ان شاء الله تستمتعون بالقراءه..
..البارت الثامن والسبعون..
فرحت بكلامه يعني مااعترض ع الجزء الثاني من الكلام
قلت""اتصل ع جوالي مالقيته""
طلع جواله من جيبه واتصل وبعدها قال""مقفل""
يمكن انتهى الشاحن
مااهتميت فيه بكره ادور عليه ان شاء الله
لما خفف السرعه استغربت وقلت""ليش""
قال وهو معقد حواجبه بقوه""ماارتحت باكلهم بمر الصيدليه""
غصب مسكت ضحكتي بس ماقدرت امسك تعليقي قلت""هذا لانك معود معدتك المسكينه ع النواشف""
وقف السياره وقال""ماطفشتي""
حسيت من رده اني بدون ذوق
يقول مو مرتاح وانا اتريق عليه
قلت بٲبتسامة اعتذار""مااقدر امسك نفسي""
فتح الباب ونزل حتى كلامي هذا بعد بدون ذوق
وهو تو يقول لي كل شي ع كيفك
فتحت الباب بسرعه ووقفت وقلت له""احسبني بعد يمكن مااقدر انام""
اللتفت علي وبعدها رجع يكمل طريقه
دخلت السياره وسكرت الباب
هنا الجو ادفى من ذاك المكان
بس بعد فيه نسمه بارده
رجع ليث وبيده كيس الصيدليه دخل السياره وانا قلت له وهو يسكر الباب""سٲلت الصيدلي ولا اخذت نوع تعرفه""
قال""لا سٲلت(سكت ثواني وكمل وهو يحرك السياره)ماادري في فنادق هنا ولا لا""
قلت وانا ارفع اكتافي""خلينا نشوف""
دخل بالاحياء ندور ومالقينا الا شقق
نزل يستٲجر اذا فيه فاضيه
رجع وقال بضحكه ان فيه فاضيه فيها خمس غرف غير الحمام طبعا
واستٱجرها يبغى ينام منجده
اخذ شنطته وشنطتي مع اني قلت له مااحتاجها
بس هو قال نحطها في وحده من الغرف الخمس
لما لقي مكان ينام فيه روق
وفي البدايه يتكلم بجديه
طلعنا الدور الثاني ودخلناها هو حط الشنط عند الباب
وقال""بنزل اشتري مويه واشياء بسيطه مابطول""
سكر الباب بعده واخذ المفتاح
استطلعت ع الشقه كانت عاديه ورسميه مافيها اي شي مميز
لقيت غرفه فيها سريرين دخلتها وشغلت المكيف شوي علشان تتهوى
وفسخت عبايتي وحطيتها ع السرير الثاني
غيرت رائي طلعت اخذت شنطتي وشنطة ليث حطيتها بالصاله وشنطتي دخلتها الغرفه
فتحت شنطتي طلعت بلوزه اثقل ماابغى امرض ابغى استمتع
فسخت بلوزتي ولبست البلوزه الثقيله
وطلعت وشغلت التلفزيون وعليت الصوت
ورجعت لفيت بالشقه وانا اطالع بالتفاصيل
انتظر ليث يرجع
لما سمعت صوت الباب طلعت للممر اشوفه
لما تٲكدت رجعت لصاله وهو يمشي وراي وبيده كيسين
جلست ع الكنبه وهو حط الي بيده ع الطاوله وجلس
وطلع من جيبه الحبوب
ماكانت بكيس صيدليه
اخذها وقال بعد ماشرب المويه""وش رايك بالشقه""
قلت بصدق""كبيره""
خلينا ننسدح بس
متحمسه لبكره بعد ثواني صمت بس صوت التلفزيون
وقف وانا وقفت معاه بفرحه اذا انسدح بغصب نفسي انام
بس اذا صاحي مااقدر
انتظرته يروح الغرفه الي فيها سرير نوم توقعت كل واحد بغرفه مثل سفرتنا الاولى
بس هو قال""وين بتنامين(اشرت له ع الغرفه دخلها وانا وراه طفى المكيف كمل وهو يجلس ع السرير الي بجنب السرير الي عليه عبايتي مايفصل بينهم غير مسافة طاوله تقريبا)كذا الجو احسن لنوم""
يعني هو بينام هنا
ابتسمت له وجلست ع السرير الثاني وقلت""كانت مكتمه بس بغيت اهويها""
انسدح ع سريره وقال وهو يطلع جواله من جيبه ويحطه جنبه""اذا ماارتحتي بنومتك خذي حبه خليتها لك بالصاله""
حركت راسي بطريقة طيب
بدون مااتكلم حابه اهتمامه وجيته اليوم من الدوام علشان ع باله اني تعبانه
واستعجاله بوقت السفر علشان يرضيني
والحين بعد مااتريقت عليه بعد يقول لي كذا
