اللي سأل عن جامعتي

جامعتي جامعة الملك عبدالعزيز بجدة الفرع الرئيس السلمانية

ومسموح لنا البناطيل مع البلايز الطويلة

طبعا العلمي من زمان سامحين لهم واللي سمعت انو الادبي من السنة اللي فاتت او دي السنة

وطبعا مسموح للأستاذات كمان ..



واللي قال ألف سلامة

اقوله الله يسلمك


وربي يسعد قلوبكم جميعا

تقريبا قبل النهار

لبست الفستان الموف

ولبست جاكيت بموت برررد وخوووف اطالع في الغرفة ظلام بس طالع نور الحمام عشان يعطي الغرفة انارة

طالعت في ماما دقيتها باصابعي وانا اقول تعالي نامي معايا وسعت لها والسرير واسع بالنسبة لنا ضميتها بقوة وحسيتها وهي تضمني كأنها تبغى تدخلني جواتها

صرت اشم ريحتها الجميلة ودمعت عيني وهي بس تسلم ع راسي في الصباح عمليتي ودحين الساعة قاربت 12

دخلت الممرضة وفتحت النور وجات شغلت المغذي وهي تتأكد انو يوصلي

وقالت خلاص صيام لاتشربي ولاتاكلي شيء ومشيت دخلت في النوم وماما ضامة يدي الباردة بين كفوفها

كان النوم مزعج بسبة المغذي

صحيت الصباح والمغذي ماكان له وقت من غيروه مدري كم كيس اعطوني عشان يهيئو جسمي

سامعة صوت اذان في انحاء المستشفى مدري كيف باتوضى

وقفت فوق السرير عشان اوصل للعامود وشلت المغذي

حطيتو ع الحوض وانا احاول انو الموية توصل لكل الأماكن صعب بس اقلها احاول والله يغفرلي

طالعت في المراية وجهي شاحب باهت فيه شيء منزوع منو

خوووف غسلت وجهي بصعوبة بسبب الابرة

ماقدرت اللبس العباية عشان المغذي

لفت ماما الشرشف حق السرير على جسمي ومسكت طرحتي كبرت وصليت وقالت لي ارجعي صلي استخارة

قالت لي ماما صلي استخارة

انتهيت وانسدحت ع الساعة 8 جو الطاقم الطبي اعطونا خبر اتحجبت بطرحة وردية جابتها اختي عشان لمن اخرج من العملية

دخلو وحسيت انهم مركزين في وجهي نزلت راسي بإحراج وسمعتهم يتهامسو وكأنو فيه شيء خوفت وانا احاول اركز

بس واحد منهم قال بشوي عصبية وهو يطالع في الممرضة ليش وجهها كذا .؟ بسرعة اتأكدي من المتبرعين

وخرجو بسرعة بنفس الاسلوب اللي داهمو الغرفة

فسخت الطرحة واعطيتها ماما اللي دخلتها وجابت المشط وهي تنعم شعري وتظفرو

اخدت مقطة الاظافر وانا اقص اظافري وماما تصورني اصلا حسيتها حتى وانا نايمة صورتني

حسيت راسي ثقيييل وجفوني انسدحت ونومت فجئة ينفتح الباب ع الساعة 10 ونص

طالعت جهة الباب وكتمت شهقتي وانا اشوف السرير واتذكرت كل الكلام هذي العملية مو سهلة زي مااتوقعت مسكت ماما يدي قولت ابغى الحمام ماتوضيت قالت الممرضة مايمدي لازم تدخلي دحين للعمليات
وجات شالت العامود حق المغذي بس بدون العجلات بس فتحت نصو

مسكت ماما وضميتها بسرعة خرجت من الغرفة وشوفت الممرضين كنت بارجع مستحيل اركب ودول يشوفوني قالت لي بسرعة مااعرف احس اني مربوشة

حاولت اطلع السرير بس حسيت اني صغييييرة حيييل وانا اتمسك فيه عشان اطلعو

انسدحت وغطوني وركبت عامود المغذي في السرير

يمشي السرير وقلبي ينبض بجنون وكردة فعل معاكسة ابتسمت شوفت ماما بعبايتها وهي تمشي معانا بس ماطالعت فيها عشان لاابكي

ولازلت محافظة ع ابتسامتي وقلبي ينبض بجنون

دخلت لمكان فيه كراج وماما جلست برة

قرأت غرفة التخدير غرفة التعقيم شوفت في المسافة البعيدة دكتور وكان متلثم بالكمامات ويتناقشو بس اشوف ناس غريبين

.
.
.

جو عادو الاسئلة عندك ربو عندك حساسية من شيء اسنانك فيها تركيبة جاوبتهم بالرفض

جاتني دكتورة سعودية تتأكد من ملابسي مسكت يدها بين يدي وأنا اطالع في عيونها برجاء محد يكشفني أمنتك بالله انو محد يشوفني حسيت باضطراب عينها

ضغطت ع يدها وطالعت فيني وقالت محد بيشوفك لاتخافي انا بانتبه لك

قربت منها وقولت خليه يطلع وكان قصدي ع دكتور او طبيب امتياز

كلمتو وقعد يقول لييش قالتلو خلاص اطلع

طلع واشرت ع الدكتور العجوز حق التخدير ودا

سكتت بس هو طلع من نفسو رفعو شعري وربطوه بغطا الراس وفتحت اللبس من اعلى

دخلو الدكاترة بعد ماانسدحت ودكتورة القلب قهرتني وهي تشبك الاجهزة

حطت في اصباعي زي المشبك وبدأ صوت ضربات قلبي تبان

حطت لصقات دائرية في اكتافي صدري وانا كل اعطيتها نظرة نارية لمن مسكت لبس العمليات

جاني دكتور وسألني قلك انو يطمني خايفة طالعت في جهتو بعصبية بس بدون لااطالع فيه وقولت بقوة لااااء

