صباح الورد


متابعة بصمت
بس اليوم اريد اوجه دعوة للنوري
للمدينة الي ذكرها اخونا المجنون

شنو رأيك شبيهة تنقلين اهلة

حبيت اقول شي الناس اتعودت بتلك المدينة اتعود على هذا الموضوع وصار جزء من حياتهم
مثل ما احنة متعودين على هذا الموضوع الي هو زوجة واحدة تكفي

على قولة اخ عزيز
كل واحد يعجبه يزوج مرة ثانية وثالثة ورابعة او بمعنى تجربة الحاج متولي
بس الي وقفه ظرف نفسي او ظرف مادي او يتخيل مشاكل معينة ويكول شلي بدوخة الراس
يعني هذا الاخ انخليه في المنطقة الي ذكرها المجنون
ممكن بسهولة يقدم على تكرار الزواج لان وجد الظروف مواتية والوضع جدا عادي

على صعيد عائلتي عدنة واحد فقط مزوج اثنين وطبعا ينظرب بيه المثل وتحكى عنه القصص
ومن واحديكول فلان مزوج اثنين
الطرف الثاني يتعجب
هذا الواقع الي اني عايشة بيه
طبعا التعجب مو محصور بالمرأة لا حتى بالرجل الي اعتاد على مجتمع لا تعدد فيه
بس بنفس الوقت اضرب مثل عدنه احد اعمامي زوجة لاتنجب ويامة لحوا عليه ازوج وهو رفض رفض قاطع
وهسة رجال كبير بالعمر واحد من ولد عمي هو الي باقي عدهم بالبيت ربوه بس مصار بمكان ابنهم
تدرون زوجة شدكول هسة
اتعض اصابعها ندم لان هي ما اصرت عليه يزوج على الاقل ابن رجلهة يكون ابنه
للعلم ابن اخو رجلهة الي جالس عدهم هو ابن اخته بنفس الوقت

واكو حالة ثانية لامرأة سعت لتزويج زوجها لانها لاتنجب
الطفل الاول اكراما لها اصبح لها واصبحت تكنى به يعني ينادوه ام سالم مثلا
ولم ينقص من محبة زوجها لها مقدار حبة
على الرغم ان الزوجة الثانية انجبت 7 اولاد الى ان في منطقتنا يشاع ان فلان لم يحب زوجته الثانية وبقى وفيا للزوجة الاولى
اني مو ضد الزوجة الثانيية اني ضد ان تستغفل المرأة
اعرف واحد زوجة تقضي فترة النفاس عند اهلهة وهو راح خطب وازوج
وماكو سبب من يسألوا كال اني رجال مقتدر واريد ازوج
لذلك اغلب النساء الي يشوفون ازواجهم عدهم استعداد يزوجون اذا اقتدروا ماديا
يرعبون عندما يتحسن وضعهم الاقتصادي


بالختام هي قضية شائكة الرجل يتقبلها والمرأة بالتأكيد لن تتقبلها فمن منا ترضى بشريك
مرة سألت زوجي كتله تقبل احد يشاركك بيه
كان جوابه بارد جدا لان هذا الموضوع غير وارد شرعيا وهناك ثقة عالية في استحالة حدوثه
لذلك لا يثاروا عندما يسمعوا مثل هذا الكلام لان الموضوع ببساطة مستحيل
وصباحكم طاعة ولاداعي للخوف سيداتي لان الي يخاف من شي يحصل له