مشاري:إيه ياشيخ..
الشيخ:طب يوم حلمت هالحلم علاقتك مع زوجتك كويسه..
مشاري:أول مره حلمت بهالحلم..كانت علاقتي فيها سيئه..كنت ماأكلمها..
لكن ثاني مره ..عادي علاقتي فيها من أحسن مايكون..
الشيخ: لاحول ولاقوة إلا بالله..طيب علاقتها مع أهلها..
مشاري: بصراحه ياشيخ أهلها مقاطعينها..
الشيخ:لاحول ولاقوة إلا بالله..
مشاري:بس هي مالها ذنب..هم اللي غلطانين عليها وقاطعوها..
الشيخ:بسألك بصراحه وجاوبني ياولدي..إنت تحبها؟؟
,,مشاري دنق وغمض عيونه بألم وتنهد وقال: مادري..
الشيخ: إشلون ماتدري..أنت تحبها؟؟
مشاري: اللي أعرفه إني ما أستغني عنها ووجودها قدام عيني ضروري..
الشيخ:شوف ياولدي..
زوجتك إنسانه كامله بجميع المقاييس.. وإنسانه كفؤ وقد المسؤوليه..
والخيشتين اللي على ظهرها.. أول خيشه هي أنـت..
مشاري باستغراب: أنــــا؟؟
الشيخ: وثاني خيشه أهلها..
هي تحبكم وتقدركم ومخلصه لكم.. وماشافت منكم ياهالطرفين أي مقابل..واللي باين بالحلم إنكم مكافئينها بالجحود والقسوه..
ومسببين لها ألم وحزن في حياتها...
بس موقادره تكرهكم او تتركم والدليل إنها مي راضيه تستغني عنكم وتشيلكم من على ظهرها أو تنزلكم عالأرض..
,,سكت مشاري وهومتنح وعاقد حواجبه وعيونه مليانه دموع..
الشيخ: شوف ياولدي..أنا فسرتلك حلمك واللي علي سويته..
لكني أبي أريح ضميري وأذكرك بتقوى الله ومخافته في زوجتك..
مهما كان هي ضعيفه ومحتاجتك..وتحبك.. فلاتكون في حياتها مجرد حزن وألم..
مشاري وهويالله يالله يحكي: يعطيك العافيه ياشيخ ماقصرت..
الشيخ:الله يعافيك..
,,وأنهى مشاري المكالمه وهومصدوم وكاره نفسه..
مشاري: أنا مسببلك يارهف ألم.. أناجاحد وقاسي؟؟؟
كل ملامح التعب وكل هالثقل اللي على ظهرك أنا سببه؟؟
ياربي والله إني أجاهد عشان أريحك يارهف وما أضايقك..
يارب سامحني..على كل اللي سويته برهف..يارب سامحنـــــــي..
,,شوي ولارهف تفتح الباب بهدوء وتناظر لمشاري وتبتسم..
رهف: الســــــلام عليكم..
مشاري وصوته مبحوح: عليكم السلام..
,,ويأشر مشاري بيده جنبه وتجي رهف تجلس بهدوء..
رهف وهي مبتسمه: كيفك؟؟
مشاري وعيونه مانزلت عن عيون رهف: أنا زين..
,,ويحط يده على بطن رهف ويقول: لكن إنتي وجهك تعبان.. الظاهر مهبل فيك هالولد..
رهف:يعني..بس أحس بتقلصات خفيفه..
مشاري: تبين أمي توديك المستشفى؟؟
رهف: لالالا..مايحتاج.. كالعاده بتخف وتروح..
مشاري:رهف..قررت قرار وأبيك تعطيني رايك؟؟
رهف:وشو قرارك؟؟
مشاري: إذا ولدتي إنشالله وقمتي بالسلامه..
أباخذك إنتي والبيبي ونسافر شهر عسل..
رهف:ههههههه حلوه ذي شهر عسل.. مشاري ترى خلاص بنخلص سنه واحنا متزوجين.. بعدين نسيت شهر العسل اللي بجده..
مشاري وهومكشر: بالله تسمين هذاك شهر عسل..
كله مهاوشات.. وطول الوقت إنا عالنت وانتي نايمه..
رهف:لاواللـــــه.. الحين أنا اللي سرت نايمه.. لو إنت معطيني وجه كان مارحت نمت..
,,,,مشاري يضحك..
رهف: بس ولو يا مشاري.. يمكن ماتصدقني..
والله إنها أحلى أيام مرت علي بحياتي.. لأنها جمعتني فيك..
,,ناظر مشاري برهف وقال:
سبحان اللي يغير ولايتغير..من يصدق إحساسي هذيك الأيام يتغير وينقلب 360 درجه.. لهالإحساس اللي لك بقلبي الحين..
