لمشاكل التسجيل ودخول المنتدى يرجى مراسلتنا على الايميل liilasvb3@gmail.com





العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 12-06-08, 02:38 AM   المشاركة رقم: 21
المعلومات
الكاتب:
اللقب:
ليلاس متالق


البيانات
التسجيل: May 2007
العضوية: 28474
المشاركات: 412
الجنس أنثى
معدل التقييم: Cheer عضو بحاجه الى تحسين وضعه
نقاط التقييم: 20

االدولة
البلدSaudiArabia
 
مدونتي

 

الإتصالات
الحالة:
Cheer غير متواجد حالياً
وسائل الإتصال:

كاتب الموضوع : Cheer المنتدى : القصص المكتمله
افتراضي

 


الجزء ( 5 ) : للحب عنوان

ملخص الجزء السابق: ردت العلاقه ما بين سلطان ووداد بعد ما اعترفت وداد لسلطان عن الي سوته مريم.. ودخول هند المستشفى من التعب الي ياها.. وطلوع هادف من السجن بعد ما تنازلوا اهل محمد من القضيه، والتغيير المفاجئ في طبع هادف الي الكل متعجب منه

الكل كان يلملم الأغراض من غرفه هند عشان يطلعون منها.. وطول الوقت هادف كان عدال هند ومتمسك في إيدها... وهند مستانسه من الخاطر على هالتغيير الي كانت تترياه من زمان عشان اتشوفه على هادف صوبها..
غزلان: منو قدك يا هادف.. ماخذ اهتمام اختنا.. ونحن صرنا مال أول
هادف: جب انتي.. عن السخافه .. ما عندها سالفه هندوو اتحط بالها عليج وتهتم فيج.. دام القمر موجود.. شو نبا في النجوم..
سلطان: وبعدين يعني.. ما بتردون اليوم البيت شكلكم.. بعد لين عشره اذا ما ييتوا تراني برد البيت روحي وانتوا دوروا لكم حد توصلكم البيت..
هند: اقول ابوي.. انا بظهر عندكم.. وانتوا تموا هني تناقروا..
غزلان: ههههههه.. اقول هدوووف الي يشوفك يقول ارهابي..
هادف: هي هي هي.. على الأقل بتم احلى منج انتي..
غزلان: انا الغزاله محد ينافسني في الجمال..
الكل مشى بسرعه صوب السيارات وغزلان وهادف من كثر ما يسولفون ويتناقرون ما لحقوا عليهم.. وهم في الممر .. كان خالد يتمشى يبا يدخل القسم الي فيه غرفة هند مفروض اتكون.. وغزلان من شافته خافت.. وخصوصا ان هادف اذا عرف بياكلها وبيسوي لها سالفه.. اما خالد من شافها فتم جامد مكانه.. لكن من ظهر جدامه هادف نقز .. لنه شكله فعلا يزيخ لحيته مب مرتبه.. وثيابه مبهدله.. يعني حالته لله..
هادف: اشفيك.. عن اطيح عينك بس؟؟
خالد: ها.. شو.. غزال..
هادف: ههههه.. الأخو.. سلامات ما اتشوف شر.. الظاهر الي انت فيه مأثر على مخك بعد
خالد: ها.. لا بس مليت من الغرفه قلت اتمشى.. بس انت ظهرت ياخوي فجأة جدامي خرعتني..
هادف: انزين يوم يتمشون ما ايون قسم الحريم..
خالد: ها.. هذا قسم الحريم.. اتصدق عاد ما انتبهت..
هادف: يوم اقول مخك متأثر ما صدقتني.. روح ربي يشافيك
خالد: ههههه..
غزلان: هادف.. يلا الكل روح عنا.. وبعدين يعني؟؟؟
هادف: بل بل .. كلتنا .. فضحتنا جدام الريال.. السموحه اخوي انا ساير..
خالد في باله يتفدى صوت غزلان وتصرفاتها وعيونها.. اااه يا عذابي..
هادف: الأخو.. في امان الله..
خالد بعد ما انتبه.. : ها.. هي هلا..
هادف: اقولك في امان الله اتقول لي هلا..
خالد: ههههه.. السموحه اعذرني..
هادف: لا ماعليك..
غزلان: يلا عاد.. الكل بيروح عنا.. محد هني.. هندو ورخصوها نحن نقعد هني ليش.. يلا عاااااااااد
هادف: انزين انزين .. عيوز ماكلين عشاها..
خالد: روح لا تتأخر على هلك.. بس ما عرفنا اسم الشيخ..
هادف: هادف خليفه ........
خالد: ماشاء الله.. ولد راعي المقاولات.. ؟؟
هادف: هيه.. يلا كلتني هاي .. بنزغد من وراها.. مشكله اكبر عني ولا راويتج شغلج..
مشى هادف عن خالد صوب غزلان.. الي كانت طول الوقت تتحرطم عليه .. وهو يرادادها.. وتموا على هالحال لين ما وصلوا الموتر الي من ركبوه اتهزبوا عدل من وداد وسلطان..
غزلان: معلووووووووووم احين كل خوفج على حبيب القلب.. ونحن خلاص..
هادف: أي حبيب قلب؟؟ شو السالفه؟؟ لا يكون انخطبتي من غير شوري..
وداد: وليش انا اروم ما اخذ شور هدوووف.. افا والله..
هادف: تسلمين الغاليه .. بس ما قلتوا لي شو السالفه ترا بعدني مب فاهم شي؟؟
غزلان: اصلا امبونك ما تفهم..
هادف ضربها على راسها .. وهي تتحرطم عليه: جب.. قلنا اكبر عني بس ما قلنا عاد خذي راحتج.. انتي ما يبالج غير سعيد يعرف لج
هند: لا عاد.. هني وبس ما ارضى على غزلان
غزلان: الله .. عاشت هندوووو.. ظهر الحق.. الله اكبر..
الكل: هههههههههه
هادف: يلا تراني اتريا اعرف السالفه
هند: لا عاد هالمره الظاهر انا بستوي ال سي ان ان وبخبرك السالفه.. ياخوي يا حبيب قلبي.. وداد وسلطان ردت المياه لمجاريها .. يعني خلاص جريب راح يعرسون ونفتك من العانس والعزابي..
سلطان: لا لا لالا.. غلطتي تراج
هادف: قولي والله.. كلولولو.. ماعرف ايبب جان يببت ورقصت بعد.. بس ماعرف المشكله..
وداد: وحليلك يا هادف.. يعني انت موافق اطمن
هادف: لا بعدني ما قلت موافق بس يببت..
سلطان: وحضرتك متى بتقول رايك يعني؟؟
وداد: سلطان شوف انا ما باخذك الا بعد ما الغالي يوافق
سلطان : الله الله الله.. الغالي بعد.. وانا شو؟؟
هادف: الغالي يبقى غااااااااااااالي..
غزلان: والزين يفرض نفسه..
الكل: هههههههههه
هادف: غزلان حبيبي.. ممكن طلب؟؟
غزلان: لا .. انا زعلانه..
هادف: افااااااا تزعلين مني.. وهذا صار لج فتره طويله ما شفتيني..
غزلان: ههه فديتك والله ماروم عليك.. تامرني انت؟
هادف: اباج اتغنين لي اشتقت لصوتج..
غزلان: يه.. غالي والطلب رخيص.. افا عليك..
وبدت غزلان اتغني لهادف والكل ساكت يسمع صوتها العذب الناعم.. وكان هادف صاد ويهه صوب الجامه ومحد منتبه له غير سلطان الي كان يطالعه من المرايه ويشوف دموعه الي تذرف.. وقتها حس فعلا بتغيير هادف وندمه..
اما خالد فرد غرفته وباله كله مشغول بغزلان.. مب عارف سر هالإنجذاب.. مع انه ما يعرفها ولا حتى اسمها.. بس شو.. معقوله حبيت.. لا .. شو احب.. انا البنات الي يمرون جدامي كل يوم ما ينعدون.. وكل وحده احلى واحلى.. اشمعنى هاي من بين كل البنات سلبت تفكيري.. لا حوووووول.. كيف اشلها من بالي
خالد شاب يدرس ويشتغل في نفس الوقت.. يدرس في الجامعه الأمريكيه في دبي.. ويشتغل في احدى الدوائر الحكوميه... وعنده محل ورود
..
الكل وصل البيت.. وام سعيد من شافت هادف ربعت تحضنه... وهالشي خلا هادف يصيح زود وزود.. بس ابوه ما سلم عليه ... لنه عرف عن موضوع هادف.. وكان متضايق منه
هادف: ابوي.. اشحالك؟؟
بوسعيد:-----
هادف: ابوي.. رد علي..
بوسعيد صد صوبه واتطالعه بنظره وحده ورد نزل راسه..
هادف: ابوي.. ادري اني غلطان.. بس ابوي انا والله ندمان وااايد.. وصدقني بتغير.. وبغير كل اطباعي مابا شي من الدنيا غير رضاك انت وامي.. ابوي.. انا مالي غناة عنك
بوسعيد: الفضيحه الي مست عايلتنا بسبتك مب شي هين عشان بكلمه وحده اقول لك مسموح
هادف: بس ابوي..
بوسعيد يقاطعه: لا بس ولا شي..
هادف: ابوي.. انا مب ساير الا وابا المسامحه منك .. ابوي.. والله اذا انت مب مسامحني صدقني بظهر من البيت وماراح اقعد في مكان انا منبوذ فيه
ام سعيد: خلاص يا بوسعيد.. الولد ندمان.. عطه فرصه اخيره
بو سعيد نش من مكانه وتوه بيدخل المكتب وما وقف الا وهادف صادنه ومب خالنه يدخل..
هادف: ابوي.. انا ريال وعند كلمتي ممكن اسمع رايك
بوسعيد ما حس عمره غير الدمعه تنزل منه.. مهما يكون ترا هادف ولده وحشاشه يوفه.. كيف بيتخلى عنه.. بس الوضع الي صار صعب عليه يتحمل ان ولده يوصل لهالدرجه .. : هادف.. انت ولدي لو صار ماصار ما اقدر انكر انك ولدي.. بس دخيلك لا تعذبني انا وامك زود.. هادف نحن دلعناك ونفذنا طلباتك مب عشان تخترب.. عشان انك اتصير احسن واحسن.. بغينا لك الزين.. ما بغينا يوصل الحال بك انك..
قاطعه هادف: خلاص ابوي.. لا اتذكرني..
وما لقى عمره غير يعق عمره على حضن ابوه ويصيح ويبوس راسه كل شوي يطلب السماح.. وطلع عامر ولد فدوى الصغير من غرفته ومن شاف هادف تم يصيح بصوت عالي...
غزلان: خرعت الولد .. روح الحلاق سنع عمرك..
هادف: ابوي.. شوف بنتك من الصبح اتحط علي وانا ساكت..
ابو سعيد: مالج شغل بولدي الغالي...
غزلان: ايه انت بتتخقق علينا انك اخر العنقود.. ترا انا بعد اخر العنقود.. بس للبنات..
هادف: جب انتي اسكتي..
فدوى: سعيد.. روح الحلاق والله خرعت عيالي..
عامر: ماما.. توفي قوليلا.. شوفي غوريلا..
جاسم: هههههههه.. والله وعرفت اتشبه يا عمووووور..
هادف: انا اراويك وتم يجرب من عامر ويسوي له حركات اتخوف وعامر تم يصيح زود.. قبضه أحمد وتم يدزه صوب الباب يطلعه من البيت عشان يوديه الحلاق.. اووووووووه.. انا باكلك
أحمد: امش الله يخليك..
هادف: خلني العب وياه
أحمد: امش زين .. والله لو اوديك حديقه الحيوان على طول بيشلونك تدري ليش.. بيتحسبونك غوريلا شارده.. ههههههههه
هادف: يالسخيف.. وين بتودين.. اذا عند خان مابا
أحمد: افا عليك.. انا بوديك عند حلاق اوكي.. قاسم شاه.. وايد اوكي يحلق
هادف: والله اذا خرب ويهي وقرع شعري .. لأقرعك ..
أحمد: انا جيه ولا جيه لازم اقرع تدري بيبدأ دوامنا في الكليه .. والزامي انقرع..
هادف: انت تعال.. جم باقي لك بتخلص؟؟
أحمد:وين .. توني اول سنه.. جدامي 4 سنين..
هادف: عيل تو الناس اقول لك ملازم.. عقب بقولها لك..
أحمد: اصلا انت من اتشوفني لازم اتحييني.. فاهم..
هادف: حاضر سيدي..
أحمد: ههههههه.. الا بسألك هادف.. ممكن يعني اترد علي..
هادف: اتفضل افا عليك..
أحمد: انت شو الي غيرك جيه فجأه.. انت قبل حتى سوالف ما كنت اتسولف ويانا.. واسامينا يمكن بعد ماكنت حافظها.. بس هالمره اول مره احسك صدق اتحبنا
هادف نزل راسه وتنهد : اااااااااه..
أحمد: وحليلك.. والله وعرفت الهم بعد عشان تتنهد.. قول طلع الي بخاطرك.. انا اخوك ماني غريب
هادف: هي والله ابا حد ارمس واقول له الي بخاطري يمكن ينصحني ويرشدني للزين ..
أحمد:افاعليك .. تحت امرك.. أحمدووو الزعيم موجود
هادف: تدري.. والله ياريتني دخلت السجن من زمان.. لأني فتحت عيوني على وااايد اشيا كنت غافل عنها.. في السجن ماشي يامي ارحميني.. وماشي لازم انفذ الي ينطلب منا بالحرف الواحد.. مافي حد نامر عليه ولا ينفذ طلباتنا.. ولا حتى شي اشيا اتسلينا.. كل الي حوالي احسهم مثل اشباح.. يخوفون.. حتى ماتروم تبتسم لهم.. يكفي المحاضرات الدينيه الي كانوا يحاضرونها لنا كانت وااااايد اتأثر فيني.. قبل على ايام المدارس يوم اييبون لنا شيخ ولا أي حد يقول لنا محاضره ولا ينصحنا ما كنت اسمع.. كنت اقعد اسولف ويا الربع ولاهي عن المحاضره والي تحويه.. اما هناك محد اعرفه عشان اسولف فكنت انجبر اسمع.. وهالشي الي خلاني صدق احس اشكثر انا حقير.. وكنت خايف اني اموت وما ألقى فرصه اتوب فيها لله.. رحت للشيخ وكلمته.. تم ينصحني.. والله ما اقص عليك حضني وباس راسي.. شو استانست.. لني فعلا كنت احتاج حد يعاملني بهالطريقه ويحضني.. وقتها تميت اصيح بحرقه.. وكل دمعه كانت تنزل كانت تحفر في خدي وتحرقني.. تم يهتم فيني واييب لي كتب.. كنت اسهر اقراهم كل ليله.. صح اني ما تميت غير اسبوعين.. بس وايد تعلمت في هالإسبوعين.. القرآن ختمته اتصدق في هالإسبوعين.. وغير جيه المشاكل الي كنت اسمعها من الي كانوا وياي.. بخبرك سالفه واحد هاي السالفه اثرت فيني وايد وضايجت بي.. وصدق حسيت بالنعمه الي انا فيها وقاعد ارفس فيها
أحمد: هادف.. اهم شي انك الحمد لله تغيرت.. وهالشي ما تدري اشكثر فرح ابوي .. وسلطان.. وعمي.. والكل بعد.. كلنا نبا لك الخير.. انزين خبرني سالفه ها الي له تأثير فيك
هادف: يقولك هذا امه ماتت وهو صغير ابوه تزوج وحده ثانيه.. ومرت ابوه كانت اتراويه كل انواع الويل والعذاب والضرب.. كان يشرد من البيت ويروح المسيد يرقد فيه.. ولا بيت حد من ربعه.. وابوه مايروم يسوي شي.. كبر وصل لعمري وكان مصروف حتى ماشي في جيبه لأن مرت ابوه مانعته.. المهم رافق شله استغلت ظروفه الي يمر فيها وتموا يغرونه بالحرام.. وبعد ما تمكنوا منه وصار طعم في ايدهم قام يسرق ويسوي البلاوي عشان يلقى له فلس ويسوي الي يباه.. وكان يصيح ياأحمد.. يقول انا مادري ليش جيه سويت.. وابوي احبه وكاسر خاطري.. مع انه ما سوى لي شي يرزى عشان اذكره فيه بس يكفي انه يابني على هالدنيا .. وامي لو كانت موجوده جان ما ودرتني اهيت بالشوارع.. وما وصلت للي انا فيه
أحمد: انزين وشو الي اثر فيك بالضبط من سالفته..
هادف: كل شي.. بس اكثر شي الي هز في نفسي يوم قال ان يحب ابوه بس لأنه يابه عالدنيا.. وانا ابوي الي ما قصر علي بشي ولا في عمره رفض لي طلب ما حبيته ولا احترمته.. وامي عمري ما ذكرت افضالها.. انا امي وابوي واخواني والدلع والدلال كله حولي.. وسويت هالشي يعني مالي عذر
اما هذا فماكان هناك شخص يرشده ولا ينصحه ولا يهتم به عشان جيه وصل لهالشي.. وقتها حسيت بدنائه نفسي..
أحمد: الله الله الله.. شو هالكلام الكبير.. دنائه.. ومادري شو.. الله يديم عليك العقل ان شاء الله
هادف: امين..

