الفصل الحادي والثلاثين



الاجواء متوتره بداخل القصر الكبير ..

انتشر خبر الوفاه ..

والكل منصدم من السبب ..

محد توقع انه يموت بسبب جرعه زايده ..




ماسكه ثوبه وتضربه بقوه على صدره ..

دموعها تنزل بحرقه ..

كل دمعه تحرق قلبها اكثر من الثانيه ..

اللي صار لها مو بسيط ..

عيونها منفخه من كثر البكي

ووجها احمر ..

تتكلم بصوت متقطع ومبحوح وهي تضربه على صدره : كله منك انت .. انت اللي ذبحته

ماسكتها حنان تبعدها وتحاول تهديها وهي تبكي : خلاص ياهناء هدي

ام عمار وهي منهاره : هوه اللي ذبحه دلعه ومامنعه من شي لبى له كل طلباته لحد ماضيعه من ادينا

حنان ماسكتها بالقوه : خلاص هناء قطعتي قلوبنا

ام عمار تأشر على مكان قلبها : يعني انا قلبي مو محروق على ولدي .. هذا ولدي ومتوفي بـ ...

ماقدرت تكمل كلامها وطاحت مغمى عليها ..

التموا عليها يحاولوا يصحوها ..

ابو مالك واقف ومو متحرك من مكانه ..

الخبر كان صدمه كبيره للجميع ..

مو قادر يرد بكلمه وحده على كلام ام عمار ..

كلامها صحيح ..

هو السبب بكل شي صار ..

هو اللي ذبحه وموته ..

سلمه كل شي من غير مايحاسبه ..

وكل ماطلب منه شي لباه له بسرعه ..

عطاه حساب خاص ومبالغ تدخل فيه من غير مايحاسبه على الصرف ..

وبالنهايه يموت بجرعه هروين زايده ..!

حس انه بمثل الدوامه وهو يفكر بهالافكار ..

الكل يلومه ويحمله الذنب ..

آآآه لو يقدر يرجع الزمن لورا ..

كان صلح اشياء كثيره

هالشي كسره كثير ..

وكسر جبروته وقوته ..

حس نفسه بدوامه والدنيا تدور فيه ..

طلع من المكان اللي ام عمار فيه ..

مايبي يسمع لوم اكثر يهزه ..





.
.
.
.
.
.





تركي جالس بالعزا وهو مصدوم ..

منظر عمار وهو بالغرفه مو غايب عن عينه ..

دموعه تنزل من غير ماترف له عين ..

مايحس باللي حوله وباللي يعزوه ..

قرب منه طارق وبيده كاسة مويه ..

حط يده على كتفه : تركي ..

تركي سرحان وماهو منتبه لشي ..

طارق : تركي اشرب هالماي مو زين اللي انت تسويه

تركي : عمار مات

طارق : الله يرحمه ومالنا الا الدعاء

تركي نزلت دموعه : شفته وهو ميت

طارق : اذكر الله .. وكلنا ماشيين على هالطريق

تركي : بس ماتوقعت مخدرااااات !

طارق : قوم معاي .. اقرا لك قرآن

تركي : مو قادر انسى شكله وكيف الابره جنبه

طارق : قوم اذكر ربك .. ومانقدر نسوي شي غير ان احنا نترحم عليه ..

تركي ضم طارق وصار يبكي بحرقه : هذا اخوي ياطارق .. رغم اللي سواه بس يضل اخوي

طارق : قول لا اله الا الله وكلنا ماشيين على هالطريق

تركي : كله من جدي هو اللي وصله لهالطريق .. لو مادلعه وعطاه كل شي كان ماصار اللي صار

طارق : كلمة لو الحين ماتنفع بشي مانملك الا الدعاء الحين وجدي ..

سكت بس شاف جده يدخل المجلس ..

دخل ابو مالك وهو منكسر ..

حاس ان كل اللي كان يسويه غلط بغلط ..

جلس بصدر المجلس وهو بحس نفسه مخنوق مو قادر يتنفس ..

