المنتدى :
القصص المكتمله
في بيتنا جني ، بقلم الكاتبة : خجل ..
بسم الله الرحمن الرحيم ..
السلام عليكم و رحمة الله و بركاته
كيفكم ان شاء الله تكونون كلكم بخير..
اليوم رجعت لكم بقصة جديدة مثل ما وعدتكم .... القصة هذي تختلف تماماً عن نمط رواية أميرتي هذي القصة ماراح أطلق عليها اسم رواية لأنها بتكون أقصر من إنها تكون رواية ..
طبعاً اذا شفتوا اسم الرواية بتتوقعون انها تخوف هي على العكس تماما قصة طريفة و مضحكة و من نسج خيالي يعني القصة خيالية و معظم المعلومات اللي فيها غير واقعية و ليست حقيقية .. و أتمنى انها تنال اعجابكم .
قراءة ممتعة ..
( الــــــــجـــــــــــزء الأول )
صحت أمل من النوم و أخذت الجوال من عند الكمدينة و طالعت ساعة الجوال و لقت مكالمة من أمها
- اووف الساعة عشرة و نص الليل غريبة محد صحاني
و بعد ما صحصحت شوي و استوعبت
- ايه صح اليوم الاربعاء مافي احد بالبيت اهلي رايحين للمزرعة من الظهر
راحت أمل و غسلت وجهها و غيرت ملابس النوم و فتحت جوالها و اتصلت على أمها
أمل: هلا يمه
أم امل: هلا فيك توك تصحين؟
أمل: يعني لي ربع ساعة
أم أمل : من الظهر نايمة لحد الحين يا حبك للنوم لو انك جاية معنا ازين لك من النوم الجو يهبل و حنا و خالاتك مجتمعين
أمل: حتى لو ماكنت نايمة كان ما جيت معكم اجلس اذاكر ابرك يوم السبت اذا جيت اختبر المزرعة ماراح تفيدني
أم أمل: طول عمرك كذا تحبين الحبسة بالبيت لو اننا بعطلة كان طلعتي حجة عشان ما تجين معنا
أمل: زين انك عارفة بنتك و عارفة اني ماحب اطلع و بيتوتية
أم أمل: الله يهديك بس , يالله بنحط العشاء وانتي كلي شي قبل ماتذاكرين
أمل: ان شاء الله يمه
قفلت أمل من أمها
- خليني أروح أسوي لي كوب قهوة يفتح مخي قبل ما أبدأ مذاكرة
نزلت أمل تحت و دخلت للمطبخ
- امم وين الدرج اللي فيه الاكواب
و صارت تفتح الادراج و تدور الاكواب
- وش هذا حتى مطبخ بيتنا ما ادل فيه شي انا لازم اتفرغ شوي للمطبخ صار عمري 20 وانا حتى بيض ما اعرف اسوي
بعد ما صلحت القهوة جت بتطلع من المطبخ بس لاحظت شافت نور الثلاجة مفتوح
- شكلهم ناسين الثلاجة مفتوحة
راحت أمل عند الثلاجة و لما قربت من عند الثلاجة سمعت صوت أحد يخرفش داخل الثلاجة و يغني
- نسم علينا الهوا من مفرق الواااادي ياااهوا يااهوا ياللي طااير بالهوااا
أمل خافت بس قالت بنفسها ( يا بنت خلي قلبك قوي هذا شكله واحد من اخواني جاي للبيت وانا مادري , بس هذا مو صوت واحد من اخواني , بس لو كان حرامي وش يبي ينبش بالثلاجة و يغني يفضح نفسه )
ترددت امل و هي يدها ترتجف تبي تمسك مقبض الثلاجة بتشوف مين وراها , بس قبل ما تمد يدها نادت
- ممحمد هذا انت؟
- حبيبي قرب بص و بص بص زعلان ازعل ازعل نص نص
أمل: مممين ففهد هذا انت؟
طلع الشخص اللي كان ورا الثلاجة و كان واحد لابس بنطلون جينز و تي شيرت أسود و له عوارض وشعره كثييف و أسووود , و جسمه طويل و عريض , و عيونه سودا و كبار و تلمع
امل لما شافت رجال غريب قدامه صرخت : ااااااااااااااااااااااااااااااااااااااااااااه
الرجال طالع أمل : يووه مادريت انه فيه أحد بالبيت
أما أمل كانت رجولها ترتجف من الخوف و مو قادرة تتحرك ( ياربي وش اسوي حرامي قدامي اكيد معه سكينة و الا مسدس حتى مو شكله خايف قاعد يتمشى بالبيت , انا دايما قوية يا امل وين راحت قوتك بس لازم انا ابين له اني قوية و مو خايفة منه عشان يروح )
أمل بالغصب طلعت صوتها بقوة و تسوي نفسها معصبة : خيير مين انت وش مدخلك بيتنا بتصل على الشرطة
الرجال: انتي اللي وش جايبك مو المفروض تكونين بالمزرعة الحين مع اهلك؟
أمل ( يا ربي هذا وش عرفه ان اهلي بالمزرعة شكله دايم يدخل بيتنا وش هالورطة اكيد بيذبحني )
أمل: وانت وش دخلك ما بقى الا حرامي يحاسبني ليه قاعده فبيتي اطلع احسن لك
الرجال ابتسم باستهزاء و هو متكتف و رافع حاجبه و يطالعها: و اذا ما طلعت؟
أمل بلعت ريقها و عرفت ان هالحرامي باين انه مو خايف منها ابدا بس قررت تحاول بكل الطرق
أمل صارت تتلفت حوالينها و تفتح الادراج تدور سكين : اذا ما طلعت الحين بذبحك
و كل ما فتحت درج يطلع لها يا اما كاسات او صحون , راح الرجال لدرج معين و فتحه و طلع منه سكين
الرجال مد السكينة لأمل : ياا حلوة تدورين على هذي؟
أمل تسمرت بمكانها : ها لا ما كنت ادور على سكين كنت ابي كاس ابي اشرب موية عطشانة
الرجال: اهاا قلتي لي موية بحاول اصدقك
أمل: ططيب ككيف انت دخلت بيتنا و من سمح لك
الرجال: امم سؤال وجيه , من سمح لي طبعا انا سمحت لنفسي, اما كيف دخلت نزلت من السقف و دخلت
رفعت امل عيونها و تطالع السقف تدور فتحة دخل منها
الرجال: لا تتعبين نفسك انا ادخل بدون فتحات
أمل: كيف يعني
الرجال شابك يدينه ببعض و يتكلم وهو يطالع يدينه و يكلمها بلا مبالاة : بصراحة انا مو حرامي
أمل: تدخل بيوت الناس و تقول مو حرامي
الرجال قرب من امل و حط عيونه بعيونها : امم طيب انا بقول لك , قد سمعتي بالجني الازرق؟
أمل: ايه
الرجال: الحين انتي قاعدة تشوفينه بعد
أمل وهو يقول كذا كانت تطالعه بكل تركيز و جحظت عيونها : ااصلا اانت ككذاب تتقول كذا عشان اخاف منك ببس مما راح ااخاف
انتـــــــــــهــــــــــى الـــــبـــــــــــارت
أعرف البارت كان قصير بس أنا خليته قصير كأول بارت لحد ما أعرف آراءكم حول البداية .. وانتظر حماسكم و انتقاداتكم ..
دمتم بخير
التعديل الأخير تم بواسطة ♫ معزوفة حنين ♫ ; 12-06-11 الساعة 07:11 AM
سبب آخر: انتبهي للمد غناتي ^_^ ..
|
11-06-11, 01:34 PM
جديد مواضيع قسم القصص المكتمله
العرض الشجري