ماادري اش صار فيني اليوم معقوله كل هذا علشانه سفرني صدق اني سهلة الارضاء
انسدحت انا بعد ع سريري بعد ماحطيت عبايتي ع الطاوله
وطالعت في السقف ثواني
وبعدها رجعت طالعت في ليث لقيته مغمض عيونه
تحركت حتى صرت مقابله له
وقلت بستغراب""منجدك ليث بتنام بسرعه كذا""
قال وهو لسى مغمض عيونه""خايفه""
قلت بستنكار""طبعا لا بس يعني تقهرني كذا انا مامعاي النوم""
قال وهو لسى مغمض عيونه ولا تحرك بس شفايفه""هذا لانك اليوم كله نايمه وانا صاحي من قبل الفجر حتى""
قلت وانا اجلس""قول ماشاء الله نومت اليوم كانت تعويض لايام مانمت فيها زين""
انتظرته يعلق لما ماتكلم
قلت باستعطاف""ليث نمت""
اول بالصاله كنت اقصد ينسدح ع سريره
وانا بعد بنسدح مو اقصد يحط راسه وينام
لما بعد مارد علي قلت""ليوثه""
يعني اني ادلعه وكنت قاصده اخرب اسمه
ضحك ليث بقوه مره
من دلعي لاسمه وهو يفتح عيونه
وانا ضحكت معاه وقلت""شفت كيف مامعاك النوم""
قال بين ضحكاته وهو يلف ويعطيني ظهره""ابغى انام""
قمت وجلست ع طرف سريره وقلت باصرار""انت نشيط وين الي مااشوف شي""
لما مارد علي ضربته برجله بس ع خفيف وقلت""ليث""
لف بتجاهي بكامل جسمه وقال بٲبتسامه""اش فيك""
قلت""اجلس سولف معاي""
قال بصدمه مصطنعه""الحين""
سحبت نفسي ع السرير حتى صرت جالسه جنبه
ورفعت رجلي ع السرير ورفعتهم وحطيت راسي ع ركبي اطالع فيه
وقلت وانا رافع حجب""ليش عندك شغل اجلس""
قال وهو يطالع فوق علشان يشوفني""مافيني تاج""
حسيت من رده اني مستبده معاه
وهو معطيني وجه بزياده
ضحكت وقلت وانا احط يدي ع وجهه""طيب خلاص نام""
ووقفت واخذت جواله الي حطه جنبه من الجهه الثانيه
وهو يطالع فيني قلت""بتسلى حتى انام""
وانسدحت ع سريري وهو رجع غمض عيونه
لما فتحته عرفت ليش مااعترض اني اخذ جواله ولا فيه رمز سري
كان فاضي من جوه وكٲنه لسى جديد حتى ارقام مافيه
فتحت الجوال علشان اشوف فيه ذاكره ولا لا
وكانت موجوده وعليها رمز سري
يعني هنا حافظ كل شي
والله انه ذكي
مليت بسرعه من جواله
طالعت بليث وابتسمت له مع انه مغمض عيونه مستغربه من عمق علاقتنا ومتنها
بنسبه لي مع ان بداية زواجنا مثل ماقال ماكانت صحيحه بيننا مواقف مو حلوه
مو المتوقع تكون علاقتنا كذا مو صايره رسميه وجاده
صرت اعرف عنه اشياء كثيره واندمجنا مع اختلاف شخصياتنا
قبل الزواج ماكنت متوقع كذا يصير
توقعت استغل فلوسه واسوي الي ابغاه للحين مااخذت منه ريال زياده
ولا تفكيري مثل زمان ابغى فلوس ابغى احترام ابغى مستقبل
من تزوجته وانا مبسوطه وافكر بوناستي ويومي وبس
ماابغى اي شي زياده
بس ودي نكرر مثل هذي السفرات حاسه ان اليوم من اوله حلو
وقفت وحطيت جواله جنبه
وهو فتح عيونه لان شكله حس بحركتي وكان واضح النوم بعيونه
قلت بٲبتسامة رضا ع شكله""ماراح اسرقك بس بحط جوالك هنا""
ورفعت الجوال ووريته وانا لسى منحنيه فوقه
رجع غمض عيونه بدون مايتكلم
منجده مايشوف شي
رجعت حطيت الجوال وانا اطالع في وجهه
بعد تفكير ثواني جلست ع طرف سريره وقلت بصوت منخفظ""ممكن توخر لي شوي""
..نهاية البارت..
..عافاكم..
..عجايب..
الحمدلله.



..بأذن الله لي حسنه ولك حسنه..
ابتعد عن التكبر فما ازداد أحدٌ كبراً إلا زاده الله ذلاً في نفوس الناس (فاهبط منها فما يكون لك أن تتكبر فيها فاخرج إنك من الصاغرين)