فتح ازارير ثوبه الاوليه حتى يقدر يتنفس ..

بس الكتمه كل ماجا لها وتزيد ..

حط يده على فخذ ابو باسل وشدر عليها ..

ابو باسل لف على ابوه : يبه فيك شي ؟

ابو مالك ماصار يشوف شي وكل شي مشوش قدام عينه

ابو باسل خاف عليه اكثر : يبه رد ايش اللي تحس فيه ؟

ابو مالك مايرد غاب عن الوعي

ابو عمار : خلينا نطلب الاسعاف

ابو باسل : بسرعه




نقلوا ابو مالك للمستشفى بسرعه ..

من كثر ماحس انه هو السبب بموت حفيده تعب ..


بعد فتره طويله ..

طلع الدكتور من غرفة العنايه المركزه ..

ووجهه مايبشر بالخير ..

ابو باسل : كيف حالة الوالد

الدكتور : مااخبي عليك حالته بخطر

ابو باسل : كيف يعني بخطر

الدكتور : انصاب بجلطه ولازم تمر 48 ساعه حتى نعرف كيف حالته

ابو باسل : طيب نقدر نحوله لاي مستشفى بالخارج حتى يتعالج

الدكتور : لا حالته حرجه .. ومايقدر على التنقل .. فيها مخاطره كبيره على حياته

ابو باسل : والحل ؟

الدكتور : الحل انكم تدعون له يقوم بالسلامه احنا سوينا اللي علينا والباقي على ربنا


ابو باسل جلس على الكرسي ..

وهو يفتح زرار ثوبه حتى يقدر يتنفس..

يفكر بحل ينقذ فيه ابوه ..

كيف هالمصايب اللي جايه ورا بعض ..

رن جواله ورد عليه وهو مخنوق : هلا حنان

حنان : طمني كيف ابوي

ابو باسل بضيقه : ادعي له

حنان : ليه ايش فيه؟

ابو باسل : صايبته جلطه وحالته خطره

حنان نزلت دموعها : خلينا نسفره لبرا

ابو باسل : فكرت بهالشي بس قال الدكتور صعب .. حالته ماتسمح

حنان : والحل طيب

ابو باسل : الحل انك تدعين له

حنان وهي تبكي : لا حول الله .. ليه المصايب تجي كلها مره وحده

ابو باسل : اذكري ربك .. وهذا اختبار لنا

حنان : لا اله الا الله

قفلت الخط ..

وغطت وجهها تبكي

ام باسل قربت منها : ايش فيك حنان

حنان ضمت ام باسل وشهقت بالبكي : ابوي تعبان

ام باسل بخوف : ايش فيه عمي

حنان : صالح يقول انه صايبته جلطه

ام باسل : لا حول الله .. الله يقومه بالسلامه ..


طلعت جنان من الغرفه وسكرت الباب بهدوء


ام باسل لفت على جنان : كيفها الحين ؟

جنان : بالموت نامت .. كل شوي وتنقز تتذكر عمار

ام باسل : الله يعينها .. اللي شافته مو بسيط

جنان : تقطع القلب لما تفز من نومها

ام باسل : الله يصبرها

جنان : انا بروح عندها يمكن تحتاج شي

ام باسل : ايه خليك جنبها يكون احسن

طق الباب باسل ودخل : كيفها دينا

ام باسل : تعبانه شوي

باسل ارتخى على الكنبه وغمض عينه : الكل نفسيته تعبانه

ام باسل : اللي صار مو بسيط وبالذات دينا وتركي لانهم هم اللي شافوه

باسل : والحين كملها جدي بعد والله يستر

ام باسل : الله يقومه بالسلامه

باسل : انا بروح المستشفى .. تامريني على شي

ام باسل : سلامتك


طلع باسل وراح للمستشفى ..

شاف ابوه يتناقش مع الدكتور ..

