|
ذكريات مؤلمه ,,
ذكريات مؤلمه ،، ف يوم كنت جالسه مع الوالد ،، وصادف حديثنا ذكرياته عن الماضي البعيد ،، تحدث عن شظف العيش ،، وصعوبة الحياة والمعاناة الكبيره التي كان يعاني منها اباءنا واجدادنا ،، وجداتنا ،، تطرق الوالد ف حديثه ,, اللي حرصت انه يكون بلهجته العاميه حتى يكوون أعبر وبدون تكلف ,, عن صعوبة حصولهم على الطعام فانتهزت هذه الفرصه وسألته هذه الأسئله : يبه ،، شلون كنتوا تطبخون قبل ؟؟ كنا نطبخ ع الحطب ،، ويازينه من طباخ ،، حتى الأكل له نطعه !! خخخخ لازم اترجم ( نكهة الأكل تكون لذيذه ) سألته :: شلون تورون الضو ؟؟ قال تاخذ المره طبانه ( الطبانه هي بقايا فضلات الحيوانات عزكم الله ) وتدفنها ف الضو لين بكره ،، قدها صارت جمره ،، وتطبخ عليها ،، واذا المره مالقت لها طبانه ولا عندها ضو ،، استعارت من جاراتها ،، سالته عن الكبريت ،، قال مافي كبريت ذاك الوقت الا نادر ،، وعند بعض العرب ،، والمره السنعه ،، جبريتها ( كبريتها ) خاشته ،، ف الصندوق !!!! ايش انواع الخضره الي كانت موجوده ف ذاك الوقت ؟؟ ضحك ابوي ،، انا افداه :)) قال ماعندنا لا خضره ولا شي ،، الا وقت الشتا ،، كلنا الحوه والحميض من البر ،، ومانغسله مثلكم ^_^ ننفضه عن التراب وناكله :)) والعيش من وين يبونه ؟؟ قال من البحرين والا من الهند ،، وايش العيش اللي كان موجود ذاك الوقت !! ماكان هناك لا عيش ولا شي ،، مافي الا الفقر ،، وقطر كان فيها فقر ماحصل ،، لا عندهم زراعه ولا لا نخيل ولا غيره ،، كان حاكم قطر ،، عبدالله بن جاسم الله يرحمه يشتري التمر من القطيف ،، ويحطه ف لقانه ( صواني ) وييون العرب وياكلون منه !! سألته عن ايدامهم ؟؟ لحم او سمج او دياي ؟؟ قال اللحم كان شوي ،، ايام الغوص ياخذ النوخده معاه ذبيحه اول مايخطفون ( يدخلون البحر للغوص ) ويذبحها اكرام لربعه اللي معاه ،، وبعدين ،، هنيه انا قلت له اكيد غداهم وعشاهم سمج !! قال لاااا ،، الغوص مافيه غدا ،، ماياكلون الا التمر ،، والعشا عيش ابيض وسمج ،، اما الدياي ،، فكانوا يربونه للبيض ،، ومايذبحونه ،، كان ابوي وهو يتكلم تطلع منه آهااات الحزن والمعاناه ،، كان يقول عشنا ايااام ومرت علينا ليال مايعلم ب حالنا الا الله سبحانه ،، هنيه تذكررت حال الرسول صلى الله عليه وسلم - يوم قالت عاشه كان يمر علينا الهلال والهلالين والثلاثه لا توقد نار في بيت الرسول _ صلى الله عليه وسلم _ !!! ايش هي انواع الأكلات او الطبخات ،، اللي كنتوا تسوونها ؟؟ العصيده ،، العيش الابيض والمحمر ( عيش بالسكر ,, أو المريس ) ،، واليبوله وهي مرق سمك ويخلط بالطحين ،، رووووعه ،، الله يرحمها أمي ،، كانت تسوييها لنا وكنت أطلبها منها طلبيه وتسوييها لي الله يرحمها ،، وخبز الرقاق ،، سالته عن الطحين ،، قال الحريم هم اللي يطحنون الحب ويسووون منه الطحين والاداه هي الرحى ،، وكانت الرحى احياناً سبيل ،، بعض الحريم ماعندهم رحى ،، والتاوه حق الخبز ،، ويسوون المصرصر ،، الساقو ،، البلاليط ،، الشعثه ،، قلت له يبه ،، عيل عندكم بقر ،، قال اييه ،، كل بيت لازم عنده بقره )) وهنيه قال ابوي ،، طباخهم الاول له حلاه وله نطعه ,, رجعنا حق نطعة مره ثانيه :)) ولاول ماكان عندهم سكر ،، يسوون العصيده والمصرصر ( وهو عباره عن ماء مغلي مبهر بالهيل والزعفران والسكر والنشا ،، من الأكلات الشعبيه اللذيذه جداً خاصه ف الشتا ،، والمحمر ع مريسه ( التمر المنقوع ) واذا زاد الاكل شيسوون فيه ؟؟ ماعندكم ثلاجات ولا شي ،، قال يحطون الاكل ف المرفاعه ؟؟ وهي عباره عن شي مثل الجفير ومربوط ف السقف ،، وزادني الوالد ،، يقول ع فقرهم ،، كانوا لازم ليلة الجمعه ،، لازم يطلعون صدقه ،، ع المحتاج منهم ،، وانا اعتقد ان كلهم كان محتاج ،، وكان اغلب اكلهم التمر واللبن ؟؟ وتالي انقطع يوم الحرب العالميه :(( قال لي هنا ،، ا لأكل انقطع ،، لدرجة ان الناس ماتوا من شدة الجوع ،، وذكر ان الرجل منهم حتى لو وجد عند المال اللازم لشراء التمر ،، لم يجد التمر ،، ياهي حياة صعبه ... سألته شقد استمرت هالحاله ؟؟ قال يمكن ٣ _ ٤ سنين ،، قال عاد تالي يات الشركه للتنقيب عن البترول واشتغلنا ف الشركه وكانت معاشاتنا ٧٥ روبيه ،، واشتغلنا ف ارامكو ع ١٥٠ ريال ،، وكانوا يقدرونها بالجنيه الذهب ،، فنحصل تقريباً ٣٥ جنيه ذهب ،، عاد عقبها زاد الخير وبدا التغير ،، وسوينا اضراب وزادوا رواتبنا ،، واستمرينا ستة شهور تقريباً وبعد سوينا اضراب ثاني وزادو ٢٥٠ واستمرينا لين ارفعوا رواتبنا الى ٥٠٠ ( يعني أهلنا كانوا يعرفون الربيع العربي من زمان http://gfx2.hotmail.com/mail/w4/pr04...moji_1F61C.gif) وهنيه بدا الخير يزيد ،، بدا العيش ( الرز ) يينا من باكستان والتمر من البصره ،، القلة بربيتين ،، قلت له القله تقريباً كم كيلو ،، قال تقريباً ١٠ كيلو ،، قلت له طيب يبه ،، كنتوا في فقر ،، ماكانت الدول الثانيه مثل مصر والا الاردن والا لبنان والا سوريا يتبرعون لكم والا نجيكم مساعدات منهم ؟؟ قال ،، اصلاً ماكنا نعرفهم والا كانوا يعرفونا ،، ف وين كانت تطبخ المره : قال كان ف الشتا كانت العرب تروح البر وتبني بيوت الشعر ،، ومطبخ المره ف وسط بيت الشعر يسمونه الدافوع ،، عقب العشا يتجمعوه حوله الاهل كلهم ويتدفون ويسولفون وكان ف القيض ( الصيف ) يرجعون البلاد ،، ويكون المطبخ صغير جداً تطبخ فيه المره عشاها والا غداها ،، هيييييه ،، والله اللي اتعبنا يمج ،، فقر ويووع وشين ،، هذا كلام الوالد ،، الله يحفظه ،، كان يتكلم ،، والآهاااات ،، تطلع من قاصي يووفه ،، مهما سوينا لكم يابهاتنا ،، ومهما تعبنا عشانكم ،، ماوفيناكم حقكم ،، يارب تجزاكم الخير ،، وترزقكم الجنه ،، وتعينا ع بركم ،، الجميل في الموضوع اني استفدت مصطلحات لغوية قديمه ,, كان ابوي يتكلم ويفسرها لي ,, فديت ويهه ,, وتمنيت امي تكون موجوده الله يرحمها ,,, كان استفدت منها جدا بحكم انه من صميم خبرتها واختصاصها ,, لكن ابوي كفى ووفى ,, وتراه من اللي يحب دخول المطبخ ,, ويساعد ,, الحين ياحلوات الموضوع مفتوح لكم ,, كل وحده تقعد مع امها والا ابوها ( لاتقولين لي امنا وابونا صغار ماعاشوا هالايام :lol: ) قعدوا مع جدانكم ,, واكتبوا ذكرياتهم ,, وخلونا نستفيد من خبرتهم ف الحياه ,,, بانتظار العضوه الأسبق ,, والا بيكون في توريط وتوهيقات :party0033: وسلامتكم |
رد: ذكريات أليمه ,,
مسا الخير هلووول
اولا شي اسجل اعجابي بالموضوع والله يخلي لكم الوالد ويطول بعمره على الطاعه بالنسبه لي استفدت جدا وعرفت تفاصيل كانت فعلا لغز لي اللي هو كيف يشبون نارهم زمان وتعلمت مصطلحات جديده بعد انا للاسف ما عاصرت جداني الله يرحمهم اما امي وابوي الله يرحمهم مايطرى علي سوالفهم عن هالشي بس ابو زوجي عنده علوووووم عن هالموضوع اخذ علومه باقرب فرصه واجي اسطرها لكم ان شالله اتمنى التفاعل هلوول من البنات الحلوات وعوده حميده للقسم ياقمر الزمان |
