
اجابت بمحبة: يمة مايفيدج انتي وردة ويرادلج رجال يقدرج
قبلت راسها وانا اقول :اروح اشوف شسوي غدة اكيد جوعانة
قالت بمودة : يمة خليت دجاجة بالفرن وخليت بتيتة وطماطة شوفيها يمكن استوت طلعيها وكعدي الولد خل ناكل سوو
لو بقيت العمر باكمله اخدم هذه المرأة لما جازيتها
**************************
مرح جميل اطلالته تشبه اطلالت والده رغم صغر سنه
ظلي عوبة باعي عليهم اشلون شايلي شيل واتتي تتفرجين عليهم من يوم يومها عمتج ماتحبنة
قلت بضجر: ماما يعني شسوي الاطباء ملو مني الله ماكاتب الي خلفه بعدين عمتي شعليه هذا امر الله
قالت بحدة: من يجيبون المسعدة ام الولد لا تجيني تبجين
قلت بجد: شنو يفيد البجي ماما خالد يحبها قبل لا يزوجني اني كنت متاكدة اكو وحدة بحياته بس عبالي ماضي ما كنت اتصور هذا الماضي الة جذور
اجابت بحدة: هسة شقررتي تكملين وياه لو تنفصلين
نظرت الى والدتي نظرة استغراب وقلا:ماما تحجين صدك ليش انفصل بالعكس الامور كلها بمصلحتي ولد وصار عنده يعني فكرة الزواج الغت
اجابت بجد: وام الولد هذا
قلت بثقة :ما ترجعله يكلون خالد عايفها وهي حامل واكو مشاكل بينه وبين عمها واخوها
اقتربت عمتي منا وهذا معناه اندلاع الحرب الكلامية بينها وبين والدتي عمتي حنونة جدا وتحبني وتحب والدي ولكنها تنفر من والدتي لانها تزوجت والدي رغما عنها بعد قصة حب في الخفاء ولانها لم تنجب لوالدي الولد الذي يحمل اسم العائلة
الا بعد سنوات طويلة ومعاناة كبيرة كانت عمتي في وقتها تحرض والدي على الزواج
الحمد لله الله ما كطع نسلنة ورزقنا بدانيال الله مينسى عبادة و الله كنت خايفة خالد يزوج وتنغث حلاوي الف الحمد لله
اجابت والدتي بكل غرور :خل يكوم بالسلامة وبعدين شيلي هم حلاوي من يزوج
اجابت عمتي بثقة :الحمد لله اتعدة مرحلة الخطر والله يكومة لخاطر ابنه حتى يفرح بشوفته بنص اهلة
ثم وجهت السؤال لوالدتي: شنو ما فرحانة لاخوج صار عنده حفيد يشيل اسمه
اجابت والدتي بكلام جعلني اضع يدي على راسي : هسة انتو فرحانين بواحد يكلون ابنكم اتاكدوا حللوا يمكن البنية ضاحكة على ابنكم
اتى صوت عمي الناهر وهو يقول : كريمة شنو هذا الحجي هذا رمي محصنات خافي ربج
اجابت والدتي باصرا ر : انت محامي وهاي السوالف مارة عليك ما اعرف اشلون صدكت
اجاب عمي بحدة : هذا الموضوع ما اريد اسمعه مو كافي علينة الي سوا خالد حتئ تكملي بسوالف النسوان ونقصان العقل وترة الناس ما متمسكين بينة عدهم استعداد يربون دانيال العمر كله وميدكولنة باب بس الله حنن قلوبهم علينة
اقترب صاحب العيون العسلية وهي يقول: جدو
اجابه عمي : جدو هاي عمتك كريمة اختي بوس راسها
اقترب دانيال وقبل راس والدتي بكل احترام
ثم اشار لي وقال : هاي بنته حلا زوجة ابوك
اقترب مني ومد يده وهو يقول : اشلونج خالة
وقفت وقبلته على وجنتيه وقرصت خده الذي تورد خجلا من قبلاتي
قلت له : بيا صف داني
اجاب بخجل : نجحت للثالث متوسط
قلت بمودة لكي ابدد خجله : شطور لو كسول
اجاب بفخر : اني الاول على شعبتي
ضمه عمي وهو يقول : بطل
اشفق على هذا الرجل الصغير لانه لم يحضى بدلال هذه العائلة طفلا وهاهو يعامل كالاطفال لرغبة العائلة بطفل
واشفق على نفسي المتارجحة بين حب دانيال الذي تسلل الى روحي المتعطشة وكرهي لوالدته التي لم ارها وارى فيها خصمي ومن سلبت قلب زوجي بل من ملكت قلب زوجي
***************************
ما قصة الارقام الغريبة اخشى ان اجيب ويكون المتصل خالد واخشى ان لا اجيب ويكون دانيال او هناك حادث ما اصاب دانيال لم يمضي على مغادرته ثمان واربعون ساعة وقلبي في حالة توتر وخوف
قلت بخوف :الو
اتاني صوت هادئا وخجل: اشلونج هوازن
قلت باستفسار : خلود
اجابت بهدوؤ : اي خلود ادري شايلة بقلبج بس والله
قاطعتها بسرعة وقلت : خلود حبيبتي الف الف مبروك والله ما شايلة بقلبي انتي اختي الصغيرة اتمنالج كل خير
كان صوت بكائها يصلني ولا ادري ما اقول
تركتها حتى هدأت وقلت : خلود ليش هشكل وضاح خوش انسان واني واثقة راح يسعدج
اجابت بعتب :ليش ما ازوجتي كان هسة اني
قاطعتها بحدة وقلت :مو نصيبي لو فرضنا ازوجته كان عمي شاف الج واحد وزوجج اله وضاح نعرفه ونعرف اهله واكيد راح يسعدج
اجابت بانكسار: هوازن والله حاولت بس ابوي تعرفي صدكي يوم العقد مالتي ضربني جسمي كله سوا ازرق كلي اطلك امج بس تفكرين تتصلين بعمج او اي احد منكم
واخذ موبايلي وموبايل امي هوازن ماكدرت اتصل وما الي عين اتصل بس البارحة شفت عمو بالحلم احجي وياه ميباوع عليه عفية هوازن كليللة يسامحني هو ومؤيد اني مو خاينة ولا خذلتهم اني وحدة متكدر توكف بوجه ابوها وحاولت وما كدرت
قلت بمودة: خلود انتي مرتاحة
اجابت بهدوء :وضاح خوش انسان وحنون والله دا احاول انسى بس اكو شعور بالذنب منغص حياتي تعرفين شوكت ارتاح
قلت باستفسار شوكت
اجابت بجد :من يزوج مؤيد وكتها احس هو عاش حياته ونساني هوازن عايشة بتانيب ضمير وما اعرف لمنو احجي الوم روحي على حبي لمؤيد والوم روحي على تفكيري بي واني على ذمة رجال غيره والوم روحي اشلون خذلته كليلي شسوي
قلت بجد :انتي مخبلة ابن عمج وحبيتي حب برئ وج انتي حتى كلمة احبك كنتي مدكوليها ليش محملة نفسج فوك طاقتها حبيبتي عيشي حياتج وتركي الماضي ولاتحملين نفسج فوك طاقتها وانطي لنفسج فرصة تعيشين الحب وي وضاح هو يستاهل وانتي تستاهلين
اجابتت بتردد :اشلونه
قلت وانا اعرف من تفصد: راح يكمل دكتورا اخذ اجازة بدون راتب من المستشفى وراح يكمل على حسابه
اجابت بوهن: من وراي
قلت بهدوء: خلود كان بيدج شي
اجابت باندفاع: لا والله كله غصبن عليه
قلت بجد :هذا هو انتي عيشي حياتج وخلي مؤيد يداوي نفسه بطريقته
اجابت بتردد: ما حاقد عليه
قلت بجد :نهائي مؤيد يعرفج ويعرف عمي وترة وصاني اكلج مبروك وان شاء الله تحصلين كل السعادة
انخرطت بنوبة بكاء
واندفعت انا بالكلام بقولي: اذا اظلين هشكل كلما تخابريني تبجين بعد ما اجاوب على اتصالج خلود للمرة الاخيرة انسي مؤيد وعيشي حياتج وي وضاح كافي بجي
اجابت وهي تحاول كبت نوبة البكاء: سلميلي على عمو وخالة
واغلقت الهاتف
حب كان الاخلاص عنوانه لم يثمر
وحب كانت الخيانة عنوانه اثمر
*************************
قبيل المغرب كانت حركة المعرض شبه هادئة هناك بعض الزبائن يدخلون ويتفرجون ويستنشقون هواءا باردا ويخرجون
دخل بطوله الفارع ووجه الذي تندر ابتسامته
استقبلته بمودة قائلا : يمكن الابتسامة تشتريها
اجاب بضجر : الله يخليك اتركتي ترة حارة الدنيا وضايج وروحي طافرة
قلت باستفسار : شبيك شصاير
اجاب وهو ياخذ نفس عميق : البيت موحش ونسوانه حزينات وصفنة اجيبهن وصفنة توديهن
قلت بقلق: صاير شي ترة ابو خالد انطه كلمة كال الولد ما اخذه من يم امه ومتفهم الوضع
اجاب بهدوء:اعرف بس اجت الامور شي فوق شي ام مؤيد قلبه على مؤيد الي راح يكمل الدكتورا وميفكر يرجع ولو اسبوع وام دانيال صح متحجي بس من هسة دتقرة للكلية وما اشوفها كل ما اسئل عليها بالمعمل تتهرب مني ومن البيت كله ماتريد تحجي ماتريد تشكي اني اعرفها هي تتحامل على نفسها في سبيل متشيل همها لاحد
قلت بجد: طالعة عليك
اجاب بوهن: اني مو بيدي عبالك متعلم هاي الشغلة بالفطرة اشيل بقلبي وما احمل واحد من ولد سعد يحمل بقلبه
قلت بود: الله يحفظكم الهم ولا تشيل همهم مؤيد رجال يجاوز وجعه ويرجعلكم وام دانيال بطلة يرجع دانيال وترجع الفرحة بيتكم مهند انتو ناس تستاهل كل خير وصدك يجي يوم رب العالمين يعوضكم عن هاي الايام بايام احسن ويمكن هاي الايام الي تشوفها نحس الله مخليها بداية الايام حلوة
اجاب بهدوء :ونعم بالله
يقال ان اجتمع رجل وامرأة كان ثالثهم الشيطان ولكن الشيطان عندما تتجسد صفاته في انسان توقع حضوره عندما تجتمع الخلان دخل مزهوا وهو يرتدي الزي العراقي العقال والغترة التي يختلط فيها السواد والبياض
القى السلام ورددناها معا
جلس وهو ينظر لمهند و يوجه له الكلام : همزين شفتك اهنا عندي موضوع وياكم
اجاب مهند بلامبلاة : خير
تجاهل كلام مهند ووجه الكلام لي : حجي نريد ك ويانا مشية زلم
قلت بهدوء: خير ان شاء خطبة لو صلحة
اجاب بفخر: خطبة باذن الله
قلت بهدوء: لمنو
اجاب بفخر: الي
وقبل ان استفسر اكثر انطلقت ضحكت مهند باعلى صوته
فانعكست الضحكات غضبا على تقاسيم وجه ظافر ليقول: اابن الاصل شما كبر عمره يظل مطلب للعوائل ويتباهون بنسبه
قلت بهدوء: والنعم منك حجي ومن يابيت ناوي تخطب
اجاب بفخر: بيت طارق الجاسم
قلت بهدوء حاولت فيه ان ابعد نبرة التوتر التي سكنت قلبي ووصلت لجسدي: بيها الخير رايحين والشغلة مكضية لو رايحين جاهة حتى نخطب
اجاب بتوتر : لا ان شاء الله مكضية المرة ارملة وعدها بس بنات اكيد اخوتها يفرحون اذا اجاها نصيب
قلت بهدوء: بيها الخير الله يباركلك
اجاب وهو يغادر مكانه: الخميس مو تنسى
وبعدها وجه الكلام لمهند: اذا يعجبك تعال
لم ينطق مهند وغادر ظافر وحصل على ما يريد بهذه الزيارة وللمرة الثانية يوجه طعنة الى اعماق قلبي
شبيك شو وجهك انخطف من طلع ظافر
قلت بهدوء : ماكو شي بس غريبة ظافر جاي يعزمني لمشية
اجاب باستغراب: صح غريبة فحضر لنفسك لموقف من مواقف ظافر
قلت بجد: وعلى شنو الخميس لخذ الاهل واطلع لبغداد هم يسوكون وهم نغير جو
اجاب بجد: احسن الك
وخطرت في بالي فكرة
قلت بجد: اكلك ليش متزوج
نظرة لي نطرة استغراب وبعدها قال : ازوجني بنتك
للحظة تناثرت الورود حولي وشعرت بزقزقة العصافير الفرحة
ولكنه قال بعد ذلك ما ارجعها صحراء قاحلة: شكد حلو وازوج ياسمين الي يامة لعبتها
قلت بجد: والله اذا حجي صدك اخذها مكبعة بعبياتها
اجاب بفخر : نسبك اشتري بفلوس بس وضعي تعبان وسالفة الزواج ما واردة بدماغي وما اعرف شوكت افكر والي اخذها هسة اظلمها
قلت بجد : شوف عندك اثنين يا بنتي يا زهرة بت الي رايح يخطبها ظافر
اجاب بحدة : لو تبقى بس هي اتخبلت اخد بت مرة ظافر
قلت بجد:سويتها مرته من يكول تقبل المرة بي البنية صديقة بنتي خوش بنية انخطبت وفسخت ما اتفاهمت وي خطيبها
اجاب بضجر : اني حالتي النفسية تعبانة واخذ وحدة اداوي نفسيتها عوفنا الله يخليك بنتك الله يكتبلها احسن نصيب وذيج الثانية الله يداويها
نهض وهو يقول: اريد اغير اثاث البيت بلكي تتغير النفسية اروح اتفرج
ذهب وانا انتظر الرد على رسالة ارسلتها اثناء ما كنا نتكلم
اتاني الجواب
اذا فكرت يوم ازوج فانت تعرف اختياري
*****************
ممنوع من الزيارة على الرغم من تحسن صحته توسلت بالطبيب لكي اكلمه واخبره بوجود دانيال معنا لكي يرتاح قلبه المتعب كان جواب الطبيب صارم حالة الانفعال حزن او فرح غير مسموحة وبعد الحاح وتشدد من الطبيب وعدت بالخروج ان اثرت الزيارة على خالد
دخلت وتركت دانيال خلفي ان كانت زيارتي تبشر بخيرر سوف يدخل بعدي
دخلت بهدوء وانا اقرأ بعض السور والايات التي احفظ
وجدته ينظر الى السقف وهو في حالة شرود
قلت بهدوء : السلام عليكم
حاول النهوض منعته بيدي وقبلت راسه ووجنتيه ابني الوحيد وان اخطأ
قلت بمودة: خالد الله يخليك بابا لا تنفعل هدي نفسك ترة كوة قنعت الدكتور اشوفك
اجاب بوهن : مسامحني
قلت بجد: والله مسامحك اني من شفت دانيال سامحتك بس هدي نفسك
اجاب بفرح: شفته هو كان كلش متلهف يشوفك
قلت بجد :ممكن تهدينفسك وتقرا اشوي قرأن ترة كل الي تريده يصير بس اريدك هادى

قراءة ممتعة ومفيدة اتمناها لكم