ام عيسى
سالفتي هاليوم عن هالانسانه

ام عيسى عامله بسيطه في مدرستنا
الوظيفه مستخدمه ومحرم لابواب المدرسه
ابو عيسى
من اقصى جنوب المملكه جابهم الكدح وطلب الرزق
وبرواتب زهيده وياعزتي عليهم هالاثنين يشتغلون
ويكرفون عن طاقم مدرسه كامل

ام عيسى انسانه بسيطه تجاعيد الزمن وظيمه مرسومه على كفينه
تكدح وتشتغل من آجل تعيل عياله هي وابو عيسى على عايله من 10 افراد
والحمل ثقيل والاحلام كثيره
والحلم بس بيت مثل اللي يسكنونه بملحق المدرسه ويكون ملك بس ملك وفي ديرتهم بالجنوب

تخيلوا معي المنظر 10 افراد مع ابوين يسكنون غرفتين وصاله ومطبخ صغير
جدا لايتجاوز متر في متر
تابع لملحق المدرسه اللي اشتغل فيه
تخيلو كيف الحياه فيه بنات واولاد شباب واطفال
تخيلو كيف تكون الخصوصيه والاستقلاليه فيه
بيت كبر علبة الببسي يضم عايله كيف الحياه تكون فيه
بالله جاوبون
ادري انكم راح تقولون سبحان ربي موزع الارزاق
وهذي قسمتهم بالدنيا
بس تدرون إنا يا صحاب البيوت الراقيه والفلل الفاخره
ذات الطوابق المتعدده والغرف الكثيره والصالات الجانبيه
غير الملاحق والملاعب اللي يركض فيه الخيل
تعتقدون إنا راضين ببيوتنا هذي ولا نطمع في مزيد
واكبر وارفه من اللي تشوفه ام عيسى وعياله حلم يصعب تحقيقه

مشهد وحصل وكنت في كل المشهدين حاضره ومليون استفهام واستفهام فوق راسي

اسمعوا واحكمو
المشهد الاول هي ام عيسى المستخدمه البسيطه
سالته يوم أنا وخوياتي بالعمل
وقلنا له وإنا نشوف وضعهم المزري وحالهم الكسيف وزحمتهم ب هالبيت اللي يضمهم
والابتسامه اللي عمره مافارقت وجهه
قلنا له ي ام عيسى البيت اللي انتم فيه كيف وضعكم فيه قادرين تعيشون بهالضيقه والحكره
قالت لنا وبتسامته شاقه الوجه
الحمدلله عايشين ب فضله وحالنا زين وبنعمه افضل من غيرنا
قلنا له والتعجب مرسوم على وجيهنا كيف
نورينا يالحبيبه
قالت عباره وحده سكتتنا جميع ولا قدرنا غير نضمه لصدورنا ونحب هالراس ونحيي فيه صبره وقناعته
(( الضيقه ماهيب ضيقة البيت الضيقه هي ضيقة القبر والحال مستور))
صدقتي ي ام عيسى الضيقه ضيقة القبر
المشهد نقل للاداره بتفاصيله من حضرة الوكيله
واليوم كرمت ام عيسى قدام الطالبات والاداره والمعلمات
على هالعباره والجوهره اللي قالته رغم ان تعليم ام عيسى ما تعدى ثلاث ابتدائي محو الاميه بس ام عيسى ضربت لنا مثال رائع للمره الصبوره القانعه الزاهده بتوافه الدنيا>> تكريم من أداره كريمه ب اول العام امر يدعو للفخر والله يخلي لنا ام يوسف ذخر وعز
كفت وفت مع ام عيسى

المشهد الثاني جارتي المقابله لبيتي تربطن بوه علاقه قويه
صداقه وحسن جيره جارتي المتعلمه وذات الشهادات العليا
بحديث أنا وياه عن البيوت والاثاث وامور الدنيا
بيتهم تقريبا اكبر من مساحة بيتنا بشوي
تخيلوا معي مساحته اكثر من 1000متر مربع وطابقين وملاحق خارجيه وداخليه ومسبح وحديقه وش كبره ويقولون ضيق عليهم
عايله ما تجاوزت عدد اصابع الايدين الثنتين
وبين سوالف وسوالف وسالته عن هالعمال اللي بيتهم
هو ترميم ولا وش تسووون
جت هالسالفه وقالت ألا وهي تشكى من ضيق بيتهم
وانه صار عليهم حكره وماصار هناك استقلاليه لعياله الشباب
أنا باللحظه هذي طار فوق راسي مليون استفهام
قلت عيدي كلامتس يا جارتي وش فيه بيتكم ضايق عليكم
قالت ايه العيال غدو شباب ويبون الاستقلاليه ودنا نضيف الارض اللي بجنب بيتنا لمنا ونبني فيه فله صغيرونه و ملاحق لشباب ولظيوفنا وبيتنا الداخلي لنا
أنا تبوسمت اكيد عندكم عرس وزواج وقالت لا والله يوخيتي مابعد جاء طاري العرس بس نبي نتوسع
قلت طيب بالاصل بيتكم كبير الداخلي مايحتاج تكبرونه عندك الدور التحتي كله مهجور بس غرفتين قاعده تستهلكينه وين الصالات الجانبيه والغرف اللي مدري كم عدده تحت وغير الملاحق اللي برا ويطرد فيهالخيال بس تاركينه للخدم والسواويق تترتع فيه
وتقوووووووووووووووولين ضاق علينا ياجارتي
خافي ربتس وش تقولين في اللي ساكنين غرفتين وصاله مثل ام عيسى وعياله العشر
جارتي ما ردت علي وغيرت السالفه بس قالت ياغيومه ربي منعم علينا وشهوله ما نوسع على انفسنا شوي
قلت يا جارتي بس شوي وش هالشوي يا جارتي أنتِ اخذتي مو شوي الا شويات وشويات

ما راج الوم جارتي يمكن أنا لاكبروا عيالي بالمستقبل يكون تفكيري مثل تفكيره ودي بسعه مدام الله منعم علينا وخيره واجد

بس ياليتنا مع وسعتنا وتباهينا بالنعمه نذكر اللي اقل منا
مثل ام عيسى ونذكر قوله الضيق ماهوب ضيق النفس والبيت
الضيق ضيق القبر القبر يا جارتنا



الحين نجي لزبده من هالسالفه


1- وحفظوه معي ورددوه السعه سعة الاخره والضيقه ماهيب ضيقة البيت الضيقه ضيقة الفبر واللحد
2_ عتبنا وين يا وزارة التعليم~~ بيوت المستخدمين لازم ناقف عندها وقفه كبيره وعشرين خط تحت غرفتين وصاله
وينكم عن وزارة الاوقاف المستخدمين طاقم من منسوبي التعليم
الاجدر يوفر لهم مسكن مريح قلت مريح على الاقل فله صغيرونه
200 متر من دورين تابعه للمدرسه
تمام مثل وزارة الاوقاف وانتم تشوفون كيف بيت وفلة المؤذن والامام
يعني وش معني المستخدم في مدرسه ولا البواب والحارس اقل

وهذي هي سالفتي
جارتي وام عيسى والسعه وضيقة القبر


وتصبحون وتمسون على ثرثره من غيمه
حفظكم ربي وين ما كنتم

عاد هالحين ودي اناااااااااااااااااام
ويا زين الاحلام والسحبه عن الدوااام

ابشرك مدونتي سنقور بخير اليوم احسن
وحتى سكروبه هه بادي عليه العافيه بس منشاره
نتقلت له العدو وصارت طريحة فراش
والوالده الله يثيبه ما قصرت جلست عندهم اليوم
وباستر ابي اجلس عندهم وحتى ابو الشباب بيجلس معانا
وكلن سحب على دوامه وبنضم هالبزارين شوي
كنهم هاليومين اللي راحت فقدوا حنان
عاد إنا كاعائله متفهمه ومتفانيه قررنا نضمهم لصدورنا اليوم
وعلى شان كذا تفرغنا من كل ارتباطاتنا من اجلهم

سبحانك االلهم استغفرك واتوب اليك

تبون تقرون عمق الاخوه وأصدق معانيها
بذمتي ما راح تقرونه وتلاقونه إلا بقلم الانفاس
انفاس قطر تحديدا ولا غير
ما اقول الله لا يضر هالقلم يابنت قطر
ماشاء الله تبارك الله
قلم نعجز نقول بس حرف في وصفه

ب قلب يشاطرك الحزن
عظم الله آجرك ي غسق
والله يلهمكم الصبر والسلون على فقيدتكم
وأسال الله لها الرحمه والمغفره وطوبى في جنات عدن
والله يصبر والدتك ويعظم ربي صبره وآجره

يدق الباب
وكل يوم وكل ساعه وكل دقيقه
يخطف له نفس
ولايعرف لا صغير ولا كبير
لاحزين ولا سعيد
لاغني ولافقير
لامريض ولا متعافي
لا عاجز ولا مستصح
هذا هو الموت وبكل وقت يطرق الباب

يا ربي اجعل يومي قبل يوم أمـي