كاتب الموضوع :
فتاة الجليد الأحمر
المنتدى :
الارشيف
مساااااااااء الخيرات و الليرات على أحلى ليلاسيين
من زمااااااااااااااان ما شاركت في المنتدى
عموماً الله ينتقم من شركة الإتصالات السعودية الدي إس إل مقطوع عندي من 18 رمضان وأمس رجع لازم أسوي إحتفال بمناسبة رجوعه
كنت شغال على النت بالراوتر حق موبايلي رغم إني من أنصار موبايلي بس صراحة أنطقلي عرق من البطء إلي فيه مدري إلي شغالين عليه كيف مستحملينه يمكن عشان ما عندي شبكة ثري جي
المهم الحمد لله أموري تمام التمام لين دحين مابدء الجد في الجامعة يعني لين دحين في دكاترة ما شفت وجههم
هذا الترم إن شاء الله راح يكون نقلة لأن معدلي زي وجهي وبدي أرفعه هذا الترم إن شاء الله وأحلى شي في جدولي إنه الربوع أف والإتنين أبدأ الساعة 10 والتلوت الساعة وحدة الظهر بالله صلو ع النبي قولوا ماشاء الله لا يتلخبط قيده أتلخبط قبل كدة ورجعت زبطته
آخر 3 سنين في حياتي كانت حياتي كلها أتعلمت فيها إلي ما أتعلمته طول 18 سنة
من جميع النواحي سواء المادية والعاطفية والإجتماعية والدراسية
من الناحية المادية كنت فوق مرررررررة ومسرف لأبعد الحدود ولا أفكر في شي إسمه فلوس وأحسن سيارة عندي فجأة أنقلبت الدنيا فوق تحت مرت بيا أيام زي الزفت في غربة وما في سيارة وأحسب حساب الأكل إلي بأكله بس ما أقول إلا الحمد لله دحين أحسن من أول بكتير أصلا ما في مقارنة سبحان إلي يغير ولا يتغر
حبيت وكرهت وطلعت سابع سما ونزلت سابع أرض وفيت وأتخذت قرارات مصيرية أنصدمت مرة وإتنين وتلاتة أشتقت وأتعذبت ضحكت وبكيت مريت بكل الحالات
كنت في احسن جامعة وكنت مطنش الدراسة وقاعد ألعب لمن شفت نتيجة الترم الأول شديت حيلي وقررت إني لازم أنجح ولازم أعدي السنة التحضيرية فجأة عملية زايدة وقت الإختبار النصفي وأنا في الغربة
أول عملية أسويها في حياتي في الغربة وما جمبي ولا أحد لا أم ولا أبو ولا أخت ولا قريب حتى أصحابي كانوا في محاضراتهم ومحد يرد والعملية مستعجلة حسيت بضعف عمري في حياتي ما حسيته حسيت قد أيش بني آدم ضعيف ودخلت غرفة العمليات وخرجت ومحد معايا بعد كم ساعة صحيت لقيت بابا وأعز أصحابي جمبي أخدوا أول طيارة وجوني
رسبت عشان الإختبار النصفي وسحبت ملفي وجيت لأسوأ جامعة فرق بين السما والأرض
الناس إلي كنت أعتربهم أقرب الناس ليا بانت معادنهم وعرفت مين الغدار ومين الصاحب ناس أعطيتهم كل شي طلعوا ما ستحقوا ولا مداس في حلقهم وناس كنت مقصر في حقهم طلعوا يستاهلوا العمر كله وبرضه ما أوفيهم
عموماً الحمد لله على كل شي وفي كل حال الإنسان ما يدري فين الخير وأكيد ربنا حطتني في كل هادي الظروف عشان أكون أنضج وأكيد ربنا دايماً بيختارلي الخير إلي أنا مني شايفه دحين ممكن بعدين يبان
آسف على إزعاجكم وتنكيدكم بس حبيت أفضفض شوية
|
25-10-08, 08:45 PM
هههههه
جديد مواضيع قسم الارشيف
العرض العادي
