الجزء السابع عشر


كان الوقت فجر والالوان مختلطه بين السواد والزرقه الخفيفه وشوي بروده والأبل كانت باركه وصوت محمد وهو يقيم الصلاه في هدوء الصبح له طعم خاص

مساعد .. عجل يا خالد اخلص وعطني السحله اتوضى محمد اقام الصلاة
خالد و تنعوش بعد الوضوء .. تفضل يابو ضيدان
بسرعه ركض يصفون خلف محمد وكان راكان عن يمين محمد وظافر ورى وجا جنبه خالد وبدى محمد يقرا بصوت عذب الفاتحه وجاهم مساعد الي كان يبي ينشف وجه من قطرات الماء لبرودت الجو لكن مالقى إلا شماغ مرمي على فراش اخوه وخذاه ونشف بسرعه ولحق على الركعه الاولى
وانتهوا من الصلاه ومشى محمد وجمع الحطب وشب النار وفز خالد وجاب البريق وملاه ماء وحطه على المركى حق النار في الوقت الي راكان راح يحلب من النياق عشان يغلونه كانوا يستعدون بتزيين فطورهم عشان يمشون بسرعه ويمديهم الظهر عند عبدالله ومساعد اخذ القصدير وعجن عجينه وقساها شوي مهوب واجد وزيين القرص وخذ جمرات وحطها فوق دائرة القرص لين نشف ثم قصدر القرص ودمسه في الرماده عشان ينضج وحط فوقه جمر وظافر راح للوايت يشغله عشان يدفى كان كل واحد يساعد من جهه وبضحك وسوالف هاديه مع الصبح والي يذكر الله عشان يحصل على فضل ذكر الله مع الشروق وشمس بدت خيوطها الحمرا تصلهم قبل تطلع عليهم وعطتهم نور سبحان الخالق



:::::::::::::::::::::::::::::::::::::::::::::::::::::::::::: ::::::::
غلوي مانمتي
غاليه ومعها كاس حليب في يدها وجالسه على عتبت اهلها الي بالحوش وتتفرج على شروق الشمس .. إلا نمت بس شبعت نوم نايمه بدري
صيته .. طيب تعالي ساعديني ابوي عندنا بزين فطوره عشانه بيروح للشباب في البر
غاليه وهي تفز واقفه .. صيوت حبيبتي وش رايك نخاوي ابوي
صيته وهي تناظرها بستهزاء .. ما ظنتي ابوي يوافق
غاليه .. روحي يا شيخه بقوله انا
وكان ابوها جالس يتقهوى مع امها في الصاله بهدوء مافيه حوار بينهم
غاليه .. صباح الخير
صباح النور والسرور كان رد ابوها
غاليه وهي تبتسم .. يبه
بادلها ابتسامة .. امري ياغاليه يالغاليه
غاليه .. يبه انت بتروح للبر
أي بروح وش تبين
غاليه بتردد لكن حزمت امرها .. يبه بخاويك
ابو عبدالله وهو يتسم لها .. بس كل الي قدامي شباب منتب مستانسه
غاليه .. بكلم رفعه تخاويني يبه طقت تسبدي من البيت ابي اغير شوي
فلوه .. وين تبين تروحين واذا اجتمعوا العيال وين بتغدين انتي
غاليه .. بدبر عمري
ابو عبدالله .. صعبه يابوتس وشاف وجهها تغير ولا اقول كلمي رفوع تسنها بتخاويتس ما يخالف
نطت بفرح تكلم اختها في الوقت الي دخل عليهم سعود .. صباح الخير
فلوه ببتسامه لولدها .. صباح النور والسرور
سعود وهو يحب خشم ابوه وامه .. تسنك بتروح للبر يبه
ابو عبدالله .. أي بمشي الحين يابوك تخاويني
سعود .. والله اني ودي مير من البارح ما رقدت عندي رحله
ابو عبدالله .. على راحتك اجل
سعود .. يمكن اذا قمت العصر اجيكم لان ذا الاسبوع فاضي
ابو عبدالله .. الله يوفقك يابوك ويقويك
فلوه .. ياولدي لو تشتغل مع ابوك مهوب كان ازين لك من كل الشوي بالسما وقلبي عليك وجال
سعود وهو مايحب يكدر امه رد عليها بأدب .. القلب وما يهوى يام اسعود
فلوه وهي تبتسم له .. جعلني مابتسي سعود
سبحان الله فلوه مع سعود تكون انسانه ثانية غير فلوه الي قلبها فيه حقد



