كاتب الموضوع :
ضياءk.s.a
المنتدى :
القصص المكتمله
الجزء الخامس
أشرقت شمس يوم الجمعة بكل حب عشان تنور هالكون وتنشر عليه الروحانية والسكينة ،،، هاليوم اللي فيه النفوس تتصافى والأسر تتجمع مع بعضها وكأنه فعلا يوم عيد ..!!
نزلت ام عبدالله درجات بيتهم متوجهة للمطبخ علشان تجهز لعيالها الفطور وتصحيهم لصلاة الجمعة ... وكان لسانها يلهج بالإستغفار والتسبيح والصلاة على النبي طول الوقت...
لكن فيه شئ شد انتباهها وقطع عليها تمتمتها وكان صوت جاي من غرفة الجلوس ،، هي في البداية توقعت يكون أسامة قام من النوم وجالس يطالع التلفزيون ،، لكنها سرعان مااستبعدت هالفكرة لأنه مستحيــــــــــل أسامة بيقوم من نفسه في مثل هالوقت وهو نايم امس في وقت متأخر ... !!!
ابتسمت بحب لما توقعتها وحدة من وردات هالبيت اللي تعشقهم وتخاف عليهم من هبوب النسمة ،،،على طول جت في بالها عذا لأنها هي اللي غالبا ما تصحى لحالها من دون ما تقومها أمها وخصوصا يوم الجمعة الصبح لأنها تحب هالوقت وتحب جمعتهم فيه ،،، راحت أم عبدالله للغرفة عشان تتأكد من توقعاتها,, لكن لما دخلت تفاجئت برجال منسدح بثوبه وطاقيته على راسه وممدد رجوله على الكنبة ويطالع الأخبار ،،
عقدت أم عبدالله حوااجبها مستغربة أن تخمينها خاب هالمرة وأن أسامة صاحي هالوقت ،، لا وعليه ثوبه يعني كان طالع ..!! خافت لا يكون فيه شي ،،
قربت منه وهي تقول ::/أســـامة وش عندك صاحي مبكر اليوم ؟؟
.............................................. ((مالقت رد ))
خافت وقربت أكثر علشان تواجهه ::/أســــــــــاااااااامـ ـ ـ ـة
وقفت أم عبدالله مشدوهة باللي قدامها خصوصا أنه للأسف ما طلع أسامة !!! لكن ثواني بس وتغيرت نظرتها من التعجب والخوف للحنان والشوق وارتسمت على فمها ابتسامة حب حلوة لما تعرفت على المنسدح قدامها ... ::/هلا والله الحمدلله على السلامة ..!! متى وصلت ؟؟
أبوعبدالله ووجهه للتلفزيون وعاقد يديه على صدره::/تو اني واصل..!!
أم عبدالله وهي تجلس بجنبه وبنبرة اهتمام::/وش فيك تتكلم من دون نفس؟؟ عسى ماشر؟؟
ابوعبدالله وهو رافع حاجبه بعتب ::/ منك ..!! يعني معقولة ماعرفتيني وانا اللي قايل بسوي لك مفاجئة ؟؟ والا لهالدرجة شكلي يشبه لأسامة ؟؟
ابتسمت له بحب ::/ والله أنها أحلى مفاجئة وبعدين أكيد أنت غير ..!! بس أنا توقعتك أسامة بالبداية لأن ما بالبيت رجال هاليومين إلا هو ..!! وانت ماكنت معطيني وجهك ..؟؟
نزل ابو عبدالله رجلينه واعتدل بجلسته ورفع حاجبه ::/ لاعادي قولي أنك تحبين أسامة أكثر منا كلنا عشان كذا الكل تشوفينهم هو ...!!
ام عبدالله وهي تحط يدها على يده::/ محمـــد ..!! أنت عارف أنك شي وعيالي شي ثاني بالنسبة لي ..!!
ابو عبدالله وهو يطالعها بنقمة::/أيـــــــــــــه أكيد خذوك مني وصرتي تفضلينهم علي .. وين أيام اول يوم كنت أنا الكل في الكل ..!!
ام عبدالله وهي تبتسم بود ::/ لازلت الكل في الكل ومكانتك غير ،،، وانا قلبي واسع لكم كلكم وكل واحد له مكانه ..!! وأنت لك المركز الأول من بينهم ... و يالله اتبسط ياعم ههههههههه
ابو عبدالله وهو يلف كتفها بيده بحنان ويضحك ::/ ههههههههه لاخلاني منك ربي ..!! والله يخليكم لي ولا يحرمني منكم ..
ام عبدالله ::/ ولا منك ..!! المهم ماقلت لي عسى ماتعبت ..!!
ابو عبدالله وهو يتسند ويعتدل بجلسته::/ لا ياربي لك الحمد كل شي تساهيل ،،، والامور كلها تمام ..
ام عبدالله ::/ الله يوفقك يارب ويسهل عليك ..
ابوعبدالله::/آميــــن ،، رحت أمس وتفاهمت معهم على كل شي وعلى موعد الشحن ،،، بس المشكلة ان صاحب البضاعة يبغى فلوسه كاش وماعنده شي أسمه تأجيل الدفع ... وهذا اللي ملخبطني ..
ام عبدالله باهتمام::/ يعني كم بيكلفك تقريبا ؟؟
ابو عبدالله وهو يتنهد ويطالعها ::/ تقريبا من مليونين لمليونين ونص ...
ام عبدالله مصدومة ::/ أوف ،، وأنت من وين بتدبر هالمبلغ ؟؟
ابو عبدالله بقلة حيلة ::/ ماأدري والله محتار ومحتاس ..
