ان شاء الله تستمتعون بالقراءه..
..البارت السادس والستون..
طالعت فيه وانا رافعه حواجبي يعني يحب لما احد يستصغره
قبل شوي كان متغدي متٲخر
شكله يحب السب المغلف بحرير يحب يسمع ولا يرد خلينا نكتشف
حطت سوناتا الصحن ع الطاوله لو يده مو مجبسه كان قلت له يشيله بنفسه ثقيل
هو جلس مقابل لي
طالعت بالبنات حتى طلعو جابت الصحن لليث
بس ماجابت الباقي لي طيب اوريها نسيت اهم شي ليث
وقفت واخذت الصحن الثاني وحطيته ع الطاوله وفتحت الثلاجه واخذت عصير طبعا طبيعي لليث وجلست
وسويت اني بعطيه بس غيرت رائي ورجعت خليته جنبي وقلت بمسخره""ولا اهتمام""
مد يده اخذه وهو يقول بضحكه""تبغين تخليني اندم ع هذا الكلام""
فتحت عصيري وانا اقول""لا ليش بديت تندم وتحاول تشوف اقبل عذرك ولا لا""
ضحك بقوه لدرجة استغربت وطالعت فيه
قال من بين ضحكاته""انتي مسليه""
مسليه
مالقي الا هذا الوصف مسليه
مين قاله اني احاول اسليه
يتمسخر علي رجعت طالعت بصحني وانا اكل مهرج عنده اسليه
يعني نزل علشان يتسلى
قلت بعد مابلعت بنبرة غرور""مو انت الوحيد الي يحب جلستي""
انا شخص متفائل علشان كذا شفت بجملته الجانب الايجابي
ابتسمت لنفسي وانا مطنشه زيادة ضحكته عرفنا انه مايعرف يرد ع كلامي
كملت اكلي بدون مااقول حرف واحد ماراح اسلي يصرف نفسه
قال بعد وقت طويل بجديه""كيف صحة ابوك""
قلت بعد ماشربت من العصير""بخير الحمدلله يداوم كل يوم""
قال""وامك""
طالعت فيه وقلت""بخير الحمدلله ليش تسٲل""
قال وهو يطالع بصحنه""ولا شي بس افكر بكره ازورهم ان شاء الله من زمان مارحت""
سكت لثواني ولسى اطالع فيه وبعدها قلت بشك""ليش مو ضروري اتصل كفايه""
طالع فيني وقال بٲبتسامه شككتني فيه اكثر""ليش ماتثقين فيني""
ماادري اساسا خايفه من ايش
مافي شي يقول لهم بس بعد مو مرتاحه
قلت وانا اتكتف وارجع ظهري""لا مااثق انا مره وثقت فيك وخسرت للحين مااشتريت البيت""
قال بجديه واضحه وهو يرجع ظهره بعد""خليني اقولك بصراحه البيت بيكون ملك لكم قبل انفصالنا بشهر والاشهر الي قدامها انا بدفع الاجار لاني تٲخرت بتنفيذ شرطك تمام""
قلت بعدم فهم""ليش""
قال بختصار""لان انا بعد مااثق فيك""
من غير مااحس ابتسمت وانا احك حاجبي
وبعدها رفعت عيوني له لثواني
وبعدها طالعت بارجاء المطبخ
كذا انتهى الكلام احنا مانثق في بعض مع ان الغريب ان احنا مابنخسر شي غير الثقه هذي
يعني هو مايقدر يضرني وانا بعد ليش هذا الخوف الي ماله داعي
لما وقف قلت بدون ماقدرت اقنع نفسي بالكلمتين الي قلتها قبل شوي لنفسي""متى بتروح عند اهلي""
مشى وغسل يده ونشفها بالمنديل وانا عيوني عليه
لسى انتظر رده ومااستعجلته بالرد لاني اشوفه وهو يطلع الخاتم قبل مايغسل ورجع لبسه
يعني هو كل مره يوضي ولا ياخذ دش ولا يغسل يده يطلعه
انا ماقد طلعته ابدا وانسى وجوده حتى
يامبالغاته
قال""بعد المغرب""
بعد المغرب يعني بكره اتغدا بمطعم واطلع اتمشى واروح عند امي وارجع البيت لنوم حلو
رجعت الكرسي شوي ومددت رجلي تحت الطاوله انتظره يطلع علشان يرجعون البنات
بس شكل ماله نيه شال الصحن قلت بستغراب لما شفته رفعه بيد وحده""بتغسله""
حطه عند المغسله وقال""المفروض بس بروح لصلاه""
قلت باستمتاع""ايوه صح تذكرت تعرف تطبخ بكره العشى عليك ابغى اذوقه""
علشان يكمل اليوم اذا طلع مو حلو ع الاقل امسك شي
اش اقول ع الاقل امسك شي ياكثر اغلاطه هو وين والمثاليه وين
قال""ع حسب المزاج""
وهو يجمع الاكل بصحن والباقي يرتبها فوق بعض هذي الحركه شفتها مع امي
قلت""قد سكنت وحدك""
مو معقوله الدوره هي اسست فيه هذي الصفات احسه يسويها بعفويه كٲنه تربى عليها
قال""لا ابدا""
كلامه قليل دايما مايبرد القلب ع قد السؤال يرد
لف ووقف عندي علشان ياخذ صحوني
قلت وانا اوقف بسرعه""لا انا باخذهم""
حسيت باحراج اني ماتحركت وهو بيشيل اكلي انا مو اتكاليه لهذي الدرجه
وبعدين بحطها عند المغسله بس مثله
شلت كل صحن بيد وبقي عصيري بحطه بالزباله هي جنب المغسله
فرجعت حطيت الصحن ع الطاوله وشلت العصير وحضنته بذراعي ورجعت شلت الصحن و لفيت عليه بٲبتسامه
لاني احس اني حليتها بدل ماارجع مره ثانيه
قال بٲبتسامه حنونه""شكرا للمحاوله اعطيني""
يقصد الصحن
بس انا بهذي اللحظه طالعت بوجهه بملامحه بتركيز وكٲني اول مره اشوفه
حسيت انه اول مره يقدر شي انا سويته
مع انه شي بسيط جدا ومثل مايقول محاوله
و قدرها
ولما وديته المستشفى واهتميت فيه ماقدره
مو فاهمته ابدا هذا الرجال
بس ماحاولت افهم حبيت انه قدر وحس اني ع الاقل اسوي شي
ابوي وجدتي وعبدالرحمن وحتى امي مااحس انهم يقدرون الي اسويه
والبنات بزعلهم علي زاد احساسي اني لازم اسوي شي اخليهم يقدروني
مع اني فكرت ان بعد زواجي من ليث بيجيني من غير مااسوي شي
الغريب بهذا الشي كله تو اكتشف ان تقديره كان يهمني
وليش غريبه مو انا الي اخلي سوناتا تطلع ترتب بدون مايدري ليث
وكٲن انا بين فتره وفتره ارتب واهتم بالبيت
وانا الي قدام امه حاولت اخلي نفسي بمستواه ولا احرجه قدامها
وحتى قلت له يجيبها البيت وانا مااعرفها حتى واصريت علشان يعرف اني اقدرها وي......
قطع تفكيري صوت ليث لما قال""اعطيني""
ومد يده ياخذ الصحن
نسيت اني حاضنه العصير بذراعي
مديت له الصحن وطاحت علبة العصير وطلع صوت مزعج وماكان فيه عصير كثير
مديت له الصحن الثاني بسرعه وانا اطالع بالارض
لما شاله انحنيت وشلت العلبه لان العصير صار بالارض وشوي ع طرف بجامتي
رجعت وقفت وانا اطالع بالحوسه الي سويتها ثواني ورفعت عيوني بتردد وطالعت بليث
شفته يطالع بالارض رجعت طالعت بالحوسه مره ثانيه كم ثانيه بس وماقدرت امسك نفسي
ضحكت بقوه هو بيد وحده وصل صحن كبير فيه كل شي للمغسله بسلامه
وانا بيدين ماعرفت اشيله
لو منجد ابغاه يقدر كان انتبهت لنفسي ولتصرفاتي مااخذ راحتي قدامه اكثر من اي شخص ثاني
كذا انا اتصرف بطبيعتي ولا لحظه حاولة ارضيه فيها
وهذا هو المريح لا ابغى تقديره ولا حبه علشان كذا حابه هذي الحياه كثير
وكل الكلام الاول كذب انا اخلي سوناتا ترتب علشان انا ارتاح
ولما قلت له يجيب امه لاني تخيلتها مثل امي
وانا مااحتاج تقدير من احد المهم ارضي نفسي
وانا من تزوجته وانا مستمتعه بكل الحياه المريحه وياما غلطت وتصرفت بمزاجي وكل الي اسويه علشان نفسي وبس
رفعت راسي ورجعت وطالعت بليث كان هو لسى يطالع بالارض ويبعد خطوه قلت بسرعه بضحكه""الحين بمسحه""
عارفه انه معصب بس مثل ماقلت مايهمني اش نظرته عني ولا عن تصرفاتي لاني عارفتها من زمان
اساسا هي شهور وتنتهي
