وإذا يعنى تضايقنا..؟
بنغيّر شي؟
وإذا مات الزهر ف اجمل حدايقنا
بنغيّر شي؟
وإذا بـ هدومنا ضقنا
بنغيّر شي؟
كثير نمر بعض احيان بـ ضيقة بال
زعل صاحب
وحاجة مال
شتيمة شخص مايعرفك
عتب قارئ
ونزعل حيل نتضايق
وإذا يعنى تضايقنا,,!
وإذا يعنى تضايقنا
هي الضيقه بتكون الحل!!
اذا كانت شموس الوقت تحرقنا
هي الضيقه بتكون الظل!!
إذا غابوا جميع الناس وتفارقنا
هي الضيقه بتكون الخِل!!
وإذا يعنى تضايقنا..!!
وكثير من التعب ذقنا
وسهرنا الليل
بيجى صبح ويفرقنا
ونبكي سيل
لين الدمع يغرقنا
ولابه شخص فـ الدنيا بليا هم
أحد ضايق
سبب فاتورة الجوال
أحد ضايق
عشر سنين متزوج وربك مارزقه عيال
أحد ضايق
لأن البيت به صجه وزحام أطفال
أحد ضايق
من السكّر
أحد ضايق
لأنه نايم مبكّر
أحد ضايق
لأنه حبها بـ خبال
أحد ضايق
لأنه مامعاه ريال
هموم أكثر من اللازم وتخنقنا
سؤال الحال!!
وإذا يعنى تضايقنا..؟
وإذا يعنى تضايقنا..!
من اللاشي
الى اللاشي
على اللاشي
تخانقنا
وندخل فى نوايا الناس
أظن فلان يقصدني
أظن السيده فلانه تسب الانسه فلانه عشان العانسه فلانه
أظن الناس هنا بالحيل تكرهني
أظن السيده فلانه تعالج من مرض نفسي
أظن فلان غبي ويشابه الكرسي
أظن فلان لها يكتب شعر حتى تغنى به
أظن البنت بنت شيوخ
أظن البنت لعّابه
أظن البنت كذابه
أظن البنت حطت (ورد) وسط(الرد) سبب من شان نتعرّف
وأتقرف
ترانا ناس فينا كذب
وغبي منهو يصدقنا
وإذا يعني تضايقنا..!!
وإذا يعنى تضايقنا..!
إذا راحوا
وخلّونا
نسوا كل الكلام العذب
بكّونا
وعرفنا بـ يوم بأن كل الحكايه كذب
ملّونا
وإذا خيّم علينا الليل
ماأشرقنا
وإذا ضقنا
وصار الحرف حبال فى مشانقنا
بعد هذا
وإذا يعني تضايقنا..!
وإذا يعنى تضايقنا..!!
إذا هذا الزمن لبّسك ثياب فـ يوم مو قدّك
بتحط ايدك على خدّك
وتبكي حيل
إذا هذا البحر ضيّق ولايقدر على مدّك
بتحط ايدك على خدّك
وتبكي حيل
إذا كل الجمر هذا عجز يصنع عطر ندّك
بتحط إيدك على خدك
وتبكي حيل
إذا خدك طبع حزنه على يدك
وعرّقنا
أقول لك شي
وإذا يعنى تضايقنا..!!
وإذا يعنى تضايقنا..!
وطفينا دروب النور
وعتّمنا
المدن والدور
ويتّمنا
شجر وزهور
وكتّمنا
رقيق شعور
وشتّمنا
علو السور
عشان أشياء هي الأتفه من الأتفه من الأشياء
رجل خاين
" ماهي دوم الرجال تخون..!"
وماهو باين
وجود عيون
خيانة بنت
" ماهي كل البنات تخون..!"
لكن انت
ترفرف من تنادى لك" حبيبي
العاشق
المجنون"
وبعد هذا
وإذا يعنى تضايقنا..!!
وإذا يعنى تضايقنا..!
ومشوا عنّا كثير اصحاب
وتفارقنا
وشققنا الورق للريح
بعض فرقا
تكون الحل قبل نطيح
بعض فرقا
مثل جمره وحنّا الشيح
بعض فرقا
كثير أكرم من التجريح
بعض فرقا
تجى جيّة دعا وتسبيح
كثير أصحاب فارقنا ونسيناهم
كأن كانت علاقتنا علاقة وقت
مصالح وانتهت
يمكن
قرابة دم أو جيران
يمكن
تشابه هم
يمكن
واللي يهم
ماضقنا
وإذا يعنى تضايقنا..!!
وإذا يعنى تضايقنا..!
وطيّرنا فراش النوم
ومسحنا كل الوانه
وإذا سيطر على جوّك حزن ووجوم
وبديت تفسر الأشياء على كيفك
زعلك لـ غيبة فلانه
وبنت كنت تعرفها قبل مده وتفارقتوا وجتك تقول:
ولهانه
وبنت كل ماتحاول تصارحها بـ أحبك حيل
تستأذن:
بروح آنام نعسانه
وبنت تعشق الدافي من الهرج
وتمرّك حيل بردانه
كثير أشياء غلط حولك
وجوه الناس
تعبانه
قلق مدري طفش مدري تعب مدري قرف مدري ترف
مدرى الناس زهقانه
كثير أشياء
تزهقنا
وإذا يعنى تضايقنا..!
وإذا يعني تضايقنا!!
بيهمّ الناس
بيخلّي أحد بارد
يفيض إحساس
بتصنع هذي الضيقه علاقة حب مابين الحطب والفاس
وإذا يعني زعلنا بيوم
لإمر ما
وطار نعاس
وإذا فينا خنقنا أنفاس
وحلّقنا
يتغيّر شي إذا يعني تضايقنا؟؟
وإذا يعني تضايقنا!!
ماهو حتى المطر يهجر حديقتنا
وتنبت فينا ضيقتنا
وتغرقنا سيول الملح
والدمعه صديقتنا
ولابه شخص فـ الدنيا تهمه ضحكتك غيرك
لذا إضحك
ولاترمي بذور الشر في خيرك
لذا إضحك
كثير أشياء من الأجمل تحاول دوم تسرقنا
لذا إضحك
وقول بحب:
وإذا يعني تضايقنا!!
وإذا يعني تضايقنا
بهدوء أكثر...!!
وإذا يعني تضايقتي
وجمعتي كل هـ العتمه
ولا أشرقتي
وقلتي في قرف مزمن :
أحس الوقت
مو وقتي!!
وإحس اني تعبت أكثر من الأكثر من همومي
وقولي لطيحتك:
قومي!!
وقولي لكل هذي الأرض:
بآعلّي..
وإنطري غيومي!!
تعبتي كثير تلومي النفس
ويخنقك البكا ساعات!!!
ولا واحد بحزنك حس
بدفا العبرات!!
وإذا يلمح أحد تقصير كذا من غير مانقصد
هنا تنصب مشانقنا
بعد هذا
وإذا يعني.. تضايقنا؟؟
.. مما راق لي ..
08-01-10, 09:58 PM
وإذا يعني تضايقنا بنغير شيء؟!!
جديد مواضيع قسم الشعر والشعراء
العرض الشجري
