شوفي يا ستي أنا من قناعاتي وتجربتي في الحياة
عندي قناعة أكيييييييييدة إنه الدنيا دوارة وإنه يوم لك يوم عليك وإنه الدنيا ما ارح تجلس على حال واحد
بس مين المسؤول عن دوران هذه العجلة أو توقفها؟؟؟؟
المسؤول هو الشخص نفسه يعني انا مثلاً انا دحين أموري تمام ماشية مية المية وكل شي ماشي زي
ما أنا أبغاه بعد فترة أنعكست الآية فأنا بيدي القرار يا إني أجلس أشكي وأحزن وأقول انا كنت كدة وكان
عندي وكان مدري ايش وأجلس أندب الماضي يا إني أرجع أشتغل وأحاول أبني نفسي من جديد وتدور
العجلة
كمان عندي قناعة تانية إننا لمن نحط هدف فالسعادة مو لمن نوصل للهدف السعادة هيا في طريقة
وصولنا للهدف كتير من الناس يفكر إنه سعادته لمن يوصل لهدفه هوا كدة بيأجل سعادته يعني إنسان
مثلاً حط هدف له إنه يجني مليون دولار وقعد يشتغل ويعمل ويتعب وهوا في باله لمن يحصل على
المليون راح أكون سعيد هو بكده بيأجل سعادته ولمن يحصل على المليون راح يلاقي إنه أكيد سعيد
بهادي اللحظة بس راح يلاحظ إنه فوت كتير من لحظات السعادة الحقيقية عشان يوصل لهادا الهدف راح
يلاحظ مثلاً إنه ضحى بأشياء كتير في صحته وماله وأهله عشان هذا الهدف السعادة مو لمن أوصل
لهدفي السعادة وانا قاعد أشوف إني كل يوم بأقرب من هدفي السعادة هي لمن أحس إني إنسان
منجز إنه ليا إنجازات لأني لو أجلت سعادتي لمن أوصل لهدفي مثلاً المليون دولار راح ألاقي إنه صار
عندي هدف تاني إني أبغى عشرة مليون طيب أشتغلت وتعبت وضحيت بأشياء كتير ووصلت للعشرة
مليون راح يكون عندي هدف تاني هوا إني أوصل للعشرين وهكذا فالواحد يستغل كل يوم في حياته
ويستغل كل لحظات السعادة بشرط إنه ما يفرط في هدفه وينجز كل يوم ولو شي بسيط عشان يوصل
لهدفه بس مو على حساب باقي الجوانب
موضوعك أكثر من رائع همس الخيال
ألف شكر وفي إنتظار جديدك
تقبلي مروري
23-05-08, 12:39 PM
جديد مواضيع قسم علم النفس , دراسات علم النفس , كتب علم النفس , ابحاث علم النفس
العرض العادي
