المنتدى :
المنتدى الطبي - Medical Forum
نصائح للتخلص من رائحة العرق
للعرق أسباب كتيرة قوي
فيه أسباب كتير قوي بتخلينا نعرق باستمرار والأسباب دي منها الطبيعي اللي بيحصل للناس كلها ودي مفيش منها أي ضرر وبتكون زي...
1. ارتفاع درجة حرارة الجو ودي مشكلة بنعاني منها كلنا دلوقتي!!!
2. القيام بأي مجهود زيادة زي مثلا الحركة الكتير أو ممارسة رياضة عنيفة.
3. التواجد في أماكن مفيهاش تهوية كتير زي وسائل المواصلات غير المكيفة.
4. زيادة الوزن وطبعا كلنا عارفين إن الناس اللي وزنهم زايد هما أكتر الناس اللي بتعاني من زيادة العرق.
5. كمان التوتر والقلق والخوف والمجهود الذهني من العوامل اللي بتسبب العرق.
6. الأكلات الحارة هي كمان من أسباب زيادة العرق.
7. كمان ارتداء الملابس المصنوعة من البوليستر بيسبب زيادة العرق.
أما بقى الأسباب غير الطبيعية أو المرضية بتكون زي..
1. وجود خلل في الهرمونات ودي مشكلة بتعاني منها السيدات بشكل أكبر.
2. أو نتيجة لزيادة في نشاط الغدة الدرقية والغدة النخامية تسبب زيادة عامة في إفرازات العرق.
3. كمان الإصابة ببعض أمراض الحميات واللي بيصاحبها الارتفاع في درجة حرارة الجسم وبالتالي زيادة إفراز العرق..
وفي الحالات اللي زي دي لازم نروح لدكتور علشان ناخد العلاج المناسب....
ليه بنكره العرق؟!
مش عارف ليه الناس بتكره العرق؟! على الرغم أن العرق ده نعمة كبيرة قوي وده لأن السائل الشفاف اللي بتفرزه الغدد العرقية بيكون عبارة عن الماء والأملاح الزايدة عن حاجة الجسم وبكده العرق بيخلصنا من المواد اللي جسمنا مش محتاج لها وبتكون ضارة بجسمنا.....
علشان كده مفيش حاجة اسمها إننا نتخلص نهائي من العرق نفسه... وكل اللي هنعمله إننا هنحاول نتغلب على رائحة العرق اللي ممكن تكون السبب في كرهنا للعرق.
إزاي نتخلص من رائحة العرق؟!
أنا شايف إن الاهتمام بنظافتنا الداخلية هي أهم حاجة ممكن إنها تساعدنا على التخلص من رائحة العرق وبتكون عن طريق الاستحمام اليومي بصابون أو شاور جيل معطر للجسم، والاهتمام بإزالة الشعر الزائد من الجسم باستمرار، وتغيير الملابس الداخلية والخارجية بشكل يومي خصوصا مع الصيف والحر.
فيه حاجة كمان أنا شخصيا باعملها طول الصيف وهي أني بالبس طول الصيف ملابس قطن؛ لأنها مريحة جدا وبتتشرب العرق.
وعلى فكرة أنا دايما باستخدم الوصفات الطبيعية علشان أتخلص من رائحة العرق.
ومن الوصفات الطبيعية دي...
وصفة قشر الرمان المطحون
وكل الحكاية إننا هنطحن قشر الرمان الناشف لحد ما يبقى ناعم زي البودرة، وبعدين نفرك بيه تحت الإبطين مرتين في اليوم.. وعلى فكرة قشر الرمان ده موجود عند العطار.
وصفة الشبَّة المطحونة
ودي وصفة طبيعية كمان هتساعدنا على التخلص من رائحة العرق تحت الإبطين كل الحكاية هنشتري شبّة مطحونة من عند العطار ونرشها تحت الإبطين بعد الاستحمام اليومي.
وصفة زجاجات رائحة الفواكه
فيه زجاجات صغيرة اسمها "رائحة الفواكه" هنلاقيها عند العطار وهنلاقي منها أنواع كتير من الفاكهة زي البرتقال، التفاح، الفراولة... يعني هنقدر نختار أي نوع فاكهة إحنا بنحبه ونجيبه ونضيفه إلى المية اللي هنشربها فهتكون النتيجة إننا لما هنعرق هنلاقي أن العرق بتاعنا بقى برائحته فواكه.
وعلى فكرة أنا مش بافضّل نهائي استخدام مزيلات العرق؛ لأن فيه منها أنواع كتير مش كويسة ممكن إنها تسبب الإصابة بأمراض سرطانية لا قدر الله كمان بعض أنواع هذه المزيلات بتسبب اسمرار الجلد تحت الإبطين أو اصفرار الملابس.
لكن لو مضطرين إننا نستخدم المزيلات دي يبقى لازم نستشير دكتور جلدية في النوع اللي إحنا عايزين نستخدمه.
|
15-09-08, 09:30 PM
جديد مواضيع قسم المنتدى الطبي - Medical Forum
العرض الشجري
