لمشاكل التسجيل ودخول المنتدى يرجى مراسلتنا على الايميل liilasvb3@gmail.com






العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


ما تسوى حياتي دونج..للكاتبه معاني..

السلام عليكم ورحمة الله وبركاته.. انقل لكم قصه لكااتبه حبيتهاا كثيير.. والقصه هذي كانت من بداايات الكاتبه. فاكييد اللي يعرفوون اسلوووب معاني في قصصها الاخيير بيشووفوون الاختلااف و التطوور

إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 25-07-08, 05:14 AM   المشاركة رقم: 1
المعلومات
الكاتب:
اللقب:
ملكة الالماسية


البيانات
التسجيل: Jul 2006
العضوية: 8455
المشاركات: 10,839
الجنس أنثى
معدل التقييم: زارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالق
نقاط التقييم: 2892

االدولة
البلدSaudiArabia
 
مدونتي

 

الإتصالات
الحالة:
زارا غير متواجد حالياً
وسائل الإتصال:

المنتدى : القصص المكتمله
افتراضي ما تسوى حياتي دونج..للكاتبه معاني..

 

السلام عليكم ورحمة الله وبركاته..

انقل لكم قصه لكااتبه حبيتهاا كثيير.. والقصه هذي كانت من بداايات الكاتبه. فاكييد اللي يعرفوون اسلوووب معاني في قصصها الاخيير بيشووفوون الاختلااف و التطوور الكبير اللي صار في كتااباتهاا..

القصه هذي كامله و اول نشر لها كان اول نشر لها كان عام:
2005

ما تسوى حياتي دونــــــج..



الجزء الاول..

طالعت ساره ساعتها .

.فقالت اترمس عمرها..اووه تو النـاس ع الدوام انا شو مطلعني بها الحزه..""

وقفت عند محطة البترول و صبت بترول في السياره..فكرت وين اتروح .. لي ما تبدا ساعات دوامها..

وقفت عند كافتيريا و طلبت حليب كرك..يلست تشرب في السياره..
مر في بالها ..وين كانت و كيف صارت..

حمدت ربها في قلبها ع الريال الطيب الي ساعدهـا و شغلها عنده في الشركه..بو هزاع..

لولاه جان الحين ..صج بتتبهدل في حياتها..

ابتسمت كيف دشت له المكتب ..تترجاه انه يشغلها و حكت له ظروفهـا..

و طيبة قلبه خلته يشغلها في البدايه بمكان.. عادي و بسيط.. و مع مرور السنين كانت تترقى لي ما صارت سكرتيرته االخاصه..

حبت شغلتها ..و صارت كل حياتها..اصلا لو مب شغلها..ما عرفت اتربي عيال أختها بعد وفاتها و وفاة زوجها بحادث سياره..

غمضت عيونها..تذكر اليوم الي وصلها خبر هالحادث ..كل السبب من زوج اختها..كان مدمن خمر و بطالي ما يشتغل..و الحين بعد ما مات و جتل زوجته بحادث ترك ثلاث عيال..من غير بيت و مصرف ولا راتب بعد..

ما كانت اتعرف شو مصبر اختها عليه..

فتحت شنطتها و طلعت صور عيال اختها من البوك..

ابتسمت يوم جافت صورة التوم عبادي..و حمودي..

وصورة فتون الي عمرها ثلاث سنوات..

اكيد ما بتنسى فضل بو هزاع عليها ..جان الحين بتعتمد ع راتب امها مال الشؤون الي ما يكفي اسبوعين بس..

طالعت الساعه ..وتحركت..وصلت مكتبها بعد عشر دقايق..

وصل (بو هزاع)
ساره: السلام عليكم..

بو هزاع: عليكم السلام..يوم اجوف هالابتسامه انسى الويع الي في جسمي كله..

ساره: ما اتقصر بو هزاع..

بوهزاع: ممكن اتيبين لي البريد ..

ساره: ان شا الله.

كانت ساره اتحب ترمس مع بو هزاع و بالعكس ما كانت تضايج من كلامه يوم يمدحها لانها كانت تعتبره شرات ابوهـا ..

حست انه جريب منها..لانها ما عاشت حياتها مع ابوها ..فكانت اتجوف بو هزاع بصوره ابوهـا خاصه لان معاملته لها شرات عياله بحب و حنان..و هالشي الي مخلي ساره تعشق شغلتهـا..

بعد ما خلص بو هزاع من قراءت الرسايل الي جافها مهمه ..

اتسند ع الكرسي..

ساره: عسى ما شر.
بوهزاع: الظاهر خلاص شيبنـا ما انروم نشتغل.

ساره: (تبتسم) ما شا الله عليك شرات الحصان لا شيبت ولا شياته.

بو هزاع(يضحك) اتقصين علي ..انا من زمان شيبه حتى اكبر عيالي بعد جم سنة بيصير في الثلاثينات..

ساره: الثلاثينات توه شباب.

بو هزاع: يا بنتي بيي اليوم الي لازم ارتاح فيه من الشغل كل حياتي شغل..مليت.

ساره: افا ..انت الي معلمني كيف احب شغلي صرت اتقول هالرمسه..

بو هزاع: انتي بعدج 24 سنة عمر الزهور.

ساره: تضحك) الله يعطيك الصحه و العافية بو هزاع..اسمحلي برد ع تلفون المكتب.

بو هزاع: خذي راحتج يبـه..

ردت ساره ع تلفون المكتب.
ساره: الــــــووو

ام ساره: ها يمه..شحالج.

ساره:طيبه يا الغاليه ..خير متصله..؟!

ام ساره: بغيت اذكرج اتمرين تشترين شريط الفيديو حق عيال اختج..ترا البارحه صدعوا براسي.

ساره (تضحك) افا عليج ..انتي اتامريــــــن الا شو اسم الرسوم !!

ام ساره: و انا شدراني انا زين مني اعرف انطق اساميهم..

ساره (تضحك) خلاص ما يهمج بدور لهم شريط ازقرت بعيبهم.

ام ساره: هي اتعرفين بعد ما فيني يغثوني .يالله يمه فمان الله.

ساره: مع السلامه الغاليه.

بعد ما خلص وقت الدوام و طلعوا الموظفين من الشركه ..وقفت ساره يوم جافت بو هزاع طلع من مكتبه.

بو هزاع: يالله يبا شو تترين روحي لبيت.

ساره: ان شا الله بس بغيت اذكرك شربت حبوب القلب .

بوهزاع: اووهوو انا افتك من حنت عيالي في البيت ..اتيين انتي.

ساره: تراك غالي ..و انخاف ع صحتك.

بو هزاع: شربتها و الله شو الدريول برع.

ساره: هي موجود برع.

بو هزاع :عيل يالله الله يحفظج..لا اتمين هني وايد ..

ساره: خلاص طالعه وراك ..ربي يحفظك.

فكرت ساره في السياره "امممم الله يهداج امايه وين الحين محل فيديو مفتوح بها الوقت..اذا رجعت البيت من غير شريط الفيديو بياكلونين .."

يلست اتلف في السياره.. و اتمر ع محلات الفيديو الي اتعرفها ..بس كلها امصكره..

قررت اتمر ع اخر محل..اذا كان امصكر بعد خلاص بترجع البيت ..لانها حست انها بتموت من اليوع..

ساره اترمس عمرها"قاصين علي عبادي و حمودي .اطراق ع ويوهم يخليهم سنعين.."

وقفت عند محل الفيديو ..استانست يوم جافت شاب طالع من المحل..

"اخيرا لقيت محل مفتوح.." و ابسرعه فتحت باب السياره ..من غير ما تنتبه ان ها الشاب كان يمر عند باب سيارتها ..

فمجرد ما فتحت الباب ..يت ضربه ع الشاب ففقد توازنه وطاحت 3 الاشرطه الي شالنها من ايده..في الشارع..وواحد من الاشرطه ..وصل الشارع فمرت سياره ..وكسرته..

حست ساره ان كل شي مر ابسرعه..حطت ايدها ع حلجهـاا..

نزلت من السياره..و طالعت الشاب..الي سار صوب الشريط الي داسته السياره..

ساره(متلومه) اسفه ما اقصد.

الشاب: (محرج)ها الي يقبضكن ليسن.

ساره: صدقني كنت مستعيله و ما جفتك.

الشاب: (بعده محرج) و انا شو ذنبي ولو طيرتيني ع الشارع ..بدل ها الشريط ..كانت السياره بتدهسني.

حست ساره بالاحراج..فسكتت.
الشاب: شو اسوي بها الشريط المكسور الحين ..تراني ماجرنه.

ساره: خلاص بدفع قيمته.

الشاب: (معصب) شو تدفعين قيمته ع بالج ما اروم ادفع قيمته .

ساره: (عصبت) اووه قلنالك اسفين ما جفناك حق شو ها الزوبعه كلها.

الشاب: نعم ..يا برودج ارواح الناس رخيصه عندج.

ساره: (متأففه)الحمدلله ما صار فيك شي..لو سمحت انا مستعيله.

الشاب(محرج) بعد مستعيله انتي ما اتوبين حمدي ربج يت سليمه هالمره.

ساره: لحـوووووول الظاهر اليوم ما بنخلص.

الشاب: ارمسي عدل لاتصل بالشرطه الحين تسحب عنج هاليسن ..الي ماخذتنه بالواسطه.

ساره: الظاهر انت قليل ادب و انا الي ما عندي سالفه واقفه اعتذر منك..

قبل لا تسمع رده ..تحركت ابسرعه صوب المحل..

سمعته يقول من بعيد..

الشاب: بنات اخر زمن..

ساره من قهرها من ها الشاب الي ما جافت ما عنده ذرت احترام ..ولا اخلاق..فكرت اتعامله المثل بالمثل..

فصدت صوبه..طلعت لسانهاا..ودشت المحل.

راعي المحل: شو في مشكل ماما.
ساره: انت اشعليك ..شو عندك اشرطة فيديو كرتون ..

راعي المحل: شي شريط اسم اناستازيا واجد هلو.

ساره: زين عطني يااه ..فكنا بسرعه ..

راعي المحل: (يهز راسه) ان شا الله..

طلعت ساره من المحل..حمدت ربها ان ها الشاب..محد و سيارته بعد مب موجوده..

اتنهدت يوم وصلت البيت..و هي نازله من السياره انتبهت ..شي كلام مكتوب ع جامت سيارتها..

" وويويوو ما اتعرف اتسوق ماخذه ليسن بالواسطه"

عصبت ساره " اكيد ها السخبف ..اووف"

طلعت كلينكس من شنطتها و مسحت الرمسه الي كاتبنها..

دشت البيت تتحرطم..الله يغربله غبر سيارتي و كتب عليها السبال"

ام ساره: بلاج تتحرطمين شرات نوفـا

ساره(مضايجه) تعالي قصي ايديني جان مره ثانيه سرت اشتري شي لعيالج الخبال..وينهم..

ام ساره (تضحك) شو صار لج ..المهم شريتي الشريط..

ساره: هي شريته لهم ..ها خذيه لهم..

ام ساره: واعليه اكيد يوعانه بقول نوفا اتحط لج الغدا ..

ساره: مشكوره امايه مب مشتهيه اكل شي بس قولي نوفـا اتغسل سيارتي شي جلب نقز فوقهـا

ام ساره : (تضحك) عشان جي تتحرطمين ..ما عليج روحي ارتاحي ..

ساره: (تبوس ايد امها) من عيوني..

وسارت حجرتها..حاولت ترقد بس ما رامت ..مضايجه من الي صار لها قبل شويه..

قالت اترمس عمرها

"انا السخيفه الي يالسه افكر بالموقف.."
كانت بترقد بس سمعت دقات ع باب حجرتها..
_ خالوووووه افتحي الباب.
ساره "اوووووف انتوا بعد الحين بجتلكم"

قامت تفتح باب الحجره..
ساره: خيييييير.

حمودي: شو هالشريط الي مشترتنه.

ساره: تشرط بعد احمد ربك انت ..

عبادي(شويه و بصيح) شو ها مال البنات شو نحن بنات.

ساره: اوووه انا اليوم صارت لي مشكله بسببكم..و كل الي صار و مب عايبنكم الشريط.

حمودي: رجعيه نبا شريط مصارعه.

ساره: نعـــــــم اسفه ما اقدر.

عبادي: عيل انا ما احبج.
حمودي: حتى انا ما احبج و بقول فتون ما تحبج بعد.

ساره: عن انتحر بس ..
طالعت ساره نظراتهم ..حست بشي غريب نزلت اتبوسهم ع خدهم..

ساره: انزين شو رايكم اتروحون اتراجعون دروسكم و بعد ين باخذكم المحل و ابروحكم اشتروا الشريط الي تبونه..

حمودي (يحضنهاا) بعد بنشتري شريطين.
ساره: يا الطمـــــاع..

عبادي: لا بنشتري ثلاث عشان انا و حمودي و فتون ثلاثه صح خالوه.

ساره:- مصختها ..شو رايك تشتري المحل بكبره..
حمودي: يوم بستوي كبير بشتري حق امايه كل شي ..

ساره: و انــــــــا.

حمودي : انتي لا .

ساره : (تضحك) يا الشيطان خلاص بشتري شريطين شو قلتوا.

عبادي (يركض) هيييييييييه..

ساره: وينها فتون..
حمودي: نايمه عند امايه.

ساره: يالله روحوا راجعوا دروسكم و بعدين قوموني من الرقاد عشان انروح نشتري اشرطه..

حمودي و عبادي يركضون..برع الصاله..

_انزيـــــــــن خالوه..

يتبع >>

 
 

 

عرض البوم صور زارا   رد مع اقتباس

قديم 25-07-08, 05:16 AM   المشاركة رقم: 2
المعلومات
الكاتب:
اللقب:
ملكة الالماسية


البيانات
التسجيل: Jul 2006
العضوية: 8455
المشاركات: 10,839
الجنس أنثى
معدل التقييم: زارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالق
نقاط التقييم: 2892

االدولة
البلدSaudiArabia
 
مدونتي

 

الإتصالات
الحالة:
زارا غير متواجد حالياً
وسائل الإتصال:

كاتب الموضوع : زارا المنتدى : القصص المكتمله
افتراضي

 

الجزء الثاني..


و في السياره ..
ساره: بس لا تصارخون ترا بنرجع البيت.

فتون: هذا عبادي.

عبادي يضرب فتون..
ساره: عبادي خلاص ما بشتري لكم شي.

عبادي (شويه وبيصيح) هي الاول ضربتني.
حمودي: جذاب خالــــــوه.

ساره: و ابويه ما اعرف اسوق بالحشره الله يهداج امايه جان ييتي معانا.

وصلوا المحل و دشوا و بعد ما صدعت ساره..اخيرا قرروا شو يشترون..

فتون: عيل انا ابا عروسه.

ساره: من عيوني .

عبادي: انا بعد ابا سياره.
ساره: ماشي اذا تبا سياره رجع الشريط.

عبادي: لا خلاص ..ما ابا..
ساره (تبتسم) فديتك حبيبي..

تحركت ساره بسيارتها بعد ما طلعت من محل الفيديو..

وسارت صوب محل الالعاب عشان تشتري لعبه حق فتون..

و بالطريج..جافت سياره وايد تجرب منها..توقعت ساره انه حد من صديقاتها يسوي فيها مقلب و حركات.

بس هاي السياره ما اتعرفها ..و لا حد اتعرفه عنده شرات هاي السياره..فكرت انها اطنش..

وقفت عند محل الالعاب..نزلت من السياره و نزلت معها اليهال..

ساره(اترمس اليهال) يالله حبايبي ابسرعه اشتروا ..ترا بعد بنمر المطعم بنشتري عشاا.

ركضوا اليهال و دشوا المحل مستانسين..

حست ساره براحه يوم جافت اليهال جي مستانسين..كل واحد يدور له لعبه ..يلست اطالعهم ..

بعد العشـاا ..يلست اطالع التلفزيون..مر ع بالهـاا الحادث الي صار لها اليوم..

قالت في خاطرها"لا يكون هو صاحب السياره الي من ساعه يالس يسوي لي حركات..اكيد هو..""

و في يوم..كلعاده..سارت مكتبها قبل الوقت..ياها اتصل من بو هزاع.

ساره: هلا بو هزاع.
بوهزاع: شحالج يبه.

ساره: ربي يعافيك..
بو هزاع: انا اليوم ما بداوم..برتاح شويه..اذا شي اوراق مهمه طرشيها بيد الدريول..و أي اجتماع اجليه حق باجر..

ساره: ان شالله ما اتجوف شر.

بو هزاع : الشر ما اييج يا بنتي.

يلست ساره تشتغل..حست بالتعب لانها اتذكرت انها ما خذت راحه..

قالت في خاطرهـا "اممم اليوم بدون بو هزاع مول مب شي..""

و في نهاية الدوام..بعد ما الكل طلع من الشركه طلعت و طرشت الاوراق بيد الدريول لـ بو هزاع.

فكرت اليوم اطلع اليهال صوب البحر..اشويه اتونسهم و تستانس معاهم..

وقت العصر ..سحبت اليهال معاهم.

ام ساره: اتحملي فيهم.

ساره: زين تعالي معانا..

ام ساره: تدرين من بعد وفاة اختج الله يرحمهـا مالي نفس اطلع مكان..

ساره: الله يهداج الحينه مرت سنتين و نص..

عبادي: ياللللللله خالـــــــــوه..