ام عبدالله ::/ يعني بتنكسل هالمشروع ؟؟ والا وش راح تسوي؟؟
ابو عبدالله باندفاع وهو يناظرها:://لالا ماراح اكنسله ..!! انا خلاص كتبت العقد مع المُصدِّر وبعدين استأجرت المحل ودفعت أول الإيجار يعني مافيه مجال للتراجع عشان كذا ابحاول ادبر هالمبلغ ..
ام عبدالله بخوف::/ محمد ..!! وش بتبيع بعد غير المزرعة ؟؟
ابو عبدالله يبتسم ::/ هههه لا تخافين يالجوهرة ماراح ابيع شي ...بشوف لي واحد قادر وأمون عليه علشان يسلفني ... وعقب ما يطلع الربح من المشروع اردهم له بالتقسيط ..
ام عبدالله وهي تنزل راسها ::// أحس انها كثيرة مليونين؟؟ ومن اللي يرضى يسلفك اياهم ؟؟
ابو عبدالله والأمل واضح من صوته ::/ أبشوف ابو مشاري أكيد ماراح يقصر ان شاء الله .. وإلا أباخذ سلفة من البنك .!!
تنهدت ام عبدالله من خاطرها وحست ان زوجها هالمرة خاطر بأشياء كثيرة ،، باع المزرعة اللي تعبوا عليها ودفعوا دم قلبهم عشان يشترونها من 15 سنة والمشكلة انها ما جابت سعرها اللي تستحقه لأن ابو عبدالله استعجل وباعها وأستأجر بفلوسها محل كبير جدا موقعه على اهم شارع بالرياض يعني يعتبر شريان المدينة ،، والفلوس اللي كانوا مدخرينها للحاجة دفعها لشركة الشحن ،، والحين بيستلف هالمبلغ الضخم عشان يقدر يشتري البضاعة (( ماادري وش ربي بلاه بهالمشروع مادام انه ماعنده سيولة ؟؟)) دعت ربها أنه يوفقه وييسر امره ولا يضيع تعبه وخسارته ..
في هاللحظة انفتح الباب ودخلت عليهم وابتسامتها شاقة حلقها ،، فرحانة برجعة أبوها و صديقها ،، اليوم صاحية مبكرة لأنها شايلة هم اختبارها اللي بكرة ،، وبالإضافة لأرنبها اللي حست امس انه تعبان وفيه شي ،، فأول ماقامت طلعت تطمن على حيواناتها وتتاكد أن كل شي اوكي لكن اول مافتحت باب البيت شافت سيارة ابوها واقفة في الكراج ..!! في البداية تشككت في الموضوع لكن لما اطالت النظر ودققت تأكدت ان أبوها رجع بالسلامة وهذي هي سيارته ..!!
سكرت سارة باب الفلة وراحت تركض لغرفة التلفزيون لأنها توقعتهم هناك وفعلا اول مافتحت الباب لقته هو وامها جالسين مع بعض ،، حست بالفرحة وان عيونها تحرقها من الوناسة ،، اول ماشافها ابوها ابتسم في وجهها هو الثاني وماقدر يخبي فرحته بشوفتها يحبها بجنون يحس انها تذكره بطفولته ويحس أن افكارهم متقاربة لبعض بالإضافة إلى أنها آخر العنقود ... واكتشف انه فعلا مايقدر يبعد عنهم ولا يوم ..
ابوعبدالله ::/ هلااااااا والله وغلا .. هلاا ومرحبا بالشيخة بنت ابوها ..
سارة وهي تحط يدها على قلبها وتقلد حركات الرسوم ::// أبـــــــي ..!! لقد عدت اخيرا ..!!
ضحكوا عليها أمها وأبوها .. أبو عبدالله ::/ هههههه اجل يا عزيزتي ..!! هلاّ جئتِ لتسلمين علي ..
سارة وهي تتقدم لأبوها ::/ هههه يبه عليك لغة فصحى شي الصراحة ...
تقدمت من ابوها وحطت يديها على كتوفه وحبته على راسه::/ الحمد لله على السلامة .. وهو مسكها مع يدها وخلاها تجلس جنبه وحط يده على كتوفها::/ الله يسلمك .. وش اخبارك ؟؟ ووش عندك اليوم صاحية مبكرة ؟؟
سارة وهي حاطة يدها على يد ابوها اللي مسنودة على كتفها وعينها بعينه وهي لافة وجهها له::/ الحمدلله تمام .. واليوم قايمة الصباح بدري لأن الله يسلمك واحد من الأرانب الصغار حسيت امس انه تعبان فقمت مبكرة عشان اتأكد أنه بخير وما زاد عليه شي ..
ابو عبدالله بنظرة استفهام ::/ أي واحد فيهم ؟؟
سارة بنبرة حزن ::/ الأبيض ..!! مسكيـــن ..!!
ابو عبدالله ويقرصها مع خدها::/ اليوم ان شاء الله بوديه للبيطري يشوفه ...
سارة باهتمام::/ايه يبه ياحبي لك .. وبعد بروح معك .. زين ؟؟
ابو عبدالله ::/ زين بس عاد حلي واجباتك وخلصي شغل المدرسة ونروح ..
سارة بحزن وهي تتذكر اختبارها ::/ لالااااا يبه ليه تذكرني ..!! بكرة عندي اختبار صعب والأستاذة حقته شديدة مرة ..
ابوعبدالله ::/ لا يوم عندك اختبار اجل ما بتروحين معي اقعدي ذاكري .. ولا تنسين ان هذي آخر سنة لك بالمتوسط ...
سارة ولاوية فمها بحزن ::/ ان شاء الله ..!!
قامت ام عبدالله وهي تناظر ابوعبدالله بنص عين ::/ أشوف يوم جت سارة نسيتونا ... ايـــه الله يرحم هذيك الأيام يوم كنت أنا الكل في الكل ..
