السلام عليكم ورحمة الله وبركاته
كيف حالكم آل ليلاس
اليوم بأنقل لكم روايه أعجبتني ماهي طويله 18 بارت ومكتمله
انتهت قبل كم يوم ماحبيت أنقلها لكم من بدايتها خوفا من عدم اكتمالها
المهم الروايه أسلوب الكاتبه بسيط ممتع وفيه نضوج أتمنى تعجبكم
أسلوب الكاتبه يشبه أسلوب كاتبه اللي تعرف تشبه مين تقول تشبه مين
راح أنقل البارتات ورى بعض لأنها مكتمله
أتمنى لكم قراءة ممتعة

البارت ألاول *


المدينة: الرياض
المكان : بيت أبوي تحديدآ مجلس الرجال
الوقت : 4العصر

جلست رجال دار فيها كلام كثير مابين أبوي وعمي وولد عمي وأخواني
وبعد ماخصلت سوالفهم دخل عمي بصلب الموضوع .
يابو سعد حنا خطابه نبي ريم ل خالد وعساك ماتردنا
وكمل/ ولدنا أنت عمه وأبخص به .

أبوي وكأنه كان عنده خلفيه عن الموضوع
يامرحبا مليون وخالد والنعم وماني لاقي لبنتي أفضل منه .
وكمل/ خلوني أسالها وأعرف رايها وأرد لكم خبر .


" بكل بساطه هذا الموضوع "
هاذي كانت بداية كل شيء,هاذي البداية المبهمة لحياة ماأعرف كيف بتكون ؟

أسمي: ريم بنت محمد بن فلان الفلاني ( قبيلية )
عمري: 22سنة/ جامعية .
عاقلة لاأبعد الحدود,محايدة بكل شيء,كتومه,جميلةوذربة .

_

طلعت من غرفت أمي بعد مابخرتها بالعود وسكرت بابها,ومريت على أمي نورة
وأخوي الكبير سعد بالصالة,ونزلت البخور قدامه وأشرت له تبخر عساني فدوه .!
تربعت كالعاده على قهوتي وأنا أحلف على أمي أني لأصبها عليهم,أخذ سعد المبخرة وتبخر
وفردشماغه للعود وريحته ,ومده على أمي وتبخرت ونزلته وهي تمدح العود ونوعه..!

سعد بخاطره علم أعرفه وكنت أنتظر وش بيقول
ماطول وقال:ريم وش قلتي موافقه على خالد ولا لا / يعدل نسفة شماغه .
نزلت راسي لفناجيلي وأناأرتبها وبعد سكوت ماطول هو بعد قلت :الراي رأيك وراي أبوي.

يطالع فأمي ويقول: أنا والله أني موافق على خالد يستاهل .
وميمتي وفنجالها بيدها :أنشهد أنه يستاهل .
* يابخته أمي شهدت له.

على سوالف أمي وأخوي اذن المغرب وأنا مكانك سر ,ساكته بعد ماقلت رايي ,
جمعت أغراض قهوتي وقمت لمطبخي , رتبت ونظفت وسويت العشاء وحطيت راسي ونمت .
اليوم الثاني كان البيت على رهف أختي أللي اصغر مني ب سنتين , وكانت فرصه لي أجلس
مع أمي كالعاده,بس اللي يفرق ان فيه موضوع دسم نتكلم فيه .
في حوشنا قبل المغرب جالسه ومسانده ظهرها على الجدار وعن يسارها مركى
وجوالها العادي جدآواللي أغلب مكالماتها فيه ل أخواني قدامها,وقهوتها وقدوعها
وموية الصحه على سفرتها جلست وأنا أقول : يمه وين أبوي .
سؤالي مكان عشان اعرف فعلا وين ابوي لا كنت بضيع الاحراج اللي انا فيه أمي تنظر لي من أمس
نظرة غير ,نظرة شخص بيفقد ,نظرة فيها أمومة,حنيه ,والله ماعرف أوصفها كانت غريبه وبس !
جاوبت امي وبدت سوالفنا..
أمي: ياوليدي أنتي راضيه؟!!
رفعت عيوني لعيونها ؟
مو قلت لكم أمي مو على بعضها !
سحبت زمزمية القهوة وصبيت لي فنجال / وقلت:
يمه الراي رايكم ؟
مدت يدها وشالت شعري اللي على وجهي ,
أمي: والله ياوليدي ماينرد خالد رجال طيب وسمعته زانه واهله نعرفهم والزواج
سنة الحياة ومثلك مثل هالبنات .!
قاطعتها لو تركتها تكمل ببكي والله من صوتها وطريقة كلامها؟
طيب يمه خلاص انا موافقه !

عن رهف وشغلها اليوم فالبيت نقلت الكلام وبديت اعلق عليها واعلم امي
باللي سوته وتذمرها من الشغل وضيعت الموضوع ورجعت امي تضحك وتنشد عن هالرهف
وويش بتسوي عشاء ونظفت المطبخ ولا لا كالعاده لازم هواش عشان يكمل شغلها ..!

_

أنا بنت أمي الكبيرة من بعد اخواني الرجال طبعآ , ومقاسمتها الهم وشريكتها بالشغل من صغري ,
ومن وقت طويل ريحتها من هم البيت واغراضه واطلبات اخواني وابوي ,
أمي شايله هم أني اتزوج واتركها وبنفس الوقت ماتبي ترفض هالخالد .

أقترحت على رهف انها تهرج العيال يجيبوني ل أمي خدامه وطبعا لانها ماتحب الشغل
وافقت وطارت من الفرح وتكفلت بالموضوع وفعلا وافق ناصر اخوي ووعد رهف انها بتكون عندها بأقرب وقت..
أخواني سعد الكبير , وناصر اللي بعده ,وأحمد ثم أنا واعوذ بالله من كلمت أنا ورهف آخر العنقود .

مرت الايام وانا بين دراستي وشغل البيت , وجلساتي مع أمي واللي دايم تذكرني فيها بالخوف من الله
في ولد الناس اللي بتزوجه وتوصيني على امه وياوليدي تراها ماتعبت عليه عشان تجين تاخذينه منها
أحرصي على امه وابوه ,وانتبهي من يوم تدور فيه الدنيا وتجيبين عيال وتزوجينهم ,
كلمات أمي بتجلس بعقلي طول العمر ورغم أني كل مره اطمنها الا انها تستغل أنصاف الفرص وتوصيني .

"بليلة وأنا مع أمي ورهف وأبوي بصالتنا وتلفزيونا شغال على محمد الشرهان الراوي
دخل سعد وبيده ظرف ونزله قدامي وهو يجلس جنبي ؟
سعد : مهرك ياعروس .
غاب صوت الشرهان وغبت لثواني والله وسرحت بالظرف , استوعبت أخيرآ أن وراي عرس !
أستحيت من ابوي وسعد اللي جالس جنبي واتوقع انه عارف الوضع والربكه اللي بعظامي الحين .
تبريكات امي ودعاويها كسرت الصمت اللي بالمكان,وابوي وكلامه مع سعد عن خالد ومتى قابلك وعطاك المهر .
رهف طلعت سنعه وسحبت الظرف وقامت وهي تقول :
بحطه بغرفتك ؟ومشت وانا ساكته !
وطولت ساكته واكذب اذا قلت الحين اني اتذكر وش صار بعدها وكيف قمت من مكاني ؟
__

بعد فتره جاب ناصر لنا خدامة وصار عندي وقت انزل السوق ادبش ,وزي اي عروس بديت
بالذهب , والجزم والشنط والاكسسوارات والميك اب والعطور والملابس والحجوزات
واشياء ثانيه اخذها بحكم عاداتنا .
آمااللي وقفت قدامه وطال وقوفي فستان الزفاف , ياااه عالم ثاني هالفستان
حلم وبياض ينقلك من دنيا لدنيا ثانيه , يآه ياقشعريرة جسمي بأول مرة جربته
أحساس لاستألوني عنه هاذا الاحساس ينتجرب بس ماينحكى .!
وأخيرآعجبني فستان وحجزته لتاريخ 10/10.

قبل رمضان بيوم أنتهيت من نزلت السوق ورتبت عفشي(دبشي) بدرج ملابسي ببيت اهلي
بحكم ان باقي لي هنا شهر ولاني قررت أهتم بنفسي برمضان وماارجع افتح دبشي الا بعد رمضان
عشان احطه بالشنط وأغلفه, مرت ليالي رمضان بين العباده واهتمامي ببشرتي ونفسي وكنت كل ليله
أكرر (اللهم أجعله لي كما أحب وأجعلني له كما يحب وأجعلنا لك كما تحب )
وتوكلت على ربي وفوضت امري لله وأطمئنيت .

ليلة العيد..
طرى على بالي هذاك الشخص اللي أنا وهو على موعد 10/10
ياترى أنا على باله وكيف شعوره الليله وباقي 10 ايام بس ؟
سرحت فيه وتخيلته ووش يسوي حسيت بأنتماء له الليله!
أنا طبعي هادي وحتى أذا أهتميت بشخص ماوضح له ,أعيش مشاعري مع نفسي لفترة ,
واذا تشجعت وقلت أني احب ماقول كل شي لا , المح وأموه ,ابين واخبي اكثر , وهالفترة
اللي كنت فيها مخطوبه كبر بقلبي مشاعر , ماحكيت عنها ل أحد حتى أختي ولا صديقاتي ,
ساكته وأنتظر اشوف هالشخص اللي ارتبط مستقبلي معه!

"أبدا مو متعشمه بحياة رومنسيه زي اللي اشوفها بمسلسلات , ولا متعشمه بكلام حلو كل يوم ,
ولا حاولة أخذ صورته واحفظها بجوالي ,تركت حركات بنات اليوم لأني اطمح لشي اكبر واكثر قيمه ,
مابي انصدم بواقع غير , بجرب وأحكم,بروح له ريم العاقل ,اللي ماحبت ولا حلمت تحب من قبل ,
كل همها حياة مستقرة ,واحترام,وحب يكبر مع الايام,واطفال أربيهم بطريقتي انا,
وبيت صغير أنا المسؤولة عنه,هاذي التفاصيل الصغيرة اللي تهمني وطلعت من بيت أبوي عشانها !

*الساعة 4 صباح العيد طلعت من دورات المياه , وانا الف منشفت شعري زين ,
وبهدوء جلست قدام تسريحتي , تأملت وجهي ملامحي عيوني ونظراتها
فتحت شعري لعبت فيه يمين يسار أبتسمت وانا عارفه السبب !
استشورت ورفعت شعري وفتحت علبت الميك اب , اخذت الريشة وعدلت حواجبي
كحل فرنسي وروج ومناكير وخاتم بصبعي الاوسط وأنتهى !
هاذا كل اللي ابيه من تسريحتي اليوم ,لفيت ووقفت وفتحت درج ملابسي
مابي ابالغ ولا ابي اتكشخ ,حتى لو كان اليوم العيد
فستان تركوازي ناعم وطويل سحبته وقفلت الدرج

وقفت للمرة الثانيه قدامي تسريحتي فتحت شعري وتعطرت وطلعت من غرفتي .
على صوت أغاني العيد بتلفزيون صالتنا, ناظرت يمين باب غرفة امي مفتوح
وهناك قهوتنا جاهزة وحلاوات العيد والعود اللي ريحته مغطيه المكان
كل شي جاهز وبنتظار رجوع ابوي واخواني من صلاة العيد , بهدوء مشيت لغرفة امي

(هالبيت ملين امان)
والله ماكان على بالي وانا مقبله على باب الغرفة الا هالجملة ,
يمه: ناديت وانا ادف الباب واطل بغرفتها.
أمي : تعالي تعالي / بصوت حنوووون.
دخلت وضميتها وبستها وسلمت على راسها ويدها
يمه كل عام وانتي بخير وصحه وسلامه كل عام وانا اشوف زولك بهالبيت .
أمي : وانتي بخير ياوليدي
قاطعتنا رهف وهي تصارخ كالعادة ومشغلة بجوالها اغاني وترقص ,وتطالع في وتغمز.
عايدت امي وعايدتني وهي تظمني وتسلم قربت من اذني وقالت :
اخر عيد لك سنقل ,تبسمت وشلت شعري اللي مغطي نص وجهي ولفيته خلف اذني
هالرهف احيانا تكون مفيده وكلمة منها تخليني ابتسم واضحك .

صوت ابوي واخواني وضحكاتهم طلعتنا كلنا من غرفة امي , سلمت على راس ابوي وعايدت اخواني
ووقفت ابتسم/طريقة معايد اخواني ل امي غريبه ووفقتهم قدامها
لوقت طويل وهالبوسه اللي على اليد منهم تسوى الدنيا ومافيها
هيبتهم قدام الرجال تضيع عند امي وهم يتقربون لها ويتوددون ويمسكون يدها ويجلسون
جنبها وكل هالحركات اللطيفه تخليني احب الامومه .

*هذا العيد الاول اقتصرته على اهلي وبقيت انا ورهف فالبيت وباقي العائلة راحوا لعيد جدي ,
وبنفس اليوم الاول مر اليوم الثاني جهزوا اهلي وبقيت انا ورهف
لان العروسه عندنا اذا قرب عرسهاعيب تطلع ( عاداتنا).

باخذكم لليوم السابع من العيد( يوم الحنا)
على الساعة 5 العصر شرفوا خالاتي البيت وبناتهم اللي بعمري تقريبا ,
موعدي مع النقاشه بعد المغرب وطبعا كل العايلة بتنقش بدايتن بأمي,
ربع ساعة بس وطلعت لهن على الصياح والزغاريط والتغطرف ومبروووك ياعروس سلمت
ويديني وقلبي ترجف ,بدون تفاصيل كثيره نقشت نقش ناعم ل يديني وارجولي
أما امي لا توصت بالنقش وهي تقول لنقاشه عرس بنتي( حنيني زين)
وهاذي ليلة الحنا وعدت وصرت بهالحنا عروس ناقصها فستانها بس .

البارت الثاني *




* يوم :10/9

ماعليه تحملوني اليوم رومنسيه حبتين ,

"وصلني الك , شدني من أيدي حبيبي وخذني معك "
عارفين هذاك الاحساس أنك بتقابل شخص وبتعيش معه وله,
بتصحى معه وتنام معه بتفرحون لسبب واحد,بتتضايق لضيقته,
بتخاف يصير له شي وتبقى بدونه , تاكل معه , تمشي ويدك بيده ,
بيضحك وتبتسم لضحكته,تغمره بسبب والف مره بدون سبب , بس لان هالصدر حلالك
وهاليدين اللي تحوطك ملكك,بتلبس وتتعطر وتجلس جنبه,لا لا مو جنبه بحظنه ,
يصير عادي تتحسس وجهه وتقرب لعيونه وتتاملها,تتكلم له عن كل شي ,
يصير عادي تمسك يدينه وتبوسها تضم اصابعك ل اصابعه ,
تسمعه اغنيه تحبها ,تحكي له عن خاطره ماثره فيك,
تبدا تعرفه على نفسك ,تعلقه فيك وتتعلق فيه , تنام على ايده وتتعود على هالنومه "

صحيت الساعه 1 الظهر وكنت نص نايمه اصلا, سحبت جوالي اللي مسويه له اغلاق على اساس انام ومايزعجني ,
ياه ياكثر الكذب هاذي عاشر مرة افتحه واقفله واسوي نفسي نايمه
ابواب بيتنا بالعادة صوتها يصحيني من كثر مايفتحونها اخواني بس اليوم غير
امي مهدده اي احد يسوي ازعاج ويصحيني بينضرب على قولتها , حتى اصواتهم مالها حس اليوم
تسحبت لدورات المياه وتوضيت وصليت وانوار الغرفة طافيه والمكيف لسى شغال
على روس اصابعي تسحبت للباب وتنصت ,معقولة للحين نايمين
رجعت لفراشي بنفس الخطوات , وغطيت نفسي ونمت او كنت اسوي نفسي نايمه
طولت على هالحال لين دق باب غرفتي بكل هدوء .
مين ؟!
ووش هالسؤال الغبي ي أنا اكيد امي او رهف ويبوني اصحى للغدا.
فزيت وفتحت الباب / هلا يمه .
أميمتي : ريمي صحيتي يمي ؟
ايه قلتها وانا اناظر بالصالة كلها ظلام والناس مدري وينهم
وسالت :ابوي وين والعيال.
أمي : طردتهم لمجلس الريجيل عشان مايصحونك / وتبتسم
ياعساني فدوة هالوجه اللي شايل همي .
وكملت امي : الغدا بالمجلس تعالي تغدي ننتظرك
غيرت ملابسي بسرعة ولميت شعري ورحت لهم بالمجلس..

سلام بصوت واطي وانا اشد اكمامي واغطي النقش حيا من ابوي واخواني .
يامرحبا/ صوت أبوي
هلا عروستنا / سعد اخوي
تعالي هنا جنبي / ناصر
اما اللي ماتكلم بس اعرف وحاسه انه يناظر في الحين احمد .
رهف مشغولة فالتوزيع وترتيب السفرة
وامي جنبي وحطت نص الاكل قدامي وحالفه علي اكله .
سوالف اخواني وابوي بعيده كل البعد عن بكرة,اكلت وساعدت رهف بعد ماخلصنا ورجعت غرفتي .

اليوم بعد العصر بينقلون عفشي (دبشي )لبيتي ,ناديت رهف وعلمتها بطريقة الترتيب وحرصت عليها
انها تسويه زي ماقلت لهاولاني مغلفته بطريقة معينه
اصريت على رهف ووافاء بنت خالتي انهم هم اللي يرتبونه
وفعلا بعد العصر جات خالتي ووفاءبنتها عشان يساعدون أمي ورهف على الشنط والهدايا اللي لها اول مالها اخر ,
أحمد وناصر مرسمين ويحلفون ان مايودي دبشي الا هم ويقنعون سعد انه يرتاح على قولتهم ,
خذوا الدبش ونقلوه السيارة ومشوا ,ورجعت لغرفتي وبديت اتفقد وش بقى ولان سعد قبل يومين قال:
ان خالد حاجز فندق تركت عندي شنطه كبيرة حطيت فيها كل شي احتاجه .

على وقت رجعت أمي وخالتي سويت قهوة وشاهي وبخرت البيت
وجلست فالصة انتظر وانامركبه سماعاتي ,سرحت لعاالم ثاني,وبدون تفاصيل كثير رجعت امي وخالتي .
مدايح أمي لبيتي على قولتها تحمس , وتعليقات رهف تخسبقني وتخليني اتمنى اشوفه هالحين وبهاللحظة
رهف تقول انها كانت بتصور بس لان خالتي ام خالد وبنتها كانوا بالبيت استحت تصوره
وطمنتني وهي تشرح كيف رتبت دبشي وعلى هالسوالف مر الوقت .

10 بالضبط ناداني ابوي لمجلس الرجال , وانا عارفه وش الموضوع .
فتحت الباب ودخلت على ابوي اللي بالعادة هالوقت فالصالة وينتظر العشاء ..
سلام / بصوت واطي !
أشر لي أجلسي هنا يقصد قدامه (جلست وضميت يدين وسكتت).
اسمعي وأنا ابوك ( بيده عصى خيزرانه ويخطط بها على الارض )
بكرة عرسك على ولد عمك الله الله فيه والله الله بطاعته ,والله الله بعمك والسمعه الطيبه
وأنتبهي من الكلام وكثره , وأسرار بيتك أحفظيها ,ولاتعرضينها على نقالة الحكي ,
وأنتبهي تقصرين بحق زوجك ترى الرجال مثل مايشتري يبيع ومثل مايحب يكره
صونيه وصوني نفسك , واذا قصر بحقك تعالي لي وعلميني وهالبيت مفتوح لك,
واناأعرفك راعية واجب وعاقلة ورزينه لاتخيبين ظني فيك .أنتهى كلامه!

بعد هالصمت والانصات لكلامه : أبشر .
تامرني بشي ثاني /بخضوع
لا وأنا ابوك الله يوفقك ويرزقك ويكتب لك سعادة الدنيا والاخرة.

رجعت لغرفتي سكرت الباب ورميت بجسمي على الكرسي ,ليه خفت من كلام أبوي , ليه شلت هم ؟
تضايقت والله حسيت فجاةأني بطلع بكرة من هنا وبرجع وحده ثانيه
عاد كيف بتكون هالوحدة مدري بس الاكيدأنه مو افضل من حالي وانا بنت
بدون هموم ,بين امي وابوي ومداراتهم لي مراعات خاطري بأبسط الاشياء.!

أمي ماقالت لي كذا ولاحكت هالحكي الكبير اللي قاله لي ابوي
وصتني بحنيه تخليني حتى لو أغلط ارجع لهاوانا عارفه انها بتطبطب علي وعلى خطاي ..!

" دقات الباب الهادية كاثره اليوم هاذي رهف اسمع صوتها من خلف الباب تقول ريم العشاء على السفرة ,
حتى اختي الصغيرة اليوم عاقل ومحترمتني ,طلعت وتعشيت مع اهلي
ورغم كل محاولات اخواني عشان اضحك كنت ابتسم بس .!

ساعة ونص وكان الكل مستعد لنوم لان بكرة ورانا يوم طويل بينتهي بشوفة خالد .
أمي وصتني سبعين الف مرةعلى اني ارقد زين وحذرتني من الجوال وأن التهي فيه وسمعآ وطاعه لها
فرشت أسناني وتوضيت وصليت ركعتين وحطيت كريم وعطر وفتحت مكيفي وطفيت الانوار ودخلت فراشي ,
أغلقت جهازي لاني وعدت أمي وحلفت أطفيه ومراح انشغل فيه , بس اللي ماوفيت فيه أنه أذن الفجر
وانا حاطه أيدي تحت خدي وافكر,مابين أحاسيسي ,وهالخالد ,وكلام ابوي ,غير تخيلاتي لبكرة
الجسر والزفة والكوشة ,والتصوير وغيره وغيره وغيره .
صليت الفجر وقريت اذكاري وهالمرة حطيت راسي ونمت نومه عميقه ..

البارت الثالث *


* الجمعة 10/10
شالت الحاف( البطانيه ) عن وجهي ورعتي قومي صلي الجمعه.
فتحت عيوني على وجهها, ويدها للحين على خدي وتمسح عليه(تبسمت)
قومي صلي الساعة 1 تاخرتي على الصلاة , وتبعد البطانيه عني وظلت واقفه وتنتظرني اقوم,
جلست / طيب يمه ابشري اقوم ( لسى واقفه عندي)
نزلت من سرير حبيت كتفها وأشرت بصلي , دخلت اتوضىء وطلعت مالقيتها صليت
وقريت الكهف ونزلت قران على تسريحتي, ورتبت سريري وغيرت ملابسي وجلست على طرف السرير وجوالي بيدي وأفتحه
تصفحت الرسايل والبريكات وصاحباتي وتوبيكاتهم أبتسمت أحساس حلو تجربه البنت مرة وحده
بعد كذا اتوقع ماله طعم , هي المرة الاولى من كل شيء مختلفه وماتنسى!

رهف اليوم مادقت الباب درعمت على طوول وهي تقوول مبرووك ياعروستنا (غمزة لي وضحكت)
جلست على ارجولها قدامي..؟!
رهف : ريم تدرين أني مانمت البارح الا الفجر(بغيت أقول وانا اردى منك)
وكملت/ البارح قعدت افكر وتأكدت اني بفقدك.!
وهالبيت كله بيفقدك بس يارب خالد يستاهلك !

(دمعت عيونها وانا العبرة بلحقي وللحين مبتسمه !!)
بسرعة قالت وهي توقف :
ماودي انكد عليك يومك قومي يالله الغدا متزهل فيه ناصر بيغدينا من برا (وتضحك)
رميت جوالي على السرير وناظرت وجهي بالمرايه وطلعت معها .
أول ماطلعت من الغرفة شفت ناصر بسروال وفانيله وجايني يغني /
ناصر وهو يصفق ويرقص مباركين عرس الإثنين ليلة ربيع وقمره
(تبسمت الصوت شين واللبس مايساعد وهو تو صاحي من النوم وفايق ويدور علي ويغني )
ناصر : أيه اضحكي يحمد ربه خالد وافقنا عليه (ويضحك)
كنت بمشي بروح المطبخ ورى رهف بس رفض وكمل اغنيته( واخذني للمجلس غصب عني)
حاولة ارفض اني اروح المجلس معه وهو يغني ولا عطاني وجه..
دخلت مع الباب وانا ارجف شفت ابوي واحمر وجهي والله وعلى صياح سعد واحمد ورهف ارتبكت زياده
طالعت فامي وأشرت عليهم كنت ابيها تفزع لي وتجلسهم لاني استحيت من ابوي لو اخواني عادي ,
سعد اخوي الكبير اللي المفروض عاقل لقط الاغنيه من ناصر وصار يغنيها ويصفق ويرقص معه
واحمد يصفر ويصفق ,جلست جنب امي بسرعه وتركتهم وافقين وللحين على وضعهم ,
أبوي راضي والدليل الابتسامه اللي على وجهه وهو يطالع فأستهبالهم ,
اقلبوها عرضه وقفوا جنب بعض الثلاثه وصاروا يغنون ويرفعون يدينهم
أشكالهم ضحكتني غصب عني والله
ورهف تصورهم وأمي تضحك (عاد هاذا اللي يونس ضحكت امي )

بكلمه من ابوي جلسوا على السفرة وتغدينا وانااسمع حكيهم عن موعد تجمع الرجال
وأنهم بيروحون للقاعةالساعة 4العصر لانهم على موعد مع جدي وعمامي
وفعلآ على الساعة اربعة كانوا جاهزين وأولهم ابوي .

واقف فالصالة ببشته الاسود المطرز بذهبي والشماغ الابيض
واخواني الثلاثة نفس الموضوع ,بشوت سوداء وشمغ بيض ,طليت عليهم من غرفتي بدون مايشوفوني
وأمي تبخرهم حسيت بفخر وفرح وحمدت ربي عليهم كثير ..!

موعدي مع كوفيرتي كان الساعة 5 العصر ولان رهف صايره مودبه معي مثل ماقلت
لكم تفاجأة بأنها مسويه حفلة صغيرة ( باي باي سنقل )
وأول ماطلعوا ابوي واخواني بثواني تحول بيتنا لديسكو واغاني رومنسية,
فرحت فيها والله وصورة ورقصت ورقصنا أمي غصب عنها وقصيت الكيكه الصغيرة
وتصورنا ونسيت الزواج اصلا وانشغلت ب السناب والضحك عليها ومعها ,
أكلنا الكيكه وتقهوينا وجات كوفيرتي ورجعتني لزواج وهمه.

على ماتتقهوى مع أمي دخلت اخذت دش , وطلعت لها قبل المغرب بشوي
جلست على الكرسي الساعة 6 الا 10 وانا ابتسم بدون سبب, بدت تستشور وانا مركبه سماعاتي وعايشه جو ثاني .
على صلاة المغرب صليت وقريت اذكاري ورجعت لها,
وبداء الشغل ..

رهف بتسوي مكياجها وتسريحتها مساعدة الكوافيره واسمعها توصيها انو انا اخت العروس واحتمال
انخطب الليله وتضحك وتطالع في ( أشرت لها ب هين عند امي )
امي عاد حكاية المساعدة الثانيه هي اللي بتسويهاوجالسه تدور أمي وتشتكي لي
(ماما مايبي مكياج ) دورنا امي وارسلت رهف تشوف وينها لقيناها بالمطبخ وطلعناها
بالقوة لان مافيه وقت والساعة 10 لازم اكون بالقاعة عشان موعدي مع المصورة .

يعم الصمت لثواني الكل ساكت وافكر فيه, ولاني هالفترة مالي شغله الا افكر فيه , ذبحني الفضول كيف
شكله الحين ,والاهم وش يحس فيه,زيي يعني ولا انا مبالغه بهالفرح
صوت الاغنيه اللي بسماعاتي فاصلني عن العالم مخليني أهوجس به , اللي متاكده منه أنه الحين بالقاعه
ويستقبل ويرحب ,آما الباقي خلال 3 ساعات بعرفه اذا فرحان ولا عادي .

* 9/30 م

شالت الكوافيرة ريشتها , وسحبت السماعه من أذني وانا ابتسم , يبارك فيك ردآ على تبريكاتها .
نظراتها في تقول أنك حلوة, وحرصها علي يخلي عندي أحساس لطيف ,
شكرتها ولفيت بهدوء لرهف , جميلة هالبنت /
الفستان احمر لفوق الركبه وكعب احمر عاالي , وساعه ذهبيه بيدها اليمنى
وأسوار ناعم وخاتم باليسرى وحلق , غير الميك اب الرايق والعدسات العسلي
والشعر الطويل الاسود واللي مالعبت فيه كثير شالته من قدام وتركته مفتوح من الخلف
تحرك شفايفها وروجها الاحمر وتغمز وش رايك بأختك (تضحك)
ضحكت فاسده هالبنت وحركاتها ماتطمن .
قلت : جميله والله نياله راعي النصيب.

أما امي ماتكلفت ورفضت المكياج الواجد تسريحه وميك اب خفيف وبرقع وفستان ساتر رغم فخامته .
(للمره الثانيه بلبسه وهالليلة اصلا ليلته )
بمساعدة أمي ورهف لبست
ووقفت قدام مرايتي , ناظرت لتاج ولتسريحتي
عيوني العسلية والكحل الفرنسي , الروج الاحمر وفستاني التوب المنفوش ,
والعقد والحلق والاساور والخاتم والمناكير الاحمر , أشرت لرهف على المسكه ,
ورد احمر طبيعي بشكل دايري ,مسكته ورجعت اناظر لنفسي ,
أمي تتكلم ورهف تعدل فستاني وأنا ولا هنا بعالم ثاني .

ناصر يدق ( على هالجملة استوعبت ان احد يكلمني ..؟!)
ردت رهف على ناصر وقال انه جاي البيت بياخذنا , ظليت واقفه قدام مرايتي
بالوقت اللي راحت امي تلبس عبايتها هي ورهف , حطيت كريم وتعطرت رغم اني باخذ عطري معي.
صوت ناصر خلاني ادور عبايتي ويديني ترجف والله .
دخل علي الغرفة وسلم على راسي وقال عساه مبروك ياوخيه ( ساكته )

التفت لشنطتي واخذها وطلع , لبستني امي عبايتي واخذت رهف المسكه وطلعت هي بعد ,
على اخر عتبه في بيتنا وقفت ,( يارب أكون زي امي وأسس بيت زيها)
كنت اطالع فيها وهي تحتي تعدل الفستان
ناصر رجع لي وحط ايده اليمنى بيدي لاني مااشوف مغطيه وجهي وبيده اليسرى كان يشيل فستاني
هو ورهف وامي تفتح باب السيارة .

ركبت وتحركت السيارة ولا احد يسالني عن احساسي لاني فعلا مااعرف اشرحه .
بس هناك بالقاعة اللي كلها صوت اغاني وزغاريط ورقص
وبغرفة العروس بالتحديد جلست على كوشتي وقدامي تورته حطيت عليها تاريخ (10/10)

أكتفيت بالنظر في كل شي حولي ولا كنت اعلق اناظر برهف تركب زفتي عشان اذا دخل
وامي تسلم وتبارك وبين يديني هنا مسكتي , وعلى الطاولة اللي يساري جوالي وعطري
آما هالمساحة اللي عن يميني بتكون مكانه ,وهاذيك اللي جالسه هناك مصورتي
وقفت اسلم على خالتي ( امه ) وبنتها وابتسمت ردآ على تبريكاتهم.

خالد بيدخل ( هذا الصوت الجديد واللي بيتكرر كثير عهد اخته)!
ردت رهف على جوالها وقالت نفس الكلام ( خالد بيدخل )
مثبته يدين وضامه مسكتي بقوه عل وعسى ماتبان هالرجفه اللي بجسمي
فتح الباب اللي قدامي واختفت رهف وعهد ومابقى الا امي , وصوت زفتي ..
أربعه اشخاص دخلوا الغرفة ثلاثه منهم مايخوفوني ألا هم الامان كله,
اما هذا الشخص اللي المحه يسلم على امي يربكني !
وقف سعد عن يساري وهو يقول :
ريمي اوقفي سلمي على زوجك ( استوعبت ووقفت )
قرب ووقف عن يميني مد يده ومديت يدي وسلمت (خامسته) وسحبتها بسرعه!

جلست وجلس جنبي عيوني على مسكتي وقلبي هالمرة اللي يرجف !
تبريكات اخواني انا مارديت عليها بس اسمعه هو يرد,وقفت مره ثانيه عشان صورة جماعية
ل اخواني معي تصورنا وطلعوا وعلى تسكيرت الباب سمعته يقول ( مبروك)
مارديت مو لاني مابي لابالعكس كنت اتمنى اني شجاعه اكثر من كذا واتكلم وارد.

تعليمات المصورة والصور وقص التورته انتهت كلها,وخرج هالخالد وانا والله ماشفت ملامحه
كنت أناظر له لين اوصل دقنه (لحيته) وارجع انزل عيوني ..!؟

أنزفيت وزي اي عروس وكل عرس تبريكات وسلام ورقص وضحك وتعليق وهدايا وغيره وغيره وغيره..!
على الاغنيه الوداعية اللي أهدتها لي رهف سريت .
سلمت على امي ورهف واخواني الثلاثة واللي مجهزين سياراتهم عشان يزفونا .
فتح باب سيارته وركبت ساعدوني هو واحمد على الفستان ,عدلت فستاني وبقيت اناظر بزينت السيارة
ثواني بس وركب وحرك السيارة من سكات !!

زفونا اخواني لين نص المشوار ورجعوا للقاعة,
نص ساعة بالضبط ووقف قدام بيت عمي اللي هو بيتنا (لان له شقه بالدور الثاني )
استغربت لان سسعد قال انه حاجز فندق ؟؟!!
أنزلي يابنت عمي لبيتك ( الصوت غريب )
نزل بسرعة وفتح لي الباب , ونزل شنطتي وكان بنفس الوقت يساعدني على الفستان رقينا الدرج
وبسرعة طلع الدرج ونزل الشنطه عند باب الشقه ورجع يساعدني على الفستان
لانه ثقيل مع الدرج,وعلى اخر عتبه لدرج وقفت وانا استرجع نفسي تعبت من الفستان والكعب ,
فتح باب الشقه ودخل شنطتي , سميت ودخلت برجلي اليمنى , فتح الانوار وانا لسى مغطيه وجهي
نزل بشته ورماه على الكنب والتفت لي؟
خالد: ادخلي يابنت عمي الله يحييك ببيتك (وقف قدامي)
سحبت الغاء عن وجهي وناظرت بالشقه !
اشر لي على غرفة النوم وقال :
تعالي نزلي وارتاحي ..؟

( قلب المؤمن دليله فيه شي غلط !!؟)
فعلا مشيت لغرفة النوم ونزلت عبايتي وعلقتها على الشماعه وفتحت المكيف
لاني مولعه من الحر وجلست على اقرب كنبه , عدلت فستاني وحاولة اهدىء قبل يجي
دخل ومعه شنطتي ونزلها وقال بصوت واطي : ثواني وراجع !
أنتظرت وانا اطالع بالغرفة واشوف دبشي مرتب فيها ,ابتسمت لان رهف ماغلطت ولا غلطه .
رجع ب صنية فيها كوبين عصير ..؟
قدمهاا لي أخذت عصير توت ونزلته قدامي وبدوره هو اخذ عصير وجلس على الكنبه المقابله ؟!
منزله عيوني وضامه يديني لبعضها .

قال: مبروك يابنت عمي !(للمرة الثانيه)
مارديت بالعكس خفت بدون سبب.!
وقف بعد مانزل عصيره وقال نزلي فستانك وارتاحي بجيب العشاء وارجع..؟
طلع واتوقع انه راح المطبخ لاني ماسمعت باب الشقه فتح ,بسرعه قفلت باب الغرفة
ونزلت فستاني بصعوبة ولبست قميصي وفتحت شعري وتعطرت واخذت شنطة الميك اب وعدلت مكياجي ,
ورجعت للكنبه اللي اول وجلست ؟
دق الباب وهو يقول ادخل ؟
ادخل بصوت واطي ..؟
دخل ومعه طاولة طعام متحركه وقفها قدامي وسحب كرسي وجلس جنبي .
خالد : أكلي حياك الله .
بدا ياكل اخذت ملعقه واكلت على خفيف وشربت مويه وانا اقول حمدلله .
شبعتي رفع راسه لي ؟؟
رديت ب ايه !

كأنه كان ينتظرني اخلص سحب الطاولة وطلعها برا الغرفه ,اخذت عطري وتعطرت وعطرت المكان
ورجعت جلست وانا عندي احساس غريب ؟
وفعلا احساسي بمكانه جاء ولد عمي وجلس قدامي وقال :
خالد: اسمعي يابنت عمي أنا رجال واضح ولا ودي اظلمك معي , وبعلمك بكل شي قبل
لا المس منك شعره ان رضيتي يامرحبا وان رفضتي حقك .

ناظرت بعيونه لأول مرة وانا انتظر وش بيقول ؟؟؟
عدل جلسته وكان قلقان !
خالد: أن قبل لا أخطبك كنت خاطب ( حسيت الدم وقف بعروقي )؟!
وكمل / هرجت ابوي بالبنت ورفض لانها ماهي من قبيلتنا وحاولة اقنعه ورفض ولاني مابيه يغضب علي
طاوعته هو وأمي باني اتزوج من بنات عمي ووقع الاختيار عليك وانا مارفضت ؟؟
" حسيت أني وحيدة أحساس غبي , ماادري يمكن ابي احد الحين يدافع عني.!!"
بصوت مخنوق قلت : أبوي واخواني يدرون ؟؟
لا بسرعة قالها وكمل / والله اني حاولة اعلم عمي بس ابوي عيا الله يهديه خايف ان عمي يرفض ؟
أرتحت أقل شي ابوي ماباعني .!
بعد صمت ..
خالد : تبين تكملين معي يامرحبا ويشهد الله
اني ماأظلمك بس البنت اللي خطبتها بيجي يوم واتزوجها
لاني عطيت اخوها كلمة .
أنابرقد بمجلس الريجيل ارقدي وارتاحي وبكرة اللي تبينه
يصير طلع وسكر الباب ..؟!

البارت الرابع *

وش يقول اللي طواه الحزن منك
وش يقول اللي يشوفك كل حاجه !



طلع وسكر الباب لهدرجة الموضوع بسيط عنده , لا ويقول ارقدي وارتاحي
حطيت يديني على راسي يارب رحمتك اللي أنا فيه طبيعي ( اللهم لا أعتراض )
عرس وعروس وفستان ودبش ونقس وأغاني وفرح وتبريكات وأخر شي مايبيني
أعوذ بالله من سوء الحظ رفعت راسي ,اتذكر مكان جوالي نسيت حتى جوالي وين حطيته
وقفت وتقدمت خطوتين لتسريحه ,ماصرت اشوف شي , أتخبط بنص الغرفة , جسمي يرجف وعيون غرقانه دمع
غير العبرة اللي مسكرة حلقي ومغيره صوتي , أخذت جوالي وانا امسح دموعي وخشمي بالمنديل
وأحاول اركز بالارقام أبي سعد هو الوحيد اللي بيطلعني من هنا بكرامتي
لفيت وجلست بستجمع قوتي وأدق واقول له وش صار ,ضيعت الرقم ولو اني ركزت بالقاه فالمكالمات الصادره
بس رحت ادوره مع الاسماء وعيوني ماشوف ابها واحاول اسحب الدمع بكومة المناديل اللي بيدي
وقلبي مكسور ومتحسفه على جيتي هنا وعلى كل شي كل شي والله ؟!
قفلت جوالي بدون شعور وقفلت باب الغرفة بعد ورميت بنفسي على السرير
وغطيت وجهي بالوسادة عشان الصوت وبكيت بكيت بكيت لين تغير صوتي وانتفخت عيوني وخلصت دموعي ونمت !

نمت بمكياجي بألمي بالفرحه اللي ماتمت , نمت بضعفي , بوحدتي , والله ماأستاهل اللي يصير !
أذا يبي احد غيري لاياخذني يقول لا ,ويدافع عن هاالا او يلعمني يوصلي خبر أنه يابنت الناس مابيك
ابي وحده غيرك أنا مو رضاوة يكسب فيها امه وابوه وعشان مايغضبون عليه يدمرني !
طيب وحياتي وأحلامي وهالقلب التبن اللي حلم وتأمل وش بيكون مصيره
ليه فكر بس بنفسه أرجع وأقول طيب وأنا !؟ حط نفسك مكاني حرام والله اللي يصير ..!!

صحيت بعد وقت ولا ادري كم صارت الساعة , طاحت عيني على فستاني وهاذيك الجزمه البيضاء
تغيرت تقويست وجهي , مسحت ادموعي بسرعة وقمت لشنطتي اخذت بجامه ودخلت دورات المياه
تحت الدش تذكرت كل حرف ياه ياقلبه يستقبل عروس بهالحكي (بصوت قوي / مو بشر والله حيوان وأنا اغطي عيوني )!!
تنظفت وطلعت , قدام مرايت تسريحته شفت وجهي ..!
عمري ماوصلت ل هالحالة ناظرت زين تغيرت ملامحي عيوني منتفخه وحمرا زي الدم
ووجهي باهت وشفايفي يابسه وكل ماناظرت بشكلي كل مابكيت زيادة .ّّّ!
طبطبت بيديني على وجهي ودورت جوالي وفتحته ..

الساعة 9 الصبح !
رميت الجوال بسرعة صلاة الفجر قلتها بصوت عالي .
صليت وطولت اصلي ابي هالضيقة تروح ودعيت ربي يلهمني الصح ويكون معي .
رجعت لجوالي وأنا افكر ادق على سعد ولا لا .؟
جلست بيني وبين نفسي شوي , تذكرت زواج أخواني سعد وناصر بيكون بعد 3 شهور
وأمي لها سنه ماتتكلم الا عن هالزواج فكرت بأمي وفرحتها بأخواني ,
لو جيتها الحين وعلمتها باللي صار بتشيل همي وبخرب عليها وناستها .!

على هالحال أذن الظهر وانا بمكاني وفكره تروح وفكره تجي !
قررت أخيرا اللي انا شايفته صح ؟

رتبت الغرفة وصليت وفتحت شنطتي وأخذت فستان اصفر استرتش ضيق وميد
وجكيت جنز ازرق لاني ماابي اتعرى واتفسخ قدامه , لبست ووقفت قدام مرايتي
وانا اشمر اكمام الجكيت ,خليت شعري مجعد وشلته ببنس من قدام .
تعطرت وانا ارتب تسريحتي , لبست صندل ازرق وعلى هاذيك الكنبه الاول المشؤمة
جلست وواضح اني ماني بخير ؟!
حطيت جوالي على وضع الطيران ورحت ل الانستقرام
يدي على خدي واطالع بصوري اللي منزلتها قديم , (اضيع وقت)

على دقات الباب نزلت ايدي .!
فتحت بدون صوت , واقف ويناظر بعيوني اللي تعلمه اني بكيت طول الليل ..!
سلام / قالها وهو مستغرب من وضعي ؟
وعليكم السلام / ماسكه مقبض الباب واطالع فيه ( مااستحيت على غير العادة )!!
الغدا جاهز اجيبه لك الغرفة / يده خلف رقبته ويتحرك ؟

لا بالصالة ؟( ودي اهاوشه وماودي اشوفه ويمكن كارهته ومستغربه ليه للحين انا هنا)؟!
دخلت وسكرت الباب وعلى طوول على علبة المنديل سحبت واحد وغطيت عيوني تنهدت ,
شويات رجع ودق الباب عدلت شكلي ونشفت عيوني من دمعها زين وفتحت الباب بشويش ,
جالس وقدامه طاولة اكل بهدوء جلست بعيد عنه !

عيوني على الاكل وحاول انشغل فيه !
وصرت اردد بصدري كلام قوي واني باخذ حقي وبرد له كل شي سواه
حفزت نفسي وسكتها من خوف ابكي قداامه !
اما هو اشوف ايده وهو ياكل غير كذا مارفعت عيوني ؟
حمدلله واخذت كوب المويه !؟
ودخلت الغرفة وقفلت الباب ( رجعت ابكي ومن كل قلبي والله )
هناك جوالي مرمي وانا جالسه على طرف غرفة النوم (وافكر ليه راضيه هالذل ؟؟)
ماطرى على بالي الا امي تو كانت البارح فرحانه واكثر من فرحتي بعد !!

نزلت على البلاط وضميت رجولي بيديني ..!
بعد نص ساعة قررت انه لازم يعرف وويش بيصير ؟؟
غسلت وجهي وانا معزمه على قراري وعارفه الهدف منه وعشان مين .؟
فتحت الباب وكان لسى بالصالة .؟
ممكن نتكلم / واقفه ؟
نزل علبت العصير وهو يقول :أبشري .
عدل جلسته وأشر لي اجلسي .
جلست على كنبه قريبه منه وشبكة اصابعي ببعضها ونزلت يدين على ركبي ؟!
ينتظرني اتكلم ؟؟

أنا : أنت البارح قلت لي سبب زواجك مني (ورفعت حاجبي )؟!!
هو : أيه بسبب امي وابوي وأنا اعتذر منك مالك دخل باللي صار( احسه نادم وصادق)
أنا : (أبتسمت ) عذرك غير مقبول ( بحزم)!
هو: ساكت ومصدوم .
أنا: زواج أخواني بعد ثلاثة شهور وأمي فرحانه ولا عندي نية أكسر فرحتها(بدا يتغير صوتي)
سكتت شوي وبلعت ريقي وكملت:
ثاني شي ماودي أعرض سمعة ابوي وأخواني للخطر وارجع لهم بأول يوم زواجي ولا ابي اعرض نفسي
للكلام وانت عارف وش اقصد البنت اللي ترجع لبيت اهلها بعد يوم من زواجها ماتسلم من كلام الناس .!!

هو : صادقه / ينزل راسه !
أنا : بجلس ببيتك لبعد زواج أخواني بس بشروطي .!
هو : رفع راسه وفتح عيونه بقوة ؟!
أنا: وافقت على شروطي جلست رفضتها لميت عفشي ورجعت بيت أبوي ؟!!( صامله ولا عندي نية اتراجع)

صمت ؟!

هو : يتنهد / وشهي شروطك ؟
أنا: ألاول توعدني وعد رجال ماتلمس مني شعره .
وكملت بسرعة/
الثاني : بعد ثلاثة شهور تطلقني .
الثالث : الموضوع يبقى بيني وبينك ولا احد يعرف عنه أبدا.
ظليت اناظر فيه وهو ساكت ويمسح بيده على وجهه ويفكر !

هو : أنتي بنت عمي وزوجتي مابي اطلقك (بعد صمت طويل)
أنا: بعد كلامك اللي البارح أنا زوجتك على ورق بس ( ورفعت حاجبي وابتسمت نكايتن فيه )!

تعومس وقلق وصار يطالع يمين ويسار ويفكر ؟!

هو : أنا موافق على شروطك وأوعدك مايصير الا اللي انتي تبينه
ووالله مارضيت على اللي صار ؟ وكمل / ليتني ماطاوعت أبوي !
أنا : وعد الحر دين ولين هذاك الموعد خلك حافظ الدين ؟( قمت )
كان يناظرني وانا رايحه الغرفة ووضعه مو افضل من وضعي .؟
__

دخلت وقفلت الباب وانا مابي افكر ومصدعه ومتضايقه وحاسه الدنيا مسكره بوجهي .؟
رميت الجكيت وفتحت البنس ودخلت فراشي أحس ببرد فعظامي رغم هالجو الحار
غطيت نفسي زين وضميت يديني لصدري ونمت ..!

*على دقات الباب القوية صحيت , فتحت عيوني بقوة وانا اناظر بكل شي حولي استوعبت
اني بغرفتي الجديده وأني المفروض عروس , تركت الباب يدق وقمت لجوالي بشوف الساعة كم
آه 11 ونص الليل يعني انا من قبل العصر نايمة , دقات الباب اقلقتني وقفت جنبه وانا اقول:

نعم (بهدوء)
فيك شي / خالد بخوف ؟!
لميت شعري بيديني وقلت : لا !

ومشيت وتركته يتكلم , دخلت توضيت وصليت صلواتي اللي فاتتني
واخذت القران من شنطتي وجلست على سجادتي أقرا !
(لان هاليلة كاتمه على صدري بقوة ودموعي ماتطاوعني , وأحس بضعف غريب و
وصعبانه علي نفسي , مو قادره ارجع بيت ابوي من الخوف من الناس وحكيها ولا قادره
أجلس بمكان غير مرحب بي فيه, ناظرت لفوق وعيوني كلها دمع اللهم لاعتراض على ماكتبت
يارب يارب ساعدني وأجبر قلبي جبرآ يليق بجبرك وطلعني من هالمكان وأنا ماضريت احد
ومسحت دموعي بشرشف صلاتي وقمت !
__

هذاك الباب الفاصل بيني وبينه صار يزعجني وهو يدق للمرة المليون ..!
نعم / وانا انزل شرشف الصلاة؟
خالد : العشاء جاهز / بصوت حنون؟
مابي عشاء /طفيت الانوار ورجعت لفراشي ؟

آخر الليل ؟

فتحت فمي بقوة بتنفس ساندة ظهري على الوسادة , فتحت الابجورة ,مسكت راسي وضغطت بقوة ,
وبقيت على هالحال وانا حاسه اني بستفرغ , رعشة بجسمي مضيعه قوتي و حرارة ودموع
وصعوبة تنفس ,وحالة يرثا لها ,حسيت بيغمى علي تمالكت نفسي شلت الغطاء
ونزلت رجولي بصعوبة ريحت شوي وان احس ببرودة البلاط فرجولي , تساندت على الغرفة
ووقفت خابره بشنطتي بنادول أبيها بخفف هالحرارة اللي بجسمي من الغرفة تساندت للكنبه
ثم لتسريحه ماسكه راسي بيد وادور بيد لقيت البنادول بس وش ابلعها فيه , مويه طالعت بكوبي
اللي على الطاولة فاضي ,أخذت البنادول وفتحت الباب بيدي اللي ترجف وشعري المنفوش وعيوني
اللي مليانه دمع من الحرارة وطلعت !

تساندت على كنب الصالة لين وصلت ل اخرها فتحت عيوني بصعوبه هاذا هو المطبخ دخلت
وباقرب طاولة تمسكت , مأشوف شي ولا ادري وين زر النور , وشاكه اني بستفرغ ومسكرة فمي بيدي
لقيت الزر وولعت اللمبات , أخذت كوب وفتحت حنافية الموية , عبيت الكوب وماقدرت افتح البنادول
وانا واقفه جلست على رجولي وكوب المويه معي بلعت حبتين وشربت وراها مويه !
مسكة راسي وجلست مكاني حافيه وبنفس الفستان الاصفر وشعري منفوش ووجهي لكم ان تتخيلوه !

صوت خطوات ولان مالي حيل اقوم من مكاني ظليت على وضعي ..!
واقف على الباب ؟
هو : أنتي تعبانه ؟ وجا لعندي !
أنا : حركت راسي ب لا !
لمس يدي اللي ماسكه فيها راسي ؟
هو: أفا علاك حمى ( بخوف )

مسك كتفي ويدي بيقومني ودفيت يده ؟!
(وانا اسكر فمي بقوة لاني بستفرغ من الحبوب اللي اكلتها وانا جوعانه !!
ماطاوعني وقومني غصب عني وهو يقول : أنتي تعبانه مشينا للمستشفى ؟
غطيت وجهي بشعري ووقفت ومشيت معه مرغمه ,دخلني الغرفة وجاب عبايتي وهو يسالني:

وين نقابك .؟

بأصبعي أشرت عليه هو وطرحتي وجابه ولبسني عبايتي وجلسني على الغرفة .
هو : البسي نقابك بسرعه بلبس واجيك ؟ (طلع ركض من الغرفة)
لبست ولا ادري كيف شكلي وبصعوبة ربطت نقابي سحبت علبت المنديل
وعبيت ايدي مناديل خايفه استفرغ !!

ثواني وجا بدون ماتكلم جاب صندلي اللي باخر الغرفة وجلس تحتي يلبسني ؟؟!!
دمعت عيوني وكرهت نفسي ووضعي وبعدي عن أمي وهالدنيا كلها.!
أخذ يديني ووقفني (يبيني اتساند عليه ورفضت )
حاولة امشي بنفسي بس مو قادره خليت ايدي بيده وأنا اتساند على كل شي يواجهني ,
أطول درج انزله بحياتي كان درج هالبيت , اعوذ بالله من الضعف والعجز .

فتح الباب وركبت , وساندت ظهري على المرتبه ولفيت راسي لليمين وغمضت عيوني ,
مر وقت قصير وسمعته يقول : وصلنا ؟
فتح الباب ومد يده لي ؟!!
تركت يده ونزلت بصعوبه , وللمرة الثانيه ورغم عني احتجت استاند عليه
دخلنا المستشفى ومسكت أقرب سستر وانا اتفكك من يدينه , دخلتني الغرفة
وحطتني على السرير وعطتني ابرة على طول ومغذي ,
لفيت طرحتي على وجهي وحطيت رجل فوق رجل واسترخيت , أسمع صوته وكأني بحلم والله ..!
نمت لربع ساعه بس وصحيت عليه يرفع الطرحه عن وجهي ويناظر في ؟؟

هو : ريم أنتي بخير ؟
صديت بوجهي ورجعت الطرحه عليه وانا اقول : أيه !
خلص المغذي وشالته وهو واقف جنبي (وهي تثبت اللصق على مكان المغذي يقول لها( بشويش )!
قدرت اوقف بنفسي وطلعنا من المستشفى وفتحت الباب وركبت نزلت مراية السيارة وعدلت نقابي !
وهو راكب وساكت وأحس الندم ياكله ؟!
شغل ورجعنا للبيت وبطريقنا مر مطعم وجبات ونزل ,رجع بعد ثواني ومعاه اكل وعصير طازج .
بصمت وصلنا للبيت ونزلت وطلعت قبله الدرج طلع وراي بسرعه وسبقني وفتح الشقه ,

هو : ريم نزلي عبايتك وتعالي اكلي ( بحزم)
أنا : هات الاكل باكل بالغرفة (والطرحه والنقاب بيدي )
هو : لا تاكلين قدامي عشان اتاكد انك أكلتي / رفعت حاجبي فيه ومشيت !
رميت عبايتي على السرير واخذت بجامه وردي كم طويل ودخلت دورات المياه,
دش دافي وطلعت نشفت شعري ولميته كعكه وتعطرت وطلعت له .!
منزل شماغه جنبه وفاتح الاكل وينتظر!

جلست واخذت العصير وشربت سحب الاكل قدامي ؟
أكلت لاني فعلا كنت بموت من الجوع , حمدلله وقبل لااقوم قال :
هو: ريم خليك بهرجك ؟

أنتظر وش يقول ؟
هو : ترى اللي تسوينه بنفسك مايرضيني أنتي مالك ذنب !
أطلبي وش تبيني اسوي أروح لعمي واعلمه وأطلعك من الموضوع ؟
وكمل / أنا غلطت يوم وضحت لك كل شي ؟ (ينتظرني أرد )

ورجع كمل / والله أني حاولة أبلغك بكل شي وماصار لي فرصة الا بليلة زواجنا
ولأني مابي أغشك بغيتك تعرفين كل شي.

صمت شويات ورجع قال:
والبنت اللي قلت لك أني خاطبها اخت خويي الروح بالروح
وهو اللي قال لي تعال أزوجك أختي وماقدرت ارفض لانها يتيمة الاب
وأخوها شايل هم أنها تتزوج رجال مايخاف الله فيها ..؟

شبك اصابعه ببعضها وسكت ينتظر ؟؟
أنا : خلصت / ببرود!؟
هو : أيه /مستغرب !
أنا : كل هالحكي مايغير شي ,وأحنا على موعدنا بعد ثلاثة أشهر !
تصبح على خير ( وانا رايحه لغرفتي !!)

البارت الخامس *


لاشيء ألذ من أن تكوني بطلة نفسك
أن تهزمي أنكسار روحك و عجزك الذي أطعموك إياه مع الحليب
أن تملئي نقصك الذي صار جزء من عقيدة معطوبة، أن تمضي في هذه الحياة
أمرأة شجاعة، تعرف ماذا تريد و تعرف تماما كيف تحصل عليه.
أمرأة كهذه يهابها الجبناء من الرجال و تغار منها الفارغات من النساء !



* بعد الفجر شبكت جوالي بالشاحن وبديت من اخر صورة وفيديو حاطتها
عندي بالمفضلة ,واللي تتكلم كلها عن الثقة بالنفس ,والقدرة والاكتفاء ,
والتعزيز والرضاء وكيفية التأقلم والتعامل الصحيح مع الظروف ,
والغضب وأمتصاصه ,والراحة النفسيةأسبابها ومنغصاتها , ألخ ..!
وختمتها ب أية( لا يُكَلِّفُ اللَّهُ نَفْساً إِلَّا وُسْعَهاَ) !

أطمئنيت فصلت الشاحن والغيت وضع الطيران ووقتت جوالي على الساعة 12ونص الظهر
ونمت رغم ان ماباقي الا ساعتين !
وعلى أول نغمة للمنبه فزيت , توضيت وصليت وأخذت جوالي ودقيت على أمي
بطمنها وأتطمن عليها .!
صوتها وحنيتها وطريقة كلامها رجعتني ورا غيرت قرار اني بكون قويه و( بكيت )!
كانت تطمني أن هاذي سنة الحياة وزيك زي البنات غيرك , توقعت اني بكيت لاني مشتاقه لهم بس!
سألتها عن ابوي واخواني وسالتني عن خالد ووصتني كالعاده أبشري ومع السلامه وقفلت ؟!

* استشورت وفليت شنطتي ادور لبس مناسب , استقريت على بنطلون ابيض
وبلوزة سماوي ثقيل بلياقه ومفتوحه مع الكتوف, شلت شعري مع الاطراف وروج وردي وكريم وعطر
وركبت سماعاتي واستلقيت على السرير حمد البريدي وقصايد حمد البريدي دخلتني بعالم ثاني!


على 2 الظهر دق الباب ؟؟
عارفه انه هو ومابي ارد بسرعه رجع دق مره ثانيه , سحبت السماعات من اذني ونطيت لسلة
الجزم اللي مغلفتهاوسحبت منها جزمة كعب نيلي ولبستها وكتيت عطر وفتحت الباب بهدووْء ؟!
واقفه والباب نص مفتوح وماسكه المقبض ؟
طالع في من فوق لتحت وأشر بيده للخلف على الاكل ؟

هزيت راسي وسكرت باب غرفتي ورحت لطاولة الاكل وهو مستغرب الوضع تاركني الفجر بحالة يرثا لها
ويشوفني هالحين وكأنه ماصار شي ؟!
جلس وهو يطالع بوجهي وينزل نظره لمكان المغذي !
بسم الله وبديت أكل !!

( صمت )

تدارك الوضع وبدا ياكل هو بعد ..؟
بس ماطول وهو يقول :

هو : خوفتيني البارح ؟/سكت ويبيني أتكلم !
أنا : ....( أكل بهدوء ولا حتى طالعت فيه !)
هو : ريم أنا أتكلم ماسمعتي ( ساند ظهره للكنبه ويناظر في ؟!
أنا : الا سمعت ماعندي رد ( على نفس الموال الاول !
هو :طيب أنا بنزل العصر لبوي تجين معي ؟(يبتسم من صوته .
أنا وبسرعة : لا العصر مشغولة / !
حسيته يفكر وقال : بأيش مشغولة؟؟؟
نزلت العصير وطالعت بعيونه :
برتب عفشي مستحيل اخليه ثلات شهور مطبق بالشنط ؟؟
هو : أها / ماعجبه ردي ؟!

صمت ..

حمدلله وسحبت منديل ومسحت فمي واخذت علبة مويه مع العصير ودخلت الغرفة وقفلت الباب .
رميت الكعب وتربعت فوق السرير وتصفحت جوالي رديت على كل الرسايل سناب وواتس وانستقرام
من الفضاوة , ولاني مأعرف اشتغل الا على صوت قصايد وشيلات كنت شارية سماعة صغيرة بحجم الكف , تذكرتها
وشغلتها وحطيت قصايد , وسحبت كل الشنط قدام الدرج وفتحتها وبديت ارتب ,الا بعض ملابسي (واللي كانت خاصه )
جمعتها وحطيتها باكبر شنطه وسويت لشنطه قفل وصفيتها جنب الدرج , ورتبت الشنط الفارغه جنبها
وغيرت مفرش السرير لاني كنت جايبه اللون الزهري اللي احبه .!
بعد العصر خلصت وركبت فواحاتي وعطرت المكان وصليت ورجعت لجوالي اراسل رهف
سألتها وش تسوون قالت نتقهوا وليتني ماسالتها لاني خرمانه على القهوة واشتهيتها زيادة يوم قالته ..؟
كان فيه مسلسل قبل هالزواج اتابعه ولاني ماختمته رجعت اتابعه وانشغل فيه .؟؟

__

أذن المغرب صليت ورجعت للمسلسل , وقفت على دقات الباب !
نزلت وانا اعدل شعري طليت فالمرايه بسرعه وفتحت , طاحت عيوني على ثلاجات القهوة
( زمزميات) والتمره والحلا بالصالة ؟!!
وهو عند التلفزيون ويشغله ؟
أنتبه لي وقال:
تعالي تقهوي خليت عهد تسوي لنا قهوة ( الريموت بيده اليمنى !
ماصدقت خبر وطلعت حافيه ونسيت الجزمه اللي كنت كاشخه فيها الظهر (جابت راسي القهوة)*_*
تركت باب الغرفه مفتوح وأنتشرت ريحت العطر والفواحات بالصالة .
جلست بعيد عنه قريب من القهوة وحطيت رجل على رجل ,
وصبيت لنفسي فنجال وسحبت الحلا وانا اطالع التلفزيون,
جلس قدامي وانتظر اني اصب عليه القهوة ولما شاف انه لاحياة لمن تنادي
قرب وصب لنفسه فنجال وهو يقول :
خالد : طيب صبي لي انا جاي اشيل كل هذا من تحت
(يأشر على صينية الحلا وثلاجات القهوة والفناجيل )

صبيت لنفسي فنجال ثاني وانا اقول : معك يدين ؟
هو : خلصتي شغلك ؟ / يبي يسولف ّ!
أنا : أيه ومركزه مع التلفزيون اللي مدري وش يعرض اصلا ..
هو : كنت بالصالة وأسمع صوت القصايد / يطالع بالتلفزيون هو بعد .

صمت ونتبادل زمزميات القهوة والكل معتمد على نفسه !

هو : ايه صح قبل ماأنسى امي وعهد عازمينك بكرة على القهوة والعشاء/يناظر لي !
أعترف انه فاجأني وماودي اروح لخالتي بذات لانها زوجتني ولدها وهو مايبيني !!
هزيت راسي ب تمام / ماقدرت ارفض استحيت !
هو : وترى ابوي والعيال معزومين على عشاء بكرة يعني بتاخذين راحتك / يطمني !
مارديت ؟!
جاء ببالي سؤال وماترددت أساله ؟
ناظرت له / عهد تدري بموضوع الزواج وانك كنت تبي وحده ثانيه ؟
هو : بسرعه لاوالله ماتدري ولااحد يدري غير ابوي وامي / خاف ان علاقتي مع عهد تخرب !
سكت ورجعت اتابع ؟!

*عمي طامي عنده غير خالد طلال اللي بعد خال وفهد وممدوح وعهد وفاء صغيرة عمرها سنتين !
عهد علاقتي معها حلوة من عمر هي وكل بنات عمي وحمدت ربي ان مالها علاقه بهالموضوع .

__

بعد ماخلصنا قهوة شلت المواعين ونظفتها ودخلت أصلي وهو طلع ولا سالته وين , أشغلت نفسي
كالعاده لين دق الباب للعشاء , وبسكات رحت وتعشيت ورجعت تابعت المسلسل لين الفجر صليت
وشغلت قران ونمت ..!
صحيت الظهر واخذت دش وطلعت اتغداء معه وبدون تفاصيل ولانه ماصار شي جديد رجعت للغرفة ونمت
صحيت على صوت المنبه 4 العصر صليت وجلست أقرا قران
(بقلبي ضيقة نفس ضيقة اليوم الاول وابيها تروح )!

*رقم غريب يدق عطيته مشغول وصمت جوالي !
لقيت رسالة واتس ( أنا خالد ردي )
مارديت ولا خزنت رقمه وبهالحظه كارهته ..؟
رميت نفسي على السرير وضميت وسادتي وبقيت على هالحال بعد ساعة دق الباب .
فتحت
نعم / لامبالاة !
بثوب ومفتاح السيارة بيده .
هو : دقيت علاك ليه ماتردين / يتنهد بستغراب ؟
بكل صدق قلت : مابي ارد !/ اعدل شعري .
هو : ريم مره ثانية اذا كنت برا ودقيت ردي ( معصب )!
وكمل/ أنا راجع من اخر الدنيا خفت ان فيك شي وانتي تقولين مابي ارد
( جلس ورمى المفاتيح على الطاولة)
(ماجزعت فيه بالعكس فرحت اني خربت عليها ؟؟

تبي شي ولا اسكر الباب / ببرود واضرب برجلي فالارض !
يطالع في من فوق لتحت !!
هو : أمي عازمه خالاتي وتبيك تنزلين لها قبل المغرب مسوين لك حفلة / يناظر لي !
أنا : المغرب ساعة ويذن / رفعت حاجبي ونزلت عيوني !
هو : مايمديك يعني / بضجر !
أنا : أي مايمدي واهز راسي .
وقف وهو يقول : خلاص بنزل ل امي تأخر الحفلة لبعد المغرب جهزي.!
سكرت الباب وانا اطالع الساعة بجوالي كم ..؟

* دخلت اخذ دش سريع عشان أروق بس , ثم فتحت سماعاتي وحطيت قصايد , طلعت للمطبخ بولع جمر
عشان أبخر شعري وكنت حريصه اني ارجع الغرفة قبل لايجي خالد , وفعلا شبيت على الجمر وحطيته بمبخرتي
ورحت للغرفة حطيت العود وبخرت شعري المبلول على صوت القصايد ونزلت المبخرة على الطاولة وأستشورت
شعري زين ولميته فوق , نص ساعة بس وخلصت مكياج , قدام مرايتي الطويلة سكرت السحاب !
فستان سكري على ابيض لين نص الساق بفتحه طويلة ومن فوق توب بأكمام نازلة على الكتف بمقوي ,مكياج
عسلي وعدسات عسلي غامق وروج أحمر ومناكير احمر سلسلة ذهب على شكل نبض وحلق , ساعة ذهبية بيدي اليمنى
وخاتم وواسوار بيدي اليسرى , كعب احمر عالي وخلخال ذهبي ,كريم وعطر ..!
قفلت القصايد وصليت وقريت اذكاري ,وقمت على صوت جوالي ..
هذاك الرقم الغريب واعرف صاحبه ولا تعشمت بيوم أن بيكون رقمه فجوالي بدون أسم ,
طولت على مارديت ب نعم !
سلام / خالد !
وعليكم السلام/ آه ياصوته بالجوال ..!
هو: خلصتي /أسمع عنده صوت ؟
أنا : أيه !
هو : بجيك يالله / كان بيقفل ؟
أنا : لا لاتجي ثواني ونازلة/ قلتها بسرعة ؟
طيب طيب ومو عاجبه الوضع / وقفل !

قفلت انا بعد ورميت الجوال ,وفتحت شعري الاسود الكثير وميلته على وجهي الايسر ,
تعطرة مره ثانيه واخذت جوالي وسماعاتي ,ونزلت ..!
باب شقة عمي واللي يطل على الصالة على طوول مفتوح , دقيته ثلاث مرات وجوالي بيدي واحاول أبتسم
ومايوضح علي شيء..
العروس العرووس / عهد وصوت ضحكتهاا !
دخلت وكان مقابل لي هو , ضميت عهد زي كل مرة أسلم عليها أخذتني بيدي وهي تقول :
عهد: أمانه فيه جمال زي كذا/ توجه كلامها لخالتها اللي لسى ماسلمت عليهم ؟!
سلمت بصوت عالي وبديت باليمين , مريته وأنا اسلم ولا حتى التفتت فيه عديته وكملت !
عهد شالة الخداديه اللي جنبه وهي تقول هنا هنا جنب زوجك بعد ماسلمت عليهن , وفعلا
جلست جنبه وضرب كتفي بكتفه من ضيق الكنبه ,حطيت رجل على رجل ونزلت جوالي بحظني وأنا
أبتسم !
عن يساري بثوب مفتوحه لياقته وعلى الكنبه شماغه وعقاله
واللي هنا على الطاولة جواله ومفتاح سيارته ,
وفنجال قهوته , هاذي التفاصيل الصغيرة شفتها بلمح البصر , شاغلني وأنتبه ل أدق تفاصيله.!
مديت يدي واخذت الفنجال من عهد وهي تقول :
عهد : وحشتيني يحماتي (يعني زوجة اخوي!)
بضحكه وأنتي أكثر ي قلبي / يسمع وساكت !

أي حركه مني تضرب كتفي بكتفه ومتقيده ومااقدر اتحرك !
خالته أم فارس : مبروك ياعروس الله يسعدكم
أنا : الله يبارك فيك / وبنفس الطريقة والابتسامه رديت على خالته الثانيه !
أما خالتي آمه جاهدت نفسي كثير وانا احاول ماوضح لها شي , جابوا ترته ونزلوها قدامنا ,
مكتوب عليها مبروك ومعها سكين..
يلا قصوها / عهد ومتحمسه عشان تصور .
مسكة شعري بيدي اليسرى ولفيت عليه وهو ماسك السكين ويناظر لي وينتظرني امسكها معه,
حطيت يدي فوق يده وقصيناها ( لمحته يبتسم حسيته فرحان)!
ماطول وهو يقول ل خالتي :
يمه : انا بروح للاستراحه اذا خلصتوا وبغيتوا العشاء دقوا علي .
/وقف واخذ شماغه ولف طالع لي ومشى !!
طلعتني عهد من الضيقه اللي كنت فيها وهي تعلمني
بسوالف بنات عماني وخوالي بالعرس .

دقت عليه عهد وجاب العشاء ورجع للاستراحه , بعد ماخلصنا وعلى ممشاء خالاته جاء !
كنت جالسه على كنبه ومعي بيالة شاهي أول ماسمعت صوته اوجعني بطني ,
جلس على الكنبه اللي جنبي
وقامت عهد وصبت له شاهي , خالتي سألت بعد وقت اذا بنسافر نتمشى ولا لا ..)؟
هو : ماقررنا باقي / ولا زاد حرف !
خالتي : ياوليدي سافروا تمشوا واستانسوا / حسيت بشي غريب !
هو : أبشري ياميمتي قريب / وطالع لي وأبتسم ؟
في شي مو مريحني وأنا احساسي مايخيب أخذت جوالي وقمت :
أنا : خالتي تامرين على شي ؟
خالتي: سلامتس ياوليدي الله يسعدكم ويهنيكم .
أشرت ل عهد ب باي بيدي ومشيت وانا اقول تصبحون على خير ,,

بعد ربع ساعة وبشقتي فوق فتح الباب ودخل ولقاني جالسه بالصالة أنتظره .؟!
أستغرب اني بلبسي وللحين جالسه بالعادة مسكره باب الغرفة علي !
فيك شي / واقف .
أنا : لا بس احساسي يقول أنكم مخبين عني شي !/بكل صدق !
جلس وفتح ازارير الياقه: يبتسم !
هو : وش تبغين تعرفين أساليني / وجهه تعبان ومرهق !
أنا: خالتي فيها شي ؟
هو : أمي لا / يهز راسه !

ماقتنعت ..

يطالع لي ويبتسم , حتى أبتسامته ماتطمن حزين ومهموم مو على بعضه !
أنا : خالد فيه شي أنا متأكده علمني لاني بعرفه أذا مو اليوم بكرة ؟/ عقدت حواجبي !
نزل ساعته وبقى يتحسس مكانها ؟!
ضامه خداديه وانتظر وش بيقول؟!
هو: تذكرين الرجال اللي أقولك يبيني أتزوج أخته (هزيت راسي ب أيه)
تعبان عنده فشل كلوي وحالته صعبه ومالقينا له متبرع بكلى ( بلعت ريقي وانا انتظره يكمل )
سويت تحاليل وطلعت مططابقه وأقدر اتبرع له , علمت أبوي ورفض وللحين رافض ؟(تضايق)
أنا بذهول: وأنت صدق بتتبرع له ؟/ فاتحه عيوني بقوة !
هو : أيه الرجال مريض له سنتين وحالته صعبه وخوويي وكفو !
أنا: مالوم عمي يومه رفض خايف عليك / نسيت نفسي !
هو: واجد اللي سسوا هالعملية وعايشين وبخير / صد عني !
تذكرت خالتي وقلت :
خالتي وش رايها ؟
هو : أمي اصعب من ابوي رافضه بعد وتحاول تشغلني أول شي بالزواج والحين تبيني أسافر
/ يتكلم وهو صاد عني ؟!


صمت ..

أنت تحبه ؟!
قلتها بكل رومنسيه وعفوية !
ضحك بقوة وأنتبهت لغمازاته وأنتبهت لسؤالي الغبي / وأبتسمت وأنحرجت !؟

هو : أيه أحبه خويي من 14 سنه ،درسنا مع بعض مرت علينا مواقف صعبه وعديناها وكان أخو
دنيا وللحين وهو كفو بس هد حيله المرض ؟!
طلع جواله وأنشلغ فيه .
( شفتوا هالكلامات اللي قالها سكرت حلقي بغيت ابكي والله
حطيت نفسي مكانه تخيلت لو مريم اعز صاحباتي بهالموقف)!!

سرحت ورجعت أساله أبغى أعرف :
يعني لو عمي يوافق بتتبرع له ؟
رفع عيونه لي وجواله بيده كأنه يقول أنتي للحين بالموضوع !
هو: أيه وبقنع أبوي وأمي ان شاءالله ..!؟
خفت وليه خفت مدري , شفته صامل وعارفه أنه يسويها , للحظه كنت بقول لا تكفى
أخاف يصير لك شي , قلتها بس بصدري وعيا صوتي يوصلها .؟!

* أخذت جوالي وسماعتي وقلت تصبح على خير ..
وأنتي من آهله وقام ..
دخلت الغرفة ونزلت والعدسات ومسحت المكياج والمناكير وطفيت النور ونمت على صوت القران .

اليوم الرابع *

صحيت متأخر أخذت دش واستشورت ولبست تيور أسود ميد ضيق من الخصر ومكسر وواسع من تحت
وبلوزة عنابي كت روج وردي بارد وعطر وطلعت ..!
ناظرت بالصالة مافيه أحد أستغربت طالعت بساعة الصالة 4 ونص العصر غريب وينه (قلتها بصدري )
رحت المطبخ أخذت توست وعصير ورجعت الصالة !
فتحت التلفزيون وجلست ؟

بعد وقت دخل كان برا ..
هو :سلام
وعليكم السلام / فرحت بجيته !
هو : أكلتي شي / جلس قدامي ؟
أنا : أيه توست وعصير / وأشر عليها !
هو: وش رايك نطلع ماطفشتي من جلست البيت ؟
ولأني ماأكذب أحساسي أبدآ عرفت أنه متضايق من أيش مدري !؟
رديت ب عادي تبينا نطلع طلعنا ؟
هو : يالله البسي / عيونه تضحك وماتوقع أوافق !
لبست عبايتي وعدلت نقابي زين ,وخذت شنطه سوداء طويله ورميت فيها
كريمي وعطر وروج ومرايه ومناديل معطره
وصرافتي وجوالي ,ولبست وشوز اسود وطلعت له !

وقف مشينا قلت مشينا ,,
نزلت وانا احاول اخليه يسبقني وينزل قدامي وعارفه انه متعمد ينتظرني ويمشي جنبي ,
ركبنا حطيت رجل على رجل ونزلت شنطتي على يساري ,
وانا أناظر لبيت عمي وسيارات عياله والبوابه الكبيرة المفتوحه ,
عند أول أشارة طرى علي خويه وقلت :
وشصار على خويك ؟ / العب بالخاتم واللي دايم بصبع يدي الاوسط !
هو : بالمستشفى على وضعه ! / يتكلم ويلتفت لي أحيانا.
سكت !
هو :ألا صحيح أنتي وش رايك أتبرع له ولا لا !/ ماتوقعت السؤال وناظرت له بطرف عيني !
رجعت اطالع قدام وقلت بكل صدق :
أذا يهمك رايي : لا لاتتبرع له !
هو بستغراب : أفا ليه ؟
أنا : بدون ليه !
(مدري وش فهم ولا عندي نية أشرح له السبب )

عادي أشغل أغاني يمد أيده للمسجل ؟
لا قلتها وصديت يمين !/ خفت اتضايق ويوضح علي وأضعف !
هو: ليش أنتي ماتسمعين أغاني ؟/ شال ايده ورجع يمسك الدركسون !
بعد شوي قلت : الا اسمع بس هاليومين علاقتي معها سيئة !
سكت .
وقفنا عند محل بيتزا وقال :
تبين شي غير البيتزا
رديت :لا
فاتح الباب بينزل : وش اجيب لك عصير ؟ يطالع لي !
توت .

__

نزلنا للحديقة بعد ماجاب الاكل وجلسنا على اول طاولة قريبه منا أكلنا بسكات وبعد ماخلصنا
لمحت صراف بأخر الحديقه قلت وأنا أوقف :
ممكن أروح أصرف ؟/ أشرت لصراف .
ورغم انها قريبه ومو بذاك البعد قال :
لوحدك ؟!/ بتعجب .
أنا: أيه مو بعيد !/ اخذت شنطتي ورجعت الكرسي مكانه .
هو : والله لو أني مجنون تروحين لحالك !!/ رمى الكيس اللي بيده
وهو يقول:أنا اروح معك أنتظري!
وأحنا ماشين لصراف قال:
كم تبغين أصرف لك ؟
أنا : أنا اللي بصرف ؟/ أحاول يكون بيني وبينه مسافه لان كفتي كل شوي تضرب بيده!
مارد وكملنا مشي ..؟
عند الصراف طلع صرافته وقال :
الرقم السري 40 45 !/ يمد الصراف لي ؟!
طنشته وفتحت شنطتي واخذت صرافي .
وقف بيني وبين الصراف وهو يمد صرافته لي ويأشر عليها ويقول:
هاذي الصراف تحت امرك اصرفي اللي تبين .
رفعت عيوني لعيونه وأنا قريبه منه حيل وقلت :
الف شكر عندي فلوس /رجعت رجفت يديني واستحيت .
لف على الصراف وسحب الفين ريال ومسك يدي اليسرى وحطها فيها وهو يقول :
أنتي زوجتي وحلالي حلالك !/ تراجعت لوراء وحطيت الصراف مع الفلوس ودخلتها بالشنطه وقلت:
على الورق لاتنسى ؟
ماكنت ابي اسوي مشكله ولا ابي اطول السالفة !
مارد ولا تكلم مشينا وهو يعدل شماغه .


__

*اليوم السادس .

على الغداء كسرت الصمت وأنا أقول :
بروح ل أمي العصر ممكن ؟
هو : أبشري اوديك علمتي عمتي أنك بتجينهم .
لا مابي اتعبها ولا ابيها تتكلف !

بدون تفاصيل كثير جهزت ورحت ل أمي العصر وتركت الغرفة مفتوحه عشان ملابسه , هناك عند أمي
وبعد ماسلمت على امي وابوي واخواني أرسلت له أني بنام عند أمي دق ومارديت
ورجع دق ومارديت , بعد الضحك والسوالف والعشاء دخلت غرفتي اللي طلعت منها
فرحانه أشتقت لفراشي وحياتي وأهلي ولاني مابي افقد هااللحظة قفلت جوالي ونمت ..!
صحيت الظهر ودخلت المطبخ عشان امي وسويت الغدا وجلسنا على سفرة وحده وتغديت معهم
وهم يحكون لي عن العرس ووش صار وامي وسوالفها ورهف وتعليقاتها رجعت للحياة بينهم والله .!
على العصر سويت القهوة وحطيتها بالحوش وجوالي للحين مقفل ولا عندي نية افتحه .!
نغمة جوال سعد مالفتت انتباهي بس كلمة ارحب يانسيب روعتني وعرفة من يكلم ؟!
سعد وهو يضحك : حياك الله تعال / يغمز لي !
قامت رهف وقمت وراها لاني مابي اشوفه !
داخل سألتني رهف سؤال غريب ؟
رهف وهي مستحيه : ريم امانه خالد رومنسي ؟
لا / أصلا مافيه رجال رومنسي / نسيت نفسي!
بستغراب رهف : بالعكس والله فيه ريجيل رومنسيين اكثر من البنات ؟!
هزيت راسي ب لا !
قالت : خالد يصلح لك أنتي مو رومنسيه / بجديه تتكلم !
أبتسمت نص أبتسامه وقلت: وكيف عرفتي أني مو رومنسية !/ تأكدت أن أختي ماتعرفني ؟
ماأشوفك تتكلمين عن خالد حتى قبل زواجك ولا تهتمين فيه هاللحين شوفيه بيجي عند سعد
وأنتي هنا جالسه !/ ( وش أقول افضفض ولا اضحك واسوي ان كلامها مر عادي )!
أمي لاتخلينها تسوي الغدا حرام تراها حرمة كبيره ؟/ بعد ماطولت النظر فيها !
رهف: والله ماتقومني تخليني راقده وهي تشتغل ؟!/ فتحت جوالها بعد صوت الرسايل وقمت
من عندها وبقلبي أكوام أكوام حزن .

رميت بنفسي على السرير وانا اغطي وجهي بمخدتي ثواني واسمعها تنادي وتقول سعد يبيك تروحين لهم
خالد عندهم رديت ب طيب ..

فتحت جوالي ولقيت له مكالمات نزلته قدامي وكلام رهف للحين باذني ومضايقني ,
دق هذاك الرقم الغريب ورديت ..
سلام / وصوت اخواني وضحكهم مغطي على صوته .
وعليكم السلام .!
هو: أنا برا عند سعد جاهزه نمشي ؟
أنا: أيه دقايق واطلع ..!
غيرت بملابسي اللي جيت فيها امس ولبست عبايتي واخذت شنطتي وطلعت
مريت رهف بالصالة وعديتها ولاقلت كلمة ..؟

طلعت لهم مبتسمه _
سلام بصوت واطي / كان جالس مع امي واخواني .
ظليت واقفه ووقف هو بسرعه وقال: يالله مشينا
سعد مستغرب قال بتريقه طيب سلم على زوجتك ويغمز له ويضحك ؟
ردآ على سعد أخذ يدي اليسرى وقلبها وباس يدي من جوا (راحت اليد) وطول
وهو يبوسها (سحبتها بشويش وانا ابتسم )!
على ضحكهم وابتساماتهم جلست عند أمي بست راسها ويدها وانا اقول اذا بغيت شي دقي علي .
مع السلامه وطلعت معه !

*

بعد أسبوعين وكنا على نفس الموال ولاتغير شي بيني وبينه , نزلنا عند عمي من المغرب ,
وبعد العشاء كنت جالسه مع عهد بالصالة وخالتي وعمي وخالد وبقيت العيال بالمجلس ,
ارتفعت أصواتهم وخصوصآ صوت عمي وخالد , راحت عهد لهم تركض ولان العيال فيه لبست عباتي ونقابي ولحقتها ,
وقفت على باب مجلس الريجيل وانا مرعوبه من الصوت وعمي وكلامه القوي ..
خالدوهو جالس على ركبه ونص : اذا مت ربي كاتب وقضاء وقدر !
حطيت ايدي على فمي لاشعوريا ..!
عمي: رح وتبرع لخويك ثم لاأشوف وجهك بهالبيت / بعصبيه !
قربت ووقفت جنب عهد وانا اناظر لخالتي وهي تتكلم مع خالد بحنيه وتفهمه على عكس عمي .؟
قام خالد وطاحت عيني بعينه وهو معصب قرب ووقف قدامي : تروحين معي ؟
وين؟/ قلتها بخوف !
مدري والله / طلع وتركني وهو ينفض يدينه ؟
أخذت شوزي ولحقته لقيته بسيارة ينتظر ركبت ومشاء على طول ,!
ركبت معه بدون جوالي وشنطتي وهو بدون شماغ ومعصب وحالته حاله ؟

صمت ..

بعد ربع ساعة وقف قدام بقالة والتفت لي :
وش اجيب لك ؟
أنا : عصير توت ومويه وعلك / اناظر بنص عين عسى هدىء !
رجع ب ثنين عصير توت على غير العادة وماء ولبان .
أخذت اللبان وسحبت وحده ومديتها له وانا أقول / خذ تخفف التوتر !
هو :ترى بمسك خط طيب /يفتح اللبان !
قلت : اووك !
مسكنا خط الطايف ودق جواله طنش الجوال ناظرت له !
شوف مين يمكن خالتي ؟!
دخل يده بجيبه وطلع الجوال ورماه على الطبلون!
هو: ايه امي وماابغى ارد / بعصبيه !
سحبت الجوال وفتحت الخط
هلا خالتي / بكل هدوء والمحه يطالع في !
خالتي: ريم ياوليدي انتم وين ؟
قريب ياخاله لاتخافين شوي ونرجع / أطمنها !
خالتي: خالد وين ليه مايرد علي ؟
نزل البقالة وجواله عندي / طالعت فيه بستغراب !
على توصياته وانتبهوا من الخط قفلت وانا اقول :
ترى عيب تدق امك وماترد هاذي أم قدر ..
بعصبيه : اعرف وش بتقول ولا أبي اعصب علاها .
أنا : حتى ولو تحمل واذا دقت رد لو انك على فراش الموت !

فتحت المويه وشربت منها شوي وضميتها بين يدين لانها باردة , سحبها من أيدي
وشرب نصها وانا مذهولة !
هاذي مويتك/ أشرت على العلبه الثانيه توقعته ماشافها .!
عارف بس انا أبغى هاذي / ويحرك العلبه ؟!
ماعندي رد صديت عنه وسويت نفسي مافهمت قصده وقال:
ليه الماء متغير طعمه كذا أحلا ماء شربته بحياتي .
أنا : لا ياشيخ / مدري وش أقول ؟!

يضحك ..

وأحنا راجعين وقفنا عند حديقه بطلب منه نزلنا وهو يقول بنلف الحديقه مشي !
وفعلا مشينا على ممشاء الحديقه وهو يقول :
ريم بطلب منك طلب هرجي أمي وأقنعيها يمكن أذا رضت أبوي يرضى !
أنا : لا طبعا ولاتفكر بيوم أني اقنعها / بكل جديه !
هو : ليه / وقف !
أنا: لاني ضد انك تسويها أصلا ؟
هو : أنتي لو شفتي الرجال وكيف تغير حاله وتدهورت صحته بتقولين سوها تكسب أجر ..!
أنا: الله معه ويكون بعونه / كنت بكمل مشي بس وقفت على عصبيته وهو يقول :
الله معه أنتم ماتفكرون الا بنفوسكم الرجال بيموت راح عظم وجلد مريض مريض
ياناس أمه ليل ونهار تبكي وخواته اذا مات من لهم ( على هالجملة وقفته:
أها قول ان السبب خواته أنت شايل هم خواته اكثر منه !!

رجعت السيارة وأنا أقول :الشرهه علي اللي أمشي معك !
ركبت وضربت الباب بقوة وانا اتنهد ؟!
فتح بابي وجلس على رجوله وأبتسم!
نزلت عيوني له صار تحتي تقريبا وحاط كوعه على مرتبتي بغى يمسك يدي وسحبتها!
هو : هاذي غيره / ويبتسم ماكأنه الشخص اللي قبل شوي معصب!؟
أنا : لا لا لا لايروح فكرك بعيد/ مبعده عنه بكل جسمي وتاركه نص المرتبه.!
هو : أحلفي قولي والله ماغرت / قاهرني بهالابتسامه اللي من القلب .
أنا:خالد روح اركب فضحتنا ؟
هو: ياويلي ياويلي يازين اللي يغارون/ يضرب بيدينه على وجهه !
أنا: ترى والله لنقز لمرتبت السواق ؟!/ على أساس ماوصلت لها من كثر مازحفت عنه !
وقف وسكر بابي بشويش وركب رجعت جلست زين ولا ناظرت له ..!

صمت ..

وصلنا البيت وقف السيارة وقفل الازرة وطفى ( حاولة افتح الباب مقفل )
أنا: ممكن أنزل ؟!/ مستغربه !
لف علي بكل جسمه وقال: والله العظيم ماعرف أسمها ولا كم عمرها ولاعمري شفتها ولابحياتي فكرت
تكون زوجتي زي ماقلت لك أخوها خايف علاها وابوها متوفي وقال تعال ازوجك أختي وصرت مجبور
على شان خويي ؟!
أشرت على الباب بنزل فتح الاقفال ونزلت مريت بيت عمي اخذت شنطتي وجوالي وركض لفوق دخلت غرفتي
وقفلت وكل حكيه براسي , تطمنت وخفت بنفس الوقت ولقيت نفسي أدعي لخويه يارب يلقى متبرع ..؟!
بالي مشغول معه وبحركاته تأكدت ان الباب مقفل دخلت سرير وعلى صوت القران نمت .

البارت السادس *

متصنع السلوه اللي غصب عنّه قنوع
واضح عليه الحزن لو ادعى بالطرب .!



أمي تقول ألام اللي تطلع بنتها من بيتها لبيت زوجها وهي
ماتعرف تطبخ ولاتظف ولاهيب سنعة بلفظنا, ماتعبت ولاربت ومأثمر وجودها بشي !
عشان كذا ولأني تربيت حرمة تعرف الواجب زين حددت نهاية الاسبوع لعزيمة بيت عمي
وفاتحت ولدهم بالموضوع .
أنا : ترى بعزم بيت عمي نهاية الاسبوع
/ بالصالة وعلى العشاء زي كل ليلة !
هو: أهلي /بستغراب
أنا : أيه وأبي أغراض من السوبر ماركت / ماطالع فيه !
هو : أبشري متى تبينا نروح
/ للحين متفاجأ من الموضوع .
أنا : بكرة أذا فاضي ؟
ماطولتها ولا تكلمت معه كثير خلصت وقمت ومن البكرة كتبت كل الاغراض اللي محتاجتها
وشيكت على المطبخ وشفت وش ناقصه !؟

على المغرب دق باب غرفتي ؟
فتحت ببجامعه رصاصي سبورت وشعري مظفر على جنب وروج كالعادة وردي وعطر ,
بالسبحه ويطالع لي وقال :
هو : يالله نروح البقالة / يتكي بجنبه الايسر على الباب ويلعب بالسبحه!
أنا: عقدت حواجبي / أنا مابي البقالة بروح السوبر ماركت .!
هو: أبشري نروح السوبر ماركت ليه مانروح / يبتسم
أنا: خلاص بعد الصلاة أجهز / بسكر الباب !!
هو: طيب تعالي نجلس فالصالة طفشت لحالي / يحك راسه .
أنا : أنا مرتاحه هنا ومو طفشانه / مسكت الباب بقوة
وكملت/ أنزل عند عمي لين بعد المغرب .!
هو: لا ماني بنازل بجلس فبيتي / زعل !
أنا: أذا اذن طلعت
/ سكرت الباب وضحكت والله على الاسلوب أجل بيتي *_*
وأنا بالركعه الثانيه دق الباب وبركعه الثالثه دق وأنا أسلم دق الباب
فتحت وأنا معصبه :
خير / بشرشف الصلاة !؟
بكل براءة قال :أنتظرك
/جالس على طاولة الصالة ومقابل لباب غرفتي !
طيب جايه / وسكرت هف !

لبست العباية وعدلت نقابي زين وأخذت شنطه وردي وجزمة رصاصي سبورت جوالي وعطر
وطلعت وأنا ارد باب غرفتي قال :
سكري العباية / ويأشر على ازرة العباية من تحت !!
نزلت راسي لعبايتي وأنا أقول : مسكرتها ؟
هو: من تحت مفتوحه !
/ نزل من الطاولة وجلس قدام أرجولي وسكر الازرة من الركبه للاخير وتأكد أنها مسكرة !!
فاتحه عيوني بقوة وأطالع فيه ..!!!
وقف مشينا ؟؟
مشيت وأنا والله للحظه ماكنت هنا يوم كان يسكرها
حسيت أني زوجته فعلا ( ماكان خالد اللي تكلم معي ليلة الزواج)
على ضربت باب الشقه أستجمعت نفسي من هالحركة الصغير اللي أثرت في ..؟
نزلنا وركبت وبدون حكي وصلنا لسوبر ماركت ..

هو: يالله هذا السوبر ماركت تحت أمرك !
نزلت ونزل دخلنا السوبر ماركت وبديت أخذ الاغراض وهو معاي بالسلة , ويحاول
يتكلم معي بكل الطرق, يترك السلة أكثر من مرة عشان يوقف بيني وبين رجل فالطرف
الثاني من السوبر ماركت , يمشي قبلي ويوسع لي الطريق , أأشر على اللي ابيه ويشيله عني ,
أوقف أتفقد ألاغراض بجوالي ويوقف جنبي ويطالع معي بشاشة جوالي , أزحف ويقرب , أسكت ويتكلم عشان أتكلم ,
أطالع ويطالع بنفس المكان اللي أطلع له , يوريني بعض الأغراض ويحاول يغريني فيها ..!
يطيح كم العباية لكوعي وأنا غافلة ويرفعه عشان أيدي ماتبان , كل هذا منتبهه له ومسويه أني مادريت ,
وأنا لو يتنحنح بس أنتبهت , أحيان الظروف تظلمنا خلينا نتصرف عكس اللي نبيه ,
يعني لو ماصار اللي صار أمدي أيدي بيده , وضحكتنا سوا,وأشاوره حتى لو الشي مايستاهل المشاورة ..!
على أخر شي نزلته بسله قلت :
خلاص / أدخل جوالي بالشنطه !
هو: ماتبين شي ثاني / ماسك السله بيد وواقف قدامي ويتكلم !
أنا: لا خلصت / عدلت أكمام عباتي وأنتظره يمشي.
وقفنا عند المحاسب وترك السله قدام الطاولة وتراجع ووقف معي !
عطى الصراف وهو مبتسم وسحب العامل السلة وطلعنا ..
بسيارة وأنا انزل المراية قال:
أفضل شي صار اليوم هاذي المقاضي / ماكان يطالع في وحسيت أنه مايكلمني ..!
طالعت له / وأبتسم !
أنا:رغم أنك دفعت الف وعليه الله يكثر خيرك / قلتها لاني متعوده اذا احد من أخواني جاب شي اقوله نفس الكلام !
هو: على قلبي زي العسل والله / كمية صدق بكلامه !
أنا: سكت لاني مابغيت ارد على الكلام الصدق بكذب
ومستحيل أرد عليه باللي أحسه لاني لو رديت عليه بقول(الله لايحرمني منك)!
فتح العصير , وحاولت أشتت نفسي مابقى سيارة ماطالعت فيها ولا جدار ماقريت وش مكتوب عليه
صديت يمين وطولت صاده وهو ساكت المصيبه أن سكوته صاير يوترني , أخاف أبعد وأخاف اقرب
حتى الكلام آخافه , ياخوفي يجي الوقت اللي أتكلم فيه وأقوله اني أحبه من قبل ماشوفه من هناك
من بيت آهلي , فرك يديني ببعضها يوضح له آني ماني على بعضي ومسكة العصير وضمه كل الوقت
يقوله أني مشغولة بشي ثاني غير هالعصير !!

بوابة بيت عمي نبهتني اني وصلت ..
حاولت أساعده بالاغراض ورفض وعطاني مفتاح البيت عشان اطلع افتح البيت قبله .
رميت عبايتي وشنطتي على الكنبه بعد مافتحت الباب , ودخل الاغراض للمطبخ ,
نزلها تحت باب الدرج وبديت ارتبها ..
نزل جواله على طاولة المطبخ !!
وين أحط هاذي ؟؟
ناظرت له وأنا أقول خلاص أنا أرتبها ..؟
ترى أنا رجال معتمد على نفسي وطول عمري ساكن لوحدي (وكمل)صحيح أني بدوي
وماعرف أرتب زين بس تحمليني / ماسك خلطة الحلا بيد وحليب النيدو بيد *_*
رتبنا وكنت مركزه على أني ابعد عنه أكثر من تركيزي على ترتيب هالاغراض !!

*طلع ورجع لنا بعشاءوبدون تفاصيل ولانه ماصار شي جديد نمت ..!
فستان ناعم ميد وتسريحة عبسي وروج وعطر وطلعت للغدا ,..
الجديد أنه قال لي أني الليله معزومة ورفض يقول لي عند مين !
حاولة أعرف ورفض وحلف أني فعلا معزومة ومايكذب !
فهمت ان العزيمه بتكون برا وعلى هالاساس كشخت ..

زي العادة دش وبخور مخصوص لشعري وأستشورت ومكياج خفيف وكحل فرنسي
وعدسات وروج ومناكير وخاتم وأساور وساعة وبنطلون جنز ازرق مشمر من تحت
وبلوزة وجالية رصاصي , كعب أسود وشنطة احمر ,ولبست عباتي ونقابي
وتعطرت ورميت العطر بالشنطه
وفتحت الخط : أنا تحت أنزلي .؟؟
رديت ب : طيب نازلة / سكرت باب الشقه وطلعت ..
لمحته بالسيارة بالشماغ الابيض ومطلع يده اليسرى مع باب السيارة ويلعب بالسبحة !
سلام/ سكرت الباب بهدوء!
هو: يامرحبا / يمطهااااا
ماالتفت لايمين ولا يسار وانتظرت السيارة تحرك ..!
ريحت عطره غطت على عطري ووترتني وأربكتني!
مع الخط ماقدرت أسكت قلت :
ماعندك نيه تقولي وين رايحين ومن بنقابل ! / طالعت له بطرف عيني !
هو: خلاص قربنا وبتعرفين / مالتفت حتى لي ..!
وقفنا عند مطعم يمكن حتى ماعمري قريت لافته , نزل وجاني عند بابي ..
مد يده يبيني أمسكها ( حلمي ولو مديت يدي تحقق ) رفضت وأنا أعدل فيها
طرحتي ..!
دخلنا بسكات وبدون حتى مايعاتب اكتفى بانه يمشي جنبي ويحرك خطواته بناء على خطواتي ..؟!

*
ديكور أحمر وأضاءة خافته وجلسات مغلقة , موظفين ببدل راقية , صوت واطي ,
زوجة وزوجها ماسكين يد بعض وطالعين , رفع الستار وأشر أدخلي ..
على ثاني كرسي جلست ونزلت شنطتي على أول كرسي , طاولة وورد وأجواء تحسسني
أني حبيبة وعلى موعد !

رجل على رجل وساندة ظهري وأنا أتامل وأنتظره , !
دخل وسكر الستاره زين وعلى ثاني كرسي جلس!
(أرقى أحساس ممكن تحسه ألانثى هذا الاحساس)
يعدل الشماغ يتأكد من المرزام يقدم الساعة وأخر شي طالع لي وبنظرة مباشرة ,
وبيني وبينه هالطاولة اللي أحسها أمان وماراح يقدر يتعداها .؟

* يبتسم / بصدري( طيب وبعدين معزومين على أبتسامه )*_*
أنا وبكل ثقة : مين عازمنا / بصوت واطي متأثره بالاجواء !!؟
هو: أنا عازمك / يشبك أصابعه وينزلها على الطاولة ؟
أنا: صدق والله / بتعجب !
بسرعة قال: أيوالله !
أنا : طيب ليه ماعلمتني ماعندي مشكلة !/ بهدوء
هو: محتاج هالجسلة معك وماكنت أبيك ترفضين ؟./ تغيرت ملامحه !
سكت وهو ياخذ القهوة والحلا من النادل .!
نزلها قدامي وأخذ قهوته وجلس!
نزلت نقابي ولفيت الطرحه على شكل لثمة وسحبتها تحت شفايفي وقربت لطاولة وشربت قهوة
وأكلت حلا وهو يطالع وقال :
ريم كملي الحياة معي ووعد شرف ماخذلك !
(ضاعت الهيبة وبدا قلبي ينبض عكس نبضه كل مره )
ضميت يدين لبعضها وانا اتحسسها وابتسم وقلت :
وش الطاري ؟!
هو: الطاري اني مابي أطلق !/ بصراحه قالها!
خالد رغم معرفتي القصيره فيه له نظرة اذا ناظرني فيها اعرف أنه حزين , واذا بدا يختصر الكلام حزين !
أنا: أنت جايبني هنا عشان تقول مابي أطلق ..؟
هو: لا أنا جايبك هنا لاني محتاج أجلس معك ؟!
أنا: طيب أشرب قهوتك وخلنا نتكلم بكل شي عدا موضوع الطلاق!/ غيرت جلستي !
سحب القهوة وشرب وكأنه راضي عن كلامي وقلت:
مره ثانيه أذا تبينا نطلع عادي فالوقت اللي تبي ! / أبتسم بخفف هالتوتر !
دق جواله وسوا له أغلاق ونزله على يمين الطاولة وقال:
أحيانا ماتوقع ردت فعلك / عينه بعيني !
أنا: ليه / ببراءة .
هو: مدري عنك فالوقت اللي اتوقع انك بتعصبين تهدين والعكس /وكمل)
يعني جلسه زي هاذي ماهقيت انك توافقين علاها ّ؟
أنا: خالد بغض النظر عن اللي صار أنت ولد عمي ويربطنا دم وشرعآ جلستي هاذي معك حلال !
هو: ويومها حلال ليه مقدر أمسك يدينك ولا أضمك ؟/ نبرة معاتبه ..!
تغيرت تقويست وجهي وطارت الابتسامه والهدوء ..؟!
قلت : أعتبرنا أصدقاء ترى عادي ولد وبنت يصيرون أصدقاء؟/ أنا بنفسي مدري وش قاعده أقول !!
هو: حتى الاصدقاء يضمون بعض ؟/ ضحك ضحكه وسخه .!
أنا: مطول تتكلم عن الضـم ؟!/ قلبت الموضوع جد .
هو:لا لا خلاص وقفت عشانك , بس يحز بخاطري أنك ببيتي وزوجتي
على سنة الله ورسوله ولا أقدر أضمك ولا امسك يدك والسبب أني وعدتك بليلة بندم علاها طول العمر .؟

(حط يده على لحيته وجلس يناظر لي )
رفعت الشوكه وقصيت قطعت حلا واكلتها شربت قهوة وهو على حاله وبهدوء قلت :
غريب أنك مارحت اليوم ل أخوياك واستراحتك !؟
هو: ماعاد صرت أحبهم واجد /شال ايده !
أنا: أفا / قلتها بضحكه !
هو: .. قاطعه جوالي ونغمته!
مديت يدي وأخذته ورديت بسرعة ب :
هلا يمه / بلهفة .!
مابين بخير حمدلله وطمنيني عنك كنت أكلم وصاده عنه ,
أبشري كررتها أكثر من مره ردآ على أمي وطلباتها ..!

قفلت ورجعت عدلت جلستي وصرت مقابله له زي أول وهو مركز علي
وعلى كل حركه مني وهالشي مقيدني بقوه !
أنا: بعد أذنك امي تبيني أروح مع سعد بكرة أفصل كنب بيته !/
هو: أبشري اوديك متى بتروحين ؟
أنا: لا سعد بيمرني / ماكنت أبي أكلف عليه !
هو: وليه سعد يمرك أنا موجود / يطالع بعيوني !
أنا: تمام / ماعندي رد ونظراته تحرج !
طلبنا العشاء وتعشينا على سوالف عادية وأغلبها عن بيت عمي , طلعنا من المطعم
ورجعنا بيتنا ودخلت غرفتي بعد تصبح على خير وأنتي من أهله وقفلت !!

يوم عزيمة بيت عمي *
بعد صلاة الظهر لبست بنطلون أسود وبلوزة اسود علاق ولميت شعري كعكة وطلعت أتغدى
معاه وبسرعة بسرعة أكلت وأخذت جوالي ودخلت المطبخ ..!
قصايد وركبت سماعاتي وثبت جوالي بجيب البنطلون الخلفي وبديت /
نوعين حلا نوعين فطاير وتمريه ,وبيتزا جهزت الشوكولاته والمكسرات والفناجيل والعصير
ونظفت المطبخ وطلعت على الصالة وهو نايم على الكنبه
رتبت الاشياء الخفيفه اللي تبي ترتيب وركبت جمر ودخلت أخذ دش طلعت على أذان العصر
بخرت البيت ونفسي كالعادة وصحيته ل أول مرة , فتح عيونه وأشرت على الساعة 4 ونص وقلت :
ضيوفنا بيجون قوم قام فعلا ورحت المطبخ اركب على القهوة ..!
فستان طويل ومكياج خفيف ومناكير وخاتم وعطر وفتحت شعري وبعثرته وطلعت الصالة أنتظرهم !

* جالس بالصالة بثوب مفتوحه لياقته كالعادة وذقن مهمل وشعر طويل وكثير من قدام ومخففه من الخلف
وأكمام مشمرةوريحت عطر وجواله بيده , نزلت جوالي على الطاولة ورحت المطبخ أتفقد شغلي !
ريحت العطر القوية خلتني التفت يسار , وقف جنبي وهو يطالع بالصحن اللي بيدي ,
هو: يعني اليوم بذوق طبخك/ هاذي أول مرة اطبخ من زواجنا !
أنا: ذوقه زين لاني مااوعدك أطبخ دايم / بعدت !
مشغولة اوزع الاطباق وهو ياكل , وساكت ,على دقات الباب وكلمة جايك راح لمجلس الريجيل !
وزعت قهوتنا وقهوة عمي وعياله ورحبت بخالتي وقلطتها هي وعهد ووفاء وجلست معهم ..!
الجديد أني عرفت أن خالد يودي أغراض احيانا لبيت سطام (صاحبه المريض )!
ماقدرت أتكلم ولا حاولت أعرف ووش السالفة خلصت شغلي ورجعوا بيتهم
ونظفت البيت ورتبت وأنا أهوجس ..

بغرفتي الساعة 11 اليل مقفله جوالي ومطفيه الانوار وضامه بطانيتي
وأطالع بهاذيك النقطه الحمرا( زر المكيف )
( عبرة ووحدة وضيقه ويمكن الليله غيرة)
ليش يهمني الموضوع وأذا يعني أحتاجوا وجاب لهم أغراض
أنا وش دخلني وبعدين الناس لناس , ولدهم تعبان وأكيد صديقه بيفزع له..
حكي حكي حكي وقاعده اسكت نفسي لاني أذا بكيت بيصبح الصبح ماسكت ..!
دق الباب بشويش ولاتحركت وغمضت عيوني!!
ياودي أطلع له وأصارخ وأبكي وأقول لها هالحكي اللي على بالي ووش أحس فيه الليله..!

(بيت عمي طامي )

عهد بالحوش والجوال بيدها .
عهد : الو خالد وينك ؟
خالد: بالبيت ليه؟
عهد : مشغول ?
خالد : لا فيكم شي ؟
عهد: طيب انزل لي بالحوش ابغاك /وقفلت ..
جالسه على الفرشة بالحوش وتنتظر خالد!
نزل ركض ومن الدرج على طول وقف بنص الفرشه : تراك خوفتيني !
عهد: أجلس ؟!
خالد يتربع قدامها /وشش فيه !
عهد: ريم قالت لك شي / بسرعه!
خالد: لا !
عهد: أسمع أمي جابت العيد العصر وعلمت ريم أنك تقضي لبيت سطام ووصتها
أنها ماتخليك تروح لهم /وكملت/ يعني أمي تبي ريم تعيي أنك تقضي لهم مرة ثانية / فهمت !
حط أيده على راسه ( مصدوم)
خالد: أنا اشوف ريم مقفله على نفسه وشكلها زعلانه !/ بقهر .
عهد: ريم نايمه؟/ بتعجب !
خالد: لاوالله شكلها زعلانه ..
عهد: خالد ترى ريم ماتستاهل وانا والله هاوشت أمي لان ريم تغيرت ملامحها بعد كلامها وواضح أنها تضايقت !
خالد: أمي وش ناويه علاه تبغى تجنني / بعصبية !
عهد: لاتلومها خايفه من تهورك !
قاطعها وهو يوقف : بطلع لريم الله يخلي لي أمي خربت علي !

* رجعت دقات الباب وطولت وكل مالها تزيد قوة وأسمع صوته ينادي ويتكلم وعلى هالحال لين مل هو ورقدت أنا !
اليوم الثاني صحيت على صداع , وقررت اطبخ ايه اطبخ بكل هالظروف !
دش كالعادة وبجامه ورحت المطبخ ,كوب كبتشينوا على الريق ولسى مصدعه !
طبخت وجهزت الاكل ودقيت الباب اللي بالنص أبيه يصحى
لانه باقي نايم , قدامي الاكل على الطاولة وبيدي جوالي وأتامل صور الكنب اللي لازم اليوم افصله ,
دخل وسلام ورديت السلام وجلس , مابي اوضح له شي وكنت طبيعيه جدآ , بعد ماخلصنا قلت :
العصر مشغول اذا مشغول بخلي سعد يجيني !
هو: انا اللي بوديك !
هزيت راسي ب تمام ودخلت غرفتي , أنشغلت وعلى صلاة العصر كنت جاهزة .
طلعنا من البيت بدون حكي كثير , وعلى مكالمته لسعد لفيت :
هو: أيه أيه اعرف المحل خلاص القاك هناك؟؟
أنا: اي محل ؟!
هو: محل التفصيل اللي تبغينه !/ مركز بالخط
توقعت أنه بينزلني ببيت أمي وانا من هناك اروح مع سعد , ماعلقت !

وفعلا وقفنا عند المحل وثواني وقف سعد جنبنا , نزلنا وسلمنا ودخلنا المحل وهو معنا ,
أعترف أني ماحبيت وجوده لاني مضطرة أجامله قدام سعد ..!
على طاولة راعي المحل كنت منزله جوالي وأشرح له وأختار معه وأفهمه بالضبط وش أبي ,
وسعد عن يميني وبيني وبينه مسافه أما هاخالد واقف عن يساري لاصق في ويتكلم مع سعد من ورى ظهري ,!
عطيته نظرة ابيه يحس ولايقرب كثير ويسوي نفسه غبي ومافهم وش قصدي ؟؟
خلصنا وطلع سعد وهو يقول : تعالوا معي للبيت بنسمر ونتعشاء سوا ؟!
خالد: لا ماعليش أنا وزوجتي عندنا مشوار ضروري / يضحك ومستانس !
ابتسمت وقلت : خلاص مره ثانيه أن شاءالله/ أكلم سعد!
سعد: يالله انا ماشي أنتبه على وخيتي / وقفا .
خالد: أفا علاك بعيوني وقلبي !/ يطالع لي ويبتسم !!
مع السلامه قلتها لسعد ومشيت لسيارة وتركته ؟
ركبنا وماعلقت .!
مرينا أخذنا عصير و حرك وأنا مو عارفه وين رايحين ولا سألته ؟

* وقف قدام بيت بحي غير حينا , وطلع جواله ثواني وقال :
عبدالله أطلع لي أنا برا ؟
التفت له ورجعت اطالع للبيت , طلع عبدالله وكنت بتغطى بس هالعبدالله عمره 12 سنه ,
نحيل و يضحك من أول ماطلع , وقف عند باب السواق وهو يضرب يده بيد خالد .!
خالد: وش اخبارك عساك طيب ويضحك ويلعب بشعره .!
مامسكت نفسي صرت أطالع فيه وبضحكته وراسه اللي ماشوف من جسمه الا هو .
عبدالله: والله طيب حمدلله / يضحك !
خالد: سطام أدق علاه مايرد / مميل عليه ويتكلم .
عبدالله: نايم اصحيه / بغى يروح يصحيه!
لا لا لا / خالد بسرعه.
خالد: طيب أذا احتجت شي واذا تبغون البقالة دق علي خلاص ؟
عبدالله: طيب بأبتسامه .
خالد: يالله مع السلامه, ياشر بيده وهذاك يرد الحركه ودخل وسكر الباب .!
خالد: هذا اللي قالته لك أمي بغيتك تشوفين بعينك ..!
يطالع لي وانا اطالع للباب هذاك اللي تقفل ,وحسيت أن ضيقتي البارح مالها سبب
وأنا الضيقة الحقيقة بهالبيت الله يفرج كربتهم / قلتها بصوت عالي !
حرك ومشينا وأنا ماعندي حكي غير اللي قلته .؟!

*
بليلة وعلى الساعة 1 الفجر تقريبا دق الباب بشويش ..
فتحت وأنا اتخبى خلف الباب لاني لابسه قميص نوم !
نور الصالة خافت وماشوف وجهه زين قال:تروحين معي للمستشفى ؟؟
فيك شي !/ قلقت !
هو: لا سطام دخل المستشفى وبروح يمكن يدخلوني !/ متكدر ..
أنا: الساعه 1 ماتوقع يخلونك تشوفه (وكملت) أنتظرني بلبس وأجي معك !
تراجع لوراء وقفلت لبست بسرعه وأخذت شنطتي وطلعت ..
خالد وضعه مايطمن وساكت ويفكر ولاهو معي بالمرة , وقف عند المستشفى ونزل ونزلت معه
دخلنا وحاول يشوفه بس رفضوا واصروا وعطوه موعد الزيارة لبكرة , مسكت يده وأنا اسحبه بعيد:
خالد مو وقت زيارة هاذي قوانين / بكل قوتي أبعده عنهم !
رجعته لسيارة بكل وسائل الاقناع وأنك أنت الغلطان جاي بوقت مافيه زيارة
وخويك بكرة بتشوفه ومن هالحكي اللي يسكت ومايريح !

ضرب الباب بقوة ونزل راسه على الدركسون ؟!
أنا : ترى اللي تسويه سخط على اللي ربي كاتبه , الله اللي خلقه وأعطاه المرض لسبب !
هو:الرجال بيموت وانا جالس أطالع فيه / يضرب بيده على الدركسون ويكررها!
أنا: خالد رجعنا البيت هناك نتفاهم / خفت من ردة فعله وعصبيته .
شغل بسرعة وهو يقول : أنا بروح لبوي أهرجه !
بسرعة جنونيه مسك الخط وكل محاولاتي بانه يهدي مانفعت , وقف ونزل بلمح البصر ونزلت وراه ركض ,
وقبل لايفتحون الباب , مسكت يده وانا اقف بينه وبين الباب ,
أنا: خالد أذا جيت عمي كذا بتتهاوشون أنت صاحي / ماسكه يده.
فتح الباب وشديت يده وجسمه لوراء وهو يكلم عهد .
وين أبوي / بعصبيه وصوت عالي !
عهد مفجوعه: نايم ليه؟؟
ضرب الباب الحديده برجله , حطيت يدين على اذوني من الصوت !
على شهقةعهد طلع لفوق يركض , أعتذرت من عهد وانه معصب عشان خويه ولحقته فوق .
أول مادخلت رميت العباية والشنطه على الكنبه وأخذت مويه بارده وفتحت نور الصالة
وجلست جنبه .
أنا : أمسك أشرب وتعوذ من الشيطان وأذا ربي كاتب أن خويك يموت بيموت
حتى أنت بتموت بيوم من الايام ,يعني مابيدك شي تطمن كلنا بنموت !
/ ثانيه رجلي على الكنبه وجالسه عليها والكوب بيدي ..
حاط يدينه على راسه ..
سحبت يده وحطيت الكوب فيها وأشرت عليه ؟؟
شرب شويه ومسك الكوب بيدينه الثنتين وجلس يطالع فيه .

صمت

ريم ضميني ..
فتحت عيوني بقوة بستوعب وش قال ..
نزل الكوب ووقف وأخذ يدي ووقفني قدامه..
فتح يدينه وأنا مابيني وبينه ألا خطوة وقال:
ضميني تككفين !
بس ضمه / يغمض عيونه ..!
عارفين وش معنى أن رجال يطلبك تضمينه, ويكون بهالضعف
ويفتح يدينه وينتظر يا أيه يا لأ ..!
ماضميته تقدمت للخطوة اللي كانت بيني وبينه وضمني هو,رفعت يديني وشبكتها من وراء ظهره
وأنا أحس بيدينه وتقويستها من خلف ظهري , يشدني لصدره ويمسح بيدينه على ظهري وأنا لاحول لي ولا قوة .!
واقفه على أصابع رجولي مبعد بكل جسمي ماعدا صدري ويديني , عمري ماحسيت ان بنية جسمي ضعيفه وصغيرة ألا الليله
والدليل أني ضايعه بين أكتوفه ويدينه!
قشعريرة بكل جسمي والسبب شعر لحيته اللي أحسه بكتفي ,تراجعت للوراء
وفكيت يديني , رجع شد يدينه ..!

خالد / قلتها وانا امسك يدينه وأحاول افكها ..؟
مسك يديني الثنتين وبعد جسمه , واقف قدامي وأناابعد عيوني يمين ويسار
نزل وباس يدي اليسرى ثم اليمنى ..!
قرب وجهه وبهمس : أقولك وش احس !
سحبت يديني بسرعه : لا .

تصبح على خير وسيده لين قفلت الباب ..!
طفيت الانورا ونقزت على السرير للحين أحس بكتوفه
وصدره ويدينه بجسمي أستحيت وكأني مسويه شي عيب .

اليوم الثاني بعد ماأقنعت نفسي ان الوضع عادي ومصار شي , وأنها أخر مره
ولانه كان متضايق ضميته بس و و و.. ألخ طلعت .!

توست محمر وجبنة وكوب شاهي وجلست كالعادة بالصالة , مركزه على الباب وأكل ,
وأخيرآ دخل ماسلم وجلس قدامي , وأخذ كوب شاهي وتوست !
وللحين أنا ماطالعت فيه وساكته..!
شويات كذا وناظرت له وأضحك , أبتسمت من ضحكته الوسخه !
بشر كيف سطام/ بطير الضحكه من وجهه !
هو: طيب حمدلله راسلته يقول بخير .!

حمدلله .!

خلصت سوالفي ماعاد عندي شي أقوله واتحاشى أني
أطالع فيه , واي حركه اسويها القاه مركز معها,
أخذت صحني وكوب الشاهي ورحت المطبخ رجعت اخذت باقي الصحون وهو بصالة ولا عطيته وجه ,
من المطبخ لغرفتي على طوول وسكرت الباب بالقفل مرتين ..!؟

أذن المغرب وأنا ماطلعت من الراعه اللي جتني , بعد المغرب أرسل لي .
أبوي والعيال بيروحون أبها يتمشون بالعائلة تبينا نروح معهم / وحاط فيس مبتسم !

رديت ب : لا !

طيب فكري وردي لي خبر / ونفس الفيس !
رميت الجوال وأنا مقرره ومصمله اني ماروح ..؟

البارت السابع *



بالصالتنا متربعه على الكنبه ومركزه مع التلفزيون وبيدي نوتيلا , واللي مرمي
قدامي جوالي وسماعاتي والريموت , أسحب ملعقه النوتيلا بشويش وانا أتابع ,
دق جوالي وتركته وقبل لاينتهى الاتصال طاحت عيني على ( عمي طامي)
شهقت ورميت اللي بيدي وماأنتبهت لنفسي ألا واقفه / هلا عمي ( وأرفع صوت الجوال)
عمي طامي: ريم ياوليدي أنا فالمجلس تعالي أبيك ..
طيب أبشر جايه أبشر (أكررها )!
خليته لين قفل حتى ماقال مع السلامه ولا كنت منتظرتها لاني اصلا مشغول بالي بوش يبي !
يمه لايكون قال له خالد عن شي , لا أن شاءالله , طيب خالد وين بفهم وش السالفة ,
خميت جوالي وتركت حوستي بالصالة وركض على غرفتي , أسكر العباية وأنا أفكر ,
البس النقاب وانا اشاور نفسي ادق على هالخالد ولا لا,ياربي لايكون عمي سامع شي ,
أخذت جوالي ورميت سماعاتي على السرير وتركت الغرفة مفتوحه ولبست صندلي ونزلت,
تركت مدخل صالة بيت عمي وطلعت للحوش هذاك الباب المفتوح , أعدل عبايتي وأهدي نفسي ,
وأطالع يمين يسار ,مجلس رجال كبير, وبهاذيك الزاوية مشب نار,
آما الجلسه اللي قدامي والقهوة والشاهي والقدوع , والشاحن
والمراكي اللي منتشره يمين ويسار توضح أن عيال عمي كانوا جالسين هنا قبل لا أجي !

سلام/ وحبيت راسه وهو يقول : هلا ببنيتي !
عمي طامي: أجلسي هنا / على مركى عن يساره .
جلست وغطيت رجولي بعبايتي / ويديني ترجف والله !
عمي طامي: ياوليدي العيال يبون يروحون يتمشون وعمتس تبا المرواح وتبا خالد يجي معها
شايلتن همه وخايفتن علاه وأنا هرجته يقول ريم مستحيه ماتقدر تجي ومايبا يتركتس يقول بيجلس معتس .!
وهو يتكلم كأنه يقنعني أروح معهم , بس الأسلوب رحيم جدآ نقدت على نفسي ليه مافكرت فيه وبخالتي ,
وأناأشوف وضعهم وأعرف انهم خايفين على هالخالد وشايلين هم..!
خلص حكي ورديت :بأبشر خلاص أروح معكم!
عمي طامي: أيه ياوليدي تعالي معنا خلي أمه تفرح , بعدين أنتي زي عهد عندي ليه تستحين !
صوته ياخذ من صوت أبوي كثير وملامحه وهالشيب والضعف واليدين المتجعده والعروق البارزه ,

طيب أبشر ..!

أنا مااقدر ارفض لا أحد كبير بالسن طلب وأضعف قدامهم فما بالك بعمي ,
عن أبوي وأخواني ووش اخبارهم وحكي عمي البدوي واللي أحاول قدر الامكان ارد عليه بنفس البداوه خلصت سوالفنا ,..!
وطلعت بيتي وأنا أتحاشا عهد وخالتي !!

*
على مدخل الباب لقيته بالصالة ,نزلت الطرحه والنقاب وجلست على أقرب كنبه اناظر فيه !
خالد: وين كنتي!؟
جالس مكاني وماد سيقانه ومساند ظهره للكنبه ويطالع بالتلفزيون والنوتيلا بيده ..؟
أنت تحب النوتيلا ؟؟/ أطالع فيه مصدومه .؟؟
خالد: ووش النوتيلا / من جده ويلف علي ؟
هاذي اللي بيدك / معقده حواجبي وأشر على نوتلاتي *_*
خالد: أها أسمها نوتيلا / ويلفها ويقراء الاسم ويقول: أيوالله نوتيلا ؟؟!
للحين أطالع فيه !!
خالد: لاوالله ماحبها وأول مره اذوقها بس لقيتك أكله منها وأكلت منها
/ يطالع فالتلفزيون والملعقه بيده وملطخها بالنوتيلا ؟؟
وقفت وسحبتها من يده وخليت الملعقه وغطيتها ونزلتها على الطاولة
وأخذت طرحتي والنقاب ولفيت عطيته نظره ومشيت وتركته ..!
رجعت له بعد مانزلت عبايتي وتعطرت وبساله عن رحلة أبها ؟
جلست قدامه ..

كنت عند عمي / رافعه حاجبي بعاقبه .!
خالد : ليش / مايطالع لي ؟
نقزت وطفيت التلفزيون ورجعت جلست وقلت :
عمي هرجني عن الطلعه ل ابها وماقدرت أرفض / أفرك يديني ببعضها !

هو : علمته أنك منتي برايحه وقال أنا أهرجها / نزل رجوله ويتكلم بجديهّ.
أنا: طيب خوالك معنا / عقدت حواجبي !
هو: أنتي معي وش علاك من خوالي/ مستغرب مني !
أنا : وين أرقد / قلتها وانا افكر فعلا وين ارقد ؟
هو : بحظني / يبتسم بخبث !
أنا: هييي وش قلت الحيا هاذي / صدمني برده وماتوقعته !

يضحك من قلب ويقول : كنت بقول اذا ماشالك المكان تشيلك عيوني وطلعت بالغلط حظني ؟
يقهقه ويحط يدينه على وجهه الاحمر ..!
أنحرجت وربي وأنا انتظره يسكت ..

أنا : خلصت / مسويه ماهمني شي ..!
هو: ليتك شفتي وجهك يوم قلتها / يضحك !
أنا: أسمع انا وعدت عمي أروح بس لازم نحل هالمشكلة / شايله هم النوم والله صدق !
هو: يمسح عيونه والابتسامه شاقه وجهه وقال: طيب نستاجر شقه لحالنا ..؟
أنا: واذا رفض عمي وقال نسكن سوا ..!/ لاني عارفه ان عمي بيسويها !
هو: خلاص ولايهمك خلي أبوي علي ؟!
أنا: والله اني مستحيه من خوالك وعيالهم / بصدق قلتها !
هو: خوالي بيكون لهم جلسه وانتي مع الحريم لاتخافين / يطمني !

فهمت اللي أبغى افهمه ودخلت أدق على امي وعلمتها وأخذت رايها وكانت موافقه اني اروح
وطبعا ماقصرت فالنصايح وسوي كذا وانتبهي من كذا ..الخ !

_


الساعة 11 الليل , بنطلون وردي وبدي أصفر وجكيت بيج فاتح مشمره أكمامه زي عادتي
روج خفيف وشعر كعكه ساعة باليمين , واقفه على شباك غرفتي والسماعه بأذوني ..!
حمدان المري صوته حزين ولا أنا اللي الليله حزينه , يابخت الشاعر يقدر يتكلم بطريقة
غير عن كل هالناس , كلماته تتكلم عني ولا أنا أبالغ
على كل حرف يقوله مركزه وأحلل ..
أسمع وأعيد وأردد ..!

الله عطاني اياك وأصبحت واكـن
علـى الله انـي لا بغيتـك لقيتـك

مؤمن بما يكتـب لـي الله ولكـن
بليت نفسي فيـك عشـق وبليتـك

تغيـب وعيونـي عليـك يتباكـن
لوانك تسقيني الوصل ماارتويتك

خليت حسرات الزمـان يتراكـن
بين الرجاءوالياس ليتـك وليتـك

داويت جرح من قسى الوقت ماكن
والا فتعطيني ربـع مـا عطيتـك

حسيت قلبي بينفطر , ودي أمشي عندي طاقه سلبية بفرغها , سحبت جزمه سبورت ولبستها وطلعت
فتحت باب الشقه بشويش ورديته وطلعت الصطح , ولان هاذي ثاني مره أطلع له وكانت المره الاولى مع عهد
ماخفت شغلت النور , وانا اطالع بالزوايا وأتاكد ان مافيه شي يخوف ..
مساحه واسعه وقصايد وسماء الرياض وبيوتها وأصوات سياراتها , مشيت فاتحه يديني
وفتحت شعري ورافعه راسي ومغمضه عيوني وأدور!!

على الاصوات اللي تحت طليت , سيارات رايحه جايه , وناس تمشي , وبيوت الله أعلم بحال أصحابه
ومن فيهم سعيد ومن حزين, مين فاقد ومين على موعد, رفعت راسي فوق يارب من له حبيب لاتحرمه من حبيبه !
أنشغلت وأنا اناظر يمين يسار أتامل هالمدينه الكبيرة , واللي مليانه حكاوي وأسرار ,
نص ساعة مرت وانا على حالي ولا يفصلني عنه ألا اذا غيرت
القصيده بقصيده ثانيه , دق الجوال وقطع صوت القصايد ..
هذاك الرقم الغريب ..

فتحت الخط..
نــعــم ..
هو: وينك /قالها بسرعه؟
أنا: بالصطح / عرفت انه تحت بالشقه ..؟
هو: أها خوفتيني / وبتنهد /جايك.!

قفلت وقفل وفتحت الصوت وظليت على وضعي ؟
ماألتفتت لصوت خطواته اللي جايه من خلفي , ثواني بس وقف جنبي !
هو: ماتكلم ؟
حط يدينه على السور ووقف يناظر سحبت سماعة أذني اليمنى ولفيت له !

طالع وأبتسم :

هو: متضايقه / عيونه فيها لمعه جديده علي؟؟

أيه وأحس ببكي , صاكه في الدنيا , جنب حبيبي ولا قادره اضمه ولا أشكي له ,
مسكر حلقي ومنفطر قلبي , ضمني , وسم علي , طبطب وطمن ووعدني ماتتركني , أعتذر لي ..!

(كل هذا بصدري) !!

أنا: أبتسمت لا .
سكت حتى هو ماصدق كذبتي ..!

بعد شوي قال: وش رايك نجلس ..
طفيت جوالي وضميت سماعاتي بيدي وقلت: وين هنا !؟
هو: أيه / مشى خطوتين وجلس على البلاط وتربع بعد !

هاللياقه دايم مفتوحه والشعر دايم مبعثر ومهمل !!
( بصدري وأنا أتامله)!!

جلست بعيد عنه شوي وضميت رجولي لصدري و شبكت يديني من وراها ونزلت جوالي وسماعاته..!
هو: تكلمي قولي اللي يطري على بالك / حتى صوته ونبرته الليله غريبه علي !!!!
أنا: ماعندي حكي / أبتسمت نص أبتسامه ؟؟
هو: أجل انا اللي بتكلم ..

مارديت أنصت !

هو: ببدا لك من الطفولة وأكثر شي أذكره فيها وفاة جدي اللي هو جدك , وأبوي ودموعه هذاك الموقف
اللي كبرني , وخلاني أعرف قيمة الابو , بديت أصاحب ابوي وأسمع كلامه وأوقف معه فالمواقف الصعبه
كنت أترك لعب الورعان وأجلس بمجلس الرجال وأسمع وش يقولون , وأراقب أبوي وهرجه وكيف يرد ,
كان كل همي أكبر وأصير رجال بسرعه عشان ابوي ,وأكبر فرحه بحياتي يوم علمني أبوي السواقه وخلاني أسوق أبه !
وثاني أكبر فرحه يوم لبست العقال دبلت كبودهم فيه أرقد وهو عند راسي واقوم البسه قبل لاطلع لبوي
عشان يعرف أني رجال ( أبتسمت ) أفز من نومي اذا قالت امي ان أبوي عنده بالمجلس ريجيل والبس وأروح ,
وأسلم وأضخم صوتي عشان مايعرفون أني صغير (يبتسم) أجلس جنب أبوي على المركي ويوجعني المركي بيدي وأصبر ,
أما المتوسط ماكان محببني فيها الا ان ابوي يخليني اودي أخواني الصغار للمدرسه على السيارة , ..!
وتراني كنت راعي مضاربات كل يوم ياضارب يامضروب وماعلم احد ,
أذكر مره أخذت سكين وضربت واحد من الشباب فكتفه بسبب كلام وسب ومن هالسوالف وماعلمت أحد,
وجاني أبوه اليوم الثاني للمدرسه , وطلب يقابل أبوي وأخذته على جنب
وفهمته الموضوع وأستانس مني وقلبت السالفه على ولده ( يضحك )
ولان الموضوع بسيط والضربه ماهيب قويه تركني .
بس مدرسيني والمديرة ماتركوني كفخوني بالعصى لين قلب جلدي احمر

الثانويه عاد كنت عاقل وطول الوقت مرسم
وكاشخ بالعقال وحريص على أخواني وأراقبهم ومسوي كبير , وأسال عنهم أخوياهم وهالحركات ..!
تخرجت من الثانوي ومافكرت بالجامعه أصلا كنت أبي العسكرية عشان أشيل المسؤولية عن أبوي وقدمت واقبلوني ,
بس وين قبلوني بتبوك ضاقت الدنيا في وبأمي وأبوي
بهذاك الوقت كأني مسافر خارج السعودية ..!
وضاق خاطر ابوي وحسيت بقيمتي عنده , حتى الاكل ماكان ياكل هذا أبوي أجل وشلون امي 24 ساعة تبكي وتوصي ,
سافرت لحالي كان خالي بيروح معي لين اعرف المنطقه ويرجع وعييت !
بتبوك عرفت سطام وكأن أخو رجال بمعنى الكلمة , لولا الله ثم هو ماصبرت على العسكرية
وضيقة التدريبات وعصبيت المدربين والاختبارات اللي يسوونها لنا ,
غير أن وضع ابوي المادي بذاك الوقت ماكان زي هالحين كان يسلفني ويقول ترجعها لي
مع أول راتب ويضحك وأضحك ومستانس على كلمة الراتب ..

ومرت الايام وتخرجت ورجعت الرياض أنا وياه , وجاني مبلغ مع التخرج
سلمته بربطته ل أبوي , وشفت الفخر بعيونه , ورجعت اداوم بتبوك أنا وسطام ,
وأتذكر صار لي حادث فالتدريبات العسكرية وجلست أسبوع منوم فالمستشفى
وكان سطام هو اللي مدبر الوضع مع أبوي والعيال ويصرفهم اذا دقوا لين قدرت أكلمهم ولا علمتهم أصلا لهالحين ومايدرون!
بهذاك الوقت توفى أبو سطام وعلمني خاله قبل هو يدري
وتركت دوامي ورجعت معه لرياض وأنا مفهمه أن أبوه تعبان بالمستشفى ,
وجلست معه بالرياض سبوعين , ورجعت أداوم لحالي وهو معه عذره ,
وجازوني سبوعين لاني ماعطيتهم علم وماقبلوا عذر أني رايحن مع خويي بسبب وفاة ابوه !

بهالوقت ماعمري فكرت بالزواج حتى وأمي مشغلتني وتقول تزوج بس ماهتميت
لين مرض سطام وقال تعال ازوجك أختي وعلمت ابوي وعيا كل محاولاتي مع أبوي عشان سطام
ولا انا اصلا مافكرت بالزواج ولاكان يهمني (حسيت أنه يبرر) ..!
هاذي حياتي قبلك بالمختصر وأن شاءالله يجي يوم وأحكي لك كل شي بالتفصيل ( يقولها بحب )!

رفعت حاجبي وأبتسمت !

هو: يالله عاد الدور عندك / يبيني أتكلم ومتحمس !
أنا: لا أنا حياتي بسيطه مافيها شي ينحكى به / تربعت !
هو: طيب أنتي كنتي موافقه علي ولا أقنعوك / يقصد أيام الخطبه؟
أنا: لاطبعا كنت موافقه وراضيه .
هو: سكت ويهوجس !؟

تفاديت أسالته وأنا اقول : تعال نمشي/ وقفت !
وبديت الف الصطح ولحقني وصرنا نمشي مع بعض , ونبعد ونقرب من بعض
ويعلق وأرد ويضحك وابتسم ربع ساعة ونزلنا ,
تصبح على خير ودخلت رقدت وهو جلس بالصالة على التلفزيون ..؟


*

بكرة الخميس طلعتنا ل أبها واللي مو متحمسه لها كثير بالعكس أفكر وأدعي
أنها تعدي على خيرولاني مشتاقه ل أمي وودي أجلس معها مسكت جوالي بدق على
خالد ولأول مرة ..!
رايحه جايه بالصالة رقمه على شاشة الجوال وناقص بس أضغط جاري الاتصال ,
تنهدت بقوة وأنا أجرب الوو ..

ضغطت وجاري الاتصال ..

تفاجأة ب فتح الخط على طووول ..

يامرحبا يامرحباا / صوته !
شلت الجوال ل أذني : الووه / بهدوء !
هو: يازين الساعة اللي تدقين علي فيها
أنا: خالد / بجديه وبتكلم مابي اعطيه فرصه يضيعني اكثر .
هو : قليـب خالــدأمري .
أنا: زادة نبضات قلبي / بروح ل أمي ممكن !
هو: تأمرين أمر متى تبين تروحين؟
أنا: بعد المغرب / جلست على الطاولة !
هو: طيب أبشري بعد المغرب أكون عندك ..
أنا: صمت
هو: تبين شيء ثاني / بلطف .
أنا: لاتسلم مع السلامه ..
هو: مع السلامه.
آه ورميت الجوال ووش ذا ليه أرجف صدق ماعندي سالفة مكالمة لخبطت جوي ,
تركت جوالي وقمت للمطبخ سويت قهوة وشاهي ورجعت غرفتي كشخة وصليت وطلعت
الصالة ثواني ولقيته يفتح الباب ..

دخل مبتسم ..

على طووول وقفت وانا أقول بلبس عبايتي..
لبست وطلعنا ومريت محل حلويات وأخذت حلا وفطاير وشوكلاته مع القهوة
ونزلني عند أمي وعلر سوالف امي سرى الليل وأنا ماأنتبهت لساعته ,
ياقصر الليل مع أمي وياطوله فبيت ولد عمي وياكثر الهم هناك وياقله هنا ..!
الساعة 11 دق علي وقلت أني لسى بسهر مع أمي ومارفض ,
1 ونص أرسلت خلصت ورد بـ جايك !
ربع ساعة ودق يقول أطلعي أنا عند ألباب ..
ركبت وأنا أقول: سسلام!
هو: وعليكم السلام يامرحبا !
وكمل/ عسى أستانستي ؟!
أنا: آيه حمدلله / ريحت عطره تضرب بلقبي مو مخي والله !!
علمني أن فيه تغير بالرحلة على قولته وأنه بدال مانروح ل أبها سيده
خواله أشاروا على عمي بأنا نروح الطايف نجلس فيها يومين وبعدها أبها ..
سألته عن السكن وكيف بيكون قال أن خاله الكبير له بيت فالطايف اصلا وبيسكنون فيه عمي
والباقين وطمني وأكد لي بأن ماراح نسكن معهم وبناخذ فندق أو شقه ..!

*

*
جهزت شنطتي بعد ماحطيت فيها كل شي أحتاجه وسكرتها صليت الفجر ونمت ..!
سحبتها نوووومه عميقه ولا صحيت الا على دق الباب بقوة فتحت عيوني وجلست بسرعةأخذت جوالي
أطالع بالساعة شهقت 5 العصر يمه قلتها وأنا ارمي الحاف عني حطيت اذني على الباب وهو مقفل
نــعم / صوتي كلها نوم *_*

هو: ريم أصحي الساعة 5 .
طيب صحيت ..
لفيت اخذت بجامه ودخلت دورات المياه دش وطلعت صليت وتعطرت وفتحت الباب !
لقيته بالصالة وينتظرني بالاكل ..؟
سلمت وجلست ..
هو: صح النوم / لابس وواضح انه صاحي من زمان .
أنا: صح بدنك / شبعانه نوم ومرتاحه على الاخر _*
عرفت أنه كان عند سطام لانه الليله بنسافر ويبي يتطمن عليه..
بعد ماخلصنا أكل ونظفت المكان سألته :
أنت جهزت شنطتك ؟/ العب بشعري .
هو: لا باقي ..
أنا: طيب جهز أغراضك مابقى وقت / تركته ودخلت الغرفة .
بعد شويات دق الباب بشويش ..
فتحت ووقفت على الباب , واقف جنب شنطته ومتكي عليها ويبتسم ..!
نـعــم !
هو: بدخل الغرفه لي عندك ملابس / ويغمز !
فتحت الباب وبعدت وسحب الشنطه ودخل يطالع بالسرير والتسريحه وقف وفتح الدرج .
هو: طيب تعالي ساعديني / يبغى يسولف _*
أنا : مــع نفسك / واقفه ومتكيه على الباب أنتظره يخلص !
هو: يضحك ويقول: هييين أذكرك بعدين !
خلص وسحب الشنطه وطلع وقفلت ..

_
بعد المغرب كلمتني خالتي وقال لي أنزل اللقهوة والعشاء وفعلا لبست ونزلت ..
10 كنا جاهزين للممشاء ..
بالحوش تحت كنا مجتمعين , عمي وهالعصاء اللي متكي عليها وهاذي اللي جنبه خالتي وحديثهم عن البيت
وطفيتوا أنواره وقفلتوا البيبان وغيره وغيره وغيره ..
أما هاذي اللي جنبي وعلى جوالها ومبتسمه عهد وبعالم ثاني ,
هناك عند السيارة الجمس الكبيرة خالد وطلال وحوستهم بالعفش وترتيبه ,
واللي راكبين السيارة وتاركين بيبانها مفتوحه فهد وممدوح ووفاء ,
طلال سكر شنطة الجمس وجاء ل عمي وهو يقول: ترانا جاهزين نمشي؟؟
طلال هيئته نفس هيئت هذاك الشخص اللي يشيك على سيارة عمي ويتأكد أنها أمنه بعد الله ..
ركب عمي وخالتي وعيالهم وأنا واقفه مكاني أنتظر خالد اللي واقف مع طلال قدام السيارة ويتكلمون ,
حرص خالد على أهله يطمن حتى لو أني ماأدري وش يتكلمون فيه !
حركت سيارة عمي واللي يسوقها طلال ..
جاني خالد يمشي وهو يقول: يالله مشينا ..
ركب السيارة وأنا ساكت وقبل لايحرك قلت :
دعاء السفر / وناظرت له .
قراء الدعاء اللي كان معلق بالسيارة وأخذته وقريته ,
طلعنا من الرياض ومسكنا الخط بعد ماخذنا قهوة ..

الجو كان مكهرب بيني وبينه , فيه شي مو طبيعي ,
عارفين أحساس أنك في مكان مافيه الا أنت وشخص تحبه هذا هو ,
منتبهه لكل شي منه , رغم أني أطالع بهالخط الطويل اللي قدامي ,
حاط ايده على درج السيارة اللي بيني وبينه , ومشمر أكمامه ولاف الشماغ على الطريقه الامراتيه
ووريحت عطره اللي لحالها تربكني, وجواله اللي قدامي هنا وصوت رسايلة !

هو : نزلي النقاب أذا منتي مرتاحه لان السيارة مغيمه اصلا
/وكمل/ ومطولين على ماتجينا نقطة تفتيش !

رجعت انتبه على صوته , وفعلا نزلت نقابي ولفيت الطرحه على شكل لثمه ,
حاطه رجل على رجل ومنزله شنطتي على يميني بيني وبين الباب وجوالي وسماعتي بحظني ..

يـابخـتـي / صوته !

أنا: نــعم / لفيت أناظر له وبسرعة صديت !
يضحك /وماعلق ؟؟
بعد دقايق قال :

ريم تدري أنتي أحسن شي صار لي بالدنيا,كل ماتذكرت زواجنا وكيف صار
أتأكد أن على نيتي ربي عطانيك ..!
(كش شعر جسمي )وأبتسمت وأنا أقول : هاذي رومنسيه !
هو: لاوالله صادق وماقصدي رومنسية / يبتسم !

فتح مسجل السيارة :

المحبة أرض والفرقا أراضي _ والزمن كله ترى لاغبت ماضي
والله إني ما أشوف إلا عيونك _ إن رحلت اليوم أو طوّل مراضي

أبتسمت بدر بن عبد المحسن هو لحالة سالفة حب هالمرة يشغله خالد عسى
هالليلة تعدي على خير وأقدر أسكت قلبي ..

ركزت بالقصيدة وكأني أول مرة أسمعها رغم أن هاذي المرة المليون
اللي أسمعها فيها قبل خالد !

قالوا العـذّال والعـذّال مرضى _ وش بلا حالك من الاشواق قاضي
قلت يهجرني حبيبي لين يرضى ـ علّموا الظالم ترى المظلوم راضي

يردد البيت الاخير معه ..!!

سيارة عمي اللي قدامنا وبينا وبينها مسافة طويلة ولوحاتها ولونها ,
والخط وهاذي الورقه اللي على الطبلون قدامي هي اللي أشغل نفسي فيها هالحين .!
تركت بدر وقصيده وصوته ولحنه وهالخالد وأنشغلت بقلبي بستر نبضه وبحفظ كرامته ,
وبنتقم له من هاذيك الليله اللي جيت فيها بفستاني وكومة أحلام
وقابلني بخبر صاحبه وأخت صاحبه !

على صوت بدر سرينا وحنا على قول المثل كلن بقلبه شقى ليله ..!
طفى المسجل ورميت الطرحه على وجهي واخذ يمين ووقف عند بقالة ..
وش اجيب لك ؟/ يحط يده على وجهه ويطالع لي ؟
أنا : بيبسي وليز وسنكرز وجالكسي ومويه / وكملت / من كل شي حبه !
بضيع الخجل والركود اللي انا فيه ومابيه يحس أنه أثر علي .!

رجع ومعاه من كل شي حبتين لي وله !

على سوالف عن ابها والطايف وكم مره رحت لها ووش أجمل شي فيها دخلنا الطايف !
ولاانو ماوصلنا الا متاخرين فضل عمي ننام كلنا بفندق الليله وبكرة يصير خير ..
نزل هو وطلال للفندق ورجع وهو يقول : يالله نزلنا !
نزلت ونزل الشنط هو وطلال ودخلنا غرفة , فتحت القسم اللي خاص فينا ولقيته غرفة نوم وصالة
ودورات مياه بغيت ابكي ليش كذا , جلست بعبايتي فالصالة وأنا أنتظره بس يجي !

دخل بكل ثقه وبراءة وقفل الباب ..!؟

عارف عارف وش بتقولين / ويضحك ؟؟؟؟
جالسه وأطقطق اصابع وسهرانه ومصدعه وحالتي حاله!
جلس جنبي وهو يقول : الفندق نظامه كذا غرفة نوم وصالة وطلال معي وش تبيني اسوي أخذ
غرفتين وحده لي ووحده لك ؟؟!

طيب أنت وين بتنام/ بضجر قلتها وتعب !؟
هو: السرير ينفصل نقدر نخليه لنفرين /وكمل/ ألا اذا بتطرديني من الغرفة بعد !
دخلنا وفعلا فصلنا السرير وبعدنا الاسرة عن بعضها شويات وتقاسمنا البطانيات والوسايد
وأخذت بجامتي ودخلت دورات المياه أغير وهو نفس الشي ..
على الطاولة نزلت شنطة مكياجي وعطري ..

كريم وعطر وفتحت شعري ونقزت على سرير وتلحفت قبل يطلع من دورات المياه !
طلع وهاذيك الابتسامه الخبيثه على وجهه , فتحت قران بصوت واطي وسويت نفسي نايمه !

دخل فراشه وصمت ..

فتحت عيوني أضاءة خفيفه وهو على جواله تغطيت وغمضت عيوني بحاول أرقد ..
هو: ريم نمتي ؟؟
ايه / بصوت واطي !!
على صوت ضحكه نمت ونام هو بعد ولأول مرة بنفس الغرفة ؟؟




أنتهى البارت ؟؟

البارت الثامن *



قريت الفاتحة فوق الضلوع اللي بها ما هنتّ
على كلّ الجروح اللي تحسّك ملح هوّنتك .!



تحسست الجوال اللي فوق الطاولة ودخلته جو البطانية , حاولة فيه يمين
يسار طافي شحن رميته وشلت البطانيه بشويش ..
غرفة ظلام وصوت المكيف والساعة مدري كم بس واضح الوقت متأخر ..

فتحت النور هذاك اللي مشاركني بالغرفة نايم على بطنه
وحاط الوسادة فوق راسه ويده فوق الوسادة ..
نزلت رجوولي بدون صوت , ومن فوق التسريحه شلت ساعتي وأنا اركز بالوقت 3 العصر ..
حطيت الساعة بشويش وتسحبت لشنطتي فتحت السحاب حبه حبه , وسحبت اول بجامه ودخلت دورات
المياه ..!

طلعت وصليت واخذت جوالي والشاحن ورحت الصالة ,, بعد نص ساعة دقيت على رقمه أبيه يقوم ..
هو: هلا / أسمع صوته من الجوال والغرفة بنفس الوقت ..!
أنا: الساعة 3 / بدون مقدمات ؟
هو: أنتي وينك ؟
أنا: بالصالة ..

جايك وقفل ..

حطيت رجل على رجل وانشغلت بجوالي ..
طلع من الغرفة بسروال رياضة اسود وفانيلة الهلال وشعره مبلل مويه ,
تربع على الكنبه وجواله ومفتاح السيارة بيده !
هو: سسسسسلام
أنا: هلا / ناظرت له بسرعة ورجعت لجوالي
هو: نطلع ناكل برا ولا اجيب شي خفيف وناكل هنا ..
أنا: لا افضل هنا ..
هو: طيب بشوف ابوي والعيال واجيب اكل وأجي ..
طلع والسكر الباب , ودخلت الغرفة فتحت الشبابيك ورتبت وطلعت مبخرتي الصغيرة
الكهربائية وحطيتها بالصالة وحطيت فيها البخور ..
أستشورت ولبست بنطلون أسود بحزام صغير ذهبي وبلوزة أسود حرير بدون اكمام ,
ومن الرقبه على شكل فيونكه , ساعة باليمين وخاتم , حددت حواجبي وروج خفيف ,
وتعطرت ورجعت لجوالي ..
بعد وقت دخل وبيده الاكل , اكلنا وعرفت أن عمي والعيال أخذوا عفشهم وراحوا
بيت خاله وتطمنت أن عمي ماعنده مانع نبقى هنا بالفندق ..
الشي الثاني اللي عرفته أنو بعد المغرب معزومين ببيت خاله وأنا لازم اروح..
أقترح خالد نطلع ناخذ قهوة ونلف شوي بالطايف ومارفضت ..

وافقت بس بشرط أنا عازمته ..

فاتح عيونه بقوة : ماعندنا حريم يدفعون / ويأشر بيده لا ..؟
تربعت بعد ماكنت واقفه : خلاص مابي أروح !!
لحووووول / يصد ومو عاجبه الوضع!!
وكمل/ خلاص موافق (يبتسم )..

( ضحكت وأنا أشد اللياقه فوق حركة الانتصار )
نقزت لبست عبايتي واخذت شنطتي وشوزي وطلعت لانه دخل الغرفة بيلبس..
مكالمة سريعه ل امي وانا بالصالة وقفلت على صوته يناديني بننزل ..
ثوب كويتي وشماغ احمر وساعة وكبك ذهبي وومسبحه سوداءبذهبي ,وعطر ..

واقف على الباب ينتظرني !

نزلنا وركبت جنبه بصمت , بهالخاتم اللي بيدي العب واحركه يمين يسار أطلعه
وارجع أدخله , شوراع الطايف , جوها وهاذيك السحب البيضاء واللي مغطيه شمسها ,
الهتني وسجيت فيها ..!

لفيت له : بصرف .!

هو: أبشري / وعند أقرب صراف صفط السيارة..
نزلت وفتح الباب ونزل معي , صرفت وطلعت وهو واقف على باب الصراف ينتظرني ..
مرينا وأخذنا قهوة ودونات ومويه ..

فتح المسجل وشغل البلوتوث وقال حطي لنا شي على ذوقك ..
مارفضت خطر على بالي أسمعه شي يبقى معه طول العمر ,
فتحت جوالي بعد مانزلت قهوتي وأنا عارفه وش بحط له ..؟؟؟؟

(رجعت لي بصوت حمد البريدي )

مديت يدي ورفعت صوت المسجل شوي ..

وفتحت القصيدة.؟؟؟

رجعت لي هالحين أسف وين جاي
أن كنت متناسي تراني ما نسيت

لا تقول متغير ولا تقول شبلاي
يغنيك صمتي لو سكت وما حكيت

لكن هالمره حكيت بلا حكاي
بارد لك باسلوبك وباقول ويت

توك تذكرني وتتذكر غلاي
يعني صباح الخير ما كنك دريت

مستحملك واتحملك لانك خطاي
وانا اعترف اني تسرعت وخطيت

ماهوب يكسر خاطري الا وفاي
ودي لو أن أرضيه حتى لو بكيت


واذا لقيت انسان وافي لك سواي
نعمة ولازم تحمد الله لو لقيت

كنت أعشقك ضايع وأحبك في عماي
والحين دربك سمح كفيت ووفيت.!

كل بيت كل شطر كنت أقصده وابيه يفهمه , ماسكه جوالي بيدي اليسرى ,
وأطالع بالمناظر اللي على يميني ,هو مدري وش وضعه بس واضح أنه مركز مع القصيدة
خفت سرعة السيارة , وبعد ماخلصت القصيدة طفى المسجل ووقف على جنب الخط ..!

هو: ريم تقصدين فيها أحد / تغير موده وتضايق ؟؟

طالعت له وقفلت جوالي ونزلته : لا ..

رفعت عيوني لقدام وبقيت أناظر ل أول شي يواجهني وأنا عارفه أني وصلت اللي أبي ,
ساكت ولا حركه حتى القهوة اللي كان يشرب منها ماعاد ذاقها , خايفه أتكلم ولا أعلق حتى
التنفس وربي أحسه يسمعه , ماطولنا أخذنا الدوار ورجعنا الشقه..
وقف السيارة والتفت وأخذت قهوتي لاني ماقدرت اشربها , نزل ووجهه مايطمن ..
دخلنا ورمى نفسه على الكنبه وغطى وجهه بشماغه !!

سيده على الغرفة وأنا لافه رقبتي واطالع له ماتوقعت ردت فعله كذا ,
أخذ الموضوع بشكل جدي وحس بأني اقصده
وشك أني بفارقه بيوم من الايام..؟
على سريري جلست بعد مارميت العبايةوالنقاب والطرحه , حطيت يديني على راسي
وفكره توديني وفكره تجيبني .!

دخل الغرفة وشلت يديني عن راسي وشبكت اصابعي ونزلتها على ركبي ,
بخطوات بطيئه جلس على ركبه قدامي , فك يديني وحطها بيدينه ونزلها بحظني ,

يطالع بعيوني :

والله العظيم عارف أني ظلمتك وكسرت فرحتك وأخذتك من أهلك ودخلتك بدوامه مالك فيها دخل ,
وحرمتك وشيلتك هم , بس كل هذا بدون قصد (يتنهد وينزل راسه)
رفع عيونه لي عارف أنك تقصديني
بالقصيدة ومالومك ويحق لك تسوين أكثر من كذا ..

(( غرقت عيوني دمع))!!

سحبت يدي من يده ومسحت دموعي وهاذيك الشهقه اللي تجي بعد البكاء فاضحتني ..؟
تحرك وجلس جنبي وضـم راسي لصدره وحوطني بيدينه :
أنا أسف أعذريني والله العظيم ماقصدت كل شي صار ..
يمسح بيده على كتفي ويكرر أعتذاره , آما أنا ضعفت وصارت دموعي أربع أربع .
بعد ماخلصت سحابة الدمع اللي كانت بعيني ,وقف واخذ المنديل ورجع وجلس على ركبه
قدامي , غطيت عيوني ثواني بالمناديل وفتحتها وغرقت ورجعت غطيتها ومسحت خشمي وهو يطالع ,
أخذت نفس عميق لعل وعسى تخف هالشهقه ..!
يدي اليمنى بين يدينه :

ريم تكفين خلاص والله مانيب بناقص !!

فتح راحت يدي وباسها وهو يقول:
ريم شوفيني ماأضمك وميت قهر على ضمتك ,ولا أقرب منك بس عشان مأجرحك
ولا أخذ منك شي غصب عنك ,تراني زوجك وشرعآ أنتي حلالي بس ماودي أكسر شوكتك وأقهرك كفايه
أني شيلتك هم وحزن بزواجنا الله يسامح أبوي !!

صديت عنه يمين وأداري دموعي لاتطيح !!

نزل راسه على ركبتي وحط راحة يدي على فمه وسكر عيونه حاولة اسحب يدي ومسكها ,
قلبي يوجعني من شعر وجهه اللي أحسه داخل يدي هذا غير الرعشه اللي بجسمي كله !

(تركته ثواني ليه مدري )

وعلى صوت الاذان اللي اخذته حجه سحبت يدي وقلت:
أذن المغرب ..
وقفت وتركته , جالس على الارض ودخلت دورات المياه , كملت بكاء وغسلت وجهي وتوضيت وطلعت ..
مو موجود بالغرفة صليت وساندت ظهري على السرير وأنشغلت بجوالي ؟
بعد ماخلص صلاة جاني وهو يقول :
تبغين تروحين لعزيمة خالي../ واقف خلف سريري!
أنا: ايه عادي / أحاول أرجع أتماسك !!

*طلعته من الغرفة وقفلتها وأنا أقول: ممكن تطلع بجهز !
لميت شعري لفوق وفتحت قصايد , وبما أني عروس يبا الفيت وأول مرة يشوفوني
بعد الزواج قررت أكشخ ..
بعد ساعة وقفت قدام مرايتي , فستان وردي ضيق لين تحت الركبه وصدر مفتوح على شكل سبعه
مكياج ثقيل حبتين وعدسات رصاصي وروج وردي غامق سلسلة طويله ومناكير تفاحي وأكسسوار
وخاتم وخلخال وجزمه كعب تفاحي , رشت عطر وكريم ونزلت شنطتي على السرير ولبست عبايتي
وسكرتها للاخير ..!!
فتحت الباب وطلعت له الصالة بالعباية ..
هو: ماشاءالله ماشاءالله / كان منسدح وجلس ...
ماعطيته فرصة:انا جاهزة نمشي ؟؟
/ جوالي بيدي وواقفه بأول الصالة.!
هو: طيب ليه لابسه العباية من هالحين ؟!

جلست / تأخرنا ولا ..
هو: أها تأخرنا / ويضحك ..

15 دقيقة بالكثير ولبست طرحتي ونقابي وطلعنا ..
قدام بوابة صغيرة وقف السيارة وهو يقول هذا بيت خالي وهذا باب الحريم ,
بغيت أنزل ومسك يدي اليسرى ..
هو: أذا تضايقتي ولا طفشتي ارسلي لي رسالة ..!!
طيب وسحبت يدي ونزلت أول مادخلت مع الباب لقيت عهد تنتظرني ..؟
عهد: هلا هلا واااي العيون لحالها فتنه / واقفه بكامل كشختها عند الباب..؟
أنا: كأنك تنتظريني / فتحت القاب ..
عهد: أيه زوجك مرسل لي أطلعي على الباب لريم وصلنا ../ وتغمزز وتضحك!
أنا: أها /وضحكت لضحكها

على مين جا والحريم كثير ولا قليل دخلت ونزلت وتعطرت وسيده لمجلس الحريم
سلمت وقاوية وجلست وعهد لاصقه جنبي وتقول أبيك وتبتسم لرايح والجاي ..
أنا: خير وش عندك وضعك مايطمن / الله يسلمك لاخلاص لاتصبين
>> أكلم بنت خالها اللي واقفه بالقهوة ..
عهد: تبتسم وتغمض عيونهاوتقول: وش رايك بكشختي ؟؟
أنا: يعني مقبوله/وكملت/ أخلصي وش عندك / رافعه حاجبي ؟؟
عهد: مقبوله يظالمه/ نست نفسها ..
نزلت راسي وانا ابتسم واحك جبهتي لان كل المجلس هالحين يطالع فينا ..
تداركت الموقف وهي تحاول تضحك وتضربني على كتفي على اساس تصرف الموضوع ..

عهد: أنفضحنا بصوت واطي وللحين تبتسم !!

أنا: لو سمحتي لاتخربين برستيجي قومي أجلسي هنااااااك / وأشر على مكان بعيد ..
عهد: ريمي محتاجتك والله / بوزت ..
أنا: ي الله قولي خلصيني / حطيت رجل على رجل ولفيت لهاا وأعدل شعري ..!
عهد: نظرت شامله على الحريم وتتأكد أن محد منتبه لها

وقالت: أنا أحب .

أنا: شههههههقه تحبين / فاتحه عيوني وفمي !
عهد: تغيرت جلستها وأحمر وجهها / حسبي الله عليك ياريم بنت محمد
>> تقولها وهي جازه على اسنانها ..
رجعت أبتسم وهي تبتسم نطمن الناس اللي تناظر فينا أنا بخير والامور طيبه *_*
أنا: صدق تحبين / مبتسمه عشان محد يشك فينا ..
عهد: اي حبك برص الطايف كله درى من شهقتك / بيدينها الثنتين ماسكه شعرها فوق وتعدله ..
منهو / ماعندي وقت بعرف ..؟
تفتح فمها وتنطق الاسم بشويش عشان محد ينتبه وتحرك وجهها وأنا مركزه بعرف بس مافهمت *_

أنا: أخلصي منهو / بصوت عالي ؟؟

رجعنا نرقع ونبتسم ومانبي احد ينتبه وخصوصا خالتي
اللي كل شوي معطيتنا نظرة /هين علاجكم عندي !
أشرت لبنت خالها المسكينه اللي للحين ماسكه القهوة ب أبي قهوة ..
صبت لي فنجال بركز مع عهد ومايخليني اركز وذكائي يضرب الا هالقهوة ..
رجعنا لموضوعنا وانا معاي فنجال قهوة وهي بيالة شاهي بنعناع ..!

منهو / ماعلى بالي الا هالسؤال ؟؟

عهد: بكتبه لك بجوالي بس انتبهي تقرين الاسم بصوت عالي
وتوديني حبل المشنقه ..؟/ عاظه على شفايفها!
لا أن شاءالله / روعتني بحبل المشنقه ؟
طلعت جوالها وكتبت وقبل لاتلف علي الشاشة قالت : ماوصيك هاه أقريه بصدرك ؟؟
هزيت راسي يعني أزهلي ولايهمك ( طــل ) ..

ياخي هالعدسات نكبتني وخلتني أقرا الاسم ساعه وأحاول أتذكر منهو راعي هالاسم ؟؟
شالت الجوال وهي تقول : والله لو أنك تقرين رواية ؟؟
قفلت جوالها ونزلته وتطالع في وانا مدلخه وأتذكر منهو فيصل ؟
ولد خالي / تقوله بصوت واطي وهي تقرب مني وتبتسم نص أبتسامه وحالتها حاله وسايحه البنت ..؟
حطيت يدي على فمي وجلست أفكر وانا اطالع فيها فجعتها ..
عهد: وشبك وين رحتي / تغيرت ملامحها ..
أنا: لايكون أحد يعرف أنك تحبينه / خفت عليها من قلبي ؟؟
عهد: بس أخته / طارت الابتسامه اللي على وجهها !!
أنا: طيب أنا وش مطلوب مني ..؟!
عهد: مطلوب منك خالد هو الوحيد اللي رافضه ../ عقدت حواجبها !
أنا : هو خطبك حلو / تطمنت !
عهد: لا ماخطب رسمي كلم خالد ورفضه وقاله لاتحاول تخطبها
من أبوي لانك مرفوض / حسيتها زعلانه على خالد؟؟
أنا: وكيف عرفتي أنه كلم خالد ؟؟
عهد: أخته قالت لي أصلا هي صديقتي الروح بالروح ..؟

قطعت زوجة خالها سالفتنا وهي ترحب على العشاء , وبعد العشاء وقبل لانسري قالت
لي أنو بكرة بيطلعون كلهم لحديقة وطلبت مني أجي وأصرت وترجت لانها خايفه خالد يرفض يخليها تروح
بسبب ان الطلعه عند خالها أبو فيصل وفيصل طبعا بيكون موجود..؟
ماوعدت عهد بشي رغم انها طلبت مني وعد باني اوقف معهااا وأقنع خالد ,
ولاني مافهمت منها ليه خالد رافضه , ماعطيتها وعد واتفقنا أكلمها اذا فضيت وتفهمني السالفة زين؟؟

* فتحت جوالي على الساعه 12 , ولقيت من هذاك الرقم الغريب رسالة قبل ساعتين, وطنشتها !
وقبل لا انزل جوالي دق ..
فتحت الخط ..
هو: ريمي أنا برا
أنا: طيب يلا طالعه ..

قفلت ولبست وأستاذنت راعية البيت وطلعت , ركبت وسكرت الباب ..
سلام..
هو: يامرحبااا / يمطهاااا !!
أنا: سكووووت
هو: طمنيني عسى أستانستي / لسى واقفه السيارة وماتحرك؟
أنا: أي أستانست / طرا علي فيصل اللي تقوله عهد وفكرت للحظه ليه خالد رافضه ؟؟
حرك السيارة ومشاءء ..
أنا: خوالك سامرين ليه ماسمرت معهم / قلته لاني شفت جلستهم بالحوش واحنا مارين البوابه الكبيرة ..؟
هو: ايه مطولين بس أنا بسمر معك ؟؟
أنا: ماطالعت له وصديت يمين اناظر بالبيوت ..!
مرينا بقالة ونزل ولا شاورني وش ابي نزل من سكات , ورجع بكيس نزله بالمرتبه اللي ورى ..
وماطالعت وش بالكيس عشان كبريائي ولانه ماسألني وساكت طول الطريق ..؟

ركب وكملنا طريقنا ...

نزلنا للفندق وسيده على الغرفة نزلت الفستان ولبست بجامه , وغسلت مكياجي ..
روج خفيف وعطر وكريم وفتحت الباب ..
دخل اول ماسمع الباب يفتح وهو يقول:
مابي أعتراض ..
سحب الفراش اللي على الاسرة والوسايد وطلع وأنا اناظر واتبعه بشوف وش بيسوي ,
بصط الفراش قدام البلازما مكان الطاولات اللي كانت بالصالة , وفصل بين الفرش بمسافة صغيرة
ونزل طاولة صغيرة على اخر الفراش وعليها 2 عصير توت وفشار ونوتيلا بملعقتين ,,
واقفه بنص الصالة وأطالع فيه رايح جاي ويرتب ويرمي الريموت على فراشه ويجيب علبتين مويه
ويعدل ويبعد ويناظر ويشيك وأخر شي قال : ببدل وأجي ..!!
دخل الغرفة وأقنعت نفسي ان الموضوع عادي وجلست على فراشي وتربعت وجوالي بيدي وأخذت العصير
وشفطت شويه وأنا أناظر طلع ولا لا , فتحت نور شاشة جوالي بشوف الساعة كم ,
ولفيت بسرعه وأنا أقول :
ليه ؟؟؟
هو: بنتابع فلم .. / وجلس جنبي على فراشه ..؟
أنا: طيب نتابع والنور مفتوح عادي / خفت يوم طفاء النور ..
هو: لا مايصلح ونور البلازما يكفي / أخذ عصيره وعطاني فشار ..
أخذ الريموت وفتح الفيلم ,وكنت بالبداية شاكه ومو مطمنه بس مع الوقت دخلت جو الفيلم
وبديت أتفاعل معه واتوقع وش بيصير وهو نفس الشيْء ساعتين مرت ماأنتبهت لها ونسيت
توتري وخوفي ..!!
وقفنا الفيلم على صلاة الفجر وصلينا ورجعنا نكمله ..
أخر شي أتذكره على فراشي وظامه بطانيتي ومغطيه كل جسمي
الا وجهي وشعري مفتوح ومغطي وسادتي ..
وأتابع وعيوني مليانه نوم , وأغمض وأرجع افتحها بقوة , ومتحمسه أعرف البطل بيقابل
حبيبته ولا لا ..
أما هو مساند ظهره على وسادتين كبار ومغطي جسمه لين صدره والريموت والجوال علي يمينه
بين فراشي وفراشه , الين هنا وصلت وبعدها ماصحيت الا على صلاة العصر ...


*
قمت أتفقد المكان وأتذكر الفيلم والغريب أني ماأذكر نهايته ..؟؟

صليت وأخذت دش وصحيته ..!!
على الساعة 5 جاني أتصال من رقم غريب , رديت وكانت ام فيصل وتعزم على الطلعه الليله ,
بدون تفاصيل علمت خالد ورفض بالبداية وقال أنه بياخذني أنا وعهد وبيطلعنا بمكان يمدحه ,
سألته عن السبب وماقال لي شي ..!!
حاولت فيه نطلع معهم وذكرته بخاله وعيب يعرف بأنا طالعين وتاركين الطلعه اللي هو مسويها
ومن هالكلام اللي يأثر بخالد ووافق ..
أرسلت ل عهد رساله بأن خالد وافق نطلع مع أبو فيصل وعايلتهم ...
هذاك الفيس اللي يرقص كان رد عهد , وب أثقلي رديت ؟؟
متربعه وجوالي بين يديني وأراسل عهد ومبتسمه..

هو: ها كيف الفلم البارح اعجبك / يطالع لي وعيونه فيها ضحكه ؟؟
فهمت وش يقصد وقلت:
نمت ماشفت النهاية / ورجعت اراسل عهد ..!!
هو: شاطره أحد ينام بنص الفلم ؟؟
أنا: فيلم 3 ساعات وشوي اكيد بنام / مسويه ثقه وماهمني أحد!
يازينك وأنتي نايمه لاحركه ولا صوت مامليت والله العظيم وأنا أتاملك
اللي يشوفك وأنتي نايمه مايقول هاذي ريم العنيدة الصعبه اللي جالسه قدامي ..!




أنتهى البارت .

البارت التاسع ..


إنى أغار فليت الناس ما خلقوا ..!


أحساس غثيث والله والله أحساس يرجعنا لعمر العشر سنوات ,
لطفل نشبه ماتقدر تسكته لو بكى ,ولاتقدر تاخذ منه لعبه اذا حابها بالضبط هي كذا الغيرة ,
ودك توقف قدام اللي تحبه وتقول بالعاميه هذا حقي مقي لاتقرب له ولاتمسك يده ولاتضمه
ولا تتخطى الكل وتجلس جنبهوأنا موجوده ولا يضحك وأنت السبب عشان ماتجن جنوني
ياخي هذا انا أحبه روح دور حدا غيره حبه (هذا الشخص لي ) شووف غيره الناس واجد ..!
لما تتأمل الشخص اللي تحبه وتشوفه فرحان مع غيرك وتركز على ملامحه وحركاته جلسته وطريقة كلامه وتحاول تفهم
ليه مستانس كذا يعني هذاك الشخص اللي مع حبيبي وش قاعد يقول لما ياخذك الفضول وودك تعرف سر هالضحك
والوناسه أعرفي أنك غيرانه ياعزي عن حالك وحابه من قلب , ومشاعرك مقلوبه راسٍ على عقب , لك الله ..!

عبالي أهيم الليله وأتكلم يوووه حكي حكي بقلبي , كومة مشاعر والله , حالة حب , ولا أحد يعرف أنا وش أحس,
كأني عايشه قصة حب من سنين كأني أنتظر رسالة أبدا أبدا مو رسالة جوال لا لا ورق ,وقلم أحمر ,وخط ,وتاريخ ,
وظرف ,وريحة عطر , وكلام مكتوب عشاني , وأسمه بأخر الرسالة ..
يماا تعالي شوفيني ، تعالي خذيني , يمما أكسر الخاطر أنا , حابه
ومغرومه ومقسومه قسمين بين قلبي وعزة نفسي , وموعوده بزوجه ثانيه واللي واعدني
هو نفس الشخص اللي أنا عاشقته ..؟!

*

على الفرشه بحديقة كبيرة وأشجار مزروعه بكل مكان والعاب وصراخ وناس جايه رايحه جالسه ,
مع عهد وحريم خوالها وخالاتها وخالتي , وسفره مليانه بأكثر من صنف حلا ومكسرات وثلاجات قهوة
وفلاشات تصوير لسناب , وضحك ونغزات ..
متربعه وجوالي وسمعاتي بحظني وشنطتي الحمراا على يميني ومفتوحه ,
عهد على يساري وتسولف مع بنات خوالها وتضحك وتحاول تضحكني , ماكثرت كلام ولا ضحك كنت عاقله
وأقصاها أبتسامه ورغم كذا ماكنت مرتاحه , أم فيصل راعية العزيمه
مركزه علي وعلى كل حركه مني أشيل جوالي أخذ فنجال قهوة اكل حلا تناظر بيديني قلت بنفسي يمكن عاجبتها
المناكيرا الحمرا والخواتم الذهبي والساعة وخصوصا ان عبايتي اكمامها واسعه وواضحه يديني ,
تطور الوضع وصارت تطالع بعيوني ومركزه بعد هنا قلت أكيد مو عاجبها أني لابسه عدسات وحاطه مسكره
وزاريه وناقده علي رسمي ..!

أم فيصل : ريم خالد ماجاب لك دبله ؟
بصوت واضح قالتهاا ؟؟
رفعت عيوني لها ولقيتها تناظر بيسراي , نزلت فنجال القهوة وقلت ..؟
لا جاب لي ياخاله بس طلعت ضيقه / بأبتسامه !
الكل سكت ومستغرب خصوصا عهد أحس تفاجأة من صوتها وهي تقول :
عهد: ماشاءالله عليك ياخاله مركزه بيدها اذا فيها دبله ولا لا ؟
أم فيصل : أيه ماشفت بيدها دبلت وهي عروس ؟/ أنحرجت !
أبتسمت لها مره ثانيه ورجعت أتقهوى وكأن شيء لم يكن , على السوالف نسيت الموضوع
وقبل العشاء سمعتها تقول هذا الحلا لخالد ذكريني أعطيه له , تكلم بنتها الصغيرة ماركزت كثير
وطنشت ..
أمي تقول الحرمه ماتتكلم فيك أو عليك الا لسببين الاول غيرانه والثاني كارهتك ..!
في هالجسله حسيت أن امي صادقه فيه شي غلط , طوول الليل حكي عن الزواج والزوجه الثانيه
وأن الرجل قادر يفتح أكثر من بيت والمفروض الزوجه العاقل ماتعترض اذا زوجها يبي زوجه غيرها ,
الكلام يرمى لي وأنا المقصوده هنا بهالحكي , حسيت أن فيه ناس تهيئني لشيء انا مابيه ..؟
خلصت أطول جلسه بالتاريخ واللي كان موضوعها انو عادي يتزوج عليك زوجك ؟
رديت على خالد وعدلت عباتي وشلت شنطتي بنسري , وأنا واقفه شفت أم فيصل توقف ,
خذت علبة الحلا وتقدمت لسيارة خالد ووقفت تنتظره , بخطوات راكده تقدمت ..
على صوت خالد وضحكه مع خواله وعيالهم ألتفتت هناك لجلست الرجال شفت زوله وبمجرد ماشافني رفع
يده لهم تصبحون على خير وجاني يمشي ويلعب بالسبحه ..
خالد: سرينا / مقبل علي !
أنا : هزيت راسي ب أيه ..
وقف جنبي وتقدمت انا وهو لخالته اللي تتكلم معه ..
أم فيصل : خالد ياوليدي هاك الحلا اللي تحبه وكملت / بغيت ارسله لك مع العيال بس أنشغلت عنه!
خالد بأبتسامه عريضه : الله لايحرمني ممنك يخاله مانسيتيني ؟؟
أم فيصل : نساك الموت أنت ماتنسي ذوقه مسويته حوريه عساه عافيه ..!/ ناظرت لي وله وأبتسمت ؟!
أنا: الله يعطيك العافيه ياخاله وتسلم يدين حوريه !/ كنت عارفه قصدها والله بس مابليد حيله ؟؟
خالد أرتبك ونحرج وتلعثم يوم قالت حوريه وطارت ابتسامته وتردد اصلا ياخذ الحلا وناظر بعيوني
اكثر من مره بيشوف ردت فعلي .. !
سحبت الحلا من يدها وانا اقول كثر الله خيركم , يالله يخاله تصبحون على خير وتحركت لسيارة
اللي اسمع صوت ابوابها يفتح وركبت , وتركت خالد مع خالته ..!
ثواني بس وركب السيارة وهو يقول: عسى استانستي / يطالع لي ويشغل السيارة ..؟
أنا بكل صدق : لاوالله مو كثير ..
منزله شنطتي عند رجولي وهالحلا بيدي وخاطري شين شين .
هو: صار شي ضايقك / يده على الدركسون ولاف بكل جسمه علي ..؟
بعد صمت فكرت فيه اقول الصدق ولا لا رديت
بــ لا
يمكن مشتاقه ل امي جلست خالاتك شوقتني ل أهلي .؟
هو: حرك وقبل لايطلع مع البوابه الكبيره للحديقه أخذ الحلا من بين يديني
ووقف عند عامل نظافه وعطاه له ورجع حرك السياره وهو يقول: بالعافيه !
أرتحت ايه هالحركه البسيطه ريحتني , أي شي حلو منه يطمني .
للحظه وأنا بالسيارة فكرت وش مضايقني وليه العبرة خانقتني وش هالجو الكئيب اللي أنا فيه ,
حاطه يديني ببعضها وافركها اصد يمين وأتنفس بقوة لعل وعسى , نزلنا الفندق ودخلت الغرفة
بنقابي وعباتي مانزلتها وقفلت ورميت بجسمي على سريري وراحت دموعي أربع أربع ..!
ربع ساعه كفت ووفت بكيت وأنتهت المشكله أخذت بجامتي وغيرت , شلت شعري , عطر وروج وطلعت ,
مالقيته بالصالة دورته وطليت مع الشباك السيارة مو تحت , أستغربت وين بيروح هالحزة ..
جلست بالصالة انتظره ..
أرسلت لرهف كالعادة : وش تسووون ؟؟
على سوالفها وعلوم أمي سجيت ومانبهني الا صوت الباب , دخل وقفل الباب أبتسم ونزل مفتاح سيارته
على الطاوله وجاني يمشي..
قفلت جوالي وانا فاتحه فمي أطالع فيه وش عنده على هالابتسامه , مد يده لي وهو
يقول: قومي البسي عباتك..!
ليش / قلتها وانا اطالع بيده الممدوده لي !؟
هو: بوديك مكان تحبينه / سحب يدي وقومني .؟
قمت معه وأنا أقول : هالحين بهالوقت ؟
هو: أيه بهالوقت عندك مانع / مسكني من كتوفي ووجهني للغرفه ودفني لههاا ..!
أنا: لاعاد قولي وين رايحين طيب لازم البس / تكاسلت ابدل .
هو: لا خليك بلبسك بس البسي عبايتك واخذي شنطتك .

سحبت جوالي والله ورحت الغرفه ورميته بالشنطه ولبست عباتي وصندلي , وطفيت الانوار واخذت شنطتي
وطلعت له .
هو : يالله مشينا / يوقف .
أنا : ايه جاهزه ..
طلعنا ومرينا على الاستقبال كان يتكلم مع الموظف بصوت واطي وانا واقفه أنتظرره , ورجع لي
وركبنا السيارة وهو يقول : بسم الله .؟
ركبت وحطيت رجل على رجل وفتحت جوالي بشوف اخر شي ارسلته لي رهف ..
منزله راسي وابتسم ومركزه بشاشه جوالي !
هو: من اللي ضحكك ؟
أنا : رهف / بصوت كله ضحك ومارفعت حتى راسي .
هو: أضحكي عسى هالضحكه ماتفارق عيونك / بصوت ملييييييييان حنيه .
ساندت ظهري للمرتبه وضيعت وش كنت بكتب لرهف ومارديت , رسايل رهف ورا بعض اشوفها بس والله
ماافهم ووش تقول تلخبطت علومي وقفلت شاشة جوالي
وسالت : وين رايحين ؟ / بغير الجوء ..!
هو : قلت لك مكان تحبينه / يحط جواله بالشاحن ..!
أنا: اامم هنا بالطايف ماحب مكان محدد / ميلت جسمي يسار وكوعت ( ساندة )
بيدي على علبة الاشرطه اللي بيني وبينه ؟
هو: الا صدق ووش اكثر مكان تحبينه / وقف عند الاشارة ولاف علي !!
الرياض / بسرعه قلتها / وكملت هاذي حبيبة قلبي !!

ياحظ الرياض والله / يقولها بضحكه !

أنا: ايوالله تنحب وكفايه امي فيها واهلي وذكرياتي / آآآحــم بشرح له ليش احبها!
ومن الناس من أكثر واحد تحبينه ؟؟؟
أبتسمت لسؤال واضح القصد من السؤال جاوبت بعفويه مصطنعه !!

أمي أكيد .

جاوبت على السؤال وسكت بس هو ماسكت رجع سأل ؟
وبعد عمتي من تحبين ؟؟/ صامل يعرف اللي يبي !

* لحظه لحظه صدق والله ياريم بعد أمك من تحبين يعني بيكون ابوي ولا سعد ولا أخواني كلهم ورهف ,
ولا هذا اللي جالس عن يساري ويسأل ويتحرى , ليه ماسألت نفسي هالسؤال من قبل ,
فعلا مو المفروض نعرف ترتيب الاشخاص بحياتنا ؟

طيب هالحين وبهالوقت وهالثواني جاوبي ياريم محمد بينك وبين نفسك بصدق
من أكثر شخص تحبينه ؟؟

آممممم أمي

أكثر شخص احبه بكل صراحه وأبوي وأخواني و و و ..!
طيب وهذا وين بيكون بهالترتيب ( أسال نفسي)!

هو أول شخص حبيته !

لأن كل هاالاشخاص اللي قبله كان حبي لهم عفوي فطره كذا من ربي ألا هو تعمدت أحبه ,
وحبيته بيني وبين نفسي حتى قبل لاأعرفه و ..؟
هو: هي ريم وين رحتي؟ / يأشر بيده قدام وجهي !!!

قطع حبل أفكاري ..

أنا : هلا !
هو: وين وصلتي وليش سحبتي على السؤال ؟؟/ يطالع في مستغرب !
أنا: أبوي أبوي بعد أمي ثم أخواني ؟/ أختصرت السالفه له بشوف وش بيسأل بعد..؟

الغريب أنه سكت وختمها بأبتسامه ولاعاد سأل ,يمكن خايف يقول وأنا أي رقم بهالترتيب ,
ساكتين بس ولا واحد فينا راضي بقى شيء ناقص , حتى الاسئلة أحيانا أجاباتها تكون ناقصه ولاتشفي الغل ,
ليته مافتح الموضوع من بدايته وتر الجو بيني وبينه من جديد.!
صفط قدام سوبر ماركت ونزلت معها بطلب منه , وكان يدرجني قدامه دخلت مع باب السوبر ماركت وهو حاط يده
خلف ظهري ويوسع لي المكان المزحوم بالناس , أخذ كيس كبير وقال حطي كل شي تبغينه لان مشوارنا طووويل ؟؟
شوكولاتات وبسكويت , وثنين عصير توت وثنين ببسي ومويه وشبس ولبان ومن هالسوالف ؟؟!
على طاولت المحاسب نزلنا أغراضنا , وطلعت جوالي على مايخلص خالد ويحاسب على الاغراض ..!
على طووول على الانستقرام فتحت صورة عجبتني وجالسه أتاملها شفت هذاك الرقم الغريب طلع لي فوق
برسايل الواتس , سحبت الشاشه تحت ودخلت الواتس ..

أنتي اللي بالمرتبه الاولى ياريم .

تركت الكلام وركزت على النقطه يعني أنتهى الحكي ,
يعني أنا الاولى بقلبه ومافيه غيري , هذا اللي بيوصله لي خالد ولا أنا أتوهم!
3 و 35 دقيقه صباحا مرسلها ,بجوالي هنا باليسار الساعه 3 و 36 دقيقه صباحا ..!
ناظرت له , دخل جواله بجيبه وطلع البوك مقفي وماشوف ملامح وجهه..؟
شال الاكياس وأشر لي مشينا ..!
سحبت نفسي ومشيت قدامه وأنا بعالم ثاني , من يقول الحكي مايربك , من يقول الكلام مايوصل
الاحساس من يقول أن الكلمه ماتثبت أن الشخص يحبك , عساك بحالتي وبهاللي أحسه ,
والبسبب هالكلمتين اللي قالهاا..
فتحت الباب وركبت وسكرت ريشة المكيف اللي قدامي , برد برد الجو بارد وجسمي يرجف ومافيه سبب
ثاني الا البرد ؟!
ركب وسكر الباب ..!

ليه ماشغل السياره ليه ماحرك ؟

أطالع فيه,ولا أنتظر شويات , طيب أنا ليه رجولي ترجف قلبي وفهمنا السبب , رجولي ليه تراعد كذا
وليه أتنفس بالغصب وكأني اسرق الهوى , وش هالحال المايل اللي أنا فيه , برد برد برد ..!
لمحته يمد يده اليمنى لي , باسطها ويبيني أنزل يدي بيده , عيوني على يده وماتحرك مني عضوا ,
أستحيت وهو ماد يده وينتظرني ويمكن طاوعت قلبي رفعت يدي اليسرى وزلتها بيده وضاعت والله بهاليد الكبيرة
دخل اصابعه بأصابعي ورفع يدي وباسها , مره مرتين ثلاث وقال :

أنتي حبيبتي وبتثبت لك الايام حبي !

ساكته ماعندي حكي أحسس بس !!

حركت السياره ومشينا وأنا مستسلمه لكل شي , حتى محاولاتي بأخفاء مشاعري تنازلت عنها هو كذا
وبجلس كذا باللي أحسه بدون مقاومه ..؟

مسكنا خط الرياض وأنا ماتوقعت أبدا ان المقصد الرياض قلت كالعادة بنمسك خط لين نتعب ونرجع الطايف ..!
ترك المفرق اللي يرجع لطايف وواصل سيده ناظرت له وأنا اقول:
رايحين الرياض ؟؟
هو: أيه رايحين الرياض ./ بكل راحه يقولها !!
أنا: وعمي والناس بتمشي ل أبها / بتعجب !
هو: خليهم يمشون حنا نلحقهم / أحر ماعندي أبرد ماعنده !!

غيرت جلستي ..

أنا: خخخاااالــــد / بزعل !
هو: عيون خالد قليبه .
أنا: ليه رايحين الرياض ؟؟
هو: عشانك .
أنا: شلون عشاني / أستغربت !!
هو: أنتي مشتاقه لعمتي بنروح نسلم علاها ونرجع / يقولها بكل بساطه !
أنا: صدق والله .
هو: يضحك ويطالع لي ويرجع يركز بالخط ..!
أنا بعد صمت: وعمي أخاف يزعل.
فرحت أني بشوف أمي والله بس ماتوقعتها وخفت يصير مشكله لو يعرف عمي .
هو: لا لاتخافين محد بزعلان .
طالعت بساعة جوالي وسالته كم باقي ونوصل فهمني وضحك وهو يقول: تغير مزاجك .
أنا : أيه طبعا بشوف أمي يحق لي !

تلقفت وفتحت درج السيارة وصحت لما شفت المسدس ,
وعلى ليه هنا ووش تبي بالسلاح قضيت الباقي من الخط
وهو يحاول يقنعني ان الموضوع عادي وكل رجال بسيارته سلاح بس مااقتنعت
وقفل مخي على انه مايصير وخطر وممكن بلحظة شيطان تستخدمه وطلعت العجوز
اللي جواتي وصرت انصح نصايح تخوف وتقنع بنفس الوقت , اللي يقهر أنه مستانس على عصبيتي وخوفي,
ودي اطنش واسكت وماكمل نصايح والسبب تبسامه ونظراته اللي أعرف قصده منها بس ماطاوعني قلبي وواصلت
انصح واخر شي قلته لو تمسك الشرطه ترى بيسجنونك والسبب هالمسدس و رفعت حاجبي بعصبيه وانا اشوفه يضحك
على كلامي , أنتظرت لين خلص ضحك وقلت ليه الشرطه ماتمسك اللي معه سلاح ؟؟
هو: لا ياقلبي تمسك بس السلاح مرخص ..ّ!
فتحت فمي على مرخص وش يقصد بمرخص بس فهمت انه مسموح يحمل سلاح او شي كذا ..!؟

الزبدة وصلنا على 8 الصباح الرياض وأخذنا فطور ودقيت على أمي وعلمتها بأنا جايين نفطر معهم ,
وفعلا رحنا بيت امي وصحى ابوي وسعد وأفطرنا وتقهوينا وأنا بطير من الفرح حسيت الدنيا أكتملت
خالــد وأهلي ياااه كذاا رضاا .
تركني أنام عند أمي وهو راح شقتنا على 10 الصباح حطيت راسي وماصحاني الا امي بالغصب الساعة 4 العصر
وهي تهاوشني على صلاة الظهر اللي فاتتني ..؟
صليت وأكلت وسلمت على باقي أخواني وسولفت معهم ,و شحنت جوالي وفتحته 20 مكالمة من عهد
أقلقتني ودقيت عليها ..

الوووو

عهد : هلا ريم / بسرعه فتحت الخط!!
سسسلام ياعسل / بأبتسامه
عهد : وعليكم السلامم / جديه البنت !!
خير صاير شي لقيت لك 20 مكالمه / خفت
عهد: أيه صاير أبوي معصب المفروض اليوم نمشي ابها وخالد يقول ل طلال انو رايح لرياض عنده شغل؟؟
ايه صح حنا بالرياض ..
عهد: طيب هو وينه كلنا ندق عليه ليه مايرد ؟
نايم ياعهد الحين أصحيه أنتم وين ؟/ قلقت !
عهد: لسسى بالطايف وعيا أبوي نروح لين يجي خالد تعرفين خايف عليه من الخط ويبيه يكون معنا !
خلاص أنا اصحيه الحين ولا يهمك .
عهد: أيه الله يوفق والله ابوي مسوي مشاكل هناا وزعلان حتى على طلال ؟؟
ابشري ابشري وقفلت , دقيت على خالد مايرد والاكيد انه لسى نايم , رحت لناصر وخليته يوديني
لشقتي بصحيه يشوف المشكله اللي احنا فيها ..
نزلني عند الشقه وطلعت ركض وفتحت الباب وسيده على مجلس الريجيل حتى العبايه مانزلتها ,
فتحت النور وانا اطالع بفراش خالد زين معقوله مو موجود وين بيكون اذا مو نايم ..
تركت النور فاتح ورحت الصالة , باب غرفتي مفتوح !!
وقفت على الباب أطالع بهالخالد اللي نايم على سرير وظام وسادتي , وبخاطري أقول من سمح لك !
نزلت العباية والطرحه ووقفت عند راسه وانا اعدل شعري ..؟
خالد / بصوت واطي ..

خالد ..خـــالد خـــالد أصحى ؟

هاه / يقولها وهو لسى نايم , مسحت بيدي على كتفه وانا اردد أسمه يمكن تعاطفا معه بسبب المشكله
اللي سببتها له مع عمي ..؟
فتح عيونه وطالع لي شويات وأبتسم عرف أني كشفته نايم بفراشي , خبرته أن عمي يبيه , وتركته على الفراش
ورحت المطبخ أسوي له أكل , بعد ربع ساعه لمحته بالصاله ,خلصت الاكل ورحت له !!
بعد ماأكل وروق وفهمته السالفه زين دق على عمي ..!

مساك الله بالخير يابوي / بهدوء
عمي : ......./ مأسمع الا صوته ولاادري وش يقول؟!
عندي شغل بخلصه وأجي ساري / واضح انه يجاوب على سؤال عمي !
عمي :...................../ كلام طووويل وملامح خالد ماتطمن!
أبشر , أبشر / يكررها خالد .
عمي : ......................وقفل الخط ؟؟

ناظرت له ونزلت عيوني ورجعت اناظر له وقلت: زعلان عمي ؟
أبتسم / أيه زعلان بس انا اراضيه بكره .
نمشي الطايف / قلتها بحل هالمشكله .
هو: لا بنسمر الليله مع أهلك ونتعشى وبعدين نسري ..؟
وعمي / عقدت حواجبي !!
أبوي أنا ارجع شوي أكلمه وأطيب خاطره وبكره
أسلم على راسه هذا ابو خالد مرضى زعله .؟
__

الطايف ..

عهد: حوريه أنتي قبل لاتكونين بنت خالي صديقة عمري وأخت فيصل حبيب قلبي
مابي أخدعك وأقول ان خالد ممكن يتزوجك بيوم من الايام ..؟
حوريه : عهد أذا فيصل أخوي حبيبك خالد أخوك حبيبي وهالشي متفقين عليه من قبل لانعرف
ريم أنتم اللي رحتوا خطبتوا له وخربتوا الاتفاق ..!
عهد بعصبية : كم مره بقول لك ابوي اللي خطب له أنا وأمي مالنا دخل ؟؟
حوريه: أنا ماعندي مشكله أكون زوجه ثانيه لخالد / منكسره وحزينه ..؟
عهد: بس خالد متزوج وريم ماتعرفينها ماترضى يتزوج عليها ..؟
حوريه: ماندري وش بيصير مع الايام وخالد ماراح أفرط فيه ..؟/ بحزم !
هاذي حوريه بنت خالي أية فالجمال وفعلا أسم على مسمى , هي أجمل بنت فجماعتنا
مخلصه الثانوي وجالسه بالبيت من ثلاث سنوات كانت تنتظر خالد ومحد يعرف أنها تحبه
ألا انا وامها , وسبب هالحب أمي وخالتي ام فيصل اللي أتفقوا وأحنا
صغار أن حوريه لخالد وأنا لفيصل وأمي أثبتت هالشي بكلامها كل مره تشوف حوريه بأنها عروسة خالد وأول وحده
رشحتها أمي لما جا أبوي يخطب لخالد بس ابوي رفض وماقال لنا وش السبب وراح على طوول خطب ريم بنت عمي .!
ماسكت على الموضوع بعد ماكلمت حوريه رحت ل أمي ونبهتها على أن اللي يصير غلط ريم وخالد ماصار لهم
شهر من تزوجوا وأنتم تفكرون تلعبون بعقل خالد وتحرضونه على الزواج والله عيب ..!
أمي ماعطت كلامي قيمه وقالت لي بالحرف الواحد: الريجيل يتزوجون الثانيه والثالثه مهو عيب !
أعرف أمي بتسكت لفتره وتبدا تلمح لخالد وتحاول تلفت أنتباهه لحوريه ..!!
طلعت من عندها متضايقه وحاسه الدنيا بتنقلب على راسي واذا كبرت السالفه ماراح أتزوج فيصل
اللي قضيت عمري أحبه ..؟
كلمت ريم وتطمنت عليهم وحطيت راسي ونمت بعد ماوافقت على أقتراحها بأني بكرة العصر
أجيها بالفندق وأسهر معهاا وواضح أن ريم براسها شي من اصرارها على أني لازم أسهر عندها ..!!

__

أنتهى البارت

*البارت العاشر

ترا الكرامة صفحة مالها طي ..

من عمر وأنا اسمع أخواني يرددون هالشطر , هو شطر معروف لشاعر شبه كرامته بصفحه
وهالصفحه مالها طي , يعني أطوي كل صفحات عمري ألا صفحة كرامتي , وفي دفاعنا عن كرامتنا
نختلف من شخص ل أخر ,ممكن اللي يجرحني ويهز كرامتي عند غيري عادي ويعدي لجل خاطر من يحب,
بس أنا غير وغير هاذي أقولها دايم فالمواضيع العامه لاني فعلا غير ..
ياخي أنا اشوف نفسي ماأشبه ل أحد أنا ماابتدي بالغلط , ولا اجرح واصون مشاعر
الشخص اللي قدامي كان من كان , حساسه بقوة وأحسب للكلمه الف حساب لي قوانيني بكل شي ,
أعيش بعالم غير عالمكم والله أكثر شي يهمني بهالعالم الحب
وأخر شي أفكر فيه الناس ووش قالت عني ..!

بعيدة أيه يوضح من بعيد أني بعيدة بس أول ماحس أنك متضايق أكون أقرب لك من أهلك ,
لطيفه وأبقى معك وأجمع لك أرق الحكي لين تروق ..!!

نرجع لموضوعنا ترا الكرامة صفحة مالها طي
لاتختبرني ولاتدوس لي على طرف ولا تهمشني , لاتقرب من كرامتي
لاتحسسني أني شي مركون يمكن تحتاجه , ولاتخليني أستسخف نفسي لاني حبيتك ,ولاتخيرني بينك وبين كرامتي .!

حلوة المواقف اللي تعظمك بعين نفسك حلو أحساس ان هالشخص
ترك هالفعل عشاني ومايبي يجرحني يااه

بس بس خلص الحكي ...!

_

الساعة 9ونص بالضبط ..

جالسه على طاولة مطبخ أمي وأضحك فاتحه شعري ومسويته بف من قدام
مكياج ناعم , فستان زهري ,و..و.. و ...
أمي : لاتطالعين في كذا وأنا صادقه / بيدها ملعقه وواقفه هناك عند الفرن ..؟
كأنها صافقتني كف والله طالعت ل رهف اللي مقابله لي وتضحك وهي تقول: صدمتيهاا ؟؟
أمي: أنزلي عن الطاولة ولا عاد تطلعين عليها/ نزلت اللي بيدها وطلعت لغرفتها ..

أنا: ..............................

رهف تأشر بيدها لي وميته ضحك ؟؟
أنا: وش تضحكين منه / عتبت على امي مدري تضايقت من شي أن أعرفه هم مايعرفونه .؟
رهف: بنت وش فيك أنصدمتي أمي صادقه أنزلي عن الطاولة يمكن تكونين حامل ماتصلح لك ؟؟
هاذي الكلمه اللي قالتها أمي ولفت في الدنيا يمكن تكونين حامل لاتعدين على الطاولة ,
الغريب مو كلمة أمي وش هالاحساس اللي جاني أمي تنتظرني أحمل ,
وهاذا الشيء عادي جدآ من أم يالله وين كان عقلي وأنا ساكته وأحب خالد أكثر وأكثر ,
لو تنكشف السالفه بكره وتعرف أمي بوضعي وش بتكون ردة فعلها ,
وأبوي وش بيقول لي حزتها , نزلت زي ماقالت أمي ورحت غرفتي , سكرت بابها بالقفل ومرتين بعد ,
وجلست قدام تسريحتي وأردد يالله لو يعرفون أهلي , ووش بقول لهم بأيش أبرر لهم ..؟؟؟

ربع ساعه مرت وأنا منزله راسي وضامته بيديني قدام مرايتي وأفكر ..
الموضوع كبير وأنا متساهله فيه ولو يعرفون أهلي بعدين بيقولون وش مسكتك ليه ماعلمتينا ,
خصوصا أمي بتزعل والله وبتجلس بخاطرها عمر وبتذكرها لي لين أموت
ليه خبيت عنها وعشان مين وليه أستمريت بهالزواج ووش بتكون النتيجه وبيتعدل الوضع
ولا بيكون أصعب مع مرور الوقت كل هذا براسي وأفكر فيه ..؟؟!!

على ضرب الباب وصوت رهف وأستهبالها طلعت ..!
قابلت أمي بالصالة وكملت للمطبخ وأنا بحالة غريبه ووضع أغرب , بعد العشاء بوقت سمعت
صوت رسايل ورى بعض وبسرعه فتحت جوالي ...!

ريمي جهزي بنسري ورانا خط ؟؟

قفلت شاشة جوالي والتفت أدور أمي , رحت لهاا الغرفة وسلمت
وأنا ماهرجت معها والله الا بـ فمان الله , ساكته واسمع لوصاياها !!
رهف وضمتها وضحكهاا وجوالها اللي بيسارها 24 ساعةوهالشعر المنكوش تخليني أقول ليتني
جلست معك بهالبيت وماتزوجة وليتني نفسك , كل همي هالجوال والضحك والوناسه والتعليق

و و و و ..

عبايتي المعلقه على الشماعه صارت بيدي وهذا نقابي وشنطتي وعطري وجوالي (وشش باقي )
قلتها وانا اسكر ازاير عبايتي عند باب غرفتي !
طلعت من بيت أهلي وركبت السيارة والله العظيم ماطالعت بوجهه
ورغم أني عارفه انه يناظر لي بس مالي خاطر لااناظر ولا أتكلم ,
تحركت السيارة وكلنا ساكتين ,مسانده ظهري على المرتبه واطالع هناك لقدام
بسيارات, بالخط , باللي هو المهم اني ماطالع للي جنبي أحساس بشع والله بقلبي والسبب كلمة أمي ,

انقطع حبل افكاري على توقيفت السيارة قدام بيتنا , نزلت راسي اتاكد ان هاذي عمارتنا
وبسرعه قلت :
تبي شي من البيت ؟؟/ طفى السيارة وسحب المفتاح .؟؟!
هو: أنزلي / يأشر بيده للبيت ..؟

ليش ؟؟/ بستغراب ..

نزل ولف من خلف السيارة وفتح بابي ونزلني , مسك يدي بقوة وسحبني معه
حاولت افلت يدي منه وتمسك بقوة فيها (خاااالد قلتها بصوت واطي وانا متعجبه منه ؟؟!)
فتح الباب وترك يدي وشغل انوار الصالة ورمى شماغه , ولف علي وأنا لسى واقفه بنص الصالة ,
وقف قدامي تمامآ ومسك كتوفي بيدينه وحركني لين جلسني على أقرب كنبه
( ماسكه شنطتي بيديني الثنتين حتى نقابي مانزلته )
وقف يحاول يفتح نقابي وهويقول ( هذا شلون افتحه ) رفعت يدي وسحبت النقاب وأنا

أقول: خير وش عندك ؟؟

أخذ النقاب وبدا يسحب الطرحه لين طلعها ونزلها هي والنقاب على الطاولة وجلس جنبي ..؟
هو: ي الله قوليلي وش صاير ؟؟
قريب قريب مني لدرجه تربك تراجعت على ورا وأنا اقول : ماصاير شي / ونزلت راسي ..!
رجع قرب وأقرب من الاول بعد وقال: ريم صرت أعرفك هالنظره وهالصمت تقول ان صاير شي علميني ؟؟
سكت ودمعت وتلخبطت طيب حلو صار يعرف اذا كنت متضايقه ولا لا (بخاطري)!!
هو: قليبي قولي / قالها بصوت نبرته تتمنى تسمعها كل بنت والله ؟؟

*مو أحيانا لازم نستسلم لضعفنا قريبه هاللحظه مني !!

قلت : متضايقه /وناظرت له وشلت عيني على طول وانا اقول:
شوي مو واجد (ورافعه حاجبي !!)
حبني على كتفي وقال : سلامتك من الضيقه سولفي لي علميني وش مضايقك ..؟
ملامح وجهي جامدة ودموعي اربع أربع واتنفس بشويش , حوطني بيدينه وتركت نفسي له غمضت عيوني
بعد مامسح دموعي بقيت على هالحال لوقت طويل , تمالكت نفسي منه وأسترجعت قوتي ووقفت
وأنا أقول:
ي يالله مشينا ورانا خط ..
وفعلا نزلت بعد ماغسلت وجهي واخذت عصير بطريقي من الثلاجه , ركبت السيارة وبعد ماقريت دعاء السفر
وخليته يقراه هو بعد فتحت الملاحظه بجوالي
وكالعادة سجلت فيها هالليلة وتاريخها والساعه واوعدت نفسي ماتتكرر !!
هالليلة وهالتاريخ من السنة الجايه بكون مغيرة الوضع ولا راح أصبر أكثر من كذا..!
__ __

مسكنا خط الطايف , بالي مشغول وهو يحاول قد مايقدر يفتح مواضيع
مابقى شي ماتكلم فيه ورغم كذا ماجذبني أبدا ولا أغراني للحكي ,
عدت الليله ووصلنا الفندق وعلى طوول على السراير نوم ؟؟!

*

الطائف ..

بعد المغرب كنت جاهزة لاستقبال عهد بنت عمي بالفندق , وببالي شيء ومصره أعرفه؟!
طلبت قهوة وحلا وشوكلاته ورتبت المكان وحطيت رجل على رجل وأنتظرتها ..؟!

فتح خالد الباب وهو يقول : يالله حي أوخيتي أقلطي !
وقفت وأنا ارحب بها سلمت عليها وجلست وأستاذن خالد ورجع ل عمي والعيال وتفرغت أنا لعهد ..
صبيت لها قهوة وجلست على اقرب كنبه لها وهي تبتسم وأنا أبتسم ..
عهد: ماادري ليش خايفه / تضحك
أنا: أفا مافيه شي يخوف / أغمز لهاا ؟!
بعد سواليفنا عن روحتنا لرياض ووش صار خلال اليومين اللي راحت دخلت فالموضوع على طوووول ؟؟
أنا: وأخبار حوريه بنت خالك / تبسمت وأنا احرك خاتمي بهدوء ..!
ماتت ضحك وهي تقول : والله كنت أنتظر هالسؤال ؟؟
نزلت الفنجال على الطاولة !!
أنا: عهد انتي عارفه ليه هالجلسه فعطيني السالفة من الاخر ..؟ /بجديه
عهد: أنتي ماعمرك سألتي خالد ؟
أنا بستغراب : عن مين ؟؟!
عهد: عن حوريه توقعتك بعد هاذيك الليله تساليه ؟/ منحرجه !
أنا: لا طبعا ولا فكرت حتى ؟؟

( حوريه تحب خالد من زمان من أحنا صغار وحاولت توضح له , بس هو مافكر فيها ولاعمرها
لفتت أنتباهه حتى وأمي تمدحها دايم بس ماخطرت على باله والله , ولما حوريه عجزت أمها تكفلت بالمهمه
وصارت تهتم بخالد وتسأل عنه ومن هالحكي , وصار بينها وبين أمي شد لما خطبك خالد وأتوقع ان سبب رفض
خالد لفيصل أمه وأخته ) خلص الحكي !!

10 تمامآ دق عليها خالد يقول أنا تحت أنزلي ودعتها وقفلت الباب ؟؟
تركت كل شي زي ماهو على الطاولة فالصالة ودخلت غيرت بجامتي وقفلت جوالي وحطيته تحت
الوساده ورقدت هذا اكثر شي اقدر اسويه بهاللحظه ؟؟

**
بعد الظهر كنا جاهزين بشنطنا نزلنا عند بيت خاله لانو خالتي وعهد ووفاء الصغيرة بيروحون
معنا بالسيارة وعمي والعيال بسيارة عمي ..!
بدون تفاصيل حركنا عمي والعيال قدامنا وهنا بهالسيارة خالتي مع خالد قدام
وعهد خلف خالتي وانا بالمرتبه اللي خلف خالد ..!

بالطريق كان مشغول بالمراية يثبتها علي فالخلف ويطالع في ويبتسم أبتسمت والله
وحاولت انه مايشوفني أبتسم ..!!

عهد هنا عن يميني تأشر لي بحرص على سيارة فيصل هاذيك البعيد , وتسوي عليها علامة قلب ,
يالله بسيطين حنا البنات اذا حبينا طوول الوقت وهي تراقب ومركزه وين سيارته واذا
وقف عند محطه او بقالة تتذمر لان خالد ماوقف معه وسبقه , للحظه فكرت فيصل نفس وضعها
هالحين يعني يراقب سيارة خالد لان عهد فيها ولا هالشي عندنا أحنا يالبنات بس ,
هدر مشاعر بشكل مو طبيعي اللي قاعدين نسويه !!؟

وفاءالصغيرة تركت أمها قدام ورجعت تجلس بيني وبين عهد , هالوفاء تحبني ودايم تقولي انها
تحبني وانا بعد احبها ولاارفض لها طلب , بطلب منها فتحت لها العاب بجوالي , وأنا مشغولها
معها وأخيرها بين الالعاب سمعت خالد يقول :

وفاء أنا أحبك ..

رفعت راسي للمرايه لقيته يطالع لي وبمجرد ماعرف أني أناظر للمرايه أبتسم !!
وفاء ترد عليه بكل براءه وانا بعد بدون ماتطالع له ولسى مركزه بالالعاب وهالجوال اللي بين يديني
على نغزت عهد لي بكتفي لفيت لها وتأشر عليه حركت راسي بـ مافهمت كتبت بجوالها :

يقصدك ..!!

وماشوف الا عيونها من خلف النقاب تضحك !
فتحت اللعبه وعطيت وفاء الجوال وأنا عارفه انه يقصدني من قبل لاتشرح لي عهد..؟
نزلنا نصلي العصر بحديقه ورجعنا نكمل طريقنا , وداخت وفاء ورغم محاولات خالتي بأنها تنام بحظنها
رفضت وقالت بنام مع ريم , رمت بنفسها علي ومارفضت حطيتها بحظني وضميتها لصدري ونامت ..!!
صوت الرسايل جوالي خلتني أمد أيدي واخذه من الشنطه ؟؟

يابختك ياوفاء نايمه بمكاني ..
والله اني حاسدها ..

وحاط قلب مكسور, هذاك الرقم الغريب واللي الين اليوم ماسجلته بأسم ولاعندي نيه أسجله !!
مارديت عليه وأنا اشوفه قدامي ينزل الجوال ويطالع لي ومعقد حواجبه ..؟

هو : يمه أصحي وفاء / يطالع بخالتي ويضحك !؟
خالتي: ليش تصحيهاا خلها ترقد تعبانه/ على نياتها !؟
يلف علينا ورى ويعض أصبعه ويضحك .؟؟

عهد بعالم ثاني هي وسماعاتها وجوالها , وأنا منتبهه ومطنشه !
وصلنا ابها واخذنا شاليه ونزلنا الشنط وطلعنا غرفنا, المكان المخصص لي انا وخالد
غرفة نوم ودورات مياه وصالة ومسبح , وبالجهه الثانيه اللي هي الاكبر عمي وعايلته ..!!
كالعاده بجامه ودش بارد وطلعت ..؟
بالغرفة لقيته متمدد على السرير ..

أنا: بتنام / شعري المبلل مغطي وجهي ؟
هو: لا بنطلع نتعشاء انا وانتي / جلس وواضح عليه التعب !
أنا: انا مابي عشاء والله تعبانه بنااااام بس / جلست على كرسي التسريحه !
هو: متاكده ماتبين عشاء ارقد / رجع رمى بنفسه على السرير .!
أنا: ايوه مابي / كنت ابيه ينام بسرعه عشان انام انا بعد ؟؟؟
10 دقايق بالظبط انتظرتها وانا افتح عيوني بالغصب , وبعدها طفيت الانوار ودخلت الفراش ,
بنور جوالي الخفيف اقيس المساحه اللي بيني وبين خالد
وبهالوساده الكبيرة فصلت السرير بينا , بس عشان اتطمن وأنام !
على أخر الليل صحيت , فتحت عيوني ظلام وأمان بنفس الوقت اللي يفرق بالموضوع
أن الوسادة اللي نمت عليها بداية الليل تغيرت ولقيت نفسي بقدرة قادر نايمه على يده ,
ولا غيرت شي والله رجعت كملت نوم ..!!



أنتهى البارت .

البارت الحادي عشر !

خبّئ جروحك إن أردت شِفاءَها
إنَّ الجروحَ إذا بدت لا تطهرُ .



مصطلح الرجل الشرقي عندنا يالبنات يغري
يعني البنت الحالمه الرومنسيه مثل حالاتي أذا قلت لها رجل شرقي يطير خيالها
لـ شكل الرجل أولآ وسامته , طوله , عرض كتوفه , لونه الحنطي , دقنه , عيونه , حواجبه ,
غير المواصفات الثانيه من غيرته وشهامته وكرمه و و و ...
أما الشرقي عندنا هو القبيلي العصبي , شرقينا هو اللي يعصب على أخته اذا كانت فاتحه عن عيونها بسوق
ولا بمكان عام , شرقينا هو اللي ماأقدر اضحك بصوت عالي قدامه ,ولا البس قصير بوجوده , شرقينا
يستحي أذا أبوه ذكر أسم أخته بمجلس رجال , شرقينا العصبي أذا حب وحب من قلب يوفي , يغنيك ويملىء
عينك وقلبك , يحفظ العهد ولا يخون , ولا ينسى , شرقينا رغم بعض عيوبه ألا أنه أمان بعد الله أذا حــب .!


ريم .. ريييييم ريمي !!
أسمع أسمي بصوت هادي وانا بسابع نومه وأرد بــ آمممم
أنا نايمه بمكان غريب واضح بس مابي أصحى وهالصوت لسى أسمعه , تعبانه ومرهقه وباقي في نوم ,
وأنا بالعادة أذا تعبانه أصير جسد بلا روح ولازم مشوار طويل عشان أصحى !!
الصوت يتكرر والمفروض أصحصح بس فيه شي يسحبني زيادة لنوم , بيني وبينكم فيه حركه تخرفني وتنيمي
عمر والله الا وهيا أنو أحد يلعب بشعري بلطف هاذي الحركه ترقدني وتخليني فاقده الوعي وسكرانه وكل شي المهم
أنها كفيله بأنها تسوي لي تنويم لا أرادي , أسمع أسمي وأرد بــ آمممم وعلى هالحال ؟؟

أغرق بالنوم وأرجع أرد بــ أمممممم !!

فيه شي تحرك تحتي تحرك تحرك رسمي ولا عطيته وجه كملت نوم , الموضوع تطور والصوت تحول
من هادي لحاد ريم بحزم وأنا نايمه أتذكر صاحب الصوت والله ولا فتحت عيني بنام ,
أنزعجت أن اللي يلعب بشعري وقف ,جا عبالي أدور اليد وأسحبهاوارجعها تكمل لعب لاني ممزجه ومالي حيل اقوم ..؟

سحبت يدي بقوة ولا أنتبهت الا أنا متربعه على السرير وشعري منكوش ومغطي وجهي
وفيه شخص منسدح على ظهره قدامي ..

وش هالموقف المرعب فتحت عيوني بقوة وشلت شعري بيديني الثنتين وقلت :
أنت عضيت أصبعي الصغير يامجنون بعصبية / قرط بصبعي الصغير وبقوة بعد ؟؟
جلس وهو يتحسس صدره ويقول : ماخليتي لي فرصه الا العض ؟؟

رفعت حاجبي وش قصده !!

طالع لي بنظرة وسخه وابتسامه مريبه وهو يقول: كنتي نايمه هنا / ياشر على صدره وبين ضلوعه..!
يمه يمه يمه كنت نايمه على صدر الرجال يافضحي ( بصدري أقولها)
فاتحه فمي وأتذكر أثاري الشي اللي تحرك تحتي صدره ياااااوووك !!
أطالع بصدره ومنطمه وهو يضغط بين ضلوعه ويقول :

كيف النومه / ويغمز ( بغيت أبكي من الفشله)!!

نسيت أصبعي المعضوع واللي كنت بقومها مشكله عشانه عضه بس أثاري معه حق ..؟
أسحب بلوزة البجامه يمين يسار الله لايوريكم
الموقف اللي أنا فيه ليتني صحيت أول ماسمعت صوته !

الليله الدور عليك أنام على صدرك :
يقولها ويبتسم ويغمز تغير حال الرجال قلب مغازلجي ؟؟

عن قلت الحيا !!

/ قلتها ووقفت وأنا ارجف وأتمرجح يمين يسار على السرير ونشبت رجلي بالمفرش
الله ياخذه وبغيت أطب على وجهي بس الله سلم ..؟
سيده على دورات المياه , قفلت الباب ووقفت قدام المغسله وأنا أتذكر شلون ماحسيت
أنه صدر بني أدم مو وسادة , طبطبت على خدودي بصحصح طالعت لصبعي المعضوض , تحسفت على النومه
الحلوة اللي طارت وندمت وحالتي يرثى لههااا ..؟

تمالكت نفسي وطلعت ؟؟

لايكون كملتي نوم بالحمام/ كان ينتظرني أطلع !؟
لمحته يدخل ولا رديت عليه سفهته ومسويه نفسي ماتأثرت أصلا ..؟
طالعت لساعتي 2 الظهر ..
صليت وبدلت وأستشورت شعري كل هذا وأنا مقفله الباب وتاركته بالصالة ..؟

آحم آحم واقفه ورى الباب بفتحه وأطلع لصالة , شديت الجكيت الازرق على قدام وعدلت الاكمام المشمره
وطلعت وأول ماشفت وجهه أبتسم وأنا قلت : نبي غدا جوعانه ..؟
هو: أفا يخسى الجوع / وكمل / نطلع نتغدا ولا أجيبه هناا ..؟

مالي وجه أطلع ومانسيت أنه عض أصبعي وودي أهاوشه بس أبي سالفة النومه المشئومه تبرد ؟؟
بكل ثقه وأعتزاز قلت : لا هنا الليله نطلع نتعشاء براا ..؟
وجلست وحطيت رجل على رجل .
بنص أبتسامه وقف وهو يناظر لي وفيه ضحكك ووناسه وأنا عارفه السبب ؟!

رجع بعد نص ساعة وتغدينا وعلمني أن الطلعه الليله علينا يعني على عمي وعياله وأنو بيروح هو
وطلال يشفون مكان مناسب للعوايل وعلى الساعة 6 بيرجع عشان نطلع كلنا ..!

خصلت غدا وشغلت فوحاتي وعطرت المكان عشان أروق وأكلم أمي مكالمة طويله , أستاذنت منه
ودخلت الغرفة ..!
كلمت أمي وأخذت علومها ,اخر تطورات زواج أخواني , وعلى سوالف الزواج والاثاث ,
والبيت قضينا الوقت , سمعته يدق باب الغرفة ويقول أنه طالع مع طلال
أووكيه قلتها ورجعت أكمل سواليفي مع أمي ..؟

5 و 10 بالضبط كنت جاهزة ماتكلفت كثير حددت حواجبي ومسكرة كثيفة و روج غامق
بلوزة أحمر خمري وبنطلون جنزل فاتح ساعة وخاتم كالعادة , جزمة سبورت , وأخذت شنطتي
وعبيتها الاشياء اللي ماأستغنى عنها زي كل مره ونزلتها على الطاولة وطلعت الصالة ..
ساندت ظهري على الكنبه ومددت رجولي وضميت الخداديه وركبت سماعاتي , سعد علوش
وفلسفته خذت الباقي من الوقت ولا أنتبهت الا على صوت المفتاح يدار بالباب ,

وهو داخل يضحك , ( الله يدوم لك الفرحه / بصدري) ..

ماغيرت جلستي ناظرت له وأبتسمت ورجعت اطالع بشاشة جوالي وصوت سعد بأذوني ,
ماحلت له الجلسه الا على طرف الكنبه اللي أنا جالسه عليها وزحمني ..
سحبت السماعه من أذني , وقلت :
فيه مكان هناك أذا بتجلس / بنص أبتسامه وتذمر !!

يقرب زياده ؟؟

هو: تدرين هالفترة صاير أمل من اللي حولي بسرعة وودي أرجع وأجلس معك أنتي وبس
/ قلبت ملامحه جديه !!؟
سحبت رجولي من خلفه ونزلتها تحت وقلت :
وش مناسبة هالحكي / رافعه حاجبي ؟
التفت لي بكل جسمه وحط يده اليمنى على الكنبه اللي خلفي !
ماله مناسبة ( يهز راسه) وكمل/ بس هذا اللي صار فعلا اليوم وأنا مع طلال كنت بخلص بدري بدري
بس عشان أرجع لك ..!

* أذا تكلم خالد بجديه أنا أرتبك على عكس أذا استهبل وضحك وغمز وسوا هالحركات أحسها تمر
وماتأثر في قد مايأثر في حكيه الجدي واللي بهالنبره وبهالصدق ..؟!

نزلت راسي وأبتسمت وكنت أفكر أغير الموضوع عشان مايوضح علي وناسة بالحكي بس قال :

أعترف لك بشي ...!؟

التفتت له ؟!
يبتسم وهو يقول :

أنا اللي سحبتك اليوم الصبح ونيمتك على صدري وكنت خايف أنك تصحين وتخرب الخطه !
رجعت أناظر تحت وقلت : أي خطه !؟
خطت أنك تنامين بحظني وعلى صدري , وأحس أبك وفيك قريبه مني .
نزل راسه يطالع بوجهي ويشوف ردت فعلي ولما شافني أناظر عادي وماعصبت قال:
صحيت 11 الا ربع وكنتي نايمه ومعطتني ظهرك , قربت منك وحطيت يدي بشويش تحت
راسك وسحبتك بهدوء ( مبتسم من صوته اللي كله ضحكه ) وقلبتك على صدري وجلست
10 دقايق أدعي أنك ماتقومين ولاتحسين بشيء , ( ينزل راسه ويناظر لي مره ثانيه)!!

حاطه يديني على ركبتي وضامه جوالي واطالع تحت ؟؟

طيب يومك صاحي بدري ليه ماصحيتني ؟

( ماكان هذا اللي بقوله والله بالعكس تمامآ كنت بقول أحلا نومه بعمري يسلملي هالصدر ويارب يبقى لي وسادة
وملجىء وحظن دافي أغيب فيه عن العالم ويكون لي بروحي )!!

صمت لثواني !

مجنون أصحيك أنا فرحان بالساعتين اللي نمتيها بحظني / يمسح بيده على ظهري !!
مارديت ولا كان عندي رد أنقذ الموقف صوت جواله واللي كان عمي يستعجله , أستغليت الفرصة ووقفت
اقوله بلبس عباتي , نزلت جوالي على الطاولة ورحت لبست عباتي واخذت شنطتي ورجعت له بالصالة ,
كان يكلم وبمجرد ماشافني بالعباية انهى المكالمه ودخل هو بعد يلبس ..؟؟

جالسه انتظره وهاذي شنطتي واللي بين يديني جوالي , واللي يرجف هنا بين ضلوعي قلبي , صعب
التظاهر باللا مبالاة , صعب تحس بشيء وتحكي شي ثاني, يارب قلبي يارب ..؟

طلع من الغرفة وريحت عطره سابقته ثوب بني وشماغ ملون ملفوف كالعادة بالطريقة الاماراتية ,
بيده سبحه وجواله ويأشر لي طلعنا ..؟؟

سوالفنا بالسيارة كانت سخيفه كلها عن المكان والجو والعشاء و.. و.. و لاهي اللي تحكي حالي
ومشاعري ولا حاله ومشاعر يعني تقضيت وقت والسسلام ..؟

مرينا محل أخذت حلا وعصاير وشبسات وخرابيط لطلعه والغريب انو قبل لا انزل نبهني خالد
أني مااطلع مكان قبل لااكلمه انا وعهد !!

( أبشر ) ونزلت ؟؟

جلست الحريم مفصوله عن جلست الرجال , وهذا مخليني اخذه راحتي كثير ,
بالشغل والترتيب أنا وعهد , بهالطلعه كنت مستقله بمعنى ماحاولت أتكلم مع أحد نهائيا
وخصوصا الحكي الزايد واللت والعجن اللي بالعادة تكون بجلست النساء بعدت عنها لانو ماتناسبني
ولا افضلها هذا الشي سوا نتيجه عكسيه وعطى صورة أني متكبره ومغرورة بس لاني ماشاركت حش ونميمه بالناس .!.

أخذت وفاء وأنا اقول لها بلعبك تعالي ..؟

سألت عهد اذا بتجي معي نلعب وفاء أو لا وطلبت مني انتظر لين تخلص السالفة بينها وبين بنت خالها
مسكت يد فوفا وأنا اقول لعهد شوفينا هناك بالالعاب اذا خلصتي تعالي ..؟
على خطوات صغيرة لعيون فوفا رحنا الالعاب وبطريقي كلمت هالخالد اللي شارط ماروح مكان لين أكلمه
سمح لي أستاذ خالد وقال : طيب روحي بس لاتطولين لاني عند العشاء وربع ساعه وراجع !!
قفلت ودخلت جوالي بشنطتي وشلت هالنتفه اللي لها ساعه تمشي وللحين ماوصلناا ..؟

الالعاب مو بعيدة عن جلستنا بس المكان مزحوم والناس فاصله بين مكان الالعاب والجلسه !
على مرجيحه صغيرة ركبت فوفا ودفيتها ملت بسرعه وطلبت تركب بالسيارة ولان المكان
فيه رجال كثير رفضت واخذتها للعبه ثانيه أكثر أمان من السيارات ..!

على ضربه بالكتف لفيت بسرعه عهد تضحك وتقول يخوافه ..؟
بعد ماجات عهد بثواني , لقيتها تأشر لي على شاب جميل جدا وتقول فصولي هنا ؟؟

ناظرت لها بستغراب: وش جابه هنا يراقبنا ؟؟

عهد: ريموه أسكتي أكيد بيشوفني / ذايبه ومرتبكه وحالتها حاله ؟
بغض النظر عن حب عهد لفيصل هو صح أو غلط هالفيصل مايطمن لان عهد ماتناظر له كثير
مو منتبهه للي يصير , الرجال يناظر بعيوني ورغم أني متغطيه زين ورجعت أتاكد أن عيوني مو واضحه
بس والله فيه شي غلط ..
حبيب عهد واقف عند الالعاب وكل شوي يقرب لنا وهي طايرة وتقول ( بيشوفني )على قولتها , معاه سبحه
يلفها يمين ويسار ووضعه مشكوك فيه ونظراته تقول أنه لعوب ومغازلجي , وهالعهد ماتشوف ..
تعمدت أني أخلي عهد عند وفاء واقنعتها بالقوة وأروح أجيب مويه من كشك عصاير جنب الالعاب
وقفت أنتظر الزحمه تخف عند الكشك وأنا أراقبه من بعيد , ماصار يطالع لعهد بالعكس تغيرت
وجهته للمكان اللي أنا فيه وتأكدت وعرفت خالد ليش رافضه , وشاكه أنه مايعرفني ولا يدري أني
زوجت خالد هو شافني ويتوقع أني من بنات خواله , مر الوقت وانا واقفه وبشوف النهاية
والنتيجه ان هالفيصل لعوب ونظره طويل ويلاحظ أدق التفاصيل بالبنت اللي قدامه واذا
حدسي يصدق خالد رافضه لـ هاسبب ؟؟

بعد العشاء فصلت عهد وهي تحكي لنا مشاكلها يوم كانت صغيرة ومواقفها اللي كله
تنقلب على راسها ومن قلب ضحكت , وأستانست وكملت على صوت الرسايل اللي ورى بعض
فتحت الرسايل رقمه ويقول: بجيك اخذك جهزي !

رديت بـ لا ..

بس بعانده ولا عارفه انو بيجي واطلع معاه وعلى قلبي زي العسل ..!
عدلت عبايتي ورجعت فتحت رسالته ..
وصلتك / وحاط فيس يغمز ..
وقف قريب من الجلسه وهو يقول بصوت واطي ريمي , ناظرت جهته وأخذت شنطتي نزلت فيها جوالي
وانا داقتها ثقل عليه , خالتي تقول خالد ينتظرك والكل يطالع لي يعني قومي بسرعه ,
عهد تقول خذوني معكم بلعب وتطول صوتها عشان خالد يسمع وتكرر خذوووووني معكم ,
تعالي حياك / قلتها وأنا أوقف ..
واسمع خالد يقول لا عهدووه لاشوفك جايه ويضحك .!
أحس اني رافعه ضغط كل اللي جالسين وهم ينتظروني أطلع من وسط الجلسه واروح له , وكأنهم
يقولون ليه مخليته ينتظر استعجلي , بهدوء طلعت واقبلت عليه , وأخونا خالد
واثق أني ماراح أرده قدامهم مهما سوا وعارف أني بحترمه قدامهم , وبمجرد ماقربت له
مسك يدي بيد واليد الثانيه لفها من ورى خصري وهو يقول:

يامرحبا في ذمتي ذمه / بصوت وااااطي !

ساكته ..

شابك يدي بيده , وبين الثانيه والثانيه يضمها بقوة , وعلى هالممشى الطويل واللي يلف المكان كامل
مشينا , مرت دقيقه و10 دقايق و15 دقيقه وربع ساعه وحنا ساكتين يدي بيده وكتفي يضرب بصدره ,
هو ساكت وأنا مابي احكي , لان اللي الحين يصير والله أكبر من الحكي , عمر ثنين حبايب ماجتمعوا
وصارت لهم لحظة لقى ولا تكلموا , وكأن الكلام هو الشي الوحيد اللي يعبر عن حبهم, طيب أنا ممكن أحبك
وأقابلك ولا أتكلم , يمكن تغنيني نظرة عن ألف أحبك, ويمكن مسكت يد مثل هالحين تقول سوالف وسوالف,
يعني الصوت والحروف مو شرط عشان تعرف بحبي , فيه أشياء ثانيه تربك وتوصل وتغري أكثر بكثير ..!

عارفين وش تذكرت ويدي بين يدينه , هاذيك الايام ببيت أمي لما كنت أحلم بهاللحظة ,
لما كنت أقول بسوي وبسوي ,ياه يجمال الحلم اذا صار حقيقه ورغم كل شيء الحين يدي بيده ,
ورغم كل شي ء يراقب خطواتي ويراعي مشيتي , وتحول هالخالد الكبير قولا وفعلا الى حمل وديع , ينتظرني بس أرضى ,
ويفرح باللحظه الصغيرة والبسيطه اللي تقربه مني .!

بأخر المكان وقفنا , رفعت عيوني له وأنا أقول عادي ردآ على تبين ندخل لعبه ..؟
حجز ودخلنا وركبنا وهو يقول ببتسامه: اذا خايفه تمسكي في/ هاذي رسالة لي وأنا فهمتها ؟؟

أبتسمت وقلت لا مو خايفه ..

بمجرد مارتفعنا لفوق نطيت بحظنه والله لا أرادي وهو ماصدق خبر وميت ضحك
ويقول: وين اللي تقول مهي خايفه!!
حسيت أني بدوخ وغمضت عيوني وساندت راسي لكتفه ..
ماسمع الا ضحكه ومحوطني بيدينه ,ومتشقق من الفرح والوناسه ..
أنا غبية اللي وافقت على هاللعبة بذات بس سالني بوقت كنت هايمه فيه ولا قدرت أقول لا ..؟
بمجرد ماوقفت وقبل ماانزل قلت له : أنت متعمد تختار هاللعبه صح !!

يعني / ويغمز ويضحك ..

مد يده لي ورفضت امسكها لانه يضحك ومزال يضحك وقمت بنفسي , ونزلت !!!

رجعنا على نفس الطريق الاول بس هالمرة وأحنا نضحك وهو يعلق على خوفي وأنو كيف اخاف
وانا معاه ومن هالحكي البطولي ..!


أنتهت الطلعه وكان أجمل شيء فيها أخرها ..؟
رجعنا الشاليه وقبل منزل من السيارة قال لي بروح أجيب أغراض من السوبر ماركت وبشحن جوالي
عشان بكلم سطام نص ساعة وراجع ...؟

دخلت أخذت دش وطلعت وخلصت كل شغلي وهو لسى ماجا النص ساعه صار ساعه وأكثر فكرة ادق عليه
بس مابغيت ازودها وطنشت ..!
تابعت مسلسل لمدة ساعتين ونمت وهو لسى برا ..؟
على 4 الفجر صحيت على صوته ..

واضح من شكله أن وراه مصيبه ؟
جلست وقلبي مقبوض وقلت: صاير شي ؟؟؟
هو: أيه قومي صحصحي ابيك بموضوع؟؟

عارفين شكل اللي طالع من مضاربه هو كذا بالضبط ازارير الثوب مفتوحه والشعر منكوش و
عيونه حمر ووجهه احمر ومشمر اكمامه وصوته رايح وكل ملامحه هم وضيق ؟؟؟

نقزت على المغسله وانا ارجف غسلت وجهي بمويه بارده عل وعسى تصحصح بي ورجعت له ؟؟
جلست وأنا أقول: أهلي فيهم شي؟؟؟
أعوذ بالله اهلك كلهم بخير الموضوع سطام؟؟

تنهدت حمدلله ..!!!

جالس على طرف السرير ومنزل راسه وشابكه يدينه ببعضه وينتظرني أستجمع نفسي بيتكلم ؟؟

طيب وش فيه سطام ؟؟

سطام بيسافر بعد بكرة علاج خارجي ماكنت عارف بس الليله يوم كلمته علمني وطلب مني أنفذ الوعد اللي بيني وبينه,
(رفع راسه لي ورجع نزله وكمل ) وهرجت ابوي بالموضوع وطول الليل وأنا أقنعه هو وأمي أخر شي قالوه أذا ريم
موافقه تزوجها ؟؟

( خلص الحكي بهالبساطه )

والمطلوب / اطالع بعيونه !؟

هو: المطلوب تقولين لــ أبوي وأمي أنك موافقه أتزوج تهاني ؟؟

مين تهاني / ثاني موقف أنحط فيه بمشواري مع هالخالد؟؟

هو: أخت سطام / منزل راسه ؟؟

أها أنا موافقه ؟!

هو: صدق / الف الف علامة تعجب بوجهه!!

أيه صدق , طف النور معك بنام ؟؟

ورجعت اتلحف بناام ..!!




أنتهى البارت .

البارت الثاني عشر *


عدوة المرأة الاولى هي :المرأة .



شكرآ للمواقف اللي توضح لنا قيمتنا , شكرآ لظروف اللي تصقلنا من جوا وتخلينا قادرين
ناضجين , شكرا للوحدة , شكرا لصمت , شكرا لدموع اللي توقف وتحبس نفسها لين يعدي الموقف, شكرا
لصوت الثابت اللي مايرجف وقت ضعفنا , شكرا لكل شخص كتب حرف اول كلمة تقوينا وتحفزنا على الوقوف مجددآ .

* سيئة جدا شخصيتي أنا من هذاك النوع اللي يعاند , يعني لو ضربته كف يبقى يناظر فيك ويتحدى نفسه
ويتحداك أنه مايبكي , يوضح لك قوته , ويأرض أنهدي ماعليك قدي , يتصور أن ضعفه عيب ,وأذا انهد اول شي
يفكر فيه بني نفسه من جديد , عشان مايقال عنه طووول مهدود , وقت البكاء يضحك , ووقت الضعف يشد عضلاته ,
ماأحد يعرف عنه شيء (أقصد من جوا) يبكي على أغنيه حزينه لوحده ويطلع لك مبتسم , يتكلم يتكلم يتكلم الا بشيء
يحتاجه وفاقده يسكت ولايحسسك أنه فاقد , يواسي غيره ولايبي احد يواسيه ..!

*

تحت بطانيتي أنتظر النوم..!
لأحد يسألني وش شعورك , لاني حاليا ماأحس بشي , كأني ببنج والله يمكن اذا فقت من البنج يوضح وين الالم بالضبط ..؟
تذكرت لما صحاني كانت الساعة 4 يعني الحين على 4 و 35 تقريبا شلت البطانيه خاطري بركعتين قبل الفجر,
شفته للحين على نفس الجلسه , يطالع لي بنظرات لوم نظرات عتاب اذا مو غلطانه , تجاوزته لدورات المياه ,
على المغاسل فتحت المويه البارده لاخر درجه , وضميت يديني لبعضها تحتهاا, عبيت يديني ورشيتها على وجهي
كررتها , خلصت سحبت مناديل غطيت وجهي شلتها , قربت للمرايه , ناظرت بعيوني بملامحي أبتسمت ورميت المناديل
بالسلة ورحت لشرشف الصلاة على التسريحه , لبسته وتعطرت ووقفت على سجادتي قريب من هالشخص اللي للحين جالس ,
بأخر ركعه قلت ( اللهم أني فوضت امري اليك ) سلمت ..!
نزلت شرشفي على السجاده ورحت اعدل شعري , لفيته يمين يسار بعثرته , أخذت لبان وسحبت شاحن جوالي ورجعت
سريري , من تحت وسادتي أخذت جوالي وسيده لصالة , تربعت وحطيت جوالي بالشاحن ونزلته قدامي أنتظره يفتح ,

خدادية صغيرة وحمرا ضميتها لصدري قبل لاانزلها بحظني واحط يديني فوقهااا ..؟
ثواني ولحقني لـ الصالة ..؟؟؟؟؟
رفس الطاولة اللي بنص الصالة برجلة وسحب مكانهاا كنبه جلس قدامي مباشرة !!

ريم أنتي سمعتيني وش قلت لك :/ نبرة صوته عاليه ؟؟!!!

شلت عيني عن جوالي ورفعت راسي له !!

هزيت راسي بــ أيه !

هو: وعادي عندك / شابك أصابعه بقوة وعروق يدينه بارزه لو بين يدينه كاس أنكسر !!!
رفعت حاجبي وبتعجب قلت: حنا عارفين الموضوع من قبل !!
هو: صادقه عارفين بس توقعتك ماتوافقين أقل شي وبهالسهولة/ يتنهد !!!

أبتسمت ..!!!

هو: يعني عادي عندك أتزوج عليك / بستغراب يقولها وبقهر ؟؟؟
أنا: علي / أشرت لنفسي /وكملت / أنا زوجتك على الورق وأنت عارف !!
هو:أنتي ماحبيتيني زي ماحبيتك صح / معقد حواجبه وصوته واطي عكس وضعه الاول!؟؟

صمت لثواني.

أنا: خالد تذكر ليلة زواجنا أنت تكلمت معي بهالموضوع وكنت تتكلم بقوة , وأتذكر ملامحك
ونبرة صوتك زين , ليش هالحين تسوي دراما وتبيني أنا اللي أرفض زواجك أو أتأثر حتى ,
خلاص وعدك لخويك نفذه الله يبيض وجهك على وقفتك مع صاحبك ..؟

( حط عينه بعيني وخفت والله وشحت بوجهي عنه)!

هو: وأنتي / قالها بسرعه ؟؟؟

أنا ياطويل العمر على الوعد , بعد شهرين راجعه بيت أمي / أبتسمت !!
هو: وأذا رفضت أطلقك / عصب وتغيرت ملامحه ؟؟
بهدوء قلت : خلها لوقتها / خفت يسوي شي وشفته معصب فعلا !!

بلمح الصبر وقف وطلع من المكان , عصب ومايبي يسوي شي يندم عليه طلع وتركني !
رجعت أضم الخداديه وللحظه تحسفت أني بفارقه وتأكدت أن ماعاد فيها رجعه !!
بعد نص ساعة قمت وصليت وأخذت كوب موية باردة ورجعت لمكاني ...؟
فتحت مسلسل ونزلت جوالي , وسجيت وبعد ماخلص طفيت جوالي , الاحداث ماأدري والله وش صار فيها
كم كانت الحلقه بعد مدري , المهم أن فيه صوت غير اللي بعقلي يملىء المكان ويشتت الافكار اللي براسي ..؟
بعد هالمسلسل جلست مع نفسي بكل صدق ووضحت لها كل شي وأعترفت باللي أحسه ؟؟
وكنت أتكلم بصوت عالي وأشر بيديني وكأني اكلم شخص قدامي :
أولا : أنا أحب خالد ..
ثانيا : أغار ..
ثالثا : مالي يد باللي يصير ..
رابعا : ماراح أرفض زواج خالد لانه وعد صاحبه واذا رفضت بتجلس بقلبه طول العمر ..؟
خامسا : بعد شهرين راجعه وبعلم أمي بكل شي ..
سادسا : أنا ماغلطت بحق أحد ..
سابعا : أذا رجعت بيت أمي بعالج نفسي من خالد وبتعافى منه هذا وعد ..
على أصابعي كنت أعد وبين ثانيه وثانيه أمسح دموعي بنفس الاصابع , أشهق وأكمل , يزيد نبضي ويهبط ,
أحس بجوع ورعشة بجسمي , أخذت جوالي وانا راضيه عن نفسي ورحت الغرفة ,شديت البطانيه وتلحفت زين ونمت ..؟

صحيت 11 الظهر على ريم صحيت على أول ريم قالها , بمجرد ماسمعت صوته صحيت , راسي بينفجر من الالم
رفعت عيوني له , واقف خلف السرير بنفس شكله الاول , حتى الثوب على وضعه هاذي الاكمام لسى مشمره
وهاللياقة والازرة مفتوحه , يطالع لي ويدخل أصابعه بين شعره وعيونه حمرا وواضح عليه الارهاق ,
جلست وساندت ظهري على السرير ؟؟!
هو: قومي جهزي بنتغدا ونمشي ؟/قالها وهو مقفي طالع من الغرفة !!
غطيت عيوني بيديني لثواني ابي هالصداع يخف ..!
رفعت يدي أتحسس حرارتي , جسمي مكسر وحرارتي عالية وجوعانه كل هذا يهون ولايتقارن باللي أحسه من جوا
أنا مريضه من داخل , تنهدت بقوة ووقفت فتحت الدرج وسحبت أقرب بجامه ودخلت أخذ دش بارد , طلعت وأستشورت وجلست قدام
تسريحتي شوية مسكره أبيها تخفي هالانتفاخ اللي بعيوني وروج لاني ملامحي شاحبه ومرهقه ,
وعطر عشان نفسيتي تتحسن شوي ..!!
عدلت السرير وجمعت ملابسي بالشنط وجهزتها عند باب الغرفة على صوت أذان الظهر طلعت لصالة
مستلقي على ظهره ومغطي وجهه بشماغه ؟؟
دخلت بقوة وبصوت جهوري وأنا أقول : خالد ترقد للعصر ترتاح شكلك تعبان ..؟
بعد دقايق رفع الشماغ عن عيونه الحمر وطالع لي بتعجب

وقال : لا ..؟

جلست بعيد عنه وسكت !
فتح جواله بسرعه وكتب رسالة اذا مو غلطانه وقفله وقام أخذ مفاتيح سيارته وطلع !!
وقمت أنا بعد ودخلت غرفتي أجهز الباقي من الاغراض ..رجع بعد ربع ساعة بالغدا ,
جلسنا نتغدا مع بعض بالصالة بدون صوت , الكل منا ساكت
رجعنا للايام الاولى من زواجنا , رجعنا للاجواء المتكهربه , منزلين روسنا ونطالع بهالاكل وناكل..!
على 1 ونص الظهر نزل الشنط ولبست عباتي وطلعت معه , شفته مع طلال قدام
السيارة قربت لهم وسلمت على طلال بصوت واطي ..!
طلال وهو يرفع لي يده : هلا والله يامرحبا يابنت عمي ..!
هو بعصبية : طلال أرجع ل أبوي العصر تمشون وفهد حتى الطريق مايعرفه ..؟؟
طلال: لاتحاول والله باذن الله أني خويك / يمسك كتفه !
فهمت أن طلال بيرجع معنا لرياض وفتحت الباب اللي بالخلف وركبت , نزلت شنطتي على المرتبه اللي عن يساري
وتأكدت من نقابي , وفتحت جوالي , أصواتهم عالية ولاحاولت أركز وش يقولون ..!
رفعت عيوني على فتحت الباب الخلفي الثاني ..
هو: طلال ملزم بيرجع معنا لرياض عادي ماتتضايقين /
راكب معي بالمرتبه الثاني وميل جسمه لي والباب مفتوح !
أنا: الله يحييه لاعادي مو مضايقني / هاديه !
طول يناظر لي وهز راسه ونزل وسكر الباب !
لف وفتح باب المعاون وركب , أنا بالمرتبه اللي خلفه على طول , وطلال واقف هناك قدام السيارة يكلم ,
أجواء أبها قلبت غثيثه أعوذ بالله صرت أستثقل حتى نسمة الهواء البارده , الصدق والله كارهه نفسي وكارهه
هالوقت وكارهه ليش راجعين الرياض , ومقفله نفسيتي من داخل بألف قفل ..؟
على صوت الرساله فتحت هالجوال اللي أخذته عذر ومشغولة فيه ..؟

أذا بغيتي شي أرسلي لي !

لمحته ينزل جواله ويغطي وجهه بالشماغ , مارديت !؟
ركب طلال وهو يسلم مره ثانيه , ركب وحركنا ..!
مسكنا الخط الطويل , هو مغطي وجهه بالشماغ وصاد يمين , وطلال مشغول بالخط والسيارة , وأنا
هنا جوالي بين يديني وأفكر بتهاني , الليله بيملك عليها خالد , مابقى فكرة مامرت براسي , بيشوفها
, حلوة , متى يتزوجها , بيحبها ,بيعاملها بنفس التعامل معي , وصلت بخيالي لبعيد , وصلت لليوم اللي بتلبس
لخالد فيه الابيض , أخت صديقه مليون بالمية بيدللها , يابختها ..؟

بـ لحظة لقيت نفسي أفكر بهالطريقة وبهالسخافه , مو يقولون لا شيء
أكثر نشاطاً من مخيلة امرأة تشعر بالغيرة !

وقفنا عند مسجد لصلاة المغرب ..؟

ونزلنا ..

صليت وعلى خروجي من باب النساء لقيته ينتظرني , قربت ووقفت قدامه ..؟

هو: تعبتي ..؟

نبرة أب والله العظيم مو نبرة زوج , حنيت هالارض كلها بصوته ,يقولها بطريقة غريبه , يقصد كل حرف ,
حتى حركت يدينه شوي ويضمني , حارت دموعي وربي بعيوني , مهو وقت هالسؤال
أكثر شي متعبني أني راجعه معك الرياض عشان تملك على أخت صديق عمرك( كل هذا بصدري )) !

رديت على سؤاله بــ لا ..!

هو: خلاص قربنا أن شاءالله / قلبت ملامحه .؟؟
أنا: أن شاءالله ..؟
لف ومشى لسياره ولحقته , ركبنا وكملنا طريقنا ...؟
((ركبت سماعاتي وفتحت قران ))

على 10 الليل وصلنا لبيتنا وكانت أسوا رحله بحياتي !!
طلعت لشقتي على طوول , نزلت عبايتي ورميتها بالسلة , فتحت أنوار الشقه , وبديت أنظف
وأرتب بدون شعور مني والله..؟؟
بعد وقت دخل بالشنط ..!
طالع في بستغراب , وسحب الشنط للغرفة , كملت ترتيب الصالة ورحت المطبخ ,
شبيت بخور , وعطرت وطاح الحب اللي براسي , تعبت زود على التعب , وفرغت الطاقه والصراخ والحركه
والهم والحزن اللي كاتمتهاا بالشغل ..؟
بدلت وحطيت كريم وعطر وقفلت الغرفة بستعد لنوم !!
قبل لاطفي النور دق الباب ..

فتحت بهدوء ..؟
هو: تعالي أبيك / يأشر على الصالة !؟
تقدمت وجلست على أقرب كنبه وحطيت رجل على رجل !
جلس جنبي على طوول وقال :
ريم أنا أتفقت مع سطام أني أجيه بكرة العصر عشان املك قبل يسافر !/ يطالع بعيوني ..؟

( ماعندي حكي )

هو: ماودك تقولين شي ليه ساكته / مستغرب وأحسه خايف !!
أنا : هزيت راسي بــ لا .
نزل راسه وبعد شوي قال :
طيب أنتي متضايقه ؟؟!
آممم لا / أعرف خالد يجس النبض بيعرف أنا أحبه غرت ولا لا ؟؟
( جالس قدامي مشبك أصابعه لابس بنطلون رصاصي وبلوزة بقبع أبيض , شعره مبلول , ووجهه مرهق ,
وملامحه جديه , وصوته اللي كان كله ضحك متغير , وعيونه مليانه حزن , يحاول يعرف بهالجلسه أنا أحبه او لا )
قام وهو يقول : تصبحين على خير ..؟؟
تصبح على نور ودخلت غرفتي قفلت الباب بهدوء ..؟
طفيت النور وشديت البطانية بقوة وبكيت ونمت بكل بساطه !!

صحيت الساعة 10 ونص الصباح ,وعلى طوول على المطبخ سويت حلا وقهوة ,
وحطيتها بالصالة وفتحت التلفزيون وجلست , حاولت أعدل نفسيتي وأروق ...!
آما هو سمع صوت التلفزيون ولا أنتبهت الا داخل الصالة يقول :
صباح الخير ..؟
أنا: صباح النور ..؟؟
ناظرت له تبي قهوة ولا أسويلك فطور ..!
هو: لا صبي لي قهوة ..!
عطيته الفنجال الاول ورجعت لتلفزيوني وجوالي , مر الوقت وعلى اذان الظهر دخلت المطبخ
أسوي لنا غدا , بعد الغدا أستاذنت منه أروح أسلم على أمي ..؟
هو بخوف : تروحين لخالتي ليششش ؟؟
أنا: بسلم عليها !
هو: ومتى راجعه / يحك راسه ..؟؟
أنا: أذا خلصت شغلك مرني ..!/ودخلت الغرفة !
فتحت سماعات الصوت وحطيت قصايد وبديت أجهز..!
كشخت ل أمي ول أهلي ولنفسي , مابي أوضح أني مكسورة , وعلى بالي ليلة زواجي هاذيك
الليله اللي أنكسرت فيها بما فيه الكفاية..؟
دق الباب على 3 العصر وهو يقول: ريم جهزتي !
فتحت الباب وأنا متعمده أخليه يشوفني , ماسكه جوالي ,ابتسم وكأني ارد على أحد , وأنا والله العظيم
بالاستديو أطالع صور قديمه , رفعت عيوني له بعد ماعرفت أنه شافني وشافني زين بعد ..؟
قلت : أيوا جاهزة البس عباتي بس / مبتسمه واطالع له واطالع لجوالي ..؟

هو : من تراسلين ؟؟؟؟؟

قالها بعفويه وبفضول بيعرف من سبب هالابتسامه !!
وحده من صاحباتي / أقولها وانا عيوني بالجوال ..؟
هو : أنا فالسيارة أنتظرك / ولف بسرعة ومشاءء ؟؟؟
قفلت جوالي ورميته على الكنبه بعد مارفعت ضغط خالد ..!
لبست عباتي ونزلت له واول ماركبت دقيت على على رهف , وقلت لها اني بالطريق وجلست
اوصيها على القهوة والحلا وأضحك معهاا , وأحاول أدور أي سالفة تقضي الوقت معها لين نوصل ,
مابي أتكلم معه , وفعلا رهف على طريف ماسكتت لين وقفت عند باب بيت أبوي , قفلت منها وأنا
اقول ياقرقه أنا عند الباب بنزل أفتحيه ..؟

أذا خلصت دق علي ...!!

نزلت وسكرت الباب ولا عطيته فرصه حتى يرد ..؟

جالسه مع أمي وأبوي وأخواني , سوالف وضحك , وأنا عقلي وقلبي معه , بين كل ثانيه وثانيه ,
أفكر ويش يسوي , ملك ولا لسى , شافها , سافر سطام , و و و و !!!؟
أفتح جوالي أنتظر منه أي شي , أشوفه متصل ولا لا , أتخبط وربي , جالسه على أعصابي , ومر الوقت
وعدت الساعه 7 ومر الوقت وعدت 9 وهو لسى مادق ولا أرسل , طفح الكيل على الساعه 1 , خلاص بعرف وش صار
جا عبالي أدق عليه اقول خلصت بس مسكت نفسي بالقوة ..؟
2 الفجر دق جوالي ؟؟؟؟؟
كنت مستلقيه على سرير وفزيت جالسه ..
فتحت الخط ..
هو: سلام ..
أنا : وعليكم السلام ..
هو: أنا عند البيت أطلعي ...
أنا : ملكت / قلبي وقف !!
هو: أيه
أنا : مبروك
هو: أنزلي
أنا : سافر سطام ..؟
هو: أيه سافر توي راجع من المطار ..؟؟
أنا : طيب انا قلت ل أمي اني بنام عندها ونسيت أرسل لك رسالة ..
هو :ريم أنا محتاجك أنزلي / صوته حزين !
أنا: على فراشي والله بنام تصبح على خير ..؟

قفلت ورميت بالايفون وأنتشرت شظاياه بكل مكان بالغرفة , نقزت وسكرت الباب قبل لاتسمع أمي
ورميت بنفسي على السرير بعبايتي وكالعادة بكيت بكيت لين دخت ونمت !!


أنتهى البارت ؟؟

البارت الثالث عشر ..


في علم النفس يقولون , الرجل يعشق المراة الضعيفه اللي تحسسه بقوته ورجولته ,
الهاديه اللي ماترادد كثير,وبمعنى أوضح اللي تتغاضى عن كل حقوقها عشانه , وعشان الحياة تمشي والمركب ماتغرق ,
ويقولون برضوا خليك معاه على الحلوة والمره , صيري له أم وعبد مطيع , وأنتبهي تكسرين كلمته
و و و و ..

أما أمهاتنا الكبار الله يحفظهم ربونا على السمع والطاعه لهذا الرجل ,
ووصايا أمهاتنا قبل زواج بناتهن كلها عنه والحرص على راحته, وحفظ سره , وطعامه ولبسه وبيته
و و و و ..

أنا مو ضد هذا كله بالعكس مئيده لكل حرف وتربيت ببيت علمني أن الرجل له الحشيمه والكرامه والسلطه والكلمه الاولى والاخيرة
وبرغم هذا كله , أعترض على بعض النقاط , وأحيانا أخلي هالاعتراض بيني وبين نفسي لانه مايعجب أمي فأحاول أبني شخصيتي
بعيد عن أهلي وعداتنا اللي فيها المراة ضعيفه وقوتها برجل , مكسورة ومحتاجه ولاتكمل حياتها ألا بأدم ..؟؟

لكل زوجه حبت وعطت وصبرت , وراعت ودعت , وسهرت وتمنت وخافت , وأنكسرت , وأنجرحت , وبكت ,
وحزنت , لكل أمراة كاملة دين وعقل وجمال , ثقي ياسيدتي بنفسك , وأعتزي بذاتك وواصلي حياتك أنتي
بطريقتك أنتي , وبعقلك أنتي , خليك ثابته , لايهزك رجل , خططي وتزيني عيشي وأفرحي وخليه
يدور يدور يدور ويرجع لك ....؟؟؟

**

ياريم قومي ياوليدي ..!!

أسمع صوت أمي ودق الباب ...
رديت بــ : طيب يمممممه بقوم ..
فتحت عيوني على شظايا الايفون , تذكرت السبب غطيت نفسي ورجعت نمت ..؟؟!
دق الباب للمرة الثانيه , وصوت رهف واصلني وسبهاا الى سريري , براسي نوم لسى وماهمتني رهف بالعكس نكاية فيها
مارديت الا لما قالت : ريموووووه أبوي يبيك ..؟؟؟؟؟؟
هيا قالت ابوي يبيك لقيت نفسي جالسه على السرير , وشعري منفوش , وادور جوالي بشوف الساعة ,
وناسيه أني ضحيت فيه البارح , فزيت للمغاسل على طووول , وغسلت ولميت شعري وفتحت الباب بشويش..؟
طليت على الصالة مافيها أحد , بصوت واطي ناديت رهف , ماردت ..؟
سحبت مفتاح غرفتي وقفلتها واخذته معي أخاف احد يشوف الجريمه اللي داخل ,
بهدوء وثقه رحت المطبخ ..

وقفت على الباب :سسلام / مبتسمه !
رهف : حمدلله على السلامه / لفت علي !؟؟
رفعت حاجبي / الله يسلمك وين أمي ..
رهف : بالحوش كلهم جننوني عشانك / تسوي قهوة واخلاقها صفر ؟؟
طارت عيوني : ليش يبوني أقوم ؟؟
رهف : مشتاقين لحضرتك / معطتني ظهرها وتتمسخر ..!
صدق صدق عاد ليه صحيتوني / واضح أن وراي بلا !!
رهف : ريم النوم الواجد مايصلح لك تصيرين حمارة / اقولكم اخلاقها صفر ..؟
كم الساعه / قلتها وأنا أتثاوب .
رهف : أطلعي من المطبخ انا اليوم ياذابح يامذبوح ..!!
طلعتني من المطبخ وسكرت الباب , واسمعها تتحلطم بعد , رجعت غرفتي بشوف الساعه كم ,
آه 4 العصر وخالد وصلاتي رميت الساعه وتوضيت وصليت , ونظفت الحوسه اللي بغرفتي ولبست وتعدلت وطلعت
للحوش ,تقهويت مع أمي وابوي وسولفت واسانست والله..
على الساعه 6 المغرب وبعد ماطلع ابوي أخذت جوال أمي برسل له رسالة , كنت جالسه مع أمي ورهف بس ماقدرت
أكتب حرف والله أستحيت من أمي شلت الجوال ورحت الصالة :
سلام جوالي أنكسر على 10 مرني / كتبتها ثم مسحتها ؟؟
سلام جوالي خربان دق على جوال أمي اذا جيت البيت / مسحتها ؟؟
سلام جوالي أنكسر هذا جوال أمي ريم / مسحتها ..؟؟!!
سلام اذا وصلت عند البيت دق على هالرقم ريم / أخيرا أرسلتهاا وقلبي يرقع والله ..؟
أرسلتها ونزلت الجوال بحظني وغطيت عيوني بيديني لثواني ورفعتها بسرعه على صوت نغمة جوال أمي رقمه !!
رعشه وتردد وضربات قلب غير عاديه كأنها أول رساله بيني وبينه أحساس ماينشرح أبدا ..؟؟
أح أح أحح أقوي صوتي برد عليه !

فتحت الخط ...

هو: ريـــم / وصلني صوته قبل لااحط السماعه على اذني ؟؟!
أنا: نعم / بهدوء ومن داخل أرجف !!
هو: ليش جوالك مقفل / بعصبيه وخوف وقلق وصوت يروح ويرجع !!
أنا: أنكسرت الشاشه / آه حسيت الجمله طوووووويله !!
هو: خوفتيني ياريم الله يسامحك / يتنهد؟!
أنا: .........
هو: يالله جهزي بمرك أخذك !؟؟
أنا: لا لاتجي الحين مشغولة مع أمي وماراح أخلص بدري / قلتها عنادا فيه ..؟
هو: متى يعني أجيك / بتذمر ؟؟
أنا: على 12 أكون خلصت !!
هو: طيب طيب ..!
أنا: تمام مع السلامه؟
هو: مع السلامه ...!!!
وقفل حبيبي ,وكل هاللخبطه اللي بقلبي ومشاعري تقول أنه حبيبي , رغم كل شيء..!!

*
رجعت لـ أمي بالحوش بعد مامسحت رقمه من جوالها وأول ماجلست قالت أنها بتطلع لسوق
هي وناصر أشتقت لـ أيامي مع أمي وطلعتي معها لكل مكان قبل ..
قبل زواجي بهالخالد كانت أمي ماتروح
تتسوق الا انا معها, نقزت قدامها وأنا أقوول |:
يمــه تكفين بروح معك تكفين تكفين / ماسكه يدهاا أترجى !
أمي: ورجالك وينه ليه مهملته اليوم / زي كل مره توصي وتعاتب وتخاف أقصر بحقه !!.
أنأ: يمه خالد مشغوول مع خويه الله يشفيه / تراجعت وجلست خفت ..؟
أمي: ملزمه تروحين معي / تناظر بطرف عينها ؟؟
أنا: أيه تكفين / ألوي وجهي وأهز راسي !!
أمي: هالدقي على أخوك وأستعجليه وأرسلي على زوجك علميه وأستاذنيه / تتقهوى !!
أخذت الجوال للمرة الثانيه ووقفت أثاريني لازم أستاذن من خالد بما أني على ذمته , يالله أكلمه
مره ثانيه ,ماطمعنا أن المكالمه الاولى تعدي , سجلت رقمه ودقيت مجبوره ...؟
فتح الخط على طووول ...

سسسلام / بجديه .
هو: يامرحبا بهالصوت
أنا: خالد بطلع مع أمي لسوق اذا تسمح / رتبت هالجملة بصعوبه والله ..؟
هو: أي سوق بتروحون...؟
أنا:مدري والله لسى ماقررنا / العب بشعري ..
هو: أسالي خالتي بعرف قلبي وين بيكون / يقولها بأبتسامه ..
أنا: طيب ي الله مع السلامه .
هو: يضحك مع السلامه ..؟

قفلت وأنا ناقده على نفسي ليش خقيت , متى يجي الوقت اللي ماتأثر كلمات خالد في , أنا أحبه
وأحس بحبه لي وكل حرف منه يعني لي وأصدقه ويربكني , تذكرت تهاني وخمدت كل أحاسيسي هالتهاني بتكون
عقوبة لقلبي عل وعسى يقسى ويترك ..!!
رحت لغرفتي وجهزت وطلعت مع أمي وناصر لسوق ,طوول الليله بتحدي مع نفسي مافكر فيه ,ولا فغيره
نزلنا وأخذنا بعض الاغراض الناقصه على بيوت أخواني , وشريت جوال جديد , وتقهويناا, وأكلت كل شي بخاطري
على حساب ناصر طبعا , 11 تماما رجعنا البيت وانا ورى لاهيه بجوالي الجديد سمعت ناصر يقول : نسيبنا عندنا ..
مارفعت راسي أفك واركب وكرتون الجوال بحظني , أمي تقول الله يحييه , أسمعها ولسى ماستوعبت !!
ناصر: هي الووو ريم / لاف رقبته علي ..؟
أنا: هاااه / مشغوووله ..؟
ناصر: يمه بنتك هاذي أغسلي يدك منهاا ..
أمي : ريم أنزلي ياوليدي الظاهر أنا أخرنا خالد ..؟؟

هنا أستوعبت ؟؟!!

رفعت راسي وشفت سيارته واقفه عند باب بيتنا , (ليش جاي بدري/ بصدري) جمعت أغراضي ونزلت
وأنا أطالع لسيارات أخواني كلهم هنا , يمه لايكون قال لهم شي...؟؟؟
دخلت أمي الحوش ولحقتها , باب المجلس مسكر , ولا أسمع صوت أحد , تجاوزت أمي ركض للمطبخ ,أدور رهف ..
نزلت أغراضي على طاولت المطبخ , وأنا أقول:

مــتى جــاا خالد / أتنهد !

رهف : من الساعه 9 وهو هنا وأنتي تلعبين بالسوق وأنا أكرف / تهاوش مو وقتها أبد !!
يمه من 9 / طارت عيوني .!
رهف : أيه من 9 ثاني قهوه أسويها لهم / لأاحول ولاقوة الا بالله .؟
صار شي >> قلتها بغباء والله !!
رهف: وش بيصير يعني لايكون جايبه العيد / تغمز !
لا لا أستغفر الله >> ثاني رد غبي / بس كنت خايفه ماأنلام ؟؟
رهف : أخلصي نزلي وتعالي نحط العشاء لهم / مشغولة تجهز أغراض العشاء ..
يلا يلا جايه / أخذت أغراضي وركض على الغرفة ..,!
نزلت ورجعت المطبخ اساعد رهف وأدقق على كل صغيرة وكبيرة , عشانه حسبي الله على شانه اللي مبهذلني ,
يدي على قلبي وأنتظر أسمع صوت صراخ أحد من أخواني , وشاكه أن خالد بيعلم أبوي والعيال باللي صار,
وأفكر وش بقول , وعلى هالحال ساعه كاملة , ماتهنيت بشي والله اي احد يمر من أخواني أطالع بملامحه معصب ولا عادي ,
طيب هالخالد ليه ماعلمني أنه جاي , وليه اصلا زار أبوي بهالوقت ..؟
بعد ماخصلت شغل المطبخ مع رهف دخلت غرفتي جهزت أغراضي وأخذت دش سريع , ونشفت شعري ولبست وفتحت جوالي بتأكد
أنه مأرسل ولا دق وفعلا 12 ونص وهو لسى جالس ولا رد لي خبر ..؟
أخذت جوالي وطلعت لـ أمي ورهف ..
أول ماجلست دخل سعد ..
سعد: ريم أبوي يبيك بالمجلس / خاطر سعد شين ..؟
وقفت بدون صوت ونزلت جوالي ورحت المجلس , بطريقي شفت ناصر وأحمد واقفين بالسيب الصغير ويتكلمون ,
كملت ولا طالعت لهم كثير , دقيت الباب وفتحته ودخلت .؟

أبوي لوحده حمدلله ..؟

سلام / والله والله حتى ماسمع صوتي ..!
بلعت ريقي وجلست جنبه ..
أبوي: خالد بالسيارة ينتظرك تبغين ترجعين معه ولا تجلسين ببيتك وبيت أبوك .
(علم أبوي/ بصدري أقولها)
أنا: برجع معه / منزله راسي ..؟
أبوي : الله يرضى عليك أنا راضي عليك دنيا وأخره ..؟
أنا: تامر شي ثاني ؟!
أبوي: مايامر عليك عدو ياريمي لا وأنا ابوك مابي الا سلامتك..؟
وقفت وحبيت يده وطلعت , بمجرد مادخلت مع باب الصالة مسكني سعد بيدي بقوة وأخذني لغرفتي
وأمي ورهف مصدومات , جلسني على طرف السرير , وفتح الباب بقوة ودخل ناصر وأحمد , جلس سعد على ركبه
قدامي وأحمد جنبي على طرف السرير وناصر واقف على يساري والباب مسكر , وانا مشبكه أصابعي ويادوب أتنفس ..
سعد: أسمعي رهف أبوي وخالد بينهم شي والموضوع اللي بينهم يخصك علميني خالد وش مسوي / عارفين العرق اللي
بالرقبه اذا عصب الرجل ينتفخ سعد يتكلم وانا اطالع بهالعرق اللي برقبته وأرجف ..؟

جلس ناصر وهو يمسك يدي ويقول:

ناصر: علميني ياقلبي اذا هو سابك ولا متلفظ عليك بس قوليلي / ماسك يدي اليسرى بقوه وينتظر أتكلم ..؟
سعد: ريم فيك شي علمينا خليني أطى على رقبته / ناصر يهز راسه موافق على كلام سعد .؟؟
أنا: ماصاير شي والله /( أستغفر الله ) ..؟؟
أحمد: أنتم خوفتوها / حاط يده من ورى ظهري ..؟؟
سعد:أبوي عيا يعلمنا وأنتي عييتي طيب أنا أعرف بطريقتي هين / قام وطلع من الغرفة وضرب الباب خلفه ..؟
جلس سطام مكانه وهو يقول:
تكفين علمينا وش صاير ريم حنا أخوانك واذا خايفه نسوي له شي أوعدك مانلمسه ../ يترجاني !!
أنا: أنتم مين قال لكم صاير شي؟؟/ أرجف .
أحمد : واضح أبوي وخالد لهم ساعتين مقفلين على نفوسهم بالمجلس وابوي عيا يخلينا نجلس معهم ,,/أسمع
صوته من خلف ظهري ولسى حاط يده علي.؟
سطام: ريم سعد معصب ,وانتي تعرفين سعد ماهو ساكت لين يعرف الموضوع....

قطع كلامه على دخول أمي للغرفة ..

أمي : وش فيكم صاير شي..؟
تغيرت ملامح أخواني وحاولوا مايوضحون لامي شي, وطلعوا من الغرفة على طوول , آما أنا فاخذت ربع
ساعه وانا أقنع أمي ورهف ان ماصاير شي والموضوع كله خلاف بسيط بيني وبين خالد ومابي أخواني يتدخلون فيه,
وعلى طوول أيدتني بان مالهم دخل بحياتك , وحلي مشاكلك مع زوجك ومن هالحكي ,,..
لبست عباتي وطلعت من غرفتي وانا احاول أعرف وين راحوا العيال ..!!
ماشفت أحد حبيت يد أمي وقفلت الباب الخارجي وطلعت لهاذيك السيارة اللي شغالة لمبتهاالداخليه ,
شماغ ابيض أشوفه من بعيد, فتحت الباب وركبت ..

سلام ..

نزلت الشنطه بيني وبينه وحطيت رجل على رجل وانا اطالع لبيتنا ..؟
هو: وعليكم السلام يامرحبا ..

حرك ومشاا ..

أخذت جوالي وارسل لرهف ...
الوو
الووو
الووو
الووووو

رهف: هلا
أنا: العيال وين ماشفتهم يوم طلعت/ حاطه فيس بدمعه..
رهف: بالحوش الخلفي تخيلي / وحاطه نفس الفيس ..
الحوش الخلفي لبيتنا مهجور تقريبا نادرا مانجلس فيه ..؟
أنا: حطيت فيس يضحك بس / بحاول أغير واقلبها ضحك ..
(أنا بخير والحمد لله وسعيده عندي مشكلة صغيرة وبحلها مع خالد تطمنوا واذا صار شي
ولاقدرت أحله رجعت لكم وعلمتكم الله لايحرمني منكم ولامن خوفكم علي ويديمكم لي ..)
حددت أسماء أخواني الثلاثه وأرسلتها لهم ...؟
قفلت جوالي ونزلته ..؟
الغريب انه ساكت , ولا يلتفت لايمين ولا يسار , وصلنا عند البيت ونزلنا , فتح لي باب الشقه ودخلت
مريت المطبخ شربت مويه ونزلت عباتي وشلتها بيدي , ورحت غرفتي , وقفلت الباب..؟
غيرت ببجامه وفتحت شعري وشغلت قران ونمت , لاني من هذاك النوع اللي يفرغ حزنه بالنوم , نمت على صوت القران
نمت وعقلي شغال وقلبي مكسور , وخايفه عليه وعلى اخواني وشايله هم أنهم يعرفون شي ...؟؟

* فتحت النور على 5 ونص الفجر صليت ورجعت بكمل نوم , اخذت جوالي بشوف الرسايل وانشغلت فيه على 6 دق الباب
ماكنت بفتح بس حسيته ملزم لانه كل شوي يدق مره ثانيه , فتحت بشويش والغرفة ظلام ..!

هو: صباح الورد / مبتسم ..
أنا: صباح النور / مالي خلق ..!!
هو: الجو حلو وش رايك نطلع نفطر براا / يمسك مقبض الباب ويقرب !!
مابين صاحيه ونايمه ومخدره وكسلانه قلت : امم طيب !!
هو ضحك: يالله جهزي تراني بموت جوع / سكرت الباب وهو رايح يلبس !!
لبست بنطلون زهري وبلوزة أصفر بارد , مسكرة وكحل فرنسي ورسمت حواجبي , روج وردي فاتح وساعة
وخاتم وحطيت جوالي بالشنطه ولبست عباتي وطلعت له بعد ساعة الا شوي وهو ينتظر بالصالة ..!
شال بوكه وجواله ومفاتيح سيارته اول ماشافني وقام ..!

يمد يده لي بـ تفضلي تقدمت قدامه وطلعت من الشقه ,قفل ونزلنا ..!
الجو كان فعلا فعلا رائع غيم وبارد يفتح النفس , بدون حكي كثير ولان العلاقه بينا من تالي صايره رسميه ,
دخلنا مطعم وافطرنا وطلبنا قهوة , وحكينا كله الله وكيلكم عن أفضل مطاعم الرياض ووجباتهم و و و و
طلعنا على 8 و 40 دقيقه والجو لسى غيم ..!!
بعد ماركبنا سألي تبين نروح مكان ثاني ..؟؟

فكرت للحظه وش بنفسي الحين وكنت صادقه معها كثير , أبغى مساحه واسعه وأمشي فيهاا , بطلع كل هالطاقه السلبيه
اللي عندي , بتعب , بكون لوحدي , بفكر بمكان خالي مافيه أحد , بصيح بصوووت عالي ..؟
طالعت له وقلت : بنروح بر ممكن ..؟/ قلتها بطلب لانه اذا رفض ماراح اعارض ..؟

هو: افا أنتي تامرين أمر ..!/ عيونه تقول وتقول .

ياحبذا يكون بعيد ومافيه احد لاني بمشي بدون عبايه / قلتها وانا صاده يمين وانتظر رده فعله ..!
هو: أبشري .
مسكنا خط وطولنا واحنا نمشي انا سكاته وهو ساكت , بعد وقت طويل نزلنا صحراء وكانت خاليه تمامآ
والجو لساته غيم وبارد , وقف السيارة وهو يقول : هنا ..
أنا: ايوه خلاص هنا / من قلب !

نزلت وتركت الباب مفتوح وقلت له بنزل العباية وانا افتح الازارير ..؟
هو: خذي راحتك مافيه احد / نزل شماغه وحطها ورى وفتح اللياقه ..!

نزلت عباتي ونقابي وحطيتها على المرتبه تعطرت وفتحت شعري ورميته على قدام ونفشته لين حسيت الهوا دخل
جواته , شمرت اكمام البنطلون , وتركت خالد ومشيت , السياره مفتوحه بيبانها الثنين , وهو واقف قدامها ,
ويراقبني , أما انا سجيت مشيت بشكل مستقيم وبخطوات متباعد وانا فارده يديني , وشعري يلعب فالهواء ,
احساس والله والله مايوصف , وبعد مسافه بعيد بعيد عن خالد وسيارته بمكان كله رمل نظيف وناعم جلست جلست اليوغا
أستنشقت الهوا تنهدت تنفست بقوة سويت كل شي يريح المعدة والاعصاب , وطولت مغمضه عيوني وجالسه ...!
وقفت وانا احس بسعادة جا عبالي أركض وفعلا ركضت وطلعت فوق الرمل ونزلت وصارخت وهو جالس فوق كبوت السيارة
ومرجع يدينه للخلف ومساند جسمه عليها ويناظر لي من بعيد ..!
أخر شي سويته اني غنيت بصوت عالي وانا ادور وفارده يديني ومبتسمه ..!!
خلصت وطاح اللي براسي بعد وقت طويل والله رجعت له , واخذت علبة المويه وغسلت يديني وتعطرت وحطيت كريم وهو
لسى جالس ولاتحرك , تقدمت ووقفت قريب منه وقلت : نرجع البس عباتي / أعدل شعري ..!
نزل من فوق الكبوت ووقف قدامي وقال: سويت لك اللي طلبتيه سوي لي اللي بطلبه / عيونه ماتطمن نظراتها !
تراجعت للخلف وقلت: وش طلبك ؟/رافع حاجبي !!

هو: بــضمك !/ يفتح يدينه .؟؟

أنا: لا

هو: ريم ضميني / معقد حواجبه ويمط الكلااااام !!

أنا: لا

بقى واقف لثواني ولف وركب وشغل السيارة وضرب الباب بقوة , على طول سحبت عباتي ولبست ,
وركبت بسرعه ...!
صمت صمت فالسيارة طوول الطريق ولا احد يلتفت لثاني ولا وقفنا الا عند البيت , نزلت وهو لسى باقي فالسيارة ,
ودخلت الشقه اخذت دش وبدلت وطلعت ومالقيته وطليت مع الشباك سيارته مو موجوده , رتبت البيت وبخرت
وشغلت فوحاتي ودخلت المطبخ سويت لنا غداء خفيف , وانتظرته لين 1 الظهر ماجا ..!
تغديت وشغلت التلفزيون وتربعت بالصالة ..؟
رجع الساعه 2 الظهر زعلان ولا يكلمني , ومايبي غداء بعد دخل وسيده على دورات المياه ياخذ دش
آما أنا رحت المطبخ سويت شاهي بنعناع وحطيت مكسرات ورجعت الصاله لقيته ساحب بطانيته ونايم على الكنبه الكبيره
بالصالة , نزلت الشاهي على الطاولة القريبه مني وجلست مقابله لتلفزيون ..!!

أشرت له على الشاهي وانا اقول: تبي شاي ..؟بهدوء

هو : لا

متلحف بالبطانبه ويطالع بالتلفزيون ..!!
3 ونص الظهر واحنا لسى جالسين دق جوالي سعد...
أنا: هلا أخوي / مبتسمه
سعد: أفتحي الباب انا برا
شهقت وقفلت الجوال وطالعت له سعد / أأشر على الباب !!
هو: وين رمى اللحاف ..
أنا: برا عند الباب / رحت ركض للغرفه بنزل البجامه ..
اما هو راح يفتح الباب لسعد وترك فراشه اللي بالمجلس ونبهته عليه وقلت له يجيبه هنا للغرفه ,أسمع صوتهم
واسمع صوت خالد يرحب بسعد ..
تنورة وبلوزة وعطر وطلعت لهم ...
سلمت على أخوي وانا اتراعد رغم اني شايفته البارح , شلت البطانيه اللي بالصالة ودخلتها الغرفه
ورجعت شلت الشاي وأنا ملاحظه نظرات سعد الغريبه وكانه يتفقد كل شي..
سويت قهوة وشاهي وحطيت عود ورجعت لهم بالصالة , صبيت عليهم القهوة وجلست ,
من حكي سعد مع خالد واضح انه مو هاضمه وكارهه بدون سبب , بس لانه شاك بشي , خالد يتقرب ويرحب
ويسولف وسعد يطالع يمين ويسارى ويشوف الوضع ..؟
بعد جلست التحقيق اللي صارت , قام سعد وهو يقول : ريم تعالي أبيك ..؟

يــمه ..

تركنا خالد جالس ووقفنا عند الباب قبل يطلع , مسك يدي وقرب وهو يقول:
أذا فيه شي يضايقك قولي لي وجوالي مفتوح دقي باي وقت ..؟
طيب أبشر / قلتها بطمنه ..
حب على راسي وطلع وهو يقول : لاتنسين اللي قلته لك ..؟؟

خلص اليوم ودخلت نمت بدري **

اليوم الثاني نزلت العصر لبيت عمي أسلم عليهم , وكان خالد معي الوضع طبيعي
ولا احد لمح لي بشي ولا علقوا على ملكة خالد , حتى خالتي كأنها ماكانت عارفه بالموضوع ,
سولفنا وسهرنا وتكلمنا بكل شي وتعشينا وطلعت وأنا مستغربه معقوله ماعرفوا ,أعرف خالتي ماتترك المواضيع
اللي زي هاذا الا وتعلق عليها وكنت متهيئه نفسيا لكلامها ..!

أنتهى البارت ..

البارت الرابع عشر *

وأنه ليس لدي شك في أن الله سيرحم العيون
التي تنظر بقصد ألى الجهة الأخر , كي لاتزيد من حرج أحد.




هذا ثالث يوم مر وأنا ماكلم خالد ولا هو يكلمني الا بـ
نعم , لا , طيب , أن شاءالله , أحاول , يمكن , وخلاص , و و و
هذا ثالث يوم يحاول خالد يقول بكل الطرق أنه زعلان , يتعمد يوضح ويقول راضيني ..
هذا ثالث يوم يثبت له أني ماحبه , تصرفاته صايره غريبة عصبي , صامت , يتأمل , يراقب , يستعطف ..!!!
حتى مكان نومه غيره , وصار 24 ساعة نايم على كنبة الصالة , يفتح عينه على اقل صوت يصير بالصالة ولو اخر الليل
, مرهق ويفكر وواضح عليه التعب ولا سالته عن السبب ولا أفكر حتى أساله ..؟؟؟

اليوم الرابع أستغليت نزوله لبيت عمي وبديت أرتب البيت , وأنظف , وأمسح , وأكنس , وصل بي هذا الترتيب
لمجلس الرجال , مكان نوم خالد واللي مااجيه الا نادرا ولا أطوول فيه بعد , قررت أشيل فراشه وأنظف من تحته
وأرتب الحوسه اللي جنبه , بمجرد ماشلت وسادته لقيت عطري ....
صفنت وفتحت العطر وتعطرت , رفعت راسي ثواني اشم العطر أتاكد أنه عطري , الغريب أنو قارورة العطر فيها أكثر
من النص وأنا عطري على نهايته , أخذته وعلى غرفتي على طوول , وقفت قدام تسريحتي وأنا أتامل عطري اللي على التسريحه
نظره بالعطر اللي بيدي ونظره بالعطر اللي على التسريحه , اللي أنا متاكده منه انه عطر نسائي مية بالمية ولاينفع
رجل يتعطر فيه ,( يعني ), جا عبالي انو يمكن بيهديه لي , حتى هالاحتمال غير وارد وواضح ان السالفة مو سالفة هدية
العطر مستخدم , نزلته على التسريحه ورجعت للمجلس ...؟؟

نظفت ورتبت وعدلت المكان وطفيت النور وطلعت ...؟؟

دخلت أخذ دش وهالعطر مشغلني , رحت لبعيد لبعيد رحت لتهاني , لايكون جايبه هديه لها وماصرت له فرصه يعطيها هديتها
بمجرد ماطلعت من دورات المياه رحت لتسريحه وانا مصمله على انه هديه لتهاني ,
أخذته وتسحبت لمجلس الرجال رميته على الفراش بقوة وانفتح
غطاه ورجعت للغرفة زعلانه وزعلانه حيييييل بعد ..!!!!

ضربت الباب بقوة وقفلته ..
شفايفي مقوسة لتحت وحاجبي مرفوع , وأتهاووش مع كل شي قدامي , وضغطي أتش , ودقات قلبي سريعه بغضب ,
أستشورت شعري , وحطيت روج ومسكرة وحددت حواجبي ولبست خاتم , وساعة , واسوارة ناعمه بيدي اليسرى , وقمت لكبت الملابس
واقفه قدامه وأنا مصره البس شي كشخه ليش مدري المهم أني بخاطري فستان , قلبت ملابسي وسحبت فستان كموني قصير شوي
واسع بجيوب ونص كم لبست وتعطرت وقفت قدام مرايتي وأحس اني بتحدي مع مين ؟
مدري المهم أكون جميلة ليه ولمين أرجع وأقول مدري !!
يمكن لنفسي , يمكن لخالد , والاكيد أني مابي أكون بموقف ينسيني أنوثتي وأهتماماتي ...!!!
بخطوات واثقه طلعت الصالة وطفيت الانوار القوية وخليت نور هادي وفتحت التلفزيون وجلست على أقرب كنبه لتلفزيون
وحطيت على فيلم ورفعت الصوت ..؟
أطالع بالساعه وأرجع لجوالي وتتكرر الحركه والتلفزيون ساحبه عليه ونسيت والله اي قناة حطيت ,
مشغولة متى يدخل وكيف بعرف العطر لمين , وليه ماعطاها الهديه , وليه يشري زي عطري والف ليه وليه براسي ..؟

فتح الباب ونزلت جوالي ومسكت ريموت التلفزيون !!
هو : ٍسسسسسسسلام ..
أنا: وعليكم السلام / أطالع بالفيلم !!
هو: سويتي لنا عشاء جوعان / جلس قدامي !!
أنا: لا وماراح أسوي / ناظرت فيه ورجعت أطالع بالتلفزيون ..؟؟؟؟؟
هو: وليه / بستغراب !!
أنا: بكيفي / حاولت أتحكم بنفسي والله بس ماقدرت !!
قام وجلس على طرف الطاولة اللي قدامي مباشرة , أرتبكت وقصرت الصوت !!
هو: هاتي علمك وش فيك / يشبك اصابعه وينزل يدينه على ركبه !!
أنا: ساكته واطالع هناك بالتلفزيون !!
هو: ررررررريــــم أنا أتكلم / بعصبيه وصوت عالي !

نزلت الريموت وعدلت جلستي وزحفت عنه شوي وقلت :
قبل شوي نظفت المجلس ولقيت بفراشك عطر نفس عطري , (أخذت نفس وكملت)
أذا بتهدي لخطيبتك عطر لاتاخذ من العطورات اللي أنا أحبها ..؟؟

((شايفين هالحوار السخيف هو اللي قلته بالضبط وواضح أني مولعه غيره ))

هو: أها / يبتسم بخبث ..؟
قام وسحب يدي وأخذني للمجلس ..
فتح النور ودخلنا وشديت يدي بقوة وهو يقول : تعالي ..
سحبني بقوة لين فراشه ولقى العطر مرمي شاله وهو يقول : أقل شي غطيه ليه راميته / يضحك !!
لفيت برجع لصالة ومسكني بيد والعطر بيد ..؟

رش من العطر بالجو ..!!

هو: هاذي ريحت مين ..؟/ يطالع بعيوني !!
أنا: .........
هو: هذا عطرك ياقليبي أتعطر به قبل لاأنام حارمتني منك بتحرميني من ريحتك !؟
/ أختفت أبتسامته!!

* كش شعر جسمي وربي وتراجعت لوراء ..؟

رمى العطر بنص الفراش وقرب :
مسك يديني الثنتين وباس اليسرى ورجع وباس اليمني وهو يقول:
أعترفي أنك غرتي / ويغمز ويبتسم نص ابتسامه!!؟؟
أنا: غرت على عطري ( كنت بوصل له فكرة أن هذا شي خاص في وأحبه ومابي احد ياخذ زيه ))
بس قاطعني وقال: ياااااشيخه / ميت ضحك !!
حطني بموقف محرج ووضح علي التسرع والغيرة بنفس الوقت ..!!
أنقهرت من ضحكه وسحبت نفسي برجع وقبل لأاوصل للباب ركض وسكره ..؟
ووقف بنص الباب وفرد يدينه وهو يقول : أنتي اللي جيتي برجولك لـ هنااا !؟؟
أنا: خـــالد بلا أستهبال / أمط الكلام ؟؟؟
هو: ياويلي ياعيون خالد / يقولها بحب !!
أنا: أفتح الباب / معقده حواجبي وندمانه !!!

هو: بشرط ؟؟

أنا: شرط / رفعت حاجبي وفتحت عيوني بقوة ؟؟
يضحك وينزل راسه ...
هو: ايه بشرط نجلس ونتكلم زي أي زوجين محترمين / الابتسامه شاقه حلقه !!
(آه بس كذا أشوا /بصدري) قلت : موافقه ..؟؟
فتح الباب ويأشر لي بــ : تفضلي !!؟؟
تفضلت على قولته ورحت الصالة وأنا افرك يديني , شلون مافكرت فيها , ليه راح عقلي لا هاذيك البنت ,
أستغفر الله العظيم...؟؟؟؟
جلست واخذت خداديه وضميتها لصدري وأنا أنتظر وين يجلس ..؟؟
ترك كل الاماكن وجلس بجنبي بجنبي لدرجه لو الف بوجهي عليه أطيح بعيونه على طوووول ؟؟
اخذ يدي اليمنى وضمها بين يدينه وقال :
أسالي , هاوشي , تكلمي , عاتبي , سبي قولي اللي بتقولين أنا أسمعك ..؟
( جا عبالي حكي كثير وعتاب أكثر بس عارفه أنها ماراح تقدم ولا تأخر ..؟؟
هو : ريــم ؟؟
أنا: نــعم ؟؟
هو: أسمعك !
أنا: ماعندي حكي ..؟
هو: أها طيب أنا عندي ..؟؟/ فك يدي وغير جلسته وبعد عني ؟؟؟!
ريم لاتتصرفين بتعالي , خليك على طبيعتك , واي مشاعر تحسين فيها أظهريها ماهو بعيب , أنتي تعرفين
قيمتك عندي , وحبي لك رغم المكابر اللي تسوينه , يمكن الظروف ماساعدتنا بس حنا نقدر نساعد بعض
ونعطي عذر ونقدر , وراعي أني رجال ولي كرامه وأضغط على نفسي واجد عشانك .؟؟؟.

وقف وهو يقول : تصبحين على خير ..؟؟

أول مرة يتكلم خالد بهالجديه وبهاللهجه , صوته حاد , وكلماته مختارها زين , كأنه ينبهني , قرصني قلبي
وحسيت للحظه أني غلط , أخذت جوالي ودخلت غرفتي بدلت وفتحت قران ونمت ..؟؟

اليوم الثاني ..؟؟

صحيت متأخر وسويت فطور وقهوة وحطيتها بالصالة, أفطرت وتقهويت وهو لسى نايم , على العصر صحى وأخلاقه
واضح أنها صفر , ماتعاطيت معه كثير حاولت أتجنبه قدر الامكان , بعد ماأكل وتقهوى نزل بيت عمي ..؟؟

بيت عمي طامي .؟؟

الساعة 6 الا ربع بالدكة وبعد ماقام عمي عن قهوة العصر ..
طلال: خالد أبيك بموضوع / يلتفت يمين ويسار
خالد: عسى خير قول / مساند ظهره للمركى وقدامه فنجال قهوة وبيده جواله ..!
طلال: نزل جوالك وركز معي / يبتسم
خالد: واضح أنك مسوي مصيبه !
طلال: أنا بخطب وأبي رهف بصراحه / يحك راسسسه ..
خالد: رهف بنت عمي محمد أخت ريم / يأشر بيده لفوق على بيت ريم ..
طلال يتربع : ايه ياخوك صراحه من بعد ماشفت ريم وأنا أفكر أخطبها / يطقطق أصابعه !
خالد: والله ياطلال مدري وش اقول لك ,ماودي أنك تبدا حياتك بمشاكل وأنا أخوك / تعومس خاطره .!
طلال: أفا مشاكل ليه صاير شي ؟؟؟
خالد: سسسسساكت ويحرك السبحه ..!!
طلال: خالد أنت سعيد مع ريم , أنا أشوف زواجكم ناجح اذا فيه شي مدري عنه علمني !
خالد: أيوالله ياخوك سعيد معها ولا أبي من الدنيا الا هي بس ريم صعبه وأنا ماأحسب حساب الامور متهور

/ يقولها ويصد ؟؟!

طلال: والله ياخالد أنت شكلك غرقان / يضحك ويلمح له ..؟
خالد: أنت وش تبي هالحين أخلص ولا بقوم والله ؟
طلال وهو يجلسه : لالا تكفى /وكمل/ أبيك تهرج ريم وتخليها تجس نبض رهوف / يضحك ويغمز !!
خالد: أها رهوف ماعندنا بنات لزواج / يوقف ويناظر له / رهوف أجل ..؟؟
طلال: خالد لاأوصيك على أخوك ..
خالد: علمتك ماعندنا بنات لزواج / مقفي ..
بعد شوي رجع له وهو يقول: طلال صحيح قبل لا أنسى مر بيت سطام شوف اذا محتاجين شي ..؟؟
طلال وهو باقي على نفس الجلسه : وليش ماتروح لهم أنت ولا مستحي من تهاني / بضحك ؟؟
خالد بعصبية : طلال الا الموضوع هذا لاتمزح فيه فاهم / يتوعد !!
طلال : اف اف ماقصدت شي أهدا !!؟؟
خالد: هالاعاد أسمعك تطري أسمها ؟؟؟
طلال: خايف ريم تسمع / يضحك ويحط يدينه على راسه!!
خالد: ططططلااااال ؟؟
طلال: طيب طيب نمزح نمزح نار لاحول ولاقوة الا بالله !!
خالد: أذا يبغون شي دق علي / مقفي ؟
طلال: أقول لهم خالد يسلم عليكم / بضحك عشان يعصب به ؟؟

خالد : لا ...!!

**

مليت لوحدي تذكرت رواية جايبتها معاي من زمان خاطري أقراها وبعد ماصليت ولاني متأكده أن خالد مطول
برا أخذت الكتاب وجيت على الكنبه اللي دايم ينام عليها وحطيت راسي على وسادته
ودخلت رجولي تحت بطانيته وفتحت الكتاب ,ولاني من النوع العميق اللي يدخل جو مع الرواية
ويحط نفسه مكان البطل .. تخيلت نفسي هالبطلة ودخلت بجوها وغفوت بعد أكثر
من ساعة قراءة وخيال وعالم ثاني , الادهى والامر اني
سحبت البطانيه وتغطيت ونمت ..؟

بعد وقت وواضح أن هالوقت طوويل لاني شبعانه نوم صحيت , صحيت وأنا اتحسس البطانيه هذا مو سرير ,
عارفه اني نايمه بالصالة وعلى كنبة خالد الغريب أني نمت والنور شغال والحين طافي , جا عبالي خالد
يالله شافني نايمه على فراشه رفعت الوسادة بالظلام أدور جوالي ....
جلست ودورت زين مالقيته ؟؟؟؟
قمت بشويش وانا أتحسس لكل شي اخاف اطيح وفتحت النور ...!!
طاحت عيوني على الكنبه اللي قدامي ومفرشي , ووسادتي وخالد , شلت شعري المرمي على وجهي بشوف زين ,
خالد أيه خالد نايم على الكنبه الثانيه , ومتغطي بمفرش سريري واللي تحته وسادتي , بقيت واقفه واطالع فيه !!!
لفت انتباهي أن جوالي على الطاولة اللي جنبه وجواله وكتاب الروايه اللي كان بحظني على نفس الطاولة
على روس أصابعي تسحبت وأخذت جوالي ورحت الغرفه لقيته طافي وشغلته وكان فل شحن يعني خالد متعمد يطفيه..!!

الساعة 2 الفجر..

طلعت مفرشي الثاني وضبطت المنبه على 5 الفجر وتغطيت وكملت نومه ..؟
وفعلا صحيت على 5 الفجر وأول شي سويته كالعادة أفتح الرسايل , لقيت رسالة منه وبلمح البصر فتحتها ..
أنا مسافر تبوك مع واحد من أخوياي أستودعتك الله ..؟؟
جلست وقريتها مره ثانيه !!!؟؟
نعم شلون يسافر وأنا أخر من يعلم , رميت بالجوال ورفعت اللحاف وقمت , فتحت الباب ورحت المجلس بتأكد ,
فراشه مو موجود وشنطة سفره بعد , رجعت الصالة ووقفت بنصها وأنا أطالع ببطانيته , ليه ماخذها تذكرت مفرشي
اللي البارح كان نايم فيه ووسادتي دورتها مالقيتها ..رميت بنفسي على الكنبه وأنا أقول:

من سمح له ياخذها !!

والدمعه بطرف عيني مو عشان الوسادة ولا المفرش ليه سافر وتركني ليه ماعلمني ..!!
* ضيعت اليوم اللي صاحيته بدري , بالمسلسلات ,والاكل , والمكالمات , والغسيل , والكي , والقصايد,
لحد الساعة 8 الليل أستسلمت لنوم , وأنا مارديت على رسالته ولا كلمته ولا أدري وصل ولا لا
ولاأعرف ليه مسافر أصلا..؟
اليوم الثاني صحيت على الفجر , أفطرت وسويت كبتشينو وحطيت الايباد وجلست أتابع مسلسل ولا قومني
بدون مبالغة الا أذان الظهر , صليت وحضرت غدا سريع ورجعت أكمل حلقات تخلص حلقه وابدا بالثانيه ,
متربعه على سريري , وفاتحه المكيف وأضاءة خفيفه وريحت عطر وشعري مفتوح وجوالي قدامي
وأكلي بحضني وأحاول أنسى وأستغني ..؟؟

على الساعه 2 الظهر دق جوالي رقمه صمته ورجعت أتابع , رجع دق على 4 ونص العصر وهالمرة
طووووول وهو يدق ولا رديت ..

7 المغرب دق الباب :::
عدلت شعري وبهدوء رحت له ..
مين ؟
عهد أفتحي / تدق الباب بشكل متواصل ؟؟
أنا: هلا هلا يالله حيهاا ..
عهد:سسسلام مساء الفل ../ تضمني !
أنا: مساء الورد جيتي بوقتك أسهري معاي مابي أنام ..؟
دخلتها وأنا اقول : يالله حي عهد / مبتسمه وفعيوني نوم ؟!
عهد: تعالي أجلسي لك رسالة عندي ؟؟
أنا : أبشري اجلس بس بعد القهوة / كنت بروح المطبخ ومسكتني ..؟
عهد: ريم أجلسي خالد مزعجني يقول خليها ترد ؟؟
أنا: يعني مو جايه عشاني / جلست !!
عهد: انا مو أرسلت لك أنزلي للقهوة ليه مانزلتي /وكملت /
صايره دجاجه أنتي / تحط رجل على رجل ..!
أنا: يختي أصحى بدري وأنام بدري مدري وش صاير لي /أتثاوب ..؟

دق جوالها وأنا ماكملت ؟؟؟

عهد: شوووفي يدق ووش اقول له ؟؟/ تلف علي شاشة جوالها ؟؟
أنا: قولي ماتبي ترد عليك بسيطه ؟؟
عهد : أنتم متهاوشين / بستغراب ؟
أنا بسرعه : لا بس أتغلا مايصير / بنص ابتسامه !!
عهد: والله خالد شكله متضايق ردي عليه عشاني / بترجي ؟
أنا: الله يعز شانك ي قلبي اعذريني ؟؟/ بجديه
فتحت خط جوالها اللي ماسكت وهي تقول : الووو
خالد :.........
عهد: رفضت ياخالد دق على جوالها يمكن ترد ؟؟/ تناظر لي !
خالد: .................
عهد: طيب أبشر أبشر ...
خالد: .......
عهد: مع السلامه ؟؟

منزله راسي والعب بخصل شعري ..؟

عهد: ريم خالد يقول ربع ساعة وبدق ترد علي ..
أنا: ............
عهد: يالله انا استاذن والله تاركه الشغل وطالعه عشانه, تصبحين على خير / توقف !
أنا: تصبحين على نور ي قلبي أعذرينا أزعجناك / أمشي معها للباب .؟

قفلت الباب وأخذت جوالي من الصالة وقفلته بعد صليت العشاء وفتحت قران ونمت ..*

بكرة الخميس وعمي عنده ضيوف , ولاني فاضية تقريبا , أتفقت مع عهد على أن قهوة الحريم
عندي وهي لها قهوة الريجيل بحكم أن الضيفه والعزومه بتكون ببيتهم وعيال عمي رايحين جايين عليها,
ليلة الخمييس سهرت بالمطبخ ...
شلة شعري ولبست سبورت ودخلت الساعة 11 تماما ,فتحت قصايد , ونزلت كل الاغراض
اللي أحتاجها على طاولة طعام المطبخ وبديت اشتغل..
وبعد ثلاث أصناف حلا , وتمريه , وتجهيز أغراض الفطاير لبكرة وتنظيف المطبخ طلعت ماشوف الدرب أدور فراشي !!

اليوم الثاني صحيت 1 ونص صحيت على صوت جوالي , أتصال من عهد فتحت الخط وانا لسى ماصحصحت ,,
الووو ريييييييييم / بصوتها كله ؟؟
هلا....
عهد:قومي الحريم بيجون بعد العصر قوووومي ؟؟
أنا: اووك بقوم قفلي / صوتي كله خمووول !!
عهد:.........
قمت بالغصب رغم كل الكسل اللي بجسمي , صليت وأكلت ورجعت للمطبخ مره ثانيه ,
سويت حشوة الفطاير اللي مجهزتها ودخلتها الفرن نظفت ورتبت وبخرت ودخلت أخذ دش ...!!
3 تماما كنت قدام تسريحتي , أستشوار , عدسات ومكياج كامل , مناكير أحمر , ساعة وخاتم , سلسلة ناعمه وحلق ,
فستان أسود قصير وأكمام طويله دانتيل , وكعب بيج , عطر وكريم ..!
أخذت جوالي ودقيت على عهد أقول لها أني جاهزة ..؟
وفعلا نزلت قبل صلاة العصر بربع ساعة لبيت عمي , ورتبت الضيافة أنا وعهد , وجهزنا قبل لايجون الحريم ..
ومر الوقت وأنا ناسيه جوالي حتى , مابين شغل وترحيب , وبخور وقهوة و , و , و و و...
الساعة 10 ودعونا ضيوفنا وعلى أخر وحده طلعت من الحريم رحت للمرايه وعدلت شعري , ورجعت لخالتي
وعهد بالصالة وأنا أعلق مع عهد على الصغيرة والكبيرة ...؟
أخذت بيالة شاهي وجلست , فتحت شنطتي وحطيت كريم وكملت سوالف مع خالتي وعهد ,...؟؟
بنص السوالف لاحظت أن خالتي وعهد يطالعون خلفي ويضحكون استغربت منهم وطولت أناظر لهم ولفيت للخلف ؟

شهقت بقوة وحطيت يديني على فمي ...!

خالد واقف وراي ويأشر لهم : لاتعلمونها ؟؟
على ضحكهم مرني ومسك يدي اليمنى وأخذني معه وراح لخالتي يسلم عليها وأنا أتبعه وأضغط بيدي اليسرى على
وجهي , عهد للحين تضحك سلم على خالتي وباس يدها , وراح لعهد ولسى ماسكني , رغم أني أستحيت وحاولة
أتراجع , بعد ماسلم على عهد , رجع لمكاني وأخذ شنطتي وهو يقول : تصبحون على خير ..؟
طلعنا مع الصالة ثم مع الدرج وهو ولا يطالع في فتح باب الشقه اللي ماكان مقفل أصلا ودخل وأنا معاه ؟؟؟
ترك المدخل وسيده لصالة ويدي بيده ولا عند نيه يفكهاا ..!

نزل الشنطه ...

وحوطني بيدينه ورغم الكعب اللي لابسته ماوصلت والله حتى لـ أعلى كتوفه , تجرأت وضميته أنا بعد
ومسحت بيديني على ظهره وهو ساكت وأنا ساكته ...
فكيت يديني شوي شوي وأنا أقول : حمدلله على السلامه/ طاح اللي بالخاطر !
هو وباقي متمسك في : الله يسلمك ..!
حطيت يديني على خصره وبديت أبعد نفسي عنه , مسك يديني الثنتين وسلم علي وهو يقول:
أعذريني أخر مرة أسويها ؟؟
سحبت نفسي ورحت وجلست وانا أقول: زين عارف أنك غلطان / رجل على رجل !!
نزل شماغه وجلس جنبي ..
هو: ايه غلطان والغلط لابسني من راسي لساسي / يبوس يدي ؟؟
أنا: على العموم حمدلله على السلامه / قلبي يضحك والله مو وجهي !!
هو: طمنيني وش سويتي بغيابي / يغمز ..؟
ناظرت له بنص عين وأنا أقول : أبد والله ياطويل العمر مسلسلات وأكل ونوم ..؟
هو: تراني تارك خووي وراجع لحالي عشانك والله العظيم ولا الاوراق ماخلصت للحين / يتكلم بصدق ..؟
أنا: لاياشيخ سبوع ولسى ماخلصت / رفعت حاجبي !!
هو بضحك : والله العظيم باقي ماخلصت ..!

أنا: .......!

هو: أشتقتي لي ؟؟/ تغير صوته ..!
حطيت عيني بعينه (وقلت بصدري أيه) , ونزلت عيوني ورجعت رفعتها ,
لعبت بشعري وأنا أبتسم ( أبتسم من كل قلبه لبتسامتي وهو ينتظر الجواب )
هو: قووولي ؟
أنا: يعني مو كثير ...؟
خالد ذكي ولماح ويعرف يقراء ملامح الشخص , ويوثق فيها أكثر من الحكي ,
وأنا وبهاللحظه كل ملامحي تقول أحبه , حتى لو كابرت وقلت غير كذا ..؟


أنتهى البارت ..

* البارت الخامس عشر ..


إلى الذين لا يعرفون مايقولونه عن أنفسهم
أنا أنضم اليكم، بكلام كثير لا أعرف كيف
أقوله ..!


(ماأعرف أعبر )هي كذا الصيغة الحقيقية والصحيحه للي بقولة ماأعرف أعبر , وأجزم أن غيري بنات كثير نفس حالتي ,
ماعندنا القدرة على وصف وش نحس فيه , على الالمام بمشاعرنا وصياغتها بجمل , أنا وبهالحالة ماعمري تكلمت ألا مع نفسي ,
بحياتي ماجلست قدامي طرف أخر وشرحت له وش أحس ولا وش مضايقني , ولا حتى أساله عن الحل بمشكلة تخصني , ترى هالخصلة وهالطبع
واللي يعتبره الكثير ميزة أنك ماتحكي ولاتضعف (شينة بالعامية ) سيء هالتكتم على المشاعر والاحاسيس وحتى المشاكل اللي نواجهها ..
هالنوعية من الأشخاص من جواها عقد عقد عقد , أقفال بدون مفاتيح , ولاتعرف هي فرحانه ولا حزينه , ولاتقدر تواسيها لان كلامك ممكن
مايوصل لجواا , ممكن مايطبطب على مشاعرهم يسكن الامهم بس مايعالج ..؟
عندي حكي كثير كثير نفسي أجلس مع شخص يسمع بس , بحكي له بشكل عشوائي كل شي , ببدا من الاخير من هاللحظه وكيف أحب ,
وبرجع لـ أول يوم سكنت مع هالخالد , وبحكي له كيف كان فستاني , وبقول له متى ضمني لأول مرة , ومتى بكيت هنا عاد بطوول أشرح
يآآآه أكثر شيء سويته بعد هالزواج أني بكيت , بشتم وبسب خالد وياحبذا يشتم معاي ولا راح أدافع عنه أبدا بالعكس بفرغ
كل اللي بقلبي عليه , ووبمسح دموعي بعد هذا كله وبقول أنو حنون , ويهتم , وممكن أنه يحبني ...!
أبي شخص أفكر معه لبكرة وبسأله ( هل ياترى اقدر أنسى وأبدا من جديد , يصير أتبع قلبي وأترك كل شي , يعني ماراح أندم بيوم
من الايام على أني حبيته وتنازلت ..)
ترى مو صعبه أتنازل لاوربي (أنا طيوبه وبكل مافي هالكلمة من ضعف بقولها , أنا فعلا طيوبه ممكن أتنازل وأعيش وكأن
شيء لم يكن , وماراح أذكرك بيوم بغلطك ولا امسكه زله عليك , ولاراح أتكلم فيك مع شخص ثاني لأنك بعيني وبقلبي كبير ,
وماأسمح أحد يقول فيك كلمة تقلل من شأنك ...؟
الموضوع مو التنازل الموضوع أكبر , أخاف أحشمك وأتنازل وأكمل وأنسى كل اللي صار وأتفاجأ بيوم بجرح أكبر ,
يخليني أندم , وأتحسف على أني ماتعلمت , مو يقولون كل ضربه بتعليمه , ياخوفي أمرر هالضربه وتجيب لي الايام ضربه أقوى منها..
أضمن لي نفسك , أضمن أنك تصون مشاعري طوووووول العمر , وأضمن لك قلبي وعقلي وعمري ؟؟!!

* تذكرون هاذيك الليلة أللي حسيت فيها أني زوجة خالد ,سلامه علي بعد رجعته من السفر,مسكت اليدين , والضمه , والتلميح ,
وسؤاله عن شوقي له, جلسته جنبي , وتبريره لسبب السفر , ومنظر شنطتي المرميه بنص الصالة ..!!
هاذيك الليله اللي ضحك فيها قلبي , هاذيك الليله اللي كنت فيها قاب قوسين أو أدنى وأقول أحبك ,
أكثر ليله لمحت فيها لخالد بحبي , وأول ليلة نمت فيها وأنا أتذكر وأبتسم ....!!

ثاني يوم ..؟!
الساعة 11 و55 صباحا بالضبط .!
جوالي يدق والباب يضرب بقوة , رميت اللحاف وجسلت مرعوبه , رفعت جوالي أدقق بالشاشة مين اللي يدق .؟
سعد قلتها بصوت عالي بعد مابلعت ريقي , وقفت وبخطوات سريعه فتحت النور , مارديت عقلي مع الباب اللي يدق بقوة
وش صاير , اخذت عبايتي من فوق الشماعة ولبستها على البجامه وفتحت الباب بقوة وطلعت , على خروجي من الغرفة لمحت خالد
يلبس ثوب النوم وهو رايح يم الباب وبصوت عالي هو بعد يقول طيب طيب جااااااي ..؟
ولعت أنوار الصالة وعظامي ترجف ورديت شعري للخلف وأنا أنتظر وش صاير , جوالي اللي يدق بالغرفة سكت !!
ثواني ويطلع علي سعد من خلف الجدار بمجرد مافتح قفل الباب , ماسلم على خالد ولا كلمه دف الباب ودخل ,ولحقه خالد
وهو يقول: عسسسى ماشر وش فيه/ وجهه كله تعجب ؟؟؟
وقف سعد على مدخل الصالة معطيني وجهه ومعطي خالد قفاه وقال: ريم جهزي عفشك بسرعه / بيده اليسرى يأشر على الغرفة ..؟
(ياويل قلبي عرف بكل شي , يارب لطفك يارب /بصدري) ؟؟
ماتحركت نظره فيه ونظره بخالد ؟؟
تقدم خالد ووقف عن يمينه وهو يقول: ليش تلم عفشها / بصوت يخوف والله .!
سعد بالعادةمو عصبي , بس الوجه الثاني له مرعب جدآ جدآ جدآ جدآ ..
لف عيونه بس لخالد وعطاه نظرة أستحقار والله لاأنسى بحياتي كل المواقف الا هاذيك النظره وملامح خالد بعدها ,؟
مشيت خطوتين وقلت : سعد أهداء !
خفت رجال قدامي الشر يلمع بعيونها , لو تماسكوا باليدين مين يفرقهم , وكل واحد يقول بالشر الزود عندي , للحظه
فكرت اكلم ابوي وبنفس اللحظه فكرت بعمي , بس مو قادره أنزل ولا راح سعد يسمح لي ..؟
سعد: يالله وش تنتظرين / طار قلبي يوم قالها ..؟
خالد: ولد أنا أتكلم خير وش بلاك / وقف قدامه قدامه ؟؟
ركضت لسعد ومسكت يده اليسرى وأنا أقول : سعد أجلس بفهمك السالفة ..؟
تفكك مني ولف يده ورى ظهري وضمني لصدره وهو يطالع بعيون خالد
ويقول: منت بكفو أوصخ يديني فيك وأضربك فبيتك , والحشمه لعمي , والبنت اللي زوجتها لك ماتستاهلها ..؟
خالد: والله العظيم ماتاخذها / سحبني فلمح البصر مالقيت نفسي الا خلف ظهره ..؟
قبل لايمد يده سعد على خالد ولانهاا قربت تصير بينهم ويتضاربون وقفت بينهم تماما وأنا أبعدهم عن بعض وقلت :
خالد أنا راضيه أطلع مع أخوي بعد أذنك ؟؟
( قلتها بكل قوه وقساوة قلب ؟)
آما سعد بمجرد ماسمعني اقولها سحبني بيدي ودخلني الغرفة وسكر الباب وهو يقول :
يالله يأمي أجمعي أغراضك وأذا تبيني أساعدك أساعدك عادي ..؟
بحركه لطيفه جدا طبطب على ظهري ومسح على راسي وسلم عليه ..!
جلس على الكنبه يستغفر بصوت عالي ..؟
وقفت أطالع له وللباب وقلبي اللي خلفه وسكرت العبره حلقي , رحت للمغسلة وطولت أغسل واحاول اوقف الدمع ,أشهق بصوت
خافت , أتنهد , أفتح عيني وأرجع أغمضها مليانه دمع , سحبت كومة مناديل , ورحت لكبت الملابس , فتحت كل بيبانه
وسحبت الشنطه الكبيرة تحته وفتحت سحابها وبديت ارمي فيها كل الملابس , قفلت الابواب وسكرت الشنطه , ووقفتها ورجعت لثانيها
ونزلتها تحت تسريحتي وحاولت ارتب مكياجي بدون ماكسر , أخر شنطه جمعت فيها شنط اليد وبعض الاغراض ,
ولاني وأنا أشيل أغراضي متاكده مليون بالمية أن ماعاد لي رجعه لـ هالمكان, حرصت على أني ماأخلي من أثري شي ..؟
حتى مفرشي الوردي واللي خالد أخذ نصه شلته , منظفاتي اللي بدورات المياه كانت أخر أغراضي ,, !!
أستاذنت سعد أني اروح لصالة اتفقد اذا باقي فيها شي , طلعت وطلع هو معي ومالقينا , خالد وأنا ادور أغراضي عيوني
تدوره يمين يسار , وين راح , كان بخاطري أروح المجلس ...؟؟

على أخر شنطة لي طلعت من بيت خالد و نزلت مفتاح بيته على طاولة الصالة وخرجت !
أعوذ بالله من قبضة القلب وحزنه , والضيقه اللي تأكل الانسان , أعوذ بالله من الفقد , الله حسيب الفراق
وأسبابه وطاريه , بسيارتنا ومع أخوي وبطريقنا للبيت , حسيت بوحشه , حسيت اني بمكان مو بكاني , الغريب
أن سعد ساكت ويحرق بنفسه !!

قدام بيت أبوي وقفنا*

نزلت بدون صوت , ودخلت مع الحوش للباب الداخلي , من الباب الداخلي , لصالة غريب مافيه أحد ,
قربت لغرفة أمي اسمعها تهلل وتستغفر , اكيد انها تصلي , دقيت الباب بهدوء ..؟
نادت باسم رهف ..
لا يمه أنا ريم / العبرة ماسكة الصوت لايطلع أعوذ باللة ؟؟
أمي: ريـم ؟؟
أنتظرت على الباب , طلعت لي بجلال الصلاة ووجهها البشوش ..
سلمت على راسها ويدها ونزلت بست رجلها كأعتذار على اللي صار واللي واضح أنها عارفه بالموضوع .!!
ضميتها بقوة وطولت أضمها ..
هدهدتها لي ودعواتها وصوتها وأنا بحظنها ضيقت صدري زيادة شيلتها هم بدون قصد مني ؟؟
شلت نفسي من حظنها على صوت أبوي داخل الصالة بعصاه راجع من المسجد وسعد يمشي خلفه بخطوات بطيئه
ويتكلم بصوت خااافت , عارضت ابوي وسلمت عليه ؟؟,

جلس على أقرب كنبه وأشر لي أجلس جنبه , وجلست بعبايتي ونزلت النقاب والطرحه ..!
(جلس سعد قدام ابوي وأمي على يمين سعد )؟؟
أبوي: لايكون مديت يدك على ولد عمك / يرفع العصى ويأشر على سعد ؟؟
سعد:لا مسكت نفسي عنه رغم انه يستاهل الضرب / يرمي الشماغ ؟؟
أبوي: مره ثانيه لاتقدح من راسك شاورني هاذي بنتي ماهي بنتك / بغضب .؟
سعد: أبشر / وقام سلم على راسه وجلس تحت رجوله وهو يمسك عصاه ويقول: والله يابوي أنه يستاهل
الضرب , هاذي ريم يابوي اللي توصينا عليها وحنا صار تذكر يوم تقول خواتكم خواتكم لايكسرونهم الريجيل ,
يشهد الله مامسكني عنه الا حشمة لعمي وتقديرآ له , ولاعاد أشوفه داخل البيت هذا ؟؟/ قالها ووقف ..؟
أبوي : أنت صليت / بحنيه ولانه يعرف سعد حقاني ولايغلط؟؟
سعد : لا بروح اتوضىء وأصلي / يساند ظهره على الكنبه ..؟
أمي : حتى أنتي ياوليدي قومي صلي وأرتاحي لين يجهز الغدا !!
أبوي : أيه يابوك صلي وتعالي تغدي معي لاترقدين / يحط يده على كتفي ..؟
طيب / وقمت ..
دخلت غرفتي وتوضيت وصليت وبدلت وانا عقلي وقلبي بمكان ثاني , قفلت جوالي وحطيته فوق الدرج ورتبت شعري
وقبل لا أطلع من الغرفة درعمت علي رهف وضمتني بحيلها كله وسلمت علي وقالت بأذني : هو الخسران وربي !!
ضحكه مني وضحكه منها وطلعنا من الغرفة ؟؟
بالمطبخ قالت أمي أنها تبيني بعد الغدا بغرفتها , هزيت راسي ب طيب وكملت شغل مع رهف ,
سألت عن ناصر وأحمد وقالولي أنهم مع سعد ينزلون أغراضي من السيارة , ثواني بس وشفتهم معدين
بالعفش رايحين لغرفتي لحقتهم وأول ماشافوني تركوا كل شي بيدهم وجوني ..!
سلامهم وطريقته وحرصهم وكلماتهم تخليني أشوف الدنيا بخير !
ركلت أغراضي بزاوية الغرفة وتغديت مع أهلي وحاولت اسولف وأوضح أني بخير , رغم سب أخواني وشتمهم لخالد
وحقدهم عليه ..!
أربع ساعات من لحظة فراقي عن خالد , وبدينا نعد , مشغوولة فيه بشكل غير طبيعي , ودي أعرف
وينه وكيف حاله , أحس أني والله العظيم مفارقه روحي ,هذا الفراق اللي أجلته لـ ثلاث شهور , واللي وعدت نفسي بيوم
أني بكون قده ..؟


بيت عمي طامي ..*

وبمجلس الرجال تحديدآ .
عمي : ماله حق ياخذ زوجتك من بيتك !
طلال: أيه سعد غلطان وريم غلطانه بعد ليش تطلع معه/ يكلم عمي ومعصب ..؟
خالد: لا والله ماهو غلطان ومالومه اذا فكرنا فيها بالعقل رجال يعرف أن أخته متزوج عليها
زوجها وهي ماكملت شهرين أكيد بيسوي كذا وأعبر من كذا ..؟/ جالس على المركى ومشبك اصابعه ..؟
طلال: أنت اللي تقول هالكلام يالرجال والله لو أني مكانك لضربه / بصوت عالي ويأشر على خالد بستغراب !!
عمي: لاااااااا لا ولد العم مايضرب أفا بس ياطلال / بعتب !
طلال: قاهرني يابوي شف حال خالد / يناظر لخالد بحزن..؟
عمي : أنا وخالد بنروح العصر لعمه ونفهم السالفة / بهدوءء يقولها ؟؟
طلال: وأنا معكم /يرفع يده ؟؟
خالد: أنا ماني معكم بتروحون لعمي روحوا / وقف وطلع مع الباب ..؟
عمي: ياخالد .. لاحول ولا قوة الا بالله .
طلال: لحظه لحظه / يركض خلفه ..
خالد: أخلص ياطلال / بتذمر ..
طلال: أنت صاحي أبوي بيحلها تعال معنا لعمي محمد / ماسك يده وواقفين بالحوش قدام باب المجلس .!
خالد: لا / يصد عنه..؟
طلال: ليه خلاص بتترك ريم / بستغراب !
خالد: آآآآهـ ياريم / وكمل/ طلال أنا تعبان بروح أرقد ؟؟
طلال: ........./ واقف مكانه يناظر لخالد وهو يرقى الدرج طالع لبيته !

**

بصالة وأحنا جالسين أغمزت لي أمي وأشرت على غرفتها , وقامت وفهمت أنو الحقيني ,بعد دقايق من دخول
أمي لغرفتها وقفت وأستجمعت كل قوتي ولحقتها , فتحت الباب ودخلت , هاذي الجلسة خاصة جدآ , نفس الجلسه اللي قبل زواجي
بكم يوم , جلست قدامها وتربعت , وبدت تتكلم , وتتكلم وانا منصته لها وأطالع بعيونها وشعرها الاسود اللي مخالطه بياض , ووجهها
ويدينها.. والله العظيم أني كنت أتأملها ولا ركزت وش تقول , أنا في حالة نفسية متدهورة وهم مو حاسين , ماأبي نصايح ولا أستفسار
ولا عتب , بنام بحظن , أبي أحد يطبطب على قلبي ويقول بتتعدل الاوضاع لاتخافين , مر وقت وأمي تتكلم , على أخر
كلام أمي فهمت أن أهلي يشوفوني مظلومه ومالي ذنب بكل اللي صار..؟
قاطعت كلام أمي بــ :
يمه خالد أستاذن مني قبل لايملك وأنا واقفت علمي أبوي / وجهي بدون ملامح وصوتي على وتيره وحده لين خلصت !
صدق / قالتها بسرعه وبستغراب وتعجب ؟؟؟
هزيت راسي بــ أيه !
أمي: وليه ماعلمتينا حنا أهلك ولنا الحق نعرف منك ماهو من الغريب ؟؟
يمه الله يرضى عليك , أنا بكل الاحوال كنت مقررت أطلق من خالد بعد زواج أخواني عرفتوا قبل الزواج
وجاني سعد وأخذني وأنا مارفضت , خلاص الباقي خليه علي أنا أحل مشكلتي بنفسي ..؟
وقفت وسلمت على راسها وطلعت من الغرفة ..!

بغرفتي رميت بنفسي على السرير , وغمضت عيوني ..!
أسويلك مساج/ رهف فاتحه الباب وواقفه تبتسم ..!
أنا: ناظرت لها بنص عين وقلت: ماعرفتك وأنتي أخلاق .؟
رهف: ترى والله أحبك أخيتي مايهون علي أشوفك متضايقه / سكرت الباب وطمرت على السرير !
أبتسمت بس !
بدت تسوي مساج على قولتها وغصب عني بعد وهي ساكته اللي يعرف رهف زين يعرف أنها أذا سكتت يعني متضايقه
وحاسه بالوضع , طوولت تدلك جسمي وجاز لي الوضع وتخدرت , وكنت بنام صدق !!
فتحت أمي باب الغرفة وهي تقول: رهف أنتي هنا وأنا أدورك ..؟
رهف: يمه الصوت خليها تنام / تحسبني نايمه.؟
أمي: هي صلت العصر قوميها !!
رهف : لا ماصلت بتريح شويات وتقوم / وقفت مساج..؟
أمي: يالله قومي أنتي صلي وسوي قهوة عمك طامي وعياله دقوا بيجون لأبوك ..!
هي قالت عمك طامي وعيالها وأنا جلست على طوول وشعري منفووش وعيوني حمرا,
وقلت بصوت عالي ولاأرادي الله يستر !!
أستغربت رهف خوفي وقالت: ريمي ليه خايفه يابنت ؟
طالعت ل أمي اللي لسى واقفه على الباب وقلت : يمه لايكون يصير شي ..!
أمي: لا ماصاير الا كل خير أبوك وعمك موجودين تطمني / طلعت وسكرت الباب وهي تستعجل رهف بالقهوة !!
فزيت أنا ورهف وصلينا وعلى طوول على المطبخ , جهزنا القهوة وقلبي يرقع وخايفه خصوصا أن أخواني الثلاثه
لبسوا وجلسوا بالمجلس من الحين يعني الوضع مايطمن الله يستر ..؟
رهف أختفت لدقايق قبل وصول عمي وعياله , ورجعت وأنا وأمي جالسين بالصالة وننتظر
وهي تقول:خالد ماجا معهم بس عمي وطلال ..؟/ جلست جنبي وحطت يدها خلف ظهري ..!
وقفت يمه بروح أنام طيب لاتصحوني ..!
دخلت وقفلت الباب , ورميت نفسي على السرير , لما قالت امي أنهم جايين توقعت خالد بيكون أول واحد
وأنه هو اللي جايبهم , وبما أنه ماجا معهم مايهمني وش بيصير ,ولا وش بيقولون ..؟




أنتهى البارت ..

البارت السادس عشر..

مشكلتي أني لاأتجزأ هكذا أحضر باندفاع كبير, أهب مشاعري دفعة واحدة أعطي الأشياء أحجامآ تفوقها ,وحين أسقط
لأأسقط متفرقه ,أسقط بثقلي كله ..؟!


( هقوة وخابت )

نصيحه لكل شخص حب , لاتتعشم كثير وتعطي الامور أكبر من حجمها ..!!

أكلني التفكير , بغرفتي والضوء طافي وبرا ماسمع صوت ولا أعرف وش صار بين عمي وأبوي وأخواني , أتقلب
على فراشي , ووضعي مزري والله العظيم , أسكر اذوني بوسادتي وأرجع أشيلها , أطالع هناك لفوق مكان ماحطيت جوالي ,
فكرت أروح أفتحه يمكن خالد أرسل ولا دق , يمكن وضح لي السبب اللي ماخلاه يجي , ,ياربي أنا متى وصلت حالتي لـ هنا ..؟
أتعس أحساس بالدنيا أنك ضعيف ومالك حيله, أن أمورك يدبرها غيرك , وحلك وربطك بيد الغير, حتى لو كانوا أقرب الناس ,
ومن حظي الردي أن كل الاشياء اللي قريتها بحياتي عن القوة , والوقوف مجددآ , وعدم الاستسلام لضعف والايجابيه ,براسي الان !!
على صوت مؤذن مسجدنا للمغرب جلست على سريري !
تنهدت , أستغفرت , قريت الاذكار , ضميت وسادتي بقوة , نزلتها ووقفت ..
توضيت وصليت وجمعت شعري وطلعت لصالة ..؟

مافيها أحد مليون بالمية أمي ورهف عند أبوي وأخواني بالمجلسس , شفت جوال أمي على طاولة الصالة ,
أخذته ودقيت على ناصر اللي بالمجلسس ؟
شلته ل أذني وانا منزله راسي وماسكته بيدي اليسرى ؟؟
ناصر : هلا قلبي ؟؟/ فتح الخط على طوول ..؟
أنا: ناصر أبي الصيدليه اذا ماعليك أمر / حاولت أجمل صوتي ؟؟
ناصر : أبشري بس تعالي تقهوي معنا كلنا بالمجلس وبعدها أوديك / بكل حنيه يتكلم !
أنا: لاياروحي مصدعه بنام ..؟
ناصر: ي الله البسي عباتك وتعالي ..!!
قفلت ونزلت الجوال ورحت أخذت عباتي ولبست شوزي وسيده على مجلس الرجال , ولاني مابي أسمع شي ,وقفت على الباب الخارجي وناديته
بصوت عالي وطلع لي , وهو يقول:
ناصر : ريم أنتي تعبانه أوديك للمستشفى / يحط يده على جبهتي من خلف النقاب ..؟
أنا:حرارة باخذ علاج وبتخف / ماكان في شي والله ..؟؟
ناصر حنون وحنيته توضح بمداراته للي معه , وهاذي الحنيه أحيانا تكسرني زيادة وتضيق خلقي , وكلامه ومواساته لي
يخلي دمعي قريب قريب رغم محاولاتي بأخفاءه ..؟
نزلت الصيدليه وأخذت علاج حرارة وبدون علم ناصر حبوب منومه , وطلعنا ...!
فالبيت أنتظرت لين صليت العشاء وأخذت حبه , ورحت لرهف بالمطبخ وسحبتها على جنب وبلغتها وحرصت عليها ماتعلم أمي ,
ولا تعلم أحد من اللي بالبيت , وعلى هواشها لي رفعت يدي وقلت : تصبحين على خير ...؟
دخلت غرفتي , وقدام تسريحتي حطيت كريم ورشيت عطر وطفيت الضوء ورميت بنفسي على فراشي , ضميت وسادتي
ونزلت دموعي أربع أربع بدون مقاومه مني وبدون صوت وعلى هالحال نمت ..؟؟

اليوم الثاني *

3 الظهر ..
رهف جالسه عند راسي وتضرب فخدي بيدها بقوة وهي تردد أسمي بشكل متواصل , فتحت عيوني بشويش ورجعت غمضتها وأنا أحط يدي
عليها وأقول : طفي الانوار ؟؟
رهف : لا يامجنونه أمي تسأل عنك من البارح تقول وش هالنوم قووومي/ تشيل البطانيه عني ؟؟
أنا: رهف خليني بناام / أخبي وجهي تحت المخده !
رهف: لا صحصحي ../ سحبت المخده عني ..!
قفزت لراسي أحذاث أمس كلها تذكرتها بالترتيب , ياه راسي بينفجر , مسكته وطولت أضغط عليه وهي جالسه تنتظر عندي
نزلت رجولي ووقفت حبه حبه ,ودخلت دورات الميه أخذت دش بارد وأنا خابره رهف ترتب سريري وغرفتي ..!!
طلعت وصليت ولبست وعدلت نفسي ورحت لهم بالصالة , ينتظروني على الغدا وواضح لهم من عيوني المنفخه ووجهي أني ماني بخير ,
دخلت بينهم وتغديت معهم وكان كل الكلام بعيد عن خالد ؟؟
بعد الغدا نظفت مع رهف المطبخ , ورجعت غرفتي فتحت الشبابيك وبديت أرتب أغراضي وأنا مقرره أنو صار وقت أني أتكلم مع
أبوي وأخواني وأقول اللي عندي وأسمع اللي عندهم وأعرف أنا وين بالضبط ؟؟؟

خلصت بعد العصر ..؟

وطلعت لرهف وأخذت القهوة منها ووديتها لأبوي وأخواني بالمجلس ..؟
بهذاك المجلس الكبير وبصدره جالس أبوي , وعن يمينه أحمد وعلى يساره سعد وناصر على نفس المركى ,
وأنا هنا على الباب وبدخل بخطوات كلها ثقه وبتكلم عشان مايجي يوم وأندم على أني ماوضحت ..؟
دخلت والله وانا اقصر الخطوه وأرفع عيوني لابوي ..
يامرحباا / صوت أبوي !

أبتسمت ..

نزلت القهوة وجلست بينهم , سحب احمد القهوة وهو يحلف أنه بيصبها , أبتسمت له وأنا براسي معركه ولاعندي
نيه أرفض ولا أحلف عليه ..؟
بمجرد ماعدلت جلستي وصب أحمد أول فنجال لـ أبوي جات أمي ورهف ..؟
جلست أمي جنب أحمد ورهف جنبي وصارت كل العيون علي وواضح أن عندي حكي ولازم ينحكي ..؟
أخذت الفنجال من يد أحمد ونزلته ...؟
أنا: أبوي أنا كان عندي علم بزواج خالد من ليلة زواجي /رميت هالقنبلة وتعقدت حواجب ابوي وركزت النظر
عليه مابي اشوف ملامح أخواني ولا أمي ..؟؟
أبوي : أفـــا ..

لحظة صمت لو تطيح الابره سمعت صوتها !!!

ولان هاللحظه أن طالت ماعاد عرفت أقول شي بعدهاا قلت وبصوت جهوري :
أيه قال لي خالد ليلة الزواج أن خويه تعبان وموصيه على أهله ومزوجه أخته !!
وأنتي رضيتي / صوت سعد ..؟
أبوي: وليه ماعلمتيني من ليلتها / ملامحه ماتطمن !؟
أنا : لو علمتك يابوي ماخليتني أجلس عنده ولا أخواني رضوا وانا ماسلمت من كلام الناس ؟؟/ كنت أحسب لكل كلمه حساب !!
/ كملت / ثاني شي خالد قبل لايملك شاورني وانا وافقت ..؟
هنا حسيت بأنزعاج أخواني ولو ابوي مو بهالجلسه صار شي ثاني ؟؟؟
أمي : حتى أنا ماعلمتيني / بعتب .؟

لفيت عليها ..!

الله يرضى عليك مابي اشيلك هم / ابتسمت !
أبوي ساكت حتى قهوته تركهاا ..؟؟؟؟؟
سعد : ريم ترى اللي سويتيه غلط واكبر غلط والمفروض اول من يعرف أهلك .؟/ تغيرت نبرت صوته وبدا يرتفع ..؟
أنا: غلط لو أني عارفه قبل لاأتزوج ورضيت فيه , بس بعد ماصرت ببيته ماني براجعه لبيت ابوي
بعد ليلة من زواجي ومعرضه نفسي وأهلي للقيل والقال ...؟؟/ بحزم !
ناصر : أنتي وش عليك من الناس عساهم تكلموا لبكرة / قاطعته/ ...
أنا: لاياناصر فكر فيها بعقل حنا عايشين بين الناسس ؟؟./ رافعه يدي !!؟؟
أحمد: عين العقل والله / يأشر علي ..!
أبوي : وخالد دامه مقرر يتزوج ليش جاني يخطب / ندمان ..؟
أنا: أبوي خالد ماقصر معي الشهاده لله , علمني بالوعد اللي عطاه لصاحبه بس اللي فهمته ان عمي طامي كان رافض
أنه يتزوج الا من بنات عمه .../ هنا بالجهه اليسرى بقلبي بركان يغلي ..؟
رهف تتحلطم بصوت واطي والله أعلم أنها تدعي ...؟
سعد : أبوي تراني بدق عليه يروح للمحكمة بكرة يطلق قبل لارفع عليه قضية / يتكلم بحرقه !!
أبوي : وش رايك ياريم موافقه / بهدوء ..؟
أنا: لا لاني أصلا متفقه معه على الطلاق بدون محاكم / قلتها وأنا أناظر بطرف عيني لسعد وخايفه من ردة فعله !!
سعد : يضرب بيدينه فبعضها بقوة ؟؟!!

بلعت ريقي ..؟

أمي : تعوذ من الشيطان ياوليدي / تكلم سعد!؟
أحمد: ريم الغريب أننا ماحسينا ولاوضح أن بينكم مشاكل ..؟
ناصر: لايكون قلل احترامه معك بس / بتهديد !!
أنا: لابالعكس ماشفت منه الا كل خير ..؟/ أستحيت وانا أقولها !
أبوي: جالس ويسمع وهو تفكيره بعيد ..!
سعد: أبوي وش رايك متى نكلمه / مركز مع ابوي وينتظر وش يقول !!
أبوي : ريم هو راضي أنه يطلقك / كان سرحان وفجأة سأل ..؟
أنا: لا رافض .؟
ابوي: أها / وسكت .
بدت الاصوات تتعالا والكل يتكلم ورهف تتحلطم بصوت واطي , واغلب حلطمتها علي وليش ماقلتي لي أختس الوحيدة
على قولتها , وأمي نظراتها تقول أنه مو راضيه علي وحاز بخاطرها الموضوع ..؟؟
على أخر الجلسه رجع سعد وسأل أبوي عن الحل وهو يلح على ابوي بالسؤال !!!
أبوي: ريم معها حق يوم صبرت بنيتي عاقل ( يبتسم لي ) وكمل/ والغلط ماهو من ريم ولا من خالد الغلط من عمك
طامي المفروض انه علمني قبل لايخطب لولده ..؟ !!
سعد: حتى خالد غلطان / حاقد عليه ويبي الشر ..؟
أبوي : خالد جاني هنا وعلمني أنه ملك بس ماقال لي السبب , وسكتت لانه قال ريم موافقه ؟؟!!
خلاصة حكي أبوي أنو ماراح نكلم خالد الا بعد زواج العيال ونذكره بالوعد واذا ماطلق لكل حادث حديث !!؟؟
وأقنع أخواني خصوصا سعد بصعوبه ولاتركهم الا هو متاكد انهم ماراح يسوون شي قبل هالشهر !

* رضيت على نفسي أني تكلمت مع أبوي واخواني وصار الدور على امي اخذتها على جنب وشرحت لها
الموضوع بطريقتي وبشكل مختصر وركزت على اني مابي أنكد عليها ولا أشيلها هم ولان ميمتي حنونه وتقتنع بسرعه
رضت ولا تركتها لين دعت لي ورضت علي ..؟

أراضي وأتكلم وأقنع وأفسر وأروح وارجع وأنا قلبي معه, وأفكر فيه *

حلفت على رهف أن مايسوي العشاء الا انا , ومارفضت بالعكس طايره من الفرح , دخلت المطبخ بعد ماصليت
العشاء وامي وابوي بالحوش واخواني كلهم برا ورهف تتابع بغرفتها , وبديت اشتغل واشغل نفسي , جهزة العشاء ولا
طلعت من المطبخ صرت أرتب الادراج والثلاجه وطاولة الطعام وبيني وبين نفسي أستغفر ..؟
على 10 وبعد ماجتمعت العائلة حطيت العشاء ..؟
نظفت ورتبت ودخلت غرفتي بكوب مويه , كريم كالعادة وعطر وطفيت النور وعلى فراشي وقبل لاتغطى سحبت
الحبوب من تحت الوسادة وأخذت حبه وشربت كوب المويه وتغطيت زييين ونمت ..؟


بيت عمي طامي *

بالحووش بعد المغرب *
طلال : يارجال لاتكابراذا متضايق قل متضايق بس لاتسكت / يكلم خالد ..؟
خالد : ........./ يلف السبحه مره يمين ومرة يسار !!
طلال: خالد روح لعمي محمد يمكن ترتاح وتفهمه بنفسك ؟!/ متربع وجالس قدامه!
خالد: لا ..... ....
طلال : أسمع ياولد هالحال مايرضي أحد , من أمس وانت ساكت وتهوجس لاتاكل ولا تشرب, ووجهك يقول أنك مارقدت أما
رجال تتحمل وتصبر الين ينحل الموضوع , ولا خلاص طلقهاا وخطيبتك موجوده أصلا ..؟
خالد: أرجع قولي وش صار أمس بالضبط / يعدل جلسته ؟؟
طلال: لاحوول ولاقوة الا بالله هاذي عاشر مرة أعيدها / يحط يدينه على راسه ؟؟؟!
خالد: بتهرج ولا أقوم بس / بزعل !
طلال: أجلس أجلس بعيد وأمري لله ....
خالد: أســلـم / بتركيز ..؟
طلال: ياطويل العمر أول ماهرج أبوي عمي محمد بموضوع زواجك من تهاني وأنا ماكنا راضين , وريم ماتستاهل الا
كل خير وخالد ماغلط معها بشي أستشارها ووافقت وتزوج الرجال ,/ قاطعه /
خالد: أبوي طلع ريم الغلطانه بهرجه هذا / بندم يقولها !!!
طلال: كمل/ ووعمي محمد بعد ماسمع كلام أبوي للاخير قال : بلغوا خالد يجيب ورقتها ولا خلوه يجيني أنا أبلغه بنفسي
آما سعد كان الشرار يطير من عيونه وكل شوي عمي يسكته مايبيه يتكلم وناصر واحمد نفس الحالة الله يعينك
على مواجههم / يضحك ..؟؟
خالد: .. ... .... .... / يفكر !!
طلال : أول مرة أشوفك بهالحالة / بستغراب ؟
خالد : وقف ومشاء يم سيارته .../ بصمت !!
طلال: ولد خالد وين رايح / بصوت عالي ؟؟
خالد: والله مدري وين رايح / يرفع يده بــ مع السلامه!!!
طلال : أنتبه على نفسك الله يستر عليك ..؟
شغل السيارة وحرك ومشاء وهو يرفع يده مره ثانيه لطلال ...!

**

اليوم الثالث للفرقا ..*

صحيت بالغصب على صوت أمي وهي تعاتبني على تأخير صلاة الظهر , وتعاتب على نومي اللي صاير ثقيل من تالي ,
توضيت وصليت ووقفت على باب غرفتي , أنادي امي وابلغها أني صليت وبرجع أنام ..؟؟
وفعلا رجعت نمت وانا والله مدري الساعة كم بس واضح انه بعد الظهر ,كملتها نوم لقريب المغرب , وصحيت بالغصب
للمرة الثانيه..؟؟؟
(صحيت أبكي متخيلين )والله العظيم هذا اللي صار , أنهرت وقمت بالقوة وسكرت الباب بالقفل ورميت
نفسي على السرير وبكيت من قلب قلبي , على أحلامي بكيت , على ترميم نفسي من جديد بكيت , على الفرقا
بكيت , حسيت أني بدائرة مو عارفه أطلع منها ..؟
راسي ينبض بقوة , وأحس بغثيان وجوع وحيلي منهد وكل اللي ابيه الحين خبر منه بعرف ردة فعله ,
بعد ماطاح اللي براسي وخلصت دموعي قمت ووقفت على المغاسل , وأنا أتامل وجهي ؟؟
ضميت يديني تحت المويه الباردة ورميتها على وجهي وكررتها بصحصح , بحس أني بخير , صليت وأنا مرهقه
وجسمي كله منمل ورجعت لفراشي ..!!
غطيت جسمي الا راسي ولفيت على يميني وغفيت , ماطولت ربع ساعة بس وفتحت الباب لان رهف قربت تكسره ,
رجعت لفراشي بعد مافتحته وتغطيت ..
دخلت بصينيه أكل وعصير ومويه وهي تفتح الباب بقوة برجلها ,...
حمدلله على السلامه / مقبله على السرير ..
أنا: أبتسمت رغم وجهي الباهت وشفايفي اليابسه ..؟
رهف : قومي أكلي لاتخوفين أمي / نزلت الاكل على رجولي المغطاة باللحاف وثبته وراحت لشباك وفتحته ..؟
أنا: لايارهف برد / كنت صادقه أحس ببرد وقوي بعد ؟؟
رهف : نعم يختي مكيف غرفتي شغال هالحزة اي برد ؟؟/ لفت وجلست مقابله لي على الطرف الثاني لسرير !!
طلعت يدي اليمنى من تحت اللحاف وأخذت الملعقه وسميت باكل ...؟
أول لقمة وماقدرت أبلعها وشربت وراها عصير / تحت تهديد رهف ؟؟
جبرتني أكل رغم أني احس بستفرغ وقلته لهاا ..؟
بعد ماخلصت شالت الصينيه وطلعت ..؟

رجعت بعد ثواني بكوبين شاي ..؟

تربعت نفس المكان الاول وأخذت كوبي وضميته بين يديني , وأنا أنتظر رهف وش بتقول ..!!
رهف: خالتك أم خالد دقت على أمي العصر / تطالع بعيوني ؟؟
أنا: وش تبغى / أناظر بهالكوب اللي بين يديني ..؟
رهف: تعتذر على اللي صار وتقول مانبيهم يتطلقون والله أنا نحب ريم ومانبي نخسرها ../ تمط الكلام؟؟
أنا: أها .../ تنهدت !
رهف: وعهد ترسل لي من امس والله وتسال عنك تقول جوالك مقفل !؟؟
أنا: ياعمري ياعهد ..؟
رهف : ريم أنتي تعرفين حريم جماعتنا , جوال امي من أمس واليوم ماطفى , الكل يسأل وأمي متضايقه
من الوضع , لاتزودينها عليها أنتي بعد قومي , عارفه نفسيتك وتعبك بس تحاملي على نفسك وخلي أمي
تشوفك بخير عشان تطمئن ..؟/ بترجي تقولها !
دمعت عيوني ورجعت لها الكوب وأنا أقول : بنام أذا قمت يصير خير ..؟
خذت الكوب ونظراتها كلها أستغراب وطلعت وطفت الانوار ..

بقيت بفراشي ساعتين زيادة , وقمت وأنا كلام رهف براسي , غسلت وغيرت وعدلت شعري وتعطرت
وجربت أبتسم قدام المرايه وفتحت الباب وطلعت ..؟
رحت ل أمي وسولفت معها وضحكت , وأكلت وتقهويت , وسويت كل اللي مطلوب مني ,
ورجعت غرفتي بأختصار !!؟؟


أخر أيام ضعفي كان اليوم الرابع , واللي ماتذكر فيه كثير ألا دخوول رهف علي وهي تقول :
رهف : ريم الحيوان سافر لسطام / جوالها بيدها ووجهها مايطمن ..؟
أنا: مين الحيوان/ واقفه قدام سريري أرتبه ..؟
رهف: خالدك الله ياخذه / نغزني قلبي ؟؟
أنا: أستغفر الله / ردآ على دعوتها عليه ؟؟
رهف: شوفي الهنوف تقول أن أخوها وصله للمطار بيسافر لسطام / الهنوف بنت عمي !!
أنا: حسيت بدوخه وأنه بيغمي علي , وجلست ويدي ترجف !!
رهف: وأنتي هنا حزينه عليه مايستاهلك وربي أصحي / واقفه قدامي ومتخصره ..؟
أنا: رجعت لها جوالها , وشبكت يدين ببعضها وضغطت عليها بقوة وأنا أقول:
والمطلوب يارهف وش دخلني فيه يسافر ولا عمره ماسافر ..؟؟
رهف : والله لعلم سعد / كانت بتطلع من الغرفة ومسكتها بالقوة ..؟
وقفت وأنا أقووول: بنت لاتصيرين سخيفة وتدورين المشاكل وش عليك منه سافر ولا بطقاق ..؟/ رافعه حاجبي
وممعصبه عليها من قلب ؟؟
رهف : سطام وين يتعالج / سألة بسرعه وهي تناظر بشاشة جوالها ..؟
أنا: مدري .. / معقده حواجبي ؟ وكملت / رهف والله العظيم أن عرف سعد منك لتندمين فاهمه
خليك محترمه وعن نقل الكلام , ولاعاد تتبعين أخباره بحريقه يسافر وين مايبي ؟؟

* مر هاليوم وأنا منتبهه لرهف وأحرص عليها أن مايزل لسانها وتقول لأحد , مر هاليوم كأكثر الايام
تداولآ للاخبار وسوالف الحريم اللي تقرفني ( عذرا على اللفظ ) أنا وحده ماحب مجتمع الحريم
وكل مرة عن الثانيه تزيد قناعتي أنه أسواء مجتمع , والدليل أنو الكل يدق ويسأل ويقول
أنه سمع أن سبب الطلاق كذا وكذا , وفلانه تقول فلانه الاخر سمعت كذا وكذا ,

و و و و ؟؟

لذلك دايمآ أعيد وأقول جمعت الحريم وسوالفهن غير مفيدة أبدا أبدا , ولانستفيد منه شي الا كيف نتعلم
نذم , ونشتكي , ونتبكبك و, نسب , ونشتم , ونحش , وأخر شي نطلع بذنوب أكوام أكوام ....؟؟

قفلت جوال أمي بدون علمها , وعوضتها بالجلسه معها والسوالف ,
ذكرتها بسوالف أخواني واحد واحد ومواقفهم ( وكنت أضحك ) أخذت أمي لحياتها الاولى الحياة
اللي تحبها عصرة ذاكرتي قدر الامكان وماتركتها لين هي بنفسها صارت تسولف
عن مواقف اللي ماأذكرها وأنا صغيرة وتضحك , وأبوي وووش كان يسوي وأول بيت لنا ومدرسة سعد
كأول طفل بالعايلة يدرس وكيف كانت تحفظه السور والاناشيد , ومين أشطر واحد فينا زمان , ومين أكثر واحد يسمع
الكلام , وفرحتها في لاني البنت الاولى , وهدية أبوي لها .. وجدتي أم أمي وكيف كانت مصره تسميني على أسمها
وسالفة أسمي وليه أختاروا ريم واللي كان بالبداية الريم , ورهف وشطانتها ,
وأهتمامي أنا برهف وعلى قولت أمي مسويه كبيرة عليها وأشيلها وأهتم فيها والبسها من لبسي يبا الفيت ,
ومن هالحكي اللي يبعد أمي عن اللت والعجن اللي يجيب الهم والغم ..؟

تفننت بالعشاء هاذيك الليلة , وطووول الليل كنت مبتسمه ,اعلق على اللي رايح وجاي ,
ماأنسى حرص سعد على أن ناصر يرجع من الاستراحه بدري ويتعشاء معنا وهو يقول
لايفوتك ريم مسويه عشاء على كيف كيفك ..؟؟؟
وماأنسى سؤال أمي اخر الليل عن جوالها وأستغرابها أنه مادق الليله ,
وتصريفتي للموضوع بسالفه تحبها

و و و ..!

نمت هاذيك الليله بدون حبوب ,ويمكن مانمت , المهم أن الليله عدت بطووولها وعرضها بدون حيلة مني ,
ماصرت أتذكر من خالد ألا سفره بهالظروف , وأذا ابغى أحلل الموضوع بالمنطق بقول : خالد شاري صديقه وقربه ...؟
وهالمنطق يضايقني ويقسي قلبي .

* *

باقي شهر على زواج سعد وناصر , بديت أتفقد ويش ناقص على البيوت , والاثاث ,وتجهيز القاعة والحجوزات , وفستاني
اللي لسى مافصلته ,وأمي ورهف وفساتينهم ووش صار عليهاا , أشغلت أمي وأنا أتذكر وأذكرهم بالمدة الباقيه ..؟
شلت كل الشغل اللي كان على أمي , وصرت كل بعد يوم أنزل مع واحد من أخواني لسوووق ولا أرجع ألا متأخر , أتعشاء
وأخذ دش وأنام , واليوم اللي بعده أطلع لشقق فوق أرتبها وأنسق وأزين ..؟
خلصت شغل أربعه أسابيع بأسبوعين كل هذا عشان , أنسى وأنفذ وعدي لنفسي ..!!
مرت أسبوعين الاسبوع الاول كنت أنامه بالحبوب , والاسبوع الثاني ماكنت القى وقت عشان أنام أصلا ,
ومرت الايام ولساني عايشه ومامت من فراقه , أما هو فكان أخر شي عرفته عنه سفره واللي للحين بخاطري ,
ورغم مكالمات خالتي أم خالد لـ امي الا اني ماسألت عنها ولا كنت أبي أعرف سبب هالمكالمات ..؟
جوالي على تقفيلته الاولى , و اللي معاي حاليا رقمي القديم!!

تجنبت كل سالفة تجيب طاريه , وكل جلسه أعرف أنه محور الحديث فيها تفاديتها ,
وضحت لهم وبصريح العباره أني مابي أعرف عنه شي , وخصوصا رهف مليت وأنا اردد
مابي اسمع عنه شي تفهمين ..؟





أنتهى البارت ..

البارت السابع عشر *



حين نقول وداعا
هل نحن صادقون بملء المعنى ؟؟
أذن لماذا بكينا حين رحلنا وودعناهــم !!

...

أنا ياسادة قارئه جيدة في علم النفس , وبهالعلم ماعمري لقيت شي ينسي..
كذا بقولها وهي اصلا كذا وأبي تفهمونها كذا شلون أنسى , وكيف , ومتى , ووين وبأي كتاب وأي علم؟؟
أبي خطوات واحد ثنين ثلاثه وأنسى ,بشيله من قلبي بقتلعه , بفتح وأغمض أضحك ,أكل وأنام...
زمان لما كنت أحلم كنت أنام وأنا أتخيل أسرتي الصغيرة اللي لسى ماعرف الطرف الثاني
فيها المهم أني كنت أحلم وأدعي يتحقق , بليلة وربكم صحيت وأنا أتحلم فيهم ,
(بمين تحلمين ؟؟)بعايلتي الصغيرة زوجي وأطفالي ,
مو قلت لكم حالمه زيادة عن اللزوم أفكر بمرحلة أني أصير أم قبل لاصير زوجه.
يؤسفني أني تأملت وماكنت عقلانيه أبدا !

*على الوعد وكل يوم أثبت لأهلي اني على الوعد قلت لهم بنساه ومرحلة وعدت وحتى أسمه ماصار يأثر
وأخباره ماتهم ,وبالعكس مـاأتمنى له الا كل خير مع تهاني , ويبقى ولد عم , وأهله أهلي , وأنا عايشه والحمدلله ..
وعندي اللي يهمني غيره , وبكمل دراستي اللي موقفتها..
وماصار الا كل خير , والحياة مستمره .

وأنا قوية اصلا !!؟

هالحكي أردده على نفسي بين كل لحظه ولحظه , وعلى قولتهم حكي ماخوذ خيره , سبوعين مضت أردده
وأعيد وأزيد فيه بدون فايدة , زيي زي أي بنت مخذولة وتحاول تلقى طريقة تعزز لنفسها وتقويها ..!

* *

ماصار شي جديد , عدت الايام بين السوق , والمشغل , وبيوت أخواني , مرت الايام سريعة
على كل اللي بالبيت واللي ينتظرون الزواج , كان أفضل هاذي الليالي ليلة ماخواني جابوا البشوت
يجربونها قدام أمي بصالتنا وأبوي جالس وعصاه بيده الايسرى ونظارته الطبيه وعلبتها قدامه على الطاولة ,
ورهف واقفه بنص الصالة وتصور وسعد وناصر كل واحد بشته بيده ويتكلمون
عن لون الشماغ المناسب والكبك والسبحه و(الجزمه الله يكرمكم )
أحمد كانت مهمته تعديل البشوت عليهم بعد مالبسوها وأبوي ينقد ويوجه ويمدح بنفس الوقت ..!
هاذيك الليلة شفت أمي نورة جميلة ,شفت نظرات الفرح بعيونها , تتعامل مع كل واحد فيهم
وكأنها تتعامل مع قطعه من قلبها ملامحها مختلفه عن كل مره شفتها فيها فرحانه ,
كانت أخف من الريشه والله العظيم , كانت بنت ال20 سنه , أختفى ألم العظام
وصارت تتحرك بلمح البصر , تنط هنا وتنط هنا , وتضحك من أعمق نقطه بقلبها , سوالف رهف وتعليقاتها اللي أمي
كانت تزرى عليها اليوم تظاهي كل حكي الحكمه عند أمي , أكثر شخص فرحان أمي أكثر من المعرسين أنفسهم ..؟
حسينا أن ببيتنا عرس فعلآ هاذيك الليله ..!!

قبل 10 أيام من الزواج *
كان موعدي أنا وامي ورهف بالمشغل طلعت من هالموعد بأني قصيت شعري الطويل لين نص
ظهري قصه متساويه وصبغت , غيرت رسمة حواجبي , مساج وحمام مغربي شالة كل التعب اللي بجسمي ,
منكير وبدكير حسستني بأنوثتي من جديد , رجعت البيت راضيه عن نفسي رجعت متغيره نفسيتي حبتين ,
بديت اتعود وأستقر ...؟
بالليل وبعد مارجعت لغرفتي وبيني وبين نفسي قررت أفتح جوالي المغلق , وكان هالقرار كفيل بأن
قلبي يرجع يدق مره ثانيه , وبطريقه غبيه , أخذته وقفلت الباب زين وجلست على سريري..؟
براسي كل الاحتمالات , رسايل منه , مكالمات بعدد مهول , تخيلت أنه يدق على الجوال من هذاك اليوم ,

شطحت بتفكيري بعيد ...!!

نفس عميق ودخلت الرقم السري للبطاقه ..
عيوني ماترمش والله, قلبي يرقع بصدري, يديني ترجف ,تأكدت من علامة الابراج فوق قبل لا أفتح الرمز السري ,
حتى جوالي للحظه حسيت أني فاقدته , سحبت الرقم السري وفتح , شلت يدي اليمنى وبعدتها وأنا اشوف رسايل
الواتس فوووق ..!
دخلت على الواتس 15 رسالة , كلها بأسم , دورت الرقم اللي بدون أسم , صرت أسحب الرسايل اللي ماتهمني ,
هناك بالاخير رقمه , أبتسمت , ولا رساله ...؟
طلعت رحت للهاتف بشوف جاني موجود يعني دق ولا لا بعد, برضوا مادق وكانت أخر مكالمه له قبل هذاك اليوم ؟؟
ياه ياكبر العشم لما قفلت الجوال وأنا أقول بيزعجني بالاتصال, حذفت الرقم وحذفت الرسايل كاردة فعل على
عدم أتصاله , وماأنكر أني بكيت والله بحرقه ونمت وأنا أبكي ؟؟؟

(بعد يومين )..

الساعة 7 المغرب ..
صليت وأخذت جوالي ورحت غرفة أمي تربعت على سريرها وأنا أنتظرها تخلص صلاة عشان أختار
معها النقش اللي بتنقشه بعرس أخواني , جالسه ومركزه مع الرسمات وأشوف ايها تناسب يد امي وتكون فخمه ..
حاطه يدي على خدي وجوالي باليد اليمنى وأقلب ...!!
مرت 10 دقايق وأنا على نفس الوضع ..!
بالصالة أبوي وأخواني ورهف تصب عليهم القهوة , صوت الاستديو الرياضي اللي قبل المباراة واصلني الى هنا ,
وتحليل أخواني للمباراة اسمعه حرف حرف ,وضحك رهف مغطي على الاصوات كلهاا ..؟
جرس الباب فالمرة الاولى ماأنتبهت له , مانبهنى ان الباب يدق الا تعازم أخواني على من يفتح الباب
والكل منهم يقول قم يافلان أفتحه أنت , لين صاح ابوي فيهم وأتوقع أنهم راحوا الثلاثه يفتحونه بعد
التهزئه اللي جتهم ..؟

خاااااالد برااااا ..؟؟؟؟
رفعت راسي / صوت أحمد !!
منهوووو / صوت سعد !!
طفى التلفزيون أو أنكتم الصوت ...؟؟
صمت لثواني!
قفلت جوالي ورميته وأنا أطالع بأمي اللي تنزل جلال الصلاة بسرعه وتوقف !!
طلعت لصالة ووقفت وطلعت معها وظليت قريبه من باب غرفتها ومتمسكه فيه لاارادي !
تساند أبوي على عصاه ومشى بخطوات ثقيله بتجاه المجلس والباب الخارجي , أما أخواني الثلاثه فكانوا يتسابقون على
الباب الخارجي ..؟
لحقت أمي ورهف اللي راحوا لـ السيب القريب من المجلس بيعرفون وش بيصير ..

بالحوش ..

عساك طيب ياعمي / بعد ماسلم على راسه ..
أبوي : بخير حمدلله حيالله خالد / بصوت هادي!!
بشروني عنكم يعيال عمي / بعد ماسلم على أخواني ..؟
كلهم بصوت واحد: بخير !
خالد : عمي بينا موضوع وأنا جاي عشانه / صوته واصلني داخل البيت !!
أبوي : حياك الله أقلط !!
أخواني مااسمع لهم صووت !
أشرت أمي لرهف أنها تسوي قهوة , وبيدينها الثنتين قالت لااااااا !
الا ان امي جبرتها تروح تسوي لهم قهوة ولاني مابي اسمع وش يقولون رحت معها للمطبخ ,
وكنت أدعي يارب مايصير شي يكبر الموضوع زيادة؟؟

*
بالمجلسسسس .

أبوي: وش الموضوع اللي بينا يالخالد / بعتب ..
خالد: زوجتي عندك / متربع والسبحه بيده ويلعب فيها!!
سعد : مالك عندنا زوجه / جالس على رجل وناصب الثانيه ومعقد حواجبه !!
خالد يلتفت له : الكلام موجه لـ عمي أنت أطلع منها / بنبرة حاااادة !!
ناصر يمسك يد سعد ويأشر على أبوي ( يعني أحشمه) !!
أبوي: ريم ماتبيك / بصوت عالي ؟
خالد: أنا أبيها خلني أقابلها وبعدها يصير خير ..؟/بهدوء ..
ناصر: خالد أنت ولد عمنا ولانبي نتردى فيك البنت طالبه الطلاق طلق والوجه من الوجه أبيض / يحاول يتحكم بأعصابه !!
خالد: عمي بنتك ماني مطلقها لو تجلس ببيتك 10 سنين أنا شاريها وشاري قربك / يلتفت لابوي ..
سعد: أنت ماتستاهل ريم بعتها عشان صاحبك وأخته / بعصبيه !!
أبوي: ياخالد الله يبارك لك وبنتي تقول أنكم متفقين تنفصلون من قبل هالمشاكل كلها ..؟
خالد: عمي قصر الكلام اللي بيني وبين خويي مايخصكم (يرفع يده) وريم خلني أقابلها وبعدها قلت لك يصير خير !!
سعد : أبوي بنادي ريم عشان يقتنع انها هي اللي تبي الطلاق ويطلق / وقف ويناظر فيه !!
وقف ناصر وأحمد وطلعوا مع سعد برا وجلسوا 10 دقايق يهدونه ,,.!

(بالمطبخ )

واقفه ومساندة ظهري على طاولة ومكتفه يديني ببعضها وفكرة توديني وفكره تجيبني !
وفجأة دخلوا الثلاثه ..؟
نط سعد بوجهي وهو يقول:
ريم هالخالد يقول بقابلها أول شي واذا تبي الطلاق أطلق / يحاول يشرح لي بسرعه!!
ناصر: أيه ياقلبي القرار راجع لك / يمسك يدي !!
أحمد: أذا ماتبين تروحين عيي وأنا أقول لبوي / بحنيه !
رهف ماسكه أبريق الشاهي وواقفه خلفهم وتقول: ياويلك >> حسبي الله !!.
رغم شرحهم الكثير واللي يحاولون يفهمنوني من خلاله أن الطلاق واقف على هالجلسه يعني اذا ماتبين ترجعين له
قوولي له أتركني , الا أني أصتصعبتها أني أقول اتركني وروح , حسيتها ثقيله أبيه يتركني بدون ماقول
(أحساس غبي)!!
أمي تدخلت فالموضوع وأخذتني على جنب وقالت قابلي زوجك وأسمعي منه أقل شي اذا تطلقتي يبقى لك
ذكرى زينه عنده ..؟
وصلني كلامها لمس نقطه حساسه بداخلي , أقتنعت فعلا , بقابله لاني مابي أفارقه على ذكرى سيئه.
خذتني ودخلتني غرفتي وقالت بدلي وتعطري قبل لاتطلعين ..!
قفلت الباب ورحت سيده لدرج الملابس أخذت تيور اسود قطني خفيف ماسك من الخصر ووسيع من تحت بجيوب ميد ,
وبلوزة جنز خفيف أزرق يربط من الوسط , لبست وشمرت أكمامها وفتحت اللياقه..!
لميت شعري من الامام ببنسه وعلى شكل بف , ومسكته من الخلف بمغاط اسود وتركته مفتوح ,
نزلت شعر خفيف على وجهي من الجهة اليمنى واليسرى , حطيت كريم وتعطرت ..!
طلعت لصالة وانا أضغط يديني ببعضها , أمي ورهف واقفات ينتظرون ؟؟
رهف : هـه كاشخه أتحدا أذا طلقها/ تأشر علي !
أشرت براسي ل أمي يعني شوفيها ..؟
ضربتها أمي على كتفها وهي تقول: أنقلعي للمططبخ ي الله ..؟/ تناظر فيها بطرف عينهاا!!
سحبت يدي امي ومشت معي لين باب المجلس ودقت الباب بشويش..
طلع ناصر وأشرت له أمي علي ..
ناصر: أدخلي ياريم / يأشر على داخل المجلس .
دخلت وأنا رافعه راسي ومنزله عيوني , ظامه يديني ببعضها , أحاول ماناظر بعيون أخواني ,
ساكته حتى السلام اللي قلته ماسمعوه هم شافوا شفايفي تتحرك بس على هالاساس قالوا وعليكم السلام ..
ماناظرت له بس لمحته ( ياحبيبي بينهم) وقفت (ووين؟؟)خلف أبوي كأني بمدرسة والله وهذا ولي أمري واللي هناك وخايفه منه
مديري العصبي واللي أحبه ؟؟

أجلسي ياريم / صوت أبوي !!

سعد طاحت عيني عليه هو واحمد يناظرون جهت خالد أحس ودهم يقومون يكسرونه لولا أبوي !!
( لكل بنت تقول أنا قويه, قوتك على نفسك ياقلبي بين الرجال تصيرين ضعيفه غصب عنك وأسالي مجربه )!!
جلست بين ابوي وناصر وأطالع بالقهوة اللي قدام ..
أبوي: هاذي زوجتك قول اللي بتقوله !!
خالد: (بعد صمت شويات) أنا قلت بقابلها لحالها ؟؟؟
سعد يتكلم وناصر واحمد كلهم معترضين وأنا ساكته وهو ساكت وأبوي يهدي فيهم ويحاول معهم أخر شي قاله :
سعد قم أخذ أخوانك وأطلع خلنا نشوف أخرتها معه / بعصبيه والعصى تتحرك قدام عيوني ؟؟

أنا خفت والله ببقى معه لوحدي ؟؟

رفعت راسي اطالع بأخواني بعطف يعني لاتتركوني والله اني صادقه كنت أتامل انهم يرفضون يطلعون ,
شفتهم يدفون سعد للباب وهو يهاوش وطلعوا وقام أبوي وطلع وهو يقول :
بعد هالجلسه واذا تبي الطلاق مالك كلام معي ؟؟
ساكت ولا رد على ابوي , نزلت راسي بعد ماطلع ابوي مع الباب , ولمحته يوقف , بلعت ريقي , من قدامي مر
وراح للباب قفله, لفيت عليه وعيوني اربع اربع شايله هم أهلي اللي يسمعون الباب تقفل ,
وأستحيت من حركته ؟؟
جاني وهو مبتسم , حاولت أقوي نفسي وأوضح له رفضي له ؟؟
جلس قدامي رجوله تضرب برجولي مابينا مسافه ابدا ..!!
زعلانه / يحني راسه عشان يحط عينه بعيني .؟
عقدت حواجبي مستغربه من سؤاله وبعدت شوي وقلت : لا / بحزم وملامح قويه ؟
( قرب )
أنا أسف على كل شي مريتي فيه وأعتذر أنا الغلطان / كان بيمسك يدي ورفضت !
رفعت راسي/ أتمنى أنك توفي بوعدك مابقى الا كم يوم ؟؟

هو: طلقتها .

أنا: مين / ناظرت بعيونه ؟
هو: تهاني الله يستر عليها / بحزن ويعقد حواجبه؟
أنا: وسطام ووعدك ؟؟/ ندمت على ويش مدري!!

صمت

منزل راسه ..
هو: سطام كنت معه طوول الفتره اللي راحت وأمس رجعنا لرياض وهو بخير أن شاءالله , وفهمته السالفه وتركت الحكم له ,
وخيرني أنت من تبغى وقلت بنت عمي ..!
أناظر فيه وهو يتكلم ( عمركم جربتوا أحساس أن هاذا الشخص روحي , وأنه قلبي على هيئة أنسان ؟؟)
بعد ماخلص أبتسم وأشر بيدينه /مابليد حيله!
أنا: مالها ذنب البنت غلطتوا بحقها ؟/
دمعت عيوني حطيت نفسي مكانها تخيلت أحلامها اللي بنتها مع هالشخص !!
هو: أعتذرت من أخوها والله ورفضت أخذ الهديه اللي عطيتها , ورحت اليوم الصبح وطلقتها وجيتك ؟؟
جيتك هالكلمه تعني لي , حسيت لها قيمه مو يقولون قيمة الكلمة بالموقف اللي تنقال فيه!!
أنا: بدري / بنص أبتسامه ؟؟
هو: ياويل قلبي عارف عارف أني خذلتك وماجيت مع أبوي ويمكن كنتي تنتظرين رساله وماأرسلت ..
ريمي كنت أبي أجيك بعد ماخلص من المسؤولية اللي على ظهري , أخذت أجازة ورحت لسطام وجلست معه وسويت أوراق
خروجه واوراق المستشفى اللي بيكمل معه علاج هنا وأوراق الرجعه لرياض كل هذا عشان أجلس معك الجلسه هاذي ؟؟
سكت وقال:
يابنت أنا أحبك ماتحسين شوفي حالي يأكد لك , بعدين ليه قاصه شعرك مو قلت لك انا أحب الشعر الطويل / بعتب !!
رفعت حاجبي : أنا ماحب الشعر الطويل !
مسك يديني وجمعها بيد وحده وشد عليها بقوة وجلس على ركبه ونص وقرب ..
باسني على خدي الايمن وهو يقول: أنا أسف ؟
ولف للجهه اليسرى وباسني وهو يقول : والله العظيم أحبك ؟
رفع شفايفه وباسني على عيني اليسرى جنب الحاجب وهو يقول: وحشتيني !
حاولت أتفكك منه وأزحف للخلف ماقدرت ماسكني بقووووة ..
شد على يديني بيدينه الثنتين وهو يقول:
ترى ماعلمت عمي ولا أهلي باللي صار أنتي الوحيدة اللي تدرين بتعلمين بكيفك المهم
أني علمتك وأعتذرت منك ..!

فك يديني ..

ساكته وأحس مكان شفايفه للحين على وجهي , وهالصمت اللي أنا فيه عشان ماتهور وأضمه ,
وبيني وبين نفسي أقوول اصبري للحين ماندري وش بيصير ..؟؟
هو: هالحين القرار لك .!
أنا: يعني بطلقني / سؤال غبي !
هو: لا ..
لفيت بوجهي عنه ومن داخلي أحس أني طايره..
وقف وأنا لسى جالسه ..؟
ولما شافني ماراح اوقف معه مسكني من كتوفي ووقفني غصب عني ..؟
هو: بطلع / ياشر على الباب ..
أنا: بالسلامه / أهز راسي !
هو: ضميني / يفتح يدينه ويبتسم ويغمز ..
أستحيت وتراجعت وأنا أقول : لاياشيخ ؟؟
جلس وهو يقول : والله العظيم مااطلع لين تضميني لو قدام عمي ../ تربع !
عــن السخاااااافه >> قلتها بصوت عالي وامط الكلام !!
ضحك بقوة وألتفتت على الباب , خفت أحد يسمع ضحكته ..؟
هو: بكيفك / طلع السبحه ويلعب فيها ..؟
أنا بطلع : قلتها ومشيت للباب ..؟
نقز قدامي وهو يقول :
والله ماتطلعين لين تضميني فكي نفسك وضميني / يلف راسه على اليمين ويفتح يدينه !!
تورطت ومابي اهلي يحسون بشي وابيه يطلع لاني طوولت معه قلت :

أنت ضمني أنا ماراح اضمك ..(على أساس حليتها)!!
بعدها حطيت يديني على وجهي ثواني وشلتها ..

هو: موافق عز الطلب ..

ضمني بطريقة حسيت فيها ضلوعي راكبه على ضلوعه ضلع ضلع , يدينه أحس قوتها بظهري , وريحت عطره بشعري
اللي كان داخل شماغه, لف فيه المجلس كله , رجولي والله بقت دقايق بعيد عن الارض , فتحت عيوني شفت خيوط شماغه بوجهي ,
متمسكه فيه رغم أني لو أترك يديني بالهوا ماطيح ..!
خالد / قلتها بنزل وحاولت أثبت رجولي على الارض ماقدرت ..!!
دقايق وتركني , ماطالعت بعيونه أنشغلت بشعري اللي طار مع اللفه اعدله وهو يعدل بلوزتي
وييقول: وأنتي طالعه نادي عمي والعيال ابغاهم ؟؟
لفيت بسرعه وأنا حريصه ماوضح ل أهلي شي , فتحت الباب وطلعت , بالطريق لصالة أهدي نفسي وأطبطب على وجهي
اللي اتوقع أنه أحمر ..
لقيت رهف وقلت علمي ابوي خالد يبيه ودخلت المطبخ , رجعت لي رهف على طووول وهي تسأل :
وووش صار علميني ؟؟؟.
وجات أمي بعدها ..!
خبرتهم باللي قاله ورحت غرفتي قبل لاأشوف احد من العيال وقفلت الباب
ورميت بنفسي على السرير لاول مره فرحآ ...
يالله ياأحساس الفرح مايوصف , ودك كل الناس نفسك فرحانه , ودك تغني , تصارخ , ترقص , والله ماأدري وش
أقوول ووش أخبص المهم أحساس حلو وبسسس ؟؟
بعد نص ساعة سمعت صوت أبوي بالصالة وعرفت أن خالد طلع من عندهم ..؟
حاولت أسمع وش يقولون بس ماقدرت أرسلت لرهف : العيال وين ؟؟
ردت لي : بالمجلسس !!وحاطه فيس *_*
وأبوي ؟؟
ردت: بالغرفة
سحبت على رهف لما شفت رقمه فووق (رسالة) أقولها بصوت عالي ؟؟
فتحت بسرعه !
ياحلو ضمتك , ثوبي وشماغي هاذي بخليها علي يومين ريحتك فيها / حاط قلب ..
مارديت بالعكس قفلت جوالي / لين أعرف ويش بيصير ..؟

*

بعد ساعه قدرت أسيطر فيها على قلبي طلعت لصالة , عرفت من أمي ورهف أنه علمهم بالانفصال عن تهاني ,
وسبب الزواج من الاساس , ورغم هذا كله أخواني يقولون ريم هي اللي تقرر يمكن ماتبيه ؟؟
تقريبا عرفت النتيجه وأطمأنيت ..؟؟

بدت الاستعدادات لزواجنا , وسوينا قبل الزواج بيومين ليلة حنا وأجتمعوا حريم جماعتنا عندنا
وعلى صوت الاغاني وريحت الحنا عدت الليله وكانت أجمل ليلة بفرحة أمي وتغطرفها ..؟
ليلة الزواج كالعادة الكل يحلف انو بينام بدري , ورغم هذا كله صارت الساعه 2 وأحنا لسى صاحين
وأمي وهواشها مانفع فيناا ..؟

(يوم زواجنا )

بيت سعودي فيه زواج تخيلوا الوضع , هواش , وصراخ , وملابس مرميه بالارض , وأكياس ملابس
وكراتين جزم ودورات المياه والحجوزات عليها بالدور , غير توصيات أمي على الاكل ,
وتبخيرها للمعرسين وتعليقاتنا عليهم وطبعا أحمد حالة ثانيه وهو يندب حظه على أنه ماتزوج معهم
وكل ثانيه يذكر ابوي أنه يبغى يعرس , ودعى أمي له ببنت الحلال اللي كلنا
حفظناه من كثر ماتردده له وتسكته فيه !!

المقارنه النهائية ومين الاجمل فيهم كانت بين سعد وناصر والحكم فيها رهف وأحمد وطبعا بسبب هوشة بسيطه
بين الحكام ماعرفنا مين الاجمل بس الاكيد أنهم بعين أمي الليله أجمل شابين على وجه الكره الارضيه ,
والدليل أنها كل بعد ثانيه تحصنهم وتتفل عليهم , عشان العين ههههههههه !!

* الكوافير اللي أحنا متفقين معها كانت عندنا بالبيت 2 الظهر وبدت على طووول تجهزنا
وعلى 5 العصر طلعنا من البيت للقاعه ..؟
وصلنا وبدينا نرتب الاغراض اللي معنا , ونشرف على التوزيعات والترتيب ..؟
ولاني أنا المسؤولة الاولى عن هذا الحفل كنت مدونة كل خطوة بجوالي , وأمشي عليها بترتيب ,
الساعة 7 تماما بدت اغاني الترحيب وبدينا نستقبل ضيوفنا ..!!
أمي هناك على الكوشه ورهف مسؤؤولة عن المطربه والاغاني وعلى قولتها بتونسنا الليله .

....
وقفت قدام المراية الكبيرة فالقاعة وهو على بالي ....
فستان فضي قصير مزين بأحجار فضية صغيرة وكعب عالي , عقد وحلق
وخاتم وساعةو خلخال , تسريحه على الجنب الايسر , مكياج رصاصي غامق ,عدسات رمادي ..
روج أحمر ومناكير أحمر , تمنيت أنه يشوفني الليله , نفسي أعرف ردة فعله لو شافني بهالشكل ..!!
على صوت أمي طارت كل امنياتي ورجعت أنشغل من جديد ونسيته ..!!
12 تماما وقبل زفة أخواني بنص ساعة , مسكتني عهد وهي تقول : أن عمي طامي بالغرفة الخارجية
وبيسلم علي , ولان هاذي اصلا حركات عمي وهذا طبعه ماشكيت في شي , عمي فعلا كل مناسبه ينادينا بالاسماء
نسلم عليه , مشيت معها وانا ادق على رهف أبيها هي بعد تجي تسلم عليه , وأكرر على عهد انو لازم رهف
تسلم على عمي عشان مايشره عليها ..؟؟
دخلت الغرفة الخارجية للقاعة على أبتسامه من عهد , دخلت بنيه طيبه ماكان ببالي أحد والله , حتى الفستان
اشده لفوق حياءآ من عمي ..؟

***
أول مالمحت شماغه الابيض لفيت عليها وقلت : الشرهه علي اللي أصدقك ؟.
سمع صوتي ولف بسرعه وهي وقفت خلفي عشان ماأتراجع , مسك يدي وقال لعهد :
خلاص روحي / وهو يبتسم ؟؟
هي تضحك ومستانسه لانها تحب هالحركات وتموت فيها ..
مسكت يدها ورفضت أنها تطلع وقلت: عهد والله ماتطلعين الا معي ....
ماسك يدي اليسرى وانا ماسكه عهد بيدي اليمنى وواقفه بالنص !
هو: سلم علي السلام العادي أحتراما لعهد وقال: مبروووك ياقلبي / يضحك.
أنا: الله يبارك فيك/ بجديه ومستعجله ؟؟
عهد: ريم فكيني بروح / تحاول تتخلص مني .
أنا: لا / رافعه حاجبي .
هو: خلاص ياقلبي ولاتزعلين أنا كنت بشوفك بس /فك يده ولفها ورى خصري ..!
طالعة بعيونه وقلت : عن اذنك !
فيه نظره بيني أنا وخالد لاهو تعمدها ولا انا تعمدتها جات كذا سبحان الله يعني لو أطلع فيه وأنا من داخل زعلانه
ولاقلت له يفهم أني زعلانه , وبنفس الوقت لو ناظرت له بنظرت حب يفهمها وبدون حكي والله ..؟

** رجعت للقاعه وأنا فرحانه وأخبي .!
على 3 الفجر وبعد زفت أخواني أنتهت حفلتنا , بدعاوي امي وفرحتها , على أمانيها اللي تحققت ,
على التبريكات , وصوت الاغاني الختاميه , على جمع الهدايا اللي لها أول مالها أخر ..!
4 الفجر ووبيتنا ورغم كل الحوسه والمكياج والتسريحه اللي للحين ماشلناها , جلست أنا ورهف
وأحمد حول امي بالصالة وهي ماده رجولها ونهمزها(مساج) , الكل منا يعلمها وش صار
ومين يمدح , ومين بارك , وأصغينا كلنا ل أحمد
وحكيه عن زفة الرجال , ووش صار هناك من أول الليل لأخره , وكم سيارة طلعت تزفهم للفندق ..!
أمي تضحك وبعيونها دمع , أرجع وأقووووووووول ..!!!!

أمي تحمسني أصير أم .



أنتهى البارت .

البارت الأخير ..*


أني لا أملك قوى خارقة تعيد لي كل الذي فقدت , لكني أصلي ,أصلي وأنا أعرف أن هذه
الصلوات لاتذهب سَدى وأنهها ستمسح على قلبي بلطفك .


_


(أنتي عاقل )


هالكلمة من أمي تحملني مسؤولية وهم , أصير فعلا عاقله وأحسب لكل شي الف حساب , مابي أخيب ظنها
ولو بحلل هالكلمة بتعب ( يعني شلون عاقل ) المفروض ماعصب , ماأتذمر ماأقرر قررات طايشه
, ماأرتكب خطأ , ماأرفض , أصبر ,أسكت ,أتحمل ,أكابر , بعض الكلمات ثقيله وتحملنا فوق طاقتنا ..؟!

هالكلمة قالتها لي أمي بعد يوم من زواج أخواني وكانت بمثابة أرجعي لخالد ولانها ماتبي تقولها
مباشرة وتقرر بدالي جابتها في قالب أنتي عاقل ..؟؟!!
وبعد هالكلمة جلسة بيني وبين نفسي وكتبت أسم خالد بالخط العريض بورقة , وتحته سلبياته وأيجابياته ,
ولان الايجابيات وبكل أمانه عبت الصفحه , قلبتها وكتبت وش أحب فيه ووش أكره ..
كنت أحاول أقنع نفسي قبل الكل مابي أقرر على أساس قلبي ولا أهلي ..
جردت نفسي من كل مشاعري أتجاهه وحطيته بموضع أختبار , وطووول الوقت أتذكر عيوبه
أو أحاول أحط بعض العيوب بتصرفاته , لاني مابي أعظمه وأكبره بعيني ..؟
شقيت الورق على الفجر , ورميته بالسله بعد ماوضحت لي الصورة وعرفت من خلالها كيف بتصرف !

اليوم الي بعده , وبعد صلاة العصر على طووول طلعت أدور أبوي ..
دقيت باب غرفت أمي وأنا أقوول : يمه ابوي عندك ؟؟
أمي : لا فالمسجد سوي قهوته قبل يجي / صوتها من خلف الباب ..
أنا: أبشري / ولفيت وسسيده للمطبخ .!
خلصت القهوة وحطيت التمر وسحبت كرسي وجلست أرجاع بصدري الكلام اللي بقوله ل أبوي !
على صوته ينادي داخل للبيت فزيت , شلت القهوة وطلعت من المطبخ , كنت أبي أجلس معه لوحدي
وأسابق الكل قبل يجون .

بمجلس الرجال لقيته ..

منزل العصى عن يمينه وسبحته بيده يستغفر ..
سسسسلام / أول مادخلت مع الباب .
أبوي وهو يرفع عيونه لي : هلا بريمي ..
نزلت القهوة وصبيت له فنجال ,سألني عن أمي وجاوبت , رجع سأل عن رهف وأحمد
وجاوبت وخلص الحكي بيني وبينه
بفتح موضوع خالد ولا أدري كيف أنتظره يسأل وهو ولا تكلم ..!

أستجمعت قوتي وقلت بعد صمت طويل :

أنا: أبوي خالد يستاهل ارجع له ولا لا / هاذي الصيغه اللي طلعت معي !
أبوي: أيه يابوك يستاهل وتراني ساكت بس عشان ماأضغط عليك ولا لو بكيفي ترجعين لولد عمك .
أنا: يعني أنت راضي عنه ؟
أبوي: خالد مافيه عيب وحتى الخطأ اللي سواه مايعيبه لانه فزعه لخويه / غير جلسته !!
أنا: ........
أبوي: يابوك الرجال اللي يضحي بنفسه عشان غيره ماينخاف عليك معه / يطق بالعصى فالارض !
أنا: طيب تسمح لي أجلس معه قبل لاأرجع لبيته / كنت متردده وان أتكلم !!
أبوي: ايه أجلسي معه وعطيه اللي بخاطرك وأسمعي منه!
على هالحكي من أبوي دخلت أمي للمجلس ,, وكملت الحكي عن أبوي وكالعادة توصي وتحرص
وراحت العصريه على هالسوالف والنصايح اللي أبوي راضي عنها ويأكد عليها ..؟

**
الساعة 12 وبعد ماخلصت شغل وترتيب البيت دخلت غرفتي , فتحت جوالي ولقيت له مكالمات ورسالة
مختصره جدآ (أنا أنتظرك ) تأملها كمية صدق حسيتها بهالكلمتين رديت بـ

سسسلام, أذا ممكن تمرني بكرة البيت لازم نجلس مع بعض فيه أشياء كثير أبغى أفهمها .

قفلت جوالي ونزلته قمت لتسريحه حطيت كريم وانا أتامل وجهي بالمرايه ,
رشيت عطر , وعلى صوت الرسايل لفيت بسرعه أخذت جوالي وجلست بنص السرير ..
رقمه , فتحت الرساله , متصل الان ..
هو: بعد العصر على طووووول بكون عندك جهزي .
أنا: ليه أجهز؟؟
هو: بنطلع نتفاهم براا , عشان ناخذ راحتنا ..
أنا: بستاذن أبوي اذا رضى العصر بكون جاهزة .
هو: باذن الله / حاط قلب .

عدت الليله وأنا أتذكر كل الاشياء اللي المفروض أعرف تفسيرها من خالد , جمعت كل الاسئلة اللي بخاطري له,
كل المواقف اللي صارت وضايقتني , ببدا معه من هاذيك الليله اللي جمعتنا الى هاللحظه ..!!
بعد تفكير طوويل وأرهاق نفسي نمت , وصحيت على صوت أمي تقومني لصلاة الظهر , على طوول قمت على غير العادة
أخذت دش وصليت , أستشورت , ولبست وطلعت ..!
_
ساعدت رهف على تجهيز السفرة وتغدينا , وبعد الغدا دقيت باب غرفة أبوي , وبلغته بأن خالد بيمرني العصر
وبطلع معه , وافق أبوي , ورضت أمي عني كل الرضى , حتى لو أنها ماقالت ولا حرف كفايه عيونها وأبتسامتها ..!
جهزت قبل صلاة العصر , ولا تكلفت كثير , ولا حرصت أني أكون جميلة بهالجلسه أبدا , بالعكس والله أجهز
وأنا أفكر , أبغى أكون عقلانيه , بتعامل بعقل من بداية المشوار لنهايته ويارب أقدر ..؟

4 و10 وبعد ماصليت دق جوالي ورديت ..
هو: سسلام
أنا: وعليكم السلام
هو: أنا برا أطلعي
أنا: يلا طالعه / وقفلت .
لبست عباتي وأخذت شنطتي وطلعت , مريت الصالة ولا كان فيه أحد من أهلي , فتحت الباب الخارجي
وشفت سيارته واقفه جنب الباب على طووول ..؟
بخطوات هاديه مشيت له , وركبت , سلمت وحطيت رجل على رجل وسكت , ترحيبه الحار وسؤاله عني
ولهفته قابلتها بكل برود , حاولت أختصر الحكي معه قدر الامكان ..!

* وقفنا قدام مطعم وهالمطعم مو غريب علي سبق وعزمني فيه , أشر لي ب أنزلي ونزلت بدون كلام,
دخلنا وجلسنا مقابلين بعض , طلب قهوة , وبعد ماوصلت سكر الستار ..
نزلت نقابي ولفيت الطرحه على شعري
حطيت رجل على رجل , قدامي على الطاولة كوب القهوة اللي محاوطته بيديني .. وأنتظر !!

جالس قدامي بالشماغ الاحمر والثوب الكويتي , وجنب كوب قهوته مسباحه ومفتاح سيارته وجوالاته
شربت رشفه من القهوة ونزلت الكوب ..

أما هو ورغم أني متأكده مليون بالمية بأنه يناظر لي , ومركز عيونه علي , تظاهرت بالامبالاة ,
رفعت عيوني على ( ليه ساكته / ويبتسم ويغمزز ) !!

أنا: أنتظرك تروق / أشرت على القهوة !
هو: مروق ياقلبي تفضلي / بأبتسامه !!

أنا: أولا اذا ممكن بهالجلسه بذات لاتغمز ولاتتودد بالكلمات ولاتبتسم أذا الموضوع
مايستاهل خلنا جديين لين يخلص كلامي ؟؟/ بجديه !
هو: تغيرت تعابير وجهه/أبشري .
أنا: خالد أنا من قبل لاأعرفك راسمه لنفسي حياة مختلفه , أحلامي فيها كثير وأهم أحلامي
أني أصير أم , وأكبر مع الشخص اللي حبيته , حياة مابي يكون فيها نفاق ,
ولاحسد , ولاظلم, ولا كره , يمكن تشوف هالكلام ماله مناسبه ويمكن تحس أنه سخيف
ولكن كل كلمه قلتها تهمني فعلا !!

(كان بيعلق ورفعت يدي له مابيه يتكلم وسكت ) /كملت/ ..
بدايتي معك ماكانت موفقه يمكن خيرة , وأنا راضيه باللي ربي كتبه, ماأشوف فيك عيب يخليني
أتركك , بالعكس أنت بعيوني كامل والكامل وجه الله , تخليت عن شرطي بطلب الطلاق , وقررت أعيش
الحياة معك , بحاول قدر الامكان أتفق معك عشان المركب تمشي / قاطعني !!!

هو:اللهم لك الحمد أخيرآ...

حورية بنت خاله كانت نقطه النقاش الاولى , واللي أنتهت بأنه مافكر فيها زوجه بحياته وكل هذا كلام
بين خالتي وزوجة خاله , تهاني وأهله وعمي وظروف زواجنا وتبريره للي صار كانت نقطة النقاش الثانيه ,
خالد أذا تكلم بجديه يقنعني , يحكي بالمنطق يتكلم وكأن مافيه صح غير كلامه , أسلوبه وتفكيره
تشدني بقوة , وجهة نظره غالبا ماتكون صحيحه ..!

أنتهت الجلسه واللي أستمرت ساعه ونص تقريبا , أنتهت بدون كلام حب , أنتهت وأنا راضيه ويمكن كنت
راضيه من قبل , بس محتاجه الجلسه ..؟

رجعت لبيت أبوي بعد ماأتفقت مع خالد أني أرجع معاه للبيت يوم الثلاثاء ..
واللي أصلا مايفصلنا عنه الا يومين , وكان تعليق خالد على هالاتفاق/

بــ الله يصبرني ليوم الثلاثاء ؟؟

بلغت أبوي وأمي باللي صار , وأرسلت لأخواني المعرسين أستاذنهم وارد لهم خبر ,
وكان الرد بــ الله يوفقك وحنا موجودين بأي وقت .
بديت أرتب عفشي وأزفه من جديد , رجعت لبيت خالد هالمرةبأمنيات رجعت بحب ,
رجعت ريم العاقلة على قولت أمي ,, ريم اللي تنازلت عن الاشياء الصغيرة مقابل
أحلامها الكبيرة ..؟



أنتهت الرواية .



سلام ياجميلات ..


أنتهت الرواية وأعتذر على البارت القصير..
هاذي الرواية كانت تفريغ طاقة لاأكثر ولا أقل وعارفه أنها تفتقد للقواعد
الصحيحه لكتابة الروايه ورغم علمي بهالقواعد ولكن ماحاولة ألتزم فيها أبدا
كنت أكتب بشكل بسيط وبسرد أبسط القصة شبه حقيقه
ولهذا السبب ماتعمقت بالوصف كثيرا حياءآ من اللي بيقرونها وفيه أشياء كثير
همشتها ....
حبيتوها وهذا شي يسعدني والله يعطيكم العافيه على الدعم وأوعدكم أذا فكرت بيوم
أكتب رواية ثالثه بتكون صحيحه مية بالمية أحتراما لكم ..
وأدعوا لي أني أتخرج ولا أجلس بهالديرة لأني أخاف يكبر الموضوع
وأنزل لكم يوميات

أنهيت نقل الروايه لكم كامله ورى بعض
إن شاء الله أعجبتكم
وأبغى أشوف تعليقكم على الروايه وإلا ببطل نقل (فيس يهدد)
خايف من التحطيم

عذرا ياقلب
شبيهة القمر
زارا
مشكورات حبيباتي على المشاركات الحلوه مثلكن
ربي يسعدكن

وفعلا كلامك زارا اول ماقرأت للكاتبة تذكرت أم رنا
أسلوبها يشبه أم رنا

النوري وزارا رواية الكاتبة الأولى
عناد حايل يعشق أحلام نجد،للكاتبة/ ديرتي نجد وأنا قمرها
أنا ناقلتها عندنا كاملةومحملتها لكن للأمانه ماقرأتها وما أقدر أحكم عليها
روايتها اللي نقلتها لكم لأني قرأتها وأعجبتني نقلتها لكم
أما الأولى إذا تحبون أنقلها لكم بنقلها وإنتن وحظكن لأن ماقرأتها
لأن ما أحب أنقل لكم الا الشيء اللي عارفه إنه مميز
لكن إذا بأنقلها لكم بعد أسبوع الإجازه أو بعد نصفه لأن مشغوله هالأيام

الرواية أنا ناقلتها بدون ردود عندنا في المنتدى اللي أنا مشرفه فيه
على منتدى الروايات المنقوله
إذا دخلتي منتدى الروايات المنقوله تلاقيها في
منتدى الروايات الطويله المنقولة الخليجية المكتملة
أنا ثبتها في الصفحه الأولى حتى ماتتعبين في البحث في 70 صفحه من منتدى المنقولة الخليجية المكتملة
إذاماعرفتي المنتدى أكتبي عنوان الروايه في العم قوقل يظهر لك المنتدى اللي نزلت الكاتبه فيه الروايه والمنتدى اللي أنا ناقلتها له
لكن حبيت تشوفيها من نقلي لأان ناقلتها كامله بدون ردود فعدد الصفحات أقل

إذا ماوصلتي لها وتحبي أنقلها بأنقلها لكم

لعيونك زارا و عيون حبايبنا اللي في ليلاس بأنقلها
رغم إني مضغوطه كثير هاليومين بنتي عندي لها أسبوع والده قيصريه
وتعرفين البيت اللي فيه نفاس وتعب الأربعين مع الأم ومولودها وضيوفها