ساره: انزين اوف منك انت..

ام ساره: خذي معاج نوفـا.

ساره: و انتي بتمين ابروحج.
ام ساره: بسير بيت اليييران.

ساره: يالله فمان الله..

دقايق وصلت البحر بعد ما مرت الدكان تشتري لليهال كره يلعبون فيـها..و شيبسات و عصاير..

يلست نوفا اتراقب عبادي و حمودي يلعبون فوق الرمل..و ساره يالسه ابعيد و فوقها فتون..كانت ساره..

تتأمل و اطالع الناس ما توقعت اجوف ناس هني ..بس الظاهر اليوم الكل عايبنه الجو..و حبوا يغيرون ...

بطلت ساره عيونـها يوم سمعت صوت من وراهـا
_ ما شا الله عيل وينه بو العيال.

من غير ما تلتفت ساره وراها عرفت صاحب الصوت..

فحبت اطنشه..بس فتون يلست تضحك له ..و تصارخ تبا تركب معاه في البانشي...

مسكتها ساره..و عطته ظهرها و يلست ..مرتبكه ..شو يبا ها الانسان منهاا..

سمعته يقول:- وين قيمة الشريط.

ساره: (من غير ما تلتفت صوبه) بجم و بعطيك الدبل.

سمعته يضحك..اتنرفزت من ضحكته..

الشاب: (يضحك) ما ابا بيزات ابا شي غير البيزات.

طالعته ساره محرجه..

الشاب: ا(يضحك) أبــــــا الليسن مالج..
ساره: انت شو حارنك..اكيد ما عندك ليسن.

الشاب: هي خليته لج ..ممكن اتعلميني السواقه.

وقفت ساره..تزقر نوفـا عشان اتيب عبادي و حمودي..

ركبت السياره ..كانت اتعرف ان هالشاب بعده يطاالعها..قالت في خاطرها شو هالانسان قليل ادب..صج عيونه زايغه.

حركت السياره..بس هو اتحرك و غاب عن عيونها قبل لا تتحرك سييارتها..

و في السياره جافت ساره ..فتون عندهـا مفتاح صندوق بريدهـا ..فخذته من عندها..

ساره: شيطانه من وين طلعتيه.

فتون: مناك برع.

فتحت ساره سدت السياره ..خلت المفتاح داخله ...

فكرت سـاره اطرش باقة ورد لـ بو هزاع..البيت لان ها اليوم الثاني الي ما يداوم فيه..

في البدايه كانت متردده يمكن اتسوي مشاكل و حساسيات من بينه عياله..بس بالاخير ..

جافت ان من الواجب اطرش له باقة ورد بس باسم كل الموظفين..

عرفت ساره ان بو هزاع ما بداوم ثلاث ايام..يعني ورا باجر بيكون موجود..

كانت من وقت لوقت تتصل به تسال عن اخباره..
لان حست ان هالانسان وايد ساعدهـا فواجب عليه انها تنشد عنه و تطمن عليه..

و في نهاية الدوام نزلت سـاره تحت عشان تعطي الاوراق حق الدريول يوصلها لـ بو هزاع..

ساره اترمس عمرها..غريبه محد الدريول جي متاخر..

ملت ساره من الوقفه برع ..فكرت اتروح مكتبها تتصل به اجوف وينه و ليش تأخر.

وصلت مكتبها..رفعت السماعه عشان تتصل بس سمعت صوت داخل مكتب بو هزاع..

ساره: (مستغربه)منو داخل المكتب !!

قبل لا تفتح باب مكتب بو هزاع انفتح الباب ردت لورا ..شهقت يوم جافت ها الشاب الي من يومين جافته ..وشال بايده اوراق.

حست ساره من نظراته انه هو بعد اتفاجأ بوجودها لانه ما علق تم ساكت يطالعها..

ساره: انت منو سمح لك تدخل هنـــــي.

انتبه الشاب ان ساره اتكلمه..فابتسم.

ساره: انت دوم جي دمك ثجيل..و بعدين شو هالاوراق الي بايدك..عطني ياااهـا

الشاب: و اذا ما عطيتج ..؟؟

ساره: (رافعه سماعه التلفون) بتصل بالشرطه.

الشاب(يبتسم) اتصلي ولهت ع السجن.

انقهرت ساره من برودة اعصاب هالشاب..

ساره: ما تنلام خريج سجون.

الشاب: لالالا و شــــــو بعد.

ضغطت ساره ع ارقام التلفون طالعت الشاب يوم يير السماعه من ايدها..

ردت ساره ورا خايفه..

الشاب: يعني انتي السكرتيره.
ساره: ما يخصك..اطلع من هني.

الشاب: اممممم بطلع بس بعد ما بتقولين ليش مطرشه باقه ورد حق بو هزاع.

اتفاجات ساره من سؤاله فتوقعت انه يجرب لـ بو هزاع..

الشاب: ما بتقولين..؟؟

سااره: لانه مريض طرشت له باقه ورد..ما فيها شي.

الشاب: يعني منج انتي مب من باجي الموظفين..

ساره: انت شو الي تبا توصله بالضبط ..و من تكون اصلا..

الشاب: يلس ع كرسيها..فحست ساره ان هالشخص يمكن يكون ولد بو هزاع..

يتها رعشه في جسمها يوم جافته يتحرك و يدور بالكرسي..كان يبا يحسسها ان كل شي هني ملكه..

ساره: (تهمس) انت هزاع.

الشاب: و انتي ساره .السكرتيره الصغيرونه الغاويه
الي مخليه الوالد يتعلق بشغله ..عشان يجابلج طول فتره الدوام.

بعد ما ساره اتاكدت ان الاوراق الي بايده ماخذنها حق ابوه شلت شنطتها و طلعت من المكتب من غير ما تلتفت وراهـا..


ركبت سيارتها .. و يلست اتصيح..تذكر كلامه..يوم يقول ان بو هزاع يشتغل عشانها..مسحت دموعها..

و قالت في خاطرهـا ."ما في شي يخليني اصيح..ها الانسان وقح ..و اكيد مليون فكره بياخذ عنهـا...

خافت ان يروغها من الشركه..لان اتعرف ان بو هزاع وايد يعز عياله .. و اذا طلب منه ..اكيد بيروغها..

بعدين قالت لا لا ما اظن بو هزاع يسوها لانها هي اتعرف كل شغل الشركه و مستحيل يطردهـا..

كل ها عشان باقة ورد خله يفكر ها التفكـــــير ..

صج انسان غبي..

وصلت البيت..فسخت عباتهـا و شيلتها .. وطاحت ع الشبريه..

دشت امها الحجره..

ام ساره: بلاج يمه..

ساره: تعبانه من الدوام..

ام ساره: قومي كلي لج لقمه..

ساره : مب مشتهيه ابا ارقد ..

ام ساره : ابرايج يمه..

ساره: وينهم العيال...

ام ساره: يطالعون فيديو..خلاص ارقدي الحينه ..

حاولت ساره ..ترقد بس مب رايمه..كانت خايفه ..و افكارها اتروح و اتيي ..معقوله بو هزاع بطردهـا

يا ربي لو طردهـا وين بتروح..و كيف بتلاقي وظيفه الا بواسطه او تتريا سنين..


كيف بتصرف ع امها و ع عيال اختها..

غمضت عيونها..اتنهدت تتمنى لو ما التقت بها الانسان موليه..

بس بعد ما بتغير شي ..ع باله بو هزاع متولع بالسكرتيره.. ما يعرف ان علاقتها فـ بو هزاع شرات الاب و بنته..

بس منـوو يفهمه ..اخيرا رقدت ساره..بس في داخلها خوف كبير من الايـام اليايه الي تهدد وظيفتها.
يتبع..>














 
 

 

عرض البوم صور زارا   رد مع اقتباس
قديم 25-07-08, 05:18 AM   المشاركة رقم: 3
المعلومات
الكاتب:
اللقب:
ملكة الالماسية


البيانات
التسجيل: Jul 2006
العضوية: 8455
المشاركات: 10,839
الجنس أنثى
معدل التقييم: زارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالق
نقاط التقييم: 2892

االدولة
البلدSaudiArabia
 
مدونتي

 

الإتصالات
الحالة:
زارا غير متواجد حالياً
وسائل الإتصال:

كاتب الموضوع : زارا المنتدى : القصص المكتمله
افتراضي

 

الجزء الثالث..



ارتاحت ساره يوم رجع بو هزاع الدوام..ع الاقل ما قامت اتجوف هزاع..الا نادرا ..


كانت اتحس انه ايي الشركه من فتره لفتره ..عشان يراقب تحركاتها مع بو هـزاع..

الحين عرفت ساره ان هزاع خايف من انها تزوج ابوه..طبعا عشان الشركه و المال الي يملكه بو هزاع..بس هي دوم تعتبر بو هزاع شرات ابوهـا..حتى هو يعتبرها شرات بناته..حصه و خلود..

في الايام الاخيره زادت زيارات هزاع لشركه ..عرفت انه عنده شهادة ادارة اعمال خذهـا من الولايات الامريكيه..وعشان جي كل فتره يمر الشركه يكسب خبرة بو هزاع..

لاحظت ساره ان هـزاع قام يطنشها من بعد ما داوم بو هزاع ..حتى ما قام يرمسها الا اذا يبا شي ضروري..

و ها الشي مخلي ساره مرتاحـه

و في يوم دشت ساره لـ بو هزاع..

ساره: الشيخ وصلتك رساله مهمه تترياهـا من زمان.
بو هزاع: (يضحك) من متى صرت شيخ.

ساره: احم من عرفت الشيخه ساره..

ضحك بو هزاع بصوت عالي..بو هزاع يطالع الباب الي انفتح..

بو هزاع:_ تعال هزاع اسمع ساره شو اتقول.

نزلت ساره عيونها بالارض يوم جافت هزاع يطالعها غييير..
ما عرفت شو هاي النظرات عتاب ولا لوم ولا شـوو

هزاع: (يبوس راس ابوه) :-شحالك الوالد.

بوهزاع: الله يسلمك يا ولدي.

ارتبكت ساره يوم هزاع جابلهـاا فقالت.

ساره:- بو هزاع هاي الرساله..اسمحلي عندي شغل.

بو هزاع: (يضحك) مشكوره يا الشيخه..(وخذ الرساله)

حست ساره بعد ما قال بو هزاع هاي الجمله..ان هزاع بجتلهـا بنظراته..كلها عداء و حقد..فحاولت تهرب من هاي النظرات ..فطلعت ابسرعه برع المكتب..

يلست ع مكتبهـا تتنهد .."اوف هالعله من وين طلع بكمل ثلاث سنوات بالشركه و ما قد جفته ألا الحين من وين طلع.مب رايمه اخذ راحتي في الشغل...""

يلست تشغل عمرهـا بالاوراق الي عندها و مرات بالكمبيوتر و احيانا اترد ع الاتصالات..

كانت تتمنى انها ما تدخل مكتب بو هزاع دام هزاع موجود داخله..

رفعت راسها يوم سمعت صوت هزاع يقولهـا.

هزاع(يتطنز) هـا الشيخه ان شا الله مرتاحه بالشغل.

مسكت ساره اعصابها ..وحاولت اطنشه..اضايجت يوم اجدم و يلس مجابلنهـا.

ساره رفعت راسها اطلعه ..

هزاع: انتي وايد ذكيه.

ساره: (تقهره) اكيد ولا ما وصلت من موظفه عاديه لسكرتيرة المدير.

هزاع: (ابرود اعصاب) عشان جي صرتي شيخه بنظر الوالد.

استفزت كلماته ساره ..كانت تبا اتصارخ عليه و اتروغه من المكتب بس خافت كل ها بنجلب ضدهـا.

ساره: لو سمحت عندي شغل.ممــــكن.

هزاع: (يبتسم) غريبه تشتغلين بضمير...لازم عشان تكبرين بنظر عيون الوالد ترا الجمال و اللسان ما يكفي صح.

ساره: (من بين اسنانه) انت قليل ادب.

هزاع(واقف) :_أنا اقدر اروغج من الشركه ع هالكلمتين بس صدقيني مب الحين فالوقت المناسب ..

بعدني ابا اتابـع لعبتج الحلوه..عشان اعرف انهيهـا بطريقه حلوه..

طالعته ساره يوم طلع من المكتب..حست بخوف كبير في داخلهـا..فكرت اتخبر بو هزاع عن كل شي ..بس يمكن ما يصدقهـا..

و في طريج البيت ..كانت اتفكر كيف اتحط حد بينها و بين هزاع..باجر اذا هزاع مسك الشركه اكيــــــــد ببهدلهـا

قررت انها اتقدم ع وظايف ..وبمجرد ما تطلع لها وظيفه زينه و رااتب ممتاز ..اتقدم استقالتها..

وصلت البيت ..حاولت تشغل بالها..وما كانت تبـا اتفكر برمست هزاع الي ترفع لها الضغط..

يلست تلعب مع حمودي و عبادي و فتون..

عبادي: ودينا البحر خالوه.

ساره: اووه مالي نفس اطلع مكان ..باجر حبيبي.

عبادي: لا اليوووووم.

حمودي: ودينا الالعاب.

فتون:ماما انا ابا اروح الالعاب.

ساره: انتوا شفيكم اليـوم..اقولكم ما بطلـــــــع ..ماشي طلعه.

عبادي: عيل انا ما احبج حتى فتون و حمودي.

يلست ساره تضحك ع رمست عبادي ..كم تسوا اليلسه مع ها اليهـال ..و الله لولا الحاجه..جان ما اشتغلت ..ولا سمعت كلام ايب لها عوار الراس.

ساره: انـــــزين باجر باخذكم الالعـاب..

مسكت ايد عبادي و حطتها ع يبهتها .

ساره: جوف انا مسخنه ما اقدر اطلع مكان اليوم.

حمودي: عيل باجر ودينا..

فتون: نلعب وايــــــــــد.

ساره: "تضحك" بنلعب وايـــــــــــد.

نوفا: ماما انت ما في يجيب رساله مال انا.

ساره: بلاج انتي العله الثانيه ..انزين بييبها باجر.

نوفا:حرام ماما انا من زمان ما يقرا رساله حق اهل مال انا.

ساره: خلاص بسير اجوف بالبريد مالي..

ساره(اترمس اليهال) شو رايكم اخذكم معاي انجوف اذا نوفا عندها رساله ولا.

تموا اليهال مستانسين و يصارخون لانهم بطلعون مكان..

ساره: هــــــا بس محد يقول خالوه ابا ها و مري هني..تراني ما اروم.

عبادي: ما بنقول..والـــــــله.

تحركت ساره بالسياره..ومعاها اليهال ..عشان اتمر البريد..اتجوف اذا شي رسايل حق نوفا او لا..

فتحت شنطتها ادور المفتاح ما لقته..اتذكرت انها غيرت رقم بريدها و استلمت مفتاح يديد..بس ما تذكر وين حطته..

عبادي:خالوه من زمان انتي حطيتي مفتاح هني.
ساره: وين.....؟؟

حمودي:داخل هني بالسده يوم سرنا البحر صح عبادي..

ساره : (اتبوس حمودي و عبادي ):- شطار حبايبي.

فتحت السده و طلعت المفتاح..

نزلت من السياره..حاولت تفتح الصندوق بس ما رامت..جربت مره و مرتين بعد ما قدرت..

ساره: شو معطيني مفتاح بالغلط..؟؟معقوله !!

بعد محاولات ..ملت ساره..وفكرت ترجع البيت..وقررت اتدور حل بعدين..

اول مره ساره اتروح الدوام و هي مضايجه..ما تبا اجابل هـزاع..

مر هاليوم ع ساره ..ابراحه لان هزاع ما شرف اليوم..
بس كان بخاطرها اتعرف ليش ما يـــــــااه..

بس اليوم الثانـــــي ..كانت في عالم فتون اتلاعب اليهـال مثل ما وعدتهم البارحــــه..

سارت تشتري لهم ايس كريم..كانت واقفه تتريـا الايس الكريم الي طلبته لليهـال..

طالعت الناس اليالسين ع الطاولات ..اتمنت اتكون لها صديقه ..جي تطلع معها..وتشكي لها همهـا..

هي عندها صديقات في الدوام ..بس كانت تبا صداقه قويه..بس للاسف شغلها و تربية عيال اختها..خذ وقتها كله.

صدت للصوت الي كان يضحك بصوت عالي..جافت هزاع يالس مع ثلاث من ربعه..طالعها ,,فرفع حواجبه مستغرب من وجود ساره ..

ساره(جنها جافت يني) : يالله بسرعه وين الايس كريم.
سنه اووف.

راعي الايس الكريم: ماما زهمه ما يجوف.

ساره: زين خلص..

خذت الايس كريم ..ابسرعه قبل لا ايي هزاع و يسولف معهـا..و سارت ابسرعه صوب الالعاب..

زقرت نوفـا و اليهـال..يلسوا ع الطاولات عطتهم الايس كريم ..و يلسواا..ياكلــــــون الايس كريم..اما هي فكرت تشرب ماي بس.

ساره:- ابسرعه كلو اا عشان انسير البيت.

عبادي: ما لعبنا.
ساره: انت ما تشبع لعبان...يلا ثاني مره ما بييبكم.تراا

حمودي:شو ها خالوه ما لعبنا شي

حست ساره انها تحرم اليهال من اللعب بس عشان خوفها من هزاع لا ايي و يرمسها عشان يغثها ..

