(( سيارة عبد الرحمن ))
عزووز يدندن : والله احبك .. احبك يشهد الله علي .. لما ننننن ابتسم .. صددني ماهو بيدي ..
عبدالرحمن : ههههههه صدقني يا ولد مو صددني ....
منال : هههه فديته عزووزي انا ..
عبدالرحمن علا الصوت : يللا عزوووز غني معاي ...
يعشقني وعذبني ..مرمرني .. وانا مالي سواه
عزوووز تحمس : يعشقني يعشقني ..
منال : فديت اللي يغني انا يا نااااااااااااااااااس ....
عبدالرحمن : هههه أي واحد فينا ..؟
منال : انتوا الاثنين ... ا.. بس ولدي اكثر
عبدالرحمن : طييييييييييب ... الحين اوقفك على الطريق .. كملي مشوارك مشي .. وانا وعيالي بنروح بالسيارة ...
منال تترجاه : لا خلاص خلاص والله سوري .. فديت انك انت حمّني احلاهم والله .. يا هلي ودنيتي وعمري ... هههههههههههههههه
عبدالرحمن : هههههه نعنبو المصالح يا شيخة ... الا تعالي .. احس عبدالله متهاوش ويا زوجته ..
منال : ليش..؟؟ ما لاحظت صراحة ..
عبدالرحمن : ما شفتيه شلون يسكتها ويكسر كلمتها قدامنا .. وبعدين ما يكلمون بعض الا ف الضرورة ...
منال : ماشالله يالخبير الاجتماعي ...
عبدالرحمن : لا والله .. مدري وش القصة ..
منال : حتى لو في شي .. انت لاتتدخل .. انت ما تحب احد يتدخل في خصوصياتنا .. فخليك على جنب .. تخاف ينحرج ولا شي .. واحنا ما نبغى يحس بهالشي ..
عبدالرحمن كان يسمع كلام منال .. ويقول ف نفسه " احمد ربي مئة مرة اللي عطاني زوجة مثلك .. "
( ف سيارة عبدالله وباسمة )
باسمة منفعلة : انت اللي تخلي الشي النتفة كبير مرة ..
عبدالله : الحين واجباتك كزوجة صارت اشياء نتفة ....؟!؟! تشوفين وين ثوب زوجك وتكوينه وتغسلينه صار نتفة ..؟!؟!؟!؟ وانا اللي اتعب واشقى عشان ايش..؟؟ عشانك انتي وعيالك وعشان تعيشون بفلوس وعز وما تنحرمون من شي ... ماتقوليلي وش الشي الصغير اللي ضخمته..؟؟؟؟ طلعات واخليك تطلعين على كيفك ولا اكلمك ولا اسالك وين رايحة ووين جاية .. والمشغل اللي فتحتيه ولاهيك عن بيتك وعيالك اللي مدري من اللي بينتبه لهم ويربيهم تربية
زينة .. واعتمادك على الشغالات ف كل شي ..هذا غير عزايمك اللي ماتنتهي .. ماشالله كل يوم فاتحة لي عزيمة حاتم الطائي ف البيت .. وكل هذا ولا اتكلم .. حتى معاي مقصرة .. متى آخر مرة جلستي معاي وشفتي وش احتاج وش ما احتاج ؟؟.. ليش متضايق .. ليش متكدر .. من متى ما جلستي سولفتي وياي وناقشتيني .. ها....؟؟ تكلمي...
باسمة : الحين طلعتني انا الغلطانة ..!؟!؟ انت اللي 24 ساعة برة البيت .. ما تعد .. كله ف الشغل ف الشغل .. ادق عليك وينك ..؟؟ ف الشغل .. وش اسويلك .. ؟؟!!!
عبدالله : تدرين ليش..؟؟ لاني ماني طايق اشوف وجهك ف البيت .. كل ما ارجع ما اشوف منك ومنك خشتك ووجهك الا النكد .. قسم بالله عفت البيت وطاريه منك .. ياخي أي حرمة انتي...؟؟ شوفي اختك شلون ما همها غير زوجها وعيالها .. شوفي شلون ما تحب احد يدخل ف واجباتها الزوجية ويسويها عنها .. الكوي هي اللي تكويه .. والغسيل هي اللي تغسل ... واذا ما قدرت ما فيها شي اذا ساعدها زوجها ..
باسمة : وانشالله تبغاني اطبخ واغسل واكوي بعد..!؟!؟!؟!؟؟
عبدالله : ليش.. لا..؟؟ مو من مستواك يا سمو الاميرة ....!! نسيتي وش كنتي قبل ما آخذك ...؟؟
باسمة : اصلا كل اللي وصلت له انت من فضلي .. ومن فلوس ابوي ...
عبدالله : ههه فلوس ابوك .. يا حلوة ابوك ما كان عنده غير 3 ملايين .. وشوفي وش سويت انا فيهم .. ضاعفتهم لك اضعاف الدنيا واخذت حصتي .. مافيها شي .. وبصراحة انا اعتبر هالثروة كلها من ورى شغلي وكدي كل يوم من الصباح .. مو من مكياجك وعزايمك ..!!!
باسمة : عبدالله لاتخليني اسوي مشكلة لها اول مالها آخر الحين ... خلي هالمشوار يقضي على خير فاهم..؟؟
عبدالله : مافي مشكلة مالها حل .. وخصوصا الزواج تدرين وش نهايته ..؟؟ ولا ماتدرين .. كلمة من4 حروف .. تقولينها وينتهي كل شي ..
باسمة : شقصدك..؟؟
عبدالله : قصدي واضح .. وهالكلمة كنت ابغى اقولها من زمان .. بس ما ابغى عيالي يتربون من غير ام .. ما ابغى يقولون ابونا حرمنا من امنا .. ولا والله العظيم اني ماني طايق اشوف خلقتك يوم واحد قدامي ...
باسمة : طلقني يللا .. طلقني ..
عبدالله سكت شوي واخذ نفس بعدين قال : سكري الموضوع وصلنا الجسر ..
باسمة باصرار : لا الحين بتطلقني .. يللا اشوف .. ان كنت رجال طلقني ..
عبدالله سكت قام يستغفر ربه ويتعوذ من الشيطان : يابنت الحلال خليني اركز ع الطريق لايصير لنا حادث لاسمح الله ..
سكتت باسمة ولفت وجهها لجهة القزاز وقعدت تتفرج ع الدنيا بقهر وتتمنى لو انها مكان اختها ماخذه عبدالرحمن .. الرجال اللي استهانت فيه يوم جا يخطب اختها بحكم انه مو غني مرة وماعنده شركات ومصانع ..
( سيارة سعود )
وقف سعود ف الطابرو حق السيارات اللي ف الجوازات والتفت بيده الجوازات ..
سعود : يللا يا حلوات ....
ديمة : وين ..؟؟
سعود : تروحين تطبقين الجواز .. ف تطبيق النساء ..
ديمة : اهااا... ادري ادري ماني غبية ..
نزلوا البنات ومشوا من قدام سيارة سعود اللي كان مع سالم ف السيارة ..
وبدت الاغنية ..
رحت ملح بهواها .. وانا واقف معاها صدقوني ياعالم .. كن سحرني حلاها..
وبدى سالم يدندن مع الاغنية وسعود يناظر البنات ويتعقبهم بعينه .. لين ما انتبه لدلع واقفه قدام وتاشر له ينزل .. قام ونزل ..
سعود وقف قدام دلع : هاا شصار ..؟؟
دلع مدت الجواز : ابغى جوازي .. هذا جوازك ..
سعود : اووو .. سوري دقيقة طيب ..
رجع للسيارة وجاب الجواز حقها ورجع يعطيها اياه ...
سعود : هذا جوازك ..
دلع اخذت الجواز : مشكور ..
سعود : تراني بحول على الطابور اللي ع اليسار فاضي مافيه زحمة ..
دلع جات بتتكلم بس سكتت لانه صوت الاغنية كان عالي والناس بدوا يطالعون فيهم ..
رحت ملح بهواها .. وانا واقف معاها
صدقوني ياعالم .. كم سحرني حلاها..
شفتها وجن عقلي .. مدري شللي حصللي
لو اشوف حد ثاني .. قلت خله يولي ..
سعود لف بسرعة يوم شاف كل الشباب يطالعون فيه ويضحكون أشر لسالم بانه يوطي الصوت بسرعة ..
سعود : وووجع سالم وطي الصوت الله ياخذك ..
دلع : يوووه .. انا بروح بسرعة .. فشلة فشلة يا ربييي ..
سعود : ههه انقلعي بسرعة .. فضيحة ..
دخل سعود السيارة معصب : انت وش سويت ..؟؟
سالم : ياخي مندمج مع الاغنية وشفتكم واقفين مع بعض .. قلت اسوي جو .. يعني فيديو كليب مع الاغنية ..
سعود ضرب سالم على راسه : فيديو كليب ياخذك انشالله .. فضحتنا قدام السيارات .. اخاف يشكون فينا ويوقفونا ع الجسر ..
سالم : لا تخاف ابوي ف الطابور اللي على اليمين يعني تيك إت إيزي ..
سعود : زين ذكرتني بروح ذاك الطابور .. شكله يمشي بسرعة ..
( من جهة البنات .. ف التطبيق )
الموظفة : اقول وين الجواز ...؟؟
ديمة بغباء : هاا..؟؟
الموظفة : اختي الجواز .. وين جوازك ..؟
لينا : يا بقرة عطيها الجواز ..
ديمة : ها..؟؟ أي صح ...
مدت ديمة الجواز للموظفة اللي حسبت ديمة وحدة مجنونة او بطيئة استيعاب ..
الموظفة شافت الصورة : هذا جوازك ..؟؟
ديمة : أي ..
الموظفة : ولا جواز اختك ..؟
ديمة : اختي ..؟ لا اختي عندها جواز ثاني ...
الموظفة : انتي ديمة ..؟
ديمة : والنعم ..
الموظفة : هااا..؟
ديمة : ا .. اقصد أي .. انا ديمة بنت عبدالرحمن ال...
الموظفة ضحكت : من طلب اسمك الكامل ..؟؟؟ والله انك حفلة يا بنت
مدت الجوازات للبنات وقالت : توصلون بالسلامة .. ولاتتركون هالحلوة بعيد خلوها جنبكم .. مدري شلون بتدبر عمرها بروحها ..
لينا : لا تخافين مسيطرين ع الوضع ...
دلع : هههه مشكورة اختي ..
طلعوا البنات من التطبيق وقعدوا يدورون على السيارة بعيونهم ... وهم واقفين على الرصيف ..
ديمة : وين السيارة ..؟
لينا : مدري .. تصدقون مع كل هالسيارات احس اني انحولت .. ما اركز .. بيضا سودا كحلية بيج .. كل الالوان ..
ديمة نزلت للشارع : الحقوني وبنحصل السيارة ..
دلع : أي صح ..قال لي سعود .. انه بيحول على الطابور الاول ..
ديمة : أي واحد ...؟؟ هذاك ..؟؟
دلع :أي ..
ديمة تمشي بين السيارات المليانة شباب وعوائل : تعالوا وراي يللا ..
لينا : شوف الهبلة هذي .. ماني نازلة بين هالحلوين .. والله استحي ..
دلع : هههه هذا اللي تفكرين فيه ..
لينا : والله شوفي كل واحد احلى من لثاني .. لو امر قدام سيارة اللي فيها بيسوي لي سكان من فوق لتحت ..
دلع مسكت لينا وسحبتها : امشي بس يللا ... عن الدلع الزايد ..
ديمة كانت تمشي بين السيارات وماهمها احد .. تصقع ف هالسيارة .. وتنفصخ جزمتها قدام سيارة .. وتطيح شنطتها مرة .. والمرة الثانية يطير غطاها .. يعني السالفة حوووسة ف حوووسة .. وما بقى احد ما شافها ..
اما دلع ولينا فكانوا يلحقون ديمة بس بطريقة انعم واكثر رزانة زي ما يقولون .. والشباب ما خلوهم .. قزووو فيهم لين ما شبعوا ( القز : هو لما الواحد يطالعك من فوق لتحت ويشوف كل شي فيك ) ولينا كانت مرة مستحية وعيونها ع الارض .. اما دلع فتحاول تتماسك قدام السيارات وتسحب لينا اللي حاطة وجهها على ظهر دلع وتمشي ... لين ما فجأة سمعوا صوت صراخ ديمة ..
ديمة : دللللللللللللللللع .... ليناااااااااااا ... تعالوا حصلت السيارة ..
لينا فتحت عيونها ع الاخير : لا لا لا تقولي اللي صار من شوي حقيقة ..؟؟ بليز لأ .. يا فشيلتييييييييييي ... والله احرااااااااااااج .. اسمي يا نااس اسمي
دلع : ههههه اليوم كل الناس بيروحون لمعارفهم يوقولولهم عن البنات الثلاث اللي مضيعين سياراتهم ويحوسون يدورون عنها بين السيارات ... وحدة منهم اسمها دلع .. والثانية اسمها لينا .. يا فشلتنا ..
ركبوا البنات السيارة وديمة كانت للحين متحمسة وتصارخ .... << مسكينة اول مرة تروح بحرين ... !!!
سالم : ايييييييي يالغراب وش فيك تناعقين ...؟؟؟!؟!؟! فضحتينا الله يفضحك ...!!
زين اني انتبهت لك .. ولا كان سويتي لنا مسلسل صراخ برى ..
لينا : المشكلة تقول اسماءنا بعد ...
سعود : !!!!!!!!!! ديمة انتي موب صاحية .... ابغى افهم عقلك صناعة وين ... ؟؟
دلع : حراام عليكم والله انها ما تقصد شي ..
سعود : الا تعالي يالدفاع انتي .. انا ماقلت لك اني بروح الطابور هذا ..؟
دلع : نسيت أي واحد قلت لي .. ما عرفت وين
سعود : قلت لك اللي ع اليسار .. مو اخر واحد .. !!!!
دلع : يوووه عاااد .. نسيت والله ..
سالم : طيب خلاص يا شباب.. انتهى الموضوع .. الحين خلونا نستانس برحلتنا ..
ديمة : صدقه سالم .. يقولون في بحر ف البحرين صدق..؟؟؟؟
الكل فقع ضحك : هههههههههههههااااااااااهاهاهاهاهاهاهاايييييي
دلع : يا حليلك يا ديمة .. البحر بكل مكان ف الشرقية .. ف الدمام .. ف البحرين .. ف الكويت .. ف الامارات .. فهمتي ..؟؟
سعود : يعني بس انتوا يالضبان اللي ما عندكم منه ... ولا كل الناس عندها بحر ..
كملوا السيارات الثلاث التطبيقات .. وعلى الساعة 1 الظهر ودخلوا مملكة البحرين بالسلامة ..
___________________________________
20-10-08, 12:03 PM
جديد مواضيع قسم القصص المكتمله
العرض العادي
