في الصبح الساعه6ونص
" كانوا احمد وغنا اول من صحى .. عشان يستعدون للروحة المزرعه "
غنا : احمدو وناسه انتوا الي راح تطبخون مو علينا احنا يالحريم هذه المره ..
احمد : أي افا عليج .. وطبعا وبدون شك مافي مثل طبخنا ماتعرفون ولاراح تقدرون توصلون للفن الي احنا نتفننه في الطبخ
غنا فاتحه عيونها : لا انت لازم تدخل موسوعة غينيس كأكثر شاب يمدح نفسه في الكوره الارضيه
احمد : احم احم هذا المفروض .. المهم زيدي الاكواب والملاعق وكل شي ترا في ظيوف
غنا : اوكي .. لحضه احمد بروح انادي الخدامة تغسلهم ..
احمد : اوكي روحي طيران
" انضم معاهم يوسف وفهد "
يوسف : لا صاحي بدري احمدو ..صدق ان يعتمد عليك
احمد : افا عليك
فهد : نصيحه يوسف لا تمدحه
ضحك يوسف : صدقت والله
احمد : افا قالبين علي بقوه هاليومين .. بس عادي عادي غيرانين
ضحكوا يوسف وفهد على خفة دم احمد
احمد : لاتوقفون كذا روحو جهزوا معانا
فهد : ولا واثق يامر وينهي
احمد : يعني عشاني الصغير ( وحب يجننهم اكثر ) .. بس انتوا مثل ماتعرفون يعني بدون مبالغه مخي يوزن بلد
فهد: احمد كمل شغلك يكون احسن
يوسف : و غنا صحت بعد؟
احمد : اول وحده فرحانه هي
فهد : طيب قوم يوسف نطلع مستلزمات الشوي
" صحت بعدها ام فهد وبو فهد وتساعدوا كلهم للرحله "
-----------------------------
" اتصلوا فهد ويوسف بأصحابهم وعزموهم على العشا مع اهلهم .. "
---------
في المزرعه
كانت فاضيه طبعا احمد طلب من كل العاملين فيها ياخذون اجازه عشان ياخذون راحتهم
غنا : الله ونااااسه منزمان عنها ..
احمد : ترا غنا مافي سباحه ماراح نشغل المسبح
غنا : ياسلااااام مو بكيفك
احمد : لا مافي اخاف تغرقين
غنا : مالت عليك اغرق شايفني بيبي
احمد : بس الشباب البنات لا مايعرفون يسبحون
"فهد ويوسف من بعيد "
فهد : شوف غنا معصبه على احمد وهو يضحك اكيد يطفرها
ضحك يوسف عليهم : تعودنا عليهم .. " وسرح في غنا وحركاتها "
فهد : يوسف يوسف .. وين رحت ؟!!
يوسف : لا معاك مارحت مكان
فهد : طيب قوم نشوف المزرعه كيف صارت بعد التعديلات
غنا من بعيد : فههههههد يوسسسف استنوني بجي معاكم
" الا بوصول عمتهم هناء "
هناء : مرحبا
احمد وغنا : هلا والله بعمتي .. " سلمت غنا على عمتها وعلى طول اخذت منها عبدالله << سمته عبدالله على اسم اخوها ابو غنا "
فهد ليوسف : قوم نسلم على عمتي بالاول
" لما راحت تسلم هناء على ام فهد سلمت عليها لكن من غير نفس وهذا الشي ضايق الكل .. بس هناء طنشت وخلت الوضع كأنه طبيعي وجلست مع ام فهد وسولفت عادي "
هناء : خلونا نجلس نفطر انا وصيت احمد ان الفطور علي
فهد : وانا اقول غريبه احمد نسى الفطور الي اعرفه مايفوته شي
احمد : كنت متفق مع عمتي من قبل حتى غنا عارفه
بوفهد : ووين بوعبدالله
هناء : اوف نسيته قالي سوي لي طريق
احمد : الله يهداج احد ينسى زوجه
هناء : شفتكم ونسيت
احمد : حريم مايقدرون يفكرون في شيين مع بعض
ضربت هناء احمد على راسه : انا عمتك يلي ماتستحي تقول كذا
احمد حاط ايده على راسه : بل يعني ما امون علي عمتي .. اسف توبه .. والله ظربتج موهينه
بوفهد : ههههه احمدو بولسان اسكت عن عمتك و روح ناد بوعبدالله
" وجلسوا الحريم يجهزون الفطور .. "
--------------------------------
بعد الفطور
غنا : عمتي ماجوا بنات اخو زوجج
هناء : اعتذروا عشان زواج بنت خالتهم
غنا : اها
هناء : بس يمكن يجون بكرا
غنا : على راحتهم ..
ام فهد : غنا قومي قولي ليوسف ينزل شنطتي من السياره نسيتها .
غنا : ان شاء الله يمه
" استحت غنا تناديهم .. وكانت السياره مفتوحه فراحت هي بنفسها تجيبها من السياره .. وجلست تلعب بالسكان .. وشافها يوسف "
نزلت غنا بعد ماحوست السياره وهي تغني
ضحك يوسف عليها : اقول غنا تصلحين تصيرين مطربه
شهقت غنا : سمعتني ؟!انت من متى هنا ؟ .. ترا ماسويت شي بس اجرب
يوسف : تبين تجربين تسوقين جد ؟
غنا انبسطت : اقدر؟
يوسف : روحي ودي الشنطة وتعالي
" راحت غنا تركض ودت الشنطه ورجعت على طول "
ام فهد : شنو فيها هذه طايره
هناء : شوفي شنو عندها
ام فهد : مافيها ثقل
هناء : خليها تعيش حياتها .. وبعدين ماسوت شي فيه خفه كل البنات كذا
ام فهد : تصرفاتها طايشه ياليت تخفف منها شوي
هناء : لاتخافين على غنا .. بنت ذكيه وواعيه
ام فهد : بس الي يشوفها ماراح يصدق انها بتدخل قسم الطب
هناء : خليها بحالها يا ام فهد " وغيرت الموضوع على طول "
---------------------------
يوسف : غنا شوي شوي لاتضغطين على البنزين كله
غنا :ولو ضغطت شنو يصير ؟
يوسف : راح تطير السياره وتظرب فينا
غنا : شدعوه للدرجه هذه
يوسف : أي للدرجه هذه
غنا : خلاص بالخفيف ولايهمك
" لكن غنا ماقدرت تدوس عليه بالخفيف ومن خوفها صرخت .. لكن يوسف مسك البريك "
يوسف :بسم الله غنا مو كذا ماقلت لج شوي شوي .. وبعدين كل هذا خوف بطيتي طبلة اذني بصرختج
غنا : انتوا كيف تسوقون .. اموت وافهم .. الحمدلله مانسوق
يوسف : بطلتي ماتبين؟
غنا : الا ما راح استسلم
يوسف : طيب خلينا نتبادل وشوفيني كيف اضغط عليه
" تبادلوا الاماكن .. وكانت غنا تشوف الزرع بدل ماتشوف يوسف يسوق .. وقف يوسف "
يوسف : اقول غنا الشرهه علي انا الي عطيتج وجه
غنا : ها سوري يوسف بس لفت نظري شكل الملفوف صاير منظره حلو من بعيد وهو بالترتيب هذا
" نزلت غنا بعد ماوقف يوسف بثواني .. لكن يوسف بقى بسياره "
يوسف : وين رايحه
" راحت غنا فتحت باب يوسف وسحبته من ايده .. وتفاجئ يوسف من حركة غنا "
غنا : تعال معاي اخاف اروح لحالي
يوسف : وين ؟
غنا : ابي اشوف الملفوف وخلينا ناخذ منه للسلطة عشان الغدا
يوسف : طيب انتي لاتجين تشيلينه بعدين يأذيك التراب ولانسيتي ان عندك حساسيه منه
غنا : لا ماعندي بس لما كنت صغيره الحين بطلت مافيني
يوسف : لاتعاندين انا بقطعها اوكي
غنا : اوكي على امرك سيد يوسف
" جلست غنا تراقب يوسف .. وهي مبسوطه كثير من يوسف وتغيره الكامل .. "
يوسف : شوفي شنو صار فيني غبرت كلي
غنا : قلت لك خلني انا بس انت الي مارضيت
يوسف : ياسلام عليج اخلي بنت تقوم بهذا وانا موجود
غنا : خلاص الحين انتوا راح تدخلون المسبح
يوسف : يلا خلينا نرجع
" يوسف كان مبسوط من داخله ونفس الوقت متضايق وحاس ان ماله امل غنا تتقبل مشاعره في يوم من الايام خصوصا انها تتعامل معاه مثل اخوها وموحاسه بمشاعره الي تزيد يوم عن يوم .. والاكثر من كذا لما يتذكر كيف غنا كانت تتكلم مع طلال وكيف تتكلم معاه يعرف ان غنا ماراح تعتبر يوسف غير اخو لها "
يوسف فجأه سأل غنا : غنا
غنا : نعم
يوسف : انتي تشوفيني مثل احمد وفهد
غنا فهمته غلط وفكرت من سؤاله هذا ان هو خايف ان غنا بعدها في شي في قلبها عليه : صدقني يايوسف انك مثلهم ومعزتك من معزتهم وكلكم اشوفكم مثل اخواني حتى اني انسى احيانا اني مو اختكم بدم"
" مادرت غنا ان بهذا الرد حطمت يوسف اكثر واكثر .. بس يوسف سأل نفسه ؟؟ يعني انا شنو كنت اتوقع من غنا .. تحبني ؟ بعد كل الي سويته لها قبل ابيها تحبني .. والحين شنو ابي منها بعد ماشافتني مثل احمد وفهد "
غنا : يوسف فيك شي ؟
يوسف متضايق : لا وصلنا انزلي
فتحت غنا الباب ونزلت
غنا : ماراح تنزل
يوسف : رح انزل يلا اسبقيني انتي
احمد : وين كنتوا ؟ ليكون رحتوا تشوفون الزروع ؟
غنا : ايه لفت نظري شكل الملفوف مادري حبيت شكله
احمد : اول مره تشوفينه ؟
غنا : أي ماكنا نزرعه قبل
احمد : اجل ماشفتي شي طورناها كثير بعد مانسبح ونتغدى باخذج اوكي
غنا : ياحظكم لا عمتي ولا امي يبون يسبحون في البركه
احمد : الليله راح يكون معاج بنات راح نخلي المسبح كله تحت امرج شنو تبين بعد
غنا : فديييييييتك انا
احمد : احم احم .. يلا
----------------------------
في الليل بعد صلاة المغرب وصل فيصل مع اهله ( امه و اخوه اياد 19 سنة خواته مها 21 سنه و دانه 17 سنة .. وسلمان 7 سنوات )
" سلمو عليهم ودخلوا الحريم مجلس الحريم "
" غنا اول مره تشوف خوات فيصل وكانوا مثل فيصل اخلاق وطيبه ومرحين بذات مها وحسسوا غنا كأنهم يعرفونها منزمان .. عشان كذا تعودت عليهم من اول جلسه مع بعض "
مها : غنا تدرين كنت معاج في مدرسة الابتدائي بس يمكن ماتذكريني
غنا : انتي تذكريني ؟
مها : طبعا مو انتي كنتي من المتفوقات
غنا : اها .. طيب شرايكم نتمشى في المزرعه ؟
مها : ماتخوف بالوقت هذا ؟
غنا : لا الاناره بكل مكان .. بس في مكان الي فيه الزرع وماراح نروح هناك
مها : خلاص بنادي سلمان يجي معانا
غنا : خلاص ناديه
" كانوا راح يطلعون بس شافوا حريم جايين من بعيد "
غنا : خلونا ندخل الحين نستقبلهم وبعدين نروح نتمشى
" كانوا اهل ناصر ..(امه واخوه الكبير عبدالعزيز ومنى زوجة عبدالعزيز وريم) "
" وسلموا عليهم وجلسوا معاهم لكن ريم ماكانت جالسه مع البنات كانت جالسه جنب النافذه تدور على يوسف "
غنا : ريم ريم
ريم بدون نفس : نعم
غنا : ليش ماتجلسين معانا
ريم : مالي خلق احس راسي مصدع
غنا : تبين بندول ؟
ريم : لا راسي مصدع من ريحة المزرعه
مها : مافيها ريحه بس يمكن حاسة الشم عندج قويه توصل لعند البقر
ريم : شتقصدين ؟
مها : ما اقصد شي بس اقول ماشاء الله عليج الله انعم عليج بحاسة الشم .
