الــــــــــــجـــــــــــــــزء الـــــــــــــخـــــــــــامـــــــــــس
دخل حمد المجلس ولقى ملاك ترتب السفرة بوضعيه اغرته شوي وخلاص ماقدر يستحمل جى يقرب منها وووو.....

ولفت عليه وخربت مخططاته

ملاك / وش فيك واقف تعال اقعد المسلسل بيبدأ الحين

جلس حمد وهو غير مرتاح لكن شكل الأكل وريحته أشغلت تفكيره شوي وابعدته عن نواياه الأوليه

حمد / وش انتي اللي مسويه

ملاك / هاذا طال عمرك رز صيني ودجاج صيني وسلطه صينينه وأكل صيني هههههههههه الأكل كله صيني بصيني وشرايك فيه ؟؟

حمد / وكالعاده لاجواب

بدأ المسلسل المدبلج اللي كان يتابعه حمد / حطيلي سلطه .....وكانت السلطه من جهة حمد....اضطرت تقرب من حمد عشان تحطله وكانت لاصقه فيه ...حطتله وانشدت مع المسلسل وما غيرت مكانها ....

وطبعاً المسلسلات المدبلجه أنواااااااااااع قلة الحيا بوسات على الرايح والجاي .....حمد بنفسه[هو انا ناقص تزيدني ماسك نفسي بالعافيه ]
صار كل ماجت لقطه يوزع نظراته يمين وشمال عشان ولا يلتهي بالأكل ما تثيره زياده ويتهور
حس بحراره بيده اليمين التفت لقى ملاك لازقه ماقدر يبعدها أو ينبها مثل العاده لما تقرب منه وكأن قربها اعجبه ...حط يده اليمين على خصرها وقربها له بشكل فضيع ومسك بيده اليسرى وجهها ولفه له ...قرب وجهها وطبع بوسه طـــويـــلـــه خدها ثم خدها الثاني ثم رقبتها وثم ....وثم ...
وهي استسلمت له على طول ...تتمنى دايم قربه وكان يصدها دائماً ...........وقف فجأه وكان أحد ساحبه غصب عنه

حمد بإرتباك / أبروح اتحمم وانام

وتركها على الأرض لوحدها بنت مثل ماأخذها....

قامت من على الأرض وهي في حالة صدمه من اللي صار وأخذتها الظنون يمين وشمال [وش فيني عشان ينفر مني كل مرة يقربلي مادري كان فيني شي يعيبني أو شي ينقرف منه أو يمكن عنده مشاكل وما يقدر ........آآآآآآآهـ يالله اللي صبرني ست شهور يصبرني العمر كله ....واهم شي الحب ولا العلاقة الجسدية شي ثانوي بالزواج ...أللعب على نفسي أنا حتى الحب ما يحبني وش يصبرني عليه .... بس انا أموووووت فيه ولا اتخيل نفسي عايشه من دونه هو اللي حبيت واللي تمنيت ولو قسى واهان وجرح على قلبي زي العسل ماصدقت انه صار بقربي وملكي ]

وقامت بعد ما اقنعت نفسها بأفكارها اللي لو احد غيرها مااستحمل الحياة هاذي

شالت السفره ودخلتها المطبخ ...وعدلت لبسعا وشكلها عقب الحوسه اللي عملها حمد وراحت لغرفتها سمعت صوت المويه بالحمام طلعت له لباس وعطرته وأخذت فوطته وفتحت باب الحمام وعلقتهم على معلاق الحمام ....ومادرى عنها لإن البانيو كان يتسكر بزجاج اخضر مايبان اللي داخله

راحت للمطبخ غسلت المواعين واخذتلها ملابس وتروشت بالسريع بالحمام الثاني

ملاك / قصر على التكيف شعرك رطب وجسمك مبلول

حمد / لارد

ملاك راحت قصرت على التكيف وأخذتلها فوطه ونطت فوق السرير وأخذت تمسح راسه

حمد وهو يحاول يبعدها وهي غصب عنه تكمل مسح وبالأخير استسلم وخلاها تكمل / أووووووه ماني بزر تقعدين تمسحين راسي أنا عاجبني البراد وأبغى اتعب زيـــــــــــن ولا عندك مانع

ملاك وكانها تكلم بزر / لا ياحبيبي ما يصير ....همين تتعب وماما تزعل منك خلاص حبي ...؟ عفيه على الولد الشاطر ...

وراحت من فوقه وفتحت الصندوق اللي فوق الكمدينو وكان فيه حلاو جالكسي لإنها تعشقه بجنون ....مدت الحلاوة له/ يالله وهاذي حلاوه للي يسمع كلام ماما ...وقرصت خدوده وراحت تمشط شعرها وتدهن جسمها عقب الأستحمام

هو خلاص ....ماصار قادر يستحمل كل مالها وتثيره بزياده مايدري وش فيها كل المواصفات اللي كان يبغاها هي عكسها تماماً وعرف لو يقعد دقيقة زياده راح يخربها من جد.... قام من السرير واخذ مفتاح السيارة وبوكه وجواله وطلع من البيت بكبره خلاص مايقدر يستحمل قربها زياده عن كذا أخذلها كم لفه بالسياره وسمع الأذان ... تذكر لبسه كان لابس بنطلون اسود قطن وبلوزة كت حمراء قطن أفرب ماتكون للبجامه ويستحي يصلي فيها راح لمسجد عارف ان كله هنود وهاللبس عادي عندهم وصلى وقعد شوي

ركب السيارة وتذكر شوق ماكلمها اليوم / الله يلعنها نستني شواقي

دق مرة ...مرتين ...ثلاث...عشر ....ولا ردت كلها انتظار

حمد / من ذا اللي قاعده تكلمه كل ذا الوقت

شوق بدلع زايد / آآآآآلـــــــــــــــو

حمد / شــــــوق من قاعده تكلمين كل ذا الوقت

شوق ماكانت تدري انه حمد وبتضيع السالفه / هلا حمد حبيبي وش ذا الرقم من متى مطلعه

حمد بعصبيه / خلك من الرقم الحين من قاعدع تكلمين

شوق / قاعده اكلم صاحباتي تعرف وقت عيد وكلهم راح يروحون السوق عشان كذا قاعديت نتفق تعرف بنات متى ينتهي كلامهم

حمد بعدم اقتناع لكن هدى شوي / آآهـ ...طيب ليه مارديتي علي بسرعه

شوق بزعل على دلع / حــــــمـــــد ....أصلاً أنت داق من رقم غريب وما أعرفه ولا تبغاني أرد على أي رقم والسلام بس لما شفتك تكرر الإتصال حسيت انه احد يعرفني ورديت

حمد بندم / آآآسف حياتي حقك علي ... بس كنت معصب من قبل من اللي عندي بالبيت عشان كذا انفعلت شوي عليك آآآسف مرة ثانيه

شوق / وليش ذا المتخلفه مزعلتك هي كانت تطول اصلاً تتزوج واحد مثلك جمال وفلوس ....الدنيا حظوظ والله والا من يصدق ان ذا القروية المنتفه تاخذ حـــمــــد

حمد يحاول يسكر على الموضوع / يالله شواقي لازم أسكر أنا جالس اكلمك من السيارة

شوق /وش عندك بالسيارة فيه حد يتمشى بذا القوايل

حمد / لاماكنت اتمشى كنت اصلي

شوق / ههههههههههههههههههه

حمد / خير ليش الضحك ضحكينا معك

شوق / ههههههههه حمد وبعد عمر طويل صار يصلي بالمسجد ....والله هزلت حمد بنفسه صار يصلي بجنب الناس اللي أقل منه ويتحمل الروايح على قولته

حمد بنفسه [أجل لو تدري أني مصلي بمسجد كله هنود وباكستانيه وش بتسوي تنتحر ]

حمد بعصبيه / خلاص شوق انا أسوي هالشي عن قناعه رجاء لاتتطنزين علي ok

شوق وهي خايفه من عصبيته بس لازم تاخذ فلوس لأجل تروح السوق اليوم وبدت تسوي تمثليتها المعتاده

شوق وكأنها تبكي / ليش تصرخ علي كافي اني اشوفك معها وماخذه مكاني ولا أقدر أسوي شي نار الغيرة تاكلني ولا اقدر أبعدك عنها تجي بالأخير تعصب علي عشانها آآآآآهـ ...آهي....آهي

حمد وهو يسب نفسه لإنه زعل شوق قلبه ومنى عمره / شوق حبيبتي خلاص آآآسف والله حقك علي أنتي الله يهديك تدورين المواضيع اللي تعصبني وتقولينها

شوق / أصلاً انت متغير علي من تزوجت ذا التكرونيه وانت صاير تعصب وتصارخ علي من دون سبب حتى العيد بالعاده تعطيني عشان أتقضى هالمرة ماعطيتني وحتى مصروف ما عطيتني مادري هي اللي تمنعك ولا أنت استغنيت عني وبطلت تحبني قلبي كان حاس انك بتنساني إذا تزوجتها آآآهي ...آهي

حمد / شوق ...ما يحتاج اذكرك أن انتي اللي حبيت وما غيرك احد ولا يمكن اني احب غيرك ولا انتهي من حبك حبك يسري بعروقي وين ينتهي معه وقلتلك من قبل وأقولك الحين ولا مليون وحده مثل ملاك وغيرها يسووونك

انا بس أنشغلت شوي بالشغل الجديد ... مايصير خاطرك الا طيب لك من الألف للميه أنا كم شواقي عندي

شوق بدلع ذوب حمد / وحده ولا عندك غيرها ؟؟!!

حمد / هههههههه ما عندي إلا شواقي وحده وأحلى شواقي بالعالم .....وأخذتهم السوالف


.............................


فــــي مــــكــــان آخــــــر....ويــــوم آخــــر

..../ آلو السلام عليكم

..../ وعليكم السلام من معي

...../ حزر فزر

..../ ملااااااااااااااك هلا والله الشمس منين طالعه يومين ورا بعض متصله وش عندك

ملاك / ابد بس حبيت أسلم واأتطمن على صديقتي فيها شي

ندى / لا مافيها شي هههههههههههههه

ملاك / اليوم بروح لبيت اهلك ومسويه جريش عاد تعالي هاه

ندى / قولي والله تصدقين القلوب عند بعضها من كم يوم وانا هاف علي طباخك......أبغى تسويلي رز ربيان حقك عجيب خبرك الحمل والوحام ششغال

ملاك / ها ها ها ها ضحكتيني أنتي بالشهر الثامن الوحام مخلص من زمان ألعبي على غيري عيوني كان رجلك مصدقك انا لا ههههههههه

ندى / صدق انك شيطانيه بدال ماتسويلي كل اللي أبي تتطنزين علي

ملاك / ليه إنشاءالله أسويلك اللي تبين أنت كفيلتي ؟؟!!

ندى / لإني انا شاريتلك مواعين المطبخ كلها وبدونها ماقدرتي تسوين شي

ملاك / عادي ابجيب الحافظه فاضيه أبشوف وشلون راح تاكلين الرز هههههههههه

ندى عصبت / ملاااااااااااااااك

ملاك / ههههههههههههههههههه


...................

بـــــــعــــد ســـاعـــــات

...../ ملاااااااااك ملاااااااااااااك يالله وش قاعده تسوين كسر جوالي أبوي أبوي من كثر مايدق يالله خلصينا

ملاك / يالله خلاص قضيت ...هاه وش رايك فيني .. شكلي حلو ....وصارت ترمش بعيونها له بإستهبال

حمد بعصبيه / أنتي فاضيه أقولك أبوي شايش تقعدين تسبليلي بعيونك

ملاك / بدلع ليه شكلي مو حلو يعني ؟؟؟....قولي يالله

حمد بقلة حيله / اللا حلو ويجنن بعد بس خلصينا واطلعي

ملاك / ههههههههه عيونك الحلوه حبيبي شفت ماضرك شي يوم مدحتني

حمد / ملاااااااااك

ملاك / طيب بسم الله علي اكلتني



.............

فـــــي بـــــيـــــت الــــعــــائـــــلــــة


وصلو البيت ودخل حمد سيارته بالحوش ونزلوا وفتح الشنظه

حمد / ليتي ...ميري

ليتي / نعم بابا

حمد وهو معصب ويصارخ / بابا بعينك انقلعي شيلي الحافظات من الشنطه وسكريها لا قضيتي بشويييييييييش

راحت الشغاله وهي تتحلطم عليه لإنه كريه ودايم يعصب عليهم

ملاك بصوت واطي / هههههههههههههههه

حمد سمعها وبسخريه / خير الشيخه وش اللي يضحك

ملاك / هههههه حلو شكلك وانت معصب وتهاوش مادري ليه معصب

حمد / وش رايك أبوي من الصبح وهو يتصل يهاوشني جبها مبكره لاتنساها .... ياويلك إذا ماجبتها .....لـــــيـــــن البيت وهو يزفني مرة بهواش ومره يسكر السماعه بوجهي حتــــ...ترن ترن

طلع حمد الجوال من جيبه وضحك / هههههههههالطيب عند ذكره أسمعي وشلون يهاوش

فتح الجوال وحطه على السبيكر

أبو حمد / وينك فيه ماصار كل هذا طريق تمشي على بيض

حمد / يبه وش فيك انطلقت مرة وحده هذاني توي طالع من البيت

أبو حمد / بالـــــبــــــيـــــــت لــــيــــن الحين ...أقول خلني أسكر السماعه لا انجلط ..........تدخلت ملاك وقالت

ملاك / يبه وش فيك معصب ترى العصبية مهب زينه ترفع السكر والضغظ

أبو حمد بهدوء / هلا والله ببنيتي وشلونك يبه عساك بخير .....طير حمد عيونه وهو يتكلم بشفايفه لملاك / كنه ماكان شايش من تو ويهاوشني صاير الحمل الوديع معك

ابتسمت ملا على كلام حمد / بخير عساك بخير ...باب بيتكم مفتوح

أبو حمد / أنتم تعالوا وانا أفتح الباب لكم تصدقين على فطوري الساعه سبع عظامي تتنافض من الجوع والسكر

ملاك / يخسي الجوع أفتح الباب حنى بالحوش

أبو حمد / بالحوش وذا الثور يقول تونا طالعين من البيت

ملاك تناظر وجه حمد المفتشل من تعليق أبوه وقعدت تضحك / هههههههههههههه يبه يمزح معك بس انت كلش كنت معصب ...يالله مع السلامه هذانا بندخل

حمد وهومنقهر / أشوفك من اليوم وانتي تضحكين علي اعجبك تعليق الوالد

ملاك / مو كثر شكل وجهك وأنت متفشل ههههههههههه

حمد انقهر زياده وبعصبيه دف ملاك / عطيتك وجه زياده اليوم أدخلي اقول لأذبحك الحين بالحوش

ملاك / طيب وش جاك ابدخل بدون دف

حمد واتشت معه / أقووول ادخلي ....ودفها بقوة لين ماطاحت على الدرج

......../ حــــــــــمــــــــــــــــد

ألتفتوا لها وهم متفاجئين من وجودها حمد خاف لاتعلم عليه أحد وملاك بعد خافت لتفضحها عند أهلها

حمد / ندى من متى وانتي هنا ...ووشلون دخلتي و .....

ندى / وش فيك شوي شوي هدي توي داخله نزلني طلال وراح للمجلس رح عنده وانتي ماتشوفين الدرج ...قومي قومي بسم الله عليك ومسكت يده وقومتها ....ماتشوفها طايحه كان قومتها ولا شلتها بعد ههههههههه

حمد / وش ذا الهبال والضحك اللي ماله داعي

ملاك وهي تتألم بس ماقدرت تمسك نفسها وما تضحك / ههههههههه ندى ماعليك من اليوم وهو معصب ويهاوش ههههههههه

عطاها حمد نظره وراح للمجلس


..................


بـــــعـــــــــد الــــغــــداء

أبو حمد / الله يعطيك العافيه على ذا الطباخ السنع الله يستر من الكلسترول أكلت من ذا الزبده لين ماقلت بس

ملاك / فيك كلسترول ...مادريت والله لو داريه كان حاطتلك حافظه مافيها زبده بدال ما ..........

قاطعتها ام حمد بقرف / وهذاك دريتي وش بتسوين يعني

دخل عليهم سعود بذا لوقت / تسلم يدينك ندوي صراحه غداء ولا أروع خصوصاً رز ربيان قعدت أكل لييييييييييييين مادخت ......أول مره أدري أنك طباخها ولا هذا تأثير طلول

ندى / اول شي وش فيه طلول مو عاجبك وثانياً مو أنا اللي طابخه جايه يد ورى ويد قدام

سعود / تستهبلين يعني ولا ماودك أطلب منك شي أنا شايف الشغاله تدخل الأكل ودخلتي بعدها .......أعترفي لايوجد لديك مفر قولي الحقيقه ياأخت العرب

ندى / الحمدلله والشكر وش فيك قلبت مسلسل ديني الغداء مسويته ملاك مرة حمد مو انا بس إذا بغيت تطلب منها نادني عشان آكل معك

انحرج سعود لما عرف أن ملاك هي اللي طابخه الغدى وبنفسه قال [وش يفكني من حمد ومن زين الوجه قاعد امدح الطبخ ازين شي أقوم ...شف عيون حمد حمره شكله ناويله على نيه ......الهجه .الهجه]

سعود / عن اذنكم ابروح استعد للصلاة

لما طلع سعود شالت ملاك الجلال عن وجهها

لف حمد عليها وكللمها بعصبية من بين سنونه / فرحانه انتي ووجهك انه مدحك لكن يصير خير بالبيت ......مابقى اللا يقوم يحب يدينك ذا المشفوح كنه أول مره ياكل

ملاك ابتسمت على تعليق حمد واستانست لما شافت نظرة الغيره بعيونه

حمد وزادت عصبيته واللي قهره انها تبتسم وبنفسه قال [عاجبها أن سعود يمدحها أصغر مني وقريب لعمرها مب انا كبر أبوها وش ذا الخرابيط اللي اخربط بها تحمد ربها أني اتزوجتها ]


لما شافت وجه حمد حمر من العصبيه ضحكت بصوت خفيف لكن سمعها حمد ووده يضربها يبرد حرته فيها [آخ يالقهر لو اني بالبيت كان كسرت سنونها ذا اللي فرحانه فيها]

قرب منها لين مالصق فيها وحط يده على كتوفها وبدى يقرصها بأقوى ماعنده

ملاك / آآآهـ ...تراك تعورني كل هذا قهر ماتقدر تصبر لين مانروح للبيت ستر وغطاء مو عند الناس

حمد / أقول انطمي وأسكتي ودواك بالبيت ويقلد صوتها ....ستر وغطاء على قولتك

ورجع يقرصها من أول كتوفها ليده وخصرها واي شي تطيح يده عليه وهي أنواع الضحك مو كأنه يألمها كنه يدغدغها

حمد / انتي ماتحسين كني قاعد اقرص الجدار

ملاك وزاد ضحكها وحمد كل شوي يلتفت لها ويهددتها وهو معصب وناسين انهم بمجلس مليان والعيون عليهم وخصوصاً عيون ام حمد وبنفسها تقول [ذا الثور ماقدر يصبر عنها حتى عندنا لازق فيها وحاضنها كنها بتطير وهي فمها بنشق من كثر الضحك انا داريه ان ماوراه خطط وانا الغبيه اللي اعتمد عليه وأخطط مثل ذا الخطط الغبيه ولا فيه مره مايلمسها رجلها وتسكت آخ يالقهر وش السواة الحين ؟؟ عسى بس ماتحمل ويخرب كل شي ]

أم حمد / أقول حمد رح صل تراه أذن ....وملحق على حرمتك بالبيت وعطته نظره معناها ياويلمك مني

حمد انتبه على جلسته وشال يده [الله يعيني على الوالده فهمتني غلط وش بيفكني من لسانها ]

قام من مكانه وراح للمسجد

قامت خلود وطيراان جلست بجمب ملاك / وش ذا الحركات أول مره أدري ان حمد رومانسي آآآآآآه الله يرزقني بواحد زيه

ملاك / [الله يرزقك بواحد أزين منه مع انه بعيني مايسواه أحد ..آآآآه لو تدرين وش سبب رومانسيته كان ضحكتي إن شاء الله يكون حظك ازين من حظي ]

خلود / وش ذا الإبتسامه إبتسامة خجل

ملاك / ههههههههههه لابس تذكرت شيء جاء على بالي

خلود بلقافه / وش هو

تذكرت مبارك ولد اخوي مع انه شاب وسيم وحليو عمره 25 إلا انه من يومه وهو يحب التجارة ....أول مابدا بسطه بالبيت بالإبتدائي ويوم تخرج من الثانوي اعطاه ابوه محل وقاله سو فيه اللي تبي ....وكرف كر ف ماصرت أشوفه والحين ماشاءالله عنده كذا فرع لمحله وعنده شركة تهتم بالعروس وتستلمها من الزفه لين الحلاو اللي بعد العشاء شفتي صوري يوم الزواج حلوه

خلود / أيه والله تجنن

ملاك / هاذي مصورة الشركه

خلود / وش رايك تروحين السوق معنا انا وسارة ....ندى لازقه برجلها بالمجلس كنه بيطير مافيه امل تروح ...... وأبغاك أنتي تختاريلي ذوقك جنااااااااااان

ملاك / تسلمين ياقلبي ...ترى أنا ماأستحمل المدح ماعندي مناعه يعني تلقيني الحين ذايبه عليك ههههههههه بس ماظني حمد يوافق

خلود / ماعليك أنا بخلي أبوي يقوله وهو مايرفضله طلب

جو من الصلاة

خلود بلع / بابا حبيبي ابروح السوق مابقى شي على العيد

أبو حمد / وش ذا الأدب بالعاده ماتقوليلي إلا إذا جيتي

خلود تفشلت / هاااااه لابس أبغى ملاك تروح معنا لإن ندى تعبانه وما أبغى اروح مع بنات خالي وما يصير أروح انا وساره لحالنا

أبو حمد / خلاص خليها تروح معكم

حمد / ماشاءالله وانتي وش ذا اللقافه وش دخلك يمكنها ماتبي تروح

خلود / إلا تبي تروح .......وش تلبس بالعيد يعني ... صح تبين تروحين معنا

ملاك وهي تنقل نظره بين حمد وخلود ودها تروح بس خايفه من حمد وخصوصاً وهي تشوف نظرة الرفض بعيونه

ملاك / لا ......آآ

واخيراً جاء المنقذ أبو حمد / خلها تروح ياحمد مع خواتك مابيهم يروحون لحالهم

حمد ووافق غصب عنه / خلاص روحي بس خليهم يوصلونك للبيت سامعه

ملاك بفرح /إنشاءالله (وهي ببالها شي ثاني ) ....[أشتقت له موووووت من متى ماشفته ولا كلمته كله من ذا اللي عندي محجرلي خلني أرسله ابي لأشوفه اليوم ]


......................

فـــــــي الــــــســـــــوق


راحو السوق مع السواق ولما وصلوا خلاص ملاك ماقدرت تصبر وودها تطير وتشوفه بس ذا البنات معها لازم تصرفهم

ملاك / انتم تصلون

البنات / أيه

ملاك / انا مالي صلاة ابروح اشتريلي شي أشربه واجيكم للمصلى لا تروحون لين مااجي فاهــــــمـــــيـــــن

ملاك / آلو

...../ هلا ملوك وينك فيه

ملاك / أهلين حبي أنا عند المطاعم تعال لي

...../ أنا واقف عند بيت الدونات

ملاك / خلاص هذاني شفتك مع السلامه

..../هلا والله وغلا ....هلا بالطيب الغالي ....عزيز وشوفته منوه

ملاك تمسك يده وتمشي هي وياه / ههههههه وأهلين وسهلين وبوستين فوق الخدين

...../ متأكده فوق خديني ولا خدين زوجك اللي حرمني منك

ملاك / لا حمد ولا غيره بيحرموني منك أنت الأصل وهو الفرع

...../ أشك بكلامك الصراحه


وأخذتهم السوالف ونسوا أنفسهم أشتااااااااااااقوا لبعض لهم مده ماتلاقو

ولا انتبهو على عيون تراقبهم وتشوفهم




......................



*....أتمنى لكم قراءة ممتعه....*


*....مع تحياتي هاجس ليل...*

الــــــــــــجـــــــــــــــزء الــــــــــــســـــــــــــادس



ملاك / لا حمد ولا غيره بيحرموني منك أنت الأصل وهو الفرع

...../ أشك بكلامك الصراحه


وأخذتهم السوالف ونسوا أنفسهم أشتااااااااااااقوا لبعض لهم مده ماتلاقو

ولا انتبهو على عيون تراقبهم وتشوفهم

....../ خـــــــــــــلـــــــــــــود خـــــــــــــلـــــــــــــود شوفي ملاك تكلم ذاك الرجال يووووه ماسكه يده ......لا وبعد قاعد يضحك

خلود تناظرها بعدم تصديق ملاك الطيبه البريئه نكون على علاقه باحدهم صدق المظاهر خداعه

خلود / اسمعي ياساره ياويلك لو تجيبين طاري لأحد لحد مااتصرف انا ........فاهمه ؟؟

ساره وهي منسبهه / إن شاء الله إن شاء الله

ترن ترن .....ملاك / وينكم فيه مالقيتك بالمصلى

خلود بدون نفيس / بالدور الفوقي عند محل الجوالات .....وسكرت الجوال من دون لا تسمع رد ملاك

ملاك / وش فيها سكرت الجوال بوجهي ....يمكن مافيه إرسال .......وصعدت لهم فوق

ملاك / وش عندكم بمحل الجوالات ؟؟

خلود بقرف / ابركب برامج بالجوال عندك مانع اخت ملاك ؟؟

ملاك باستغراب / لا ماعندي مانع

دخلو المحل وطلبت خلود من صاحب المحل البرامج اللي تبيها والأغاني .......وجلست على الكرسي تنتظر

ساره وهي تنغز خلود من خصرها وتساسرها / خلود خلود شوفي هاذا هو نفس الرجال اللي مع ملاك تو

خلود بقهر وقرفمن ملاك / وش دراك ؟؟

ساره / أنا مناظرته زين شوفي نفس نظارته جفنشي

خلود بنفسها / بنفسها [لا وبياع بمحل ..... لا يصير بس هندي وانا أقول من بتاخذ حمد أخذ وحده نفس اطباعه كل خرابه جاء في حرمته آآآآخ يالقهر وش يصبرني للبيت وأعلم عليها حمد بعذره مايبيها تتطلع شكله عارف سواد وجهها ]

صاحب المحل / الحساب 200 ريال

خلود بصراخ / وليش ان شاءالله 200 ريال انا شاريه جوال جديد ولا تحسبنا لا قين فلوسنا بالشارع يومنك تبي تسرقنا عيني عينك ماناقص إلا هندي يلعب علي

صاحب المحل وهو معصب والشياطين قدام عيونه / لا ترفعين صوتك مانتيب بحراج

خلود طيرت عيونها / ســــــعــــــــــــودي

صاحب المحل / ايع سعودي ولا ماعجبتك ؟؟!....وجيبي 200 ريال وخوذي جوالك وفكينا منك

خلود / وإذا كنت سعودي ..... يعني باعطيك 200 !!

صاحب المحل وهو يتأفف / اللهم طولك ياروح .....يابنت الحلال أنتي طالبه كذا برنامج غير الأغاني غير الثيمات غير الوجه الجديد وكان فيه فايروس وشلناه لك بكم تبين كل هذا يصير ؟؟!! بخمسين مثلا كان السعر ماعجبك عادي راح امسح البرامج واشيل الوجه وارجع الفايروس وخذي جوالك لأي محل ثاني يصلحه لك .......وألتهى بالابتوب اللي قدامها وطنشها ......./ هاه وش قلتي ؟؟

ملاك بصوت واطي / معليش سولها خصم علشاني

لكن خلود سمعتها ووصلت حدها من قلة ادب ملاك تكلمه عندهم عادي ولا هامها أحد

خلود بصراخ مفاجئ هبلت صاحب المحل / مابي خصم ولا شي والـ200 أبدفعها وبعصبيه ضربت الابتوب بقوة وسكرته

آآآآآآآآهـ يالحيوانه وش سويتي آآآآآآآآآآهـ

ملاك بخوف تمسك يده اللي سكرت عليها خلود ولا همها احد هذا الغالي ماتستحمل يجيه اي شي / خلود الله يهديك شوفي وش سويتي بيده

خلود خافت يوم شافت يده تنزف دم و بنفسها [ياويلي وش سويت عسى مايوديني للشرطه واكيد ملاك بتشهد معه هذاي ماتهتم من احد ولا تخاف من احد شوف كيف ماسكه يده .......ياويلي آآه آهي]/ والله مادريت والله العظيم قسم باله تــبــغـــ.....تبغى فلوس ابعطيك بس لاتعلم الشرطه والله ورب الكعبه ماكنت أقصد آآآهـ آهي آهي .... وصاحت على طول

ملاك بلشت هاذا يده تنزف وهاذي تصيح وكل اللي بالمحل يطالعون الفلم اللي قدامهم دورت بشنطتها على لزق ولقت وعطته عشان يلزقه على جرحه لإنه من الأشياء الضروريه اللي بشنطتها

ملاك / خلود حبيتي ماصار إلا الخير بس شكل الدم خوفك والا هو جرح بسيط

صاحب المحل بعصبيه وألم / اي بسيط سنة الابتوب خرمت عظمي نقولين بسيط بلا الوجع مو فيها

خلود بعصبيه وخوف / كلله منك لو ماشفتك معه كان ماعصبت وصكيت عليه الابتوب الحين إذا اشتكى علي وش أقول لأخوي صكيت اللابتوب على يد خوي حرمتك

صاحب المحل / أي خوي واي خرابيط انتي ووجهك اللي تقولينها

خلود من بين صياحها / لاتنكر أنا شفتكم تتمشون مع بعض وقت الصلاة ولا الأخت اتصرفنا ابروح اشرب شي واجيكم اثرها رايحه تقابلك عند اخوي ان ماوريتك انتي وياه

ملاك انصدمت وشلون شافتها لازم تفهم خلود السالفه

صاحب المحل / أقول لا يكثر ياام لسانين بتخوفيني بحمدانوه أعلى مابخيلك أركبيه اتنتي وهو معك

خلود طيرت عيونها / يعني ماانت خايف

صاحب المحل / وليش اخاف ماسويت شي غلط

خلود / ماسويت شي غلط ؟؟؟ كل هذا وما سويت شي غلط تقابلها وما سويت شي غلط

صاحب المحل / ايه عادي انتم حرام عندكم

خلود وعصبت مره ثانيه / ايه حرام انك تخاوي حرمه ولا متزوجه بعد مايسمى حرام

ملاك من اول وهي تحاول تسكت خلود لكن مافيه فايده كانت تصارخ ولا تسمع احد غير صاحب المحل

وبالخير قدرت تسكته يوم علت أصواتهم وبدت تخبص بالحكي / خـــــــــــلــــــــــود وش ذا الكلام

هذا مبارك ولد اخوي سعد وش خوي وخرابيطه



خلود منصدمه وكل شيشتها تبخرت / مــــــــــبــــــــــــــــارك هذا مـــــــــــبـــــــــــــــارك

مبارك وهو يقلده / ايه مــــــــــبــــــــــــــــارك انا مـــــــــــبـــــــــــــــارك ورجع صوته الخشن عندك مانع اخت خــــــــــــــلـــــــــــــود ؟؟!! ولا ماعجبتك كان ماعجبتك خلي أخوك حمدانوه يغيرني !!

خلود وهي تعض على شفايفها / وبنفسها [صار ولد أخوها وانا طينتها صراخ من الصبح وبالخير صكيت على يده الجهاز أودي وجهي منين منه ومن ملاك ]

أنا وش دراني شفتها معك حسبتها خويتك وانها قاعده تخون أخوي فلازم اتصرف يعني

مبارك بسخريه / ماشاءالله على المصلحه الإجتماعيه الصغيرونه الشطوره هاه وش الحلول اللي توصلتيلها ....وبلهجة جد .....أقول لا تطولينها أعطيني 500 لأجل الجوال والجرح اللي جرتيني

خلود بسرعه وبدون قصد مطماع أستغلالي ......وتداركت نفسها وسكتت

مبارك أبتسم على حركاتها الطفوليه وكلامها المتسرع وجازتله السالفه / أقول ملاك خلي ذا البزر أم لسانين تعطيني لبفلوس لأمسكها مع شوشتها وأحذفها بره

خلود بنفس التهور اللي ندمت عليه / انا ماني بزر انا أصغر من ملاك بسنه ياابو عيون مسكره

مبارك أنفجر ضحك على تعليقه الطفولي

ملاك / خلاص مبارك لا تاخذ شي علشاني خلنا نطلع

مبارك مطنش ملاك وكانه ماتكلمه لاهو ولا خلود معطينها اشكل محترم

مبارك وتكلم بجد وبنبره خلت عقل خلود يطير وقلبها يرقع / هاذي تسمى العيون الناعسه .....أشر على عيونه .....ونزل راسه عشان تشوف عيونه ورفع النظارات لفوق راسه وطالعها بنظرات تذبح ......

ذا انتي ماعجبتك غيرك من البنات يتخبلن عليها ويتمنن نظره من هالعيون

خلود جسمها ولع وأطرافها بردت كل شي تلخبط فيها بترد زي عادتها ماقدرت فعلا كانت عيونه عذاب خصوصاً وهم قاعدين يطالعون بعض لاهي نزلت عيونها ولا هو نزل عيونه

ملاك ضربتها على كتفها / يالله خلود كل اللي بالمحل قاعدين يطالعونكم ...........يـــــــــــالــــــــــــــلــــــــــ ه ,,,,,ودفتها وطلعتها من المحل ورجعت تاخذ الجوال من مبارك

ملاك / ماتوقعت تغازل عيني عينك وحريف الأخ بعد ......أجل البنات يتمنون نظره من عيونك هاه ..........هين يابروك ماقيت إلا اخت حمد

مبارك / والله اني مااغازل مادري ليه أصلا سوينت كذا .......تصدقين اسمها حلو والله زي عيونها

ملاك / لا الحاله مستعصيه .....مبارك وش فيك ؟؟!!

مبارك / هاه .... سلامتك ....بس هي صدق أصغر منك بسنه

ملاك بخبث / وش عندك أخ مبارك تسال

مبارك انحرج / أقول لايكثر جاوبي لأوريك شغلك

ملاك / ايه صدق ..... بس انها طيبه واخلاق و.......

مبارك / بس بس أحد سألك عن اخلاقها .......سألت كم عمرها بس

ملاك / هين يابروك إن ما خطبتها لفيصل مااكون انا ملاك

مبارك بسرعه / والله لاتندمين .....البنت خشت مزاجي بس بدري على الزواج

ملاك / أي بدري انت عمرك 25 وش تنتظر ......ترى البنت حلوه وراح تطير ......ويمكن تصير مخطوبه بعد لإن عيال خوالها وعمامها كثار

مبارك / أقول الموضوع شكله مطول والناس عيونها طاحت من المطالع بيننا آلو عشان نكمل السالفه ..... يالله مع السلامه وسلمي على الناس

ملاك / يبلغ يالعاشق الولهان

وانتهت الطلعه بعد ماشرت لبس للعيد وهديه لحمد ورجعوها البنات البيت



...........................


فـــــــــــي يــــــــــيــــــتــــٍ مـــا

شرفتي ياست ملاك الساعه 11ونص وتوك راجعه للبيت وين حنا قاعدين فيه ......انا سمحتلك تروحين بس عشان أبوي قالي وإلا لو ردتلي كان مارحتي

ملاك / حمد الله يهديك ترى مارحنا إلا الساعه 7 المغرب والسوق بعيد على بال ماجينا ولا حنا طالعين من السوق مبكر

حمد ويبغى يطلع حرته من عقب موقف الغداء واللي زاد الطين بله هواش امه له يوم شافته هو وملاك قراب لبعض ولا قدر يطلع حرته بالبيت لإنها راحت لسو وراجع للبيت مبكر مخصوص عشان يهاوشها إذا تاخرت وهوعارف انها بتتاخر السوق بعيد وخواته يالله يطلعون من السوق / لا تردين علي لما أقولك شي تنطمين وتسمعين فوق شينها قوة عينها ......غلطانه وترادد

ملاك / مايسوى ترى طلعه كان رفضت وبس بدال الصراخ ذا كله و.........طـــــــــــــراااااااااااااااااااااخ

وعيونه حمر من العصبيه / قلتلك لاتردين أنتي بقره ماتفهمين ولا زي الحمير ماتجين إلا بالضرب

ملاك وهي حاطه يده على خدها مافيه شي يستاهل الضرب وبتهور ردت عليه ندمت عليه بعدين / ترى الروحه كلها على بعضها ماتسوى إلا كانك منقهر من سعود عشانه مدحني هذا شي ثاني

حمد ووصل حده ولا قدر يمسك نفسه ووووووووووو...........



...................


قدام المرايه بالحمام تتذكر كل اللي صار امس يوم رجعت من السوق وتتلمس البقع الزرقه والموف اللي بوجهها من ضرب حمد وشفايفها المنتفخه من جهة اليسار ومتحجر الدم فيها غسلت وجهها بالمويه بيدها اليمين بس لإن اليسار مورمه ومزرقه شوي ولا تقدر تحركها

دخلت الغرفه وراحت تقوم حمد للدوام

ملاك / حمد .....حمد قوم الساعه سبع ...قعدت جمبه على السرير وتضربه بخفه على صدره .....حمد قوم تراني زهقت والله مالي خلق تعباااااااااانه حيل وانسدحت بجمبه ولصقت فيه لإنها كانت على طرف السرير ولا فيه مكان وبصوت ناعم واطي سحر حمد اللي كان صاحي بس مافتح عيونه مع ان التعب باين فيه / حــــــــــــــمـــــــــد حــــــــــــــــمــــــــــد قـــــــــــوووووووم تراني تـــــــــــــعــــــــــــبــــــــــاااااااااااا نـــــــــــه حــــــــــــــمـــــــــد حــــــــــــــــمــــــــــد

لف عليها ولا حست فيه لإنها مغمضه عيونها وقعد يتأمل وجهها وشفايفها كان متندم على اللي سواه ماعمره آذاها بهالشكل لكن وش يسوي كان مايشوف قدامه من الغيره من سعود و والعصبيه من هواش أمه له وكلامها اللي استفزته فيه امس ولا قدر يتحكم بنفسه وضربها بالعقال لين ماعضت الأرض ولا نام لين ماصلى الفجر .......حطت يدها اليسار على بطنها وانتبه على تعبير اللألم اللي انرسم على وجهها .........طالع يدها المورمه وعرف السبب

قام من السرير وحست فيه وقامت بتعب / صباح الخير حمد

حمد / صباح النور ......ماوده رد عليها لكن الشعور بالذنب مسيطر عليه

ملاك / بتتحمم ؟؟؟

حمد / لا مافيه وقت

ملاك / ليه الساعه 7و10 ودوامك يبدا الساعه 8

حمد بإستسلام / خلاص جهزي ملابسي

ملاك / تامر أمر من عيوني

راح الحمام وتحمم واخذت الفوطه وملابسه وعطرتهم وعلقتهم بالحمام وراحت تسوي الفطور وحطته على الطاوله ..... مثل العاده ولا كانه صار شيء امس

حمد / ملاك ملاك

ملاك / سم بغيت شي

حمد يناظرها بحقران / يعتي وش ابغى ؟؟! شوفي شغلك

ملاك فهمت عليه لكن ماتقدرت تحرك يده اليسار لإنها تعورها حيل مشطت شعره وعطته الطاقيه

حمد / جيبي الشراب الأسود والجزمه السوده ........جابتهم له وحطتهم قدامه

حمد / لبسينياهم

ملاك / ماقدر يدي تعورني لا حركتها

تذكر حمد شكل يدها شكل يدها المورمه / بس اليوم راح اترك تدلعين مع انك ما تستحقين الدلع

حز بنفسها كلامه نفس عادته ماتغير ولا بان عليه التحسف أو الندم تأملت خير يوم رد عليها يوم صبحت عليه لكن كل آمالها تبخرت يوم رد عليها ذا الرد القاسي لامت نفسها لإنها هي الغبيه اللي رضت بانه يتمادى بإهانتها بسكوتها عنه بس وش تسوي تحبه ومن زود حبه تمحي أي خطا لو كان كبر الجبال

طلعت من سرحانها على صوت حمد / ترى ماني جاي على الغدى اليوم .....وتحسف انه قالها لو طنشها وخلاها تسوي الغداء وتتعب على الفاضي كان احسن

ملاك / ليه وين بتتغداء فيه ؟؟

حمد / معزوم عند واحد من الربع بعدين انتي وش دخلك لا قد تتلقفين بلي مايعنيك

قعد على الطاوله وفطر وطلع للدوام وودعته كالعاده


...................

فــــــــــي وقـــــــــــــــــتـــــــــــــ آخــــــــــــــر


ترن ترن

...../ ألو هلا حبيبي وينك فيه تاخرت علي من متى وانا قاعد أستناك

......./ آسف شوق بس انشغلت شوي دقايق وانا جايك

شوق / يعني الشغل أهم مني ياحمد ؟؟؟.....كان خليتها موعد عشاء أحسن كانك ماتقدر تخلي الشغل عشان شواقي حبيبتك

حمد بنفسه [زعلت والله البلشه الحين وش يرضيها الحين ]/ يالله شواقي انا عند باب المجمع اطلعي الحين

راحو المجمع وتغدوا وماخات الجلسه من مسكة اليدين والبوسات والتحضن على خفيف اللي على قولة شوق بريئه

رجع البيت الساعه 6 المغرب بعد ماتمشى بالسوق هو وشوق وشرت لين ماقالت بس كأنها تتقضى لعرسها


...................

بـــــــعـــــــد مــــــدهــــ وبـــــــبـــــــيـــــــــتـــــــ أبــــــــو حــــــــمــــــــــد


مجتمعين في الصاله الأم والبنات والأب وملاك وحمد

وملاك مكثره مكياج على غير عادتها لأجل تخفي علامات الضرب اللي بوجهها هي مازارتهم اسبوعين ومع ذلك ماراحت الآثار تماماً

أم حمد بعد مااتفقت ويا حمد على الخطه / أقول ملاك مافيه شي بالطريق كملتوا 7 شهور ودي أشوف عيال حمد بكري قبل لا موت

ملاك وتضايقت من كلام ام حمد وبنفسها [أي حمل وأي بطيخ وشلون أحمل وانا بكر بلا سلكي يعني ]/ بسم الله عليك بعد خالتي بعد عمر طويل ان شاء الله بتشوفينه عياله وعيال عياله بس ربي ماكتب للحين

أم حمد بإصرار انها تكمل الخطه / روحي أكشفي يمكن عندك مشاكل ولا عند حمد ......هاذا ندى حملت من ثاني شهر وكل بناتي كذا ومرت نايف بعد واللي طولت نورة بعد 4 شهور انتي كملتي 7 شهور وما حملتي أنا ام عيال وادري روحي اكشفي التأخير مب طبيعي دايم يصير فيه مشاكل

ملاك وتبي تسكر السالفه / ان شاء الله على امرك ابروح المستشفى واكشف وما يكون خاطرك إلا طيب

ابتسمت ام حمد وخطتها بدات بالنجاح الدور والباقي على حمد يقنع اللي عنده


.........................

بـــــــــعـــــــــــــد أســـــــــبــــــــــوع

تنهد بضيق وسمى بالله وقوى قلبه ودخل على ابوه بالمكتب ورسم على وجهه علامات الحزن والضيق

انتبه على شكل ولده الحزين وانقبض قلبه على شانه / أجلس ياحمد .....ومسك يد ولده وجلسه ......وش فيك لك أسبوع مانتب طبيعي ضايق خلقك ولا تتكلم قول يابوك ريح نفسك

حِمد حمد ربه ان ابوه سهل عليه الموضوع / وش أقولك يايبه صارلي شي ما عرفت اتصرف فيه قلت مافيه إلا أبوي أعرف مني أطلب مشورته .....وتنهد بضيق

أبو حمد وتحمس يبغى يعرف وش ذا الموضوع اللي هز ولده وضيق خلقه / قول ياولدي اسمعك

حمد / رحت من كم يوم أنا وملاك للمستشفى بنكشف بنشوف ليه للحين ما حملت ........وطلعت النتيجه اللي صدمتني يايبه وحطمت احلامي ......وتغير صوته ونزل راسه وبحركه مسرحيه متقنه مسح دموعه بطرف شماغه

وهالحركه اثرت بأبو حمد وخوفته على ولده / كمل يابوك وش صار

حمد وحب يزود العيار حبتين لأجل تنجح الخطه تمام / طلعت ملاك عقيم يايبه عقيم ..........وانا اللي كنت ابغى استقر خلاص بعد ماا شتغلت وربي يرزقني بعيال واربيهم مثل ماربيتنا بالأخير تطلع حرمتي عقيم أنا نا اعترض على قضاء ربي بس أبغى أشوف عيالي كم بقالي بالعمر اللي كبري عياله طوله ........وانا حتى الأبوه ابنحرم منها قلي يليبه وش اسوي شر علي ......وحط شماغه على وجهه وكأنه يبكي ويطلع صوت يحرق القلب

أبو حمد ماتوقع حمد القاسي يبكي المتبلد الأحاسيس والمشاعر يبكي ولده بكر عياله يبكي تحركت عاطفة الأبوه بشكل كبير داخله لحمد وقام من كرسيه وقعد جمب ولده وحط يده على كتف حمد / حمد وانا أبوك الله يهديك وش بقيت للحريم تصيح ياولدي تصيح ماهقيتها منك ......انت رجال تتزوج بدل الوحده أربع وش يضرك

حمد طار من الوناسه أبوه قاعد يسهل عليه المر وهواللي شايل هم أقناعه بزواجه للمره الثانيه لإن أبوه يحي ملاك .......وده يقوم يحضن أبوه .....بس ماوده يخرب خطتته

حمد وهو منزل راسه / طيب يايبه ملاك وش أسوي فيها ....؟؟!

أبو حمد / وش بتسوي فيها ......بتقعد ببيتها معززه مكرمه ......وتزوج بدالها ثلاث بس لاتطلقها مالها ذنب هي بعد متقطعه على الضنا مثلك ويتيمه وحرمتن ماانت لا قي زيها

حمد / طيب من اتزوج اخاف اتزوج وحده تصير عقيم مثل ملاك وابلش فيها بعد شكل انا حظي شين مع الحريم

أبو حمد / استغفر ربك وش ذا الكلام ومن قال ان حطك شين ربي عطاك شيخة البنات لو مثلها ثنتين بالدنيا كان حنا بخير

حمد بنفسه [اعصابك ذا الشايب مايتحمل فيها كلمه ]/ شكل أبدورلي وحده مطبقه ولا ارمله وعندها عيال أضمن واتزوجها وأجيب كم ولد قبل ما شيب ولا عاد انفع

أبو حمد يضحك / هههههههه الله يخس حكيك ....ما عليك الرجال يجيب عيال ولو على فراش موته

قام حمد وحب راس ابوه وطلع من البيت وطوالي دق على امه وشوق وعلمهم بنجاح الخطه وانتهاء دوره


...............


فــــــي بـــــيــــــــتـــــــ آخــــــــــــــر

...../ تبغاني اخطبلك انت صاحي ؟؟!!

....../ ايه صاحي ....ابوي لايمكن يوافق على شوق علشان كذا أبغاك انتي تقترحينها على أبوي لإنها يحبك ولا يسمع فيك ولإن شوق قد حملت وسقطت من زوجها الأولي .....وتقدر تحمل مني فهمتي ......يعني ومن ذا الكلام

ملاك بصراخ / لا مافهمت أول قلت اني عقيم وسكت عشان افتك من كلام امك ونشرته بين اهلك وسكت وثاني شي تقولي اخطبيلي .....أنت ماعندك أحساس ما عندك قلي يحس قلبك وش حجر ...... الناس ماهي لعبه بين أيديك.....حرمتني من ابسط حقوقي وسكت حرمتني من الضنا وسكت كل هذا ولا كفاك ....؟؟!!

جاي تقولي وبكل وقاحه اخطبيلي

حمد / أقول قصي لسانك لا أقصه لك ....وبتروحين تقولين لأبوي ورجلك فوق راسك ولا بيت اهلك قريب وانتي عارفه وش ابسوي ما يحتاج اذكرك


..........................


بــــــــــعــــــــــــد يـــــــومـــــــيـــــن ......./ قلت لا يعني لا أي بنت إلا شوق ....اكيد حمد هو اللي مرسلك ....؟؟؟؟

ملاك / يبه الله يهديك تضن لو حمد مرسلني كان قلتلك كان عاندت ورفضت مهما يكون انا حرمه واغار على رجلي بس شوق يايبه ازين من غيرها هي أنسب وحده له بالعمر ومن الأقارب وعارفينها وحنا قراب لبعض يعني اضمن انها مو مغيرته علي ولا راح تطلب منه يطلقني اخاف يتزوج وحده ثانيه وتطلب منه يطلقني و قد حملت من رجلها الأولي يعني بإذن الله تقدر تحمل من حمد

قامت وباست راسه ويده ....والي يعافيك يبه وافق خل حمد يشوف عياله وانت بعد ماتبي تشوف عيال بكرك

أبو حمد تشوق انه لعيال ولده وتحت حنة ملاك وافق / خلاص اللي تشوفونه لو اني ماداني ذا البنت ولا ارتاح لها بس مابي اردك وانا ابوك وعيال حمد عيالك ....باست راسه ويده مره ثانيه ودموعها تسيل على خدها ....فرحتني الله يفرح قلبك

أبو حمد / والله انك غريبه احد يخطب لرجله ل وبعد تصيح من الفرحه الله يسعدك ويرزقك على قد نيتك من حيث لا تحتسبين قولي آمين والله انك مره مالك مثيل

ملاك بصوت فيه غصه / آآآآآآمين ومسحت بيدها دموعها دموع القهر والظلم .....حمد ظلمها حطمها قهرها حرمها من كل شي كانت تتمناه .....حرمها من حبه حرمها من انها تكون أم لعياله حرمها من أنها تكون زوجه له لها احترامه وكيانها يعاملها كانها جماد بدون احساس أو مشاعر واحساس نسى انها امراه ومو أي امراه امراه مرهفة المشاعر والأحساس مثل الزجاج الشفاف أي شي يخدشه وأي شي يعلم فيه

ضغطت على السماعه الحمراء وانقطع الأتصال مع حمد اللي كان حاضر معهم من بداية الجلسه


...................


بــــــــــعــــــــــــد أســـــــــبــــــــوعـــــــــيـــــــــن

وفـــــــــي الـــــفــــــــجــــــــــر ...../ آلو

....../ آلو خالتي ألحقيني ندى بالمستشفى تالد ولا أعرف اتصرف لهم 4 ساعات ولا احد طلع من الغرفه

سمعته يكلم شخص ثاني ونساها على الجوال وسمعت صرخته اللي هزته وذبحتها / لا لا لا لاااااااااا ...... ابيها هي ماابي الولد فاهمين ماابي الولد رجعوها لي ابيها هي ........و انقطع التصال







*....أتمنى لكم قراءة ممتعه....*


*....مع تحياتي هاجس ليل...*







ان شاءالله تكون اعجبتكم الأجزاء

وتتحفوني وتشرفوني بردودكم الحلوه


وكان تبوني اكمل قولولي وكان تبوني اوقف برضو قو لو لي عادي احترم وجهات النظر

((ما فادني زينه ماطالني غير شين فعوله ))

روايه أجزم بانها ستكون رائعه

الاسلوب رائع والاحداااااااااااااث مشوقه
××××
ملاااااااااااااك
اسم على مسمى يالبى قلبها

حمد
كررررررررررررررريه ماحبيته ابدن ابدن

اعتقد انه ملاك بتجيب راسه صوووووح

×××
تقبل مروري وعبق زهوري

همت بهواكـ

السلام عليكم ورحمة الله وبركاته

هاجس ليل

حياك الله كاتب ضمن كوكبة كتاب ليلاس الكرام
أتمنى تلاقي هنا من اعضاء ليلاس كل الدعم و التشجيع و النقد البناء اللي يساعدك على التألق و التميز
وتكون تجربتك الاولى في واحة ليلاس مميزة

طلب صغير يا اخوي

أتمنى انك ما تنزل الكثير من الاجزاء مره وحدة حتى تعطي فرصة للقراء انهم يقرأوا و ياخذو وقتهم في التعليق على الاجزاء المنزله


بالتوفيق لك ...

لي عودة ان شاء الله