 
 

 

عرض البوم صور Cheer   رد مع اقتباس
قديم 12-06-08, 02:40 AM   المشاركة رقم: 22
المعلومات
الكاتب:
اللقب:
ليلاس متالق


البيانات
التسجيل: May 2007
العضوية: 28474
المشاركات: 412
الجنس أنثى
معدل التقييم: Cheer عضو بحاجه الى تحسين وضعه
نقاط التقييم: 20

االدولة
البلدSaudiArabia
 
مدونتي

 

الإتصالات
الحالة:
Cheer غير متواجد حالياً
وسائل الإتصال:

كاتب الموضوع : Cheer المنتدى : القصص المكتمله
افتراضي

 

اليوم الثاني.. في بيت خليفه
غزلان: حصووووووو يالحماره اشتقت لج والله
حصه وهي تشرب العصير: انزين.. لا اتسبين.. مشتاقه واتسبني..
غزلان: لا ادلعج انتي شو فيج
حصه: الله والدلع..
دخلت عليهم هند عشان اتسلم على حصه: هلا والله بحصوونه.. اشحالج؟؟ محلوه ماشاء الله.. يبالج ريل عيل..
حصه: هههههههه.. انتي هاي سوالفج من اتشوفيني اتدعين علي بريل.. شوفيج.. ملانه مني.. تبين الفكه
هند: افا والله.. بس اقول يعني..
غزلان: لا ماشي زواج.. ماعندنا بنات يعرسن قبل ما يخلصن الدراسه..
حصه: ان شاء الله يدووو..
الكل: ههههههههه..
غزلان: ايه انتي,.. قلتي لي اخر مره كلمتج من المانيا انج بتخبريني سالفه.. يلا خبريني..
حصه: أي سالفه؟؟
غزلان: شو عرفني.. لو اعرف ما بسألج..
هند: عيل انا طالعه بخليكم على راحتكم..
حصه: افا والله.. اذا انتي طلعتي انا بطلع وراج..
هند: تسلمين لي والله
غزلان: ماعليج.. ماشي طلعه من غرفتي الي يدخل غرفتي ما يطلع منها.. ايه انتي.. خبريني يلا..
حصه: اول شي خبريني وين صوغتي؟؟
غزلان: صوغتج.؟؟انتي ماشي ببلاش عندج... صوغتج محفوظه..
حصه: خل اشوفها يدامي عشان اصدق..
غزلان نشت ويابت الجيس الي حاطه فيه صوغه حصه ويابته لها: هاج.. يلا بوسي ايدي وقولي شكرا
حصه باست ايدها وعقب جان اتصدق عالصوب الثاني: اعععععع.. مالح..
غزلان عصبت وجان تضربها على ظهرها.. : مب ويه هدايا انتي..
حصه: هههههههه.. مشكوووره حبيبه قلبي انتي..
هند: ههههههههه والله انتي الي يطالعكم يقول مسرحيه ريه وسكينه.. عليكم سوالف
غزلان: يلا خبريني السالفه
حصه: عندي شكوى هندوو.. اختج وايد ملقوفه
هند: توج تدرين.. من زماااااااااااااااااان
حصه: لا ادري .. بس قلت اخبرج..
غزلان: يلا..
حصه: خل اشوف شو يايبه لي.. عشان اشوف الي يايبته لي يرزى ولا لا..
غزلان: اقووووووول انا يبت لج الصوغه.. وين الأوردر مالي..
حصه: اختج داهيه ما تنسى شي.. هاج
هند: شو هالدفتر..
غزلان: الليله بسهر عليه.. هالدفتر يختي فيه كل الأمور الي استوت في غيابي بالتاريخ
هند: يما يما منج..
حصه: غزلان.. هالبروش عندي مثله..
غزلان: من وين لج.. ماشي في البلاد شراته.. من وين؟؟
حصه: ادري ماشي هني مثله.. بس الي يايبنه لي.. بس تدرين سبحان الله نفس الذوق..
غزلان: ليش صخيتي وما قلتي منو الي يابه لج.. يلا خبريني؟؟
حصه: ترا اذا يبت طاريه بتكفخيني.. ابراهيم..
غزلان: جان زين ما يبتي طاريه.. اصلا هو قلاد اكيد شافني يوم خذته لج غياض فيني خذاه..
حصه: المهم سدي السالفه.. تدرين ما ارضى مهما يكون اخوي.. تبين اتعرفين السالفه ولا لا؟؟
غزلان: اكيد شو تتريين..
حصه: سمعي.. اقولج مره انا سايره مركاتوا ويا اختي وريلها.. وتمت اتكمل حصه السالفه الي صارت عن عادل.. وخبرتها الي صار.. .. بس والله تدرين.. لهاليوم مادري ليش وايد يطري على بالي.. فيه شي جذبني.. مادري شكله ولا اسلوبه الحلو.. مادري شي ..
هند: يمكن اعجاب..
حصه: مادري والله
غزلان: حصووووو.. كبرتي.. قومي خل اشبرج.. هي والله شكلج طولتي بعد.. قمتي اتحبين يا حصووو..
حصه : الله يسامحج سويتيها حب مره وحده.. لا حبيت ولا شي..
غزلان: ها عيل شو..
هند: اقولج اعجاب.. غصب تدفنين هالأفكار في راسها..
حصه: انزين.. المهم غيري السالفه.. باجر مدارس..
غزلان: هيييييييه .. هالسنه غير.. ثانويه عامه.. يعني نحن اكبر بنات..
حصه: هيه.. يعني شد حيل ومذاكره عدل..
غزلان: أي مذاكره.. مافي شي محسوب.. وانا الصراحه ناويه هالسنه استانس .. والعب شوي.. شو كل سنه نكرف.. بستانس عقب بنبدأ نذاكر..
هند: لا يا غزلان.. لا تفكرين جيه.. اباج اتشدين حيلج.. واتييبين فوق ال90.. خل عنج اللعب لاحقه عليه
غزلان: شو لاحقه.. عقب في الجامعه ماشي لعب.. خلني العب واشاغب.. بس مو معناته اني ما بذاكر.. بذاكر بس شوي اقل..
حصه: هي اتصدقين يبالنا نسوي شله زعامه السنه..
غزلان: انتي خلج بالحب..
حصه: لا حوووول احين هاي بتذلنا.. أي حب..
غزلان: ماعلينا.. المهم امي ياسه اتنادي علينا اكيد حطوا العشا يلا نشي نسير نتعشى..
نزلو وتعشوا.. وبعدها تموا يسولفون ويخططون شو يسون في اول يوم مدارس الي هو بيكون باجر الصبح.. وبعدها اتصلت في ابراهيم عشان يمر عليها.. هو قايل لها وموصنها يوم اتسير بيت غزلان ما تتصل في البيت وترد الا وياه هو..
حصه: يلا اترياك بسرعه..
غزلان: احين كارتيني.. وسيتي موجودات كانوا بيودونج..
حصه: لا والله تبينه ينتفني.. اخوي ويغار علي.. مايباني امشي في الفريج والعيال يلعوزوني..
غزلان: الله الله.. يلا نشي اخوج وصل..
حصه نشت عشان اتروح.. : وهي انتي .. ما بتين اتسلمين علي
غزلان: اقول هالسوالف مب علي انا...
حصه: اذاما ييتي تراني ما بكلمج وبحاربج
غزلان: ياربي شو هالبلشه..
ظهرت غزلان وا حصه عند الباب عشان اتسلم عليها.. وكارتيني الشغاله راحت تفتح الباب ومن فتحت الباب كان ابراهيم واقف مجابلهم.. وتم يطالع غزلان الي كانت معطته ظهرها,,
حصه: يلا باجر تعالي عندنا عشان انروح ويا بعض..
غزلان: لا انا بسير ويا شاهين دريولنا..
حصه: قلت لج بتين وياي يعني وياي.. انتي كل سنه اتيين وياي اشمعنا هالسنه..
غزلان: يصير خير.. يلا ابا اسير ارقد بتمين واقفه يعني
ابراهيم: الحمد لله على السلامه ..
غزلان صدت واتطالعته بنص عين وردت من غير نفس: الله يسلمك
ابراهيم: ويسلمج..
حصه: ويسلم غاليكم..
غزلان: شو فيكم.. يلا ريولي عورتني من الوقوف..
ابراهيم: اييب لج كرسي..
غزلان: لا شكرا بدخل البيت ارتاح..
حصه: يلا انا سايره البيت.. بخليكم رواحكم..
غزلان: تخبلتي انتي.. يلا سيروا..
وبندت الباب وتمت واقفه ورى الباب تتأكد اذا راحوا ولا لا.. بس ابراهيم تم واقف يهزب حصه..
ابراهيم: انتي وبعدين وياج.. ليش جيه.. ما تبيني استانس. افف منج
حصه: انت اتعرف غزالووو بتزعل مني اذا خليتكم جيه
ابراهيم:يلا امشي..
غزلان تمت واقفه وناقعه من الضحك.. طلع هادف من البيت وشافها تضحك..
هادف: الحمد لله والشكر.. العقل يمدحونه ترا..
غزلان: اووووه.. جب انت
هادف: شوفيج ممكن اعرف
غزلان: وفي غيره همتي دامتي الي يضحكوني..
هادف: هاييل احيدكم في رسوم أليس في بلاد العجايب شو يابهم هني؟؟
غزلان: حصه واخوها ابراهيم.. هاييل..
هادف: حصه ربيعتج.. اخوها شله؟؟
غزلان: اوه نسيت انت ما تعرف شي.. انت لازم انقول لك تاريخ العايله من اول ويديد
هادف: هي والله يبالي.. يالله خبريني شو سالفه اخوها..
غزلان: خل ندخل وبخبرك السالفه..
دخلوا وقعدوا في الميلس وتموا يسولفون وخبرت غزلان السالفه كلها لهادف.. الي كان مستانس ان في واحد مثل اخلاقيات ابراهيم يبا اخته بس كان متضايق لأن غزلان ما تباه.. بس ما يقدر يقول شي مهما يكون يتم هو الصغير..
غزلان: يلا نش ورانا مدارس باجر..
هادف: الله يعيني ماعرف كيف باجر بتجابل ويا الطلاب في المدرسه..
غزلان: انت ما عليك من حد.. ولا تنسى كون قوي.. ويكفي ان ربيعك الي طعنته يحبك وما يفارقك صاير ماشاء الله.. ويكفي انك رحت واعتذرت من اهله كلهم.. وانك صدق تبت لربك.. وخلاص شو تبا اكثر من جيه.. عندك ربيع مثل محمد الي لو حد بداله جان فكر في الإنتقام.. وعند ولد عم اسمه ناصر لا تنساه..
هادف: ناصر.. لولاه جان محمد للحين شايل علي..
غزلان: خلاص انت اشعليك من الباقي عليك من الي اخترتهم ربع لك احين.. ومن نفسك..
هادف: يلا انزين.. انتي بعد بسج سهر جدامي يلا.. لا تنسين تراني ريال البيت من بعد ابوي وسعيد
غزلان: ترا هالمشكله..
..

 
 

 

عرض البوم صور Cheer   رد مع اقتباس
قديم 12-06-08, 02:42 AM   المشاركة رقم: 23
المعلومات
الكاتب:
اللقب:
ليلاس متالق


البيانات
التسجيل: May 2007
العضوية: 28474
المشاركات: 412
الجنس أنثى
معدل التقييم: Cheer عضو بحاجه الى تحسين وضعه
نقاط التقييم: 20

االدولة
البلدSaudiArabia
 
مدونتي

 

الإتصالات
الحالة:
Cheer غير متواجد حالياً
وسائل الإتصال:

كاتب الموضوع : Cheer المنتدى : القصص المكتمله
Hello

 

اليوم الثاني الكل قايم بنشاط.. ومستانس لأنه اول يود دوام.. وداد بعد راح اترد دوامها.. وغزلان اتزهبت عشان اتروح بيت حصه ويروحون سوى المدرسه.. اما هادف فمر عليه ناصر ومعاهم كان محمد لنهم قرروا عشان يتحدون الكل ويبينون ان كل شي رد طبيعي يوم بيشوفون محمد وهادف ويا بعض..
ناصر: ماعليك منهم.. انت اتعرفني على كثر ما يعيبون علي انا ما اعطيهم سالفه
محمد: هي والله.. نحن ما علينا من حد.. اهم شي انك ندمت وتبت
هادف: لا تتخلون عني دخيلكم.. ترا والله الموقف بيتم صعب علي.
محمد: ماعليك.. صدقني بتم ربيعك لآخر يوم في عمري.. يكفي ان ابوي وامي راضين عليك.. ويوم هم يرضون على شي انا بعد برضى عليه..
هادف: تسلم لي..
..
غزلان في بيت حصه..
غزلان: عنبووو.. مب رقاد هذا.. قلت احين بتنش قبلي.. يلا بسرعه مابا شله منال يوصلون قبلنا ويقعدون مكانا المعتاد
حصه: ماعليج انتي منهم.. يلا اضوي.. خلصت..
غزلان: سرينا.. بس اقول منو بيودينا..
حصه: روميو..
غزلان: انا خلاص بروح ويا الدريول..
حصه: اصطلبي احسن لج.. يلا بسرعه
غزلان: اوهووووو.. انتي ليش تبين اتضايجين فيني في اول يوم دوام..
حصه: شو اسوي ما ارتاح الا يوم اشوف هالبراطم تنزل..
غزلان: سخيفه..
ظهروا من الغرفه ونزلوا عشان يرحون المدرسه.. وكان ابراهيم يترياهم بشوق عشان يشوف غزلان.. ومن شافها ما حس بعمره الا ينزل ويفتح الباب لهم..
حصه: شوفي الحب انتي منو قدج.. انا في حياته ما سواها لي..
غزلان وهي تضربها في بطنها: جب انتي..
حصه: مجرمه..
ركبوا السياره والصمت معمر المكان.. وكان ابراهيم ما يشل عينه من عيون غزلان وهو يطالعها من الجامه وهي منزله راسها من الفشيله ونفس الوقت مغيضه .. ودها تجلع عيونه.. ولما وصلوا نزلت غزلان بسرعه من السياره..
ابراهيم: حطي بالج عليها..
حصه: وانا؟؟
ابراهيم: انتي ما ينخاف عليج.. رياله..المهم يلا فارجي..
حصه: يقولي فارجي ويرمسني وهو يطالع برع.. والله حاله.. الحب بلا.. يلا باي..
ابراهيم: انا بمر عليكم الظهر..
حصه: حلاته.. نركب رنج.. منو قدنا بس..
ابراهيم: يلا برع لوثتي سيارتي..
حصه: لاوالله.. انا اراويك جان ما سرنا ويا دريولهم..
ابراهيم: افا والله.. لج مني طلعه للسينما..
حصه: هههههه.. اوكي رضيت..
نزلت حصه من السياره وربعت عند غزلان الي كانت اتحوس واتدور على صفها.. وهم يدورون في قوائم الصفوف.. كانت المديره واقفه واتسلم على البنات.. وطبعا المديره هي ام عادل.. ومن شافت حصه على طول سارت صوبهم..
المديره: السلام عليكم..
غزلان: او .. ابله نعيمه.. اشحالج؟؟ لج وحشه..؟؟
المديره: بخير.. كل عام وانتوا بخير..
غزلان+حصه: وانتي بخير..
حصه: ها شو.. مجهزين نشاطات يديده.. تراني يايه ومتحمسه..
المديره: ههههه.. وحليلج.. اسمج حصه اظني صح..
حصه: هي..
المديره: ماعليه.. شي نشاطات.. بس مابا النشاطات تشغلكم عن دراستكم.. لا تنسون انتوا ثانويه عامه.. يعني اباكم ترفعون راسي .. ابا اوائل من مدرستي..
غزلان: الله يقدرنا..
حصه: الصراحه من بعد مخططات غزلان اشك.. ؟؟
المديره: ليش شو مخططاتها؟؟
غزلان وهي تقرص حصه :ايه خبله انتي..
المديره: شو فيج.. خلها ترمس عادي..
حصه: بقول انا ماعلي منج.. ناويه انشاغب شوي.. اونه عشان اخر سنه..
المديره: عاد الي يسمعج يا غزلان انج هب شيطانه ولا كنج في اليوم الواحد اكثر من مرتين لازم اتجابل وياج.. بس مشكلتي ماروم اقول شي لأنج في نفس الوقت شاطره.. انا ما امانع شطانتكم.. لأنه من حقكم بنات في هالعمر تستانسون.. بس مب انكم تهملون الدراسه.. ولا الشطانه توصل لقله الأدب..
غزلان: لا افا عليج ابله.. عند حسن ظنج ان شاء الله
المديره: ان شاء الله.. الا اقول حصه.. شو ناويه تدرسين.. ؟؟
حصه: ان شاء الله ناويه ادرس طب أسنان..
المديره: عيل يلا شدي حيلج في النسبه العدله.. يلا بخليكم..
راحت المديره بعيد عنهم وغزلان تتحرطم: احين اشمعنى تسألج انا مالي رب يعني.. شو بلاها مهتمه فيج ماشاء الله..
حصه: لأني مب شيطانه شراتج فضحتينا..
غزلان: اسكتي انزين.. شكله منالووو هذوم جدامنا.. خل انروح الصف نحجز لنا مكان..
حصه: هههههه.. يلا .. الي يسمعج يقول شافت يني وخايفه..
غزلان: اليني يخاف منهم اصلا.. عفان الله هب بنات..

 
 

 

عرض البوم صور Cheer   رد مع اقتباس
قديم 18-06-08, 02:43 AM   المشاركة رقم: 24
المعلومات
الكاتب:
اللقب:
ليلاس متالق


البيانات
التسجيل: May 2007
العضوية: 28474
المشاركات: 412
الجنس أنثى
معدل التقييم: Cheer عضو بحاجه الى تحسين وضعه
نقاط التقييم: 20

االدولة
البلدSaudiArabia
 
مدونتي

 

الإتصالات
الحالة:
Cheer غير متواجد حالياً
وسائل الإتصال:

كاتب الموضوع : Cheer المنتدى : القصص المكتمله
افتراضي

 



الجزء ( 6 ) : للحب عنوان

ملخص الجزءالسابق: طلعت هند بالسلامه من المستشفى.. وتفكير خالد إلي انجذب صوب غزلان.. والصلح الي تم بين هادف وأبوه.. وطبعا بدت دوامات المدارس بالنسبه لناصر وهادف وغزلان وحصه.. وأحمد طلعا الوحيد الي بعيد عنهم في كلية الشرطه

خالد طلع من المستشفى بالسلامه ورد البيت.. ودخل غرفته .. تم يطالع في المراية.. سرحان ويتمعن في شكل الجروح الي على ويهه من أثر الحادث.. وما وعى إلا على رنة التليفون كان ربيعه عبدالله متصل.
خالد: هلا والله.. إشحالك عبود؟
عبدالله: بخير الحمد لله على السلامه.. جيه تطلع من غير لا تقول لنا
خالد: الله يسلمك.. شو اسوي ما بغينا انلعوزك.. اخبرك عبود بذمتك خشمي ما يباله عمليه شرات هاييل الي يسوون عمليات..
عبدالله: هههههههه.. اشفيك.. خشمك ما بلاه شي.. شو هالمنكر بعد.. والله واتخبل الريال
خالد: يعني الغزاله بتحبني جيه.. ؟
عبدالله: هههه.. والله هالغزاله مغربلتنك الظاهر.. الي مادري لين وين راح توصلك
خالد: جب انت الواحد ما ياخذ منك لا حق ولا باطل.. وانا عرفت اسمهم وما يخصني بييب رقمهم يعني بييب
عبدالله: اقول اجلب ويهك.. وخل انشوفك الليله.. الصراحه انت اهبل..
خالد: انا اراويك خل اشوفك ويا هالويه.. مع السلامه..
بند خالد الخط عن عبدالله وتم سرحان يفكر في غزلان الي كانت ماخذه كل تفكيره و.. وما حس بعمره إلا انه رقد وراح في سابع نومته.. دخلت عليه امه عشان تتطمن عليه لقته راقد ومب متلحف لحفته وظهرت.. ..
..
في المدرسة..
غزلان كانت متضايجه ليش انهم مفرقينهم السنه عن بعض .. يعني هي في صف وحصة في صف.. فقالوا بنسير صوب المديرة وبنرمسها..
في غرفه المديره..
رن تليفونها ويوم ردت عليه كان عادل ولدها الي متصل..
عادل: الو اشحالج امي؟؟ شخبارج؟؟ شو علومج يا احلى أم في الدنيا؟
ام عادل: اخ منك انت.. الحمد لله شو عندك متصل لي من صباح الله خير؟
عادل: ماشي مشتاق لصوتج يمي..
ام عادل: اونننه..
عادل: اقول امي انا اليوم بمر عليج؟
ام عادل: لا ما يحتاي.. انا يايه بموتري وبرد بموتري..
عادل: لا لا .. ما يصير.. ام عادل.. ترد بموترها.. وولدها عادل موجود.. لا لا لا
ام عادل: اشفيك انت؟عن العياره ..
عادل: انزين انا بمر عليج مافيها شي.. اتخققي فيني جدام البنات
ام عادل: وسيارتي؟؟
عادل: خليها تبرع لأمور المدرسه
ام عادل: لاوالله.. ماشي.. قلت لك انا برد بموتري وبس.. يلا عاد وراي شغل..
عادل: امي شفتيها؟؟
ام عادل: لا..
عادل: ليش غايبه.. عسى ما شر.. فيها شي؟؟ صايبنها شي؟؟
ام عادل: بل بل بل.. بعدها ما صارت حرمتك عشان هالكثر اتحاتيها..
عادل استحى من كلام امه وغير الموضوع.. : خلاص عيل اشوفج اليوم عالغدى.. باي..
ام عادل: اخ منك يالعيار.. مع السلامه
بندت الخط وهي مستانسه لأنه اول مره اتشوف عادل متحمس للزواج هالكثر.. ولا بعد مستانس هالكثر.. هالشي فرحها وايد.. وسمعت دقت الباب... ويوم دخلوا شافت الثنائي المرح غزلان وحصه داخلين والحزن في ويووهم..
غزلان +حصه: السلام عليكم
المديره: وعليكم السلام.. غريبه ليش يايين من اول يوم عندي معقوله شطانتكم بدت وطردوكم؟؟
غزلان: لا الله يسامحج ابله.. نحن يايين ونبا نطلب منج طلب..
المديره: اتفضلوا..
غزلان: ليش فرقتونا؟؟ حرام .. هاي اخر سنه.. ابا اكون ويا حصووو..
حصه: هي والله انا بعد ابا ابله.. كافي ان السنه اليايه كل وحده بتسير تخصص ولا جامعه غير عن الثانيه..
المديره: اكيد الوكليه غيرتكم عشان المشاغبات..؟
غزلان: عاد على اخر سنه اتغيرونا والله حرام..
المديره: خلاص خلاص.. لا تصيحون.. انا برمس الوكيله عشان اتردكم.. واترد اي حد يبا يرد صفه الجديم.. خلاص راضين علي احين..
حصه: مشكوووووره يا احلى مديره في الكره الأرضيه
غزلان: والمريخ.. والمشتري.. وزحل.. والزهره.. ونبتون.. وبلوتو.. وكل الكواكب..
المديره: ههههههه.. يلا روحوا للوكيله وانا يايه وراكم احين..
طلعوا من الغرفه وهم مستانسين حدهم واخيرا بيجتمعون سوى في نفس الصف.. ام عادل تمت سرحانه وهي اتشوف الإبتسامه على ويه حصه.. واتخيلت نفس الإبتسامه لعادل يوم بتكون من نصيبه..
..
وغزلان نقلوها لصفها الجديم .. وردت ويا حصه.. وطبعا غزلان كعادتها ما تنسى شغل الزعامة.. لازم تسحب حصة وياها في مغامراتها بس هالمره حصه ما سمعت لها.. دق جرس الحصه الأخيرة وغزلان ظهرت من الصف تمت اتحوط شوي في المدرسه.. بعد ما مر على الحصه ربع ساعه دخلت... كانت عليهم مدرسة الكيميا الي ادرسهم من الصف الأول الثانوي.. أبله مريم..
دشت غزلان الصف وبصوت عالي: الســــّلام عليكم.. ليش ما تردون؟؟
أبلة مريم: لا والله؟
غزلان: أوه.. أبلة مريم هني.. شحالج؟ شخبارج؟؟.. كل عام وانتي بخير؟؟
ابلة الكيميا: ردي مكانج يلا..
غزلان: أفا.. ما توقعت منكم جيه.. شو سويتوا بأبله مريم.. اقولها اشحالج اتقولي ردي مكانج..
أبلة مريم: وبعدين يعني..
البنات تموا يضحكون على تصرفات غزلان واستهبالها وخبالها.. وهي ردت مكانها.. وناقعه من الضحك.. شافت كتاب الكيميا محطوط على طاولتها.. بس ما كان عندها كتاب النشاط..
غزلان نشت وحاطه ايدها على خصرها: لا والله.. اشمعنى انا الوحيده الي ما عندها كتاب نشاط.. ناسيني من الحسبه..
أبلة مريم اتعرف سوالف غزلان وتمت تضحك عليها: لا حووول.. أم لسان.. من يوم ما درستج من اول ثانوي للحين.. ما تكبرين ولا تتغيرين..
غزلان: ترا ماشي أبلة كيميا غير وحدة بس حلوه مثلج تتحملني..
ودق الجرس وطلعت غزلان ويا الأبلة وهم يسولفون طول الدرب عشان تاخذ كتاب النشاط من المخزن.. وبعدها ظهرت ويا حصة عشان تروح صوب المواقف ويردون البيت.. ومن ظهروا شافوا ابراهيم يترياهم تمت غزلان تتحرطم وما تبا تروح وحصة تسحبها غصب..
غزلان: مابا قلت لج مااااااااابا.. شو ما تفهمين عربي.. غصب يعني
حصة: هيه غصب.. ولا تراني بزعل..
غزلان: انا مادري كيف يتحمل ملاقة اخوج.. يلا امشي..
حصة: عقب الزواج بتتحملين كل شي..
غزلان: شو.. زواج.. لا لا لا.. اخاف منكم اتورطوني اتودوني عند الملاج احين مافيني.. مجرمين خليني.. مابا ادريبج انتي متفقه ويا اخوج ادري..
حصة: انتي وايد متأثره بالمسلسلات.. امشي بسرعه
ركبوا الموتر.. وابراهيم كان مستانس وايد لشوفة غزلان.. بس الي زعله ان غزلان من ركبت الموتر تغطت..
حصة؟: انتي عكس الناس من تركبين الموتر تتغشن.. وبرع لا
غزلان: مو شغلج..
ابراهيم: خلي البنت على راحتها اشفيج انتي..
حصه: تدرين الحركة الي سويتيها في ابله مريم حللللوه..
غزلان: بعد عشان اتعرفين.. توه هاي اول جرعه اتريي الباجي اكثر..
ابراهيم: شو سويتو اليوم.؟؟
غزلان: شو هاللقافه عفان الله.. وقف وقف بنزل هني بكمل مشي للبيت
حصه: قعدي شو اتخبلتي انتي.. مب صاحية اليوم شكلج.. تبين تنصلخين في هالحر..
غزلان: اصلا انا اصحى منج.. ما كنت صاحية يوم ييت وياج انتي..
حصه: اقول نزلي وصلنا بيتكم.. اشوفج العصر عشان انجلد الكتب سوى
غزلان: اوكي يلا باي
ابراهيم: في حفظ الرحمن..
غيضت غزلان من ابراهيم بس طنشت ودخلت البيت وشافت هادف ووداد قاعدين في الميلس يسولفون.. دخلت عليهم وكان هادف حاط راسه على ريل وداد وهي كانت تلعب في شعره..
غزلان: لا والله .. كل هذا يصير وانا محد
هادف: وصلت الحسوده..
وداد: فديت غزولتي انا.. تعالي وقولي لي عن أول يوم دراسي.. كيف كان؟
غزلان: لا بالأول خل اسمع يوم الدراسي لهادف..
هادف: لازم يعني هاللقافه..
غزلان: وهاي قعده اتريا حضرتك تنطق..
وداد: انا سمعت السالفه مابا اسمعها مره ثانيه
غزلان: والله مب مشكلتي جان اترييتي لين ما اوصل..
هادف: اسمعي.. اليود دشيت المدرسة وكان محمد وناصر وياي.. وكل شوي انا ومحمد نسولف بصوت عالي ونضحك.. والشباب مب مصدقين ان هذا الي وياي هو محمد نفسه.. وشله حمدان كانوا دوم يحطون على نصوور قاموا يخافون مني.. اذا انا مشيت في درب هم يمشون عكسه.. والأساتذه ما يرمسوني.. ولا المدير يطالعني بنظرات اجرامية وده يطردني من المدرسة.. راح له محمد وفهمه كل شي.. وتم يمدحني جدام المدير وقال له انه رد علاقته وياي لأنه عرف إني فعلا تغيرت.. وقتها صدق استانست وتطمنت ان الله عطاني ربع بمعنى الكلمة.. وحسيت ان الله عوضني..
غزلان: اخي العزيز.. اني اهنئك بهذا الصديق الحقيقي الذي لديك.. احتفظ به.. وابقى معه ابد الدهر.
هادف: شكرا يا اختاه على هذا الشعور الطيب..
وداد: لقد حان وقت الغذاء.. هلمووا.. هههه الله يخس ابليسكم خليتوني اتخبل شراتكم..
بوسعيد: لا والله بغزلان حبيبتي.. ليش ما بدلتي للحين..
غزلان: كنت اسمع قصه كليله ودمنة من هادف..
هادف ضربها على رقبتها.. وهي صرخت ..: انا اراويج..
ام سعيد: الله يخليكم لبعض على طول ولا يفرقكم يا عيال..
الكل: آميييييييين
هند: انا الصراحه يوعانه مافيني اتريا.. الغدا بيبرد ترا
.....
سلطان قعد يقيل ويا هله والكل يسولف.. فدوى كانت تلعب ويا عيالها.. واما الباقي فيسولفون ويا بوسلطان وام سلطان..
سلطان: اقول امي.. ما قلتي لي متى قررتوا املج على وداد.. ترا انا حدّي مستعيل..
جاسم: عاش المعرس..
أم سلطان: خل بالأول احل سالفة مريم
سلطان: لاحووول.. انا شو ذنبي يوم الله رزقنا ببنت خالة علة ..
أم سلطان: مب ذنبك.. ذنبها هي انها ياهل وما عندها عقل وما تعرف اتفكر صح
سلطان: مشكله يوم نبتلش بيهال..
ناصر: والله من يوم ما خبرني أحمد وقالي عن اسلوبها وهي ترمس كرهتها ..
أم سلطان: الله يهديها..
جاسم: ابا افهم.. شو تتحرى الزواج غصب.. ؟؟ خل تتريا نصيبها.. لازم تخرب على غيرها..
سلطان: الله يخليكم صخوا عن طاريها انا روحي واصل حدي منها..
بوسلطان: اسمع يا سلطان اشرايك ارمس عمك الليله اقول له اذا طاع يعني.. انا نملج بكم في رمضان؟؟
سلطان ابتسم واستانس على راي ابوه: صدق.. والله ياريت
ام سلطان: خوش فكره..
بوسلطان: خلاص عيل الليلة بنسير بيتهم.. وبنرمسهم في الموضوع
سلطان: بس وداد قالت لي مره انها ما تبا حفلة غير يوم سعيد اخوها يكون موجود
بو سلطان: مو مشكله.. اهم شي الملجه..
سلطان: اقول جاسم ما تعرف رمضان السنه متى راح يكون؟؟
الكل تم يضحك على سؤال سلطان الي بين اشكثر مستعيل على هالزواج..
.. ..

 
 

 

عرض البوم صور Cheer   رد مع اقتباس
قديم 18-06-08, 02:45 AM   المشاركة رقم: 25
المعلومات
الكاتب:
اللقب:
ليلاس متالق


البيانات
التسجيل: May 2007
العضوية: 28474
المشاركات: 412
الجنس أنثى
معدل التقييم: Cheer عضو بحاجه الى تحسين وضعه
نقاط التقييم: 20

االدولة
البلدSaudiArabia
 
مدونتي

 

الإتصالات
الحالة:
Cheer غير متواجد حالياً
وسائل الإتصال:

كاتب الموضوع : Cheer المنتدى : القصص المكتمله
افتراضي

 





بيت عادل

عادل طول الوقت يحاتي موضوع حصة.. فقرر انه يفاتح امه بالموضوع ويشوف شو سوت.. كانت ام عادل واميره قاعدين في الميلس يسولفون ..
أميره: يني من يبنا طاريك طلعت لنا؟
عادل: ليش شو كنتوا اتقولون عني؟
أم عادل: كنت ارمس اختك عن حصه.. وقررنا خلال هالإسبوعين نروح بيتهم..
عادل: إحلفي.. قولي والله؟؟ يعني بتخطبونها لي.. توني كنت ياي ارمسج في هالسالفه لأني ماباها اتطير من ايديني
أميره: لا يكون حمام وانا مادري.. دوومك مستعيل..
عادل: المصرقع ريلج.. انجبي انا ارمس مدام نعيمه.. إم عااااااااااادل.. ومليون خط تحت عاااااادل
أم عادل: هههه.. لعلني ما انحرم من هالفرحة.. وعقبال ما افرح فيك معرس وارقص في عرسك..
عادل: انتي اخطبي ولي.. وخل اعرس.. وبترس لج هالبيت كله عيال.. بييب يوسف.. وريم.. وعايشه.. وأحمد.. وغيرهم..
أميره: ولا بعد سماهم بعد.. انت شو ناوي تقضي على المجتمع بعيالك
أم عادل: ربي يهنيك ويرزقك بالذرية الصالحة يا رب.. وانت بعد رمس استاذك..
عادل: احين.. احيييييين برمسه..
أميره: يوم اقول مصرقع ما تصدقوني.. ههههههه
.. .. ..
في بيت العم خليفهأبو سعيد
كانت وداد قاعده ويا غزلان وحصة اتساعدهم في تجليد الكتب.. وهند اتساعد امها في شغل البيت..
هادف: وييييييو.. يهالوو.. بعدكم انتوا على سالفه تجليد الكتب..
وداد: صح .. حبيبي هات كتبك خل اجلدهم..
هادف: لا شو.. تبون يقولون عني مصري.. ولا ياهل.. مابا ..
غزلان: انت اخس كتب كتبك .. مقطعه على اخر السنه وها كله لنك ما اتجلد..
حصه: هههه.. اشفيكم كلتوا الولد خلوه.. يوم بتتقطع كتبه ذاك الوقت نحن بنضحك عليه..
هادف: جب جب .. فالحين ترمسون بس.. صدق انكم حريم
رن تليفوون البيت على طول ربعت تشل التليفون..
هادف: نشت البداله.. الي يشوفها جن التليفون بيركض عنها وبيشرد..
غزلان: ما عندي سالفه ارد عليك.. ألوووووو..
الطرف الثاني--: السلام عليكم
غزلان من سمعت صوت ريال اتخرعت لأن الصوت غريب عنها وغير جيه الرقم أول مره اتشوفه.. : منو؟
--: انتي الغزاله.. أنا متأكد من صوتج..
غزلان: هيه انا غزلان .. منو وياي؟
--: بعد اسمج غزلان.. صدق اسم على مسمّى..
غزلان: نعم.. وبعدين.. منو وياي؟؟
وداد: هاتي التليفون خل اشوف منو؟
غزلان: ماعرف.. واحد مادري بلاه يستهبل..
طبعا الطرف الثاني من سمع صوت وداد.. بند بسرعه .. ووداد ما سمعت غير صوت الخط وهو ينقطع طووط طووط
وداد: الله يغربلهم.. يلعوزون الخلق.. بس ما عليه ها رقمه في الكاشف اذا اتصل مره ثانيه بخلي سلطان يتفاهم وياه.. خل اكمل تجليد احسن
غزلان: لا ما يحتاي.. انتي سيري ساعدي امي.. وأنا بجلد الكتب ويا حصه.. واذا بغينا مساعده الأخ هادف موجود..
هادف: ايه انتي.. انا ساير .. ما بساعد ولا شي..
وهي رن التليفون عصبت وداد واتحسبت ان نفس الشخص رد يتصل.. وردت بسرعه من غير لا تتطالع الرقم.. وافتشلت يوم سمعت صوت مرت عمها أم سلطان
وداد: آسفة عموو.. بس توه واحد متصل يستهبل اتحريتج هو.. المهم اشحالج؟؟ وشخبارج؟؟
أم سلطان: بخير طاب حالج.. أقول الغاليه اليوم طالعين مكان؟؟
وداد: لا عمو ليش؟
أم سلطان: قلنا بنيي الليلة عندكم وأنا وعمج والعيال
وداد استانست من سمعت هالرمسه.. أكيد سلطان وياهم: هيه هيه.. حياكم الله .. البيت بيتكم.. أي وقت
أم سلطان: خلاص عيل انتي سيري خبري أمج .. ونتشاوف عقب
وداد: خلاص صار..
بندت وداد الخط وربعت بسرعه عشان اتخبر امها السالفه.. وأما غزلان فكانت اتفكر فاللي متصل.. كيف عرفها.. ومنو هذا؟؟ .. والأفكار اتوديها واتييبها.. لاحظت حصه القلق الي باين على عيون غزلان ودرت الي بيدها وبدت تسألها: حووو.. اشفيج؟؟ شو صاير ؟؟ روميو مات..
غزلان: يالسخيفه.. تمت تتطالع حواليها اذا في حد يسمعهم من اهلها ولا ماشي.. سمعي.. الي كان متصل توه عرفني.. قالي انتي الغزاله اكيد نفس الصوت..
حصه وهي فاجه عيونها وبصوت عالي: منو هذا.. ؟
غزلان وهي تضربها على راسها: يالغبيه خفي صوتج.. فضحتينا.. ماعرفه.. بس خايفه والله
حصه: لاحوووول.. ومنو هذا.. انا اموت واعرف..
غزلان: مادري بس ما اتوقع حد من الأهل لأنه صوته مب مألوف.. والرقم غريب
حصه: يعني ظهر رقمه..
غزلان: هيه
حصه: شوفي اذا اتصل مره ثانيه سأليه انت منو؟؟
غزلان: لا والله احلفي..
حصه: شو بلاج غبيه.. ما قلت اتعرفي عليه.. قلت سأليه انت منوو.. يعني شو بيطلع لج من السماعه مثلا
غزلان: اسكتي اسكتي.. وداد يايه صوبنا مافيني اتعرف..
وداد: اليوم عمي وعياله بيون..
غزلان وبخبث: كل عياله.. حتى ولدهم العود..
حصه: أكيد.. أصلا ما يستوي ايون بيتكم ومن غيره ما تحلى القعده اصلا
وداد: سخيفات.. اصلا انا ما عندي سالفه اخبركم
هند: متى اتحيدينهم عندهم سالفه.. خبريني انا..
وداد: امي ما قالت لج.. يقولج عمي ومرت عمي وعيالهم بيونا..
هند: هييه.. بس حسافه أحمدوو محد..
غزلان: ماعليه المهم نصوور الدعله موجود
هند: تدرون.. اشتقت لسعيد خاطري ارمسه..
وداد: وانا بعد اتصدقين.. نشي خل اندق له..
وهني رن تليفون حصه وكان الرقم غرب.. ترددت انها ترد في البدايه بس عقبها ردت..
حصه: ألوو..
أبلة نعيمه: السّلام عليكم.. وياج أبله نعيمه
حصه وهي متفاجأة: أبـــله نعيمه.. هلا. وعليكم السلام
المديره: أنا خذت رقمج من أبلة هنادي لأنج دوم على اتصال وياها.. اشحالج ؟؟
عادل كان لاصق بالسماعه يبا يسمع صوت حصة وأميره ناقعه من الضحك عليه.. تم يصّر على أمه انها تتصل فيها وتسألها إذا كانت مخطوبه ولا لا.. وتفتح وياها السالفه .. لأنه مب قادر يصبر زود...
حصه: الحمد لله بخير.. بس غريبه صاير شي.. حد مشتكي عليّ؟
المديره: هههه.. لا تخافين محد مشتكي ولا شي.. ما وحّالكم اتداومون.. بس بغيت منج رقم أمج إذا سمحتي..
حصه: شووو امتلكها الخوف تمت اتقطع في الكلام وتبلع ريجها.. أأأأمي.. لـ..لـ.. لـ.. ليش؟
المديره: شو بلاج خفتي.. قلت لج لا تخافين.. انتي قولي لي منو وياج؟
حصه: وياي غزلان,,, ليش؟؟ والله طاح قلبي..
المديره: عطيني برمسها..
حصه: غزلان.. المديره تبا اترمسج
غزلان تمت اتأشر لحصه ليش؟.. ردت عليها حصه بالإشارات ماعرف..
غزلان: ألوو.. السلام عليكم.. اشحالج ابله؟
المديره: وعليكم السلام.. بخير.. اسمعيني.. بقولج شي.. ومابا حصه اتعرف شي عن الي بقوله لج لين ما ارمس امها..
غزلان: ان شاء الله..
حصه تمت اتحاول تلصق في غزلان عشان تتسمع بس غزلان تصدها وما تخليها..
المديره: بغيتج اتقولين لي.. حصه مخطوبه لحد.. محيرينها لحد..
غزلان: اممم... لا
المديره: الله يبشرج بالخير.. انزين.. عطيني يما رقم امها..
غزلام: حصوو.. كم رقم امج؟
حصه: ******.. بصوت واطي.. شو السالفه؟
غزلان: هاج ابله الرقم .. سجلي عندج ******
المديره: مشكووووره.. يلا مع السلامه.. مثل ما وصيتج مابا حصه اتعرف بشي..
غزلان: خلاص صار ان شاء الله..
بندت غزلان الخط وهي تضحك ونفس الوقت اتحاتي من كلام المديره ودها اتعرف شو الموضوع مب قادره..
حصه: غزالوو.. شو السالفه خبريني..
غزلان: حالي من حالج مب فاهمه شي..
حصه: ضحكة المكر هاي ماحبها.. ممكن اتقولين شو السالفه؟؟
غزلان: صدقيني ماعرف شي.. انتي روحي بيتكم واعرفي السالفه من امج.. وخبريني..
حصه: لا اول لازم اعرف منج..
غزلان: بتروحين بيتكم ولا افرج..
حصه: والله اذا طلعتي اتعرفين شو السالفه وما قلتي لي.. براويج
غزلان: والله ماعرف شي.. انتي روحي..
حصه: اقول.. انا بسير البيت.. انتي الواحد ما ياخذ منج لا حق ولا باطل..
غزلان: احسن.. يلا برع..
طلعت حصه وربعت بيتهم عشان اتعرف شو السالفه.. اول ما دخلت لقت سالم ريل عزيزه اختها يطالعها ويضحك.. وعبدالله كان يلعب ويا عياله من شاف حصه ودر عياله وتم يأشر لخوله مرته الي تمت اتيبب .. شكت ان السالفه مب هينه وفي شي صاير.. لأن الكل مب على حاله.. ومخبين شي.. سارت الميلس عشان اتشوف امها الي من شافت حصه ربعت وحضنت بنتها وتمت اتصيح: يا عيني عليج يا بنتي كبرتي وصرتي عروس وقاموا الناس يخطبونج.. كبرتي وكبرتينا وياج...
حصه: ممكن افهم السالفه.. ترا انا بتخبل مب فاهمه شي..
عزيزه: خلوني انا بفهمها.. ترى هاي طول عمرها بتم خديه ولا بتفهم ..
ابراهيم توه كان داخل البيت.. ومعصب ليش ان حصه ردت البيت من غيره لا تترياه.. : السلام عليكم.. انتي هني؟؟ انا مب قايلج اترييني انا بييج؟؟
حصه: اووه.. انا مب فايجه لشي.. فهموني ممكن.. شو السالفه؟
ابراهيم: اي سالفه.. شو السالفه ..
ام عبدالله: اقعد امي بخبرك شو السالفه..
بو عبدالله: سمعي يا بنتي انتي كبرتي وصرتي حرمه.. ماشاء الله عليج..
حصه وهي تقاطع كلام ابوها: وبعدين والله صدعت وافتر راسي.. ابا افهم .. مب قادرة اجمع أبا افهم الله يخليكم حد ينطق ويقول لي.. شو بتتبرون مني؟؟ ولا هي صح.. انا مب بنتكم وانتوا متبنيني واحين لقيتوا اهلي..
خوله: ههه وحليلج متاثره وايد بالأفلام المكسيكيه..
ابراهيم: انا بخبرج بمعلومه.. شوفي انتي شفناج عند الزباله لافينج بقماط ابيض.. لا لالا .. وردي.. وفارينج.. وشليناج ويبناج عندنا وكبرناج
الكل تم يضحك على شكل حصه الي شوي وبتنفجر صياح
أم ابراهيم: بس دوختوا بنتي.. خلوها عروس تستاني.. سمعي يا بنتي مديرتكم خطبتج لولدها.. وهذا الشي الي يخليني انا وابوج واخوانج اسعد اهل في الدنيا وفخورين ان عندنا بنت مثلج.. الي اختارتج انت يمن بين المئات البنات الي جدامها وبنات العوايل الي تعرفهم..
نشت ام ابراهيم وحضنت بنتها الي كانت تذرف الدموع من عيونها والفرحمه مب شايلتها.. ما تعرف شو اتسوي.. ونظره اخوانها لها.. والفرحه الي في عيونهم.. حست بفخر من نفسها.. واستانست يوم انها قدرت اتفرح اهلها بهالطريقه.. ما تصورت انها تكون سبب فرحتهم لهالدرجه..الخجل والحيا كان مالي خدودها.. بسرعه نشت وركضت عشان تروح غرفتها.. بندت البال وساندت ظهرها على الباب واتصيح من فرحتها.. ماكانت مصدقه الموقف الي هيه فيه.. كيف هذا كله يصير في يوم وليله.. كانت اتحس عمرها في حلم.. وما ودها اتنش منه.. فتحت مقبض شعرها ونزل شعرها الأسود الطويل وانسدل على ظهرها ونشت راحت اتجابل المنظره تمت تتطالع عمرها.. في المنظره وتتأمل في ملامحها وتتخيل عمرها عروس.. والطرحه على راسها.. والناس قاعدين يطالعونها.. وحست بالخجل من أفكارها.. وما قامت منها إلا بصوت دقة الباب الي ربعت عشان تفتحه شافت ابراهيم واقف جدامها ويبتسم لها..
ابراهيم: ها يالعروس.. تستحين بعد.. خبريني شو رايج ياللي سمعتيه..
حصه: ها بإرتباك.. رأيي.. أنا.. في شو..
ابراهيم: اخ منكم انتوا يالبنات.. شطار في الإستهبال.. يلا عاد.. انا برهوم.. ماترومين اتخشين عني شي..
حصه: اولا انتوا بعدكم ما سألتوا عن الريال.. وثانيا لازم اشوف صورته على الأقل
ابراهيم: بس سالم يقول انتي شايفتنه وهو شايفنج.. والظاهر خبلتيه من شافج.. على طول خطبج.. وها دليل انه ريال محترم ما يفكر انه يلعب..
حصه: بس انا ما شفته ..
ابراهيم: مادري ناصر يقول مره في مركاتو شافج وانتي شفتيه هو نفسه قايل حق سالم لأنه كان طالب عنده..
حصه: ها.. إحلف؟؟ لا لا ما صدق.. معقوله.. ذاك الي تلاسنت وياه.. لا لا لا.. واي يما بيغمى علي
ابراهيم: ههههه.. ايه اشفيج بسم الله.. وبعدين ليش تتلاسنين وياه المسكين.. من البدايه راويتيه العين الحمرا
حصه: هههه.. اقول اطلع برع
ابراهيم: عروس مانروم نقول لج شي.. تطردنا بعد.. ما عليه انا اراويج.. ما بقول لج السالفه الي كنت ياي اخبرج عنها..
حصه: برهوووووووووووم.. حبيبي انت .. اتخش عن حصونه
ابراهيم: وااااي ماروم على الدلع ما اتحمل.. سمعي.. يوم الخميس بيون يخطبونج رسمي.. وعشان اتشوفينه بعد.. بس ها.. لا تخبرين حد غير غزلان.. أقصد من رباعتج.. تعرفين بعد سوالف البنات.. قولي لهم اذا صار كل شي رسمي..
حصه: ان شاء الله.. أحين ممكن اتسوي لي خدمة صغيره
ابراهيم: اشوف بدت الطلبات من احين.. عرسي عشان ريلج يبتلش بطلباتج..
حصه: هاك هاي ورقه كتبت فيها كل الي احتاجه للمدرسه..
ابراهيم: واخوج الي يدفع.. بفلس عيل جيه..
حصه: أفا انا اختك حبيبتك.. اذا ما صرفت عليّ تصرف على منو
ابراهيم: خلاص ان شاء الله من هالعين قبل الثانيه..
حصه: تسلم لي عيونك.. يا أحلى أخو في الدنيا..
ابراهيم: والله ماشوف بعض الناس حسوا بالحلاة الي تقولين عنها..
حصه: بتحس.. اذا مب اليوم باجر..
ابراهيم: مع السلامه
طلع ابراهيم من الغرفه عشان ياخذ الأغراض الي تباهم حصه للمدرسه وتمت حصه تكمل سرحانها بأحلامها وتتذكر شكل عادل.. ونظراته.. وما كانت منتبهه لتليفونها الي احترق من كثر ما يرن
..
في بيت العم خليفه بو سعيد
غزلان: اوهوووو.. وبعدين ويا هالبنت.ز ليش ما ترد؟
ناصر: قولي الفضول ماكلنج..
غزلان: انت اسكت انا واصله حدي.. ومب فايجه لشي.. أقول هادف قوم حل انسير بيتهم وأعطيها ورقه طلباتي والبيزات عشان تاخذ لي شراتها,..
هادف: يلا لبسي شيلتج..
غزلان: ليش انا شو لابسه.. خيشه..
هادف: اوهووو .. شو عرفني فيكم انتوا البنات.. عباتج اقصد..
غزلام: جيه وين بسير انا الا هو بيت حصو.. خطوتين جدام بيتنا..
طلعت غزلان ويا هادف وسارت صوب بيت حصه وكان ابراهيم توه طالع من الكاراج.. ومن شاف غزلان وقف موتره ونزل وسار صوبهم.. ومن شافته غزلان تمت تتأفف وردت البيت.. وتم هادف يناديها وهي مطنشتنه ما ترد عليه.. حس بالفشله وياله ابراهيم وسلم عليه
هاف: هلا والله بو خليل..
ابراهيم: اهلين.. الحمد لله على السلامه.. ادري متأخره بس ما شفتك من وقتها
هادف: لا عادي.. الله يسلمك.. بس الرضيعه كانت تتصل في حصه وما ترد عليها بغت تعطيها هالورقه والبيزات عشان تاخذ لها نفس الأغراض.. يطقمون اونه.. والله هالبنات ما عندهم سالفه..
ابراهيم: اشعليك خلهم يستانسون.. هات الورقه وانا باخذ لها.. وحياها الله.. حصه داخل..
ومن سمعت غزلان هالرمسه غيضت: لا شكرا.. ما يحتاي.. هونت مابا اطقم وياها..
ابراهيم: ليش افا عليج.. ماشي فرق بينا.. وبعدين انا ساير اخذ لحصو..
غزلان: هادف.. ناصر يزقرك تعال..
هادف تم يضحك في خاطره على اشكالهم ومفتشل من ردة فعل غزلان ويا ابراهيم بس ما يروم يقولها شي..
هادف: اسمحلي بس الرضيعه دفشه شوي.. تامرني على شي.
ابراهيم: لا سلامتك..
ابراهيم حز في خاطره تصرف غزلان.. وماكان وده انه يشوف هالكره في عيون غزلان صوبه.. بس هو معاهد نفسه انه يصبر.. وراح يصبر إلين ما يلين قلبها واتحبه.. وقتها راح يخطبها.. أما هادف فرد البيت مغيض من اسلوب غزلان .. بس شو بيقول.. لأنه يعرف انها عنيده.. وما تسمع لحد.. خصوصا في هالموضوع.. دخل البيت وياها وهو ملاحظ ان ابراهيم ما غير وقفت ابراهيم ما تغيرت..
هادف: اف منج.. فشلتيه المسكين..
غزلان: احسن عشان مره ثانيه لا يفكر انه يتدخل..
هادف: الله يهديج..
غزلان: شو مينونه شايفني..
هادف: لا حشى.. عاقل.. وماشي اعقل منج.. يوم انج اتضيعين من ايديج ريال شراته شاريج.. وماشي احسن منه.. بس انتي الكلام ضايع وياج..
..

 
 

 

عرض البوم صور Cheer   رد مع اقتباس
إضافة رد

مواقع النشر (المفضلة)

الكلمات الدلالية (Tags)
للحب عنوان للكاتبة بنت البلاد, للكاتبة بنت البلاد, الكاتبة بنت البلاد, بنت البلاد, قصة للحب عنوان للكاتبة بنت البلاد
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 11:29 PM.


مجلة الاميرات 

 



Powered by vBulletin® Version 3.8.11
Copyright ©2000 - 2021, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية