المنتدى :
كتب المسرح والدراسات المسرحية
ربيع عقب الباب , مسرحية لعنة الملك ميداس
مسرحية
لعنة الملك ميداس
تأليف
ربيع عقب البـاب
الشخصيات
محبو ب : بغبغان من نوع خاص
سـميرة : فى الرابعة عشر من عمرها
الأم :
الأب :
العفريت : مارد حكايات ألف ليلة وليلة
المشهد الأول
حجرة الأب الغائب 00 المكان مملوء بالتحف و الأشـــياء
الغريبة ، قوارير و أباريق كبيرة صغيرة، و أقنعة ، وأوان
من طراز قديم جدا 0
سميرة صبية فى الرابعة عشرة تدو ر في الحجرة حزينـة
تارة 00 فرحة تارة أخرى 0 تطالع الأشياء ، وتتحدث إلى
محبوب الذي يمكن أ ن يكو ن حرا أ و فى قفص 0
سميرة : سمعت 00 خلى بالك كويس 00 بابا إيه ؟!
محبوب : جى بكرة
سميرة : أوعى تنسى 00 بابا إيه ؟!
محبوب : هيه لبانه 00ماقلنا خلاص 00 دى ماصدقت !!
سميرة : مش حاسيبك 00 بابا إيه؟ رد لحسن أخصمك !!
محبوب : بابا كدا ب 00 هيه يللا( من المستحسن انجليزى)
سميرة : يانهارك اسود و مهبب 00 بابا إيه؟
محبو ب : ( لنفسه ) دى حاتزعل 00 يعنى حانصيع 00 أنا حاقولها بالتركى 00
حكم هيه ماتعرفشى تركى( يقهقه)
سميرة : رد عليه 00 قلت بابا إ يه ؟
محبو ب : بابا كداب ( تر كى )
سميرة : و كما ن بالفيومى 00 أ نا عايزاها بالعربى 00 بابا إيه؟
محبوب : بلا ش عشان خاطرى 00 و حياة أبو ك !!
سميرة : مش حاسيبك 00 بابا إيه ؟
محبوب : بابا كدا ب 00 هيه يللا 00 أكدب يعنى ؟!
سميرة : قطع لسانك 00 أ وعى تقول كده00 أ وعى !!
محبو ب : قطع لسانك 00 أ وعى تقول كدة 00 أ وعى !!
سميرة : عشان يعنى ماا لظروف بتمنعه 00 تقوم تقول عليه كده ؟
محبوب : عشا ن يعنى 00000000000000000000000000؟
سمير ة : أ يوه ا لظروف !!
محبو ب : أيو ه 00 ظروف و جوابات ( فرنساوى)
سميرة : أنت بتخرف تقو ل إيه ؟ بابا جى بكرة 00 أيوه جىهو مايقدرشى يتأخر
أكتر من كده 00أ يو ه !!
محبوب : هومايقدرشى 00 هومايقدرشى ( إجريجى )
سميرة : ( تقاطعه ) اسكت 00 ماتتكلمشى 00 سامع ؟
محبوب : ( يمثل البكاء) و الله لأنى معيط 00 هيه 00ولاحاتقدرى تسكتينى 00
إن شاء الله حتى أمو ت ( يبكى )
سميرة : ( تهدأ ) أنت ز علت 00طب ماتزعلشى 00 أنا قصدى(تختنق بالبكاء)
حتى لو كان كداب 00سيبنى أحلم إنه جاى0البيت من غيره قبر00 وماما
ليل نهار قاعده و دمعتها علىخدودها 00 ما بتتكلمشى 00 وكل ماآجى
أتكلم معاها تسرح بعيد عنى 00 وجر ى على أودتها 00 نفسى بابا يجى
بقى ومايسافرشى 00 نفسى يامحبوب ( تبكى )
محبوب : مش ممكن( انجليزى ) لازم أتكلم معاها !! دايماتجيب قاعىعارفه إنـى
ماأقدرشى أتحمل دموعها !!
سميرة : ليه يامحبو ب ؟ ليه مش ممكن ؟ يعنى هو انكتب علينا00نعيش كده 00
زى المقطوعين 00للقلق والخو ف والانتظار وقلة الحيلة 00ننام على ياترى
00 و نقوم على ياهلترى !!
محبوب : اللعنة 00 اللعنة ( فارسى )
سميرة : محبوب 00 كلمنى عربى 00 خليك حلو
محبوب : اللعنة 00 اللعنة
سميرة : اللعنة ؟ قصدك إيه يعنى حب الانتيكات 00والأثارات 00والتحف 00مش
كدة ؟
محبوب : و الأجهزة الحديثة 00 و الـ 00000000000000000
سميرة : أيوه 00 اللعنة 00 هيه اللعنة 00 كل حاجة تزيد عن الحد تبقى لعنة 00
عندك حق يامحبوب 00عندك حق !! بس تفتكر حايبطل يسافر 00تفتكر00
يقول كفاية كده 00و يبطل
محبوب : اللعنة ( انجليزى- فرنساوى – المانى – فارسى)
سميرة : يعنى حايفضل كده ؟ عايش على كف عفريت ؟ لكن أنا عايزاه 00
عايزه أقعد معاه 00أتحدت معاه 00آخد رأيه فى حاجات كتيره 00كتيره
خالص (صمت )كتير باشوف صاحبتى نرجس قاعده ويا باباها 00يتحدتوا
تشور عليه 00و يشور عليها 00وللا زبيدة 00ياسلام أنا يتيمة يامحبوب
00 يتيمه خالص( تبكى )
محبوب : أنت حاتردحى ياختى ؟ هيه ناقصه نكد00خليك زى زبيدة 00 تسمنى
و تربربى وتبقى قد الزير00وللازى نرجس دايمافاشخه ضبها 00وصوتها
مالىالبيت!!
سميرة : أيوه نرجس 00ياه يامحبوب 00 مفيش أجمل من كده0 باباها بيوصلها
كل يو م للمدرسة 00 وهي فرحانة 00 طايره زى العصفوره00 وتشاور
باب أحلى بابا 00أحلى بابا ( تبكى )
محبوب : طب ما أنى بأوصلك كل يو م 00 ما بتقولليش كده لي
سميرة : لو كنت بابا كنت 000000 كنت غنيت لك .. دلعتك
محبوب : خلا ص 00 أدى احنا فيها 00 أتبناكى
سميرة : محبو ب 00 أ نا باتكلم جد 00 جد خالص !!
محبو ب : و هو أ نا باهزر معاكى يا بنت 00 ( فرنساوى)
سميرة : تعرف يامحبوب ( و هى ترسم بسمة على وجهها )أحلى حاجة عملها بابا
00 إنه علمك لغات !!
محبوب : أ نا اللى علمت نفسى 00 أ نا جيل بلا أساتذة!!
سميرة :غلط 00 دا البغبغنات على قفا مين يشيل 00 يا ناكرالجميل!!
محبو ب : ياناكر الفطير و الزبادى و البيتزا 00 تيجى أغنى لك غنوة !!
سميرة : صوتك و حش 00وحش مو ت
محبوب : أ نا 00 أ نا 00 طب و الله لا أحرمك من صو تى
سميرة : أحسن برضه00 أ نت زعلتى ياحلو ة !! ماتزعلشى تعرف00بابا كل
مشكلته إيه ؟ الأجهزة والأ ثارات والتحف 00والأنتيكات اللى لاليها أول من
آخر00عشان كده نفسى الدنياهنا تتملى 00 ياما صليت 00وطلبت من ربنا
يحول كل شيء في البيت لآثار و انتيكات 00 وأجهزة 00 لكن !!
محبوب : بتحلمي ( ألماني )
سميرة : وليه لأ يامحبوب ؟
صوت : ( الأم من الخارج ) ياسميرة 00 ياسسو 00 ياسميرة
سميرة : أنا هنا 00 أنا هنا ياماما
الأم : ( تدخل بحذر ) أنت هنا 00 و أنا بانكت البيت عليك ؟
سميرة : أعمل إيه ياماما 00 فرحانة !! ( تلف لتعبر عن فرحتها )
الأم : وإيه الفايدة ياسميرة ؟ وهو يدوب بيورينا وشه يوم ولا اتنين 00 وتنه
مسافر تاني !!
سميرة : مسيرة يقعد 00 ومايسافرشي ياماما !!
الأم : يسمع منك ربنا
محبوب : يسمع منك ربنا يابنتي !!
الأم : ( تفاجأ بمحبوب ) أنت جايبه متعوص الرجا معاكي ؟
محبوب : وليه الغلط دا بقي ؟ دا الملافظ سعد ياعبـ 00 ياماما ( تركي )
الأم : غلطنا في البخاري ياخي ؟
محبوب : غلطنا في البخاري ياخي !!
سميرة : محبوب 00 مش معقول كده !!
محبوب : يعني عاجبك اللي بتقوله ماما ده ؟
سميرة : دي بتهزر معاك 00 ما أنت عارف بتحبك قد إيه !!
الأم : طيب اسيبك أنا 00متتأخريش عشان ننزل السوق 00هيه (وهي تخرج )
ماتتأخريش عليه ؟
سميرة : ( تتحرك صوب الأشياء 00تعاينها وتمسك بها ) الإبريق ده جايبه من خمس
سنين 00 وراس الفرعون من سنتين 00والفانوس ده من عشر سنين00
جايبه م الصين 00 ماما هي اللي قالت لي ( تقلب إحدي القوارير ) ودي
( محبوب يندب ) ياتري إيه اللي فيها ده 00 لأ بلاش 00 بابا يزعل !!
محبوب : ( بخوف حقيقي ) بلاش 00 بابا يزعل !!
سميرة : طب بس استنه ( تعالج فتح القارورة ) ياه دي جامده قوي !!
محبوب : ( بهياج ) بلاش 00 سميرة 00 بلاش !!
سميرة : لأ بقي 00مش حايزعل ( تفتح القارورة فيصاعد منها دخان كثيف ملون 00
كثير كثير 00 يعلو يعلو بينما سميرة تقع علي الأرض رعبا ) إيه 00دددده ؟
محبوب : ( يصرخ ) ياعبيطة 00 كده 00 منك لله .. ضيعتينا !!
إظلام
المشهد الثانى
نفس المشهد السابق ، سميرة ومحبوب في حالة رعب أمام مارد ألف
ليلة وليلة الضخم !!
محبوب : ( يصرخ )ميرة 00 ميرة
سميرة : إيه ده ؟ أنت ممممين ؟
المارد : أنت اللي فتحتي الإزازة ؟
سميرة : أننننت مين 00 مممين ؟
المارد : أنت و لا لألألألأ ( يقلدها )
سميرة : أنا 00 أنننا اللي ففففتحتها
المارد : ليه عملتي في نفسك كده ياشاطرة ؟ يللا ياشاطرة 00اختارى لك موته ؟
سميرة : مممموته ؟
محبوب : موته تاخدك
المارد : اسكت أنت 00 بلاش طولة لسان .. دورك جي
محبوب : اسكت أنت 00 بلاش طولة لسان !!
سميرة : والنبي ياعم !!
المارد : نصيبك كده 00 قضاكى كده !!
سميرة : يعني ده جزات المعروف ؟
المارد : لا معروف 00 ولا متلوف !!
سميرة : والنبي ياعم ( وهي تتزحزح )
المارد : دا عهد خدته علي نفسي 00 اللي يطلقني أخيَّره في موتّْه !!
سميرة : عهد 00عهد إيه وسخام إيه ياعم ؟
المارد : لما اتحبست هنا 00 فضلت ألف سنه 00 قلت اللي حايفتح لي 00له
عندي تلت أمنيات أحققها له 00لكن ماحدش سأل فيه ( يبكي )
سميرة : طب سد 00 سد يا نونو 00 سد ( تغني ) ماما زمانها جيه 00جيه
محبوب : ماتعيطشي يانونه 00سد !!
المارد : اسكت 00 سامع 00قلت اسكت ( يتوقف ) وفاتت ألف سنة كمان 00
قلت اللي حايفتح لي له عندي كل اللي يطلبه 00 لكن مفيش حد سأل
فيه (يبكي )
محبوب : طب بس عشان أجيب لك شيكاليته 00بس 00ماما زمانها جيه 00
المارد : مش قلت لك اسكت ( ينفخ فيقع محبوب ) وفاتت ألف سنة 00
وماحدش عبرنى00قلت اللي حايخلصنى حاكون عبد له طول عمره( يبكي )
محبوب : طب والله ما ني سائل فيك 00عيط لما تنفلق
المارد : (وهو يجعر ) اليأس ملا قلبي 00خلاني أقسم 00اللي حايخلصنى بعد
كده حاموّته 00لكن قبل ماأموته 00أخيره في الموته 00اللي تريحه !!
محبوب : هاهاها 00 الموته اللي تريحه 00 ياأهبل يابو نفافيخ !!
سميرة : وده يبقي جزات المعروف ؟
المارد : أنا خلاص حلفت 00 ومش ممكن أرجع في كلامي أبدا
محبوب : بس أنت بقي كداب !!
المارد : لأ 00 أنا مش تداب !!
محبوب : لأ بقي 00كداب وستين كداب
المارد : لأ 00 مش كداب 00 وإن ماسكتش حافعصك بايديه !!
محبوب : بقي معقول 00 إزازة قد ضفرك تساع الـ 0000فيل اللي هو أنت ؟
سميرة : ( تتفهم مايقصده محبوب فتتهلل ) أيوه 00 أيوه إزاي ؟
المارد : مش مصدقة ؟
محبوب :أيوه 00 مش مصدقه 00ياكداب هاتروح النار !!
المارد : تحبي تشوفي بعنيكى ؟
سميرة : مش حاصدقك إلا إما أشوف بعنيه
المارد : بس كده 00طيب 00 ياقوي ( يزعق ويتحول إلي دخان ، ويدخل الزجاجة )
سميرة : ( تسرع وتغلق الزجاجة ) وقعت في شر أعمالك 00 يالئيم !!
المارد : أنا في عرضك !!
سميرة : دلوقتي 00 أنا في عرضك 00 اختاري لك موته ( وهي تقلده ) أنا بقي
حادفن القزازة 00عشان ماحدش يخلصك أبدا
محبوب : ( في حالة ضحك مستمر ) ياطويل ياأهبل 00 ياعيل !!
المارد : عيل وغلط 00 معلهشي
محبوب : ياعيل 00 ياعيل
المارد : افتحي لي ياسميرة 00 وكل اللي أنت عايزاه مجاب !!
سميرة : كداب في أصل وشك !!
المارد : أبدا و الله 00 أبدا
سميرة : إيه رأيك يامحبوب ؟
محبوب : رأيي نسيبه محبوس 00ولا أقول لك 00إدي هولي ألعب بيه شوية!
سميرة : أنت شرير يامحبوب 00 وقلبك مش حلو
محبوب : أنا 00 أبدا والله 00 دا أنا طيب خالص !!
سميرة : أمال عايز تفتري عليه ليه ؟
محبوب : خلاص أفتحي له !!
سميرة : أفتح له ؟
محبوب : علي ضمانتك ؟
: علي ضمنتي 00 بس إياك يقمر فيه !!
سميرة : ( تفتح القارورة ) أنا حافتح 00 حافتح
محبوب : ماتفتحي 00 هو أنا بيهمني !!
سميرة : بس يعني 00 مش ممكن 000000
محبوب : دا عيل 00 خايفة من عيل ؟
المارد : قول لها والنبي يامحبوب !!
محبوب : قول أنا عيل الأول !!
المارد : أنا عيل و ستين عيل !!
محبوب : شفتي 00 يللا افتح له ينوبك فيه ثواب
سميرة : ماشي 00 كلامك 00 اتفضل
المارد : ( من بين الدخان يستوي واقفا وهويبكي تأثرا )
محبوب : وبتعيط ليه تاني ؟
المارد : أنا عايز بمبوني 00 أنا فرحان 00 شبيك لبيك 00 عبدك بين إيديكى
سميرة : كل اللي أنا عايزاه ؟
المارد : كل اللي أنت عايزاه ياسميرة ياحلوة !!
سميرة : ( دون تفكير ) عايزاك تحول كل حاجة يلمسها بابا في البيت لتمثال 00
لأنتيكا 00 لجهاز كمبيوتر 00 تلاجة 00 لعربية 00لــ0000000000
المارد : غالي و الطلب غالى !!
سميرة : اللي يلمسه بابا
المارد : واشمعنا بابا يعني ؟
سميرة : عشان يفضل معانا مايسافرشي
المارد : تحبي نبتدي من دلوقتي ؟
سميرة : لأ 00 لما يجي بابا 00 بس قول لي 00أعرف إزاي إنك معنا هنا ؟
المارد : حازغزغك 00 طبعا مش هاسيبك ومش هافرقك .
سميرة : مش حاتفارقني ؟
المارد : وماحدش حايشوفني غيرك والواد محبوب لازعر
محبوب : لازعر 00 أنا أزعر 00 ياعيل ياعُيِّطه
المارد : مش قصدي 00 قصدي الفقر ده ( يقصد محبوب )
محبوب : أنا 00 أنا غلطان 00 يعني كان لازم
المارد : ( يقاطعه ) طب بس ماتزعلشي
ص الأم : ياسميرة 00 ياسميرة اتأخرنا
سميرة : حالا ياماما 00 أنا ماشيه ( للمارد )
المارد : و أنا رايح السيما
محبوب : السيما 00 السيما 00 ماليش دعوه خدني معاك
المارد : هو أنا فاضي لك 00 أنا عندي تصوير ويا اسماعيل يس و عبد المنعم
سميرة : احنا حانتسرمح من دلوقتي ؟
المارد : يادوب أخلص الأولدر 00 و أكون هنا علي طول
سميرة : كلام رجاله ؟
المارد : كلام عفاريت !!
محبوب : ( يتشقلب ) أنا مش موافق !!
سميرة : ليه بس يامحبوب ؟
محبوب : كداب !!
المارد : وبعدين معاك 00 حاتسكت 00 و لا أنتف لك ريشك
( لوحة غنائية 00 يرد عليه محبوب خلالها ماتقدرشي بينما سميرة
تقهقه و تنسحب )
إظلام
المشهد الثالث
بهو المنزل – الأب يتقدم حاملا حقيبتين كبيرتين فهو مقبل من سفر
يستحسن أن يكون لباس الأب لباس صيد00 برنيطة وشورت 00وعلي
كتفه بندقية !!
الزوجة : ( تسرع نحوه وتحمل عنه الحقيبتين ) حمد الله علي السلامة ( بفرح)
الزوج : الله يسلمك يامديحة !!
الزوجة : نورت بيتك ( وهي تكاد تبكي )
الزوج : ( يبحث عن شيء ) أمال فين سميرة ؟
الزوجة : البنت دي مش عارفه جري لها إيه !!
الزوج : إيه بس اللي حصل ؟
الزوجة : من يوم ماسافرت 00 وهيه دايما في أودتك !!
الزوج : في أودتي أنا ؟
الزوجة : في أودتك بالساعات 00 ودمعتها ياحبة عيني مابتفارقشي خدودها
الزوج : حبيبتي ياسميرة 00 سميرة 00 سوسو 00 أنت يا بنت ؟
الزوجة : أنا حاناديها لك !!
الزوج : معلهشي يامديحة 00 ما أقدرتش أبعت 00يدوب لحقت أحجز في آخر لحظة
الزوجة : أنت عارف قد إيه محتاجين وجودك معانا 00 كنت أتمني نكون أول
ناس تشوفهم في المطار !!
الزوج : يللا 00 الجيات أكتر !!
الزوجة : لهو أنت ناوي تسافر تاني ؟
الزوج : شوية يامديحة 00 وربنا يعمل اللي فيه الخير !!
الزوجة : بلاش يابو سميرة 00 عشان خاطري !!
الزوج : و الله أنا احترت معاكي 00 أقول بلاش سفر 00 تقولي لازم عشان
نجيب و نجيب 00 ونعمل أبصر إيه 00 و أما خلاص أعود نفسي 00وأقول
عندها حق 00 تقومي تقولي كده ؟!!!
الزوجة : كفاية يابو سميرة 00 كفاية 00 البنت بتكبر و محتاجاك !!
الزوج : ( يغير الموضوع ) هيه فين البنت دي 00 ياسميرة !!
ص : أيوه ياباب 00 جيه يابابا ( تقبل مسرعة ومعها قفص محبــوب 00 تنزلق
فيقع القفص )
محبوب : آه آه 00 ياراسي 00أدي اللي بناخده منكو 00 مفيش عقــل 00مفيش صبر
الزوج : ( يضحك 00 يرفع سميرة ) وحشاني ياعفريتة 00تعالي 00عمال أنادي
عليك م الصبح 00 كنت فين ؟!!
سميرة : والله ماسمعت يابابا 00حمدالله ع السلامة 00وحشتني خالص 00خالص
يا بابا ( تلقي بنفسها بين ذراعيه وتقبله )
الزوج : هيه 00 وعامله إيه في الدراسة ؟
سميرة : ولاحاجة
الأب : ولاحاجة ؟
سميرة : قصدي 00 كويسه يابابا !!
الأم : أروح أحضر لك الحمام ( تتحرك )
الأب : وحشتيني 00 وحشتيني ياشقية !!
سميرة : لو أنا باوحشك صحيح 00بلاش تسافر
الأب : و أنت كماني ؟!
سميرة : يابابا 00 أنا عايزاك 00 أنا محتاجه لك !!
الأب : أمال مين حايوفر لك الشقة و العربية و المكتب و الـ0000000
سميرة : مش عايزه يابابا ( تقاطعه )
الأب : مش عايزه ؟ معقول ياسميرة 00 والعربية اللي نفسك فيها و الـ
سميرة : مش عايزه يابابا 00وجودك معانا بالدنيا كلها
الأب : دا كلام سابق لأوانه 00 نتكلم فيه بعدين
سميرة : احنا عندنا حاجات كتير يابابا 00 مش عند حد من زملاتي
الأب : طب بس احكي لي عامله إيه في المدرسة ؟
سميرة : زي كل سنة يابابا
الأب : كويس 00 كويس جدا
سميرة : يابابا 00 احنا بقي عندنا مخزن ملان حاجات جميلة 00 وحاجــات
بيتهيألي مش حانعوزها أبدا !!
الأب : البحر يحب الزيادة !!
سميرة : وأنا البحر 00وباقول لك كل اللي احنا محتاجينه لقمة هنية 00 وشربة
مية 00 وبيت نضيف 00 وعيشة مستورة !!
الأب : لا 00 دا أنتو متفقين عليه !!
سميرة : أبدا و الله يابابا 00 بس أنا باحس دايما بغربة 00 إننا غلابا قوي 00
إني يتيمة يابابا !!
الأب : معقول ياسميرة ياحبيبتي 00 وماما ؟
سميرة : لا ماما 00 و لا عمو 00 و لا خالو 00يعوضوني عنك يابابا !!
الأب : كلها سنتين 00 ولا تلاته 00 و أقعد !!
سميرة : يابابا ؟
الأب : الناس ياسميرة اتغيرت 00 ماحدش بيحتـرم حد ماعهوش 00 اللي
معاه بيمشي راسه مرفوعة 00 و أنا مش عايزأحرمك من حاجة !!
سميرة : وأنت يابابا 00فين طموحك اللي ياما كلمتني عنه ؟ ياما00 وماكنتش
باقدر أفهمك !!
الأب : كل حاجة اتغيرت ياسميرة !!
محبوب : كل حاجة اتغيرت 00 كداب !!
سميرة : ( تهاجم محبوب ) اسكت !!
محبوب : ( بانفعال ) اسكت !!
سميرة : هيه ؟ ( تتوعده )
محبوب : هو الحق عندكو كده 00 ضايع
سميرة : ياك كسر حقك !!
محبوب : ياك كسر حقك !!
الأب : ( ينهض ضاحكا ) محبوب 00ياصاحبي 00 أنا ماسلمتش عليك !
محبوب : قلة أصل !!
الأب : ( يضحك ) أنا متأسف ( يدنو منه ويربت علي القفص ) أما أنا جايب لك
أصناف أكل 00 إنما إيه !!
محبوب : مش عايز منك حاجة !!
الأب : أنت كمان ؟
محبوب : وأنت كمان 00 وهو أنا حمار يعنى ؟
الأب : طب ماتزعلشي 00 قول لي ياسميرة 00محبوب عامل إيه معاكي ؟
اوعي يكون نسي اللي حفظه ؟
محبوب : اشمعنا أنا اللي حافتكر 00 ما أنت نسيت كل حاجة !!
الأب : نسيت 00 نسيت إيه فكرني ؟
محبوب : أول مرة سافرت فيها 00كنت بتعيط وتقول 00 مش عايز أسافر 00
أنا باحب بلدي 00 باحب ناسها 00 ترابها زعفران 00 نيلها شرياني
00غيطانها جنة الرحمن 00القديم فيها بينطق بعظمة الجدود00 بيتحدي
الدنيا كلها 00 حتي لوعشت فيها فقير غلبان 00 ماحيلتيش اللضة 00
مش ممكن 00 نو أنسيبل
الأب : أنت لسه فاكر يامحبوب ياإبني 00 دا كلام فات عليه زمن !!
محبوب : وعجزت 00ونسيت 00يامحبوب نفسي أشوف بلدنا أجمل بلد 00أحلي
بلد 00 نفسي أشوف العدل فيها سلطان ماشي بين الناس 00 يسلم علي
ده وده ومايفرقشي بينهم !!
الأب : دا كلام خايب يامحبوب 00 وبعدين البلد بقيت مفتوحة للمجتهديــن
والمستثمرين 00 لكل الناس 00 كل الناس !!
محبوب : كداب 00 كداب
سميرة : اسكت 00 أنت اللي قليل الأدب !!
الأب : محبوب لسانه فلت ياسميرة 00 وعجز 00 لازمن نبيعه أو نسيبه يطير !
محبوب : أحسن 00ما أنا وجودي زي عدمه 00محبوس داخل قفص00إيه الفايدة ؟
سميرة : و أهون عليك يامحبوب ؟
محبوب : أروح عند ناس تانية 00 يمكن يسيبوني حر طليق 00 مش يعبوني في
مخزن انتيكات !!
الأب : هوووه 00أنا طالع 00أنت خلاص فعلا 00لازم تسيب البيت ( يخرج )
سميرة : ليه يا محبوب ؟ ليه زعلت بابا ؟
محبوب : بابا خلاص 00 آه لو كنتي سمعتيه زمان 00 ولا عمايله 00دا علمني
فرنساوي و انجليزي و ألماني و إجريجي 00 كان بيتألم لما يشوفنــي
محبوس 00يبكي 00وقدام أي مشكلة يجي جري 00يطلقني 00 يحررني ...
ومش مهم عنده النتايج !!
سميرة : محبوب 00 أنت مش بغبغان عادي !!
محبوب : بغبغان 00مش بغبغان 00 كله محصل بعضه !!
سميرة : طيب 00ماتزعلشي بقي 00 أنا حاخلي بابا يصلحك !!
محبوب : بابا عمره ماحايصالحني 00 لأنه دلوقتي بيشوفني كهنه 00 و أنتو ماشاء
الله 00لبستو المستورد 00 و آخر صيحة !!
سميرة : أنا حاخلي العفريت يدي له كل حاجة 00 مش حايسافر !!
محبوب : حايفتري !!
سميرة : لأ بقي 00 كده أنت مش كويس !!
محبوب : بابا حط بدل قلبه قلب سيراميك 00 وف صدره عمل ضمير علي آخـر صيحة
00 بالروموت كنترول !!
سميرة : دا كلام كبير 00 عمري ماسمعته منك !
محبوب : كل الكلام دا اتعلمته منه 00 منه هو !!
سميرة : طيب 00خلي عندك أمل يامحبوب وبلاش سوداوية !!
محبوب : دا بيقول حايبعني 00 ويمكن يدبحني !!
سميرة : مش حايجي ناحيتك
محبوب : بيتهيألك 00 ماهو كل أجازة علي يدك !!
سميرة : لأ 00 في دي مالكشي حق يامحبوب 00 داكل أجازة بيغيرلك القفص !!
محبوب : لعنة 00 لعنة !!
سميرة : لعنة 00 لعنة إيه ؟
محبوب : كل سفريه بيغير القفص 00 ويجيب بداله واحد أضيق منه 00 أضيق .. لما
اتخنقت !!
سميرة : طب ماقلتليش ليه ؟ بقي أنت تعبان ؟
محبوب : أنا مش تعبان 00 أنا بمب 00 بس يعني 00كنت حاسس بالحرية أكتر
سميرة : طب ماتزعلشي 00 حاغيرلك القفص !!
محبوب : مش حايسمح لك !
سميرة : ليه بتقول كده يامحبوب ؟
محبوب : هو عايز يتخلص مني 00 وبكره أفكرك !!
سميرة : معقول !!
محبوب : هو لسه جي النهاردة 00بكرة 00 بكرة حايحطني في قفص أضيق !!
سميرة : وهو أنت عملت له حاجة ؟
محبوب : إذا كان علي العمايل 00 أنا عملت كتير 00 بس كان فرحان وسعيد بيه ...
دلوقتي مش عايز حد يقلب عليه المواجع !!
سميرة : طب إيه رأيك 00 أنادي العفريت ؟
محبوب : بلاش
سميرة : بلاش !!
محبوب : خايف عليك !!
سميرة : لأ ماتخافشي 00 مش عايز بابا يبقي معانا 00 ويرجع يجيب لك قفص
أكبر و أوسع ؟
محبوب : ياريت !!
سميرة : طب يللا 00 أنا حادخل الأودة 00 باي 00 باي يامحبوب !!
إظلام
|
21-07-08, 09:28 AM
المشاركة رقم: 1
جديد مواضيع قسم كتب المسرح والدراسات المسرحية
العرض العادي