رفعه .. جعلتس الهندريه ياغاليه توني راقده
غاليه .. تكفين يا رفوع خلينا نتمشى ونروح سوى امي ماقالت شي عشاني مع ابوي
رفعه .. انتي خبل العيال كلبوهم هناك وش مودينا
غاليه .. ماعلينا منهم
رفعه .. عيال عمتي رفعه معهم وش لون ماعليتس منهم مهوب اخواني بس
غاليه .. ازين وزين عشان نروح انا وانتي نتمشى على السياره وناخذها حجه
رفعه .. يعني مهوب رايح الا انا وانتي
غاليه وهي تضحك .. وش تبين بالعجز خليهن ينخمدن صيته ناقده علي
رفعه وهي يالله تفتح عيونها .. بروح عشانتس صوتس يلعلع شابعه نوم
غاليه .. لبى عيونتس




:::::::::::::::::::::::::::::::::::::::::::::::::::::::::::: ::::::::
كانت رفعه تنزل مع بناتها ومعها حافظة الفطور اليوم الخميس ودايم تحب تسير على اهلها وتفطر
لقت رفعه لافه عليها الطرحة وراقده في الصاله ضحكت رفعه وبناتها على شكلها
شيهانه .. رفووووع اليوم اجازة الظاهر تحسب اليوم مدرسة وفقعت ضحك وشاركتها امها وعبير
قامت رفعه على الضحك وابتسمت بعبط .. هلااا جيتوا
وقامت تحب خشم عمتها وتسلم على بنات عمتها
رفعه .. وينتسب تروحين مع ذا الصبح
رفوع .. بنروح مع ابوي انا وغاليه
شيهانه .. في ذمتس
رفوع .. تخاوينا
نطت عبير بخاويكم انا
رفعه .. تتفقنا وانا قدامكم ليه مالكن والي
جتمعوا على امهم يحبون خشمها وراسها عشان توافق
رفعه .. فارقني وراكن وروحن مير ترا العيال قدامكم
عبير .. مع خالي ضيدان ماعلينا خلاف
رفووع وهي تحس بالنشاط .. حلوووو ليتني امسيت البارح
شيهانه .. عادي ارقدي في الطريق
رفووع .. وفوت الوناسه وسمعت صوت جوالها يدق يالله بنات ابوي برى
رفعه .. لا تمسن تعالن ذليل
شيهانه .. ان شاء الله اصلا انا احب افراشي بزن عليهم نرجع في الليل
تدفها عبير .. امشي بس قدامنا
وراحت عبير وشيهانه لخالهن عشان يسلمن عليه
غاليه وهي تشوفهن مقبلات تفتح بابها .. يامرحبا والله اسفرت وانورت واستهلت وامطرت هلا ببنات عمتي الفاضلات
رفوع .. اسكتي حسستيني اني في اذاعة السعوديه
غاليه .. افرح يبه بيخاونك البنات الحلوات
عبير .. ياشين البزران اذا تكلموا تقصد بنات الثانوية
رفوع .. وياشين بنات الكلية اذا رفعن خشومهن
عبير .. ياختي تفكيرنا واعي مهوب مثلكن

شيهاانه .. حدكن يابنات خالي على أختي
غاليه وهي تلتفت عليها .. اقول يابنت سعد عيني خير انتي وختس شين وقوي عين إلا مير مودينكن تمشن وتفرعن علينا
ضيدان هو يبتسم .. غاليه يابوتس وش فيتس على بناتي
رفعه بشهقة .. وحنا يبه
ضيدان .. كلبوكن بناتي مير احد يتمنن بعزيمته
شيهانه .. شفت يا خالي وحسافه ان اسمك بعد اسمهن
عبير .. ماعلينا منهن يا خال حنا في سيارتك مهوب سيارتهن يومهن يتشرطن
غاليه .. بسم الله علينا كلنا بقشورنا تكفين يارفعه عليت سبهن
رفعه .. ازهليهن يا غلوي اوريتس فيهن اذا جينا للبر لله الحمد مايعرف يسوق الا انا وانتي اذا ما خمست بهن ما كون بنت ضيدان لين يفتر راسهن وتنسى شيهانه الطب البشري وتروح للبيطري لمعزا عمتي
وفقعوا ضحك رفعه وابوها والبنات
عبير .. شرهتس على الي بيركب معتس
قطع سوالفهن ضيدان ابو عبدالله .. إلا الحين انا بلشت بكن وش بتسون اذا وصلنا
رفعه .. فديت اخواني مهوب قايلين لنا شي العون عيال عمتي خاصه راكان هو الي بيغسل شراعنا
غاليه .. كيفه بخواته ماله علينا كلام حنا
عبير .. انشهد ماعليكن ياويل حالي وش بيسوي بنا حنا
شيهانه بضحكة .. عادي قولي خالي حلف علينا
البنات .. هههههههههههههههههههههههههههههههه
ضيدان بضحك .. تسذب عيني عينك
شيهانه .. ادري ياخالي مراح نهون عليك وركون يهاوشنا
رفوع .. يبه تكفى لا تفزع ابي اشوف اشكالهن وهن يتهزءن
ضيدان .. عسى التهزيء ما يجي من نصيبكن
غاليه .. الله يستر


:::::::::::::::::::::::::::::::::::::::::::::::::::::::::::: ::::::::

ام ضيدان .. وخليتن بناتكن يروحن ماقدامهن الا عيال
رجحا .. وش نسوي ياخاله مع ابوهن وخالهن ماعليهن خلاف
ام ضيدان .. بلا كان خاويتنهن ولا خليتهين يقعدن وينثبرن مابعد خبرت البنت تسير ةمها خلافها امحق جيل تالي ماعاد به حيا ولا مستحى

رفعه .. يمه هذا الزمن قامت البنت تمشي كلمتها على امها وتمشي على هواها يوم اروح للسوق والله اني اشوف الام متستره والبنت يا دافع البلا تسنها مسيره متزينه ومتبرجه جعل ربي يستر على بنياتنا ويعافينا مما ابتلاهن
ام ضيدان .. جعل ربي يخلي راكان لهن مايبتعن شبر معه الا مغطيات عيونهن ولا لونه عليهن كان تبعن الي تعاينين
رفعه .. بسم الله على بنياتي إلا ان شاء الله بيجن مثلي واحسن
رجحا بضحكة .. ترفقي شوي على عمرتس

وااصلي وااصلي وااصلي ..

رواية رائعه تستحق المواصله على تنزيل الأجزاء ،،


همسه أختي في الله ..:

رواية رائعه كـ هذه حررام في حقها عدم تنزيل الأجزاء في وقتها !!


تقبلي المروري ..
ولكم السعادة
تسآهيل الخفجي

اشكرك اخوي تساهيل والله اني تحطمت يوم شفت قلة الردود

خلاف قصصي الباقية قلت اكيد انها ما اعجبتهم

والجزء جاهز يبي له تكه بس

بالعكس يالغيم قلم ممتع وبسيط اعتدنا عليه ومتالق دائما
لكن خبرك بعد العيد والعوده للمدارس المخ متنح حبتين وحالة فتووور صايبتنا
ولكن من اول ماينزل الجزء تلقيني اول المسنترين عنده واقراءه بشغف

ونشكرك يارقيقه على هالكرم الحاتمي الا المفرووض نقابله بردود تشرح الخاطر لكن التمسي لنا العذر
وانا وحده اعترررف اني هالفتره مقصرره كثير بالردود

لكن شوفي المشاهدات وينشرح خاطرك

لي عووده ان شاء الله بعد الجزء الجديد

الجزء الثامن عشر



يعم الهدوء والكل انشغل بتفكيره وبصوت خافت
عبير .. شيهانه بطني يمغصني ياليتنا ماجينا
شيهانه .. اشكرتس اختي العزيزه توتريني زيادة
عبير .. اقسم بالله ان يدي بدت ترجف وبردت اطرافها خلاص شوفي الخيام بينت
كان مكانهم قريب ماياخذ تقريبا إلا ساعة
غاليه .. الله ياحلووو المكان خطير
ضيدان .. ما اشوف إلا سيارة عبدالله
تحس بالعرق نط بجبينها والحراره دخلت جسمها .. الحمدلله يارب لك الحمد كان هذا رد عبير
رفعه .. ههههههههههههههههه يا عيني على الخوف وين البطلة الي من شوي
عبير .. اسكتي والله اني من شوي اقرا ذنوبي وستغفر
الكل حتى خالهم ضحكوا على خوف عبير

كان عبدالله حاط شماغه على وجه داخل في غفوة بسيطه قطعها صوت السياره جلس على طول والتفت وشاف سياره ابوه
وقف وهو يمدد يديه ويتمغط وعلى طول وبحركه عقد حواجبه بستغراب وش هـ الحريم الي مع أبوه توقع جدته امه لكن صدمته يوم شاف الصبايا نازلات من السياره اقبل على ابوه وحب خشمه
غاليه .. عبووووود صح مفاجأة
ضحك وسلم عليها .. أي والله مفاجعه
ضحكوا البنات
غاليه .. افا عليك شوفتنا مفاجعه الله يسامحك يا ولد ابوي
التفت على بنات عمته .. وش أخباركم يا بنات
ردن بصوت خافت يالله ينسمع الله يسلمك
دخلوا داخل الخيمه وطبعا البنات ما زالت عليهم عباياتهم
ابو عبدالله .. مابعد جاوك العيال
عبدالله .. على وصول ان شاء الله
واخذ يقهوي ابوه ويمد على خواته الفنجال
غاليه .. افا انت الي تقهوينا ارتح يابو ضيدان بقهويك انا
عبدالله .. وانتن وش عندكن جايات
غاليه .. اعتبر السؤال هذا وشو
عبدالله .. ترا معنا رجاجيل غير عيال عمتي
رفعه .. في ذمتك
ابو عبدالله .. رفعه تحلفين بغير الله
رفوع .. استغفر الله وتلتفت على بنات عمتها وبضحكة الموت جاك ياتارك الصلاه
عبدالله .. وش عندكن
رفعه .. هذي فكرة اختك غلوي
عبدالله ويلتفت على غاليه الي رافعه برقعها فوق راسها وتاكل تمر بطراف اصابعها .. يا مرحبا بغلوي وش دراها أني مشتاق لها
غاليه ببتسامة .. وعشان كذا جيتك على وجهي اسيح ياخوي لاني بعد مشتاقه لك وابيك تمشينا
عبدالله بضحكة .. أي بدت المصالح خابر انه مهوب لله
كان وحده تراقب الموقف بتعجب شافت بساطة الشخص الي قدامها وكيف تعامله مع خواته صح انه ولد خالها بس ما يجتمعون في مجلس واحد كثير وموقفه اليوم فتح عيونها على مدى روعه اخلاقه
وبصوت يالله ينسمع .. عبوره شفتي كيف يعامل خواته
عبير .. أي مشاء الله عليه ودي اتخيل راكان مثله
شيهانه .. ترا راكان هو الوحيد المتشدد ولا سعيد اشوى
عبير .. سعيد مشغول دايم وخالد توه صغير
رفعه بشهقة .. جووو العيال شوفوا غبرت السيارات




:::::::::::::::::::::::::::::::::::::::::::::::::::::::::::: ::::::::
وسوم عجلي علي ابوي عنده عشا وانا جاي معتس
وسمية .. لبى قلبك تكفى بس لفه وحده بعد تبي الناس يجو نوانا ما تكشخت
نادر .. نعنبو دارتس كل مناسبة لازم اوديتس للسوق خافي ربتس
وسمية .. نادر ترا الله جميل ويحب الجمال
نادر .. وش دخل الجمال في الاسراف ان الله لا يحب المسرفين
وسميه .. والله انك سديت نفسي ترا التسوق متعه لا يعرفها إلا من حرم منها
نادر .. امشي خليني مع ابوي الحين هو مشتطط عشان ظافر مهوب فيه تبينه يحرق اعصاب امي
وسمية .. صراحه ظافر زودها ابوي معلمنا ان فيه عشا مهم بيحطه ويكسر كلمة ابوي ويروح للبر ترا بعد يبي له قرصة اذن
نادر .. انتي وظافر تفكيركم سطحي ما تهتمون إلا بنفسكم بس وامي هي الوحيده المتضرره بس كل الهواش من نصيبها
وسمية .. رجعت علي تبي تطلع حرة ظافر فيني
نادر .. خلص يالله امشي
وسمية زهي تحلطم .. باقي اكسسوار
نادر .. امشي يا وسوم قبل اخليتس عشان كون واحد يجي ويفكنا منتس ويخطفتس
وسمية .. بسم الله علي تفاول يعني
سفهها نادر وراح لسيارته عارف طبع ابوه وكثر ما يلوم امه عشان عدم اهتمام ظافر


:::::::::::::::::::::::::::::::::::::::::::::::::::::::::::: ::::::::

ابشري يا جده بس ترا حنا حر مرقوق في ذا الحر
ام ضيدان .. عمتس مسيرة عليكن قومي مشاعل والله الله بالغدا مهيب تجي إلا كل خميس
جواهر .. ابشري ولا يهمتس ترا عمتي منا وفينا
مشاعل وهي تتكلم مع جواهر في المطبخ .. الله يهدي جدتي الشغاله تكفي وتوفي عمتي مهيب غريبة ودايم تجينا
جواهر .. تبين تذاكرين روحي ذاكري انا بزين كل شي لكن كانتس تبين تجلسين على النت انثبري معي هنا وزيني
مشاعل .. هذا يوم اجازتي وابي اريح اوف مهوب حاله اقابل المطبخ
جواهر .. اجل همي شوي وعجلي عشان تروحين تقابلين على كيفتس
مشاعل وهي تأفف .. طيب كنت اتوقع تقولين روحي رفهي عن نفسك شوي
جواهر .. ليه قالولتس اني الشغاله بعد المفروض يوم الخميس اني ارتاح مهوب اكرف طول الاسبوع والخميس
مشاعل .. طيب والشغاله وين راحت
جواهر .. الله يعز النعمه من زين طبخها اكل ما تحوفينه بيدتس مايجي زين
مشاعل .. طيب انتي تعشقين الطبخ والمطبخ انا اكره المطبخ والطبخ
جواهر .. انتي كل شي ماتحبينه بالله عليتس قولي شي تحبينه
مشاعل ..أعشق النسكافيه والجلكسي والنت فقط لاغير والجو البارد طبعاً
جواهر .. يالله حبيبتي زيني الايدام انتي
مشاعل .. رحماك ياربي
جواهر .. الايدام هو الشي الوحيد الي تضبطينه




:::::::::::::::::::::::::::::::::::::::::::::::::::::::::::: ::::::::

عبدالله .. بسرعه روحن للخيمه الثانية
بسرعه البنات قامن للخيمه بدون اعتراض ودخلن الخيمه

نزلوا الشباب وكانوا مشغولين بالبل والوايت ونصبوا حوش لصغار والي شاكين انها بتولد قريب عشان ما تسري لان الناقة الي يجيها المخاض تمشي وتسري وتبعد عن باقي البل فطرة سبحان الله
كانوا تعابى مره
خالد .. خلاص مهمتي خلصت بروح اريح
محد التفت له كان الوقت بدى يجي قرايب الضحى العود وخلاص يبون يخلصون قبل صلاة الظهر



ابو عبدالله .. يا بنات
رفعه .. لبيه يبه
ابو عبدالله .. يالله الله بالغدا العيال تعابى ويبون غدا من يديكن
غاليه تسمع ابوها .. يالهوي من زين الدبره والطبخ
عبير .. خلونا نتكاتف وبيزين الغدا
شيهانه .. المشكلة ان كلنا رفالا صيته وجواهر قدهن اشلانا
غاليه .. مايبي لها في بر لونتس تعطينهم حصى كلوه وتلذذو
رفعه .. نعنبو دارتس مهم اجنبي
عبير .. هي وشي دجاج لحم وش بالضبط
غاليه .. مفطح يا النفلاء
عبير .. ياويل قلبي يوه الي ابطوا ما كلوا
غاليه .. اسمعن يا الغوالي حنا بنصلح الكشنه واذا فيه اغراض السلطه اما الرز وخلافه بنادي عبودي فديت روحه مايهون عليه يدري ان حنا خرطي
شيهانه بتسرع .. بينقد علينا
التفتوا عليها ونفجرت رفعه وغاليه ضحك عليها في الوقت الي عبير انحرجت
رفعه .. ماعليتس عبدالله مهوب من ذا النوع الرجعي الي تفكيره بس في بطنه
عبير .. عكس راكان لو يلقى الغدا ما اعجبه اقلب البيت علينا
رفعه .. لبى عيونتس ترا اغلب العيال مثل راكان و مساعد مهوب بعيد عنه
سمعوا صوت تنحنح
احم ياولد
رفعه بعد ما تسترن البنات .. ادخل يا عبدالله
عبدالله .. ابوي يقول انكن بتزينن الغدا و انا خابر انكن من جنبها الا اذا بنات عمتي غير
غاليه .. فديتك دريت بالي في خاطري بنات عمتي تسنهن ايانا بس يابو ضيدان انت زين الغدا وحنا بنزين الكشنه والسلطه
عبدالله .. مابه سلطه رز وعليه لحم وخلاص انتهى الموضوع
غاليه .. خلاص وفرت علينا الجهد
عبدالله .. خلاص لاتعدن الشراع ترا معنا رجال مهوب منا لا اشوف طرف اعبيكن
غاليه .. لا لا ماتفقنا على كذا
رفعه .. يعني نجلس في الخيمه
عبدالله .. العصر بنروح للبل وقتها روحن للي تبن
وطلع وخلاهن
شيهانه .. هذا رد عبدالله المتفهم اجل الباقين وش بيكون ردهم




:::::::::::::::::::::::::::::::::::::::::::::::::::::::::::: ::::::::


خالي الله يرضى عليك وينك جايبهن وش يبن
كان هذا كلام راكان الي شاف ظافر يوم راح يتوضى لصلاه الظهر وعلى طول عاتب خاله
ابو عبدالله .. يا ولدي وش فيها اذا جن انت شفتهن جالسات بالخيام حتى برى ما طلعن
راكان .. ابرك اوريك فيهن والله ان يعيفن البر
ابو عبدالله .. افا ياذا العلم تهدد وانا الي جايبهن والله لو تقول كلمة ان تضيق
سكت راكان وهو منقهر مايقدر يكسر كلمة خاله





شيهانه .. بنات تشوفن العرق الي بعيد ياسلام خلونا العصر نروح له
غاليه تلتفت لرفعه الي غطست في النوم .. والله لو داريه بيصير كذا كان ما اتعدى بيتنا
عبير .. لا عادي الحين حنا مو مجتمعين خلونا نستانس
وكان اشكالهن باين عليها الطفش حتى عباياتهن ما نزلنها خايفات احد يجيهم ويكشفهم ورفعه مغطية وجهها
غاليه بتحماس .. أي والله خلونا نصلي ونلعب لحد ما يعطونا الغدا ثم ناخذ السياره من ابوي ونروح للعرق وش رايكن
عبير .. معتس






مساعد بصوت خفيف .. محمد
محمد يلتفت على مساعد بعد ما صلوا .. هلا
مساعد ببتسامة لؤم .. تدري من هناه
محمد .. انت تكلم كلمات متقاطعه عجل قول الي تبي بروح اساعد عبدالله في الغدا
مساعد .. بنات العمه مع خواتي هنا
رجفه يد واضحه لانه شايل مقداع وهتز في يده عكس شكله الي واضح انه ما تأثر بس مساعد كاشفه من زمان
محمد بهدوء .. تمزح
مساعد .. والله العظيم تشوف الخيمه الثالثه شوفها قبل شوي ابوي جاي منهن وماخذات مفتاح سيارته يبن يتمشن فرصه لك وغمز بعين
محمد .. اعقب واخس تهقى اني بروح وراهن ذولي شافاتنا
مساعد .. يا تسذبك لسانك ينطق بكلام وعيونك تنطق بكلام
سفهه محمد وراح وخلاه وضحك مساعد يحس بمتعه اذا رفع ضغط محمد





رفووع وهي تأفف احد قالتس اني ابي اكل كان خليتيني راقده
غاليه .. لا يفوتس طبخ عبود يهبل
رفعه بعصبيه .. مابي
شيهانه بضحكة .. ترانا بنروح الحين نتمشى
رفعه بعصبيه .. جعلكن ماتعودن لا تقوموني
عبير .. وبنروح ونخليها
غاليه .. وش نسوي كيفها
شيهانه .. اجل انا احل المعاون جنب غاليه
عبير .. يا سلام انا اكبر منتس
شيهانه .. ماعلي انا الي حليت قبل


وعلى طول غسلن يديهن ومشن بهدوء للسياره الي قربها ابوهن ومشت السياره الي سمعها العيال وابتسم مساعد على وجه ركان الي غادي احمر

ابو عبدالله .. ماصبرن للعصر
فقعوا ضحك محمد وعبدالله على شكل راكان الي انقهر لان خاله تكلم في محارمه قدام خويهم
عبدالله ومحمد يشوفون ظافر اخو خلاص ماعاد به خوي بس
وده يروح ويلحقهن لكن يهدي اعصابه عشان خاله
ابو عبدالله .. وش بلاكم تضحكون ضحكونا معكم
عبدالله .. سالفه يبه طرت علينا
ابو عبدالله .. تسنكم تضحكون علينا
محمد .. محشوم يابو عبدالله





كان الجو لطيف وغاليه تفحط في البنات يا الله يا زين الحريه
شيهانه .. ولا شريط عند خالي
غاليه .. ابوي راديوا بس
شيهانه .. شغالي الراديو طيب او خلينا نروح لسياره العيال
عبير بشهقة .. اظاهر توهقتن ماعليتس منها مابعد شافت وجه راكاان عشان تعيف الاشرطة
غاليه .. يا راكان الي مسبب لكن رعب
عبير .. انتبهي تطعسين بنا
غاليه .. افا عليتس انا سواقة
شيهانه .. اقول انقلب السواقين تجينا توتس طالعه من البيضه تبين تطعسين
غاليه .. اجل اصبرن وشوفن

وعلى طول عشقت السياره واسرعت ورقت العرق لحد ماجات في راسه لكن للاسف تجري الرياح بما لا تشتهي السفن غرست

غاليه بضحكة لو رفعه معنا كان مابقى دعوه الا جابتها
عبير .. يا طرجيبي تكفون يابنات التفتن
يوم التفتن البنات الا المخيم واضح لهم
شيهانه .. وش السواه
غاليه .. السواه يجونا يطلعونا اكيد الحين عندهم خبر

وش بيكون مصير البنات :)[/SIZE]