غنا : خلاص براحتج ريم اذا خفيتي تقدرين تجين معانا
" فكرت ريم اذا طلعت معاهم يمكن تشوف يوسف ليش ماتطلع معاهم ؟ "
ريم : غنا غنا بجي معاكم
" طالعوا البنات بعض مستغربين "
غنا : يلا تعالي
" شافت ريم يوسف مع اخوها ناصر رايحين بأتجاه سيارة يوسف ,, فوقفت تراقبه "
غنا : ريم بتبقين كذا واقفه ؟!! تعالي نمشي
ريم : لا بطلت اجي بنتظركم هنا
غنا : طيب ادخلي مو حلوه توقفين هنا والشباب رايحين جايين
ريم : انتي مالج دخل روحي لصديقاتج
غنا : كيفج
" راحت غنا لعند مها ودانه وكملوا طريقهم "
مها : ترى هذه ريمو ما ارتحت لها
غنا : يمكن مو متعوده على هذه الاجواء او مو بسهوله تحب تتكلم مع ناس اول مره تلتقي فيهم .. كل شخص وحسب بيئته وطبيعته .
مها : على قولتج
دانه : لالا ريم معاي بالمدرسة .. هذه ماحد يتحملها شايفه نفسها ولسانها طويل متبري منها وماتنطق بغير الشر .
مها : لاتقولين هذه مالت عليها بس
غنا : اهم شي مانسوي معاها مشكله وهي بكيفها .
دانه : كانت مسافره برا على ما اعتقد مو منزمان جايه
غنا : ايه صح اخوها صديق يوسف وصارت له المسكين سالفه هناك
مها : شنو ..
" خبرتهم غنا بالقصة الي صارت لهم .. وتأثروا مها ودانه "
مها : ليش اجل اخته كذا غير
غنا : مادري الاصابع مو سوى
مها : على قولتج .
غنا : خلونا نرجع عشان العشا .. واساعد امي وعمتي
مها : وانا ودانه معاج
غنا : يلا نرجع
" كانت ريم بعدها واقفه وتلعب بالجوال وكل ماطلع يوسف تراقبه "
مها : شعندها هذه للحين واقفه
غنا : خليها لاتكلمينها ماعليج منها
ريم : رجعتوا
غنا : أي عشان نساعد امي وعمتي عشان العشا .. تجين معانا ؟
ريم :هه انا ؟!! لا هذه الاشياء مو لي ماتعودت عليها اسفه كان ودي بس مثل ماقلت لج ماتعودت
مها : هذه صفات البنت الي راح تكون فاشله في حياتها
ريم : من انتي حتى تحددين .. روحي بس ماناقصني الا نصايحج
دانه تهمس لمها : مها اتركيها وفكينا من شرها
غنا : براحتج .. ماحد قال غصب يلا قوموا معاي
" وحطوا العشا وكلهم تساعدو مع بعض وكانو كلهم يسولفون مع بعض ويضحكون ومبسوطين ماعدا ريم الي بس وجالسه وتتمسخر "
مها : ترا شكلي بقوم اذبحها انا ما اقدر امسك نفسي
غنا : يامها عشاني ماعليك منها خليها تاكل في نفسها
مها : طالما هي ماتحب كذا ليش جايه ؟
غنا : خلاص خليها بحالها .. خلينا كذا حلوين مع بعض وهي تجلس وتقول مثل ماتبي
مها : طيب طيب بحاول
--------------------------------
" كانوا الشباب يلعبون الكوره الطائره لعبة يوسف وفهد المفضله ومقسومين فريقين .. واتفقوا ان الفريق الي خاسر الغدا بكرا اهما الي يطبخونه "
(يوسف واحمد وعبدالعزيز بفريق ... وفهد وفيصل واياد في فريق )
" طلعوا البنات برا يراقبونهم من بعيد "
مها : غنا انتي مع أي فريق
غنا : امممم مع الاثنين
مها : انا مه فريق فيصل لان اخواني مع بعض هههههه
غنا : وانتي ريم
ريم : فريق يوسف
مها : مو اخوج هذا الي الي مع اخوان غنا ؟
ريم: ضروري اقول فريق عبدالعزيز كلهم مع بعض
دانه : مها ماتقصد
ريم : اسكتي انتي ماحد كلمك ..
مها : سكتي عنها العاقل من عقل لسانه والجاهل من جهل قدره وهي تشوف قدرها اكبر من حجمه
غنا تهمس لمها : بليز مها عشاني لاتردين عليها بليز
ريم : هي انتي غنا اذا مو عاجبج ادخلي داخل
غنا : ريم انتي شقد تحبين المشاكل اذا في مجال توصفين ؟
ريم : تبين اكون صريحه معاج .. انتوا مادخلتوا لي من زور
غنا : وليش واقفه معانا ؟؟ ممكن افهم او حابه تتسلين بالخناقات ؟
ريم : انا مو طالعه عشانج .. عشان " واشرت على يوسف بس كان يتحرك ولما التفتت غنا كانت تأشر على ناصر الي كان جالس ويراقب "
غنا : هذا ناصر مو ؟ عشانه طالعه
ضحكت ريم بصوت عالي : بريـــــــــئه
هزت غنا مستنكره ضحكة ريم الجريئة وايل كان صوت عالي
ريم : لاحياتي مو ناصر ولا عبدالعزيز والحين اسكتي خليني اراقبه
كانت مها راح تتكلم بس غنا اشرت عليها تسكت
" كانوا الشباب يلعبون ومتحمسين .. ومن كثر الحماس كان يوسف يركض وضربت رجله بحصا وطاح على ركبته "
صرخت ريم وغنا بنفس الوقت
ريم : لااااااا ماصارت الطيحه الا لك الا انت يايوسف
استغربوا البنات من ريم وتصرفاتها الوقحه
" راحت غنا تركض تجيب الاسعافات الاوليه الي دايما تكون حريصه عليها في مثل هذه الاماكن "
واتصلت بأحمد وقالت له جيب يوسف جنب سيارته انا بوقف هناك معاي علبة الاسعافات الاوليه
احمد : كفوو غنوءه فديت الي يفهمون خلاص تعالي
" وفعلا احمد قال ليوسف ويوسف كان معاند ويقول شوي واخف ماله داعي ضمادات وغيره بس احمد مافي اعند منه :d) واصر عليه وبذات لما قال احمد غنا ماراح ترتاح الا لما تحط الضمادات "
غنا : يوسف تعورت ؟
يوسف : والله ماله داعي مافيني شي ترا جسمي رياضي اتحمل
غنا : ليش العناد كلها لفه بسيطه وبعدين انت تنزف
احمد : ماعليج منه بس لفيها له .. انا بروح اقول لشباب يوقفون اللعب
" كانت ريم واقفه وهي ميته قهر وتقول ياليتني بدالج ياغنا "
غنا : يوسف رجلك مرضوضة الافضل انك ماتلعب الحين
يوسف : لا شدعوه بعدين احنا متفقين الفريق الخاسر هو الي يطبخ الغدا بكرا
غنا : خلاص اعلن خسارتك .. انا ابي اكل من طبخك .
" يوسف نقطة ضعفه غنا ومايبي يرفض لها أي طلب "
يوسف : بس تبينهم يقولون علي ظعيف وين راحت قوتي ولا تنسين اني ارفع حديد يعني المفروض اني ما استسلم
غنا : ماراح يفكرون كذا .. بليز عشان اختك الصغيرونه
يوسف ( عشانج ياغنا مستعد اسوي كل شي بس لاتقولين هالكلمة تذبحني )
غنا : يلا خلصنا .. بس ها مثل ما اتفقنا اوكي
يوسف : اوكي شنو نسوي بعد
ابتسمت غنا
" سرح يوسف في غنا وابتسامتها .. الي خلت غنا ترتبك شوي "
غنا : يلا انا بروح للبنات
يوسف انتبه لنفسه وانحرج : اوكي
ريم : غنا شلون يوسف الحين
غنا مستغربه من ريم وكيف كذا كهتمه بيوسف : يوسف بخير
تنهدت ريم بارتياح : اشوى خفت كسر ولا شي
غنا وعلامة التعجب مرسومه في ملامحها
حست ريم : ترى اسأل عادي لايروح فكرج بعيد بس يوسف لما كنا صغار على طول يجي بيتنا وانا كنت العب معاه <<< تكذب :d كان يظربها ومايبيها تلعب معاه .
غنا : طيب عن اذنج بروح اجلس مع مها ودانه واذا تبين تجين حياج
ريم : بسألج
غنا : شنو ؟
ريم : الي سمعته صحيح ؟
غنا : وانتي شنو سامعه ؟
ريم: عمي بوفهد مو ابوج الحقيقي ؟
غنا : ايه هو عمي اخو بابا على طول بس انا تربيت عندهم ومثل بنتهم بالظبط
ريم : انج تكونين بنتهم بدم هذا شي وانج تكونين اختهم بالاسم هذا شي ثاني
غنا : انتي شنو تبين توصلين له بالظبط
ريم: مامره سألتي نفسج انتي شنو تعنين لهم يمكن اهم مايشوفنج مثل اختهم .. بس مايبون يجرحون مشاعرج فأنتبهي شوي على تصرفات جمعاهم
غنا عصبت : انتي مالج دخل هذه حياتي انا وبعدين انا الي اعرفهم زين واحد واحد وشنو اعني لهم .
