هلابك اوركيدا
والله لما عرضتوا علي الموضوع احترت مدري وش اكتب وحضرت موضوع غير هذا لكن

سبحان الله جا الموضوع هذا في بالي فجئه من الذاكره

لما سمعت الاصوات الي تنابح تبي السماح للمرأه بقيادة السياره

وجا معاي ها الموضوع

في حياتي ليالي طويله لكن مرت علي ليله لا تنسى هذي الليله اعطتني درس الي الآن وانا اطبقه ما نسيته

بحكم عمل زوجي كنت في منطقه تبعد اكثر من الف كيلو عن المنطقه الي يسكن فيها اهلي واهل زوجي

وفي الاجازه الصيفيه تزوجت اخت زوجي وصممت احضر الزواج وظروف عمل زوجي ماتسمح له انه يحضر معي الزواج وكان رافض احضر

المهم تحت ضغط اهل زوجي انه اذا ما حضر هو يحضرون اولاده اقتنع وحضرنا الزواج وبما انها اجازه جلسنا فتره طويله

وبعدها خلاص حجزنا علشان نرجع

وشلت عفشي بنرجع خلاص المدارس على الابواب

طايرتنا الساعه عشر في الليل ولا زم قبل الرحله بساعه اكون في المطار


لكن وصلوني اختي واخوي قبل الرحله بدقايق قبل ننزل قالت اختي معاك فلوس قلت معاي بطاقة الصراف ماعليك الخير واجد

قالت لي يووه ماراح تحتاجين اصلن حتى تصرفين الحين بتطيرون على طول

الركاب داخل الطايره بسرعه عساكم تلحقون

وقدامك زوجك واذا البطاقه معاك ماعليك كن الفلوس بجيبك لكن الحين العامل الي بيشيل شنطكم

ما يمديك تسحبين له

وفي شنطتها صرف عشرات قالت خوذيهم يمكن تحتاجينهم

القرش الابيض ينفع في اليوم الي مش ولا بد

اخذتهم وانا اضحك عليها اقول بس علشان ما ينكسر خاطرك ودعت اخواني وعلى طول لطايره بما ان عندي واسطه ما احتجت الانتظار ولا قالو راح عليك الوقت قطعت البوردنج على طول وعلى مقاعد الطايره ودعاء السفر والتعليمات الي من المضيفين

لكن تأخرنا واحنا جالسين والركاب يسئلون ليش الطائره تأخرت با الاقلاع قالو مساعد الطيار ما بعد جا

مرت ساعتين واحنا جالسين

بعدها قالو انزلو بتطلعون طايره ثانيه

نزلنا عادي بعدها نادو على الركاب يركبون الطايره مره ثانيه ركبنا ونفس الحاله لكن ها المره انتشرفي الطائره ريحة اسلاك كهربائيه محترقه

وصارت بلبله في الطايره قامت وحده كبيره با السن قالت الله عطاكم الفرصه مرتين تبون تذبحونا مركبينا طياره عطلانه خافو الله في اكثر من 200راكب ويحاولون المضيفات يهدونها وهي تزيد عليهم
نزلونا مره ثانيه حتى يغيرولنا الطايره وكانت الساعه الواحده صباحآ

وجلست با الاستراحه وبدأت المعاناه كلمت زوجي الي جالس ينتظرنا با المطار هناك وخبرته قال عندي خبر الطايره الي كنتو عليها فيها عطل والحمدلله جات سلامات خلاص شوي وتطيرون

وانتظار ساعه ساعتين ولا في امل !

وارجع اكلم زوجي قلت برجع خلاص لبيت اهلي وبكرا نمشي قال انتظري بكلم اشوف سالفتكم وين ترجعين ومن بيرجعك اهلك في بيتهم

نايمين والمسافه ماهي بسيطه علشان ترجعين خلك با المطار اشوف الموضوع<<بين بيت اهلي والمطارساعتين

ورجع كلمني قال لا ما يمديكم خلاص شوي وتطيرون

ولكم انكم تتخيلون وضع عيالي الي خلاص شوي ويطلعون لي قرون الي يركض على السلالم الكهربائيه والي يبي الحمام والي تناشب له بهوشه مع اطفال

وهذا انا ما جلست امسك هذا واضرب هذا وبنتي صغيره في حضن الشغاله تصيح ما ادري وش فيها

واختموها عيالي ماما جوعانين وانا ما ادري من وين اصرف جننوني انعميت ما عاد اشوف الطريق

تذكرت فلوس اختي الي عطتني وصار الريال ذيك الساعه كأنه الف ريال <<والي اليوم وانا ادعي لها الله يفرج عليك يا ام عبد الاله كل كربه

اخذت لعيالي الي يبونه ورجعت لبنتي اشوف سالفة صياحها قالت لي وحده من الحريم الي جالسين با الانتظاربنتك ذبحتها الشغاله تضربها وزاد جنوني جنون

عطيت الشغاله المقسوم من الهواش وارجع اكلم زوجي اتوقع كل الي في المطار يسمعني وانا ابكي لا وعيالي يشوفوني ابكي ويبكون معي

كلمته وهو صوته فيه نوم

وانا مواصله قلت ليش انت وينك صوتك نايم قال انا جالس با المطار انتظركم حتى لدوامي ماني طالع

المهم واوصيه تكفى لاتطلع من المطار يمكن الحين خلاص تطير الطايره

وهو يقول والله ان ربي مغنيك عن حضور ها العرس قلت لك لا تروحين

وانا هواش انت فاضي ومرتاح من عيالك الي ماعاد اقدر اسيطر عليهم

وانت وينك الحين وهو يرد انا بالمطار يعني وين بكون

المهم المفروض الطايره تطيره الساعه عشر في الليل طارت الساعه السابعه صباحآ

بعد ماخلاص احس اني انتهيت لدرجة اني قلت خلاص ركبونا طياره عطلانه وربي با الجو بيدبرنا ..

وصلت وكان زوجي با استقبالنا وانا كاسر خاطري انه احنا بمطار الرياض ناقعين اكثر من عشر ساعات وهو جالس هنا با المطار

على ان المطار يبعد عن بيتي اقل من نصف ساعه لكن الله يجزاه خير كان بيموت من القلق علي وعلى عيالي لدرجة انه شكله نام با المطار

رجعت لبيتي لقيت البيت مقلوب طبعآ فوق تحت عااااااادي متعوده

انا ما قهرني الا شكل في اكل جديد قلت بسم الله وش هذا من متى قال فطوري

قلت ليش ماكنت من امس با المطار قال لا ليه خير ان شاء الله اقعد انتظر على الفاضي

نمت في بيتي وافطرت ولا طلعت للمطار الابعد ما تأكدت ان رحلتكم با الجو من اكثر من نص ساعه

وحياكم الله في بيتكم

واقعد اصيح من القهر

ومن بعدها اخذت درس لا يمكن انساه اني ما اسافر من غير محرم

وشنطتي ماتخلى من الفلوس النقديه ما نفعتني بطاقة الصراف الي كان فيها مبلغ وقدره

وبطاريتين جوال شحنهم فل خوف من يطفي الجوال وابتلش

والتوبه اني اسافر بدووووووووووووون محـــــــــــــــرم


وكانت ليله والله ثوانيها ساعات

صحيح ان المرأه ثلاث ارباع المجتمع ماهي نصف المجتمع في نظري

والرجل الربع لكن بدون ها الربع بينهار الثلاث ارباع


شكرآ اوركيد وفجوره على ها الدعوه

ولا تفكرون بيوم تسافرون بدون محرم

قالها الي ما ينطق عن الهوى

{ لا تسافر المرأة ثلاثا إلاّ ومعها ذو محرم }