صباح التفاؤل



طلعت أعبي المسبح لسنافر انصدمت الجو براد ماشاء الله الحمدالله هالسنه ماجتنا رطوبه مرة علينا الاسبوع الماضي بس ماطولت

ف عز الكلام سكت الكلام

مساء السعاده.

يارب اجعله عام خير. وبركة للجميع

انا مااتابع السناب الا قليل جدا مافي فايده. وكله إعلانات محومه كبدي زيتونه اذا جت وتفتح سنابات اقول لها. اقلعيهم


ممكن اهلي بس بعد المقربين.

لكن شدتني شخصيه اهم شي ماعندها إعلانات

اليوم كانت طارحه موضوع الحرص على الصلاه في وقتها وخصوصا الفجر استغربت. كنت اظن محد يفوت الصلاه

وكثير رسائل تجيها ان اغلبهم. مايقومون او يحاولون انهم يقومون ويغطهم. النوم. ا و انهم تعودو اذا صحو يصلون


هنا استشعرت نعمه عظيمه انا غافله عنها وفضل كبير وعظيم مااوفي حقه لأمي رحمة الله عليها عودتنا الصلاه في وقتها. تقوم هي وجدتي قبل الفجر بساعه ولا ساعتين ويصلون الوتر ثم تقومنا للفجر. اذا غابت جدتي لأبوي تصحينا
الله يغفر لهم اهل دين وطاعه
من فضل ربي وكرمه ماذكر فوت فرض عن وقته اللهم لك الحمد واسال الله الثبات ولايحرم امي الاجر
والحمدالله. أني عودت عيالي على الصلاه في وقتها.


ف عر الكلام سكت الكلام

مساء الهدوء والسكينة

والأخبار الزينه بنيت اختي جابة بنت. الحمدالله على سلامتها عاد عمتها تصير اختي. بس انها تحفه من حقبة السبعينات وتقدر العيال الا تموت عليهم
رغم والله أني اموت على البنيات كلهن خير وبركة

المهم انصدمت بدينا الاسبوع الثالث لا اله الا الله صايره الأيام تمشي سريعة جدا. جدا
تو أتناقش مع الشيخه زيتونه اقول رمضان هالسنه ماحسينا فيه خفيف جدا جد


ف عز الكلام سكت الكلام

هالعطله ماشاء الله فعاليات.

من ضمن الفعاليات.

أحب اهل نجران قلوب تنبض. ثقافة مختلفه جدا

يذكروني بتوري قلوب تنبض لها

من بداية العطله وخيتي مشتطه هتونه ترى ظبيه النجراني مرسله لك دعوه خاصه زواج اخوها أبدا اول الحاضرين ان شاء الله حب كبير لأهل نجران

والله وحضرنا يالله من فضلك العالم المبتسمة والترحيب. ماشاء الله عليهم كلهم مبتسمين. طاقه ايجابيه

وتعرفنا على خواتها ماشاء الله تسع يهبلون أبشركم مافهمت الا وشوشه كلهم من نجران ماقد طلعو منها يازين الخوات ماشاء الله ربي لاتحرمني من وخياتي


والقهوة الا تقعد الرأس تقول جايبين الا تصلح القهوه من نجران. مع قهوتها (بغيت اقول ماودها تروح معي للبيت)

ويازينهم ويازين رقصتهم السعي مدري السعب🤣🤣. وشويات الا جاين يبوني أرقص معهم. هتونه ترقص سعب🤔😂. ابد ابد مامسكوني طقطقه


جايبين مطربه من الا حساء. جنبي وحده من اهل الأحساء يصير ابوها زميل ابو الولد. ميته ضحك تقول ماهي عارفه
ترقصهم بالطق.
اخر شي خلوها تغني بروحها. وجلسو على الدجيه وشيلاتهم.


بس. ناس جميلين اهل نجران

وانقضت. ذيك الليله بسلام ورجعت مبسوطه الله يسعدهم


ف عز الكلام سكت الكلام

صباح الأشياء الجميلة والذكريات

اتصال هتونه تكفين اطبعي الإذاعة لميساء على الأب توب من زماااااااان مامسكت الاب غبار جالسه اتذكر كيف الكتابه

مرة في بالي ذكريات المقلط وليلاس وهو ملعلع وأيام انفاس قطر. مدري وش دخل بس فتحت الجهاز انهلت الذكريات من كل مكان
ايّام تعليق امي الله يرحمها وانا ماسكة الأب توب. تهاوش لو ماسكة المصحف ابرك واشفع لك الله يغفر لها

ايّام منتدى الجيران البعيد وفعاليات رمضان. والضحك على الصور الفطور. وعلى كنافتي. الله يذكرهم بالخير. قفلو


مدري هل بيوم بترجع عز المنتديات


الزبده بعد عنا الكتابه يجي السنفور الصغير ويمسح كل شي. وارجع اكتب من جديد.

ف عز الكلام سكت الكلام