كاتب الموضوع :
العامريه
المنتدى :
القصص المكتمله
الجزء التاسع والثلاثون:
اللـــــــــــــــــــــه ..... سعّودي صوتك عذاب .... قالتها هند وهي تقوم وتتعدل .................................................. .............!!!!!!!!!!!!!!!!!!!!!!!!!!!!!!
سعد وهو يضحك على نعومة هند: والله انتي العذاب مهب صوتي ..... ليه مانمتي يالغاليه؟؟؟؟ تبينا نوقف في محل وتركبين ورى عشان تتمددين ...؟؟؟؟
هند وهي ترفع من نقابها شوي قالت: لا ..... تسلم لي يارب .... ماله داعي .... راحتي هي اني اجلس بجنبك .... واحكي على راسك لين تقول اسكتي ..... وضحكت بنفس النعومه ... وضحك سعد معها وقال:اما اسكتي ذي والله ان تبطين ماسمعتيها ..... انا ماصدقت تنفك عقدتس وتحكين .... اقول لس اسكتي ....! على طاري الصمت والحاله اللي جاتس .... انا اذكر واحد من اخوياي يوم اعرس يقول خذيت مرتي معي ..... والثلاث ايام الأولى معي وهي ساكته .... يقول شكيت ا ن اهلها غاشيني واني متزوج وحده طرما .... يقول يأست من انها تتكلم .... قمت وصيت واحد من اخوياي .... يجيب لي حبتين من حقة الحكي .... وابتسم يوم شاف هند فتحت عيونها فيه وهي تقول مقاطعته:وانت تعرف ناس يبيعون هالحركات؟؟؟؟؟؟؟؟؟؟؟؟؟؟؟؟؟
عدّل قعدته سعد وهو يقول: عاد ياحبكم يالحريم تكتشفون هالأشياء ... ولما لاحظ نظرات هند التفحصيه قال:والله انا مااعرفه بس صديقي يقول انه يقرب له ..... انا مالي دخل......! طيب خليني اكمل بعدين اسألي طيب .....!!!
ابتسمت هند وبانت إبتسامتها من تقوس عيونها وقالت:كمل .... وبالنسبه للحبوب وطقتها انا واثقة فيك كل الثقه .... !
سعد وهو يبتسم بشكر:فديت روحس .... والله اني خابر انس وحده مافيه مثلس ... طيب ماودس اكمل السالفه ... وكمل لما شاف هند اشرت له براسها ... وقال:المهم ان الرجال جاته الحبوب ..... شرا عصير وحط الحبتين فيه .... وعطاها مرته .... وشربت العصير كله ... ويقول من يومها رحنا مكه خذينا عمره وجلسنا يوم فيها ورجعنا لجده وتمشينا ..... وهي طووووول الطريق تهذر على راسي ..... عاد تخيلي مهب تهذر سوالف وبس .... كل اللي عندها خرته .... كل شي الاولي والتالي .... يقول يوم بغيتها تفصل شريت لها حليب السعوديه وخليتها تشربه وفصلت عاد انا بغيت اسوي فيس نفس اللي سواه في مرته .... وش رايس الحركه مهب حلوه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟!
هند وهي تمسك صدرها من الرهبه:يااااااااااويلي .... كان امووووووووت .... زين علمتني عن حركاتك .... خلاص من اليوم ورايح ماراح اشرب شي من يدك ...... طلعت تخّوف ...!!!!!!!!!
احس اني تعبت .... والله اني راحمة ذا الضعيفه من يوم جينا وهي تحوس .... شطبنا المطبخ انا ومزون معها وهي باقي خلصت المطبخ وطلعت تنظف المجالس .... احس ان البيت عليها كبير .... ويتعبها الشغل فيه .... كانت نوره تقول هالكلام وهي تنشف شعرها من الماء بعد الحمام الدافي اللي خذته .... ومامداها لفت الا وزيد حاط يده على خصرها ..... ويشدها له بنعومه .... ويقول:والله هذا من رحمتس بس ..... ليتها عاد شايلة البيت كله .... انتي اللي تطبخين وانتي اللي تصرفين الاكل ..... وتغسلين بعد معها ..... هذا غير بيتس اللي لاجيتي تمرين عليه .... وتحطين يدس الحلوه فيه ..... ! وسكت لما شاف نوره ابتسمت في وجهه .... وقالت:الا من طيب قلبك وحنيتك علي .... الله لايحرمني منك ..... كل شي اسويه عشانك عسل على قلبي .... تأكد من هالشي .... قاطعها زيد وهو يمسك خصله من شعرها ويلفها في اصبعه ويقول:نوري ... وش رايس اجيب لس شغاله .... لس انتي .... ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
نورة سحبت خصلتها من اصبع زيد وسوت نفسها مبوزه وقالت:ليه شايفني عجوز .... مااقدر اقوم .... وقالت بدلع:لا حبيبي .... انا اللي بقوم بشغلي ..... وشغل زوجي .... لاني اكون في قمة متعتي لو اشرفت على كل شي يخصك ..... وبعدين انا مااحب اعتمد على احد .... احب اسوي شغلي بنفسي ..... ومهب أي واحد اثق فيه عشان اسلمه شغلي ..... مثل مهب أي واحد اسلمه قلبي ..... اللي له قلبي وروحي وكلي شخص واحد بس ..... ويسوى عندي الدنيا كلها .... ودنقت على راس زيد اللي جلس على طرف السرير .... وباسته وهي تقول:يادنيتي انت...!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!
هند كانت تطلع الملابس وتصفها في الدولاب ..... وسعد كان يحوس على شي مضيعه .... وكانت هند تراقبه من بعيد .... ماتبي تسأله تبيه يقول لها وش يدور عليه ..... صحيح ان علاقتهم صارت احسن بكثير عن قبل .... بس بقت اشياء ومنها ..... ان سعد مايحب يطلب من هند شي لأنه يظن في نفسه انه بيتعبها ..... وهي تقدرون تقولون تعبت من ها الوضع .... تتمنى لو يطلب منها طلب حتى لو بسيط .... تبي تحس انها لبت له أي شي .... ماتحملت الوضع فرمت البيجامه اللي كانت في يدها على الشنطه ..... وقامت ومشت لسعد سيده .... واول ماوصلت له رفع عينه فيها وصار مقابلها بالتمام .... رفعت يدينها وحوطت بها كتفه وهي تقول:حبيبي سعودي وش يدور عليه؟؟؟؟؟ وليش مايقول لي ؟؟؟؟؟ وابتسمت إبتسامه هاديه .... قلبت كيان سعد .... اللي قال وهو يمسك خدودها:ولا شي .... بس مضيع كبكاتي .... ومدري وين حطيتهم ..... ممكن هنودتي الحلوه تساعدني ونلقاها؟؟؟؟؟؟؟
نزلت هند يدينها عن كتوفه وقالت:طيب ليش سعودي ماقال لهنودته عن اللي يبي ..... عشان تطلعه له من تحت الأرض .... وسكتت لما تكلم سعد وقال:ماحب سعودي يتعب هنوده ..... اخذت هند نفس طويل يدل على ضيقه وقالت:سعد ..... انا وش بالنسبه لك؟؟؟؟؟؟؟؟؟؟؟؟؟؟؟
سؤال سألته هند لسعد طلع على راسه مية علامة إستفهام قال ببرود:انتي بنت عمي وزوجتي ........ وحبيبـــــــــــــــــــــــتي .... شدد على هالكلمه وهو يمسك طرف خشمها .... قالت هي وهي تقرب تمسك جيب ثوبه:طيب بما اني حبيبتك .... وزوووووووجتك .... اقول يعني ترى عادي لو تقول لي انت وش تبي ..... انا من واجبي البي لك كل اللي تبي .... يعني تبي ماء قول ياهنوده جيبي لي ماء .... كبكاتك ضايعين قول ياهنوده دوريهم لي ..... يعني صرت احس اني صديقك في العمل على هالتعامل .... مااحس اني حبيبتك وزوجتك ..... !!!!!!!!!!!!!!!!!!!!
سعد وهو يبوس جبهتها قال:انتي مهب صديقتي ياهند ..... انتي روحي .... وعشانس روحي ماحبيت اتعبس ..... لأنه مايهون علي اتعبس .... بس دامس تبين هالشي ... اللي يريحس ... ويالله الحين بأبدأ ... جيي لي ماء .... ودوري كبكاتي .... وطلعي لي شراب ..... وجيبي لي طاقيه ... وومممممممممـ ....... هند وهي تضف راسها:بس ..... خلاص اسحب كلامي ..... وضحكت وضحك سعد معها .................................................. ..........................
محمد وين زيد وفايز .....؟؟؟؟؟؟؟؟؟؟؟؟؟؟ كان ابو زيد يسأل محمد وهو معصب .... جاوبه محمد على قد السؤال وماحب يتفلسف على ابوه ..... وقال:زيد الحين بينزل .... وفايز يلبس ملابسه وبيجي ..... خير عسى ماشر .....؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ابو زيد اللي حس انه معصب عشان شي مايستاهل قال:استغفر الله العظيم ..... والله مدري يابوك .... بس عشاني افكر في عزيمة الليله .... ابي زيد يجيب الذبيحه ..... وفايز يجي يدق لي على الجماعه اعزمهم ..... وانت رح اسأل نوره وجب اغراض البيت اللي ناقصه ..... يالله يابوك اخلص ..... ماعاد به وقت ....... قام محمد وحب راس ابوه اللي طول عمره حنون .... وطيب ويحب عياله .... وطول عمره رجال فيه خير .... وهو فخور بأبوه .... ومايعرف وش كثر ..... طلع من الصاله وهو يقول:ابشر .... الحين اروح .... وهو طالع لقى زيد نازل .... قال له: ولد اخلص جب الذبيحه .... ناظره زيد بنص عين وقال:وش دخلك ....؟؟؟؟؟؟؟؟؟؟؟؟؟؟؟؟
محمد بكل ثقه قال:انا اللي دخلني .... وقرب من زيد .... وهو يقول : والله مايعدي اليوم الا وانا مملك عليها ..... بس بيني وبينك لحد يدري ..... ضحك زيد ضحكه هزت المكان وسمعها ابوه اللي قال:يالله يازيد .... اخلص يابوك ..... ربت زيد على كتف اخوه .... وهو يقول:الله يوفقك ... ورفع صوته لأبوه وهو يقول:ابشر طاااال عمرك الحين طالع .......................!!!!!!!!!
بعد ماطلع زيد ..... صّوت محمد على نوره وهو يقول:يا أم الجوري .... وشوي طلعت له نورة من المطبخ وهي تقول:سَــمـ .... ابتسم لها محمد وهو يقول:وش حالس وخيتي .... ردت نورة وفي بالها وش كثر تحترم هالإنسان وقالت:بخير زان حالك ... انت وش حالك ؟؟؟؟؟؟؟؟؟؟؟
رد محمد وهو يقعد عالكرسي اللي كان ابوه قاعد عليه قبل مايطلع هو وفايز يجلسون في الحوش .... ويكلمون الجماعه يعزمون:انا بخير دامس والجوري ومن يعز عليس بخير ..... اقول ام الجوري ..... قبل مايجي الشايب ويعرض على ظهري سامري ..... اكتبوا اللي ناقصكم ..... عشان اجيبه .... ضحكت نوره على تعليقه وهي تقول :ابشر .... الحين اخلي مزون تكتب الطلبات ..... وتجيبها لك الشغاله .... خمس دقايق بس ..... انشرح صدر محمد لما عرف ان مزنه هي اللي بتكتب .... وعلى طووووووول جات فكره في باله .... ومامداه يخلص التخطيط .... الا الشغاله واقفه قدامه ومادة له الورقه .... خذاها من الشغاله وهو يقول لها لحظه ..... مسك الورقه وكتب فيها .... ومدها على الشغاله وهو يقول وديها لمس مزنه وقولي:مستر محمد .... مافي معلوم ايش هذا كلام اوك ..... هزت الشغاله راسها له وراحت .... وهو يبتسم إبتسامة خبث عاللي سواه .................................................. .........................
كانت مزنه في المطبخ .... تسوي حلى ..... جاتها نورة وهي معتفسه من بنتها اللي رجعت على ملابسها ..... قالت مزون ولا عليس امر اكتبي اللي ناقص ..... فتحت مزنه عيونها في نورة قالت لا والله النوري الله يخليس ..... انا مااعرف في بيت الناس ..... اخاف اكثر طلبات ..... ضحكت عليها نورة ..... وجلست على الكرسي وحطة بنتها على الطاوله وهي تقول:طيب يالله اكتبي بسرعه .... ولاتقولين ماتعرفين ..... قعدت تملي نورة مزنه الطلبات .... ومزنه تكتب ولما خلصت قالت نورة لمزنه تعطي الشغاله الورقه توديها لمحمد وسوت مزنه اللي قالت لها عليه نورة ..... ورجعت تكمل حلاها اللي قطعته نورة ..... الا شوي الشغاله راجعه عليها بالورقه تقول:مس مسن .... مستر مهمد .... كلام يقول مافي معلوم ... ايس كلام؟؟؟؟؟
رفعت مزنه الورقه من يد الشغاله وهي تناظرها بإستغراب الى ان شافت اللي لفت نظرها في الورقه كان مكتوب آخر الورقه "احبــــــــــــــــــــــــــــــــــــــــــــــ ــــــــــــــــك" ..... ابتسمت مزنه بخجل .... وقالت للشغاله ... ودي ورقة لمستر محمد وقولي مس مزنه .... يقول "عيب"............................................. !!!!!!!!!!!!!!!!!!!!!!!!!!!!!!!!!!!!!!!!!!!!!!
طلعت الشغاله بالورقة لمحمد وقالت له اللي قالت عليه مزنه .... وضحك محمد بصوت عالي من قوته ..... وصل لمزنه في المطبخ ..... وضحكت بإحراج ............................
يالله هنودتي ... ترى تأخرتي .... كان سعد يقولها وهو يلبس شماغه عالمرايه .... رفع عينه عن شماغه وناظر على جنب من المرايه لما شاف هند طالعه بلوك جديد بالنسبه له:شرق بدون ماء ...... ونزل يده عن شماغه وهو يصفّر بقوة ..... :يالبيـــــــه ..... هونّا مابه مراح ..... يمدحون بيتنا ..... وصغّر عيونه .... لما شاف هند تأشر بيدها إشارة لا .... وهي تقرب منه تقول:هاه وش رايك؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟
كانت لابسه ..... بنطلون شمواة اسود من فرزاتشي .... وعليه بادي طويل احمر لنص الفخذ.... بدون اكمام .. وفوقه جاكيت اسود قصيركمه قصر مو طويل.... من قوتشي ..... تقريباً كانت قمه في الأنوثة ..... هذا غير ريحة عطرها شانيل ..... اللي كانت تدّوخ ..... كانت مسويه شعرها كيرلي على طوله ..... ولامته بشكل عشوائي مطلع لها شكل جنان ...... هذا غير الميك آب اللي كان بسيط .... بس كان لون الروج هو اللي مغير ملامحها .... كانت حاطه روج احمر بلمعه..... مطلعها بيضاء زود على بياضها ..... قربت من سعد ومسكت شماغه وقالت خلني اضبطه لك...؟؟؟؟؟؟؟؟؟؟؟!!!!!!!!!!!!!!!!!!!!!!!
جلس سعد بكل طواعيه وهو فاتح فمه ..... وقعدت تضبط شماغه ..... ولما خلصته رفعته من يدينه .... وهي تقول خلصت .......!!!!!!
قام واقف وجاء قبالها ..... وطبع بوسه طويلة على جبهتها ..... وهو يقول بسم الله عليس الله يحفظس لي يارب ...... لاتطلعين لين تقرين على نفسس سمعتي ..... وابتسم لها وهو يقول:انتظرس في السيارة لاتطولين ......وطلع........................................ .................
كان البيت هادي .... ماكان فيه غير صوت الجوري .... وكلنا أنتظار لدخول هند .... او سعد اللي وحشني .... بشكل مستحيل احد يتخيله ..... فقدته كثير ...... صحيح كانت اسبوعين بس كأنها سنتين ..... كنت انا وعمتي ونورة جالسين في المجلس .... والعيال وعمي جالسين في الحوش ..... كان الصمت عندنا يالحريم سيد الموقف .... ماقطع هالصمت الا دخول هند المفاجئ والهادي بشكل غريب .... لاني اعرف هند هي بجهه والعقل والركاده بجهه ..... شفت جت بسرعه وانكبت في حضن عمتي تبكي ..... تقطع قلبي عليها .... ونزلت دمعتي .... لما تذكرت اني مستحيل ارجع اسوي مع امي نفس الشي ..... قمت عشان اسلم على هند .... رغم اني مشتاقة لها الا ان داخلي حزن كبير ..... اشتقت لامي .... واشتقت لأبوي ..... ابيهم .... سلمت عليها .... رغم ثقل جسمي ..... كانت تسألني عن احوالي .... وتقول انها مشتاقة لي .... كنت ارد عليها بس بشروود .... مدري وش جاني ..... جلسنا شوي ..... وتقهوت .... وقعدت تسولف لنا عن رحلتها ..... واضح من عيونها انها مبسوطة ..... ابتسمت في داخلي ..... الحمدلله ان فيه احد من اللي احبهم ..... مبسوط بحياته ..... صحيح نورة مبسوطة لكن مازال يؤرقها ...... سالفة ان زيد باقي يحب منيرة .... ويبيها ..... هو اسلوبه شوي دفش .... كثير يلمح لها عن هالسالفه ...... المفروض ..... يحاول ينسيها ..... يخليها تثق فيه لآخر حد .... موب يزرع الخوف في قلبها .... يالله الله يهدي سرهم يارب ..... مع اني متأكدة مليون بالمية ان نورة غالية عند زيد .... هذا إذا ماكان يعشقها حد الموت ..... قطعت سرحاني هند لما قالت :بنات سعد دق علي يقول يبي يسلم عليكم ...... قطعتها نورة وهي تقول:بدينا بالحركات .... مايعرف جوالات خواته يعني ..... يوم يدق عليس ..... قطعت كلام نورة هند اللي تقطعت من الضحك وهي تقول:بدينا .... توني مابعد جالي شهر ..... لحقتي تشغلين علي حركات الحموات ....
نورة وهي تبتسم :بس وش رايس فيني ....؟؟؟؟؟؟؟ امانة مايصلح الدور علي ..... قسم بالله اني تحفه وانه يضبط ....
هند وهي تناظرني بنظرة انا عارفة مغزاها:الا يصلح ..... وهي توجه لي نظرة كأنها تقول لي معس جلسة محترمة ...... انتظريها بس ..... قمت لما شفتها تناظرني وانا اقول نورة سعد جاء ...... وابتسمت إبتسامة من الأذن للأذن لما شفت سعد دخل علينا ..... رحت له بسرعه وضميته ..... وطلعت الكبت اللي في صدري على كتفه .... مدري وش فيني ..... بس ماانتبهت اني ابكي بقوة ..... الا لما شفت سعد جلّسني .... وقعد يمسح على راسي وهو يقول:بسم الله عليس مزون وش فيس ..... انا بخير شوفيني ..... كل ذا عشاني وحشتس ..... طيب شوفيني .... كان يحاول يرفع راسي ..... وانا عجزت احط عيني في عينه .... مدري ليه ..... لو تسألوني الحين ليه قلت لكم مدري ..... جاني شي جبرني ابكي لما شفته ....... يمكن خفت مااشوفه ..... او .... مدري مدري ...... شفته تركني لما شاف نورة اقبلت عليه .... وسلم عليها ولما جات تحب راسه رفع راسه هو وحب راسها ..... لبى قلبه .... طول عمره حنون ..... احس بالفخر دامه اخوي ..... جاني بعد ماسلم عالجوري ..... وسأل نورة عن اخبارها عالسريع .... وهو يقول لي : وش فيها دلوعتنا ...... من اللي مكدر خاطرس ..... لما قال هالكلام حسيت بحنانه ..... رجعت دموعي تنزل ورجعت اضمه بقوة ..... وبدوره هو حط يده ورى ظهري وهو يقول : هدي حبيبتي هدي ...... كل شي بيصير اوكي ..... بس انتي هدي .... بعد مافرغت شحنة الشوق والخوف في نفس الوقت ....... وبان على شكلي اني هديت ..... ماانتبهت الا لهند اللي جات وقالت ..... :بنت قومي ترى الحقوق محفوظة ..... ضحكت لها .... وانا ابعد عن سعد واقول : اشبعي به ..... اسبوعين معه مامليتي؟؟؟؟؟؟؟؟؟ فتحت عينها فيني وقالت:انتي لتس معه اربع وعشرين سنة مامليتي منه ..... تبيني يا أم اسبوعين امل ...؟؟؟!
اول ماشفت المجلس امتلى رياجيل ..... رجعت امشي عليهم بالقهوة وانا ااخطط للي في بالي ..... واول ماوصلت لسعد قلت له بصوت واطي:انا بروح اجيب المملك ضبط وضعي عند الجماعة ...... ضحكت على شكله لما فتح عيونه وقال:اليوم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
قلت بحماس :ايه الله يعافيك ...... ماعاد وراي صبر ...... ابتسم لي سعد وقال توكل على الله وانا بقول لعمي يضبط وضعك ..... تخبر انا جديد على هالشغلات مابعد صرت خبرة ..... نزلت القهوة وطلعت بسرعة من المجلس ...... ودقيت على المملك اللي كنت متفق معه من العصر .... وقايل له اني بجيبه بعد صلاة العشاء ...... وهذانا صلينا العشاء ورجعنا نتقهوى .....
قمت من محلي ورحت جلست جنب عمي ..... وانا اقول له:عم ترى محمد يبي يملك اليوم ..... وهذا هو طلع يجيب المملك ..... شفت عمي فتح عيونه دليل اإستغراب .... ابتسمت له وهزيت راسي ..... وابتسم لي بحنان الأبو ...... قمت ورجعت محلي ..... ومامداني اقعد ..... الا وانا اسمع عمي يقول : هذي والله الساعة الطيبة اللي جمعتكم كلكم .... تشهدون معنا ملكة محمد ولدي على بنتي ..... ابتسمت في نفسي ...... وانا اسمع الرياجيل ..... كل واحد يبارك في جهه ........ واللي يقول مشاء الله .... واللي يدعي لهم بالتوفيق ..... قمت من محلي ..... وسحبت الدلة امشي بها على الرياجيل ....... عقب مالفيت دورة كاملة على المجلس ... طلعت برى اعلم هند بالجديد ..... عشان تمهد لمزنة ..... وكل شي يصير تمام ..... سمعت الجوال يرن .... بس محد يشيلة .... لين قطع ..... رجعت سويت إعادة إتصال ........ ورن رنتين ثم سمعت احلى الووو .............!!
كان جوالي يدق ..... وانا اصب للحريم ....... القهوة .... طلعت جوالي من شنطتي وشفت ..... "حبيبي" يتصل بك ..... لأني غيرت الأسم من معذبي لحبيبي ..... وحنا راجعين من التمشية .... طلعت من المجلس ..... ولما وصلت الصاله انقطع الرنين ....... مشيت شوي ..... لقيته رجع يرن ..... على طول رديت وانا اقول:الووووووووو.................................. ........
سعد:احلى الووووووووو ....... وحشتينــــــــــــــــي ........ كان يقولها بحالمية .......
هند بخجل: مممممممممـ وانت اكثر ..... بعدين إذا صوتي حلو ..... اكيد اذنيك هم الحلوين .....
سعد: والله انتي الحلوة ....... هنودة ؟؟؟..............
هند:لبيــــــــــه.........
سعد:لبى قلبس ......... عندي شي بقوله لس ....... طيب...........
هند بنبرة إستفسار:قووووووووول .... فيه شي؟؟؟؟؟؟؟؟؟؟؟؟؟؟؟؟................................ .
سعد:ايه ......... محمد راح يجيب المملك ....... يبي يملك على مزنه ..... لا اوصيس مهدي لها الموضوع .......عشان لاجاء يسألها الشيخ ماترتبك .......
هند بفرح: الله ونااااااااااااااااسة ......... واخيراً ........ من عيوني ياقلبي ..... انا ماامهد الموضوع بس ....... انا امهد ابووووووووووووووه ..........وضحكت
سعد بحب:كفو والله ......... يالله حبيبتي ..... لازم ارجع المجلس ..... تعرفين يفقدوني ....!!!
هند وهي تميلح: حتى انا حبيبي فقدوني الحريم...........................
سعد وهو يضحك:اكيد فقدوس محد يهذر على روسهم غيرس .................... مع السلامة حبيبتي ....
هند وهي معصبه:هين اوريك ياقلبي ....... مع السلامة ........................................
احس اني على نار ....... لين وصلت ودخلت بالمملك ..... المجلس ........ سلم على الرياجيل وجلس ..... حاولت فيه يتقهوى .... بس رفض يقول مستعجل ......... تمت مراسم الملكة على خير وبقى توقيع مزنه ..... وشروطها لو عندها شروط ....... خذيت الكتاب ........ انا ووجهي ناوي اوديه لها ..... بس شافني سعد وعطاني نظره يحبها قلبكم ..... وخذا الكتاب من يدي ..... وطلع داخل لقسم الحريم ......... ورجعت انا بخيبتي .... وجلست بمحلي ..... ارد على العرب اللي يباركون لي ........ .................................................. ...........................
من قالت لي هند وانا مرتاعه ....... الحين عرفت سبب الخوف اللي حسيته ....... كذا يامحمد .... تحطني قدام الأمر الواقع ..... صحيح احلى واقع ........ بس والله تفاجأت ....... شفت هند ونورة وهم يأشرون لي يبوني ادخل مقلط الحريم ..... لأن سعد والكتاب فيه ....... مشيت وانا مستحية عالآخر ....... واول مادخلت طاحت عيني على الكتاب اللي في يد سعد ....... كان له رهبه كبيرة ....... قام سعد من مكانه وجاء حب راسي وهو يقول:مزون إذا كنتي باقي موافقة ... وقعي هنا ..... وإذا لا ..... علميني خليني اصدم محمد ..... كان يقولها بنبرة الفكاهه ....... ماكان لي مزاج اضحك او حتى ابتسم ....... شفتوا المرتاع ..... انا كنت زيه ..... زي البلهاء يحركوني واتحرك ..... مسكت القلم ووقعت ..... انتبهت من قوة بوسة هند لخدي ..... وضمة سعد المفاجئه لي ....... التفت على نورة لقيتها تبكي ..... ايه تبكي في عيونها دموع رحت لها وضميتها ..... وانا احب راسها .... واقول كمحاولة للتخفيف عنها في حال انا ابي من يخفف عني: افااااااااا ........ النوري .... تبكين ..... وانا اللي احسبس بتفرحين لي ....... ضمتني نورة وهي تقول في وسط بكاها:من فرحتي يالغاليه ابكي ........ من فرحتي ..................
مزون تكفين ........ افتحي المروحه ....... قسم بالله خنقتني ريحة الكشنة ....... ماتفهمين انتي ......... اقول لس انا وحااااام ....... مااحب هالريحه ....... تكفين لاتعذبيني ..... ابتسمت لها وانا افتح شبابيك المطبخ ....... واشغل المروحه ....... :تامرين امر ........ كم مرت اخو عندنا وحده ........ اكيد بنشيلس على كفوف الراحة ..........................................
قالت نورة اللي تأكل بنتها :هذا وهو اول واحد ....... بكرة لاجبتي درزن ....... وش بتسوين ...... والتفت نورة على بنتها اللي قالت:ماما .......همـــ ...........................................
نورة: من عيوني ....... هاس حبيبتي ........ ومدت الملعقه لفم الجوري ..........
هند وهي معصبه عليهم:هين مزون بعد شهرين عرسس ..... وبعد شهرين بتحملين ..... جعلني اشوف وحمس ......... واضحك عليس ......... مايكفي اني موب راقصة في عرسكم ..... انتي ورجلس المهبول ذا ................!!!!!!!!!!!!!!!!!!!!!!
ضحكت مزنه وكشرت تسوي معصبه وهي تقول:حدس ........ الا رجلي ........ يسواس انتي واللي في بطنس .......... ترى إذا السالفه عنه ....... الله يعينس ..... بقلبها عليس .......
نوره اللي وقفت بصف هند من بعد اسلوب مزنه:ان كان فيس خير المسي هنودتنا ........ والله ان يفرمس سعد .................................................. .........................................
The End
اتمنى ان تكون النهاية بحجم شوقكم ..... وبحجم مستوى القصه ....... لا أعلم كيف بديت ... او كيف انتهيت ..... ولكني اعلم ..... انني استطعت ولو بالشكل البسيط ...... ان ازرع إبتسامة عذبة على شفاهكم ....... اعتذر كثيراً إن قصرت ....... او تأخرت في تنزيل الاجزاء ..... كنت معكم هنا طوال سنتين وربما اكثر ..... ولكن تأكدوا كنتم معي وستكونون نبراساً إلى الأبد .... ابيحوني ..... وحللوني ..... وادعوا لي بالتوفيق .... ولكم كل أمنياتي بالتوفيق .....
اشكر كل من ساهم في إرتقاء اسلوبي .... او في تشجيعي ..... كل الشكر ....... على ثقته الغاليه التي أهداني إياها ..... بحق كنتم لي اجمل أخوة ..... اسأل الله ان يحفظكم .... قبلاتي الحارة للجميع ... اختكم المحبة لكم إمرأة مـا ...!
|
06-12-08, 01:41 AM
جديد مواضيع قسم القصص المكتمله
العرض العادي
