المنتدى :
الارشيف
الى كل عشاق روايات احلام
بسم الله الرحمن الرحيم
الى كل عشاق روايات احلام او الروايات الرومانسية المترجمة بشكل عام ....
بصراحة انا مش جايبة رواية جديدة للتحميل ولا حاجة زي معظم الاعضاء بس انا كان فيه كلمتين في نفسي عايزة اقولهم من يوم ما بدأت أعرف الروايات دي ...
وقبل اي حاجة لازم اعترف ان انا كنت واحدة من مدمني الروايات الرومانسية المترجمة من نوعية احلام وعبير وخلافه
بس انا بعد ماخدت كفايتي من الروايات دي وقرأت منها حوالي تلاتين عدد و اكتر اكتشفت حاجه مهمة جدا خلتني اتخلص من كل الروايات اللي كانت عندي واللي بتنتمي للنوعية دي ...
الحقيقة ان انا عندي 18 سنة ولغاية فترة قريبة جدا كنت مش مرتبطة يعني تجاربي العاطفية في الحياة كانت زيرو وزي معظم البنات اللي زيي اللي بيلاقو في الرويات دي صورة وردية للاحلام اللي نفسهم يحققوها على ارض الواقع ووصف خيالي لفارس الاحلام اللي بيتمنوه ادمنت روايات احلام
وشوية شوية اتعودت عليها وبقت شئ اساسي في حياتي اليومية
بس انا عايزة اطلب منكو طلب واحد بس ...
انا عايزة كل واحدة تقف مع نفسها خمس دقايق وتبص للمسألة بموضوعية وتفكر فيها بعقل ...
انت يوم ما هاتختاري الانسان اللي هاتعيشي معاه بقيت عمرك وهاتأمنيه على نفسك وعلى ولادك هتختاريه عشان اخلاقه ورجولته وانسانيته وللا علشان عضلاته اللي هاتقطع القميص وشعر صدره اللي فاتح عليه الزراير وصوته اللي زي صوت طرزان !
الجواب طبعا معروف بس السؤال هنا ما دام كلنا عارفين ان كل الكلام اللي في الروايات ده كلام فاضي وان الاحداث الهايفة دي كلها ضحك ع العقول و كلام تهييس في تهييس بنقراها وبنضيع فيها وقتنا ليه !
انا صحيح خطوبتي بعد كام يوم -عقبالكو - بس صدقوني انا بطلت الروايات دي من زمان من قبل حتى ما اعرف خطيبي بس كمان بعد ما عرفته وحبيته اتأكدت فعلا ان الحب الحقيقي غير اللي بنقراه خالص وان العملية مش بنت مذة وواد عايش حياته في الجيم
الحكاية غير كده خالص ...
وبكرة تعرفوا
وتقولو د\ساره قالت ...
متنسونيش في ردودكو الحلوة
سلام .....
|