كاتب الموضوع :
راعية الفزعة
المنتدى :
القصص المكتمله
مها بضيج : خوله خبرتني انك خذيت جم تقرير من عندها !! عسب تعرف اذا فيه امل انه فيوم يرجعلها بصرها
خالد بضيج : فعلا صااااار هـ الشي ليش تسألين ؟؟!!!!
مها بتوتر : خالد صارحني الله يخليك ولا تقص علي !! الدكاتره اشو قالولك بالضبط فيه امل ولا لا.. ؟؟!!!!
خالد وهو يتنهد : مها الله يخليج هـ السؤال ما وقته ؟؟!! اذا صارت فرصة بخبرج بالسالفه كلها !!
مها ع طول قاطعته : خالد الله يخليك صااارحني ؟؟!! فيه أمل ولا لا ؟؟!!!
خالد بضيج : للاسف ما فيه امل انا اضطريت اكذب على خوله لاني عارف اذا خبرتها انه ما فيه امل تشوف وترجع
لحالتها الطبيعيه ساعتها اكيد بترفض احد يشاركها همها وبتم وحيده طول عمرها !! وبترفض وجودي معها !!
مها ودمعتها على خدها : يا الله ليش جذا !!!! فعلا خوله لا درت نفسيتها بتتعب !! الله يسهل ان شاء الله
خالد يقاطعها : مها انا ما خبرتج عسب اكدرج اباج تساعديها لازم تحسسيها انها شرات غيرها وما فيه شي ناقصها
مها وهي تصيح وبصوت عالي: ما اقدر ما اقدر !! الله لا يسامح اللي كان السبب الله لا يسامحه ...
خالد وهو يتنهد : المهم مها هـ الموضوع خليه بينا ولا تعلمين احد حتى فهد
مها وهي تتنهد : الله كريم .. خالد بخليك احينه
فاطمه بضيج : هاه مهوووووي مع منو ترمسين ؟؟!! وليش دموعج على خدج صااير شي لا سمح الله
مها بضيج : لا هذي وحده من ربعااااتي صار لها حادث ويمكن تروح فيها الا ما خبرتيني حمود للحين مصكر تلفونه
فاطمه بالم : هيه وهو وايد ماخذ بخاطره عسب جذا انا ما الومه
مها وهي تتنهد : تعرفين احس فيه أحد داعي علينا !! بيتنا صار عباره عن كومة مشـــآكل
فاطمه : ما بيدنا شي غير نحمد الله وندعيه انه يفرج علينا همومنا
مها : واخبار البيبي عسى ما بسببلج ازعـــآج
فاطمه بابتسامه : لا من هالناحيه تطمني بعده توه صغير لا حقين على دوار الراس وغيرها من مشاكل الهضم
مها بضيج : يالله اللي يبا شي يصبر .. انا بسير بيت عمي هلال ابا ساره فموضوع تقدري اتمي مع خوله
فاطمه بخووف : ليش خوله فيها شي !!!!
مها بحزن : خوله تبا تطلق من خالد تقول ما تبا تظلمه معها .. تبا تتخلص من حزنها بدون ما أحد يشاركها
فاطمه وهي مصدومه : اشوووو تبا تطلق !!!!!!! لا هذي اكيد تخبلت خليني اروح اتفاهم معاها
مها : خلااص حبيبتي انا بسير اخذ عبااتي الدريول صارله ساعه واقف برع وانتي تفاهمي معاها براحتج .. يالله باي
خوله كانت سرحانه وتصيح : احينه كيف بيكون شعوره خصوصا عقب ما خبرته اني كنت اتسلى واتلاعب بمشاعره
عسب انتقم منه اكيد بيتحراني وحده أنانية وبلا اخلاق .. بس مب مشكله اذا هالشي بيخفف الالم اللي بداخله ما عاد
يهمني حتى لو اعتبرني اني ما اسوى بيسه !!اهم شي يكون هو مرتاااح .. بس الشي اللي معذبني انا كيف بقدر انساه
وكيف بطلعه من قلبي عقب ما غرسته فصدري وزرعته في كل مكان في جسمي اه يا خالد لو تعرف شكثر احبك
واني عمري ما اتصورت فلحظة اني يمكن اخسرك او ما اكون من نصيبك..بس انا راضيه بقسمتي عايشه في هالحياه
وجني مب عايشه يمكن حبي لك كبير و مصيره الوقت يداووي هالجرح بس خايفه الوقت يمضي وانا بعدني ما نسيتك
فاطمه تقطعلها حبل افكارها : خوالي بلاج حبيبتي ؟؟!!! صارلي ساعه ادق الباب وانتي ولا على بالج
خوله وهي تتنهد وتمسح دمعتها : اسفه فطاامي سرحت شوووي اعذريني
فاطمه وهي تيلس حذاها : خوله بلاج متكدره حبيبتي !! باقي على زواجج بس اسبوع المفروض تستانسي
خوله بضيج : واللي مثل حالتي يعرف يستانس .. ما اقول غير الله يصبرني مكتووب علي الشقاء
فاطمه وهي تتنهد : خوالي إنتي شو تقولين !! ادري انه اللي صارلج جان وايد قاسي وصعب على أي انسان يستحملة
!! بس لازم تنسي وتتفائلي يمكن فيوم ترجعلج نعمة البصر والله كريم اهم شي تخلي ثقتج بالله كبيره وما تيأسي
خوله وهي تتنهد : ارجع اشووف انتي من صدقج !!!! كل الدكاتره يقولوا ما فيه امل !! ما يحتاج تعيشوني فـ كذبة
فاطمه وهي تحضنها : خوالي حبيبي لا تقولي جذا !! ارادة الله فوق كل شي !! عشاني لا تكدرين خاطرج وتفائلي
خوله ودمعه ارتسمت ع خدها : اااه اللي حاز فخااطري اني يالسه اعذب كل اللي حوالي !! ليتني اموت واريحكم مني !
فاطمه : خوله حرام عليج !! خافي ربج !! ما يصير اللي قاعده تقوليه !! هذا نصيبج ولازم ترضى فيه !! وبعدين لو
صار فيج شي تتوقعي انه نحن بنرتاح غلطانه خوالي !!صدق الرمسه اللي سمعتها من مهاا تقول ناويه تطقلي من خالد
خوله اول ما سمعت اسم خالد تمت تصيح : اه وهذي اللي معور قلبي ما اتصوور حياتي من غيره !! انا خسرته فطوم
فاطمه بضيج : انزين ليش تطلقون خالد يحبج وانتي تحبيه ليش ادمرين حياتج بايدج
خوله بضيج: انا طول عمري ما كنت انانيه!!ولا تزوجته بصير انانيه !!كيف تبيني احمله ثمن غلطه هو ماله شغل فيها
فاطمه تقاطعها:انتي بعد مالج خص في اللي صار وهذا انتي صبرتي وتحملتي !!اصبري عشان خاطري شيلي موضوع
الطلاق من راااسج .. فكري فامج وابوج طول عمرهم يحلمون يشوفونج عروووسه مع انهم كانوا فاقدين الامل في هـ الشي ! بس سبحان الله قدرة الله فوق كل شي !! فكري عدل قبل لا تتخذي اي خطوووه وعقب تندمين عليها
خوله وادموعها اربع اربع : من جهه امي وابوي ومن جهه ضميري اللي يأنبني ويقولي اذا خذيتي خالد بتظلميه
فاطمه تقاطعها وبضيج : هذا مش ضميرج هذا الشيطان يوسوس لج ولا تنسين ابغض الحلال عند الله الطلااااق
خوله وهي تتنهد وكلامها صار متقطع من كثر الصيااح : انزين علميني اشو ااسوي !! افهموني مابا اظلمه معاي!!
فاطمه بابتسامه : اباج تتمسكين بحبج وترى الزواج مش طبخ ونفخ وانه ريلج يعتمد عليج .. لا حبيبتي خالد يحبج ومتفهم هالشي واذا تفاهمتوا صدقيني ما فيه شي بيأثر على علاقتج معااه وبتعيشوا مرتااحين !!
خوله بضيج : الكلام اسهل من الفعل الواحد ما يضمن باجر اشو بيصيرله افرضي انه تعب ومل مني ساعتها بيكون همي وعذابي اشد من العذااب والالم اللي احسه ينهش بجسمي احينه .. فاطلع من حياته بكرامتي وايد احسن
فاطمه : ياربي احينه انتي ليش راسج يابس .. خوله الله انعم عليج بنعمة الزواج فلا تبطرين على النعمه وتتجاهليها
خوله بضيج : بس انا خااايفه اظلمه معاااااي ؟؟!! خايفه يمل مني وعقب يطلقني !!
فاطمه وهي تتنهد : شيلي هالافكار من راسج عسب ترتاحين وتريحي خالد بعد .. ترى الوسواس بيدمر حياااتج
وقاطعتهم سناتا : ماما خوله بابا خالد تحت ..
|
19-03-10, 09:39 AM
جديد مواضيع قسم القصص المكتمله
العرض العادي