ريم : بل الي يقول الحقيقة كذا يجيه
غنا : خلي حقايقج لج
" ريم جرحت غنا في الصميم .. رغم ان الكلام مامهما بس كانت تقول اذا هي تنظر لي كذا فمكن حتى الناس يشوفوني مثل ماهي قالت "
راحت تمشي لحالها جنب زروعات الملفوف وهي تبكي <<< حبت هذا المكان
-----------------------

مها : دانه وين راحت غنا تأخرت
دانه : ممكن بعدها ماخلصت من ضمادات يوسف .
الا بدخلة ريم وراحت جلست جنب امها وقالت لام فهد وهي تتصنع الدلع : خالتي ام فهد
ام فهد : هلا بنتي
ريم : ممكن اسألج عن شي
ام فهد : أي قولي
ريم : هذه الي اسمها غنا مو بنتج صح
ام فهد : صح هي بنت اخو زوجي وانا الي ربيتها .
ريم : اها فكرتها جد بنتج خصوصا انها داقه الميانه مع اعيالج
ام فهد فهمت قصد ريم : أي اهي تربت معاهم واهي مثل اختهم يحبونها ويخافون عليها
ريم : حتى يوسف؟
ام فهد استغربت من سؤالها : أي حتى يوسف
ريم : أي صحيح حتى المسكين قبل شوي انصابت رجله وغنا ضمدتها له
ام فهد خافت : ولدي صار له شي ؟
ريم : لالا الحين راح مع الشباب
مها : غنا وينها ؟
ريم : مادري عنها .
" طلعت مها تدور عليها "
" كانت غنا جالسه على العربه الي يجمعون فيها الملفوف وتفكر وكانت غنا اذا سرحت تحرك الاسواره الي بأيدها وبدون ما تنتبه طاحت من يدها والي نساها اياها صوت مها "
مها : غنا انتي وينج وليش قاعده لحالج مليتي منا
غنا : لا افا انا امل منكم بالعكس ..
مها : اكيد ريمو ضايقتج
غنا : كلامها مايهمني خلينا نرجع
-------------------------------
" بعد ماجلسوا البنات وسولفو وانبسطوا كل وحده راحت تنام .. البنات بغرفه ماعدا ريم الي تبي تنام لحالها .. والحريم بالغرفه الثانيه "
" كانت غنا متعوده تحط الاسواره اذا جات تنام تحت المخده ولما تحسست ايدها وماشافتها شهقت و فزعت من مكانها "
مها وهي بين النايمه والصاحيه : غنا فيج شي ؟
غنا : ها لالا كابوس اعوذ بالله نامي نامي انا برجع انام
" وبعد 5 دقايق ولما تأكدت ان مها كانت نايمه طلعت غنا تدور على الاسواره "
-------------
عند الشباب الكل كان نايم ماعدا يوسف وناصر
ناصر : يوسف فيك نوم ؟
يوسف : لا والله
ناصر : قوم نتمشى ونخلي الشباب ينامون لانزعجهم
يوسف : وين تحب نجلس ؟
ناصر : انت ادري
يوسف تذكر المكان الي فضلته غنا : قوم نروح جنب الملفوف
استغرب ناصر : الملفوف وشنو عجبك في المكان هذا ؟
يوسف : مادري حبيته
ناصر : قوم نروح هناك
" كانت غنا تدور على الاسواره في الضلام وماكان ينورالمكان غير موبايلها "
غنا : ياربي هذه وين راحت
" كانت في حفره كبيره جنب العربه الي كانت جالسه عليها غنا بس غنا ما انتبهت فيها .. قربت غنا لمكان العربه وجلست تدور فيها وشافت الاسواره طايحه جنبها وهي بترفع الاسواره عن الارض شافت حشره كبيره ومن خوفها منها رجعت على ورى وطاحت في الحفره وظرب راسها في العربه قبل لاتطيح الي خلاها على طول من بعد ماصرخت يغمى عليها "
يوسف : كأني سمعت صوت صراخ
ناصر : أي حتى انا كأني سمعت
" جلسوا يدورون مصدر الصوت هنا او هنا بس مالقوا شي "
ناصر : يمكن يتهيء لنا ؟
يوسف : انا وانت مع بعض ؟
ناصر : يمكن مو صوت صراخ
يوسف : لا لا الصوت صوت صراخ انا متأكد اخاف صار لاحد شي
ناصر : لا وين يصير شي الكل نايم
يوسف : مو متطمن بروح ادور
ناصر : انا تعبت بجلس هنا ( كان يقصد العربه ) وانتبه للحفره
ناصر : اقول يوسف ترا هذه الحفره خطره لازم تسكرونها مايصير كذا تتركونها
يوسف : تصدق مثل ماقلت يتهيء لنا او صوت ثاني .. أي حفره ؟
ناصر : تعال شوفها
" راح يوسف يتفقد الحفره وما انتبه لغنا بس الي لفت نظره لمعة الاسواره لان غنا كانت لابسه عبايه والحفره كبيره فما كانت تبين في الضلام "
يوسف : جد خطره بس في شي طايح فيها عطني هذا ( كان يقصد المجراف عشان زراعة البذور )
ناصر : اتركه خله يولي
يوسف : لا خلينا نشوف
ناصر : شوف
" اخذ يوسف المجرفه وحطها في الحفره بخفيف عشان يسحب السواره ومعه سحبه للاسواره كانت غنا شاده عليها فبانت يدها .. نقز يوسف من مكانه "
يوسف مرعوب وماحب يبين لناصر خاف تكون اخته ويخوفه
"دقق يوسف في الاسواره وتذكر ان هذه الاسواره شايفها مره وبالظبط كانت لغنا "
يوسف كان قلبه شوي ويوقف ونادى : غناااااا غنااااااا
ناصر : شفيك يوسف ليش تنادي على غنا ؟
يوسف والعرق ينزل من جبينه وحاس جسمه مو قادر يحمله من خوفه على غنا : ناصر بسرعه ساعدني عشان اطلعها بسرعه "نسى في لحضه ان ناصر عاجز عن الحركه بسرعه "
لكن ناصر بعد مافهم ليش نادى يوسف على غنا والحين طلب مساعدته.. شد على نفس وراح يساعد يوسف لحد ماطلعوها وكان الدم مغطي وجهها
يوسف ماقدر يتحمل غنا بهالمنظر فشالها عن الارض وراح يركض فيها السياره والخوف عليها يتملكه "
ناصر : اجي معاك ؟
يوسف : لا مايحتاج ولاتخبر احد في الوقت الحالي
ناصر : طمني اذا وصلت اوكي
---------------
" كان يوسف يسرع بأقصى ماعنده "
يوسف والخوف يتملكه : غنا غنا حياتي تسمعيني ؟!! غنا ردي علي تسمعيني
( لكن غنا ماردت عليه )
" استوقفه لمرور لسرعته "
يوسف : عندي مصابه بليز اتركني
شرطي المرور : بسجل عليك مخالفه مايصير تسوي لنا حوادث
" طلع يوسف 300 ريال ورماهم في وجه الشرطي ومشا ولا اهتم بالعواقب "
" واخيرا وصلوا المستشفى ودخلها قسم الطوارئ "
يوسف لدكتور : بليز دكتور طمني غنا فيها شي ؟
الدكتور : تطمن مافيها شي بس بسبب الظربه الي براسها اغمى عليها .. والجرح مو كبيركثير بس نزفت شويه ويحتاج لخياطه بسيطه بس لاتخاف ..
يوسف : اقدر اشوفها ؟؟
الدكتور : أي تقدر هي الحين نايمه من اثر المسكن بس وركبنا لها مغذي عشان النزيف ساعه وتقدر تاخذها .
يوسف : شكرا دكتور .
الدكتور : انت زوجها ؟
يوسف : لالا انا انا اخوها
الدكتور : الله يخليها لك يلا تفضل
" دخل يوسف وشاف غنا نايمه ووجهها اصفر وشاحب .. جلس جنبها ومسح على راسها .. وصار يراق ملامحها "
انتبهت غنا ليوسف وبصوت ضعيف : يوسف
يوسف رفع ايده بسرعه : ماتشوفين شر ..
شافت غنا الخوف في عيون يوسف وحبت تطمنه : انا وين ؟
يوسف : انتي بالمستشفى
غنا : ليش ؟
يوسف: هذا الي ابي افهمه انتي شلون طحتي في الحفره ؟
" تذكرت غنا الي صار "
رفعت غنا الاسواره : عشان هذه
يوسف : لدرجه هذه غاليه عليج
غنا : لاتنسى انها من جدتي
يوسف : خوفتيني عليج كثير .. ماتدرين لو صار فيج شي شنو ممكن يصير فيني
غنا : اسفه
يوسف: اششششش ماقلت كذا عشان تعتذرين بس عشان ابين لج غلاتج
غنا : الحين الي هناك راح يدورون علي
يوسف : كلهم نايمين وانتي بعد ساعه راح تطلعين
غنا : الحين مافيني شي خلنا نمشي
يوسف: لا بعد مايقول الدكتور
غنا : ماعليك منهم يبالغون ترى جد مافيني شي
يوسف : قلت لا يعني لا
غنا : طيب خلاص
" سكتت شوي والتفتت على يوسف "
غنا : يوسف لو مو انت كان يمكن صار فيني شي الحين
يوسف : خلاص انسي الي صار اهم شي انج بخير

" بعد ساعه رجعوا المزرعه وكان ناصر ينتظرهم "
يوسف : ادخلي انتي ياغنا
ناصر : طمني ان شاء الله بخير
يوسف : الحمدلله ..
ناصر : قوم ندخل ننام
يوسف : لا انت ادخل نام انا ابي اجلس لحالي شوي
ناصر : صار شي ؟
يوسف : لا ماصار شي بس حاب شوي اجلس لحالي
ناصر : اوكي تصبح على خير
----------------------------
في بيت ام بدر
كان بدر صاحي ويفكر في غنا وحسها انها قريبه منه خصوصا ان شاف غنا دخلت عند عمه في المستشفى .. اذا كانت غنا بنت عمه ليش تخبي امه عليه ومنو هذه غنا الي حتى هو لاحظ الشبه بينهم
" صحت ام بدر عشان تروح تتاكد اذا اخذ بدر دواه وشافته صاحي "
ام بدر : انت مانمت ؟
بدر : لا يمه مانمت في شي منزمان كنت افكر فيه وابي اعرفه
ام بدر : شنو ؟
بدر : يمه البنت الي هذاك اليوم عطت الجوري حلاوة كانت عند ابوي وانتوا دخلتوا وراها وبعدين هي طلعت وراكم وجات للجوري وحتى اعتذرت مني .. بس الي فهمته انه هي في بالها ان انا المريض وهي ماعرفتكم منو انتوا ليش ؟
ام بدر : هذه اخت فهد
بدر : طيب وين المانع تقولون لي ؟ وليش خبيتوا عليها ؟
ام بدر: بصراحه عمك مايبي عيال عمك يدرون عن زواجه فيني
بدر : اها عشان كذا خبيتوا عليها وانا ؟
ام بدر : انت كان ممكن تعرفها على نفسك لو عرفت انها بنت عمك
بدر : بس انا تقابلت معاها وكان ممكن اخبرها يعني لو مو بالصدفه ماتكلمت يمكن تكلمت
ام بدر : هذا قدرة رب العالمين الي خلاها ماتعرف
بدر : يعني طلعت بنت عمي وماعرفتها ولا حتى سلمت عليها
ام بدر : في الوقت المناسب راح تسلم عليها وتتعرف على عيال عمك الباقي احمد ويوسف
بدر : بعد عندهم احمد ويوسف ؟
ام بدر : ايه .. بس بدر ابيك توعدني انك ماتتصل فيهم في أي حال من الاحوال
بدر :يمه بس غنا حستها قريبه لي كثير ماعرف ليش وغير كذا تشبهني
أم بدر : يمكن عشانها كانت حنونه مع اختك ومعاك
بدر : يمكن ..
ام بدر : اخذت دواك ؟
بدر : أي اخذته
ام بدر : يلا روح نام
-----------------------------
في صبح اليوم الثاني
طلعوا اهل ناصر اول شي مع ان يوسف حاول فيهم يجلسون بس ام عبدالعزيز كانت تبي تروح البيت عشان تستعد للناس بيجونها ظيوف
ناصر : ان شاء الله انبسطتوا يمه
ام عبدالعزيز : أي والله وناسه ولو ان ام فهد من النوع الي مايسولف وماتتكلم كثير بس ام فيصل وهناء بالعكس الجلسه معاهم حلوه كثير
ريم : أي انبسطنا مافي أي وناسه بذات هذه غنا مسويه فيها مثاليه مالت عليها
منى : بالعكس خوش بنت تهب لانا كثير عجبتني حسيتها بنت ذكيه .. وحركه تساعد امها وتهتم فيها رغم انها مو امها الحقيقيه
تذكر ناصر الي صار فيها امس : غنا الي اهي بنت عم يوسف صح
ريم : ايه ماغيرها
ناصر : المسكينه امس طاحت في حفره واغمى عليها بعد ماظرب راسها
ام عبالعزيز : لاتقول وعساها بخير
ريم : شفيج يمه نسيتي تونا شايفينها الصبح مافيها شي ياثقل دمها هي وصديقاتها ماحبيتهم
عبدالعزيز : تراج حشيتي فيهم لحد ماقلتي بس .. خلاص اسكتي
ريم : شفيكم علي انت ومرتك
ناصر: ريم اسكتي شي انتي ولا مره قلتي كلمه مثل الناس
ريم : شي واحد بس خلاني متحمله هالرحله
ناصر : طيب ممكن تكرمينا بسكوتج يكون احسن
ريم : اوووف الواحد ماياخذ راحته .. طيب عشان اسكت عطني موبايلك العب فيه شوي
" طبعا ريم اخذت الموبايل عشان تاخذ رقم يوسف "
-------------------------------
انتبه بو فهد على الضماد الي في راس غنا
بوفهد : غنوءه تعالي
غنا : هلا بابا
بوفهد : شنو هذا الي براسج ؟
حطت غنا ايدها على مكان الجرح : هذا ؟؟ لا مافي شي بس ظرب راسي بالمرجيحه وجرحني وغطيته
بوفهد : انتبهي يابنتي
غنا : ان شاء الله .. بابا تبيني اصب لك شاي ؟
بوفهد : أيه
" جا يوسف وكان توه صاحي من النوم وقرب لغنا "
يوسف : غنا كيفك الحين ؟
غنا : الحمدلله تمام التمام
يوسف : انتبهي لنفسج شكلنا المره الثانيه ماراح نجي هنا عشان مايصير الي صار اليوم
غنا : لا ان شاء الله ..
" احمد من بعيد ينادي يوسف " : يوسسسسف ترا اليوم الغدا انت الي بتسويه لانك انت الي خسرتنا كيفك
يوسف : شفتي ياغنا انتي السبب
ضحكت غنا : بس لاتفشلنا وتخربها
يوسف : الله يستر ترا اول مره
غنا : لحضه اكتب لك المقادير ..
يوسف : ليش انتي تعرفين ؟
غنا : لا ماعرف اسوي لاشخاص هالقد بس في مين يعرف هنا واحلى طبخ
يوسف : منو؟
غنا : عمتي هناء على طول تسوي لاهل زوجها .
يوسف : يلا بسرعه طيران جيبيه من عندها
" راحت غنا لعمتها هناء وطلبت منها المقادير وقالت لها خليه بيني وبينج وبين يوسف "
هناء : اقول غنا يوسف تغير معاج ؟
غنا : وين عمتي منزمان
هناء : غريبه كان اعند واحد بعد احمد طبعا
غنا : لا مو يوسف الي تعرفينه قبل .. المهم بعدين اجي خليني اروح اعطي يوسف المقادير
هناء ( يوسف يتغير وهو الي يتبع امه في كل شي غريبه اكيد في سبب غيره ).
" وفعلا اتقن يوسف الكبسه وكانت احلى مايكون .. "
احمد : قول الصج يسوف في احد عطاك المقادير
يوسف : في بالك بس انت الي تعرف
احمد : بس انت هذه اول مره تطبخ فيها
يوسف : فن يابو الفن
فيصل : انا اشهد ان يوسف احسن شيف طاح سوقك احمدو
احمد : لالا انا متأكد ان يوسف اخذ المقادير من احد
فهد : الاخ احمد غيران
بوفهد : تعالوا ياشباب اجلسوا معانا واشربوا الشاي
" بعد ماتغدوا وصار العصر الكل رجع للبيت "
-------------------------------
" كان يوسف تعبان لانه مانام زين واول ماوصل رمى بنفسه على السرير وبس غطت عينه لثانيه .. سمع صوت رنة موبايله تنبهه بمسج .... كان المسج من ريم ( ماتشوف شر .. لما شفتك طحت خفت عليك سلامات .. ريم )... استنكر يوسف حركة ريم وبدل ما اثرت فيه صار العكس مسح المسج على طول ( انا من انتي صغيره كنتي مثل العضم ببلعومي بعد هذه الحركات اووووف .. ورجع نام "
----------------------------
بعد يومين
"اتصلت ام هبه بأم فهد وعطتهم الموافقه .. كانت غنا جالسه جنب ام فهد وسمعتها وهي تكلم ام هبه وبعد ماقفلت "
زغرطت ام فهد
ابتسمت غنا : ياليت اعرف ازغرط كان زغرطت
ام فهد : اروح ابشر فهد
" وخبرت فهد وابو فهد .. وحددو موعد الخطبه الرسميه وبعد الخطبة الرسمية حددوا الملكه وكان كل شي سريع الي خلا فهد مايكون مرتاح كثير لهذا الزواج بس توكل على الله .. "
" في الملكه ماكان فهد يقدر يتصل بهبه بأي شكل من الاشكال لان اهلها كانوا يرفضون لحد ماتتزوج .. هذا الشي خلا فهد يتخوف شوي لان حاب يعرفها قبل الزواج وماتفاجئ فيها "
----------------------
غنا : فهد ليش ماحسك فرحان ؟
فهد : لا مو زعلان عادي بس تعرفين هذه حياة بعيش معاها طول عمري .. لازم احاتي شوي خصوصا اني ماعرف عنها شي
غنا : معاك حق .. بس انت تطمن يعني حتى لو هبه مثلا ماكانت مثل ما انت تبي او في شي ماعجبك فيها انت تقدر تغيره .. الا الجمال طبعا بس تراها تجنن وانت شفتها بالصوره
فهد : انا اصلا مهتم بأخلاقها اكثر ..
غنا : لا ان شاء الله انت خلك متطمن ولا تحاتي والي اعرفه ان شخصيتك قويه وتقدر تدير كل امورك بسهوله
فهد : الله يسمع منج
غنا : بلبس فستان ماحد لبس مثله في زواجك
فهد : اكيد تبينهم يقولون اخت المعرس لبسها مو حلو
غنا : افا عليك اكيد لا
فهد : طيب انتي مافصلتي لحد الحين صح امي اليوم قالت لي
غنا : لا تطمن كل شي جاهز كنت ادور على موديل وانت زواجك بعد 3 اسابيع يمديه وبعدين ترا الي تخيطه ام صديقتي
فهد : حتى بالخياطه واسطه
غنا : افا عليك
-------------------------
" طلب يوسف من غنا تعطيه جهازها لان جهازه عطلان ... وكان المسن حقها يفتح تلقائي بمجرد ماتدخل ولسوء الحظ ان طلال كان جالس على المسن .. وعلى طول كتب ..
غنا واخيراااا شبكتي كنت منزمان انتظرج .. ( كان كاتب النك نيم طلال )"
يوسف : هذا اكيد طلال ولد خالتها ماغيره .. ياليت يبتعد عن غنا ويفهم ان غنا مو له ( ومارد عليه
رجع طلال وكتب : غنا لاتقولين لي انج ماتتبعدين عني انتي ماتردين على مكالماتي ولا حتى المسجات ..
ويوسف بعده مايرد ويبي يشوف شنوا خر هذا الكلام
طلال : طيب غنا على راحتج الظاهر نسيتي وعدج لي انج راح تعطيني فرصة .. ورفضتي مشاعري قبل لاتعطيني فرصه ..
يوسف ( تعطيه فرصه ؟؟!! غنا قالت راح تعطي طلال فرصه يعني غنا مارفضته على طول قالت له راح تعطي حالها فرصه يعني في امل ان يوم من الايام .... لالااااااا )
" قفل الجهاز بعصبيه وحط راسه على الطاوله تصور كيف ممكن تروح منه غنا يقدر يتصورها مع غيره .. يقدر يشوف غنا تحب احد غيره يقدر يتحمل كذا ؟؟ !! ... راح واول ماشاف غنا بوجهه عصب وهو يتصور انها ممكن يوم من الايام تترك البيت وتروح حتى لايطاليا عشان منو ؟؟ عشان طلال ... "
يوسف من غير شعور : اخذي جهازج هذا خليه لج .. ولاتكذبين علي مره ثانيه فهمتي ( كان يقصد لما سألها اذا تحب طلال او لا وهي جاوبته بلا من غير ماتقصد انها تفهمه انه هي ماتحبه عشانه هو )
غنا : يوسف صار شي ؟
" يوسف مارد وتركها وراح غرفته "
غنا ( يوسف فيه شي .. انا متأكده وهذا مو تقلب من يوسف او حاب يرجع مثل قبل بس انا حاسه ان يوسف فيه شي )
" راحت غرفتها وجلست على مكتبها تقرا كتاب بس فكرها ماكان مع الكتاب فكرها كان مع يوسف "

انتهى الفصل التاسع لما زعل غنا من كلام طلال لغنا في المسن من غير ماتعرف غنا "

كانت غنا تسأل نفسها : شنو صار بالظبط الي خلا يوسف يعصب وشنو يقصد لما قال اني كذبت عليه .. "
طلعت غنا من غرفتها وهي معصبه وعلى طول راحت غرفة يوسف .. وكان يوسف كعادته اذا زعل وعصب يمشي على جهاز المشي (السير ) وما انتبه لغنا
غنا : يوسف ممكن شوي
يوسف : لا ماتشوفيني مشغول ؟
راحت غنا سحبت السلك
تنرفز يوسف : بأي حق توقفين الجهاز
غنا : لما احد يطلب يكلمك المفروض ماترده
يوسف : وانا مابي اسمع .. كيفي والحين روحي يمكن في احد ينتظرج
غنا : يوسف ابي افهم شصار كان كل شي طبيعي ؟
يوسف : مافي شي بس خلاص مليت ابي ارجع يوسف الي قبل
انصدمت غنا وكانت فاتحه فمها وعيونها
يوسف : لاتستغربين " ورجع شغل الجهاز "
كانت غنا بعدها تطالع يوسف ومستنكره الي سواه ونزلت دموعها
" التفت عليها يوسف وشاف دموعها .. بس ثواني الا اختفت من قدامه .. "
يوسف : شسويت انا ؟!! " شدد قبضته وضرب الجهاز " وجلس على السرير وحط كفينه على راسه
( غنا ما اقدر اشوفج تروحين مني حتى لو كان الاحتمال 1% .. )
" يوسف كان متيقن ان كل هذه العصبيه هو احتمالية ان طلال في له فرصه اما هو حاس ان مافي مجال له "
-----------------------------------

" كانت غنا بغرفتها تفكر في كلام يوسف .. وكانت خايفه من الي راح يصير او يصدر من يوسف .. وكان اكثر شي تفكر فيه الي خلا يوسف فجأه يقلب عليها .. وشنو يقصد اني كذبت عليه .. ( لازم افهم بس بعد ما يهدأ ) قطع حبل افكارها صوت الموبايل وكان من ساره "
ساره : هلا غنوءه
غنا : اهلين بالقاطعه
ساره : دايما في البال بس كنت مشغوله مع امي
غنا : معذوره حبيبتي .. وكيفها خالتي ؟
ساره الحمدلله
.....
ساره : اتصلت عشان اسأل عن اخبارج
غنا : الحمدلله .. بما اني ماقدرت اتصل فيج قبل ماقدرت اقولج ان فهد ملك وزواجه بعد 3 اسابيع
( ساره تفاجئت كان الخبر عليها مو هين .. لدرجة ان هي تفاجئت من نفسها كيف تأثرت لما سمعت انه راح يتزوج )
غنا : سارونه فيج شي ؟
ساره : لا الف مبروك ..
غنا : طبعا انتي ماتحتاجين عزيمه ..
ساره : وفصلتي لج فستان ؟
غنا : أي بس باقي اكسسورات واشيا بسيطة .. تقدرين تجين معاي
ساره : اكيد ..
غنا : بمرج اليوم العصر اوكي
ساره : اوكي
" كانت ساره تقول بينها وبين نفسها : يعني شنو كنت متوقعه بالظبط هو حتى مايعرفني .. اكيد هذه مجرد فكره وبتعدي ياساره ..لاتفكرين كذا وانسي يمكن من كثر ماتكلمت غنا عنه رسمت حلم بقلم رصاص ينمحي بكل سهوله .. "
---------------------------
---------------------------
"طلعت غنا من غرفتها وبالصدفه هم كان يوسف طالع .. وماقدر يحط عينه بعينها .. وقفت شوي تطالعه بنظرات استنكار واستغراب ونزلت بسرعه "
يوسف :غ... ( لا انا لازم ما اكلمها وابتعد عنها قد ما اقدر )
" ولما نزل هم شافها .. صد عنها وطلع الحديقه "
انتبه احمد الي كان جالس جنب غنا
احمد : شفيه يوسف ؟
غنا : مادري ..
احمد : شكله زعلان عليج
غنا : يمكن .. بس اذا زعلان ماله داعي ماسويت شي
احمد حس ان حتى غنا فيها شي : لا انتوا فيكم شي .. تخانقتوا ؟
غنا : لاسوء فهم .. بس بالنسبه ليوسف اما انا فما فاهمه شي
احمد : انتي جالسه وتعطيني الغاز .. فهميني شنو صار ؟
غنا : ماصار شي يا احمد وخلنا من يوسف الحين .. وين بطاقات زواج فهد قالي انها كانت عندك بعد ماجبتها من المطبعه .
احمد : عطيتها امي ..
غنا: تمام خفت تنسى .
احمد : انسى .. صاحيه انتي انسى بطاقات زواج فهد
غنا : مادري خفت تنساها وماتعطيها ..
احمد : وشلت لك كم وحده عشان صاحباتج اعرف امي ماراح تعطيج
غنا : فدييييييتك انا .
احمد : ولاتنسين بيت خالتج لازم تقولين لهم .
غنا : اكيد
-----------------------------
في الصاله كان بو فهد جالس يقرا جريده وكان فهد جاي من برا سلم فهد عليه وجلس جنبه
بوفهد : والله وكبرت ياولدي وبتكون عايله
فهد : هذه هي الحياه
بوفهد : بتكبرني
فهد : هههههه .. الله يخليك لنا يبه وتزوج يوسف واحمد وغنا
بو فهد : شكلك تبي تقول شي
فهد : أي يبه
بوفهد : خير
فهد : يبه بدر والجوري
بوفهد : شفيهم
فهد لازم يحظرون زواجي
بوفهد : بس اذا جاو راح ينفضح كل شي
فهد : لا يبه انا بوصي فيصل على كل شي انت تطمن ..
بوفهد : ام بدر سهله هي والجوري لكن بدر شلون ؟
فهد : يبه انت ماتتمنى يحظرون ؟
بوفهد : اكيد .. بس بدر مايحب هذه الاماكن .. مشكلته دايما يخاف من نظرة الناس
فهد : انا بكلمه واذا رفض راح نخليه بالفندق مع السواق
بوفهد : خلاص انا بكلم ام بدر ..
فهد : طمنتني يبه
-------------------------------
انقضت الـ3 الاسابيع بسرعه .. والحال بين غنا ويوسف مثل ماهو مايكلمون بعض وبذات يوسف الي كان يتحاشى غنا والمكان الي تجلس فيه .. التهى بشغله وغنا بزواج فهد بين السواق والاستعدادت والترتيبات مع ام فهد .. وفهد كان مشغول بين شغله وزواجه
-------------------------------------
يوم زواج فهد
كان الكل مشغول في مكان .. غنا كانت في غرفتها تحط لها الكوافير مكياج وطلبت منها انه يكون ناااااااعم لان غنا يناسبها الناعم .. وكان فستانها ناعم وكلها طالعه ناعمه .. كانت قمه في الجمال ..
" طلعت غنا بعد ماخلصتها الكوافيره عشان تاخذ علبة الكسسوارات الي وصت احمد عليها وتركها في طاولة الصاله تحت ... كان يوسف داخل من برا وشاف غنا .. وانبهر فيها وفي جمالها الانوثي الي ابرزه جمال الفستان اكثر واكثر ويوسف اول مره يشوف غنا بالشكل هذا فأول ماشفاها وعشان غنا ماتنتبه فيه تخبا ورا الستاره للصاله الثانيه .. "
غنا سمعت الصوت : منو ؟؟ وخافت غنا يكون احد غير يوسف او احمد فراحت تركض ورجعت غرفتها
" طلع يوسف من ورا ستاره وهو سرحان في غنا .. وحس ان الشوق لها بيذبحه .. لان له 3 اسابيع مايكلمها او حتى يجلس بالمكان الي اهي جالسه فيه "

-----------------------
لما دخلت غنا غرفتها شافت ساره وجالسه معاها بنت بس في البدايه ماتعرفت عليها لانها كانت معطيتها ظهرها .. بس لما تعرفت عليها راحت تركض وحضنتها وحتى من الفرح ددمعت عيونها
مروى : لااا غنا اذا بتبكين برجع بتخربين مكياجج
غنا تمسح دموعها : ما اصدق انج جيتي .. احلى مفاجئه بس وين خالتي
مروى : امي ماجات ولا خالد .. عشان عنده كورس وامي جلست معاه
غنا : جيتي مع منو ؟
مروى : طلال .. ويسلم عليج وايد وايد
غنا : فرحتيني كثييييييير .. بس ليش بعدج مالبستي
مروى : وصلنا متاخر ..
غنا : يلا بسرعه البسي
مروى : انتي لاتنتظريني روحي وانا بجي بعدين مع طلال
غنا : لا ماراح اتركج
ساره : انا راح اجلس معاها بس انتي روحي لازم تكونين هناك مع ام فهد
مروى : ساره راح تجلس معاي خلاص انتي روحي
غنا : قلبي مايطاوعني
مروى : قلت لج خلاص بذبحج ترا
غنا : اوكي يلا انا بلبس عباتي وبطلع احمد ينتظرني
--------------------------------
" نزلت غنا .. وطلعت الحديقه تنتظر احمد يدخل السياره عشان تركب .. وكان يوسف واقف من بعيد وموطي راسه وصاير شكله كانه متضايق ويروح ويجي وهو متوتر .. حست فيه غنا ... كانت راح تروح وتشوف شفيه بس احمد دخل وناداها عشان تركب السياره وماراحت ليوسف "
احمد فتح النافذه ونادى يوسف
يوسف : هلا احمد
احمد : متى بتروح القاعه ؟
يوسف : مع فهد بعد شوي راح يجي لازم اكون معاه
احمد : ترا طلال بالمجلس روح اجلس معاه
يوسف ( طلال هنا ؟؟ .. ) ومن غير نفس : طيب
احمد : اوكي انا بوصل غنا وبرجع
----------------------
" بعد ماوصل احمد غنا رجع البيت وراح المجلس وشاف طلال بالحاله "
احمد : طلال يوسف ماجا هنا ؟
طلال : الا سلم وطلع قالي عنده شغله ضروريه
احمد : وفهد جا ؟
طلال :أي من شوي وراح غرفته عشان يلبس
احمد : اعذرنا ياطلال تركناك لحالك
طلال : لا عادي .. معذورين اكيد
" كان طلال فكره الوحيد في غنا واصلا السبب الي خلاه يجي مو زواج فهد لا .. كل هذا عشان غنا ويعرف ليش تتهرب منه "
-----------------------
" لبست مروى ورفعت شعرها ومسويته كيرلي ولبست فستان وردي فاتح قصير وناعم .. وحطت مكياج خفيف .. "
ساره : واااو طالعه جنان يامروى .. انتي لحالج بدون مكياج تهبلين ..
مروى : خجلتيني .. عيونج الحلوه
ساره : اذا خلصتي خلينا نمشي
مروى : اوكي وانا بتصل بطلال يودينا
ساره : لالا انا راح اروح مع السواق
مروى : ليش تعالي معانا
ساره : لا انا بمر البيت بالاول عشان امي
مروى : عادي نمر ناخذها
ساره : لا امي ماتروح اماكن مزحومه ماتناسبها انا راح اعطيها ابرتها وبجي مع السايق لاتحاتيني
مروى : سوري ساره عطلتج ماكنت اعرف
ساره : لا شدعوه قرايب غنا هم بمقام قرايبي
مروى : الله يديم صداقتكم لبعض
ساره : اميييييييييييين
" طلعت ساره وراحت البيت اما مروى فاتصلت بطلال وقالت له ياخذها على القاعه "
لما كانت مروى طالعه كان طلال واقف ويتكلم مع احمد
وشافت مروى احمد من بعيد ... وجلست تراقبه وهو يتكلم مع طلال .. وانتبه طلال لمروى الي كانت واقفه
طلال : مروى يلا نمشي
سمع احمد اسم مروى والتفت من غير مايتعمد وطاحت عينه عليها بس بسرعه رجع وصد ( مروى .. مروى هنا ؟؟ .. )
مروى : اوكي طلال ... شلونك احمد ؟
احمد من غير مايرفع راسه : بخير انتي شخبارج ؟
مروى : الحمدلله ..
طلال : مروى غنا وينها؟
احمد : انا وصلتها قبل شوي .. يلا نمشي
طلال : ويوسف وفهد ؟ماراح تنتظرهم
احمد : لا راح نسبقهم وبيجون ورانا
-------------------------
" مر العرس بخير وكان قمه في التنظيم والترتيب .. وكانت هبه ماتفارقها البسمه الخجوله وكانت جميله بما للكمله من معنى .. وبعد العرس راح فهد مع زوجته للفندق "
بالفندق .. كانت جالسه هبه في الصاله مستحيه .. جا فهد وجلس جنبها .. وبقى ساكت مدة مو عارف كيف يبدا يتكلم واخيرا تكلم وقال
: هبه .. انا عارف ان صعبه علينا اليوم نتكلم مع بعض لان هذه اول مره نشوف بعض .. بس صبري علي شوي شوي ونتأقلم على بعض
هبه رفعت راسها وابتسمت وهزت راسها بالايجاب
فهد : بتجلسين بهذا الفستان ؟
هبه : لا بروح اغيره " وراحت تغيره "
فهد ( الله يتمم علينا بخير وتكونين زوجه صالحه .. والله يكمل جمالج بجمال الاخلاق )

---------------------------------
رجعوا البقيه للبيت وكانوا كثير تعبانين بعد الزواج فلكل راحوا ينامون
"
-----------------
اليوم الثاني الساعه 9
... صحت غنا اول وحده وحست راسها مصدع فأخذت لها شور سريع عشان تصحصح .. وحست نفسها جوعانه لانها ماتعشت وقالت في خاطرها ( مابي اكل لحالي والتفتت على مروى وابتسمت ابتسامة خبث ) .. وعلى طول راحت صحت مروى من نومها الي بالموت قدرت تفتح عيونها..
مروى : حرام عليج بعدني ماشبعت نوم
غنا: ماحد قالج تجين مافي نوم الحين تعالي معاي نفطر .. امس ماتعشيت والحين بموت من الجوع
مروى : انا تعشت اتركيني نايمه تو الناس .. انتي شلون صحيتي بدري
غنا : صحيت شسوي ..يلا قومي قومي
مروى : طيب انتي روحي جهزي الفطور وانا باخذ شور وبنزل
غنا : اوكي بس مو ترجعين تنامين او ها راح ... واشرت على كاسة الماي
مروى : لالا مستحيل انام .. حتى شوفيني بقوم
غنا : طيب انا بنزل اجهز الفطور

" لما نزلت غنا راحت وافتحت الستاير الي بالصاله عشان تلطف الجو واتنبهت ليوسف الي كان يجري .. وفكرت انها تطلع وتكلمه وتحط حد للمشكله الي اصلا اهي ماتعرف شنو اساسها .. "
غنا كانت واقفه تنتظر يوسف ينتبه لها من غير ماتناديه .. وفعلا ثواني وانتبه لها يوسف
يوسف كان يفكر نفس تفكير غنا بس السبب غير ...
طالعها لثواني من غير مايتكلم ..
غنا : يوسف اقدر اكلمك ؟
يوسف اشر على الطاوله بمعنى تفضلي .
غنا : انت للحين ماتبي تكلمني ؟
يوسف : لا احنا جالسين ببيت واحد وهذا مايصير..
غنا : بس انا ابي اعرف ليش عصبت وشنو كنت تقصد لما قلتي لي كذابه ؟؟ في شنو بالظبط كذبت عليك ؟
يوسف : ممكن ياغنا تنسين الي صار مابي افتح الموضوع
غنا : لا يوسف انا لازم اعرف
يوسف : لو فهمتج ياغنا .. يمكن تكرهيني .. وانا مابيج تكرهيني
غنا : اكرهك ؟ يوسف انت تدري ان بالكلمه هذه حيرتني اكثر يوسف انت كلك على بعضك كتلة الغاز
يوسف : غنا انا خايف يجي اليوم الي تفهمين فيه كل شي بعدها جد ماراح نقدر نكون في بيت واحد
غنا تنرفزت اكثر : يوسف كون صريح معاي .. تكلم
يوسف : قريب تفهمين .. " وقام واستأذن منها "
" كان طلال واقف من بعيد وينتظر يوسف يقوم ويستغلها فرصه يكلم غنا ..وبس دخل يوسف راح طلال ونادى غنا "
غنا : طلال ؟!!
طلال : أي طلال .. كيفك غنا
غنا : الحمدلله .. وانت ؟
طلال : مو بخير ...
غنا : ليش عسى ماشر
طلال : ليش تطنشيني
غنا : اطنشك ؟!! طلال ياليت تفهمني انا كنت مشغوله وما اقدر اكلمك بأي وقت .. وبعدين اخواني .. وسكتت
طلال : اخواني .. اخواني غنا انتي نسيتي انهم مو اخوانج بدم ؟
غنا غمضت عيونها دلالة على تأثرها بالكلام هذا الي صارت تسمعه في كل مكان تقريبا : طلال عمري مافكرت فيهم بغير هذا
طلال : بس انتي ماتاخفين ان يمكن في احد منهم يشوفج مثل ما انا اشوفج الحين
غنا : شنو تقصد ؟ ياربي انتوا ليشت بون تجننوني .. طلال انا اسفه ما اقدر اكمل كلامي معاك مروى تنتظرني وانا بعدني ماسويت فطوري " ومشت .. لكن طلال سحبها .. وتنرفزت غنا اكثر .. وسحبت ايدها : اتركنييييي .. طلال انتبه لتصرفاتك المره الجايه ... اما طلال عصب من كلام غنا وظرب الكرسي لدرجة تعورت ايده "
" كانت مروى واقفه وانصدمت من الي شافته "
دخلت غنا وهي معصبه وراحت غرفتها تركض وراحت وراها مروى "
مروى : غنا شصار ؟
غنا : مادري يامروى مادري خلصت من عند يوسف جاني طلال
مروى : طلال متهور .. شفت الي صار بس مافهمت
غنا : مروى فهمي طلال ان انا مااقدر اسوي الي هو يبيه ..
مروى : غنا انتي هم الي سويتيه غلط
غنا : ممكن تفهميني في شنو غلطت ؟
مروى : ماكان المفروض تطنشينه .. على الاقل كنتي وضحتي له ان هو مايقدر يكلمج مث قبل
غنا : هه ومن قالج اني ماقلت
مروى : بس انتي ماوضحتي له اذا على الاقل انتي بالوقت الحالي مافي قلبج أي شي اتجاهه
غنا : مو انتي الي قلتي عطيه فرصه
مروى : انا كنت اقصد عطي نفسج انتي فرصه قبل لاتحددين اذا انتي رافضته او لا قبل لاتستعجلين وتندمين
غنا : مروى تراني صرت بدوامه ومو فاهمه شي .. وبعدين طلال سمعني كلام ماتتقبله أي وحده مكاني
مروى : والله ماني عارفه شنو اقول
غنا : اسفه مروى قلت ابيج تفطرين معاي .. واخر شي دخلتج بمشمله بدل الفطور
مروى : مو مهم .. اهم شي انتي فكري زين طلال متهور واذا عصب مايعرف شيقول وبتشوفينه راح يعتذر لج .
غنا : مابيه يعتذر ابيه يفهمني ..
مروى : طيب انتي اهدي الحين وخلينا نجلس بالحديقه نفطر ونشرب شاي
------------------------------
في الفندق
فهد : هبه غيري ملابسج عشان راح نطلع من هنا ونروح شقتنا
هبه : ان شاء الله .. بس انت فطرت ؟
فهد : لا يصير افطر وانتي مافطرتي ؟
حمرت خدودها
فهد : انا وصيتهم يجيبون لنا فطور الحين .. راح نفطر ونروح الشقه
هبه : اروح اغير ملابسي وارجع
فهد : يلا انتظرج
" فهد كأول يوم حس ان هبه بنت مؤدبه وخلوقه ومطيعه وكانت الابتسامه ماتفارقها .. فأرتاح نوعا ما .. "
------------------------------
" وفعلا كلام مروى صحيح دقايق الا وطلال مطرش اعتذار لغنا وقال لها ماكان يقصد يجرحها .. بس ماعرف ليش لما طنشتيني جن جننوني .. "
" بس الرساله ماريحت غنا ابد بالعكس حست انها بعدها ماسوت شي وطلال ابد ماراح يفهم ان غنا ماتكن له مشاعر خاصه .. وغير كذا ذكرها بالكلام الي قاله وخصوصا ان قال ممكن احد فيهم مايشوفها مثل اخته .. وحست ان بالكلام هذا راح تمر عليها ايام صعبه خصوصا انها كبرت وماعادت طفله وتطنش هذا الكلام ... "
مروى : هذا طلال مطرش لج مسج صح ؟
غنا : أي
مروى :قلت لج
غنا : وانا قلت لج قبل مابيه يعتذر ..
مروى : بيفهم شوي شوي والله يعينه
غنا : مو قصدي اجرحه يامروى .. بس صدقيني قلبي اصلا خالي مايشغله أي شي ولا افكر بأي شي غير دراستي .. عشان اكون صريحه معاج .. خالتي ام فهد مره قالت لي كلمة واثرت فيني .. قالت لي مره ان ماراح يبقى لي احد وان هي مو مستعده تتحملني وانا خايفه يجي هذا اليوم وماعندي سند .. بس دراستي راح تكون سندي الوحيد
مروى : لا مو كافي دراستج تنفعج لمستقبلج ماننكر لكن ماراح تكون كشخص تحتاجين له في الشدايد
غنا : انا ماقلت راح اعيش وحيده لا اقصد اني بالوقت الحالي اهم شي عندي دراستي وباقي الامور في وقتها الي يناسبها
مروى : صح كلامج وكل واحد وتفكيره ..
غنا : والله راسي صدع
مروى : استني اروح اجيب بندول
غنا : لا مايحتاج
مروى : بلا يحتاج ماراح يخف الا بالبندول
" دخلت مروى المطبخ وراحت تدور على البندول في الثلاجه ... "
" وقتها كان احمد نازل وشاف الثلاجه مفتوجه بس مروى ماكانت تبين لنعومتها ولانها منزله راسها .. احمد فكرها غنا ووقف ورا الثلاجه عشان ينقزها ... لما لقت البندول سكرت الباب وشافت احمد بوجهه ونقزها وبنفس الوقت تفاجئت .. واحمد ماكان احسن منها وصار كل واحد يطالع بعيون الثاني من الحرج .. وكل واحد ثواني ومابقى منه الا غبرته "
مروى ( ياربي ليش دايم امر بهذه المواقف مع احمد .. احرااااااج )
"احمد ( يا الله من وين تطلعين لي يامروى .. لايكون الحين في بالها اني متعمد .. ) .. طبعا احمد ماحب مروى تضن فيه انه هو متعمد فرجع وشافها بتطلع .. "
احمد : مروى
مروى مستغربه والتفتت من غير ماتتكلم
احمد : اسف على الي صار قبل شوي فكرتج غنا ماكنت متعمد
مروى مستغربه ليش يبرر لها : لا احمد انا مافكرت جذي
احمد : مادري ماحبيت تاخذين عني فكره
ابتسمت مروى : لا ماراح اخذ فكره ..
احمد : طيب عن اذنج
" وقف احمد وهو معطيها ظهره وهو يقول في خاطره ( انا شسويت الحين ليش بررت لها .. غبااااااء .. بس صحيح ليش بررت لها شنو دافعي ؟؟ ... لالا جد جد اني غبي "
( اما مروى فأنبسطت ان احمد برر لها )..
غنا : انتي وينج تاخرتي
مروى : ها لا بس كنت ادور على البندول
غنا : اها .. طيب قومي نسيت شي بروح احط هديتي لفهد وهبه في غرفتهم قبل لايجون
مروى : اوكي .. بس انا راح اروح الحين اخذ شنطتي عشان انا وطلال راح نروح فندق وبكرا بنرجع ايطاليا
غنا : كذا فجأه
مروى : لا مو فجاه بس نسيت اخبرج
غنا : وليش الحين تغدوا بالاول
مروى : لا مو حلوه يجون العرسان واحنا موجودين
غنا : مافيها شي
مروى : لا انتي لاتصيرين عنيده ..
غنا زعلانه : بس لو قلتي لي قبل مو كذا فجأه
مروى : مافي فرق ..
قربت غنا لمروى ولمتها : انتي كل مره تجين تعلقيني فيج اكثر احسج مثل اختي بالظبط
مروى : وانا بعد .. بس لاتخليني ابكي .. ان شاء الله بعد سنه او سنتين بنجي الكويت
غنا : أي كذا ارفعي معنوياتي مثل كل مره
مروى : بس غنا بطلب منج طلب .. كلمي طلال وسلمي عليه عشان مايجلس هناك وهو فكره هنا
غنا : اوكي
" سلمت غنا على مروى .. وبعدها اتصلت بطلال وسلمت عليه وقالت له انه تحب تكون معاه مثل قبل يعني قبل لايصارحها بمشاعره وقالت له ان لازم يفهمها وهي ماتفكر الحين بأي شي ثاني غير دراستها "
-------------------------
بعد 3 ايام من زواج فهد
" اول ماصحت ام فهد راحت على طول وصت على الترتيبات عشان يستقبلون العرسان ويطبخون احلى الطبخات لصباحيتهم .. وماجات الساعه 2 الا كل شي جاهز .. وعلى الساعه 2 ونص جا فهد مع هبه "
" انبسطت هبه بأستقبالهم الحلوا لي كان بالبخور والورد والزغاريط .. وحست نفسها انها بوسط عايلتها .. "
فهد : ان شاء الله مرتاحه
هبه : أي الحمدلله كأني بوسط اهلي
فهد : ان شاء الله طول العمر ..
ام فهد : يلا فهد اخذ عروسك وخلها تشوف شقتها ..
فهد : نقوم ؟
هبه : على راحتك
مسك فهد ايد هبه : خلاص قومي عشان تشوفينها ..
" صعدوا فوق وشافت هبه الشقه وعجبتها كثييير "
فهد :اذا في شي ماعجبج قولي لي .. تراها مافيها شي .. انا زوجج الحين
هبه : لا والله جد كل شي عجبني وكل شي مرتب وحلو ومثل ماتمنيته
جلس فهد هبه على الكرسي وقعد مقابلها : هبه بما ان ماسمحت لنا الفرصه نعرف قبل بعض .. فأنا حاب اني اكون صريح معاج من البدايه.. اهم شي عندي الثقه المتبادله والصراحه ومانخبي على بعض أي شي .. .. انا عندي الحياة الزوجيه شي.. وحياة الشغل شي ثاني وماا خلط بين الامور فهمتيني ..
هبه : ايه .. وانا بعد اتمنى هذا الشي
ابتسم فهد : ان شاء الله نكون متفاهمين
"هبه حست انها راح تعيش اسعد انسانه مع فهد "
فهد : انا بدخل اخذ شور .. انتي اخذي راحتج .. وها أي شي تبينه لا تترددين
فهد : نسيت شي مهم ..
هبه : شنو ؟
فهد :بعد بكرا راح نسافر .. جهزي اغراضج واذا ناقصج شي قولي لي اوكي
هبه : ان شاء الله
-----------------------------
كانوا بوفهد وام فهد وغنا واحمد بالصاله يسولفون
بوفهد : الا يوسف وينه ؟؟
احمد : والله مادري اليوم الصبح قال راح يمر ناصر ويتغدى معاه واعتقد انه معاه للحين
بوفهد : يوسف هالايام مايقعد بالبيت ..
ام فهد : يوسف اصلا تغير كليا .. انا خايفه ان صاير له شي الي خلاه يتغير
احمد : يمه يوسف تغير للأفضل
بوفهد : وحتى انا هذا رايي .. بذات مع غنا
غنا استغربت ( عمي كان عنده علم ؟؟! )
بوفهد : لاتستغربين غنا انا كنت اعرف مشاكل يوسف معاج بس ماحبيت اتدخل هذه المشاكل تصير في كل بيت ولو انا تدخلت ممكن تصير اكبر .. ويوسف كان تفكيره محدود تفكير طفل وكبر عنده للمراهقه بمجرد ماتعدا المرحله تعدت معاه التصرفات الي كان يتبعها ..
غنا : أي تطمن يبه يوسف بالعكس يعاملني مثل مايعاملوني فهد واحمد
ام فهد ( ماعجبها الكلام .. وحاسه ان غنا فعلا صارت جزء من البيت وهي هذا اخر امنيتها )
---------------------------
ناصر : يوسف انت مو على بعضك من فتره في شي ؟
يوسف : لا مافيني شي بس الشغل شوي تعبني
ناصر : انت الله يهداك حد يشتغل مثلك
يوسف : هههه لو شفت فهد قبل شنو قلت ..
ناصر : الحين بيتغير ماكان عنده شي الحين عنده زوجه وبكرا بيجيب عيال بتتغير حياته وبيهمل الشغل شوي
يوسف : صدقت واكبر دليل ابوي لما كبرنا كبرت همومه معانا لدرجة انه صار مايقدر يجمع بين الاثنين
ناصر : المهم لاتنسى اني موجود بأي وقت اذا في شي لاتخبي علي لاتحط بقلبك تكلم فضفض
يوسف : لاتخاف علي ..
ناصر : يلا نرجع البيت ..
" وصل يوسف ناصر البيت .. ورجع "

---------------------------------
" في شقة فهد "
بعد ماطلع فهد من الشور .. وراح الغرفه شاف هبه جالسه على الكرسي سرحانه
فهد : وين سرحانه
ابتسمت هبه : نعيماا
فهد : الله ينعم بحالج
فهد : هبه شرايج نتمشى بسياره شوي او تبين ترتاحين
هبه : لا خلنا ننزل جنب امك شوي انا ماعرف اهلك كثير
فهد : مثل ماتبين .. انا راح انزل قبلج اوكي .. ولاتنسين البسي عباتج عشان اخواني
هبه : ان شاء الله
-------------------------
فهد لما نزل شاف غنا صاعده بتروح غرفتها
فهد : غنوءه وين ؟
غنا : غرفتي بشوف فلم بدل الملل الي حاسه فيه .. الحمدلله ان الدراسه الاسبوع الجاي
فهد : اول مره اشوف وحده تبي العطله تخلص
غنا : من الفراغ
فهد : طيب غنا اقدر اطلب منج طلب
غنا : اكيد انت تامر
فهد : ابيج تجلسين شوي مع هبه عشان تاخذ عليكم وتتعود شوي شوي .. هي الحين بتلبس وبتنزل
غنا : من عيوني خلاص انا بغير ملابسي وراح انزل
فهد : فديت اختي الطيبه
ابتسمت غنا وراحت غرفتها
---------------------------
بعد 10 دقايق نزلت هبه وجلست جنب خالتها ام فهد .. وكانت معاهم غنا ..
اما فهد فراح يجلس مع احمد شوي "
ام فهد : ان شاء الله مرتاحه
هبه : الحمدلله .. حاسه نفسي بوسط اهلي
ام فهد : وهذا الي نبيه .. اخذي راحتج هذا بيتج الحين
هبه : اكيد ..
" جلست شوي تسولف مع ام فهد وبعدها استأذنت ام فهد من هبه عشان تروح تاخذ دواها وبترجع وبقت هبه مع غنا "
غنا : هبه انتي شنو هواياتج
هبه: الرسم احب الرسم كثير .. وكنت وانا صغيره احب اشتغل بالصوف بس الحين بطلت
غنا : الله موهبه حلوه كنت احاول بس ماعرف
هبه : سبحان الله كل واحد يتقن شي معين
غنا : انا احب اكتب اشعار .. واموت بشي اسمه سباحه
هبه فجأه : ماحسج تشبهين اخوانج ولا امج ولا حتى عمي
" وقبل ما تجاوبها غنا .. نادها فهد تجيب الكاميرا من غرفتها عشان يتفرجون عليها احمد وفهد "
غنا : عن اذنج هبه ثواني بس اجيب الكاميرا لفهد واحمد وارجع
هبه : خذي راحتج
" لما شاف فهد هبه لحالها راح وجلس جنبه "
فهد : وين امي ؟
هبه : راحت تاخذ دواها وبترجع
فهد : اها .. " الا برجعة امه "
علقت ام فهد لما شافت فهد وهبه جالسين جنب بعض انهم لايقين على بعض .. وجلست تمدح في هبه فخلت هبه تخجل وتنزل راسها
ضحك فهد : خجلتيها يمه
" رجعت غنا وعطت فهد الكاميرا واستأذن فهد عشان يروح مع احمد "
ام فهد : وين رحتي وتركتي هبه ؟
غنا : رحت اجيب الكاميرا الي وصاني عليها فهد
ام فهد : اها .. طيب غنا قولي للخدامه تجيب العصير ليش ماقلتي لها ؟
غنا : اوه نسيت يمه .. اروح الحين اجيبه
ام فهد : اما غنا هذه بتجنني من كثر ماتنسى .
هبه: عادي خالتي توني قبل لا انزل شربت .
" بعد ثواني رجعت غنا ومعاها العصير وهي بتقدمه ضربت رجلها في الطاوله وطاح العصير على الارض "
وقفت ام فهد وصرخت ونست وجود هبه: افففف منج مامره سويتي شي زين .. عميه انتي ماتشوفين ؟ الطاوله اكبر مني ومنج .
" حست غنا بشعور مختلط بين الخوف والاحراج وماقدرت ترفع راسها بسهوله"
غنا : اسفه يمه .. الحين ارفعه واجيب غيره .
ام فهد بعد ماتذكرت وجودد هبه وحبت تعدل الموقف : يايمه انتبهي مره ثانيه ولا ترفعينه انتي خلي الخدامه تجي وتشيله
غنا مرتبكه وحيت دموعها بتخونها : اوكي
" ولما عطتها ظهرها عشان تنادي الخدامة دموعها فعلا خانتها نزلت ورا بعض "

" يوسف شاف الموقف قدامه وتأثر كثيييييييير .. طبعا يوسف ما استغرب من الموقف لانه كان يوقف مع امه ضد غنا في مثل هذه المواقف لكن المره هذه كانت غير بنسبة له .. وحس في داخله بشعور الندم ونفس الوقت القهر من امه وخصوصا ان قدام زوجة اخوه .. كان راح يدخل بس مسك نفسه لان هذا مو من صالح غنا ولا من صالح أي احد ويمكن يزيد الطين بله .. فدخل بعد ماطلب طريق وراح المطبخ على طول "
" طبعا هبه استغربت من الي صار وكانت خايفه نوعا ما .. وجلست تسأل نفسها هل غنا مو بنتهم مثلا ...( لان سؤالها الي قبل الموقف تقريبا جاوب عليه )"
ام فهد حست بهبه : هبه عذريني وجعنا لج راسج بس انا اذا ارتفع عندي الضغط اتنرفز شوي
هبه : لا خالتي لاتهتمين .. انا منكم وفيكم الحين
------------------------------
" دخل يوسف وشاف غنا تمسح دموعها وهي تصب العصير بعد ماطرشت الخدامة تشيل الي طاح بالارض .. قرب يوسف من غنا "
يوسف : غنا .. غنا
غنا لما سمعت صوت يوسف مسحت دموعها بسرعه والتفتت عليه : هلا يوسف
يوسف : غنا لاتمثلين علي ان مافيج شي
غنا : لا انا مافيني شي بس مادري شنو دخل بعيني
يوسف : واذا قلت لج اني شفت بعيوني بتقولين شي دخل في عيني ؟
نزلت غنا راسها وخانتها دمعتها للمره الثانيه
ماقدر يتحمل يوسف منظر غنا فرفع يوسف راس غنا ومسح دموعها وجلسها على الكرسي : انا ما اقدر اشوف دموعج ياغنا .. لاتبكين
غنا : انا مو زعلانه بس انحرجت من هبه .
يوسف : الي سوته امي ماحد يرضى فيه .. انا لازم اكلمها
غنا : لالا يوسف الله يخليك لا ..
يوسف : غنا انتي مامره واجهتي امي .. يمكن هذا الي يخليها ماتتغير معاج
غنا : يوسف هذه بمقام امي مهما كان هي الي ربتني وانا ما اقدر ارد الي سوته لي بالاساءه هذا شي ما اقبله لنفسي
كبرت غنا بعيون يوسف اكثر من ماهي كبيره : انا الي كنت اجهلج ياغنا
يوسف : لا يوسف لاتبالغ .. والحين اصلا الي انتي تسويه لي نساني كل ايام اول وما افكر فيها ابد وابيك توعدني انك تنساها مثل ما نسيتها
ابتسم يوسف : اوعدج
ابتسمت غنا : شوفني الحين ابتسم مو زعلانه اصلا ماشيل بخاطري على امي
يوسف : طيب الحين روحي جلسي معاهم ولا كأن صاير شي عشان ماتحس هبه بشي وتشوف الامر عادي
غنا : ان شاء الله
" قام يوسف من مكانه وطلع وقبل لايطلع التفت عليها .. وقال في نفسه ( ياليت تحسين بللي في داخلي ياغنا .. انا كل يوم اتعلق فيج .. ياليت تحبيني مثل ما احبج ) "
" اخذت غنا العصير بعد ماغسلت وجهها وطلعت وجلست معاهم وسولفت ولا كأن صار شي .. وهذا الشي خلا هبه بعد تستغرب "
" بعد ماجلست هبه معاهم لمدة ساعتين استأذنت وراحت شقتها ... وام فهد قامت بعد ماقامت هبه بس قبل هزأت غنا ( طبعا ام فهد زودتها وكان هذا هو بداية انتقام ام فهد لان ام فهد لايمكن راح تمرر زواج بو بدر على خير وماكان قدامها غير غنا الي بنظرها هي جزء من المشكلة "
دخل فهد بعد 10 دقايق وشاف غنا جالسه لحالها بالصاله وكانت متضايقه
فهد : وينهم ؟
غنا : ها .. ايه امي راحت غرفتها وهبه استأذنت وراحت شقتها
فهد : غنا فيج شي ؟
غنا : لامافيني شي بس حاسه بملل شوي الحين بروح اشوف فلم ..
فهد : اوكي فكرتج زعلانه او متضايقه
غنا : لالا مافيني شي .. الحين بروح غرفتي
فهد : اوكي
--------------------------------
" دخلت غنا غرفتها وحست نفسها مخنوقه وهي تحاول تمسك دموعها لان الي صار شي سخيف وماله داعي اصلا تسوي كل هذا .. فغمرت راسها بالمخده وجلست تبكي بحرقة .. "
---------------
" هبه كانت سرحانه في الموقف الي صار وفي رايها ماكان له داعي تصرخ عليها ام فهد "
فهد : شفيه الحلو سرحان ؟
هبه : فهد ممكن اسألك سؤال
فهد : اكيد
هبه : غنا
فهد : شفيها غنا ؟
هبه : احسها ماتشبهكم ابد
فهد : ياما اخوان مايتشابهون عادي
هبه ( كيف افهمه ما اقدر اقوله امك ومعاملتها ونظراتها ماتدل على ان غنا بنتها ): امم لا اقصد يعني ممكن هي من وزجه ثانيه مادري بس خلاص انسى
فهد : توقعج بمحله
هبه : من زوجه ثانيه ؟
فهد : وابو ثاني .. غنا مو اختنا بدم .. هي بنت عمي الله يرحمه
هبه متفاجئه : اها
فهد : بس غنا ترتبت معانا وهي مثل اختنا بالظبط ومامره حسسناها بشي وهي هم نفس الشي تعتبرنا اخوانها
هبه : أي حسيت بهذا الشي ..
فهد : وهذا الي محيرج قبل شوي ؟
هبه : كان مجرد فضول
-------------------------------

كان يوسف يفكر في غنا وانها اكيد بعدها متضايقه ففكر يتصل باحمد ويطلعون كلهم مع بعض يتعشون برا .. واحمد ما مانع واستأذن من اصدقائه ورجع البيت "
" راح يوسف وقال لغنا تستعد عشان تطلع معاهم .. لكنها رفضت بس يوسف اصر عليها وبعد جهد جهيد رضت وغيرت ملابسها وطلعوا "
-------------------------
بالسياره
احمد : غنوءه الطلعه هذه مخصصه لج .. فالاختيار بيكون عليج .. قبل لانروح نتعشى وين نروح ؟
غنا : أي مكان مايفرق
يوسف : لا انتي الي بتختارين هذا اتفاقنا انا واحمد
" كانت غنا تبي تنفس عن الي داخلها ففكرت في مدينة الالعاب كأنسب مكان تصرخ فيه براحتها "
غنا : طيب راح تتحملون المكان الي بختاره
احمد : أي
غنا : مدينة الالعاب
يوسف واحمد يطالعون بعض مستغربين
غنا انتبهت لهم : ماحد قالكم
يوسف : خلاص الي تبينه
" وراحوا على مدينة الالعاب ومافي لعبة ماركبتها غنا .. لدرجة دوخت يوسف واحمد الي كانوا رافضين يركبون بس هي كانت وراهم وراهم ... بعدها على طول راحوا تعشوا "
بعدها راحوا تعشوا ورجعوا وكانت الطلعه بنسبه لغنا احلى طلعه .. "
يوسف واحمد : ان شاء الله انبسطتي ؟
غنا : اكييييييد الله يخلييكم لي فديتكم انا
احمد : بس ها هذه اخر مره نروح للالعاب
غنا : ههههه خلاص اخر مره
يوسف : يلا الحين روحي نامي
غنا : يلا عن اذنكم
--------------------------------
بعد يومين
( سافروا فهد وهبه عشان يقضون شهر العسل .. )
--------------
في بيت ام بدر
ام بدر : بدر عندي لك خبر يمكن يعجبك ويمكن لا
بدر : شنو يمه ؟
ام بدر : راح ننتقل من هنا .. ونروح لعند بابا
بدر انبسط : جد يمه ؟ وراح نشوفه اكثر من قبل ؟
ام بدر : انا اعرف ان ابوك اهملنا شوي الفتره هذه بس هذا كله بسبب الظروف الي صارت له .. بس الحين راح تشوفه على طول
بدر: احلى خبر .. واقدر اشوف عيال عمي ؟
ام بدر : لا حبيبي ماراح تقدر
بدر : بس فهد صح ؟
ام بدر : أي بس فهد
بدر : طيب يمه فهد عارف ان احنا راح نجي ؟
ام بدر : ماعرف والله اذا خبره ابوك .. .. يلا الحين بروح اطبخ الغدا
بدر : اوكي
" بدر من الفرحه فكر يتصل بفهد ويشوف اذا يعرف او لا ولما اتصل وشاف موبايله مقفل راح يدور على رقم الشركة وطلب منهم يحولونه على المدير وطبعا ماكان فهد كان يوسف !!!! "
بدر : مرحبا
يوسف : مرحبتين
بدر : شخبارك ؟
يوسف مستغرب شوي خصوصا ان صوت المتصل مو كبير : الحمدلله .. منو معاي ؟
بدر : ماعرفتني ؟
يوسف : لا منو انت
بدر : انا بدر
يوسف : ومنو بدر ؟
بدر استغرب : فهد نستني انا بدر ولد عمك
يوسف : بدر ولد عمي ؟!! ( يمكن يكون اخو هبه ؟ بس ما اذكر ان عندها اخو اسمه بدر )
يوسف : أي عم ؟
بدر : فهد انت تمزح معاي انا ولد عمك عبدالله الحين ماتقدر تنكر
يوسف انصدم .. بدر ولد عمي عبدالله .. اخو غنا !!!!!