حسيت بصوتي شبه عالي بس ينقلع مو فايقة له

مسكت نفسي مافي شيء يخوف جاني دكتور ثاني من عند راسي وقالي قلقانة

طالعت فيه بالخطأ ونزلت عيوني عرفتو دكتوري قولت بنفس الصوت لاء وقلبت وجهي عنهم وانا اضم يدي خااايفة مرررة خايفة مسكت نفسي لاابكي

ابغى ماما جا اللي طردتو من الغرفة ونزل تحت ورفع حزام عريض بس انو مو ثقيل وثبتو حررت يدي

وانا اشوفو يربط واحد ثاني معد اقدر اتحرك طالعت في السقف ودكتور التخدير ماسك المغذي ويشتغل

طالعت في اللي وعدتني محد يشوفني نزلت عيونها وهي ماسكة جوالها وقالت كأنها تذكرني بدون لا أخاف اشهد ان لاإله إلا الله رددت

وبعدها قولت لاإله إلا انت سبحانك اني كنت من الظالمين


فيه شيء بارد دخل يدي

احس به في رقبتي وصل لرجولي في ثواني رفعت عيني لسقف احس بها تهتز

كل شيء يغبش

يختفيي

.
.
.

أحس بازعااااااج اصوات كثيرة


مدري انا فاتحة عيني ولاعيني مقفلة بدأ شيء ابيض يبان في عيوني فيه برضو لون سماوي ارتجف جسمي ابغى اتنفس موقادرة


أحس بنااااار بسكاكين في حلقي أحس انو رقبتي شابة نار ماتنطفي حاولت اتحرك ماقدرت حسيت باحد مسك يدي صرت امسكها بقوة واتشبث فيها

حسيت انو اليد دي تضم يدي

وصوت يقول فيييه ألم طالعت وصورة شخص مغبشة حاولت انطق بصعوبة وشفايفي ترتجف م م مكتووومة سكت وانا ارجع استسلم لظلام

بعد فترة فتحت عيني وانا اسمع الدكاترة وهم يتكلمو واحد زوجتو بتولد ومدري ايش بالغصب ميلت راسي بس شوي وطالعت لقيت الممرضة

جاتني وانا ارجف قالت فيه ألم جيت بارفع يدي وانا احس بنار بس ماقدرت اوصلها لحلقي شبكت اصابعي بعض وثبتها ع بطني وقولت

مكتومة مافهمتني وبدأ عقلي يستوعب انو في فمي اكسجين

غمضت عيوني وحسيت احد يمسك يدي حاسة بألم في رجولي وبألم في يدي

كأن احد موقادر يدخل الإبرة جا احد ومسك يدي واتعورت وصرت اضغط باصابعي كل مااتألمت

فتحت عيوني وانا اشوف الدكتور ماسكها ورجعت غمضت عيوني

جاني من يدي اليسار وقالي السلام عليكم غمضت عيوني

قالي قولي الحمدلله قولت ا ا حمد الله كانت لغتي ركيكة نوعًا ما صوتي مبحوح ومو بسهوله يخرج

حسيتو فرح وصار يردد الحمدلله طالع فيني وقالي تتألمي حاسة بألم فضيع بس مستحيل اقولو لأني عارفة طبيعي اتألم

قولتلو بخوف ماصليت صرت مفجوعة وانا اردد ماصليت ماني متوضية ماصليت بس هو قالي ارتاحي

طالعت فيه بخوف في قلبي وقلبي ينقبض وحسيت ببرد ضميت اصابيعي ولازلت مااشوف تمام بردااانه بررررررداااااانه بدأ جسمي يرتجف

واسناني تصك في بعضها وصرت اتألم شوفتو يغطيني

مادري كيف

فجئة صرت في غرفة ويحاولو ينقلوني ع سرير ثاني

وماما واقفة مع الممرضات

طالعت في الساعة اللي في الجدر

الساعة 4:30 حسيت بفجعة كثييييير الوقت


.

.

.

هذا الطفل غير قوانيني

يوم كامل عاش معي

نام معي اكلتو شربتو روشتو نظفتو

وشلتو

وفوق دا كلو أول شخص اسمحلو يستخدم مناشفي

لمن شلتو حسيت اني صغيرة

وانا احاول اثبت يدي مع ثقلو

لمن يضحك اشوف الدنيا تضحك وانسى كل الحزن

ولمن يحزن ويبكي ازم شفايفي وانا اكتم بكيتي

وتتجمع الدموع في عيوني

واضمو وانا اقول لاتبكي

وهو يضمني ويحط راسو

لمن أكلو ويدخل يدو في شعري ويقعد يضحك احس اني ملكت الكون

لمن اغطي وجهي بايادي واشيلها بسرعة وهو يشرغ بضحكتو ويحرك يدو ورجولو

لمن ينام واضمو بقوة واخبي وجهي به

وتوصلني ريحتو اللي هي ريحة عطري

جزء مني

لمن يمسك خدي بيدو واحيان يدخل فمو كلو في خدي ويعبيني تفالينو

بالله احد يقرف من طفل .؟

جميييل

من غير انا متعلقة بكل الأطفال كيف

بطفل عاش معي يوم كامل .؟