قرب منه : هلا يبه

ابو باسل لف عليه : ليه خليت العزا وجيت .. المفروض توقف مع عمك وعياله

باسل : بس حبيت اعرف حالة جدي

ابو باسل : جدك ادعي له الله يقومه بالسلامه

باسل : الله يشافيه يارب

ابو باسل : لحد الحين حالته مو مستقره وماصحى لاحد

باسل : طيب ليه مانسفره لبرا

ابو باسل تنهد : انا قلت هالشي .. بس الدكتور يقول حالته ماتسمح

باسل مرر يده بشعره : لاحول الله .. المصايب كلها مره وحده

ابو باسل : مانملك الا الدعاء

باسل بخاطره ( هذا جزاء الظالم .. ظلمنا بتعامله وهذي آخرته ) : طيب يبه انت روح ارتاح وانا بجلس هنا

ابو باسل : اساسا جلستنا كلنا مالها فايده

باسل : خلاص خلنا نروح البيت عشان نرتاح ..







*************






قدام القصر الكبير ..

مكان العزا ..

وقف سيارته بعيد حتى يعزيهم بوفاة صاحبه ..

احيانا يندم نفسه ويحس انه هو السبب بوفاته ..

جلس فتره بالسياره ومانزل ..

سيف حط يده على كتفه : ماراح تنزل ؟

صقر : الا الحين نازل

فتح الباب ونزل قفل السياره ..

بس شاف من بعيد ماهر وهو داخل ..

رجع للسياره ..

سيف : ايش فيك صقر ؟

صقر : ماهر موجود

سيف : واذا موجود ؟

صقر : يالغبي هو يعرفني ومو وقته انه يعرف اني طلعت من السجن

سيف : ايش بيسوي

صقر : ماادري بس انا برجع .. اذا انت تبي تدخل بكيفك

سيف : لا راجع معاك

ركبوا السياره وحركوا عن المكان قبل مااحد يشوفهم





***********




مرت الايام ..

وخلصت ايام العزا ..

وابو مالك على نفس حاله ماتغير ..

ابو عمار : الحين يعني مافي له اي حل

الدكتور: للاسف لا .. احنا سوينا اللي علينا والباقي على ربنا

ابو عمار : شكرا ..

طلع من العياده وجلس عند ابو باسل : مايصير نظل جالسين كذا

ابو باسل : يعني ايش بأيدنا

ابو عمار : مادري بس لازم نسوي شي

فجأه شافوا حركه غريبه من ناحية غرفة ابو مالك ..

ابو عمار وقف مستغرب : ايش صاير ؟

ابو باسل : علمي علمك

ابو عمار قرب منهم : فهموني ايش صاير

الدكتور : لو سمحت اجلس

دخل الدكتور الغرفه بسرعه ..

ووقف ابو عمار وهو على اعصابه : طيب حد يفهمنا ايش السالفه

ابو باسل : خلاص يامالك اهدى

ابو عمار : وين اهدى ومحد مفهمنا ايش صاير

ابو باسل : تعال اجلس وارتاح .. الحين بيفهمونا

جلس فتره طويله وماتحمل ..

اعصابه فلتت ..

ابو عمار وقف : لا انا فلتت اعصابي على الاقل حد يفهمنا ايش صاير

طلع الدكتور من الغرفه ووجهه مايبشر بالخير ..

ابو باسل وقف : فهمنا يادكتور ايش صاير ؟

الدكتور : احنا سوينا اللي علينا وحاولنا قد مانقدر ننقذه لكن – حط يده على كتف ابو باسل – شدوا حيلكم .. البقى براسكم

ابو عمار جلس على الكرسي مصدوم ..

فتح ازارير ثوبه بقوه ..

اول شي ولده والحين ابوه ..

مين يقدر يستحمل كل هذا

ابو باسل جلس : لاحول ولا قوة الا بالله

ابو عمار غمض عينه ..

يتذكر كل لحظات الخلاف اللي كانت بينهم ..

يتذكر اللحظات الحلوه والمره

يتذكر كيف كانت علاقته مع عمار وكيف ضاعوا اثنينهم بلحظه ..

(( وجهه صاير احمر من العصبيه ..

مو عاجبه الوضع ..

ولا عاجبه الدلع الزايد له : يبه هو ولدي .. مو عاجبني كيف تعامله

ابو مالك : انا عارف مصلحته ومايحتاج تعلمني

ابو عمار : يبه انت بتضيعه

ابو مالك : شوف يامالك .. ان سمعت انك مهزأه ولا معاقبه ماتلوم الا نفسك

ابو عمار : انا مو عاجبني طريقة تعاملك معاه ودلعك له .. راح يضيع بالهطريقه

ابو مالك : عمار مالك دخل فيه

ابو عمار : انت ليه تدخل بحياتي كلها .. بزواجي وبعلاقتي مع عيالي

ابو مالك : انت مو عارف مصلحة نفسك ولا تعرف تتصرف .. جايب لي وحده مو عارفين اصلها من فصلها وتقول تعرف مصلحة نفسك

ابو عمار : انت متى بتخليني اتصرف مع عيلتي باللي يعجبني .. تدخل فيني بكل صغيره وكبيره .. انا كبرت وابي اعامل عيالي بالطريقه اللي تعجبني مو اللي انت تعجبك

ابو مالك : اذا عرفت تتكلم معاي عدل .. هذيك الساعه اخليك على كيفك

ابو عمار : احنا عمرنا مابنتفاهم يايبه .. وبنظل دايم بخلاف ! ..))

فتح عينه على لمسة يد اخوه صالح : يالله ياخوي قوم معاي

ابو عمار مسح دموعه اللي نزلت وقام مع اخوه ..









************







بعد ماخلصت ايام العزا الثاني ..

دينا متمدده على السرير وتعبانه ..

مو قادره تتحمل اللي صار ..

توها طالعه من عمليه ..

ومرهقه ..

وجات هالمصايب تعبتها اكثر واكثر : جنو جلسي معاي

جنان وهي جالسه جنبها على السرير : لا خلاص بروح البيت .. وانتي ارتاحي لاتفكرين كثير

دينا نزلت دموعها : مو قادره ماافكر

جنان : خلاص ريحي نفسك .. ليه البكي الحين

دينا : رغم اني اكرهه .. بس مو متصوره انه مات

جنان : ترحمي عليه

دينا : هو اخوي ياجنو على كل اللي سواه فيني راح يظل اخوي

جنان ماعرفت ايش تقول .. نفسية دينا تعبانه : خلاص دنو انتي نامي وارتاحي .. وكلنا ماشيين على هالطريق

دينا : مو قادره انسى شكله وهو بالغرفه

جنان : دينا اذكري ربك ونامي .. اللي صار صار ماتقدرين ترجعين شي

دينا : حتى جدي مو قادره اتخيل انه راح

جنان : يوووه دينا خلاص ارحمي نفسك

انطق الباب ودخل تركي : ممكن ادخل

جنان : مو انت دخلت وخلصت

تركي ابتسم وهو يشوف دينا كيف انفها الصغير احمر..

وعيونها منفخه وحمرا من كثر البكي ..

قرب منها وجلس على السرير : الحين ليه كل هالبكي

دينا جلست وضمت تركي بقوه وهي تبكي : مو قادره اتخيل كل اللي يصير

تركي وهو يمسح على ظهرها : اششش خلاص دنو ارتاحي

جنان وقفت واشرت لتركي انها طالعه ..

تركي هز راسه لها ..

طلعت جنان وخلت تركي ودينا ياخذوا راحتهم ..






*************







خالد مقابل جهازه الكمبيوتر ويتصفح النت ..

زهقان وهو جالس ينتظر : غريبه هذي مختفيه لها فتره

رن جواله ورفعه : هلا مهند

مهند : ياخي انت وينك صار لك فتره ماتنشاف

خالد : ابد بالبيت

مهند : ايش تسوي ؟

خالد : نوم واكل و نت

مهند : يالله بس بمرك نطلع

خالد : مالي خلق

مهند : ماعلي منك بمرك ونطلع

خالد : طيب

مهند : يالله جهز نفسك

قفل الخط وراح ياخذ له شور عشان يطلع ..

لبس بنطلون جيبنز وتيشيرت اسود ..

نزل وهو ماله خلق وتفكيره كله بالنت ..

دخل السياره : السلام عليكم

مهند : وعليكم السلام .. زين قدرنا نشوفك

خالد : يعني دراسه وحوسه ايش تبي بعد

مهند بخبث : ايه ياليت دراسه

خالد : ايش تقصد؟

مهند : هههههه ولا شي بس اللي ماخذ عقلك يتهنا به

خالد لف وجهه : والله ماعندك سالفه

وصل القهوه ..

خالد لف على مهند : كان قلت لي جايين للقهوه على الاقل اجيب لابتوبي

مهند : انت ايش سالفتك مع النت

خالد : مافي سالفه

مهند : لاتخاف جايب لابتوبي معاي

خالد : زين اجل

دخلوا القهوه وسلموا على اصحابهم ..

جلس خالد وبسرعه فتح اللاب توب وشبك بالنت ..

مهند يناظره وهو شاك فيه ..

تصرفاته ماهي طبيعيه هالايام ..

ودايم على النت..

أكيد فيه سالفه وهو مايدري عنها ..

بعد ماشبك على الماسنجر ..

بالبدايه انبسط لما شاف توبك مشابه لتوبكها ..

بس بعدين صابته خيبة امل ..

مهند قرب من خالد : خالد .. انت وراك سالفه

خالد : انت ايش سالفتك اليوم علي

مهند : انت اللي ايش سالفتك ؟

خالد : ماعندي سالفه

مهند : الا .. صاير مو طبيعي هالايام

خالد : مـ ...

قاطعه صوت في الايميل ينبهه بدخول احد جديد

خالد نقز : جنو

مهند ناظره بأستغراب ..

ايش هالاهتمام كله ..

ومين هالجنو اللي نقز لها من اول ماسمع الصوت ..

معقوله هذي جنان نفسها : خالد

خالد وهو مندمج مع المحادثه : هم

مهند : مين هذي جنو

خالد : جنان

مهند : ايش عندك معاها

خالد مارد عليه وظل ساكت ..

مهند : خويلد لايكون ....

خالد لف عليه : لايكون ايش

مهند بشك : تحبون بعض ؟

خالد : افففف منك

مهند : رد علي


خالد : جنو شوي بس اشوف سالفة مهند اللي ناشب لي

جنان : طيب


خالد لف على مهند : نعم ارد على ايش

مهند : انتوا بينكم شي .. يعني تحبون بعض

خالد : ايش هالاسلوب تحبون بعض

مهند : ماعليك من اسلوبي بس جاوبني ايش اللي بينكم

خالد : مافي بينا شي ايش فيك صاير تحن علي من الصبح

مهند : لان اللي واضح ان فيه بينكم شي مو طبيعي

خالد : كل الحكايه انها فتره مادخلت وانشغل بالي عليها

مهند : انت تحبها ؟

خالد : لا

مهند : لا تخبي علي .. ترا واضح عليك

خالد : تعجبني وبس فيه شي غلط

مهند : وهي ؟

خالد : ماتدري عن شي

مهند : ليه ؟

خالد بلع ريقه : ماقدر اقول لها شي

مهند ناظره بأستغراب : فيه احد يحب وحده ويخبي هالمشاعر بداخله

خالد : مهند افهمني .. هي تحب انسان ثاني .. تحب ولد خالتها وانا مستحيل اجي ببساطه واهدم اللي بينهم او اشوش على مشاعرها

مهند : وانت بتظل كذا بس حب من طرف واحد ايش لك فيها اجل

خالد : مشاعري مو بأيدي .. عجبتني من غير مااحس رغم اني كنت اكرهها واكره شوفة نفسها وغرورها وكبريائها .. بس بعدين تغير كل شي .. وبعدين انا مو نذل اخرب عليها حياتها وهو بيكون شريك حياتها

مهند : وانت ؟

خالد : انا الله لي .. بس هي لازم تعيش حياتها بعيد عني ومع اللي تحبه .. ومااجبرها تحبني بالغصب

مهند : انت انسان غريب

خالد : مو غريب بس مثل ماانا ماارضى حبيبتي حد ثاني يلف مخها هو بعد ماراح يرضى

مهند : ايه وعذب نفسك

خالد : اني اشوفها مبسوطه مع حبيبها هذا يكفي .. يالله بس خليني ارجع لها قبل لاتطلع

رجع للابتوب حتى يسولف معاها ..


خالد : باك

جنان : ولكمو

خالد : يسلمووو

جنان : ايش فيه مهند

خالد : ماعنده سالفه .. ماعليك منه الا انتي وينك مختفيه فتره طويله

جنان : شسوي انشغلت مع دينا

خالد : ليه عسى ماشر ؟

جنان : ابد توفى اخوها وجدها

خالد : اي اخو لايكون عمار ؟

جنان : ايه

خالد : من ايش توفى

جنان : جرعة هروين زايده

خالد : ياساتر .. بس افتكت منه

جنان : ايه قول لها هالكلام عشان تهب فيك

خالد : هههههههه لا ماراح اقول شي

جنان : المهم انا طالعه

خالد : بدري

جنان : من عمرك .. بس بروح عندي كم شغله

خالد : اهاا

جنان : يالله باي



طلعت جنان من النت ..

وخالد لف على مهند بحقد : اففففف كله منك ومن هذرتك اشغلتني عن البنت لحد ماطلعت






************





جنان بعد ماقفلت النت نزلت تجلس مع اهلها ..

كانت ليان جالسه جنب امها وحاطه راسه على كتفها ..

جنان وهي تجلس : اوه كالعاده لينو لازقه عندنا

ليان : يوووه جنو ترا مالي خلق كلامك

ام جنان : حبيبتي جنان اتركي اختك ترتاح .. تعبانه شوي

جنان : ليه ايش فيها الخانو

ام جنان تبتسم وهي مبسوطه : بتصيري خاله

جنان فهت شوي وماستوعبت الكلام : كيف ؟

ام جنان : انتي بتصيرين خاله وانا بصير جده وليان بتصير ام

جنان لسه مصدومه : مافهمت

ليان ترفع راسها : يالمفهيه يعني انا حامل

جنان : خييير .. حامل !

ليان : ايه

جنان : وجع توك متزوجه لازم تحملين الحين

ام جنان : جنان ايش فيك هذا بدل ماتقولين لاختك الف مبروك .. كذا تتنرفزين

جنان مسكت اعصابها ماتدري ليه غارت وتنرفزت : مافيني شي بس مو حابه اصير خاله الحين

ماهر دخل : مين اللي ماتبي تصير خاله

ليان : اختك جنان فيه احد غيرها

ماهر قرب منها وقرصها على خدها : فيه احد مايحب يجيه ولد او بنت اخت

جنان : ايه انا

ليان : ماعليك منها هذي غريبة اطوار

ماهر : ايه والله

ليان : تدرون ايش خاطري فيه

جنان : يالله بدينا بالوحام

ماهر وهو يجلس جنبها ويمسك بطنها : تدللي بس عشان ماهر الصغيرون

ليان تضربه على يده : يالله بس جوز عني

ام جنان : ههههه خلو اختكم على راحتها .. يالله قولي ايش خاطرك فيه

ليان : خاطري اشم ريحة البحر

جنان : ههههههههه بالله عليكم هذا وحام .. مالقت لها الا بحر

ام جنان وهي تضم ليان : لعيون اول حفيد نوديها احلى شاليه

ليان : شفتي كيف هذي الناس اللي تفهم

جنان تكش عليها : مالت عليك وعلى وحامك

ليان : هذي اللي بكفخها

ماهر : ارتاحي بس لايصيب ماهر الصغيرون شي

ليان : شف الثاني بعد

ام جنان : هههههههه ماعليك منهم

ليان : طيب متى نروح الشاليه

ماهر : خلوه بالويك اند ونسوي جمعه للعائله بهاليوم خالاتي وخيلاني والشباب وننبسط

ام جنان : خلاص ماهر انت رتبها واحنا نروح

ماهر : اوكي

ليان : لا لا خلاص هونت مانبي نطلع شاليه .. مالي خلق

جنان : يالله اخذوا لكم على دلعها

ليان : انتي روحي غرفتك وفكينا من شرك

جنان : انا رايحه من غير ماتقولين

دخلت غرفتها وهي مقهوره ..

مو متخيله تجي وحده صغيره او واحد وياخذ الدلع كله ..

تمددت على السرير وهي تتنهد ..

رن جوالها ورفعته : الو

سديم : الله شفيك ماعندك اخلاق

جنان : طفشانه

سديم : ليه ؟

جنان : الاخت ليان حامل

سديم : مبروووووووووووك

جنان : لاتباركين

سديم : ليه ؟

جنان : بس مو مبسوطه للموضوع

سديم منصدمه منها : والله انك غريبه

جنان : ماابي اصير خاله .. احس نفسي عجوز

سديم : ههههههههه والله انك غريبة الاطوار

جنان : يوه شفيكم .. كيفي مابي حد فوق راسي

سديم : ههههههههه والله انتي مو صاحيه

جنان : ماعلي منكم .. مابي بنت اخت

سديم : بالعكس وناسه بكره يجي البيبي وبتشوفين كيف بتحبيه

جنان : هين احبه

سديم : اقول انتي محد يكلمك وانتي بهالاخلاق

جنان يكون احسن بعد


قفلت الخط وتمددت على سريرها تنام ..

مالها خلق شي







***********






خالد رجع البيت بالليل متأخر ..

جلس على الكرسي

وفتح الدفتر الخاص فيه ..

المغلف بالقماش العاجي ومبين كأنه قديم ...

اللي يخبي فيه مشاعره وخواطره ..

هالدفتر هو صاحبه بوحدته ..

يقدر يبوح عن مشاعره وقت مايبي ..

بدون مايأذي احد فيها ..

طلع القلم وبدا يخط بيده كلمات طالعه من قلبه ..

مو قادر يخبيها ..



صمتٌ أسقطني في دوامة المجهول

لـ يغرفني في كوب الـ إستفهام .!

ويشعلني كجمرة الشتاء .!



لـ أحرف أسئلةٍ لم تضع بعد نقاطها .!

كيف لكي أن تنتطقي .!؟


لتعلني ميلاد فجرٍ جديد

من صبحٍ لا أعلمه .!


أيتها المتمردة سطر قلبي الجديد ..

أحبك .. بلغة إشارة تبعثها نظراتك الدافئة بين أضلعي .!

أحبك .. بصمت محارب فقد سلاحه أمام جيشك الصامت .. !

أحبك .. كـ لوحة .. تعبر بلا صوت .!


هيا أطلقي عنان لسانك لصدى الريح

كي يولد حبنا من عدم .!




بعد ماخلص من الخاطره ..

قفل الدفتر وتمدد على السرير وغمض عينه ..

يفكر بجنان وكيف خذت عقله وقلبه بهالفتره البسيطه ..

(ليتني بس اقدر اقول لك كلمة أحبك )




**************




باليوم الثاني..

صحت من النوم جنان ..

تدور لولي قطوتها وين راحت ..

مالقتها ..

نزلت لهم تحت حتى تسألهم اذا شافوها ..

شافت امها جالسه : صباح الخير ماما

ام جنان : صباح النور

جنان : ماما ماشفتي لولي

ام جنان : انا قلت لبندر يجي وياخذها

جنان انصدمت : لييييييييه ؟

ام جنان : انتي عارفه اختك حامل ومو زين لها وانا من البدايه ماكنت راضيه فيها

جنان تطق رجلها على الارض : افففففف منكم

راحت غرفتها وهي تتحلطم : يعني لازم ياخذوها مني

رفعت جوالها ودقت على بندر ..

رد عليها بندر وهو مروق : هلا نونه

جنان : وين لولي

بندر : ههههههه الناس تسلم اول وبعدين تسأل عن اللي تبيه

جنان : مالي دخل وين لولي

بندر : خلاص اخذتها

جنان : وليش تطاوع امي

بندر : لان معاها حق .. هذي تضر والحين ليان حامل ومو زين لها

جنان : اففففف منكم

بندر : جنو .. خلاص ولا يهمك كلها قطوه وبعدين ليه مارحتي المدرسه اليوم

جنان : مالي خلق اداوم

بندر : ليه ؟

جنان : بس مزاج

بندر : انتي مزاجيه بشكل

جنان : ابي لولي

بندر : راح اعوضك بعدين

جنان : طيب نشوف


قفلت الخط وجلست زهقانه ..

مو عارفه ايش تسوي ..

فتحت النت تتسلى مع انها متأكده ان محد شابك بالايميل بهالوقت ..

اول ماشبك ايميلها انصدمت من خالد انه موجود ..


جنان : خالد ايش عندك شابك هههههههه

خالد : الناس تسلم تقول صباح الخير شي .. مو على طول ليه شابك

جنان : طيب صباح الخير .. بس ماعندك دوام

خالد : اسألي نفسك اول

جنان : هههههههههه لا انا متعيجزه اروح

خالد : يالسودانيه يالزوله

جنان : مالزول غيرك .. قول لي غريبه داخل النت الحين

خالد : ابد ماعندي جامعه اليوم

جنان : والله انت والطب من جنبها

خالد : لاتطنزين علي

جنان : هههههههه

خالد : طيب طمنيني عليك .. كيفك ؟

جنان : زفت

خالد : ليه ؟

جنان : بندر كأنه يهدي الهديه وخاطره فيها

خالد : ليه ايش مسوي ؟

جنان : اخذ لولي .. مسوي فيها خايف علي

خالد : انتي ايش لك بهالسوالف .. عاد مالقيتوا الا قطوه

جنان : وانت ايش دخلك .. انا حره فيها

خالد : دخلني الباب

جنان : ياسخفك

خالد : مو اسخف منك

جنان : اففف

خالد : اذا انتي تحبيه خلاص طيعي كلامه وخلي القطوه تبعد عنك .. تراها مو زينه لك

جنان : اجل ليه اهداني اياها من البدايه

خالد : الله يعينه عليك .. وعلى عنادك .. لاتتعبين الرجال

جنان : طفشانه .. كافي ان اختي حامل

خالد : مبرووووك بتصيرين خاله

جنان : لاتبارك .. حاسه نفسي بصير عجوز بكلمة خاله

خالد : ههههههههه انتي عليك افكار مادري ايش تبي

جنان : انت مالك دخل فيني

خالد : ايه اكيد مالي دخل فيك

جنان : انا اروح اكمل نومي اريح لي منك ..

خالد : بكيفك



بعد ماطلعت جنان من النت خالد استرخى على الكرسي يفكر بمشاعره ..

وكيف انه ماله حق يفكر فيها او انه يعترف لها باللي داخله ..

ولازم مايبين لها هالشي ..

مو هو اللي يخرب بين اثنين ..

لازم يفرح لفرحها ..

واذا شافها مبسوطه هو راح ينبسط ..

بس اهم شي مايخرب حياتها .. !






************





بعد ماخلص دوام المدرسه ..

رجعت للبيت وهي زهقانه ..

زهقت من هالروتين اليومي : افففففف متى نخلص من هالمدرسه ونرتاح

دخلت الغرفه ورمت عبايتها وأغراضها ..

فتحت دولاب ملابسها تختار لها شي تلبسه بعد ماتخلص شاور ..

محتاره ايش بتلبس ..

بس سمعت صوت ارعبها من وراها ..!

: ليه محتاره .. تبيني اساعدك بشي



.
\
.
/
.
/
.
/