بس كانت اطمن نفسهاا"لا مستحيل بيجوفيني من بين كل هـا العالم""

بعد ساعه من اللعب ..كانت اتركب اليهال فـي السياره..
فتحت باب سيارتها و قبل لا تيلس التفتت لصوت الي كان يسالها..

هزاع:- عيال منو هذيلا.

ساره مب عارفه باي اسلوب اترمسه..

ساره(تطنز) الييـران.

هزاع:-ع بالي ارمله ولا مطلقه بس يوم جفت اوراقج طلعتي انسه و توج 24 سنه.

ساره: (محرجه) منو سمح لك ادور معلومات عني.

هزاع: (رافع حاجب واحد) بـاجر بتكونين السكرتيره ماليه..لازم اعرف عنج كل شي.

ساره (تبتسم) ساعتها اشتغل بمكان ثاني..انا مستحيل اشتغل عندك.

هزاع: تراج تشتغلين عندي ..ماشي فرق بيني و بين الوالد.

ساره: فرق السما و الارض.

هزاع (يطالع يمين و شمال ومتكي ذراعه ع باب سياره ساره المفتوح..وبعدين يساسر ساره)

هزاع (يبتسم) انزين شو رايج بوفر عليج وقت ترا الوالد شيبه و عنده عيال اكبر عنج..و بعمرج..

انا بعدنـي شباب و منـاسب لج ..بعطيج كل الي تبينه..بس تزوجيني شو رايـج..

استوعبت ساره كل كلمه قالها هزاع..و حست ان كلماته هزت كل جسمها و خلاها ترتجف من الغيض و العصبيه..

ساره: (تتنفس بصعوبه) تبا اتعرف رايي.

هزاع (يبتسم) يا ليــــــــت.

رفعت ساره شنطتها و كفخته بويهه..بكل قوتها..حط هزاع ايده ع خده مب متوقع الضربه..

ركبت سيارتها ابسرعه ..وقفلت الابواب ..كانوا اليهال يلعبون و يصارخون في السياره بس بعد ..الموقف الي صار تموا ساكتين مستغربين ..

حطت ساره راسها ع السكان..تاخذ نفسهـا ..وسمعت هزاع يدق ع دريشه السياره,..

هزاع::"امحطي ايده ع خده"نزلي الدريشه اقولج..؟؟

ردت ساره بسيارتها لورا..من غير ما اطالعه او تهتم بكلامه..مب مستعده تسمع كلالام غيره..

شو يتحرا عمره بنات الناس لعبه بايده..ما توقعت ان هالانسان الي يجوفه يقول ريال و النعم فيه..بس كلامه.. شرات سم الافعى..

كانت دموعها تنزل ع خدودها..بها الوقت تمنت اتكون ابروحها ..عشان تاخذ راحتها..ما حبت اتصيح حذال عيال اختها..

لانهم خافوا من الي صار و تموا ساكتين لي ما وصلـوا البيت.


***
يتبع >>

 
 

 

عرض البوم صور زارا   رد مع اقتباس
قديم 25-07-08, 05:20 AM   المشاركة رقم: 4
المعلومات
الكاتب:
اللقب:
ملكة الالماسية


البيانات
التسجيل: Jul 2006
العضوية: 8455
المشاركات: 10,839
الجنس أنثى
معدل التقييم: زارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالق
نقاط التقييم: 2892

االدولة
البلدSaudiArabia
 
مدونتي

 

الإتصالات
الحالة:
زارا غير متواجد حالياً
وسائل الإتصال:

كاتب الموضوع : زارا المنتدى : القصص المكتمله
افتراضي

 

الجزء الرابع
في اليوم الثاني قررت ساره انها اتخبر بو هزاع كل شي..
ابتسمت يوم اتذكرت كيف ضربت هزاع..يستاهل..

و ضحكت..يوم اليهال اول ما دشوا البيت يتراكضون لامهـا عشان يقولنها ان خالتهم ضربت ريال..

طلعت مليون رمسه و عذر رد ع اسئلة امها..طالعت الساعه جافت الساعه..تسع وشي ..

قالت اترمس عمرهـا"غريبه بو هزاع تأخر..بعد ما اتصل عشان يقولها انه بتأخر.."

يلست ساره اتحاتي يوم طافت ساعتين و بو هزاع ما ياه الدوام..

اتصلت ع موبايله..جافته مغلق ..فكرت ادق البيت بس خافت لـ هزاع يرد ع التلفون..

اخيرا خطر ع بالهـا اترمس دريول بو هزاع ..اكيــــد هو يعرف .

ساره: الــــــوو.

الدريول: سلامو عليكم.

ساره: عليكم السلام..هلا سيد.

الدريول: منو كلام..

ساره: سيد وين بابا هزاع.

الدريول: بابا هزاع في مستشفى امس فليل يروح ..وايد تعبان..

ساره(خايفه) : ليش شو صار له..؟؟

الدريول:قلب مال هو عور.
ساره: يوم هزاع موجود عنده في البيت كيف بتحمل غلاسته اكيد بيصير فيه شي.

الدريول:شو كلام مدام.؟

ساره: ماشي باي مستشفى ..اوكى باي.

اتريت ساره لي ما خلص الدوام..و بقت لها كم شغله..بس طلبت من محمد مساعدها ان يكمل عنها..

و في السياره اتصلت لامها..

ساره: امايـه انا بتأخر شويه..؟

ام ساره: خير عسى ما شر.

ساره: بو هزاع تعبان شويه بسير اجوفه.و اتطمن عليه في المستشفى.

ام ساره: الله يحفظه لا تتأخرين يمه.

ساره: ان شا الله مع السلامه.

ام ساره: فمان الله..

بعد ربع ساعه وصلت ساره المستشفى..وصلت الدور الثالث...سارت ادور ع رقم غرفة بو هزاع..دقت الباب..
فتحت الباب .شويه شويه..

اتفاجأت يوم جافت الغرفه فاضيه..حست بقلبها ينقبض من الخوف..

طلعت ابسرعه من الحجره..وسارت صوب

الممرضه..تسالها عن بو هزاع..فعرفت انه في العنايـــه و انه تعب الصبح..وايد..

نزلت دموع من عيون ساره ..خافت انها خلاص ما بتجوف بو هزاع..بس الممرضه حضنتها ..و طمنتها انه بيكون بخير ..بس ما يبون حد يرمسه و يبونه يرتاح..


دلتها الممرضه قسم العنايه بالقلب..وسارت هناك..حاولت تدخل بس ما خلوهــا..تمت يالسه ع الكرسي ...الي مجابل الغرفه..

وقفت يوم انفتح باب الغرفه.. وجافت هزاع طالع ..منها..طالعته و يلس يطالعها..

حست ساره ان الحزن امبين في عيونه..يلست تتأمـل ويهه اتمنت انه اتخفف عنه لانها حاسه بشـو داخله لانها مرت بها المرحله ..ايام ما كان ابوهـا تعبان ..بالقلب..

طالعت كدمه زرقه معلمه ع خده مكان ما ضربته البارحه..قالت في خاطرهـا "ول هالدرجه كانت الضربه قويه دواك.."

اجدم منها هـزاع..كانت تتوقع ساره انه بتغير بس ذيل الجلب يتم طول عمره عوي.

هزاع: (يهمس) انتي شو تسوين هني؟؟

ساره: اتطمن ع بو هزاع.

هزاع: منو امرج اتين ترا الوالد مب محتاينج بشيء.

ساره: ادري بس انت ما اتعرف غلاوة بو هزاع عندي.

مد هزاع ايده عشان يمسك ساره من ذراعها ..بس ساره ردت لـورا.

ساره: لا اتحط ايدك علي.

هزاع(يتطنز) خايفه اوصخج..؟

ساره: مافي داعي لها الكلام ..انا ييت اتطمن على بو هزاع و برجع البيت ..فلـو سمحت خلني اجوفه.

نزلت ساره عيونها بلارض مستحيه..يوم يلس هزاع يطالع ويهـا فقالت في قلبها"هـا وقته"

هزاع: اســــــف.. علاقتج بالوالد بالشركه بس ما ابا تتعدى حدودهـا.

ساره: (تترجاه) بس بطالعه ما برمس صدقني.
هزاع: قلتلج اســــف ..و من باجر انا بيي اداوم بالشركه عن ابوي.

ساره: لا انا ما اباك اتكون هناك.

هزاع(يتطنز) لا و الله شو رايج انزين تتنقين منو بيكون المدير ..لي ما يرجع الوالد بالسلامه.

ساره: انا ما اقصــــــد جي.

هزاع: مب مهم رايج ولا قصدج..انا عارف انتي اكثر وحده اتعرف بالشركه..بكل صغيره و كبيره عشان جي ما اقدر افرط فيج..

ساره: انا بقدم استقالتـي.

هزاع: فالج طيب بس مب الحين..باجر بنتلاقى في الشركه..(حط ايده ع خده مكان الكدمه) وهـــاي لها حساب ثاني.

ساره: اتمنــــى انك اتوصل سلامي لابـو هـزاع.

تحركت ساره من غير ما تتريا رد هزاع..دشت سيارتها ..و يلست اتصيح ابصوت عالي..

حست ان الدنيا ضايجه فيهـا مب عارفه كيف تتصرف ..بعد ما بتصير تحت سيطرت هـزاع..اشكثر قاسي هالانسان ..منعها من جوفة بوهـزاع..

ليته ايعرف بو هـزاع شو سوا لهـا ..عشان تحترمه و اقل شي اتسويه هاي الزياره ..الي حرمها من جوفته..

دشت البيت ..ركضت لها فتون حضنتها ساره و شلتها..
فتون: ماما عبادي يقول انا ما حلوه.

ساره(تبتسم) انتي احلى وحده بالعالم.

فتون: احلى منج بعد صح.

ساره: (تضحك) انتي تشبهيني عشان جي حلوه.

فتون: لا انتي مب حلوه بس انا ..

ساره(تبوسها ع خدها) ولا تزعلين انتي بس حلوه.

دشت الصاله..جافت امها يالسه اطالع التلفزيون ..باستها فوق راسها.

ساره: غريبه مب راقده.
ام ساره: بغيتج اتطمنين ع مديرج.

ساره: الحمدلله ابخير.

ام ساره: الله يشفيـــــــه.احط لج الغدا.

ساره: تغديت فـ الدوام.

سارت حجرتها اتغسلت و يلست ع شبريتها اتفكر شو بيصير باجــــر.قالت في خاطرها"يا رب تشفي بو هزاع"

سارت تفتح درجها ادور اوراقهـا عشان اتقدمهـا في أي مكان يناسبهـا..بس لو قدمت ورقه السكرتاريه بتنفعها اكثر..بس لازم المدير يوقع عليهـا..

استبعدت ان هزاع يقدر يساعدهـا..بس يمكن يبا الفكـه منها عشـان عادي بيوقع..اترددت اخيرا قررت تطلب منه ان يوقع ع ورقه يثبت انها اشتغلت هني ثلاث سنوات ..و انها قادره ع انجازات ومهارات وايـد اتسويهـا..

يلست ساره اتفكر غريبه ان هزاع للحين ما تزوج..يمكن عشان دراسته في امريكـا ..بس وايد عرسوا و كملوا برع..

ابتسمت و قالت هـا اصلا منو بياخذه دمه ثجيل وويه لـوووح

**
وفي اليوم الثاني..ساره تتريق ..
ام ساره: ساره قبل لا اتروحين الدوام ..وصل عبادي و حمودي المدرسه سار عنهم الباص.

ساره: جي ناشين من الرقاد متأخرين.

ام ساره: ها حمودي تأخر مدري طالع ع منو كسلان.

ضحك ساره ع شكل عبادي و حمودي ..ساكتين مالهم نفس يرمسون من صباح الله خير..

ساره: يالله قوموا بتأخر عن الدوام بسببكم.منو يسوي لي المصايب غيركم.

ام ساره: (تضحك) يحليلهم حرام عليج سارووه.

طالعت ساره ساعتها .."اويه اول مره بحياتي اتأخر عشر دقايق."

نزلت من سيارتها.. و راحت مكتبهــــا..دشت ..فجافت هزاع واقف عند باب مكتبه..و محمد المساعد مالهـا واقف حذال مكتبهـا يطبع اوراق..

هزاع "يطالع ساعته":تو النـــــــاس..جان تميتي راقده.

حست ساره بالغيض بس ما قدرت اترد عليه لان محمد موجود...طالعت محمد

هزاع: تعالي المكتب ابـاج..؟ "ودش مكتبه"

اجدمت ساره من مكتبهـا و حطت اوراقها الي تبا اتقدمها ع وظايف ثانيه الي بايدها..
محمد: الله يعينج.

ساره: يالله سترك.

دشت مكتب بو هزاع..جافت هزاع يرمس بالتلفون..كانت معاه وحده ..عرفت ساره انه يرمس خلود..اخته و كانت اطمنه ع بوهزاع..

ارتاحت ساره يوم عرفت ان بو هزاع ابخير و انه احسن من البارحه..اتفاجات يوم سمعت هزاع يرمسهـا

هزاع: انتي دوم جي تتأخرين.

ساره:"منزله راسها بالارض" اول مره.

هزاع: متأكده.!!.ليش عشان بو هزاع مب موجود بالمكتب يعني.

مسكت ساره اعصابهـا..ما كانت تبا تتهور باي شي لي ما تضمن وظيفتها الثانيـــــه.

هزاع: (يستفزها) ثاني مره اذا تاخرتي بس دقيقه بتصرف تصرف مابيعيبج.مفهوم اخت ساره.

ساره: (تهمس) مفهوم.

هزاع: ما اسمع..؟؟

ساره: مفـــــــهوم.

هزاع: (يبتسم) الحين روحي ييبي البريد و ملفات البارحه الي ما اشتغلنا عليها.

طلعت ساره...من مكتبها ..يلست تتنفس براحـــــه..و قالت في نفسها "الله يستر من ها اليــــــوم"

ظنت ساره ان هزاع بيلس ينكد عليها طوال اليوم..بس بالعكس كان يشتغل بجد..

حتى ساره نست انه ع خلاف معاه ..و اهتموا بالشغـل اكثر من أي شي ..

كانت اتلاحظ ساره ان هزاع يحاول يمسك عليها أي غلطه ..بس ما لقى أي شيء
يعاتبها او يلومها عليه..

بالعكس حست انه اعجب بشغـلها و قدرتها ع التعامل مع الموظفين الي في الشركه و الي يشغلون في الشركات الثانيه الي يتعاقدون معاها..

قالت في خاطرهـا "يا رب اتم جي ع طول حياتك و انت رايق يا هزاع..""

فكرت ساره و هي يالسه ع مكتبها انه وقت امناسب عشان اتخلي هزاع يوقع ع ورقه تثبت مهارتها كسكرتيره..

دشت مكتبه..جافته واقف عند الدريشه يطالع برع..التفت صوبهـا

هزاع: ما خلصنا من الاوراق بعد.
ساره: خلصنا بس هاي ورقه خاصه فيني.

هزاع(يلس ع مكتبه) : مب فاهم.؟؟!!

ساره:اباك اتوقع ع هاي الورقه تثبت مهارتي كسكرتيره.
هزاع (مستغرب) ليش؟؟

ساره: (مرتبكه) عشان اقدم ع وظيفه بمكان ثاني.
تم هزاع يطالعهـا : عندج اوراقج كلها ..هني.؟

ساره: هـي..
هزاع: ابا اجوفها ممـــــــكن.
ساره: اكيد ثواني بروح ايبها لك.

بعد شويه .
يلس هـزاع يطالع اوراقهـا
هزاع :ما شا الله عندج وايد شهادات وبها العمر.
استانست ساره من داخلها لانها اول مره تسمعه يمدحها من عرفته.

هزاع: ما يفوتج شي تحصلين ع كل شي بسهوله
ساره(مستغربه) شو قصدك.......؟
هزاع : ما في مهــــــم..

فتح درج من الادراج..وحط اوراقها داخــــــــل الدرج و قفل عليه بالمفتاح.

ساره(مستغربه): انت شو اتســـــــوي؟؟!!

هزاع: (يدور بالكرسي) بخلي اوراقج معاي لي ما احس انج صج بتحتاجينهـا بعطيها لج.

ساره: مب ع كيفك عطني اوراقي.

هزاع: ما بعطيج..ما بخليج اتقديمن ع وظيفه ثانيه عشان تهملين شغلج هني لانج ضامنه مكان غير ها المكان.

ساره: (منفعله) ما فكرت بها الطريقه.

هزاع:ما يهمني بشو اتفكرين لانج داهيه..وذكيه..

طالع ساعته..اظني انتهى الدوام..وقف شل شنطه بايده..وسار صوب الباب..

هزاع(يبتسم) نتلاقى ع خير.

كانت ساره بترد عليه بس طلع و صكر الباب ..

ساره اترمس عمرها.."انا الداهيه ولا انت يا الساحـــــــر..غربل الله ابليسك.."

بطلت ساره عيونها يوم سمعت ضحكت هزاع من ورا الباب ..سارت تفتح الباب ..بس طلع قبل لا اجوفها ..خمنت انه كان يسمعها شو اتقول..


يتبع>>

 
 

 

عرض البوم صور زارا   رد مع اقتباس
قديم 25-07-08, 05:21 AM   المشاركة رقم: 5
المعلومات
الكاتب:
اللقب:
ملكة الالماسية


البيانات
التسجيل: Jul 2006
العضوية: 8455
المشاركات: 10,839
الجنس أنثى
معدل التقييم: زارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالقزارا عضو متالق
نقاط التقييم: 2892

االدولة
البلدSaudiArabia
 
مدونتي

 

الإتصالات
الحالة:
زارا غير متواجد حالياً
وسائل الإتصال:

كاتب الموضوع : زارا المنتدى : القصص المكتمله
افتراضي

 

الجزء الخامس..

دشت ساره مكتب بو هزاع بعد ما دقت الباب.

ساره: شي اجتماع الساعه وحده الظهر .
هزاع: امممم ما انروم انجله ..ابا اسير عند الوالد بها الوقت.

ساره: وايد تأجل ..و بو هزاع وايد مهتم باجتماع مع هاي الشركه.

هزاع: وين بيكون .

ساره: في قاعة هلتون..لازم اتكون موجود هناك الساعه وحده بعد الغـدا.

هزاع: يبالنا عشر دقايق لي ما نوصل..عطيني الملف التابع لها الاجتماع..و تزهبي الساعه وحده الا ربع.

سارة و هي طالعه من مكتب بو هزاع.."ان شا الله يباني اروح معاه الاجتماع..لا بوي مستحيل.."

ردت ساره مكتب بو هزاع..

ساره: (جافت هزاع مشغول بالقرايه) لو سمحــت؟

هزاع(يبتسم) امـــــري.

ساره: تقدر تأخذ محمد معاك الاجتماع انا ما اروم اروح.

هزاع: و ليش ان شا الله..؟؟

ساره: عندي شغل ..

هزاع(معاند) الشغل يتأجل مب توج قايله انه الوالد مهتم بها الاجتماع.ولا خلاص يوم بو هزاع مب موجود مب لازم تثبتين مهارتج لي..

ساره: (معصبه) انا مب مثل ما اظن.

هزاع(رجع يطالع الملف) روحي مكتبج و زهبي الاوراق الخاصه بالاجتماع..الساعه وحده الا ربع.

ساره: عطنــــي اوراقي.
هزاع: (مستغرب) أي اوراق..؟؟!!

ساره: اوراقي الي قفلت عليها بالدرج.

هزاع: ما بعطيج بتروحين مكتبج ..ولا اروغج بطريقتي..اظن اتعرفينها.

ساره..بطلت حلجها عشان اتسبه.بس غيرت رايها و طلعت من المكتب.

ويلست ع مكتبهـا مضايجه شو يعني بتيرني من شعري مثلا..حاولت اتركز بشغلها بس ما قدرت..ما تبا اتروح معاه الاجتماع..لو كان بو هزاع عادي مب تهتم..

اتنهدت "متى بترجع يا بو هزاع..الله يردك بالسلامه.."

رن التلفون الخاص بمكتب بو هزاع ..ساره "ها شو يبا الحين"

ساره: نعـم ..

هزاع (يذكرها) باجي عشر دقايق و بتيي الساعه وحده الا ربع.

عضت ساره ع شفايفها الي تحت..عرفت انه يحاول يستزفها كانت تكرهه موت يوم يصير دمه ثجيل..

هزاع: تسمعينـي .

ساره: هي سمعتك..في شي ثاني..؟

هزاع: بناخذ معنا خمس موظفين تعالي خذي اسامهيهم من عندي و خليهم يتزهبون بعد.

ساره(مرتاحه) ان شا الله..الحين بييك.

سارت ساره مكتب بو هزاع و بعد ما خذت الورقه الي فيها اسامي الموظفين..سمعت هزاع يقول..

هزاع: (متسند ع الكرسي):خليهم يسرون بسياره الخاصه بالشركه..بس انتي تعالي معاي بسيارتي.

ساره(معترضه): نعم ..شو قلت؟؟

هزاع: ليش معترضه..مب دوم تركبين مع بو هزاع..و بسيارتج بعد..هالمره بتكون في سيارتي..

ساره: انت غير و بو هزاع غير..

هزاع(يصرخ عليها) الشغل الشغــــــل مب ع كيفج تقررين مع منو و كيف اتروحين.

غمضت ساره عيونها متفاجاه من ردت فعل هزاع..تحركت بتطلع من المكتب ..بس وقفت يوم سمعت هزاع يقولها..

هزاع: بعدني ما خلصت كلامي..

تمت ساره واقفه بمكانها بس مجابله باب المكتب..مب رايمه اطالع ويه هزاع..

هزاع: انا مب يالس ارمس الباب..

صدت ساره صوبه و منزله راسهـا بالارض..كانت تقاوم الدموع الي كانت بتنزل ع خدهـا..

هزاع: ثاني مره اذا قارنتي من بيني و من بين بو هزاع مب برغوج من الشركه بخليج تشتغلين من غير راتب.

ساره ساكته لانها ما تبا اتسمعه صوتها..عشان ما يعرف انها تبا اتصيح..

هزاع: سامعـه ؟؟؟؟
ساره اتهز راسهـا

هزاع:روحي اتصلي بالموظفين ..ماشي وقت .عن نتأخر بس..

طلعت ساره من مكتبها وزقرت محمد وطلبت منه يتصل بالموظفين..سارت الحمام و يلست اتصيح..مب من حقه يتأمر عليها جي..ولا من حقه يصرخ عليها شو يتحرا عمره..

طالعت ساعتها ..جافت باجي خمس دقايق ع الساعه وحده الا ربع..

غسلت ويهها..و مسحت الروج و الكحل ..من عيونها حست شكلها غير..بس ما اهتمت..

طلعت من الحمام..اتفاجات يوم جافت هزاع ..واقف حذال مكتبها..

طنشته و سارت صوب مكتبها و شلت الاوراق بايدها و حطتها بالفايل..كانت اتعرف أن هزاع يراقب حركاتها..

و في السياره تمت ساكته..حتى هزاع ما رمس موليه..

رن موباليه..من كلامه عرفت ساره..ان وحده من خواته اترمسه و تبا يروح المستشفى للوالـد بعد الاجتماع..

دشوا قاعة الاجتماعات..استغربت ..ساره من اسلوب هزاع في الرمسه مع اصحاب الشركه الثانيه..

عمرها ما توقعت يكون عنده اسلوب وكلام محترم..حتى طريقته في الاقناع كانت وايد ممتازه..

قالت ساره في خاطرها"عيل بلاك تعاملني جي..جنك واحد ما اتعرف السنع ولا الادب.."

بعد ساعتين انتهى الاجتماع ..و عند السياره..
ساره: انا بسير ويا باجي الموظفين.

هزاع :-ليش ..؟؟

ساره: انت بتروح المستشفى الحينه..يعني طريجك غير ..عن طريج الشركه.

هزاع: (يفتح باب السياره) اركبي اركبي الوالد يبا يجوفـج..؟

ركبت ساره السياره..الحين عرفت ليش هزاع تم ساكت لانه تضايج يوم عرف ان بو هزاع يبا يجوفهـا..

وصلـوا المستشفى بعد عشر دقايق..

استانست ساره يوم عرفت ان بو هزاع مب في العنايـه.
فتح هزاع باب الحجرة وقفت ساره بمكانها..

هزاع: ليش وقفتي تعالي دشي.

ساره مستغربه من تغير معاملة هزاع لها..من ركبت معاه السياره ما يرمس معاها ..واذا اتكلم..كلمه او كلمتين و كان يرمسهـا بهدوء..

دخلت ساره الغرفه و جافت بو هزاع يتها الصيحه بس يودت عمرها..اجدم هزاع و باس راس ابوه..

هزاع: ها اشحالك الحين احسـن..؟

بو هزاع: الحمدلله ابخير ..تعالي ساره ليش واقفه بعيد..

ساره: اشحالك بو هزاع ..ان شا الله احسن.؟

بوهزاع: بخير يا بنيتي شحال الشغل وياج..عسى هزاع مب متعبنج.

ساره(اطالع هزاع) لا الحمدلله الشغل ماشي اوكي بس ناقصنك.

بوهزاع: (يبتسم) خـلاص يبا الحين وقت راحتي هزاع بمسك الشغل عني..بس لا تخافين وصيته عليج.

ساره( مستغربه) يعنـي ما بجوفك فـ الشركه.

بو هزاع: البركه فـ هزاع بزوركم من وقت لوقت.

ساره: بــــس انــــا....

وقف بها اللحظه هزاع ..

هزاع: يالله يبا بوصل ساره ..وبرجع لك.(يطالع ساره) ترا الدكتور قال ممنوع الكلام.

بو هزاع: كنت ابا اعرف شو سويت في الاجتماع.

هزاع: كل الي بغيته من هاي الشركه سويته لك..و ان شا الله يوم بترجع البيت ..برويك كل الملفات..الحين ارتاح ولا اتفكر الا بصحتك.

ساره: ما اتجوف شر بو هزاع..فمان الله..

بو هزاع: الله يحفظج بنيتي.

و في السياره..استغربت ساره من الطريج الي ساير فيه هزاع غير طريج الشركه.

ساره: (خايفه) وين رايـــــــح.

هزاع: بمر ع مطعم بتغـدى ميت يوع.

ساره: انا ما ابـا اكـل شي .

هزاع: ابرايج تمي طالعيني انا يوعان ..

ساره: انزين وصلني الشركه و بعدين روح أي مطعم تباه.

هزاع(يطالع الشارع) مب تكسي عندج انــــــا..ادريبج ميته يوع بس خايفه مني.

ساره: ما اتخوفني.

هزاع(يبتسم) ترا اليوم الي صار فـ المكتب اكد لي انج موليه ما اتخافين مني.

ساره: انا بحياتي محد صارخ علي لا ابويه الله يرحمه ولا امايه..ولا بو هزاع.

هزاع: عادي اتوعدي ع صراخي..بعيبج.

صدت ساره صوب الدريشه اطالع برع ..كانت اتفكر هالانسان من شو مخلوق ..عفان الله ما يحس ما عنده ذرة احساس..

وصلـوا المطعم ..في البدايه ما رضت ساره تنزل من السياره بس هزاع هددهـا يسحبها غصب..فاشترطت عليه ان تتغدى ع حسابها..بعد ما وافق نزلت من السياره..

يلسوا ع الطاوله في الزاويه..طلعت موبايلهــا اترمس امها..وهزاع يلس يطلب الغـداا.

ساره: امايه..اشحالج الغاليه.

ام ساره: الحمدلله عيال اختج مخبلين فيني.

ساره(تضحك) قوليهم يليسون زين ترا ما باخذهم الالعاب...المهم امايه انا بتأخر دقايق بس.

ام ساره: ليش شو عندج.

ساره: اجتماع في الشركه.

ام ساره: ع خير شحاله بو هزاع.
ساره : الحمدلله ابخير توني مريت عليه .

ام ساره: انزين عيل الله يحفظج.
ساره: ويحفظج الغاليه.

هزاع يالس يسمع كل كلمه اتقولها ساره...وبمجرد ما صكرت ساره التلفون.

هزاع: امج اتعرف انج امخططه اتقردنين بوهزاع.
ساره: (من بين اسنانه) احترم نفسك ..ترا و الله الشارع متروس تكاسي.

هزاع: ليش معصبه استغربت انها سالت عن الوالد.
ساره: فيهـا الخير و بو هزاع يستاهل كل الناس اتحبه.مب..

هزاع(مقاطعنها) مليون مره قلتلج لا اتقارنيني في الوالد انتي ما تفهمين.؟

ساره: عيل ثمن كلامك
هزاع (مغير الموضوع) منو ها اليهال الي عندج...؟

ساره: عيال اختي.
هزاع: الظاهر وايد متعلقين فيج..كل مكان اجوفج فيه لازم يكونون معاج..وين امهم.

ساره : (منزله عيونها) متوفيه.
هزاع( متفاجأ ) الله يرحمها.

وصل الاكل و يلسوا ياكلون في البدايه كانت ساره مستحيه ..بس بعدين طنشت..ويلست تأكل..

هزاع: اتعرفين ان شكلج وايد حـلو من غير مكياج.
ساره: اونـه

هزاع: و الله احسج انسانه غير بدون مكياج لا اتحطين مكياج مره ثانيه.

ساره: نزل قرار و ما بحط .

هزاع: تطنزين...
ساره: لا اســـــولف.
هزاع(يضحك) ابا اسوي فيج شي بس مب الحين.

ساره(وقفت عن الاكل):- شو بتفنشني.

هزاع: لاو ين راح فكـــــرج..
ساره: عيل شـو؟؟
هزاع: مب الحين بعدين.

ساره في قلبها "يا حلاتك و انت رايــــق "
هزاع: "رافع حواجبه" ليش اطالعيني جي..؟؟

ساره (نزلت راسها ) لا ماشـــــي..؟؟

هزاع: كم عندها عيال اختج..؟؟
ساره(مستغربه من سؤاله) عبادي و حمود توم و فتون..

هزاع: وين ابوهم..؟؟

ساره: اتوفى بحادث بسيارته و اختي كانت معاه.

هزاع: هاا عشان جي هم الحين عندكم.

ساره: هي ترا ابوهم ما كان يشتغل ..و انا ابوي متوفي ..و راتب الشؤن مال امايه ما يكفينـا..عشان جي انا الحين اشتغل ..واخاف باي وقت اتروغني..جوف لو رغتني بتقطع رزقي ..ورزق ايتام..تحمل ..ترا.

هزاع: (باين عليه متأثر) اتعرفين ما توقعت ان بكون ها السبب الي يخليج متعلقه في الشغل.

ساره(تتنهد) انا الضحيـــــه لازم اعيل عايلتي امايه حرمه عوده ما اتروم ع الشغل.

سكت هزاع يفكر شويه..انتبهت ساره انها اتكلمت وايد ..و ما كان لازم تحكي كل شي لـ هزاع..

بس جافت انها ما غلطت عشان ما يفكر يروغها ..

هزاع: انتي صج ضحيه..

ساره (تبتسم) لا تشفق على حالي.

هزاع: لا طبعـا الوحيد الي يستاهل اني اشفق عليه..هو الوالد الضحيه الثانيـه.

وقفت ساره محرجه من كلام هزاع..شلت شنطتها و طلعت برع المطعم..

وقفت ع الشارع ادور تكسي..دقايق وسمعت صوت هزاع من وراها.

هزاع: (يأمرها) تعالي اركبي السياره..

ساره (اطالعه) ما بركب بسير بتكسي.

هزاع: ابروحج..؟؟
ساره: هي التكسي غريب عني و انت بعد غريب..

هزاع: "يطالع يمين و يسار" انزين اركبي و بعدين كملي رمستج.

ساره(اتروح بعيد عنه) قلتلك ما بركب و بخلي بوهزاع يجوف حل معاك ..

هزاع:-"ابرود اعصاب" ترا بشلج و الله.

ساره: تتحرا عمرك يالس بامريكـا.
هزاع: يبتسم "عـادي عندي لكن الرمسه بتييج انتي.؟

ساره(منفعله) يا برودة اعصابك.
هزاع: بعد للعشره اذا ما ركبتي السياره بشلج و الله.

بدا هزاع يعد..ساره اطالعه ها من صجه ولا يسولف..
سارت صوب السياره ..وركبت..

ركب هزاع السياره..فتح السده وطلع زقاير ..استغربت ساره اول مره اتجوف هزاع يشرب زقاير..

طول الطريج يلس يشرب زقاير ..من غير ما يتكلم..وساره كانت الافكار تاخذها و اتيبهـا..شو ها الانسان الغريب..

اول مره اتجوف واحد يشرب زقاير ويكون بارد في مواقف حرجه..

وقف هزاع سيارته جريب من سياره ساره.
هزاع: خلي الفايل فـ السياره..

كانت ساره بتنزل من السياره بس التفتت صوب هزاع يوم قال
اياني و اياج ترمسين حذال الوالد بشي يضايجه.

ساره: وبعد تبا شي..؟؟

هزاع(يطالع شنطتها) طلعي موبايلج.
ساره مستغربه ..

هزاع: طلعيه شويه بس.حتى مفتاح سيارتج ابا اجوف شكله..

طلعت ساره موبايلها و مفتاح سيارتها..اتروعت يوم هزاع يير شنطتها.

سارهLمستغربه) شو اتسوي..؟؟

هزاع: يالله روحي سيارتج.

ساره: وشنطتي.

هزاع: من ساعه في المطعم قلت لج ابا اسوي لج شي و سويته..

ساره: شو بلاك انت صاحي.

هزاع: لا تخبلت يوم يتني كفخه بهاي الشنطه ع خدي.

الحين ساره فهمت كل شي قصده ينتقم منها..
ساره: شنطتي فيها اشياء مهمه.

هزاع: وقت ما ابا بردها لج يالله انزلي من السياره ولا بتحرك باخذج معاي البيت.

ساره(نازله من السياره) انت ميــــــنون..

وصكرت باب السياره بقـوه..

**

 
 

 

عرض البوم صور زارا   رد مع اقتباس
إضافة رد

مواقع النشر (المفضلة)

الكلمات الدلالية (Tags)
للكاتبه معاني, ما تسوى, ليلاس, أغاني, القسم العام للقصص و الروايات, حياتي دونج, روايه مميزة, روايه ما نسوى حياتي دونج كاملة, روايه خليجيه إماراتيه, قصه اماراتيه كاملة, قصه كاملة
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 12:36 PM.


 



Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية