|
بلا منطق ، للكاتبة : جرة ..
♪♪♪ السلآإم عليكم ورحمة الله .. صبحكم الله بالخير آل ليلاس :flowers2: .. جيت هالمرة ومعي رواية من إختيـــآإر الغالية أم أحمد : ارادة الحياة .. رواية بلا منطق ، للكاتبة : جرة .. الرواية كاملة والاكيد انها رائعة .. اتركككم مع مقدمة الكـــآإتبة و الجزء الأول .. قراءة ممتعـة اتمناها لكم .. ♪♪♪ |
هنا..سأضع قصة...ربما تعجبكم..ربما تضايقكم...ربما و ربما و ربما...>>>إلخ...! قبل وضعها أود أن أوضح بعض النقاط ... رغم كرهي للنقد إلا أني سأتقبله إن كان بناء..أما الغير الهادف فأنا سأتجاهله..و أرجوكم ساعدوني فأنا مشروع كاتبة...>>>يقولو بأني مشروع كاتبة... لن أسامح من ينسب القصة لنفسه أو ينقلها حتى و إن كتب بأنها منقولة..طبعاً لن أستطيع أن أمس من هذا الشخص شعرة لكن بيني و بين ربي أنا لن أسامحه...! و...ماذا أيضاً...؟! آه نعم..حينما يتم ذكر دولة خليجية فأنا لا أقصد الدولة نفسها..أنا أقصد دولة خليجية بشكل عام..حيمنا يتم ذكر دولة عربية فأنا لا أقصد الدولة بحد ذاتها..أنا أقصد أي دولة عربية بشكل عام..و هكذا...! آراء شخصيات القصص لا تدل على شيء..فإن كانت لهم بعض الآراء العنصرية أو الخاطئة أو المجحفة بحق شيء فهذا لا يعني رأيي أبداً..و حينما وضعت هذا الرأي وضعته نتيجة توقع بأن شخصية كهذه لو كانت على أرض الواقع لكان هذا رأيها...! هذا ما لدي و سأبدأ بوضع القصة الآن بإذن الله...! |
هذه الصورة تعبر و بشكل كبير عن قصتي... قصتي عن فتاة طبيعية من جميع النواحي لكن ماضيها و حقيقتها تخنقها و تقف حجراً أصم تتعثر به في كل خطوة.. لكنَّ حبها البريء لعمها الـ(جنتل مان) كان جرافة أبعدت بها هدا الماضي... قصتي ليست بتعيسة، و لكنها غير منطقية بالنسبة لبطلتها..و..ربما بالنسبة لكم _أيضاً_...! أمنياتي بأن تنال إعجابكم...قراءة ممتعة..^_^ الجزء الأول "حياتي عجيبة" مرحباً بجميع المتسللين لعقلي و قلبي عشان يقرؤا أفكاري و يعيشوا معايا حياتي العجيبة الخالية من أي منطق...! معاكم جو...أوووه لحظة أول شي:"بسم الله الرحمن الرحيم"، يعني عشان تحفنا البركة _إن شاء الله_، و "السلام عليكم و رحمة الله و بركاته"، عشانها تحية المسلمين، و دحين خليني أكمل: صباح/مساء الخير، كيفكم؟!، إن شاء الله بصحة و عافية، معاكم الراوية و بطلة القصة جود في الصف الثاني ثانوي عمري 16 سنة و كم شهر، قريب _إن شاء الله_ بأكمل 17، أعيش مع جدة _ جدتي_ الأرملة من زمااااااان من قبل ما أجي حتى، و مع عمو _إلي حيشارك في رواية ربع القصة_ الأعزب 29 سنة مادري ليش مو متزوج رغم إنو شاب موظف مستقيم لا يمين و لا شمال مو زي الأغبياء الصايعيين إلي يجيبوا لي العمى في الأسواق و الأماكن العامة...! مادري ليش أعيش عندهم رغم إنو عندي أم و أب و أخوان و أخوات يجوا كل أسبوع، كنت في البداية أسأل جدة و عمو:"ليش ما أعيش عند ماما و بابا؟!"، و ردة الفعل تكون نفسها:"التهرب"، لكن لمن لاحظت نظرات الاحتقار و الاشمئزاز من بابا و ماما و أخواني و أخواتي صرت أصر لمن تتهرب جدة و عمو من الإجابة، بس ردة الفعل تختلف؛ جدة تخاصمني أما عمو يقول:"والله اليوم في الشغل..." أو "واحد من الشباب..."، دحين أنا استسلمت و معد أسأل بس عشان أتحاشى نظرات أسرتي المرعبة أحبس نفسي في الغرفة لمن يجوا، حتى باقي أعمامي و عماتي _رغم إنو ما لهم دور كبير في أحداث القصة_، جدتي و عمو سعود هما الوحيدين إلي يعاملوني عادي... "مفتوح"، قلت لمن سمعت دق على الباب. -يلا جود حبيبتي الغدا. -طيب دحين جاية. هدا عمو سعود، ضحكت و أنا أقارن بين جدة و عمو، جدة تقتحم الغرفة و إزا كان الباب مقفول تدق بعصايتها دق يصحي العمارة كلها...!، أما عمو يدق بكل رقة و ما يدخل إلا لمن أقوله..ههه _استغفر الله_، خليني أروح أتغدى بس... و أنا رايحة للباب وقفت عند التسريحة، اتأملت و جهي، شعري، جسمي..ايش فيني شي حلو؟!، كثير بنات في المدرسة يقولوا لي:"ما شاء الله!،إنتي حلوة مرررة"، هل أنا فعلاً حلوة؟!، أنا أشوف إني عادية، أصلاً أحس إنو كل البنات حلوين لو اهتموا بنفسهم... إلي يخليني أذكر دا الشي هوا موقف سار لي اليوم في المدرسة، بعدين تعرفوه لمن أناقش عمو فيه لأني الصراحة ماني عارفة كيف أتصرف مع البنت المجنونة إلي جاتني...! رحت لغرفة الجلوس و أول ما دخلت مسكتني جدة:"وينك؟!،ساعة نستنى!،أصلاً المفروض إنتي إلي تجهزي لنا الغدا،ايش بتسوي لمن تروحي لبيت زوجك؟!،ها...!">>>إلخ يااااااا رب رحمتك!،طفشتني جدة ببيت الزوج دا،إلا إني قلت بعد ما سمعت عمو يدافع عني:آآآآآآآآسفة"حطيت يدي على راسي" و لكي عليا أرفع الغدا و أغسل المواعين. و جلست آكل و أنا أفكر:"الله يعين!،دحين لازم أغسل الصحون أففففففف...!"،بالله يعني..ايش ورايا أنا؟!... بعد ما خلصت أكل رحت غرفتي،قرأت مقطع من الكتاب إلي أقرأُو دي الفترة،بعدين رسلت مسج لعمو عشان يجيني الغرفة أبا أكلمو في شي، أكيد خلص غدا،أصلاً أنا قرأت مقطع قبل شوية عشان أستناه يخلص،دقيقة تقريباً مرت قبل ما يجي عمو و فوق راسه علامة"؟"،جا و جلس جنبي على السرير:"خير جود،ايش فيه؟!" -ولا شي،بس في بنت في المدرسة مضايقتني و ماني عارفة كيف أتعامل معاها. لمحت شبح ابتسامة على وجه عمو،ينبسط لمن أكلمو و لا أستشيرو في خصوصياتي،قال:كيف؟ -في حركة طالعين فيها البنات و إلي هيا الإعجاب،وحدة تعجب في التانية،تقوم تسوي لها كل شي و تخدمها،و تلاقيهم في الساحة يسووا حركات مش مزبوطة! الصراحة فشلة،هدا موضوع حساس،لكن لازم أكمل: هما ما يقتصروا على الرسائل الغرامية ، هما..يعني.. They also touch each other يا سلاااااام عليا قدرت أطلعها بالانجليزي،أعتقد لأني مع أصحابي الأجانب في المسن نتكلم عن دي الأشياء كتييييير،عمو هز راسو و هوا يقول:طيب،و إنتي ايش دخلك فيهم؟! -مو هنا المشكلة،في وحدة تتلصق فيا و تقولي أحبك و إنتي حلوة و مادري ايش،شي يفقع القلب،نفسي أشوتها بس... قال عمو بعد تفكير:ممممممم طنشيها و لا تعطيها وجه. -يعني أنا ما طنشتها تتوقع؟! -جود ترى حرام! -أدري،هما ما يعرفوا إنو هدا شذوذ،هما يفكروا الصداقة كدة...! عمو بانفعال:يا سلام،ما أحلاها من صداقة والله!... قلت بتردد:عمو أنا حلوة..؟ -طبعاً،إنتي قمر... -عمو من جد قولي، لأنو هدي مو أول وحدة... قال عمو بهدوء:إنتي كيوت و فيكي شي يشد بس ايش مادري... -أفففف مجانين"سكت ثواني و قلت"عمو تعرف بأي طريقة يفهموا؟!وسع عمو عينو:بأية طريقة؟قلت بسخرية:آخدها على جنب و أقولها:"أنا بأنهي علاقتي بيكي"،بعدين تسير تكرهني و تطالعني باحتقار و تمر من جنبي و تدقني و تقول:"أوووه سوري"... ضحك عمو و عينه تقول:"سخافات بنات"،و من جد سخافات بنات،أفف...حط عمو ايدو على كتفي و قال:طنشي جوووود طنشي و لا تحاولي تكلميها و لا شي،شوية شوية حتبتعد هيا عنك. -و إزا ما ابتعدت؟! -والله عاد هدي مشكلتها؛لأنو بكذة يكون ما عندها عزة نفس و احترام للذات. -ممممم بحاول و أشوف. -يالله الله يحميكي منهم،أهم شي ما تسمحي لأحد يخدعك. لسبب أو لآخر حسيت إنو عمو خايف عليا حتى لو ما بان هدا الشي في صوته...! -أعجبك أنا،لا تخاف...! قال عمو بابتسامة:أي مشكلة ثانية؟ -هههه لأ سلامتك. قال عمو و هوا يمثل الدهشة:سلامتي مشكلة...؟!!!! -ممممممم ايوة. -يا بنت! "حضني و قعد يدغدغني" اسحبي كلمتك. أنا قاعدة أضحك و أحاول أفلت منو:خـ ـ ـ ـ ـلا صصصصصص خلااااااااااصصصصصص. -قولي توبة. -مو توبة... عمو بتهديد:جووووووود! -خلص خلص توبة... تركني و هوا يقول:أنا ما عندي لعب... -و هدا ايش تسميه؟! -إذا ما تعرفي ترا بعض المجرمين يستخدموا الدغدغة عشان يعذبوا ضحاياهم. -والله عاد،المهم اليوم أربعاء أحد جاي؟ -لاء بس ممكن أبوكي يجي... أكيد تقولوا:"أخيراً جات سيرته" بس لا تستعجلوا لأني حأتكلم عنو كثير مستقبلاً،قلت:مممم أحسن برضو... هز عمو راسه كأنو مو لاقي شي يقولو،اغتنمتها فرصة،و قلت:عمو أنا كبيرة كفاية،قولي ليش أعيش عندكم؟ طالع عمو فيني لثواني و كأنه يفحصني و بعدين قال:مو عاجبتك العيشة عندنا؟! يحاول يغير الموضوع لكن:إلا عاجبتني،و أحبك أكتر من أي أحد،حتى أكثر من بابا،أصلاً إنتا بابا"لانت ملامح عمو"بس أبغا أعرف،من حقي... اتنهد،وقف و قال:"الجهل أحياناً نعمة،و تراني ما أعرف شي"و خرج .يكذب،أنا عارفة إنو يكذب،عارفة و متأكدة إنو يعرف،يحق لي أسمي القصة:"بلا منطق" صح؟!،تسير في حياتي أشياء كثيرة مالها أسباب،والله حالة... و عشان ما أستسلم للأفكار الشيطانية إلي تراودني لمن أفكر بحياتي الغريبة أشغلت نفسي لين أدان العصر،على النت طبعاً،في موقع فنان،تحدد لنفسك شخصية و تختار ملامحها بعدين تبدأ تعيش،عندي فيه أم و أب و أخوان و أصحاب و كل كل شي،بس عشان الصلاة سجلت خروجي،و أنا أصلي سمعت الجرس يدق،أنهيت صلاتي،استغفرت شوية بعدين فتحت باب غرفتي بمقدار يسمح ليا أشوف إلي برا بس ما يسمح لهم يشوفوني،و طفيت النور،شفت بابا و جدة و عمو،بابا هوا الوحيد إلي أموت و أعرف ليه يطالعني باحتقار،لأنو نظراتو ليا غريبة،يطالعني كدة كأني حشرة أو شي مقزز مثير للاشمئزاز...و صح أنا ما أحبو و لا أهتم فيه إلا إنو في شي في داخلي يدفعني لمراقبتهم (ماما،بابا،أخواني،أخواتي)،كنت أسمع كلامهم لأنهم يتكلموا بصوت عالي عشان جدة تسمع و كان كلامهم عادي جداً،بابا كيوت نوعاً ما و كايند بس لين عندي ينقلب180ْ، تقولون ماكلة حلال أبوه ، دقايق بعدها عمو قرب من الغرفة ، خليت الباب مطرف،ولعت النور،و قعدت على السجادة،فتح عمو الباب و قال:آآآآه جود... -نعم... بتردد قال:أبوكي يبغا يشوفك. فرحت،هدا معناته إنو يهتم فيا و لو بمقدار 1%...!قمت بجماس،رتبت شعري شوية،اتعطرت و قلت:طيب دحين جاية. راح عمو،لمحت حزن مشفق في عينو،ما اهتميت،و خرجت مبتسمة،بابا يبغى يشوفني..مين قدي؟!...وصلت الصالة،سلمت عليه،صح ما حسيت بالعاطفة إلي أحس بها لمن يسلم عليا عمو لكن مو مهم...،بعد ما سألني عن حالي _لمجرد السؤال_ قال:والله و كبرتي يا جود...! ابتسمت و أنا أقول في نفسي:"أكيد بأكبر،أستناك يعني؟!"،تابع بابا بسخرية:"يا حظ إلي بياخذك...!"،نزلت راسي،أكره لهجة السخرية دي،تحسسني إني رخيصة،الله يصبرني بس،و عشان ما أبين له تأثري قلت:أوكي أستأذن،عندي أشغال... و رحت على غرفتي،اتمالكت أعصابي،بعدين فتحت الباب،ما شفت أحد في الصالة،خرجت مستغربة،سألت الشغالة قالت لي إنو عمو و بابا في المجلس و جدة في غرفتها...رحت أنا بدوري المجلس و جثيت عند الباب،أحب أسمع كلامهم،مو حباً في التجسس بس لأنهم ما يكلموني صرت أنا أحب أسمع كلامهم و حكاياتهم... سمعت عمو يقول:يا أخوية ما عاد يصير البنت قاعدة تكبر...! بابا بسخرية:عاجز عنها...؟!،ترى عادي بأرسلك مصروفها إذا تبغى...! عمو بقهر:لأ ماني عاجز عنها،لكن صار لازم تضمها لبيتك،جود كبرت و صارت تسأل و أنا ما أقدر أصرفها بكلمتين زي أيام و هيا صغيرة... بديت هنا أركز أكتر،يمكن أعرف الحقيقة... -تبغاني أدخل حشرة بيتي؟! عمو بعصبية:إنتا الغلطان أعتقد،هيا مالها أي ذنب...! ايش حشرة؟!،و ايش غلطان؟!،الموضوع فيه إنَّ،لازم أعرف... -يا سعود أنا كل ما أشوفها أتذكر فعلتي،زوجتي كل ما تشوفها ينكسر قلبها و تتذكر،أولادي يقل احترامهم ليا كل ما شافوها"كمل ببساطة"و بعدين تشبه أمها مرة فأتذكر ذيك الحقيرة... -والله الحقيرة ذي غلطت معاها برضاك و شي طبيعي تطلع تشبههـ... شهقت أنا بقوة بعد ما استوعبت الكلام إلي انقال،التفت عمو بسرعة و جا يجري على الباب في الوقت إلي جريت فيه أنا لغرفتي و قفلت الباب على نفسي،أنـــا بـــنـــت حـــراااااااااااام...! دق عمو الباب بقوة و قعد يترجاني أفتح و أنا أبكي،بعد شوية سمعت صراخ عمو و هوا يطرد بابا و جدة تخاصم بكلام ما فهمته و لا أهتم أفهمه،و سمعت آخر جملة من بابا يومها:"كل دا عشانها...؟!"،اتحطم قلبي،...كل شي بان دحين،كل شي سار بمنطق،أنا أعيش هنا لأنو بابا غلط مع وحدة،نظرات الكره و الاشمئزاز الموجهة ليا سار لها تفسير دحين... أبكي و أنا مرتمية على السرير،أحس قلبي ينزف بداخلي،أحس بالاختناق... أنا شي ربنا مو راضي عنو...! ************************************* |
الجزء الثاني "الجهل أحيانًا نعمة،،،صدقتَ عمي" اليوم الخميس،صليت الفجر و رجعت ألتم على نفسي..الجو كان هادي و مرعب؛لأني مطفية الأنوار و الغرفة ثلج و مافي نور من الشمس إلي ما أشرقت و ما أعتقد إنها حتشرق مرة ثانية عليا... ضغطت على جسمي أكثر و حشرت راسي بين صدري و رجلي؛حاسة بالقرف،ماني قادرة أطالع نفسي في المراية،و صورة بابا و ماما_الخيالية إلي رسمتها لنفسي من زمان_ ما تفارق عيني،مو بس صورتهم كمان شكلهم لمن غلطوا مع بعض،لا تقولوا ممجنونة و كيف تفكر...أنا حاسة بأني أحقر من أحقر حشرة... بدأت الشمس تشرق و بدأ صوت مخنوق يتسلل أذني،صوت دق على الباب،متأكدة إنو عمو،قمت فتحت لأني بديت أحس إنو ماله ذنب،أمس طول اليوم يدق و أنا مطنشة،يتصل على جوالي يرسل رسايل برضو مطنشة،رجعت أتجه لسريري إلا إن عمو مسكني بيد و باليد الثانية قفل الباب و بالمفتاح كمان،حسيته يتقرب مني،ما مرت ثواني إلا و أنا في حضنه:"بس يا جود بس يا عمو،والله ما يستاهل دموعك"،قال عمو كدة بصوت حزيييييين،أما عني فما قدرت أقاوم،زاد بكائي خاصة إني فحضن الإنسان الوحيد إلي أحس بالحنان و العاطفة عندو ،هوا ملاذي،سحبني لين السرير،جلسني و جلس جنبي و حضني بقوة و أنا أبكي و أبكي... مادري كم مر من الوقت لين ما هديت بسبب حركة يده على ظهري و شعري ، و بسبب تقبيله لراسي بصدق...ابتعدت عنه و قلت بصوت متقطع مخنوق:أنا..أنـ..أنا شي ربنا موه مو راضي عنوووو... -لا ياجود لا تقولي كذة،إنتي مالك ذنب،إنتي..إنتي... قاطعتو :أنا وحدة حقيرة بنت حرمة شوارع،أنا..أنا و لا شي... عمو بانفعال:جود إنتي أشرف منهم و من إلي جابهم... -هدا الكلام إلي لازم الناس تقوله في دي الأوضاع. "جووووووود"،تابع عمو بيأس:إنتي بنت أبوكي،يعني كان ممكن يجيبك من زوجتو بس عشانه...جود أنا طردتو من البيت و بعمل جهدي عشان معد تشوفي وجهو، و بعدين لازم ما تنكدي على نفسك، لازم تعيشي حياتك طبيعي،و...و... -كيف يا عمو؟،كييييييييييف؟!،كيف و أنا أعرف إني..."استصعبت أقولها" كمل عمو:إنك جود، و بعدين احمدي ربك إنو في أوراق رسمية تثبت إنك بنته...! اتذكرت النسخ من أوراقي الرسمية إلي عندي، و قلت:بس أنا مسجل إنو ماما هيا ماما...قصدي زوجة بابا...! -ايوا، أنا لمن عرفت اتضاربت مع أبوكي و رفضت أعتني بكي من غير أوراق رسمية...! -يعني حتى إنتا..؟! عمو يفسر بسرعة:لا يا جود مو عشان شي، بس لمن أشوفك كذة بلا أوراق ما تقدري تدخلي جامعة و لا مدرسة و لا شي...لو صارلك كذة يا جود أجن، جود إنتي بنتي، أنا ربيتك...ربيتك...! ما اتحملت أكثر عشان كذة قلت ببكى:عمو احكي لي القصة من البداية... اتنهد عمو و قال:زمااااااااااااااان قبل 16 ،17 سنة دخل علينا أبوكي بـبيبي عمره أيام،كان هذا البيبي إنتي، أنا و جدتك من الصدمة ما قدرنا نتكلم... قاطعته:كم كان عمرك وقتها؟! -مممم ما بين الـ12 و الـ14 ، يكن تقولي صغير و تستغربي بس أنا كنت رجال البيت و كنت واعي و فاهم... كنت قد ما أقدر أحاول أكون حيادية عشان أفهم الموضوع بعقلي مو بقلبي،قلت:وبعدين عمو ايش سار؟! أخذ نفس عميق بعدين قال:سألناه، فقال:"خذوها و اتصرفوا فيها،هذي ثمرة حرام" و بعدين اتبرى... سكت عمو خوفاً من إنو يجرحني فقلت:اتبرى مني و بعدين...؟! -جود يمكن... -أنا أبغى أعرف التفاصيل، عادي كمل... -جدة طردته من البيت و عصبت و غضبت عليه، أما أنا فما لقيت إلا إني أشيلك و أدخلك الغرفة، بعدها قعدت جدة تولول و تبكي..."اتنهد"إنتي مع الصوت العالي بكيتي،رحت أحاول أسكتك"ابتسم"و علطوووول دفنت راسك الصغير في صدري... دمعت عيني و حضنت عمو،لفيت يدي حول رقبته و قعدت أبكي و دفنت راسي في صدره، هوا لف يده حولي كمان و قال:من يومها و إنتي بنتي..."ضحك بخفة" تصدقي حتى البامبرز كنت أغيره لكي...! استمريت بالبكاء..بصراحة كنت مستمتعة بالإحساس بالحب و الأمان، و الله الاثنين دولا نعمة...! بعد مدة قال عمو:جوووود ورايا دوام...! ابتعدت عنه و أنا أقول بابتسامة بسيطة:اليوم خميس...! -وي..ايوا الله...!،أقول جود ايش رايك نفطر برة؟! -مابا. -لأ تبي،بس قولي يا رب ما تكون جدة صاحية. -يا رب تكون صاحية. عمو بعتاب:جوووووووووود...! -مابا أخرج عمو،مالي مزاج...! -أنا أبغاكي تمارسي حياتك طبيعي، و دحين حنخرج،دقايق و أشوفك جاهزة و لا والله ألبسك أنا...! طالعت فيه بفجعة، فقال بطريقة شبابية مزعجة:عادي كنت ألبسك و أروشك و أدخلك الحمام كمان. اتفشلت فضحك و قال:يلا يلا... خرج و قفل الباب وراه،طالعت في الباب لدقايق،فجأة قلت:"ما يستاهلوا دموعي،صح كلامك يا عمو صح،و عشانك بس حأمارس حياتي طبيعي"... أعرف صعبة لكن حأحاول رغم إني متأكدة إني حتغير للأسوء طبعاً،اتنهدت...الله يعين... وعشان عمو الحبيب لبست و خرجت بهدوء عشان ما تصحى جدة؛لأنها مستحيل تخلينا نخرج دحين... لقيت عمو في الصالة لابس جينز و تيشيرت عادي، ابتسمت و رحت فتحت الباب و تبعني هوا، أول ما قفلنا الباب اتخصرت و قلت بسخرية:ليه ما جيت لبستني؟! و احنا ننزل الدرج قال:عشان أبغاكي تخرجي باقتناع. -طيب ليه ما تلبس ثوب؟! بانزعاج:يوووووووووه كيفي...! -طيب طيب لا تعصب،بس عشان شكلك أحلى "كملت بتفكير" مادري ليه الشباب يكرهوا الثوب و الشماغ مع إنو يطلعهم أكشخ و أحلى...؟! -لأنو متعب و ثقيل. -ممممم يمكن. و صلنا السيارة و انطلقنا إلى...مادري وين بس أكيد I’ll have a lot of fun بما إني مع عمو الحبيب... |
الجزء الثالث "منذ الآن،،،أنا ابنة الآن،،،وداعاً أيها الماضي" أفففف...اليوم خميس و حتتجمع العائلة و أكيد الزفـ...أوووه استغفر الله ما يسير أشتمه ولا بعدين يسير عقوق...!،أكيد بابا حيجي و باقي أفراد العائلة الكريمة...بس ماني خارجة لهم و الله لأقعد أكلم أصحابي الرهيبيييييييييييين على المسن... ************************************ بعد صلاة المغرب جهزت اللاب و العدة تبعو،جلست و حطيته فوقي ،طبعاً كان فيه مخدة على رجولي لأني سمعت قبل إنو يسبب عقم...!،المهم شبكت السماعات و رتبت لستة من الأغاني و لا أحلى _منوعة_ :"فيروز،بعض أغاني تامر،لنكن بارك،بلو،ايفانسينس...إلخ"،الموهيييييييييم دخلت المسن و لقيت جوسيف داخل،جوسيف ولد من أمريكا فرفوشي و يجنن، دخلت عليه...أنا:"جووودة"،هوا:"جوس">>>طبعاً المحادثة كانت بالعنقلييييييزي... جووودة:جووووووووووووووس! جوس:نعم؟! جوووودة:أنت مشغول؟! جوس:"أنت مشغول؟!"،أما زلت تستخدمين الانجليزية الرسمية؟! (وجه ساخر) انقهرت...دايماً يقولي إنو كلامي مؤدب و إني لو جيت أمريكا حسير مسخرة... جووودة:هذا ما علمونا إياه في المدرسة (وجه معصب) جوس:قلت لي مسبقاً أنك حسنتِ لغتك بالقراءة و التحدث مع الأجانب ، لا في المدرسة...! جووودة:ليس هناك من يستهزأ بلهجتي كما تفعل (وجه زعلان) جوس:أوووه لا، أنا فقط أمزح، و أنا متفرغ،ماذا تريدين؟! جووودة:لاشيء فقط أشعر بالملل...! اختفى دقائق،بعدين رجع:أووووه جود أنا مضطر للذهاب الآن لكن... رسل لي رابط و قال:فلم رائع استمتعي به إلى أن أعود... جووودة:أوكي... جوس:آسف جود أنا مضطر...! -لا بأس...إن شاء الله تسير الأمور بخير...سلام جوس:شكراً...سلام...! دخلت على الرابط و حملت الفلم و علبال ما الفلم يتحمل قعدت أدعي إنو جوسيف يكون كويس،جوسيف هوا الوحيد إلي أقدر أقول معاه:"إن شاء الله،الحمدلله،سلام،شكراً...إلخ"،أقدر أقول معاه كلمات عربية و إسلامية و هوا يستخدمها لأنو و ببساطة فري و مو معقد،شوية شوية انتقل تفكيري لبابا،كيف حيجي و عمو طردو؟!،كيف حيجي مع التتش إلي سار الأسبوع إلي فات؟! اتنهدت..صح عجبني موقف عمو و كيف إنو حسسني إني مو أي شي عندو لكن أنا ما أبغى تسير مشاكل بسببي...! الأفكار تروح و تجي في بالي و ما وقفها إلا صوت طلع من اللاب لأنو التحميل خلص،فتحت الفلم و اتفرجته من غير ما أشوف المقدمة لأني أثق بذوق "جوس..."...! ************************************************** ************ آآآآآه يا ربي الفلم فظيييييييع،نكتة...! رسلت رسالة لجوسيف معلقة فيها على الفلم إلي خرجني من مزاجي الخربان...بعد ما أرسلت الرسالة سمعت دق على الباب:"اتفضل"،كنت متوقعة عمو لكني اتفاجئت ببنتين صغار..!،كدة أعمارهم ما بين الـ12و الـ14،عليهم ابتسامة خجولة،طالعت فيهم مستغربة:"ايش يبغوا؟!"،هما من العائلة لكن بنات عمـ/ـتـ/ـي أو أخواتي...مادري الصراحة...! قلت بابتسامة:"هلا" ، ايش أقول بالله؟!،نعم أو ايش تبغوا..قليلة أدب شوية...! قالت وحدة فيهم:ممكن ندخل...؟! -اتفضلوا...! دخلوا ببطء و جلسوا على السرير،قمت من مكتبي و سحبت كرسي المكتب و جلست قدامهم،و قلت:ايوا... -آآآآ نبغا نتعرف عليكي. -مممممممممم. -أنا علا بنت عمك 13 سنة،و هاذي سارة"بلعت ريقها"أختك 15 سنة...! طالعت في سارة،اتوترت هيا،لكني ابتسمت:"ياااااه،أتعرف على أختي...!"،قلت:و أنا جود 17 سنة،اتشرفنا...! علا:و احنا كمان... مرت لحظات صامتة، فقلت:إنتوا حتبدؤوا بالكلام لأنو إنتوا إلي تبغوا تتعرفوا... قالت سارة بتوتر:آآآ ايش هواياتك؟! ضحكت و قلت:الانترنت و القراءة،يو؟! -أحب الرسم و الكتابة... -أوه ما شاء الله ، و إنتي علا؟! -والله مادري بس أحب الرقص و الأغاني و الوناسة...! عرفت هما من أية نوع من البنات، لكن المثير إنو سارة أختي..."دق الباب قطع عليا تفكيري" مفتوووووووح...! دخل عمو بابتسامة حلوة اختفت أول ما طاحت عينو على سارة و علا،قال:جود تعالي شوية أباكي... سارة:لا خلاص خارجين... عمي:لا حبيبي اقعدوا عادي... لكنهم خرجوا على أي حال بعد ما حسوا نفسهم غلط،دخل عمي رافع حاجبه باستفسار،قلت:علا بنت عمي و سارة أختي يبغوا يتعرفوا عليا. باستنكار:تطور واضح...! اتنهدت و قلت:ايش بغيت؟! -ايش تبغي عشا؟ -مممممم -بسرعة الله يرضى عليكي... -ليه إنتوا مو مسوين عشا؟! -إلا بس تبي تخرجي؟! قلت بسرعة:لا لا و ما أبغا شي...مني جيعانة...! -كيف يعني ما تبي تتعشي؟! -بعدين أسوي أي شي. -جوووود.... -والله مو جيعانة،إنتا روح اتعشى معاهم و بعدين فكرني أقولك على شي. -شي...؟! -عن سارة و بابا و علا... -طيب... وخرج...بعد شوية سمعت صوت حرمة تخاصم و تقول:"كيف تروحوا عندها؟!"،"والله العظيم لو شفتكم تهوبوا ناحية غرفتها ما يسير لكم طيب"،قدرت أستنتج إنو سارة و علا هما إلي قاعدين يتهزؤوا،ضحكت غصباً عني، و قلت:"أنا سالي و سارة و علا هما آرمنغارد و لوتي و الحرمة إلي تصرخ الآنسة منشن و غرفتي هيا العلية"،ضحكت بقوة..أنا الفتاة المنبوذة ها ها ها... لكن يا ترى هل ضحكتي كانت طالعة من قلب...؟! ************************************************** ***************** بعد ما راحوا دخل عليا عمي و قال بابتسامة بسيطة:خير؟! -الخير بويهك... رفع حاجبه و قال:كويتية؟!... -خليجية... -يعني تتكلمي بلهجة ستة مادري سبعة دول؟! -همممممم،ايوا عادي،المهم كنت بأسألك بابا جا؟! عمي بانزعاج:ايوا ليه؟! -أبغاك تتأسف منو... -نعم...! خفت من انفعال عمو،قلت بسرعة:أنا مابغا أكون سبب لمشاكل بينكم... -طول عمرك سبب لمشاكل بيني و بين أبوكي...! انطعنت...قليلة بإحساسي وقتها،قلت:طيب ليه متكفل بيا؟! صرخ عمي:لأني إنسان، لأني أخاف ربي، لأني ما أسوي إلي فراسي و أرميه عالناس، لأني "كمل بمرارة" أحبك، لأنك بنتي، تحت عيوني كبرتي...16 سنة و لسه تسألي...!،دوبك تفكري... بكيت و قلت:طب ليه؟!، ليه غلطان و يعاملني كدة؟!، ليه يحسسني إني حشرة؟!، ليييييييييه؟! عمو بحقد:لأنو حقير و مو رجال... قاطعته و أنا أمسح دموعي:حقير و مو رجال أتفق معاك لكن يظل أخوك الكبير، اتصل عليه و قولو إنك آسف حتى لو ما كنت آسف... -جود ما أقدر، ما... قاطعتو:كرامتك ما تسمح لك، أعرف، بس ايش الفايدة من إنك تقعد مقاطعو؟!، أنا عن نفسي حعاملو زي ما كنت أعامله قبل أسبوع... طالع عمو فيني بنظرة غريبة، فقلت:ايه؟! جلس عمو عالسرير و قال:الصراحة جود إنتي غريبة، يعني وحدة وضعها زي وضعك يكون تفكيرها كذة...!، ماني قادر أفهم... قلت بابتسامة:أنا ما عرفت إلا بعد 16 سنة... -حتى لو...إنك تكوني عايشة بعيد عن أمك و أبوكي، و إنك تكوني منبوذة شي المفروض يخليكي مهزوزة و تحسي بالنقص...! اتنهدت و قلت:ما أقولك إني ما أحس بالنقص بس أنا ماني فاقدة لحنان الوالدين "كملت بإحراج" إنتا بابا و جدة ماما... ابتسم عمو و فتح لي ذراعيه،رحت أنا بخجل بسبب نظرته اللعوبة الضاحكة، حضني بقوة و قال:الله يرزقني بزوجة زيك...! قلت أنا بمزاح:وي ليه؟!، أنا موجودة...! دفني بعيد عنو:بنت...! ضحكت بعدين قلت:عمو احكي لي عن سارة و علا... -هذولا البنتين أميرات، كل بنات العائلة يقهروني ماعدا علا و سارة، هما صحبات بالمرة و 24 ساعة عالتلفون و علاقتهم مرة حلوة ما شاء الله... -الله يديم عليهم، المهم دحين أبغاك تتصل على بابا و تحل الموضوع... اتنهد عمي:طيب يسير خير، و الأهم إنك إنتي تشيلي ذا الـ"بابا..." من بالك و تعيشي عادي، صح صعبة بس لازم نكمل حياتنا و قولي لأي أحد يضايقك و لو بنظرة "غنى عمو" تفو تفو عليك، تفو تفو عليك، تفو تفو عليك و عاللي عرفني عليك...! -يا سلااااام...عبد الحليم حافظ قدامي... -ايوا ترى الشباب يقولوا إني صاحب صوت ذهبي... -ايوا ايوا و الله إنك من جمبها...! -والله إني أنا معطيكي وجه، و لا في وحدة تقول لعمها من جمبها -ايوا أنا... -يا ربيييييييي، يلا أقول تصبحي على خير... -و إنتا من أهلو... و خرج عمو، و مع كل خرجة و دخلة له يزيد إصراري بإني أقول لبابا و لكل إنسان:"تفو تفو عليك...الأغنية"، و أعيش حياتي عادي...! ***************************************** |
الجزء الرابع "موقف محرج سخيف مضحك،،،لكن من يعي أثره؟؟؟ " آآآه و أخيراً إجازة الصيف جات، السنة الجاية تالت سانوي و بعدها جامعة، كشخة الجامعة مو...؟! كنت فرحانة مرة بالإجازة لكن إلي نغص عليا هوا إنو عمو عازم أصحابو، يعني هوا ما نغص عليا مرة بس إنو عمو طلب مني أسوي حلى و مكرونة بالباشمل و هوا حيجيب فطاير و ساندويتشات من برة و أشياء زي كدة، و صح إني ما أعرف أطبخ إلا إني خبيرة شوييييييية في الحلى _بما إني أعشق شي اسمو سكر_ و أعرف أسوي كم طبق أحبهم أما الأشياء إلي ما تعجبني فما أعرف حتى اسمها>>>بكاااااااااااشة ^^ و دحين العصر و هما حيجوا بعد صلاة العشاء و أنا دحين في المطبخ، صرخت:عموووووووووووووووووووووووووووووووووووو....! "نعاااااااااااااااااااااااام"،قلد صرختي و هوا يدخل المطبخ، قلت:كم واحد حيجي؟! قال بغلاسة:مالك دخل. رجعت لشغلي في الحلى:أوكي إزا انحطيت في موقف محرج عشان الأكل قليل أنا مالي دخل...! -أووووه، لا خلاص، لحضة هممم..واحد، آمم 5...ايوا معايا نسير سبعة... -يعني حيجوا ستة... -احلفي إنتي و وجهك... -مالت عليك، و دحين يلا أشوف حط يدك. -ليش إن شاء الله؟! اتخصرت:حلوة دي، أنا أكرف و إنتوا تاكلوا...! كان عمو حيرد لولا صوت جدة:"سعووود، يا سعوود" عمو:ايوا يا امي... -ايش تسوي في المطبخ؟! طالع عمو فيني بنظرة بعدين قال:أبغى موية. صرخت جدة بعصبية:لا بغيت شي قول لجود. -إن شاء الله "قال لي" سامعة..؟!،مو مني...! -أففففف و رجعت أكمل شغلي، شوية مادري إلا بعمو يبوسني:تسلم يدك يا عسل... و خرج...طبعاً كل كلامي لو قبل شوية كان مزح...بصراحة أنا أبغى أوري أصحابو و الناس إنو كون أمو كبيرة و ما تقدري تسوي شي و كونو مو متزوج ما يعني إنو مافي وحدة تسوي له شغلو، أنا موجودة و أنا حأطبخ لو، مو دايماً يقولو:"ما شاء الله طبخ زوجتو يجنن"، أنا بأقلب دا القول لـ:"ما شاء الله طبخ بنت أخوه يجنن"، أوه لحظة..ليه بنت أخوه؟!...إلا بنته...^_^...! ********************************************** آآآآه، الطبق الأخير جهز، عمو قاعد يستلم مني الأطباق و يوديها، شلت آخر صحن و خرجت من المطبخ، كنت منغمسة في الشغل لدرجة إني رفعت الأكمام و البنطلون، كنت لابسة بجامة رياضية، و مع رفعة البنطلون لين قبل ركبي و الأكمام لكوعي طالع شكلي...نو كومنت زي ما يقولو...! المهم جا عمو بابتسامة، و قبل ما يشيل الصحن قال:تسلم يدك... -الله يسلمك بس لين متى حأقعد شايلة الصـ... فجأة خرج شاب طوييييييييل، شهقت من الخوف و كنت حأفلت الصحن لولا إنو عمو مسكو و قال و هوا يطالع جهة ما أطالع:بسم الله عليك... مسكني بسرعة و دخلني المطبخ،سمعت صوت:آسف والله ما كنت أدري... عمو:حصل خير حصل خير... و الكلام إلي منو، حطيت ايدي على قلبي:"وجع هوا و وجهو ما شال عينو"، قعد يطالع فاتح فمو، شكلو ما شاف خير، ما عندو أخوات دا...؟! قطع عليا سلسلة شتائمي عمو و هوا يدخل و شكلو كده مو عاجبو الوضع:خلاص ما سار شي...! و شال الصحن و مشي..أوكي أنا ايش دخلني؟!...يعني أنا ناديتو مثلاً...؟! "أوووووه"، رحت غرفتي و مسكت كتاب و قعدت أقرأ...شباب أغبياااااااااااء،عمى...!>>>حقدت لوووول آآآآه، بدأت أنعس، حطيت الكتاب على الكوميدينة جنب السرير و رحت الحمام، بعدين حطيت راسي على المخدة و أول ما حطيت راسي اتذكرت الموقف، و لقيت إنو يضحك، زي في قصص الحب في الانترنت، زي المواقف في ديك القصص بالضبط...! (رافعة أكمامها و بنطلونها و خصلات من شعرها اتمردت و داعبت ملامحها، و خدودها المتوردة من حرارة المطبخ زادتها أنوثة و جمال) ههههههههه، بس الفرق بيني و بين بنات القصص إني ماني شايلة شعر ايدي و رجولي...ههههههه...يا فلّة...! و نمت و أنا مبتسمة من هدا الموقف السخيف...! ************************************************** ******** وااااااااااه الساعة 7، اتأخرت، لحظة لحظة..ليه ما أغيب؟!...بس غريبة عمو ما صحاني، يمكن اليوم خميس...يووووووه إجازة نسيت...ههه...! لحظة مو كأنو بدري أقوم؟، إجازة ماني قايمة قبل 10 من غير شر يعني...دفست نفسي، لكن ما قدرت ،أنا ببساطة الأفكار تجيبني و توديني، وصلت بتفكيري للصين و البوذيين...إنا لله...و الله إني درنك، خليني أقوم أحسن...! كالعادة بعد ما صليت على النت، و يا فرحتي، لقيت صحبتي الكويتية "دانة..." أون لاين، الآدمية دي مجنونة، نكتة، و دمها خفيف بشكل...! و الله أنا كنت محسبة الكويتيين و الخليجيين _بشكل عام_ زي في المسلسلات سخيفين و سطحيين لكن هيا ورتني العكس و خلتني أحرم أحكم على بلد أو شعب من مسلسل ما يعرض إلا أسوء شي في المجتمع هدا إزا ما كانت الفئة إلي يتكلم عنها تشكل 1% يمكن و أعتقد الكل يعرف أي نوع من المسلسلات العربية أقصد...! _نرجع لدانة_ ، دخلت عليها:هاااااي...! -هلا و الله بالسعودية و أهلها...! كنت قاعدة أكتب رد إلا إنها سبقتني:بدت عندكم العطلة ها...؟! -يعني ما بدأت عندكم؟! -كم يوم و تبدا...! حلو تصاحب أحد من برة بلدك، تعرف أخبار و أشياء... قلت:أجل يلا أشوف..انقلعي ذاكري بلا درجات تسود الوجه... -تشب، أنا ما أخلص من أمي و أبوي تطلعين لي إنتي...! -هههههههههه....! -اييييه يا الدنيا، صدج يومٌ لك و يومٌ عليك، و الله لو إنج معي اللحين كان طقيتج طقاق معتبر...! -أتغمشر وياك هو...! رسلت لي صورة واحد يضحك و يطيح من الضحك، ضحكت و قلت _قصدي كتبت_ :خير...؟ -أتغشمر يالدلخة أتغشمر...! انقهرت، أنا أعرف إنها "أتغشمر" بس غلطت في الكتابة... -أعرف إنها "أتغشمر" بس غلطت في الكتابة... -ايه ايه تعرفين، اللحين إنتي و يا ويهك مرافجتني من كم سنة و ما تعرفين هالكلمة...! -يوووووووه أقولك أعرف بس غلطت...! -صدقتج خلص، بس و الله لأنشر هالنكتة في الفريج كله...ههههه -انقلعي إنتي و فريجك...مااااالت...! -هههههه، انزين جود برب و بأرجع لج بعد شوي. -أوكي تيت... (احم احم يا قراء...هذا الكلام من جرة،تقول:إزا فيه أي خطأ في اللهجة الكويتية فسامحوها لقلة الخبرة و المعرفة...) استنيت شوية و طلع لي صوت،رفعت المحادثة، لقيت مكتوب:باااااااك....! -ولكم باك...! -شنو "أتغمشر"؟!، و الله إنج "وجه واحد مدروخ" كدا حسيت إنو إلي قاعد يكلمني مو دانة، كتبت:دانة...؟! -لا بانة...ها ها ها...! يا ربي على البياخة، كتبت:لا من جد، مين معايا؟! -أنا السيد أخو دانة. -آآآه طيب وين دانة؟ -أوووووه كاهي يت، ادعي لي، بتذبحني...! استنيت ثواني و بعدين:"أوووووه سوري جود، هذا الحمار أخوي...!"، مر وقت أفكر فيه برد بس دانة قالت:أووووه قالج إني قلت إنج تقولين "أتغمشر"... -ههههه، حلوة "قالج إني قلت إنج تقولين أتغمشر"، يا شيخة ايشبك مسوية من الحبة قبة؟!، عاااادي، و سلمي لي عليه كمان... -لااااا، هاي مغازلجي ما ينعطى ويه...! -حتى احنا عندنا مغازلجيين في السعودية...! -في كل مكان تلاقينهم، المهم اللحين إنك ما زعلتي... -لا ما زعلت، عادي و الله عادي، حتى أنا أحكي لعمو عن هبالاتك...! -بس والله وريتج فيه، طقيته...! -ههههههه، أولااااااااااد... -صدقتي أولاد... -إلا على سيرة الأولاد عندي لج حجاية بمليون دينار... -عندج لي شنو؟؟؟؟ -يعني قصدي أقول ستوري بس زيكم... -أقول جود حبيبتي، لا ييتي (جيتي) الكويت لا تحجين كويتي انزين...؟، تحجي سعودي عادي... -يوووووه، خليني أقولك القصة دحين...! -قوليها، منو مقضبج؟! حكيت لها عن موقف أمس، و كان الرد: WoOoOoOoW -ايشبك؟!...ههههه -جوووووووووووود....! -ها... -بتعرسين قبلي يو آند يور فييس؟!... ضحكت، دانة دايماً تترجم تعابير عربية، و قصدها _للي ما استنتج_:"إنتي و وجهك"...! -الله...زواج مرة وحدة... -ايه، و بتعطيني موجز مفصل عن كل شي...! -كيف موجز و مفصل يا دماغ؟!...خخخخخ -عاااااد...! و بعدها قعدنا نتكلم في أمور عادية، صحبات و يتكلموا تقدروا تتوقعوا ايش يقولوا...صح؟! بعد مدة طالعت في ساعة اللاب توب و لقيتها 11...!، ياااااه مر الوقت بسرعة...!، و عشان كدة خرجت بسرعة يمكن جدة تكون صحيت و محتاجة شي...! خرجت و لقيتها نايمة و عمو في الصالة ياكل و يتفرج مسلسل مادري برنامج...اتذكرت أنا ما فطرت...سويت لي فطور و رحت جلست في الصالة مع عمو إلي قال:يا قلووووووووودة...! -ايش؟! -ليش تسوي فطور زيي؟! و رفع حاجبه، قلت:صاحية من 7 الصباح و ما أكلت شي...! -والله محد مسكك...! إنا لله، شكل عمو له مزاج يستهبل...بس تصدقوا الرجال أغبياء ما يعرفوا الوقت المناسب للمزاح، و على كل حال ضحكت، يعني ايش أسوي بالله؟!... بعد شوية رن جوال عمو و طلب مني أجيبه، أففف هذي مشكلة الكبار، بس يطلبوا من إلي أصغر منهم يسووا لهم أشياءهم و يجيبوها لهم، مادري ايش حيضرهم لو قاموا بنفسهم...و مع المساحة إلي شغلتها لكم في الصفحة قمت و جبت الجوال، و كان المتصل "أحمد"، أعطيت عمو الجوال و رحت لغرفتي عشان أعطيهم الحرية في الكلام...تصدقون أحمد دا أحبو، هوا صاحب عمو من زماااااان، مررررة طيب و حبوب، أتذكر و أنا صغيرة كان يلعبني دايماً و نخرج مع بعض أنا و هوا و عمو و كان يجيب لي حلويات و هدايا و حركات زي كدة، دحين لأني كبيرة و بالغة أغطي عنو، بس في التلفون لمن أرد عليه أتفشل لأنو يقول:"هلا جود حبيبي كيفك؟!" و يسأل و كدة، _طبعاً_ هوا ما قصدو شي و كمان يشوفني صغيرة بس أنا أستحي...! الموهيييييييييم إني دحين لازم أدور على شي يشغلني...النت و لفيته، و الكتب إلي عندي كلها قرأتها...أفففف، و الله حالة...! آخر شي رحت و وقفت قدام المراية و كالعادة سألت نفسي:"ايش الحلو فيني؟!"، خلينا نبدأ بالترتيب...عيني مو واسعة و لا مكحلة و رموشي عادية مو كثيفة، خشمي مو "دلة سيف" زي ما يقولوا و لا طويل، عاااااااادي مرررررة، شفايفي مو توتية بس دايماً لونها حلو عشاني ما أخليها من غير مرطب بما إني ما أحب لونها الطبيعي، جسمي عادي ماني دبة و لا نحيفة، شعري آآآآه يا شعري، الكل يحسدني عليه لكنو متعبني، كل إلي أقدر أقوله عنو إنو (طاااااااااايح) و طوييييل لين نص فخذي _تقريباً_ ، يفقع القلب..أوكي الحمدلله ناعم لكن مو لدي الدرجة...!، و بعدين خفيف،لقمة، عارفة ما حتصدقوا لو شفتوني بس هدا مفعول القص...يعني لو ماني قاصتو مدرج كان شفتو قد ايش هوا لقمة و نتفة...!، و مع ها كلو تجيني مضايقات كثير في المولات و الأماكن العامة و في المدرسة بما إنو البنات عندنا سايرين مو بنات...! عمو يقول إني كيوت بس أنا ما أشوف هذا الشي في نفسي....أوووووووه لحظة، هل أنا أعرف مقاييس الجمال؟!، لا...هل مرة قلت عن وحدة حلوة و لا وحشة؟!، لا...أجل خليني ساكتة و أصلاً ايش حارق رزي في إنو الناس يشوفوني حلوة ما دام ما حتفرق معايا؟!، يعني بالله عليكم ايش بسوي بجمالي عند بنت، و لا عمو ، و لا جدة؟! الجمال هدا _يعني لو كنت جميلة_ ما حأستفيد منو إلا لمن أتزوج، صح؟! فجأة انفتح الباب بقوة،التفت مستغربة:"ايش قلة الأدب دي؟!"، لكن صدمني منظر عمو المتحمس المبتسم:جوووود أحمد أحمد... -ايه؟! -أحمد يا جود أحمد... -ايش بو؟! -أحمد زواجه بعد أسبوع. -نعممممم....؟! اتنفس عمو بقوة بعدين قال:أحمد صاحبي زواجه بعد أسبوع. -آآآه الله يوفقه... طالع عمو فيني بنظرة...قلت:ايش تبغاني أقول؟! -ولا شي... ضحكت:الله يهنيه و يوفقه... و زغرطت، قال:أووووش جدة نايمة... -مو تبغاني أتحمس...أهوه اتحمست... -طيب مو كدة...المهم أبغاكي تجي معايا... -وت؟! -وت الله عليكي يختي...أبغاكي تجي معايا... -ليه ايش دخلني أنا؟! قال عمو برجاء:جود أبغا أحد من طرفي في قاعة الحريم... -همممم... -جود بليييييييييز...! -و الله يا عمو تعرف إني ما أحب الزواجات، غير إني أحس إني حأكون غلط... -لا مو غلط، حتى أحمد بنفسو قالي يبغاكي تجي، و لو مو العيب كان خلاكي تزفيه... رفعت حاجبي لاستحالة قول واحد لصاحبه دا الكلام عن بنت أخوه...! قال عمو:نسيتي "أهمت" يختي، نسيتي إلي كنتي حتموتي عليه... للتوضيح:"أهمت" يعني أحمد، و أنا صغيرة كنت أقول كدة... -لا ما نسيت بس برضو أحس إنو مالو داعي غير إني ما أعرف شي عن الزواجات... -أحمد قال حيوصي وحدة من أخواته عليكي... -يا سلاااااام، يعني حأكون سبشل ون...! -شوووووور يا قلبي...! -طيب بأشوف... -ايش إلي تشوفي...؟!، الأسبوع بعد زواج..يبغالك فستان... ضحكت:الأسبوع بعد زواج...لا الصراحة لازم أروح ما يسير...! ضحك عمو:يوووه غلطة غلطة، المهم حتروحي يعني حتروحي...! -إن شاء الله يسير خير...! -"يسير خير"، كلام المامات هذا...! -هههه...! ضحك عمو و خرج، أما عني فقعدت أفكر، أنا مرة وحدة حضرت زواج مع جدة مع تهزيئة منها بإنو الناس ما شافوني...أحس جدة همها الوحيد زواجي، أففففف، محتارة..أنا ما أبغا أروح لأني أكره العزايم و الزحام و ما أبغا أكسف عمو، هوا يبغا أحد من طرفو في قاعة النساء، اتنهدت، الحيرة، الحيرة، لمن الواحد يحتار في الإسلام يستخير صح؟!، حأستخير...^_^...! ************************************************** ************ |
الجزء الخامس "حصاد ما زرعته الصدفة" صفر عمو، ابتسمت وقلت: I feel like I’m a girly girl -والله إنتي Girly girl -لااااااا وع...! -ليه إن شاء الله؟!، إنتي مرررة كيوت...! كنت لابسة فستان أخضر من ذوق عمو، كيوووت مرررة، حاسة نفسي فيه غلط، يغطي لين بعد الركب بشوية، و بلا أكمام، مفتوح من عند الصدر فتحة كبيرة شويتين، بس أنا لبست داخلي مناسب، عييييب و حرام...! لبست كمان جزمة خضرا و شراب بلون الداخلي، كان كدة شكلي...مممم تعرفوا كيف أجسام البيبي فيس؟! أنا زيهم دحين و هدا شي ما يعجبني أبداً لأني أحسهم حقيرات و مو بريئات زي أشكالهم...! قال عمو:بس ناقص تفتحي شعرك...! فتحت شعري، و طالعت في عمو إلي قال بصوت واطي:أضمن لك تنخطبي... ضحكت:والله فاضي، دحين متى ماشيين؟! -إنتي خلصتي؟! -ايوا... -ما حتحطي مكياج؟! -لا طبعاً...! -غريبة إنتي...! -كترة المكياج تخرب البشرة غير إنو يخفي الجمال الطبيعي للمرأة غير إني أؤمن بإنو ربنا خلق لكل وحدة واحد يحب ملامحها زي ما هيا، حتى لو كانت دوبها صاحية من النوم...! -يا فتاية...امشي امشي بس...! -أقولك جدة ليش ما تجي؟! -ما تبغا... -آها... -يلا... خرج عمو، لبست العباية و شلت شنطة بناتية بايخة أجبرني عمو أشتريها و رفض رفضاً قاطعاً إني آخذ وحدة من شنطي العملية السبورت...! و لمن وصلنا سمعت أصوات و ربشة، قلت:يوووووه ما كان نمت في البيت أحسن لي...! عمو بعتاب:جوووووود...! -أوكي خلاص... -يلا انزلي... -عمو وين أروح؟! -شايفة البنت الصغيرة هناك... -ايوا... -قولي لها أنا جود و بس... قلت و أنا أضحك:حركات أفلام و ربي...! -جود انزلي... -طيب طيب متى حنرجع البيت؟! -لمن أتصل عليكي... -أوكي باي... -باي... نزلت و رحت للبنت الصغيرة:هاااااي...! -باي... وي..!،أقولها هاي تقولي باي...!، قلت:أنا جود -آآآآه إنتي زود... مسكت يدي و دخلتني لجوة، و صرخت عند حرمة:ماما ماما...زود زود...! التفت الحرمة بابتسامة لبنتها بعدين اتغيرت ابتسامتها لابتسامة مجاملة:هلا و الله بجود. مدت يدها، سلمت عليها بتوتر،قالت:ايش فيكي خايفة؟!،تعالي... يا إحرااااااااج، هين يا عمو والله لأوريك، نادت الحرمة بنت كدة تقدروا تقولوا عمرها 16 سنة..يعني شي زي كدة...قالت الحرمة:هادي جود... -يا ناسو..تعالي تعالي...أوووه لحظة ليه ما فصختي عبايتك؟! -آآآآ مادري... فتحت البنت عبايتي، و كلمت وحدة من العاملات و أعطتها العباية، و قالت:لااااااا، كدة تغطي عليا...! استحيت فقالت:يا ربييييييه تستحي، تعالي حينبسطوا بيكي البنات... و جرجرتني معاها لطاولة عليها بنات كتير، قالت:هييييييييي شوفو جود...! كلهم طالعوا فيا، بغيت أبكي من الخجل، كل وحدة قالت شي: وحدة قالت:يختي عليكي...! -يا ناسوا...! -so cute…! -حرام البنت رايحة فيها، فشلتوها... جلستني البنت إلي جرجرتني، و جلست جنبي و قالت:أنا صفاء أخت أحمد، و هادي "أشرت على البنت إلي قالت(حرام البنت...)" أختي الكبيرة أحلام و البقية صحباتي مو مهمين،هههههه اعترضوا باقي البنات و سبوا دي الـ "صفاء..." و بعدين قالوا أسماءهم، قلت:و أنا جود... أحلام:عارفين،هههههه شوفوا الحيوانة، يعني لازم تفشلني، أنا بالغصيبة أتكلم و هادي تتريق...! وحدة من صحبات صفاء قالوا:أوكي يا جود سنة كم؟ -طالعة ثالث ثانوي. -لااااا...! قالت تانية:واااااو..!، والله أحسبك متوسط...! أحلام:أحسن..بعدين تكبري و تحملي و تتخني و لا عاد تقدري ترجعي زي أول...! قلت:ليه يعني...؟! -صعب..شوفي أختنا كانت عمود كهربا، لمن اتزوجت تخنت. قلت:لازم تتخن، أصلاً الرجال العرب يحبوا المرأة الدبدوبة...! قالت صفاء بانفعال:هذا زمان يا قلبي زمااااان...! تصدقوا.. راح الإحراج...قلت:الرجال كدابين..والله لو ايش ما يقولوا ما يبغوا إلا وحدة مربربة، و أكترهم يطلبوا من زوجاتهم يتخنوا...! قالت وحدة من صحبات صفاء:ايش دراكي؟! -قرأت كتاب عن الرجل العربي. قالت وحدة تانية:يا حماااااااس، ايش اسمو؟! -مادري والله ما أتزكر، بس هوا مو كتاب كتاب، هوا جزء أو فصل كتاب كبييييير...! صفاء:تحبي تقرأي؟! -شوووووور...! و على كده جلسنا نتكلم، و أنا شوية شوية أفلها معاهم أكتر، بس الشي الوحيد إلي ضايقني هوا إنو الجلسة كانت جلسة بنات سو متش...! ************************************************* بعد مدة دق عمو، قلت:أمممم صفاء وين عبايتي؟! -ليه؟! -عشان بروح... -لاااا بعد شوية العشا...! ابتسمت:طيب، عمو اتصل... -ما عليكي منو، بعدين لو عرف أحمد والله يوريه شغلو... كنت حأتكلم بس الجوال رن، رديت:جووووود بسررررعة....! -طيب طيب ليه مستعجل... -أبغى أنام... ضحكت:أحسن، المهم خلاص دحين جاية...! -يلا بسرعة... قفلت عن عمو، و قلت:أعتقد وصلك صوتو...! صفاء بشفاه ممطوطة:من حكايات أحمد عنو حسبته حبوب...! -لا حرام عمو حبوب بس يبغى ينام..يلا وين عبايتي لا ياكلني...؟! -إنتي استني عند الباب و أنا أجيبها لكي...! -أوكي... ودعت البنات و رحت أستنى عند الباب، فجأة طلع لي واحد قدامي، واحد طويييييييييييييل، شهقت و التفت بسرعة أدخل إلا إنو مسك يدي، حاولت أسحبها:فكني... ابتسم بغرابة و كان بيقول شي بس أنا شهقت:إنتا...! نفس الولد إلي شفتو بالغلط لمن أصحاب عمو جو..هز راسه:ايوا أنا و الصراحة عجبتيني من يوم ما شفتك و حابب... قاطعتو بإني أحاولت أسحب يدي بقوة لكني كنت أضعف منو بكتيييييير، قال:لا تخافي ما حأسوي لكي شي بس خذي... حط في يدي بطاقة، رفعتها و راح هوا، و تخيلوا ايش كان فيها...؟! (أحبك...*********0505)، وجع، الحيوان و كمان ايش لابسة أنا، الله يهديكي يا صفاء وينك؟!، شققت الورقة و رميتها على الأرض، بعدها علطول جات صفاء، خفت تكون شافت شي لكن ملامح وجهها كانت عادية، أعطتني العباية و هيا تقول:جود أبغا أعطيكي رقمي عشان نتواصل...! ابتسمت و قلت و أنا ألبس العباية:تصدقي ما عندي صحبات... -لييييه؟!، إنتي سكرة...! ضحكت و قلت:و إنتي عسل بس أنا ما عندي صحبات من المدرسة، كلهم في الانترنت. -لا كده مو حلو...! -عادي متعودة...! -طيب سجلي عندك..*********0505، و ايميلي ــــــــ@ــــــ -همممممم، خلاص حفظتهم...ايش تبغيني أسميكي؟! -ممممممم، دلعي صفصف بس علي أخوية مسجلني صفصوفة. -اخلي صفصوفة الفيرست نيم و فصفوصة اللاست نيم، ايش رايك؟! ضحكت:حلووووو ضحكت:يلا باي دحين... حضنتني، استغربت بس ايش أسوي، باستني على خدي و قالت:باااي... -باي و دخلت لجوة أما أنا مشيت للباب و قبل ما أخرج من باب القاعة انمسكت ايدي..التفت و كان نفس الآدمي إلي أعطاني البطاقة، قال:ليش قطعتي الورقة؟! خفت و سرت أسحب يدي:ايش تبغا إنتا؟!..اتركني...! -شكلك سويتي علاقة جيدة مع أختي "كمل بسخرية" صفصوفة فصفوصة... -مالك دخل، اتركني... و سحبت يدي بعنف و خرجت، دورت على سيارة عمو، و ركبتها، و أول ما ركبتها حسيت بالأمان، اتنفست بقوة، قال عمو باستنكار:خير...؟! اتوترت:ها..لا و لا شي بس أحس يعني مرة خنقة و زحمة و كده يعني...! -آآآ يعني ما كان حلو؟!، ما انبسطتي...؟! -إلا قابلت بنت مرة كتكوتة، تسير أخت أحمد... -أية وحدة؟! -صفاء "رفعت حاجبي" تعرفها؟! -يحكي عنها أحياناً، المهم إنك انبسطتي... -ايوة الحمدلله، كيف كان أحمد؟! -مفجوووووع...! -ههه ليه؟! -كل شوية يتلفت يمين و شمال و أول ما شافني:سعووووود وينك؟!، كيف شكلي؟!، ايش لازم أسوي دحين؟!، أقولك خايف..أقولك مادري ايش... -ههه، حرام مسكين Nervous -يختي...! وصلنا البيت و كل واحد على غرفته، و لمن حطيت راسي على المخدة بدأت أفكر بداك الشاب و اتزكرت آخر شي قالو:"شكلك سويتي علاقة جيدة مع أختي..."، يعني صفاء أختو و صفاء أخت أحمد معناها هوا أخو أحمد... لاااااااا...!، أنا كنت مخططة أقول لعمو لو زودها بس كيف؟!، كده حتسير مشاكل..يا ربي، يا ربي ألهمني ايش أسوي؟!... فجأة رن جوالي بصوت رسالة، فتحتها و كان محتواها:"تصبحي على خير حلوتي المغرورة"، من دا؟!، لا يكون..لا لا أكيد واحد لعاب، بس كيف عرف إنو هادا جوال بنت؟!، يمكن يجرب حظو...!، أقووووول ما تحسوا إنو شباب دي الأيام سطحيين، و ما أقصد بالشباب الأولاد بس..لا حتى البنات...أوووووف، الله يعين...! ************************************************ صحيت و اتمنيت يكون اليوم عادي و هادي؛ لأني أول ما صحيت اتزكرت داك الشاب، يمكن تقولوا سخيفة بس أنا بديت أحس بالخوف و..."أووووه من دا إلي راسل رسالة من صباح الله خير؟!"، قمت أشوف جوالي، نفس رقم أمس، أوووووه دا مستقصدني، فتحت الرسالة و كانت:"الحمدلله الذي أحيانا بعدما أماتنا و إليه النشور...قولي هذا الدعاء عشان يسير صباحك عسل يا عسل"، يستهبل دا؟!، فكرت أرسلّو أسأله لو كان هوا نفسو بس فكرت إنو حينبسط كده، فأرجحت إني أطنش..."طنش تعش تنتعش تفرفش تنفرش"،هههه... قلت الدعاء، زكرني فيه، هههه فيه خير الولد...! بعد ما غسلت و صليت و كده خرجت لبرة، كان عمو صاحي، استغربت؛ عمو حتى لو صحي بدري يقعد في غرفتو وقت _بالعادة_، رحت جلست جنبو:صباح الخير... -ظهر النور...! -وي "طالعت في الساعة و كانت 12:30"، وااااا أدن الظهر يعني...! -ايوا... -عمو ايش مصحيك؟! مد لي جواله، أخدته و قرأت الرسالة المفتوحة:"سعود ماني عارف أتصرف...!"، قلت بتلقائية:يعتمد إزا كان دخل عليها و لا لأ... بعدين انتبهت للي قلته و اتوترت، عمو طالع فيني بنظرة، قلت:بقوم أسوي فطور... و رحت للمطبخ و بدأت أسوي فطور، قلت بصوت عالي:"عمو أحسبك...؟!"، و صلني صوته:"ايوة يا فهّيمة"، يخرب...أما دقة...! حسبت حساب عمو معايا و رحت للصالة، شغلنا التلفزيون و أكلنا عادي و بعدين كل واحد راح على غرفتو، دق جوالي، نفس الرقم، رديت بصوت ثابت و ثقيل:نعم... -نعم الله عليكي... -علينا و عليك، مين معايا؟! -معاكي الميتم في هواك... ضحكت و قلت بعفوية:المتيم المتيم... قال بغيض:تستخفي دمك...؟! خفت و قلت:مين إنتا؟! -مين يعني؟!، أنا إلي أعطيتك البطاقة... -ايش تبغى؟! -أبغاكي... فصلت في وجهو، رجع اتصل، سويت الجوال صامت و أشغلت نفسي بأمور تانية... ******************************** |
الجزء السادس "اعتراف،مواجهة...كم أحب عمي...!" آآآآه الإجازة قربت تخلص...تصدقوا...؟!، طول الإجازة توصلني رسايل من الآدمي داك و اتصالات و مقاطع فيديو و شي حركات...!، صح أزعجني بس أخاف لو قلت لعمو تسير مشاكل بينو و بين أحمد... صداقة طولها بعمري و أكتر كمان حرام تخرب عشان إنسان سخيف زي دا غير إني حأحس بالذنب...!، أحمد _ما شاء الله_ صاحب عمو من أيام المتوسط...!، و أنا على كل حال ما أرد عليه فأكيد حيجيه يوم و يطفش...! أوووه اتذكرت شي، أنا رايحة تالت سانوي يعني خلاص بأخلص من المدرسة،ياهوووووو....!، أنا تخصصي علمي و الصراحة دخلت علمي عشان في الجامعة يسير يمديني أدخل علمي أو أدبي غير إني أبغا شي يشغل وقتي أكتر، يعني أنا _الحمدلله_ المواد الأدبي ما تاخد مني وقت كبير لأني أحبها و أحب أتعمق في اللغات لكن المواد العلمية هيا إلي أحتاج فيها أجتهد و أنا لا صحبات و لا أخوات و لا شي...يعني ما أشغل وقتي بشي... وااااو...مر الوقت بسرعة، الساعة 10:30 ليلاً، خليني أقرأ أي كتاب و أنام... انسدحت و فتحت الكتاب و أول ما بدأت أندمج دق الجوال بنغمة رسالة، إنا لله و إنا إليه راجعون...أكيد إنو الزفت أبو البطاقة، فتحت الرسالة و يا ليتني ما فتحتها، كان محتواها:"حبيبتي جود بنت سعيد الـ********، إما تعطيني و جه و نتواصل و لا حتلاقي صورك الفاتنة بالفستان الأخضر في التواقيع و الصور الرمزية،،،علي"... في البداية تنحت..لكن بعد دقيقة كاملة استوعبت الوضع...! يا ويلي، يا ويلي، ايش أسوي؟!، أنا غبية ليه خرجت عند الباب من غير عباية؟!، بس والله ما كان فيه أحد، والله...! نزلت دموعي غصبن عني، خايفة، أنا ناقصة ! فوق ما إني بنت حرام و العائلة كلها تدري يجي هادا ينشر صوري...!، محد حيوقف معايا، محد حيصدق إني مظلومة، آآآآه يا ربي ساعدني، يا ربي لا تتركني...! "لأ..ايوا لأ"، قلتها و مسحت دموعي، حأعلم عمو، لازم، لازم...! خرجت من الرسالة و طفيت الجوال و حطيت الكتاب على جمب و نمت أو غمضت عيني مدعية النوم...! ********************************************** صحيت الساعة 7 الصباح، صليت الفجر، و دعيت ربي يوقف معايا، اليوم حأكلم عمو، و يا رب ما يخيب ظني فيه...! سويت لي فطور بسيط، أكلته بسرعة و قعدت أستنى... الساعة 9 الصباح صحي عمو، جاني في الصالة و قال:صباخ الخير. قالها بابتسامة حلوة، شكلو رايق، قلت:صباح النور. -من متى صاحية؟! -من 7 -ليه ما صحتيني؟! -ما قلت لي...! -أصلاً ليش أبغا أصحى؟!، وي، هههههههههه شكلي مسطل... ضحكت بلا طعم، دخل عمو المطبخ و سوا له فطور، شغل التلفزيون و جلس ياكل، و أنا أستناه يخلص فطوره... -جود فيكي شي؟! سألني عمو بقلق، ابتسمت ابتسامة واهية و قلت:لا، لا ما فيني شي... كمل عمو فطورو و لمن جا يقوم و قفت معاه و قلت:عمو أبغا أكلمك في موضوع... -موضوع...؟! -ايوا..بس تعال الغرفة. و مشيت و مشي ورايا، دخلنا غرفتي و رديت الباب، جلست على السرير، جلس عمو قدامي و قال:خير..شكلك مو عاجبني...! -آآآآ عمو أبغاك ما تفهمني غلط و تثق فيا عشان أنا لسه زي ما تعرفني و زي ما إنتا ربيتني... قطب عمو حواجبو و قال بجدية:جود..ايش فيكي؟! -حأحكي لك حكاية... سكت ثواني بعدين كملت:في زواج أحمد لمن اتصلت عليا وقلت يلا اخرجي قلت لصفاء أخت أحمد تجيب عبايتي لأنها هيا شالتها فقالت لي أستنى عند الباب... سكت فقال عمو باستنكار غاضب:في الشارع من غير عباية...! -لا لا، باب يخرج على ساحة أو حوش بعدين باب للشارع... -ايوا و بعدين... -أنا كنت قاعدة أستنى صفاء و فجأة طلع لي واحد قدامي... عصب عمو وكان حيتكلم بس قاطعته:اسمعني و لا تتسرع...جيت بأدخل إلا إنو "بلعت ريقي" مسكني من يدي و... صرخ عمو:اش قلة الأدب دي؟! دمعت عيني:حاولت أفك يدي بس هوا كان ماسكها بقوة و حط فيها بطاقة عليها رقمو و راح... طالع عمو فيني بنظرة، بعدين قال:وينها؟! -ايش هيا؟! -البطاقة... -أنا من قهري شققتها و رميتها على الأرض، بعدين جابت صفاء العباية و راحت... -طيب... -الموضوع ما انتهى بكده، أنا لمن جيت بخرج للشارع وقفني و قال:"ليه قطعتي البطاقة؟!"، أنا شديت يدي و خرجت و نسيت الموضوع، بس سارت تجيني رسايل على الجوال، حسبتها إزعاج بعدين دق الرقم، رديت و سألت مين قال إنو هوا نفسو... قال عمو بقهر:جيبي جوالك... خفت:بس... -أقولك جيبي جوالك... بكيت و قلت:رسل لي أمس رسالة قالي فيها إنو يعرف اسمي الثلاثي و عندو ليا صور هددني بيها...! مسكني عمو و هزني بعنف:كيييييف صورك؟! -مادري مادري... صرخ عمو بهستيريا:قومي جيبي جوالك بسرعة... قلت:فيه شي لسة... صاح عمو:ايش كمان؟! -بس أبغاك تهدا و ما تفقد أعصابك... قال بقلة صبر غاضبة:جود مو وقتك، اتكلمي... -إلي أعطاني البطاقة هوا نفسو إلي شفتو بالغلط لمن عزمت أصحابك... انصدم عمو و قال بصوت مخنوق:ايه؟! بلعت ريقي و قلت:هادا الشي إلي خلاني أسكت عن الإزعاجات بس لمن وصل الموضوع لكده قلت أقولك عشان تتصرف... -ليه ما اتكلمتي من البداية؟! -خفت تسير مشاكل بينك و بين أحمد و... قاطعني:أصلاً كيف عرفتي إنو أخو أحمد؟! -عند الباب لمن مسكني قال شكلك سويتي علاقة جيدة مع أختي صفاء، فاستنتجت إنو أخو أحمد... -لا حول و لا قوة إلا بالله...خلاص أعطيني جوالك و أنا أتصرف... أعطيته جوالي و قلت:عمو لا تسوي مشكلة بينك و بين أحمد هوا مالو دخل...! -أنا أعرف أتصرف... و خرج من الغرفة، خفت بس خلاص..أصلاً أحمد لو وصلو خبر أتوقع ما يسلم دا الغبي منو حتى لو كان أخوه...و أهم شي إنو عمو في صفي..أهم شي...! ************************************************* بعد المغرب اندق باب غرفتي و كان عمو، دخل و قفل الباب، خفت، جا جلس جنبي على السرير، أعطاني جوالي:اتصلي عليه... -نعم...؟! -أقولك اتصلي عليه و قولي له يجي بكرة هنا... -ماني فاهمة...! -اسمعيني جود، أبغاكي تتصلي عليه و تقولي له يجي بكرة على أساس إني ماني موجود و إنو جدة نايمة ما تدري عن شي، إنتي تستقبليه و بعدين أنا أتصرف... -لا عمو ما أقدر، أخاف... -من ايش تخافي؟!، أنا معاكي، يلا دحين اتصلي... مسكت الجوال و دقيت عليه رغم عدم اقتناعي لكن نظرات عمو تقول:"كلمة زيادة ما أسمع"، رد و بغيت أموت من الرعب، همس عمو في أدني:"أنا معاكي"، و لف يدو حول أكتافي، ابتسمت بأمان و قلت:السلام عليكم... -و عليكم السلااااااام..يا هلا...! -آآآه ممكن لو سمحت تجي بكرة البيت عندي لأنو عمو ما حيكون موجود... قال "علي" باستكار:"وشو...؟!"،سكت لما يقارب الدقيقة بعدها قال بنبرة ما عرفت أفسرها:و جدتك؟! -حتكون نايمة ما تدري عن شي... -وعمك وين حيكون؟! -عمو حيخرج مع أصحابو مستحيل يرجع قبل 12 الليل... قال بتذاكي:لو عمك خارج أكيد أحمد خارج معاه و أحمد ما تكلم...! -أحمد عريس أكيد ما حيخرج معاهم... ضحك بخفة:طيب..متى تبيني أجي؟! -ممم بعد صلاة العشا كويس...؟ -إلي يريحك يا عمري...! حسيت بنبضات قلبي تتسارع و أنا أقول:طيب..مع السلامة...! قفلت الجوال و اتنفست بقوة، قال عمو:خلاص بكرة بعد صلاة العشا علطول أبغاكي تكوني لابسة تنورة طويلة و بلوزة واسعة شهقت:من غير عباية...! -يا جود عندو صورك و متأمل فيكي لين قال بس....! نزلت راسي و برطمت، قال عمو:جود أنا عصبت و صرخت عليكي أول لأني أحبك، يعني لو ما أحبك و أغار عليكي ما كان خاصمتك صح؟! غطيت وجهي بيديني و قلت:بابا لو عرف حيقتلني...! حضني عمو و قال بحنان:و عمو سعود وين راح؟!، أنا أعرف إنك أشرف من الشرف جودة...! بعد ثواني ضحك عمو:أشرف من الشرف، والله كأننا مسلسل...! بعدت عنو و قلت و أنا أمسح دموعي:أصلاً حياتي كلها مسلسل...! -من جييييييد، إنتي البطلة و "بغرور" أنا الشخصية الطيوبة المحبوبة من الكل و سعيد الشرير إلي الكل يسب فيه و علي الشاب القذر إلي يزيد الطين بلة...! -استغفر الله... -استغفر الله، يلا دحين ارتاحي بكرة ورانا عملية خطيرة... -ايوا ميشن (مهمة) زي في ألعاب البلاي ستيشن... -خخخ، طيب تصبحي على خير... -و إنتا من أهلو... خرج عمو و ابتسمت بسعادة، رغم الهبل إلي حأسويه بكرة إلا إني مبسوطة بإنو عمو حبيبي معايا...! ************************************************** ****** في اليوم الموعود بعد صلاة العشا دق قلبي ما رضي يوقف، عمو صلى في البيت خوفاً من إنو يجي على وقت الصلاة، صليت و لبست تنورة طويلة واسعة وجاكيت ما يفصّل جسمي، حاولت قد ما أقدر أخفي أي شي ممكن يجدب فيا، شعري لفيته ورا (كعكة) و ما نزلت ولا خصلة على وجهي، صح طلع شكلي مو حلو_بس هادا إلي أبغاه و أكيد تعرفوا قد ايش تأثر القصة على ملامح الوجه و تحليها...! "أقول عمو ايش رايك نبطل؟!"، قلت بتوتر، قال بصرامة:لأ... دق الجرس، قلت برعب:عمو ايش بتسوي؟! بتهديد قال:جووووود... دخلت للمجلس و كان فيه باب تاني للرجال عشان يدخلوا على المجلس طوالي..عمو وقف في مكان يقدر يشوف منو إلي في المجلس بس إلي في المجلس ما يقدروا يشوفوه، نفس المكان إلي وقفت فيه لمن عرفت حقيقتي، تتزكروا...؟! سميت بالله و فتحت الباب، دخل بابتسامة واسعة و كبيرة بانت منها ضروسه...! أنا نزلت راسي، أحس بطني مخربط و أطرافي ترتجف، قفل الباب وراه و بعدين مد يدو بباقة ورد أحمر:الورد للورد... اتراجعت على ورا، مسك يدي: عى وين؟! قلت بصوت مرتجف:بأتصل على عمو أشوف متى حيرجع... رفع حاجبه:مو قلتي ما حيرجع قبل 12 -أتأكد أتأكد حسيته مو ناوي يتركني فقلت:الله يخليك والله لو عرف يقتلني... تركني و هربت ورحت لعمو إلي قالي أدخل الغرفة و دخل، طبعا ما دخلت و وقفت مكانو... دخل عمو بهدوء و نظرات ثابتة، انصدم أخو أحمد، و وقف من المفاجأة، قال عمو:اجلس يا علي اجلس... انتبهت لشي..اسمو علي،يااااااه اسمو حلو حرام عليه... جلس علي و على وجهو ملامح المفاجأة، سكتوا لثواني بعدين قال عمو:خير؟..ايش ساير بالدنيا؟! -سلامتك. -الله يسلمك. اتغيرت ملامح وجه "علي" و هوا يقول:هذي ما تبلع لسانها؟!،تقولك على كل شي...! -يا علي الزم حدودك و أدبك، أنا ما أبغا مشاكل و ماني مستعد أخسر أحمد عشان خاطر واحد زيك... -لااااا، حبيبي أقدر أخسرك أحمد في ثواني. -طيب يا علي أنا معتبرك رجال كبير و محترم، مابغا أضارب، أبغا أتفاهم معاك بهدوء لين نوصل لنقطة تلاقي...! رفع علي حواجبو و قال بسخرية:ليه؟..عاد نفسك رجال؟! هنا كشر عمو و كمل علي:يا بابا لو رجال، لو عندك نخوة ما كان خليتها تتطلع و تستقبلني...! -قلت إنك متأمل فيها كفاية، و بعدين هذا اللقاء كان طعم لك، و جود سكتت خوفا من إنو تسير بيني و بين أحمد مشاكل لكن لمن اتعدى الموضوع الرسايل و الاتصالات قالت لي... علي ببجاحة:قلت لك لو أبغى أفرق بينك و بين أحمد فرقت فلو تبغى تتمرجل و تضارب عادي..أنا أصلاً ما كنت أبغا الموضوع يوصل لكذة..صح هددتها لكن بس عشان تخاف و تصير ترد علي..هيا السبب في أي مشكلة حتصير...! قال عمو بهدوء _استغربت إنو ما زال محافظ عليه_:شوف..ما حأطلب منك الصور مقابل أي شي لأنك أكيد مو غبي لدرجة تعطيني هيا من غير ما تحتفظ بأي نسخ، لكن..تبغى انشر انشر و أنا لو أسافر لآخر العالم عشان جود و سمعتها على قلبي زي العسل...تسمعني؟! أنا ما اتحملت و بكيت...أنا عندي أم و أب و أخ و أخت و صديقة و عندي الدنيا كلها في عمو... و قف علي و قال بقهر:إنتا ما فيك رجولة؟!، ما فيك حمية، غيرة؟! قال عمو و هوا يصر بأسنانو:أنا رجال أحسن منك يا بزر... و مسكو عمو و فتح الباب و دفو بهمجية _ما اتوقعتها من عمو_ و قال:ما أشوفك تعتب عند بابنا، فاهم؟! و قفل الباب، و مشي و لمن مر من جمب الورد طالع فيه بكره و حقد و قهر و كمل طريقو للباب، لمن شافني، مسكني و مشاني معاه لين غرفتي، و أول ما دخلنا حط يدو على جبهتي و هوا يقول:مسخنة..كنت متوقع،من صغرك إذا زعلتي تسخني، حبيبي صلى العشا...؟! هزيت راسي، فقال:كويس، انسدحي لين أجيب الفيفادول...! سحبت نفس بعدين رحت و اتمددت على سريري أستنى عمو و أنا أفكر:"أحبك يا عمو أحبك"، رجع عمو، شربت الفيفادول و انسدحت، فجأة حسيت بعمو يدخل معايا تحت البطانية، استغربت فقال:زمان كنتي تصحي و تجيني تبكي:"حلمت حلم يخوف"، أضطر أجي و أنام مع حضرتك، و دحين ما تبيني؟! قلت بخجل:لا مو عن كده بس... قاطعني:أقول نامي نامي... شوية شوية بدأت أحس بالأمان و السكينة الشي إلي خلاني أدفن وجهي في صدر عمو، ضحك"يا بيبي"، ما اهتميت، أهم شي أداوي الجروح إلي بداخلي، يمكن تقولوا مصابة بفراغ عاطفي لكنكم ما تعرفوا ايش يعني أب متخلي عنك و أم مجهولة بتاريخ أسود...! ****************************************** |
الجزء السابع (خربشات جود لسنتها المدرسية الأخيرة) انتهت الإجازة و بدأت المدرسة،فصلي مليااااااان بنات شطار بس الشطار إلي يسووا أي شي عشان الدرجات،و كمان عندهم واسطة عند الأبلات،إلي أمها في المدرسة و إلي أبوها لو قدم شكوى قامت الدنيا و لا قعدت و إلي حلوة،بعض الأبلات يحبوا البنات الحلوات و إلي و إلي...إلخ...! و على فكرة..تراهم عادي يغشوا،من الآخر كده شطارة من غير أخلاق..ما يعجبوني و هما ما أعتقد يحبوني لأنهم حاولوا مرة يدخلوني معاهم لكني رفضت...!، صح أتعب لمن أغيب لأنو ما عندي أحد أسألوا عن الواجبات لكن أمشي حالي...! بس في شي..أنا ثالث...!،تعرفوا ايش يعني ثالث؟!،يعني فرييييييييييييي فريييييي...!،أبلاتنا لا بأس بهم و لو إنو بعضهم يحبوا البنت إلي تروح و تجي عندها و تستشيرها في كل شي...مادري على ايش؟..يعني من حلاتهم؟!،ولاعشان العقل إلي قد اللوزة؟!...! بس الصراحة ماني عارفة ايش أدخل في الجامعة،يعني دحين يمديني أدخل شي أدبي أو علمي،الصراحة متحسفة على تعبي تاني ثانوي و تعبي الجاي في تالث،يعني أنا مستحيل أتحمل أدخل مادة علمية و أتعمق فيها،لا تقولوا كان من البداية دخلتي أدبي..لأني حأزعل منكم؛مو شرحت لكم سبب دخولي العلمي قبل؟!..أني وي حأرجع و أقولكم أبغا أشغل وقتي مو إنو المواد الأدبية سهلة،لا بالعكس،بس أنا أغلب الأشياء في الأدبي أعرفها من قبل ما ندرسها يعني الأدب مثلاً أغلب النصوص إلي فيه أعرفها من قبل و أعرف شرحها و تحليلها و قصص مؤلفيها فما أتعب فيه و النحو أمشي فيه بالفطرة بس المواد العلمية ما أجيب فيها إلا لو ذاكرت من جد و أنا أبغى أبسط عمو..أبسطو بدرجاتي الحلوة يعني...! ************************************************** * أفففففف،طفشانة من فصلي،بينفقع قلبي...!،البنت منهم لو نقصت ربع درجة تسوي دراما في الفصل لا و إلي يجنني إنو البنات يلتفوا حولها و يواسوها و يخففوا عنها مستصابها،تقولو أحد ماكل حلال أبوها...! إلي يخليني أذكر لكم دا الشي هوا المحاضرة السخيفة إلي أكلتها من أبلة الرياضيات..طلبتني في بداية الفسحة و ما تركتني إلا على نهايتها و هيا تقول:"خلاص عندك حصة ذحين،بينا كلام في وقت لاحق _إن شاء الله_"،يعني كان لسه عندها كلام...!،ولاااااااا،محتوى المحاضرة شي تاني،تقول:"إنتي شاطرة لكنك مهملة ما تهتمي بدرجاتك،شوفي كيف "أبرار" و صحباتها يبكوا عالربع و النص و إنتي جايبتلي 9 و نص و رافضة تعيدي..."عادوا راسها..عمى!،ايش إلي أعيد..9 ونص من 10 و أعيد،بعدين أبرار و صحباتها إلي طايرة فيهم ما عندهم ما عند جدة...!،ماااااااااااااالت...! ****************************************** أوهوووووووووووه...!،قال ايه:"خلي الحريم يشوفونك"،الله يهديكي يا جدة ايش إلي يشوفوني ما يشوفوني...!،اضطريت ألبس تنورة طويلة جينز و بلوزة بمبية بنوتية عالآخر...! المهم خرجت و سلمت عالخمسة عجايز و كل ما سلمت على وحدة:"باسم الله لا إله إلا الله"،"ذكر الله عليكي"،"الله يخليكي ذخر لوالديكي"،ههههه والديني ما دروا عن هوا داري على قول دانة...و وحدة قالت مع كل بوسة:"ما شاء الله"،و الأخيرة كنت بديها بوكس عشان تشوف عدل،تخيلوا تبوسني في أدني و ما فيها ضعف نظر،أصلا بعض الكبار كده يبوسوا في الأدن..قرففففف....! جلست بهدوء بعيد عنهم،شوية و قالت جدة:"قومي ذوقيهم قهوتك"،مسكت القهوة و صبيتها بالطريقة إلي علمتني عليها جدة،أمسك كل الفناجين باليمين و أصب باليسار،و والله وزعت عليهم القهوة و جاني مديييييح عليها،بغيت أموت ضحك على حركات جدة..."والله لو يدروا إني ما أعرف القشر من الهيل من البن"،ما أعرف أصلاً كيف تتسوى القهوة...! طبعاً قلت لكم هدا الموقف عشان أفسر لكم سبب خطبتي،انخطبت و عمو رفض من غير ما يقولي حتى،جدة حاولت تلعب آخر ورقة رابحة بنظرها ألا و هي إنو القرار قراري،قال عمو:"طيب"،و سألني و رفضت،و جدة دحين زعلانة مني،بس عادي ياما زعلت مني و رجعت رضيت...! تصدقوا لمن ناقشت عمو في موضوع زعل جدة قال:"والله لو خليتها على راحتها كان إنتي مخلفة 3 بالقليل"،انصدمت لكني أرجعت الأمر لزواج جدة إلي سار و عمرها 15 مادري14 سنة...! و أرجعت الأمر لشي تاني كمان و إلي هوا فكرة جدة بإنو لو اتزوجت رح أنستر..ما أقدر ألومها و أنا واثقة من إنها خايفة عليا..صح أتضايق و أزعل لمن تلمح للموضوع لكن أياً كان هدي جدتي و أمي..ياما و ياما صبرت عليا و على تصرفاتي إلي ما تروق لها و ما تعجبها و تشوف إنها حركات بنات "هدا الزمان"...! عالعموم حطوا في بالكم إني أحبها و ممكن أتحمل منها أي شي و متأكدة من إنو لازم أبرها زي ما لازم أي وحدة تبر أمها..و لو في يوم ما سمعت كلامها أكيد حيُعتبر عقوق...! ************************************************** ** خلص التيرم الأول على خير،نسبتي 99,98% و ترتيبي الثانية على دفعتي الأولى على فصلي..الحمدلله،لكن في شي و إلي هوا حقد أبرار عليا،جات تقولي مرة:"دحين إنتي إلي غلبتيني"،تنحت فيها الخبلة...!،الأولى بنت في الفصل التاني،شاطرة و مجتهدة جداً،يعني..يطلعوها مثالية و متميزة،أما أنا فلا دا و لا دا لأني أخالف في الشعر و الجزمة و المرطب...إلخ و في الفصل مالي حس،محد يعرفني...!،أصلاً ما أهتم بكل هدا..نسبتي حلوة..خلاص الحمدلله و يوم التكريم غبت لأنو ما يعطونا حصص كتير...! و عمو وداني محل جوالات و خلاني أشتري هدية نجاح جوال،اخترت جوال حلو عجبني،لا تسألو عن اسمو،ترى ما أدري،بس أعتقد إنو غالي شوية..بس عادي؛ما يغلا عليا شي...! و بعدين رحنا و اتعشينا في مطعم،والله فلة،عمو على قد ماهوا عاقل فري و على قد ماهوا متحفظ عفوي _معايا_...! ***************************************** "عمو أبغا أروح السوق"،قلت لعمو بعد الغدا،قال:إن شاء الله يوم الثلاثاء الجاي...! -لا عمو،اليوم عشان في أشياء ضرورية أبغاها...! -زي... -زي ملابس خارجية و داخلية و أبغى عطر و أبغى ساعة طفشت من إلي عندي و سماعات للآي بود وّ... علقت على حرف الواو،قلدني عمو:وّ... قلت بانفعال و سرعة:عمو يعني ايش هدا؟!ليش لازم أشتري أشيائي وحدة وحدة،هيا قولي بالله كيف أستغني عن العطر أو الملابس..كلها أشياء ضرورية أبغاها دحين بعدين إنتا منتا مشغول في العصر و كمان منتا... قاطعني و هوا مدووش:بس بس خلاص..بأوديكي اليوم بعد العصر...! -من جد...؟!،ثاااااانك يووووووو....! -والله منتي ريلي ولكم بس ايش أسوي؟!،عندك قدرة عجيبة عالزن.."كمل بتهديد" بعد العصر علطول..! -عطول عطول عطول...! -عطول و لا عرض؟!،ها ها ها...! -هههه بايخة...! -أجل ليش ضحكتي؟! -بس... و قمت و رحت أتجهز للسوق لأنو ما بقي شي عالعصر...! رحنا السوقو كان هادي و حلو و مافي زحمة،قعدت أتسوق لين المغرب لكن بنتيجة لأني عارفة إني ممكن ما أروح السوق لشهر أو شهر و نص...!،صلينا المغرب بعدين قال عمو إنو يبغا أشياء،لمن جينا بندخل المحل كان مليان شباب..عشان كده وداني عمو للطاولات و اشترالي عصير فرولة طعممممممممممم،حط الأكياس عندي و راح للمحل...! بعد شوية بدأ السوق يتملى،أففففف بروح البيت...!،وهـ طالعوني..والله إني حيوانة لمن خلصت أشيائي سار السوق ممل،من جد إني بنت...! بعد دقائق جات شلة شباب يمكن 6،7 أنفار>>>ولا كأنهم رز بخاري أنا و وجهي قال أنفار قال...! المهم جلسوا على طاولة قريبة شوية مني،طاولتهم كانت جنب الطاولة إلي قدامي،أنا كنت أشرب العصير بالتالي كاشفة،كنت ما أسوي شي ملفت،أشرب و عيني عالعصير،متنحة يعني...! فجأة سمعت واحد من الشباب يغني:أحلى من القمر هيا..أحلى يمكن شوية..أحلى من العسل كلمة..قالتها بحنية... قاطعو واحد و هوا يقلد صوت بنت:أنا لسه ما اعترفتلك...! -يا حبيبتي إنتي تبغي تعترفي بس مستحية،عساني فدا لهالخدود المتوردة...! وجع إن شاء الله،من جد قلة أدب،بس ما أبغا أعطيهم نظرة،يمكن مو عليا و فشلة لو طالعت فيهم باحتقار و هما ما يقصدوني...! قال واحد غير الاتنين إلي اتكلموا:يا فرولة جدة... -ايش فرولة إنتا التاااااااانييييييي اسمها ستروبييييييرييييييييي....! قال ستروبيري بدلع و مطها،انقهرت أنا،عرفت إنهم يقصدوني،طنشتهم لكن حواسي ما طنشتهم،قال واحد:ايش ذا الثقل؟!،يا ربيييييييه...! قال واحد بلعانة_دوبي أسمع صوتو_:"ما أقول إلا يا ليتني مكان المصاصة...!"،أنا هنا شرقت و بعدت عن العصير و قعدت أكح و أكح و أنا أطالع فيهم بحقد،هما بكل لؤم قعدوا يضحكوا أول ما بديت أكح،بعد ما وقفت الكحة غطيت وجهي،قال واحد فيهم:لاااااااا،ولعوا النور...! -الدنيا ظلمت...! و تعليقات سخيفة تانية،الله يهديك يا عمو وينـ...قطع تفكيري رنة جوالي،شفت المتصل،كان عمو،رديت:نعم...! -ايوة جود أنا في المحل..تقدري تجيني؟! -ايوة بس ليه ساير شي...؟! "الله..جواااااااالي كشخة..شوفوا"،أعطيتهم نظرة من تحت الغطا و أنا أسمع عمو يقول:لا بس ما معايا صرف...! -صرف ريالات؟! -ايوة... -آها طيب دحين جاية...! قمت و شلت الأكياس،كانوا أربعة،كل اتنين في يد،و العصير ما بقي فيه إلا نقطة فرميتو في الزبالة القريبة و مشيت متجهة للمحل إلي فيه عمو،ما كان بعيد،فجأة حسيت بأنفاس عند رقبتي،التفت مستغربة،و ما أدري إلا بواحد من ديك الشلة يقول:"أساعدك...؟!"،مصداقيتي كراوية للقصة ما تسمح ليا أخبي عنكم إنو قلب ادردب لين رجلي،من هناك شفت الشلة متجهة نحوي،قلت:"لالا شكراً"،و مشيت بسرعة:"و ربي غزال"،"والله لأجيب راسها"،و غيرو،لمن وصلت للمحل ما كان فيه ناس كتير_الحمدلله_،دخلت لقيت عمو عند الكاشير،حطيت الأكياس و طلعت محفظتي و تخيلوا كم كان يبغى؟!،كان محتاج تلاتة ريال بس...! الحساب كلو 303 و عمو ما عندو إلا 50 و ما يبغا يصرفها عشان تلاتة ريال،يعني صح أحيانا كده يسير لي و ما أحب إني أصرف لكن لمن تفكروا إنو الموقف السخيف إلي سارلي قبل شوية كان عشان تلاتة ريال تـ...>>>أترك لكم الوصف...! خرجنا أنا و عمو و شال عني بعض الأكياس،مرينا من عند شلة الحمير إلي ما يتسمو،و ما رموا عليا ولا كلمة،شي حركات لمن يكون ورا الوحدة رجال...! رجعنا البيت،بست عمو عشان الروحة،و دخلت غرفتي أجرب أشيائي و كل شوية أنط عند عمو أو هوا يجيني ناخد رأي بعض في مشترواتنا...! ************************************************** ** كنت قاعدة عالنت..فاتحة الماسنجر..أكلم دانة..أنا و هيا فاضيين..و قاعدين نقول لبعض نكت..نكت بايخة..حرام مو كلها بايخة..بس برضو..كلامنا كلو سخيف...! دانة:أقول جود..وش رايك نشغل المايك؟! -اقلبي وجهك..أكلمك بالكتابة و يخب عليكي...! -تلايطي بس..حتى أنا مابي أحاجيك بالمايك..أخاف تطلعين ريال...! -دانة..دانة..تخيلي أطلع رجال...؟! -هههههه...خبلة...! كنت حأرد لكنها سبقتني و رسلت:تخيلي نطلع أنا و إنتي رياييل...؟! -الله...حماااااس...! -جود يا خبلة...! -أقول دانة اسمعي دي النكتة..يقولك واحد غلس طاح قال أحسن...! -ههههههههههههههههههههههههههه...طب خذي هذي..واحد سأل أبوه..وش أفيد الشمس و لا القمر..قال أبوه:القمر لأن الشمس غبية تطلع في النهار...! قعدت أطاااالع مدة و عدت قراءة النكتة،بعدها كتبت:بس القمر يستمد نورو من الشمس...! -وشلوووووووووون؟؟؟!!! -الأب غبي لو مافي شمس حيكون مافي نور القمر...! -جود يا خبلة يا غبية يا بايخة...! -وجع وجع وجع..ليش تسبي؟! -شو أسوي..الله مبتليني بج...! -دانوووووه...! و رسلت لها وجه معصب...! رسلت ليا وجه يضحك..أفففف ايش فييييييييييييييييييييييييييه؟؟؟!!! بعدها كتبت:ما عليج خلاص..اسمعي هذي..يقولج في بقرة ياها جفاف نزلت نيدو...! -ههههههههههههه...حللللللللللللللووووووة....! -طبعا حلوة مو دانة الحلوة قالتها...! -مشكلة الواثقين...! فجأة جاتني إضافة من ايميل مألوف..الايميل فيه "سرو" و بعدها رقم..استغربت..الفضول خلاني أقبل الإضافة و أنا أقول لدانة إني مضطرة أخرج..و سويت لها بلوك و قبلت الإضافة...! علطول جاني:السلام عليكم رديت:و عليكم السلام..مين؟! -جود...؟! استغربت..راودتني بعض الشكوك بس ما حبيت أتسرع،كتبت:ميييييييين؟! -جاوبيني جود و لا لأ...! -إنتي إلي أضفتيني..قولي مين و بعدين أجاوبك...! -أوكي..أنا سارة..جاوبيني جود و لا لأ...؟! ما انصدمت لأني كنت متوقعة و كمان هدا الايميل أشوفو فوق في الرسايل إلي يرسلها عمو...! -قلت:أكيد أخدتي ايميلي من رسالة رسلها عمو لكي...! -ايوة..أنا أكلمك من غير محد يدري..أنا نفسي أتعرف عليكي..و..يعني إنو نسير أخوات من جد...! راودني شعور غريب..غمضت عيني و أنا أدخل كمية كبيرة من الهواء لصدري و أخرجها...فتحت عيني و رسلت:"سارة حبيبتي"،بعدها كتبت:ساعات نحس إنو الكبار يسووا شي غلط و إنو ما بيدنا حيلة و الموضوع يكون حساس لدرجة ما نقدر حتى نفكر مجرد تفكير إننا ننقاشهم أو نقولهم على رأينا...! -بس يا جود أنا أحس إنو إلي يسير مو غلط بس..أنا أحس إنو حرااااااام و ربنا حيعاقبنا...! -سارة أنا كل إلي أقدر أسويه إني أشكرك على إنك حسيتي بيا و أنا عارفة إنك تبذلي جهدك و أنا عارفة كمان إنك تتعرضي للتهزيـئ و الخصام بسببي..بس يا سارة إلي إنتي تسويه غلط..إنتي قاعدة تسوي شي ما يرضي لا أمك و لا أبوكي..و إلي ساعدك على إنك تسوي دا الشي هوا ثقتهم..أقصد إنهم أعطوكي الثقة و خلوكي تجلسي عالنت لحالك..لو كانوا من النوع إلي يراقب بناتهم و يقعدوا معاهم عالنت ما كان قدرتي تضيفيني و تكلميني..صح و لا لأ...؟! -صح بس هما كمان غلطانين..ماما يمكن يحق لها عشان يمكن هيا حست بالخيانة بس بابا..بكامل رغبتو اتزوج أمك و جابك..مو من حقو يرميكي...مو من حقو ما يعترف بكي..حرام..إنتي مالك ذنب...! غصباً عني دموعي نزلت،كتبت:الله يسامحك يا سارة..بكيتيني...! -جود حتى أنا..قاعدة أبكي...! ابتسمت بحزن و أنا أكتبلها عشان أنهي هدي المحادثة:أوكي سارة..احنا دحين مافي في يدنا شي..ايش رايك لمن نكبر بعدين و نسير نسوي إلي نبغاه نسير من جد أخوات..نتقابل و نروح و نجي مع بعض و هدي المحادثة نخليها سر صغير بيني و بينك..و لمن نكبر نتذكر و نقعد نضحك على تصرفاتنا و محاولاتنا و احنا صغار..بس دحين انسي موضوعي..ركزي على نفسك و دراستك زي ما أنا حسوي..و لمن نكبر حيسير إن شاء الله إلي نبغاه...! -طيب...! -يلا باي حبيبي..الله يحفظك...^_^ -باي... و خرجت و حذفتها...! بعد مرور بعض الوقت..حسيت بسعادة..ما أعرف كيف أشرح لكني حسيت بسعادة و نمت و أنا مبتسمة و في داخلي أدعي لسارة..أدعي لها من قلب..و عرفت ليش أجر إلي يسعد مؤمن كبير...! ************************************************* |
الجزء الثامن "ابنتي ما عادت طفلة" (فترة الإجازة الصيفية قبل الجامعة) الساعة 8:30 صباحاً، أنا دحين في المدرسة عشان أستلم شهادتي و ملفي، خلااااص معد فيه مدرسة، اللاااااااه بروح الجامعة...مادري ليه أحسها كشخة...!، أعرف إنو الجامعيين حيقولوا عني سخيفة بس ما يقدروا ينكروا إنهم حسوا بالإثارة تجاه الجامعة في يوم من الأيام...! أففففف،قال ايه قال..بعد عشرة دقايق، لنا نص ساعة ملطوعين و لسه ما أعطونا الشهادات،دق جوالي ينغمة رسالة، كانت من عمو، فتحتها:"هاه جود بشري"،رسلت لو رسالة:"بأنام و هما لسه يقولوا بعد عشرة دقايق...!"، رفعت راسي على صوت عالي:"جوااااالي،أهوه معاها"، كانت أبرار، اتقدمت مني و هيا تقول:"جوالي، إنتي سرقتي جوالي...!" البنات بكل لقافة التفو حولنا، صح اتوترت بس ما بينت لهم و قلت بابتسامة:آها..يعني إنتي ضيعتي جوالك...؟! رفعت حواجبها و اتكتفت:قصدك سرقتيه مني...! يووووه على حركات بنات المدارس،قلت:هممممممم، من متى؟! قالت بتذاكي:من آخر يوم في الاختبارات النهائية. قلت باستنكار مفتعل:متأكدة...؟! طالعتني باحتقار و قالت:ايوة..ليش أكذب؟!، إنتي إلي ما حيفيد معاكي الكذب...! -همممممممم، بس فيه رسايل و مكالمات من تاريخ... قطع كلامي رنة جوال، كان الصوت طالع من جيب أبرار...! البنات ماتوا ضحك، كزبتها بانت، طالعت فيا بحقد، قلت بصوت عالي عشان أسلم شرها:وااااااا هدا مو جوالي... طالع الكل فيا مستغرب، أنا ضحكت و قلت:"شفتو جنبي و فكرتو جوالي، دوبي اتزكرت إني نسيتو في الشاحن"، طالعت في أبرار:"سوري والله سوري،الغلط غلطي" "يلا بنات،تعالوا عشان تاخذون شهايدكم"،كل البنات راحوا لعند الأبلة إلي نادت، ما بقي إلا أنا و أبرار، ما كلمتها و لا حأكلمها و بدأت أرسل رسالة لعمو أخبرو فيها إنو النتايج طلعت، رسلتها و رفعت راسي عشان أرد على سؤالها:"ليه؟!"، اتنهدت و قلت:عشان لمن كنا أولى ثانوي آذوني بنات سنة تاني بتريقتهم عليا بإني بائعة الكبريت الفقيرة الوحيدة، جيتي إنتي و قلتي إنك صحبتي و صرفتيهم عني، عشان موقفك دا ما كرهتك و لا حأكرهك لأني أعرف إنك في يوم من الأيام حتكبري و تتزكري هبالتـ...قصدي تصرفاتك دي، بعدين بصراحة الموضوع كله سخافات بنات" خرجت جوالها و قالت بسخرية:أصلاً جوالي ما يجي جنب جوالك شي...! جوالها كان حلو و مرتب لكن ايش أقول عن تخلف البنات و فراغ عقولهم...؟! -مو مهم..لو يرسل و يستقبل مو مهم...! -مادام مو مهم بادليني... انصدمت و قلت:سوري ما أقدر...! -مو دوبك تقولي... قاطعتها:لأنو هدية و أحبو... جلست جنبي و قالت:"اللااااااااه في أحد يهديكي..."، فجأة وقفت و صرخت:مرة ثانية فتحي عينك كويس...! ومشيت، بعد شوية اكتشفت إنو البنات طلعوا من جوة...يااااارب رحماك إن شاء الله ما يكون في الجامعة زي دي الأشكال، و بعدين _زي ما أسلفت_ جوالها مرتب و ما فيه شي...و يالله خليني أروح أجيب شهادتي، أكيد خفت الزحمة...! رسلت رسالة لعمو عشان يجيني و ما طول لأنو كان متعمد يسجلني في مدرسة قريبة من شغلو، أول ما دخلت السيارة قلت:ما شفتها لسه... -ليه؟! -بس كده، نعسانة و أبغى أنام، بعد ما أصحى أشوفها...! -الله يخلف، أنا أول ما أخذت الشهادة بغيت أمووووت رعب و إنتي ولا على بالك...! -بأحطها عالتسريحة و لمن ترجع من شغلك شوفها، كمان عشان تكون ردة فعلك معتدلة...! -أعوذُ بالله..ايش ذا التشاؤم؟! ضحكت ضحكة واثقة:قصدي أخاف من الفرحة تاكلني...هههه...! طالع عمو فيني بطرف عينو:الغرض يعني...؟!، تبيني أضحك...؟! -هههههههههههه...ما طلبت منك تضحك...هههههههههههههههههههههه...! -انزلي انزلي بس...! -هههه..وين أنزل...؟! طالعت من الشباك:وي وصلنا...! نزلت و أنا أقول:أقول عمو ايش رايك تنزل معايا...؟! قال عمو بنفاد صبر:برجع شغلي...! سبلت بعيني و قلت بدلع مصطنع:مين أهم أنا و لا شغلك؟! -زوجك بيرجعك من تاني يوم بس ابعدي عن السيارة...! -ههههههه...بايخة...! رسل لي عمو نظرة آباء حمراء خوفتني و خلتني أبتعد عن السيارة و أنا مبرطمة، و طلعت فوق و أول ما وصلت شقتنا رسلت لعمو رنة على أساس وصلت الشقة و جيت بأدق الجرس لكن استوقفني صوت:"لو سمحتي أختي..."،التفت:نعم... كان شاب في أواخر العشرين مع وحدة، قال:تعرفي وين شقة الأستاذ/سعود الـ*****...؟! -هادي هيا بس هوا مو موجود..خير..؟! قال و هوا يأشر عالشقة الفاضية قبال شقتنا : لا بس أنا حبيت أشوف الشقة لأنو بأستأجرها... -آآآه طيب لحظة... دقيت على عمو مستغربة:"العادة ما يدي موعد إلا و هوا فاضي"،ما رد، دقيت جرس الشقة، فتحت لي الشغالة، قفلت الباب ورايا، بس قعدت أطالع من العين السحرية و أنا أعاود الاتصال، فصلت و أنا أشوف شي مرعب، "الوحدة" رفعت غطوتها و تطلع ملامحها ملامح "وحد" مو وحدة، و تكلم الوحد بصوت رجال:ليش خليتها تدخل..؟! -وش عليك..؟، مافي رجال في البيت...! يميييييييييي، قفلت الباب بالزرفونة و دفيت عليه كنبة و طلعت فوقها أراقب، قربوا من الباب، دقوا الجرس، طبعاً طنشت، لكن لمن لاحظت إصرار قلت:مييييييييييييييييين...؟! -المستأجرين...! -آآه طيب لحظة بنادي أخوية... و قعدت أراقب أستنى ردة فعل، اتكلموا، ما سمعت لأنهم ما كانوا يتكلموا بصوت عالي زي قبل شوية،عمى...، فجأة حط واحد عينو على العين السحرية، أنا بكل غباء صرخت و طحت على ورا من الخوف، سمعت صراخهم و عصبيتهم، تدروا ايش سويت؟!، رحت المطبخ و أخدت سكينة و سحبت الشغالة معايا و رحنا لغرفة جدة، و هناك قلت لها الموضوع و كانت ردة فعلها:"أوووووه مشكلة كلام بابا سَأُود (سعود)" -لا ما فيه مشكلة إن شاء الله يروحوا...! -تعال نشوف...! -لاااااااا، اقعدي هنا معايا، و بعدين كيف نخلي جدة لحالها؟! -طيب قدا (غدا)...؟! قلت بصوت واطي بانفعال _عشان جدة ما تصحى_:الله لا يردو الغدا...! ما عجبها الموضوع لكن كيفها، والله ما أخليها تروح، هادي إنسانة أمانة برقبتنا، بعد مرور ساعة إلا ربع رحت بحذر أنا و الشغالة ،لكن كل شي كان تمام و يدل عالهدوء، قربت من الباب و أنا أشجع نفسي بإني حصنت نفسي بأذكار الصباح...!، طالعت من العين السحرية،ما كان فيه أحد، و مع شدة الخوف وسوست و فكرت إنهم ممكن يكونوا في المجلس – مدري كيف يعني ! - فرحت المجلس برضو ما كان فيه أحد، خرجت بسرعة منو خوفاً من إنهم يكونوا في حمام الضيوف لكن آنستنا الكريمة دقت على باب الحمام بكل قوة و صرخت بغضب:هرامي...مين؟؟؟...إلخ شديتها بسرعة و رحنا لغرفة جدة لكنها أبت إلا أن تسوي الغدا و طنشتني و راحت...! أما أنا و بعد مرور ربع ساعة رحت لغرفتي و حطيت جوالي _إلي سرقتو_ في الشاحن و الشهادة ما قدرت أقاوم و فتحتها و كانت نسبتي...ماني قايلة لكم اعرفوها لمن يجي عمو...حطيت الشهادة عالتسريحة و نمت...! ************************************************** ** صحيت و طالعت في الساعة كالعادة...أووووه 9 الليل، لا ظهر و لا عصر و لا مغرب...دخلت الحمام،خرجت..صليت صلاة الله يخلف عليها_استغفر الله_، قلت أذكار المساء...أذكار المساء و 9 الليل..وضع غلط...!،استغفرت شوية بعدين لميت سجادتي و شرشفي و أنا أطالع في التسريحة..غريبة ما شافها،فتحتها أراجع درجاتي لكنها ما كانت الشهادة، كانت: (احنا المستأجرين الجداد، لو تبغي عمك تعالي بكل هدوء للمجلس)، ضحكت، يعني عمو يغبى يسوي مقلب و شكل الشغالة قالت لو فاستغل الشي دا...المصيبة خطو...والله عمو مو وجه مقالب...! كنت بروح المجلس لكني أرجحت إني أصلي العشا، أخاف أنشغل مع عمو و أنساها، صليت و قرأت شوية قرآن، بعدين رحت للمجلس و أول ما دخلت انمسكت من ورى زي في الأفلام،قال:جيتي للموت برجلك، نياهاهاهاها...! ضحكت و فلت يدي منو و قلت:كاتبلي بخط يدك رسالة استدراج...! قال بسخرية:والله إنتي إلي دخلتي الدور؛ايش رسالة استدراج...؟! -رقِّع رقِّع...! ضحك و قال:تعالي شوفي... في الجزء التاني من المجلس كان فيه طاولة طعام عليها علبة كيكة،ابتسمت،أحب الحلويات...!، و جنبها كان فيه هدية مغلفة،رحت و مديت ايدي لكن عمو وقفني:لحظة لحظة..."طلع جواله"نزلي شعرك على وجهك عشان ما تباني...! -كمان أبا أصور الكيكة... عمو بتلقائية:بنصورها بالكاميرا إلي... سكت و بان عليه القهر من زلة لسانو، ضحكت و قلت:لسانك حصانك إن صنتو صانك و إن خنتو خانك...! -افتحي الهدية أقول... ضحكت و أنا أنزل شعري و بدأت أفتح الهدية إلي أعرفها، لكن حسيت بسعادة كبيرة لمن لقيت إنو الكاميرا هيا نفسها إلي أبغاها و قلت لعمو عليها،نطيت عليه و حضنتو:مرررررررة شكراً...! و بستو مرة تانية بقوة، قال بعدما نزلني على الأرض لأني كنت متعلقة فيه:خنقتيني...! -مااااالت...! شغلت كاميرتي الجديدة على الفيديو، أعرف أتعامل معاها لأني قرأت عنها كتييير، وجهتها لعمو و قلت:هدا عمو سعود يا كاميرا..هوا إلي جابك ليا و هوا أول واحد لازم تدخل صورتو الميموري حقتك"لفيتها عليا"و أنا جود صاحبتك و هادي"وجهتها للكيكة"كيكة نجاحي،هيا عمو افتحها... -لا إنتي افتحيها... -طيب خد صور... أعطيتو الكاميرا و فتحت الكيكة بعدين قلت:قفل أبغا أستمتع بالأكل...! ضحك عمو و قفل الكاميرا بعدها قال بصوت عالي:ياااااه،جوالي...! ضحكت لأننا نسينا كاميرتو مفتوحة،قلت:ولاَّ زمانك... -هيييي حبيبي دا ما أسمح لك...! أكلنا من الكيكة و احنا نتفرج على مسرحية (لولاكي 1) مسرحة كويتية قديمة و بعدها طلبنا عشا و لمن كنت أدور على شي حلو نتفرجو و احنا ناكل تخيلوا ايش لقيت...؟!...لقيت مسرحية (مدرسة المشاغبين)مسرحية مصرية قديمة...اللاااااه العرب زمان كانوا فنانين...! اليوم حسيت إنو الدنيا مو سايعتني و إني أملك كنز ثميييين...! أووووووووه مو كأني ما قلت لكم نسبتي...خلينا نعذبكم شوية>>>الأخت واثقة إنكم مهتمين...! ********************************************** الساعة 12 الظهر،أمس كان يوم رائع_الحمدلله_،طالعت في كاميرتي الجديدة،أحس كل شي يستاهل التصوير...لمبة غرفتي،شرابي،سلة الغسيل،كرسي الحمام_الله يكرمكم_،طرحة جدة الملونة،كل شي كلللللل شي...و عمو الكريم ماخدني مسخرة لكن عادي؛أنا عارفة إنها مجرد نشوة،يعني أول ما اشتريت الجوال كنت كل شوية أغير النغمة و لا الوول بيبر و كمان الآي بود كنت كل شوية أغير محتوياتو وكده...! مع سعادتي بتخرجي و بنسبتي إلي ما تعرفوها _حررررة_ و بكاميرتي و بكل شي حولي طفشانة،ليييييش؟!،علشان جدة اليوم حتاخدني معاها لبيت وحدة من صحباتها مسوين جمعة أما عن محلي من الإعراب بينهم فما أدري...آآآآآه وت ايفير لأني أبغى و لا ما أبغى أروح نفس الشي،أنا ممكن أتحمل جمعات العجايز لأني متعودة عليها و أعرف أتعامل معاهم لكن إلي قاهرني إنو جدة ماخدتني عشان العجايز (جدات الرجال) يشوفوني،تبغى تزوجني بأي طريقة وكأني حمل تقيل و تبا تتخلص منو و أنا هدا الشي ما يعجبني خاصة مع تلميح جدة بإنو قطار الزواج حيفوتني كأني أربعينية دحين،أفففف..لكن لمن أفكر بجدية في الموضوع _بعيد عن أحاسيسي و تأثري_ ألاحظ إنها خايفة عليا تبغا تزوجني و تستر عليا قبل ما يسير لي شي بسبب حقيقتي،على كل حال أنا لمن أوافق على أحد _مبدئياً_ حأقولو على أصلي قبل ما نعقد،هذا قرار اتخذتو لمن انخطبت أول،صح ما كنت موافقة بس خفت أنغصب،طبعاً محد منكم _قرائي الأعزاء_ يوافقني لكني مقتنعة و بقوة..تخيلوا يكتشف زوجي المستقبلي الحقيقة بعد ما نخلف لنا 4 ولا 5،طبعاً مستحيل يقبل يكمل معايا و أنا و بزورتي بعدها فين نروح.._الله لا يقدر يعني_ بس أنا أقول...! إلي يخليني أفتح دا الموضوع هوا شي سار اليوم الصباح بدري،شي زعلني كتييييير،لكني اتخطيتو لمن شفت الكاميرا و اتفرجت على فيديو الحفلة البسيطة أمس و هدا الشي هوا: (رحت بعد ما صليت الفجر لجدة و قلت:جدة نجحت...! -مبروك...! -الله يبارك فيكي..تخيلي كم نسبتي جدة تخيلي...؟! -كم...؟! -100% جدة،100%...! -الله يوفقك يا بنتي و يستر عليكي...! -جدة منتي مبسوطة...؟! سألتها بإحباط،قالت:أكيد بس بأسعد أكثر لا شفتك في بيت زوجك وسط أولادك..و اليوم بتجين معي...) مداخلة من الكاتبة:"جود يا غبية قلتي لهم على نسبتك" وااااااااه زل لساني كلو منك يا كاتبة ليه ما ذكرتيني...أففففف منك...! مداخلة أخرى:"أقووووووووووول...احترمي نفسك لا أقلب حياتك نكد و أخلي نهايتك وحشة" أووووه،خلاص يا قراء بالعافية عليكم الخبر هدا،أنا ما أقدر أعترض أخاف "مُعَزِبتنا" تزعل...نرجع للجد... صليت الظهر ... رجعت للاب توبي حبيبي و قعدت أفكر في إلي حسويه دي الإجازة،ما أبغا أضيعها زي الإجازة إلي فاتت في قراءة الكتب و الهجولة في الانترنت..أبغى أسوي شي مفيد،مممممممممم فكروا معايا ايش أسوي؟!،ايش أسوي؟!،اييييييييييييييييييييييييييييييييييييييييش؟ !...! بسسسسسسسسس لقيتها،حأتعلم فرنسي،بالله مو فنانة؟!،يعني أنا انجليزيتي جيدة جداً _الحمدلله_،لكن الفرنسي أعرف فيه 3 كلمات:"ميغسي،مادموزيل،ايكسيوزموا"،و ماني متأكدة من النطق كمان...! و لو اتعلمت لا تتوقعوا مني أفلت كلمات فرنسية لأنو "مُعَزِبتنا" ما عندها هرجة في الفغنسي احم احم قصدي الفرنسي،نسيت إنكم جاهلين سامحوني>>>أعلم أني شطحت...! بس جد هيا قالت لي أقولكم كده>>>تستحي تعترف بجهلها>>>جوووووودوووووه>>>خلاص خلاص...! ************************************************** ********* "نجحتي يا جود؟!"،سألتني وحدة من العجايز صحبات جدة،قلت لها:ايوا الحمدلله...! -كم نسبتك؟! أفففففف،ايش دخلها؟!،مناشيف دولا...! للتوضيح:"مناشيف" تعني..ناس مو شايفين خير يعني عينهم حارة...! قلت باستهبال:ليش الإحراج؟! قالت وحدة:الله يا بنتي،عيب ذا الكلام محدن غريب هنا...! غربلوا راسك _على قول دانة_،عمى،ما أبغى أقول..وي...! ضحكت ضحكة مصطنعة:اطمني نجحت و هدا هوا المهم...! فجأة قالت جدة:مية...! طالعت في جدة مصدومة،ليه كدة يا جدة؟!،لييييييييه؟!،الله يهديكي...!،صح قالوا ما شاء الله ودعوا لي بس برضو مالو داعي...! قالت وحدة:بناتنا في الثمانين و السبعين و إنتي مية وحدة مرة...! شفتوا...؟!،عشان كدة..الله يسامحك يا جدة...! بعد دا الحوار اتعكر مزاجي و اضطريت أجاوب على أسئلتهم إلي تبين قد ايش هما حريم فاضيات ما عندهم شغلة إلا الناس و الزواج...! ************************************************** ******* في شي مزعلني و إلي هوا إني ما حأقدر أروح حفل تكريم الأوائل على جدة،يعني أنا جبت الأولى _الحمدلله_ ،وكنت متحمسة أروح بس ما أقدر،ليه...؟!،عشان خاطر العائلة الكريمة بتتجمع اليوم احتفالاً بالمتخرجين من الأولاد و البنات،و إلي فاقع قلبي هوا إني ما حأخرج و أنبسط معاهم لأنهم _وبكل بساطة_ مو معترفين بيا،أفففففف...كلو من جدة،الله يهديها أحيانا تجيها طلعات عجيبة..قال ايه قال:"أهلك بيجون و إنتي في ذا الحفلات و الهبل"،الحفلات و الهبل مهتمين بيا أكتر من أولادك و أحفادك الكرام...!،عمو ما يدري بالموضوع و لا كان سوا شنة و رنة على جدة و كان وداني،آآآآه يا ليتو يدري،بمووووووت قهر،نفسي أروح،بتقولوا لي قولي لعمك،أقولكم:طيب بس أنا ما أحب أسوي مشاكل كفاية المشكلة الأساسية إلي أنا سببها _بالأصح_ نتاجها و سببها سي السيد بابا _استغفر الله_،الله يسامحو بس...! سمعت دق على باب غرفتي،قلت بدون نفس:"ادخل..." دخل عمو و قال:إنتي لسه ما جهزتي؟! -لا تتوقع مني أطلع لهم...! -شي طبيعي ما تطلعي،أصلاً أنا ما بخليكي،قصدي لحفل التكريم...! -ها...! -مو اليوم مسوين في كلية ***** حفل لتكريم الأوائل على جدة؟! -إلا...! -طيب...؟! يا سلااااااااام،والله يا عمو إنك خطنطييييييييييير،بس مين قالو؟! -جدة تقول لأ عشان اليوم العائلة الكريمة حيحتفلوا بـ... قاطعني بعصبية:كم مرة أقولك تكلميني أنا قبل ما تكلمي جدتك؟! -طيب يا عمو ايش أسوي؟!،يعني ما أبغاكم تتضاربوا... -مو عشاننا حيوانات احنا نتضارب...! -يوووووه يا عمو خلااااص...! -خلاص...؟!،إذا خلاص قومي بسرررررعة والبسي عشان أوديكي قبل ما يجوا...! ابتسمت:حااااااضر...! -يلا بسرعة...! وخرج،لمحت ابتسامة خفيفة على وجهو،يضحك عمو لمن يسوي نفسو عصبي و حازم؛لأنو بطبيعتو مو كدة و تحسونو يبا يضحك بس كاتمها...! لبست و أنا أتساءل:"ايش حيسوي بابا لو عرف؟!"،هل حيرجع يعترف بيا متفاخر و لا حيطنش لأني ببساطة شخص غير مهم بالنسبة لو...؟!،في كل الأحوال أنا ما أتساءل حباً فيه...المسألة مسألة فضول...! لبست فستان بسيط جداً و فتحت شعري و لبست عليه طوق بلون الفستان و لبست حلق و سلسلة و صندل فقط لا غير...! لبست العباية و حطيت الروب إلي أعطوني إياه في كيس لأنو تقيل،لمن أوصل حألبسو،خرجت لعمو و قلت:يلا جهزت...! طالع عمو في الساعة:باقي وقت ايش رايك نتصور؟! -فكرة...! -يلا جيبي الكاميرا...! رحت و جبت الكاميرا حقتي ،مالتي،مالي،بتاعتي و ماين>>>مو كأنو مالي حقت أولاد>>>وت ايفير... و قعدنا نتصور بسعادة بعدين وصلني عمو و قلي أتصل عليه لمن أخلص،صح حسيت بغرابة لأني لحالي و كل وحدة معاها أمها،أختها،خالتها أو أي أحد لكني و بكل خيالية حسيت عمو معايا،ابتسمت رغم إحساس مؤلم بالنقص،لبست روبي،و بدأت مراسيم الحفل،و إذا عن إلي صار في بيتنا فعمو حيسير راوي مؤقت إلين أرجع...!>>>بس شوية شوية عليه،تراه مو خبير...! ^^^^^^^^^^^^^^^^^^^ أمممممممم أنا سعود عم جود و الآنسة الكاتبة طلبت مني أحكِّيكم إلي سار في بيتنا عشان جود مو موجودة،أتمنى تعجبكم طريقة روايتي للأحداث...! في المجلس عند الرجال_و أنا ما أقدر أحكي لكم إلي سار عند الحريم_ كان الوضع ربشة و بسطة و تهريج...فجأة قال سعيد _أبو جود_ و هوا متوقع الإجابة:نجحت جود يا سعود...؟! -ايوا الحمدلله...! حسيت الأنظار كلها متوجهة ليا؛جود مرتبطة عندهم بسعود،دايماً...! قال سعيد باستنكار:لاااا و كم جابت...؟! ما عجبتني لهجة الاستخفاف في كلامو،قلت بطفولية عشان أغيضو:جابت 100% و هيا دحين في حفل التكريم الله يحفظها من كل عين و يسلمها من كل شر...! كل إلي في المجلس قالو بتلقائية:"ما شاء الله"،ما عدا سعيد:أوووووه ممتازة البنت...! "البنت"...؟!، و لا كأنها من صلبو،سكت و ما قلت شي،الصراحة ندمت إني قلت نسبتها،أخاف عليها،بس ايش أسوي...؟!،أبغى أوريهم إنو ذولا الفرحانين فيهم ما يجوا ولا شي قدام جود..يعني ولا واحد فيهم اتعدى الـ97%...!،خلاص لمن تجي أقرأ عليها...! بعد شوية حطوا العشا،أكلت شوية لإن جود قالت لي إنو نفسها في بيزا هت و أنا أبغى آكل معاها،بس يتيسروا السادة إلي هنا أروح أجيب العشا و أجيب جودة قلبي...! بعد العشا و قبل ما أروح للمجلس:"خالي سعود"،التفت و كان عبدالله ولد أختي _يعني_ ولد عمة جود...! _آمممممم ممكن أسألك سؤال...؟! -اتفضل... -أبغا أكلمك في غرفتك من غير محد يسمعنا...! رفعت حاجبي و قلت:تعال... و أخذتو لغرفتي،دخلنا و قلت:خير...؟! -يعني هوا شوية ممكن تتضايق بس إذا ما تبغى تجاوب قولي و انسى إني سألتك... -عبدالله ايش عندك...؟! -هيا جود غلطت بشي و لا بس خالي سعيد يكرهها كذة...؟! احتد صوتي:ليه تسأل...؟! -بصراحة يا خالي..أنا..يعني أنا "بعثر نظراتو في الغرفة" يعني جود أنا..هوا أنا أحـبـ... استنتجت إلي يبغى يقولو،قاطعتو بحدة:لأ..لأ يا عبدالله لأ...! طالع فيني عبدالله مستغرب و كملت أنا كلامي:جود ما سوت شي و لا حتسوي إن شاء الله،بس إنتا شيلها من راسك...! -ليه...؟! -لأنو ما ينفع،ما ينفع... قال و هوا على وشك يبكي:ليييييييه...؟!،ليه...؟!،و هيا مالها ذنب إن أبوها غلط،مالها ذنب...! استغربت كيف إنو رجال ممكن يبكي و يقول إنو يحب بدي الطريقة،قلت:و من متى إن شاء الله...؟! -من زمان،من أيام الثانوي،لمن كلمت أمي في الموضوع هدت و رعدت،مادري ليه...؟!،جود أتذكرها كانت قمة في الأدب بس... كملت:بس محد حيوقف معاك،تخسر رضا أمك و أبوك عشان وحدة ما تدري حترتاح معاها و لا لأ...؟!،و بعدين إذا تحبها من جد انساها،تدري ليه...؟!،لأنها مو ناقصة كلام،كفاية المنشور عنها...! -يا خالي أنا ما أهتم...! اتنهدت و أنا ألاحظ الصدق في عيونو،قلت بحزم:غسل وجهك و الحقني،و جود شيلها من راسك و لا تحاول تكلمها من ورايا...! و خرجت..."الله يا الدنيا"،البنت إلي كارهينها و متقززين منَّها ولدهم ميت عليها،و يمكن كمان بعد كم يوم يطلعلي كم واحد صريع غرام جود...اللهم لا شماتة...! ******************************************* صباح الخير و الإحساس و الطيبة،مروقة تراني اليوم...! والله أمس انبسطت و قابلت بنات كتاكيت و قابلت بنات من أيام المتوسط و الابتدائي...شي حركات...! بس دحين أموووووت و أعرف ايش سار أمس في بيتنا،فيني فضووووووول..ولا بابا كيف كانت ردة فعلو...! أفففففففف،ايش معنى إنتوا تعرفوا و أنا ما أعرف...؟!،سألت عمو ما قالي شي مثير،و لمن خصصت السؤال عن بابا قال:"استغرب شوية بس بعدين عادي"،يعني عرف..آآآآآآه يا ربي أحس إنو فيه شي،حتى عمو لمن سألتو لو أحد قالو شي عني اتهرب من الإجابة،يوووووووه و أنا مالي...؟!،يعني لو أحد بيقولو شي أكيد حيكون يزعلني فليش أحووووووس و أدورررر على شي حيضايقني...؟! المووووهيييييييم دحين إني خلاص قررت ايش حدخل،و استخرت و حسيت براحة_الحمدلله_،قررت أدخل فرنسي،يعني أنا من زمااااان نفسي أتعلم هدي اللغة و ما دام موجود تخصص في الجامعة و ما دام ما عندي شي معين أبغاه فليه ما أدخل...؟!،و أنا على كل حال نزلت دروس مرة مفيدة و اتعلمت الحروف و الأرقام من 1-10…!،و سويت علاقة مع كم فرنسي و فرنسية،طبعاً أكلمهم انجلش بس أنا أطلب منهم يفلتو كلمات فرنسي و أحياناً أسألهم عن معاني كلمات معينة أو أطلب منهم يعطوني مقابل أي كلمة انجليزية كلمة فرنسية و هدا شي مررررة مفيد يزيد من حصيلتي اللغوية الفرنسية الغير موجودة و كمان يعطيني فرصة أطفش عمو و أسبو سبات ما يفهمها...خخخخخ...! طبعاً أنا و بمساعدة من عمو بدأت أسوي شغلات التسجيل في الجامعة و لا تقولوا لي اختبار قدرات،اعتبروا إنو القصة انكتبت من قبل كم سنة..أوكي...؟! و _الحمدلله_أموري ماشية و _بإذن واحد أحد_ حأتقبل لأنهم طلبوني أسوي بطاقة دخول الجامعة...! بعد كم يوم رحت الاستديو أتصور و طلعت صورتي عدمممممم...! مقرفة تجيب الاكتئاب،سألت عمو قال:"حتى أنا لمن اتصورت للرخصة ما كانت صورتي حلوة"،يعني وحشة بس ما يبا يقول...! وريت جدة،فقالت باستنكار:"أعووووذ بالله..من ذي...؟!"،كنت حأبكي و أنا أقول:جدة هذي أناااااااا...! خاصمتني جدة:إني قلت لك لا تصورين لكن ما تسمعين،حراااام بيدخلون فيها الجُن"،آآآآآه يا جدة...الجِن ما بيدخلوها من الخرعة...استغفر الله بس...! ******************************************* آآآآآآه أحس نفسي نعسانة و أنا مالي نص ساعة صاحية من نومة استمرت 12 ساعة...أففففففف بدأ كسل الإجازة،و لا الدروس أنا و وجهي ليا كم يوم مطنشة دروس الفرنسي،أنا لو داخلة معهد كان انغصبت أروح لكن ايش أقول...؟!،البركة في جدة إلي ما تخليني أسوي شي إلا بطلعة الرووووح...!،تخيلوا حتى شعري ما تخليني أقصو،بس سمحت لي أدرجو،دحين طولو لآخر ظهري...! سيبونا من شعري دحين و خلونا في اكتشافي الجديد..اكتشفت إنو داك الولد _أخو أحمد_ اسمو علي،و أنا أفتح الرسايل إلي جاتني منو _من الفضاوة عدتها_ لقيت في وحدة من الرسايل اسمو،والله اسم علي حلو ما يستاهلو،بعدين أنا إلي أعرفو إنو لكل واحد نصيب من اسمو،هوا و وجهوا ايش نصيبو من اسمو..يعني...لو كان اتسمى على علي _رضي الله عنه_ ...؟!،أووووووه لحظة..أنا ايش نصيبي من اسمي...؟!،يعني أنا مني كريمة مررررة...يا سلااااام يعني لازم أكون كريمة مادياً...؟!،أنا كريمة معنوياً...>>>ترقع...! أووووووه اتذكرت..اسمعوا الخبر الصاعقة...حنروح بكرة المزرعة..مزرعة العائلة..والله و طلع عندنا مزرعة،تصدقوا ما كنت أدري...! وت ايفير..أنا متحمسة مررررة،عمو يقول فيها خيول..احم احم..مو خيول خيول..هما بس 4،هما عائلة،رجال و حرمتو و أولادهم>>>أتكلم عن الخيول...! إلي سويتو هوا إني جهزت شنطتي،حطيت فيها العدة:آي بودي،لاب توبي،شاحن اللاب و الآي بود..لا لا مالو داعي أشحنو باللاب،بس للاحتياط،كتب...! و بكده انتهى يوم من أيام الإجازة..انتهى زي أي يوم تاني،انتهى من غير ما أنجز فيه أو أسوي أي شي لمستقبلي و ديني...لكن الفرق اليوم إني حطيت راسي و أنا أفكر و أخطط لرحلة الغد،أتمنى بابا ما ينكد عليا،ما سار بينا أي احتكاك من عرفت حقيقتي...الله يكمل فرحتي و حماسي بس...! *********************************************** الساعة 7:30 صباحاً في السيارة،عمو طبعاً هوا السائق،جدة قدام جنب عمو و وراها منورة (الشغالة)،و أنا ورا عمو و شابكة السماعات و مندمجة مع فيروز،روقااااااان،و عمو المسكين مقهووووور من الطريق الطويل و ما يقدر يشغل شي لأن جدة فيه و فوق دا كلو تعطيه محاضرة عن شباب زمان و عن إن إلي قدو عندهم أولاد و عن رجال أول كيف كانوا (نشميين)،أنا بعد مدة شلت السماعات و قلت بطريقة غنائية:زماااااااان أول تحوولللل،لالالالالالالا لااااااااا...كيف صوتي...؟! عمو:زي وجهك... -ياااااي أجل بأسير مغنية...! جدة:نعممممم...؟! -عمو يقول صوتي زي وجهي مما يعني أنه جميل...! -ايش تقولي إنتي...؟! -أقول الله يرفع برجال زمان،كان الواحد فيهم يستحق كلمة رجال...! -اييييييه... و انطلقت جدة في محاضرة تانية لعمو _الذي يكاد يقتلني_ لها بداية دون نهاية...! وصلنا المزرعة و نزلنا و...واااااااااااو كانت فانتاستك،كبيرة،واسعة،و خضراااا،صح خضار باهت لكن برضو حلوة،نزلت أنا و الشغالة جدة _تحت إشراف عمو_ و وصلناها لجوة البيت إلي في المزرعة،هيا و منورة انشغلو بالفطور،أما أنا فرحت حطيت عبايتي و شنطتي في وحدة من الغرف و خرجت الآي بود و رحت لعمو:عمو..عمو...! قال و هوا يقرأ الجريدة:نعم... -عادي لو خرجت أتمشى برة...؟! -لأ أخاف عليكي...! -طب..تعال معايا...! رفع راسو عن الجريدة:ايش تبغي ببرة..حررر...! قلت برجاء _استهبالي_:الله يخلييييييييييييييييك،عشان خااااااطري...أبغى أروووووووووح...أبغـ... قام عمو:بس..مرجوجة...! -ههههه...يلا...! و خرجنا نتمشى بعد ما أعطينا جدة خبر..كانت المزرعة فاضية،قعدنا نمشي نص ساعة نتكلم و نسمع مع بعض،فجأة قلت:عمو أبغا أركب حصااان...! -لأ... استغربت الرفض القاطع،قلت:ليييييييييييه...؟! -لأ و خلاص...! أووووووه عرفت لييييييش..ايوااااااااا،والله يا عمو إنك تفكر لبعييييييييييييييييييييييد>>>وي ايش الهبل إلي قاعدة أقولو و ليش أمطمط الكلام...؟! رجعت لأسلوب الترجي إلي يستفز عمو:طب بس نروح عندهااااااا...ابليييييييييييييس...! طالع فيني عمو باستغراب،قلت:ما عليك درنك..بس خلينا نروح...! -نروح نشوفها بس..مافي ركوب...! رحنا و شفت الأحصنة،كانت مي حلوة،ألوانها فاتحة،قلت:الحمدلله مو حلوة... -ايش...؟! -أنا أحب الأحصنة الغامقة...! كان في واحد أبيض و واتنين بني بااااااااهت و واحد منقط بالأسود...! بعد شوية سمعنا أصوات سيارات،بدأت العائلة الكريمة بالتوافد،خرجنا،أنا كملت مشي للبيت و عمو راح للسيارات...بعد شوية حطوا الفطور..صح حسيت نفسي غلط بينهم لكن كيفهم أنا على لحم بطني من عشا أمس...! ************************************* بعد العصر و بعد ما برد الجو شوية استندت على شجرة كده طالعة غلط لحالها _استغفر الله_...! كانوا الأولاد و الشباب هناك بعييييييييد يلعبوا كورة مادري ملاحقة و أنا أتأمل السما و الزرع و أسمع و داخلة جو و أغني بس من غير صوت يعني...! بعد مدة حسيت أصوات الأولاد أوضح،طالعت فيهم،لقيت إنهم و من غير ما يحسوا مع اللعب و كده قربوا جهتي،بالتالي أنا مشيت و رحت لورا الاصطبل و رجعت لتأملي،بعد مدة سمعت صوت حمحمة،طنشت،رجع الصوت مرة تانية،رفعت راسي و انفجعت،واحد واقف،شهقت،وقفت الآي بود و جيت بأمشي لكن:جود لحظة...! و يعرف اسمي كمان،رفعت قلنسوة الجاكيت عشان أغطي شعري،و قلت:نعم...! -أنا..احم،أنا عبد..عبد الله ولد عمتك... -خير...؟! -أممم تتذكريني زمان،كنا نلعب مع بعضو احنا صغار...!؟ -همممم..آآآه ايوا اتذكرت "مديت ايدي" كيفك...؟! بلع دا الـ"عبد الله" ريقو و مد يد مرتجفة ليا،صافحتو و هوا يقول بتوتر:الحمد لله،إنتي كيفك...؟! -تمام..."رفعت حاجبي" خير يا عبد الله،أي خدمة...؟! -آآه الصراحة جود أنا أبغى أكلمك في موضوع شخصي...! -موضوع شخصي..بيني و بينك..!؟ مين يطلع عشان يكلمني في موضوع شخصي..أنا يادوبك اتذكرتو،قلت:اتفضل بس بسرعة... لسه دوبو عبد الله بينطق إلا نط لنا واحد طول بعرض:عبد الله إنتا هنا و احنا ندورك من ساعة "طالع فيني باحتقار" ايش قاعدة تقولك الست جود...؟! انقهرت من طريقة كلامو،لكن إلي بعدو أسوأ،صرخ فيني:و إنتي يا قليلة الأدب..طالعة برا بذا المنظر...؟!،من أول شايفك عالشجرة و عايشتلي جو رومنسي،من جد ما ينلام فيكي أبوية...! قلت بسخرية:أووووه أخوية إنتا...؟! -ايوة أخوكي و إذا محد رباكي أنا بربيكي...!،و إنتا يا عبد الله ما تخاف على نفسك واقف معاها،المفروض تطنشها من يوم ما نادتك...! عبدالله:لا لا أنا بس كنت بأسألها عن الساعة..أنا الغلط عـ... قاطعتو:يا سلااااااام...ساعة...!،ساعة ايييه...؟!،هوا إلي جا و كلمني و قالي إنو يبغاني في موضوع شخصي،هدا كل ما في الموضوع...؟!...مو صح يا عبد الله...؟! عبد الله كان منزل راسو،رفعو و قال:عبد الإله خلاص والله الغلط غلطي..أنا إلي جيت أكلمها...! عبد الإله:ومن جد شغلة الموضوع الشخصي...؟! حمر وجه عبدالله و هز راسو و مشي،اتنهدت أنا،قال عبدالإله بسخرية قاسية:و ايش هوا الموضوع الشخصي...؟! -قبل ما يتكلم إنتا جيت...! و لفيت بأمشي إلا إن عبد الإله مسكني من ايدي و لفني عليه،ضغطني على جدر الاصطبل و قرب وجهو من وجهي:لو ما بطلتي حقارة يا ويلك و الزمي حدودك ولا ترى والله و شوفيني حلفت..والله ما يسير لك طيب...! تركني و أنا مصدومة،كنت أطالع على مستوى نظري بجمود،يعني بطنو...! اتخصر و انحنى ليا و قال بابتسامة:أوه و إذا فرحانة بالملامح الجذابة إلي عندك فلازم أقولك إنها ما تأثر في ولا واحد فينا لأننا نعرف قد ايش إنتي قذرة و نجسة...! و راح وأنا أطالع فيه،همست و دموعي تنزل:"ليه...؟!"،رحت و دخلت البيت إلي في المزرعة،دخلت الغرفة إلي حطيت فيها شنطتي،لقيت ملياااااان فيها بنات يضحكوا و يتكلموا،سكتوا لمن شافوني،ما كان باين إني أبكي قد ما كان باين إني مقهورة و مولعة،شلت شنطتي و رحت لغرفة فاضية،رميت الشنطة و استكنت لحضن زاوية من زوايا الغرفة،و هناك بكيت قهر،بكيت ظلم،بكيت وحدة و غربة بين أقرب الناس ليا...! ليه كده يا أخوية...؟!،ليه كده يا ولد أبوية...؟! *********************************** |
الجزء التاسع (ألست ابنتك...؟!،إذاً لا تظلمني مثلهم...!) بعد مرور أسبوع من الحادثة السابقة... كنت في غرفتي ودمي محروق غير الاكتئاب إلي صابني،عمو كل يوم يسألني ايش بك...؟!،أقولو طفشانة و أبغى الدراسة تبدأ،أنا حتى الدروس الفرنسي تركتها و أمس مع قهري مسحتها،المشكلة سويت (شفت&ديليت)،والله مادري بس سايرة كارهة لكل شي لدرجة دسيت الكاميرا في الدرج و قفلت عليها خوفاً من إني أكسرها هيا التانية...! اندق باب غرفتي،طنشت،رحت و انسدحت يعنني نايمة،لكن الباب انفتح:"جود إنتي نايمة...؟!"،كان عمو يسأل و هوا يقرب مني،رفع البطانية:طيب يا نايمة..يا تقولي لي إلي سار ولا حأعتمد كلام أخوكي عنك...! فزيت:ليه...؟!،هوا قالك شي...؟! جلس عمو عالسرير:ايش إلي سار...؟! استسلمت و حكيت لعمو كل شي بالتفصيل،قال بعصبية:و عبدالله الحيوان ايش يبغى منك...؟! -مدري عنو..عبدالإله جا و هوا كان لسه دوبو حيتكلم...! كنت أراقب ملامح عمو الغاضبة،قلت:و دحين ايش حتسوي...؟! -عبدالله خليه على جنب شوية لكن عبدالإله أنا أوريكي فيه...! -عمو ايش حتسوي...؟! -هاتي جوالك...! ابتسمت مادري ليه و أعطيتو الجوال،خليه يربيه الغبي...! أخد عمو الجوال و دق على رقم،فجأة صرخ: (إنتا كيف تتجرأ و تمد ايدك على بنتي؟!..أنا مخي ملحوس و لا إنتا إلي ما تلزم حدودك؟!...لأ ما رح أهـدى و اسمع هذا الرقم رقم جود،اليوم..اليوووووم يا ويلك لو ما اتصلت عليها و اعتذرت منها...تسمع يا ويلك...؟!) و فصل في وجهو...قلت:عمو ليه كده...؟! قال عمو بقهر:لا تتدخلي و إذا اتصل عليكي ردي و حسسيه بالذنب و يا حبذا لو تهزئيه كمان...! -لييييه طيب كل دا...؟! -فجعني قليل الأدب؛حكالي مسلسل عنك و آخرتها ماد ايدو عليكي و ظالمك...قلة حيا...! و خرج من الغرفة..بيني وبينكم يستآهـل،أجل مِعلم عمو و متبلها كمان...! ****************************** الساعة 11:30 الليل دق جوالي،رقم غريب،ابتسمت و أنا متوقعة المتصل،رديت و في نيتي أطولها:نعم...! -إنتي جود...؟! مادري ليه حسيتو رافع حواجبو...! صوتو كان باين طفشان و مو طايق نفسو،اتوسعت ابتسامتي وأنا أدعي الاستنكار:مين معايا...؟! -ذحين هذا جوال جود و لا لأ...؟! -أول مين إنتا...؟! قال بسخرية:لا تخافي ماني واحد لعاب يا بينوكيو...أنا آسف...! قلت باستعباط:لا لا لمن تقول لأحد بينوكيو يعني خشمو طويل..أنا خشمي موطويل...! حسيتو حيفصل فقلت بهدوء:عبدالإله أنا ما غلطت لا زمان و لا قبل أسبوع و لازم تفهم إني مجرد تجسيد لِلي حصل بين أبوك و أمي إلي ما أعرفها...! و فصلت..وأشغلت نفسي بأمور تانية...! *************************************** صحيت الساعة 2:30 الظهر،كالعادة دخلت النت بعد ما صليت،لقيت دانة أون لاين،حطيت نفسي أون لاين لأني ما أحب أبدأ محادثة،أخاف الشخص يكون مشغول أو شي...!،بعد شوية أعطتني إشارة تنبيه،قلت:هلا والله بالطش و الرش...! -ههههه،كيفج يالخبلة...؟! -تمامووووووووووز..إنتي كيفك من زمااااااان عنك...؟! -الحمدلله زينة..أقولج عندي لج خبر بمليون دينار...! -خبر بمليون بكرة ببلاش>>>متأثرة بالمسلسلات...! -لوووول...! -أقولك دانة مليون دينار=عشرة ملايين ريال..صح...؟! -تقريباً...! -أجل اقلبي وجهك إنتي و خبرك...؟! -شلووووووون...؟!،إلي يسمعك اللحين يقول بتعطيني مليون ريال...! -أولاً إلي يقرأك مو إلي يسمعك،ثانياً وش خبرج...؟!>>>كويتية بالغلط>>>خخخخخ -ههه طيب..خبري يا طوييييييلة العمر هو عبارة عن قرار اتخذه الوالد و هذا القرار هو عبارة عن:"أين سنقضي إجازةالصيف"...! -آهـا و أين قرر الوالد قضاء إجازة الصيف...؟! -في بلدة يُقال لها:"الأرض الطآهـرة" قعدت وقت أفكر و جيت أكتب بأسألها لكني شهقت وكتبت:وااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا ااااااااااااااااااااااااااو...! و رسلت لها بنت تصرخ،أما عنها فرسلت لي بنت تضحك و تطيح من الضحك،بعدين قالت:الصراحة مقررين من زمان بس ما حبيت أقولج قبل ما أتأكد...! -يا سلااااااام طب كم حتقعدوا...؟! -هو نحن مو يايين سياحة،أبوي عنده انتداب في السعودية..يعني ممكن ندرس السمستر الأول من السنة اليديدة في السعودية...! -واااااااهـ وناسة متى طيارتكم...؟! -عقب باجر...! -والله يا دانة فرحتيني،و عشان كده حأتكلم كويتي طول هدي المحادثة و حأدعي لج باجر توصلوا بالسلامة>>>ترى بدأت أتكلم كويتي...! -ههههه...انزين قولي أتحجى مو أتكلم...! -يوووووووه إلي هوا...! -ههههههه و على دي الحالة حكاوي و هرج و "حش" و ضحك و مضايقة لبعض،والله ماني مصدقة.."دانة" مصاحبتها من زمااااان و رح أسوي المستحيل عشان أقابلها بس إلي مفرحني من جد إنها ممكن تطول في السعودية يعني ممكن تدرس شوية هنا معايا في الجامعة...واااااااااااي والله فلة...! على السفرة في العشا... "طب ليه؟!"سألت بيأس عمو إلي رفض رفض قاطع إني أقابل دانة بحكم:"ايش دراكي عنها؟!"...! -عمو أنا حأقابلها في مكان عام و حتكون موجود حولنا و بعدين أهـلها حيجوا معاهـا و حتتعرف على أخوانها و أبوها و... قاطعني:أكره هدا النوع من العلاقات،الأب يتعرف عالأب و الأم تتعرف عالأم والأخ يتعرف عالأخ عشان البنت صحبة البنت...! -عمو..عمو الله يخليك...! -قلت لأ... -طيب أقنعني...! طالع عمو فيني بعين أبوية مفرصعة،قلت بخوف:دحين عودتني على التفاهـم و دحين ما تبى حتى تقنعني...وضح لي وجهة نظرك عالأقل...! اتنهد عمو بملل و قال:دحين دانة صحبتك من كم سنة..طيب على عيني و راسي حتى أنا عندي أصحاب عالماسنجر لكن مو لدرجة إنك تروحي و تقابليهم..تخيلي تطلع وحدة وحشة ولا مؤذية،ايش تسوي وقتها لو لصقت فيكي و عرفت عنوانك...؟! -هدا سبب مو مقنع،بعدين أنا ما حأعطيها عنواني بعدين هيا ممكن تدرس السمستر الأول هنا فحأقابلها في الجامعة أني وي...! -ايواااا قلتيها..حتقابليها في الجامعة..إن شاء الله لمن تجي الجامعة قابليها...! -عموووووو....! -جود... برطمت و قلت بزعل:طيب خلاص...! و رحت لغرفتي:أففففففف،دحين أعرف البنت من كم سنة و جاي دا يقولي وحشة و مادري ايش شكلو..من جد الرجال سخيفين...!"،هيا بالله ايش أقول للبنت لو قالت لي نتقابل و لا شي:"معليش آسفة يمكن تكوني بطالة"...والله حالة. ************************************************** *************** اليوم كان أول يوم في الجامعة،كنت ضاااااااااايعة بمعنى الكلمة و الكل يطالع فيني،رجعت البيت جيعانة,,,حتقولوا الجامعة مليانة كافيتريات حأقولكم كل ما أوصل مكان الشرى تقولي وحدة:"لو سمحتي شوية"،و أنا بكل غباااء أبعد لها...!،في النهاية جت وحدة و قالت لي بتعاطف:"تبين شي"،قلت بحرج:"لالا تسلمي"،و والله أنا ميتة جووووووع و أبغى آكل الكافيتيريا بكبرها لكن...!،ما أخدنا شي طبعاً لكن سووا لنا محاضرة و علمونا بعض الأشياء..صح حسيت بالملل لكن الحق يُقال استفدت...! أوووووه في شي،كنت أبغى أقابل دانة لكن بغبائنا اتفقنا نتقابل في الجامعة و احنا ما نعرف أرقام بعض و ما نعرف أي مكان في الجامعة عشان نتلاقى فيه...أوه...ليه ما أدخل ماسنجري يمكن تكون موجودة..و دخلت و بالفعل لقيتها...! كتبت:دانوه... -وعليكم السلام و رحمة الله و بركاته..الحمد لله زينة...! -أووووه...المهم وينك اليوم ما جيتي...؟! -امبلى ييت و دورت عن "جود" في أسماء الطالبات المستجدات بس كانوا وايدين إلي أسمائهم جود و جودي و الذي منه...! -حلوة و الذي منه بس لا تعيديها...! شوية و إلا دانة راسلة ليا سطرين:"والذي منه والذي منه والذي منه..." -احلفي عاااااااد -والله..هههه -يختي ايش البياخة دي...؟!،المهم قولي لي موادك و عند مين؟! عددت لي موادها و قالت الأساتذة أو الأستاذات إلي عندها وكان فيه كلاس مشترك بينا فاتفقنا نتقابل هناك...! اتكلمنا عن إلي سار لنا في الجامعة و لمن حكيت لها عن البنت إلي حزنت عليا قالت:حتى أنا شفت بنت صغيرونة اكسرت خاطري...أقول جود لا تكون إنتي...؟! -يمكن ليه لأ...! -لالا البنية مسكينة و ظعيفة مستحيل تكون إنتي...! -ايش قصدك يعنيييييييييييييي...؟! -هههههه...! -دانووووووه... -يلا عاد باي أخوي يبي النت...! -أوكي باي...! ****************************************** في اليوم إلي بعدو قابلت دانة في واحد من الكلاسات... -لاااااا مومعقوووووول...! -قلتلك إني أنا إلي شفتيها...! كنت حاسة برهبة و حماسة كبيرة،هدي هيا دانة إلي أعرفها من سنين...! ابتسمت و أنا أمد ايدي:تشرفت بمعرفتك دانة...! مدت ايدها:إنتي صغيرة وايد...! -ههه..عادي و إنتي تتاكلي...! -يعني عشاني متينة...؟! انقهرت منها...قلت:وايش فيهم المتان...؟!،إلي يشوفك يقول ما تمري من الباب..إنتي مربربة و الربربة شيء جيد...! يالفعل مآهـي دبة و لا شي...لا يكون عندها هوس بالنحافة...! -لا لا والله إني متينة و بأضعف إن شاء الله...! -نو نو نو ما دام عرفت طريقك مستحيل أسمح لكي تسوي رجيم نيآهـآهـآهـا...! طالعت فيني بنظرة:جود ظنيتج عاجل(عاقل) اتفشلت و مديت لساني بحرج،بعدين نطيت عليها وحضنتها:وحشتيني مرررررة...! -اللحين أمداج تعرفيني عشان تتولهين علي...! -شوووووووووور....! رجعت البيت و عالغدا قلت بحماسة:عمو اليوم قابلت دانة...! -طيب...! -أحب دانة...! -الله يوفقكم و لا يفرق بينكم..منتي مقابلتها برة الجامعة...! -دحين قلتلك بأقابلها ،أنا بس قاعدة أحكي لك إلي سار...! -إحكي يا عمري محد ماسكك...! -ياخي ايش البياخة دي...؟! -بياخة ها...؟! -لالا..آسفة طلعت عفوياً...! -كملي كملي غداكي بس...! بصراحة حاسة عمو متغير،ما يكلمني زي أول،و يحاسبني على كل شي...مع التفكير في تغير عمو في الآونة الأخيرة حسيت بالكتمة و بالعبرة في حلقي،حطيت ملعقتي و قمت،قال عمو:"كلي..ليش قمتي...؟!" -ها..الحمدلله شبعت...! -لا يكون زعلتي...؟! -لالا..وي...! و رحت لغرفتي و قفلت الباب على نفسي و قعدت أفكر،هوا مو متغير عشان دانة و مقابلتي لها،ولا متضايق عشان الجامعة،هوا متضايق من يوم روحة المزرعة و زاد تضايقو من يوم ما جات وحدة من عماتي يوم الخميس،يا ترى ايش قالت لو شي يخليه يغير معاملتو معايا...؟؟؟؟ قطع تفكيري دق عالباب،قمت و فتحت،كانت منورة،قالت:ماما ينادي...! -طيب دحين جاية...! ايش تبغى جدة؟!،غريبة العادة لو تبغاني تصرخ بأعلى صوتها،رحت أشوف ايش تبغى..دخلت غرفتها و قفلت الباب ورايا بعد طلب منها،جلست جنبها و قلت:خير...؟! -خير إن شاء الله"سكتت شوية"يا بنتي إنتي كبرتي و سرتي عروسة...! قطبت حواجبي و أنا أسمعها تقول:و يوم الخميس جوكي خطاب...! -نعم....؟! قالت جدة بحزم:عبدالله ولد عمتك طلب ايدك و هو رجال ما ينشره عليه ليش بترفضين...؟!،و إذا هو قابلٍ بك غيره ما يقبل...! -بس يا جدة أنا... فجأة انفتح الباب بقوة،كان عمو و باين عليه معصب و مولللللللع،قال:دحين أنا ما قلت الموضوع ذا يتقفل و بعدين يا جود اتركي الولد في حالو...! انصدمت من الجملة:"اتركي الولد في حالو"،وقفت بانفعال:مو عشان أنا إلي أجري ورآهـ...؟! -الولد قايل لي إنك حتقبليه،كيف يكون واثق و هوا ما كلمك...؟!،شوفي لو شفتك مرة ثانية معآهـ و لا سمعت اسمو على لسانك ما حيصير لك طيب..سامعة..؟! انصدمت و حسيت ببركان يتفجر بداخلي،قلت بغيظ:إذا أنا ما عرفت اسمو إلا قبل كم أسبوع كيف ممكن أوقف معآهـ و أكلمو؟!،هدا شي..الشي التاني إني أنا ما أخرج لهم،هيا المزرعة قبل كم أسبوع و أعتقد قلتلك على كل شي سار فيها،وديك المرةكانت أول مرة أشوفو غير إني ما أسوي حركات بايخة زي دي و إنتا بالذات تعرف أسخف السخائف إلي سارت ليا فكيف ما أقولك عن شي زي كده...؟! سكت لثواني بعدين قلت بصوت أهـدى:أنا ما أدري عن إلي قالو لك عبدالإله أو عبدالله،كل إلي أعرفو إني ما سويت شي غلط...! و مشيت خارجة من الغرفة وسط ذهول جدة و عصبية عمو المكتومة،لكني اتوقفت عند الباب،التفت وقلت:و على فكرة..مو لازم تصدقني،يكفيني ربي يحميني منـ..من عبدالله أو من غيرو...! و كملت طريقي لغرفتي القريبة،قفلت الباب بالمفتاح و لجأت لسريري و قعدت أبكي بقهر...كنت حقول:"يحميني منك"،لكن كيف أقولها و عمو بالأساس هوا ملاذي الوحيد منهم...؟!،ليش اتغير...؟!،هدا مو عمو؛هوا رجال غيور لكنو _بالعادة_ يكبح جماح غيرتو لين ما يفهم الموضوع...آآآآآهـ يا القهر والظلم...! رن جوالي..حسيت بحقد شديد على المتصل أياً كان خاصة بعد ما لاحظت إنو مصر و مو راضي يفصل،قمت و رديت بغيظ و كره من غير ما أشوف الرقم:نعم...! -آآآآ،جو..جوو...د...! -مين؟! -أنا،امممم..عبداللـ... هتفت باستنكار:عبدالله...! -ايوة..أبغا أشرح لـ... صرخت:تشرح اييييه؟!...تتصل على عمي حالاً و تفهموا إنو أنا مالي دخل...! قاطعني بصوت تعبان و باكي:جود أحبك...! طاح الجوال من ايدي و بكيت و بكيت و بكيت...! ************************************************** ****** "آآآآهـ ايش فيه؟!،ليش أنا سادحة عالأرض؟!"،مرت ثواني قبل ما يرجع لي كل شي من نبأ الخطبة لاتهام عمو ليا لعبدالله و حبو...! كشرت لمن صوتو رجع لأدني:"جود أحبك"،جملة تتكرر على مسامعي ببشاعة،اتلفت حولي أدور عالجوال،مسكتو،دورت على رقمو،اتصلت...رد بعد حوالي الدقيقتين بصوت مرتجف:هـ..هلا... اتنهدت وجلست على كرسي المكتب كعادتي في أي شي جدي،قلت بعد ما جمعت القوة الباقية فيني:اسمع..أنا في مشكلة مع عمو،هوا يحسب إنو أنا و إنتا مكلمين بعض و متفقين على كل شي،لو سمحت تتصل عليه و تفهموا إنو أنا ما أعرفك و لا ليا أي دخل بالموضوع...! -بس يا جود أنا أحبك من جد،أنا ما أبغا ألعب بدليل إني جيت و خطبتك و عانيت لين ما خليت أمي و أبوية يوافقوا و حلفت إني ما أتزوج غيرك...! غمضت عيني و أنا أقول:عبدالله ايش تعرف عني...؟! -أعرف حكايتك،أعرف إنك مالك دخل،يعني ايش فيها إذا أمك كانت وسخة؟!،خلاص أبوكي طلقها بعد ما عرف حقيقتها...! تناقض ما بين كلامو و الحكاية إلي أعرفها،قلت باستنكار:نعم...؟! -شفتي؟!،أنا أعرف كل شي عنك و عادي ما يهمني ما دام إنتي محترمة...! -و هدا الكلام كل العائلة تعرفو...؟! -ايوا و أنا راضي "سكت ثواني و قال" أصلاً مافي مجال أكون راضي أو لا،لأنو أبوكي ما غلط،عمي اتزوج أمك من غير محد يدري بعدين طلعت خربانة قام طلقها و جابك تعيشي عند جدة لإنك تشبهين أمك و هو ما يقدر يتحمل..جود..إنتي ما غلطتي بشي،جود أنا أبغاكي،جود والله لأسعدك و أعوضك عن كل الألم إلي سببوه الناس لكي...! و كمل وعود و أنا أقول في نفسي:"هدا و إنتوا تحسبوني بالحلال...!،أجل لو تعرفوا الحقيقة ايش كان سويتوا؟!"...! قاطعتو بهدوووووء:إذا هدا إلي تعرفو فإنتا ما تعرف شي و أرجوك..أرجوك تتصل على عمو و تقولو الحقيقة لأنو شاك فيا و هدا الشك يقتلني "دمعت عيني و كملت بصوت مخنوق" عبدالله الله يخليك اتركني فحالي مكفيني إلي فيني،و لو من جد تحبني اتصل على عمو و فهمو الموضوع لأني إذا خسرت عمو ما يبقالي أحد...! و قطعت الاتصال،مسحت دموعي و خرجت من الغرفة لحمامي _الله يكرمكم_ ،و وأنا خارجة من الحمام عمو كان خارج من غرفتو،نزلت راسي ودخلت لغرفتي:"ياااااا رب عبدالله يتصل،يااااا رب"،صليت إلي عليا من صلاة و دعيت فيها،دعيت و دعيت و دعيت لدرجة البكا و الشهيق...! رن جوالي بنغمة رسالة،فتحتها و كان المحتوى: "لأني أحبك بصدق سألبي طلبك و لأني أعشقك سأتركك لكن تأكدي بأنك ستبقين فراشة أحلامي ما حييت...! المخلص:عبدالله،،،" هه هدي آخرتها،مسحت الرسالة و أنا أشكر ربي إلي أجاب دعائي بالسرعة دي،الله كريم عطوف رحيم، ياما و ياما سويت ذنوب لكني كل ما ألجأ لربنا ألاقي عندو إلي أبغاه...! رحت لسريري مستعدة للنوم،و منتظرة عمي يجيني بعد ما يعرف الحقيقة...! ************************************* المقطع دا حيرويه عمو سعود بطلب من الكاتبة...*__________^ كنت قاعد أدخل المفتاح في باب الشقة عشان أقفلها بما إني رايح للشغل و أكيد جود ما تبغى تروح الجامعة بسبب المشكلة إلي سارت و أنا مابغا أكلمها..أوكي ابن آدم خطاء و أوكي هيا بنت و متعطشة للحب بطبيعة الحال لكن عشان تتعلم و عشان تعرف إنو مو كل ما أحد قالها شي تصدقو؛ما أتهم عبدالله لكن حتى هوا شاب مراهق رغم إنو موظف لكن عقلو صغير...! و وقت ما كنت منكب في حساباتي لبعض الأرقام إلي تخص الشركة إلي أعمل فيها..رن الجوال،رفعتو عن المكتب و لقيت رسالة من "عبدالله"،لاشعورياً اتجهمت لكني مضطر لفتحها،كان محتواها:"الغلط غلطي أنا،و لمن قلت لك لا تحرمنا من بعض ما كان قصدي إنها تحبني أو شي،أنا آسف...أرسل لك هذي الرسالة بحرج من نفسي لكن صار لازم أوضح الأمور..جود مظلومة حرام ما تدري عن شي...أرجوك يا خالي إنك تصلح الوضع أنا حاس إني رميت (محصنة غافلة)...مرة ثانية آسف" عدت الرسالة مرة و مرتين و ثلاثة..معقووووووول؟؟؟؟؟؟...! كملت دوامي و بالي مشغول،يعني أنا غلطت في حق جود...غلطت و بقوة...حرااااام عليا والله أسوي كده...!،يا ربييييييه..خلاص قربت أوصل للبيت...! لمن وصلت و دخلت المفتاح اتفاجأت بالباب ما ينفتح،مقفلينو بالزرفونة _بالأصح_ مقفلتو جود بالزرفونة،هادي حركاتها؛أكيد ما تبغاني أشوفها لمن أفتح الباب فزرفنتو عشان يمديها تشرد لغرفتها لمن أدق الجرس...! هزيت راسي و أنا أدق الجرس،فتحت منورة،سألتها عن جدة قالتلي تصلي وجود قالت إنها دوبها دخلت لغرفتها،شفتوووووو....!،بدع البنت دي...! رحت لغرفتي،دخلت و غيرت ملابسي،ارتميت عالسرير كعادتي عشان أبرد شوية،بعدها خرجت و رحت لغرفة أمي،دقيت الباب ودخلت،كانت عالسرير جالسة و عالأرض السجادة مفروشة قدامها و تسبح و تذكر الله،ابتسمت و أنا أتجه لها،قبلت راسها،ردت عليا بنظرة زعل،جلست جنبها:خير أمي ايشبك؟! -البنت حابسة عمرها لا راحت جامعتها و لا فطرت و الله إني أشوف فعيونها الظلم،جود إلا نفسها ما تضيعها يا سعود إلا نفسها...! قلت و أنا أمسك ايدها:طب أبشرك رسلي عبدالله رسالة،يقول فيها إنها ما تدري عن شي...! نهرتني جدة:و إنت كنت تنتظر رسالته...؟!،سعود لا تخليني يا ولدي أتحسب روح راضي البنت...! قلت بسرعة:لالا الله يهديكي لا تتحسبي..بروح أراضيها بس أهم شي ارضي عني...! -ما أرضى عنك إلا يوم أشوف البنت مرتاحة و تضحك...! -بروح بروح خلاص... -يلا الله يرضى عليك... رحت لغرفة جود و أنا أفكر إنو أمي تموت على جود لكن تصرفاتها تبين العكس،فتحت الباب و كانت تصلي،دخلت ورديت الباب و جلست على سريرها،اتأملتها و هيا تصلي،أول شي خطر على بالي:"جود كبرت"،ابتسمت و أنا أتذكر طفولتها إلي كانت في مراهقتي و شبابي أنا...خلصت جود صلاة و قعدت تستغفر و هيا تطالع عالأرض،ابتسمت و أنا أشوف على وجهها الانزعاج من تواجدي أنا،الله يعيني..اتنهدت و قلت:تقبل الله...! ما ردت فقلت:ياهووووووو ترانا هنا...! فجأة جود قامت و جات بتخرج من الغرفة،فزيت أنا و سحبتها من كتف شرشف صلاتها،طالعت في ايدي بنظرة سم،بعدت ايدي و مسدت على كتفها عشان يترتب الشرشف:آسف آسف سيد شرشف...! طالعت فيني و قالت ببيرود:أضحك...؟! أوهيييييي شكلها زعلانة و بقوة،قلت بهدوء:جود حبيبي تعالي... و مسكتها من ايدها و سحبتها لين السرير،جلسنا عليه،هيا كانت لافة وجهها عني،متكتفة و تهز رجلها بسرعة،قلت:رسلي عبدالله... قاطعتني بقهر:وعرفت إنو مالي دخل؟!،شي طيب و كويس لأني... وقفت جود كلام لمن اختنق صوتها فهزيت راسي و قلت:أنا آآآآآآسففففففف..بقوة آسف...! و قبلت خدها...فجأة ودون سابق إنذار انفجرت جود تبكي و تشهق،أنا تنحت،كانت منزلة راسها و مغطية وجهها بيدينها..كانت تبكي بقهر و من قلب...! حطيت ايدي عليها:"جودة قلبي ليه كده...؟!"،لمن شفتها مستمرة بالبكا حضنتها،أكثر شي زعلني و حسسي إني قليل أدب إنها لفتني بيدها و قعدت تبكي،حسيت بعاطفة أبوية تتفجر فيا،قلت و أنا أمسح على ظهرها:بس يا بابا بس...خلاص أنا آسف..ايش أسوي؟!،فجأة جا واحد و قالي عن بنتي حبيبتي كلام مو حلو،ايش تبغيني أسوي؟!،والله إني كنت أستنى من يكذب إلي سمعتو...! قالت و هيا تشهق:يعني..إنتا ما ما..ما تثق فيا؟! -إلا يا قلبي أثق فيكي والله أثق..لكن كل شي سار بسرعة و صدموني بالكلام...! بعدت عني و قالت بانفعال:بس أنا من قبل مكلمتك عن عبدالله داااااا...كان لازم تتوقع أي شي...! و مسحت دموعها و هيا تقول:ايش قالك عبدالله بالضبط؟! -قال ليش توقف في طريقها بعدين هيا كمان تبغاني...! سكتت جود بعدين قالت:آآآآه طيب هيا العائلة الكريمة تفكر إنو حضرة بابا متزوج وحدة و طلعت خربانة قام طلقها و جابني عندكم و لا عارفين كل شي...؟! قلت بتوجس:مين قلك دا الكلام؟! اتنهدت جود و قالتلي إنو عبدالله اتصل عليها و قالتلي على الكلام إلي هيا قالتو،قلت بانفعال:متصل عليكي الحيوان؟! -وأنا رجعت اتصلت عليه...! -نعم...؟! -خليني أكمل..فهمتو إني ما أنفع لو و إنو ما يعرف شي فقالي إلي يعرفو،سألتو:كل العائلة تعرف دا الكلام؟!،قال ايوا بعدين عاد فهمتو إنو ما يعرف و إني ماني ناقصة...! اتأففت،فقالت:و أنا أبغى أستأذنك أرسل لو رسالة إنو إلي يسويه في نفسو هبل و أبغا أشرح لو موقفي...! -و ايش سوا في نفسو هوا و وجهو...؟! -رسل لي رسالة إنو ما حينساني و ما حيفكر في غيري و من دا الكلام...! عصبت و شكلها جود ندمت إنها قالت لي... قالت:عمو هدي "اتنهدت" أحس إنو من واجبي أعقلو..اسمحلي أرسل لو رسالة...! -أفففف..بشرط أشوفها... -لا عمو أكيد حيكون كلام سخيف،ثق بيا و حتشوف بنفسك إنو دا العبدالله متغير...! -طيب و لو إني مو مقتنع...! قالت و هيا ترفع أكتافها:حتى أنا ما كنت مقتنعة لمن خرجت على أخو أحمد...! -أووووووه لا تذكريني...! -إلا كيفو أحمد؟! -الحمدلله بس ساير ممل و اهتماماتو سخيفة...! ابتسمت:كيف؟! -قبل كم يوم يناقشني في ارتفاع أسعار الغذاء و لسه أمس يقولي:"نسب الطلاق ارتفعت"،"رفعت صوتي"و راسل لي لنك لتصويت "تابعت بسخرية"هل تعتقد أن التعدد حل للعنوسة...؟! ضحكت و هيا تقول:نشوفك..المهم دحين..ترى التعدد مو حل للعنوسة...! -إنا لله..قومي قومي أقول...! -ههههههههههههه...! الحمدلله إلي أعاني...! ********************************* |
الجزء العاشر (ها قد ظهر في حياتي..من جديد) اتأففت و أنا أسمع التلفون يدق بدون توقف،قلت:"طيب خلاص بنرد"،وي بسم الله علينا...!،والله عندنا شي سخيف و هوا إننا نتكلم لمن يرن التلفون و كأنو المتصل حيسمعنا...! رديت:نعم...! -جود...؟! كان صوت رجال،شكيت و قلت:بابا...؟! -ايوة... -كيفك...؟! رد من غير نفس:بخير،عمك موجود...؟! -ايوة لحظة... -لالا.. -ها... -وينك؟ انقهرت منو،يحقق و هوا لسه ما سلم،قلت بسخرية:في البيت الأبيض...! -احترمي نفسك..هيا كلمتين و رد غطاهم،جاك خاطب و ببتزوجينه و يا ويلك لو درى عمك بذي المكالمة...! صرخت بانفعال:خير...؟!،نعم...! كان حيكمل"بابا" تهزيئو لكني قاطعتو:حعلم عمو و لو الرجال موعاجبني ما حتزوجو و مادامو من طرفك أكيد إنو واحد حقير زيك...! مادري كيف طلعت مني...!،يا ربي سامحني...! -أنا أبوكي جنتك و نارك تقولين لي حقير...! -بابا مو قصدي لكن إنتا ما تعرفني عشان تعرف المناسب ليا ولا لأ...! -إلا أعرف و والله ما أرضى عليكي إذا ما اتزوجتي ذا الرجال...! في عقلي ولعت إشارة حمرا:"رضا الله من رضاه" -بابا بابا...! -نعم... بلعت ريقي:إذا حترضى عني فـ فـ حأسوي إلي تبغاه...! -يصير خير يصير خير...! -بس لازم تكلم عمو و تقولو و لا أنا حأقولو... -حأكلمه... و عشان ما يستغفلني قلت بصوت عالي:عمووووووووو....! -يا بنت مو ذحين... -إلا... جا عمو،مديت لو السماعة:بابا يبغى يكلمك عن واحد جا خطبني...! قلتها و لا كأنو شي..أخد عمو السماعة مني مستغرب و أنا واقفة عندو،وهدا كان كلامو... (-نعم..سعيد شوية شوية أنا ماني فاهم...! -ايوا.. -طيب...؟! بانفعال:ميييييييييين...؟! -لالا هذا ما يناسب جود. -أنا مربي جود و أنا أعرفها...!...أوكي أبوها لكن ما تعرف عنها شي...! -مين قالك...؟ بقهر:طيب خليني أسأل عن الولد و أفكر و أشاور جود...! -الله يسلمك...!) قفل عمو و طالع فيني بغضب،قلت و أنا أرفع أكتافي:اضطريت أقولو موافقة،كان يصرخ و يقول إنو ما حيرضى عليا،بعدين تراه ما بغى يقولك لكني ورطتو بإني ناديتك...! -ليه هوا مين عشان يرضى عنك و لا لأ...؟! -هوا بابا...! -اذكري لي شي واحد سواه يثبت إنو أبوكي... اتنهدت و قلت:عمو أنا مالي طاقة أجادلو،أحسن شي تشوف دا الرجال و تفهمو الوضع من غير ما بابا يدري...! -عارفة إنتي مين دا الرجال؟؟؟ -مين؟! -علي... -مين علـ...نعم...؟! الحيييييواااااان...ايش يبغى؟!..من وين طلع؟!،الله ياخدو ليه ما يسيبني في حالي؟! قال عمو بعد ما جلس عالكنبة:المشكلة الخطبة سارت رسمية،يعني أكيد أحمد دري عنها...! -ما أتوقع أحمد يزعل لو رفضنا...! -ما حيزعل لكن أبوكي أداهم كلمة،و لمن الواحد يدي كلمة في مجلس وسط رجال لازم ينفذها...! انفعلت أنا:يا سلاااااام يرمي كلماتو على حسابي...!،والله كلمة رجال كلمة حمار مو شغلي..أتزوج أي أحد إلا داك السطحي المتخلف "تابعت بيأس" عمو خلينا نقول لبابا على إلي سواه يمكن يوقف معانا...! اتنهد عمو:ما تعرفي تفكير سعيد إنتي..حيصر أكثر...! مسحت دموعي الخفيفة و أنا أقول:خليهم يجوا عندنا عادي لكن بشرط أشوفو شوفة شرعية أنا و إنتا و هوا..و نقولو بنت مين أنا و بكده يتفركش الموضوع لكن من طرفو...! وسعت عين عمو:لا يا جود..اصحك تقولي لأحد و خذيها مني نصيحة حتى لو تكرهي زوجك حاولي تبني أسرة مستقيمة..لا تخربي بيتك بنفسك...! -يا عمو واحد ما أحبو كيف أكمل حياتي معاه...؟! -يا بنتي افهميني..دحين إذا حصل و ما قدرت أنهي الموضوع و اتزوجتي علي أبغاكي تعيشي معاه بهدوء..يعني مثلاً ما تقعدي تسوي مشكلة عالرايحة و الجاية..أبغاكي تكبري عقلك دايماً و حطي في بالك إنو بيدك تخلي بيتك جنة و بيدك تقلبيه نار...! كلام عمو حسسني إنو الموضوع تم و سار رسمي،قلت:عمو ايش دا الكلام...؟! اتنهد عمو:أنا ما أدري كيف يتصرف في موضوع زي كدة من غير ما يقولي والمصيبة الأكبر إنهم بعد بكرة حيجوا...! -كيف؟! -بعد بكرة الحريم حيجوا يشوفوكي...! -كماااااان..والله لأطلع لهم قردة...! -جوووووود...! -طيب... قاطعني:تترتبي و تطلعي لهم..و على كل حال هوا مستحيل يأذيكي، أصلاً أهلو ما حيوقفوا معاه لو فكر حتى تفكير يقل أدبو...! سكت عمو ثواني و كمل:حصلي استخارة و إنتي كمان و.."لن يصبنا إلا ما كتب الله لنا"...! و ابتسم عموابتسامة مطمئنة،وقف و قال:رغم إني أكره دا الولد إلا إني مطمن لإنو أهلو أهل أحمد إلي أعرفهم...! اتنهدت و قلت:أصلاً كده و لا كده كنت حأوافق...! -ليه؟! -بابا حلف ما يرضى عليا و رضى الله من رضا الوالدين...! -لا حشى عجوزة...! قلت بغرور:دحين رجوح العقل سار عجز...؟! -أحلا يا...المهم مبروك...! قلت بسخرية:الله يبارك فيك "كملت بهدوء" حاسس إنو ما فايدك شي...! هز عمو راسو،ابتسمت بحب:أنا مني خايفة و "عسى أن تكرهوا شيئاً و هو خيرٌ لكم"...أقول عمو..ما تلاحظ إننا سايرين نقول درر و نستدل بآيات قرآنية...! -ايوا ما شاء الله علينا وقت المشاكل نسير محترمين بس نرتاح نكفر...! -استغفر الله..لا تحسسني بالذنب...! -خلينا نحس بالذنب..ايش ورانا؟! -من جييييييييييييد...! تصدقو شي..حاسة بهدوء و سكينة..واثقة في عمو و مني خايفة من هدي الخطبة...! ************************************************** **** اليوم الموعود..لبست تنورة جينز غامق و بلوزة مرتبة يعني مو فخمة و لا عادية لكن حلوة،حسافة ألبسها قدام الحمار إلي ما يتسمى...! "أوووووه اتذكرت شي"،خرجت من الغرفة و ناديت:عمو عمو... -ها... -وينك؟! -هنا... رحت للصالة و أنا أقول:لاااا...وصفت لي مكانك بدقة...! -واااااو شكلك حماااااس...! -ياااااه..المهم ترى حأقولو حقيقتي اللاحقيقية...! -وما هي حقيقتك اللا حقيقية...؟! -يعني..الكذبة المشهورة عني...! -آآآآ ايوا... فجأة دق الجرس،حسيت بمغص لكن قويت نفسي بآية الكرسي...! قام عمو و فتح الباب من المجلس أما أنا فتحت الباب من الصالة،كانوا حريم كتيييير،الله يعين..أففففففف..سلمت عليهم أنا أول لأني أنا إلي فتحت الباب،بعدين سلموا على جدة إلي كانت ترحب فيهم بكل كبرياء و رفعة راس،نزلت راسي و همست:"حرييييم"،بعدين جلسوا و أمرتني جدة أضيفهم مادري أقهويهم،المهم صبيت لهم القهوة و وزعت بيتي فور مو حلو_استغفر الله_ لكني اضطريت آكلو و أشرب قهوة مجاملة...! سألتني حرمة:كيفك جود؟ -الحمدلله..إنتي كيفك؟؟ -الحمدلله..جود إنتي ايش تدرسي في الجامعة؟ -فرنسي. -فرنسي...!،ايش بتسيري بعدين..معلمة؟! -لالا..أكره التدريس بس دخلتو لأني أحب اللغات. قالت شابة باين عليها إنها متزوجة:طيب كان دخلتي انجليزي أحسن. -أعرف انجليزي..مالو داعي أتخصص فيه...! -آهاااا. قالت الحرمة إلي شكلها أم علي:طيب و كيف درجاتك؟ ابتسمت:الحمدلله...! ابتسمت الحرمة و هزت راسها...! فجأة رن جوال وحدة من الحريم إلي اكتشفت إنهم تلاتة لا غير،مادري كيف شفتهم كتير قبل شوية،الحرمة و الشابة و العجوزة إلي اندمجت مع جدة في الكلام...! قالت الحرمة_أم علي_:"يلا يا جود عشان تشوفوا بعض"،وقفت و أنا أقول في نفسي:"والله لو تدري إنو ولدك حافظني صم"،مشيت لين المجلس،كان عمو واقف يستناني،طالعت فيه:عمو بليز خليك جنبي... هز عمو راسو و جينا بندخل إلا إني مسكتو و قلت:حأقولو على إلي اتفقنا عليه....! رفع عمو سبابتو و حركها و هوا يقول:إلي اتفقنا عليه و بس...! هزيت راسي،بدون ما أحس كنت لاصقة في عمو،وقف علي و على وجهو ابتسامة واااااسعة:هلا والله،كيفك جود؟ جلست على كنبة بعيدة شوية و جلس عمو جنبي،قلت:الحمدلله. -مالي كيفك...؟! أفففففف،سخيف و ثقيل دم،قلت في محاولة للتنفير:مالو داعي أشوفك قدامي كويس المهم إنو فيه شي بقولك عليه... -قولي حياتي... عمو الصامت رفع نظرو بتهديد مما أدى إلى احترام علي لنفسو،قلت:بابا زمان اتزوج وحدة... قاطعني:أعرفها أعرفها ذي السالفة قالي عليها أبوك...! قلت بقهر:طب ممكن تخليني أكمل كلامي؟! -أوه طبعا..اتفضلي... -تعرف الحكاية أجل ما تطفشني بها بعدين،و إذا عرفت أي شي تاني فمو على مسؤوليتي...! -شي ثاني!،زي... وقفت و قلت:أنا حذرتك..تتزوجني يعني تتحمل كلام ناس و بلاوي كتير..إذا حصل شي مستقبلاً فالغلط منك لأني _ببساطة_ حذرتك...! خرجت بعد القنبلة إلي رميتها،و من المجلس على غرفتي غير آبهة بأسئلة جدة و نظرات أهل علي...! ************************************* صحيت و أنا حاسة بإحساس غريب،طالعت في الساعة،كانت 9:30 صباحاً،صح يمديني أتصل على عمو و أروح الجامعة و ألحق كم محاضرة لكن مالي مزاج أقابل أحد أو حتى أسمع لأحد يتكلم و يشرح...! تعرفوا...؟!،حاسة بشي على صدري..شي تقيييييييل،ما بكيت أمس و لا اليوم و لا بكرة و لا بعد مية سنة...! متبلدة...؟!،يمكن،عديمة إحساس...؟!،كمان يمكن لكن إلي متأكدة منو هوا إني مني فرحانة لكن مادام بابا إلي ما يرضى حيرضى فلا بأس حأتحمل...!،بس وينو عني أمس و لا هوا بس أعطى موافقتو و خرج منها...؟!،و لايمكن يتبع مقولة:"أمشي في جنازة و لا أمشي في زواج"...! ذكرت الله و خرجت من غرفتي و اتفاجأت بعمو في الصالة،ابتسم:"هلا حبيبي"،رحت،جلست جنبو و حطيت راسي على صدرو،لف يد حولي و اليد التانية قعد يمسح بها على شعري،قال:جود بابا فيكي شي...؟! هزيت راسي بلا و قلت:متى حنسوي العقد؟! -بعد أسبوع. غمضت عيني و أنا أفكر إنو العلاقات الروحية أقوى من العلاقات المفروضة علينا زي الرحم مثلاً،الأخوة و الأب مو مجرد شخص اشترك في تكوينك،الأب هوا الرجل المربي و المؤدِّب و هوا الظهر و السند و أنا عندكم كمثال...! قطع تفكيري صوت عمو المتهدج:حاسة إني ما حاولت أحميكي من دي الزواجة..صح؟! رفعت راسي و شفت الحزن على وجه عمو و الألم،قلت:عمو تبكي...؟! -لا ما أبكي...! بكيت أنا و قلت:إلا تبكي..ليش؟! رجع عمو راسي لصدرو و قال بصوت مخنوق:جود كم عمرك؟! -19 سنة...! -بعد 19 سنة جاي يقولي موبنتك و لا تتدخل لو سمحت...!،بعد 19 سنة...! ما عرفت ايش أرد على عمو..ما لقيت غير إني أبلل صدرو بدموعي بصمت...! أهي دموعي خرجت،أتوقع كانت حبيسة عيني من زمااااااان و دحين بس أُطلق سراحها...! *********************************** بعد أسبوع،،، مسكت القلم بيد مرتجفة،حاولت أوقع في الدفتر الكبييييييييييييييييييير،لكن ما قدرت،رميت القلم على الدفتر و رفعت نظري لـ"عبدالإله"إلي جاب الدفتر:وين عمو؟! -وقعي و فكينا...! اتكتفت و قلت بعناد:ماني موقعة قبل ما يجي عمو...! قال عبدالإله بتهديد:لا تخليني أفقد أعصابي،وقعي و فكينا...! "لا لا انتبه لا تفقد أعصابك"،طالعنا،كان عمو واقف عند الباب،دخل الغرفة و جاني:جود حبيبي ايشبك؟! قلت و أنا على وشك أبكي:ما..ما.. مد عمو يدو من ورا ظهري و مسك القلم و قال:يلا قولي بسم الله و وقعي...! مسكت القلم،و كانت يد عمو فوق يدي،كنوع من التشجيع يعني،همس في أدني بصوت واطي:يلا بسرعة عشان بحكيكي عن علي،هبلت بُه...! دمعت عيوني على سيرتو و وقعت،قفل عمو الدفتر على القلم و أعطاه عبدالإله المتملل من المشهد الدرامي شوية إلي سار قدامو،قال عمو:وديه لهم...! -طيب و إذا سألوني عنك؟! -قولهم مشغول. -لا مشغول...! خرج عبدالإله،قال عمو:خليه يولي،يلا قوليلي شروطك واحد واحد عشان أقولك ردات فعلو...! قمت و طلعت ورقة من درج التسريحة كتبت فيها شروطي،ضحك عمو:كاتبتها كمان...! قلت:بس حفلة زواج... -ايوا قلت والله البنت ما تبغا لا حفلة خطوبة و لا ملكة،كان بيعترض بس أبوه قال أوكي مافي مشكلة...!،كان حيقوم يخنقني...! -طيب و ايش قال عن الدراسة؟! -رضي،بس مو هذا الشرط إلي أبغاااااااااااه...! ها...؟! -هههههه،قلتلو مافي مكالمات أو لقاءات،قال:لا كيف نتعرف على بعض؟!،قمت قلت أنا باستعباط:لا يا علي جود حياوية مستحيل ترضى تكلمك...! قلت بملل:لوكلمتو حأسمعو كلام ما يسرو أبداً...! قال عمو:يووووووه كنت أبغا أضحكك...! كنت حأتكلم لكن الباب انفتح فجأة،طالعنا أنا و عمونبغى نشوف مين قليل الأدب دا إلي دخل بلا احم و لا دستور،و كان قليل الأدب:"بابا"،قالبلا مقدمات:الرجال يبغا يشوفك...! قام عمو:نعم... -لو سمحت سعود لاتتدخل...! وقفت أنا و قربت من بابا لين سرت مقابلة له،حطيت يديني ورا ظهري:بس أنا مابغا أشوفو...! -ليه في أحد طلب رأيك؟! كان عمو حيتكلم لولا إني قلت:عمو خليني أتصرف "التفت لبابا و قلت ببرود"ما رح أشوفو قبل الزواج و ماتقدر تجبرني _ببساطة_ مو في صالحك لإني أقدر أفركش الموضوع بصرخة مني أفضح فيها كل شي...! فقدت توازني بسبب صفعة قوية من بابا،كنت حأطيح لكن مسكت نفسي و ما حطيت يدي على خدي،ثار عمو و مسك بابا من ثوبو:لا تمد ايدك...! أبعدت عمو عن بابا:عمي حبيبي هوا ما أهانني هوا أهان نفسو،هوا يحاول يثبت رجولتو بدا الكف و لو كان رجال كان أوفى بكلمتو و رضي عني لو اتزوجت القذر علي...!،أنا اتزوجتو دحين صح لكني ما حأسمح بأي تواصل بيني و بينو قبل الزواج و الإشهار...! رفع بابا صوتو:إنتي لو تهتمي برضايا كان خرجتي للرجال...! -غضبك عليا حاصل حاصل فليش أتعب نفسي؟!،و دحين الله لا يهينك برا...! -ايش...؟؟؟؟؟؟!!!!!!!!!! -غرفتي وي..،أنا حرة ما أبغاك تقعد فيها...! خرج بابا و اتنهدت أنا بتعب،غضبان عليا،يمكن نقولوا كان من البداية ما اتطاولتي عليه،أقولكم بابا يستغل إنو بابا،يستغل حكم الدين في الموضوع،أنا لمن متى أدور رضاه إلي ما حيجي؟!،لمن متى...؟! *************************************** رن جوالي يمكن للمرة الألف،المتصل _طبعاً_ كان علي..إلي مجنني هوا كيف جاب رقمي؟!،من زمان كيف جابو؟!،أفففففف،سويت الجوال صامت لين ما فصل،اتصلت على 905 و طلبت رقم مستشفى شهار (مستشفى للمجانين) و سويت لعلي تحويل عليه،بعد دقائق وصلتني رسالة من علي:"ايش التخلف ذا؟!،تافهة سخيفة،تحسبي نفسك تضحكي،انقلعي..الغلط علي ذال نفسي وأدق عليكي"،فطست ضحك،باين إنو انقهر،قمت خرجت من الغرفة و رحت لعمو في الصالة:عمو عمو... -نعم... جلست جنبو و قلت:علي بس يدق عليا "ضحكت" طفشني فسويت لو تحويل على مستشفى شهار...! فتح عمو عينو:ايش الحركات دي؟! -اسمع ايش رسلي... قرأت عليه الرسالة،قال:هاتي الجوال... اتصل عليه و شغل السبيكير،رد علي:يعني ما تجين إلا بالعين الحمرا...؟ -لابالزرقا... سعود...؟! -يعني و بعدين معاك؟! -ياخي زوجتي و بكلمها...! -طيب هيا ما تبغى...! ما كنت أبغا مشاكل عشان كده سحبت الجوال من عمو و رحت الغرفة و حطيتو على أدني و سمعت:ما كفاية حارميني من شوفتها...؟! -علي بأسألك سؤال..ايش حتقلي لمن تكلمني...؟! -جود...! -جاوبني... -نتعرف على بعض...! -نتعرف...؟!،السبب إلي إنتا متزوجني عشانو ما يحتاج إنك تعرف شخصيتي...! -كيف؟! -علي..إنتا حترميني أول ما يروح الشي إلي عاجبك فيني "تابعت بهدوء" بعدين الشي إلي تبغاه ما حيسير قبل الزواج فمالو داعي أكلمك...! -جود إنتي ايش قاعدة تقولي؟!..ايش إلي ما حيصير إلا بعد زواجنا...؟!،عن ايش تتكلمين إنتي...؟! قلت:إنتا عارف و أنا عارفة..ولعد تتصل...! -لاااااا إله إلا الله...! قهرتني طريقة كلامو..و كأنو أنا السخيفة إلي مسوية لو إزعاج و قلق،قلت:محمد رسول اللهتبغى شي؟! -سلامتِك...! -باي... -لا لحظة... -نعم...؟! -متى تبغي زواجنا يكون؟! باغتت جسمي قشعريرة،قلت:مادري...! -نهاية الترم كويس؟! -الإجازة بين الترمين أسبوع...! -عادي تسحبي ترم...! قلت بانفعال:يعني أقعد سبعة شهور في البيت؟! -الله يا سبعة شهور،الترم كله أربع شهور...! -عشان مع إجازة الصيف...! -آآآآه طيب ايوا عادي...! -لا مو عادي سبعة شهور في البيت...! -زواجنا حيكون نهاية ذا الترم،جهزي نفسك...! -بس أنا ما يناسبني دا الوقت...! -أقول نهاية ذا الترم يعني نهاية ذا الترم..و ذحين تبغين شي؟! -لأ.. -سلام. و فصل و انفصل الأمل عن مشاعري...! ************************************************** ** |
الجزء الحادي عشر (تغيير جذري) انتابتني نوبة بكاء شديدة و رجفة قوية،_طبعاً_ تحت بطانيتي و السبب هوا إنو اليوم يوم زواجي،مابغا،مابغا،مابغا...! فجأة حسيت بايد على كتفي،بعدها انفتحت البطانية،كان عمو،جلس على السرير:لا حول و لا قوة إلا بالله...! حط يدو على جبهتي و رفعها بسرعة،نادى:منورة..منورة...! جات منورة،قال لها عمو:جيبي بنادول و موية...! في غضون ثواني كان البنادول في يد عمو:"جود قومي"،التميت على نفسي و غطيت وجهي:مابغا،قولو جود غيرت رأيها،ولا قولو جود ماتت اختفت انقرضت..أي شي...! حط عمو البنادول على جنب،جلسني و حضني:جود حبيبي استهدي بالله...! قعدت أبكي و عمو يحاول يهديني،قلت و أنا أشهق:عمو خايفة،أنا مابغا أنا.. قاطعني:جود يا قلبي إنتي خلاص ما حيسير شي...! قلت بانفعال:"كيف ما يسير شي؟!،كييييييييييييييييف؟!،كفاية إني حتزوج واحد متخلف سطحي غبي و بابا على بالو الدنيا سبهللة،تخيل يا عمو قالي حأرضى عليكي و آخرتها طنشني كأني..كأني..."، فجأة انفجرت بكا و أنا أتذكر كلمة بابا عني:"حشرة"...حشرة حشرة حشرة.. ********************************************* كنت مرعووووووووووووووبة و أرتجف،كنا في السيارة أنا و علي متجهين للشقة إلي حنعيش فيها،يعني ما كان في مجال يوصلني عمو لين الغرفة زي ما وعدني...! وصلني صوتو:ليش ساكتة؟! غمضت عيني بألم و تعب،أشوا إنو وجهي الكئيب مُغطى...! قال بنبرة ما عرفت هل هي ساخرة و لا ممازحة:"مسوية فيها زعلانة..ما بنراضيكي ترى...!"،و على كل حال ما رديت عليه بسبب لساني المربوط من الخوف و أصلاً مافي شي ينقع ينقال...! كلمات عمو و توصياتو لعلي بيا ترن في أدني:"حطها في عينك،تراها غالية،علي هادي أمانة برقبتك،لا تزعلها،داريها..."و أشياء كتيييييييييييييير اتسببت ببكايا الصامت من تحت الغطا...! فجأة وقفت السيارة و انطفت مع صوتو:يلا..وصلنا...! نزلت بصعوبة بسبب الفستان إلي أصر علي إنو ما أغيرو عشان يشوفني فيه،مااااااااالت عليه الحيوان...! ما كان فيه شنط لأنو كلها فوق من قبل أمس و... انقطع حبل أفكاري لمن حسيت بيدين علي تمسكني،حاولت أبعد عنو لكنو قال:تبغي تطيحي بفستانك ذا...؟! "فستانك ذا"...!،إنتا إلي أصريت ما أغيرو..وجعععععععععع...! طلعنا بالمصعد و لمن وصلنا الشقة غمضت عيني و بلعت ريقي..يااااااا رب...!،فتح الباب و مسك كتفي و دفني بشويش لجوة،دخل بعدي و قفل الباب بالمفتاح قفلتين،صوت قفل الباب أفقد قلبي دقة من دقاتو..حسيت إنو الدنيا ضيقة و إنو الهوا حولي مايكفي اتنين،فتحت الطرحة و أنا أسمعو يقول:"روحي للغرفة و أنا بأسوي شغلة بسيطة و أجيكي" و خرج من الشقة و قفل الباب،حسيتو حبسني،اتنهدت و مشيت بفستاني التقيل للغرفة إلي كان واضح إنها غرفتنا،"غرفتنا...؟!"همست بالكلمة دي متسائلة مرعوبة من الفكرة..غرفتي أنا و زوجي إلي هوا علي،مسحت دموعي قبل ما تنزل عشان مكياجي ما يخرب و دخلت الغرفة و اتفاجأت بها أحمر×أحمر،لا لا ما كان في شموع بس شرشف السرير أحمر،القعدة الصغيرة على الجنب حمرا و الجلالة حمرا و الدواليب و باب الحمام...! فسخت العباية و لفيتها بشكل مرتب و حطيتها على جنب،فجأة انفتح الباب،التفت،كان علي و وراه وحدة شرق آسيوية،طااااااالعت،قال:لا تخافي هذي مصورة...! -ها...؟! -مُـ..صَـ..وِ..رَ..ة...! اتذكرت،زواجنا ما كان فيه تصوير و أنا مع الربكة ما انتبهت،بدأت المصورة تجهز كاميرتها و لمن خلصت قالت:يلا ريدي...؟! جا علي و وقف ورايا و لف يدينو على خصري،نزلت راسي و أنا أحس بجسمي يغلي،قالت المصورة:تشييييييييييز...! ضغط على خصري أكتر و همس في أدني:"ارفعي راسك و ابتسمي عشان الصورة تطلع حلوة"،هزيت راسي بلا فقال للمصورة:خلاص صوري مافي مشكلة...! و التقطت أول صورة،الفلاش كان قوي جداً جداً..و توالت بعدها الصور التافهة و كنت فيها كلها منزلة راسي،بعد كده ابتعد علي عني،اتنفست بارتياح و هوا كمان اتنهد بتعب لكنو فجأة فز و قال:صورتين أخيرة كمان... قلت بهمس ورجاء:لا خلاص...! قال بإصرار:إلا... و اتصورت كم صورة غبية و سخيفة،مادري كيف حأشوفها بعدين...! جلس علي على السرير بابتسامة و قال:تعالي جود... رجعت على ورا خطوتين،ضحك بخفة و قال:ما بأسوي شي،صورة بس... هزيت راسي و قلت وأنا أبكي:لاااا،الله يخليك لا...! ابتسم و قال:ليييييييييييييييييييه؟! -خلاص علي الله يخليك،طلعها برة،والله ماعاد أقدر أستحمل...! طااااااااااااااااااالع فيني و فجأة وقف و راح كلم المصورة و بعدها خرج معاها و رجع بعد ثواني،قفل الباب و جا وقف قدامي،مسح دموعي بأطراف أصابعو و هوا يقول:فيه وحدة تبكي يوم زواجها عشان التصوير؟! لفيت وجهي،مسكو و خلاني أطالع فيه:لمن أتكلم طالعيني و ردي عليا...! رجعت نزلت راسي و غمضت عيني بقوة،اتنهد و قال:إنتي من ايش خايفة؟!،ليه زعلانة؟!،إذا خايفة مني فما أدري الصراحة ايش أقولك..أنا إنسان مو وحش و إذا خايفة من شي ثاني فـ"خلل يدو في شعري و حضني" ـحأقولك إنك حتصحي بكرة و تلاقي كل شي انتهى و عدّى...! ************************************ صحيت..فزيت بخوف من المكان لكني هديت بعد ما رجع كل شي لبالي،رجعت أنسدح و أنا أغمض عيني بتعب،التفت لمكانو..ما كان موجود...!،يمكن صحي قبلي و خرج...! طالعت في الساعة،قمت بعدها بسرعة:"الصلاة"،سحبت روبي و دخلت أتروش و أنا أفكر بـ إللي حيسير بعد كده...! أقصد زواج و اتزوجني..طيب و بعدين..ايش حيسوي...؟!،مستحيل يكون جاد..مستحيل..هدا واحد لعاب حيرميني بعد كم شهر...!،"يرميني"،همست بدي الكلمة بسخرية..لو رماني ما حتكون أول مرة أنرمي..بابا رماني قبل على أخوه و أمو و لا سأل عني...! لالا..بابا ما رماني مرة وحدة..بابا رماني مرتين..المرة الأولى أول ما انولدت و المرة التانية كانت دحين لمن زوجني علي بلا تفكير...! اتنهدت..كل إلي أنا فيه بسببو...!،اتوضيت و خرجت من الحمام متجهة لباب الغرفة،قفلتو بالمفتاح،لبست بجامة خفيفة،صليت بعدها اتجهت لشنطي،كنت شبه جالسة قدامها،أوكي ما أحبو..أوكي كارهة نفسي و حياتي معاه لكن في النهاية أنا زوجتو و هوا زوجي..ليا حقوق و له حقوق و أنا حسوي إلي عليا و ما عليا منو..أهم شي التقصير ما يجي مني...! اتذكرت فجأة كلام جدة:"صوني زوجك..تزيني و تعطري له..لا تضطريه للغلط و إن راح له فالذنب ذنبك..و تذكري إن بيدك تخليه عبدٍ لك و بيدك تخليه يقهرك...!"..وقتها علطوووول اتجه تفكيري لبابا..معقول تكون زوجة بابا اضطرتو للغلط و الحرام...؟!،لا مومعقول..زوجة بابا ما شاء الله أنيقة و الحق يُقال إنها جميلة و محترمة..يعني ما قد آذتني..هيا بس ما تعبرني...! فتحت وحدة من الشنط و خرجت منها فستان بسيط يغطي لين نهاية الركبة،عند الأكتاف فيه نفخة بسيطة،من تحت الصدر فيه شريطة بمبية تنشد و تنربط فيونكة من قدام...!،همممم..تعرفوا الموديل الدارج دي الأيام..هوا كده...! طلعت صندل بمبي و لبستو،رحت بعدها للتسريحة و جلست،طلعت كحل..كحل بمبي كمان و لسه دوبي أقرب الكحل من عيوني اتحركت أكرة الباب بعدها توالت الدقات...! حبست أنفاسي بخوف بعدها همست بقهر:"انقلع..دق من اليوم لين بكرة..ما حفتح إلا لمن أخلص"،و بالفعل اتكحلت بالكحل "البمبي"،حطيت مسكرة،روج بمبي،مرطب فوقو،و نشرت أحمر خدود بمبي على وجهي بطريقة شفتها في اليوتيوب...! _كيف أحمر خدود و بمبي_..المهم إني حسيت بقلبي انفقع...بمبي بمبي بمبي..أفففففففف..حق إلي يلبسلو أسود...! اتعطرت و اتجهت للباب،و قبل ما أفتح الباب طالعت في رجولي..وجع..أول كنت ألبس أطول من كده و تهزئني جدة لكن عشان زوج الغفلة..مااااااااااالت...! فتحت الباب و للأسف كل الجرأة اختفت و أخفضت بصري..شكلو قوتي كلها راحت في التطنيش إلي قبل شوية...! وصلني صوتو و أنا أشوف رجلو تتطقطق عالأرض بتوالي:ليش قافلة بالمفتاح...؟! رفعت بصري و أنا أدعي و أطلب من ربي يمدني بالقوة عشان أقدر أفهموا الوضع لكنو طالع فيا من فوق لتحت،سحب نفس و هوا يبتسم،مسك ايدي و مشاني معاه و هوا يقول:فهمت..سامحتك...! جلسني على كنبة في الصالة و جلس جمبي:صح النوم...! ما رديت،قال:طب هزي راسك عالأقل أو طالعي فيا...! برضو ما رديت،ضحك:طيب تبغي تفطري...؟! كنت من جد جيعانة و أحس إنو جسمي محتاج (أكللللللل)،فوق كده ما أبغا أبين خجلي و توتري،هوا راح يفهمهم على إنهم رضا و أنا مني راضية،أنا لازم أتكلم و أطفشو لكن من غير ما أقل أدبي و أتطاول عليه...!،كنت حقول:"ايوة أبغا أفطر لكن ما أبغاك تشوفني و أنا آكل"..لكن جوالو رن،مد ايدو و جاب الجوال و قال و هوا يجذبني لحضنو:هذا واحد صاحبي حلف يغلس علينا...! و رد بابتسامة:ايوة يا كلب...! "كلب" و يبتسم...! ضحك:يا حيواااااااااان...! بعدها قال بصوت عالي:كل *****...! شهقت بصوت منخفض و بعدت عنو،طالع فيا و حرك ايدو بتساؤل،كنت أطالع فيه مدهوشة،أنهى المكالمة بسرعة و قال:ايش فيييييييييييه...؟! -كيف..كيف تقول لصاحبك كده و قدامي...؟! -وايش قلت...؟! -قلتلو كل...مابغا أقولها..عيب كده عيب..على الأقل قدامي...! طالع فيا بسخرية:كم عمرك حبيبي...؟! -داخلة عالعشرين...! -و أنا أقوووووول...أكيد ماما قالت لك لو سمعتك تقولي ذي الكلمة مرة ثانية بالفلفل...!،خير ايش عندك كنك بزرة..! -بزرة...؟!،والله إنتا إلي أخدتني من بيت أهلي بزرة بعدين إنك تكون كبير هذا أدعى إنك تترفع عن دي الألفاظ...! قرب وجهو من وجهي و انحنى عليا:أتكلم بالطريقة إلي تعجبني و لو فيه هنا شخص يعترض على كلام الثاني فهو أنا إنتي و كلامك الماصخ:تاني و هدا و مادري وشو كمان...! قلت بغيض:اختلاف الألسن آية...! -طيب ليه ما تطبقين هذا الكلام عليا...؟! اتكتفت و لفيت وجهي:اختلاف الألسن آية مو قذارة الألسن...! مسك و جهي و قربني منو:خلينا حلوين..و خلي أول يوم لنا يعدي على خير..أوكي...؟! ******************************* مداخلة من الكاتبة:"سعود سيتولى الروي لبعض الوقت،لا لشيء،فقط لأن لا داعي لوصف يوميات جود الحالية غير أنني أرغب بإيضاح بعض الأمور عن الشخصيات التي لا تحتك بها جود في القصة...!" اليوم سعيد نادانا أنا و أمي عشان نتعشى معاهم في بيتو،الكل يضحك و يهرج إلا أنا؛بنتي و أخذوها مني،مين يرجعها ليا؟!،لمن كلمتها صوتها كان باين تعبان،تقول علي كويس معاها لكنها ما تحبو..ما تبغاه...! رفعت راسي على صوت سعيد:ايشبك يا رجال؟! قال عبدالإله بملل:مفتقد جود...! قال عبدالرحمن أخو عبدالإله _متزوج و مخلف_:"والله البنت مو هينة" قال سعيد باستخفاف:يا ذي الجود..والله ما تستاهل تتعب نفسك عشانها...! وقفت أنا بعصبية و جيت بخرج من المجلس إلا إن عبدالرحمن مسكني:عمي الله يهديك أبوية يمزح بس...! قلت بنرفزة:يا تعدلوا كلامكم عنها و لا مالي قعدة معاكم؟! سعيد:خلاص ما بنقول شي بس اقعد...! سعيد أب رائع،ألف مين يتمنى يكون عندو أب زيو لكن لين يجي الموضوع عند جود يقلب 180ْ و يسير..مادري ايش أقول عنو...! فجأة رن جوالي و يا فرحتي،كان المتصل جود،رديت بسرعة:ألو... -عمو وحشتني...! -حبيبي حتى إنتي..والله البيت من غيرك وحشة...! -وينك دحين؟! ويني؟!،ويني يا جود؟!،أنا في البيت إلي طول عمرك اتمنيتي تدخليه...! -أنا..أنا برة البيت...! -يعني مشغول؟! -لالا حبيبي بس من الفضاوة أتمشى في الشوارع....! هنا قال عبدالإله بصوت عالي:عمي كم الساعة؟! طالعت في عبدالإله بغضب،قالت جود:قولو الساعة عشرة إلا ربع...! ابتسمت و طالعت في عبدالإله:تقولك الساعة عشرة إلا ربع...! قالت جود بعدها بهدوء:إنتا عندهم...؟! اتنهدت:ايوا بس قلت "رفعت صوتي" يمكن تتشاءمي من سيرتهم...! ضحكت جود بخفة:يعني قلة عقل مقابل قلة عقل...! ضحكت:العين بالعين و السن بالسن و البادي أظلم...! -زي حركات الأطفال يرفعوا صوتهم عشان إلي في التلفون يسمعهم...! -من جد...! و سكتنا الاثنين،خرجت من المجلس و قلت بهدوء:كيفك جود؟! اتنهدت:الحمدلله...! -لا يكون مخبية عني شي...؟! -عمو علي مراهق...! تشتكي لي يا جود..آآآآآه لو أقدر أخلصك من السخيف دا بس...! قالت جود بسرعة:عمو يلا باي علي جاي...! -و إذا؟! -عمو أنا مكبرة عقلي زي ما قلتلي و من حقو عليا إني أفرغ نفسي لو...! -طيب بابا حبيبي انتبهي لنفسك ها...؟! -حاضر..إنتا كمان...باي...! -باي...! والله ما يستاهل ظفرك يا جودة،يا جودة قلبي...! رجعت للمجلس و لمن جلست سأل سعيد:كيفها مع زوجها؟! -طيبة...! قال عبدالرحمن:ياخي جود ذي عجيبة،تصدق ما أعرفها..يعني شفتها و هيا صغيرة بس ما أتذكرها...! -مو منها...! -إلا منها24 ساعة في غرفتها،كيف نشوفها؟! عبدالإله:أنا شفتها... كان باين على سعيد مو عاجبو مجرى الحديث لكنو ساكت...! قلت:و ما قصرت معاها ما شاء الله...! -هيا كمان...! عبدالرحمن بفضول:ايش فيه؟! ************************************************** **** "مقطع آخر يرويه سعود" مشكلة سعيد الوحيدة هيا إنو مو مقدر النعمة إلي عندو..ألا و هي الأبناء و ذُكر في القرآن أن البنون زينة الحياة الدنيا...! بصراحة ما اتوقعت إني حأفقد جود لذي الدرجة،صح كنت عارف إني أحبها و متعلق فيها لكن مو لذي الدرجة،رجع لي داك الإحساس بالنقص..الإحساس إلي محد قدر ينسيني هوا إلا جود...! لمن أفكر في جود و في تطور مشاعري تجاهها أردد غصباً عني:"عسى أن تكرهوا شيئاً و هو خيرٌ لكم"،ببساطة جود في البداية حسيت إنها مسؤولية كبيرة حرام أضيع مراهقتي و شبابي في تحملها لكن بعدين أدركت إنها نعمة من ربي..في ذاك اليوم حضنتها و بكيت،قلتلها:"إنتي بنتي الوحيدة"،ما فهمت قصدي إلا إنها بكيت لبكايا،يمكن إنتوا كمان تكونوا ما فهمتوا قصدي لكن إلي أبغا أوصلو لكم هوا إني أحب جود أكثر من أي شي ثاني،يمكن أكثر من أمي كمان...! ************************************ "تستأنف جود الروي"... مراااااااااااااااااحب حبايبي...كيفكم؟!،اشتقتولي...؟!،سامحوني..زي ما تعرفوا عروسة جديدة منشغلة بشريك الحياة ماااااااالت عليه _بجدية_ بهموم الحياة..أففففففف...! كنت قاعدة على كنبة الصالة أكلم عمو..كان عمو مصر إنو في شي مضايقني و إنو علي أهانني و إنو و إنو و إنو...! قلت:عمو حبيبي خلاص قفل الموضوع...! -ما رح أقفلو قبل ما تقوليلي إذا كان مضايقك و لا لأ...! -عمو يا قلبي إنتا و الله أنا كويسة..إنتا كده من جد تزعلني منك..يعني إنتا ما تصدقني...؟! -مو عن ما أصدقك لكن..أكرهو يا جود..أحسو ما يستاهلك...! -عمو..إنتا بذلت جهدك..لمن قلتلك عنو وقفت معايا و ساعدتني و لمن عرفت عن الخطبة حاولت تخلصني لكن ما قدرت..في النهاية سار المقدر و المكتوب...! -مقدر و مكتوب طيب لكن احنا لازم ناخد بالأسباب..حنقعد كل ما سار شي نقول مقدر و مكتوب..؟! -عمو احنا أخدنا بالأسباب لكن ما سار إلي نبغاه و بعدين علي طيب ما يهينني ما يعاملني بسوء و دحين من جد قفل الموضوع لإني من جد بدأت أتضايق..خلاص...! -أفففف..طيب طيب...! ابتسمت و قلت بمزاح:فديت والله..ما كنت أعرف إنك لدي الدرجة تحبني و تخاف عليا...! -انقلعي..انقلعي يلا...! ضحكت:تبَى شي...؟! -سلامتك...! -الله يسلمك..باي حبيبي...! -باي...! وقفت و كنت حروح للغرفة لكن:جود..! التفت مفجوعة،كان علي واقف ورا الكنبة و متكتف و على وجهو نظرة غريبة...! قلت و ايدي على قلبي:بسم الله..إنتا من متى هنا...؟! طالع فيا بعدها جلس على الكنبة و قال:تعالي...! رحت و جلست،طالع فيا و قال:عمك حبيبك و تتفدين فيه و أنا الشي إلي حاول عمك يخلصك منه لكن قدر الله و ما شاء فعل..يا حرااااام على المصيبة إلي صابتك لمن اتزوجتك...! طالعت فيه مستغربة،صرخ:لا تطالعيني بهذي النظرة...!،ايش معنى إن إلي صار مقدر و مكتوب و ايش معنى أخذنا بالأسباب...إنتي تتكلمين عني كأني شر و جاكي...! سحبت نفس و قلت بهدوء و أنا أحاول أتمالك نفسي:علي إنتا تعرف وضعنا أعتقد..تعرف الظروف إلي جمعتنا..كيف تتوقع مني أعتبرك شي حلو...؟! كان حيتكلم لكني قلت:إنتا كنت حتدمر حياتي بإفسادك لسمعتي..أنا بنت يا علي و البنت سمعة عندنا زي ما إنتا عارف...! -لو إنك رضيتي تكلميني ما كان حيسير شي و كنت حتزوجك بعدين عادي...! -أسوي الحرام عشان ما يسير شي...! -مو حرام..أنا كل إلي كنت أبغاه هوا إني أعيش معاكي قصة حب و ما كان في نيتي أي شي...! -مافي رجال في العالم يقبل يتزوج وحدة قبلت تكلمو قبل الزواج..حيقولها كم عندك غيري...؟!،أنا مني هبلة عشان أضيع نفسي...! -يا جود إنتي إلي جبتي كل ذا لنفسك..كان ممكن ببساطة تطنشيني...! -أطنشك...؟!،أطنشك و إنتا مهددني بصوري...! -الصور كانت عندي بس عشان أتأملك أنا حبيتك من قلب و عجبتيني لكني اتفاجأت بك رافضتني و محقرتني..قلت لازم أوريها مين علي..اتزوجتك و أنا ما في نيتي آذيكي أبداً..ما يهمني لو تكرهيني..المهم إني أنا أحبك و إنك عاجبتني و داخلة مزاجي..هذا المهم و أنا ما رح أمس شعرة منك لكن لازم تفهمي إن مو كل شي يصير بينا تروحين تقولينه لعمك...! -أنا..ما أقول كل شي يسير بيننا لعمو..هوا يسألني كيفك أرد عليه الحمدلله كويسة و بعدين تعال هنا..ليش سمعت كل كلامي ما عدا علي طيب و ما يأذيني...؟! قال باستنكار:متى قلتي ذا الكلام...؟! -قبل شوية..قلت لعمو إنك ما تأذيني أو تهينني..لكن إنتا ما كنت تبغا تسمع إلا إلي يضايقك..لا تحاسبني على أشياء مو بيدِّي..أنا أبذل جهدي عشان وضعنا يتحسن..المفروض تساعدني مو تحاسبني على كل كلمة طلعت بقصد ولا من غير قصد...! طالع فيا علي بحواجب مقطبة،قلت:بعدين ممكن لو سمحت تبطل توقف و تتجسس عليا..أنا أكره دا الأسلوب...! قال بسخرية يقلدني:"تكرهي دا الأسلوب"،تابع بعدها:لو كنتي واثقة من نفسك ما كان اتضايقتي...؟! قلت بقهر:لأ أنا واثقة من نفسي...! -ما دام واثقة ليش حاطة كلمة سر للاب توبك..ليش أول ما أجي تقفلين كل الملفات إلي فاتحتها و ليش أول ما أدخل عليكي و تكونين على النت تسجلي خروجك و تطلعي...؟! قعدت أطالع فيه مصدومة،قلت بعدها:علي..كل دا أسويه عشانك..عشان المفروض أتفرغ لك..يعني لو.."كنت حاسة بصعوبة في الكلام"..إنو يعني لازم..لازم يعني إني أفضّي نفسي..ما ينفع تجي من الشغل و تلاقيني عالنت..من أبسط حقوقك إني أستقبلك...! -لا تسوي فيها المثالية...! طالعت فيه..أخفضت بصري لمدة بعدها رفعتو،قلت و أنا أطالع في عين علي مباشرة:في جوالي و في اللاب و في كل المواقع و في ايميلي الباس وورد هيا رقم بيت جدة..أعتقد حافظ الرقم و لو مو حافظو أكيد مسجلو في جوالك...! و وقفت عشان أروح للغرفة إلا إنو مسك معصم ايدي و قال:أروح أفتح ملفاتك و أشوف مشاركاتك و رسايلك...؟! قلت بهدوء:عادي ما عندي مشكلة لكن أساسات كتيرة في علاقتنا رح تتدمر...! و سحبت ايدي و رحت للغرفة...! ***************************** كنا قاعدين نتفرج على التلفزيون _أنا و علي_ و كنت حاسة إنو عين علي مو عالتلفزيون..عينو كانت عليا..من أول..و أحسو ما يطالع فيا عادي..حسيتو اخترقني..زي سوبرمان لمن يطالع و يشوف إلي ورا الجدار...! و الصراحة بطني بدأت تعورني و قلبي يدق بقوة و بسرعة..يا الله ما طفش..ليش ما يشيل عينو..والله الفلم إلي قاعدين نشوفو حماس لكن...! كنت ماسكة نفسي لا أبكي لأني الصراحة مابغا تسير بيننا مشكلة تانية...! استرقت النظر لو..كان ما زال يطالع فيا..يا ربيييييه...!،شيل عينك شييييييييييييييييلها..أبغا أفهم ليش قاعد يطالع فيا..لييييييييييييييش...؟! طول علي و هوا يطالع فيا..طول مرة..طول لدرجة ما قدرت أستحمل و انفجرت أبكي بلا سابق إنذار و أنا مغطية وجهي بيدِّيني...! علي انفجع،حط يدو على ظهري:جود..جود ايشبك...؟! استمريت أبكي،هزني:جووووووووووووود...! رفعت راسي و قلت بقهر:ليش تطالع فيا كده...؟! -نعم...؟! طالعت فيه:فجعتني..لا تبلم فيا..حسيت نفسي عُريانة و أسوأ...! قال في محاولة لتهدئتي:جود حبيبي شكلك عاجبني..مني قادر أبعد عيني عنك...؟! -شكلي عاجبك امدحني مو تبحلق فيني..ترى والله خوفتني...! ضحك:طيب خلاص مرة ثانية حأغمض عيني..ايش رايك...؟! -فجعتني يا علي فجعتني..ليش قعدت تطالع فيا بديك الطريقة؟؟؟!!! سحب علي نفس بعدها بعد عني،مسك الريموت و قلب على قناة رقص و مو أي رقص..الرقص إلي على مستوى..و طبعاً إلي كانت ترقص كانت محتشمة بالمرة...! قال و عينو عالتلفزيون:ما تبغيني أطالع فيكي...؟!،طيييب على عيني و راسي...! و رفع الصوت و قعد متنح في "الرقاصة"،حسيت بالدم يغلي في عروقي،قمت و قفلت التلفزيون:قللللة أدببببب...! صرخ علي:يعني ايه يعني...؟!،فيكي ما تبغينا نطالع و في الرقاصة كمان ما تبغينا نطالع...في ايش نطالع يعني...؟! انفعلت:طالع في ولا شي...! وقف علي و اتجه ليا..خفت و لمن مد ايدو اتوقعت يبغى يضربني فشردت،صرخ:هييييي إنتي...! ما كنت حقبل أحد يهينني أو يمد يدو عليا..و لو ضربني والله لأضربو...! لحقني:تعاااااااااالي هنا...! هربت:والله لو ضربتني لأضربك و أشتكيك عند عمو يا متوحش...! -أنا متوحش...!،تعالي هنا..تعاااالي هنا أحسلك..صدقيني حتزعلي مرة لو ما جيتي...! بكيت:أزعل...؟!،أصلاً ما عليا منك..لكن حط في بالك إني لا يمكن أقبل أحد يمد يدو عليا...! صرخ علي:مجنونة ولا مجنونة...؟!،مين قالك إني حضربك...؟! -إنتا مديت ايدك قبل شوية...! كبّر علي خطواتو،حاولت أهرب لكنو مسكني:مديت ايدي أبغا أمسكك و أجلسك عالكنبة عشان نتكلم...! -مابغا أكلمك..اتركني...! طنشني و جلسني على الكنبة،جلس جمبي،كان حيقول شي لكني بكيت،قال:اللهم طولك يا رووووووح...ليش تبكين ذحين؟! قلت و أنا أشهق:دحين ايش حتسوي...؟!،حتصرخ عليا مرة تانية زي أول لمن كلمت عمو..إنتا ليش ما تفهم..أنا ما أحب أحد يعاملني كده..ما أحب...! -لا إله إلا الله..مين قالك إني حصرخ عليكي...؟! قلت بقهر:عمري ما بكيت و اضطريت أترجى أحد..ليش دحين إنتا تضطرني أترجاك...؟!،بعدين ليش قاعد تطالع فيا..إنتا من جد خوفتني..بطني عورني و قلبي سار يدق بقوة..أنا ما أحب كده...! اتنهد علي،غمض عينو و أخفض راسو شوية و قال:أنا آسف...! رفع راسو و خلى وجهو مقابل لوجهي..كان مغمض عينو و قال:أهو..مني قاعد أطالع فيكي...! كانت نبرة صوتو مو معصبة زي قبل شوية..كيف فجأة مزاجو اتغير...؟!،و بعدين ليش يتأسف مني و يحاول يسترضيني...؟! قلت بتوجس:ليش مغمض عيونك...؟! قعد علي على نفس حالتو،مغمض عينو و زام شفايفو،لكنو فجأة فكها ضحكة،طالع فيا و قال:إنتي ايش تبغين...؟! قلت و أنا أتكتف:لعد تطالع فيا زي أول...! حط يدو ورا رقبتي و همس:من عيوني..أي شي ثاني...؟! طالعت فيه و أنا زامة شفايفي،كيف فجأة اتغير...؟!،كيف فجأة نظراتو المزعجة سارت مرحة و حبوبة...؟!،كيف...؟!،ايش هيا طبيعة علي..؟!،هل هوَ شخصية متقلبة؟!،حاسة بصعوبة و مني قادرة أفهمو...!،مني قادرة...! كرر:أي..شي..ثاني...؟! هزيت راسي بلأ،قال:أجل امسحي دموعك تراها غالية...! ^^^^^^^^^^^^^^^ و في الليل لمن نام علي..اتسللت من الغرفة و مسكت الريموت و مسحت قنوات الأغاني و الرقص و الاس ام اس و إلي يرسلو فيها الناس مواصفات الأزواج إلي يبغوهم و..و..و...! بعدها نمت مرتاحة...! ****************************************** بعد إتمام الشهر الأول من الزواج...! همممممممم..تعرفوا شي..اتعودت على وضعي..أعرف دحين تقولو ايشبها دي منبرشة كده بلا مقدمات...حقولكم عشان بس لا تستغربوا من تغير طريقة تعاملي مع علي..سرت معاه عادي..أضحك..أنكت..أتضارب..يعني عايشة معاه زي ما ممكن أي زوجة تعيش مع زوجها...! الآن..جالسة عالكنبة إلي قدام التلفزيون و جالس جنبي _بالأصح_ لاصق فيني و مطوقني بيدو،نتفرج على فلم،هوا بكل رومانسية ينقل نظرو بين الفلم و بيني،أما أنا فمندمجة مع الفلم و ما جبت خبرو_زي ما بيقولو_...! -جودي حياتي... قلت برقة:اسمي جود...! -أدلعك قلبو أدلعك...! قلت باعتراض:لأ جودي يعني الجبل إلي رست عليه سفينة نوح _عليه السلام_ أما جود فهو قمة الكرم...! قال بخبث:طب لكي نصيب من اسمك؟! طالعت فيه بطرف عيني:طبعاً...! -أثبتي لي...! -نعم...؟! -أثبتي لي إن لك نصيب من اسمك...! و رفع حاجبو،قلت:كيف يعني؟! -أوريكي كيف... حاولت أقوم بعد ما فهمت قصدو:لالا خلاص...! -لااااا مفر... -طب بأجهز لك العشا... -مااااااابااااااااااااااا...! أففففففففف الله يعيني بس...! ************************************************** رن جوالي:"حبيبي يتصل بك"،حبيبي هوا علي،كنت مسميتو علي لكنو هزأني و غيرو لـ حبيبي،أفف حتى الحب بالغصب...! ما رديت عليه:"والله لأسوي عليه مقاطعة"،تخيلوا...؟!مو راضي يوديني بيت أهلي على أساس شهر عسل و اليوم رايح لأصحابو متجمعين في استراحة على شرف علي و زواجو و يا ليت بيطلع من دي الجـَمعة بشي إلا سهر و تعب...!،أووووه لحظة لحظة..مو كأني قلت شي غبي قبل شوية...؟!،قلت:"بيت أهلي"..وااااااه كلام متزوجين...! والله لمن يرجع حأديه ظهري و إذا كلمني و قالي:"ايشبك؟!"،حأبكي و أقول:"رايح لأصحابك و تاركني"،لأني لو بكيت حيحزن..اتنهدت و أنا أفكر إنو علي طيب لكن عليه حركات شباب أغبياء و اكتشفت إنو يحبني من جد و إنو الحركات البايخة إلي سواها قبل كانت بس عشان يبغا يعيش قصة حب و الصور إلي صورها كان يتأملها و يحلم فيني..هذا لو كان الكلام إلي قالو في تاني يوم لنا صح...لكن إلي متأكدة منو هوا إنو طيب _الحمدلله_...! أوصف لكم علي:شاب طائش عندو طاقة عالية غير موجهة،أفقو ضيق لأنو _ببساطة_ شان حرب على القراءة و يتنرفز لمن يشوفني ماسكة كتاب،يقول مضيعة وقت،رومانسي جداً جداً جداً عكسي أنا إلي ما فيني رومانسية عالية رغم إني كنت أقرأ قصص حب كتيييييير أيام مراهقتي...! رن جوالي مرة تانية و كان علي،رديت على أساس أوريه إني زعلانة لكنو قال بلا مقدمات:خمس دقايق و تكوني جاهزة و لابسة عبايتك...! -ليـ... فصل في وجهي..وجعععععع...!،أففففف طيب ايش ألبس؟!،لازم أعرف المكان إلي حنروحو ..خلاص حألبس أي لبس مرتب...! لبست بنطلون و بلوزة مرتبين..ليش تطالعوني كده؟!،أقولكم مرتبين و لا لازم أوصفهم يعني،الملابس لمن تنوصف تطلع مو حلوة..والله عاد بكيفكم عساها ما عجبتكم...!،البنطلون بني غامق و البلوزة بيضا ماسكة عند الخصر و عليها في النص زخرفة بني و ذهبي...! لبس بسيط لكن مرتب،شعري لميتو كعكة مو مرتبة عشان تنزل خصل وما يسير الشكل عادي...!،بس لوكان عندي طوق ذهبي كان حيطلع شكلي مررررررة أحلى...! لبست العباية:"وين خمسة دقايق،ليا حوال النص ساعة من يوم ما اتصل"...! بعد عدة دقايق اتصل:"يلا انزلي"،اتنهدت و نزلت من المصعد لأنو أكثر أماناً من الدرج بما إني لحالي...! أول ما دخلت السيارة مد علي ليا علبة،قلت:ايش دا؟! -افتحيها و تعرفي...! فتحتها و كانت سلسلة ذهب أبيض مادري ألماس المهم إنوكان لونها أبيض..على شكل قلب مفرغ و من جوة مكتوب علي،زي الصورة دي..طبعاً هدي مجرد توضيح لفكر التعليقة..ما تشبهلها أبداً... قلت بسعادة:شكراً... و جيت بأرجعها في علبتها لكنو قال:لا البسيها عشان شهر عسلنا خلص و حنبدأ نخرج للناس و ننشغل عن بعض،أبغاكي تتذكريني دايما...! ما كان فيه في الشارع ناس عشان كده كشفت و لبست السلسلة،عدلتها على رقبتي و رجعت غطيت وجهي:طيب..شكراً...! -ما عجبتك؟! -إلا والله حلوة...! و كانت بالفعل حلوة...! -ما شفتك فرحتي؟! التفت عليه و قلت بابتسامة:هكذا أنا..بااااااااردة...! قال بزعل:ما دام الموضوع فيه علي أكيد باردة...! اتنهدت و قلت:وين حنروح؟! -مفاجأة...! بعد نص ساعة و شوية كنا تحت عمارتنا،قلت بحماس:يااااااي هادي هيا المفاجأة...! زم شفايفو:ايوا... فجأة انتبهت لشي:علي مو كأنك كنت عند أصحابك؟! -لأ،رحت المكان إلي فصلت عنده السلسلة و هو بعيد شوي...! -آها..احم..طيب شكراً...! -العفو...! حسيتو زعلان لكن مادري من ايش...!،مو مهم لأني دحين حأشوف عمو،نزلنا،دقينا الجرس،وصلنا صوت منورة:ميييييييييين؟! -جوووووود....! فتحت الباب،ياااااه حتى منورة اشتقت لها...!،سلمت عليها بالأحضان و علي مستغرب،قلت:وين جدة و عمو؟! -مافي هنا...! -آآآآه طيب لمن يجوا افتحي الباب و لا تقولي لهم إننا جينا طيب..؟! -طيب...! التفت لعلي:تعال أبغا أوريك غرفتي...! و لمن دخلنا غرفتي قال:ما شاء الله حلوة...! انسدحت عالسرير:يااااااه وحشتني...! -مين هيا؟! -غرفتي. -آها...! اتوجه للتسريحة و قعد يفتش و ينبش،قلت:ايش عندك؟! -زوجتي حلالي...! وصل لدرج مقفول،كان فيه خرابيش و خواطر و كلام بنات و حركات كده...! قال و هوا يحاول يفتحو:ايش فيه هنا...؟! -مااااااااالك دخل...! وقف و اتوجه للباب،قفلو و هوا يقول:وين المفتاح؟! جلست على السرير و أنا أقول:أوف..ناوي تطلع المالك دخل من عيني...! -جداً..بس وين المفتاح؟! -مادري..أكيد عمو شالو...! ترك الباب و جا انسدح عالسرير و سند راسو بإنو حط يدو اليمين على خدو اليمين و قال:انسدحي انسدحي... ومددني جنبو،سار وجهي في وجهو،قلت:ياخي تصدق وجهك من قريب يخوف...! -زي دايماً تغازلي بجرأة غريبة...! ضحكت:والله مو قصدي بس أضحك لمن أحد يقعد يطالع فيا...! -لاااااا،تضحكي ما شاء الله عليكي...! ضحكت _مرة تانية_ لمن اتذكرت المناحة إلي سويتها بعد أسبوع من الزواج... -طب إنتاقعدت مبلم فيني فخفت و بكيت...! -يعني تبغيني أتأمل وحدة ثانية...؟! -جرب و شوف...! -إلي يسمعك يقول تحبيني...! علي دايماً يتطرق لدا الموضوع..قلت:أحبك ما أحبك مو قضيتي إنتا زوجي حقي أنا،تطالع فيا أنا،تتغزل فيا أنا،أنا و بس...! صح ماأحبو لكن مستحيل أسمح لو يستغفلني و لا أسمح لوحدة تطالع فيه و لاتبتسم لو...! دق الجرس،حسيت بحماااااس،نطيت من على السرير،مسكني علي:على وين؟! طالعت فيه باستغراب:أبا أستقبلهم... -لا،أحلى لو تطلعي لهم فجأة... فجأة جاتني فكرة و رحت بسرعة لدولاب الملابس و خرجت وحدة من البيجامات إلي ما أخدتها معايا،و في نص ما أنا ألبسها قلت لعلي إلي يطالع فيني من أول:عييييييييييب،لف وجهك....! اتنهد،ابتسم و قال:لو في بيتنا كان وريتك العيب من جد...! ابتسمت و رحت لشنطتي و اتعطرت و خرجت للصالة بابتسامة...! وقفت عند باب الصالة و أنا أسمع عمو يقول:طب ليه ما تخليني أتصل لك عليها؟! حسيت بايد على كتفي،التفت كان علي،سوالي حركة يعني اسكتي،ابتسمت و رجعت أطالع،قالت جدة:أنا ما أبغا إلا شوفتها يا ولدي و زوجها ليه ما يجيبها؟! قال عمو بسخرية و قهر:عشان شهر العسل...! أنا هنا طاح وجهي،يا ليتني خرجت لهم عادي و ما اندسيت،طالعت في علي إلي قال:هذا إلي قايلته لهم عني...؟! قلت بهمس:والله ما كان قصدي...! -أوريكي أنا في البيت...! يووووووووه علي لمن يحقد أعوذ بالله...! دخل الصالة و قال:لذي الدرجة موطايقني؟! طبعاً عمو و جدة انخلعت قلوبهم،خرجت أنا لهم و قلت بسعادة:أنا جييييييييييييت...! اتهللت أسارير عمو و فتح لي ذراعو،نطيت عليه و حضنتو،كنت متعلقة فيه و طولنا لأنو همس:الحقيني على غرفتي بعدين...! هزيت راسي،و تركتو و رحت لجدة إلي ضربتني بالعصاية لأني فجعتهم،ضحكت و قلت عشان أضايقها:هااااااا...ما تبغي إلا شوفتي؟! درت حول نفسي و قلت:أهو أنا...شفتيني ولا لأ؟! ضربتني مرة تانية،قال علي:بنت اعقلي..احترمي وجودي عالأقل...! جدة:سامعة..سامعة..لكنك ما تحبين إلا قُل الحيا و قُل الأدب...! شهقت:يا حيوان تسوي نفسك قدامها عاقل...! انتبهت للسبة إلي سبيتها لمن جدتي هزأتني،نزلت راسي أسمع و علي يبتسم،بعد ما أشفت جدة غليلو،قال:هيا ما تقصد بعدين"قربني منو" هاذي الكلمة علامة بينا يا جدة..ما عليك منها...! -و إن كان يا ولدي ما يصير البنت تسب زوجها...! و بدأوا بعدها جدة و علي يتناقشوا في مواضيع كتيرة،حسيت جدة مندمجة مع علي،كمان هوا غير كلامو و سار يتكلم زيها..أنا بعد كده انسحبت من الجلسة لغرفة عمو من غير ما أحسس أحد،دقيت الباب ودخلت،قال عمو:سنة أستنى...! ابتسمت و قفلت الباب و أنا أقول:عشان محد يحس...! و جلسنا _كعادتنا_ عالسرير،قال عمو بلا مقدما:ايش سوالك؟! -وليش جازم إنو سوالي شي؟!،عمو علي مو شرير بس زي ما قلتلك من قبل مراااااااااهق...!،أنا ما أقول عنو مهو متربي و لا قليل أدب،هوا بس عقلو فاضي...! -و هذا مو شي؟! سحبت نفس و قلت:عمو كم مرة قلتلك علي ما آذاني بشي؟!،علي مكرمني يا عمي مكرمني،ما آذاني لا مادياً و لا معنوياً،أنا أعرف إنك تكرهو و ما تطيقو لكن لازم تعرف إنو ما اتعدى حدودو معايا،علي إنسان كويس...! طالع عمو فيني بنظرة فهمت معناها،قلت:لا يا عمو لأ..ما حبيتو و لا اتعودت عليه "بلعت ريقي" كل ما في الأمر إني زوجتو..زوجتو بكل ما في الكلمة من معنى...! ما بكيت لكن حسيت بالدموع في عيني،تابعت:أأدي واجباتو و أخدمو لكن ما أستمتع بدا الشي،أنا زوجة سنعة جداً لكن الفرق بيني و بين السنعات إني ما أستمتع لمن أخدمو،ما أستمتع لمن أهتم فيه "اختنق صوتي" أسوي كل شي و كأنو واجب عليا و لازم أخلص منو و لمن أنهي أشغالي أرتاح حتى.."اتجمعت الدموع في عيوني"..أنا ما حبيتو أنا حنلعن لو ما سويت كده،الملائكة تلعني و ربي يسخط عليا.."قلت ببطء" أنا..ما..حبيتو...! مسح عمو على شعري:خلاص يا جود لا تبكي والله ما تهونين عليا لكـ... قاطعتو بابتسامة مغصوبة:أنا عارفة إنو هدا كلو من قهرك عليا...! و سكت و سكت هوا كمان،وقفت و قلت عشان أخفف الجو:بس عارف...نفس الحكايات إلي في القصص...! طالع عمو مستنكر ، قلت:القصص إلي كنت أقرأها أيام المتوسط....! قال عمو يجاريني:ما كأنك إنتي قصة دحين؟! ضحكت:و أنا البطلة... -يا سلاااااااام...أنا البطل...! -لأ أنا،إنتا شخصية ثانوية ما لأمك داعي...! -ايش الكلمات السوقية دي..؟! -علي عداني..المهم..يلا نخرج و نقعد معاهم...! -مع احترامي الشديد..أكره قعدة علي...! ابتسمت:تعرف ايش إلي مخفف عليا الموضوع..؟!،اسمو..أعشق اسم علي و كنت أقول لو زوجي ما كان اسمو علي حأسمي ولدي علي...! ******************************************** دق الجرس،غريبة؛مين ممكن يجي في دا الوقت؟!،رفعت نفسي أشوف من العين السحرية و كانت المفاجأة:"بابا"،رغم هدا قلت:"مين؟!" عشان لا يسوي سيرة و تفتحي لغريب و مادري ايش هوا،قال:"أنا،أنا،افتحوا"..بالله..احلف إنو إنتا،فتحت الباب و كان لحالو و أنا كمان لحالي لأنو علي لسه في الشغل،يرجع 2 الظهر و الساعة دحين 1:30،قلت بتلقائية:أهلاً اتفضل... -زاد فضلك... و دخل و جلس في الصالة من غير ما أقولو،يعني صح كنت حأحطو في الصالة لكن المفروض يستناني أنا أقولو...! قال:ايش فيه؟!،ما تبغيني...!؟ -ها..لالا..بس مستغربة ليش جيت...! -بنتي و بأطمن عليها في بيتها مع زوجها...! ابتسمت بسخرية:آآه ايوا ايوا،طيب..ايش تشرب؟! -ولا شي...! طنشتو و رحت للمطبخ،فتحت التلاجة،و جت عيني على جيك عصير سويتو لكن:"هدا سويتو لعلولي حبيبي عشان لمن يرجع من الشغل حران">>>طلع الحب..بس والله من جد هدا سويتو لعلي و ليا...! و عشان كده اكتفيت بعصير منجا جاهز و لحسن الحظ كفى كاستين بالضبط،رجعت لبابا إلي كان متحفظ في جلستو و مديت له العصير من غير صحن،يعني..هيا كاستين و أنا عندي يدين فايش لو داعي الصحن...؟! و بدأن نشرب العصير بصمت و من دحين أقولكم:لو تنطبق الأرض عالسما ما حأبدأ بالكلام...! رن جوالي،كان علي،رديت:نعم... -هلا حياتي.."سكت لثواني بعدين قال بصوت عالي"المفروض إنتي تقولي هلا حياتي...! ضحكت و قلت:طيب ايش تبغى دحين؟! -مالت عليكي و عاللي متصل مشتاق يسمع صوتك،المهم..افتحي الباب معايا مقاضي كثييييييييييير ما يمديني أدق الجرس...! -الله لا يهينك دق الجرس باليد إلي ماسك بها الجوال...! -جود افتحي الباب...! -ههههههه -يلاااااااا... قمت و فتحت الباب وكان علي في وجهي و عشان ما أظلمو كان شابك السماعة و يدينو _بالفعل_ مليانة أشياء،نزلها على الأرض،قفل الباب و حضني و باسني على رقبتي من دون ما ينتبه لبابا،همست له:"علي ابعد عني،بابا هنا"،تركني مصدوم،طالعنا في بابا،كان منزل راسو،شلت الأشياء و رحت للمطبخ كطريقة للهروب من الموقف المحرج أما علي إلي اتلون وجهو مية لون سلم على بابا و رحب فيه و قال بصوت عالي:جود سوي شاهي...! سويت الشاهي خلال خمس دقائق و رحت للصالة،وزعت الشاهي و جلست جنب علي،بعد شوية قال بابا موجه الكلام ليا:والله الحمدلله رضي أحد يتزوجك...! طالعنا فيه أنا و علي بصدمة،كمل لا مبالي:لازم تحافظي عليه بعيونك و تطعيه و... كان يتكلم و أنا مصدومة،فجأة سمعت صوت عالي:جود قومي جيبي موية حارة،الشاهي ثقيل...! بابا:ليه بالعكس حلو..والله تعرفي تسوي شاهي يا بنت...! علي:لا عمي أنا شاهيا خفيف،جود قومي...! خرجت من الصالة و اتوجهت لغرفتنا،ليييييييييييييييييييييييييش؟!،لييييييييييي ييييش؟!،ليش يقلل من قيمتي قدام علي،أكيد يعرف إنو الرجال لمن يشوف أهل زوجتو مو عاملين لها قيمة و ما يهتمو فيها،أكيد أكييييييد ما حيحترمها هوا كمان،حيقول:"هادي ما وراها أحد"...! بعد دقائق جا علي،طالت فيه بعدين أخفضت بصري،مسك أكتافي و قرب وجهو من وجهي:خلص حبيبتي خلص بس كِنت حإئتلو أتلة ما صارت و لا استوت...! ضحكت:كيف أتلة و بعدين "ثقلت لساني" ما صارت و لا استوت؟! ابتسم:إي هيكا بدي إياكي...! طالعت فيه:مو لايق عليك...! -خلينا اللايق لكي...! -ههههه...! ابتسم بتودد:كيف بطنك ذحين؟! اتذكرت،أنا في الصباح كنت حاسة بقرف و غثيان،قلت و أنا أحط يدِّي بين بطني و صدري:لاالحمدلله أحسن...! -ايش رايك نروح نكشف؟! -غثيان و راح،ايش فيها؟! -لا خلينا نروح... كنت فاهمة قصدو كويس،قلت:بس إنتا ما اتغديت و دوبك راجع من الشغل و تعبان...! -عادي يا قلبي،يلا البسي عبايتك و أنا أستناكي في الصالة...! و خرج من الغرفة،أما عني فما لقيت إلا إني أغير بنطلون البيجامة بتاني واسع و مرحرح،لبست العباية و طلعت للصالة و نزلنا مع بعض،أصلاً أنا نفسي..غمضت عيني في محاولة لتخيل نفسي "أم"،و خطر على بالي سؤال:كيف الإحساس لمن يكون عندك أم؟!،ايش هيا مشاعر الأولاد تجاه أمهم؟!،و سواءً كنت حامل دحين و لا لأ أبغى أعرف لكني ما حأسأل علي؛أخاف يحس بالشفقة أو شي زي كده...! و صلنا المستشفى، و بعد انتظار ثقيل دم و إجراءات أثقل دما دخلنا للدكتور الشاب السعودي المصرقع إلي رسلني مع نيرس لغرفة التحليل،سحبوا من دمي الكلااااااااب،بس لحظة..كويس لمن الواحد يسحب دم صح؟!،رجعوني بعدها لغرفة الدكتور،كان علي جالس أول ما دخلت وقف بلهفة،رفعت أكتافي:ما قالوا ليا شي... -يا بروووووودك...! جلسنا و دخل الدكتور و هو يضحك،قال:مبرووووووووووووووووووووووك...! طالعنا فيه بلهفة،جلس على مكتبو،و قال و هوا يضحك:1+1=3،هههههههههههههه...! طالع علي فيه باستخفاف و كان مستحقرو،قال الدكتور:هههه سوري بس شفت..ههه..أشعة لجنين وحدة و..و..هههههههههههه يا ربي..شكل جنينها يضحـ...هههه..يضحـ...هه..ـك...! Drunk و فطس ضحك،قلت بصوت منخفض: طالع فيني و قال:ماني درنك لكن شكل البيبي حق الحرمة صغير و يضحك،مررررررررررررة صغير...! قا علي بملل:كم لك دكتور...؟! ابتسم و قال:60"سكت بعدين كمل" يوم،هههههههههههه...! آآآه يعني يبغى يحسسنا إنو طول و هوا دكتور بعدين يفاجأنا بـ"يوم"...أهبل...! بعد مدة دخلت النيرس و معاها ملف و خرجت،طلع الدكتور ورقة و مدها لنا،سحبها علي منو و وراني هيا،بعدت الغطا عن وجهي و قرأت المكتوب بابتسامة،حسيت بسعادة و قلت و عيني تجري عالسطور:أنا حامل..في أحد جوتي...! ابتسم علي ابتسامة اختفت لمن سمع الدكتور يقول:خلو هاذي الورقة معاكم،و عموماً إنتي ما تحتاجي متابعة ذحين لكن..حطي في بالك إن أي حركة أو أي ثقل و لو كان بسيط ممكن يفقدك جنينك...! هزيت راسي،و سحبنا الورقة و في السيارة قال علي بعصبية:قاط معاكي الأخ...! -من يوم ما شفتو قلت عنو مصرقع...! -و يكلمك و ماخذ راحته...! -هههههه...! -لا والله...! و في البيت و احنا عالسرير مستعدين للنوم،طالعت في بطني و حطيت يدي عليه...! وصلني صوت علي:بايش حاسة...؟! التفت لعلي،ابتسمت،قال:من جد جود حلو الحمل و لا لأ...؟! ضحكت:والله هادي أول تجربة ليا بعدين أنا لسه في البداية..لمن أولد إن شاء الله أقولك...! اتقرب علي مني،حط يدو على بطني،طالع فيا و قال من قلب:أحس..أحس مرة متحمس..أحس إن شوية مني و شوية منك حتسوي شخص أو شخصة....! ضحكت على مصطلح "شخصة"،ابتسمت:إنتا تبغا ولد و لا بنت...؟! -نفسي أجرب الاثنين...! -ايواااااا..إنتا ما وراك شي..أنا إلي حأفحط في الوحام و القرف و الولادة و آلامها...! قال علي:ايوة الله يا جود..تراني قد سمعت إن الوحدة ممكن تتوحم و تكره زوجها..إذا صار لك كذة ايش يصير فيني...؟! -تصبر و تعين من الله خير...! -لا لا بتزوج عليكي...! طالعت فيه بغيض بعدها انسدحت و أنا أديه ظهري،ضحك:"يا هبلة أمزح معاكي"،كان علي يتكلم و أنا أسمع بإدن و أخرج من التانية...أحس بإحساس غريب..وكأنو شي بداخلي اتحرك..يمكن هدي هيا الأمومة..بس كيف أمومة و الجنين حتى حركة ما يتحرك...؟!...! ما أعرف كيف أوصف..كل إلي أقدر أقولو هوا إني حاسة بإحساس جيد..إحساس حلو و مريح..و حاسة بالحب تجاه كل شي...! ************************************************* |
الجزء الثاني عشر (أنا...أمٌ لطفل طبع حبه في قلبي) أنا كل مالي أسير أتقل..أنا في الشهر الخامس دحين..لا تقولوا نطت كم شهر و استعجلت لأني حأرد عليكم إنتوا إلي استعجلتوا،_ببساطة_ الشهور إلي فاتت ما فيها إلا علي و عمتي أم علي ناشبين ليا في حلقي و بالذات عمتي على أساس حفيدها الأول بما إنو أحمد جاب بنت..و مسوين ليا هليلة بعد ما عرفوا توقعات دكتورتي بأني حجيب ولد..يا خوفي لا أجيب بنت...!،طبعاً ما عندي أي مشاكل أنا و كل شي من ربنا حلو لكن علي و أهلو و جدتي و عمو كلهم فرحانين،جدتي كعادة العجايز قعدت تسمي و تذكر أما عمو فـ: جلس عمو جنبي و حط أدنو على بطني و هوا يبتسم و علي يطالع فيني بنظرات أعوذ بالله _ببساطة_ يغار من عمو لأني متعلقة فيه و كتير أشياء أتقبلها من عمو أتضايق منها لمن تطلع من علي...! فجأة عمو صرخ:أداني كف،أداني كف...! ضحكنا،قلت بدلع و أنا أمسح على بطني:أحسن،عشان مرة تانية ما تضايق ولدي...! علي:لا و الولد عاد...! قلت:خير إن شاء الله؟! نط علي وجلس جنبي من الجهة التانية و قال برومانسية متعمدة عشان يحرجني:لا قلبي،بس إنه مضايقني..ماخذك مني...! انكسف عمو ونزل راسو،رفع علي حاجبو بنصر وأنا مديت لساني،ثواني إلا و عمو قام،قلت و أنا أصر:يا متخلف... -يا ثورة... فجأة جا على بالي إنو البيبي حقي يحس بيا و باللي يسير حولي،عشان كده سبلت بعيني و قلت:علي حبيبي... طاااااااااالع فيني بعدين قال:خير...؟! -بس عشان البيبي لا يحسب إني أكرهك...! -يعني إنتي ما تكرهيني؟! سأل بسخرية،قلت:واللهيييييي يا علي ما أكرهك و لا أحبك..بس كده...! قال يتريق عليا:بس كده... قلت بصوت ثقيل:بس كذذذذة... كان باين عليه الزعل،مديت ايدي اليسار و رتبت شعرو ورا إدنو و قلت بهدوء:ايشبك؟! طالع فيني بعتب:ما فيني شي... -علي إنتا عارف إنو هدا الشي مو بيدي،أنا أأدي كل واجباتي تجاهك لكن العاطفة و الحب مو بيدي...! -مو من حقك تفرقي بيني و بين سعود و حتى لو المفروض أكون لك أقرب...! سحبت نفس و اتقربت من علي و بست خدو و قلت بصوت هامس مبتسم:أنا زوجتك و إنتا زوجي،بس خلاص لا تفتح الموضوع دا مرة تانية...! و قمت،الغريب إنو ما قام ساعدني كالعادة،التفت و ابتسمت ابتسامة ذات مغزى،قعد يطاااااااااااااااااااالع فيني،فجأة وقف و لف يدو على خصري:تخنتي مرة يا جود..ايدي ما عاد تنلف عليكي...! -انقلع،قليل أدب،محد قلك...! رفع حاجبو:محد قلي ايه؟! ما مداني أجاوب إلا و صوت عالي،كان عمو:خلاااااااااااااااااااص فقعتوا مرارتي...! التفتنا،كان عمو داخل الصالة و باين عليه:الخجل&القهر&القرف...! ضحكت على عكس علي إلي اتنرفز،قلت:و أحد قلك تراقبنا؟! -ما راقبتكم بس أنا كنت طفشان و لمن جيتوا دخلتوا موود و أعطيتوني أبو لابس...! ابتسمت:من وين جايب دي الكلمة؟! حك عمو راسو:أعتقد من مسلسل...! -ههههه طيب خلاص تعال اجلس...! و جلست و مسكت طرف بلوزة علي و شديتها عشان يجلس جنبي و جلس و من هرجة ورا التانية إلين دق الجرس،كان "بابا" و الأسرة الكريمة،بابا طلب من علي و عمو يروحوا للمجلس عشان زوجتو"ماما سابقاً..."،بناتو "أخواتي..."،أما عني فاتحركت لغرفتي،مابغا أقابل أحد،و في السيب كانت جدتي متوجهة للصالة،سألتني على وين رايحة،فاضطريت أرجع للصالة:"بصراحةمالي مزاج أناقش أحد"،بابا سلم على جدتي و أعطاني أشكل _كالعادة_، و أنا أصلاً مابغا أسلم عليه،كفاية حركتو السخيفة قدام علي في بيتنا...!،بعدها راح للمجلس مع أخواني الـ"بله"،قعدت في الصالة مع زوجة بابا و أخواتي و جدة،و على عكس ما هو متوقع ما كانت زوجة بابا تطالعني بحقد أو نظرات غريبة،كانت بالضبط مو عاملة ليا أي حساب و لا مهتمة لوجودي و هدا أحسن _طبعاً_،أما أخواتي فكنت حاسة بنظرات وحدة فيهم تتوجه ليا،كانت سارة،تتذكروها و لا...؟!،المهم..أخواتي بعد ما عديتهم طلعوا أربعة،وحدة كبيرةو و شكلها متزوجة،و التانية أعتقد سن جامعة،و التالتة ثانوي،و الرابعة سارة...! بعد مدة دق الجرس،و دخل شخص كريييييييييه بالنسبة ليا (عبدالإله)،حط صحنين دائريين كبيرين،و كان العشا...! أفففففف رز و لحم...!،استغفر الله بس و الله طفشت،جات منورة تشيل،و قمت أبا أساعد إلا إن صوت جدة وقفني:"جود ما يصير اجلسي"،قلت:لا بس بشيل السلطات...! و جو أخواتي يساعدوا في نقل الأشياء للمطبخ و كانوا يتكلموا مع بعض،بشكل أو بآخر حسيت إني دخيلة رغم إنو هدا البيت أحقيتي فيه أكبر،أنا عشت فيه،هوا بيتي،أما هما فبيت أهل أبوهم...! كنت قاعدة أقسم السلطات بين الرجال و الحريم،فجأة سمعت صوت:كيفك جود؟! التفت مستغربة،كانت سارة،ابتسمت:الحمدلله،إنتي كيفك؟! -تمام الحمدلله...! كان باين عليها التوتر و الخجل من شي معين و بعد كده بدأوا باقي الأخوات الكرام يسلموا عليا،لا لشيء لكن لأنهم حسوا على دمهم؛عيب جداً ما يسلموا و هما شافوا أختهم بنفسها تسلم عليا...! سارة:كيف البيبي؟! ابتسمت:الحمدلله...يسلم عليكي...! كانت سارة حترد لكن:سااااااارة،تعالي هنا... انقلب وجه سارة،كانت أمها،قلت بسخرية:كان الله في عونك...! خرجت سارة من المطبخ و قالت الكبيرة:ليه يعني؟! قلت بنفس أسلوبي الساخر:أبد سلامتك بس مو أول مرة تسير لها...! قالت الثانوية:يحق لنا...! -طبعاً طبعاً...والله ينخاف عليها،مراهقة و تتأثر بسرعة...! بدأو البنات يحطوا الأكل عند الحريم،أما عن الرجال فمافي أحد يقدر يروح و يجي إلا أنا و أخواني و بابا..لكن بما إني حاااااااامل فما أقدر أروح و أجي..أحسن...بعد ثواني دخلت للمطبخ تلاتة أشياء بيضا،بابا و عبدالإله الغبي و أخ تاني مادري ايش اسمو،كبيييييييييير و يخرع،و في رواية يشبه صخر إلي في المقنع،تعرفوه...؟!،كان "صخر" يطالع فيا و كأنو يقيمني أما الاتنين الباقيين يرموني بين الفينة و أختها بنظرات احتقار،انقهرت منهم،مديت لساني بطفولية شديدة و خرجت من المطبخ وسط صدمة بابا و عبدالإله و ضحكة صخر من حركتي إلي ما ينقال عنها إلا:"سخيفة"،على كلٍ سخيفة أفضل بكتيييييييييير من "حشرة"...آه الله يعين...! اتجهت لغرفتي و كنت حأقفل الباب لكن منعني شخص تبعني و إلي هوا بابا،ابتسمت بهدوء فرد عليا و هوا يهز راسو:"ما أقول إلا الله لا ييسر لك ولادتك"، و راح،غمضت عيني،زي دايماً يجي يعمق جراحي و يروح،مسكت بطني و أنا أفكر إنو ما عندي مشكلة تتحق دعاويه فيني لكن في ولدي صعبة و أنا أضعف من إني أتحمل دا الشي...! ************************************* كنت قاعدة عالنت أتصفح ايميلي،لفتت نظري رسالة من دانة اسمها:"يوميات محشش في بطن أمه"،ابتسمت و أنا أفتحها متحمسة أعرف محتواها،و كان هدا هوا محتواها: (هااااااااي جود..كيفج و كيف الحمل وياج؟!،لا يكون ولدج متعبج؟!،لو كان عطيني خبر أربيه لج...! أوكي أدري طولتها و هي قصيرة...اقري هالرسالة و عطيني رأيج...أوكي....؟! في البداية يوم كنت نطفه ظنيت إني من كريات الدم البيضاء ماعرفت إني من بني البشر إلا لما قالت( الدكتورهـ ) لأمي مبرووكـ ياست هانم إنتي حامل عاد أمي من الفرحة حطت يدها على بطنها في المكان اللي أنا موجود فيهـ عرفت إني المقصود وفهمت إني مشروع بني آدمي . . بيني وبينكم ضاق صدري .. قلت وش لي بوجع الراس أطلع لعالم ثاني وأصير إنسان وفي حساب وعقاب وأدرس . همست لي عقلي قال إحمد ربك بتطلع وبيصير عندك إيميل وماسنجر 8 صحيح أنه يطفش بس ماعليه وتشترك في منتديات ,, قلتلها وأصير مشرف في منتدى قالت كل تبن إلا ذي ., فرحت أنا قلت أجل بطلع اللحين قال بدري باقي تسع شهور (تحطيم)ـ ., ولما صار لي خمس شهور كنت حاس إني ذكر بس قلت يمكن أكون بنت - لحوووول جلست أقطع من الشعيرات الدمويه وأقول غلام فتاه.. صبي صبيه.. بزر بزرهـ وأنا أفكر سمعت صوت أبوي يكلم أمي حاولت أركز ايش يقولها قربت إذني طلع أبوي يتغزل في أمي (تم تشفيره .....) كنت بتصل عليهم وأقول إستحوا أنا أسمعكم بس لم تسنح لي الفرصهـ بصراحهـ إستحيت من كلام أمي وأبوي قلت أنام أحسن لي عيب أتصنت عليهم بعدين يعاقبني ربي ويصير ولدي يتصنت علي جلست أمص اصبع رجلي لين نمت وبعد فترهـ سمعت صوت قوووي يتجه ناحيتي قمت بطولي إلا ويرتطم راسي ببطن أمي آآآآخ بس قوة الصوت نستني الوجع الله لايوريكم كأنه شلااال مدحدر علياا أحاول أهرب منا ولا منا هنا ولا هناك مافيه مجال ربي ستر ومر من جنبي وماتأذيت طلعت أمي اللي يهديها شربت مويااا بكميه كبيره على غير العادهـ بس والله تونست جلست ألعب بالمويا برجووولي كنت بسبح بس ماعندي شووورت .. لما جاء الشهر السابع راحت أمي ومعاها أبوي للدكتوره تطمئن أمي على صحتها طبعا نامت أمي على السرير وابوي واقف جنبها ( بيحسسها بالأمان ) قلت حشااا ليه هو انتي حامل بوحش !! الدكتورهـ حطت جهاز على بطن أمي وبدأت تحرك يمين يسار فوق تحت وههم يشوفوني على الشاشه عاد أنا قمت أتدلع واحرك رجلي وأفتح عيوني وأغمضها بنعومهـ وأمص أصبعي ., وأمي وأبويا يتبادلون نظرات الحب والرومانسيه ويبتسموااا ويوم شالت الجهاز وإنقطعت عن الرؤيه وأنا أقول فكهـ كأن عمرهم ماشافوا بزر عاد سألت أمي الدختورهـ متى موعد الولادة قالت باقي شهرين سمعت الخبر ويجيني إنهيار عصبي شهرين يامفتريه خلاص أنا طفشت أنكتمت الجووو حار مافيه الا مكيف صحرواي حتى مايبرد قلت مايصبرنا غير النوم ونمت شهرين (نومة أهل الكهف) صحيت من النوم وحسيت بملل وفراغ قاتل حاولت أرفهـ عن نفسي ورحت ألعب لعبة الحبل بإستخدام الحبل السري وأجلس أنطط وأغني شبره أمره شمس نجوم كواكب هواء واحد اثنين ثلاثه هيييييييييييييييه ... وفجأه من قوة ماأنطط تزحلقت وأنقلب يصير راسي تحت ورجولي فوق قامت أمي تصررخ ., أخذها أبوي على طووول لأقرب مستشفى قال الطبيب هذي ولااااااااده لما سمعت الخبر وأنا أفرح مابغينا نطلع وبديت أكشخ وارتب حالي أستعد للقاء الأول مع صديقي بالحضانهـ وأمي كل شوي تتعالى صرخاتها حطوها على السرير متوجهين لغرفة الولاااااده وأبوي يمشي جنبها ويقولها لاتخافي أنا معاكي ترد أمي أخاف أموت وانا اولد , أبوي رد عليها والدموع تنهمر من عينيه ياجعل يومي قبل يومك <===<< متأثر بالأفلام وأنا أقول ماوصلنا لغرفة الولادهـ إنكتمنا ياهوه هوّوووووووونا ., طبعاً نقلوا أمي لسرير الموجود بالغرفه وجاء الدختور ومعاه النيرسات ., قال الدختور لأمي زفيييييييييير أمي فهمتها عكس أدتها شهييييييييييق واذا انا اللي أنشفط وأدخل جوّووا دقيت أمي بكوعي قلتلها يقولك زفير زفير الظاهر أمي سمعتني وزفرت زفرة وتدفعني أمي بقوه وأنا طلع سرعتي 180 ميغابايت وطلع كل شي فيني الا خشمي قلت لحووووول هذا اللي كنت خايف منه إستدعى الدختور الطاقم الطبي عشان يطلعون خشمي حاولوا المرهـ الأولى والثانيه مانفع وبعد ثالث محاوله طلعوهـ ) الثالثه ثابتهـ ) جلست أبكي وأقول للدختور غض البصر وتشيلني النيرس على يدها وتلفني بذاك الأبيض ياسلاااااااام وأخيرا انتهت معاااناتي ها..تحسين بشي>>>أخاف الرسالة تكون خرعتج...! المهم إن شاء الله تولدين بالسلامة،لو بنت سميها دانة،لو ولد سميه دان...هههههه أتغشمر...! سلااااااام) ضحكت بقوة و أنا أمسك على بطني،حسبي الله على ابليسها،لا و دان هيا و وجهها...! آآآآآه يا ربي لو ولدت حأتهمها هيا...! رسلت الرسالة لعلي و زودت عليها تعليقات...ايش هيا؟!،مالكم دخل و أصلاً ما حتفموها...ائ ائ اييييييييييه..انقهروووووووووووووووو....! احم احم..ادعوا لي ربي ييسر لي ولادتي>>>شكلكم ما حتدعولي لأني خبيت عليكم التعليقات و الله آآآآآثفة بس غصباُ عني>>>أقوووووول حتدعولي من فوق خشمكم...! ************************************************** ** -آآآآآآي ايوا جاهزة...! -ذحين ايش سويتلك عشان تقولين آي؟! قلت بانزعاج:ولا شي بس شديت شعري...! ترك علي شعري و هوا يضحك،واتقدمني للباب_كنا رايحين لأهلو_،صرخت بقهر:يا خاااااااين شيل معاك شي...! -هوا كله صحن واحد...! اتظاهرت بالزعل و مديت ايدي بشيل الصحن لكنو و زي دايماً سبقني و شالو،ابتسمت:أوو علي..سو كيوت...! قال بقهر من نفسو:غبية... ضحكت و نزلنا تحت عن طريق المصعد لأني سايرة تقيلة اليومين دي...! و لمن ركبنا السيارة... علي:القهر ما أتحمل أشوفك زعلانة...! ابتسمت،رغم كل إلي سواه فيا،رغم طيشو و سطحيتو إلا أنو حبو الصادق ليا يخليني أتجاهل أي شي سلبي...! علي:ما تردي...؟! اتنهدت و سكت و سكت هوا كمان،دايماً تنتهي حوارتنا العاطفية أو إلي تخص علاقتنا بدا الشكل،و دايماً أزعل علي مني،أخاف أصحى في يوم ألاقيه هوا كمان بارد زيي...!،أعز علي جداً و ما أتوقع أقدر أكمل من غيرو،هادي فطرتي...! قلت كنوع من التخفيف:تعرف إني ما أقدر أتخيل حياتي بدونك؟! قلت لمن ما لقيت رد:ما ترد؟! ما رد عليا،يمكن حس إنها مهي طالعة من قلبي،يمكن اعتقد إنها محفوفة بالشفقة،يمكن حس إني أسكتو،يمكن و يمكن و يمكن....! ظللنا ساكتين لين وصلنا لبيتو،أول ما نزلنا سار حماس في البيت،أخوات علي يحبوه خاصة الصغيرة (لينا)،متعلقة فيه بشكل،عمرها حوالي التلاتة تقريباً...! هوا كمان مرة يحبها،شالها و استفرد بها بعيد عننا، جلسنا أنا و عمتي (أم علي) و صفاء و أحلام و أختهم الكبيرة (ليلى) إلي هيا كبيرة و متزوجة و مخلفة قالوا حتجي بعدين،وت ايفير..خليني أوصف لكم أهل علي،أولاً:أم علي طيبة لكن امرأة و بقوة،أم و أنثى في نفس الوقت و في الاتنين رائعة، أحلام:28 سنة غير متزوجة و لا مملكة و لا شي..ليييييييييش؟!،بس عشانها تبغى واحد آدمي محترم،كل إلي تبغاه في زوجها الدين و الأخلاق وتقول ما عندها أي مشاكل تتزوج واحد دخلو أقل من متوسط لكن أهم شي يكون محترم و عارف ربو، صفاء:و إلي هيا أقرب وحدةليا،بنت ثانوي،حبوبة،عندها شوية أفكار مراهقة لكنها واعية و ماتنخدع... قلت:صفصف قلبو ارمي لي المخدة إلي جنبك... قالت بغلاسة _إلا على سيرة الغلاسة يقولكم في واحد غلس طاح قال أحسن ههههه_:مااااااااااااابا...! عمة أم علي:بنت أعطيها المخدة...! قلت:بنت أعطيني المخدة لا أقلب زوجة أخ شريرة...! صفاء:جربي جربي بس... التفت لعمتي و قلت و أنا أمسك ظهري:عمة ظهري يعورني،شوفي بنتك الغبية دي...! -حبيبتي ظهرك يعورك...! و ميلتني ناحيتها و قعدت تمسح على ظهري،فجأة علي وقف و نزل لينا من عليه و وقف على راسنا،مد ايدو و بعدني عن عمتي و جلس بينا،حط راسو على صدرها و قال:حقتييييييييييييييييييييييييييييييي...! قلت بقهر:أنا جيت قبلك...! -أحسن..عشان مرة ثانية تحسي بإحساسي لمن تطنشيني و تقعدي مع سعود...! -أنا حرة... -و أنا حر... -إنتا ليش تقلدني؟! -و إنتي ليش تسرقي أمي؟! -عمتي... -أمي... -أم صاحب عمو... -آآآ...عمة زوجتي... -أم زوجي... هنا اتحول الوضع لاستهبال و قال علي:أم أخواتي... -أم صحباتي... -زوجة أبوية... -مرة عمي... كان علي حيقول شي لولا إن عمتي بعدت عنها علي و قامت و هيا تقول:بس إنتا و هيا..أقوم أشوف العشا أحسن...! بعدما راحت عمتي قال علي:رهيبة أمي تستحي...! صفاء:ذحين إنتوا دايماً كذة...؟! أحلام بطريقة سينمائية:قلبي معك... قلنا أنا و علي في وقت واحد:مع مين؟! مسكت خشب الكنبة أنا و علي و قلنا في وقت واحد:خشب خشب... طالعنا أنا وعلي في بعض و فطسنا ضحك،أحلام:حراااااااااام ضحكت صفاء:المصيبة حامل...! -شفتي عاد...؟! لمن لم يفهم حركة:"خشب خشب":لمن اتنين يقولوا نفس الشي في وقت واحد يحاولوا يمسكوا خشب أو أي شي أحمر و إلي يمسك أول يتزوج أول _طبعاً_ هادي مجرد تخاريف و بدع لا تُؤخذ على محمل الجد...! ************************************************ كنت جالسة عالسرير أبكي،مغطية وجهي بيديني...! "جود ايش فيكي؟!"،رفعت راسي و قلت وأنا أمسح دموعي:إنتا جيت؟! جا علي وجلس جنبي،وقال:جود قلبي ايشبك؟! قلت بقهر ودموعي على خدي:خلاااااص،قرفت من نفسي أبغا أتروش مني قادرة...! طااااااالع فيني علي مستغرب،كنت قرفانة من نفسي لأني ليا كم يوم أحاول أتروش ما أقدر،شكل البانيو و عمقه _رغم إنو مو عميق_ يدوخني،منظر الحمام بكبرو يخليني أفقد توازني...! -كيف يعني؟! -أجي بأتروش ما أقدر..قبل شويةكنت حأطيح...! شهق علي:لعدندخلي الحمام من غيري...! -نعممممم...؟! سحب علي نفس و قال:جود حبيبي انسي الموضوع و قومي حطيلنا الغدا و خلينا ناكل و بعدين نشوف لنا صرفة...! هنا أنا اتوترت،قلت بتردد:أمممممممم...ما سويت غدا...! و زي ما اتوقعت،قال بانزعاج:ليه يعني؟! قلت بسرعة أدافع عن نفسي:سويت الكشنة و أول ما طلعت ريحتها طلعت عالقدر،و دحين أبغا أتروش...! اتنهد علي و قال بعد ما حط يدو على جبهتي:جود وجهك مصفر،بعدين إنتي شوية حارة،ارتاحي ذحين و بكرة إن شاء الله أروشك...! -نعم يا أخوية...؟؟؟! طالع فيني بنظرة..بعدين قال:ترااااااا خلاص ما عاد فيه شي..يعني خلاص..يعنيييييي..نامي نامي والصباح رباح...! -مالك دخل..بعدين أنا مابغا أنام بس جيعانة...! قال يقلدني في لهجتي الخفيفة:جيعانة..دحين قلبو أروح أسويلك لنش..أوه قصدي غدا...! كملت معاه و قلت كأني أكلم بيبي:أبيبي و الله أبيبي (حبيبي)...! ضحك و قام يطبخ طبخة خطيرةما يعرف لها إلا شيف محترف و إلي هيا:"اندوووووووووووووووووووووووووووومي" ***************************************** حاطة ايدي على قلبي:"الحمدلله ربي ستر"،دوبي خرجت من الحمام،كنت أتروش،كنت حأطيح طيحة،منجد أنا غبية،استغليت إنو علي في الشغل واتروشت لأنو حلف عليا ما أهوب ناحية الحمام من غيرو خوفاً عليا من الدوخة أو الطيحة،و قبل شوية كنت على وشك أطيح طيحة تجيب خبري أنا و إلي فبطني،والله أحس بطني انرج وظهري و رجلي مرة يعوروني،اتمددت عالسرير و غمضت عيني بألم،رجعت أفتحتها وطالعت في الساعة،كانت 12 الظهر،باقي حوالي الساعتين و يجي علي..رجعت أغمض عيني...! "جوووووووووود،جود قومي..جووود"،فتحت عيني على صوت علي،طالعت فيه باستغراب و قلت بتعب:ليه جاي بدري؟! قال باستنكار:بدري ايه...؟! قلت و أنا أطالع في الساعة:الساعة لسه اثنعـ...أوووه شكل نمت...! حط يدو على شعري و قال بنظرة ذات مغزى:اتروشتي...؟! -ايـ..وة... لاحظت إن الوضع موعاجبو،قلت:حسيت نفسي كويسة قمت دخلت...! -حسيتي نفسك كويسة ها؟!،ارجعي نامي و بلا حركات بايخة...! -ايش سويت؟! قال بصوت مرتفع:ولا شي..بس دخلتي الحمام وجاتك دوخة و ذحين عالسرير ما يندرى ايش صاير فيك و في إلي فبطنك...! دمعت عيني:علي خلاص والله ما صار شي...! قرب مني وقال بهدوء:يعني ايش كان حيصير فيكي لو انتظرتيني..جود أنا زوجك ما فيها شي...! حمر وجهي و قلت:خلاص علي خليني أنام الله يخليك...! قام زعلان،قلت:علي لأ... طالع فيني،قلت بصوت منخفض خجول:خليك جنبي... جلس بهدوء عالسرير جنبي،غمضت عيني و هوا كان يمسح على شعري...! صحيت بعد مدة واتفاجأت بنفسي في حضن علي،ضربتو على صدرو بالخفيف عشان يصحى و ناديتو لين ما قام،فتح عينو ببطء، اتثائب و قال بكسل:آآآآآه كم الساعة؟! -مادري... لمن حاولت أقوم فتح عينو بسرعة و فز يساعدني،وصلني لين المغسلة و قعد ماسكني عشان ما أطيح،إلي أزعجني إني اضطريت أتسوك قدامو و أنا أكره أتسوك قدام أحد،بعدها وصلني للسرير و جلسني و قال بتهديد:حركة وحدة يمين و لا شمال ما يصير لك طيب...! ابتسمت و هزيت راسي دليل الطاعة،بعدها اتيسر هوا عالحمام...! ***************************************** سعود يروي،2 الليل... مديت يدي للجوال وحطيتو عالصامت ورجعت أنام و مامرت ثواني إلا و الجوال يطيح،قعد يهتز لين طاح،دلدلت ايدي أجيبو عشان أرد عالمزعج التافه لكني انصدمت باسم علي،وسوست،رديت بقلق ازداد بعد ما سمعت صوت بكا:سعود الله يخليك تعال،تعال بسرعة أنا محتاجك...! -ايش فيك؟! -جود تموت يا سعود..تموت..تعااااااااااااااااااال....! زاد بكاه،صرخت فيه:وينك؟! -في مستشفى************ -خلاص خلاص دحين جايك... -بسرعة الله يخليك... فصلت ولبست ثوبي المعلق فوق البيجامة،كل إلي أعرفو دحين هوا إنوجود تولد و لا ايش يوديهم المستشفى اثنين الليل...؟؟؟ مشيت بسرعة عالية غير قانونية و لمن وصلت المستشفى سألت عن قسم الولادة و هناك لقيت علي منهار ويبكي،و سمعت أصوات قوية،أصوات أصابتني بالهلع،ميزت صوت جود،رحت لعلي إلي اتشبث بيا و قعد يبكي:تناديني،تناااااااديييييييييييييني و تناديك يا سعود...! كانت تنادي كل الناس وتقول كلمات غريبة عليها،نزلت دموعي غزيرة وأنا أسمعها تناديني وتنادي "أمها" وأبوها وأخواتها وعلي و أمي و حتى "دانة" نادتها...! حاولت أسد أذني لكن الصوت ما زال يوصلني،حسيت برغبة جامحة في إني أدخل و أخرج منها هذا الطفل إلي يعذبها...! ^^^^^^^^^^^^^^^^^ تستأنف جود الروي... انفجرت بداخلي مشاعر غريبة و عواطف قوية وانفجرت _أيضاً_ أبكي وأنا أشوفهم يخرجوا طفلي من الغرفة،سحب الدكتور ايدي و حقني بشي خلاني أسترخي و أغط في النوم...! سمعت أصوات متعددة و أنا أفتح عيني ببطء،كانت الرؤية ضبابية في البداية لكنها وضحت بعدكده...جدتي وعمو من جهة و من الجهة التانية علي إلي هجم عليا وحضني بقوة لدرجة صحت فيها من الألم،اعترضت جدتي:بعد عن بنتي بتكسرها...! عمو بسعادة:خليه يا أمي خليه...! ابتعد عني وضربني:غبية... ضحك عمو و سلم عليا:سرتي أم... ابتسمت بتعب وحاولت أجلس،ساعدوني عمو وعلي،أما جدتي فما لقت إلا إنها تسلم على ايدي لأنو من الصعب عليها توقف و تسلم عليا،و أدباً معاها شديت ايدها و بستها،اتخصر علي:ليه ما رديتيلي سلامي زيها...؟! قلت بصوت واهن:لأنك قلت لي غبية...! فجأة اتذكرت شي:وينو...؟! عرفوا كلهم إني أسأل عن ولدي و اتقلبت وجوههم،قلت:ويييييييييييييينه؟! علي:جود حبيبتي هوا عشان... قاطعتو و أنا أبكي:سار فيه شي؟؟؟ -لا بس... انفجرت أبكي و أشهق،جلس عمو جنبي:يا ويلي عليكي يا بنتي،والله ما فيه شي بس عشان خرج قبل أوانو طلع قاصر...! قلت بقهر و أنا أبكي:هدا عشان بابا قعد يدعي عليا ما أولد،هوا ليه يسوي كده؟!،ايش حيستفيد؟! -لا يا جود،اخس عليكي،لا تقولي كده...! -إلا هوا قال الله لا ييسر لك ولادتك،أنا ايش زنبي دحين؟!،هوا غلط موأنا...! علي:هو ما غلط،هو اتزوج وحدة وطلعت معفنة و طلقها يعني بالحلال،لكن حركته سخيفة إنه يسوي فيك كذة..مو عذر إنك تشبهي أمك...! زاد بكايا وأنا أحس إني أخدع علي،قال عمو:خلاص قفلوا الموضوع..والولد ما فيه شي _إن شاء الله_ وكونه قاصر مومشكلة خاصة في الفترة الأخيرة...! جدتي:ايه و الله خلو المواجع مقفلة...! مسحت دموعي:طب أبا أشوفو...! مسح علي على شعري:لمن تسيري كويسة أوديكي أنا،طيب؟! -لأ دحين...! قال عمو بحزم:جوددحين ما ينفع يخرج و لا إنتي ما تقدري تتحركي خلاص بعدين...! -طب إنتوا شفتوه؟! علي:ايوة و صورناه... و فتح جوالو و وراني صورة لولدي حبيبي،لانت ملامحي و أنا أبوس شاشة الجوال:حبييييييبي يجنن...! سحب علي الجوال و قالو هوا يمسح الشاشة بقرف:بوسيني أنا لا تبوسي الشاشة...! -ههههه،انقلع،عمو مرة قمر،صح؟!،يشبهني صح؟!،يجنن صح؟!...! قلد عمو طريقة كلامي:ما فيه ملامح صح؟! ضحكت جدتي و قالت:سبحان الخالق فيه منك أول ما جيتيني و فيه من سعود الكثير...! حزت في نفسي كلمة "جيتيني" لكني ما حأسمح لأي شي يفسد فرحتي...! ابتسمت:أصلاً قمر...! قال علي بتفكير:وجه الشبه بينه وبين القمر هو الشكل الكروي و قلة الملامح...! قلت بانفعال:لا تقول على سعُّودي كده...! انتبهت للشي إلي قلتو لمن الكل طالع فيني مستغرب،قال عمو:هوا كان يتكلم عن... قلت بسعادة:علي أبغا أسميه سعود... طالع علي فيني محتار،قلت:الله يخليك أبغاأسميه سعود..الله يخليك...! ابتسامةعلي خلتني أتحرك وأصفق لكني هجدتوأنا أحس بالألم في جسمي،بعدها طالعت في عمو إلي كان متوتر وخجلان،ضحك علي:إنتا و وجهك ليه محمر؟! عمو:غبي انقلع...! قلت:جدة حلو اسم سعود صح؟!،علي أهلك ما حيقولو شي صح؟! علي:لالا ما عليكي،حتى لو هذا ولدنا واحنا أحرار...! -بعدين أنا حملت فيه 9 قصدي 7شهور...! -ايوة صح..بس لا تقولي كذة قدامهم...! -بس متى حشوفوا؟! علي وعمو:يووووووووووووووووووووووه....! ************************************************** * صفاء:يا ربييييييييييييييييه يجنن...! قلت:أجل ولد جود ما تبغيه يطلع يجنن..والله أنا نونو أنا أزنن...! عمتي كانت شايلتو و سعود مرتاح معاها و ساكت،رغم إني لاحظت عليه إنو نوام..الله يحفظو يا رب،ما كمل شهر من يوم ما جا و كده اتعلقت فيه...! قلت بتساؤل:عمتو ما يأسر (يأثر) عالولد لو كان قاصر؟! قالت عمتي:لا لا إن شاء الله،هو بس هذا الشهر يقعده في المستشفى و بعدها ما يصير فيه شي إ ن شاء الله...أحمد ولدي كان قاصر...! شهقت:وي عساها بقلبي عمو أحمد كان قاصر...! طالعوا فيا مصدومين،صرخ علي:خير..خير إن شاء الله...! اتوترت،يا ربيييييييييييه خرجني منها،قلت بتلعثم:لا..هوا عشان دوبي أعرف..و عمو كان..يعني كان يحكيني عنووووو...و... قالت عمة بشدة:ايش فيها...؟!،محنا رايحين جايين نقول لكل أحد حبيبي و حبيبتي و مادري وشو..جات عليها مسكينة تحاسبوها على كلمة عفوية....! قلت و أنا أسبل بعيني:صح أنا مسكينة..مسكينة مرررررررررررررررة....! قال علي يتريق على الراء الخفيفة حقتي:مررررررررررررة...وجع اتمرجلي شوية....! التفت عمي لعلي:وش إلي تتمرجل شوية؟! قلت أنا:صح صح وش إلي أتمرجل شوية؟! التفت ليا عمي و قال بحاجب مرفوع:تتريقين علي...؟! -ها..لا لا بس كده من غير ما أحس...! قال علي و هوا يأشر عليا:كذابة تتريق تتريق...لا تصدقها...!،و بعدين تعالي هنا ليش إن شاء الله عمو أحمد..من وين لك هذا الأدب...؟! طالعت في علي مستغربة:ايش إلي من ويلي دا الأدب..أنا متعودة دايماً لمن أكلم أحمد أخوك أقولو عمو...! -ليش..ليش عمو...؟!.."تابع بقهر"..بعدين ليش أحسك تعرفينه و كنك عايشة معاه...؟! -علي..يعني بالله عليك...أنا أعرف عمو أحمد من قبل ما أشوف وجهك..كنت أروح معاه الملاهي و المكتبة و البقالة و كل مكان و كان دايماً يجي البيت عندنا فشي طبيعي أكون عارفتو و بعدين هوا واحد من الناس إلي شاركوا في تربيتي...! قال علي بطفش:طفشتينا إنتي..رباني و رباني..خلاص طفشت...! -بكيفك إطفش..ايش هوا دا...؟!،إنتا عارف مرة ضربني عشان طلعت راسي من شباك السيارة و هزأني..بالله واحد ضربني و علمني و وداني و جابني..تبغاني أناديه باسمو حاف...؟! قال عمي أبو علي:ما عليك منه يا بنتي..هذا واحد ما فراسه..هو بس من غيرته مو قادر يستوعب الوضع...! قلت بقهر:بالله بلا غيرة بلا كلام فاضي...! من جد..من ايش يغار علي...؟!،عمو سعود و أحمد كانو مرة قريبين من بعض،و عمو قد قالي إنو أحمد هوا إلي علمو كيف الحفايض تتغير و كيف الرضاعة تتسوى لأنو كان يسأل أمو إلي هيا عمتي دحين عشان يعلم عمو بما إنو جدة كبيرة و ما تعرف تتعامل مع الأشياء إلي احنا نستخدمها دحين..بالتالي أكيد شاف عمو و هوا يغيرلي...! الخلاصة..واحد شافني في كل الحالات زي أحمد غباء إنو أحد يغار عليا منو...! ************************************************** ******************** اليوم أنا متحمسة و علي كمان متحمس؛عشان حنخرج سعود من المستشفى..ياهووووووووو...! أول ما ركبنا السيارة شغل علي المسجل عالـ إف إم،قلت بعتاب:علي لا تخلي أول شي يسمعو الأغاني...! قفل المسجل نهائياً،و طالع فيني مستغرب:أول شي سمعه الأذان...! ابتسمت:صح..إنتا إلي أذنت فيه...؟! قال بحرج:لأ سعود...! قلت:ليييييييييييه؟! -مادري كنت مفجوع و خايف ماني مصدق إنه ولدي..و إلى الآن ماني مصدق...!،و على فكرة تراني إلى الآن ما شلته...! -نعم...؟! -حاولوا فيني ما رضيت..في البيت إن شاء الله بحاول "تابع بحزن سينمائي" لإني يا عمري عليا شلت لينا أول ما ولدت و طيحتها و أخذت من التهزيء الشي إلي عقدني و كرهني في الأطفال...! ابتسمت:كم كان عمرك وقتها؟! -مممممم..لينا عمرها 3 سنين يعني كان عمري وقتها..همم..23 تقريباً...! -ههههههههههههههههههههههه -اضحكي ايش عليكي؟!،والله ما أنسى ذاك اليوم..شي يفشل الكلام إلي قاله أبوية...! ضحكت مرة تانية،قال يقهر:جودوه...! -خلاص خلاص بسكت...! طالعت في سعود،حليوة و يجنن اسم الله عليه و هوا بعد شوية فتح عينو و قعد يبحلق فيني،قلت:حبيبي أنا،علي طالع كيف يطالع،علي شوفو...! قال علي بتعقل استغربتو:جود الله يهديكي..قاعد أسوق...! الله لنا،من متى علي يسوق و يلتزم بقواعد السلامة....؟! لكني طنشت و قعدت أكلم سعود:حبيبي عنوني..سَعُّودي والله إنك إنتا سعدي و هنايا...! علي:يااااااارب،يا رب تثبت علينا العقل و الدين...! كنت حأرد عليه لولا إني اتذكرت شي:علي احنا ما اشترينا لسعود أشياء...! كنا مأجلين الشرى للشهر الثامن أو التاسع،قال علي:طيب اليوم نرتاح و بكرة إن شاء الله نحط سعود عند أمي و نروح أنا و إنتي السوق...! شهقت:وي ولدي أتركو...! -أقول..أمي أحسن منك في الصغار فلا تخافين...! -لا مو عن كده بس ما أقدر أسيبو،حأشتاق لو...! -بالله عليكي...! أفففففف والله ما أقدر،أنا أشتاق لو لمن ينام كيف لو أتركو...؟! ************************************************** ******************* في السوق _حالياً_ أنا و علي قاعدين نتناقش _بالأصح_ نتضارب؛لأنوهوا يبغى يطقم لسعود أزرق و أنا أبغى أطقم برتقالي،و إلي يقهر إنو مختار من بين كل الأطقم الزرقا أعفن واحد،قلت:ذوقك زي وجهك...! همس علي بغضب:حناخذ ذا يعني حناخذ ذا...! "فيه ايه؟!"التفتنا للصوت،كان عجوز عامل في المحل،قال علي:خير؟! -يا ابني وائفين هنا من أول،فيكو ايه؟! -وايش دخلك إنت؟! انقهرت من قلة أدب علي و فظاظتو مع العجوز،قلت:ايش أحلى دا و لا دا؟! ابتسم بتسامح:تعالوا أوريكو حاجة...! راح العجوز،كنت حألحقو لولا ايد علي إلي مسكتني:إنتي بأي حق تتكلمي معاه؟! -أولاً عجوز،ثانياً أخفف من قلة أدبك معاه...! كان حيتكلم لولا العجوز إلي رجع و معاه طقم متكامل أزرق و برتقالي وقال:"مافيش حاجة تستاهل"،حطوا قدامنا و مشي،مادري يتهيأ لي و لا لأ لكني كأني لمحت على وجه علي ندم،قلت:حلو...؟! قال بهدوء:ايوة... -طب يلا...! حاسبنا عليه بسرعة من غير مكاسرة على سعرو الغالي و خرجنا،و احنا ماشيين قال:جود تعالي...! -على وين؟! قلت و أنا أشوف إننا نتوجه لمحل محترم:خير إن شاء الله؟! ابتسم:بالله عليكي..يلا.. مشينا،شهق علي بخفة و قال:هذا شي فن تعالي جود... -والله إنك منحرف...! كان مليان متزوجين،جداد،قدام،وسط،ميديم،لارج،سمول هههه أمزح،المهم..لمن رحنا للقميص إلي عجب علي لقينا منو ألوان كتيييييير،الصراحة كلها معفنة ما عدا الأبيض،لكن الأخ ما طاحت عينو إلا عالأحمر وكان مو حلو،قلت:لا علي الأبيض أحلى...! -إنتي في كل شي تعارضين؟! -دحين مين إلي حيلبسوا؟! -جود حبيبتي الوحدة تلبس ما يُسعد زوجها مو ما يُسعدها هيَ...! -يا سلاااااااااااااااام...! سكتنا و احنا نسمع:حبيبتي هذا شي يخصني و يخصك...! صوت بنت خجول هامس:إلي يعجبك خذو...! -يا قلبي بنكمل نص سنة و إنتي لسه تستحين...! هنا قال علي بقهر من التناقض التام:خذي الأحمر...! قلت و أنا ماسكة ضحكتي:أقول حبيبي ايش رايك ناخد الاتنين؟! -لأ... و سحب الأحمر،حاسبنا عليه و ما هدي علي إلا لمن رجعنا البيت طبعاً من بعد ما أخدنا سعود من عند عمتي...! ************************************************** كنت اليوم على أعصابي والسبب هوا الدوري العربي مادري الآسيوي لكرة القدم..المهم اليوم حتسير مباراة إلي يفوز فيها ياخد الكأس و المباراة بين السعودية و الـ..ما حأقولك درءاً للمشاكل...! إلي خايفة منو هوا إنو السعودية تخسر؛لأنها لو خسرت حيقلب علي البيت فوق تحت...يا الله قد ايش أخاف منو لمن يخسر الفريق إلي يشجعوا فكيف لمن السعودية بكبرها...؟!،لأول مرة أهتم و أقول:"ياااااااااا رب تفوز السعودية"،أوووووووه لحظة وزوجات مشجعين الفريق التاني تطيح على روسهم إلا قولوا زوجات لاعبين الفريق الخاسر ايش يسير لهم؟!،وي مساكيييييييييييين،و زوجات لاعبين الفريق الفايز أكيد يكونوا في قمة السعادة،أزواجهم رايقين و يجننوا...يووووووه والله الرجال أغبياء،يتحمسوا لكورة يجري وراها 21 مجنون...أفففففف و القهر إنهم يحرقوا أعصابهم واللعيبة ما يدروا عنهم،ما شاء الله رشاقة و لياقة و صحة و فلوس و أزواجنا المخابيل ياكلوا في الشيبسات و يتخنوا...و إلي خايفة منو أكتر هوا سعود إلي يكره الأصوات العالية و يخاف منها و ممكن ما ينام الليل بسببها...! يا عمري على ولدي...سمعت علي ينادي"جوووووووووود،المباراة بدأت"،لا يا شيخ و فرحان تقولي،يارب يا كريم نزّل مطر ورعد و برق و خلي المباراة دي تتوقف...!،بست سعود و حطيتو في سريرو إلي زي القفص عشان ما يطيح_اسم الله عليه_ و رحت لعلي،و أول ما جلست لف يدو على أكتافي و قربني منو،ايوااااااا بعد شوية مع الحماس يدفني أطير أوصل للجيران...! ححاول أحكيلكم إلي سار:سجل الخصم هدف،حطيت اصباعي على إدني عشان المسكينة ما تنصمخ من صراخ علي لكني اتفاجأت بـ"لاااااااااااا،والله قهر،ايشبهم ذولا ما يلعبوا عدل"،لااااا والله تطور واضح،بعد دقائق سجلت السعودية هدف،اتحمس عليو باسني بقوة على خدي:"الله يسعدك"،قلت:"حبيبي مو أنا إلي سجلت الهدف"،ما رد عليا،تعرفوا ايش أكتر شي أحبو في المباريات...؟!،أحب أشوف الفريق الخاسر و جمهورو و أضحك عليهم حتى لو كان هدا الفريق السعودية،تعرفوا أنا أكره كرة القدم و..."الحيوان..يا غبي يا ثور..."،قلت:بسم الله علينا مين تكلم؟! -الحمار ضيع انفرادة؟ -مين هادي؟! -مين؟! -انفرادة...؟! -يعني قدام الملعب لحاله مع الكورة و ما حوالينه أحد...! -آها...! والله حالة..يسب الرجال عشان ما سجل هدف و ضيع "انفرادة"،عادي ايش فيها؟!..وي..والله حتى الرجال مستصيب،يا ساااااااااتر....! بعد مرور وقت مو قصير أعلن المعلق إلي صمخ إدني فوز الفريق الخصم،اكفهر وجه علي و ضرب فخدو بقهر:"والله حراااااااااااام"،طاااااااااااااااااالعت في علي،آخر مرة خسر فريقو قلب البيت عليا،قال:خير،ايش فيكي؟! -لالا ولا شي،بس..يلا خيرها في غيرها،أنا بقوم أشوف سعود...! -جود والله جيعان حطي العشا...! -طيب بس بشوف سعود و أحطو...! سبحان الله..يغير و لا يتغير..أصلاً من يوم ما جبت سعود و هوا أهدى و أعقل و آدب...! ************************************************** ***** |
الجزء الثالث عشر (بداية استقرار علاقة) قلت بتردد و أنا ألبس سعود و أرتبو:أمممم علي... قال و هوا مشغول بشماغو:نعم... -آآآه هوا زي ما تعرف أهلي..يعني هما ما يحبوني فـ..يعني... -ايـــه...؟! قلت بسرعة:أخاف يضايقوا أمك و أخواتك و... قاطعني بصوت حريمي:يووووووه والله مادري كيف جود طالعة منهم،حرام وحدة زي جود تكون بنتهم "كمل بصوتو العادي"هذا إلي بتقوله أمي وأخواتي...! -يعني مو ممكن يزعلوا و لا شي..يعني كده ولا كده؟! -لالا إن شاء الله..يلا جاهزة؟! -ايوة بس بأتأكد من أشياء سعود..هممممم..حليب..حفايـ...علي امسكو بالله لا يطيح،ساير يتحرك كتير اسم الله عليه...! راح له علي و شالو،انسدح عالسرير و رفع سعود فووووووووق،كنت حأنبه علي إني دوبي لسه مرضعتو و ما جشأتو،لكن:طِرااااااااااااااااااششششششششش...! شهق علي ،قمت أنا بسرعة و شلت سعود...! علي:ولدك هذا وجه أحد يلعبه...! بست سعود:والله عسل،ينقط عسل ولدي...! طالع علي فيا بنظرة،كتمت ضحكتي و أنا أقول:خلص حبيبي حصل خير،قوم غير و أنا بغسل لسعود...! -حسبي الله و نعم الوكيل يا ذولا البزران،قرف في النهار و بكا في الليل...! -حبيبي احنا في الليل دحين...! كنت عارفة إنو يقصد بالليل وقت النوم و النهار الوقت إلي نكون فيه صاحيين لكن أستعبط...! طالع علي فيا بنظرة مرعبة فسكت و ألهيت نفسي بغسل سعود و تغيير ملابسو...! كنا رايحيين لبيتنا_بيت جدة و عمو و بيتي_ لكن هادي المرة غير،بابا و أعمامي و عماتي و أولادهم و بناتهم موجودين و أهل علي و بسبب وجودهم أنا خايفة من كرههم ليا يضايقو أهل علي و هدا إلي أنا ما أرضاه لسببين:ما أبغا مشاكل معاهم بالتالي مع علي و لسبب تاني أهم و هوا إني أحبهم و ما أرضى عليهم،أفففف..خليها على الله...!،طالعت في سعود بإعجاب،حضنتو و دفنت وجهي في رقبتو و قعدت أسوي حركات بفمي،مادري ايش اسمها لكن أتوقع تعرفوها و هوا يضحك،التفت لعلي و سألت بابتسامة:خلصت...؟! -ايوة يلا..اتأخرنا...! وقفت و مسكت سعود،ألصقت ظهرو بصدري و رفعتو لمستوى وجه علي:قول آسف لبابا...! طنش علي سعود إلي بدأ يمد يدينو يطلب من علي يشيلو،قلت:حرام عليك يقولك آسف...! قال علي مستنكر:هبلة إنتي..ما يتكلم...! قلت بتعاطف:شوف كيف يمد يدُّو...! قال بسخرية:لمن يكون معايا يبكي يبغاكي و لمن يكون معاكي ينقز يبغاني،ولدك ما فيه قناعة و رضا...! قرب وجهو من وجه سعود:"القناعة كنز لا يفنى"،ودق جبهتو بطرف أصباعو:سامع...؟! ثواني مرت و سعود مبحلق في علي قبل ما يبكي بصراخ،شهقت و قلت باستنكار و أنا أحضن سعود:ايش هادي الوحشية؟! قرب علي و هوا مستغرب:وي..اتعور...! -حرام علييييييييييييك..حبيبي اتعورت.."شهقت" حسبي الله على ابليسك جبهتو محمرة...! قال بطفش:يووووه إنتي و ولدك المدلع..ارحميه و خليه يطلع رجال..أنا في الصالة..بسرعة...! و خرج..أففففففف إلي يقهر في الرجال إنو لمن يكون في بيتو و يغلط يستخدم سلطتو و ينهي الموضوع لكن لمن الوحدة تغلط يمسكها عليها...والله حاااااااالة...! لبست عبايتي و خرجت و في السيارة همست في إدن سعود:"سبحان الذي سخر لنا هذا وما كنا له مقرنين و إنا إلى ربنا لمنقلبون"،قال علي:يا بنت الحلال صغير..كم مرة أقولك؟! راقتني كلمة بنت الحلال لسبب أو لآخر،قلت:زي ما نأذن في أدانيهم أول ما يولدوا نقول الأدعية و الأذكار و الأشياء دي..أنا مقتنعة...! كنت مؤمنة إني لمن أهمس بالأدعية اليومية في أدن سعود يتأثر و يداوم عليها و يسير يحس بالنقص من غيرها...! اتنهدت و أنا أتذكر شي،قلت:علي ايش رايك أتصل أعتذر...؟! -جود قلت لك... قاطعتو و أنا على وشك أبكي:هما يكرهوني ليش ينادوني و بعدين مالهم و مال أهلك...؟!،والله أخاف عليهم يضايقوهم،حتى إنتا ما حتسلم من تنغيزات بابا و عبدالإله...! -من ذا؟! -أخوية... -جود بقولك شي بس ما تزعلي... -قول... سحب علي نفس:أبوكي شايلني على راسه على أساس إني..يعني هو يعتبررررر إنيييييي..كيف أقولها ذي؟!"تابع بسرعة"يعتبر إني خلصته منك و من المسؤولية...! قلت بسخرية:آهاااااااااا،يعني أطمن إنك مارح تتأذى و لا أهلك...! -إنتي ليش خايفة علينا...؟! -لأني أحب أهلك...! سأل علي بهمس:و أنا جود؟! ما عرفت بايش أجاوب لأني أنا نفسي ما أعرف ليه...! قلت و أنا أخفض راسي:صراحةً مادري بس..إنو..أنا ما أحب إنك تزعل أو تتضايق أو يعني..ما..مدري..أحس إنو أبغاك دايماً تكون مرتاح و... سكت و أنا مني عارفة ايش أقول و لفيت وجهي للشباك و أنا أحس بمشاعر غريبة..الإحساس هدا يجيني بين فترة و التانية..حسيت بايد قوية تضغط على ايدي و صوت هادي وصلني:جود أنا ما اتزوجتك إلا و أنا عارف وضعك و أمي و أخواتي عارفين كل شي فلا ترهقي نفسك بالتفكير...! قلت بصدق:إنتا الشخص الوحيد إلي أرتاح لو في هدا الموضوع بعد عمو...! -جووووووووود ترا أسيب الدركسون و أضمك...! ضحكت بخفة:لو متنا و إنتا "ضامني" على قولك فحيكون شي رومانسي بس سعود معانا..ايش ذنبو يسير ضحية رومانسيتنا؟! -الله يكفينا الشر..بس خلاص...! أبغا أوضح لكم نقطة و إلي هيا سبب راحتي لعلي في الكلام معاه عن مشكلتي..علي غير عن عمو..عمو لمن أكلمو يحاول يلاقي أعذار لبابا و أخواني و كده أما علي يسب وما يخلي فيهم شي ما يقولوا بالتالي يبررررررررررررد قلبي وكمان أكون أنا متزنة لأنو عندي خيارين..إما أتصرف بنضج و أعامل بالتي هي أحسن أو أكرههم و أسبهم و أحقد عليهم..عمو يشجعني عالخيار الأول و علي عالتاني و بكده أكون متزنة...^___^ في بيتنا،،، دقينا الجرس فانفتح البابين،باب المجلس و باب الصالة،باب المجلس فتحو عمو و باب الصالة منورة،ابتسمت لعمو و دخلت مع سعود و علي سلم على عمو و دخلوا بعدها للمجلس،أول ما دخلت حسيت برهبة،حريم كتيييييير و كلهم عينهم عليا أو يمكن على سعود،و القهر محد رحب فيا غير منورة و جدة،يكفوني..مااااااااااالت...! سلمت على منورة و على جدة إلي سحبت مني سعود إلي فشلني و بكي،غريب أمرو دا الولد؛يكره الناس و الأصوات العالية،قلت و أنا أمسح على راسو من غير ما أشيلو من جدة:حبيبي هادي "عليت صوتي" ماما،مو مامتك،بس مامة مامتك،يعني جدتك...! بعد كم قبلة رضي سي السيد سعود و سكت و استكان لحضن جدة،بعدها وقفت محتارة؛أسلم و لا ما أسلم؟!،لو سلمت ما حيعطوني وش و لو ما سلمت حيقولوا قليلة أدب طالعة لأمها و يخلوني حديث الصباح و المساء...! سحبت نفس و قلت بصوت واضح و عالي شوية:كيفكم؟! طالعوا فيا لثانية بعدها لفوا وجوههم عني و كملوا "هروجهم..."،التفت لجدة و أنا أحاول قد ما أقدر أكبح دموعي و قهري،والله ما أوريهم ضعفي،و شلت سعود و جلست جمب جدة،بعد ثواني رن جوالي،شفت:"صفصوفة فصفوصة"،ابتسمت و أنا أرد:هلا والله...! -هلع حبيبتي هلع..جود ترانا وصلنا و إنتي حتكوني الوسيط بيننا و بين أهلك...! -أصلاً ليش مسوين دي العزيمة...؟! -يا هبلة..عشان العائلتين تتعارف...! -أوووووووه..طيب طيب دحين حأفتح لكم الباب...! -لالا... رجعت الجوال لإدني:هاااا... -استني نحط عطر... -هههه..و افتحي باب المصعد عدلوا مكياجكم... -خلاص عدلناه... -الحمدلله..بعد من واحد لخمسة و أفتح... أول ما قفلت وصلني صوت فضولي كريه:مين؟! التفت لمصدر الصوت،كانت عمتي"صفية"،قلت بهدوء:واااااااحد،اتنييييييين،تلاااااااتة،أرررررررب عة،خممممممسة....! قمت و فتحت الباب و قلت بصوت عالي:هلع هلع والله...! نطت صفاء عليا،بعدتها:"انقلعي"،و رحت عند عمة:هلا والله بعمتو..كيفك؟! و سلمت على عمة إلي شالت سعود مني و على زوجة أحمد و بنتها و ليلى و أحلام،يعني سلمت عالكل ماعدا صفاء إلي بان على وجهها الزعل،دخل الكل و بدأوا الحريم يسلموا على بعض،اتكيت عالباب و قلت:ما حتدخلي...؟! لفت وجهها:لأ... قلت أمازحها:يا حبي أنا ما أقدر أسلم عليكي قدام الناس..بعدين فيه أطفال.."غمزت بعيني" في الغرفة أريح...! طالعت فيا بصدمة،ضحكت و رحت سلمت عليها،دفتني بعنف و هيا تقول:يا حسرتي على أخوية متزوج *****...! قلت:لالا..*** لأني مع الاتنين...! صرخت بقرف:يا حيوانة...! قبل ما أتكلم وصلنا صوت جدتي:أصواتكم وصلت للرجال...! ضحكت و دخلنا،شلت العباية من صفاء...! كنا جالسين و كانوا "أهلي" جالسين مع أهل علي جلسة ودية جداً،عمتي و ليلى و زوجة أحمد مع الحريم،أحلام مع البنات،الشي الوحيد إلي قدرت أقولوا هوا:"منافقيييييييييييييييييييين"،وقفت و قلت لصفاء إلي كانت واقفة جمبي بهمس:تعالي ورايا... و رحت لعمة و أخدت منها سعود و رحت على غرفتي،تبعتني صفاء،أول ما دخلت:الله..حماااااااااااس....! ابتسمت بغرور:طبعاً حماس...! قالت بعفوية:أحلى من غرفتك دحين...! -لأنو هادي غرفة بنوتية شبابية أما ديك فغرفة زوجية...! جلست عالسرير و قالت:مع إنو غلط..أنا قرأت إنو لازم غرف المتزوجين تكون ألوانها هادية عشان الألوان لها تأثير على النفس،و الأحمر يدل على الغضب و هو أيضاً من الألوان النارية...! طاااااااالعت فيها،قالت:ايييه..أمس قرأت الموضوع...! -و أنا أقوووووووووول...! -انقلعي..هاتي سعود...! سحبت مني سعود:يا ناااااااااثو..والله كبر...! -سمي على ولدي..ما عندي غيرو...! ما أنهيت جملتي إلا و بالباب يندق،فتحتو مبتسمة متوقعة أحلام لكن... قلت باستغراب:سارة...؟! كانت كالعادة:خايفة،مترددة،خجلانة...! -أممممممم..أ...أأأأ... رحمتها...ابتسمت و سلمت عليها،دخلتها و أنا أقول:والله زمااااااااااان..صفاء هادي سارة أختي 15 سنة.."التفت لسارة" و لا يمكن خلاص دخلتي الـ16..صح...؟! قالت سارة مستنكرة:أنا 19...! ضحكت:أووووه معليش أنا بس فاكرة لمن قلتيلي إنو عمرك 15.."التفت لصفاء"..ودي صفاء أخت علي...! ابتسمت صفاء و قامت تسلم على سارة إلي عينها على سعود،بعد ما خلصت مدت ايدها لسعود و الغريب..الغريب إنو ما رفض،طالعت أنا باستغراب،قالت صفاء بعفوية:ايش معنى؟! "سااااااااارة..ساااااااارة"،كان صوت بنت،قالت سارة:هنااااااا...! دخلت البنت..هيا نفسها ديك البنت إلي جاتني أول مع سارة..ايش اسمها يا ربيييييييييييي؟!،ايش؟!،خلاص مو لازم أناديها باسمها...! ابتسمت و سلمت:كيفك؟! -الحمدلله تمام..إنتي أخبارك؟!..يا ناسو..هذا سعود...! و راحت لسارة:هاتيه... قالت سارة بتملك:لأ... -أعطيييييييييييينيييييييييي... -لأَّ...! قلت:هييييي إنتي و هيا لا تتضاربو على ولدي..هاتو... شلت سعود و جلست عالسرير،جلست جمبي صفاء بابتسامة هادية،و سارة و علا قدامي عالأرض عشان يلعبوا مع سعود..أوه أوه علا..اتذكرت اسمها..الحمدلله...! بعد مدة،،، وقفت سارة:أعتقد إنو لازم نروح عشان العشا قرب..لازم نساعدهم...! وقفت علا:ايوة الله..من جد...! قلت:إنتو روحوا اتعشوا و أنا برضع سعود و أنومو...! علا:يعني ما حتتعشي؟! ابتسمت و أنا أهز راسي بـ"لأ"،التفتت علا لصفاء:و إنتي؟! قالت صفاء تصرف:آآآه مسوية رجيم ما أقدر آكل دهون...! خرجوا البنتين،قالت صفاء:ما أحب أتدخل لكن إلي قاعد يصير غلط...! عرفت ايش تقصد و من البداية حسيت إنها تستناهم يخرجوا بس عشان تكلمني في الموضوع دا...! -قبل أي شي تقرفي لو رضعت سعود قدامك؟! قالت بسرعة:لا عادي... -طيب ممكن تجيبي لي شرشف الصلاة إلي هناك...؟! سحبت صفاء نفس و قامت تجييب الشرشف ليا،لفيتو عليا و فتحت بلوزتي و دخلت سعود تحت الشرشف عشان أرضعو و بعد ما رتبت الوضع و استقريت و بدأ سعود يرضع بشكل متواصل رفعت عيني لصفاء و أنا أقول بابتسامة:خير ست صفاء؟! -جود هذي أختك و شكلها قد ما تقدر تحاول تتقرب منك،شكلها تخالف القوانين المتخلفة المحطوطة لها عشان تقابلك.."تابعت بانفعال"ما شفتي كيف وجهها لمن نادتها البنت الثانية؟!،اتقلب و لمن عرفت إنها هيا اتنهدت براحة..حرام إلي يصير حرام...! -طيب..هدّي ايش فيكي؟! سحبت نفس:ما فيا شي..أصلاً من الأساس أنا مالي دخل...! ابتسمت:صفصف حبيبي إنتي ما تعرفي كل شي،هدا أولاً،تانياً،أمها و أبوها مو راضيين عن إلي تسويه معناتو هيا غلطانة...! -بس أحياناً الأم و الأب يكونوا غلطانين...! -عارفة و عايشة دا الشي كمان و أحس إنو هدا ابتلاء من ربنا..يعني يسير الواحد محتار؛ما يبغى يسوي الشي الغلط لكن رضا الله من رضا الوالدين و أمو و أبو ما حيرضوا عنو إلا لمن يسو دا الشي الغلط...فهمتي؟! -أففففف..طيب بروح أتعشى...! قلت بسخرية:مو مسوية رجيم؟! -بقول جود أقنعتني أتعشى...! -لا والله..أقول اقعدي اقعدي..كلي سيرلاك تلاقيه في شنطة سعود...! طالعت صفاء فيا بحقد بعدين راحت للشنطة و بدأت تسوي سيرلاك لنفسها و إلي يضحك إنها أخدت كاسة سعود و فتحت غطاها و استخدمتها كصحن..قلت و أنا أضحك:سيرلاك و يخب عليكي...! رمتني بنظرة حادة،قلت و أنا أرمش بعيوني:مطرح ما يسري يمري...! و على دي الحال..قعدت ما بين سعود إلي يصحى من الهمس و ما بين صفاء إلي مسكت المجتمع من الألف إلى الياء و شرشحتو و ما خلت فيه شي ما قالتو...! ^^^^^^^^^^^^^^^^^^^^^^^^^^^^^^^^^^^ عمو سعود حيروي دا المقطع... جو العزيمة حلو..أهلنا و أهل أحمد كلهم موجودين..حتى علي اندمج مع الشباب رغم إنو في بداية العزيمة كان متحفظ و زام فمو..احم أعترف..كرهي لدا الشخص..أقصُد علي..خف..أو خليني أقول سرت مطمن على جود معاه..مني قادر أفهمو..كيف شخص كان بذيكَ الدرجة من التفاهة يتحول لأب..حتى جود لمن أكلمها تقولي:"علي اتغير"..كنت أعتقد إنها اتعلقت فيه أو حبتو لكن يوم بعد يوم أقتنع أكتر إنو اتغير..و بعد ما ولدت جود تغيرو بدأ يزداد و كأنو شي رباني نزل عليه خلاه يعقل..معقول الأبوة تعقل لدي الدرجة...!،كل هذا مو مهم..المهم..جود و سعادتها و راحة بالها...! فجأة جا على بالي شي..أنا كلمت سعيد إنو جود ولدت و قلتلو إنها سمت حفيدو سعود..قال بهدوء و عمق:"عليك؟!..اتوترت و أنا أقول:"ايوة"...لكن ما شافو..لا إلا شاف صورتو في جوالي لكنو ما اهتم..وريت عبدالإله كابر و قال بهمجية:"و أنا مالي؟!"قهرني...!،وريت عبدالرحمن قال:"أووه ما شاء الله...!"،و سعود ينحب..حليوة اسم الله عليه..جات في بالي فكرة صغيرة..قمت و خرجت..وقفت عند مغاسل المجلس و اتصلت على جود...! ردت:نعم... ابتسمت:هلا حبيبي..كيفك؟! -الحمدلله..يو؟؟؟ -نحمدالله بخيرٍ و عافية...! ضحكت جود:ليش كده تتكلم؟! -مادري..المهم جيبي سعود...! -ايييييش...؟! -أبغى سعود..هاتيه... -ليه؟! -أبغاه..مشتاقلو...! -بس... قاطعتها:ما عليكي من الحريم..مري من عندهم و لا كأنو شي...! متأكد إنها حابسة نفسها في الغرفة...! -طيب بس هوا نايم...! -صحصحيه...! اتنهدت:طيب بحاول...! بعد عشرة دقائق جاتني لين عند المغاسل،بالتالي لا الرجال كانو يقدروا يشوفوها و لا الحريم...! أخذت سعود منها..سلمت عليه..كان شكلو يجنن الله يحفظو..نوااااام الولد..قالت جود:عمو حرام يبغى ينام...! -ما عليكي..لو مرة ما صحصـ قطعت كلامي و أنا أتنبه لسعود إلي مبحلق فيا،قلت:حبيب عمو إنتا..شوفي..صحصح...! رفعت جود نفسها:"حبييييبيييي"،و مسحت على راسو،بعدها شالتو مني و هيا تقول:"هاتو عمو..."،بلبلت ايدها بموية بعدها مسحت على وجهو،رتبت شعرو،و أخيراً أعطتني هوا و طلعت من جيبها علبة صغيرة،قلت:ايش دا؟؟؟ -عطر أطفال...! عطرت سعود،باستو،و قالت:انتبه لو...! ابتسمت:ولو..ولدي زي ما هوا ولدك...! ابتسمت جود و راحت...! رجعت المجلس،أول ما دخلت حسيت بالعين عليا أو خليني أقول على سعود الصغير..جلست في مكاني..أحمد كان جالس جمبي،مال عليا و قال بابتسامة واسعة:سَعُّودي..كيف حالك؟! و شالو مني،قلت:هييي..هاتو...! قال أحمد بمبالغة:الله..أنا ما أشوفو إلا في السنة حسنة...! -طالع...!،أصلاً ما مر عليه سنة من يوم ما انولد...! اتأفف أحمد و أنا أشيل منو سعود،قال:يا أناني...! هنا اتكلم علي:هيييي..لا تتضاربو على ولدي..أصلاً ليه جبتوه؟! قلت و أنا أحتضن سعود:وحشني...! اتثاءب سعود،قلت و أنا أغطي فمو:أعوذ بالله من الشيطان الرجيم...! قال أخوية سعد (يسير عم جود يعني):هاته شوية...! أحمد كان أقرب لسعد،بالتالي أعطيتو لأحمد و أحمد وصلو لسعد..زوجين من الأعين كانت تراقب إلي يسير..علي و سعيد...! سعود الصغير كان يحرك ايدو بعشوائية..لاحظت عليه إنو أول ما يصحى من النوم يكون فايق و يلعب..سعد كان يسمي عليه قبل ما يقول:يا ولد..سيب لحيتي...! مسك سعود لحية سعد و قعد يلعب بها..أغلب إلي في المجلس ضحكو..هنا علي قام و شال ولدو..سعد كان يرتب لحيتو إلي خربها سعود الصغير،علي كان حيجلس لولا سعيد إلي قال:جيبه هنا...! طالع علي في سعيد لثواني قبل ما يروح لو..و لشدة دهشتي حط سعود في حضن سعيد..سعيد انصدم،التفت لسعد،ابتسم ليا..رجعت أطالع في سعيد إلي كان يتأمل سعود بهدوووووء و علي _الخالي وجهو من أي تعبير_ كان متكتف فوق راسو و عينو على ولدو..دقني أحمد و همس:تلاقي عواطفه اتحركت...! نظرة سعيد كانت غريبة،بعد مدة لا بأس بها من التأمل مد سعود لعلي،علي شالو و رجع جلس مكانو...! أما عبدالرحمن فبطبيعتو المسترخية كان مبتسم بس عبدالإله كان ما يطالع رغم إني حسيت بفضولو لمن لمحتو يسترق النظر...! لكن المهم سعيد..نظرتو كانت غريبة..هل فعلا اتحركت عواطفو زي ما يقول أحمد...؟!،أحمد من قبل قلي إنو سعود الصغير حيسوي تغيير و وجودو حيأثر..يا ليت لو يكون كلام أحمد صح..يا ليت...! ************************************************** ************** جود تعود للروي،،، و في السيارة كنا راجعين للبيت،قال علي:نايم...؟! طالعت في سعود:ايوة... -كيف؟! قلت باستغراب:نايم..مغمض عيونو...! -يا هبلة أقصد الـ...يعني فوق كيف أهلي و كذة؟! -آها..لا عادي انبسطوا الحمدلله...! -و إنتي...؟! -آز أولويز حبست نفسي في الغرفة بس المرة دي مع صفاء...! -ليييييييييييييه؟! -مطنشيني طول الوقت..بعدين كنت أبا أنوم سعود...! لأنهم بعد مدة رجعوه ليا...! اتنهد علي و قال:لازم تدخلي نفسك فيهم..بعدين إنتي دحين خلاص متزوجة..يعني ما تسببي لهم خطر...! قلت بعجب محاولة تغيير الموضوع:قلت دحين مو ذحين...! استجاب علي لتغييري الموضوع:أوه من جد...؟! -والله...! أغبى شي لمن اتنين كل واحد عارف في ايش يفكر التاني لكن يتظاهروا إنهم ما يعرفوا و الاتنين يستجيبوا لهذا التظاهر...! ************************************* كنت جالسة و فوقي سعود و علي ماسك كاميرتي و يصور سعود فيديو..السبب إنو سعود كان يبربر (يعني يطلع أصوات)،كان مبوز و يبربر كأنو يعترض على شي و احنا فاطسين ضحك،دنقت:سعدي حبيبي ليه زعلان...؟! سعود كان يحرك ايدو و رجلو و لمن قرب علي مننا و حط الكاميرا قدام سعود مباشرة ضربها سعود،ضحك علي:خلاص حقفل بس سوي باي للكاميرا...! مسكت يد سعود و سويت بها باي و أنا أقول:بي باي كام..بي باااااي...! و هنا سعود شكلو وصل حدُّو؛لإنو بكي بزعل،حضنتو:ليه حبيب ماما..ليييييييه...؟! كان علي حيوقف تصوير لكني قلت:لا علي كمل كمل...! سعود كان يبكي و أنا أحاول أهديه..ما رضي لا بالرضاعة و لا بصدري و لا بالدغدغة و لا بأي شي،قلت يمكن يحتاج تغيير و متضايق لكن ما كان فيه شي،حضنتو أكتر:حبيبي..ليه زعلان..قولي ايش تبغى...؟! طالع سعود في علي _إلي ماسك الكاميرا_ و بعدها طالع فيا و قعد يتشكوى،قلت:علي..جيب الكاميرا الهبلة قليلة الأدب هنا...! جا علي و جلس جمبي و مد الكاميرا لسعود،ضربها سعود و رجع يبربر،قلت:كأنو يسبها..بس ليش زعلان منها...؟! طالع علي فيا بنظرة:لا يا شيخة...؟!،قال ليش زعلان منها قال..لاااا و ماخذة الموضوع بجدية...! -والله من جد ليش زعلان منها...؟! قفل علي الكاميرا و حطها على جمب و قال و هوا يشيل سعود مني:ولد علي..لازم تكون عليه طلعات و هفات زي أبوه...! انحنيت أنا على سعود إلي فوق علي:واللهِ تفسير منطقي.."رفعت نظري لعلي"..تصدق أبوه عليه حركات بلللللللللللهة..و كما يقول المثل:من شابه أباه فما ظلم...! علي قعد يطالع فيا،ابتسمت لو بهبل:هيهيهيييييييييه...! -لو مو سعود في يدِّي كان وريتك...! وقفت و ابتعدت عنهم و قلت و أنا أأشر على فرشة سعود على الأرض:كداااااااب..لو من جد تبغى توريني كان ببساطة حطيت سعود و قمت وريتني...! وقف علي و قال و هوا يحط سعود على الأرض:ساعات أدور أعذار عشان ما أقوم عليكي بس ايش أسوي لمن إنتي مصرة تخليني أوريك شغلك...؟! و اتقدم..قلت:هيييييي..أنا وحدة مشغولة و مني فاضيتلك و بعدين تارك الولد على الأرض ليه..لو مو قد مسؤولية إنك تنتبه لو ليش تشيلو مني...؟! و شردت و جلست عالأرض و حطيت سعود فوقي:لو سمحت علي بنوم الولد...! وقف علي فوق راسي:و أنا بستنى لين ما تنومي الولد..تعرفي أنا أهم شي عندي ما أعطلك...! قال علي الكلام إلي قالو قبل شوية بعزيمة و إصرار..يوووووووووه علي لمن يحط في راسو شي يعند و ما يهجد إلا لمن يسويه...؟! قلت:هييي إنتا ليه ما تسير حبوب و تتيسر تنام و أنا ألحقك بعد ما أنوم سعود...؟! طالع فيا ببرود،صرخت بقهر:ليه يهناك تطفشني و "توريني شغلي"...؟! جلس على الكنبة و حط رجل على رجل:لإني أحبك و الواحد لمن يحب وحدة يهناه _على قولك_ يطفشها و أنا مو بس يهناني إلا أحس بنقص لو مر يوم و ما ضايقتك فيه...! مديت لساني لعلي و رجعت أعطيه ظهري،دقني برجلو دقة خفيفة:تعرفي رح أمسك لسانك الطويل دا و أقطعو...! التفت بحماس لعلي:قلت دا...! حك راسو:مو مني منك إنتي و كلامك الماصخ...! قلت:قلتلي نفس الجملة في صباحيتنا...! انحنى لجهتي و هوا جالس و ابتسم:جننتيني في صباحيتنا...! -حرام عليك..والله كنت ساكتة و ما سويت فيك شي...! -أول شي ما صحيتي بعدي إلا بمدري كم و لمن صحيتي قفلتي الباب و لمن اتكرمتي و خرجتي قعدتي سااااااااااكتة و لمن اتكلمتي قعدتي تعطيني محاضرات..عيب و كيف تقول كده قدامي و إنتا ما تستحي على وشك و مادري ايش هوا و طلعتي لي قرون..حسيت دمي يغلي...! -يا سلام..إنتا غلطت..أنا ما أحب دي الألفاظ القذرة و بعدين لا تنسى إنو حضرتك كنت عريس يعني المفروض توريني أحسن ما عندك مو تسب قدامي...! أسند ظهرو على الكنبة و اتكتف:لكنك لمن بطلت أسب و حاولت أبطل أقول الألفاظ إلي ما تعجبك ما مدحتي..فالحة بس تعترضين...! انحرجت أنا هنا و قلت أكابر:ما..ما..طب يعني المفروض إنو..إنو الواحد لمن ما يسب ما تكون ميزة..و... قاطعني علي لمن وقف و انحنى عليا و باسني و باس سعود و قال بهدوء:نومي سعود و تعالي..أستناكي...! و راح،طالعت في وجه سعود:في رأيك لازم أتعود أقول كلام حلو...؟! سعود كان يطالع فيا ببراءة،ابتسمت،حضنتو و قلت بحب:عشانك و عشاني ححاول أغير من نفسي...! كنت حقول:"و عشان خاطر علي"،لكني سمعت صوت خطوات،رفعت راسي و كان ظل يختفي تدريجياً عند باب الصالة...! ابتسمت..علاقتنا غريبة و الظروف إلي جمعتنا أغرب...! علي يحبني و ما زال يحبني و متمسك فيا رغم علمو بإني ما أحبو..أنا واجبي كزوجة و أم جديدة يخليني أصبر..أعتقد عشان كده مستمرين بهدوء و سلام..طبعاً بغض النظر عن المشاكل اليومية الزوجية السخيفة إلي مي سبب مقنع لإنهاء علاقة عقلاء...! ************************************* |
سأضع الآن الجزء الرابع عشر لكنه _حقيقةً_ ليس الرابع عشر بل هو الأول...! سأبدأ بوضع الفصل الثاني من "بلا منطق"..و لا أنكر بأنني ترددت و فكرت بأنه كان يجب أن أقسم من البداية القصة إلى فصول..مثلاً فصل لما قبل زواج جود ثم فصل لما بعده ثم فصل لولادة سعود ثم فصل لـ...إلخ...!،لكن لحظة..القصة عن جود و عن أبيها لذا...! لن أطيل و سأترك لـ"جود" بعض النقاط لتوضحها لكم...! الفصل الثاني ، الجزء الأول (لقد..كبرنا) أهلاً و مرحباً بكم في الفصل التاني من حياتي،فكرة تقسيم حياتي لفصلين ما جاتني إلا قريب و سببها هوا التغير الجذري إلي سار في حياتي،أفكاري،شخصيتي و كل شي...! في السنتين إلي مرت كبر سعود،كبرت أنا،كبر علي،فكرت ما أنط كم سنة لكن حسيت إنو مالو داعي أطول عليكم و إنتو كنتو حتملو خاصة مع الروتين القاتل،صح نخرج و نروح و نجي و نزعل و نضحك لكن مافي تغيير كبير،التغيير الصح سار بهدوء و حبة حبة و ما ظهر أثرو إلا دحين..و أنا فكرت فيها كمان من ناحية إني قاعدة أحكي لكم قصة حياتي و الإنسان ما يحكِّي قصة حياتو إلا لو كان فيها شي مهم أو مفيد و ممكن الناس تستفيد منو و لمن يسيرو الشرطين دولا يحكي بس ما يطول عليهم..يعطيهم الخلاصة و يمشي...! و شي أكيد سنتين مو قليل عشان أنطها ببساطة كده لكن من جد ما كان فيه أي حدث مهم بالنسبة لشخصيات القصة بس أنا اتغيرت و علي تغير..للأحسن طبعاً..كل واحد فينا أخد من طباع التاني..أنا سرت اجتماعية و علي سار أعقل بكتير..سار يقرأ لكنو ما يعرف إني أعرف دا الشي و يحاول قد ما يقدر ما يبين تغيرو..يحاول يرجع لعلي زمان لكن معد يقدر..أكتر شي يضحكني هوا إني لمن أدخل عليه الغرفة و يكون ماسك كتاب من كتبي يرميه و يقول:"القراءة تقصر العمر"،أما عن سعود إلي سار عمرو سنتين فمافي أحلى منو..شخصيتو غريبة..هوا هادي و ما يسوي رجة و جلبة رغم كده يسوي كل إلي في راسو،و كل يوم يطلع لي بمنكر جديد..و يتكلم ما يستحي لو أحد ضايقو أو قل أدبو عليه،أما عن جدة فحابة سعود بشكل،لمن أروح لها من غيرو تقول:"عوِّدي بيتك"، بس عمو..و آآه يا عمو..حالتو زي ما هيا..عارفين يفكرني بمين..يفكرني بالعقاد الله يرحمو..كان عاقل و عبقري و ما اتزوج..بصراحة بدأت أفهم ليش جدة قلبها يعورها على عمو؛لأني دحين ما أقدر أتخيل حياتي من غير علي..صعب مرة...ساعات يكون في الشغل و أنا في الجامعة أحس إني مشتاقة لو بالمرة و إني أحتاجو..ساعات محد يفهمني غيرو .. و على فكرة تراني أستلطفهُ و أتقبل أي شي منو و...وي لا يكون حبيتو...؟!،شكلي حبيتو..ههه تخيلوا أحب علي..واااااه مرة لأ...! ************************************************** اليوم الربوع يعني لازم نروح لبيت أهل علي بما إننا كل ربوع عند أهلو و كل خميس عند أهلي..المهم صليت العصر و رحت أدور على سعود..مالو حس..أصلاً دايماً مالو حس...! رحت لغرفتو..ما كان موجود..غريبة..بالعادة ما يطلع منها..فين راح؟!،..ناديت بقلق:"سعود..سعووووود"،أعوذ بالله من الشيطان الرجيم..وينو..؟!..دورت و دورت..في النهاية رجعت لغرفتو،و لمن دخلتها و لفيت فيها لقيتو عند السرير من الجهة التانية و حالتو غريبة،مفسخ البنطلون و ماسك لون فلوماستر أسود و يرسم خطوط على رجلو و منغمس لدرجة ما حس فيا،قلت بصدمة:سعود...! فز سعود و طالع فيا بتوتر و هوا يقول:وا سي...(ولا شي) نزلت لمستواه و مسكت رجلو و قلت:ولا شي يعني شي..ايش هدا؟! -بابا لَزولو...(بابا رجولو) -ايشبها؟ -أثودة...(أسودة) شلت سعود و أنا أقول:حبيبي بابا رجال كبير..إنتا لمن تكبر تسير زيو...! سعود كان مبررطم و زعلان..أنا يبغالي أهزأ علي عشان ما يلبس قصير مرة تانية،قلت:يلا حبيبي أروشك قبل ما يجي بابا...! بيني و بينكم نفسي أصور رجل سعود؛منظرها كان يفطس ضحك لكنو بكده ما حيحس بالغلط و حيعيدو...! عاد دحين الله يعيني أدعك و أغسل و يا ماما عيني و يا ماما فمي دخل فيه الصابون و موال يبدأ من أول خطوة تخطوها رجلنا في الحمام لين آخر خطوة...! دق جرس البيت و أنا ما حوقف تلبيس سعود عشان خاطر علي ما يبغى يفتح الباب بالمفتاح..و بالفعل فتح علي الباب و جاني معصب:يعني كم مرة أقول أول ما تسمعين الجرس افتحي الباب...؟! -ليش ما تستخدم مفتاحك؟! -و ليش أستخدمه و فيه أحد في البيت؟! -و ليش أوقف شغلي عشان حضرتك ما فيك تطلع المفتاح من جيبك و تفتح الباب؟! -الله و الشغل عاد... كنت حأرد لولا سعود إلي قال بهدوء و برود:ماما..بابا..خلاس..نَلوحَ عندَا ناث...!..(نروح عند ناس) التفتنا أنا و علي،قال علي:أية ناس؟! رفع سعود أكتافو:مدلي..(مدري) قلت:لا يا شيخ..أنا بروح ألبس و إنتا قول لبابا ليش لونت رجولك...! و بينما كنت ألبس سمعت علي"أنا ما قلت لك تكبر و تسير أسودة..إنتا صغير ذحين...!" ابتسمت و أنا أمشط شعري،حلو يكون عندك طفل رغم إنها مسؤولية كبيرة من ناحية الدين و الأخلاق و كيف إني لازم أغرس فيه الإسلام...! أكتر شي يثيرني في سعود هوا الكلام..كل مالو يتحسن و الحمدلله و السبب إننا أنا و علي ما نكلمو بنفس الطريقة عكس الكل..الصراحة أنقهر..يعني كده حيصعب عليه يتحسن..صح أنا و علي نحب لدغات سعود لكن ما نظهر دا الشي قدامو،لكن بيني و بينو في الغرفة نتكلم بنفس الطريقة..سعود..اتجه تفكيري لأثر وجودو في حياتي..سعود هوا أعمق و أحلى نقطة نلتقي فيها أنا و علي..و هوا إلي يصبر كل واحد فينا على سلبيات التاني...! في بيت أهل علي كنا أنا و هوا طالعين في الدرج عشان نسلم على عمي أبو علي المشغول في مكتبو،في نهاية الدرج استغربت وقوف ولد عمرو ما بين الـ12 و الـ14 يكلم لينا،التفت لنا و ركز عينو عليا و هوا يقول بدهشة:والله و طحت واقف يا علي...! علي بشدة:ولد...! قلت باستنكار:مين إنتا؟! قلد الولد طريقة كلامي و هوا يقول:"مين أنا...؟!"،تابع:واااااااي عالرقة..عندك أخت؟! ما كانت ثواني إلا و بعلي ضاربو على راسو ضربة محترمة،شهقت و قلت و أنا أفرك راس الولد:علي كيف تضربو كده؟!،اتعورت حبيبي؟! اتنهد الولد و قال بحالمية:ايدك ناعمة...! هنا حسيت بالقرف و بإنو الولد دا مو بريء أبداً،قطبت حواجبي و ابتعدت متوجهة لمكتب عمي و أنا أسمع علي يهزئ الولد تهزيئة تلصق الجبهة بالأرض...! رسمت أحلى ابتسامة و أنا أدخل على عمي إلي ما أشوفو كتير..عمي إنسان مثقف له هيبة،النقيض لعلي،أتمنى أتقرب منو في يوم..بعد ما سلم عليا سأل:ليش صوت علي طالع؟! -مادري..شكلو اتضارب مع الولد إلي برا..إلا مين داك الولد؟! -هذا أخوي...! -ها...؟! اتداركت نفسي و أنا أقول:عمو ممكن أتفرج عالكتب؟! -اتفضلي... و رجع لأوراقو أما أنا فأخذت لفة عالمكتبة و حسيت بالإحباط،قلت:عمو إنتا قرأت كل دي الكتب؟! طالعني بنظرة متفحصة:نعم...! -ما شااااااااااااء الله..و أنا كنت أحسب نفسي مثقفة،طلعت ولا شي قدامك...! ابتسم:يا بنتي إنتي باقي صغيرة،مو عشان متزوجة و عندك ولد خلاص...! شهقت و أنا أطالع في واحد من الكتب:عقودتي حبيبتي..من زمان أدور على دا الكتاب..أبغاه عمو أبغاااااااااه....! ترك عمي أوراقو و فسخ نظارتو و قال:يبغالي أقعدلك قعدة..وش قلتي قبل شوي؟! حسيت بإحراج و أنا أقول:عقودتي... رفع حاجبو:حبيبتي...؟! طلعت لساني بحرج،قال:أي كتاب...؟! -إلي اسمو (أنا)..زمان قرأت منو مقاطع و كان مقطع فتركتو..كنت صغيرة..دحين أدور عليه..ما لقيتو..لا في بيتنا و لا في المكاتب..مادري ليه...! -غريب..رغم أنه كتاب مشهور له..هو أول كتاب قرأتهُ للعقاد...! -أووه طب أبغاه...! -أنا أسمحُ للناس بأن تستعير الكتب مني لكن ليس قبل أن أريهم شيئاً...! يووووه يخلط عربي فصحى كتير...! راح لمكتبو،فتح الدرج و طلع كتاب ممزق و حالتو حالة،قلت:وي ايش دا؟! قرب مني الكتاب و قال و أنا أتصفحو:هذا علي و هو طفل أبدع فيه..إلي حصل إني ضربته ضرب إلى يومك هذا ما ينساه،سويت فيه إلي سويته و هو ولدي..أجل كيف إنتي؟! طالعت فيه بصدمة،فقال:أنا ما أهددك لكن خدش واحد عالكتاب يفقدني صوابي...! حسيت بالغيض..الموضوع و ما فيه إنو دا الكتاب مو عندي و من زمان أدور عليه..مااااااالت،قلت:آها..عموماً أنا لن آخذه فسعود و علي و الجامعة يملؤون وقتي...لهذا لا أملك الوقت الكافي لقراءة كتاب...! طالع فيا لثواني،بعدها قال:حقاً...؟!،على كلٍ عليك أن تعتادي علي فأنا من ناحية الكتب فظ..بشكلٍ آخر أقدسها...! -أووووه..أنا أيضاً أقدسها..لكن ألم تفكر بأنني أستطيع شراء هذا الكتاب بنفسي و مكتبتك هذه تخدمني بلفت نظري إلى ما لا أملك من كتب..غير هذا و ذاك أنا حينما أقرأ كتاباً أحب أن أتملكه فأكتب عيه اسمي و أسجل تاريخ شراءه و أوقع عليه و لن أستطيع بالتأكيد فعل هذا في كتب غيري...! ضحك عمي،طالع في ساعتو:طب يلا ننزل عشان نتعشى...! -مابغا... ضحك مرة تانية:لا تزعلين..لغتك حلوة بأعطيك الكتاب بس تعالي نتعشى...! اتكتفت و اتجهت للباب:مااااابا... قال و هوا يتبعني لتحت:أبغاك بعدين تشرحين لي شغلة الاسم و التوقيع لأني ما فهمتها...! قلت بسخرية:أولا يفقدك الخدش الواحد صوابك؟! -قلت خدش لا حرف...! -أعتقد بأننا نخدش الكتاب إذا ما كتبنا عليه...! -تعتقدين أما أنا فلا...! مشيت متجهة للصالة عند الناس المتجمعة هناك..لكن من جد حركتو تقهر..ولا يوريني الكتاب و يهددني فيه..مااااااااااااالت...! ************************************* اليوم الخميس..أول ما وصلنا بيتنا... فتح عمو الباب بابتسامة،فتح يدينو لسعود:حبيبي وحشتني... سلم عليه سعود بهدوء،بعدها و لدهشتنا راح يجري لجدة و نط عليها و جلس في حضنها:زدة زدة...(جدة جدة)...! علي:بشويييييش لا تعور جدتك...! جدة:خليه عساني فداه...! قلت بعد ما سلمنا و جلسنا:يا حسرة..ما قد اتفديتيني..ايش معنى سعود؟! جدة بغضب:الله و أكبر عليكي... قاطعتها:على ابليسي... كملت:فيه وحدة تحسد ولدها؟؟؟!!! علي:اتخيلي يا جدة..تقولي "تابع بصوت نسائي" إنتا من يوم جا سعود مطنشني...! شهقت:والله ما أقول كده..ماااااالت..بعدين أنا أطنش ما أتطنش...! قال سعود إلي في حضن جدة:عمو سَعود أبـ... قاطعتو بحماس:قال سعود...! نطيت عند سعود و قلت:حبيبي قول سييين... -ثييين... -سييييييييييييييين... -ثييييييييييييييييين... -إنا لله... و قمت بطفش،قال عمو:ها حبيبي ايش تبغى...؟! -مدلي نسيت...! كنت حأصرخ بحماس لكن عمو وقفني:لو نطقها غلط صححي له..لو نطق صح لا تظهري أي تأثر...! -أوكييييييييييييييه...! **************************************** صحيت من رن جوال علي المتكرر،رفعت راسي بكسل و دققت النظر في الساعة و بسبب الظلام ما قدرت أحدد الوقت بالضبط لكن تقريباً حوالي التلاتة:"اللهم اجعلو خير"،دقيت علي:علي..علي قوم جوالك يدق... أفففف ليش ما قفلو..؟!،وقف رنين الجوال لكن رجع يدق،ازداد قلقي،"مين ممكن يدق في دا الوقت؟!"،شديت على علي إلي قام بطفش:هاااااااه... -جوالك له ساعة يدق...! -بسم الله..!،مين؟! -مادري... فتح علي الأبجورة و رفع الجوال لوجهو،رد بعدها بسرعة و القلق باين في صوتو:سعد..ايش فيك؟؟؟ قال علي باستغراب:"ها...؟!"،تابع بعدها بصدمة و غضب:نعم...! قام بعد كده و خرج من الغرفة،أنا طار النوم من عيني من الفجعة،فقمت و وقفت ورا باب غرفتنا،كان علي واقف آخر السيب،و كان باين في صوتو القهر و هوا يقول:تعرف يا سعد إني إنسان متزوج...! -حتى لو صاحبك و حبيبك ما تتصل علي آخر الليل..أقلقتني...! -سعد ما أمزح...! -وش إلي آخر الصحبة؟!،يا سعد أقلقتني أنا و أهلي..الساعة ثلاث الليل..تعرف ايش يعني ثلاث الليل؟! سكت علي لثواني بعدها قال بهدوء:إنتا شخص قليل أدب...! و قفل الجوال..و لمن دخل الغرفة قدرت أشوف تعابير وجهو المستاءة،قلت:خير علي..ايش ساير...؟! رمى الجوال عالسرير:ولا شي... و راح انسدح معطيني ظهرو،جلست على السرير و اتكيت بدقني عليه:حبيبي ايشبك؟! وصلتني تنهيدة،قلت:صاحبك فيه شي؟! -يا ليت..والله أهون عليا...! -أوف..للدرقادي...! جلس علي و اعتدلت أنا بجلستي و ابتسمت بهدوء،قال علي بعدما اتنهد:أصحابي غريبين..يعاملوني كأني واحد أعزب..هذا متصل علَي يقول طفشان أبي أسولف..خوفني..و لمن حاولت أفهمه و قلت له أقلقتني أنا و الأهل قال خربت عليك الجو...؟!،و ضحك...! حطيت ايدي على فخدو و قلت:هدا إنسان سخيف و مو غلط لو قطعت علاقتك بشخص لو حسيت إنو تافه...! -المشكلة يا جود كلهم كذا..ذحين بس عرفت ليش فيصل تركنا بعد ما اتزوج،أنا كنت زيهم...! حط يدو على راسو:كنت إنسان تافه..أنا تعبت منهم..هم ما يحترمون تغيري..ما يحترموني...! قلت و أنا أمسح على راس علي:إنتا اتغيرت و هدا شي طيب..أما عن الشباب دولا فاسحب عليهم زي ما تقولوا..ما دام هما تافهين و سخيفين لدي الدرجة...! -لكن يا جود ما عندي غيرهم...! قلت بدلع:أنا ما أكفي...؟! ابتسم بحزن:إنتي زوجتي و حبيبتي..أنا أبغا صاحب..صاحب ما يربطني فيه دم..علاقتي به مبنية عالود و الاحترام..مو دشرة و صياعة...! قلت بمزاح:أوووووه..أنا ما يربطني فيك دم بس..أنا يربطني فيك بلااااااااوي...! -بلاوي...؟! قلت و أنا أوسع عيني:حيوانات منوية مثلاً...! قال بتفكير:أذكر درسنا عن ذي الحيوانات..كان درس ممتع..ما ذاكرته و عرفت أحل أسألته...! -يا منحرفففف...! -أنا زوووووجك...! الحمدلله بشوية مزاح و ضحك و مداعبة اتخطينا مشكلة أصحابو لكني عارفة إنو علي ما رح يترك الوضع مسالم معاهم..لمن يروق و يهدى حأكلمو بجدية في الموضوع...! *********************************************** كنت قاعدة أتفرج عالسعودية الأولى..الصراحة قناة هبلااااا لكن الحلو فيها إنها تنقل الصلوات من الحرم..إلي يخليني أقابلها هوا رمضان،اليوم 29 شعبان فرمضان ممكن يكون بكرة...! و من يوم ما جا داك المذيع حق رمضان و العيد و سمعتو يقول نهنئ قلبت و بدأت أشوف كل دولة متى حتصوم و هاتك يا برامج و نقاشات..والله حالة..دحين ربنا يبغا يجمعنا في شي يقوموا دول يفرقونا..والله مخبل..من جد..أحس خلاص ما دام أم القرى صامت العالم كلها تصوم و متى ما فطرت فطرنا،ليش لازم نتخاصم..؟!،الله يعين زوجات الفلكيين و الناس دولا إلي قاعدين يتخاصمو...! فجأة اتذكرت شي،نطيت من على الكنبة،طالعت في الساعة..بقي وقت..علي راح لصلاة المغرب و أخد معاه سعود عشان يعودوا عالصلاة و كمان عشان إمام المسجد إلي جمبنا مسوي محاضرة للأطفال إلي مرة صغار عن الرسول _عليه و على آله الصلاة و السلام_ و عن أخلاقو و سيرتو...! رحت و شبكت النت..أووووه دانة مو أون لاين..مو مشكلة،أكلمها و لما تدخل تشوف،كتبت:هاي دانة..كيفك؟! و بدأت أكتب رسالتي و لمن كنت أكتبها سمعت صوت،رفعت راسي،لقيت:هااايااااااااااااااااااات...! -أوه إنتي أون لاين...! -نعم نعم أنا أون لاين...! -هههه...كل عام و إنتي بخير...! -و إنتي من أهله..بس أنا فاطرة باجر..اهئ اهئ...! -يا شيخة..أول رمضان ولا آخرو..أقلها تلحقي العشرة الأواخر...! -بلاااااااااج ما دريتي...هاي دورة شعبان و رمضان ياية في الطريق...كم بقضي أنا...؟! -إيييييييه..الله يعينك...! -دورتي الخبلة مرة أول الشهر و مرة آخره...! -هدا لأنو أكلك مو منظم..يعني صح أنا تجيني مو نفس اليوم لكن عالأقل أعرفها في العشرينيات..أخت زوجي ما شاء الله في نفس اليوم تجيها أو قبل أو بعد بيوم بس...! -أوف..الله يعين..اللحين غيري السالفة..والله لو هكر يتجسس علينا بيروح فيها...! مداخلة:واحد من أحلام دانة:عشقها الهكرز..تموت فيهم..لكن ما عندها ولا هرجة في التهكير...!>>>زي حالتي يعني...! -ههههه..إنتي و الهكرز حقونك في زحمة..إلا ما قلتلك...! -خير...؟! -سعود اليوم وداه أبوه لمحاضرة للأطفال عن الرسول _عليه و على آله الصلاة و السلام_...! -مو جنه (كنه) صغير عالمحاضرات...؟! -فكرت كده في البداية بس علي اتأكد إنو ما فيها قصص التعذيب و كده..و إنها خصيصاً للصغار تحت السابعة..يعني يوعوهم بس إنو فيه شي اسمو محمد _عليه و على آله الصلاة و السلام_ و إنو هوا رسولنا و لازم نحبو و كده يعني...! -يلا إن شاء الله يستفيد...! سكتنا لحوالي دقيقة بعدها قالت دانة:أووووه تذكرت...! -ايش؟! -انخطبت...! -من جد..ميييييييييين؟! -ولد عمي...! -طيب كيف؟! -رفظته...! حزنت و كتبت بزعل:لييييييش؟! -أولاً سخيف و رجعي جداً،ثانياً يقول:أبيها بيظا...! -وجعععععع...المتخلفين دولا في كل مكان...! -شي يبط..لا و بعد كم يوم قال:بس عشانها بنت عمي بستر عليها..خل نعقد...! كتبت بقهر:خليه يولي..مين مفكر نفسو؟! والله من جد شي يقهر..الشباب دي الأيام أغبياء..دانة حلوة ما شاء الله..يعني هيا فتاة جميلة..عشانها سمرا..أصلاً سمارها لحالو يجنن ما شاء الله..برونزي..مو العالم تتشمس عشان دا اللون و هما ما يبغوه...! كتبت:و إنتي أهم شي مو زعلانة؟! -نعممممم..زعلانة طل..ما بقى إلا هو أزعل عليه...! -من جد ما يستاهل حتى تفكري فيه>>>حاااااقدة>>>قاطة معاكم...! -هههه..قطي قطي براحتج...! -هيهي..أوكي يلا باي عشان بروح أجهز للعشا...! -عشا في المغرب...! -قلت قصدي كتبت أجهز،يعني أقطع خضار السلطة و أبشر و أقطع للكشنة،و علي يقول نفسو في حلى و أغسل الدجاجة مدري اللحمة مادري ايش حسوي و...سلامتك...! -الله...!،أشوه ما عرست...! -هههه..إنتي و وجهك..يلا باي...! -باي..اشتغلي زين و ظبطي الطبخة...! -طااالع من يتكلم..تلايطي بس...! -أتخيلج تقولين تلايطي...! -ارحميييييينييييي...يلا بااااااااااااااي...! -سلام...! و قفلت النت...! ولمن وصل علي للبيت مع سعود فتحت يديني لسعود مرحبة،شلتو و قلت و أنا أحضنو:كيف المحاضرة؟! علي:صدع لي راسي فيها..أنا داخل أنام صحيني للعِشا...! نزلت سعود و قلت بدلع خفيف:مافي كل عام و إنتي بخير...؟! أكيد وصلو خبر من أي مكان...! قال:فيه فيه بس حالياً مالي مزاج،بعدين إن شاء الله أهنيك صح...! ضحكت:ادخل ارتاح حبيبي و بعدين أنا حأصحيك للعِشا و العَشا...! و دخل علي من هنا و رحت أنا أكمل شغلي في المطبخ و على طاولة المطبخ جلس سعود يتكلم بحماس عن المحاضرة و يعيد و يزيد في الكلام _الغير واضح_ و يا جود سوي نفسك ما تعرفي و تتفاجئي...! المشكلة لمن يحكي زي كده:قال الشيخ.......،و بعد ما قال الشيخ:"يعيد نفس الكلام"،قال:..........! و على دي الحال و أسوء..لكن ايش أسوي لازم أشجعو...! ************************************************** * رمضان السنة دي غير،أحلى رمضان مر عليا من يوم ما اتزوجت علي...ببساطة علي غير،أعقل،متفهم،أول رمضان لنا مع بعض ما قدرت أتعبد زي الناس..كان يجي آخر الليل و يا جود اسهري معايا..كنت أحاول أفهمو إنو أبغا أصلي،أقرأ قرآن لكن لا حياة لمن تنادي،كان يقولي بكل وقاحة:"ما عندي وقت إلا الليل"..لكن و كما أسلفت من بعد ما جا سعود اتحسن الوضع..كل رمضان يكون أحسن من إلي قبلو بس رمضان دي السنة غير،يا حليلو علي..شكلي حبيتو أنا و وجهي..هدا الطبيعي و الدليل إني أشتاق لو و أفتقدو أحياناً و أقلق عليه لكن ماني حاسة بالحب..يعني ما أحس تجاه علي نفس الإحساس إلي أحسو تجاه عمو و سعود..تعرفوا..أحس علي عندي زي جدة..أحبها لكن مو زي عمو..أعرف مافي مجال للمقارنة فجدة ماما و عمو بابا و سعود ولدي و علي زوجي لكن في شي غريب ماني قادرة أفهمو...! "جووووووووودييييييييييييي...!" رفعت راسي:"ها...؟!"،كان علي،عدلت جلستي عالكنبة الموجودة في غرفتنا و أنا أقول:متى جيت؟! -دوبي... جلس جمبي:في مين كنتي تفكري يا خاينة...؟! ابتسمت:في ولد الجيران...! -نعم...؟! عصب علي فقلت:بالله يعني..أولاد الجيران أكبرهم متوسط...! -خفت يكون عندك حالة مراهقة متأخرة...! -لا يا شيخ...المهم..ايش سويت اليوم؟! -صحيت في الصباح و رحت الشغل،لا لا أول وصلتك إنتي و سعود الجامعة بعدين رحت الشغل،بعدين رجعت و قبل شوية صحيت للعصر و... قاطعتو:قصدي شي مثير أو موقف غبي أو أي شي غير...! -آها..ايه يا طويلة العمر..اليووووووم صار لي موقف حلووووو مع موظفة حلللللللللللوة في الشركة... هنا عرفت إنو يبغا يثير غيرتي..كنت أستمع لموقفو الحلووووو و أنا أهز راسي،بعد ماخلص قلت:خلصت...؟! ابتسم:ايوة...! -اللهم إني صائمة..أشوف السمبوسة أبرك لي....! و قمت،مسك ايدي:تعالي تعالي زعلتي...؟! قلت بعدم اهتمام:لأ..بعدين أنا قلت اللهم إني صائمة..يعني الذنب عليك..أحسن...! -جوجو..حرام عليكي أنا زوجك...! -والله لو فاضيتلك كان بكيت و استغليت الوضع لكن ورايا سمبوسة بتنحرق...! أفففف...الرجال الأغبيا..ايش يفكروا نفسهم؟!،الواحد فيهم محسب زوجتو ميتة عليه...! أووووه ايشبي أنا غرت؟!...هههه...والله إني حرمة...! ********************************************** أووووووه رمضان مر بسرعة أحس لسه أمس أول ليلة...! العشرة الأواخر...هادي الأيام تثيرني بشكل..أحس فيها براحة غريبة..بس دي المرة غير..حأسوي شي غير..حأسجل كل شي طلبتو من ربي و كل شي حأطلبو عشان لمن يتحقق أتزكر إني دعيت ربي و استجاب ليا،مرة واحد من الدعاة قال بأنو من أساليب الشيطان إنو لمن يسير إلي تبغاه ينسيك إنك دعيت فما تتذكر إنو هادا لطف من ربنا و رحمة منو و يقل حماسك للدعاء إلي قال عنو الرسول عليه و على آله الصلاة و السلام إنو هوا العبادة...! صحيت من سرحاني و أفكاري على صوت علي،قلت:نعم...! قال و هوا يقرب كاسة الموية من فمو:نعم الله عليكي..أذن...! -أوووه..طيب...! و بدأنا فطور،بعد مدة وقف علي:الحمدلله..سعود يلا صلاة... طالع سعود إلي معلق في فمو سمبوسة في علي بنظرة طفولية ما تحمل معنى...! ابتسمت،اقتربت من سعود عشان أمسح بقايا الطعام على وجهو و من شعرو:دحين لأ..بس حيروح معاك العشا..صح سعود...؟! طالع سعود فيا،بعدين في علي،بعدين فيا و هز راسو بايوة...! علي:بس بعد العشا تراويح..حيتعب...! -عادي ما فيها شي سعود بطل...! طالع علي فينا بحيرة بعدها راح للمغرب...! وقفت:سعود يلا نصلي مع بعض...! هز راسو و وقف،قلت:روح اتوضى و غسل فمك و يلا...! اكتشفت إنو سعود ما نام إلا متأخر مرة لأنو قعد يلعب بالجيم بوي تبعو و نسي نفسو،خاصمتو و دحين أبغاه يصلي و ينام...! و لمن كنت أصلي كان سعود واقف جمبي،تعرفوا كيف صلاة الصغار،ساعات أرفع من السجود ألاقيه راح لكنو يرجع بعدين،فكرتي هيا إنو يتعود على وقت الصلاة و إنو يسيب أي شي في يدو و يقوم و كمان عشان يتعود عالوضوء...! لكن المرة دي غير..رفعت من السجود لقيتو ساجد،قلت يمكن يلعب في خيوط السجادة و لا شي و استمريت في صلاتي بقلق،أنهيتها بعجل،سلمت و قلبتو على طول..كان...نايم،قلت أذكاري،حصنتو و شلتو لين سريرو،دورت الجيم بوي و أخدتو..رح أستحدث نظام جديد بالنسبة للجيم بوي..قبل ما أنام يدخل غرفتي...! رحت بابتسامة للسفرة عشان أرفعها...! *************************************** اتجهت للتلفون و أنا أسمعو يرن،رفعت السماعة:نعم...! -السلام عليكم... -وعليكم السلام..مين؟! -رجلك موجود...؟! قطبت حواجبي و أنا أقول:دقيقة أناديه لك...! رحت لعلي:واحد يبغاك...! -مين...؟! قلت بانزعاج:واحد يقول.."قلدت طريقة كلام الرجال" رجلك موجود...؟! فز علي و راح للتلفون:ألو...! -هلا هلا بهالصوت...! بعد علي السماعة عن أُدنو بعدين رجعها:لا هو..ايوة..طيـ..إن شاء الله..صار صار..مع السلامة..الله يحفظك...! بعد ما قفل قلت:مين دا؟! -ايش قلتيلو إنتي...؟! -ما قلتلو شي،بس هوا يصرخ...! قال بهدوء:لهجتك ما عجبتو...! -مين هواااااا؟! صرخ علي:جدي...! -جدك...!؟ -أبو أبوية...! -آآه..طب ليه كده يتكلم؟! -هذا يعيش في مكان نائي..الكهربا ما وصلت لهم إلا قبل كم سنة...! -أمَّا...و ايش يبغى؟! -مو هاذي المشكلة...! -خير إن شاء الله...! جلس علي و جلست جمبو،قال:يقول ما شافني بعد زواجي و ما شاف ولدي و يقول لازم نعيد عندو...! -نعم نعم نعم...! طالع علي فيا بنظرة غريبة،قلت:شوف علي..أول يوم بالمشمش..تاني يوم من عيوني...! -لكن هذول أهلي...! -هادولا مو أهلك..هادولا جماعتك إلي ما شفتهم من سنين..حتقضي أول يوم العيد عندهم...؟!،صعبة...!،بعدين عمو ما يروح لهم...؟! -إلا بس ثالث يوم العيد...! -هاااا...قلتها ولدو يروح لو تالت يوم العيد تقوم تروح لو إنتا أول يوم...! -ما سمعتيه يصرخ...؟! -إلا..قولو أي شي..زوجتي تبا تشوف أهلها مثلاً...! -هاهاها..يا ماما لو قلت له كذا يقول علي مب رجال حرمتك تقودك...! -ليه..سيارة؟!،بعدين إنتا ليه ما قد اتكلمت عنو؟! -لأني ما أحبه...! -لا وي جدك..المهم..كلمو و زبط الموضوع معاه..تاني يوم من عيوني نروح...! -يصير خير..يصير خير...! أحس علي يبغا يقول شي لكن ساكت..والله عاد بكيفو..السنة دي دوري نعيد أول يوم عند أهلي بما إننا سنة عند أهلو و سنة عند أهلي...! ************************************** هكذا انتهى الجزء الأول من الفصل الثاني..أتمنى أن يكون قد حاز على إعجابكم و نال رضاكم...! انتظروني في الجزء الثاني: (اكرهني..لكن لا تكره ليَ السلامة)..و إلي ذاك الحين كونو بخير...! )...جرة...( |
الجزء الثاني "اكرهني..لكن لا تكره ليَ السلامة" -علي يعني و بعدين معاك...؟! -ايش تبغيني أسوي..؟!،محروم...! كنت قاعدة أحاول أتميكج لكن علي مجنن أهلي،قلت باستنكار:محرووووووم...؟!،و الله حتى الرجال سارو كافرين عشير...! -أقوووول بلا كافرين بلا مسلمين..أعطيني الفرشة...! قلت برجاء:علي خلااااص...! -طيب إنتي ايش حيضرك..أعطيني الفرشة لو مازبطت امسحيه...! كنت _بالضبط_ أبغا أحط الظل لكن علي يقول إنو هوا فنان و يبغا يحطو ليا..قلت:علي حنتأخر...! -عادي...! -عليييييييييييييي...! سحب الفرشة و بدأ يحطلي..و هوا يحطلي اتذكرت إنو اليوم عيد و إني ما قلتلكم كل عام و إنتو بخير..بالتالي...كل عام و إنتو بألف خير..و بسبب علي حنتأخر..ايوا هوا رجال ايش عليه..صلى و رجع اتروش و لبس الثوب و الشماغ و اتعطر و يلا..مو أنا إلي من أول أرتب سعود و دحين جاي علي بكل بساطة يستهبل و يلعب..أففففففففففف...! -خلصت...! طالعت في المراية و...! صرخت و أنا أوقف و أجري عالحمام:حسبي الله على ابليسك...! -اييييييييش...؟!،حلو و الله...! -وع وع وع...! -والله حلو...! قلت بعصبية:جيبلي منديل المكياج...! -حـ... -أقولك جيبلي المنديل...! جابلي علي المنديل و هوا يضحك،سحبت منديلة و مسحت بها الظل،طالع علي في ساعتو و قال بجدية:والله تأخرنا...! لو كانت النظرة تقتل كان علي ميت من زمان،ضحك:فديت العيون أنا...! -طير..طير من قدامي...! -ما هندي أجنحة...! قلت:خير كلجت...؟!،ايش إلي ما هندي أجنحة...؟! طالع علي فوق و قال باستعباط : جرة غلطت..مو مني...! قلت و أنا أحاول أتذكر:ايوااااا..صح..العين جمب الهاء...! طنشت بعدها علي و اتجهت للباب،ناديت سعود إلي كان يستنى في الصالة،لابس و متشيك و شكلو قمر..كان يلعب بالجيم بوي،قلت:سعووووووووود..تعال حبيبي...! جا سعود:نعم...! -بابا يقول يبغا يلعب بالجيم بوي..ممكن تعطيه يلعب شوية...! فرح سعود..و راح بحماس لعلي إلي قعد يبربر و يعترض،حطيت الظل و كملت مكياجي بسلام و اتجهنا لبيت أهلي...! في البيت ما كنا أول الواصلين، "أسرتي" الموقرة كانت واصلة،عمو فتح من باب المجلس،سلمت عليه،سلم على علي،و شال سعود و حط في يدو عيدية،سعود مدها ليا علطول،حطيتها في شنطتي،قال علي:يا مفترية..فلوس الولد...! -هوا أعطاني..بعدين عمو..ترى اتزوجت مو يعني معد تعطيني عيدية...! ضحك عمو:إنتي دحين المفروض تعطيني عيدية...! قلت و أنا أدخل من باب الحريم:مابغا...! رجعت:ولدي...! احتضن عمو سعود _إلي يلعب بالجيم بوي _ و ما عليه من أحد:أبغاه معايا...! ابتسمت:أوكي انتبه لو...! و دخلت عالبيت..هناك سلمت على جدة و خبيت في ايدها عيدية..لها و لعمو..الصراحة أستحي أحط فلوس في ايد عمو..أحس أنا آخد عادي لكن أعطي لأ...!،و كمان عيدت منورة و انبسطت كتيييير...!،و على كل حال تظل العيدية شي من ألطف الأشياء الاجتماعية عندنا..لكنها مو عند كل الناس..أعرف ناس ما عندهم اعتراف بها أصلاً...!>>>أشوة..احنا عندنا عيدية..ترى والله تفك زنقات...! على الظهر رجعنا البيت ونمنا لين المغرب..صحينا..لبسنا و رحنا لبيت أهل علي، و بعد ما أكلنا عشا مغربي (نسبة إلي صلاة المغرب و ليس لدولة المغرب)كنا قاعدين مع بعض..إلي ريحني إنو أحمد و زوجتو عند أهلها..يعني مافي أحد أغطي عليه...! قال عمي:سعود تعال...! راح سعود لعمي:نعم أبوية...! حط عمي في ايد سعود خمسين،قعد سعود يطالع فيها بعدين دخلها في جيب عمي:مابغا...! طالعنا في سعود مستغربين،قال عمي و هوا يرجع يطلعها:ليه حبيبي...؟! -أنا ماما تعتيني (تعطيني) مو إنتا...! قال علي بانفعال و هوا يمد ايدو:عساك العافية..أبوية هات أنا أبغاها...! عمي:رجال وش طولك و ش عرضك تطلب عيدية..إنت عيدني...! شهق علي:والله عيدت.."التفت ليا"..جود أنا ما أعطيتك و قلتلك أعطي أمي و أبوية و أخواتي...! قلت و أنا أحط ايدي على خدي:يوووووه نسيت أقولهم إنك معايا...! طالع علي في عمي:سااااامع..سامعييييين.."طالع فيا"..يا صررررراقة يا حرررراااامية...! -ياخي نسيت ياخي..خلاص وي...! التفت لعمي:هات عمو عيدية سعود..عشان أحفظها لمستقبلو...! قال علي و هوا يشوفني آخد عيدية سعود:أحفظها لمستقبلو هاه.."ضربني على كتفي"..بعدين إنتي مجمعة أكثر مني..أعطيني هيا...! -هيييي...شايفين ولدكم المتوحش يضربني...! قالت عمتي بابتسامة:و إنتو تتضاربون عشان فلوس...! -شفتي كيف يا عمتي..أيام زمان كانو الأزواج متحابين..دحين يتضاربو عشان فلووووووووس...والله الفلوس تغير النفوس...! علي:والله يا أمي هيا مجمعة أكثر مني..اتفقنا ففتي ففتي عيدية سعود بس الخاااااينة ما التزمت بالاتفاق...! طالعت عمتي في سعود:تعال حبيبي تعال...! راح سعود لعمتي و جلس في حضنها و كمل لعبو و هوا يوريها و يحكيها عن مراحل اللعبة و هيا تسمع،قالت صفاء:يا مفتريين عيدية الولد...! أحلام:أشوة ماما و بابا ما كانو ياخذوها مننا و احنا صغار...! قلت:لالا..مين قالك..أنا حشتريلو إلي يبغاه و أمشيه فيها و الباقي حآخدو...! وقف عمي و قال و هوا يمسح على وجهو:إنتو إلي يقعد معكم يصدع..أنا طالع فوق..أم أحمد صحيني للعِشا...! عمتي:إن شاء الله...! التفت لعلي:إنتا ليه ما تهجد...؟!،تعبت أبوك..صدعتلو راسو...! -يا هبلة يتكلم عنك...! -وي..طالع..حبيبي أنا قمة في الرقة..أنا أصلاً أهمس ما أتكلم...! قال علي بسخرية:تهمسي..يا أمي إنتي في المطبخ و أنا في الغرفة يوصلني صوتك..قال تهمس قال...! عمي:أتكلم عنكم الاثنين..بعدين متى حتعقلون...؟!،بداية ما شفتك يا أم سعود ظنيتك عاقلة بتعقلين هالخبل ولدي بس طلعتي ألعن منه...! -حرام اللعن عمو حرااام...! طالع عمي فيني بنظرة خلتني أقول و أنا ألف وجهي عن عمو:وي بسم الله...! و طلع عمي،التفت لعلي:أقول بعلي..مو كأننا اتهزئنا...! -إنتي إلي يقعد معاكي لازم يتهزئ يا طويلة اللسان...! -أنا لساني طويل..ياخي لماذا تتهمني دائماً بما ليس فيّ...؟! و انطلقنا في جدال تاني..الجو المرح هدا بيضيف عليا راحة كبيرة..إدعائي و أخدي لكل شي بالمزح ينسيني توتري و قلقي و تصرفي هدا هوا إلي خلى أهل علي يرتاحو ليا و ما يحسو إني ضيفة أو شي لمن أجيهم..يعني أنا يعاملوني كأني بنتهم..أخوات علي يسبوني و أسبهم..عمتي تخاصمني و عمي ساعات يهزئني..يعني مو زي زوجة أحمد..هيا مي شريرة..لأ..هيا بس محترمة و تستحي مو زيي..أنا صح مني اجتماعية بس لمن تحطوني مع ناس أتعود عليهم بسرعة..هدا الشي اكتشفتو بعد ما اتزوجت و سرت أنعزم لحالي،أول الناس تعزم "أسرتي" و أنا ما أروح،دحين عشني متزوجة اتغير الوضع..بالفعل الزواجة دي فيها حسنات..و حسنات كتير..و لو عدينا تطلع أكتر من السلبيات...! ************************************************** ***** خايفة..خايفة من روحة الديرة دي..أول مرة أسافر..أنا ما قد رحت لمكان بعيد زي كده..الطريق لين ديرة علي حيطول و أنا وحدة أبوية مو راضي عني..تخيلوا يسير شي لا سمح الله..كيف أقابل ربنا؟!..يا بنت ايش التفكير المتشائم دا؟!..."لن يصيبنا إلا ما كتب الله لنا"...بس..بس أخاف...! مافي إلا حل واحد..مسكت جوالي..بلعت ريقي بخوف..دورت في الأسماء و اتصلت على بابا..وصلني صوت واحد يبغى يخلص:نعم...! -السلام عليكم... -و عليكم..خير...؟! استهديت بالله في نفسي و قلت:كل عام و إنتا بخير..بابا...! -متصلة عشان كذة...؟! بما إنو قاعد يهينني ما رح أجامل،قلت بتردد و شجاعة مفقودة:كنت أبغا أعطيك خبر إنو أنا و علي و سعود حنروح بكرة الصباح لديرة علي..الطريق طويل و وعر و أنا ما حبيت أروح قبل ما أسلم عليك..و..أتأكد إنك مو غضبان عليا أو شي...! حل الصمت لحوالي الدقيقتين،بعدها صرخ بابا صرخة خلتني أغمض عيوني:روحي الله لا يردك بالسلامة...! قلت بخنقة:طب ليه؟! -متصلة علي يوم العيد أحسب عندك شي مهم..آخرتها تقولي لي وين بتروحون..روحوا جهنم أنا مالي فيكم...! و فصل..مسحت دموعي..بايش يحس دحين...؟!،نفسي أعرف...! اتجهت لدولاب الملابس و بدأت أدور على شي مناسب..أنا و علي اتفقنا نسهر اليوم مع بعض..من حقو يجي يلاقي وجه مبتسم و أنا ما حأحرمو من أبسط حقوقو بس لأنو بابا صرخ عليا..و بعدبن أنا متعودة على دعاويه...! فجأة جاتني فكرة غريبة..بابا دحين مع أخواني و أخواتي كأب حنون مهتم بأولادو..اتعوذت من ابليس:"خلاص الله يهنيهم"،أنا عندي علي يحبني و عمو أبو حنون و جدة مي مقصرة و سعود الله يحفظو ضحكتو تنسيني هموم الدنيا كلها..الحمدلله...! الحمدلله..الحمدلله...! ************************************************** ******* كنا في الطريق الطويييييييل الممل..سعود كان نايم في حضني..اتعمدت أمس ما أنومو بدري عشان ينام في الطريق لأنو لو ما نام حيصرع أهلنا...! وصلني صوت علي:ايش فيكي؟!..أحس إنك مو على بعضك...! -ها...! كنت بالفعل مو على بعضي..كنت خايفة من الطريق الخالي من أي شي إلا الشاحنات و الجمال...! قلت:علي متى حنوصل...؟! -ممم..بعد ساعتين..تقريباً...! -يووووووه...! -نامي لو طفشانة...! -لا لا و أخليك..أقعد صاحية أحسن...! ابتسم علي ابتسامة خفيفة:اش عندك؟! -ما عندي إلا العافية...! طبعاً مستحيل أقلو:قلقانة عشان أبو زوجتك المصون داعي بإنها ما ترجع بالسلامة...! فاجأني علي بسؤالو:جود كلمتي أبوك...؟! -ها...؟! -كلمتيه...؟! -كيف..متى...؟! -قصدي عشان العيد و كذة...! -آه..ايوة...! -آها...! -ايييييش؟! -و ايش قالك؟! -عادي ما..ما قلي شي..إنو بس سلمت عليه و قلت كل عام و إنتا بخير و فصلت...! -يعني ما قالك شي...؟! -لا لا ما قالي...! -طب ما دعالنا دعوة حلوة كذة و لا كذة...؟! انصدمت أنا:هااااا..لأ لأ ما دعالنا و لا دعوة وحدة...! هز علي راسو..يا ربيييييييييييييييه..ليش سأل...؟! طالعت في سعود..عدلتو و شكلي ضايقتو لأنو بدأ يتحرك...! قام سعود و اتلفت بعدين رجع حط راسو على صدري و لف يدينو عليا و قعد يحرك راسو بدلع و أنا ما قصرت..أبوس و أتفدى،حسيت بنظرات علي الناقمة؛يقولي مدلع و مو رجال..أنا أحس أهم شي دحين الأخلاق حتى الدين ما أركز عليه معاه..يعني بس الله و الرسول _صلى الله عليه و على آله و سلم_ و أتعمد أحط الحرم وقت الصلاة و بس فكيف يعني لسه أنبه عالرجولة و ما رجولة..شفتوه كيف راح يرسم على رجلو..كلو من علي..لكن كويس يسير الولد بعدين متوازن من ناحية الأخلاق و الدين & الاجتماعيات و العادات...! غير كل دا أنـ..."شهقت" شديت ايدي على سعود إلي قام مفزوع من الفرملة القوية،التفت لعلي إلي كان مضطرب،قلت:ايشبك...؟! قال بنفس مقطوع و هوا يسند راسو عالدركسون:طلع لي جمل فجأة بعدين اختفى...! -علي اسم الله عليك مافي جمال..شوفهم بعيدين عننا...! قال بانفعال:داري..لكنه فجأة طلع قدامي..كان قريب عشان كذة فرملت بقوة...! قلت و أنا أمسح على ظهرو:حبيبي يمكن تعبان..لو تعبان نوقف نرتاح بعدين نكمل...! قال بتعب واضح:مني تعبان لكنّ..أعوذ بالله من الشيطان الرجيم و بس...! و شغل على إذاعة القرآن..يا رب تعدي دي الرحلة على خير..ولا من وين طلع الجمل..مافي جمال حولنا..من جد أعوذ بالله من الشيطان الرجيم...! كمل علي الطريق و أنا أحاول أنوم سعود إلي خاف و أهديه و بداخلي أدعي إنو كل شي يمشي تمام...! ^^^^^^^^^^^^^^^^^^^^^^ لمن وصلنا لديرة علي حسيت بالراحة لإننا وصلنا سالمين لكن إحساسي بالتعب نساني كل شي إلا التفكير في السرير...! نزلنا من السيارة و لمن شفت علي رايح للشنطة قلت:الله يخليك خلي الأشياء بعدين..سعود حبيبي يلا صحصح...! علي:خليه خليه..أنا بشيله...! و جا و شالو،قلت من قلب:الله يسعدك...! ابتسم علي بتعب واضح و اتقدمني،لحقتو،دق علي جرس البيت الحديث الملون بألوان شعبية و انفتح الباب،فتحت الباب شغالة،قال علي:السلام عليكم..كيفك رمسة...؟! -الحمدلله...! استنكرت لهجة الشغالة..كانت مكسرة لكن واضح فيها التأثر بلهجة إلي حولها..مديت ايدي:كيفك؟! -الحمدلله ماما...! علي:وين جدي و جدتي...؟! -فَوْق...! طلع علي بتعب و هوا شايل سعود..الله يعينو..طلعت وراه و أنا أتأمل المكان بعيون ناعسة و منهكة...! و دخلنا غرفة الجد و الجدة..كانت simply تراثية و كانت مثيرة و روعة..السرر قديمة،المكيف الصحراوي الح!طوط في زاوية من الغرفة،المباخر و التحف،الـ... الـ... الـ...،كل شي فيها تراثي...! أعطاني علي سعود و راح يسلم،رحت أنا أسلم كمان..مادري ليه حسيت الجد يطالع فيا باحتقار..لكن الجدة كانت تطالع بابتسامة مريحة..أعتقد..أعتقد و الله أعلم إنها هيا نفسها إلي جات لمن جو أهل علي يخطبوا رسمي...! سمعت صرخة أفزعتني،طالعت في صاحبها _الجد_ إلي قال بعنف:هات الوَلْد...! رحت عندو..أوكي ولد حفيدو لكن لا يصرخ،سحب الجد سعود بجفاصة قلك يبغى يشيلو مني..صحي سعود و بكي بخوف،شهقت:هييي إنتا...! وقف علي بعد ما أعطاني نظرة و راح لجدو:شوي شوي عالولد راقد تريه...! قال الجد باستنكار:وش هالوَلْد...؟! -ما عليه يا جدي ما عليه هُو لا كان راقد ما يحتمل..إلا وين غرفتنا...؟! دلونا على غرفتنا و أول ما دخلنا نط علي عالسرير:ذكريني أقولك شي لمن أصحى...! حطيت سعود جمب علي و انسدحت جمبهم...! سأل سعود و هوا على وشك يبكي:ماما مين داك...؟! قلت بهمس و أنا أمسح على وجهو:هدا جد بابا..دحين خلاص نام من غير صوت عشان بابا تعبان...! عساها بقلبي...!،أكيد مفزوع من القومة المتخلفة إلي قامها بسبب الجد قبل شوية و أكيد مستنكر المكان...! **************************************** صحيت من النوم و أنا مني مرتاحة...!،يا ربيييييييييه لسه ألبس و أتشيك و أروح أقابل الخليقة إلي برا..أصلاً أصواتهم واصلتنا..كلامهم صعب...! طالعت في سعود..كان نايم و باين عليه الزعل..شكلو استنكر المكان..أما علي فكان شكلو تحفة..سادح لي سدحة متخلفة و يشخر..كلو من النومة الغلط إلي نايمها...! عدلت الاتنين و غطيت رجولهم بس بما إنو المكيف ما يبرد...! هيا دحين كيف أروح عالحمام و هدولا برا...؟!،مالي إلا حل واحد،اتصلت على صفاء،ردت:هلع هلع واللله...! -صفاؤوووووه دوبي صاحية و متصلة عليكي أسألك وين الحمام...؟! -يا سااااترررر..قولي كيفك طيب...! -مابغا..وين الحمام...؟! -يا كثر الحمامات...أية واحد تبغي...؟! -في واحد قريب بس المشكلة هما برا ما أقدر أخرج لهم بكعشتي و لبسي حالتو حالة...! -هيييي هييي هيييييييييه..لو تتمنطري ما يتحركوا..لسه ما عرفتيهم...! -أقولك هيا أصوات بنات..أصحي علي يفجعهم عشان يروحوا...؟!...! -عشان يرملك جدي...! -وي اسم الله عليا..خلاص باي..بدبر حالي...! -ايش حتسوي...؟! -يا أمي خلاااص..باي...! -باي...! عاد والله ينقلعوا..بخرج و إلي يسير يسير...سحبت فرشتي و المعجون و خرجت،الأصوات اختفت و ما حسيت إلا بالنظرات تلسعني من كل جانب،دخلت الحمام _أكرمكم الله_،قضيت حوائجي و خرجت راجعة للغرفة وسط نفس النظرات...! في الغرفة استقبلني علي بهجوم مباغت:خرجتي بذا المنظر...؟! طالعت في نفسي:ايوة...! حط يدينو على راسو:لاااااا لااا يا ربي لااااا...! قلت بسخرية:قدر الله و ما شاء فعل...! طالع فيا بنظرة،قلت:اييييييييه...؟! -خارجة قدامهم ببرمودا و تيشيرت و تقولي ايه...؟! -كل إلي برة بنات زيي...! و رحت لشنطتي،دخلت فرشتي و خرجت تبع علي،رحت أعطيتها لو مع المعجون:خد حبيبي عشان تصلي و تلبس و ننزل نسلم...! رحت أصحي سعود و أنا أسمع علي يقول بصوت عالي مضخم:أنا علي بن سلطان آبي أمر..! انحنيت على سعود و قلت و أنا أبوسو:يلا حبيب ماما تقوم...؟!،علي بليز قفل الباب معاك...! خرج علي بعد ما انصرفوا البنات و قفل الباب وراه...! صحي سعود و أنا علبال ما يخرج علي قعدت أغدق سعود بالحنان..الولد دا مدلع بشكل..الكل يقول كده لكنهم ما يعرفوا إنو لمن يغلط نشد عليه و نخاصمو لكن مو قدام الناس عشان نفسيتو وشخصيتو ما ينهزوا...! ^^^^^^^^^^^^^^^^^^^^^ كنت جالسة في غرفة الجد و الجدة،جمبي علي،سعود كان يلعب برة مع الأطفال،في الغرفة معانا كان فيه الجد و الجدة _طبعاً_ و عمات علي،كانو كتيرين ما شاء الله...! فجأة جات على وجه علي مخدة،نزلت على حضنو،شهقت مستنكرة أما علي فبكل بساطة مد المخد ليا و قال:هلا...! قال الجد بغضب:قول..قول وش تزيد فيه هاذي عن بنات عمامك...؟!..قول يا ناكر العيش،،لمن تخلي بنات عمامك..للغريب...؟! انصدمت..كيف يقول كده قدامي...؟!،الجدة و العمات كانو ساكتين،ابتسم علي مجاملة:ما صار نصيب...! -وش إلي ما صار نصيب..منت رجال محللن لك أربع...؟! هنا علي انصدم،أنا شهقت:أربعة في عينك...! علي:جود...! كنت حأسكت لكن الجد قال:ليه مب رجال هو...؟!،متزوجن واحدة مب شايفتن فيك رجال..علي رجال و يقدر...! انفعلت:أوكي الشرع شرط المقدرة لكن لم يقصد المقدرة الجسدية و حسب..غير إنو مو من حقك أبداً تقول هدا الكلام لواحد دوبو متزوج..دوبو بدأ يبني حياتو...! -وش بلاها هاذي...؟! كانت طريقة كلامو مستفزة بشكل..! قال:لالا..لازمك وحدة...! قال علي:جدي...وش هالكلام...؟!،جود مافي منها...! -وش إلي مافي منها و أمها و أبوها راميينها..! هتف علي باستنكار:جدي...!...؟! أعتقد إني في هدي اللحظة فقدت السيطرة على نفسي و قلت بانفعال:رموني...؟!،صح رموني لكن رموني عند ناس ربتني صح...! علي كان يحاول يهديني و يهدي جدو إلي قال بسخرية:بنت واحدتن نجسة...! قلت:أوكي..بنت النجسة حتربي ناس من صلبك..يكون أحسن لو ما تهينها في بيتك و هيا ضيفتك...! و خرجت من الغرفة و رحت لغرفتنا...! *********************************************** كنت قاعدة أتفرج على فلم على اللاب حقي في الوقت إلي دخل فيه علي،كنت عارفة إننا حنتكلم في الموضوع،عشان كده حطيت اللاب على جمب و اعتدلت في جلستي،كان علي حيقول شي لكني قلت بسرعة:ذاتس واي قلتلك من قبل ما نتزوج إنك بزواجك مني تعرض نفسك للمشاكل،شوفها المشاكل جات بعد سنتين من زواجنا...! -لكنك غلطتي لمن اتطاولتي عليه...! قلت بقهر:علي أنا ما اتطاولت عليه..هوا إلي اتجاوز حدودو؛كيف يعرض عليك الزواج قدامي،كيف يقول إني بنت وحدة نجسة..كيف يتجرأ...؟! جلس علي جمبي:أوكي..انسي إلي صار و مرة ثانية لمن يكلمك أحد من أهلي اسكتي و خليني أنا أرد...! -طيب بس هدا الإنسان أنا معد أبغا أشوفو...! قال بعتاب:جود هذا جدي...! قلت و دموعي تهدد بالنزول:و أنا زوجتك...! بعدها ما قدرت أتحمل،أكره أحد يتطرق لداك الموضوع،التميت على نفسي و بكيت...! -يا الله يا جود..ذحين ليش تبكين...؟! قلت و أنا أشهق:لو بنت نجسة ليش يرضى لحفيدو يتزوجها...؟! قال علي و هوا يحاول يرفع راسي:جود جدي كبير سن...! قلت بقهر و أنا أحرك ايدي بانفعال:كبير سن مو قليل أدب...! انصدم علي من كلمتي،أما أنا فلفيت وجهي بعيد...! وصلني بعد شوية همس:حتى أبوية يقول أخلاقه ضيقة و لسانه شوي طويل...! التفت مستغربة،قال و هوا يرفع أكتافه:ما نسبه..هذي صفة فيه و عالعموم كنت عارف إنه ما حيسيبك في حالك...! ما كنت أبغا أزعل علي مني عشان عجوز قروي متخلف قليل أدب،عشان كده قلت:علي حبيبي لا تزعل مني..أنا انفعلت عارفة لكني ما أحب أحد يكلمني بدي الطريقة أو ينوه لداك الموضوع...! -بيني و بينك لو كنت مكانك كان سويت أكثر لكن خلاص..و ذحين انزلي و لا كأن صار شي...! -لالا علي ما أقدر...! -جود أنا مابغا الناس يتكلمون عنك..انزلي عشان أنا بروح مع الشباب...! -ياااااااي حتى هنا في شباب و حركتات...! -ههههه فيه فيه،أدشر واحد يرجع البيت الساعة ثمنية...! -وي استغفر الله..روح طيب و ادشر معاهم...! -بروح بروح..بروح أقززززززز...! -بتروح ايييييييه...؟! -أقز...! وقام،لحقتو:علييييي...! -انزلي لهم...! و خرج من الغرفة..يووووووه أحس الكلمة مألوفة..مألوفة بالمرة...! ************************************************ كنت قاعدة مع بنات أعمام و عمات علي و مع عمة علي الصغيرة إلي ما تتجاوز الخمسطعش سنة..طبعاً جابها الجد من زوجة صغيرة غير الجدة..زوجة قد حفيداتو...أفففف،المهم..كلهم طلعوا ما يعيشوا هنا،متوزعين في المدن على حسب ظروف أعمال أبهاتهم..ناس في الشرقية و ناس في الشمال،ناس في الوسط،ناس في الجنوب،ناس عندنا في الغربية..أكتر شي مسلي كان اختلاف لهجاتهم رغم إني أكره اللهجات التقيلة و أتضايق منها لكن برضو حسيت بمتعة و اكتشفت إنو كلمة أقز معناها أبصبص في البنات و رح أسوي حرب مع علي عليها بعدين...! كنت مندمجة أسمع حكاية في الوقت إلي سمعت فيه صوت بكا سعود و:ماما...! التفت،كان سعود إلي جري لحضني و قعد يبكي..خفت و الكل خاف و اتوتر،قلت:سعود حبيبي ايشبك...؟! -دلبوني..(ضربوني).. و أخدو فَلوسي...! شهقت:مين ضربك...؟! -ديبان...! -من هدا..؟! -مدلي..(مدري)...! وقفت:وريني هوا...! قالت وحدة:يووووه..لا يكون ذيبان...! قالت تانية:أكيد..جود روحي و صفقيه الحيوان...! اتخصرت بنت الجد "عمة علي":لاوالله..أُخوي هذا...! التفت لها:معليش..حق ولدي لازم يرجع..حتزعلي لو رديت الضربة...؟! ابتسمت:لا حبيبتي خذي رااااحتك...! رحت و طلعت للحوش،كانو الأولاد يلعبو قدام الباب..طالعو كلهم فيا..قلت و أنا متخصرة:وين ديبان دا...؟! الكل طالع في ولد مفعوص..شكلو كان وععععععع،قلت:إنتا إلي ضربت ولدي...؟! اتقدم الولد و وقف قدامي بكل ثقة:ايه أنا...! انحنيت:بأسألك يا بابا..إنتا كم عمرك...؟! -وش دَخْلِك...؟! ابتسمت:اتكلم بأدب و احترم إلي أكبر منَّك..و لا تخليني أفقد أعصابي...! -وريني وش بتسوين...! قلت بانفعال:ما حسوي شي بس ولدي لا تمد ايدك عليه و رجع فلوسو...! نط الولد و صفق سعود كف،سعود انصدم و ما سوى شي..هوا مهو متعود عالضرب...مسكت الولد من ياقة ثوبو الأصفر و قلت و أنا أهزو:ما قلت لا تمد ايدك...؟! شوية إلا بالولد يحاول يديني كف و كأنو الحركة عجبتو..كنت مقررة أعتبر الموضوع سخافات صغار و أكبر عقلي لكن دحين...مسكت يدُّو و دفيتو،كان نحيف و قِلَيل فطاح..وقف و نط عليا بهمجية،دفيتو بعيد،الولد دا لازم يتربى و قدام كل الأولاد إلي أكيد متفرعن عليهم و ما حيربيه إلا أنا...! صرخ الولد:يا الكلبة يا الحيوانة يا الـ******* يالـ******* و بدأ يسب سبات قذرة،سكت،وبعد ما خلص صفعتو كف قوي..كف خلاه يطيح على الأرض و يطالع فيا بصدمة،قام:يا بنت الـ******،والله لأكلم أبوي والله لأخلي رجلك يطلقك..! مسكتو من ياقة ثوبو:كم عمرك عشان تقول دا الكلام يا قليل الأدب..طالع في كل إلي حولك..تحسب واحد فيهم يحبك..كلهم يكرهونك..كلهم لمن ما تكون موجود يقولو الحمدلله ديبان مو موجود..طالع..طالع فيهم و شوف...! كنت عارفة إنو في كلامي قسوة و إنو الأطفال لمن يسمعوا كلام قاسي ينهدو لكن أحد أكتر الأشياء إلي تستفزني هوا الطفل قليل الأدب...! الولد كان مفجوع و مصدوم من الكلام..قلت:رجع فلوس ولدي...! قال الولد و هوا يبكي:بعدي يدك..والله لأعلم أبوي...! ابتسمت:تبغى تعلم أبوك علمو..لكن حط في بالك إنك حتكبر بدا الدلع و دي الشخصية..و إذا أهلك استحملوك دحين فبكرة الناس ما حتتحملك..حتكبر و حيكبروا الأولاد و حيكبر كرههم لك..الكل..الكل يا "بسخرية" ذيبان حيكرهك..و الكف إلي أعطيتو لولدي حيكبر..حيكبر مرة...! ايش أقصد بجملتي الأخيرة...؟!،مادري..لكني قلتها بأسلوب مرعب و أنا أبتسم..بس عشان السخيف عديم التربية يلزم حدودو...! ابتعدت عنو،التفت لسعود،كان يطالع فيا مشدووووه،قلت:ايشبك حبيبي...؟! قال و هوا في عالم تاني:ماما...غلط...! -ايش...؟! -مـ..ما ينفع تدلبي الولد..حرام...! -يعني أنا غلطت يا سعود...؟! طالع فيا بثبات وليد اللحظة و قال:ايوة...! -طب ايش أسوي عشان أصحح غلطي...؟! -قولي آسفة...! ابتسمت،التفت للولد:تعال...! طالع الولد فيا بحقد،قلت بصوت جهوري:كلكم تعالو أبغا أكلمكم...! اتجمعوا الأولاد حولي،اتربعت،التفت لسعود:روح جيب شنطتي...! -وينها؟! -في الغرفة إلي جيتني فيها...! الكل كان حولي و يطالع فيا بفضول ما عدا "ذيبان" إلي كان واقف متكتف بعيد و يحدّجني بنظرات حادة..لمن ركزت في ملامح الولد لقيت إنو جميل،عينو ما شاء الله مكحلة و واسعة و أنفو واقف..تعرفو كيف أولاد القرى لمن يجوا حلوين...؟!،و قلت أول عنو وع لأنو بالفعل وع..ثوبو مصفر،شبشبو مقطع و حالتو حالة و أنا عارفة و متأكدة إنو مو بسبب شي مادي زي نقص فلوس مثلاً..كل مافي الموضوع إنو أم دا الولد عمرها ما اتجاوز التلاتين و متزوجة عجوز مكحكح أحفادو أكبر منها...! قلت لأقرب ولد مني:كم عمر ديبان؟! -ست...! -أوه ما شاء الله...! ستة سنوات...!،جاب سعود الشنطة،عديت الأولاد بشكل سريع..كانو 12 تقريباً..يوووه اسم اللله عليهم..!،فتحت شنطتي و شفت فيها ريالات..ريالات من عيدية سعود إلي ألقطها وراه...! طلعتها و أنا أقول:حعطي كل واحد ريالين...! وزعت عليهم الريالين و أنا أدعي ما يشوفوه شي قليل...!،حسيت نفسي رهيبة و أنا أشوف على وجوههم السعادة،وقفت،رحت لـ"ذيبان"،ابتسمت و مديت يدِّي:أنا آسفة..أنا غلطت في حقك بس ايش أسوي..سعود جاني يبكي فسرت ما أفكر...! دف يدي،شديت يدو و حطيت الريالين فيها،نزلت و بستو..إلي فطسني ضحك كان خجلو و تحرجو من بوستي...الله يخلف..الأولاد عندنا يطقوا العشرة و الـ12 و احنا لسه نبوس فيهم...! قلت:سعود اطلع عشان تغير ملابسك بعدين انزل العب معاهم...! و دخلت للبيت و طلعت فوق لغرفتنا و سعود ورايا،و لمن كنت ألبسو قلت:سعود حبيبي صح الضرب غلط لكن لمن أحد يضربك لا تجي تقولي..خد حقك بيدك...! -ماما إنتي قلتي غلط نضلب(نضرب)...! -صح غلط نضرب..الضرب آخر شي الواحد يسويه لكن ايش يسوي الواحد لمن أحد ياخد فلوسو و يضربو و يهينو قدام الكل...! برطم سعود:ماما فَلوسي...! -حبيبي خلاص لمن نروح جدة حجيبلك إلي تبغاه و هنا لو كنت تبغى تروح البقالة مع بابا ولا شي قلي و أنا أعطيك...! -لأ ماما..إنتي أعتيتيهم (أعطيتيهم) من فَلوسي كمان...! ضحكت و حضنتو:والله ما كان عندي ريالات غيرها..خلاص وعد أرجعها لك...! -وعد...؟! -وعد...! -مـ... قاطعتو:الله يا سعود..خلاص وعدتك أنا...! قال بإذعان:تيب...! ابتسمت:يلا بابا انزل و العب معاهم بس انتبه لا تطلع في الشارع...! و لمن خرجت من الغرفة اتفاجأت بولد قدامي..يوووه هوا نفسو داك قليل الأدب أخو أبو علي إلي شفتو في بيت أهل علي بس الفرق إنو كبر شوية،ابتسم:هلاااااااا والله..زمان عنك...! و مد يدو،صافحتو و ابتسمت مجاملة:كيفك...؟! -بخير...! حسيت إنو شاد على يدِّي و ما بيسيبها،قلت بتهديد و ملامحي تتغير لملامح غاضبة:والله..والله يا إنتا يا إلي مدري ايش اسمك..والله لو ما تفك يدِّي و تقصر الشر لأرزعك بكف زي إلي رزعتبو أخوك...! ساب يدِّي:أووووووه..أثرك متوحشة...! شمقت و مشيت مطنشتو...! هدي فايدة الزواج المتأخر..الأب ما يدري عن شي و الأم مشغولة بشبابها إلي حيضيع على عجوز مكحكح و الأولاد ما يتربو عدل..أفففففف الله يعين على القرف إلي عايشين فيه...! ********************************************* في الصباح كنا جالسين جلسة حلوة،جلسة حريمية و بناتية..قهوة و شاهي و موالح،كنت متحمسة أتناقش مع مجموعة من الموجودين عن الأقسام الموجودة في الجامعة و عن الفرق بين الجامعة و الكلية،سمعت:"آآبة..تشرب قهوة...؟!"،للتوضيح:آبة تعني أبي و إلي اتكلمت وحدة من عمات علي،آآآه يا عمة أبوكي مو حاسس نفسو غلط في الجلسة النسائية دي...؟!،أحلى شي في الموضوع كلو الجدة،إنسانة مسالمة كافية خيرها شرها غير عن ضرتها إلي ما نشوفها...! فجأة جات مخدة على وجهي،كان مصدرها الجد،مسكت أعصابي و أنا أوجه نظرات باردة لو،حرب العيون يعني،بعد شوية بعدت المخدة عني،والتفت للي كنت أكلمهم و كملت هَروجي...! سمعت صوت أعلى من الهمس:أم سعود... التفت،كانت وحدة من عمات علي،ابتسمت:هلا... -آآبي يبغاك...! التفت للجد:نعم... -آذيتك يا بنتي...؟! -لأ... قال و هوا يهز راسو:أنا بغيت أناديك يا بنتي أناديك...! -تبغى تناديني ناديني جود..مرة مرة ما تبغى تنطق اسمي قولي أم سعود...! -والله لو ما أعدك بنتي ما كان شلت الكلافة...! -لالا..الكلافة حلوة...! و برضو التفت أكمل هَروجي...! اليوم آخر يوم و أبغا أستمتع باختلاف الثقافات إلي أثارني هنا..أووووه صح..بكرة الفجر حنحرك..و أخيراً حنروح جدة..ياااااااهوووووووووووووو...! ********************************************* هدا الموقف رح ترويه جرة بنفسها عشان شي حتكتشفوه دحين...! قال علي:جوووووووود... أجابت و هي منشغلة بسعود النائم في حضنها:ياااااا نعم...! -نعم الله عليكي يختي..إنتي ايش قايلة لجدي...؟! أرمشت بعينيها:ولا شي...! -ولا شي ها...؟!،جدي يوصيني عليكي...! -ههههه عشان... وحكت له ما جرى لكنها فجأة صرخت بأعلى صوتها و هي تشد يديها حول سعود:علي الجمل انتبه...! ^^^^^^^^^^^^^^^^^^^^^^^^ في السيارة التي تعلوها ضحكات الشباب و تعليقاتهم الجريئة قال عمر:يا الله إنك تجيرنا..طالعو طالعو...! التفت الجميع حيث يشير عمر الذي شهق فجأة:عبود وقف وقف...! قال "عبود" بملل:هااااااا -وقف أقولك...! توقف "عبود" المتملل من لا شيء،فخرج عمر من السيارة مسرعاً..جثى و تحسس القدم التي رآها تتحرك،نظر لأعلى الجسد،كانت امرأة،تقدم و وضع رأسه على صدرها ثم قفز و ضرخ:"حية حية"،نزل الشباب الواحد تلو الآخر،حمل أحدهم الطفل إلى السيارة و تعاون البقية على الرجل أما عمر فوقف حائراً متردداً،صاح به صديقه:عمر يلا... -تحس..رافضة...! قال "عبود" بلا تفكير و بسرعة:"ارمي عليها الشماغ و يلا"،نفذ عمر و حمل المرأة إلى السيارة ليعودوا أدراجهم للمدينة (جدة)...! ********************************************* |
الجزء الثالث (ما بعد الحادث) بعد العصر...! سعود يروي... وصلت المستشفى و رجولي ما تشيلني،رحت للمكان إلي وصفو ليا أحمد و لقيتو هناك،ناديت:أحمد...! جاني بسرعة و ملامحو ما كانت تبشر بخير،قلت:أحمد ايش فييييه...؟! قال بعجل:مادري..الشباب إلي هناك اتصلو علي و قالو رجال و حرمة و ولد سارلهم حادث...! صرخت:يعني ايه سارلهم حادث...؟! مسكني أحمد من أكتافي:اهدى يا رجال..اذكر ربك...! انفعلت:أهدى..بنتي بتموت و إنتا تقولي أهدى...؟! هزني أحمد بقوة و قال بشدة:سعود...! قلت بألم و ضعف:أحمد... حضني أحمد،بكيت بضعف:يا أحمد ما عندي غير جود..محد يحبني زي ما هيا تحبني..قولهم يعالجوها..جود يا أحمد جود...! أحمد كان متماسك،قال بثقة:بإذن الله سالمين...! ابتعدت عن أحمد:كيف سار الحادث...؟! اتنهد أحمد:هذا مو مهم ذحين..المهم يبشرونا عنهم...! قعدت رايح جاي راح جاي..يارب تطلعها ليا سالمة..هيا و سعود و أبوه..يا رب بأحسن عمل سويتو أنجيهم..ياااااا رب...! من باب معين خرجوا مجموعة من الدكاترة،قال واحد فيهم:"وين أهل الحادث؟!"،فزينا أنا و أحمد،اتجه لنا:الحمدلله على سلامتهم...! قلت بلهفة:سلموا...؟! -الرجال سلم ما فيه شي الحمدلله "اتنهد أحمد براحة" مجرد جروح و رضوض بسيطة،الولد الصغير بسبب كمية الغبار و الأتربة إلي دخلت صدره أُصيب بحساسية صدر و... قاطعتو:كيف يعني...؟! أرسلي الدكتور نظرة متعالية منقرفة:ما صار عليه شي...سلم...! قلت بلهفة:و جود...؟! طالع الدكتور مستغرب،قال أحمد:الحرمة..الحرمة...! هز الدكتور راسو و هوا يقول:سقطت و رجلها اليسرى انكسرت فجبسناها لها..لكن الحمد لله الركبة ما جاها شي...! قلت بصدمة:ايييييييييش...؟! مسكني أحمد و قال:أهم شي هي بخير...؟! تابع الدكتور ببساطة:عمر الجنين كان شهر و نص..أعتقد ما كانت حاسة فيه...! استندت على الجدار:حسبيَ الله و نعم الوكيل...! قال أحمد بصوت واطي:هل فيه تشوه...؟! وقفت أنا:تشوه ايه...؟! طالع فيا أحمد منصدم و قال:أسأل أسأل...! قال الدكتور بطفش:لأ..قلنا سلموا...! راح الدكتور،قال أحمد:سعود اذكر ربك..الحمدلله سلموا...! قلت بانفعال:سلموا ايييييييييه..سقطت و انكسرت رجلها و اتشوهت...! عصب أحمد:سعود مافي تشوه ما سمعت الدكتور بعدين أنا كنت أتكلم عن علي..يا سعود جود الحمدلله سلمت...؟! سكت أنا..و سكت أحمد لكنو قال بعدها بهدوء:سعود..إنتا اللحين منفعل..اهدى و بعدها نتكلم في الموضوع...! ********************************************* أيضاً سعود يروي،،، في الليل بعد الساعة عشرة قالولنا إننا نقدر ندخل على علي و سعود لكن جود لأ..ايا رب قومها بالسلامة...! أنا حالياً عند سعود لأنو علي أهلو عندو،بعد ما يخرجوا أدخل أنا...! كان سعود قاعد يحكيني عن إلي سار و يوريني الجروح و الخدوش إلي اكتشفها في جسمو،ابتسمت و أنا أتلمس وجهو الصغير..حتى هوا أحس بالأبوة تجاهو..يا ترى هل من الممكن يكون عندي ولد حليوة زيو في يوم من الأيام...؟!...! فجأة اندق الباب،اتوقعت أحمد ياخد سعود عشان أهلو يشوفوه لكني اتفاجأت بخمسة شباب،قال واحد بصوت فخم:احنا إلي شفنا الحادث...! -آآآه أهلاً...! ما عرفت ايش يبغوا أو ايش يفترض بيا أسوي...! نط واحد و قال:جايين نتحمد لكم بالسلامة...! و دخل و دخلوا البقية وراه،قفلت الباب و دخلت،سعود كان يطالع فيهم و مستنكر،التفوا حول السرير،لاحظت الخوف على وجه سعود،رحت و جلست جمبو:حبيبي هدولا إلي شالوك من الصحرا و جابوك هنا...! -ليه سالوني...؟! و قرب مني أكتر،رفعت سعود و جلستو فوقي:عشان كان عندك دودو في كل مكان،كان لازم يجيبوك المستشفى...! بكي سعود و دفن وجهو فيا:مابغا..ماما..ماما...! حضنتو:سعود إنتا بطل و تبكي...!،ما يسير كده...! رفعت راسي للشباب:معليش بس دوبو صاحي و ما شاف أمو...! قال واحد:لالا عادي..معاك حمادة،سعود..اسمك سعود ها...؟!..اسمع يا سعود..ماما تعبانة عشان كذة لاز... قاطعو سعود بقهر:مو تبعانة...! قال واحد:سعودوه..أمك تعبانة..لا تقعد تقول مو تبعانة مو تبعانة هبالة هيا...؟!،تبغى تشوف أمك اصبر لين تصحى و صدقني ما حيدخلون بزر بكاي زيك...! قال "حمادة" بانفعال:"عبود الولد صغير حرام عليك"،الكل اتوقع بكا سعود لكنو سأل و هوا يمسح دموعو:يعني هيا نايمة...؟! قلت بحنان و أنا أمسح على راسو:ايوة حبيبي تصحى و نروح عندها...! طالع سعود في "عبود" و قال و هوا مبوز:ماما مو تبعانة...! قال "عبود" و هوا يعلق على حرف اللام:إللللللا...! صرخ سعود بانفعال:مو تبعانة أقولك..ماما نايمة بس...! كان "عبود" حيرد لولا "حمادة" إلي قال:بس خلاص..خلونا نتعرف على بعض..أنا حمادة "أشر على عبود" هذا التعيس عبود "أشر على صاحب الصوت الفخم" هذا محمد نقوله أبو الهول..و هذا صاحب الصوت الذهبي اسمو يوسف..هذا يا سعود إلي شالك... طالع سعود في يوسف إلي ابتسم بلطف،بعدين قال و هوا يأشر على واحد مالو حس:مين دا...؟! طالع حمادة و قال:هذا عمر..هي إنتا الولد يكلمك...! ابتسم عمر بتوتر لسعود بعدها طالع فيا:إنتا ايش تقربلو...؟! -أنا..أنا عم أمو...! اتقلب وجه عمر،الكل ضحك و ما وقف ضحكهم إلا سعود يسأل:إنتو كلكم سلتونا...؟! حمادة:ايوا...! طالع سعود في "عبود" و قال:إنتا ما سلتنا...! عبود:أوووووه كرهني الولد "رفع صوتو" إلا شلتك و ركبتك في سيارتي و جبتك هنا...! صرخ سعود:لا ما سلتني...! صرخ "عبود":صح ما شلتك لكن شلت أبوك و كسر لي كتفي...! قال سعود"عمو..بابا ما يكسل (يكسر)"،التفت لعبود:إنتا قليل أدب..بابا ما يكسل..بابا ساتل (ِشاطر)...! -مالت عليك...! قلت:ما يسير يا عمو..عيب ترفع صوتك..قولهم شكراً هما ساعدوك...! قال يوسف:والله تعجبني..من يوم ما شلتك حسيت بشي غريب..حبيتك حبييييييييييييتك "أشر على فخدو" تعال اجلس هنا الله يخليك...! طالع سعود فيا بتردد،ابتسمت،شلتو و حطيتو على فخد يوسف،أول ما حطيتو انكمش على نفسو و وجهو حمممممممممر..ضحك يوسف:يا نااااااااااسو..يستحي...! احتضنو:صغير..صغير مرة...! سعود كان رايح فيها من الخجل،ضحكت و أنا أسمع حمادة يقول:أعطيني أجرب...! شد يوسف على سعود و قال بتملك:لأ حقي..أنا أنقذته...! طالع فيا سعود برجاء،مديت ايدي و علطول نط،قلت و أنا أمسح على شعرو:خلاص..فاض به الكيل..ما يقدر يتحمل أكتر...! كان سعود دافن وجهو في صدري و لاف يدينو عليا،ابتسمت و أنا أحس إنو يدينو الاتنين ما تكمل لفة حولي..فكرت فيها..سنتين و نص..سعود صغير..صغير بالمرة...! محمد:وين أبو سعود...؟! كنت حجاوب لولا الباب إلي اندق بعدها انفتح،كان أحمد،طالع مستغرب لثواني بعدها قال:أووه أهلاً...! سلم عالكل مصافحة و مد ايدو لسعود فراح معاه و هوا يقول:عمو..ماما...! قال أحمد و هوا يرتب شعرو:ذحين نروح لبابا و بعدين نروح لماما...! قلت:أهلك لسه موجودين...؟! -هممم ايوة لكن ذحين بقولهم يروحون مع أبوية عشان الشباب يدخلو...! قال محمد:لالا احنا ما جينا إلا عشان نسلم..أصلاً غلطنا يوم جينا بلا موعد...! ابتسم أحمد:كذة و لا كذة بيروحون عشان سعود يدخل...! استنكرو فقلت:أنا سعود...! اتقرب مني أحمد و قال بصوت واطي شوية:سعود دقايق و تعال عشان أهلي يشوفون سعود و يسلمون عليه...! هزيت راسي،خرج أحمد و رجع بعد دقايق _بالفعل_ لكن من غير سعود،قال:يلا...! و مشي و مشينا وراه،و لمن دخلنا عند علي لاحظت التعب عليه،كان سعود جالس فوقو و يكلمو...سلمت عليه:الحمدلله على السلامة...! ابتسم:الله يسلمك...! التفت للشباب و قال بابتسامة واهنة:شكرا...! قال حمادة:عفواً عفواً..ممكن نجلس...؟!،ايوة ممكن صرنا من الأهل..صح...؟! و ابتسم و دخل،مسكو محمد و شدو عليه:من آداب زيارة المريض عدم الإطالة..امشي...! و رجعو على ورا،و قال بأدب:احنا مو جايين نسولف و ننبسط احنا جايين نطمن و نقول الحمدلله عالسلامة و الله يعوضكم في إلي راح...! قطب علي حواجبو:و ايش إلي راح...؟! نط يوسف و قال و هوا يعدد على يدو:سيارة،جوالين،لابتوب،جيم بوي...و ايش كمان؟!،مادري نسيت...! برطم سعود،قال علي:عادي حبيبي نجيبلك واحد ثاني...! قال سعود بحماس:أحمرة...! -أحمرة حق بنات...! اعترض سعود:بابا بلوزة أحمرة عندك...! ضحكنا،انحرج علي و ضرب سعود بالخفيف على راسو:طيب بأشتريلك أحمرة...! حضن سعود علي بقوة،اتألم علي بسبب جسمو المنهك رغم كده قعد يطبطب على ولدو...أثر فيا المنظر..أثر فيا مرة...! محمد:يلا مع السلامة...! علي:لالا خليكم "طالع في حمادة" صرتوا من الأهل...حكوني...كيف لقيتونا و نقلتونا هنا...كلموني عن الحادث يعني...! اتحمسوا الشباب و دخلوا واحد ورا التاني و اتوزعوا في الغرفة...! ********************************************* علي،،، هذي أول مرة أروي..أعرف..و حستمر معكم كم مقطع،قولو ليييييش..عشان في شي حسويه بالسر،إنتوا لازم تعرفونه عكس شخصيات القصة إلي ما حتعرف عنه شي،أوكي ما علينا..اسمحولي ماني مسلم عليكم و لا شي..تعبان حدي و مشغول و متحمس أسمع لتفاصيل الحادث...! قلت:أولاً عرفونا عليكم...! بَدَو يقولون أسمائهم:"محمد،حمادة،يوسف،عبود،عمر"،لاحظت على عمر نظرة غريبة،حاولت أتجاهلها و أنا أقول:كيف نقلتونا...؟! نط يوسف:أنا شلت ولدك..يجنن حبيته أبغالي واحد زيه...! لفيت سعود بايدي و أنا أقول بابتسامة:الله يرزقك..و أنا من شالني...؟! قال "عبود" :أنا..و كسرت كتفي حسبنا الله و نعم الوكيل...! فجأة فز سعود و صرخ:بابا ما يكسل...! عبود:اسكت إنت اسكت..يا رب..أكره صوته يا ناس..إلا كسر كتفي و هشمه...! التفت لي سعود و قال بزعل:بابا كسلت كِفو(كتفو)...؟! -حبيبي أنا ما كسرت كتفه لكن عورته لإني كنت ثقيل عليه...! التفت سعود لعبود:بابا مو كسل كِفك...! -انطقها عِدل أول...! يوسف:عبودوه..و بعدين معاك..سيب الولد في حاله...! عبود:شوف يا علي..والله إني آسف لكن ولدك ذا ماني مستسيغه..من يوم ما شفته قهرني...! قال سعود بابتسامة:مَثَثِيغو..حولة الكملة(مستسيغو..حلوة الكلمة) يعني ايس...؟! ابتسمت على نطقه،قلت و أنا ألمس حلقه:يعني يبلعه...! أحمد:يبلعه في عينك..حبيبي يعني يستحمله...! حضني سعود:بابا صح...! قلت و أنا ألف ايدي حوله:بابا صح..يقولك سعود بابا صح يعني بابا صح...! التفت:والبقية ايش سويتو...! حمادة ببساطة شديدة:يوسف قلك شال سعود،أنا و محمد و عبود شلناك و عمر شال زوجتك...! طالعت في عمر إلي صرخ بانفعال:آسف..والله إني آسف..لكن لقيتهم كلهم في السيارة و لقيت نفسي قدام زوجتك..اضطريت إني أشيلها..والله إني آآآآآآآآآآآآآآآآآسف...! و نزل راسه..أنا فكرت فيها من قبل..أكيد واحد فيهم شال جود و استفزتني الفكرة لكن لو ما سوا إلي سواه كان فقدتها _لا سمح الله_،يعني لازم أشكره،قلت بصدق:فكرة إن واحد يشيل زوجتك فكرة تـ..تقتل من القهر لكن لازم أشكرك إنت في النهاية أنقذتها..ماله داعي تبوس الأرض...! رفع راسه:والله...؟! ابتسمت:والله...! قلت:و كيف وصلتو الخبر لأهلي...؟! أحمد:اتصلو علي...! -طيب اتصلو عليك بس كيف عرفو رقمك...؟! حمادة:أول شي احنا ما انتبهنا لذي الشغلة إلا بعدين..و لقينا في جيبك جوال بس كان..كان خلاص..خلاص ميت... قلت باستغراب:ميت...؟! قال إلي اسمه محمد بصوت قوي و "كشخة":الجوال إلي في جيبك كان خربان خلاص فما لقينا إلا بطاقة سلمناها للمستشفى..البطاقة حقت شغلك فاتصوا المستشفى على شغلك و اسمك كان شوية واضح فعرفنا رقم بيتك و رقم أخوك...! يوسف:و أنا بفني و رهابتي اقترحت إنو نتصل على أخوك عشان بالعادة الأهل يقعدو ايييييش...؟!،يقعدوا يولولو و يلطمو و ولدنا و مدري ايش شكلو..فاتصلنا على أخوك بس طلع رهيف و قلبو ضعيف بس بعد ما سحب عبود السماعة و قعد يهزأه عشان يجي بسرعة هدي...! سعود _عم جود_:أجل ما كنت هادي و ثابت لإنك قوي..هااااا...؟! رغم تعبي لقيت إن الكلام إلي انقال أقدر أمسكه على أحمد،قلت:أحمدوه...! طالع فيا أحمد،قلت:أحمد..تخاف عليا..تحبني...؟! أحمد أداني نظرة..على أساس أخاف و أنكتم لكني ابتسمت و قلت عشان أستفزه:فديت أخوي إلي يحبني...! صح كنت تعبان لكني أحاول أتناسى تعبي بالتركيز على إحساسي بإني منجذب للشباب ذول...! غصباً عني كنت منجذب لهم..حسيت إنهم اللايف سيفيرز لي و لعائلتي...!،آآآآه يا عائلتي..عائلتي الصغيرة ما تسوى شي بدونها..يا رب تقومها لي بالسلامة..قالولي اتجبست رجلها اليسار لين أسفل ركبتها و الحمدلله ما جا ركبتها شي و قالولي كمان إنها كانت..آآه يا ربي..كانت حامل و سقطت...! طالعت في سعود المبسوط يتكلم،لمن سألت عنه قالولي بسبب كمية الأتربة الكبيرة جاته حساسية صدر...!،الله يشفيهم...! ********************************************* علي أيضاً،،، يا ربي..مو حالة هذي..مر يومين من صار الحادث و جود على نفس الحالة،تصحى دقايق و ترجع تنام،و لمن تصحى تبكي،أحاول أنا بدوري أهديها لين ما تنام و أنا حاس إنها هيا تجبر نفسها عالنوم...! الدكتور يقول مافيها شي..طيب لو ما فيها شي من جد هل حتكون هذي حالتها...؟! اتلمست الجبس إلي على رجلها،أحس بالخنقة كل ما طالعت فيها و في ملامح وجهها،السواد تحت عيونها،اصفرار وجهها،الخدوش و الأسوأ من هذا كله الحزن و التعب الواضح عليها...! حطيت ايدي على بطنها و شديت شوية:جود..جود قومي ما يصير كذة..أهون عليكي...؟!،و لو مو عشاني عشان سعود..كل يوم يسألني عنك..قومي يا جود..قومي...! حسيت بحركة بطنها،رفعت راسي و اتفاجأت بها تبكي،فزيت من كرسي،جلستها:جود..جود..لا ترجعي تنامي..جود...! كانت تبكي و من قلب:بـ..بـ... -جوووووووووووود...! اتمسكت فيا:بابا..بابا...! -يا جود سيبينا من أبوكي..خليكي في نفسك..اتماسكي و لا ترجعي تنامي...! اتفاجأت بها تنتصب في قعدتها و لا كأنها وحدة مي قادرة تصحى من يومين...! قالت بضعف و هيا تمسح دموعها:أنا إلي كنت أغصب نفسي أنام..أنا صحيت يا علي خلاص بس لمن صحيت كل شي رجع ليا..من طفولتي إلمن دحين بابا كان بيظلمني...! قلت و أنا أحاول أمسك أعصابي:جود قلت سيبينا من أبوكي...! تابعت جود و دموعها تنزل غزيرة:كنت صغيرة..عشرة سنين كان عمري..رحت أبغا أسلم عليه..في العيد..بعدني عنو..و سلم على كل الأطفال إلي كانو موجودين و عيدهم و قعد يلعب معاهم و ما عبرني..خرب عيدي زي ما خربوا دحين...!،عمو لحظتها ما كان موجود عشان كده أنا دحين أخاف بابا يكون موجود و عمو مو حولي...! قطبت حواجبي..مجرد تافه و مجنون..أبو جود ثور و غبي..من يوم ما وافق علي و أنا بذيك العقلية و من غير ما يسأل عني أكيد مجنون...! مسحت على ظهرها:حبيبتي لـ... طالعت فيا و قالت بقهر:كنت شبه ناسية..ليش بعد دا الحادث اتذكرت كل شي..ليا يومين أغصب نفسي أنام..كل ما أنام أحلم بالحادث و لا بأي شي تاني سواه ليا بابا و أنا صغيرة..ليش كل شي رجع لذاكرتي فجأة..ليييييييش...؟!،ليه كل دا سار...؟!،عشان أسير أكرهو من جد...؟! -جود تعرفين إن لو ربنا ما كان كاتب يصير الحادث ما كان صار..إنتي إلي كنتي ماشية على هذي الفكرة و نقلتيها لي..ذحين وش الفرق...؟! طالعت جود فيا و قالت:ربنا كاتب صح..لكن هوا دعا و دعوة الوالدين مستجابة..يا علي كل إلي سويتو هوا إني قلتلو كل عام و إنتا بخير احنا مسافرين لا تكون مو راضي عني..في ايش غلطت..في ايش...؟! -غلطتي في إنك اتصلتي..كان المفروض تتركينه ياكل تبن..تعاملينه كأب ليش..اش سوا عشان تحسنين له...؟! أخفضت جود راسها و رجعت دموعها للنزول:كل شي سيء في حياتي كان لبابا دور فيه..ياما و ياما رمى دعاوي عليا و كلها تتحقق..مادري أنا غلطت في شي فدعاويه تتحقق و لا ربي يبتليني عشان يشوف قد ايش أستحمل..ماني عارفة لكني كل شوية أتذكر شي سيء سواه بابا ليا..إحساسي بالنقص و أنا صغيرة..كره الكل ليا بسبب غلط ارتبكو بابا..زواجي منك و تعبي معاك أول أيامنا..سعود القاصر و ولادتي الصعبة لو و الحادث.."طالعت فيا و تابعت" قالي الله لا يردكم سالمين..قال روحوا جهنم..يبغانا نروح جهنم يا علي..مو خايف عليا..مو خايف على بنتو...! نطقت آخر الجمل بصعوبة،قلت:خلاص يا جود..الحمدلله سلمنا احنا الثلاثة...! -سلمنا...؟!،يمكن..بس البيبي راح و رجلي و الجروح في كل مكان و سعود و إنتا كمان..سعود يا علي سعود..سعود حتى لمن يكبر حيتعب..سعود ما حيكون عندو خالات و أخوال..ما حيكون عندو أهل أم..أنا مابغا سعود يكبر بنفس الطريقة إلي أنا كبرت بها..مابغا سعود يحس بالظلم زي ما أنا حسيت...! لفيت ايدي حولها:البيبي و الله بيعوضنا..رجلك حتتحسن و إذا عن الجروح فكلنا في الهوا سوا و أنا و سعود بخير بس ناقصنا إنتي تنورين بيتك...! قالت بترجي حزين:علي أنا اتعقدت من بابا..خلاص معد أبغا أشوفو؛كل إلي قاعد يسويه هوا إنو يدمر ليا حياتي..علي الله يخليك معد أبغا أشوفو...! بعدتها عني و مسكت وجهها بيديني:اسمه معد رح تسمعينه..إنتي بس إِأْمُري...! ابتسمت لها،فهمست بوجع:"علي"،هزيت راسي _بابتسامة حنونة_ بتساؤل..جود كانت تحرك شفايفها و كأنها تبغى تقول شي لكن صوتها مو راضي يطلع،حطيت ايدي على ظهرها أشجعها،فاتقربت مني و رفعت يدينها و لفتهم حول عنقي،قالت و دموعها تبلل رقبتي بوجع و ضعف شديد:علي..أنا مرةأحـــــــــــبــــــــــــــــك...! ارتعشت و حسيت بصدمة كبيرة قبل ما أسترخي و أطوقها بذراعي بشدة...! ********************************************* |
الجزء الرابع (عمَّق جراحي ففقدت الأمل تُجاهه) علي أيضاً،،، طالعت في جود بسعادة و أنا أهزها:هيييييي إنتي...يا إلي تحبيني...! -همممممممم كانت دوبها صاحية،قامت بتعب:بعد عنيييييي...! ضحكت و أنا أمد لها العكاز،أخذته و حاولت تنزل من السرير،نهرتها:جود...! و رحت أساعدها،و عند باب الحمام قالت:طير...! -ما عندي أجنحة...! تابعت و أنا أمشيها لجوة الحمام:"يلا يلا قدامي"...! قالت برجاء:والله ما أحتاج مساعدة...! قلت بحماس:فلة..أدخلك الحمام و أروشك و أغسلِّك و... صرخت:علييييييييييييي -خلاص خلاص ما بدخل بس لا تقفلين الباب و إذا احتجتي شي ناديني...! -اوعدني ما تدخل...! ابتسمت:وعد ما أدخل...! -احلف... -والله... -والله ايه...؟! -وعد و والله ما أدخل إلا إذا ناديتيني...! بعد ما وعدت و حلفت اطمنت و دخلت و أنا على كل حال كنت أمزح بس...! آآآآآآه يا ربي..مين كان يتوقع..جود تحبني..أحسها فكرة مستحيلة؛يعني كانت قبل تستحقرني و كنت حاس إنها حتى إعجاب مو معجبة فيا..بالنسبة لها كنت مجرد زوج في أشياء لازم تسويها لي و أشياء لازم ما تسويها لكن ذحين كل شي اتغير أو حيتغير...! قطع تفكيري خروج جود من الحمام،ابتسمت:هلا والله بإلي تحبني...! طنشتني جود و مشيت:مين قال إني ما أحبك...؟! عضيت شفتي على فلتة لسانها عشان أكتم ضحكتي،قلت و أنا أساعدها في الطلوع للسرير و الجلوس عليه:أنا..كنت أظن إنك ما تحبيني لكن اكتشفت إنك تموتين على أرضي...! -لا يا شيخ...؟! فجأة جود صرخت:وجع..غلطت..كنت بقول مين قال إني أحبك...هييي إنتا لا تحسب إنو هدا اللاوعي حقي قال الحقيقة ترى بس غلطت...! -أقووووول لا تطفشيني باللاوعي ذا..ترى ما أفهمه...! كانت حتبدأ تتفلسف لكني سكتها بـ:أحبك و تحبيني و قفلي هذا الموضوع نهائياً...! -غصب هوا...؟! -ايوة غصب و ذحين مع السلامة عندي مشوار مهم...! -وين...؟! و لإني عارف إنها ما حتخليني قبل ما تعرف قلت:واحد صاحبي تعبان بروح أزوره،زيارة بسيطة و راجعلك...! -و تخليني لحالي...؟! مسحت على شعرها و أنا أقول:حبيبي أهلي ذحين جايين في الطريق قربوا...! -و سعود..كيفو و وينو و مع مين قاعد و... قاطعتها:بس يا ساتر..سعود ما فيه إلا العافية و جاي مع أهلي...! قالت بلهفة:والله...؟! ابتسمت:والله...! و شكلها كذة رضيت و وجهها نور...آآآه يا ذا الوجه،إن ما وريتك يا سعيد..نروح لجهنم ها...؟!،أنا إلي بوديك جهنم...! أووووووه أعوذ بالله من الشيطان الرجيم..علي..إنتا منت رايح للمشاكل..بتتكلم بهدوء و بتخرج..بالهدوووووووء...! و رحت لبيت عمي الثور سعيد و يوم وصلت فتح لي عبدالإله الباب باستغراب..يحق له؛هاذي ثاني مرة أجي فيها ذا البيت،الأولى لمن طلبت من عمي جود و ياااااا كرهي لنفسي ذيك الأيام و الثانية هاذي هيا..قلت:السلام عليكم...! -وعليكم السلام..هلا...! -كيفك...؟! -الحمدلله..كيفك إنتا...؟! -بخير..أبوك وين...؟! -آآآآه..روح عالمجلس و أنا بناديه...! -محد في طريقي...؟! -لالا...! رحت عالمجلس إلي أشر لي عليه..نفس ذاك المجلس إلي قعدت فيه أول لكن أول جيت عشان مصلحتي و مضرة وحدة إلي هي جود..مصلحتي لإني حبيت جود و مضرة لإني عرفت إنها تكرهني و ما تبغاني..لكني كنت أناني و مو عقلاني..طايش و أهبل..لكن ذحين كل شي متغير..جيت عشان مصلحة جـ..أو خليني أقول مصلحتي إلي ما بتسير إلا إذا جود ارتاحت و صدقوني ما أبالغ..أنا شاك في إن ربي رجع لجود حقها مني بالتعلق الشديد إلي صاير فيا تجاهها و في حبي إلي يخليني أتقبل كل كل كل شي منها...! جا عمي،وقفت له،سلمت عليه،و لمن طلب الشاهي قلت:أنا ماني جاي أشرب شاهي يا عمي..أنا جايك في موضوع...! -خير..محتاج شي...؟! كان عمي بارد بشكل كريه..قلت:لا..تسلم ما تقصر لكن... سكت لثواني بعدها قلت:إنت أكيد سمعت بالحادث و بإلي سار...؟! سكت عمي لمدة مو قصيرة بعدها قال بانزعاج بان في ملامحه:ايوة سمعت...! -و سمعت إن جود "غمضت عيني وبلعت ريقي" جود يا عمي كانت..كانت حامل و.. قطعت كلامي لمن طالع فيا لثواني مصدوم بعدها قال بسرعة و هو مقطب حواجبه:الله يعوضكم...! سحبت نفس:أنا..جسمي أحسه مكسر و ولدي سعود جاته حساسية صدر من الغازات و الأتربة و الأشياء ذي..و حط في بالك إن عمره سنتين و نص...! قال بهدوء:قلت جايني في موضوع..هذا الموضوع...؟! سحبت نفس أبغى أمسك أعصابي إلي شكلها بتنفلت،قلت مباشرة و في الوجه:دعاوي على جود..وقف...! قطب عمي حواجبه،قلت:اتصلت عليك تقول كل عام و إنت بخير تقوم تدعي عليها...!،أنا ما أطلب منك تعاملها كبنتك..كل إلي أبغاه منك توقف تدعي عليها...! قال عبدالإله باحتقار:و هاذي ما تخلي شي في فمها...؟! طالعت فيه،أكرهه..طبيعته و حركاته مستفزة،قلت:لم نفسك عاد..أنا ماني جاي للمشاكل...! قال عمي:في بيتي و تهدد ولدي...؟! -أنا ما أهد... قاطعني عبدالإله:ايش تتوقع من واحد قبل يتزوج وحدة زي جود...؟!،أصلاً ما قبل بها إلا وهوا زيها...! أنا هنا أعصابي ثارت،وقفت و مسكت عبدالإله من ياقة ثوبه و وقفته:جود أحسن منك يا.."بسخرية"..ولد الرجال...! وقف عمي بسرعة عشان يباعد مابينا:بس إنت وياه..اذكرو ربكم...! تركت عبدالإله بعنف و صرخت على عمي:لو تعرف ربك ما كان هاذي حالة بنتك...! المفاجأة كانت عبدالإله يدفني من كتفي:هييي إنتا لا ترفع صوتك على أبوية...! من ضربته عرفت إن ماله بالضرب،قلت بتهديد:عبدوووووه..ابعد عني..ترى بتندم...! قال بتحدي:وريني ايش بتسوي...؟! تعرفوا الشباب الصغار لمن يسووا نفسهم أقويا و يتفرعنوا...؟! -أوريك...؟! التفت لعمي و قلت بابتسامة مرعبة واسعة:ولدك بدأ يستفزني...! قال عبدالإله بصوت عالي:طبعاً استفزيتك..أبوية..زوجت جود الخربانة لولد شوارع..ايش راح يخلفو ذول...؟!،والله بتخرب البلد...! سحبت نفس و رفعت أكمامي و قلت ببرود:بوريك أولاد الشوارع ايش ممكن يسووا...! و خلال ثواني كنت منهال على عبدالإله بالضرب..أحكيلكم إلي سار بغليل مشفي..مشفي جداً...! أخخخخخ..يا حسيت بلذة بعد ما ضربته..لذة عجيبة..رغم إني خرجت من بيتهم على صراخ عمي و شتم عبدالإله المصقع..طبعاً خرجت مطرود و لا يغركم طريقة الروي الهادية..ترى الوضع كان مرة توتر و حساس لكن البركة في هانم جرة –الهبلة - البارعة جداً في وصف المشاعر الثائرة..يعني أنا كنت معصب و زعلان لكن زي ما قلت..البركة في جرة...! ******************************************* تستأنف جود الروي،،، السلام عليكم..انقطعت عنكم كتيييير..صح...؟!،لكن والله غصباً عني غير تعبي الجسدي تعبي النفسي..الله يسامحك يا بابا الله يسامحك..خلاص..ايشبي...؟!،هدا قدر ربنا...! اندق الباب،رفعت الطرحة على راسي خوفاً من إنو يكون الدكتور أو الممرضة،لكنهم كانوا أهل علي و معاهم..سعود...! قلت بلهفة:سعود حبيبي سعود...! سلموا عليا،كلهم كانوا فيه حتى زوجة أحمد..قربت أحلام مني و هيا شايلة سعود:أحطه فوقك عادي...؟! -ايوة ايوة...! حطت سعود فوقي..حضنتو بقوة:حبيب ماما إنتا...! سعود كان متمسك فيا،اتكيت على ظهر السرير و سعود كان حاط راسو على صدري و مسترخييييييي..حبيبي..تعرفوا متى يسوي دي الحركة..يسويها لمن يكون مشتاق ليا...! شوية إلا لينا تنطنط عند عمتي..شالتها عمتي و سوتلها نفس الحركة إلي أنا مسويتها لسعود،ضحكت أنا..بعدها جات في بالي فكرة حلوة،قلت:لينا...! طالعت فيا:نعم...! -عندي فكرة..ايش رايك تكتبي عالجبس...؟! طالعت في مامتها بعدين فيا:ليش...؟! -عشااااان..بس أبغاكي تكتبي عالجبس...! نزلتها عمتي:يلا روحي اكتبي...! -ما عندي ألوان...! قال عمي:ما شاء الله..ناوية تبدع...! قلت:لينا حبيبي قلت تكتبي..خدي القلم إلي في جيب بابا...! طالع عمي في جيبو العلوي:هذا ناشف...! ضحكوا صفاء و أحلام..قلت:يقولك أغلب الرجال كده..يحطوا في جيوبهم أقلام ما تكتب ...! دورت عمتي في شنطتها:أنا عندي قلم...! أخدتو لينا بحماس و نطت فوق السرير،قالت عمتي بشدة:بشويش يا لينا...! قلت ورا عمتي زي الهبلة:بشويش يا لينا و لا تبغي تكسريني أكتر...! قالت لينا و هيا مبوزة:أنا نتيت (نطيت) بشويش...! -يلا يلا طيب..اكتبي...! -ايش أكتب...؟! -اكتبي أي شي...! نطت صفاء و قالت بطفولية:أنا أبغا أكتبلك كمان...! قلت:ايوة اكتبيلي عالجمب:أكتب لك على الجوانب لأنك أحلى من الأجانب بعدين تمني ليَ العيش في ظل والدي الكرام...! ضحكوا،قالت صفاء:انقلعي بطلت دي الحركات من يوم المتوسط...! أحلام:لاااا أنا الحمدلله ما وصلت سادس إلا و أنا مبطلتها...! التفت صفاء لأحلام بقهر:يعني زيي...! -لا والله..حبيبتي إنتي لين ثالث متوسط و إنتي في أوتجرافاتك...! قال عمي بتفكير و هوا يهز راسو:اييييييييه أتذكر..جاتني صفاء و لقيتك يا أم أحمد كاتبة لها قلت أنا و أمك واحد فزعلت مني...! قلت:يا سخيييييييييييفاااااااا....! ضربت صفاء برجلها الأرض:ليش قاعدين تطلعوا فضايحي...؟! قلت:هوا كده..بين فترة و التانية لازم نمسك أحد و نشرشحو و لو كنت عايشة معاكي ديك الفترة كان ما خليت شي..بس للأسف...! قالت لينا:إنتي ايش حرفك...؟! -الجيم...! -إلي أمو ضربتو في راصو..(راسو)...؟! -أووووووه هيا دي القصة لسه عايشة...؟!،لأ أنا إلي أمو ضربتو في بطنو...! كتبت لينا شي بعدها قالت:إنتي أمك ضربتك في بطنك...؟! -لأ..بس أنا ماما هيا جدة و جدة كانت دايماً تضربني في رجلي...! يااااااه يا جدة..والله اشتقت لها...! -ليش...؟! -مادري..لمن تشوفيها اسأليها...! رفعت لينا ايدها و قالت بفخر:خلصت...! و طالعت فيا،رفعت نفسي أحاول أشوف..بشكل عام كانت مسوية شخبطة،قلت:واااااااو ما شاء الله...! التفت لصفاء:الله يسعدك تعالي شوفيلي ايش كاتبة...! جات صفاء و قالت و هيا تسحب القلم:قلب و سهم و جيم و لام...! -آه طيب...! ناديت لينا فجات و انضمت مع سعود الشبه نايم لحضني،تكلمو و هوا مطنشهااااااا...قالت صفاء ببوز:حكتبلك...! بعدت بعد شوية:"خلصت"،التفت لعمو وعمة وقلت بتردد :آآآآه .. ينفع إنتو كمان تكتبولي...! ضحكوا و قامو و كتبو من جد..وي ايشبي...؟!،فرحت..والله أتاريني هبلة أفرح من أي شي...قامت بعدها أحلام و كتبت و بعدين رجعو القلم لعمتي...! فجأة و دون سابق إنذار انفتح الباب،التفتنا مفجوعين،كان علي و حسيت إنو مسك صرخة كان حيصرخها في آخر لحظة لمن شاف أهلو...! سلم عليهم و جا و شال لينا و سعود بعفاشة شوية:يعني منتو شايفين رجلها مكسورة...؟! وجعععععع..ليش يشيل ولدي كده..والله لو مو أهلو موجودين كان صرخت عليه لكن أخاف يفشلني و يهزأني..تعرفوا..الرجال هبل لمن يكونوا معصبين...؟! قال عمي بشدة معهودة مع علي:وش فيك...؟! -تعبان يا أبوية..أبغا أنام...! و راح و انسدح على سرير المرافق و أعطانا ظهرو..أففففففف..أكره علي لمن يكون كده..يعصب فينكد عالكل..يعتقد إنو طفشو و تململو سبب مقنع عشان يصرخ و يهزأ كل إلي حولو...!>>>الوحدة لمن تعيش مع واحد تكتشف كل عيوبو...! قعدوا أهل علي شوية بعدها راحوا و تركو سعود عندي و علي موجود فعادي...! طالع سعود في علي و سأل بهمس:نايم...؟! سألت بنفس الهمس:ليش تسأل...؟! -عسان..(عشان)..أزلس..(أجلس)..فوقك...! ابتسمت:عادي حبيبي بس اطلع بشويش...! طلع سعود و قال و هوا يوريني يدو:ماما سوفي...! -ايش حبيبي...؟! -دودو...! مسحت عالجرح:معليه حبيبي إن شاء الله يروح...! أشر على وجهو:دود ودودو دودو..مو حَلولو...! قلت و أنا أبوس الجروح على وجهو:إلا حلولو و ستين حلولو..بعدين حبيبي هدي خدوش صغيرة..تروح بعد مدة...! حسينا بعدها بحركة علي،قلت بصوت واطي:يلا يلا انزل بسرعة...! نزل سعود من فوقي،و راح و جلس عالكنبة بصمت و هوا مخفي ابتسامتو..كان متحمس..يتحمس سعود لمن نسوي أنا و هوا شي من ورا علي...! جلس علي..نقل بصرو بيني و بين سعود بعدها قال:فينهم...؟! -راحو...! -ليش...؟! طالعت في علي و أنا أفكر في إجابة للسؤال الغبي إلي سألو...!،صرخ علي فجأة:أهلك ما جو...؟! بسم الله الرحمن الرحيم..ايشبو دا يصرخ...؟!،قلت:والله ما كلموني..كلموك إنتا...؟! وقف:ايوة كلموني..عندك مانع...؟! -لأ..بس ايش قالولك...؟!،حيجوا...؟! صرخ:ايوة حيجوا..ولا ما تبغيهم كمان...؟! و راح للحمام الموجود في الغرفة..لااااا إله إلا الله..بالله عليكم ايش سويت دحين عشان يصرخ فيا...؟!،غبي...! -ماما...! التفت لسعود،قلت:نعم حبيب ماما...! قال سعود بتفكير و هوا رافع سبابتو:بابا..يسلخ..(يصرخ).. علشان هوا.."سحب نفس و بلع ريقو"..هوا ما..ما يعلف..(يعرف)..مسكين ما يعلف...! -ما يعرف ايه حبيبي...؟! قال سعود بقلة صبر و كأني أنا الهبلة إلي ما أفهم:هوا ما يعلف..خلاااااااس ما يعلف و بس...! -طيب خلاص ما يعرف و بس...! خرج علي من الحمام،قال و هوا رافع حاجبو:سمعت اسمي...! ابتسمت:سعود كان قاعد يقول إنو هوا مرررررة اشتاق لك..صح سعود...؟! هز سعود راسو بايوة..ههههه..يعجبني في سعود إنو نبيه..مستحيل يفضحني قدام علي في حالات زي كده...! راح علي لسعود،شالو و جلس عالكنبة و جلسو فوقو:طيب يا سعود أنا بقولك شي...! طالع سعود في علي فقال الأخير:شايف رجل ماما مجبسة صح...؟! -ايس يعني...؟! رفعت البطانية عني و قلت:هادا الشي الأبيض إلي لينا كتبت عليه اسمو جبس...! قال علي:ايييييييييوة..معد أبغا أشوفك تجلس على رجل ماما لييييييييييين ما نشيل الجبس إن شاء الله...! قلت:علي...هوا يجلس على فخدي و التجبيس من تحت...! -ولو..خلاص قلت معد يجلس يعني معد يجلس...! آآآآه آه يا ربي..يا ناس صفقوووووووه..ايش إلي ولو..الرجال عليهم طلعات أحياناً...! قال سعود بتكبير عقل:تيب...! قلت:علي أهلي متى حيجوا...؟! -بكرة...! -آها...! و الصراخ داك كلو و آخرتها بكرة..والله على بالي حيجوا دحين فعصب من إنو الوقت متأخر...! قلت:علي ايش رايك إنتا و سعود تكتبولي عالجبس...؟! اتحمس سعود للفكرة أما علي فسوى نفسو ما يبغى..الغبي؛أنا عارفة إنو رومانسي و يحب دي الحركات القرعة..لكن يسوي نفسو مو مهتم...! ******************************************* الحمدلله..حالي أحسن..يعني..سواءً جسمي ولا نفسي و بكرة الصباح قالولي حخرج،يااااا الله اشتقت لنفسي في بيتي مع زوجي و ولدي...! كنت جالسة عالسرير،فوقي سعود _و على فكرة عمو هزأ علي و خلى سعود يجلس فوقي_،عمو و علي عالكراسي،جدة كانت فيه بس راحت قبل شوية لأنها ما تقدر تسهر و كده و يا ناااااسو عليها أول ما شافتني بكيت و سوت مناحة و زعلت من علي لأنو وداني الديرة حقتو و علي قعد طوووووول القعدة يتأسف منها..و الله جدة حبيبتي تحبني بس تسوي نفسها ما تهتم...! فجأة اندق الباب،قلت باستغراب:فيه أحد حيجي...؟! ما كملت جملتي إلا و بالباب ينفتح،و للمفاجأة كان بابا...! انصدمت..ايش يبغى دا...؟!،ليش جا...؟!،آخر شخص أتمنى أشوفو هوا بابا...!،اعتدلت في جلستي و أنا أسمعو يقول:"السلام عليكم"،علي و عمو وقفو و هما يردوا السلام عليه...! علي كان متحفظ و التوتر باين عليه..ليه ما أدري...!،أما عمو فكان وجهو..وجهو كان متهلل...! ازدادت نبضات قلبي و أنا أشوف بابا متجه ليا،قال:الحمدلله عالسلامة...! -آآ..احم..الله يسلمك...! قال بهدوء و عمق:كيفك...؟! قلت و أنا أرجع قصة وهمية ورا أدني:الحمدلله...! قال بابا و هوا يمسح على شعري:كل عام و إنتي بخير...! أنا من غير ما أحس بعدت ايدو بعنف،انتبهت للي سويتو لمن شفت الصدمة و الحرج على وجه بابا،قلت أدارك الوضع:و إنتا بخير...! طالعت في عمو أبغى تفسير للي قاعد يسير فابتسم بتشجيع،قطبت حواجبي،قال سعود:ماما مين دا...؟! حطيت راس سعود على صدري و قلت من غير ما أحس:مـَ..مادري...! وقف عمو و جا لين عندي:ما تدري...؟!،حبيبي هذا جدو...! قال سعود باعتراض و هوا يرفع راسو عن صدري:ما عندي زدو..أنا عندي أبوية...! شال عمو سعود و اتوجه لبابا و هوا يقول:عادي..يسير عندك أبوية و جدو...! -لأ مو عادي..أنا ما أحبو...! طالعنا كلنا في سعود مصدومين،أحرج بابا،لكنو ابتسم بمجاملة:ليش ما تحبني...! نزل عمو سعود بعد ما انتبه لمحاولتو النزول للأرض،قال سعود و هوا يطالع في بابا:عسان إنتا ما تحبني..أنا ما أحبك...! حط بابا ايدو على راس سعود:إلا أحبك و أموت فيك...! قال سعود و هوا يبعد ايد بابا بطفولية:سييييل يدك..لا تمسك سعلي (شعري)..إنتا ما تحبني لا تقعد تكدب...! خفت يكون مسوي شي لسعود،قلت:سعود حبيبي ليه تقول كده...؟! التفت ليا سعود و قال بانفعال و هوا يحرك يدو:ما يلضى..(يرضى).. يسلم عليا..يسلم على كل الناس ما يسلم عليا...! -معليه حبيبي معليه..تعال...! جاني سعود،اتسلق السرير و جلس في حضني،قلت:حبيبي أنا كم مرة أقولك لا تكلم أحد ما تعرفو..و لا تروح تسلم على ناس ما تعرفهم...! كان سعود حيتكلم لولا علي إلي وقف و قال بانفعال:طفل..طفل ماله دخل بسخافاتك و مشاكلكم...! اتجه علي ليا،و شال سعود و خرج من الغرفة،وقف بابا بعد ثواني من تنكيسو لراسو:أنا أستأذن...! و خرج..وتر الجو و خرج...! حطيت راسي بين يديني لثواني بعدها رفعتو و طالعت في عمو،جلس عالكرسي:كلمني سعيد على كل إلي سار...! -ايش إلي سار...؟! -مكالمتك له،روحة علي و المضاربة إلي سارت...! -مضاربة...؟! قال عمو بدهشة:ما تعرفي...؟! -عمو ايش فييييييه....؟! اتنهد عمو:علي راح و كلم أبوكي في بيتو فانفعلو و اتضارب علي مع عبدالإله...! انصدمت:علي في ايش كلم بابا...؟! -قالو لعد يدعي عليكي و قالو مو لازم تعاملها كويس أهم شي تبطل تدعي عليها..إلي سار إنو عبدالإله اتطاول شوية فانفعل علي و ضربو...! قلت بقهر:أحسن...! عبدالإله ينرفزني..ينرفزني أكتر من بابا،قال عمو:لكن يا جود علي بالغ في ضربو..أنا شفت عبدالإله..ضربو بقوة...! -أحسن يستاهل..عبدالإله من يومو قليل أدب و ما يحترم أحد...! سكتنا..إلي قطع الصمت كان أنا..قلت و عيني على حضني:تعرف عمو..بعد إلي سار قررت أبطل أحاول أسترضي بابا..خلاص هوا يكرهني..معد حذل نفسي و ما رح أسمح له يحتل و لا ثانية من تفكيري...! فز عمو:جود لا تقولي كده...! قلت و دموعي تنزل على خدي:في قلبي شي عليه يا عمو..إحساس يخنق ما قد حسيتو تجاه أي شخص في حياتي كلها...! -جود سعيد اتأثر..الحادث خلاه يلين...! قلت و أنا أحس دموعي وقفت:نعم...؟!،و إذا اتأثر يعني...؟! قال عمو بحنان و هوا يمسح على ظهري:خلاص يا جود خلاص..كل شي حيتصلح..سعيد مصر يستسمح منك و يعتذر...! -عمو..مو..خلاص..أنا تعبت معد أبغا أشوفو...! سكت عمو رغم رغبتو الواضحة في الكلام..و سكت أنا كمان...! ******************************************* قلت بقلة صبر:علي لو سمحت اطلع برة...! كنت قاعدة أغسل في المطبخ و علي صارع أهلي..ضحك و هوا يلف ايدو على خصري:حرام عليكي..فرحان بخرجتك من المستشفى...! -قلتهاااااا..خارجة من المستشفى يعني تعبانة و حالتي حالة و بالغصب أسوي شغل البيت..لا تجي و تزعجني إنتا كمان...! همس علي:والله مشتاق لك...! قلت و أنا على وشك أبكي:والله هلكانة...! آآآه يا ربي لو سعود كان صاحي كان تركني في حالي و ما اتجرأ يزعجني في المطبخ...! -و أنا قلت لك اشتغلي...! -أسيب البيت مقرف يعني...؟! -لا..لا تسيبيه مقرف بس كمان لا ترهقي نفسك..اسمعي..أنا بساعدك...! -والله...؟! قلتها بلهفة و سعادة،قال:بس على شرط...! -إنتا تأمر أمر حبيبي...! -نروح ننام بعد ما نخلص شغل...! -بس كده..نروح ننام ليه ما ننام...؟! و ابتسمت ابتسامة بلهة،قال:جووووووووود... -طيب طيب إلي تبغاه حيسير بس تعال ساعدني...! و بدأ علي يساعدني..صح تعبت و أنا أقولو كيف يسوي دا و وين يحط داك بس اسمها في أحد يساعدني...! ******************************************* كنت جالسة عالسرير و جمبي عكازي و أقرأ في الوقت إلي رن فيه جوالي،رفعتو مستغربة،الرقم كان غريب،ما رديت لأنو علي مو موجود بالتالي لو كان أحد يستهبل ما حقدر أنفك منو بإعطاء الجوال لعلي...! رجع الجوال يرن مرة تانية،طنشت..لسبب أو لآخر اتذكرت أيام علي كان يزعجني،ركزت عالمقطع إلي أقرأو:"مابغا أتذكر مابغا..علي زوجي و أبو ولدي..أما داك فمجرد شاب صايع"،أحياناً أحس إنو الشيطان يذكرنا بأشياء سيئة عن أشخاص علاقتنا بهم حلوة و مستقرة..يعني أنا عندكم كمثال..علي أحياناً يقول كلمات أو يسوي حركات تخليني أتذكر أيام قبل ما نتزوج و أول أيامنا مع بعض..الشي إلي يخليني أتضايق لكن أحاول جاهدة أتناسى الموضوع خوفاً من إنو تتأثر علاقتي بعلي..و بعدين علي صح اتغير لكن طباعو و طريقة كلامو ما اتغيرت...! رن جوالي للمرة التالتة برنة الرسالة،و كانت من نفس الرقم،كان محتواها:"ردي يا جود..أنا عبد الرحمن"...! عبدالرحمن...؟!،مين عبدالرحمن...؟!،لحظة لحظة كأنو عندي أخ بدا الاسم...! رن الجوال فرديت:نعم...! -أيوة..السلام عليكم...! -هلا و عليكم السلام...! -جود..أنا عبدالرحمن أخوكي...! -أهلاً... -كيفك و كيف صحتك و سعود كيفو و أبو سعود...؟! كنت حجاوب لكنو قال بحماسة:تصدقي أول مرة أسألك كيفك...! طنشت الجملة التانية و قلت:الحمدلله إنتا كيفك و كيف أهلك...؟! -تمام الحمدلله...! سكت لثواني بعدها قال ببساطة و حسيتو يبتسم:الحمدلله عالسلامة و الله يعوضكم...! مادري ليه حسيت صوتو و طريقة كلامو أجبروني عالابتسام:الله يسلمك و يكفيك الشر...! -مممممم..جود..حاب أعرف لو أقدر أزورك بعد كم يوم...! انصدمت و ما رديت،قال بسرعة:لو مشغولة أو تعبانة عادي...! قلت بصراحة:والله يا عبدالرحمن فاجئتني..أنا أصلاً استغربت اتصالك...! اتنهد بعدها قال بمرح مناقض لتنهيدتو:أنا رجال متزوج و مخلف و مستقل..مالي دخل بمشاكلك مع أبوية..ولا إنتي شايفة غير كذة...؟! -أوكي الله يحييك...! -حطي في بالك ما حجي لحالي...! قلت من غير قصد:ليه...؟!،ناوي تجيب القبيلة كلها...؟! انتبهت للي قلتو و انحرجت لكن عبدالرحمن ضحك:لا بس أنا و زوجتي و بنوتتيني و وحدة تزن على راسي من يوم الحادث:أبغى أشوفها أبغى أشوفها...! قلت باستغراب:مين...؟! -خذي كلميها...! وصلني صوت بعدها:جود حبيبتي كيفك...؟! -الحمدلله..مين..سارة...؟! -ايوة..جود أبغى أجي عندك...! ضحكت على أسلوبها:الله يحيكي حبيبي تعالي...! -طب..طب متى أجي...؟! -إنتي متى تبغي تجي...؟! -أبغاااا..أبغى أجي بكرة يا جود..أبغى أجي بكرة...! -طيب بكرة بكرة..و دحين أعطيني بكلم عبدالرحمن...! سبحان الله رغم إنو الفرق بيننا سنتين إلا إني أجسها صغيرة مرة و أعاملها على كده...! عبدالرحمن:ايوة...! ضحكت:خلاص بكرة تعالو بس بما إنكم ما أعطيتوني خبر من قبل فحتكون زيارة بسيطة...! -بالله يعني..ايش كنتي بتسوي لو معطينك خبر...؟! حسيت بالفرق ما بين أسلوب عبدالإله الساخر و ما بين أسلوب عبدالرحمن الساخر...!،قلت و أنا ما أحس بالكلفة:كنت حجهز عشا لكن دحين والله ساندويتشات و يخب...! -ايواااااا طلعي المستخبي..ساندويتشات ها...؟! قلت بصدق:والله عشان تعبانة ما يمديني أطبخ فـ... كمل عبدالرحمن:فمالو داعي تبرري..احنا جايين نسلم و كمان جايين عشان نسكت الهبلة سارة..طفشتنا بكي..خالاتي يقولو ساحرتها...! ضحكت:سواءً كنت تمزح ولا لأ قولهم إنو حتى هيا ساحرتني...! -و أنا ماني ساحرك...؟! -لأ..المهم..خلاص بكرة حتجوا إن شاء الله...؟! -ايوة بإذن الله بعد صلاة المغرب...! -خلاص أستناكم...! -أوكي يلا ببااااي...! -مع السلامة...! طالعت في الجوال و ما حسيت بنفسي إلا و أنا مسجلة رقمو بـ"عبدالرحمن"...! اتنهدت..أنا ما أعرف من أخواني و أخواتي إلا سارة و عبدالرحمن و عبدالإله..و اتنين من إلي أعرفهم كويسين معايا و طيبين..يعني...؟!،يعني بلاش هبل و مو عشان بابا ما يعاملني كويس أقوم أحط اكس على أسرة بكاملها و مو عشان عبدالإله غبي و ضايقني كم مرة أقوم آخد موقف من أخواتي و أخواني..الواحد لازم يكون متزن و متعقل...! ******************************************* اليوم إلي بعدو بعد المغرب...! علي قال يبغا يخرج لأنو مالو مزاج يقابل أحد لكني عارفة و متأكدة إنو يتهرب عشان المشكلة إلي سارت..أكيد عبدالرحمن و سارة عرفوا عنها..معقول ما اتحسسوا...؟!،سارة و طيبة لكن عبدالرحمن...؟!،أقدر أعرف من تصرفو إنو آدمي شاري راحتو و ما عليه من أحد..شكلو عبدالرحمن من داك النوع من الناس..إلي لو فجرتوا قنبلة جمبهم يقولو بابتسامة:"وي..ايش إلي سار...؟!"...!،أوووووه أنا و وجهي ايش التمثيل الغبي دا...؟!،الخلاااااااصة..سارة و عبدالرحمن داخلين مزاجي...! اندق الجرس،مسكت عكازي و قمت،رفعت نفسي بصعوبة عشان أشوف و كانو هما،فتحت الباب فهجمت عليا سارة:جود يا دبة فجعتيني عليكي...! -سارة بس حطيحيني...! بعدت عني:سوري..ما انتبهت..المهم كيفك..إنتي كويسة...؟! ابتسمت:الحمدلله..."رفعت بصري للبقية"...اتفضلو و.."برجاء"..قفلوا الباب وراكم بالله...! دخل عبدالرحمن و أهلو (زوجتو و بنتينو) و قفل الباب وراه و هوا يقول:أبو سعود موجود...؟! -لأ..اتفضلو...! سلمو عليا،بعدها أنا رحت للبنتين الصغار،ابتسمت و سلمت عليهم..شكلهم كانو مستنكرين،قال عبدالرحمن بعد ما جلسنا:هذي عمتكم اسمها جود...! قالت زوجة عبدالرحمن:هما عارفينك بس مو عارفين ايش علاقتك بهم...! ابتسمت و أنا ألتفت لسعود:حتى هوا..حبيبي سعود هدا خالو عبدالرحمن و هادي خالة... ورطت..ما عرفت ايش اسمها،قالت زوجة عبدالرحمن:خالة حليمة...! ابتسمت:طيب..هادي خالة حليمة و هدولا الحلوتين بنات خالك.."التفت لعبدالرحمن"..كم أعمارهم و ايش أسماءهم...؟! عبدالرحمن:مممممم..يعني احنا جايين نتحمد عالسلامة و نتعارف كمان...! قلت:شفت كيف...؟! قال و هوا يأشر:هذي شهد خمسة سنين و هذي رغد سنتين...! التفت لسعود:ها بابا خلاص عرفتهم...؟! قال سعود بتعالي:أنا سعود...! قال عبدالرحمن بقهر:طب ايش نسويلك...؟! ضحكت:حبيبي خدهم معاك الغرفة و العب معاهم...! لصق فيا سعود:مابغا...! عبدالرحمن:بناتي ما يخوفوا..ما ياكلو أحد...! فاجأتنا شهد بوقفتها،اتوجهت لسعود،شدتو من ايدو:عمة وين نروح؟! ابتسمت:أول غرفة عاليمين...! قامت رغد و مشيت ورا أختها إلي تشد سعود المفجوع،غطى عبدالرحمن فمو بيد و أشر على سعود باليد التانية:كاكاكاكاكاكاااااا..روح لمصيرك...! التفت عبدالرحمن لزوجتو بابتسامة واسعة:والله مخلفين رجالة...! قلت:سعود خواف و ما يحب إلي ما يعرفهم...! ابتسمت حليمة و هيا تهز راسها،يا ناسو عليهم..مادري ليه حسيت عبدالرحمن و حليمة (كوبل) مرة حلو..الله يخليهم لبعض...!،أقولكم..تتوقعوا أنا و علي كده زيهم ثنائي حلو و كتكوت و يا ناااااااسو علينا...؟!...! شهقت و أنا أتذكر:يوه ما ضيفتكم...! يييييييييي الله لا يفضحنا و لا عصير و لا كيك و لا شي...! اتلفتت حليمة حولها،قال عبدالرحمن:يوووووه و الله جبنا حلى و كيك و معجنات بس نسيناها في السيارة...! طالعت فيه:هيا انزل جيبها...! طالع فيا مستغرب،قلت:عشان أنا بس أجيب العصير و القهوة و المادري ايش..ما فيا حيل...! قال عبدالرحمن و هوا يهز راسو:لاوالله و نعم المضيفة...! بعدها خرج..ابتسمت و أنا أمسك عكازي و أقوم و أتجه للمطبخ،رجعت على ورا:سارة تعالي ساعديني...! اتكتفت سارة و قالت بزعل:دحين اتذكرتيني..من أول مطنشتني و أنا إلي رتبت لهذي الزيارة...! -والله حبيبي انشغلت..يعني تعرفي أول مرة أشوف عبدالرحمن أو خليني أقول أكلمو و أقعد مع أهلو...! -ما..ما..مالي دخل..ايش دا..تطنشيني و ما تعطيني وجه...؟! -سااااااارة...! قالت حليمة:سارة وي..عيب..قومي ساعدي أختك...! قلت:حليمة ترى البيت بيتك..تقدري تدخلي المطبخ و تساعدي...! و ابتسمت ببلاهة...قامت حليمة بابتسامة و قومت سارة "الزعلانة" معاها و بعد ما خلصنا تجهيز العصير و القهوة و الشاهي قالت حليمة:خلاص...؟! -ايوة شكراً عالمساعدة ضيوفي...! قالت حليمة بصراحة:حسبت عندك شي متعب تبغينا نساعدك فيه...! -احم..لو سمحتي لا تحرجيني..قولي عفوا و خلاص...! ابتسمت:عفواً...! طالعت في سارة المبوزة،مشيت للتقويم الموجود في المطبخ،سحبت ورقة من الشهور إلي فاتت و مسكت قلم كان محطوط بإهمال جمب التقويم،كتبت عالورقة ايميلي و رقم جوالي و كتبت:"I miss you all the time..that’s why you gotta call me whenever you can..I love you my little cute sis..Jood"مشيت لها و أعطيتها الورقة:عشان تعرفي إنك مو أي شي عندي..هبلة...! طالعت سارة في الورقة بعدها حضنتي و باستني،اتكتفت حليمة:يعني دحين كل الاهتمام وجهتيه لها...؟! طالعت في حليمة بدونية،دقيت سارة:أقولك هدي زوجة أخونا...؟! ابتسمت سارة:ايوة...! -مممممم..مادري على ايش عاجبتو..والله لو مو خوفي من زعلو كان وريتها أففففففف...! طالعت في حليمة المستنكرة ببراءة:والله مو مني..أمس شفت مسلسل زي كده..وقعدت أتضارب مع علي بسببو..هواااا مع أهل الرجال الأشرار و أنا كنت مع الحرمة فقاعدة دحين أقلد أخوات الرجال..تعرفي كنت أمس أقول:مستحيل أنحط في وضع زي كده بس أهو أنا قاعدة مع أختي و معانا زوجة أخونا الحلوة إلي له حق تعجبو إلي.."حكيت راسي"..أنا كمان معجبة فيها...! و طلعت لساني بحرج،ضحكت حليمة:إنتي مجنونة...! فجأة طب علينا عبدالرحمن و صرخ باستعباط:تفتري في أخواتي و أنا مني موجود...؟! حليمة:لااااا مو معقول كل واحد يمثل عليا من جهة....! ^^^^^^^^^^^^^^^^ بعد ما راحو _و بعد ما اتصلت على علي الأهبل و قلتلو إنهم راحو_ فكرت بإلي حصل اليوم و لقيت إنو الزيارة كانت زيارة حلوة..و لأول مرة أتصرف بعفوية مع ناس لأول مرة أشوفهم و أقعد معاهم..حسيت معاهم بالحميمية و الألفة..شي غريب اتسلل لقلبي و شدني لهم..شي غريب بس حلو...! و في النهاية جا سعود و وقف قدامي،قلت:ها كيف حبيبي انبسطت مع البنات...؟! نزل سعود راسو بتفكير:همممممممممم...! هزيت راسي بابتسامة:همممممم...؟! رفع سعود راسو أخيراً و قال:شهد..غبية بـ... قاطعتو:وي حبيبي ليش غبية...؟! رفع سعود سبابتو:ماما..هيا غبية خلاس...! -طب ليييييه...؟! -علشاااااااااااااااان... -ايوااااااااااااااااا قال بسرعة:تطفشنيييييييي..سوي كده..لا لا تسوي كده..ألعابي يا ماما ألعااااابي...! آهاااااا..أصلاً كان باين عليها من يوم ما شدتو إنها قوية و متسلطة..قلت:طيب رغد...؟! ابتسم سعود ابتسامة عريضة:رغد حولة ماما...! وسعت عيوني:حولة...؟!،عجبتك سعود...؟! قال بتأكيد:اييييوة..بس ساكتة و كده تسوي..."رمش سعود بعيونو"...! هزيت راسي:ما شاء الله ما شاء الله...! أقولكم كم عمر سعود...؟!،حوالي التلاتة..طيب رغد..سنتين صح...؟!،ينفع ينفع...! بس ما أقول إلا الله يخلف..و أنا قدهم حدي كابتن ماجد أحبو و يخب عليا كمان...! ******************************************* |
الجزء الخامس (بعد ماذا...؟!،،لم أعد أحتاجك) مادري ليه جا على بالي أروح مكة و أسوي عمرة...! و عشان كده نطيت عند علي في الليل قبل ما ننام لإنو في هدا الوقت يكون علي راااااايق و مسترخي فيلبي لي طلباتي...! طالع فيا:ياااااا هلا...! -أمممممم علي حبيبي ايش رايك لو نروح ناخد عمرة...؟! -واللهِ فكرة جيدة لكن يا جود الحجاج بدأو يجون و إنتي شايفة كيف جدة صارت فكيف مكة...؟! -علي الله يخليك كم لنا منها...؟!،بعدين ما فيها شي احنا كبار....! -طيب احنا كبار و سعود...؟! -سعود يقعد عند أهلك ما فيها شي...! -لكن... قاطعتو و أنا أنقز:الله يخليك الله يخليك.."مسكت دقنو"..فديت هدي اللحية..الله يخليك...! قال و هوا يمسح على لحيتو الصغيرة:هدي اللحية بتنشال قريب إن شاء الله...! قلت بحماس:طب يلا قبل ما نحرم عشان المُحرم ما ينفع يشيل شي من شعرو...! طالع:كني قلت أوكيه خلاص...! حضنتو:الله يخليك..ترا أحبك...! دفني:العبي غيرها..حبك و اعترفتيلي به..خلاص يا ماما خلاص...! ابتسمت لو في الوقت إلي كنت قاعدة أفكر فيه بكل إلي قلتلو..داك اليوم كنت واعبة بدليل إني ما قلت لو عن أصلي و لمن قلتلو أحبك كنت حاسة بضعف شديد و كانت حالتي صعبة و كنت حاسة إني محتاجة علي و لقيتو قدامي أول ما فتحت عيني فقلتها و من قلب..أنا دحين ما أدري هل قلتها بسبب الحاجة و لا هيا كانت موجودة من أول و طلعت مع كل إلي سار...! ************************************** -ماما..تزيبيلي هدية...؟! كان سعود يتكلم،كنا في بيت أهل علي عند الباب عشان نودعهم و نحط سعود عندهم،كنت شبه جالسة عالأرض عشان أكلم سعود،قلت:ايوة حبيبي بس خليك عاقل لا تتعب أمي و أبوية طيب...؟! قال و هوا على وشك يبكي:ماما زيبيلي هدية...! ضحكت:طيب حبيبي..وي وعدتك أنا...! برطم سعود..أنا والله عشان زحمة الحجاج و الأمراض و كده و لا كان أخدتو معايا..لكن أخاف عليه خاصة مع حساسية الصدر إلي جاتو...! فتحت يدِّيني:ما حتحضن ماما...؟! اتعلق فيا سعود،شلتو و أنا أقوم:أوبااااا...! رحت بو لعند علي إلي سلم عليه،قال سعود:بابا..إنتا تزيبلي هدية...! حط علي يدو على راس سعود:ايوة بس لو ما أزعجت عماتك و أبوية و أمي...! سأل سعود ببراءة:يعني عادي لو أزعزت (أزعجت) عمو أحمد...؟! ضحكنا كلنا،قال علي بلؤم:ايوة عادي...! حضنت سعود بالقوة و بستو و رحت لعند عمة إلي شالتو،ودعنا الكل و خرجنا..و انطلقنا في الطريق...!>>>انطلقنا...؟!،ليش حسيت نفسي كأني غرندايزر...؟! قلت و أنا أطالع في علي المركز عالطريق:ما حلقت لحيتك...؟! -بعد ما نحلل إن شاء الله...! -ههههههههههههه...! قال باستغراب:ايش بك...؟! -هههه..مادري..حسيت إني أبغا أضحك فضحكت...! -دوم مو يوم يا رب...! ابتسمت و سكت لثواني قبل ما تبدأ المواضيع و الهرجات تنفتح وحدة ورا التانية لييييييين ما وصلنا مكة و لو إنو الطريق مو طويل بس عشان الزحمة و الأشياء الهبلة التانية زاد الوقت شوية،المهم إننا وصلنا الحمدلله و رحنا عالحرم...ياااااااااه وحشني بشكل...! في كل خطوة من خطوات العمرة حسيت بمتعة خاصة و إلي مفرحني إنو العمرة كانت مع علي و مو أي علي..علي الجديد،حسيتو خاشع..هدي تاني عمرة ليا معاه لكنها غير...! في الفندق حضنتو: I’m so proud of you قال و هوا يحك راسو:آآه... قاطعتو قبل ما يكمل:فخور...! قال بقهر:أعرف انجليزي...! ضحكت:و أحد قال غير كده...؟! -لا بس والله تخلف..أنا ماني محتاج الانجليزي إلا في المطاعم و الأشياء ذي..بالله عليكي بأستخدم كلمة براود و أنا أطلب شي...! ضحكت لكن دي المرة بغرور:احمد ربك ما دقيتك بكم كلمة فرنسي...! -أفففف أكره جامعتك...! -هدا و أنا أداوم يومين بس في الأسبوع...! -إن شاء الله ساعة..برضو أكرهها..القهر وافقت على تعليمك...! ضحكت:طيب ياخي أنا بتصل أطمن عمو و أشوف سعود...! قال و هوا يرتمي عالسرير:قوليلهم تعبان لو سألو عني...! -عمو و أهلك عادي لكن سعود ضروري تكلمو...! -أففففففف...! -و أنا حتصل على صفصف عشان أقل أدبي براحتي...! اتصلت على صفاء،ردت:ألو...! -السلام عليكم...! -و عليكم السلااااااام..كيفك جود و كيف العمرة...؟! -مالك دخل..أعطيني سعود...! -جود يا حيوانة...! -اللهم إني معتمرة...! صرخت بانفعال:هيييييي لا تقعدي تخرفي أدعية..وجع...! قلت برجاء:صفاء حبيبي و الله هلكانة بكلم سعود و أنام...! -الله يهلك شيطانك..قولي آمين...! -شيطاني و شيطانك ياااا رب...! -دقيقة...! بعد ثواني كان سعود يتكلم،قلت و أنا أحس بنشاط مفاجئ:حبيب ماما..كيفك...؟! -تيب...! -وحشتني..أنا وحشتك...؟! -ايوا قد البحل...! -حبيبي..إن شاء الله بعد بكرة أجي..أنا دحين تعبانة،كلم بابا و لا تطول عليه،حتى هوا تعبان...! -تيب...! مديت الجوال لعلي،أخدو مني من غير ما يقوم..قال:ايوا حبيبي...! ضحك علي بتعب:و إنتا وحشتني أكبر من السماء...! -إن شاء الله يا بابا إن شاء الله..حاااااضر...! -يلا مع السلامة...! و حط الجوال على الكوميدينة جمبو،قلت بغيرة طفولية:ليش إنتا وحشتو قد السماء و أنا قد البحر...؟! علي الهلكان ما رد عليا و لا حتى بنظرة،رسلت رسالة لعمر أطمنو فيها و أقولو إني حكلمو بعدين بسبب تعبي بعدها قعدت واقفة لثواني متنحة،اتجهت بعد كده للسرير و أول ما لمس راسي المخدة عرفت علي ليه ما رد عليا..نمت بعمق و أنا مرتاحة...! ************************************** أنا دحين في الحرم..في المحل حق النساء،كنا واقفين نستعد لصلاة الفجر لكن حصل موقف غريب جمبي،كانت على جمبي اليمين وحدة أجنبية بعدها فراغ بعدها و حدة سعودية و من اليسار جدر،كنت أبغا أنبه الأجنبية دي إنو لازم ما نترك بينا فراغ و احنا نصلي لكن السعودية جذبتها بطريقة غير لائقة و مزعجة،سمعت تمتمة من الأجنبية،كنت حأتكلم لكن الإمام كبر...! صلينا و بعد ما خلصنا حطيت يدي على كتف الأجنبية،التفت لي و فاجأني إنها كبيرة سن و نظرتها دلتني إنها متضايقة،أكيد أثر عليها تصرف الحرمة إلي راحت و لا دريت عنها..الله يهديها،قلت: Excuse me..can you speak Arabic…?! هزت راسها بحزن بـ"لا"،ابتسمت: you are mad at that woman..right…?! هزت راسها بايوة..حسيتها مي قادرة تفهمني تمام فاتكلمت ببطئ شديد كمحاولة للشرح: she did what she did because we should leave no spaces between us while praying together…! تابعت بابتسامة: Got it…?! ابتسمت الحرمة بسعادةYes .Thank you..I didn’t know that..I’m having difficulties..I don’t : know that much about Islam and don’t know where or from whom can I find more information …! -well..you don’t really need other’s help..read Qur’an and search for the books talking about Islam at the bookstores and you’ll know everything you want to know…! اتلفت حولي و رحت لجهة المصاحف،دورت على إلي باللغة الانجليزية و سحبتو،رحت للحرمة و مديتو لها: Here.read it and you’ll be fine…and now bye cause I have to go…! و رحت للمكان إلي متفقين أنا و علي نتقابل فيه بعد الصلاة و أنا أفكر:"كيف قدرت أتكلم بطلاقة...؟!،بالعادة أتوتر...!"...! هل عشان النية الطيبة...؟!،هل هوا شي من ربنا...؟!،كل شي جايز...! ************************************** كنا قدام بيت أهل علي عشان يطلعو لنا سعود،ما كنا حندخل لأننا تعبانبين،كنت غايصة في الكرسي بس لمن شفت أحمد متجه لنا اعتدلت في جلستي،كانت ايد سعود في يد أحمد،ياااا الله أستحي منو..أحسو يعرفني و يعرف كل هبلي و فضايحي و الأسوأ من هدا كلو إنو ما زال يعاملني كطفلة...!،من جهة علي ركب أحمد سعود،فتح علي الشباك،قال أحمد:تقبل الله...! -منا و منكم...! -كيفك...؟! -بخير...! ضحك أحمد:صوتك يقول انقلع ماني فايق لك...! -طيب ما دام عارف انقلع...! ضحك أحمد و قال بـ"أبوية":كيفك جودة بابا و كيف العمرة...؟! صرخ علي في الوقت إلي قلت فيه بهدوء:الحمدلله..شكراً عمو...! انفعل علي:جودة اييييييييه و إنتي ليش تردين عليه...؟! صرخ أحمد كمان:إنتا إلي ايه..بنتي هذي مربيها...! كانو يتضاربو و أنا أفكر:"صح والله هوا و عمو و جدة إلي مربيني...!"،ابتسمت..ساعات أتمنى ما يكون فيه غطا لكن..في الجنة بإذن الله...! قال علي بانفعال:يلا طيب..يلا روح..هلكان أنا...! قال أحمد بقهر:وجع..مافي أحد إلا و هزأني عليها..يا عالم زي بنتي زي بنتيييييي...! ابتسمت و أنا أسمع علي يقول:قال بنتي قال..بنتك ما تعدى عمرها خمسة سنين...! ضحك أحمد:يلا يلا..الله معاكم...! و راح دخل البيت...!،ناديت سعود و خليتو يجلس في حضني،كنت أبوسو و أمسح عليه في الوقت إلي كان علي فيه يتكلم و يعطيني تعليمات للمستقبل حول الطريقة إلي لازم أتعامل فيها مع أخوانو..إلي يسمعو يقول عندو درزن أخوان..هوا واحد و راجني به..أخواني و أخواني..يا شيخ طير...! ************************************** حالياً أنا في الجامعة و عندي بريك طويل..ساعتين،و أنا في كل بريكاتي أروح أقعد مع سعود في الحضانة..يعني..تعرفوا أنا أداوم يومين في الجامعة بس و اليومين دي مهي مرة مليانة،أنا ماشية بالهداوة،مني مرة مهتمة بالتخرج،صح مهتمة بالدراسة لكن مابغا أقصر في حق بيتي و زوجي و أهم شي سعود،أنا أحس الدراسة مهمة عشان تشغل وقتي و عشان أضمن لي مستقبل؛لو أي شي سار _لا سمح الله_ أكون قادرة أعتمد على نفسي و ما أحتاج لأحد...! المهم..رحت متجهة للحضانة،دخلت،سلمت عالمسؤولة هناك و رحت أدور على سعود و لمن لقيتو ناديتو،التفت ليا و ترك اللعبة إلي في يدِّو و جاني يجري،شلتو و خرجت و أنا ماشية كنت شايلتو و أكلمو:كيفو حبيبي اليوم...؟! -تيب...! -مبسوط...؟! -إِوَّا...! ضحكت على طرقة نطقو لكلمة "ايوة"،ابتسمت:طب يلا نفطر...؟! دخلت أقرب كافتيريا و أنا أتمنى الشؤون ما يكلموني على سعود؛هوا قلي يبغا يشوف الجامعة و أنا وعدتو اليوم بما إننا على آخر الترم..إن شاء الله يتجاوزو...! رحت لطاولة فاضية،جلَّست سعود و جلست جمبو،حطيت شنطتي عالطاولة و خرجت منها نص سندويتش و واحد تاني كامل و خرجت عصيرين،أعطيت النص لسعود و فتحت لو العصير و قلت:يلا حبيبي بسم الله و كل...! قلت و أنا أفتح عصيري:بشويش بابا..بشويش حبيبي...! حبيبي عساها بقلبي،شكلو جيعان...! بعد دقائق قليلة جات وحدة معايا في الكلاس إلي قبل شوية:السلام عليكم...! رفعت راسي:وعليكم السلام..هلا...! -ممكن أجلس...؟! -اتفضلي...! جلست البنت و قالت بابتسامة:هذا ولدك...؟! طالعت في سعود إلي مو عامل لها بال:ايوة...! -اسم الله عليه يجنن..كيف حالك...؟! طالع فيها سعود لثواني بعدها رجع ياكل،ضحكت:يعني لا سلام على طعام...! قلت و أنا أمسح على راسو:لا حبيبي ما اتغدى أمس و نام قبل العشا...! -آآآه طيب جود ممكن دفترك..أبغا أنقل ملخص محاضرة اليوم...! أففففف..أنا دي الحركات ما تعجبني..يغيبوا و بعدين يجوا ينقلو بالساهل...! قلت:إنتي ليه ما حضرتي...؟! -ها..ظروف طارئة..المهم بتعطيني و لا لأ...؟! شايفين كيف تتكلم..و كأنو حق من حقوقها إني أعطيها دفتري،قلت:بعطيكي لكن ما تاخديه معاكي..انقلي هنا عندي،أنا بريكي ساعتين يمديكي تنقلي...! -أنا برجعه...! -معليه أنا ما حجي إلا التلوت ما أقدر أخليه عندك لين داك الوقت...! -طيب أنا أوصلك هوا لبيتك...! -لا معليش تبغي تنقلي انقلي هنا...! قامت بزعل:شكراً ما تقصري...! و راحت..وجع..قلعة..حركات بلهة؛الترم على آخرو..أكيد تاخد الدفتر و لعد توريني وشها...! قال سعود:ليه لاحت..(راحت)...؟! -مادري عنها..حبيبي كمل فطورو...؟! هز سعودر اسو و هوا يقول بطريقة أهل السودان:آآآآآآي...! طالعت فيه مستغربة و أنا أضحك غصباً عني،قلت:سعود..من وين متعلم دي الكلمة...؟! قال ببساطة و هوا يرفع أكتافو:بابا قلي...! ما شاء الله عليه علي..أنا أناحل في سعود عشان الأدعية اليومية و هوا يتسلى عليه..و على سيرة يتسلى..فكرت قبل كم يوم..هل لو جبت بنت حتسلى عليها و ألعبها زي ما علي يلعب بسعود؛يلبسو ثوب و شماغ و يصورو،يصورو بعد ما أروشو..بعدين يهناه يصور سعود و هوا لابس بس شورت..لا و يحط صور سعود و هوا عريان في جوالو و يستخدمها كـ"وول بيبر"...! أكلتلي كم لقمة و أنا أجاوب على أسئلة سعود إلي ما تنتهي...! بعد حوالي عشرة دقائق رن جوالي،كان عمو،رديت:نعم...! -جود...! كان صوت عمو متغير و غريب الشي إلي خلاني أقول بلا مقدمات:عمو ايشبك...؟! -سعيد يا جود..سعيد أبوكي...! -ايشبو...؟! -تعبان..تعبان...! -اييييش...؟! قال بصوت متحشرج:الله يخليكي يا جود..يبغا يشوفك..يبغا يشوفك...! -نعم...؟! -جود انسي كل شي و تعالي..الرجال لا ياكل لا يشرب لا ينام..السكر و الضغط عندو نازل..جود هوا في المستشفى لكن إلي فيه نفسي...! -نفسي...؟! سكت لثواني بعدها قلت:الله يشفيه و يعافيه...! قال عمو باستنكار:جود...!؟ -عمو ايش تبغاني أقول...؟! -تزوريه...! -أزورو...؟! -ايوة..ردي له زيارتو..زي ما زارك أول زوريه دحين...! سكت شوية و أنا أسمع عمو يتكلم،بعدها قلت:يسير خير إن شاء الله..حكلم علي و أشوف...! قال عمو برجاء:جود الله يرضى عليكي تعالي..أبوكي يبغا يشوفك...! -خلاص عمو خلاص..اهدى إنتا..كل شي حيكون كويس إن شاء الله...! -حتجي...؟! -بإذن الله...! اتنهد عمو:هيا مع السلامة...! قلت:"مع السلامة"،و قفلت...! بابا تعبان..تعبان و يبغا يشوفني...!!!،أنا في مسلسل و لا ايه...؟!،الشرير يمرض في النهاية و يطلب يشوف الإنسان إلي ظلمو...! مادري ليه ابتسمت بسخرية و أنا أقول في نفسي:"بابا يبغى يشوفني"،لسبب أو لآخر اتعوذت من ابليس..خلاص..أروح أزورو و طهور إن شاء الله و أمشي...! ^^^^^^^^^^^^^^^^^^^^ في البيت،،، قلت لعلي:علي..ترا بابا تعبان...! التفت ليا مستغرب:أبوكي إنتي...؟! هزيت راسي فقال:أبوكي سعيد...؟! قلت بقلة صبر:ايوة...! قال بدون تأثر:ليه..ايش فيه...؟! -مادري..عمو يقول تعبان و يبغا يشوفني..أنا خايفة يكون فيه شي خطير...! فجأة و من العدم ظهر الاهتمام على وجه علي و هوا يقول:لالا إن شاء الله كويس..أنا حكلم سعود و أفهم منه الموضوع...! كنت منزلة راسي و ساكتة في الوقت إلي كان فيه علي يتصل على عمو و يستناه يرد،قال بعد ثواني و هوا يسحبني لصدرو: (-ايوا هلا...! -كيفك..الحمدلله تمام..إنتا كيفك و كيف جدة...؟! -الحمدلله..بغيت أسألك عن عمي..تعبان و لا ايش فيه بالضبط...؟! -يا شيخ...! -طيب طيب..ايوا أعرف المكان..لالا..خلاص يسير خير إن شاء الله...! - في أمان الله...!) قفل الجوال و قال و هوا يمسح عليا:جود ايشبك...؟! قلت و أنا على وشك أبكي:بابا ايشبو...؟! رفعني علي عنو و قال و هوا ما سك وجهي بتهديد:لا تبكين..أبوكي ما فيه شي و حسب ما يقول عمك نفسيته تعبانة..هذا كل ما في الموضوع...! قلت و أنا أشهق:طب أنا ليه أبكي...؟! -اسألي نفسك...! -مـَ..مـَ..مدري...! حضني علي:جود اسم الله عليكي ايش فيكي؟!،دايماً قوية ايش صاير لك ذحين...؟! كنت أبكي و علي يحاول يهديني...!،ليش أنا قاعدة أبكي...؟!،ليييييييييييييييييييييش....؟! ************************************** كنا واقفين أنا و علي قدام غرفة بابا إلي في المستشفى،قال علي:جود أنا ما بدخل..حستنى عالكراسي...! قلت بنبرة تايهة و من غير ما أحس:ممكن أطول...؟! -إنتي تبغي تطولي...؟! -ما..مادري...! -جود بتطولي و لا لأ..مو ربع ساعة و ترجعي تتصلي عليا...! -لالا.."ازدردت ريقي"..أبغا أقعد معاه...! شفت في عين علي عدم التصديق لكنو حط يدو على كتفي و شد عليه،بعدها راح،مديت ايدي المرتجفة لأكرة الباب،سحبتها فجأة،بعدها دقيت عالباب و جنبت،انفتح الباب و كان عبدالرحمن في وجهي،كشفت وجهي،ابتسم ليا بهدوء و سلم عليا:كيفك حبيبي...؟! -الحمدلله...! دخلت،عن يساري كان فيه حمام،ما كنت شايفة السرير لكني كنت شايفة أخواتي إلي طالعو فيا مستغربين،اتقدمت ببطء و أنا أقول بصوت منخفض:السلام عليكم...! ردوا السلام،قال بابا بصوت كسير:هلا..و عليكم السلام...! ما عرفت ايش أسوي أو كيف لازم أتصرف،قلت بأعلى من الهمس:كيفك...؟! -نحمد الله على كل حال..إنتي كيفك و كيف سعود و أبو سعود...؟! -الحمدلله بخير...! و سكتنا..بطبيعة الحال كانت الأنظار مركزة عليا..بعد ثواني قال بابا:اجلسي يا جود اجلسي...! رفت نظري له..كان يأشر على كرسي جمب السرير،اتجهت بهدوء للكرسي و جلست و أول ما جلست حسيت بشوية راحة لكن التوتر ما زال موجود،قال بابا:مادري من وين أبدأ يا بنتي...! طالعت فيه و أنا أحس بتوتري يزداد،تابع:أنا غلطت في حقك يا جود...! -ها...؟! نبضات قلبي ازدادت و بطني مغصتني و حسيت إني فعلاً بدأت أعرق...!،كنت بس مستنية الجاي من الكلام...! -أنا إلي خلاني أسوي كذة الشبه إلي... قاطعتو بإني طالعت فيه بحدة..فكرة الشبه تثير أعصابي بشكل..كل التوتر و الاضطراب اتحول لجدية و غضب...! حطيت رجل على رجل و اتكتفت:مو عذر...! قال برجاء:عارف..و اللهِ عارف..عشان كذة أبغاكي تسامحيني..الله يخليكي أنا أحس بالموت...! على الكلمة الأخيرة الكل انفعل و عاتب بابا و "زوجة بابا" و قفت جمبو في محاولة لتهدئتو...! أبعدها عنو:جود سامحيني..أنا مابغا أقابل ربي و أنا ماني مستسمح منَّك..ما حتحمل الإثم ما حتحمل...! قلت بانفعال:كلمة وحدة قاعد ترددها و تتوقع منها تنسيني كل شي..إنتا لك دور في كل شي سيء في حياتي...! قال بسرعة:قصدك زواجك من علي..أنا مستعد أنهي الموضوع...! في هدي اللحظة..تقدروا تقولوا بركان و ثار بداخلي،وقفت بقوة لدرجة طاح الكرسي رفيع الأرجل،قلت بانفعال:بعد ما استقريت مع زوجي و خلفت و ولدي قرب عالتلاتة سنين جاي تقولي أنهي الموضوع...؟!،و تعال هنا..تتكلم عن علي كأنو المصيبة الوحيدة في حياتي رغم إنو سار شي من أجمل الأشياء إلي رزقني هيا ربي و بعدين وينك عني من قبل..وينك عني لمن كان علي و غيرو يضايقوني و يهددوا حياتي و سعادتي...؟!،وينك عني لمن كنت أبكي في كل مجلس أمهات عشان أنا ما عندي ماما تجي معايا...؟!،وينك لمن كنت أحس بالنقص.."اختنق صوتي و نزلت دموعي"..و أنا أشوفك تسلم و تلعب مع كل طفل و تطنشني أنا بسبب ذنب ارتكبتو إنتا...!،و لمن رميتني على علي من غير ما تسأل عنو و فوق كل دا تجي ببساطة و تحسسوا إني أي شي..تحسسوا إنوا تفضل عليا لمن قبل فيا.."عليت صوتي"..بأي منطق كنت تتصرف..بأي منطق...؟! قال و دموعو تنهمر:أبغا أعوضك..سامحيني..سامحيني أبوس رجلك...! قلت ببديهية غاضبة:أنا ما أبغاك تبوس رجلي..أنا أبغاك تسيبني في حالي..لا تدعي عليا..لا تستغل حكم الدين في الموضوع ضدي..أنا المظلومة عمري..عمري ما رفعت ايدي للسما و دعيت عليك رغم علمي بأن ربي ما حيخذلني...! في الغرفة اعترض البعض على كلامي،سكتهم بابا:لا تتدخلوا...! التفت ليا و قال يستجديني:قلت لك يا بنتي..ما بقي لي قد إلي راح..سامحيني...! قلت بألم: دحين .. دحين سرت بنتك .. ما زلت تفكر بأنانية..تفكر بنفسك بس..لمن رميتني على جدة و عمو فكرت بإنو الشبه رح يأذي مشاعرك و وجودي رح يأثر على علاقتك بزوجتك و أولادك،لمن زوجتني فكرت براحتك و تحررك من المسؤولية و حتى لمن حسيت بغلطك و ندمت ما استسمحتني عشاني،إنتا خايف على نفسك من عقاب ربنا..أقولك هيا من دحين لا تخاف ربنا ما حيعاقبك بظلمك ليا..أنا متنازلة..أقولها من جد..أنا متنازلة عن كل حقوقي و ما رح أطالبك أبداً بإنك تمارس دورك كأب معايا بس اتركني في حالي..لا تخرب لي بيتي..خلاص أنا مرتاحة مع زوجي و ولدي لا تجي بعد كل دي السنين و تدمر كل إلي أحاول أبنيه...! قال بابا بضعف:أنا أبغا سعادتك...! رفت بصري له:ولو قلتلك إنو سعادتي في بعدك عني...؟! كان بابا حيقول شي لكني جاوبت على سؤالي:ما حتوافق..و أنا عارفة إنو الحوار إلي دار بيننا حيطلع و بشكل مناقض للواقع و للـ..منطق..حتطلع إنتا المسكين و أنا البنت العاقة..أوكي متنازلة كمان عن نظرة الناس الحسنة ليا بس ما حتنازل بعد كده عن.."سكت لثواني بعدها قلت بقوة"..أوكي خدها مني على بلاطة..لو حصل و صاب زوجي و لا ولدي شي بسبب دعواتك فأنا ما حقصر و أشياء كتيييير متخبية حتطلع..أشياء ضدك..يعني زي ما إنتا كنت مبين إنو أنا قليلة الأدب و إلي ماشية على خُطى "ماما" إلي ما أعرف اسمها حتى..كمان أنا حطلع الأشياء إلي ضدك و ولدي لو فكرت في يوم من الأيام تعاملو بنفس الطريقة إلي كنت تعاملني فيها فلا تلوم إلا نفسك لإني وقتها حنسى كل المبادئ و الأخلاق الحسنة إلي اتربيت عليها و إلي كنت ما حتربى عليها لو كنت في بيتك..و حتصرف تصرفات مجنونة و أنا أقدر على كده...! بابا..كان محطم..قال ببكى:أنا أبغا أعوضك عن كل إلي راح..أنا ما أقدر أنام الليل..أشوفك دايماً حولي..أنا ضغطت على نفسي..معاملتي لك كانت دايماً تحسسني بالذنب لكن أهلي و بيتي و أولادي إلي كانو على وجه زواج..كيف أحميهم من غلطتي..فكرت إنو حياة إنسانة تتدمر أهون من حياة أسرة بالكامل...! قلت بدهشة و عدم تصديق:هذا المبرر الوحيد إلي عندك...؟!،مستحيل..مستحيل كل ديك الحركات و الدعاوي تطلع من إنسان من غير حقد و كره متأصل في داخلو..مستحيل...! اتراجعت على ورا خطوتين:إنتا فظيع..إنتا مو طبيعي..أبداً مو طبيعي...! اتجهت للباب،غطيت وجهي و خرجت و أنا أسمع نداءات بابا،استندت عالجدر القريب و أنا أكابح دموعي...! استوقفت إحدى الممرضات و سألتها عن الكافتيريا،كنت بحاجة للجلوس و كراسي الممرات المرضى أولى بها،قالت الممرضة و هيا تبتعد:فيرست فلوور...! نزلت للدور الأول و هناك سألت عن الكافتيريا،دلوني و رحت،ما كان في الكافتيريا إلا عوائل مشغولة بنفسها الشي إلي ريحني و خلاني أبعد الغطا عن وجهي،جلست و خليت راسي بين يديني المستندة عالطاولة...! رفعت راسي على صوت ضحك عالي و كالعادة كانو شلة شباب معتوه ما يعرف للجدية معنى...! اتوجهت أنظارهم ليا بما إني من غير رجال،ما عملت لهم بال..إلي فيني مكفيني...! جلسو على وحدة من الطاولات،همسهم و ضحكاتهم كانت وصلتني...! أحس بالصداع..طلبت شاهي،وصلني الشاهي..و كنت معتمدة عالشاي كلياً عشان يبعد عني الصداع...! سمعت:يعني..كل واحد و مستواه؛ناس مستواها كابتشينو..ناس مستواها هوت تشاكلت..و ناس شاهي من دون سكر و يخب...! بعدها ضحك...! هل أنا تقيلة دم و لا الكلام بالفعل ما يضحك...؟!،طالعو فيا بنظرات ماكرة،ما عبرتهم و أنا أقوم و أغطي وجهي،شلت شنطتي عشان أخرج..القهر كان لازم أمر من عندهم عشان أخرج،مشيت بثقة مصطنعة لكن المفاجأة كانت واحد فيهم مد رجلو فطحت،بعدها انفجروا بالضحك،انكشف وجهي و حجابي اتهلهل،ما اهتميت..قمت و الكل كان يطالع فيا مصدوم..العوائل الموجودة طبعاً أما الشباب فيتنهدوا من شدة الضحك،ضربت بايدي عالطاولة و بجرأة غريبة قربت وجهي من وجه إلي مد رجلو و قلت:عارف ليه سويت فيا كده...؟! قال بابتسامة مستفزة:لأ....! و رفع حاجبو،قلت:عارفة منتا عارف و حأقولك ليه.."رفعت صوتي مرة و قلت بقهر و انفعال و عدم وعي"..ما انرميت أول ما انولدت عند جدتك..ما عشت منبوذ من أهلك ومن الناس،مو كل ما أحد كلمك اتعرض لمشاكل،ما عذبك أبوك بمعاملتك كأنك حشرة..نقطة سودا..ما اتزوجت غصباً عنك و خلفت..و الشخص إلي اتزوجتو كان حيدمر حياتك و سمعتك..ما دعا عليك أبوك بأبشع الدعاوي،كل ما حاولت تتقرب منو صدك و أهانك و دعى عليك و كل دعاويه تتحق...! مسكتو من بلوزتو:سار لك دا الشي...؟!،سااااااار...؟! الولد كان مصدوم،هزيتو:سار و لا ما سار...؟!،اتكلم..عرفت ليه سويت فيا إلي سويتو..عرفت و لا لأ...؟! قام واحد منهم و قال و هوا يحاول يبعدني عن صاحبو:يا أختي احنا آسفين..خلاص...! بعدت ايدو بعنف،أحكمت لف طرحتي حول وجهي و شلت شنطتي من على الأرض،اتوجهت للباب لكني اتذكرت إني ما حاسبت،رحت للبياع و سألت بوهن:كم الشاهي...؟! كان لبناني و أكيد فهم إلي انقال،قال:لا إِختي خلي الحساب عليِي...! طلعت محفظتي و رميت مبلغ مادري كم..رميت جزء من الطرحة على وجهي و خرجت من الكافتيريا إلي حل عليها الصمت بسببي...! أحس نفسي كأني قنبلة و انفجرت...! اتصلت على علي،رد عليا،قلت بلا مقدمات:تعال..خلصت...! -جود..ايش فيكي...؟! -ولا شي بس تعال...! -جود... قاطعتو:علي الله يخليك تعبانة..تعال...! -جود لو فيه شي قولي لي...! قلت و دموعي تنهمر:علي ارحمني و تعال..مني قادرة أتكلم أكتر...! -خلاص يا جود خلاص جايك...! و في السيارة كان على مقعدي سعود،فتحت الباب،جلست و حطيت سعود فوقي،احتضنتو،قال علي:جود... -بعدين علي بعدين... سعود:ماما أحبت (أحبك) إنتي حِولة (حلوة)...! شديت ايدي عليه..قال سعود:بابا أحبت...! علي:حتى أنا حبيبي أحبك...! -بابا أبا سليت زديد..(شريط جديد)...! -بعدين يا بابا بعدين...! -بابا أبـ... قاطعو علي بحزم:سعود حبيبي خليني أركز عالطريق و ماما تعبانة لا تصدع لها راسها...! طالع فيا سعود:ماما إنتي تبعانة...؟! قلت و أنا أضغط راسو على صدري:لأ حبيبي بس راسي يعورني شوية...! ************************************** يومين مروا عالحادثة..هديت و هديت أعصابي و بدأت أنظر للموضوع بطريقة أخرى...! آه و على فكرة ترا بابا خرج من المستشفى..على أي أساس...؟!،مادري...!،من البداية ليش دخل المستشفى و اتنوم..سألت عمو..قلي:"قلتلك إنو إلي فيه نفسي"،حسيت بالغيض..ليش اهتموا بنفسيتو و ما اهتموا بنفسيتي أنا...؟!؛يعني دحين أحس إنو الكل متوقع مني أسامح بابا و أعاملو ولا كأنو شي..طب ليه أول ما كانو ينظروا لبابا على إنو مو طيب..ليه ما كانو يتوقعو منو يضمني لبيتو و يتحمل مسؤوليتي...؟!،المشكلة إنو ضمي لبيتو و تحملو مسؤوليتي واجب عليه أما أنا فمسامحتو و التنازل عن كل حقوقي عليه مو واجب..لكن ايش أقول في ناس ما تخاف ربها و ما توزن الأمور صح...؟! المهم و المختصر المفيد إني قررت قرار يريحني و محد يقدر يكلمني فيه..قررت أبرو و بس..بر الوالدين واجب من غيرو دنيا الإنسان و آخرتو تضيع و يخسرها..و أنا مسامحتو و حعاملو بالحسنى..أنا مو مثالية لكني أحاول..أحاول قد ما أقدر أحكم بعقلي..بابا يبغاني أسامحو و أنا مسامحتو حتى لو كنت شايفة إنو أناني..أنا بصراحة أبغا راحتي و راحة أسرتي الصغيرة إلي راحتها تمثل راحتي...! لكن..حطوا في بالكم إنو مسامحتي له ما تعني الرضا ما تعني الحب..أنا لسه ما أحب بابا..كمان ما أكرهو..صح يقهرني و يسبب لي قلق و ربشة و شوشرة بس ما أكرهو و أتمنالو الشر...! علي حالياً يتفرج برنامج يتابعو..بالعادة ننام بعد البرنامج..أنا ما أحبو عشان كده قاعدة عالسرير أقرأ...! بعد دقائق دخل علي الغرفة،قلت مستغربة:ما حتشوفو...؟! قال و هوا يغير ملابسو:لأ...! رجعت أقرأ،علي راح لجهتو من السرير،كان هادي و الطفش باين عليه،اتوقعت ينام لكن..لكنو حط راسو على فخدي و دفن وجهو في بطني...! استغربت،حطيت الكتاب على الكوميدينة و قلت و أنا أمسح على شعرو:علي ايشبك...؟! ما رد عليا،قلت:علييييي..فيك شي...؟! اتنهد علي بعدها قال بنبرة هادية و عميقة:كنت أحسب إن حبي كفاية... استغربت:ايش...؟! -كنت أحسب إن حبي لكي كفاية..كنت أعتقد إني لو بنيت علاقة زوجية طبيعية رح ألاقي السعادة لكني ما لقيتها..أفكاري كلها كانت غلط عشان كذة حياتي مبنية على غلط...! كنت حتكلم و أظهر استغرابي من فتحو لدا الموضوع كده بلا مقدمات و لا مثيرات له،لكنو قام عني و قال:الغلط مو غلطك..إنتي يا جود إنسانة رائعة..رغم كل إلي سويته كنتي دايماً تظهري ليا بأحسن مظهر و عمرك ما قصرتي فيا..تسوي كل الأشياء إلي عليكي لدرجة سرت فيها ما أقدر أعترض على الأشياء إلي ما تسويها نتيجة عدم حبك ليا...! -علي ايش دا الكلام...؟! قال بانفعال:هذا الواقع...! انفعلت أنا كمان:أوكي..ما أبغا أعيشو...!،و بعدين أعتقد تتذكر إني قلتلك إني أحبك...! -صح قلتيلي لكن أعتقد كمان إنك تتذكري إنك كنتي تعبانة و تقولي أشياء منتي واعية لها...! قلت بقهر:مين قلك إني ما كنت واعية..مييين...؟!،أنا كنت واعية و عارفة ايش أقول لا تخلي أشياء تافهة تنغص علينا...! -ولو يا جود افترضنا إنك حبيتني أحس فيه شي ناقص..يا جود أنا متأكد من إن إلي سويته قبل فيكي مأثر و أحس إنك مستحيل تنسي...! -صح أوافقك في إن إلي سويتو له دور و مأثر لكنك اتغيرت و... قاطعني:أنا ما اتغيرت..أنا إلي سويته ما كان ممكن أسويه...! قطبت حواجبي:كيف يعني...؟! اتنهد:جود..علي إلي قدامك هوا نفسه علي إلي أول..أنا يا جود كل ما أفكر بإلي سويته أنصدم..لا أهلي و لا تربيتي و لا الناس إلي حولي يخلوني أسوي كذة..ساعات أقول إن أصحابي هم السبب بس أنا كنت كبير كفاية عشان أعرف الصح من الغلط..أنا أحس إني..جود أنا سويت شي غريب علي..شي المفروض ما أسويه..تدرين لو وصل خبر لأحمد أو لأبوية أو لأمي كان ممكن يقتلوني..جود أنا مادري كيف سويت إلي سويته...! -علي اتذكر إنك قبلت تجي البيت على أساس ما فيه رجال...!،مستحيل أحد يسوي كده و هوا..أوكي اسمحلي أقولها..و هوا مو قليل أدب أو شي...! نزل علي راسو بعدها رفعو و قال:جود..لازم تعرفي إنو ما كان عندي لكي أي صورة..إنتي عجبتيني و كنت أبغا أعيش معاكي قصة حب عذري في البداية..لمن كلمتيني عشان أجيكي انصدمت لكن وسوس لي شيطاني..و من الأساس غلطتي لمن سويتيلي بال و غلط عمك لمن حاول يحل الموضوع بإخراجك ليا كطعم عشان أجي و يوريني إنو معاكي و إنو واثق منك..أنا يا جود لمن شفت عمك انصدمت و انتبهت إن كل إلي قاعد أسويه غلط بغلط لكني كابرت و بينت إني أنا كذة...! طالعت في علي مستغربة،قلت:أنا ما كنت مقتنعة لمن طلعتلك حتى شديت شعري و لبست ملابس واسعة و كان شكلي مو حلو...! ابتسم علي:متذكر لكن إلي يحب واحد يشوفه حلو بكل الأشكال..إنتي حتى لمن ولدتي سعود كنت شايف إنك أجمل وحدة في الوجود...! ضحكت:من وين جايب في الوجود...؟! حك راسو:أعتقد من واحد من كتبك...! ابتسمت:طيب..دحين أبغا أفهم شي..إنتا في بداية زواجنا قلتلي إنو عندك صور ليا بس بنية إنك تتذكرني...! -كذبت عليكي...! -علي..مني قادرة أفهم..كلامك مو مترابط،كل شوية تقولي سبب..كل شوية تقولي شي يبطل الشي إلي أنا أحسبو..ما أحس إنو أسبابك و تفسيراتك و أعذارك منطقية و ما زلت مصرة إنك اتغيرت و تغيرك يُعتبر معجزة...! قال و هوا يرفع أكتافو:لو يريحك اعتبريه معجزة...!،لكن أسبابي و حياتي في ذيك الفترة ما أحب أتكلم عنها...! ابتسمت:مو لازم تتكلم عنها.."أخفضت بصري"..تعرف..بابا عرض عليا يخلصني من دي الزواجة زي ما دخلني فيها،رفضت،و رفعت صوتي عليه...! حط يدو ورا رقبتي و قال بملامح لينة:يعني إنتي تبغيني يا جود...؟! هزيت راسي بايوة بعدها همست:الحمدلله بابا ما تاب قبل دحين...! -كيف يعني...؟! قلت بدلع:كنت تبغاني أقولك أحبك...؟! ابتسم فقلت:لو فهمت الجملة إلي قلتها حقولك و كل يوم كمان...! -يااا شيخة...! قلت و أنا أتمغط:و دحين..ايش رايك نعين خير و ننام...؟! قال بخبث:عاد أنا أحلى شي عندي تعيين الخير حقك...! صرخت بصوت رفيع:آآآآه يا منحرف ما فكرت كده...! -ايش إلي منحرف...؟!،أنا زوجك...! -منحرف...! قال بقهر:طفشتيني بكلمة منحرف...! -منننننحرف...! -أقولك أنا زوووووووووووووجك...! ************************************** |
الجزء السادس "بين غرفتي و غرفته خطوتين و لم يخبرني" كنت قاعدة أنا و علي في الصالة لمن رن جوالو،استغربنا،بالعادة محد يكلمنا بعد العصر إلا أهالينا و احنا دوبنا مقفلين منهم...! رفع علي الجوال و قال:مين داق عليا...؟! و رد بشدة عشان لو كان أحد يستهبل و كان كلامو: (نعم...! -ايوة..مين...؟! سكت شوية و هوا مقطب حواجبو بعدها قال بترحيب:آآآه هلا والله هلا فيكم...! -الحمدلله بخير إنتو شخباركم...؟! -الحمدلله أحسن...! باستغراب:لاوالله لسه..ليش تسأل...؟! -يا شيخ الله يهديكم ليش تكلفو على نفسكم...؟! -تحت العمارة...؟! -ذحيييييييين...؟! -ها..لالا والله مو قصدي بس استغربت...! -لالا حياكم الله اطلعو...! -لا والله ما فيها شي بس فجعتوني..يعني ما شاء الله عرفتو رقمي و موقع بيتي و ... ضحك علي:لالا..يلا أستناكم...!) قفل علي و طالع فيا و قال و كأنو يعدد شي في مدرسة:جابو رقمي و عرفو وين البيت و اشتروا جيم بوي أحمر لسعود و ذحين هما تحت العمارة و طالعين لنا...! -اييييييييييييييييش...؟! قلت بعدها أستدرك صرختي:لحظة لحظة..مين دولا...؟! -إلي أنقذونا...! -و طالعين لنا دحين...؟! -أيييييييييييوة...! وقفت بسرعة وقلت:اتأكد إنو المجلس مرتب...! و اتجهت للمطبخ و عند باب المطبخ التفت و كان علي ما اتحرك شبر واحد،اتنرفزت و قلت:عليييييي...! أشر بأصباعو على الباب و هوا يبتسم و بالفعل دق الجرس،وقف علي:شفتي كيف زوجك فنان و عارف الوقت لين شقتنا بالضبط...! -يا ربييييييييي..طب روح افتح لهم و المجلس إن شاء الله مرتب محد جانا من مدة...! راح علي للمجلس و ناديت أنا سعود،جاني سعود في المطبخ،قلت:سعود حبيبي تعرف تلبس لوحدك...؟! -ايوة مامي أنا كبيل..(كبير)...! ابتسمت:طب فاكر بلوزتك الحمرا إلي فيها صورة قرد أهبل يضحك...؟! -ايوة فاكلو..(فاكرو)...! -طيب البسها مع الجينز الغامق و تعال وريني...! -ماما القرد أهبل غبي بس أنا أحب البلوزة عشنها أحمرة...! يا ربي فايقتلو أنا...! قلت:طيب طيب يلا حبيبي روح البس بسرعة و تعال وريني...! راح سعود و أنا كنت أجهز العصير..بصراحة مالي مزاج أسويلهم قهوة و شاهي..بعدين مو هما شباب..يعني المفروض ما يهتمو بدي التفاصيل ولا...؟!،و علي مو داك الفهم في "سلوم العرب" عشان يجي يرجني بعدين فـ..عادي...! جاني سعود و قال:أزنن ماما...؟! ضحكت:ايوة تزنن حبيبي تاخد العقل..فديتك والله...! و جا بيروح بس ناديتو و قلت:سعود ما حطيت عطر...! راح سعود و رجع بعد شوية،تركت الصحن إلي كنت قاعدة أزبطو و نزلت لسعود و حضنتو و شميت ريحة عطري أنا..المفترض إنو يحط من عطرو أو إذا مرة من عطر علي لكن ايش أقول في حركات سعودي إلي ما تخلص...! قلت و أنا أستنشق:عسل ولدي عسل يجنن..هيا بابا خليك رجال لا تلعب و تسوي جلبة و دوشة...! -تِيب...! تركتو:و لمن تروح قول لبابا يجيني عشان يودي الصحون...! و كنت حقولو مو بصوت عالي لكنو راح و جا علي بعد شوية و قال بنرفزة:خير إنتي خير..ولدك ذا فضحنا...؟! -ايييش..ايش قال...؟! -دخل و قال:"قلد سعود" ماما تقووووووووووول..سكتو و قلتلو تعال قلي في أذني...! ابتسمت:طيب ما فيها شي...! قال:المهم ايش تبغيني أودي...؟! شلت صحن العصيرات و مديتو لو:شيل إنتا دا و قول لسعود يجي ياخد الحلا مو تقيل...! قال باستغراب:أية حلا...؟! -لحسن الحظ أمس ما جاني نوم فسويتو و أهوه اليوم احتجتو...! قال و هوا يتناول الصحن مني:كويس كويس...! و راح و جاني بعدها سعود،أعطيتو صحن الحلا و قلت:تقدر تشيلو...؟! -ايوة..أقولك ماما... -نعم...؟! -تعالي اقعدي معانا...! ابتسمت:وي سعود..ما ينفع هما رجال غريبين عني..ما ينفع يشوفوني...! قال سعود بطفش مني و كأني أنا إلي مكبرة الموضوع:يا ماما ما فيها شييييييي..عادي يغمضو عنونهم...! ضحكت:روح روح الله يستر عليك و خليك هادي لا تتكلم بصوت عالي...! قال سعود بطفش من التعليمات:طيب...! و راح و غصباً عني كنت مبتسمة..مبتسمة ابتسامة واسعة بانت منها أضراسي...! أول شي نطق حرف الطاء..تاني شي قال طيب بنفس الطريقة إلي يقول بها علي طيب لمن يكون طفشان..سبحان الله كأنو هوا قدامي..تعرفو كيف لمن يقولو "الخالق الناطق"...؟! و بعد حوالي الربع ساعة وصلني صراخ و ضحك عالي..طنشت لمعرفتي بإنو ما حيعطوني وجه و رحت أشغلت نفسي على اللاب...! و بعد حوالي ربع ساعة تانية جاني علي و سعود إلي جري ليا و نط فوقي و قال و هوا يحط جيبم بوي أحمر عند عيني:أحمرة أحمرة ماما...! علي:يا مفجوع..بتخزق عينها...! بعدت الجيم بوي عني:ايش فيه...؟! قال علي:جابولو جيم بوي أحمر لإنهم شافو حقو إلي خرب مع الحادث...! -آآآه طب مرة شي حلو منهم...! علي:بس والله أحرجوني و ولدك هذا كأنو مو شايف خير..شهق شهقة..أنا انفجعت عليه...! ابتسمت:إنتا تعرف قد ايش كان متعلق بجيم بويو..و بعدين ما فيها شي..بالعكس مرة حلوة حركتهم...! ابتسم علي أخيراً و ارتمى عالسرير و قال و هوا مغمض:فيه أشياء كثير بقولك عليها...! من ملامح علي قدرت أعرف إنو مرتاح فارتحت..الحمدلله لك يا ربي..علي لمن يتكلم بدي النبرة معناتو مرة مرتاح و يكون يبغى يعبر..عشان كده صرفت سعود و أعطيتو كم أمر عشان ينشغل فأتفرغ أنا لعلي...! يا رب..يا رب خليه دايماً مرتاح كده...! ***************************************** اتنهدت..يا ربي..محتارة..أقول لعلي و لا لأ...! أنا حاسة إني حامل..بس خايفة و متوترة..من ايش مادري..شكلي اتعقدت من التسقيطة إلي فاتت...!،سبحان الله..رغم إنو محد قلي عشان ما أزعل يعني إلا إني كنت حاسة..نفس الإحساس إلي حسيتو في حمل سعود و حسيتو في العيد هوا نفسو إلي أحس بو دحين..يوووووووه خليني أقول لعلي نروح نكشف بلا قلق و حيرة...! عزمت أمري و رحت متجهة للصالة،جلست جمب علي،سعود كان يلعب بالجيم بوي بعيد شوية،قلت يعنني بجدية:أبو سعود...! التفت ليا مستغرب:خير...؟! -أنا شاكة إني حامل..يلا نروح نكشف...! قلت الموضوع عااااادي و ببرود و لا كأني قبل شوية كنت مترددة...! قال علي:ايييييييييييييش...؟! -أقولك يمكن أنا حامل...! -و تقوليها بكل برود...؟! قال سعود و عينو على شاشة الجيم بوي:ايس يعني حامل...؟! قلت:حبيبي حامل يعني في بطني نونو...! ترك سعود الجيم بوي و جا بحماس و قال و هوا يدق على بطني:زوة..(جوة)..نونو...؟! ابتسمت:يمكن يا بابا مو أكيد...! طالع سعود فيا بنظرة غريبة:أنا زوة أول...؟! -ايوة...! قام سعود عني و قعد يتفحصني و يلف حولي،جلستو عليا:ايش قاعد تسوي...؟! قال و هوا يأشر على بطني بسبابتو:تلعيه..(طلعيه)..خليه يخلز..(يخرج)...! ضحكت:حبيبي..يمكن فيه يمكن مافي...! حضني سعود و حط راسو على صدري بدلع:نونو يع...! طوقتو بيدي:ليش حبيبي..النونو يسير أخوك و إنتا أخوه الكبير...! -يلعب معايا...؟! -آها...! رفعت عيني عن سعود لمن سمعت علي يقول بجدية:جود... جاوبت قبل ما يسأل:شهر أو شهرين بالكتير...! تابعت:بروح أكشف عند نفس الدكتور إلي أول...! حدَّجني علي بنظرة قاتلة أما أنا فضحكت...! ***************************************** طلعت نتائج التحليل و طلعت حامل..حامل في الشهر التاني..لكني ما أحب أتكلم عند الناس..و علي هزأني:"في الشهر الثاني أكيد مداكي تتأكدي..ليه ما قلتيلي من أول...؟!"،أففففف و الله علي يطفش لمن يعصب..أحس نفسي أسطرو بس...!>>>"أسطرو" تعني أسطره و أعتقد أنها مأخوذة من ساطور أو مسطرة...!>>>بس أنا مابغا أضرب علي بالساطور و لا بالمسطرة..مممم..يوووووووه بلا ساطور بلا ماطور...! المهم دحين..ادعولي أكون حامل ببنوتة..أبغا بننننننننننننت...!،و لين ما يتحدد الجنس و لين ما ينفخ بطني و تطلعلي كروشة حلوة ما حأتكلم...! أوه نسيت أقولكم..عمو مسافر..عشان الشركة إلي يشتغل فيها مسوية مؤتمر مادري اجتماع..المهم حاجة يتجمعوا فيها الكبارية إلي يشتغلو في نفس الشغلة و يقعدوا يتكلمو...!،و الصراحة مادري عمو ايش يشتغل..كده مرة قلي و شرحلي بس ما أفهم..المهم إنو مسافر دحين..مسافر لو يومين و حيرجع اليوم بعد العشا و أنا لازم أروح أرتب غرفتو...! أول ما وصلنا نزلت أنا أما علي و سعود فراحو لمحل الألعاب عشان يشتروا "سليت زديد"،سعود يبغى شريط جديد للجيم بوي الأحمرة حقو...! أول ما دخلت الشقة سلمت على مُنورة..سألتها عن جدة قالتلي تصلي..رحت لغرفتي،صليت المغرب،فسخت العباية و رحت لعند غرفة جدة،كانت مديتني ظهرها و باين إنها خلصت صلاة و جالسة تسبح...رحت و حضنتها من وراها:تقبل الله يا أحلى جدة في الدنيا...! جدة بطبيعة الحال انفجعت..انفجعت و بقوة و خفت أنا عليها..مسكت عصايتها و حاولت تضربني لكنها ما قدرت لإني سحبت منها عصايتها و حطيتها بعيد و أنا أضحك و جلست جمبها،قالت بغضب:هات العصا...! -أعطيكي هيا عشان تضربيني..لأ...! -با بنتي أعطيني عصاتي..لا تلعبين بها...! استحيت من نفسي لمن اتلمست لهجة الاستجداء من جدتي..الشي إلي خلاني أقوم و أعطيها العصاية و المفاجأة كانت تحول ملامح جدة المترجية و ضربها ليا على فخدي:آآآي يعور...! -حيلي حيلي عني بكمل صلاتي...! "حيلي" تعني ابتعدي...!،قبلت راس جدة و سحبت مفتاح غرفة عمو من شنطتها و رحت للغرفة،ولعت الأنوار فيها بعدين اتوجهت للصالة و لقيت منورة تتفرج على ستار أكاديمي..يوووووه الشي دا لسه عايش...؟! قلت:ايش دا...؟! -ستار أكاديمي...! -ايوة عارفة بس تخلف مرة...! قالت منورة بانزعاج:حرام..كل واحد لازم هبيبي (حبيبي)..هبيبي..هبيبي..صوت مو هلو...! ضحكت:هما أصلاً بس عشان الشهرة..فيميس يعني...! -فيميس حرام كده...! -الله يعين..المهم..الله يخليكي ولعي فحم عشان أبخر غرفة عمو...! و رحت لغرفة عمو..دخلتها و رديت الباب..بدأت بالسرير،نفضتو و غيرت الشرشف و بيوت المخدات،نفضت البطانية و حطيتها على جمب عشان أبخرها بعدين،فتحت الشباك عشان تتهوى الغرفة،مسكت الكوميدينة،ما كانت مرة ملخبطة،جمعت الأوراق إلي عليها فوق بعض و جطيتها على زاوية الكوميدينة..كنست الأرضية،مسحت الأرفف بعدها اتجهت للتسريحة إلي أقدر أجزم إنو في زوبعة حصلت عليها،لأول مرة تكون بدا المنظر..عمو دايماً مرتب..ايش إلي حاصل دحين...؟! رفعت أكمامي،مديت ايدي لكني رجعتها و رحت جبت سَبَت (سَبَت تجي بمعنى سلة) كبير شوية و نكت كل الأشياء الموجودة عالتسريحة فيه..حطيت السَبَت عالأرض و مسحت التسريحة و مقابض الأدراج إلي فيها بعدها جلست في نص الغرفة و سحبت السَبَت ليا...! طلعت من السَبَت كل الأشياء إلي توقف زي الكريمات و الغسولات و العطور و العلب الفاضية إلي مادري ليش لسه ما انرمت في الزبالة...! رتبت كل الأشياء دي عالتسريحة بعد ما مسحت الغبار عنها..اتجهت بعد كده للسَبَت..الباقي فيه كان أوراق و بطايق،لملمت الأوراق و حطيتها على جمب،لملمت البطايق و كنت أشوف ايش مكتوب على كل بطاقة..و تخيلو..كان فيه بطاقة لمشغل نسائي..ايش جابها عندو...؟!،تلاقو أحد في الشارع أدالو هيا و أول ما دخل حطها عالتسريحة..هههههه...! حطيت البطايق فوق الأوراق و قمت..حطيتهم في طرف التسريحة التاني..لمن رجعت للسَبَت على أساس أخرجو من الغرفة اتفاجأت بصورة،كانت صورة لشباب في مسبح من بينهم عمو و أحمد...! اتذكرت..هدا حصل لمن عموا تخرج من الجامعة..راح مع أصحابو استراحة،كان عمري وقتهاااااااا..ممم..يجي تسعة عشرة سنين..حتى عمو سوى حادث في طريق الرجعة من الاستراحة،يووووه ما كانت أيام حلوة كان عمو كئيييييييب،رغم إنو سِلم...! لفيت الصورة لمجرد لفها لكني اتفاجأت بكلام عليها...! حسيت بفضوووول و جريت عيني عالسطور و انصدمت بالمكتوب...! "قالها ليَ الطبيب بكل بساطة..(جهازك التناسلي تأثر و قد لا تنجب)،ثم سجل ليَ خروجاً و ذهب..ربما لينقل خبر مصيبةٍ أخرى لمريضٍ آخر...! حينما زارتني تعلقت بها بشدة،طوال السنين الماضية كنت أشعر بأنها مسؤولية كبيرة ظُلمت _أنا_ باضطراري لتحملها لكن الآن..هي ابنتي..ابنتي الأولى و الأخيرة...! احتضنتها بقوة،شكوت لها و أنا أبكي..لم تعي ما أقول لكنها بكت معي مستفسرةً عن دموعي...! في تلك الليلة نامت جود بعدما أرهقها البكاء بين ذراعي،في تلك اللحظة شعرت بالأبوة الحقة..كنت أعتقد بأني أحبها لكني و بعد ذاك الشعور الذي اجتاحني علمت بأنني لم أكن إلا أشفق عليها...! تغير كل شيءٍ الآن..كل شيء..جود ابنتي و أنا والدها و لن أسمح لأيٍ كان بأن يؤذيها..هو عهدٌ أقطعه على نفسي..سأكون ملاذها و حاميها...!" رميت الصورة بفجعة و كأنها شي يلسع و وقفت و بعدت عنها و قعدت أطالع فيها برعب و يدَّيني حاضنتها لقلبي ،سرت أسمع صوت أنفاسي المتلاحقة،قعدت على نفس الوضعية لدقائق،بعدها مشيت ببطء شديد و انحنيت و جبت الصورة و أعدت قراءة الكلام مرة و مرتين و تلاتة...! مني قادرة استوعب..أو يمكن مابغا أستوعب..مادري لكن يدِّي ترتجف و صدري يهبط و يعلو و حسيت بحرارة شديدة في جسمي وإني بديت اعرق...! فجأة و بلا مقدمات انفجرت أبكي و بقوة،قعدت على الأرض .. أبكي بألم و وجع وأنا أشهق...! فضلت على دي الحالة لمدة .. ما أعرف قد ايه .. أبكي وأمسح دموعي إلي مي راضية توقف رغم محاولاتي...! وسط أفكاري و دموعي اتذكرت إني لازم أهدى لإنو عمو حيجي و أكيد بابا أو عمي سعد أو وحدة من عماتي حيجو..أكيد في أحد حيجي..أنا لازم أهدى عشان أستقبلهم...! اندق الجرس..أكيد علي و سعود...! وقفت بسرعة و أنا أمسح دموعي و أرفع الصورة عن الأرض،طويتها و دخلتها في جيبي،شلت السبت عن الأرض و ألقيت على نفسي نظرة في المراية خوفاً من إنو البكا يكون واضح،ناديت:"منورة..جيبي البخور...!"...جات منـ..جا علي بالبخور و وراه سعود المتحمس بشريطو الجديد...! شلت المبخرة من علي و اغتصبت ابتسامة:هلا...! حسيت بنظرات غريبة من علي،قال بعدها:ايشبك...؟! -ايشبي...؟!،ما بيا شي...! -إنتي كنتي تبكي...! ما قالها علي بتساؤل،قالها بجزم و ثقة و تأكد فما لقيت مفر إلا إني أقول بابتسامة حزينة:لا بس و أنا أرتب شفت صورة لجدو الله يرحمو فبكيت شوية...! -إنتي من قبل قلتيلي إنه ميت من قبل ما تنولدين...! -ها...؟!،لالا بس يعني..هوا أنا كنت دايماً أحس لو كان موجود يمكن وضعي حيكون غير فـ..يعني أنا..أحس إنو لو هوا موجود كان يمكن بابا ما يتجاوز حدودو زي دحين...! قال علي:آآآآه يا جود الله يهديكي..ما يستاهل البكا..فجعتيني حسبت فيكي شي...! الحمدلله عدَّى الموضوع على خير..أنا أعرف علي مستحيل يخليني لو شك في شي...! مشيت في الغرفة شوية و بعدها حطيت المبخرة في نص الغرفة،طفيت الأنوار و خرجت و أنا مقررة إني أحاول قد ما أقدر ما أبين شي و أستقبل الناس عادي...!،قفلت الغرفة و حطيت المفتاج في جيبي التاني،شلت سعود و بستو و احنا متجهين لغرفة جدة:كيفو حبيبي...؟! -تيب...! التفت لعلي:اتأكدت إنو الشريط ما فيه عنف...؟! ضحك علي:عنف اييييييه...؟!،القصة كلها يقعد هذا ايش اسمه..يوووووه نسيت..المهم بس يقعد يجمع دوائر ذهبية..و ينقذ الناس و يتسابق و هوا سريع و بعدين فيه شرير و...! قاطعتو بابتسامة:سونيك...؟! -اييييييوة...! دخلنا الغرفة،سلم علي على راسها و يدها،قال:كيف حالك يا أم سعود...؟! ابتسمت..علي مو معترف إلا بعمو رغم إنو جدة كنيتها أم سعد على عم كبير عندي..و أشك إني لو شفتو حعرفو...! قالت جدتي:بخير الله يسلمك يا وَلَدي...! سعود نط عند جدة و جلس في حضنها:زدة سوفي..اسليت سليت زديد..(جدة شوفي..اشتريت شريط جديد)...! و كالعادة جدة و علي لمن يجتمعوا يندمجوا في الكلام و ينسوا إلي حولهم...! أنا كنت جالسة و في حضني سعود إلي نط من عند جدة و جا عندي يبغاني ألعب معاه،كنت أحاول قد ما أقدر أركز معاه،كنت أسرح كل شوية،تركيزي كان مسلوب و كنت مسرحة..و كل ما أحد قال شي أحسبو يقصد عمو..كل تفكيري كان منصب على عمو...! اندق الجرس بعد فترة،قمت عشان أفتح الباب و لمن طالعت من العين السحرية فُوجئت ببابا و أهلو،يا الله أنا ناقصة..لسه دوبي مكتشفة مشكلة عمو...!،مني ناقصة بابا يجيني دحين..مني ناقصة أبداً،بلعت ريقي و فتحت الباب بقلب ينبض بشدة..هدي أول مرة أشوفو بعد المواجهة إلي سارت..المشكلة المواجهة سارت قدامهم كلهم...! حاولت قد ما أقدر أكون ثابتة،قال بابا:السلام عليكم...! رفعت عيني لهم و من دون ما أحس جات على عبدالرحمن إلي كان مبتسم زي دايماً،قلت:و عليكم السلام..أهلاً...! كنت حبتعد لكن بابا فاجأني بإنو اتقدم و حضني:كيفك...؟! حسيت بقلبي ادردب و أنفاسي حارة..ايش دا القرب...؟!،بابا عمرو ما اقترب مني أكتر من قرب الواحد لمن يسلم على أحد بالخد و دا الشي سار من سنين و من غير نفس كمان...!،و بصراحة بدل ما تتحرك عواطفي حسيت بانزعاج...! قلت بصوت واطي:الحمدلله...! و الحمدلله تركني،أعتقد البقية كانو حيسلمو لكن شكلو ملامحي المستنكرة و حواجبي المقطبة نفرتهم..أحسن...! أعطيتهم ظهري و أنا أقول:علي جوة...! رحت لغرفة جدة:بابا و أخواتي و دولا الناس جو..أعتقد لازم تروح المجلس...! علي:طب هما وينهم...؟! -في الصالة...! -طب...كيف أمر...؟! -أمممممم اتحمحم و قول طريق أو أي شي... قام علي بتأفف،من هناك وصلني صوت الحمحمة و:"أنا علي و أبغا أمر..يعني إلي يغطي يغطي و إلي ما يغطي يغطي أحسن"،ضحكت و أنا أساعد جدة على النهوض،التفت لسعود:حبيبي افتح شنطتي و حط من العطر حقك و تعال...! -مين زا...؟! -جدك...! -أبوكي...؟! -ايوة...! -ما أحبو...! قلت بشدة:سوي إلي قلتلك عليه و لا تقول هدا الكلام قدام أحد..يلا بابا بسرعة...! و في الطريق من غرفة جدة للصالة كانت جدة تكلمني:زي ما قلتلك يا بنتي كان...! -إلي يرضيكي بسويه...! للتوضيح:"كان"..يقولوها كبار السن و يقصدوا بها إنو الحدث من الماضي..يعني مالو داعي نفكر فيه لإنو ماضي و جدة تقصد إنو بابا لازم أسامحو و أعتبر إلي سواه من الماضي إلي راح و ما حيتغير...! آآآخ يا جدة عالماضي إلي بيني و بين بابا آآآخ...! دخلت الصالة و أنا مبتسمة..لازم أبتسم..أياً كان هدولا ضيوف في بيت جدتي إلي أعتبرو بيتي..طبعاً ضيوف بالنسبة ليا،المهم.. جلَّست جدة و جلست جمبها،أخواتي و زوجة بابا سلموا على جدة،سلامهم على جدة كان غير عن سلامي أنا..سلامهم كان سلام أي حفيد على جدتو..أنا ما أسلم على جدة كده..أنا أسلم عليها زي أي شخص يجي و يسلم على أمو..جدة بمقام ماما إلا مو بس بمقامها..هيا ماما...! زوجة بابا كانت بتتكلم مع جدة و البنات بيتكلمو مع بعض،سعود دخل بعد مدة و جلس جمبي و كان يطالع الكل بتفحص،ضحكتني نظرتو..و كأنو واحد يقيم بضاعة و لا شي..لا و لمن وحدة تطالع فيه يلصق فيا و يلف وجهو..!! بعد ثواني نطت سارة عندي و قالت بابتسامة سعادة واسعة:كيفك جود...؟! ابتسمت:الحمدلله حبيبي..إنتي كيفك...؟! هل أتوهم و لا الكل عينو عليا...؟! -الحمدلله تمام..سعووووود..كيف حالك...؟! طالع فيها سعود بنظرة تضحك،قال:إنتي أول زيتي(جيتي) عندنا...؟! ضحكت سارة:ايوة جيت عندكم..تتذكر اسمي...؟! ما رد عليها سعود و لف وجهو ما يبغا يطالع فيها،جلست سارة جمب سعود:اسم الله عليه يجنن...! ابتسمت:طبعاً يجنن..ولد جود ما تبغيه يجنن...؟! ضحكت سارة،شدني سعود،دنقت لو،همس في أدني:مين اسمها...؟! اعتدلت في جلستي:اسألها إنتا...! قالت سارة:ميييين اسمي...؟!،اسمي سارة..ليش نسيت اسمي...؟! هز سعود راسو و قال ببديهية:عشان أنا نسيتو..خلاس..خلاس أنا نسيتو...! ضحكت سارة،نط سعود و الله يسامحو راح و وقف قدام زوجة بابا،قال و هوا يأشر عليها:ماما..مين اسمها هدي الحُلمة..(الحرمة)...؟! ما عرفت ايش أرد لكن إلي أنقذ الموقف كان سارة الله يسعدها،وقفت و مسكت يد سعود و قالت:"هدي جدتك"،و مشيت معاه و قالت و هيا تأشر على كل وحدة من أخواتي:هادي خالة خلود عندها بنوتة و ولد حلوين زيك،و هادي خالة مها خلصت الجامعة قبل مدة،و هادي خالة منى تدرس في الجامعة زي ماما و أنا خالة سارة و لا أقولك قولي سارة بس و أنا أدرس في الجامعة،لسسسسه دوووووبي أبدأ الجامعة...! قال سعود و هوا يأشر على نفسو:طب أنا اسمي سَعُود...! فلت سعود يدو من يد سارة و جا يجري و نط فوقي و قال بحماس:أنا عندي اتنين زدة و واحد أمي...! ابتسمت بتوتر و أنا أمسح على راسو،"أمي" يقصد بها عمتي أم علي هوا يسمع علي يقولها أمي فيقلدو...! قالت "مها" فجأة:جود إنتي فرنسي...؟! قالتها بطريقة أشبه بحال ناس دوبهم يتعرفوا على بعض ويحاولوا يفتحوا موضوعات للنقاش .. هزيت راسي بايوة و أنا أفكر إنو أخواتي ما قد أعطوني وجه..كانو دايماً يطنشوني و ما يعطوني وجه..حتى لمن أمهم و بابا ما يكونو موجودين برضو ما يعطوني وجه..كانو بس يسترقو النظرات ليا...!،ليش دحين سايرين يبتسموا ليا و يسألوني و يكلموني...؟!،أو خليني أقول يحاولو يكلموني...!،هل عشان يرضو بابا و لا هما أصلاً كانو يطنشوني عشان خايفين من أمهم أو بابا لا يعصبو لإني فاسدة و ماشية على خطى ماما _إلي ما أعرف حتى اسمها_ و دحين بابا حلل لهم يكلموني فساروا عادي معايا...؟!،و لا ايش الهرجة بالضبط...؟!،تعرفو..فكرة إنهم كانو خايفين من أمهم و بابا مي مقنعة..هما لو من جد حاسين إني مظلومة كان عِملوا زي سارة و عبدالرحمن..صح إنو عبدالرحمن ما قد احتك بيا قبل الحادث بس كان لمن يشوفني يبتسم ليا عادي و لا كأنو فيه شي...! أوووووه و أنا مالي..أياً كان السبب أنا أخواتي مني حاقدة عليهم..الاتنين إلي من جد ما أطيقهم بابا و عبدالإله و إن شاء الله إني حأبر بابا حتى لو ما أحبو و عبدالإله قلعتو ما عليا منو...! و دحين خليني أركز مع البنات بلا ما يقولي عني قليلة أدب...! قالت مها:طب كيف..لإنو مادري بس جايتني هفة نفسي أتعلم فرنسي...! ابتسمت:عادي...! -لأ قصدي أبغا شي مسلي لإنو أنا أتعلم في البيت بنفسي...! -مممم..شوفي هوا أهم شي يكون عندك انجلش كويس لإنو أغلب المواد الحلوة أو المسلية ما تكون بالعربي...! كنت أحاول قد ما أقدر أكون طبيعية...! ابتسمت مها:أصلاً أنا انجليزي...! -آها..طب كويس..أنا عندي لو تبغي صحبات فرنسيين مممكن تكلميهم و تطلبي منهم يفلتو كده في نص الكلام كلمات فرنسي..ترى كده يساعد في إنك تتعلمي كلمات جديدة كمان أكتبلك لو تبغي لستة كتب و أشياء من النت لإنو دورت في أغلب المكتبات ما لقيت إلا دروس و برامج مسوينها مصريين..صـ... قاطعتني منى باستنكار:و إذا مصريين...؟!،ايش العنصرية دي...؟! طالعت فيها..ايش تبغى دي...؟!،حتى ما خلتني أكمل كلامي...! ابتسمت:مو عنصرية..إنتي ما خليتيني أكمل كلامي..كنت حقول صح دروس جيدة و مفيدة بس عشانك يا مها في البداية اللكنة حتركب معاكي و حيكون صعب عليكي تتكلمي زي الفرنسيين و إنتي أول الدروس اتعلمتيها مع مدرسين مصريين و كنت حقول حتى السعوديين لا تاخدي دروسهم إلي منزلينها على الانترنت و كنت حقولك على موقع فرنسي تعليمي كويس..عرفتي يا منى الله يهديكي ليش قلتلها مسوينها مصريين...؟! منى شكلها كده اتفشلت،ضحكت خلود:العجلة مي حلوة...! قلت:لا عادي..بعدين أنا أصلاً من أول محاربي العنصرية في البيت...! قالت سارة:دحين إنتو مو آداب كلكم..ليش ما قد اتقابلتو...؟! خلود:ايوة الله من جد..ليه ما قد شفتو بعض...؟! ابتسمت:أنا ما أداوم إلا أحد و تلوت و البريكات كلها مع سعود عشان أنا أحطو في الحضانة...! خلود:طب ليه ما تدخليه روضة و ترتاحي...؟! -أخاف عليه..أنا حتى في حضانة الجامعة أخاف عليه...! -بس ترى فيه روضات معروفة و مرة محترمة...! -عارفة بس أنا أصلاً أبغاه يقعد عندي ليييين سن المدرسة...! هزت خلود راسها،و سكتنا،أكره لمن الموضوع يخلص خاصة مع ناس مني مرة معاهم و في نفس الوقت لطيفين بغرابة..يعني..هما فجأة و من أول جلسة لنا كانو لطيفين..!! إلي أبغا أعرفو.. هل لو عاملوني و كلموني قبل كانوا حيكونو بدا اللطف و يعاملوني كأختهم و يناقشوني في أشياء بسيطة و ماتنقال إلا في جلسة لناس قريبين من بعض..آآآ..وت ايفير...!،بس على فكرة لمن أكون متعودة عليهم و متعودين عليا يكون عادي زي في بيت أهل علي لمن ما نلاقي شي نتكلم فيه أقول لأحلام و صفاء:"انقلعو..والله تطفشو الواحد"،و أروح أساعد في المطبخ أو أدخل النت أو أي شي...! وقفت بعد ثواني و رحت للمطبخ،سألت منورة:أحد قالك تسوي شي..كشنة أو رز...؟! -لأ...! خرجت و أنا أبتسم:"يسسسسسسسس..نفسي في بيك"،وقفت و قلت للكل:ايش تبغو عشا...؟! قالت زوجة بابا بجمود"ليه من برة؟!"،قلت و أنا أرفع أكتافي:منورة و أنا تعبنا في البيت ننظفو و انهد حيلنا و كمان أنا نفسي في بيك...! اعترضو البنات و قالت سارة:قريب أكلنا بيك...! اتخصرت:يا سلاااااااااام والله محد قلكم..أنا أبغا بيك...! قالت جدة:يا بنتي خذولكم من ذاك الفطاير القبعة ...! -بيتزا هت...؟! -والله مادري ايش اسمه...! قلت:أنقذتكم جدة...! منى:بس هيا قالت خذولكم يعني هيا ما تبغى تاكل...! ابتسمت و أنا أقول بصوت واطي:جدة لمن تبغى شي تقول روحوا..سووا ..كلوا..مستحيل تقول إنو هيا تبغى...! تابعت:المهم..ايش تبغو...؟!،أو يعني ايش تحبو من بيزا هت...! سارة:مممم أطراااف جبنة...! -شي أكيد..اسمعو..ايش تاكلو أكتر لحم و لا دجاج...؟! خلود:كلو واحد...! -أوكي...! و رحت للمطبخ عشان أكلم علي براحتي،اتصلت و رد:نعم...! -السلام عليكم...! -و عليكم السلام..هلا...! -مممم..علي حبيبي معليش تروح تجيب لنا عشا...؟! -عشا...؟! -ايوة الله انهد حيلي و أنا أرتب ما أقدر أطبخ...! -أففففف..طيب ايش تبغو...؟! علي مستحيل يلبي طلب من غير ما يتأفف...! -بيتزا هت...! -هممممم ما أتوقع الكل ياكل...! -مو مهم..لإنو جدة إلي طلبتو و أنا ما أصدق تطلب أكل و يعجبها...! -طيب طيب..ايش تبغو...؟! قلت بعد ما قلت إلي نبغاه:تتوقع يكفي...؟! -كم أخواتك...؟! -أربعة...! -أربعة..سبعة و هنا أربعة..تقريباً احنا خمسطعش...! -إن شاء الله يكفي..المهم..شوف عروضهم و زبط...! -أوكي..أي شي ثاني...! -سلامتك...! -الله يسلمك يا قلبي...! قلت بتساؤل:علي وينك...؟! ضحك:خرجت و لا كان فصلت في وجهك من غير ما أرد...! ضحكت:مالت عليك..يلا باي...! -مع السلامة حبيبي...! رجعت الصالة و جلست جمب جدة...! بعد حوالي الربع ساعة اندق الجرس،وقفت و مديت ايدي إلي حاولت أوقف ارتجافها لسعود:"يلا حبيبي عشان نسلم على عمو"..قال سعود بحماس:جا...؟! ابتسمت:ايوة...! ما كانت ابتسامتي لسعود ابتسامة سعادة لإني حشوف عمو..كانت ابتسامة بنية إخفاء مشاعري المضطربة و الخايفة و كانت ابتسامة مناقضة لشدة نبض قلبي...! رحت لغرفة جدة إلي فيها شنطتي،اتعطرت و عطرت سعود و رتبت شكلو و رحت للمجلس بقلب يدق بقوة..مو عشان بابا..لأ..في شي أهم..في عمو و اكتشافي الجديد عنو...! دخلت المجلس و أول ما دخلت اغتصبت ابتسامة:السلام عليكم...! ردوا عليا السلام،وقف عمو:هلا والله...! جري سعود لعمو إلي شالو،قال بعد ما باس عمو:إنتا فين كنت...؟! -أنا كنت مسافر عشان عندي شغل...! -تيب عمو..عمو أنا اكتشفت شي...! التفت ليا عمو و قال بابتسامة:الشين...! ابتسمت ابتسامة بسيطة:سار ينطقها أحياناً...! التفت عمو لسعود:ايش اكتشفت...؟! قال سعود بطريقة تعليمية:ينفع..أقولك..عمو..أنا...! استغرب عمو:عمو أنا...؟! ابتسمت و أنا أسمع سعود يقول الجملة إلي يكررها كل يوم عليا:اسمي سَعُود و اسمك..سَعُود..يعني..أقولك عمو أنا...! ضحك عمو و نزل سعود،رحت أنا و حضنت عمو علطول،طولت شوية و نسيت إلي حواليا حتى بابا إلي طنشتو قبل شوية لمن حضني .. و لمن بعدت عنو ابتسم بهدوء مستفسر:جود ايشبك...؟! حاولت أبتسم:عمو مرة اشتقتلك...! ابتسم:و أنا كمان حبيبي..قوليلي كيفك...؟! قلت بهدوء:الحمدلله...! -ايشبك...؟! -ها..ولا شي...!،زي ما قلتلك إنتا بس وحشتني مرة،إنتا كيفك...؟! - الحمدلله بس تبعاااااااااااان...! ابتسمت على تقليد عمو لسعود في كلمة "تبعان" و قلت و أنا أطلع مفتاح غرفتو من جيبي و أحس إني بعد إلي عرفتو أبغا أهتم فيه أكتر..أبغا أراعيه و أعطيه وقت أكتر من الوقت إلي بأعطيلو هوا بالعادة:رتبتلك الغرفة بس لا تنام..علي حيجي دحين و حيجيب عشا..اقعد عشان تسلم عليه و تتعشى معانا...! -أوه صح والله مو موجود..حيتأخر...؟! -دحين بأدق أشوفو...! و قبل ما أدق اندق الجرس،ابتسمت:أكيد هوا...! و رحت و فتحت الباب،مديت ايدي بآخد الأكياس بس علي بعدها:خلي منورة تجي تشيلها...! همست:أنا لسه في بداية التالت...! -لو الأول...! و حط الأكياس قدام الباب إلي يفتح عالصالة و دخل للمجلس و قال بابتسامة:سلاااااااامة الأسفار...! وقف عمو:الله يسلمك...! و سلموا على بعض،و لمن مشيت خارجة من المجلس استوقفني علي:جود...! التفت فقال:لا تشيلي الأكياس...! انقهرت منو و من طريقة كلامو،فمديت لساني و أنا مغمضة عيوني بقوة:اممممممممممممممم و خرجت و أنا أسمع ضحكة عمو و صرخة علي إلي عصب: هييييييي إنتي...! رحت للصالة و فتحت الباب و شلت الأكياس و وديتها للمطبخ،جو أخواتي عشان يساعدوني،و بدأنا نفرش السفرة،قالت زوجة بابا بلا أي مشاعر ظاهرة على وجهها:إنتي عبي عند الرجال...! -ها...؟! -إنتي الوحيدة إلي يمديكي تروحي...! ما كنت أبغا أروح و أجي قدام بابا و عبدالإله..مادري ليه أحس بشي غريب لمن أكون متواجدة معاهم في نفس المكان..دولا الاتنين غير عن عبدالرحمن و أخواتي و زوجة بابا..لمن أكون معاهم أحس بخنقة و أحس الجو حولي يتغير...! وقفت و شلت التلاتة بيتزات و بطرف أصباعي الصغير شلت السفرة و اتجهت للمجلس و أول ما دخلت وقف علي و صرخ:إنتي ايه إنتي...؟!،ليه ما تسمعين الكلام...؟!،ما كفتك التسيقطة القريبة..ما كفاكي سعود والدتو في السابع...ذحين في ايش تبغي تولدين..في الخامس و لا في الرابع...؟! لو كان الوضع تاني كان زعلت من علي لإنو صرخ عليا قدام الملأ لكني غمضت عيني و أنا أقول:شكراً على التكتم علي...! التفت لعمو إلي قال بسعادة بالغة:جود إنتي حامل...؟! عيني من غير ما أحس جات على بابا بس بسرعة بعدتها لكن إلي لمحتو في وجه بابا كان غريب..معقول عشان علي اتكلم عن الإجهاض إلي سارلي بسبب الحادث...؟!،أياً كان السبب نظرة بابا كانت مرة غريبة...! قال علي إلي و أخيراً انتبه:أوه...! التفت لعلي و قلت بدهشة مصطنعة:أوه...! ضحك علي و رجع جلس،التفت لبابا إلي قال بتردد:أنا كنت أدعيلك ربي يعوضك...! طالعت فيه و أنا أحس بالغرابة تجاه نظراتو الغير مشمئزة،ابتسم بحرج..أعطيت علي السفرة و البيتزات و خرجت...! لمن خرجت اتذكرت البيبسي و الكاسات و الموية،شكرت الله إنو علي جاب بيبسيين..يعني ما حأضطر أقولهم..صبو و رجعوه لنا...!>>>والله لو كان عصير كان جاب واحد و قال:"بلا تبذير"...! رحت بباقي الأشياء للمجلس و أول ما دخلت وقفو عمو و علي و شالوها مني..يا ناسو عليهم..الله يسعدهم...! قال عمو:جود تعالي اتعشي معانا...! التفت لعمو مستغربة،قلت بعدها بغرور:لاوالله تبغاني أقعد و آكل مع رجال..هزُلت...! قلت إلي قلتو بعد ما قررت آخد الوضع بمرح و مزح و أنكت و لا كأنو شي...! كده..out of the blue...قررت دا القرار...! عمو استجاب و قال:مالت عليكي يختي...! قلت و أنا أحرك يدي:أنا رجالين في البيت و بالغصيبة متحملتهم،لسة أتحمل خمسة اسم الله عليكم..من جد ما حأقدر...! قال عبدالإله بسخرية:و سعود رجال...! طالعت في عبدالإله..تصدقو نفسي أمسك وحدة من البيتزات و أرميها في وجهو بس حرام فيه أضيع بيتزا...! قلت بطريقة فلسفية بعد ما اتخذت قرار تاني يخص عبدالإله:ايوة يا قلبي سعود أعتبرو رجال لأن الأم ترى الرجل المتكامل و المرأة المتكاملة في أولادها..إنتا يمكن ما تفهم الذي أقصدهُ من كلامي..لكن إذا ما تزوجت و أنجبت فستفهم...! طااااااالع فيا عبدالإله:من وين ململمة ذا الكلام...؟! يا ليت لو عندي نظارة عشان أعدلها زي الناس المثقفين و إلي يسوو نفسهم...قلت:عبدالإله يا عبدالإله..كلماتي تخرج من قلبٍ إلى قلبٍ و إنني لأصدقك القول في كل شيء...! علي:جود ايش قاعدة تقولي...؟! طالعت في علي المفجوع مني و عليا،ضحكت:لا و لا شي بس شوف كيف وجهو سار..ينقهر بسرعة و أنا بس حبيت أنرفزو...! قال عبدالإله:إنتي على بالك دمك خفيف...؟!،ترى بايخة...! ضحكت: I didn’t ask you to laugh…! قال عبدالإله بغيض:عرفنا تعرفي انجليزي...! قلت و أنا أتقل حرف الآر و أتكلم انجليزي سعودي:frankly..I like to talk in English…! قال عبدالرحمن بابتسامة:تتفرجي السعودية الثانية...؟! ضحكت:زمان..على أساس أقوي اللغة...! -وييييييييييين تقوين اللغة...؟!،يا أمي هما يحتاجو مين يقوي لغتهم...؟! قلت:حرام عليك والله بعضهم جيدين...! سكت عبدالرحمن مدة بعدها قال بتفكير:تصدفي يا جود مشكلتك نفس مشكلتي..أنا كده زيك أبغا عنصر ذكري في البيت بس ما عندي...! -آآآآه حتى أنا..إن شاء الله أكون حامل ببنوتة لإني طفشت من الأولاد..أشياءهم مي حلوة...! أضفت بعد ما لاحظت انهم التفوا عالسفرة عشان يتعشوا :"يلا أنا كمان بروح أتعشى..جيعاااااانة ..بأكل نفسي و بأكل بنوتتي و لا ولودتي"،و خرجت من المجلس و جلست على سفرة الحريم و أنا بالي مشغول بشيين:الأول:"أدعي لك" & "أدعي عليك"..حرفين بس الفرق لكن المعنى يختلف و لو بابا نطق قبل ما يسير الحادث كان بست رجلو على كلمة أدعي لك...! أما الشي التاني و إلي هوا أهم فكان..عمو...! ***************************************** كنا في السوق أنا و علي و سعود،خلصنا تسوق و جالسين على وحدة من الطاولات نشرب و ناكل هوت آند كريسبي...!>>>يميييييي أحب بطاطسو...! كنا نتكلم و نضحك و مبسوطين،بعد دقائق سمعنا صرخة:"علي"...! التفتنا،كانو شلة شباب،أنا علطول غطيت وجهي أما علي فقام بسرعة استغربتها و كان مبتسم..غريبة العادة يتضايق لمن نشوف أحد نعرفو في مكان عام...! و الغريب أكتر إنو سعود وقف و كان حيروح لهم لولا إني مسكتو:وين رايح...؟! كان سعود ينطنط و يقول و هوا يحاول يفلت يدُّو مني:ماما..ماما...! كان وجهو يشع حماسة و بقدرة قادر قدر يفلت مني و جري لهم،واحد منهم انحنى و فتح يدينو لسعود و شالو و قعد يكلمو و يضحك معاه...! كنت غصباً عني أراقبهم..مين دولا...؟!...! بعد مدة ليست قصيرة رجعولي،قلت باستغراب:علي مين دولا...؟! ابتسم:هاذول إلي أنقذونا...! -ها...؟! اتوسعت ابتسامتو:خلينا نروح البيت عشان أقولك...! وقفت و بدأت ألملم الأشياء،أخدنا الباقي من الأكل و اتوجهنا للسيارة...! و في السيارة قلت و أنا أتذكر أشكالهم:ما شاء الله صدفة حلوة إنكم اتلاقيتو في السوق...! التفت:ايوة..و أعطوني أرقامهم كمان...! -طب ليه مرة مبسوط...؟! ابتسم بسعادة:لأول مرة شباب في ذا السن يشوفوني معاكي و ما يدقو بالكلام...! -كيف يعني...؟! -يعني أصحابي إلي أول كانو مثلاً كل ما اتصلتي عليا يقعدو يرمون كلام تافه و إنتي عارفة ايش أقصد أما ذول فشافوكي و واحد فيهم شالك و حفظوا وجهك رغم كذة ما دقوني بالكلام أو شي...! -هما ممكن يكونوا كويسييييين بس لا تغتر بهم مرة...! -ايش...؟! سحبت نفس بعدها قلت:إنتا يمكن اتعلقت فيهم عشانهم بعد فضل الله هما السبب في سلامتنا لكن كمان أكيد لهم عيوب و مساوئ..إنتا لسه ما تعرفهم...! -طيب يا جود حتعرف عليهم...! -أوكي اتعرف عليهم..أنا قصدي لا تحط عليهم الآمال،لا تحسبهم الأصحاب البيرفكت..لا تعطيهم كل ثقتك..مثلاً لو تبغى تقابلهم قابلهم في مكان عام لا تروح استراحة أو شقة...! طالع علي فيا:هذا الكلام قوليه لولدك لمن يوصل ثمنطعش سنة...! قلت بعتاب:علي...! -و أنا أدري عنك،رجال تراني...! -لو عجوز..بالله يعني إنسان ما تعرفو يقولك تعال البيت عندي تقوم تروح..ايش دراك لا يكون مبيت لك شي...؟!،بعدين أنا مرة ما أحترم الشباب إلي يروحوا استراحات و ما استراحات...! -إنتو عشان حاطين في بالكم إن إلي يروحون الاستراحات يسوا بلاوي زرقا..عادي الاستراحة عندنا زي السوق عندكم...! -لأ غير مو زي بعض..أحس إنتو لمن تتجمعوا غير عننا..دخان و قرف..يع...! -و كمان حاطين في بالكم إنو الشباب يتجمعوا و يدخنوا بالسر...!،المشكلة إن في أشياء أخس من التدخين..التدخين ما صار يتسوى بالسر...! قلت بقرف:المهم إنو قرف..بعدين إنتا كنت تجي و فيك ريحة دخان من الاستراحة...! ندمت إني اتكلمت..حسيت علي اتضايق من سيرة أصحابو إلي تركهم لكنو على أي حال قال:الريحة ما كانت من الاستراحة..كانت من بعض أصحابي إلي يدخنون..بعدين أنا كنت أتروش عشان تروح...! -حبيبي عارفة إنو الريحة مو منك و لا من الاستراحة بس أنا أكره الاستراحات..أكرههااااااااااااا...! -طيب يختي اكرهيها...! قلت بتنبيه:علي..ترانا خرجنا من الموضوع...! -ولعد نبغا ندخل فيه...! قلت و أنا أرفع أكتافي:براحتك...! ***************************************** كنت مني قادرة أنام..يا الله..معقولة...؟!،طالعت في علي،كان نايم،قمت من على السرير و رحت للتسريحة و طلعت الصورة..عمو شاغلي بالي..لا ليلي ليل و لا نهاري نهار..كل ما أسمع صوت عمو أو أشوفو أتلخبط و أتوتر و في أحسن الأحوال أسرح...! "جوووود"،التفت مفزوعة لعلي،قلت:هاها..نعم...؟! كان مغمض عين و مفتح التانية،قالي بصوت نايم:ايش إلي مصحيكي...؟! -ها...؟!،لا ولا شي بس ما جاني نوم فقمت...! رجع علي راسو عالمخدة:قولي بسم الله و تعالي نامي...! دخلت الصورة في الدرج و رجعت أنسدح،غمضت عيوني و أقول غمضت لإني بالفعل ما نمت و ما أعتقد حنام _على الأقل_ مو قبل ما أواجه عمو...! ***************************************** كنت قاعدة على اللاب توب،أستنى التحميل يخلص..كنت قاعدة أحمل فلم عن السيرة النبوية للأطفال،هوا مو السيرة السيرة..هوا الفلم عبارة عن قصص لطيفة و أحداث مسلية للأطفال عشان يتعلمو الأخلاق النبوية بطريقة مسلية و حلوة...! خلص التحميل،شيكت عالفلم لا يكون فيه شي مُخل بس كان سليم،ناديت:سعوووووود...! جا سعود و في يدو الجيم بوي،حطيت اللاب توب على جمب و مديت يدِّيني:تعال بابا...! قرب سعود مني فشلتو و جلستو فوقي،قلت:ممكن تضغط ستارت و نشوف شي مع بعض...؟! -ايس...؟! -إنتا سوي إلي قلتلك عليه و بعدين نشوف...! و سحبت الجيم بوي و وقفت اللعبة...! شغلت الفلم و بعد مدة وقفتو:سعود ايش رايك نروح نسوي فشار...؟! أيدني سعود و رحنا للمطبخ،قال:ماما أبغى أحت الفُسال..(أحط الفشار)...! خليتو يحط الفشار في القدر بعدها جلستو عالطاولة و حطيت الفشار عالنار،رحت عندو،لفيت يدي حولو و بستو،قال:ماما... -حبيب ماما... -ايس الفلم نسوفو..(ايش الفلم نشوفو)...؟! -فلم عن الرسول...! -هوا ايسبو..(ايشبو)...؟! قلت باستغراب:مين...؟! -الرَصول...! ابتسمت على سينتو المقلوبة لشبه صاد،قلت:ايشبو..مابو شي..قلي إنتا..تحبو...؟! -هوا وين لاح..(راح)...؟! -هممممم..هوا عند ربنا دحين..بعدين تراك ما جاوبتني..تحبو و لا لأ...؟! قال سعود بانفعال:ما أعلفو..(أعرفو)...! قلت و أنا أمسح على راسو و ظهرو:ما تتذكر لمن رحت مع بابا المسجد و سمعت الشيخ يتكلم عنو...؟! -ماااااااامااااااااا... قلدت طريقتو:نعاااااام...! -داك مُحمدٌ...! ضحكت:مُحمدٌ...؟!،طيب ياخي محمدٌ اسم الرسول...! هتف سعود باستنكار:ماما...؟! طنشتو و رحت أعبي الفشار و طول ما احنا نتفرج عالفلم سعود مو راضي يقتنع إنو الرسول عليه الصلاة و السلام هوا نفسو "مُحمدٌ" على قولو..و حتى لمن جا علي و انضم لنا و قلنالو عالمشكلة و حاول يفهمو برضو مو راضي يقتنع...! الله يعين...! ***************************************** كنا عند أهلي،قاعدين في الصالة أنا و علي و سعود و جدة و عمو...! كنت أحاول قد ما أقدر أكون طبيعية،لإني حالياً لمن أتواجد في مكان مع عمو أتلخبط و إنتو تعرفوا ليه...! رفعت راسي على صوت عمو:جود...! -نعم...؟! -وين الحامل وصلت...؟! ابتسمت،قال:ليا ساعة أنادي...! -معليه كنت متنحة شوية...! ابتسم،وقف:طب تعالي بسألك عن شي في غرفتي...! قطبت حواجبي مستغربة،قال:بعد ما رتبتي الغرفة في أشياء مني لاقيها...! وقفت:أنا دايماً كنت أرتبلك غرفتك و أحط كل شي في مكانو...! و لحقت عمو،و لمن دخلنا الغرفة سأل عمو:كان فيه أوراق عالتسريحة.."تسارعت دقات قلبي"..كنت مستعجل عشان الطيارة و ما مداني ألمها..فين حطيتها...؟! -أمممم..رتبتها و حطيتها عالتسريحة...! -ايوة بس في بعضها ناقصة...! -مَـ..مدري..أنا حطيتها زي ما هيا..هيا مهمة...؟! قال عمو بلا مبالاة:لا مي مهمة بس كان بينها صورة هبلة ما حبيت إنك تشوفيها...! طالعت في عمو،قال:ايشبك...؟! بلعت ريقي:ها..لالا بس ليه ما تبغاني أشوفها يعني...؟! -لإنها سخيفة..يعني أيام كنت صغير و مسوي فيها رِوِش...! طالعت في الأرض..عمو قاعد دحين يتعذب من جوة لكن كاتم و مخبي...من غير ما أحس دموعي نزلت...! جا عمو:جود تبكي...؟! حط يدِّينو على أكتافي:جود ايشبك...؟! رفعت نظري لو،قال بعمق:جود... لفيت وجهي بعيد،ابتعد عني عمو و جلس عالسرير و نكس راسو،طالعت فيه..الحزن كان باين عليه و الجو حولنا فجأة اتغير...! طالعت لفوق أحاول أوقف دموعي،بعدها قفلت الباب و رحت و جلست جمب عمو،حطيت يدِّي على كتفو،التفت ليا بغضب،قال بقهر:ليش شفتيها...؟! انصدمت من نظرة عمو و لهجتو الحادة،تابع:تفتحي شي مو لكي ليه...؟! جفت دموعي،قلت:عمو الصورة طلعت قدامي...! -يعني ايه الصورة طلعت قدامك...؟!،ما شاء الله هيا اتحركت عشان تشوفيها...! انفعلت:مو هذا المهم دحين..يا عمو ليش ما قلتلي..19 سنة بين بابي و بابك خطوتين ليش خبيت عني...؟! صرخ عمو:و أقولك ليه...؟! رجعت أبكي:زي ما كنت أقولك على كل مشكلاتي،ليش إنتا ما لجأتلي ليش...؟! -كان عمرك وقتها عشرة سنين.."تابع بسخرية"..و كان أبوكي مو مقصر،ليش أجي أنا و أزود همك...؟! اغتصبت ابتسامة و قلت بتودد و أنا أحط ايدي على ظهر عمو:طب احكيلي عن كل شي...! وقف عمو:"الموضوع لا يطلع لأحد"،و مشي متجه للباب،وقفت بسرعة و قطعت طريقو:عمو الله يخليك...! -جود ابعدي...! -طب قلي..ما حيضرك شي..أنا عرفت و خلاص...! هتف عمو:ايش تبغيني أقولك...؟! -جاوب على أسئلتي و بس...! مشي عمو بطفش مصطنع للسرير..كنت عارفة إنو في أسوأ حالاتو؛حاس بالضعف و النقص..جلست جمبو:قلي كيف اكتشفت إنو عندك عقم...؟! اتنهد عمو،قلت برجاء:عمو الله يسعدك لا تعورلي قلبي أكتر..قلي ايشبك...؟! نزل راسو،عقد يدينو:إنتي فاكرة الحادث...؟! -ايوة...! سحب نفس:الدكتور إلي كان ماسك حالتي ما قالي إلا جهازك التناسلي اتأثر...! حبست أنفاسي،التفت ليا عمو:جود إنتي حامل...! بلعت ريقي و حاولت أكبح دموعي:ما عليك كمل...! رجع عمو لتنكيس الراس،قال:رحت و كشفت كذة مرة لين ما ثبتت النتيجة،قالي الدكتور ممكن أنجب لكن بنسبة ضئيلة...! ما قدرت أمسك نفسي أكتر،بكيت:عشان كده مو راضي تتزوج...؟! حضني عمو و قال بحزن:يا جود إنتي عندي أحسن من مليون بنت كان ممكن أجيبها.."اختنق صوتو"..يحسبوني أبالغ لمن أقول إنك بنتي..والله العظيم و الله العظيم أعرف ايش يعني أب..يا جود إنتي بنتي..واللهِ بنتي...! و استمريت أبكي في حضن عمـ..في حضن بابا...! ***************************************** |
الـجزء الـسـابـعـ تـوتـر عـلاقـة لـمـ يـسـعـفـهـا إلا رسـائـل ما مر كتير من يوم ما اكتشف عمو إني عرفت،يومين تقريباً بس..و لإني متعودة على الصدمات و الظروف الصعبة قدرت أهدى و أستعيد توازني و أفكر بعقلانية و قررت قرارات جديدة و قطعت على نفسي عهد بإني ما أرتاح إلا لمن يسير إلي في راسي...! و على فكرة ترانا في بيت أهل علي،قاعدين أنا و عمتي و البنات أخوات علي و زوجة أحمد نتكلم عن الزواج و تبعاتو..تعرفوا جلسات الحريم...! و بالضبط دحين كنا نتناقش عن الأشياء إلي ما تخلي الشباب يتزوجوا..قالت ليلى أخت علي الكبيرة:هيا بالله شوفو أخو زوجي..قلك ايه..ماني موظف كيف أفتح بيت..القهر إنو هو إلي ما يبغا يتوظف..تخيلو..ولد عمه لقاله وظيفة بتسعة آلاف و يقول لا لا مي من تخصصي..حاولو أهله يقنعوه بإن صعبة يلاقي وظيفة ثانية تبدأ بتسعة آلاف مو راضي...! قلت:والله هذا دلع..ليه..وظيفة بتسعة آلاف يرفضها..غيرو بألف و ألفين متزوجين و مخلفين...! زوجة أحمد:بس يختي الألف و الألفين معد تكفي...! -مو هدا إلي أقولو..يعني هوا ما عندو عذر...! صفاء:بس ساعات يكون السبب خارج عن الإرادة زي لو كان الواحد بشع و مو حلو...! أحلام:مو حلو يحاول يرتب نفسو،أما إنه يحط يدو على خدو:"أنا معفن و لا وحدة حتقبل بي"،هذا غباء و الرجال مو مرة الناس تهتم بجمالهم..أهم شي النظافة و الترتيب...! في دي اللحظة ألهمني ربي بشي فقلت:طب لمن واحد يكون كامل و مكمل،أخلاق و شغل و شكل حلو بس مشكلتو مثلاً..مممم..ما يخلف..ايش يسوي؟!،هدولا من جد يحزنوني...! أحلام:في دحين طرق كتيرة عشان الناس تخلف،يعني عادي...! قلت:كلنا نقول كده بس في الواقع مستحيل وحدة تضحي...! أحلام:يا شيخة..دحين بالغصبة تلاقي واحد مقبول..مو كويس مقبوووول..و إذا على قولتك كامل و مكمل ليش لأ و بعدين الله يخلي المياتم و كافل اليتيم كهاتين...! و لصقت وسطاها و سبابتها في بعض...! أم علي:الله يغنيكي يا بنتي...! أمنا على دعاء عمتي و أمنت أنا و أنا أحس إني طايرة...! بعد دا الحوار ما قدرت أركز معاهم و حتى لمن رجعت البيت سألني علي:"ايشبك؟!"،فقلت ولا شي..و طول الليل و الأفكار تجي و تروح في راسي لين ما رسيت على خطة محكمة جداً..طبعاً كلو من إلهام ربنا..الشي إلي خلاني أقوم أوتر و أنا للمعلومية كنت محافظة عالوتر قبل ما أتزوج بس دحين..استغفر الله..الله يهدينا و يصلحنا و يثبتنا...! ********************************** كنت في بيت جدة أنا و سعود..علي مو موجود..مواعد هدولا إلي أنقذونا في الحادث و مرة متحمس..إن شاء الله ينبسط...! دق الجرس،قمت و فتحت،كان عمو،سلمت عليه،بعدها قلت:عمو وين كنت؟! رفع الأكياس إلي في يدِّو:منتي شايفة الأكياس...؟! و على فكرة ترى عمو من داك اليوم متغير معايا،قلت:آآآآ..طب كويس إنك جيت عشان بكلمك في موضوع...! طنشني عمو و راح للمطبخ و حط الأكياس،قلت:عمو... قاطعني:لو فتحتي دا الموضوع مرة ثانية ما حيسير لك طيب...! -عمو اسمعني على الأقل...! صرخ:مابغا...! و راح لغرفتو..أوكي أعترف..أنا مغشوشة بعمو..اتوقعت حيقبل يناقشني أو يسمعني عالقليلة لكن..أففف...!،بس يمكن عمو مرة متأثر من الموضوع فاتخلى عن كل قيم الحوار إلي زرعها فيا...! خرج عمو من الغرفة و هوا لابس البيجامة،جلس بقوة عالكنبة و مسك الريموت و ركز عينو عالتلفزيون،تعرفوا كيف لمن الواحد يبغى يسوي نفسو مو مهتم...؟! جا سعود بحماس و سلم على عمو و كعادتو قعد يوريه ايش إلي ساير في اللعبة إلي يلعبها عالجيم بوي،قلت:سعود حبيبي خلي عمو يرتاح..هوا تعبان شوية...! سعود:عمو إنتا تبعان...؟! طالع عمو فيا بعدها ابتسم لسعود:لا حبيبي مني تعبان..اقعد اقعد...! طالع سعود بعد ثواني فيا فرسلتلو نظرة الأمهات المرعبة فخاف و قام...! قلت:عـ... صرخ عمو:جود..تبغي تتكلمي في شي ثاني حياكي الله غير كذة لعد تجين...! انصدمت،قال عمو بعصبية و توتر:ما أقصُد البيت..قصدي.."تابع بسرعة"..لا تكلميني لو بتكلميني في دا الموضوع...! -عمو إنتا حتى ما عرفت ايش هوا الموضوع...! صرخ بصوت أعلى:لأ عارف..يا جووود أمي إلي ما تدري عن شي سكتت عني..إنتي إلي عارفة كل شي ما قَدَّرتي...! قلت و أنا أشير على نفسي:يا عمو أنا أحبك..اسمعني..كل إلي أبغاه سعادتك...! -مابغا أكون سعيد..ايش رايك...؟! بكيت:يا عمو اسمعني..اسمعني بس...! ضرب عمو فخدو بقهر بسبب بكايا:دحين الغلط سار غلطي و الحق معاكي...! -عمو كل إلي حسويه في مصلحتك...! -مصلحتي و عارفها..قفلي الموضوع...! -عـ... -جود..قفلي الموضوع...! نزلت راسي و سكت...!،الموضوع أصعب مما اتصورت لكن والله ما أسيبو إلين ما أسوي إلي فراسي..والله...! طول مدة الزيارة كنا نتفرج عالتلفزيون أو أنا أكلم جدة أو عمو يكلمها..يعني لساني ما جا على لسانو...! لمن رجعت البيت رسلت لعمو: "صعب لمن إلي تحبهم و تبغى مصلحتهم ما يفهموك" و المفاجأة كانت رسالة وصلتني منو بعد دقائق: "و أصعب لمن أولادك ما يقدروا إنك إنسان و لك نقاط ضعف و مواضيع تكره إنها تنفتح" رسلت: "أكره المواضيع الحساسة><" فرسلي: "أجل اخرجي منها"...! رسلت و في داخلي إصرار يكبر: "لأ..ما رح أخرج منها و رح تعرف يا عمو قد ايش كيدهن عظيم"،بعدها قفلت الجوال ونمت...! ********************************** تعرفو إنتو نظامنا..يوم الأربعاء عند أهل علي و يوم الخميس عند أهلي و أنا متعودة أكلم جدة و عمو كل يوم بس دحين بيني و بين عمو (تتش) فكيف أكلمو...؟!،و كمان مو معقولة ما أكلمو و لا أسلم عليه إلا يوم الخميس الجاي...! قعدت يوم الجمعة في حيرتي لساعات لكن بعدها قررت قرار..جدة و حكلمها عادي بس عمو..أنا أوريكم فيه...! إلي سار يا حبايبي إني أنا و عمو سوينا تشاتنق بالجوال؛أرسلو رسالة فيرد عليا برسالة و رح تشوفو تطور الأحداث لو قرأتو الرسايل...! رسلت: "جمعة مباركة يا أحلى عمو..ما غيرت رأيك...؟!،لسه ما تبغى تسمعني...؟!" رسل: "لأ" انقهرت من الرسالة القصيرة دي..فرسلت: "لأ...؟!،ما فهمت..قصدك لأ غيرت رأيي و أبغا أسمعك و لا ايش...؟!" رسل: "جود و رب الكعبة رسالة تانية اليوم ما يسير لك طيب" رسلت: "طيب معد حرسل بس علبال ما يخلص اليوم اتذكر إني أحبك" كانت هادي هيا الرسايل ليوم الجمعة...! يوم السبت و من صباح الله خير رسلت: "صباحك خير يا وجه الخير..يُقال بأن من الحب ما قتل و أنا أقول بأن من الحب ما ألَّف و رسل..ايش رايك في السَجْع...؟!،المهم..كيفك اليوم؟!،هاااا..ما تبغى تسمعني...؟!" رسلي: "جوووووووووود..ما حتبطلي؟!،ترى بدأت أفقد أعصابي...!" رسلت: "عادي افقد أعصابك..أهم شي أشوفك مبسوط حتى لو من بعد ما توريني شغلي...!" رسل: "أففففففف..أنا مابغا أكون مبسوط..هدي حياتي و أنا حر" يستعبط دا...؟!،قال حر قال..و الله مسخرة...! رسلت: "آآآآسفة..بعد ما اتزوجت جاي تقولي دا الكلام..أنا يا عمو بعد ما اتزوجت عرفت ليه جدة تزن عليك عشان تتزوج..لو قلتلي حياتي و حر قبل كده كان بكل غباء سكت على أساس "حرية شخصية" بس دحين لا و ألف لا و ما رح أخليك إلا لمن أسوي إلي في بالي" رسلي: "كل إلي قاعدة تسويه إنك تضيعي وقتك..لو تنتبهي لبيتك و زوجك يكون أحسن" مادري ليه حسيت بفرق..دي الرسالة حسيتها غير..حسيت عمو فيها غير..لكني اتجاهلت دا الشعور و رسلت رسالة فيها شوية عاطفة عشان عمو يلين شوية،رسلت: "أضيع وقتي...؟!،والله حرام عليك..بسألك عمو..ضيعت وقتك لمن ربيتني..ضيعت وقتك لمن دافعت عني في مواقف كتيرة...؟!،نفس الشي بيسير..أنا مني قاعدة أضيع وقتي لمن أحاول أحللك مشاكلك" رسل: "ما طلبت منك تحليها" رسلت: "مو لازم تطلب" و بكده انتهت الرسايل يوم السبت...! يوم الأحد و أنا في الجامعة في واحد من البريكات فتحت جوالي و لقيت رسالة من عمو،فتحتها و كانت: "جود..إنتي غير..إنتي بنت..أكيد تحتاجي من يحميكي و يحللك مشاكلك لإنو واثق منك..أنا رجال و أقدر أحل مشاكلي بنفسي..ما أحتاجك تزني فوق راسي و لو أبغا شي بقولك..عشان كده قفلي الموضوع و انتبهي لنفسك و للبيبي إلي في بطنك" رسلت: "البيبي إلي في بطني يسلم عليك و يقولك اسمع كلام ماما تراها صح" رسل: "الله يسلمك و يسلمو..و قوليلو يبطل يتدخل في إلي مالو فيه" طبعاً تقدروا تفهمو الكلام ليا مو للبيبي...! رسلت: "البيبي قاعد يبكي؛يقول:"ليه يا ماما أبوكي مو راضي يسمع الكلام و هوا عارف إنك تحبيه و إنو كل إلي حتسويه في مصلحتو" رسل: "قوليلو لإنو بابا عارف مصلحتو و مهو صغير..جود..الله يخليكي..سيبيني في حالي و انسي الموضوع" لمن التمست الرجاء في رسالة عمو رسلت: "تتوقع أقدر أسيبك في حالك...؟!،تتوقع أقدر أنسى...؟!،لو خطر على بالك إني أقدر فحقولك هيا من دحين..ما حقدر..فديت قلبك يا عمو...!" إلي سار إنو عمو ما رد على رسالتي طول اليوم،يمكن لإنو الرسالة كانت عاطفية..مادري لكنو ما رسل...! أما عن يوم الاتنين فرسلت: "ها عمو حبيبي..حتسمعني...؟!" المفاجأة كانت الرسالة إلي رسلها ليا عمو في ليل الاتنين..كنت طول اليوم مستنية رد و لمن جاني انصدمت...! كان محتوى الرسالة: "لكي حياتك و ليا حياتي و زي ما أنا ما أتدخل فيكي و في أسرتك لا تتدخلي فيا إنتي كمان و زي ما أنا محترم خصوصياتك احترمي خصوصياتي إنتي كمان..مو معقول منتي قادرة تفهمي إني رجال كبير أقدر أتحمل تبعات قراراتي..تقوليلي أبغا سعادتك أقولك سعادتي أعرف وينها و أرجوكي لعد تتدخلي..أنا بدأت أتعب من التدخل هذا..مو بدأت إلا خلاص تعبت..الخلاصة..حياتي و أنا حر فيها..و لمن أبغا شي صدقيني حقدر ألاقيه بنفسي" جود:!!!!!!!!!!!!!!!!!!!!!!!!!!!!!!!! ^^^^^^^^^^^^^^^^^^^^^^ اليوم هوا الأربعاء..كنت في البيت لحالي،علي و سعود راحو عند أهلو،أنا ما رحت معاهم لإنو من جد مالي مزاج أقابل أحد،طبعاً علي ما وافق يخليني ما أروح إلا بعد جدل و بكا مني..يا الله قد ايش نرفزني،قلتلو:"عادي ما فيها شي قولهم تعبانة شوية"،قام صرخ عليا:"إنتي أصلاً مو عاجبك إننا نروح عند أهلي كل أسبوع..كل ساعة و الثانية قولهم تعبانة قولهم تعبانة"،يااااااااااااه قهرني..هادي بس تاني مرة أسويها،أول مرة لمن كنت حامل بسعود و كنت من جد تعبانة حتى علي رجع ليا و قالي إنو عمتي الله يسعدها هزأتو و خلتو يرجع لإنها عرفت إني تعبانة من صوتي في التلفون..و بعدين هوا يعرف قد ايش أحب أهلو و أعزهم...! أوه..نسيت أقولكم ليش مزاجي خربان..مزاجي خربان و معفن من الرسالة إلي رسلها عمو..مرة أثرت فيا و كل ما أقرأها أحس كأنو أحد يطعني و بسببها خلقي ضاق بالتالي الوضع بيني و بين علي..خليني ساكتة أحسن...! لا تقولو مالو ذنب..علي الله يهديه ما يقدر لمن أحد يكون معصب أو متضايق و لمن هوا يكون طفشان بس طفشان ما يبغا أحد يكلمو...! اتنهدت و أنا أقوم من على الكنبة و أتجه للتلفون..لازم أكلم جدة...! يوم التلوت حالفني الحظ و ردت منورة..اليوم كمان يا رب ترد منورة؛لإني بيني و بينكم مابغا أكلم عمو..مرة مابغا أكلمو..و لا ديكَ رسالة يرسلها ليا...! قعدت أسمع "التووووووت" بملل:"أفففففف ليه ما يردوا؟!"،بعد شوية انرفعت السماعة:ألو...! يووووووه هدا صوت عمو..مشكلة تلفون بيت جدة مافيه كاشف و لا كان ما رد عليا...! قال بشدة:ألوووو..مين...؟! اتحمحمت:السلام عليكم...! قال عمو بدون أي مشاعر واضحة في صوتو:و عليكم السلام..هلا..كيفك...؟! قلت بزعل اتعمدت يكون واضح:من ربنا بخير..أعطيني جدة...! -مممممم..من ربنا بخير ها...؟! سكت،قال عمو:لحظة...! بعد شوية جاتني جدة و كلمتها،سألتني عن سعود و علي قلتلها عند أهل علي و لمن على أساس ننهي المكالمة قالت:عمك يبغاك...! وصلني صوت عمو:حتجي بكرة...؟! قلت بطفش مدلع:إنتا تعرف إنو أنا أجي كل خميس...! -ايوة..علبالي...! و سكتنا احنا الاتنين،ما أقدر أفصل في وجهو كمان مني قادرة أقولو مع السلامة..أحس نفسي أقولو حاجة في نفس الوقت زعلانة منو و ما أبغا أكلمو...! قال عمو بصدق:جود أنا مابغا أزعلك مني...! نزلت دموعي..كنت عالحفة..أستنى الهمسة عشان أبكي،قلت ببكا:عمو إنتا حتى ما سمعتني..إنتا منتا عارف ايش أبغا أقولك...! قال بتعب:لا عارف يا جود عارف..إنتي تبغي تقوليلي أدور علاج و أتزوج و أعيش حياتي عادي بس أنا مابغا..مابغا...! صرخت بقهر و استعجال:فيه خمسمية وحدة ما تخلف نفسها تتجوز...! صرخ عمو كمان:مابغا...! تابع بهدوء:مابغا..إنتي تجبريني أرجع أقولك بكل وقاحة مالك دخل بيا...! حزت كلماتو في نفسي..اتوجعت و حسيت إني معد حقدر أتكلم،قلت:"باي"،و فصلت من غير ما أسمع الرد...! ليش..ليش عمو مصر على رأيو...؟!،اتوقعت يلين...! كل خططي خربت..كل خططي..آه يا قهري آه..يا ربي ساعدني..تعبت..تعبت...! فجأة حسيت بإني لازم أكون أقوى..أوكي زعلانة من عمو لكني حظل أحاول و أحاول..و قِدو هزأني و صرخ فيا و قلي كلام جارح فمعد فيه شي أخاف منو...!>>>قصدي..إني جربت عصبية عمو و غضبو فمناعتي أكيد قويت..أكيد...! ********************************** يوم الخميس في بيتنا،كنا قاعدين أنا و علي و سعود إلي ينقز يمين و شمال و يتنقل من شي للتاني و جدة إلي تتكلم معانا و شوية تنشغل بسعود..بالعادة أنا أندمج مع عمو لكنو سلم علينا و دخل على أساس مصدع...! أفففففف..الرجال أغبياء..عمو بس لو يخليني أتصرف..لو يثق بيا..أخ بس أخ..والله أحس بنار جوتي..نار ما تنطفي إلا لمن أسوي إلي فراسي...! فجأة و صلتنا صرخة عمو:"جووووووود..جود تعالي"،صرخ علي:"طفشتنا إنتا..تعال هنا و اقعد معانا"...! قالت جدة:قومي شوفي عمك...! وقفت و اتجهت لغرفة عمو و قبل ما أدق الباب خليت ملامحي زعلانة و أنا بالفعل زعلانة منو...! دخلت لغرفتو و لقيتو جالس عالسرير،قلت:نعم..ايش تبغى...؟! قال بصرامة:تعالي هنا...! اتأففت و رحت جلست جمبو،كان حيتكلم لكني قلت بزعل:لو حتقولي لا تتدخلي في حياتي حقولك مالو داعي لإنك كررت دي الجملة عليا كتير...! كنت بالضبط قاعدة أستغل غلاتي عند عمو و حبو ليا..لازم أستغل لازم..لازم عشان يلين...! اتنهد عمو و قال باستجداء خفيف:يا جود يا بنتي افهميني..أنا والله مابغا أزعلك لكني.."اتنهد عمو للمرة التانية"..يا جود أنا في هذا الموضوع أفقد أعصابي و ما أنتبه للي أقولو..والله ما كنت أقصُد الكلام إلي رسلتو لكي..أنا بس... سكت عمو..حسيت إنو مو قادر يكمل و يعبر،قلت:عمو إنتا حتى ما سمعتني..أنا قضيتي مو إني أزوجك..أنا إلي يهمني سعادتك..مو ممكن جداً تتزوج و تدخل في مشاكل و يزيد همك..أنا يا عمو عرفت إنو عندك مشكلة و أحس إنو من واجبي أساعدك زي ما قد ساعدتني كتير..إنتا بس ثق بيا..ثق بيا و شوف ايش حيسير...! -يا جود إنتي منتي فاهمة..صدقيني منتي فاهمة و واعية للوضع..إنتي يا جـ... قاطعت عمو بقهر و أنا أرفع سبابتي:أُص و لا كلمة..ايش إلي مني فاهمة...؟!،إنتا على بالك أنا جود الصغيرة إلي ربيتها..أنا إنسانة متزوجة و مخلفة و ليا تجربة و أفهم في دي المواضيع أكتر منك..لا تقول منتي فاهمة...! نظرة عمو المصدومة خلتني أنتبه إني رفعت صوتي و اتكلمت بطريقة غير لائقة من بنت لأبوها،قلت:عمو سامحني إني رفعت صوتي عليك و كلمتك بدا الأسلوب..أنا يا عمو.."بلعت ريقي و دمعت عالخفيف"..أحبك يا عمو و أبغا راحتك..اسمعني..مو عشانِّي صغيرة تقوم تحسب إني مني فاهمة..أنا يمكن أكون صغيرة في نظرك لكني كبيرة كفاية عشان تناقشني و تفهم مني و أفهم منك مو تصرخ و تهزئ و تسكتني قبل حتى ما تسمعني...! رفع عمو يدِّو لوجهي و قال و هوا يحرك إبهامو على وجهي عشان يمسح دموعي:و أنا أحبك يا جود..و لإني أحبك ما أبغاكي تفتحي دا الموضوع مرة ثانية...! قلت و دموعي تزيد:طب ليه ما تثق بيا...؟!،ليه ما تثق بيا زي ما كنت أثق بِيك و أنام مرتاحة بس عشانك معايا و مصدقني...؟!،زمان يا عمو كان دورك إنك تتصرف و أنا أثق..دحين سار دوري أنا عشان أتصرف و إنتا عشان تثق...! كان عمو حيتكلم لولا الباب إلي اندق،مسح عمو دموعي بسرعة قبل ما يفتح علي الباب،طالعنا فيه و أجبرنا نفسنا على الابتسام،قال علي:لا والله...!،قلك يعني مافي شي و يا ناسو عليكم تبتسموا مع بعض..من يوم ما هيا مرابطة عند الجوال و إنتا أول ما شفتها قلت راسي مصدع عرفنا إن مافي شي..مافي شي بالمرة...! ضحكت و أنا أوقف:طيب ليش حاقد...؟!،العشا جهز...؟! -ايوة...! قلت و كأني أكلم طفل:حبيبي والله لا تزعل..خلاص لمن نروح البيت أقولك سر...! دفني علي بعفاشة:امشي..امشي و إنتي ساكتة...! مسكت كتفي و قلت و أنا أتوجه للصالة:آآآآآي..ياخي اتقي الله فيا و في إلي في بطني...! حسبي الله على ابليسك يا علي..ما قدرت أسمع رد عمو بسببك...!،بس يا ربي يكون لان..يا رب...! ********************************** كنا قاعدين أنا و علي في الصالة و سعود يتفرج على قناة براعم..والله قناة حلوة..آمنة و ما أخاف يجي فيها شي مُخل أو خيالي زيادة عن اللزوم...! كنا أنا و علي نتكلم عن الحمل و الأشياء دي الشي إلي خلاني أتذكر إني ما قد كلمت عمتي أم علي على إني حامل،قلت:علي..تصدق إلى الآن ما كلمت عمتي عن حملي...! ضحك علي:حليلك من عوزُه..أمي دريت من قبل ما أهلك يدرون بس قالت لي ما أقلك عشان ما أخرب عليكي لو تبغين تفاجئينها و عادت علَي الأسطوانة يوم حمل سعود...! "حِلِيلِك مِن عَوَزُهْـ..جملة مركبة تخص أهل جنوب السعودية معناها..حليلك أي:يا عمري أو يا روحي عليك..العوز و هو الحاجة..الضمير عائد على العقل و مختصرها يا عمري عليكي من حاجتك للعقل...! هيا قوية شوية لكن..صغار السن و الشباب يستخدموها للمزح و أغلبهم لا يعرفون معناها فقط يجيدون استخدامها في الوقت المناسب بغرض المزاح و التنكيت و هذا يفسر استخدام علي لها ببساطة و عدم غصب جود منها" ابتسمت،عمتي رهيبة..أنا مرة معجبة بها ما شاء الله...! بعد شوية جا سعود إلي كان سادح قدام التلفزيون و وقف قدامي،رفع بلوزتو و مسك بنطلون البيجامة:ماما فكيلي...! طالعت فيه مستغربة:ليه حبيبي تبغى الحمام...؟! هز راسو بلأ:أبغى أوليكي سي (أوريكي شي)...! -ايش توريني...؟! -أوريكي..فكيييييييييييييي...! ابتسم علي:نطق الراء...! قلت و أنا أفتح لسعود البنطلون:ساعات من غير ما يحس ينطق صح...! جلَّست سعود فوقي و قلت و أنا أمسح على فخدو الصغير العاري عشان ما يبرد:ايش تبغى توريني...؟! كنا أنا و علي نبغا نعرف ايش الشي دا..رفع سعود وحدة من رجولو:سوفي..عندي صعل زي بابا...! علي:عندك ايه ياخي...؟! قال سعود باستغراب من عدم فهم علي:صعل...! قلت:يعني شعر...! علي:ما شاء الله..الشين صارت تنقلب لصاد ذحين...! غريبة..سعود ينطق الشين سين..و أحياناً من غير ما يحس ينطقها عادي..ليه دحين قلبها صاد...؟! حضنتو:ما شاء الله ولدي سار رجال..إنتا عارف ليه سرت رجال و كبرت...؟! رفع سعود نظرو ليا فقلت:عشان لمن تجي أختك تكون إنتا كبير و هيا ما تعرف شي و إنتا تعلمها و تدلعها و هيا تسمع كلامك و تحترمك و تحبك...! بعد سعود عني و حط يدو على بطني:نونو بنت...؟! التفت لعلي إلي قال:إنتي شاكة إنها بنت...؟! قلت و أنا أرفع أكتافي:أنا نفسي في بنت بس مادري لو بنت ولا ولد...! قال علي:أقول سعود..ما كان يمديك ترفع البنطلون و تورينا..ليش لازم تفصخ...؟! -تفسني..تفسني مللللللللللة...(طفشني..طفشني مررررررة)...! و رفع سعود رجلينو و اتكور على نفسو و حط راسو على صدري،حضنت سعود و حطيت وجهي في رقبتو و أنا أسمع علي يقول:ما شاء الله شيخ سعود..كم عمرك عشان تقولي البنطلون يطفش...؟! رفعت راسي عن سعود:تسكت ساكت...! رفع علي حاجبو،قلت:ايييييوة تسكت ساكت..أحد قلك تتكلم قدام الولد و تقول إنك ما ترتاح إلا بالشورت و إنو البنطلون يطفشك..الولد ما حيجيب دا الكلام من بعيد...! -أفففففف يعني حتى في بيتنا بنحاسب على كلامنا...؟! -ايوة بنحاسب..ما دام عندنا أطفال لازم نحاسب...! ********************************** كنا في بيتنا _بيت جدة_ قاعدين في الصالة أنا و علي و عمو نتكلم و نتقهوى و ناكل مكسرات و حلا و الأشياء دي...! جدة كانت جوة في غرفتها تصلي و سعود كان قاعد يشخبط و يرسم على دفتر أخدو من عمو...! و على سيرة عمو تراه قاعد يتكلم و ينكت و لا كأنو شي و أنا دحين محتارة مني عارفة ايش أسوي،مني قادرة أفتح الموضوع مرة تانية،ردة فعل عمو مرة غريبة..من كتر ما هوا يتصرف ولا كأنو فيه شي مني قادرة أكلمو...! المشكلة الأكبر إنو عمو لو حس مجرد إحساس إني حفتح الموضوع يتكلم و يقول أي شي..و لاحظت إنو يتجنب ننفرد أنا و هوا في مكان لحالنا...! أوففففف من جد بدأت أتعب...! التفت لسعود _إلي قطع حبل أفكاري_ مفجوعة لإنو صرخ فجأة:مااااااماااااا..أعتيني دلازة (دراجة)...! احتجت مدة عشان أستوعب إلي قالو سعود و لمن استوعبت قلت بخصام:طب ليش تصرخ...؟!،إلي يسمعك يقول لك سنين تطلبنا دراجة و ما جبنالك...! علي:لا و أعطيني..يعني كأن الدراجة في شنطتك ذحين...! قلت:استغفر الله يا ربي..ليش تصرخ أبغا أفهم...؟! برطم سعود و طالع فينا و هوا على وشك يبكي..قال عمو بقهر عليه:جيبولو دراجة..ليش تصرخوا عليه المسكين...؟! التفت لعمو:لو كان يطلب من مدة و قلنالو لأ فانفعل و صرخ معليه..لكن دي أول مرة يطلب..ما قد نطق...! سعود كان مبرررررطم و زعلان بقوة،قال عمو:تعال..تعال حبيبي...! راح سعود لعمو و جلس فوقو:ما عليك منهم ماما و بابا الشريرين..أنا حجيبلك دراجة.."التفت لنا"..انقلعو أنا حجيبلو دراجة...! أسند علي ظهرو على الكنبة:فكة برضو...! طالعت في سعود الزعلان،شبكت يدِّيني في بعض و رمشت بعيوني:سَعُّودي حبيبي...! قال و هوا يميل على عمو يحتمي بو:مابغا..لا تسلخي(تصرخي) فيا...! رحت و جلست جمب عمو و قلت و أنا حاطة يدِّي على خد سعود:سعود حبيبي أنا عشان خفت عليك..أنا أحبك عشان كده صرخت فيك...! غطى سعود وجهو بيدِّينو و بكي:إنتي ما تحبيني..إنتي ما تبغي تعتيني(تعطيني)...! -يووووووه سعود لا تقعد تبكي..أنا والله أحبك..ايش إلي ما أحبك...؟! و شلت سعود و حطيتو فوقي:خلاص حبيبي خلاص..والله أنا أجيبلك أحلى دراجة...! هز سعود راسو:مابغا..عمو يزيبلي..إنتي ما تبغي تزيبيلي...! حضنتو أكتر:خلاص عمو يجيبلك بس المهم إنتا ما تزعل مني...! لمن شفت سعود مستمر بالبكا قلت بصوت باكي:دحين أنا ايش أسوي يا سعود و إنتا زعلان مني..أنا أتعب لمن أزعل و كمان النونو يزعل...! سعود رفع راسو و دموعو كانت جفت،قال:ماما خلاس لا تبكي..أنا أحبك...! ابتسمت و حضنتو:والله...؟!،أصلاً أنا ما أقدر أزعل منك...!،فيه وحدة تزعل من حبيبها...؟!،فيه وحدة تزعل من روحها و حياتها و عمرها...؟! و بستو،قال علي:خلصتو...؟! عمو:ايشبك حاقد...؟! علي:تخيل..تخيل أنا أعيش المجاغة و الدلع ذا كل يوم..أفففففف...! انقهرت أنا:ايش إلي مجاغة و دلع..تبغى الولد يطلع ناقص حنان...؟! نزلت سعود من عليا و أول ما عدَّى من عند علي مسكو و حط ظهرو على صدرو و انحنى عليه و قال بتهديد:أحبك و لا ما أحبك...؟! قال سعود بعناد طفولي:لأ...! دغدغو علي و سعود مصر على "لأ"،كان نفسي أطالع في عمو أشوف نظرتو لكن قوية شوية...! نزل علي سعود و هوا يقول:حسبي الله على ابليسك..تعبت و إنتا لسه لأ...! ضحك سعود و راح يكمل شخبطة و رسم...! وقفت أنا بعد شوية و اتجهت للمطبخ عشان أشوف العشا و أنا أدعي ربي ييسر لي أمري و يلهمني بالصح تجاه ردة فعل عمو إلي منعتني من فتح أي موضوع...! ********************************** رن جوالي و أنا في واحد من الكلاسات،قفلتو بسرعة و أنا أحس بنظرة الأستاذة الناقمة..طنشتها و أنا أفكر باللي ممكن يتصل عليا في دا الوقت..يووووه أنا غبية ليه ما شفت مين...؟! بعد ما خلصت المحاضرة رحت و جلست في الكافتيريا..أشوف المكالمة من مين و بعدين حروح لسعود...! شغلت الجوال و كانت المكالمة و للمفاجأة من بابا..احترت أرجع أتصل و لا لأ لكن و على أي حال بابا رجع اتصل...! بعد كم رنة رديت بتوتر حاولت أخفيه ورا الجمود:نعم...! -السلام عليكم...! -وعليكم السلام...! -كيفك يا بنتي و كيف ولدك و زوجك...؟! بنتي...؟!،يااااا الله يا دي الكلمة..من بعد ما كانت حلمي و شي أطلبو من ربنا سارت ولا شي..طبعاً من بابا بس...!،و أصلاً ما كنت محرومة كلياً منها..عمو و جدة ما كانو مقصرين...! قلت:الحمدلله..إنتا كيفك...؟! و زي ما كان يسألني "كيفك" زمان لمجرد السؤال سألتو أنا دحين "كيفك" لمجرد السؤال...! -الحمدلله بخير دام إنتي بخير...! سكتنا و لمن حسيت إننا طولنا قلت:بـ.. لكنو قاطعني بنبرة غريبة:بسألك يا جود..سامحتيني...؟! -ها...؟! -من قال ها سمع...! -ايش..ايش دا السؤال بعدين أنا قد قلتلك من قبل إني مسامحتك فليش دحين تسأل...؟! -مسامحتني...؟!،كيف مسامحتني و إنتي ما تتصلي تسألي عني..ما تزوريني..ما تراسليني حتى..يا بنتي أنا أبوكي و خلاص رضيت عنك..لازم تحاولي تتقربي مني..أنا أبوكي ما يسير العلاقة تم بيننا كذة...! كان يتكلم و كأنو الحق معاه و أنا الغلطانة قليلة الأدب إلي ما أستحي على وجهي...! قلت بصدمة: ..إنتا..إنتا فظيع..أنا مني عارفة إنتا كيف تفكر...! تابعت و أنا أصر:إنتا الغلطان..إنتا تحاول تتقرب مني و تراضيني مو أنا...! قال بابا ببديهية:لأ..إنتي من زمان تدورين رضايا صح...؟!،خلاص رضيت عليكي ذحين..المفروض نعيش مع بعض كأب و بنتو و لا كأن بيننا أي شي...! حسيت بنفسي انسدت و يومي خرب و مزاجي سار زفت،قلت بقرف حاولت أخفيه:طيب..أنا دحين لازم أروح أشوف سعود..باي...! -بتسوي إلي قلتلك عليه...؟! -مع السلامة...! قال بتعقل في غير مكانو:الله يصلحك يا بنتي..يلا مع السلامة...! و انتهت المكالمة على كده...! يا عالم..يا ناس..أنا أبالغ و لا بابا عجيب...؟!،لكن ما أقول إلا حسبي الله و نعم الوكيل..حسبي الله..يا رب..يا ربي يا حبيبي أغنيني بفضلك عنو و لا تحوجني له أبداً أبداً أبداً...! و دحين أقوم أشوف سعود أصرف لي...! ********************************** بعد ما خلصت صلاة العصر اندق الجرس،أكيد عمو،ابتسمت و قمت عن السجادة من غير ما أفسخ شرشف صلاتي..اتعطرت شوية و رحت للباب و كان بالفعل عمو...! فتحت الباب:هلا والله...! سلم عليا عمو و قال بصوت عالي عشان يسمعو سعود:وين سميي..وين متخبي...؟! طلع سعود من ورا الباب و نط على عمو و هوا يضحك...! و "سميي" يعني الإنسان إلي اسمو على اسمي...! قفل عمو الباب و نزل سعود و هوا يقول:وين علي...؟! -في الصلاة..أكيد حيجي دحين...! فجأة عمو سوى نفسو مدهوش:وي..سعود نسيت حاجة جبتها عند الباب..ايش أسوي دحييييييين...؟! قال سعود ببساطة:افتح الباب و زيبها.."التفت ليا"..ماما عادي نفتح الباب...؟! قطبت حواجبي:ايش فيييييه...؟! رجع عمو فتح الباب و قال بخوف مصطنع:سعود شوف الحاجة لا يكون الحرامي سرقها...! خرج سعود بفضول طفولي و شهق قبل ما يصرخ:دلاااااازة..(دراجة)...! فطس عمو ضحك على ردة فعل سعود إلي صرخ للمرة التانية ببكى:ماما..أنا أبغى دلازة...! خرجت راسي من الباب:اللاااااااااااااااه..ايش دي الدراجة...؟! ضحك عمو:يحسبها مو لو...؟! و خرج و شال الدراجة الصغيرة بيد و سعود باليد التانية:هيا حقتك الدلازة...! قال سعود و دموعو على خدو:حقتي الدلازة...؟! هز عمو راسو و هوا يضحك:ايييييوة...! و حط الدراجة عالأرض و قعد يمسح دموع سعود،قلت:حسبي الله على ابليسك يا سعود..ليش مفجوع...؟!،مطلعنا أنا و أبوك الأشرار إلي حارمينك...! قال عمو:ايوة الله حارمينو..ليه ما تجيبولو دراجة...؟! قلت بقهر:عمرو ما اتكلم و من داك اليوم إلي قلت فيه إنك إنتا حتجيب ما فتح فمو بكلمة لدرجة نسينا الموضوع...! نزل عمو سعود و هوا يطالع فيا و يهز راسو يعني:"أطفال ما عليكي"،ابتسمت:طب سعود قول لعمو شكراً...! راح سعود لعمو و رفع يدِّينو،شالو عمو...سعود باس عمو و حضنو:سُكلاً عالدلازة الحولة..(شكراً عالدراجة الحلوة)...! عمو راح فيها،قال:فديتك إنتا الحول إلي تجنن...! قلت:اسم الله على ولدي حول في عينك...! أداني عمو نظرة،قلت:قصدي يعني ما ينفع تنطق زيو في دي الحالة...! نزل عمو سعود و قال بصدق:طب أنا حرااااان و جيعان..ما اتغديت و أنا ألفلف في محلات الدراجات عشان ألاقي دراجة أحمرة و حولة...! قلت:حبيبي إنتا..دحين أحطلك شي تاكلو...! قلت و أنا أتوجه للمطبخ:بس ليش ما جبت معاك جدة...؟! قال بصوت عالي لإنو في الصالة:حاولت فيها بس أمي الله يهديها دي الأيام معد ترضى تخرج...! خرجت من المطبخ بعد ما حطيت الباقي من الغدا عالنار و جلست جمب عمو في الصالة:الله يصلحها كده مرة كلمتها..تقولي السكر و الحمام و الدوخة..يعني عند الناس و فهمت بس عاد عندي أنا..مني غريبة...! اتنهد عمو:أهم شي حاولي تكثري من زياراتك ترى معد هيا زي أول تتحمل بس تشوفك كل أسبوع...! اتنهدت:يا ليت لو أقدر...! -والله بدأت تحس بفراغ..و أنا مهما أقعد معاها أحس إني ما أكفيها...! قلت و أنا أتجه لسعود عشان أساعدو يركب الدراجة و يتوازن فيها:هيا تبغى حرمة و أطفال...! ابتسم:البركة فيكي..اولدي بسرعة...! ابتسمت أنا كمان:فيا و فيك إن شاء الله...! قال عمو بحماس عشان يغير الموضوع:يلا سعود يلا..عشان أصورك...! ما قلتلكم يقول أي شي المهم ما يعطيني فرصة أتكلم..أففففف...! جا علي بعد شوية،سلم على عمو بعدها راح و وقف فوق راس سعود:سعووووووووووود..ممكن ألعب بالدراجة شوية...! قال سعود بخوف:لأ لأ...! قال علي برجاء و مسكنة مرررررررعبة:الله يخليييييييييييييييييييييييك...! جري ليا سعود و هوا يبكي،دفن راسو فيا و قال وسط دموعو:بابا ما يلعب..ما يلعب...! صرخ علي:سعود إنتا و وجهك ليش تبكي...؟! -إنتا تكسل..(تكسر)..الدلازة..إنتا كبيل..(كبير)..ما تلعب...! ضحك عمو و قال بشدة مصطنعة:علي..ما تقرب من دراجة سعود فاهم...! علي مسك الدراجة و قعد يمشيها من غير ما يركب فيها و هوا يقول:اللاااااه حلوة ذي الدراجة..حكسرها...! و كان يبتسم بلؤم،سعود ما كان يشوف لإنو دافن وجهو فيا بالتالي قعد يبكي بحزن:ماما..ماما..ماما... و علي مبسوووووط و متلذذ..هتفت باستنكار:علي...! قال عمو:حبيبي سعود طالع بابا ما ركبها..يمزح معاك..شوف...! لكن سعود مازال يبكي:ماما..ماما.. قلت بقهر:سعود طالع..بابا مبسوط عشانك صدقتو..طالع بابا قاعد يكد..يمزح معاك...! ترك علي الدراجة و جا و جلس جمبي:تعجبيني لمن تسوي فيها تربوية...! قلت:أجل..تبغاني أقولو يكدب عليك عشان معد يصدقك...! قال عمو باستغراب:كيف فهمتي قصدو..أنا ما فهمت...! عمو استغرب كيف فهمت إنو علي يقصد إني قلت تمزح بدل تكدب و يحقلو و يحقلي أنا كمان أستغغل دي النقطة و أقول:"هما كده المتزوجين يفهموا بعض من غير شرح"...! ابتسمت و كنت حجاوب على عمو بس علي شال مني سعود بالغصبة و حطو فوقو،سعود كان مو راضي يرفع راسو و يبكي و علي يحاول يرفع راسو و هوا يقول:وي سعود..تبكي عشان دراجة..بعدين أنا ما ركبتها و حط ذا كله على جمب..أبوك نحيف و رشيق ما يكسر شي...! -مابغا..إنتا تبغى تكسل دلازتي...! حضنو علي و قال:حبيبي إنتا حبيبي...! قال عمو و هوا يهز راسو:حسبي الله على ابليسك نكدت عالولد...! قلت:ايش فهمك إنتا...؟!،لازم دي اللمسة الحلوة في كل شي و لا كيف يسير علي علي...؟! طالع فيا علي:أقول لا أحط لمستي الحلوة ذي عليكي ذحين..قومي يلا قومي..قومي..ما عندنا حريم يتكلمون و يعطو آرائهم...! انفعلت فجأة و هبيت فوق علي:وجع إن شاء الله..إذا كانت أم سلمة _رضي الله عنها_ أدلت بفكرة على الرسول و أصحابو تجي حضرتك إنتا ما تبغا تسمع لزوجتك..ليه..و بأي حق...؟!،و إذا كان الرسول سيد بني البشر و أحسنهم خلقاً لمن جالو الوحي لجأ لزوجتو تقوم تسفه مني قدام ولدي..والله ما أقول إلا حسبي الله عليكم يا الرجال..والله إننا أعقل منكم بخمسمية ألف مرة..بس فالحين ترددوا ناقصات عقل و دين..بس..غير كده ما عندكم هرجة...! وقمت و رحت للمطبخ أشوف الغدا إلي كان يتسخن من غير ما أسمع أي كلمة زيادة و من غير ما أرد على علي إلي قال:"جود لمن تعصب..أعوووذ بالله"...! كان نفسي أقول من الشيطان الرجيم لكن احترمت نفسي و سكت...! ********************************** أففففف..مقهورة من عمو..يتصرف و لا كأني لسه مكتشفة شي مصيري عنو..مسترخي و لا على بالو لدرجة سرت أنا أحس إنو عادي ما فيها شي..الحسنة الوحيدة من ردة فعلو العجيبة دي هيا إني هديت غصباً عني و ما سرت أفكر بعواطفي بس...! بس بيني و بينكم عمو يكابر؛يعني حتى لو ما بين الحزن و الضيقة أكيد موجودين...! رفعت نظري لسعود إلي يروح و يجي بالدراجة و رامي الجيم بوي...! لاحظت عليه إنو لمن يتعلق بشي ممكن بسهولة يتخلى عن باقي الأشياء..تعرفو ألعابو تنعد..لإنو يعلق عاللعبة بالشهور بعدين يطلب شي جديد بس تصدقوا...؟!،ألعابو إلي هوا اختارها تنعد لإنو فيه ألعاب تعجبني أو تعجب علي نقوم نشتريها على أساس لسعود..و بعدين نقعد زي الهبل نلعب بها و هوا يقعد زعلان لإنو اشترينا لو دي اللعبة و خلينا ديك...! قلت:سعود..ليش رامي الجيم بوي..مو حبوه...؟! طالع سعود في الجيم بوي:ماما هوا يبغى ينام..سيبيه لَحَالو...! -آآآآآآآه يبغى ينام...! الله المستعان..الولد دا عليه تصريفات زي وجهو..قال يبغى ينام قال...! قمت و شغلت الجيم بوي و لقيت اللمبة حمرا فقلت:سعود حبيبي فين الشاحن...! -في غلفتي..(غرفتي)...! رحت لغرفة سعود و شبكت الجيم بوي في الشاحن...! جلت بعيني عالغرفة،ابتسمت؛كل شي صغير،و لاحظت إنو ترتيبها نفس ترتيب غرفتي زمان،يمكن من غير ما أحس رتبتها بدي الطريقة...! انسدحت على السرير الصغير..يا الله كيف حالي اتغيرت؛همي الوحيد كان بابا بس دحين سار آخر آخر شي أفكر فيه،دحين سرت متزوجة و عندي زوج لازم أداريه و أسعدو و ولد لازم أربيه و مستنية بنت...! قمت من على السرير و أنا أقول:"بسم الله"،حطيت يدِّي على بطني:"أبغى بنت"،ابتسمت و أنا أمسح على بطني،رفعت نظري لفوق،قلت:"شكراً"،بعدها سحبت نفس عمييييييق و خرجت من غرفة سعود للصالة و لقيت سعود ينطنط فوق الكنب،بس لمن شافني هجد وجلس بأدب،ضحكت و رحت جلست جمبو،شلتو و حطيتو فوقي،حضنتو و قعدت أبوسو و أمسح عليه...!،أتذكر عمو كده كان يسويلي،فجأة و من أغير ما أدري يحضني و يبوسني و يقعد مدة بعدين يسيبني،قد ايش كنت أحس بالأمان و الحنان،طالعت في ملامح سعود إلي طالع فيا و قال:ماما... -عيونها... -ماما إنتي تحبيني...؟! ابتسمت و أنا أهز راسي:ما حجاوب...! -ليس... قاطعتو بإني بستو و استنشقت ريحتو:في وحدة يكون عندها عسل و ما تحبو...؟! ضحك سعود بسعادة و حرج و من الخجل دفن وجهو في صدري و هوا يضحك و أنا أضحك...! اندق الجرس بعد مدة..إن شاء الله علي؛متحمسة أقولو إني حامل ببنت..أنا من قبل كنت حاسة و رحت من ورا علي مع عمتي إلي قالت بإنها تبغى تاخد رأيي في مجلس و مسكت السواق و رحنا على المستشفى..إلي سار إني قلت لعلي قبل صلاة العشا و قبل ما أقفل الباب:تراني عرفت جنس البيبي...! و قفلت الباب بعد ما قلتلتو:"الصلاة حتفوتك"،لإنو كان يزن يبغى يعرف..وي لا أكون أخدت ذنبو..أقوووووول خليني أروح أفتح الباب...و رحت عشان أفتح الباب و لمن فتحتو قال:سنة...! -كان فتحت بنفسك...! -مزرفن...! -طيب لا تعصب..دحين حزر..بنت و لا ولد...؟! قال علي:مممممم..ولد أكيد لإني أبغى بنت...! التفت لسعود:سعود تتوقع النونو بنت و لا ولد...؟! قال سعود:بنت...! قلت:لأ... علي:ولد...؟! -لأ... -أجل جنس ثالث...! قلت باستنكار:لاااااااااء...! ضرب سعود الأرض برجلو و قال بإصرار:واللللللللللللله بنت...! علي:لا تحلف و إنتا مو متأكد...! ابتسمت:كلامو صح..بنت...! قال علي بفرح:من جد...؟! شلت سعود و حضنتو:حبيب ماما إنتا..كيف عرفت...؟! قال سعود:أنا أعلف (أعرف)،أنا كبيل (كبير) هيا نونو سَعيييييييلة (صغيرة)...! ضحكت:فديت ولدي الكبير أنا...! علي:و كالعادة يتم تسفيه علي...! نزلت سعود:تبغى أشيلك إنتا كمان...؟! مد علي يدِّينو و هوا يرمش بعيونو ببراءة مرعبة:،قلت:الله يرفع بالبراءة عنك بعدين إنتا إلي المفروض تشيلني مو أنا...! التفت علي لسعود:سعود أشيل ماما...؟! هز سعود راسو بايوة و هوا زام شفايفو،اتقدم مني علي،رجعت على ورا:لا علي أنا سايرة تقيلة حتطيحني بعدين ما ينفع... قطع كلامي و هوا يشيلني:سعود يلا الحقني عشان نحط أمك و أختك على أكف الراحة...! طالع فيا و هوا يمشي بيا و همس:قدرت عليكي في السابع ما بقدر عليكي و إنتي في بدايات الخامس...؟! قلت بخجل:بس سعود...! لفت علي لسعود إلي كان مو معطينا أي اهتمام،حطني عالسرير و هوا يضحك:ولا جاب خبرنا...! رجع علي يطالع في سعود:ها سعود..شفتني و أنا أشيل ماما...؟! -ايوة...! هز علي راسو:مو حلو...؟! قال سعود و هوا يرفع أكتافو:إنتا أول ما سلت ماما كده...؟! قال علي بحذر:ليش إنتا متى شفتني أشيل ماما...؟! كان سعود قاعد يحاول يتذكر أما أنا فحطيت يدِّي على خدي:يا حسرة على ولدي ياااااا حسرة.."تابعت بقهر"..عشان لمن أقولك يااااا سيد علي بطل تستعبط برة الغرفة تبطل..مو تقولي عادي نايم،نايم في عينك..بلى في وجه العدو إن شاء الله...! طالع فيا علي:ايش فيكي إنتي..يعني ايش حيكون شاف...؟! كنت حرد لكن سعود قال:اِتْزَكَرْتَا...! و كان حيكمل لكن علي قال:أوووص..روح على غرفتك يلا...! لوَّى سعود فمو بعدين راح،قلت:ما شاء الله..حضرتك بس فالح تسكت الولد...! قفل علي الباب و جا و جلس قدامي و قال بابتسامة:من المتوقع إنو بعد ما عرفنا إنو إلي في بطنك بنت نعيش لحظات رومنسية...! -ها...؟! -ها...؟!،بدل ما تقولين لي كلمة حلوة تقولين ها...! قلت و أنا أحرك يدِّي:بعد عني..عيب..أصلاً..أصلاً إنتا قليل أدب...! قرب مني:أنا إلي قليل أدب و لا إنتي إلي ما فيكي رومنسية...؟! قلت و أنا أرجع شعري على ورا:أصلاً مُنـ قاطعني:لا تقوليها..اسكتي أحسن...! قلت و أنا أأشر على حلقي:عالقة..عالقة هنا...! رفع علي دقني:وين وين..وريني وين عالقة...؟! كملت في نفسي الكلمة:"ـحرف"...! ********************************** خرجت المكرونة الباشميل من الفرن و حطيتها على جمب،فتحت قدر الرز بعدها خفضت النار عليه...! سحبت نفس و أنا أفكر بإني بكرة ما حأطبخ غدا و حناكل من باقي عشا اليوم..أكيد حيزيد...! طبعاً أكيد تسألو ليش كل دا..أقولكم علي عازم أصحابو الجُداد حتى قلي على أسماءهم و حفظني هيا،سرت أحس نفسي أعرفهم من كتر ما يكلمني عنهم...! أول شي "محمد"،يقول علي إنو ضخم و صوتو قوي ما شاء الله و إنو مررررررة محترم و مثالي على عكس "عبدالرب"،الطفشان من كل شي و في نفس الوقت قليل أدب شوية و ما عليه من أحد..و يقول علي إنو ما يحب اسمو..يقول إنو طويل و مسوي زحمة..الله يصلحوا سمو مافي شي..و عشان كده الكل يناديه عبود و مع بركات باب الحارة سارو ينادوه "عبدووو"..أما عن يوسف فيقول علي إنو حبوب و صوتو يجنن ما شاء الله و قد سمعني مقطع لو في جوالو و من جد حلو..و مين كمان يا ربي...؟!،ايوة اتذكرت فيه واحد اسمو عمر و علي يقول إنو مرة خجول و يستحي من خيالو..و لمن يحكيني عنو أفطس ضحك..أحب الأولاد و الرجال الخجولين و فيه كمان واحد اسمو أحمد يقول علي إنو حبوب و خفيف دم و يقولولو حمادة...! طبعاً أنا أموت و أعرف مين إلي شالني بس أخاف أسأل علي..حيحقد و يهزأني...! و ساعات أقول:"لو كنت مو متزوجة كان سارت علاقة حلوة بيني و بين إلي شالني و كان سارت لي حركاااااات زي في قصص الحب"،بس لا تقولو لعلي إني قلت كده..والله ليذبحني بدم بارد...! بعدت الرز و حطيتو على عين مي مولعة،غطيت المكرونة عشان ما تبرد و خرجت من المطبخ من غير ما أنزل أكمامي المشمرة و بنطلون بيجامتي المطوي،و لمن خرجت من المطبخ لقيت علي منحني يحط صحون الكباب على الأرض،قعدت أطالع فيه و أتأمل...! و لمن اعتدل علي و جات عينو عليا حسيتو وقف يتنفس لثواني قبل ما يقول بعمق:جود...! هزيت راسي أنفض منو كل الذكريات إلي مرت عليا،قلت بابتسامة:نعم...! قال بنظرة تايهة و هوا يتقدم مني:نفس الشي..نفس الشي بس..بس إنتي ذحين حامل..حامل مني أنا و من قبل جايبتلي ولد...! قرب مني أكتر و مسك أكتافي و هزني بشويش:ذيك اللحظة ما كنت متخيل إني ممكن أكون معاكي تحت سقف واحد و عندي منك أولاد...! ضحكت ضحكة قصيرة خفيفة،قال علي:جوووووود...! قلت و أنا أنزل أكمامي:ولا أنا ما كنت متخيلة إنو ديك الصدفة ممكن تتعدى حدود موقف محرج...! ابتسم:لكنها اتعدت...! -اتعدت و بس....؟!،.."تابعت برجاء"..جيب صحون الكباب بليز...! ابتسم علي و هوا يرجع يجيب الصحون و ابتسمت و أنا أردد:"سبحان علام الغيوب..مين كان يتخيل؟!"...! ^^^^^^^^^^^^^^^ كنا قاعدين أنا و علي عالسرير..أصحابو راحوا..بس كعادتو يجي يحكيني عن إلي سار و لو فيه شي مو عاجبو يحط حرتو فيا...! ابتسمت و أنا أسمعو يتكلم:و أهم شي في الموضوع كله عمر..تخيلي ما جا...! -ليش ما جا...؟! -ها...؟!،يقول يستحي يدخل بيتي و يخاف يضايقني..الآدمي ذا يستحي من خياله...! -يا نااااااااسو..تعرف مرة أحب الأولاد لمن يكونو يستحو..يعجبوني دولا إلي يستحو من خيالهم...! -هييييي إنتي...! -ايييييش..ايشبك قلبت فجأة...؟! -لا تتكلمين عن عمر...! قلت بسخرية:لييييييش..تغار عليه...؟! رماني علي بوحدة من المخدات و قال بانفعال:عليكي يا غبية...! مسكت المخدة و حطيتها على جمب:وي..و ليش عمر بالذات...؟! قال بتوتر:عـ..عشان هوا يستحي و إنتي يعجبوكي إلي يستحون و.."تابع بنرفزة مفاجئة"..و بعدين لعد تنطقين اسمه...! قلت بلا مبالاة:عدم نطقي لاسمو ما حيأثر و لا على شعرة مني و لو إنو غريب إنك عصبت فجأة...! حاول علي يغير الموضوع في الوقت إلي كنت قاعدة أتساءل فيه عن سبب عصبية علي...! ********************************** اليوم ما عندي دوام بالتالي قاعدة في البيت مع سعود إلي يتفرج على التلفزيون و ياكل كورن فليكس...! وقفت و مسكت الريموتات و رفعتها فوق دولاب التلفزيون عشان سعود لا يقعد يقلب و يخبص ترتيب القنوات...! و رحت لغرفتو و اتفاجأت بكل الألعاب مِرَمَية و السرير محووس و الدراجة طايحة على الأرض...! ناديت:سعووووووووووووود...! و جا سعود،قلت و أنا أأشر عالغرفة:ايش دا...؟! -غلفة..(غرفة)...! -لا يا شيخ..غرفة...؟! بعد شوية قلت:كملت فطورك...؟! -بقي سوية...! -طيب خلص هدي الشوية و بعدين الغرفة دي تترتب و كل شي يرجع مكانو و الدراجة يا ويلك لو شفتها مقلوبة كده مرة تانية..سامع...؟! قال سعود و هوا مبرطم:ماما... -ما تكلمني قبل ما ترتب الغرفة...! سعود فِضِل مبرطم،قلت:يلا عشان لو رتبتها حعملك مفاجأة...! و خرجت من الغرفة و رحت لغرفتي وين ما جوالي يرن،مشيت للكوميدينة و أنا أفكر في مفاجأة لسعود عشان ما أطلع كدابة قدامو و...ايييييييييييييييش دا...؟!،بابا هوا المتصل...!،ايش يبغى مني في دا الوقت...؟! طالعت في الساعة،كانت 11 الظهر..ايش يغى...؟! رديت بتحفظ و جمود كعادتي:نعم...! -أيوة السلام عليكم...! -وعليكم السلام...! -كيف حالك و كيف أهلك...؟ -الحمدلله بخير..إنتا كيفك...؟! -الحمدلله..آآآ جود بغيت أسألك..أبو سعود موجود...؟! قلت و أنا أعلق على اللام:لللللللأ..ليش تسأل...؟! -لا بس أنا قريب من عمارتكم و أبغى أكلمك في موضوع بيني و بينك فما حبيت أضايق أبو سعود...! -دحين...؟! -ايوة لو كنتي فاضية...! فاجأني لكن و للواجب و الاحترام _فقط_ رحبت فيه و حصل و جا بابا و بطريقةٍ ما صرفت سعود و أقنعتو ما يجينا..بعدها قعدنا أنا و بابا في الصالة لوحدنا بعد ما رفض أي شي إلا كاسة موية...! قال بعد صمت دقيقة كاملة:كيفك و كيف الدراسة و الجامعة معاكي...؟! -الحمدلله...! -فرنسي إنتي صح...؟! -ايوة...! ابتسم:تعرفي فرنسي...؟! طالعت فيه..ايش السؤال الغبي دا...؟!،و إنتو كمان ليش تطالعو فيا كده..ايوة أعرف و فنانة بس البركة في الناس إلي ما تعرف..خليني ساكتة بس...! و جاوبت على أي حال:ايوة...! و سكتنا..يا ترى ايش الموضوع...؟!،أياً كان الموضوع حكون جامدة و هادئة و ما حسمح لعواطفي تظهر لإنو مو أي شخص يكون قد إنك تعبر عن مشاعرك قدامو و توريه... "جود إنتي ما قد شفتي بيتي...؟!"،انقطع حبل أفكاري و رفعت راسي لبابا و أنا أسمع سؤالو السابق و أقول بحواجب مقطبة:نعم...؟! -آآآآ..إنتي ما قد جيتي بيتي إلي هوا بيتك و بيت أخوانك و أخواتك...! هزيت راسي:يعني...؟! قال من غير ما يجاوب على سؤالي:مها بنتي ملكتها الأسبوع الجاي...! ما اتحمست أو فرحت و افترضت إنو يبغى يغير الموضوع،قلت بصدق:أوه الله يباركلها...! -و أنا جاي أعزمك...! قعدت أفكر و بشكل سريع عرفت إنو عيب أرفض و إنو مها مالها ذنب بمشاكلي مع أبوها،قلت:مين إلي حيتزوجها...؟! -ولد بيت الـ*****...! -آآه ايوة ايوة..الله يتمم لهم على خير..إنتا ممكن تتصل على علي توصفلو مكان القاعة...! -لا الملكة في بيتي..هيا عائلية...! قلت بصدمة:نعم...؟! اتوتر بابا:أنا يا جود..يعني إنتي من الأهل و..يعني..يعني أختك و.. قاطعت بابا:آسفة ما أقدر أجي..بس وصل لها سلامي و مباركتي...! قال بابا:دوبك كنتي موافقة و لا عشان في بيتي...؟؟؟!!! قلت بنرفزة و توتر:ما أقدر..ما أقدر و خلاص...! طالع فيا بابا برجاء:يا بنتي انسي إلي كان و تعالي..أختك بنفسها مصرة تجين..تعالي..تعالي و خلي الموية ترجع لمجاريها...! بابا كان يتكلم و كأنو مالي حق أرفض أو أزعل،اتكتفت و حطيت رجل على رجل:و من متى كان فيه مجاري أصلاً...؟! بابا صدمو سؤالي،تابعت من غير ما أسمع إجابة:أنا أعتذر ما أقدر أجي..من جد ما أقدر..لو أقدر كان جيت...! وقف بابا و اتفاجأت بو يجلس جمبي و يمسك يدِّي و يقول:جود..جود خلاص انسي..أنا أبغا أصلح كل أغلاطي و أبغاكي تساعديني...! سحبت يدِّي من بابا و بعدت عنو جسداً و نظراً:مابغا..ما أقدر أدخل بيتك...! -مو سامحتيني..خلاااااص...! بابا شبه مو فاهم و واعي لأثر إلي سواه في نفسي الشي إلي ما خلاني أبكي أو أصرخ بانفعال..الشي إلي أجبرني أفهمو بالهداوة و أوضح لو أفكاري و أنا أحاول ما أجرح مشاعرو أو أقل أدبي...! قلت:بابا..سامحتك ما يعني إنو بين عشية و ضحاها علاقتي بك تسير بيرفكت..عارف..عارف لو جيتني قبل ما أتزوج كان ممكن أتبكبك و أولول و تقعد إنتا تحاول فيا مدة بعدين أرضى و أتعلق فيك و أحبك لكن دحين غير..أنا زمان كنت أحس إنو عمو مو مجبر يهتم بيا،كنت أتمنى لو تجي و تضمني لك و... قاطعني بانفعال:أنا أبغى أضمك ذحين...! قلت و أنا أغمض عيني أداري عبرة:أرجوك لا تقاطعني...! تابعت بألم و أنا أتذكر مخاوفي:كنت خايفة من اللحظة إلي يقرر فيها عمو يتزوج و يحس إني أنا رادع أو تُقل عليه عشان كده كنت أطلب من ربي إنك في يوم تجي و تؤويني بس دحين أنا في بيتي مع زوجي و ولدي مني تقل على أحد..و اسمحلي أقولها..ما سار لك أي أهمية في حياتي..و ربي الحمدلله ما تركني..عوضني عن كل شي كان ناقصني..و كل ما جيت إنتا تسوي شي المفروض إنو يدمر حياتي يزبطها على عكس المتوقع.."ابتسمت و أنا أهز راسي"..من يوم ما انولدت إلمن يومك دا و ربي كافيني الشر و يرعاني..لمن رميتني على عمو اتزبطت ظروفو و سارتلو أشياء كتير بس..عشان يتعلق فيا و يسير يحبني زي بنتو..لمن زوجتني علي من غير ما تسأل عنو و عن إلي سواه فيا اتغير فجأة و اتغيرت شخصيتو و سار رَجُل محترم..و محد قادر يصدقني قد ايش علي اتغير و بشكل غير طبيعي..كأنها معجزة..أما عن سعود و ولادتي القاصرة الصعبة له بعد دعوتك طلع ما فيه شي و ربي ستر..و الحادث..الحادث إلي سلمنا منو كلنا و فوق دا الناس إلي أنقذتنا سارو أصحاب علي و بقوة و يحبوه و يحبهم...! اتبادلنا أنا و بابا النظرات لثواني بعدها قلت:أقولك كل دا عشان تفهم إنو كل شي سيء كنت تحاول تسويه ليا ربي يردو في نحرك..أنا يا بابا معد أحتاجك و لمن سامحتك سامحتك عشان ما عندي وقت أحقد على أحد، بيتي و دراستي ماخدين كل وقتي...! و سكت لثواني بعدها قلت:و بيتك ما أقدر أدخلو..أعتذر...! -لييييه..ليه...؟! قلت بسخرية حزينة:كيف تخلي الحشرة و القذارة تدخل بيتك...؟! انفعل بابا و قال باستغراب:ليه تقولي عن نفسك كده...؟! -مو أنا إلي قلت...! -مين إلي قال...؟! اتنهدت بألم:هيا كلمة قلتها عمري ما حنساها.."طالعت فيه بألم"..بس عمرك ما حتتذكرها...! أشحت بوجهي و أطبقت شفايفي على بعض و أنا أداري دموعي...! أجبرني بابا أطالع فيه لمن مسك وجهي و لفو عليه و قال بعمق:ايش قلت...؟! بعدت يدُّو و لفيت وجهي:مالو داعي.."وقفت"..اعتبر البيت بيتك...! و كنت حدخل و أخليه لكنو قال بحزن:تبغيني أخرج صح...؟! -مو عن كده بس أنا كنت واضحة و صريحة معاك و هدا شي أُشكر عليه.."ابتسمت بشجن"..يعني..أحسن من إني أسلم على يدَّك و راسك و أنا من جوة كارهتك و حاقدة عليك.."حطيت يدِّي على قلبي"..هدا أبيض تجاهك بابا..أبيض...! وقف بابا و خرج من الشقة حزين زعلان...! ارتميت على الكنبة...! ليش..ليش شايف إنو المفروض ما أكون زعلانة..ليش...؟!،ليش بابا يعتقد إنو ما دام رضي عني خلاص كل شي يتصلح...؟!،ليش معتبر إن معاه كل الحق لمن يطلب مني أعاملو كأب و ايش الفايدة _أصلاً_ من محاولتو تصحيح أغلاطو و هوا لسه غير آبه لمشاعري...؟!،مادري لو ملاحظين لكن بابا ما يبغاني أعاملو كأب عشاني..بابا يبغى كده عشان هوا يرتاح و يحس بالرضا عن نفسو...!،ليش بابا كده..لييييش...؟! و السؤال الأهم إلي أبغالو إجابة دحين..ليش أنا لازم أضغط على نفسي و أتحمل كل دا...؟! ********************************** |
الجزء الثامن "الهدوء الذي يسبق العاصفة" سعود سيروي،،، كنت قاعد مع أمي نتفرج عالتلفزيون و نتقهوى،قالت أمي بعد تنهيدة:يا ولدي وين جود ما تكلمني...؟! -الله يا أمي..لسه دوبك مقفلة منها...! كانت جود لسه دوبها مكلمتني و مكلمة أمي...! قالت أمي و هيا تهز راسها:والله إن البيت ماش من بعدها...! ضحكت:ماش...؟!،هذا و إنتي كل ما جات صرختي عليها،أجل لو ما تحبينها ايش بتسوي...؟! أمي رغم حبها الكبير لجود إلا إنها كل ما تجي لازم تهزأها و أمي أصلاً كل ما زادت غلاة أحد عندها كل ما زاد خصامها له..و كدليل ما كانت تخاصم علي في بدايات زواج جود رغم إنها اندمجت معاه لكنها كانت مسالمة بس دحين الله لا يوريكم لا تهزيئة أول ما يدخل و قبل ما يخرج...! رن جوالي و كان سعيد و على سيرة سعيد ترى بنتو مها بتملك الأسبوع الجاي..كان الموضوع بالسُكيتي و محد عرف إلا لمن عزمنا سعيد على الملكة..الله يوفقهم..طبعاً سعيد قالي إنو يبغى جود تجي و أنا اقترحت عليه يروح لها عشان تحس إنو من جد مهتم بها و يبغاها تجي و أصلاً لازم يروحلها كل فترة و التانية و يسأل عنها عشان تحس إنو صادق و يبغى رضاها...! رديت و أنا متحمس أعرف ايش سار لكن صوت سعيد المكتئب و هوا يرد على سلامي خلاني أقوم أدخل غرفتي و أقول بقلق:سعيد ايش فيك...؟! قال سعيد بيأس:خسرتها..خسرتها يا سعود خسرتها...! -مين...؟! -جود..جود معد تبغاني..أنا لازم أنسى إن عندي بنت اسمها جود..لازم أنسى..لازم...! سعيد كان صوتو تعبان و الحزن باين عليه،قلت:سعيد ايش فيييييه..أقلقتني...! قال سعيد بصوت متحشرج:تقول معد تحتاجني..استغنت عني بعد ما اتزوجت..تقول بيتها و دراستها أهم مني و يوم اتصلت عليها قالت.."سكت و كأنو مو قادر يكمل لكنو تابع بعد ثواني بتعب واضح"..سعود أنا مني قادر أتحمل..البنت كرهتني و معد هيا زي أول..تقول إنتا تعال حاول تكسب رضايا أنا تعبت منك و معد حفكر فيك و تقول ما حتدخل بيتي..يا سعود تقول كرامتها ما تسمح لها و ما تنزل نفسها لِي..البنت ذي اتغيرت..اتغيرت.."برجاء"..أبغاك تصلح بينا يا سعود..ما أبغا أقابل ربي بذنبي ما بغا...! كنت مصدوم من الكلام إلي قاعد أسمعو...!،قلت و أنا مو هنا:جود قالت دا الكلام...؟! -سعود أنا حاس إني مخنوق..مخنوق و مو قادر أكتم..أرجوك يا سعود تصلح بينا أرجوك...! -ما عليك يا سعيد ما عليك..اترك الموضوع ليا...! فصلت و أنا أسمع ترجيات سعيد و تشكيه من جهة و من جهة تانية كلام جود الفظيع يزن و بشكل أقوى...! لبست ثوبي المعلق و مسكت جوالي و مفتاح سيارتي و خرجت و عند الباب قالت أمي:سعود..وين مروح...؟! -ها..لا بس صاحبي طاح بروح أطمن عليه...! قالت أمي بتعاطف:يا عمري..هيا لا وصلت طمني...! -إن شاء الله إن شاء الله...! و خرجت بسرعة و أنا أسمع دعاوي أمي ليا...! في السيارة كنت قاعد أحاول أهدي نفسي لإني كنت مطنقر؛كيف تتجرأ تقول لأبوها كده...؟!،أوكي غلط معاها لكن إنها تقولو معد أحتاجك و دراستي أهم منك و فوق هذا بكل قلة أدب و وقاحة تقولو إنتا تجيني مو أنا أجيك...! والله والله لو مو حامل كان ضربتها..أياً كان إلي سواه هذا أبوها و هيا إلي كانت زمان مصرة على كده ليش دحين غيرت رأيها...؟!،و بعدين كيف هذا الكلام يطلع منها..كيف...؟!،جود مهما كان مستحيل تجرح أحد أو تتطاول عليه فكيف لمن أبوها...؟! اتنهدت..الكلام طلع من جود طلع و من واجبي أوريها قيمة كلامها و أفهمها إنو هذا أبوها و إنها غصباً عنها رح تدخل هذا البيت إلي..مو من مستواها...! ^^^^^^^^^^^^^^^^^^^^^^^^ جود،،، كنا قاعدين في الصالة نتفرج على التلفزيون في الوقت إلي رن فيه الجرس..سعود جري للباب و قعد ينطنط بحماس:"مين..مين"...! علي:قومي شوفي...! قمت و أنا أقول:ما شاء الله عليك..هدي آخر مرة أشوف مين على الباب...! و إلي كان على الباب عمو...! ابتسمت و أنا أفتح الباب:أهلاااااااااان..ايش المفاجأة الحلوة دي...؟! اختفت ابتسامتي و أنا أسمع عمو يقول و هوا يمسك يدِّي:السلام عليكم..جود تعالي أبغاكي...! و سحبني معاه لمجلسنا تحت نظر علي المستغرب...! جلسني و جلس على كنبة بعيدة قدامي،سكت لثانية قبل ما يتنهد بقهر و هوا يضرب فخدو،قلت بقلق:عمو حبيبي ايشبك...؟! طالع عمو فيا بنظرة مرعبة و قال بنبرة غريبة:قليلة أدب...! -نعم...؟! قال عمو بهمس غاضب:تعرفي لو مو إلي برة و لو مو بطنك قدامك كان قمت عليكي ضرب...! صدمتني كلمات عمو..قلت و أنا على وشك أبكي:عمو ايشبك...؟! -ايشبي...؟!،ولا شي..بس طار عقلي من كلامك الوقح لأبوكي...! إشارات حمرا ولعت في عقلي..بابا في الموضوع...! قلت بتساؤل:ليش أنا ايش قلت لبابا...؟! وقف عمو و هوا يقول:"ولا شي"،اتقدم مني و قال بسخرية مؤلمة:والبيت إلي حضرة كرامتك مي مخليتك تتنازلي و تروحيلو حتروحيه غصباً عنك و رجلك فوق رقبتك...! طالع فيا لثواني قبل ما يقول بعمق:لو الأولاد كذة فربي مو حارمني...! و خرج من المجلس و خرج من الشقة من غير ما يرد على علي إلي قعد يسأل...! رجع علي دخل المجلس وقال:جود ايشبكم...؟! رفعت نظري لعلي و رفعت أكتافي:مادري...! اتغيرت ملامح علي و هوا يشوف دموعي الطارفة،جلس جمبي،قلت و دموعي مملية عيني:بس بابا في الموضوع..أكيد قال شي لعمو بس أنا ما قلتلو ولا شي..هوا جا هنا و كلمني بس أنا رديت عليه بأدب و ما اتكلمت بوقاحة...! قال علي باستنكار:متى جا و كيف ما تقولين لي...؟! -قبل أمس و إنتا في الدوام جا و قلي أروح عندو عشان ملكة بنتو و قلتلو مابغا أجي و فهمتو ليش رافضة بس هوا ما فهم أنا ايش ذنبي...؟!.."غطيت وجهي و قلت بصوت مو واضح من البكا"..ليش هوا مو عادي يزعل و أنا عادي...؟!،ليش لمن يزعلني و يضايقني محد يقولو شي بس لمن هوا يزعل... بكيت و ما قدرت أكمل...!،حسيت بالظلم..ليش يتبلى عليا..ليش يقولني كلام ما قلتو...؟!،قهر..قهر..قهر...! حط علي يدُّو على ظهري:جود خلاص لا تعبين نفسك عشانه...! رفعت راسي و قلت بقهر:كيف خلاص كيف...؟!،كيف و أنا دحين حروح غصباً عني بيتو..أكرهو و أكره بيتو..أكررررره بيتو..مابغا أروح هناك.."ضربت بقبضتي على فخدي بشكل متوالي و قلت و أنا أصر"..مابغا مابغا مابغا... مسك علي يدِّي و قال بشدة:جود بس...! طالعت في علي:أكرهو..علي..أنا أكره..بَا... سكت و أنا أنتبه لسعود الواقف عند الباب و يطالع فينا بحيرة و تساؤل..مسحت دموعي،قال علي و هوا يمد يدُّو:تعال بابا تعال...! جا سعود و جلس فوق علي وقال بتردد:ماما إنتي ايس بيكي..(ايشبك)...؟! قلت و أنا أقوم:ولا شي...! و رحت لغرفتي و أنا أتمنى من علي يمسك سعود لا يلحقني و يزن على راسي...! ********************************************** مقهورة من عمو و دمي فاير و كارهة بابا و مني طابقة أسمع صوتو..لا و متصل يأكد عليا أجي الخميس عندو عشان ملكة هانم مها..يووووه و هيا مالها مسكينة..ما سوت لي شي...! يا الله..حلم حياتي كان إني أدخل داك البيت بس دحين...! تعرفوا..أحس بشي جوتي..شي يخليني أكره نفسي و ما أطيق ولا أحد..حتى عمو مُستفزة منو و..زعلانة..كيف يصدق بابا...؟!،اتنهدت و أنا أفكر إنو محد فاهمني..الكل يبغى مني أرتمي في أحضان بابا بس أنا ما أقدر..يا ليت والله لو أقدر...!،تعرفوا كيف لمن يستخدمو تعبير:"طابت النفس"...؟!،أنا طابت نفسي من بابا..صح أقول أكرهو و مقهورة منو و ساعات أسبو و أشتمو لكن من جوتي كل إلي أبغاه منو إنو يسيبني في حالي و يبعد عن حياتي..ما أتمنالو الشر بس أبغاه ينساني و ينسى وجودي..زي..زمان...!،ايييييييوة زي زمان..صح كنت أتألم لأنو ما يهتم بيا لكن بشكل عام كنت مرتاحة...! خرجت من أفكاري و أنا أسمع صوت شي يطيح،طالعت في أرض دولابي إلي واقفة قدامو و كان واحد من فساتيني طايح...! قفلت الدولاب و التفت لعلي إلي كان جالس على السرير و فوقو لابتوبي إلي شابك فيه اليو ا سبي حقو..قصدي حقي بس هوا استحلو و كان يكتب شي...! قلت:علي...! من غير ما يطالع فيا:نعم...! -علي بعد بكرة ملكة أختي و... صرخ علي:لاااااااء...! و قفل اللاب توب و حطو في نص السرير و انسدح و غطى نفسو لين راسو:تصبحين على خير...! ضربت الأرض برجلي:علييييييييييي...! قال من تحت الغطا:لأ...! -علي بليز ما عندي شي ألبسو...! طلع راسو:كل ذي الفساتين و ما عندك شي...! -علي أنا حامل...! -يعني أيام سعود ما اشتريتي...! -إلا بس ما كان فيه مناسبة فما اشتريت فستان...! -جود حبيبتي إنتي حلوة أي شي تلبسينه يطلع حلو...! قلت بزعل:شكراً مابغا منك شي...! و رحت و بعدت اللاب توب و انسدحت على ظهري،بعد شوية حسيت بيد علي،قلت بزعل:بعِّد يدك..إنتا أصلاً ما تعرفني إلا دحين...! قال بطفش و هوا يزبط البطانية:بعدِّل البطانية...! و بعد خمسة دقايق من التقلب قام علي و هوا يبعد البطانية عنو:أفففففف متى حتولدي...؟! -إنتا تعرف متى حولد...! -جود مو معقول..يعني حنقعد أربعة شهور على ذي الحالة..جود أنا كل يوم أقوم الليل بردان...! علي الفترة الأخيرة ساير يشتكي من بطني..يقول إنو بطني كبرت و سارت تاخد جزء من البطانية..أوكي كلامو صح لكنو سار يبالغ...! قلت بطفش:قلتلك خليك قريب مني عشان تكفي البطانية...! -بطنك تضايقني...! قلت بقهر:و قلتلك كمان نشتري بطانيتين صغار منتا راضي...! -ليش عزاب على غفلة...؟! -أجل خلاص اسكت و اتحمل...! -أتحمل...؟!،أتحمل إني كل يوم أقوم مزكم و حالتي حالة..أربعة شهور هذي مو كم أسبوع...! قمت من السرير و خرجت من الغرفة و علي يقول:تعالي هنا..خلاص آسف كنت أمزح...! طنشتو و رحت لغرفة سعود و انسدحت جمبو،خليت راسو تحت يدِّي و كعادتو ما قصر و بشكل أتوماتيكي دفن وجهو في صدري...! بعد شوية دخل علي الغرفة و وقف جمب السرير متكتف:قومي...! حطيت راسي على المخدة و غمضت عيني على أساس أنام لكني ما حسيت إلا بيدِّين علي رافعتني،شهقت و قلت بهمس:نزلني...! -أششششش لا تصحين الولد...! و في غرفتنا جلسني على السرير و بعدها اتمغط:يدِّيييييييي...! -ما قلتلك تشيلني.."رفعت سبابتي"..و بعدين ما تقرب مني سامع...؟! جلس جمبي:أفااااااا..هذا و أنا متعني و شايلك من هناك...! -مو حضرتك مو عاجبتك النومة معايا..كان خليتني عند ولدي...! -ما أقدر..تتوقعين أقدر أنام و إنتي زعلانة مني..تتوقعي أقدر...؟! -ايوة ليش لأ..مو إنتا شغَّال طول اليوم منتا راضي تسويلي شي..أصلاً إنتا بس فالح تكسر لي خاطري...! قال علي و هوا يلعب بشعري:فديت خاطرك أنا..قوليلي ايش تبغي...؟! اتكتفت و لفيت وجهي بدلع:مابغا أروح عندهم إلا و أنا لابسة أحسن لبس...! لا تقولو سخيفة...!،حُطوا نفسكم مكاني..ناس أول مرة تدخلو بيتهم و كمان منتو عاجبينهم و شايفينكم "اِيوووووه"...! علي:بس مافي وقت يا جود بعد بكرة الملكة...! طالعت في علي و رجعت لفيت وجهي:مالي دخل..لو نقعد من الفجر لين آخر الليل في السوق..أهم شي ما أروح عندهم مقربعة...! استنكر علي:مقربعة...؟!،عمرك ما كنتي مقربعة..طول عمرك قمر و تجننين..بعدين أنا ما قلتلك إنك الحلى كله فمافي شي يطلع عليكي مو حلو...! قلت بصوت باكي:قلتلي عشان تبغى تنفك مني...! -أنفك منك...؟!،ليش مجنون..مين يدلع عليا و يرجني بعدين...؟! -مدري عنك..اسأل نفسك...! ابتسم:طب..أشوف ابتسامة...! قلت بدلع:لأ مابغا...! -لييييييش..ايش فيه كمان...؟! قلت بزعل:فيه إنك بعد شوية حتقعد تقولي متى حتولدي و متى حننفك من دي الحالة...؟! -شفتي هذا اللسان...؟! طالعت في علي،كان لامس طرف لسانو بطرف أصباعو،قال و هوا يغمض عينو و يفتحها:عساه القطع لو قال شي يضايقك مرة ثانية...! قطبت حواجبي:هيييييي..لا تدعي على نفسك...! ابتسم:تخافين علي جود...؟! ابتسمت و هزيت راسي:لأ...! -قولي جود قولي..قولي أخاف عليك...! رفعت بصري فوق:أفففففف يعني أبغا أفهم يعني..لو ما حخاف على أبو أولادي أخاف على مين...؟! -لااااااااا أنا كذة قلبي ما يتحمل..تبغيني أموت إنتي...! -الله يرحمك...! ضربني علي بقوة ورا كتفي،قلت بألم:آآآآآآي علي..حرام عليك حامل أنا...! -مو حرام عليكي أنا...؟! -هوا الرحمة بس للميتين..الله يرحمنا كلنا...! اتكتف علي و لف وجهو و قلد لهجتي:لأَّ أنا زعلااان...! قلت بحماس:علي يا حيوان زبطتني...! طالع فيا:حطي حيوان على جمب بعدين بحاسبك عليها بس ايش قصدك بزبطتني...؟! -لا بعدين تحاسبني على حيوان...! -غبية تستاهلين..كانت الكفة في صالحك بس قلبتيها و ذحين حوريكي مين علي من جد...! ابتسمت و قلت بثقة:أصلاً ما أهون عليك...! ********************************************** كنا أنا و علي في السوق و سعود حطيناه بيت أهل علي...! قلت:علي شوف داك المحل..أول دخلتو كان فيه ملابس حوامل حلوة...! -أففف جود..كبير مرة...! -يعني يا علي و إذا كبير..يلا عشان نخلص حتى أنا والله تعبانة...! -ايوة تعبانة...! علي مو مصدق إني تعبانة،يقول:"إنتي أصلاً مبسوطة باللفلفة"،يعني صح أحب اللفلفة في الأسواق لكني دحين تعبانة..والله تعبانة...! المهم..دخلنا المحل و كان في وجهنا شاب لابس يوني فورم المحل،كان صغير مرة..يجي حق 18 سنة و بااااااين إنو سعودي،قال علي:لو سمحت فين قسم الحوامل عندكم...؟! قال الشاب بفجعة استغربناها أناو علي:قسم مين...؟! قال علي بملل:حوامل...! حاول الشاب يتدارك نفسو و قال و هوا مسوي فيها رسمي:للمدام...؟! علي:لا لي أنا..مقاسي اكس اكس لارج..عندكم...؟! كتمت ضحكتي،والله يحزن دا الولد..مفجوع و مو عارف يتصرف...! قال الشاب بتوتر و تأتأة:إِ..إذا كنت حامـ ..قصدي لو يعني..احم احم..احنا..احنا عندنا كل المقاسات يعني حتى لو الوحدة كانت حامل مرة..يعني مرة حامل... قطعو علي بطفش:وين القسم...؟! -ها..ايوة هواااااا..هناك هناك...! رحنا وين ما أشر لنا الشاب و لمن مشينا قلت:علي ليه كده..حرام فجعتو...! -حرام عليه هوا طفشني..يقولي إذا كنت حامل و آخرتها يقول حامل مرة..أبغا أفهم ايش يعني حامل مرة...! ما رديت على علي و أنا أتفحص الملابس و أتفحص أسعارها...! مسكت واحد عجبني،كان بسيط و لطيف كده بس غالي مرة،رفعت راسي و شفت مكتوب "new arrival"،قلت خليهم ينقلعو..و يعني ايه نيو آرافيل..أروح أشوف شي تاني...! اتجهت لفستان أبيض سادة قماشو ناااااااااااعم،فيه شريطة ذهبية من تحت الصدر تنربط من ورا،لفيتو أشوف و اتفاجأت برسمة..كانت بالذهبي و الخطوط متقطعة و رفيييعة..لمن دققت في الرسمة كانت لوحدة حاطة يدها على بطنها و تبتسم..ابتسمت..حسيتها أنا..كانت الرسمة مرة كيوت..أكيد تعرفو الرسم البسيط و إلي الملامح تكون مي واضحة...! ناديت علي و قلت:علي شووووووف...! مسك علي الفستان و قال بسخرية:ايش هذا..ثوب و لا غترة...؟! -علييييييييي...! -و أنا أدري..قُماشة بيضا..ايش تبغي فيها...؟! لفيت الفستان:شوف الرسمة..علي أنا أبغاه..مرة كيوت...! -لأ...! -ليش الغلاسة...؟! -مو عاجبني...! -علي بليز أبغاه..نفسي... قطع كلامي يد انمدت من ورايا و مسكت الفستان و:لو سمحت هذا بكم...؟! التفت أنا للبنت الطويلة إلي كانت حاطة فول ميك أب و تتكلم بثقة،قلت:بس أنا أبغااااااااه.."التفت لعلي"..علي أنا أبغا دا الفستان...! سحب علي الفستان من يد البنت:لو سمحتي زوجتي مسكت الفستان قبل...! ابتسمت البنت بشكل استفزني و قالت:عشان خاطري..علي...! شهقت و أنا أسمعها تنطق اسمو بدلع لكن علي ما سمحلي بإظهار أي ردة فعل لمن سحب الفستان بعفاشة و مسك يدِّي و مشاني معاه للكاشير:تعالي يا روحي بلاش نقعد وسط زبايل...! وصلني صوت البنت و هيا تشتم لكني كنت أفكر بشي تاني...! علي مستحيل يمسك يدِّي في مكان عام أو يقولي كلمة حلوة قدام الناس لكنو كسر القاعدة إلي حطها لنفسو قبل شوية بس عشاني..بس عشان يرضيني...! ابتسمت و احنا نخرج من المحل..ابتسمت رغم كلام علي الغاضب و بربرتو..ابتسمت رغم شتائم البنت إلي انهالت على مسامعنا..ابتسمت و أنا أحط رجلي برة المحل و أسمع:"إنتو الزبايل"...! تعرفو..في ناس تستاهل إني أدور رضاها و في ناس ما تستاهل حتى إني أعترف بوجودها...! ^^^^^^^^^^^^^^^^^^^^ و في السيارة عند بيت أهل علي _عشان ناخد سعود_ نزل علي الجوال و قال:أمي تقول ننزل نتعشى معاهم...! قلت بتعب:ما فيا حيل...! -ايش إلي ما فيكي حيل..انزلي يلا...! نزلت و أنا أتأفف و عند الباب اتعطرت،مديت لعلي:تبغى...؟! -لا يا شيخة...! رجعت العطر للشنطة و أنا أقول بطفش:يعني ايش فيها...؟! قال و هوا يدق الجرس:فيها إنه عطر نسائي...! فتحت أحلام الباب،سلمنا عليها و دخلنا،و من بعيد جا سعود يجري..وقف قدامي:ماما...! ابتسمت و أنا أشيلو:نعم...! مشيت و جلست على كنبة من كنبات الصالة و جلست سعود فوقي و أنا أسمعو يقول:وين لحتي..(رحتي)...؟! -رحت السوق...! -لييييييييييس...؟! ضحكت بسبب طريقة سؤال سعود..سألني بتذاكي و كأنو مكتشف شي،كنت حجاوب لكن لينا جات،سلمت عليها و أنا أسمعها تتشكوى:جود سعود ما يخليني ألعب بالجيم بوي...! -واااا..ليه يا سعود ما تخليها تلعب معاك...؟! -ماما هيا دلبتني...! -ليش ضربتيه يا لينا...؟! -عشان..طب ما... قاطعتها:أول شي الضرب غلط ما ينفع نضرب،تاني شي يا سيد سعود لمن أحد يغلط عليك خليك أحسن منو و لا تفتري بجيم بويك و دحين قومو عني الاتنين لإني تعبانة و مني فايقتلكم...! بعدو عني و هما يتناقشو و بعد مدة جات عمتي،سلمنا عليها أنا و علي،قالت و هيا تجلس:أشوة إنك جيتي كنت بسألك...! ابتسمت و كنت حقول:"في ايش" لكن علي قال بعنطزة:غصباً عنها تجي...! طالعت في علي مستغربة أما عمتي فقالت باستنكار:لا مو غصب..لو تعبانة و لا عندها شي محد بيغصبها...! رددت ورا عمتي زي الهبلة:صح صح محد بيغصبني "تابعت" بعدين إنتا ليش مصر إني شريرة...؟! -لإنك منتي طيبة...! طنشت علي و قلت لعمتي:ايوة عمة..عن ايش كنتي بتسألي...؟! -كنت بأسألك عن طبيعة الملكة بكرة...! يووووووه هيا بالله دحين بايش أجاوبها...؟! قلت:والله مدري بس هيا عائلية...!،بس مين حيجي معاكي...؟! -أنا بس...! -ليش...؟! -ولا وحدة فيهم راضية تجي و أصلاً أنا ما بطول بس بسوي الواجب و أمشي و لو عليا ما بروح...تعبانة و مني عارفة حتى ايش ألبس...! اتكيت على ظهر الكنبة:أصلاً أنا نفسي بابا ما قلي إلا بداية دا الأسبوع و سارت لخبطة و مني عارفة ايه و اليوم لفلفت و بطلعة الروح لقيت شي عدل..السوق يا عمة شي قرف..مافي ولا حاجة..مدري يعني أذواق الناس اتغيرت و لا ايه..و فوق دا مرة غليت الأشياء...! -من جد غليت و على ولا شي..والله رحت قبل كم يوم و سألت عن سعر بلوزة..قلي 500 قلت ليش مرة كذة غالي قال لاااااا هذي حرير أصلي..اتحسستها قماشها حار..قمت مشيت إلا حضرته يناديني:تعالي تعالي عشانك بـ400..طنشته..أنا أعرف الحرير..كذاب واحد...! -أنا سمعت إنهم يشتروها بقروش و يزودو أصفار عاليمين..يعني لو كانت البلوزة بـ25 قرش..يزودو صفرين تسير بألفين و خمسمية أو صفر فتسير بميتين و خمسين...! -والله يا حبيبتي مي بعيدة..لإني من جد أشوف أشياء بألف و حقها مية...! قلت بقهر:والله أنا كمان أول اشتريت جينز بميتين تقريباً و كنت فرحااااااانة فيه و عمو يا بنتي غالي ما يستاهل بس أنا سويت حفلة و هليلة لين ما اشترالي و بعدها رحت الهرم و لقيتو بـ60..بغيت أنجن..بس مسكت نفسي و قلت للرجال:ليش دا بستين أنا متعودة أشتري من عندك بتلاتين قام قلي... قاطعني علي:و ليييييييييييييش تكلمين الرجال...؟! طالعت في علي بطفش:قبل ما أتزوجك..قبل ما أعرف إنو في أحد في الوجود اسمو علي حيتزوجني...! صرخ علي:ولو..سعود كيف يخليكي لحالك..و بعدين تناقشين الرجال ليش...؟! دخل عمي الصالة و قال بغضب:يعني الواحد ما يعرف يروق في بيته...؟!،و بعدين هذا حالكم بعد كم سنة زواج..وش بتسوون بعد عشرين..خمس و عشرين سنة...؟! سكتنا أنا و علي متفشلين..عمو دايماً يهزأنا..دايماً...! قالت عمتي بابتسامة رزينة:ايييييوة يا جود كملي...! ابتسمت بحرج:ما..ما..خلاص اتفشلت..أحس مال أمي داعي لو اتكلمت...! ابتسم عمو:لا لِك داعي بس تعالي سلمي...! رحت و سلمت على عمو و بست راسو،قال علي:أبوية...! -نعم...! -لييييش أحس إنك تحب جود...؟! شهقت و اتخصرت:وليش ما يحبني إن شاء الله...؟! طالع عمو فيا بانزعاج من صراخي،ابتسمت بهبالة:هيهيهيييييييي...! رجع عمو يبتسم:أحد يكون عنده جود و ما يحبها...؟! قلت بفرح:وي عمو حبيبي..فديتك...! علي بقهر:ايوة طبعاً..مو حضرتها ملاك يمشي على الأرض قدامكم بسس نرجع البيت كوووول البلاوي تطلع...! اتخصرت:وليش معترض يا روح أمك..متزوجتك عالفاضي أنا...؟!،تبغاني أخرب برستيجي و أطلع بلاويِّا قدام الخلق...؟!،لا لو سمحت أنا إنسانة هبلي و تخلفي لا يتعدى حدود بَيتي...! و رجعت أجلس مكاني وسط ضحكة عمو و اعتراضات علي و أنا مبتسمة...! حلو..حلو الجو هنا..أم و أبو و أخوان..الجو هنا في بيتهم حلو..حلو بالمرة...! ********************************************** كنت لابسة الفستان و قاعدة قدام التسريحة أتمكيج،و بعد ما خلصت لبست طقم دهب ناعم عندي،حلق و سلسلة و اسورة،الحلق كان شكلو كده خط..خط واحد و السلسلة كمان و الاسورة عادية ما فيها شي،في يدِّي اليسار لبست ساعة ذهبية بس للأسف ما كانت تلمع زي الطقم لإنها مي دهب من جد..هيا من سواتش..و لبست كمانت صندل دهبي و طوق دهبي سويتبو "بف" و نزلت قصة..و كان شكلي..حلو...! طالعت في علي إلي خرج من الحمام،قلت:خلاص أنا جاهزة..توبك هناك معلق...! ابتسم علي و هوا ينشف يدِّينو في بلوزتو:أنا يا جود..ايش هذا الجمال...؟! ابتسمت:الجميلات للجميلين...! -أقول... -قول... غمزلي:نطنش الملكة...؟! ابتسمت و قلت و أنا أرفع أكتافي:والله على قلبي زي العسل بس عمو بالغصيبة رضي أروح بعد العصر بغاني أروح بعد الظهر كمان...! -بأقوله داخت و أتحداه يفتح فمه بكلمة...! قطبت حواجبي:لا تتكلم عن عمو كده...! قال علي ببساطة:آسف..حسبتك زعلانة منه فأخذت راحتي...! قلت و أنا أروق التسريحة:زعلانة منو مو حاقدة عليه...! في شي لازم كلكم تفهموه..أنا صح زعلانة من عمو..زعلانة و بقوة بس هدا ما يعني إني ممكن أسمح لأحد يتكلم عنو بطريقة وحشة..عمو هوا عمو..زعلانة منو أو راضية عنو أحبو...! قرب علي مني و قال برجاء:جود الله يسعدك و الله من زمان عنك متشيكة...! اتخصرت:ايش قصدك يعني...؟! ابتسم:لا بس إنتي ذي الفترة مشغولة بأبوكي و عمك فمطنشتني شوية..بعدين أنا ما بسوي شي بس..بطالع فيكي...! -لا صدقتك بس بتطالع فيا...! -جود بلا بلاهة...! ابتسمت:طيب من عيوني بس على شرط..بعد المغرب نمشي على طول...! هز راسو:حااااااااااااااااضر...! بالله عليكم أروح من العصر و أقعد هناك طفشانة و لا أقعد مع زوجي و أبسطو..بالله عليكم ايش أحسن...؟! ابتسمت:طب ممكن طلب...؟! -إِأْمري لا تطلبي...! -ممكن أروح أنبه سعود لا يعدم نفسو و أقولو إننا حنمشي بعد المغرب...؟! انحنى و مد يدُّو للباب:تَفضلي...! ابتسمت و مسكت فستاني بيدِّيني و سويت زي ديك الحركة في الأفلام..لمن البنت تحي أحد و قلت بلطف:شكراً...! و اتجهت للباب بابتسامة..بلا بابا بلا نيلة...! ********************************************** |
الجزء التاسع (أنانيةُ مُخطئ و غيظُ مظلوم) في السيارة،،، عند باب بيت بابا وقف علي السيارة و أول ما وقفها حسيت إنو غباء مني إني سمعت لعمو و جيت،قعدت أشتم نفسي...! قال علي:يلا جود ننزل...؟! طالعت في علي بعدين طالعت في البيت من الشباك..كان فيلا...! هدا البيت إلي كان المفروض أعيش فيه 20 سنة،هزيت راسي أبغى أنفض كل الأفكار إلي جاتني،قال علي:جود.. التفت لو و قلت بهدوء:نعم...! -إنتي..ما قد جيتي هنا ولا...؟! -لأ ما قد جيت...! -طب..ننزل...؟! قلت و أنا أفرك يدِّيني:ما..مدري...! مسك علي يديني و شد عليها،التفت لو،كنت كاشفة وجهي لإننا خلاص قدام البيت و مافي في الشارع أحد الشي إلي خلَّى ملامحي تبان لعلي إلي ابتسم و قال بنبرة مطمئنة:عمك ما حدد الوقت..مو لازم تطولين...! و مد يدو و حطها تحت عيني اليسار:و مو لازم تخربين مكياجك...! بحرص شديد وقفت دموعي إلي كانت تهدد بالنزول..ما حسيتَ بَّها...! قلت برجاء:علي ممكن ما تسيبني إلمن ما يجو الرجال...؟! ابتسم و همس:و أنا أقدر أسيبك...؟! فجأة نط علينا سعود:ماما هدا بيتهم...؟! -ايوة حبيبي...! قال علي بغيض من ورا أسنانو:ولدك هذا عنده هواية يخرب علينا...! ابتسمت و أنا ألتفت لسعود:زي ما فهمتك بابا خليك هادي و عاقل..طيب...؟! -تِيب...! نزلنا من السيارة،مسك فيا سعود:ماما سيليني...! -ما أقدر حبيبي..تعبانة دحين...! -لا مو تبعانة...! علي:سعود ماما ما تقدر تشيلك كل شوية..تتعب بعدين...! -تب..(طب)..إنتا سيلني...! -ليش نونو إنتا..ما تقدر تمشي...؟! قال سعود برجاء:بااابااااااااا...! شال علي سعود و قال و هوا يحك خشمو بخشم سعود بمداعبة:إنتا ما تبغى تطلع رجال يعني..ما تبغى...؟! ضحك سعود و ضحكت أنا..ضحكة سعود كانت تجبرني أضحك...! اتعطرت و عطرت سعود إلي كان علي قاعد يزبطلو الشماغ الصغير على راسو...! قال علي و هوا يمد يدُّو للجرس:ادخلي برجلك اليسار و قولي اللهم إني أعوذ بك من الخبث و الخبائث...! ضحكت:يا لئيم...! انفتح الباب..إلي فتحو كان عبدالإله..وسع فتحة الباب و هوا يقول ببرود:أهلاً..اتفضلو...! دخلنا و قلبي كان يدق دق مو طبيعي و أنفاسي اتسارعت و كنت مانعة عيني من إنها تجول عالمكان و كنت مانعتها كمان من إنها تدمع لإني كنت حاسة بالخنقة و الضيقة...! قال عبدالإله:تعالو...! و مشينا ورا عبدالإله إلي ودانا لصالة فيها بابا و عبد الرحمن و..عمو..عمو إلي وقف و قال بابتسامة:أهلااااااان..ما بغيتو تجو...! و سلم عليا و أقول سلم لإنو أنا ما بستو و لا حتى اتحركت من مكاني..هوا إلي جا و حضني و باسني،بعدها اتخصر و قال بمزاح ما بلعتو:إنتي قلتي حتجي بعد العصر..ايش إلي جابك بعد المغرب...؟! طالعت في عمو لثواني بعدها أخفضت بصري و أنا أفك طقاطق العباية إلي مديتها لعمو بصمت...! قطب عمو حواجبو،قلت:علقها لو سمحت لأنو ما أعرف وين مكان العلاقة...! مسك عمو العباية:أووه طيب.."مدها لعبدالإله"..عبدالإله مكن تقوم تعلقها...؟! عبدالإله بطفش:أففففف يعني ما تعرفي تلفيها و تحطيها جمبك...؟! طالعت في عبدالإله..ناقصة أنا...؟!،لكني أخدت العباية من عمو و لفيتها و قعدت على كنبة و حطيتها جمبي...! اعترض الكل فقام عبدالإله بتأفف و سحب العباية من جمبي و راح يعلقها...! عمو:وي..قومو سلمو...! اتحرك علي إلي ماسك سعود في يدُّو و سلمو الاتنين على الموجودين أما أنا فما اتحركت من مكاني الشي إلي خلى عمو يطالع فيا بنظرة غريبة...! أخفضت بصري و عطلت أذني..مابغا أشوف و مابغا أسمع...! بابا:الله يا جود..أبوكي مالو بوسة...؟! مادري هل أنا حساسة و لا صوت بابا مستفز...؟!؛لإني أحس بنار جوتي...! جلس علي جمبي و حمبو سعود،حط علي يدُّو على الكنبة ورا أكتافي و قال:والله جود تعبانة ما تقدر تقوم...! طالعت في علي مستغربة،ابتسم لي و رجع يطالع فيهم و في عمو بالتحديد:هيا كانت جاهزة من العصر بس أنا منعتها لإنها كانت تعبانة...؟! عمو بقلق:ليش جود ايشبك...؟! عشان أكون صريحة معاكم حقولكم إنو نبرة عمو القلقة أسعدتني و طمنتني إنو عمو ما قلب عليا كليا...! طالعت في عمو و أنا أسمع علي يقول:ولا شي..خرابيط حمل...! جا عمو و جلس جمبي و قال و هوا يمسح على ظهري:والله معليه حبيبي..علبالي إنتي متعمدة تتأخري..بس المهم إنك دحين أحسن..صح...؟! سكت و ما قلت شي...! يا الله ليه مني عارفة أتكلم...؟!ليه أحس إنو دموعي طارفة و إنو أي أحد بسهولة ممكن يبكيني...؟!،و بعدين حلقي يعورني و... قطع حبل أفكاري يدِّين على أكتافي و بوستين على خدِّي و:سلامات والله..والله من جد حملتهُ كرها..أنا أحمد ربي إني رجال عشان دا الموضوع...! رفعت راسي..كان عبدالرحمن و كان كالعادة مبتسم..بعدها قام بابا و سوا نفس إلي سواه عبدالرحمن و قال:سلامات يا بنتي..ليه ما كلمتيني و قلتيلي إنك تعبانة...؟! ما عرفت بايش أرد لكن علي ما قصر لمن قال:والله يا عمي ما كلمت حتى سعود تبغاها تكلمك إنتا...؟!،بعدين ايش كان ممكن تسوي..تأجل الملكة و لا تعفيها من إنها تجي...؟! بابا انصدم لكن عبدالرحمن قال بمرح:لا طبعاً نأجل الملكة لإنو ملكة من غير جود ما تسوى شي...! علي:لااااا صدقني أحسن لو يعفيها لإنو جود ما تحب المناسبات..صح جودي...؟! التفت لعلي إلي كان مبتسم ليا و مسترخي عالآخر...! ما رديت و اكتفيت بإني أخفض بصري..الله يستر..علي ناوي يطلع لهم قرون اليوم و لا من متى علي يدلعني و يجلس قريب مني و يعاملني بلطف قدام الناس...؟!؛علي بالعادة يعاملني كأني أختو و لا صحبتو قدام الناس...! رجعو بابا و عبدالرحمن جلسوا،قال عبدالرحمن:إلا جود..إنتي في الشهر الكم...؟! رفعت راسي و أنا أفكر إنو سؤال زي دا على ما حيقدر يجاوب عليه،قلت بصوت منخفض هادي:نص الخامس...! -ايش...؟! عمو بضحكة:وي جود..بالعادة تلعلعي..ايشبك...؟! عليت صوتي:نص..الخاااامس...! عمو:اييييوة..هاذي جودة إلي أعرفها...! سحبت نفس..ايش هدا..مني عارفة أضحك و لا حتى أبتسم..يا عالم البيت دا خانقني و كاتم على نَفَسي...! بابا:يلا..تقومي بالسلامة إن شاء الله...! يا نااااس..يا عااااالم..سكتووووه..قولو لو يسكت..صوتو يستفزني...! حط عمو يدُّو على خدي و قال بقلق هادئ:جودة حبيبي فيكي شي...؟! طالعت في عمو و أنا أقول في نفسي:"زي ما أجبرتني أجي هنا طلعني،أنا مخنوقة ليش منتا حاسس بيا..ليش معد إنتا فاهمني زي زمان..ليش..ليش...؟!"...! قال عمو:جود إنتي حارة.. حط علي يدُّو بسرعة على جبهتي..قال بعدها:مي حارة ولا شي..الله يهديك يا سعود فجعتني...! ابتسم عمو:كنت حقول شوية بس إنتا ما خليتني أكمل...! عبدالرحمن:ما شاء الله جود..إنتي محاطة برجال يحبوكي من كل جانب...! طالعت في عبدالرحمن مستغربة،قال بابا:ولد..استحي على وجهك...! بعدها طالع فيا و ابتسم:جود تعالي أوريكي البيت...! ركزت نظري على بابا و قلت بسرعة:لأ مابغا...! -ليش...؟! -ما..ما..ما أقدر أطلع درج...! ابتسم بابا:طب بس الدور الأرضي...! يا ربي رحمتك و لطفك..يا رب..ما حقدر..ما ما حقدر...! بابا:و لا أقولك خلاص بس تعالي عشان تسلمي على أم عبدالرحمن...! لاااااااااااااااا..كمان أسلم عليها..ما حقدر..من جد ما حأقدر...! كنت حقول أي شي عشان أتهرب لكن منعني سعود _الجالس جمب علي_ من الكلام لمن وقف و اتجه ليا،قال و هوا حاط يدو على راسو:ماما سيليه...! سعود كان مبرطم و هادي بغرابة لفيت يديني حولو و قربتو مني:ليه أبوية الشماغ حلو عليك...! ققال و هوا على وشك يبكي:ما أبغاه...! علي:ليش ما تبغاه...؟!،حلو عليك...! شوية ما أدري إلا بسعود يبكي و يشهق شهقات صغيرة متقطعة:ما..ما..ماما... انفجعت أنا و علطول شلت سعود و حطيتو فوقي و خليت راسو على صدري،بعدت الشماغ عنو و حطيتو على فخود علي إلي انحنى بقلق:سعود بابا ايشبك...؟! الكل سأل عن السب..أفففففففففف..بجد مني فايقتلهم...! لفيت يديني حول سعود و دنقت راسي عليه و قلت بهمس و أنا أبوسو:ليه حبيبي ليه تبكي...؟! رجع علي شعري من جهتو ورا أدني عشان يقدر يشوف سعود،حط علي يدُّو على جبهة سعود و قال بقلق:كأنه مسخن...! قال عمو بقلق و هوا يحط يدو على رقبة سعود:ايوة الله مسخن...! بابا:نجيبله فيفادول...؟! رفعت راسي:لأ..هوا بس..بس مستنكر المكان و زعلان..لو نام حيصحى كويس إن شاء الله...! عمو:و ليش زعلان...؟! طالعت في عمو..وجهي كان قريب من وجهو..أخفضت بصري..مادري ليه ليش ما قدرت أطول أطالع فيه..قلت:عادي..مستنكر المكان و متضايق...! انحنى عمو عليا على أساس بيفحص سعود لكنو همس لي من غير محد يحس:"طيب حبيبي لا تقولي كده عشان أبوكي لا يتحسس"...! بابا لا يتحسس..بابا لا يتضايق..بابا لا يزعل..بس جود تاكل تتتبن في وجهها عادي...!!!! و أعتقد إنو عمو استغرب احمرار وجهي المفاجئ...! عبدالرحمن:تبغي أطلعو فوق ينام...؟! وقف عبدالرحمن و جاني،مد يدُّو عشان يشيل سعود،فقال سعود بانزعاج طفولي و هوا شبه نايم:لُوح (روح) إنتا..أبا مامي...! شديت يدي على سعود:خلاص حبيبي خلاص...! طالعت في عبدالرحمن و أجبرت نفسي على الابتسام:ما حيرضى يجي...! عمو:جود والله شكلو تعبان...! بابا:ايوة الله يا بنتي..أعطيه مسكن عالأقل...! قلت بقهر:ولدي و أعرفو..في حالة زي كده ينام و يصحى يسير كويس...! سكت عمو بس بابا طالع فيا بنظرة كأني أنا الهبلة إلي مني فاهمة...! قعدت أمسح على سعود عشان يهدى و يرجع ينام...! محد كسر الصمت إلا عبدالرحمن إلي قال:ساعات بناتي كذة يسيرلهم..يزعلو فيسخنو..ينامو و يصحو كويسين يعني صح كلامك يا جود ما يحتاج خافض حرارة...! قال عمو بابتسامة حلوة:صح..حتى إنتي يا جود كنتي كذة تسوي...! حسيت بالألم لإني اتذكرت كيف كانت طبيعة علاقتي بعمو قبل و قارنت بين أول و دحين...!،من يوم ما بابا دخل حياتي و على أساس رضي عني علاقتي بعمو ساءت...! قهر..قهر لمن يجي واحد و ببساطة يخسرك أعز إنسان عندك و إلي يقهر أكتر إنو يشوف إنو ما سوى أي شي...! طالع بابا في ساعتو بعدها وقف:نصلي العشا جماعة هنا عشان نبدأ نستقبل الناس...؟! وقف عمو:ايوة صح..أكيد الناس بعد العشا حتبدأ تجي...! عبدالرحمن:احمد ربك ما جُوك من المغرب...! وقف علي:طيب جود أنا بروح أصلي..طمنيني على سعود...! عمو و هوا مقطب حواجبو:بتصلي معانا ولا...؟! علي:لا بصلي في المسجد القريب...! عمو:لا معانا عشان تستقبل الناس...! -و أنا مالي فيكم...؟! أعطى عمو علي نظرة فسكت الأخير بانزعاج...! خرجوا الرجال من الصالة و قعدت أنا لوحدي مع سعود النايم في حضني و الزعل باين على ملامحو...! سعود اسم الله عليه نبيه و حساس..لو حس إنو الجو متوتر يتضايق و ترتفع درجة حرارتو..زي دحين يعني...! إن شاء الله ينام و يرتاح...! ^^^^^^^^^^^^^^^^^^^^^ طبعاً أكيد تعرفوا إنو الرجال دايماً يجو قبل الحريم..فبالتالي علي راح يقعد مع الرجال إلي جو و على كل حال ما جو إلا المقربين و على فكرة ترى جو حريم..أعتقد يسيرو خالاتهم و عماتي كمان جو..و إلي يقهر إنهم اتوزعوا على البيت و بدأو يساعدو على أساس إنهم قريبين..أوكي صح لازم يساعدو بس مو يتركوني لحالي..حاسة نفسي غلط..أفففففففففففففف...! كنت قاعدة أحاول أشغل نفسي بسعود النايم،كنت مدنقة راسي عليه أبوسو و أشم ريحتو..لكني رفعت راسي على:جووووود...! كانت سارة،قالت:والله دوبهم قالولي إنو علي زوجك راح..سوري سبتك...! و جات و سلمت عليا من غير ما أقوم بسبب سعود النايم في حضني،جلست جمبي و قالت بهمس:ترى بالغصبة قدرت أشرد من ماما..من شغلة ورا الثانية..من جد تعبت...! ابتسمت:مع إنكم مو متكلفين...! -احنا مو بس مو متكلفين..على فكرة تراه بس عشا و إلي عزمناهم يتعدوا....! -أريح لكم...! -بس مادري كيف الناس ساروا كثيرين و فجأة لقينا نفسنا آآآآخر شياكة..كنا على أساس حتخلي الملكة بسيطة بس فجأة قلبت ملكة و معازيم و فساتين...! -احنا كده ما نقاوم نقعد من غير بهرجة و فشخرة...! -من جد..! بعدها قالت بحماس:جوووود..إنتي في بيتنا.. قصدي في بيتك و بيتنا...! متحمسة...؟!،والله من جوتي يا سارة مخنوقة...! ابتسمت مجاملة،قالت و هيا تمسك يدّي:تطلعي تسلمي على مها...؟! -لالا...! قالت بخيبة أمل:لييييييييش...؟! -حبيبي ما أقدر أطلع درج...! -طب..أنادي أخواتي يجو يسلمو عليكي...؟! -لا خليهم يمكن أمك تحتاجهم...! -عادي يقولولها نبغى نسلم على جود و يجو يسلمو و بعدين يرجعولها...! -لا حبيبي خلاص مالو داعي...! اتنهدت سارة بعدها قالت بهدوء:جود ترى ماما ما حتتضايق لو جو سلمو عليكي...! اتنهدت:الشغلة مو شغلة تتضايق..أنا حطيت نفسي مكانها و اتخيلت علي يجيني ببنتو و أنا مني مقصرة معاه في شي..شي يقهر...! -طيب إنتي حطيتي نفسك مكانها و هذا شي كويس..لكن ما سألتي نفسك:ممكن تحرمي وحدة من إنها تحضر ملكة أختها بس..عشانها تذكرك بإنو زوجك خانك أو ظلمك أو غلط عليكي...؟! سكت و ما عرفت بايش أرد عليها و انتبهت إني ما أعرف سارة إلا كبنت كتكوتة تحاول تتقرب مني...! قلت:سارة إنتي كم عمرك...؟! ابتسمت:أنا قدك ناقص اتنين...! -ليش ما تقولي يعني...؟! -عشان للجدران آذان و أنا ما أحب أحد يعرف عمري...! ابتسمت:محد يلومك..مو هُمَّا الناس يا يصغروكي و يطقوكي عين عشان مو باين عليكي كبرك..يا يقولو شكلك أكبر و هدا شي يقهر...! هزت راسها:عشان كذة ما أقول...! بعدها قامت:بروح أشوف ماما شكلها تنادي...! و راحت سارة و بعد شوية مادري إلا بسارة و أختينها إلي أكبر منها و أمها،اتفاجأت و اتوترت،حطيت سعود النايم على الكنبة و وقفت..قالت أم سارة:أوه جود..أهلاً...! ما قدرت أقرأ أي مشاعر على وجهها..طيب على الأقل أحسن من إني أشوف حقد أو كره...! و اتقدمت أم سارة و سلمت عليا..و الغريب..الغريب إني لقيت نفسي أهمس لها من غير ما أحس:"آسفة لو كان وجودي ضايقك بس أنا ما جيت بإرادتي"...! ابتعدت عني مصدومة و مستغربة..هزت راسها و كأنها تنفض شي بعدها قالت:تبغي تطلعي تسلمي على أختك فوق...؟! هزيت راسي بلأ،طالعت في سعود:سعود...؟! طالعت في سعود النايم:ايوة...! -كبر ما شاء الله...! حاولت أبتسم..يا ربي ايش دا التوتر و الخوف و ليش قلت إلي قلتو...؟!،طب لو ما كانت متضايقة و أنا قلتلها إني جيت مو بكيفي...؟!،لالالا أكيد متضايقة..بس لو ما كانت...! -جووووووووووووووووود...! رفعت راسي،كانت أختي الكبيرة المتزوجة،قالت:ليا ساعة أنادي..وين وصلتي...؟! كانت مبتسمة،قلت:ها..لا بس كنت قاعدة أحاول أتذكر اسمك...! يووووووووووووه..يلعن أبو التصريفة..غبية يا جود غبية..ايش إلي أحاول أتذكر اسمك...؟! ابتسمت:خلود يختي..اسمي خلود...! قالت التانية:و أنا منى لو منتي فاكرة كمان...! و جات خلود و سلمت عليا و بعدها منى...! قالت أمهم:تبغي تطلعي سعود ينام فوق...؟! -لا ما... قاطعتني:ترى ما فيها شي و بعدين الناس بتبدأ تجي ما يسير ينام هنا...! قلت و أنا أتظاهر بالهدوء و عدم التوتر:لو مضايقك أصحيه...! نطت سارة:مو عن كده..ماما قصدها الناس حتضايقو بصوتها...! ابتسمت لـ"سارة":أحسن برضو..عشان ما يتعبني في الليل...! اقتربت سارة من سعود،قلت بسرعة:لا الله يسعدك...! طالعت فيا مستغربة فقلت:حيخاف..لازم أنا أقومو...! قالت برجاء:طب قوميه..والله اشتقتلو...! رحت و جلست و شلت سعود و جلستو فوقي:يلا حبيبي تقوم...؟! لف يدّو حول رقبتي و أستد راسو على كتفي وقال من غير ما يفتح عيونو:مااااامي...! قلت و أنا أمسح على ظهرو:يا عيون مامي..يلا قوم..شوف سارة من أول تبغاك تقوم...! قال بدلع:مابغا..ما أحبها...! سعود كان شبه صاحي عشان كده كان يرد عليا،شهقت سارة:ما تحبني يا سعود...؟! قال سعود بزعل و هوا دافن وجهو فيا:ماما غسلي وزهي..حتيلي عتل (وجهي..حطيلي عطر)...! ضحكت:طيب بس قوم...! -ما يسوفوني...؟! -وي سعود..يعني أقولهم روحو عشان سعود...؟! سارة:ايوة عادي نروح عشان ما نشوف حضرة سعود...! قالت أمهم:يلا بنات ورانا شغل.."بلهجة آمرة"..سارة..إنتي اقعدي هنا...! و راحت و وراها خلود و منى و جلست سارة جمبي،بعدت سعود عني و وقفتو قدامي،كان يطالع في سارة المبتسمة لو،كانت نظرتو تضحك و مع عينو المنفخة سار تحفة...! طلعت من شنطتي قارورة موية و حطيت في يدّي شوية و شطفت بها وجه سعود..طلعت حبة بولو و حطيتها في فم سعود إلي قعد يمصها و هوا يطالع في سارة بنظرة طفولية مثيرة للضحك..طلعت عطر و عطرتو...! قلت:خلاص يا سعود رضيت...؟!،غسلتلك وجهك و حطيتلك عطر...! سعود بدأ يقطم البولو و هوا يطالع فيا،بلعو وقال:ماما..سِماغي...؟! اتلفت حولي أدور على شماغو،قلت:سارة شوفي حوالينك في شماغ...؟! اتلفتت سارة:أممممم..أهوه...! و مدت ليا الشماغ،قلت و أنا ألبس سعود القَبَعَة:بس مو تجيني بعد شوية تقولي شيليها...! سعود بتساؤل:للأبد...؟! ضحكت:لا وي..بس لمن تجي تبغى تنام شيلها...! قالت سارة:ايس الزمال هدا يا سعود..أنا ما أتحمل كده...! تابعت بصوتها العادي:أنا لازم أصورك الصراحة...! و مسكت جوالها و قالت:جود عادي...؟! ابتسمت و هزيت راسي فقالت:يلا سعود ابتسم...! سعود ما أبدى أي ردة فعل،قلت:وريها كيف بابا يسوي في الصور...؟! قال سعود:أوليها...؟! ابتسمت:ايوة وريها...! اتكتف سعود و رفع راسو و ابتسم ابتسامة جانبية و هوا رافع حاجبو...! ضحكت سارة و صورتو..ورتني الصورة بعدها أعطت سعود الجوال عشان يشوف صورتو،قالت:يجنن اسم الله عليه...! قلت:سوسة دا الولد..ما عندو حركات أطفال و تريقة و تقليد لكن بس يشوف صورنا أنا و أبوه يقعد يقلدنا...! ابتسمت سارة:بس شخصيتو حلوة ما شاء الله..أحسو يسوي كل إلي في راسو من غير إعلانات...! -يووووه على سيرة الإعلانات..تعرفي كل ما أنظف غرفتو ألاقيه مسويلي بدعة جديدة..مرة ألاقيه مشخبط على ملابسو الداخلية و مرة على الجدر ورا الستارة و مرة بألوان الفلوماستر على المراية و قبل كم يوم لقيتو راسم رجلو على وحدة من كتبي...! ضحكت سارة:قوية راسم رجلو..أعرف كنا نرسم يدّنا بس رجلنا...! ابتسمت،و بعد كده قالت سارة:جود امشي ندخل المجلس إلي جوا..أحسن بدل ما يشوفنا الرايح و الجاي...! وقفت و أنا أسمي بالله،قلت:سعود حبيبي تعال ندخل جوة...! قام سعود و هوا ما زال يطالع في الجوال و مشينا أنا و سارة و مشي ورانا،التفت لسعود:يووووه نسيت شنطتي..روح جيبها...! -يوووووه يا ماما..إنتي ليه بس تنسي تنسي...؟! طالعت فيه:لا يا شيخ..روح..روح جيبها يلا...! راح سعود بتأفف و جاب الشنطة و رجع يمشي ورانا و عينو عالجوال...! دخلنا مجلس صغير و قعدنا فيه،قلت:سارة أبغى أصلي...! -هممممم الحمام أهو هناك و أنا بروح أجيبلك شرشف و سجادة...! -لالا متوضية بس أبغى سجادة...! قالت و هيا تقوم:و شرشف...! -لالا مالو داعي..حصلي بعبايتي، جيبيلي هيا الله يسعدك...! -جود بلا هبل..خلاص حجيبلك شرشف ما فيها شي...! و راحت و رجعت بعد شوية،فرشت السجادة في زاوية من الغرفة و مدتلي الشرشف...! مسكت الشرشف و لبستو،قلت بعدها بحرج:ما أقدر أصلي واقفة لازم أجلس...! ابتسمت و شالت السجادة و فرشتها قدام وحدة من الكنبات المواجهة للقبلة و قالت:يلا يختي..اجلسي و صلي...! حطيت شنطتي قدام السجادة و كبرت و صليت و في صلاتي دعيت عالسريع بإنو الليلة دي تعدي على خير لإني طفشت و أبغى أرجع لبيتي...! خلصت صلاة و سلمت بعدها فكيت الشرشف..سارة اتناولت مني الشرشف و لفتو مع السجادة و حطتهم على جمب،بعدها جلست جمبي،قالت:جود فستانك ما شاء الله مرة حلو...! ابتسمت:عيونك الحلوة...! ابتسمت و شبكت يدّينها مع بعض:مرة كيوت و إنتي حامل...! -يعني عشني دبدوبة...؟! ضحكت:ايوة..شكلك مرة فلة..كيوت و مربربة...! اتنهدت:والله لازم أنحف بعد ما أولد..أنا أصلاً من بعد ما جبت سعود تخنت،صح نقص وزني مع الرضاعة بس برضو و دحين كمان حولد و يا سلام عالكم كيلو إلي حزيدها...! سارة:إنتي منتي مرة دبة..يعني جسمك جسم حرمة,,لا إنتي نحيفة و لا إنتي دبة...! قلت:لا والله مو حلو..و إن شاء الله حنحف...! "لييييييييييه؟!"،التفتنا..كان عبدالرحمن و في يدّو تيبسي حطو على طاولة متوسطة الحجم..شال الطاولة و حطها قدامي و جلس جمبي:هذا ما استطعت سرقته...! "التيبسي صحن مسطح واسع تُوضع عليه صحون أخرى أصغر حجماً" تابع عبدالرحمن:لا تنحفي..شكلك مرة حلو..كده من كل محل فيكي لحم...! قلت:يا هنايا...! ضحك:والله دحين متضارب مع حليمة عشان الرجيم إلي تسويه...! قلت:لا تقول...! سارة:صح لا تقول..يمكن ما تبغى أحد يعرف...! -والله إنتو الحريم عقد..عادي ما فيها شي...! قال بعدها:جود يلا كلي..عارف إنك ما حتتعشي بعدين معاهم...! طالعت قدامي..كان فيه ورق عنب و سمبوسة و أشياءات حلوة،قلت:إنتا بتضرب عالوتر الحساس..أنا نقطة ضعفي الأشياء دي...! عبدالرحمن:كووووولي كلي حبيبتي..والله إنك قاعدة تغذي اتنين مو واحد...! ابتسمت:طيب كلوا معايا..ما أحب آكل لوحدي...! بعدها قلت:سعود حبيبي تعال...! جا سعود و جلس فوقي بعد ما أعطى الجوال لسارة و قعدت أنا آكُل و أأكل سعود معايا و أنا أسمع لكلامهم...! قال عبدالرحمن بمتعة:جووووووود..تعرفي إنو زوجك _روميو السعودية_ ضرب عبدالإله في هدا المجلس...! لفيت وجهي لعبدالرحمن بسرعة و أنا أسمع سارة تقول باستنكار:عبدالرحمن !!! كان عبدالرحمن حيقول شي لكني قلت بهدوء و تساؤل:عبدالإله أخوك...؟! -هممممم..شوفي هوا أخوية لكنو اتطاول و علي حار علطول يتنرفز فسارت مضاربة..و أنا مني مع أحد ضد أحد..أنا أحب أخوية و متعاطف معاه في نفس الوقت ما أكره زوجك.."تابع بسرعة"..بما إني ما أعرفو ما أحبو...! درت بعيني عالمجلس الداخلي الصغير..قلت:بس علي ما يعرف إني أعرف و ما يعرف إنو عمو يعرف...! عبدالرحمن:الصراحة شي بديهي إنو موضوع زي كذة ما حينسكت عنو...! قال بعدها:جود إنتي ايش رايك في إلي سار...؟! وترني سؤالو..ما اتوقعت يسألني سؤال زي كده..قعدت ألعب في سلسلتي لثواني قبل ما أطالع في عبدالرحمن مباشرة:رح أقول...! ابتسم:قولي...! سحبت نفس:أنا مني مثالية..الصراحة زوجي برد لي قلبي و بعدين هدي مو أول مرة عبدالإله يسيء فيها ليا...! سارة:بس يا جود ترى عبدالإله طيب...! التفت لسارة:مو لازم ما تحبوه زيي..إنتو أصلاً ما عندكم سبب مقنع عشان تكرهوه و بعدين شغلة طيب و مو شرير و شغلة عبط شباب ما تعجبني..و مو لازم نلتمس لكل الناس أعذار على كل أخطائهم...! تابعت بعد صمت ثواني:و على كل حال أنا ما شفت من عبدالإله كل شي و أعتقد عبدالإله نسخة مصغرة من أبوكم..معاكم طيب و مثالي و مع أشخاص معينين قمة قلة الأدب و البشاعة..و اسمحولي لكن إنتو فتحتو الموضوع و خليتوني أتكلم...! عبدالرحمن:احنا كمان محنا مثاليين..شي طبيعي اتعاطفنا مع عبدالإله حتى لو كان هوا إلي بدأ...! التفت لعبدالرحمن،كان يتكلم بصراحة لطيفة و هوا مبتسم..ما حسيتو حاقد أو شي..حسيتو بس بيقولي عالواقع...! ابتسمت:و أنا مع زوجي و..اقفل الموضوع...! عبدالرحمن:أصلاً أنا قلت من البداية مالي دخل فيكم..أنا أحب أهلي و أحبك و مابغا أزعل و لا واحد فيكم و مني مستعد أخسر علاقتي بكي عشان مشكلة أنا مالي ذنب فيها...! خطر على بالي فجأة سؤال،قلت:بس مو إنتا مستقل و مالك دخل بمشاكلنا..ليش ما حاولت تتقرب مني من البداية...؟! ابتسم عبدالرحمن ابتسامة حزينة هادية:أبوية كان يعصب و إذا ما عرف أمي تخاصمنا لإنها تخاف علينا يعصب...! اتغيرت ملامح وجهو و رجع لمرحو و هوا يقول:يا دوووووبا..خلصتي ورق العنب...! طالعت في آخر حبة من ورق العنب..أخدتها و أكلتها لسعود و أنا أقول:مو جبت الأكل ليا...؟! قال بغيظ:لكي مو لولدك...! فجأة سعود شرق،بعدت ورقة العنب عنو و دقيتو على ظهرو بالخفيف و أنا أسمي عليه..و الحمدلله راحت الشرقة و شربتو موية...! التفت بغضب لعبدالرحمن:سمي بالله على ولدي...! ضحك عبدالرحمن:والله و طلعت عيني حارة...! نزلت سعود من فوقي و أنا أقول:حبيبي روح غسل فمك هناك...! كان فيه مغاسل داخلية في المجلس..راح سعود و رجع بعد شوية..نشفتلو وجهو و عطرتو و عدلتو بعدها قال:ماما أعتيني بولو...! اتنهدت و أنا أطلع بولو و أعطيه،سعود زي كوووول الأطفال ياخد البولو كأنو حلاوة...! بعد ما أكلتو البولو بستو و أعطيتو الجيم بوي عشان ينشغل...! قام عبدالرحمن:أنا كذة شردت من الشغل بما فيه الكفاية..لازم أروح لهم...! سارة:صح..بابا حيعصب...! -والله احنا قلنا عائلية و أبوكي عزم كل معارفو..يتحملهم عاد...! سارة بعتاب:عبدالرحمن...! -والله لو تشوفيهم تنفجعي..أصلاً أشك العشا بيكفيهم...! سارة بقهر:ليه هما جايين يباركو و لا يطفحوا...؟! عبدالرحمن:جود لا يفوتك وجه سارة و هيا حاقدة...! التفت لسارة وقلت:أحلى وجه حاقد في الدنيا كلها...! مدت سارة لسانها لعبدالرحمن إلي قال:شايفة..دايماً تسويلي حركات البزورة دي...! قلت:والله..أصلاً إلي ما تسوي حركات بزورة ما يمشي سوقها...! قال عبدالرحمن و هوا يكابح ضحكتو و يهز سبابتو المشيرة ليا:إنتي حيوانة...! التفت لسارة و راح عبدالرحمن و حاولت أنا قد ما أقدر أركز على كلامي مع سارة و أصرف تفكيري عن وجودي في دا المكان و كنت أطلب من ربي يعديلي دي الليلة على خير و ما يخلي فيها أي احتكاك ببابا...! ^^^^^^^^^^^^^^^^^^^^^ بعد مدة وقفت سارة و قالت بحرج:جود أنا لازم أروح...! كنت عارفة إنو مو وضع عادي إنها تترك الكل في ملكة أختها و تقعد معايا و كنت من جوتي شاكرتها على دا الشي...! قلت:طب هما الحريم حيدخلو هنا...؟! هزت راسها:ما أستبعد...! -طيب... قاطعتني:جود اخرجي و اقعدي زي أي حرمة..مو لازم تتحركي..بس اجلسي و اهرجي مع الحريم...! قلت و أنا أقوم:طب سعود...؟! -سعود شكلو كابس عليه النوم..أوديه يلعب مع الأطفال و إذا نام أنقلو لأي غرفة...! -لا لا إذا نام جيبيه عندي...! ابتسمت سارة بتفهم:إذا نام حأحطو في غرفتي في سريري...! شلت شنطتي و ناديت سعود و شلت منو الجيم بوي،قال:ليس مامي..أنا أبغا ألعب...! -حبيبي عشان دحين توديك سارة عند الأولاد تلعب معاهم...! -ماما أنا مابغا ألوح (أروح) عندهم...! و جا و لف يدّينو حوالين رجلي،حطيت يدّي على راسو:"ليش حبيبي؟!"،التفت لسارة:كيف بزورتكم..أشرار...؟! -والله أولاد خلود و عبدالرحمن حبوبين فاطمني...! قلت و أنا أتذكر:صح سعود..رغد فيه...! رفع سعود راسو،قالت سارة:صح والله هيا تستناك من أول...! قلت:من جد...؟! سارة:ايوة الله..من يوم ما جيناكم و هيا راجتنا بو...! ابتسمت:نفس الوضع عندي...! طالعت في سعود:ها حبيبي تروح...؟! -لأ...! اتنهدت..رحت و جلست و جلّست سعود فوقي،همست:سعود حبيبي ما يسير تجي معايا..أنا حروح عند حريم كبار...! -ماما..أنا ما أسوي شي بس أقعد..بس أقعد...! -حبيبي ما ينفع..الله يسعدك خليك شاطر و اسمع كلامي...! -ماما طب أنا ما أحبهم..ما أعلفهم (أعرفهم) ...! سارة:طب إنتا روح و جربهم و العب معاهم..لو ما عجبوك ناديني و أنا أجيبك عند ماما...! قلت و أنا أدقو بالخفيف على ظهرو عشان ينزل عني:يلا حبيبي روح مع سارة و لو ما ارتحت ناديني...! قام سعود من فوقي و شكلو ما اقتنع تماماً بس الصراحة أنا ما فيا حيل أداري فيه و بعدين سعود لو أحد قال شي ما عجبو ممكن جداً يخاصم و يهزئ و أنا مني مستعدة أنحط في موقف محرج مع ناس وضعي حساس معاهم...! وقفت،و مسكت سارة في يد سعود و قالت:يلا أنا حدخل معاكي و أرجع لماما أساعدها...! صرخت بعد كده:رغد..رغد تعالي...! جات رغد بعد مدة و طالعت في سعود و قالت بفرح:إنتا زيت...؟! طالعت في سعود إلي ابتسم بلطف و جنتلة:ايوة...! و ساب يد سارة و راح مسك يد رغد و خرجوا...! طالعت في سارة بصدمة:وي..سرقت قلب ولدي...! ضحكت سارة:أطفال آخر زمن...! شلت شنطتي و مشيت مع سارة و دخلنا الصالة و أول ما دخلنا ارتفع معدل نبضات قلبي...! كان فيه حريم،بعضهم كانو عماتي و جدة..جدة كانت فيه..رحت لها و سلمت عليها..رحبت بيا:فديييييت من رِيت (رأيت)..هلا والله بجود..هلا ببنتي هلا...! و جلستني جمبها:وينك عني..ما تِجنِّي من أول...؟! قلت بصوت واطي:ما كنت أعرف وينك..أول ما جيت دخلوني جوة...! رفعت راسي على:"جود إنتي حامل...؟!"،كانت عمة صفية "أم عبدالله"..قلت:ايوة...! -ما شاء الله..في الشهر الكم...؟! -نص الخامس...! -ايييييييييييييييييييييييييييه..ما شاء الله..طب دريتي إن ولدي بيتزوج...؟! ما استنتجت إنها تحاول تستفزني أو تدقني إلا لمن قالت:خطبنالُه بنت الحلال إلي بتصونو و تسعدو..الحمدلله يارب...! بنت الحلال...؟!،حسيت بالكلمة كأنها خنجر و طعني..هيا صح تقصد ببنت الحلال وحدة طيبة لكن بالنسبة ليا كان معناها شي تاااااااني...! قلت:الله يوفقو...! قالت بتشكك:تقوليها من قلب...؟! جدة:الله يا صفية..خلي البنت...! -يا أمي بطمن على ولدي...! غمضت عيني و رجعت أفتحها في محاولة لتهدئة نفسي...! جدة باستغراب:من ايش...؟! المجلس كان كلو ساكت..الحوار بالنسبة لهم كان مثير لدرجة و لا وحدة فيهم حاولت تسكت صغيرة العقل دي...! عمة صفية:سمعت إن مو كويس الواحد يتزوج و وحدة تفكر فيه...! رفعت بصري مصدومة..كنت مفحمة منها...! قلت و أنا أحس بخنقتي ترجعلي:أنا ما أفكر في ولدك..بعدين أنا متزوجة و مخلفة و مرتاحة الحمدلله...! التفت لجدة إلي قالت:الله وكبر "أكبر" عليك يا صفية إن كان بتحرقين لي دم بنتي...! عمة صفية باستنكار:ذحين يا أمي تدعين عليا عشان بطمن على ولدي...! -ايوة بدعي و أتحسب عليك..جود حامل يا صفية..الأول ولدته قاصر و الثاني طاح..عاد أنا أبغى الثالث يثبت...! أصوات الحريم عليت و هما يسألو عن إلي راح..سكت و نزلت راسي:"وين بابا..جابني هنا و لعد سأل عني..جابني هنا بس عشان يرضي نفسو..لو كان من جد يبغاني عشاني كان سأل..اتصل..مرتاحة ولا لأ..ولا عمو..هزئ و خاصم بعدها تركني..تركني بعد ما حقق لبابا رغبتو..دايماً بابا..دايماً بابا هوا المهم رغم إنو ما يستحق أي اهتمام..دايماً"...! بعد شوية رن جوالي،كان علي،قمت و أنا أقول لجدة:"علي متصل"،و خرجت برة الصالة و وقفت عند بابها،رديت:ألو...! -ايوة هلا...! -أهلين...! -أمي وصلت...! -طيييييييييييب...؟! -شوفيها..استقبليها يعني...! -والله يا علي أنا يبغالي من يستقبلني..خليها تدق الجرس و... قطعت كلامي و أنا أسمع صوت الجرس و بعدو صوت عمتي أم علي و هيا ترد على "الكيف حالكم و الايش أخباركم"...! قلت:أهوه قاعدة أسمع صوتها...! -طيب كويس..إلا..كيف سعود...؟! -ما فيه شي..تعرفو..مرض الدلع حقو..قام و أكلتو و انشغل بالجيم بوي بعدين راح مع الأطفال و مافيه شي الحمدلله...! -كويس كويس..و أمه كيفها...؟! اتنهدت و كنت حتكلم لكنو قال:خلاص خلاص عرفت..بس لو تبغي أوديكي البيت تراني حاضر...! -ليتك ما جبتني من الأساس...! حسيت الأصوات عند علي تخفت،و وصلني صوت علي هادي:كنت مستعد ما أجيبك و أوقف ضد الكل معاكي لكنك كنتي مصرة...! -أنا ما كنت مصرة..كنت مستسلمة و مغلوبة على أمري...! -لا جود..بدليل إنك أصريتي أوديكي السوق عشان تشتري فستان...! سكت لثواني بعدها قلت:معليش علي اتحملني..بس مافي غيرك ألومو..بابا و مني طايقتو و عمو و عارف وضعي الحالي معاه..و أنا نفسيتي زفت..لازم ألاقي أحد أحط الغلط عليه...! -طيب حطي الغلط عليا بس مابغا لا صراخ و لا تطويل لسان...! ضحكت غصباً عني:ما حصرخ و لا أطول لساني...! -أصلاً أنا مين عندي غير جودي حبيبتي أتحملها...؟! ابتسمت:ولا أحد...! رفعت راسي على صوت عمتي تناديني،قلت:علي أمك قدامي...! -والله...؟!،أجل اقلبي وجهك و خليني أرجع للرجال..قمت من عندهم عشانك..إلي يشوفني يقول دوبي خاطب...! -طب ياخي باي...! -باي...! و أنهينا المكالمة،ابتسمت لعمة و سلمت عليها و هيا كعادتها حضنتني و سألتني عن حالي و مادري ليه شفت في وجهها علي..الشي إلي خلاني أردد بداخلي:"بلا صفية بلا عبدالله"،لا و الأخ بيتزوج..مو كأنو قال ما حينساني...؟! فجأة اتذكرت رسالتو..اتذكرتها بالنص و اتذكرت:"ستظلين فراشة أحلامي"،قال فراشة أحلام قال..الله العالم حتى اسمي مو فاكرو...! دخلنا أنا و عمتي الصالة..سلمت عمة عالحريم..الحريم وقفولها..ليش ما وقفولي أنا...؟!،دايماً كنت معجبة بعمة..لها رزة و أول ما تدخل مجلس تعمل جو..ما شاء الله عليها..و ابتسامتها حلوة..و أعتقد هدا أهم شي..يعني غير فارق السن بيني و بينها فيه قدرتها عالابتسام في وجه ألد أعداءها أما أنا فلا..و أعتبر دا الشي نقطة ضعف...! جلست عمة على طرف المجلس و نادتني،رحت لها و جلست جمبها وين ما تأشر...! حطت عمة يدها على ظهري:كيف حملك ذي المرة...؟! ابتسمت بهدوء:الحمدلله..أحسن من أول...! -طبيعي أول مرة دايماً متعبة...! التفتنا أنا و عمتي لحرمة قالت:ما شاء الله يا أم أحمد..معروف عنك..حريم أولادك كنهم بناتك...! الحرمة مو من عماتي بالتالي أكيد وحدة من خالات أخواتي أوووو..يمكن وحدة من معارفهم...! قالت عمة:والله زي ما أبغى بناتي يتعاملو..أعامل أنا حريم أولادي...! أوه هوا دا المشهور عن عمة...! و الحقيقة هدا شي حقيقي لأنو أنا و زوجة أحمد عند عمتي كأننا أحلام و صفاء و الله لا يغير علينا...! قالت وحدة تانية:ايوة الله معاكي حق..والله كل إلي تعبانين مع أمهات أزواجهم يكونوا لا هما و لا أمهاتهم عاملوا حريم أخوانهم عِدل...! عمتي أم علي:الجزاء من جنس العمل...! قالت عمة صفية:إلا يا أم أحمد..إنتي من وين عرفتي عايلتنا و خطبتي منها...؟! حقدت على عمة صفية..طالعت في عمتي إلي قالت بهدوء:ولدي أحمد صاحب أخوكم...! عمة ما تحب تتكلم في دي المواضيع و عمة صفية ثرثارة و تحب دا الكلام...! و شكلو ما عجبتها إجابة عمتي المتحفظة فقالت:طب و ليش اخترتي جود بالذات...؟! عمة:نصيب..ربي كان كاتب إن علي لجود و جود لعلي...! عمة صفية:آه يعني ولدك ما شافها و عجبتو...؟! عمة:لأ..لا شافها و لا شافته...! عمة صفية ما كانت _حالياً_ بتسأل بلؤم..لكن سبحان الله فيها طبع مو حلو..هذرة و ما تعرف ايش إلي ينفع و إلي ما ينفع ينقال...! طالعت في عمة..صح..عمة ما تدري عن إلي سواه علي..تتوقعوا ايش حتكون ردة فعلها لو عرفت...؟!،علي قالي لو أهلو عرفو حيدبحوه..معقووووووووووووووووول...؟! عمة صفية:بس سمعنا إنو شافها...! عمتي:طيب شافها لكن بعد ما اتكلموا الرجال و اتفقنا على كل شي...! الصراحة كلام عمتي مو حقيقة؛احنا كنا لسه ما حددنا حتى متى العقد..بس المسكينة تبغى تسكت صفية و معاها حق..يعني لو عمة قالت شوفة شرعية كان راحو قالو كلمها و كلمتو..و خرجت معاه و عملو و ما عملو..و كان خلونا لبانة في فم الناس...! آه من الناس و آه من طبايعهم...! ^^^^^^^^^^^^^^^^^^^^^ حالياً أنا لابسة عبايتي و فرحااااااااااااااااااانة عشاني أخيراً حخرج من دا البيت إلي خانقني...! كنا قاعدين في الصالة أنا و علي و سعود و عمو و بابا و أخواني...! و أعترف..كنت مقهورة من بابا لإنو هوا إلي أصر أجي و بسببو عمو هزأني و آخرتها ما أظهر حتى فرحتو بوجودي..يعني..المتوقع بعد كل داك الإصرار على مجيئي إنو يكون فرحان إني جيت لكني و كما أسلفت بابا بس قاعد يرضي نفسو..ما أقول إنو ما ندم..لأ هوا ندم لكنو ما حبني..هوا بس حس بالذنب و حس إنو غِلِط فقاعد يحاول يصحح غلطو بإرضاء نفسو و هوا قاعد يرضي نفسو بتقمص دور الأب الطيب إلي بنتو تصدو و ما تقبل منو أي شي...! اتنهدت من جوتي..يااااا رب فرج عني..من جد وضع متعب و رغم إني مضايقة من حركات بابا إلا إني مستسلمة لدا الواقع و متهيأة نفسياً لأي شي غبي تاني ممكن يسويه أما عن دحين فمو شاغل بالي إلا الخروج من هنا...! وقف علي:جود يلا...؟! وقفت و أنا أحاول أخفي ابتسامة السعادة..ياااااااااااااي حخرج و أخييييييييييييييييراً...! قال عمو:لسه بدري..خلوكم شوية...! لألأ..مستحيل أقعد أكتر...! قلت بسرعة:لأ ما ينفع نقعد أكتر..سعود لازم ينام و بكرة ورانا جمعة...! و على سيرة الجمعة..ترى عمة راحت من بدري و قالتلي نروحلها بكرة بعد صلاة الجمعة نفطر معاهم...! علي:و اليوم خميس و الطرق زحمة..لازم نمشي بدري...! رددت أنا:صح الطرق زحمة و البيت بعيد...! وصلني بعدها صوت عبدالإله ساخر:إلا ما قلتيلنا..ايش رايك في بيتنا...؟! طالعت في عبدالإله بقرف حل عليا فجأة و قلت:يجنن زي أصحابو...! التفت لسعود و مديتلو يدّي فقام و مسك في يدّي و أخيراً اتحرك علي و مشي و مشينا وراه و المزعج إنهم كلهم قامو معانا..مدري يعني يخافو علينا نضيع و لا ايش...؟! المهم إنهم جو و حصل و كنا واقفين عند الباب إلي فتحو علي و كنا حنخرج لكن بابا وقفنا لمن قال:جود ايش رايك تباتي هنا اليوم...؟! التفت بسرعة:هاااا!!!!!!!!!!!!!!!!!!! ابتسم بابا:باتي عندنا اليوم...! عبدالرحمن:الله مرة فلة..لو بتي حدشر معاكي بكرة...! احتجت وقت عشان ترجعلي القدرة على الاستيعاب و لمن رجعتلي قلت و أنا خافضة راسي و أهزو:ما..ما أقدر...! عمو:و ليش ما تقدري يعني...؟! -عشـ..عشان ما..ما أقدر أترك علي و سعود و.."بلعت ريقي"..وكمان ما... قاطعني عمو:علي..عادي تبات جود هنا...؟! علي:واللهِ براحتها..تبغى تقعد تقعد ما تبغى محد يجبرها...! عمو:شفتي..علي موافق..باتي...! قال بابا بابتسامة:أنا كنت خايف علي يرفض..أشوة...! عمو بابتسامة حلوة:لا علي مو غلس..كنت متأكد حيوافق...! قلت بقهر:علي وافق بس أنا مابغا...! طالعو فيا مصدومين،اتوترت و سارت أنفاسي مسموعة...! قال علي:أنا قلت براحتها...! حسيت علي ما يبغا يدخل بس أنا أبغاه يدخل...! عمو:و ليش إن شاء الله ما تبغي تباتي...؟! طالعت في عمو و حسيت قلبي ينعصر من الألم،قلت بصوت باكي و أنا أطالع في الأرض و أهز راسي بلا:ما..مابغا..أنا..مابغا أبات..أنا أبغى أروح البيت...! بابا:ليه يا بنتي والله ما فيها شي..أنا أبغاكي تنامي و تصحي و تفطري معانا..و بعدين لاحظي إنك ما قد نمتي هنا و لا مرة...! عبدالرحمن و عمو قعدوا يقولوا:"صح جود..باتي باتي"،و قعدوا يكرروا و يأكدوا على كلام بابا الشي إلي خلاني أنفجر:و مابغا أنام ولا مرة هنا...! عمو بشدة:جود...! شدة صوت عمو خلتني أفز،قال بعدها و هوا يصر:أبوكي لا ترفعي صوتك عليه...! طالعت في عمو و لقيت في عينو نظرة غاضبة أرعبتني خلتني أبكي و أضرب الأرض برجلي و أقول بصوت عالي بلا وعي:عمو لا تتكلم..إنتا آخر واحد أبغى أسمع صوتو...! -لااااا و ترفعي صوتك عليا كمان.."عِلِي صوت عمو"..جود حالك زايد منتي ملاحظة...؟! طالعت في بابا..كان ساكت..ولع النار و ما حاول يطفيها...! قلت بصوت مخنوق:إنتا ساكت ليه...؟! عمو:جود كلامك هنا معايا...! علي:يا سعُو.. عمو بانفعال و شدة:علي لا تتدخل..بنت..كلميني هنا مالك شغل في أبوكي...! طالعت في عمو و شفايفي ترتجف،قال:إنتي لو كنتي جيتيني و كلمتيني كان ممكن أتعاطف معاكي..لكنك اتطاولتي على أبوكي و سرتي إنتي الغلطانة..لازم تتحملي نتيجة غلطك...! طالعت في عمو..أنا ليش ساكتة..ليش ما أتكلم لييييييييييييييييش...؟!،و علي..علي ليش ما يدافع عني...؟! بعد صمت ثواني قال عمو بلهجة آمرة:خلاص جود..نامي اليوم هنا و بكرة من بدري أنا بجي و برجعك لبيتك...! التفت لعلي إلي اتكلم أخيراً و قال ببرود و ثقة:جود ما رح تسوي شي غصباً عنها...! عمو بنرفزة:علي إنتا فاهم الوضع كويس...! انقهرت..ليش..ليش لمن حسيت إنو علي حيفكني جا عمو ببساطة يسكتو و يكلمو كأنو الغلطان...؟! التفت لعمو بقهر:لأ مو فاهم الوضع و محد فاهم و إنتا بنفسك ما تدري عن أي شي...! قال عمو من ورا أسنانو:جود لا تخليني أسوي شي يزعلك و يزعلني...! اتنرفزت..اتنرفزت و حسيت ببركان يتفجر جوتي..قلت بصوت عالي..صوت عالي أجبر الكل عالسكوت:ليش هيا بقي فيها زعل و رضى..أ... سكت و أنا أتذكر جيت عمو لبيتي زعلان و خروجو منو زعلان..بكيت..بكيت و قلت و أنا أحس بظلم بابا و تبليه عليا:يا عمو..يا عمو بابا قلك إني قلت و قلت و قلت..بس ما قلك إلي هوا قالو و ياااا ليتها جت على كده..عمو أنا ما قلت لبابا شي..والله ما قلتلو شي.."زادت دموعي"..هوا إلي قال كلام مو معقول..هوا إلي اتصل عليا و أنا في الجامعة و قلي..قلي... سكت..ما قدرت أكمل..غطيت وجهي بيدّيني و قعدت أبكي،علي علطول حط أياديه على أكتافي:جود خلاص..محد يقدر يغصبك على شي و أنا موجود..جوووووود...! رفعت راسي و أنا أحس بنار جوتي..بابا طول عمرو يتكلم و يقول ليش أنا ما أتكلم..ليش دايماً أكبر عقلي..رح أتكلم رح أتكلم...! قلت بقهر و الحقد باين في صوتي:بابا كدب.."طالعت في عمو"..أنا اعتذرت ما قليت أدبي..أنا شرحتلو ليه ما أقدر أجي..بابا إنتا جبتني هنا غصباً عني.."اختنق صوتي"..و..و معد سألت عني..تركتني لنظرات حريم بعقول أطفال..تركتني لتعليقات عمة صفية..تقولي ولدي عبدالله حيتزوج..حيتزوج بنت الحلال إلي حتسعدو و كأني افتكرت في ولدها..و فوق دا جاي تطلب مني أبات..أنا هنا مخنوووقة..أنا أبغى أخرج من هنا..أنا أبغى أخرج..خلاص ما أبغا أقعد..خلااااص ما أبغى... رجع علي يحط يدّو على أكتافي:جود حبيبي خلاص اهدي..قلتلك محد حيغصبك على شي...! الكل كان ساكت و مصدوم مني و من إنفعالي بس أنا كنت منهارة..تابعت و أنا مني واعية لأي شي غير إحساسي بالوجع و الأم:و ما اكتفيت بس بكده..إنتا جمعت كل الناس حولك ضدي و هدا كلو كان ممكن أتجاهلو..أنا عادي عندي..متعودة على بغض الناس بس إنتا..إنتا يا بابا أخدت مني بابتي الحقيقي..إنتا خليتو يدخل بيتي زعلان و يخرج زعلان..إنتا أخدت مني أشياء كتيرة حلوة بس دحين إنتا أخدت مني سبب سعادتي..حرام عليك كده..أنا ما عملتلك شي..ليش تحرمني من عمو..ليش تتبلى عليا و تقولني كلام أنا ما قلتو..ليش...؟! بابا:ما اتوقعت إن الأمور توصل لكذة..كل ما في الموضوع إني كنت متأثر من كلامك و لمن كلمت عمك كنت منفعل..ما كان قصدي أتبلى عليكي زي ما تقولين و نيتي ما اتعدت حدود إني أفضفض..و بعدين إنتي مكبرة الموضوع..كلامك إلي قلتيه ما كان لو أي داعي...! قلت بانفعال:تفضفض على حسابي...؟!،تفضفض تقوم تقول كلام أنا ما قلتو...؟! قال بابا في مدافعة عن نفسو:أنا قلت إلي فهمتو من كلامك و.. قاطعتو:و مين قال فهمك لازم يكون صح...؟!،إنتا طول عمرك ما كان عندك ذرة مفهومية و ما كنت تعرف تتصرف مع أي شي و إلي عايش مشكلتي معاك ما يقدر ينكر دا الشي...!!! عمو بصوت عالي:لحظة لحظة لحظة..جود ايش معنى كلامك هذا...؟! التفت لعمو بإصرار:معناتو أخوك كداب...! سحب عمو نفس و قال من ورا أسنانو:لا تتكلمي عن أبوكي بهذا الأسلوب...! سكت لثواني بعدها رفعت راسي،قلت و أنا أحس بإنو مافي ولا واحد من إلي حولو يستاهل أي شي و بالأخص بابا...! قلت:عمو تبغاني أقولك ايش قال...؟! عمو ما رد و هوا يستناني أتكلم،قلت:كتير أشياء ممكن أقولها تخليك تكره أخوك و كتير أشياء ممكن أقولها تخليك.."أشرت على أخواني"..إنتا و هوا تكرهوا أبوكم..لكني ما رح أقول..عارفين ليه...؟!،عشان بس أنا أحس إنو أنا المفروض أكون أحسن منو و ما أكرر الكلام السخيف إلي قالو... صوتي كان تدريجياً وضوحو يقل...! قال عمو:جود أياً كان إلي قالو لا تتكلمي عن أبوكي كدة..جود إنتي إلي كنتي دايماً صابرة و متحملة عشنو أبوكي..دحين لمن سار ما يسوي أي شي إلا إنو يدور رضاكي سرتي تحاسبيه عالزلة...؟! قلبي كان يعورني..كان من جد يعورني..حسو فيا..واقفة و الكل يطالع فيا بعين الاتهام..واقفة أجادل عمو قدام زوجي و ولدي..ليش يحطوني في موقف زي كده..ليييييييش...؟! و زي أي امرأة تُظلم بكيت،قلت و دموعي تنزل:ما رح تقتنع يا عمو أنا عارفة و ما رح تصدقني و بابا رح يظل الإنسان الكويس الصالح إلي صابر على أذى بنتو..كل إلي أبغى أعرفو هوا كيف قدر يسحبك لصفو..أنا نفسي أعرف الكلام إلي قالو بالضبط..أبغى أعرف ايش الكلام السيء إلي نقلو بابا عشان تطالع فيا بالنظرة البشعة هذي..عشان تطالع فيا باحتقار و تعاملني كأني..كأني... قطعت كلامي و أنا أنتبه لشي،قلت:إنتا..إنتا يا عمو دايماً كنت.."ازدادت دموعي و قلت من قلب و أنا أطالع في بابا"..أصلاً أكرهك..دايماً كلمة وحدة منك تكفي عشان الكل يلتف حولك.."التفت لعمو"..و دي ما كانت أول مرة تشك فيا..و في كل المرات كان بابا أو أحد من الأهل لهم دخل..أنا حتى لمن كنت أبغى مصلحتك ما وثقت فيا..عمو ايش سار فيك..ليش منتا مصدقني..أنا ما أكدب..والله ما أكدب.."التفت لبابا"..قولو إنو أنا ما قلتلك شي..هوا يصدقك إنتا..ليش ما تقولو إنو أنا اعتذرت منك و فهمتك ليش ما أقدر أجي..إنتا ليش قلتلو إنو كرامتي ما تسمح لي أجي..أنا ما فكرت في الكرامة..أنا كنت بالفعل ما أقدر أجي..أنا والله ما فكرت لا في كرامتي و لا في إنو جيتي لهنا فيها إهانة..والله أنا ما فكرت كده..أنا قلتلك لو أقدر أجي كان والله جيت بس أنا ما أقدر..ما أقدر لِـ ..أنا..أنا.. نزلت راسي لإني ما كنت أقدر أطالع فيهم أكتر،قلت و أهز راسي:أنا كنت مستعدة أحبكم كلكم حتى عبدالإله بكل العبط إلي سواه معايا بس إنتو رفضتو..إنتو إلي صديتوني لمن أجبرتوني على أشياء أنا مالي طاقة عليها..إنتو تعاملوني كأني إنسانة ممكن أرتكب ذنب عظيم في أي لحظة..يمكن عشان تاريخ أسود عرفتوه لماما بس أنا ما اخترتها أم ليا..أنا ما اخترت أكون أشبها..ربنا إلي كتب كل شي بس ربنا ما كتب إني أنظلم..ربي ما كتب إنكم تعاملوني باحتقار و دونية بس عشانو قدر إنو ماما السيئة تكن ماما..إنتو إلي ظلمتوني..ربنا ما يرضى بالظلم عشان كده أنا ما أقول إنو هدا مقدر و مكتوب لإني كل ما تظلموني كنت أحس ربي معايا يبرئني..كنت أنام و أصحى و ألاقي كل شي تمام.."سكت و تابعت بعد ما رجعت رفعت راسي"..إنتو إلي منتو رجال..إنتو إلي استخدمتو سلطتكم و قوتكم عشان تظلموني..بابا استغل مكانتو الدينية كأب رغم إنو ما كان أب..بابا كل إلي سواه هوا إنو كوني..شارك في تكويني..جوتي فيه كم جينة منو..عمو أو خليني أقول باباتي..استخدم سلطتو و معاه حق..هوا رباني و علمني و سوالي كل شي بس للأسف لمن جيت أحاول أردلو شوية من إلي سواه منعني..ليش ما أدري..يمكن شابفني أصغر و أغبى من إني أتصرف في مواضيع زي كده..لكن بعدين صدمني.."التفت لعمو و قلت"..صدمتني يا عمو لمن قلت إنك ما تبغى أولاد بسببي..لمن قلت إنو رحمة من ربي إنو ما عندك أولاد على أساس إني المثل السيء للبنت العاقة رغم إنو ما مرت مدة من لمن قلتلي إنو أنا أحسن من مليون بنت كان ممكن تجيبها لو اتزوجت..إنتا يمكن حاسس إنو أنا شخص مختلف بس أنا هيا جود إلي عرفتها و من هيا في الكوفلة..أنا ما جيت هنا عشان بابا..أنا علي عرض عليا ما أجي و يوقف معايا ضدكم بس أنا رفضت و أصريت أجي عشانك إنتا لإني كنت عارفة إنك حتزعل و أنا ما أبغاك تزعل لكن الظاهر إنتا منتا مهتم برضايا..بابا هوا الأهم..بابا لازم ما يزعل..بابا لازم يكون مرتاح..بابا لازم ما يحس بالذنب رغم إنو لازم يحس بالذنب..ليش تداروه و تدورو راحتو على حسابي ليش...؟! كان عمو حيتكلم لكني منعتو:لا تقول شي..أنا أبغى أرجع أقولكم إنكم منتو رجال..منتو رجال لمن ما قدرتو تمنعوا ظلم بابا عني..منتو رجال ما قدرتو توقفو عبدالإله من مضايقتي..منتو رجال لمن رضيتو إني أعزل نفسي في غرفتي..منتو رجال لمن تركتوني أتزوج من غير وحدة فاهمة تعلمني كيف لازم أتعامل مع زوجي و كيف لازم أتصرف في حالات معينة..منتو رجال لمن اضطريتوني ألجأ لأم زوجي عشان أسألها عن الصح و الغلط..أنا في كل شي كنت ماشية بالبركة..ربي كان ساتر عليا و راحمني لا أكتر و لا أقل..أنا والله قلبي يعورني و أنا أقولها لكم لكن إنتو..إنتو.. سكت..فيه شي غريب جوتي سار خلاني أسكت..شي خلاني أهدى و كأنو ربنا أنزل سكينة عليا..سكينة خلتني أسكت و ما أحس إلا بكل إلي حولي يسيروا غبش بالتدريج...! بعد كده لفني الهدوووووووووووووووووووء...! ********************************************** |
الجزء العاشر (أيقظتم جروحي) ايش دا.. ايش فيه...؟! فتحت عيني ببطء و أنا أتساءل عن الإحساس الغريب إلي حاسة بيه...! جات عيني في عين علي..علي كان قريب مني و يدّو حول أكتافي..كانت المخدة ورا ظهري و ظهرو و كان مميلني عليه،رفعت راسي عن صدرو فباسني على خدي و قال بابتسامة:ظهر الخير...! حاولت أرفع نفسي و ساعدني علي عشان أجلس،طالعت في ساعة يدِّي فقال علي و هوا ينزل يدّي على تحت:وحدة..قومي صلي الفجر و الظهر و تعالي عشان نفطر مع بعض...! -عـ... ابتسم:ولا كلمة..سوي إلي قلتلك عليه و تعالي...! -طب لا تطلع من الغرفة أبغاك...! اتمدد عالسرير و حط يدِّينو تحت راسو:يلا أستناكي...! قمت و رحت عالحمام و في الحمام انتبهت إني لابسة جلابية،كملت شغلي و خرجت و قلت و أنا أتجه لشرشف صلاتي:علي أنا متى غيرت...؟! -و إنتي نايمة...! طالعت فيه مستغربة،ابتسم ابتسامة واسعة:والله..و إنتي نايمة غيرتي...! سكت و أنا أتنهد،قلت:طيب خلاص بصلي...! -صلي...! -طب سعود صاحي...؟! -من قبلي و قبلك...! -طب روحلو لا يقعد لحالو...! قال و هوا يعطيني ظهرو:مابغا...! -علي... -صليييييي...! استسلمت و صليت و لمن خلصت لقيت علي متربع عالسرير و فوقو سعود إلي جاني أول ما خلصت و انسدح عالأرض و خلى راسو على فخدي..دنقت عشان أبوس سعود،بستو و أنا أتنفس بعمق لمن شميت ريحتو..ياااه قد ايش أحس براحة لمن أشم ريحة سعود...!،بعدها رفعت راسي لعلي إلي ناداني و أنا أرجع شعري ورا أدني،قلت:هلا...! ابتسم و هوا يقول:سعود...! طالع فيه سعود:نعم...! -شوف ماما حلوة...؟! رجعت أطالع في سعود إلي سار يطالع فيا و هوا سادح،قال:ماما مو حلوة...! حطيت يدّي تحت دقنو و قلت و أنا أحرك راسو:ليييييييييييييه...؟! قال و هوا يبتسم ابتسامة تجنن:ماما تزنن...! و نط حضني،لفيت يدّي حولو و أنا أضحك بخفة:حبيبي إنتا...! قال علي بصوت واطي:ترا أنا إلي اتفقت معاه يقول كدة...! التفت لعلي:فديت إلي قال و إلي علم.."ابتسم علي"..و فديت أهل الكذة إلي يقولو كده...! -أووهييييييييييييييي علينا..ترا الكل ملاحظ عليا قالب حضري...! ابتسمت:أحسن..أنا ما أحب الكلام التقيل...! -أصلاً من يوم ما اتزوجتك سارو يسموني دحين...! ابتسمت و بعدها همست في أدن سعود:سعود حبيبي اطلع عشان أبغى أكلم بابا...! بعد عني و قال:سل..(سر)...؟! ابتسمت و هزيت راسي و أنا أغمض عيوني و أفتحها،قال:تقوليلي أنا سل بعدين...؟! -من عيوني...! -تيب...! و خرج و قفل الباب بعد ما قلت:"قفل الباب وراك"...! وقفت عن السجادة و أنا أسمي،رحت و جلست جمب علي و أنا أفك لفة الشرشف و أخليه على أكتافي...! ابتسم لي علي،قلت:علي رحت صليت...؟! -لأ...! -ليه...؟! -ما عندي ملابس نظيفة...! -بس أنا قريب مغسلة كل ملابسك الداخلية...! -ما عندي ثوب...! قطبت حواجبي مستغربة..أنا و علي كنا متفقين يلبس نفس ثوب أمس لإنو جديد و أمس أول لبسة،قلت:بس التوب... قاطعني بلطف بابتسامة وترتني:جودي حبيبي..عدمتيلي هوا بمكياجك...! اتذكرت المناحة إلي سويتها أمس..صح إني فقدت الوعي _تقريباً_ لكني لمن وصلنا البيت قمت و قعدت أبكي و أبكي و أبكي...! حط علي يدّو على جبهتي:إنتي أمس كنتي حارة...! -و دحين...؟! -لا اسم الله عليكي ما فيكي شي...! اتنهدت و قمت من على السرير و اتجهت للشماعة أبغى أشوف التوب...! لفيت التوب و كان بالفعل معدوم في منطقة الصدر بالمكياج..نزلت راسي و يدّي ما زالت متمسكة بالتوب..كنت قاعدة أتذكر كل شي سار و كنت قاعدة أتذكر كيف قضينا أنا و علي ليلة أمس..كنت أبكي و هوا يحاول يهدّيني دون جدوى إلين ما نمت...! رفعت راسي و لفيتو لمن حسيت بيد علي على كتفي...! رجعت نزلت راسي و قلت بحرج:علي أنا آسفة عـ... قاطعني:أوووص لا تقولين كذة مرة ثانية...! تركت التوب و لفيت بكامل جسمي و سرت مقابلة لعلي:بس إنتا مالك دخل و... -لأ ليا دخل...! -بس... قاطعني بانفعال خفيف:بس ايييش..منتي زوجتي..منتي حبيبتي..إلي برة في الصالة مو ولدي..إلي في بطنك مي بنتي.."سكت و زفر و تابع بهدوء"..جود أنا ما أرضى أحد يهينك أو يضايقك لإنه إذا أهانك أو ضايقك معناته ضايقني و أهاني أنا..جود إنتي..إنتي خليتي لحياتي طعم..إنتي.."ضحك بخفة و هوا يهز راسو بعدها قال و هوا مبتسم و موسع عينو"..مني عارف كيف أعبر بس أنا يا جود أكبر همومي كانت ايش فيه موضوع حلو أنزله في المنتدى لكن ذحين..آآآه جود مادري ايش أقولك...! مسك أكتافي:الخلاصة..إنتي دُنيتي و حياة جود مي سعيدة فيها أنا ما أبغاها...! الخلاصة...؟!،تبغو الخلاصة...؟! الخلاصة إني قربت من علي و لفيت يدّيني حولو..لالا..ما بكيت بس من جوتي كنت قاعدة أحس بقلبي يتقطع...! علي..علي إلي الكل ظن فيه ظن السوء..الكل حتى أنا اعتقدنا إنو صايع و ضايع..علي إلي كرهتو في بداية وجودو في حياتي وقف معايا..صدقني رغم إنو ما سمع الكلام إلي انقال..و ما شك واحد في المية إني قلت لبابا كلام وقح..بابا إلي قدر ياكل حلاوة بعقل الكل..الكل حتى عمو...! بعدني علي عنو و قال:جود...! رفعت راسي و قلت بهدوء:نعم...! قال علي بقهر:نعم الله عليكي يختي..قولي عيونها...! طالعت في علي و أجبرت نفسي..لالا ما أجبرت نفسي..أنا بالفعل ابتسمت...! قلت:عيونها و كل شي في حياتها...! -أوه أوه أوه إذا بتقوليلي الكم كلمة الحلوة ذي ياليت كل يوم تسير مشكلة...! شهقت باستنكار:تف من فمك...! علي مثل إنو يتفل،قلت:يوووووه الله يهبل ابليسك...! ابتسم و قال و هوا يعتدل:طب ممكن سؤال...؟! -مية سؤال...! -لا بس عندي سؤال واحد...! اتنهدت بابتسامة و قلت و أنا أحرك راسي يمين و شمال:اتفضل اسأل...! -هوا سؤال ممكن يضايقك بس أنا لازم ألاقيله جواب و.."سحب نفس و طلعو بتأفف و قال بسرعة"..أوكي جود..معليش يمكن تنزعجي بس أنا أبغى أعرف ايش فيه بينك و بين عبدالله و ليش أمس اتكلمتي عنو و ليش عمتك هذي مدري مين هيا تستفزك بزواجُه...؟! نكست راسي..غمضت عيني و عضيت شفايفي بقهر..هدا إلي استفدناه...! علي:جود لا تزعلي مني..أنا عارف إنه مو شي كبير لكن من حقي أعرف..أنا أمس طول الليل من بعد ما نمتي و أنا أفكر في الموضوع..و بعدين أمس اتذكرت إنو عبدالله هذا ما قد احتك فيا و ما يسلم و يبدأ كلام إلا إذا أنا سلمت...! طالعت فيه فقال:صح المرات إلي شفتُه فيها تنعد عالأصابع و كنت أقول يمكن ما ارتاح لي و ما كنت مهتم لكن من بعد كلامك أمس عرفت إن فيه سبب و أنا أبغى أعرف هذا السبب...! لازم أقولو..لازم أوضح الأمور و لا هدا الشي حيقعد في نفس علي و حيسببلو شك..قلت:ببساطة و من غير ما أدوشلك راسك بتفاصيل سخيفة..عبدالله خطبني و عمو رفض فقال عبدالله ليش تحرمنا من بعض فعمو حسب إنو أنا أعرفو رغم إني ما كنت أعرف حتى اسمو لإنو من بعد ما كبرت..تعرف يعني الغطا و كده و أنا ما كنت متعلقة في أهلي فما كنت متذكرتو...! علي زي أي رجال عصب و اتنرفز:الكلللللب الحيوااااان...! -مين...؟! -عمك و عبدالله...! -عبدالله و أهبل بس عمو ليش...؟! -أنا دايماً أبغى أسبه بس عشان خاطرك.. بس ما دام الوضع كذة إلا كلب و حيوان...! اتنهدت..بصراحة مشاعري الحالية تجاه عمو ما تحمسني عشان أدافع عنو و أجادل علي بعدين علي ما يَعني كلامو حرفياً..هوا قصدو لمن ينقهر منو...! مديت يدّي لرقبة علي..كانت عروقو طالعة..قلت و أنا أمسح ببطء عليها:طيب بس حبيبي اهدى...! و الحمدلله هدي علي شوية من حركة يدّي على رقبتو لكن النرفزة ما زالت موجودة..قال و هوا يبعد يدّي:كيف أهدى...؟!،أهدى و أنا عارف إنو فيه واحد بقرة يحبك و عمك الغبي معدوم الثقة يشك فيكي و قد شك من قبل...! ابتسمت بحزن..الله يسامحك يا علي..ذكرتني بإنو هادي مو أول و لا تاني مرة يشك فيا عمو..قلت:أوافقك عبدالله بقرة و لإنو بقرة قال ما حينساني و ما حيتزوج غيري و سوا مسلسل مكسيكي و دحين حيتزوج و مبسوط فمالو داعي تشغل بالك بو...! قال علي بسخرية:قال ما حيتزوج...؟! هزيت راسي فقال:طيييييييييب والله لأعلم زوجته...! -علي لا تحلف...! -لغو لغو...! -يا سلام..تاخد راحتك و تقول لغو...! ابتسم:طب أقولك بلا عبدالله بلا عطا الله..روحي سويلي شي آكله...! -لا علي..مابغا أطبخ...! -لا يا شيخة...؟! -قلت:علي والله مالي مزاج..الله يخليك عشان خاطري مابغا أطبخ اليوم...! -يعني نطلب...؟! -ايوة...! قال:أجل قومي جيبي جوالي...! -وينو...؟! -في الصالة...! و رحت للصالة و هناك كان سعود قاعد يتفرج عالسعودية الأولى..كان فيها فلم:"baby’s day out"..يووووه ذكريات...! قال سعود:ماما تخيلي..النونو في البرة...! ابتسمت على حرف الراء في كلمة "البرة" و إلي يُقصد بها سعود الشارع و ابتسمت أكتر على كلمة تخيلي إلي مدري من وين جايبها...! قلت باستغراب مصطنع:والله...؟! -ايوة و... قاطعتو و أنا أمد يدّي:تعال حكينا أنا و بابا...! و جا سعود و مسك في يدّي اليسار لإنو اليمين مشغولة بالجوال...! و رحنا لغرفتنا،طالع علي في سعود:أهلاً بمخبص الأجواء الرومانصية نمبر ون...! مديت لعلي الجوال و أنا أبتسم:اطلبلي ماك آرابيا من ماكدونالدز و اطلب لسعود هابي ميل...! قال علي و هوا ينقل رقم ماكدونالدز من جوالي:أصلاً احنا شعب بس فالح يصرف الراتب على الأكل...! طبعاً علي حالو حال أي رجل سعودي و يمكن خليجي..لازم يكرر دي الجملة و أخواتها قبل ما يطلب من أي مطعم رغم إنو يا عمري عليه لو حس إننا نفسنا في شي لازم يجيبو و لا يحس بالذنب لكنو الله يصلحو لازم يعترض و يعلق...! قال و هوا يتصل و يحط الجوال على أدنو:طب ممكن أسأل سؤال سخيف...؟! -اسأل...! -ليش تقولي ماكدونالدز...؟! قلت باستغراب:عشان اسمو كده...! -طب ما أعرف أقول زيك..أنا ما أقول إلا "مقدونلز"...! ابتسمت:ترا بس أنا الفنتك و لا عمو يقولها عادي...! قال علي بتعب:أصلاً مشوااااار..ماااااكدوناااااالدز..مرة تاخذ وقت...! ابتسمت:طب خلاص قول 88...! طلب علي لنا و لنفسو...! بس مو مهم الأكل قد ماهوا مهم السؤال إلي أبغى أسألكم هوا...! أبغى أعرف ايش رايكم في الحوار إلي قبل شوية...؟!،سخيف صح...؟! هوا سخيف يمكن..بس بالنسبة ليا كان مهم لإنو خرجني من مزاجي الزفت و أعطاني قوة خلتني أتوعد عمو بشي...! ما حقولكم ايش هوا الشي لكن حتشوفو ايش حسوي و حيشوفو كلهم مين جود...! *********************************** بعد العصر كنا قاعدين أنا و علي على الكنبة الطويلة قدام التلفزيون و سعود بعيد عننا شوية يكتب أو يرسم..ِشي زي كده...! و بما إنو اليوم جمعة ففيه أشياء كتير اتعودنا نتفرجها زي برامج الفتاوى و حجر الزاوية و بعدين الدخيل (إضاءات) لو عجبنا الضيف بعدين نشوف الفلم إلي يجي كل جمعة على ام بي سي 3 أو ماكس و زي كده...و بصراحة كنت حاسة بروتين و ملل خاصة مع المشكلة إلي حسبت إنها حتخف لو رحت لعمتي أم علي لكني اعتذرت منها لإني كنت تعبانة و دوبي بس بدأت أصحصح و هيا قلقلت عليا مرة..حسيتها حاسة إنو فيه مشكلة سارت لكنها ما تبغى تتدخل..و كلمت عمي فقالي جملة غريبة..قالي:"إن لم تكن ذئباً أكلتك الذئاب"...!!! سألتو عن السبب فقلي:"لا أعلم .. فقط أحببت قول هذه الجملة لكِ"،قلتلو:شكراً عالجملة الحلوة و بعدها قفلنا...! لكني قعدت أفكر في مناسبة الجملة..أكيد عمو قالها على أساس المشكلة..هما عرفو و حسو إنو فيه شي من بعد ما كلمهم علي جوة الغرفة من غيري بس أكيد ما يعرفو السبب لكن جملة عمي موجهة ليا و أنا أبغى أعرف سبب قولو لدي الجملة...! فكرت و فكرت و أنهيت تفكيري بإنو عمو أطوارو غريبة و لو طلعات..فكرت كده عشان ما أنشغل أكتر...! سمعت صوت جوالي يرن فقلت:سعود بابا روح جيبلي جوالي...! علي:و حقي كمان...! راح سعود و رجع بجوالتنا،أخدت جوالي و طالعت في المتصل و كان..عمو!!! اتنهدت و أنا أطالع في الاسم و بعدين رميت الجوال على طرف الكنبة و أنا أقول لعلي إلي يسأل:رقم غريب...! رن جوال علي فقال:جود..سعود...! -إذا طلبني مشغولة أو نايمة...! رمى علي الجوال عالكنبة:ما أرد أحسن...! بعد مدة مو قصيرة رن الجوس..استغربنا؛مين ممكن يجي في دا الوقت...؟! كنت شاكة بشي فقلت لعلي:علي ممكن تقوم تفتح بس قبل قولي مين...؟! علي فهم عليا،قام و طالع من العين السحرية بعدين التفت لي و همس:سعود...! قلت و أنا ألملم الأشياء:لحظة...! و دخلت صحن الشاهي و المكسرات في المطبخ و رحت عالغرفة بعد ما قلت:أنا..نااااايمة...! لحد يطالع فيا..مو هوا إلي قال لو الأولاد زيي أجل ربي مو حارمو...؟!،كلامو دا معناتو إنو أنا ما فيا خير و لا تتوقعو مني أطلع لواحد هدا ظنو فيا...! نولت راسي و أنا حاسة إني كارهة إحساسي بالألم و الوجع و كأنو عمو قلي كلامو السخيف قبل شوية...! اتنهدت و أنا أحس بقلة الحيلة لكني فجأة رفعت راسي..والله رح أوريهم إن الله حق و أرجع أقول:رح أوريهم مين جود...! ^^^^^^^^^^^^^^^^^^^^^^^^ ("جود!!!!" صاح الجميع بخوف و هم يرون جود تتهاوى..أمسك بها علي و هو ينادي باسمها...! كان الجميع مصدوماً و متصلباً و كان أول من تحرك سعود لكن علي أوقفه عندما قال:"خليك بعيد"...! قالها بتوحش و هو يشد على جود الشيء الذي صدم..لا بل أخاف سعود الذي اعترف لنفسه بأنه خائف من علي الذي لم تكن ملامحه طبيعية...! قال سعود الصغير بخوف و هو يقترب:ماما...! عاد سعود يقترب ببطئ و هو يقول:علي خلينا نوديها المستشفى...! و عندما وصل لجود الذي كان علي قد مددها و وقف،دُفع سعود بعنف من قبل رحيمه:لو قرب واحد منكم من جود رح أذبحه...! ثم انحنى على جود...! اتجه سعود لسعود الصغير و حمله و هو يهدهده كي يطمأن لكن كيف و هو الخائف الأول في المكان...؟!،كان يشعر بنبض قلبه يزداد و هو يُفكر:"جود طايحة فاقدة كل قوتها و مو مسموح ليا أقرب منها و أطمن عليها"...! بالنسبة لسعود كان من المؤلم حد القتل ألا يتمكن من الاقتراب من جود في الوقت الذي تكون فيه معتمدة كلياً على من حولها..في الوقت الذي تفقد فيه كل قوتها...! يا لها من دنيا..لم يتوقع سعود يوماً أن يمنعه أحد من مساعدة جود و ليس هذا فحسب..بل يستسلم هو لهذا المنع...!،لكن ما لم يعيه سعود هو أنه لم يستسلم ضُعفاً بل استسلم لشعورٍ بأنه أخطأ و بأن جود لن تقبل مساعدته لو كانت في وعيها..حتى و إن كان سعود لا يشعر بشعوره هذا...! علي كان يفحص جود والقلق بادٍ عليه،قرَّب وجهه من وجه جود فحصل شيء غريب؛ملامح علي تغيرت و ليس هذا و حسب بل..ابتسم..نعم علي ابتسم...! أنزل سعود سعود الصغير المتعلق به و اتجه لهم،جثى و مد يده لوجه جود:"ايش فيه؟!" رفع سعود رأسه لعلي الذي قال بسعادة:"جود كويسة"...! اقترب سعود من جود أكثر و وجد أنها كانت..نـــــائـــــمـــــة!!! و لاحظ أن نومها لم يكن عادياً..جود كانت نائمة بهدوءٍ و استرخاء و الراحةُ باديةٌ على وجهها...! كان سعود متفاجئًا من وضع جود و لم يوقظه إلا صوت علي و هو يقول بصرامة:سعود افتح الباب...! اتجه سعود الصغير للباب و رفع نفسه لكي يتمكن من فتحه في الوقت الذي رفع فيه علي جود بصعوبة بسبب حملها إضافة إلى توتره و اضطراب الموقف،قال سغود برجاء:علي خليني أساعدك...! -ابببعد...! و عندما كاد سعود أن يمد يده هاج علي:ابعد يدَّك.."التفت لابنه"..اتحرك قدامي...! خرج علي يسبقه سعود الخائف المصدوم من كل ما حصل...! وضع سعود لم يكن أفضل من وضع سعود الصغير فقد كان خائفاً و مصدوماً...! لمَ علي عامله و كأن ليس من حقه أن يتصرف و لم شعر هو بأنه لم يكن قادرًا على الاقتراب من جود...؟! كانت هذه التساؤلات و غيرها تدور في بال سعود قبل أن يتنبه لشيء:"جود...؟!،ايوة جود..جود بنتي أنا...!" التفت لسعيد و قال:"سعيد إنتا خليتني أظلمها"...! انفعل سعيد:"تظلم مين...؟!،سعود أنا ما قلت شي و إنتا شاهد..سعود أنا كلمتك إنتا...!،و إن كان فيه غلط فهو منك لإنك إنتا إلي بالغت في ردة فعلك" صُدم سعود..هو فعل ما فعل لأنه رأى بأن جود أخطأت في حق والدها الواجب عليها الصبر على آذاه بمكانته الدينية و الاجتماعية و بالمختصر فعل ما فعل من أجل سعيد و في النهاية يقول هذا...! قال سعود:"لكن جود قالت إنها ما قالت شي و إنتا اتقولتها"...! -و ليش بالضرورة تكون صادقة...؟! -جود ما تكذب كمان جود ما تبكي قدام أي أحد لكن لإني ظلمتها و جرحتها ما اتحملت...! -يا... قاطع سعود سعيد:نادو أمي.."دخل لداخل البيت"..أمي..أمي...! كانت أمه و الخادمة "مُنورة" أمامه..أمه كانت شبه مرتدية عباءتها الكبيرة الفضفاضة،اقترب سعود من أمه و أمسك بها:أمي ايشبك...؟! نظرتها كانت غريبة،قالت:وش بجود...؟! توتر سعود:ما بها شي..بس راحت مع زوجها...! بكت أم سعود،قالت:والله إن جود ما بتروح إلا مودعتني لكنها خرجت و معها الظيم و القهر...! احتضنها سعود:أمي اسم الله عليكي جود ما فيها إلا العافية...! أبعدت الجدة ابنها عنها ناهرةً إياه:هذا سعيد يا سعود..سعيد..ما خاف ربُه في الحرام بيخافُه في بنتُه..حرام عليك..الله لا يبارك فيكم من أولاد إن كانكم بتحرقون دم جود...! أمشى سعود أمه و أجلسها و جلس جوارها:أمي الله يخليكي لا تدعين..كل شي بينحل...! سعيد و عبدالرحمن و عبد الإله كانو يحاولون تهدئة الجدة و سعيد كان مصدوماً من كلماتها عنه و محزوناً لكنَّ هذا واقع نظرة أمه له و إن كانت تحبه و سامحته لهذا الحب...! قالت الجدة:جود محد غيرها شايل همي..ما تبغوني أدعي عليكم عشانها..أنا أدري لو طحت ما بتتركون بيوتكم و مصالحكم و زوجاتكم عشاني..والله لأدعي و أدعي..والله لأدعي لين ربي ينصرها عليكم...! انفعلت:يا أمي ايش ذا الكلام..في حرب احنا...؟!،يا أمي اهدي و... صرخت الجدة باستنكار:أهدى...؟! تابع و هي تحرك عصاها:والله إنها ما لعبت على ظهوركم و شكلها بتلعب..تفو عليكم من رجال...! ظل سعود يدعو:"يا رب هدئ سرها..يا ربي طمن قلبها..يااااا رب"،كان خائفاً من أن تنفعل لإنها إن انفعلت بشدة تتعب و إن تعبت يتعب هو و هو في مشكلة كهذه يحتاج لكل قوته كي يحلها..يجب أن يبقى سعود قوياً..يجب...!) ما سبق كان ما استطعت سرقته من ذاكرة سعود و هو يقود سيارته متجهاً لمنزل ابنته بأعصابٍ متوترة مشدودة...! ابنته التي لم تجبه رغم أنه ظل يعاود و يعاود و يعاود الاتصال...! ^^^^^^^^^^^^^^^^^^^^^^^^ سعود،،، دقيت جرس بيتهم و قلبي يدق دق مو طبيعي..نفس حالتي قبل كم يوم الفرق إنو أول كنت معصب و دحين متوتر...! طولوا شوية و بعدين علي فتح لي الباب...! قال:أوه سعود..أهلاً...! -السلام عليكم...! -و عليكم السلام..حياك..ادخل...! دخلت و سلمت عليه..علي ما ابتسملي و جود ما كانت موجودة عشان ترحب بيا..الوحيد إلي كان زي ما اتعودت هوا سعود إلي جاني بفرح و اتعلق فيا...! سلمت عليه و باسني بعدها بعد راسو عني و خلى أياديه ملفوفة على رقبتي وقال:عمو أنا زعلان منك...! -ليش حبيبي...؟! -علسااااان إنتا زعلت ماما و..و هيا سالت (سارت) تبكيييييي مسكيييينة..ماما..أنا زعلت علسان ماما زعلت أول...! سكت و نزلت راسي و ما عرفت ايش أقول..مد علي يدو و شال سعود و هوا يقول:تعال بابا أبغاك...! قلت:علي نادي جود...! هز علي راسو و دخل لجوة الشقة،رجعلي بعد شوية من غير سعود و قال قبل ما أتكلم:تعال المجلس...! دخلنا المجلس و جلسنا في كنبات متفرقة،قلت:وين جودة...؟! -نايمة...! طالعت في علي..عارف إنها مي نايمة و عارف إنو علي عارف إني عارف...! قال علي ببديهية و هوا يرفع أكتافو:نايمة...! -عـ... قاطعني:لا تتوقع مني أجبر جود على شي...! -مو تجبرها بس حاول فيها...! -أحاول فيها ايه...؟!،جود يا سعود مضغوطة و حالتها حالة..وجودك و وجود أبوها ذحين غلط...! -يا علي... قاطعني:سعود أنا زوجتي حامل..جود حامل يا سعود و من بداية حملها عيشتوها في قلق على أساس أبوها رضي عنها..كذة فجأة و من العدم رضي و ياليته ريحها و حاول يراضيها..لااااا ما يقدر لأنه من الضروري ينكد على جود..راضي غضبان لازم يزعجها...! -علي أنا ما كنت أدري..بالفعل ما كنت أدري..و أول ما دريت بغيت أنجن..جود بالنسبة ليا... ما قدرت أكمل..زعل جود مني مصيبة و دي المرة زعلها مو عادي..هيا زعلت لإني ظلمتها و غلطت عليها...! -سعود بقول شي و لا تزعل...! رفعت راسي لعلي فقال:الصراحة ردة فعلك و كلامك ما كان هين..سعود أنا انصدمت..إنتا إلي قدرت تتحمل أسوء من كذة يطلع منك ذاك الكلام..بعدين إنتا وثقت في جود في إلي أكبر من كذة تجي على كلام واحد مريض تقلب 180 درجة..ليش و بأي حق...؟! علي لمن ما لقى مني جواب تابع:يعني لو أنا مكانك كان ممكن أسويها و أضرب جود و أبهذلها لكن إنتا..إنتا الهادي المتأني يطلع منك كذة...!!؟!! قلت بانفعال خفيف:طيب أنا غلطت..قولي ايش أسوي..شور عليا أنا مابغا جود تزعل أكثر من كده...! -جود قدها زعلانة و خالصة...! -طيب أنا مابغا المشكلة تزيد...! -ابعدوا عن جود إنتا و أخوك..جود أبداً مي مستعدة تشوفكم ذحين...! -نبعد لين متى يعني...؟! -لين ما تولد...! -إنتا بعقلك..كيف أترك بنتي فوق الشهرين...؟! انفعل علي:والله إلي قدرك تصرخ و تجرح يقدرك تتركها..جود تعبانة و إلي فيها مكفيها...! -يا علي افهمني..افهمني..أنا من يوم ما عرفت إني غلطت جيتكم و حاولت من قبل أتصل بس ما رديتو..من أمس و إنتو ما تردو.. كنت أبغى أطمن عليها..أنا والله أمس ما نمت من التفكير و القلق...! اتنهد علي و عينو على تحت..رجع يطالع فيا و هوا يقول:إنتا و تعز عليا ما بقطعك لكن سعيد هذا.."سكت لثواني"..قوله يبعد عن جود..و الأبوة إلي طالعة من مدري وين يطنشها شوية.."تابع بسخرية"..معليش يتحمل البعد عن بنتو عشان خاطر المسكينة تعبانة أوي...! طالعت في علي..ليش يتريق...؟! قال بجدية:سعود جود تعبانة..أنا كل إلي أتمناه إننا نقضي الكم يوم الجاية على خير و ما حنقضيها على خير لمن أبوك حوالينها..سعود أرجوك..أرجوك تكلم أخوك و تقوله يبعد عن جود شوية..أرجوك...! وقفت و قلت برجاء:طب بس طلة..بس بسلم عليها و أسألها كيفها و بمشي...! وقف علي:ما أقدر...! قلت و كأني طفل يعاند:إلا تقدر..إنتا بس ما تبغى...! قطب علي:ايش إلي ما أبغا..عبط هوا...؟! -علي حاول..لو تبغى حتحاول...! قال علي بنرفزة:صح ما حاولت و لا رح أحاول لإني ما أبغا جود تنفعل بعدين أجاملك و أكذب عليك ليه...؟!،حط في بالك إني كان ممكن من البداية ما أفتح لك الباب حتى لكنك تعز عليا و تعز على جود ولا والله كان ما... قطع علي كلامو بعدها قال بتأكيد لنفسو قبل ما يكون ليا:ما أبغاك تزعل..ما أبغاااااك تزعل..أرجوك و شوف قاعد أترجاك..أرجوك ابعد عن جود ذي الفترة و قول لأخوك ما يتصل حتى.."استدرك علي"..لكن إنتا اتصل..ما حترد عليك لكن اتصل و حسسها إنك تبغى تكلمها بأي طريقة...! -أنا بالفعل أبغى أكلمها بأي طريقة...! -طيب لكن مو تقول ما حترد فتوقف تتصل..لاااا لازم تستمر تتصل...! اتنهدت:طيب..أعتقد لازم أمشي...! اتنهد علي...! كنت عارف مافي إمكانية يقولي كمل السهرة معانا زي دايما و كنت عارف إني لازم ما أطول عشان كده سحبت نفسي و خرجت و رجعت لأمي..أمي إلي متضايقة و معكننة بسبب جود و زعلها..أو خليني أقول بسبب فعلتي أنا...! ************************************ اتصلت على بيت جدة و بجد اتمنيت إنو عمو ما يرد..آآآه كده مرة حاولت أقنع جدة تشتري جوال لكن ما ترضى لإنها تكرهو...! و زي ما هو متوقع أو زي ما كلكم تتمنو عمو رد...! بالنسبة لكم المسألة مسألة حماس لكن بالنسبة ليا..خليني ساكتة أحسن...! عمو: ألو.. ألوووووو... قد سبق و قلتلكم إنو تلفون بيت جدة ما فيه كاشف...! شديت عالسماعة،بلعت ريقي و حاولت أجمع شجاعتي لكني ما قدرت و عمو بدأ يتنرفز و هوا يسأل:"مييييين؟!"...! قلت عشان ما يفصل لإني أبغى أكلم جدة:ألو...! كنت أبغى أقول السلام لكن السلام حتى المختصر كان أطول من قدرة احتمالي...! -جود...! لهفة...؟!،أنا قاعدة أسمع من عمو لهفة...! قلت بصوت شبه مخنوق:أعطيني جدة...! قال عمو بنبرة واحد مستميت على شي:جود..جود أنا صدقتك علطووول لمن اتكلمتي..أنا..جود إنتي سكتي و دسيتي عني و... كنت على وشك أرمي السماعة و أكسر دا الجهاز الغبي إلي وصلّي لهفة عمو..لهفة أبكتني قهر بدل ما تسعدني...! قلت و أنا مغمضة عيني:أعطيني جدة...! -جو... قاطعتو بصرامة ظهرت في صوتي من غير ما أحس:أبغى..أكلم..جدة...! غريبة..أنا فعلاً غريبة..غريبة لمن زعلي يعبر عن نفسو ببكا و فجأة بصد و جمود...! صد و جمود يجو فجأة و يروحوا فجأة...! -جود يا بنتي اسمعيني..أنا والله من حبي لكي.. قاطعتو بصوت باكي:أبغى جدة..أبغى أكلم جدة...! -يا جو.. -عمو خلاص ما أبغى أسمع صوتك..أعطيني جدة...! -جود أنا... قاطعت عمو ببكاء حقيقي و أنا أشهق،قال بفجعة:جود خلاص..خلاص لا تبكي يا بابا لا تبكي حتكلمي جدتك...! برجاء:جووود اهدي الله يخليكي..طب كيف تكلميها...؟!،اهدي عشان أعطيكي تكلميها..اهدي...! قلت بقهر:ما أبغى أهدى..أعطيني جدة...! -خلاص خلاص حأعطيكي جدتك...! و راح عمو و طولت جدة لين ما جات و هدا شي كان في صالحي لإني قدرت أعدل صوتي و أضبط مشاعري...! وصلني صوت جدة الملهوف:جود!!!! -جدة حبيبتي...! يااااه..أحس نفسي أحط راسي في حضن جدة..نفسي...! وصلني صوت جدة الحزين:كيفك يا بنتي...؟! اتنهدت:الحمدلله كويسة..إنتي كيفك...؟! -والله إني مشغولة عليك يا بنتي..ليش خليتنّي أمس...؟! -ها..كنت مستعجلة ولا ما كان رحت إلا مسلمة عليكي...! -لا تكذبين يا جود..أنا سمعت كلامك لكن ما أقول إلا حسبي الله عليه من ولد جابك و خلاك لكني والله قلتلهم إن ربي بينصرك و أقولك يا بنتي إن هذي دنيا إن ما ظلمتي الناس ظلموك..والله إن ربي ما بيخليك يا بنتي ما بيخليك...! كلام جدة كان زي البلسم كمان ذكرني بشطر من بيت شعر:"و من لا يظلم الناس يُظلمِ"،هدا البيت الواحد لمن يقرؤُو يسير عندو استعداد يظلم عشان ما ينظلم بس يمنعو:"كن مظلوماً و لا تكن ظالماً"...! آآهْ يا ربي...! جدة:جاكي سعود...؟! -ايوة أمس...! -و ايش قالك...؟! -بصراحة يا جدة ما طلعتلو...! -ليه يا بنتي...؟! -جدة مابغا أشوفو دحين...! -يا بنتي الحرمة ما تفيدها القوة و الصد..والله إن دمعة الوحدة فينا تقوى على مِيَةْ رجال و إن كانك ضايقة على عمك فابكي و قولي..لا تخلين شي فقلبك...! -إن شاء الله...! تصدقو ما فكرت أتبع دا الأسلوب...؟!،أنا بس أسوي كده مع علي لكن عمو..صح كنت أسويها معاه لكن في أشياء تافهة...! بس صادقة جدة..هدا الأسلوب من امرأة يأثر على الرجال أكتر من لو صرخت و عصبت...! طيب لو على كده أنا عندي سؤال..هل غلطت لمن انفعلت في بيت بابا ولا كان معايا حق...؟! عن نفسي أحس إني غلطت و ما غلطت بس إنتو ايش شايفين...؟! *********************************** سعود،،، ما تبغى تسمع صوتي...؟!،جود كارهتني..متضايقة مني...! إنتو تعرفوا جود ايش بالنسبة ليا...؟!،جود أحلى شي سارلي في حياتي..لو مو جود أنا كان ممكن أنجن...! مسحت على وجهي بقوة..أنا قاعد أبكي..ايوة أبكي..رجال و أبكي..أبكي مقهور...! مقهور من نفسي و من الناس و من كل شي...! غبي..أنا غبي..غبي لمن صدقت سعيد و رحت لجود جرحتها..غبي لمن وقفت ضدها..غبي غبي غبي...! ضربت سطح مكتبي بقبضتي بقهر:آآآه يا ربي..آآه يا سعيد الـ..استغفر الله يا ربي...! أنا كيف انخدعت...؟!،سعيد طول عمرو يبالغ في كل شي و يعتبر أي شي إهانة لو و أنا الغبي صدقتو رغم إني عارف حقيقة شخصية سعيد...! حطيت راسي بين يدّيني..أوكي أنا صح كنت عارف إنو سعيد هوا سعيد و جود هيا جود لكني ما استبعدت إنها تنفعل و تقولو الكلام إلي قالو ليا..كل غرضي كان إني أوضح لها إنو إلي سوتو غلط..يمكن بالغت في ردة فعلي لكن والله ما كان قصدي...! أنا بس ردة فعلي كانت قوية لإني فكرت إنو جود طول عمرها فاهمة و دحين بس انفعلت..كنت أبغى أوصلها إنو إلي سوتو غلط و اكتشفت بعدين بسبب بجاحة سعيد إنو ما قالت ولا شي من إلي قالو...! طب أنا حطيت في بالي احتمال إنو جود ما تقصد الكلام إلي حسبت إنها قالتو و إنها بس انفعلت..ليش ما حطيت احتمال إنو سعيد يكون منفعل و مو واعي للي يقولو...؟! يا ربي ليه سار إلي سار...؟! هزيت راسي:استغفر الله استغفر الله...! خلاص..ربنا كتب دا الشي و قدرو...! رفعت راسي على صوت أمي تناديني،وقفت،اتحمحمت عشان أعدل صوتي و مسحت وجهي و خرجت من غرفتي للصالة وين ما أمي قاعدة...! بست راسها و جلست جمبها:خير...؟! حركت أمي يدها بنرفزة و قالت:قُم..قُم عني..قُم...! قطبت حواجبي:أمي ايشبك...؟! -و ايش بي...؟!،قُم أقولك قُم...! بعدت عن أمي شوية و أنا مستغرب،قلت أمي ايشبك..ايش مسوي أنا...؟! -الله لا يبارك في أباليسك يا سعود..البنت ظايمة و إنت تسأل وش بي...!!! نزلت راسي و أنا أتنهد...! رفعت راسي:إن شاء الله بينحل الموضوع يا أمي..إن شاء الله بينحل...! قال أمي:بينحل...؟!،يا سعود والله إني كنت أقول إنك ولدي حبيبي لكن ذحين ما فرقت عن سعيد إلي كاسر بخاطري طول عمرُه...! لمست في صوت أمي الحزن و الانكسار..قربت منها و حطيت يدّي على ظهرها و مسكت باليد الثانية يدَّها:و إن شاء الله إني بقعد ولدك و حبيبك و رح أسوي إلي يرضيكي و سعيد في ايش كاسر خاطرك..سعيد دايماً كذة و إنتي متعودة عليه...! قالت أمي بحسرة و هيا تهز راسها:سعيد..سعيد والله إني راضية عليه و ما بيعاقبه ربي لكن الضيقة موجودة..موجودة يا ولدي..سعيد كسر بخاطري و خاطر مرتُه لمن راح للحرام و رمى بنتُه ولا سأل عنها و بس فلح لي يحرق دمها..والله إني أعرف إن جود ضعيفة ما بتقصر و ما بتقول الغلط لكن الله بلاها بأبو..أبو ما اتقاه فيها...! أمي كانت متضاااايقة و صوتها مخنوق،مسحت على ظهرها:أمي حبيبتي سعيد طبعو كذة و مرتو ما دريت إنو سوى الحرام يا أمي...! -ما دريت لكن ظنت إنوا تجوز و انحرق قلبها لكن والله إنها بنت حلال لمن صبرت و ربت أولادها أحسن تربية...! -يا أمي سعيد ما قصر فيها ولا في أولادو..هوا بس عليه حركات و بعدين هوا يحبها و يعزها و هيا كمان...! -يا ولدي الحب مو كل شي..أبوك يوم اتجوزني ما بغاني ولا بغيتو لكن فيه عقل و حياة و التزامات صبرتنا وجابت الحب..يا ولدي إن كان على الحب كان لا أنا أمك ولا تعرفني...! -لكن فيه المعزة..و هيا زي ما قلتي تخاف ربها و متعلقة بأولادها ولا وحدة يجيها زوجها ببنت يمكن تشتري كرامتها ببيع أولادها...! -اتنهدت أمي:المهم ذحين..جود ما أبغى ضيقتها تطول..سامعني...؟!،البنت حامل و ربي سلمها ما سقطت مع الزعل..تروح وتاخذ بخاطرها و لو تقلب الدنيا عليك ما تقول شي..سامع...؟! -إن شاء الله...! -يالله قُم...! -وين...؟! -روح لجود...! قلت باستنكار:لسه أمس كنت عندهم و جود ما رضيت تطلع لي...! -أمس..مو اليوم...! -يا أمي دوبني مكلمها و ردتني...! أمي بعصبية:أدري ردتك لكن معها الله والحق..و عساك بأزود...! انقهرت من دُعا أمي عليا،قلت:أميييييي...! ضربتني على ظهري:قووووووووم عني..قوم...! -أمي... وقفت لمن أمي مسكت عصايتها..كانت معصبة حدها..قلت:أمي هدّي...! -روح لجود...! -أمي مافي فايدة من روحتي دحين..والله بس بيزيد إنفعالها و علي قلّي لا تجي..لو رحت ما بيفتح لي الباب...! زاد انفعال أمي و حركت عصايتها بغضب و ضربتني على فخذي بها و قالت بصوت باكي:روح..روح عني..ما هِلاَّ بتلحق أخوك في ظلمو..روح...! "هِلاَّ"..بكسر الهاء و تشديد اللام و فتحها تعني:فقط و تُستخدم كاستخدام بس...! مسكت على فخذي و فركت عليه و أنا أحس بالألم...! طالعت أمي فيا لثواني بعدها بكيت...! انصدمت..ايش كل الحب دا..؟!،كل ذا عشان جود...؟!،أمي طول عمرها شديدة و عصبية مع جود ايش إلي سار دحين...؟! رحت و جلست جمب أمي:أمـ... ردتني أمي بحركة يدّها إلي تطلب مني أبعد...! -أمـ... -قوم عني قوم...! حضنت أمي و بست راسها و خدها و يدَّها بعدين حطيت راسي على صدرها كأني طفل محتاج حنان و أمي الله يسعدها ما قصرت..حضنتي و رجعتني لأيام زماااااان..أيام قبل ما تجي جود..جود إلي خلتني أنا أعطي حنان ما أنعطي...! *********************************** كنا أنا و علي على السرير متمددين..سعود نام من مدة فدخلنا أنا و علي نريح و نمد ظهورنا...! -آمممم علي... -نعم...؟! -علي..آآم..أبغى أطلب منك شي...! -خير...؟! كنت متوترة و خايفة يرفض..الشغلة فيها سفرة و أنا مرة أبغاها...! رفعت نفسي و قلت و أنا ألعب بطرف شعري:أبغى..إنو يعني... جلس علي:جود ايشبك..اتكلمي...! قلت بسرعة:أبغى نروح المدينة...! -اييييييييييييييش...؟! -علي الله يخليك..غيب يومين اضطراري و خلينا نروح المدينة..تعبت من الناس..أبغى مكان ما نعرف فيه أحد...! -طب ليش كذة فجأة...؟!،طول اليوم ما فتحتي فمك...! أخفضت بصري و قلت و أنا أحس بدموعي طارفة:اليوم اتصلت أبغى أكلم جدة و..رد عليا عمو...! فز علي:قالك شي...؟! هزيت راسي بلأ،قال علي بتشكيك:جود.. غطيت وجهي بيدّيني و بكيت...! -جود!!!! حضني علي:جود بس..حبيبي بس...! قال:طب قوليلي قالك شي...؟! هزيت راسي: بلأ فمسح على شعري:طب خلاص خلاص..بسم الله عليكي يا قلبي..بسم الله...! علي كان متعاطف بالمرة و مشفق عليا و على حالتي..عشان كده قاعد يحاول يخفف بشتى السبل عني...! لمن هديت بعدني عنو و ابتسم:ها خلاص...؟! مسحت وجهي و قلت:نروح...؟! -لازم نروح لإني عارف لو قلت لأ بترجعي تبكي و تقطعيلي قلبي..عارف إني أهبل و ما بتحمل...! قلت و أنا زامة شفايفي:هما الهُبل مو إنتا...! قلدني علي:هُما الهُبل...؟!..."بصوتو العادي"..جود ما تلاحظي إنك تسيري زي الأطفال لمن تزعلي...؟! قلت بصوت باكي:يمكن عشاني لمن كنت أبكي و أنا صغيرة محد كان يعطيني وجه لو عمو موفيه...! -يوووه يا جود..إنتي الليلة تبغي تقضيها بُكا و قاعدة تدوري سبب...! -مو عن أدور سبب بس... -بس ممكن نقفل الموضوع وننام..أنا عارف إنك متأزمة ولا ما كان خربت كل خططي حقت السنة؛أنا كنت ناوي أخلي الاضطراري لآخر السنة لكن عشانك و عشان وضعك غيرت رأيي...! نزلت راسي و أنا أحس إني مكسوفة من نفسي...! قال:هيييييي ما قلتلك ذا الكلام عشان تنزليلي راسك...! رفعت راسي و جات عيني في عين علي..وجع وجع وجع...! قلت بقهر:علي خليهم كلهم ينقلعو..إنتا أحسن واحد في الدنيا...! ضحك علي:إنتي لمن تحقدي..فظيييييييييعة...! -والله من جد..أنا أكره كل الرجال ما عدا إنتا و عمو.. سكت لثواني بعدها قلت:يعني زعلانة و حاقدة بس لسة أحبو و كمان عبدالرحمن و..كمان عمو أبوك و كمان عمو أحمد أخوك أحبو لـ.. فز علي وقاطعني بنرفزة:ايشششش دخل أهلو ذا في كلامنا ذحين...؟! -يااا الله يا علي..كم مرة قلتلك زي عمو..أحمد أخوك زي عمو...! -أعتقد قد قلتلك كيف تتكلمي عنه سواءً معايا ولا مع الناس...! و كأني فايقة لهبلو..علي ساعات يطلع بطلعات...! برطمت و أخفضت بصري فهجد علي علطول و قال يكمل كلامنا:طب و جارنا...؟! اتذكرت جارنا المتعلق بسعود لإنو كل خلفتو بنات...! ابتسمت:هدا كمان طيب...! -طب و أصحابي إلي أنقذوكي و أنقذوا ولدك و أنقذوا زوجك حبيبك...؟! -ممممم هدولا بعيد عن إنهم أنقذونا أحترمهم..كفاية إنهم مخلينك مرتاح...! ابتسم و حط يدّو على كتفي:شفتي...؟!،لعد تقولي أكره كل الرجال ما عدا..قولي أحب كل الرجال ما عدا...! -أحب كل الرجال ما عدا كده واحد...! صرخ علي:هييييييي...!!! قطبت حواجبي باستغراب فضحك،قلت:هيي على ايش تضحك...؟! -أضحك على نفسي..قلتلك تقولي الشي و لمن قلتيه اتنرفزت...! ابتسمت و رفعت أكتافي:عادي..أصلاً لو ما اتنرفزت كنت حنقهر...! -والله إنتو الحريم حالتكم حالة...! الحمدلله وافق..أبغى أروح المدينة و أرتاح من الهم كم يوم...! *********************************** باختصار شديد حقولكم على إلي سار...! في الليل يوم السبت رجعت اتصلت بجدة و قلتلها إننا حنطلع المدينة بكرة..طبعاً رفضت لأسباب كتيرة منها إني حامل لكني وعدتها بإنو علي حيمشي على أقل من مهلو..فقالت:"والخط السريع...؟!"،قلتلها:"يخليه بطيء"...! و حاولت فيها لين ما اقتنعت و طلبت منها تقول لعمو إننا حنروح و تقولو جود تقولك:"مع السلامة"..أياً كان هدا عمو...! لكن بابا ما افتكرت فيه ولا حفتكر،تخيلو من داك اليوم ولا مسد كوول وحدة..كل ما أفتح جوالي على أمل ألاقي منو شي أُحبط..حتى ما كلف نفسو يرسل مسج فاضي ولا يرسلي سلامو مع أحد..والله سرت أحس إني أنا الغلطانة من الثقة إلي يتمتع بيها بابا...! أما عن عبدالرحمن فرسلتلو رسالة و قلتلو فيها يسلم على سارة و كتبتلو في الرسالة إنو مافي في قلبي شي عليه ولا على أخواتي...! أهل علي علي كلمهم و فهمهم الوضع من غير تفاصيل و تعمق..قلهم إني تعبانة شوية و أبغى أروح المدينة..و إلي حصل إنو عمة أعطتني لستة نصايح و وصتني أنتبه لنفسي...! و فجر الأحد انطلقنا و الروحة كانت ميسرة الحمدلله و وصلنا تقريباً على عشرة و نص..إحدعش...! رحنا لواحد من الفنادق إلي كلمهم علي و قالولو إنو ممكن تكون فيه غرف فاضية بما إننا ما حجزنا من بدري بس الحمدلله لقينا في أول واحد رحنالو غرفة...! و يا رب لك الحمد..كل شي اتيسر و سار بسرعة...! و بعدها نمنا أنا و سعود في حضن علي من تعب الطريق...! *********************************** سعود،،، يا ربيييييييي..جود ما ترد..سافرت المدينة ولا ودعتني و كل إلي قدرت عليه ترسلي "مع السلامة" مع أمي...! و القهر علي قافل جوالو و إلي يقهر أكثر إني لمن سألت أحمد قلي:"لا عادي يرد ولو كان قافلو يرجع يتصل"...! هذا الكلام معناتو مستقصديني...! بس طبعاً مستقصديني..جود و زعلانة مني و علي ما أقول إنو ورا جود لكنو أعتقد مستغل الوضع الحساس بيني و بين جود عشان يسترخي بأسرتو بعيد عن الناس...! آآآآخ..أكره علي لمن يحط سوتش اللامبالاة عندو على "ON"...! و بعيد عن علي..جود هيا الأهم..جود إلي رسلتلها و دقيت عليها مرات كثييييييييرة ما تنعد و برضو ما ترد..آآآ يا جود..والله اشتقت لصوتها و لاتصالها اليومي عشان تطمن عليا..حتى تلميحاتها لمشكلتي و زواجي رغم إنها كانت تزعجني و أحياناً كنت أنهي المكالمة بسببها...! لكن دحين ما عَلَيَّهْ..خليها تلمح من اليوم لبكرة بس ترضى...! و إلي يقهر أكثر سعيد إلي مو حاسس بأي ذرة ذنب و إلي يستنى اتصال من جود عشان تخفف من وطأة التطاول إلي حصل منها عليه و عليا في بيتو _على حد قولو_...! حطيت راسي بين يدّيني..بعيد عن إنو أنا سعود الجنتل و بعيد عن إنو جود بنتي و حبيبتي ما يسير رِجَّال..قصدي رِجَااال يوقفوا في وجه حرمة حامل و يثوروها..يثوروها لدرجة يُغمى عليها...! و لمن طاحت ما قدرت أقرب منها..منعني علي و منع أي أحد من إنو يقرب...! الشي الوحيد إلي مطمني ومهديني هوا إني ما سمعت أي خبر سيء عن حملها..بس معقول ما تكون اتضررت...؟! جود ممكن تخبي عادي عندها..أهم شي أمي ما تتعب..بس حيبان لو سار شي..ياااا الله..هل ممكن يكون سار شي خطير و أنا ما أدري...؟! لالا..هيا ما ارتطمت بالأرض..علي علطول مسكها و مددها بهدوء عالأرض و بعدين جود ما أُغمى عليها..جود كانت نايمة...! بس فعلاً إلي سار شي غريب..فجأة فقدت وعيها و خوفتنا كلنا عليها لكن في النهاية طلعت نايمة..أنا مني فاهم الحالة إلي جتها لكنها كانت نايمة..نوم طبيعي..إنسان و نايم..مظهرها،صوت أنفاسها،حركة جسمها..كلها كانت طبيعية الشي إلي منع علي من إنو يوديها المستشفى و بلا تردد أخذها للسيارة و راحو لبيتهم...! "...ثم أنزل عليكم من بعد الغم أمنة نعاساً يغشى طائفةً منكم..." رفعت راسي و أنا أسمع دي الآية من مسجل أمي الواصل صوتو لغرفتي...! و .. فهمت حالة جود ...! *********************************** جرة ستروي،،، في بيت سعيد جلس عبدالرحمن مع والديه و بجواره زوجته...! تحدثوا جميعاً في أشياءَ كثيرة متنوعة و في منتصف الحديث قال سعيد:من يوم الخميس و جود لا حس ولا خبر..وينها...؟! قطب عبدالرحمن حاجبيه:في المدينة...! سعيد:نعم...؟! عبدالرحمن:في المدينة..اليوم الفجر حركت...! قال سعيد بعصبية:و كيف من غير ما تعطيني خبر...؟! عبدالرحمن:كنت تبغاها تستأذنك...؟! -مو تستأذن..أقلها تعطي خبر..مو تسافر من غير حشيمة لأي أحد...! -لا حشمت يا أبوية حشمت..هيا كلمت جدة أمس في الليل و قالت لها تعطينا خبر بس جدة كلمتني و كلمت عمي لكن عشانها زعلانة منك ما قالت لك...! لم يشأ عبدالرحمن أن يزيد الطين بلة؛لأنه متأكد من أنه إن قال الحقيقة سيُغضب والده و إن أغضبه سيذهب الأخير ليثير الفوضى مرة أخرى في حياة جود...! قال سعيد بانزعاج:هَيَّا..سوتلي مشكلة مع أمي...! نظر عبدالرحمن لوالده باستياء فمدت حليمة يدها من طرفٍ خفي و حركتها بهدوء عليه بُغية تهدئته...! وقف عبدالرحمن و هو ينادي:ساااااارة..سارة...! ثم خرج من غرفة الجلوس و لقي سارة أمامه،قال و هو يمسك يدها:تعالي...! -ايش...؟! و عند المغاسل قرب مدخل البيت_حيث لا أحد_ وقفا...! قالت:خير عبدالرحمن..ايشبك...؟! أخرج عبدالرحمن جوالهُ و ضغط عدة أزرار ثم مدهُ لها...! تناولته منه بنظرة متسائلة ثم جرت عينها على المسطور في شاشته...! (السلام عليكم... كيفك؟! عارفة الوقت متأخر بس كنت حابة أقولك إني بكرة حروح المدينة من الفجر إن شاء الله..مدري ليش بس أحس إنو لازم أقولك و كمان أحس إني لازم أكتر أقولك إنو قلبي أبيض من ناحيتك...! و وري دي الرسالة لسارة..هيا لازم تشوفها لإنو الكلام لها كمان و آسفة ما رسلتلك على جوالك بس تعبانة و ما فيا حيل أكتب كتير و إذا عن بقية "أخواني" فقولهم إنو إلي سار ما كان بيدّي و إذا فيه مشاكل بيني و بين أبوكم فإنتو مالكم دخل فيها و.. باي..حدعيلكم) تنهدت سارة و هي تخفض رأسها..مدت يدها بالجوال لأخيها الذي أمسكه و قال:ايش رايك في إلي سار...؟! -أنا سمعت كلام فظيع...! -طيب و ايش رايك في إلي سار...؟! تكتفت:ما حقول إني ضد بابا...! -كمان محد يتجرأ يقول إنو ضد جود...! -شوف عبدالرحمن..ماما جمعتنا أنا و أخواتي و قالت مالكم دخل في كل دي المشاكل..أبوكم أبوكم و جود أختكم...! عبدالرحمن بشكك:صح..كيف كانت أمي...؟! -ماما صح تتضايق من جود لكنها أبداً مي راضية عن إلي سار يوم الخميس خلود اتنرفزت و عصبت حتى منى سارت تسب و مابقت شي في المجتمع ما سبتو...! -طب..ومها...؟! -مها...؟!،مها زعلت و قعدت تبكي عشان خربوا ملكتها...! عبدالرحمن بطفش:محد خرب ملكتها..الناس كلها راحت و زوجها و أهلو كانوا راحوا...! -بس برضو مسكينة..كانت مبسوطة و نكدوا عليها...! -والله لو فيه أحد ينزعل منو فهوا أبوها مو جود..يا أمي إنتي ما شفتيه كيف..جود كان التعب و الضيقة باينة عليها و ما قدَّر و آخرتها يطلب منها تبات..أنا صح وافقت و اتحمست لكن لمن شفت وجهها كيف قلب خفت و بعدين جود كانت ماسكة أعصابها بس أبوية و عمي هيجوها...! تنهدت سارة:عبدالرحمن خلاص..المشكلة سارت و خلصت..أهم شي دحين تولد بالسلامة...! -من جد سار ينخاف عليها..المهم عبدالإله وينو..يبغالو قعدة ذا الثاني...! -عبدالإله..عبدالإله من يوم ما سار الموضوع لا ياكل زي الناس ولا يتكلم زي العادة..بس ساكت و يا عالنت يا برة...! تنهد عبدالرحمن:الله يهديه..ما يبطل تكبير المواضيع دا الولد...! *********************************** كنا أنا و أمي و مُنورة في بيت سعيد..هوا قلنا تعالوا فرحنا بما إننا قاعدين في وجوه بعض أنا و أمي من غير جود إلي كانت تسير علينا كل شوية...! في المجلس كنا قاعدين أنا و سعيد و أولادو..البنات كانو قاعدين معانا قبل شوية بس عشان زوج خلود جا و كمان عشان مرة عبدالرحمن و أمهم لا يقعدوا لحالهم...! كانوا يتكلمو و كنت مشاركهم عالخفيف..يعني مجاملة و كنت قاعد أحاول أحافظ على ابتسامتي و أرخي حواجبي إلي تتقطب كل شوية بسبب تفكيري المستمر بجود...! رفعت راسي على نداء زوج خلود،ابتسمت و هزيت راسي بتساؤل فقال:لنا ساعة نتكلم عنك و نستناك تعلق...! -من جد..ايش تقولو...؟! -أنا إلي فتحت الموضوع..قلت إن الولد الصغير إلي جا يوم الملكة يشبهلك فقالو لي اسمو على اسمك...! -آآه..قصدك سعود...! هز راسو:دايما يقولو إن للإنسان نصيب من اسمو و سبحان الله حسيت الولد مرة متأثر منك...! ابتسمت:هما مسمينو عليا...! يااااااه يا ذيكَ الأيام..كنت مرتاح..مرتاح مع جود و سعيد بعيد عنها...! صدق علي..من يوم ما رضي سعيد و احنا في مشاكل..سعيد هذا شخصية غريبة...! رفعت راسي لعبدالإله الساكت..تعرفوا أشوف فيه مين...؟!،أشوف فيه أبوه...! عبدالإله من النوع إلي يضخم كل شي..لمن يكره يكره بجنون و لمن يحب يحب حد القتل...! عبدالإله أحسو معجب بأبوه مرة..و لمن شاف أبوه ما يحب جود و ما يعاملها كويس صدق إنو جود تستحق الكره و الاحتقار...! و لمن اجتمعت ثقتو المطلقة بصحة حكم أبوه على جود مع تضخيمو لمشاعرو اتكون كره غير مُبرر لجود و تعلق شديد اشتد بأبوه لإنو فهم أو خليني أقول اتفهم إنو أبوه مظلوم و تعبان مع البنت العاقة...! و دحين عبدالإله مصدوم..انصدم من كلام جود و من ردة فعل أبوه اللامبالية و يا خوفي دحين يقلب على أبوه..الولد دا مو ناضج تماماً...! و يمكن تقولو:"طب وين وجه الشبه في الكلام إلي قلتو...؟!" أقولكم:سعيد قدر يسير شخصيتين بسبب تضخيمو لكرهو لجود و تضخيمو لحبو لأولادو فسار اثنين في واحد و سار هنا قمة الأخلاق و هناك قمة الشر...!،أما عن عبدالإله فشرحت لكم تضخيمو لكل شي...! التضخيم و إنهم يسووا من الحبة قبه..هدا هُوا وجه الشبه...! اتنهدت و أنا أفكر إني لازم أ أصحح غلطي و كيفو سعيد..المهم أنا..أنا رح أحاول أرضي جود بشتى الطرق و إلين ما ترجع من المدينة بالسلامة إن شاء الله حكرهها في جوالها من كُثر ما أتصل و والله ما أسيبها إلين ترضى..هذي جود..بنتي و حبيبتي و صحبتي و أمي و أبوية و كل شي...! والله ما أسيبها..والله...! *********************************** |
الجزء الحادي عشر (و عقدت مشاعري فعادت قوتي) سعود،،، "أففففففف" رميت الجوال و أنا أتأفف...! جود مي راضية ترد..اليوم اثنين و جود برضو مي راضية ترد..إلي يقهر إنها 24 ساعة قافلة جوالها و لو مو قافلتو ما تطنش..لااااا..تسوي بِزي..جود تبغى تقولي أنا مابغا أكلمك إنتا شخصياً لإنها لمن تتصل أمي عليها بالتلفون ترد عادي و تكلمها و أمي تقول إنها كويسة و من صوتها شكلها أحسن بس أنا أبغى أطّمن بنفسي...! لمعت في راسي فكرة..ليش ما أتصل على جود من تلفون البيت عشان ترد و أكلمها...؟! لكني فكرت إني كذة رح أضايقها و أنا هدفي أرضيها مو أضايقها...! خلاص..لين ما تجي حستمر أدق عليها و سواءً ردت أو لأ أهم شي رغبتي في سماع صوتها توصلها...! بس أنا لازم أكلم أحد فيهم..لازم...! اتصلت على علي و حسيت نفسي حطيييييير لمن وصلني صوتو:نعم...؟! -علي...؟! -أيوة...! -علي...؟! علي بطفش:ياخي ايوة علي...! -علي... كنت مني عارف ايش أقول و علي ما يرحم...! قال:سعود..تراني راد عليك قلت يمكن شي مهم أثاريك بتجرب اسمي...! ملّيت صدري هوا و فضيتو،بعدها قلت:كيفك...؟! -بخير..أي خدمة...؟! الظاهر من صوت علي إنو ما حيكون كريم مرة معايا في الكلام عشان كذة جبتها من آخرها و قلت:علي متى جايين...؟! -ماااااااااااااااااالك دخل...! -علي قولي متى جايين...؟! -طب..لحظة بأستأذن من جود أقولك...! -علي بلا سخافة..متى جايين...؟! علي كان قاعد يستعبط و يتسلى أما أنا فكنت متنرفز حدي...! قال:الصراحة يا سعود مادري..جود ذحين تروش سعود..سعود ولدي مو إنتا..إنتبه لا تلخبط ترى ولدي ها...؟!،المهم جود قاعدة تروش سعود ولدي إلي هوا مو إنتا و ما رح ترد عليا إلا لمن تخلص..مستعد تستنى...؟! -علي...! قلتها بنرفزة و قهر..وقتو دا يستهبل..لا وضعي ولا وضع زوجتو يساعد...! -لا تصرخ بعدين بصراحة أنا رديت خوفاً من إنو يكون فيه شي مهم لكن ما طلع فيه أي شي..يلا باي...! قلت بصوت عالي:علي...! علي:شوف سعود..أنا ما تركت شغلي و أهلي عشان ولا شي..أنا تركتهم لإن جود تعبانة مي ناقصتكم..جود ما ترد لإنها عارفة إنكم حتسدوا نفسها و هيا قاعدة تضغط على نفسها عشاني و عشان سعود...! -نسد نفسها...؟!،محد بيسد نفسها..كل إلي نبغاه إننا نطمن عليها...! -تطمنوا...؟!،أنا متأكد مليون بالمية إنكم حتكلموها عنكم و عن زعلها منكم و عن أبوها إلي لازم تصبر عليه..و أكيد طبعاً ما حتقدروا إنها تعبانة و حامل...!،سعود أنا جيت هنا بطلب من جود لإنها مي مستعدة تشوف خلقة واحد فيكم..يا سعود جود قعدت تترجاني لين ما رضيت نروح المدينة...! -عارف..عارف إنها هيا إلي ما تبغانا عشان كذة قاعد أسألك متى جايين عشان أقدر أجيها...! علي قعد يقول كلام غيض مو مفهوم..قلت:علي خلينا نتكلم بالهداوة عشان تفهمني و أفهمك...! -طيب اسمع..جود مي قاعدة تتدلع..جود زعلانة..من جد زعلانة منكم كلكم و لمن قاطعتكم ما كانت "تـتـ..ـغلى"..قاطعتكم لإنها مي قادرة تشوف وجه ولا واحد فيكم..عشان كذة أقولك جود مو مستعدة تكلمك ذحين...! -طب لو مو ذحين..متى..لمن يبرد كل شي و معد يسير فيه أي داعي نتكلم في الموضوع...؟! علي كان حيرد لكني قلت:أنا مابغا يعدي الموضوع كذة..أنا أخاف تسامحنا بالظاهر لكن الزعل يقعد جوتها..أنا مابغا علاقتي معاها تسير زي علاقتها بأبوها...! -ليش هوا أصلاً فيه علاقة بينها و بينه...؟! -فيه..جود تأدي الواجب تجاهو لكن ما تحبو و ما يهمها و أنا ما رح أرضى إنو حالتي معاها تسير نفس حالتها مع سعيد...! اتنهد علي:شوف سعود...إن جينا للقوة فجود أقوى مني و منك..حسب ما أنا فاهم جود متحملة طول عمرها و هاذي أول مرة تنفعل و تصرخ..تخيل...؟!،كم عمر جود ذحين..فوق العشرين سنة متحملة و إنتو ولا يوم واحد منتو قادرين تصبروا..الصراحة شي يضحك...! سكت..كلام علي صحيح..فوق الثلاثة و العشرين سنة و جود ساكتة و احنا ساكتين عن سعيد و الكل ساكت و ما يفكر إلا في نفسو و لمن جات جود تدافع عن نفسها كلنا هبينا فوقها و لمُناها...! قلت:طب علي متى ينفع أشوفها أو حتى أكلمها...؟! -جود ذحين أحسن و تضحك معانا و كلو عادي لكن لو جات سيرتكم أحسها تتضايق..أفضل تتركوها على راحتها..متى ما بغت تكلمكم تكلمكم...! سكت..مستحيل علي يفهم..مو عشان شي بس لإني أنا مستحيل أقعد أتبكبك و أترجى عشان يصدق إني متأزم من زعل جود مني رغم إني و أنا أدعي ربي و ألجألو أبكي..يعني..تعرفو كيف الواحد ينسى كل القوة قدام ربو و يظهر ضعفو...؟! أيقظني من أفكاري صوت علي و هوا ينادي باسمي...! -ها ها..معاك...! -ايش قلت...؟! -في ايش...؟! مادري هل أصابني قدر من التناحة ولا ايش المشكلة...؟! اتنهد علي كمان و قال:اسمع..أنا ما بكلم جود ولا حفتح معاها الموضوع لكن بذكرك بإن جود تحبك و تحب جدة و تحب عبدالرحمن و سارة أختها دايماً تتكلم عنها..و مهما حصل جود مستحيل تفرط فيك إنتا بالذات..هيا بس ذحين تعبانة و مع الحمل زاد انفعالها و تأثرها ولا ما كان سار إلي سار..جود طول عمرها تحكم عقلها ولا أنا غلطان...؟! اتنهدت:لاوالله يا علي منتا غلطان...! -يعني...؟! اتنهدت للمرة المادري كم و قلت:خلاص أنا بستنى و بخليها على راحتها بس إنتا سلملي على سعود و بوسو ليا...! ضحك علي:تصدق كأنك أمي..لسه مكلمها و تقولي بوس لي سعود...! شوية إلا قال علي:أهوه سعوووود..تعال تعال..تعال كلم عمو...! و وصلني صوت علي بعدها و هوا يقول:هنا بابا هنا..هوووبَّا..يلا كلم عمو...! بعد كده وصلني صوت سعود و هوا يكلمني بحماس..فديت قلبو..لو مو عشان جود و عشاني عشانو هوا...! الله لا يحرمني من جود و ذريتها...! ^^^^^^^^^^^^^^^^^^^^^^^^^^^ جود،،، طالعت في الساعة..كانت 4 العصر...! خرجت من الغرفة للصالة الصغيرة جداً وين ما كان علي و سعود قاعدين...! جلست جمب علي و شلت سعود من عليه و حطيتو فوقي و حضنتو و بستو...! قال و أنا أبوسو:ماما كلمت عمو...! رفعت راسي ببطئ عن سعود و طالعت في علي إلي قال:قبل شوية اتصل و طلب يكلم سعود...! -آآه...! "آآه"،تظهر لا مبالاة..عارفة لكن والله حسيت بقلبي و هوا ينعصر...! قال علي:طلب يكلمك...! مادري علي مو حاسس بيا ولا متعمد يقول كده عشان أحن لعمو...! ما قلت شي فقال:سألني متى حتجو قلتلو مادري بس صح جود..ترى بكرة الفجر حنحرك فجهزي الشنط...! التفت لعلي:عارفة إنو بكرة حنروح بس أنا عندي رأي تاني...! -خير...؟! -مادري لو عادي نمشي دحين...؟! -ذحين...؟! علي كان مستنكر و متفاجئ،قلت:عشان نوصل جدة عالليل و نرتاح و تداوم إنتا بكرة و أنا كمان...! -دوبك تتكلمي...؟!،كان من أول..أنا لاني مستعد ولا نايم بدري أمس...! -أنا بس عشان لا ينحسبلك بكرة غياب كمان بعدين أمس ما جات عشرة إلا و احنا نايمين...! -صح..لكني أمس ما نمت على أساس بكرة حنحرك...! اتنهدت:طيب براحتك..سعود قوم عني...! و قام سعود من فوقي و قمت أنا،قال علي:وين رايحة...؟! -أبغى ألم الأشياء و أخلي إلي نحتاجو عشان بكرة بعد الفجر نمشي علطول...! -يا أمي ارتاحي ذحين..لسه عصر...! -لااا..أصلاً كل إلي جبناهم كم هِدمة و ملاعق و سكينتين...! ابتسم علي:و ثلاث شُوك...! سُعود:و جُوم بويي ماما...! ابتسمت:و جيم بويك كمان...! -ماما لا تشيليه علشان ألعب...! -ما حشيلو بس حألمو مع الأشرطة في الشنطة حقتو...! -لا ماما..أنا أعرَف..كمان أبَا ألعب...! -يا تلعب دحين ولا حشيلو..أنا مني ناقصة حُوسة...! و رحت لغرفة النوم و بدأت أرتب و على كل حال الأغراض ما كانت كتيرة...! طالعت في الساعة بعد ما خلصت و ما كان باقي شي عالمغرب...! رفعت راسي لعلي إلي دخل الغرفة و هوا يقول باستغراب:ما جهزتي...؟! عرفت إنو يُقصد الصلاة،قلت:ما فيا حيل..استغفر الله..أحس مالي مزاج أخرج...! -ايش إلي مالك مزاج...؟!،جود بكرة مسافرين..خلينا نروح نصلي المغرب و بعدين نقعد في التوسعة لين العِشا ناكل اسكريم...! ابتسمت و أنا أحس بالحماس للفكرة:يووووه..زمان كنا أنا و جدة و عمو و مُنورة نسوي كده..بس كنا نقعد من العصر...! ابتسم علي:و إن شاء الله تسووها قريب..يلا اتوضي و البسي عبايتك عشان نمشي...! -آآآه طب الله يسعدك روح لبس سعود...! -أنا بأتوضى...! -طب..اتوضى و لبسو..ممكن...؟! قال علي و هوا يتوجه للحمام:لَك تكرمي...! ابتسمت:لَك الله يسعدك...! قال علي من جوة الحمام:تصدقي جود..أحس دعواتك مستجابة...! رحت وقفت عند باب الحمام:و أنا أحس... وقفت كلام و أنا أطالع في علي إلي وقف وضوء و قعد يطالع فيا،قلت:كمل وضوءك...! -تحسي بايش...؟! ابتسمت:كمل وضوء قبل ما ينشف آخر عُضو وضيتو...! كمل وضوء و هوا يقول:بايش تحسي...؟! -أنا ما أحس..أنا متأكدة إنو I loik you قال علي و هوا ينثر الموية من يدّو:لويك...؟! قلت و أنا أدخل الحمام و أبدأ أتوضى:يقولك..زمان في بريطانيا كانو في القرى ينطقوا like لويك...! -أووووه...! بعدها قال بانفعال:ليش لويك..ليش مو لويف...؟! -ها...؟! -لويف يعني لوف بس على وزن لويك...! ضحكت و أنا أنشف يدّي و أخرج:تعجبني يعني أحبك..بعدين أنا من يوم ما عرفتك و أنا أحبك...! -شوف الكدابة...! قلت ببطئ:تعجبني يا علي اللهجة الحجازية منك...! -إنا لله... كملت:و إنا إليه راجعون..ليش معصب..إنتا كل شي منك حلو..حجازي بدوي كلو واحد...! -لا مو كلو واحد..إنتي عديتيني...! ضحكت:عديتك...؟!،ليه هوا مرض...؟!،بعدين يلا خلينا نروح عشان ما نتأخر...! -و سعود يختي...؟! قلت بدلع:إنتا قلت حتلبسو...! -مابغا دحين..زعلان...! ابتسمت و قلت:لو مو حامل كان بستك بس صعب عليا أرفع نفسي...! اتجه علي ليا و انحنى:نزلتلك...! بستو على خدّو فلف وجهو عشان خدّو التاني فبستو كمان...! شوية إلا هوا مدنق عشان أبوس راسو،قلت:لا يا شيخ..مسختها...! ما اتحرك علي فبستو على راسو و أنا أحسب إنو بيردلي هيا زي دايماً لكنو اعتدل في وقفتو و مد يدّو من فوق بتعالي...! انقهرت..أنا متعودة يردلي بوسة الراس دايماً...! ضربتو على يدّو و مشيت عشان ألبس سعود...! لكنو ضحك و وقفني:تعالي تعالي...! وقفت مشي و اتكتفت و أنا معطيتو ظهري...! جا من ورا يا و باسني على خدّيني الاتنين و على راسي بعدين ضربني على كتفي من ورا:روحي يا مدلعة...! قلت و أنا أحرك كتفي إلي ضربو:مابغا..مو إنتا قلت إنتا حتلبسو..بعدين أنا لسه ما لبست و إنتا تعرف أنا قد ايش أحوس مع بطني لمن ألبس العباية...! قال علي بابتسامة:أقول جود..روحي لبسي سعود و مالو داعي تغيري لبسك ما فيه شي و إذا عن العباية أنا بساعدك فيها زي دايماً...! كان فيه شدة خفيييييييفة في صوت علي،قلت بدلع عشان يخف شوية:طب..طب إنتا قلتلي إنك حتلبسوا...! علي كان يطالع فيا و أنا أتكلم..حسسني إني بيبي بابتسامتو..قلت:ليه تطالع فيا كده...؟! ابتسم و حط يدّو على أكتافي و قال بصوت واطي:تضحكيني لمن تسيري عبيطة زي الأطفال...! وسعت عيني ببراءة:أنا...؟! -لا والله...؟! بعدت عنو:خلاص حلبس سعود...! ضحك:و أنا حجهزلك عبايتك...! رحت لسعود و أنا أفكر إنو بيني و بين علي مافي أي حواجز..و معد أخجل منو زي في بدايات زواجنا..لكن لمن يعاملني كأني بيبي و يحسسني إني عبيطة زي ما يقول أحس بتوتر...! مالت عليا..كم لنا مع بعض و ما أعرف أرد عليه لمن يعاملني كأني طفلة بس على كل حال هوا قد قلي إنو ينبسط مني لمن أتصرف بديك الطريقة...! لبست سعود و لبست أنا عبايتي و ترى علي ساعدني من جد..ساعدني عشان يسكتني لإنو لو ما ساعدني كان فتنتو...! و رحنا و صلينا و اشترينا اسكريم و قعدنا ناكلو...! أنا علي كان جالس جمبي و سعود قدامنا...! علي:والله يا شيخة الاسكريم هذا فن...! )الاسكريم الفن هدا اسكريم ينباع في التوسعة (الساحة) حقت الحرم..يكون ملون..شكلو زي حق البحر لكن ملون فيه كوووول النكهات إلي ممكن تتخيلوها و طعمو..ِشي مو طبيعي..مو حلو بس يضحك و يخليك مبسوط..شي غريب!!! يا رب تيسر لعبادك زيارة الحرمين..و نصيحة مني..لمن تروحوا أول شي تفكروا تعملوه هوا إنكم تصلوا العصر بعدين تخرجوا التوسعة و هناك اقعدوا لييييين صلاة العِشا و ادعولي ^__*( قلت:ايوة الله..بس تصدق كان بريال سار بتلاتة دحين...! -لااا..أول أول كان بريال..السنة إلي راحت كان بريالين..دحين بس سار بثلاثة...! -حرمية...! -لا حرام مساكين..أتذكر مرة سألتهم ليش رفعتوا السعر قلي واحد من الرجال إنو سعر النكهات و البسكوت ارتفع فاضطروا يرفعو...! فجأة سمعت كلام فرنسي..رفعت راسي بحماس و طالعت في العائلة الفرنسية،قلت:علي علي..شوف فرنسيين...! طالع علي فيهم:طيب...؟! قلت:ايش رايك أروح أنبرش عليهم...؟! -أقول اقظبي أرظك...! (اقضبي أرضك) قلت:يا ماما..العرق طلع...! -ما أحلاكي والله رايحتلهم..منتي شايفة ولدهم ايش طوله...! -حبيبي دولا الأجانب ضُخام..هدا تلاقيه 15 سنة...! -15 سنة ايه..أطول مني بسم الله علينا...! -هما كده ضُخام...! -ما علينا..اسمعي ذي النكتة...! -ها... -يقولك محشش معصب جا عند زوجتو قلها:أقولك اليوم حصلتلي قصة غريبة من كُثر ما هيا غريبة ما حتصدقيني و حتقوليلي كذاب لكن إنتي الكذابة يا قليلة الأدب إنتي و أهلك..اطلعي برة إنتي طالق...! طالعت لعلي لثواني قبل ما أفكها ضحكة...! مسكت على بطني و أنا أحاول أكتم ضحكتي:آآه آه..حسبي الله على ابليسك يا علي..بطني...! و كملت ضحك...! قال علي بابتسامة واسعة:طب عندي وحدة ثانية..عندي وحدة ثانية...! -لاااء..خلاص ما حتحمل..تبغى تولدني إنتا...! -الله يخليكي الله يخليكي...! ضحكت على أسلوب علي و هوا يترجى..قلت:لا خلاص الله يسعدك..والله حروح فيها...! سكت علي لثواني قبل ما يقول:أصلاً ما حتنفع...! طالعت في علي من جانب عيني:من إياها...؟! -خخخخخخ...! حاولت أكتم ابتسامتي:هيا بس...! و قعدنا على دي الحالة..مبسوطين و مرتاحين..و أغلب الوقت قضينا و احنا نسمع هَروج سعود..مادري لو تعرفوا لكن أحلى شي عند الأم و الأب إنهم يسمعوا كلام أولادهم لإنو من كلام أولادهم ينتبهوا إنهم هما و أولادهم كبروا أو بدأوا يكبروا...! ************************************** رجعنا الفندق بعد ما اشترينا من محل على الشارع مادري ايش اسمو بُرجرز و رحنا عالفندق و أكلنا..أنا حرصت إني ما أشرب بيبسي عشان ما ينفع حامل و برجر و بيبسي..قمة الضرر...! بعد ما أكلنا و احنا نتفرج على "نظرة على" في الجزيرة للأطفال _و على فكرة تراه برنامج مرررة حلو_ رحنا ننام و كنا مرهقين جداً...! حتى سعود ما قدرت أفرشلو طُراحة زي أمس..نام وسطنا أنا و علي بما إننا حاجزين غرفة زوجين بس..يعني ما فيها إلا سرير مزدوج...! سعود و هوا نايم كان يتحرك و يتقلب لين وصل عندي..تخيلوا ايش سوى...؟! حضن يدّي و شمني كأنو يتأكد إنو أنا أمو أو شي...! ابتسمت و أنا شبه نايمة و مديت يدّي التانية و حطيتها على شعرو..حبيبي هوا..من يوم ما حملت و هوا معد يتحضن فيا و ينام عندي كتير زي أول..سار يحس إنو يتعبني و كمان سار يحس إنو كبير...! و السبب الأكبر في كده هوا الناس..دحين يجيلك أخ و تسير إنتا رجال و مدري ايش...! الله يعينو..الولد الأكبر دايماً يكبر بسرعة...! و كنت حدخل في النومة لكن علي قرب مني و قال:جود...! رفعت راسي و قلت بنعاس:همممم... علي كان فاتح عينو و مركز على شي معين فيا...! قال:السلسلة...! طالعت في السلسلة إلي لابستها..كانت هيا ديك إلي جبلي هيا بعد شهر العسل حقنا..السلسلة إلي فيها اسمو...! قلت و أنا أجلس:كويس فكرتني...! و جيت بفسخها لكن علي قال:"لاااااا"،طالعت فيه مستغربة:عشان ما يسير لها شي و أنا نايمة..أخاف تنقطع...! قال بصوت واطي:جود أنا فرحت عشان شفتها عليكي..لا تشيليها...! فكيت السلسلة و رجعت انسدحت و طالعت في علي:الصراحة أنا أحرك يدي كتير و أنا نايمة و سعود نايم جمبي و السلسلة دي أغلى عندي من إني أفرط فيها و أنام بها.."ابتسمت و غمضت عيني"..و تراها الشي الوحيد إلي يذكرني بإني ما كنت مقدرة الكنز إلي عندي...! ما شفت تعبير وجه علي لإني كنت مغمضة و ما فتحت لكني حسيت بيد فوقي و فوق ولدي..كانت يد..أبونا و حبيبنا و حامينا..كانت يد..رَجُلي..إلي لو ألف الدنيا كلها ما ألاقي أحد يحبني زيو...! ************************************** |
الجزء الثاني عشر (ما قبل عصف العواطف) خرجت من مكتب أستاذتي و أنا مصدومة...! معقوووووووووووووول...؟! يا الله..أبغى أروح البيت و أقول لعلي بسرعة..لالا..حقولو في السيارة ما حستنى...! رحت جبت سعود من الحضانة و قعدت في الكافتيريا...! طالعت في ساعتي..كانت وحدة..بعد ساعة علي حيجي و أنا خلصت محاضراتي...! قعدت أفطر مع سعود و أنا أفكر باللي قالتو ليا الأستاذة...! أوكي..هدا آخر ترم ليا و أنا كنت مخططة ما أكمل عشان أفضى لسعود بما إنو بدأ يكبر و يفتح عالدنيا..كمان أبغى أبدأ أعلمو الحروف و أبغى أغرس فيه حب القراءة..لكن كلام الأستاذة خلاني أفكر شوية...! الأستاذة عرضت عليا أسير مُعيدة و أكيد تعرفوا إنو المعيدة لازم تكمل ما جستير في مدة معينة و أنا عارفة و متأكدة إنو علي ما حيوافق سواءً لازم أكمل دراستي ولا لأ..علي ما صدق على الله أخلص البكالوريوس..مستحيل يرضالي...! رفعت راسي لسعود إلي خلص فطور و طلبني الجيم بوي،قلتلو:ما جبتو...! -ليش...؟! -مافي شحن..أمس طول الليل قعدت تلعبو و ما سمعت الكلام و ما خليتو يشحن...! قال باعتراض:أنا لعبت يوم الجمعة كده...! -لأ..يوم السبت..أمس منتا فاكر...؟! -ماما مو أمس...! طالعت في سعود بعتاب:دحين أنا مو ماما...؟!،كيف ترفع صوتك عليا...؟! سعود قعد مبرطم و منزل راسو لدقيقة قبل ما يجي و يحضني...! حضنتو و بستو و قعدت أهديه..أشياء كتيرة اتغيرت في سعود في الفترة الأخيرة و أوضح شي تعبيرو عن النعاس..قبل كان يبكي لمن يبغى ينام..دحين سار يعابط و يعاند...! همستلو:يلا حبيبي تقوم عشان أعطيك جوالي تلعب...؟! رفع سعود نفسو و باسني و أخد الجوال و جلس في الكرسي إلي جمبي و قعد يلعب و أنا رجعت لتفكيري..و وسط ما أنا أفكر رن جوالي...! أخدتو من سعود و انصدمت باسم عمو...! جيت برجع الجوال لسعود بس بالغلط ضغطت عل زر الرد...! لااااااء..قعدت أردد لألأ و أنا أحط الجوال على أدني...! وصلني صوت عمو حااار عالي:جود..جود حبيبتي جود...! الجوال كان حينكسر من شدة ضغطي عليه...! عمو بسرعة:جود أنا مني عارف كيف رديتي بس فيه موضوع ضروري أبغى أكلمك فيه و أنا كلمت علي و وافق إني أمرك و آخذك إنتي و سعود من الجامعة...! كلام عمو نطقني:كيف...؟! سحب عمو نفس من كلامو الطويل المتواصل و قال:شوفي جود..دوبي مكلم علي و طلبتو و وافق..و أنا دحين قربت من الجامعة..اجهزي و تعالي معايا إنتي و سعود نروح عند أمي..أمي يا جود ميتة و تشوفك..مرة مشتاقتلك و الدمعة تطيح من عينها كل ما جات سيرتك...! انقهرت..دحين علي وافق و خطط مع عمو و بعدين خلاني قدام الأمر الواقع...! قلت بغيض:و متى كلمت علي و كيف وافق من غير ما يسألني...؟! -جود حبيبي..أنا طلبتو و وافق لكن قلي أتصل أسألك...! -تتصل تسألني...؟!،كيف و إنتا دوبك تقول إنك قريب...؟! -خلاص إنتي ما بيضرك شي..تعالي و..علي بعدين بيجي ياخذك...! قلت بقهر و أنا أوقف:بس عشان جدة و عشان علي ما يطق مشوار من البيت للجامعة و لا كان ما جيت و لا حتى فكرت...! قال عمو و كأنو يسكتني و ياخدني على قد عقلي:عارف حبيبي..والله عارف..أصلاً أنا معد يهمني إلا جدة...! اتنهدت:طب دحين إنتا برة...؟! -ايوة اطلعي و حتلاقيني...! فصلت من غير ما أقول مع السلامة...! طيب يا علي طيب..هوا عارف إني ما أحب الهبل و الحركات دي..والله بس ما أبغى أكسر كلمتو و أزعلو و لا كان سويت فضيحة و ما ركبت سيارة عمو...! لميت أشيائي و لبست العباية و خرجت من الكافتيريا و أنا ماسكة سعود بيد و باليد التانية ماسكة الجوال أتصل على علي...! كنت أمشي متجهة للمخرج لمن علي رد:ألو...! -علي..من جد موافق أروح مع عمو...؟! -بسم الله علينا..سلمي أول...! -علي بجد مني فايقتلك و زعلانة منك..كيف توافق و تتصرف من غيري...؟! -أول شي أنا مني بزر عشان أقولك و أستشيرك عالرايحة و الجاية..ثاني شي أنا ما وافقت إلا و أنا حاس إنو هذا الشي في مصلحتك..اتعوذي من ابليس و روحي..ولا عاجبتك حالتك مع عمك...؟! سكت..ما لقيت شي أقولو...! قال:تبغين شي...؟! قلت بهمس معاتب:شُكراً..علي...! و فصلت..لكن هين..والله لوريهم الاتنين...! خرجت من الجامعة و قلبي حسيتبو بيخرج من أضلاعي...! أول ما شفت سيارة عمو و عمو فيها جسمي قشعر و ما قدرت أرد على سعود إلي يسأل عن سبب وجود عمو و عدم وجود علي...! كنت مستمرة في المشي بس من جوتي التوتر و الخوف كانوا بيدفعوني لورا...! كنت خايفة من مواجهة محتومة بيني و بين عمو رغم إنو الحق..كل الحق معايا...! قلت لسعود يركب ورا و أنا فتحت باب المقعد الأمامي بيد مرتجفة...! جلست و قفلت الباب...! قلبي كان يدق و أعصابي مشدودة و كنت أحس كأنو أحد حاط حمل تقيل على راسي و عمو ما كان وضعو أحسن؛ صوتو و هوا يرد على تساؤلات سعود وضحلي قد ايش هوا مرتبك...! حرك عمو و لمن خرجنا من المواقف قال و عينو مركزة عالطريق:كيفك جود...؟! -كويسة...! **دقيقة من الصمت** قال بنبرة غريبة:كنت متوقع تسأليني كيفك...؟! اتنهدت بدون صوت و أنا أداري دمعتي..شوفتي لعمو حركت كل مشاعري النبيلة تجاه هدا الإنسان و حسيت قد ايش أنا مشتاقتلو و قد ايش أحبو...! عضيت على شفتي السفلى لمن حسيت بدموعي تتسلل لخارج عيوني...! سكتنا لين وصلنا و نزلت رغم إحساسي بإني المفروض ما أنزل لكن عشان جدة..عمو قال إنها تبكيني...! وقدام درج بوابة العمارة حسيت بصعوبة..بالعادة علي يساعدني بس دحين.. عمو ما حيقصر بس يمكن مكسوف و مو متجرء..انقطع حبل أفكاري لمن مسك عمو شنطتي:سعود تعال شيل شنطة ماما...! و جا سعود و أعطاه عمو الشنطة و قلو يسبقنا و يطلب المصعد أما عننا فعمو مسكني و قال:يلا بسم الله...! سميت و طلعت..ما كان بيدي حيلة..أنا أخاف أطلع درج لحالي و أنا حامل...! و طلعنا بالمصعد و أول ما دخلت الشقة إلي اشتقتلها موت و شفت جدة في الصالة،تركت كل شي و مشيت بسرعة _أرهقتني_ لجدة،جلست جمبها و حضنتها و بكيت..بكيت زي الأطفال لمن يكتموا و يكتموا و يكتموا لكن أول ما يشوفوا أمهم يفرغوا كل شي...! عمو أخد سعود و دخل خاصة بعد ما شاركتني جدة البكاء...! اضطريت أوقف بُكا..رغم إني اتمنيت لو أبكي في حضن جدة لين الصبح بس خوفي عليها كان أكبر بكتيييير و أقوى من رغبتي في البُكا و التفريغ...! توقف بُكايا ما منعني من إني أتشبث في جدة و ألصق راسي في صدرها..اشتقتلها..اشتقتلها..اشتقتلها...! بعدتني عنها بعد مدة..الشي..إلي خلاني أشوف ملامح وجهها الحزينة...! قالت:وينك عني...؟!،سافرتي و معد سألتي عني...؟!،أنا يا بنتي تدرين مالي غيرك يداريني..ليش خليتنِّي...؟! مسكت يد جدة و بستها:جدة أنا ما جيت هنا إلا عشانك و لا أنا قلبي معورني من عمو و زعلانة منو...! انفعلت جدة:و أنا ضربتُه..والله إني ضربتُه و قلتلُه إن كان جود ما رضيت أنا ما أرضى...! جفت دموعي و أنا أقول بعدم تصديق:ضربتييييه...؟! -أي والله يا بنتي ضربتُه و إن شاء الله ما بتطلعين إلا راضية...! اتنهدت و أنا أقول لنفسي إني تعبت من كل شي..اتنهدت و أنا أتمنى لو كانت الأمور أبسط من كده...! أبسط...؟!..البساطة و التعقيد..أغلب مشاكلنا كانت من التعقيد و أغلب حلولها كانت من التبسيط..ياااااه..من جد الدنيا تضحك...! تضحك كيف إنها تغلطنا لمن نكون صح و تحسسنا إننا سوينا مصيبة و احنا ما نكون إلا ارتكبنا شي بسيييييييط و تاااافه...تضحك كيف إنها تحسس المجرم و العاصي و المفسد إنو ما يسوي شي في الوقت إلي يكون فيه يدمر حياة فرد أو أسرة أو مجتمع بكاملو...! رفعت راسي لسعود إلي دخل الصالة و قال بشكك:ماما...! -ها حبيبي...؟! قرب مني و قال:ماما بابا يقول لو إنتي تبكي النونو تبكي زي لمن أنا كنت نونو أبكي..بعدين..بعدين إنتو كوووللللكم تسيروا تبكوا بعدين تزعلوا..مو كويس كده ماما...! ابتسمت لسعود و سحبتو لحضني:حبيب ماما إنتا..أنا بس زعلت شوييييية بس أنا دحين خلاص كويسة...! -ماما إنتي زعلانة..أنا أعرف..إنتي أول زعلانة من الزامعة..(الجامعة)..ماما إنتي الجامعة زعلتك...؟! ضحكت عشانو نطق الجامعة صح و غلط في نفس الجملة،قلت:حبيبي الجامعة ما تزعل أحد...أنا كنت متضايقة و لمن شفت جدة بكيت..هدا كل ما في الموضوع..إنتا دحين اقعد مع جدة..أنا بدخل أكلم عمو شوية...! و بعدت سعود عني...! حروح لو..ايوة حروح لو و أوريه إنو الله حق بسسس..على طريقتني الخاصة...! أعتقد إنكم طفشتو من شغلة الإصرار و العزيمة إلي تجيني فجأة و تروح فجأة لكني مضطرة أقولكم إنو إصرار غريب خلاني أقوم...! كنت متجهة لغرفة عمو و لمن جيت بدق الباب انفتح...! انفجعت و رجعت براسي على ورا...! قال عمو:كنت..جايك...! ما رديت فوسع فتحة الباب:تعالي...! دخلت و قفل عمو الباب و جلسنا عالسرير كعادتنا..دايماً...! جلسنا ساكتين مدة قبل ما يفاجئني عمو بإمساكو أكتافي و تقبيلو راسي و هوا يقول:أنا آسف..ما رح أفسر أو أعطي أعذار..أنا غلطت بغض النظر عن الظروف و عن الأسباب و عن ردود الفعل إلي طلعت مني و منك..أنا آسـ..ـف...! رفعت راسي ببطئ و حطيت عيني الدامعة في عين عمو و قلت بصعوبة:أنا..أنا حسيت..حسيت إني خسرتك...! قلت و دموعي تزيد:أنا عماتي يكرهوني..أنا مالي من عائلتي إلا إنتا و جدة..كنت حنجن لمن شفت بابا يضمك لصفو.."عليت نبرتي"..حسيت بالخطر..حسيت إني حخسرك...كمان خفت من بابا يقول شي يخسرني علي بالتالي سعود ولدي.."أشرت على نفسي و بُكايا يزيد و يعلى على صوتي"..أنا بس خُفت عشان كده اتوحشت..بس والله ما كان قصدي.."بدأت أشهق شهقات متقطعة"..والله مَـ..ما.. .. ما كان قصدي أعلي صوتي عليكم أو.. .. .. حضني عمو عشان يهديني:عارف..والله عارف إنك ما قصدتي ولا أنا ما قصدت...! قلت و أنا مستمرة بالبُكا إلي زاد في حضن عمو:عمو إنتا ما تعرف بابا..بابا والله يخوف..أحسو بس يبغى يخرب حياتي..عمو فيه أشياء كتير إنتا ما تعرفها..بابا في بداية زواجنا كان يقول لعلي الحمدلله رضيت تتزوجها..بابا كان بيفتري فيا قدام كل الأطفال لمن ما تكون موجود..أنا انقهرت عشان الكل يصدقو..بابا كان يسوي أشياء كتير فيا من وراك.."طالعت في عمو"..إنتا ما تصدقني صح...؟!،عمو أنا والله ما أكذب..عمو إنتا تعرفني أنا ما أكذب...أنا ما أكذب...! شدد عمو احتضانو ليا:لا والله مصدقك يا جود لكن خلاص..الله يخليكي خلاص..لا تبكي كذة..لا تعوريلي قلبي...! قعدت أبكي في حضن عمو و هوا كان يمسح عليا و يهديني و يذكرني بحملي...! عمو و يدو تطلع و تنزل على ظهري:بس حبيبي بس..بس يا حبيبة أبوكي إنتي..والله يا جود ما تدري قد ايش دموعك غالية عندي..ما تدري قد ايش اشتقت لكي في حضني..اشتقت لصوتك و لكلامك..جود أنا لو غلطت عليكي في يوم هذا ما يعني إنك معد سرتي مهمة بالنسبة ليا..لأ..جود أنا أدين لكي بأشياء كثييييرة..أولها و أبسطها إنو بسبب وجودك إنتي نضجت أنا و سار عندي عقل و سرت رجال..هذا أبسط شي..غير الحب و الرضا إلي وجودك سببو ليا..إنتي لو مو موجودة في حياتي كان مداني إنسان تافه من بنت لبنت و من استراحة للتانية...! كنت تدريجياً قاعدة أهدى..لييييين ما بعدت عن عمو و قلت و أنا أمسح دموعي:آسفة عشان رفعت صوتي عليك...! قال عمو و هوا يمسح على وجهي:لا حبيبي..أنا إلي آسف إني ما وثقت فيكي و أياً كان إلي سويته شوية قدام إلي سواه سعيد طول عمرو معاكي بعدين حتى لو..أنا أعرف قد ايش إنتي متأذية منو...! -الناس طاقات و قدرات و أنا صبري خَلَّص و معد فيا ديك القوة و الصبر إلي كانو فيا و أنا بنت...! تابعت:كمان أنا انقهرت..حسيت إنو حتى لو قلت الكلام إلي قالو بابا أنا أظل حرمة كبيرة..أنا مني طفلة عشان تحاسبوني على أغلاطي و تعاقبوني عليها..أنا كبيرة و متزوجة و إذا ما كان ليا احترامي و استقلاليتي دحين فمتى...؟!،أنا لو حسيت إني غلطانة أروح بنفسي و أصحح غلطي..مو تجي إنتا أو أي أحد تاني و يجبرني أسوي إلي هوا يشوفو صح...! أنا أعترف إنو أنا سمعت كلامك بمحض إرادتي رغم إنو علي عرض عليا ما أروح و يوقف معايا في وجهكم كلكم لكني أنا رفضت و أجبرت نفسي أروح رغم إني كنت كارهة البيت و أهلو و كارهة فكرة وجودي هناك بس سمعت كلامك عشان.."اتوقفت عن الكلام و طلعت هوا"..أنا بس كنت مابغا أكسر كلمتك كمان قعدت أفكر..كيف حتسير علاقتي معاك لو ما سمعت كلامك...؟!،خيالات كتيرة جاتني خوفتني و.. ابتسمت و أنا أهز راسي:ما..ما أعرف كيف أقولك بسسس... نزلت راسي لثواني بعدها رفعتو:أنا انفعلت..أنا أحس إني ما كنت أنا..أنا حتى أحس مني قادرة أناقش أحد في الموضوع و في الكلام إلي قلتو عشان كده أبغى الموضوع دا يتقفل نهائياً و كل إلي يهمني إنتا..أنا بابا معد بيني و بينو شي..و أنا أصلاً مابغا يكون بيني و بينو شي..أخواتي..عارفة خسرتهم بعد ما كنت على وشك أكسبهم و عبدالرحمن مليون بالمية سحب نفسو و خرج منها و عبدالإله تلاقيه أعطاني كل حسناتو من السب و الشتم و الحش فيا...! أنا كل دا ممكن أتجاوزو لكن إنتا مستحيل..أنا مستحيل أستغني عنك أو أسمح لأي واحد ياخدك مني..إنتا أبوية أنا و أنا بنتك غصباً عني و عنك و عن الناس و عن بابا و عن مجموعة الأوراق الغبية إلي تدرجني تحتو و تحت زوجتو...! عمو جفنو كان يرتجف،قال بصوت مكتوم:أحياناً أتمنى أكون بنت..أبكي من غير أي إحساس بالنقص...! -ابكي..عمرها الدموع ما ارتبطت بالضعف أو نقص الرجولة..الرسول بكي...! -_عليه الصلاة و السلام_،بس يا جود احنا اتربينا على دي الفكرة..كل إلي تقوليه صح لكن ما عرفناه إلا نظري...! -نظري...؟!،كل الأشياء الحلوة في الحياة نظري،العقلانية و المثالية و المنطقية..كلها أشياء نظرية أو سارت نظرية في عصرنا دا...! ابتسم عمو:منطقية...؟! قال بعد مدة:تصدقي في الفترة الأخيرة سرت أكرر nonsense , nonsense , nonsense...! -nonsense...؟!،حلوة الكلمة دي..أحسها معبرة...! -أحس حياتك على أساس حقيقتك و كل الأحداث إلي سارتلك و سارتلي..أحسها كلهاnonsense...! ابتسمت:أحس قرفت من الكلمة..كررناها كتير...! ابتسم عمو ابتسامة صغيرة...! قلت:بس ايش قصدك بالأحداث إلي سارتلي...؟! -عندك زواجك إلي كرهتيه في البداية و دحين متعلقة فيه زي الـ...كيف أقولها ذي...؟!،إنو..إنو مرة متعلقة فيه..مرة...إلا جود..إنتي لدي الدرجة مرتاحة مع علي...؟! أخفضت بصري:علي...؟! طالعت في عمو و ابتسمت:علي عفش و عصبي و غيور مرة و أحياناً..قروي.."ضحكت بخفة"..بسسسس أحبو..كفاية إنو محسسني إني ملكة و مافي مني اتنين و ما أأشر على شي إلا و يجيبو..ما أقول إلا و يسمع..علي يحبني أكتر مما أنا أحبو..علي.."طالعت في عمو"..ما حوقف لو بدأت..المهم إني مرتاحة معاه و أبغاك إنتا كمان ترتاح مع محروسة حتتزوجها...! وجه عمو اتقلب...! قلت بسرعة:عمو أوعدك ما حتحس بشي..و ما حيسير إلا واحد من اتنين..يا حالك تتحسن يا تقعد زي ما إنتا..عمو الله يخليك اسمح لي أبدأ أتصرف..و لو كلمتك في الموضوع تاني فحيكون بخير و لو ما كلمتك فاعرف إنو مافي نصيب...! قال عمو بشدة:جود أنا مني مستعد أقعد مع وحدة تحسسني بالنقص...! -هدي كل مشكلتك...؟! -لأ..كمان مابغا أحرم وحدة و أعيشها معايا عذاب...! -عمو..البنات دحين عاقلات..الوحدة سارت بس تبغى واحد كويس يضمها و يستر عليها و بعدين أنا مستحيل أورطك..لمن أفكر في وحدة مجرد تفكير حكون واثقة منها و من عقلها...! -ليه..فيه وحدة محددة...؟! -فيه كده وحدة...! -جود أنا هاذي السخافات ما تعجبني...! -مو سخافات..إنتا بس قول موافق...! -لأ مني موافق..جود أنا ما حتزوج لعبة عشان تقوليلي فيه كده وحدة...! -طيب آسفة إني استخدمت هدا التعبير..أنا فيه كم وحدة أعرفهم و واثقة منهم...! بيني و بينكم..هيا وحدة لكني مابغا عمو يشك...! وقف عمو و قال و هوا معطيني ظهرو بلا اهتمام غريب في غير محلو:سوي إلي تبغيه و أنا مالي دخل...! -يعني موافق...؟! التفت:جود..تعرفي لو مو مزعلك و أبغى رضاكي كان قلت لأ..لكني مضطر أقولك موافق..بس..حطي في بالك إنك ممكن تتعرضي لموقف محرج بسببي...! قطبت حواجبي:كيف يعني...؟! قال و هوا يرفع أكتافو:عادي..يعني ممكن فجأة أفركش كل شي بدون أي حساب أو حشمة لأحد..و شوفيني قلتلك عشان ما تزعلي مني...! و جا بيخرج لكني وقفتو و أنا أقول بدلع مُنهي للموضوع:عمو..مو دوبنا اتراضينا..مافي hug عالطاير كده...؟! التفت لي عمو و ابتسم..حضني و قال بحلاوة:آسف..نسيتيني بكلامك في موضوعي...! -عارفة..مو بنتك و إنتا أبوية...! بعدها باسني و همسلي بلطف:بس المرة الجاية أبغاكي ألين من كده...! طالعت في عمو مستغربة فغمزلي و خرج من الغرفة و أنا مشيت وراه...! رحنا و قعدنا في الصالة عند جدة و سعود و منورة إلي قامت للمطبخ عشان عمو...! قال عمو بمرح:ها يا ماما..جودة و رضيت و إنتيييييييييي...؟! طالعت جدة في عمو باحتقار:أوووووه..خيابة..والله إن ما معك إلا الخيابة...ماما..قال ماما...! عمو اتكسح و أنا ضحكت...! مسكين عمو..يعني هوا وين و وين لمن يستعبط...! دق جوالي برنة وحدة..رفعتو و كان علي..الظاهر إنو خايف أكون في نص نقاش يقوم باتصالو يقاطعني...! كنت حرجع أتصل لكن خليه يولي..أنا زعلانة منو..صح إني شايلتلو شكراً حلوة جوتي عشاني اتصالحت مع عمو لكن برضو زعلانة منو لإنو خطط مع عمو عليا من غير ما يقولي...! رفعت راسي لعمو إلي ينادي..قلت:هلا...! -ايشبك...؟!،مسكتي الجوال و سرحتي..مين...؟! -ها..علي...! -طب ارجعي دقي..خليه يجي...! -طيب...! تصدقوا لازم أدق...! بكرة دوامات ولازم أرجع البيت عشان علي بكرة مداوم...! رجعت دقيت زي الكلبة...آخخخ..والله كنت أبغى أستغل الوضع و أزعل بس للأسف...! وصلني صوت علي ساخر:أشوفك دقيتي..مو كنك كنتي زعلانة.."قال يقلدني"..شكرا علي...! انقهرت..علي الحيوان..لسه دوبي أمدح فيه..شكلي حسدت نفسي...! فجأة إلا عمو نط و أخد الجوال:علي علي...! و كان دا إلي سمعتو: (-ايش...؟! ضحك عمو بقوة:أقول تعال تعال..تعااااال اليوم العشا على حسابي...! -كبسة من يد منورة تاكل أصابعك وراها...! -ليش ايش فيها الكبسة...؟! -إلا على حسابي..أنا مشتري كل شي...! -تعال تعال...! -لا حتتعشى إن شاء الله...! ضحك:طيب حتتغدى...! ضحك مرة تانية:علي بلا غلاسة..خلاص فطور...! -يا أهبل فطور رمضان قصدي...! -هيا خذها...!) أعطاني عمو الجوال و حطيتو على أدني...! قال علي:جود...؟! -ايوة... -تبغينا نتعشى عند عمك ولا لأ...؟! حسيت علي كأنو يبغى يقولي:"أنا لسه بأستشيرك و أحترمك"...! قلت:براحتك...! -أنا قلت تبغينا..يعني إنتي ايش تبغي...؟! -إنتا ايش يناسبك...؟! -إلي يناسبك...! -أنا أبغى إنك تجي و نقعد معاهم و نتعشى بعدين نروح البيت...! -خلاص سار...! ابتسمت:شكراً..يلا تعال دحين...! -طيب بس وين بلوزتي الكروهات...؟! -ممممم..في الغسيل...! -يا ربييييه..ايش ألبس أنا...؟! -البس أي شي...! -ما فيا حيل أفكر...! -البس جينزك العادي و البس التي شيرت السودا إلي مكتوب عليها بالدهبي...! -طيب طيب..يلا مع السلامة...! -مع السلامة...! -تبغو شي و أنا جاي...؟! قلت بصوت عالي:منورة ناقص شي...؟! -مافي لبن..فلفل أسود...! قلت لعلي:لبن و فلفل أسود و..شبس...! -شبس ايش...؟! -آآآه تسالي كاتشب و...ليز حار الله يخليك...! -ليش اثنين..ليش الفقعة...؟! -آآآ عشان الحار ليا و الكاتشب للبيبي...! -حجيب حار بشرط يكون فيه جبنة سايلة و عيش عشان أسوي سندوتش...! ضحكت:فيه فيه...! ضحك:هَيْ يلا مع السلامة...! -الله يسلمك...! و قفلت...! قال سعود:ماما أنا أبغى ليز بالبُجنة...! -مو حلوة كثرتو..يجيب السومة...! -إلا ماما..أبغاااااا...! مديتلو الجوال:خد اتصل على أبوك...! قال عمو:جود دحين إنتي من جدك..لبن و فلفل أسود...؟! طالعت في عمو:وي عمو..لا تزعلني منك..ما فيها شي...! -عارف بس أحس غباء..لبن..و فلفل أسود...!!! -و شبس كمان...! ابتسم عمو فرديتلو ابتسامتو و بعد كده دخلنا في جونا المعتاد من الكلام و الفُرجة عالتلفزيون...! ^^^^^^^^^^^^^^^^^^^^^^^ ارتمى علي عالسرير:منورة هذي..شي خطير..أحبها..تصدقي...؟! طالعت فيه و أنا أغير و أعلق ملابسي:لا يا شيخ..كل دا عشان الكبسة...؟!،أنا أسوي زيها..أصلاً هيا إلي علمتني...! -طالع فيا:كم لك ما سويتي كبسة لحم..والله إني اشتقت لها..ترى حلمت بها و احنا في المدينة...! -يا سلام..جيب لحم و حسويلك كبسة...! -مو إنتي حالفة عليا ما أدخل ذبيحة البيت قبل ما تولدي...! قلت و أنا أتوجه للسرير و أنسدح:والله..ما فيا حيل أنا..أقطع و أنظف ومدري ايش هوا..بعدين تعال هنا..ليش ما جبتلي صدور الدجاج إلي طلبتها منّك...؟! ضرب جبهتو:يااااااا الله..أنا حمار فتحت الموضوع ليه...! -وي علي..ايش حيسير فيك يعني لو جبتلي إلي طلبتو منّك...؟!،ما تبغى تريحني يعني...؟! طالع فيا:أنا نسيت و كنت مبسووووووط لإنك نسيتي الموضوع لكن دحين فكرتك...! ابتسمت ابتسامة غريضة فقال:بس خلاص طفشتيني..قلت دحين..عارف قلت دحين...! قلت و أنا ما زلت محافظة على ابتسامتي:و كمان قلت فكرتك...! -بس عاد جود..مصختيها..طفشو الناس من تعليقاتك...! قلت بطفولية:حتى إنتا ما يحبو تعليقاتك...! سكت لثواني و هوا يطالع فيا بتأمل بعدين ابتسم و قال ببساطة:وجهك منور...! -ها...؟! -وجهك..منوووور...! حطيت يدّي على خدّي:من..من جد...؟!،ليه...؟! ابتسم:منتي عارفة ليه...؟! طالعت في علي باستغراب،فقال و هوا يحط يدّو على خدّي:عشان كذة كنت أدعي ربي يفرجها بينك و بين عمك..كنت عارف إنكم لو اتصالحتو نفسيتك حتتحسن...! ابتسمت و أخفضت بصري،قلت بصوت منخفض:ليه كنت وحشة...؟! ضحك:لا اسم الله عليكي ماكنتي وحشة..بس ذحين فيكي شي غير.."تابع و هوا يأشر على قلبي"..أحس هذا مرتاح...! ابتسمت:لو مو إنتا حولي ما كان حيرتاح..سواءً عمو صالحني ولا لأ...! ابتسم فاتحمحمت...! فطس علي ضحك:من جدك إنتي...؟! -اييييش...؟! -ايش ذا..قلك تستحي يعني...؟! صرخت بقهر:هيي..بس كده..يعني حمحمة حقت البرستيج...! -برستيج...؟!،الله يخلف البرستيج ضايع بينا..والله ما أحس بهبالتي إلا معاكي...! ابتسمت:و أنا ما أحس بسخافتي إلا معاك...! -و هبالتِك...!؟ قلت و أنا أحط يدّي على خصري:و سخافتَك إنتا كمان...! -أنا ما عندي سخافة...! -و أنا ما عندي هبالة...! -لا عندك هبالة بدليل ذاك اليوم لمن كثرتي ملح في الغدا عشاني خاصمتك على ملحك القليل في الغدا إلي قبلو...! -حتى إنتا عندك سخافة بدليل إنك خاصمتني على الملح القليل بدل ما تطلبني ملاحة و تزود الملح قد ما تبغى...! -طب شسوي قهرتيني...؟! -حتى إنتا قهرتني...؟! سكتنا أنا و علي لثواني و احنا نطالع في بعض قبل ما نفكها ضحكة...! قلت:كل واحد فينا أهبل من التاني...! قال:و كل واحد فينا أسخف من الثاني...! -لاااااء لو سمحت أنا سخافتي لا يضاهيني فيها أحد...! -و أنا هبالتي و عكاستي لا تقاوم...! سألت و أنا أعطيه نظرة:من جد...؟! قال و هوا يرفع حواجبو و ينزلها بسرعة:ايوة ولا ايش مطيح بنات العائلة فيا غير عنادي...! -لا والله...؟!،أصلاً وين بنات العيلة..كلهم في ديرتك...! -اللللللمهم فيه بنات عيلة و كلهم يحبوني...! قلت بحقد و غيرة:لأ مو كلهم يحبوك..أصلاً لمن رحت الديرة أول كلللللهم كان عندهم ذكريات مو حلوة معاك و كل شوية وحدة تجي تسألني.."قلت أقلد أصواتهم"..جود لسه علي مدري ايش..لسه يحب مدري ايش يسوي...و بلاوي تانية كتير...! -طيب يختي ايش فيكي حقدتي..وجع..أعوذ بالله ما ينمزح معاكي...! قلت:علي أنا لسه قاعدة أمزح...! -لا بالله...؟! -ايوة...! -بغت عيونك تذبحني و تمزح أجل لو ما تمزحي...؟! و على كده...استمر أحلى وأسخف حوار ممكن يدور بين اتنين...! ********************************* سعود،،، سحبت نفس و أنا أسمع "التووووووت" و أستنى سعيد يرد...! يا رب افرجها من عندك...! سعيد:ألووووو... -ألو..ايوة هلا سعيد..كيفك...؟! -الحمدلله بخير..إنتا كيفك...؟! قلت و أنا أهز راسي لسبب ما أعرفو:كويس..كيف الأولاد و كيف أهلك و كيف مها..إن شاء الله مرتاحة...؟! ضحك سعيد:لا مرتاحة و مبسوطة مرة...! ابتسمت:الله يوفقها...! سكتنا لثواني قبل ما يقول سعيد:إلا وينك عنا..من يوم الملكة ما شفناك...؟! اعتدلت في جلستي و أنا أقول:مشاغل و ظروف و لخبطة نوم..عارف إنتا الوضع...! قال بقلق:ليه سعود..عندك شي شاغلك...؟! شخصياً ما عندي لكني استغليتها فرصة و قلت و أنا أتنهد:كثير أشياء شاغلتني يا سعيد...! -خير سعود..ايش فيه...؟! -جود يا سعيد..جود...! -جود...؟!،ليش ايش عندها كمان...؟! ما عجبتني نبرة سعيد أبداً لكني ما أعتقد إنو وقتو أحاسبو على نبرتو دحين...! قلت:أنا و جود اتراضينا و كل شي سار تمام الحمدلله و انزاح الهم عني...! -طيب...؟! -سعيد رفعت سماعة على جود من يوم الخميس...؟! -سعود أرجوك لا تكلمني في هذا الموضوع و اسألها هيا ذا السؤال..راحت المدينة بلا حشمة لأي أحد..سوت إلي سوته و خربت على بنتي ملكتها و فرحتها إلي ما تتكرر و خرجت...! كان نفسي أقول:"إنتا خربت على بنتك"،لكني كنت أبغى أقنعو مو أتمشكل معاه...! قلت:سعيد جود تعبانة و بعدين هذي أول مرة ترفع فيها صوتها...! -أول مرة أو آخر مرة ما يهمني..أبوها و عيب عليها إلي سوتُه...! "و هيا بنتك و أحسن منك"،برضو شي كان نفسي أقولو...! قلت بهدوء عشان يسمع لي:سعيد المفروض تكون حاسس بها..إنتا لمن غلطت كنت تبغى من يسامحك و لقيت..كمان هيا ذحين تبغى من يسامحها...! -بس أنا عانيت لين ما لقيت من يسامحني..لازم تعاني زي ما عانيت عشان تحس بغلطها...! -عانيت...؟!،عانيت كم...؟!ما مر شهر إلا و جود عندنا و إنتا معانا عادي..لا و تطلبنا بكل ثقة ندخلها جوة عشان ما تشوفها...! **كان سعيد بعد ارتكاب جرمه يطلب من أخيه الصغير بأن يدخل ابنته الرضيعة (جود) لإحدى الغرف الداخلية لأنه يكره رؤيتها...! قال سعيد بنرفزة:طيب شهر..خليها تستنى شهر و بعدين يسير خير...! سخافة !! ، الشي الوحيد إلي جا على بالي هوا إنو سعيد إنسان سخيف...! -طيب ليه ما تكون أحسن منها و تروحلها و صدقني الكل حيشهد إنك الكويس و الصالح إلي تعفو عن أخطاء الناس..والله الكل حيشهد لك بكذة...! سكت سعيد..شكلو قاعد يفكر...! ابتسمت بسخرية..هذا إلي هام سعيد..الناس و نظرتهم..الشغلة عندو مو شغلة دين و عدل و حق..الشغلة عندو شغلة ناس و كلام و سمعة...! قال:خلاص يا سعود..بكرة و أنا عندها و إن شاء الله إنها بتحفظ لي هذا الشي...! قهرتني الجملة الأخيرة لكني كالعادة ما قدرت أقول لسعيد الصراحة في وجهو...! -إن شاء الله ربي يفتح عليكم و يجمع بينكم بالخير...! -آمين..هيا أبوية تبغى شي...؟! -لا سلامتك...! -الله يسلمك..مع السلامة...! همست:"مع السلامة" و حطيت الجوال جمبي عالسرير...! يااااااااااا الله..كلمة "أبوية" ذكرتني بإنو سعيد عمرو ما قصر معايا في شي..و كان بالفعل في أيام كثيرة زي أبوية لكن... اتنهدت..سعيد غريب..غريب كيف إنو يقدر يكون مثال الرجل الصالح عند ناس و مع ناس ثانيين يكون مثال الرجل "الفحل". انقطع تفكيري عن سعيد و اتجه ليا..ايش دوري...؟!،كيف لازم أساهم في هذي المشكلة...؟! يا رب..مني عارف كيف لازم أتعامل أو _بالأصح_ أرشد جود للطريقة الصح إلي لازم تتعامل بها مع أبوها...! أوكي..أكيد ما حغصبها تحبو أو تهتم فيه لكنها لازم تكون موجودة حوالينو...! يعني..مثلاً تتصل عليه زي ما تتصل عليا..لا لا ما تتصل عليه زي ما تتصل عليا..بس على الأقل توريه إنها مهتمة أو تتظاهر بالاهتمام..تحسسو إنو أبوها..بكده سعيد يهجد عنها..ترى سعيد إنسان عاطفي؛بسهولة يحس إنو ضحية و بسهولة يحس إنو مذنب،رغم إنو إحساسو بإنو ضحية أكبر و المشكلة إنو لمن يحس إنو ضحية ممكن يبدأ يسوي أشياء شيطانية بس عشان يتخلص من هذا الإحساس..فعلاً شي عجيب...! فجأة اتجه تفكيري لجود..جود مشكلتها إنها مهتمة كتير بعائلتها..أحسها تتوحش أول ما أحد يهوب ناحية علي و سعود...! اتنهدت..أنا زمان كنت كده مع جود..بس دحين خفيت..يمكن عشني سرت أحس إنو وراها أحد غيري..رغم إنها ما تحسسني بكده..جود كل ما يسير لها شي تقولي..و بصراحة هذا شي يفرحني..جود تحسسني إني لسه مسؤول عنها..ما زالت تاخذ رأيي في أشياء حتسويها و إن كان علي وافق و كلو تمام...! أحياناً أحاول أتخيل نفسي لو اتزوجت..هل حأحسس جود بنفس دا الإحساس ولا علاقتي بها حتسير سطحية..آه..أصلاً ما حتزوج..ليش أتعب نفسي بالخيال...؟! إلا صح..جود اتحركت...؟!،سوت شي...؟!،أنا أعطيتها الإذن و قلتلها سوي إلي تبغيه..يا ترى ايش سوت و لو ما سوت ايش حتسوي...؟! أنا مني مستعد..هيا كلمة رميتها بلا اهتمام بس عشان أرضي جود..لاء..لاء..مابغا أرتبط..أنا راضي بقدري و مابغا أي شي يتغير..حالتي عاجبتني..يا ليت لو جود تفهم..لكنها ما حتفهم..لإنها,, ما تبغى تفهم...! ********************* |
الجزء الثالث عشر (عصفُ العواطف) جود،،، كنا أنا و سعود قاعدين نتفرج أنا و أخي على سبيس توون..دوبنا خلصنا فطور و قاعدة أتفرج معاه...! سعود كان جالس جمبي و حاط راسو على بطني و يقول:ماما بعدين أنا أسير سامي و النونو وسيم...؟! ضحكت:طب ممكن النونو بنت...! -عايدي..خلي اسمو وسيمة...! قلت بعجب:ما شاء الله سعود..عرفت كيف تخليها مؤنث...! طالع سعود فيا باستغراب فقلت و أنا أمسح على شعرو:يبعدين تدخل المدرسة و يعلموك اللغة العربية...! تصدقوا أطفالنا أذكى أطفال...؟!..هيا بالله ايش عرفوا بالتأنيث..شوفوا هوا عرف يأنث رغم إنو مو فاهم فكرة التأنيث...! أتذكر مرة سمعت دكتور طارق السويدان يقول:"الطفل العربي عبقري و مبدع لين 7 سنين و 7 سنين عندنا سن مدرسة" و كان يقصد إنو مدارسنا بتدمر الأطفال و تخرب أفكارهم و تشغلهم بأشياء المفروض ما يعرفوها باسم الدين..زي عذاب جهنم و القبر..أطفال ما اتعدوا السبعة سنين يكلموهم في أشياء زي..لا الله ولا رسولو بيرضو بكده...! من جد عندنا بيكبتوهم و يدمروا مواهبهم...! قلت و أنا أربت على ظهر سعود عشان يقوم:سعود جيبلي جوالي...! قام سعود و جاب الجوال و طالعت أنا في الساعة..كانت 11 قبل الظهر..يا رب يكون أحد راسل لي رسالة..طفشانة...! اتذكرت فجأة موضوع الإعادة..ما كلمت علي أمس بسبب الروحة لجدة و عمو..بس يلا..أهو اتصالحت مع عمو...! مدلي سعود الجوال و راح لعند التحفة إلي في دولاب التلفزيون..مادري ايش يسوي بالضبط بس كان قاعد يتفحصها و يقلبها في يدّو و ينقل بصرو بينها و بين التلفزيون...! طالعت في الجوال..ولا مسج واحد حتى...! تصدقوا..كنت متوقعة مسج كده حلو من عمو لكن خابت توقعاتي..بس خليني أكون صريحة..هوا أمس بحركاتو و نظراتو ليا وراني الاعتذار في أقوى حالاتو..يعني المسج ما كان حيفرق معايا مرة...! و بما إني طفشانة ألفت مسج كتكوت و خفيف كده و رسلتو لعلي..عل و عسى يرد...! جاني سعود بالتحفة إلي كانت على شكل سفينة و قال:ماما..وين السواق...؟! -مافي حبيبي سواق..هدي زي اللعبة...! قعد سعود يمشي السفينة عالكنبة جمبي بعدين طالع فيا و قال بسعادة:أنا السواااااق...!ابتسمت و ناديتو و جلس جمبي..لفيت يدّي حولو و نزلت راسي لو:إنتا تبغى تسير سواق...؟! -مممممم..بس على شرط...؟! -ايش...؟! -مابغا زي رشيد أنام في البرة..أبغى أنام معاكي...! ضحكت..سعود قصدو برشيد سواق أهل علي...! حضنتو:اسم الله على حبيبي..إن شاء الله أشوفك دكتور في الـ..سعود إنتا ايش تبغى تسير...؟! قال بتفكير:أنا أبغى أسيييييييير دكتور في الجوم بوي...! -وي سعود..كيف دكتور في الجيم بوي...؟! -يعني عادي..أسير دكتور الجوم بوي...! -كيف يعني دكتور الجوم بوي..يعني لمن يخرب الجيم بوي تصلحو...؟! -أممممم..ممكن بس أكتر أكتر دكتور في إلي يلعب كل الألعاب من غير ما..الماما حقتو تقولو لأ و كمان هوا يعرف كللللل الألعاب و كل شي جوة اللعبة الناس ما تعرف إنو في اللعبة الشي إلي ما يعرف و كمان محد يعرف السر..هوا سر محد يعرف السر دا إلا دكتور الجوم بوي...! طالعت في سعود بابتسامة..سعود سار ينطق كلو صح لكن يمطمط في الكلام و يقولك بدل الجملة تلاتة...! حضنتو و بستو:يا ربي أشوفك يوم مهندس أجهزة ألعاب...! -ايش يعني...؟! -يعني تشتغل مع سوني ولا تبغى مع نيتندو...؟! طالع فيا بحواجب مقطبة:أبغى مع الجوم بوي...! -يعني مع نيتندو...! -ايوة خلاص مع نيدينتو...! ابتسمت و أنا أحاول أكرر الكلمة عشان ينطقها صح:تبغى تشتغل مع نيتيندو..إنت تبغى تشتغل مع نيتيندو عشان نيتبندو هما إلي عملوا الجيم بوي...! -ايوة..نيـ..تييييـ..ندو..نيتينننـ..دو...! ابتسمت و هزيت راسي...! أما سعود فاتذكر جيم بويو وراح جري يجيبو و قعد يلعب في السيب..سعود يحب يقعد في أماكن غريبة..في السيب في نص المطبخ..عادي في أي مكان عجيب تلاقيه...! رن جوالي بنغمة رسالة..يا رب يكون علي رادد عليا...! و بالفعل كانت من علي بس محتواها كان: "في اختراع اسمه تستنيني لين أجي البيت و تقولي لي ذا الكلام في وجهي أما و أنا في الشغل...!" رسلت و أنا أحس بقهر: "كلك ذوق حبيبي" رجع رسلي بعد دقايق: "هههه..لا تزعلي..أنا انقهرت عشان قرأت الرسالة وروقت لكن بعدها المسؤول عني ناداني يبغاني في شغل..كان يكلمني و أنا مني معاه و آخر شي قلي:"التناحة ذي ما أبغاها هنا"..وجع يقهر..أقلدلك هوا بعدين..أحبك..بس لا تقولي لأحد *_^" ابتسمت و حطيت الجوال على جمب و قعدت أتفرج عالتلفزيون و أنا مبتسمة...! رن جوالي فرفعتو و اختفت ابتسامتي علطول...! قعد يرن مدة بعدين وقف لثواني و رجع يرن...! سحبت نفس و رديت:نعم...؟! -السلام عليكم...! -وعليكم السلام....! -كيفك...؟! -الحمدلله...! سكت بابا لثواني بعدين قال:ما أشوفك سألتيني عن حالي...! قلت بدون مشاعر:كييف حالك...؟! -بخير...! قالها بدون نفس..انقهرت..كيف يتكلم معايا بدي الطريقة..و كأنو متفضل عليا رد على سؤالي...! كنت ساكتة و أستناه يتكلم..ما كان عندي أي استعداد علشان أبدأ الكلام...! -أشوفك ساكتة...! ايش يتوقع مني..أشكرو على اتصالو مثلاً...! -جود رُدّي...! قالها بابا بشدة استفزتني...! كنت قاعدة أفكر في شي قوي..الكلام إلي حقولو لازم ما يكون شي عادي..لازم كلماتي تكون ما تنسي...! بابا باستنكار:جود!!! قلت ببطئ شديد:بابا..أحبك...! -ها...؟! ضحكت:اييييييييوة..ايوة أحبك..أحبك قد السما و قد البحر..أحبك حب مو طبيعي..شي فظيييييييع...! -جُـ..جود إنتي... بابا كان متلعثم و حالتو حالة،قلت بتعداد:أول شي نبذتني و رميتني على عمو و جدة و هناك اتربيت أحسن تربية..أنا ما أقول إنك ما كنت حتربيني لكن ما كنت حتربى بنفس قيمة الحب إلي اتربيت بها..جمعتني مع علي غصباً عني..و دحين عارفة محد حيريحني غيرو.. و بدعوتك خليتني أسقط في وقت ما كنت مستعدة فيه للأولاد..بتسببك بمشكلة بيني و بين عمو خليتو يراضيني و أجبرتو..يسمحلي أسوي إلي أبغاه..إنسان سوا كل إلي سويتو حرام ينكره..حرام ما ينحب..ولا إنتا شايف غير كده...؟! قال بابا بتنهيدة:ما أدري يا بنتي أصدقك ولا لأ...! أكره نبرة بابا دي..تحسس سامعها بإنو حقيييير و مو متقي الله فيه..على عكس الواقع...! اتنهدت:إلا ما قلتلي..ليش اتصلت...؟! -و هذا سؤال تسألينُه أبوكي...؟! -لا بس قلقت..يعني مو متصل في دا الوقت إلا و في شي...! -إنتي شكلك تبغي الدُغري...شوفي جود..أنا جايك ذحين...! -نعم...؟! -يا بنتي ما يسير..شوفي أنا بقدر ظروفك و أتجاوز و أقولك ما يسير..المفروض إنك ترحبين فيا...! -ما يحتاج تقولي أنا أعرف الواجب لكن استغربت..إنتا فاجئتني...! -خلاص طيب أنا جايك ذحين...! قلت بأسلوب حاولت يكون لطيف:طب..يعني بس حتمر..لإنو أنا مني جاهزة و علي يرجع تعبان ما يقدر يشوف أحد...! -و إن كان..في شي اسمه أسلوب...! -آسفة..إنتا فاجئتني..كمان..علاقتي بك ما تخليني أو تخليك ترحب بيا في أي وقت...! -قصدك نظرتك لي...! عضيت على شفتي السفلى..كنت عارفة بابا ما حيفهم كلامي لكن ليش قلتلو..مادري...! -طيب ما رديت عليا دحين..إنتا بغيتني في موضوع...؟! -ايوة بكلمك في شي و بمشي...! ابتسمت:أجل حياك الله...! -بدري!! و قفل،حطيت الجوال جمبي و قمت رحت لسعود إلي ما زال يلعب في السيب...! قلت:سعود...! -نعم...؟! -حبيبي قوم ادخل غرفتك..جدو ذحين جاي و أبغاك تقعد في غرفتك و ما تخرج هوا يبغاني في موضوع...! قال بملل:جدو أبوكي...؟! -ايوة...! وقف و قعد يبربر "يتحلطم" و هوا يدخل الغرفة:كل ما يجي إدخل الغرفة إدخل الغرفة..ليش هوا مو إدخل الغرفة؟!" صادق سعود..بابا عمرو ما جا كزيارة اب عادية لبنتو...! روقت الصالة و جهزت شاهي في طقم مرتب و قعدت أستنى...! ما استنيت وقت طويل لين ما دق الجرس و قمت و قلبي يدق بقوة...! حسيت بالغيض من نفسي..ليش أتوتر..ليش مني قوية و جامدة..ليش دقات قلبي و حرارة جسمي يخونوني في المواقف دي..ليش...؟! فتحت الباب بعد ما اتأكدت إنو بابا و بكل غباء أخفضت بصري و أنا أقول:اتفضل...! دخل بابا:زاد فضلك...! قفلت الباب و أنا أسحب نفس أما بابا فجلس في الصالة قبل ما أقول _كعادتو_...! كنت حتجه للمطبخ أجيب الشاهي و بقية الأشياء لكن بابا وقفني:جود..تعالي اجلسي...! -الشاهي جاهز...! -ما رح أشرب شي عندك...! مادري هل قصد بابا يهينني أو يجرحني بجملتو دي...؟! جلست في نفس الكنبة إلي بابا كان جالس عليها..كانت طويلة كفاية عشان يكون بيني و بينو فراغ معقول و مُريح ليا...! إلي قطع الصمت كان أنا،قلت:ايش الموضوع إلي بغيتني فيه...؟! طالع بابا فيا بابتسامة:ايش هذا..لا سلام ولا كلام...! طالعت في بابا لثواني قبل ما أقول:كيفك...؟! -بخير ما دام إنتي بخير...! يا الله قد ايش أحب دي الجملة من علي و عمو و جدة..أحسها طالعة من قلب..أحس إني لو قلتلهم إني كويسة حيرتاحو و يسيروا من جد بخير...! -بابا ايش الموضوع إلي بغيتني فيه...؟! قطب حواجبو:يا بنتي إنتي ليه كذة..فيكي عجلة و قلق و علطول مربوشة...! قلت بقهر:طبيعي بقلق..إنتا من يوم الخميس ما سألت عني..رحت المدينة و رجعت ولا كأنو شي..دحين..تتصل عليا في الصباح و تقولي ابغاكي في موضوع و ما تباني اقلق...! -احترمي نفسك و لا ترفعي صوتك..و إنتي إلي ما اتصلتي و بعدين لا تلعبيلي دور الخايفة المفزوعة..خلاص بقولك..أنا جاي هنا أبغى أتكلم معاكي في وضعنا...! تصدقوا ارتحت...؟! أنا من يوم ما قلي:"أبغاكي في موضوع" و الدراما عندي شغالة..اتخيلت أحداث و أشياء زادتني قلق..لكن ما دام قال وضعنا فألف حمد و شكر...! -شوفي جود..أنا بأتكلم و أقول لكن بشرط تسمعيني و ما تقاطعيني...! قلت و أنا أتنهد:اتفضل...! -أنا يا جود كنت ناوي أناقشك في فعلتك يوم الخميس لكن عمك رجاني ما أتكلم و لا أنا شايف إننا لازم نوعيكي لغلطك...! طالعت في بابا و أطلت النظر لحد ما قال:ليش تطالعي فيا كذة..كلمة الحق ما ينزعل منها ولا إنتي شايفة غير كذة...؟! -لا ما ينزعل منّها بس للأسف ما نقدر نقولها دايماً...! -في هذي صادقة و معاكي حق...! لا تتوقعو أناقشو في كلامو و أقولو نفس إلي قلتو لعمو..إلي قدامي إنسان ما يفهم..لو قلت إلي قلتو لعمو حيفتح معايا نقاش سخيف أترفع أنا عنو...! بابا:أنا يا بنتي جايك اليوم بنفسي عشان أقولك إن إلي قاعد يسير غلط..ما ينفع أنا و إنتي نستمر كذة..الناس بدأت تتكلم و أنا مني خايف على نفسي قد مني خايف عليكي..أنا مني أناني زي ما تقولين..أنا خايف على أولادك و بيتك..أنا يا بنتي... وقف بابا كلام و كأنو مو قادر يكمل...! منظر بابا و نبرتو كانت مثيرة للشفقة..كنت على وشك أتعاطف معاه لكن صوت بداخِلي دوى:"كدااااااااب"...! حاولت أتجاهل الصوت لكن ما قدرت..ما قدرت أتعاطف..ما قدرت أبدي أي ردة فعل..لكن قدرت..بس قدرت _بعد ما دققت النظر في عين بابا_ أشوف قد ايش الصدق أبعد ما يكون عن كلامو...! شفت أشياء كتيرة وحشة في عين بابا..أشياء من زمان عارفتها و شايفتها لكن دي المرة غير..دي المرة شفتها كلها مرة وحدة الشي إلي خلاني أقول بكل ثقة و حزم:أوكي بابا..أنا ممكن أبدأ معاك صفحة جديدة لكن بشرط... طالع فيا بابا بحواجب مقطبة،قلت:أبغى أعرف كل شي من يوم ما غلطت لحد ما حطيتني عند جدة و عمو...! بابا انصدم و سار يتنفس بصوت مسموع...! أما عني فما بعدت عيني عنو و أنا أستنى...! شفايف بابا..بدأت ترتجف..وبدأ يطلع أصوات قصيرة متكرررة كأنو يبغى يقول كلمة معينة بس مو قادر...! شوية شوية حسيت بوجه بابا يحمر..خُفت..مابغا يسير لو شي عندي و بسببي...! قمت بسرعة و جلست جمبو..حطيت يدّي على صدرو و اليد التانية لفيتها على أكتافو و قعدت أسمي و أقرأ عليه و أهديه...! و الحمدلله بعد مدة هدي بابا و رجع وجهو طبيعي و عضلاتو ارتخت..اتنهدت أنا براحة..لالا..لا تحسبو حب أو اهتمام..أنا في دي المواقف أحكّم إنسانيتي لا أكتر و لا أقل...! قلت:أجيبلك شي...؟! -موية...! جبت لبابا موية..شربها مرة وحدة و حط الكاسة عالطاولة إلي قريبة منو...! قلت:أحسن دحين...؟! طالع بابا فيا بعتاب فقلت:هدا شرطي و طلبي..أنا من حقي أعرف كل شي...! قال بابا بانفعال:ايش تبغي تعرفي أكثر من إنك بنت حرام...؟! حسيت بدمي يفور..قلت:أول شي وطي صوتك سعود لا يسمع و يروح ينطقلي الكلمة في كل مكان..تاني شي في أشياء كتير مي واضحة لازم أفهمها...! همس بقهر:ايش..ايش...؟! -أمي..اسمها و أصلها و كل شي عنّها...! -تسألي عن وحدة حقيرة ليه...؟! -أبغى أعرف..أبغى أعرف حقيقة هدي الإنسانة إلي قلتو إني على خطاها..أبغى أعرفها أو على الأقل اسمها...! قال بابا و هوا يتجنب يطالع فيا:أنا جاي هنا عشانك و عشاني..مو عشانها أو عشان حكايتك...! -حكايتي هيا حكايتك هيا حكايتها...! -لأ...! مسكت يد بابا و قلت برجاء مستميت:بابا الله يخليك..الله يخليك قُلي..أنا مابغا منك شي غير إنك تقولي..الله يخليك...! سحب بابا يدّو:حيفرق معاكي شي...؟! قلت و دموعي كانت قريبة:بابا الله يخليك..الله يخليك قولي..أبغى أعرف...! قال بشدة:جود خلاص..قلت لأ يعني لأ...! بكيت من شدة بابا:أبغى أعرف..إذا كانت حقيرة و كلبة و بنت شوارع زي ما تقولو كيف جيت..كيف حملت بي...؟! بابا بانفعال:اتقي الله..هذا مقدر..حتعترضي على ما كتب الله...؟! -أنا ما أعترض..أنا أبغى أعرف..بس أبغى أعرف...! بابا بنفاد صبر:تعرفي ايه...؟! -أبغى أعرف كل إلي سار..حكيني الحكاية...! -و مين إنتي عشان أكلمك في موضوع زي هذا...؟! طالعت في بابا و قلت بحزن باكي:أنا الموضوع كلو..بابا ارحمني و ارحم حالي..قُلي..أنا تعبت..أنا أحس إنو كل إلي أعرفو غلط بِـ غلط..أحس إنو في شي ناقص و أبغى أعرفو..من حقي أعرفو...! قال بابا بتنهيدة:أستغفرك ربي و أتوب إليك...! طالع فيا:قد ما تبغي تعرفي قد ما أنا مابغا أقول..يا بنتي أنا أتألم لمن أتذكر..صعب عليا أتكلم..صعب...! -أنا أواجه نفس الصعوبة..بابا إنتا لازم تتكلم..لازم تجبر نفسك تتكلم زي ما أنا جبرت نفسي من قبل على أشياء كتيرة أكره أسويها عشانك و عشان عمو...! سحب بابا نفس و قال:حتكلم..لكن فيه تفاصيل أعتذر عن إني أقولها...! -براحتك..المهم أفهم و يسير في شي ممكن الواحد يصدقو...! -كان عندي شغل..المدير طلب مني أرتب ملفات ما يستأمن عليها أي أحد و أنا ما حبيت أوقف و أكمل شغل بكرة...! كنت مسلمة كل حواسي لبابا..سمعي و بصري و فؤادي...! -كان الوقت ليل لمن خلصت و كنت حركب سيارتي لكن... عض بابا شفايفو و نزل راسو لتحت:وقفتني "لمى" لمن قالتلي بإنها تخاف تركب تاكسي لحالها في ذا الوقت و رجتني أوصلها...! صدري سار يهبط و يطلع،قلت:لمى أمي...؟! غمض بابا عينو و فتحها و هوا يهز راسو بايوة...! قلت بتساؤل لنفسي:لمى...؟! و كأني بحاول أثبِّت الاسم..أمي أنا..اسمها لمى...! -ايوة لمى..لمى أو خديجة...! طالعت في بابا باستغراب فقال:اسمها خديجة لكننا كنا نناديها لمى...! قطبت حواجبي:ليش كانت لكم معرفة قوية بها..و مين كنا..مين تقصد...؟! -الشركة..الكل يناديها لمى..كانت في الورق بس خديجة...! طالعت في بابا و قلت و أنا أرجع قصتي ورا أدني:و بعدين..وصلتها و بعدين...؟! سحب بابا نفس و قال و هوا لا زال يطالع تحت:وصلتها لشقتها و... قاطعت بابا:شقتها...؟!،ليش مالها أهل و كيف شقتها..احنا هنا لازم محرم...! قال بحقد:هذي وراها ناس..تسوي إلي في راسها و تضرب بالقوانين عرض الحايط...! -طيب وراها ناس و جنية و تسوي إلي في راسها..لكن مين هذا إلي يسكن وحدة زيها في عمارتو...؟! -لا تسأليني عن أي شي..أنا مادري..هيا دلتني على عمارة و وصلتها لها و بعدين طلبت مني.. قاطعتو:معليش..لحظة لحظة..العمارة..كانت عادية ولا...؟! طالع بابا فيا بغضب:ايش قصدك يعني...؟! قلت و أنا أرفع أكتافي:ما قصدي شي..بس أبغى أعرف...! -جننتيني أبغى أعرف أبغى أعرف..العمارة ما كان فيها شي يشكك..كانت عمارة زي هذي إلي إنتي ساكنة فيها...! بعد صمت ثواني قلت:ايوة و ايش طلبت منك...؟! -طلبت مني أوصلها لشقتها و... قاطعتو بهمس مصدوم:و توصلها لشقتها ليه...؟! -قالتلي خايفة و... -تاكل تبن خايفة..أحد قلها تتأخر عن بيتها..ايش الـ... بابا ما صدق أوقف في صفو:فعلاً كانت حقيرة و كلبة و ماكرة و... قلت:و بعدين..ايش سار...؟! قال بنرفزة:سار إلي سار...! قلت بغيض:يعني ايه سار إلي سار..يعني ايه...؟! -إنتي غيبة..ما تفهمي...؟! -أنا مني غبية..أبغى أعرف كيف...؟! قال بعين اتوسعت بشكل مرعب:كيف ايش...؟! قلت بصوت مرتجف:أوكي أنا غبية..أنا مني فاهمة..فهمني...! أعاد التساؤل:إنتي غبية...؟! -ايوة غبية..يلا فهمني...! قال و هوا يحرك يدّو:طلعتها للشقة و حلفت عليا أشرب شي عشان تعب الطريق و..و.. طالعت في بابا و أنا أحس بالحزن يسيطر عليا:خلعت عبايتها...؟! طالع بابا فيا بصدمة،قلت بصوت باكي:فتحت شعرها...؟!،اتمايلت قدامك زي الـ... بدأت أبكي..غطيت وجهي بيدّي و قعدت أبكي...! بابا خاف:جود بس..بس خلاص..جود اذكري ربك...! قلت و أنا مغطية وجهي:ليه..ليه كده تسوي فيا..أنا ما سويتلك شي..ايش كان حاوجك..زوجتك ايش كان ناقصها..جمال و لا حُب ولا أخلاق...؟!،إنتا ليه كده سويت فيا..أنا..أنا ما سويتلك ولا حاجة..أنا..أنا ما..أنا... بابا حضني فازداد بكايا...! ما أبغاه يحضني..ما أبغاه يكون أبويا..ما أبغاه هوا..أنا أبغى عمو..أنا ما أحبو..مابغا أبوية يكون كده..مابغا هدا يكون جد أولادي..ما أبغاه يكون نسيب زوجي..ما أبغاه..أنا أبغى واحد تاني..أبغى رجال..أبغى اسمي يكون تحت اسم رجال..أبغى أحط عيني في عين كل الناس و أقول:"هدا بابا"،بكل فخر أقولها زيي زي أي وحدة شايفة في أبوها الرجل المثالي...! تركني بابا بعد ما خف بكايا،قال:عشان كذة ما بغيت أقولك...! مسحت دموعي و اتظاهرت بالقوة لإنو جا على بالي سؤال يحتاج قوة...! قلت:أنا..أنا بقي عندي كم سؤال يحتاجو إجابة...! -اسألي..معد بقي شي يتخبى...! -آآ..هل..كنت إنتا..يعني..أبغى أعرف لو..إنتا..أول أحد..قصدي..يعني..ماما..يعني إنتا..إنتا أول شخص لها ولا... -نعم...؟! طالع فيا بصدمة مخلوطة بغضب و خوف:إنتي..إنتي كيف تتجرأي و تسأليني هذا السؤال..كيف...؟!..لا..لا إنتي..إنتي شي ثاني..إنتي شي مو طبيعي...! -جاوبني..ايوة ولا لأ...! بصراحة..ما سرت حاسة بأي شي..كنت بس أبغى أعرف و أعرف..تماماً زي المدمن..بس يبغى المخدرات من غير لا يفكر بالطريقة و الوسيلة...! قال بابا بانفعال:مو من حقك تسأليني ذا السؤال...! -بابا إنتا لو جاوبتني حرتاح و حفهم أشياء كتيرة أنا مني فاهمتها...! -إنتي ايش تبغي و ايش تقصدي بالضبط...؟! -بابا إنتا عارف كويس أنا ايش أقصد..أنا عارفة مو مفروض أحط عيني في عينك و أسألك في شي زي كده لكن وضعي و وضعك غير..بابا أرجوك جاوبني...! -يا بنت استحي..إذا منتي محترمتني كأبوكي احترمي سني..احترمي شيبتي..احترمي ولدك إلي جوة..احترمي إلي في بطنك..احترمي نفسك وذاتك...! -ذاتي...؟!،ذاتي تعبت من كُتر الاحترام..ذاتي تبغى تعرف ما تبغى تضايقك والسلام..ذاتي ما طلبت منّك تقول إلا..ايوة أو..لأ...! -إنتي سألتيني و أنا من حقي أجاوبك أو ما أجاوبك...! -طب بس هُز راسك..بس...! -يا بنت ايش في راسك إنتي..قاعد أقولك لأ ما رح أجاوب...! -بابا..أنا من حقي أعرف تفاصيل قصتي كاملة..جاوبني..جاوبني إنتا كده تاخد ذنبي.."تابعت بطفولية"..بابا أنا ما رح أسامحك..لو ما جاوبتني ما رح أسامحك و حيقعد دا السؤال في نفسي ليييييييين... قاطعني بصرخة:"لأ" فزيت من الصرخة المفاجئة فقال بابا:لأ..ارتحتي..خلاص أخذتي المعلومة إلي تبغيها ولا لسه عندك أسئلة قذرة ثانية...؟! سكت..كنت أبغى أضيف دي المعلومة للي عندي..رغم إني كنت متوقعة الإجابة لكن لمن انقالت في وجهي و صاحبها إلي متأكد منّها صرح بها ليا حسيت بشي تاني..حسيت بها أقوى و أوسخ و أبشع...! شي..يعور القلب...! اتنهدت بهدوء و بطئ لكني رفعت راسي بعد ثواني و أنا أحس الإستماتة في إني أعرف ترجعلي...! قلت بصوت واطي:طب بابا..لمن ماما حقيرة و بياعة هوى كيف جابتني..معقول ما كانت تاخد أي موانع...؟! أخفض بابا راسو:مو هنا العجيب.."رفع راسو و صوتو"..مو هنا إلي مني قادر أصدقو..أمك في حياتها ما حملت..أمك كانت تاخذ موانع..طول عمرها..من يوم ما صاعت..المفروض تأثر عليها حتى لو وقفتها..لكنها حملت..حملت فيكي رغم كل الموانع إلي أخذتها...! طالعت في بابا بعجب:حملت بي و هيا مداومة على حبوب تمنع الحمل...؟! طالع بابا فيا باستغراب لمن قلت و أنا أحاول أحشرو:طب مو هيا كلبة و حقيرة..ليش ما حاولت تنزلني...؟! -إنتي ما عندك إحساس..أنا أكره أتكلم في ذا الموضوع..أتألم و ما أحب أنسأل في ذي التفاصيل...! -إذا كنت تتألم فأنا أتألم أكتر منّك..بابا أنا و إنتا في دا الموضوع مافي بينا خصوصية أو حساسية..جاوبني بابا جاوبني..ولا أقولك..قولي القصة كلها...! -أقولك عن ايه؟؟!!،عن وحدة من عجايب الدنيا ولا أقولك عن عقاب ربي ليا..أقولك عن ايه ولا ايه...؟! -قولي عن كل شي..و زي ما اعتبرتني عقاب..اعتبرني رحمة..ربي عجلك عقابك في الدنيا..ربي يبغى يطهرك من ذنبك و إنتا زعلان...؟! كلامي كان زي البلسم بالنسبة لبابا..حسيتو لان و هدي و حيقولي على كل شي..أنا ما قلت إلي قلتو تخفيفاً عن بابا..أنا قلت إلي قلتو عشان أبغى أعرف..كوسيلة لإقناع بابا إنو يتكلم..و سواءً كان في كلامي شي من الصحة أو لأ فأنا ما يهمني..أنا بس أبغى أعرف..بس...! طالع بابا فيا بتأثر..بابا شخصية غريبة..غير متزنة؛دحين متأثر و ممكن يقلب معايا 180 درجة للأحسن لكن بحلول الصباح يرجع يكرهني..عادي..عادي جداً...! ابتسمت:يلا بابا حكّيني الحكاية...! اتنهد:حملت بك... قاطعتو:لحظة لحظة..إنت ما كنت خايف تعلم...؟! -لأ..كانت معروفة فاجرة..و معروف عنها ما تتكلم و تتبلى إلا على إلي يصدها..أذكر مرة اتبلت على واحد و في الأخير طلع مطنشها لأنها أكبر منُّه و كمان كان متربي فما أعطاها وجه..حقدت فاتبلت..غير كذة ما تنطق بحرف...! في نفسي..حبيت دا الشاب و بقوة..لو بابا كان زيو!!! قلت:المهم إنتا..بعد ما غلطتوا و حملت..ليش قالت لك..المفروض تنزلني سُكّيتي و ما توجع راسها...! قال بقرف مقهور:مو ما كانت تبغى تخسر فلوس...! -و طبعاً إنتا أعطيتها عشان تسكتها...! قال و هوا يهز راسو:نعم..أعطيتها لكن يوم موعد العملية انسرقت شنطتها و معاها الفلوس...! -oh my god..و بعديييين...؟! تعرفوا..مني حاسة بإنو دي القصة قصتي قد مني حاسة إنها قصة مثيرة تستحق الاستماع و الإنصات...! بابا استغرب حماسي إلي في غير وقتو لكنو قال:انسرقت الفلوس فرجعت لي و طلبتني فأعطيتها...! -أعطيتها مرة تانية...؟!،طب..بعدين..بعدين ايش سار...؟! اتنهد:"وصلني" طالع فيا:قالت لي أوصلها لإن السواق إلي تثق إنو ما يعلم سافر و سواق أهلها ما يرضى يوديها مكان إلا بإذن من أهلها...! قلت باستغراب:لها أهل...؟! -أجل...؟! -و وينهم عنّها...؟! -ما أعرف..كل إلي أعرفُه إنها كانت تروح مشاويرها "الوصخة" من الشغل..السواق إلي متفقة معاه يوديها من الشركة و يرجعها لها و بعدين يجي سواق أهلها و ياخذها من الشركة لبيتها...! طالعت في بابا:هذي ما فقلبها خوف...؟! -أمك ما في قلبها شي غير الصياعة و الشباب الصغار...! -رجاءً لا تنسبها ليا..أنا أمي جدتي إلي ربتني..مو دي إلي ما عرفت اسمها إلا و ولدي عمرو أربعة سنين...! كملت و أنا أنتبه لشي:بس لحظة..ما كانت تواجه مشاكل..متى كان يمديها تسوي شغلها و تروح مع داك السواق و ترجع بعدين يجيها سواق أهلها..كيف كده...؟! سحب بابا نفس:كانت مفهمة أهلها إن شغلها يستمر لين آخر الليل...! -و أهلها بُله..ما يفهموا...؟! -ما أدري يا بنتي..أنا علاقتي فيها ما كانت قوية لحد إني أعرف ظروفها..لا تسأليني...! قلت باستغراب:و إنتا كنت ماشي معاها في علاقة و إنتا ما تعرف ظروفها...؟! -أنا بس.."انفعل"..أنا قلتلك إني غلطت مو بإرادتي..شي قدامي و... ما اقتنعت بفكرة "مو بإرادتي" لكني اتنهدت و قلت:طيب و بعدين..وديتها ولا لأ...؟! -وديتها..ما كان بيدي حيلة..دخلت الحارة القديمة و هناك عند العمارة إلي حتم فيها العملية اتفاجأنا بسيارات الهيئة و الشرطة و بالدكتور إلي أخذت الموعد عندُه نازل بين أيادي الشرطة..سحبت نفسي من المكان و كان كل همي أتخلص منك....! زودت إنصاتي و قلت و في خيالي كتير احتمالات:ايوة... سحب بابا نفس:دورت على كذة طبيب..و في كل مرة كان يطلع مانع..مرة الدكتور مسافر..مرة مريض..مرة انمسك و غيرُه كثير.."بلع ريقو و انبح صوتو"..تخيلي..تخيلي تسسسعة شهور نحاول ننزلك..نحاول..نحاول مافي فايدة.."اتوسعت عينو و بدأ يحرك يدو و هوا يتكلم"..كل مرة كان يطلع شي..تسعة شهور..تسعة شهور و احنا في دوامة محاولات فاشلة...! قلت بعجب و عدم تصديق:تسعة شهووورر!!!؟؟؟ طالع فيا و قال بطريقة تأكيدية:تسسسعة شهور.. تابع:و حتى بعد ما ولدتك..جات لتحت بيتي و اتصلت عليا..نزلت و ما دريتبها إلا راميتك عليا..أخذتك و أخذتها و رحت لشقتها و هناك صرخت بأعلى صوتها بإنك شيطان..شيطان ما قدرت تتخلص منو لمدة تسعة شهور رغم إنها آذت نفسها بالضرب و حاولت تطيح لكن ما كانت تزبط أي حركة.."ضحك ضحكة صغيرة ساخرة"..و رغم تعب الولادة إلا إنها هددتني بتدمير حياتي..أنا خفت..كانت قد إنها تسويها،عشان كذة أخذتك و حاولت أتخلص منّك..عند البحر،عند المسجد،عند ملجأ..ما قدرت؛الناس كانو دايماً حولي،تخيلي..يوم أحد الساعة ثلاثة الليل و الناس في البحر..و إذا ما كان حولي أحد تبكين بكى عالي مو طبيعي يلم الناس من بيتها..كُنتي كنك فاهمة..كُنتي..كُنتي فعلاً شيطان صغير زي ما أمك قالت...! كدب..مو معقول..ايش إلي قاعدة أسمعو..محاولات فاشلة لإسقاط جنين تستمر تسعة أشهر و ناس في البحر يوم الأحد الساعة تلاتة الليل!!! طالعت في بابا:و بعدين..ايش سار..كيف وصلتني لعمو و جدة..كيف قلت لأهلك دا الخبر..و كيف أنا كبرت بعدها و كيف..قُلي..كمل القصة...! سحب بابا نفس و نفثو و كأنو يستنى ردة فعل لكنو ما لقى إلا نظرات الإثارة و التحمس و..الفضول! قال:ما كنت بعقلي..أخذتك و رحت لبيتي،هناك لقيت مرتي صاحية في انتظاري..هيا صحيت من يوم ما خرجت فجأة و قعدت تستناني إلين ما جيتها و إنتي في يدّي...! مع كل كلمة تخرج من بابا كان قلبي يسرع في النبض..كنت..مسلوبة التركيز و السمع و كل شي...! قلت:ايش سوت..كيف رحتلّها بيا..كيف اتجرأت تواجهها...؟! -قلبت الدنيا عليا..صرخت و صحت الأولاد من صراخها و طردتني من البيت...! -طردتك...؟! -آآآه لأ..أنا إلي خرجت..آآ المهم المهم..أنا خرجت و منظر أولادي ما أنساه..نظراتهم كانت تذبحني و لحد الآن كل ما أطالع فيهم أشوفها..عشان كذة أنا... قاطعت بابا لإني ما كنت أبداً مستعدة أسمع أعذار سخيفة تانية...! قلت:بس وقتها سارة ما كانت فيه..صح...؟! -لأ..إنتي أكبر...؟! -ايوة أنا أكبر..المهم..و بعدين..رحت لجدة...! -ايوة..ما كان قدامي غيرها..لقيت نفسي من غير ما أحس برة البيت..راميكي على الكرسي إلي ورا و ماشي بالسيارة لبيت أمي...! قلت و أنا أحس بالخوف على نفسي:حاطني ورا..بيبي مولودة حاطني ورا لحالي...! أخفض راسو:كنت أبغاكي تطيحي.."رفع راسو و قال بصوت عالي"..بس ما طحتي..قعدتي حية..ما صابك ولا جرح ولا خدش..شيطان..فعلاً شيطان...! طالعت في بابا مصدومة،قلت بقهر:مو شيطان..إلي سلمني تسعة شهور سلمني مشوار النص ساعة...! قال بابا من غير ما يعلق على كلامي:هناك أمي هزأتني و سخطت عليا و طردتني...! -طب ليش اتكلمت..ليش لمن رحت لجدة قلت إني بحرام..ليش ما فهمتها إني بزواج...؟! -مادري..أنا رحت لها من غير ما أحس..و اتكلمت بلا حساب...! -طب ليش قلت لجدة..ليش ما اتكلمت قدام زوجتك بلا حساب...؟! -ما أعطتني فرصة..دخلت بك و علطول صرخت و هاجت و ما جا الصباح إلا و هيا خارجة لبيت أهلها...! -أوفف..خرجت...؟! -طبعاً..و ربي ستر ما دريت إنُه بحرام و لا ما كان رجعت لي...! بصراحة كبرت في عيني..فوق ما عندها مبدأ و كانت ما حترجع لو بحرام كمان يحبها..باين إنو يحبها..ولا ما كان اتكلم كده بعيون واسعة و صوت حار متحمس...! بس كده معناتو خرجت لأهلها و سارت مشاكل أكبر مما أتصور..أجل عشان كده الناس اتكلمت و تَبَّلت ما شاء الله..و أنا كنت مستغربة؛أحسبهم اتكتموا عالموضوع..والله لو كده يحقلهم يكرهوني..قصدي مرة بابا و أخواني..أكيد حسوا إنو وجودي كان سبب لمشاكل بين أبوهم و أمهم و كان سبب لتوتر عائلة بكاملها..من جدة لأولادها لأولادهم...! سحب بابا نفس:و هذا إلي صار..عمك هوا إلي أخذك..كان صغير و كنتي أصغر..و من يومها عاد و هوا مصدق إنُه أبوكي و إنتي بنتُه...! -قصدك سار بابا و سرت بنتو..عمو عُمرُو ما كدب كدبة عشان يصدقها..هوا لقاني قُدامو،وحدة شبه يتيمة..شي طبيعي حيحس بالأبوة تجاهي...! طالع بابا فيا بعتاب:أنا مني جايك عشان تزيدي حسرتي و إحساسي بالذنب...! -لأ..لا تتحسر..صدقني..لو عشت معاك..في بيتك وسط أولادك ما كنت حتربى زي ما اتربيت عند عمي و جدتي..مو عشان شي فيك..أولادك متربين أحسن تربية..إنتا و زوجتك إلي أتوقع إنها ما كانت حتأذيني ربيتوهم..بس أنا ما كنت حتربى زيهم..زوجتك غصباً عنها ما حتقدر..حتشوف خيانتك لها فيّا..إنتا نفسك ما حتقدر..إنتا و أنا بعيدة عنك ما تطيقني كيف و أنا في بيتك...؟! -لالا..أنا ما أكرهك...! قلت و أنا أتنهد:ما علينا..المهم..ايش عملت بعد كده...؟!،وين رحت...؟! -أخذوكي جدتك و عمك من هنا و أنا بدأت أصالح مرتي من هنا...! -طب كيف كان الوضع..أنا نفسي أعرف الوضع فترة ما كنت بيبي..كيف كنتو عايشين كعائلة..كنتو عادي تتزاوروا و الحياة ماشية ولا كنتو شبه متقاطعين...؟! -كلهم كانو عادي إلا أنا و أولادي...! -بس كانو صُغار...! لمن شفت نظرة بابا المستفسرة:أولادك كانو صُغار لسه...! قال بحزن:ايوة كانو صغار و وجودك سبب لهم مشاكل أكبر منّهم بكثير...! وجودي...؟!،ليش ما يقول فعلتو...؟! سحبت نفس و سحب بابا كمان...! قلت:طب بابا..تقدر توصلها...؟! -ايش...؟! قالها بابا باستنكار،فقلت:بابا أبغى أعرف..تقدر توصل لماما ولا لأ...؟! وقف بابا:أنا عمري ما شفت وحدة بجراءتك..ما كفاية الأسئلة القذرة إلي أجبرتيني أجاوبك عليها..لسه كمان تبغيني أوصلها!!! ما كنت أبغى بابا يزعل..مو حُباً فيه بس طفشت..طفشت من إنو بيني و بينو حساسية..خلاص تعبت و قرفت...! مسكت يدُّو و أنا جالسة و قلت:بابا لو أقدر أقوم و أبوس راسك كان قمت لكن ما أقدر و ما فيا شدة..بابا لا تزعل..أنا ما كان قصدي أضايقك أو أزعلك منّي..بابا بليز لا تزعل و تخرج من بيتي زعلان...! طالع بابا فيا لثواني بعدين انحنى:نزلتلك...! انفجعت..أنا كنت بتكلم بس..ما عنيت ولا كلمة وحدة من إلي قلتها...! لازم أتخذ قرار..لحد يستهين..التصرف إلي حسويه دحين حيحدد مصير علاقتنا...! كرامتي و مشاعري ما كانو سامحين لي بسسس... نزلت دمعة من عيني و أنا أبعد بشفاهي عن راس بابا...! حسيت بإني سويت شي المفروض إني ما أسويه رغم إني كنت حاسة إني لازم أقبل راس بابا...! أنا من جوتي أحس إنو ما يستاهل..أنا من جوتي أحس بحرارة..أحس بقلبي يزيد نبضو..و أحس إنو جسمي ولع..أحس كل خلية جوتي ثارت..كأنو جسمي و عقلي و عواطفي رافضين إلي سويتو بس أنا حاسة رغم صعوبتو إنو الصح..إنو... رفعت راسي مصدومة..مسكت جبهتي و طالعت في بابا بصدمة...! قلت بشفايف مرتجفة:بَـ .. بَـ ... قال بشفاه مهتزة:كنت مقرر..كنت قاعد أقول..لو ما باست راسي تنسى إنها بنتي..كنت أتمنى ما تقبلي راسي..لإني.."دمعت عينو"..كل ما أشوفك أتألم..كنت أبغى عذر عشان أقاطعك بس إنتي في حياتك ما أعطيتي فرصة..أو سويتي شي ممكن آخذُه كعذز أو عيب فيكي و لمن حاولت أطلع عيب فيكي طلعت أنا الغلطان..لثواني الناس وقفت معايا لكن فجأة أمي و أخواني الاثنين و أولادي و حتى زوجتي..زوجتي إلي هيا زوجتي قالتلي:"كانت حامل..ليش خليتها تنفعل؟!"،رغم إن وجودك يضايقها إلا إنها عاتبتني...! نزل راسو و رفعو:قبل كنت أكرهك عشانك تذكريني بماضي أسود ذحين سرت أكرهك لإنك عمرك ما غلطتي عليا و سمحتيلي ألاقي فيكي عيب...! تابع و هوا يحرك يدّو و يتجنب يطالع فيا:دايماً كان..كان ربي معاكي ضدي...! طالعت في بابا مستغربة و مفجوعة..ايش دا الكلام...؟! قلت بانفعال:بابا..ربي أرحم بعبيدو من نفسهم..كيف تتكلم كده...؟!،كيف تتجرأ...؟!،هذا ربي..في كل شي لُه حكمة..اختار لي و اختار لك هدي الحياة..هذا اختيار ربي..مو اختياري أو حتى اختيارك...! إنتا..إنتا كيف تسمح للشيطان يلعب براسك..ربي حطك في اختبار لمن مشيت أمي بمفاتنها ظاهرة..صح فشلت في الاختبار و استسلمت لهواك لكن إلي إنتا فيه دحين اختبار تاني و أنا..أطلب منك تعديه..عشان لو ما عديتو أنا حتأثر..إنتا قدامك دحين ولدي..و زوجي...زوجي حسسو إني غالية عندك حتى لو ما كنت كده في الحقيقة لإنك بكده تفيدني؛احترامو ليا حيزيد..ولدي..ولدي لو حبك أنا حعشقك..لو عشقك أنا حموت عليك..إنتا..إنتا لو بس توسع أفق عقلك شوية حتلاقي إنو كل إلي حولك يساعدك..سمعتك..أولادك..زوجتك إلي تحبك..أخوك إلي عقلو يوزن بلد..أمك إلي مهما سويت تسامحك..كل دا و منتا قادر تستقر..منتا قادر تحس بالراحة..بابا و إن كنت في أيام قاسية عليك و تجاهك و أتكلم كلام جارح أنا محتاجتك..أنا أبغى يكون عندي أم و أب..أعرف أمي فاجرة ما تشرف بس..بس أبغاها..نفسي أشوفها عشان كده سألتك لو تقدر توصلها ولا لأ..نفسي لو بس ألمحها.."دمعت عيني"..أنا..أنا ما..يعني..يعني..أمي فاجرة و توطي الراس و أبوية ما يحبني..أنا حياتي صعبة..صح أقول دايما لنفسي و للناس إني مستقرة مع عائلتي الصغيرة و مبسوطة و مني محتاجة أحد بس..بس أنا كدابة..ايوة أنا كدابة..أنا أحياناً أغار من علي..لمن يحكيني أو يحكي سعود عن هبلو أو ذكرياتو مع أمو و أبوه و مع أخوانو و أخواتو..أحس في دي الظروف ما ألاقي شي أقولو..أحس إني أبغى أتكلم بس مافي شي ينقال..ذكرياتي مع عمو ما فيها قلة أدب أو هبل..عمو كان مُربّي و مُؤدِّب..ما كان صاحب عشان يشاركني في الأشياء إلي نسويها بالدسة من ورا أهالينا...بابا أنا والله أحتاجك..حتى لو سمعت أو حسيت بالعكس..اتأكد إني..إني لسه أبغى أب و إن كان حولي رجال كثير يحسسوني إنهم آباء بس أبغى الإنسان إلي أنا قطعة منو..أبغى سعود.."بكيت"..أبغى سعود يشوفني معاك زي ما يشوف علي مع عمو سلطان..أبغاه يشوفني معاك إنتا لإنو عارف إنو إنتا أبوية الحقيقي..هوا..هوا دايماً يقولي:"عمو سعود أبوكي الكذبي و جدو إلي ما أحبو أبوكي الحقيقي"..أنا ما أبغاه يقول كده..أنا أحب عمو و هوا بابا و هوا كل شي بس..بس كمان إنتا..خلاص..خلاص لا تسير بابا..خليك عمو و خلي عمو بابا..ما عندي مشكلة بس..طفشت..خلاص طفشت..سعود كِبر و بدأ يفهم و أنا..حامل..لازم نشوفلنا صِرفة..لازم..أوكي حتى لو تكرهني..الله يخليك مثل قدام علي و سعود إنك تحبني..الله يخليك...! غطيت وجهي بيدّيني و قعدت أبكي...! كرهت نفسي و أنا قاعدة أترجاه..لأ أنا مو كده..مو هادي مشاعري أو يمكن ما أبغى هادي تكون مشاعري.....! طول عمري و أنا مستقلة..طول عمري و أنا أقول إني ما أحتاج بابا لإنو عمو مكفيني و زيادة..طب ليه قاعدة دحين أترجاه..أنا حُمارة أصلاً..أترجاه ليه..أنا قوية و ما أحتاجو..أنا... وصلني صوت بابا هادي يخفي وراه أشياء ما أعرفها:جود..جود خلاص..خلاص لا تبكي..أنا..أنا و إنتي حنبدأ صفحة جديدة مع بعض..حنسى كل إلي سويتيه ليا و حبدأ معاكي صفحة جديدة...! رفعت راسي:و إلي سويتو إنتا...؟! -ها...؟!،أنا....؟! ما حعطي بابا فرصة ينكر أو شي،قلت:أنا كمان حنسى كل إلي سويتو ليا و حبدأ معاك صفحة جديدة...! ابتسم:أجل خلاص...! اتقدم مني و جلس جمبي:أنا حكلم عمك و حقولو على إلي سار و أنا حأوضح للكل إنو كل إلي بيني و بينك انتهى و إنو أنا و إنتي ما بينا أي شي سيء...! هزيت راسي:لاء..لا تتحمس..خلينا واقعيين..من ثانية حتحبني و أحبك..لا طبعاً..احنا محنا بزورة أو زعلنا استمر ليوم أو يومين..بابا هذي سنين..هذي 24 سنة..لا تستهين..بابا مو مهم نحب بعض قد ماهو مهم تصفى نفوسنا..لا تتكلم أو تقول أي شي..خل يربي ييسر كل شي..أنا.."ضحكت بخفة"..أنا ربي واقف معايا عشان كده ما أبغى أي أحد يدخل أو يتصرف...! نزل بابا راسو و قعد يستغفر على الكلام إلي قالو...! رفع راسو:حتسيري تجي بيتي و تتكلمي عني عادي قدام الناس...؟! قلت و أنا مقطبة حواجبي:أنا أصلاً ما أتكلم عنك قدام الناس...! -ايوة..إنتي يا ما تتكلمي يا تقولي كلام مو كويس...! -لا والله..يشهد ربي عليا إني ما أنطق بحرف و إذا اتكلمت ما أقول إلا كل خير..أصلاً أنا ما أعطي فرصة لأحد إنو يكلمني عنك..أو يسألني عن ماضيا...! -المهم إن الكل يحسب إن علاقتي بكي سيئة أنا أبغى الناس ذحين تعرف إنها سارت كويسة...! -بابا..على فكرة لسه قبل أسبوع كانت النار والعة بينا..ما يسير كده..الناس مو مهمة..في ايش حيفيدوك..كلمة كلمتين حيقولوها و ينسوا..بعدين نبقى أنا و إنتا محتارين ما بين إتباع إلي اتظاهرنا بيه و ما بين إتباع مشاعرنا و أحاسيسنا...! -طيب..المفروض أحاسيسك تكون كلها حب و احترام ليا...! -أوكي..حتسير لكن شوية شوية..مو كده فجأة من قعدة وحدة..الاحترام موجود موجود سواءً حبينا بعض أو كرهنا بعض..يعني..المفروض يكون موجود..لكن الحب مو علطول..العجلة مي حلوة..أوكي اتصالحنا و اتصارحنا و أنا شاكرة لك إجابتك على أسئلتي لكن هذا ما يعني إنو علاقتنا تسير وردية..كده..out of the blue..نسير مثال لعلاقة بيرفكت بين أب و بنتو...! وقف بابا و قال بحكمة مادري من وين طالعة:الظاهر إنو مافي أمل...! طالع فيا:أنا خارج..تبغي شي...؟! قلت باستغراب ممزوج بصدمة:بابا!!! -خلاص..أنا اتأكدت من شي ذحين...! -بابا أ... قاطعني:إنتي أضعف من إنك تنسي إلي سويتو...! قلت بنرفزة من أسلوب بابا:الحمدلله إنك عارف إنك سويت شي...! وسع بابا عينو بصدمة من جملتي،قال:شفتي..إنتي الحقد و الكره كبر فيكي و الظاهر إنك حتنقليه لولدك..عشان كذة أعتذر عن التقرب منُه..علاقتي بك يا جود ما رح تتعدى حدود الواجب...! كانت صرخة على طرف لساني:"أحسن" صرخة اندفنت بداخلي..لإنها أدركت إنها لو طلعت حتسبب إلي ما يحمد عقباه...! وقفت و أنا أسمي...! قلت بطريقة إنهاء حوار:إلي يريحك أنا مستعدة أسويه..المهم تكون راضي عني..إنتا والد..و رضا الوالد من رضا الله...! اتنهد:أشوفك على خير...! و خرج...! جلست على الكنبة و ما كانت إلا ثواني قبل ما بكيت بصمت..مجرد دموع بدأت تتوالى على خدّي...! مشاعري..هدرتها..بكيت و أظهرت لبابا ضعفي..اعترفتلو بحاجتي لو قبل ما أعترف لعمو و لكم و لنفسي حتى...! آخرتها يطلعني غلطانة..حقودية و أضعف من إني أسامح..أنا لو زي ما يقول ما كان فتحتلو الباب..أنا أنقل الكره لسعود..والله العظيم أحاول قد ما أقدر ما أحسسو بشي..أشجعو لمن يحكيني عن رغد و عن بقية أولاد أختي خلود و عن تجاربو المعدودة معاهم...! أنا ما بزرع الكره في أحد..ولا أقول لأحد عن شنايع بابا..ما حقدت لا على أخواتي و لا على بنات عماتي و لا وطيت راسهم في التراب..أنا مادري..مادري ليه محد يقدر..هل لازم أصرخ و أندب و أشقق ملابسي عشان يحسوا بألمي..يحسوا قد ايش أنا عانيت...؟! ايش العالم دا...؟!،ايش الناس دولا...؟! "ماما.." رفعت راسي لسعود إلي قالها بتفحص،قرب مني:تبكي...؟! مسحت دموعي:لا حبيبي...! قرب مني أكتر فمديت يدّي عشان يجلس في حضني و جلس...! حط راسو على صدري و قال و هوا ينعم بالدفا:مامي ايشبك...؟! -ما فيا شي حبيبي..ما فيا شي...! -ماما هوا هدا أبوكي كل شوية يجي إنتي تبكي..إنتي تبكي..ليش كده...؟! حضنتو أكتر و دفنت راسي في رقبتو و قلت بصوت مخنوق:أنا بس متضايقة..هوا مالو دخل...! رفع سعود راسو و قال بإصرار:لأ..أنا ما أحبو..شرير..بس يخامصك و يقولك أشياء وحشة..هوا زي النونو ما يعرف عيب..هوا مامتو ما تقولو عيب...! شديت على سعود:خلص حبيبي خلص..هوا حُر..احنا مالنا دخل...! رفع سعود نفسو و لف يدّو على رقبتي و قال و هوا يبوسني:طب لا تبكي..أنا أزعل لمن تبكي..لا تبكي علشان الأغبياء...! كلام سعود غصبني أبتسم،قلت:عيب تقول كده سعود...! -طيب خلاص لا تبكي...! ابتسمت..سعود قال جملتو الأخيرة بنفس أسلوب علي لمن يبغى يسكتني و يبغاني أسوي إلي يبغاه...! رفعت راسي للباب إلي انفتح فجأة..و كان..علي...! طالعنا أنا و سعود باستغراب،قلت:وي..ايش جابك دحين...؟! قال و هوا يقفل الباب:مافي شغل و طفشان...! -و إنتو عادي كده سايبين...؟! ابتسم:مو سايبين بس مافي شغل و المدير رايق فاستأذنت..قلت ما دام إنك في البيت ليش أقعد...؟! أجبرت نفسي على الابتسام و أنا أشوف علي متجه لينا،جلس جمبي و فجأة اتغيرت ملامحو..قرب وجهو من وجهي و قال بحواجب مقطبة:جود ايشبك...؟! رجعت براسي على ورا:ايشبي..ما بيا شي...! -جود...؟! -علي ما فيا شي...! طالع في سعود:سعود أمك ايشبها...؟! قال سعود ببساطة:عشان هدا أبوها خاصمها...! -نعم...؟! صرخة علي خلتني أفز،التفت لو و قلت بسرعة:بابا كعادتو قلي كلام بايخ فاتضايقت و سعود كان قاعد معايا...! -وتردي عليه ليه...؟! -هوا جا ما اتصل..إلا اتصل بس قلي... قاطعني علي بعصبية:جا البيت...؟! -ايوة جا البيت...! -جا البيت...؟! -ايوة...! -جا البيت...؟! -علي ايوة ايشبك..جا البيت...! -جا البيت..كذة ببساطة..جا البيت...! -و يعني جا البيت..ايش فيها...؟! -فيها إنُه دخل بيتي و طلع و أنا مالي علم...! -ايش يعني..تبغاني أتصل عليك و أقولك إنو بابا جا...! -ايوة تتصلي عليا و تعطيني خبر..مو أقعد زي الأهبل..الناس داخلة و خارجة على بيتي و أنا مادري...! -لا من جد علي..بابا كان عند العمارة و... قاطعني:لو عند الباب..تعطيني خبر تحترمي رجال البيت الموجود.. قاطعتو بقهر:أنا محترمة بس هادا بابا لازم.. قال بشدة:لمن يكون أبوكي رجال أستأمنُه على أهلي يسير خير..هذا شي..الشي الثاني لمن أكلمك ما تقاطعيني و عدلي طريقة كلامك معايا لا تشوفي شي ما يسرك و قومي حطيلي شي آكلُه لإني جاي تعبان و طفشان و قرفان و قرفتيني إنتي زيادة...! و قام راح للغرفة...! أخفضت راسي..ليش أنا ناقصة..ناقصتك يا علي تخاصمني...؟! قال سعود الصامت من يوم ما جا علي:ماما...؟! رفعت راسي و قمت:"تعال ساعدني"،و رحت للمطبخ...! و طول ما أنا أرتب الغدا و أسخنو كنت أستنى علي يجي يساعدني _في الفترة الأخيرة سار علي يساعدني بما إني تقلت_ لكنو ما جا،حزت في نفسي...ليش ما جا...؟! حطيت الغدا و رسلت سعود ينادي أبوه...! جلسنا عالسفرة ساكتين،علي..شغل التلفزيون و قعد ياكل و هوا يتفرج..أنا..كنت آكل و عيني على لُقمتي،و سعود ينقل بصرو ما بينا...! خلصنا أكل و وقف علي:أنا داخل أنام...! قال سعود إلي متعود يسمعو مني:تمسي على خير...! قال علي بدون أي مشاعر واضحة:جود ما بتنامي...؟! قلت و أنا أروق السفرة:برفع...! -رفعي و تعالي...! قلت من غير ما أرفع عيني:شُغل البيت متلتل و أنا ما عندي نوم...! حسيت بنظرات علي الحاقدة قبل ما يروح للغرفة...! بعد ما راح قال سعود:ماما ايشبو بابا...؟! قلت و أنا أعطيه صحن خفيف عشان يوديه للمطبخ:ايشبو بابا...؟! و وقفت و مشيت وللمطبخ ورا سعود إلي قال:إنتي زعلانة و هوا سواكي زعلانة..ما ينفع كده اتنين زعلانة...! ابتسمت..حضنت سعود و بستو..حبيبي هوا..متعاطف معايا مرة...! بعدتو عني:معليه حبيبي..بابا زعل لإنو بابا..بابتي أنا زعلني..هوا زعل عليا..عشاني مو مني...! -طب ليه يخامصك..إنتي مالك شُغل.."صرخ"..هوا جا مو إنتي...! انفجعت..في صوت سعود كان فيه قهر..شي غريب أول مرة أشوفو عليه...! شوية إلا سعود يبكي و يحضن رجليني و يقول بقهر و صوتو مختلط بدموعو و مو واضح:كل شوية يجي تبكي بعدين بابا يزعل..يـ..يزعل و..ويخاااامصك..أنا ما أحبووو..بس أبوية و عمو..هوا أسلاً (أصلاً) غبي..أنا ما أحبو بس يقعد يطفشنا و يخليني زعلااااان...! انصدمت..هدي مشاعر سعود تجاه بابا...؟!،سبحان الله كيف الطفل يحس..حسيت..حسيت إني..إني قاعدة أشوف نفسي زمان..كنت كده أحس..أحس إنو لمن يجوا عماتي و بابا و البقية أتضايق و أسير زعلانة...! انقهرت..انقهرت على ولدي..أنا ما كنت أبغى سعود يعيش نفس الأحاسيس إلي أنا عشتها..ما كنت أبغاه يحس بأي توتر في أي علاقة كانت...! سحبت نفس أحاول أهدّي فيه نفسي..ما ينفع أبكي..كفاية سعود..أنا لازم أكون أقوى..ما ينفع كلنا ضعيفين..ما ينفع...! -تعال سعود...! و رحنا للصالة..جلس و جلست جمبو...! قعدت ساكتة لثواني قبل ما أقول:سعود..بابا قد قلك شي...؟! هز راسو بلأ...! -أبوية أنا يا سعود..أبوية أنا..إلي جا اليوم...! هز راسو:لااااء...! -أجل خلاص..احنا مالنا دخل..هوا يسوي إلي يبغاه و يقول إلي يبغاه..و بعدين إنتا ليه مزعل نفسك..هوا حُر..و أصلاً ما يقدر يسويلنا شي..قول ليه...؟! ابتسمت لنظرات سعود المتسائلة و قلت:بابا معانا..هوا يعرف كل شي..احنا مالنا دخل..هوا إلي يتصرف..و إذا هذا أو غيرو عملولنا شي نقول لبابا و هوا يتصرف..بابا يعرف...! اتنهد سعود:بس بابا يخاصم...! -بابا يخاصم لإنو عصبي شوية و يتنرفز بسرعة بس هوا من جوتو يخاف علينا و ما يحب إنو أحد يضايقنا...! -طـ..وي..بابا...! التفت و لقيت علي ماشي لنا و عينو مثبتة لقدام و لمن وصلنا شال سعود و قعد مكانو و هوا يحطو فوقو..حضنو بيد و باليد التانية جذبني لصدرو...! غمضت عيني و فتحتها و أنا أحس براحة تتسلل ليا...! قلت بهدوء:ليه ما نمت...؟! قال بهمس:ليه و من متى أنا أنام و أنا مزعلكم..و إنتا يا مفعوص..حسابك بعدين..آخرتها طلعت أنا إلي أزود على أمك همها...! سعود:ايش يعني همها...؟! -علي:اشششششششششش..لا تخرب اللحظة...! ********************************* جرة،،، أسند رأسه على مقود سيارته..لمَ..لمَ دائماً هكذا...؟!،لمَ لَم يرى يوماً عطفها و نضجها و جمالها الذي يتحدث عنه الجميع...؟! "جميلة روح و شكل"،"أميرة" و غيرها الكثير الكثير من الأوصاف التي سمعها عنها..لم لا يرى هذا الجانب منها...؟!،لم تظهر الجانب الجميل منها للناس أما لأبيها لا تظهر إلا القسوة و التبلد...؟!،لم لا تفهمه...؟!،لم هي عديمة الإحساس..بل لم هي جريئة منزوعة الحياء...أي امرأةٍ هي هذه...؟! هكذا سعيد كان يفكر...! تركته يهيم في أفكاره بينما تسللت من الحاضر للماضي عن طريق ذكريات حُفرت داخل سعيد و سعود و الجدة و الجميع...! ذكريات تظهر ما كان يحدث حول جود و هي محاطة بغطاءٍ أبيضٍ فوقه التفت يد عمها المراهقة...! سأبعد التراب عن ذكرياتهم المدفونة..ذكرياتهم التي لن يعرفها أحدٌ حتى جود..فقط أنا و أنتم و أصحابها...! (دخل سعود الذي لم يكن يتجاوز عمره الخامسة عشرة لغرفة أمه..كان يحمل الرضيعة التي لم ترضع و لن ترضع من أمها..كانت هادئة و مستكينة..تماماً كما مظهر أمه التي وضعت رأسها بين يديها صامتة...! قال بتردد:"أمي..الجيران سألوني بنت مين إلي عندكم..ايش أقولهم؟!" رفعت أمه رأسها فأصابه الفزع..عيناها كانتا محمرتين و ملامحها غاضبة..قالت:بقوةٍ مرعبة:"بنت سعيد..قول هذي بنت سعيد..اتزوج من ورانا و جابها..قول كذة.. "صرخت"..هذي بنت سعيد" صرختها أيقظت الرضيعة فبكت..قالت:"خذها..خذها داخل" سحبت سماعة الهاتف التي أمامها..اتصلت بابنها و بدون مقدمات أمرته أن يأتي و أردفت أمرها بدعوةٍ فظيعة دب الرعب بسببها في كل خلية من خلايا سعيد الذي ذهب لأمه خاضع الرأس كسير النفس...! قالت:البنت هذي بنتك..سامع..بنتك و بنت مرتك إلي شردت لبيت أهلها و والله يا سعيد..والله لو ما تسجلها باسمك لتشوف شيٍ ما شفتُه..سامع...؟! رفع سعيد رأسه..لا..لا يريدها..إنها قذرة..إنها نجسة..إنها.. قال:"أمي هذي مي بنتي" "مي بنتك..أجل جايبها لي ليه..هذي بنتك و أكيد عارف" قال بصوتٍ عالٍ يائس:"يا أمي..يا أمي تراها بنت شوارع..هذي ممكن ما تكون بنتي..أنا مع الخوف أخذتها من غير ما أعترض..يا أمي لا تورطيني..لا تخربون لي بيتي..هذي مي بنتي" نظرت إليه بغضب..كيف لا و قلبها كان قد أخبرها بأن تلك الرضيعة هي ابنة سعيد..هكذا..شعرت بأنها منها و من صلب زوجها المُتوفّى...! قالت بإصرار:"لا بنتك..بنتك..و حتربيها و حتضمها لكرتك..رضيت و لا ما رضيت" قال بغضب:"اثبتيلي..طب اثبتيلي إنها بنتي و إذا أثبتيلي يسير خير" ورقة سعيد الأخيرة الرابحة كانت جهل أمه..هو يطالبها بإثبات و هي لا تملك إلا مشاعرها..و أيُّ إثباتٍ هو هذا...؟! ما لم يكن بحسبان الجميع هو سعود المواهق الناضج..المراهق الواعي الذي وقف جوار الباب و همس:"تحليل الـDNA" أمهما نظرت باستغراب أما سعيد فنظر لأخيه الصغير بغضب:"إنتا ادخل جوة و مالك شغل" حاول سعود أن يركز ناظريه على أمه:"أمي ممكن نتأكد بتحليل في المستشفى" صرخ سعيد:"سعود يا حيوان ادخل جوة" كرامة سعود صاحت:"مني حيوان..أمي ممكن نتأكد..ممكن" اتجه سعيد غاضباً لسعود..أمسكه من قميصه و دفعه للخلف بقوة:"قلت لا تتدخل" سقط سعود أرضاً و كان سعيد على وشك إفراغ غضبه به لولا صيحة أمه:"سعيد" لسع أخاه الصغير بنظرة شذرة:"حرجعلك يا كلب" عاد لأمه التي قالت:"كلام أخوك حيمشي..بكرة أنا و إنتا في المستشفى و لو ما جيت فانسى إني أمك و انسى هذا البيت و نصيبك منُه و انسانا كلنا و ارجع لبنات الشوارع يا ولد الشوارع..تفو عليك..يا خسارة التربية" نظر لأمه مطولاً بغضب و حقد ثم خرج من الغرفة،و في الممر..حيث رأى سعود على وضعه لم يتغير رفعه من قميصه،قرب وجهه من وجهه و كاد أن يقول شيئاً لكنه صمت و اكتفى برميه بوحشية و خرج من المنزل...! سعود احتضنه الجدر..ظهره آلمه لكن ليس بشدة إيلام قلبه و قلب أمه..ليس بشدة إيلام صوت بكاء الرضيعة التي لم ترضع من صدر أمها و لن ترضع...! وقف و اتجه لغرفته حيث الرضيعة..حملها و اتجه لأمه التي احتضنته و احتضنتها باكية...! و في الصباح كانوا في المشفى..أصر سعود على المجيء بغية حماية أمه رغم ضعفه..رغم خوفه ممن أوصلهم للمشفى..رغم خوفه من أخيه الذي رأى الوحش في عينه...! و هكذا أصبحت جود ابنةً لسعيد و زوجته...! هكذا أصبحت جود بالحبر ابنة سعيد و بالقلب ابنة سعود..حرفُ علةٍ كان الفرق..ربما..أخطأ الكاتب!!! ********************************* |
الجزء الرابع عشر (سأسعى لرد الجميل) سلمت و قعدت أستغفر و بعدين مسحت على وجهي...! علي:ايش تسوي من أول..ساعة تستخيري !!،بعدين في ايش..ليش رافضة تقولين لي...؟! التفت لعلي،بصراحة استخرت في موضوع عمو و في موضوع الإعادة حقي...! قلت:استخرت لنا...! -في ايش...؟! -في كل شي...! -ايش إلي في كل شي..استخارة هذي مو دعاء...! -يوووه علي..خليني أنا و ربي...! علي قعد يطاااااالع فيا..قلت:اييييييش؟! -قاهرتني...! -يا الله..ايش سويت دحين...؟! -تقهري..دايماً لمن تكوني داسة شي أحس لكن لو أمووووت ما أعرف ايش هوا إلا لمن تبغيني أعرف...! ابتسمت..قمت و أنا ألم السجادة و أسمي بالله عشان يعيني في حركتي...! حطيتها على جمب و نزلت الشرشف على أكتافي و رحت جلست عالسرير...! قلت:اطمنت على سعود إنو نايم...! -ايوة..طول اليوم كان مهلوك و تعبان...! -ايوة الله يصلحو..تعبني ما نام أمس إلا متأخر و صحي بدري اليوم...! هز راسو و حاولت أنا أشغلو بأشياء تانية..أعرف علي..لو حط في بالو يعرف حيعرف و لو اتبع أسلوب معين أنا حستسلم و أقول..و أنا ما ينفع أقول..خططي كلها حتخرب و دي..حتبقى مصيبة...! ********************************* سحبت نفس..لازم أكلم عمو و آخد موافقتو..أوكي هوا وافق..لكنو وافق عالفكرة بشكل عام و أنا لازم آخد موافقتو عالشخص...! بصراحة خايفة و حاسة بصعوبة..عمو لو أقولو مين في بالي حيثور أكتر و حنسى أنا نهائياً إني أفاتحو في الموضوع مرة تانية...! بس أنا لازم أتشجع..أنا أبغى الموضوع يخلص قبل ما أولد..لازم أتحرك..أوكي عمو حيرفض..أوكي ممكن يعصب و يخاصم بس أنا لازم أحاول..لو ما حاولت حكره نفسي بعد كم سنة و حلومها في اليوم مية مرة...! بس متى أكلمو..الجوال ما ينفع..و لمن نروح علي معانا..كيف..متى يمديني أكلمو...؟! اتنهدت..مافي إلا إني أبات عند جدة بكرة و يوم الخميس الصباح لمن الكل نايم أكلمو...! بس علي ما حيرضى..حيقولي:"خلاص حتروحيلهم يوم الخميس..ايش لو داعي؟!" أفففف..كل ما شي يتعدل يخرب التاني..و كل الموانع تكون حاجات سخيفة زي دي...! لكن ايش حسوي..أكلمو و أمري لله...! و في الليل..في الوقت إلي علي يكون فيه رايق..قلت:أمممم..علي..حبيبي...! قال بنفس طريقتي:نعم..يا عيوني...! اعتدلت في جلستي و قلت و أنا ألعب بشعري:آآآه..علي أنا أبى أطلب منك شي...! -أنا أبغى أنام...! -ايوة حبيبي..حتنام و أنا حنام و كلنا حنام و سعود حينام و احنا حنام و... -ايوة ايوة و بعد النوم...؟! -آآم..علي أنا أبغى توديني عند جدة عشانننن أنام عندها...! قلت قبل ما يعلق:الله يخليك علي..الله يخليك لا تقول لأ...! كان حيتكلم لكني قلت:بليييييييز..الله يخليك..علي حبيبي إنتا لا تردني..قُلي طيب..قلي طيب...! طالع فيا مدة قبل ما يقول:لأ... -لاااااااااااااااااا... -قلت لأ يعني لأ..لو كان فيه سبب مقنع أوكيييي لكن بس كذة..طقت في راسك و بتروحي..آسف ما رح أخليكي...! قلت بدفاع:فيه سبب..جدة..جدة أحسها مرة محتاجتني و فاقدتني و عمو أحسو يبغى يكلمني في أشياء كتيرة بس مو لاقي وقت و... طالع فيا بنظرة:ما تبغيني أقعد معاكم يعني..أوكي أنا ممكن أحطك يوم الخميس..أسلم و أمشي !! -لا علي مو عن كذااااا..بس.. -واحشتك القعدة عندهم يعني...؟! -يعني..يعني ايوة و كده أبغى أقعد معاهم و... سكت فقال علي:كلنا نشتاق لقعدة أهالينا و أيام زمان لكن ايش نسوي..لو إجازة قولي ها ممكن لكن احنا ورانا دوامات..أحطك يوم الخميس و أجيكي الجمعة و السبت أدوام..ما حرتاح كذة...! -لالا..أنا عندي خطة أحلى..بكرة بعد العصر علطول نروح عند أهلك و بعد العِشا نمشي..تحطني عند جدة وتروح على البيت..و يوم الخميس تجوا إنتا و سعود على بيت جدة...! -اممممممم..ما شاء الله..و لين يجي الخميس ايش نسوي أنا و سعود لحالنا...؟! -عادي..تقعد عند أهلك..حتنبسط و ينبسطوا...! -بصراحة إنتي وضعك موعاجبني..يا تقولين لي ايش عندك و تتيسري عند أهلك يا نامي و انسي الموضوع..ولااا تزني لا أبطل روحة الخميس بالمرة..تصبحي على خير...! همست:و إنتا من أهلو...! و أعطيت علي ظهري..حتسألو..ايشبو قالب؟!،أقولكم:علي حاسس إني مخبية عليه شي..أنا صح مخبية بس مو هبل..أنا فعلاً ما أقدر أقول لعلي أي شي دحين..ما أقدر..ما ينفع...! بكيت..من غير دموع..اللهم خشمي حمر و قلبي انقبض...! مديت يدّي..سحيت منديلة من الكوميدينة و مسحت بها خشمي..و احتفظت بها تحت البطانية بين يدّيني عند قلبي...! حسيت بيد عند عضدي و وصلني صوت هامس:جود إنتي ليه تبغي تروحي...؟! غمضت عيني قلك نايمة:خلاص مو لازم...! ببطئ:ليه..تبغي..تروحي...؟! قلت و أنا خافضة بصري:أبغى أروح...! اتنهد:طب..نامي ذحين و و بكرة حنشوف...! قلت:إنتا زعلان..ما حروح و إنتا مو راضي...! لف يدّو عليا و حط راسو على مخدتي:لأ مني زعلان..نامي و الصباح رباح...! يا رب يرضى..يا رب لمن بكرة تهديه و يرضى..يا رب...! ********************************* كنا قاعدين في بيت أهل علي قعدة حلوة..هروج و حكايات و تريقة..أنا و عمتي و بناتها و علي أما سعود و لينا فقاعدين بعيد عننا شوية مادري في ايش يتناقشوا...! صفاء:بس والله..أحسك ذحين غير..وجع..في زواج أحمد كنتي شايفة حالك..باين عليكي طيبة بس فيكي عنطزة...! شهقت:أناااااا...؟! قبل ما ترد قال علي:ايوة إنتي و لمنننن ذحين فيكي عنطزة بس كنك أخف لكن أول ما أخذتك..الله لا يبلانا..أعووووذ بالله..شايفة حالك على مادري ايش...! أحلام:امممم..كنت أحسك لسه صغيرة و كنت أقول:حتكبر...! التفت لعمة و أنا متوقعة إنها حتكمل سلسلة المصارحات دي...! لكنها ابتسمت ببساطة،قلت:ايوة عمة كملي...! علي فجأة بصوت عالي:و حتى مع أهلي كنتي ساكتة و ما تتكلمي..مسويتلي فيها الهادية..لكن في البييييت..تعالو شوفوها..وحش..مجرمة..أعوذ بالله...! طالعت في علي:لا يا شيخ...؟! -ايوة الله..كنتي شايفة حالك..شي لا يُطاق...! -عمممممة..شوفي ولدك!!! ابتسمت عمة برزانة و قالت:سيبيكي منهم..أخوان و اتجمعوا على أحد..إنتي ما كنتي مغرورة..كنتي تبغي تسمعينا و بعدين تتكلمي و اسم الله عليك ما مر شهر إلا و إنتي معانا عادي...! حطيت يدّي على بطني:والله صادقة فيا يا عمة..هدا الكلام إلي يريح..أنا حامل...! علي و هوا يدَّعي الدهشة:بالله..حامل...؟! طالعت في علي بعدين في صفاء إلي قالت:هوا شوفي أنا انقهرت..يعني أعطيتك ايميلي و جوالي و ما اتصلتي ولا حتى أضفتيني..انقهرت منك..حيوانة وحدة...! علي:بأي حق ما تضيفي أختي...؟! سكت..اتذكرت كيف إني بعد زواج أحمد انشغلت بأشياء كتيييييرة...! علي:جوووووووووود...! -ها...؟! ابتسم:وين وصلتي...؟! -ولا محل...! صفاء:وجع..ما لقيتي تتنحي إلا لمن اتكلمت...! -ما تنحت !! عمة:بنت..ايش ذا اللسان على مرة أخوكي...؟! صفاء..اتفشلت أما أنا فضحكت:ايوة صح أنا مرة أخوكي..احترميني...! علي:المهم..ايش كنا نقول..ايوة..ليش يا هانم جود ما تضيفي أختي...؟! -ماااا..نسيت...! -ليش نسيتي...؟! -امممم..انشغلت...! -بميييين..بيا...؟! أديت علي _إلي الظاهر إنو فهم سبب سرحاني_ نظرة:و أنا ايش عرفني بك وقتها عشان أنشغل بك...؟! صفاء نطت و كأنها تبغى تغير الموضوع:هي..آآآ..جود شفتي إلي رسلتلك هوا...؟! قطبت حواجبي مستغربة من دخلتها الغلط:ايش...؟! -رسلتلك رابط قصة...! قطبت حواجبي أكتر:لا ما جاني شي..ليا مدة ما دخلت...! -ليييييييييش...؟! -البركة في أخوكي و ولدو...! علي:ولدو مو ولدك...؟! -إلا..بس صفاء تعالي هنا..أنا ما قلتلك ما تقري شي إلا لمن تقوليلي...؟! -لالا هذي حلوة أنا متأكدة منها..إلي كتبتها عندها مدونة تنزل فيها مقالات و أشياء حلوة...! -طب لو كده ارسليلي لنك بلوجّها (رابط مدونتها) ...! -أوكي...! علي:هانم صفاء..ما كنك قاطعتيني...؟! كان معصب الشي إلي خلاني أضحك:دوبك تنتبه...؟! قال و هوا يحك راسو:ما..مادري طفشان...! و وقف و راح لسعود و لينا و قعد معاهم..قالت عمتي بهمس:ايشبه...؟! قلت و أنا أرفع أكتافي:مادري له كم يوم طفشان و نومو ملخبط و كده...! صفاء:مني...؟! ابتسمت:لا حبيبي مو منك..أخوكي أحياناً عليه طلعات طفش غريبة...! صفاء:إلا أقولك..لمن تدخلي مدونتها.. -لحظة لحظة ايش اسمها هيا...؟! -مادري نسيت..المهم ادخلي و اقرأي المقال إلي كاتبتو عن الزواج..مرررررررة حلو..اتكلمت فيه عن فكرة إنُو بعد السنين الأولى يخلص الحب...! -آآه..ترا عبط..الناس الطبيعين يكونوا دايماً العكس..السنين الأولى مليانة مشاكل..الزوج يكون عصبي و يتنرفز بسرعة و الزوجة مدلعة و ما تتحمل كلمة..هيا لو عدت كلو يهون...! عمة:لا مو لذي الدرجة يا جود..هما بس يكونو دوبهم بادئين حياتهم و مو متعودين..هما يقولو إنها حلوة و ما تتعوض لإن المشاعر فيها تكون قوية و سبحان الله بكذة يسير توازن..يعني يكونون مو متعودين و مو ناضجين لكن مشاعرهم حارة و قوية فيقدرون بكم كلمة حلوة و كم وردة يتراضو...! أحلام:و بعدين مو الحب إلي يخلص..الانـــبهااااار..يكون كل واحد طاير في الثاني..بعد كم سنة يتعودوا على بعض و يسيروا عاقلين..مو كلمة توديهم و كلمة تجيبهم...! صفاء بسخرية و قهر:بس البنات دايماً يقولو إنو الخمسة سنين الأولى و بعدها خلاص معد يحتفلو بعيد زواجهم و لا يحبوا بعض بقوة...! قلت:عبط زايد...! علي من بعيد:يوووووووووه..يعني ما بقي لنا إلا شوية...! التفت:وي..اسم الله علينا...! عمة بغضب:علي..كم مرة أقولك ما تقول إلا الطيب...؟! علي و هوا يسوي شي لسعود و لينا:آآآآآسف...! قال بعد مدة:إلا ايش رايكم توقفوا ذا النقاش الهادف..طفشتوني ترا...؟! كملنا كلام و لا كأنو قال شي فاتأفف بطفش..حبيبي هوا..الطفش باين عليه..مادري ايشبو..يبغالي أشوفو بعدين...! قالت أحلام:بس أحس إنو الخلفة في البداية مي حلوة...! ابتسمت:صح..مرة سمعت واحد يقول إنو مالو داعي لو ما يعرفوا بعض...! صفاء:بس الخلفة هيا إلي تبين لو الآدمي كويس و لا لأ...! عمة:إنتوا لا تشغلوا نفسكم بذي الأفكار..الطيب طيب من البداية و السيء سيء من البداية..ترى يبان من البداية..لو الوحدة ذكية تكتشف...! أحلام:مو هذي المشكلة..هما ما يقدروا يكونوا أذكياء..الناس تسوي الملكة عشان يتعرفوا على بعض احنا نسويها عشان ننبسط كم شهر و يطلع كل واحد قدام الثاني بيرفكت...! عمتي:إلا على سيرة الخلفة..كم باقيلك و تولدي...؟! -أممم..شهرين و نص بالكثير...! عمة بثقة:لا يا حبيبتي لأ..قولي شهرين و نص بالقليل...! ابتسمت باستغراب:والله آخر مرة حسبت طلعت معايا كده...! عمة:لالا... صفاء:استحي على وجهك..أمي حاسبتلك أحسن منك...! -عشان ولدها بعدين مو هيا إلي حتولد..يحقلها تستعجل..أنا أبغى أطول المدة...! أحلام بضحكة:مو أول مرة تولدي !! -مو يا حبيبتي لإني مو أول مرة أولد خايفة..لإني عارفة ايش حعيش..قبل..في سعود كنت عايشة جو مع كلام العقاد..يقول إنو المرأة تحس بمتعة لمن تولد..تستمتع بالألم يعني..و كنت مطمنة عالآآآآآخر..لين ما أكلت على راسي...! قربت مني عمة و قالت بصوت هامس:طب كده بينك و بين نفسك..ما كنتي حاسة بمتعة..ما كنتي حاسة بأي سعادة...؟! قلت بضحكة خافتة:إلا إلا..بس والله تعبت...! -ايوة هوا كذة أول ولادة..صدقيني ذي المرة إن شاء الله أهون...! صفاء:يعني يعني... أحلام:مال أبو أمنا داعي...! طالعت عمة في أحلام:أبو أمك الله يرحمه..بس خلاص..جود..يلا اسكتي...! طالعت في عمة:والله أنا شُجعت على الكلام ولا ما كان اتكلمت...! وقف علي من عند البزورة و هوا يقول:أحلى شي عندي لما جود تتهزئ...! طالعت فيه بقهر:ما اتهزأت...! عمة:تعال اقعد إنتا..ناقصتك و عبطك...! جلس علي جمب عمة من الجهة التانية:الله لنا يا أم علي..كل ذا عشان ما قلتلك من بدري...؟! قلت:ايش هوا...؟! مدلي علي لسانو:اييييييييييييه..مالك دخل..سر بيني و بين مامي...! مامي طلعت من علي تجيب الـ.. والله زوجي ما ينفع لو الدلع..بس فديتو كل شي منو حلو !! عمة:مامي..مامي وقت الراحة لكن في الجد.."قلدت صوت علي"..أمي..كنك شوية و تصفقني كف...! و قامت متوجهة للمطبخ...! قلت باستغراب:علي ايشبها...؟! قال بلا اهتمام:آآآ..واحد من "أصدقائي القُدامى" اتصل عالبيت و أمي ردت فقال إني ما أرد على جوالي من مدة طويييييييييلة و عاد أمي سألتني لإنها تعرف صوته صاحبي من زمان فقلتلها فزعلت ليش ما اتكلمت من أول...! -لا يكون هذا نفسو إلي اتصل آخر الليل...؟! قال بقرف:مادري..كيفهم..الله لا يردهم على قولك...! قلت:بعدين منتا في مدرسة أو جامعة عشان يكون فيه مكان يجمعكم غصباً عنك..كل شي بيدك..خليهم يولو...! -يااااا شيييخة...! قلت:و عمة أكيد فيه شي تاني مزعلها..هيا ما تزعل من دي الأشياء...! -بس أنا ما سويت شي...! -مو لازم إنتا..ممكن أي شي أو حتى ممكن أشغال اتجمعت مع بعض فسارت طفشانة..عادي مو شرط تكون إنتا...! اتنهد علي:طيب خلاص... طالع في أخواتو:طالعي كيف يطالعو فينا...! طالعت في صفاء و أحلام..كان باين عليهم الطفش...! ضحكت:علي شكلنا مطفشين أمك و أخواتك...! صفاء:ايوة..بصراحة اليوم مملين...! أحلام:لا علي و جود من جد إنتو ما عندكم نص و نص..يا تسو لنا جو مو طبيعي يا تجيبولنا البلى..يعني معليش بس بصراحة سايرين مملين الفترة ذي...! قلت:سويتي احنا ما سار عندنا شي إلا انتظار البيبي..يعني هوا الشي الحماسي القادم..غير كده غرقانين في روتين قاتل..يعني المفروض نجي و إنتوا تحمسونا..مو احنا...! صفاء:مو احنا نفس الحالة..أنا كنت أدور على شي أستناه ما لقيت إلا البيبي حقك ذا...! قلت و أنا أغمض عيني بفلسفة:العوائل المحترمة دايماً تمر بحالات زي كده...! علي:ارحمييييييييييني...! -طيب... طالع علي فيا باستغراب فقلت:حرحمك...! -آآآآه... و على كده لين ما اتعشينا و حركنا..أنا في السيارة كنت تعبانة..أسندت اسي على ورا و أنا أحس بنفسي مكتومة..يا رب تيسر الولادة ليا يااااااااا رب...! لفيت راسي و أنا أنادي سعود إلي كان سادح و مغمض عينو..فتحها على طول..قلت:نمت حبيبي...؟! قال بتعب هوا كمان:شوية... ابتسمت:هيا سمي بالرحمن بابا و نام...! رجع سعود يغمض عينو و أنا أسندت راسي و غمضت عيني...! علي:تدري لو سامحين للمرأة بالقيادة كان خليتك تسوقي و قسمت المشاوير بينا...! قلت و أنا مغمضة عيني و مسترخية:لو سمحوا للحريم يسوقوا حجيب سواقة تكون كوفيرة و ماخدة الحزام الأسود في الكراتيه...! -و كم حتعطيها إن شاء الله..3 آلاف ولا أربعة...؟! -والله أي شي..لو حتريحني أديها أي شي...! -و من وين إن شاء الله..اتوظفي و ادفعي من راتبك...! عقلي صحصح لكن صوتي لأ... قلت:إن شاء الله لمن أتوظف...! ضحك بسخرية و هوا يلف:تخيليكي موظفة...! رجعت أغمض عيني من غير ما أرد..عندي إحساس قوي يقولي إني حكون امرأة عاملة..مع إنو مرة حلو الوحدة تقعد في بيتها و ترتاح..لكن عندي إحساس قوي ينفي دا الشي...! بعد مدة مادري كم هيا اكتشفت إني غفيت لمن فقت على صوت علي...! -جود..جود..جود يلا... قلت بنوم:هااااا...؟! -ايش إلي ها..قومي...؟! قلت و أنا أقوم:ايش..وصلنا...؟! طالعت باستغراب في المكان إلي موقف فيه علي...! علي:نمتي...؟! التفت لعلي و أنا مقطبة حواجبي...! ابتسم بحلاوة:انزلي و ادعيلي...! قلت:علي من جدك...؟! -يعني بوصلك لين هنا عشان أستفزك مثلاً...؟! -بس إنتا كنت زعلان و متنرفز طول اليوم عشان كده و دحين... قاطعني:خلاص انزلي إنتي ذحين...! -علي كيف أتركك لحالك...؟! -منتي كنتي ناوية تتركيني لحالي أمس...؟! -بس... -جود..لو مانزلتي حمشي و تحلمي أرجعك...! قلت بحرج من نفسي:بس إنتا ما كنت راضي...! قال بنفس أسلوبي:و دحين راضي..ممكن تنزلي...! قلت بسعادة:شكراً علي...! ابتسم:شوفي لا تبيني سعادتك و تستميتي في الامتنان..سوي نفسك منتي مبسوطة لإني عالتكة حتنرفز...! قلت و أنا على وشك أبكي:Ali gimme a hug -مع نفسك ذحين..يلا انزلي...! -عليييييي... اتلفت يمين و شمال كأنو حرامي و هوا يتأفف و بعدين حضني...! بعد عني و قعد يتحمحم..قلت:ايش حتسوي بكرة...؟! -أسوي أي شي..طبعاً إنتي ما تبغي سعود معاكي..صح...؟! -آآه..خلاص اخرج إنتا و هوا كده عالظهر و مروا في الليل نتعشى مع عمو و جدة...! اتنهد:طيب يسير خير..يلا انزلي...! -اتصل عليا أول ما توصل و خلي سعود ينام معاك لا تنام لحالك...! -ما أنام لحالي عشاني ولا عشان سعود...؟! -آآآ..عشان سعود...! -لا يا شيخة...! ضحكت:خلاص ما دام مني موجودة خليه ينام معاك...! ضحك:أقول انزلي انزلي...! ابتسمت:لا من جد حبيبي..لا تخليني كده..أخاف عليكم...! ضرب على صدرو:أنا و ولدك رجال...! ابتسمت:مو أنا ليش أحبك إنتا و لدك إلا لإنكم رجال...! ابتسم فقلت:طب علي تنزل معايا عشان أخاف أطلع لحالي...! قالو هوا يوقف السيارة:طيب...! طالع لورا:بس سعود نايم..خلاص جود اطلعي و ما عليكي خلاف إن شاء الله...آآ..أقولك بطلعك عند درج المدخل بعدين استخدمي المصعد و إذا دخلتي طمنيني...! قلت و أنا أنزل:طيب..! و نزلت من السيارة و استنيت علي لين ما جا و طلعني..شافني دخلت المصعد بعدين راح للسيارة..أول ما وصلت خرجت من المصعد و أنا أسمي..دقيت الجرس..وصلني صوت منورة فقلت:"جود"..دخلت وسط نظرات عمو المستغربة..ابتسمت و أنا أتصل على علي...! قلت:دقيقة بس بطمن علـ..ايوة هلا..خلاص وصلت..طيب..أول ما توصل طمني...! و قفلت..طالعت في عمو بابتسامة و أنا أمشيلو..سلمت فقال:ايش جابك...؟! جلست:ايش الترحيب دا...؟! -لا بس مو من عوايدك تجي الربوع...! ابتسمت:جا على بالي أبات عندكم فجيت..و كمان أبغاك في موضوع...! تابعت:آآ..اتعشيت...؟! -محنا مسوين عشا اليوم..جيعانة ادخلي شوفيلك أي شي...! طالعت في عمو مستغربة و أنا أفسخ عبايتي في مكاني:ايش الأخلاق هذي..وي!! ضحك:لاااا..بس يا شيخة ما نمت الظهر مادري ليش و أحس نفسي مهدود..و يا ليت سويت شي..لا بس كذة لااااابد...! ابتسمت و أنا أتذكر:بس إنت خِلقة أخلاقك يوم الربوع زفت...! -يا شيخة..إلا في ايش كنتي تبغيني...؟! -ممم..شوية مو دحين..جدة وين...؟ -جدتك تصلي و بتنام أكيد بعد ما تصلي..إلا أقولك..كويس إنك جيتي..تراها سايرة روحها في خشمها و طفشااااانة..و أنا ما أعرف ايش أسوي معاها..أحسها..أحسها ما تبغاني..يعني مو تكرهني بس تحسيها ما تحب تقعد و تهرج معايا..كذة..ما..مادري كيف...! -طب ما تحاول تخرجها...؟! -واللهِ أتمنى..أترجاها دايماً بس ما ترضى..كل ما أحاول أكلمها تقولي سكر و كل شوية أحتاج الحمام و معد فيني شدة..أصلاً هيا من يوم ما بطلت تخرج معايا و سارت ما تجيب أشياءها بنفسها ساءت نفسيتها...! ابتسمت و أنا أمسح على كتف عمو:خلاص حبيبي..هدّي..لا تحرق أعصابك..إن شاء الله أنا دحين حولد و إنتا حتتزوج..يعني..تسير حركة شوية في العيلة..و إن شاء الله تفك و تتحمس..تعرف ايش..إن شاء الله لمن أجي أشتري أشياء البيبي أقولها تجي معايا و لمن إنتا تجي تشتري الدبل و زي كده نصر عليها تجي تختار...! قال بطفش:دبل ايه يا أمي فكيني...؟! كان نفسي أقول لعمو حتى إنتا أخلاقك سايرة زفت عشان قعدتك في البيت..لا إنتا إلي سويت عيلة و لا إنتا إلي صايع في الشوارع تسوي حركات شباب و تغير جو...! لكن و لإني أبغى أكسبو ما حقلو كلام زي كده...! قلت:إلا إن شاء الله..اسمع أنا بروح أشوف جدة و أسلم عليها و أشوف لو تحتاج شي و بعدين بجي و أناقشك في دا الموضوع...؟! قال عمو بضيقة أطفال:جود تناقشيني في ايه..منتي ناقشتيني و خلصتي...؟! ابتسمت و أنا أوقف:ناقشتك في الموضوع مو في ذات الشخص...! -يعني إنتي محددة خلاص...؟! -والله تقدر تقول أبغى آخد موافقتك عليها بعدين آخد موافقتها عليك...! -و مين هيا دي...؟! قلت بدون اهتمام و أنا أعطيه ظهري:أحلااام..شوية أروح أشوف جدة و أجيك...! و رحت بسرعة عند جدة و قلبي يضرب ضرب مو طبيعي...! آخر شي أتذكرو كانت دهشة عمو و نظرة الصدمة المرعبة...! خلصت جدة صلاة و قالت على طول:جود... ابتسمت:ايوة جدة... و رحت و سلمت عليها..جلست جمبها و جيت بتكلم لكن صوت صفقة الباب القوية ألجمتني...! جدة:الله وكبر "الله أكبر" ايش فيه هالولد...؟! قلت و أنا أحاول أرقع:آآآه خسر فريقو حق الكورة... -الله يا خسر فريقُه..عمك من متى يشجع...؟! عضيت شفتي السفلى..أنا حمارة؛أعرف إنو جدة ما يمشي معاها الترقيع..أذكى مني و من عمو و منكم !!! قلت و أنا أبتسم:أجل تلاقيه شاف شي نرفزو..إلا قوليلي إنتي..كيفك و ايش مسوية...! -الحمدلله..إنتي كيف جيتي و متى و ليش ما تقولينْلي...؟! -والله يا جدة حسيت إني مشتاقتلك و مشتاقة لعمو..كلمت علي و طلبتو و الحمدلله وافق و جابني..بكرة بيجي هوا و سعود و يتعشوا معانا...! اتنهدت:خير..خير إن شاء الله...! ابتسمت و أنا أحط يدي على فخدها:إلا إنتي ايشبك يا جدة..أحسك..كده تعبانة و طفشانة..ليه..ايشبك...؟! قالت بهم بدون تردد:والله يا بنتي إني شايلة هم ذا الولد..إنتي و ربي سترها معاكي لكن سعود..والله إني ما أكلمو في زواجُه..أدري بيظيق (يزعل) عليا..لكن معد فيا صبر..أبغى أشوف ذُريتُه قبل ما أموت...! قلت بانفعال:اسم الله عليكي جدة لا تقولين كذة..والله أزعل منك..لا تفاولي على نفسك...! -أنا أدري..والله إني أدري إن إلي فيه وِحدة..الواحد لا كبر و ما اتزوج يعجز..عشان القلب..القلب يا بنتي إذا ما لقى الزوج يعجز و إذا عجز عِجزنا احنا...! اتنهدت:أعرف جدة أعرف..كلامك والله صح..إنتي ادعي..ادعي بس و أنا بحاول أقنعو..والله إني إذا كلمتو يظيق كمان لكن ايش نسوي..لازم..و الحمدلله مافي أي مانع..السكن متوفر..يفضي وحدة من الشقق و خلاص و الراتب الحمدلله راتب عمي يكفي و يوفي..مافيه أي مانع...! -صادقة والله..لكن ذحين ليش ظاق..كلمتيه إنتي...؟! -ها..آآه ايوة حاولت أفتح معاه الموضوع..هوا..هوا وعدني حيفكر لكن مع التوتر تلقيه اتنرفز و قفل الباب بقوة و عصبية...! -يا بنتي إنتي ليه ما تشوفين وحدة من أخوات علي..إلا كم عمرها ذيك إلي باقي ما اتزوجت..طيبة هيا..فيها خير..عمك ضعيف ما يقدر في الحريم...؟! ما كنت أبغى أدخل الفكرة في راس جدة..أخاف تتكلم و لا تقول شي رغم إنو الكل متوقع إنها الأنسب لعمو...! قلت:مادري..الله يكتب إلي فيه الخير..هيا جدة تبغين شي...؟! -إن كان شي موز هبيلي...! -إن شااااء الله...! وقفت فقالت:و الموية..عبيلي كاستي...! قلت و أنا أشيل كاسة جدة الخاصة إلي تتغطى:إن شاء الله...! و رحت للمطبخ..عبيت الكاسة بموية باردة و أخدت كم حبة موز و أنا أقول:منورة كلمي عمو ينتبه للموز..شوفي الخربان كتير..حرام هذا كرتون كامل...! -أنا قلت..لكن بابا سؤود مافي ينتبه..هدا رجال حرامي..أنا أول أروح..حيوانة..فوق كويس تحت خربان..بابا سؤود ما يفتح كرتون عشان شوف بعيونو يقول احنا مسلمين لازم أمانة..ثقة...! -عارفة الله يصلحو عمي..يحسب كل الناس زيو...! -أنا أقول لكن بابا ما يسمع...! -والله ما شفتي علي..يروح يضارب على حبة الطماطم لو فيها قاااااد كده سواد يروح يضارب...! -أحسن بنغالي كده ينفع..ناس طيبين ما ينفع...! -صادقة و الله..هيا يلا تصبحي على خير...! -و إنتي من أهلو..! و رحت لجدة..قعدت معاها شوية..أكلت و أكلت معاها موز..هرجنا كده يجي حق ساعة إلا بعدين نامت و اتوكلت أنا على غرفتي و هناك أديت علي رنة..عشان لو نايم خلاص..لو صاحي يرجع يتصل و رجع اتصل...! رديت بهدوء:ايوة... -أهلاً..ما نمتي...؟! كنت قدني سادحة عالسرير و مغيرة:لاااء..دوبها جدة نامت و أنا.."اتثاوبت"..أنا دوبي دخلت الغرفة..إنتا ايشبك ما نمت...؟! -و أنا أقدر أنام من غيرك...؟! -و إنتا راضي لأ...! ضحك:قصدي يهمني تكوني في البيت..حتى لو منتي معايا...! -ايوة..شغل استبداد هذا...! -هذا اسمو حب..حب يااا جاهلة..يا عديمة الغومنصية...! -غومنصية...؟!،ايش دا..فرنسي على بدوي..ايش يطلع هذا...؟! -هذا اسمهُ لغة الانترنت و المنتديات..بس إنتي مالك فيها...! -لا صدقني ليا فيها و بقوة...! -ايوة زمان كان لكي فيها ذحين خلاص...! -كلو منك...! -والله..ما أحلاكي تفتحي مواضيع و تتناقشي بكل رُقي مع الأعضاء..مصصصصخرة...! -أصلاً مو من حبي فيها..أحسها كلها نفاق..الناس الراقيين إلي فيها و أصحاب المبادئ مهم موجودين..على الواقع يختفوا مدري كيف...! -أصلاً أحسها دقة قدييييمة..منتدى و ناس أتناقش معاهم و قوانين ألتزم فيها..يييييه..شي يجيب الطفش...! -لا هوا حلو يكون عند الواحد منتدى يطلع فيه كل مواهبو و إبداعاتو..بعدين بصراحة فيه منتديات أنا أدخلها و أشارك فيها عشان أحمل.."بسخرية"..ضع رداً لائقاً ليظهر المحتوى...! ضحك:طيب يختي سيبينا ذحين من المنتديات..إنتي بتنامي...؟! -إن شاء الله..و إنتا...؟! -بقفل منك و أنام...! -سعود وين...؟! -سعود يا ستي جمبي أهو..سادح و في سابع نومة...! -حبيبي هوا..بوسلي إياه...! -طيب... -بوسو !! -طيب!! -دحين يلا... -استغفر الله..لازم تسمعي الصوت يعني...؟! -ايوة ايش حيضرك يعني لو بستو...؟! -طيب طيب.. و ما سكت إلا لمن سمعت صوت بوسة...! انشكحت...! قال:ارتحتي يختي..شوفيني خليتيني أضعف و أحضنو..مني قادر أسيبو...! -و فيها ايه يعني لمن تنام حاضن ولدك...؟! -ما فيها شي..تبغي شي...! -لا سلامتك..بس انتبه ترا إلي جمبك سعود مو أنا...! بانفعال:يا حيوانة يا قليلة الأدب.."وطى صوتو"..والله بس ما أبغى سعود يصحى..لكن تعالي..تعالي و أنا أوريكي..قليلة أدب وحدة...! ضحكت:هدّي هدّي ايش فيك..مزحة و طلعت...؟! -أنا أمزح قلة أدب عادي..إنتي لأ...! -استبدااااد...أقولك مستبد بس ما تسمع...! -إنتي كذة تخربي صورة الطهر و الأخلاق و الحياء حقتك في عيني...! -أوووووه..كيوت علي..كيوت..يعني أنا لسه عندي حياء قدامك..حسبت إني فاصخة الحيا أنا...؟! -كذابة..والله لو قدامي ذحين ما نطقتي بكلمة..قلك ما أعرفك يعني...! قلت و أنا أبغى أوقف النقاش:طيب خلاص..يلا روح نام..مع السلامة...! قال بصوت واطي:ايييييوة..اطلعي على حقيقتك..أتحداكي ذحين تكملي النقاش..شوفي أنا رحمةً بك و رأفة..و مراعاةً للأدب العام ولا كان قليت أدبي و نزعت قناع المروءة و الشرف..يلا..يلا روحي نامي و خليكي قد مزحاتك مرة ثانية...! -آآه..تقصد بأن هذا هو درس اليوم...! -نعم نعم هوكذلك...! ضحكت:تبغى شي...؟! -لأ..تصبحي على خير...! -و إنتا من أهلو..اتغطى كويس...! -طااااااييييييب...! -يلا باي...! -سلام...! و قفلنا...! حطيت الجوال على الكوميدينة و أنا أبتسم بسعادة لكن سرعان ما اختفت ابتسامتي... عمو..أسلوبي كان غلط..أنا أصلاً ما كنت ناوية أكلمو كده..لكن لمن سألني لقيت نفسي أتكلم من غير ما أحس..أنا لا اهتمامي ما كان مفتعل..حتى بسرعة رجعت اتوترت..أسلوبي كان غلط..كان المفروض أكون معاه أكلمو بهدوء و صراحة و أحاول أمتص أغضبو..كيف أرتكب دي الغلطة و أنا أكتر وحدة أعرف إنو عمو لو أحد كلمو بأدب مستحيل ما يناقشو و يتكلم معاه..أنا غبية..كيف كده أسوي..دحين الموضوع حينقفل نهائياً و ما حقدر حتى أفتح فمي...! يا ربي..ايش دا...؟!،يا ربي لو لك حكمة وريني هيا..أنا عارفة عموحيعصب من قبل لكن قلت أحاول و طلعت كده من غير ما أحس...! يا ربي..يا ربي لا تكلني إلى نفسي طرفة عين..يا ربي إنتا أعلم بتعبي و بالهم إلي في قلبي..يا ربي لا تخليني لوحدي..يا ربي هدئ سر عمي..كل إلي أبغاه هوا إني أرد لو الجميل..يا ربي إنتا أعلم بالتعب إلي تعبو معايا..رباني و كبرني و حبني !!! يا رب..ياااااا رب ********************************* "آآآآآه..ظهري..سار لي كم يوم و أنا حاسة بالألم يزيد عليا..استغفر الله يا ربي..ايش دا..يلا هانت..راح الكتير و بقي القليل..كلها ثلاثة شهور إلا و أولد..." طالعت في الساعة..كانت ثمانية..مع إني حاسة بتعب لكن ما فيا نوم..قمت بصعوبة و أنا حاسة نفسي مكتومة..شي جديد دا..لسه بس أمس بدأت أحس بالكتمة..مادري ليه أحس حملي في سعود كان أسهل و أهون مع إنو الكل يقول إنو أول حمل هوا أصعب حمل...! خرجت من الغرفة للحمام..يوووووه..اتذكرت إنو ما معايا فرشتي..ما كنت جاهزة للمبيت..الله يصلحو علي لو قلي من أول..على كل حال أحمد ربي..واحد تاني كان رمى بخاطري عرض الحايط...! فجأة جا على بالي عبدالله..لو رضيت بو كان حيسوي معايا كده...؟!،مادري ليه أحس إنو لأ..يمكن لإني حابة علي مرة و مرتاحة معاه الحمدلله..بس من جد..أحس لو رضيت بعبدالله كان قعدت في مشاكل مع أهلو حتى لو هوا يحبني و أفترض أنا إني ححبو...! يووووووه..أنا كمان..ايش التفكير دا..خلاص بيتزوج الرجال و يفكني من إحساس الذنب و لو إني حسب حكاوي عماتي لمن يجوا و أقعد معاهم و أسمع أحسو..يعني أمو و أخواتو لمن يقعدوا يتكلموا عنو..أحسو عايش طبيعي..مالت عليه رغم إني ناسيتو و مني مهتمة لكن كنت أحس نفسي كلبة بسببو..وجع..حسيت بالذنب عالفاضي عشان واحد كان مصاب بمراهقة متأخرة..بس بالله "وش يحس فيه" لمن يتذكر...؟! "وش يحس فيه"..أنا صح مني متعودة على دا الكلام لكن دي الجملة بالذات أحسها أحياناً معبرة و لو إني ما أزبطها لمن أقولها..هيا مي حلوة إلا من أهلها...! أوه لحظة..ايش كل إلي فوق دا...؟! أنا قاعدة أتهرب من التفكير في عمو و في إلي سار أمس..أو خليني أقول التخلف إلي سويتو أمس...! اتنهدت و أنا أبدأ صلاتي على كرسي التسريحة الموجودة في غرفتي...! قعدت أقول الأذكار و أنا في نفسي أتمنى لو إني صحيت و صليت الفجر في وقتها..كان قعدت أدعي لين الشروق..كان اتواصلت مع ربي زي العالم و الناس..كان..استغفر الله..خلاص..رحمة ربي و لطفو مو مرتبطين بقعدتي لين الشروق...! اتنهدت و أنا أحاول أذكر نفسي بكل الأشياء إلي ربي ما خذلني فيها..طبعاً ربي ما قد خذلني..أنا قصدي في الأشياء إلي أتذكرها و يا قلها قدام إلي ما أتذكرها...! قمت و أنا أفكر إني حسوي فطور لمن يصحو..طالعت في الساعة..جدة هادا وقتها بس عمو..عمو على حسب ما كان ينام دا الأسبوع و طول الأسبوع كان يقولي إنو ما كان يخرج من الشغل للمسجد للبيت..معناتو أكيد كان ينام كويس معناتو أكيد حيصحى اليوم بدري...! سمعت صوت كحكحة قوية طالعة من جهة الحمام..أكيد هدا عمو..تعرفوا كيف الرجال في الحمام يكحوا و يتمضمضوا بقوة أول ما يصحوا...! قمت من الكرسي و خرجت من الغرفة من غير ما أفك الشرشف..أحس شكل الوحدة بالشرشف يغصب الرجال إلي قدامها إنو يهدى...! جلست على وحدة من كنبات الصالة إلي تقابل التلفزيون...! دخل عمو بعد ثواني و طالع فيا بنظرة لاسعة سرعان ما اتحولت لطبيعية و هوا يقول:صباح الخير...! و ارتمى عالكنبة و سحب كل الريموتات عندو...! قلت و أنا أشوفو يشغل التلفزيون و يقلب لين ما يوصل للجزيرة الوثائقية:صباح النور...! قلت عشان أكسر الصمت:كيفك عمو..نمت كويس أمس...؟! -نمت... -ارتحت... ببساطة:لأ لكن نمت..اليوم حنام كويس...! طنشت و ما حاولت أفكر في إلي يقصدو و أنا أقول:كنت أبغى أسألك عن.. لمن شفت نظرتو الغريبة قلت:..الللفطووور..نستنى منورة تقوم تسويه و لا تبغى أسويلك دحين...؟! -لا ارتاحي إنتي شكلك تعبانة...! -ايوة صح والله..بس عادي ممكن أسويلك...! قال بصدق:لا حبيبي ارتاحي..إنتي جيعانة يعني مرة...؟! -لا بس قلت لو إنتا تبغى...! -أنا ما أبغى...! قلت بتفكير:بس أصلاً أنا أبغى أتحرك..عارف..أحس نفسي مرة تقيلة و مكسلة..والله أحس حملي في سعود كان أسهل...! قال بابتسامة:لإنو سميي..شي طبيعي يكون حملك فيه سهل و هين...! -لا ياشيخ... -إلا ايش ناوية تسمي البنوتة....؟! -والله ما ححاول أفكر دحين..جدة تقول إنو الدكاترة كدابين و إنو محد يعلم الغيب..قصدها ممكن يكون ولد...! -بس سعود اتوقعوا صح...! -ايوة بس أنا ما حشغل نفسي دحين..كل شي من ربنا حلو..عارف أنا خايفة من ايه..خايفة من علي..علي يحب الأسماء الخفيفة حقت البنات إلي دحين و أنا ما أطيقها..أنا ما أحب إلا أسماء زمان..فاطمة رقية عائشة..إذا مرة مرة جديدة جمان شيماء أحلاااام...! -جمان...؟! -ايوة..مو حلو...؟! -إلا بس أحس جمانة ألطف..هيا جمان جمع..صح...؟! -ايوة...! -و علي في ايش يفكر...؟! -علي يقولك ليان لينة تالة...! -طيب كلها حلوة دي...! -عارفة بس فيها شي يقهر..الناس تقلبها أجنبي..عندك لينة يكتبوه بالألف و تالة و نورة و سارة...! -طيب إنتي ايش دخلك في الناس..أهم شي بنتك تكبر و هيا عارفة و متأكدة إنو اسمها عربي و خلاص...! -بس أحس أسماء زمان غير..تحس البنت تكبر باسم..كده ناضج و ثقيل لو معنى...! -شوفي جود كلو يهون قدام وله و دلع و غرام...! -ايوة الله شي يفقع القلب..بنات عندي في الجامعة مساكين مظلومين..والله وحدة معايا في كلاس مسكينة اسمها دلع و هيا بعيدة كل البعد عن الدلع..ضخخخخخمة و عفشة..و البنات قليلات أدب ماخدينها مسخرة..و هيا ضعيفة..عفشة و تهبش صح..لكنها ما تتحمل..يعني مي قوية بس فيها دفاشة...! ضحك:أنا أعرف إنو لكل واحد نصيب من اسمو...! -هيا تلاقيها دلعها في مشاعرها مو في تصرفاتها أو شكلها...! -غلطة أهلها مو غلطة الناس..هما إلي أعطوا إلي حولها مجال عشان يتريقوا عليها...! قلت بابتسامة:طب ايش في أحلام...؟! لعمو مطلق الحرية إنو يفهم السؤال زي ما يبغى !!! -اسمممم جميل و أصحابو أجمل لكن ما أحس إنو يناسبني ولا يناسبك...! -هوا أنا ما أتخيل وحدة من بناتي أو بناتك يكون اسمها أحلام بس ليش ما يناسبك..ولا يناسبني كمان...؟! سكت عمو لثواني و هوا منزل راسو بعدين رفعو و قال:كان بإمكاني أصرخ عليكي و أقفل الموضوع لكن ما أبغاكي تطلعي من هنا منتي راضية...! جود أنا حتكلم و مأبغاكي تقاطعيني ولا..تبدي رأيك...! سكت لثواني و هوا يطالع فيا بنظرة مؤلمة بعدين أخفض راسو و قال بحزن: أحلام ذي أخت أحمد..أحمد صاحبي من المتوسط..تهمني راحة أخواتو و أنا ما أرضى لأحلام بواحد زيي..أبداً..مهما كانت ظروفها و مهما اتأخر سنها في الزواج..لإنها تستاهل تجيب أولاد..هيا و إلي زيها لازم يربوا لأنهم حيربوا صح لو ربوا..حرام..حرام عليا لو اتزوجتها...! و وقف و عمو و خرج من الصالة و أنا كنت SHOCKED و بس ... ^^^^^^^^^^^^^^^^^^^^^^^ |
الجزء الخامس عشر (أنا و أبي و أصدقاؤه) علي،،، قفلت من جود بعد ما قلتلها إني أنا و سعود بنخرج أي مكان..حسيتها من صوتها شوية متضايقة لكنها ما أعطتني فرصة حتى أسأل ليه..عالعموم أنا ما حصر..جود لها مدة داسة عني شي..و ما دام ما تبغى تقول أحسن لها إنها ما تتوقع مني أساعدها..لإنها من البداية ما دخلتني في ذا الموضوع الخطير إلي متكتمة عليه...! طالعت في سعود إلي أصر على اختيار ملابسه..ما كان شكلُه زي لمن جود تلبسُه..اتذكرت سيل تحذيرات جود من إنو سعود يخرج من البيت بشكل مو مرتب...! قلت:كذة عاجبك...؟! طاااااالع فيا سعود لمدة قبل ما يقول بنفس أسلوبي المستفز:جددددداً... -طيب ماما قالت لازم تخرج مرتب...! -طب أنا كده مرتب...! -لأ منتا مرتب..حلبسك من الأشياء إلي أمك تجمعهم مع بعض...! و مشيت متجه لغرفتو و في طريقي مسكت يده و مشيتو معايا...! كان لين ما وصلنا لغرفتو يتكلم و يقول إنو يبغى يلبس على كيفُه...! وقفنا قدام الدولاب يمكن فوق العشرة دقايق آخر شي اتصلت على جود تتصرف معاه..أنا ما أحب سعود لمن يتكلم و يبدي رأيه..ما عندي صبر أنا للبزورة إلي يتكلموا..أحب سعود بعد ما جود تزبطوا...! و كان هذا إلي قالو سعود: (-كويس.. -ايوة..إنتي رحتي و تخليني..ماما..أنا بابا ما يعرف شي في الملابس..بس يخلي شكلي مو حلو... "أنا هنا صرخت لكن سعود أعطاني نظرة قلك يسكتني" -ايوة ماما ايوة.. -البلوزة الحمرا مع البنطلون الأزرق... -طب ماما أنا أبغى ألبس كده..ليش تقولي لأ...؟! قال و هوا على وشك يبكي:طيب في البلوزة فيه في الجوة البلوزة ورقة زرقا..عادي ينفع...! -خلاص طيب... بزعل:أبى البنتلوووون... -البيضا الصفرا مو حلوة... -طيب.. باس السماعة بعدين حطها على أذنه لكن رجع و باسها بأقوى...و أنا كل إلي قدرت أسويه هوا إني أتحسر على جوالي...! -حتى أنا أحبك.. -لا عادي البلوزة البيضا حلوة..حلوة زيك.. بخجل:ايوة يلا باي...) و مدلي الجوال..أخذتو منه و قلت:ايوة سيد سعود..ايش قررت...؟! -قررت..أنا إلي قررت ترا مو ماما..ماما سمعت كلامي أصلاً..أنا قلتلها أبغى البيضا..هيا قالت حاضر..ماما تسمع الكلام شاطرة...! -و أنا...؟! -إنتا أبداً مو شاطر...! -سعودوه فكني من شرك و وريني وين البلوزة البيضا ذي...! طالع فيا ببراءة و ابتسم و هوا يمد أياديه:ما أوصل..شيلني...! حسبي الله و نعم الوكيل..أنا ما أتحمل النظرة البريئة حقت ذا الولد...! شلتو و لمن شلتو ما قدرت..بستو و قلت و أنا أرفعو:أصلاً ولد سوسة حق مشاكل...! -ماما تقول أنا زيك بس أعقل...! -أمك..أمك هذي يبغالها تصفيق مجننتني..يلا جيب البلوزة..يلا...! جاب سعود بعد عناء البلوزة و إلي طلعت في النهاية سكرية مو بيضا...! وي..ايشبي غلس...؟! مدلي سعود يدو:بابا لبسني...! -البس بنفسك...! قال بدلع:ما أعرَف...! -لا يا شيخ..و الهبل إلي لبستو قبل شوية...؟! قال و هوا يرفع أكتافو:نسيت كيف...! طبعا اضطريت ألبسو..آآآه يا ذا الولد هوا و دلعه..أنا لازم أخليه رجال و عفش..والله أشوف أولاد زملائي إلي في الشغل..من سن سعود..يجوا بملابس رياضية..أقولهم كيفك أحسهم بيعطوني كف..أما ولدي..يا حليلُه..ما يطالع فيه واحد إلا و يبتسم..كلو من تربية جود..معلمتو عالأدب..الله يصلحها بس...! حطيت يدي في يدو و قلت:نمشي...؟! -عند فين نروح...؟! ما كنت عارف وين أوديه بس لازم أخرجو و لازم أخرج أنا كمان..بصراحة البيت من غير جود ما فيه حياة..صح أنا ممكن أقعد عالنت أو أتفرج أي فلم لكن سعود...! -وين تبغى تروح...؟! -أمممم..أبغى أروح في الملاهي...! طالعت في ساعتي..كانت لسه وحدة و نص..قلت:طيب بس مول مو ملاهي ملاهي...! قال ببساطة:طيب...! -وين تبغى تروح..شوف احنا أول شي نتغدى بعدين نلعب لإننا من فطرنا ما أكلنا...! قال و احنا نخرج و نركب المصعد:لا بابا..مابغا..أول شي ألعب بعدين ناكل... -طيب أنا جيعان...؟! -إنتا العب معايا مو بس لحالي زي كأني لحالي ألعب...! -على حسب..لو ما كان زحمة ممكن ألعب معاك..طب إنتا ما قلتلي ذحين..وين تبغى تروح بالضبط...؟! -آآآ..نرووووح مول أوف أرابيا...! -نعم يا أخوية...؟! قالها بطريقة..والله ما كأنو سعودي...! -لينا قالتلي كده...! -و من علم لينا...؟! -مادري...! قلت و أنا أركبو السيارة و أربط حزامو:اسمو مجمع العرب...! إلا تعالو..من سماه كذة...؟!،واللهِ هوا مول جيد و أهل جدة طالعين فيه..بس مين سماه...؟! شغلت السيارة و جيت بمشي لكن سعود وقفني:بابا غلط... التفت مستغرب فقال:أول شي تقوووول:سبحان الذي... قال بعد مدة:قووووول... -ايشبك...؟! -قول ورايا... -ايش أقول...؟! -قول سبحان الذي... -سبحان الذي.. -سخر لنا هذا و ما كُـ ـ ـ ـنا لهوووو مقـ ..مقرنين.. كملت عنو:و إنا إلى ربنا لمنقلبون... -ايوة.. -طيب كان قلت لي تبغى تقول الدعاء... ما رد عليا سعود لكنو اكتفى بإنو يلف وجهو و يطالع للشباك..آآخ من حركات البنات هذي..كأنو جود لمن تقعد تتدلع عليا!! وصلنا لمجمع العرب و رحت لجهة الألعاب و قعدت أطالع في العروض..ما كنا حنحتاج شحن كثير..عبيت بمية و قلت إنها إن شاء الله بتكفي سعود...! و بدأنا نلف..أغلب الألعاب كانت مقفلة..أوفففف..ايش المصخرة هذي..من يوم ما أعرف نفسي و ألعاب الأطفال تفتح من بدري..القطارات و الأشياء إلي تفجع هيا إلي تفتح خمسة...! عالعموم هوا قلي إنهم شوية و يفتحوها بس يبغوا يسووا صيانة و شوية تعديلات...! قلت:هيا سعود سمعت بنفسك..خلاص نروح ناكل أي شي و بعدين نجي نلعب...! برطم سعود فقلت:تبغى ذرة ولا بطاطس و لا اسكـ... سكت..لإني كنت أبغاه ياكل شي عدل..مو حلى...! لكنو قال:اسكريم... قلت:طيب حبيبي شوف أنا حشتري بطاطس و حشتريلك اسكريم..تاكل شوية معايا بعدين تاكل الاسكريم عشان إنتا حتلعب لازم تكون قَوي...! -طيب بس أبغى اسكريم...! و رحت و اشتريت من هوت آند كريسبي الحجم الكبير..لإني جيعان مرة و أبغى سعود ياكل معايا..اشتريت كمان هذا الـ الاسكريم على شكل دوائر صغيرة..سعود يحبو..يحب يقعد يحاول ياكلو دائرة دائرة...! جلسنا على طاولة و كان سعود ياكل لقمة معايا و لقمتين من الاسكريم...! قلت و أنا أرفع حبة بطاطس ملفوفة كده بيدي:شوف سعود شوف..مليانة كاتشب...! -فيها شطة...! -لا ما فيها..أنا قلت للرجال ما يحط عشانك..كلها..ترى أنا معد قادر أتحمل..مررررة أبغاها...! قال بلا اهتمام:كلها... قلت عشان أنرفزو و أخليه ياكل:لإنك أصلاً ما تقدر تاكلها..خايف يكون فيها شطة... طالع فيا:إلا إلا أقدر.."فتح فمو"..أكلني... ضحكت و أنا أدخلها في فمو بشويش عشان لا يشرق...! بعد ما خلصنا أكل _و على فكرة أكلت معاه من الاسكريم_ قال سعود:بابا أبغى موية بعدين أبغى الحمام...! طالعت فيه..يعجبني لمن يكون واضح و يقول إلي يبغاه بطريقة التعداد...! قلت:"طيب نروح الحمام أول عشان نغسل"،و رحنا بالفعل عالحمام و هناك رفض سعود مساعدتي..ابتسمت و أنا أستناه عند الباب المردود..طريقته و هوا يرفض..مادري حسيتو كأنه حس إني اتعديت على خصوصياته أو شي...! خرج و شلتو علطول عشان يوصل للمغسلة و يغسل لنفسو..طبعا ساعدتو في ذي بعد ما رفعتو للمغسلة و نشفتلو و خرجنا و اشترينا الموية و بعدها انطلقنا نلعب...! أشرت لسعود بباي و ابتسمت لمن انتبهت إنو يناديني من أول و حاولت أركز معاه في كل مرة كان يختفي فيها و يرجع يبان لمن تنعاد اللفة من جديد..السؤال..ايش الممتع في ذي الألعاب؟!،يعني ايه يقعد يلف و يدور و يلف و يدور...؟! كنت حاس بالطفش..و عارف نفسي لازم ألاقي شي أسويه ولا حنكد على سعود الضعيف..مو ايش أسويله..يعني لو يقعد معايا و يكلمني والله أنبسط معاه لكن لمن من لعبة للثانية أقعد أستناه...! لو هانم جود ما راحت ما كنت حكون طفشان..والله إني غبي..لمن تكون معايا أحياناً أحس بالطفش ..مو منها..بس كذة..أحياناً أتمنى جود و سعود يبعدون عني شوية..لكن بس يبعدو أحس نفسي محتاجهم..أستوحش..من جد سخيف و مادري ايش أبغى؟! إلا لحظة..أنا كم لي من أصحابي..يعني..حمادة و ذولا...؟! فجأة رن جوالي..رفعتو و:"أوف..شكلي جذبتهم" رديت:ألو... حمادة:السلاااااااااااااام عليكوووووووووووووم ابتسمت:و عليكم السلام..هلا..كيفك؟! -طيب..إنتا كيفك و كيف أهلك؟ -بخير... -آآه علي وينك..شكلك برة ! -ايوة برة... -طب..آآه..يعني معاك أحد؟! -كيف؟! فجأة يطلع صوت: (أقول بلا أدب زايد..هات.. حمادة بغضب:ياخي يمكن معاه أحد...) قلت و أنا أأشر لسعود:أحمد ايشبك؟! فجأة يطلع لي صوت عبود:علي..إنتا برة..طيب عرفنا..معاك حرمتك ولا لأ..نبغى نشوفك..يمدينا نجيك؟! اتنرفزت من الأسلوب لكن سكت..أوكي..هذا الآدمي همجي خلقة و ما عندو ذوق..لكن طيب و هذا الشي إلي مصبرني...! قلت:لأ..ما معايا إلا سعود... قال بأدب مدري من وين جاي:طيب وينك...ممكن نجيك..عادي ما بنضايقك؟! حسبتها خلال ثواني و قلت:أنا في مجمع العرب... قال بصوت مضخم:حيثُ يتكدسُ أهلُ جدةـااااا. ضحكت:لا مو لذي الدرجة زحمة...! -المهم المهم..نبغى نجيك ذحين..و قول لسعود الغضب الساطع آآآآآتٍ... -الساطع...؟!،امشي امشي بس الله معاك... و فصل..و رحت أنا عند سعود..مسكتو من يده و قلت:سعود فاكر أصحابي إلي أول جو البيت؟! -و جابولي جوم بوي أحمرة...؟! ضحكت على الجيم بوي إلي مو راضي ينَّطق صح:ايييييوة..بيجون...! -وين؟! -هنا... -هنا معانا...؟! -ايوة... -بس بابا إنتا تقعد معاهم بعدين أنا مين يلعب معايا...؟! انتبهت لذي النقطة:آآآه إنتا حبيبي ما شبعت لعب...؟! برطم سعود فقلت:طب يا سعود أنا كمان طفشان...! سكت سعود لثواني قبل ما يقول:طب..أنا جبت الجوم بوي بس ما جبت شريط...تشتريلي؟! طبعاً مضطر أشتريلو..آآه منو..أكره سعود لمن يبان فيه المكر و شقاوة الأطفال..طبعا مو أكرهه أكرهه بس يعني...! قلت:و أنا أقدر أقول لأ؟! و رحنا لمحل كذة لا هو كشك و لا هو محل..كان يبيع الكترونيات و أشياء زي كذة،أول ما دخلت قلت:عندك أشرطة جيم بوي؟! طالع فيا الرجال لثواني بعدين قال:عندي مجموعة بسيطة؟! -ورينا... و رفعت سعود و جلستو على القزاز (زجاج)..طلع الرجال كذة شريط..شكلهم ما كان يحمس..يمكن مي ماشية..قلت:طب ليه كذة مغبرة و شكلها قديم؟! -احنا معد نبيع..هذي بضاعة من زمان عندي و ما دامك تبغى اشتري..نفس الشريط مافي شي..ما رح تلاقي هنا في محل ثاني...؟! -طيب..وريني شي كذة يناسب لولد صغير...! سعود سحب وحدة من العلب قال:بابا هدا... مسكت العلبة و قلبتها بيدي..كان عليها قرود شكلهم يضحك و موز في كل مكان...! قلت:طيب..ايش فيها ذي...؟! قال الرجال:ما فيها ولا شي..بس قرود ينقزوا و ياكلو موز..بس حلوة..حتى إنتا يمديك تلعبها..تضحك و تسلي...! -ايوة..و بكم...؟! -عشانك و عشان ولدك بمية و لا ترى والله هذا مو سعرو...! -بس شريطك مغبر و باين عليه قديم..المفروض إنتا تبغى تتخلص منه...! مسح الرجال العلبة و قال:أهوه..معد هوا مغبر...! سعود بثقة:إلا..شكلو قديم..هدا مو بمية...! طالع الرجال فيه و قال بابتسامة:ليش مو بمية...؟! -علشااان هوا مو زي إلي أول جبناه...! -كيف كان إلي جبتوه...؟! -كان جديد..خلاص بتمانين...! الرجال برجاء و هوا مبتسم:تسعين...؟! -لللللللأ... -خمسة و تمانين...؟! سعود و هوا طفشان من زن الرجال:خلاص أقولك تمانين !! ضحك:خلاص ولا تزعل..ثمانين ثمانين...! طالع فيا:سمي على ولدك و حصنو..ما شاء الله حليوة و واثق...! ابتسمت و أنا أحس بالفخر بسعود:يعني خلاص من جد ثمانين...؟! ببساطة:ايوة.. حاسبت الرجال و طلعت..جلسنا على طاولة بعد ما اشتريت عصير منجا..جلست سعود فوقي و قعد يلعب..كنت أتفرج عليه و هوا يلعب و هوا كان يوريني و يشرحلي..اسم الله عليه..في الألعاب رهيب..حركتو سريعة و ما يحتاج وقت عشان يستنتج...! كنت أخليه يشرب معايا..ما كان حاسس بأي شي..مشتغل عالأتوماتيك على قول جود..أقرب المصاصة منو فيشرب و عينه معلقة عالجيم بوي...! شوية إلا رن جوالي..حطيت العصير عالطاولة و خرجت الجوال من جيبي و كان أحمد..رديت:ألو... -أين أنت يا أخ العرب...؟! -أنا في السوقِ...! -السوقِ..لا إله إلا الله اسمهو المجمعوووو...! -و إنتم وينكم...؟! -احنا تحت...! -كيف دخلتو...؟! -كلمنا بنات كانوا داخلين و قالوا أوكي...! -تستهبل إنتا و هوا...؟! -يا سلام و إنتا كيف دخلت...؟! -عادي أنا معايا أطفال...! -ارحمني..حتى ما يخلوا..بس يمكن لإنك جيت بدري فمشوك..و لا تبدأ محاضرات..محمد مكفينا و عمر وجهو قالب طماطم..تقول أحد خطبوا...! فجأة طلع صوت:"اسكت يا قليل الأدب" أحمد:شايف شايف..قال ايش..حياوي..وجع..صوتو أعلى منو...! ابتسمت:هوا حياوي حياوي..بس معاكم يعبر معايا ينكتم مدري ليه...! ضحك أحمد:طيب وينك بالضبط...؟! -أنا عند الألعاب..في الطاولات..المحل فاضي حتلاقوني علطول...! -أوكي..ببايو إلى أن نصل إليك...! -ههه..طيب يلا باي...! بعد مدة سمعت اسمي..التفت:كان حمادة ينقز و ينادي و وراه البقية..ابتسمت و قلت لسعود:أهم جو...! اتأفف سعود فقلت:بابا سعود..خليك عاقل..خلاص كمل لعب و ما بتطفش...! أعرف إنها صعبة بالنسبة لطفل إنو يقعد و يشوف الألعاب و يتركها..لكن ايش أسوي..خلاص قاعد ألعبو من أول..خليني أنا أنبسط كمان !! جو لين عندي فشلت سعود عني و جلستو على الكرسي و هوا ما زال يلعب..وقفت و أنا مبتسم..سلمت عليهم..بعدين جلسنا عالطاولة...! كلهم قعدوا يطالعوا في سعود إلي مطنش أهاليهم..قلت:سعود حبيبي..قوم سلم...! طالع فيا:بابا أبغى موية...! شربتو موية و أنا في نفسي أتوعدوا..يلعن أبو التطنيش إلي مطنشهم هوا...! بعد الموية عن فمو و قال و هوا يطالع فيهم:سلاكم عليكم...! رد عبد الرب و أحمد و يوسف في نفس الوقت:و عليكم السلاكم...! طنشهم سعود و كمل لعب..محمد ضحك أما عمر فاكتفى بابتسامة...! قلت باستنكار:سعود..ليش ما تسلم...؟! وقف سعود اللعبة و مدلي الجيم بوي و هوا يقول بحيرة:أبوسهم ولا بس بيدي...؟! اتنهدت و قعدت أطالع فيه..قال:بااااابا..ايشبك...؟! مد يوسف يدو و رفعو من فوق الطاولة بشوية صعوبة..باسو و حطوا فوقو..أخد الجيم بوي مني و قعد يلعب معاه...! عبد الرب:هييي سعود..و احنا مالنا رب...؟! طالع فيه سعود و قال بطفش:شوفو فوق...! على فكرة:"سعود يكره عبود" أحمد:يوسف والله إنتا لازم تتزوج..كنك حرمة..إحساس الأمومة عندك متفجر...! يوسف بحقد:بلى قالولك لغم أتفجر..بعدين ايش إلي حرمة..هذا اسمو أبوبة...! محمد:أبوبة؟!،اسكت إنتا و هوا..اسكت...! سعود و هوا يهز يوسف من كتفو:شوف شوف.. طالع يوسف في شاشة الجيم بوي:أما..جبت حياة جديدة؟! -ايوة علشان كملت مية موزة...! -آآآه من قلك إنو كذة...؟! -أنا قلتلي...! ضحك يوسف و هوا يلف يدو حولين بطن سعود..أحسو متعلق فيه بشكل غريب...! قال عبود:متى نتغدى...؟! حمادة:أول نلعب بعدين نتغدى...! محمد:تستهبل..جايبني من بيتي في عز الظهر عشان نلعب...؟! -أجل ايش جاي تسوي...؟! عبود بتهديد:محمد..تبغى تناقش قضايا الأمة بعيد عنا الله يخليك..أنا جاي أبغى أنبسط...! أحمد:بعدين واحد جاي السوق لحالو مع ولدو..ايش يبغى يسوي غير إنو يلعبو...؟! قلت:ترى عادي..مو لازم تلعبوا...! حمادة:اسكت يا شيخ..وجع..آباء ثقيلين دم..إلا نبغى نلعب..أنا و عبود نبغى نلعب..يوسف...! يوسف و هوا مشغول مع سعود:هااا... -تبغى تلعب...؟! -إذا لعبتو بلعب عادي...! عبود:سعودوه... -نعم... -تبغى تلعب...؟! سعود بلا اهتمام:اسأل بابا...! عبود:بابا.. طالعت فيهم:براحتكم..تبغوا تلعبو قومو العبو...! رفع يوسف راسو:عادي آخذ سعود...؟! -حجي معاكم...! حمادة بحماس:حتلعب...؟! -لأ..بس حجي...! -طيب وين الكرت...؟! قطبت حواجبي فقال:عشان نزود عليه...! تابع:احنا كذة دايماً..نشحن مع بعض..كل واحد يدفع خمسين...! قلت:مالو داعي..فيه أعتقد...! حمادة:يعني كم حيكون فيه إذا كنت إنتا من قبل قاعد تلعب سعود..يلا طلعو و كل واحد يطلع إلي عندو...! محمد:ما رح أدفع شي..لإني ما حلعب...! -مالت عليك إنتا..خذ عمر و فكونا...! وقف محمد:عمر امشي نروح أي كوفي شوب...! طلع عمر محفظتو و حط عالطاولة خمسين فقال محمد:بتلعب...؟! -لأ... -وليش تدفع...؟! -حرام ما حيطلع شي لو كل واحد دفع خمسين...! قلت:تعالو نروح معاهم..عشان بقعد مع سعود...! ابتسم محمد:ما عليه خلاف..خليه يروح معاهم و تعال إنتا...! حمادة بابتسامة:علي من قلك إنك ما حتلعب...؟! عبود بابتسامة أوسع:من الحمار إلي أعطاك الإذن...؟! طالعت فيهم فقال يوسف:إنتا و هوا بلا سماجة..سعود أبوية قوم عني عشان بنمشي نروح نلعب...! و نزلو منو..جاني سعود و وقف عندي و شدني من كمي..دنقت فهمس في أذني:بابا يسير ألعب معاهم تاني...؟! حمادة و عبود:ايوة يسير...! التفت متفاجأ فلقيتهم واقفين ورايا و مبتسمين ابتسامة عرييييييييييضة..ضربهم محمد على أكتافهم بالخفيف:إنتا وهوا بلا جْنَان...! وقفت و طلعت خمسين و حطيتها عالطاولة..التفت لسعود:خلاص تقفل الجيم بوي...؟! -بس أكمل المرحلة...! -اضغط ستارت و قفل الجيم بوي...! سوى سعود إلي قلتلو عليه و مدلي هوا فقال أحمد:لا حنلعب أدفانتشر كامب..ما ينفع تشيلوا في جيوبكم أشياء...! محمد:و طبعا ما في غير محمد حمالكم...؟! عمر:مو مشكلة بشيل أنا معاك...! سحب حمادة الخمسينتين إلي عالطاولة و قال و هوا يطلع خمسينة من عندو:يلا..يوسف عبود يلا...! طلعوا الاثنين و اتوجهنا لمحل الشحن..شحن حمادة و جانا..و بسرعة عالية مشيوا زي المجانين و لمن وصلنا للعبة إلي يقولوا عليها لقيت إنها نفس اللعبة إلي مانعت إنو سعود يدخلها...! قلت:هييي إنتا و هوا..ايش يدخلكم هناك...؟! كانت لعبة كبيييييييييييييرة و فيها زحليقة سماوية عاااااالية و فيها طلعات و نزلات و حاجات غريبة...! عبود:والله صادق فيه..ثقالة دم آباء...! مسك يوسف يد سعود و حمادة مسك يدي،قال عبود:يلا حبايبي لا تخافوا..مافي شي يخوف...! فلت يدي من حمادة:أقولك إنتا و هوا..خلونا في ساعة طيبة..ولدي ما بيدخل شي زي كذة...! محمد بتعقل:علي الله يهديك ما فيها شي..دايما إلي أصغر من سعود يدخلوا..ما عليه خلاف إن شاء الله...! تابع:يلا هاتو عفشكم...! طلعوا كلهم محافظهم و جوالاتهم..قلت:عادي كذة أشياءكم تتلخبط...؟! عمر:تبغى أشيل بس أشياءك...؟! قلت:أخاف أحد من أهلي يتصل عليا...؟! عبود بصدق:عادي إذا أهلتك اتصلت محمد بعدين يقولك...! ضحك محمد:خلاص اطمنت..لو أهلتك اتصلت أنا حقولك..ولا يهمك...! ابتسمت:"أهلتي؟!،والله لو جود تسمعني ولا تسمعهم..كان تكردفنا و تصرخ:"أنا ماليا اسم يعني..مرة مرة ما تبغوا تنادوني قولو أم سعود"،تماما زي ما سوت مع جدي..يعني..على حسب كلامها...! قلت:أنا ما أقدر على ذي الألعاب..سعود أبوية عادي تدخل لحالك...؟! سعود و هوا يلصق في يوسف:ايوة عادي..يوسف فيه...؟! يوسف بعبط:أخ بس..ولدك دايماً جُملو في الصميم...! قلت:طيب حبيبي انتبه لنفسك..و إياك تتزحلق على ذاك الشي...! كانت الزحليقة مرعبة..أتخيل سعود ينزل منها...! عبد الرب:سعود..لا تسمع كلام أبوك..يلا...! حمادة:والله هيا أحلى شي...! يوسف:بسرعة عشان يدخلنا...! و راحوا..قلت باستغراب:ايوة الله..كيف بيدخلو..طول بعرض كل واحد فيهم ما شاء الله...! محمد:يرشوا الرجال...! عمر:محمد لا تقول يرشوا...! محمد:أجل ايش هيا..يعطوه فلوس عشان يدخلهم..عشان كذة ما أرضى أدخل معاهم...! جلسنا عالكرسي إلي قريب من اللعبة،قلت:بس طالع كيف الأهالي يطالعو..حاقدين عليهم...! عمر:غريبة ما يشتكوا...؟! محمد:كل إلي يجوا في ذا الوقت ناس تبغى الهدوء و ما تبغى مشاكل..و أغلبهم حريم و بنات يبغوا يجوا ينبسطوا و يتمشوا..مو زي حقون الليل...! عمر:أنا أخواتي يجوا في زي ذا الوقت مع بنات خالاتي و زي كذة...! -والله أنا ما سرت أجي عالظهر إلا بعد ما اتزوجت..يا شيخ قرفوا أبو أهلي..أجي أبغى ألعب ولدي..أبغى أروق مع أهلي..مافي..تحس الكل يطالع فيك...! محمد:تحس ما عندنا فكرة إنو واحد يجي مع أهلو..يا هيا مع صحباتها و أهلها..يا هوا مع شباب يضطروا نفسهم لبنات الناس عشان يدخلوهم...! عمر:بس احنا ذي المرة جينا شوية متأخر و لا كان دخلونا عادي...! محمد:ايوة في الصباح عادي يدخلو...! قلت:والله إنهم بقر..بدل ما ينشروهم برة يمنعونا يحطوهم جوة يمسكوا قليلين الأدب...! محمد:والله صادق.. عمر:حتى الحريم سار عندهم عادي... محمد:ايوة..أصلاً ترى الحرمة إلي كانت مع البنات هيا إلي عرضت علينا تدخلنا...! -بالله...؟! محمد:ايوة الله..جاتنا و قالت:تبغوا تدخلو؟!،قلنا ايوة فقالت:والله شكلكم طيبين بس اوعدوني ما تأذوا بنات الناس..عاد حمادة و عبود اتحمسوا و قعدوا يحلفوا و يوعدوا..نادت بناتها و دخلنا معاهم...! عمر:المشكلة السكيورتي شافنا نكلمهم و خلانا ندخل عادي...! رفعت راسي و أنا أسمع صوت سعود..لقيتو يأشر من ورا شبك من فوق و جمبو يوسف..ضحكت و سويتلو باي..فجأة جات كورة كبيرة على راس سعود..خفت عليه..ابتسم محمد:عادي الكورة لينة...! التفت سعود وجري على أحد في الوقت إلي سمعنا فيه ضحكة عااااالية،قال عمر:هذا عبود...! قلت بغيض:هذا عبود حيوان...! محمد:ايشبك إنتا..ما تبغى أحد يقرب ولدك؟!،ايش بتسوي إذا دخل المدرسة..ترى الأولاد كلهم كذة عفشين..ترى سعود حالة شاذة...! -لا تقولي..قول لأهلتي...! ضحك محمد:ترى ما كان قصده..هوا كذة عبيط...! ضحكت:والله صادق فيا..أنا ما عندي إلا سعود و هيا...! عمر:بس ليش احنا كذة..ايش فيها لو قلنا أسماء حريمنا...؟! علي:أنا عارف إني لمن أتكلم بالنكرة عن أخواتي و أمي و زوجتي غلط لكن أنا عارف و متأكد إني حلاقي تريقة و سخافة من إلي حولي..و ما حينادوني إلا بأسماءهم...! محمد:صح كلامك..بس الواحد يبدأ بنفسو..مثلاً بتكلم أحد من أهلك في الجوال قدام رجال عادي ناديهم باسمهم..يعني شوية شوية لين ما السخيفين يحسوا بسخافتهم...! قلت بصراحة:بس أنا بدوي و ما أتحمل..عارف نفسي و إلي حولي في الشغل و الشباب إلي يقربولي ممكن ما ينادوني إلا:يا زوج جووود يا زوج جوووود...! ابتسم محمد:شاطر..تنفذ الكلام بسرعة...! ضحكت بحرج:اسكت خلاص..ما انتبهت...! قال بابتسامة:هذي آخرة الحماس في النقاش في ذي المواضيع...! وقف عمر فجأة:أنا بقوم أشوفهم...! و راح وقف عند سور اللعبة..قال محمد:إنا لله..أنا ما أعرف متى ذا الولد يبطل...! -ايش فيه...؟! -ترى قام مستحي منك...! قلت بطفش:ييييييييييه هوا لسه..أنا المتخلف نسيت الموضوع...! -المشكلة لو تشوف أولاد أعمامو..تعرف كيف لمن يجوك الشباب معفنين ما فيهم أخلاق و لا حيا؟!،هما كذة..مادري كيف طالع من بينهم..أصلاً حتى لمن يتعاملو معاه..كأنه بنت..الله يعينو على نفسه...! -الحياء حلو بس هوا مرة...! -بعدين هوا مو حياوي..هوا خجول..يعني ما يتكلم قدام الناس..أنا متفاجئ إنو اليوم اتكلم و إنتا موجود..تصدق قعد سنتين معانا ولا كأنو يعرفنا..بعدين فك معانا و سار يتكلم...! قلت:إلا إنتوا كيف اتلاقيتو...؟! -آآآآ..تقدر تقول إلي جمعنا حمادة و عبود...! -آآ..يعني هما أصحاب من زمان...؟! -من أيام الجامعة...! -ايوة صح..إنتوا كلكم موظفين...؟! ابتسم:دقيقة خليني أكمل..حمادة و عبود كانو أصحاب في الجامعة..حمادة أول ما اتوظف اتعرف على يوسف إلي جا يتدرب في نفس المكان إلي اتوظف فيه حمادة..اتصاحبوا الثلاثة بقوة و أنا كانت ليا معرفة بيوسف..كان هوا و أهلو جيرانا زمان..كنت تقريباً في السنة مرة أقابلو..كذة كل بداية إجازة صيف..تعرفني لئيم و ما أحب حركات الشباب و الـhanging out و زي كذة..لكن هوا دخلني فيهم..مرة أصر عليا أجي و هما موجودين..و شوية شوية صاحبتهم..بعد سنة تقريباً سرت مرة معاهم...! -آآآآه..طب و عمر...؟! -عمر عاد صاحبي أنا..درس معايا الابتدائي و بعدين اتفرقنا..إلي جمعنا بو كان ورطة بصراحة فكنا منها..مرة ورطنا في الحساب..كنا خارجين أنا و أخواتي و اتحممممسنا في الأكل..جينا بنحاسب..نقص يمكن خمسين ريال..جا هوا و بكل خجل مدلي خمسين..أنا انفجعت..وجهو كان مرة مألوف..نسيت موضوع الفلوس و قلتلو:أعرفك..تعرفني..طبعاً هوا مسكين حسب إني أهزأو ليش بيساعدني عشان كذة اضطريت آخذ منو الفلوس و قلتلوا برة بسحب و أرجعلك...! -و إنتا ليه ما رحت سحبت و رجعت دفعت...؟! -يا شيخ الفلبيني ذاك حيوان..فضحني؛ما تروح تسحب و مو راضي يخليني أسدد بالبطاقة..يقول ممنوع صاحب المحل منع...! -وجع..المهم..و بعدين عرفت إنه صاحبك من الابتدائي...! -ايوة..لمن رحنا عالبنك و شافني أدخل بطاقتي سألني لو كنت أدرس في المدرسة إلي كنا ندرس فيها..قلتلو ايوة قلي أنا عمر كنت صاحبك و مدري ايش..طبعاً هذا كلو و راسو في الأرض..مستحي مني و من أخواتي...! -أووه..بس حلو ما شاء الله..يعني واحد من أيام المدرسة و محترم..أنا ما أطيق أصحابي إلي كانوا في المدرسة...! ابتسم:و أنا زيك..لكن عمر غير..أنا نفسي بس أفكو شوية عالناس..ما شاء الله عليه تراه مثقف و أخلاقو حلوة..بس يبان دايماً غبي من خجلو...! ضحكت:يا ليت عبد الرب يعطيه شوية...! ابتسم و قال بصوت واطي:أقولك شي بيني و بينك..أنا و عبود ما نتفق أبداً..أوكي حبيبي و صاحبي لكن أبداً ما أتحملو و هوا يتضايق مني..يقول إني ثقيل دم...! ابتسمت:هوا بصراحة إنتا محترم بزيادة...! ابتسم:ايوة..شوف احنا خمسة مع بعض بس كل واحد مع أحد..عندك حمادة و عبودة مرررة أصحاب..أنا و عمر نليق لبعض..أنا ما أتحمل قلة الأدب و السماجة و عمر ما يتحمل العفاشة..فلايقين لبعض... -ويوسف؟! ابتسم:يوسف معانا كلنا..يوسف شخصيتو حلوة..يمشي معانا و مع المصافيق إلي قاعدين يلعبو..ينفع في الفلة و ينفع في الأدب و العلوم و الأخلاق...! ابتسمت:ايوة بس مين صاحبو مرة...؟! -هوا يميل لعبود و حمادة بس تقدر تدخل فيه..تراه بيموت على ولدك..حاط صورتو وول بيبر في الجوال حقو...! -من وين له صورة ولدي...؟! -مادري عنو..صورو زمان في المستشفى قبل ما تقوم إنتا..صورو في بيتك أول..كنت إنتا مشغول عنو..خاف تقول لأ فما قلك...! ابتسمت باستغراب:ما كنت حقول لأ..بس هوا ليش متعلق مرة في سعود..أحس غريبة..دايماً الشباب يا ما يهتموا بالأطفال يا يكرهوهم...! ابتسم بحزن:يوسف أصغر أخوانو..كلهم حريم و رجال كبار..أصغر أخواتو لمن اتزوجت و جابت ولد اتعلق فيه بقوة...كان هوا كمان مو كبير بس الولد سار لو حادث و هوا تقريباً بعمر سعود يوم الحادث..يومها كان تقريباً مر على موت ولد أختو سنة..أصلاً إلي انتبه للحادث عمر..لمن نزلنا كلنا شاف سعود طايح عالأرض علطول شالو و اتمسك فيه..فوق هذا.. يوسف مرة حساس..تحسوا جاي غير..عارف اتربى لوحدو..أمو و أبوه عجااايز و كبار..أخواتو إلي ربوه فجاي رهيف مرة..تحس ما كان فيه رجال في حياتو...! -بس ما أحسه مرة غير..أحسو عادي رجال ما شاء الله و طيب..صالح يعني...! -هوا حبيب بس مرة رهيف..مرة..تحسوا مو سعودي...! -بالله عليك..السعوديين كلهم كذة..ما تشوف أبوك كيف يعامل أخواتك..يييه على أبوية..كان شديد معايا أنا و أحمد أخوية شدة..بس شوفوا مع أخواتي..ايش لطف و رقة..هههه..يعني والله قاعد أقول ايش هذا..كل قوتو تروح قدام أخواتي إذا اتكلموا...! ابتسم محمد:هذا الطبيعي..أنا أحس نفسي مابغا أولاد كثير..واحد اثنين بس و الباقي بنات...! -تفكر تتزوج...؟! -طبعاً... -متى...؟! استغرب محمد أسلوبي فقلت:محد منكم متزوج إلا أنا...! ابتسم:عندك عمر حقتو جاهزة..بس والله خايف عليه..حريم عيلتهم قوايا و هوا يا قلبي ضعيييييف..بس من كلامو الظاهر إنها تحبو..مع إنها عفشة و تردح...! ضحكت و أنا أتذكر الحكايا إلي تحكيني هيا جود من الكتب إلي تقرأها..حكايات الحب إلي تكون فيها البنت قوية و الولد ضعيف و خواف...! فجأة سمعت صوت بكى..التفت و كان سعود شايلو يوسف يحاول يهديه..وقفت و رحت بسرعة فقال يوسف:ما فيه شي ما فيه شي بس انفجع...! مديت يدي و شلتو من فوق سور اللعبة:انفجع من ايه...؟! قال سعود وسط بكاه:ولد..ولد جوة كعشني...! -نعم...؟! مسح محمد على راسه:كعشك ليش ايش سويتلو...؟! -مادري..ولا شي...! عبد الرب ملامحه فجأة اتغيرت..قال حمادة:الولد شعره خشن و منكوش و ولدك ما شاء الله شعرو حلو فكعشو...! -يا سلام..عشانه قرد يضرب ولدي...! يوسف:خلاص علي احنا خاصمنا الولد...! عبد الرب قرب من سعود و مد يده لراسه و قال بتأثر:خلاص سعود..آسف... طالعت فيه:ليش تتأسف إنتا...؟! حمادة بسرعة:لإنو سعود من أول كان خايف من الولد و ما يبغى يلعب في نفس الجهة بس عبود قلو ما عليك و مشاه معاه بس فجأة الولد نط من وراه و كعش سعود...! قلت بغضب:وينو ذا الحمار...؟! يوسف:مادري..كعش ولدك و فجأة اختفى..بس ترى عبود ما قصر فيه دفو بقوة...! قعدت أضغط على راس سعود بأطراف أصابعي:من وين شدلك شعرك...؟! -من كل محل...! و دفن وجهو في صدري...! قلت و أنا أمسح على راسو:خلاص إنتو كملو لعب و أنا بهديه...! طالع فيا سعود:لا بابا..تعال العب معايا...! -سعود تبغى تكمل لعب و إنتا كذة...؟! محمد:سعود راسك يعورك لمن ذحين...؟! -لااا..بس أنا..انا انفجعت...! ابتسم محمد:خلاص علي ادخل معاهم...! -ايش إلي أدخل معاهم..أنا من زمان ما لعبت ذي الألعاب..ما أقدر أنطنط و أتسلق...! حمادة:والله حماس..تعال معانا...! سعود:بابا أبغى معاهم بس إنتا تجي...! يوسف:تعال..إذا ما تبغى تتسلق فيه جوة مسدسات تتطلق كور..ممكن نسوي حرب الكور...! عبدالرب:ارحمني..ولا شريط سوني...! سعود و هوا يمسك وجهي بيدينو:بابا والله أبغى أوريلك شي...! بعدت يدو عن وجهي و بستها و همست:سعود بس الولد كعشك...؟! ابتسم و هوا يمسح وجهو:ايوة... قلت و أنا أنزلو عالأرض:محمد الله يخليك جيب الموية...! راح محمد للكرسي إلي قاعدين عليه و جاب الموية..شربت سعود و مسحت وجهو و رقبتو بالمنديل زي ما جود تسوي معاه بعد كل لعبة كان يلعبها...! طلبني سعود موية فرجعت شربتو عشان ما أبغاه يكبكب..بعدها و هوا يقول:بابا تجي معايا...؟! حسيت إني أبغى أدخل معاه مادري ليه..قلت و أنا أمسح شنب الموية إلي فوق شفايفو:طيب...! انبسط سعود و قعد ينطنط..محمد كان ماسك البطاقة طلعها و رحت للرجال المسؤول عن اللعبة بعد ما دخلت سعود من فوق السور..طبعاً الرجال في البداية رفض بس عبود قال:عادي زي ما دخلتنا دخله...! قال:كل شوية دخل دخل..أنا بعدين في مشكلة...! قلت:أنا ما حطلع فوق بس تحت عند اللللـ... يوسف:عند مسدسات الكور...! الرجال كان طيب والله لإنو في النهاية استسلم و خلاني أدخل...! دخلت اللعبة بعد ما أعطيت البطاقة لمحمد إلي راح مع عمر و جلسوا عالكرسي إلي كنا جالسين عليه..أعطيتهم طبعاً جوالي و أشيائي..حطيتها في يد عمر لحالو...! دخلت مع سعود أول شي لمحل المسدسات..علمني سعود كيف..و بصراحة انبسطت و أنا ألعب معاهم حرب الكور على قولهم..نعبي في المسدسات الكبيرة كور..تقريباً تشيل ثلاثة أربعة كور و نبدأ نطلقها..كان حمااااس محترم..كنت مطنشهم و قاعد أطلق لسعود..كنت أحاول قد ما أقدر ما أجيب الكور عليه..على عكسه..كان يحاول يسددها و يجيبها صح في الأغلب و كان ينبسط لمن أسوي نفسي اتعورت...! قعدنا زي المجانين نلعب و باقي الأطفال يطالعو فينا بحقد...! قلت:سعووود..لعد تطلق عليا...! سعود قعد يضحك و استمر يطلق عليا...! قعدنا نلعب ليييييين أذان العصر..ما كنا حنطلع لولا الرجال إلي قعد يزن و محمد إلي هزأنا و أجبرنا نطلع...! خرجت و أنا أحس بالتعب..يييييه..ايش كنت حسوي لو طلعت فوق و قعدت أتسلق و أنطنط...! طلعت آه تعب و حر قوية...! حمادة بفجعة:بشويش لا تطلع روحك...! -اسكت كلو منك..حماس و حماس...! عبود:من إلي كان يصرخ و يضحك جوة...؟! قلت و أنا أفتح الموية:اسكت مالك شغل...! لكن الموية كانت مخلصة..قلت:يووووه..أحد يروح يشتري موية...! يوسف:أنا بروح..سعود تجي معايا...! قلت و أنا آخذ أشيائي من عمر:سعود لا تاخذ موية باردة ...! هز سعود راسو بعد ما مسك في يد يوسف و راح معاه..قلت بصوت عالي:يوسف انتبه لا يفلت من يدك...! حمادة بصوت واحد مو شايف خير:علي..إنتا تخاف على ولدك...؟! طااااااااالعت فيه لين ما قال عبود:سؤال سخيف...! حمادة:لا بس ما أحس إنك من النوع إلي يخاف...! قلت و أنا أتذكر جملة من جمل جود:الخوف ذكاء...! محمد:هذا بالنسبة للأطفال..بس الكبار !! قلت و أنا أرفع أكتافي:عادي..أنا لين قبل ما أتزوج ما كنت أخاف..والله كان عقلي ترللي...! ترللي كناية عن العقل إلي مو في مكانه...! ضحكوا على الكلمة و اكتفيت أنا بابتسامة و أنا أشوف يوسف و سعود جايين:والله من جد...! مدلي يوسف موية قبل ما يبدأ هوا و البقية يتبادلوا المويتين..فتحتها و قربتها من فم سعود:بسم الله... أحسكم مستغربين ليش أشربو و هوا يمكن موصل خمسة سنين بس أقولكم..سعود حجمو صغير..طبيعة جسمه زي جود و سعود عمها..ما فيهم جسم..أنا ما شاء الله أخواتي مو زي جود..لينا اسم الله عليها توصل لفخذها...! بعدت الموية عن فمو و شربت و أنا أمسح فمو بأطراف أصابعي اليسار...! قلت:أحد يبغى موية...؟! عبود:يلا أكل...؟! حمادة:بصراحة أنا واحد أبغى آآآآآآكل...! محمد:اذكروا الله..خلونا نروح الفود كورت و نتغدى..بلا فجعنة...! همست:لا إله إلا الله...! طالع فيا محمد:تتريق...؟! -نعم...؟! استنتجت فابتسمت:لا من جد أذكر ربي...! قال و هوا يرجع شعره على ورا:طيب يلا عشان أنا بدأت أتنرفز...! -ليه...؟! و مشيو و مشيت وراهم و أنا ماسك يد سعود إلي سأل:بابا متى نروح ماما...؟! -نتغدى و بعدين نروح عند جدة..ولا أقولك..أمك قالت عشا..أريح نرجع البيت نرتاح بعدين نروح لجدة...! -طب ما ينفع ماما تيجي معانا في الفود كورت و تاكل...؟! ضحكت كيف إنو لقط الكلمة و علطول بدأ يستخدمها..قلت:ما ينفع حبيبي..منتا شايف أصحابي..كيف ماما تجي...؟! -طيب..كلهم هنا رجال..هدولا كلهم عادي ماما تيجي و تقعد معاهم بس أصحابك لأ !! ما عرفت بايش أرد عليه و فاجئني حمادة لمن رجع على ورا و حط يده على راس سعود:welcome to Saudi Arabia عبود:الولد ذا خطير..ممكن يفضحك...! محمد:إلا ضعيف شايف شي عجب..شي مخالف للمنطق...! يوسف:يا شيخ..زوج أختي..هزأها في بريطانيا ليش ما تغطي..عشان كانو قاعدين حريم مع رجَّال و كانوا منقبات...! محمد:أية..عديم المبدأ...؟! هز يوسف راسو...! عبود:وجع..فاكر لمن قابلته...! يوسف:بس خلاص..سلكتو الرجال...! جلسنا على طاولة و بدأ كل واحد يقرر من وين يبغى..أنا و سعود كنا جالسين عالطرف..التفت لو:ايش تبغى...؟! -مممم..أبغى هاااارموونجر...! كنت عارف إن سعود يبغى من مقدونلز (ماكدونالدز)...! ثواني إلا و الطاولة كلها تفطس ضحك و بدأوا يكرروا..هارمونجر..هارمونجر...! طالعت فيهم:هييييييي..إنتا و هوا..ولدي !! بعد ما هديوا طالعوا في سعود إلي كان يطالع فيهم بدونية فظيعة..قال بلكنة مزبوطة:burger حمادة:ايييييييييييوة..كده تعجبني...! سعود:أنا حر..أنا بالكيفي..أبغى أقول كده..بابا شوفهم...! قلت و أنا أمسح على ظهره:خلاص حبيبي خلاص...! عبود:وااااااااا..من جد أبو..طالع كيف وجهه قلب...! طالعت فيه:لا يا شيخ...؟! يوسف:مالت عليك إنتا و هوا و هوا..سعود حبيبي قول ايش تبغى..من وين هامبرجرك...؟! اتكتف سعود و قال:من ماكدونالدز...! محمد:علي..انتبه لولدك..و خليه يتابع ناس تتكلم انجليزي كويس..تراه يلقط بسرعة...! قال سعود بثقة:أول شي عربي..لغتنا أهم...! حمادة و عبود هزوا روسهم بإعجاب...! محمد:يا شيخ...! سعود ببديهية:ماما تقول...! قلت من ورا أسناني بغيظ:خلي..أمك..في..حالها...! حمادة:بدوي بدوي...! عبود:أقولك يا أبو هارمونجر..أبغى ماك عريبيا...! طالعت فيه مستغرب:ها...؟! محمد:ماك عربي...! ضحكت:ايش هذا...ماك عريبيا...؟! عبود:يلا مين بيقوم...؟! قلت و أنا أوقف:أنا بروح..مين يبغى من مقدونلز كمان...؟! يوسف:خذني معاك...! عبود:يوسف جيبلي ماك عريبيا...! علي:أحد ثاني...؟! هزو راسهم بلأ فرحنا لجهة مقدونلز و اشترينا...! رجعنا للطاولة و لقيناهم بدأوا ياكلو..عبود:سنة إنتا و هوا...! سعود بقهر:زحححححمة..زحمة...! التفت لسعود و طالعت فيه باستغراب فقال عبود:إنتا..كل ذا عشان زحـ..زعلتك و خليتك تمر من عند الولد..حقودي واحد...! قال يوسف:بس إنتا..محسسني إنتا البزر و هوا الكبير...! جلسنا و مدينا لعبود وجبتو..أكلنا و كنت أنا ما بين نفسي و ما بين سعود إلي يقتنص أي فرصة عشان يوقف أكل...! زبطنا موضوع الفلوس _بما إن كل واحد يدفع لنفسه_ ...! عبود:هيا سعودوه..المرة الجاية تجرب الزحليقة...؟! سعود:يعني و بعدين معاك..إنتا ليش كده تطفشني...؟! قرب عبود من سعود و نزلو و همس في إذنو بشي فهمس سعود لعبود بشي خلاه يصرخ:والله لوريك شغلك..جرب تسويها بس...! قلت بحواجب مقطبة:ايش فيه...؟! عبود:مالك شغل..سر بيني و بين ولدك.. و مد لسانو بطفولية...! ودعنا بعض و بعدها كل واحد اتيسر في طريقه...! يا ترى ايش قال عبدالرب لسعود...؟! آآه..أكيد شي سخيف أو تعليق غبي من تعليقات عبود...! أول ماوصلت البيت حسيت بتعب فظيع و قررت إني لازم أنام...! فصخت لبسي و ارتميت عالسرير و أنا أفكر بسعود إلي دخل الحمام إلي في غرفتنا..آآ..ايش هذا..بدأت أخرف..عقلي فجأة بدأ ينطط لأحداث اليوم...! خرج سعود و طالع فيا:بابا..نروح ماما...؟! قلت و أنا ألتفت:تعال نام معايا ذحين و بعدين نروح لماما...! طالعت في الساعة و أنا أفكر إن باقي ساعة عالمغرب...! قلت و أنا أضبط منبه جوالي عشان الصلاة:يلا سعود..غير ملابسك و تعال...! طالع فيا باستغراب:بابا كده تنام...؟! طالعت في الشورت و الفلينة إلي ما لبست عليهم شي:ايوة و إنتا كمان...! اتخصر:لأ..عيب و مو مرتب... و خرج من الغرفة بعناد..طنشته و غمضت عيني لكن بعد حوال الخمس دقايق حسيت بشي صغير ينط من فوقي و بطانية تغطيني ببطء أظهر ضعف إلي يشدها...! ابتسمت و لفيت يدي على سعود..الولد ذا ماخذ من أمه كل شي حلو...! ******************************* هكذا هو علي مع ابنه .. و هذه هي النقطة الوحيدة البسيطة التي أوضحها هذا الجزء !! جَ ـرة |
الجزء السادس عشر (أنا و أبي..قرار مؤجل) فتحت الباب و أنا مبتسمة لسعود و علي..حضني سعود بسرعة أول ما فتحت الباب:هاه حبيب ماما...؟! قفل علي الباب و دخل:وين جدة...؟! -و أنا ليا الله...؟! -والله إلي ما يبغاني ما أبغاه...! طالعت فيه بنظرة:طيب.. ضحك و هوا يرتمي عالكنبة..جلست حمبو و قلت و أنا أحط يدي على فخدو:وين رحتوا...؟! -مجمع العرب...! -طب ليه شكلك تعبان...؟! اعتدل في جلستو و قال بهمس:اسكتي..لعبت... ابتسمت بسعادة:بالله..ايش...؟! -أصحابي غصبوني و سعود رجني..بس والله انبسطت...! -أصحابك..ليه إنتا قابلت أحد...؟! -واللهِ من غير ما أرتب..اتصل عليا أحمد و قلي إنتا برة..سألني ويني و قلي بيجوا...! -آه..و انبسطتوا...؟! -الحمدلله...! قلت برجاء:حكييييني...! ابتسم:ما فيا حيل ذحين..بعدييين...! لويت فمي:مااااالت... طالع فيا فقلت بسرعة و خوف:أمزح أمزح... قال بأمر:سعود..روح نادي عمك و جدتك...! قلت:جدة أكيد تصلي السنة و تقول الأذكار دحين...! -طب سعود وين...؟! -في غرفتو..مادري ايش عندو...؟! -إنتي مو جاية تقعدي معاهم...؟! قلت:سعود حبيبي روح اقعد عند جدة لين ما تخلص صلاة...! اتكتف:أقعد أستناها يعني...؟! ابتسمت:ايوة..هيا تحب تصلي و أحد يستناها...! راح سعود بتأفف..ههه..عرف إني أصرفو...! قلت بصوت واطي:جدة مرة متضايقة عشان عمو ما اتزوج..تكلمني و هيا شوية و تبكي..حزنتني..و كلمت عمو ما أعطاني وجه...! قال بنرفزة:و عمك ايشبُه..تراه كبير...! قلت:وطي صوتك لا يسمع و يزعل..كلمتو و تخيل..ولا كأني فتحت معاه الموضوع..و لو حاولت ألمح يغير السيرة و يتكلم عن شي بعييييييييييد....! أوكي..اتكلمت عشان أبغى أحسس علي إنو معايا في الموضوع و أهيئو نفسياً لو سار نصيب و في نفس الوقت ما كدبت..هدي كانت ردة فعل عمو..ولا كأني قلت شي...! شي مستفز !!! عمو ليه كده..ليه لمن ما يعجبوا الشي يطنش..يحسس إلي قدامو إنو سخيف...! علي:والله عاد عمك مو صغير عشان أحد يحزن عليه و يقرر عنه و مو صغير عشان يقعد لين ذحين مو متزوج..طق الثلاثين و هوا لسه..شوفيني ما كملتها و عندي ولد بسم الله عليه عمره خمسة سنين...! قلت بعتاب:علي..اذكر الله و احمد ربك عالنعمة..يمكن عمو نصيبو لسه مو دحين...! استغفر علي و قال:عارف بس والله مقهور..عمك ما شاء الله رجال أخلاق و متوظف أحسن وظيفة و مو متزوج..زيه زي أحلام..كل إلي جوها زبالة مع إنها بنت حلوة و محترمة و متعلمة..وين عمك و إلي زيه عنها...؟! قلبي دق..آه..علي ايش قاعد يقول...! تابع:مو قصدي شي..بس وين الآوادم يختفوووون..وين..هذولا المحترمين وينهم..يا الله يا جود..كل ما أروح معاكي جرير و أشوف المثقفين يقروا..أقول يا ربييي.ذولا في الحياة وينهم..ليش ما نشوفهم..ليش ما يطلعوا...؟! حطيت يدي على كتف علي المتنرفز و قلت:بس حبيبي..هدّي..ايشبك...؟! -أفففففف..انقهرت...! -طيب حبيبي..أحلام و عمو مافي زيهم..أنا متأكدة ربي حيكتبلهم الخير..الناس الفنانة و المحترمة دايماً نهاياتهم حلوة...! -هذا لإنك تحبي الـ "يتريق عليا" happy endings -ايوة أحبها و مؤمنة بها و مقتنعة لإنو مافي نهاية وحشة لإنسان طيب..حتى حتى لو ما لو حظ في الدنيا تشوف خاتمتو..شي يقول عالجنة علطول..هذا إذا مرررة مرة يعني حظو ما كان صاحي...! ابتسم علي:كنك..كنك قلبتي على بدوي...! ابتسمت و قلت و أنا أحك شعري:أحس و أنا حامل أسير عفشة...! -و متوحشة...! -يا سلاااااااااام !! -و أنا صادق..يا ربي بس تولدي بالسلامة...! -آمين بس مو عشانك..و مديت لساني...! طالع فيا باستغراب فضحكت:كان قصدي أقول للقراء مديت لساني لك...! قال بغضب:و إنتي تقوليلهم عن قلة أدبك معايا..ذحين يقولو ما عندُه شخصية...! كنت حرد لكن عمو دخل الصالة بابتسامة و هوا يرحب بعلي...! وقف علي و سلم عليه:لا كان أحسن ما خرجت..ساعات تحسسني كنك سندريلا..تجي في الوقت بدل الضايع...! قلت بقهر:سندريلا ما جات في الوقت بدل الضايع..مداها تتكلم و ترقص مع الأمير...! طالعو فيا الاتنين بعدين كملوا كلام بعد ما رد عمو على علي...! قمت و أنا أقول:ايوة ايوة طنشوني..أصلاً من حلاتكم يعني..مالت عليكم سخيفين تافهين...! رجعت التفت و قلت:عمو..ولدي وين...؟! -آآ..وريتو لعبة جديدة نزلتها على جوالي و قاعد يلعب...! قلت و أنا أتابع طريقي:و أنا أقووول مالو صوت...! رحت لغرفة عمو و بالفعل لقيت سعود..قلت:وي سعود..ايش تسوي...؟! جا لين عندي و وراني اللعبة..قلت:آآه ايوة حلوة..بس ممكن تقفلها عشانك واحش ماما مرة...! قال بنفس دلعي:طب ممكن بس شوية أخلص المرحلة...؟! برطمت:بس سعود أنا أبغى أقعد معاك و أكلمك...! -طيب..طيب خلاص لا تزعلي..دحين رح أقفلها...! ابتسمت:يلا... و مشي خارج من الغرفة و مشيت وراه..وصل لين عند عمو و قال:عمو خلي بابا يحطها في جوالو...! عمو:طيب حبيبي...! علي و هوا يسحب الجوال:ايش هيا...؟! جاني سعود و حط يدو في يدي..جلست على وحدة من كنبات الصالة البعيدة عن عمو و علي و جلس سعود جمبي..حط راسو على صدري و لف يدو حواليا...! قلت:ايوة سعود..قولي..ايش عملت...؟! قال علي بيأس:لااااااااا..سعود..سعود الله يخليك..من يوم ما اتكملت بذا الأسلوب يعني بتبدأ شغل المجاغة حقها..سعود الله يخليك خليهم يوقفوا...! ضحك عمو:و إنتا ايش عليك منهم..خليهم..أم و ولدها..ما حتقدر تدخل بينهم...! قلت و أنا أمسح على شعر سعود:وي..ايش حارق رزك...؟! علي بغيض:أصلاً ما عندي رز من الأساس...! قال سعود بهدوء و هوا يغمض عينو:ماما في سر حقوووولك عليه بعدين...! -طيب حبيبي...! فز علي:لا يكون إلي عبود قالو لك و تكذب عليا من أول ما تبغى تقول لي...! قطبت حواجبي فقال:يختي هذا عبد الرب قال شي في أذن سعود نرفزه و مو راضي يقولو...! قلت و أنا أمسح على شعر سعود:ايش قلك حبيبي...؟! قال بطفش:يا ماما هدا واحد.."سكت لثواني"..ماما دا عبودي..ايش أقووووولك..ماما..تعرفي زي مين..زي داكا عبدالإله أخوكي بس دا عبودي يحبنا...! ابتسمت بهداوة و أنا أخلل يدي في شعر سعود و أكمل لعب بيه...! قال عمو:طيب علي..أنا بطلب إذنك في شي...! طالع فيا:طبعاً جود أنا حستخدم سلطتي عليكي كأب و ما حستنى رأيك...! رجع يطالع في علي:علي..عارف تعبان..باين عليك..بس أبغاك تقعد إنتا و زوجتك و ولدك عشان سعيد كلمني و قلي بيجي يتعشى هوا و أولاده بما إنو البنات و أمهم رايحين زواج...! قلت و أنا أحاول ألتهي:زواج مين...؟! -مادري..صحبة خلود يعرفوها و يعرفوا أهلها فحيروحوا كلهم..يعني..شي زي كذة..المهم ذحين..علي ايش قلت...؟! علي و هوا يسند راسو عالكنبة:بكيفكم أنا مالي شغل...! عمو:علي... علي:إنتو أحرااااااااااااار...! عمو و هوا يطالع فيا:جود..طبعاً حتقولي لأ...! أخفضت بصري و قلت و أنا أزبط لسعود لبسو:براحتك...! -لا تقوليلي براحتك..إنتي إلي تقرري...! قلت بهدوء و أنا أتجنب أطالع فيه:لأ مو أنا..بعدين هدا مو بيتي عشان أقرر مين يجي و مين ما يجي...! -أنا ما فتحت هذا الموضوع..أنا قلت تقعدي معاهم و تتعشي لإني عارف إنك متى ما طقت في راسك بتخرجي لبيتك و علي ما شاء الله بس في دا الموضوع ديموقراطي...! علي:كنك..كنك دخلتني في الموضوع...! عمو:ليه و مين قال إنو مالك دخل...؟! -عشاني ديموغراااااطي...! -ديموغراطي..والله إنك..علي..كنت أبغاك تساعدني...! -الله لا يبلانا..تقول بزرة قدامك ما تفهم..ياخي أهي عندك..تتكلم عنها..كلمها !! قلت بابتسامة واثقة:عمو إنتا ليه افترضت إني حرفض..عادي..حياهم الله...! ابتسم عمو:ايييييوة لإني عارف إنك تعتبري دا البيت بيتك..عشان كذة أخدت إذنك...! قلت بسخرية و أنا أدعي العجب:بالله...؟! اتكتف و قال بابتسامة حلوة:بالله...؟! لفيت وجهي بدلع و ما كانت إلا ثواني و عمو جمبي لاف يدو حول أكتافي و باليد الثانية يداعب سعود...! علي بصراخ:هييييييييييي..قوووووم..ايش تسوي عند زوجتي..قووووووم...! جدة إلي دوبها دخلت الصالة:ولد..ليش صوتك طالع...؟! علي:شوفي..شوفي يا جدة كيف اتجمعوا في جهة و طنشوني..ولا كأني زوجها..و لا كأن إلي في حضنهم ولدي...! جدة بطفش و هيا تتوجه لعلي:يا الله سترك... جلست جمب علي:هب لي مخدة لظهري...! حط علي مخدة ورا ظهر جدة و هوا مبتسم...! جدة بعد ما ارتاحت في جلستها:هيا تعال... حط علي راسو على صدر جدة بس طبعاً بالخفيف عشان لا يضغط على صدرها..و مد لسانو بطفولية...! اعتدل عمو في جلستو:علي يا أهبل..هييي..قوم عن أمي لا تكتمها...! اعتدل علي في جلستو كمان و قال:والله يا سعود إننا أهبل رجالين..مسوين أقويا ليييين عند الحريم نضعف...! طالعت في علي بدهشة و هوا يتابع:والله..يا الله على أصحابي إلي في الشغل..زوجاتهم و أمهاتهم كنهم ولا شي و علطول يشتكون منهم...! قلت:علي لا يكون تقلهم إنك ما تستبد و تفتري..تراهم مو طبيعيين و الرجال دحين زي الحريم..ينقلوا الكلام بطريقة وحشة...! -أنا ما أقول شي..أصلاً ما أعرف كيف كل واحد يتكلم عن الشر إلي يسويه في زوجته...! عمو:يمكن على أساس رجولة و قوة...! ضحك علي:رجولة ايه..يا شيخ والله على الحكاوي إلي أسمعها..حريمهم مو بس مكردفينهم..إلا ماسكينهم من رقابهم...! ابتسم عمو:عشان ربي قال سَكن مو افترى و سيطرة و محاولة إثبات قوة...! جدة:علي قوم عني...! شهق علي قلك انصدم..فقلت:جدة الدلع عندها مؤقت..قوم...! قام علي عن جدة و هوا يتأفف:وجع..محد يبغاني في ذا البيت...! حزنت عليه:تعال علي حبيبي تعال... وقف عمو و هوا يقول بطفش و قرف:والله إنكم ما تنعطوا وجه..خلاص قايم..لا تروحيلو و لا تروحلها...! ضحك علي:سعودي حبيبي تستحييييييييي...؟! طالع عمو فيه بنظرة و هوا يجلس و يمسك الريموت...! قلت و أنا أقوم:جدة قلتي لمنورة تسوي شي...؟! عمو:يووووووه سعيد قال نقولو ايش يجيب عشا...! قلت:ليش يجيب..خلاص أنا أسوي..بس واحد منكم حيروح و يجيب لو فيه شي ناقص...! اتأفف علي و قال عمو:لا تطالعي فيا...! قلت بثقة:مو شغلي لو فيه شي ناقص واحد منكم حيتلحلح...! و دخلت المطبخ..خليني أشوف ايش ممكن أسوي...! فتحت التلاجة و أنا أسمع:"ما قلت إنها تحس إنو هذا بيتها..دحين لا يمكن توافق سعيد يجيب شي..معتبرتهم ضيوف عندها" ابتسمت..هدا عمو..مشكلة عمو إنو ما يعرف إنو همسو أعلى من صوتو العادي...! عمو من الناس الفاشلين في الهمس...! قلت:منورة... قالت:مافي صلصة...! -طب طماطم...؟! -فيه شوية... طالعت في البصل إلي في السبت:ممم كويس فيه بصل..هيا الله يسعدك قطعي 3 بصلات كبار صغير صغير...! -بابا سئيد يجي...؟! -ايوة... -بس دجاجة وحدة فيه...! -مو مشكلة..مو بقي من شوربة الحب إلي في المغرب...؟! هزت راسها بايوة فقلت:خلاص نحميها و إن شاء الله يكفي..بس بابا و أخواني حيجوا على ما أعرف...! سمعنا صوت جدة تنادي منورة..رحت لها أنا:هااااا... جدة بلهجة آمرة:اخبزي الخميرة...! قلت بتكاسل:جدة بقي من حقت المغرب...! -و إن كان..اخبزي..والله إني خبزت لجدك ذيك الخميرة قبل ما أولد عمك بكم ساعة...! قلت في نفسي:"ايش دخل الولادة في الموضوع؟!" -مين..عمو سعود...؟! -ايوة... -هدا إنتي يا جدة مو أنا..بعدين أنا تعبانة و ما فيا حيل و أصلاً أصلاً ما أعرف أسوي الخميرة...! -تعلمي..مين بيسويها لسعود لا مُت..والله إن ولدك يحبها...! قلت باستنكار غاضب:جدة..لا تفاولي على نفسك خلاص حتعلم أسويها...! عمو:الله يهديكي يا أمي ايش ذا الكلام..قولي خير...! رحت المطبخ من غير ما أرد..بس فعلاً لازم أتعلم أسويها..هدا تراثنا و إن كنت منفصلة عن تراثنا و ما أعرف فيه شي..لكن زي الخميرة و العصيدة و شوربة الحب و الدكيك..هدي كلها أشياء حلوة..أشتاقلها بين فترة و التانية و سعود حبيبي يحبها و أنا ما أعرف أسويها..حتى علي والله يحبها...! مسكت أنا العشا و خليت منورة تتولى الخميرة..بس أنا لازم أتعلم..إن شاء الله بعد ما أولد أتفرغ لتعلمها...! خلصت من شغل العشا و خرجت من المطبخ بعد ما زبطت النار...! قلت:عمو بابا متى حيجي...؟! -والله قلي إنو قريب..خليه..ايش عليكي إنتي...؟! قلت و أنا أجلس:عليا إنو العشا ما بقيلو شي و يجهز...! علي بشك:مو كأنه ينفع تخليه على نار هادية و ما يسير فيه شي...؟! اتنهدت و أنا أحط مخدة ورا ظهري:إلا.. قلت و أنا أطالع في سعود إلي كان يلعب بعيد بالجيم بوي:سعود تعال هنا...! جا سعود و جلس جمبي:ماما شوفي..أنا ما وريتك...! قلت و أنا أطالع في القرد إلي قاعد يتزحلق على غصن:ايوااا..ايش دا..اليوم اشتريتو...؟! -ايوة..عشان أصحاب بابا جو..بعدين أنا مابغا أقعد طفشان..بعدين بابا جبلي...! -آآآه..ايوة و بكم اشتريتوه..شكلو قرمبع...! طالع علي فيا:لا تتفلسفي..ما لقيت إلا هوا..و ولدك إلا يبغاه...! -طيب أنا ما قلت شي..بس لإنهم في المحلات دي يا تعطيهم في وجههم يا ياكلوك...! مسك عمو كرتونة اللعبة:واللهِ واضح إنو مو أصلي..غشاشين..بكم اشتريتو...؟! علي:طلب مية بس سعود قعد يزن عليه..تخيلوا هوا إلي كاسر مو أنا...! التفت لسعود بابتسامة:من جد سعود..ايش قلتلو...؟! سعود:قلتلوووو حقك مو زي حقي إلي أول..شوفي ماما العلبة حقتو..كأنها مو من جد..بعدين قلتلو بتمانين..قلي خلاص طيب...! عمو:بداية طيبة والله..قدر ينزل عشرين ريال...! علي:والله أنا ما لي في الألعاب و الأشياء ذي.."طالع فيا"..أحسن عشان مرة ثانية تجي...! -لا أنا أثق في سعود..هوا يعرف و يقدر يفرق لو أصلي ولا مو أصلي..بعدين كويس إني ما جيت..أقلها الولد سار يعرف يكاسر...! اندق الجرس و مادري ليه لكن اتوترت...! وقف عمو و كان حيروح لكن علي قال بلا اهتمام:خلي سعود يفتح الباب...! طالعت في علي بعدين في عمو إلي قال:سعود حبيبي تعال...! قام سعود و هوا ماسك جيم بويو و مسك في يد عمو و عينو على الشاشة...! فتح عمو الباب و دخلو تلاتة رجال..بابا و أولادو..وقف علي و وقفت أنا..سلم عمو و قفل الباب بعد ما دخلو و سلمو على علي بعدين وصلولي و سلمو عليا..كل دا سار أتوماتيك...! جلسو و بالصدفة كان عبدالإله جالس قريب مني..ما يفصل بيني و بينو إلا مكان شخص واحد...! التفت لي و قال:كيفك؟! كأنو في أحد صفقني بكتاب !!! هزيت راسي:الحمـ..الحمدلله..إنتا كيفك...؟! -بخير..كويس الحمدلله. و أداني ظهرو... وي..ايش يبغى في حياتو دا...؟! فجأة كده نط عبدالرحمن في الموضوع:جود متى حتولدي...؟! تابع بعد ثانيتين:طفشان أبغى بيبي و مالي مزاج في بيبي حقي فلازم أحد ثاني يجيبلي بيبي...! احتجت وقت عشان أستوعب الكلام إلي انرمى عليا بسرعة غريبة...! قلت:ما..إن شاء الله قريب..كم شهر كده و أولد...! بابا:كم شهر يعني كم...؟! قلت:مادري..ما أحب أفكر..يمكن شهرين تلاتة مادري...! أنا أعرف بالضبط كم بقي بس دحين ما أعرف..أففف متوترة و مربوكة..أنا ليه متوترة..ايوة عرفت عشان أسلوب بابا الغبي في الكلام...لأ..أسلوب بابا كان عادي..يا ربييييييييي..أنا ايشبي...؟! عمو:وي سعود حبيبي..ليه ما تسلم على جدك...؟! عبدالرحمن بمزاح عبيط:عندو إلي يشغلو..سعودوه..سلم على جدك و أخوالك...! قال سعود و هوا يتوجه ليا عشان يعطيني الجيم بوي:حسبتكم سلمتو عليا...! أخدت الجيم بوي منو و أنا أسمع عبدالرحمن يقول:كيف يعني سلمنا عليك و إنتا مو حاس..أبغى أفهم يعني يعني أبغى أفهم أنا...! التفت سعود لعبدالرحمن:عشان إنتو بس تبوسوا تبوسوا تبوسوا..تعوروا خدي..أصلاً إنتوا تبوسوا الهوا..بس ماما تبوسني من جد..كمان بابا و عمو و أبوية و أمي و إنتوا ما تعرفوا..أنا حسبتكم سلمتوا... و قال سعود شي بصوت واطي...! قال عبدالرحمن:شوف الولد..أنا خالك ترفع صوتك عليا ليه...؟! عبدالرحمن كان مستمتع و الكل عارف إنو يبغى يستفز سعود عشان كده محد اعترض على كلام سعود...! سعود إلي كبر راسو و راح سلم على راس بابا و بعدين مشي لعبدالإله و مد يدو فصافحو الأخير و اكتفوا بالمصافحة...! عبدالإله قال بابتسامة أول مرة في حياتي أشوفها:تستاهل..علبالك كل الأولاد أولاد أختك...! أوكي سعود ولد أختو..يمكن يقصد خلود..مادري... عبدالرحمن بقهر:والله هذا سعود الطفل الوحيد إلي ما عرفت أبكيه...! عمو:و ليش الأذية..مرة ياخي مستميت على أذى الأطفال روح بكي بناتك...! عبدالرحمن:ما أقدر أقرب من بناتي أنا..ايشبكم إنتوا...؟! عبدالإله و هوا يضحك:أبله..اسكت..إلا توري الخلق إنك خواف...! -مني خواف..بس الأم تتوحش لمن أحد يقرب على أولادها..شوف جود شوية و تاكلني...! عمو:لا جود تحب تترك الحرية لسعود إنو يتصرف. و قام عمو و شال سعود و جلس جمبي و حط سعود فوقو...! حط عمو يدو ورا أكتافي و هوا يقول:سعود تحب خالو عبدالرحمن...؟! سعود التفت لعمو و سار وجهو قريب من وجه عمو:ايوة عادي..بس خليه يسكت...! علي:اسكت... التفت عبدالرحمن لعلي بابتسامة عريييييييييضة:هلا و الله بالنسيب..ليه صوتك مو طالع اليوم...؟! ما رد علي عليه فبوز عبدالرحمن بقهر..غصبني أبتسم..ملامح وجهو و هوا مقهور تضحك...! قال فجأة:ايش رايكم نلعب أونو...! بابا:عبدالرحمن..اعقل... عبدالرحمن:إنا للاااااااااااااااه... عبدالإله:أصلاً فيه أونو...؟! بابا:فيه ولا مافي..عيب إنتا رجال..لازم تبطل لعب...! اتنرفزت... قلت بنبرة بريئة:هيا الرجولة تتحدد بورق ملون عليه أرقام...؟! التفت لي بابا:لا طبعاً بالأفعال لكن اللعب للأطفال...! قلت بصوتي العادي:الرسول كان يلعب..كان لمن يزعل أو يتضايق يروح و يلعب مع عائشة رضي الله عنها و كان يحب يشوفها تلعب...! صلى الكل على النبي و قال عبدالرحمن:فديتش و فديت طوايفش يا جود..يلا نلعب أونو !!.. عمو:معاك...؟! عبدالرحمن بضحكة:لأ..هيهي... ابتسم عمو:واللهِ في مكانٍ ما في الغرفة عندي بس مي كاملة.."التفت لي"..جود عندك؟! -في البيت..ايوة...! علي:أونو أصلية من أيام زمان... عبدالإله بغلاسة طفولية فظيعة:طب احنا عندنا مونوبولي أصلية من أيام زمان..الحديدية ذيك...! علي:مافي مونوبولي حديدية..هيا ورق...! عبدالرحمن:لاااا قصدو الأشياء إلي نحركها..المكوة و الجزمة و... عمو استغل انشالغهم بالنقاش التافه و ميل راسو و همس لي:حبيبي خفي شوية على بابا و حاولي تفتحي أي نقاش معاه...! التفت لعمو فسار وجهي قريب من وجهو:نعم؟! -ها..ولا شي..كم الساعة دحين...؟! و طالع في ساعتو.. وي ايشبو عمو...؟! أنا سمعت إلي قالو عمو كويس..كنت بس أبغى أتأكد من إنو قال إلي سمعتو..بس ليش هوا غير رأيو في اللحظة الأخيرة..لو كان عاد الجملة كان قلت:إن شاء الله طيب...! قال عبدالرحمن بأسلوب لطيف:ايش حنتعشى اليوووووووووم...؟! قلت:كبسة... -لااااا..خلينا نطلب أي شي..مافي حرمة هنا تبغى تطبخ...! -أنا طبخت... طالع فيا بصدمة:إنتي سرتي من إياهنُّ..جوووود كنت أحسبك فلة...! طالعت فيه:فلة يعني نطلب و فيه أحد ممكن يطبخ..بعدين على فكرة..كبستي أنا لا تقاوم..حتى اسأل علي...! التفت عبدالرحمن لعلي بجدية و كان حيتأكد من المعلومة لولا عبدالإله إلي قال:طبعاً..القرد في عين أمو غزال...! و لف وجهو اتنرفزت و في لحظة حسيت إنو إلي قدامي بزر...! و ما لقيت نفسي إلا أطلع لساني لعبدالإله إلي معطيني ظهرو...! عمو ابتسم و عبدالرحمن ضحك أما بابا فطالع فيا مستغرب:وي بنت..ايش هذي الحركات...؟! التفت عبدالإله:هيييييييي..ايش سوت...؟! قلت و أنا أحس فجأة بالذنب:والله ولا شي بس مديت لساني...! عبدالإله بتريقة عليا:بس مديت لساني... التفت لعمو:عمو شوفو !! عمو:طنشيه... كنت حعترض على اقتراح عمو التطنيش لكن عبدالإله فجأة ابتسم:كنت أمزح... -ها... علي بسخرية على مادري مين: مين قال ها سمع... -إووووو علي..لا تستخدم دا المثل..مرة أكرهو...! عبدالإله:ايوة علي..كيفك...؟! طالع علي في عبدالإله:الحمدلله..إنتا كيفك...؟! -بخير... التفت لعمو و قلت بصوت واطي:يعني ايش نفهم من دا الحوار...؟! التفت لي عبدالإله واهوا رافع حاجب واحد و بتهديد:لا تحشي..تراني قاعد أحاول أحبك ها... بسم الله..ايشبو فجأة كده انقلب.. " أحاول أحبك " ؟! ... والله ساعات الناس دولا يخوفوا..فجأة تتقلب مشاعرهم و أفكارهم...! قلت بطاعة زي لمن أبغى أرضي سعود:طيب حبيبي ما رح أحش..أصلاً أنا ما كنت أحش...! و وقفت و أنا أسمي ربي و رحت للمطبخ..أففففف..كأنو الجو حار..يمكن مع حرارة الفرن !! طفيت النار على العشا و قلت لمنورة تعبي السلطات في صحون صغيرة و تبقيلها...! حطيت الرز و الدجاج في الصحن الكبير المدور و حطيت في صحن صغير لمنورة بعدها رحت لباب المطبخ و قلت:عمو تعال جيب صحن الرز..ما أقدر أشيلو...! وقف عمو و جا لين عندي و عداني لجوة المطبخ و علي يقول:جود..تحتاجون مساعدة...؟! -ها..لا حبيبي ارتاح بس الصحن ما أقدر أجيبو...! جدة:الله يا جود إن كانك بتولدين علينا...! -ما بقي شي خلاص بس صحون صغيرة..أصلاً الحركة أحسن..بعدين أنا ما بتعب نفسي...! -إلا تتعبين..شوفي وجهك غدا مظلم...! -عادي..لازم الحمل كده...! عمو و هوا خارج بالصحن:خلاص جود اقعدي...! جيت بدخل المطبخ مطنشتهم لكن جدة نهرتني:إنك اقعديّ...! قلت بزعل:جداااااااهـ.... وقف علي لكن جدة قالت:مو إنت إلي تقوم..عبد الإله..قوم..قوم لا أقوم عليك...! عبدالإله بطفش:ايش فييييييييييييييه...؟! جدة:قوم اخدم أختك في حملها و اكرمها..الله وكبر عليكم إن كان بتهلكونها كذة كل ما حملت...! عبدالإله لجدة:إنا لله عالحب المفاجئ إلي يطلعلك فجأة...! ابتسمت و جلست..عبدالإله قام متنرفز..كان ممكن يقوم عادي لكن جدة استخدمت لفظة غلط..استخدمت كلمة "اخدم"،الشي إلي طلع قرون لعبدالإله...! بابا:هيا..ولدي يتهزأ عشانك...! ما قالها بحقد أوغيض..لا بالعكس قالها ممازح...! و كان أنا قدامي خيارين..يا أستجيب للمزحة دي و أكسر عدد بسيط من الحواجز أو ما أستجيب و ينعاد موال السنين...! و خلال ثواني فكرت و قلبت الخيارين و اخترت إني أبتسم...! -و هوا أنا أحمل كل شوية...؟! علي:بس والله جدة رهيبة لمن تحب أحد...! قلت:طبعاً..أم سعود مو أي شي...! بابا:أم سعد... -مالي شغل أبغاها أم سعود زيي...! جدة:إلا يا بنتي..إني أبغاني أم سعود...! ابتسم عمو و قال بابا:هيا خلي سعد يسمعك...! جدة:سامعني و داري..و إن كان الوحدة ما بتختار كنيتها لولدها ايش بتختار...؟! قلت:صح..ما شاء الله..محلايا والله أتكنى لولد من أولادي و أنا ما أحبو...! عبدالرحمن:مافي أم حتكره واحد من أولادها...! -لا مو عن تكرهو..بس مثلاً لو في وحدة واحد من أولادها قليل أدب ولا قليل خاتمة..بأي حق تتكنى بيه..كل ذنبها إنو الكبير يعني...! بابا:فيه قصة مشهورة للنبي مع رجال تظهر إن الوالدين يتكنوا لأكبر ولد احتراما له...! -عليه الصلاة و السلام..عارفتها القصة لكن أحياناً ما يستحق الاحترام و أنا كأم مابغا أتكنى لواحد موطي راسي مثلاً..أنا بتكلم عن الأشياء الكبيرة مو عن كسل في المدرسة ولا قلة ترتيب في البيت...! عبدالرحمن بتفكير:يمكن كلامك صح بس في النهاية هذا الولد ما طلع إلا من تربية أمو و أبوه...! -كنت أقول كده بس دحين عرفت إنو الأم و الأب مو هما إلي يربوا قد ما التلفزيون و الأصحاب يربوا و يأثروا..كتير أشياء ما تعجبني في طفلي..لا أنا أسويها ولا أبوه...! قبل ما أحد يعلق رفع سعود راسو عن الجيم بوي و قلي:طفلي يعني أنا...؟! -ها..لا حبيبي أنا بتكلم بشكل عام...! اتنهد سعود بطفش و رجع لشاشة الجيم بوي...! عبدالرحمن:على مين..قال طفلي قال...! و ضحك..انقهرت:دحين ايش إلي يضحك...؟! عبدالرحمن:سعود... من غير ما يرفع عينو:نعم... عبدالرحمن:نعامة ترفسك...! طالع سعود في عبدالرحمن بحدة و رجع بعد كده لجيم بويو...! علي بابتسامة:ولدي..هذا ولدي... ابتسمت و أنا أقوم:عشان مرة تانية لا تتعرض لولدي...! تابعت:سعود حبيبي يلا عشان نغسل يدنا...! قام سعود و هوا ينهي إلي كان في يدو..ضغط على ستارت و جاني...! الكل غسل يدو بعدها جلسنا عالسفرة..عبدالإله و هوا يرتمي عالأرض:ما بغيتو تجلسوا...! عمو:دحين إنتا ما تعرف تكمل جميلك..لازم تحطلك لمسة في النهاية...! عبدالإله:هذا مو جميلي..أنا أُجبرت على هذا الجميل...! قلت و أنا أغرف لسعود:ما دام الشغل فيك فيك اتظاهر بإنك إنتا اتبرعت...! -اسكتي إنتي كلو من تحت راسك...! جدة:والله يا عبود..تسكت أختك هاااا... التفت عبدالإله لجدة:أبغى أفهم..ليش في صفها...؟! -لإنها حامل... قلت و أنا أشوف جدة تاكل أول لقمة:جدة الملح كويس...؟! هزت راسها بايوة و جلست أنا أأكل سعود..مو أأكلو أأكلو بس أساعدو عشان لا يعدم لبسو..مافيا حيل أغسل..لسه قبل أمس مخلصة كل الغسيل...! و بعد ما خلصنا العشا اعتذرت بإني ما أقدر أرفع..بصراحة تعبانة..رحت لغرفتي و اتمددت..يا ربي..مستغربة..ليش تعبانة مرة..والله في سعود ما تعبت دا التعب...! تعرفوا ايه..قاعدة أفكر في شي..قاعدة أقول يمكن التعب إلي فيا مو من الحمل قد ما هوا من أشياء تانية...! ياااا الله قد ايش اليوم انحرق دمي..في حياتي ما اتوقعت إنو عمو ممكن يكون بدي الصعوبة..عمرو ما أعطاني إحساس بإنو عنيد أو غلس إلا في موضوع ودا..أوكي أعرف..الرجال مرة حساسين و مستحيل يكلموا أحد في شي زي كده بس خلاص..أنا عرفت..ليه ما يتعاون و يتجاوب معايا...؟! اليوم ولا كأني اتكلمت..من بعد ما قلي إنو مستحيل يرضى لأحلام بنفسو و دخل غرفتو معد كلمني..خرج للصلاة و رجع و من بعدها قعد معايا عاااااادي..شي من جد يقهر..لا و كان يكلمني في أشياء عجيبة .. تخيلوا بالله .. يناقشني في "أفاتار" و قد ايش حلو الفلم و قد ايش نجح ..! حسيت نفسي حنجن..كيف يكلمني في فلم وأنا لسه قبل شوية بأترجاه يوافق على شي في مصلحتو...! فجأة اندق الباب فانقطع حبل أفكاري...اعتدلت في جلستي و أنا أقول:اتفضل... انفتح الباب و كان عبدالرحمن مبتسم..قال:منتي نايمة..صح...؟! ابتسمت و أنا أهز راسي بلأ..اتقدم مني و هوا يطلع جوالو:أقولك فيه أغنية فرنسية أحبها أبغاكي تترجميلي هيا...! ابتسمت:ايش اسمها...؟! ضحك بهبل:ما أعرف.. قلت:ما أقدر دحين والله تعبانة..ارسلي هيا و أنا أرسلك ترجمتها بعدين...! بوز بعدين قال:كده خربتي الموضوع إلي كان حينفتح...! -هااا... ابتسم و قال ببساطة:كنت أبغى أفتح حوار معاكي بس بتعبك قفلتيه...! ابتسمت:سعود فين...؟! -مادري في الصالة..بس ترى أنا معجب بولدك..ترا هوا حق بنتي ماليا شغل...! ابتسمت:كيفهم بناتك و حليمة كيفها...؟! -الحمدلله كويسين..صح حليمة تسلم عليكي...! -الله يسلمها...! قال و هوا يحك راسو:آآه جود..كنت أبغى أسألك في شي...! -ايش...؟! -هواااا..جود أبغى أسأل..هل أنا أهبل لدرجة إن الواحد ما يعتمد عليا...؟! أول إحساس جاني بعد سؤال عبدالرحمن كان إنو عبدالرحمن يلف و يدور...! قلت:واللهِ مادري..أنا ما قد اتعاملت معاك لكن الظاهر ليا إنك تستهبل منتا أهبل...! -يا شيخة الشباب حولي طفشوني..كل شوية يقولو إنتا زي البزورة ما عندك هرجة..مدري كيف متزوج و مخلف..و خرابيط زي كده...! -و هما مالهم...؟! -مدري... بعدها سكتنا...! مدري لكن حاسة ورى عبدالرحمن شي...! قلت:و إنتا دا الموضوع مضايقك مرة...؟! -ها..لا عادي... -طيب... -ايش...؟! حك راسو و هوا ماسك ابتسامة..بعدها طالع فيا:أوكي جود..بصراحة قاعد أحاول أفتح معاكي أي نقاش و هذا أول شي جا على بالي.."ابتسم بحرج"..اتوقعت تبدأي تتكلمي عن غباء الناس و آرائهم الأغبى...! ما عرفت ايش المفروض تكون ردة فعلي..يعني أنا تعبانة و في غرفتي و يجيني واحد هدا كل هدفو..أنا عارفة عبدالرحمن عفوي بس بجد مني عارفة بايش أرد عليه...! و ما لقيت نفسي إلي أقول:طيب بصراحة..مني عارفة ايش أقولك.. تابعت بعد ثواني باسترسال مفاجئ:أقدر جداً إنك جيت لين حدي تبغى تفتح معايا نقاش بس عبدالرحمن خليني أقولك شي..إنتا منتا مضطر تفتعل أي شي..صدقني أنا مستعدة أرحب بأبوك في أي وقت لو حسيت إنو جوتو.."و أشرت بأصابعي بحركة".. قد كده مشاعر صادقة تجاهي فكيف إنتا و إنتا من مدة تبذل جهدك عشان توصل علاقتنا للوضع الطبيعي في الوقت إلي أعتبر فيه موقفي سلبي تجاهكم و ما زلت أحس بإني دخيلة على عماتي و بنات عماتي..أنا أعترف إني ما أقدر أنسى لكن في نفس الوقت مستحيل أحقد أو أطلب منكم إثبات على محبتكم..صدقني متى ما تجي إنتا و بناتك و حليمة تنوروني و تبسطوني..في أي وقت..ارفع السماعة و قولي..أنا يا عبدالرحمن ما عندي دي القدرة إلي تخليني أدخل في الناس و أسوي معاهم علاقات بس أنبسط و أحس بسعادة لمن هما يجوني..عشان كده حبيتك إنتا و سارة أكتر شي..لإنكم دخلتوا فيا غصباً عني...! طالع فيا و قال بصدق:عارفة..السلبية ذي مشكلة فينا كلنا..لين وقت قريب ما كنتي هامتني..من جد..كنت أقول و أنا مالي بوجع الراس..فاكرة لمن قلتلك إنو السبب أبوية و إنو لو مو أبوية أمي إلي تخاف علينا من غضب أبوية..ترا كل هذا راح من يوم ما اتزوجت..بس أنا فجأة حسيت ببناتي يكبروا..حسيت إني ما أبغاهم في يوم يحسوا بالحيرة تجاهك..لو أنا كنت مطنشك كأخت لأسباب أشوفها مقنعة هما ما رح يلاقوا أي سبب مقنع عشان يطنشوكي كخالة..بكده بدأت أتقرب منك بس "ابتسم" لقيت نفسي سعيد بتواجدي حولك..سبحان الله..ارتحتلك..كذة من غير سبب...! ابتسمت..ما عرفت ايش أقول لكني أحس بإحساس حلو...! ابتسم و هوا يوقف:طيب خلاص أنا بروح...! وسعت ابتسامتي:طيب ممكن تناديلي سعود...! قال بخوف طفولي:لااااا مابغا..زوجك حاقد عليا أخاف أنادي ولدو لكي يقوم يقلبها تحقيق...! قطبت حواجبي بابتسامة:ليه يعني...؟! -مادري يا شيخة عنو..والله زوجك عقد...! -علي..لا والله مو عقد..بالعكس...! ابتسم:يمكن معاكي إنتي مو عقد..مع الناس غرز...! -ها... -عقدة..ايش اللفل التاني..غرز... لمن ما راحت التناحة من وجهي قال:تفصيل..مدرسة... قطبت حواجبي مستغربة و مني فاهمة... -مالت عليكي..heavy blooded!! ضحكت:ايش يعني..تقيلة دم بالانجليزي...؟! هز راسو بايوة فقلت:هادي تضحك...! -يلا يلا خلاص بروح...بباي.. و خرج...! قطبت حواجبي بابتسامة و أنا أرجع أتمدد..دخل فجأة و خرج فجأة...! تمتمت لسببٍ ما:"الحمدلله" لكن سرعان ما اتذكرت عمو و ما احتجت وقت عشان أتوقع إني حرجع لبيتي و لسه ما أخدت منو كلمة...! **************************** |
الجزء السابع عشر (سُفرة..و لأول مرة) "جود يلا قومي الصلاة" قلت و أنا أقوم:لقيت توبك؟! -ايوة ايوة... اتوجه علي للدولاب بينما رحت أنا للحمام...! كنت حاسة نفسي تعبانة و أبغى أنام..استغفر الله... اتوضيت و خرجت..ما لقيت علي..الظاهر خرج للصلاة...! كبرت و صليت..بعد ما خلصت حاولت أنام بس ما قدرت..كنت تعبانة بس مادري ليه مو قادرة أنام..اتعوذت بالله من الشيطان و أنا أغمض عيني...! سمعت بعد دقايق صوت بكا قريب مني..فتحت عيني مفجوعة و كان سعود يبكي..جلست بتعب:بسم الله سعود..ايشبك...؟! قرب مني و حضني و قال ببكا:ماما أبغى أجي عندك..شفت..شفتك تروحي... رفعتو بصعوبة و سدحتو جمبي و انسدحت..طبطبت على صدرو بتعب:بسم الله حبيبي..لا ما أروح..بسم الله..قول بسم الله بابا... قعدت أقرأ على سعود لين ما هدي و هديت أنا كمان...! ^^^^^^^^^^^^^^^^^^^^ علي،،، همست:ايش قاعد تقول سعود؟!،كيف طاحت..ايش طيحها...؟! قال سعود بصوت متحشرج:خرجت بتجيب موية لنفسها و كانت الأرض مبللة فطاحت... -وذحين..كيفها؟! -علي مادري..أمي تعبانة..علي..أنا ما أقدر أكلم جود..اليوم خميس و إنتو أكيد جايين..كلمها بس لا تفجعها..قولها أمي كويسة...! -طيب..طيب الدكتور ايش قلك عنها...؟! قال بحرقة و وجع:يقول..يقول جاها شُعُر..ما..ما..يقول... قلت و أنا أفكر:شُعُر؟؟؟؟!!!! -يقول جاها شُعُر..شعر يا علي شعر... -خلاص خلاص سعود اذكر ربك..إن شاء الله ما فيها إلا العافية..أنا بجي مع جود اليوم و إن شاء الله جدة بخير...! -علي..لا تفجع جود..قولها إنها تعبت شوية..والله أخاف يسير فيها شي..علي الله يخليك..مني ناقص...! -خلاص سعود خلاص..أنا بتصرف..ما عليك.. قال بصوت واطي:علي..مني عارف ايش أسوي... -استهدي بالله يا رجال..أمك ذحين في بيتها تحت عينك و إن شاء الله ما فيها شي..بلغت أخوانك إنتا...؟! -ايوة..موجودين كلهم..بس..بس أمي تسأل عن جود... شي من الراحة اتسلل لقلبي لمن فهمت إن جدة تتكلم...! -خلص ولا يهمك..جايين..ما يجي العصر إلا و احنا عندك...! -إن شاء الله.. -تبغى شي...؟! -لا سلامتك... -الله يسلمك..مع السلامة...! تكيت راسي على ظهر الكنبة..يا ربي..ايش أقول ذحين لجود..والله لتنجن عليا..كيف أهديها...! "علي..." فزيت:هلا... -ايشبك...؟! -ها..ما..ما فيا شي... قطبت جود حواجبها و جات جلست جمبي:إلا فيك شي..ايشبك...؟! لازم أقولها..يا ربي عونك...! -آآآ..جود..دوبي مكلم عمك و... قالت بفجعة:ايش..فيه شي...؟! -ها..لا لا حبيبي بس جدة... -ايشبها جدة...؟! -ما فيها إلا العافية بس تعبت شوية...! دمعت عيون جود و أنفاسها عليت فجأة:علي..جدة ايشبها...؟! -ما فيها شي..جود ايشبك..اذكري ربك... بكيت:إلا فيها..ليش عمو كلمك و ما كلمني...؟! مسكتها من أكتافها:جود..جود ايشبك... -بربك علي..جدة فيها شي... -ما.. -بربك أقولك..جدة فيها شي...؟! هزيتها:جود ايشبك..إنتي حتى ما سمعتيني..جدتك ما فيها شي.. -طب..طب ايش تعبها..تعبت شوية..طيب ايش فيها...؟! -أول شي تهدي و بعدين..مني قايلك و إنتي كذة... زاد بكاها:هيا فيها شي..جدة فيها شي... قلت بشدة:جود... رفعت راسها بسرعة و قعدت تطالع فيا بشفايف مرتجفة...! حضنتها و قلت بصوت واطي:إن شاء الله تكون بخير...! -طب ايشبها..ليش ما تقولي...؟! -طاحت..طاحت من موية كانت عالأرض..في المطبخ... بعدت عني و قالت بصوت عالي:طاحت عالسيراميك...؟! -ما جاها شي..الحمدلله ما انكسرت..بس..بس جاها شعر..و..و..لفوا حوضها في المستشفى عشان العظم ما يتحرك و..و إن شاء الله بخير..هيا في بيتها ذحين و... شوية شوية جود كانت تغطي وجهها و تنهار بالبكا...! حضنتها:جود خلاص لا تبكي..ما فيها شي..عمك قال إنها كويسة و تسأل عنك تبغاكي..ما حتسأل عنك إلا و هيا فيها قوة..سمي بالرحمن ما فيها إلا العافية...! رفعت راسي لسعود إلي كان يطالع فينا من عند بابا الصالة..تركت أمو إلي مسحت دموعها و هيا تحاول تتمالك نفسها قدام ولدها !! ناديت سعود فمشي لنا ببطء و على وجهو الحيرة..طالع في جود:ماما ايشبك...؟! رفعت جود راسها:ما فيا شي..روح البس عشان نروح عند جدة...! سعود و هوا على وشك يبكي:ليش دحين..لسه... كنت عارف لو بكي سعود حترجع تبكي جود و وقتها حفقد أنا السيطرة...! -حبيبي جدة تعبت عشان كذة ماما تبكي..نبغى نروح لها ذحين عشان نقعد معاها...! طالع فيا سعود لثواني بعدين حط يدو على كتف جود:طب عادي ماما لا تبكي..زي لمن إنتي أول تعبتي في..في المدينة بعدين سرتي كويسة..عايدي ترى..والله جدة طيبة ما فيها شي...! قلت:إن شاء الله..ذحين روح البس عشان نروح لجدة...! راح سعود فقلت لجود:هيا جود..قومي نلبس عشان نروح...! قومتها و رحنا لغرفتنا نلبس...! يا رب..يا رب فعلاً ما يكون فيها إلا العافية..أنا ما طمنت جود إلا من خوفي عليها..بس يا رب ما يكون في جدة شي...! ^^^^^^^^^^^^^^^^^^^ سعود،،، قاموا بنات أخواني لإنو جود جات و معاها علي بيدخل يسلم على أمي...! دخلت جود و بعدت الطرحة عن وجهها إلي أثر البكا كان باين عليه..أول ما طاحت عينها على جدة انقلب وجهها..كنت بروح ألحقها لا يسير فيها شي لكنها كانت اتوجهت لأمي..انحنت و سلمت على وجهها و راسها و طولت عند رقبتها...! أمي كانت تمسح على شعرها و تقرأ عليها..أمي لحظتها كانت أقوى من جود...! أخفضت راسي لمن حسيت بعلي جمبي..حضني و قال بصوت غير مسموع:كيفك...؟! -الحمـ..الحمدلله... تركني و اتوجه لأمي..سلم عليها بعدها رفع سعود و خلاه يسلم...! جود مشيت لي و حضنتني..مسحت على راسها و بستو:بس بابا..جدة كويسة..ما فيها شي.. تركتها و قلت لعلي:تعال المجلس... التفت لسعود و حاولت أبتسم:تجي معايا... طالع فيا و على وجهو نظرة الـ ولا شي و هز راسو بلأ و هوا زام شفايفو...! شال علي سعود و همسلو بشي في أذنو فسكت الأخير و حط راسو على كتف علي إلي راح للمجلس...! التفت لجود و ابتسمت و أنا أحس بالوجع من جوتي:جود حبيبي لا تضغطي على نفسك..أمي ما فيها شي... طالعت فيا و التعب باين على عينها:هِيا كيف طاحت...؟! -ما..جود أبوية خلاص..خليكي إنتي دحين معاها..هيا من أول تسأل عنك...! و رحت للمجلس...! ارتميت عالكنبة جمب علي إلي كان حاط في حضنو سعود..سعود كان سااااااكت..كان في عالم ثاني..حسيتو مو معانا أبداً...! طالعت في أخواني..كانوا يتكلموا عادي..صح كانوا متضايقين بس مو زيي..كانوا كلهم أقويا..كانوا .. أنا ليه ضعفان..ليه أحس محد موجوع غيري..يمكن لإني عشت مع أمي أكثر منهم..يمكن لإني الصغير و الصغير دايماً الأقرب للأم...! بعدين جود..أنا أحتاج ذحين جود..يا ربي..استفغر الله العظيم..ما أعترض بس تعباااااان..أنا تعبااان...! أحس راسي حينفجر !! رفعت راسي و أنا أسمع سعد ينادي:علي.. طالع علي في سعد:نعم... ابتسم سعد:كيف حالك...؟! -الحمدلله بخير..إنت كيفك...؟! -بخير نحمد الله..كيف سعود و كيف بنت أخوية...؟! -الحمدلله... سعد:سعود..ليش ساكت..سعووووووود... علي:سعود كلم عمك... سعود كان مسترخي و شبه نايم بسبب الجو الهادي...! رفع نفسو عن علي و قال و هوا يطالع في سعد بتفحص:نعم... -كيف حالك...؟! -كويس... -ما بتسألني عن حالي...؟! طالع سعود في سعد لثواني قبل ما يبرطم و يحمر خشمو..رجع راسو لصدر علي و لف وجهو عن سعد...! سعد:يه..سويت شي...؟! علي و هوا يمد لي سعود بعد ما مديت يدي لو:لا بس هوا تعبان شوية...! سعد:عاد بغيت أتكلم معاه...! سعيد:ما عليك..الولد ذا مدلع...! همس سعود و ما سمعتو إلا أنا:أنا مو مدلع... مسحت على راسو و حسيت بحرارة.. التفت لعلي:فيه حرارة شوية... مد علي يدو يعس سعود و على وجهو انزعاج:يا الله.. قلت بصوت واطي لعلي:جود و هيا صغيرة كانت علطول تسخن لو حست بأحد تعبان أو بالجو متوتر...! "لو..محتاجين..تبغوا أنزل أجيب دوا؟!" عبدالله إلي اتكلم...! التفت علي بسرعة و قال بشدة:لأ... طالعت فيه مستغرب..ليش كذة يكلم الولد؟!،عبدالله معروف طول عمرو مبادر ويتطوع في كل شي..مو قصدو يتفضل عليه أو شي !! قلت:لا حبيبي..سعود يمرض مع الزعل عادي..ينام و يصحى طيب..ما عليك...! عبدالرحمن:طب ليه زعلان..أحد خاصمو..علي..يا مفتري... سعيد:ما تعرف ولد أختك يعني..طالع على سميو مدلع... طنشت لكن علي ما طنش:بس سبحان الله..ما شفت الرجولة إلا فيهم...! سعد:طبعاً..معروف..الطفل المدلل بحكمة دايماً يطلع رجال..لأنهُ يكون قد حظي بما يحتاج من حنان...! علي:مممم..صح ايوة... اتفاجأت لمن حسيت بسعود يقوم عني و يوقف،مسح عينو اليمين بقيضة يدو و قال بصوت مخنوق:غبيون كلكم..أنا مو مدلع... و مشي خارج من المجلس..انصدمنا كلنا..ايشبو الولد فجأة...؟! سعد:باين عليه من أول زعلان... عبدالرحمن:ياخي ليتك وديتو في بيت أبوية مع باقي البزورة... سعيد:الله يهديك يا علي..ليش تجيبو...؟! طالع علي في سعيد:ما جا على بالي... و وقف بعد ما قالي بيكلم أهلو...! قلت لسعيد:ما..ما عليك خلاص بيروح عند أمو..هوا من أول أصلاً ما يبغى يجي هنا... آه يا رب..مصدع..راسي يعورني..أحسو ثقيييييييييييييل..ثقيل مرة...! ^^^^^^^^^^^^^^^^^^^ جود،،، انفجعت لمن شفت سعود طالع من ورا الساتر إلي نحطو عند باب المجلس..وجهو ما كان عادي..الزعل باين عليه...! جا لين عندي..لفيت يدي حول أكتافو وقلت بصوت واطي:ايشبك يا بابا..ايش فيه...؟! طالع فيا و هوا مبرطم:أبوكي بس يقول مدلع مدلع..عشان عشان أنا قعدت عند بابا...! وقفت و انسحبت من الصالة إلي انتقل لها سرير جدة بما إنها أوسع و متهوية أحسن...! رحت لغرفتي و دخلت فيها مع سعود..رديت الباب...! خليت سعود ينسدح عالسرير و اتمددت أنا جمبو..فرصة عشان أرتاح شوية..قلت:ايشبك حبيبي..ليه زعلان...؟! -مادري..بس هادا أبوكي بس يقول مدلع..بعدين سرت ببكي... اتنهدت..لأول مرة أحس نفسي عاجزة عن التصرف مع سعود...! قلت:طب بابا تبغى تلعب جيم بوي...؟! هز راسو بلأ فقلت:طب تنام..حاسس نفسك تعبان...؟! -لأ ماما أبى معاكي... -حبيبي أنا تعبانة و لازم أقعد مع جدة..والله مني فاضية... برطم سعود..حسيت نفسي من جد مني عارفة كيف أتصرف...! اندق باب الغرفة المردود بعدها انفتح..كانت سارة...! دخلت بهدوء أكسبها إياه الوضع..جلست عالسرير بعد ما اعتدلت جالسة و سعود اتحرك و حط راسو على فخدي...! حطت يدها على سعود:حار... هزيت راسي بايوة فقالت:كيفك...؟! -الحمدلله..إنتي...؟! هزت راسها:طيبة..آآم جود..لو تبغي..أنتبه لسعود... بسرعة:لا حبيبي..ما يحتاج... -لا لإنو ماما قالت جايين ضيوف و الظاهر رح تنشغلوا...! -ضيوف ايه...؟! -ناس من الجماعة دولا..جايين يسلموا على جدة...! اتذكرت..قد مرة تعبت جدة و اتكدسوا الناس علينا بشكل متعب..و بدل ما يسيروا أدوا واجب تعبونا بذبايح الكل يوم و الضيافة و مدري ايش هوا...! عضيت شفتي السفلى..الله يعين بس...! قلت:سعود بابا لازم أروح أقعد مع جدة... ابتعد سعود عني و سحب البطانية و غطى نفسو...! اتنهدت فقالت سارة:ما عليكي..أنا بنتبه لو...! قلت:هوا رح ينام علطول بس خليكي معاه الله يسعدك لين ما تتأكدي إنو نام...! ابتسمت:طيب... قلت بصدق:شكراً... و خرجت و أول ما خرجت لقيت أم سارة في وجهي..مدري ليه بس حسيت قلبي طاح...! قالت و هيا تأشر على غرفتي:سارة جوة...؟! خفت..أخاف تحسبني أستغل بنتها أو شي..والله سارة هيا إلي عرضت..أنا مالي !! قلت:أيـ ..ايوة... -لحالها...؟! -للللأ...مع سعود... -آه بس حسبتها فاضية..باقي البنات وين...؟! -مادري... تابعت بسرعة:تبغي شي...؟! طالعت فيا:لأ يا ماما إنتي روحي اقعدي مع جدتك... و عدتني لغرفة جدة وين ما كانوا البنات مستقرين...! رحت للصالة و أنا قلبي يدق بقوة..يا ربي قد ايش أستحي منها..و رغم إنها ما تسوي حركات هبلة..بس دايماً إحس إني سلبت منها شي و أحس..هيا كمان تحس كده !! ^^^^^^^^^^^^^^^^^^^ جود،،، حطيت الصحن على الطاولة الصغيرة إلي قدام جدة و أنا أتنهد...! جدة مي راضية تاكل !! قالت وحدة من العجايز إلي على السفرة:الله يا أم سعد إن كانك بتتعبينا معاك..كلي الله يهديك... لأ..لأ فظيعين..من بعد العصر جو و إلمن دحين..ايش قلة الذوق دي..استغفر الله بدل ما ياخدوا أجر أخدوا ذنب..تعبت و أنا أرتب للضيافة لإنو لو ما كان كل شي بيرفكت حيروحوا يلفوا على العيلة كلها و يقولوا:ما فيهم سنع..ما فيهم كرم... أنا أداريهم و لا أداري جدة ولا سعود و لا أداري نفسي...! قلت:جدة الله يخليكي كلي..ما يسير كده..كلي الله يخليكي... قامت وحدة من العجوزات و هيا تحمد الله..قربت من جدة..أعرفها دي..دي صحبة جدة الروح بالروح...! حطت يدها على كتفي:قومي يا بنتي قومي ارتاحي... قلت:لا عمة مرتاحة..ما تقصري... هزت راسها:قومي..قومي ادخلي كليلك لقمة..شوفي ولدك..شوفي عمرك.."دنقت ليا"..و إن شاء الله نص ساعة و هم خارجين... -ها... -قومي قومي... جدة:قومي يا جود قومي... طالعت في جدة مستغربة و الحرمة تقومني..جلست صحبة جدة مكاني و بدأت تأكل جدة و أكلت معاها..قعدت أطاااالع..ليش تاكل معاها و ما تاكل معايا...؟! حزت في نفسي بصراحة..ليه أنا بنتها...؟! التفت لي الحرمة:هيا روحي يا بنتي روحي... سمعت رنة جوالي فرحت متجهة لغرفتي لكن استوقفني صوت سارة تناديني...! كان صوتها جاي من غرفة جدة..لسه أهلي ما راحوا..بس البنات من يوم ما جو الحريم قليلات الأدب دول و هما في الغرفة و عماتي و زوجات بابا و عمو سعد قاعدين يوجبوا في الحريم من أول...! رحت لغرفة جدة و وقفت عند بابها..كانوا قاعدين يتعشوا..غرفولهم و مشيوا...! قلت:نعم؟! سارة:اتعشيتي...؟! -لأ... -طب..تعالي معانا لا تقعدي ضغطك ينرفع و تتعبي...! -لالا مابا... خلود:بلا عبط تعالي لا تقعدي مع إلي هناك... -لا مابغا..بعدين جوالي يدق..يمكن علي يبغى شي...! سارة:طب نغرفلك... -والله مالي نفس حبيبي..كمان بروح أشوف سعود..شكلو حيبدأ سخونة...! -لا لا نومتو..ترى ما فيه شي... ابتسمت:شكراً حبيبي.. و أديتهم ظهري بمشي و قبل ما أتحرك سمعت همس:"ايشبها دي؟!" بصراحة ما عندي القدرة عشان أميز مين بالضبط بس على كلٍ ما يهمني...! رحت لغرفتي و لقيت اتصال من عمة..يوووه..ما فيا حيل أكلم بس عيب..لازم أتصل..عشان كده جلست على السرير و دقيت و ما كانت ثواني إلا وردت:ألو... -أيوة السلام عليكم...! -هلا و عليكم السلام..جود حبيبي كيفك؟! -الحمدلله كويسة..إنتي كيفك عمة...؟! -الحمدلله يا ماما..إنتي كيفك و كيف جدة...؟! قلت و أنا أتنهد:الحمدلله كويسة... -كلمني علي والله وقلي..طمنيني يا بنتي عليكم..جدتك كويسة...؟! -الحمدلله يا عمة جت على كده..الحمدلله... -حبيبي تبغي أجي عندك...؟! للحظة حسيت إني أبغى عمة...! قلت بلهفة من غير تردد:ايوة عمة... اتداركت الوضع:لاء عمة..ناس كتير هنا..جو من العصر..ما راحوا..تعبوني..و سعود تعبان..مو راضيين يروحوا..تعبوا جدة... -مين ذولا...؟! -مادري يا عمة..ما أعرفهم كلهم..ناس يقربولنا من بعيد..مادري أصلاً كيف عرفوا بالخبر..تخيلي بدل ما ييجوا يقولوا كيفك جو دقوا العشوة..راح علي جاب رز و لحم..اتعشوا و برضوا ما راحوا...! -يا بنتي أهلكم ذولا.. بقهر:أهلنا يثقلوا علينا..عمة تعبونا تعبونا... -خلاص يا ماما خلاص..بكرة إن شاء الله أنا أكون عندك لو تبغي..ولا أقولك متى ما بغيتيني اتصلي.. سحبت نفس قوي و طلعتو...! عمة:بسم الله عليكي... قالت بعد ثواني:هيا عمك يبغاكي... اتحمحمت عشان يتعدل صوتي...! عمي:أيوة... -احم..ايوة هلا عمي..كيفك...؟! -إنتي إلي كيفك...؟! -الحدلله بخير إنتا كيفك...؟! -أنا بخير..كيف جدتك...؟! -الحمدلله.. -سعود كيفه...؟! ما عرفت أية سعود يقصد لكني قلت:الحمدلله كويس... -جود ايش رايك تجيبين سعود عندنا...؟! -كيف...؟! -لين ما جدتك تصير طيبة..ترجعي على بيتك... استغربت:ليه..أنا حروح على بيتي إن شاء الله... -ما بتقعدين عند جدتك...؟! -ها..إلا بس... -علي قال ناوية تقعدين لين جدتك تتحسن... أوكي..أنا ما أعرف أي شي عن إلي يقولو...! -خلاص يسير خير..أشوف أنا كيف الوضع و أتفق مع علي و... سكت..مادري ليه..أحس كأني..مادري مادري... عمي:شوفي يا أم سعود..إنتي غالية عندي..لكن لو دريت احتجتي شي و ما كلمتي عمتك بزعل عليكي..و ها أنذا أبلغتكِ...! أجبرني أبتسم بآخر جملة..قلت:الله يسعدك عمو..ما تقصروا والله... -هيا خذي عمتك ... عمة:هيا أمي مع السلامة..سلمي على جدتك و انتبهي لنفسك... -إن شاء الله... -يلا نشوفك على خير... -مع السلامة... فصلت و أنا أتنهد..أحس نفسي ارتحت شوية..يا رب لا تحرمني منهم..عمو و عمة من أحلى الأشياء إلي سارت لي بعد زواجي...! التفت لسعود..كان نايم..بس على وجهو التعب..انحنيت و بستو..يا ربي عليك يا سعود..إنتا أكتر شي أشيل همو...! سعود مو من الأطفال الطبيعيين أو العاديين..مو أمدحو عشنو ولدي..لا باين عليه..سعود من الأطفال الأذكيا إلي يخافوا و يحسوا لو فيه شي مو حلو قاعد يسير..لو طفل طبيعي كان ما اهتم بمرض جدة بس سعود غير..يشيل هم الأشياء و يقلق...! دحين و هوا صغير كده..كيف لمن يكبر...؟! بدأ سعود يتحرك..أكيد حيصحى..لإنو نومتو كانت نومة تعب..تستمر كم ساعة و بعدها يقوم...! فتح عينو بعد دقائق و رفع راسو..بستو و أنا أحط يدي على رقبتو:ها حبيب مامي... مافي حرارة..زي ما اتوقعت..ديك كانت سخونة زعل...! -ماما... -يا عيونها... -ما نروح اليوم البيت...؟! -ما أعرف حبيبي..أنا أبغى أقعد مع جدة..بكلم بابا و أشوف... -ماما أنا أبغى معاكي... حضنتو:طيب حبيبي ولا يهمك... بعدتو عني بعد ثواني:هيا تقوم تغسل... قام سعود و هوا يقول:فيه ناسات برة...؟! ابتسمت:ايوة حبيبي بس إنتا امشي بسرعة روح الحمام..محد يشوفك...! -طيب إنتي تعالي... قمت و أنا أبتسم..حطيت يدي في يدو و رحنا..و بعد ما خلصت غسيل و تشطيف رجعت على غرفتي..جلست سعود على كرسي التسريحة و اتجهت لشنطتي...! أعطيتو لبان و عطرتو و بعدها خرجنا من الغرفة و استغربت من إنو الأصوات انعدمت إلا من صوت عماتي و البنات..و صوت أطفال جديد...! رحت للصالة و لقيتها خالية من سفرة العشا..بس عماتي و البنات كانو قاعدين قدامهم شاهي و جدة نايمة...! قلت باستغراب:وين الناس...؟! التفت لصحبة جدة إلي قالت مبتسمة: هيّا طردتهم لكي... -طردتيهم...؟! -لا والله لكن قلت إن أم سعد تعباااااانة و إنك إنتي ما فيكي شدة و ولدك تعبان..عاد خلاص..العيب بيكون عليا قلت هالكلام مو عليكم...! -ليه..خلاص سعود مو تعبان الحمدلله و كان دخلناهم جوة عن جدة...! سارة:إلا أحسن..يا شيخة ولا كأنو قدامهم مريضة..ايش ذا...؟! قامت سارة بابتسامة و شالت سعود:سعووووودي حبيبي..نمت معايا اليوم...؟! سكت سعود و لف وجهو فقالت:سعووووود..هيييي..ايش سويتلك أنا؟!،ليش ولدك كده مطنشني...؟! قالت أمها:نزلي الولد و خليه في حالُه...! قلت:لا عادي..سعود أبوية... نزلتو سارة و قالت بهمس حزين على سعود:والله حبيبي مرة زعلان...! خلود:خليه يروح..ترى جو أولادي و أولاد عبدالرحمن..جوة في غرفة جدة...! مسك سعود فيا:مابغا... اتنهدت... تركني سعود و راح..اتحركت لقدام السيب عشان أشوف وين بيروح..و راح لغرفتي...! رجعت جلست على أقرب كنبة مني...! خلود:ايشبو..مو على أساس يعرف أولادنا...؟! طالعت فيها:تعبان... أم سارة:تعبان ايش فيه...؟! رفعت أكتافي:مادري..عشان جدة و عشان الجو... عمتي صفية:ولدك ذا مدلع..ايش دراه هوا بمرض جدة...؟! استغفر الله يا ربي..عاد عمة صفية دي تنرفزني..عليها أخلاق و أسلوب..تخيلوها حماتي..الله يرفع بأم علي عنها بس...! سارة:جود تبغي شاهي...؟! -ها..لا حبيبي... -ترى فيه نعناع... ابتسمت:لا مابغا... سمعت جوالي يدق..كنت حقوم لكني لقيت سعود قدمي ماسك الجوال:بابا... ابتسمت:شكرا حبيبي... و قمت و أنا أسمع سارة تنادي سعود إلي راح لها بتردد...! رديت على علي لمن وصلت لغرفتي و رديت الباب:ألو... -أيوة السلام عليكم...! -وعليكم السلام هلا...! -كيف جدة...؟! قلت و أنا أهز راسي:الحمدلله كويسة... -و حفيدتها...؟! -الحمدلله... -طيب جود أكيد إنك بتقعدين صح...؟! -لو..عادي يعني...؟! -عادي... -شكرا... -طيب يختي ارسليلي سعود عشان نمشي... -كلمت عمة و عمو و قالـ... -عارف أنا إلي بلغتهم...! -ايوة قالتلي عمة..عمو يقول سعود يقعد عندهم بس والله مو راضي..يقول ما يبغى يروح يبغى يقعد معايا...! -لأ..أنا بروح عند أهلي و سعود بيجي معايا..جود إنتي رح تنشغلي بجدتك..سعود حيتعبك...! -والله مني عارفة..مو راضي..مو راضي حتى يكلم أحد هنا...! -ناديه طيب..بكلمه... -بس بشويش عليه..ترا مرة متأثر... -ايش بسوي لُه يعني..ناديه... ناديت سعود و خلال ثواني كان عندي..مديتلو الجوال فأخدو و ما سمعت إلا إلي قالو: -ليه؟! -مابغا..أبغى ماما... -لأ مو تعبانة... برطم و عيونو دمعت:مابغا... سكت لدقائق بعدين قال:أجي بكرة؟! -بكرة نجي هنا؟! -أمي و أبوية يجوا...؟! -طب أنا أروح عند أمي... -طيب.. -لأ مو زعلان... -مع السلامة... و مدلي الجوال،قلت:كويس اقتنع... -طيب..شوفي أنا بكرة أهلي رح يجوا..بيجيبوا سعود معاهم... -و إنتا طبعاً... -أكيد..تبغي شي قبل ما أمشي....؟! -لا سلامتك بس شوية أجهز سعود و أرسلو لك....! -يلا في أمان الله...! -مع السلامة...! وقفت:يلا سعود حبيبي..تجهز عشان تروح مع بابا...! -ماما أنا بكرة حجي...! -ايوة حبيبي إن شاء الله.. ما كان فيه شي أسويه غير إني أوصي سعود على أشياء معينة...! مشيت معاه لين باب المجلس و ابتعدت لمن شفتو يدخل...! جلست على الكرسي إلي جمب سرير جدة و أنا أتنهد...! سارة:جود سعود رايح...؟! -ها... كنت شاردة و مو منتيهة...! قالت:سعود حيروح...؟! -ايوة... -ليه...؟! -عشان مني فاضيتلو..حيروح هوا و أبوه عند أهلو...! حليمة:طب كان خليتيه يجي معايا...؟! ابتسمت:ما كان رح يرضى..بالغصبة راح عند جدتو و جدو...! أم سارة:ليه..خليه معاكي..بعدين ولدك مو شقاوي يعني...! أول شي:شغلة يروح لهم مالها داعي..و بعدين هما ما عرضوا إلا تأدباً و ذوقاً..تاني شي:سعود مدلع و يحتاج رعاية طول اليوم..أعرف أنا السبب لإني أبالغ في الاهتمام بيه لكنو فعلاً ما يقدر يقعد..خاصة في الأجواء الكئيبة دي...! قلت:لا أحسن يروح هناك..أنا ما حقدر أنتبهلو هنا...! فجأة طلع صوت جدة:جود... فزيت:نعم... -ازهمي منورة... -أنا فيه جدة..ايش تبغي...؟! قالت بصوت عالي:ازهمي منورة !! -جدة أنا فيه..قوليلي ايش تبغي..محتاجة شي...؟! -أقولك نادي منورة... كنت حقوم لكن سارة وقفت:خليكي خليكي...! و راحت للمطبخ و ربعد ثواني جات منورة و انصدمت لمن قالت لها جدة إنها تبغى الحمام..منورة اتجهت لحمام جدة و جابت الكرسي المتحرك و السطل إلي يتعلق في الكرسي عشان تقضي فيه جدة حاجتها _الله يكرمكم_ ....! انصرفوا من الصالة و راحوا لغرفة جدة..أما أنا فوقفت..أبغى أتعلم الطريقة الصح عشان بعد كده أنا..إلي رح أسوي لجدة...! هوا مو عن شي..منورة طيبة و تحب جدة و جدة تحبها لكن من أولى يخدم جدة..بنتها و لا شغالتها...؟! أعرف إني ما حقدر أسوي لجدة كل شي..بس على الأقل أتعلم..في الوقت إلي أكون فيه صاحية و مو تعبانة أنا أسوي لجدة كل شي...! رجعت جدة بعد ما خلصت على السرير بمساعدة منورة و أنا أطالع و ألقط كل حركة...! منورة رجعت الأشياء للحمام و بعدها رجعت للمطبخ..رحعت أنا جلست على الكرسي إلي جمب السرير بصمت...! بعد دقيقة كاملة سمعت:يا بنتي تعبانة إنتي...! قلت بزعل:مني تعبانة يا جدة...! -ما تعرفين... -خلاص اتعلمت... -إنك اولدي بالسلامة و أنا بخير...! غطيت وجهي و دفنتو عند كتف جدة..حطت يدها على راسي و قعدت تقرأ عليا...! مقهورة..ما أعرف بس حاسة نفسي...مادري..زعلانة من إلي سار و زعلانة عشان حاسة نفسي مني راضية..هذا قضاء..طب ما دام أنا مؤمنة بكده ليه مني راضية..ليه أحس نفسي مو هادئة..ليه أحس إني مغمومة...؟! رفعت راسي و بعدت شعري لمن حسيت بأحد يدخل الصالة..كانوا هما..رجعوا...! مسحت وجهي و أنا أسمعهم يقولوا إنوا الشاهي خلص...! بطبيعتنا ما نقدر نقعد من غير شاهي و نعناع على الطاولات...! مها:ماما والله جيعانين...! أم سارة:ليه ما اتعشيتوا..ما غرفنالكم احنا...؟! سارة:ايش غرفتولنا..لقمتين..ماما ايشبك..احنا فوق الخمسطعش بنت ما شاء الله...! أم سارة:سمي بالرحمن..والله لو بغيتوه كان فيه البركة...! انتبهت من كلامهم إنو الكل راح ما عدا أخواتي و أمهم و بابا و زوجة عبدالرحمن و أعتقد عند الرجال فيه زوج خلود لإني سامعة أصوات من عندهم غير إلي أعرفها...! وقفت و أنا أقول:فيه لو تبغوا أشياء مجمدة..بطاطس و نجتس و كده... جمعت سارة يدّينها:من جد؟؟؟!!! ابتسمت:ايوة... أم سارة:لأ..ليش البطر..مرة جيعانة روحي سويلك أي شي...! قلت:عادي..حتى أنا ما أكلت و أعتقد إنتو كمان..ممكن نسوي أي شي خفيف...! كنت أتظاهر بالقوة في الوقت إلي كنت فيه متوترة و خجلانة !! أم سارة:لأ..مالو داعي..الحرمة تعبانة خلوها ترتاح... التفت لجدة و رجعت طالعت في أمهم:بالعكس جدة تحب النجتس..والله ممكن تاكلها...! سارة بطفش و هيا تتكتف و ترجع على ورا:قصدها منورة...! -آآآم طيب أحد يجي يساعدني..بسوي الشاهي و..أحد..أبغى أحد يطلع النواشف معايا...! سارة بكسل:ينفع ما أجي...؟! -و هوا فيه أحد غيرك حيجي...؟! أم سارة:قوموا يلا ساعدوها...! أوبس..أنا ما كان قصدي شي..والله طلعت كده..لا يكون فهمتها على أساس إنها دقة...؟! وقفت مها و قومت معاها سارة إلي كانت تعترض...! رحنا للمطبخ و قلت أنا لمنورة تدخل تنام..رفضت فذكرتها بإنو بكرة ورانا قومة من بدري عشان جدة...! كنت قاعدة أسوي الشاهي و أنا أستمع لكلام سارة و مها....! كان نفسي لو أدخل معاهم في الحوار لكن خفت ما يتقبلوني..خفت يطلع شكلي سخيف و غير كده أنا مني من النوع إلي يدخل صح..عمتي دايماً تقولي إني أعطي إلي قدامي إحساس بإنو أقل مني و بإني إنسانة متعالية..قالت لي كده لمن اعترفت لي مرة عن أول انطباع عني..و إنها بس كانت تبغى ترضي ولدها إلي كان ما يعترف بشي اسمو زواج أصلاً...! أنا ما أقصد..قد مرة سألت علي لو كان دا الكلام صح..و بدون تردد أكد كلام أمو..من غير ما يفكر أو يحاول يتذكر حتى..كان يبغى ينرفزني..آه..أكره علي لمن أحسو يستمتع بعصبيتي...! خرجت من أفكاري على صوت سارة:جود التونة خلصت...؟! التفت لها:مافي في الكرتون...؟! -لأ... -طب..شوفي يمكن في الدولاب... أشرتلها و لمن راحت لقت وحدة صغيرة..طلعتها و قالت:ليش هنا...؟! ابتسمت:منورة تحب تخزن لوقت الحاجة... مشيت و سحبت من التلاجة الشطة و المايونيز و أخدت صحن و تبسي كبير و مفك و خرجت...! و أعتقد إنها معد حترجع المطبخ تساعد !! رفعت الكافتيرة عن النار بعد ما طفتيها و لمن كنت أصب الموية في البراد سمعت:اتوقعت رح تجي تتأسفي...؟! التفت بعد ما حطيت الكافتيرة:نعم... مها من غير ما ترفع عينها عن الطماطم إلي كانت تقطعها:اتوقعت..بس يمكن إنتي ما حسيتي إنك غلطانة...! قلت باستغراب:عن ايش تتكلمي إنتي...؟! -عن يوم الملكة...! احتجت ثواني عشان أرجع لطبيعتي..حسيت كأنو الزمن اتوقف !! قلت بعد ما أعطيتها ظهري و كملت صب الموية:و ليه أعتذر...؟! -تعرفي إنتي ايش يعني ملكة...؟! -ايوة أعرف.. -طيب... قلبي كان يدق بقوة..لكن فيه شي..قصدي أشيااااء..لازم تتوضح...! قلت:روحي اطلبي ذا الطلب من أبوكي..أنا غلطت..لكن مو عليكي و لا على أحد..أنا غلطت لإني رفعت صوتي على أبوية..هدا الشي الوحيد إلي أحس إني غلطت فيه..أنا تبت..و استغفرت ربي عشاني رفعت صوتي على أبوية بس ترا ما اعتذرت من بابا..هوا نرفزني بس صدقيني..لو كان فيه أحد ما كان انفعلت..حسيت إنو مافي قدامي أحد بعدين أنا ما اتوقعت إنو كل هدا يسير..أنا بس... قاطعتني بقهر:أنا بدل ما أنام مبسوطة نمت أبكي..مافي أي تبرير لتصرفك... -و أنا كمان..بدل ما أنام فرحانة لأختي نمت محروق قلبي..مين إلي نرفزني..مو أبوكي؟!..أنا سكت و ما انفعلت عشان ولا شي..أصر الكل عليا فجأة إني أبات و أنا ما كنت أبغى..كنت تعبانة..قلت لأ لأ لأ..بس ما سمعوا..آخر شي دمعت و قلت إني ما أبغى قام أبوكي بدأ يقول كلام بايخ و فجأة عمو وقف في صفو و هزأني..حسيت إنو التهزيء دا لازم يتوجه لأحد تاني..لا تطالبيني بأشياء أنا ما أقدر أسويها..الاعتذار دا لو حتطلبيه من أحد اطلبيه من أبوكي أو عمك...! التفتت بسرعة و كملت شغل و هيا تقول:عالعموم أنا مني حاقدة عليكي...! ابتسمت و أنا أرص الفناجين في صحن:لإنكم اتربيتوا صح ما شاء الله..من بعد ما جبت سعود و سرت ألاحظ أثر كل شي عليه سرت أقدر أفرق بين إلي متربين و إلي مو متربين ..بغض النظر عن الذوق و المجاملات إلي تسير كتير في بيئتنا..و اكتشفت قد ايش إنتوا متربين ما شاء الله..و مني قاعدة أجامل أو أكدب..بدليل إني حقولك إني لو عشت عندكم ما كنت حكون زيكم لإنو لا بابا و لا أمك و إلي هيا الأهم رح تتقبلني..كل دي الحقائق اكتشفتها بعد ما اتزوجت..و أمك ما سارت تعني بالنسبة ليا شي سيء زي زمان..لإني أنا دحين عندي بيت و عشان ما أكره أمك أو أحس إنها السبب في وضعي زمان أحط نفسي مكانها..بنت زوجي إلي ما قصرت عليه في بيتي..و من مين..من وحدة ما تسوى ظفري..شي يقهر... "فيه إنسانة طبيعية تتكلم عن أمها بذي الطريقة؟!" التفت مفجوعة و لقيت أم سارة تدخل للمطبخ...! قالت لمها:ودي الطماطم خلاص... سويت نفسي مو مهتمة و رجعت لرص الفناجين رغم إني خلصت منها لكن سويت نفسي قاعدة أرتبها أكتر...! خرجت مها من المطبخ فقالت أم سارة:ردي.. برضو طنشت.. قالت:على بالك ما أفهم الحركات دي..ترا عندي بنات..لا تسوي نفسك مو سامعتني... -ما أسوي نفسي، مشغولة قاعدة أرتب الفناجين... -براحتك بس مهما كان ماضيك مع أمك سيء ما يحقلـ... التفت لها بقهر و قلت من ورا أسناني:ما عندي أنا ماضي معاها و لا مع زوجك و لا مع أي أحد... قطبت حواجبها و قالت بعد ثواني:أنا ما قصدت أذكرك بشي..لكن ما يسير تتكلمي عن أمك و أبوكي بذي الطريقة..إنتي عندك أولاد..مهما كانت أمك سيئة المفروض ما يحسوا بذا الشي و ما يحسوا كمان بكرهك لأبوكي..بغض النظر عن كون أبوكي زوجي أو حتى أمك هذي زوجة زوجي... كان نفسي أصرخ في وجهها"مو زوجة زوجك" زميت شفايفي بينما كانت تقول:و إذا كنتي إنتي ما تكرهيني فأنا نفس الشي كمان..أنا أثق في سعود و في تربيتو..و بعدين لو كنت أكرهك ما كان خليت رقمك و لا حتى ايميلك يقعد عند سارة..و إذا علبالك ما كنت أعرف عن العلاقة الـ سرية بينك و بين سارة فتكوني غلطانة..أنا بالعكس كنت أبغاها تستمر لكن أخاف على أولادي و ما أسمح لأي أحد يلومني على هذا الخوف..أنا ما أكرهك إنتي كشخص..أنا أكره المشاكل إلي ممكن تجي من وراكي...! -واللهِ أنا كبيرة و أولادك كبار..أنا عن نفسي مني محتاجتهم..ما أنكر إني أحياناً نفسي أكون وسطكم بس خلاص..أنا متزوجة و عندي بيت أنا وسطو..تخافي عليهم من ايه...؟! قالت و هيا تفتح التلاجة و تطلع منها أشياء:أتكلم عن زمان... قلت و أنا أشيل الصحن إلي عليه الشاهي و الفناجين:ما أهتم بزمان... و خرجت من المطبخ..حطيت الشاهي على زاوية السفرة و رحت جلست عند جدة...! سارة:وي..تعالي اجلسي...! -ها..مابغا..تعبانة ما بجلس على الأرض...! و أول ما خرجت أم سارة قالت سارة:ماما شوفي جود..تقول زعلانة منك ما تبغى تجلس معاكي على سفرة وحدة...! طالعت في سارة مفجوعة..ايش بتقول المجنونة دي...؟! طالعت فيا أم سارة بعدين طالعت في بنتها:قومي جيبي السكرية...! -ماما... -بنت..قومي أشوف... قامت سارة بتأفف و أمها تقول لمنى:منى حبيبي الفناجين... لمن جات منى بتدف صحن الشاهي لأمها قالت:انتبهي لا تخبصي الترتيب... ابتسمت..دقة وااااااااااااضحة..المفروض إني بدل ما قعدت أعيد و أزيد في ترتيب الفناجين أعبي السكرية و أحطها في الصحن !! أم سارة:تعالي تعالي يا جود.. -مابغا مني جيعانة... قالت بلهجة أموية آمرة:تعالي بلا عبط... قمت..و أنا أفكر في الطريقة إلي استخدمتها..زي لمن تكلم بناتها لمن ما يسمعوا الكلام..بس طبعاً هيا قالتها بحكم إنها أم تكلم وحدة قد بناتها..أقول كده لإني ما أبغاكم تفهموا إنو خلاص كل شي اتعدل..سبق و قلت إنو ولا واحد حولي مثالي..كلهم طيبين لكن مو مثاليين و بيرفكت..عشان كده لا تفهموا لفظة "أموية" غلط !! جلست على جهة فاضية من السفرة و ما كانت ثواني إلا و سارة تفحط و تجلس جمبي..حطت السكرية عالسفرة بقوة:أقولكم جيييعااااااااانة...! أم سارة:سمي بالرحمن...! منى:مفجوعة وحدة...! و تتالت التعليقات على سارة إلي صرخت:ايشبكم إنتوا عليا..جود شوفيهم...! خلود:سيبي جود في حالها..طالعي كيف وجهها أحمر..هييييييي جود..جود.. رفت راسي لها:نعم... وين باقي الحوار...؟! مو مهم..المهم..إني مع أخواتي على سفرة نواشف..في ديك الليلة..في وضع اتخلى الكل فيه عن كل السخافات كسرت حواجز كتيرة..و زي ما يقولوا.. I BROKE THE ICE *************************************** نهاية .. تناقض البداية .. بقي الكثير !! |
الجزء الثامن عشر (عسى أن تكرهوا شيئاً و هو خيرٌ لكم) سعود،،، قمت من الصالة متوجه لغرفتي و أنا كاتم زعلي من أمي..عارف إنها متضايقة و محرجة من وضعها لكن مالو داعي تصرخ فيا عشان أقوم..بمجرد ما تنادي منورة عشان حاجتها للحمام أنا رح أقوم بنفسي من الصالة...! ارتميت على السرير و أنا أحس نفسي قرفان..من كل شي..من وضعي..من وضع أمي..من تعبنا احنا الاثنين..من علاقتنا..علاقتنا من قبل ما تمرض و هيا متوترة و من بعد ما مرضت..لا تسألوني..والله حسبتها رح تهدى من ناحيتي لكنها ساءت..مني عارف كيف أتصرف و مني عارف ايش إلي مزعلها مني..حاولت أغير كثير أشياء في نفسي اتوقعت إنها هيا إلي مضايقتها لكن مافي فايدة..مني عارف ليش زعلانة..و مستحي أكلم جود...جود خلقة تعبانة..فوق حملها شايلة هم أمي و همي..قعدت عندها من يوم الخميس لين السبت..الأحد راحت الجامعة و يوم الاثنين جت هنا..قعدت تقريباً طول اليوم بعدين راحت..و اليوم ثلوث..الأغلب حتجي بكرة و تبات...! اتنهدت:"المصائب لا تأتي فرادى" الحمدلله لك يا رب على كل حال...! فعلاً مستحي من جود..أحس نفسي مثقل عليها مرة..نفسي لو تشيلني من بالها و تريح نفسها..فوق همنا على راسها تخرج..يا ذا التخرج..آه..أحياناً أفكر..لو ما كانت متزوجة كان أحسن..جود اتزوجت صغيرة و بدأت الجامعة متأخرة ترم..كان المفروض دحين تتزوج...! يوووه..استغفر الله..خلاص هيا مرتاحة..أنا مالي..الحمدلله على راحتها و على حب علي لها...! اعتدلت و أنا أفكر إنهم أكيد خلصوا...! استغفرت من إحساسي بإني مابغا أخرج..أمي سارت عصبية معايا و ما تطيق قعدتي و أنا ما أحب أحد يقلب معايا من غير سبب...! لكنها أمي..مهما سوت و مهما حسيت إنها تغلط في حقي..أكيد أظل أنا حبيبها و آخر عنقودها...! وقفت و مشيت متجه للصالة..جلست على أقرب كنبة من سريرها و أول ما جلست قالت:كلمنك جود...؟! -ها..لا..بس أكيد بتجي بكرة...! -ليش ما تكلمني...؟! -يا أمي جود والله تعبانة..مشغولة بحملها و تخرجها...! -الله يوفقها و يلقيها خير...! -آمين يا رب...! -و إنتا..ما تبغى تلقى خير...؟! -نعم؟! -أقول ما بتلقى خير...؟! -الله يا أمي..إلا إن شاء الله..الله يكتب الخير للجميع...! بعد ثواني نادت أمي منورة ففزيت:ها أمي أنا فيه... و قربت منها و انحنيت فقالت:حيل عني..منورة..يا منورة... -أمي أنا هنا..ايش تبغي..منورة في الحمام..قوليلي ايش تبغي...؟! -ما بغيت شي... ما رضيت أتحرك من عند سريرها..أبغى أشوف ايش تبغى...! و لمن خرجت منورة و جات طلعت أمي تبغى علبة المنديل إلي مي قادرة توصل لها...! حسيت بدمي يغلي..أنا هنا..أنا ولدها هنا..ليه يعني ما تطلبني علبة المنديل..لا فيها حرج و لا شي خاص...! ارتميت على الكنبة و أنا أتمتم باعتراض...! طالعت فيا أمي بعتاب و هيا تقول:ظقت عليا...؟! ما طالعت فيها...! قالت:هيا إن كان ما بتكلمني لا تكلمني..لكن لا تظيق عليا..إني ما أقدر يا ولدي على ظيقك...! اتنهدت و قمت..جلست على طرف سريرها و مسكت يدها:أمي أنا مضايقك في شي...؟! -إنك أدرَى ايش مظيقني عليك...! --قوليلي..قوليلي يا أمي..عيوني لكي والله..بس قولي ايش تبغي...! قالت بحزن شديد:زوجة..أبغى أشوفك مع زوجة و أولاد..شفت أولاد سعد و سعيد و خواتك لكن إنتا بعده..أبغى أشوفهم يا ولدي قبل ما أموت...! نزلت راسي و أنا أحس بألم في حلقي..كتمت صوتي و دموعي..إلا موضوع الأولاد..ما أطيقو ينفتح من أمي...! -قولي..إن كان في وحدة تبغاها..قولي... رفعت راسي:خير يا أمي إن شاء الله خير..إنتي بس لا تشيلي همي...! -والله إن خيروني بين الأولاد اخترتك..كبرت و ما في كبري من أولاد إلا إنتا و جود..ما تبغاني أشيل همك؟! -يا أمي الله يهديكي لا تقولي كذة..كلنا أولادك و كلنا نحبك...! -لا يا ولدي..وقت شدتي حبايبي..وقت ضعفي إنتا و جود...! -والله حرام ذا الكلام..من يوم ما طحتي كلنا حولك..إنتي بس لا تفكري كذة...! -لا كبرت عرفت ايش أقول... سكت..ما رح أطول في نقاش شي زي كذة !! قبلت راس أمي و حضنتها.. ياااه..ما اتوقعت في شبابي إني ممكن أحضن أمي و أحتويها..كنت دايماً أنحضن من قِبَلِها..و ما أحتوي إلا جود..و بعد ما راحت جود اتعودت إني ما أعطي حنان لأحد..أنا دايماً متعود أنسدح على فخذ أمي..رغم إنو أخواني قد شافوني و قعدوا يضحكوا عليا..ما أؤمن بمبدأ الرجال إلي يستغني عن الحنان و المشاعر..أحس كل إلي كذة مو رجال و عندهم نقص في الرجولة عشان كذة يدعوا إنهم مو محتاجين نساء يعطفوا عليهم...! ابتعدت عن أمي لمن حسيت إنو وقت راحتها جا..سدحتها و غطيتها و طفيت الأنوار و انصرفت لغرفتي عشان ترتاح...! سحبت لابتوبي و جلست على السرير..يووووووه..متى آخر مرة قعدت زي الآوادم عليه...؟! فتحتو و أنا أفكر إنو يبغالو تنظيف و كثير أشياء لازم تتمسح..شكلي..شكلي والله أعلم حضطر لوالحد من المجانين إلي أعرفهم عشان أسرقلي كم فلم حلو أتسلى عليهم و لو إني أعرف إني مني حق أفلام...! ************************** جود،،، كنت في المطبخ قاعدة أجهز الغدا..سعود عندي يتكلم و علي برا في الصالة يتفرج عالتلفزيون...! سعود:ماما ماما نسيت..يا ماما... -ها يا بابا نعم... -نسيت أقولك... -تقولي ايه...؟! -أقولك عالسر... -أية سر؟! -أول لمن رحت مع بابا مول أوف أرابيا و إنتي مو معانا.. -ايوة... كان حيتكلم لكني اتذكرت:ايوااااا..لمن في بيت جدة قلت تبغى تقولي حاجة...!؟ -ايييييييييوة..حقولك عالسر... -قول حبيبي... قرب مني و قال بصوت واطي:بس ما تقولي لبابا... -ما أقول.. قال بهمس مبحوح:شفتي الزحليقة الكبيرة إلي هناكَ..هديكَ يا ماما... -ايوة.. -ماما ديكا الزحليقة إلي زي البحر لونها... -ايوة حبيبي عرفتها... -بابا يقول لأ..ما أركبها..أنا مع عبودي و يوسف و حمادة دخلنا اللُعبة..بعدين أنا مابغا أدخل الزحليقة هادي بس عبودي شالني و غصباًُ عني..تخيلي..تخيلي غصباً عني خلاني في الزحليقة..و أنا خُفت..خُفت مرة مرررررررررة..كمانةْ خُفت بابا يخاصم.. -حبيبي إنتا..طب بابا ما شافك تبكي؟! قدرت أعرف إلي سار..مالت على وجهو عبودي دا..بكّى ولدي..أنا علي قلي سعود بكي عشان واحد كعشو !! قال بحماسة يحاول يخفيها:إلا يا ماما..شافني أبكي..أنا قلت لبابا إنو واحد كعشلي شعري..بابا كان حيخاصمو..شوية..شوية مرة و يقتلهم...! -حبيبي إنتا فديتك..يعني إنتا كدبت عشان بابا ما يخاصم صاحبو...؟! -ايوة..علشان يمكن بعدين يزعل عبودي..أنا ما أحب هدا عبودي..بس حبوه هوا طيب ترى بس شوية غبي...! تركت إلي في يدي و نزلت لسعود..شلتو و بستو:حبيبي إنتا شاطر..ترا إلي سويتو كويس..صح الكدب حرام و غلط بس لمن تحس إنو لو كدبت فيه مشكلة ما رح تسير ترا أحسن...! -يعني ربي مو زعلان مني...؟! -لأ حبيبي إن شاء الله مو زعلان منك..اسمع...الكدب حرام مرة حرام بس زي ما قلتلك..لو خايف إنو تسير مشكلة لو أحد عرف ما تقول أحسن...! قال بصدق:أصلاً أنا ما أعرف كيف أكدب..أحس لمن أكدب أقول كلام مو من جد..أنا ما أصدق نفسي لمن أكدب...! ابتسمت و قلت و أنا أبوسو:حبيب مامي سعود..حبيب مامي..! -حتى مع النونو...؟! قلت و أنا أنزلو:مع النونو من غير النونو مافي أحد زي سعود...! تابعت:يلا حبيبي دحين خد السفرة و افرشها...! سحب سعود سفرة و راح للصالة..مالت عليه عبودي..والله حق إلي يعلم علي عليه..أنا ولدي..ينغصب يسوي شي ما يبغاه..أشوى ما كنت هناك..كان وريتو شغلو...! بس والله فرحت بسعود..حبيبي هوا..أنا متعودة منو إنو ما يعرف يكدب لكنو لمن احتاج يكدب عرف يكدب الكدبة الصح في المكان الصح...! اتنهدت براحة قبل ما أنادي:علي تعال جيب صحن الرز...! جاني علي و شال الصحن و هوا يقول:والله إنك مدلعة..أبوية ما قد شال صحن لأمي لمن كانت حامل في لينا...! قلت و أنا أشيل السلطات:صدقني إنتا إلي ما كنت تدخل المطبخ و تشوف...! جلسنا ناكل..في الغدا دايماً سعود يتكلم..علي يكون طفشان و تعبان من الشغل فما يفتح مواضيع و سير و مافي إلا سعود نشيط في دا الوقت...! سعود:بابا بابا.. -يااااا نعم... -بابا أبغى أجي معاك البقالة... طالع علي في سعود:هوا أنا قد رحت البقالة و إنتا مو معايا...؟! -بس شكلك طفشااااان... كمل علي أكل و هوا يقول:هذا و إنتا عارف... قلت و أنا أقطع لسعود دجاج:ايشبك عالولد ضعيف...؟! قال علي بنرفزة:عشان لازم على كل غدا أرد على ذا السؤال...! قلت:قول طيب و خلاص...! ما رد علي و كمل أكل لكنو بعد ثواني شال سعود و حطو في حضنو:يعني إنتا لازم تحسسني بالذنب...! و قعد يأكل سعود بيدو..ابتسمت و أنا أشوف سعود يضحك:عشان عندي شي بقولو..أبغى أشوف معصب ولا عادي... -ايش عندك...؟! -ولا شي..خلاص بعدين... -سعود اهرج..ايش عندك...؟! التفت سعود لعلي:بابا..غلط !! قلت:بسم الله..ايش فيه...؟! -ماما بابا مو اهرج..بابا انطق..إنتي اهرج...! علي:كيف؟! سعود:بابا ما ينفع تتكلم كده..ماما بس تقول اهرج...! نزلو من فوقو:طيب..و خلاص لا تقول إلي عندك...! -عارف..أصلاً رح أقول لماما و ماما تقولك بعدين تقول طيب... علي:هيا لأ... سعود:لأ..إنتا ما تقول لماما لأ... ابتسمت:فديت حبيبي أنا... علي:لمدة أسبوع..أي شي تطلبيه..لأ... سعود بثقة:نشوف نشوف... هنا علي اتنرفز و بدأ يعابط في سعود..الشي إلي يضحك إنو سعود يقلد علي في أسلوبو الواثق و في حركاتو المستفزة فيسير علي كأنو ينقهر من نفسو أو شي...! بدأت ألملم الصحون لمن خلصو...! قلت و أنا أمد صحنين فوق بعض لسعود عشان يوديهم:علي إن شاء الله بكرة نروح عند جدة...؟! سحب علي نفس:بكرة ربوع..عند أهلي...! -طب... ما لقيت شي أقولو فسكت..قال علي:طب لو على الأقل مري سلمي و بعدين أنا أرجعك لو تبغي لبيت جدتك...! قلت و أنا أخفض بصري:المشكلة مو في الوقت إلي أروح فيه..علي جدة تتوقع مني أبات عندها..كمان..أنا..هوا أنا كمان أبغى أقعد عندها..ما دام ويك اند و مافي دوام و... -لو منعتك حأحس بالذنب..مو لازم تمري على أهلي بس أنا بروح...! ابتسمت بسعادة:من جد؟!،الله يخليك ليا !! أخفى ابتسامة و هوا يقوم للحمام عشان يغسل..وقفت أنا بنشاط و أنا أبدأ أساعد سعود في الترفيع...! يااااه..من جد إني أحياناً غبية..مادري ليه حسيت إنو حيرفض..مادري ليه...! فجأة سمعت صراخ..علي كان قاعد يناديني...! كنت قدني خلصت ترفيع و غسلت لسعود بعد ما غسلت أنا..رحت للغرفة و لقيت علي سادح مستعد لقيلولتو...! قلت:أيوة... -حتنامي...؟! -ايوة..اليوم تلوت...! أنا لمن أروح الجامعة لازم أنام...! -طيب يلا... -طب لحظة بنادي سعود... و كنت على وشك أخرج لكنو قال بطفولية:مابغا سعود... -نعم؟! -ما أبغى سعوووووووووود..مابغا..خليه ينام في غرفتو... قطبت حواجبي و أنا مبتسمة، فقال باعتراض:جود لنا مدة من يوم ما قعدنا مع بعض زي الآوادم..والله سرت أحسك قدييييييييييييييمة...! -قديمة!!،أوريك من القديمة..بس أروح أنوم سعود و أجي... لمن شفت امتعاض قلت:أصلاً هوا نعسان..يمكنو نايم دحين...! و رحت لغرفة سعود و زي ما اتوقعت كان شبه نايم على السرير و هوا ماسك الجيم بوي...! شلتو منو و بستو فقال:ماما أديني... -ايش تبغى حبيبي...؟! قال هوا مغمض:أديني جوم بويييييي... قلت و أنا أغطيه:طيب حبيبي طيب... بستو للمرة التانية و خرجت من الغرفة متوجهة لغرفتي...! دخلت و لقيت علي نايم..ضحكت بخفة..هدا إلي كان يبغى يقعد معايا...! و طبعاً الولد طالع لأبوه..نام من غير ما يتلحف...! مسكت البطانية و نفضتها و أنا أسمي بالله تلاتة..انسدحت جمبو و غمضت عيني و أنا أدعي و أطلب من ربي أشياء كتييييييييرة... ************************** دخلت و اتقدمت من جدة..سلمت عليها:كيفك جدة اليوم..إن شاء الله أحسن؟! -بخير يا بنتي بخير.. طالعت في علي الواقف عند الباب:ادخل يا علي ادخل... دخل علي و قال بصوت عالي:كيفك يا أم سعود اليوم...؟! -إن شاء الله إني بخير... -لا إنتي بخير و ما فيكي إلا العافية... سلم عليها و بعدها رفع سعود عشان يسلم عليها،قعدوا الاتنين على وحدة من الكنبات و جلست أنا جمب جدة عالكرسي إلي جمب سريرها...! بدأ علي يفتح حوارات مع جدة و بذكاء أجبرها تتكلم..و حتى لو كان كل كلامها نكدي و يائس لكن اسمنها اتكلمت..نطقت...! بعد مدة دق الجرس..قام سعود و سأل:ميييييييييييييييين؟! وصلنا صوت عمو:أنا... فتح سعود الباب و هوا يقول:لازم تقول اسمك... ابتسم عمو و شال سعود:طيب يا سيدي آسف...! قفل عمو الباب و جا لجهتي..سلم على جدة و عليا و بعدين راح لعلي..سلم عليه و قعد جمبو و حط سعود فوقو...! عمو:يعني يا سعود بابا ما يقول أنا...؟! -بابا معاه مفتاح... -طب لو ما معاه مفتاح...؟! -بابا دايماً معاه مفتاح... التفت علي لعمو:ايش تبغى ياخي..معايا مفتاح... عمو:اسكت..أبغى أشوف من فتى عليه...ايوة يا سعود..بابا لو لو مثلاً ما معاه مفتاح..ايش يقول...؟! رفع سعود أكتافو:ماعرف... -طب ماما...؟! سعود بصوت عالي:عمو!! -نعم؟! -ايشبك..خلاص..هما معاهم مفتاح..أنا بس ما عندي... قلت و أنا أقلد سعود:ايشبك ياعمو..جننتو خلاص..وي... عمو و هوا ينزل سعود للأرض:والله الولد متحيز معاكم..ما يبغى أحد يقول عنكم شي...! علي بفخر:تربيتي هذا... راح سعود لشنطتي و خرج منها الجيم بوي و انفرد بزاوية من الصالة و قعد يلعب..يا ربي عليه دا الولد..ما يطفش..أنا ما قبلت بأي جهاز غير الجيم بوي لسعود لإنو مو معقد و أحس دحين الواحد يطفش منو بسرعة قدام باقي الأجهزة..إلا سعود..متمسك فيه بشكل..فعلاً غريب...! وقف علي بعد مدة:طيب..أنا بمشي ذحين...! عمو:ليه؟!،اقعد... علي:بكرة إن شاء الله بجي..ذحين بروح عند أهلي... عمو:طب اقعد شوية..خلي الجو يبرد... تابع عمو بشكل مفاجئ:ولا آآآه ايوة...اليوم ربوع... علي:يب..لازم أروح..سعود يلا...؟! سعود:دحين...؟! علي بشدة خفيفة:ايييوة ذحين..بكرة إن شاء الله نجي هنا...! قام سعود و هوا ماط شفايفو..مشي لين عندي..باسني و همستلو أنا:بوسلي أبوية و أمي... بعد عني:طيب... سلم على جدة و عمو و راح مسك في يد علي و خرجوا الاتنين...! عمو:بتقعدي اليوم هنا...؟! هزيت راسي بايوة بعدها التفت لجدة:جدة..اليوم بنام عندك...! حسيت بسعادة جدة و راحتها إلي حاولت تكتمها..قالت:هَيّا الله يرضى عليك...! ابتسمت:أكلتي...؟! -الحمدلله...! قلت:يعني؟! عمو:ما أكلت... ابتسمت بزمة:أنا عارفة..مادري جدة قاعدة تعاند مين؟! عمو:تعاندني أنا... عمو كان يمزح بس..حسيت إنو يعنيها!! قلت:حروح أشوف أي شي يتاكل...! عمو:الغدا موجود لو تبغي..هيا أكلت شوية و ما حترجع تاكل...! -أنا الحمدلله مو جيعانة بس بسوي شاهي و تبعاتو...! و رحت للمطبخ و أنا أفكر بنبرة عمو..فيه شي..أبصم بالعشرة فيه شي..عمو كان يقصد إلي يقولو..تعرفوا كيف الواحد لمن زعلان و ما يبغى يبين فيدق بالكلام...؟! اتنهدت..من جد المصائب لا تأتي فرادى و إن كان إلي يسير حولي مو مصايب مصايب الحمدلله يعني بس هيا كده أشياء صغيرة تتجمع في وقت واحد تسببلي قلق..استغفر الله..يا ربي اكتب أجري بس...! بعدت الكفتيرة عن النار و أنا أفكر في زمان..في دا المطبخ كنت دايماً..كل ما أبعد الكفتيرة عن النار أوعد نفسي إني ما حكبكب الموية الحارة و أنا أعبيها في البراد عشان ما أرجع أمسحها..كان دا آخر همي..سبحان الله كيف الواحد كل ما كبر كل ما زاد همو..مو إني الحرمة الكبيرة إلي همها قد الدنيا..لا..بس أحس مشاكل الحياة مالها سن..بمجرد ما الواحد يتزوج و يسير مسؤول عن نفسو و عن أحد تبدأ مشاكل الحياة الروتنية..لو ايش ما كان عمرو..و بغض النظر عن طبيعتو..حساس و لا لا مبالي..اجتماعي و لا منعزل..هيا تجي..هيا كده حياة الكبار و أصحاب البيوت...! إلا على سيرة البيوت..لازم ننتبه أنا و علي لموضوع البيت..العقار قاعد يرتفع..و ما ينفع الواحد يقعد طول عمرو على الأجار..عاد مدري عن علي يقدر يبني و لا لأ..شكلي حستفسر من عمة عن دا الموضوع...! خرجت من المطبخ و تركت أفكاري هناك لإنو الطفش البادي على وجه عمو شغلني عن كل شي...! صبيت لجدة شاهي و رحت جلست عالكنب جمب عمو..صبيتلو شاهي و صبيت لنفسي...! قلت:كيف الشغل اليوم...؟! طالع فيا مستغرب سؤالي:الحمدلله... -ما سار شي أكشن؟! -لأ... -ليه منتا كريم في الكلام؟! اتنهد بأفأفة فقلت:ايشبك حبيبي..ليه كده طفشان؟! أنا أعرف طفشان..من سنين أعرف ليه طفشان !!! قال:ما..مادري..ملل..اليوم زي أمس و بكرة حيكون زي اليوم..كل يوم نفس الشي..طفشت... قلت و أنا أرفع فنجاني:صح..تحس العيلة راكدة..مافي زواجات..مافي بيوت جديدة تنفتح..مافي مواليد بالتالي أطفال جدد..مافي خروج مافي سفر..طبيعي حنطفش...! -لو تلمحي وقفي...! التفت لعمو و قلت باستغراب مصطنع:ألمح لايش...؟! -جود..تراكي ما تعرفي تكذبي...! -أكذب؟؟؟!!! -ايوة..أنا لمن أكذب أو أسوي نفسي يبان عليا و إنتي نفس الشي...! ضحكت:صح..أنا ما أعرف أكدب...! -مو أنا إلي ربيتك و ما عودتك تكذبي...! -ما اضطريتني كمان..ترا الكذب جُبن..يبدأ من خوف الطفل من أحد بنية صافية..يتحول لكدب لمن يبدأ يحس الإنسان بالأمان و بإنو حماية لو...! -ايوة..زي البقر إلي في الشغل عندي...! ابتسمت:ايش...؟! -يركن الواحد سيارتو قدام الشركة و يقول للمدير:آسف اتأخرت سيارتي خربانة و ما لقيت تاكسي بسرعة...! -لقوا من فلتهم... -والله من جد..و ما يسير لهم شي..المدير يخرج و يشوفهم خارجين و يركبوا السيارة قدامو..مرة اتأخرت و نصحني واحد بالكدبة دي..قلتلو لو شاف سيارتي بعدين؟!،قال:عادي..قلوا أخوية و لا صاحبي صلحها و جابها ليا..مادري يعني ما عندي ضمير ولا ايه..والله ممكن ما أنام...! -هدا الطبيعي أصلاً... -لا معد سار طبيعي... جدة:لكن يا بنتي الكذب ضرورة أحياناً... التفت:ايش...؟! -والله يا بنتي كانن الوحدة تكذب عشان لا تتطلق... -كيف..في ايش يعني...؟! -ينت عمتي الله يرحمها..زوجها طلقها عشان عرف إن غداه كان من طبخ أمها..يقول ليش تكذبين؟! -و هيا ليش كدبت عليه..كان قالت طبخ أمي... -هو كان صِلف زوجها..كانت تعبانة بتولد و إلا اطبخي..أمها بغت تساعدها طلقها...لكن رجعها بعدين... -غصباً عن وجهو يرجعها..والله لو وحدة تانية تتفل في وجهو و تقولو انقلع الله لا يردك...! عمو:ميت الرجال..الله يرحمو...! -الله يرحمو..إنتا فاكرو يعني...؟! -لا..لكن قد حكتني أمي عنو...! -آه..طب..ايش تبغوا عشا...؟! قلتها بابتسامة فقال عمو:لنا كم يوم ما نسوي عشا..محد ياكل...! -طب أنا مشتهية ماكدونالدز..ايش رايكم...؟! -أمي ما تاكل...! -إلا..تحب التشيز برجر..عادي...! -طب جيبي التلفون...! -لا..إنتا اخرج جيب... -مابغا ما فيا حيل... -الله يسعدك عمو..عشان خاطري..لازم تخرج..ما يسير شغل و مسجد و بيت...! قام:أصلاً حتى المسجد معد أروح كتير...! و راح لغرفتو..اتنهدت..الواحد لين متى..ما يسير..ما يسير..بالذات عمو ما ينفعلو يقعد وحداني..عمو لازم يكون عندو أحد يهتم فيه..لازملو زوجة و أولاد..بغض النظر عن الأولاد..هدا رزق من عند الله..عمو لازم يكون فيه أحد حولو..ما ينفع كده!! خرج بعد دقايق و هوا لابس..استغربت إنو استسلم و بيخرج يجيب...! قال:كم أجيب...؟! -آآه..أنا اتنين و كمان منورة..جدة ما حتاكل إلا واحد.. -لحظة لحظة..كيف يعني..كلكم تشيز برجر...؟! -ايوة و إنتا كمان.. -لا مابغا... -إلا..أنا أبغى تشيز برجر و أبغى زيك...! -مابغا..مو حلو..ما يشبع...! -بليز..أبغى جدة تاكل و ما رح تاكل إلا لو كلنا زي بعض مع بعض...! -أوكييييييييي..أنا لا تحسبيني..احسبيكم... ضحكت:أوكي ححسبنا..أنا و منورة أربعة و مع جدة خمسة...! -أوكي و ايش تبغوا معاه..ببسي؟! -ايوة..جيب كبير من البقالة أصرف... بعد ثواني دخلت منورة للصالة و في يدها ورقة..مدتها لعمو:بابا..جيب هدي..ناقص من البيت...! مسك عمو الورقة وطالع فيها بعدين رجعها لمنورة:ما حنسوي اليوم عشا..بكرة أجيبها...! قلت:ما دام حتمر البقالة جيبها و اخلص...! قال و هوا يمسح وجهو:ما معايا صرف...! -أنا معايا... قال و هوا يتوجه للباب:لا خلاص يا ماما..مالو داعي..بكرة أصرف و أقضي للبيت مرة وحدة...! -طيب.. و خرج عمو و أول ما خرج قالت منورة:جود..تعالي فيه مشكلة في مطبخ...! جدة:ايش فيه...؟! منورة:ها..لا بس أبغى أسأل عن شي كيف أسوي في اللحم...! جدة:مين علم جود؟! قلت و أنا أقوم:بس أنا سرت أحسن منها..سارت تسألني...! قلتها بمزاح و أنا أتوجه للمطبخ مع منورة..أول ما دخلت قلت:ايش فيه؟! -مافي مشكلة في لحم...! -عارفة..ايش فيه؟! -جود..أنا في قولك..إنتي لا تقولي أنا قلت... -طيييييب... -جود بابا و ماما في سير زي نار..أنا دحين..عندي اتنين بوس..خلاص أنا سرت اديوت (غبية)..ماما يقول شي بابا يقول تاني..بابا يقول:أنا قولي لي كل شي لا تعبي ماما..ماما تقول قولي أنا كل شي..لا تقولي لبابا..خلاص..أنا تعبت..ما أعرف ايش أسوي..أسمع كلام مين..بابا و لا ماما..ماما زعلانة من بابا..كل يوم تخاصم..كل يوم..تقول بابا ما يحب هيا... اتنهدت..كنت متوقعة حسمع شي من دا القبيل..قلت:هوا عشان مرض جدة و عمو طفشان اتوترت علاقتهم..معليه..اصبري شوية و إن شاء الله مدة و يرجعوا زي أول...! قالت و هيا تخفض بصرها:أنا أعرف ليه ماما زعلان...! -ليه؟! -أمي كل يوم تقول..بكرة أموت بكرة أموت..تقول تبغي تشوف زوج وبيبي حق بابا...! اتنهدت:عارفة..إنتي بس كل ما تجيب سيرة الموت خاصميها..قولي لا تقولي يا أمي كذة..احنا نحبك و إن شاء الله تشوفي أولاد بابا..لا تخليها تتكلم براحتها عن دي المواضيع...! -أنا أخاصم تقولي:يا حمارة اسكتي..أمي بس تقول أنا موت أنا موت... ابتسمت..جدة ما تسبها إلا و هيا تعرف طيب قلبها..قلت:ما قصدها تسبك..هيا شوية أسلوبها عفش...! -أنا ما يزعل من ماما..جدة..أمي سعودي..زي أمي هناك..ماما أنا كده...! ابتسمت:الله يسعدك يا منورة و لا يحرمنا منك... -جووووووود..لا يقولي كده... و حضنتني:أمي تقول تعالي اندونيسيا خلاص..بس إنتوا... قلت بعد ما بعدت عني:منتي مشتاقة لأهلك يعني؟! -إلا أبغى أروح خلاص بس إنتوا هنا..أنا أبغى هناك و هنا...! ابتسمت:الله يخلي الجوالات و الايميلات..مي مشكلة...! -ما أعرف أنا..بعدين يمكن أشتري كمبيوتر...! -إنتي إن شاء الله أكيد بيجيكي يوم و ترجعي لبلدك..وقتها عاد اشتري و اتواصلي معايا..مو تنسيني...! -ايوة..إنتي زواج ما نسيتيني..أنا كمان ما أنساكي...! -يا ربي يا منورة..ييسرلك ولد الحلال...! -اندونيسيان..ولد حلال خلاص مافي... ضحكت:ايش دراكي..أنا كنت و أنا صغيرة أقول مافي سعودي ولد حلال..عادي..يجوا أولاد الحلال لبنات الحلال...! اتكلمت منورة و قالت شي..لكني ما سمعتو... يا الله قد ايش غبية..لمن أستخدم تعابير مني قدها !! يا الله..يا الله... ^^^^^^^^^^^^^^^^^^^^^^ سعود،،، رفعت راسي لجود إلي سألت:خير عمو؟؟؟ أنا قلتلها تجي لغرفتي بعد العشا..أبغا أكلمها و أقولها عن إلي قاعد يسير...! -ولا شي..بسسس... تابعت:جود..أبغى أسألك..أمي قد قالت لك شي عني...؟! -كيف...؟! -في الفترة الأخيرة اشتكت مني..قالتلك إنها متضايقة مني...؟! قالت باستغراب:للللأ... تابعت:ليه تسأل...؟! -أمي يا جود في الفترة الأخيرة سارت معد هيا طايقتني..تعاملني مرة زفت...! قطبت حواجبها:ليه..مسويلها شي...؟! -لأ..مادري..والله طول الأيام إلي فاتت أفكر لو كنت مسويلها شي بس ما ألاقي..مادري ايشبها..والله طفشت..زعلانة مني و بقوة..مرة زعلانة و ما تكلمني إلا قدامك و قدام الناس..غير كده ما تتعامل معايا...! -وي..من متى كده معاك...؟! -من يوم ما مرضت...! -و قبل ما تمرض...؟! -برضو..بس أهون من دحين.... نزلت جود راسها و سكتت... لمن ما شفت منها ردة فعل حطيت يدي على كتفها:جود... رفعت راسها بسرعة:عمو..أنا أعرف ايش بجدة...! -ايشبها؟؟؟!!! سحبت نفس:أوكي عمو..جدة باختصار..تبغاك تتزوج..خايفة عليك..و يحقلها..و أنا معاها في كل تصرفاتها..الفرق الوحيد إنها هيا مي متجرأة تكلمك و تصارحك أما أنا فأكلمك و أحاورك..هدا هوا الفرق...! قلت بنرفزة:جود اتكلمنا في دا الموضوع و إنتي سويتي إلي عليكي..جزاكي الله خير...! جود بدهشة و غضب:عمو..إنتا منتا منتبه لنفسك..إنتا على بالك زي كل الرجال..تتحمل تقعد لحالك..أصلاً من الأساس مافي رجال يتحمل يطول من غير زواج لكن إنتا بالذات زيادة..لا طباعك و لا تربيتك تخلوك تعيش لحالك...! -طب أنا ايش أبغى بالزواج..ايش حسوي..ما يهمني الزواج قد ما يهمني الأطفال..و إنتي صغيرة ما كنت محتاج أي شي..كنت مبسوط..أعترف..أنا إنسان أحب أربي..أحب يكون عندي أحد أهتم فيه...! -عارفة بس كيف يكون عندك أحد و إنتا مو متزوج...؟! قلت بصدمة:جود إنتي تستهبلي..إنتي عارفة وضعي كويس... قالت بغيض:عارفة لكن الأطفال شي من ربنا..هدا شغل ربنا..مو شغلك إنتا..إنتا كل إلي عليك تتزوج و تصارح إلي حتتزوجها بكل شي...! -ايوة..و أجرح نفسي..جود لو انرفضت من أحد حتدمر..بعدين هذي أحلام..حرام... قاطعتني:مني..قاعدة..أناقشك..في الأشخاص...أنا بكلمك عن الفكرة..إنتا لازم تسعى..و تحاول و... -أسعى!!!،طيب..إذا افترضنا هيا وافقت..أهلها؟!..ليه يرموا ببنتهم على واحد مريض ما يخلف...؟! -مو لازم أهلها يعرفوا...! صحت:نعم؟!!!! -مو..لازم..أهلها..يعرفوا... حسيت بدمي يغلي..ايش قاعدة تقول هذي؟! قلت:آها..أخدعهم..أتزوج بنتهم و أنبسط على حساب سعادتها و سعادتهم..ما شاء الله..و نعم الأخلاق والله... -إنتا سمعتني..خليني أكمل..عمو..إنتا فهمتني إنو النسبة ضئيلة بس فهمتني في طفولتي أكتر إنو مافي شي مستحيل أو صعب على ربنا...! صرخت:جود مالك شغل في حالتي..بلا ضئيلة بلا زفت..و قفلي الموضوع لإنـ... قاطعتني بصوت قوي:لأ ما رح أقفل الموضوع..و ما فيها أي شي لو سمعتني..اتحملت كل كلامي إلي قبل ما تبغى تتحمل تسمع فكرتي..أنا مني أنانية و لا متخلفة عشان أرضى لبنات الناس بإلي ما أرضاه لنفسي و لأولادي..فكرتي ما فيها إجبار..فيها إنك تتعاون معايا و تثق بيا..فيها إنك إنسان مسلم عندك رب تستخيرو..فيها إني ما فكرت أكلمك في الموضوع قبل ما أستخير ربي مرات و مرات لين ما ارتحت تماماً..فيها و فيها..و بعدين تعال هنا..تحسب إني أبغالك أي وحدة و السلام..تحسب إنو الموضوع لو ما تم حيتغير شي في حياتي أو حياتك..سبق و قلتلك مليون مرة إنك لو سمعت كلامي يا يتحسن وضعك يا تقعد زي ما إنتا..لكنك ما تبغى تسمع و لا تبغى تحاول...! حسيت بقلبي ينبض بقوة..أنفاسي حارة..شي يوجع إنو بنتك تحط عينها في عينك و تطلع فيك كل ذي العيوب عشانك بس..حاولت تشاركها همومك...! حطت جود يدها على فخدي و قالت بهدوء و عطف:عمو ما أبغاك تزعل مني بس ثق فيا..كم مرة لازم أطلبك تثق فيا..ما حيضرك شي لو حاولت..وافق على الإنسانة و أنا مجهزة كل شي..كل كل شي..أحلام دي لو كلمتها و لا سمح الله رفضت ما حيطلع الموضوع لأحد..حيقعد بيني و بينها و بينك..علاقتي بزوجي و علاقتك بأحمد ما رح تتأثر لو أحلام رفضت لإنو محد رح يعرف بدا الرفض إلا احنا..أنا فكرت أقولها و آخد رأيها..يكون الموضوع بيني و بينها..محد يدري إلا هيا... قلت بخنقة:ما أقدر..أكره اللف و الدوران..جود افهمي..هذي أخت أحمد... -و يعني أخت أحمد..ما حيضرها و لا حيضر أحمد شي...! -ما أقدر ما أقدر... -ايش إلي ما تقدر؟!،إنتا أصلاً ايش رح تسوي؟!،عمي اسمعني..أنا إلي رح أكلم البنت و أسألها..وافقت كان بها ما وافقت انتهينا و أنا وعدتك لو ما وافقت ما رح أفتح الموضوع معاك نهائياً..و ولا كأنو سار شي..إنتا بس راضي بها زوجة ولا منتا راضي...؟! سحبت نفس و أنا أشيح بوجهي عنها...! جود مي فاهمة..مي فاهمة شي !! طالعت فيها:جود إنتي منتي فاهمتني... -لإنك إنتا..منتا فاهم نفسك..كيف تبغاني أفهمك؟! -أنا فاهم نفسي كويس و عارف ما حقدر أكمل معاكي..جود تعرفيني ما أحب اللف و الدوران..أتخيل..بس أتخيل وحدة تكلمك عن واحد و تسألك موافقة عليه ولا لأ..من ورايا..من غير علمي..جود أنا أحط نفسي مكان أهلها..لو افترضنا يعني إني وافقت..يا الله..بنتي..توافق و تعطي كلمة من ورايا..شي يقهر!! -و إنتا مالك في أهلها..هيا وحدة ناضجة و كبيرة و وضعها من الأساس ما يسمح لأهلها يرفضوا لأسباب سخيفة..الشي الوحيد إلي حيكون سري هوا مشكلتك و هيا .. المعنية بالأمرحتكون عارفة..عمو استوعب..ليش نطلع كلام..افرض مثلاً إنكم خلفتوا..إنتا ما تدري..هدي أشياء غيبية..علمُها عندَ ربي..ولا إنتا و لا هيا و لا دكتور يقدر يقرر أو يمنع..لو مكتوب لك شي حيجيك..إنتا عليك تسعى و تحاول...! حسيت بالضعف و الطفش و الاستسلام... قلت:طيب..افرضي وافقتْ و وافقت هيا..و وافقوا أهلها..أحمد..أحمد لو ما كان راضي..ما حيقدر يكسر كلمة أهلو..أخسر صاحبي عشان وحدة...؟! -ايييييييييوة..هنا فكرتي..أنا رح أكلم البنت..و إذا وافقت تروح إنتا تكلم أحمد..على أساس الموضوع بينك و بينو و إنك ما تبغى تتقدم رسمي إلا لمن هوا يوافق و تشرحلو إنو مافي شي حيتغير لو ما وافق و تطلب منو يخلي الموضوع بينك و بينو... قلت بصدمة:أقولو عن إلي فيني...؟! قالت باستنكار:لا طبعاً..بس أحلام تعرف !!! سكت لثواني قبل ما أقول بتفكير:جود من متى و إنتي تعرفي لشغل الحريم ذا...؟! فجأة حسيت بالزعل..جود من متى تعرف تسوي شغل الـ من تحت لتحت..ايش هذا الدهاء إلي طلع فجأة...؟! طالعت فيا بنظرة ما عرفت أفسرها:ربي أقر بعظم كيد النساء لكن ما أقر بسوء هذا الكَيد..لإنو مو دايماً نستخدمو في الشر..و ما أعتبر إلي قاعدة أسويه كيد..أنا قاعدة أحاول أسعد ناس أحبهم... قلت و أنا أحس باللامبالاة تتسلل ليا:طيب..و بعدين..أتقدم رسمي...؟! -لأ..يبقى علي..تكلم علي و تاخد موافقتو و تطلب منو ما يقول لأحد عشان لا تكون فيه أي حساسية في الموضوع..قول لعلي لا يقولي حتى..و اطلب منو هوا يكلم أحلام و ياخد موافقتها..و اصحك تطلب من أحمد يكلم أحلام..لإنو أحمد عاقل و ما يهمو كلام الناس و يمكن ما يتحمس للفكرة لإنو يخاف من الحساسيات..تفكير أحمد زي تفكيرك..لكن علي مرة متأثر من إنو أحلام مو متزوجة و زعلان عليها..حيتحمس للفكرة..اطلب منو هوا يكلمها و لمن يقولك إنها موافقة تتقدم رسمي...! -آه..و متى أسوي كل هذا...؟! -من بكرة لو تبغى...! -إنتي على بالك أنا أقدر أكلم أحد في ذي المواضيع و لا أقدر ألف و أدور..بعدين أنا ما أعرف أكذب..على طول يبان على وجهي...! -دي هيا المشكلة الوحيدة...! طالعت في عينها:لأ..المشكلة الأكبر إنو كل كلامك مو عاجبني...! اتنهدت جود:أوكي..ايش رايك أكلم أنا أحلام و لو وافقت تكلم إنتا أبوها و تقولو إنك ما رح تتقدم رسمي إلا لو وافقو..و إنو مافي شي حيتغير لو رفضوا...! -جود..أنا إنسان واضح..يا أهل البنت يعرفوا بوضعي يا بلاش...! -طب قولهم... -مجنونة إنتي؟! -شايف..شايف كيف..ما دام منتا قادر يقعد الموضوع سر بينك و بين زوجتك إن شاء الله ..أنا ما أبغالك أي وحدة و السلام..أنا متنقية أحلام تنقاية..في كتير بنات ميتين و يبغوا يتجوزوا..بس أنا عارفة إنتا ما تقدر تعيش مع أي وحدة لإنك إنتا مو أي واحد..مو زيك زي كل الرجال..إنتا لمن تتزوج تبغى حياتك تتحسن..ما تبغا لقب متزوج ينضاف لك و خلاص..عشان كده قاعدة أقولك..حاول..الموضوع يستاهل...! اتنهدت:جود..اقفلي الموضوع خلاص و لو أبغاكي تنفذي الفكرة حقولك...! طالعت فيا:يعني توعدني تفكر من غير حساسية...؟! -يعني قفلي الموضوع و لعد تفتحيه إلا لو أنا فتحتو...! -عمو..أقولك على شي...؟! طالعت فيها فقالت:أنا مرة طرحت فكرة الرجال إلي ما يخلف..كنا نتكلم عن الزواج..فقلت كجس نبض:طب و إلي كامل بس عندو مشاكل في الخلفة؟!،أول مُعارض كان أحلام..قالت إنو فيه ألف طريقة و طريقة عشان الأزواج يخلفوا و لو ما نجحت ولا طريقة فكافل اليتيم كهاتين... و أشرت بأصابيعها...! قلت:تبغي تعطيني أمل يعني...؟! -لا مو عن كدة..بس أقولك عن رأيها في الموضوع بشكل عام...! -قلتيها..بشكل عام..لكن لمن يسير الموضوع شخصي يتغير كل شي...! ابتسمت جود لسبب مجهول و قالت و هيا توقف:عالعموم أستنى ردك..عمو استخير..لا تعتمد على نفسك بس..استخير..ربنا أعلم...! و خرجت من الغرفة و أول ما خرجت عرفت ليش ابتسمت...! إلي ظهر لجود من تساؤلاتي الأخيرة و من استماعي لها بهدوء هوا إني مهتم مع إني كنت أبغى أوضحلها إني مني مهتم...! قال لا مبالاة قال !! رميت بنفسي عالسرير و أصدرت آه طفش و ملل من كل شي... مابغا أفكر و مابغا أعطي لنفسي حتى فرصة أفكر في الموضوع..أنا حتى لو كنت مقتنع باللف و الدوران إلي جود تبغاني أسويه..وين المروءة و الأمانة..أكذب على صاحبي..صديق عمري..إلي معايا طول ذي السنين..أكذب عليه..عشان حياتي و سعادتي..سعادتي...؟!،ليه و مين قال سعادتي مربوطة بأحلام هذي؟!،أصلاً إنسانة ما أعرفها و لا أثق فيها..مو عشانها أخت صاحبي خلاص..أعطيها كل ثقتي و أقولها عن كل مشكلتي..مين هيا و مين تطلع...؟! اتقلبت على الجهة الثانية و أنا أستغفر..يا رب تسامحني..أخذت ذنب بنت الناس و أنا أفكر فيها بذي الطريقة..ايش ذنبها و هيا في بيت أهلها ما تدري عن شي...؟! استغفرت..لكن المرة دي بقوة..لإني حسيت كيف إني حولت الموضوع لشي شخصي..خليت تركيزي على أحلام مو على الفكرة..أنا ليه كده ساير سخيف و سطحي..التافهين هما إلي يغفلوا عن الفكرة و يهتموا بالأشخاص...! فكرة..ليه مين قال إني حفكر..ما حفكر.. ولا حتى ححاول ..! ********************************* سعود،،، صحيت و أول ما قمت..و بشكل مفاجئ..جا اسم أحلام على بالي... ضربت وجهي بيديني و شديت على شعري و أنا أزمجر !!! قمت و سحبت فرشتي و اتوجهت للحمام بعصبية..أمس ما نمت الليل و اليوم أول ما أقوم تجي على بالي !!! خرجت من الحمام و أنا أذكر ربي..أوكي..هذا الشيطان..هوا إلي قاعد يقلقني..أنا المفروض ما أستسلم...! قعدت أطالع في غرفة جود قبل ما أرجع لغرفتي..كلو منها..من ذاك اليوم..من يوم ما رمت اسم أحلام و أنا مني قادر أوقف تفكير..صح مو مرة لكن كنت أفكر و بين فترة و الثانية ينقز اسمها فجأة ليا..سرت أحس إنو اسم أحلام مشهور..ما أقولكم إني اتعلقت أو حسيت إنها ليا..لا..بس سارت أحلام "أخت أحمد" شخص في بالي..أول ما كانت تعنيني..ذحين أحس بوجودها..زمان كانت زيها زي أي وحدة في الشارع..ذحين سرت أحسها قريبتي...! حسبي الله و نعم الوكيل...! خرجت للصالة و لقيت أمي و جود..قاعدين ياكلوا كيوي...! سلمت على راس أمي:صباح الخير...! أمي:صباح النور...! جلست قدام التلفزيون و أنا أسمع جود تقول:عمو أقطعلك كيوي...؟! قلبت للجزيرة الوثائقية و أنا أقول:لأ... و بعد ثواني لقيتها قدامي مبتسمة بقطعة كيوي..طالعت فيها:مابغا... -بس أنا أبغاك تاكلها... -ايوة بس أنا مابغا آكلها... -حتردني يعني...؟! سحبتها منها و رميتها في فمي فضحكت...! جلست جمبي و قالت و هيا ترجع شعري ورا أذني:استخار عمو حبيبي...؟! قلت بانفعال من ورا أسناني:لايش؟! ابتسمت بحلاوة:لحياتو... طالعت في التلفزيون و هيا تقول:طبعاً لأ..بس والله عاذرتك..أعرفها دي الحالة..لمن نكون عارفين إنو ربنا رح يهدينا عشان نسوي الشي إلي ما نبغاه لو استخرنا..قاعدين نعاند الصح و نعاند نفسنا..تمر عليا دي الحالة كتير بس في حياتي ما استسلمت لنفسي أكتر من يومين تلاتة..أضغط على نفسي و أستخير... و قامت رجعت لأمي و فتحت معاها موضوع مادري ايش هوا...! بعد مدة قالت أمي:جود..قومي منورة..خليها تسويلنا فطور...! جود:أنا بسوي يا جدة..خليها ترتاح... أمي بنرفزة:خليها تقوم..ليش ترتاح..البيت خلاص قام...! جود:حرام يا جدة مسكينة..طول الليل معاكي..خليها ترتاح دحين..حرام..أنا بسويلكم فطور..ايش تبغوا...؟! قلت و أنا أقوم:سوي لأمي..أنا مابغا...! و رحت لغرفتي..و أول ما دخلت طاحت عيني على السجادة..استغفر الله العظيييييييم..ساير زي الإمعة كلمة توديني و كلمة تجيبني..كل شي ينقال أفكر فيه..كل شي ينقال يأثر فيا..أفففففففف...! رميت نفسي على السرير..في الفترة الأخيرة ساير كاره نفسي..و متضايق من تصرفاتي و ردود أفعالي تجاه كل شي و كمان ساير مضطرب..فقدت الهدوء و الثقة و فقدت قدرتي على التفكير بعقلي و... و خلال ثواني غرقت في التفكير في الشخصية مو في الفكرة..من جديد !! ********************************* جود،،، قلت لعلي إلي سأل:الحمدلله..أحسها فكت شوية...! علي و هوا يلف بالسيارة:يمكن اتعودت و اتأقلمت مع الوضع...! وقف عند بوابة العمارة و نزلنا..قال و هوا يشيل مني شنطتي الكبيرة:طيب و عمك...؟! و كملنا نقاش لين وصلنا الشقة... دخلنا و بدأت أنا أروق البيت و أرحمو من بعض آثار تدمير علي و سعود من غيري..طبعاً سعود صغير..على حسب إلي معاه..لو أنا يكون منظم..لو أبوه يبدأ يتمرد من ناحية الترتيب...! و انشغلت عاد ببيتي و أسرتي...! عالساعة عشرة خلصت شغلي..أحمد الله بس إنو السبت ما عندي دوام..أصلاً أنا غبية..يوم الربوع ما سويت شي قلك بروح لجدة من بدري و جا علي و خبص كمان يوم الخميس..هوا قلي إنو رجع يبغى يتروش و هناك ما يرتاح لإنو مافي كل أشياءو...! قعدت على الكنبة في الصالة جمب علي و أنا أتنهد...! طالع فيا بعدين رجع يطالع في التلفزيون..قال:نومت سعود... -طيب... -قولي شكراً... -شكراً... حسيت بنظرات علي إلي استمرت مدة مو قصيرة فالتفتلو:ايشبك...؟! -إنتي ايشبك...؟! -ما بيا شي..ايشبك تطالع من أول...؟! -حتعيدي نفس موال أول زواجنا...؟! ابتسمت بحواجب مقطبة:ايش فكرك...؟! -فكرني إن..معد فيه شي جديد أتذكره...! طالعت في علي مستغربة:علي..ايشبك..ضايقتك بشي...؟! -لا..بس أحس ليا مدة عنك..من زمان ما قعدنا مع بعض..أحس إني فقدتك رغم إنك كل يوم في وجهي...! -فقدتني؟!،كيف يعني..حاس إني مقصرة معاك في شي...؟ -لاء جود لأ..بس أحس..مادري..أحسك بعدتي عني..بشكل ما يريح...! سكت و ما عرفت ايش أقول..أوكي يمكن لنا مدة من آخر سهرة حلوة بس هوا عارف..مو بيدي..حملي و تخرجي و تعب جدة...! ناداني لمن ما لقى رد..طالعت فيه فقال:عارف و مقدر إنك مشغولة بأشياء كثير لكن أنا كمان لي حق عليكي...! نزلت راسي:أوكي..أنا آسفة لو كنت انشغلت عنك أكتر من اللازم..أوعدك ححاول أرتب نفسي و أنظم وقتي...! قرب مني و لف يدو على أكتافي:ما أقولك كذة عشان أحسسك بالذنب..أنا بس أبغى أوصلك إنك واحشتني..جود ما قد حسيت إني فاقدك زي ماني قاعد أحس ذحين...! طالعت فيه و قلت و عيني في عينو:طب قولي مشتاقلك لا تقولي كده...! سكتنا مدة و احنا نتبادل النظرات..اتنهد علي بعدها و قال:تعرفيني ما أعرف أعبر..أنا اتنرفزت و حسيتك منشغلة بغيري.."ابتسم"..ايش تتوقعي من واحد بدوي زيي...؟! أخفضت بصري لإني حسيت إني ممكن في أي لحظة أبكي ..نفسي أبكي و أشكيلو بس مني لاقية سبب مقنع و مني عارفة بايش رح أشكي..أنا أحس نفسي مدووشة..أحس فوق راسي أشياء كتير..هم حملي..هم عمو..هم جدة..انتباهي لسعود..و دحين علي و إهمالي الغير مقصود لو...! حطيت راسي على صدر علي فحضني و هوا يهمس باسمي...! قلت:ما فيا شي... -طيب...؟! غمضت عيني و أنا ألف يدّيني حولين علي:خليني كمان شوية...! -أوكي..إنتي حرة... ********************************* جود،،، صحيت الصباح و لقيت علي مو موجود..اتنرفزت..أكره لمن علي يسوي كده..ليش ما يقومني أساعدو و هوا عارف نفسو يحوس الدنيا و يتأخر لو ما قمت معاه...؟! يمكن متأثر من حركتي أمس..أو تلاقوه حاسس بالذنب عشانو حسسني بالذنب..حبيبي هوا..حساس و رومنسي..أبغى أفهم أنا ايش يبغوا البنات بالرومانسيين بالكلام..ايش أحلى من إنك تقومي و تلاقي زوجك خارج لشغلو من غير ما تحسي و لا تنزعجي..هدي قمة الرومانسية و الرقة بالنسبة ليا...! خرجت من الغرفة بعد ما اتشطفت و اتغسلت..سعود كان مشغل التلفزيون و قاعد يتفرج على (بوب ذا بلدير)..هوا كده اسمو صح...؟! جلست و أنا أقول:صباح الخير... قال من غير ما يطالع فيا:صباح النور مامي... -وي..صباح النور من غير بوسة ولا حضن...؟! قام و جا لين عندي..حضني و جلس جمبي..قلت:من متى حبيبي صاحي...؟! -مادري..من أول...! ابتسمت:طب فطرت...؟! -مممممم..سويت كورن فليكس...! مسحت على شعرو:بالعافية حبيبي... مادري ليه حسيت بالخوف..إني أقوم و ألاقي سعود مشغل التلفزيون و ماكل فطورو..بالعادة كان يجي و يصحيني...! قلت:طب مامي لمن تفطر ما رح تفطر معاها...؟! ابتسم:أنا سويت شويييييييييييية كورن فليكس عشان لمن تقومي آكل معاكي...! ابتسمت بسعادة:يسعد قلبك يا قلبي..ايش تبغى تفطر...؟! طالع فيا:لا أمامي مو دحين..شوية خلي الكورن فليكس يروح من بطني و بعدين آكل معاكي...! ابتسمت:حبيبي أنا مني جيعانة..متى ما إنتا جعت كلمني...! حضني و حط راسو بالخفيف على بطني:ماما إنتي حلوة...! قلت و أنا أمسح على جسمو:عارف إنك زمان كنت تقولي إنتي حولة...؟! شهق بصدمة طفولية:من جد...؟! هزيت راسي:آها... -وي..ما كنت أعرف أقول حلوة...؟! ابتسمت و هزيت راسي:ما كنت تعرف تقول.. -يا الله كنت نونو زي النونو إلي هنا... قالها و هوا يأشر على بطني...! قلت و أنا أمسك يدو:ايوة زي النونو إلي جوتي..حط يدك و حس...! و قعدت أحرك يدو و هوا يقول:ماما متى يجي النونو...؟! -مممممم..بعد شهرين إن شاء الله...! باقيلي أعتقد شهرين إلا..بس ما فيا أشرح الـ "إلا" لسعود...! -طب ايش اسمها...؟! -مادري..إلي ييسرو ربك حلو...! -أنا أبغى اسم حلو...! ابتسمت:أكيد حلو..أخت سعود لازم يكون اسمها حلو...! -ينفع لورا...؟! -ايش لورا دي...؟! -ماما..همتارو !! -آآآآه..البنت إلي عندها همتارو..لورا..ايوة عرفتها..لا ما ينفع.أبغى أسماء عربية قوية...! سعود قعد يتكلم و يقترح من إلي يعرفو و أنا سرحت أفكر في اسم..طالعت في سعود بعد ما جاتني فكرة شريرة..همست في أدنو بشي فبعد عني بحماس و قال:الله..حلو !! -بس هدا سر بيني و بينك..لا تقول لأحد...! حط يدينو على فمو:ما أقول ولا لأحد...! ^^^^^^^^^^^^^^^^^^^^^^^^^^^^^^ سعود،،، قلت و أنا أضحك:بشويش عالبنت... كنت قاعد أكلم أحمد و دوبي سمعتو يخاصم بنتو و يقولها تروح..الظاهر مضايقتو...! أحمد:ياخي مني..يا بابا بس خلاص...ها..بعدين..بعديييييييييييين..قاعد أقول بعدين... قلت:أحمد ابعد الجوال و بعدين خاصمها..أنا ايش دخلني أتهزأ معاها...؟! أحمد:أعرف طفشتك بس معليش...! و ما سمعت صوت بعدها غير بكا بنتو..يوه..ايش بكاها..لا زود خصام و لا سمعت صوت ضرب و أصلاً أحمد ما يضرب...! قلت:بسم الله ايش فيه...؟! أحمد:ولا شي..حدجتها بنظرة بس..ههههه.. -يا مجرم..نظرة الآباء الحمراء... -اييييييييوة..بس شوف البراءة..قاعدة تبكي مني في حضني..ها..لا حبيبي مو عنك..والله مو عنك..هذا عمو سعود..قاعدة تسأل عنك تبغى تعرف تستحي ولا لأ..هههه... -ليه ما تستحي مني يعني...؟! -لا يعني تتفشل إنك سمعت الخصام و لا لأ..بس عادي ما تتفشل منك...! -هيا ايش تبغى...؟! سكت ثواني بعدين قال بهدوء:تبغى تنام...! ابتسمت:جود كانت كذة...! -مو لو ما اتعاملت مع جود زمان كان والله ما عرفت أمشي حالي معاها...! قلت بعفوية:ليه وين أمها...؟! -ها..تعبانة شوية فـ..أنا مضطر أعتني بطفلتنا...! -ما تشوف شر..اسمع..عندك أي شي جديد فلة...؟! -ايش تبغى...؟! -فلم..مسلسل..طفشااااان مرة و ما عندي أي شي أسويه...! -عندك فلوس...؟! قلت بسرعة:محتاج شي...؟! -لا بس لو عندك فلوس و فاضي ما عندك أفكار أو مشاريع روح اتزوج...! -أحمد فكنيييي... -أستهبييييييييييييييل....! -لااا تستهبل..أعرفها حركات نص كم دي..ترموا الكلمة قلك تبغوني أنشغل و أفكر...! -ترموا؟!،إنتا الظاهر أحد مطفشك قريب...! -طبيعي..طول عمرهم و هما يطفشوني...! -ايوةعارف و أنا معاهم..بس الظاهر المدة ذي مكثف التطفيش...! -جداً... -يالله يا شيخ..ييسر الله طيب..الواحد ما يدري وين الخير....! -من جد..دحين ما جاوبتني..عندك ولا ما عندك...؟! -لو ما عندي يسير عندي... -ايش عندك...؟! -ما عندي شي جديد... -يا شيخ أبغى حاجة ما شفتها...! -بالله يا سعود..متأكد ثلاثة أرباع إلي عندي ما شفته....! -طيب بعدين وصلي هيا بطريقة ما...! -لا إنتا تعال خذها..كم لي ما شفتك...؟! -من جد..أحس من بعد ما اتناسبنا معد سرنا نشوف بعض...! -لإننا اطمأنينا..سرنا أهل..غصباً عنا كل فترة و الثانية بنشوف بعض في أي مناسبة...! ضحكت بخفة:هواااا ذا..و كل واحد أخس من الثاني..ما نتصل و لا نسأل...! -بس نحب بعض... -نعم...؟؟؟!!! -نعم الله عليك..حاسك تعبان و طفشان قلت أغدقك بالحنان...! -اغدق الضعيفة إلي بكيتها..خليك بعيد عني...! -من ايش خايف..أنا الحمدلله محصن...! ليش كل الناس قاعدة تدقني...؟! -و أنا عارف ربي... بعد صمت ثواني ضحك أحمد بقوة و قال:إلي على راسه بطحة يحسس عليها..أنا دوبي شايف مسلسل و واحد من الممثلين قال ذي الجملة..ما قصدت أدقك بالكلام يعني...! سكت فقال أحمد:تريد شيئاً...؟! قلت بهدوء:لأ... -أوكي..أشوفك على خير..مع السلامة... -مع السلامة... و فصلت... يا الله..كنت قاعد أكلم أخو أحلام... آآآآآآآآآه..أنا..كنت قاعد أكلم أحمد..أحمد صاحبي..صاحبي من سنين..مو أخو أحلام..أصلاً مين أحلام...؟! ضغطت المخدة على راسي... أبغى كل خيال سخيف فكرت فيه يطلع و كل لحظة حلوة اتخيلت حدوثها تطلع..لإنو مجرد التفكير..غباء...! غباء؟! الغباء هوا إني قاعد أمثل الصلابة..من يوم ما حسيت إنو فيه إمكانية وحدة توافق و أنا حالتي مشقلبة فوق تحت..كلام جود عنها و عن رأيها "العام" في موضوعي قلب لي كياني..أنام عليها و أصحى عليها..اسم أحلام يتردد عليا كل يوم أربعة و عشرين ساعة...! و ما زلت أنا متذبذب..ما بين أستسلم و أفصح عن رغبتي بمعرفة المزيد و ما بين أكتم...! ********************************* |
الجزء التاسع عشر (ألهمني يا ربي) كنت في الجامعة لمن رن جوالي رنة الرسالة..رفعتو و إلي ظهر لي إنو الرسالة من عمو..لحظتها..فقد قلبي دقة من دقاتو..اتفاءلت و اتشاءمت..عشان كده فضلت أروح أطمن على سعود و أقعد معاه و أفطر...! لمن وصلت لعند سعود و شافني وقف و جا عندي..مدلي يدينو فشلتو و بستو:هلا حبيبي... و رحت و قعدت معاه في مكان الجلسات و قعدت أفطر معاه..قال:ماما خلصتي...؟! -لا حبيبي...بقيلي محاضرة وحدة...! -أول جيتي و خلاص...! -حبيبي أول كنت مصدعة و مابغا أحضر المحاضرة...! -طب دحين إنتي مصدعة...! -بسم الله عليا..لا مني مصدعة..قول كلام طيب !! -ماما إنتي أكلتي اليوم بنادول...؟! -ايشبك إنتا...؟!،تبغى تروح البيت يعني...؟! -لأ..بس مابغا أقعد هنا تاني...! قطبت حواجبي:ليه أحد قلك شي...؟! -لأ..بس فيه ولد معفن...! -ولد معفن..ليه ايش سوا...؟! -قرفني..مو راضي يمسح خشمو..أعطيتو منديل مو راضي..مسح بيدو و قعد يلعب بالألعاب..وسخها ما قدرت ألعب...! ابتسمت:خلاص حبيبي يمكن أمو ما علمتو..لا تقعد تتريق و تتكلم عليه...! كمل أكل من غير ما يعلق و رفعت أنا جوالي و فتحت الرسالة و... OMG !! **************************************** سعود،،، كنت مجنون..مستحيل..مستحيل كنت بكامل وعيي..ايش رسلت أنا..ايش كتبت...؟! والله ما كان قصدي و لا كنت أعنيها..حتفهم غلط..أنا عارف جود..ما حتفهمها زي ما أنا أقصد..أصلاً ايش كنت أقصد لمن رسلت ذاك الكلام...؟! حطيت راسي بين يدّيني منتظر الاتصال المتوقع من بعد رسالتي...! لكن إلي جاني كان رسالة..محتواها ما أعطاني إحساس بأي شي غير سعادة جود... "أشياء زي كده الجوال ما يصلحلها ^_* " رميت الجوال بعيد عني..أنا ما قلت إني وافقت..ما قلت إني وافقت..بس قلت أبغى أعرف أكثر عنها..مجرد فضول..ما قلت إني وافقت أو حتى اقتنعت بأفكار جود الملتوية...! وجع..وجع في كل شي !! لا و حاطة وجه غمزة كمان..أنا هنا محروق دمي و هيا مبسوطة..ليه مبسوطة ليه؟! أنا عارف جود ما تختار و لا تُعجب بأحد إلا و هوا يستاهل بس يا عالم فهموها..أنا لو هيا مبسوطة و مرتاحة يكفيني..أولادها أولادي و سعادتها سعادتي..ليش ما تبغى تفهم إني راضي بها جمبي و بس..مني محتاج شي ثاني...! جود..جود..استوعبي... يا رب..يا رب يا كريم يسر لأحلام هذي زوج يسعدها و يصونها..ذحين..ذحين يتقدملها و يوافقوا عليه..يا رب..يا رب يا كريم...! و قعدت أدعي..بصدق و إخلاص لإنسانة..ما أعرف عنها إلا اسمها...! **************************************** جود،،، كنت متحمسة..بشكل مو طبيعي..لدرجة علي سأل:"من وين مشرقة الشمس اليوم؟!" قلتلو:"من الشرق"،و قعدت أضحك و هوا يطالع فيا مصدوم..سعيدة و نشيطة بشكل..و الأهم من هدا كلو إني مرتاحة و واثقة كمان!! آه يا ربي شكراً..موافقة عمو بس فرحتني..بغض النظر عن موافقة أحلام..لإنو لو ما وافقت معناتو دا نصيب و بعدها يحقلي أستسلم..باعتبار..إنو دي إرادة ربنا..و لو إنو عمو حيكرهني لمدة بسيطة بسبب إحساسو بالرفض بس لو وافقت و اتوفقوا رح يحبني أكتر...! سعود و هوا يجلس جمبي:ماما..إنتي ايشبك الوم...؟! -ايشبي...؟! -مرة طيبة اليوم... -وي سعود..يعني أنا دايماً شريرة...!؟ ضحك:لا يا ماما..بس مرة فرحانة ما شاء الله ما عصبتي..أبغى أعرف ايشبك...! -ليه..هوا أنا سايرة أعصب كل يوم...؟! قال و هوا يهز راسو:لأ بس..تشمبقي كتير...! -أشمبق ها... أشمبق يقصد بها سعود أشمق و معناها أعطي نظرة احتقار و أنا ألف وجهي...! بس هل من جد أنا سايرة أشمق كتير؟!،الأغلب الإجابة حتكون ايوة بس مو على أحد غير سعود و علي..والله صابرين عليا..سعود ما يزعل و علي ما يخاصم..بس لحظة..علي غصباً عنو يتحمل مزاجي..سعود ليه يتحمل..حبيبي هوا..عاقل اسم الله عليه...! دخل علي الشقة بعد مدة..كان راجع من صلاة العصر..طالع فيا و هوا يقفل الباب..جا و جلس على وحدة من الكنبات و هوا يقول:اليوم مني مرتاح...! -ليه حبيبي...؟! فز في قعدتو و قال:شفتي..شفتي..ايش إلي ليه حبيبي..إنتي الفترة الأخيرة سايرة تقولي:خير..ايش صاير؟! اتخصرت:أقووول إنتا و ولدك..ما شاء الله كل واحد من جهة..دا دوبو يقولي تشمبقي كتير و إنتا تقول إني ما أكلمك كويس...! قال و هوا يمد يدينو لسعود:عالعموم رجعتي للطبيعي حقك ذي الأيام..معناته مافي شي...! -علي يعني و بعدين معاك؟! حط سعود على فخدو و قعد يلعبو..طالع!!،ولا حتى عبرني بنظرة...! برطمت و قلت بزعل و أنا أقوم:لا تكلموني..ما أحبكم!! و رحت على الغرفة..أوكي..لازم جدياً أبدأ أفكر بطريقة أفتح فيها الموضوع مع أحلام..بس لا..قبل لازم أكلم عمو عنها..يا ربي..متحمسة..أبغى آخر الأسبوع يجي عشان أكلم عمو..مواضيع زي دي ما ينفع تنقال في التلفون..و بعدين أنا أبغى أخلص كل شي بسرعة عشان قبل ما أولد يكونوا مملكين..والله إني طول الوقت أدعي يتم الموضوع على خير قبل ما أولد..عندي إحساس قوي إنو لو ولدت و هما مملكين ما رح أتعب زي لو ما كانوا مملكين!! بعد شوية دخل علي عالغرفة و فسخ توبو و علقو..جا بعدها للسرير و اتمدد..قلت باستغراب:حتنام؟! -لا..بس..أوفففف..أحس نفسي مكسر..لأسباب مجهولة...! -أمس نمت كويس؟! -ايوة بس مادري ايش فيني...! -يمكن من كتر النوم..أمس تراك نمت مرة بدري و كمان اليوم الظهر تعتبر رجعت بدري و نمت لين العصر اسم الله عليك...! -تعويض الأسبوع إلي فات..كنت ما أنام كويس...! -لاحظتك..ليه؟! -طفشاااااااااان..و قرفان من كل شي..أحس روتين قاتل..أبغاكي تولدين بسرعة..ذحين...! ابتسمت و أنا أحط يدي على بطني:خلاص معد بقي شي...! طالع فيا:تتحرك؟! ابتسمت و أنا أطالع في بطني:حالياً لأ... قرب مني و حط أدنو على بطني و قال:لا تتحرك... -قبل شوية ما اتحركت... -بس ذحين تتحرك..جربي حطي أذنك..ولا ما تقدري..حطي يدك حتحسي؟! طالعت فيه و قلت بابتسامة و أنا مقطبة حواجبي:علي..تراها جوتي!! ضحك بخفة و هوا يرفع راسو:نسيت!! اندق الباب و كان سعود إلي دخل و هوا ماسك بيد وحدة الجيم بوي..دخل و قفل الباب..جا و جلس فوق السرير عندنا..قال:طفشان!! قلت و أنا أرجع شعرو ورا أدنو:ليه حبيبي..ليه طفشان؟! بوز شفايفو و ما رد فقال علي:ايش فيك...؟! -أبغى.. و رجع سكت..قلت:ايش تبغى حبيبي...؟! قال بحيرة:مادري.. -ايشبك..تبغى تخرج..تروح محل معين؟! -لأ.. -أجل ايشبك...؟! رفعو علي و حطو على فخدو:عادي..طفشان زي ما أبوه طفشان..صح سعود...؟! -إنتا طفشان يا بابا...؟! -ايوة طفشان مررررة..أبغى يصير شي حماس..دوبي قاعد أقول لأمك تولد بسرعة...! -هيا ماما لمن تولد يسير حماس...؟! -ايوة زي لمن جيت...! -أنا سويت حماس...؟! قلت:طبعاً حبيبي..مرة فرحنا لمن جيت..كان أحلى يوم في الدنيا...! ابتسم:من جد...؟! قلت:علي وين الصور حقت سعود...؟! -كلها في ميموري الكاميرا حقتك...! قلت:سعود قوم جيب الكاميرا حقتي من الدولاب و علي جيب اللاب توب حقي...! طالع علي فيا:وإنتي يا برنسيسة...؟! ابتسمت:أدعيلكم بالتوفيق...! قال سعود و هوا يتوجه لنا بالكاميرا:بابا..الرسول كان يساعد في البيت حقو..لا تستحي..قوم...! قام علي:من مين أستحي..من زوجتي و ولدي..بس أنا مالي مزاج أقوم بس حقوم عشان ذكرك للرسول صلى الله عليه و سلم و لا ما كان قمت..أصلاً قمت عشان بس لا أكسر مبدأ من المبادئ إلي تحشرها هاذي المثالية في راسك...! قال آخر كلمة و هوا يحط اللابتوب قدامي..ابتسمت و أنا أرفع شاشتو:شكراً..مالو داعي تبرر الخير إلي تسويه...! خرجت الميموري من الكاميرا و دخلتها في اللاب توب..فتحتها و بدأت أدور على جهة صور سعود و هوا بيبي...! قال علي:خلينا نتفرج عالصور من البداية...! قلت و أنا أرجع للبداية:أوكي... و لمن فتحت أول صورة قال علي:يييييييييه..بزرة.. -لو سمحتوا من غير تعليقات..بعدين البزرة دي هيا بغيت تموت عليها...! قال سعود:ماما أول وريتيني صورتك..إنتي حلوة حتى زمان...! بستو:حبيب مامي إنتا..مو أحلى منك...! قلت:الصور الجاية كلها بايخة..خليني أشغل الفيديوات...! شغلت فيديو الحفلة إلي جبلي فيها عمو الكاميرا و قعدنا نتفرج و نضحك على هبلي و هبل عمو وقتها..قلت:والله لو يدري إنك شفتو...! -بس والله مرة كان غير..حتى وجهه..أحس ذحين صاير نكدي...! -حبيبي هوا من الوحدة... قال علي بنرفزة:هوا إلي عاجبه الوضع..لو يبغى بيلاقي... قلت في محاولة لإغلاق الموضوع:الله يرزقو بنت الحلال! و بدأت أقلب في الصور..علي لمن ينفتح دا الموضوع يتنررررررررررفز..يقول إنو عمو هوا الغلطان و أياً كانت أسبابو رح يلاقي لو يبغى...! و في كلام علي..شي من الصحة...! سعود:ماما..أنا..ويني...؟! خرجت من الصورة إلي كنا فيها و قلت و أنا أدور على فيديو معين:علي فاكر لمن كان يبربر...؟! ضحك علي:ما قد وريتيه...؟! -مادري واله ..ما أعتقد..كم لي ما فتحت الكاميرا...؟! لقيتو..و شغلتو..كان فيديو لسعود قاعد يبربر فيه..كان نونو مرة ما كمل كم شهر...! سعود بدهشة:هدا أنا...؟! -ايوة حبيي... كان سعود يطالع بحماس و خدودو محمرة أما علي فكان يضحك و مبسوط و يعلق كل ما اتذكر حاجة... اتذكرت أنا كمان شي..داك اليوم كان حلو..لأسباب كتيرة..كنت فيه أحاول أرضي علي..لإني زعلتو..من غير ما أحس..اتكلمت و قلت شي من غير ما أدري إنو كان قاعد يسمع..هوا ما عرف إني عرفت لكني عرفت..و كنت أحاول أرضيه بشتى الطرق..حسيت بالذنب قوي يومها!! اتنهدت و أنا أنفض كل ديك الذكريات من راسي..الحمدلله..أنا لحياتي معنى دحين..دحين قاعدة أعطي مو آخد..أحب و أنحب..أقلق و يقلقوا أحبابي عليا..الحمدلله..يا ربي لا تغير عليا بعد ما أنعمت..يا رب...! سعود:ماما!!،إنتي صغيرة.. طالعت في الصورة إلي فاتحينها و ابتسمت:ما قد وريتك؟! -ماما إنتي ما توريني كل شي..بس هديكا إلي في الأول... ابتسمت:طب كيف حلوة الصورة...؟! --ماما إنتي في كل الأيامات حلوة...! ابتسمت فقال علي:والله جود..طالعي..مو حلوة..كان عندك حب شباب... طالعت في الصورة إلي كانت وحدة من أحلى صوري و أنا صغيرة..كان شكلي فيها حلو و نفس الصورة متقنة و ثابتة..قلت:وين حب الشباب..أصلاً الحمدلله ما كان عندي..إنتا إلي كان عندك مو أنا...! -متى شفتيه....؟! -مادري ما شفتو..بس أحس وجهك يركب عليه يكون فيه حبوب زمان...! -مالت عليكي..والله إني وسيم...! - أنا قلت غير كده..بعدين الأولاد كلهم تطلعلهم حبوب أول ما يبلغوا مو زي البنات ممكن تجي في ظهورهم أو صدورهم...! -وااااه..تجي في أجسامكم...؟! -يب..أحياناً كمان يطلع الدهن في الشعر..هيا أصلاً الحبوب كلها دهون لازم تطلع..و عاد على حظ الوحدة في أي مكان يطلعلها..بس ترى كمان الاهتمام لو أثر..يعني الدهون تتركز في محل واحد بس تطلع في الباقي و لو بنسبة بسيطة..بنات يعرفوا يتعاملو معاها و بنات لأ...! -إنتي تعرفي...؟! قلت بغرور:ايوة الحمدلله..أعرف... -يااااا رب سترك..محد يقولك شي.. -والله كنت أعرف... -طيب خلاص... و قعدنا نحاول أنا و علي نلهي سعود و نخرجوا من موود الطفش..و على كل حال..أنا و علي اتفقنا نسوي تجديدات في حياتنا بعد ما أولد..حنضيف أشياء في البيت تعمل تغيير بس ما تكلف كتير لإنها مي شقتنا ولا بيتنا الدائم..كمان أنا لازم أغير من شكلي..كمان لازم... لازم؟!،اللازم دحين إني أخلص موضوع عمو و أنهيه..قبل ما أولد!! **************************************** كنا في بيت أهل علي..قاعدين قعدتنا المعتادة و كنت من غير ما أحس أراقب أحلام..و فجأة..حسيتها شريرة..مو شريرة..بس حسيت إنو شكلي حيطلع سخيف لو كلمتها..يا ربي..مادري..أنا استخرت و قلبي يقولي بقوة إني ما أخرج من هنا إلا و أنا مكلمتها..بس كيف..و متى؟! فجأة أُلهمت بشي..أحلام تنام بدري..و نادراً ما تكمل معانا السهرة..يا دوبك تتعشى و أحياناً ما تتعشى لو اتأخر العشا!! خلاص..لمن تطلع أنا حلحقها بعد مدة و أكلمها..بس ايش حيكون عذري لو سألتني عمتي وين رايحة..آه..ايوة..حقولها أبغى أسألها عن فلم..لالا ايش السخافة..حتقولي صفاء عندك تعرف كل شي عند أختها..طب..آه..حقولها وحدة في الجامعة كلمتني عنها و طلبتني رقمها..و إنو أنا ما أعطيتها خفت تكون كدابة فبسألها عنها و.. آآآآآه..ليش فجأة أحس كل أفكاري و خططي سخيفة؟! يا ربي..ألهمني بشي ما يشكك أحد..مابغا أحد يعرف أو يحس بإني داسة شي..كفاياني علي إلي عينو تقولي كل يوم:"ايش وراكي؟!" قالت عمة إنوا العشا جاهز و قاموا البنات بالتالي يغرفوا و يساعدوا أمهم أما أنا فكنت أرتب السفرة بما إنو عمتي أصدرت قرار بإنو ما أتحرك..مادري ليه بس تقول إنو شكلي تعبان و عمة لمن تقول شي لازم يتنفذ ولا حتستخدم أسلوب السطلة الأموية..عاد اتخيلوا كيف !! جلست أحلام آخر وحدة عالسفرة و هيا تقول:أبغى..أناااام.. علي:أصلاً متى ما كنتي تبغي تنامي...؟! عمي:سمي عالبنت..صاحية من الفجر...! علي:كمان إنتي مع نفسك..خير صاحية من الفجر..ايش عندك...؟! طالعت أحلام فيا:سكتيه..ما فيا حيل أرد...! طالعت في علي:علي.. -مابغا..ما بطالع... ضحكت فقالت عمتي:اهجد عن بنتي و زوجتك... علي:بنتك و فهمنا..زوجتي ليش..ايش سويت لها...؟! عمتي:ولا شي..بس ناوي... علي بفجعة:بسم الله أمي..كيف تعرفي...؟! -من عيونك أعرف...! عمي:أمكم رومانسية و حساسة...! عمي كان يتريق و أنا بصراحة ما أرضى على عمة..قلت بقهر:طبعاً لازم تكون حساسة لعيونكم..مو ما شاء الله النظرة ذي متوارثة..منك يا عمو لأولادك إلي هما أ ولادها..إلي هما أزواجي...! حسيت بنظرة غريبة..التفت و كان علي يطالع فيا بنظرة مرعبة..قلت:ايش فيه...؟! صفاء:قلتي أزواجي... انتبهت و قلت:وي..قصدي..أزواجي أنا و زوجة أحمد..قصدي عمو أحمد..لا تسويلي سيرة... علي:هيا ايش سويت ذحين...؟! عمة:أقلقتها..خليها تتعشى... علي بطفش:طيب... ابتسمت و أنا أشوف سعود يكلم لينا و يقطع لها من اللحم إلي في صحنو...! قامت أحلام:الحمدلله..تصبحوا على خير... قلت:حتنامي...؟! -ايوة.. -آه..طيب..تصبحي على خير... -ايه..كنتي تبغي شي...؟! -ها..لالا..بس كنت أبغى أسألك عن رواية..لو حلوة ولا لأ... -ايش اسمها...؟! -مادري..بس حلاقيه لو دورت عليه أون لاين..بس بما إنك تبغي تنامي... -عادي..ما حنام دحين..حقرأ أول..تعالي... علي:ايش هوا الكتاب...؟! التفت لعلي:مادري..مني فاكرة اسمو ولا اسم إلي كتبو أو إلي كتبتو..أنا فاكرة إنو لفت نظري اسمو بس مادري ايش هوا... جات عندي أحلام و مسكت يدي:طب تعالي..ما حنام علطول..تعالي عادي... قمت و رحت مع أحلام و أنا أسمعهم يكملوا كلام..طلعت الدرج و قلبي يدق بقوة..مادري ايش حقول..مادري كيف حبدأ..لكن لازم أتكلم..لازم ما أطلع من هنا إلا و أنا مكلمتها..وافقت ما وافقت..مو قضيتي..المهم أقولها!! دخلنا لغرفتها و اتوجهت هيا علطول للابتوبها..فتحتو و قالت:تعالي..ايشبك؟! حكيت راسي و قلت بتردد:أحلام..أنا..مابغا أسألك عن كتاب... طالعت فيا باستغراب:ها... -أنا أبغا أكلمك في موضوع..هوا..هوا ما ينفع بالجوال و ما ينفع قدام أحد و... قاطعتني بتوجس:ايش فيه جود..علي فيه شي..إنتي فيكي شي...؟! -لالا... -سعود فيـ... قاطعتها و أنا أتقدم منها و أجلس عالسرير:لا أحلام..ما فينا شي... -أجل ايشبك...؟! -أنا أبغى آخد رأيك في شي يخصك... -خير... لمن حسيت بتوترها و استغرابها هديت..كأنو ثقتها و هدوءها انتقلوا ليا و أديتها أنا توتري و ترددي!! -خير إن شاء الله..بس قبل..أبغاكي توعديني ما يطلع الموضوع لأحد..عشان لو سار شي لا سمح الله..محد يعرف إلا أنا و إنتي..و أنا ما اخترتك أكلمك في دا الموضوع إلا و أنا واثقة منك... -جود..من جد خلعتيلي قلبي..ايش فيه...؟! -أحلام... سحبت نفس و طلعتو:أحلام أنا أبغى أخطب لعمو و... وقفت كلام لمن شفت أحلام تقطب حواجبها..قلت بسرعة:أحلام لا تهتمي بإنو عمي..أنا... قاطعتني بهدوء و صوت عميق:كملي.. سحبت نفس تاني و قلت:عمو عندو مشكلة..أنا.. أطبقت شفايفي و سكت و أنا أطالع لتحت.. رجعت أطالع في أحلام و أنا أقول:لمن كان عمري عشرة سنين..آآه..أحلام إنتي عارفة عمو أكبر منك و لسه مو متزوج و مو راضي يتزوج..هوا..أنا قبل مدة اكتشفت ليش..من كلام كان هوا كاتبو.."دمعت عيني"..و..و.. رجعت أخفضت بصري و أنا أحس بالصعوبة..قالت أحلام:و ايش...؟! قلت من غير ما أرفع بصري:لا تزعلي مني أو تفهميني غلط..أنا مني شايفتك ناقصة أو شي..في الحقيقة عمو هوا إلي ناقص و.."طالعت فيها"..أحلام أنا مابغا لعمو أي وحدة..لإنو أي وحدة لو ما وافقت عليه ما حتسكت..إنتي الوحيدة إلي أنا واثقة إنها رح تسكت حتى لو ما حصل نصيب..إنتي الوحيدة إلي..إلي.. قالت بصدمة:جود عمك يبغاني..يبغى يخطبني؟؟؟ قلت بسرعة:أ... قاطعتني بإنزعاج مفاجئ:جود أمي و أبوية عندك..تكلميني أنا ليه...؟! -لإنو..أحلام اسمعيني..عمو عندو مشكلة..أبغى أعرف أنا أول تقبلك لهدي المشكلة بعدين رح يجي هوا رسمي..أصلاً أصلاً عمو موعاجبو الوضع..مو عاجبو إنو أجي أكلمك بالدسة بس أنا أصريت لإني.. -ايش مشكلة عمك...؟! -أنا لمن كان عمري عشرة سنين..عمو سوا حادث و..سار..يعني..هوا سار معد يجيب أولاد... قالت بصدمة:ايييش؟؟؟؟!!!! -هوا.. -جود عمك عقيم؟! مسكتها:أحلام وطي صوتك..خليني أكمل..اسمعيني..أنا عارفة يمكن تنصدمي..صدقيني أنا انصدمت أكتر منك بس هوا وضع لازم أتعايش معاه..بليز خليني أكملك..و سوي إلي يعجبك بعدها... -جود إنتي عارفة ايش قاعدة تقولي...؟! -هوا مو عقيم..هوا الدكتور قلو صعب تخلف... -و ايش تفرق..متى سار الحادث و كيف؟! -لمن كان عمري تسعة أو عشرة سنين..لمن اتخرج من الجامعة...! -ليه..قصدي كيف..هوا إلي سواه..كان لحاله ولا معاه أحد...؟! -كان لحالو..هوا..هوا راح استراحة بعيدة شوية..أصحابو كانوا مسوين احتفال..وكانوا بيناموا..عمو ما يحب فرجع لحالو ما نام معاهم و سار الحادث في الطريق...! قطبت حواجبها:استغفر الله..طب و كيف سار ما ينجب..كيف..قصدي ايش قال الدكتور و.. -مادري..هوا بس قلي إنو الدكتور قلو صعب تخلف..ما كلمني ولا قلي التفاصيل...! اتنهدت و قعدت تستغفر و هيا منزلة اسها..كانت متعاطفة مع عمو و الظاهر نسيت إلي قلتو في البداية...! حطيت يدي عليها:أحلام..لا تفهميني غلط و خدي وقتك في التفكير..أنا زي ما قلتلك اخترتك إنتي لإنك حتسكي و ما رح تتكلمي عن الموضوع لو ما حصل نصيب... رفعت هنا أحلام راسها و قالت مقاطعتني:و إنتي يا جود تبغيني آخذ عمك...؟! -أنا قاعدة أعرض عليكي الفكرة.. قاطعتني:و ايش إلي يجبرني يا جود..أنا مني فاضية لدرجة إني أستنى أي واحد يجي و يدق الباب..بعدين مستحيل أعطيكي كلمة من غير علم أمي و أبوية..كبرت صح..اتأخرت في الزواج صح..لكن مستحيل أتنازل عن مبدأ من مبادئي عشان تجربة ما أعرف رح تنجح ولا لأ..ما أعرف نفعها حيكون أكبر من ضررها ولا العكس...! -مو عشان كده..عشان منتي فاضية..عشان عندك نشاطات و اهتمامات حفظت عقلك و كيانك عن البلاوي إلي يسببها الفراغ و الوحدة..عشان واثقة منك و من عقلك..أنا ما أقولك تخبي عنهم علطول..لو أعطيتيني موافقتك حقول لعمو عشان يتقدم رسمي..أنا لو كنت متأكدة إنو رفضك ما حيأثر على علاقتي بكم ما كنت دسيت و جيت كلمتك لحالك..إنتي لو رفضتي..علاقتي بعلي رح تتأثر، علاقة عمو بأحمد كمان رح تتأثر و علاقتنا أنا و عمو و جدة بكم كعيلة رح تتأثر..أنا مابغا دا الشي يسير..كمان عمو ما يبغى أحد يعرف بموضوعو..ما يبغى أحد يعرف بمشكلتو إلا الإنسانة إلي حيتزوجها و إلي هيا الوحيدة إلي رح يأثر عليها شي زي كدة..بعدين محد يدري..يمكن ربي يرزقو أولاد..الخلفة رزق و الرزق عند الله... -ونعم بالله..لكن في شي اسمو منطق..لو اتزوجت واحد و اكتشفت بعدين إنو ما يخلف أقول الرزق على الله لكن إني آخذ واحد ما يخلف عشان يمكن ربي يرزقو..وين الأخذ بالأسباب في تصرف زي هذا...؟! سحبت نفس أقوي فيه نفسي..أنا قلت إني حتحمل أي شي عشان عمو..و أحلام و إن كان كلامها يأثر فيا لكن من حقها..تقولوا في وجهي ولا من ورايا...! -أحلام إنتي زي ما قلتي منتي مجبورة..وافقتي ولا ما وافقتي مافي شي مو كويس رح يسير..أنا وعدت عمو..قلتلو لو تم الموضوع رح تتحسن حياتك و تسير أحلى..لو ما تم رح تفضل زي ما إنتا..إنتي استخيري و اسألي ربي..الواحد ما يدري وين الخير..لو رضيتي قوليلي..لو ما اقتنعتي لعد تكلميني في الموضوع..لإني ما رح أتحمل رفضك زي ما عمو ما حيتحمل يسمعها مني..أنا قلتلو إنو لو ما وافقتي ما رح أكلمو في الموضوع مرة تانية..علاقتي بكي ما أبغاها تتأثر..و أقول بكي عشان أنا أصلاً ما أبغاكي... -ما رح أقول لأحد..من ستر على عبدٍ في الدنيا ستر الله عليه يوم القيامة..و إنتي إلي لا تزعلي من كلامي..بس ما أعتقد فيه مجال للمجاملة في مواضيع زي كذة...! وقفت:صح معاكي حق..تصبحي على خير...! و خرجت من الغرفة من دون ما تستوقفني !! عند بداية الدرج كانوا علي و صفاء قاعدين يتكلموا..طالع علي فيا مستغرب:ايشبك...؟! -ها..هههه..لا بس..أول مرة أحلام تفتري فيا..طردتني من الغرفة...! قالت صفاء:يووووه..أحلام رعب لمن تبغى تنام...! علي:صح..أتذكر أول كعشتك...! جود:وي!! صفاء:وجع..بس لا كنا صغار..هيا كانت أولى متوسط..و أنا كنت لسة بزرة..بس برضو وجع...! قلت و أنا أتجه للدرج:لا تتوجعي كتير..علي دحين ماشيين...؟! صفاء:لااا اقعدوا... -قولي لأخوكي..أنا مالي شغل... -كذابة..أنا إلي مالي شغل..يا صفاء مرة أخوكي مستبدة..ما دام سألت لازم نروح ذحين...! نزلت و أنا أقول:ايوة..هيا ما تنبلش بعصبيتك قبل النوم..أنا إلي أبتلي فيك بس...! صفاء:مين قلك..مين قلك..ترى مرة قد لقاني أون لاين و قعد يهزأني..و اكتشفت بعدين إنو نعسان...! علي:بس ما سكتيلي..قعدتي تسبين...! صفاء:حتى أنا كنت نعسانة!! قلت:هوا طبع فيكم..خلاص..أصلاً مادري واحد نعسان ليش يدخل النت..مني فاهمة فكرة نعسانة و برضو أشتغل..لا و شي مو مهم كمان...! وصلنا للدور الأرضي و جلسنا..طبعاً كنت سرحانة..شغالة عالأتوماتيك..أرد مادري ايش أقول و في الأغلب أهز راسي و أبتسم!! و بدل ما ينزاح عني هم زاد هم!! **************************************** سعود،،، تتوقعوا جود كلمتها أمس؟!،هيا قالتلي لو وافقت حقولك..لو ما وافقت ما حفتح لك الموضوع مرة ثانية..خلاص لمن تجي اليوم حشوف حتكلمني ولا لأ و كمان يمكن تكون أصلاً ما فتحت الموضوع معاها..يمكن كانت البنت مشغولة أو طفشانة فما قدرت تفاتحها في موضوع زي كذة..يمكن..محد يدري...! يوووووه و أنا ليه مهتم..أصلاً من البداية مني مقتنع بالفكرة..أنا يا آخذ وحدة زيي بنفس مشكلتي ولا بلاش..خلي المستصحين للمستصحين..حرام أظلم وحدة على حساب سعادتي...! و أحسن ما توافق..عشان ما أحس بالذنب..و هيا الله يوفقها و يرزقها إلي يسعدها..والله إنها بنت ناس و متربية..هيا أعقل أخوات أحمد على حسب ما يقول..كمان جود تقول إنها أحسن متعلمة غير متزوجة قد قابلتها...! دخلت للبيت من صلاة العصر و أنا مو قادر أبعدها عن تفكيري..الفترة الأخيرة ساير سخيف..بس أفكر في ذا الموضوع..و معد أقدر أشيلو من راسي..كأني واحد مو شايف خير..مين يوم ما انقالي اسم وحدة مو قادر أوقف تفكير...! أوووووووهـ !! رحت لغرفتي عشان أغير ملابسي..أكيد جود شوية و تجي...! خرجت للصالة و ما مداني أجلس إلا و الجرس يندق..قمت و فتحت الباب بعد ما شفت جود و وجه علي و سعود...! كالعادة سعود أول من سلم عليا..اتعلق فيا زي دايماً..بستو و أنا أبتسم:كيفك يا بطل...؟! -الحمدلله يا بصل...! -وي سعود!! -بابا يقول!! قفل علي الباب و هوا يقول:يا ذا البابا..أي شي غلط هوا السبب...! نزلت سعود و أنا أقول بغلاسة مفاجئة:لإنك كلك على بعضك غلط...! علي:ما برد عليك...! و دخل لجوة عند أمي..سلمت على جود و أنا أقول:من متى و علي يقصر الشر...؟! قالت و هيا تفسخ العباية:نعسان..من الفجر صاحي...! -يستاهل..ليش يسوي صحي...؟! -مادري عنو..لقى فلم و اتحمس و ما رضي ينام إلين يمكن الساعة تمنية..بعدين قال لو نمت ما حقوم إلا الظهر فقعد صاحي...! -آآه.. و رحنا دخلنا لجدة و هناك سلمت على علي بالغصب..هههه..أهبل علي لمن يزعل..يسير زي الأطفال...! علي..؟!؟! شديت على نفسي لمن انتبهت إني رجعت أفكر في علي بطريقة ثانية..علي زوج جود..مالي صلاح أخو مين!! استغفر الله العظيم..كل شي يلف و يدور حولها..كل شي...! جا سعود عندي و قال بحماس:عمو عمو.. -ها... -اسمع اسمع... و قعد يحاول يقول: Amm..amm..I..I like playing..aaa..video games تابع بحماس:عمتو أحلام علمتني... -آه.."ابتسمت"..ما شاء الله..طب تعرف ايش يعني...؟! -ايوة..يعني ألعابُ الفيديو... ابتسمت عشان لا أحبطو و أنا في نفسي قاعد أقول:حتى سعود سار يلف و يدور حولها..الله يستر لا كمان علي يرجع يتكلم عنها ذحين!! من جد..من جد قرفت..أنام و أصحى على نفس الموال..نفس التفكير ما يتغير..قمة السخافة و التخلف..حياتي سارت كلها تفكير في الارتباط..أنا مادري كيف الشباب إلي كل همهم الزواج عايشين و متحملين نفسهم...! ^^^^^^^^^^^^^^^^^^^^^ جود،،، حسيت للحظة بالحقد على سعود..حسيتو نطق اسم أحلام في وقت..مادري بس جاني إحساس إنو عمو حيقوم على سعود ضرب...! طالعت في عمو..آه يا عمو..أنا عارفة..أكيد على نار و ما أقدر أكلمو..هوا عارف إنو لو ما وافقت ما حقولو..تلاقوه دحين يحسب إنها رفضت..هيا رفضت؟!،من جد مادري..بس إن شاء الله يحسبني ما كلمتها لسه..و إن شاء الله ما يسألني:"كلمتيها ولا لأ؟!"،وقتها حتوتر و لو أنا اتوترت عمو ايش يسوي..ما ينفع كلنا خايفين و متوجسين..الحياة ما تمشي كده..لازم نشد على أنفسنا و ندور على سعادتنا و راحتنا..لو قعدنا بآدابنا و مثالياتنا ما حنعيش..حنتعب و أنا..تعبت من التعب...! يا الله كيف زواجي و السنين غيرتني..غير..غير لمن يكون عند الواحد عيلة لازم يحافظ على كيانها..يسير أقوى و يتنازل عن مبادئ و قيم كان متمسك فيها في حياتو قبل ما يتزوج..ما أقولكم اتغيرت تغيير شامل..جود هيا نفسها جود..بس اتنازلت عن كتير مثاليات كنت متمسكة فيها..زي إني ما أكلم أحد لو زعلني..زمان كان لا يمكن أتناقش مع أحد في مشاعري..دحين أغصب الناس يسمعوني..زمان كان لا يمكن أقول لأحد إني محتاجة مشاعر..لمن اتزوجت حسيت إنو لازم أتكلم..أعبر عن احتياجاتي بكل صراحة و ثقة لإنو الحياة كده..الناجحين كده..يكلموا الناس في إلي يبغوه و يرموا بردود فعلهم المتوقعة عرض الحايط..هوا كده..الحياة كده!! عمو:علي أمس شفت أحمد...؟! علي:لأ... -متى تشوفو أجل..لمن إنتا ربوع و هوا خميس..متى تشوفوا بعض...؟! -والله ايش أسوي..عشان زوجاتنا ياخذوا راحتهم..بعدين هوا المفروض إن اليوم تكون زيارة أهلي بس أنا ما أحب الحبسة..بعدين ما أقدر أقعد مع أمي و أخواتي..متى أقعد معاهم و متى أحمد يقعد معاهم لما زوجاتنا فيه...؟! -شوفولكم صرفة..آخر مرة كلمت أحمد يقولي كيف علي!! ضحكت أنا بخفة فطالع فيا علي:طالع..تضحك..كلو بسببك أصلاً...! -والله..محد قلك تتزوج..اتحمل...! -اسكتي..والله لو مو حامل كان رديت عليكي...! ابتسمت و قال عمو:خليها تضحك..ايش حارق رزك..ليش ما تبغاها تضحك...؟! -وليش تضحك..ايش إلي يضحك...؟! قلت:ولا شي يضحك..آسفة...! سعود:mom..ig..igroning is the best ابتسمت لسعود:صح حبيبي صح..ignoring is the best و شديت على "اقنورنج" عشان أصحح النطق لسعود من غير ما يحس...! علي:سعودوه..أنا ما قلت تتعلم لغتك أول و بعدين لمن تكبر تتعلم انجليزي...! عمو:خليه..القوانين و تحديد الأوقات حيخرب عقلو..هوا ذكي و يلقط الكلمات بسرعة..لا تقمعوا...! علي:ياخي الولد اتصرع..أحلام من جهة و جود من جهة..ما يسير..عربي و انجليزي و فرنسي..حرام..أول شي العربي يثبت عنده بعدين...! قلت:صح..هوا إلي مو شاطر في لغتو ما يقدر يتعلم لغة تانية بس دحين صغير..عادي..المشكلة تكون لمن نعلمهم حروف و كتابة و قراءة..دحين إلي قاعد يسويه حفظ بس...! عمو:ايوة الله..كده ممكن يفيدو..يقوي الحفظ حقو...! سعود:دحين إنتوا قاعدين تتكلموا عليا و تفكروا فيا...؟! علي:شفت كيف..شفت كيف إنتا مهم...؟! -بس إنتوا قاعدين تتكلموا عني وأنا..لسه..ما ما..ما قلت ولا حاجة..أنا بالكيفي..أنا سعود مو إنتوا..أنا أتكلم!! جدة:صادق..صادق الولد..يالله..يتجادلون عن الولد قدامُه..شي!! ضحكت أنا:جدة محنا قاعدين نتجادل..قاعدين نناقش قضية...! و الحمدلله دخلت جدة معانا في الهرجة..من يوم ما طاحت معد سارت تتكلم كتير..يا رب تحسن الحال بس...! **************************************** أحلام،،، ما زلت مصدومة من إلي سار أمس..مني قادرة أقول لأمي لإني وعدت جود..كمان مني قادرة أفكر لحالي..كنت في كل شي أشارك أهلي أو على الأقل أمي..لكن ذحين حاسة إني ما حقدر أكلمها لإنها ببساطة حتقول لأ..و لو ما قلتلها إنه ما يجيب حكون أكذب عليها و ببساطة أكبر..أنا ما أقدر أكذب على أمي...! جود فجعتني و صدمتني..خلتني متشتتة بين أفكار كثيرة..ما بين زعلي لإنسان كويس اكتشفت إنه ما يخلف..و ما بين زعلي لإني حسيت إن جود متوقعة إني أوافق..و ما بين صدمتني لإن أحد جا خطبني..أنا لأسباب كثيرة ما أعجب أحد..أولها إني سمرا..و لمن أحد يتنااااازل و يسأل عني و يكتشف إني متعلمة و أهلي تاركين ليا الحرية إني أكمل و أشتغل يبعد..و لمن يكتشفوا إن ليا شروط مستحيل أتنازل عنها ينصدموا..و كأن الطبيعي إني لازم أرمي نفسي على أي واحد يجي..مادري كيف يفكرون..مادري...! اتنهدت و أنا أفكر إني لازم أفكر في الموضوع بجدية..أنا بصراحة مني مستعدة أضحي..أصبر و أصبر و أصبر و آخر شي أتنازل عن أمومتي مقابل إني أتزوج...! للحظة شكرت جود إنها جات و كلمتني لحالي..حسيت رغم زعلي منها نفسي أقولها شكراً من قلب..إلي قالتو صح..لو اتقدموا رسمي علطول حتسير حساسيات..لكن برضه فكرة إني أعطي موافقة أو رفض من ورا أهلي مو عاجبتني...! و بيني و بينكم..الرفض عندي أهون..مادري لكن حاسة بكرامتي ثايرة عليا..فجأة..حسيت بالنقص..حسيت جود واثقة إني حوافق..بس..بس كان فيه في صوتها نبرة رجا..معناته..يمكن..مادري..يمكن..يمكن أنا متحسسة من الموضوع و أنا مادري..برضه مادري!! أستخير؟!،بصراحة..أحس إني لازم أستخير..في نفس الوقت مابغا..خايفة أستخير و أرتاح و من غير ما أحس أقول ايوة موافقة و بكذة أتنازل عن أمومتي..عن حقي في إنو يكون عندي أطفال و أنا مابغا أتنازل..أنا خايفة..خايفة.. مسحت دموعي إلي كانت طارفة؛ يمكن الخير في إن ما يكون عندي أولاد..يمكن الخير يكون في عم جود مو في أحد ثاني..يمكن.. الحيرة تذبح و الخوف يكبر في قلبي.. غطيت وجهي بيديني و بكيت.. ليش..ليش لازم أحمد ربي إنو جا أحد و خطبني..ليش أحمد ربي إنو فيه أحد فكر فيا..ليش لازم أفرح و ليش حاسة إن الكل يتوقع مني أوافق رغم إنه محد يعرف بالموضوع إلا أنا و جود..و ليش جود اختارتني..يا رب..يا رب ألهمني..يا ربي لا تتركني لحالي..آآآه يا ربي آه... مسحت وجهي بالسريع لمن اندق الباب..انفتح و كانت أمي..استغربت لمن شافتني..قربت مني:أحلام..؟! -ايوة.. -تبكين؟! -ها..لالا بس... و فكيت البكوة فحضنتني أمي بسرعة:بسم الله ايش فيكي...؟! من يوم ما لامس راسي صدر أمي ما اتحملت أكثر و بكيت من قلب...! -أحلااااممم..أحلام يا بنتي ايش فيكي..ليش تبكين...؟! -مادري..مادري.. -ايش إلي ما تدرين..أحد قالك شي..أحد ضايقك...؟! -لااااء..محد سوالي شي..بس..مادري ايشبي..أمي مادري ايشبي... سكتت أمي لثواني بعدين قالت بهدوء:أمس جود قالتلك شي لمن دخلت معاك هنا...؟! انصدمت لكن مسكت نفسي في آخر لحظة:لا أمي لا..جود مالها شغل... بعدت عن أمي شوية و قلت و أنا أمسح دموعي:جود كانت تسألني عن كتاب إذا حلو ولا لأ عشان ما تبغى تبدأ شي جديد مهي متأكدة إنو يسلي... -أجل ايشبك...؟! -مادري..أمس كنت عادي..لكن قبل ما أنام انكتمت فجأة و اليوم صحيت مخنوقة... رجعت دموعي للنزول على آخر كلمة فرجعتني أمي لحضنها و مسحت عليا و هيا تقول بهمس:أعيذك بكلمات الله التامات من شر ما خلق..بسم الله عليكي بسم الله..عشان كذة ما جيتيني اليوم أول ما صحيتي..كم مرة أقولك إنتي و أخواتك لا تكتموا لا تكتموا لكن ما تسمعوا الكلمة مني..ما دامك في البيت معايا تعالي و قوليلي... ابتعدت عن أمي..مسحت وجهي للمرة الثانية..حاولت أبتسم و أنا أقول:خلاص..هيا بكوة كانت محبوسة طلعت... -هيا تعالي معايا تحت...! -لا أمي عندي كم شغلة بسويها...! -هاااا..هذا الغلط..ما دام مخنوقة و مكتومة تقعدي لحالك ليه؟!،عشان تقدري الشيطان عليكي؟!،انزلي يلا معايا..بسبقك..غسلي وجهك و تعالي...! و خرجت من الغرفة و نفذت أنا كلامها..أبغى أعطل عقلي و قلبي..حنسى كل إلي قالتو جود.. بشكل مؤقت..لو على الأقل!! **************************************** |
الجزء العشرين (اعذريني،،لكنها حياة!!) جود،،، خرجت من الرسالة إلي كنت فيها و مسحتها وأنا مفجوعة!! أحلام مو من جدها..مو..من..جدها...! طالع فيا علي إلي كان متمدد على الكنبة الطويلة:جودوه... التفت:ها... -ايشبك...؟! -ما فيا شي...! نط علي فجأة و سحب الجوال و قعد يفتش فيه و هوا يقول:فجأة يتقلب وجهك و إنتي ماسكة الجوال..أفتش ما ألاقي شي...! -و إنتا دايماً تفتش...؟! -ايوة..إذا اتقلب وجهك زي كذة..طبعاً بفتش...! -هدي عادة مي كويسة..لا تخلي دي الحركة شي من طباعك...! قال و هوا يرجعلي الجوال:واللهِ لو قعدتي ما تقوليلي حتسير عادة عندي...! -أنا مني مخبية عليك شي..رسايل غريبة من ناس ما أعرفها بتجيني...! -و من متى و إنتي تنفجعني كل ما جاتك رسالة من رقم غريب...؟! -لأ..هوا الفترة الأخيرة كترت و سارت مرة وسخة..شي طبيعي حنفجع...! -مافي في جوالك أي رسالة وصخة...! -طبعاً لإني أمسحها كلها أول بأول..يطيح الجوال في يد لينا و لا سعود... -سعود ما يعرف يقرى... -مو حيروح لمثلو الأعلى لينا و يقولها اقرئيلي...! -ايشبك طب متنرفزة..أطفال عادي...! -مني متنرفزة...! -إلا..عصبيتك زايدة ذي اليومين...! سحبت نفس:لأ يتهيألك..مو زايدة ولا شي..إنتا بس طفشت من الدوام و من الروتين..دحين تيجي الإجازة و ترتاح...! -إلا على سيرة الإجازة..إنتي المفروض هذا آخر ترم لكي..ايش حتسوي و إنتي حامل...؟! -عادي..حاخد وثيقة التخرج و أروح أولد...! -جود بلا استعباط..ما تدري يمكن تجيكي الولادة قبل..زي في سعود...! -لا إن شاء الله..تتيسر...! اتنهد:طيب و بعد ما تتخرجي..ايش حتسوي...؟! -مادري..آآآآه علي..ايوة صح..أنا فيه استاذة عرضت عليا الإعادة..ممكن كمان أقدم على وظيفة في الجامعة و... -تحللللللللمي..أنا ما صدقت تتخرجي...! -بصراحة علي..أشوفو شي ضروري..إنتا ناسي إننا لازم نبدأ دحين نفكر في بيت..أصلو ما رح ينفع نعيش طول عمرنا على الإيجار...! -يييييييييه...نفس موال أمي مع أبوية زمان...! -ايوة طبعاً نفس الموال..أنا ما أدري إنتوا الرجال ليش ما تفهموا..والله ما ينفع..طبعاً إنتا مستحيل تبني..حتطفش بسرعة..عشان كده نشتريلنا أرض نخليها..الواحد ما يدري ايش يسير في الحياة بعدين...! ضحك بسخرية:و ايش حتسويلك الأرض..تجيبلك نص بيت...؟! -تجيب إلي تجيبو..اسمها شي يقعد..مو فلوس متكدسة في البنك تنصرف في الأخير على خرجات و ملابس و هبل..و أرض نشتري وراها أرض..لين ما بعدين تجيبلنا شي طيب..أما شغلة أولادنا يكبروا و ينحشروا في غرفة..هدي مو عندي أبداً...! -يا شيخة خليها على ربك..ما تدري يمكن أقدر أبنيلك قصر بعدين..بصراحة أنا لمن بدفع على شي بدفع على شي يعجبني..و ما بآخذ فضلة أحد...! -هااااا..هدي الفكرة غلط..محد ياخد فضلة أحد بالفلوس..عادي..أعطانا شي و أعطيناه شي...! -جود أجلي الموضوع لبعدين...! -المهم دحين..إن شاء الله بعد ما أتخرج أشوفلي أي شي..حتى لو أتعاقد مع أي شركة و أترجملهم أون لاين...! -واللهِ يا جود ما بكذب عليكي..أنا شغل ما أبغاكي تشتغلي..كل شي تبغيه بيجيكي..لكن شغل لأ..سوي إلي تبغيه..افتحيلك موقع ولا أي شي..علمي الناس فرنسي بس إنك تخرجي من البيت لأ...! اتنهدت:خلاص ربك يسهلها بعدين..أستخير و تستخير و لو فيه خير ربي حيجيبو...! جا سعود و مدلي الجيم بوي:ماما شوفي...! أخدتو منو و شفت،قلت و أنا اأشر على الكلام:يقولك تبغى تسجل؟!..يس ولا نو...! أشر على "يس" و قال:يس...! سجلتلو و رجعتلو هوا..أخدو و جلس جمبي فوق رجل علي إلي كان آخرها لاصق في فخدي...! علي بطفش:يعني يا سعود يعني...؟! التفت سعود لعلي:عورتك...؟! -لأ..بس مضايقني...! قلت:الله..خلي الولد مسكين يقعد...! -أبغى أقوم...! قام سعود و راح لغرفتو..قلت بصوت واطي لعلي:كان لازم تقومو يعني...؟! -أنا مددت رجلي أبغى أرتاح..بعدين بعد شوية بقوم للصلاة..حيكون قدو اندمج في اللعب و حيقعد يقولي:بابا أنا مُتحمس...! -طيب حتى لو..لمن تسوي معاه كل شوية زي كده يسير بعدين يكره القعدة معانا..دحين صغير و ما يقدر يطنشنا بس بعدين..لمن يكبر...! -جود... -نعم...؟! -ليش إنتي اليوم شايلة هم المستقبل...؟! -أنا ما رح أرد...! قال بنفس أسلوبي و هوا يقوم:و أنا حعترف..هذا من ذوقك...! قمت أنا أشوف سعود و بالي يرجع ينشغل بالرسالة..بايش أرد عليها..بايش؟! أنا دوبي أنتبه..إني فعلياً..ما عندي أي معلومات عن الحالة !! ^^^^^^^^^^^^^^^^^^^^^^^^^ راحوا علي و سعود الدانوب عشان يمونوا للبيت..اغتنمتها أنا فرصة و دقيت على عمو و أنا حاسة بالخوف..عارفة من حق أحلام و بالعكس عجبني إنها رسلت و استفسرت من غير ما تخجل أو تتتردد..و إن كان زعلت على عمو لكن في شي طمني عليه..إنها سألت معناتو جادة و بتفكر في الموضوع..و إنها ما جاملت معناتو ما حتغصب نفسها على شي و ما حيسير لها بعدين كلمة على عمو..هيا سألت و إن شاء الله حتعرف كل شي..يا رب بس تيسر لها و تيسر لو...! رد عمو بصوت خالي من أي مشاعر:ألو... -السلام عليكم... -و عليكم السلام..هلا..كيفك...؟! -الحمدلله..إنتا كيفك و كيف جدة...؟! -تمام الحمدلله...! قلت في محاولة لفتح موضوع عادي:جدة كيف..اتقدمت في مشيها؟! -ممم..يعني..منورة تقول إنها سارت توقف لحالها من غير ما تساعدها و تجلس على الكرسي.. -آه..كويس..أنا كنت أبغى أكلمها في دا الموضوع..خليها شوية شوية تبعد المسافة بين الكرسي و السرير..عشان جدة تسير كل شوية تمشي أكتر من غير ما تحس... -خلاص حكلمها..أصلو أمي كل ما أحاول أمشيها تقولي أخاف أخاف... -هيا الخطير عليها دحين السيراميك..لو تسير تقدر على الموكيت كفاية... -و وين السيراميك عندنا؟!..البيت كلو موكيت ما عدا المطبخ و الحمامات... -ايوة..مو عشان كده بقول كفاية..آآم عمو..كنت أبغاك في موضوع.. قال عمو بنبرة المترقب:خير إن شاء الله... -لا خير..بسسس..هوا أحلام..طلبت.. عمو بتوتر:ايش..ايش تبغى...؟! -هوا..يعني هيا تبغى تتطمن من ناحيتك و.. قاطعني بعجلة:ايش يعني تتطمن من ناحيتي...؟! -يعني..عارف هيا عندها شروط و شوية استفسارات..أنا بس كنت أبغى أعرف لو عادي مثلاً ترسلك رسالة أو حتى ترسلي هيا و أنا أرجع أرسلها لك..عارف الوضع شوية حساس و هيا عندها..يعني.. قال عمو بثقة و هدوء:أي شي تبغاه أنا حاضر و من حقها..تسأل إلي تبغى تسألو و لا تستحي ولا تجامل..هذي حياة مي لعب!! ابتسمت..كلام عمو ريحني..و إن كان ممكن يعصب لكنو حيلتزم و لو صرخ عليا حقولوا إنتا إلي قلت عادي...! -الله يسعدك طمنتني..أنا مرة كنت خايفة تتضايق من أسئلتها و استفساراتها...! -لا عادي.. -أوكي أنا حكلمها دحين و أرجع أتصل عليك..يلا باي...! -مع السلامة.. و أنهينا المكالمة على كده...! سحبت نفس أهدي فيه نفسي..انتبهت فجأة..كيف حرسل الرسالة لعمو و أنا مسحتها..ضربت جبهتي بيدي بقهر..كيف أرسلها دحين؟!،أنا مستحيل أكلم عمو مباشرة..حوريه الرسالة و هوا يتصرف..ما أقدر أقولو:"أحلام تبغى تعرف لو كنت قادر ولا لأ؟! !!! ما أقدر..هدا رجال و حتى لو حرمة..هدي مواضيع الواحد ما يحب يتكلم فيها..أنا نفسي ما أقدر كيف بعمو؟؟؟!!! بسسسسس..عمو رجال..رجال من جد..مستحيل يقدم على خطوة زي دي و هوا.. غطيت و جهي بيديني و أنا أبلع ريقي..إذا أنا نفسي مو متقبلة الفكرة..إذا أنا نفسي اتحسست من أحلام..كيف عمو..أنا عارفة من حقها..عارفة إنها ما تبغى تبلي نفسها بواحد مو قادر على الزواج..عارفة إنها مي واثقة من عمو و ما تعرفوا لدرجة تجزم فيها إنو ما حيتقدم إلا و هوا قادر..حتى و لو كان عن طريقي..حتى و لو كانت واثقة مني و من إني أتمنالها الخير..أحلام طيبة لكن مي ساذجة عشان تغفل عن نقطة مهمة زي دي و لا غبية عشان يمنعها خجلها من إنها تسأل..و الأسوء من داك لو إنها تبغى تقرير عن الحالة و هدا الأصعب..يعني إجابة عمو..لو حيجاوب..ما حتكون "ايوة أقدر" و بس..لأ..هدي لسه فيها روحة مستشفى.. أنا من جد..من جد مني عارفة و لا فاهمة أي شي عن حالة عمو..من جد...! همست من قلب و بصدق:"يا ربي لا تتركني لوحدي" أنا أبغى ربي ييسر الخير للاتنين وين ما كان و في مين ما كان..بس فكرة إنو الموضوع ما يتم..أحسها صعبة..صعبة عليا..أنا من قلب أبغاهم لبعض..من قلب...! اتنهدت و أنا أفكر إني لازم أتصل على أحلام قبل ما يحي علي عشان أقدر أكلمها براحتي...! اتصلت على أحلام لكني قطعت الاتصال بسرعة قبل ما ترد..ايش حقولها دي كمان...؟! أنا عمو بغيت أقلو بس بعدين غيرت رأيي في نص المكالمة و طلعت مكالمتي لو من غير سبب..أنا صح دايماً أتصل..أعطيه تقرير عن أي شي سار و يعطيني هوا كمان..لكني مع التوتر ما عرفت حتى أبدأ الكلام و الحكايات..آآه يا ربي..تعبت..ايش أسوي..أقولكم..خلاص برسلها رسالة..و حقولها ارسليلي الرسالة تاني..عادي..ما فيها شي..ايوة ما فيها شي..حقولها مسحتها عشان خفت علي يشوفها أو حاجة..و حقولها إنو دا من حقك و عاد..لأ ما حقول دا الكلام الأهبل..هيا عارفة إنو دا من حقها..آآه..من يوم ما بدأت دا الموضوع و أنا أتمنى إنو أحلام مو عاقلة و ناضجة..لو كانت بنت عبيطة كان الموضوع أسهل..أسهل؟!،ايوة أسهل لكن مو أضمن إنو يبقى سر و أصلاً..لو كانت عبيطة مستحيل كنت حفكر فيها لعمو..أنا ياما شفت بنات حلوين و حبوبين و طيبين لكن هبلات و ما فكرت في ولا وحدة فيهم..مع إنو عمو أحس أحسلو وحدة تكون منطلقة و هبلة شوية..كفاية هوا عاقل بس وضعو ما يسمح بوحدة عبيطة حولينو..يا رب..من جد "الحلو ما يكمل"..عمو رجال و لا كل الرجال..عليه قلب و عقل..حتى حلاوة حلو و يجنن..مو عشني أحبو..لأ عمو مرتب و نظيف و لا يمكن يقبل يكون مو مرتب و هدا شي يفتقدوه رجال كتير إلا من رحم ربي!! اتنهدت و أنا أفتح جوالي عشان أكتب رسالة..الشي الوحيد إلي مني مترددة أكتبو هوا السلام عليكم !! كتبت: "السلام عليكم.. أحلام عارفة يمكن يكون مالي داعي لكن ممكن ترسليلي..." مسحت إلي كتبتو..رسالتي لازم تكون واثقة..ما ينفع أحسسها بترددي..كلنا لنا مصلحة..هيا تبغى تستقر و أنا أبغى أطمن على عمو و أسعدو..خلي ترددي لبعدين...! كتبت: "السلام عليكم.. كيفك أحلام؟!،آسفة بس ممكن ترسلي الرسالة إلي رسلتيها مرة..." وقفت كتابة و أنا أتذكر شي... مسحت إلين كلمة آسفة و أنا أتذكر جملة في رسالتها غفلت عنها مع دهشتي من طلبها... أحلام قالت في آخر الرسالة:"اترددت قبل ما أرسلك و خفت تزعلي و أنا مابغا زعلك لكن من حقي أعرف كل شي..أنا أبغى حياتي تتحسن..مابغا هم جديد" أحلام كمان كانت مترددة..مو بس أنا... ابتسمت بسعادة..خاصة بعد ما انتبهت إنو جملتها رجعت لذاكرتي نصاً..شكراً يا رب!! رحت للرسالة إلي كنت أكتبها و كملت بعد كيفك أحلام: "أبداً ما زعلت..كنت حزعل لو عرفت إنك خليتي دا الشي في نفسك لكن عندي طلب صغير أتمنى ما يضايقك..ممكن ترجعي ترسليلي الرسالة تاني..أنا مسحتها خفت أحد يقرأها..ارسليها عشان أرسلها لعمو..عمو يشوف إنو من حقك إنتي تعرفي لكن أنا لأ..عشان كده ممكن ما يكلمني و لا يقبل مني..ارسليها تاني و إذا عندك أي شي تبغي تعرفيه اتكلمي و اسألي..أنا سبق و قلتلك انسي إني جود و اعتبريني وحدة عرفتيها بس..من يوم ما بدأ موضوع الخطبة" و ما أعرف كيف رسلتها..مادري ايش إلي حرك أصابعي..كل إلي أعرفو إنو الرسالة اترسلت...! فتحت الرسائل المرسلة و قرأت الرسالة و حسيت فيها ثقة مني..يمكن لمن اتذكرت تردد أحلام حسيت بالقوة..مادري..خلاص..ربي ييسر..أنا مالي شغل بدي التفاصيل..المهم دحين الموضوع يمشي..أنا ورايا تخرج..والله معد أنا عارفة ايش أسوي..معد بقيلي شي..اختبار واحد بقيلي و أخلص.. اتنهدت..أبداً ما اتوقعت أتخرج بدي الطريقة..اتوقعت إني أكون مبسوطة و متحمسة..أول ما سجلت في الجامعة كنت معتقدة إنو آخر سنة حتكون فلة و بسطة..ما اتوقعت إني حكون متزوجة و مخلفة و عندي أشياء و هموم بالنسبة ليا أهم من الجامعة و من التخرج..من جد مني حاسة بحماسة..حاسة إنو الوثيقة حتنحط في ملف في الدرج..مالي ذكريات في الجامعة قد ما ليا ذكريات مع علي و سعود..غلطانة؟!،صح..عارفة..كان المفروض أعطي اهتمام لنفسي و لحياتي..لأ، أنا مني مهملة..أنا بس..مادري يمكن أكون أبالغ..أنا كل أستاذاتي يحبوني و يراعوني..لكني أنا عزلت نفسي عن البنات..يمكن..مادري..أنا الصحبة الوحيدة إلي كانت من جد صحبتي هيا دانة و كمان دحين معد أكلمها إلا نادراً..وين و وين لمن أكلمها..أغلب شي رسايل بالايميل..صح تكون طويلة بس والله أنبسط بها..تعطيني تقارير و أنا أعطيها تقارير..و السبب إننا احنا الاتنين فجأة كرهنا الماسنجر..بصراحة سرت أكسل أدخلو و هيا تقول إنها سارت تحسو سخيف و تطفش منو..و معاها حق..أحسو دقة قديمة!! و بعدين هيا الوحيدة إلي حافظت عليها من أصدقاء الانترنت الكتيرين إلي كانو عندي..ناس استمريت معاهم بالسنين و دحين طنشتهم..ما حذفتهم بس خلاص..و أتوقع لو ما صادف و شفت دانة وجهاً لوجه كان حتى هيا معد كلمتها..أنا مادري كيف كنت عايشة و كل معارفي أون لاين ما أعرف أصلهم من فصلهم..ساعات أحس إنو ربي كان ساتر عليا طول حياتي...! قمت من على سريري و أنا أسمع صوت الجرس..الله يعين دحين على ترتيب التلاجة..والله مالي شغل..علي و سعود حيساعدوني غصباً عنهم!! ***************************************** أحلام،،، قرأت رسالة جود يمكن للمرة العاشرة!! تستهبل؟!!!!!!!! ايش يعني مسحت الرسالة و تبغاني أرجع أرسلّها هيا..أففففف..فجأة..حسيت نفسي طفشانة و نفسي أقولها معد أبغى..أنا ايش يجبرني أضحي..لا أنا إلي عَجّزت و لا أنا إلي متأكدة من عمها و واثقة كل الثقه فيه...! اتقلبت عالسرير بعد ما حطيت الجوال على الكوميدينة..فجأة فقدت حماسي و رغبتي في الموضوع..و ايشبها حالي؟!،الحمدلله مني فاضية و لا ميتة على أول عريس يجي..أصلاً مين جا؟!،فعلاً..مين قد خطب؟!،ولد صاحب بابا قبل سنتين..بس عشان تخصصي انجليزي و هوا بيسافر يدرس فيبغى وحدة تعرف انجليزي كويس ما تفشلو...! أصلاً رفضوه من غير ما يستشيروني..ماما قالت لي قبل سنة تقريباً..تقول بابا شاف فيه سخافة مو صاحية...! أنا أثق برأي ماما و بابا..يمكن أكثر من ثقتي بنفسي..ماما حكيمة و بابا نظرته في الرجال ما تخيب..حاسة إني غبية..لمن أتخذ قرار زي هذا لحالي..غبية و كذابة و أخدع أهلي..في نفس الوقت أنا قطعت عهد على جود إني ما أكلم أحد..جود معاها حق في تكتمها..أنا فاهمتلها..هيا عاجبتها علاقتها بأهل زوجها..جود تشوف يا تقوى ذي العلاقة أو تقعد زي ما هيا و معاها حق..مو أمدح نفسنا لكن بصراحة كأهل زوج..ما أعتقد فيه زينا..و أكيد جود ما تبغى تخسر هذي الميزة خاصة إنها شبه وحيدة و ما عندها أهل..جود من قلب شايفتنا أخواتها..الله يديم المحبة بس..أنا نفسي أحب جود و مابغا أزعلها... يوء..أنا ايشبي..خرجت عن الموضوع..خلي جود على جمب..هيا قالت انسي إني جود و أنا رح أحاول أنسى.. مسكت جوالي و فتحت الرسالة إلي رسلتها..نفسي لو ما كنت رسلتها..سؤالي يعني موافقة بس أبغى أتأكد من بعض الأشياء و أنا خايفة إني ما أكون موافقة...! أستخير؟!،ليه..و أنا حاسة إنو أصابعي بتتحرك و ترسل من غير ما أحس..أنا وكلت أمري لربي..و أياً كان إلي حيصير فهوا خير..و لو مو في الدنيا في الآخرة...! قرأت رسالة جود للمرة المليوووووووون... ابتسمت..ليش فجأة أحس جود أكبر مني..جود أصغر مني بكم..بتسعة..عشرة سنين..ليش حاستها أكبر مني..ليش حاستها أفهم مني..لو اتزوجت حسير كذة..حكبر..أنا كبيرة و بالغة و عاقلة خلاص بس قصدي..حسير كذة..حسير حرمة..حتسير عندي كل ذيك المواضيع و الاهتمامات..و الـ... ما حقول سخيفة..هيا الكلمة المتوقعة صح؟!،من وحدة متعلمة و حرة نفسها..صح؟!،طيب..ما حقولها لإنها مي سخيفة..هذي هيا المرأة و السخافة إنو الوحدة تنكر رغبتها في ذا الشي..قمة السخافة..لإنو رح يجيها يوم و تبان فيه بشكل..يحرجها و يصدمها قبل ما يصدم إلي حولها..يصدمها و هيا إلي كانت مسوية المثالية المترفعة عن ترهات النساء!! آآآه يا ربي..وين قاعد ياخذني تفكيري..ليش ما أقدر أركز في أي شي..يا رب..يا رب أبغى أغمض عيني و أفتحها و ألاقي كل شي انتهى و اعدّى.. يا في الجامعة أمارس نشاطاتي..يا في..يا في بيتي مع..زوجي!! ***************************************** سعود،،، ضغطت على الجوال بقوة... مسحت على وجهي الحار بيدي.. قرأت الرسالة و ضربت على المكتب بقبضتي..مو أنا إلي أنسأل سؤال زي هذا...؟! بالعقل..بالعقل..كيف أتقدم و أنا... أوكي..صح من حقها لكن مو غباء منها تسأل..بعدين جود..جود كيف تتجرأ..هيا صح كتبت في الأخير إنو أحلام رسلت لها ذي الرسالة..يعني مو منها لكن برضو..المفروض جود متأكدة من إني ما حقبل و أتنازل لها و أوافق إنها تكلم البنت و أنا ما أقدر أتزوج!! قال لا تزعلي قال...حتزعل من ايه جود..أنا إلي حزعل...! بس تدروا ايش..أنا رجال..أقدر أتزوج..إني فقدت قدرتي على الإنجاب ما يعني إني غير قادر بعدين..بعدين أنا مني عقيم ذحين..لأ مني عقيم..ايوة أنا مني عقيم..أنا بس صعب إني أخلف بسبب التشوهات إلي اتعرضت لها من الحادث..و إذا الكل يعتقد إني مني متزوج لإني مني رجال فحعرف أنا..سعود.. كيف أثبت لهم العكس... آخخ عالقهر..أنا أنحط في موقف محرج زي كذة لكن ايش أسوي..بدأت لازم أكمل و حوري أحلام و جود إني رجل طبيعي !! ***************************************** جود،،، بعد ما كلمت جدة طلبت عمو..طبعاً ما حسألو عن أي شي..بس ححاول أستشف من صوتو أفكارو!! -ألو.. -حم حم..أهلاً..كيفك...؟! -الحمد لله إنتي كيفك...؟! -تمام..الحمدلله..كيف جدة..إن شاء الله أحسن... اتنهد عمو:الحمدلله..تدري..أحس حالتها الصحية زي ما هيا بس حاسسها فرحانة..بس تحمدالله و تهلل..مادري ايشبها...! ابتسمت:الحمدلله طيب..الله يديم عليها...! -آمين..جود.. -أيوة... سال بهمس:إنتي..قايلتلها شي...؟! -ها.. عدلت صوتي و اخفيت الصدمة عشان لا يحس علي بشي..قلت بصوتي العادي:لا طبعاً..ليش هيا قالتلك حاجة...؟! -لأ..بس مني لاقي سبب لسعادتها..الله يديم عليها لكن شكيت... ابتسمت بهدوء:عمو أنا وعدتك صح؟!،بعدين إنتا منتا واثق من عقلي..قالولك هبلة و لا هبلة أمشي و..أتكلم عن مشاريعك و مخططاتك...!!؟ أضفت الإضافة الأخيرة لمن حسيت بعين علي تلسعني..يفترض مني ما أنتبه لنظرتو لكن علي عمرو ما حيفهم إني أحس بها لو هوا في شركتو و أنا في الجامعة!! قلت:إنتا طمني عنك و عن نفسيتك..يعني المفروض راحة جدة تريحك..إنتا كنت شايل همها...! -...ايوة...أنا..مرتاح... قلت بسعادة:يا ربي دايماً.. -جود.. حسيت من نبرة عمو كان يبغى يقولي شي فقلت:ها حبيبي... قال بهدوء ممزوج بتردد:أبـ..آآ..لا..آه..تعالي..قصدي.. -عمو...عندك شي...؟! -لا..بس تعالي.. ابتسمت:حجي في موعدنا إلي دايماً.. -إيوة..آآم..تبغي شي دحين...؟! -سلامتك.. -الله يسلمك.. -و يسلمك..باي.. -مع السلامة.. -نشوفك على خير... و أنهينا المكالمة..حطيت الجوال جمبي فقال علي:ايش مشاريع عمك...؟! التفت لعلي و قلت:حبيبي هوا..مرة طفشان..سايرة تجيه أفكار مشاريع و خطط..يعني..يفكر يبدأ شغل... -آه..و ايش الأفكار إلي جاته...؟! ضحكت:قلي ما أقول لأحد...! -أنا مو أحد... ضحكت:يا شيخ كلام فاضي..مرة يقول يبغى يشتغل في الدبلوكسات..مرة يبغى يبني استرحة..مرة يبغى يبني فوق العمارة..مرة يبغى يفتح كوفي شوب..يعني زي كده..طفشان و ساير.. قاطعني علي:مو لو يتزوج!!..جود والله متنرفز..لسه قبل كم شهر واحد من إلي في الشركة اتزوجوا..يا جود رجل غير صالح للزواج..مجنون..مصفوق و اتزوج..عمك ايش قاعد يسوي..والله أنا مستغرب..أحسن مني و أكبر لكن أنا إلي متزوج و مخلف..شي عجيب... -علي اذكر الله و سمي على نفسك..عمو خلاص ربي حيرزقو في الوقت المناسب..لا تتكلم زي كده عن نفسك...! اتأفف علي:طفشان و مقهور..أصحابي..صح متخلفين و همج بس أطيب منهم و أنظف مافي..أخواتي..عمك..ليش كل الرهيبين في الحياة ما يتزوجوا..ليش الزواج ساير شي أسطوري...؟! -أولاً لا تقول أخواتي..صفاء لسه صغيرة و قدامها فرص و أحلام إن شاء الله ربي بيرزقها واحد يقدرها مو حي الله أهبل يجيها على تخصصها إلي يفيدو في البعثة إلي حياخدها و هوا مو وجه دراسة أصلاً..عسكرية تكرف أهلو و كتير عليه..يا علي إنتا ما تدري ايش في الغيب..أنا قلبي يقولي شي كويس حيسير..و إن شاء الله قلبي قاعد يصدقني..إنتا بس قول يا رب...! طالع فيا علي بتساؤل و قال:ليش..ليش أحسك ذكرتيني بعمرو خالد...؟! -هااااا...؟! ضحك:فجأة صح؟!،بس والله ذكرتيني به...! ابتسمت:عشان رمضان قرب يعني...؟! -والله مدري بس من زماااااااان عنه..ياخي أحبُه..يعطيني أمل في الحياة...! -الله يسعدو و يسعدك... قال بنرفزة:يسعدني ثم يسعدو..أنا زوجك..أنا أول... اتنهدت بابتسامة بعدين قلت:الله يسعد الجميع...! -كذة ممكن أسامحك...! -الحمدلله..أهم شي إنك تسامحني و ترضى... -تتريقي...؟! -لا والله..علي..لا يكون تبغى تتضارب..ترى ما فيا حيل....! ضحك ضحكة شيطانية فابتسمت... يا رب لا تحرمني من دي الضحكة!! ***************************************** جود،،، اليوم خميس!! قاعدين في بيت جدة في الصالة..مع عمو و جدة..عمو اليوم غير..متحمس..بالمرة..لا مو متحمس بسسسس.. زي ما هوا زمان..كان نفسي أقولو:ليش مبسوووووووووط؟! لكن ما أقدر..هوا مو إنو مرة طاير بس في سعادة في وجهو..لأ مو سعادة قد ما هيا راحة..آآه..أصلاً ايش الفرق المبسوط مرتاح و المرتاح مبسوط...!! عمو:صح جود..ايش حتسوي في تخرجك؟! -خلاص إن شاء الله..يوم التلوت حختبر آخر اختبار و أنفك..و وثيقتي حتكون بعد شهر إن شاء الله...! -جود نسويلك حفلة...؟! علي:ايوة عشان حتسير معد تروح الجامعة...! عمو:اسكت إنتا..بلا بدونة زايدة..حنسويلها عشان حتتخرج بنتيجة عالية...! -والله ما أعتقد..كنت أبغى أتخرج بمعدل عالي..بس ما أعتقد...! -ليه حبيبي كم تتوقعي...؟! اتنهدت:أربعة... -حااففف...؟! برطمت فقال علي:دوافييييييييير... عمو:والله مو دوافير بس البنت ما قد نزلت نسبتها عن 98%..مالت... علي:ايش فيك إنتا كأني أنا السبب..بعدين هذيك مدرسة و هذي جامعة..المدرسة الكل شطار الجامعة يبان مين الشاطر و مين الحفييييييظ...! قلت بتفكير:بس والله كويس مني..البنات التانيين إلي متزوجين يجيبوا تلاتة..تلاتة و نص لو مرة..الحمدلله..أنا أحسن منهم...! -طيب..و ايش حتسوي بعد ما تتخرجي...؟! قال علي بابتسامة واااااااسعة:حتجيبلي أولاااااد... طالع عمو في علي بطرف عينو:تحللللللللللللم... ضحكت..نفس الشي إلي قالو علي ليا أول...! علي:لا يا شيخ..و إنتا مالك..زوجتي و أنا حر...! عمو:والله لو راضية ما بقول شي..لكن لو تبغى تسوي شي ما بخليك تمنعها..ناسي شرطنا..إذا ناسي أذكرك...! -أي شرط؟!!! -لمن خطبت..ناسي ولا منتا ناسي..جود..تراني ما قلتلك عشان بس لا يطيح من عينك..ترا هددتو..و قلت البنت قدامها مستقبل ما تمنعها من أي شي..قام قال:والله لو احتاجت تسافر لفرنسا أسفرها...! شهق علي أما أنا فقلت:والله مابغا أسافر بس أبغى أعيد في الجامعة...! طالع علي فيا:لأ... -بس ما بغا دحين..أبغى اقعد مع بنتي شوية..ما يسير أخليها و أشتغل علطول..و بصراحة مابغا أجيب شغالة...! علي:شغالة؟!..حنسير عيلة سعودية..حطارد المكاتب يعني..و هذي شردت و هذي ما تعرف تطبخ و...والله مافي..لو ايش ما يسير...! سكتنا أنا و عمو و قعدنا نطالع في علي إلي لجأ لجدة:شوفيهم... جدة:يا الله في العقل... -ايوة..مع أولادك..أنا مني فاهم..في بيتنا جود المسكينة و هنا أهلها يدافعوا عنها..مادري متى توقفوا في صفي...! عمو:ما رح نوقف في صفك... -أنا ما أحبك أصلاً.. -حتى أنا ما أحبك أصلاً... طالع سعود في "رجلي البيت" و قال:مبزرة... ضحكت أنا ضحكة مكتومة..و ضحكوا عمو و علي...! عمو:جود انتبهي لولدك..ساير عليه كلمات مدري كيف مسوية... قلت:طبعاً..من سبعة و تلاتين درجة..أكيد حيقلب..هما و كلامهم... عمو:والله مرة مبالغين..كثير أعرفهم من الرياض ما يتكلموا كدة..يا شيخة زودوها هما و اللهجة... علي:ايوة أثقل بكثير من الجزء الأول... قلت:هما تحسهم يبغوا اللهجة تطلع..طيب شي حلو يبينوا للناس لهجة منطقة من مناطقنا بس مو لدي الدرجة !! علي:أسوأ شي لمن الناس تقلدهم..شي يقهر..يعني لمن مهي لهجتك الأساس تطلع بشعة..والله يا شيخة ناس من نص جدة يتكلموا نجدي..الله لا يوريكي..شي.. -أعرفهم..مليانين في الجامعة..إلي يضحك إنو بعض النجديين يتفشلوا من لهجتهم و بعض الحجازيين يكرهوا لهجتهم فيسير كل واحد يتكلم بلهجة التاني...! عمو:عشان قلة الأدب ولا المفروض كل واحد يتكلم بطبيعتو..كلو من التريقة حقت الناس..بدوي و حضري و مدري ايش هوا..متخلفين... قلت و أنا أقوم عشان أشوف العشا:من جد... و رحت للمطبخ و ما مرت ثواني إلا و عمو دخل المطبخ..صب موية في كاسة و مر عليا و قال بهمس:أبغى تفسير للرسالة..اليوم!! و خرج..أوكي..فجعني و احتجت وقت عشان أستنتج..صوتو..ما كان معصب بس المتوقع إنو يكون معصب..أحلام كانت صريحة بزيادة..صح اعتذرت لكنو شي أكيد يقهر أي رجال..عمو المفروض يعصب بس إنو ما عصب..طلب تفسير..بنبرة واثقة..طبيعة دا التفسير كيف لازم تكون؟!،و متى يمديني؟! خرجت من المطبخ بعد ما قلت لمنورة تجهز العشا و تغرفو..جلست و كان عمو مبتسم بهدوء..الشي إلي خوفني زيادة..لو متنرفز و معصب أهون عندي..أما إنو يبتسم و يتكلم و يتحمس هدا الشي يفجعني..هدا معناتو إنو معصب و مقهور لدرجة إنو أخفى أي أثر لمشاعرو..يا ربي لأ..مابغا..يا رب يسرها معايا..تعبت منو..أبغى مصلحتو و هوا مو متعاون معايا!! انحط العشا و اتعشينا و شربنا الشاهي و انبسطنا سوا و رجعنا البيت و ما حصل أي شي..لا عمو ناداني و لا أنا رحت و كلمتو!! رجعت البيت..فتحت شنطتي بشوف جوالي إلي رن برنة رسالة و انصدمت !! ***************************************** خرجت من الاختبار و أنا مرتاااااحة..آخر اختبار..يااااه..الحمدلله..خلاص معد فيه مذاكرة تحت وطأة دوشة علي و سعود!! أخدت سعود من الحضانة ودقيت على علي..أول ما رد قلت بصوت عالي:خلاااااااااصت... ضحك:مبروووووووك..خلاص معد حتذاكري... -معد حذاكر... -خلاص..تاخذي وثيقتك و نسويلك حفلة و تقعدي في البييييييييييييييييييت... -علي.. -نعم.. -مالت عليك..دحين هذا هوا إلي هامك..منتا مبسوط إني حتخرج و يسير مستوى دراستي..جامعي... -إلا..ولا لأ..أصلاً ما يهمني..لو إن شاء الله ابتدائي..إنتي جود و أنا علي و ولدنا سعود..في ستين نيلة المستويات هذي... قلت بصوت أوطى:كداب..أصلاً كنت رح تحتقرني لو ماكنت متعلمة... همس:ههه..أنا؟!،أكون غبي لو أفكر إنو فيه أحسن منك..بلا تعليم بلا نيلة... -من جد؟! -طبعاً أصلا إنتي..."اتغيرت نبرتو"..لا بس شوية ظروف مع الأهل..إن شاء الله... قطبت حواجبي قبل ما يقول علي:غبي.. -ايييش...؟! -يا شيخة المدير ساير مسوي وكيل مدرسة..يمشي في الأسياب و يعطي أوامر..دوبو يقولي:ارجع على مكتبك...! -إنتا في السيب؟! -ايوة..تعبت من القعدة..المهم ذحين..ايش حتسويلنا عالغدا اليوم..بمناسبة إنك خلصتي... -ما حسويلك شي يا عمري..إنتا حتمر عليا أنا و سعود و نروح نتغدى في أي محل... -لا جود..غدا مي حلوة..اسمعي خلاص مو لازم تطبخي..نشتري بخاري عالطريق...! -لأ..أبغى أتغدى برة... -جود الدنيا حر.. -و مين قلك حنقعد في الشارع؟!،حندخل أي مطعم...! سعود:مقدونلز ماما مقدونلز... أول شي جا على بالي إنو ماكدونالدز مو شي محرز يعني..غدوة تخرجي المفروض تكون في مطعم محترم بس عشان خاطر سعود... قلت:سعود يبغى مقدونلز..خلينا نمر..الله يخليك..والله مشتهيتو..ترضى البيبي يشتهي شي و ما أعطيه...؟! -جود..قلتلك ألف مرة إنو الحركات ذي في أول حمل..ما تنفع ذحين... -علييييييييييييي... -خلاص خلاص..طيب..أعوذ بالله..سايرة زنانة... ابتسمت لكن قلت عشان يغير دي العادة:شكراً حبيبي..بس مو لازم لمن توافق تتعوذ من ابليس..وافق و قول من عيوني..خلاص إنتا وافقت...! -حبطل ترا... -لا لا لأ..حرام..أولادنا يبغوه و أنا حبيبتك كمان أبغاه...! -أنا أبغى بخاري... -عادي..نتعشى بخاري... -ما شاء الله عليكي..الله يحفظك بس.. -آمييييين.. -يا رب العالمييييين... -يلا باييييين... ضحك:باي.. -باي حبيبي...! قفلت من علي و التفت لسعود بحماسة:حنروح ماااااك... ابتسم سعود:ماما أنا مابغا هابي ميل... -ليش؟! -عشان خلاص النونو يجي..ياخد هابي ميل..أنا لأ..أنا كبير...! ابتسمت:صح..ولدي كبير... رحت للكافتيريا و اشتريت أكل ليا و لسعود بما إنو علي حيطول شوية و سعود ما فطر ولا أنا..جلسنا على طاولة و هناك..رن جوالي..و كان..عمو!! ما رديت..لإنو بعد شوية حخرج مع زوجي و ولدي و أنا عارفة النقاش حيطول..ما حيكون شي وحش..لا..من بعد إلي شفتو في شنطتي مستحيل يكون وحش..أنا خايفة يكون عمو يبغى التفسير إلي طلبو و أنا مني مستعدة أبداً أعطي تفسير مو لاقيتو دحين!! ***************************************** سعود،،، ممكن أفهم ليش ما ترد؟! أتصل عليها من أول ما ترد لييييش..يعني أكيد شافت ليش ما ترد..أكيد إني متصل أبغى أكلمها في شي مهم..آه جود... عضيت شفتي السفلى من القهر..ضمنت يعني و لا ايش؟!،أصلاً لو ما سويت إلي سويتو كان ردت من أول رنة.. حطيت راسي بين يديني:استغفر الله العظيم..ايش هوا ذا إلي أنا فيه؟!،ما بقي أحد إلا و فسرت تصرفاتو على إنها إهانة و تطنيش ليا..ياما جود ما ردت عليا و ياما أنا ما أرد عليها..ليش دحين بس متحسس من الموضوع لدي الدرجة؟! رفعت راسي و أنا أتنهد..أوكي أعترف..أنا ساير حساس و..غبي!! رن جوالي فجأة..و كانت جود..اترددت قبل ما أرد لكني رديت:ألوو.. -السلام عليكم... -و..عليكم السلام... -كيفك عمو...؟! -الحمدلله..طيب..إنتي كيفك...؟! -الحمدلله بخير..عمو.. -نـ..نعم.. -اليوم كان آخر اختبار... قالتها بسعادة..ابتسمت:مبروووك..بس لسة الوثيقة أحلى شي..لمن تاخديها تحسي بالحرية من جد...! ضحكت:أنا حاسة بالحرية خلاص..أنا ما يهمني لا الاختبار ولا النتيجة المهم عندي إلي أضيعو في المذاكرة...! ابتسمت:الناس الأذكياء كذة..الطبيعيين يشيلوا هم المذاكرة مو الاختبار و النتيجة إن شاء الله الواحد بياخذ إلي يستحقو...! -صح بعدين أغلب الدرجات نزلت فإن شاء الله شي حلو... -إن شاء الله..آآه جود..كيف؟! -ايش حبيبي؟! حسيت جود عارفة..و تبغاني أتكلم..هيا ما اتكلمت عشان تترك ليا المجال..جود أنا فاهمها..تبغى تسمع مني و تفهم كل إلي أبغاه..جود حريصة على إني أكون أنا المستفيد الأول..مو إنها مي مهتمة بأحلام..لأ..لكنها تبغى تفيدني أكتر شي!! -كيف الـ.."قلت بسرعة"..جود احنا لسة على وعدنا؟! -أية وعد؟! -إذا ما حصل نصيب ما ينفتح الموضوع مرة ثانية..أبداً..حتى طول السنين الجاية..استجبت لرغباتها و لو ما طلعت بنتيجة فما رح أستجيب لرغبات أي أحد...! -إلي يريحك..مافي أحد يغصب أحد على شي..صدقني إنتا ما سويت أي شي إلا برغبتك..أنا..ما أجبرتك على شي..تصدق عمو إنك لمن ترفع صوتك أنسحب..أنا ما أرجع أتكلم إلا لمن إنتا تعطيني إحساس بإنك ممكن تسمع..و كنت إنتا في كل مرة تعصب تحس بالذنب و تزعل إنك زعلتني فترجع تسمع!! حسيتها سعيدة و هيا تتكلم..اتنهدت..أحس ما عندي شي أقولو... تابعت جود:الربوع الجاي إن شاء الله حكلمها..بعدها يسير الدور عليك كلياً..تتقدم رسمي..طبعاً ما حتروح بجدة و بيا و تتقدموا..لأ..أول شي كلم أبوها لحالو..على أساس ما تبغى يسير حساسية لو ما حصل نصيب..عارف عشان يطمنوا..عشان ما يضيفوا لمواصفاتك إنك صاحب ولدهم و نسيبهم...! اتنهدت:لسة بدري يا جود على دا الكلام..خلي الموافقة تجي و بعدين.. تابعت و أنا أنتبه لشي:طيب إذا افترضنا إنو البنت وافقت..أهلها..لو رفضوا...! انفعلت جود:و ليه يرفضوا..وين يلاقوا أحسن منك؟!،عمو..أوكي أهلنا و حبايبنا لكن لمن تخطب و تتكلم مع أبوها اتكلم بثقة..لا تحسسوا إنو يتفضل عليك أو شي..مو تقل أدبك لكن خليك واثق و محترم!! -أعصابك يا جود..أهل أحمد غير و إنتي عارفة..ما عندهم طبيعة الاستغلال لو شافوا واحد مسكين...! -أنا عارفة حبيبي إنو ما عندهم دا الطبع لكن برضو الواحد يروح باحترامو..مو يروح بتردد..حتى لو من جوتك خايف و متوتر لا تبين!! اتنهدت و قلت بهدوء:خلاص طيب..يسير خير بس أهم شي ما يطلع الموضوع لأحد..جود أنا أجبرت نفسي أسوي أشياء كثيرة أنا ما أبغاها ولا مقتنع فيها..أنا قبلت يا جود أعطيها تقرير جديد عشان تفهم إنو الكذب مو لنا..مستحيل أقدم على خطوة زي دي و أنا مني قدها..صارحناها و لازم تقدر هدي المصارحة و تردها لنا كمان...! -عارفة حبيبي إنك ضغطت على نفسك..على بالك مني فاهمة..حتى أنا والله انصدمت..صدقني تصرفك دا ما حيروح هدر..كلو يرجعلك..لو مو دحين بعدين..و لو مو بعدين عند ربنا حيكبر..ما حينساه...! -إن شاء الله خير..تبغي شي دحين؟! -سلامتك.. -الله يسلمك..باي.. -باي.. و أنهينا المكالمة..و أول ما أنهيناها انتبهت إني ما أخدت التفسير إلي أبغاه..لسة!! ***************************************** |
الجزء الحادي و العشرون (وحدي الآن!!) أحلام،،، "جود أنا ما رح أوافق بمجرد إنك نفذتيلي طلبي!!" قلتها بانزعاج على الجوال لجود إلي كانت تكلمني..و اتوقعت إنها تتضايق لكنها قالت بكل هدوء:و من قال إني اتوقعت دا الشي أصلاً..أنا قاعدة أكلمك عادي..أبغى أعرف ايش رأيك..إذا كنتي لسة مترددة قولي بستخير قولي لسة أحتاج وقت أفكر..لا تقوليني شي أنا ما قلتو...! -جود..مو إني أبغى أقولك بس..جود هذي حياة..مو شي عابر..أنا ما رح أضحي بشي قليل..حتى لو إنك تشوفي إني المفروض أحمد ربي..أنا ترى مني ميتة عالزواج..و بصراحة..بصراحة يا جود..لازم يكون فيه شي يستاهل هدي التضحية!! اتنهدت جود بصبر و قالت:أحلام حبيبتي..من قال إنك ميتة على الزواج..مين قال إني شايفة إنك لازم تحمدي ربك..أوكي ما أكذب عليكي..أكيد حبي لعمو يخليني أشوف إنو لازم أي وحدة يتقدملها تحمد ربها لكن بغض النظر عن دا الموضوع..عشان تحسسي الرجال بقيمتك لازم تحسسيه بإنو هوا يحمد ربو إنك وافقتي و حسسيه بدا الشي بعيد عني..قلتلك من قبل لا تهتمي بيا..خرجيني برة الموضوع..أنا مجرد وسيط..لا تخلي علاقتك بيا تأثر على قرارك...! -ما..أصلاً أنا مني مهتمة..عادي..المفروض ولا وحدة فينا تزعل..هذي حياة!! حسيت جود تبتسم و هيا تقول كأنها تكلم طفلة:صح حبيبي..هدي حياة..محد يزعل من التاني..كل واحد يقرر و يختار إلي يريحو!! سبق و قلت إنو جود أحياناً تحسسني إني أصغر منها و إنها زي أمي!! قلت:طيب.. ما قالت جود شي فكملت:أنا..قرأت... -قرأتي ايه؟! -دورت عن الـ..الشي إلي حطيتيه إنتي في... -أيييوة... -جود..مادري..بس.. حسيت فجأة بشي يضغط على قلبي.. بلعت ريقي و أنا أغمض عيني..كنت حتابع لولا جود إلي قالت:و أنا كمان... انفعلت فجأة:جود ليش تقولوا مستحيل..كل القضية إنو..إنو هوا عندو "بصوت أوطى"..تشوهات أثرت عـ..علــ الـ... اتوقفت..حسيت بصعوبة و حرج إني أقولها..ما أعتقد حيكون شي لطيف أكلمها عن حالة عمها في وضع زي كذة!! قالت جود بلطف:عارفة حبيبي..لكن هوا مو مقتنع بنسبة الواحد بالمية دي..يمكن معاكي يقتنع و يمكن ربنا يقدر شي..أنا مني مستوعبة فكرة إنو ما يخلف أصلاً..أحلام أنا من يوم ما كنت صغيرة و أنا أتخيل أولاد عم صغار أربيهم زي ما رباني أبوهم..و أنا مؤمنة بدا الشي!! اتنهدت..أنا مالي حل إلا إني أتوكل على الله و أؤمن بالنسبة الضئيلة دي..إلي أطلقت عليها جود واحد بالمية عشان تحط أسوء الاحتمالات قدامي..بس لأ..مين قال إني لازم ألقالي حل عشان أكمل..أوففففففف... جود:طيب حبيبي يلا دحين مع السلامة..لازم أقفل!! -مع السلامة... -باي... و قفلت..آآه يا ربي..ليش أحس إني ملزومة بسعود ذا ... ؟؟!! رحت للرسالة إلي رسلتها جود ليا و كتبت تحتها إنها من سعود..سوى نفس حركتي يعني..الفرق إنو المخاطب في الرسالة أنا!! "السلام عليكم،، التقرير الطبي و صلك و أنا رجال..بكلمتي!! وفق الله الجميع" أنا أعرف شكله..أحمد كان يورينا صورهم مع بعض..الشي إلي يصعب عليا الموضوع..أتخيلُه قدامي يتكلم و يقول هذي الكلمات!! حطيت الجوال على جمب و رجعت أفتح التقرير من جديد..أتأمل فيه..أقرأ الكلمة فيه مية مرة..أراجع قواعد اللغة فيه..ساير شغلي الشاغل..من يوم ما حطتو جود في شنطتي و أنا مشقلبة فوق تحت!! ************************************************** * سعود،،، قمت من سجادتي لمن سمعت صوت أمي..حسيت إني لسة محتاج أقعد أكثر لكن أمي أولى !! رحت لها و جلست جمبها و أنا أقول:خير أمي..بغيتي شي؟! -ايوة بغيت... ابتسمت:ايش بغيتي؟! -بغيتك تقعد معايا..الله إن كان قاعد في البيت و بتخليني لحالي!! بست راسها:آسف..خلاص بقعد معاكي!! و صبيت لنفسي فنجان قهوة و أنا أفكر بإلي كنت قاعد أدعي بيه..مادري لو كان صح..مادري لو كان منطقي لكني في النهاية دعيت و الدعوة وصلت لربي و إن شاء الله إنها رح تتم...! أنا مادري لو رح تستسخفوني ولا لأ..لكني ما كنت قاعد ادعي لنفسي..كنت قاعد أدعي لأحلام..ايوة لأحلام..كنت قاعد أدعيلها ربي ييسر لها الزوج الصالح إلي هيا تستاهلو..لإنو أنا معد تفرق معايا..الموضوع بالنسبة ليا سار إرضاء لجود و بس..أنا حسوي إلي ينطلب مني و بس..و أحلام الله يختار لها الخير!! رن تلفون البيت و أيقظني من أفكاري..قمت برد عليه لكن أمي قالت:والله إنها جود... التفت لأمي باستنكار:ايش دراكي؟! -دريت... رديت على التلفون و أنا أبتسم..بشوف فعلاً جود و لا لأ..و كانت..جود!! قلت باستغراب:الله..والله يا أمي إنك صادقة..جود تصدقي أمي قالت إنو إنتي من قبل ما أرد!! ضحكت جود:يوووه..هوا دا يجي شي قدام إلي دايماً..عارف أحياناً لمن أكون أبغى أكلمها و ما فيا حيل أتصل ألاقي سعود جايني يقولي إنها عالتلفون!! ابتسمت:أمنا رهيبة!! -شفت كيف؟!..صح أنا كنت أبغى أكلمها..بس إنتا كيفك؟! -طيب الحمدلله..إنتي ايش مسوية؟! -تمام الحمدلله... -و كيف الحمل..صح متى حتولدي؟! -آآمممم..يوم الملكة.. -أية ملكة؟! قالت ببديهية:ملكتك!! -نعم؟!..ليش؟؟ليش هيا... -لا بس أنا أقول..أنا كده..أبغى أخلص موضوعك بعدين أولد..مابغاها تجي إلا و عمها متزوج!! اتنهدت..و حسيت تنهيدتي طيرت جود فوق من السعادة..قالت:آخر التنهيدات إن شاء الله!! -خذي أمي... و وديت السماعة لأمي..قال مني مهتم قال!! ************************************************** * جود،،، قفلت من جدة و أنا متحسفة على عمو..يا قلبي عليه..والله ما كنت متوقعة حيتأثر كده..تأثر عمو معناتو إنو هوا من جد راغب فيها..طب ليش يسوي نفسو مو مهتم...؟! يمكن هوا نفسو مو عارف إنو مهتم!! رن جوالي و كانت أحلام..قمت لغرفتي و قفلت الباب..جلست على الكرسي باسترخاء و رديت:ألو... -السلام عليكم... -و عليكم السلام..أهلاً..كيفك؟! -الحمدلله..كيفك إنتي؟! -تمام... -آآآآه جود.. -نعم... -كنت أبغى أسأل عن شي... -اسألي حبيبي... -جود كيف عمك مع الشغل؟! -كيييف...؟! اتفاجأت بالسؤال إلي جاي فجأة و من غير مقدمات ولا مؤهلات تفتح الموضوع!! -جود بصراحة..ما ينفع مافي أولاد و كمان مافي شغل.."تابعت بسرعة"..أنا..أنا لسة ما وافقت بس أبغى أعرف..يعني..إنو... -والله ما أعتقد حيعترض من غير سبب..بس حتأكد منو و أرد لك خبر... -ايوة... -أي شي تاني...؟! -..لأ..مع السلامة... -باي..آآ..لحظة أحلام... -ها... -أحلام لو عندك أي شي تاني..شروطك يعني..طلباتك..ايش تبغي؟! -ما..مو الشروط بعدين لمن يتقدم رسمي؟! -إلا حبيبي بس دحين إنتي من حقك تعرفي كل شي..فيه شروط ما حتقدري تشترطيها بعدين...! -زي ايه؟! -مادري بس أنا من رأيي ما دام التواصل بينكم ميسر استغلي الفرصة..لا تعطي كلمتك إلا و إنتي متأكدة من كل شي..و أقولك هيا من دحين..لو عمة و عمو وافقوا حتلاقي نفسك غصباً عنك توافقي لإنو لو الكبار وافقوا ما للصغار كلمة...! -ماما و بابا مو كذة!! -ولا عمو و جدة..ولا أنا..لكن نروح ولا نيجي ما رح نتغير..بالذات في دي الأمور... -جود... -نعم... -من غير زعل..بس..أحس إنك تبغي تثبتيلي بكلامك إنك مهتمة فيا و إنك..منتي متحيزة لعمك...! سكت لثواني..غمضت عيني و فتحتها و أنا أبتسم...! قلت:أحلام..من غير زعل كمان..أنا ايوة متحيزة لعمي..و مصلحتو عندي أهم من مصلحتك..مهتمة بكي لكن سعادتو عندي أهم..و أنا كنت صادقة معاكي في كل كلمة قلتها..إنتوا الاتنين عندي مهمين و عمو أهم و عشان ما أظلمك نورتك بالحقيقة و كنت معاكي في كل كلمة و طلب طلبتيه و على فكرة..إلي سواه عمو لمن نفذ طلبك مو شي هين..أنا مادري أصلاً كيف اقتنع..إنتي عارفة إني رجعت البيت و لقيت التقرير في شنطتي..ما كلمني من كتر ما هوا مستصعب الموضوع..أحلام..أنا ما أزكي عمو لكن ما حتلاقي رجال زيو بسهولة..وحدة من دعواتي كانت إنو ربي يرزقني واحد زيو!! ما علقت أحلام فقلت:أي شي؟! -لأ... -أوكي باي.. -بـ..ـأي... و قفلت..ابتسمت..مادري لو كان إلي قلتو مناسب..لكنها الحقيقة..أحب أحلام لكن يبقى عمو عندي أهم...! و في الليل وصلتني رسالة من أحلام.... "السلام عليكم جود،،، كيفك؟!،مادري يمكن ليل..آسفة بس أنا ما جاني نوم و ما حيجيني إلا لمن أقولك ذا الكلام!! جود أنا ما قد ارتحت لشي قد مني مرتاحة لهذا الموضوع..مو إني موافقة..لأ..بس أحس إنو إلي بعدو خير..إذا تم فهو خير و لو ما تم فخيرة ليا و لعمك و لكي و لأهلنا..إنتي كلمتيني أنا لوحدي عشان مشكلة عمك و أنا أقولك إني راضية بها..أما شغلة الشغل و السكن و باقي أمور الحياة فخليها بعدين..لمن تتقدموا رسمي حقول شروطي لأهلي و حيقول عمك شروطه..و لين هنا دوري خلص..الباقي موافقة أهلي..آه..شي ثاني كمان..أنا متوقعة شي يستاهل التضحية..يعني..حياة مثالية أو شبه..بما إنو مافي حياة مثالية في عالمنا!!" ابتسمت لدرجة فكي عورني..ياااا ـــ طالعت في علي بسرعة و كان مديني ظهرو..أوه..لو كان شاف ابتسامتي كان فتحلي تحقيق..الحمدلله... قفلت جوالي و حطيتو عالكوميدينة و أنا أراقب علي..جيت بأنسدح لكن وصلني صوت علي:جووووود... -ها حبيبي... -ليش قاعدة تطالعي فيا؟! قلت و أنا أعدل البطانية فوقو:أحبك حبيبي أحبك... -كذااااابة... -والله أحبك... -كذابة... قلت أبغى أغير الموضوع:يعني على بالك ما أحبك؟!،كذابة لمن أقول أحبك؟! التفت ليا:كذابة في السبب..إنتي تحبيني غصباً عنك..بس كذابة في إنو سبب مطالعتك فيا هوا إنك تحبيني..إنتي ما عندك حركة لمن تحبي أحد تتأمليه..و أنا عندي ذي الحركة و إنتي ما تتفاعلي معايا لمن أسويها... كان علي في نهاية الكلام منزعج و يتكلم بغيظ... قلت و أنا ألعب بشعري:أنا أستحي..مو ما أتفاعل معاك... طالع علي فيا لثواني بعين ضيقة بعدين قال:إنتي كذابة و أنا ما أحب الكذابين... -ما تحبني؟!... قال بقهر و هوا يدف البطانية و يجلس:أنا ما أحب الحريم... -أحسن..و لا أنا ما أحب الرجال... قال بقوة:أحسن.. و رجع انسدح بقوة على السرير و سحب البطانية..ابتسمت و قربت منو..حطيت يدي على كتفو فحركو بعنف..قطبت حواجبي بس رجعت ابتسمت و قلت بهمس:علي..أقولك على شي..بس ما تقول لأحد إني قلتلك... -مابغا..أبغى أنام... -شي مرة مهم... -مابغا... -علي.. -جود..أبغى أنامممم... -عليييييييييي.... صرخ:أبغى أنام..ما تفهمي إنتي؟! دمعت عيني و قلت:طيب..خلاص نام... و رحت لجهتي من السرير و انسدحت..أهبل..ليش يصرخ؟! أصلاً أحسن ما رح أقولو,,كنت حقولو و حرضيه بس بكيفو..غبي..ما يستاهل.. مسحت دموعي..لا وي حبيبي يستاهل..بس برضو غبيييييييييييي... سميت بالله و نمت... ************************************************** * سعود،،، -جود..من جدك؟؟؟؟؟؟؟؟ -والله..تبغى أرسل الرسالة إلي رسلتها..ترى عادي..أرسلك هيا... -جود..جود..آآآهـ... ضحكت جود أما أنا فمسكت على قلبي.. قلت بقهر:ليش قاعدة تضحكي؟! -ليش شوية و تبكي؟! قلت بغيظ من ورا أسناني:مني قاعد أبكي..أنا ما كنت... -ما كنت متوقع بس الحمدلله وافقت..خلاص عمو اتكل على الله و استخير و روح اتقدم رسمي... -جود... آخخخ..أنا ما كنت أبغاها توافق..ليش توافق..ليش هذي المعجزة تسير لمن ما أبغاها تسير..ما رح أقدر أعطي أي عذر..أنا مشيت في الموضوع لإني متأكد إنو مو أحلام "أخت أحمد" هيا إلي حترمي بأمومتها عرض الحايط..أنا كنت أدعي إنو ربي ييسرلها الأحسن..و مو أنا الأحسن!! -أوكي..أنا بس كنت أبغى أعطيك الخبر..بعدين أفهمك و أقولك على التفاصيل..دحين تروح تصليلك ركعتين و تحمدالله و تطلب منو التوفيق..و بعدين إن شاء الله لمن أجي حصرف علي..أقولو يكلم أصحابو و يقابلهم ولا أي شي... -جود..مابغا تسرع و كرفتة..مو تمشيلي الموضوع جري..و إلي صبرني كل ذي السنين و صبرك يصبرك كم سنة..من جد..من جد مابغا يطلع الموضوع لأحد... -أصلاً ما رح يطلع لأحد..إنتا أول شي تكلم أبوها..حتى أحمد و علي مالو داعي تكلمهم..كلم أبوها و قلو إنك تبغى رأيو و إنك مستعد لأي تساؤلات..و إنك ما جبت معاك أحد عشان لو كان مافيه نصيب محد يتحسس..طبعاً حيزعل علي و حيلومك أحمد عشان ما قلتلهم بس إنتا وقتها قول خفت عمي يكون لو رأي أو وجهة نظر ففضلت تسمعو الطلب منو مو مني..و خلاص..معد فيها شي..لو أعطوك الموافقة..نروح أنا و إنتا و جدة و نخطبها.. -جود في العادة الموضوع يكون عند الحريم بعدين يتطور و يوصل للرجال... -ايوة..بس علاقتك بهم أقوى و أفضل من علاقتنا احنا بهم..أنا و جدة علاقتنا بهم جات عن طريق المصاهرة بس..لكن إنتا تعرفهم من زمان..تعرف كل فرد في العيلة عندهم من زمان..عشان كده أحسن إنتا تبدأ مو احنا... اتنهدت:طيب طيب.. -خلاص..يسير خير إن شاء الله.. -إن شاء الله..مع السلامة... و قفلت الخط..رميت الجوال على السرير.. ليش وافقت..من متى عيلة أحمد تربي بناتها على التضحية و عدم الثقة في النفس..و ليش..ايش ناقصها عشان تضحي؟! يا رب يسر أمري..مابغا..مابغا أتزوج أخت أحمد..أخت أحمد أختي..أبغالها أحسن واحد زي ما كنت أبغى لجود أحسن واحد.. اتنهدت..يمكن عشان لمن علي اتقدم لجود و آذاها في البداية..يمكن الموضوع ينرد لأختو..و كما تدين..تدان... قعدت ثواني أقلب الفكرة في راسي بعدها عرفت مقدار السخف إلي قاعد أفكر فيه.. إلي مو واثق من نفسو و إلي حاسس بالنقص هوا.. أنا... ولا ما كان حسيت إنها قدمت تضحية كبيرة..لو كنت واثق كان قلت تحمد ربها... آآآ..يا ليت لو عندي جزء من الثقة إلي عند دولا الشباب الفاضيين..الواحد يمشي و يقول:"يا أرض انهدي ما عليكي قدي"..على الأقل أنا فيه شي فيا أكون فخور فيه..هما لا عقل و لا شكل... استغفر الله بس!!... ************************************************** * جود،،، كنت فرحانة..و كيف لأ و أنا حاسة بربي معايا في كل خطوة..علي من نفسو اعتذر مني و قال:"جود حطلع أسلم على جدة و سعود و أنزل علطول عشان فيه واحد دق عليا و وعدته حقابله اليوم" قلت من دا الواحد يا علي؟! قلي:"واحد صاحبي من أيام الثانوية..سافر برة يدرس..شفتو مرة وحدة بس في ثاني سنة في الجامعة و ذحين مدري من فين جاب رقمي..المهم إنه يبغى يشوفني" و وصلنا علي و راح..مع السلامة و الألب داعيلك... طبعاً ما قلتها في وجهو..كان حيقعد و يلصق فيا..أنا أعرف علي..لو شك في شي ما يخليني!! بعد ما راح علي قعدنا في الصالة و عمو كالعادة اتصرف بطبيعتو..أخاف لمن يسوي كده!! اتكلمنا عادي و ضحكنا و ما كان فيه أي شي إلين ما قام عمو و راح لغرفتو..أوكي..هل يفترض بيا ألحقو؟؟؟ كنت على وشك أقوم لكن جدة نادتني..التفت:هلا جدة... -تعالي... رحت لين سريرها و جلست جمبها..قلت:خير جدة..ايش فيه؟! -ما فيه إلا الخير... اتلفتت جدة يمين و شمال بعدين قالت بصوت واطي:عمك..يفكر... -يفكر في ايش؟! -ششش..عمك يفكر في وحدة..مادري إن كان حاببها ولا..لكن في وحدة في البال... اتوترت أنا مادري ليه..قلت:ايش دراكي إنتي؟! -العين يا بنتي..أنا أدرى بالرجال..جدك يوم فكر يتزوج عليا كذة كان... شهقت:جدو الله يرحمو فكر يتزوج عليكي؟! رغم إني ما أعرفو إلا إني انقهرت.... قالت جدة بشماتة:كبّــنُه..مطلقة و عندها أولاد..يقول بكسب أجر..قلت اكسب أجر فيني إن كان بتكسب..ما بقي إلا تاكا الحرمة يكسب الأجر منها... ("كَـبّـنُـه" بمعنى تركته أو استغنت عنه) -ايوة و بعدين..اتزوجها... -أقولك كبنه..جاها واحد غني كتب لها عمارة..الله يا بنتي..والله صادقة ايش عنده غير هالعمارة و ما كنت برضى يكتبها باسمها و هي مسكينة تبغى شي لأولادها... -يا الله..و لو كان يبغى يكتب العمارة باسمها... -معاي ثلاثة..سعد و سعيد و سعود..و إن كان الخير ما هِلّا في سعود..سعد بيقول تفاهم و سعيد بيقول لا تعبي عمرك و خليه يسوي إلي يبغاه..مافي إلا سعود رجال..والله إني أسمع كلمتُه ما أسمع كلمة الباقين... -حرام جدة..عمي سعد صح ما أعرفو بس والله رجال طيب.. -طيب لزوجته مو لأمه..أبغى رجال يوقف معايا..الله يا بنتي... -صح..والله صادقة و معاكي حق..لكن فيهم خير..ولو حسوا إنك حتتأثري كان وقفوا في وجهو..أكيد!! أنا ما أعرف شي عن جدو..قد شفت صور لو..كان يشبه أكتر شي عمي سعد..يمكن لإنو الأكبر فسنو أقرب شي لجدو الله يرحمو..بس برضو الصور ما تغني عن الكلام إلي يظهر الشخصية و محد يتكلم عنو كتير!! -المهم ذحين..روحي شوفي عمك ايش فيه..والله ما بيقولي شي..بيقولك لكن ما بيقولي..صادق فيا والله ما بسكت عنُه..بس خليه..روحي شوفي ايش فيه و تعاليلي..ولا أقول..اتصلي عليا بكرة..و إنتي ما عندك جامعة..اتصلي و قولي ايش قلك...! ضحكت:إن شاء الله..بروح أشوف و إن شاء الله ربي يهديه و يقولي...! و رحت لغرفة عمو..دقيت الباب و دخلت..طالع فيا بنظرة مدري كيف فقلت:قبل ما نقول أي حاجة..تخيل جدة ايش قالتلي...؟! -ايش قالت...؟! -تقول إنك تحب و في بالك وحدة...! -أنا؟!... -ايوة إنتا..تقول إنو في عينك نفس نظرة جدو لمن كان يبغى يتزوج..والله أول مرة أدري إنو جدو كان ناوي يتزوج على جدة...! -زمان هذا كلنا كنا صغار... -تقول كان معايا تلاتة رجال... ابتسم عمو:قصدها إنو حيخاف لو كبرنا نسوي مشاكل..لإنو كان عندها أولاد..فيعني... اتقدمت و جلست على السرير:ايوة صح..أصلاً على قولها..يكسب أجر لمن يجبر بخاطر زوجتو أحسن... -مممم... أصدر عمو دا الصوت و هوا يهز راسو.. قلت:مو لازم تعلق المهم إنو أنا جاية اليوم و هدفي الأساسي أفهمك ايش تسوي... -مني بزر... -لكنك رجال... -هذا أدعى إنك ما تفهميني أي شي... -هذا أدعى..إني أفهمك..مع احترامي..إنتو عديمي الهرجة... -عديمي الهرجة؟! -أييييوة..و ما تدروا وين ربي حاطكم..و هدي نقطة أتضارب دايماً مع علي عليها.. -مو على أساس عاقلة و منتي متحيزة... قلت بتفكير:صح..أنا عاقلة..و مني متحيزة و أكره إنو الحريم يكرهوا الرجال و الرجال يكرهوا الحريم و كل مين يسب و يسخط عالتاني بسسس..لازم الوحدة تكون..أممم..سخيفة يمكن..قدام زوجها.."ابتسمت ابتسامة عريضة"..و ما ينفع أبداً تكون عاقلة عشان لو كانت عاقلة معد حيقبل منها أي سخافات أو تصرفات صبيانية و حيتوقع إنها تكون عاقلة حتى في أمور مهمة..زي الزواج عليها و زي الأسلوب الحلو في الكلام..يعني..أشياء زي دي..يسير يقول:خلاص عاقلة ما تحتاج كلام فاضي بالرغم من إنو كل دا مو كلام فاضي...! سحب عمو نفس عميق و بعدين قال:اوكي..لو حمشي في دا الموضوع فعشانك..أبداً..ما اتوقعت إنها توافق.. -ولا أنا.."طالع عمو فيا بصدمة فابتسمت"..بس كان عندي إحساس إنها حتوافق... -جود..أنا راسي يعورني و بطني كمان... ضحكت لإنو عمو صرخ لمن عبر عن عوار بطنو... قلت:عادي..حتى أنا بطني عورني أول..لمن انخطبت و... قاطعني:و لمن سارت ديك المشاكل..شفتي..إنتي بدايتك ما كانت حلوة زي بدايتي دحين..المفروض تقدري و ما تستعجليني... -و شفت..بدايتي ما كانت حلوة بس مرتاحة في حياتي دحين و بدايتك إنتا مي حلوة بس إن شاء الله حترتاح في حياتك بعدين..عمو..افهم..كان ممكن أشوفلك أي وحدة..بس أنا ما كنت أبغالك أي وحدة..إنتا عارف لو إنك واحد عادي اتعرضت لمشكلة زي مشكلتك كان يمديك تلاقي ألف وحدة أون لاين..تحط إعلان في وحدة من المواقع الهبلة دي و تـ... -جود... قلت و أنا أرمش بعيني:نعم... قال و هوا كاتم ابتسامتو:اطلعي برة... ضحكت:أمزح..والله أمزح... -تمزحي..إنتي ايش فيكي اليوم..إنتي شايفة كلامك ياخد كم سطر..عارفة سايرة زي مين..زي إلي سألوه كم الساعة قالهم عن سيرة مخترعها..ايشبك اليوم...؟! رفعت أكتافي بحرج:ما..ما..طيب عشان أبغاك تتحمس..إنتا مرة بارد... -أتحمس لمن فيه شي يحمس... قلت بحماس:طب يلا سوي شي يحمس... -جود... -آسفة..اسمع عمو اسمع... -ها يختي... -إنتا دحين تروح و تكلم عمو..عمو أبو أحمد مو إنتا..هههه..و بعدين تقولو إنو إنتا ما جيت مع أحد عشان تبغاه يفكر و ما يحس بأي نوع من الحرج..طبعاً رح يعطيك نظرة أو يمكن حتى يقول إنو لو جبت مين ما رح يتوتر أو يحس بالحرج بس إنتا خليك واثق..لو اتهزيت أو اتوترت عمي رح يستغل النقطة دي و يمكن يسحبك بالكلام شوية شوية..مادري..إنتا ما تعرفو..ما قد اتعاملت معاه؟! -إلا..و أخاف منو..أحسو داهية و داس شي... -ايوة..عمي من النوع إلي يعطيك إحساس إنو يعرف عنك كل شي..فإنتا خليك واثق و كأنو مافي أي شي لإنو فعلاً مافي أي شي..إنتا كنت واضح مع بنتهم في شي يخصك و يخصها..فروح و قلو و لمن يعطيك الرد و إن شاء الله إنهم حيوافقو نتقدم رسمي و نروح لهم بكل احترامنا و نخطب بنتهم... -و أحمد..أحمد لو دري من غيري حيزعل... -أحمد لو عرف حيروح يكلم أحلام على أساس ما تسير حساسية و مدري ايش هوا..إنتا قول لعمي إنو يكلم علي و أحمد و يفهمهم ليش إنتا ما كلمت ولا واحد فيهم من قبل..قولو إنك خايف علاقتك الحلوة بهم تتأثر و لا أي شي..استخدم مصطلحات كبيرة..زي مثلاً..النفس البشرية و لا حساسية الإنسان..و لا طبيعة العرب في أمورٍ كهذه ولا تأثير المصاهرة على العلاقة الودية..كلام زي كده يعني..والله رح ينبسط و يقول "قلدت صوت عمو":احم..نعم بالطبع أتفهم هذا الأمر.و سأنظر مع الأهل في هذا الموضوع و سأتكفل بأمر أحمد و علي..سيتفهمان هذه النقطة فلا داعي للقلق... ضحك:ليتك تشوفي نفسك... -ليتك تشوف علي.. السوسة..لمن يقلد أبوه..شي مو طبيعي..نكتة... عمو:علي و سوسة؟!..المهم..و متى أروح؟! -اتصل عليه و قلو أبغاك في موضوع و اتفق معاه على موعد... -طيب و لو مثلاً رفض... -وقتها حكون عند وعدي..ما اتغير شي في حياتك و حسحب نفسي من موضوعك دا..و ما حتدخل إلا لو إنتا طلبت... -ما أعتقد إنو ما حيتغير شي في حياتي..أنا ما أتحمل إني أنرفض... -شوف..البنت موافقة طيب..و إنتا ما فيك أي شي..إنسان محترم و عاقل و مرتاح مادياً و السكن جاهز..الشقة إلي قدامنا تفضيها..و تسكن فيها و لو إنها تبغى مكان واسع و لا فلة و لا أي شي يمديك تبني فوق أو تفتح دا الدور على إلي تحتو بدل ما تتعب نفسك و عادي..كل أمورك الحمدلله متيسرة..يعني ما عندهم أي سبب عشان يرفضو... -يجيب الله إلي فيه الخير... -يا رب... قمت:يلا قوم نروح لجدة..صح ايش حقولها هيا قالتلي أقولها ايش قلت... -قولي أي حاجة المهم..أمي متى لازم تدري؟! -يوه فكرتني..ما تروح تكلم الرجال في الموضوع إلا و هيا دارية..لمن يعطيك موعد قلها و اطلب منها ما تقول لأحد..و أنا ما أدري عن أي شي..جدة ما رح تتكلم لو طلبت منها ..شوف أنا ما أدري..بس إنتا و عمي إلي حتكونوا تدروا عشان يزبط الموضوع..طيب..أنا فهمت أحلام كده... قال عمو بقرف:ايوة..شغل حريم..من تحت لتحت... -شوف..كفاية أحلام بالغصبة ترى وافقت على كل اللف و الدوران دا..تقول تحس إنها تكذب على أمها و أبوها... -صح كلامها..كلو أصلاً بتخطيطك... -ايوة..ايوة بتخطيطي..أنا السبب..أصلاً كلو من تحت راسي..أصلاً أنا عقربة و قليلة أدب بس يلا خلينا نروح لجدة... قال و أنا قاعدة أقومو:إنتي اليوم مو طبيعية... -ايوة..مني طبيعية..يلا خلينا نتعشى... و خرجنا من غرفتو..رحنا للصالة..قلت لمنورة تغرف العشا..و طبعاً ساعدتها..أكره إنو أقعد و الشغالة تروح و تجي على الغرفة..مو حلوة..لازم نساعدهم...! ************************************************** * سعود،،، بعد صلاة العصر..جلست في غرفتي و مسكت الجوال..لازم أتصل..خلاص..الشغلة معد هيا بيني و بين جود بس..أحلام تدري..و لازم أنا أتحرك..جود سوت إلي عليها..أنا حمشي في الموضوع بس عشان خاطر جود و لا أنا والله دعيت ربي يفكني من إلي أنا فيه..أنا مابغا أصلاً..مابغا يكون لأحد فضل عليا...!! دقيت على أبو أحمد و أنا أحس بوجع في بطني و توتر..يا رب تيسر... رد عليا:ألو... -ألو..السلام عليكم... -وعليكم السلام و رحمة الله و بركاته..هلا والله..كيفك يا سعود؟! -تمام الحمدلله..إنتا كيفك عمي؟! -بخيرٍ و الحمدلله..كيف الشغل و الحياة معاك؟! -الحمدلله... المفروض أنا أتكلم فليش قاعد أستناه يقول شي؟! اتحمحمت و قلت:آآآه عمي... -أيوة... -كنت..أبغى أكلمك في موضوع... -و إلي هو... -ما..ما ينفع في الجوال..يعني..إنو..لازم أشوفك... -ايه لازم تشوفني بس ايش الموضوع؟! -لالا ما ينفع... اتنهد عمي:يا إنك محتاج فلوس يا إنك بتعطيني فلوس... -ها... ضحك عمي:تعال متى ما فضيت..حياك الله البيت بيتك... -ها... -تعال في أي وقت... -لا..أنا مني محتاج فلوس..أنا أبغاك في كلام... -ايوة بتعطيني فلوس..تعال أبوية متى ما فضيت... قلت و أنا مفجوع و مني فاهم:ما حعطيك فلوس..إنتا ما قد اتسلفت مني... ضحك عمي:سعود أبوية..متى تبغى تجي؟! -ما..مادري..إنتا متى فاضي؟! -والله أنا فترة العصر ما عندي شي..فتعال بعد العصر فوراً..فقد يطول النقاش... -بببـ..ـكرة عادي؟! -غداً؟!..لا شيء لدي فأهلاً بك... قلت و أنا أهز راسي:شكراً... -العفو..أهذا كل شيء؟! -بـ..ـلى... -نعم مناسبة أكثر..لست سيئاً في اللغة و لكنك تبدو متوتراً..لأسباب..مجهولة... -..طيب... ضحك أبو أحمد:نشوفك بكرة على خير... -إن شاء الله..مع السلامة... -مع السلامة... و فصل عمي..ايش كان قاعد يقول..والله مني فاهم..ايش يعني أبغى فلوس و بعطيه و بيعطيني..عن ايش كان قاعد يتكلم؟! أنا قلت من قبل إني ما أحب أتعامل معاه..رجال غريب ما أقدر أفهمو!! و ما أقدر كمان أتصل على جود و أسألها في كل شي..لو بكرة كلمت أبو أحمد في الموضوع جود حتطلع من الموضوع..أنا خلاص و حدي و لازم أتصرف من عندي..ما معايا أب و لا أم ولا أي شي.. وحدي..وحدي تماماً.. و هذا شي يضايق..أبداً مابغا أكون وحيد..هيا بعيلتها كاملة و أنا... قطبت حواجبي فجأة..لأ..مني وحدي..جود ممكن أكلمها في أي وقت و أمي.. أمي..جود قالت أقول لأمي قبل ما أروح بس لأ..ما ينفع..أخاف ما يقبلوا..بس أنا من زمان أمي قد كلمتني في أحلام..أو في أخوات أحمد بشكل عام..لو ما دريت مثلاً إنهم رفضوني ممكن بعدين تكلمني عنهم و أقولها من قبل إنهم رفضوني و.. لالا..ما ينفع..لازم أقولها..لازم و لا شكلنا حيطلع سخيف.. وقفت بقوة و خرجت من الغرفة:"أمييييييي..أمي..." أمي لازم أكلمها ذحين..ذحين!! ************************************************** * أحلام،،، رفعت راسي لمن اندق الباب ودخل بابا..قالت ماما باستنكار:سلطان!! قال بابا و هوا يقفل الباب:لقد طفح الكيل..بنتي و أبغى أكون معها في وضع زي هذا..تخيلي يا أحلام..والدتك هددتني و حلفت أن لا يحدث لي طيبٌ لو دخلت لكني ما أخاف منها.."تابع بغيظ"..أنا كنت أبغى أقول لكن والدتك لا تؤثرني بأي شيء... ردت عليه ماما و قعدت تخاصم و قعدت أنا أطالع فيهم..ايش هذي السعادة إلي أحسها باينة على وجيههم؟!،مو كذة..أنا خادعتهم..أنا داسة عنهم شي..ما أقدر كذة..ما أقدر.. غطيت وجهي بيديني و قعدت أبكي.. حضنتني ماما:بسم الله عليكي..ايشبك؟! قلت بشهيق:مو حلو كذاااا..ما أحب أنا زي كذة..شوفو ايش سويت فيكم..حرااام...حرااااام.. قال أبوية بحزم:بنت..وش الكلام الفاضي هذا؟!،ايش إلي سويته فينا و ايش إلي حرام؟!..ايش فيك إنتي؟! مسحت أمي على ظهري:بسم الله عليكي حبيبتي بسم الله... و سكت بابا..مادري ليه..يمكن ماما أعطتو نظرة..مادري..لكنو جا و جلس جمبي و قال بحيرة:ايشبك..ليش تبكين..هي هي..إنتي بكيتي زي كذة لمن أنا خطبتك؟! بعدتني ماما عنها و قالت:يا رب ترحمني..ما دريت بنفسي إلا و أنا معاك.. -طيب أول مرة شفتيني..كيف كنت..وسيم..عجبتك..انصدمتي بجمالي؟! طالعت في ماما و أنا أمسح دموعي مستنية جواب لكنها طنشت بابا و لا كأنو قال حاجة.. بابا دايماً كذة..مو دايماً بس يعني..يمزح و يستعبط كثير..برة البيت جدي بشكل يقهر أحياناً لكن معانا لأ!! قال بابا:شايفة يا أحلام..شاهدة إنتي صح..وعي أمك..قوليلها لا تسوي كذة..ترى بعدين أروح أتزوج عليها... قالت ماما بقهر:زوج بناتك بعدين روح اتزوج... ضحك بابا و باس راس ماما:شفتي كيف..بناتك كبرو و حيتزوجوا و يخلوكي..و أقعد أنا معاكي.. انحرجت ماما و بعدت بابا عنها بصمت... ضحكت أنا و قلت:تتزوج على ماما..حيسير شي مو كويس... قال بابا باحتقار:تهدديني؟! -ايوة... ابتسم لكنو قال بعدها بجدية:شوفي..أنا الرجال و واثق منه..و مني شايف أي مانع..لكن الغصب في ذي الأمور مصيبة..إذا بتسمعي كلمتي خير و بركة لكن إذا بغيتي تقرري بنفسك فإنتي أكبر من إني أغصب عليكي و أقرر من غير ما آخذ رأيك..و هذي أمك تعرف سعود و أهله من زمن..اسأليها و اسأليني و أحمد عندك و علي و جود تربية سعود خيرُ دليل..و في النهاية إنتي إلي تقرري... قالت ماما:أنا والله بستخير ربي..و استخيري إنتي كمان يا بنتي و ادعي..إن كان فيه خير يجيبه ربي و إذا كان فيه شر الله يصرفُه عنك... قلت:طيب كيف ذحين..يعني لو ما وافقنا..يزعلوا بعدين مننا؟! بابا:لأ..إذا ما كان فيه نصيب فرح أكلم سعود و أقوله ما كتب الله..هوا جا لحاله عشان أول ياخذ موافقتنا..يقول ما يبغى يخسرنا لو ما وافقنا و ما يبغى يكون فيه بينا أي حساسيات..و ما يبغى رفضنا يأثر على حياة علي و جود و على علاقته بأحمد و معاه حق..من كلامه أنا ارتحت يا بنتي..لكن زي ما قلتلك أنا ما بغصب عليك في شي..و هذي حياتك في النهاية و إنتي إلي بتعيشينها مو احنا... اتنهدت..ذحين لو بابا و ماما يعرفوا إني أنا عارفة من أول..ايش يسير؟! سلمت عليا ماما و باركت لي و دعتلي و بعدها خرجوا من الغرفة و ما مداهم يطلعوا إلا و صفاء داخلة..شهقت و حطيت يدي على قلبي:بسم الله الرحمن الرحيم... جرييت لين عندي:أحلااااااام... -هاااا... حضنتني و كأنها بغت تبكي..ضربتها و بعدتها عني:بنت بلا عبط..ايش فيه؟! -إنتي إلي ايش فيه؟! و ما لقيت نفسي إلا أقولها على كل شي حاسة به..و كان نفسي لو أصارحها بكل شي لكني اتأكدت خلال الدقائق الأخيرة إنو هذا..مو في صالح أحد..أبداً... ^^^^^^^^^^^^^^^^^^^^^^^^^^^^^^^^^^^^^^ في غرفة أم أحمدٍ و أبيه... قالت أم أحمد بثقة:هذا مو شغل رجال..هذا شغل حريم..جود تدري.. -يا شيخة الله يهديكي..و ايش درى جود مسكينة..مالها في حركات الحريم... -سلطان..أنا أدرى..بس خلي الموضوع يتم على خير..وقتها بسألها..تدري..صدقني تدري..أنا فاهمتلها..هيا تبغى الخير لعمها و لأحلام..و خايفة ما يكون فيه نصيب عشان كذة.. -يا بنت الحلال بلا شك زايد..حرام..والله جود مالها في ذي الحركات... -يا سلطان سعود أبرئ من كذة..مستحيل كان يفكر في أحلام..مستحيل... -كلنا كنا نتمنى سعود..إنتي بنفسك قايلتلي إنك تبغي سعود لأحلام... -ايوة و كنت أدعي ربي يجيبوه إن كان فيه خير لبنتي..بس جود تدري..مستحيل سعود يفكر مجرد تفكير في أحلام..مو عشان شي لكنه أجبن من إنه يخطب من معارفه..فهمت؟!،هذي هي الفكرة..و جود ما غلطت لكن أنا لإني من فترة شاكة فيها..كنت أحس فيها شي مو طبيعي..و ذحين شوفو جا.. كاد أن يلومها لكنها منعته:و لا تقول حرام..عادي..بالعكس أنا مبسوطة منها..هذا تصرف حكيم و أريح لنا و لها..و إذا ربي كتب نصيب بسألها و بأتأكد من شكوكي..و عادي ما فيها شي... -والله الحريم مرعبات..أنا ما أحبكم... -يا رب تلطف بي... -لكني أحبكِ... ابتسمت أم أحمد:و أنا أيضاً... ************************************************** * سعود،،، ("-أ..أنا جاي هنا لحالي مو من عدم احترام أو شي..لاوالله..لكني ما حبيت أعلن أي شي قبل ما آخذ منك كلمة..و احنا أهل..و إنتا يا عمي عندي زي أبوية الله يرحمو..أنا يا عمي..أبـ..أبغى..أنا جاي متقدم و أتمنى إنكم توافقوا عليا كـ..كنسيب لكم..أنا أتشرف بإني أكون زوج لبنتكم..بنـ..بنتكم أحلام..و.."تابعت بسرعة"..عمي أنا جاي لحالي زي ما إنتا شايف..من غير علم أحد عشان ما نفتح أي مجال للحساسيات إنها تدخل بينا..أنا ما كلمت أحمد و لا جود لإنو الزواج قسمة و نصيب و أنا خايف ما يكون بينا نصيب..أنا مستعد لأي تساؤلات..و حاضر لأي طلبات..إذا كان فيه نصيب و إذا وافقتوا جبت أهلي و خطبنا لكن إذا الله ما كتب فاعتبر إني ما جيتك و ما طلبتك شي..و..ايوة..أنا خايف تحز في نفسك إني ما جبت أخواني و لا أمي..لكن أنا زي ما قلتلك معتبركم أهلي و واثق إنكم ما رح تفهموني غلط..أنا أخاف إذا الحريم دريوا يطلع كلام بايخ..و مالو داعي الكل يعرف إننا خطبنا من عندكم و رفضتوا..لا سمح الله يعني لو ما كان فيه نصيب..و أهلي ما يتقبلوا أمور زي كذة..أخاف يقولوا خلاص اتركهم أو ابعد عنهم و لا تعمق العلاقة معاهم..أخاف تتأثر علاقة جود بعلي و هذا شي ما أبغاه لبنتي..أخاف علاقتي بأحمد تتأثر و هذا أكثر شي أنا أخاف منه..عشان كذة..أنا أبغى يتم الموضوع بيني و بينكم..أحسن ليا و لكم..و أحسن لبنتك كمان..إنو ما يقولوا انخطبت و رفضوه و زي كذة... و رح أكون في انتظار ردك..." كدة..طلعت كل دا الكلام مرة وحدة..فرطت كل شي..استرسلت..و ليه لأ..مع نظرة عمي أبو أحمد المهتمة..مادري..لكن قلت كل إلي في قلبي و لو ما اتداركت نفسي كان مداني فرطت الهرجة كلها!! طالعت فيه أستنى ردة فعل فابتسم و قال:عسى خير.."وقف"..و جيتك على راسي..و زي ما قلت إنت ولدي..و أنا أبغى لولدي الخير... وقفت و سلمت على راسو:و كلم أحمد..رح يزعل لو عرف إني ما قلت لو من قبل..بس فهمو إنو أنا كنت خايف من الحساسيات إلي تجي مع هذي الأمور في العادة.. -ما عليك..بكلمه أنا.. -و علي كمان..ما رح يخليني في حالي..حيعصب... -علي معصب من غير شي..عادي ما عليك... ابتسمت و ودعنا بعض..خرجت من بيتهم و قلبي يدق..ايش سويتي فيا يا جود..الموضوع جدي دحين..و لا مفر..ما يمديني أتراجع..خلاص..خلاص..ارتبطت بناس..ارتبطت بناس!!) كان هذا إلي سار و كان عمي لطيف..بس ما كانت تفرق معايا..حاسس بالخوف و بالتوتر..أول ما رجعت استلمتني أمي..قلتلها إنو وعدني و قال "عسى خير"..فدعتلي و استمرت تدعي و حسيتها اندمجت في الدعاء فانصرفت عنها و لمن جيت خارج لصلاة العشا وقفتني منورة،التفت لها فقالت:بابا..إنتا..تسوي جواز؟ -نعم؟! آخر شخص اتوقعت يسألني كان منورة!! -بابا لمن إنتا يسوي جواز ما ينفع خوف..لازم قوة..بابا إنتا طيب إن شاء الله ربي يجيب طيب..لازم دعاء..لازم نروح مكة عشان نصلي و نسوي دعاء..بعدين بابا مافي بركة كده..روح مكة... اتنهدت بابتسامة:إن شاء الله نروح مكة... قالت منورة بزعل:إنتا ما تبغى أنا يعرف؟!،أصلاً أمي كل شي تقولي..أنا هنا يعرف كل شي إنتا ما تعرف ولا شي... ضحكت:يا أمي مو ما أبغاكي تعرفي..بس استغربت ايش دراكي؟! -أعرف أنا أعرف... -طيب ما دام تعرفي ادعيلي ربي يوفقني..و لا تقولي لأحد و اصحك... قاطعتني:بابا... -نعم... -روح صلاة..روح يلا... رحت و أنا مندهش من الأسلوب..كأني بزر عندها..لكن معليش..هذي منورة..مافي أحد ما يحبها..بنت ناس و طيبة..الله بس يهديها و لا يغير عليها... و طبعاً ما قاومت بعد الصلاة إني ما أتصل على جود إلي هدتني و قالتلي على أشياء كثير.. كانت تكلمني بأسلوب المعلم..و ما أخفيكم إني اتضايقت..مو عشان شي..بس كل ما أحس إنو جود كبرت أتضايق..أحياناً و بكل أنانية أتمنى لو إنها لسة صغيرة..ما تقدم على أي خطوة من غير ما تقولي.. إلي يضحك إنو كل الموازين اتقلبت..أنا إلي دحين معد أقدر أسوي أي شي من غير ما أقولها!! ************************************************** * نعم هي حقيقة .. مزيجٌ غريب من السعادة و الحزن يتسسل لقلوب آبائنا إذا ما شعروا باستقلالنا و قوتنا .. فخر و إحساس بانخفاض القيمة .. هذا بالنسبة لهم .. لا يعون أن معزتهم لا تُفنى ~ جَ ـرة |
الجزء الثاني و العشرون (سأمضي قدما..) جود،،، قلت بحيرة:طب كيف دحين..أسوي عشا و لا ما حتتعشى معانا... قال علي:والله مادري..أنا بس لو أعرف..ايش يبغى أبوية مننا؟! قلت و أنا أمدلو الشماغ المكوي:إن شاء الله خير... -لا بس مو من عوايده يجمعنا..بعدين ليش أكد إني أجي لحالي و ما أجيبكم معايا؟!،والله قلقني... -علي ايشبك..إن شاء الله مافي شي..إنتا كلمت أحمد؟! -ايوة و قلو أبوية نفس الكلام:تعال من غير أهلك..أبغاك إنتا و أخوك في موضوع ضروري... -خلاص حبيبي إن شاء الله خير..إنتا روح دحين و شوف ايش يبغى و طمني ها..لا تخليني على أعصابي... -إن شاء الله..لا تستنوني عالعشا..اتعشوا إنتوا..أمي ما حتخليني أطلع من غير ما أتعشى معاهم... -خلاص إن شاء الله حبيبي... سحب علي نفس و طلعو..يا قلبي عليه متوتر..يا ليت لو أقدر أقلو و أريحو..بس إلا تعالو هنا..لا يكون عمو جامعهم لشي تاني..وي الله يستر..لا إن شاء الله..أكيد جامعهم بيكلمهم في موضوع عمو... ودعت علي عند الباب و قفلتو لمن راح..جا عندي سعود:ماما.. -ها حبيبي... -ايش فيه...؟! -ايش فيه؟! -ايشبو بابا شوية و يبكي؟! -ههه وي..متى شوية و يبكي؟! -يعني كده..مفجوع؟! -ايوة مفجوع..مو حيبكي..لا بس عشان أبوية اتصل عليه فجأة و قلو يروح لو..فقام هوا انفجع... -طيب أبوية ايش يبغى بابا؟! قلت و أنا أمشي و أمشي سعود معايا:والله مادري حبيبي..بس عادي يمكن يبغى يكلمو في أي شي..بابا انفجع عشان اتصل عليه فجأة... -آآآآآآهـ... -يلا نشوف شي ناكلو..بابا يقول ما حيتعشى معانا... -ايش ناكل؟! قلت و احنا ندخل المطبخ:أي شي... اتعشينا أنا و سعود و لعبنا و قرأنا و سوينا أشياء كتير قبل..ما يرن جوالي..كان عمو..أول ما رديت قال بفجعة على لهفة على مادري ايش:جود..قلي حياكم الله في أي وقت... اتهللت أساريري و كنت على وشك أصرخ من الفرحة لكني حسيت بالجو اتغير..قلت:مين إلي قلك كده و على ايه؟! -عمي..آآ..عمك أبو أحمد و عمي كمان... قلت بحيرة:على ايه و ليش تروح عندو؟! اتغيرت نبرة عمو و هوا يقول:جود تستهبلي...؟! قلت بصدمة سعادة:عمو من جدك..و كيف كده من غير ما تقولي... عمو كان يعترض و أنا أسوي نفسي دوبي عارفة.. كان نفسي أعبر من جد عن مشاعري لعمو بس أنا حاسة بعلي جوة الغرفة..و خايفة يعرف إني أنا في الموضوع..حيوريني شغلي!! قال عمو أخيراً:جود..انقلعي... و فصل... عضيت شفايفي..مادري أضحك على نبرة عمو المقهورة مني و لا أسجد لربي شكر و لا أنطنط زي المجنونة... سحبت نفس عمييييق قبل ما أتذكر فجأة..قال لجدة؟!،عشان أعرف..لو ما كان قلها أسوي نفسي ما أعرف عشان يبان لها إنها عرفت قبلي... التفت و لقيت علي واقف يطالع فيا بحيرة...قلت:أوه علي متى جيت؟! قال و هوا يرمي شماغو على السرير:ايش قالك عمك؟! قطبت حواجبي..ايشبو هوا زعلان ولا يتهيأ لي... -ما..يقول إنو عمو..أبوك يعني..قلو يجي في..في أي وقت... -ليش؟! -آآه..عشان..احم.."بحماس"..عمو يبغى يتزوج أحلام... -و إنتي..تبغي..تفهميني إنك مااااالك أي يد في الموضوع..صح؟! -ها... قال بسخرية:ها؟! -آآآم..إنو... -إنوووووو... حسيت كأني مجرم يستنى العقاب..قلت بسرعة و بصوت باكي:طيب أنا خُفت ما يوافقوا أهلك..عمو كان عادي عندو يقول بس أنا خفت إنو أهلك ما يوافقوا..فقلت ليش المشاكل..و ليش نحرجكم بإننا نتكلم بالصوت العالي..خلاص بالسكيتي إليييييين ما يوافق أبوك و أمك و أحلام... -آه..يعني لو كان عمك ما يوافق شروط أبوية كنا حنتفشل و نوافق بس عشان ما نزعلكم..مثلاً يعني..مثلاً... -شفت..شفت كيف؟!،مشكلة بيني و بينك..أنا ما قلت إنكم حتتفشلوا بس عمو شرح لعمي وضع عائلتنا..عندنا احنا كتير أفراد سخيفين في العائلة و المشكلة إنو جدو الله يرحمو مو موجود..لو كان موجود ما كان ادخلوا..طيب؟!،كانوا حيبهذلونا لو ما كان بينهم نصيب..و رفضوا ولدنا و مادري ايش شكلو..كان أزعجوني و أزعجوا عمو..ما كان خلونا في حالنا..هما ما عندهم فكرة إنو حتى الأهل يرفضوا بعض عادي..فخلاص..خلي الموضوع يتم بهدوء و إذا وافقتوا يسير بشكل رسمي..مالو داعي تزعل..أنا بالذات إنتا ما أبغاك تزعل..كنت خايفة من دا الشي و متأكدة منو بس كنت مضطرة..و بعدين عمو كان يقولي ما أبغى لو ما كان فيه نصيب تتأثر علاقتك بعلي و علاقتي بأحمد..و لا نكذب على نفسنا..احنا فينا نوع من السخافة و الـ..البدونة كمان..فنتجنب دا الشي فينا أحسن... لف علي وجهو و هوا يتنهد:شوفيكي و إنتي تنطقي بدونة..طالعة من طرف لسانك..انطقيها عدل أول... اتخصرت:يا سلام..هيا ايش فيها دي حروف أنا أنطقها غير..بدونة..بدونة..عادي... طالع فيا باحتقار:كم مرة قلتلك لا تتخصري قدامي... طالعت في يدي:فين أحط يدي يعني؟! -حطيها على فمك و اسكتي... حسيت بالقهر..مشيت للحمام و أنا أبربر:عاملي ضجة على ولا حاجة..بدل ما يباركلي على زواج عمو حبيبي الجنتل مان..جاي يضارب معايا... و دخلت الحمام..ما أظن سمع حاجة..دايماً يقولي إنو ما يسمع ولا شي من إلي أقولو لمن أكون معصبة..علي يقول إنو ملامحي و هيا تتغير أكثر إثارة من كلامي..عشان كدة بالعادة ما يتأثر من كلامي..أهبل..بس... ضحكت بخفة..خلوني بس أبكي..والله يقلب الدنيا و هوا يتأسف..لمن أبكي على شي أبداً معد يرجع يسويه أو لمن أزعل بصمت..علي ما يحب أحد يقولو في الوجه إنو غلطان..يعصب..بس لو أحسسو بالذنب علطول يتأثر و يتجاوب...! خرجت من الحمام و لقيتو في وجهي..حطيت يدي على قلبي:بسم الله الرحمن الرحيم..ايشبك؟! كان مبتسم و حسيتو حيقول شي فسكت..لكنو اتجاوزني و دخل الحمام..طالعت ورايا في الباب المقفول..و بعد ثواني حمدت ربي إنو ما قلي شي..اتذكرت حاجة ممكن استخدمها ضدو..فاكرين..لمن كنت أبغى أقولو شي و صرخ عليا:"أبغى أنااااااام"؟! أنا فاكرة و داك اليوم كنت أبغى أقولو إنو عمو قلي حيخطب وحدة من القرايب..ما كنت حقولو إنو أحلام..و كنت ناوية أقولو إنو عمو مهو راضي يقولي مين..بس دحين..لو رجع فتح الموضوع أنا حذكرو بالصراخ إلي صرخو عليا و حقولو إني كنت أبغى أقولك بس إنتا ما كنت راضي تسمعني..عضيت شفايفي..يااااي..شي أذل علي بيه..والله أنا أوريك يا علي..قلك ماسك عليا حاجة..طيييييب!!... -مجنونة إنتي؟! فزيت و التفت..كان علي واقف ورايا... قال بضحك:ليش تضحكي... حط ايدو على خدي:حرارتك طبيعية..ايش فيكي أجل؟! بعدت يدو بحرج:اتذكرت شي يضحك... قال و هوا يمشيني إلين السرير:ايش هوا؟! -ما رح تفهم لإنو في نص قصة..لازم تكون عارف الأحداث... -حكيني طيب... اتكتفت:مابغا..إنتا دحين تبغى تنام؟! قال بنفس أسلوبي:لأ مابغا أنام... -خلاص طيب أنا أبغى أنام... -لأ..مو على كيفك... -لا والله... -ايوة الله... قلت لمن حسيت بتوتر مفاجئ:احم..تعرف ايش أصل ايوة الله إلي نقولها؟! قال و هوا يهز راسو:قد قلتيييييلي... -طيب أصل ايش و... -قد حكيتيني الحكاية... -ووووو.... -مافي مافي لا تحاولي تصرفيني... -أصرفك من ايش؟! مسك وجهي و اتغيرت ملامحو:بس من جد..من زمان ما فرحت بذي الطريقة..كنت مقهور على أحلام..كنت مقهور على أختي..و ذحين... حطيت ايدي على ايدو:الحمدلله..صح..المفروض أباركلك..مبروك... حضني:شكراً جود..ما أعتقد سعود البنوتة لولاكي كان حيفكر إنو يخطب... ضربتو:عمو رجال... -قصدي إلي يستحي... ************************************************** ** كنت قاعدة أكلم جدة في التلفون..قلت:جدة أجليها كم يوم..خلينا نثقل شوية... -يا بنتي اتصلت عمتك تقول حياكم الله بكرة..عاد خلاص..قالت الله يحييكم..نروح يا بنتي ما فيها شي... قال علي إلي رمى نفسو على الكنبة جمبي:أففف على المزعجين..بكرة..من جد ما تنعطوا وجه... طالعت في علي بقهر بعدين قلت لجدة:جدة علي قاعد يتريق..يقول إننا مزعجين..جدة على الأسبوع الجاي.. -خلاص..بكرة يعني بكرة... -جدة ما يسير كدة..أعطونا الموافقة من هنا نروح لهم من هنا..والله ما يسير... شال علي سعود و حطو فوقو و قلو:شايف..شايف أهل أمك كيف يجرو ورا عمتك..يالله نشمت فيهم... قال جملتو الأخيرة بسعادة..طالع فيه سعود لثواني بعدين طالع فيا و طلب السماعة..أعطيتو وقال:جدة... -ايوة أنا سعود..كيفك؟! -جدة إنتو ليش تجروا ورا عمتي؟! -يعني عمو يبغى يتزوج أحلام؟! ابتسم سعود:طيب..طيب أنا خلاص موافق..تعالو... أنا ما اتحملت و فطست ضحك و علي معايا كمان... أخدت السماعة من سعود و كانت جدة تضحك..قلت:شفتي كيف..وافق لنا سعود؟! ضحكت جدة:والله ليت كل الرجال سعود.. ضحكت:من جد.. -هيا يلا مع السلامة..بروح أشوف عمك و أبلغُه... -إن شاء الله..سلميلي عليه..مع السلامة... -في أمان الله... و قفلت من جدة..علي كان قاعد يلعب مع سعود و ينكت معاه..قاعد يحرشو علينا.. طالع فيا علي:جود.. طالعت فيه فقال:ذحين..لو بكرة حتجونا و تخطبوا أحلام..إنتي و سعود و جدة..أنا حوصلك لبيت أهلي؟! قلت بحيرة..ايـ ..ايوة... ما فكرت في دا الشي..أصلاً..صرخت:آآآه..علي... -بسم الله ايش فيه؟! -ايش أقول..أطالع في أمك و..و..مابغا... -يلا..تدريب عشان لمن تخطبي لسعود..صح سعود..مين تبغى نخطبلك..والله يا سعود..ما رح أزوجك إلا ملكة جمال..وحدة... سعود:مابغا ملكة جمال... طالعت فيه:مين تبغى؟! -مممم..أبغى..وحدة.. علي فجأة:أص..عيب..إنتا لسة صغير... كنت حدافع عن سعود لكنوا تكفل بنفسو:وي بابا..إنتا إلي بدأت..أصلا مابغا دحين..خلاص لمن أكبر.."نط عندي"..ماما..دحين عادي عمو و أحلام يتزوجوا..مو لأ؟! علي باستخفاف:ايش الكلام الكبير ذا؟! قلت:عادي حبيبي ايش فيها؟! -عمو..و أحلام عمة..زي عمو أحمد و عمة صفاء... -لااااا حبيبي لأ..عمو سعود عمي أنا..هوا يسير كأنو جدك..شفت جدو..بابتي..عمو سعود يسير أخوه..بس أحلام..عمتك عشنها أخت بابا..فهمت حبيبي؟! -طب ليش أنا أقول لعمو سعود عمو مو جدو؟! -لإنو عمو سعود صغير..حرام تقلو جدو... علي:مو صغير..أكبر مني... قلت باستنكار:سمي على عمي..بكم أكبر منك يعني... -بكثير..بكثير.. -لا مو بكثير..مادري بكم بس مو كتير... -خلاص طيب لا تزعلي..سعود..مقتنع إنو حلال؟! التفت لعلي:علي لا تدخل دي المصطلحات في بالو..حبيبي سعود.. قاطعني سعود:مو أخوان..أعرف.."ابتسم"..بس كنت أبغى أعرف ليش أنا أقول عمو...! ابتسمت و بستو:حبيبي إنتا..الله لا يحرمني من دي الابتسامة... و حط سعود راسو على صدري..ابتسمت لمن حسيت بيه يحاول يتجنب بطني..بس يقرب راسو من صدري..يا رب..متى أولد و يرجع سعود ينط عليا بكل جسمو..يوه..هههه..حتكون فيه أخت أصغر..لازم حتقعد في حضني طول اليوم..ههههه... علي:جووووووود... فزيت:نعم... ابتسم:في مين تفكري؟! عضيت شفتي السفلى و أنا حاطة اصباعي بتفكير مبتسم:مممممممم... ضربني علي بطفولية على يدي إلي عند شفايفي:لا تسوي كذة..لا تسوي كذة... -بسم الله ايش فيه؟! -عيب... -ايش إلي عيب؟! -كذة..تـ..تسوي حركات بفمك... -والله ما سويت شي و لا علبالي شي... -إلا..لا تكذبي.. -سعود أنا ايش سويت؟! قال سعود بحيرة:ولا شي..بس كنتي قاعدة تفكري في أفكارك... قال علي بنفس الراء الخفيفة جداً حقت سعود:تفكري في أفكارك؟!..سعود..ليش عندي إحساس إنك حتكون مغازلجي ناجح؟! قال سعود و هوا يتنهد:مادري..أنا ما عندي إحساس بأي شي... التفت لعلي بيأس:علي منجد..ايش أقول؟! طالع فيا علي:ايشبك إنتي..عادي..أكيد جدة حتتكلم..بعدين..مادري..أحس حيكون شي مضحك..يعني..حتبدأوا قلك رسمية و ثقل و بعدين غصباً عنكم حتقلبوها ضحك..ما أتخيل أصلاً منظر سعود و هوا يتكلم.."ضحك علي"..حيكون تحفة..حبهذلو... -لا الله يسعدك..خلي عمي في حالو..يا رب تيسر بكرة... ضحك علي:جوووود..من جدك إنتي؟! رن جوالي برسالة..فتحتها..قرأت إلي فيها..كتبت حرفين و أعدت الإرسال... علي:مين؟! -هادي... ^^^^^^^^^^^^^^^^^^^^^^^^^^^^^^^^^^^^^^ و جا بكرة..و قررنا إنو أروح على بيت أهل علي مع علي..لإنو علي يقول:مني فايق أوصلك لين عند عمك و بعدين أرجع لبيتنا..خلاص تعالي معايا مرة... اتفقنا نكون هناك بعد العشا..بس علي يبغى يكون مع أهلو في وقت زي دا،قلت:علي الله يسعدك لأ..وديني عند جدة من دحين..و روح إنتا على أهلك..علي الله يخليك... و قعدت أترجاه لكنو رفض..شرييييير..عارف إني متوترة و مبسوط من كده..علي ما زال يستمتع بتوتري و خجلي..يااااااه.. مع دوشتنا و لكاعتنا في اللبس و مع حوستي أنا مع سعود وصلنا بعد انتهاء صلاة العشا تماماً..ابتسمت بنصر..يا ربي يا حبيبي..عمرك ما تخليني لحالي... طالعت حواليا..يوء..سيارة عمو فيييييييييييييين؟! قال علي و هوا يتلفت:شكلهم ما وصلو... طالعت في علي برجاء فقال و هوا يحرك راسو:انزلي انزلي... مسكت يدو فقال:أنْـ..ـزُ..لي... نزلت و قلبي يدق بقوة..ليش متوترة..يمكن عشاني أعرفهم..لو ما كنت أعرفهم من قبل..كان دخلت بثقة..بس أنا أعرفهم و جزء منهم..كيف كده؟! أول ما دخلنا..فقدت الإحساس!! علي دخل بكل أريحية..سعود ما يدري عن شي..أما أنا فدخلت بخطوات قصيرة... "جود.." التفت لسعود:نعم سعود حبيبي..ايش تبغى؟! "جود.." "جود.." التفت لعمتي إلي كاتمة ابتسامتها و ضحكت بهبل:هههه..نعم... -كيف حالك؟! -الحمدلله... -ليش جاية اليوم؟! -ها... صفاء بصوت منخفض:الله..أحب أمي و هيا نذلة... طالعت في صفاء باحتقار فراحت عند علي إلي همس لها بشي فبغت تموت من الضحك المكتوم... طالعت فيهم بقهر..و فجأة ظهر عمي:هلا والله بجود.. سلم عليا:أشوف أهلك ما جو..جود..إنتي عارفة أنا ما أحب الاستهتار..أعطيتونا موعد لازم تلتزمون به... -آآآ..هما قالو بعد العشا..احم..احنا إلي جايين بدري... -لللللأ..صلاة العشا خلصت...وينهم؟! قلت و أنا أحس إني أبغى أبكي:ما..ما... ليش متوترة..ابتساماتهم توتر..ليش يبتسموا بدي الطريقة..أكره دا النوع من الابتسامات..ايوة..هما يبتسموا عشان حسوا بتوتري..لازم أكون على طبيعتي..عادي..ايش يعني..بالعكس المفروض أجيهم واثقة..مو كده..رفعت راسي بقول شي و بس جات عيني في عين عمتي نزلت راسي بسرعة.. قالت:جود..يلا تعالي اخطبي بنتي... دقها عمي:بس..لا توتري البنت..جود..يقولك وراء كل رجلٍ عظيم..امرأة..و أنا قلت إنو وراء الرجل العظيم إلي جاني امرأة..مافي رجال يقول ذاك الكلام..اسأليني في السعوديين..والله ما يقولوا ذاك الكلام المرتب..إنتي محفظة عمك و لا شي؟! رفعت راسي و طالعت في عمي:إلا..عمو يقول..عمو مو سعودي..عمو شي تاني... علي:أقول إنتي..لا تتعنطزي على أهلي لا أوريكي شغلك.. "لحد يضايق أهل صاحبي لا أوريكم شغلكم..علي..تعال هنا..حَرَمي يبغى يدخل" علي:لا إله إلا الله... كان صوت أحمد إلي رجع قال:علي..كأخوك الكبير..آمرك إنك تجي... علي:مابغا..أبغى أقعد هنا... أحمد:علي تعال... علي:جود إنتي اطلعي و أحمد تعال... طالع عمي في علي إلي خرج بصمت و هوا يمثل الصدمة و الخوف..ضحكنا عليه لكننا اتوقفنا لمن سمعنا صوت جرس..كنا في الصالة و كان لها باب.. دخلت مرة أحمد مع بنتها و جدة..شهقت أنا بفرح:جدة... رحبت عمتي بجدة و بدأ الوضع يسير جدِّي..انسحبت صفاء بهدوء و أخدت معاها سعود و بنت أحمد و دخلتنا عمة على غرفة مجلس مقفول للحريم..نادراً ما تفتحوا عمة..لإنها ما تحتاجوا كتير..بس دحين..لإنو رجال و حريم... جلسنا و اتضيفنا..حسيت بالغرابة..أنا لمن كنت دوبي متزوجة كان الوضع أبسط من كده و لمن يكون فيه عزايم أعتبر أنا من أهل البيت و أساعد..ما قد عاملتني عمتي بجدية زي كده..أو خليني أقول عاملت جدة..هههه..المسيطرة على الوضع!! مرة أحمد كانت جالسة جمبي..همست:ما مداني أتصل و أبارك..كل شي سار بسرعة..ههه..مبروك... طالعت فيها:الله يبارك فيكي..أحس مني عارفة ايش أسوي.. -مو لازم تسوي شي..جدتك حتتكلم.. -بس جدة قاعدة تتكلم في أشياء عادية.. -شوية و حيدخلوا في الموضوع..ما شفتي ليلى..غريبة..المفروض تجي... و ما كانت دقائق إلا و ليلى _أختهم الكبيرة_ دخلت بابتسامة:السلام عليكم... سلمت علينا و جلست جمب أمها..رجعت مرة أحمد تهمس لي:بس متى سار كل شي..ما حسيت بأي حاجة؟! كنت حرد عليها لولا ليلى إلي أشرت لنا بابتسامة إننا نسكت..هزت راسها بإنو ما يسير نتكلم فسكتنا احنا الاتنين..ياااا..أحس بحرجي يزيد... طالعت في جدة إلي حطت فنجانها على الطاولة:عاد يا أم أحمد..إنتو أهل و نعرفكم من زمن..ولدي صديق و حبيب ولدك و بعدين ولدكم أخذ بنتنا و حبيناكم و ما شفنا منكم إلا كل خير..عشان كذة..جينا نخطب بنتكم أحلام لولدنا سعود و إن شاء الله إنكم بتوافقوا... ضحكت عمتي:والله يا أم سعود ما دام قلتيها احنا أهل..رح أقول ربي يتمم على خير و احنا سبق و فكرنا في الموضوع..و الكلمة الأولى و الأخيرة كانت لأحلام..أبوها و أنا و أخوانها موافقين..و هيا قالت الشور شوركم..فما أقدر أقولك ذحين إلا ربي يتمم على خير... جدة:هيا على بركة الله..و إن شاء الله ما بنختلف في الباقي..عاد أنا قلت لسعود هوا و الرجال يتكلموا في المهر و الفلوس..أنا مابغا يا أم أحمد وجع القلب..تعبت والله و معد فيا شدة... -سلامتك يا أم سعود ما تشوفي شر إن شاء الله... همست لي مرة أحمد:هيا جدتك أم سعود؟! -لا أم سعد بس تحب تتنادى أم سعود..عمتنا ذكية.. عمتي:جود... فزيت:نعم... ابتسمت:ما سمعنالك صوت... -أمممم..جدة كانت قاعدة تتكلم... -بالله..عشان كذة؟! هزيت راسي:ايوة... -أوه... مادري إذا كان لازم أقول شي..من جد مني عارفة..خايفة لازم يكون فيه شي ينقال..جدة اتكلمت بس هل لازم أنا أقول شي كمان..جدة اتكلمت ببساطة..قالت إنها تبغى تخطب و ردت عليها عمتي بدعاء..أنا..دحين..ايش لازم أقول؟! رن جوالي برسالة..قطبت حواجبي فاتحمحت ليلى..طالعت فيها و لقيتها تهز جوالها..فتحت جوالي بهدوء بينما جدة و عمتي كانوا يتكلموا..كانت رسالة من ليلى: "فين بنتكم..ما شفناها؟!..اسألي عن أحلام ^_*" أوه..ايش دا..ليلى قاعدة تساعدني.. اتحمحمت:إلا يا عمة أحلام فينها..ما شفناها؟! ابتسمت عمتي و التفت لليلى:قومي شوفي أختك وينها... قامت ليلى بابتسامة و خرجت..و بعد بضع دقائق دخلت أحلام بهدوء..لا..ما كانت خجلانة بس رزينة..رحبت فيها جدة و نادتها تجلس جمبها فجلست و سارت بيني و بين جدة..طالعت فيها جدة بحب و مسحت على شعرها:كيف حالك؟! -الحمدلله بخير..إنتي كيفك يا عمة..إن شاء الله بخير؟! -بخير يا بنتي بخير.. جدة كانت محتفية بأحلام إلي التفت لي بشكل مفاجئ و سلمت عليا و هيا جالسة:كيفك جود؟! -الحمدلله..إنتي كيفك؟! -الحمدلله... قالت عمتي:تعالي ماما أحلام تعالي.. راحت أحلام و جلست جمب أمها و فجأة أنا حسيت الوضع غبي..و حسيت إني أبغى أنهي التمثلية دي لكن مادري إذا كان إنهائي هذا حيقبل كشي لطيف أو كقلة ذوق..فضلت عدم المغامرة و آثرت الاستماع لكلام ليلى و عمتي و جدة..أحلام و أنا كنا ساكتن و مرة أحمد تراقب الوضع بابتسامة... اتنهدت..أنا إلي رفضت قدوم أي أحد..الرسالة إلي جاتني كانت من زوجة بابا..أنا ما عندي رقمها بس هيا في آخر الرسالة قالت إنها هيا..سألتني إذا كنت أبغاها تجي معايا..و لا لأ..و أنا من غير تفكير رسلت:"لأ"..حسيت بالذنب بعدين..لكني فعلاً ما كنت أبغى أحد..هما ما يعملولي اعتبار..لو جو كان اتكلموا و طنشوني و يمكن أحرجوني بتعاملهم اللامبالي معايا..رغم إنو أنا إلي تعبت مع عمو و أحلام و مشيت في الموضوع و بعدين عمو أنا إلي أبغى أزوجوا و مابغا أي أحد يتدخل..أكيد دحين حيكتر الكلام عليا بس بكيفهم..كلو إلا عمو..يبعدوا عنو!! لحظة..أنا في ايش قاعدة أفكر؟!..المفروض إني أنبسط..أنبسط و ما أهتم بأي أحد..و حتى لو كنت حقول كلام غلط..عمتي حرمة عاقلة بعدين ناس عفويين و طيبين أحسن من ناس يفهموا في الواجب و نفوسهم زفت..أنا أفهم في الواجب بس ما أعرف لحركات الحريم...أوووووه..مع نفسهم..مين هما؟!..مادري..إلي هوا... ^^^^^^^^^^^^^^^^^^^^^^^^^^^^^^^^^^^^^^ سعود،،، سامعين..سامعين قلبي؟! حطيت يدي على بطني و أنا أحس بالمغص..قطبت حواجبي..يا رب ايش إلي أنا فيه دا؟!،بعدين أنا ساكت من أول و سعد و سعيد هما إلي قاعدين يتكلموا..سعد يتكلم و يناقش العلاقات و سعيد يتكلم في الأمور الجدية المادية و عمي مندمج معاهم... فجأة علي بصوت عالي:سعود تبغى بنادول؟! هدي المجلس و سألني الكل ايشبي..طالعت فيهم بحيرة..طالع عمي في علي:ليش ايش فيه؟! علي ببراءة:لا بس من أول شايفو ماسك على بطنو خفت فيه شي..سعود أجيبلك بنادول..بردان؟!،ليش ترجف؟! قلت:لا ما فيا شي..شكراً... عمي:ذحين إنت بدل ما تقوم تقعد مع نسيبك تتريق عليه..قوم اقعد معاه إنتا و هوا... كان يكلم علي و أحمد..قامو الاثنين و قام معاهم زوج أختهم الكبيرة..جلس علي عن يميني و زوج أختهم جمبو أما أحمد فارتمى جمبي من الجهة الثانية و قال و هوا يلف وجهو:لا تكلمني يا وِحِش... ابتسمت و كنت على وشك أتفاعل معاه في تقليدو لصوت حرمة إلا إنو التفت ليا بسرعة و قال:مو عشان قاعد أمزح تحسب إني مني زعلان..يعني ما قلتلي قبل و فهمت..الرجال ما يبغى كلام و شعشعة بس إني أتصل عليك و ما ترد..هذا شي أنا لا أقبل به... قلت:والله عشان قلت..ما..ما... -ما ما..إنتا بس فالح تقول ما..عمرك في حياتك تعطيني سبب مقنع... قلت و أنا أحرك يدي:ياخي مادري..حسيت إني مابغا أكلمك... علي:ياخي قول إنك مستحي..ترى عادي..كلنا نستحي... قال أحمد بابتسامة عريضة:سعود بطنك يعورك؟! -ها... زوج أختهم:والله أنا أخذت منوم ذاك اليوم..ما عرفت أنام... علي:أنا..ما حسيت بشي... أحمد:لإنك مفجوع... -أنااااا؟! -ايوة إنتا..مبسوط و ما فيك ولا ذرة حيا..كان يضحك و ينكت و عادي... ضربو علي:وجع..وجع..قول ما شاء الله... -أقول لا أفقع وجهك ذحين..أنا أخوك الكبير... قال علي و هوا يهز راسو:أخوية أخوية أخوية..أخوية الكبير..أخوية أخوية أخوية..أخوية الصغير..فجأة جات على بالي..ايش ذا الشي؟! قلت:طاش ما طاش..أعتقد... "سعود.." كملت و أنا أكلم علي:أطفال ألفين و لا شي زي كذة... "سعود.." سعد:سعود... طالعت في سعد:نعم.. -عمك يناديك.. قلت من غير ما أطالع في عمي:طيب... و رجعت لجلستي..ضربني أحمد على كتفي:تستهبل.. علي:رد على أبوية إنتا و جهك... قلت:طيب.. طالعت في عمي:نعم... -كيف حالك؟! -الحمدلله.. -موجود؟! علي بصوت واطي:لا كول مي..ههههه... طالعت في علي مستغرب و عمي قال:نعم يا علي؟! -لا..ولا شي أبوية... -أنا سمعتك تقول شي.. -لا ولا شي... -بس أنا سمعت.. -بس أنا ما قلت شي... -يعني أنا مخرف؟! أحمد:لا وي سلامتك من التخريف... عمي:خلاص يا سعود..أنا معد بناديك إلا أبو سلطان..خلاص..كفاية علي سمى عليك... عضيت شفتي السفلى..حسيت بحرارة مفاجئة في صدري و أنا أسمع علي يقول:مو أنا إلي سميت عليك..مالت عليك..قال أسمي عليك قال!! "بصوت أعلى"..سعود ترى ما سميت عليك... -ها... أحمد:خلاص أبوية أنا وعدتك..أول ولد يجيني بسميه عليك... قال عمي بحكمة:لأ..المرأة هي تسمي..الظلم ربي ما يرضاه..هي إلي تعبت هي إلي تسمي..إلا إن كانت طيبة و راضية لكن ما تجبر على اسم ما تحبه... سعد:بعدين الأولاد دايماً معاها..ما أحس إن الاسم يفرق معايا... و بدأوا عاد يتناقشوا في الأسماء و يتكلموا أما أنا فمن بعد كلمة عمي انخنقت و حسيت إني أناني..لمن لمحت السعادة على وجيههم و كيف إنهم ما اتعاملوا بأي رسمية..كانت كأنها زيارة عادية لطيفة..حسيت إني حقير و أنا أسمع صوت أحمد و علي..كل واحد يكلمني من جهة..من جد حاس إني بشع... كمان..حاس بسعادة..أو بشي من الراحة..الشي إلي قارفني أكثر..لإني حاس إني حرتاح على حساب أحد!! أخذنا الكلام إلين ما جا العشا..كانو علي و أحمد يدخلوا الأشياء..و أنا و زوج أختهم..مادري ايش اسمو..كنا نرتبها على السفرة..جو علي و أحمد و ساعدونا و لمن خلصنا جلسوا الرجال الكبار و جلسنا احنا بعدهم..ما كان ليا نفس آكل..لكن الضوء كان مسلط بشكل مزعج عليا..ليش ما تاكل و والله لتاخذ ذي و ذا الكلام..و أخواني كانو معطيني اهتمام أكثر من اللازم و أنا كنت مابغا آكل..متوتر من الوضع كأي شخص و متوتر كسعود.. أكلت كم لقمة بالغصبة لكن ما قمت من السفرة..عشان لو قمت حقعد و حضطر إني آكل من جد... من جد تعبان و أبغى أروح البيت..يا رب تعدي كل شي على خير... عمي:سعود.. قاطع أفكاري لمن ناداني..قلت:هلا... -ما تبغى تشوف البنت؟! انصدمت من السؤال:لـ..ـلا..ما..عادي..ما.. ابتسم أحمد:سعود من المعارضين للزواج من غير شوفة..مادري إذا اتغير اليوم رأيُه... ابتسم سعد:لأ..الشوفة سنة و أمر الرسول بها.. صلوا الموجودين عالنبي..و الكل أبدى رأيو في موضوع الشوفة إلا أنا..الكل اليوم كان يتكلم إلا أنا..يا ب لطفك..أكره ذي الأجواء... عمي:ها سعود..إذا تبغى تشوف البنت هذا من حقك و حقها..علي أبوية قوم شوف أمك..قلها تكلم أختك... وقف علي و أنا طالعت فيه و رجعت أطالع في عمي بسرعة و أنا أحرك يدي:لا لا لأ..ما..أنا دوبي ماكل..لأ مابغا..مابغا أشوف أحد... ضحكوا أخواني عليا..طالعت فيهم بعدين رجعت أطالع في عمي:أنا ما أهتم في ذي التفاصيل..عمي..أنا ما يهمني الشكل..مابغا أي شي... ابتسم عمي:إنت رجال..و إذا ذي التفاصيل ما همتك ذحين تهمك بعدين... سكت و أنا قاعد أفكر جدياً في الموضوع..ذحين شوفة..معد فيه وقت..و أنا دوبي ماكل..قمت بسرعة للمغاسل إلي عند المجلس..غسلت بسرعة و اتصلت على جود..ردت عليا بلهفة:عموووووو... قلت بسرعة بصوت واطي:جود..ذحين بيخلوني أشوفها و أنا دوبي ماكل..ما قالولي من قبل و أخواني وافقوا..جود مني.. قاطعتني جود:حرسل سعود دحين بعودة.. -ايوة الله يسعدك..بسرعة ها... و ما كانت ثواني إلا وسعود دخل المجلس بابتسامة..جري لين عندي و نط فوقي و جلس..حضني و لف يدو على رقبتي..و مسح عليها..قدرت أشم ريحة العود..خاصة لمن سعود حط يدينو على وجهي:عمو وحشتني.. ضحكت غصباً عني..أكيد جود موصيتو يسوي كده..مسكت يدو و مسحت بها على رقبتو و وجهو..همست:ماما قالتلك تسوي كده؟! ضحك بخفة و هز راسو بايوة،همس في أذني بحماسة:عمو رح تتزوج أحلام؟! ابتسمت لسعود:إن شاء الله.. رجع يهمس بجدية دي المرة و هوا مقطب حواجبو:طب ماما تقولك خليك قوي... -قالت قوي؟! قال ببساطة:لأ..بس نسيت ايش قالت..المهم..من جد خليك قوي.. ضحكت و نزلتو:طيب ياخي حكون قوي... علي:ولدي.. التفت سعود لأبوه إلي كان عند الباب و قال بأمل درامي:بابا... قال علي بنفس الأسلوب:ماذا تفعل هنا؟! رفع سعود أكتافو:ولا شي..بس جيت في مهمة مستعجلة... -مهمة مستعجلة؟! -ايوة من.. قاطعو علي:بس عرفت من مين..ما دام قاعد عند سعود عرفت من مين..بس من وين جايب مهمة مستعجلة ذي؟! -من عندي.."تابع لمن طالع فيه علي بنص عين"..والله..أنا في عقلي الكلمات..من عندي... سعيد:فصيح ولدك ما شاء الله... طالع سعود في سعيد و شمقلو قبل ما يخرج من المجلس..انصدم سعيد و سكت أما أنا اتجاهلت الموضوع و البقية ما انتبهوا لكن علي اللئيم ابتسم بفخر..أشوة جات على ابتسامة مو تعليق ولا شي... عمي وقف:يلا سعود.. طالعت فيه:ايش؟! ابتسم:يلا ما بتشوف بنتي؟! -ها... قومني أحمد:قوم..قوم و احمد ربك حسمحلك تشوف أختي..يلا قوم... سحبت ايدي من أحمد و استلمني علي..همسلي:لا تسوي ذي النظرة قدام أحلام..تراها ما ترحم..خليك عربجي شوية... عمي خرج من المجلس فمشاني علي و أحمد يقول:خليك زي ما إنتا..لا تسمع كلام الأهبل ذا... خرجت و مسك عمي في يدي..ابتسم عمي لمن حس بتعجبي:لو كان والدك _رحمه الله_ حياً لفعل ذات الشيء.. أخفضت راسي و أنا أترحم على أبوية.. دخلني عمي لغرفة صغيرة بسيطة..كانت قريبة من المجلس..دخل معايا و جلس جمبي..حط ايدو على يدي:تدري إني ما كنت أبغاك تروح لأي بيت غير بيتنا..من زمان و أنا أشوف فيك رجال..لم أشعر يوماً لا بطفولتك و لا بطيشك... ابتسمت بتوتر قبل ما ينفتح الباب..وقف عمي علطول و رحب بالشخص إلي جا..اتمنيت للحظة لو كلماتو تتحول لصيغة المذكر لكنها كانت لأنثى... بطني قلبت عليا..لا..أنا دوبي ماكل كمان!!... جلس عمي و إلي معاه في الكنبة المقابلة ليا..قال عمي:سعود..حهديك للخطوة الأولى..اسألها عن حالها؟! قلت و أنا أتجنب النظر فيها:كيفك؟! -الحمدلله..كيفك إنتا؟! -الحمـ..حمدلله.. كان صوتها عميق و هادي..ما حسيت بنفسي و أنا أطالع فيها..حسيت بقلبي يدق بقوة..كانت..كانت هادية..رافعة راسها بس خافضة بصرها..شي غريب فيها يشد... رفعت بصرها و التقت عيونا فأخفضناها احنا الاثنين بسرعة..اتنهد عمي:أنا ما قد جربت الشوفة فمادري لو يحق لي أتريق عليكم و لا لأ.. استغربت من كلام عمي إلي تابع يفسر:أحمد و علي أكدوا إنك مؤمن بالشوفة و من المؤيديين لها و أحلام قالت إن عندها كلام بتقوله لكن اثنينكم ساكتين و تدعوا بالخلاص من ذا الوضع..صح يا سعود..صح يا أحلام؟! طالعت في عمي و انتبهت لها لمن همست لأبوها بشي فابتسم و قال:اتكلمي..قولي إلي تبغيه... حسيت فجأة بإني أبغى أتكلم..ما يسير كذة..لازم أترك انطباع جيد.. قلت:خير يا أحلام..ايش تبغي تقولي؟! طالعت أحلام في أبوها بعدين طالعت فيا..قالت:كنت أبغى أسأل عن الشغل..أنا ما أقدر أقعد في البيت فاضية... قلت بسرعة :ما عندي أي مشاكل في إنك تشتغلي لكن شرطي ما يكون في مكان فيه رجال..مو عشان شي..لكن في شغلي أشوف مناظر غير مرضية و الحريم يتأذوا..و إذا ما اتأذوا يتكلموا الرجال عنهم..أنا أسمع و أشوف أشياء مو كويسة في شغلي... قالت أحلام و هيا تتكتف:أصلاً أنا مابغا.. سكت و أخفضت بصري..أنا أصلاً ما كنت حرضى إنها تقعد في البيت..لا شغلة و لا مشغلة..لا أنا حرتاح و لا هيا... وقفت أحلام بعد ثواني و خرجت من المجلس..تبعتها بنظري..و حسيت بحرج شديد لمن راودتني فكرة إنها..حلوة.. وقف عمي فوقفت..ابتسم و سلم عليا:مبروك... -الله يبارك فيك... مسك يدي للمرة الثانية و خرجني من المجلس و هناك استلموني..أخواني و أحمد و علي... ^^^^^^^^^^^^^^^^^^^^^^^^^^^^^^^^^^^^^^ جود،،، أول ما رجعت أحلام سلمنا عليها و هيا كانت خجلانة لكن محتفظة بابتسامتها..كانت عمتي حاضنتها و تبوس فيها... صفاء بحماس:أحلام أحلام..كيف..حلو؟! التفت لصفاء و أنا متخصرة:طبعاً عمو حلو... لكن صفاء سكتت و اكتشفت إنها أكلت نظرة محترمة من عمتي..لوت شفتها و لفت وجهها بعيد.. عمتي و هيا تترك أحلام:بس والله فاجئتونا يا جود..ما قلتو إنو فيه شوفة ولا طلبتو... قلت بصدق:و أنا يا عمة مادري عن شي..عمو لمن اتصل عليا كان مفجوع..الظاهر عمي و بابا و عمي سعد قرروا فجأة... جلسنا و عمتي تقول:لا بس والله عشانهم..ما أحسها مريحة لمن فجأة..أحسن الاثنين يتجهزوا لها من قبل... -ايوة من جد..بس خلاص حصل.."ابتسمت"..إن شاء الله يوفقهم ربي... أمنوا الموجودين..قالت جدتي:هيا يا بنتي شوفي عمك..نمشي ذحين... عمتي:ليه يا خالة..خليكم..لسة ما شربنا الشاهي... ليلى:ايوة جدة الله يخليكي..خلينا شوية نقعد مع بعض... -والله يا بنتي..خلاص تعبت... قلت لجدة:جدة..من جد أتصل على عمو؟! -ايوة.. -من جد من جد دحين ولا شوية كمان... جدة بقلة صبر:جود!! قلت و أنا أتصل:طيب... صفاء:الله..جود تتهزأ... -ايييييييه..ما اتهزأت..ايوة..ألو.. -السلام عليكم.. قلت بسعادة:وعليكم السلام..كيفو عمو؟! -..طيب.. ضحكت على طريقتو..كان متحفظ و يقولها بشدة..قلت:طيب يا سيدي جدة تقولك يلا... قال بحماس:ايوة يلا..تلبس عبايتها و تخرج... -عمو..محد حيفسر كلماتك على إنها خجل.. -ها؟! -ليش متحمس؟! قال بصوت واطي:نفسيتي تعبت..أحس المجلس مظلم و فوقي لمبة صفرة... -معليش معليش.. اتنهد و حسيتو يبغى يقول شي فقلت:ها حبيبي؟! قال بهدوء:ولا شي..بس.."اتنهد"..خلاص..خلي أمي تجهز و أنا بشغل السيارة... -طيب حبيبي يلا مع السلامة... -مع السلامة... جدة:ايش يقول؟! -يقول يلا اجهزي.. -ما قال شي ثاني؟! ابتسمت:لأ... عمتي:صفاء قومي جيبي عباية جدتك.. راحت صفاء و جدة تقول:ما بتروحي لبيتك إنتي؟! قلت و أنا أساعدها تقوم لمن جات صفاء بالعباية:أكيد علي يبغى يقعد مع أهلو... -خليه و تعالي... ما عرفت ايش أقولها بس عمتي قالت:إنتي يا أم سعود اقعدي عندنا... -والله يا بنتي بروح بيتي أرقد.. ساعدت جدة في لبس العباية و وصلتها لين الباب و كنت في طريقي للباب أتكلم مع منورة إلي كانت متحمسة آخر شي... اتمنيت لو ألاقي عمو عند الباب لكنو كان _ زي ما قال _ في السيارة..كنت أبغى أسلم عليه و... قلت بدهشة مبتسمة:عمو!! -كنت أشغل السيارة..خلاص جهزتي أمي؟! جدة:ايوة خلصت... اتجهت لعمو و حضنتو..بستو:حبيبي إنتا..ايش سويت؟! قال بتوتر:مادري جود.."بصوت أوطى"..شكلي حآخذ حبوب منومة... -لأ ما تاخد ولا شي..تصليلك ركعتين و تحمد الله..بعدين أصلاً المفروض ما تكون عندك... اتنهد و قال:أبغى أكلمك في شي..متى حتنامي؟! ابتسمت:ما أعتقد حنام اليوم..كمان علي يمكن يطول هنا..أكيد يبغى يقعد مع أهلو..فإنتا لو ما نمت اتصل عليا حتى لو متأخر عادي... -لو ما نمت أتصل؟! ابتسمت:اتصل... -خلاص طيب..يلا أمي... و مسك في يد أمي و خرجوا..قفلت الباب و التفت فاتفاجأت بأحمد في وجهي..طالع فيا لثواني بصدمة و اختفى بعدها..سحبت نفس و خرجتو و حاولت أتمالك نفسي..بسم الله من فين طلع؟! رجعت للصالة بهدوء و استغربت لمن شفت مرة أحمد تلبس عبايتها..قلت:حتروحي؟! -ايوة..أحمد يقول تعبان و يبغى ينام.. هزيت راسي و أنا أفكر..عشان كده جا للباب..يا ربي..حاسة بالذنب..أرعبتني فكرة..تخيلوا علي يدري..والله يسويلي فضيحة..أنا لمن أرد على سلام أحمد يفتني كيف لو يدري إنو شافني؟! سألت مرة أحمد عن بنتها فقالت لها صفاء إنها في غرفة الألعاب..غرفة صغيرة جوة المطبخ..المفروض إنها مستودع بس عمتي مخليتها للأطفال... خرجت زوجة أحمد من الغرفة و عمتي كمان.. بعد مدة رجعت عمتي و هيا تضحك..قالت:جود..ايش سار؟! -ها.. -طلع أحمد في وجهك؟! -ها؟!..لا كنت..إنو كنت أمشي جدة للباب و..و.. ضحكت عمتي و هيا تجلس جمبي:هوا قلي و هوا مفجوع..يقول حرام..جود صغيرة و حامل..هذا ظلم يا أمي..ربي ما يوفق أخواتي بعدين.. قلت باستغراب:مو أول مرة أحمل.. ابتسمت:بس ما زال مهو مقتنع..لإنو شافك و إنتي بيبي.. قطبت حواجبي..أنا عارفة إنو ما يشوفني كبيرة..يبان من طريقة كلامو لمن أرد عليه في التلفون..قلت بسرعة لمن انتبهت لشي:قلك قدام زوجتو؟! ابتسمت عمتي:لأ..كانت تلبس بنتها الجزمة في غرفة الألعاب و تلم أشياءها... اتنهدت براحة..ما رح تتقبل الفكرة..قلت:عمة..مع احترامي الشديد..عمو و ولدك أغبى رجالين شفتهم في حياتي..إنتي عارفة لمن أي أحد يتصل يطلبني كان يقول استني حبيبي و زي كده يكلمهم..و ما كانوا إلي يتصلوا صحباتي كانوا بنات يجيبوا رقمي مادري من فين و يتصلوا في الاختبارات النهائية بس..فكنت أنحط في مواقف محرجة..يا إنو يعجبهم يا إنو يدقوا بالكلام و يتريقوا... أحلام:البنات هبل..الكلمة ذي تطلع عفوية عادي.."وقفت"..تصبحوا على خير... قلنا:"و إنتي من أهلو"،و بعد ما خرجت انتبهت إنو سعود و علي مو موجودين..قلت باستغراب:فين ولدي..و علي..وي عمي كمان فين؟! صفاء:ولدك يلعب بالجوم بوي حقو و بابا و علي ما شفتهم خرجوا من المجلس.. و ما كملت صفاء جملتها إلا و علي و عمي داخلين.. جلس علي جمبي:جود.. -نعم؟! -خطبتي أختي خلاص؟!إلا فينها..هي..لا يكون عمك أخذها... -طلعت تنام فوق..بعدين مو أنا إلي خطبت جدة و عمو هما إلي خطبوا... -لا والله..أصلاً إنتي حرمة عندك كيد نسا..من جد كيدهن عظيم..تلفي و تدوري و مسوية مالك شغل..لكنك تشتغلي من تحت لتحت..حركات حريم..أعوذ بالله... -ايوة..حركات حريم و مبسوطة بنفسي..ما رح تحسسني بالذنب... -و مين قال أبغى أحسسك بالذنب؟!..أصلاً إنتي ما تحسي بالذنب... -أنا ما رح أرد.. -أحسن أصلاً... عمي:علي... -نعم... -إنت ليش مؤذي و مزعج؟! -أنا مني مؤذي و مزعج... صفاء:مافي مؤذي و مزعج يقول إنو مؤذي و مزعج... علي:اسكتي إنتي لا ذحين أقول لجود إلي قلتيه عليها... قلت:أنا لا أستجيب للنمامين... علي:أنا نمام؟!،قولي..يلا قوليها..أنا نمام هااااا؟!،عشنك ما شفتي أبو مخظر إلي في معايا في الشغل..كان عرفتي النمامين من جد... قلت بتفكير:مخظر؟! عمي:الأغلب إنها مُخضَّر.. قلت:نطقها يجيب الهم..ايش دي الأسامي؟! عمتي:كان خضر أحسن... علي:الرجال بدوي..لسة عندهم أهل في الصحرا... حسيت فجأة بوجع..قطبت حواجبي و عضيت على شفايفي لثواني قبل ما يزول الألم..رجعت لوضعي الطبيعي و لانت ملامحي و رجعت أبتسم و أسمع للكلام... عمتي:جود.. التفت لعمة:ها... فقالت بقلق:فيه شي يعورك؟! -ها..لالا.. طالع علي فيا:ايشبك؟! قلت باستغراب:ولا شي..ما فيا شي... و بعد ثواني قام عمي:يلا..تصبحوا على خير... ردينا عليه:"و إنتا من أهلو"،و أول ما طلع نطت عندي صفاء:جود أبغى أسمع البيبي... ابتسمت:تعالي..بس لحظة..ولدي فين؟! وقفت صفاء:مادري..بروح أشوفو... و راحت و علي يقول بتوجس:جود..تبغي نروح و تولدي؟! ضحكت:ليه على كيفي متى ما بغيت أولد أولد... ابتسم علي:والله فلة..تولدوا متى ما تبغوا..لو أنا حرمة و الولادة كذة كان ولدت آخر السنة عشان آخذ إجازة أمومة و بعدها إجازة صيف... عمتي:لا والله..الحمدلله ما ندري عنها.. قلت:من جد..والله كان كل يوم يطلع زوج الوحدة بشي..مني فايق..مشغول..عندي اجتماع..كويس إنو شي إجباري... رجعت صفاء بسعود..تركت يدو و جات عندي و حطت أذنها على بطني و هيا مبتسمة..صرخت بحماس فجأة:سمعت سمعت... قال سعود بانزعاج:بشويش على مامي... طالعت صفاء فيه باحتقار:لا والله..هي إنتا و وجهك... نقل سعود بصرو من صفاء ليا و قال:ماما..دحين هيا سوت قلة أدب..أسوي أنا قلة أدب؟! قلت:لا حبيبي..خليك أحسن منها..بعدين ما ينفع تغلط على إلي أكبر منك... علي:لا يا سعود..إلي يقل أدبه عليك قل إنتا عليه أدبك..احنا في غابة حبيبي..القوي ياكل الضعيف..و المؤدب عندنا ضعيف... بعدت صفاء عني:والله حينصرع مسكين..حبيبي سعود..أنا عمتك و قليلة أدب..ايش تسوي؟!،مالك إلا تصبر عليا..بس لمن واحد في المدرسة _إن شاء الله_ بعدين و لا في الشارع يطفشك و لا يضربك و لا حتى يسبك لا تسكت..وريه شغلو..خليك رجال... سحب سعود نفس قلك طفش مننا و بعدين جا عندي..جلس جمبي و قال:ماما..دحين عمو يسير عروسة؟! ضحكت:عريس مو عروسة... -طيب..أنا رح أشوفو؟! -إن شاء الله حبيبي... -طيب أبغى أشوفك..سيري عروسة تاني... -بسم الله عليا..قول كلام طيب... علي بدرامية:مسكينة..ما تقدر تتخيل حياتها مع غيري... ما أعطتني عمتي فرصة أرد لمن خاصمت:و إنتا تتخيل جود تعيش مع غيرك... طالعت في علي إلي قال و هوا يرفع أكتافو:عااااااااايدي... عمتي:بالله؟! علي:ايوة عادي..جود إنتي عادي عندك أعيش مع وحدة غيرك؟! والله لأطربقها فوق دماغك..قال تعيش مع غيري قال.. أنقهر زي كده..أنا ما أقدر أرد على علي قدام أحد..ما يسير أصلاً..و هوا كمان..ما يهناه يمزح دا المزاح إلا قدام أهلو... علي:جووووووووووووووووود... -هااااا... -عادي ولا مو عادي..عادي ولا مو عادي؟! قلت و أنا أطالع فيه:أنا مابغا أرد... -قولي مو عادي و انفكي... علي كان رايق و أنا فجأة مزاجي خرب و أحس إني أبغى أكون في بيتي..يا دوبك ماسكة نفسي لا أقل أدبي قدام عمتي و صفاء... عمة:علي..روح البيت يا بابا..روح على بيتك... شهق علي:تطرديني يا أمي؟! -ايوة..عشان أنا أبغى أطلع أنام... -روحي نامي و احنا هنا نقعد... صفاء:روووووووووووووحوا..خلاص طفشتونا.."و مدت لسانها"... ابتسمت عمة ليا:جود تبغى تروح على بيتها..خذها يلا..و إذا تبغى ترجع بعدين ارجع... قلت:ها..لا عمة وي... قاطعتني:إلا حبيبتي تبغي تروحي بيتك..و تكلمي عمك صح..معليش ولدي ما يفهم..لازم أنا أقولو... علي:أمييييييييي... -ايش إلي أمي..خذ زوجتك و روح على بيتك..خلاص..أنا عارفة تبغى تسهر معانا علبالك ما حنام و حنقعد مع أحلام..بس ذي أحلام مو صفاء..لو ايش ما يسير ما رح تسهر... قام علي بزعل و ضيق:خلاص يلا البسوا أنا في السيارة... و خرج... طالعت في عمة فقالت بلطف:والله البيت بيتكم حبيبتي..بس علي ما كان حيفهم إلا لو قلتها في وجهو:روحوا على بيتكم... قلت:لا هوا عشان من أول و هوا يبغى يقعد معاكم..يقول أبغى أكون معاهم في أوقات زي دي... قال سعود بابتسامة لعمتي:أمي..بابا من أول يقول:أبغى أهلي أبغى أهلي..و يسوي غلاسة..شفتي كيف سار..ما قعد معاكم... طالعت في سعود بصدمة..قلت:شمتان في أبوك يا سعود؟! قال و هوا يقوم:لا مو شتمان بس بابا طفشني... -روح..روح البس الجزمة.. لمن راح قلت بقهر:والله الولد دا سوسة..بكل أدب و برقة يبتسم و يتريق.. عمتي:والله صادق..إلي يغلس ما يتوفق... قلت و أنا ألبس عبايتي:علي ما يغلس..بس طبعو يزن و يعيد الكلام إلين ما يسير إلي يبغاه.."ابتسمت"..مو قصدو يضايق أحد..و لو حس حيوقف... "أصلاً محد يفهمني غيرك..ايش أسوي لو رحتي مني؟!"... كان علي واقف عند باب الغرفة..قلت بقهر:برضو ما حرد... ضحك:يلا يلا.. سلمنا عليهم و رحنا..و أول ما حركنا قال علي برقة:علي ما يغلس..مو قصدو يضايق أحد..ياي..كنتي تتكلمي بحالمية.. طلعت هوا دليل طفشي فقال بنفس الأسلوب:ياااااي..خجلانة و تسوي نفسها طفشانة... صرخت باستنكار:علي!! -ياااااااااي..عصبت... لفيت وجهي و اتكتفت:لا تكلمني اليوم..سامع؟! ************************************************** ** هكذا انتهى .. براحة .. أيمكننا قول هذا؟! علها فقط تدوم ,, !! جَ ـرة |
الجزء الثالث و العشرون (عهدٌ جديد) جود،،، ضحكت و أنا قاعدة أستمع لتفاصيل شوفة عمو من عمو..قلت:بس الحمدلله اتكلمت... -والله حسبت إني ما حقدر أقول شي..بس قدرت..بس أقولك جود..حسيت بشي غريب... -ايش؟! -حسيت إنها مي أول مرة أشوفها..ما حقولك إني ارتحت و سبحان الله كأني أعرفها من زمان..لا بس حسيتها مألوفة ليا...! -يمكن شايفها في حلم..و عقلك الباطني مخزنها بس إنتا ما تدري..عادي... -هيا..إنتي وكلام كتبك الفاضي... -والله من جد..بس قولي..حلوة؟! -آآآ..ايوة.. -ايش أكتر شي عجبك فيها؟! -جود لا تتنسوي..خلاص... ضحكت:من جد..قوووللي.. -والله مادري جود مادري..بس فاكر إنها سمرا و..و... -ووووو؟! -كــأنها غجرية.."تابع بسرعة"..بس بطريقة حلوة... ابتسمت و أنا أقول:عشان ملابسها..بس شخصيتها أبداً مو غجرية... -جود بس أحس إننا ما نتوافق..إذا كلنا هاديين و باردين..ما يزبط... -عمو..إنتا هادي و خجول..هيا هادية و.."بصوت أوطى"..جنية... قال بتوجس:لا تكون حرمة كلبة؟! -وي..ههه..لا..بالعكس طيبة و عاقلة..بس فيها قوة..هيا ساكتة مو من خجل لأ..من..ايش أقولك..مو غرور..بس إنها واثقة..أنا حسيتها تناسبك لإنو ما فيها المثاالية الزايدة حقتك..يعني شوف..إنتا لمن ربيتني كان فيه جدة تناقض كل إلي تقولو..لو ما كان فيه جدة كان أنا دحين في صدمة نفسية..عمو الطفل يحتاج شخصيتين مختلفة تربيه و إنتا و أحلام مختلفين فـ... قاطعني بهدوء:جود..ترى عمي كلمني عن الأولاد... -ايش قال؟! -يقول ما بيناديني إلا أبو سلطان... قلت بعطف:لا تخلي هذا الكلام يأثر عليك..بعدين شي طبيعي حيكلمك..واحد و بنتو حتتزوج..أكيد حيتكلم في أولادها الجايين..عمو قلتلك وكل أمرك لربك..و إذا فيه شي ممكن يتسوى سويه و بس..غير كده الخلفة رزق و الرزق على الله..و لو إنتا أو أحلام مكتوب لكم أولاد حيجوكم حيجوكم..بأي طريقة رح يجوا..و لو إنتا و أحلام مكتوب لكم نصيب حيتم غصباً عنك و عنها و عن أهلها..لا تقعد كل شوية تلوم نفسك و تحسسها بالذنب... -على العموم هيا قبلت و هيا عارفة..هيا إلي قررت لنفسها هذا المصير... -خلاص..ما دام عارف هدي نفسك و زي أي رجال عادي حاول تتذكر شكل خطيبتك و احلم فيها..غير كده اترك كل شي عليا... اتنهد:أنا أبغاكي تولدي و تخلصي... ابتسمت:ليه يعني؟!..مثقلة عليك بنتي ولا ايه؟! -لا بس أحس مو حلو..حتزوج أنا إن شاء الله و إنتي حتولدي..كلو في نفس الوقت..ما ينفع كده..يا حماس مرة يا مافي ولا حدث... -يوووه ذكرتني..حدد معاهم موعد الملكة... -ملكة ايش؟! سأل عمو بفجعة..قلت:ملكتك و ملكة أحلام..ولا ما تبغى تملك... -جود بلا هذي الحركات دحين..كل شي في وقتو حلو... -حركات؟!..محسسني كأنو الملكة شي مو لازم يتسوى..عمو لازم تملكوا بسرعة..عشان تسيروا تقدروا تكلموا بعض و تتقابلوا... -جود الله يخليكي أنا ما أحب هذا الكلام الفاضي..أكلمها و أشوفها بعد الزواج..خلاص!! سحبت نفس و أنا أصبر نفسي..قلت:ايوة بس لازم ملكة حبيبي..لازم... -جود أنا مالي شغل... -حدد وقت يناسبك..و على العموم مالو داعي نتكلف..و إذا رضيوا تكون في البيت أحسن... -بيتنا؟! -لأ طبعاً بيتهم هما... -جود أحس..إني مابغا أدخل معاهم في ذي التفاصيل..و رضيوا و ما رضيوا... ابتسمت:منتا دخلت على أيامي ولا نسيت؟! -ترى على فكرة..أنا ما سويت شي كتير..أبوك إلي اتكفل بالموضوع... -أصلاً ما أتذكر زواجي..تصدق..أتذكر غبابيش بس..فاكرة الفستان بس لإنو هوا الشي الوحيد إلي قدامي... -إنتي ما كنتي مهتمة..لا رحتي شفتي القاعة و لا سألتي عن الكروت و لا أي شي..لو مو أنا موجود كان ما اختارولك شي حلو... -كانوا يبغوا يخلصوا و بس... اتنهد عمو فتابعت:بس الحمدلله مرتاحة..ايش أبغى بزواج قد الدنيا و آخرتها ما أنبسط..الحمدلله لك يارب... -الحمدلله.. -صح..كيف جدة معاك..كلمتها و حسيت من زماااان ما سمعت صوتها كده... قال براحة:مروقة عالآخر..بعدين سايرة كريمة..أعطت منورة خمسين ريال فجأة..و أنا رمت عليا مفتاح صندوقها..تقول افتحو و خد إلي تبغاه... ضحكت:و فتحتو؟! -ايوة..كنت طفشان و فاضي..قلت أشوف ايش فيه..بما إنها ما تخلي أحد يمسكو غيرك و غير منورة... -دا كان زماااااان..والله ما تخلي منورة تقرب منو دحين..و أنا لو فيها شدة فتشتني بعد كل مرة أرتبو... -معليه..هوا الواحد كده..يكبر و يفقد الثقة في إلي حولو.. -عارفة أنا مني زعلانة منها..بس منورة مأثر عليها الموضوع دا..تقول:أنا مني حرامي... -يلا..الله يهديها لأمي بس... -من جد... -إلا تعال هنا..ايش قلتو في المهر و الشبكة و الكلام دا... -عمي يقول ما بنختلف و إنتي عارفة دي الأيام سار فيه حد لكل شي..نسيت كم..سعيد إلي ماسك موضوع الفلوس.. -إنتا عندك شي طيب؟! -ايوة الحمدلله..بس أخواني يقولو بيساعدوني... -طبعاً يساعدوك..ليه..أخوان عالفاضي..أخوانك و أخواتك يساعدوك و أنا كمان.."تابعت بضحكة"..أشتريلها هدايا باسمك..بس... -كثر الله خيرك يختي..لو جات على الهدايا كان احنا في خير..والله جود حسيت إنو من جد زواجاتنا..صرف في صرف..أكثر شي يقهر إنو الواحد يدفع دم قلبو و تحويشة عمرو و هوا ما يدري حيكمل معاها ولا لأ..اتذكرت واحد صاحبنا..مسكين اتبهذل مع طلباتها و طلبات أهلها..و آخر شي ما كمل شهر معاها..قال ايه..بخيل و مو رومانسي..و أهلها وقفوا معاها... -هوا من جد بخيل؟! -لا..بس شي طبيعي..كان عالحديدة..طفرتو..ما خلت في جيبو شي..و لسة تبغاه يسير رومانسي و كريم... -هدي وحدة مي شايفة خير..كان المفروض يسيبها من البداية.. -ترى كان حيكمل معاها لو مو هيا طلبت الطلاق..مرة مسكين هدا... -هدي المفرض كان تنضرب..ترى عادي..ممكن جداً تكون من الحريم إلي يحبوا أزواجهم يتسلطوا عليهم و لمن هوا مسكين سارت تقل أدبها تبغى تستفزوا عشان يصرخ عليها أو يقولها لأ... -هذا مرض... -لأ مو مرض..الناس معادن..بعضهم يتفاعل بالبرودة و بعضهم يتفاعل بالحرارة..إلا هوا فيه معادن تتفاعل بالبرودة؟! -والله مدري عنك..المهم دحين..يلا باي بروح أشوف أمي و أكلمها في الملكة و الكلام دا..يمكن يكون في بالها شي!! -طيب حبيبي..يلا مع السلامة... -باي... خرج علي من المطبخ بصحن اندومي و هوا يقول:مين إلي كان المفروض تنضرب؟! -وحدة زوجة صاحب عمو..قليلة أدب..و زوجها مسكين..علي..إنتا سمعت كل المكالمة؟! قال و هوا ياكل:ايوة... قلت:بس المفروض معد تسمع شي..أغلبها دحين حتكون عنكم و عن ايش لازم نسوي..ما ينفع تسمع... -والله يا جود لازم إنتي و عمك تفهموا الوضع..و أنا و أهلي كمان..لازم نكون واقعيين مو نجامل في بعض..خذي راحتك و اتكلمي و أنا ما رح أطلع كلامك لأحد... ابتسمت:عارفة حبيبي مو قصدي كده..بس أحسها مي حلوة... -والله أنا أحمد قلي كلام لمن عرف إني بخطبك..ما أنساه..و أعتقد حيقول نفس الكلام لعمك... قلت بفضول:ايش قال؟! -قلي:إنتا بتخطب بنت أخو صاحبي..مو حيا الله وحدة علاقتنا بأهلها عادية..كل شي في حياتك يطولني و يأثر عليا..و أنا مابغا أخسره و لا أخسر معرفتهم..عشان كذة أي مشكلة تحصل ما تتعدى حدود شقتك لإنو لو حصل أنا بوقف معاك في كل الأحوال و بكذة أخسر أفضل صديق عندي..و كمل لستة تحذيرات كذة مابغا أقولها..و الله ما أقدر أنسى إلي قاله..أعتقد حيقول لعمك نفس الكلام... -يعني قلك كلام قوي؟! -للغاية... -و إنتا ما زعلت منو؟! -بعد ما فجعني و عرض عليا أسوء النتايج حضني و:"مبروك عليوة..والله كبرت و حتتزوج"..كنت حقتله... ضحكت:لا كويس وعاك... -أنا واعي..ما أحتاج أحد يوعيني... -دحين يمكن بس زمان..أبداً... -طول عمري عاقل... -علي... -قفلي الموضوع... -طيب..إنتا ليش سويت اندومي دحين؟! قال و هوا يشرب شربة الاندومي:جيعان... -و إلي في القدر هناك ايش هوا؟! -أكل أنا طفشت منو... -لا يا شيخ... -حآكل..لا تاكلينا... -قول إن شاء الله... -أنا سويت وحدة عشان أقدر آكل و ما تزعلي... -طيب..شكراً..بس قول إن شاء الله حـ... سعود:بابا أنا أبغى اندومي زيك... التفت لسعود إلي دخل الصالة و هوا يلعلع..قلت:لأ..العشا جاهز... -طب ايش معنى بابا؟! قلت و أنا أقوم:لمن تكبر و تتزوج..كل اندومي و العشا جاهز و لا تخلي ولدك ياكل... -مابغا..أنا مني شرير..حخلي ولدي ياكل... سمعت علي و أنا أدخل للمطبخ:سعود لمن تجيب ولد حتسميه علي؟! ياااه..الله يرزق عمو..أنا قرأت في النت..والله رجال اتأذوا بنفس الطريقة إلي اتأذى بها عمو و خلفوا..و بعضهم لجأوا للجراحات التجميلية..عمو بس لو يرضى..أنا عارفة الواحد ما يحب دي الأشياء و صعب يعرض نفسو لدي النوعية من الجراحات بس هوا مضطر..بعدين كمان فيه رجال كتبوا إنهم سافروا كسياحة مع أصحابهم و من غير محد يدري اتعالجوا..ليه عمو ما يسوي كده من ورانا؟!..ليه؟! اتنهدت..خلاص..لو ربي كاتب شي حيسير..ليش أنا أقلق و أندب حظي..البنت و ما خدعناها في شي و أنا و مفهمتها إنو فيه بعض التشوهات البسيطة في أرجل عمو و صدرو..كلمتها مرة عن دا الموضوع بعد ما كلمتها عن الكبيرة و ما كذبت عليها في شي..التشوهات مهي كبيرة و بشعة..لكنها خدوش واضحة..قلتلها..بصراحة..علي عندو زيها في رجلو..و أغلب الأولاد كده..بالذات إلي استمروا لين ما كبرو يلعبوا كورة في الشارع..و الفرق بين عمو و بينهم المسبب..هما الاسفلت و عمو قزاز السيارة و الشارع كمان!! أنا على فكرة شفت هدي الخدوش بالصدفة..مرة عمو كان لابس برمودا قصيرة شوية فلمحتها و إلي في صدرو شفتها مرة و هوا خارج من الترويش و كان روبو مو مربوط كويس..فلمحتها بالصدفة..ابتسمت لمن اتذكرت كيف استحى دا اليوم و حس بالذنب إني شفتو..يا قلبي عليه..مستحيل يلبس قصير أو عريان قدامنا..حتى في غرفتو..ما قد شفتو.. ولمن أرتبها ما أشوف فيها ملابسو إلي كده!! حبيبي..والله محترم..ما قد حطنا في مواقف محرجة معاه!! ****************************************** كنت قاعدة أكلم عمتي..كانت قاعدة تسألني متى يناسبني يكون موعد الملكة..استغربت و سألتها:عمو أو جدة ما قالو شي؟!..قالتلي قالوا أي يوم عادي..طبعا اتنرفزت..ما يسير يتركوا الأمور سايبة كدة..لازم تكون لهم كلمة في كل شي..هدا شي يعنيهم كمان..أشوة عمتي طيبة و اتصلت و كلمتني..وحدة غيرها كان ما سوت لي حساب... قالت:أنا قلت نحاول نبدر عشان موعد ولادتك..صعبة عليكي بعد ما تولدي و صعبة كمان قبل ما تولدي بشوية.. -والله مني عارفة..أنا كده على الأسبوع التاني في الشهر الجاي حكمل تسعة بالضبط... -احنا في نص الشهر..الله يسهلك يا بنتي..بس حطي في بالك يمكن قبل... اتنهدت:مني عارفة يا عمة..شوفي أحلام أهم شي..يمديها تتجهز في كم؟! -جود مادري..يمكن تبغي تفرحي بعمك لكن أنا من رأيي ما نتكلف في الملكة..حفلة بسيطة بعد العقد و خلاص... يوه..الحمدلله..جات منها ولا مني... قلت:ايوة و أنا شايفة كده..إنتوا متى يناسبكم..ما دام عمو قال أي وقت..خلاص شوفوا إنتو إلي يناسبكم... -إنتي إذا عندك شي..قولي.. -والله لو عليا حقولك بكرة..أنا إن شاء الله مابغا أولد إلا و عمو مملك..فشوفوا أحسن أقرب يوم لكم..و خلاص... -شوفي..أنا ما بعزم إلا خالاتها وعماتها..إنتي كيف إلي عندك؟! -والله مادري..أكيد عماتي حيجوا و أكيد عمو حيعزم عماتو و خالاتو كمان... -كثيرين أهلكم... -لالا..أهل جدة أغلبهم ماتوا و نص أهل جدي الله يرحمو..فما أعتقد حيكونوا كثيرين... قالت عمة بصدمة:وي يا بنتي..لا تتكلمي عن أهلك كذة..قلت مابغا كثير لكن مو كذة..هذولا بشر... -والله يا عمة من جد..أنا أسأل عمو و أردلك خبر... اتنهدت عمة:لإنو احنا قررنا نسويها في البيت... -ايوة قلي عمو... -طب ما قالك من قبل إنو قال أي يوم عادي... -لا والله..عمو ما يفهم في دي الأشياء و جدة أخاف أكلمها تغير رأيها فجأة و لا تعصب ولا أي شي..يا عمة كل ما أسألو عن حاجة يقولي:نسيت..مادري والله..و كده..ما يعطيني الخبر صح... -الله يعينك..خلاص..أنا أشوف عمك و أرجع أتصل عليكي... -إن شاء الله..الله يتمم على خير... -آمين..مع السلامة.. -مع السلامة... حطيت السماعة و طالعت بعدها في بطني..حطيت يدي و قلت برجاء:يا رب..مابغا أولد إلا بعد الملكة من غير شر..حتى لو ليلتها..المهم أولد و هيا تمت!! ****************************************** سعود،،، قلت بتوتر:بس ايش أسوي يا جود؟! -ولا شي..بس روح و نور بيتهم بعد أسبوعين... -جود من جدي أنا... -و أنا من جدي كمان..دحين إنتا شفت التوب إلي حتفصلو..اخترت التصميم..أعطيت الخياط مقاساتك... -فيه تصاميم كثير و مني عارف أي واحد أختار..أحمد يقول بيجي يساعدني... -لأ..ما يجي ولا حاجة..أنا أبغى أخترلك.. -تجي معايا؟! -ايوة لحظة..عليييييييييييي..علي... سكت و أنا أسمعها تتابع:ينفع أروح مع عمو أختارلو تووووب؟! -محتار طيب..يا سلام..والله أنا أبغى عمي حلو... -لأ لكنو عريس... -شكراً.."قالت موجهة الكلام ليا"..ايوة حجي..بس متى؟! -إنتي متى فاضية؟! ضحكت:كل يوم أنا فاضية... -اليوم يمديكي.. -والله يمديني..بس مدري لو علي حيوافق... فجأة وصلني صوت علي:ذحين إنتا ما ينفع تختار لحالك..بيبي ولا بيبي؟! قلت بتحفظ:خلاص مو لازم..شكراً... ضحك:أمزح معاك..متى تبغى تروح؟! -مو لازم..أصلاً جود هيا إلي عزمت نفسها..مو لازم... -سعود بلا استهبال..بعدين الملكة بعد أسبوعين لازم تجهز كل شي من ذحين.. -يعني عادي جود تجي معايا؟! -ايوة.. -في أي يوم؟! -في أي يوم.. -اليوم.. -نعم؟! -اليوم مو يوم؟! -إلا بس مو كذة فجأة... -أنا حجيها... -أففففف.. -علي من جد اتكلم..عادي عندك ولا لأ؟! -سعود..إنتا ليش زي الأطفال؟! -ما فهمنالك..شوية عادي شوية مو عادي... -ياخي زوج سعودي غلس..ما حيوافق إلا لمن يطفشك..ليش إنتا مرة حساس؟! -مني حساس أنا... -أجل حشاش؟! -علي!! -اسمع اسمع ذي النكتة..يقولك بزر محشش قال لصاحبه..قول اثنين قال اثنين..قال سيارة أبوك مقربعة... ضحكت بشدة عشان ينبسط و يرضى إني أمر على جود... علي:ايش ذي الضحكة..الله لا يبلانا..لا تضحكها لأختي..سامع؟! سمعت اعتراض جود و مديحها لضحكتي و ابتسمت..غبي علي..أصلاً ما فهمت النكتة ولا ركزت معاه..بس أبغاه يوافق... وصلني صوت جود:ايوة عمو..والله ضحكتك حلوة.. -أنا ضحكت عشان أبغاه يوافق.. -علي حبيبي ما يقول لأ..بس لازم يغلس..بس النكتة تضحك... -ما سمعتها... - أعيدلك هيا؟! -لاااا..اجهزي خلاص..أنا جايك... -أجل يلا باي... -باي.. و مريت على جود..و أخذتها..جابت معاها سعود..سألتها:علي قعد لحالو؟! ،فقالت إنو هوا إلي عرض إنها تجيب معاها سعود..يقول:فرصة..أتذكر أيام العزوبية... بس أنا من رأيي إنو إلي زوجتو جود ما يحتاج يرجع لأيام العزوبية!! وصلنا للمحل..كان فاضي إلا من شابين صغار..طالعت في الساعة..كانت لسة أربعة..اتعمدت أجي بدري عشان ما يكون فيه أحد!! رحت للرجال إلي في المحل و قلتلو:فين التصاميم إلي قلتلك تحطها على جمب؟! طلع الرجال مجلة و مجموعة أوراق..رحنا لكراسي المحل و قعدنا..و بدأنا نتفرج..كويس إنو المحل كبير..لو صغير ما كان خليت جود تدخلو!! بدأوا سعود وجود يبدأوا رأيهم..وريت جود التصاميم إلي عجبتني..قالت جود:بس مرة بسيطة.. -أنا ما أحب الأشياء الثقيلة..مالو داعي..شوفي هذا مثلاً..ولا فستان حرمة... -طيب خلاص..فصل واحد بسيط و فصلك كمان دقلة... -جود الدقلة ثقيلة... -عمو يوم واحد بس..شكل الدقلة مرة حلو..و حط في بالك إنو ما يمديك تلبسها في غير الملكة..في زواجك لازم بشت... -بشت؟!،طيب يسير خير.."تابعت لمن حسيت بنظرتها"..مني لابس بشت..في زواجي ألبس دقلة... اتنهدت جود بصبر و قالت:عمو..شفت دي التصاميم إلي عاجبتك..حيجوا الشباب بزيها و أفخم منها..لازم..تلبس..دقلة... -و أنا ما يهموني الشباب..جود أحسها تكتمني... -قد جربتها؟! -لأ..بس اتخيلت و اتوقعت إنها حتكتمني... -طيب معليش..يوم واحد بس..انكتم يوم و..لا انكتم كم ساعة و بعدين فكها... -جود... -عمو الله يسعدك..خلينا نفرح فيك... و بعد زن ما يعلم فيه إلا ربنا قلت:طيب..لكن مني مفصل واحد من ذي الفساتين... قالت و هيا تأشر على واحد بسيط من إلي عجبوني:فصل دا..بس البس دقلة... و اخترنا الدقلة و اتفقنا مع الرجال على إنو يخلصها قبل بأسبوع..طبعاً أنا كنت مختار القماش من قبل..أعطيت الرجال واحد من أثوابي و طلبت بعض التعديلات عليه و خرجنا من المحل..و أول ما ركبنا السيارة قلت:جود.. -نعم.. -لمن قعدت أختار في التصاميم حسيت إني مو رجال... -بالعكس..أنا مرة تعجبني فكرة النقش على التياب..مو هما مطفشينكم..لا تلبسوا بناطيل و لا تغيروا تراثكم..خلاص..حلوا تراثكم و جملوا لبسكم..بالعكس مرة أنبسط لمن أشوف أولاد صغار لابسين أتواب منقشة... -أنا عارف بس مو زي إلي جوا..الثوب كلو منقش..مو حلو كذة... ابتسمت:و إنتا ايش عليك..إنتا أخدت إلي يعجبك و خلاص...! اتنهد عمو:الله يعين.."التفت لسعود"..سعود نمر باسكن روبنز... قال سعود ببساطة:ايوة.."نط فجأة و دخل راسو بينا"..ماما..فاكرة لمن قلتلك فيه نكهة إنتي ما ذقتيها لسة... -ايش هيا؟! عمو:لوف بوشن؟!،ترى مي جديدة..مر عليها فترة... جود:لا أعرفها..ايش هيا سعود إلي تقول عليها؟! -هيا مو جديدة بس احنا ما قد جربناها..ما حتعجبك!!... ضحكت جود:طب ايش هيا؟! -نعناع بالشوكولاتة... قلت:ايييييوة..قد جربتها..مي حلوة... سعود:عارف..بس ماما مسكينة ما قد جربتها... قلت و أنا أوقف:نطلبهم عينة عشان تذوقها... و نزلنا و اشترينا اسكريم..مادري ليه جا فجأة علبالي أشتريلهم أو..مدري..بس حسيت إني أبغى أشتري لجود خصيصاً بصراحة..حسيت إني أبغى أمارس شي من أبوتي!! ****************************************** جود،،، كنا في بيت جدة و صادف إنو العيلة اتجمعت اليوم مو أمس..أنا متعمدة أجي لجدة يوم الخميس لإنو تجمعهم بالعادة يكون الربوع ومتعذرة بأهل علي طبعاً..يا الله..أنقهر لمن يأجلو جمعتهم للخميس..أحس إني في عزيمة مو في بيتي..صح إني معد أتوتر و أحبس نفسي و أكتئب..بس ما أرتاح..كده أتضايق... جدة كانت جوة في غرفتها..صح..نسيت أقولكم إنها رجعت لغرفتها..أحس نفسيتها أحسن لمن رجعناها لغرفتها..المهم..و كانوا البنات معاها و زوجات عمي سعد و بابا..في الصالة الأخوان قعدوا..عمو و عمي سعد و بابا و معاهم عمتي صفية قعدت..قبل شوية تركتنا و راحت لهم..أعتقد تبغى تاخد من عمو الأخبار و تتطمن على أمورو... علي لمن شاف إنهم متجمعين سلم على جدة و قلي إنو بيروح لأهلو..خاصة لمن ما كان فيه من الرجال إلا الأولاد..أولاد جدة يعني!! خرجت من غرفة جدة بروح للمطبخ أطمن على العشا..و عشان أروح للمطبخ لازم أمر بالصالة..يعني لازم أمر بعمة صفية إلي استوقفتني:جود!! التفت لها و خلال ثواني قررت إني أكون سويت معاها..مدري ليه..قلت:هلا... -إنتي ذحين كيف تروحي تخطبي إنتي و أمي من غير أحد كبير..ايش يقولوا الناس عننا؟!،مهم مسوين لنا قدر..و بعدين كيف تحددين يوم الملكة من غير ما تكلمينا و تاخذين الإذن.. رققت صوتي:عمو إلي قالهم في أي يوم عادي..و عمتي الله يسعدها رجعت اتصلت عليا و قالتلي ايش يناسبك؟!،فأنا قلتلها إنو أنا يناسبني إلي يناسبكم قامت هيا قالت إنو يناسبهم بعد أسبوعين... -ايش فيها هذي؟!،ميتة على زواج بنتها..اللهم عافهم و لا تبتلينا..المفروض تثقل شوية... يا ربي ايش أقولها دي؟!،ولا أكبر دماغي ولا ايش أسوي؟!... عمو بعتاب:صفية ايش ذا الكلام؟!،عشان اعتبرونا أهل و قالو مالو داعي الكلافة نقول عنهم كذة... طالعت فيا عمتي بطرف عينها:لا والله يا حبيبي..ما اعتبرونا أهل لكن لقوا من يعتبرهم أهل... جلست على أقرب كنبة لمن حسيت بضيق و وجع فجأة..رفعت راسي لمن سمعت:بنت ايشبك!!؟؟ كانت عمتي..اتغيرت ملامحها للشكك..وقفت بطفش:ما فيا شي..بعدين مني بنت ولا أنا طفلة عشان تكلميني كده!! و دخلت المطبخ لكنها استوقفتني و هيا تقوم:خليكي خليكي..أنا بشوف العشا... لويت فمي و رجعت قعدت..قال عمي سعد:عمتك طيبة بس لسانها.. بابا:ما تقصد تأذيكي.. قلت:لا تقولي ما تقصد تأذيني..إنتا ما قلت كده إلا و إنتا عارف إنو إلي تقولو يأذي..قول إنها مي متعودة عليا..مي واثقة مني..كده يعني... قليلة عقل..مي شريرة..قليلة عقل و عاطفية!! عمو فجأة:ليش..ايش فيه..ليه صفية قعدتك..تعبانة؟! ابتسمت لعمو:لا لا ما فيني شي سمعت صوت سعود و هوا يسأل عني..طالعت في مدخل الصالة:ها حبيبي..هنا... جا بشك و هوا يطالع كأنو يقيم الوضع..وشوش لي و هوا مقطب :ايش بيكم؟!... قلت بتساؤل:ايشبنا؟! -هديك الحرمة سوت هبالة؟! هزيت راسي بابتسامة بلأ فطالع في عمتي إلي خرجت من المطبخ و حسيت بالإحراج بس بالسعادة في نفس الوقت..مادري كيف... قال:لو سمحتي..لا تطفشي ماما..ترى..ترى بعدين ما أحبك.. قلت لسعود:بس حبيبي..ما يسير كده... عمتي بسخرية:هيا..اشتكت لولدها.. ضحكت:والله ما اشتكيت..هوا سمع صوتنا..ما يسير حبيبي هدي عمتي.. اتنهد سعود و على وجهو نظرة احتقار:طيب..المهم..لو سمحتي..لا تكلمي ماما.."بلهجة آمرة"..ماما..خلاص..روحي غرفتك و اقعدي..بعدين إنتي تزعلي و أختي تزعل..كده..كده عادي عندك؟! عمي سعد:سعود تعال... طالع فيا يستشيرني فابتسمت فراح..وقف قدامو فحط عمي سعد أياديه على أكتاف سعود:سعود..أنا مين؟! -أخو عمو و هدا... -ما تعرف اسمي؟! -مممممم.. قام عمو و جلس عند سعود و همس في أدنو فقال بتذاكي:أعرف..سعد... -عمو سعد..طيب قلي..تحبني؟! قال و هوا يرفع أكتافو:أنا ما أعرفك... -طيب ما تعرف عمتك صفية..ليش تقول ما تحبها؟! -هيا طفشت ماما... -ما طفشتها..كانوا يتكلموا عادي..شوف.."سعوووود..إنتا غبي"..طالع في عمك..ما زعل و أنا سبيتو..عادي إحنا أخوان و ماما بنت أخو عمة صفية..عادي..ما يزعلوا من بعض... -طيب.. جلَّس عمو سعود فوقو على الأرض:يعني لا تقول لعمتك كده تاني... اتنهد سعود و طالع في عمة صفية:لو سمحتي..أنا آسف... طالع فيا عمو:سعود ساير زي بنات الجامعة... ابتسمت:من جد... بابا:ايش فيهم بنات الجامعة؟! عمو:لو سمحتييييييييييييي..ابعدي أبغى أشتري..صح جود؟! ضحكت:ايوة..بسببهم سرت أحس لو سمحتي قليلة أدب... عمي سعد:و إنتا ايش دراك ببنات الجامعة؟! عمو:جود قالتلي... عمتي صفية:المهم ذحين..شغلات الزواج تعطينا خبر فيها..و ما تحددي الموعد إلا إذا كلمتينا..و لا تحاولي تبيني لأهل زوجك إنو محد مهتم في عمك إلا إنتي... يا للسخاااااافة!! ابتسمت:إن شاء الله.."مديت يدي"..سعود حبيبي تعال... جا سعود و مسك في يدي..رحت على غرفتي و قفلت الباب..و قبل ما أقول أي شي قال سعود بحرج:مامي أنا آسف.. -على ايه؟! -إني قلت كده..بس سمعت..صوت عالي.. قلت و أنا أمسح على راسو:طيب حبيبي حتى لو..أنا ما أقدر أجبرك تحب إنسان إنتا ما تحبو بس لازم تتعلم كيف تخلي عدم الحب دا ..حطيت يدي على قلبو"..في قلبك..مو لازم تعبر..كل إلي عليك إنك تسويه إنك تبعد..أما تتكلم و تقول فهادي صعبة..هما دحين يقولوا إنو أنا إلي علمتك كده..و يضايقوني..فإنتا مرة تانية لا تسوي كده!! -طب ماما..بابا قلي لمن أنا مني فيه..أسير أنا الرجال..قلي لو أحد قال لماما شي قول شي..طيب أنا قلت إلي أقدر..بابا قلي... ابتسمت:كفاية إنك تجي و توقف جمبي..مو لازم تدخل نفسك و تتكلم..بعدين من الأساس أنا أرتاح لمن ما تعرف الأشياء الوحشة..عشان كده أنا معد أبغاك تتدخل... باسني:خلاص مامي آخر مرة... حضنتو:حبيبي إنتا... اندق الباب..و كان عمو..يوووه..لو مدة ما دق عليا باب دي الغرفة..في الفترة الأخيرة سارة إلي كانت تدق..ابتسمت و هوا يرد الباب..جا و جلس على السرير جمبنا..قال:ايوة يا سيد سعود..من متى ما شاء الله دي الجرأة؟! طالع سعود فيا:ماما مابغا أتكلم... -طيب لا تتكلم... عمو:لا تتكلم بس اسكت..أنا سكت و هيا اتكلمت عن عمتك... قاطعت عمو عامدة:خلاص أنا كلمت سعود و هوا قال معد حيسوي كده تاني..بعدين ليش نكبر الموضوع..ما سار شي... عمو حس إني ما أبغاه يتكلم فقال:صح..تصدق سعود..إني قبل كم يوم نمت هنا؟! قلت:من جد؟!..ليه؟! -مدري..لمن ما يجيني نوم أجي هنا و أنام..أصلاً سرت أقعد فيها كتير... قلت بحرج:عمو عندي طلب؟! -ايش؟! -سوي إلي تبغاه في العمارة بس خلي دي الغرفة في حالها..قد ما تقدر حاول تبعد عنها... قال ببديهية:طبعاً جود..لا غرفتك و لا غرفة أمي تنمسك..أصلاً من الأساس مابغا أغير في الشقة دي..أفكر آخد الشقة إلي قدامنا زي ما قلتي... -ايوة..لإنو عارف..أحس الغرفة دي فيها شي عجيب..مادري بس كل ذكرياتي هنا..و أنا صغيرة و لمن بدأت أكبر و لمن بدأت مراهقتي و سخافاتي و لمن بدأت أعقل و لمن نضجت و لمن جيت حتزوج..لمن ما كنت أعرف و لمن عرفت..كل كل حاجة و كل شي جوة دي الغرفة..أحس أولادي لو كبروا..أبغى أوريهم هيا... ابتسم:إن شاء الله..بعدين لو تبغي تنامي عندنا..علي مسافر ولا أي شي..وين تنامي إنتي و أولادك..غرفتك رح تقعد زي ما هيا..و خلاص..أنا أمسك الشقة إلي قدامنا و أعدلها... -ايوة..أصلاً أريح لك..خصوصية أكتر و بعدين جدة ما رح ترتاح..حتى لو أحلام كانت راضية ما رح ترتاح... -فكرت أنا كمان في كده..بس يبغالي أكلم المستأجر و أعطيه خبر... -لسة بدري!! -لا يا جود..مو شي سهل السكن دحين..بعدين أنا أبغاها تفضى في أقرب فرصة عشان أعدل فيها..مو معقول أدخلها عليها زي ما هيا... -يعني حتقولو يخرج في أقرب وقت يقدر عليه... -ايوة..و قدو العقد إلي معاه قرب ينتهي..ما حجددوا.. -آه..الله يعينو و يعينك... قام:هيا يلا..لا تقعدوا هنا أكثر..سعود روح مع إلي كنت معاهم و جود ارجعي للبنات و جدة... قلت و أنا أقوم:مع مين كنت يا سعود؟! -مادري..مع ولد مدري ايش اسمو... عمو:ما كنت مع رغد؟! -لاااااااااء..مو حلو أقعد معاها كل شوية.. عمو:قاعد يثقل الولد..قاعد يثقل... خرجنا من الغرفة و راح كل مين للمكان إلي كان فيه.. أول ما جيت بدخل غرفة جدة اتفاجأت بزوجة بابا جاية بتخرج..قعدنا نطالع في بعض لثواني قبل ما تخطي هيا خطوة لقدام..قلت:آآآآآه..خالة... -نعم... قالتها _كالعادة_ بدون أي مشاعر واضحة..ابتعدت شوية عن باب الغرفة عشان محد يسمع وقلت بصوت واطي:آسفة عالرد الأهبل..و شكراً عشنك عرضتي عليا إنك تجي..من جد حسيت في البداية بالخوف و الوحدة بس فجأة حسيت إنو أنا أبغى أتكفل بدا الموضوع..أبوية و أنا إلي رح أزوجو..الأغلب إنك اتضايقتني من الحرفين إلي رسلتهم بس أنا ما كنت في وضع يساعد إني أشرح..أنا أعتذر عن تصرفي و ردي الغير لائق على خدمتك إلي عرضيتها..كان المفروض أرفض بطريقة ألطف!! -حصل خير.. و كملت طريقها.. عضيت على شفايفي و غمضت عيوني..ياه على صلابتها..هل هيا من جوة كده؟! دخلت للغرفة و أنا أقول لنفسي إني سويت إلي عليا..وضحت موقفي و اعتذرت..تقبل و لا ما تقبل..ما همتني!! ****************************************** جود،،، -أفففففففففففف... عمو:جود إنتي ايش فيكي اليوم؟! اتنهدت و أنا أحاول أهدي نفسي:مادري..طفشانة و خلاص..إنتا رحت شفت توبك و دقلتك ايش سار عليهم؟! -خلاص متفق معاه قبل الملكة بأسبوع... -والملكة بعد أسبوع..يعني المفروض تكلمو و تشوف جاهزة و لا لأ..لإنو خلاص موعدكم اليوم... -اليوم جمعة يا جود... -و إذا... -يمكن ما يفتحوا... -لا يفتحوا..ليش ما يفتحوا؟!،اتصل عليهم و... قاطعني:طب بقولك شي؟! -ها... قال بتردد و خوف واضح:ما..ما أعرف رقمهم... -نعم؟! -ما عندي رقم الخياط.. -لا والله..اتصل على 905 و اسألهم..ولا منتا عارف اسم المحل كمان؟! -جود خلاص..جاهزين جاهزين إن شاء الله..لا تقعدي تصرخي و ترفعي صوتك... قلت برجاء:عمو..بليز..لا ترفع لي ضغطي..أنا خلقة تعبانة و قرفانة من ولا شي..اتصل عليهم و شوف ايش سووا..هدولا الواحد لازم يجري وراهم..الله يسعدك..معد بقي وقت.. قال بنرفزة:لا تقولي معد بقي وقت.."تابع بطفولية"..بعدين حتى إنتي ما اشتريتي فستان؟! -أنا لو أروح ببجامتي..المهم أزوجك... -قاعد على قلبك أنا؟! ايش فيه عمو فجأة يتكلم كأنو بنت؟؟؟ قلت:لأ..بس شوفتك مستقر و مرتاح تغنيني عن ألف فستان... "العريس عمك و العروسة أخت زوجك..كيف بجامة؟!" طالعت في علي إلي تابع و هوا يجلس بابتسامة:اف يو آي.."عرضت ابتسامتو"..هذا اختصار دوبو شفتو..يعني فور يور انفورميشن... قلت باستحقار:هدي أشياء حقت أهل الماسنجر و التشاتنغ... طالع علي فيا بغيظ:أنا..معد..أدخل..ماسنجررر..والله ترى ما تعرفيني زمان!! قلت:أعرفك أعرفك..عمو..باي... قال عمو بشوية ضيق:باي... فصلت و أنا أتنهد:زعل مني!! -ليش؟! قلت و أنا على وشك أبكي:مادري..علي فجأة قرفانة من كل الناس..و عمو متصل عليا يشاركني مخاوفو و ترددو..متوقع مني تشجيع بس أنا ما يجي على لساني إلا كلام بايخ..يحقلو يزعل عارفة..بس والله غصباً عني!! قال علي و هوا يرفع أكتافو:عادي..إنتي على آخر حملك لازم كذة..في سعود كنتي تبكي كل ما قلتلك شي و ذحين تسبي و تلعني..كلها كم أسبوع و تولدي... -يا رب تسهل... -فاكرة جود..فاكرة لمن طردتيني من الغرفة؟! -متى طردتك؟! -أول..على آخر حملك في سعود..قعدتي تبكيييييييييي..ولمن قلتلك ايش تبغيني أسوي؟!،قلتي اطلع برة... شهقت:أنا؟!..والله ما قد قلتلك اطلع برة... -إنتي ما قلتي اطلع برة..إنتي قلتي سيبني في حالي..فأنا زعلت و اتضايقت منك و خرجت نمت في الصالة و أنا حاقد عليكي!! اتذكرت:ايييييييييوة..اتذكرت..فاكر طب إنتا ايش سويت داك اليوم؟! ابتسم:بس خلاص اسكتي... -إنتا إلي قعدت تمزح مزاح مدري كيف مسوي..عفش و بايخ و يعور... -خلااااص..اتأسفت منك يومها..صح؟!،و سبتلك الغرفة.. -أحد يجي يمزح مع زوجتو في أول حمل لها بضربها على راسها... -ما كان بقوة..بس زي كذة... و ضربني على راسي..فجأة..حسيت بنار شبت جوتي... قطبت حواجبي و أنا أحاول أمسك نفسي..رجعت شعري على ورا و عدلتو و اتجنبت أطالع في علي..أفضل إنو يسكت..أنا حالياً قابلة للانفجار!! قعد علي يتمتم:بسم الله علينا..ايش ذي الملامح..وي..ما سارت مزحة و عدت... سحبت نفس و خرجتو..قلت و أنا أطالع فيه:لازم نروح السوق..اليوم أو بكرة... قال:إنتي اليوم ما أعتقد حيكون كويس لو تروحي السوق..نروح أنا و سعود عشان أفصلو ثوب... -و إنتا؟! -أنا حفصل مع أحمد..يقول لقى واحد فاضي و حيفصل بسرعة..ما عندو غيرنا يعني... قلت:أجل فصل لسعود هناك... قال باستغراب و هوا مقطب حواجبي:أنا ليش ما كنت حفصل لسعود معايا في نفس المحل؟!...ممممم..أقولك..خلاص أتصل عليه و أشوف إذا فاضي نروح اليوم... -خلاص..إن شاء الله فاضي و..أقولك..و إنتا في طريقك اشتري عشا..أنا ما فيا حيل أطبخ... -أوكي..بس خليه يوافق أول.. -حيوافق..ليش ما يوافق... اتصل عليه و كنت متوقعة من طريقة كلام علي إنو حيسمع لرأي أحمد لو قال لأ لكنو صرخ بعبط فجأة:إلللللللللللللا...إلا..نروح اليوم..أحمد مالي مزاج لـ..قصدي ليا مزاج أخرج... آهاااااااااا..من الآخر علي ما يبغى يقعد معايا اليوم..تصدقوا..حتى أنا مال أمي مزاج لعلي ولا لسعود... -أحمااااااااااااااااااااااد... -حبيبي إنتا..والله أخوية الكبير أحبك..لالا..أنا أمر عليك..عادي..أحسن برضو... و قفل..وقف بسعادة:بنروح... -الله يلقيكم خير... قمت أنا كمان عشان أقول لسعود..لقيتو قاعد يلعب بالمكعبات..قلت:سعود.. -نعم.. -قوم البس عشان تروح مع بابا و عمو أحمد تشوفوا الثياب..عشان ملكة عمو.. -ماما مابغا توب..أبغى بدلة..و كرفتة... -لأ..تلبس توب..إنتا سعودي و عربي قبل كده..البس لبسك..بعدين ما تبغى تختار رسمة زي لمن اخترنا لعمو... بوز و هوا يقوم:طيب.."فتح دولابو"..ايش ألبس؟! -البس أي شي مرتب..ويلا بسرعة عشان لا تتأخرو..المحل بعيد... -ايش دراكي إن المحل بعيد؟! كان علي واقف ورايا يقفل أزارير التوب حقو..قلت:حسيت..ايوة البس دا سعود... مسك علي أكتافي و قال و هوا يميل راسو:لا يكون زعلتي عشان قلت ليا مزاج أخرج؟! -لا حبيبي ما زعلت..بعدين أنا ليا مزاج أنام... ابتسم بلطف:نامي متى ما تبغي..قالولك مفتري؟؟؟ أجبرت نفسي إني أبتسم..والله حبايبي و على قلبي زي العسل أقضي اليوم كلو معاهم بس ما أقدر..مابغا أزعلهم..لو قعدت معاهم ممكن أعصب فجأة و أزعلهم!! بعد ما جهز سعود خرجوا..قفلت الباب وراهم و أنا أتنهد..رحت لغرفتي و استلقيت عالسرير..مو معقول..مو معقول كده.. دمعت عيني و أنا أفكر إني رح أحضر ملكة عمو بنفسيتي الزفت دي..يا ليت عمو كان أقل صلابة و اقتنع قبل..كان كلمت أحلام قبل و كان وافقت قبل وكان... يوووه..خلاص..يمكن ربنا رايدها في داك اليوم..يمكن ربي كان كاتب يتجمع بينهم الخميس الجاي..خلاص..ما يسير أقعد أقول:لو لو لو.. يا رب تيسر لي..والله مني عارفة ايش حلبس؟!،و على قول علي..العريس و العروسة..كل واحد أقرب ليا من التاني..يا رب طلبتك..بكرة ما أخرج من السوق إلا ومعايا أحلى فستان..يا ربي تعرف قد ايش أحب دولا الاتنين و قد ايش يهموني..يا رب تيسر لي كل شي و توفقهم... نزلت دموعي و تابعت:يا رب لا تخلي ولادتي تعطل أي شي عليهم..يسرها ليا بعد ما تتمم ملكتهم..يا ربي طليتك..لا تردني.. غطيت وجهي و قعدت أبكي من قلب..خلاص تعبت..أنا تعبت..يا ربي أعيني على إلي أنا فيه..و ارفع عني ما بي!! يااا رب... ****************************************** ابتسمت بسعادة و أنا أركب السيارة و أحط الأكياس عند رجولي... قال علي و هوا يحرك السيارة:أحلى روحة سوق في حياتي... سعود:ماما أنا قعدت أدعي تلاقي أحلى حاجة في الحياة... التفت:حياتي إنتا... علي:جبر الخواطر يا هوووووو... ضحكت:حياتي إنتا أكتر... قال:والله من جد..ربي اليوم راضي عننا.. -و إن شاء الله كل يوم... -والله أول مرة ما تطفشيني..أول مرة روحة السوق تتيسر كذه..و من غير متخلفين في قسم الحوامل!! ضحكت و أنا أفكر إنو من جد الحمدلله..أول ما دخلنا..رحت للمحل إلي متعودة أشتري منو و أنا حامل..أول نقطة كان إنو عامل تخفيض 30%..تاني نقطة..إني أول ما دخلت طاحت عيني على فستان..رحت و شفتو من قريب و كان من جد حلو..لدرجة إنو علي عبر وقال:مرة رهيييييييييب!! طبعاً أنا قلت..نشوف فساتين تانية..ما يدري الواحد..يمكن يلاقي شي أحلى..درت في المحل كان فيه أشياء حلوة بس داك كان أحلى..أخدناه و لمن جينا بنحاسب قال الرجال بحيرة للي جمبو:هدا ما معاه صندل فلات؟!! أجابو زميلو بنعم فقال:هدا معاه صندل..ليه ما أخدتوه؟! قلت و أنا أحطو على الكاشير:أهوه... علي بفجعة:بسم الله... كتم الرجال إلي يحاسب ضحكتو..مدلنا الكيس و دفع علي..خرجنا من المحل و علي يقول:إنتي متى مداكي تروحي تجيبي الصندل و ترجعي؟! قلت من قلب:أبغى أنفك.. قلت بكسل:بقي الاكسسواااار؟! قال بطفش:ما عندك في البيت؟! طالعت في الكيس و اتذكرت الطقم الفوشي إلي عندي..ينفع عالفستان..قلت بفرح:إلا..علي فاكر الطقم الفوشي؟!،إلي اشتريتو السنة إلي فاتت؟! -إلي أنا اشتريتو..لأ... -إنا لله..أبداً ما تكمل جميل..حتى لو بعد سنة!! و على كده اتيسر اللبس و اتحسن المزاج ^___^ ****************************************** هكذا انتهى .. بتيسير من الله في أمور هي الأكثر تنغيصاً .. شكليات مزعجة نعاني منها في مناسباتنا و أفراحنا !! بانتظاركم ,, ج ـرة |
الجزء الرابع و العشرون (بداية~) الخميس... العاشرة صباحاً..سعود،،، خرجت من الحمام و أنا ماسك على بطني..فجأة بطني قلبت عليا..رحت للصالة وين ما كانت أمي..قالت بقلق أول ما شافتني:وشبك؟!..ليش حاط يدك على بطنك؟! جلست جمبها و قلت:مادري..من يوم ما صحيت و بطني يعورني.. حطت ايدها على بطني و قعدت تقرأ عليا و تسمي و تنفث و تتعوذ من الحساد..ابتسمت و أنا أسمعها تختم قراءتها بـ:و حسبي الله على إلي ما يسمي عليك... -آمين.. طالعت في منورة إلي مدت لي كوب يتصاعد منو بخار..قالت:اشرب بابا..بعدين روحي حمام..اليوم لازم قوة... أخدت الكوب منها:شكراً... و انصرفت بعدها منورة..قالت أمي:لا تشربُه... قلت و أنا أشم إلي في الكوب:ليه؟! -تكون حاطة فيه شي..نعوذ بالله... -يا أمي اتقي الله..الحرمة لها سنين عندنا..بعدين الحافظ ربي..بسم الله الذي لا يضر مع اسمه شيء في الأرض ولا في السماء و هو السميع العليم... قلتها عشان أطمن أمي و أطمن نفسي..بما إني ساير موسوس و أتأثر بسوء الظن!! قالت أمي و هيا تمسح على ظهري:قوم البس ثوبك يا ولدي... -ذحين؟! -أي والله..بغيت أشوفك... -بتشوفيني إن شاء الله..بعد العشا..أصلي و ألبسو... -اسمع..لا تصلي في المسجد..صلي في البيت... -ليه؟! -بس..أحسن.. -ليه يا أمي..أنا أبغى ربي يبارك لي... -بيبارك إن شاء الله..يا ولدي أخاف عليك من الحساد... -الحافظ الله..و الحساد رحت المسجد ولا ما رحت بيحسدوا... -قول الخير..ربي ما بيبارك و إنتا ما تسمع الكلمة..صلي هنا... قلت أبغى أرضيها:خلاص طيب..إنتي بس ادعي... -يا رب إنك ما توري ولدي يوم زعل..و تغنيه و ترزقو و توريه الذرية و تسعدو بزوجة ما تعصاه ولا تضيِّقو..يا رب إني طلبتك.. سلمت على راسها:آمين يا رب... و قمت:أنا بروح أجهز بعض أشيائي..و إنتي كمان..أمي أبغاكي ترقصي..طيب؟! ضحكت أمي بحرج:برقص في زواجك مو في بيت الناس... ابتسمت:يا سلام..في بيت الناس ملكتي..سوي إلي تبغيه... و رحت لغرفتي أجهز بعض أشيائي..لا تسألوني ايش..المهم أشغل نفسي عن التفكير.. أنا من يوم ما صحيت و أنا أبغى قلبي يهدى..يدق بسرعة و قوة..و مهما اتظاهرت بالشجاعة ترا أنا ما زلت خايف..اليوم..اليوم حياتي كلها رح تتغير..و بتوقيع مني..و توقيع منها..نتربط مع بعض..كل شي يخصني يخصها و العكس..و من قبل..و أنا أحس بدا الإحساس..كأنها حاجة و اتملكتها..صح..ما يعجبني أسلوب الزوج المتملك..بس جوتي شي..يخليني أبغاها..من يوم ما عرفت إنها وافقت بدأ شي جوتي يكبر..بهدووووء..و من غير أي إذن مني!! ^^^^^^^^^^^^^^^^^^^^^^^^^^^^^^^ الثالثة ظهراً..أحلام،،، سحبت نفس عمييييييق:أوكي..أنا مني صغيرة و لا بنت هبلة عشان أتوتر كل دا التوتر.. حطيت يدي على قلبي و قلت بصدق:يا رب.. التفت لأمي إلي نادتني:نعم.. كانت عند باب غرفتي..قالت بابتسامة:يلا حبيبي تعالي ناكل عشان تبدأ أم تغريد تسويلنا شعرنا... أم تغريد..كوفيرة تجي للبيوت نعرفها من مدة... قلت:لسة بدري... -ايوة..حتبدأ صفاء دحين..اسم الله عليها شعرها ياخذ وقت..بعدين إنتي لسة حتتروشي... قلت بإذعان:ايوة... -يلا ماما... و خرجت من الغرفة..خرجت و إذا كنتوا تبغوني أعبر فأعتذر.. حاسة بأشياء غريبة..الطبيعي يا يكون الخجل مسيطر عليا أو الفرح..أنا بس متوترة و حاسة بشوية خوف..مني عارفة أحدد طبيعة مشاعري..خاصة مع الأشياء إلي لازم أسويها..عقلي طول دا الأسبوع كان كل يوم..واحد اثنين ثلاثة..أشياء لازم أنجزها..كأني آلة..أسوي إلي أمي تقول عليه من غير ما أسأل لإني حتى لو سألت ما حفهم..توتري و قلقي غريبين..ما ينكدوا عليا أو شي..لأ..بس يسووا لي أشياء غريبة داخلي..أحس بها..يوم عن يوم..تزيد... نزلت و رحت للمطبخ..كانت ماما مجهزة نواشف و أشياء بسيطة..عشان معد أضطر آكل بعد المكياج و اللبس... بدأت آكل و كنت أفكر بتركيز..اختفى لمن سمعت صوت بابا عالي:هلا يابو شعر ثاير..هلا..يابو شعر ثاير..كسى بظلو جبينك..يا ليتني في الظفاير..يا ليتني في الظفاير..شعرة على رمش عينك..هلااا باسني:الورد يشكيك عندي..سرقت لونه لخدك..هلااا.يابو شعر ثااااير..يابو شعر ثاير... ضحكت و أنا أسلم عليه:حستشور شعري..ما حيكون ثاير... قرب مني:أقولك سر... همس:الشعر الناعم حلو..بس صدقيني..مافي زي شعرك الغجري..تحسبي ما يعجب الرجال..الرجل يحب الشعر الثائر... -زي لينا لمن ما تمشط شعرها مثلاً؟! قطب حواجبو:لا..أقصد الشعر العربي المموج و الذي يبدو من كثافته..ثائراً... -بابا..هذا إنتا..مو الرجال... بعد عني و قال بجدية:بنت..أنا أدرى..أمك فين؟! -مادري..قالت حتجي تاكل معايا... قال:كنت أبغى أذيها شوي..يلا..خيرها في غيرها..فيه أحد..مين قاعد يستشور؟! -صفاء..أم تغريد فيه.. -و أنا داخل أغني!!لا إله إلا الله..دخلتوهم حتى البيوت... -مستعد تودينا عالموعد و تنتظرنا؟! طالعنا في ماما إلي دخلت المطبخ بروبها..قال بابا:كيف تتركين بنتك لحالها..منتي شايفة نظرة القلق إلي عليها..والله إنتوا يالحريم..وش فايدة شكلك ما دام بنتك قلقانة؟! طالعت ماما فيا فرحت و بستها..حضنتني و قعدت تمسح عليا..اتكتف بابا:إذا ما انتهجت الجد قلتوا "ثقيل دم" و إذا ما مازحناكم صرتم لي عدواً... قالت ماما:امزح و إنتا تضحك..مو لازم تمثل لي الدور المرعب ذا!! -يعني خفتي... -لأ... جلست و أكلت مع ماما أما بابا فراح..قال يبغى يتأكد من حاجة..بس ماما كانت قاعدة تكلمني و تفهمني على كم حاجة..و أنا كنت أسمع بإنصات... ^^^^^^^^^^^^^^^^^^^^^^^^^^^^^^^^ السابعة و النصف مساءً..جود،،، قلت و أنا ألف المنشفة:هيا..روح البس بجامتك إلي جهزتها عشان تاكل و تلبس... قال و هوا يقرب مني:بردان... حضنتو:حبيبي أنا..روح البس بسرعة عشان لا تبرد أكتر... و خرج من الحمام..خرجت وراه و أنا أقول:علييييييييييي... دخلت للغرفة..و سمعت صوت من الحمام..قلت:لسة ما خلصت؟!..هيا بسرعة عشان ناكل و نلبس... و خرجت من الغرفة..أنا اتروشت من الصباح من بدري..عشان أقدر آخد راحتي و ما أعطلهم.. رحت للمطبخ و ما لقيت سعود..كنت حنادي لكنو دخل ينطنط من البرد..قلت و أنا أشوف البجامة لاصقة على جسمو:أنا ما علمتك أول تنشف جسمك.. قال:نشفت ماما..بس الموية ما تخلص..كل ما أنشفها ترجع في ظهري مرة تانية... قلت و أنا أجلسو على الكرسي و أمدلو ساندوتشو:عشان المفروض تنشف جسمك و تحط المنشفة على شعرك علطول..الموية تجي من شعرك.. و خرجت من المطبخ عشان أجيب منشفة أغطي بها راس سعود لا يمرض لي اليوم!! و لمن خرجت من غرفة سعود لقيت علي..قلت و أنا أتابع طريقي:يلا علي..عشان تاكل و تلبس... -مو كأنو مرة بدري؟! قلت و أنا أمدلو الساندوتش حقو:لأ..مو بدري ولا شي..أنا لسة حسوي شعري..ايشبك نسيت؟! قال علي بصدمة:جود.. قلت و أنا أجلس في الكرسي إلي جمب سعود:بسم الله..ايشبك؟! -ما رحتي للكوفيرة... -بالله؟! -والله..ايشبك..ملكة عمك..وااااه..من جد مع نفسك..بعدين هذي ملكة أختي..مستخسرة فيها يعني؟! -في جملة وحدة..اندهشت و أبديت رأيك و عصبت!! -لا من جد..جود ليش ما رحتي..ليش ما تذكريني..إنتي عارفة إني ما أنتبه لذي الأشياء... -علي ايشبك؟!..أنا شعري ما يحتاج الحمدلله..بس حمشي عليه بالاستشوار و حسوي فيه أي رفعة..بعدين أنا مني فاضية لوجع الراس..ترى الروحة للمشاغل عنى... -طب أهلي جابو في البيت وحدة..ليش ما رحتي و سويتي؟! كان علي متعاطف معايا..ابتسمت:عمة اتصلت و سألتني لو أبغى بس أنا قلتلها لأ..ما حتحمل لسة حرارة و شد و حوسة..مالي مزاج... -براحتك... سعود:مامي خلصت..ألبس؟! -لا حبيبي..لسة شوية... -إنتي قلتي!! -لمن أنا أخلص شعري ابدأوا إنتوا البسوا.. علي:ايوة عشان أصلاً هيا في اللبس حتاخذ وقت أطول..بعدين ايشبك..لسة كمان حتتمكيج..حتااخذ واااااااااااااااااااقت... سعود بابتسامة:ماما..دحين عمو يسير عروسة؟! -ايوة يسير عريس حبيبي... -طيب ماما أبغى أشوفك لمن عروسة..بابا حتى إنتا... قلت:قد وريناك... -بس صورة وحدة وريتوني..كان فيه صور كتيرة..أبغى أشوفها كووووولها... علي:هيا ذيك أءدب صورة.. طالعت في علي بغيظ..قال:كيفي..سويت شي حرام؟؟؟ -لأ..بس غير لائق... -يا سلام..ترى كنت مؤدب بالنسبة لعريس... -أنا عارفة..بس أحس المفروض ما نسمح لوحدة حيا الله مصورة تشوفنا بأوضاع مختلفة... -جود محسستني إني مدري ايش هوا... -ايوة..مدري ايش هوا... -طب أقولك..كنتي تتخيلي لحظتها إنك حتقعدي معايا ذي القعدة..جمب ولدك و في بطنك بنت مني..بالله كنتي تتخيلي؟! قلت و أنا أهز راسي:أبداً.. -هييييا أحمدي ربك..احمدي ربك يلا أشوف... -علي... -نعم... ابتسمت و قلت و أنا أطالع في عينو:الحمدلله... حط يدو على صدرو:أوه قلبي... رمشت بعيني فقال:بس خلاص بطلت... اتخصرت:لا يا شيخ..أصلاً لو تلف العالم كلو..ما تلاقي عين حلوة و فيها إلي في عيني... قام:صح..لو ألف العالم كلو ما ألاقي ظفرك.."سكت لثواني بعدين تابع"..إلا..في الزبالة..لا تعصبي..أنا ياما قلتلك تدفني أظافرك في التراب بس ما تسمعي..حلاقي ظفر من أظافرك..في مكانٍ ما.. و خرج من المطبخ..قطبت حواجبي في محاولة لفهم إلي قالو علي بس ما قدرت.. قمت و خليت سعود كمان يقوم..قلتلو بعد ما ساعدني في ترفيع الأشياء يقعد و يتفرج على التلفزيون.. -ماما أبغى ألبس توبي دحين... -لأ..عشان لا يتعدم ولا يسير فيه شي..لمن أخلص شعري و وجهي نبدأ كلنا نلبس سوا... و رحت للغرفة و بدأت عاد..مشيت على شعري بالاستشوار..قلت لعلي إلي كان قاعد يتفرج على ألبوم زواجنا:علي..فكرني إني أبغى استشوار جديد بعدين... -ايش فيه..يشتغل؟! -ايوة بس مرة قِدِم..أبغى أسوي شعري ستريت مو راضي.. -قلتلك تروحي عند كوفيرة ما رضيتي!! قلت و أنا أرجع شعري بعد ما خلصت على ورا:أهوه سويتو... طالع فيا و ابتسم:حلوة.... ابتسمت:عيونك الحلوة... قلت و أنا جالسة على كرسي التسريحة أطلع من الأدراج إلي ححتاجو:علي لو سمحت..طلعلي من الصندوق الطقم الفوشي.. -مابغا.. -علي بلا غلاسة... -أبغى أشووو...واااا..جود..هههه..عليكي هنا نظرة..زي وجهك يا شيخة.. قلت بقهر:شي طبيعي..لإنها جزء من وجهي... ضحك ضحكة مكتومة:قال مستحية إنتي و وجهك..تعالي تعالي شوفي..بالله تجين...واااا..هاهاهاهاهاها.... و سار يضحك بهستيريا..مالت على إلي جاب سيرة الصور بس!! كنت خلاص خلصت من الأساس لمن قال و هوا يقفل الألبوم:بس والله كنتي..تحفة..ساكتة و خايفة و حالتك حالة..بس أنا كنت زعلان إنك خايفة و متضايقة... طالعت في علي من المراية و رجعت أكمل..قال:جود... -ها... -ايشبك؟! ما كنت أبغى أنكد عليه بمزاجي إلي فجأة اتغير..قلت و أنا أحاول أبتسم:ولا شي.. -لا من جد جود..ضايقتك؟! التفت:وي..لأ..قلتلك ولا شي..بس أبغى أركز و إنتا ما تخليني أركز..ترى أنا قاعدة أبذل جهد.. قال و هوا يقفل الألبوم:طيب... وقفت فجأة و رحت للاب توبي..شغلتو و اتصلت و قعدت أدور في اليوتيوب..قلت:أول شفت وحدة تعمل مكياج عيونها أسود و فوشي مرة حلو... -لا إنتي الأسود عليكي مو حلو..يضيق عيونك.. قلت و أنا أدور:ايوة..مو هوا إلي عجبني إنو سوتو بطريقة..كده مدري كيف ما ضاقت عيونـ..أهوه... فتحتو و جبت مراية صغيرة بقاعدة و جلست أطبق الخطوات بحماس..و علي كان واقف و يتفرج معايا..و يجيبلي الأشياء إلي أحتاجها..من جدو كان مهتم..أول مرة يعطيني وجه في دي الأمور!! خلصت بسعادة و قعدت أقارن ما بين نتيجتي و نتيجتها..قلت:كيف؟! -حلو..سويلي أنا كذة.. ابتسمت:إن شاء الله..أولد و أسويلك..بس من جد ربي إلي ييسر..أول مرة أزبط حاجة من أول مرة..يااااه..شكراً يا ربي!! قمت و رحت أكمل مكياجي و أنا سعيدة برسمة العيون إلي سويتها..ما كان شي قوي عشان كده حبيتو..أنا ما أحب المكياج التقيل..المكياج الهدف منو يبين الجمال..مو يسوي جمال تاني!! قلت بسعادة:خلاااااااااااااااصت... طالع فيا علي باستغراب:جود..ربي يحبك اليوم..إنتي العزايم العادية مكياجك ياخذ فيها وقت أكثر.. -لا تبالغ..بعدين إنتا اليوم متحمس معايا..ما استنيتني زي دايماً..و دي تفرق..بعدين ايوة..أنا طلبت من ربنا ييسر أموري اليوم و الحمدلله أهي متيسرة و إن شاء الله حتكمل كده.. وقفت:يلا دحين..البس.. نط:و أخيراً... ضحكت و أنا أخرج لسعود عشان أساعدو.. لبست سعود و قلتلو يستنى أبوه عشان يسويلو الشماغ..أنا أعرف أسويه بس ما فيا حيل..خلاص علي ما ياخد وقت..خليه هوا يسويه!! دخلت الغرفة و قلت لعلي يروح يسوي لسعود الشماغ فخرج و قعدت أنا عاد ألبس..فستان و اكسسوار و خلال ربع ساعة كنا كلنا جاهزين!! علي:الساعة ثمانية و ربع..تتوقعي الناس يجوا ذحين؟! -قلنا بعد العشا..يعني حيوصلوا لو مرة بدري على عشرة تسعة و نص...! -طب احنا ليه متحمسين؟! -عشان ملكة أختك و عمي... -آآه طيب... وي..ايشبو زوجي؟!..مو كأنو ساير ينسى كتير؟! ركبنا السيارة و اتوجهنا لبيت أهل علي..أول ما ركبنا أنا اتصلت على عمو..رد عليا و كأنو يبغى يقول شي:ايوة جود.. كان في صوتو رجاء و خوف..قلت بتعاطف:ها حبيبي... -جود... قلت لإني عارفة إنو مو عارف ايش يقول:جهزت إنتا خلاص؟! -ايوة..آآآ..أصلاً..مافي شي..بس حلبس الثوب و..جود مابغا ألبس الدقلة من البيت.. -وي يا عمو..إلا تلبسها من البيت..يعني كيف يعني..حتلبس عند الناس؟! علي:أهم شي ناس!! أديت علي نظرة و أنا أكمل:لا حبيبي البسها من البيت.. -جود ثقيلة... -ايش إلي تقيلة؟!،بلا دلع..بعدين لا تنسى إنك رجل الحفل... عمو متوتر و ما يبغى يبين..فقاعد يدور شي يعترض عليه..عشان توترو يبان كتضايق مننا و من رفضنا لأشياء هوا عارف إنو حنرفضها... ابتسمت:البس توبك و الدقلة و تعال..أبغى أقعد معاك شوية قبل ما يجوا الناس..كمان أبغى أتصور معاك... عضيت على شفتي و أنا أسمع عمو يتكلم..غمضت عيني..يا رب رحمتك!! بلعت ريقي..قلت بصوت منهك أبغى أنهي المكالمة:خلاص حبيبي..اجهزوا و تعالو..إن شاء الله حنوصل قبلكم..حستناك!! -طيب..يلا مع السلامة.. -مع السلامة.. قفلت و دخلت الجوال الشنطة..قال علي:جود... -نعم.. -حاسة بشي؟! -لالا..ما فيا شي.. سكت علي..يا رب لطفك..مو دحين..مو دحين!! وصلنا لبيت أهل علي و حاولت قد ما أقدر ما أبين أي شي..دخلنا..سلمنا عليهم..عمتي كانت آخر وحدة سلمت عليا..قالت بابتسامة:الله..حلوة اليوم... عمي:حلوة كل يوم... أجبرت نفسي إني أبتسم..حسيت بالقلق لمن شفت ملامح عمتي تتغير..قالت:روحي حبيبي ارتاحي..شكلك حرانة... دخلت و أخدت سعود معايا..جلست على الكنبة في غرفة الجلوس البسيطة حقتهم و أنا أتنفس بصوت مسموع..قلت:سعود... -نعم ماما... -حبيبي افتح الشنطة و حط من العودة إلي فيها..انتبه لا تجيبها على ملابسك... فتح سعود شنطتي و طلع العودة..ولمن شفت ايدو تتهزهز و هوا يحاول يفتح مديت ايدي:هات..هاتها.. مدلي سعود العودة و كنت أحاول أفتحها ما قدرت..يدي أنا كمان كانت ترتجف..حسيت بالضعف و بدأت أدمع و أشهق شهقات مكتومة..كنت قاعدة أداري دموعي ما أبغاها تنزل..و بطرف أصباعي أبعدها كل ما أوشكت تطيح!! دخلت عمة و جاتني مسرعة..جلست جمبي و مسحت على ظهري:اسم الله عليكي جود..ايشبك؟! قلت و أنا أمدلها العودة بايد ترجف:مـ..مني عارفة أفتـ..ـتحها... أخدتها مني:طيب بس خلاص لا تبكي..بس خلاص.. اتكفلت عمة بسعود و قالت:خلاص خليكي إنتي هنا..لا تسوي أي شي..حنادي صفاء لكي.. -لا..ما فيا شي.."اتحمحمت"..عمو و جدة حيجوا دحين إن شاء الله..بس يخلصوا لبس و حيجوا... ابتسمت:حياهم الله..تبغي أناديلك علي؟! -لالا..هوا فينو؟! -يساعد عمك و أحمد... -آه..طيب..خلاص عمة لو..آه لو تبي شي ناديني.. -يا بنتي ارتـ..خلاص طيب حناديكي لو احتجتك..خلي هذي هنا... قالت جملتها الأخيرة و هيا تحط مخدة ورا ظهري..قالت:معاكي أدويتك؟! هزيت راسي فقالت:خلاص طيب..تبغي أجيبلك موية؟! -لا معايا..معايا قارورة في الشنطة.. وقفت:خلاص طيب ذحين أنادي صفاء تقعد معاكي... -لا الله يسعدك..خلاص سعود معايا... اتنهدت عمتي و راحت..طلبت من سعود يطلعلي حبة من المسكن إلي أستخدمو و الموية..بلعتها..خف الألم لكن ما زالت الانقباضات أسفل ظهري و بطني مزعجة..يا رب لطفك..مو دحين..مو دحين!! سعود بعد ما خلصت بلع:ماما..ايش يعورك؟! -ولا شي حبيبي..بس أختك زعلانة..تبغى تكون في الملكة زيك... -طيب هيا فيها..لا تزعلي..حقولك بعدين ايش سار... ابتسمت:تقولك خلاص معد هيا زعلانة... قال:طيب ينفع أروح عند لينا؟! -ينفع حبيبي.. -و كل شوية حجي أشوف لو تبغي شي.. ابتسمت لسعود فخرج..و بعد ثلث ساعة قالتلي عمتي إنو عمو و جدة وصلو..كنت حقوم عشان أسلم عليهم لكني اتفاجأت بهم داخلين مع علي..ابتسمت و نسيت الألم لمن شفت عمو بالدقلة حقتو و الغترة..كنت حوقف لكنو قال:لا توقفي... و جا و سلم عليا..قلت و أنا أحاول أحافظ على ابتسامتي:مبروك حبيبي... قال بهمس:خلينا نعقد أول... همست:إن شاء الله حتعقدوا.."طالعت في ساعتي"..بعد عشرة دقايق... عمو:أووووووه.... علي بشر:المأذون حيجي تسعاااااااااااا.. ابتسمت و أنا أسلم على جدة..جلست جمبي و قعدت تسألني و تستفسر..أجبرت نفسي أحافظ على ابتسامتي..لأ..ما رح أبين لهم وجعي..الملكة لازم تتم و أنا مبتسمة و فرحانة..لازم!! جلس عمو جمبي من الجهة التانية:ايش رايك بس في شكلي؟! كنت حرد لكن علي قال متعمد:مال أمك داعي..كان جيت بالثوب و لبست بعدين الدقلة..زي البزران..فرحان بلبسه الجديد!! طبعاً عمو الكلمات جات عالجرح..قلت:لا حبيبي..ما عليك منو..شوفني أهوه لابسة ومحد فيه..شوف علي نفسو لابس و محد جا..و أحلام دحين قاعدة تلبس و عمتي و صفاء و كلهم..سيبك منو.. عمو بطفولية:ايوة..أصلاً إلي مو لابسين عشنهم في بيتهم..لو كنا في بيتنا كان دوبنا بدأنا نلبس... قالت جدة بغضب و هيا تبعد يدها عني:علي..ما تشوف بنتي تعبانة..لا تكلم ولدي... ضحك علي:ايشبك جدة تسوي زي نكت المحششين؟! عمو بصرامة:هي..أمي!! اعتذر علي:آسف..بس والله..جود تعبانة ايش دخل سعود في الموضوع؟! جدة:ما بتقدر ترد عليك..."التفت لي"..جود بصلي..ما صليت سنتي!! علي و هوا يخرج سجادة من صندوق في الغرفة:صلي هنا.. فرشها لها قدام كنبة بعيدة عننا شوية.. وقفت جدة بمساندة عصايتها..و راحت لوين ما فرشلها علي!! عمو:بعدين زوجتك تعبانة و إنتا تضحك..الظاهر كل المشاعر راحت على أيام سعود..فاكر لمن... قاطعو علي:كنت بزر... -لا ما كنت بزر..كنت بتكمل ستة و عشرين سنة... ابتسمت و قلت لعمو:أنا مني تعبانة!! طالع فيا لثواني قبل ما يبتسم و يبوسني على جبهتي:صح..منتي تعبانة... رن جوال علي..رد و قال بعد ثواني:"طيب.."،قفل و قال بابتسامة شيطانية:يلا..روح عشان تدخل قفص الزوجية السعيد... طالع عمو فيا فابتسمت بتشجيع.. قال و هوا يوقف:أخواني..مين يشهد لي..ما جو!! علي و هوا يهز راسو:لااااا تحاول..لا مفر..بعدين يا غبي..أخوانك..هم إلي جايبين المأذون!! قلت:بشويش عليه..قوم عمو حبيبي..سمي بالله و قوم... علي:متأكد مليون بالمية إن أحلام قاعدة تشرب شاهي أخضر ذحين و إنتا مسوي مأساة.. قرب من عمو و مسك يدو..هزو:سعود!!..خليك رجال..ردد ورايا..أنا شجاع.. -أنا شجاع.. -أنا لستُ خائف.. اتنهدت و أنا أسمع عمو يردد زي الأهبل ورا علي إلي قال:يلا اتوكل على الله..بشوف أمي لو تبغي مني شي و ألحقكم... خرج عمو و هوا يذكر الله..يا قلبي عليه..من قلب خايف..ابتسمت..أنا كنت أقوى منو يوم ملكتي!! "جود.."..كان علي..ناداني بجدية..قال:قوليلي بايش حاسة؟! ابتسمت:ما فيا شي... -أنا ما سألتك ايش فيكي أنا قلتلك بايش حاسة... -مني حاسة بشي.."ابتسمت"..بس بتتحرك كتير و تضايقني... مسح على شعري:لو حاسة بشي أوديكي ذحين المستشفى من غير محد يدري..أحضر العقد و نمشي من غير ما نقول لأحد... هزيت راسي بلأ فابتعد عني و هوا يتنهد..كان حيخرج لكني ناديتو..التفت ليا..قلت:علي لو اتصلت عليك تعالي من غير محد ينتبه... اتنهد و خرج من الغرفة..غمضت عيني و أسندت راسي عالكرسي..يا رب تعيني..و تمرر دا اليوم على خير... ^^^^^^^^^^^^^^^^^^^^^^^^^^^^^^ سعود،،، حطيت القلم بقوة فوق الدفتر و قلت من قلب:الحمدُلله... فز المأذون جمبي فضحك كل من كان في المجلس..علي:أعصابك..أعصابك... أحمد:سعود إنتا تحفة... سعيد:لذي الدرجة ميت عالزواج يا سعود؟! قلت من قلب:لأ..بس الإنسان..في هذي الظروف..يبغى كلللل شي..يتمممم..و خلاص... علي:خلاص خلاص طيب..لا تاكلنا... أحمد مسك الدفتر على أساس بيوديه لأحلام لكن علي قام:أنا أبغى أوديه... أحمد:نوديه مع بعض.. و راحوا و هما متحمسين.. قال المأذون:اذكر الله يا ولدي و احمده... -الحمدلله.. رجعوا أحمد و علي على صوت زغاريط محترمة..قامو أخواني و عمي يباركوا..سلموا على بعض و حضنوا في بعض..باركلي المأذون و باركلنا و انصرف... أول ما خرج نطوا عليا أحمد و علي و طاحوا فيا سب:يا حمار حتتزوج..أخيراً فكيتنا..أخيراً حتلحقنا... و الكلام دا.. اعتدلوا و وقفوا صراخ لمن دخلوا مجموعة رجال و من بعد كده بدأت مراسيم الحفل..ناس تدخل..تسلم عليا..تترحم على أبوية..و تجلس..بعضهم كانوا يوقفوا يتكلموا معايا بحكم قرابتهم مني أو شخصيتهم الانفتاحية..و بعضهم كانوا يسلموا و يمشوا.. حسيت بالطفش و الملل بدأ يتسلل ليا..ايش البسطة في إني أجلس..و أوقف..أسلم و أبتسم للناس و أرجع أجلس..مو المفروض يكون اهتمامهم بيا عن طريق القعدة معايا؟؟؟!!! جا علي و وقف عندي:ياخي ابتسم.. -طفشان!! -لا يا شيخ؟! -مو ملكتي..مو الحفلة ليا..اقعدوا معايا... علي:أخوان البنت لازم يوقفوا و يستقبلوا..بعدين احنا كل شوية قاعدين ننط عندك.. -ياخي ايش القلق ذا؟!..والله الأجانب زواجاتهم أحلى مننا..ينبسطوا فيها..مو زينا..نلبس و نصرف و نحط أيادينا على خدنا من الطفش بعدين!! -أولاً هذا مو زواج..ثانياً..أبسط من كذة ايش تبغى؟!،الفرق بين ملكتك و العزايم إنك جالس في صدر المجلس و احنا واقفين عند الباب نستقبل الناس..ابتسم ياخي..لا يقولو مغصوب على أختنا... ابتسمت لكن قطبت حواجبي لمن طالعت في واحد داخل:علي هذا موووو... التفت علي و ابتسم..راح للولد و سلم عليه..خلاه يسلم على عمي إلي ضحك بعد ما سمع الولد يعرف بنفسو..سلم على أحمد و على أخواني و بعدين جاني..وقفت فمد يدو:أنا حمادة.. علي:أحمد.. -هههه..ايوة أحمد..كيفك؟!،مبرووك... ابتسمت:الله يبارك فيك.. -عارفني طبعاً؟! ابتسمت بحيرة:مو إلي..الحادث صح؟! -ايوة..احنا الأبطااااااال.."التفت لعلي"..أقولك..بقعد معاك شوية و بمشي..أحس مال أمي داعي... علي:بلا غباء..أنا إلي عازمك... -عارف إنو إنتا إلي عازمني..ايوة صح..كلمك يوسف؟! -ايوة و فهمنا ليش ما بيجي..عمر ايش عنده؟! -مادري..يقول:مالي داعي... -زيك يعني..نفس الإحساس..ليه ما جا معاك؟! -عمر بالغصب يحضر مناسبات أهلو..تبغاه يجيك..لو تناحل فيه يوم..ما رح يجي... -و يوسف ايش عنده مع أولاد أخته..كان رماهم عليها ولا على زوجها... -إفترى..يقول أمي بتخرج مع أختي السوق فرموا أولاد أختو عليه..بس ما عليك..هوا يحبهم..حينبسط معاهم!! -محمد و عبود وينهم..متى جايين؟! وكانوا يتكلموا فوق راسي..و بأسئلة علي عن أصحابو اتذكرت أنا إنو في ناس ناقصين..أولاد أخواني و أخواتي..فينهم؟!،المفروض يكونوا أول الواصلين!! ^^^^^^^^^^^^^^^^^^^^^^^^^^^^^^ جرة،،، دخل عبدالرب "عبود" للبيت من الباب الكبير المفتوح و هو يفكر بأنه بالتأكيد هو..عدد السيارات أمام البيت هائل!! قال لنفسه:حمادة الحمار قال إنه وصل..وينه؟! نظر إلى الساترين اللذان وُضعا أمامه..واحد في المنتصف أخفى مدخل البيت و آخر على الجانب..استطاع أن يستنتج بأن الأول للنساء و الثاني للرجال... نظر دون قصد للفتاة التي وقفت بعيداً عن حاجز النساء و عنه..لكن أمامه مباشرة بعباءة مفتوحة أظهرت فستاناً أخضر و حجاب وُضع بإهمال أظهر جزءاً كبيراً من شعرها..ظل ينظر إليها ببلاهة..ابتسم و هو يعدل من وضع شماغه على رأسه..تحمحم..اتجه إليها و قال بابتسامة واسعة:لو سمحتي..هذا بيت علي بن سلطان؟! ظهر على الفتاة توتر شديد..قالت بتلعثم و هي تحاول تغطية ما ظهر:ما..مادري..مني من أهل البيت... و كادت أن تدخل لكنه أمسك بيدها:لو سمحتي طيب..ممكن أتزوجك؟! صاحت:ها!!!!! -لو سمحتي..الله يخليكي..والله ترى أنا مرة كويس..بس قوليلي اسمك و ايش تقربين لعلي و خلاص... حاولت شد يدها و هي تقول بغضبٍ الآن:اترك ايدي.. خرجت جود بعباءتها و حجابها..تعجبت عندما رأت رجلاً ممسكاً بيد فتاة و لم تحتج وقتاً لتستنتج هويتيهما...! قالت بغضب:سارة!! التفت سارة و قالت برجاء و خوف:جوووود.. و هربت إليها..ابتسم عبد الرب:أم سعود..أخبارك؟! اشتعلت جود غضباً:إنتا مو صاحب علي؟!،ايش تسوي واقف معاها؟! -ولا شي بس... قالت جود بشدة:امشي من قدامي... قال بضيق:أعصابك..أصلاً أنا ما قد سويت كذة.."ابتسم"..بس عشان عجبتني..قلتلها ايش اسمك و ايش قرابتك لهم بس ما رضيت تقولي... قالت بغيظ:أختي لها أهل..روح دق بابهم لو تبغاها..مو تمسكها في حوش بيت صاحبك و..وبعدين ايدك ما تنمد لها..سامع؟! تبسم بسعادة:أختك؟!..بس خلاص..شكراً!! و ذهب..و حالما اختفى بكت سارة..التفت لها جود فاحتضنتها:سارة من جدك..هذا واحد مخرف..بعدين إنتي ايش إلي مطلعك برة؟! -عـ..عشان ماما قالت لي..أستنى خلود لإنو السواق حيجيبها و هيا ما تعرف البيت..بس هذا طلع لي مادري من فين و قلي ممكن أتزوجك؟؟؟ -قلك كذة؟! -ايوة..فجعني!! تنهدت جود وهما تدخلان:لا حول ولا قوة إلا بالله..مجنون هذا؟!..بعدين هدي أول مرة يدخل فيها بيت أهل صاحبو..ما قال لو شافني علي لو سمع شي من أحد؟!..خلاص حبيبتي لا تبكي..و الله يسعدك لا يطلع دا الشي لأحد..حتى لأخواتك!! هزت سارة رأسها بتفهم و هي تعدل من وضعها..رن هاتفها المحمول فأجابت:نعم..ايوة هوا باب كبير مفتوح و قدامو سيارات كثيرة..اييييييييوة.. أنهت سارة المكالمة:"خلود وصلت.." و بالفعل لم تكن إلا ثواني و إذ بخلود تدخل..ابتسمت جود و استقبلتها:أهلاً..كيفك؟! -الحمدلله بخير..سارة فين ماما؟! جود:جوة تلاقيهم..اتفضلي حبيبتي.."مدت يدها"..هات عبايتك... سارة و هي تأخذ العباءة:لا جود..معانا كيس عشان لا تضيع عباياتنا... خلود:طيب قلتي لماما إنو عبدرالحمن و عبدالإله وصلو..جو علطول ورايا... سارة:أكيد كلموها أو على الأقل عبدالرحمن قال لحليمة!! و دخلتا و دخلت جود للمطبخ..جلست على الكرسي بتعب:آآهــ... دخلت صفاء بغيظ:ما أبغاها ذي الأخوة... نظرت جود لفستان صفاء الهادئ..على عكسها تماماً..خالٍ من أي تقاصيل دقيقة... جود:ارفعي فستانك لا ينعدم... -أصلاً الفستان معفن..أنا الطويل ما ينفعلي.. وضعت وشاح بلون الفستان على الطاولة:قلت لأمي بس ما سمعت..إلا حلو..البسيه!! -طيب حلو... -لأ مو حلو..أنا ما ينفع لي الأشياء الناعمة..أنا لازم ألبس شي قوي..بعدين قلت هاذي ملكة أختي لازم أسوي فيها شي غير!! -ايوة بس دي في البيت..بعدين إنتي ليش كده معصبة؟! -ولد عمي محمد بيجي و يبغى أحد يساعدو في شيل الصحون..و مافي إلا أنا المسكينة..قال ايه..إنتي أختو..طب و باقي أخواته فين..ليش ما يساعدونه؟! قالت جود في محاولة لتهدئتنها:طب ليش زعلانة؟!،اطلعي و ساعديه..مافيها شي!! ضربت قدمها بالأرض:قهر قهر!!..ذلوني على ذي الرضاعة..بعدين أمي ما لقت ترميني إلا على أمه..هو إلي دايماً يوجب و يجيب الأشياء و أخواتو حاطين رجل على رجل..أنا إلي أساعده كل مرة..مالت عليه و هو يقدم خدماته على حسابي!!! قالت جود بتساؤل:تكرهي أخواتو؟! فكرت صفاء لثواني ثم شهقت:لا بسم الله بنات عمي أحبهم..والله حتى هوا أحبه..بس حماااااااااااااااار... و خرجت..وقفت عند الباب لتتأكد من عدم وجود غيره قبل أن تخرج..انتبهت له و قد أعطى الباب ظهره..كان واقفاً في طرف قرب مدخل البيت..سترت ما ظهر منها و خرجت مسرعة..وقفت وراءه فلم يشعر بها..ظلت تنظر إليه بحقد..بدأت تنقر بسبابة يمناها على ظهره فلم يتحرك..قالت:هيييييييييي..إنتا..وجع اتكلم.. لا رد فعل..قالت و هي على وشك البكاء:محمد!! تمتم بشيء فقالت بغيظ:محمد يا حمار..أنا خارجة لمين؟! كادت أن تتحرك لتقف أمامه و هي تقول:و ربي لو ما تـ... -أنا محمد لكني مني حمار و لا أنا إلي تعرفيه!! هل سكب أحدهم ماءً بارداً عليها؟!.. تصلبت مكانها..الجسد نفسه..لكن الصوت.. تابع:ممكن تبعدي ذحين عشان أدخل؟! بشكل سريع قالت و هي تهز رأسها:أ..أنا..حسبتك أخوية...أنا آسفة... -يا أمي ادخلي جوة أبغى أمشي..من يوم ما جيتي بتخرجي و أنا لاف أستناكي ترجعي.. -طيب... نفد صبره..قال بغضب:ادخلي خلاص... أتاهم الصوت عالٍ:صفاء..صفاااااء..محمد يقول الطريق زحمة حيتأخر شوية..لسة ربع ساعة كمان!! هي ميزت الصوت..إنها ابنة عمها..هو قال لأنه ما زال يشعر بها خلفه:ادخلي..محمدك لسة ما بيجي ذحين... قالت قبل أن تجري للداخل:ترى مو أنا..إلا أنا..بس ترى مو أنا إلي يقولو عليها... تنهد حينما سمع صوت الباب..التفت و هو يحمد الله مئة مرة ألم يرهم أحد..ردد:متخلفة!! و اتجه لقسم الرجال... أما عند صفاء التي لجأت لجود في المطبخ:جوووود..سويت شي متخلللللف... -هااااا... -أنا..أنا محمد أخوية كبير..ضخم و طويل..خرجت و لقيتو مديني ظهرو..رحت و مديت ايدي عليه و قلت كلام غبي و في الأخير طلع مو محمد..يا ربيييييييييييييييييييييييييي.... قالت جود و هي تتنهد:من جد إنو البنات... -ايش؟! -ولا شي..سلامتك..و محمد أخوكي فين؟! -ما سمعتي إلي صرخت؟! -إلا..بس مشكلة لو حيتأخر أكتر من ربع ساعة..احنا نبغى نخلص بدري... -إلاااا..إنتي ليه قاعدة هنا من أول؟! -حسيت بصداع و شوية ألم..قلت أجي هنا أهدى شوية... -جود ترا اليوم... قاطعتها:ما فيا إلا العافية..أخدت مسكن و دحين خارجة أساعد أمك... قطبت صفاء حواجبها:كنت حقولها إنو..مكياجها حلو!! رفعت أكتافها و لم تلقي لهذا بالاً..خرجت لتجالس الموجودات!! ^^^^^^^^^^^^^^^^^^^^^^^^^^^^^^ سعود،،، لمحت سعود داخل و ماسك في يد واحد كبير..استغربت..قلت لأحمد:تعرف من هذا إلي ماسك في يد سعود؟! طالع أحمد و كان الشاب اتجه لعلي و أحمد و عبدالرب و قعدوا يتكلموا..قال أحمد بابتسامة:علي لاملنا شلته اليوم!! -انبسط و لا تزعل..صدقني أحسن من المتخلفين إلي أول!! -تصدق شفت واحد قبل كم يوم في الشغل..يبغى وظيفة..انرفض طبعاً..الأخ عمره 29 و دوبه يخلص بكالوريوس..و لمن شافني قال:أخو علي؟!..هلا والله و يسلم و يسأل..يبغاني أتوسط له يعني.. -و ايش قلتلو؟! -قلتله مالي يد أنا في الشركة..ولا أنا موظف لي سمعتي و بعدين غير كذة..ما يستاهل..لو يستاهل كان ممكن أكلم أي أحد لكن والله حقه يمسك تاكسي ولا يبيع في مطعم..عشان يعرف كيف يستهتر!! -يا شيخ..الله يصلحهم و بس... ابتسمت لمن شفت علي و إلي معاه متجهين ليا..وقفت و سلمت على إلي عرف بنفسه كـ"محمد"..جلست و جلسوا هما حواليا و حركوا الجو..أحمد كان واقف معايا بس مسكين كل شوية يتنادى من أبوه عشان يسلم على مدري مين و يستقبل ولد مدري مين... سعود كان قاعد يطالع فيا بابتسامة..ابتسمت غصباً عني..ناديتو و جلستو فوقي..قال:عمو دحين إنتا سرت عروسة؟! علي:يا ابني عريس..عريس... قطب حواجبو:عريس مو حلو..ما يحط ألوان..عمو حلو... أحمد:عمك مو حاط ألوان... -إلا شوف.. و حط يدو على صدري..قلت:صح أنا اليوم ملون..إنتوا إلي مو ملونين... قال سعود:شفت ماما؟! -ايوة.."همستلو في أدنو"..ششش..بعدين بابا يزعل لو قلت ماما قدام أصحابو... هز راسو بتفهم:معليش..بابا غريبُ الأطوار... علي:سمعت بابا بس حسوي نفسي ما سمعت... عبدالرب:عندي إحساس إنه سبك... محمد:سعود ما يسب... سعود:صح..ما أسب..أنا بس أقول... ضرب أحمد "صاحب علي"..عبد الرب:يقول..ما تفهم إنتا؟!..بس يقول... ضربو عبدالرب:أصلاً ما يقول و لا يسب..سعود هذا ردة فعل بس... قلت:لازم يسير طفل همجي عشان يسير فعل... -ايوة..بعدين إذا كبر ينعاب عليه لو سار قليل أدب و الإنسان لازم في فترة من حياته يكون قليل أدب... محمد:قلة الأدب شي نسبي..يختلف من شخص لآخر..ناس قلة أدبهم يضايقوا بنات الناس و ناس قلة أدبهم يقرأوا كتب ساقطة و ناس قلة أدبهم يسبوا و ناس يضربوا و كذة..قلة الأدب شيء غير مُعَرَّف!! و شوية شوية دخلو في حوار حول هذا الموضوع..و من غير ما يحسوا ابتعدوا عنا..قال أحمد لسعود:سعود فين الأطفال جالسين؟! رفع سعود أكتافو:في كل محل..شوف فيه عندكم و فيه عندنا... أحمد:ياخي أقلق على بنتي في زي هذي المناسبات... قال سعود:لا عمو..قاعدة مع لينا.. ابتسم أحمد و قال:سعود ايش رايك تتصور مع عمو؟! -ايوة.."التفت لي"..حتى ماما قالت تبغى تتصور معاك... -إن شاء الله... طلع أحمد جوالو و عدلت أنا من وضع سعود فوقي..و ابتسمنا..صور أحمد و ورّانا..ابتسمت:حلوة... سعود و هوا لاوي فمو:جوالك..أهبل... أحمد:لا يا شيخ... سعود:معليش عمو..بس لازم صورة حلوة... و نط من فوقي و راح لعلي و سحب منو الجوال بعد إزعاج و جا..طلع فوقي و مد الجوال لأحمد:يلا صورنا... و حضني و هوا يطالع في الجوال..ابتسمت و لفيت يدي عليه..صورنا أحمد و هوا زعلان على جوالو..قال و هوا يرسل الصورة لنفسو:من حلاة جوال أبوك يعني... -جوال بابا ما فيلو خمشات... -ايش أسوي يعني لمن جوالي يسير جوال بنتي؟!..ترى و الله علي أهمج مني بس عندو ولد مؤدب... ضحكت:مأساة لو علي ولدو زيو... أحمد:ما كان حيصبر عليه..كانت حتنعاد مأساة أبوية و علي..الأب عصبي و الولد جني!! ضحكت:معليش..الحياة صعبة!! و بعد مدة نزل سعود وخرج من عندنا و هوا يقول:"أبغى أشوف مامي كويسة"..قال أحمد بريبة:فيها شي أم سعود؟! رفعت أكتافي:مدري..من يوم ما جيت أعطاني علي إحساس إنها تعبانة... -إنتا ما شفتها..ما سلمت عليها؟! -إلا..بس كانت تقول إنو ما فيها شي..مادري..قلقوني عليها... -إن شاء الله ما فيها شي..يمكن شي عارض بس!! -إن شاء الله... بس من جد..ايش فيها جود؟!..لمن علي يقولي ادخل لها جوة ما تقدر تطلع..من جد فجعوني أول ما جيت..بس علي مبسوط و مرتاح..معناتو ما فيها شي الحمدلله.. بس كان شكلها تعبان و..يا ربيييييييييي..خلاص طفشت!! ^^^^^^^^^^^^^^^^^^^^^^^^^^^^^^ جود،،، اتنهدت و أنا أستنى عند باب الصالة..إلي يفصل بين مجالس الرجال الكبيرة و البيت... العشا انحط للناس و عمو دحين حيدخل لأحلام إلي وصلت للصالة أخيراً!! قالت لعمتي:ماما مابغا هوا يدخل و أنا أكون مستنية..أول هوا يدخل... ابتسمت عمتي:طبعاً يا ماما..أجل..بخليكي تستنيه... صفاء:ماما ترى جود واقفة!! طالعت فيا عمتي:زعلتي؟! قلت بدون أي تعبير:لأ... عمتي و صفاء و بعض المقربين كانوا واقفين يستنوا أحلام و عمو يتجمعوا عشان يزغرطوا..و بعدين يروحوا للعشا و يتعشوا..هما قالو لمن عمة عرضت عليهم إنهم يروحوا:"بنطمن على بنتنا"..و حتى عماتي و البعض من أهلنا..كانوا واقفين يستنوا عمو يجي عشان يسلموا عليه!! رن جوالي..رفعتو بضيق و كان علي..رديت بتعب:هااااه.. -ايش إلي هااه..تعالي شوفي عمك..فجأة..ماله داعي..حرام نحرج أحلام!! قلت بطفش:استغفر الله العظيم..وينكم إنتو؟! -احنا ورا الباب و صوتك طالع..أحمد طير شوية هناك..يلا تعالي... فتحت الباب بهدوء و مريت منو..كانوا الواقفين عمو و علي و عمي أبو علي و بابا و عمي سعد و عبدالإله و عبدالرحمن... ابتسم عبدالرحمن و أشرلي..لكني _و بكل قلة حيا_ طنشتو!! طالعت في عمو..سلمت عليه ببرود:مبروك... همس عبدالإله بشي..طالعت فيه بعدين رجعت أطالع في عمو..قلت:ايشبك؟! قال بتردد:ما..يعني..حرام أحرج البنت و كذة..خلاص مو لازم و أنا ما عندي مانع..يعني لو هيا... -عمو... -نعم؟! أشرت على باب الغرفة إلي المفروض يدخلوها:"ادخل"..أشرت على البقية:إنتوا..برة!! و مشيت لجوة وين ما كانوا الحريم واقفين..قلت بصوت عالي:إلي يبغى يسلم على عمو..هوا واقف لحالو..أحلام..بعد ما يخلصوا ادخلي..عمة..أنا رايحة أشوف سعود و جدة!! و اتعديت الحريم إلي كانوا يطالعو فيا بذهول!! ما أدري إذا نفذوا إلي قلت عليه لكني..تعبانة و ما.. عضيت شفتي السفلى:"يا رب سترك..." حاولت أستجمع قوتي و دخلت لوين ما كان العشا محطوط..شفت جدة تتعشى مع كم حرمة..اتمنيت ما تشوفني عشان ما تناديني..مالي مزاج أكلم أحد... دخلت المطبخ وين ما كانوا الشغالات الموجودات يتعشوا..دخلت عمة بعد ثواني للمطبخ..كانت حتتكلم لكني قلت:دخلوا؟! قالت و هيا تتوجه ليا:ايوة.."همست لي"..قومي يا بنتي..لا تقعدي تحت عينهم..ما بيذكروا الله عليكي... قلت و أنا أقوم:ولدي فين؟! -مع الأطفال..غرفتلهم في غرفة الألعاب..تعالي إنتي اتعشي... -لا لا مابغا... خرجتني من المطبخ:جود والله لتتعشي..شوفي كيف وجهك..عمك خايف عليكي..سألني ايشبك؟! ابتسمت بتعب:كلمك؟! -ما بغى يرد عليا السلام بس لمن شاف وجهك نطق... -معليه ترا مو قصدو..بس هوا خجول... -عارفة..تعالي إنتي اتعشي... -عمة مابغا أدخل جوة..مابغا أشوف أحد... -طيب اقعدي هنا..و أنا بجيبلك إلي تبغيه... -مابغا شـ... -ماما... التفتنا لسعود..اتقدم مني:ماما جبتلك... ابتسمت عمة:هيا والله ما تردين ولدك..كلي إلي جابه... ابتسمت و أخدت الصحن من يد سعود..عمة جلستني على الكنب إلي كان موجود برة المطبخ..تقريباً كانت صالة..وصت سعود عليا و راحت تهتم بضيوفها... كان الصحن مليان بأشياء أحبها..بس النفس مسدودة..اتنهدت و أجبرت نفسي آكل..عمة حلفت عليا و غير كده أبغى أجبر بخاطر سعود... سعود:ماما إنتي ايشبك؟! -ولا شي حبيبي... -إلا..من أول..منتي فرحانة و عمو سار عروسة... ابتسمت و قلت بصدق:دحين مافي شي يعورني... -طيب أول؟! -إلا..بس دحين لأ... -و بعدين؟! -إن شاء الله لأ... ما كنت أبغى أكون في ملكة عمو كده..كنت أبغى بنفسي أدخل معاه و أسلم عليه و على أحلام و هما مع بعض بس تعبانة..و نفسيتي زفت..مو معقول إلي أنا فيه..مو معقول!! لمحت صفاء متجهة ليا..جلست جمبي و هيا ماسكة صحن:أمي موصيتني عليكي..جوالي معايا و رقم علي جاهز..بكبسةِ زرٍ واحدة يجـ...جوووووووووووووود... صاحت و هيا تطالع في فستاني... قلت و أنا أحاول أتماسك:دقي على علي.. -جو... -اصصص..لا ترفعي صوتك..دقي على علي.. غرزت أصابعي في الكنبة و أنا أحاول أكتم آهاتي... بكي سعود:مامااااا... -لحد يدري عني..لحد يدري لين ما كل الناس تروح...آآآه..اتصلي علي علييييييييييي... صفاء:عـ..علي جود..جود... ... ^^^^^^^^^^^^^^^^^^^^^^^^^^^^^^ صفاء،،، ؟؟؟؟؟؟؟؟؟ رميت العباية على جود بأمر من علي و قفلت الباب..عباية مين كانت؟!..مادري!! طالعت تحت لسعود إلي كان يشدني و يبكي:ماما..مااااامااااا... سمعت خطوات و خلال ثانية انتبهت..نزلت لسعود و حضنتو:بس حبيبي بس.. سارة:بسم الله ايش فيه؟! -ها..لا ولا شي..بس يقول وسخ ملابسه و خايف جود تخاصمه... قربت سارة و قالت و هيا تسحب سعود مني:فين؟! ازداد بكى سعود فرجعته لحضني:شفت مو باين؟!.."التفت لسارة"..يقول انكب السفن عليه بس الأغلب إنو موية لإنو مافي في ثوبه ريحة و لا دبق!! ابتسمت سارة:عادي حبيبي..ما حيبان..سفن ولا موية..بعدين ما بنقول لجود..صح صفاء؟! شلتو:صح.."مسحت دموعو"..خلاص حبيبي لا تبكي.. قالت سارة:أمك تبغاكي جوة..تدور عليكي... بست سعود:بروح لها و بالمرة أتعشى مع سعودي حبيبي... و رحت للبوفيه و قلبي في رجلي..رحت لزاوية فاضية:سعود حبيبي..سمعت ماما ايش قالت..نقولهم لمن الناس يروحوا..طيب؟!،عشان لا نسوي رجة!! -ماما تموت؟! -لا وي اسم الله عليها..بس تروح تجيب البيبي و تجي.. -إلا..أنا شفت دم... قلت بفجعة:فين دم؟! طالعو الناس فيا فوطيت صوتي:فين الدم حبيبي..مافي دم؟! قال و هوا مستمر بالبكا:إلا..في الفستان..دم... ابتسمت و مسحت على راسو:حبيبي هذا مو دم... الظاهر سعود كان يتخيل.. قال بإصرار و هوا يمسح دموعه:إلا..أنا شفت..ماما حمرا... -وجهها أحمر... -لأ..فستانها!! -يتهيألك حبيبي يتهيألك..هدي بس أختك السوسة ضايقت أمك شوية!! وععععععععع..يا كرهي لنفسي و أنا أتعامل مع الأطفال بذي الطريقة..أية كذبة ممكن تقنع سعود؟!..مادري!! قال سعود بحقد:غبية!!عورت ماما!! -لا حبيبي لأ..و زي ما اتفقنا..ما تقول لأحد..ماما وصت..إذا تحب ماما اسمع كلامها!! هز سعود راسو و مسح وجهو..فجأة طلعولي بنات أعمامي و عماتي و سألو عن سبب بكا سعود فقلت:انكبت موية على ثوبو..فاتضايق... "عادي حبيبي مو باين منها شي"،"يا قلبي على النظافة"،"اسم الله عليك تجنن"...إلخ... و فجأة..حسيت نفسي كارهة الدنيا..بس ما أقدر أسيب سعود..الوضع خطير..ممكن في أي لحظة يتكلم و جود معاها حق..ما ينفع نسوي رجة..يا رب يسر لها ولادتها..يا رب.. رفعت جوالي أبغى أدق على علي لكني اتراجعت..أكيد لسة في الطريق..يا رب سهل دربهم..يا رب... و بعد شوية خرجت كَذة عائلة..شوية شوية إلين ما فضي البيت إلا من قرايبنا..كنت معصبة..أبغاهم يروحوا لكنهم أقارب..خالاتي و عماتي..ما حعرف أبتسم و أجامل..عشان كذة ما احتكيت بأحد..و جلست أنا و سعود على طاولة في الطرف ناكل..انبرشوا عليا بعض بنات خلاتي بس بعدين راحوا..الظاهر لمن شافوني ما أعطيتهم وجه بعدوا..حتى سعود..حاولوا فيه..ما رد عليهم..قالت وحدة فيهم:أعوذ بالله..نكديين... قلت بطفش:أبغى أنااااااااااام... -نامي..أصلاً إنتي ايش تسوي غير إنك تنخمدي؟! سبيتها فردلتي و راحت... يا ربي..مو معقول.. طالعت فيهم..كلهم أقارب..أقارب أقارب..و أمي بدأت تتصرف كأنو مافي أحد..ايش لازم أسوي..هل أقول ذحين؟!،ولا آخذ أمي على جمب و أكلمها؟!..يا رب..يا رب الهمني... ^^^^^^^^^^^^^^^^^^^^^^^^^^^^^^ |
الجزء الخامس و العشرون (نهايةُ البداية~) سعود،،، اتحمحمت و عدلت من غترتي و أنا أسترق النظر لها..جمال هادئ و ناعم..بعيد كل البعد عن الألوان المؤذية للعين!! هذا..الجمال إلي أعتبرو جمال!! بعدين..فستانها..حلو..طويل بس من غير أكمام..لونو سكري..عجبني..كان حلو..فيه أشياء مشدودة و فيه ثنيات ثابتة..مادري كيف..بس إنها كانت ثابتة و ما تتحرك..حتى الشدات..أعتقد إنهم في نفس الخياطة يشدوا الخيط عشان يعطي هذا الشكل!! في النهاية الفستان رسم جسمها بطريقة حلوة!! طالعت في ساعتي لمن انتبهت لبصري وين راح..أوه..طولنا و احنا ساكتين..أخاف تُنهى الجلسة و احنا ما اتكلمنا..بس..أوكي عارف..لازم أنا أبدأ..قلت أول شي جا على بالي:مبروك.. رفعت عينها:الله يبارك فيك.. جات عيني في عينها..فبدون أي شعور ابتسمت..فأخفضت راسها... زعلت..ليش ما ترد الابتسامة؟!،آآآآآه يمكن مستحية..معقول؟!،طب ليش..أنا ما سويت شي قلة أدب أو جريء!! قلت و أنا أحاول تكون نبرتي جدية:أحلام..أنا جود كلمتني عن شغلك..و أنا أقولك إني موافق..أهم نقطة عندي إنك ما تقصري فيا..غير كدة..حياتك إنتي حرة فيها..أصلاً ما أفضل إنك تقعدي في البيت.. و أكون شغلك الشاغل... طالعت فيا:بابا ما كلمك عن الشغل؟!،كلمك و قلي ردك..بعدين ما حتكون شغلي الشاغل..أنا حتى لو ما اشتغلت لأسباب خارجة عن إرادتك زي إني ما ألاقي..أنا عندي نشاطاتي..أنا أترجم و أدرس أحياناً..أشرح بعض القواعد لأولاد صحباتي و كذة..ما رح تكون شغلي الشاغل... كانت تتكلم بثقة..الشي إلي ضايقني..لإني من الأساس ما كان قصدي أقول ذاك الكلام..أنا عارف إنها عارفة إني موافق على الشغل و فاكر حواري مع أبوها في التلفون بعد الشوفة..لكني كنت أبغى أقول شي و هدا أول شي جا على بالي!! على كل حال أستاهل..كان قلت أي شي ثاني..حبكت موضوع الشغل!! ابتسمت من جديد و قلت:متى تبغي يكون زواجنا؟! أعرف بايخ بس سألت هذا السؤال عشان ما تعرف ترد..ابتسمت و أنا منتظر ردة فعل... بعد نص دقيقة قالت بخجل:اليوم..ايش رايك؟! -ها؟؟؟؟ طالعت فيا ببديهية:لسة اليوم ملكتنا..تسألني عن الزواج ليه؟! قلت بهدوء و أنا أحاول أمسك أعصابي:عشان مني عارف في ايش أتكلم..و بعدين إنتي المفروض إنك تستحي من كل كلمة أقولها... -ليش؟! -عشان..مادري..خلاص.. نزلت أحلام راسها و سكتت و إذا ما كنت غلطان فوجهها كان أحمر..مو خجل..مادري ايش..بس مو خجل!! رفعت راسها و هيا تتنهد..قالت و هيا تحاول تتجنب النظر فيا:آسفة.. -على؟! -على..أسلوبي.. قلت و أنا أفقد توتري:و ليش استخدمتيه؟! -عشان..مادري..بس.. ابتسمت:مشكلة لو هذا خجلك.. -لاااا..بس..مادري..خلاص آسفة.. -طيب..هذا أول حوار لنا... أخفضت راسها و هيا تتنهد..قلت:أحلام.. رفعت اسها و طالعت فيا بنظرة غريبة..عجبتني و لأول مرة أنا أنطق اسمها و ترد عليا هيا..مباشرة!! قلت بهدوء:أحلام..إنتي عارفة بكل إلي فيا..صح؟! هزت راسها من غير ما تطالع..وقفت و اتوجهت لها..جلست جمبها..من غير ما أحس..كنت فعلاً..تحت سيطرة مشاعري.. مسكت يدها و قلت بصدق:أحس..إنو ما حيكون فيه أولاد يصبرونا على بعض..عشان كدة..وعد مني..ما أضايقك في يوم..ما أقولها لكي زي ما كان ممكن أي واحد يقولها..أقولها لكي صادق..ما حيكون عندي غيرك أعطيه اهتمام..جود و اتزوجت و إن كنت لسة ما انفصلت عنها كأب..أمي..مالي كلمة عليها..حرمة كبيرة و لها احترامها..أبرها و أرضيها..لكن إنتي..الوحيدة إلي أقدر أعطيها كل يوم..و أتوقع منها مقابل..عشان كذة..من جد يا أحلام..عمري ما حضايقك بكامل إرادتي..هذا وعد..و إذا أخلفتو..ذكريني!! انتبهت لها و هيا تحرك شفايفها تبغى تقول شي بس مي قادرة..ابتسمت و نسيت أي إحساس بالذنب!! و اندق الباب بعد مدة..حوالي الربع ساعة..كان أحمد..طالع فيا بصدمة:سعود..ايش إلي وداك هناك؟! اعتدلت في قعدتي و بعدت عن أحلام.. اتوجه لنا أحمد و هوا زام شفايفو..مسك ايدي و قومني:عيب..عيب يا بابا..ما ينفع حبيبي كذة..قلة أدب على طول..شوية شوية..شوية شوية ولا بعدين أختي تكرهك... قال أحمد فجأة بخوف و هوا يطالع في أحلام:آسف... طالعت في أحلام لكنها كانت منزلة راسها..وقفت:عن إذنكم... و خرجت فطالع فيا أحمد بسعادة..قال باستعباط و كأنو معصب:تمسك يد أختي هااا..تمسك يد أختي..والله لوريك شغلك..والله... -أحمد... -سعووووووووووووود... و حضني..ضحكت و حضنتو..قال بانفعال:حمار..مبروك... -اليوم أنا حمار و حيوان و غبي و كل شي... -من حبك سبك.. -من سبك حبك..المهم..علي فين؟! -مدري عنو..حتى أصحابه مساكين راحوا..بغوا يسلموا عليه ما لقيوه..مدري فين راح... حسيت بالقلق..طلعت جوالي و اتصلت على جود لكن جوالها كان مقفل!! قلت لأحمد بقلق:جوال جود مقفول... -طب شوف علي... اتصلت على علي و نفس الحكاية..قلت:فيه شي..امشي امشي بس... -سعود وين رايح؟! -مادري..بشوف أمي..شوفلي طريق... -اصبر يا سعود الله يهديك..دقيقة أنا بكلم أمي تشوف جود..يمكن تكون موجودة و جوالها فصل مافي شحن أو شي... طلع أحمد جوالو و اتصل:"ايوة هلا أمي..أقولك شوفي جود بالله..سعود يبغاها..."،"ايوة أبوية قال خلاص.."،"لا مع إلي باقيين..قاعد معاهم أنا مع سعود..هيا أمي شوفي جود.."،"مع السلامة.." فصل:قالت بتشوفها..ايشبك ياخي فجأة؟؟؟ -كانت تعبانة..كانت تعبانة حسيت أنا..قالتلي ما فيها شي..و شفت علي مرتاح قلت أجل شي عارض..أكيد إنها... قاطعني بشدة خفيفة:سعود اهدى..و إذا..أكيد إنها راحت بتولد..ادعي ربك يسهل..ما فيها إلا العافية... -لأ..ما تولد اليوم..تعبانة و طول الأيام إلي فاتت مشغولة بالملكة..ما ينفع اليوم... اتنهد أحمد و هوا فاقد الصبر في إني أفهم بس أنا صح..مو اليوم..جود تبعانة!! رن جوال أحمد،رد و قال بعد ثواني:كيف يعني مي موجودة؟!..ايش إلي مختفية..شبح هي؟!..أمي علي كمان مو موجود... بس خلاص أنا رايح لأبوية أقله...شوفو حاولوا تتصلو على علي ولا على أي أحد... و خرج أحمد من المجلس..خرجت وراه و من غير إحساس رحت لجوة البيت..لقيت عمتي في وجهي..مشيت لها..مسكت أكتافها:جود فين؟! شهقوا الموجودات و دخلو لمادري وين..قلت بقهر:فين جود؟؟؟ رفعت راسي لمن سمعت:مامااااا... كانت بنت جاية و رجعت مفجوعة لمن شافتني..قلت بصوت عالي:ايش فيها جود؟! تركتني عمتي و رجعت لي بعد ثواني..قالت بهدوء:جود أخذها علي..بتولد... تركت عمتي و جيت خارج..لقيت عمي في وجهي..مسكتو من أكتافو و قلت بخوف:جود بتولد... عمي بشدة:و إذا بتولد..الله معاها و ييسر لها..كيف تدخل على بيت ما تدري من داخله؟!..امشـ... قاطعتو:عمتي... أحمد:خلاص أبوية... عمي:لا حول و لا قوة إلا بالله..اذكر ربك و امشـ... قاطعتو للمرة الثانية:إذا رحت تزعلوا؟! -نعم؟! -عمي إذا رحت دحين..أحلام تزعل؟!،حتتضايقوا؟!،حتحز في نفسكم؟! طالع عمي فيا و بعدين قال:سعود إنتا مؤمن؟! -ها؟؟ -قول لا إله إلا الله... -لا إله إلا الله... طفيت فجأة..رفعت بصري لهم..قلت بحرج:أنا آسف... هز عمي راسو:شيطان..نعوذُ باللهِ منه... اتعوذنا أنا و أحمد من ابليس و أخذنا عمي للمجلس إلي كنت فيه أنا و أحلام و قعدنا..بعد مدة جانا سعود..جا عندي و قعد يبكييييييييي.. حضنتو و حاولت أهديه..سألتو ايشبك مارد..قعد أحمد يساعدني في تهدئتو..و عمي قعد يتصل..قال بغضب:ما يرد.. أحمد:طبيعي ما حيرد أبوية..ما حيقدر يكذب و يخاف يشغلكم..أصلاً من البداية اختفى من غير ما نحس..أكيد ما بغى يلفت الأنظار... -لكني أتصل..معناته فقدته..ليش ما يرد؟! ^^^^^^^^^^^^^^^^^^^^^^^^^^^^^^ علي،،، قعدت رايح جاي رايح جاي..يا رب تسهل يا رب..يا رب تهون عليها..يا رب!! جلست على الكراسي و طالعت في جوالي..مابغا أفتحه..لو فتحته حينسال سيل اتصالات و أنا مابغا أرد على أحد ذحين..حتى و لو كانت ملكة أختي..زوجتي تولد..ولازم أكون معاها..و إن كنت أتمنى أقول لأحلام في يوم زي كذة:مبروك!! يا رب تلطف و تيسر..يا رب!! طالعت في الساعة و رجعت رفعت راسي..أكيد الناس راحت و أكيد أهلي حسوا فيني ذحين!! ذكرت الله و أنا أهدي نفسي..ليش قلقان و أتعرق؟! هاذي مي أول مرة لا ليا و لا لجود و بعدين..بعدين صوتها أخف من لمن على ولادة سعود..لمن جاها الطلق على سعود العمارة كلها دريت..ذحين صبرت..و ما طولت قبل ما تدخل لغرفة الولادة..على عكس سعود..معناته..معناته إنها كانت بالفعل تتألم آلام ولادة..و ساكتة!! غطيت وجهي بيديني بتعب..كنت حاس إنها تتوجع بس ما قدرت أقولها شي..كانت مستميتة عشان الملكة..يا صبرك يا جود... غطيت أذني..مابغا أسمع أي شي..مابغا أستوعب مقدار ألمها..مابغا!! حل سكون فجأة من غرفة جود و سمعت صوت..صوتها... قمت بسرعة و فتحت باب الغرفة..كانت جود و في يدها..في يدها بـ..بنت..بنتي!! كنت حتقدم لكن الممرضة..أخذت بنتي من جود إلي ما بغت تسيبها بس ضعفها خلاها تستسلم للمرضة التانية إلي سدحتها على السرير و... سحبني الدكتور برة الغرفة:مبروك!! -ها؟! ابتسم:مبـ..ـروك!! طالعت فيهم و هما يخرجوا جود و بنتي من الغرفة بس كل مين راح في جهة..قلت و أنا أشر عليهم:آآآ... ضحك الدكتور:علي ايش..علي صح؟!..ايش فيك؟!..أول طفلة لك هاذي؟! -ها..لا..عندي ولد... -ما شاء الله...الله يبارك لك فيهم -أبغى شوف... -شوف بعدين..خلي الممرضات يخلصوا شغلهم..اتصل إنتا على أهلك طمنهم!! قلت و أنا أنتبه:ايوة الله.. و طلعت الجوال و انصرف الدكتور... أول ما فتحته..رن..رقم أبوية!! رديت و سمعت:يا سلطان اذكر ربك خلاص.. -قافل جوالـ...علي!! ابتسمت:ايوة أبوية... -مقفل جوالك ليه؟!..تخرج من غير... -أبوية.."صرخت بسعادة"..جود ولدت..بنت!! قال بلهفة:بنت!!!! سمعت الزغاريط و الصراخ و اتحمست:ايوة بنت..أبوية كنت أبغى أشوفها ما خلوني..أخذوها علطول... -معليش معليش يا ولدي..عشان يغسلوها و ينظفوها..معليش.. انقطع كلام أبوية و وصلني صوت أمي:علي حبيبي..جود كيفها؟! -أخذوها يا أمي..ما خلوني أشوف لا بنتي ولا زوجتي... -روح اطمن عليها..لا تخليها لحالها..لا تصحى و ما تلاقيك..مو كويس!! -إن شاء الله... قالت بصوت باكي:الله يسامحك..فجعتني عليها لمن اختفيت..لعد تسوي كذة!! ابتسمت:إن شاء الله..بس ما كنت أبغى أخرب بعدين جود هيا إلي طلبت إن محد يحس فينا.. -يا عمري عليها..لسة شايلة همنا..علي..انتبه لزوجتك..لا تكثر عليها بالكلام..تتعب بعدين!! -إن شاء الله..أمي كيف كملت الملكة؟! -الحمد لله..بس على آخرها إنتوا أقلقتونا عليكم!! ابتسمت:أهم شي إنها تمت و محد حس بحاجة..هيا ذحين أمي..بروح أطمن على جود!! -اتصل على جدتها طمنها..راحت من عندنا و هي تبكي... -إن شاء الله..مع السلامة.. -مع السلامة... مشيت للغرفة إلي كانت مجهزة و محجوزة لجود و أنا أدق على سعود..رد عليا بسرعة:علي!! خلاص..فرحتي و عبرت عنها بالصوت العالي قبل شوية..ما زلت فرحان لكني بوعيي... ابتسمت بلؤم:نعم... -جود؟! كنت حفطس ضحك..من جد سعود تحفة..شوية و يبكي.. قلت:ايشبها؟! -كيفها؟! -بخير... -علي..طمني!! فجأة وصلني صوت عالي:لعنة الله عليـ... قلت بسرعة:لا تدعي جدة لا تدعي..جابت بنت!! سعود:الله يبشرك بالجنة..جابت بنت يا أمي..جابت بنت!! تابع:الحمدلله..الحمدلله لك يا رب!! و استمعت لبقية حوارهم بسعادة و أنا أطالع في باب الغرفة..اتوجهت له و دخلت..لانت ملامحي لمن شفت جود ممدة على السرير و مغمضة عيونها!! وصلني صوت سعود:طب هيا كيفها دحين؟! قلت بصوت واطي:دوبي داخل لها..نايمة!! -مبروك... ابتسمت و أنا أجلس:الله يبارك فيك... مديت ايدي لوجه جود..يا قلبي أنا..فديت روحك!! قال:خلاص علي..لمن تصحى قولي..طمني طيب؟! -طيب..مع السلامة... -مع السلامة... و فصلت..حطيت جوالي على الشي إلي جمب سريرها..مسكت ايدها و قربت منها..همست:جود..جود... هزيت يدها بالخفيف و قلت:جووود..بلا دلع..قومي... طلعت همهمة خفيييييفة..ابتسمت:قومي..تراكي خلاص ولدتي..ولدتي و جبتي بنت..و عمك اتزوج أختي..و تمت الملكة..و أنا علي..زوجك..قومي ايش تبغي أكثر من كذة؟!،المفروض تنشطي و تقومي... همست بشي فقربت منها:ايش؟! -عـلييي.. -عيونه!! قعدت أطالع فيها لمدة بس ما قالت شي..ابتسمت و بست عيونها:الله لا يحرمني منك.. ناديت الممرضة و طلبت منها تجيب بنتي..أبغى أشوفها!! جابتها ليا بعد مدة في سرير صغير..وقفت السرير جمب سرير جود و خرجت..قمت و قفلت باب الغرفة..أبغى آخذ راحتي مع بنتي و زوجتي!! قعدت أتأمل فيها..مديت ايدي و لمست وجهها بأطراف أصابعي..صغيرة..أصغر من سعود..كنت أحسب إن سعود أصغر كائن في العالم بس هذي أصغر و أحلى..شعرها كثير و ملامحها باينة!! انحنيت عليها و بست برقة جبهتها..حذرتني أمي في سعود من التقبيل على الخد!! مديت ايديني أبغى أرفعها بس ما قدرت..أخاف..من البيبهات!! لازم جود تكون معايا و نكون على سرير كبير و تحطو بنفسها فوقي..مو أنا أرفعو!! انتبهت لجود لمن فتحت عيونها..رحت لها..حسيتها خلاص صحيت..قلت و أنا أتذكر ولادتها لسعود و كيف نامت و ما صحيت على طول:جود حبيبي ارتاحي... حاولت تقوم..حاولت أمنعها:جود ارتاحي..ايش تبغي؟! هزت راسها بلأ فاستسلمت و عاونتها على القومة... قالت بتعب:أعطيني هيا... طالعت في بنتي و جود:ما..ما أعرف كيف أشيلها..ما..أخاف أنا... -لا تخاف... -آآآآ..دقيقة أناديلك الممرضة.. و طلبت الممرضة و فتحت لها الباب..طلبت منها تشيل البيبي و تحطو عند جود..طبعاً شمقت و كشرت لكن غصباً عنها..شالت بنتي بكل برود و حطتها عند جود إلي من يوم ما لمستها نسيت الدنيا و إلي عليها..جلست على كرسيي و قلت:حلوة.. طالعت فيا بابتسامة و حسيتها فجأة أقوى من قبل ثواني.. رجعت تطالع في البنت و قعدت تمسح عليها و تسمي و تكلمها بهمس... طالعت فيا بعد دقايق:عمو؟! -ايوة..صح..عمك قال أقوله لمن تصحي!! -قولو..لا تخليه!! رفعت جوالي و اتصلت على سعود..رد:ايوة علي..طمني... فتحت السبيكر و قلت:جود صحيت..بس لسة تعبانة!! جود بصوت واطي:لا مو تعبانة... سعود:جود حبيبي..سلامات..مدري مبروك..كيفك؟! يخرب بيتو..كيف سمعها؟! ابتسمت جود:الحمدلله... كنت مقرب الجوال منها لإن صوتها كان شوية واطي... ضحك سعود:ها حبيبي..ايوة ماما..خدها... استنتجنا علطول إنه سعود..ولدنا!! سعود:مامااااااا... -ها حبيبي؟! -مامي خرجتي أختي؟! ابتسمت جود:ايوة... -أبغى أشووووف!! -تعال مع عمو... قلت:إلا صح ايش وداك هناك؟!،مو المفروض عند أمي؟! سعود ببساطة:علشان أنا بكيييييت و قلت أبغى أروح مع عمو..قامو خلوني!! قلت:يا سلام.. أعطتني جود نظرة فسكت..وصلنا صوت سعود:والله قعد يبكي..و بعدين جود..ليش ما تقوليلي إنك تعبانة..كان أجلنا الملكة!! ابتسمت جود:لا..عادي..جدة؟! -طيبة..و تبغى تجي بس قلتلها مو ذحين!! قلت بعبط:ايوة..لا تطفشووونا..زوجتي لسة تعبانة!! جود:لا حبيبي..تعالو في أي وقت..علي..أهلك..طمنهم!! قلت:واثقة إنها مهمة عندهم... سعود:طبعاً واثقة..جود أميرة و الأميرة الكل يحبها... قلت:وفر هذا الكلام لأختي ولا تحسب إني مقصر في بنتكم يعني؟! ابتسمت جود و قال سعود:إنتا تبغى تتمشكل اليوم عشان كدة مع السلامة و اتصل على أهلك طمنهم... -مع السلامة..تعال إنتا و وجهك..محد استنى معايا ذي المرة... -إنتا ما دقيت.. -عشانك كنت نايم في العسل... انزعجت جود:قول ما شاء الله... -ما شاء الله..آسفين..ما قصدنا..يلا سعود باي.. -باي!! و فصلت و اتصلت على أمي..أول ما ردت:أميييييييييييييييي..جود صحيااااااات... -الحمدلله..الحمدلله..كيفها و كيف البنت؟! اتكلمت جود:الحمدلله عمة الحمدلله..مبروك... -إنتي إلي مبروك و حسابك معايا بعدين..تدسين عني..تختفين من غير خبر إلا عند الهبلة صفاء إلي ما اتكلمت إلا آخر الليل؟؟؟!!! وصلنا اعتراض صفاء عالسبة..قلت:إلا هبلة و ستين هبلة... قالت جود:الحمد لله خلاص!!.. -خلاص..خلاص..علي..قفل المكبر و حط الجوال على أذن جود... -ليش؟! -بس!! نفذت لمن حسيت بصرامة في صوت أمي..ثواني و ابتسمت جود:في أي وقت... ابتسمت:حتعب لو ما... -ايوة... ابتسمت جود:والله عادي... -إن شاء الله..مع السلامة... طالعت بعدها جود فيا..قلت و أنا أقفل الخط:ايش قالت لك أمي؟! قالت و هيا تتثاءب:ولا شي!! -جود!!.. قالت برجاء:علي..لا تخرج من الغرفة..حتى بنتي ما تخرج منها!! -ها... -أخاف أحد ياخدها ولا نلخبط... -ربك يحمي..إنتي ايش فيكي؟!،بعدين ايش إلي نلخبط..ايش دراكي مثلاً إنو هاذي هيا بنتك؟! -بنتييي!!... -إنتي ايش فيكي؟! نبرتها فجأة اتغيرت..قالت بصوت باكي:أخاف... -من ايش؟! -الممرضات يخوفوا..أخاف ياخدو بنتي!! سكت..جود مو طبيعية..اتنهدت و أنا أتذكر إنو نفس هذي التصرفات كانت تظهر على أيام سعود..الله يعدي الأربعين على خير بس!! قلت:من جد جود تبغي تنامي و لا بس كذة دلع؟! لمن شفت نظرتها المستغربة تابعت:ايش أسوي لين ما تصحي... طالعت فيا جود بتعب و قلة حيلة فابتسمت:خلاص نامي... -بس لا تروح... -ما بروح..حخليكي مثلاً.. ابتسمت و أسندت راسها على المخدة..قالت براحة:أعتقد هدي أهون ولادة حتمر عليا في حياتي... قلت و أنا أقوم للباب أبغى أقفلو:ليه..كانت هينة؟! جلست على الكرسي و أنا أسمعها تقول:فوق ما تتصور... قلت بعجب:بس قعدتي تصرخي... طالعت فيا باستغراب:لازم!! -طيب جود..بايش دعيتي لمن كنتي تولدي؟! ابتسمت جود بهدوء بعدين رجعت قالت:ولا شي!! و غمضت عينها... ابتسمت و أنا أقوم..مسكت يد جود..اتقربت من وجهها..همست:لا تفتحي عينك..أوكي؟! ^^^^^^^^^^^^^^^^^^^^^^^^^^^^^^ سعود،، خرجنا أنا و أمي و منورة و سعود من المصعد و أنا قلبي مو طبيعي..مو راضي يهدى..مادري ليش قلقان و.. دقيقة..هما أهل علي..وصلوا؟! وصلنا للغرفة..دقيت الباب ففتح لي علي و شال سعود علطول..ابتسم:أهلااااان..دقيقة بس أكلم إلي جوة... زي ما اتوقعت..آآه أكره ذي العقد..يعني ايه دحين؟!،حيخرجوا البنات مثلاً من الغرفة و يقعدوا برة؟؟؟ رجع علي:ادخل.. و رحب بجدة..دخلت و أنا مستغرب..محد خرج!!! أول ما شفت جود ابتسمت..كان فوقها سعود و يكلمها و هيا معطيتو اهتمام شديد..طبعاً أمي سلمت على جود أول و كانت حتبكي بس احنا منعناها..دفت منورة كرسيها لوين ما سرير البيبي موجود و حطوه في يدها!! نطيت عند أمي بحماس:بنت!! علي:قول ما شاء الله!! -جود!! علي و هوا يضحك:ايش فيك إنت؟! قعدت أمي تسمي و تقرأ و أنا قعدت أطالع في البنت مشدوه..خدودها حمرا و شعرها أسود و كتير..كأنها جود..هيا جود!! رفعت عيني لجود:إنتي..إنتي!! ابتسمت جود:بنتي.. أمي:لا والله..سعود شبهك لكن هذي خلقتك..و أحمد الله ما لعلي في أولادك شبه!! ضحكوا الموجودين و علي انقهر..قال بغيظ:أصلاً القرد في عين أمه غزال..بعدين من زين أولادك يا جدة يعني؟! أمي:وايش فيهم أولادي؟!،لك عليهم كلام؟! علي:لا ما فيهم شي بس أنا إلي فيني كل البلاوي!! رحت لجود و سلمت عليها:مبررروك..الحمدلله على السلامة..ههه..سوري اتحمست مع بنتك!! قالت بحرج:أنا إلي سوري..كنت مرة باردة و متوحشة أمس!! ضحكت:لا عادي..المهم ولدتي و فكيتينا.. سلمت على الموجودين و انصدمت بأحلام بينهم..ما عرفت ايش أسوي و اكتفيت بالمصافحة.. رحت للبنت بعد ما رجعتها أمي للمهد و نسيت حرجي..ابتسمت و دنقت لها:أوه... طالعت في جود:إنتي كل أولادك يشبهولك... علي:يشبهولي!! طالعت فيه:أمي ايش قالت؟! -أصلاً بنت شي طبيعي ما حتشبهني!! قلت و أنا أروح أوقف جمبو:حتى سعود ما جالك!! طالع فيا:إنك تهين رجولتي..ايش قصدك يعني..دمي مو قوي؟! لفيت وجهي:ايوة!! -أفقع وجهك ذحين..أفقع وجهك؟! التفتلو:لا يا شيخ؟! -ايوة..قدراتي الجسدية أقوى من حقتك... جود:بس قدراتو العقلية قوية... علي:قصدك عمك أذكى مني..لا يغرك..ترى غبي..بعدين من فين لكي القوة تهذري؟!! جود ببراءة:أنا قلت قوية مو أقوى..بعدين خلاص لا تطفش عمو!! سعود:بعدين يا بابا عادي لو إنتا غبي..عمو ذكي بس ما يعرف..يخاف..إنتا ما تخاف!! علي:أنا..مني غبي..و إنتي..لا يغرك عمـ... قاطعتو عمتي:علي... -لا تبدأي..حسكت... واااه..ما احتاجت إلا كلمة عشان تسكت ولدها..يا قوتها عمتي؟!،أحس فيها حياء المرأة المحترمة و قوة تمنعني من إني أكلمها...أحسها شي..جود دايماً كانت تكلمني عنها..لكني مهتم بها..بشكل غير..دحين!! رن جوال جود فطالعت فيه لثواني بعدين وقفتو.. علي:مين؟! -ها..ما..بابا... قلت:ردي طيب... قالت بطفش:مالي مزاج... أوكي..قاعدة و تضحك و مرتاحة معانا و مالها مزاج..مو عن شي..بس كدة حيبدأ لها موال..و سعيد يبغى الزلة عليها... وقف عمي و سلم على جود:مبارك ما جاكي يا أم سعود.. ابتسمت جود:الله يبارك فيك..ليش حتمشي؟! هز عمي راسو و راح للباب و أحلام وقفت و قالت:أبوية حجي معاك... جود بزعل:ليييييه؟؟؟ طالعت فيها أحلام و قالت ببرود:معليه..تعبانة و ما نمت من أمس... ما نمتي؟!،أحد قلك لا تنامي؟!..شوف كيف تكلم جود بس؟!.. وجع!! ^^^^^^^^^^^^^^^^^^^^^^^^^^^^^^ جود،،، قلت:سلامتك حبيبي... عمو انطق..قول سلامتك..ما تشوفي شر..أي شي.. حاولت..أعطيت عمو نظرة..أطالع فيه أبغاه ينتبه..مافي..ولا كأنو هنا.. لا و على وجهو نظرة قرف كمان!! خرجت أحلام و عمي دق على باب الحمام إلي في الغرفة:صفاء..يلا ماشيين... دخلوا صفاء المسكينة الحمام عشان عمو يدخل..و ما يبغوا يخلوها برة لحالها..يا عمري عليها..أم الافترى!! طبعاً عمو مسكين انصدم:واه..من أول في الحمام؟! و خرجوا صفاء و عمي.. قعد عمو على المكان إلي فضي من بعد أحلام و عمي و قال:كيف كذة؟!..علي ليش ما خرجت مع أختك و قعدت معاها؟؟؟ عمو كان متضايق و متنرفز..قال علي:والله فكرت في الموضوع بس صرفت النظر... -ايش هذا؟!،لو دريت ما كان دخلت... سعود:ماما.. طالعت فيه:ها حببي... أشر على المهد:أختي دحين دي؟؟؟ ابتسمت:أيوة.. -خلاص نزلتيها..مافي نونو في بطنك... -لا حبيبي... برطم:طب..مافي أحد أسمعو بعدين في بطنك... -يا سلام..ما أولد يعني؟! -اولدي بس مو حلو كده..مافي نونو جوة..أبغى أسمع... علي:إن شاء الله ما تمر سنة إلا و في يدي بنت ثانية!! طالعت في علي بصدمة و انفعلت جدة و مدت عصايتها لعلي:انكتم..لا تدعي..أصلاً دعاويك مردودة... يوووه يا جدة..عليها كلام أحياناً... علي:ايش؟!،أبغى بنات و أولاد كمان... عمتي:طبعاً..ما حملت ولا ولدت..أكيد تبغى زيادة... -أمي أبغى بالقليل زينا..ستة..هذا بالقليل... قلت بيأس:لسة أربعة... عمتي:اسكت و قول يارب جيبلي الخير..ما تدري يمكن هذي خلفتك و خلاص..ادعي بالبركة في إلي عندك و إذا بيجيك زيادة فرزق ربي..لا تحدد!! -لاااا أمي..ايش بس اثنين؟! عمو:التربية مو شي سهل... علي:جاك... قرب مني سعود و همس:ماما..ما حيجي أبوكي؟! قلت بصوت واطي و أنا أحتويه:مادري حبيبي..ليش تسأل؟! قال بنفس الهمس:عشان لو... قاطعتو بابتسامة:ايوة..سوي إلي قلتلك عليه... ابتسم بحماسة فبستو..طالعو فيا مستغربين فابتسمت.. قالت عمتي:ما قلتيلي يا جود..ايش ناوية تسميها؟! علي:هنا..أنا هنا... قلت:مادري..نفسي في اسم لو قيمتو..مابغا من دي الأسماء المدلعة... علي:ايش بتسميها إن شاء الله..حسينة ولا بدرية؟؟؟ -لا دا ولا دا..بسميها عائشة..خديجة..رقية..فاطمة... عمتي:ايوة حبيبتي عاقلة..و إذا مرة فسميها من الأسماء المعقولة..شيماء..صفاء أحلام..هذي الأسماء يعني... علي:أسماء بناتها يعني... ابتسمت..علي لئيم..ما كان قصدها عمتي!! ردت عليه عمتي و سكتتو كالعادة بس أنا انشغلت بسبب الجوال إلي دق..طالعت في عمو فابتسم:ردي يا جود... رديت و كان عبدالرحمن..طبعاً أول ما رديت صجني بصوتو:مبرووووووووووووووووووووك... ابتسمت و أنا أبعد الجوال..أشرت لسعود ينزل عني:الله يبارك فيك... -بس بصراحة توقيت..مادري كيف..في ملكة عمنا..بس والله سويتيلنا أكشن... -الحمدلله... قال بصوت واطي:طيب أقولك..أبوية اتصل..ليش ما رديتي عليه؟! -هاااا؟!،كنت.. قلت بنبرة قلك وحدة مجبورة:أهل زوجي..كانو عندي و عارف ما قدرت أرد..عيب..فشلة!! ضحك:حقول ذا الكلام لأبوية بس لا تحسبي مصدقك..عارف مالك مزاج... قلت:لا لا..مو كده!! -ايوة..مو كده..المهم..احنا بكرة إن شاء الله جايينك..خليكي مستعدة..كلنا حنجي مرة وحدة!! -حياكم الله... -هيا خذي..فيه كم أحد يبغى يكلمك... و بدأت أكلم..طبعاً ما كلمت إلا سارة و أمها إلي باركت و ودعت و بس.. غير كدة محد كلمني..خير بابا..لا يكون زعلان؟!،والله ما فياااااا!! ****************************************** في اليوم التاني فاجأوني أهلي كلهم..أنا اتوقعت بس أخواتي و أمهم..ما اتوقعت بصراحة يجوني..في ولادة سعود محد جاني إلا بابا و خطف!! الغرفة اتملت حريم..حافظت على ابتسامتي..أياً كان..هدولا ضيوفي..و بعدين عمتي كانت قاعدة معايا..ما جو صفاء و أحلام..ما يبغوا ناس و دوشة..قالو حيرجعوا يجوا بعدين... و غير إنو الغرفة اتملت حريم برة كانوا الرجال كتير..و كانوا قاعدين يقولو إنهم حيغطوا و يروحوا في زاوية عشان الرجال يدخلوا.. و حصل و غطوا و دخلوا بابا و عمو و عمي سعد و أخواني و علي و واحد..ما أعرفو!! بسم الله مين دا؟؟؟؟؟؟؟؟ ما شهقت أو اعترضت..هدا داخل مع كل محارمي في دي الحياة باستثناء عمي أبو علي!! لكني حسيت بالحرج..أنا خلقة أستحي لمن أكون وسط رجال حتى لو كانوا محارمي..كيف بواحد جديد؟؟؟!!! طالعو فيا لثواني و كان عمي سعد حيتقدم لكن الغريب دا نط لين عندي:مرحبآآآآآآآآآآآآ... و مد يدو يبغى يسلم فقال عمو بسرعة:جود هذا أخوكي!!.. -نـ..ـعم؟؟؟ قال الشاب بسرعة:أنا..ولد أخت زوجة هذا... أشر على بابا و هوا يتابع بابتسامة:خالتي _إلي هيا مرة أبوكي_ رضعتني فسرت ولد أبوكي بالرضاعة بالتالي أخوكي..أنا كنت أدرس برة و ما كنت أجي إلا نادراً و ما يكون ليا مزاج أقابل أحد جديد و سمعت إنك ولدتي فقلت يلا..نشوفها..أهي أختي في النهاية... مد يدو أطول:مبروك.. قعدت أطالع فيه..ما صافحتو..مادري بس... اتحرك علي أخيراً و اتقدم من دا الشاب..مسكو من أكتافو و حركو بهدوء بعيد عني و هوا يقول:الله يبارك فيك... طالع الشاب في علي:هييي..ترا أختيييي..لا تغااار... علي بملل:عارف.."طالع فيا"..اسمه رامي.. قلت بتساؤل:رامي؟؟؟ طالعت في عمو فقال:ايوة رامي..و أخوكي بالرضاعة... -بس..ما قد قلتلي عنو؟! قال عمو بتفكير:نسيتو..نسيت إنو موجود... -ما قد شفتو!! علي ببساطة:بايخ..لا تتحسفي!! طالعت في علي بصدمة و فجأة بسم الله..كل الرجال اتقلبوا على رامي دا و قعدوا يقولو إنو مستهتر و غريب الأطوار و مهو مننا و سار هوا مسكين مفجوع... قلت بصدق:وي..ايشبهم عليك؟! سكتوا لمن سمعوني و قال هوا بيأس:مادري..دايماً الرجال ما يطيقوني!!.. قلت باستنكار:حتى ما سلموا عليا و استلموك... قال بطفش:متخلفين.."طالع فيا و ابتسم"..بس إنتي شكلك فلة.. سحب جوالي إلى جمبي على الطاولة و سجل فيه شي و قال:رقمي عندك..لمن أتصل ردي... طالعت في علي..كان طفشان و زعلان..واضح عليه..ليه كده..معقول عشان دا الأخو إلي طلع فجأة؟؟؟ سلم عليا طبعاً أول شي بابا:مبروك يا بنتي.. ابتسمت:الله يبارك فيك... سلم عليا بعدين عمي سعد و باركلي و جا عبدالإله و سلم بهدوء و قال:مبروك.. -الله يبارك فيك.. و جا عبدالرحمن..ابتسم ابتسامة واسعة:مبرووووووك... ابتسمت بصدق:الله يبارك فيك... -كيف..تعبتي؟! طالعت فيه:لا الحمدلله.. قال بدهشة:من جد...؟! جاوبتو بالاستنكار:إنتا مو عندك بنتين؟؟؟ حك راسو وقال بتفكير:إلا.. دمدم علي بشي..طالع عبدالرحمن فيه:لا تحقد ياخي..كنت أبغى أطمن عليها!!.. علي اتكلم أخيراً:قلها كيفك الحمدلله على السلامة..غباء هوا...؟؟؟ عمي سعد بسخرية:هوا؟!..ولد الـ***** و هوا؟؟؟ بابا:معد فيه رجال..الواحد سارت مرته تشده لها مو هوا يشد مرته له... أنا والدة يا ناس..لحد ينرفزني!! حمدت ربي مليون مرة إنو علي سكت..كان ممكن يقلبها..أسكت أحسن.. ابتسمت و كأنو بابا يمزح..عمة موجودة..و بصراحة مابغا أحد من أهل زوجي يعرف بتصرفات بابا و غلاستو..هما أكيد سمعوا عنها لكن غير لمن يشوفوها... قال عمي سعد:طيب يلا نستأذن.. قلت بلطف:ليه لسة بدري عمي؟! ابتسم:إذا رجعتي لبيتك بالسلامة إن شاء الله نزورك..ما قد جيناكي احنا... ابتسمت:حياكم الله... و خرجوا الرجال..أشرلي أخوية الجديد:بااااااي.. و خرج... اتنهدت و فكوا الحريم الغطا و بدأوا يروحوا بعدها..حسيت بالراحة..معد بقي إلا مرة بابا و أخواتي و عمتي صفية مع بنت صغيرة لها..و عمتي أم علي طبعاً... وقفت عمتي صفية و حطت في ايدي كرت زواج..ابتسمت:مين؟! قالت بفخر:ولدي عبدالله... قطبت حواجبي قبل ما أتذكر و أوسع ابتسامتي:آآه ما شاء الله..مبروك.."فتحت الكرت"..متى الزواج؟! و شفت تاريخ الزواج..حسبتها وكان تقريباً بعد شهر و شوية... رجعت دخلتو و أنا أسمعها تسأل:حتجي؟ ابتسمت:إن شاء الله... -تعالي..لا يقولو ما عزمت بنت أخوها... قلت و أنا أحط الكرت على جمب:إلي يقولك كده قوليلي عليه و أنا أخاصمو... سلمت عليا:هيا يلا مع السلامة... -مع السلامة... ابتسمت بهدوء و أنا أتذكر..يااااه..أيام الثانوي!! خلود _أختي الكبيرة_ لو تتذكروها اتكلمت:جود..سعود كم عمرو؟! طالعت فيها:ستة..تقريباً... -و..كيف؟!،المدرسة..حتسجليه السنة الجاية...؟! -إن شاء الله..و لو إنو نفسي إلي بعدها... -وي..ليه..أصلاً المفروض السنة الجاية ثاني... -ايوة..بس سعود لسة صغير بعدين جسمو ما يساعد..السنة الجاية و خير... سارة و هيا واقفة عند بنتي تصورها قالت:أصلاً أول سمعت إنو الطفل المفروض يقعد عند أمو ثمنية سنين بالقليل... قلت:ايوة..نفسي كده بس مابغا يكون بعدين بينو و بين أصحابو فرق كبير... طالعنا للباب لمن دخل سعود و معاه لينا و في يدهم حلويات و شبسات... طالعت عمتي باستغراب في لينا:مين جابك؟! -بابا..يقول حيجي هوا بعدين... ابتسمت:كيفك حبيبي؟! -الحمدلله..أبغى أشوف البنت.."راحت عندها"..ايش اسمها؟! ابتسمت:مادري..لسة ما قررنا... سارة:طب في ايش تفكري...؟! -خديجة..بس علي مو راضي... -ليه...؟! -يقول احنا في ألفين و عشرة... سارة:مو حلوة أسماء ذي الأيام..سخيفة..دلع..وله..الوجود... عمتي:ها..ايش؟! التفت لها سارة:والله..صحبتي أمها جابت بنت..أبوها سماها الوجود.. قلت بعدم تصديق:تبالغ؟؟؟!!! -والله ما تبالغ..لا تسوي زي أخواتي..محد صدقني ترى..بس من جد..أبوها سماها كده..و أمها و جدتها و عماتها بينهبلوا ما يبغوا ذا الاسم... عمتي:طبعاً ما يبغوه..حرام يظلم البنت... وافقت عمتي:من جد..مرة هبالة... قعدنا شوية قبل ما توقف مرة أبوية و تعلن إنها حتروح..اتفاجأت بعد كده إنو الرجال ما راحوا..و إنهم يبغوا يدخلوا..استغربت..أجل مرة أبوية و أخواتي ما راحوا مع بابا!!! علي دخل هوا و عمو و قالو إنو علي ياخد عمة و لينا..يا عمري عليها..ما قعدت إلا شوية بعدين والله وحشتني كنت أبغاها تقعد بس عمة ما تبغى تخليها لحالها!! عمو:طب علي ليش ما تقعد و أنا أودي عمتي لإني خارج خارج..أمي تبغى تجي... قلت:عمو ليه ما جبتها معاك من أول...؟! ابتسم:أنا جيت من الدوام علطول و هيا كانت نايمة... -آها... عمتي:لا ماله داعي..لا تتعب نفسك... جلس عمو:أوكي... طالعت في عمو:تعبك راحة..قول تعبك راحة... ابتسمت عمتي:مو مشكلة.. طالع عمو فيها:ههه..معليش نسيت... و خرجوا..انقهرت من عمو إنو ما قلهم يسلموا على أحلام..مسكت جوالي و رسلت لعلي..قلتلو يقول لأحلام إنو عمو يسلم عليها..آه..عمو بارد..مو بارد..بس ما يعرف حركات مملكين..الله يعينك يا أحلام!!.. و دخلوا نفس الرجال..لكن..كان ناقص عبدالإله ورامي..الظاهر هوا وداهم!! جلسوا و أخذوا مكانهم في الغرفة..قال عمي سعد:شفتي..جيناكي..بس ما كنا ماخذين راحتنا أول.. ابتسمت بلطف:حياكم الله... نط عبدالرحمن لين سرير بنتي و قال:ايش حتسميها...؟! كان نفسي لو سعود يتكلم لكنو كان قاعد يفتح الحلاوة إلي في يدو..هدا و أنا موصية عليه..الله يسامحك.. قلت:مادري..أي اسم حلو... أبغى علي يكون موجود..ما رح أتكلم و هوا مو موجود... شالها عبدالرحمن و وداها عند بابا إلي مسكها و ابتسم..ابتسمت أنا..غصباً عني.. سمى عليها بالله و علطول مدها لعمي سعد إلي شالها و قال:أذن أبوها عليها...؟! ابتسمت:لأ... و بدأ يأذن بصوت هادي و خفيف..حسيت بالسعادة..نصيبها..أهل أمها أعطوها كل الاهتمام..محد أعطاني وجه منهم في ولادة سعود.. طالعت في سعود إلي كان يطالع بفضول و إثارة..قال:ايش يسوي ماما...؟! ابتسمت و أنا أشرلو يسكت فتابع المشاهدة..و لمن خلص عمي سعد قال:لا إله إلا الله..بسم الله عليها..جميلة!! ابتسمت و أنا أطالع في سعود إلي قال:ليش قلت الأذان...؟! عمي:عشان الرسول وصانا... -أنا محد قلي... قلت:إلا حبيبي..أبوية أذن في أذنك... لوى فمو بعدم اقتناع:أصلاً ايشبهم؟!،محد جا عندي لمن أنا نونو..مدري ايشبهم ما يحبوني... عمو:لا حبيبي نحبك..كيف ما نحبك؟!،و بعدين سوينا عزيمة و إنتا جيت بس ما تتذكر كنت نونو... قلت و أنا أنتبه:بس حبيبي..لا تكتر حلويات... ترك الكيس و راح جلس عند عمو:أقولك.."طالع فيه عمو"..إنتا تعرف إنو..إنو هادي أصلاً أختي؟! ابتسم عمو:ايوة..أختك الصغيرة... -بعدين لمن أحد يضربها أضربو..أنا أخوها..أحميها من كل الأشرار... عبدالرحمن:الله الله..أشرار ها؟؟؟ -ايوة..لازم الأخو ما يخلي أختو يطفشها أحد..صح مامي...؟! ابتسمت:صح حبيبي... قال بابا:سعود ايش تبغى تسمي أختك...؟! طالع سعود في بابا:استنى خليني أفكر...أمممممم قال بسعادة:بسميها خديجة... -نعم؟!!! قال سعود ببديهية:خديجة..زوجة الرسول... طالع بابا فيا:جود... قلت:خديجة حلو... دخل علي و أبوه على بابا يقول:والله ما سميتها... اتخصر علي كأنو بنت:لا والله..مالك دخل..أصلاً ايش دخلك في بنتي؟! عمي أبو علي و هوا يقفل الباب:افهم عن ايش قاعدين يتكلموا و بعدين... و جلسوا الاتنين..قال علي:جود ايش فيه؟! ابتسمت:مافي شي بس بابا مو عاجبو اسم خديجة... علي بعدم رضا:خديجة؟! بابا:ايوة..ما تسموها خديجة... أمر بابا كان على هوا علي لكن علي ما قدر يتغلب على العناد و الغلاسة فقال:إلا خديجة بنت علي بن سلطان الـ****** و النعم فيها..بنتي اسمها خديجة..كيفي كيفي أنا حر.. بابا انجن جنونو..قال و هوا يحاول يحافظ على هدوءو:خديجة لأ..الاسم قديم و يظلمها... عمي أبو علي:عارفة معنى خديجة...؟! -ايوة..إلي ينولد قبل وقتو..بس سبحان الله معناه مو حلو بس اكتسب حلاوتو من الناس إلي اتسمت بيه... عمي سعد:كثير أسماء كذة..حلوة بأصحابها... ما كان هدفي أضايق بابا..أو أعابطو أو أحاول أطفشو..لأ..بس أحياناً يحس الإنسان إنو يبغى يثبت _و بأي طريقة_ للناس إلي حواليه إنهم غلط..أنا ما سميت خديجة على أمي إلي خلفتني و رمتني..أنا سميت خديجة على زوجة الرسول الصابرة الجميلة المخلصة..و أبغاها تكون زيها..و إذا كانت أمي اتسمت خديجة و شوهت الاسم فأنا سميت بنتي خديجة و حزيد الاسم حلاوة في عين الناس و لو إنو كفاية..إنو زوجة الرسول كان اسمها كده..يكفيني أنا..على الأقل..بنتي حيكون لها من اسمها نصيب..بس مو من أمي..لإنها ما اتسمت عليها..لازم بابا يفهم دا الشي!! عبدالرحمن و هوا يجلس جمب عمي سعد و يطالع في..خديجة..قال:يالله عقبال ما يجيني ولد أنا كمان... عمي أبو علي:ايش تبغى في الأولاد..خليك عالبنات أحسن... -واحد على الأقل... عمي سعد:إنتا بالذات ما رح تقدر على ولد... عبدالرحمن:تربية البنت أصعب..معروف!! و بدأوا يتجادلوا..قلت بقهر:اسكتوا..أصلاً محد يربي غيرنا..إنتوا بس تلبسوا و تأكلوا و أحياناً كمان ما تسووا ولا شي.. علي:هيا..انفكت... عبدالرحمن:عادي عادي خذي راحتك حبيبتي..طلعي إلي في قلبك..إنتي في نفاس و نفسيتك تعبانة..أنا عارف أنا عارف... ابتسمت لعبدالرحمن فانفجع..استغربت..ابتسامتي كابتسامة تفجع ولا كشي مفاجئ يفجع؟؟؟ أعتقد الخيار التاني..علي ياما اتغزل في ابتسامتي..مالت عليكم!! ****************************************** قررت دي المرة أقعد عند جدة..لسببين..الأول:إنو جدة ما تقدر تجيني كل شوية لبيتي و هيا قالت إنها تبغاني تحت عينها و إن كانت ما تقدر ترعاني لكنها تبغاني عندها..التاني:إنو وضعي دحين مع أهلي أحسن..و بعدين بصراحة غباء مني إني ما قعدت في ولادة سعود عند جدة..كأني أبغى الكلام يجيني!! قعدت في بيتي بس عمتي كانت تجي كتير و جدة كانت أربعة و عشرين ساعة عندي بس دحين غير..مالي شغل..بروح بيت أهلي!! استقريت في غرفة جدة و جدة الحمدلله خلاص في غرفتها دحين..ما أقدر طبعاً أقعد في غرفتي..عشان الناس لمن تزورني!! علي كان قاعد في السرير القريب من سريري..بما إنو غرفة جدة كلها سرر..من ديك القديمة بس أنا خلولي واحد عادي..عشان أرتاح!! كان قاعد يلعب مع خديجة هوا و سعود إلي يحاول قد ما يقدر يكون حذر معاها..أحسو حاسسها شي مقدس... طالعت في عمو إلي كان ساكت من أول و قال فجأة:جود... -نعم... -دحين..متى الواحد لازم يتصل على..على حقتو؟! -على حقتو؟؟؟!!! -يعني..يعني... علي:حقتو في وجهك..ليش لعبة؟!،عندها اسم ترى!! قلت بعد ما فهمت:في أي وقت حبيبي..إنتا ما دقيت عليها من يوم الملكة؟! هز راسو ببطئ بلأ..فقلت:ليييييه؟! علي:دق ذحين... -يمكن مي فاضية..يمكن مالها مزاج تكلم أحد..يمكن ما تبغى تكلمني..يمكن... قلت:عمو ايشبك؟!،لو مهي فاضية أو مالها مزاج ما حترد..حتقفل جوالها..إنتا تتصل و تكون بدأت بالخطوة الأولى..ما ينفع كده... التفتنا لعلي إلي قال:ايوة هلا..أحلام إنتي فاضية؟! عمو:علي يا حمار..لأ... علي:عشان سعود يبغى يتصل و خايف تكوني مشغولة.. علي:بالله؟!،أجل خلاص..يلا مع السلامة..."نزل الجوال"..تقولك فاضية..اتصل عليها... -كيف تقولها إني خايف أتصل عليها؟!،أنا مني خايف!!..علي ايش السخافة ذي؟! علي ببرود:عادي إنتا ايش فيك؟!،روح اتصل عليها ذحين..روح... قلت:ايوة عمو ما يسير..روح اتصل بسرعة و كده قول إنو علي كان يكدب و مدري ايه... قام عمو معصب فالتفت لعلي:ما اتصلت؟! ضحك بلؤم فقالت جدة:والله يا علي لو ما تبعد عن ولدي..والله!! علي:يا جدة مو معقول..لازم يتحرك..لازم يسير كذة زيي..يتصل و يسأل ولا ترى بعدين أختي تقول مطنشني و تزعل منه!! ^^^^^^^^^^^^^^^^^^^^^^^^^^^^^^ سعود،،، اتصلت مضطر..يمكنها فرصة جات عشان أتصل بما إني ما كنت حتجرأ... ردت:ألووو.. صوتها كان هادي..اتكلمت:ألوو..السلام عليكم.. -...و عليكم السلام... -كيفك أحلام؟! -الحمدلله..إنتـ..ـا كيفك؟! -الحمدلله.. ايش أقول؟!..ايش يقولوا الرجال في ذي الحالات؟!..ايش أقول؟!،مفروض مني أتكلم..و المفروض منها تحافظ على خجلها و تسكت..هذا المفروض بس أنا مني عارف ايش أقول... اندق الباب بصوت خافت..طالعت فيه و كانت جود..قلت و أنا أوقف:ليش قمتي من سريرك؟! أشرتلي إني أسكت و اتقدمت مني..حطت على التسريحة ورقة و خرجت... قمت و كان مكتوب عليها: "1-مبروك عليا إنتي.. 2-الله لا يفرقنا.. 3-سعيد إنك من نصيبي.. Pick one :3 حكيها عن بطولاتك في الشغل..مغامراتك حول العالم..حتى لو تكذب..أي شي D: " إلي فوق كان خط جود و إلي تحت..أكيد علي..غبي!! سحبت نفس بعد ما بعدت الجوال عن أذني..طالعت فيه و طالعت في الورقة..اتحمحمت و أنا أرجع الجوال على أذني..ابتسمت:أحلام.. -نعم؟! -أنا..أحلام..إنتي عارفة ايش فيا؟! لمن ما وصلني رد قلت:أحلام..عارفة ولا منتي عارفة؟! -ايوة.. قلت بقهر من إنو حركتي حتخرب:عارفة!! -لأ.. -أجل؟! -ايوة..ايش فيك..يعني كمل.. قلت بعد ما استوعبت:آه... -أحلام.. -هاااا... قالتها بطفش..بس ما استحيت من نفسي أو انحرجت..لأ..ابتسمت..زي الأهبل..أحد طفشان مني و أبتسم لو.. قلت:أحلام.. -سعود ايش فيك؟!،أحلام أحلام أحلام..ايش فيك؟! -ولا شي..عاجبني اسمك.. ^^^^^^^^^^^^^^^^^^^^^^^^^^^^^^ أحلام،،، لو قال اسمك حلو كان يمكن أقدر أقول عيونك الحلوة و لو إني مستحيل كنت أقولها بس سعود قاعد يستعبط و أنا مني عارفة ايش أقول..خاصة إن..إن مو هذي الصورة إلي وصلتني عن سعود..مو هذي..مني عارفة ايش أقول..لازم هوا يقول..مو أنا..هوا إلي اتصل..هوا يدير الدفة!! وصلني صوته:كنت أبغى أقولك إني سعيد إنك من نصيبي..هذا إلي فيا... زميت شفايفي.. تابع:بس مني عارف كيف أبدأ..لازم نقول كلام حلو و لازم نثقل..كيف أجمع بين الثقل و الكلام الحلو..و العقل كمان..كل واحد يعطيني نصيحة من جهة..مني عارف أنفذ أية وحدة... ابتسمت و أنا أسمع:جود من بداية الموضوع و هيا تقولي حكم عقلك..علي يقولي قول كلام حلو و خليك جريء..أمي زي أي أم تحرشني و تقولي اثقل..لا ترمي نفسك عليها..و بكده سرت حيران..مني عارف أعقل و لا أرمي نفسي و لا أثقل... اتنهدت فقال:يعني؟! -ولا شي سلامتك... -آآممم..عادي أسأل سؤال سخيف؟؟؟ -اتفضل.. -دحين..يعني إنتي..إنتي ما تستحي مني؟! -نعم؟! ايش قاعد يخربط هذا؟!..بايش أرد عليه؟! -جود ما كانت ترد على علي لمن كان يتصل عليها..و لو ردت ما تتكلم كثير زيك..إنتي ما شاء الله عليكي ما تستحي... ما أستحي؟!،كأنو ذي سبة..ليش يقولها كأنها مدح؟؟؟!!! -أحلام..بصراحة..مادري يمكن منبرش..بس أبغى أقولك على أشياء كثير..أحس كأنك حقتي..يعني أبغى أقولك على الأشياء إلي أنا ما أقولها إلا لجود... رجعت شعري على ورا و أنا أتنهد بتعب.. قلت و أنا أبتسم:و أنا حسمع.. -تصدقي إني في الفترة الأخيرة سرت أنتبه لـ... و بدأ يتكلم بحماس و يحكِّي قصص و حكايات غريبة سارت له و أنا بدأت شوية شوية أتخلى عن تحفظي رغم صدمتي بالشخصية المناقضة إلي معايا..مناقضة للي كان يتكلم عنها أحمد..بس إني و مع صدمتي حاسة بسعادة و.. يمكن .. استلـ .. ـطاف..!! ****************************************** |
الجزء السادس و العشرون "شكراً..محاولة جيدة!!" جود،،، قد سمعتوا بالنكتة:"أبغى واحد بيبسي و فجأة ميرندا"؟!.. حياتي أنا..سارت زي كده.. فجأة فجأة الحريم اقترحوا يسووا عزيمة عشاني..فجأة.. أنا مادري أهلي من فين جابوا دا الحب..فجأة كمان؟؟؟!!! طبعاً أنا ما حسوي شي بحكم إني والدة و ما حتعب بس بصراحة استثقلتها..استغفر الله..أشوة إني عند جدة..لو في بيتي كان من جد تعبت... اتعطرت و عدلت من شكلي لمن سمعت جرس الباب..عمو قال إنو أحمد و أهلو حيجوا..زوجتو و بنتو يعني..ناديت سعود و رتبت شكلو..و بعد ثواني دخلت زوجة أحمد و بنتها علينا..ابتسمت لها أول ما دخلت..سلمت على جدة و عليا و جلست بعدين على واحد من السرر:كيفك أم سعود؟! -الحمدلله..إنتي كيفك؟! مديت ايدي لبنتها..أوه صح..ايش اسمها؟! آآآ..ايوة..رؤى..علطول أنسى اسمها!! مديت ايدي لرؤى:حبيبي..كيفك؟! جات و سلمت عليا بتوجس خاصة بعد ما حذرتها أمها من إنها تطلع فوق السرير... طالعت في خديجة إلي في سريرها الصغير إلي جمب سريري و لوحت بيدها:خديجة..خديجة..هيا ليش ما تطالع؟! قلت:لسة صغيرة حبيبي..ما تتذكري سعود..حتى هوا ما كان يطالع..حتى إنتي كمان... -إلا أنا كنت أطالع..أنا فاكرة ترى... زوجة أحمد:رؤى ايش جبتي لخديجة..ما جبتيلها شي؟! ابتسمت:إلااا.. و راحت لشنطة أمها و طلعت كيس صغير و حطتو في سرير خديجة..ابتسمت أنا:اللله..ايش دا..ايش جبتي لبنتي؟! -جبتلها.. قاطعتها:لا تقولي..خليها هيا تشوف.. و أخدت الكيس و مدتو ليا..فتحتو و كان جوتو علبة صغيرة..كان فيها اسورتين دهب صغار..ابتسمت بسعادة..ما كنت أقدر أشتري لسعود زي كده..كنت كل ما أشوفها أدعي ربي يرزقني ببنت... خرجتها:الله يسعدك..شكراً حبيبي.. طالعت في زوجة أحمد و قلت بصدق:كل مرة كنت أشوف أشياء بنات يوجعني قلبي..ما أقدر أشتري لسعود... مديت البناجل لرؤى:لبسيها إنتي بنفسك.. اتحمست رؤى و قامت أمها تساعدها..و بعد ما لبسوها شالتها زوجة أحمد و هيا تسمي..اتضايقت خديجة و سارت تسوي حركات بوجهها الصغير..أوه حبيبتي.. جدة:ما شاء الله..الله يسعدك يا بنتي..الله يسعدك..أشوف.. ودت زوجة أحمد خديجة لجدة..قالت و هيا ترجع تجلس:حلو يجيكي العكس علطول..ولد بعدين بنت..نفسي في ولد بصراحة... -ايوة..التغيير حلو..بس على المدى البعيد..البنات أحسن لو كانو أكتر... -طبعاً البنات قلبهم على أمهم..أياً كان... -من جد..رؤى حبيبي..ما شفتي سعود؟! -في المجلس مع بابا و عمو سعود... قالت لها أمها:روحي طيب شوفيه.اقعدي معاه..لا تخليه لحالو... خرجت رؤى من الغرفة و قعدنا نتكلم لحد ما قالت جدة:هيا يا بنتي بصلي ذحين.. قامت زوجة أحمد و جابت خديجة و رجعتها في سريرها..و رجعت جلست..قلت بحرج:ههه..معليش قومناكي و جلسناكي كتير... ابتسمت:لا حبيبي عادي..تعبكم راحة.. -يعني تعبناكي... قالت بمزاح:ايوة تعبتوني.. ضحكت بخفة قبل ما تميل عليا و تقول بصوت واطي:جود أقولك على سر.. قلت بصوت واطي عشان جدة تصلي:يا ساتر..سر و بين كنات!! -ههه..ايوة..بس لا تقولي لأحد..كنت حعلن الخبر بس قلت نستنى شوية..عشان لا نخطف الأضواء من بنتك.. طالعت فيها:قولي والله... ابتسمت:والله... قلت بصوت واطي:أخو ولا أخت.. رفعت أكتافها: لسة مادري.. -قلتي لعمتي؟! -لأ..قلت مشغولة بكي و بولادتك و بملكة بنتها..المصيبة في أحمد..مو حاس بشي.. -ما عرف.. -ولا على بالو..فظيع..ما ينتبه لولا شي.. -صاحب عمو..ايش تتوقعي منو؟!..بس في الكم؟! -ايش في الكم؟!،لسة دوبي ما كملت شهرين..قلت خليه ما بقلو..أحمد ما رح يسكت و بصراحة ما أحب أتكلم علطول... -من جد..معد أحد يذكر الله.. -ايوة الله..حسبي الله عليهم..إلا جود..بكرة فيه عزيمة عندكم؟! -ايوة..هنا..جاية إن شاء الله صح؟! -إن شاء الله.. التفتت لوراها و مسكت كيس..مدتو ليا بابتسامة:اتفضلي..مبروك.. -ايش دا..ليه تعبتي نفسك؟! -ما كنت عارفة ايش أجبلك بصراحة..سمعت بالعزيمة فجبت إلي جوة.. قلت و أنا أمسك الكيس:شكراً..من ايد ما نعدمها... الظاهر إلي جوة كان لبس أو شي زي كده..لمحت قماش!! قلت:بس صح..ترى لازم تجيبي لرؤى أخو..حرام..لا تكبر لحالها... قلت كلماتي بجدية الشي إلي خلى أم رؤى تطالع فيا بنظرة:لا يا شيخة..ولدتي من هنا بتزني على راسي من هنا!! انحرجت:لا يعني.."تابعت بسرعة"..بعدين أنا قد حملت لمن سعود كان عمرو قريب من التلاتة سنين بس ما ثبت!! -يا شيخة هوا نصيب..بعدين على ايش الصربعة..السعودية لازم خمسة ستة..حتخلفهم حتخلفهم..في البداية في النهاية..حيجوا!! ضحكت:من جد..الله يعيننا!! و على كده..استمرت الزيارة الخفيفة..راحوا بعد نص ساعة و رجعلي عمو و كانت خديجة في يدي.. دخل بهدوء لمن شاف جدة تصلي..لسة ما خلصت ما شاء الله عليها!! جلس في السرير إلي جمبي:متى علي راجع؟! -شوية إن شاء الله و يجي..راح البيت محتاج كم حاجة..سعود فين؟! "هنااااااااااا..." دخل سعود الغرفة بابتسامة:ماما ممكن أجلس عندك؟! -تعال حبيبي... جا و جلس في طرف سريري عند رجلي:ماما أبغى أشيلها.. عمو:تقدر؟! -لأ مو أشيلها..بس حطيها عندي..هدي أختي النونو..لازم أمسكها... ابتسمت:طيب تعال من الجهة التانية... كان سعود جالس على جهة رجلي اليسار..يعني في طرف السرير المكشوف..غير مكانو و جلس عند الجدار اللاصق في السرير..حطيت خديجة و أنا أسمي فوقو..كان متربع.. ابتسم أول ما حطيتها و دنق و باسها بلطف..يا قلبي أنا!! طالع فيا:ما ينفع نبوسها في خدها..بعدين تجي حساسية... ابتسمت:صح..نبوسها في جبهتها... -طيب هيا تعرفني؟! -طبعاً حبيبي..إنتا أخوها الكبير... -ايوة..ماما بعدين لمن أسير أكبر..أكبر من أخوها الكبير..أبغى أجيبلها ألعاب... -لأ إنتا لمن تكبر هيا إن شاء الله حتكبر و تسير ما تبغى ألعاب..تسير تبغى مكياج..اكسسوار ملابس..مو ألعاب... طالع فيا بحيرة:يعني ايش أجيبلك..كلكم تبغوا مكياج..طب مين يشتري ألعاب؟! عمو:جيبلها ألعاب دحين..لازم لمن تكبر؟؟!! -ايوة..ما عندي فلوس دحين..أنا بعدين ربي حيعطيني فلوس..حجيبلكم كلكم كل شي... قلت:الله يرزقك حبيبي..الله يرزقك و يهديك... -ايوة يا ماما..ترى أنا الله قلي..حيعطيني فلوس..و حيعطيني كل شي.. لاحظت الاستغراب على عمو فابتسمت:عادي..ما تعرفو؟!،دايماً كده!! سعود في الفترة الأخيرة ساير يتكلم بدا الأسلوب..كل ما يشوفني طفشانة يقولي:لا تزعلي..بعدين الله يسويلك.. و على حسب الشي إلي مضايقني..و حتى لمن يتأخر في شي..أخاصمو و أقولو متى إن شاء الله حيمديك؟!،يقولي:عادي..الله يساعدني أخلص بسرعة.. و أنا بصراحة..ما حبيت أعقدو أو أسألو ليه يقول كده..لإنو رح ينتبه أكتر و يمكن يصر و يتجاوز الحد المعقول لدا النوع من الكلام..بعدين هوا لسة طفل و كل إلي عليا إني أوجهو..أوجه دي المشاعر و الثقة بالله للمكان الصح... عمو:جود.. -نعم.. -ترى..قبل مدة و أنا أرتب لقيت شنطة الصور..فاكرتها؟! قطبت حواجبي و قلت و أنا أتذكر:أيـ..ـوة... -بس..قلت لازم أطلعها لكم..من جد كنتي نسخة من خديجة.."ضحك"..قصدي هيا نسخة منك..مرة شبهك..و صورك و إنتي أكبر شوية..كأنك سعود..مرة يشبهلك... سعود:أنا أشبه ماما..من زمان..ترى من أول أشبهلها..إنتا ما عرفت؟! -إلا ياخي عرفت..منتا و أمك في وجهي من يوم انولدتو... قلت:بس أحلى شي..شهدتني و شهدت أولادي... -ايوة الله..لسه ما كملت أربعين و عندي أحفاد..مين زيي؟! قلت بقهر و عصبية:لا تقول أربعين..لسه ما كملت خمسة و تلاتين!! -جود!!.. -ايوة الله..تحسب أحلام تقول عمرها..أصلاً بنفسها قد قالتلي إنها من يوم كملت العشرين معد تقول عمرها لأحد... -أحلام..مو سعود..و بعدين احنا الرجال عادي..مهي مشكلة العمر.. -إلا مشكلة..بعدين عمو إنتا اسم الله عليك مو باين عليك العمر..خلاص اسكت!!.. جدة إلي خلصت صلاة و قراءة قرآن و كده:صادقة..رجال..حرمة..لا عمرك و لا مالك و لا جسمك..ما تتكلم عنهم... تقصد جدة بجسمك وزنك و صحتك.. من جد صادقة..معد أحد يذكر الله... قام عمو:طيب..أنا بقوم عشان حيأذن بعد شوية.. -طيب عمو لو سمحت نادي منورة خليها تجي... خرج عمو من الغرفة عشان يستعد لصلاة العشا..دخلت منورة بعد ثواني فقلتلها عن عزيمة بكرة و طلبت منها ترتب البيت و تنظفو كويس..حتى والله يبغالي أقول لعلي يجيب معجنات و حلى..يا ربييييييييييه..يا ليت العزيمة عند عمتي..والله كان ارتحت..هنا أشيل هم..أحس أي غلطة و لا نقص حيتحسب ليا.. يؤ..ايش النذالة دي..يعني عمتي تتعب على حسابي؟! اتصلت على علي فرد:نعم..ذحين..عشا..مافي أي محل مفتوح.. ما رديت عليه فقال:آمري..ايش تبغي؟! -اتصل عليا بعد العشا قبل ما ترجع البيت... -ليش؟! -أبغاك في موضوع... -إلي هو... -حقولك دحين..أبغاك تشوفلي محل معجنات طيب..و تحجز عندهم..و بكرة تكون الصحون جاهزة... علي بعبط:على رسلكِ..أية صحون..إنتي متفقة مع محل ولا شي؟! قلت ببساطة:لأ..بس عشان عزيمة بكرة..روح اختار مجموعة معجنات و اختار صحن حلو..و خليهم كده يسووا عشرة احدعش صحن..و بكرة يكون جاهز عشان تجيبوا على بيت جدة... -جود العزيمة مو في بيتي..ليش مطلوب مني أشتغل؟! -العزيمة لبنتك و زوجتك..بعدين عمو حيتكفل بالعشا مسكين..يسوي ايه ولا ايه... -جود..خلاص أجلو العزيمة..بعدين..بعدين أمي قالتلي إنها بتسوي سابع..خلاص مالو داعي مرتين... -والله يا علي..هدي عشان سلامتي..سابع بنتي إن شاء الله يكون حفلة و تفاسير و كده يعني..بعدين ما حيكون من جد سابع..يعني مو دحين حنسويه.. "التفاسير..التحف الصغيرة و الأكياس التي تقدم في حفلات المواليد الجدد" -طيب طيب..خليني ألحق الصلاة ذحين.. -الله معاك.. -مع السلامة... صح..أبغى أسوي لخدوجتي حفلة كبيرة..بنتي و أبغى أفرح بها..خديجة هدي مو أي شي..غير إنها أول بنت ليا..هيا هدف من أهدافي في الحياة..صح سعود كمان هدف بس هيا غير..خديجة دي ما حتكون أي بنت..أبغاها بطاعة مريم عليها السلام و إخلاص خديجة رضي الله عنها و جمال روح عائشة بنت الصديق.. و بدل ما يقول بابا كل خديجة قليلة أدب..حخليه يفهم كيف الواحد لو من اسمو نصيب..و حخليه يقول..كل خديجة..عظيمة!! ************************************************** * و طلع الصباح و أذن الظهر و أذن العصر و المغرب و العشا و لبست..و جلست على سريري..طبعاً أول من جا كانو.."أهلي"..أخواتي و أمهم يعني..و بابا و عبدالإله..و..وي!!..وين عبدالرحمن؟!..يمكن بعدين حيجي.. دخلوا كلهم بما إنو مافي أحد..علي أخد معاه سعود و راح يجيب المعجنات و كم حاجة كده كمان.. أول أحد سلم عليا كان بابا..و طبعاً أنا بنتي كانت في حضني..سلم عليها..قال:مصرة خديجة؟! بس دي المرة قالها بشكل لطيف فما اتضايقت..ابتسمت:ايوة.. عبدالإله:بندخل ألفين و احدعش و دوبها..خديجة!! طالعت فيه و قلت برقة:طب اقترح عليا اسم تاني... طالع فيا لثواني قبل ما يجي يسلم و يقول بـ "خياسة" شديدة:مبروك!! و خرج.. سلمت عليا مرة بابا:الحمدلله على السلامة.. سلمت على خديجة و خبت في الكوفلة حقتها جنيه دهب!! و بدأوا أخواتي يسلموا عليا و يباركولي.. و على سيرة الدهب..ترى معد أحد دحين يهدي دهب..ساروا الناس يحطوا فلوس..بس يمكن مرة بابا ما تبغى تجي و ايدها فاضية..و ما تبغى تجيب أي شي!! سارة طبعاً علطول شالت خديجة:يا حياتي!!.. كان على وجهها عطف شديد..و حرام..كلهم كانوا مبتسمين..بس يمكن مو متجرئين يقربوا!! فجأة سمعنا صوت:أنا جيييييييييييييييييييييييييييت... جدة:دحمي!! كان صوت عبدالرحمن إلي دخل و معاه أهلو..جا بسرعة عليا و سلم:الحمدلله على السلامة.. ابتسمت:الله يسلمك... سلمت عليا حليمة:كيفك جود؟!،الحمدلله على السلامة... -الله يسلمك... سلمت على شهد و رغد..كانوا لابسين زي بعض..يسعدهم..فجأة حسيتهم كبروا!! حليمة شالت خديجة من سارة و عبدالرحمن وقف على راسها و سار يضغط على خدها بسبابتو و يضحك..شوية إلا خديجة كشرت و بكيت من غير صوت.. حليمة:لا يا ماما..لا تبكي... ابتسمت لمن حطتها عندي و هديتها..جلسوا الموجودين..قالت مرة بابا لعبدالرحمن:شفت عبدالإله؟! -ايوة..قاعد في المجلس يكلم صاحبو... آه..عشان كده خرج..أتاريه مو مرة سخيف..ههه!! قربوا رغد و شهد..قالت شهد:اسمها خديجة خلاص؟! ابتسمت:ايوة... رغد:طب ايش..ايش تناديها؟! قلت باستغراب:خديجة!! -لأ..الشي التاني حقها.. حليمة:دلعها يعني.. -آآآآه..والله مدري..إنتي اخترعيلها دلع... -فين سعود؟! طالعت في رغد بابتسامة:أقولك اخترعيلها دلع تقوليلي فين سعود!!.. استحت رغد و قالت شهد:قوليلها دوجي.. -دوجي؟! -ايوة..أنا صحبتي اسمها خديجة..أمها تقولها دوجي... -طيب دوجي دوجي... حليمة:دوجي..أحسو شي حق مسنجر..مو حلو.. عبدالرحمن بعبط:حركاااات حليمة..تفهم في الماسنجرررررر... طالعت حليمة في زوجها بنظرة و هيا كاتمة ابتسامتها..قال:آسف آسف..بس أمزح!!.. ضحكت أنا بخفة و أنا أعدل الكوفلة حقت دوجي..خلاص حناديها دوجي 3: وقفت حليمة:مها..الصينية حطيتيها فين؟! مها:في المطبخ..جمب المايكروويف.. وقفت:"حقوم أسخنها"..و خرجت.. عبدالرحمن:إلا صح..علي فين..و ولدك؟! تابع بابا:و سعود فينُه؟! طالعت في بابا:عمو راح يقابل واحد حق ديكور يعرفو عشان يزبطلو الشقة و علي راح يجيب أشياء و سعود ولدي معاه... جدة:والله إن الشقة حالية ما فيها شي..لكن يبغى يصرف.. قلت:لا يا جدة..لازم تتعدل..بعدين لا تنسي إنو المستأجر إلي فيها من زمان..ما تدري ايش خبص فيها!! -إلي خبصه يدفع ثمنه!! -ما عندنا احنا دا القانون!! بابا:خلاص نوى يسكن هنا؟! قلت:ايوة.. دخل عبدالإله و جلس.. قالت جدة:وينك يا عبدووو؟! -كنت أكلم واحد صاحبي.. -دريت..لكن ما لقيت تكلم صاحبك إلا عندي؟! -ما طولت..بعدين أنا وعدت الولد أتصل عليه..مطنشو ليا فترة!! قامت سارة و طلبت مني خديجة..مديتها بهدوء لها فراحت بها لعبدالإله..جلست جمبو و رفعتها:شوف..ودلبو أنا..شوف شوف عبدالإله!! طالع عبدالإله في خديجة بنظرة غريبة..قعدت أنا أراقب الوضع..أبغى أشوف ايش يسوي!! طالعت فيا سارة:جود ممكن نصورها؟! ابتسمت:ممكن.. سارة:عبدالإله طلع جوالك و صورها.. عبدالإله:جوالي مافي شحن..بعدين انتبهي لرقبتها!! وقف عبدالحمن:أنا أنا بصورها.. و قعد يصور بسعادة.. مالت عليه عبدالإله..كأنو بنتي حالها واقف تستناه يتكرم و يحط صورتها في جوالو!! وقفت سارة و جات عندي و حطت خديجة في ايدي..مسكتها و أنا أقول:وريني الصور.. مدلي عبدالرحمن الجوال..و أول ما شفت الصورة:يسعد قلبها.. شفت صورة تانية:وي حياتي..شوفي سارة كيف فمها صغير و يجنن!؟! شفت صورة تالتة:أوه يا قلبي.. عبدالإله:تراها في ايدك!! ضحكت و أنا أرجع الجوال لعبدالرحمن:طيب غير في الصور.. -عادي ما تفرق.. قلت بنفس أسلوبو الغلس:إلا تفرق.. -لا ما تفرق.. قلت بصوت أعلى:إنتا منتا أم!! -مني أم..لكن هذا غباء..تمدحي في الصور و بنتك في ايدك..امدحيها مباشرة.. -طيب أنا لاحظت هذا الشي إلي يستحق المديح في الصور..فأمدحها في الصور!! -آها..يعني هيا معفنة في الحقيقة!! -نعم؟! قال و هوا يرفع أكتافو:هذا معنى كلامك.. -لأ..مو دا معنى كلامي..بعدين لو سمحت لو ما عندك شي عدل تقولو لا تكلمني.. -قصدك لو ما عندي مجاملة ولا كذبة لا أتكلم.. -محد قلك تجامل..بعدين ما تحتاج تجامل..بنتي حلوة ولازم تنمدح!! -إنتي ما تحبي الصراحة..و أصلاً منتي صريحة مع نفسك..ملامح بنتك مي باينة..من فينلها حلوة؟!،حتى عيونها ما تفتحها؟! -ليه؟!،و إنتا فتحت عيونك أول ما انولدت..و اسكت خلاص!! -إنتي ما تتقبلي الحقائق.. جدة اتدخلت:عبدالإله.. التفت لها:نعم؟! -أصه.. طالعت فيه و قلت و أنا أهز راسي بطفولية:أصه.. رن الجرس فقام عبدالإله:بروح أفتح الباب!! عبدالرحمن:والله هذا عبدالإله مرة مو كويس..قرأت في كتاب إنو ما ينفع أحد يتكلم مع الوالدة كذة!! التفت لعبدالرحمن:أية كتاب؟! -"نصائح للزوج المثالي"..كتاب حلو..أجيبلك هوا؟! ابتسمت:لا شكراً.. قال بابا:يا رب..أنا مني قايلك لا تقرأ ذي الكتب؟! -ليش؟!،حرام علينا حلال للبنات..ايش معنى يقرأوا دي الكتب و احنا لأ؟! مرة بابا:من حلاتها يعني عشان تقرأها..كلها كلام سخيف!! شهق:سخيف!!،شايفك بعيني تعطي لمها واحد!! فرصعت مرة بابا بعينها لعبدالرحمن فقال:بسم الله علينا!! و لف وجهو..ابتسمت..أتخيل نفسي أجيب لعلي كتاب زي كده..والله ليرميه في وجهي!! رن جوال مرة بابا..ردت و قالت بعد ثواني:طيب.. فصلت و قالت:عبدالإله يقول جو الرجال..روحولهم.. وقفوا عبدالرحمن و بابا..قال عبدالرحمن:مين بالضبط؟! بابا:مين يعني؟!،زوج جود و زوج أختك و عمك!! و خرجوا و بخروجهم دخلت خلود..و معاها أولادها و سعود..سلمت عليا:مبرووووك..الحمدلله على السلامة.. ابتسمت:الله يسلمك.. شالت خديجة:هاتو..هاتو القمر.. سلمت على أولادها و ناديت سعود إلي كان مشغول بجزمتو يربط حبلها..طالع فيا:نعم!! -مافي بوسة لمامي؟! وقف و جاني..حضني..همستلو:وحشني حبيبي.. ابتسم:حتى أنا.. رفعلي رجلو:شوفي الحبل..مُلخبط.. فكيتلو عقدة الحبل و رجعت ربطتو..عطرتو و عدلت لبسو..و راح بعدها لوين ما كانو الأطفال قاعدين!! رجعتلي خلود خديجة:قمر اسم الله عليها!! ابتسمت:مش أقمر منك!! ضحكت على الجملة و رجعت لمكانها!! رن الجرس و رن جوالي..رديت..كانت صفاء و قالت إنهم وصلو.. كلمت سعود:حبيبي قوم افتح لأمي و أبوية.. قام سعود و خرج من الغرفة..و ثواني و أهل علي دخلوا..سلموا الموجودين على بعض بعدين جت عمتي و صفاء و أحلام و مرة أحمد ليا..سلموا و سوولي حماس لمن قعدوا يتناقلو خديجة ما بينهم بفرح!! جلسوا و اتقدمت القهوة و الحلا..حليمة إلي جابت الحلا و سارة إلي قدمت القهوة!! قالت جدة للأطفال:روحو للصالة..سارة..افتحي التلفزيون لهم!! قومت سارة الصغار و أخدتهم معاها.. و بدأ الجو يحلو..لمن بدأت الهروج و الحكايات..و لمن انزحمت الغرفة زيادة بقدوم عماتي.. ما رح أكدب و أقول اتضايقت و انزعجت..رح أكون صادقة..و حقول..إني انبسطت!! ^^^^^^^^^^^^^^^^^^^^^^^^^^^^^^^^^^^^^ سعود،،، نط علي عندي فجأة:سعود سعود.. نعم.. -أختي موجودة!! -ها؟! -أختي..موجووودة!! -ايوة عارف..أهلك جو.. -أختي أختي..حقتك..خطيبتك.. -آآه..أحلام يعني؟! قال بقلة صبر:ايوة!! -طيب أنا عارف.. -أوففف.ياخي نفسي في يوم أشوف ابتسامة فجعة على وجهك.. -علي..من جدك إنتا؟! -ياخي أختي..لازم تحسسها إنك ميت عليها.."بجدية"..سعود..ترى مو كويس كذة..لازم تسير رجال!! -الفجعنة يعني رجال..إلي مو شايف خير هوا الرجال!! -أوففف..تراك ممل!! -لو تروح تجيب العشا يكون أصرف.. -انقلع جيبه إنت..بيتك!! -عزيمة زوجتك!! -مني جايبه!! -عارف..ما منك فايدة!! سوالي كش بيدو..ضحكت:شارب شي إنتا؟! -لا بس طفشان.. -ليش طفشان؟! -يا شيخ نفسي أروح البيت و أخذ جود و سعود و خديجة..مو حلوة حركة إن الوحدة تقضي الأربعين عند أهلها!! ابتسمت:مافي وحدة ما تقضي الأربعين عند أهلها..هيا بس جود و شفت كيف كانت أمي تروح و تجي عليها!! -حتى أمي..كانت تزورنا كثير.. هزيت راسي:"ايوة.."..قمت بعدها و خرجت عشان أجيب العشا..مو المفروض إني أخرج دحين..لكن احتياط..خاصة إني..و بشكل مفاجئ..مهتم بالعزيمة و أبغى كل شي يكون تمام!! ^^^^^^^^^^^^^^^^^^^^^^^^^^^^^^^^^^^^^ جود،،، راحوا الناس و ما بقي في البيت إلا احنا..قبل شوية خرجوا أهلي و أهل علي..و بعد ما خرجوا دخلوا علي و عمو الغرفة...! علي:الله الله..ايش كل ذي الأكياس؟! جدة:اذكر الله!! علي و هوا يجلس:لا إله إلا الله!! تابع:بصراحة لازم لكل مولود نسوي حفلة..كم دخلتي اليوم؟! طالعت في علي:ايش السؤال دا؟!،بعدين إلي اليوم مو الحفلة لسة..عمة تقول حتسوي سابع لخديجة!! علي:سابع..متى يعني..بكرة؟! -لأ..مو لازم اليوم السابع بس إنو بعد مدة..حتسويها في بيتكم..لمن أرتاح و أغير شكلي... عمو:تغيري شكلك..؟! علي:كيف يعني حتغيري شكلك؟! -يعني مثلاً أقص شعري..و أصبغ..و أروح أسوي يدي..أظافري يعني..و كده يعني.. علي:قاعد أسمع كلام أهبل بس حسوي نفسي ما سمعت!! قلت:كلام أهبل؟!،لا مو كلام أهبل..أولد و ما أغير في شكلي..يا سلام..ايش أفرق أنا عن الحريم التانيين؟!،بعدين لازم الوحدة تغير شكلها لمن تولد!! علي:جود..إنتي زمان..كنتي أعقل!! -أنا زمان..كنت أغبى!! -لأ بالعكس..ذحين أغبى..ولدتي سعود و ما سويتي شي..وش صار فيكي؟!،ولا شي..ليش ذحين فجأة تبغي تغيرين ستايلك...؟! عمو:إنتي حلوة كده..مو لازم تغيري!! سعود:صح ماما..إنتي حلوة!! طالعت في علي فقال:ما رح أقول إنك حلوة كمان.. -هيا حغير و حسوي إلي في راسي!! -والله ما تغيري!! -طيب قول إني حلوة!! -والله ما أقول!! -بكييييفك..لو صحيت يوم و لقيتني مدري ايش مسوية..لا تزعل!! -أصلاً مين بيوديكي؟! -إنتا.. -ما شاء الله.. جدة و هيا تلف شرشفها:أصه..بوتر!! قلت بصوت واطي:اسكت جدة تبغى توتر!! قال بغضب بصوت واطي:تسكتيني؟!!! شمقت و التفت لعمو:عمو..إنتا شفت أحلام؟! اتوتر عمو:هااا..لأ.. قلت بعجب:ولا سلمت و لا كلمت؟! هز راسو بلأ فقلت بقهر:تدخل بيتك و تخرج ولا حتى تديها رنة!! قال يبرر:فين كان ممكن أشوفها؟!،و بعدين أديها رنة ليه؟!،هيا جات عشانك..العزيمة عشانك مو عشاني!! -طيب ارسل رسالة دحين!! -طيب!! يا ربي ترحمني..كل إلي أتمناه إنو يكون يرسل و يكلم و يسوي كل دي الأشياء من غير ما يبين و لو إني أشك..عمو فوق إنو خجول وضعو مأثر..سبق و قلتلو مية مرة إنو لازم ما يحس بأي نقص..لازم يكون مبادر و شجاع في هدي العلاقة ولا ما حيمشي الحال..أحلام بنت و البنت مستحيل تبدأ..إنو الوحدة تبدأ شي مهين..كأنها متشحتفة عليه!! وقف عمو:بروح أجيب شنطة الصور..سعود تعال معايا و خرجوا فقال علي:أي شنطة صور؟! ابتسمت:شنطة كبيرة فيها كل صورنا و صوري و أنا صغيرة كمان..ما قد شفتها؟! وقف:لأ.. جا عندي و قال و هوا يشيل خديجة:بسم الله..الله الله ليه مكشر الحلو؟! ابتسمت و أنا أشوفو يلعب معاها و يبوسها و هيا مبرطمة..مدري ليه!! -ايشبها بنتك ذي..بنت..ليه زعلانة؟! ضحكت:تبغى مامتها!! قال و هوا يهزها:و أبوكي يعني..مدري ليه أولادي يكرهوني؟! ضحكت و أنا أشيلها منو:ما يكرهوك..إذا يكرهوك أكرههم!! -والله لو يكرهوني..تطرديني برة البيت..إنتي أصلاً الأم الزوجة..مو الزوجة الأم!! قطبت حواجبي و أنا أبتسم:ايش الكلام دا؟!،أحبك و أحبهم..و أنا زوجة و أم..ولا شي عندي قبل التاني!! ابتسم و هوا يمسك ايد خديجة:أمزح معاكي!! ^^^^^^^^^^^^^^^^^^^^^^^^^^^^^^^^^^^^^ سعود،،، قلت و أنا أحط ايدي على أكتاف سعود:يعني متأكد..هيا تحب بوكيمون؟! قلي بجدية:ايوة..أكتر شي تحبو..أكتر شي..بوكيمون!! -لو جبتلها بيكاتشو حتفرح؟! -مررررررررة!! -متأكد!؟! -ايييييوة!! -على ضمانتك؟! -اييييييييوة!! -طيب لا تقول لأحد إني سألتك..خليها مفاجأة..سر بيني و بينك!! ابتسم سعود:طيب..بس عمو..حتى أنا جبلي بيكاتشو!! -إن شاء الله حبيبي.. شلت شنطة الصور و أعطيت سعود كم ألبوم..عشان لا تكون جيتو معايا من غير فايدة.. والله و لو إني شاكك في كلام سعود..بس هوا أدرى..عمتو و أدرابها!! ************************************************** * أحلام،،، رن جوالي و كان سعود..بشكل تلقائي كنت حرد لكني وقفت لسببين..الأول..ما أبغى أبان فاضية و.."متصربعة" عليه و الثاني..دقات قلبي اتسارعت بشكل مزعج..رديت بعد شوية بصوت هادي:ألوو.. -ألووو.. قطبت قبل ما أسمعه يتحمحم و يقول:السلام عليكم.. -و عليكم السلام.. -كيفك أحلام؟! -الحمدلله..إنتا كيفك؟! -الحمدلله كويس.. و سكت..لثواني قبل ما يقول:جيتي بيتنا في العزيمة صح؟! -ايوة.. -عجبك؟! -آآآ..مادري..ما شفته..ما ركزت.. -يعني مو حلو؟! -ما شفته..ليش تسأل؟! -عشان بعديننن.."قطع كلامو فجأة".. المهم اسمعي..أنا أبغى أجي عندكم و أبغى أجيبلك هدية و أستحي أسأل جود ايش أجيبلك..ايش تبغي؟! -هاااااا قال ببساطة:عادي لا تستحي..ايش ناقصك..ايش تبغي..نفسك في ايه؟!..أخاف أجيب حاجة و ما تعجبك.. سكت..ايش أقولُه ذا؟!!! -أحلاااااااااام.. -أي شي..مو مشكلة.. -اطلبي أي شي..إن شاء الله القمر..أجيبلك هوا.. حق من يقوله جيبلي القمر ذحين؟! لكن بما إنو مُصر أنا ما رح أرفض و حوريه الأي شي من جد.. قلت بتوجس:أي شي..أي شي؟! -أي شي أي شي.. سكت أفكر في شي يكلف قبل ما أقول بنعومة:أممم..عندي خاتم ذهب أخضر أبغالو عقد!! -ذهب مع أخضر؟!زي أشياء أمي يعني...؟! -لااا..ذهب أبيض..سعود أنا عندي فستان و أبغاله عقد من مدة..بس محد معطيني وجه!! قال بسعادة:اسمي طالع منك زي العسل!! اتحمحمت بخجل فقال:مع نفسهم ما يعطوكي وجه..أجيبلك أنا إلي تبغيه!! ^^^^^^^^^^^^^^^^^^^^^^^^^^^^^^^^^^^^^^ جود،،، قعدت جمب علي في الصالة و أنا أسمعو يقول لسعود:ولد..انتبه..لا تعور أختك!! كنت حاطة خديجة على فرشتها في الأرض و كان سعود جالس عندها و يلعب و يكلمها!! التفت لعلي و قلت بهمس:خلي الولد..لا تقعد تعقدو من أختو!! -الله..شوفي كيف قاعد يمسكها..حيعورها!! -لو عورها حتبكي..و بعدين بس قاعد يهز الألعاب فوقها و يكلمها..بلا غلاسة!! -والله إنتي مدلعة ولدك..و مهملة بنتك..بيبي لسة ما كملت شهر!! رن جوالي فرفعتو و كان طالع اسم.."رامي xD" .. قطبت حواجبي..طالع فيا علي:مين؟! مديت الجوال لو و أنا أقول بعجب:الرقم مسجل باسم؟!..مادري ميـ...."تابعت و أنا أتذكر"..آآآه ايوة..شكلو داك.. -لا تردي!! -ها؟!،ليش؟! -بس..أحسه كذاب مو اخوكي.. ضحكت:إنتا الكداب دحين!! فسرت:ايوة..ما كنت حترضى تدخلو لو ما صدقت إنو أخوية من البداية.. -طيب..ليش يطلع فجأة؟!،دوبها الأخوة ثارت عليه؟! كان الجوال اتوقف عن الرن..قلت بابتسامة:ما أستبعد إنو جاي من ورا أهلو.."وقفت لمن رن مرة تانية"..ترا زوجتك الشي الشرير إلي الأهل يخافو على أولادهم منو!! و رحت لغرفتي..رديت:نعم؟! -أهلاااان..كيفك..كيف حالك و كيف البيبي؟! -الحمدلله كويسين..إنتا كيفك؟! -أناااا..تمام..أقولك جود احنا..أو أنا بالأصح قررت أجي عندك..و بجيب معايا..مو أهلي..يعني أهلك..أهل بابا سعيد فمتى يناسبك و متى ينفع نيجي؟! -والله حياكم الله في أي وقت بس عارف..أبغى كده كم يوم عشان أرتب البيت و أرتاح و... كنت أحاول أكون قد ما أقدر لطيفة..مو إني ميتة عليهم و أبغاهم يحبوني لكن لمن أحد من أهلي يحاول يدخل فيا أشجعو بسرعة..لإنو..مو معقول الوحدة تعيش طول عمرها كده..مابغا عدد أفراد أهلي إلي يهتموا فيا يكونوا معدودين!! قال:عادي براحتك..أصلاً عمي سعد هوا قال نفسو يجيكي فأنا قلتلو إني أنا بتصل فقلي طيب..و اتصلت لإنو قالولي إنك رجعتي بيتك و خلاص يعني..استقريتي و مدري ايش هوا!! ابتسمت:أنا لسة دوبي راجعة..بس شوف متى ما أحدد يوم أنا حتصل عليك و أقولك..و لو تبغى تجي لحالك عادي ما عندي مشكلة..في أي يوم تعال.. -لاا مابغا أجي لحالي..أخاف زوجك يعصب..شكلو..كذة عصبي و يتنرفز بسرعة..صح؟! ضحكت:لالا..عادي..بس يومها كان مزاجو مو حلو..و لا دايماً مو كده!! -المهم..سلميلي على إلي عندك و ردي عليا!! -إن شاء الـ قاطعني:أقولك جود.. -ها.. -ايش رايك في العزيمة نسويلك حفلة..عشان اتخرجتي؟! -لا لا تسوي..لسة ما رحت أخدت الوثيقة..انشغلت و تعبت..لمن آخدها يسير خير!! -والله أنا حزنان عليكي..المفروض محد يتزوج قبل ما يخلص دراسة..ليش كذة استعجلتي؟! -نصيبي..الحمدلله!! -الحمدلله..طيب يلا مع السلامة!! و فصل حتى قبل ما أقولو باي.. كان يتكلم بسرعة..العجلة واضحة في صوتو بس الطيبة واضحة أكتر..أعتقد إني أبغى أحبو..لإنو قلبو أبيض..و لا تقولوا ايش دراكي؟!،أنا ما أحب أحكم بسرعة عالناس بس لمن أحكم..أحكم صح!! ^^^^^^^^^^^^^^^^^^^^^^^^^^^^^^^^^^^^^^ سعود،،، وصلت لبيت أحلام و أنا حاسس بشي غريب..كدة..شي جوتي يخليني أبغى أدخل بسرعة بس لازم أثقل!! طالعت في المراية و شفت شكلي إلي حسيتو فجأة حلو..ابتسمت:الشياكة دي يبغالها وقار و ثقل..والله صادقة أمي..طالع قمر أحلى من أخواني و أبوية الله يرحمو!! اتعطرت و نزلت و أنا ماسك كيس الهدية في ايد و في الايد الثانية ماسك صحن ورق العنب..دقيت الجرس و وصلني صوت:مييييييييييين؟! قلت بصوت حاولت يكون واضح:أنا..سعوووود!! استنيت شوية قبل ما ينفتح الباب و اتفاجأت بأحمد إلي ابتسم:خير..ايش تبغى؟! -ها!! ايش جاب أحمد..مابغا أحمد يكون موجود..مالو داعي يعرف إني زرت خطيبتي و.. بعدين في حدود و خصوصية!! ضحك:اتفضل ياخي اتفضل!! دخلت و أنا أفكر..أنا مني قاعد أتعامل مع صاحبي عشان يكون في حدود بيني و بينه بالنسبة لعلاقتي بخطيبتي..أنا أقاعد أتعامل مع أخوها..أخووووووووووها..ليش مني مستوعب؟!! دخلت عمتي للصالة و هيا تسلم..رديت عليها السلام بحرج..أحس..مني متعود عليها..أحس إني أكشف على غريبة!! -كيفك يا سعود؟! قلت و أنا خافض راسي:الحمدلله عمة..إنتي كيفك؟! -بخير..أمك كيفها..عساها طيبة؟! -الحمدلله..تسلم عليكي!! ابتسمت و هيا تشيل مني الصحن:الله يسلمها..هات عنك!! و راحت فقال أحمد:سعود إنت و وجهك.. طالعت فيه فابتسم ابتسامة كبيييييرة... رفعت حاجبي:خير؟! قال بسعادة:أنا..أقدر أشوف زوجتك..إنتا..ما تقدر تشوف زوجتي.."مد لسانو"..كسحة كسحة..هييي..هييي.. أنا عارف..أحمد لمن يستعبط بدي الطريقة يعني يبغى يخفف عني شي و دحين..يبغى يخفف عني حرجي..أقدرلو دا الشي!! -يا حيوان..لا تفشلني!! قلت بصوت واطي:ما أقدر أستعبط هنا!! -صح..بعدين برستيجك يخرب..تعال..نروح المجلس عشان تجي أحلام... و مشينا لكن وقفنا لمن سمعنا صوت عمي..التفتنا و اتفاجأت أنا بأحلام معاها..كان ماسك ايدها..و باين عليها إنو كان قاعد يمشيها!! سلم عليا:هلا والله بزوج بنتي..كيف الحال؟! -الحمدلله بخير..إنتا كيفك عمي؟! -بخير.. قال بعد ثواني باستغراب:أحلام..ليه ما تسلمي على زوجك..سعود..سلم..ايش فيكم؟! مديت ايدي لأحلام و صافحتها..و بس!! ايوة بس..لا تطالعوا فيا كده..ايش تبغوني أسوي يعني..أسلم عليها بالخد مثلاً..قدام أبوها و أخوها مثلاً؟! قال عمي بقرف:مملين!! و مشي فقال أحمد:معليش..أبوية لمن يتحمس فجأة مأساة..تعالو هناك.. و مشينا أنا و أحلام ورى أحمد زي البله..ولا واحد فينا يطالع في الثاني..دخلنا..خرج أحمد و قفل الباب وراه!! اتقدمت من أحلام خطوتين و مديت ايدي مرة ثانية..طالعت فيا باستغراب فمسكت ايدها و سلمت عليها بالخد..ابتسمت:كيفك أحلام؟! أخفضت راسها:الحمدلله!! مشيتها معايا لين الكنب..جلست في كنبة مهي مواجهة للباب..مابغا لمن أحد يفتح الباب نكون في وجهو!! طالعت في لبسها..وين الفستان إلي قالت عليه؟! كيف حيركب العقد على لبسها دا؟! رفعت الكيس إلي حطيتو عند رجلي و مديتو لها..ابتسمت:العقد إلي طلبتيه.. اتلون وجهها لمية لون..ابتسمت باستمتاع و طلعت الهدية من العلبة..مو بس الهدية كانت مفاجأة..لأ..التغليف كمان كان مفاجأة..قلت:أحلام..شوفي بايش مغلف الهدية؟! طالعت أحلام في التغليف إلي كان مرسوم عليه بكاتشو متكرر..تابعت:سألت سعود أحلام ايش تحب من الشخصيات..قلي بوكيمون..قلتلو لو جبتلها بيكاتشو حتفرح..قلي حتفرح آخر شي!! طالعت فيا مستغربة:سعود قلك إني أحب بوكيمون؟! -ايوة.. -و حفرح لو جبتلي بيكاتشو؟! -ايوة..حتى كنت أبغى أجيبلك عروسة بس ما لقيت وحدة حلوة..عارفة كلها صناعة سيئة و شكلها غبي..قلت بدل الدبدوب أجيبلك بيكاتشو بس ما لقيت و نسيت هرجة الدبدوب!! قال و كأنها تكلم نفسها:بس ليش قلك إني أحبُه؟! -يعني مو عاجبك؟! -لالا مو عن كذة..أي شي تجيبو حلو بس أبغى أعرف ليه قلك إني أحبه!! -يعني كذب عليا؟! -لا..سعود ما يكذ..آآآآه اتذكرت.. -ايش؟! -عشان مرة قلتلو إنو أحلى لعبة عندو في الجيم بوي حقت بوكيمون..شكلو ربط!! ابتسمت..مادري ليه..بس أحلام و هيا تتكلم مرة حلوة..مرة أحلى من لمن تكون خجلانة و ساكتة..فيه ناس..كلامهم عسل!! قلت:ممكن أطلب منك شي؟! -ايش؟! -إنتي ما لبستي الفستان الأخضر إلي قلتي عليه فأبغاكي لمن تلبسيه تلبسي العقد إلي جبتو..أنا كنت أبغى ألبسك هوا!! حطت ايدها على راسها و قالت بحرج:حسيته مرة ثقيل..ما يتلبس في البيت!! قلت بطفولية:مالي شغل..المرة الجاية تلبسيه و أنا ألبسك السلسلة..مو إنتي!! -طيب..لا تعصب!! -أنا ما أعصب..أنا لمن أعصب أترك المحل!! -يا سلام..و لو كنت إنت الغلطان؟! -برضو حترك المحل..و حسوي نفسي مو مهتم..بس لمن أرجع من الشغل حتأسف للي غلطت عليه..عارفة..كنت دايماً أسوي مع جود كذة!! -كنتو تتضاربو و إنتوا صغار؟! -مو كثير..بس مرة زعلتها..فهمت شي غلط و خاصمتها..فزعلت مني..أنا عرفت إني غلطان فقلت لمن أرجع من الشغل أراضيها لقيتها قافلة باب البيت بالزرفونة..عشان أضطر أدق الجرس فتشرد على غرفتها..بس رجعت صالحتها بعدين!! -حركة ذكية..حسير أسويها كل ما أزعل منك!! -لا يا شيخة..محد حيفتح الباب غيرك!! قالت باستغراب:ليه..و أمك..و منورة؟! -ليه..إنتي تبغي تسكني مع أمي؟! -ها.. اتوترت أحلام..الظاهر سؤالها كان عفوي..قلت:ما دام اتفتح الموضوع..أنا حابب إنو نسكن في الشقة إلي قبالة شقة أمي..أكون قريب منها و إنتي ترتاحي في بيتك..ايش رايك؟! -مادري..أنا اتخيلت إنو حنسكن عند أمك..هيا مو تحتاج أحد يكون معاها؟! -ايوة هيا تحتاج..أنا قلت يعني ما حنحتاج غرف و كده بس شوفي..جود تبغى غرفتها و أمي كمان ما تبغى تغير شي..لا في غرفتها ولا في البيت..عشان كذة أنا المستأجر إلي في الشقة إلي قدام حيطلع و حنعيد ترتيبها..و شغلة الفتح مني حاببها..أمي لها تصانيف و أكيد إنتي لكي تصانيف كمان..فأحسن كل وحدة يكون لها بيت بباب مقفول!! طالعت فيا أحلام:أنا حاسة إني حرمة!! ضحكت:طيب منتي حرمة..لكي عزايمك و مزاجك..بعدين أياً يكن..لازم يكون فيه شوية خصوصية..مو معقول..داخل خارج و الكل يعرف حاجاتي..صعبة!! -طيب أنا أبغى شي.. -ايش؟! -في بالي بوية من زمان نفسي أسويها..كده..غريبة..شفتها مرة.. -شوفي..نتفق على يوم..تجي و تشوفي الشقة و تقوليلي على كل إلي تبغيه..طيب؟! ابتسمت و ابتسمت..مسكت ايدها و قربتها مني:أحلام.. شديت على ايدها:يمكن..أكون سخيف..و يمكن..تكون اهتمامات بنات بس..أنا أبغى دبل..احنا ليش ما اشترينا دبل زي الناس من قبل الملكة؟! نزلت راسها مادري ليه و قالت:مادري.. مسكت وجهها و خليتها تطالع فيا..ابتسمت:ممكن ما تنزلي راسك مرة ثانية؟!،أنا لمن أحرج أحد أحس بالذنب!! ************************************************** * |
الجزء السابع و العشرون (في بيتي..أسرتي) علي بطفش:يعني؟! قلت:يعني أبغى أروح السوبرماركت..و أبغى أروح أشتري طقم مواعين جديد!! -ليه..ليه..هما ما قد شافو أشيائك..عادي..كأنها جديدة!! آآآه يا ربي..علي ليه مو راضي يفهم؟!، هما أول مرة يدخلو بيتي..أبغاهم يخرجوا منو مندهشين من كل شي!! قلت:و كمان..ترى أبغى أجيب من دولا الشغالات إلي ينظفوا..عشان تساعدني في تنظيف البيت!! ضحك علي بسخرية..قلت:علي أنا ما حقدر أنظف البيت لحالي.. -خذي شغالة أمي... -ما أحب.. -ما تحبي ايش؟! -مالو داعي..بعدين عمتي تحتاجها..عيب..أستحي والله من أمك!! -ما رح تدخل شغالة بيتي!! -هيا حتدخل حتدخل..أنا مني آلة..شوية خديجة حتكبر و معد حقدر أنا على شغل البيت..المهم دحين..اليوم الاثنين..حيجوا يوم السبت.. -ما شاء الله..يعني أول يوم في الإجازة؟! -علي حبيبي إنتا..الله يحليك..أنا سألتك السبت يناسبك قلت ايوة و خلاص قدني كلمتهم..الله يسعدك علي..والله لو ينقص شي قد كده ما أسلم من لسانهم..يقولوا مقصرة و لو بس أهل زوجها ما كان قصرت و ما كان سوت..يعني يرضيك إنتا يتكلموا عني..يرضيك؟! -محد بيتكلم عنك..هذولا أهلك..إنتي بس تتوهمي إنهم ما يحبونك!! -لا ما أتوهم..عمتي صفية تتكلم كتير في أي شي..والله ما أسلم من لسانها بعدين.. -أصلاً لا تجي أحسن.. -وي حبيبي عيب ما يسير..إلا تجي الله يحييها..المهم.."ابتسمت"..متى حتوديني؟! اتنهد بطفش فاتأففت..قال:الخميس.. -لاااااا..ما يمديني..الخميس متفقة مع الشغالة.."بسرعة"..ترى مرة كويسة..عمتي قالت لي عليها..تتحاسب باليوم هيا!! -يعني مخططة و متفقة..و أنا تقوليلي آخر شي!! -لأ..لأ يا علي..أنا مو مخططة..هيا الحرمة محجوزة كل الأيام ما عدا الخميس.. -جود إنتي قاعدة تكلمي علي مو سعود..خلاص الربوع إذا مداني..لو كنت تعبان ما حوديكي!! -لا يا علي..نسيت..الربوع حنروح مع عمو و أحلام عشان الدبل!! ابتسم:قولي إنك تبغي بكرة.. -أبغى بكرة.. -مني موديكي... -علييييييييييييييييي... -دوام..دوام يا بنت الناس..اتقي الله!! -دوام ايه..ما تجي احدعش إلا و إنتا هنا..تنام تصحى الظهر و نمشي..الله يخليك..أبغى كل شي يكون حلو و جاهز من بدري.. كان صوتي في آخر الكلام اتحول لنبرة البكاء..والله لو ما رضي حبكي و أسوي مناحة من جد!! -أمري لله..ايش أسوي فيكي... قلت بسعادة:من جد؟! -ايوة!! بستو على خدو بقووووة:حبيبي إنتا..الله لا يحرمني منك!! اتحمحم و كتم ابتسامتو و اتكلم قلك بصوت رجولي:روحي..روحي جيبيلي موية!! قمت و رحت و أنا مبسووووطة..فديتو والله!! ************************************************** ** علي:كلها حلوة..خذي أي واحد!! -هيا كلها حلوة أكيد..بس ايش الأحلى؟! -مادري!! قلت بتفكير:هدا أحلى.. -لإنو أغلى طبعاً.. -هوا أغلى عشان قطعو أكثر..أبغاه.. قلت لمن شفتو حيعترض:إنتا قلت خدي أي واحد!! سحب نفس و كلم الرجال عشان يجيب الطقم إلي اخترتو..علي حتى لو ما كان طفشان يسوي نفسو طفشان بس دحين شكلو من جد تعبان..يا عمري عليه..بس خلاص..أنا ما أتعبو دايماً..بعدين أنا ليا أسبابي... خرجنا من المحل و ركبنا السيارة.. و حط الرجال حق المحل الطقم في الشنطة..طبعاً المقعدة إلي ورا كلها أشياء من السوبرماركت..في بالي أكلات كتير بسويها..أنا صح ما أحب أتكلف في أي شي..بس دولا مو أي أحد..مو شي عادي..أول مرة يدخلوا بيتي..غير كده..ما ينفع آخد راحتي و أريح نفسي..طبعاً ما حطبخ عشا..بس حسوي كم صحن!! طالعت في الأشياء إلي ورا..مهي كتيرة مرة..بس علي حسسني بالذنب و هوا يردد:إنتي بطرانة!! مرينا على عمتي و قعدنا عندهم شوية..تركت الأولاد عندهم..أوه ايش دا..أول مرة أستخدم لفظ الأولاد..طبعاً فهمتوني..قصدي أولادي..سعود و خديجة!! ************************************************** ** كنت في السيارة مع عمو..وقفنا عند بيت أهل علي لإنو أحلام و عمتي حيجوا معانا عشان نروح نختار الدبل!! نزلت من السيارة و ركبت ورا..استغرب عمو:جود ليش ترجعي ورا؟! قلت ببساطة:عشان أحلام تركب قدام!! -ليش هيا تركب قدام؟!،إنتي تعالي اركبي جمبي..لمن إنتي موجودة هيا ورا!! عمو كان يتكلم بعدائية مدري من فين جات..قلت بلطف:عمو أحلام زوجتك و معروف إنو هيا إلي من حقها تقعد جمبك!! -لأ..لازم ما تخلي الأمور سايبة و تنتبهي..خلي لكي قدرك!! -طيب خلاص دحين..شوفهم جو.. أسوأ شي لمن الرجال فجأة يتصرف كحرمة..و يا ليت بشكل يبرد القلب..لأ..بغباء..بالذات عمو..مشكلة لمن يسوي نفسو فاهم في الأمور دي..يخبص الدنيا!! عمتي ركبت عادي ورا..أما أحلام فتنحت فجأة..مدري ليه!! عمو:يلا.. ركبت أحلام بهدوء و جلست..سلمت عليهم و سألتني عمتي عني و سألت عمو بعدين قالت:ليه ما جبتي الأولاد معاكي و خليتهم هنا؟! -علي يبغاهم... -و ليش ما جا هوا؟! -ما يبغى..قلتلو ما رضي.. رن جوالي برسالة..كانت من أحلام..طالعت فيها لقيتها جالسة بهدوء أكبر من هدوء عمو إلي يبغالو ضرب..ما سلم و لا سأل!! فتحتها و كانت:"آسفة..إنتي زعلتي عشاني ركبت قدام؟!" من جد الطيور على أشكالها تقع!! كتبت:"لأ..أنا إلي رجعت بعدين بصراحة يعني..ما حخليكي في يوم تركبي قدام مع علي ;P" رن جوال أحلام فالتفت عمو و طالع فيها بس رجع يطالع قدامو!! طالعت في عمتي..همست لها بغيض:أغبيا.. همست عمتي:مو وجه ملكة قبل الزواج!! ضحكت ضحكة مكتومة فاتفاجأت بعمو يسأل بانزعاج:ايش فيه يا جود؟! -ولا شي.. -ليش تضحكي؟! -مني قاعدة أضحك عليك!! -أنا ما سألتك إذا قاعدة تضحكي عليا ولا لأ..عشان كذة كنت أبغاكي تركبي قدام..عشان ما تقعدي تحشينا..أحلام تراها قاعدة تحشنا هيا و أمك.. اتحمحمت أحلام مهي عارفة ايش تقول..قلت:لأ كنا قاعدين نحش علي..صح عمة؟!، و بعدين ما كنا نحش..كنا قاعدين نناقش شي..يعني ليش مثلاً ممكن أتريق عليكم؟!، مافي شي يستاهل التريقة بعدين إنتا عارف إني ما أحب أتكلم في أحد!! وقفنا عند مول كان فيه محل مجوهرات عامل تخفيض على الدبل و الأشياء دي..دخلنا و اتوجهنا للمحل..وقفنا عند الدبل و شوية إلا عمتي تقولي إنها تبغى رأيي في شي عاجبها..طبعاً فهمت الحركة و رحت معاها..على أساس نسيبلهم المجال بس أنا عارفة..ما تفرق معاهم..سبنا ولا ما سبنا..ما حيسووا شي!! ^^^^^^^^^^^^^^^^^^^^^^^^^^^^^^^^^^^^^^ سعود،،، طالعت في الرجال إلي وقف قدامنا و سأل:أي خدمة؟! قلت:نبغى نتفرج و حناديك لو احتجناك.. -أوكي.. و مشي فالتفت لأحلام:أخبارك؟! -الحمدلله..كيفك؟! -تمام..شوفي..عاجبك شي؟! التفت تدور:ماما فيـ.. حسيت فجأة إني مابغا أحد يجي معانا، قلت بقهر:خليها..اختاري معايا دحين!! أحلام باستغراب من لهجتي:طيب حختار معاك بس أبغى رأيها كمان!! رجعت قلت بهدوء:أكيد.."ابتسمت"..بس نشوف إلي يعجبنا و نناديهم بعدين يعطوا رأيهم..أوكي؟! هزت راسها و طالعت قدامها في الخواتم..أشرت على واحد:هذا.. قلت بتفكير:دا..بس مافي شبه بينو و بين الرجالي منو... -أكيد ما حيكون فيه شبه!! -ههه ايوة بس خدي شي هادي أحلى..زي دا مثلاً!! -لااا..أحسُه مو مميز..شوف هذا؟! طالعت في إلي أشرت عليه..كان حلو..قلت:تمام..شوفي ذا شبهو!! طالعت:ايوة..حتى ذاك.. وصلنا في النهاية لطريق مسدودة و احترنا ايش نختار..التفت أنا دحين أدور على جود و شفتها هيا و عمتي يتفرجوا على باقي الأشياء و يتناقشوا في مادري ايش..ناديت:جود.. التفتت و جاتني هيا و عمة..قالت:نعم... -تعالي شوفي.. اتقدموا هيا و عمتي..أحلام:ماما ايش أحلى..ذا و لا ذا و لاذا.. قاطعتها عمتي:طب خلي الرجال يطلعهم.. ناديت الرجال و خليتو يطلعهم و بدأت عمتي عاد تجرب على ايد أحلام..خاتم خاتم..و جود استلمتني..كانوا يجربوا في وقت واحد كل دبلة و يحطوا أيادينا جمب بعض..طبعاً أنا و أحلام كنا مستسلمين تماماً!!.. جود:دي أحسن وحدة عليكم!! أحلام:ليش؟! -لإنو أصابعكم نحيفة و طويلة..و هيا عريضة شوية..فتخفف من نحف يدكم..صح عمة؟! -على قولك و بعدين كلها تشبه بعض!! قلت:يعني خلاص..نتوكل على الله؟! جود:براحتكم.. عمة:ها أحلام..عاجبتك؟! أحلام بتردد:مادري.. طالعت في أحلام:عاجبتك ولا لأ؟! قالت بسرعة:أبغى الأولى..هيا عاجبتني!! طبعاً الأولى كانت أثقل و أحلى..و أغلى، المسألة بالنسبة ليا مي مسألة فلوس.. بصراحة مو عاجبني خاتم الرجال فيها..يعني هوا صح نفس حق الحرمة بس الزخرفة في حق الحرمة أحلى..عشان كذة ما أبغاه بس عشان خاطر أحلام..بعدين مو إني بقعد لابسها أربعة و عشرين ساعة..أنا أكره الخواتم!! قلت:خلاص براحتك.. أحلام:يعني عادي..ما كانت عاجبتك أول؟! ابتسمت لها:عادي.. اشترينا الدبل..و خرجنا من المحل..جلسنا على وحدة من الطاولات..قالت جود:هيا اسمعوا..مو حنسوي سابع لخديجة..يوم السابع تلبسوا الدبل؟! قلت:مابغا..أبغى ألبسها دحين!! -البسها دحين براحتك..بس قصدي إنو يعني..نسوي حفلة للدبل!! قلت بسخرية:للدبل؟!، سويلنا احنا.. -أوكي لكم..باستخدام الدبل!! عمة:ترى ما سار سابع..كم لك ولدتي؟! بتكملي شهر والدة!! -عادي يا عمة..بعدين خليها بعد العزيمة أحسن!! -صح متى حددتوها؟! -السبت.. قلت:السبت؟!،و كيف حتكون..كبيرة مرة؟! جود:أكيد.. -الله يعينك.. قالت بابتسامة:و يعينك..حتجي و تجيب جدة و منورة من بدري..أنا و علي ما نقدر نسوي كل شي لحالنا.. قلت بلا اهتمام:طيب.. -من جدي أتكلم!!.. قلت:طيب..ما قلتلك شي..قلتلك طيب.. قالت بمرح مفاجئ:يلا ايش تبوا تتعشوا دحين؟! ابتسمت لجود:بتعزمينا على حسابك؟! -لا على حسابك إنتا!! عمة:ماله داعي..أنا مجهزة عشا.. جود:ليش تتعبي نفسك و تطبخي؟! عمة:عاد خلاص طبخت و محد بياكله لو اتعشينا احنا هنا.. قلت:طيب بس نشرب عصير..أو أي شي..ما ياخذ وقت.. وافقت عمتي بعد ما اترجيتها شوية و قعدنا نشرب..ما احتجت وقت طويل عشان أتغلب على توتري..بس أحلام احتاجت و ما زالت تحتاج..يمكن لسة مي متعودة عليا قدام أهلها..أو قدام أحد بشكل عام..يلا..شوية شوية حتفك بنفسها..ما أحس إنو الخجل الشديد من طبعها..و هذا الشي..على عكس المتوقع..مريحني!! ************************************************** ** جود،،، رن جوالي و كان رامي، أخوية إلي طلع لي فجأة..ما شاء الله عليه..يتصل و يرسل كتير!! رديت:ألووو.. -آآ..السلام عليكم!! -و عليكم السلام..أهلاً.. -كيفك جود..أخبارك..كيف البيبي الجديد..متعبتك؟! ابتسمت:الحمدلله..مهي متعبتني ولا شي..إنتا كيفك و كيف الإجازة معاك!! -حماس..آآ جود كنت أبغى أقولك على شي مو حلو شوية..عادي؟! -خير إن شاء الله؟! -هوا مخطط الجية عندك اتغير..أبوية سعيد يقول نروح المزرعة أحسن!! قطبت حواجبي:ليه فجأة؟!، طب أنا جهزت كل شي!! -عادي..جيبي كل شي جهزتيه على المزرعة.. سكت فقال:أبوية سعيد يقول بنسوي حفلة.."بسعادة"..حفلة فيها شويييي و حركااات!! أوكي هوا أريح لي بس علي حيطربق الدنيا على دماغي..ما يحب تغيير المخططات المفاجئ..و لا أنا كمان!! اتنهدت:نفس اليوم..السبت؟! -أيوة..حتجي؟! -إن شاء الله..أحاول!! -حقولهم إنك حتيجي!! قلت بشدة:لأ..حعطيك خبر لو حجي..لا تتكلم ولا تقول شي!! -يمي..خوفتيني..خلاص ما بتكلم.."اتغير صوتو"..أقولك جود..إنتي..هوا إنتي من جد زي ما يقولو؟! -ايش يقولو؟! -مرة مغرورة..و مرة قاطعة..و مرة مدري ايش..ياخي أحس كلام فاضي..متحمس كذة أتعرف عليكي مع إنو كلمة أتعرف سخيفة بس..مضطر أستخدمها!! ضحكت مجاملة:إنتا بعدين قرر بنفسك!! -ههه..طيب إن شاء الله..يلا دحين مع السلامة..و نراكِ قريباً إن شاء الله!! -إن شاء الله!! -باي.. "مع السلامة"..و فصلت..رحت للغرفة و ين ما كان علي قاعد يحوس في النت..مدري ايش قاعد يسوي..قلت:عليييي.. من غير ما يطالع فيا:نعم.. -عنديييي خبر..حلو زيك.. -إلي هو.. -رامي دوبو اتصل و تخيل؟!، معد يبغوا يجوا عندنا.. -أحسن!! -بسسس..يبغونا نروووح.. قال بنفس أسلوبي:فييييين؟! -المزرعة حقت العائلة.. -سلميلي على أهلييييك و قوليلهم علي يقولكم مع نفسكم..و سويلي شاهي على طريقك!! -يعني.. -ما حعيد كلامي.. -بس بابا حيدوشني لو ما جيت..لازم نروح كلنا.. -أوكي بس من جد مني متحمس.. -أنا متحمسة..علي..أولادنا لازم يروحوا و يجوا على أهل أمهم..حيحسوا بنقص..بعدين سعود قاعد يكبر و يسأل..أنا بدأت أغير فكرة إني ما أحتاجهم!! -إنتي فعلاً ما تحتاجيهم.. -أنا ما أحتاجهم بس أولادي يحتاجوهم و حاجة أولادي من حاجتي.. و رحت للتسريحة أروقها..قلت و أنا أفتكر:علي من جد تبغى شاهي؟! -لأ.. -أوكي!! ************************************************** ** اتصلت على بابا و ما استنيت وقت لين ما رد:نعم.. -السلام عليكم.. -و عليكم السلام.. -كيف حالك..إن شاء الله كويس؟! -بخير..أخبارك و أخبار بنتك؟! ابتسمت:الحمدلله..تسرك..آآمم..بابا هوا إنتوا من جد قررتوا إنو نروح المزرعة يوم السبت!! -نعم.. -بس كنت أبغى أتأكد لإنو رامي كلمني و حسيتو مستعجل و كده فما وثقت في كلامو..المهم هوا متى لازم أجي..العصر ولا في الليل؟! -لا الليل.. -طيب عشان أهل علي..أبغى أعزمهم..لإنو كنت حناديهم لمن على أساس في بيتي فلازم يجوا دحين.. -عارف..حتعلمينا في الواجب يعني؟! -ها..لا بس خفت إنكم كنتو تبغوها عائلية فـ.. قاطعني:ليش منتي معتبرتهم من العائلة؟! -إلا بس.. -شي طبيعي رح نناديهم..هذول نسايبنا ذحين مو بس أهل زوجك!! -طيب..بس كنت أبغى أتأكد.. -طيب.. مالت على إلي تتصل عليك تبغى تكلمك في أي شي!! قال:تامرين على شي؟! -سلامتك.. -الله يسلمك..في أمان الله.. -مع السلامة.. قفلت..لويت شفايفي شوية..بعدين قمت أشوف سعود..بدأت بجد أحزن عليه..أحسو أصغر من إنو يكون أخو كبير!! ************************************************** ** في المزرعة،،، كنت قدني ألغيت موعدي مع الشغالة إلي تتحاسب باليوم و أنا أفكر إني لو احتجتها مرة تانية صعب ترضى تجي..بما إني و من أول موعد ما وفيت بكلمتي و عطلتها عن رزق كان ممكن تلقاه في ذاك اليوم عند غيري!! رحنا للمزرعة و علطول أنا و علي افترقنا..هوا راح لمدخل الرجال..بعد ما اتأكد إنو أهلو موجودين من قبل و أنا رحت لمدخل الحريم مع سعود إلي رفض يروح مع أبوه و خديجة إلي دوشتني في السيارة ببكاها..مي راضية ترضع من الرضاعة..و طبعاً ما أقدر أكشف عن صدري في الشارع..بس إنها سكتت لمن حطيت أصباعي في فمها..يالله تتجمل فيا لين ما ألاقي محل أرضعها فيه!! دخلت لجوة البيت و قلت لسعود يحط الأشياء و يروح للمطبخ..ما كان تصميم البيت يتوه و كان المطبخ واضح من الصالة..كنت أبغاه يناديلي منورة عشان تساعدني في شيل الأشياء لجوة..سعود حبيبي تعب و هوا شايلها عني..ثقيلة عليه!! جلست على وحدة من الكنبات إلي في الصالة و أنا أفكر إنو سعود أخد وقت أكتر من اللازم..المطبخ قدامنا..وين اختفى؟! "خلاص رايح ذحيـ.." رفعت راسي لمن سمعت الصوت و... ^^^^^^^^^^^^^^^^^^^^^^^^^^^^^^^^^^^^^ جرة،،، شهقة جود كانت مفزعة بحق..تجمد مكانه لثواني و ظل ينظر إليها فاغراً فاه قبل أن يضع يديه على رأسه كالمستصيب..لقد تذكر..ذكرى محرجة! قال بعصبية و هو يضرب الأرض بقدمه قبل أن يتابع طريقه للخارج:"استغفر الله!!" وضعت يدها على قلبها الذي ينبض بشدة و هي مغمضة العينين..تدريجياً تحولت زمة شفتيها لابتسامة..نظرت لخديجة فوجدتها تنظر إليها ضاحكة..ضحكت جود بشدة الآن:ايشبك تضحكي؟!،لا تقولي لأبوكي سامعة؟!،حيبهذلني!! احتضنت ابنتها بشدة قبل أن تصل منورة و معها سعود..سألته جود:وين اختفيت؟! -منورة ما كانت في المطبخ..ما شفتيني و أنا خرجت؟! -لا حبيبي ما شفتك..منورة الله يخليكي دخلي الأشياء لجوة..سعود بابا تعال معايا.. و توجهت جود للداخل مبتسمة..بلا سبب..هي تعلم بأن الموقف لا يحتمل الضحك..حتى هو ذاته شعر بالحرج الشديد و قد ظهر هذا على وجهه..فلم هي تضحك؟!، لم تبتسم بدلاً من أن تتجنب رفع نظرها في وجه أحدهم؟! لقد تذكرت..سخافة..نسيتها..و سذاجة..منها و منه..و من الجميع..لهذا هي تضحك..لأنها ببساطة..تذكرت كيف قضت مراهقتها!! ^^^^^^^^^^^^^^^^^^^^^^^^^^^^^^^^^^^^^ سعود،،، كان الجو..دوووووشة..كلام كثير و أصوات عالية و إلي يضحك و إلي يخاصم و إلي يناقش قضايا غريبة..أنا عني كنت قاعد في زاوية مع أحمد و علي وبعض من أولاد أخواني..رفعنا راسنا لعبدالله إلي دخل معصب..سألوه ايش فيك..فارتمى على كنبة و هوا يقول:ولا شي!! سمعت أخواني يتكلموا بين بعضهم و يقولوا إنو متوتر عشان زواجو قرب بس مني مقتنع..عبدالله على أساس مرة مرتاح مع خطيبتو و مبسوط إنو أخيراً اتحدد موعد الزواج..بكيفو..أنا ايش عليا؟! عبدالرحمن:عقبال ما تتوتر إنتا يا رب؟! طالعت في عبدالرحمن:أنا ما أتوتر.. عبدالإله:نشوفك.. -اسكت إنتا ..عمرك ما تقول حاجة عدلة أصلاً... وقف عبدالإله و هوا يقول إنو بيروح يشوف عبدالله ايش فيه.. و غرقت أنا في أفكاري..زواج؟!،بدت الفكرة تحلالي..من جد!! خرجنا بعد شوية على أساس نبدأ شوي..طبعاً أنا هذي الأشيا مو من اختصاصي..لا أنا و لا أحمد و بالنسبة لعلي..ما كان مرة منفتح على الموجودين فما انضم لهم مع إنو يحب يشوي و يفهم في هذي الحاجات!! علي كان ساكت..علي في اجتماعات عائلتنا مو على طبيعتو..ما أقولكم إنو يسير نكدي أو شي..لأ..بس ما يرتاح..هما كمان مو معطينو ذاك الترحيب..فبالتالي دايماً معايا..لكن لو أحد كلمو يرد..غير كذة..ما يفتح نقاش أو يشارك في حوار!! أحمد:طالع كيف يشووا..أبو الفشل إلي زي كذة..علي روح بالله اشويلنا عدل... طالعت في أحمد:هييي..استحي على وجهك..أولاد أخواني!! شمق أحمد كأنو بنت..ابتسمت و قلت مازح:اثقل..أعطي نسايبك فكرة حلوة عنك.. -ليش إنت ما تثقل؟!.."همس"..في ناس مصدومييييين..يقولو.."بصوت بنت"..مرة مرة غير عن إلي اتوقعناه... ضحك علي..أنا فهمت بس مو مرة..و شكيت و اتوترت شوية..قلت:كيف؟! -ولا شي..ما أحب أدق أو أمزح في ذي الأوضاع بس فجأة جا الشي على بالي.. -مني فاهم... علي:حسب معرفتي الشخصية بسعود..هوا تجيه حالات انبراش مفاجئة... أحمد:أنا عارف بس.. سكت أحمد فجأة و بعدها قال بحماس:سعود!! قطبت حواجبي:ايش فيه؟! -أقدر أكلمك عن زوجتك..بس ما تقدر تكلمني عن زوجتي..أحسسسسن... و قعد يضحك..قلت:هذي المرة الكم إلي تبهرني فيها بذي الحقيقة؟! ابتسم بسعادة:مادري..بس..فلة!! جا عبدالرحمن مبتسم:السلام عليكم.. ردينا السلام فقال:كيييف حالكم؟! أحمد:الحمدلله بخير..إنت..أخبارك؟! -تمام..كويس.."التفت لعلي"..إنتا..ليش ساخط على المجتمع؟!،ليش زعلان؟! طالع علي في عبدالرحمن:مني زعلان..شكلي زعلان؟! عبدالرحمن بتفكير:لأ..بس أبغى هرجة..هيهي.. فجأة نط رامي و صرخ:هييييييييييييييي.. أشر على علي:إنتا..زوج أختي..اسمك علي صح؟!.."على أحمد"..و إنتا أخوه..اسمك.. أحمد بابتسامة:أحمد.. -ايوة أحمد.."طالع في علي"..اسمع..عادي أجي بيتكم؟! -ها.. -مثلاً فجأة أنطلكم..عادي أنا خال أولادك..بعدين أنا ما شفت خديجة كويس..أنا أحب الأطفال..أحب ألعب معاهم!! علي كان يساير رامي إلي ما حس بتضايق علي منو..ههه..أنا عارف علي ليه متضايق..علي يكره دا النوع من الشباب..عفويين و ساعات تحسهم مو رجال كبار من طريقة كلامهم و تعبيرهم عن مشاعرهم و صراخهم و حماسهم مع أي شي يشوفوه..مع إنو والله في المواقف إلي تحتاج تصرف سريع يتبرع و يوقف مع المتورط دايماً!! قعدنا مدة نتكلم و انضم لنا الكل ما عدا عبدالله و عبدالإله..عبدالإله و فهمناها ما يحب علي لكن عبدالله ايش عندو..ليش متجنب الكل و بالذات أنا؟! حاولت أكلمو و احنا خارجين من البيت للحوش لكنو صرفني..مو إني اتأثرت بس أنا عارف عبدالله..ما يصرف إلا لو وراه بلى!! ^^^^^^^^^^^^^^^^^^^^^^^^^^^^^^^^^^^^^ جود،،، ضحكت و أنا أسمع سارة تتريق على أستاذة غبية عندها..وقفت ضحك لمن شفت سعود متوجه ليا..قلت و أنا أقرب منو:ها حبيبي.. -ماما ممكن أخرج مع الأولاد برة؟! -أية أولاد؟! -مادري مين..كتيرين!!..بس هما قالو حيخرجوا يلعبوا في المراجيح و الكورة!! -طيب حبيبي بس.."التفت لسارة"..عادي دايماً يخرجوا الأولاد؟! -ايوة عادي..أصلاً الرجال ذحين برة يشووا.. قلت و أنا أطلع جوالي و أدق على علي:طيب خد كلم بابا و قلو إنك حتخرج.. بعد سعود عننا و رجع بعد شوية و قلي:بابا يبغاكي.. حطيت الجوال على أدني و أنا أقوم:ألو.. -ايوة..كيف يخرج سعود أنا أخاف عليه! -مادري..يقولوا دايماً الأطفال يخرجوا..إنتوا مو برة؟! -إلا..المهم ذحين..بعد العشا نمشي؟! -ايشبك؟!، تعبان ولا شي؟! -لا بس طفشان.. -ايش مطفشك؟! -مادري..المهم ذحين.. خلاص خليه يخرج بس ينتبه لنفسه.. -إن شاء الله..باي.. -مع السلامة.. قفلت و طالعت في سعود:خلاص حبيبي اخرج العب معاهم بس انتبه لنفسك..لا تروح بعيد من البيت..خليك قريب.. -طيب.. -انتبه لنفسك..قول بسم الله و اقرأ آية الكرسي.. -ما أعرف أقولها لوحدي.. ابتسمت و قعدت أقولها معاه شوية شوية..بستو و خرج بعدين..ليتو يدخل معاهم و يسير اجتماعي أكتر شوية !! رجعت جلست مع البنات..بيني و بينكم الجلسة معاهم أحلى..الحريم مملين..ساروا زي الرجال..بس يناقشوا قضايا المجتمع و مشاكلو و أنا وحدة بصراحة..مشاكلي مكفيتني و زيادة!! ************************************************** ** كنا في بيت أهل علي..قاعدين في الصالة..خديجة كانت تبربر و متنرفزة من شي مادري ايش هوا..مهي جيعانة؛دوبي أكلتها..ما عدمت عشان تتضايق و اتأكدت من إنو مافي شي يوجعها بس ما زالت تعترض و مكشرة!! سعود:ماما ماما..أنا أول أسوي زيها و أقعد زعلانة؟! -ايوة..منتا فاكر..قد وريتك فديو لك و إنتا زعلان..نسيت؟! -لأ بس مو زيها..هيا..هيا تقول بصوت عالي.. ابتسمت:صورناك من بعيد..كنت تضرب الكاميرا..معصب عليها..مدري ليه!! شال علي خديجة مني و رفعها لمستوى نظرو:خديجوووو...ايش مزعلك؟! قلت:مو كويس ترفع الأطفال لمستواك..لازم إنتا تنحي لهم!! -هيا..جاك الفتي.. أحلام:صح..نفسيتهم تتأثر..لازم الواحد ينحني و يكلمهم!! نزل علي خديجة بطفش و قعد يحاول يسكتها و يهديها!! عمي أبو علي:تذكرني بأحد..أم أحمد..فاكرة؟! عمتي بدون نفس:طبعاً..مين ينسى؟! أحلام:دقيقة..كأني بدأت أتذكر.. صفاء:ايش الهرجة؟! كان فيه ابتسامة على وجوه التلاتة..قلت:مين؟!،مين كان كده..علي؟! ضحك عمي:و أسوأ من ذلك.. علي:لااااا بالعكس..أنا كنت مرة هادي.. قلت:بالله..كان دوشة؟!،أنا عارفة سعود مو طالع عليه!! علي و هوا يحط خديجة عندي:لا لا..أنا كنت هادي..ما أتذكر إني كنت أسوي إزعاج.. أحلام:من يوم ما انولدت و إنتا مزعج..في البداية صراخ و بكى طول الليل و بعدين تكسير و نقزة!! عمتي:حسبي الله..جنني.. التفت لعمة بابتسامة:ليش؟!،ايش كان يسوي؟! عمي:علي..أول ولد لي بصوت عالي..أحمد و أحلام و ليلى..كلهم كانوا هادئييين..بلا أصوات آخر الليل و لا بكاء ولا حتى حركة إلا علي..كسر القاعدة و صدمني فماذا فعلت؟! قلت:ماذا؟! -قلت لعمتك..اذهبي لمنزل أهلك حتى يهدأ ابنك..ثم عودي..حياك الله!! -مع نفسـ..آآآه..قصدي ليش؟!،هوا ولدك كمان.. -ابني..نعم..لكن بصوتٍ عالٍ..لا.. علي:كملي كملي..قوليها مع نفسك.. دقيت علي لا يزودها كالعادة..لكن عمي اختار إنو يطنش و قام و يا ليتو ما قام..لإنو قام و نادى لينا إلي لحقتو و رجعت لنا بعد شوية:جود..بابا يقول روحي عندو.. قطبت حواجبي و سألت لينا:ما قلك ايش يبغى؟! -لأ.. قلت:أخاف لمن كده يناديني.. علي:هيا كلها كم مرة.. -لااا..يقعد يكلمني كده بطريقة..أحس كل ثقتي تروح..كأني في تسميع في المدرسة!! عمتي:يا بنتي عادي..هوا يحب يسوي كذة مع حريم أولاده.. -يسوي كده مع مرة عمو أحمد؟! ضحكت أحلام:سواها مرة و خرجت تبكي.. صفاء:الله..كان فلة ذاك اليوم..بابا انفجع.. عمتي:ما ينفع مع أي أحد ذا الأسلوب..قعدت على أعصابي أول مرة سواها لكي.. علي:أمي..أبوية سوالك كذة؟! -أوووهـ..ياما و ياما..بس ما كنت أعطيه وجه فبطل!! وقفت و أنا أشيل خديجة..حطيتها عند عمتي إلي قالت:هاتيها هنا.. و طلعت لفوق..دقيت الباب و سمعت:تفضل.. فتحت الباب بهدوء:السلام عليكم!! شايفين..أحس هنا كأني دوبي متعرفة عليه!! -و عليكم السلام..تفضلي..اجلسي.. جلست:نعم عمي..كنت تبغى شي؟! -نعم.. -خير؟! -كل الخير إن شاء الله..آآ جود أردت أن أسألك عن وثيقتك..ألن تذهبي لاستلامها؟! -أكيد..كان نفسي أستلمها قبل ما أولد بس ما مداني..حروح..حآخدها إن شاء الله.. هز راسو:مممممم.. جود!! -نعم.. -وددت لو أسألك عن..عن أمرٍ ما.. -خير؟! -هو أمرٌ يخصكِ..جداً.. قطبت حواجبي و بدأت أتوتر..خاصة إنو ملامح عمي اتغيرت و عينو ضاقت.. -أيـ..ايش؟! -يمكنك أن تعتذري عن الإجابة لكن عي بأن لي الحق..كل الحق في أن أعرف الإجابة!! ما قلت شي و أنا أستنى منو يسأل.. -جود..هل كانت بينكِ و بين عليّ علاقة قبل الزواج؟!. قطبت حواجبي:نعم؟! -بالأمس..سمعت صفاء تتحدث مع أحلام..عن أمرٍ ما.. قطبت حواجبي و أنا أسمعو يتابع:عن موقفٍ حصل..شاهدته صفاء فكتمته لكن يبدو أنها أخيراً أخبرت به أحلام بالأمس..لم أكن أقصد التجسس..وددت أن أطمئن عليهن في الليل فسمعتهن صدفة!! سألت بتوجس:ايش سمعت؟! ابتسم:استخدمي الفصحى.. قلت بقلة صبر:عمي..ايش سمعت؟! اتوسعت ابتسامتو:جود كان بإمكاني ألا أخبرك..و لم يكن ليحدث شيء..فقط لأني أحترمك و أعزك أردت أن أعرف المزيد..منكِ..لا تتوتري و ثقي بأن ما سيُقال لن يتعدى حدود هذا الباب!! قلت بنرفزة:إذا ما كان شي يأثر فليش قاعد تسأل بجدية و كأنو موضوع خطير؟! -لتوليني اهتماماً و لتفصحي عن كل شيء!! سحبت نفس عميق و قلت و أنا أحاول أهدي نفسي إلي هاجت فجأة:طيب..قولي ايش سمعت عشان أعرف أنا ايش أقولك!! -سمعتها تقول بأنها رأت علياً في زفاف أحمد..يحادثكِ..و كانت في نبرتها ضيق كبير الأمر الذي ذكرني بصدمتها وقت خطبتك لعلي!! نزلت راسي و أنا أفكر..معناتو صفاء شافت..طب ليش ما اتكلمت؟!، ما قالت شي؟!، مو من طبع صفاء إنها تكتم..صفاء أصلاً ما تعرف تخلي شي في قلبها!! -جود!! رفعت راسي:نعم؟! -أخبريني.. قلت:واللهِ يا عمي هذا موضوع مر عليه وقت طويل..أنا مني عارفة ايش المناسبة إلي خلت صفاء تتكلم..أنا ما كنت أعرف إنها شافت شي أصلاً..هيا ما حسستني إنها تعرف حاجة..بس غلط منها إنها تفتح هدا الموضوع و هيا سكتت عنو في وقتو و كمان إنتا يا عمي..مابغا أزعلك أو أكون وقحة معاك بس الموضوع دا لو حناقشو مع أحد دحين حناقشو مع علي..بعدين هوا فعلياً لمن أفكر فيها ألاقي إنو ما سوالي شي..فما أعتقد إنها حاجة مهمة تسألني فيها و تتأكد منها!! -جود كل ما في الأمر هو أنني أريد أن أعرف المزيد عنكِ..أنا أستغرب حقاً كيف تكون هذه حالكِ و أخلاقك..كيف تكونين أنتِ أنتِ و وضعك لم يكن مستقراً و لم تنعمي لا بطفولة و لا مراهقة ولا شباب طبيعي..كيف نشأتِ هكذا تحبين العلم و القراءة..كيف أرى السعادة و الراحة عليكِ مع نفور عائلتك و الناس منكِ..لا أقصد الآن..أقصد في بداية زواجكما..كنت رغم كل شيء غير طبيعي..طبيعية!! اتنفست بعمق..أنا فيها فيها..رديت متجاوبة معاه: -أنا لم أُحرم من شيء..ما عدا ما حرمت أنا نفسي منه بحكم إحساسٍ بالنقص كان يعتريني في طفولتي..ألصقت بنفسي صورة الفتاة الوحيدة و كبرت عليها..في المدرسة لم أكن لأتحدث إلا إن طُلب مني..مع من جواري إن سألتني أو استفسرت..أشرح لبعضهن الدروس الصعبة..أعطي بعض المعلومات..أساعد في تنفيذ مهارات التعبير..إلى أن كبرت و بدأت أشعر بالغرابة في مجموعات كبيرة..الأمر الذي أبعد عن رأسي فكرة الصداقات..في هذا الأمر لم يكن الخطأ خطأ من حولي..كان خطأي!! -و حب العلم..و القراءة..أكان ذلك فطرياً مكتسباً؟! ابتسمت بشجن و أنا أتذكر كيف كان عندي رعب من إني أسير بنت بطالة!! قلت:لا..السبب الأول هو أنني سمعت مرة من المذياع الخاص بجدتي أن القراءة هي السلاح الأول ضد الفساد و أن على الفتاة أن تكثر من القراءة و تشغل نفسها بها لألا يجرفها الفراغ لأمور سيئة..شعرت بأن تلك الكلمات موجهة لي..خاصة أني كنت أُعامل _دون أي ذنب_ على أني الفتاة السيئة الطباع المشاغبة..رغم أني كنت هادئة و مسالمة!! -متى كان ذلك؟! -في الصف الخامس الابتدائي..القراءة بالنسبة لي كانت واجباً في البداية لكنها بعد ذلك أصبحت عادة..شيء لا يمكنني التخلي عنه أو النوم من دونه..كثيراً ما كنت أنام على الكتب!! -آها..أمرٌ مثير..لكن ماذا عن طفولتك..كيف قضيتها ؟! -أُسيء إليها.. قطب عمي حواجبو:لم؟! -أممم..أو لا لم يُسئ إليها..آآ..وضعي كان حساساً..علي الاعتراف بهذا..فتاة صغيرة غير مرحب بها..و عم شاب و جدة كبيرة في السن و خادمة..مستأمنة! -خادمة مستأمنة..أهي ذاتها التي تأتي مع جدتك بالعادة؟! -لا..ليست منورة البتة! -تعجبت؛ إذ يبدو لي بأن منورة هذه خادمة مخلصة! -نعم، هذا صحيح! -حسناً، أكانت تلك الخادمة حاملة جيدة للأمانة؟! -نعم.. طالع عمي فيا بنظرة و كأنو يستنى مني أكمل، قال:لفظة "مستأمنة"!؟.. هل أساءت لهذا الاستئمان مثلاً؟! -جل ما في الأمر هو أنني _وبسببها_ شاهدت ما لم يجب أن أشاهده..في الصف الثالث الابتدائي، جدتي كانت تنام مبكراً و عمي في الخارج بالتالي تستفرد الخادمة بالتلفاز و تجبرني على البقاء في الغرفة، و بفضول الأطفال تسللت و بقيت واقفة عند باب الصالة أتجسس على ما تشاهده.. -و ما كان الذي شاهدته؟! -كان مشهداً سيئاً..مرعباً بالنسبة لطفلةٍ في ذاك السن..صحت فزعة فشعرت بي الخادمة.. فضربتني..سمعت جدتي بكائي فأتت مسرعة و وبختها..حينما وصل عمي أخبرته جدتي فطرد الخادمة و استبدلها بمنورة التي بقيت عندنا لحد الآن..و بعد عدة أيام أخبرته بما شاهدت..كان يحثني على أن أخبره بأي شي فأخبرته فشرح لي و وضح لي الأمور بطريقة مناسبة..يحزنني أنني عرفت أمراً كهذا و أنا لم أتجاوز العاشرة لكن وجود عمي خفف الأمر..لقد استطاع بطريقة ما أن يلهيني..نمى الكثير من المواهب فيّ..تقريباً نسيت ما حدث.. و بشكلٍ عام عشت طفولتي بسلام..لولا ما أخبرتك به و ما تلقيته من نظرات احتقار و إساءة كبار لكنت محظوظة بطفولة مثالية!! -ماذا عن أسرتك..والدك..إخوتك؟! أخفضت راسي:أشعر بالغيرة..من إخوتي..كنت..أتمنى لو تكون العلاقة أقوى لكن بعيداً عن العواطف..ما كنت لأكون سليمة نفسياً لو عشت معهم..أبي لا يحتمل وجودي..فضله علي يتجسد في تخليه عني..رغم شدة تأثير هذا عليّ إلا أنه كان أفضل..لي و للجميع.."رفعت راسي"..أخبرني الآن أنتَ عمي..لم تثير كل هذه المواضيع الآن؟! رفع أكتافو و قال ببساطة:لأطمئن على ابني..و أبنائه.. رجعت شعري على ورا:في السنة القادمة سيلتحق سعود بالمدرسة؟!، مر ما لا يقل عن الست سنوات..آلآن فقط أردت أن تطمئن؟! -أثار الموضوع استماعي لحديث بناتي..أخبرتك!! -و ما الذي أثار الموضوع عند صفاء؟! -لا أدري.."مسح على لحيتو و تابع بلهجة غريبة"..لو علمت بهذا قبلاً لكان لي تصرفٌ آخر مع علي.. -ماذا تقصد؟! -ليست هذه هي طريقتي في التربية..و لا طريقة أم أحمد..لم أكف عن التفكير بالأمس..كدت أخبر أمه لكنني تراجعت!! -لم؟! -لن تتقبل الأمر على أنه نشوة أو طيش و معها في ذلك حق..ستشعر بالإحباط و هذا ما أخشاه!! -طبيعي..تماماً زي لمن أسمع من سعود كلمة بطالة..أولادنا لمن يغلطوا يحسسونا إنو فيه غلط في تربيتهم!! -أكيد.. -لكن يا عمي..ما دمت زوجته الآن فلا أعتقد بأن للتدخل أو حتى لمجرد التفكير داعٍ..أنا و علي تجاوزنا هذه المشكلة..و لا أحبذا أن تُفتح من جديد..ثم إني أخبرتك بأن الأمر لم يتجاوز حدود المضايقات السخيفة..و أشكرك..أعتبر هذا حرصاً منك عليّ لكن صدقني لن أكتم أو أتغاضى إن أُسيء لي أو جُرحت.."ابتسمت"..لا أحب دور الضحية!! ابتسم:كل ما قلناه سيبقى سراً..فقط عي يا جود بأن ما حدث لم يصدر عن ابني..لا أدري من كان ذاك..فعلاً هذه ليست هي تربيتنا..ربما هو في فترة من فترات حياته تخلى عن الكثير من المبادئ..هو عاد إليها الآن..لكن صدقيني..ليست هذه هي أخلاقنا ولا يدل فعله على أفكارنا.. قلت و أنا أوقف و أنهي النقاش:عمي..أنا أحب ولدك و مرتاحة معاه و ما رح أرضى بحياة من غيرو..مستحيل أسعى في إني أبعد عنو..و مو زيادة ثقة أو شوفة حال..لكن شوف سعود..سعود ولدنا..أكيد تعرف إنو الأولاد و نفسياتهم تجسيد لطبيعة العلاقة بين أمهم و أبوهم!! وقف:أعلم.."مشي و اتقدمني للباب بعدين التفت لي"..و لا تقفي مرة أخرى قبل أن يقف من هم أكبر منكِ سناً!! ضحكت بحرج:حسبت خلاص..خلصنا كلام.. قال و هوا يقفل باب المكتبة:خلصنا..نعم..بس مي حلوة توقفين و أنا ما وقفت..أو..إلي في مقام أكبر..أبوك..عمك..جدك.. هزيت راسي قبل ما أقول و احنا ننزل الدرج:بس عمي لاحظت شي من زمان..ليش إنتا جوة تتكلم بالفصحى و برة تتكلم عادي؟! طالع فيا و ابتسم:أقول بس يبقى سر.. ابتسمت فتابع:أخجل..أمام الكتب أشعر بالحرج من استخدام العامية لذا.. -لذا تستخدم الفصحى..بس ترى حتى أسلوبك يتغير..تسير كده..كأنك واحد غامض و فاهم الناس بس محد يفهمك.. -أذمة؟! ضحكت:لأ..و أنا صغيرة دايماً كان نفسي أقعد مع أحد زي كده..و ما اتوقعت تكون إنتا دا الأحد..لإنو عادي مع الناس..بس جوة.."سألت بمزاح"..بس لا يكون تمثل..تمثل عليا يا عمي أبو علي؟! قال و هوا يجلس جمب عمتي:لا يا جود أم سعود.. جلست جمب علي إلي دقني و سأل بهمس:ايش قلتوا؟! همست بغلاسة:ما حقولك.. قال بضحكة مستهترة:والله لتقولي.. قلت و أنا أرفع أكتافي:نشوف.. ^^^^^^^^^^^^^^^^^^^^^^^^^^^^^^^^^^^^^ في السيارة،،، علي:جود..جووود..جود!! فزيت من سرحاني:هااا.. -خييييير..ايش فيه؟!،حتى عشا ما اتعشيتي!! -إلا اتعشيت!! -طيب اتعشيتي..ايش فيكي متنحة و مو معايا؟! -ها..أناااا مني متنحة..معاك بس نعسانة!! -أبوية ايش قلك؟! -ولا شي..قعد يسأل عن لو كنت ناوية أكمل دراسة أو أشتغل أو أقعد في البيت..و يعني..عن دي الأشياء.. -و ايش قلتيلُه؟! -نفس إلي أقولو لأي أحد يسألني!! قال و هوا يرجع يطالع في الطريق:أوكي..حأستغبي و أسوي نفسي صدقت!! أوكي أنا ما كذبت..بالفعل عمي سألني عن الدراسة!! بس أنا ليه حاسة إني اتضايقت؟!،يعني الموضوع في النهاية اتقفل بشكل حلو..ليش أحس إني متأثرة؟! كمان صفاء غبية..أبغى أفهم ايش السياق إلي جاب السيرة و خلاها تتكلم؟!،أنا والله مادري إنها شافت شي..ما بان على وجهها يومها شي..والله لو أدري كان كلمتها و وصيتها تسكت..كان لمحتلها أو حتى فهمتها إنو مافي شي..بس يالله..أهو نصيبي و حياتي كده..كل فترة لازم يطلعلي أحد يفجعني بحاجة سمعها ولا فكرة تشكيكية..ربي يعيني!! ************************************************** ** رديت على جوالي..كان رامي إلي اتصل:"جوووووووووود..ازاااايك؟!" ابتسمت:الحمدلله..إنتا كيفك؟! -تمام نحمدالله..إنتي كيف..و سعود و خديجة؟! -كويسين الحمدلله!! -علي كيفو؟! -الحمدلله طيب.. -جود..هوا علي يكرهني؟! قلت باستغراب:ههه..لاااا..ليه؟! -عشان أبغى أجي عندك البيت قبل ما أرجع أسافر..أبغى أجي كذة في العصر من بدري..أخاف يكون ما يحبني..عشان زوج أختي بالرضاعة..أختك يعني.. ما يحبني فما أقدر أروح لها البيت كل شوية!! حزني فجأة..أحس كأنو طفل..طريقتو في الكلام و نبرتو..كل شي فيه طفولي!! -حياك الله في أي وقت..بس كلمني قبلها بيوم..عشان أنا ما أحب الزيارات المفاجئة!! -خلاص ولا يهمك..بس حطي في بالك...كلها كم يوم و أجيكي!! ابتسمت:إن شاء الله.. سأل بعدم تصديق بعد ثواني:بالله جود إنتي أول مرة تشوفيني..محد قد كلمك عني؟! -لأ..هدي أول مرة.. قطعت كلامي لمن دخل علي و سأل عن إلي أكلمو..قلت:رامي.. قال و هوا يرمي توبو على السرير:يا ذا الرامي.. أشرتلو يعلق التوب على الشماعة و أنا أسمع رامي يقول:ايشبك؟!،جا علي..سلميلي عليه!! قلت و أنا ما زلت أأشر على التوب:علي رامي يسلم عليك.."لرامي"..يقولك الله يسلمك.. علي كان قاعد يهمس:افصلي..افصليييييييييييييييي.. قلت:طيب رامي أكلمك بعدين.. -أوكي متى ما تبغى..أصلاً ترى ما كان عندي هرجة..بس طفشان فقلت أتصل أحسن العلاقة بيني و بينك!! ضحكت بخفة:ما يحتاج تتحسن..هيا كده حلوة.. -إلا..أنا أطمح لأكتر..أحسك كده..أخت..كويسة ما شاء الله.. -إن شاء الله أكون..باي.. -يلا باي.. فصلت من هنا نط عندي علي من هنا:مو نازلي من زور..يختي سعود أعقل منه..ايش هذا؟! طالعت فيه:ما رح أرفع التوب!! -بكيفك..أنا راميه على جهتك أصلاً.. -عادي..حشيلو و أحطو في جهتك.. -والله لتشيليه و رجلك فوق رقبتك!! -لا تحلف!! -إلا بحلـ رن جوالو فطالع فيه و قال بتساؤل:أرد ولا عنو؟! -مين؟! -عبدالرب.. -رد..هوا ما يتصل دايماً..يمكن يبغى شي.. رد علي و بعد السلام و كلو سكت و هوا يسمع بعدين قال:متى تبغوها؟! -والله أنا ما عندي مشكلة بس أشوف أهلي..و أرتب معاهـ.. -يا شيخ ماله داعي.. -طيب الكل جاي يعني؟! -خلاص طيب..أشوف أهلي و أرتب معاهم و أرد عليك!! -مع السلامة.. طالعت في علي بعد ما قفل:ايش فيه؟! -يقول يبغوا يطلعوا البر و يبغوني أجي أنا و إنتوا و حتى أهلي و أهلك.. -ايش هببهم على البر؟! -يقول إنه يوم الحادث كانت أول مرة يروحون بر مع بعض بس خبصت الروحة.. -علي داك المكان كان خالي..ايش وداهم هناك..محد يروح هناك قلك طلعة بر!! -والله عاد مدري عنهم..المهم ذحين إنهم عزموا و مستحي أردهم.. - طيب متى قالولك بيطلعوا؟! -ما حدد موعد بس أتوقع يبغوها قريب.. -إذا دي الأيام ما حقدر أروح..روح لحالك و بعدين ليش يقلبوها طلعة كبيرة..خليها بس بينكم و بين بعض.. -صعبة أقعد أتشرط..والله أستحي منهم.. -بس..أحس البر يخوف.. -لا ما يخوف..قال إنهم بيروحون البر إلي فيه ناس و حمامات..يعني محل نظيف و مرتب..المهم..خلاص بعدين أفهمك..قومي ذحين سويلي أي شي ينأكل..جيعاااااان جداً.. قلت و أنا أوقف:إن شااااااء الله جداً !! ************************************************** ** |
الجزء الثامن و العشرون (أقفال و مفاتيحها!1!) جرة،،، في الخلاء..بعيداً عن أضواء المدينة و ضوضائها انقست العائلة لقسمين..رجال و نساء..كان عددهم كبيراً..كبيراً جداً..فعلي و عائلته بمن فيهم أقارب أمه و أبيه و جود و كل أقاربها..و أصدقاء علي..الذين خططوا لهذا الأمر..لم يكن بالحسبان هذا العدد الهائل لكن والد علي اقترح أن تُلغى الحفلة التي كانت ستُقام في بيته و عوضاً عنها نُظمت هذه الرحلة بعد موافقة جود و تأكيدها بأنها لن تكون مُرهقة لها بل على العكس ستحسن من مزاجها و تجدد نشاطها!! عدلت جود من وضع غطاء ابنتها خديجة:حبيبتي..من أولها بر!! سارة:الجو حلو.. -عارفة الجو حلو بس ترى هادي أول مرة أطلع بر..شوفي أنا عمري كم و دوبي أطلع و هيا لسة دوبها..دوبها مفتحة عينها عالدنيامكملة شهر و في البر!! صفاء:يلا..إن شاء الله تطلع قوية كذة زي البدويات!! جود:ملاحظة كويسة..أنا أبغى بنتي تكون أقوى مني!! عمتي:و بعدين الهوا هنا نظيف أحسن لها من التكييف و البلاوي.. احتضنت جود خديجة و أحكمت لف غطائها:حياتي أنا.."قبلتها"..حبيب مامي..بردانة؟! على بعد بضعة أمتار قال عبدالرب الذي جلس إلى جوار علي:علي.. نظر علي إليه فقال:تحبني؟! علي:لأ.. -مرة مرة؟! -مرة مرة.. -ولا حتى في الله؟! -ولا حتى.. هز رأسه بيأس:استغفر الله.. علي:ايش عندك؟! -أبغى أتزوج!! التفت حينها الجميع إليه فقال بغضب:خير؟!، حرام الواحد يتزوج!! محمد:إنت صرخت!! -ما صرخت!! -لا صرخت!! رامي:من جد؟!، حماس..طيب ايش معطلك؟! علي:مين؟! قال و هو يحاول التذكر:أخت زوجـ.. قفز أحمد صديقه عليه و احتضنه ثم صاح:عبدالرب..كل عام و إنتا بخير..أحبك..مرررررة أحبك..إنتا أحسن صاحب في الدنيا.. حاول عبدالرب إبعاده فهمس أحمد من بين أضراسه قبل أن يبتعد:انكتم الله يكتمك!! عاد أحمد لوضعه الطبيعي و قال بابتسامة:اليوم عيد ميلادو.. رامي بسعادة:نغنيلك؟! -أصلاً اليوم مو عيد ميلادي..أصلاً مادري متى عيد ميلادي.. صحح محمد بهدوء:يوم ميلادي.. كان عبد الإله ينظر باستنكار لأسلوبهم..لحظ عبدالرب ذلك فسأل علي عنه فأجابه الأخير بأنه نسيبه ففكر عبد الرب.. "إنا لله..شكل أخو زوجتي ثقيل دم..هيا بالله هذي نظرة؟!، والله لو مو الحيا كان خزقتُ عيناه خزقاً مبرحاً..بس يالله..كلو يهون عشانها!!" ثم ابتسم ابتسامة عريضة بلهاء و هو يفكر في أمرٍ ما..آخر!! بدأن النساء بالتحضير لطهو الطعم ..كان الاتفاق أن يحضرن هن الأدوات ثم يتكفل الرجال بالسلخ و الطبخ و هكذا كان الأمر! بعض الفتيات - ممن لم يشاركن في الإعداد - اكتفين بلملمة ما بقي من مخلفات الشاي و القهوة و التسالي..كان منهن جود و سارة و صفاء التي كانت تتحدث بصوتٍ عال:لالالا..شوفي يا سارة..الفسيولوجية مرتبطة بالسيكولوجية..مستحيل تفصلي بينهم..بدليل أدوية الاكتئاب و تحسين المزاج..ممكن نحول بالعلم كل شي لمادة و نتعامل معاها..ايشبك؟! سارة:طيب أوكي..كلامك صح..بس هذا كلام فاضي.."أخفضت صوتها"..ايش يعني ألوان معينة تفسد حياة الزوجين و ممكن توصلهم للطلاق..واحد يطلق وحدة عشان لبستلو رمادي مثلاً و هوا كان معصب..هذا مجنون..و فكة منو كمان!! صفاء بصوتٍ منخفض:هما الرجال كذة..لازم تلبسيلهم ألوان معينة..عارفة كده أحمريكا كده على شفافيكا.. جود:ايش شفافيكا هدي؟!،أول مرة أسمعها!! صفاء بسعادة:دوبي اخترعتها..الموهييييييم.."عادت لصوتها العالي الطبيعي"..تقدير الإنسان إلي قدامك مهم..و طبعاً لازم الواحد ينتبه قبل ما تتحول الآثار لآثار مادية..لازم كل شي يتعدل و الموضوع ما اتعدى مرحلة الزعل..فاهمة؟!، يعني لو مثلاً بدأ يسب أو يتعامل بعفاشة اعرفي إنو الحالة مستعصية و صعب علاجها..عشان كذه أقووول إنو السيكولوجية و الفسيولوجية مستحيل ينفصلوا.. سارة:بس لازم يكون فيه شوية حرية..يعني كل طرف حر في إلي يلبسوا..مو معقول نقعد على إلي يعجبهم بس!! صفاء:طبعاً..لازم تكون فيه ديموقراطية في العلاقة!! جود:بنات.. التفتتا لها فقالت:من جد إنكم بنات..بروح أشوف عمتي يمكن تبغى شي!! قالت صفاء بعدما ذهبت جود:ايشبها فجأة؟! سارة و هي تمسك بيد صفاء و تجذبها:تعالي هناك..أحس هنا مرة قريبين من الرجال!! و بالفعل كانوا قريببين..قريبين جداً من العم سعد الذي كان يقول:لكن ما تقدر تحكم على أحد قبل ما تتعامل معاه..ايش كان يدريني إني حتفق معاك أول ما شفتك؟! محمد:لكن تبقى الأرواح جنود مجندة..أنا ما كرهتك أو اتضايقت منك أول ما شفتك و عرفت إني ممكن في يوم أتكلم معاك..لكن فيه ناس ما أرتاح لهم..ممكن تكون إنت ارتحت و أنا ما ارتحت لواحد مع إننا احنا الاثنين متفقين..فهنا المشكلة!! أحمد "صديق علي":مهي مشكلة..عادي.ما ارتحت لأحد في ستين داهية!! أبو علي:ماذا لو كان شخصاً لا بد من مجالسته؟! محمد:كمان أحياناً إنسان كنت ترتاح معاه فجأة تسير ما تحبه فهنا يكون الوضع صعب..ما تقدر تنسحب لإنه في وقت من الأوقات كان أقرب إنسان لك.. العم سعد:سهلة..انسحب بهدوء و أدب..و ما تقول لنفسك:لا جيت رايح طلع الفضايح!! أحمد:تقنعني هذه المقولة!! أبوعلي:حمار إلي قالها!! أحمد:و إلي يقتنع فيها؟! محمد:حمار شوية!! ضحك أحمد:لا يا شيخ!! أتى بعد قليل سعود و العم سعود و يوسف..رحب أبوعلي بسعود:هلا والله بالرجال..كيف البر عجبك؟! -حلو..كبير..بس مو حلو كده كل ناس لحالهم.. العم سعود:كيف كل ناس لحالهم؟! -يعني ما نقعد مع ماما ولا مع جدة و لا أمي ولا أحد..مو حلو..ما أحب!! أبوعلي:عيب..لا يجوز ذلك!! العم سعد:بعدين لمن كلهم مع بعض..رجال مع حريم تسير أشياء مو حلوة!! سعود ببساطة و هو يرفع كتفيه:عادي..كل الناس طيبين ما تسير أشياء مو حلوة!! محمد:مو كل الناس طيبين!! رفع سعود حاجبه:يعني إنتا شرير..مو كويس؟! ضحك محمد:لا مني شرير بس.. قاطعه:خلاص..عادي مافي شي.. أحمد:ياخي فلة هذا سعود..أحبك أنا ترى.. قال سعود بلا مبالاة:حتى أنااا.. يوسف:سعود دايماً كلامه صح..مالكم شغل.. ابتسم محمد..كان معهم..نعم ! واقفًا يشاركهم الأحاديث و الضحكات..لكنّ فكرةً ما سيطرت عليه.. "نفس الصوت بس الكلام..غريبة!!" قال علي لعبدالرب بعصبية:إش إلي ما قلت شي؟! عبدالرب:ايش فيك معصب؟!، ما صارت كلمة و طلعت ياخي!! -بس هذول..اسمع..أنا ما أعرفهم عدل..ما تدري في ايش ممكن يفكرو بعدين!! -خلهم يفكرون في أي شي..عادي عندي..بعدين أنا ما كنت قاعد أمزح..من جدي أبغى أتزوج!! -تبغى تتزوج مين؟! -أبغى.."حك رأسه"..أبغى أتزوج وحدة من..أبغى أخت أم سعود!! قطب علي حاجبيه:خالة سعود؟! -ايوة!! -بس ما عنده خالات صغار!! -نعم؟! ضحك علي:كلهم عجايز و أغلبهم ماتوا..مين ضاحك عليك؟! -علي..أخت أم سعود..صغيرة!! لم يعد علي يحتمل..قال بصدمة ضاحكة:إنتا شفت جدة؟! -جدة؟! ضحك علي بشدة فاستفز عبدالرب الذي قال بغيظ:علي مافي شي يضحك..من جد منت وجه أحد يكلمك..اتوقعت تعصب..تتوتر..لكن ما تضحك!! توقف علي عن الضحك:أكبر من أمي و أمك..ايش إلي تتزوجها؟! -أخت..أم..سعود..أخت..زوجتك!! فغر علي فاه ثم هز رأسه:هاااا.. -خير؟! -أخت زوجتي..بنت عمي سعيد؟! -ايوة..سعيد و لا مسعود مادري..بس هيا!! جذبه علي لمكانٍ أبعد ثم قال بغضب:إنت بعقلك؟! -ايه بعقلي.. -من وين عرفتها..كيف فكرت فيها؟! أجاب عبدالرب متمنياً رؤية تصديق علي:آآ..أخواتي شافوها في الجامعة و..يوم قالوا الاسم عرفت إنها من نسايبك عشان الاسم الأخير و اللقب فقلت ليش أتعب نفسي..أكلمك أحسن!! أخفض علي رأسه لثوانٍ قبل أن يرفعه ليقول منهياً الموقف:طيب..أنا آسف ما أقدر أعطيك كلمة..لاهي أختي و لا لي دخل فيها!! -علي إنت ولدهم..و أنا صاحبك.. -أوكي صاحبي على عيني و راسي بس طبيعتهم ما تسمح بإني أتدخل..معليش.. شعر عبدالرب بالضيق و الحرج؛ نظر لعلي بعبوس:آسف لو كنت فشلتك هناك.. ثم ذهب و أشغل نفسه بأمور أخرى..تنهد علي..لو كانت العلاقة عادية بينه و بين رحمائه لما كان هذا هو الرد!! لحق بالباقين و تشاغل معهم..أظهر أنه غير مهتم رغم أن عينيه ما زالت معلقة بصديقه!! كانت جود تهدهد خديجة لتنام:دوهة يا دوهة..و الكعبة بنوها..من زمزم ملوها..سيدي سافر مكة..جبلي.. توقفت عن الغناء حينما جلست سارة بجانبها فقالت الأخيرة:كملي كملي.. ضحكت جود:أستحي.. -طب يلا أغني معاكي..سيدي سافر مكة..جبلي صندوق كعكة.. تابعت جود معها:والكعكة حبة حبة..و الصندوق مقفول..و المفتاح عند الصايغ..و الصايغ يبغى الفلوس..و الفلوس عند العريس..و العريس يبغى الولد..و الولد يبغى الحليب..و الحليب عند البقرة..و البقرة تبغى الحشيش..و الحشيش فوق الجبل..و الجبل يبغى المطرة..و المطرة عند ربي..حطي حطي يا مطرة..على قريعة بنت أختي..بنت أختي جابت ولد..سمتو عبدالصمد..و دوهة يا دوهة.. سارة:نامت؟! جود و هي تنظر لخديجة:غير عن خلق الله كلهم..في نص الدوشة تنام..أغنيلها تصحصح!! صفاء و هي تنضم إليهما:تخلعي قلبها بصوتك!! نظرت جود بغضب لصفاء التي اعتذرت:أنا آسف أبلة جود.. أمسكت جود بها من أذنها:صوتي يخلع القلب؟! صفاء بوجع:لاااء..يجنن..صوتك قمة الرقة و الاسترخاء.. -ايوة.."تركت أذنها"..كده تمام.. التفت جود لسعود الذي أتى:ماما..يبغوا خديجة.. سألت جود باستغراب:مين قال يبغاها؟! -بابا..هما كللللللهم يبغوا خديجة..خلاص عشان أنا طفشوا مني..محد سار يبغى يشوفني ضحكت جود و هي ترسل قبلة لابنها:إنتا بكري إلي يطفش منك مع نفسو..إنتا سعودي حبيبي!! ثم تابعت و هي تبحث:طب مين حيجي يشيلها؟! ابتسم سعود و هو ينظر خلفه:عمو.. وقفت جود و هي تسمي ثم تقدمت قليلاً حيث كان يقف بعيدا عنهم..كما فعل _أيضاً_ العم سعود الذي حمل خديجة بحذر:بسم الله.. قالت و هي تعدل غطاءها:بس عمو الله يسعدك لا تحركها كتير..دوبها راضعة..و انتبه لا تقعد تتنقل بين أياديكم كتير..و قلهم برقة لو سمحوا..بلاش عفاشة مع بنتي.. ضحك:إن شاء الله..أي شي ثاني؟! ابتسمت:سلامتك.. -ربنا يسلمك.. و ذهب..جلس مكانه حينما قال العم سعد بتساؤل:فيها من أبوها شي؟! أنكر أعمام علي ذلك لكن أحمد قال:إلا..الكشرة..علي كان معصب دايماً.. التفت علي لأحمد:هذي ابتسامتها الخاصة..و ما كنت مكشر..ايش دراك عني؟! -لاااا..نسيت..نسيت لمن قعدت ألعبك قمت تبكي و أبوية فهم إني غيران منك قمت آذيتك؟! علي:لا ما نسيت..و إنت ضربتني من جد طيب.. أحمد:ياخي الكذب حرام.. -مني فاكر بس أكيد سويتها..إنت كنت تغار.. أبو علي:أحمد ما غار..إنت على عكس الناس غرت و هو أكبر منك.. سعيد:زمان كنا نغار من الصغار عشان الشغل و المسؤولية..ذحين الصغار يبغون الفلتة و ما يبغون أحد يسألهم وين رايحين و من وين جايين.. عبدالرب بإعجاب مفتعل:صح يا عمي..ما شاء الله عليك..تعرف تفسر و تحلل.. عبدالرحمن:أنا نفسي أرجع صغير..أولى ابتدائي..فلة!! عبدالإله:لإنك متزوج و مخلف..روح اسأل واحد في المتوسط:تبغى ترجع ابتدائي؟ و شوف ايش يقولك.. العم سعود و هو يعدل وضع خديجة في حجره:متوسط..أكيد يبغى يكبر.. أبو علي:المهم إن الإنسان يستمتع بالعمر إلي هو فيه..أحلى عمر عمري..كذة الواحد لازم يفكر.. هفت نسمة باردة على المكان فقال العم سعد:غطي البنت لا تمرض.. و كان العم سعود على وشك تغطيتها إلا أنها عطست..عطسة صغيرة أضحكت من سمعها، ضحكوا بصوتٍ عال؛ لحد أن خديجة بكت فقال رامي:مسكينة..وديها عند أمها.. عبدالرب بعطف مفتعل _أيضاً_:يا خوفي عليها..شكلها حتمرض..حبيبتي!! العم سعود:بس يا بابا بس..و إنتوا ما تعرفوا تضحكوا بهدوء.. عبدالرب:وحدة و عطست..يا الله عالسخافة.. علي:هاتها سعود..هات.. أخذها من العم سعود و هو يقول لذاته ساخراً:"ما يدري إنه ما جاب خبرها".. عمر بعجب عفوي:ايشبك عبود ساير حساس؟! عبدالرب بغيظ مناقض للرقة التي افتعلها:إنت ساكت دايماً ما لقيت تتكلم إلا ذحين؟! محمد:الله..يسلط عليك.. أحمد:يا كداب!! يوسف:اخس عليك..قليل أدب واحد!! ابتسم علي و هو يمسح على خديجة و يحكم الغطاء عليها..لم عوضاً عن التوتر و الانفعال يشعر بالسعادة؟!، لو فقط كان الوضع وضعاً آخر لربما تمكن من التدخل..لربما تمكن من احتضان صديقه بدلاً من الاعتذار و اللولوة الآن..لربما!! وقفوا الآن لمد سفرتي العشاء..الكل كان يعمل..رجال و نساء..كان منظراً جميلاً..كلهم يأتون و يروحون و ينظمون هنا و هناك..مر علي بقرب عبدالرب الذي كان نشطاً بشكل غريب و همس:حاول تعجبه بس مو بإنك تقلد البنات.. ضيق عبدالرب عينيه:أول و أبسط خطوة إني أتعاطف مع حفيدته.. قال علي ضاحكاً:صدقني ما رح تكون بذاك التأثير.. و على العشاء..عند النساء قالت والدة عمر:الحمدلله يا جود شفناك إنتي و أولادك.. ابتسمت جود و هي تفكر بأن شخصية والدة عمر مختلفة عن شخصية ابنها التي صورتها من كلام علي عنه:والله أنا إلي كنت متحمسة أشوفكم من زمان..أبغى أشوف أهل المنقذين حقونا..ههه.. أم أحمد:والله دوشني ولدي..احنا سوينا خير..ليش محد يتكلم عننا..ليش ما يكتبوا عن الحادث في الجريدة..قلت اسكت..إنتا تسوي الخير لله مو للجريدة.. ابتسمت جود:ايش درى الناس عن الحادث..وجودهم هناك أصلاً رحمة من الله..ولا ما كان أحد دري عننا.. أم علي:سبحان الله ذاك الحادث كيف صار..أنا كنت مطمنة..على أساس علي قد ساق طريق الديرة و يعرف فيه جمال و أغنام.. جود:أصلاً أنا كنت على أعصابي و خايفة لإنو في الروحة علي فرمل بقوة فجأة..يقول شاف جمل..و ما كان في داك المحل أي جمال..و في الرجعة كان يتكلم و مهو مركز..أنا نبهتو للجمل بس ما لحق يفرمل في الوقت الصح.. سارة:الحمدلله على السلامة.. ضحكت جود:الله يسلمك.. سارة:أحس مرة شي يخوف.. صفاء بحماسة:حسيتي لمن جو و شالوكم؟! هزت جود رأسها بالايجاب فانفعلت صفاء:كذة امتنيتي لهم..صح؟! جود بصدق:أبداً..إلا مت من الخوف أول ما حسيت بأحد بس رحمة من الله فقدت وعيي ولا كان اتجننت مع الفجعة!! أم محمد:مهو شي حلو..أحد ما تدري عنه يشيلك و ياخذك معاه.. صفاء بعفوية:ما نفسك تعرفي مين شالك؟! نظرت جود بغضب مستنكر لصفاء التي حشرت ملعقتها في فمها و هي تتجنب النظر إليها..عضت أحلام شفتها السفلى:"حمارة!!"، و أغمضت والدتها عينيها في محاولة لامتصاص غضبها..قالت زوجة أحمد:بس الحمدلله..إنتوا سلمتوا..والله ناس نعرفهم ما بقي منهم أحد.. جود:بس مادري هيا الجمال دي تكون ملك لأحد و لا مع نفسها في الصحراء.. أم علي:هي لو كانت ملك لأحد المفروض ما يفلتها و يدفع تعويض لو ضرت أحد من الناس.. جود:المفروض والله.. صفاء بهمس لجود:أنا آسفة للغاية.. نظرت إليها بغيظ:حتى لو كان نفسي أعرف بقول قدام كل دول؟! -طب بصراحة.."عادت للابتسام و هي تقول بسرعة"..ما نفسك تعرفي؟! جود بصدق:إلا نفسي بس حركات الأكشن دي ما تنفع إلا للبنات..لو عرفتو دحين يمكن أكرهو و أحقد عليه!! -لييييه؟! -عشان..بس كده..كملي عشا.. -أفففف..قلك ما أفهم يعني.. -ايوة..ما تفهمي!! انحنى سعيد والد جود أمام كفر سيارته الخلفية و نظر إليها بحيرة:ايش إلي بنشرها؟! صاح العم سعد من داخل سيارته:خير يا سعيد..فيه مشكلة؟! استقام و هو ينفض الغبار عن ثوبه:الكفرة الخلفية متنسمة.. قال عبدالإله و هو يرى عميه سعد و سعود كلٌ يترجل من سيارته:خلاص أنا رح أصلحها.. "أنا إلي بسويها.." كان عبدالرب يتحدث بشدة و حزم. قال عبدالرحمن بعفوية:إنتوا مو رحتوا؟! ثم نظر حوله، و بالفعل كان الجميع قد رحل إلا عبدالرب بالتالي بقية أصدقائه الذين ترجلوا ليروا ما الأمر.. عبدالرب بصوتٍ جهوري:أنا..حم حم..أنا ما أمشي من مكان إلا لمن أطمن إن الكل مشي..بعد خليني أشوف.. همس يوسف:سمعتي..سمعتي ولا ما سمعتيييييييي يا أخت زوجة علي؟! أحمد:لو كان ربي ساتر عليه بيفضح نفسو..من متى عبدالرب يتعاون و لا يتعاطف مع أحد؟! عبدالإله:لا مالو داعي، خلاص أنا بسويها.. سعيد:لا تعب نفسك يا ولدي..خلاص اتوكل على بيتك.. -لا والله يا عمي ما أتوكل و إنتوا قاعدين هنا..و والله ما يمسكها غيري.. -لا تحلف.. -إلا بحلف..شوية يا عبدالإله..خليني أشوف.. فلنبتعد قليلاً عن الرجال و لنتساءل عن تأثير تلك الشهامة عليها..انتظرت هناك طويلاً و لم أتيقن مما دار بخلدها إلا حينما هزتها أختها:سارااااة ..قومي يلا..خلصوا!! -هااا..طيب طيب.. ************************************************** ******* داخل إحدى المراكز التجارية، كان عبدالرب جالساً على إحدى الطاولات، أمامه صديقه أحمد الذي كان يقول:بسرررعة..خلصني..أبغى أمشي.. -أبغى أفهم مستعجل على ايه؟! -ياخي وعدت أمي ما أتأخر عشان تبغاني أوديها لناس بتزورهم.. -اقعد معايا..السواق موجود ليش؟!، أنا صاحبك طفشاااان.. -بيتهم بعيد و ما تبغى تروح مع السواق..أصلاً ايش دخلك..وعدتها و خلاص.. كاد عبدالرب أن يعترض إلا أن طيف الشخص الذي لمحه ألجمه..قال بهمس:حمادوووه..هذا مو..مو ذاك إلي شفناه في البر مع علي؟! أدار أحمد رأسه:وين؟! و عاد ينظر لعبدالرب الذي قال متجنباً النظر للشخص:بعد الطاولة إلي جالسين عليها حرمتين..تلاقيه مع ثلاث بنات.."شهق"..تكون حقتي معاه؟! تابع عبدالرب باهتمام و هو يرى الفتيات يكشفن عن أوجههن و يتناولن ما أمامهن:والله معاه..شوف شوف نظر أحمد بعفوية:أية وحدة؟! لف عبدالرب وجه أحمد بيده بشدة:لا تطالع! غضب أحمد:لا يا شيخ..إنتا قلت شوف!! -و إنت ما تصدق أحد يقولك شوف تقوم تشوف.. - عبود و ربي..تراك مطفشني..جايبني هنا تصرخ و تتضارب ليه؟! تنفس عبدالرب بعمق:ياخي علي منرفز أهلي.. -ايش سوالك؟! -كلمته قام يقول:مالي مالي دخل..أنا ما أعرفهم..أنا ما أقدر أساعدك ولا أقدمك لهم..و أنا محسبه صاحبي..ليش لمن احتجت له رفض يساعدني؟! -إنتا كلمتو و قلتلو تبغى أخت مرتو؟! -ايوة! -ايش قال بالضبط؟! -قال لا تمشكلني معاهم..أنا ما أقدر أدخل..وضعي ما يسمح و الكلام الفاظي ذا.. -طيب يمكن فعلاً ما يقدر يساعدك بعدين على فكرة..ترى ما تحتاجو..مو لازم تخطبها على أساس إنك صاحب علي..مرة مو لازم! -أنا أبغى أسهل و أقصر الطرق..أكيد زوج بنتهم ما رح يرضى إلا بالخير لأخت زوجته..فاهمني؟!، يعني هوا بمثابة ولدهم..ليش ما يقدر يدخل؟! -يمكن عندو مشاكل معاهم..إنتا شفت كيف يسلم عليهم؟!، بارد و هادي..ما أحسه طبيعي إلا مع سعود و يمكن لإنو كان من الأساس صاحب أخوه من قبل.. -ولو..حسيته لمن يتكلم خايف..ياخي..ياخي ولا كأنه رجال.. -شوف..بصراحة أنا أشوف ما معاك حق تزعل ولا تتضايق..يمكن فعلاً ما يقدر يدخل..يمكن لو حاول يدخل و قدمك كصاحبه يرفضوا..ما تدري..البيوت أسرار و بعدين ما أحس من طبع علي يرفض يساعد أحد و هوا قادر.... عبدالرب بصوت منخفض:أوب أوب أوب..شافني..ياخي كريه الآدمي ذا.. تابع و هي يزيح نظره:مالت عليك..خلى أخواته يتغطوا..و أنا مالي فيكم..وجع..فيه وحدة طالعت فيا..تكون حقتي؟! -هيا مع كلمة حقتي دي..لو أنا ما رح أوافق عليك بسببها ..ايش حقتي..ما عندها اسم البنت؟! -لا والله..تبغاني أقول اسمها قدامك؟! -يا ربي رحمتك.. -والله مالي شغل..بخلي أمي تخطبها..تخيل أحد غيري ياخذها..والله..والله.. -ايش بتسوي؟! رفع أكتافه:ولا شي..ههههه.. غمز أحمد بعينيه:تعجبني يا واقعي إنتا.. ************************************************** ******** جود،،، كنا قاعدين في الصالة..كان علي قاعد يقلب في القنوات بطفش و هوا يقول إنو يوم الجمعة مافي شي عدل في التلفزيون!! حط يدو حوالي أكتافي و كمل تقليب..وقف عند قناة كان فيها واحد يتكلم و قعد يسمع..جات بعد شوية المذيعة تعلن عن الفاصل و استنتجنا إنو برنامج لقاءات!! كتم الصوت و طالع فيا:فيني طفش!! -حتى أنا..علي!!، امشي نسافر.. -نسافر فين؟! -أي محل..نغير جو..بعدين حط في بالك إنو إنتا ما خرجتني ولا محل!! -أنا ما خرجتك ولا محل؟! -قصدي ما سفرتني..والله عيب أنا في دا العمر ما قد خرجت برة السعودية..أنا حتى ما اتعديت منطقة مكة!! ابتسم:لا أنا قد اتعديتها!! -وين قد رحت؟! -أبعد منطقة زرتها الشرقية..أبوية ما كان يسمح بإنو نسافر لحالنا..لا أنا ولا أحمد!! -يلا..الشرقية حلوة..يقولو نظيفة!! -كل السعودية نظيفة إلا جدة.. -أم الرخا و الشدة!! رجع البرنامج فرفع علي الصوت و قعدنا نتفرج لدقايق قبل ما يقول علي بكل صدق و صراحة:أوف على شعرها..يجنن!! طالعت في علي مستنكرة:نعم!!! اتوتر علي:لونو..لونو حلو بس طبعاً الشعر الأسود أحلى..أحلى يصغر الوحدة وووو.. -تستهبل إنتا؟؟؟؟!!!! قال بتهديد:جودوه..لا تبدئي حركات حريم..ترى مني فايق..كل ما في الموضوع إنو لون شعرها لفت نظري..ما مدحتها ولا ذميتك!! -والله حبيبي ما حستنى منك تمدحها و لا تذمني..ايش في شعرها شي حلو..إنتا ما تشوف..ما تشوف كيف خفيف و لونو بايخ؟! علي كان يحاول يبرر لكن أنا..لا يمكن أضيع الفرصة..أنا لازم أستغل و أسوي إلي في راسي!! قلت:شوف يا قلبي..رضيت و لا انغصبت رح توديني أقص شعري و أصبغو يعني رح توديني!! -حلو والله..بتخوفيني يعني؟!، روحة منتي رايحة..مين بيوديكي يعني؟! ضربت بقبضتي على فخدي:مالي شغل..مالي شغل..ليش تمدح قدااااامي..حتى معد فيه حيا..قدامي أنا تقول شعرها حلو..ما دام يعجبك اللون الفاتح مانعني أصبغ ليه..ليييييييييه؟! -عشان..عشان اللون الفاتح يكبر!! -بس عاجبك؟! -عاجبني بس مو عليكي.. -إنتا عندك عقدة الرجال العرب..مادري على ايش ميتين على الشعر الأشقر مع إنو مو حلو و يبان فيه الشيب بسرعة!! -ما دام عارفة ليش تزعلي..أصلا الغامق أحلى عليكي.. -عارفة إنو أحلى..بس برضو حروح أصبغ.. -بتصبغي لون ايش؟! حلو..بدأ يستسلم!! اتكتفت و قلت ببرود:بمبي!! -أقول مع نفسك.. ضحكت:أمزح أمزح..بصبغ..خليها مفاجأة.. -قولي ترى لو ما عجبني والله أرجعك نفس اليوم ترجعين اللون القديم.. -لا حيعجبك إن شاء الله.. اتنهد و هوا يرجع لجلستو الطبيعية..قلب القناة إيقافاً للمشاكل و حط شي تاني..و بعد دقيقة صرخ:و مين قالك إني موافق إنك تصبغي؟! رمشت بعيني ببراءة:إنتا حبيبي.. -لا ما وافقت.. -إلا.. دخل سعود للصالة:ماما..خديجة صحيت.. طالعت فيه:تبكي؟! -لأ بس قاعدة تصحى..أنا كنت قاعد أشوفها بعدين هيا صحيت بس ترى أنا ما صحيتها من نفسي.. -ايوة حبيبي عارفة ما رح تزعج أختك.. التفت لعلي:خلاص علي بكرة تودينيييييي؟!،"نطيت عليه و بستو"..شكراً حبيبي الله لا يحرمني منك!! رحت لخديجة إلي كانت تتحرك..خرجتها من سريرها:هاتو حبيبي هاتو.. جلست على سريري و أنا ماسكتها و جلس جمبي سعود:ماما.. -ها حبيبي.. -دحين لمن أقول لخديجة كلام مو حلو تزعل؟! -طبعاً.. -طيب هيا ما تعرف تقول..كيف تزعل؟! -خديجة ما تفهم الكلام بالضبط بس تحس لو إنتا كنت تقولها كلام حلو أو وحش..تتذكر لمن كنت أخليك تكلمها و هيا في بطني؟! هز راسو بايوة فقلت:كانت تسمع و كانت عارفة و متحمسة إنها حتخرج و تشوف أخوها الكبير.. اتحمس سعود:يعني تعرفني؟! -أييييوة.. -طيييب..طيب هيا ما تتكلم..طب متى تسير معايا؟! -شوية حبيي..ايشبك؟!، لسة صغيرة!! -طيب ماما أنا قبل شوية كنت قاعد..كنت قاعد أقولها يا غبية عشان هيا ما تسمع فعادي ما تزعل..طب يعني هيا زعلت مني دحين؟! -ليه حبيبي تقولها غبية؟!، طبعاً زعلت أصلاً يمكن عشان كده صحيت..الواحد لمن يكون زعلان ما يقدر ينام!! برطم سعود و حس بالذنب..زم شفايفو:طيييب.. باس خديجة بلطف:أنا آسف..إنتي ذكية و حلوة!! ابتسمت و أنا أقوم و أمشي للباب:زمان كنت تقول:حولة!! قال بصدمة و هوا يهز راسو:لاااااااا ضحكت على أسلوبو و طلعت للصالة..فديتو ولدي..والله كبر!! ************************************************** ******** جرة،،، أمام المشغل الذي قصدته جود قال علي و هو يدير المقود:جود ايش سويتي؟! -ولا شي!! -جود!! أجابت بدلال:علي ولا شي..حتوديني البيت و تروح تصلي و بعدين تجي و بعدين تشوووف!! -والله إنك..بنروح نجيب سعود و خديجة أول.. -ها..لا لااا..مو لازم..خليهم عند عمتي هيا قالتلي إنهم وحشوها..خلاص خليهم عندها!! سأل بسخرية:وحشوها؟!! -ايييواااا... أوصل علي جود للمنزل، صعد معها لشقتيهما ثم نزل، ذهب للمسجد القريب ثم عاد، و كاد أن يدخل مفتاحه لكنه تراجع!! دق الجرس فانفتح الباب ببطئ، دخل و قد استنتج بأنها خلف الباب، أغلقه و قال دون أن ينظر للخلف:أطالع ولا ما أطالع؟! تحمحمت فنظر إليها.. -جوووووود!! قالت بخجل و هي تمسك بأطراف شعرها:نعم.. حاول أن ينطق لكنه لم يجد ما يقله..أيظهر إعجابه أم صدمته؟!.. اقترب منها ليحرك يده على شعرها قائلاً:شعرك..فين؟! التفتت:أهوه.. وضع يده عند آخر ظهرها:كان هنا..ايش وداه لين فوق؟! قالت و هي تأخذ بيده لغرفتهما:تعال، عاجبتك الوقفة عند الباب يعني؟!! جلسا على سريريهما، قالت و هي تضع كامل شعرها على كتفها الأيسر:شوف..أنا بس قصيتو لين نص ظهري..لسة طويل..إلي قدام بس قُصة!! -لأ هذا مو طويل..مو طوييييييييييل..شعرك نصه راح، بعدين ايش هذا اللون..ايش هذا؟؟؟ صمت علي لثوانٍ قبل أن يقول بغيظ:غبية..شكلك حلو!! اتسعت ابتسامتها:حلو شوية ولا مرة؟! -والله ما أقولك!! -يعني حلو مرة؟! -لأ.. قالت بثقة:أصلاً كنت عارفة إنك ما حتتحمل الحلاوة دي.. نظر إليها:شين و قوي عين.. مد علي يده ليلمس شعرها لكنها منعته و هي تمسك بيده:أول قول إني حلوة و إنو شعري عاجبك.. -قوليلي إنتي أول ايش ذا اللون؟! قالت و هي تمسك بخصلة من شعرها:شوف..حطتلي تدرجات البني إلي عندها كلها..أنا قلتلها أبغى ألوان مجنونة..قامت طلعتلي ألوان تخوف..أخضر و أزرق و بمبي..أنا خفت فقلتلها إنو أبغى يسير فرق في شكلي بس من غير الألوان العجيبة.. ابتسم:إنتي حلوة.. -و..؟! -و عسل.. -و..؟! -وسكرة..و خلاص طفشت.. -قول آسف عشنك صرخت عليا.. -آسف.. -عشان؟! -عشاني صرخت عليك..خلاص رضيتي؟! تبسمت:أصلاً مني زعلانة..لو زعلانة ما أخلي أولادي عند مامتك.. -يعني تركتيهم متعمدة؟! هزت رأسها بابتسامة أعرض.. ابتسم:و يلوموني فيكي يا شيخة!! ************************************************** ******** سعود،،، كنت قاعد أطالع في أمي مبتسم بسعادة..تخيلوا قاعدة تكلم مين؟!، قاعدة تكلم أحلام..أحلام اتصلت عليا و طلبتها..حتى ما كلمتني بس سلمت عليا و قالت لي إنها تبغى تكلم أمي!! بصراحة مرة انبسطت..حسيت كدة بإحساس كويس..مادري ايش هوا..يمكن الإنسان دايماً يتمنى لو أحبابو يسيروا أحباب بعض.اتذكرت فجأة جود و كيف كانت تدافع عن علي لمن كنت متنرفز منو و ما أتكلم عنو بطريقة حلوة..اتذكرت كيف كانت تبتسم ابتسامة عريضة لمن أقعد و أتناقش معاه في أي شي..جود تحب علي و تحبني فتبغانا نتفق..هوا ذا التفسير الوحيد للحالة إلي أنا فيها.. ودعت أمي أحلام و مدلتي الجوال..قلت و أنا أحطو على أذني:فصلتي؟! أمي:لا.. استأذنت من أمي و رحت على غرفتي،قلت و أنا أقفل الباب:هاااا..كلمتي أمي؟! -ايوة.. -هوا على أي أساس في المسلسلات يجيبوا الحماوات أشرار و زوجات الأولاد قليلات حيا؟! -هههه..مادري..ليه تسأل؟! -أحس إنو الحرمة إلي تأذي زوجات أولادها وحدة فاضية!! -كمان الزوجة إلي تحط عمتها في راسها أفضى منها..على الأقل الأم تخاف ولدها ينساها و لا يبعد عنها..عندها سبب..أما الزوجة..ما عندها عذر!! -يمكن تخاف أمو تحرشو عليها!! -بس هاذي ما عندها ثقة بنفسها..بعدين لو هيا من الأساس ما تغلط الأم ما رح تلاقي حاجة تحرش على أساسها!! -صح..درر ما شاء الله عليكي!! -ههه..شكراً يا سيدي!! -العفو يا ستي.. سمعتها تقول بعد كده:"سعود.."، و ضحكت بعدها..سألت:ايش فيه؟! -ليلى زعلانة لإني وعدت بنتها رح أدرسها و قاعدة أكلمك ذحين.. -تدرسيها ايه؟! -انجليزي..تقول عندها يوم السبت اختبار.. -يعني حتفصلي؟! -لأ..ههه.. -ليه، ما حتدرسيها؟! -إلا بس مابغا ذحين!! -ليه ما تبغي دحين؟! -عشاااان..أبغى أكلمك!! ابتسمت:تبغي تكلميني لييييه؟! ما ردت عليا فاتوسعت ابتسامتي:الله يا أحلام..أبغى أشوفك..أكيد حلوة و إنتي مستحية!! ^^^^^^^^^^^^^^^^^^^^^^^^^^^^^^^^^ أحلام،،، طالعت في وجهي في المراية..لأ..ايش ذا؟!، من جدي أنا مستحية؟!، أنا المفروض ما أستحي..أنا كبيرة و.. لأ..ليه يعني المفروض ما أستحي؟!، ليش أحسس نفسي إني غبية لمن أستحي..هذا شي طبيعي..أمي لحد دحين تستحي!! -أحلاااااام.. قلت و أنا أحاول يكون صوتي واضح:نعم.. -وينك؟! -معاك معاك.. -في ايش كنتي قاعدة تفكري؟! -ما..ولا شي.. -كذااابة!!، في ايش كنتي قاعدة تفكري؟! -في ولا شي!! -قولي فيك.. -مابغا.. -طيب خليني أقولك على شي..في الثواني إلي سكتي فيها اكتشفت شي.. -ايش؟! -اكتشفت..إني أحبك من جد.. حسيت بقلبي ينقبض و أنا أسمعه يكمل:ما شفتك إلا مرات معدودة و ما أعتبر نفسي خطيب يكلم أربعة و عشرين ساعة بسسس..مجرد إحساسي بإنك موجودة في مكان حآخذك منو بعد مدة يخليني أحس براحة..يخليني أفهم: ليش أمي كانت زعلانة عليا و ليش جود اتحملت كل أنواع الضغط إلي مارستو عليها عشان توقف زن و محاولة بإني أقتنع بفكرة الزواج!! حطيت يدي على قلبي..شديت ايدي على الجوال و أنا أسمعو يقول بضحكة: و..خلاص..قلت إلي أبغاه..يلا خلينا نغير الموضوع!! ************************************************** ******** جود،،، كنا قاعدين على السرير مستعدين للنوم لمن ناداني علي و هوا يعتدل في جلستو:جود.. -نعم؟!.. -جود لي مدة أبغى أكلمك في موضوع بس متردد.. -خير حبيبي..ايش فيه؟! قرب مني:لمن رحنا البر كلمني عبدالرب في شي و حسيت إني لازم أقولك.. قطبت حواجبي و قلت بتشكيك:في ايش كلمك؟! -كلمني في..في أختك.. تابع بسرعة:أنا ما قلت شي..لكن وضحتله إني مالي كلمة عندهم و ما أعرفهم عدل!! -لحظة لحظة..كلمك في أختي؟!،أي وحدة و ليش؟! -مادري..قال أخواته شافو وحدة في الجامعة و كلموه عنها فعرف من الاسم إنها من نسايبي فجا و كلمني!! معناتو ما قلو إنو شافها، ولا عبد الرب ايش دراه عن اسمي الكامل..ولو افترضنا شافو صدفة في المستشفى..ما أتوقع لسه متذكرو!! -طيب..عبدالرب كيف..قصدي..مثلاً لو جاك في أختك ولا بنتك..ترضاه لها؟! -هوا طيب..مقتدر..و أخلاقه حلوة..و..عارفة؟!، زي أصحابي زمان بس بأدب..يعني هو مرجوج و ما فراسه بس يظل طيب.. ابتسمت:زيك يعني؟! ضحك:لا مو زيي..على ألعن و أقوى.. قلت و أنا أسحب نفس:طيب..مو أخواتو شافوها في الجامعة..خلاص يكملوا الموضوع لحالهم..احنا مالنا شغل!! -أنا مني عارف ايش أسوي ذحين..عبدالرب زعل مني عشان..شوفي..أنا الصراحة كلمته بعصبية و من غير نفس... -زودتها مرة يعني؟! -لأ بس هو في البداية اتكلم و أخوانك موجودين..فضحنا بس حمادة حاول يزبط الوضع!! قلت بفجعة:اتكلم ايش قال؟! -ما قال شي واضح بس بغى و الظاهر حمادة عارف فسكته على طول!! -آه..يعني أهم شي ما ركزوا على الموضوع؟! -لالا لكني خفت إنهم انتبهوا فعصبت.. -مواضيع زي هدي ما يبغالها عصبية و صراخ، إنتا اتصل عليه و قلو إنو إنتا وضعك حساس معاهم و ما تقدر تتدخل في حاجة زي كده..فهمو!! -ايش يعني..تبغيني أنشر غسيل أهلك؟! -بلا غسيل بلا..صابون..عادي..اتصل و قولو إنك ما تقدر تتدخل و إنو ظروفنا ما تساعد إننا نساعدو ولا نوقف معاه..خلاص يروح بأهلو..حصل نصيب الحمدلله، مافي يتصارفوا هما من غير حساسية ولا شي!! -أنا شكلي أسكت و أتناسى.. -لأ..شي زي كده محد ينساه، و بصراحة أمشي في جنازة ولا في زواجة!! طالع فيا علي:تمشي في جنازة ولا في زواجة..ما شفت حماس زي حماسك لعمك و أحلام..وين الجنازة يختي؟! -مااا..عمو غير..عمو حالة خاصة..بعدين يعني..يعني اعتبروا تدريب عشان لمن أخطب لسعود..يعني مثلاً تبغاني أطبق دا المثل على سعود؟! -والله يا حبيبتي إنتي ناس و ناس..اعترفي إنك منتي مهتمة!! -مو مني مهتمة و بعدين بالذات سارة..أحبها و أبغالها كل خير!! -سارة؟! اتوترت:إ..إيوة سارة.. -ايش دراكي إنه يبغى سارة؟! -مدري..بس كده جات على بالي و بعدين نفسي أصلاً أشوفها متزوجة!! -أيواااا... ************************************************** ******** |
الجزء التاسع و العشرون-الأخير (أقفال و مفاتيحها!2!) جود،،، خرجت من الجامعة و أنا مدري بايش حاسة..وثيقتي في يدي..خلاص خلصت..خلصت يا ناس خلصت!! قابلت كم بنت و كم أستاذة باركولي..انبسطت بصراحة بمباركتهم ليا على التخرج و الولادة..و رغم البسطة دي كنت خايفة..من الفضاوة..أنا ما أقدر أعيش بس على شغل البيت و حاجات أهل البيت..ما أقدر!! علي وصل مع سعود و خديجة إلي كانت على كرسي الأطفال ورا..دخلت للسيارة و جلست بصمت فقال علي:ايش..مقبول؟! التفت بغضب:اسم الله عليا..ممتاز عالي..بس مو مرتبة شرف!! -و زعلانة عشان مرتبة الشرف؟! -لأ..بس..مدري..قولي مبروك!! -مبروك..بس هدّي..ليه معصبة؟! انفجرت أبكي:ايش أسوي دحين بعد ما اتخرجت؟!، علي أنا ما أقدر أقعد في البيت كده..لازم أشتغل..ما أقدر..ما رح أتحمل..أنا ما أحب القعدة و الفضاوة ما أحب.. مادري ايش إلي هيجني..يمكن لإني طول الطريق للجامعة و أنا أفكر و حتى و أنا أستلم الوثيقة و أصورها و أختم نسخها قاعدة أفكر بأشياء مرعبة!! علي عصب مني:أنا اتخرجت بجيد جداً خرجت من الجامعة أصرخ زي المجنون و إنتي تبكين..بدل ما تحمدين ربك إلي اتخرجتي بنسبة عالية مع إنه عندك ولد وكنتي حامل..استغفر الله على ذول الآوادم.. -مالي شغل..تشوفلي أي شغلة في أي مكان..أنا ما أتحمل..ما أتحمل.. -والله..و أنا أقول نروح ذحين نتغدى و نفرح بتخرجك..تجيني تبكي..مالت عليكي!! مسحت دموعي:وين نتغدى؟! -مافي..خلاص بطلت!! رجعت أبكي:لااااااااااااا... -خلاص خلاص أمزح..بنتغدى.. -فين؟! -في بلدي.. -مابغا!! ضحك:والله إنك غبية يا جود..قولي فين تبغي؟! -لا تسبني.. -فين تبغي؟! سعود:ماكدونالدز!! قلت بطفش:مابغا..طفشتنا بماك إنتا.. علي:طب قولي ايش تبغي؟! -أي شي ما أعرفو..وديني محل ما قد رحتو.. -بس مالي شغل لو ما عجبك.. -عادي.."التفت لورا"..سعود هات بوسة..أمك اتخرجت!! -ايوة و قاعدة تصرخ فيا كمان!! ابتسمت:هههه.معليه عندي حالة نفسية حبيبي..اتحملني!! قرب مني سعود و باسني:مبروك..وريني وثيقة.. مديت الكيس إلي حطيت فيه أوراقي لو:بس انتبه لا تتناثر منك!! ************************************************** ******** جود،،، كنت حاطة خديجة على فرشتها في الأرض، كانت صاحية و سعود قاعد عندها يلعب معاها..كان فيه فلم قديم لويني الدبدوب..أول فلم لو..و كنت قاعدة أحكي سعود عن حكايتو و كيف إنهم كانوا فاهمين إنو المدرسة مكان فيه وحوش و ظلام و استغليتها فرصة:و ترى على السنة الجاية..كده يسير في ألعابك..تخاف عليك عشان حتروح المدرسة!! -من جد؟! -ايوة.. -طيب ماما إنتي سرتي سنة أولى؟! -أكيد!! -ايش سويتي؟! ضحكت:نمت.. -نمتي؟! -ايوة..كنت سهرانة عارف مع مين؟! -مين؟! -مع عمو سعود و عمو أحمد..جا عمك أحمد عندنا و قعدوا يلعبوا معايا واحد طش و موية تلج و كلو.. قال بفخر:أنا بعدين ألعب مع خديجة و نكسر كل شي في البيت.. سويت نفسي مفجوعة:يا ساتر عالنية!! ضحك قبل ما يسأل:طيب حروح المدرسة إلي جمب البيت؟! -لا حبيبي..واحد صاحب بابا في الشغل قلو على مدرسة تانية حلوة و الأساتذة فيها طيبين و الأولاد مؤدبين.. -طيب..ماما مابغا أروح سنة أولى..بروح الجامعة زيك.. ضحكت:لسة قدامك 12 سنة قبل الجامعة..لا تستعجل.. -طيب الجامعة حلوة.. -و حتى المدرسة حلوة..تروح و تلاقي أصحاب قدك، تلعب معاهم و تتكلم..مرة حلو!! -طيب..بس لمن أجي تقعدي في البيت.. -ليه ما تبغاني أشتغل؟! -لأ..ولا أجي معاكي زي في الجامعة.. -استحليتها يعني..هااا؟! ابتسم لي ابتسامة عريضة فضحكت و قمت أشوف الغدا... ************************************************** ******** جرة،،، أمسك علي بآلة التصوير منادياً:"جود!"، فنظرت إليه متبسمة فقال:لأ..اوقفي..عشان لبسك يبان.. وقفت و ابتسمت و هي تتساءل عن سبب اهتمام علي المفاجئ بالتصوير!، التقط الصورة و هو يضحك:ذا الفستان ما كان ضيق عليكي!! أشارت إلى سرير خديجة:بنتك ولا جسمي؟! -بنتي!! -و جسمي.. -حلو زي ما هوا.. -ايوة..خليك عاقل.. لبس شماغه و قال بينما كان يعدله:البخور فين؟! نظرت جود إليه مستغربة..كان قد ارتدى ثوب العيد و شماغاً جديداً!.. قالت:ايش عندك إنتا اليوم..أوكي عزيمة و كبيرة بس مو لدي الدرجة!! -أهل أبوية جايين..أمي تقول إننا ما نشوفهم كثير فلازم نكون بأحسن شكل!! -هدا الكلام ليا أنا..هما أهلك..أنا إلي لازم أكون بأحسن شكل دايماً و كمان هادي أول طلة ليا بعد الولادة.."صرخت بحماس"..صح..صبغت شعري!! -محد شافك صح؟! -لأ بس قلتلهم.. -طب يلا عشان اتأخرنا..الأولاد جاهزين؟! -ايوة خلاص من أول!! وقفت و لبست عباءتها..حملت خديجة ثم خرجوا.. كان هذا يحصل بينما كان العم سعود جالساً على إحدى مقاعد الصالة في بيت أبو أحمد..دخلت والدته للمجلس الداخلي أما هو فطُلب منه أن ينتظر لتخرج صفاء كي يتمكن من الجلوس مع الجميع..لوهلة..شعر بالذنب لكنه _و على أية حال_ أخفض رأسه حالما سمع وقع أقدامٍ قوية..مر السواد مسرعاً و صعد للأعلى..وقف متوجهاً للمجلس:السلام عليكم.. ردوا عليه السلام..سلم على رأس عمه و عمته ثم اتجه لأحلام..قبل خدها و هو يسألها عن حالها ثم جلس إلى جوارها:طيب..جود متى رح تجي؟! سأل و هو ينظر لعمته التي قالت:مادري..علي قال بيدق عليا لا وصلوا.. رن جوال أم أحمد فقالت:وصلوا.. أحلام:طب أطفي النور؟! العم سعود:ليش؟! -عشان..نفاجئ جود.. الجدة:يا الله سترك..بتفجعون بنتي؟! أم أحمد:قومي طفي لا تفتنا صفاء و لو إني أشك إن جود رح تفهمها!! وبالفعل كانوا قد وصلوا..قال علي:انزلوا!! جود:ليه..فين رايح؟! -بس بركن السيارة بعيد عشان سيايير أعمامي!! -آه.. سعود:أنا بقعد مع بابا!! نزلت حاملة خديجة و دخلت للمنزل..كان الباب مفتوحاً.. اتجهت لمجلس النساء الداخلي الواسع، فتحت بابه فلفحتها البرودة، وقعت عيناها على الإضاءة الصغيرة الموجودة في جهاز التكييف، قالت بلهجة الخائف المستعجب:بسم الله علينا!! عادت للصالة و جلست فيها و هي تنظر حولها، أين أهل البيت؟! رفعت رأسها عندما شعرت بدخول سعود و علي الذي صرخ:ايش تسوي هنا؟! -مدري..وين أهلك..رحت مجلس الحريم،لقيت اللمبة مطفية..رجعت..مدري ايشبي خفت!! اغتاظ منها:ليش ما تولعي النور؟! سألت بانزعاج و زعل:ليش تصرخ عليا..ايش سويتلك أنا؟! خرج العم سعود من جهة المجلس:جود حبيبي تعالي ولعي النور.. فزت:من فين طالع إنتا كمان؟! قال و هو يحاول جاهداً ألا يضحك:جود روحي ولعي النور!! قالت و هي على وشك البكاء:والله لو ما تقولولي ايش فيه.. أمسك العم سعود بيدها، أوقفها و هو يقول:الله الله على الصبغة و القصة..تعالي تعالي!! دخل العم سعود للمجلس و هو لا يزال ممسكاً بيدها، أضاء المكان فرأتهم جميعاً و قد وقفوا ضاحكين..قد فهمت الآن!! ضرب علي رأسها بخفة:إنتي وجه مفاجآت إنتي؟! أبعدت يده و هي تشعر بالحرج و السعادة في نفس الوقت!! عمها و عمتها، أحلام و لينة..جدتها أيضاً كانت هناك لكن بغطائها..ضحكت جود من غطاء جدتها، كانت قد اكتفت بلف جزءٍ من وشاحها على وجهها، كان وشاحها من ذاك القماش القديم الخفيف المخرم..سلمت عليهم واحداً واحداً و هي تشعر بالحياء لسبب..هي ذاتها..تجهله!! أم أحمد:والله أنا قلت الحركات ذي مي لجود..بس البنات الله يهديهم!! همس عمها أبو أحمد و هو ينحني لها للسلام:هذه أفكار صفاء.. حكت رأسها بحرج:لا بس خفت عشان اللمبة الحمرا إلي في المكيف كان شكلها يفجع مع الظلام!! العم سعود:فاكرة لمن حسبناها عين جني؟! قالت:يحقلنا عمو..كان في داك المكيف لمبتين..وحدة حمرا و وحدة خضرا!! جلست و جلس إلى جوارها علي و سعود، قال عمها أبو أحمد:نعيماً.. ابتسمت:الله ينعم عليك!! -لماذا؟! -عشان..الله ينعم على الكل !! -لم قصصتي شعرك و لم صبغتيه؟! -ها؟؟!! علي:هيا أجيبي الآن.. قالت ببساطة:علي طلبني..قال إنو يبغاني أغير شي فغيرت!! علي:شوف الكذابة!! العم سعود:طب حلو.. ابتسمت لعمها:عيونك الحلوة!! أم أحمد:حلو..سيبيكي من علي و أبوه!! أبو أحمد:أتريدينها أن تسيبني مني يا أم أحمد..أهكذا العشرة؟! عمتي:ايوة هكذا!! ضحكت جود:حلوة ايوة هكذا.. أشار العم سعود لجود بأن تذهب لجدتها فذهبت و جلست إلى جوارها، كان في حضنها كيس صغيرة، مدته الجدة لها و هي تقول:إن ما رضيلك علي بالشغل كلميني..عصاتي أشغلها.. ضحكت و هي تقبل رأسها:لا ما يحتاج أنا عندي عصاياتي الخاصة!! علي:ارحميني يا أم عصي إنتي.. وقفت لينة بعد هذا و اتجهت لجود و مدت لها هدية:أنا غلفت الهدية.. ابتسمت جود بصدق و هي تحضنها:يا حياتي إنتي..شكراً.. العم سعود:أنا مع أمي.. أحلام:و أنا مع سعود!! عمو:صح زوجتي معايا كمان!! قالت جود باستلطاف عفوي:ويه..فديتو إلي عندو زوجة!! قطب العم سعود حاجبيه و هو يبتسم ابتسامته الجانبية..ابتسمت جود:هيهي..معليه.. وقف سعود بعد ذلك و تقدم من أمه..احتنضنها بقوة:مبروك يا آنسة ماما.. -ههه..حبيبي..الله يبارك فيك.. قدم إليها هدية فقال علي:تعالي هنا..سلمتي عليهم كلهم إلا أنا!! وقفت جود، ذهبت لعلي و قبلته على عجل و استحياء ثم عادت بسرعة لمكانها قرب جدتها.. علي:هيا..شردت!! ضحك من كان هناك..تجاهلت جود نظرة علي لها و هي تتظاهر بأنها غير خجلة البتة!! وقف العم سعود:طب أنا أروح دحين.. جود:ليه؟! -عشان أحمد برة و أهلو بيدخلوا و بالداخل فيه شخص حاقد عليا فيستحسن أخرج.. عمي:اقعد يا رجال..قاعدة مع أحمد..ما عليها خلاف!! ابتسم عمو:لا عشان أحمد كمان.. أحلام:سعود..أوصلك للباب؟! ابتسم العم سعود بحلاوة:تعالي.. خرج الاثنان من الغرفة فقال علي بنعومة:سعود..أوصلك للباب؟!، ياااااي.. تنهدت جود براحة واضحة فقال علي:نفسك حبيبتي..لا يخلص.. جود:ياخي خليني.. علي:ما شفت وحدة تنبسط بزوجة أبوها زيك.. تبسمت جود:شكراً لإنك قلت أبوها..و بدل ما تتريق قول ما شاء الله.. قالت الجدة بضيق:ما يبغى يذكر الله على ولدي.. علي:ايوة طبعاً ما بذكر الله..ناسية ايش سوى فيني أيام الملكة..ولا خلينا من إلي سواه..إنتي يا جود ايش سويتي..والله أغلس عليهم..أنا ما عشت أيام الخطوبة و الملكة هما كمان ما يعيشوها.. أم أحمد بغضب:علي..قول كلام طيب..بدل ما تدعي لأختك تتكلم عنها كأنها عدوتك ما تبغالها الفرحة.. قال سعود و هو يهز رأسه:بابا ولد مو كويس.. نظر علي لابنه:نعم؟؟؟!! ابتعد سعود عن أبيه ثم قال:أمزح..حروح أنادي صفاء.. و خرج سعود من المجلس، توقف عند الباب الفاصل بين المجالس و باقي البيت..كان هذا الباب قريباً من الباب المؤدي لفناء المنزل..قريباً من الباب الذي توقف عنده العم سعود و أحلام التي قالت و هي تتكتف:ما جيت عشان كذة أنا.. ابتسم العم سعود و رفع إحدى حاجبيه:أجل ليش جيتي؟! -جيت عشان أوصلك للباب..عشان عيب تمشي لبرة لحالك.. أشار بسبابة يسراه على خده الأيسر و قال بجدية:لو سمحتي..دحين بسرعة.. تحمحم سعود محاولاً مجاراة والده عندما مشى عبر الباب الفاصل وتابع طريقه للأعلى دون أن ينظر إليهما..ضحك العم سعود:شوف الولد.. أخفت ابتسامتها و كادت أن تنطق إلا أنه أمسك بذقنها، قبل خدها الأيمن فالأيسر، ابتعد للخلف قليلاً ثم قال بابتسامة و هو يشير بيده:ادخلي و قفلي الباب.. ثم ذهب لحيثما مجالس الرجال كانت..لم فجأة يشعر بأن صدره أوسع و أكبر؟!، تساءل لكن أحمد الذي وقف مرحباً منعه حتى..من التفكير في إجابة.. دخلت صفاء هائجة:أوكي..الله يسعدها و الحمدلله سارت أختي متزوجة بس إني أتحبس في بيتنا..هذا شي أنا ما أرضاه.. و لم تنتظر رداً بل نظرت لعلي:عليوووووه اطلع برة..مرة أحمد بتدخل.. وقف متململاً:أففففف.. قفزت صفاء بحماسة لجود:هييييييييييي..صبغتي.."شدت صفاء ما كان على كتف جود من الشعر"..مررررة حلو..ما شاء الله يجنن.. -آآي..طيب حلو..لا تشديه.. تركت صفاء شعر جود ثم قالت و هي تتنهد بصدق:مدري..بس أحس لمن أشوف شي و يعجبني أسير أبغى أقطعه.. قالت جود و هي تجلس _فقد وقفت لتسلم على صفاء_:أخت علي.. جلست صفاء و قالت بفخر:شوفي..ترى الفكرة فكرتي و التجهيزات كلها أنا سويتها بس ماما قعدت تقول:أكيد تبغى عمها معاها في لحظة زي ذي..طبعاً أنا قلت خليه يجي عادي بس أفكاري ما تتنفذ إلا بوجودي لكنهم ضربوا بكلامي عرض الحايط و سووا إلي في راسهم و نفذوا أفكاري في عدم تواجدي!! الجدة و هي تنظر بدونية لصفاء:لا إله إلا الله..العقل زينة!! صفاء:أنا ما حرد!! جود:لا يا شيخة!! دخلت زوجة أحمد و ابنتها رؤى..باركتا لجود ثم جلستا في الوقت الذي قالت فيه الجدة لأبي أحمد:هيا يا ولدي قم اخرج..تعبت من الغطا..كتمني!! بدت الصدمة واضحة على وجه أبي أحمد و هو يقف بكبرياء قائلاً:إن شاء الله..آسفين..تعبناك!! وخرج، فقالت زوجته:هيا يالله..الناس بيجوا.. جود:عمات علي؟! ابتسمت:و أهلك كمان؟! جود باستنكار:ايش؟! أحلام:علي اقترح الحفلة فقال بابا ليش ما نناديهم؟! تبسمت جود بسعادة:من جد علي؟! أم أحمد:قال إنك كنتي مكتئبة و طفشانة فطلب إنا نسويلك شي!! شعرت جودبالامتنان الشديد لزوجها، لقد كانت _بالفعل_ في حاجة لجوٍ جميل كهذا.. قالت جود:صح أنا سويت مناحة..مرة خفت و حسيت بالفضاوة!! أحلام:الحمدلله..أحد حيحس بإحساسي!! أم رؤى:أنا كنت على وشك أكتئب بس أمي الله يسعدها اشتغلتني دورات..من وحدة للثانية!! أحلام:بابا ما يقتنع بالدورات..يقول يمديكم تتعلموا أي شي من النت!! -لا أمي كانت تبغاني أخرج و أبوية ما عنده فكرة الشغل فما كنت حنبسط لو اتعلمت في البيت!! جود:أكره الدورات!! أم رؤى:بالعكس..تبان نتيجتها بعدين..عارفة مرة أخذت دورة علمونا فيها مهارات كتابة تقارير العمل..طبعاً شي أنا مالي فيه..متى نفذت إلي أخذتو؟!، مرة مرض أحمد و كانوا طالبين منو تقارير..أعطاني معلومات و أعطاني واحد مسويه من أول و قال:يلا..سوي زي هذا..بكرة أصحى الصباح ألاقيه جاهز!! صفاء:أخواني مفترين على فكرة..و زوجاتهم ساكتين لهم!! الجدة:داموا راضيين..وش دخلك؟! صفاء:جدة إنتي ايش فيكي عليا اليوم؟! -صجيتيني..صراخ من يوم ما شفتك..حتى سلام ما سلمتي!! -إلا سلمت أول.. أم أحمد:قومي طب سلمي ذحين.. وقفت صفاء، ثم قبلت رأس الجدة، عادت لمكانها و هي تقول لجود:والله لأطلع حرتي في أولادك!! -جربي و شوفي..!! رن الجرس معلناً وصول أهل أبي أحمد و بعدهم أهل أمه، تم استقبالهم و قُدم لهم ما لزم تقديمه، و بعد حوالي الربع ساعة رن الجرس ليعلن وصول عائلة جود..الأمر الذي أوقفها بحماسة لتذهب لاستقبالهم، لا تدري لم ينشرح صدرها كل ما تواجدوا معها في نفس المكان أمام أسرة علي؛ و كأنما ذاك الجزء الذي نقص أمامهم في يومٍ من الأيام عاد للامتلاء، لكنها _و رغم ذلك_ لا تظهر هذه المشاعر؛ تخاف أن ينفروا من قبولها و نسيانها السريع لكل ما مضى!! صافحت سارة جود ثم احتضنتها:مبرووووك..هادي مني و من أخواتي.. أخذت جود الكيس الكبير الحجم من سارة التي مدته لها بابتسامة واسعة:أوه.ثانك يو..هادي ليا؟! دقتني صفاء:يا هبلة..إنتي خريجة فرنسي..قولي ميغسي جداً.. ضحكت جود:ميغسي جداً.. ابتسمت سارة:عفواً.. قالت جود و هي تنظر لداخل الكيس:ينفع أفتحها دحين؟! صفاء:لأ يا جود..اثقلي..خلاص هاتيها أطلعها غرفتي.. نظرت جود لصفاء:ههه..دا بعدك..والله ما تطلعيها غرفتك..برسل سعود يحطها في السيارة!! صفاء:حرام عليكي يا جود..بس هدية وحدة أعطيني!! -مافي..هادايايا.. -لسوف أنتقمن منك.. -انتقمني زي ما تبغي..امشي نقعد..واقفين زي الهبل!! و ذهبن جود و صفاء و سارة مع من كن معهن و جلسن عند إحدى الزوايا بما أن المجلس كان ممتلأً بالنساء!! كانت سارة تتحدث مع صفاء عن أمرٍ ما بينما كانت جود تنظر إليها بابتسامة شجنة..ليتها فقط تستطيع التدخل في ذاك الأمر الذي تحدثت فيه مع علي.. حسنٌ..لا بأس..ستفعل ما بوسعها..ستدعو..ستدعو لها بكل خير..ثم..ثم سيكون أمراً رائعاً إذا ما تزوجت سارة؛ ستنفصل و تستقر و تتمكن من التواصل معها بالزيارات و المقابلات..و يا لسعادتك يا جود إذا ما تحقق ذلك.. سألت العمة صفية:ها يا جود..ايش ناوية تسوي بعد التخرج..بتقعدي في البيت؟! جود و هي تنظر إلى عمتها:مادري والله..بس نفسي أقعد مع خديجة لين تكبر شوية.. -ليش ما في بالك الشغل؟! -والله لو لقيت شي يناسب الوقت و الظروف ليه لأ؟! خلود:أتوقع تلاقي شغل في السفارة السعودية الفرنسية..ذحين سايرين يوظفوا السعوديات بسرعة.. هزت جود رأسها:حلو الإنسان يتكلم مع أهل اللغة إلي اتعلمها.. منى:هاجري فرنسا..سيري سفيرة هناك.. همست صفاء:ذحين علي يطلع من تحت الأرض يفقعها و ينزل..خخخخخ.. ابتسمت لمنى:تجي معايا؟!، ما عندي واحد من محارمي حيرضى يسيب شغلو و يسافر معايا.. مها:إلا..زوج صحبتي ترك شغلو هنا و راح معاها برة..هيا تدرس و هوا يتمشى.. قالت زوجة أبي جود:ليه؟!، هيا تروح و ما عندها شي طيب..بتنشغل بالبيت..بالأسواق..بس رجال يروح و ما عندُه شي..صعبة!! و بهذا بدأت المتواجدات بالنقاش..الأمر الذي سمح لجود بالتسلل للخارج لتطمأن على خديجة النائمة التي وكلت منورة بالبقاء عندها في غرفة صفاء..دخلت للغرفة بهدوء فوجدت منورة حاملة خديجة الباكية تحاول تهدئتها، قالت و هي تجلس على السرير و تأخذ ابنتها من منورة:صحيت من أول؟! -قبل شوية.. نظرت جود لخديجة التي توقفت عن البكاء و هي تشهق شهقات صغيرة متقطعة:شكلها جيعانة.."نظرت لمنورة و ابتسمت"..خلاص منورة حبيبتي أنا بقعد عندها..انزلي تحت لو تبغي.. -جود..أنا ما قلتيلك..زوجة أخوية فيه بيبي بنت.. قالت جود بسعادة:بالله؟!، أية إلي اتزوج قبل سنتين؟! -ايوة.. -مو قلتي إنو زوجتو ما تخلف؟! -هيا مسكينة أول كل ما يجي بيبي يروح، سبعة شهور..في بيبي خمسة شهور..زي كده..بعدين أمي سوت لها علاج من غير ما يعرف أخوية، هوا يقول علاج عند دكتور مافي شيخ و لا حريم.. -آآه يعني زي الطب الشعبي؟! -ايوة..أنا قلتي لها..سمي خديجة عشان زي بنتك.. ضحكت جود:طيب رضيت؟! -ايوة..عشان زوجة الرسول.. ابتسمت:ما شاء الله عليها..بس لازم أشوفها خديجة..ما دام اسمها زي بنتي لازم أعرفها.. -ليش ما تروحي اندونيسا..دحين إجازة..والله تجي عندنا في البيت..عادي مو لازم فندق.. ابتسمت:إنتي قلتي بتروحي إجازة صح؟! -إن شاء الله..بس أمي ما يبغى..زعلانة.. -ما عليكي..جدة أنا حفهمها..إنتي خلاص تبغي تروحي عشان أهلك و زوجك و أولادك..روحي الله معاكي.. -بس إجازة..كم شهر..أول أنا أروح ما تقول شي.. -هيا تحبك..حتى يمكن أكتر مننا..بس خلاص وعد..أنا رح أكلمها لكي.. -شكراااا.. ابتسمت:عفواً.. و خرجت منورة من الغرفة..فبدأت جود بإرضاع ابنتها، نظرت إليها، كانت خديجة تتنفس بسرعة و ترضع بنهم، قالت بعطف:حياتي أنا..آسفة انشغلت عنك اليوم.. طُرق الباب..كانت أحلام، تراجعت:أوه سوري.. ابتسمت:ههه..عادي حبيبي تعالي بس جيبيلي شرشف من الصندوق.. أغلقت أحلام الباب حالما دخلت، فتحت صندوق شراشف الصلاة و أخرجت واحداً، غطت جود به نفسها فجلست أحلام إلى جوارها:حبيبتي..شكلها حيعانة.. -يا الله..مرة انشغلت اليوم..لو مو سعود يحب يرضعها و يستأذن كل ما جا يرضعها كان من جد ما أكلت.. -سويلك جدول و لا حطي منبه..عارفة أمي أول ما ولدت لينا كانت تنسى لإنو مرت فترة قبل آخر بيبي فسارت مسوية جدول و تحط صحات عليه.. -أمك و تنسى عشان مرت فترة..أنا أنسى ليه؟! -ترى تعتبري اتأخرتي في ثاني بيبي.. -خمسة سنين..يقدروا يتلاحقوا.. -ممم..ايوة صح..آآآه أقولك جود.. -نعم.. -أبغى..أبغى أطلب منك خدمة.. -خدمة؟!، خير..ايش فيه؟! -أبغى أشوف تقسيمة البيت بالتفصيل..سعود وصفلي إياه بس ما كان وصفه واضح..و أنا كلها كم مرة إلي جيتها..أبغى أشوفه من جوة..و عندنا عيب لو رحت بيت خطيبي فترة الملكة.. -كلنا عندنا دا عيب..بس إنتي سُكيتي تعالي..ترى المستأجر إلي قدامنا أقل من شهر و يخرج..خلي عمو أحمد يحدد موعد مع عمو سعود و روحي شوفيه عشان تحددي كل غرفة في ايش حتستخدميها..بعدين لازم تكوني صورة..غصباً عنكم حتجددوا بويات و أرضيات..الرجال إلي ساكن فيها أولادوا لا حول و لا قوة إلا بالله يخربوا كل شي.. -يعني مرة وصخة؟! -لا..ما حتكون بداك السوء..لإنو عمو يشترط على كل مستأجر إنو يسوي تنظيف و يتكفل بكل خراب قبل ما يخرج أو يدفع..و مكتوب دا الشرط في العقد.. -و يلتزموا؟! -بعضهم و بعضهم لأ..بس الرجال دا طيب فأتوقع يلتزم.. -إن شاء الله.. تبسمت جود:بس كده؟! -ايوة.. قطبت جود حاجبيها بابتسامة:ليش أحس فيه شي تاني؟! تنهدت أحلام:بصراحة طفشت.. -من ايه؟! -نعسانة بس ماما حتوريني شغلي لو نمت فقلتلها إني بطلع أناديكي.. -آآآه..اتعشي و نامي.. -و متى حينحط العشا؟! مددت أحلام ظهرها على السرير و هي تتابع:حرااااام..صاحية من ثمانية الصبح.. -و ايش إلي مصحيكي تمنية؟!، هدا صيف يا أمي.. -ما أحب أسهر.. قالت جود و هي تبعد خديجة عن ثديها:أحلام خدي خديجة شوية.. عادت أحلام للجلوس و تناولت خديجة من جود التي وقفت متجهة للتسريحة لتهندم شكلها..التفت لأحلام بعدما انتهت:يلا.. وقفت أحلام:يلا ^^^^^^^^^^^^^^^^^^^^^^^^^^^^^^^^^ بعد العشاء و بعد ذهاب أغلب من تواجد اتصل العم سعود على جود، أجابت:أهلاً.. -وسهلاً..كيفَ حالكِ؟! -الحمدلله بخير..ماذا عن حالك؟! -طيبة و الحمدلله..يقولك يا ستي أبوكي و أخوانك يبغوا يسلموا عليكي.. -طيييب..كيف أجيلكم؟! -اطلعي للصالة تلاقيني و تلاقي محارمك..ما شاء الله ترانا كثيرين.. -ما شاء الله لا تحسدكم..بس فعلاً أنا دايماً أقول إنو عندي مجموعة محارم متكاملة و من بعد رامي إلي طلعلي فجأة كملت.. -ههه..موجود تراه.."أخفض صوته"..و زعلان منك.. -ليييه؟! -تعالي و اسألي بنفسك..باي. و انتهت المكالمة، وقفت جود، كانت خديجة تنتقل من يد لأخرى بين الجميع..كانت جود تشعر بالسعادة كلما سمعت إحداهن تمتدحها، كانت مع جدتها الآن، اتجهت جود إليها:هاتيها جدة عنك..بابا و أخواني في الصالة بروح أسلم عليهم و آخدها معايا.. همست الجدة لجود و هي تأخذ خديجة منها:لا سلمتي على أبوك حطيها في حثلو..سامعة؟! هزت جود رأسها:إن شاء الله.. خرجت من الغرفة و دخلت للصالة بابتسامة:السلام عليكم.. ردوا السلام عليها، اتجهت مباشرة لوالدها، انحنت له و هي تمسك بخديجة:كيفك بابا؟! -الحمدلله بخير.. فعلت ما أمرته به جدتها و هي تقول بعفوية أتقنت افتعالها:بابا خليها معاك شوية.. سلمت على البقية و عندما وصلت لرامي الذي قال بضيق طفولي:ليش تقوليلي ما تبغي حفلة و تخلي أهل زوجك يسوولك؟! جود بصدق:ما كنت أدري.. العم سعود:شفت..قلتلك؟! تكتف:المفروض أهلك يسوولك حفلة مو أهل زوجك.. دخل أبو أحمد و علي الذي قال:سووا محد قلكم لأ.. العم سعود:أحمد راح؟! أبو أحمد:نعم.. جلسا فجلست جود و هي تقول:والله ما كنت أدري..أصلاً انفجعت في البداية.. ضحك العم سعود و هو يقول لأخيه سعيد:هات هات خديجة.. شعرت جود بالاطمئنان..أنبت نفسها لشعورها هذا، فلم كانت خائفة على خديجة و هي في حضن جدها؟!، و لم هذا الشعور و العلاقات في تحسن..هي حتى لم تشعر بهذه المشاعر في أيام سعود! أقد يكون لنظرات والدها الغاضبة؟!، ربما..أجابت نفسها ثم أكدت لذاتها:"إلا..قاعد يطالع فيا معصب"..لم تكن تتوهم فقد كان بالفعل ينظر بغضب و انزعاج إليها..لم..ما الأمر يا ترى؟! "جود!!.." انقطع حبل أفكارها و رفعت رأسها لأبيها:نعم!! -ايش مسوية في شكلك إنتي؟! كان يسألها بجدية أخافتها، قالت بتوتر:ايش..ايش سويت؟! -ليه قاصة شعرك و صابغتُه..أذية بس؟! جود بعدم فهم:هااااا..؟؟؟!!! -تبغي تستفزيني يعني؟! جود باستغراب:أستفزك..بشعري؟!.."سألت ببراءة و صدق"..ليش إنتا أصلاً ايش دخلك في شعري؟! -نعم؟! -قصدي..قصدي هوا ما يأثر عليك..يعني..يعني إنتا مو عاجبك دحين..أول أحلى؟! قطب أبو عبدالرحمن حاجبيه، استهدى بربه، تنهد ثم قال:ايوة..الطويل عليكي أحلى.. جود:يعني مو حلو شكلي دحين؟! -لأ.. كان والد جود قد فقد أي رغبة في الكلام..و إن كان قد بدأ بالميل إليها كابنة في الفترة الأخيرة فمظهرها الآن سيبعده كل البعد عنها، و يزيد الطين بلة اقتناعه بأنها غيرت من شكلها فقط لاستفزازه! و ليته يسأل نفسه، كيف تدري أنها بهذا تستفزه ما دامت لم ترها قبلاً، كيف يتوقع هذا الرجل من جود بأن تعرف إن كانت بهذا اللون أو بهذه القصة أو بتلك النظرة تزيد من شبهها بأمها..و ما أدراها هي أنه بعد لم يتخلص من أمرِ الشبه المنطقي حصوله..ما أدراها؟! علي:لا بالعكس..مرة يجنن..مرة حلو..جود مررررة شكلك حلو..مرة تجنني.. احمر وجه جود خجلاً و تحمحمت..قال العم سعود منهياً هذا الحوار:التغيير حلو.. عبدالإله:الصرعة مي حلوة.. نظرت جود لعبدالإله باستنكار:مني مصروعة.. -و أحد قالك إنك مصروعة؟! -إنتا! -لأ..أنا بس قلت إن الصرعة مو حلوة! -طيب!!، قصدك عليا!! -والله..إلي على راسو بطحة يحسس عليها!! -ما على راسي بطحة!! -مثل..مثل ما ينفهم بالمعنى الحرفي!! -طيب حتى ردي..ما ينفهم بالمعنى الحرفي.. عبالرحمن بصدق:ايشبكم؟!،مرة سخيفين..يا الله!! ضحكت جود، فقال عبدالإله:سبك..تضحكي ليه؟! -ههه..طيب من جد..من جد والله مرة حوارنا سخيف!! لم يجب عبدالإله حتى بنظرة، فهمس علي:حركات بنات!! كتمت جود ضحكتها التي اختفت إذ رأت عبدالإله يحمل خديجة بتوتر شديد و هو يقول للعم سعود الذي أجبره على حملها:ما أقدر، حتطيح، مرة صغيرة! علي:و حلوة! نظرت جود لعلي بابتسامة ثم راقبت عبدالإله الذي غضب فجأة:فتحت عينها! علي:شي طبيعي تفتح عينها، مهي إنسانة يعني؟! جود:خلاص قامت! علي:انفجعت مسكينة!! العم سعود:علي..روقنا الله يخليك!! جود:غنيلها عشان ترجع تنام! عبدالإله و هو يمد خديجة لعمه سعود:لا والله؟! بضعٌ من السنين و بالتأكيد ستجري الأحاديث بصورة ألطف، لن تصمد الجروح و الآلام طويلاً أمام الزمن، ستبرئ، شاءت أم أبت، فالقلب من الكره و الحقد يفسد، و العقل لهما يرفض! و بالتأكيد لا تخيب نظرةُ عاقل إذا ما نظر إلى أشخاصٍ طيبين كهؤلاء، عائلة لطيفة، أفرادها مترددون عن الاجتماع أكثر _أدباً_ لا مللاً..و الأكيد، أن هذه "الجمعة" لن تكون بلا جدوى، فالليل ما زال في أوله و الصيف في بدايته، يُسمح للصغار بالسهر و للكبار بالسمر ^^^^^^^^^^^^^^^^^^^^^^^^^^^^^^^^^^^^^^^^^ عند الباب المؤدي لفناء المنزل توقفت أحلام:نعم.. ابتسم العم سعود:نعم؟! -آآم..إنت قلت تبغاني.. -أبغاكي عند الباب..يعني أبغى أودعك.. -آه.. ثم صمتا.. العم سعود:أحلام!! قالت بضحكة:هااا؟! فتح ذراعيه لها، ثم احتضنها بلطف:حتوحشيني لين ما أشوفك المرة الجاية.. تخشبت أحلام لثوانٍ، لا هي ابتعدت و لا هي تفاعلت معه! تسارع نبض قلبها، لم يسبق و أن كان سعود بهذا القرب منها من قبل، ازدردت ريقها عندما شعرت بقبلة و همسة قبل أن يختفي! أُغلق الباب، هزت رأسها ثم اتجهت للداخل من جهة غرفة الجلوس الخاصة بالعائلة، ثم للأعلى حيث غرفتها.. قال علي من خلف الباب المؤدي للمجالس:حتوحشيني لين ما أشوفك المرة الجاية.. جود بغضب:لا تتريق!! علي:عمك قليل أدب.. -مو قليل أدب، زوجتو، و بعدين مالك شغل، خليهم ينبسطوا، قول ما شاء الله.. -ايوة.هما خليهم ينبسطوا، أما أنا مسكين، و لا حتى رسالة ما ترسلي..و لمن رديتي عليا حولتيني على إشهار.. -يا ربيييييييي..ماسكها عليا من يوم ما اتزوجتني، قلتلك ألف مرة احنا حالة خاصة.. قال علي متظاهراً بالبكاء:والله إني مسكين، جيت بسوي نفسي أحب نسيت إني بدوي حبيت بدوية! -قلتلك ألف مرة البدو هما إلي يعيشوا في الصحرا..احنا مدنيين! -مو هذا موضوعنا..مالي شغل..اليوم اليوم ترسليلي رسالة كننا محنا متزوجين! -خلاص شوف..الأسبوع الجاي نلعب لعبة المخطوبين، و نقعد نرسل رسايل و نسوي خطط عشان نتقابل! -تمام، و آخر الأسبوع نرتب خرجة بالسر من ورا أهلنا! -ايوة..بس لا أشوفك تجيني الغرفة، ترانا مخطوبين! -لاااا.. رفعت جود أكتافها:خلاص مخطوبين.. و عادت لحيث الجميع جلسوا، ضرب علي الأرض بقدمه:كلبة!أوريك أنا!! ************************************************** ******** جرة،،، ضغط علي بشدة على جواله عندما سمع صوته:ألووو.. تحمحم:أيوة السلام عليكم.. -وعليكم السلام..هلا والله..كييييف حالك؟! -الحمدلله بخير، إنت أخبارك، كيف الإجازة؟! -عادي، زي الجن، نايمين نهار و قايمين ليل!! -هذا أيام زمان، ذحين ما يمديني أسهر، لإن الليل هوا الوقت الوحيد إلي تكون فيه خديجة نايمة و سعود هاجد! -ههههه..مسكين إنتا، ياخي صح السهر يتعب بس فيه لذة، أحلى شي إنك تنام في الوقت إلي تروح فيه الشغل! سكت علي لثواني قبل أن يقول:المهم عبدالرب، أنا متصل أبغاك في موضوع.. -خير إن شاء الله.. -عن إلي صار في البر و.. قاطعه عبدالرب:ما صار شي، و ما دام فتحت الموضوع أنا إلي آسف، ما كان لازم آخذ راحتي و كأن محد موجود إلا احنا، و معاك حق تعصب علي، ما يحقلي أتكلم عن وحدة ببساطة و بأعلى صوتي! -عبدالرب أنا ما فتحت الموضوع عشان أسمع هذا الكلام، كل إلي كنت أبغا أقولك هوا إني آسف لإني رفضت أساعدك و أوقف معاك، بس أنا ما رفضت و عصبت عبط أو من غير سبب، أنا وضعي معاهم ما يساعدني أساعدك، ممكن بس لإنك صاحبي يرفضونك، أنا بس كنت أبغى أقولك، إذا البنت في بالك لا توقف بسببي، كمل الموضوع مع أهلك، إنت ما قلت إن أخواتك إلي شافوها، روح على هذا الأساس، تدري أنا ما دخلت بيت عمي إلا مرتين و في المرتين خرجت بمصيبة و مو سهل عليا أكلمك عن أشياء تخصني حتى أهلي ما يعرفونها بس عشانك و عشان ما أبغاك تشيل في خاطرك مني.. -والله مني زعلان و لا أفكر أزعل، و لا يمكن يوم أفكر أحرجك بطلب أنا عارف إن مالك قدرة عليه.."ضحك عبدالرب بخفة"..أنا زعلت لإني اتفشلت من نفسي! -هههه، لا لعد تتفشل من نفسك، اسمع، أنا معد حفتح هذا الموضوع مرة ثانية لكن اوعدني إنك ما توقف بسببي و إذا سويت أي شي بشرني! -ولا يهمك..بإذن الله أول واحد يدري بأي شي يصير إنت.. ابتسم علي:إن شاء الله.. -تأمرني على شيء؟! -سلامتك.. -الله يسلمك..مع السلامة.. -في أمان الله.. قطع علي الاتصال و تنهد بقوة.. -سلامتك من الآه..العشا يستناك! نظر لجود فقالت:أي شي تبغى تقولو على السفرة! -تسكتيني..هااا؟! ضحكت:وي!، طب جيعانة و ولدي جيعان، تعال يلا.. وقف و هو يهمس لربه:"يا رب تمم.." ************************************************** ******** في إحدى الأحياء..في بيتٍ غط أفراده في نومٍ مسائيّ مناسبٍ لإجازة الصيف..كان مستيقظاً..هو و والدته التي قالت:يعني إنت ايش شفت منها..ايش إلي عجبك و لفتك فيها؟! محمد بتردد:مادري، أنا شفتها و الصراحة هيا حلوة و..مثقفة و مؤدبة أكيد -هيا البنت حبوبة..بس مثقفة مادري عنها.. -أول شي زي ما قلتلك حسبتني أخوها..و كانت مرجوجة فمرة اتضايقت و قرفتني الصراحة بس في طلعة البر سمعتها تتكلم..طبعاً ما شفتها عرفتها من الصوت..كانت تتكلم باحترام و طريقة مرتبة..فاستنتجت إن الهبل إلي سوته يوم ملكة أخت علي كان من توترها و خجلها..يمكنها من النوع إلي يخرف لمن يخجل..و هذي خصلة جيدة..يعني هيا عفوية..تتصرف على سجيتها.. سألت أم محمد نفسها بتفكير:صفاء محترمة؟! كان تساؤلها مسموعاً، فقال محمد:أمي إنتي شفتيها..ايش رايك فيها؟! -البنت جميلة و أهلها طيبين..و هيا حبوبة و نفسها حلوة.. -طب في قعدتك معاها..كيف حسيتها..عاقلة..رزينة و توزن الكلام؟! -لا عاقلة و رزينة اسم الله عليها.. -ايوة أمي..إنتي عارفتني..أنا ما أبغى وحدة هبلة زي الهبلات إلي عندي في البيت..أنا الغباء و الرجة ما أتحملها.. ابتسمت:لالا اطمن..أصلاً أول ما شفتها علطول فكرت فيك..سبحان الله إنتا و هيا..كأنها انخلقت لك..بس لحد ذحين ما قلتلي، ايش إلي حطها في بالك؟! -ولا شي، أنا موضوع الزواج في بالي من كم شهر و على أساس إني حأعتمد على اختيارك كليا، بس لمن شفتها قلت ليش ما أسألك عنها، قدني خلاص شفتها و بعدين أهل علي أحسهم ما شاء الله محترمين و الواحد ما يلاقي زيهم في أي محل.. -في هذي معاك حق، بس خليني أنا أستخير و إنتا.. قاطعها:استخرت قبل ما أكلمك! ابتسمت:طب ما يضرك لو استخرت مرة ثانية، بعدين أبوك لازم يعرف، حيمتحني لو ما قلتلو.. ضحك بخفة:طب يا أمي لازم تقوليلو.. -أخاف ما يصير نصيب و يتأثر، ترى صاير إنتا شغله الشاغل! ابتسم، قبل رأسها ثم وقف فقالت:بتنام؟! -ما أظن بيجيني نوم..بشوفلي أي حاجة أسويها!! وقفت:طيب..أنا بروح أتمدد شوية..صحيني أول ما يأذن المغرب..لا تخليني نايمة..سامع؟! -إن شاء الله!! اتجهت لغرفتها و هي تفكر:"إنت اخترت..مو أنا!!" لطالما كانت خائفة من اختياره، هي ترى بأن من العقلانية ألا تكون زوجته عاقلة معقدة فيما يخص الأخلاق و التنظيم مثله..ضحكت بخفة و هي تغلق باب غرفتها:"والله ما يجيب راسك إلا صفاء..".. ************************************************** ******** جود،،، كنت قاعدة أكلم عمو و كان قاعد يسألني عن القاعات و المعازيم..حبيبي هوا..متحمس يجهز للزواج!! قلت بعد ما خلص كلامو:خلاص ولا يهمك..أنا أدور و أسأل..إنتا قلتلي تبغوه بعد كم؟! -مادري..بس أقل من سنة و أكثر من ثلاثة شهور..هذا إلي فهمتو من كلام أحلام!! -خلاص أنا أصلاً أبغى أكلمها و يسير أشوف..المهم عمو..زي ما قلتلك.. -ايش؟! -أول شي..طبعاً العزيمة إلي سارت مرة حمستني للحياة و بعدت حالة الطفش إلي عندي بس..سار شي مرة حلو..تخيل..أخواتي جابولي هدية!! -حلوووو.. -والله اتحمست..حتى كل وحدة كاتبتلي شي..أقرألك؟! -براحتك!! -شوف..أخواتي كاتبين كلام عادي..إنو الله يوفقك و مبروك و الذي منه بس سارة..تخيل ايش كاتبتلي؟! -ايش؟! -اسمع.."و أخيراً من حقي أن أمارس دور الأخت معكِ علناً..و أخيراً من حقي أن أجسد مشاعري في هدية أو سلام أو اتصال أو حتى قبلة دون أن أخشى حساباً في نهاية اليوم..كنت أدعو لأعيش لحظات كهذه طويلاً..و ها هو إلهي يحقق لي رغبتي..لم يخذلني و لم يخذلك و لن..سارة"..ايش رايك..مو مرة سويت بالله؟! -يا شيخة الله يسعدها..من صغرها و هيا تطالع فيكي بنظرات..كانت تقولي:أنا أحب ألعب معاها بس هيا ما تحب تلعب.. -كنت أخاف يفشلوني لو طلبت ألعب معاهم..بس والله كنت ألعب عادي!! -أهم شي..إنو كل شي عدى و انتهى..و أهم شي إنو بإذن الله أولادك حيكبروا و فيه أهل أم و أهل أب..هوا سعود الوحيد إلي لحق شوية هبل لكن إن شاء الله حينسى مع الوقت!! -إن شاء الله..و فاتك عبدالإله..كاتب:"عبدالإله..أخوك الأكبر"، و كأني ما أدري إنو أخوية!! ضحك:ما عليكي..أبله دا..عبدالرحمن ايش كتب؟! -والله يا عمو كاتب كلام عبيط..ما أعتقد حينبسط لو قرأتوا لك. تابعت:ما علينا..المهم..أبغاك كده في يوم..تنطلي البيت تفاجأني لإنو واحشتني القعدة معاك فوق ما تتخيل!! -الله..دايماً تحسسيني إني واحد خطير..فلتة زماني و الكل يبغاني!! ضحكت:حلوة..فلتة زماني و الكل يبغاني..كيف جبتها دي؟! ضحك:أعجبك أنا.. ضحكت و أنا أفكر إنو عمو ساير منطلق أكتر من أول..مو معايا طبعاً..من زمان هوا معايا عادي بس مع الناس..من كلامو و حكاياتو أحسو ساير..مدري..شكلو و أخيراً..اقتنع إنو طبيعي!! ************************************************** ******** جرة،،، أعادت أم أحمد سماعة الهاتف لمحلها، فقالت أحلام التي جلست إلى جوار والدتها:مين؟! -أم محمد! -مين أم محمد؟! -صاحب علي..إلي في طلعة البر، فاكرتها.. -ممم..ايوة ايوة..ايش تبغى؟ -تسلم و تسأل..و تقول نفسها تمرنا يوم و ما تقطع أواصر العلاقة.. -قالت أواصر العلاقة؟؟ -لأ..أنا أتريق!! -هههههههه..أمي من جدي أتكلم، ايش تبغى تجينا؟! -ايش تبغى يعني؟! كتمت أحلام ضحكتها بيديها:صفاؤووووه..؟؟.. -عندنا غيرها؟! ************************************************** ******** جود،،، كنا في السوق، خلصنا تسوقنا بدري و طلب سعود إنو يلعب..رحنا لجهة الألعاب،شحنا بطاقة و أقنعنا سعود إنو يدخل النطنيطة لإنو وقتها طويل و أنا أبغى أجلس شوية..جلست على الطاولة و خليت عربية خديجة جمبي و رتبت الأكياس و علي راح يشتري ذرة!! التفت أبغى أشوف علي بس ما جا..أكيد زحمة..إجازة!! خلص وقت اللعبة و بدأ عاد الرجال المسكين يحاول يخرج الأطفال..ما عدا سعود لإنو و قبل ما تولع اللمبة الحمرا كان متأهب إنو يخرج..ضحكت..من جد التاريخ يعيد نفسو..كنت ما أعاند في الألعاب و لا أسوي أي نوع من شقاوة الأطفال برة البيت.. جاني سعود:خلصت.. -حبيبي..البطاقة لسة مليانة..تبى تلعب تاني؟! -لأ..تعبت..أبغى أقعد عندك.."جلس"..فين بابا؟! -راح يشتري ذرة.. قال بنبرة غريبة:ماما أنا أبغى ألعب مع خديجة!! ابتسمت:أديها كم سنة و تجي تلعب معاك.. -بس أنا أكون سرت كبير؟! -لا ما تكون كبير مرة..يمكن تكون عشرة سنين..احدعش!! -كبير!! -بس لسة تلعب..يوه..أهو بابا جا.. حط علي أكواب الذرة على الطاولة و جلس:خلصت؟!،تدخل ثاني؟! سعود:لأ.. -ليش؟! جات عيني من غير قصد على حرمة كبيرة تكلم بنت صغيرة عن نفس اللعبة و فز قلبي..بسم الله..مين هدي؟!، كانت وحدة كبيرة..عمرها يجي خمسين سنة أو أكتر..كانت كاشفة وجهها الشي إلي خلاني ألاحظ بشكل مزعج..تفاصيل وجهها المألوفة عندي!! همس علي:جود جود!! التفت:نعم.. -طالعي في الحرمة إلي ماسكة بنت صغيرة تكلمها..نسخة منك..بس إنتي صغيرة و هيا كبيرة!! غمضت عيني..ما كنت محتاجة أحد يوافقني..التفت لجهة الحرمة و قلت و أنا أحاول ما أبين أي شي:لا تطالع فيها!! -بلا غباء..لو حطالع فيها بطريقة وسخة ما حقولك تشوفيها..بعدين لو مي كاشفة وجهها ما كان انتبهت!! سحبت نفس عشان أهدي قلبي..قلت:من جد تشبهني؟! -والله تشبهك.. سبحان الله في وجهها شي..موجود في وجهك!! سعود:يخلق من الشبه أربعين.."ابتسم"..صح ماما؟! ابتسمت:صح حبيبي!! علي بإصرار:هذا مو شبه..هذا دم!! سعود:وين دم؟! دم؟!، يمكن صح..إذا أنا لاحظت إنها تشبهني و علي لاحظ ليش ما يكون دم؟!، الحرمة دي يمكن تقربلي..يمكن تكون خالتي..بنت خالتي..بنت خالي..يمكن تكون.. أمي.. ايوة أمي..يمكن..يمكن أمي تابت و اهتدت..يمكن تكون زي ما هيا بس قاعدة تتمشى مع بنت أختها الصغيرة..يمكن تكون هدي الصغيرة حفيدتها و أنا خالتها..يمكن..يمكن ما تكون أي شي من إلي فكرت فيه.. يمكن بس..كان لازم أعرف من البداية..إنو أمي..وحدة من سكان هدي المدينة..قريبة مني أو بعيدة..أكيد إنو كان من الأفضل ليا إني ما أشوفها ولا تشوفني!! يمكن دي الطلعة كلها..اترتبت عشان أكتشف حقيقة إني بخير من غيرها..سواءً كانت ليا علاقة بدي الإنسانة أو مالي..أكيد..أكيد أنا بخير من غير أمي..لو كانت في وجهي..أو في وجه أولادي أو في وجه زوجي..ايش كان حيكون شكلي..ما كنت حقدر أبرها..أكيد..كل إلي فيه..من يوم ما انرميت على عمي و جدتي رضيعة أبكي لحد ما خرج سعود من اللعبة..أكيد..خير..أكيد!! صحيت من أفكاري و أنا في السيارة على صوت علي إلي قال بعطف:آسف.. -ها..؟؟!! ابتسم بحرج:ما كان قصدي أضايقك لمن قلت دم!! ابتسمت:لأ ما ضايقتني..و صح كلامك و لا مو صح..صدقني استفدت حاجة..عمري ما رح أنسى إنو كلمتك هيا السبب فيها!! -ايش؟! -ما رح أقولك!! -جووووود قولي لا.. ^^^^^^^^^^^^^^^^^^^^^^^^^^^^^^^^^ جرة،،، أسندت جود رأسها و أغمضت عينيها، قال علي:جوووود... ابتسمت و هي لا تزال مغمضة العينين:أحبك.. -نعم؟! -بس..أحبك..هدا هوا الشي إلي اكتشفتو.. -و دوبك عرفتي؟! -هههه..أكيد لأ..بس.. -بس ايش؟! لم تجبه، و لم تشعر بأي شيء إلا بيده الدافئة و هي تضغط على يدها بشدة، كانت دمعة يتيمة واحدة تلك التي تسللت لخارج عينها اليمنى..رفعت يمناها، فأوقفتها، شعر بها علي فابتسم..عليه الليلة أن يحاول جاهداً لمحو ما حصل اليوم.. انتهتـ .. |
|
مررره نايييس هذي الرواية ..
تابعتها في منتدى الجيران من أول أسبوع نزلت فيه .. تسلم يدك حنوون :) |
شكلها حلوة الرواية لسه في بدايتها بس حبيت أشكرك معزوفة على التنزيل
|
اقتباس:
♪♪♪ يسللللمك ربي .. نوووو^_^ووورتي يا محاميتنا المستقبلية ^^ .. ♪♪♪ |
اقتباس:
♪♪♪ العفو حبيبتي .. نووو^_^ووورتي .. ♪♪♪ |
رد: بلا منطق ، للكاتبة : جرة ..
شكرا حبيبتي
رواية رائعه ومجهود اروع ووفقك الله |
| الساعة الآن 08:31 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية