هلا ضمضم

البارت نزل وانا زي الهبله قاعده استناه وكل شوي اشيك مادري ايش العمى الي جاني الله لايعمي قلوبنا

بارت اليوم جدا موجع لدرجة اني ماني قادره اعلق بشي

بديت اكره الجده على حبها الاناني والتملكي لكن ربي بيحرق قلبها زي ماحرقت قلب هالضعيفه

مناير روحي ياشيخه مابيجي نهاية الروايه الا وانازانتطك مع هالرقبه اذا ماسبغني ياسر بهالشي كريهه هالحرمه بشكل

رهف وشهد صدمه الي سار

عندي احساس انو المهمه الي رايح فيها عناد بيسير فيها شيء ويكون نتيجته الكشف النهائي لاوراق اعناد لكن بينخطف ومايدرون وين اراضيه وبيكون ضاع من يد الغيوض للمره الثانيه انا وتفكيري الشاطح

اما جسار الله يعينك ياشيخ على نفسك ماراح تفوق الابصدمه قويه ياشيء بيسير لدرر ولا عناد وقتها بتفووق وتعرف ان الله حق بعد ماتجرح الضبيء

ياسر يمكن يكشف الاوراق للغيوض ويعلمها بالحقيقه بس على صورة شكوك مش واقع حقيقه هو متيقن منها وعليها هي الاثبات و قتها بيكون عناد اختفى بالمهمه ويتاخر كل شي <<<<<<<<<<<<فيس الاكشن العجيب



اما بالنسبه للنقاش

زيزفون تعرفين اني صدمت لما اعرفت من اخوي انو يعرف شباب عادي عندهم يتزوج مطلقه
وذكرلي واحد يعرفه رجال الكل يمدح فيه ومتزوج مطلقه وتصدقين انه بعد فتره طلقها و تزوج بنت ماسبقلها الزواج والزين كله فيها امه ندمت انها زوجته وحده مطلقه بالبدايه
بس تعرفين ايش المشكله الحين صرتي تخطبين للولد وانتي ماتعرفين اطباع البنت الا اذا كانت مره قريبه منك بعض الاحيان لوو انها بنت اختك ماتعرفين خباياها ومايبان الا بعد الزواج فما بالك بمطلقه كيف مع تباعد الي ساير الحين بيعرفون مين السبب بالطلاق يمكن هي تقول هو السبب وهووووو يقول العكس وتضيعين بالطوشه فتريح راسها الوحده وماترشح وحده مطلقه يمكن احتمالية الفشل فيها بتكووووووون اكبر لان سبق فشلت لكن لو هو جاء وقال ابغاها ذاك الوقت ننضر للموضوع اذا هو مقتنع فيها ليش لا وعل
بضربلك مثل لواحد قلك شوفي هاذي غرفتين مقفله ماحد يعرف ايش فيها وحده دخل فيها مره واحد وخرج مجروح ومضروب والثانيه ماحد دخلها ولاحد يعرف ايش فيها ايش بتختارين هل بتدخلين الي في احتماليه كبيره انك تخرجين منها مضرووبه ولا بتدخلين الثانيه وتقولين ممكن تكون افضل

دمت بود ضمضم

الأجازة الصغيرونة حدث فيها اجمل مناسبة

زواج أنسانة غالية وقريبة لقلبي


هالأنسانة حاربة الكل عشان تنفصل عن زوجها

بعد زواج مدته اكثر من عشر سنوات و فيه ثلاث اطفال

هالخطوة كانت متأخره لانها مالقت الراحة التقبل لزوجها من بداية الزواج ولكن خوفها على مشاعر ابوها وامها ومن نظرة المجتمع خلاها


تستمر في هالزواج

صدقا صدقا انا كنت اول المحاربين ضدها لقناعتي بانه اسبابها غير كافيه


مرت الايام و حصل الانفصال

و كان هالشيء سبب لتقاربنا اكثر مع العلم بانها تعلم بوجهة نظري في انفصالها


بصبرها و قوة ايمانها قدرت تكسب تقدير و حب كل الي كان ضدها في مرحلة الانفصال


وبايمانها القوي بربها و بصدق قرارها

وانه ما جا عبث وبرغم من تعلقها الشديد بابنها البكر

قدرت تتخطى مرارة الفقد و دخلت في نادي الجوي ((للدكتور صلاح الراشد)) على الفيس بوك

و كانت شمس دافئة تنير كل من حولها بالعطاء والحب


دون ان تنسى ذاتها

مرت سنة ونص على انفصالها الان ((ماشاءالله))

تزوجت من رجل عشقته وارتاحت له من اول نظرة


عندما تقدم لخطبتها في النظرة الشرعية وهو بالمقابل يعشق تراب رجليها

نصيحتها دايم لنا هي ((أن نعيش اللحظة ))


لا نكون اشباح اجسادنا موجوده في مكان وعقولنا و قلوبنا في مكان آخر


ونحيا في المستقبل بينمتا عقولنا اسيرة للماضي او للمسقبل فتضيع


علينا روعة تذوق متعة اللحظات

وسلامتكم

مساء الخير ضمضم ............. مساء المشاعر والمواجع العميقة ........... والله ياضمضم ماادري ايش اقول وايش اكتب البارت مو بس دسم الا انه متعب ومؤلم جدا ............ من كثر ماتعبني هالبارت من اول مانزل لحد الان وانا موقادرة اركز على كل الاحداث كثر الاحداث الي تخص لقاء الغيوض برعد وعبد المجيد بعناد اكثر مشهدين متعبين بصراحة وموعجعة لحد النخا ع واحس مهما كتبت ماراح اوفي هالبارت ربع حقة .......... اجل بارت لقاء عناد والغيوض شراح يصير لنا ؟؟؟؟؟؟؟؟؟؟؟؟؟


البارت القادم عن بتال وفلك.. حال فلك المايل بنعدله لها وش رايكمـ=)

ايه ضمضم اعدليه بس بشي منصف يرفع قدر فلوكة مو تخلين بتيل يوجع قلبها بصراحة خلاص الحرمة بتولد من كثر الهموم والتفكير قبل ماتدخل شهرها بتال لازم يتصرف بعقلانية هالمرة ويحاول قد مايقدر مايحول جلسة التفاهم لاجواء عصبية يندم عليها الاثنين خلاص العمر يمضي الى متى بيعيشون بصد وهم هالاثنين


وحتى مليك ورهيف بعد خلاص يتصرفون بذكاء الحريم مو بهمجية وعصبية وكل وحدة تكذب الكذبة وتحاسب زوجها عليها عيييييييييييب عليهم هم متعلمات وفاهمات اجل شخلو لمناروه اجل


نفتح شنطة الـيزيد..=)
و
نعطي شوشو عدد النجومـ الـي تختارها.....
لآنها قالت ان مناير الليله بتجيب العيد=$
و
قالت الليله ب يعطي يوسف عناد اسم الشخصيه الي يبونها في العمليه..,
بس بعدها خبصت شوشو السالفه =$

عاد انا هنا معاك بصراحة المسكينة مو مخلية تخمين الي فكرت فيه وخمنته لذلك مو بس نجوم اليزيد تستاهل درع كبير ويبرق لها على التوقعات العسل ,,,,,,,,,,,, اما التخبيص بصراحة سالفة الرصاصة الطايشة دوختها الله يهداك ضمضم صار هاجس لها هل هي رصاصة بالمعنى المقصود والله هي الرصاصة الي قالتها منايروه لرهيف خخخخ............... لاجد والله تستاهل شوشو كل خير ........... المهم نجي للبارت والحرايق الي فيه


مناير\انا ماقولك انك رفله ..ياعميري هذي الـي كان متملكها رجلـتس يا الدلخه هذي الي يحبها من يومه صـغير عمره عشر سنين...

والله مافي وحدة رفلة وهدامة بيوت الا انتي ياعجوز خيبر الحين الناس في ايش وانتي في ايش مو على اساس انك محزونة وان عمك وبنته ماراعوك وماعملو لخاطرك شي وديباجة طويلة عريضة وقلنا يمكن الي صار يكون لك درس بس من وين تعقلي ومقرن بكبره مكبر راسك هذا الي فالحة فيه بو طبيه مايجوز عن طبعه اشك امها كانت تحوم بقلبك هالسالفة من يوم تزوج ياسر بس موت بنتك اخرك عن هالمهمة وماصدقتي جاتك من السما


ماشفتي الـشق الي بذراعه هذا ياحظي المنسدح من حبه لـها راح يطامر لـين سوى لـي فيها قيس بن عنتر وانقذها ...
سنين وسنين وهو يحب التراب الي تمشي عليه وعقبه تدرين وش سوت فيه..
كشتت فيه ولآكأنه في يومـ عرفته...


والله ياحكيمة زمانك مو حظك انتي المنسدح الا حظ بتيل يوم اخذ وحدة مثلك والحق مو عليك الحق على ياسر الي عارف بلاك وتارك حرمته ومسكنها عندك .............. والله انتي انطقي اسمه عدل اول وبعدين سوي فيها ام العريف يقال لك الحين مسوية فيها مثقفة قال قيس بن عنترة جعل عنترة يطلع من قبره ويقطع هاللسان

بس زين قلتي كشتت فيه وماخبرتيها الباقي والله فيك الخير ليتك بعدك جالسة بمحكرك ابرك للعالم ...........

شوفيها متريشه مع ولد الراسـي...
شفتي الـحلق الي عليها يلمع..
ياعميري انتي ابخس بقيمته ابوتس ماهو راعي ها الكار..!
روحي الحين تبوسمي معها وخلـيها تأكلك البقلاوهـ احسن...!


هذا الي عال قلبك الحلق والخير الي عايشة فيه ملوك اما الخناجر الي ترميها بقلب الي معك مو هامك ابد والمصيبة كل الي سويتيه وجالسة تقنعيها ماتخبر احد على بلاويك بس ياليت ياسر يبرد خاطره فيك مو مثل بتال الي ماسأل مين وصل لفلك خبر سفره مع الحية مناهلوه

بس ياسر اذكى من عمه وبيسأل هالمطيورة الي تركز اذونها وعيونها في شي وشي وبيداويك زين يامنايروه بس اصبري شوي جايك الخير


اما رهف مالها حق تحاسب ياسر على انو كان يحب بنت خاله لانها بالاساس كانت زوجته لها حق لو انو طراها وتغزل فيها بعد ماتزوجها .................اما قبل مايتزوجها مو من حقها وياليت امها وياسر يتخذون هالمرة حل حازم مو كل ماانفتح هالموضع لمت خلاقينها وتهاوشت مع زوجها وهجت من بيتها اصلا هي كذا تبين انها مو وجه زواج ومسؤلية وحتى لو عرفت عن علاقات ياسر السابقة قبل مايرتبط فيها بعد مالها حق تحاسبه من حقها تحاسبه على تصرفاته لما انربط اسمه بأسمها بس لو بذر منه اي شي غير لائق لها كل الحق تسوي الي تبغي وتحاسبه على كيفها .................. ولو كل حرمة سمعت لخرابات البيوت الي منتشرين هالايام بزود كان عدد المطلقات فاق عدد الي بذمت ازواجهم


وربِ
انه استغفال من شـخص لآيستحق الآحترامـ
كي يستغفلني بتلك الطريقه...!
آحببته..
لـيكافئني ب {الكذب...}..


ليه كيف استغفلك ياسر يعني هو قال انو تملك على بنت خاله وماصار نصيب مافصل وقال انو قلبه ماهواها ولا قال انو هو الي تركها ولااعطى اي معلومات عن هالموضوع

وحتى لو خبرها ياسر بالحقيقة كلها بدون نقصان هل راح تتقبلها برحابة صد وترتاح بحياتها اتحداها اصلا اذا ماخربت حياتها وطلبت الطلاق لانو حب زوجته السابقة قبل مايعرفها والله حاله ............... من وجهة نظري انو قمة الغباء اننا نحاسب شخص على شي مو بيده .................... وبدل ماتتوعد لياسر بالشر والعقوبة تصير عاقلة ولو لمرة بحياتها وتتقرب من ياسر وتحط هدف انو مايحتل قلب ياسر غيرها هي زوجته وحلاله وام عياله ان شالله وتترك العصبية والدلع الي مايحل مثل هالامور ................... ترى كنا راسمين امل على رهف وتأثيرها على شخصية ياسر اتمنى ماتكون نظرتنا لرهف غلط وانها مو قد هالامل وخصوصا انها تملك كل المؤهلات الكفيلة لتغيير مشاعر ياسر من جذورها بس اذا عرفت كيف توجه هالمؤهلات صح ...........ومناير كانت تبغي تنتقم من ياسر من قبل حتى يتزوجها من اول روحة لها ببيت الدايس لانو كان له يد برجعت فلك لبتال الي مانساها طول السنين الي راحت ............... ويمكن غيبة فلك فتحت لها المجال لانو لو تواجدت وشافت بطنها قدامها بيكون هدفها بس تشفي غليلها منها ومابيكون لها بال لالملوك ولا زولها ........... ملوك موضارتها بشي بس ياسر ماتبغي له الراحة وهي مو شايفة الراحة ................ وهذا حال كل من هم على شاكلة مناير اذا مالقو الراحة بحياتهم يستخسروها على غيرهم ............



اما لقاء الغيوض بأكثر حرمتين هادمتين للسعادة كان شيء كبير جدا ومحتاج لطاقة تهد جبال ............ حرمتين كانو كفيلتين بسلبها كل الراحة والسعادة طول السنين الي راحت

وطلعت هيا من البداية مو هامها حياة الغيوض وسعادتها حتى وهي على ذمة ولدها والدليل الحوار الي كان بيتهم عن رجعت سارة الي احس تركها لبيتها وزوجها لشيء جدا تافه وسخيف ولما سطام الي كان احقر منها تزوج واستقر وحست هي انو البساط بينسحب من تحت رجولها رجعت بكل حقارة علشان هدف دنيء مثلها وهو ابعاد الغيوض من حياة سطام للابد .....................

وسطام بما انو رجولته مسلوبة عند سارة وامه الي اتوقع ماعجبها الوضع بين سطام والغيوض وماتبغيه يستقر معها بعيد عن سويرة وانو هي اكيد الي خططت لتزويج ولدها علشان ترجع سويرة له بنفسها بسبب الغيرة وخدعو الغيوض وواهلها لما خبروهم انو سطام منفصل عن زوجته يعني الثلاثة ماقصرو عليها بالماضي ودمروها بغرضهم الا انساني ام سطام طلعت حقيقتها ونيتها السودة علشان ولدها مستعدة تحرق قلوب

وسويرة الي كانت رافعة خشمها وكانت مصرة على صغر عقلها ماقررت ترجع الا لما خسرت قلب سطام ونيتها تخرب حياة هالمسكينة الي مالها اي ذنب ولاتدري عن نواياهم وسطام ماقدر يدافع عن حاله لما واجهته الغيوض بكلام سويرة ولما الغيوض انسحبت بكرامتها ماهنى لسطام وامه هالحال ومالقو شي غير يحرقون قلبها على ضناها لاوبليلة زواجها يعني هدمو حياتها بالاول وماهان عليهم تعيش حياتها متهنية بالاخر

شفت اخو عساف بعيني....!
يمه نسخت اخوي احمد يشبه حيل يشبه..؟
الغيوض ب مفاجئه\نسخت احمد اخوك..أنتي متأكده من هذا الكلامـ...
و...
شلون نسخته وش دخل عناد ب عساف..من ناحية الشبه..؟

وهذا اول خيط لقطته الغيوض واول امل بس يمكن الذكريات السابقة ماخلتها تواجه ام سطام بهالحقيقة ومااصرت انعا تشوف عناد شبيه ولدها بس ساعت الحقيقة قربت وبتشوفه وهو عساف ضناها مو عناد اخو ولدها وهذا من رحمة رب العالمين انو ياخذ ملامح امه علشان يكشف هالجريمة


مناير \وهذي ام حرمة ياسـر ...منا وفينا...وهذويلي ياوخيتي اهل جسار الـراسـي...رجل الـظبي بنتا...!

خخخخخخخخخخ شر البلية مايضحك الناس قلوبها مولعة وهالمتفرغة جاية تشتغل مراسلة بسي ان ان لاوموقادرة تترك فشخرتها بنسب الراسي لهم والله حالة

وش جابتس...!
وش الي طلعتس من ورى عمق الـماضـي..!
ليه اليوم انتي هنا..!
هو مايكفـيتس ان انا اليوم شفت بنتس...
وشفت عناد فيها..!
وش تبين...
مانبيك ..!
عناد لـي...!
حتى عناد لويدري مايبيك مايبي الا انا.!
انا
امه....!
وانتي حتى لو انتي حقيقه مخفيه
الا
انس ولآشـي..!

حسبي الله ونعم الوكيل الي جابها ربها وربك الي نسيتيه طول سنينك ............. الي جابها هو عقابك الي بالدنيا قبل الاخرة ........... الي جابها انذار لك وللي جنبك انو مهما طال الظلم الي سويتوه في حق مظلوم بس لابد انو بيوم دعوة هالمظلوم بتستجاب وبياخذ حقه من ظالمه ........... بس انتي وولدك وزوجته تجبرتو وطغيتو وابد مافكرتو تكفرو عن ذنوبكم وسويرة بدت بأول طعنة يوم سعت لتطليق الغيوض من سطام وامه كملت مع ولدها الجريمة الاكبر

وياويلك ياام سطام من عناد الي راح تكون ردة فعله جدا مفاجئة لك ولولدك ........... اكثر من فرصة ربي مهلكم تفكرون عن ذنبكم واصريتو عليه خلينا نشوم ياام سطام هل عناد بيفضلك انتي الي حرمتيه وظلمتيه وظلمتي امه على امه الي انخدعت وانكذب عليها بدون جرم

يمكن لو ام عساف هي الي رمت ولدها عليكم علشان تشوف حياتها يمكن بس يتمسك فيك ياام سطام بس السالفة خطف وتزوير وبلاوي زرقة وتستاهلو الي جايكم من عناد ومن اخوان عناد بعد

والمصيبة الي انتي مصرة عليها مع ولدك انو الولد مات الله يستر من مفاولكم شكل هالكذبة بتوصل عناد فعلا للموت بسبب المهمة الي داخل فيها

اتوقع عناد من كثر ماكررو هالكذبة بيقولها لهم بنفسه انو عناد هو الي مات خلاص وعساف الي موتوه هو الي عايش الحين وخلاص ينسو وجود عناد دامهم اكدو هالكذبة وعاشوها


الـغيوض...َ!
سحابة كانت من الماضـي...
امطرتني ب الجراح العميقه...!
الـغيوض..!
وادي سحيق جداً....
من الأنين المكبوت لـي...!
الغيوض...!
جدار طال وطال وطال...
بيني وبين رفيق العمر وحبيبه...!

اذا كانت الغيوض بزواجها من سطام جرح لك وعميق اجل الي انتي سويتيه فيها ايش لكن ربك رد كيدك بنحرك وماخلى لك قلب سطام مثل قبل ويمكن هالشي الي كسر غرورك وخلاك تكملي مع سطام الي جسده معك وقلبه مع الي فرقتيه عنها بشرك وشراستك وهي كملت مع انسان عطاها قلبه بعد وحبها وقدرها من اعماقه وماحلا بعينك الا لما صديقاتك الي مثلك خبروك وكسروك انو عشق غيرك وهذا الشي ماعجبك ............. نسيتي انو الدنيا دوارة وممكن ترجع لبنتك بيوم تجي وحدة وتسوي نفس سواياك بالغيوض

الغيوض بلوعه\وش ابي انكش ب الماضي...!
الماضـي فيه ولد لي ماضميته ولآشبعت من ريحة هدومه...
الماضـي انا.....
تدرين ان انا مالقيت نفسي الى الحين..عايشه مع الماضي.....

قفزت سآره كـ الملدوغه وهي تشد الخطوات لـتذهب مع مناير..
لتقف الجدهـ ب عكازهـآ..
لتهمس الغيوض \وش يرد لوعتي اذا عساف لـبس بشته في يومـ ومافرحت فيه مثل ساره اليومـ..؟
الجده صمتت ب وجع من ثم اردفت\يمكن مات..اطلبي له الرحمه!

اه هالمقطع وربي عور قلبي الله لايوفقك ياهيا لاانتي ولا سويرة الله لايرحمك لادنيا ولا اخرة شهالقلوب الحجر حرااااام وربي حرااااااااااام الي قاعدين يسوونه في هالمظلومة ........... جعل ربي يذوقهم الي ذاقته اضعاف مضاعف انحرمت حتى تشوف ولدها بالبشت وهو تزوج مرتين ومافي مرة تحققت امنيتها بعد لو احمد عايش قلنا تعوضها بأحمد بس عناد خلاص راحت عليها ............ بينما هو يزفون جسار للمرة الثانية مثل مازفو عناد مرتين وهي مالها الا حسرة ام بفرحة ولدها ليلة زواجه الله يرحم قلبها ويعوضها

والاخت شهد جاية تكمل حقارة اهلها وخباثتهم وتكذب حرمة مذبوحة لما عذرتها انا ماتعرف السالفة وخبرتها .......... الحين بالذمة هالكلام الي تقوله رهف وامها عن زواج سابق للغيوض من سطام مو مستمر لحد الان وعن اخ مخطوف فيه مجال للكذب من حرمة بمقام امها .............. حتى لو كانت مصدومة ماترد وتتصرف بوقاحة لانو هالشي بيرجع عليها من رهف لما تنكشف الحقيقة وتنحرم هي من عناد الي ماكان يهمها وجوده اصلا

بعدين بتعرف قيمته لما تشوف سعادة رهف بوجوده وهو يشوف الفرق بينها وبين شهد في تعاملها معاه وتقديرها له

اذا كان ردها الحين على هالموضوع بهالعنف بنشوف لسانها وكلامها لاهلها لما تعرف جريمتها الكبيرة والي ماتغتفر ذيك الساعة نبغي نسمع كلامها والله بس فالحة تكمل حقار ة اهلها على هالحرمة

الحين ملوك سمعت القصة مثلها مثل شهيد وهي بعد شافت الصورة واكيد بتخبر عناد انو صاحب الصورة له اخ يكون اخوه هو بعد ويمكن يسأل عن عايلة هالولد وتخبره وبكذا بيلاقي حاله عند باب بيت الدايس وبتنكشف اغلب الحقيقة والباقي بينكشف بالمواجهة بين سطام وامه والغيوض وعناد ببيت الراسي الي بيحط النقاط على الحروف


سطام بعد مو اقل من امه لما عرف هوية عبد المجيد وانو جريمته قربت تنفضح ومع ذلك ماتراجع عن كذبته بس سبحان الله كأنو هالساري داعي بحضور ملك ودخل الشخص المعني والشبه الي تغاضى سطام عنه انو هو الي بيكون دليل وحقيقة واضحة مهما زور من اوراق بس الشبه ماله اي حل الا انو هو الشخص المفقود

وسطام انعمى ونسى انو عناد شبيه امه ومن سوء حظه وحظ امه انو كان له اخ نسخة منه وياليت بعد عبد المجيد شاف رعد علشان تكمل الصورة بس ربي حط عناد بوجهه ورعد بوجه جدته


سطام بمكر\ما ..جد علمٍ جديد..وماظن ان فيه فود من عقب اكثر من ثلاثين سنه..الله يعوضني خير..
آبتسم ساري\وش يدريك...ماتشوفه الا داخل عليك..!

في ذات الوقت..
دخل ريان وعناد..مبتسمين...
لـتتسارع قطرات الـعرق المبتل ب سنين عجاف على جبين سطامـ...
و
ترتفع عيني عبد المجيد بـ صدمه لـ عناد...!

ياسبحان الله رساله واضحة موجهة لسطام وقدام عينه بس مين يعتبر بس ................ بس ربي رايد انو كذبته وجريمته تظهر للنور خلاص وماباقي الا صاحب السالفة يعرفها والخيوط الي كانت بعيدة تنربط وتكتمل الصورة في اوضح هيئة ..............

لو
لم
آدفنه بيدي هذه...
لـ قلت انكـ احمد...
لـو
لمـ
آنثر عليه التراب مرات ومرات..
لـ امتلئ جوفي اهازيج بعودتكـ..
طيف..!
ام
حقيقه..!
عودة من الموت..!
ام
حياة اخرى بعيدهـ...!

من آنت يآشبـيه الـذي وسـدته بيدي ب اللحد..!
من
انت..؟
آختنق حتى كادت تظهر الدموع من عينيه لولآ
بقايا رجوله عتيه تسكنه..
وتلومه ان ذرف تلك الدموع..
بحضـرت الرجال...,

يالله موجع موجع هاللقاء لعبد المجيد الله يعين قلبه رجع له عناد كل المواجع ............. اه اعاد له هالشبيه ذكرة يوم لايمكن لاي اب ينساه مهما مرت السنين فكيف وهو لم يمضي الا سنوات قصيرة تصدقي ضمضم ذكرتيني لما علقت على ماجد ولد غنج بشبه الي يحمله من امه زخبرتك انو لو كان يشبه ابوه منصور كان عزام ماحبه هالكثر بس انو يشبه امه بيخليه يحبه بدرجة كبيرة ..................... والحين اقولك انو شبه عناد من امه والاهم اخوه احمد الميت بيخلي مكانته بقلب عبد المجيد كبيرة حيل ومااستغرب لو عطاه الي كان ممكن يعطيه لاحمد لو كان عايش نقطة اهنيك جدا عليها عبد المجيد بيشوف بعناد ولده المرحوم وراح ينسيه هالشبه الحزن الي بقلبه وبيخليه متمسك فيه نفس تمسك الغيوض فيه

تصدقي ضمضم على ماني قلبي متأثر على الي قلب حال عبد المجيد بس ضحكت ضحك هالمخرف ابو عيون حارة الناس في ايش وهذا بيموت على الفلوس الي عند عبد المجيد الحمد لله انو ماعنده بنات كان تلصق يبغي يناسبه والله فراغة ......... هههههههههههه


سطامـ بحده\قوم ياعناد جهز السياره لـ اخوك وانت سق فيه...؟
عناد بصدمه\يبه ريان بيسوق فيه ..وانا بلحقهمـ بسيارتي...,
سطامـ بحده\لآ قم انت...والحين...!

يقاله الحين بيبعد الحقيقة عن عبد المجيد لما يبعد سطام عنه خلاص الجريمة انكشفت والاكاذيب ماعا لها لزمة وعبد المجيد بدى يربط الخيوط وسبب برودة قلب سطام ولما يجتمع بالغيوض وكل واحد يحكي للثاني الي شافه وسمعه بيعرفون الحقيقة بس الباقي على عنا د ومايخذل عبد المجيد ويحط اعتبار للموضوع واللقاء الي يبغيه فيه وان شاء الله ملوك تخبره بسالقة الاخو المفقود وانو اخو صاحب الصورة الي عندهم


اما لقاء الغيوض برعد الي ياسبحان الله كأنه حاس انو هي جدته فعلا وتمسك فيها .............. كان هاللقاء متعب لحد استنزاف الطاقة والمشاعر ............. صعب جدا على ام تشوف ولدها وتقريبا بنفس العمر لما انفقد ونفس الشبه ويجي احد ويسحب هالروح من بين احضانها ................ لحظة جدا مؤلمة وهي تتخيل انو الزمن رجع من جديد وولدها هالمرة بحظنه والمشهد بيتكرر هالمرة من جديد بس قدام عينها يعني بعناد ماكان قريب منها لما انخطف دون لما رعد بحظنها ويجي رجال ماتعرف يسحبه منها تخيلته هو عساف وهذا الي جاي يخطفه منها ويحرمها من جديد من ريحته .............. هالمرة كانت مقررة انها تمنع الي اخذه يحرمها من ولدها هالمرة قررت تدافع عنها بس ماتفقده كانت تحاول تسوي الي ماسوته قبل ثلاثين سنة .............. ماتنلام والله ولدها بحضنها بشحمه ولحمه نست الزمن وكل الي حواها هاللحظة ............

الين جاء ياسر الي ربي كأنو يعطيه رساله لرحمة قلب هالام علشان يريحها بس شكل الحقد هو الي سيطر عليه رغم تأثره بحالة الغيوض كان بأمكانه بدل مايقول ويكذب انو ريان ابو الولد وعساف الحين رجال مو بنفس هالعمر يخبرها انو هذا احتما يكون حفيدها لانو هذا حفيد سطام من عناد نسخة احمد ورعد نسخة عساف الصغير بس هو الي بيدفع ثمن سكوته بخسارة الغيوض ورهف اذا عرفو تعمده عن اراحة هالقلب بسبب حقد ماله معنى

ويمكن لو صفى النيه كان بيحصل فوق الاجر دعوة ام مظلومة له بكل الخير والسعادة بد الي ناويه عليه رهف في هالليلة الي بتقلبها عليه ............. غير الي يمكن يقلب عليه جسار بسبب كلامه له ويستخدم الدوسيه الي عنده ضده....... الغيوض بحرقه\ولدي ياياسر هذا ولدي اشم ريحته ولدي ...انت ماتحس بهذا الشي انا احس فيه...أحس فيه..أنا ام...
ياسـر\الا والله حاس بلوعتك بس هذا ماهو بولدكـ..

ليتك صدق ياياسر تنسى حقدك على عناد وترحم الغيوض بعد ماترجع لوعيها وتخبرها على الاقل بالي استنتجته على الاقل بتكون الاول بهاالشي لانو سكوتك مابيدفن الحقيقة الي قربت كثير



نجي عاد للقاء العرسان التحفة ............. مقرن متشقق من الفرح بزواج بنته ونجاح خطته انو ياخذها الي بباله ونسى انو هي سوتها ووافقت بس علشان لاتنزل راسه وانو مو بالضرورة ينجح هالزواج ..............وبنته من الاصل كارهة الرجال على توافه مثل وجهها وشي طبيعي بيكون فرحته بزواجها الثاني اكثر من الاول ........... لانو الي مثل حالتها قليل الفرص انها تلاقي رجال مثل جسار ماينعاف من اي بنت فمابال بوحدة مثلها سبق لها الزواج غير انو فيها مشكلة صحية من ناحية العيال ومو اكيد انها بتقدر تتخلص منها لانها بيد رب لعالمين


بس احسن شي الموقف الي صار لها وهي رافعة عينها بعين جسار وترى مو بس جسار ملاحظ عليها القوة والتماسك وحتى لو هو فسره قلة حيا فعلا احس الظبي ابد ماارتبكت مثل غيرها هذي فلك لما رجعت لبتال كانت مو قادرة تسيطر على اعصابها اما الظبي ماحسيت فيها خجل ولا ارتباك العروس ماينلام جسار من نظرته فيها وهذا اول الغيث ولسى ماشافت وسمعت راي جسار الي شكلها ماشكل عنده فارق لانو هدفه واضح من هالزواجة علشان تعدل حياته الي انعفست ............ بس مازلت اتمنى انو جسار يعرف انو الظبي كان لها يد في كشف حقيقة سيوف وكيف بتكون ردة فعله ناحيتها

اما المغرورة الظبي ايش ردة فعلها لو عرفت انو هالرجال الي هي مستخسرة فيه الجمال بس لانها تكرهه هو بعد يكرهها وندمان قد شعر راسه انو من بين كل الحريم مااخذها الا هي

يعني الشعور متبادل وهي ماخذة مقلب انو جسار سعى لها بنفسه وخطبها بس اذا هي تفشخرت بهاالشي بتجيب لحالها الصدمة الكبيرة وانو مافكر ياخذها اصلا وهي طليقة صديقه المقرب بس الظروف جات كذا وانربط فيها وانو ابوها كل ماجلس معاه جاب سيرتها واسمها يعني افهمها ومااستبعد على مقرن يطلب نفس الطلب حتى لو كان جسار عنده حرمته وماكانت مثل ماهي لانو من البداية حط هالهدف بعينه وكثير اباء سووها

بس جسار يعني ليه مستغرب من حشمة الظبي عادي ومو غريب والحشمه مو مقتصرة على فئة معينه ولا طبقة دون طبقة وبعدين حتى الغير ملتزمات يسوونها خصوصا لما يكون باليد زينة من حنة او اصباغ بالاظافر وهي بتمر بالشارع او مكان فيه رجال .............. عن نفسي اسويها في مثل هالظروف يعني نقش الحنة ملفت جدا باليد او بالرجل وحتى المناكير وبصراحة الوحد على حسب البيئة الي تخليها تنتبه لهذي النقاط وانا ماتبعت هالشي الا بعد زواجي لانو زوجي نبهني لهالشي من بداية زواجنا وخلاص اخذتها قاعدة مع انو صرت نادر احط حنة لانو بالاساس الكنج تبعي مايحب ريحته خخخخخخخخخخ وامي وامه هواش معاه على هالنقطة

بس بعد كانت بتكبر بعين جسار لو هي تخلت عن البذخ والاسراف بالنسبة لفستان الزفاف الي ماله داعي اصلا لانها مو مسوية زواج كبير وبقاعة مجرد زواج عائلي وضيق جدا غير كذا هي سبق لها لبست فستان زواج يعني عادي لو استغنت عن هالبذخ بفستان ناعم وفخم ومناسب لمثل هالزواجة وبنفس الوقت ماكان بيخليها بهالحوسة الي صارت لها من كبر الفستان اصلا انصدمت انها لابسة فستان زفاف وهي زواجها عائلي وجسار مابيهمه لو مالبسته لانو مو اول زواج له علشان نقول من حق زوجها يشوفها بفستان ابيض ............... يعني جات ترقعها من صوب وطلعت لها نقطة لو تخلت عنها كانت اكثر لفت انتباه لجسار وهو فستان قيمته لو حطتها لناس محتاجين افضل من انو نهايته الدولاب لانو ماراح ينلبس مرة ثانية .......... بس مين يتعظ ويحط بباله هالنقطة الا الناس القليل وياسبحان الله يطلع لهم طلة ابهى وافخم من الي تكلفو بفساتينهم لانو رب العالمين مبارك لهم في هالحرص


بس ليه درر واختها ماكان لهم تواجد في العرس والعايلة كلها موجودة وحتى رعد موجود توقعت يكون لدرر دخول وهجوم من نوع اخر على ابوها والظبي بهذي الليلة


الظبـي بحرج وهي تمسك كف يآسـر\يآسـر من الي بيسوق فينا..؟
يآسـر ب تهكمـ\عاد خليها لك مفاجئه..من تتوقعين عمتي..حزري..!
الظبي \آحزر...أنت صايبك شـي الليله..؟
يآسـر بهمس وهو يتحسس اناملها\آووو..عروس غريبه ما ارتجفت اصابعها..!

هههههههههههه يعني مو بس جسار الي لاحظ عليها عدم الخجل حتى ياسر الي من لحمها ودمها لاحظ قوتها وعدم ارتباكها مثل باقي العرايس فرق بينها وبين فلك سبحان الله

لـيردف بخبث\الي بيسوق فيك عناد زوج الـي تبطرتو على نسبهمـ بحجة مناطح غمام الانساب..
اخرتها ي عمه صـآرت زوجة حماك براقيه ثالثه..آييييه دنيآآآآ حقـيييره..!
آنتفضت بوجع من تهكمـ ياسـر الساخر...

زين والله عجبني وبقوة تهكم ياسر على الظبي وتذكيره لها على هالنقطة علشان تعرف انو الدنيا دواره والانسانة الي بيوم حاربت علشان تبعدها عن عايلتهم صارت قريبة لها واذا ربي عطاها بيكون اولاد عمهم امهم براقية بس الوجع ليه هل من هالقرب والنسب الي رجع من جديد وبزيادة من هالعيلة والله بسبب صحوة ضمير متأخرة لتفكيرها العقيم الي مانفعها ولا رفع من قدرها شي والحين عاد اخذت الي مابيرضى لها الزلة على ملوك ولا على هالنسب لانهم الي عرضوه عليه مو هو الي طلبه بنفسه

اما جسار لحد هاللحظة وقلبه مازال اسود على عناد لايكون خايف انو الظبي تنفتن بعناد بعد لاتخاف اذا انت زوجها الي تملك الجمال اعترضت على عطايا ريها على هالوسامة لانها بس تكرهك وكأنو الجمال على كيفها وتوزعه على بس الي من هم من نفس شاكلتها لانو جسار نسبه ماعليه كيف لو كان مستواه في النسب اقل ويملك هالمقومات

وهالجمال يالظبي الي مقهورة منه هو الي بيوم بيخلي الحجر الي بصدرك يدق وينبض وهو الي بيعلمك كيف تقدرين عبيد الله وكيف تشوفينهم بالنظرة الصحيحة مو النظرة المتخلفة الي ورثها لك مقرن

جسـآر\آنقلع عن وجـهي لـ آحط حرة الليله فيك..ماهو ناقصني الا انت..

وليه ان شاء الله وش فيها هالليلة توك صاحي من الي انت سويته بدري والله لساتك ماشفت شي منها وندمت اجل اذا شفت الجبروت والغرور واللسان الي ينقط سم شراح تقول خخخخخخخخخخخخخ

يآسـر بهمس دافئ يشبه دفئ جلد الافعى...\تزوجت عمـتي..الف مبـروك..!
لـيردف \ماهي من القلب على فكره وانت سيد العارفين..!
بس اذا قال العاجي الكبير كلمه مالنا الا التنفيذ...
بس انتبه تصـير استفاقتك الميمونه على عمتي...

الي يسمعك ياياسر يقول انو عمتك مثل فلك علشان تخاف عليها هذي الظبي الي حتى انت وبقمة عصبيتك ماخافت ولا اهتزت لما بيوم وقفت بوجهها تحذرها من تدخلها بحياتك ........... بس لانك متأكد انو جسار مو رخمة وضعيف وبيسكت لظبيكم وبيهزه شكلها لا هذا جسار والظبي نفسها بتتفاجئ بمين جسار الي ماعرفتوه ابد وهو الي بيربي لك نواقص الظبي وبيعدل اعوجاجها .............. من حيث فرض ارائها على رجال يكون زوجها لانو هذا مو طارق الي بتذله بشي عطوه اياه العاجي لا هذا مالها عليه ممسك تذله فيه الا سالفة سيوفوه وهو بالمثل عنده الي يكسرها ويحطمها اذا فكرت انها بتشن هجوم عليه بتكون خسارتها كبيرة وجسار مابيكسرها الا اذا هي تمادت وحاولت تكسر شموخه وقوته عليها

وجسار الجديد عمتك الي خايف عليها هي اول من سعت لتوصيله بهذي الشخصية والله هو كان مامثله مثيل والحروب بينهم بتبدي من اول ليلة اتوقع


عناد واخيرا بعد هالمدة قدر يوصل لاسم هالشخصية .............. والله يستر من الثمن الي بيدفعه لانو ضحى بعمره علشان ينقذ هالشخصية الي اكيد الجماعة المجرمة مابتتخلى عن انتقامها من عناد والله يستر



واخيرا ضمضم ماتتصورين مقدار الوقت الي اخته في هالتعليق تقريبا اربع ساعات ومع ذلك مااحس وفيتك حقك والله لو اكتب اضعاف هالتعليق مو كثير على ابداعك وتعبك ............. بعد هالمشاعر المتعبة اتمنى انو اللقاء الحاسم مايكون بعيد علشان نكمل التعب الي بقلبنا مرة وحدة ,,,,,,,,,,,, واكيد بيكون لنا مفاجأة غير عن ماتصورناها وهذا الي متوقع منك يالغلا ................ في انتظار البارت القادم يمكن يكون فيه نسمه خفيفة ورقيقة تبرد شوي من اللوعة الي حملها لنا هذا البارت

صباح الخيرات والليرات ............ صباح الفول المدمس وخبز التميسس .......... صباح القهوة التركية والعربيه


اشكر كل من رد وشارك في النقاش الي طرحته ,,,,,, كنت متوقع الاقي ردود واراء اكثر وطبعا ايد كلا وله وجهة نظر مختلفة



النوفي مشكورة يالغلا على بصمتك زردك على هالطرح ............ بس شكلك فهمتيني غلط انو انا ضد زواج المطلقة او حتى الارملة او انا الي اشوف النظرة العقيمة الي المجتمع العربي للاسف ينظر لها بمنظار اسود


حنا بصراحه مايعيب البنت عندنا طلاقها اللي يعيبها ويكهرنا فيها رفضها للزواج بحجة ان تجربتها الاولى فاشله والثانيه لازم تريث فيها فمايكون منها الا تشوف العمر يركض ونصيبها بالزواج يقل



حلو هالكلام جدا ومثل ماقلتي النظرة تختلف من مجتمع لمجتمع ............... ومثل ماقلتي انو يمكن هالمطلقة تكون صغيرة بالسن وبأول شبابها ليه نحكم عليها انها تكمل حياتها بدون نصف ثاني

صحيح كثير بنات او حريم بسبب تجربتهم المؤلمة يرفضون الزواج مرة ثانية ............ بس انا اتكلم عن الي يرفضون يزوجون ولدهم مطلقة وهو مطلق وفي بعد الي عنده عيال والحرمة ماعندها ............ بينما اذا بنتهم مطلقة وتكون نظرة الناس لها نفس نظرتهم يحتجون ليه يعني يحبون لبنتهم ويتمنون لها شي بينما على غيرها يكون مرفوض قطعيا قمة التناقض بصراحة


والامثلة الي ضربتيها فعلا نشوفها ونفرحها لاستقرارها .............. بس نظرة الناس دائما تكون ظالمة ومن منظار واحد


اذكر كانت حاضرة زواج وحدة مطلقة والكل عارف انو زواجها الاول مادام الا كم شهر والاغلبية تكون ببيت اهلها والسبب انو زوجها يمد يده عليها كثير ومن غير سبب وفي مرة رفع عليها سكين لولا لطف رب العالمين كان البنت انذبحت وطلعت بالشارع تركض المسكينة مثل المجنونة وتخبت بأحد بيوت الجيران الين كلمت واحد من اخوانها يجي يلحق عليها

واصرت تتطلق منه لانو شكله مو صاحي والبنت اعرفها شخصيا ماتهش ولا تنش واهله لما خطبوها لهذا السبب ولانو هي يتيمة فكرو بتصبر على جنون ولدهم

وتطلقت والعالم ماقصر بالحكي عنها واخوانها الي عارفين السالفة حطو عليها قيود قاسية لاتحضر اعراس ولا اسواق ولا زيارات زين بعد اذا احد زارها يسمحون لها بهاالشي وحتى التيلفون ممنوع واذا احد اتصل عليها لازم بالاول اخوها الي يرد ولما انخطبت للمرة الثانية كانو اخوانها بيرفضون لولا امها وقفت لهم والبنت مسكينة مع انها خايفة من التجربة بس جحيم اخوانها اجبرها تجازف والي خطبها ولد عمتها وماسبق له الزواج

بس الناس ماعجبهم ووحدة من حريم اخوانها من حقدها عليها قالت اكيد انو بينهم شي من اول وهذا سبب طلاقها بسرعة من زوجها الاول وزوجها الدلخ بغى يطلقها للمرة الثانية بس هو تمسك فيها وعجل الزواج الي ماخلى من حكي الحاقدين على العروس المسكينة والدعاوي وربي جالسة وانا اسمع الكلام وقلبي تقطع عليها بس الحمد لله ربي مايضيع مظلوم وتوفقت والحمد لله مستقرة ومبسوطة بزوجها الي يحبها وعندها عيال


انا نظرتي ايجابية جدا من هالناحية وغرضي من الموضوع انو ليه ماننظر للمطلقة على انو من حقها تشوف حياتها من جديد مو بالضرورة تكون تجربتها الثانية مو ناجحه




ومشكورة اختي عزتي في كبريائي على المشاركة وحلو التنوع بالاراء ..................ز


زيزفون تعرفين اني صدمت لما اعرفت من اخوي انو يعرف شباب عادي عندهم يتزوج مطلقه


طيب ليه استغربتي في بعض العوايل والقبايل لما تصير عندهم بنت مطلقة ويعرفونها زين مازين ومواصفاتها واخلاقها لايعلى عليها ليه مايعطيها فرصة خصوصا اذا عرفو سبب الطلاق وانها انظلمت بزواجها الاول والقريب اولى من الغريب


انا اشوف اذا واحد كان مطلق او ارمل وعنده عيال على الاقل من الافضل له انو ياخذ مطلقة اذا هو يعرف وحدة من عايلته او مقربة لاهله عارفينها بنت ناس كل الصفات المؤهلة فيها وبتكون له نعم السند زوجة وام لاولاده ليه لا

ترى كثير تكبرو على هالمطلقات وتزوجو بنات ماسبق لهم الزواج وماتهنو لانو الي بيكون اول زواج لها تبغي تتدلع وتروح وتيجي وتحس بأيام زواجها انو زوجها ملكها بس كيف عاد لو خلوها تصير ام لعيال زوجها اصلا مابترضاها بينما المطلقة الي عارفين اخلاقها بتكون راضية ومتقبلة هالشي اكثر



وترى في بعض الشباب حتى لو هالمطلقة كانت متملكة وماصار لها نصيب تكمل بعد تلاقي من بعض الشباب الرفض بحجة انو زوجته الي يبغيها ماحد شافها وجلس معاها غير

طيب هو ضامن انها ماانخطبت كثير وانشافت بالنظرة الشرعية صحيح المدة تكون اقل وغير عن الملكة بس يعني حرام ينظر لها هالنظر عن نفسي رشحت بنات كثير من الي ماتممو زواجاتهم لشباب اول مرة يتزوجون ورشحت مطلقات وارامل للي لهم نفس الظروف وترى اذا قلتي علشان انو مااحد يعرف مين سبب الطلاق

على الاقل نرشح الي نكون متأكدين منهم وعارفينهم سواء من العايلة او من الجيران او اخواتصديقات لنا ومافيها شي عن نفسنا واهلي عندهم عادي وحتى اخواني عادي ياخذ وحدة تكون متملكة قبل واذكر انو امي بعد مرة رشحت لهم اياها والباقي للنصيب وتطابق التحاليل


اعرف وحدة مادخلت العشرين ترملت بعد شهرين من زواجها لانو زوجها صار عليه حادث بمكة وهو رايح يحج وبصراحة حالتها جدا كانت مؤثرة وبسبب مواصفاتها المرغوبة خطابها من كل مكان سواء عزابية او مطلقين او متزوجين والنصيب لصاحب النصيب


jello مشكورة على المشاركة الحلوة والف مبروك لزواج صديقتك مثال رائع وبصيص امل لكل انسانة تحطمت من تجربتها وعانت وبالاخير حصدت نتيجة صبرها خير الله يوفقها ويسعدها يارب




مشكورين الغوالي على المشاركة الجميلة والممتعة