" الرقم اللذي طلبته لايمكن الاتصال به الان فضلا اعد المكالمه فيما بعد "

نزلت الجوال من اذنها وهي مستغربه ..

كل ماتتصل عليه جواله مقفل ..

مو عارفه ايش صاير معاه ..

تبي تتطمن عليه وتعرف اخباره ..

حطت الجوال على لطاوله ..

ورجعت جلست قدام فيصل اللي مندمج بالالعاب ومنبهر بألوانها وهي عقلها وتفكيرها مو معاه..

حست ان الباب ينفتح ولفت عليه بسرعه ..

شافت راشد داخل وهو مرهق شوي ..

وقفت بسرعه وقربت منه : الحمد لله على سلامتك حبيبي

راشد : الله يسلمك

سديم : ماقلت لي انك جاي

راشد مارد عليها وجلس وهو ساكت

سديم استغربت منه..

هذي مو عوايده ..

يمكن تعبان من السفر : راشد انت تعبان ؟

راشد : خلي الناني تاخذ فيصل

سديم ناظرت المربيه واشرت لها تطلع

طلعت المربيه وجلست سديم جنبه : ايش فيك .. صاير شي ؟

راشد اخذ نفس : ابي اتكلم معاك بموضوع

سديم : ان شاء الله خير

راشد سكت ثواني .. بلل شفايفه الجافه وتكلم من دون مقدمات : سديم انتي من قبل وكنتي تبين الطلاق

سديم انقبض قلبها ودق بقوه .. عقدت حواجبها : ايش جاب هالسيره الحين ؟

راشد : لاتقاطعيني .. انتي صغيره وفرق السن بينا كثير .. يعني لما توصلين مثلا لسن 30 انا اكون فوق 45 سنه محد ضامن حياته .. اخاف يصير لي شي ومحد لك حتى ابوك مااضمنه عشان كذا لازم اامن لك حياتك انتي مع فيصل

سديم وماهي فاهمه شي من اللي يقوله : وكيف تأمنهم

راشد ببرود اعصابه : شوفي ياسديم انا لا انفع لك ولا انتي تنفعين لي

سديم ناظرته بصدمه تحس لسانها انعقد ..

تكلمت بأستغراب : توك تقول هالكلام ؟ .. دام تقول ماانفع لك اجل ليه تزوجتني

راشد : للمره الثانيه والاخيره اقول لك خليني اكمل كلامي كله – سكت ثواني وتكلم بعدها ببرود- انا لازم اطلقك ياسديم

سديم حست بهاللحظه سمعها فيه شي .. انصدمت من كلمته : ايش ؟

راشد وهو يسترخي على الكنبه ويتكلم ببرود اكثر : بس الانفصال بوحده مايفيد .. ابوك ينخاف منه عليك .. ومو بعيد يبيعك لحد ثاني مثل ماباعك قبل .. عشان كذا انا تكلمت مع فارس انه يتزوجك بعد ماانا اطلقك .. هو الوحيد اللي اقدر اامن عليك وعلى فيصل عنده

سديم ماهي مستوعبه شي ..

الكلام صدمها والحروف مو قادره تطلع من لسانها وتحسه ثقيل :انت ايش جا .. جالس تقول ياراشد

راشد وعينه بعينها : اللي سمعتيه من بعد مااطلع الحين تاخذين كل يخصك هنا .. وابوك خليه علي .. ودراستك اللي على حسابي راح تمشي عادي مافي عندي اي مشاكل .. وكل شي مسجل بأسمك او بحسابك هذا من حقك انتي

سديم كل كلمه قالها شلتها ..

حتى الكلام مو قادره تنطق بحرف واحد ..

دموعها متجمعه ومو فاهمه ليه كل اللي يسويه راشد ومن اي قلب عو ..

راشد وقف ومشى عنها : انا طالع ..

مسك مقبض الباب وقبل مايطلع : سديم انتي طالق

سمعت الكلمه وكأن حد صب عليها مويه بارده ..

كل شي صار بسرعه ..

تبي حد يجي ويصحيها ويقول لها انتي اللي تشوفيه بكابوس ..

بس شكله ماهو كابوس ..

هي اللي تشوفه هذا واقع ..

تبي تفهم ليه تزوجت وتطلقت بهالطريقه ..

كل شي غااامض حولها ..

ضغطت على نفسها ورضت بنصيبها وتقبلته ..

وبالاخير تطلق من غير اسباب تذكر ..

غير الاهانه وتنزيل كرامتها بعرضها على فارس ..

كأنها لعبه مل منها وتتحذف من شخص لشخص ثاني ..

اي نوع من البشر يكون ..

حست بالغربه ..

مافي امان ..

رفعت رجلينها وضمتها لصدرها تدور الامان ..

دموعها تنزل بحرقه ..

ماعاد تآمن لشي من حولها ..

ماعندها ثقه حتى بنفسها ..

خايفه من كل شي حولها ..

ابوها ..

ابوها شلون نسته ..

هذا بيذبحها اذا عرف عن الطلاق !



.
.
.
.
.



طلع من البيت وركب سيارته ..

مسك الجوال ودق على الارقام بسرعه : فارس

فارس بدون نفس : آمر

راشد : سديم وطلقتها وقلت لها انك بتتزوجها .. الدور عليك انك تتزوجها

فارس شد على اعصابه وتكلم بعصبيه : صااااحي انت .. ايش سوت لك البنت عشان تطلقها بهالطريقه

راشد : مايحتاج تكثر حكي .. تاخذها انت احسن من ياخذها واحد ثاني ويعذبها

فارس : هه وانت اللي سويته فيها مو تعذيب .. انت ذبحتهااااااااا

راشد : اي تعذيب وذبح انت الثاني

فارس : رايح وقايل لها بزوجك فارس .. مافكرت بمشاعرها .. كان طلقتها بدون هالكلااااام

راشد : تبي ابوها يزوجها لواحد ثاني وماندري عن مستقبلها

فارس : هه لا لا برافو برافو .. تحتاج تصفيق .. خايف بعد على مستقبلها – كمل وهو شاد على اسنانه – اللي يخاف على مستقبل حد مايتعامل معاه بالوحشيه اللي انت مسويها

راشد : فااارس احترم نفسك احسن لك

فارس : انا محترم نفسي من قبل لااعرفك .. بس ماقول الا حسبي الله ونعم الوكيل

راشد ببرود : المهم سديم وهي حره من هاللحظه .. الباقي عليك انك تاخذها

فارس بعصبيه : انت حقير ونذل ماتستاهل انك اخذتها

راشد : فيه شي ثاني بعد تبي تقوله وماقلته

فارس : لاتفكر اللي سويته ببنت الناس بينسى .. بيجيك يوم وتندم على اللي سويته وراح تشوفه ببنتك

قفل الخط بوجهه ورماه على جنب ..

وده يذبحه ..

يقطعه بأسنانه ..

ايش هالقلب اللي عليه ..

متزوجها وكأنها تسليه ..

تمناه انه قدامه حتى يذبحه ويطلع كل قهره فيه !



.
.
.
.
.


جالسه بنفس وضعيتها ..

بنفس صدمتها ..

رخص فيها كثير ..

مو عارفه لمين تتكلم او تشكي همها له ..

حاسه نفسها ضايعه .. تايهه ..

ومالها ظهر يحميها ..

نزلت رجلينها على الارض ..

اخيرا تحركت ..

اخذت جوالها من على الطاوله ..

قلبت بالارقام ماعرفت مين تكلم ..

جنان همها ومشكلتها تكفيها ..

اهلها خايفه من ردة فعلهم ..

مالها غير دينا ..

دقت عليها وبصوت مبحوح تكلمت : آلو

دينا بروقان : هلا والله ازيك ياعسل

سديم بصوت مخنوق : انتي وين ؟

دينا : جايه تووووووني الحين داخله الخبر حتى بعدني ماوصلت بيتنا ؟

سديم وتحس ان صوتها راح .. حاولت ترجعه وتبين انها طبيعيه : احم .. احم .. تقدرين تجين عندي على طول ؟

دينا توها تنتبه على نبرة صوتها : سديم ايش فيه صوتك .. صاير لك شي ؟

سديم نزلت دموعها وتكلمت وهي فيها بحه : انا تطلقت

دينا بصدمه : ايييش !

سديم : تعالي عندي ضروري مالي حد

دينا : خلاص راح اجي

سديم : اذا جيتي تعالي جناحي على طول

قفلت الخط واخذت المخده اللي جنبها ورمتها على الارض من القهر ..

دموعها تنزل وماهي موقفه ..

انظلمت كثير وراح تنظلم اكثر ..

خايفه من كل شي حولها ..

دخلت غرفة النوم وكل شي فيها يذكرها براشد واللي سواه فيها ..

سحبت المفرش ورمته على الارض وهي تبكي بقهر ..

شالت المخدات ورمتهم بعصبيه وحرقة قلب ..

رمت نفسها على السرير بالعرض ولمت نفسها ..

تشهق بالبكي ..

مافي شي اقسى من انه يرخص فيها بهالطريقه ..

ولمين ؟!

للي قلبها ماينبض الا بأسمه ..

تكومت على نفسها اكثر وهي تبكي ..

تبي الدفا ..

تبي الامان اللي ضاع من عندها ..

تبي السند اللي مو عارفه وين تلاقيه ..

شهقت اكثر وهي تندب على حظها السيء ..


:


دخلت القسم وهي تناظر حولها ..

مستغربه من العفسه اللي صايره ..

كل شي مرمي ..

مشت لناحية الغرفه المفتوح جزء من الباب ..

فتحت الباب وهي مستغربه من الوضع ..

قربت من السرير ولمستها : سديم

سديم لفت عليها وعيونها منفخه من البكي ..

جلست وسندت ظهرها على واجهة السرير وهي ثانيه رجلينها ومقربتهم عند صدرها وهي ساكته..

ناظرتها دينا وهي خايفه : ايش اللي صار

سديم : تطلقت بعد ايش اللي صار

دينا : طيب ليه كل هذا ؟

سديم : مادري .. لاتسأليني شي .. خليني بروحي

ناظرتها دينا مستغربه : سديم

قطاعتها سديم : مالي خلق اتكلم بشي كافي اني خايفه اروح البيت

دينا : ليه خايفه ؟

سديم وهي تبكي : مادري ايش بيسوي فيني ابوي اذا عرف

دينا : ماراح يسوي شي

سديم : انتييي ماتعرفييييه

دينا : خلاص سديم اهدي

سديم بكت اكثر ودفنت راسها بين رجلينها : ياربي ليه يصير لي كل هذا .. انا تعبت من كل شي متى ارتااااح

دينا : سديم اذكري ربك

سديم وهي تبعد دينا بيدها : خلاااص دينا تركيني بروووحي

دينا : طيب خلاص سديم ارتاحي

طلعت دينا من الغرفه ..

وهي تناظر اغراض سديم ..

لازم تلم اغراضها من الحين ..

نادت الخدم يلمونهم لها ..

انفتح الباب بسرعه : سديم

وقف منصدم وهو يشوف دينا ..

حك راسه : آسف ماكنت ادري انك هنا

دينا لفت وناظرته .. : لا عادي .. سديم داخل

ثامر : فيها شي ؟

دينا : انت دريت

ثامر : ايه .. يالله بروح اشوفها

دينا : ايه بس انتبه تراها منهاره وخايفه من ابوك

ثامر : هذا اللي خلاني اجي بسرعه .. جوالها مقفل وهناك مقلوبه الدنيا

دينا : اجل خليها بكرا تروح لين ماتهدا الأمور

ثامر : لا راح تزيد .. الاحسن انها تروح البيت اليوم

دينا بتردد : طيب .. اذا رحت انا معاكم البيت ممكن مابيتكلم لها لمايشووفني معاكم

ثامر : هي فكره بس اتمنى ان هالشي يمنعه ..

تركها ودخل غرفة سديم بهدوء ..

شافها كيف ضامه نفسها ..

قرب من السرير بسرعه وجلس قدامها : سديم

سديم رفعت راسهها وجهها مليان دموع ..

شهقت بالبكي بس شافته وارتمت بحضنه ..

مافي عندها ظهر غيره : شفت ياثامر شصااار في اختك

ثامر : شفت ياعيون اخوك

سديم وهي تشهق بالبكي : بنجن ياثامر بنججن انا شسوييييت له حتى يعاملني بهالطريقه

ثامر وهو يمسح على شعرها : خلاص سدوم اهدي

سديم : شلون اهدا ياخوووي وانا تطلقت

ثامر : اذكري ربك ياسديم واهدي وقومي معاي نروح البيت

سديم بعدت عنه : لا اللا البيت ماقدر اروح

ثامر : مايصير تجلسين هنا .. خلاص ماصار بيتك

سديم : شلون اقااابل ابووي

ثامر : مسحي دموعك وانا معاك لاتخافي

سديم بلعت ريقها : ابووووي بيذبحني

ثامر وهو يضمها ويحاول يهديها ويهدي من خوفها : ماراح يسوي لك شي .. انا معاااك

سديم وهي تشهق بالبكي وهي على صدره : انا ضعت ياثاااامر ضعت

ثامر : ماضعتي دامني معاك

سديم وهي تشد على التيشيرت حقه : انت ماااااشفت ايش سوااا فينيييي .. لعب فيييينييي .. اخذني لعبه ومللل مني

ثامر : انتي مو لعبه

سديم : الااا اخذني تسليه .. والحين مللللل

ثامر : خلاص سديم هدي

سديم رفعت راسها عن صدره : انا بشعه .. انااااا بششعه .. ولا ماكان تركني بهالطريقه


ثامر مسكها وناظرها بعينها الحمرا من كثر البكي ..

وخصر شعرها واللي لزقت بوجها من دموعها ..

رفع يده يبعد شعرها عن وجهها ..

ويمسح دموعها ..

تكلم بهدوء وبغصه وهو يشوف حالها : وربي انتي قمر

سديم وهي تبكي اكثر : اجل ليييه طلقني وسوا فيني كل هذاا

ثامر وهو يحاول يمسك اعصابه قدامها ..

بلع ريقه وتكلم والغصه بنبرة صوته : ماهو قد النعمه اللي كانت عنده

سديم شهقت بالبكي : انا خااااايفه .. خاااااايفه

ثامر ضمها : اشششش .. اهدي .. انا معاااك


.
.
.
.
.


**************

وجهه قلب احمر من العصبيه ..

شاد على اعصابه ..

وهو يمشي رايح جاي ..

وهو ماسك الجوال بيده ..

سكر الباب بقوه ..

هز البيت بصوته العالي وعصبيته : بنتك مقفله جوالها .. والله أن ماجات اليوم لا انا رايح وجارها من شعرها .. سودت وجهي سودة الوجه

ساكته وخايفه منه ..

مالها كلمه تنسمع ..

دموعها تنزل على حظ بنتها ..

ابو سديم مكمل كلامه : وين اودي وجهي من الناس وهذي مطلقه

ام سديم : هي مالها دخل

ابو سديم : وين مالها دخل .. اكيد شاف منها شي وطلقها .. انا اوريها بس تجي والله لكسر راسها

ام سديم : بس ..

ابو سديم : انتي تسكتي احسن لك فاااااهم

بلعت ريقها ام سديم وهي تتمنى ان تعدي هالسالفه على خير ..



.
.
.
.
.


ارتجفت اكثر وهم يوقفوا السياره قدام الباب ..

خايفه من اللي بيصير ..

ضمت ولدها لصدرها اكثر ..

لف عليها ثامر وشاف الرعب بعينها ..

مسك يدها وشد عليها : لاتخافي كلنا معاك

دينا : سديم انا موجوده معاك اكيد ماراح يقدر يسوي شي

سديم بلعت ريقها ودينا تاخذ فيصل من عندها ..

فتح ثامر الباب ودخلت سديم وراه وقلبها يدق اكثر كل ماقربت من الباب الداخلي ..

بلعت ريقها وهي تركب اول عتبه من الدرج الصغير ..

كل خطوه تتقدم فيها ينقبض قلبها اكثر ..

بلعت ريقها ..

هذا البيت مثل ماطلعت منه بغموض ..

رجعت له بغموض اكثر ..

وبمستقبل مجهول ..

فتح الباب وتقدم ثامر ودخلت وراه دينا ..

شدت سديم على اعصابها تقوي من نفسها وهي تدخل ..

خايفه من اللي راح تواجهه ..

مافيها تتحمل طعنات اكثر ..

تحس نفسها مخنوقها ..

وماتسمع غير دقات قلبها ..

سمع ابو سديم الباب ينفتح ويتسكر ..

مشى لناحيته وهو متحلف فيها ..

ناظر سدبم وباين على الغضب من نظراته ونبرة صوته : شرفتي ياست الحسن والدلال

سديم بلعت ريقها وهي تشوف نظرات ابوها ..

مسكت يد ثامر وشدت عليه ..

ثامر تكلم بسرعه قبل مايسوي ابوه أي شي لسديم : يبا سديم الحين تعبانه خليها ترتاح وبكرا تفاهموا

ابو سديم ناظر ثامر وتكلم من بين اسنانه : انت تسكت وتبلع لسانك احسن لك

ثامر : بس يبا مايصير هي تعبانه الحين خاف عليها على شان صحتها

ابو سديم سفه ثامر ولا كأنه يسمع له ولف على سديم : انبسطتي الحين بعد ماسويتي الي بارسك ونزلتي روسنا بالارض

ثامر انقهر من كلمة ابوه : يبا ايش دخل الحين الطلاق بتنزيل الراس .. هي مالها ذنب

ابو سديم : مو انا قلت لك تبلع لسانك .. وبعدين ليه محد قال لك ان الي تبيه بيصير وبتتزوج اسود الوجه فارس

ثامر : بس ...

ابو سديم وهو يأشر بسبابته : انت تسكت وتنطم مابي اسمع لك حس

لف على سديم : والله لكسر راسك على سواد الوجه اللي سوتيه لنا

سديم بلعت ريقها وتكلمت وفكها يرتجف من الخوف ودموعها تنزل : انا مالي دخل بشي

ابو سديم جرها من شعرها لناحيته : مالك دخل ياسودة الوجه

رفع يده حتى يضربها ..

ثامر سحب سديم بسرعه ..

تخبت وراه وشدت على التيشيرت ..

ابو ثامر وهو رافع يده بيضربهم : انا اوريـ ...

ثامر مسك يد ابوه : يبا حرااام عليك اللي تسويه

لف على امه : ماتقولي لك كلمه يمه ولا بس جالسه تتفرجين

ام سديم : يـ ..

سديم شهقت بالبكي وانهارت تقول كلام مو مفهوم : خلااااااااص وربي ماتحمل .. كافي اللي تسووه فيني

ثامر لف عليها بسرعه ومسكها : سديم .. سديم اهدي

ابو سديم : ايوااا مثلي علينا انك انجنيتي بعد

ثامر لف على ابوه : خلااااااص يبا يكفي

اخذ سديم وطلعها من البيت بسرعه ..

جا بينزلها معاه عند الدرج طاحت عليه : سدييييم

دينا وهي مرعوبه : اش فيها؟

ثامر وهو يضرب سديم على خدودها : وانا ايش دراني ... سديييم .. ردي علي

لما ماشاف منها رد وجالسه تهمهم بكلام مو مفهوم لف على دينا : طلعي المفاتيح من جيبي وافتحي السياره بسرعه

دينا ناظرت فيه وهي مفهيه : بس عندي فيصل

ثامر صرخ بوجها : دخلييييييه دااااخل ايش تنتظرين

دخلت دينا فيصل بسرعه وطلعت ..

اخذت المفاتيح وفتحوا السياره ..

دخلوا سديم السياره الي تتكلم بكلمات مو مفهومه وتبكي ..

ساق ثامر السياره بسرعه جنونيه للمستشفى ..

دينا تناظر سديم وتبكي ..

كل شي ارعبها وكان الهواش والصراخ لها مو لسديم .. !





***************





جالسه على الكنبه وهي متوتره ..

تفكر بالحل معاه ..

لفت راسها ناحية الغرفه ووقفت تروح له ..

تقدمت بخطوات متردده ..

وهي تطقطق بأصابعها ..

دخلت الغرفه وشافته متمدد على جنبه على السرير

راحت من الطرف الثاني للسرير وركبت فوقه ..

قربت منه بهدوء وهو عاطيها ظهره ترددت تتكلم معاه ولا لا ..

رفعت يدها حتى تحطها على كتفه وتراجعت ..

رجعت مره ثانيه وحطتها على كتفه ..

تكلمت بهدوء : بندر

بندر : هم

جنان سكتت ثواني .. : .. ممكن اتكلم معاك

بندر تنهد : جنان .. تعبان بعدين اتكلم معاك

جنان بلعت ريقها ودموعها بدت تتجمع بعينها ..

سحبت نفسها بهدوء وطلعت من الغرفه ..

جلست على الكنبه ونزلت دموعها ..

من حقه يسوي كل هذا فيها ..

هي مو مريحته بشي ..

من تزوجها وهو مو ملاقي غير وجع الراس ..

نزلت راسها وغطته بيدينها وهي تبكي ..

حست بلمسات تسحب يدينها من على وجها ..

رفعت راسها وناظرت قدامها ..

بلعت ريقها وهي تشوفه جالس على ركبه ويناظرها بأستغراب

بندر : ايش فيك تبكين

جنان وهي تمسح دموعها : مافيني شي

بندر : اجل ليه هالدموع ؟

جنان : مافيني شي بس كذا

بندر : متضايقه من شي معين ؟

جنان هزت راسها بالنفي ..

بندر وقف وجلس جنبها على الكنبه : انتي هالفتره بالك دايم مشغول .. صاير معاك شي

جنان بلعت ريقها وسكتت فتره ..

شبكت يدينها مع بعض وصارت تطقطق بأصابعها بتوتر : اللي شاغل بالي انت

بندر : بأيش شاغل بالك ؟

جنان : من تزوجنا وانا مو قادره اريح بالك

بندر اخذ نفس : انا اللي نفسي افهم ايش سويت بالضبط حتى توصلي لهالمرحله

جنان بللت شفايفها وبعدت عينها عن عينه : انت مالك دخل بشي

بندر : اجل شالسالفه بالضبط ؟!

جنان دق قلبها بقوه وارتجفت ..

غمضت عينها وهي حاسه بمغص ببطنها من خوفها من ردت فعله ..

بندر شد على يدها اكثر : جنان ريحيني وقولي لي ايش فيك

جنان سكتت فتره وتكلمت ببطء : انت .. لما تقرب مني – سكتت ثواني وهي تبلع ريقها – وتلمسني تذكرني بأشياء دايم ابي انساها

بندر عقد حواجبه : اشياء مثل ايش !

جنان والرجفه كل ماجا لها وتزيد : عمار اخو دينا

ناظرها بندر بأستغراب وهو يتمنى : ايش فيه

بللت شفايفها اللي جفت وتكلمت بصوت مرتجف ومخنوق : بصغري تحرش فيني

بردت اطراف بندر وهو يناظرها ..

وكأنه حد صب عليه مويه بارده ..

انصدم من كلامها ..

وحس ان لسانه ثقيل ..

مو عارف ايش يقول من الصدمه ..

تكلم بكلمات متقطعه وهو يتنفس بقوه : كيف .. تحرش .. فيك ؟

جنان ودموعها تنزل : يعني تحرش فيني وخلاص .. هالشي مسبب لي ازمه نفسيه كل ماتقرب اتذكر اللي صار

بندر شد على قبضة يده وغمض على عيونه بقوه يحاول يهدي من اعصابه ..

وهو يسمع الكلام مثل السكاكين تطعن بقلبه ..

تكلم من بين اسنانه : ليه ماتكلمتي من اول ماصار هالشي

جنان بين دموعها وهي منهاره بالبكي : ماقدرت .. خفت

بندر بعصبيه : غلطانه ياجنان .. لو قلتي وتكلمتي كان تصرف حد بوقتها ووقفه عند حده

جنان وعينها حمرا من البكي : كنت صغيره يابندر .. ماعرف ايش اسوي او كيف اتصرف

بندر مرر يدينه بشعره وسند راسه على الكنبه وهو مغمض عينه وصدره يرتفع وينزل من القهر ..

ايش اللي جالس يسمعه ..

عمره ماتوقع ان المشكله وصلت لهالحد ..

جنان حب الطفوله كان يشوفها شفافه وعمرها مانشمخت بشي ..

بالاخير يطلع وراها هالسالفه كلها !

جنان نزلت على ركبها قدامه وحطت يدينها على ركبه وهي تشهق بالبكي : احلف لك بالله ان ماصار شي اقوا من التحرش .. واذا تبي افحص علي .. او حتى – بلعت ريقها واختفى صوتها .. تكلمت بصوت مخنوق – اذا صرت تشمأز مني طلقني .. بس قبل خليني اتعالج

بندر فتح عينه : انتي ايش تقولين

جنان : انا اتكلم جد اذا ماتبيني طلقني .. بس اول اتعالج

شهقت بالبكي وحطت يدينها على اذنها : بس مااااابي اتذكر شي مااااابي اتذكره اكرهه والله اكره ..

تمسح على رقبتها وكأن فيه حد لمسها : ماااابي شي يذكرني باللي صااااار

بندر نزل على الارض قدامها وضمها لصدره بقوه

وهو ياخذ نفس يصبر نفسه على المصيبه اللي سمعها

وبخاطره ( انتي روحي ياجنان شلون اتخلى عنك ) ..

جنان وهي على صدره : بس شقول لاهلي اذا رجعت لهم .. شقووووول

بندر : لاتخافي .. انا معاك .. وراح اوقف معاك للآخر

جنان شدت على قميصه : ماكنت اقصد والله ماكنت اقصد

بندر بلع ريقه وغمض عينه ..

هالمصيبه ماتجي على البال ابد !

وعمره ماتخيلها ..

كيف صار كل هذا ..

وينهم عنها مالاحظوا عليها من البدايه ..

يلوم الكل على اللي صار واولهم ابوها وامها ..







*************

يمشي بالممر رايح جاي ..

متوتر ومو مرتاح ..

كافي اللي صار لها وابوه يزودها عليها ..

طلع الدكتور من العياده وقرب منه بسرعه : ايش فيها

الدكتور : انهيار عصبي

ثامر بارتباك : وكيفها الحين

الدكتور : انا عطيتها مهدئ .. وكتبت لها على مهدئات تاخذها بالضروره .. بس لازم تبعدوها عن أي توتر بهالوقت

ثامر : شكرا

مشى الدكتور وجلس ثامر على الكرسي وهو يتنهد ..

دينا : سديم ماتستاهل كل اللي صار لها

ثامر : الله يصبرها

دينا : ابوك مع احترامي لك ماهو بصاحي

ثامر : لو هو صاحي ماوصلنا لهالحاله

دينا : بس هي مالها ذنب

ثامر : بس مين يفهمه هالشي

رن جوال دينا وطلعته من شنطتها : هلا ماما

ام عمار : وينك مو قلتي بتجينا

دينا : لا ماقدر اجيك .. بنام عند سديم

ام عمار عقدت حواجبها : ليه ؟

دينا : بس محتاجتني شوي

ام عمار : طيب بس انتبهي على نفسك

دينا : ان شاء الله


:


طلعت سديم من المستشفى متأخر وهي تعبانه ..

دخلت غرفتها وهي مكتومه ووجها قالب للون الاصفر ..

ساعدها ثامر تتمدد على السرير ..

لف على دينا وهمس : انتبهي عليها وخذي راحتك

دينا : طيب

ثامر وهو ماسك مقبض الباب : رقمي وهو عندك .. اذا صار لها شي دقي علي

دينا : اوكي

طلع ثامر من الغرفه وقفلت دينا الباب ..

جلست على السرير

تنهدت سديم ونزلت دموعها غصبا عنها ..

دينا : سديم ليه تبكين الحين

سديم : تطلقت بعد ايش تبين اكثر

دينا : اللي صار صار.. اهم شي صحتك

سديم : وين الصحه وانتي شفتي بعينك ابوي كيف

دينا : الحين انتي ارتاحي ولاتفكري بشي

سديم : كيف ارتاح بس

دينا : سدوم خلاااص ترى توك جايه من المستشفى ريحي عمرك

سديم لفت نفسها وعطت دينا ظهرها وظلت تبكي ..

تنهدت دينا ..

ماتلومها ..

اللي صار لها كبير ..


:


بصباح اليوم الثاني ..

فتحت عينها مستغربه على صوت مناقشات عاليه ..

لفت على جنبها تطمن عليها ..

شافتها جالسه وسانده ظهرها على واجهة السرير ..

وثانيه رجلينها ومثبته راسها عليهم ودموعها تنزل ..

تكلمت وهي خايفه : شافك ؟

سديم هزت راسها بالنفي من غير ماتتكلم

دينا : اجل ايش صاير ؟

سديم : مدري

دينا : خليك هنا وياويلك ان طلعتي

سديم : ليه مجنونه انا اطلع

دينا : لاحول الله

انطق الباب ولفت سديم على دينا بخوف ..

سديم وهي جالسه بمحلها : مين ؟

: انا

ارتاحت شوي لما سمعت صوت امها ..

دينا وقفت وفتحت الباب ..

دخلت ام سديم وبيدها فيصل ..

لفت سديم وشافته ..

بلعت ريقها وهي تتذكر راشد واللي سواه فيها ..

هذا اللي بيظل يذكرها فيه طول عمرها ..

ام سديم : خذي ولدك مو راضي يسكت

سديم تلف راسها : وخروه عني مابي اشوفه

ام سديم مستغربه : بس هذا ولدك

سديم وهي تبكي : هذا ولد راااشد

دينا : سديم هذا صغير ماله ذنب

سديم وهي تشهق بالبكي : مابيه يذكرني بابوه

دينا لفت على ام سديم : عطيني اياه ياخاله

ام سديم : سامحينا على هالظروف

دينا وهي تاخذ فيصل : شدعوه ياخاله هذي اختي

طلعت ام سديم من الغرفه بسرعه ودينا تحاول تسكت فيصل ..

سديم حطت يدينها على اذنها : سكتيه مابي اسمع صوته

دينا : حرام عليك ياسديم

سديم : واللي سواه ابوه فيني مو حرام .. حتى مو فاهمه ليه سوا كل هذا فيني

دينا : خلاااص انسيه

سديم وهي تبكي اكثر : وييين انسى ويييين .. مااااقدر انسى .. كل اللي صار صعب ينسى .. يعني هو ياليت طلقني وبس كان اهون علي مليون مره .. الا رخص فيني وعرضني وعند مين – شهقت بالبكي – عند فارس

دينا جلست على السرير وحطت فيصل قدامها : ولدك ماله ذنب .. لاتحمليه ذنب هو ماله دخل فيه

انطق الباب ..

مسحت سديم دموعها بأطراف كمها بسرعه : مين ؟

ثامر : انا

سديم : ايش تبي

ثامر : ابي ادخل .. خلي القطوه الشيرازيه تلبس عباتها

دينا : وانت مانسيت هالقب

ثامر : لا .. واخلصي ابي ادخل

دينا : ماراح اخلص .. ويالله روح بس

ثامر :اقول ترا عطيتك وجه

سديم ضحكت بضيق رغم همها : ههههههه

دينا : الله يرحم زمان اول .. لما كنت بزر

ثامر : هذاك اول بزر الحين رجال

دينا : هين

ثامر : ليه عندك كلام ثاني

سديم : اقول دينوه اخلصي خلينا نشوف ايش عنده

لبست دينا عبايتها ودخل ثامر الغرفه وهو يحاول يلطف الجو ..

قرب منها وقرص خدها : ازيك

سديم تبعد وجها عنه : ثامر ترا مالي خلق شي

ثامر : افا .. اكيد القطوه سوت لك شي وزهقتك

دينا : اففففف رجع وقال قطوه

ثامر : سدوم جد عاد مو كأنها قطوه ؟

سديم رمت عليه المخده : تأدب وخلي البنت بحالها

ثامر يضحك : والله انتوا يالبنات مشاكل

دينا : ماسمعت اختك ايش تقول يالله اسمع كلام اللي اكبر منك

ثامر : مو معناته اني اصغر منكم خلاص تجلسون تذلوني

سديم تتأفف : افففف

ثامر : خلاص بطلع . بس كنت جاي اتطمن عليك

سديم : كثر الله خيرك

ثامر : أي وانـ ...

سديم : خلااااااااااااص اطلع

ثامر : هههههههه طيب طيب

طلع ثمر من الغرفه ..

ولفت دينا عى سديم وهي تنزل شيلتها : سدوم .. انا راح اروح بيتنا لان تركي راسل لي مسج يبيني ضروري

سديم ابتسمت لها : لا عادي اصلا تعبتك معاي

دينا : شدعوه سدوم كلنا خوات

قربت منها : بس انتبهي على نفسك .. ولاتفكرين كثير

سديم : يصير خير

دينا : سدوم جد اتكلم محد راح ينفعك غير نفسك

سديم تنهدت : يادينا انا انجرحت

دينا : عارفه وحاسه فيك بس لاتزم تنتبهين .. ان اهملتي نفسك ترا بتصيرين عجوز وبتجلدين وسنونك تطيح وتمشين على عكاز

سديم : ههههه

دينا : ايه وانا الصادقه .. الظاهر تبين تصيرين كذا .. شوفي وجهك شلون اصفر

سديم : لاتخافين فتره وتعدي

دينا : ان شـ ..

رن جوال دينا ولفت عليه تشوفه : هذا تريك جا

سديم : خلاص روحي له

دينا : والله ماودي اخليك

سديم : اصلا تعبتك معاي

دينا : لاتقولين هالكلام لاتخليني الزق اكثر

سديم : لا واللي يرحم والديك لاتجلسين كافي الفضايح للي شفتيها البارح

دينا : أي فضايح

سديم بضيق : ابوي فيه حد غيره

دينا : عاااااااادي .. انتي ماشفتي جدي الله يرحمه كان نفس الشي .. مسوي فيها سلطان زمانه

سديم : هههههه الله يرجك متوفي الرجال وجالسه تتطنزين عليه

دينا : وانا عند ربي صادقه

سديم : خلاص روحي حرق جوالك تركي بأتصالاته

دينا ضمتها : مثل اوصيتك انتبهي على نفسك .. ولا تطلعين ترا الحرب قائمه بس الحين بوضع خمول

سديم : ههههههه الله يرجك

دينا باستها على خدها : يالله مع السلامه

سديم ابتسمت لها : مع السلامه

طلعت دينا من الغرفه ..

وناظرت سديم فيصل اللي نام من بعد ماتعب من البكي ..

بلعت ريقها وهي تتأمله ..

مسكت يده ..

ومررت يدها على وجه وبشرته الناعمه ..

الاطفال فيهم براءه مو طبيعهيه ..

نغزها قلبها عليه ..

كل هالبراءه وتحمله ذنب ابوه اللي ماله دخل فيه ..

حملته وضمته لصدرها ..

هذا اللي بقا لها ..

وهو اللي بيصير سندها بهالدنيا ..

نزلت دموعها وودها تحميه من كل اللي حوالينه ..

وماتخلي حد يوصله ..

حتى ابوه !





*************

فاتحه الدولاب ..

تدور الجاكيت .

شافته معلق فوق ..

وقفت على اطراف اصابعها حتى توصل له بس ماقدرت ..

شافها كيف تحاول توصل لجاكيت ..

وقف جنبها ونزله لها..

وقف ورا ظهرها يساعدها بلبسه ..

ابتسمت على مساعدته لها ولفت وهي تسكر الجاكيت : شكرا

ابتسم وهو يشوف اللون الفوشي كيف مناسبها هذا لونها المفضل : .. جنو

جنان وهي ترفع رسها له : هم

بندر : انا اخذت لك موعد مع دكتور نفسي

جنان : جد ؟

بندر : ايه

جنان بتوتر : تعبتك معاي بندر

بندر مسكها من كتوفها : اذا ماوقفت معاك اوقف مع مين

جنان بخجل : تسلم لي

بندر : المهم صحتك

جنان نزلت راسها وهي تلعب بسحاب الجاكيت : بس لي طلب

بندر : آمري

جنان : مابي احد يدري عن هالشي حتى اهلي واقرب الناس لي

بندر ابتسم وباسها على راسها : سرك ببير .. يالله نطلع

جنان هزت راسها بالايجاب ..

طلعوا اثنينهم يتمشوا ..

شافت جنان البحر واللي واقفين قدامه يصيدوا السمك ..

لفت على بندر : للحين تحب الصيد

بندر : واموت فيه

جنان : طيب تقدر تعلمني

بندر : ايش اللي غير الأحوال .. حسب علمي ماتحبي تصيدي .. وتكرهي ريحة الزفره

جنان : هذاك اول

بندر يبي يعاندها : لا حبيبتي انا اخذ على كلمتك الاولى .. وانتي قبل ماكنتي تبين تتعلمين .. فأنا ماراح أعلمك

جنان : خلاص مابي منك شي

مدت بوزها وجلست على الكرسي وهي مكتفه يدينها ..

بندر ضحك يحس انه يتعامل مع طفله ..

جلس جنبها وبعدت عنه ..

قرب منها اكثر وابتعدت عنه حتى وصلت للطرف : وخر انا زعلانه

بندر وهو يضحك ويحوطها بيدينه : ههههههه ماقدر على الزعلانين .. ولا يهمك راح اعلمك

جنان وهي لافه وجها عنه : بعد ايش

بندر : امزح معاك يالدوبه

جنان لفت عليه وسكتت فتره ..

ناظرته بتأمل ..

عيونه ..

انفه ..

شفايفه ..

سكسوكته ..

: بندر

بندر : سمي

جنان نزلت عينها وهي تلعب بطرف جاكيتها ..

سكتت وماعرفت ايش تقول له ..

تكلمت بتردد وهي متوتره : حامل بخاطرك على ..

سكتت وماعرفت تكمل كلامها ..

بندر فهم عليها ..

كان متوقع سؤالها ..

مسك يدها وناظرها : جنان ابيك تنسين هالسالفه وتشيلينها من بالك .. هالشي ماضي وانت صغيره .. مابي تذكريه الا اذا رحتي للدكتور

جنان : اذا انا نسيت انت مابتنسى

بندر : تأكدي ان انا ناسي من اللحظه هذي .. بس لزم تشيليها من بالك وخلينا نبدا صفحه جديده

جنان ابتسمت له ..

وتتحمد ربها انه تفهم لمضوع بهلطريقه وماعقد السالفه ..


بندر لف وناظر البحر ..

بلع غصته ..

يحس بالجرح بداخله من عرف الحكايه ..

بس لازم يقوى ..

حتى يدعمها ويقويها بدل الضعف اللي هي فيه ..

لازم مايحسسها باللي يحسه بداخله ..

حتى تنسى وتبدا حياة جديده معاه ..




***************




مرت ايام والاوضاع مو متغيره ..

زهقانه من جلستها بالغرفه بروحها ..

وقفت وقربت من الباب ..

مسكت المقبض وهي خايفه ومتردده..

بلعت ريقها وفتحت الباب ..

طلعت راسها حتى تطمن من الوضع ..

المكان هادي ..

معناته مافي حد ..

مشت بهدوء خايفه ان ابوها يحس فيها ويتهاوش معاها ..

دخلت الصاله ارتاحت نفسيا لما شافتها فاضيه ومو جالس فيها احد ..

مسكت بطنها اللي بدا يطلع اصوات ..

صار لها كم يوم مو ماكله شي ..

راحت للمطبخ وسوت لها ساندويتش مع كوب كوفي ..

وطلعت تجلس بالصاله وتشاهد تلفزيون تسلي من نفسها ..


:


مر من عند الصاله وهو بيطلع ..

انتبه عليها جالسه تراجع بمشيه ..

انرفع ضغطه وهو يشوفها جالسه ..

حب يسمعها كم كلمه يسم بدنها فيها : يعني الحين انتي مبسوطه على هالجلسه

سديم شرقت بالكوب اول ماسمعت صوته ..

ابو سديم مكمل كلامه : سودتي وجهنا ونزلتيه بالارض

سديم نزلت الكوب على الطاوله ..

انقهرت من كلمته لها : ليه انا ايش سويت ؟!

ابو سديم : كل هذا وماتدرين ايش سويتي !

سديم بقهر : انا ماسويت لا فضيحه ولا منكر .. تطلقت وانا مادري حتى ايش السبب

ابو سديم : انا اقول لك ليش .. لانك وحده ماعطيتيه كل حقوقه ولا اهتميتي فيه

سديم : تقدر تسأله اذا انا قصرت معاه بشي واحد من حقوقه .. بالعكس هو اللي قصر معاي

ابو سديم قرب منها ومسكها من نهاية راسها بشعرها : والله انك قليلة حيا .. عاطيك فلوس واملاك وكل هذا ومقصر

سديم ودموعها تنزل تحاول تفك نفسها : يعني الدنيا عندك كلها فوس .. ماتفكر بالاهتمام والمشاعر .. انا انسانه يايبا بعتني عشان فلوس وتطلقت وانا مادري ليش وايش بينك وبينه

ابو سديم شد على شعرها اكثر : انتي مافكرتي بكلام الناس ؟ مافكرتي كيف بتاكل بوجهي وانا عندي بنت مطلقه ؟

سديم تألمت اكثر ومسكت يده وهي مغمضه عينها وتبكي : آآآي .. وانا ايش ذنبي .. مافي بيدي شي

ابو سديم شد على شعرها ورماها بقوه : انا راح اوريك الحين

سديم مسكت راسها وهي تون من الالم ..

خافت وهي تشوف ابوها يتركها ويمشي ..

اكيد رايح يجيب شي حتى يضربها فيه ..

انكمشت على نفسها اول ماسمعت خطواته تقرب منها ..

اكيد بيضربها ..

هو متحلف فيها ..

استغربت وهي تشوفه راجع وعلبة بيبسي بيده ..

ناظرته ببلاهه ..

حط البيبسي على الطاوله قدام سديم : شفتي علبة هالبيبسي ؟

سديم ناظرته وهي مو فاهمه قصده

ابو سديم اخذ العلبه وفتحها : الحين لو شفتيه مفتوح ومحطوط قدامك بتشربيه ؟

سديم مافهمت ليه يقول لها هالكلام وليه السؤال الغريب ..

ابو سديم : انا اجاوبك .. طبعا لا .. بتخافي حد شارب منه او جاي عليه شي .. ماتدرين ايش اللي صاير له من قبل – شد على كلمته – البنت المطلقه ينظروا لها نفس النظره ولا حد يقرب منها

سديم سمعت الكلام وانحرق قلبها ..

وكأن سكاكين تنغرس بصدرها ..

اذا ابوها يقول لها هالكلام ايش بقى للناس الغريبه عنهم ..

نزلت دموعها بحرقه وهي تتنفس بقوه من قهرها ..

فتحت فمها حتى تتكلم وسكرته ..

الحروف ماهي قادره تطلع تحس انها ثقيله عليها من صدمتها بأبوها : اذا انت يايبه تقول لي هالكلام .. ايش خليت للغرب .. انت ماتخاف علي ؟ .. تراني بنتك – رصت على الكلمه اكثر وهي تشهق بالبكي وتأشر على نفسها – بنننتك يايبا

دخل البيت وهو يسمع الاصوات ..

مشى بخطوات سريعه من خوفه عليها ..

توجه ناحية الصوت ودخل الصاله بسرعه ..

وقف جنب سديم وبعدها وراه : يكفي يبا

ابو سديم بعصبيه : انتي حتى احترام لابوك مافيه .. يبي لك تكسير راس

سديم : أي احـ ....

قاطعها ثامر : يبا خلاص عاد .. كافي ضغط

ابو سديم : وخر عن وجهي

ثامر : ماراح اوخر .. زوجتها على كيفك ومزاجك وهذي هي النتايج .. خلاص اتركها بحالها

ابو سديم بعصبيه : توقف بوجهي ياثااااامر .. تراني ابووك

ثامر : ابوي على عيني وعلى راسي .. بس هذي بعد اختي .. اذا انت وامي ماتخافون عليها انا اخاف عليها

سديم سكرت اذنيها بيدينها وهي شهق بالبكي ..

تعبت من هالمناقشات وهالكلام ..

تصحى وتنام وهي تسمعهم ..

ماعاد فيها تتحمل اكثر : خلاااص بس والله تعبت تعبت من هالصراخ والمشاااااكل

انهارت بالبكي وهي مسكره اذنها ..

مسكها ثامر : سديم اهدي

ابو سديم ناظرها بأستحقار : تستاهلين كل اللي يصير لك

سديم : انا بنتك حراااام عليك يايبا اللي تسويه

ابو سديم : بنتي اللي تسمع كلامي وتنفذه اما غير كذا لا

ثامر وهو ياخذها ويدخلها الغرفه : خلاص اتركها بحااالها

دخل ثامر سديم الغرفه وهي منهاره بالبكي ..

مسكها يحاول يهديها وهو مو قادر ..

انفتح الباب وجريت ناحيتها : سديم .. يمه ايش فيك

ناظرها ثامر وتكلم بعصبيه : توك الحين جايه وتذكرتي انها بنتك وينك عنها من قبل

ام سديم ناظرته وهي مافي فاهمه شي : ثامر ايش فيك

ثامر : بنتك بيجننها ابوي وانتي مو بحولها ولا حتى تكلفين نفسك تدافعين عنها

ام سديم ناظرته وهي معقده حواجبها : ثامر شهالكلام

ثامر سفه كلام امه : جيبي عبايتها بسرعه

ام سديم : ليه

ثامر : أيش اللي ليه.. ماتشوفيها كيف تعبانه البنت


اخذ عبايتها بسرعه وطلعها من الغرفه وهو ساندها عليه ..

شافه ابو سديم طالع معاها وهو جالس بالصاله وتكلم بصوت غضبان : على ويييين ؟

ثامر مارد عليه ..

ابو سديم : اقول لك على ويييين رايح معاهااا

ثامر وهو عن الباب : ابعدها عنك

ابو سديم من بين اسنانه : اذا بتطلع معاها مالك رجعه للبيت انت معاها

ثامر قبل مايطلع لف على ابوه : اطلع واكسب صحتها .. ولا نها تموت قامي وانا اتفرج عليها

طلع من البيت وراح للمستشفى ..

طلع الدكتور من الغرفه وهو معصب : هذا الانهيار الثاني .. وانا قايل لك من قبل ابعدوها عن أي توترات بهالفتره .. هذا يأثر على صحتها بشكل سلبي

تنهد وهو يسمع كلام الدكتور لحد ماتحرك من عنده ..

جلس وهو يفكر بهالمشاكل والمسؤليه اللي متحملها فوق راسه ..

وين يروح معاها بعد مايطلعوا من المستشفى ..

مايبي حد من اهلهم يحس بالمشاكل اللي صايره ..

فتح محفظته

" ماتكفي حتى لليله بفندق "

سكر المحفظه ورجعها بجيبه وهو يتنهد ..

حس بصداع فضيع والدنيا تدور فيه وهو يقلب بالارقام اللي بجواله ..

مافي غير دينا الي ممكن يأمن عليها عندها وهو يدبر نفسه ..

ردت عليه دينا بعد فتره : آلو

ثامر : السلام عليكم

دينا بخوف من اتصاله : وعليكم السلام .. سديم فيها شي ؟

ثامر : امم عشان كذا انا داق عليك

دينا : ايش صاير خوفتني

ثامر بخجل وتوتر : تقدر تنام سديم عندك كم يوم

دينا : اكييييد .. بس قول لي ايش صاير ؟

ثامر : ولا شي .. بس ابيها تبعد شي عن البيت واجواء التوتر

دينا : ايه زين تسوي

ثامر : مشكوره دينا على مساعدتك

دينا : لاتشكرني هذي اختي .. بس وينكم الحين

ثامر : بالمستشفى

دينا بصدمه : ليييييييييييييه

ثامر بعد الجوال عن اذنه ورجعه مره ثانيه : بشوي شوي بطيتي اذني

دينا : آسفه بس صدمتني .. هي ايش فيها

ثامر : لا بس تعبت شوي

دينا : انا جايتكم الحين


قفل الخط ودخل الغرفه عند اخته بعد ماعرف انها صحت ..

شافها دموعها على خدينها ..

سكر الباب وقرب بهدوء من سريرها ..

حط يده على كتفها ومسح دموعها : سديم اهدي حبيبتي ليه تبكين

سديم : شايف انت الوضع بنفسك كيف

ثامر : لاتهتمين لشي .. اهم شي صحتك

سديم : اذا ابوي يقول عني هالكلام ويشبهني بـ .. – ماقدرت تكمل كلامها وغطت يدينها بكفينها وهي تشهق بالبكي - ... ايش خلا للغرب ياثامر

ثامر وهو يجلس على السرير ويقربها منه ويضمها : يعني انتي ماتعرفين ابوك

سديم : ابي يوم احس انه ابوي ويحسسني اني بنته .. هامته الفلوس وبس

ثامر : من يوم يومه وهو كذا.. الاهم أن انتي ولا كأنك تسمعين كلامه ولا استفزازاته

سديم وهي تمسح دموعها وتبعد عن صدر اخوها : دخلتك بمشاكل وانطردت من البيت بسببي

ثامر عطاها نظره : هذي اللي بكفخها الحين

انفتح الباب ودخلت بسرعه : سدوم ايش فيك حبيبتي

سديم ناظرتها : مافيني شي

ثامر : يالله انبسطي هذي هي القطوه جاتك

دينا لفت عليه : اووووف منك ترا مو وقتك

سديم وهي تضحك وتمسح بقايا دموعها بيدها : وانت ماتبطل هواش

ثامر وهو يتنهد : شسوي كانت الجنيه ماليه فراغي واتهاوش معاها .. دام هذي اختها يعني نفس الشي

سديم لفت على دينا : الا صحيح اخبارها

دينا : الحمد لله كويسه .. المهم جهزي نفسك اليوم النومه عندي

سديم لفت على ثامر مستغربه

ثامر : ايه غيري جو بدل قلق البيت

سديم : وفيصل

ثامر : لاتخافي على فيصل .. خذي لك فترة نقاهه عند هالقطوه

دينا : رد وقال قطوة

ثامر : دام عيونك زرق بتظلين قطوه

دينا وهي تتحلطم : شعب سعودي متخلف

ثامر : الظاهر نسيتي اصلك وانك سعوديه

دينا : لا مانسيت

ثامر : خلاص معناتك سبيتي نفسك

سديم : ههههههه





***********

بصباح اليوم الثاني ..

وقفت قدام المبنى ..

رفعت عينها على الائحه وحست بالغصه وقلبها يدق بقوه ..

ارتجفت وشدت اعصابها حتى ماتبين ضعفها ..

غمضت عينها بقوه تحاول تهدي من اعصابها ..

حط يده على كتفها وشد عليها بقوه ..

لفت عليه بنظرات تايهه ..

ابتسم لها بحنيه : اذا ماتقدرين عادي نأجل الموعد

رجعت لفت على المبنى وهي خايفه وقلبها يدق بقوه فضيعه ..

شدت على يده واخذت نفس : لا راح ادخل

بندر وهو معلق نظره عليها : جنان .. انا قلت لك ماراح اجي اذا انتي منحرجه

جنان شدت على يده اكثر ..

بلعت ريقها وردت بسرعه : لا ابيك معاي

بندر : طيب بس انتي هدي .. كلها جلسه عاديه

جنان هزت راسها بالايجاب وتكلمت بصوت مخنوق : ان شاء الله

بندر ناظرها وهو خايف ..

تعابير وجهها وخوفها ماهو طبيعي رغم انها تحاول تخفيه ..

شد عليها اكثر وقربها منه .. : الدكتور تراه عربي بس جنسيته كنديه .. اخترته حتى تتكلمين معاه على راحتك

جنان هزت راسها من غير ماتتكلم

بندر بهمس : جنو ابيك تكوني قويه

جنان ناظرته : انا قويه

بندر : هههههههه طيب ياقويه خلينا ندخل

دخلوا العياده وجنان تناظر حولها ..

وهي شابكه يدينها وتطقطقهم ببعض ..

حست بتوتر وماهي قادره تسمع شي من الكلام اللي دار حولها ..

كل اللي في بالها الا انها حاليا بعيادة طبيب نفسي ..

قاطع افكارها يده وهي على كتفها وهو يهمس : خليك قويه مثل ماتفقنا

وجا يبتعد يمشي بعيد عنها

ناظرته بنظرات مستنجده ..

فهم عليها وابتسم : انتظرك برا

بلعت ريقها وزاد توترها ..

تعلقت عينها عليه لحد ماوقف عند الباب وهو يسكره غمز لها ..

سكر الباب ولفت على الدكتور اللي جلس على الكنبه اللي قدامها ..

شدت على اعصابها اكثر ..

ابتسم الدكتور وهو يشوفها كيف تشد على اعصابها ..

تكلم بلكنه شاميه مكسره شوي : شو اخبارك ياجنان

جنان بلعت ريقها : الحمد لله

تكلم معاها بأكثر من موضوع لحد ماهدت اعصابها ..

ابتسم وهو يناظرها : يلا هلا خبريني عن نفسك شوي

جنان كلمته رجعتها لسنين ورا ..

حاولت قد ماتقدر انها تتناسها ..

اللمسات المقززه ..

انفاسه الحاره اللي تلفحها ..

صوته ..

صورته ..

غمضت عينها بقوه وهي تتذكر كل شي ولحظه بلحظه ..

تنفست بقوه وتكلمت وفكها يرتجف تحاول تمنع دموعها من انها تنزل : دكتور لو سمحت الكلام اللي بقوله اتمنى زوجي مايعرفه !


.
.





رجع البيت بعد ماخلصت جلستها وقابل الدكتور ..

وهو يتذكر كل الكلام اللي انقال له ..

حرف حرف وكلمه كلمه ..

(( جالس ورا مكتبه ويتكلم بهدوء ..

وهو يعدل نظارته الطبيه ويتصفح بملفها والملاحظات اللي كاتبها : مراتك ياستاز بندر تحتاج شوية وقت

ناظره مستغرب : كيف وقت

اخذ نفس : المشكله اللي صارت لها وهي صغيره اثرت عليها لحد هلا

عقد حواجبه وهو يناظره ..

الدكتور اخذ نفس وهو مكمل : اللي بدي اياه منك .. انك تاخد حدرك وتنتبه عليها .. وغير هيك مابتأرب منها بتاتا بهيدي الفتره لحد مابتتعالج من اللي هي فيه تماما ))


اخذ نفس وهو يتذكر هالكلام ..

جلس على الكنبه ولف عليها وهو مبتسم : ارتحتي بالجلسه ؟

ناظرت المجله اللي بيدها من غير ماترد عليه ..

بندر مسك يدها : جنان فيك شي

جنان هزت راسها بالنفي

بندر : اجل ايش فيك ماتبي تردين علي

جنان نزلت دموعها : حاسه اني ثقل عليك

بندر رفع راسها ولفه لناحيته ..

بعد الخصل اللي على وجها ومسح دموعها : لو انتي عبئ علي تأكدي كان احين مو جالسين مع بعض وانتيببيت اهلك

جنان : انت مو مجبور تتحملني وتتحمل اللي فيني

بندر ابتسم : الا مجبور .. تدرين ليش ؟ّ

جنان ناظرته بعيون مغرقه دموع بدون ماترد

بندر : لاني أحبك

جنان بلعت ريقها وابتسمت بخجل ..

بندر : ايه كذا ابيك تبتسمين وتضحكين .. ومابي اسمع كلام عبء وماعبء

جنان هزت راسها بالايجاب ..

بندر طق راسها بسبابته : قالت عبء قالت

جنان ضحكت : هههههههههه






*************






جالس بغرفته وهو متوتر ..

من عرف بالخبر وهو مو جاينه نوم من ليلتها ..

تمدد على السرير بالعرض وهو مثبت يدينه على راسه ومغمض عينه وهو ياخذ نفس ..

كل مايتذكر الكلام يجيه الحرقه بقلبه ..

كيف اجل هي ..

كيف تحملت الكلام ..

لازم يتحرك ويسوي شي ..

فز من سريره وطلع من الغرفه ..

شاف امه جالسه بالصاله ومشغوله بحياكة الكورشيه ..

رفع يده يحك رقبته وهو يناظرها ويفكر كيف يفتح معاها الموضوع ..

مشى بهدوء لناحيتها وجلس جنبها ..

حط يده على فخذها : ياحي الله ام فااارس

نقزت ام فارس : الله يقطع شرك .. خرعتني

فارس ضحك : هههههه كل هذا اندماج

ام فارس وهي تناظر غرزتها : زين ماختربت كان وريتك شغلك

فارس : اجل الحمد لله انها ماخربت .. عاد انتي يمه كله ولا خياطتك

ام فارس : اخلص ايش كنت تبي ؟

فارس : ها

ام فارس : داريه ان وراك حكايه .. اعرفك من نظراتك

فارس وهو يحك رقبته : لا لا مافي شي

ام فارس : انت ماتحك هالرقبه الا وراك سالفه ومو عارف كيف تطلعها

فارس : هههههههه يعني كاشفتني

ام فارس : من زمان .. انت صار لك كم يوم وانت تحوم بالبيت .. ومو عارف كيف تتكلم

فارس بعد عينه عن امه وهو يضحك : هههههههه

ام فارس حطت غرزتها على الطاوله ورجعت حطت يدها على كتفه : قول لي ايش اللي شاغل بالك بهالفتره

فارس ابتسم بأحراج وقلبه تلخبطت دقاته ..

ام فارس وعينها عليه : ماودك تتكلم

فارس بلع ريقه الجاف وبلل شفايفه ..

حاول يقوي من نفسه وهو يفتح الموضوع ومو عارف ردة فعلها من ناحيته : يمه انا ابي اتزوج

ام فارس وطيف ابتسامه بدا ينرسم على شفايفها : واخيييرااا .. مابغيت تنطق .. فرحتني .. شوف عاد انا حاطه عيني على كم بنت من زمان .. بس كنت انتظرك تتكلم تقول شي

فارس ابتسم على حماس امه ..

عدل جلسته وحط يده على يدها : لا يمه انا حاط ببالي وحده

ام فارس عقدت حواجبها : حاط ببالك وحده

فارس هز راسه بالايجاب ..

ام فارس ناظرته بشك : منهي .. ومن بنات مين ؟

فارس وهو حاط عينه بعينها : وحده تعرفينها وتعرفين اهلها

ام فارس سكتت وهي تناظره

فارس فرك جبينه : سديم

ام فارس بردت اطرافها وتغيرت ملامح وجها .. وتكلمت ببرود : كنت متوقعه .. هي من تطلقت وانت مو على بعضك

فارس ناظرها بخوف : كأن الموضوع ماعجبك

ام فارس بعدت عينها عنه : مو على كذا بس البنت مطلقه وعـ ...

: ايش عندكم تتساسرون من وراي .. ايش هالمؤامرات

لفوا اثنينهم ناحية الصوت ..

وضحك فارس عليه ..

قامت ام فارس من مكانها : هذا ابوك جا وتفاهم معاه

فارس ناظرها بأستغراب : يمه الحين تركتي المهمه الصعبه علي .. جيتك عشان تساعديني بعدين تتخلين عني

ابو فارس : ايش هالموضوع اللي مره صعب عليك انك تكلمني فيه وتحتاج مساعدة امك

ام فارس وهي تطلع من المجلس : ولدك يبي يتزوج

ابو فارس : ههههه وليه هالشي معصبك

ام فارس اشرت له وهي ماهي مهتمه وطلعت ..

ابو فارس ناظرها وهو مستغرب ..

لف على فارس : ايش فيها ؟

فارس رفع كتوفه ..

ابو فارس جلس جنبه : هذي الساعه المباركه .. واخيرا تحركت

فارس ابتسم بأحراج ..

ابو فارس : وبنت مين تكون ؟

فارس اخذ نفس وتوتر خايف من ردة فعل ابوه ..

تكلم بأرتباك : سديم بنت جيرانا

ابو فارس ابتسم : خير ماخترت

فارس رفع راسه وهو يناظر ابوه بأستغراب ..

كان خايف منه اكثر من ابوه ..

بس طلع العكس ..

ابو فارس : بس انت عارف انها مطلقه وعندها ولد

فارس : انا عارف بكل هذا ومستعد اني اتحمل المسؤليه

ابو فارس : بس تراها مو أي مسؤليه .. لاتنسى ولدها اللي عندها

فارس : داري يايبه ورغم كل شي ابيها .. بس .. – فرك جبينه بتوتر وبلع ريقه – بس امي شكلها مو راضيه

ابو فارس حط يده على فخذ فارس وشد عليه : مو حكاية انها مو اضيه .. بس أي ام تتمنى انها تخطب لولدها بنت ماهي مطلقه .. فما بالك بسديم اللي عندها ولد

: الحين انت واقف بصفه .. انا قلت بتشيل هالفكره من راسه

ابو فارس لف عليها : ليه انتي شايفه على البنت شي ؟

ام فارس : لا

ابو فارس : اجل ليه انتي معارضه الفكره

ام فارس : لاني ابي لولدي وحده بنت مو مطلقه

ابو فارس اخذ نفس : فارس رجال عمره 26 وعارف مصلحة نفسه .. هو اللي مختارها ويتحمل كل المسؤليات اللي تجيه

ام فارس : نسيت اخوانك ايش بيقولون

ابو فارس : داري ايش بيصير مايحتاج تقولين لي .. بيجون وكيف ياخذ بنت طلقه وعندها ولد واحنا وين راحوا بناتنا .. بس هذا كله مايهمني قدام سعادة ولدي .. اذا هو شايف سعادته معاها الله يقدم اللي فيه الخير وبروح اخطبها له من الحين لو يبي رغم المشاكل اللي بيني وبين ابوها

فارس وقف وراح لامه وباس راسها : يمه اذا منتي راضيه ترا – كمل بغصه – اصرف نظر عن الموضوع .. كله ولا انتي

ابو فارس ناظره : شوف انا قاعد وادافع عنك وبالنهايه تقول تصرف نظر .. لا يابوي مافي صرف نظر .. الموضوع راح يمشي يعني بيمشي

فارس : ههههههه شنسوي اذا الوزاره الداخليه ماعطتنا التصريح

ابو فارس : هههههههه ماعليك الوزاره الداخليه خليها على الوزاره الخارجيه .. وبيجيك التصريح

ام فارس : .. لا لاتصرف ولا شي .. اذا ودك فيها .. من اول ماتخلص عدتها انا اكلمهم

ابو فارس : ايه من البدايه سمعينا هالكلام خلينا نفرح قبل مايروح لبعثته .. والله انا كنت شايل همه وابيه يتزوج قبل مايروح .. بس كنت ابي تجي منه مو مني

فارس لف على امه وشد على يدها : هههه اهم شي انتي راضيه ؟

ام فارس هزت راسها وابتسمت : الله يقدم لك اللي فيه الخير

فارس ارتاح وتنهد ..

كان حامل همهم وانهم يرفضوا انه يتزوجها ..

بس من كلامهم ارتاح حتى لو طلع حد معارض لهالزواج بيوقفوا ضده ..

وبيتم كل شي بعد موافقتها هي ..





***************