بيرو حبيبتى ... انا خلصت الفصل السابع

بجد جننتينى معاكى بتقلبات قحطان .... شوية رقيق على غير العادة ومتفهم ... وشوية دماغه انشف من حجر ...
بس بجد اكتر حاجة ضايقتنى .. موضوع زواج سلمى وفراس ده !!! مش كفاية المآسى اللى فى العيلة جايين يكملوها
سالم ده انا مش طايقاه .. لأنه المفروض عارف ابنه وتحرره وتربيته الاجنبية ... بنت اخوه رخيصة عنده للدرجة دى انه يقبل يزوجها لابنه ؟؟؟!!!
وقحطان ده كمان عايز الولعة ... يعنى عشان العرف والتقاليد ومنظره قدام الناس يدمر حياة اخته ؟؟؟ بكل بساطة كده ؟؟؟

هو عارف فراس ومش عاجبه منظره ومياعته ... ازاى يأتمن الانسان ده على اخته وخصوصا انها هتكون لوحدها معاه فى الغربة ...يعنى ماحدش هيعرف ينقذها لو اذاها ... فراس ده اساسا انسان انانى وماعندوش اى كرامة ولا رجولة ... مستعد يضحى بكل حاجة مقابل انه يوصل للى عايزه ويسافر امريكا ... باع اخته فى الاول ... ودلوقتى ماعندوش مشكلة انه يتزوج ويمرمط انسانة مالهاش ذنب معاه وهو عارف انه ماعندوش اى استعداد يتحمل مسئوليتها ولا يصونها ويتصرف كزوج محترم !!!
وبعدين كمان بيرو عندى سؤال ... معقولة لسه بيحصل الكلام ده ؟؟؟ ان الرجل يزوج اخته او بنته كده بدون ماياخد موافقتها .... وهى تسكت كده وماتقدرش تفتح بقها ولا تحاول تعترض ... كل اللى بايدها تبكى همها بصمت من غير ماحد يحس بيها ؟؟؟ معقولة الكلام ده موجود فعلا ؟؟؟
قحطان شايفها عيب انه يرفض ابن عمه وان البنت ما تتسئلش عن ابن عمها ... بس العقل والمنطق بيقولوا ان ده يتعامل معاملة الغريب ... هو العبرة برابط القرابة ولا العبرة بالعشرة ومعرفتنا باخلاق الانسان ده وتربيته وشخصيته !!!
عندها حق سيادة انه عقلية متحجرة .... ودى نقطة تانية ... انه الاخ بيعاقبها انها بتناقشه وبيعتبر ده جدل اطفال .... يا سلام كأنه مش من حق الست فى عرفهم انها تقول رأيها وتناقش ... معترف ان الرجالة بس هما اللى بيفهموا وبيعرفوا يقرروا وان الستات دول مجرد عقول فارغة ربنا خلقهم عشان يكونوا عبيد للرجالة وتحت رجليهم !!!!
آآآآآآآآآآآآآآآآآآآآآ ه يا حرقة دمى ... يامين يناولنى زمامير رقابيهم المجموعة دى قحطان وسالم وفراس ..... آه وحسن كمان .... لالالا حسن ده مايكفنيش اخنقه .... ده اقل حاجة ادوسه تحت رجلى لحد ماجيب اجله

اللى مصبرنى انه فيه بوادر انه مش كل الرجالة فى العائلة العجيبة دى كده .... رعاد وعلى طيبين ومتفهمين شوية شكلهم ... وقبلهم محمد الله يرحمه ...


يلا معلش طولت عليكى فى الحكى ... بس بجد دمى اتحرق من الموقف الاخير وماقدرتش اسكت الا مافضى اللى جوايا

وان كان الحق يقال عشان مابقاش ذكرت المساؤئ بس ...
فى اول الفصل انا كنت معجبة بقحطان جدا ... حتى لما اتختم المشهد ختام مش ولابد كنت عاذرته لأنه غصب عنه انه يتخيل انها كانت لواحد غيره ... كرامته ماتسمحلوش بكده ... بجد عاذراه ومش بلوم عليه خالص فى النقطة دى
وكمان لما نصفها قدام عيلته كان قمة فى الروعة الصراحة ...
انا كل اللى بلومه عليه بس زى ماقلتلك نشوفية دماغه وانه مش قابل انها تناقشه وتحاول تقنعه فى موضوع سلمى وفراس ...

يلا ماعلينا .... مازلت متابعة وقربت اوصل الحمد لله

سلام مؤقت يا قمر ...

خلصت الفصل الثامن ...

طبعا هتستغربى ان الردين نزلوا ورا بعض ... بس انا كنت بخلص الفصل واكتب رده عندى لحد مادخل نت عشان ابعتهملك



بجد الفصل قمة فى الروعة ... نهاية الفصل السابع حاجة ونهاية الفصل الثامن حاجة تانية خاااااااااااااااااااااااالص ...

بجد مستمتعة جدا لدرجة انى كنت بلتهم السطور واجرى عليها بعينى وبعدين ارجع تانى اقرأ كل كلمة بتأنى واعيد وازيد فى كل فقرة !!!

بس بصى بقى ... ليا رأى فى حماتها دى ... هدية ... ماعرفش انتى جبتيلها الاسم ده منين بالضبط مش لايق عليها خالص !!
المهم ياستى انى كنت متقبلة معاملتها لسيادة فى الاول وانها مش طايقاها ومش بلومها على كده ... لانه طبيعى سيادة مختلفة تمام الاختلاف عنهم وعن الصورة اللى كانت بتتمناها فى زوجة ابنها الكبير واللى هتكون سيدة الدار ... كمان احترمتها جدا انها ماشتكيتهاش لقحطان على لبسها اللى كانت بتظهر بيه قدام النساء ولا انها ماكانتش بتنزل على الارض معاهم وقت الاكل ... وقحطان هو اللى اكتشف الامور دى لوحده ..
لكن موقفها الاخير ده كان اوووووووووفر بجد ومافيهوش ريحة عقل ولا حكمة خالص ... ليه بقى ؟؟
لانه مش معقول ابدا انك تيجى لواحدة مش بتعرف تعمل كوباية شاى لنفسها وتقوليلها تعالى اعجنى ... ولا واحدة عمرها ماغسلت لنفسها حتى شراب وتديها جبل غسيل وتطلبى منها تغسله ..
العقل بيقول انى اخليها تتفرج على حد وهو بيعمل وبعدين تخليها تجرب قدام عينيها عشان تقومها لو غلطت وبعد كده ابقى اسيبها تقوم بالشغل لوحدها ... مش تسيبلها صينية العجين وتختفى وبعدين ترجع تلومها على اللى حصل ... ده اقل واجب يعنى انها تبوظلهم العجنة خالص !!!
صراحة موقفها ده ضايقنى لانه خالى من العقلانية تماما ... بيدل على انها عايزة تذلها وخلاص مش فكرة انها عايزة تعلمها فعلا ... بدليل انها سابتها بعد كده وماطلبتش منها حاجة تانى !!!
صراحة مش متخيلة الامور بين سيادة وحماتها هتتصلح ازاى بعد كده ؟؟؟ بيتهيألى عند الحموات الانطباع الاولى لا يزول ابدا ... ربنا يستر

تعليقات بسيطة بقى على باقى الابطال ....
الجوهرة .. ياقلبى ... الله يعينها ... ليها حق تكره سيادة بعد مقارنة الحقير بينهم !! بس أملى فيها ان عقلها اكبر من كده وانها عارفة قد ايه زوجها حقير وعنده نقص ... لازم تكون ثقتها بنفسها عالية وتعرف انه الجمال مش كل حاجة فى الكون ... يارب تفهم كده ... ويارب يا بيرو تخلصينا بقى من الحيوان ده ... عايزين نضحى بيه على العيد لانه الدبايح غالية اليومين دول وانتى عارفة !! وان كنت مستحرمة صراحة انه هيفضل يعذب فى جوهرتنا لحد العيد

نادين وعلى ... الثنائى القادم بقوة ... انا حبيت شخصية نادين وحساها انسانة كويسة فعلا من جواها وعندها رغبة حقيقية فى الخروج من المستنقع اللى عاشت فيه ده !!! لكن بأى وسيلة تخرج ؟؟؟ باللف والدوران واللعب على براءة وسذاجة على ... ده اللى حسيته من النبذة اللى جات عنهم فى مقدمة الرواية خالص ... على مايستاهلش كده ... وكمان ايه هيكون موقفه لما يكتشف حقيقتها ؟؟؟ وهو ابن الشيوخ ... الاخلاقيات والشرف عندهم اهم من اى حاجة فى الكون ... واللى يفقدها فى نظرهم لا يستحق الا القتل وليس له مكان فى الحياة ... فازاى هيتقبل نادين لو عرف حقيقتها ؟؟؟ مش قادرة اتخيل الصراحة ..

رعاد وغزل ... لا تعليق حتى الان ... سانتظر واتابع فى صمت ... وان كان اللى جوايا ... ربنا يصبرك يا رعاد ويقويك عليها

يلا ماتقلش عليكى
رجاء اخير ... ماتطوليش علينا الغيبة ارجوكى لانى مش بقدر استنى ... مش عارفة انا هستحمل ازاى على ماترجعى تانى ...

رمضان كريم عليكى وعلى كل اهل اليمن يا غالية

يا خسااااااااااااااارة غالبا مش هقدر احضر الفرح ... مش كنتى تخليه الخميس !!!

يلا بس ده كويس لانى كان ممكن اتهور وابوظلهم الفرح ولا اتخانق مع اى حد واعمل فضيحة .... ربنا يعدى دى جنازة .. اقصد جوازة على خير !!!

وبعدين كمان انا قلت خلينى بعيد كفاية البنات دول على سيادة دول ناويين يجننوها ... اصل الحلوة بدأت تغير وممكن تنبش اظافرها فى وش اى واحدة لو لمحتها بتبص بصة لقحطان ... ياعينى عليها حبيبتى دى ...


ربنا يعدى الجاى على خير بجد ... انا قلبى مش متطمن الصراحة يابيرو ... شكلك ناوية نية سودة للفرح ده ... براحة على قلوبنا الله يكرمك


سلام مؤقت يا قمر .... اشوفكم فى الصباحية وعليكوا خير