رفع راسه وطالع فيني وهو مبتسم وتحولت ابتسامته لضحكه
ولما شفته يضحك رجعت اضحك
قال بضحكه""مامنك امل""
قلت وانا اتكلم عن نفسي بصفة الغائب بطريقة يٲسه مزح""لا تحاول معاها""
حط الصحنين الي كانت بيده فوق بعض ع الطاوله ورجع عدل وقفته
وحط يده ع كتفي وقال""لا تقسين ع نفسك تقدرين""
رفعت حواجبي بستنكار لكلامه كٲنه يحاول يغيرني اويساعدني ع التغيير
تو اقول انا ماابغى اتغير علشانه ولا علشان حياته
رجعت خطوه ورا علشان ابعد يده عن كتفي
وتعثرت بالكرسي وجلست عليه بطريقه مو مريحه وسويت اني عادي انا كنت ابغى اجلس ومو ناسيه ان وراي كرسي
وقلت بمسخره""انت الي لا تتٲمل كثير ماراح تكسب اجر عن تغييري""
هو يقهرني وانا اقهره هذا شغلنا
بهذي اللحظه سمعنا اقامت الصلاه قال وهو طالع من المطبخ""لاخر يوم""
حسيته تحدي كلامه نشوف ماراح اتغير وحتى لو كانت كل صفاتي سلبيه انا ابغاها
وبعدين من مثاليته يرتاح بس
قمت ورحت اخذت منشفه امسح العصير وانا جالسه ع الارض دخلت سوناتا وقالت""انا سويه""
ياجمالها ياناس وقفت واخذت علبة العصير وارسلت لها بوسه بالهواء
ورميت العصير بالزباله وغسلت يدي
وانا بعد بصلي العشى وبنام مع اني نشيطه وكل الكسل طار
طلعت اخذت دش خفيف وصليت العشى وفتحت شباك الغرفه وطفيت المكيف
خلينا ننام اليوم كذا الهواء الي يدخل بارد ويبرد الغرفه
انسدحت وانا العب بجوالي لما رجع ليث دخل الحمام ع طول
ولما رجع شغل المكيف قلت""ليش الجو حلو كذا""
قال""بنام""
ياشيخ اش هذي المعلومه شكرا ع الافاده قلت""ايوه طيب نام بهذا الجو حلو وصحي كذا""
قلت اخر كلمتين علشان يقتنع بس
قال وهو يروح بتجاه الشباك يعني بيسكره""مااقدر""
وقفت وشلت مخدتي وسحبت البطانيه وراي وطلعت من الغرفه
حطيتها ع الكنبه وسحبت طاولة الصاله الكبيره وبعدتها
وحطيت مخدتي ع الارض وانسدحت وتغطيت
بعد ماشغلت التلفزيون شكل بنام هنا تغيير دام للحين انا نشيطه
تميت تقريبا ساعه اتفرج وبعدها سمعت صوت بغرفتنا
اللتفت اشوف اش فيه لقيت ليث طالع من الغرفه وبيده مخدته وبطانيته
من الحماس جلست بسرعه وصفقت بقوه وقلت بتشجيع""اش هذاالتطور ياسلام ماعرفتك""
قال بغرور وهو يتقدم""اجرب اكون مجنون مثلك""
وين الجنون كله نوم بالصاله
بس بالنسبه له شي تغيير النظام اوالروتين
وخرت له مكان جنبي
..نهاية البارت..
..عافاكم..
..عجايب..
الحمدلله.


..بأذن الله لي حسنه ولك حسنه..
(وسيق الذين اتقوا ربهم إلى الجنة زمرا) يأبى الله أن يدخل أهل الجنة فرادى فكل صُحبة يدخلون الجنة سويا انظر لصحبتك أين سيذهبون بك! ابن القيم”..

حبيباتي نزف جروحي و bluemay شكرا لاهتمامكم والله اني سعيده فيكم..
تسلمون ع طيبت قلبكم وكرم اخلاقكم ربي مايحرمني منكم..

الذين يشاهدون محتوى الموضوع الآن : 37 ( الأعضاء 14 والزوار 23)
‏فيتامين سي, ‏سمر آل باز, ‏امل جدة, ‏ريم السعودية, ‏شكولاين, ‏عجااايب, ‏طوطه1985, ‏شعله ضياء, ‏هنودة البنودة, ‏تائبة لربها, ‏riman, ‏hoouur, ‏ذاكرة الجسد, ‏غير عن كل البشر

السلام عليكم
عمري عجايب م تشوفين شر الله جعل العافيه بجسدك :).
البارت جمممممميل مره احس فيه تحسن ف علاقتهم وتاج تعجبني عفويتها هههههههههههههه
الله يعطيك العافيه .