كاتب الموضوع :
دانة الحمادي
المنتدى :
الارشيف
لافي: يقول انتو وين.. وايش تعملو
ليال بحده: يقول حنا وين.. هذي مقدور عليها.. وصار انه نسى.. بس ايش تعملو هذي ايش تقصد فيها
لافي باستغراب: ايش اقصد؟
ليال بكل جرائه: ايوا ايش تقصد.. ابي اعرف ايش تقصد
لافي يعاند قدامها حتى مايبين انها كسرته بسؤالها: سؤالي واضح
ليال: ايش رايك انا اجاوبك عليه
لافي بعناد: تفضلي
ليال: نعمل الشي الي لو انت بغيت تعمله كنت اخذت زوجتك ورحتو لكمان ماحد عرف عنكم انتو وين
لافي مصدوم: انتي وقحه
ليال: انت علمتني كذا.. نسيت؟ هذي حياتي الخاصه الي المفروض ماحد يعرف عنها شي.. هذي كلمتك لي.. ناصر انا داخل اجهز اغراضنا ابي ارجع الان
لافي بحده: استني هنا
ليال: انا ابي اعتذر عن الحاله الي جاتني هذا بالاول.. بالثاني في لحظه نسيت انه ناصر وحيدك.. عارفه غلاة الولد اذا كان وحيد اهله.. ابي منك تعذر فقدي لولدي.. لاتلومني.. انا بعد ما اقدر الومك على قلقك على ناصر
مشيت عنهم.. دخلت الغرفه وانا اول مره من خسرت ولدي ابكي.. اليوم شفت غلاة ناصر بعيون لافي.. كيف نسيت انه وحيد اهله.. كيف نسيت انه لويبتعد عنهم شبر بيظلو يقلقو عليه.. لحبهم فيه وخوفهم عليه.. وهذا ابوه فكيف امه.. رفعت التلفون وطلبت البيت كلمت ام ناصر وطمنتها على ناصر.. قلت لها مسافة الطريق وبنكون عندهم.. اعتذرت منها ما ابي احرم ام من ولدها كفايه حرماني من ولدي.. جهزت نفسي وطلعت لهم.. لافي كان جالس على الكرسي مصدوم مني.. صحيح كنت وقحه معاه.. كان ودي اني اعتذر على وقحاتي بس تراجعت
ليال: ناصر يلا ياروحي.. خالتي قلقه عليك انا كلمتها وهي تستناك
لافي: ليال انا حجزت لكم هنا اسبوع
ليال بضيق: لا ماله داعي.. سعادتي هناك بالبيت معاكم
لافي: ليال..
ليال ماعطته وجه: يلا يا ناصر.. عشان خاطري.. ابيك تروح لامك تراهي مقطعه نفسها عليك
ناصر بكل حنان: انا كلمتها.. وقالت لي انها كلمتك.. وخلاص الامور طيبه حبيبتي.. ماحد زعلان مننا
ليال: معلش خلينا نرجع الله يخليك
لافي بحنان: ليال.. حبيبتي انتو بتقعدو هنا اسبوع عسل.. وبكره بنجي انا وام ناصر والبنات بنسهر مع بعض.. ايش تبين بعد
ليال بحزن: ابي سلامتك
ناصر: يلا ايش تبين بعد هذا عشقك ويدلعك يلا خلاص امسحي دموعك ويلا
ليال: عندي شرط
ناصر: اطلبي عيوني
ليال: عمي يعشيني على حسابه
لافي: ههههههههههههه ماطلبتي غالي.. واحلى لابوستر انتي معزومه عليه اليوم
ناصر: ياي ياي.. غدا وعشى احلى دلع
ليال باستغراب: مين قالك على حكاية الابوستر
لافي: هذا شغلي عاد
شفتها بعيونه.. شفتها كان يكذب.. اكيد ناصر ما قال له.. ناصر مايتكلم عن حياتنا ابد.. واضحه يا ليال واضحه.. اكيد السايق.. ايوااااااااا السايق.. صح اجل منين عرف اننا هنا.. ما اصدق .. هو من البدايه عارف بتحركاتنا.. ايش موضوع هالمسرحيه ذي.. ايش صاير.. اقنعت نفسي بالغصب حتى اعدي الموضوع.. بس التفكير شغلني كثير.. ماكنت لاقيه تفسير لكل الي صار.. قلت ابي اريح دماغي واعيش حياتي.. واذا الله كاتب لي اعرف بعرف من غير ما اتعب نفسي.. كفايه علي الي انا فيه.. لافي حجز لنا بمطعم راقي ورحنا له.. وطبعا الابوستر هو سيد الاطباق الي قدامي.. رحت استمتع بالاكل وهم كانو يتكلمو بالشغل.. وقتها لافي صار يكلمني
لافي: ماخذه قلبك الدراسه ياليال
ليال: الحمدلله.. الله محببني فيها
لافي: طيب ليه ادارة الاعمال.. ليه تحبي التجاره كذا
ليال بخبث: من كنت صغيره كان ودي افتح صالون نسائي.. واديره بنفسي.. عاد قلت ادير شي ما اعرف كيف اتصرف معاه
لافي: كنتي تجيبي من عنده القدره في الاداره وتريحي نفسك
ليال: وانا ايش يضمني الي بجيبها ما تلعب علي.. ياعمي الحلال اذا مالقى راعيه يديره يضيع.
لافي: يعني كل طموحك تفتحي صالون نسائي بس
ليال: تبي الصراحه
لافي: اكيد
ليال: هذا كل الي ابيه
لافي: وايش قصة الكمبيوتر وبرامجه الكامله الي تبين تتعلميها
ليال: كنت اسمع من البنات عن الفوتوشوب وعن الابداعات الجميله الي ممكن تتعمل على هالبرنامج.. عاد صالون نسائي اكيد محتاج لدعايه وتصميم.. وانا احب هالشي
لافي: أي مكتب ممكن يعملك الف تصميم وانتي تختاري الي تبينه.. من غير ماتتعبي نفسك للدراسه
ليال: انا ما احب اعتمد على غيري بشغلي.. احب شغلي اعمله بيدي.. تصميمي الي بعمله اكيد انه الشركه الي بروح لها بتطوره وتبيعه على الف غيري.. وهالشي انا مابيه
لافي: حتى لو انت صممتيه ونفذتيه.. بيجي من يشوفه وبيطوره
ليال: بس بعد ما اعرضه.. ويكون لي علامه تجاريه معروفه..بعدين أي احد بيشوف أي تصميم مشابه لتصميمي مطور طبعا بيقول.. هذا يشبه تصميم ليال
لافي: اقنعتيني
ناصر بالفرنسي: انا قلت انه الدراسه والشغل بيطلعوها من الي هي فيه.. ومارح يأثر هالشي على شغلنا ابد
لافي: بس انت قلت انك ماتبيها تشتغل
ناصر: اذا الشغل بيطلعها من حالة الاكتئاب الي هي فيها ماعندي مانع
لافي: مع انها اقنعتني.. بس لسا خايف من موضوع دراستها هذا.. ماراح اقدر استفيد منها بشغلنا ابد.. وخوفي لا تطور روحها وتكسرني
ناصر: صدقني البنت ابسط من الي انت تفكر فيه.. وبعدين بتقدر تفيدنا اذا تعلقت بالشغل اكيد.. مصلحتنا من مصلحتها
لافي: صحيح بسيطه.. من شوي وجع قلبي كلامها على ولدها الي فقدته
ناصر: انا الي اشوفه منها يذبحني باليوم اكثر من مره
لافي: الدكتور ما طمنك
ناصر: الا طمني وطمنها.. ولو غير كذا ماتشوفها تضحك
لافي يرجع للغته العربيه: خلاص بكره تدق عليهم ويجهزو اوراقهم .. انا موافق على هالصفقه
ناصر: بس لسا يبغي لها مراجعه.. لجنة الحسابات ماردت علينا
لافي: ترد اللجنه.. ونتحرك
ناصر: انت تامر
لافي: ليال لاتاخذي بخاطرك اننا نتكلم بلغه ما تفهميها
ليال: خذ راحتك هذا شغل.. بس اذا اكتشفت انك بتزوجه من وراي.. فيها كلام ثاني
لافي: هههههههههههههه هذي عاد الي ما اقدر عليه فيها.. شوفي كيف يعشق ترابك
ليال بلا مبالاه: اه شايفه
ناصر ينتبه: ايش هالنغمه الجديده هذي
ليال: أي نغمه اقول اني شايفه
ناصر: تنكري اني اموت بترابك
ليال: لا ما انكر بس اقول قاعده افكر اني اتعلم هاللغه حتى اعرف يمكن انكم تغازلو قليلة الحيا الي جالسه توزع ابتسامات عليكم من اول ماجلسنا
لافي: هههههههههههههههه بدينا الغيره.. اقول خلينا نمشي قبل لا تقلبي ليلة هالمسكين
ليال: اقول ماهي ليلته لحاله.. وليلة الي معاه بعد
لافي يضحك: والي معاه ايش دخله
ليال: اقول تراه حلالي بعد ولا ينسى
لافي: اقول زوجك هو الي حلالك.. بس غيره مالك دخل فيه
ليال وهي تناظر عيونه: اقول خاف من غيرتي عليك ياعمي .. ترا غيرتي ممكن تحرق الكلبه الي قاعده تناظر وانا جالسه
لافي: هههههههههههههه ناصر بعد زوجتك عني.. قول لها مالها دخل فيني
ناصر: اقول لها مالها دخل فيك وانت مبسوط من غيرتها
ليال: اقول خلونا نمشي بالطيب لارتكب جنايه اليله
لافي: ول ول جنايه مره وحده
ليال: ايوا مره وحده.. وبنوصلك البيت اول شي وبعدين نروح الفندق حتى اتطمن انك بيد حرمتك ايش قلت
لافي: ههههههههههههههههههه حتى حرمتي ماتغير علي كذا
ليال: خلني اقول لها عن الحلوة الي تناظرك وانت تشو غيرتها
لافي: هههههههههههههههه تعمليها يعني؟
ليال: لا والله ما اعملها.. بس ممكن اذا زادت غيرتي عليك اخذ حق خالتي بيدي
لافي: ههههههههههههههههههههه لا على كذا نمشي احسن.. وخلي خالتك تغطيني.. اكيد ماراح تشرق علي شمس الصبح
ليال: هههههههههههههه احسن
ركبت السياره.. وانا بعد منتصره.. ساعات احس انه مافي احسن منه وقلبه ذا مافي اطيب منه بس بسرعه اكتشف العكس.. ادري بروحي كنت منافقه معاه الليله كثير.. لكني ارد له المعامله هو كمان منافق في تعامله معاي.. اجل المسرحيه الي عملها بالفندق كانت عشان دراستي؟ .. دراستي بايش ممكن تخوفه.. وايش الشغل الي ناصر يتكلم عنه ولافي يبيني اني اكون قريبه منه.. وايش هو الشي الي خايف اني اكسره فيه.. بس زين عملت الي مثلت عليهم الغيره.. ولاكنت انفضحت.. الان انا مصره اني اتابع دراستي.
رجعنا الفندق.. صحيح اننا ماطولنا.. بس كنت محتاجه للنوم.. غيرت ملابسي.. وفتحت ذراع ناصر ورميت نفسي فيه.. ونمت براحه.. صحيح ماصار لي زمان من صحيت بس حاجتي للنوم كانت اكبر من اني اقاوم اكيد جمسي يبي يعوض ليالي السهر.
صحيت الصبح.. فطرنا وبعد غزل ناصر الحلو اخذنا تاكسي وطلعنا.. كان الفندق قريب من الهايد بارك.. دخلنا الهايد بارك.. اسرني المنظر.. الشجر.. التصميم.. النافوره.. البحيره الصغيره.. الطيور.. النظافه.. التنظيم.. الهدوء.. الناس الي قاعده كل واحد في حاله.. محد له علاقه بالثاني.. الكل عايش مع نفسه.. العيال كيف يلعبو جنب اهاليهم صحيح فيه حركه صحيح فيه صوت.. بس مافيه ازعاج.. قعدنا في محل كان يكلمني في اشيا كثيره كنت استمع له اكثر ماكنت اتكلم.. ماهو عشان طبع فيني.. كان حذر.. وصلت في معاملتي معاك للحذر ياناصر.. خوفي من باكر زاد رعبي.. كنت افكر اني افاتحه بالي اشوفه من ابوه.. بعدين اتردد.. الحذر كان هاجس عندي.. بحياتي ماعرفت الحذر.. كنت عايشه بأمان مع ابوي.. الوضع هنا غير.. وجودي مع لافي يحسسني بالخوف.. من ايش ما اعرف.
قضينا الاسبوع بالفندق وطلعنا منه وانا عايشه بين السعاده والحذر من أي خطوه جديده تكون بحياتي.. او غلطة لسان ممكن اقولها ولافي يكشفني.. فضلت اني التزم الهدوء.. اكون مستمعه أأمن لي.
داومت بالجامعه.. ونفس اسلوبي القديم بالجامعه في السعوديه.. اتبعته هنا بلندن بعد.. كانت لهفتي ماهي للشهاده بقدر ماكانت للمعرفه.. كنت ابي اعرف كيف اتصرف.. كيف اكتشف.. كيف ابدع.. كيف انتج.. اشيا كثيره حددتها.. ومشيت على خطة سير.. في ليله جلست جنب الشباك.. وانا اتأمل المكان سرحت بعيد.. كنت ابي اتعلم اقرا حركة الشفايف.. كنت خايفه من هالخطوه.. ادري انها ممكن تخرب بيتي.. اكيد اذا قلت لناصر ماراح يوافق.. وانا من نفسي ما اقدر اتصرف.. وحتى لو تصرفت وحتى لو عملت الي ابيه من غير لا يعرف ناصر.. كيف بلاقي المكان الي يعلمني.. انا من البدايه كنت معتمده على ناصر بكل شي هو الي كان يدور لي عن احسن الاماكن وهو كان يحجز لي.. كيف بتصرف الان.. وكيف بغطي على الوقت الي بكون فيه غايبه.. وكيف وكيف وكيف.. قمت من مكاني ورحت ساجده لله.. سجودي المعتاد.. طلبت الكثير من الله ودايما يحقق لي الي ابيه.. ياربي ياحبيبي في حياتي ماطلبتك ورديتني.. اذا كان لي خير في الي افكر فيه.. قربني منه.. واذا كان لي شر.. ابعدني عنه.. ظليت على سجودي مده كبيره.. احس اني قضيت وقت كبير وانا كذا.. حسيت بيد ناصر تلمسني
ناصر بخوف: ليال انتي بخير؟
ليال ترفع راسها: بخير ياروحي.. مالك الخوف بعيونك
ناصر بحده: اخاف من سجودك
ليال تبتسم: تخاف من سجودي؟
ناصر: لانك تطولي فيه.. ليال لا تطولي كذا مره ثانيه.. قلبي ينقبض عليكي
ليال بحده: ناصر انت انجنيت.. هذا سجود.. ايش الي ينقبض قلبك منه
ناصر: انتي ليه تطولي كذا
ليال: لاني قريبه من ربي.. السجود ياناصر يقربني منه اكثر.. احب اتكلم معاه وادعيه
ناصر: الله يحقق لك الي تبينه.. ليال عشان خاطري لا تطولي كذا مره ثانيه
ليال: ليه طيب
ناصر: اخاف كل ما ابي اوعيكي.. تكوني................
ليال: ههههههههههههه اكون ايش.؟ مت!!
ناصر: حبيبتي لاتيجيبي هالطاري على لسانك.. ما احبه.. الله لا يبعدنا عن بعض
ليال: امين.. ابعد هالشي عن راسك يا ناصر.. اذا بيصير لا انا ولا انت بنقدر نأخره.. وبعدين يابختي اموت ساجده.. حبيبي.. الا سجودي.. امنعني عن كل شي .. الا سجودي
ناصر طول عمره يخاف علي.. من كل شي.. كان يحميني من كل شي الا ابوه.. بعد مده طويله.. يمكن بعد ما خلصت كورس بالجامعه.. ماني متذكره.. المهم كنت بالجامعه في يوم.. وكنت مخلصه وانتظر ناصر يجي ياخذني..كنت تعبانه وضايق خلقي.. عشان فيه ماده ما كنت فاهمتها.. او ماكنت مستوعبتها.. في حياتي ما مريت بهالشي.. اني ما استوعب ماصارت لي من قبل.. دخلت السياره وانا ماني قادره اتحمل حالي.. وهو بعد ماقصر راح يضايقني بكل وسيله قصده اني اضحك واغير من نفسيتي.. بس انا كنت ضايقه من حالي.. وتعبانه احس اني مجهده وابي ارتاح.. عزمني على الغدا ورفضت.. قال لي نتمشى شوي.. رفضت.. صرخت عليه من قلبي
ليال بحده: ناصر انت ماتفهم ابي ارجع ارتاح.. مو معقوله تعمل كذا اقولك احس بضيق انت جالس تزيد علي.. ماني طايقه روحي وانت جالس تستهبل
ناصر بحده: ليااااااااااااااااال.. تكلميني انا بهاللهجه
ليال: اقولك تعبانه.. تعباااااااااااااااااانه
زاد التوتر بيننا هذاك اليوم.. كنت ابي اصرخ.. بس حتى الصراخ ماهدى من توتري.. دخلت البيت وصعدت غرفتي.. صرت ابكي.. كنت اقول في نفسي.. هذا اكيد لاني ماتوفقت اني اتعلم حركة الشفايف بس انا ابي اتعلمها.. محتاجه اتعلمها.. ابي اعرف لافي ايش يقول.. كان الفضول بيذبحني.. نمت وانا ابكي.. صحيت على العصر.. ونفسيتي زادت على الاخر.. نزلت لهم تحت.. وانا قرفانه من نفسي.. دخل ناصر وقال لي
ناصر من غير نفس: جاهزه نمشي
ليال بقرف: نمشي فين
ناصر من غير حتى مايطالع فيها: عندك درس كومبيوتر.. غريبه انك نسيتي بالعاده الا دراستك ماتنسيها
ليال بحده: وانت هالشي مضايقك؟.. ليه ماقلت لي وانا اتركها لجل عيونك.. انت فاكر اني بطلع عن شورك؟.. اذا كنت منت راضي من الان انا تاركتها.. وانبسط ياناصر
ام ناصر تدخل عليهم: خير ياعيال مالكم؟
ناصر بحده: منتي صاحيه اليوم الظاهر تبين كف يصحيكي من غفلتك انت تكلمين زوجك يامدام
ليال بحده: وانت بعد تكلم زوجتك.. يا اخي ارحمني ارحمني
ناصر مستغرب: ارحمك من ايش.. والله منتي صاحيه
كنت ابكي بحرقه.. توتري يزيد.. وحالتي تزيد.. وماني طايقه اشوفه او اسمع صوته.. كان يزعجني وجوده.. يوترني.. دخل لافي لحظتها على صراخي مع ناصر.. راح يطالع فيني بغضب.. وانا كنت ارد له النظرات.. كنت ابي اذبحه.. لافي بعد ماني طايقته.. احس انه كاتم على انفاسي.. مسيطر على حركتي.. ساجني في بيته تحت سلطته.. كنت ابكي كأنه ميت لي عزيز.. اصرخ واصرخ في ناصر بس.. ماكنت اجيب اسم أي احد بلساني غيره.. حسيت بكره ناحيته غير طبيعي.. امه كانت واقفه حاجز بيني وبينه تمنعه عني.. ولافي كان متفرج على الي قاعد يصير بيني وبينه.. والبنات واقفين بعيد خايفين ولاهم فاهمين ايش الي حاصل.. لما لفيت عنه بطلع من غرفتي.. قدر يبعد امه ومسكني من كتفي وعطاني كف اغمى علي في وقتها من قوته.
فتحت عيني وليقيت نفسي في مكان غير المكان.. مغروس بيدي ابره محلول.. ليه؟ انا فين؟ ايش الي صار.. رحت ادور لقيت اني لحالي بهالغرفه.. رجعت راسي مره ثانيه ونمت.. صحيت بس عيوني لساها مغمضه.. ابي افتحها ماقدرت.. حسيت اني مخدره.. كنت اسمع اصوات حولي.. كنت انادي من غير لاتنفتح عيني
ليال: ناصر.. ناصر
ناصر: جنبك حبيبتي
ليال: ابي افتح عيني
ناصر: شويه وتصحين.. ارتاحي شوي
ليال: ايش الي صار
ناصر بفرح: طلعتي حامل يامجنونه.. بهدلتيني امس.. ايش اعمل فيكي
ماقدرت اسمع ايش قال نمت مره ثانيه.. صحيت بعدها بمده.. فتحت عيني.. شفتهم كلهم حولي واولهم ناصر الي كان يوزع الورد بالغرفه.. ماكنت حتى ابي ابتسم.. كنت لسا قرفانه منه.. قربت امه مني وباستني.. قرب لافي هو بعد وحضني.. بعدته عني وانا ماني طايقته
ليال: ابتعد عني تراك قرفتني
لافي: ههههههههههههههههههههههه انا بعد الله يعينني عليكي
ام ناصر: طيب وانا غير ولا زيهم
ليال بتعب: لا خالتي انتي غير.. ماني طايقتهم طلعيهم برا.. ما ابي اشوفهم.. ريحتهم تقلب الكبد
لافي: هههههههههههههههههه حاضر حاضر.. طالعين خلاص
ناصر: ياشين هالوحم والله ماخلاني افرح بولدي
ليال بلهفه: أي ولد
ناصر يقرب منها: ما سمعتيني وانا اقولك من اخر مره فتحتي فيها عينك
ليال بحده: خلك بعيد لا تقرب ريحتك قرف
ناصر: ههههههههههههههههه طيب وقفنا بعيد
ليال: ناصر اقولك.. قوم اطلع برا.. برا
ناصر: طيب ماتبين تعرفي ايش فيكي
ليال: ما ابي.. روح وارحمني ما ابي
ناصر: انتي حامل يا ليال
صدمني الي سمعته.. كنت ابي احضنه بس ريحته كانت قرف قرررررررررررررررررف.. اضحكو علي وعلى حالي.. كانت حالتي مأساه من جد.. قال لي ناصر
ناصر: بخليكي هنا لحد بكره.. نوف بتكون معاكي
يتبع
|
25-12-08, 08:35 PM
جديد مواضيع قسم الارشيف
العرض العادي
