كاتب الموضوع :
الراكدة
المنتدى :
الارشيف
الفصل الثامن عشر
***********************
وصل فارس حليب الخلفات مع أبو سلطان
أم فهد ترحب بولدها ،،، ( مرحبا فارس ،،،)
فارس يعطي ريم حليب الخلفات ،،،
ريم بتقزز ،،،( أففففففف ريحته مقرفه ،،،)
أبو سلطان بعصبيه ،،،( حليب الخلفات مقرف ،،، احمدي ربك على النعمه ،،،)
نوره توبخ بنتها ،،،( لازم تكلمين يالملقوفه ،،،)
ريم تبرر ،،،( مهوب قصدي ،،،)
ابتسم لها سلمان ،،،( ريم ما تقصد شي ،،، تبغا تضحك معي ،،، وانتوا كبرتوها ،،،)
أبو سلطان يسأل متعب ،،،( وين البنات ،،،)
متعب يلتفت على هنوف ،،،( هاذي هنوف ،،، ) ويناظر يدور هند ،،،
ابتسم يوم ارفعت يدها بدون صوت ،،( وهذيك هند ،،،)
أبو سلطان درا انهم ما سلموا عليه مستحيات من فارس ،،،
فارس نزل عينه لما سأل ابو سلطان عن البنات ،،،
فارس بهدوء قام ،،،( تامر على شي يبه ،،،)
أبو سلطان ومتعب ،،،( ما يامر عليك عدو)
وطلع بعد ما سلم على العجايز ،،،
طلع وراه أبو سلطان ومتعب ،،، وعقب طلعوا ،،، كلن راح لخيمته ،،، ينظفها ،،،ويرفعون الفرش ،،، ويرتبونها ،،،
دلال مع هنوف في خيمتهم ،،، ( هنوف شفتي عمي فارس ،،،)
هنوف بلا مبالاه ،،،( ايه ،،، ما شاء الله ،،،)
دلال باعجاب لعمها ،،،( هادي ويستحي مهوب من شباب ذا الأيام ،)
هنوف تلبس شالها ،،،( يالله دلال ،،امشي نطلع ،،،)
دلال تنسدح وتصفح مجلة جايبتها معها ،،،(أقول اجلسي ،،،مطر ،،،بس انتمشى بيزيد ويغرقنا،،،)
هنوف اتطل من باب الخيمه،،،وتاخذ نفس( الله ،،، والله الجو مغري ، حرام ما انتمشى ،،،)
ابتسمت دلال ،،،( كأنك أول مره تطلعين للبر وتشوفين مطر،،،)
هنوف باهتمام ،،،( الصراحه ،،،أول مره اطلع بر السعوديه ،،، بروحنا محد حولينا ،،، امشي نلعب تحت المطر ،،، ونركض ،،،ونصارخ ،،،ونسوق ونقحص ،،،)
ضحكت عليها دلال ،،،( ويدعمنا خالي سلمان ،،،)
ضحكت هنوف ،،،( حرام عليكم ،،،والله خالي سلمان طيب ،،، ليش ماخذين منه موقف ،،،)
دلال تلوي فمها ،،،( إيه هين طيب ،،، طيب عندكم ،،،وإلا عندنا يورينا العين الحمرا ،،، )
هنوف تمدحه ،،،( والله ما شفت منه شي ،،،إلا حنون وطيب ،،،ويحب أبوي حب خيالي )
دلال منقهره ،،،(أكيد ياحبيبتي ،،،إنتوا بنات متعب ،،،اللي بحياتهم ما شافوكم ،،،بعدين إنت ما عمرك عشتي معه ،،،عشان تعرفينه ،،،ما شفتي وش يسوي فينا ،،، محرم علينا ما نتمشى إلا حول الخيمة ،،، وصوتنا نوطيه ،،، واللي يسمع ضحكتها ،،، تشهد على روحها ،، هو ونواف أبو نفس ،،،أصلا ما ارتاحت مضاوي إلا يوم سافر يدرس )
هنوف ما عجبها الكلام ،،،( كل هذا في سلمان ،،،)
وتكمل بنفس ،،،( اشفيه بعد نواف ،،،)
دلال محتره من اهتمام نواف بهنوف ،،،( حبيبتي ،،، إسئلي مضاوي عنه ،،،وش كان يسوي فيها ،،،لا تروح لرفيقاتها ،،، ولا تكلم بالتلفون في أي وقت ،،، وطلعتها مع هيا وإلا أمها ،،، ما يثق فيها ،،، من كثر ما شاف من بنات ،،، صار يشك بكل اللي حوله ،،،)
طول ما هي تكلم ،،، وهنوف تناظر الفروه اللي عطاها نواف ،،، سرحانه وتفكر ،،،معقوله نواف راعي بنات ،،، معقوله يغازل ،،،ويلعب عليهم ،،، يمكن هم اللي يلاحقونه ،،،أكيد نواف مزيون ورزه ،،،أكيد إنهم ما خلوه في حاله ،،، بس أخاف إنه صاحب نزوات وحريم ،، لااااااااااا،،،الله يسامحج يا دلال بعد ما خذيت عنه فكره زينه خربتيها ،،،خذت نفس ( حسافه)
دلال كانت تكلم لكن هنوف ما كانت تسمعها ،،،( وش اللي حسافه ،،،)
هنوف وهي قايمه ( ولا شي ،،،إمشي نروح لهم ،،،)
********************************
في بيت الشعر
عندهم غدا لمنزالهم ،،،أبو سلطان ،،،( قلطوا الغدا يا عيال ،،،)
قام متعب وراح للمطبخ ووراه عبدالعزيز ،،،( خلص الغدا يا كومار ،،،)
كومار تعبان ويتصبب العرق من جبهته ،،،( ما كلص ،،،كمسه دقيقه ،،،)
دخل وراه عبدالعزيز ،،،( كومار حط الغدا ،،،)
كومار يتأفف ،،( كمسه دكيكة ،،،)
جا نواف لاف غترته على راسه حمدانيه ،،،( يالله حط الغدا بسرعه ،،،)
كومار بعصبيه سكر القدر،،،( ما فيه كدا ،،،)
عصب نواف ،،،( تكلم عدل يا حمار ،،،)
كومار مازال معصب ،،،( إنت همار ،،،)
امسكه نواف مع ارقبته وارفعه فوق ،،، ( مين الحمار ،،،)
قام إيرافس ،،، ويصيح ،،،
متعب يوخره عنه ،،،( نواف تعوذ من الشيطان ذبحت الرجال ،،،)
نواف ما زال ماسكه ،،،وهذا يصيح ،،،( نواف طلبتك ،،لا يموت بين إيدينك ،،،أقول طلبتك)
عبدالعزيز يوخره عنه ،،،( نواف أبوي متعب يطلبك ،،)
هده نواف بعد ترجي عمه ،،،( إحمد ربك إن بابا متعب موجود وإلا كان ذبحتك ،،،والله إن سمعتك اتطول صوتك علي لعلمك من هو نواف يا حمار ،،،)
***********************
في خيمة هيا
هنوف جالسه عند هيا في خيمتها ،،،
هيا تغير لولدها متعب ،،، وروابي جالسه عند باب الخيمه تلعب بالرمل ،،،
هيا تنادي روابي ،،،( روبي تعالي أغير ملابسك ،،،)
روبي زعلانه ،،،( ما بي ليه توبي أول ،،،)
هنوف تضحك عيها ،،،( لأن توبي حلو وإنتي مو حلوه ،،،)
صاحت روابي ،،،وراحت لأمها ،،،( ماما توبي أهلا من روبي ،،،)
هيا تضحك ،،،( ما عليك منها إنتي أحلا من توبي وهنوف ،،،)
روبي تمد لسانها على هنوف ،،،(إممممـ ،،،ماما اتدول أنا أهلا ،،،)
هنوف تأشر بصبعها ،،،( لا لا لا ،،، توبي أحلا ،،،،)
صارت تصيح بصوت عالي ،،، تسكتها تلعبها ،،، ما فيها فايده
الشباب توهم جايبين الغدا ،،،
دخل نواف لما سمه صوت روابي تصيح ووراه مشاري ،،، انحرجت هنوف ،،،
مشاري يحب بنته ويسكتها ،،،ونواف ابتسم لما شاف هنوف ومسك توبي يلاعبه ،،،
يمسح دموعها أبوها ( من طق روبي ،،،)
تصيح ما ردت عليه ،،، راح مشاري لهيا ،،،ومسكها ،،،(أطق ماما ،،،)
روابي تهز راسها ،،،( ماما لا ،،، تك ،،،أنوف ،،،)
ضحك مشاري ،،،( عيب قولي خاله هنوف ،،، بعدين خاله هنوف تحبك ،،،)
روابي تصيح ،،،( لا ما تحبني تحب توبي ،،،)
وتلتفت على نواف ،،،( أواف لا تحب أنوف مو حلوه ،،،)
نواف يناظر مشاري اللي ضحك ورفع حواجبه ،،،
صاحت لأن نواف ما رد عليها ،،( أواف ماما اتدول إنت تحب أنوف ،،،لا تحبها )
هنوف تمنت الأرض انشقت وابلعتها ،،، نواف خذا تعوب وطلع ،،، مشاري هدها تصيح وراح ورا نواف ،،، هيا قامت ترتب الخيمه تتهرب من نظرات هنوف لها ،،،
وهنوف راحت لخيمتهم وهي ساكته ،،،
تحس بدوخه وبروده دخلتها ،،، خذت لها إلحاف ووساده وانسدحت على الأرض،،،
حاولوا فيها تقوم للغدا ،،، ما رضت تحس إن راسها ثقيل وعظامها تعورها ،،،
*****************
بعد الغدا ،،،
صوت بوري ،،،
طلعت ساره راسها من باب الخيمه ،،،( هلا متعب تبي شي ،،،)
متعب بصوت عالي ،،،( صوتي لأمي والبنات ،،،وتعالوا بنتمشى عند الحلال ،،،)
اركبوا مع متعب أم سلطان من قدام وعمته موضي وخواته الجازي ونوره وهند ورا ،،،
التفت متعب عليهم ،،،مستغرب ،،،( وين هنوف ،،،؟)
هند وهي تسكر الباب ،،،( ما راح تروح ،،،)
متعب بدهشه ،،،( ليه ،،، خابره بتروح ،،،فيها شي ،،،؟)
هند اتطمنه ،،،( ما فيها إلا العافيه ،،، بس تعبانه شوي ،،،)
نزل متعب وراح لخيمتهم ،،،ولقى هنوف منسدحه ومتلحفه ،،،( هنوفه ،،، وش فيك ،،،تونسين شي ،،،)
هنوف ترفع الغطا عن راسها ،،،( سلامتك يبه ،،، ،،،)
( ليه ما نتيب رايحه معنا انتمشى عند الحلال ،،،)
هنوف بصوت تعبان ،،،( يبه دايخه شوي وبنام ،،، من الصبح قاعده ،،،)
أبوها باهتمام ،،،( أحسن عشان تنامين في الليل ،،،ترا ليل الشتا طويل ،،،)
هنوف ترجع تلحف ( يبه والله فيني النوم ،،، وعظامي مكسره ،،، خلني أنام شوي ،،،)
متعب باستسلام ( على راحتك ،،،)
طلع متعب ،،،ووقف عند السياره يفكر ،،،عقبه طل من الدريشه ( هند ،،،هنوف إلحالها ،،،ونواف بياخذ أمه واخته وفارس بياخذ أمه والبنات ،،،)
فهمته هند ،،،( خلاص يبه ،،،أنا بقعد عندها ،،،)
أم سلطان بحزم ،،،( هند ،،،اجلسي ،،ساره بنتها مريضه مهيب رايحه والشغالات موجودات)
سكرت هند الباب بعد ما انزلت ،،،( ما يخالف يمه ،،، بشوفها،،،ما ني مستانسه وهي تعبانه)
مشى متعب رايح للحلال ،،،
أم سلطان بعصبيه ( تراك مدلع هنوف وظالم هند ،،،)
متعب بضيقه ،،،( يمه هند وهنوف واحد عندي ،،،)
لازالت معصبه ( لا مهومب واحد ،،،إلا هنوف ماخذه حقها منك ،،، وإمشيه رايها عليكم ،،، وإلا الطيب دايم ماكول حقه )
أم حمد عمته موضي ،،، تلوي فمها ( أكيد بتاخذ حقها مهيب بنت حصه ،،،)
الجازي تغمز لعمتها ،،، ونوره ماتت من القهر ،،،
انقهر متعب ،،،( حصه ، حصه ،حصه ،،،،حصه ما ضرتكم ولا ضرت غيركم ،،، )
خافت الجازي من انفعال متعب ،،،( متعب خلاص انتهينا من ذا السالفه ،،،)
متعب مولع نار ،،،( لا ما انتهينا ،،، حصه يا عمه ،،، يوم تدلعت تدلعت علي ،،، على زوجها ويا ليتها كانت تدلع ،،، كانت مريضه ،،،وتوجع ،،،وأنتوا تقولون دلع واتميرض ،،،لين ماتت ودريتوا إنه مهوب دلع ،،،)
أم سلطان منقهره منه ،،،( ما قصرت معها ،،، قابلتها في الكويت يوم مرضت ،،، وما اعرست عقبها ،،، والله ما حد سوى سواتك ،،، وعاش شبابه بدون مره ،،، كلن ماتت مرته واعرس وعين خير وجاه عيال ،،،مهوب قاعد على ذكرى امرته وعلى ذا البنتين اللي أحرمتنا من شوفتهم ،،، لين اكبروا وجو غصبن عليك ،،،)
الجازي والدمعه في عينها ،،،( اذكروا الله ،،،)
متعب عجز من الكلام ( يمه اللي ما يبي حصه ما يبي بناتها ،،،إنتوا حتى ما ذكرتوها بالخير ،،، دايما تذكرون جهلها وطفولتها ،،، جاتكم من ديره لديره ،،،بنت صغيره ما تعرف شي ،،، بدال ما تصيرون لها عون ،،،وريتوها انجوم القايله ،،، دايما اتدورون عليها الزله )
تنهد ،،،( حصه بتاخذ حقها مني لين أموت ،،، وهنوف بدلعها لين الله ياخذ أمانتي ،،، ويرحمها برحمته ،،،والله يرزقها اللي يدلعها بدالي ،،،)
أم سلطان تمسح دموعها ،،،( الله ياخذ أمانتي قبل أمانتك يا ولدي ،،،)
عمتهم موضي تحسفت على كلمتها ( الله يرحمها ،،،) الجازي ما قدرت تمسك نفسها ونزلت دموعها غصبن عليها ،،،ونوره قامت تشهق من الصياح ،،،
متعب مشى بطريقه ساكت ،،، وما عاد التفت عليهم ،،،
*************************
هند بعد ما تطمنت على اختها،،،وشافتها نايمه ،،، راحت وجلست عند عمتها ساره تساعدها على بنتها ،،، طلت عليهم هيا ( بتروحون معنا ،،،)
ساره متضايقه من بنتها ،،،( لا ما نيب رايحه ،،،أروجه مريضه ،،،)
هند مبتسمه لها ،،،( مشكوره ،،، أنا قاعده عند هنوف تعبانه شوي ،،،)
هيا عارفه وش اللي متعب هنوف ،،، أكيد الموقف اللي انحطت فيه اليوم ،،،والله ما ألومها ،،،موقف بايخ ،،، الله يقطعني ،،،أنا اللي سولفت ،،،ما توقعت روبي بتفهم حكينا ،،،
نواف يصوت لهيا ،،،( هيا ،،، هيا ،،،)
تغطت هند ،،،هيا تناديه ،،،( تعال ما فيه أحد غريب ،،،)
نواف مستغرب ،،،( وش فيكم مانتوب رايحين ،،،)
هيا ترد بدالهم ،،،( لا ،،،وحده بنتها مريضه ،،، والثانيه اختها تعبانه ،،،)
ناظر نواف هند يبي يسألها عنها ،،، لكنه لاحظ نظرة هيا له وفهم ،،،( يالله ما يشوفون شر نمشي هيا ،،،)
هيا تشيل ولدها ،،،( يالله مشينا ،،،)
**************************
ثاني يوم الصبح ،،،
صحت هنوف وراسها يوجعها ،،، وعيونها منتفخه ،،، ما لقت أحد في الخيمه ،،،
قامت وغسلت ولبست ،،،وطلعت لخيمة جدتها ،،،
متعب وهند وأبو سلطان وأم سلطان ،،، يفطرون ،،، ويسمعون إذاعة السعويه ،،،
( السلام عليكم ،،،)
التفتوا ،،،متعب بفرح ،،،( مرحبا ومسهلا ،،، ) حبته وحبت راسه
أبو سلطان ،،،( يا مرحبا ،،، وش لونك اليوم ،،،)
حبت راسه،،،( الحمد لله طيبه وبخير ،،،)
حبت راس جدتها ،،،ومسكت يدها ،،،( اجلسي ،،،ذوقي لك شي ،،من البارح ما ذقتي لقمه )
جلست ،،،وابتسمت ،،،( مو مشتهيه والله ،،،)
ابتسم متعب لما شافها تبتسم ،،، ( أكلي وتشتهين ،،، بتخاويني اليوم ،،،)
ضحكت ،،،( ما يبيلها كلام ،،،)
ضحكت هند فرحانه إن اختها طيبه ،،،( بروح معكم ،،،ما شفت الحلال ،،،)
أبو سلطان ( بنتخاوى كلنا ،،،)
قام متعب ،،،(إن شاء الله ،،،تبون شي ترى بمشي ذلحين ،،،)
أبو سلطان باهتمام ،،،( لا تروح إلحالك ،،، أخذ لك خوي )
متعب ،،،( ما نيب رايح إلحالي ،،، معي سلمان ،،،) وطلع ،،،
إلحقته هنوف ( يبه ،،،)
التفت عليها ،،،ابتسم،،،
هنوف تاخذ نفس ،،،( يبه وين بتروح ،،،)
متعب يأشر بيده ،،،( بنروح لأحد ذا القرايا ،،،نشتري الحاجات اللي ناقصه ،،،)
هنوف بنظرة ترجي ،،،( يبه ما يصير أروح وياكم ،،،)
متعب مستغرب نظرتها ،،،( ليه تبين شي ،،،)
هنوف بضيق ،،،( لا بس بطلع وياك ،،،متضايقه شوي )
ابتسم لها ،،،( روحي إلبسي ،،، بروح أصحي سلمان ،،،وأمرك ،،،)
حبه ،،،( الله يخليك لي ،،،)
راحت لهند وقالت لها ،،،لكنها ما رضت تروح ،،،
******************
سلمان ما عجبه إن هنوف تروح معهم ،،،لكنه استسلم لأن أبوها أصر على روحتها ،،،
طول الطريق كانوا ساكتين ،،، عقبه انتبه لنفسه وتذكر إنها البارحه تعبانه ،،،،
التفت عليها ،،، وابتسم ،،،( كيفك اليوم ،،،)
ضحكت ،،،( تو الناس ،،،)
ضحكوا عليها ،،،( اعذريني ،،، توني صحيت من اليوم وأنا نايم ،،،)
متعب يضحك ،،،( لا تكفى صحصح ،،، ما نبي نموت)
ضحك سلمان بصوت عالي،،،ضحكت هنوف ( لا صحصح ألحين ،،،)
وصلوا المكان اللي يبونه ،،،وشروا حاجاتهم ،،،ومشوا،،،
في الطريق ،،،متعب ينبه سلمان ويأشر بيده ،،،( سلمان خفف شوي ،،،)
سلمان ،،،( ليه ،،،)
متعب يأشر ،،( خابر ذا الأرض ،،، منابت فقع ،،،)
خفف سلمان ،،، ابتسم متعب وأشر بيده ،،،( وقف هنا ،،، هه شوفوها هناك ،،،)
نزل ومعه المحفار ،،،وحفر وهنوف معه تراقب وطلعها ،،،
هنوف فاتحه عيونها ،،،( شلون عرفت ،،،بحياتي ما طلعت فقعه ،،،)
ضحك متعب ،،،( خبره ،،،)
سلمان يأشر على تحتها ،،،( هه ،،،هاذي جارتها تحتك ،،،)
هنوف مستغربه ،،،( جارتها ،،، يبه شلون علمني ،،،)
سلمان مبتسم ،،،( الفقعه لازم لها جاره ،،، امشي معنا وتعرفين ،،،)
متعب علمها كيف شكل بيت الفقعه وإن كل وحده لها جاره ،،،
وكل ما لقى وحده هو وإلا سلمان طلعت هنوف جارتها ،،،لما عرفت ،،،
جمعوا فقع كثير ،،، واقسموه بين الحريم والرياجيل ،،،
*************************
بعد الغدا الحريم فارشات برا الخيام ،،،
أم حمد ،،،( يالله لك الحمد ،،، من زمان ما ذقنا الفقع ،،، يا زينه ،،،)
أم فهد تناظر هنوف ،،،( زينه من زين اللي لاقطته ،،،)
أم سلطان فهمت نظرة أم فهد ،،،وانقهرت ،،،( كل شي من يدين هنوف زين ،،،)
ضحكت هنوف باحراج ،،،( ما جمعت إلا شوي ،،،أكثره أبوي وسلمان مجمعينه ،،،)
دلال منغثه من سلمان اللي دايما يخانقهم ،،، ويضايقهم على الروحه والرجعه ،،،وعند هنوف كل شي يسمح فيه ،،،ولا يقول ولا شي ،،،( يمه خلي أبوي يودينا نجمع فقع ،،،)
الجازي ( بقول له ،،، عساه يوافق ،،،)
هنوف ببراءه ،،،( عمه إذا ما وافق أبوي بيودينا باجر ،،، روحوا معانا ،،،)
دلال تنرفزت ،،،( ما راح انروح إلا مع أبوي وإلا فارس ،،،)
استغربوا رد دلال ،،، وانحرجت هنوف ( على راحتكم ،،،)
في الليل
كلن راح لخيمته ،،، وهند وهنوف جلسوا عند جدتهم ،،،لين يجي أبوهم ،،،
صوت متعب ينادي ،،،( هنوووووف ،،،هنووووف ،،،هند ،،،هند ،،،،)
فزت هنوف ووراها هند ،،،وراحوا ورا الخيام ،،،مكان صوت أبوهم ،،،
متعب ماسك كشاف في يده ،،،ويحركه يمين ويسار ويضحك ،،، راحت له هنوف ،،، وهند وقفت بعيد شوي ،،،لأنها شافت طلال ،،، متعب يضحك على أشكال الشباب وهم يركضون في كل اتجاه يطيحون ويقومون ويصارخون ،،( مناك مناك ،،،) (امسكه) (حده حده) (اهجم ،،،) (يا غبي ،،،) ( وين راح ) ( تحتك ) ( اهجم عليه ،،،)
امسكوه ،،، وضحك متعب ،،،( يبه حرام عليكم عذبتوه ،،،)
ضحك عليها ،،،،( وش أسوي فيهم مشتهين يشون لهم جربوع ،،،)
هنوف مشمئزه ،،،( يع ،،، ياكلون فار ،،،)
جاهم نواف يكح من الركض ،،،وماسك الجربوع ،،،( ما قلت لك إني أنا اللي بمسكه ،،،)
سلمان وعبدالعزيز يتنفسون بسرعه ،،،( وينه ،،،)
نواف يعطيه سلمان ،،، ( إخذ ،،،)
متعب يضحك عليهم ،،،( هنوف تقول يع تاكلون فار ،،،)
سلمان يمد الجربوع على وجها ،،،( يع هاه ،،،)
راحت ورا أبوها وصرخت ( لااااا ،،، يبه شوفه)
متعب ياخذه منه ،،، ( جيبه ،،،) مسك يد هنوف ( إمسكيه ،،،)
وخرت يدها ،،،(ما أقدر ،،،) حاول فيها ،،، كل ما حطته في يدها وخرت يدها
ضحكوا عليها ،،، (يالخوافه ،،،)
خذاه متعب ووداه لأمه ،،،
دخلوا على أم سلطان ،،،وهند جالسه عندها ،،،
ناظرها طلال وابتسم ،،، انحرجت ونزلت عيونها ،،، يا ربي شسوي ،،، شلون أطلع وهم صاكين على الباب ،،، وأمي وضحى الله يهديه احرجتني بنظرتها ،،،والله فهمت ،،،حتى الموجودين فهموا ،،، بدخل ورا القاطع على الأقل بعيد عن الأنظار ،،،
ضاق خاطر طلال ،،، الله يهديك يمه وضحه ،،، حتى محرومين من الشوفه ،،،
نواف يغمز له ،،، ( عاجبك نقش القاطع ،،،)
ضحك طلال ،،،( أول مره أشوف قاطع ،،، منور ،،،)
سلمان يناظر في القاطع ،،،( يتهيأ لك ،،،إلا مظلم ،،،)
متعب يحذفه ،،،( غصبن عليك منور ،،،)
هند انحرجت من كلامهم ،،،
هنوف ارسلتها جدتها تجيب الحليب والشابوره ،،،
راح نواف وجاب متعب الصغير يلعبون عليه ،،، وحطه في حضن سميه يلاعبه ،،،
جات وراه هيا وأم طلال ،،،
أبو طلال مر خيمة أمه يبي يمسيها بالخير قبل ينام ،،، ( ما شاء الله متجمعين ،،،)
أم سلطان ترحب ،،،( يا مرحبا ،،،) حب راسها وجلس بينها وبين متعب ،،،
( كيف حالك يمه ،،،)
أم سلطان تضغط على رجليها ،،،( طيبه ،،،إلا من ذا الرجلين ،،،)
أبو طلال يضغطها ،،،( يمه ،،،إمشي إمشي ،،، طلقي رجلينك ،،،)
تنهد ،،،( ان شاء الله ،،،)
دخلت هنوف ومعها الشغاله شايله الحليب ،،،
سلمان يصوت لها ( نزليه هنا ،،،) ويأشر على عبد العزيز يبيه يصب
أبو طلال مبتسم لهنوف ،،،( يا مرحبا بسمو الأميره ،،،)
ابتسمت ،،، وراحت تسلم على عمها ،،،
نواف مبتسم ،،،ويناظر أبوه ،،،والله إنك جبت اسمها ،،،
جلست وراه هو وأبوها ،،، أبو طلال يمسك يدها يجرها ،،،( قربي فيه مكان ،،،)
ابتسمت ،،،وبهدوء ( لا يبه خلني هنيه مرتاحه ،،،) تبي تبعد عن الأنظار ،،، وخاصة عن أنظار نواف
*****************************
جلسوا يسولفون ويضحكون ،،،،
أم سلطان ،،،( نواف سمعنا من قصيدك ،،،)
سلمان يضحك ،،،( يمه أنا اللي بسمعك ،،،)
أم سلطان باستهزاء ( أنت تقصد ،،، أشوف سمعنا ،،،)
سلمان تحنحن وضحك ،،،( قصيدتي ،،،قصيدة واحد مثقف عنده لغه ،،،) ،،،احم احم
طولت بغيــابك مـأي لف
ترجع لنــا ثاني آي هوب
بسبـــابك آي كانت سليب
النوم مــا جاني أت نايت
واعطف على أحبابك كم هير
عليك ولهـاني ماي هارت
واصبر على حسابك آي ويت
تصبر على شاني يو مصت
يالترف خطــــابك رفيوز
تنســـاني آي كانت بليف
يا حظ من جــابك أت لاست
ثم عــاش وحداني أت هوم
( منقول )
ضحكوا عليه ،،،أم سلطان ما فهمت شي ،،،( والله إني داريه إن قصيدك مثل وجهك ،،،)
سلمان يرفع امتونه فوق بغرور ،،،( شكرا شكرا ،،،أكيد حلو مثلي ،،،)
أم سلطان تلتفت على نواف ،،( نواف سمعنا طيب صدورنا ،،،)
نواف ابتسم ،،، وبصوته الشجي ،،،
على ذاك الطريق اللي يسمونه غرام أحباب
وطت رجلي على دربه ولاأدري وش نوى فيني
تبعته لآخر دروبه .. ألين أن القمر قد غاب
تعب قلبي ، ولا تعبت مسافاتٍ توديني
لقيت الليلة الجردا : هدب ظل وسما واعشاب
بعد ذاك الظلام اللي يتوهني عناويني
صدفتك معجبه فيني وياليت..الغرام : اعجاب
وتراك انتي الهنوف اللي هقيتك تستحقيني
عطيتك عشق من قلبي..وسلمت لغلاك رقاب
وغيرك يحترق قلبه ولا يقدر يحاكيني
أنا قبلك صدفت عيون لكن ويش جاب لجاب؟
ترى كل العيون اللي لقتني ما تكفيني
رماني حظي العاثر عليك وجيت لك طلاب
ولا أنتي اللي عشقتيني ولا انتي اللي عتقتيني
تعالي واعتقي ذاك الخفوق المولع المرتاب
مهب لاجلي ، عشان الله يجازيك ويجازيني
تعدي في سما عشقي ولو عشقي خراب أصحاب
وصوني بالهوى نفسك قبل لا انتي تصونيني
وشيليني على متنك : خفوقٍ باريٍ منصاب
ومن فوق الغرام العذب .. شيليني وحطيني
ولا منك هقيتيني شجاع وما يطيق يهاب
أنا لك بالهوى والله مثل ما انتي هقيتيني
أنا ما أمشي ورا غيرك ولو أنه يطق الباب
وترى عيبٍ عليّ أطعن..ولو كثرت سكاكيني
زهودٍ ما يطيق الدم لا داين ولا طلاب
شجاع وعارفٍ نفسي وأظن أنك تعرفيني
غيورٍ ماعرفت أضحك مع الغدر ببّرود أعصاب
أبيع عيوني الثنتين قبل أنك تخونيني
إذا شد الغرام .. اترك خفوقي : بين ناب وناب
لفرقى تكسر ضلوعي .. ولا عشقٍ يوطّيني
أنا رجلٍ ولي غيره .. وإذا شفت الهوى كذاب
تثور بقلبي الفزعه ولا تهدى شياطيني
سؤالك لو يزعزع بي كياني ما قبلت عتاب
اجي لك وأسالك نفس السؤال اللي سألتيني
عن العشق القديم أبواب .. تقفيها كثير أبواب
بعد ذاك الحبيب اللي خدعني وانخدع فيني
أبي عشق تحسب له كل نظرات العيون حساب
وابي قلبٍ علي قلبي ، وابى دينٍ على ديني
وابي نظرة عطا توفي ولا تخلف بدون أسباب
وابي منك قبل لا نتي تصديني .. توديني
وابي دربٍ على العذال صعبٍ ومتعبٍ وغلاب
وابي نفس الطريق الصعب يبعدهم ويدنيني
ترى لو للقلوب عيون ولدموع العيون أهداب
حشى ما تنزل الدمعه لغيرك لو تركتيني
أنا أول من عرف قدرك وأنا توي صغير وشاب
وابي منك ما دام أنك عرفتيني تحبيني
ما دام أني لقيتك في طريق أسمه غرام أحباب
دخيل الله ، وبعد الله دخيلك .. لا تخليني
ما دام أن كل من يحيا على وجه التراب تراب
عسى تنساني الدنيا مادام أنتي ذكرتيني
أم سلطان باعجاب ،،،( صح إسانك ،،،)
الجميع ( صح إلسانك ،،،)
هنوف صمت وتفكير ،،،من يصدق إن نواف راعي بنات ،،، كله مشاعر وأحاسيس ،،،بس ليه بتكذب دلال عليه ،،، روبي خوفتني ،،،معقوله قايل لهيا إنه يحبني ،،، شلون حبني وهو ما يعرفني ،،، يعني ممكن يصير فيني مثل البنات اللي يعرفهم ،،،يحب وحده وينساها ويروح للثانيه ،،، لااااااااااااااااااااا ،،،ليش أفكر فيه ،،،كيفه ،،،،
صوت أبوها نبها ،،،( هيا تعالي إخذي ولدك ،،، رقد ،،،)
قامت هيا وخذت ولدها ،،،
شاورها عمها ،،،( تبين حليب ،،،)
ضحكت ،،،وشاورته ( عبالي عندك سالفه ،،،لا مشكور ،،،)
ضحك وانتبهوا له خاصة نواف اللي ميت ويعرف أبوه وش يقول ،،، شاورها ( ما عندي شي بس بحر أبوك ) ويناظر نواف ويبتسم
ابتسمت ،،، وشاورته (إلا أبوي ،،،لا تحره تكفى ،،،)
أم طلال فاهمه زوجها ،،،ابتسمت ،،،( هاه يا بو طلال وش عندك أنت وبنت أخوك ،،،)
ضحك ،،،( بتزوجي من بنات خوالها المزايين ،،،)
ضحكت هنوف ،،،( لا تخرب بيني وبين عمتي ،،، إذا بزوج بزوج عمي سلمان ،،،)
أم سلطان بدون شعور ،،،( لا إن شاء الله ،،،اسم الله على ولدي ،،،،)
صمت ،،،وصدمه
غمضت عيونها عشان تماسك ،،،مسكت يد عمها ،،، حست إنها بتدوخ ،،،
أبو طلال ولع وجهه من القهر ،،،نواف ناظرها بحزن ،،، أم طلال والجازي نزلوا روسهم ،،،هيا ونوره وساره عيونهم تغرقت دموع ،،، هند ورا القاطع ،،، ما قدرت تحمل المكان حست إنها بتختنق ،،، طلعت من باب الخيمه اللي بجنب القاطع ،،، وراحت تمشى ،،،تبي شي يوسع صدرها ،،،تبي تنفس هوا نظيف ،،، لأنها استنشقت دخان ،،، كل ما توسعت ضاقت،،، ليه الدنيا كذا ،،،
فتحت هنوف عيونها،،، بصمت ناظرت جدتها والتفتت على أبوها وناظرته،،، قامت بهدوء واطلعت ،،،
متعب مغمض عيونه وصوته يالله يطلع ،،،( ليه يمه ،،،)
ما ردت عليه ،،،لأنها نفسها منصدمه ،،، أبو طلال يهدي متعب ،،،( متعب زلت إلسان ،،،)
ما رد عليه متعب ،،،أبو طلال بضيق (لا تضايق ،،،هنوف أنا اللي بروح أطيب خاطرها ،،،)
متعب يناظر أخوه بحزن ،،،( سلطان أمي ما تحب هنوف ،،،)
الجازي بعبرة ،،،( متعب هند وهنوف بناتها ،،، لا تفكر بذا التفكير ،،،)
أم سلطان تمسح دموعها ،،،ومنزله راسها ،،، لأنها منصدمه من نفسها ،،،
متعب حس بحزن أمه ،،، وما كمل كلامه ،،، وقام ،،، طلع وراه أبو طلال ،،،خايف عليه ،،،
سلمان ضرب الكوب اللي بيده بالأرض ،،،وبعصبيه ،،،( تبون تذبحونه ،،، ذبحتوه من أول وبتكملون عليه ،،، ) وقام طلع ،،،
خيم الصمت على الخيمه ،،، وقام كل واحد بهدوء بدون ما يعلق ،،،أما الجازي خافت على أمها ،،،وقررت إنها تنام عندها ،،،
دخلت هنوف الخيمه وجلست بهدوء ،،، ليش ،،، خوالي اللي كل الناس يتمنون قربهم ،،، شنو شافت منهم ،،، معقوله جدتي ما تحب أمي ،،، آآآآآآآآآآآه طلعت من صميم قلبها
تذكرت اختها ،،،وينها ،،، خافت عليها ،،،أكيد اسمعت الكلام ،،،والله ما ألومك ،،، كنتي تحذريني دايما ،،، بس ،،، حتى أمي وضحه مثل غيرها ،،، ليش ،،، مهي أم متعب ،،،أحن إنسان على وجه الأرض ،،، وإلا أبوي من عالم آخر غير عالم هالأسود ،،،آآآآآآآآآآآآآه يا ليتني ما جيت البر ،،، عالأقل ما أنصدم هالصدمات كلها ،،، يا ليتني ما عرفتهم ،،، يا رب تخليلي أبوي وخوالي ،،، تذكرت ،،،عمانها وجدها ،،،أحبهم لكني أخاف أنصدم فيهم ،،،أبوي قلبه تعبان ،،، خافت ودمعت عيونها ،،، بروح أشوفه ،،، أول ما طلعت تدوره ،،، صدمت فيه،،،( يبه وينك ،،،خفت عليك ،،،) دمعت عين أبوطلال
متعب يلمها ،،، ويبتسم ( لا تخافين ،،، ما فيني إلا العافيه ،،،وين هند ،،،)
ارتبكت هنوف ،،،( يبه جيت ما لقيتها ،،، ) دمعت عيونها
متعب مستغرب ،،،( يعني وين بتروح ،،،)
هنوف بخوف ،،،( ما أدري ،،، هي اطلعت ،،،بعد،،،؟ )نزلت راسها وسكتت
عرف متعب وش بتقول ،،، أبو طلال بحنيه ( ما عليه هنوف امسحيها في وجهي ،،،أمي ما تقصد ،،، والله إنها ورانا تصيح ،،،)
دمعت عيون هنوف ،،،( دام أبوي معاي ما عاد حد يهمني ،،،)
متعب يتنهد ،،،( لا يا هنوف ،،،هاذي أمي ،،،ولازم تهمك مثل ما أنا أهمك ،،، )
هند من وراه ،،،( يبه ،،،اللي يهمك يهمنا ،،،)
أبو طلال و متعب بابتسامه واسعه ،،،(مرحبا ،،،)
ابتسمت هند ،،،ولمته ،،،(يبه لا تضايق أدري إنها زلت إلسان وإنها ما تقصد ،،، وترا إحنا محنا زعلانات بس شوي ماخذين بخاطرنا،،، )
أبو طلال يحب راسها ،،،( الله يكملك بعقلك ،،، ) انحرجت هند من تصرف عمها وحبت راسه
هند كانت متضايقه ،،،لكنها ما تبي تضايق أبوها وهو قلبه ما يتحمل ،،، بتحمل كل ألم يجيها عشان صحة و عافية أبوها ،،، ما لهم غيره ،،،ولا فيه أحد يسوى ماطا رجلينه ،،، الله يخليك لنا ،،، والله لا يحدنا على غيرك ،،،
*****************************************
في الرياض
في فلة أبو فيصل
فيصل يبشر أبوه وأمه ،،،( أبشركم عليا جابت ولد ،،،)
أبو فيصل فرحان ،،،( جعله مبارك ،،،)
عبير فرحانه ،،،( مبروك وش بتسميه ،،،)
ابتسم فيصل ،،،( اسمه طلال ،،،)
عصب أبوه ،،،( مهوب مسمى طلال ،،،)
فيصل يهديه ،،،( يبه أنا واعد طلال ،،، إذا جاني ولد بسميه باسمه ،،،)
أبو فيصل لازال معصب ،،،( طلال من طيب أفعاله ،،، لو فيه خير كان رجع إختك ،،،)
فيصل بهدوء ،،،( يبه هذا شي بينه وبين زوجته ،،،وأنت عارف بكل شي ،،،ماله داعي انتكلم باللي فات ،،، وحتى لو طلقها ،،، طلال رفيقي ولاهوب مفرق بينا إلا الموت ،،،)
طلع فيصل ،،، وراح لزوجته في المستشفى متضايق ،،،
حب راسها ،،،( مبروك ،،،)
فتحت عينها بتعب ،،،( الله يبارك فيك ،،،)
فيصل بزعل ،،،( ليه ما اتصلتي فيني ،،، )
ابتسمت ،،،( تونا واصلين وأنت تعبان ،،، وعبدالرحمن حلف ما اتصل فيك ،،،)
ابتسم ،،،( ترى اسمه طلال ،،،)
غمضت عيونها بالموافقه ،،،( يستاهل ،،،)
**********************
بعد يومين ،،،
هدت الأوضاع شوي،،،
الحريم فارشات برا الخيام ،،، العصر ،،،
اقبل عليهم ونيت أبو سلطان ،،، فيه متعب وطلال ،،،
متعب يصوت لهنوف ،،،( هنووووف ،،،)
راحت له هنوف ،،،ضحك ومد يده لها ،،،وحطه في يدها ،،،
صرخت ( آآآآآآآآآآآآآآآآآآآآآآآآآآ) وأغمى عليها
تجمعوا عليها بلحظه ،،، متعب يضرب وجها يناديها ،،،(هنوف هنوف هنوف ،،،)
لكنها ما ترد ولا تحس فيه ،،، هند اتطمنه ( يبه لا تخاف بتصحى ،،، بس هي ما تحمل تشوف الدم ،،،على طول يغمى عليها ،،،)
جابوا لها عطر ،،،ورشته هند في طرحتها وشممته اختها ،،،
متعب بندم ،،،( أنا صايد لها الطيور أبيها تفرح وتستانس ،،،)
أم سلطان خايفه عليها من البرد لأنها طايحه على الأرض ،،،( شلوها للخيمه ،،،)
وخرهم طلال وحملها ،،،لخيمتهم ،،،وطلع ( يبه أنا برا ،،إذا ما صحت بنوديها للطبيب )
أبو سلطان روعوه عيال نوره الصغار ،،،وجاهم بسرعه ،،،( عسى ما شر ،،،)
هنوف إلى الآن فاقده الوعي ،،،الجازي اتطمنه ،،،( طيبه ،،،أغمى عليها وبتصحى ان شاء الله ،،،)
أم سلطان عيونها تدمع ،،،( لا مهيب طيبه ،،، ودوها للطبيب البنت ما صحت ،،،)
متعب ما يرد عليهم ،،، يشممها العطر ويرشها بالمويه ،،،
سلمان وأبو طلال توهم جايين من الحلال ،،، ( وش فيكم ،،،)
نوره بخوف ،،،( ما أدري ،،، هنوف شافت دم الطيور ،،، وأغمى عليها ،،،وإلى ذلحين ما توعت ،،،)
سلمان متروع ،،،( من متى ،،؟)
نوره ،،،( من نص ساعه ،،،)
سلمان يكلم متعب ،،،( نوديها للطبيب ،،،)
متعب يوقف ،،،( شلها ،،،)
حملها سلمان وطار فيها لسيارته ووراه متعب وهند خذت عباتها والحقتهم ،،،
ركب متعب مع طلال اللي يسوق ،،،وورا هند وسلمان مع هنوف ،،،
راحوا لأقرب طبيب في أحد القرى القريبه منهم ،،، طمنهم الطبيب ،،،وحط لها مغذي وأكسجين ،،، هند واقفه على راسها تقرا عليها ،،،
سلمان عند متعب اللي ما تحرك جالس على كرسي برا غرفة الملاحظة ،،،
حط يده على رجل أخوه ،،،( طيبه إن شاء الله ،،،)
متعب يهز راسه ،،،( إن شاء الله ،،،)
بعد ثلاث ساعات من يوم أغمى عليها ،،،
هنوف تحس راسها ثقيل ،،،وعيونها تعورها ،،، غمضت عيونها بقوه ،،،
شافتها هند وصارت تكلمها ،،،( هنوف ،،،هنوف ،،،هنوف حبيبتي تحسين فيني ،،،)
همهمت بصوت مهوب مفهوم ،،،فرحت هند لأنها صحت ،،،وراحت لأبوها ،،،
ابتسمت ،،،وحطت يدها على كتف أبوها اللي منزل راسه ،،،( يبه ،،،)
رفع راسه يناظرها ( لبيه ،،،) هند بابتسامه ،،،( لبيت حاج وأنا وهنوف معك قول آمين ،،،)
دمعت عينه ،،،(آمين ،،،) سلمان يبي يضحكه ،،،( وأنا معكم ،،،) طلال ضحك ،،،(وأنا بعد )
تنهدت هند ،،( يبه أبشرك هنوف صحت ،،،)
فز متعب ،،،( بشوفها ،،،) ودخل بسرعه ،،،كانت نصف واعيه
مسح على شعرها ،،،( هنوف حبيبتي ،،،)
فتحت عيونها غصب عشان أبوها وبصوت واهن ( لبيه ،،،)
ابتسم وعيونه مليانه دموع ،،،( روعتيني عليك ،،، )
ابتسمت ،،،( اشفيني ،،،)
ضحكت هند ( ارجعت لج الحاله ،،، أغمى عليج من شفتي الدم ،،،متى بتكبرين ،،،)
ابتسمت بتعب ،،،( يبه لا تخاف هذا شي طبيعي ،،،)
متعب بابتسامه ،،،( خلاص ما عاد فيه طيور ولا صيد ،،،)
ابتسمت هنوف بعد ما صحت شوي ،،،( جان شويتها وجبتها ،،، ليش تجيبها وفيها دم ،،،)
ضحك متعب ،،،( ما أنتي بذايقتها لا مشويه ولا مطبوخه ،،، جزا لك على اللي سويتيه فينا ،)
طلال ما دخل عليهم ،،،
جلس برا ،،،وطرا عليه يتصل بالرياض دام الخطوط تشبك ،،،
اتصل على فيصل يعزمه على البر ،،،( يا مرحبا ببو راكان ،،،)
ابتسم فيصل ،،،( الله يرحب بك ،،، كيف الحال ،،،)
طلال بابتسامه ،،،( طيبين وبخير ،،، مهوب ناقصنا إلا شوفتك ،،،يا خي الربع كلهم متجمين تعال ،،، جمعه ،،، وشوفة الحلال اللي ترد الروح ،،، وصيد ،،،)
ضحك فيصل ،،،( بجيكم ذا اليومين ،،، وجهز السماوه ،،،)
تفاجأ طلال ،،،( مبروك ،،مبروك ،،،متى جابت ،،،)
فيصل ،،،( قبل يومين ،،،)
طلع متعب وسلمان ووراه هند وهنوف ،،،
( أجل ننتظرك ،،، إن شاء الله ،،،)
فيصل ( إن شاء الله ،،،)
طلال ينهي المكالمه عشانهم بيمشون ،،،( فيصل تامر على شي ،،،)
فيصل ،،،( سلامتك ،،،)
( في أمان الله ،،،)
( في أمان الكريم ،،،)
********************
في رنج متعب طلال السواق ،،،ومتعب في جنبه وهند وراه ،،ابتسم وناظر في المرايه ،،،انحرجت ونزلت عينها ،،،
متعب يسأل طلال ،،،( من كلمت ،،،؟)
طلال يناظر المرايا ( فيصل ولد خالي ،،،) رفعت عينها له ،،،وابتسم
متعب ( وش أخباره ،،، )
طلال مبتسم ،،،( جاه ولد وسماه طلال ،،،ويقول جهز السماوه)
متعب مبتسم ،،،( ما شاء الله ،،، أجل الله يعينك ،،،)
سلمان ،،،( ما عزمته يجينا ،،،)
طلال طب في مطب من كثر ما يناظر في المرايا ،،،( إلا عزمته ،،، وبيجي ،،،)
عصب متعب ،،،(حاسب ،،، كسرت السياره ،،،)
ضحك سلمان ،،،( لا تلومه إنكسرت ارقبته على اللي وراه ،،،)
انحرجت هند ،،، متعب يضحك ،،،( وقف ،،،وقف ،،،)
وقف طلال ،،،متعب ملتفت على هند ،،، ( روحي مكان سلمان ،،،)
طلال رافع حواجبه ،،،( ما نيب سايق ،،، )
متعب مبتسم ،،،( بتسوق غصب عليك ،،،)
مشى طلال غصبن عليه ،،،ما يقدر يقول لعمه شي ،،،ويتحلف في سلمان ،،،
سلمان يرفع حواجبه له ويضحك ،،، وهو يغمز له يعني أوريك الشغل ،،،
************************************
في اليوم الخامس
عندهم غدا كبير بيجيهم خالهم الامير ماجد بن سلمان أخو أم سلطان ،،،
أقبلت سيارات مليانه رياجيل وحريم ،،،وقفت عند خيام الحريم ونزلتهم ،،،وراحوا لخيام الرياجيل ،،، كانوا بانين بيت الشعر الكبير ،،، ومفتحينه من الصوبين ،،،وفارشينه بالسجاد الأحمر ومزينينه بالسدو المهدب ،،، ومساند السدو الحمر ،،، وكأنهم محتفلين في العيد
الشباب واقفين برا بيت الشعر ،،، ينتظرونهم ،،، أول ما وصلوا مسك سلمان الرشاش وضربه في السما ،،، فخر لجية خواله ،،،
أبو سلطان وعياله وأبو فهد وعياله ،،،وأبو حمد وعياله ،،، والجماعه اللي حولهم ،،،جايين للغدا ،،، كلهم اطلعوا يسلمون عليهم ،،،أبو سلطان مبتسم ،،( الله حيهم ،،،الله حيهم ،،،)
وحب خشوم وسلام ،،، وتحفي ،،،وأخذ العلوم ،،،
**************************
عند الحريم ،،،
أم سلمان وبناتها في خيمة أم سلطان ،،، والحريم متجمعات عندهم ،،، كانوا مادين سفره طويله فيها أنواع المكسرات والحلويات ،،،والقهوه والشاهي ،،،
هنوف ودلال يقهوون الحريم ،،، ويوزعون الحلويات ،،، ويبدلون الفناجيل كل شوي ،،، أم سلطان رايحه جايه على خيمة المطبخ ،،، هند كانت تطبخ ذبايح الحريم ومعها هيا وساره ،،، هيا تضحك على جدتها ،،،( يمه ،،، طاحت رجلينك ،،، ارتاحي ،،،)
ساره اتطمنها ،،،( ترى كل شي جاهز ،،، الله يسلم يدين هند ،،،)
أم سلطان بحب لهند ،،،( الله يعطيها العافيه ،،،)
هيا بابتسامه ،،،( وش عليه طلال ،،، بينتفخ ،،،مرته طباخه درجه أولى ،،،)
هند تمثل الابتسامه والفرح ،،،لأنها لازالت حاز في نفسها كلمت جدتها ،،( الله يرحم اللي علمتني الطبخ ،،، ويعطي خالاتي العافيه ،،، ما قصروا معنا ،،، ولا فرقوا بينا وبين بناتهم ،، علمونا مثل ما علموهم ،،،)
سكتت جدتها واسرحت ،،، والله إنك صادقه ،،،أنا كبرت وخرفت ،،،ما عاد أثمن كلامي ،،، جعل اللسان اللي ما يصون ينقطع ،،، تنهدت وطلعت راحت لخيمتها ،،،
أم سلمان تناظر هنوف رايحه وجايه ،،، ما انزلت عينها عنها ،،، هنوف كانت لابسه بلوفر صوف لازق على الجسم وتنوره جنز لو وست ،،، وشال صوف لكنها منزلته في الخيمه ،،،
عامله شعرها ظفيره ومنزلته على ظهرها شعرها كستنائي ناعم وطويل ،،، وقاصه بكلتها مدرجه وقصيره نازله على جبهتها ،،، وجها ما فيه شي بس حاطه روج أحمر لأن بشرتها صافيه وناعمه ،،،كأنها بشرة طفل ،،،إذا ابتسمت بينت أسنانها كأنها لولو مصفوف ،،، كل البنات لابسين أحلى ما عندهم وحاطين أنواع المكياج ،،،حتى بناتها ،،،إلا هي وهذا اللي خلا أم سلمان ما تنزل عينها عنها ،،،
**************************
قبل الغدا ،،،
شافوا ثلاث جيوب مقبله عليهم ،،، وقف سلمان ونواف برا لين أقبلت الجيوب ،،، وابتسموا
انزلوا ،،، ( الله حيهم ،،، يا مرحبا ومسهلا ،،،)
عامر مبتسم ،،،( الله يبقيك ،،، والمرحب باقي ،،،)
متعب يرحب ،،، ويتطاولون الخشوم ،،،( يا مرحبا ،،، ومسهلا ،،،هذا الغدا المبارك ،،،)
أبو سلطان مقبل عليهم يرحب ويسلم ،،،
دخلوا بيت الشعر ،،، وكان أبو سلمان في وجيهم ،،، يرحب فيهم ،،،( مرحبا ومسهلا ،،،)
محمد مبتسم ،،،( والمرحب باقي ،،،)
أبو سلمان ،،،ما سك يمين محمد ،،،( وش ذا اليوم المبارك ،،،)
محمد لازال مبتسم ،،،( مبارك بشوفتكم ،،، وشوفة ذا الوجيه السفره ،،،)
جلسوا يسولفون ويتحفونهم ،،،
وقبل لا يقلطون الغدا ،،،
أبو سلمان انتهز فرصة وجود إنسباهم ،،،( يا بو سلطان ،،، أنا كنت بجيكم أخطب بنت متعب الصغيره لكن دامكم متجمعين ترى حنا طالبين القرب منكم ،،،)
أبو سلطان مبتسم ،،، ( والله يا بو سلمان ،،، يشرفنا نسبكم ،،، ومثلك عارف البنت لها عيال عم وخوال ،،، وهذا هم قدامكم)
التفتت أبو سلمان على أبو فهد ،،،عمهم سالم ،،،( وش قلت يا بو فهد ،،،)
أبو فهد حاشم أبو سلمان وما يبي يرده ،،،( من ناحيتي ما عندي مانع ،،، والله لو انها بنتي ما أردها عنكم ،،، )
أبو سلمان مبتسم ،،،( تسلم ،،، هاه يا بو طلال وش قلت ،،،)
ابتسم أبو طلال بحزن وهو ما التفت على نواف اللي مات من القهر ( تستاهل يا بو سلمان ،)
أبو سلمان بابتسامه واسعه ،،،( وش رايك يا متعب ،،،)
متعب خيم على وجهه الحزن ،،،( البنت مهيب بنتي يا خال ،،، بنت ذا الرياجيل اللي قدامك ،) وأشر على خوالها ،،، خالها عامر يرد له الابتسامه ،،،( دام عيال عمها عطوك ،،،فتستاهل)
محمد ما عجبه الكلام ،،،( لكن يا بو سلمان ،،أنت عارف البنت يتيمه ،،،وما تربت لا عند أبو ولا أم ،،، فلازم تستشار ،،، وخاصة إنها عايشه في ديره ثانيه ،،، )
أبو سلمان مأيده ،،،( أكيد يا بو عامر ،،، لكنا نبي الرد بسرعه لأن الولد بيكمل دراسته برا ونبيها معه ،،،)
محمد ارتاح ،،،( الله يكتب اللي فيه الخير والصالح ،،،)
نواف كان بيتكلم ويحجرها ،،،لكنه انصدم من رد أبوه ،،، ما يقدر يرد وينزل كلمته قدام الرياجيل ،،، لكنه ارتاح وخاف بنفس الوقت لما سمع رد أبو عامر إنها لازم تستشار ،،،
أبو سلطان بصوت عالي ،،،( قلطوا الغدا ،،،)
*************************
بعد الغدا ،،،
متعب خذا خوال بناته عشان يسلمون على بناتهم ،،،
ووقف السياره ورا الخيام ،،، وحذر الحريم محد يطلع ،،،ودعا بناته ،،،
طلعوا ورا الخيام ،،،وتفاجئوا ،،،
هند حبتهم كلهم ،،، كانت مشتاقه لهم ،،، تحط يدها ورا راس الواحد فيهم ،،،وتلمه ،،،
دمعت عيونها ،،، أما هنوف لمت خالها محمد ولا عاد هدته ،،، دفنت وجها في صدره ،،،
وصاحت ،،، لمها لين سكتت ،،، حاس إن فيها شي ،،، متعب تفاجأ من ردة فعل هنوف ،،، توقع هند اللي بعيده عنهم هي اللي تصيح ،،، لكن هنوف إصدمته وعرف إنها متأثره وما نست اللي صار ،،، متعب يلطف الجو ،،،( الظاهر إني بزعل ،،،بتروحين وتخليني ،وتصيحين على خالك ،،، بدال ما تصيحين علي ،،،)
ابتسمت هنوف وعيونها مليانه دموع ،،،( مشتاقه لخوالي ،بعدين إذا رحت بشتاق لك أكيد )
هند فرحانه ،،،( أسعد يوم في حياتي ،،، اليوم ،،،)
محمد يحط يده وراها ،،،( والله أنا اللي أسعد يوم في حياتي ،،،اليوم،،،)
هند بابتسامه ،،،( فديت قلبك ،،، شلون دليتوا مكانا ،،،)
عامر مبتسم ،،،( خالج دليله ،،،أفا عليج ،،، )
سعود يضحك عليه ،،،( الله يسلم ماجلان،،،)
ضحكوا عليه،،،
ناصر مبتسم ،،،( ترا مخيمين قريب منكم ،،، حول عشرين كيلو ،،،)
هنوف مستغربه ،،،( زين من قالكم عن مكانه ،،،)
سعود مستغرب ،،،( ليه ما تدرين إن أبوج جانا وتغدا عندنا ،،،)
هنوف تحط يدينها على خصرها ،،،( والله متى ،،،؟)
متعب يضحك ،،،( عزمتهم بعمل ،،، مفاجأه لكم ،،،)
هند والدمعه حايره في عينها ،،،( أحلى مفاجأه ،،،)
*****************************
انتشر خبر خطبة هنوف ،،،
أم سلطان تقنع هنوف ،،،( يا بنتي ،،، ترا سلمان ولد شيوخ ،،،متربي على العز ،،،وناسن خيرهم واجد ،،، ويعرفون المعاريف ،،،وحريمهم مشيخات ،،، كل سنه في ديره ،،، ولا يلبسون إلا الغالي ،،، وكل وحده لها سواقها وشغالتها ،،، ولا يبون منهم شي ،، لا طبخ ولا نفخ ،،، عندهم طبابيخ ،،، ومطابخ خاصه فيهم ،،،)
هنوف سرحانه ،،، نست أني بنت خوالي متربيه على يدينهم ،،، خوالي اللي ما يعجبونها ،،، وألحين تمناني لولد أخوها ،،، الولد اللي يتمنونه كل بناتهم ،،، محد يبي يفرط فيه ،،، وعند أمه كل البنات طلعوا إبداعاتهم وفنونهم ،،، ليش ،،، شاللي تغير ،،،
طرت عليها فكره ،،،
( يمه ،،، إنتي ما تدرين إن فارس ونواف اخطبوني ،،،)
أم سلطان استغربت ،،،( إلا أدري ،،، وما الله كتب نصيبهم عندك ،،، فارس يقول أبوك إنك رفضتيه ،،، ونواف ما رديتي عليهم ،،، وأبو سلمان استشارهم ،،،وعطوه ،،، ما بقى إلا ردك ،،،)
هنوف تنهد ،،،( منو اللي عطاه ،،،؟)
أم سلطان ،،،( سأل أبو فهد ،،،وسلطان ،،، وعطوه ،،،)
هنوف تضايقت ( بس يمه ،،،أنا ما شفت أحد اهتم لخطبتهم ،،، وكلمني ،،، إلا أبوي ،،،)
أم سلطات تفهمها ( يا بنتي الزواج قسمه ربك ،،، وفارس بنات خواله تارسين الرياض ،،، ونواف هاذي دلال وخواته ،،، قدامه إذا نوى يعرس ،،،مهوب لاقي أحسن منهم ،،،)
تضايقت هنوف ،،، ما تدري ليه ،،، وإلا وش منه ،،، هي كانت رافضه نواف من الأساس ،،، يعني وش اللي تغير ،،، يمكن الإحساس بالرفض وإنه تنازل عنها بسهوله ضايقها ،،، أو فيه إحساس ثاني تملكها ،،،
****************************
نواف متحطم ،،، خذا جمس أبوه وسرا ،،،
يبي يبعد ،،، عن الخيام واللي في الخيام ،،، وقف له على ضلع ،،،
ليه يا يبه ،،، ذبحتني ،،، عذبتني ،،، حطمت أحلى حلم بحياتي ،،، كيف بنساها ،،، معقول بينتهي حبي لها بلحظه ،،،تنهد ،،، كلمه منها بتحييني وإلا تقتلني ،،،
شغل المسجل ،،، وكانت الأغنيه ضاربه على الوتر ،،،
جمرة غضى .. أضمها بكفي
أضمها حيل . .
أبي الدفا .. لو تحترق كفي
وأبي سفر لليل
بردان أنا تكفى .. أبي احترق بدفا
لعيونك التحنان .. فعيونك المنفى
جيتك من الإعصار .. جفني المطر .. والنار
جمرة غضى
والله الجفا برد .. وقل الوفا برد
والموعد المهجور ما ينبت الورد
ياحبي المغرور .. ياللي دفاك اشعور
رد القمر للنور .. واحلى العمر .. في وعد
بردان .. بردان أنا تكفى.. أبي احترق بدفا
يا أول الحب .. شفتك أنا مره
واهديت لك قلب
ورديت لي جمرة
ومن يومها كان الرحيل
وليل الشتا .. القاسي الطويل
وآه يا الحنين
لليل باب له حارسين
برد وسحاب
آآآآآآآآآآآآآآآآآآآآآآآآآآه يا الهنوف ،،، تكفين ارحميني ،،،
رجع لبيت الشعر ،،، لقى طلال ينتظره ،،، ابتسم ،،،( ما نمت ،،،؟)
طلال ابتسم بحزن ،،،(أنام وأنا ما دري وينك ،،،تأخرت ،،،)
نواف بهدوء ،،،( أزعجتك ،،،)
حس بضيقه ،،،( ما أزعجتني ،،،أقلقتني ،،، ترا مهيب نهاية العالم ،،،)
التفت عليه نواف ،،،( أنت أكثر واحد عارف إنها نهايتي ،،،)
مسكه من متونه ،،،( بس أنت رجال ،،، )
نواف يغمض عيونه ،،،( والرجال ،،،لازم يكون مجرد من الاحساس ،،،)
طلال بهدوء ،،،( لا ،،، بس لازم تحمل ،،،)
نواف يترجاه ،،،،( طلال طلبتك ،،،)
طلال يناظره ،،،( لو تطلب ارقبتي ،،، ما تغلى عليك ،،،)
ابتسم ،،،( برجع للرياض بكره ،،،أحس إني بموت لو أجلس ثانيه وحده ،،،)
طلال بهدوء ،،،( والمطلوب ،،،)
تنهد ،،،( سيارتك ،،، وترجع مع أبوي عبدالله تسوق فيه ،،،)
خذا نفس ،،،( على شرط ،،، ما تسري في ذا الليل ،،،)
حب خشمه ،،،( إن شاء الله ،،،)
*****************************
هيا متضايقه ،،، طول الليل وهي تقلب على الفراش ،،، جلس مشاري ،،،( تراك أقلقتيني ،،)
هيا ودمعتها ما جفت من عرفت ،،،( أحس بضيقه ،،، ) حطت يدينها على وجها وصاحت ،،،
مشاري بهدوء ،،مسكها وحط راسها على صدره ،،، ( نواف رجال ما يهتز عشان مره ،،،)
هيا ،،،( أبوي ظلمه ،،، ليه ما حجرها ،،،)
( أبوك ،،، استحى في مجلس مليان رياجيل ،،،وأبو فهد عطاه ،،،وهو اللي يرد خاله ،،، مهيب زينه في حقه ،،،بعدين البنت بتستشار يمكن ترفض ،،،)
هيا تأشر على نفسها ،،،( أنا أدرى ،،، هنوف مهيب لنواف ،،، أمي وضحه ميته عليهم تبيهم واليوم كله وهي بارزه فيها ،،، هقوتك ما أقنعتها ،،، )
مسك وجها ومسح دموعها ،،،( اللي الله كاتبه بيصير ،،، وإذا مهيب له ،،، مهوب ميت ،،، بيتزوج ويجيه عيال ،،، ومصيره ينساها ،،،)
هيا تهز راسها ،،،( مستحيل ينساها ،،، أنت ما شفته ،،،كيف يتغنى فيها ،،، وإلا يتكلم عنها يصير بحالة هيمان ،،، بحياتي ما شفت إنسان يحب لذا الدرجه ،،، )
مشاري ،،،( وش الحل برايك ،،،)
هيا متخذه القرار ،،،( بكلمها ،،،)
*************************
مع تمنياتي لكم بقراءة ممتعه
انتظر ردودكم
|
25-04-10, 11:53 PM
المشاركة رقم: 66
العرض العادي
