اهلين ماشاء الله القصه رائعه واسلوبك فى الكتابه حلو وبسيط
الغريبه ليش مافيه ردود من القراء مع انى اتوقعهم يقرون على الصامت لانها فعلا تستاهل القرائه
الشخصيات كثير وهذا دائما الى يحلى القصص
رحيل زعلت على الى صار لها بس هى من البدايه سكتت عن اهماله لها وتركه لها من الايام الاولى من زواجهم ونسى انه الحريم مو زي بعض والمفروض ماترجع له لانه مايستاهلها
اتمنى تاخذ رائد هو الى بيصونها وبيعرف قيمتها
وعلى قولتهم خذ الى يحبك ولا تاخذالى تحبه

عبدالله اكيد بيوافق عليه عمه وبيبديه على الاجنبى بس راكان ماراح يمشيها له
متعب دخول كيان بحياته اكيد بيغيره
لمى تستاهل الى صار لها مع انى اتمنى انه مايطلقها ويستمر معها

يعطيك الف عافيه واستمرى على هالابداع وحنا بنتظارك ولو انى جيت متاخره شوى يالغاليه

[ الفصــل الثــالث وَ العشرونْ ]


يا دِنيَا الهَمْ ●● { يڪفيّني
وربي ضَ‘ـاقت سِنّيني ~



:
:



:
:




ناظر أمه وقال :" يمه "
أم سعود :" لبيك "
سعود :" بغيت أقول لك ، أنـا ماشي اللحين لـلشرقيه "
أم سعود :" يا يمه ماصار لك كم يوم من رحت ، و إلى متى على هالحـال "
سعود :" يمه شوية أشغـال ، كم مره وانا أأجل أشغـالي ، ومسـاعد أتصل علي وضروري أرجع لهم ، ويمكن تكون زياراتي للرياض أربعة أيـام أو خمس و أرجع للشرقيه "
أم سعود بخرعه وهي تضرب على صدرها :" يـاويلي عليك يا ولدي ! ، وليش كذا يا يمه ؟ "
تنهدت الريم وهي تناظر أخوها ، وعرفت إنه لاعنده لا أشغال ولا هم يحزنون ، كل هذا تهرب .
سعود وهو يبوس إيد أمه :" يا يمه غصباً علي " تنهد سعود وهو يبي يروح للشرقيه عشان ينسى رحيل ويبعد عن سيرتها ، يبي يستوعب كل شي ، يمكن هناك يرتاح شوي ويرتب تفكيره المتشتت ..
كمل سعود :" وأنا والله ما أنقطع عنكم ، كل آخر أسبوعين أكون هنـا ، وأنتوا بعد تجون هناك عند عماني زياره وتغيرون جو ( كمل وهو يشوف أمه ساكته ) يمه أنـا ماني برايح إلا إذا شفتك راضيه على روحتي "
مسحت دموعها اللي بعيونها قبل لا تنزل :" والله تتعب عمرك بطريقتك هذي ، يكفي إنك تشتغل هنا ليل ونهار ....."
قاطعها :" يا يمه ، هالموال سمعته أكثر من مره ، ماله داعي ترجعين تكررّينه ، بس مثل ماقلت لك أنـا أشغالي كثيره بالشرقيه ، وإذا تميت هنـا بجلس كل آخر أسبوع أروح هنـاك ، وأنا ما أبي أتعب روحي بالمشـاوير ، وتقعدين تحاتيني ، وبعدين الشرقيه قريبه ما يحتاج تنزل دموعك الغاليه ، تدرين وش كثر دموعك تضايقني "
ام سعود :" أبوك عرف إنك تبي تروح للشرقيه ؟ "
سعود تنهد :" أنـا فاتحته بالموضوع ، هو ماعنده مشكله ، بس قال شِف أمك بالأول ( أبتسم ) لأنه عارفك عدل ( نـاظر أخته الريم ) و إنتي ما سمعت صوتك "
الريم :" يعني إذا قلت لك لا تروح ما راح تروح ؟ "
سعود :" لا يعني ما علّقتي ، غريبه "
الريم :" لأني عارفه إن كلامي ما راح يغير شي "
أم سعود :" متى ناوي إن شاء الله تمشي ؟ "
قال وهو يفكر ما يبي يمشي اللحين ويبي يـأجل مشواره لبكره :" بكره بدري إن شاء الله "













بعد ما قال جملته ...
خمــس ثوانـي المجلس يعمْه السكوت ..
والأنظـار على عبدالله ..
وثم ضحك أبو رائد بعد أستيعـابه للي يقوله عبدالله ، وضحكوا بعده البـاقي بعد ما كانوا ينتظرون ردة فعله وخصوصاً راكـان ..
نـاظر عبدالله أبوة إللي يناظره ويضحك مستغرب من ولده ..
عبدالله وهو يتظـاهر بالشكل العادي يخفي إرتبـاكه :" ها وش قلت يا عمْ ؟ "
أبو رائد بإبتسـامته :" أنا قلت لك تم ، ولكن إنت تدري إن البنت لها رآيها "
مشى عبدالله إلى آن وصل لعمه وبـاس خشمه :" ربي يطول بعمرك ويخليك "
أبتسم له عمه وسحبه يجلس بجنبه ، يـا حَب أبو رائـد لـعبدالله ، كل شي بعبدالله يعجبه ، صحيح مسمى عليه وهذا إللي زاد من محبته له ..
راكان كان يغلي نـار بهاللحظه ، ويناظر بعبدالله بقهر ووده لو يقتله ، وده يسوي شي لكن مابيده شي ..
أخذ نفس والنيران اشتعلت بقلبه ..
ناظر راكان بهيف إللي ناظره ، وبعّد هيف نظره عن راكان إللي هيف يعرف إن راكان منقهر من إللي قاعد يصير ..
وقف راكان وطلع بدون ما يستـأذن ، و طلع وراه هيف ..
أما عبدالله شافه يوم طلع و أبتسم بنصر ..
طلع هيف وهو ينادي راكـان لكن راكان ما ألتفت له ولا حتى رد عليه ..
مسك هيف إيد راكان بقوه حتى يوقفه :" راكـان ! "
ناظره بعصبيه :" اللحين ابي أفهم شي واحد ،، ولد عمك هذا وش يبي ؟ ، وش يبي يوصل له بالضبـط ؟ أكيد إنت قلت له إني أبي أخطب أختك ، وهو راح قبل لا أجي وتكلم قدام الكل وخطبها من أبوك وهذا كله تحدي لي ...."
قاطعه :" راكــان ! لا تحكم و إنت ماتعرف شي ، أصـلاً عبدالله من البـارح ما شفته ، من يوم كلمتني أنـا ما شفت عبدالله تو اليوم أشوفه ، وموضوعك ما فاتحت فيه أحد ، وهو بالصدفه خطب ، وهذا شي مكتوب أنـا مالي دخل . "
راكان :" يعني للحين ماكلمت أبوك بموضوعي ؟ "
هيف :" لا للحين ، أنـا قلت لك ما فاتحت فيه أحد ، وأختي كلمتها بالموضوع بس ماردت علي وقالت بتفكر . "
راكان اللي طخ شوي :" يعني شلـون ؟ "
تنهد :" يعني إذا أبوي كلم أختي بموضوع عبدالله ووافقت عليه ، إنت الله يوفقك مع غيـرها "
ناظر فيه شوي يبي يستوعب ..
هو بنى حياته مع آسيل ، وفجـأه يطلع له عدوه عبدالله ويخطبها قبله ، ليه ! ، وش معنى عبدالله بالذات ؟!
هز راسه ونظره ما شاله عن هيف ، ولف وركب السيـاره ، ومشـى بسرعه يبي يبعد عن هالمكان ..
تم هيف ينـاظر بالفضى إللي تركه راكان ..
حس هيف بإن أحد وراه ، التفت ..
قال :" عبدالله ؟ "
عبدالله وهو فرحان :" لا عمه "
هيف :" هههه سخيف "
عبدالله وهو يدخل إيدينه بجيوبه :" إلا وش فيك واقف برى ، وهالكريه وش فيه طلع وشكله معصب ؟ "
هيف مايبي يبين لعبدالله شي :" لا هو أصلا من اليـوم ما أدري وش فيه ، وأنـا طلعت وراه أبيه يجلس شوي ،،، المهم ما عليـنا خلنا ندخل داخل لا نتأخر عليهم و يفقدونا "
هز راسه عبدالله وهو فاهم أصـلاً راكان وش فيه طلع معصب ..
ودخلوا داخل ..



:


:



11:00 اللــيل




دخلوا البيت وقالوا :" الســلام عليكم "
رفعت رحيل راسها عن اللاب إللي توها فاتحته ، وفاتحه ع المنتدى ، أبتسمت وهي تشوف أهلها :" أهليين ، وعليكم السـلام " نزلت اللاب توب من على الخداديه اللي على رجلينها ، وراحت وضمت أبوها وباست خده :" وشلونك يالغالي ، ما شفتك اليوم "
ضحك :" بخير ياحيـاة أبوك ، ها عسى ما طفشتي و......"
قاطعته بسرعه ما تبي تبين لهم إنها طفشت وهم برى البيت :" لا لا بالعكس ، جلست ع النت وراح الوقت بسرعه ، وما توقعت إنكم راح تجون بدري ( ناظرت أمها إللي تفسخ عبايتها ، وراحت لها رحيل وأخذت عبايتها ، قالت مبتسمه ) إلا شخبـار الملكه ؟ "
أبتسمت لها أمها :" مشـاء الله تهبل ، هههههه أمـا كيان مشاء الله عليها صايره هاديه اليوم "
ضحكت رحيل :" ياحليلها ، أكيد البنات ما رحموها ( لفت ) يلا أنـا رايحه أكلمها أشوف أخبـارها "
وراحت رحيل للـصاله الثـانيه ، وطلعت جوالها اللي بجيبها الأيمن ، وأتصلت على كيان ، دقايق وقالت :" هلااا والله بالعروسه "
ضحكت لها كيان :" هلا برحوله ، إلا توك تتذكريني وتتصلين ، غيرك أتصل بدري "
ضحكت رحيل بحرج :" ههههههه والله عارفه إذا أتصلت بدري راح اشوفك منتي بمعي ، أدري إنك تحاتين وتفكرين ، يعني جربت حالتك ، قلت أتصل متأخر أحسن "
كيان :" زين سويتي ههههههههه "
رحيل :" ههههههههههه ، أيوه وأخبـارك ؟"
كيان :" والله أخبـاري مو تمام "
قالت بخرعه :" أفـا ! ليـه ؟!! "
كيان تسوي نفسها مستحيه وهي تخفض درجه صوتها :" لأن رحول مـاجات ملكتي " قالت جملتها وهي تسمع رحيل إللي تضحك براحـه ..
رحيل :" الله يقطع بليسك خرعتيني ،،، إلا متعب شـافك ؟ "
كيان :" لا ، هو ما طلب يشوفني ، وهذا أحسـن شي ، لأنه لو طلب أنـا برفض "
رحيل :" ههههههههههههههههههه وليه ؟ "
كيان :" بس ، اليوم على أعصـابي وأحاتي كل شي ويالله نزلت أوقع "
رحيل :" أهـا ، مبروك إن شاء الله .. و ربي يوفقك ويستر عليـك "
كيان :" الله يبـارك بعمرك فديتك "
رحيل :" يلا أنـا حبيت أسلم عليك وأبـارك لك ، وأشوفك إن شاء الله على خير ، يلا تامريني بشي ؟ "
كيـان :" أبد أبي سـلامتك "
رحيل :" ربي يسلمك ، وصلي سلامي للوالده ولليان ولمها "
كيان :" يوصل يالغاليه "
رحيل :" يلا مع السلامه "
كيان :" مع السـلامه "
سكرت منها ورجعت جوالها بجيبها ..
وشافت أخوها خالد وفهد يدخلون ، سلموا ..
رحيل :" وعليكم السلام "
شافت فهد يجي للصاله اللي هي فيها ، ويجلس ع الكنب براحه :" يالله "
أبتسمت رحيل وهي تناظره ، وناظرت خالد إللي سـألها ..
خالد :" إلا وين أهلي ؟ "
رحيل :" بالصاله الثانيه "
هز راسه وراح لهم ..
أما رحيل راحت لأخوها فهد وجلست قريب منه :" ها وش أخبار الملكه ؟ "
أبتسم فهد :" والله حلوه ما عليها كلام ، ولا يفوتك عبدالله وش سوى "
ضحكت رحيل على طاري عبدالله :" الله يستر ، وش مسوي ؟ "
ضحك :" مدري وش سالفة عايله عمي خالد ، متعب ولده تملك ، وعبدالله خطب ،، مشاء الله عليهم "
رحيل :" ههههههههههه وشو !! وش جالس تقول ؟ "
فهد : تدرين اليوم ملكة متعب والكل حـاضر ، وقف عبدالله قدام الكل ، عاد أنا يوم شفته وقف ، خفت ، وانتي تعرفين عبدالله دايم يجيب العيد "
ضحكت رحيل :" طيب ، كمل "










› بيت أبو متعب




:" عبد الله "
رفع راسها عن جواله :" سمْ "
أبو متعب :" سمْ الله عدوك ( أبتسم ) إلا وش الطاري ، أشوفك اليوم خطبت بنت عمك بدون لا تاخذ رآيي "
عبدالله أرتبك :" هاه ، إيه أنـا كنت بكلمك بالأول ، بس آآ أنـا شفت الوقت مناسب إني أتكلم فقلت أتكلم عادي ، وبعدين هذا عمي مافيها شي لو كلمته هو بحسبة أبوي ربي يطول بعمرك ( بلع ريقه بعد كلامه ، وقال ) وليه ، إنت مو راضي إني أخطب بنت عمي ؟ "
أبو متعب وهو يناظر بولده كتم ضحكته على شكل ولده كيف يتكلم بسرعه و خايف من ردة فعل أبوه :" إلا راضي ، بس أنا أقول يعني لازم تفاتحني بالأول "
عبدالله أرتاح ، وقال بمرح :" مره ثانيه إن شاء الله "
أبو متعب :" ليه كم مره بتتزوج ؟! "
ضحك عبدالله بصوت عالي :" هههههههههههههههههه لا يعني أخاف لا سمح الله نويت أتزوج على زوجتي ، أكلمك بالأول قبل لا أخطب "
ضحك أبو متعب على عبدالله إللي ياخذ كل موضوع بمزح ..
أبو متعب وهو يناظر بـطلال :" أجل إن شاء الله بالأول نخطب لطلال ، ثم نملَّكم معَ بعض بليله وحده "
أبتسم طلال إللي جالس بجنب متعب :" أجل دام متعب تملك ، وعبدالله خطب ، ما باقي إلا أنا "
أبو متعب :" قريب إن شاء الله ، أبي أفرح فيكم قبل لا يجي يومي ......."
قاطعوه الكل وهم يقولون :" بعد عمرٍ طويل إن شاء الله "
بعد الجلسه إللي كلها سوالف عن المكله ، راح أبو متعب ينام بعد تعب اليوم ..
وطلع كل منهم ينـام ..
ورقى عبدالله فوق ، ودخل غرفته و زفر بتنهيده طـويله ، ويراجع إللي سواه اليوم ..
تمدد ع السرير على ظهره ..
أنـا خايف لا أتزوج آسيل وأظلمها معاي ..
أخاف بس إني تزوجتها بس عشان راكـان ما يتزوجها ..
يمكن أنـا سويت كل هذا بس عشان أقهر راكان ..
جلس ، ونفث بتوتر وهو يدخل أصابعه بشعره ..
والله مـاني عارف أنـا ليه سويت كذا ..
يعني كل هذا غيره على آسيـل ، أبيها لي أنـا وبس ..
لا لا لا !
ما أظن كذا ، أنـا ما أحبها عشان أغـار عليها ..
يووة ، وبعدين آسيـل وش فيها ..
حلوه ، وعاقله وثقيله وخجوله ، وش عاد أبي أكثر من كذا ..
وهي الوحيده إللي أشوفها مناسبه لي ..
وماهو بشرط أحبها قبل الزواج ..
إن شاء الله أعرفها عدل إذا تزوجتها ، وأحبها بعد ..
وقف ، وهو رايح للحمام ( عزكم الله ) عشان يتحمم بمويه بارده تبرد أعصابه قبل لا ينام ..
ويبي ينسى كل شي ، وأصـلاً التفكير في هالأشيـاء ماراح تفيده .

:


:


:


دخل البيت وهو كاره كل شـي ..
ومايبي يشوف أحد ..
كره حياته بعد ماكانت حلوه ..
كرها بعد ما خرب عليه عدوه عبدالله ...
شـاف أخته رانيـا إللي جالسه ع الكنب وأبتسمت يوم شافته ..
قالت :" هلا والله براكان "
ناظرها بنظرات غريبه هي ما فهمتها ..
وجلس ، وسند راسه على ورا ..
رانيا بإستغراب :" راكان ؟ ، وش فيـك ؟ "
راكان :" مافيني شي "
رانيا :" ماكنت كذا قبل لا تطلع من البيت ،، راكان ! قولي وش فيك ؟ وش صـاير ؟ "
راكان بقهر :" اليوم ولد عم آسيل وعدوّي خطبها قدام الكل ، وعمه وافق ، يعني ما باقي إلا آسيل توافق ( ناظرها بعيون فيها حزن ) يا رانيا أنـا خايف لا توافق آسيـل ، وياخذها عبدالله بعد مابنيت حياتي معها ، والله مادري وش بيصير لي وقتها ، عبدالله ابغض الخلق عندي ، ياخذ أحب الناس عندي ( مسك راسه بكفوفه ) يالله ماني مصدق إللي صـاير "
رانيا ماصدقت إللي قاعد يقوله أخوها :" راكــان !! إنت صادق باللي تقوله ( عقدت حواجبها ) وشلون صار كذا ؟ ، وبعدين إنت خطبتها قبله ......"
قاطعها :" أخوها هيف قال لي إنه كلمها هي .. بس ما ردت عليه وقالت بتفكر ، بس أهله ما كلمهم بموضوعي ، ومادري إذا أبوها قالها بإن عبدالله طلب إيدها قدام الكل بتوافق ولا لا ، ( تنهد ) آه يـا رانيا قولي لي وش أسوي ؟ "
رانيا حال أخوها أحزنها كثير وحالته بعد ما آسيل خطبها ولد عمها تغيرت كثير عن قبل ، لما راكان كلم أخوها بإنه طالب إيد أخته رجع البيت وهو فرحان وعلى أعصابه بنفس الوقت وينتظر ردها على أحر من الجمر .
قالت :" يـا راكان إذا آسيل مو من نصيبك ، أنسـاها وفكر بغيرها ، البنات ربي مكثرهم ، وغير آسيل عشر "
أبتسم بسخريه :" هه أنسـاها " هز راسه ، ووقف ، ورقى فوق بدون أي كلمه زيـاده .
اما هي أكتفت بتنهيده ، وما بإيدها شي غير إنها تنسّي أخوها هالآسيل ..
وتحـاول إنهـا تلاقي له بنت الحلال بأسرع وقت ؛ يكفي إنها مخطوبه وبتتزوج قريب وبتتركه بهالبيت لحاله ..


:
:
:


هزت راسها بعد ما كانت مندمجه معه :" اها ، والله منت سهل يا عبدالله ههههههه"
فهد وهو يتثاوب :" والله للحين ما عرفتيه ( عدل جلسته ) بس إللي يدور ببالي اللحين هو من متى يحب آسيل ؟ "
رحيل :" ومن يقول إنه يحبها ؟ "
فهد :" أكيد يحبها ، يعني معقوله يحرج نفسه ويحرج عمه ويتكلم قدام الكل بثقه وخطبها ، وحتى عمي خالد شكله أنحرج هههههههههههه لأن بـاين إن عبدالله ما فاتح أبوه بالموضوع بالأول "
رحيل :" ههههههههههه والله ما أستبعد عنه شي "
وقف :" يلا عقبالي إن شاء الله ( كمل وهو يمطط إيدينه ) آه أنا بروح أنـام ، ها وإنتي مو ناويه تنـامين ؟"
وقفت :" إلا ، وهذا انا طالعه معك "
مسك إيدها :" يلا حيـاك "
وطلعوا فوق وكل منهم أتجه لغرفته بعد ما قالت رحيل لأخوها:" تصبح على خير " .


:


:

:

دخل الشقه وجسمه مهدود من التعب ، أو لأنه من الصبح ما ريح جسمه ..
دخل الصاله إللي نورها خافت ..
ومافيها أحد ..
نـاظر بـغرفة لمى ..
آه بس متى أتخلص منك وأفتك ..
حاس إنك إنتي إللي مسببه ضيق خـاطري ..
لف ودخل المجلس العادي اللي مخصص للشباب إذا جاوا عنده ..
وجلس ع الكنب وآصدر تنهيده طويله من أعمـاقه ..
تمدد ع الكنب بتعب وحاس إنه بس يبي ينام .. مع إنه جوعان ..
لكن من شوقه للنوم ، أنسدت نفسيته ..



:
:



دخلت الغرفه وفكرهـا مع أخوها إللـي يبي يبعد بـأي وسيله عن ذكرى رحيل ..
آه يـا رحيل وش سويتي بأخوي ..
مع إني أشوفه يخفي حزنه عنـا ، لكـن كل شي بـاين بعيونك يـا سعود ..
دخلت غرفة الدانه بعد مـاطرقت الباب وسمعت صوت أختها :" تفضل "
شـافت أختها جالسه عَ التسريحه وتمشط شعرها المبلل ، ناظرت بالريم وثم رجعت نظرها للمرآيه ..
تمددت الريم على سرير الدانه ..
الدانه :" الريم ؟ وش فيك ؟ "
تنهدت بعمق :" سعود "
الدانه إللي أدارات بجسمها حتى تشوف أختها بعد ما كانت معطيتها ظهرها ، وقالت بإهتمام واضح :" وش فيه ؟"
الريم وهي تناظر السقف :" يبي ينقل للشرقيه ، وتكون جيّاته للرياض زياره وبس "
الدانه وهي توسع عيونها :" وليه طيــب ؟!! "
الريم :" أنـا حاسه إنه يبي يروح للشرقيه عشان ينسى رحيل بالمره ، لأنه شكله يأس من رجعتها مع إنه ما حاول يتكلم مع أخوها مره ثانيه ؛ وقال بكره بيروح للشرقيه ويجي للرياض كل ثلاث أسـابيع يومين أو ثلاثة أيام . "
الدانه ماهي مصدقه إللي قاعد يصير :" مو معقوله سعود كذا ، لهدرجه ضعف عشان رحيل ، ما خبرت سعود كذا ، خبري فيه قوي وصبور ، ما توصل فيه كذا ( كملت وهي تهز راسها بعدم إستيعاب ) بس لا مـا أظن كذا ، أكيد إنه عشان أشغال ، وهي إللي حدته على إنه يروح للشرقيه ، وإحنا شبكنا كل شي ببعض إنه يبي يروح عشان ينسى رحيل وكل شي يذكره برحيل "
الريم وهي تجلس وعاقده حواجبها :" مادري ،، يمكن كلامك صحيح "
الدانه :" المهم إنتي ما عليك ، وإحنا راح نتأقلم على هالموال ، ولا تنسين إن سعود حتى وهو هنا يكون أغلب وقته برى وبالشغل ، ودايم مشغول عنا ، ع الأقل لا صار هناك ورجع لنا يوم يومين بهالطريقه راح يتقرب منا أكثر ويترك الشغل كله بالشرقيه ، ويفضى لنا لا صار بالرياض " كانت الدانه تقول هالكلام حتى تقنع الريم إللي تعلقت برحيل وراحت لأهلها خلاص ومالها رجعه ويالله أستوعبت الريم بأن رحيل خلاص ماهي زوجة أخوها بَل طليقته ، واللحين أخوها الوحيد بيتركهم .
الريم إللي بدت تقتنع بكلام أختها ، هزت راسها وهي تفكر شلون بتتعود على أن سعود يكون بعيد عنهم ويكون بالشرقيه ، صحيح الشرقيه قريب لكن هي متعوده يكون أخوها بالبيت وتشوفه بآخر الليل راجع من الشغل تعبان ، وحتى إذا سافر هي عارفه إنه راح يرجع ، وراح تفقده كثير ..
وقفت الريم :" يلا أنا ما أطول عليك ، بروح أنام عشان أصحى بدري وأسلم على سعود قبل ما يمشي ."
الدانه :" اوكي ، وأنا بعد أبي أنام عشان أصحى بدري ، بس المشكله اللحين الوقت متأخر ، مدري نصحى ولا لا "
الريم :" لا لاتحاتين أنا بوقت المنبه وبصحيك ( كملت وهي تطلع وتتثاوب ) يلا تصبحين على خير "
الدانه وهي تتمدد على السرير :" وإنتي من أهله ، وسكري الباب وراك "
طلعت الريم بدون ما تسكر الباب عناد لـ الدانه ..
الدانه بطفش وهي ترفع اللحاف عنها ، وقالت بطفش :" يالله يالريم والله مالك داعي " قالت جملتها وهي تسمع الريم إللي تضحك ، وسمعت صوت باب غرفة الريم تّـتسكر ..
وسكرت الدانه الباب ورجعت للسرير ، وبدت تغوص بـأعماق أفكارها حتى غفت عينها .

:

:

:

يتبع الجزء

* اليـوم الثاني ، 8:05 صبـاحاً


نزل تحت وماسك شماغه وعقاله بإيد ، والإيد الثـانيه يعدل ازارير ثوبه العلويه ..
دخل غرفة الطعـام ، شـاف أهله جالسين ، وقال وهو يرسم إبتسامه على وجهه :" صباح الخير . "
:" صبـاح النور . "
قالت أمه وهي تأشر بالمكان إللي جنبها :" تعال يمه سعود ، تعال أجلس هنا ."
جلس بالمكان إللي أشرت عليه أمه ، وقال :" أخباركم يالغالين ؟ "
أبو سعود :" بخير يابوك ، ها ماشي اليوم ؟ "
سعود وهو يـاخذ كوب الحليب من أمه :" أي والله ماشي " قال جملته وهو يسمع تنهيدة أمه ، ناظرها وأبتسم ..
سعود وهو يحط ( يضع ) إيده على كتف أمه :" يمه ، لا تحاتين أنا كل آخر أسبوع هنا ، وكل يوم بكلمك ، وإنتوا بعد بتكلموني ، بس لا تضيقين خاطرك يالغاليه وتخليني أكنسل مره وحده . "
أم سعود :" لا يمه روح وإنت مرتاح ، وأن شاء الله توعدني إنك كل أسبوع هنا ."
أبتسم لها :" إن شاء الله أوعدك ، وأنا أقدر أصلاً أصبر أكثر من أسبوعين ما أشوفك . "
أم سعود بحب :" الله يخليك لي ياوليدي ، يلا يا يمه أفطر وراك مشوار ."
بعد ما خلص سعود من الفطور ، قال وهو يوقف :" الحمد الله ."
أم سعود وهي توقف معه :" بالعافيه "
بعد ما غسل سعود إيدينه ، راح للصاله عند أبوه إللي يقرأ جريده بنظره الضعيف ولابس نظارات ومضيق عيونه ..
قال سعود :" يلا يا يبه ، أنا ماشي "
وقف أبوه وهو يبتسم :" الله يستر عليك ويوفقك ، بس هاه كل شوي أبيك تكلم نتطمن عليك ."
سعود :" إن شاء الله لا توصي " راح وباس راس أبوه وإيده ..
ولف وشاف أمه تناظره ، وراح لها وباس راسها وإيدها ، وضمته وهي تحاول إنها تتماسك بقد ما تقدر .
سمعها تقول :" أنتبه لعمرك يمه "
سعود وهو يناظرها :" إن شاء الله ، وماصيك على نفسك وعلى أبوي ( كمل وهو يحاول يستعجل حتى يطلع ) يلا ما أبي اتأخر ، تامروني بشي يالغالين "
أبو سعود :" أبد مانبي غير سلامتك "
سعود :" ربي يسلمك "
أم سعود :" إلا وين شنطتك ؟ "
سعود :" أنا من البارح حطيتها بالسياره "
أم سعود :" زين سويت "
سعود وهو يلبس نظارته الشمسيه :" يلا مع السلامه ، وسلموا لي على البنات "
:" مع السلامه "
طلع وهو يسمع أمه إللي تدعي له من قلب :" الله يستر عليك يا ولدي ، الله يستر عليك ويسهل دربك . "
بعد ماطلع سعود ، نزلت دموع أم سعود ...
أبو سعود :" يـا أم سعود ترى ماله داعي هالدموع ، والشرقيه قريبه ، و إن شاء الله كل أسبوع تلاقينه هنا "
أم سعود :" هذا ولدي الوحيد وشلون ماتبيني أبكي عليه ....."
قاطعها أبو سعود إللي شوي ويعصب من كلام زوجته :" يامره إنتي وش تقولين ، وش هالكلام ، ولدك الوحيد وربي يطول بعمره إن شاء الله ويخليه لنا ،، وأمحسي دموعك لا عاد أشوفها " دخلت الدانه على جملة ابوها ..
وقالت وهي تناظرهم مستغربه :" السلام عليكم "
:" عليكم السلام "
قالت وهي تناظر أمها :" وش فيكم ؟!! وش صاير ؟! "
أبو سعود :" مو صاير شي ، بس سعود راح للشرقيه من شوي وأمك جالسه تبكي . "
أرتاحت الدانه على أن هالدموع مو على شي صاير :" أها ، يا حرام ماسلمت عليه قبل ما يمشي ."
أبو سعود :" إن شاء الله بيجي وتتعودون على هالموال ، ولا هو أول مره سعود يروح . "



:

:

:


طلعت من غرفتها وشافت أخوها جالس بالصاله إللي قدام غرفتها وسرحان ..
قالت :" صباح الخير "
ناظرها بسرعه بعد ما صحته من سرحانه ، قال ببلاهه :" هلا ! صباح النور "
جلست بكنبه مقابلته ، وقالت بكسل :" متى صحيت ؟ "
رائد وهو يسند جسمه على ورا :" 6 الفجر "
آسيل :" وش عندك صاحي ؟ "
رائد :" ماعندي شي ، صحيت وأنا أبي النوم ، بس مانمت ."
أبتسمت له ، وقالت :" أيه رائد ؟ "
ناظرها بهدوء :" آمري ؟ "
آسيل :" ما يامر عليك عدو ( كملت وهي تخفض درجة صوتها ) أبيك اليوم توصلني لرحيل . " قالت جملتها وهي تتفحص ملامح وجهه إللي تغيرت لملامح ونظرات ماعرفت تفسرها .
قال يردد أسمها :" رحيل ؟ أحم ، طيب ، كلميني متى ما بغيتي تروحين . " قال جملته ووقف ، ودخل غرفته ..
بعد ما راح منها ، زفرت اسيل بتنهيده من قلب على حال أخوها ، إللي أكيد يفكر إذا خطب رحيل ، بتوافق عليه ولا لا ، هذا إللي أكيد يفكر فيه أخوها ..



:



:



طلع من الحمام ( عزكم الله ) بعد ما توضـأ ، ودخل المجلس عشان يصلي الفجر ..
بعد ما صلى ، طلع عَ الصاله وشـافها جالسه تتابع التلفزيون ..
وأنتبهت عليه ، وناظرته ..
ناظر بالطاوله اللي قدامه الخاليه وناظرها ، وقال حمد بسخريه :" وين الفطور ؟ "
نزلت راسها بفشيله :" آآ أنت تعرف إني مـا أعرف شي بالمطبخ ...."
قاطعها وعيونه شوي وتطلع من مكانها :" نعــم ! يعني اللحين تبين تفهميني إنك ما تعرفين تسوين حتى فطور "
هزت راسها بـ( إيه )
حمد بقهر :" بالله ما تقولين لي شلون بعيش مع وحده مثلك ؟ ، ولا شي فيك زين ( شافها رفعت نظرها على جملته ) أسمعيني زين .. من اليوم ما عاد فيه دلع إللي متعوده عليه في بيت أهلك ، وكل شي يخص المطبخ أنا بجيبه لكن إنتي إللي عليك تطبخين وتتعلمين حالك حال غيرك . "
لمى وهي عاقده حواجبها :" بس أنا ما أعرف ! "
حمد ببرود :" بس أنا بجيب لك كُتب للطبخ تتعلمين منها "
ولف وطلع من الشقه تاركها وسط تفكيرها ، وهي تطرح على نفسها عدة أسئله ومن أهمها كيف بتعرف تطبخ وهي تخاف من الفُرن نفسه ..!







* العصر

طلعت رحيل من الحمام ( عزكم الله ) ولافه الروب على جسمها بإحكام ..
وجلست قدام التسريحه وهي تسحب المنشفه الصغيره من راسها ، وبدا ينزل شعرها المتبلل على أكتافها وظهرها ، وبدت تحركه بالمنشفه بطريقه سريعه ..
وقفت وهي تسمع رنين جوالها ، راحت له ورفعته وهي تشوف أسم آسيل ، أبتسمت ..
ردت بصوت مُرحب :" هلا والله ، الله حيها "
آسيل :" هلا فيك أكثر يالغاليه ويحييك ويبقيك ، وش أخبارك ؟ "
رحيل :" بخير يوم سمعت صوتك ، و إنتي وشلونك ، وشلون الأهل ؟ "
آسيل :" والله كلهم بخير الحمد الله ، يوه وش كثر مشتـاقه لك"
رحيل :" وأنا بعد ، والله من زمان عنك . "
آسيل :" والله .. يعني مشتاقه لي ؟ "
رحيل :" أي والله .. كثير "
آسيل :" ههههههه يالبى قلبك ، إيه ترا اليوم بجيك . "
رحيل بفرح باين بصوتها :" والله !! "
آسيل :"أي والله . "
رحيل :" يامرحبــا والله ومسهلا ، بتنورين البيت . "
اسيل :" منور بأهله حبيبتي ،، يلا أنا أتصلت عليك عشان أعطيك خبر وأسكر ، يلا تامريني بشي ياحلوه ؟ "
رحيل :" أبد أبي سلامتك ، ولا تتأخرين "
اسيل :" تامرين ، يلا مع السلامه "
رحيل :" الله معك "



:


:


:" الله يستر عليك ياولدي ويوفقك وين ما رحت ، وأنتبه على عمرك فديتك .....يوصل سلامك ...... مع السلامه " وسكرت وهي تناظر بالريم اللي دخلت عليها وهي تكلم ولدها .
الريم وهي موسعه عيونها :" سعود راح ؟!! "
هزت أمها راسها بـ( أيه ) :" ويسلم عليك "
الريم صرخت لا شعورياً :" وليه ما صحيتوني ؟!!! "
دخلت الدانه وبإيدها صينيه فيها كـاسة عصير :" أوص ! حتى أنا ما سلمت عليه قبل ما يمشي " نزلت الصينيه وجلست ..
جلست الريم بقهر وهي تبي تبكي :" إهئ ، وربي قهر ، المشكله أنا موّقته المنبه بس سكرته يوم سبب لي الأزعاج وكملتها نومه "
الدانه :" وأنا أعتمدت عليك ، على بالي بتصحيني ، وصحيت بعد ماطلع بدقايق "
تنهدت أم سعود :" ما اقول غير ربي يستر عليه ويوفقه بشغله ، هو كل همه شغله وبس ( وقفت ) خلوني أروح أصلي ، وإنتوا بعد يا بنات صلوا " وطلعت من الصاله ..
الريم وهي توقف :" اففف قهر !! "

:

:

:


دخل بصينيه القهوه ، ويناظر بولد عمه إللي جالس وشابك إيدينه ببعض وسرحـان ، أبتسم مسـاعد وهو يناظره ..
نزل الصينيه عَ الأرض :" ها سعود وش تفكر فيه ؟ "
أبتسم :" يعني وش أفكر فيه ؟ أمي ( سكت شوي ) كلمتها من شوي وربي حسيت إن ودي أرجع للرياض "
جلس مساعد عَ الأرض مقابل للصينيه :" الله يخليها لك ، و إنت لازم تتعود على هالشي ، مو إنت إللي أخترت إنك تعيش بالشرقيه ؟ ولازم تتحمل أختيارك "
هز راسه بإقتناع ، ونزل من الكنب وجلس ع الأرض ، وقال يبي يغير الموضوع :" إلا شخبار ولدك حمَود ؟ "
أبتسم مساعد بحب وهو يمد فنجان القهوه لـسعود :" يالبى قلبه ، طالع عليك "
ضحك سعود وهو ياخذ الفنجان :" ولا بعد عشرين سنه ، لاتحاول إن ولدك يطلع علي ،، يبطي "
مساعد :" أصلاً إنت يحصلّك واحد أسمه حمَود بن مساعد يشبهك ، ولا في الأحلام حبيبي ، لكني تنازلت وحاولت إني أرفع من معنوياتك شوي وقلت إن ولدي المزيون يشبهك ، ولكن بالحقيقه هو الأحلى "
ضحك سعود بصوت عالي وهو يسمع مساعد يمدح في ولده ،إللي عمره ما يقارب 3 سنوات ودبدوب وشعره خفيف وعيونه صغيره ، والحلو فيه خدوده ..


:

:




طلعت من غرفتها وهي لابسه عبـايتها ، ورافعه شعرها على فوق ، وماسكه بإيدها جوالها وحاطته عند أذنها :" مرحبا ،، وينك ؟ "
طلع من غرفته وهو يناظرها :" قدامك "
التفتت وهي تشوفه يسكر باب جناحه ، وينزل جواله من أذنه ويناظرها :" ههههههه على بالي برى "
أبتسم رائد وهو يمشي لناحيتها :" لا والله من الصباح وأنا بغرفتي ، نمت لي ساعتين "
آسيل :" حلو "
رائد :" ها تمشين ؟ "
أبتسمت :" إيه ، جاهز ؟ "
رائد :" إيه " نزل تحت ، وهي تتبعه ..
دخلوا الصاله وشافوا أهلهم ، قال :" السلام عليكم "
:" وعليكم السلام "
ناظر أبو رائد بـ آسيل :" على وين ؟ "
أبتسمت بحب لأبوها :" أبد .. بزور رحيل " قالت جملتها وهي تناظر أمها إللي لوت فمها على طاري رحيل ..
أبو رائد :" أها ،، أجل وصلي سلامي لها ، وعلى فكره ترى إبيك بموضوع ، لا رجعتي بقوله لك "
أستغربت آسيل الموضوع إللي أبوها يبي يكلمها فيه :" إن شاء الله "
رائد :" يلا آسيل أنتظرك بالسياره " ناظر أمه إللي تناظره بنظرات غريبه ..
ولف وطلع ..
وأستأذنت آسيل وطلعت لأخوها ..
ركبت آسيل ، وحرك رائد على بيت عمه ..
وشغل المُسجل على أغنية أشوف الوقت لماجد المهندس ..

أشوف الوقت عيا ما صفالي
يناكدني وانا عيني شقيه
وعز النفس عندي راس مالي
وحظي ياملا عزومه رديه
أجاملكم و أنا ماني بسالي
مشاكل في ضميري داخليه
علينا جارت أحكام الليالي
وهدتنا الحزن شكرا عالهديه

دخيل الله من هم جرالي
وخطا المخطي يجازى بالخطيه
عذول الناس أنا مالك ومالي
ماتدري الزمن وش سوى فيا
ابطلب خالقن بالكون عالي
يسهلها لنا في كل نيه
طويت من الحياه اكثر احبالي
الموت أهون ولا درب الدنيه .


تنهد رائد وهو يسمع الكلمات إللي توصف شعوره ..
أنتبهت آسيل على تنهادة رائد إللي طالعه من قلب ، وهي تسمع الكلمات وعرفت إن أخوها منسجم مع الأغنيه ..
وصلوا لبيت أبو خالد ، ودخل رائد الحوش ،، ووقف في منتصفه ..
رائد :" قبل لا تنزلين ."
ناظرته وهي عارفه إن عنده شي يبي يقوله :" هلا "
قال بتردد :" آآ .. أبيك توصلين لها سلامي ،، وقولي لها ربي يعوضك إن شاء الله غير سعود ويعوضك باللي أحسن منه "
ناظرت فيه شوي تبي تشوف إللي بعيون رائد ، لكن ما لقت تفسير ، هل هو حزين أو فرحـان ، لكن نظرته مو حزينه ولا فرحانه ، نظراته غامضه ..
شافها تناظره ..
ناظر قدام بهدوء مبالغ فيه ..
أنتبهت على نفسها ، وهزت راسها ، وقالت وهي تنزل :" مع السلامه " وسكرت الباب بدون لا تسمع رده لأنه اصلاً ما رد عليها ..
وحرك سيارته ، وطلع من بيت عمه ..





يتبع الجزءَ ..