ابو عبدالله يضحك ::/ هههههههههههههههههههههههههه .. وحده بوحده والبادي أظلم ..!! لاتنكرين انك انت اللي بديتي ..
سارة ترفع نظارتها وترفع معها واحد من حواجبها::/ يمـــه مو معقولة ..!! لا تقولين انك تغارين ؟؟ ترى بتطيحين من عيني ؟؟
ام عبدالله معصبة::/ وليش أن شاء الله مايحق لي اغار آنسة سارة ؟؟ (( وهي تصرف الموضوع ))المهم انا بروح اجهز الفطور روحي صحي اخوانك عشان يفطرون ويلحق أسامة على الصلاة ..
قامت سارة من عند أبوها ومشت وهي تقول ::/ ان شاء الله ماميتو بس ابروح لعيالي أول وبعدين ابروح لعيالك ..
طلعت سارة وابتسمت ام عبدالله وهي تطالعها وبعدين التفتت على أبو عبدالله والابتسامة على وجهها ::/ تبغى شي معين على الفطور والا أحط لكم على ذوقي ..؟؟
قام ابو عبدالله وخذ غترته وعقاله في يده وتقدم منها وقرب لها ::/ ايه لو سمحتي ..!!( وحط اصبعه على زاوية فمها )) ابغى ابتسامتك هذي ماتفارقك طول اليوم ... لأنها تريحيني من كل تعب .. وتحسسني بالتفاؤل واني مالك الدنيا باللي فيها ..!!
ابتسم لها ومشى عنها وتركها وراه وخدودها موردة من الخجل ..
ام عبدالله بصوت عالي شوي::/ ماأدري متى بتتخلص من مراهقتك ..؟؟
ابو عبدالله يضحك ::/ ههههههههههههه طول ما انتم عائلتي وانت زوجتي فأنا بضل مراهق ... وعلى فكرة (( لمعت عيونه بحب )) بُعدكم جنني ...((وكمل ضحكه ومشى))
توجه أبو عبدالله للدرج طالع فوق والإبتسامة على وجهه وام عبدالله لفت رايحة للمطبخ .. وحمرة الخجل كاسية خدودها ...
هذي هي حالتهم حتى لما كبروا وصار عندهم عيال ،، وأحفاد ... حبهم عمره مايعرف الكبر والكلمة الحلوة اللي تعود محمد يقولها لها ماتعرف عمر معين ولا وقت معين ...
جو الألفة والمحبة المخيم على بيت ابو عبدالله محسس سكانه انهم مثل اليد الوحدة والشخص الواحد .. عايشين كأنهم اصدقاء ومترابطين بكل الروابط الإنسانية القوية من صداقة وأخوة واحِبَّه...
-------------------------------------------------------------------------------
كانت واقفة قدام مراية الحمام وعيونها منتفخة من الصياح أمس ... شافت لون أزرق خفيف فوق جبهتها ،، وشافت جرح بسيط احمر عند رقبتها ،، ((وكل هذا بسببه هو ... الحقير الواطي ،، محسوب علينا أخ وبس ..جعلله للمرض اللي يفتك فيه يارب .. يا حظها ندى ليتني اتبادل معها ولو يوم واحد بس .. ودي أجرب حياتها .. ودي اجرب معنى الأخ الحنون اللي يخاف على اخته ويغار عليها ،، ودي أجرب أكون تاجرة وعندي فلوس وما فيه شي ناقصني ..!! صدق ان ندى مولوده وبفمها ملعقة من ذهب )) نزلت راسها وغسلت وجهها عشان تطرد أفكارها وغسلت وأسنانها وتنشفت وطلعت لغرفتها عشان تبدل وتنزل تحت عند امها واخواتها .. ولما كانت في الصالة وفي طريقها لغرفتها رن التليفون ووقفت في مكانها ورفعت راسها للسماء ( يالله )) وتأففت (( أفففف ياربي من المتخلف اللي متصل هالوقت )) سحبت رجولها على الأرض ورفعت التليفون بملل ..
أريج :::/ نــعــم...!!
إيمان ::/بسم الله الرحمن الرحيم ..!! يختي الناس تسلم وتصبح مو (( نعععععععععم ))
نعامة ترفسك ان شاء الله ..
أريج تضحك ::/ ههههههه وش اسوي بك انت بعد ؟؟ فيه احد يدق على الناس من صباح الله خير ..
إيمان ::/ إيه انا .. عندك اعتراض ..؟؟
اريج وهي تتسند على الجدار ::/ لا وش دعوى انت تدقين بأي وقت على الرحب والسعة .. المهم وش اخبارك ووش اخبار امك وعمي ؟؟
إيمان ::/ الحمدلله بخير نسأل عنكم .. انت كيفك وكيف دراستك .. عسى بديتي تذاكرين ؟
أريج ::/ اففف لا والله ما بديت .. الله يسهل علينا بس ونجيب نسب تدخلنا الجامعة ..
إيمان تبتسم ::/ آآآمين الله يوفقكم ان شاء الله .. الا وين عبير ؟؟ صاحية والا بعدها نايمة؟؟
أريج ::/ لحظة شوي ابروح اشوفها لك ..
حطت أريج السماعة على الطاولة وراحت لغرفة عبير .. توها بتدق الباب بس فتحته عبير قبلها وكانت تربط شعرها ومبدلة ملا بسها عشان تنزل ..
عبير مبتسمة::/ صباح الخير .. من وين طالعة الشمس اليوم اول وجه اتصبح عليه انت ؟؟
أريج تضحك ::/ ههه قولي بعد مو عاجبك ؟؟ عشان اكفر فيك الحين ..
عبير ::/ لا وش دعوى الا عاجبني ونص ..!! بس تعالي وش فيها عيونك متنفخة ؟؟
أريج وهي تعطيها ظهرها وتمشي ببطئ ::/ تعرفين كل هذا من الوناسة امس .. المهم إيمان بنت عمي تبغاك على التليفون ...
ضحكت عبير على اختها وراحت لمكان التليفون علشان ترد على بنت عمها ولحقتها اريج عشان تشوف وش تبغى فيها لأنها مهما حاولت تقاوم لقافتها ما تقدر لأن هذا الشي الوحيد اللي ماتقدر عليه ..
عبير ::/ صباح الخير والنور ..
إيمان ::/ الحين وش اقول ؟؟ كان تركتي لي وحدة اقولها ..
عبير تضحك::/ هههههههه معليش نسيت .. عادي قولي صباح الورد والياسمين ..
إيمان ::/ إيه صح .. اجل صباح اللي قلتيه تو ..
عبير ::/ طيب يالزولة .. شكرا ..
إيمان تضحك ::/ ههههههه العفو .. المهم وش اخبارك يالطيبة ووش علومك ؟؟
عبير ::/ الحمد لله ماعلي كأني البخت ..
إيمان :/ الحمدلله هذا اهم شي .. ((وهي تلتفت على اللي واقف عند الباب بيطلع ويحاكيها )) طيب اصبر وش فيك مستعجل خلني اسلم عليها ..
عبير وهي مستغربة ::/ وش فيك إيمان من تكلمين ؟؟
إيمان ::/الله يسلمك هذا نواف اخوي يسألكم إن كنتوا محتاجين شي لكم او للبيت عشان يجيبه معه لأنه بيطلع الحين ويمكن يمر على سوق الخضار .. تحتاجون شي ؟؟
عبير وهي تبتسم بخجل متفشلة منه ::/ لا سلامتك وسلامته ما نحتاج شي ..
إيمان ::/ يقول لك أكيد ..!! لاتستحين ان كنتوا تبغون شي ؟؟
عبير وهي تتلعثم ::/ لا والله إيمان مانحتاج شي الحمدلله بس ,,,,
إيمان ::/ إيه .. بس وشو ؟؟
عبير وهي صدق متفشلة ::/ قولي له لا ينسى موعد أمي اليوم بعد المغرب ..
إيمان وهي تكلم نواف ::/ تقول لك ما يحتاجون شي بس لاتنسى موعد امها اليوم ..
نواف وهو وده لو يكلمها بنفسه ويسمع صوتها اللي من زمان عنه ::/ لا قولي لها مانسيت وحاطه على المنبه عندي في الجوال ..
إيمان بصوت واطي لعبير ::/ إيه صدَق من قال المحبوب في راحة ..!!
عبير ::/ وش تقولين ؟؟
إيمان ::/ ماأقول شي سلامتك .. بس يقولك نواف أنه ما نسى وحاطه منبه عنده في الجوال ..
عبير تبتسم ::/ إيه سمعته ..
أريج وهي ترفع صوتها علشان تسمعها إيمان ::/ أمووووووووووووونة لاتخافين على عبيروه تراها تسمع صوت نواف ولو هو في المريخ ..
إيمان وهي تضحك على اريج ::/ هههههههاااي ايه والله صادقة اختك اذا اشتهيتي سمعتي اللي تبغين .. سبحان اللي خالق الحب والمحبة ..
عبير وهي تشهق ::/ مشكلة اللي يكذبون كذبة ويصدقونها ...!!
إيمان وهي تضحك ::/ علينــــــــااااااااا ،، بس والله حرام عليك اللي تسوينه بأخوي ... يختي عطيه وجه ...
عبيربتملل::/ إيماااااااااااااااااااان ترى طفشتيني من كثر ما تقولين هالكلام ..!!
أريج وهي تقرب لأختها ::/ ريري امانتك وش قالت .. (( وتقرب فمها للسماعة )) أموووونة تكفين وش قلتي لها ؟؟
عبير وهي تبعدها عندها ::/ بعدين اقول لك يالملقوفة ..!! يالله إيمان مع السلامة وسلمي على امك وعمي واخواتك .. ووالله اني متفشلة في اخوك يعني لو كان مشغول ترى عادي نروح مع ليموزين ..
إيمان تشهق ::/ اسكتي اسكتي لا يزعل علينا ربي .. حبيبتي إذا كنت تبغين تموتين ناقصة عمر قولي هالكلام لنواف بنفسك ... ويالله عاد عن الرسميات .. ومع السلامة ...
سكروا البنات عن بعض وقامت عبير بتنزل تحت بس تعلقت فيها اريج علشان تعرف وش قالت لها إيمان لكن عبير رفضت تقولها ..
عبير ::/ مااااااااااااااااراااااااااااااح اقوووووووووووووووووووووووولك شي وخلي بصلتك تحترق ههههههههههههههههه
أريج وهي واقفة عند الدرج وتشوف اختها تنزل ::/ زين يا عبيروه جعلك تطيحين من الدرج وتتكسرين ولا يبقى فيك ولا عظم سليم ..
عبير وتسوي نفسها تطيح ::/ آآآآآآآآآآآآآآآه لا لا ارجوك لا تدعين علي مرة ثانية طحت طحت...
أريج منقهرة ::/ زين تتطنزين والله لأوريك ..
شالت أريج شبشبها وراحت تركض مع الدرج علشان تلحق أختها وتضربها وأول ماشافتها عبير شهقت وراحت تركض علشان تتوزى عند امها ...(( الله يديم عليهم بسمتهم)) ...
-------------------------------------------------------------------------------------------
أول ماوصل أبو عبدالله الدور الثاني قابلته عذا وهي تكلم بالجوال اختها لمياء ومن يوم شافت أبوها صرخت على لمياء علشان تسكر وراحت ركض لأبوها اللي ابتسم بوجهها وحس انه مشتاق لهم كلهم ولها هي بالذات لأنها تعبت وهو مو موجود عندها وعلى حسب كلام الجوهرة ان رجلها تعورها وله أربع أيام ماشافها وهو اللي متعود انها تصبح عليه بابتسامتها البريئة ...
عذا وهي تتعلق برقبة ابوها ::/ هلا والله وغلا .. نوّر البيت بجيتك يالغالي ..
ابو عبدالله وهو يضمها له وما يستغرب تصرفاتها لأن عذا بالذات ما تقدر ماتعبر عن مشاعرها بالأفعال ::/ منور بكم وانا ابوك ..
عذا وهي تواجهه وتبعد عنه شوي ::/ متى وصلت ؟؟
ابو عبدالله ::/ من ساعة تقريبا ...
طلع عليهم أسامة من دورة المياه وهو توه خالص متسبح ومعه فوطته يمسح فيها شعره ومغطي بها وجهه ..
أبو عبدالله يضحك ::/ صبحه بالخير راعي البيت ..!!
نزل أسامة فوطته وهو متفاجئ ورافع حاجبه شاف عذا وهي تبتسم والتفت على اللي واقف جنبها ولقاه ابوه ،،، ابتسم من خاطره وفرح بشوفته ..
أسامة يضحك::/ هلا والله براعي هالصوت ..
قرب لأبوه وسلم عليه وحبه على راسه ::/ الحمدلله على السلامة ...
أبو عبدالله ويلف عذا مع كتفها ::/ الله يسلمك من كل شر يا أبوي .. وش أخباركم عقبي وكيف حالكم ؟؟
عذا وهي لازالت مبتسمة من الفرحة ::/ بخير بس مشتاقين لك ..
ابو عبدالله::/ ياحبي لك والله انت اللي ترفعين معنوياتي .. تشتاق لك الجنة يالغلا ..
أسامة وهو يتمصخر :::/ هه ماتعرفها بنتك أنت .. ترى هذا كله مصلحة عشان تضمن انك تسوي اللي هي تبغاه بعدين .. تراني فاهمها ..
عذا وهي مطيرة عيونها فيه ::/ حراااااام عليك يالدب الحين انا كذا .. الله يسامحك بس ..
أسامة ::/ هاه خذ ..!!على بالها بتسوي قدامك انها متسامحة وماتدعي على أحد .. ولا تكره أحد ..
أبو عبدالله يضحك::/ههههههههههههههه حدك عاد كل شي ولا عذاي تراها الغلا كله ..
أسامة ورافع حاجبه ::/ يعني ياأسامة ضف خلاقينك وعطنا مقفاك لأن مالك سنع ..
ابو عبدالله يضحك::/ ههههههههههه لاعاد مو لهالدرجة ،،، المهم ترى امكم تحت تجهز الفطور يالله أخلصوا وانزلوا علشان نفطر .. (( ونزل يده من على كتوف عذا ))
عذا ::/ ان شاء الله ،، انا بسبقكم تحت وانتم لا تتأخرون ..
مشت عذا بعرج خفيف للدرج علشان تنزل ،، وانتبه لها ابوها وتذكر الموقف اللي سووه فيها اخوانها التفت ابو عبدالله على طول على أسامة اللي مشى لغرفته ومسكه مع يده ونادى عذا علشان توقف ..
ابو عبدالله ::/ عذا ..!!
وقفت عذا والتفتت لأبوها وشافته ماسك اسامة مع يده ::/ سم ..! بغيت شي يبه ؟؟
أبو عبدالله ::/ وش اخبارها رجلك عقب اللي سووه فيك هالوحوش ؟؟
عذا تمد بوزها ::/ توك ذكرت ؟؟ وبعدين اللي تشوفه الى الآن وانا اعرج شوي ..!!
أبو عبدالله وهو يلف يد أسامة ::/ أنت ما تستحي على وجهك يوم تسوي سواتك بأختك ؟؟
أسامة وهو يضحك ::/ هههههههههه آآآآآآآآآآآآي يبه يعور تكفى فكني ؟؟
ابو عبدالله ::/ الحين تتألم ..!!والا يوم تتهور وتسوي المقلب لأختك مافكرت بألمها .. هاه ؟؟
أسامة ::/ يبه والله أنا عبداً مأمور ،، والرأس المدبر هو لمياء وانا وصارورة نفذنا بس ..
ابو عبدالله وهو يشد قبضته على ولده ::/ اسمها سارة كم مرة قايل لكم لا تسمونها صارورة ؟؟
عذا ::/ يبه خلاص سامحه هالمرة علشاني أنا مسامحته ..
اسامه ::/ إيه مسامحتني لأنك ناوية على شي تراني فاهمك .. أأأااه يبه خلاص تكفى آسف لاتزيد الشد ...
عذا تشهق::/ هذي جزاتي اللي بتوسط لك ... لكن صدق انه مايثمر فيك المعروف ..(( وتلتفت على أبوها)) يبه سوي اللي تبغاه فيه.. لك اللحم ولنا العظم ..
أبو عبدالله وهو يبتسم ::/ قل والله ما اعيدها ..!!
أسامة وعافس ملامحه من الألم::/ يبه عيب انا كبير على هالتصرفات ..
أبوعبدالله ::/ ليش ماصرت كبير يوم قررت تسوي فعلتك ؟؟ يالله خل عنك كثر الهرج وقل اللي قلته ..
أسامة ::/ والله مااعيدها خلاص اعتقني ؟؟
عذا وهي تتقدم من أبوها ::/ فديتك والله ياعنترة انا قايلة محد مآخذ حقي من أسامة إلا انت وإلا سارة عارفة ان محد بياخذ بثأري إلا امي نورة ..
أبو عبدالله وهو يفك أسامة ::/ أحمدي ربك بعد ان امي واقفة معك وانا مع سارة وامك مع أسامة ..
عذا ::/ مساكين لمياء وعبدالله مابقى لهم أحد ..
أبو عبدالله يضحك::/هههههههه المسكين عبدالله وإلا لمياء عندها سندها اللي من يلمسكم بأصبعه يطيركم كلكم في دقيقة ..
ضحكوا كلهم وهم يتذكرون فهد وضخامته وسمعوا صوت سارة تناديهم علشان ينزلون للفطور .. ونزلت عذا قبل ابوها وأسامة اللي دخلوا غرفهم يبدلون وبينزلون ...
-------------------------------------------------------------------------------
ندى بعد ما خلصت فطورها مع زياد اخوها خذت اللاب توب من عنده وراحت لغرفتها علشان تتصفح النت شوي قبل لا تبدأ تذاكر .. أول ماوصلت عند باب غرفتها شافته مفتوح واستغربت من اللي فاتحه بس يوم دخلت شافت سحر متمددة على السرير وتقرا قرآن ...
ندى وهي مبتسمة وتحط الاب توب على الطاولة ::/ وش عندك اليوم مشرفتني ؟؟
سحر وهي توقف عند نهاية الآية ::/ اشتقت لك ..
ندى وهي تضحك وتدور على سلك التليفون ::/ ايييييييييييييييييييييه .. وانا بعد .. وين السلك ما شفتيه ؟؟
سحر باستهبال ::/ الا تلاقينه بجيب مريولي حق المدرسة ..!
ندى باستغراب ::/ ووش بتسوين فيه بالمدرسة ؟؟
سحر تضحك ::/ استهبل انت ووجهك على طول صدقتي ..
ندى وهي تكشر بوجهها وترجع تدور ::/ مو وقت خفة دمك ..
تحمست سحر واعتدلت في جلستها على السرير ::/ هذا لاب توب زياد ..
ندى تستهبل ::/ لا أبو الجيران .. مستعيرته منه ..!!
ضحكت سحر::/ أي واحد ابو صالح والا أبو طلاااااااااااال (( وتغمز بعينها ))
ندى وهي تسايرها ::/ لا أبو زياد ..
سحر:: /خخخخخخخخخ بايخة .. المهم عندي لك امانة ..
ندى وتناظرها بقلة اهتمام ::/ ووش هي إن شاء الله ؟؟
سحر::/ اول شي اوعديني أنك ماتقولين لي لا ..
ندى ::/ وليه ان شاء الله ؟؟ افرضي قلتي لي شي ما يعجبني ..
سحر بحماس:/ لا والله العظيم بيعجبك ..! يعني ماتثقين بذوقي؟؟
ندى تبتسم ::/ لا وش دعوى ..!!..
قامت سحر من على السرير وبغت تطيح وتتخرطف في المفرش ::/ خلاص انتظري .. أي وجع بغيت أطيح ،،، انتظري ندوش دقيقة وراجعة ..
ندى وهي تضحك ::/ هههههههههههههه طيب طيب بس شوي شوي على عمرك .!!
طلعت سحر وهي تركض رايحة لغرفتها وقعدت ندى تفكر بالأمانة اللي عند سحر واللي متحمسة لها لهالدرجة ..
رجعت سحر وهي ماسكة علبة مكعبة نيلية صغيرة بيدها وكانت ملفوفة بشريطة فضية أنيقة تقدمت سحر لندى ومدت يدها اللي فيها العلبة لها وهي تبتسم ..
ندى باستغراب ::/ وش هذي ؟؟
سحر مبتسمة :/ الأمانة ..
ندى بحاجب مرفوع ::// أي امانة ؟؟ ومن عند مين ؟؟
سحر تغمزلها ::/ بصراحة من اللي بالي بالك ..
ندى واحمر وجهها ::/ طلال ؟؟
سحر ::/ههههههههههههههه احبك يوم تفهمينها وهي طايرة .. إيه من طلال ،،
جاء عندنا امس وعطاني إياها لك .. يقول انه ماعطاك هديتك يوم عيد الأضحى.. عاد هذي هي ولو انها متأخرة .. بس اتمنى انك تقبلينها ..
ندى وهي ودها تعبرعن فرحتها بس ماسكة نفسها عن سحر ::/ من اللي يتمنى انت والا هو ؟؟
سحر وتطير عيونها بندى ::/ اكيد هو يالغبية .. يالله عاد خذيها وافتحيها خلينا نشوف ذوقه هالمرة ...
ندى وعلى بالها تكابر ::/لالا سحر ماراح اقبلها أحس اننا مصخناها وبعدين خلاص كبرنا والمفروض ماعاد آخذ منه شي ..
سحر بعصبية ::/ ندى لايكون طلال ولد من الشارع ؟؟ تراه ولد عمك وانت عارفة أن نواياه شريفة .. عاد يالله اقبليها ..
ندى بتوسل ::/ سحر ..!!
سحر وهي تحط الهدية بيد ندى ::/ ندى أنت وعدتيني ماتقولين لي لا وبعدين لا تسوين نفسك مو فرحانة بهديته والا انك ماتحبينه ترى انا عارفة البير وغطاه عاد خذيها وفكينا ..
ابتسمت ندى من كلام سحر اللي كان كل حرف فيه يحكي الحقيقة وخذت الهدية بيد ترتجف وكانت تتخيل شكل طلال وكأنه هو اللي واقف قدامها ويعطيها الهدية.. فتحت الشريطة وهي تناظر سحر اللي ابتسمت لها وهي متحمسة وودها تشوف وش جايب اخوها.. فتحت التغليف النيلي المعرق بفضي .. وطلعت لها علبة شفاف على شكل كريستالة طلعتها وفتحتها ولقت داخلها خاتم فضي بفصين ألماس وشكله بالمرة ناعم وكيوت ..
فتحت ندى فمها لما شافت الخاتم يعني صدق أبهرها وعجبها .. رفعت نظرها لسحروهي مطيرة عيونها ..
سحر ::/ رووووووووووووووعة ،،،(( وبحماس)) يالله لا تقعدين تطالعيني البسيه خليني أشوفه على يدك ..
طلعته ندى وحطته بأصبعها البنصر وعلى يدها الناعمة وبشرتها البيضاء طلع للخاتم شكل ثاني ...
سحر بانبهار ::/ واااااااااااااااااااو تدرين ودي اصور يدك بالخاتم واوريها طلال ..
ندى تبتسم وودها تصيح من حبها لطلال ::/ ياحبي له والله العظيم ان عنده ذوق ..
سحر تضحك ::/ هههههههههههههه تدرين ليتني سجلت كلامك وصورت يدك ووريتها طلوول . كان على طووووووول راح يجي اليوم يخطبك والا وش يخطبك الا بيعرس عليك بكرة ..
ندى تستهبل ::/ لالا يوم الأحد عندي إختبار فيزياء صعب .. خليه يوم الأثنين لأن ماعندي شي ..
سحر ::/ هههههههههههههههههههههااااااااااااااااي أجل انت اللي مستعجلة مو أخوي ؟؟
ندى وهي تضربها على كتفها ::/ أقول اسكتي تكفين ..!! وروحي جيبي لي سلك من عند مشاري والا مصعب خليني اشيك على إيميلي قبل لاأبدء أذاكر ..
سحر وهي تتوجه للسرير ::// روحي انت انا بكمل قراءتي
ندى بتوسل ::/سحـــــــر ،،، استحي منهم تخيلي اروح والقى واحد منهم موجود ..؟؟
سحر وهي تجلس وتمسك المصحف ::/ لالا أكيد راحوا يصلون .. والا تدرين روحي جيبيه من غرفتي أكيد بتلقين لك واحد ..
ندى ::/ زين ابروح .. بس تشوفين والله بتتحسفين ..
سحر وترفع صوتها وعلى بالها معصبة::/ المفروض انت اللي تخدميني على اللي سويته لك مو انا اللي أخدمك ،، لا وتتشرهين علي بعد انت ووجهك ؟؟
ندى وهي ترميها بالسجادة ::/ خلاص يالرنانة اسكتي مانبغى منك شي أنا بروح اجيب السلك .. الواحد مايطلب منها شي استغفر الله ..
طلعت ندى وراحت لغرفة سحر عشان السلك وهي طول الطريق تطالع يدها والخاتم اللي في أصبعها وعلى وجهها ابتسامة حلوة تعكس المشاعر العميقة اللي بداخلها ...
أما سحر فتمددت على السرير ورجعت تقرأ لكن بالها مو معها من التفكير فوقفت القراءة وتخيلت لو أن زياد يسوي زي طلال .. (( يعني ليته على الأقل يغلط مرة وحدة ويجيب لي هدية .. مو شرط خاتم ألماس والله ما أبغى منه كل هذا تكفيني وردة حمراء ريحتها زكية ،،، بتكون أغلى عندي من كنوز الدنيا كلها يكفي انها منه ...!!مافيه إلا أني أنتظر يمكن الله يهديه ويرقق قلبه علي ويتكرم علي بهدية كتذكار منه استلذ لما أشوفها واروي بها ظمآي كلما اشتقت له)))
-------------------------------------------------------------------------------
يوم الجمعة...
بعد المغرب ...
كان نواف يصلي في المسجد القريب من حارة بيت عمه علشان اول مايخلص من الفرض والسنة يروح لهم ولا يتأخر عليهم ...
أول ما سلم الإمام منتهي من صلاة المغرب قام نواف على طول وصلى السنة وقرأ قرآن يمكن وجه واحد وبعد كذا لبس عقاله وصلح تشخيصته وطلع متوجه لبيت عمه ..
كانت يديه تعرق على المقود من الإحراج أو يمكن من الفرحة أو يمكن هذا طبعه لما يحتم عليه الأمر أنه يجتمع مع عبير في مكان واحد ...!واليوم بالذات بيتواجد معها بصورة قريبة أكثر من قبل خصوصا لأنه بيوديهم المستشفى وبيكون قريب منهم لما يدخلون عند الدكتور يعني تقريبا طول الوقت بتكون هي جنبه وكأنها فعلا زوجته .. ابتسم لما وصل تفكيره عند هالنقطة ...
لف نواف مع الملف اللي يطلعه على طول لبيت عمه بس لما قرب بسيارته تفاجأ بجاكوار فضية آخر موديل واقفة قدام باب بيتهم .. في البداية استغرب من تواجدها لكن بعدين توقع انها وحدة من صديقاتهم أو احد جاي يزورهم .. قرب سيارته للباب اكثر وأكثر ووقفها على جنب وارتجل منها .. بس لما التفت على الباب طارت عيونه لأنه شاف شاب وسيم جداً وكاااااشخ يعني الثوب يلمع وباين أنه توه مفصل والشماغ حمرته تكسر العين .. يعني الولد ماينعاب من ناحية الكشخة والرزة ويكفي سيارته ...
قرب منه نواف وهو مصدوم من تواجده عند باب بيت عمه بس مع ذلك ابتسم وكأنه يرحب فيه ..
نواف ::/ حي الله اللحية الغانمة ..
....::/ الله يحيك ويبقيك ...
نواف ::/ ماأدري تنتظر أحد هنا ..!!
مؤيد بنظرة تكبر ::/ وأنت وش لك ؟؟
نواف وهو مستغرب غروره ورده ::/ عجيب ..!! واقف عند باب أهلي وتقول لي هالكلام ؟؟
مؤيد وهو يرجع من عند الباب ويوقف جنب سيارته ::/ ماسمعت ان راكان له أخوان ؟؟ علمي به أن عنده أخوات بس .. (( وابتسم باستهزاء ))
نواف وهو مقهور من غرور هالشاب ::/ هذا بيت عمي وبحسبة أهلي ...!! ووقفتك قدام بابهم ما عجبتني ؟؟ يعني لك شي نقدر نخدمك فيه آمر واحنا حاظرين ..؟؟
مؤيد بتهكم::/هههههههههههههه ما يبغى لها كلام لو أبغى شي منك اكيد بآمرك وما فيها شك ؟؟
نواف اللي فعلا تضايق وكان شاد على قبضة يده ::/ المطلوب ؟؟
مؤيد وهو يتسند على باب السيارة ومواجه لباب البيت ::/ انا انتظر راكان يجي ..!! يعني ما أبغى منك شي ؟؟
نواف باستغراب ::/بس راكان شكله مو هنا لأن سيارته مو موجودة ..!!
مؤيد وهو متملل ::/ عارف مو أنت اللي تجي تعلمني ..!! هو الحين بيجي قايل لي انتظره ببيتهم بس انا ولد أجاويد ولا دخلت على الحريم بالبيت لحالهم .. (( ورفع حاجبه لنواف ))
نواف يتطنز ::/ حي الله ولد الأجاويد ...
سفهه نواف وتقرب للجرس علشان يدقه ويطلعون له بنت عمه وامها وفي نفس الوقت كان منقهر من تصرفات ولد عمه العديمة المسؤولية والغيرة (( الحين قايل للرجال يجي ينتظره ببيتهم وهو عارف انه مو موجود وأن مافيه رجال بالبيت غيره ،، وما في البيت الا أمه واخواته البنات عرضه وشرفه ..!! صدق انه يبغى له تأديب هالمستهتر بس مو منه من هالسم اللي يآخذه ويشربه نساه دينه وعاداته وتقاليده ..!!))
دق نواف الجرس وردت عليه نورة بنت عمه الصغيرة وقال لها تنبه عبير انه جاء ..
رجع نواف من عند الباب وراح يركب سيارته ويقربها للباب اكثر علشان يريح مرت عمه وكان مؤيد لا زال واقف قدام الباب .. ونواف منقهر منه وده لو يروح ويعطيه كم بكس على كم طراق علشان يستحي على دمه ويرجع لسيارته .. طلعت عبير من البيت وكانت ماسكة امها واول ماشافهم نواف نزل على طول حتى يساعد مرت عمه وغصبا عن نواف التفت لمؤيد بيشوف هل هو فعلا ولد اجاويد وصاد عن الحريم والا فاتح عيونه ..؟؟؟
بس للأسف شافه رافع واحد من حواجبه ومركز عيونه على عبير اللي كانت ماسكة امها وتحاول تنزلها من الدرج .. هنا انقهر نواف من جد وبعصبية قال لعبير وهو يمسك يد مرت عمه ::/ عبير روحي اركبي السيارة وانا بجيب امك ..
استغربت عبير من تصرفه بس نزلت عند رغبته ونفذت له اللي يبغى .. وراحت وركبت السيارة وهي مستغربة تواجد هالشاب الى هاللحظة قدام بيتهم ..
نواف ركب مرت عمه وراح هو يركب في مقعده بس اول ماركب قالت له مرت عمه ::/ هذا الى الآن موجود ؟؟ ماراح ؟؟
نواف وهو عاقد حواجبه ::/ ليه ؟؟ ومن متى أصلا هو جايكم ؟؟
ام راكان ::/ قبل نصف ساعة دق علينا الجرس يبغى راكان وقلنا له أنه مو موجود بس أصر أنه يدخل وينتظره داخل البيت لكن لولا الله ثم لسان عبير والا ان كان هو الحين بالمجلس (( وضحكت ))
نواف يبتسم بعذوبة ::/ بنت رجال والله ..
وحرك نواف سيارته بيمشي لكن وقفته عبير ..
عبيربصوت واثق ::// نواف معليش نوقف لحد مايجي راكان ويروح معه ..
نواف مستغرب ::/ ليش عاد ؟؟
عبير وهي تفرك يدها من التوتر ::/ لا بس اخاف على أريج ونورة وانوار تراهم بالبيت لحالهم وودي اتطمن عليهم وانه راح ..
نواف وصار أسنانه من القهر ::/ أنتم متأكدين انه يبغى راكان وماسوى لكم شي ؟؟
ام راكان ::/ لا والله ياولدي ماسوى شي بس لأنه أصر علينا يدخل المجلس مع اننا قايلين له مافيه رجال بالبيت وأنه لازم ينتظر راكان بسيارته .. وبس هذا اللي مخوفنا يعني أخاف يدق على أريج ويقول لها انه من طرف راكان .. عاد أريج انت عارفها تخاف من طاريه اخافها تروح تفتح له علشان تفتك من لسان اخوها ولا يضربها ..
تنهد نواف ووقف سيارته ينتظرون راكان يشرف .. وفعلا ما مر 10 دقايق الا وهو جاي دخل البيت وبدل ملابسه وطلع مع هالصديق اللي مبين انه ولد نعمه بسيارته ..
وبعدها تحرك نواف متوجه للمستشفى وشعور السعادة بدأ يغمره من جديد لأن هواه اللي يتنفسه راكب وراه ..!!
----------------------------------------------------------------------------
|
24-04-08, 02:55 AM
جديد مواضيع قسم القصص المكتمله
العرض العادي