رد: ذكريات أليمه ,,
شكرا على هذه المعلومات بالرغم في كلمات صعبة عليه أفهمهاو تقريبا فهمت الموضوع بالنسبة ليه لا أعرف عن أيام جدي في القديم أما جدتي ألي أعرفة أوفي أيامهم كانت الحياة أسهل شوية كل ألي قالته لية على أيمنا مكنش عندنا حاجة أسمها بوتوجاز الي هو عيون نار من فوق وفرن من تحت كان عندهم حاجة أسمها الجرن هو عبارة عن فرن ولكنة من الطين الناشف على شكل قوس في الوسط لوح من الصاج أو الحديد وتحته كانوا يضعون خشب أو فروع أشجار ليشعلوا فيها النار وكانوا يعملوا كل شئ فيه من خبز وأكل وكانت تقولي كان بيطلع الاكل جميل وكان الخبز تأكلية وهو ساخن كانت تحبة الله يرحمها اكثر من البوتجازات الحديثة والتي أصبحت أحدث دة الي أعرفة وشكرا لانك بتفكرينا بأجدادنا
|
رد: ذكريات أليمه ,,
هلوله قلوب تنبض على هالموضوع الاكثر واكثر من الرءاع عاد انا من عشاق التراث وحكاويه
يرحم امك وامي وموتى المسلمين ويحفظ الوالد ماقصر كفى وفى بجد استمتعت وعرفت اشياء كثير وخصوصا سالفة العظام يالله سبحان من علم الانسان مالم يعلم بيكون لي تواجد هنا باقرب فرصه بس اجمع المعلومات الوافيه ف عز الكلام سكت الكلام |
رد: ذكريات أليمه ,,
ياهلا. بالهاله. والله. نور. المطبخ. من زمان. عن. مواضيعك. موضوع. فله. روعه. لي. عوده. احاول. اجمع. واكتب. لك. مع. انه. تقريبا. نفس. الشي. الفقر. والجوع. الله. يكرم. نزلهم. ويغفر. للميت. منهم. |
رد: ذكريات أليمه ,,
http://www.liilas.com/up/uploads/lii...8224082261.gif
مراحب الله يطول بعمر الوالد حبيت الموضوع الماضي مع كل تفاصيله الحلوة ومفرقات الحاضر "الربيع العربي" هههههههه ضحكتيني يا بنت تسلم ايدك |
رد: ذكريات أليمه ,,
شكرا الك حبيبتي على الموضووع الرائع
|
رد: ذكريات أليمه ,,
السلام عليكم
موضوع خراااافي. يجوز لي انا وعجيزات المقلط. اووووه نسيت بنات المقلط خص أمهات خمس طعش بنو وهتونه اول فايده انا فيه مفردات عندنا بعد النطوع. حنا نقول الأكل ناطع يعني طعمه طالع الحوا والحميض نفسها وقطر بعيده عنا يا أهل حايل ولا نجد يسمونه بقيرا الهاله ياليتي عند جدتي كان جبتلك مجلد قصص بحاووول تستاهلين النجوم كلها |
رد: ذكريات أليمه ,,
السلام عليكم ورحمة الله وبركاته ...
يمر شريط الذكرياات كالنهر الابيض فيزيح بعض همومنآ .. ويروي عطشنآ للماضي^ احب كثيرا الماضي واعشق تراثنا الجميل .. وبموضوعك الانيق هلوله جددتي بكل قلب محزون وجعه ..>> ذكريات أليمه ،، فبمجرد رحيل اشخاص جعلوا للذكريات معنى خاص تفقد جمالها وتتسبب باآآآهآآآت ( قاصي اليووف ) >> ترجمي المهم يااقمييل .. اللي استغرب منه ان حريم قبل ومع غياب وساائل الراحه المتوفره هالايام من اجهزه كهربائيه وغيره ماكانوا يشتكون من الم الركب او التهاب المفاصل بكثره مثلهالاياام.. السبب والله اعلم هو طريقه العمل بالمطبخ.. فالسيده قديما كانت تطبخ جالسه .. وكل ادوات الطبخ او ماتحتاجه لتجهيز اطباقها يكون بمتناول يدها او تحت يدها مثل مايقولون * موضوع جميل حبيبتي.. والاجمل ان تبقى قلوبنا على المحبه وان طال الغياب ؛ |
رد: ذكريات أليمه ,,
ما أحلى الزمن الأول... لا عقد ولا هم ولا غم...
|
رد: ذكريات أليمه ,,
[QUOTE=بنت المطــر;3253949]مسا الخير هلووول
اولا شي اسجل اعجابي بالموضوع والله يخلي لكم الوالد ويطول بعمره على الطاعه بالنسبه لي استفدت جدا وعرفت تفاصيل كانت فعلا لغز لي اللي هو كيف يشبون نارهم زمان وتعلمت مصطلحات جديده بعد انا للاسف ما عاصرت جداني الله يرحمهم اما امي وابوي الله يرحمهم مايطرى علي سوالفهم عن هالشي بس ابو زوجي عنده علوووووم عن هالموضوع اخذ علومه باقرب فرصه واجي اسطرها لكم ان شالله اتمنى التفاعل هلوول من البنات الحلوات وعوده حميده للقسم ياقمر الزمان هلا بالغااااليه ,,, تسلمين ياعمرررري ,,, ماعليج زووود ,,, يالله ننتظر علوووم عمج :)) وانا مثلج ,, انتظر تفاعل البنات ,,, |
رد: ذكريات أليمه ,,
اقتباس:
أهلييين هتوووونه ,,, نورررتي ,,, الله يرحم موتانا وجميع موتى المسلمين ىيااارب ,,, أنتظر تواجدج ف الموضوع ,, بفااارغ الصبر ,,, |
رد: ذكريات أليمه ,,
اقتباس:
هلا ورده ,, كنت ادري ان بعض الكلمات بتكون صعبه للبعض ,, لكني حاولت أشررررح وأفسر قد ماأقدر ,,, أكيد أجدادنا في كل العالم العربي عانوا الأمررين ,, الله يجزاهم خير على صبرررهم يااارب ,, نوررررتي ,,, |
رد: ذكريات أليمه ,,
اقتباس:
هلا ام بنوووون ,,, حبيبتي ,, انا بعد والله اشتقت لهاالمكان وزواااره ,, أشكررررج ع الثناء والمدح ,, ماعليج زووود يااعمرررري ,, أنتظر تواجدج العطر ,, نووورتي ,, |
رد: ذكريات أليمه ,,
اقتباس:
هلا والله ،،،، الحمدلله ان اعجبك الموضوع ،،، نورررررتي ،،، لا تحرمينا من تواجدك ،،، |
رد: ذكريات أليمه ,,
اقتباس:
شكررررراً لمرررررورك ،،، نورررررتي :)) |
رد: ذكريات أليمه ,,
اقتباس:
هلا نجلا ،،، هههههههههه ياحلو كلامج ،،، عاااد بنااات المقلط كلهم يصغرووون ،، حتى انا استفدت منه حبيبي ،، يالله عاد روحي لجدتج وسلمي عليها وخليها تحااازيج ويبي لنا العلووووم السنعه والطيبه منها ،،، نوووورتي ،،، |
رد: ذكريات أليمه ,,
اقتباس:
ياهلا ويامرحبتين كباااااار بكاتبتنا ،،،، عطرررتي المكان ونوررررررتيه ،،، فعلاً كانت التنهيدات طاااالعه من قاااااصي اليووووف ،،، ولو كنتي معااااي تسمعينها ،، لاستشعررررتي الالم والمعاناه ولكانت غنيه عن الشرح والتفسير ،،،، شاكرررره لج مروووورك :)) |
رد: ذكريات أليمه ,,
اقتباس:
ياهلا ويامرحباا ,, وانتي الصادقه ,, أيااام ماكانت القلوب صافيه ,, |
رد: ذكريات أليمه ,,
الله يحفظ الوالد ويرحم امك يارب ويجمعكم بها في الفردوس الاعلى
يازين سوالفه وسوالف ذكريات زمان احبهااا والله صراحه ماما تحكيلنا وجدتي مااقصرواا بس ماايستحضرني موقف الحين ان شااء الله باذن الله اذا جاء ع بالي موقف ولا شي بكتبه |
رد: ذكريات أليمه ,,
اقتباس:
هلا لووولي ,, وحشتيني ياعمرررري ,, من زمااااان عنج وعني ::)) الله يرحم موتانا وجميع موتى المسلمين يااارب ,, أنتظر قديمج ,, وبتنظمين لقائمة البنات اللي وعدووني بسرررد ذكريااات أهلهم ,, ة_ة فيس ينتظررر |
رد: ذكريات مؤلمه ,,
الهالة
الله جمييييييييييييييل الموضوع ان شاء الله لي رجعة للموضوع |
رد: ذكريات مؤلمه ,,
اقتباس:
هلا تورررري ،، منوررره ؛)) بانتظاااارك ،، |
رد: ذكريات أليمه ,,
اقتباس:
كنت ابعلق لكن رايي. انتي. لخصتيه. فعل هذا السبب السبب الثاني يتعرضون للشمس اكثر منا وممكن. الاكل. له دور اول اكلهم صحي اكثر |
| الساعة الآن 06:13 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية