كاتب الموضوع :
فاطمه المصون
المنتدى :
القصص المكتمله
// الجزء السادس //
بعدهااا بربع ساعه .. جنان قاعده تقرأ قرآن و لا تسمع صوت بندر يتنحنح _ أحم أحم .
جنان من الربكه أحذفت ملفعها عليها و ألبست نقابها و قلبهااا يطق طبووول ..
جنان بصوت خايف _ أدخل
دخل بندر و بيده بوكيه ورد وجنان عيونها بالباب تنطر أحد يدخل وراه بس ما في أحد دخل .. ألتفتت عليه شافته يبتسم و هو يجلس ..
بندر بهدوء _ السلام عليج
لا بأس طهور إن شاء الله بنت العم .. و خطاج السوو ..
جنان و راسها بغى ينكسر من كثر ما مدنقه _ وعليك السلام ..
و خطاك اللاش ...
بندر حط البوكيه على الطاوله و قعد بالكرسي الي قريب للسرير ..
بندر قعد نص دقيقه و هو ساكت مايدري شيقول ..
أما جنان قلبها بيطلع من مكانه و نفسهااا زاد ... قعدت تلعب بأصابعهااا . متوتره من وجوده معها بنفس المكان و بروحهم و من قربه لهااا و مستغربه من زيارته لها .. و ليش زايرني بروحه ؟! و ين أهلي ؟ و الساعه توها ما دشت الثلاث .. ؟ و أحنا سلمنا ما يسمح انه يشوفني أو يزوري قبل العرس .
و يا عمري يا بندر جايب بوكيه !!
وقاعد قريب مني .. يا ويلي لو أحد دش من أهلي بيذبحوني .. ما قول إلا الله يخليك و يحفظك يا بندر .. تعبتك حيل معاي .. يا فشلتي باقي عالعرس شهر و العروس منومه بالمستشفى و لا المعرس هو الي مدخلهااا المستشفى ..
قطع تفكير جنان صوت بندر الجهوري ..
بندر مركز على عيونهااا _ جنان جنان جنان ..
جنان بإنحراج _ هلااا . أمم نعم
بندر بإستفهام _ عسى ما شر اكلمج و انتي كلش مو معاي !
جنان و نزلت راسها _ آسفه ما سمعتك .. شبغيت ؟
بندر و يطالع الدريشه و يرد يطالع جنان _ هاذي أول مره يعورج جنبج اليمين ؟!
جنان بتردد _ لااااا قبلها بأسابيع كنت أحس بعوار بس كان خفيف مو نفس اليوم ..
بندر بصبر _ الله يهداج ما تدرين ان الدوده إذا أهملناها تتطور حالتها و بعدين تنفجر في جسم الانسان !!
جنان حست من نبره صوته انه بهاوشها بس تماسك نفسه و ردت لوضعها الأول _ آسفه ماكان عندي خلفية عن هالشي ..
بندر قعد يطالعها و هي مدنقه راسها بعدين قال
_ الحمد لله لحقنا عليج و لا الله العالم شبيكون مصيرج ؟!
ثم سكت ثواني .. شافها متوتره من طقطقت اصابعها .. و رجفة يدهااا .. مو بس أنتي يا جنان المتوتره هم انا أعصابي مشدوده .. و نفسي زاد على المعدل الطبيعي .. قلت خل أقطع هالجو المتوتر .. سألتهااا بهمس _ شخبارج بعد العملية ؟!تحسين بآلام فمكان الخياط ؟!
جنان حست بأنفاس بندر على خدها الأيمن من كثر ما هو متوتر .. جنان أرفعت راسها لبندر وشافته يطالعها وجهه أحمر و ملامحه مرتبكه و على طول رفع نظره للسقف ..
جنان بحيااا _ عوار خفيف ..
بندر و عيونه عالسقف _ الحمدلله على كل حال ..و نزل نظهره لساعته شافها 2:55 ظهرااااا
بندر و هو بيقوم ولا جنان ترفع راسها له ..
جنان بهدوء _ بندر ..
بندر وهو واقف ويضبط شماغه _ هلااااا ..
جنان بحرج _ امي و ابوي ليش ما جووو ؟!
بندر ابتسم لهااا _ أصلااا انا الي جاي أمبجر ..
جنان بحيااا نزلت راسها و لا بندر يكمل _ السالفه و مافيها ان واحد من الربع منوم اهنيه وانا جاي ازوره فقلت مره وحده أزورج و لا الأهل بيجون شوي إن شاء الله بس ها الله الله بالصحه ديري بالج على نفسج و انا أخوو ....
سكت بندر و وجه أختبص بغى يزل لسانه و يخربط خلاص يا بندر هاذي زوجتك مو أختك .. و حاول تتأقلم مع هالوضع بس ما أقدر ما أقدر .. يبيلي وقت !
بندر _ ياالله تامريني على شي ؟!
جنان حست بألم و حسره للحين يا بندر ما تكن لي مشاعر حب أو موده غير مشاعر الأخوة .. لهدرجه زواجنا مابقاله غير شهر واحد و نكون مع بعض و ما تغيرت ..قالت بجديه_ ما يامر عليك عدوو بس لحظه بندر أبسألك سؤال ؟
بندر بقلبه _ من ألحين بدينااا بالسين و الجيم
و ابتسم لهااا _ سمي ..
جنان _ سم الله عدوك ... الغرفه هاذي منو الي حاجزهاا لي ؟!
بندر _ انا الي حاجزهااا ليش ؟!
جنان ماتدري تلطم ولا تصرخ و لا تبجي ما تدري شتسوي من الفشيله شايلني للمستشفى و هم بعد دافع فلوس الغرفه .. وين أبوي و محمد عن هالشي .
جنان بحرج _ اسمحلي عن الأزعاج بندر و ادري تعبتك معاي و إن شاء الله فلوسك الوالد بيردها لك و انا ...
قاطعهاا بندر بتهور _ شهالحجي هذا.. شنو ازعاج شنو فلوس ..؟! مدام انتي في ذمتي فأنا ولي أمرج مو أبوج و لا أخوج و لا أمج ..!
جنان انقهرت من أسلوبه في الرد مهما كان ما يرد علي بهالطريقه شنو شايفني جارية عنده ..
فقالت بصوت مرتجف _ لا مو ولي أمري ...
اذا عشت تحت سقفك ذيك الساعه أصرف علي بس مدامني تحت ولاية ابوي أعذرني ما ....
بندر هاذي ماتفهم و يقاطعهااا بهمس ووجهه بوجه جنان الي ردت لي ورى من شكله المعصب _ أنتي ما تفهمين انا ألحين زوجج رجالج وهذا واجبي فاهمه .
لف عنهاا بسرعه و طلع من الغرفه .....
جنان حاولت تسيطر على تنفسها السريع و على رجفه يديها .. بس ما قدرت نار شابه في صدرها .. وماراح تقدر تطفيهااا إلا .. و بتهور منها أخذت كرتون الكلينكس الي جنبها و أحذفته ناحية الباب و قالت بقهر و دمعه أنزلت من عينها
_ حقيييييير يا بندر و بتم حقير ..
و فصخت نقابها و ملفعها و لا خياط العملية يعورها حطت يدها بمكان الخياط ..و قعدت تئن من الألم ..
:: بندر ::
والله هالشوارب و الطول و العرض على شنو ! إذا ما صرفت على زوجتي أصرف على منوو .. اقهرتني هي و تفكيرها السخيف آخ كان ودي أعطيهاا الطراق الي يصحصحهااا من فكرها ..
طلعت من عندهاا و الضغط أرتفع عندي بس الي شفته و سمعته كان أكبر من جذي .. علبه كلينكس تنحذف علي .. انا بندر الي ينحذف علي كلينكس و انوصف بالحقييير انا انا .. انا الي عبير لي صرخت عليها تنطرم .. الرياجيل لا شافوني يحترموني و يهابوني لا حضرت عندهم ... تحذف علي مره علبه !!
ضغطت على شفاتي السفلى خلاص شكلي بأطينهاا و بأمسكها من رقبتها و أرفعهااا و أخنقها لي تقول بس ... الظاهر زيارتي لها كانت غلط بغلط و لا بالطقاق إلي يطقها أهم شي أوصلها للمستشفى تقعد بغرفه خاصه و لا عامه بلعنة الي تلعنهاااا .. انا لازم أوقفها عند حدهاا .. أنحنيت جسمي عشان أخذ العلبه و مسكتها .. دخلت عليها و الشرر بعيوني أحس كأنهاا تقول انت شنووو و لا شي ؟! أحس كأنها أطعنت رجولتي وما تشوفني رجال قدامهاااا ..
انا تحذف علي علبه . !!
شفتهااا بدون ملفع و نقاب .. و يدها على جرحهااا بس ما شفعني منظرها عن تهديدي لها .. وحذفت العلبه بإتجاه الطاوله الي صدر صوت مزعج و طاحت العلبه تحت الطاوله و انا أقول لها _ و الله و الله و الله ياجنان هالشوارب ( ومسك شاربه ) ما تطلع على رجال إن ما ربيتج يا .... !!
و طلعت من عندها و انا ما أشوف شي . الغضب أعماني و باليا الله وصلت لسيارتي و حركت لبيت عمي عشان أخذ خالتي تزور بنتها المصون ..
بالطريق وانا متوتر حدي يالله يا بندر هذي أول الغيث يا حبيبي أجل لي جبتها عندك شبتسوي لك .. يمكن تمد يدهااا مو بعيده عليها قايل انها والله مو بهينه لكن مو على بندر إن ما قطعت لها يدها قبل لا تطول ما كون بو عذبي !! قطع توعدي و تهديدي صوت مسج تلفون أخذت جهازي بشوف و لا مافي مسج جديد .. غريبه أجل من وين هالصوت ؟! كملت طريقي لبيت عمي و لا جهازي يرن بس هاذي النغمة مو نغمة جهازي .. ولييييي شسالفه ..؟! تفحصت مكان المقعد الي جنبي مالقيت شي بس صوت النغمه كان وراي بالضبط طالعت وراي ولا جنطه و كتب .. اووووو طقيت جبهتي هاذول أغراض جنان .. أوف نسيت لاعطيها عبير ترده لهااا . خلاص ما في غير أوصلها لخالتي ..
اسرعت شوي بالسرعه .. عشان أوصلهم أمبجر ..
// بيت بو محمد //
ام محمد و سارا و بدور جاهزات ينطرن بندر .. لأنه واعد خالته يوديها لجنان .. أما بو محمد و محمد مقيلييين لي صلاة العصر و بعد الصلاة بطريقهم يروحون لجنان ..
سارا _ يمه مو جن بندر تأخر علينااا .!
أم محمد و شايله عبايتها بإيدها _ لا ما تأخر بس أنتي الي لابسه بدري ...
و ألتفتت على بدور _ جهزتي القهوة ..
بدور و بتروح للمطبخ _ ايه يا خاله و ألحين بجيب سله القهوة و الدلوووعه هاذي ( تأشر على سارا ) تجيب الحلا في الثلاجه ..
سارا و تخصر _ ياااااا سلاااااااام و انا يعني لازم لازم لازم أشيل بيدي شي كل ما طلعت من هالبيت ..
ام محمد بقهر _ اجل أنطقي في البييييت ..
سارا _ يمااااااااااا
ام محمد _ يا تشيلين يا تنطقين !
سارا و تخز بدور و تجر رجولها جر للمطبخ ..
بعد خمس دقايق ولا بندر واصل لبيت عمه دق هرنات ( بوري )
قالت أم محمد لسارا _ يمه سارا شوفي هذا بندر ؟
سارا و تروح للباب الخارجي و طلت ولا بندر قاعد في السياره .
سارا بصوت عالي _ يما .. بدور يلى تعالوووا بندر برى ..
:: بندر ::
حسبي الله و نعم الوكيل على هاللسان الطويل و هالصوت الي يلالع وواصل للحدود .. والله انهن بلاء على عمي .. أقوم أكفخهاا ألحين .. حسافه لو أنهن مو خوات جان ملجت عليهن ولعنة خيرهن الخير ...
( يشوف سارا و هي تمشي شوي شوي ) هاذي وين عنها محمد جان سنعهاا عالمشية الماصخه .. ما قدرت استحمل أكثر من جذي .. هذيج تحذف علبه كلينكس و هاذي تتمخطر بمشيتهااا ..
صج قله تربية و قله توعية ... نزلت من السياره و انا ضاغط على أسناني من القهررر .. و مشيت صوبهااا أبي أربكهاا عشان تمشي مثل الأوادم و يوم وقفت جنبهاا شفتهااا أطالعني بأستفهااام صراحه حسيت راسي بينفجر من صباح الله خير و انا بالمستشفى و بعدها رحت للدوام خلصت شغلي عالسريع عشان أزور رفيجي و منهااا أشوف جنان و أتحمدلهااا و ألحين أطق مشوار و أرد بعد للمستشفى .. آه ياراسي خلاص ما أقدر استحمل و جزاي علبه كلينكس . و ألحين جا دور سويره طنشتهاا لأني ما أبي أنزل عقلي لهالأشكال و بعد ما أي أزعل خالتي .. بعدها رحت صوب خالتي و مرت ولدهاا ..
وحبيت راس خالتي _ يا هلا بأم محمد .. شلونج يا خاله ؟
ام محمد _ بخير يا بندر .. انتو شخباركم كلكم ؟ عساكم بخير .. ؟
بندر _ الحمدلله ما نشكي باس .. (وألتفت لبدور )
شلونج يام عمر ؟ و شخبار الشيوخ ؟!
بدور بحرج _ تمام يا بندر و الشيوخ بخير ..
بندر و يده بالمخبا _ الحمدلله يلى مشيناااا ..
رحنا صوب السيارة شفت سويره قاعده حمدت الله زين فيها خير .. ركبنا و سألت بدور _ أقول ام عمر ما بيجون الشيوخ يزورون عمتهم ..؟
بدور و قاعده ورى مع سارا _ لا ما نستيفد منهم غير وجع الراس و جنان تعبانه تبي الهدوء و الراحه ...
أم محمد _ ايه والله خلهم يلعبون و يستانسون احسنلهم من روحه المستشفيات ..
بندر و تذكر أغراض جنان _ خاله هاذي الجنطه و الكتب حقت جنان ... نسيتهم هنيه بعد ما دخلناها المستشفى ولا عطيتهم عبير ..
ام محمد _ يعطيك العافية يا بندر و الله ماقصرت و سامحناا ..
بندر _ شدعوة يا خاله .. لا تعب ولا شي .
ام محمد _ بتسلم يا وليدي . اقول أمك بتزور جنان اليوم و لا لأ ؟!
بندر _ امبلى بتزورها و يمكن أهم بالطريق ألحين و تهقين يا خاله عبير بتصبر لباجر؟
الكل أضحكواا على عبير ..
أم محمد _ يا حبي لهاالبنت .. حبيبه والله ..
سارا و تدخل _ سبحان الله الله خلق و فرق .. ( نغزه على بندر)
تفشلت امها و بدور من طولة لسانهااا ..
أما بندر حب يقهرها _ساااراااا ..
سارا بدلع _ نااااااااعم ..
بندر يهز راسه للأسفل كأنه يسأل _ تهقين تهقين تهقين لو أنتي مكان جنان اليوم هل راح أوديج المستشفى ؟!
الكل مات ضحك على شكل سارا و هي معصبه .. !
سارا بقهر_ الله لا يحوجني لك .
أم محمد متفشله من بنتها _ أعذرني يا وليدي سارا عقلهاا صغير و لا تاخذ بكلامهااا ..
بندر استحى من خالته _ محشومه يا الغالية وسارا مثل أختي عبير .. إذا ماتحملت خواتي منو بيتحملهن ؟!
ام محمد _ الله يحفظك ..
&&&&&&&&&&&&&&&
// بيت بو بندر //
عبير لابسه امبجر . من فرحتهاا لجنان .. الأرض مو سايعتها تحس تبي تطير و تغني .. كلها عشر دقايق و تشوفهاا .. جنان بالنسبه لها مو بنت عم لا.. و لا خوات لا .. بينهم شي كبير . كبير مثل أزدواج روحيين ببعض ... و صار جسد واحد .. جنان بالنسبه لها توأم روحهااا .. قعدت تنادي فاطمه و هي واقفه عالدرج _ فاطمة يلى ننطرج بالسيارة ...
و مشت بتطلع برى البيت و لا تشوف حور مع الخدامه تلعب غميضه .. اسرعت بمشيتها و حبت حور على خدها بقوة لي قالت حووور _ آي عولتيني يادبه ..
تركتهاا و هي تشوف الخدامه المسكينة تدور على حووور ..
عبير _ الله يعينكم يا هالخدم .. وين تلاقونهاا غسيل ولا تنظيف ولا طباخ و لا لعب ...!
ما أقول إلا الحمدلله على كل حال ..
ولا هاذي فاطمة واقفه جنبي ..و تناديني ..
عبير بخرعه _ بسم الله من وين طلعتي ؟!
فاطمه _ من القبر بعد من وين! من هالباب ( تأشر على باب الصاله)
عبير _ زين جان سلمتي مو تخرعيني ..
فاطمه _ كاج سلامة قلبج مافيج شي ..
عبير وتمسك يد فاطمه _ أقوول أمشي خل نطلع نقعنى امي برى و أكيد واقفه مو قاعده داخل السياره ...
طلعنا برى البيت .. و طالعنا ببعض و انفجرا ضحك على شكل أمي و هي معصبه و مثل ما توقعت امي واقفه عند السياره لا يمكن تقعد مع الدريول بروحهاااا ..
عبير و فاطمه _ السلام عليكم
ام بندر بعصبية _ وعليجن السلام .. كل هذا لبس و هذا وحنا بروح للمستشفى مير لو بنروح لعرس شبتسون . ؟
و قعدواا ورى جان تقول فاطمه _ الله يصلحج يا خاله جان قعدتي بالسياره أحسنلج من الوقفه ..
ام بندر _ وآكل أثم عادي عندج !
فاطمة توهقت كلش ولا خالتها تعصب _ لا العذر منج يا خاله ما أقصد جذي بس رجولج تعورج إذا طولتي وانتي واقفه .. و لا جان خليتي الدريول يطلع من السيارة ويوقف عندهااا ..
ام بندر _ و هو ما يرتاااح يمج تراهم بشر يا فاطمه ماهم حيوانات بس ينكرفوون ولا يرتاحون ..
عبير و تصفق عالخفيف _ عااااشت ام بندر .. أقول أم بندر ممكن رقمج طالبينج منظمه حقوق العمال ...
ام بندر وتطق عبير عالخفيف _ أحشميني يا بنت ..
عبير و تحب راس أمهاا _ محشومه يا الغالية .. ايه تذكرت حديث للنبي صلى الله عليه وسلم عن الإحسان للخدم أسمعي يا ام حووور و طبقي هالوصية النبوية عن إمام البشرية .. علية الصلاة و السلام
فاطمه بحرج _ صلى الله عليه و سلم ..
عبير _ قال نبي الهدى صلى الله عليه وسلم (( أخوانكم خولكم . ملككم الله رقابهم . فأطعموهم مما تأكلون . و اكسوهم مما تلبسون . فلا تكلفوهم من العمل مالا يطيقون . فإن كلفتموهم فأعينوهم )) ..
فاطمه _ الله يجزاج خير يا عبير وانا والله ماقصد اني محتقرتهم و أذلهم ذل .. بس مثل ما ياخذ راتب شهري لازم يشتغل .. و يتحمل الشغل . وهاذي سمية (خدامتها ) والله اني مريحتها ماعندها غير حور و تنظيف و غسيل و شقتي تعرفيها مو من كبرهاا على قدنا انا و جاسم .. وشايلين يدها من الطباخ .. ونسأل الله ان يغفرلنا و يرحمنا.
أم بندر _ انا أشهد .. و الله اني بعض الاحيان أقسي على خدامتي .. و اعصب عليهااا .. وبني آدم خطاء .. و نسأل الله ان يتوب علينا ..
عبير _ آمين .. يلى قربناااا باقي بس هالدوار و نوصل لجنوووو
فاطمه تستعبط _ تحبييينهاااا ؟!
عبير _ أحبها إلا أمووت فيهااااا لو تقولي قطي نفسج بالبحر أقط نفسي عشان أتسبح خخخخ 2 في 1 ..
فاطمه_ سخيييفه ..
ام بندر بصوت مرتفع شوي _ بس يا بنات أكبرن أكبرن حريم أطول مني و هاذي سوالفجن !
استحت فاطمه و اسكتت اما عبير ولا جنه امها نقدتهن على اعمارهن قالت _ يمااا نلعب .. ! و شافت محل ورد .. و قالت للدريول _ لحظه لحظه أوقف عند هالمحل .. بشتري ورد لأهل الورد ..
أضحكت فاطمه وقالت _ الله يخليكم لبعض ..
ام بندر _ يلى بسرعه مو تطولين و تنقعيناااا مالي خلق !
ضحكت عبير من سمعت طاري التنقيعه _ وانا أشوف بندر طالع على منوووو أثاريه طالع عليج
أم بندر _ انزلي انزلي بدال التفلسف الفاضي ..
:: جےــــــــنــــــــان ::
(( و الله و الله والله ياجنان هالشوارب ما تطلع على رجال إن ما ربيتج يا .... ))
قعدت تحسس الخياط و هي تبجي مو مستوعبه الموقف ..يمكن حلم يمكن كابوس إيه أكيد كابوس و لا في أحد يقولي هالتهديد !!
بس آثار الكابوس موجوده .. البوكيه و الكلينكس المحذوف تحت الطاوله .. غمضت عيونهاا بقوة ماتبي تشوف نظرة غضب بندر أو تستعيدهااا ..لكن شلون و أغلب ساعات اليوم ما شافت غير وجهه .. هزت راسهااا بخوف يمين و يسار .. جنان قعدت تنافض مثل الريشه .. و صارت توسوس يمكن يدخل عليها فهاللحظه و يكفر فيهاااا .. و منو الي بيفكها منه .. امها . ابوها . محمد .!!! نظره بندر مسيطرة على تفكيرها .. كأنه ينعاد عليها أحداث التصادم الي صار بينهم.. حاولت تبعده لكنها ما قدرت .... جنان مع تنافضهاا و بدون وعي منهاا كانت تضغط على الجرح ... هذا أول الدرب يا جنان شلون تاليه .. نزلت دموع جنان بحرقه و قهر وضغطت على الجرح بزياده لي عورت نفسهاااا ..
جنان بصوت مقطع من البجي _ و الله ما خذه و الله ما خذه ... و قامت ببطء .. و بإنكسار جريح .. و هي تصيح _ والله ما خذه ..لو على جثتي .! مشت عالخفيف لي وصلت لطاوله الي يحطون الورد فيها و بجهد ضعيف حذفت البوكيه .. و
تطاير الورد في الغرفه و تناثر على الأرض ...
بعدهااا أتكأت جنان بيدهاا على الطاوله و أجهشت بالبكاء .
كرهت حظهااا و كرهت مرضها الي وصلهاا لهالحاله .. ما كانت تدري انها بتوصل لهاالمواصيل ولا خطر على بالهاا انها بتصادم مع بندر .. ضاق عليها تنفسهااا و صارت الرؤيه عندها ضبابيه من تجمع الدموووع ..
دخلت عليها سارا و هي تمشي بسرعه و تتكلم بصوت عالي _
أشتقتلج ياااا ...
و ركضت لجنان الي متكية عالطاوله و شالت يدهاا عالخفيف _ أسم الله عليج جنوو ليش واقفه شفيج تبجين تعالي تعالي ..
جنان ما تحملت و يدها على خصرهاااا فحظنت سارا بقوة كأنها تبي تحتمي بهاا ..
سارا بخوف من شكل الغرفه الي كلها ورد محذوف على الأرض و تشوف أختها تبجي ..
قالت _ جنان حبيبتي تعالي أول عالسرير ..
جنان قعدت تبجي و تشاهق ..
و متشبثه بسارااا .. ماتبي تفكهااا ولا تتركهاا تخاف يجي بندر و يسحبها من حضن سارا ..
سارا ما تحملت منظر أختها فطوقت أختها . و قعدت تهديهاا و لا أم محمد و بدور داشين عليهم . شافوا المنظر و صوت جنان و هي تبجي .. ركضت ام محمد لهااا
و تقول _ يمه جنان ... و ألتفتت لسارا _ روحي نادي الممرضات
حاولت سارا تفك نفسها من يدين جنان إلا يد جنان ضاغطه عليها .. أشرت لأمهااا على يد جنان و فهمت عليهااا .. مدت ام محمد يدهاا ليد جنان الي ماسكه كتوف سارا بقوة .. وقعدت تفككهم عن بعض .. لقت قبول من جنان .. وخرت سارا عن أختها بشويش و بسرعه مسحت دمعه نزلت من عيونهااا دمعه حسره دمعه أسى على حال أختهاا الي في ليله و ضحاهاا روحهاااا توشك على الهلاك .. تشوفهاا في زواجهاا الي رافضته و لا في صحتهااا التعبانه .. وجههاا المصفر مو وجهه جنان الطفولي الملائكي.
جسمهااا ذبل كأنه ورده ذبلانه بحاجه من يسقيهاااا .. عيونهااا الي تشكي بدون نطق ...!!
راحت تنادي النيرس عشان تشخص على حالة جنان ...
سحبت ام محمد جنان و حاولت تقعدها على السرير على ما تجي الممرضه .. و قعدتها بحذر و راس جنان على صدر امهااا ..جنان قعدت تشم ريحه الحنان ريحه الأمان .. وامهااا صارت تقرأ عليهاا قرآن لي حست بهدوء بنتهااا و وقوفها عن البجي .. فمسحت على شعرهاااا ..
ام محمد بهمس _ أسأل الله العظيم رب العرش العظيم أن يشفيك .. ( سبع مرات تقال للمريض )
و شافت الورود الحمرا و الصفرا كاسيه الغرفه .. وكرت طايح على الأرض ..ألتفتت لبدور .. و قالت بهمس عشان ما تضايق جنان _ بدور ..
بدور الي انصدمت من الي قاعده تشوفه .. مو معقوله هاذي جنان بنت خالتي .. سبحان الله صج المرض يغير خلقة بني آدم .اسمعت خالتهاا تناديهاا .. قالت _ نعم خاله ..
ام محمد و تأشر بعيونها على الكرت المقطوط بالأرض _ شوفي من منووو هالكرت ؟!
بدور راحت صوب الكرت .. شالته وقرأت شمكتوب فيه ..
ام محمد _ من منوو ؟!!
بدور _ مو مكتوب الاسم بس الي مكتوب فيه " لا بأس طهور إن شاء الله ..."
أم محمد هزت راسها بأسى على حال بنتهااا ..
دخلت عليهم الممرضه "هندية" مع سارااا الي تركض ..
الممرضه و هي معصبه _ هازا ليش قاعد هنااا .؟
بدور والاستغراب على ملامح وجهها _ مايعرف . يجي انا يشوف هذا واقف ..
الممرضه و متجهه لجنان _ هازا مجنوون خياااط للحين مايصير زين سلون يمسي !!
جنان ودها تصرخ و اطلع قهرها و حقدها على الممرضه .. بس مالها خلق .. تبي الفراش تبي الراحه تبي حظن أمهااا تبي تنسى بندر و طوايف بندر ..
وخرت ام محمد عن جنان بهدوء .. و تقول لهاا بحنان _ يمه جنان لاتعورين قلبي و تقومين من سريرج ..
جنان هزت راسها بطاعه و جات الممرضه تساعدها بالصعود .. و لحفت جنان بعناية
بعد ما أرتاحت جنان و حست بالراحه و كأنه هم و أنزاح و الآلام خفت شوي عليهاا .. أمسكت يد أمهاا و حبتهاا و ادمعت عينها ..
جنان وبحه صوتها _ سامحيني يماااا
أم محمد قربت وجهها بوجهه بنتها و حبت جبهتها _ مسامحتج يايمه بس لا تعودينها ...
جنان بإبتسامه عذبه _ إن شاء الله ..
سبحان الله مهما واجه الإنسان ظروف و منح سيئه مدام الحظن الدافي و القلب الحنون موجود بينسى الإنسان نار الدنيا و لهيبهااا ..
دشواا عمال النظافه ينظفون الغرفه من الورد المنثور ..
و طلعوا مع الممرضه الهندية وهي تتحرطم من جناااان ..
ساراا حبت تلطف الجوو و تغيره _ أقول جنكم قلبتوها فيلم هندي .. ؟!
جنان بتعب تقولهااا _ محتراااا
سارااا و سوت نفسها معصبه _ هاا أشوف التقليد ما قريتي جملة دايما نقراها تقول حقوق الطبع محفوظه .. ؟!
بدور تكلمت بسرعه _ ياختي أتركي عنج الفتنة و قومي سلمي على أختج على طوول أخذتيها بهوشه ..
راحت بدور لجنان تسلم عليها _ حمدلله على السلامه و ماتشوفين شر ..
جنان تبتسم _ الله يسلمج و الشر ما يجيج ..
و طالعت بساراا بنظره أخويه _ وأنتي ما تبين تسلمين على !!
سارا أخنقتهااا العبرة من تفكير أختها السيئ عنهااا انا لو فكرت بس تفكير بكون حشره . و هي بمكانهاا تقول _ و ليش ما أبي اسلم عليج ؟!
و أسرعت بمشيتهاا لسرير جنان و أحضنتهاا بخفه ..
تذكرت سارا طراق جنان لها فهمست بإذنهاا _ آسفه عالحركه الي سويتهااا لج أمس .
جنان بضحكه أسى _ أنتي الي سامحيني عالعلقة الساخنة الي كليتيهاا..
سارا سكتت بعدين أبتسمت بخبث _ شسالفه الورد ؟! من بندر مووو ؟!
جنان صدت وجها عن أختها لجهة بدور _ منو قال ؟! هذا عامل نظافه جابه لي بالغلط .!
سارااا _ يا كبرهااا كبراااه يا وخيتي مشكلتج مااا تعرفين تجذبين .. !
بدور و ام محمد قاعدين يطلعون القهوة و الحلى .. و أخذت بدور القهوة من خالتهااا الي رافضه ان بدور الي تقهوي و سارا موجوده ..
بدور _ عنج عنج يا خاله ..
ام محمد منحرجه _ لا والله وسارا شفايدتهااا ؟
صاحت ام محمد على سارا _ سارا سارا ما تسمعين ..
سارا و قطعت سالفتها مع جنان _ آمري يماااا ..
ام محمد _ تعالي صبي القهوة . بسج سوالف مو زين على أختج .
بدور و هي مصره _ والله ما تاخذ القهوة .. انا يا خالة الي بصب ..
سكتت ام محمد عن بدور .. و قعدوا يتقهون و يسولفون ..و ساراا تقول سالفه ورى سالفه عن يومياتهاا في المدرسه .. أما جنان فكريا مو معاهم .. قاعده تخطط لهدف و بإذن الله هالأيام الثلاث بتصيب الهدف وبيرتاح قلب قلبها و بتلحق على شبابهاا الي يذبل يوم بعد يوم . و بتضغط على مشاعرهاا المجروحه .. و بتحافظ على كرامتهااا و بتطوي صفحه عذابهااا من حياتهااا ..
قطع تفكيرهاا ضحكة سارااا المميزة مع صفقة يديهاا .. الي يشوفها يقول مشجعه رياضية على هالصفقه ..
سارااا _ ايواااا سيبيني بالحالي عشان يأطع رأبتي سي سيدك .
بدور ببراءة _ وانا أتكلم من صجي .. شنو فيهااا .. ؟!
سارا و ماده أصابعها الخمس لبدور _ أختاري أصبع ..
بدور مو فاهمه عليهاا و أختارت أصبع السبابه .. سارا سوت بهالأصبع كأن أحد يدغدغهاااا ..سارا _ خخخ ضحكتيني وانا ماودي أضحك ..
جنان ما تحملت تمسك نفسها فضحكت على استعباط أختهااا_ مادري من وين تجيبين هالحركات !!
بدور بقهر _ أكيد من رفايجها كلهن من طقه وحده ..
ساراا و تخصرت _ هي انتي حدج إلا رفيجاتي ..
ام محمد شافت بنتهااا بطول السالفه .. _ خلاص يا سارا انا الي بنام عند بنتي ..
سارا و تمسك يد أمهاا _ و الله ما تنامين اهني يمااا و ماراح تاخذين راحتج ..
ام محمد _ اجل نامي انتي عند أختج ..
ساراا _ اوكي بس كلمي ابوي و محمد خاصه حمودي أعرفه يحب يعاندني ..
بدور أدافع عن زوجهاا _ والله محد يحب يعاند كثرج و لا تحطين كل شي على ظهر محمد ..
سارا تلتفت لأمها _ يماا بنت أختج قاعده تغلط علي .
ام محمد _ والله بنت أختي ما قالت شي غلط . !!
سمعوا أصوات قريبه من غرفه جنان .. وألتفتوا كلهم ولا ام بندر و فاطمه و عبير ..
ادخلواا و رحبواا فيهم ولا عبير توقف و هي فاتحه ذراعهااا و تقول بالفصحى _ كم أشتقت إليك يا حبيبتي ..
الكل قعد يضحك على عبير و هي جايه ركض لجنان ..
عبير و هي حاظنه جنان _ جنو خطاج السوء ..
جنان تبتسم _ خطاج اللاش يا عمري أنتي ..
جنان تمثل الزعل _ انا زعلانه منج ..
عبير بإستفهام_ مني ! لييييش ؟!
جنان _ شلون طاوعج قلبج و تركتيني بروحي ..
عبير وتغمر _ بروووحج !!
جنان الي حمر وجههااا من قصد عبير ..
جنان بحيا _ بس أنتي غير ..
و لا صوت أم بندر علااا بين الحضور .._ عبير ..
عبير و تلتفت لأمهااا _ هلااا يمااا
ام بندر _ الليلة نامي عند جنان و بندر ياخذج الصبح عشان جامعتج ..
عبير _ آوفكوووووورس . . . و هذا يبيلها تفكير ..
أم بندر وتتوعد فيهااا _ وجوزي عن السوالف بنت عمج تعبانه مو زين لهااا سامعه ؟
عبير _ آوفكوووووورس . . . و هذا يبيلها تفكير ...
أم بندر تعصب من جد _ عبيروه
عبير ببراءه _ نعم
سارا لسانها بياكلهاا لازم تقوله _ و سد باب ..
عبير بقهر _ يسد فمج ..
أم بندر و ام محمد ما عجبهن الوضع .. فتكلمت ام بندر حتى تنهي المشكلة _ عيييب يا بنات ..مادري متى تركدن و تعقلن ؟!!
@@@@@@@@@@@@
بندر بعد ما نزل أهل عمه للمستشفى سيده راح لبيته يبي يرتاح من هم جاثم على صدره
يبي يقعد مع نفسه .. يفضفض ما في جعبته .. دخل البيت و أتجه لغرفته .. فصخ شماغه و حذفه بأهمال على سريره و حذف عمره على الفراش .. حس ظهره متكسر .. من كثر ما هو مرهق و مجهد نفسه اليوم و أعصابه كانت متشنجه ..
مر عليه شريط أحداث اليووم و هوشته مع جنان تأفف بندر ما كان يحب يهدد أحد و لا يكره أحد فيه .. لكن تأتي الرياح بما لا تشتهي السفن ..
لف بندر لصوب الثاني .. و تذكر منظر جنان و هي متألمه من العملية ..
بندر بحرقه _ بس ما يشفعلهااا عن علبه الكلينكس ...!
بدون مقاومه استرخى بندر للنوم ...
// الساعة 8 مساءا //
جنان كانت تقرأ قرآن كريم .. حتى تشعر بالطمأنينة و السكينه ..
" ألا بذكر الله تطمئن القلوب " و صوتهاا كان خاشع و منصت لآيات الذكر الحكيم ..
دخلت عبير على جنان في الغرفه .. و شافتها تقرأ . فراحت صوبهاا و يدهاا على كتف جنان . أنتبهت جنان لوجود عبير فرفعت راسهاا لعبير و أبتسمت .
عبير _ حسبك (( ملحوظه : إذا بتقاطعين أحد و هو يقرأ قرآن تقولين حسبك بضم الباء و كسر الكاف للمؤنث و فتح الكاف للمذكر .. مو تقولين صدق الله العظيم لأن السنة هي حسبك قالها حبيبنا صلى الله عليه وسلم .. و لم يذكر انه و صحابته الأبرار و السلف قد قالوا صدق الله العظيم .. ))
جنان _ هلااا عبير ..
عبير _ جاسم برى بيسلم عليج .
جنان _ حياااه الله ..
جنان تستحي حيل من جاسم لأن أخلاقه مثال للرجل المسلم فتنحرج لي شافته و من كثر سوالف أختها فاطمه عنهاا تحبه محبه ولد عمها و زوج أختها ....
تغطت جنان و عطت إشارة لعبير عشان تسمح لجاسم يدخل الغرفه ..
جاسم دخل الغرفه و عيونه على الأرض وواضح عليه الإنحراج ..
جاسم _ السلام عليكم .
جنان بحيا _ وعليك السلام بو حور .
جاسم وهو واقف _ حمدلله على السلامه و ما تشوفين شر .
جنان _ الله يسلمك و الشر ما يجيك ..
جاسم و يرفع راسه لأخته _
الشيبان زاروج اليوووم . ؟
جنان تهز راسها _ ايه بعد صلاة العصر ..
و أشرت لعبير عشان تقهوي أخوهااا ..
عبير و تروح للقهوة و تأشر على الكرسي _ حياااك يا بو حور أقعد .. و هاك الفنجان ...
جاسم و يرد للورى _ تسلمين انا بطلع الحين و لا تنسين أدقين على بندر تأكدين عليه عشان ياخذج الصبح أوكي ؟
عبير _ أوكي ..
جاسم بتأكيد _ دقي مره مرتين ثلاث لي يرد عليج لأنه تعبان للحين نايم أوكي .؟
عبير تهز راسها _ أوكي ..
جنان نزلت عيونهاا تحت من طاري بندر قدام جاسم .. أكيد تعبان من كثر ما يهدد و يتوعد ! بس ما عليه بريحه الليله من تهديداته ..
جاسم _ يلى انا بطلع ألحين تامرين على شي جنان .. ؟
جنان بحرج _ سلامتك بو حور ..
جاسم _ يلى مع السلامه ..
طلع جاسم و عبير على طول أقعدت على الكرسي ..
عبير بفرح _ ما ني مصدقه اني ببات عندج ؟!
جنان اضحكت على شكل عبير و هو مستانسه _ إلا صدقي بس ها ما بي وجع راس ..
عبير عقدت حواجبها _ أفا انا وجع راس ..
جنان بحرج _ أضحك معاااج .. لا تصيرين حساسه عبور ..
عبير _ انا الحساسه و لا بعض الناس المهم ما علينا من الاحساس و خرابيطه .. أقول شرايج نلعب ..
جنان فتحت حلجها من الصدمه _ هاااااااااااا
/\/\/\/\/\/\/\/\/\/\/\/\/
// غرفه نوف الساعه 10 مساءا //
نوف بتردد _ لا ما أقدر إلا الشي هذا يا عهووود !
عهود بخبث _ زين هو مصر وانتي تعرفينه أكثر مني ..
نوف و تطق خدهااا _ أدري والله بس أخواني أخواني يا عهود تعرفينهم شكاكين ..
عهود _ قوليلهم انج معزومه على عرس رفيجتج .. عاد انتي يا نوف تعرفين تضبطين ! لحظه كاهو داق علي بسد الخط و بشوف شيبي أوكي ..
نوف بتوتر _ الله يستر .. اوكي حبيبتي ..
نوف ما توقعت هالطلب من عزوز ( رفيجها والعياذ بالله ) انهاا تطلع معاه لشقته .. صح هي تكلمه و تشوفه في مكان عام بس تروح معاه بشقه و بروحهم .. لا يمكن .. لكنها ما قرت و لا سمعت أو ربما تجاهلت او تناست قول الله تعالى " ولا تقربوا خطوات الشيطان " يعني الشيطان ما يقول لبني آدم أزنى لا بل يقول كلم فلانة .. تواعد معاها في مكان عام . لا تلمسها لا تأذينهااا .. لكن بعد ما يعزز حب الرجل في قلب المرأة .. يصب أفكار شيطانية قذره في عقل الرجل .. و آخرتها يطيح الفاس في الراس .. نوف خافت من قلب لا يكون ماسك عليهاا شي و بيهددها ..
بيطلع حقير و نذل و سافل .. قطع عليهااا صوت أمهااا و هي عند باب غرفتهااا _ نووف أفتحي الباب ..
نوف وجسمها كله يرتجف حست كأن أمهاا اسمعت كل شي و عرفت كل بلاوي بنتها .. مشت بخوف واضح . و فتحت الباب ..
أم أحمد _ نووف شفيج صارلي دهر عند الباب ليش ما تفتحين ؟
نوف بتلعثم _ ممما سمعت ..
أم أحمد ما عجبها شكل بنتها _ عمري شفيه وجهج مشحوب .؟
نوف بتلقائيا مسكت وجهها و ابتسمت ابتسامه صفرا _ ماكو شي يمه يمكن فقر دم ..
أم أحمد بتفحص _ اي والله خلاص انا باخذج باجر الصبح للمستشفى يسولج تحاليل ..
نوف بسرعه _ لا لا يمه خليه بعد باجر ..
أم أحمد _ أوكي يمه و يلى نامي لا تسهرين مو زين السهر .. شكل ما جاج الأنيميا إلا من كثر ما تسهرين ..
نوف بتنهي الحوار بسرعه _ تامرين أمر ..
بعد ما طلعت أمها .. نوف سكرت الباب و سندت ظهرها عليه ..
نوف بارتياح _ أوف أشوى ما حست ..
راحت لسريرها تفكر بهالورطه الي بطيح فيهاا .. لا لا يا نوف لا تظلمين الرجال يمكن نيته شريفه و ما يغلط .. بس يمكن نيته خبيثه ليش لأ .. ؟! يا رب ما يكون مسجل مكالماتنا ..يارب ..
بعد دقيقتين ولا جهاز نوف يدق .. شافت الشاشه طلع عنود يتصل بك ( مسميتهم بأسامي بنات )
نوف تصنع الهدوء _ هلااا
عزوز بحقارة _ هلا و غلا بالحبيبه .. شدعووه يا معووود كل هذا تغلي .. تعرفينا ما نصبر على التغلي .. شلووونج ؟!
نوف بخوف _ انا بخير انت شخبارك ؟
عزوز عرف انهاا خايفه قال خل أكملها _ تعبااان ..
نوف بسرعه _ عسى ما شر شفيك .؟
عزوز _ تعبان ودواي شوفتج ..
نوف بترجي _ تكفى عزوز ما اقدر والله ما اقدر راعني ..
عزوز ببروده أعصاب _ نوف صارلي يومين و انا انطر ردج بس الظاهر انج بتخليني أتصرف تصرف ثاني ..
نوف النذل بيسويهااا حسبي الله عليه ._ شنو بتسوي ؟
عزوز و بضحكه خبيثه _ لحظه يا قميييل ..
و شغل شريط مسجل فيه مكالماتهم و كان مشغل بالذات حوار لهم يخدش الحيا ممزوجه بكلمات العهر و الفساد ما تمت للدين و الحياء بصله ..
نوف تخيلت شكل أخوانهااا لو سمعوا هالمكالمة فما تمالكت نفسها و صاحت بقهر _ تفوووووو عليك يا نذل .. ..
عزوز ببروده _ لا لا لا لا ما أتفقنا على جذي ...
نوف الدنياا تدور حولينهااا _ حرام عليك و الله حرام ..
عزوز مستحقرها _ حرااام خو انتي تعرفين الحلال من الحرام.
المهم الساعه 8 و نص باجر أشوفج عند مجمع ( .... ) بالضبط .. و كيفج إذا ما تبين تجين عادي عندي أوصل هالأشرطه لأخوانج أوكي يا قلبي .. بس انا خايف عليج ..
و انتي تعرفين شكثر انتي غاليه على .
قاطعته نوف بحرقه و بقهر تكلمه _ الله يلعنك و يلعني يا نذل يا سافل ياأخس من الخسيس ..
عزوز بصوت جدي _ الوعد باجر يلى أحلاااااام سعيييييده ..
وسكر التلفوون ..نوف قعدت اطالع التلفون فتره قصيره .. لهدرجه انا أنغشيت !! ولا بعد كنت أبي أذله ! طلع لا يحبني و لا شي .. يبي يوصل لهالغرض و بعدهااا يرميني مثل الجيفه ..
نزلت من سريرهاا و وقفت قدام المنظرة و مر قدام عيونها صور .. أحمد .. نواف .. أبوي .. شبي يسوون فيني لو سمعوااا الشريط .. أكيد بيذبحوني أكيد ماراح يخلوني .. يارب فرجهااا .. يااارب .. وأجهشت بالبكاء .. و قعدت بمكانهااا على الأرض ما حست ببروده السيراميك تحتهاا من حرارة جسدهاا و دموعهاا مضت فتره وهي تبجي و تنعى حال مصيرها المجهوول .. !
سمعت أصوات عاليه بالدور الأرضي .. قعدت تميز هالأصوات ولا صوت أخوهاا نواف و زوجته خزنه توهم جاين من السفر ( يتعالجون )
بسرعه ركضت لباب غرفتهاا و قفلتها بالمفتاح .. جاتهاا هواجس و وساوس .. من صوت أخوهااا نواااف ..
نوف و تنتفض _ ليش جاي هالحزه .. لا يكون الخسيس سواهاااا و أرسلها لنواف عشان جذي جاي بيذبحني ..
أمسكت راسهاا بقوة و قعدت تدور _ لا لا عزوز قال باجر إذا جيت ماراح يرسلهااا ..
بس ليش هالحزه بالذات نواف جا ...!!
سبحان الله كأن نواف حاس بهلاك أهل بيته ..!
// الدور الأرضي //
من ياخذ الدمعه لعينه و يعطيه ¤¤¤
بسمه أمل وأعطيه فالناس أمي¤¤¤
أم أحمد كانت رايحه لغرفتهااا بتنام تأخرت على موعد النوم .. ولا باب البيت ينفتح ألتفتت لباب و لا نواف و زوجته .. ما تحمل نواف و هو يشوف نظر عينه قدامه . شاف المسافه بينه و بين أمه بعيده ترك الجنط و ركض لأمه ... أم أحمد شافت ضناهااا راكض لهااا أسرعت بمشيتهاا له ونبض قلبهااا زاااد ..
أم أحمد ببكاء _ نواااااااااااااف ..
نواف و دموعه على خدوده _ يماااا ..
حضن أمه بقوة و حب راسهااا و يدهااا .. أمه قعدت تبجي بصوت عالي و تقول _ طمني ياوليدي عليك .. شخبارك ؟
نواف و يبتعد عالخفيف عن امه _ تمام يالغالية ..
خزنه بانحراج واضح من وجودها بهالمشهد الحميمي _ شلونج خاله ؟!
أم أحمد و تمسح دموعها _ بخير يمال العافية سامحيني يا بنتي .. أنتي شلونج ؟ وحمدلله على السلامه ..
خزنه _ الله يسلمج و يحفظج من كل شر .. شدعوه ياخاله..
نواف و يتلفت عالصاله _ وين ابوي و الأهل ؟
أم أحمد _ الكل نايم وانا كنت بدش غرفتي و لا نور البيت يحضر يا يمه ( تهجد صوتها ..)
نواف و يحب راسها _ النور نورج يا الغالية و يلى انا برتاح و انتي ارتاحي شكلنا أخرنا عليج نومتج !!
أم أحمد وتقوم من على الكرسي _ الله يحفظكم يا عيالي .. يلى فمان الله ...
نواف و خزنه _ في حفظه ..
!!!!!!!!!!!!!!!!!!!!!!!
جنان _ عبير دقيتي على أخوج عشان ياخذج باجر للجامعه ؟
عبير وطق جبهتهاا _ أووووه أشوي انج ذكرتيني ...
جنان و ترفع يدها للسما_ الله يعين الي بياخذج ..
عبير و ترفع أصبعها لوجه جنان _ اصلا الي بياخذني يحب يده 360 يوووم .. إلي ماخذهاا عبير مو إيشي ...
جنان بإصرار _ الله يتمم عليج عقلج .. المهم دقي ألحين على أخوج ..
عبير بقهر _ طاااع هاذي بعد قولي أطلعي برااا أشوفج تبين فرقاي ..
جنان انقهرت _ شكو هذا بهذا ؟ فهميني تكفين فهميني ..
شافت عبير سكتت وماردت .. أبتسمت جنان بشطانه _ أهااااا قولي جذي لا يكون بتسحبينهااا وماراح تحضرين .. ؟!
عبير ابتسمت و هزت راسها بنعم ..
جنان _ آآآسفه .. دقي على أخوج و قوليله يجي ألحين لأني أبيه بشغله ...
عبير مستغربه _ ليش شتبين بأخوي ؟
جنان بجديه _ أولا : مو حرام انه يجي .. ثانيا : بتعرفين كل شي بس بعد ما يصير الي أبيه ..
عبير بخوف _ جنان عسى ماشر أنتي اصلا اليوم مو طبيعية كله سرحانه .. في شي جايد و انا ماعرف قوليلي من هالحين .. يمكن فهمتي شي بالغلط .. تكلمي جنان !
جنان بعزيمه _ دقي على أخوج ..
استسلمت عبير لطلب جنان الغريب بعد ما شافت أصرارهاا و جديتها بهالطلب ...
طلعت جهازها من جنطتها و دقت على رقم بندر ... بعد خمس رنات رفع الخط بندر بصوت نعسان ..
بندر _ آآآلووو ...
أنتهى ...
|
30-07-08, 11:06 AM
جديد مواضيع قسم القصص المكتمله
العرض العادي
