ان شاء الله تستمتعون بالقراءه..
..البارت الثامن عشر..
قال عبدالرحمن وهو يطالع فيني""ليش""
حركت يدي بطريقة لا بس قد قالها خلاص
سمعت ليث يقول""لانها تبغاني ارجع لبنت اختها وقلت لك علشان تفهمون ردة فعلها""
قال عبدالرحمن""مو مشكله المهم مااشغلك يلله مع السلامه""
سكر الخط وقال بابتسامه""الموضوع اسهل""
حركت راسي بطريقة ايوه وانا افكر بالموقف من جديد
وين بنسكن هو الحين عند امه ولا عند ابوه ولا بيكون لنا بيت وحدنا
اكيد امي سٲلت ابوي
طلعت من غرفته ودخلت المطبخ لامي الي جالسه تجهز الغدا بالصحون
قلت لها وانا اجلس ع طرف الطاوله""تكلم ابوي عن ليث""
طالعت فيني وهي مبتسمه ورجعت تطالع بالصحن وقالت""ايوه تكلم وافق ع شرطك طبعا وهو بيخلص كل الحجوزات""
قلت وانا معقده حواجبي""حجوزات ايش""
قالت وهي تفتح الثلاجه""حجوزات الزواج""
مو هو قال لي زواج بسيط حجوزات لايش في الزواج
قلت السبب الي قاله لي بعدم فهم للكلام الجديد""ابوه تو طالع من المستشفى مايحتاج""
قالت وهي تلفت علي بكامل جسمه""ابوه هو الي قال بيحتفل بزواج ولده وبعدين هو بخير ليش مايحتاج""
بصدق والله اعجبني هذا التغيير خليه يكون مميز
قلت بالسؤال الي جيت علشانه""طيب وين بنسكن""
قالت""تعالي شيلي هذا الصحن""
نزلت من ع الطاوله واخذت الصحن وهي تقول""امه مو ساكنه هنا علشان كذا ماجات واخوه في بيت وحده علشان كذا اكيد بتسكنون مع ابوه مابيخليه وحده""
حمدت الله بقلبي كثير لان امه ماراح تكون موجوده ماابغى اقعد طول الوقت اثبت لها اني استحق ولدها..
كان في بالي عشرين يوم كفايه وزود للاستعداد
بس امي ماعندها شغل غير تحسسني ان الوقت ضاع واحنا ماسوينا شي
والله مايحتاج شي قبل الزواج باسبوع اشتري اغراض كثير وانتهينا
هو بيسوي كل شي والبنات بعد كل مااداوم يوم يتفاجائون بحضوري ع بالهم بسوي مثل جوهره اجازتها اخذت اكثرها للاستعداد من بعد الزواج
انا بٲخذ اسبوعين بس ان شاء الله اسبوع قبل الزواج واسبوع بعده
دام هو كل يوم بيداوم اسبوع كثير علي بس اليوم احلام وشوق اصرو نروح اليوم السوق سوا مريت ع احلام بيتها واخذتها ونزلنا السوق
وقابلنا هناك شوق اول مره اطلع مكان معاهم وصراحة انبسطت معاهم
وصرت اسٲلهم عن رايهم وانا متٲكده انهم بيقولون الصدق مو مثل عبدالرحمن الي يبغاني اخلص ولا مثل امي الي كل شي حلو
اشتريت اغراض كثيره ولا تهون احلام وشوق اخذو هم بعد
اشتريت كل شي من المهر طبعا وخلصنا كل شي بهذا اليوم مو مثل ماقالو كلهم يحتاح اسابيع اخذت كل شي يلفت نظري حتى لو مااعجبني مره وكان واضح بعدد الاكياس لما دخلتها انا وعبدالرحمن غرفتي
دورت ع كيس فيه بجامه جديده ماقدرت اقاومها طلعتها ودخلت الحمام اخذت دش ولبستها
وبعدها تعشينا وطلعت الاكياس الصاله ووريت امي وجدتي بحماس اول مره اتسوق كذا من غير مااحسبها وكانت ممتعه صراحه
لما شافوها اعترفت امي اني مااحتاج لشي طبعا غير فستان الزواج واني قدرت وسويتها واخذت كل شي بيوم واحد
وزود ع كذا جبت لامي وجدتي اغراض هذا زاد مدحهم
ولاني مانمت من رجعت من الدوام حطيت الاكياس كيف ماكان ونمت
بس امي قالت حتى لو اني شبعانه نوم كان قلت سبب ثاني يخليني ماارتبها
ولما صحيت مالقيت اي اثٲر للاكياس وعرفت ان امي رتبتها كلها الله يخليها لي
دوامت وماكانا عندنا سالفه الا السوق امس ووصف لثيابي والوانها
ولما رجعنا قال لي عبدالرحمن ان ليث قال له اسم القاعه اذا نبغى نشوفها
من متى العلاقه علشان يقول له المهم انه عرف وبس
ومنجد رحنا انا وامي جدتي رفضت قالت بشوفها بعدين يعني اذا مااعجبتني بتغيرونها
دخلنا ودخل معانا عبدالرحمن لان دخلنا بعد العصر
كانت اش اقول عليها ابدا مو في احلامي حتى
حسيت بفرحه كبيره شعور بالرضى استوطن قلبي طالعت في كل جزء منه وانا مو مصدقه
قلنا زواج هادي حسيت اني احلامي تتحقق والزواج لسى ماتم شلون بعدين
اخذت نفس عميق وطالعت بامي الي فرحتها تعادل فرحتي
وطالعت بعبدالرحمن الي كان يطالع فيني ومد يده وقال""كفك""
لما قالها كذا حسيت اني كٲني صحيت تو من شفت المكان وانا ناسيه كل شي
ولما قال كفك ونظرته الي تنطق بوضوح ان احنا لعبنا صح كل الشعور بالسعاده والرضى انمحى وكانه مو موجود بالاساس
طالعت بامي وانا مو عارفه اش شعوري بهذي اللحظه رجعت طالعت بعبدالرحمن ومديت يدي بتردد ضربها وصار يطالع بالمكان بنظرة نصر
قلت بصوت منخفظ""خلاص شفناه يلله نروح""
ومشيت بتجاه الباب وانا مستغربه من تٲثري اذا كذا تٲثرت كيف وانا لابسه الفستان ووقت الزفه ودعوات امي ونظراتها
ابدا ماحسبت حساب لهذا الشي لا مستحيل ماابغى كذا ابغى زواج هادي ماابغى كل هذي التفاصيل وكل هذا الاهتمام
وقفت عند السياره هذا الزواج ماراح يكون اكثر من علاقة عمل مثل مااتفقنا
ماابغى اجرب هذا الشعور وهذا الخيال وبنهايه كذا
كل شي ماله طعم لا دام امه مو موافقه مثل ماقال خلاص نملك بالبيت مع عشى بسيط ونروح حتى بدون فستان ابيض وبدون حضور
كان هذا قراري وماراح اغيره اول ماوصلت البيت مشيت بخطوات بطيئه حتى دخلت امي البيت
رجعت سياره وقلت وانا اطلع الجوال من الشنطه""اعطيني رقم ليث""
..نهاية البارت..
..عافاكم..
..عجايب..
الحمدلله.


..بأذن الله لي حسنه ولك حسنه..
(اللهم نوّر مرقد كل ميّت وعطر مشهده.وَطيب مضجعه وآنس وحشته.وَ نفّس كربته وَ قِه عذآب القبر وَ فتنته اللهم في كل دقيقة تمر على كل مؤمن متوفي وهو في قبره،أسألك أن تفتح له باباً تهب منه نسائم الجنة لايسد أبداً.اللهم أمطر على قبورهم من سحائب رحمتك،اللهم وارحمنا إذا صرنا إلى ماصاروا إليه..امين يارب العالمين..)