رهف: وأنا من هذيك الأيام إلى آخر يوم بعمري وأنا إحساسي لك مايتغير ولايتبدل..
بالعكس إنت سرت كل أحاسيسي ومشاعري وسرت دنيتي كلها..
مشاري: طيب يللاه إختاري.. وين تبين تسافرين؟؟
رهف: أممممممم..جده..
مشاري بعصبيه: ما أقول إلا ياليت هالجبس اللي بفخذي بيدي..
رهف وهي تضحك: ليــــه؟؟
مشاري: عشان أرقعك على خشمك..
من جدك إنتي.. تبينا نروح جده..
رهف:هههههههه خلاص إنت كيفك إختار اللي تبي وين مارحت أنا معك..
مشاري:إشرايك نروح بلجيكا.. وبعدين نروح على أسبانيا..
تكون أسيل هي وزوجها هناك...نزورهم ونقعد معهم يومين وبعدها نكمل رحلتنا وين مابغينا..
,,ابتسمت رهف بألم وعورها قلبها لما ذكر مشاري إسم أسيل وقالت بنفسها:
إنشالله الله يشفيها وترجع مع زوجها يارب..
مشاري: ها اشقلتي؟؟
رهف:إنت بالأول فك هالجبس..
وخلني أولد.. ولاقمنا إحنا ثنيناتنا بالسلامه يسير خير..
****
*****
(في بيت أبوصالح..)
,,في غرفة أثير..
,,,بعد يوم مليئ بالأحداث..
كانت قاعده على طرف السرير وهي قمه بالجمال والنعومه ومصدومه وترتجف وخايفه وتفرك إيدينها ببعض.. وبحالة بكاء شديدة..
فتح صالح الباب بهدوء ,, وقرب منها وجلس جنبها وحط يده على كتفها..
صالح: أثيــــر..خلاص..من يوم ماطلعنا من القاعه وركبتي السياره وانتي تبكين ومنهاره..كل هذا حب بأبرار؟؟
,,أثير ماترد ومستمره تبكي..
صالح:خلاص يا أثير..
إنتي المفروض تدعينلها بالتوفيق وإن الله يسعدها ويرزقها الذريه الصالحه..
وبعدين لاتخافين..فراس إبن حلال وإنسان مستقيم وملتزم وبيحطها بعيونه..
بالعكس هو اللي الله يعينه عليها..
,,حطت أثير إيدينها على وجهها وانهارت تبكي وهي تقول بنفسها:
يااللـــــــه ياصالح..موحاسس بالمصيبه اللي بتطيح على روسنا..
,,قرب صالح من أثير وشال إيدينها من على وجهها وقال:
خلاص..قومي شيلي هالمكياج وغيري فستانك.. وارتاحي شوي..
***
****
*****
(في بيت أم عبدالرحمن..)
,,بغرفة منى..
كان عبدالرحمن نايم على السرير ومعطي زوجته ظهره..
ويتنهد بكل ألم.. وشايل هموم الدنيا كلها على راسه..
حست منى إن عبدالرحمن مانام ولسه صاحي.. قربت منه بهدوء وحطت يدها عليه..
منى: عبدالرحمن..مانمت؟؟
عبدالرحمن وهويتنهد: من وين يجيني النوم..وبنتي أسيل هذي حالتها؟؟
منى:عبدالرحمن.. وبعدين إحنا بنقعد كذا ساكتين والبنت كل مال حالتها تتدهور..
لادراسه ولازواج ولانفسيه زينه.. يكفي هالترم والترم اللي فات ضاعوا عليها عشان هالزواج..على أمل إنها تكمل دراستها بأسبانيا..
عبدالرحمن: وش أسوي..
هذا أنا قاعد أوديها عند الشيخ اللي يقرأ عليها بانتظام..
ووديتها عند دكتور نفسي.. وكلامهم واحد مايتغير..هاللي في البنت عين قويه مواضطراب نفسي..
قسمآ بالله إن تفكيري إنشل موقادر أفكر إلا فيها..سرت لا أشتغل زي الناس ولا أقعد مع خلق الله..طول الوقت بالي مشغول..
لكن الظاهر مافي إلا حل واحد.. نخلي معاذ يطلقها..
منى:لا ياعبدالرحمن لاتستعجل حرام نخرب حياتهم وهي لسه ما ابتدت..
الولد ماصدر منه إلا كل خير..يحبها وبينجن عليها وكلنا ملاحظين..
حتى أسيل ياعبدالرحمن اعترفت إنها تحبه زي ماهويحبها.. ولاعمره ضايقها أو كدر خاطرها.. بس تقول لاشافته تحس نفسها بتموت وينقلب هالحب اللي بقلبها لكره..
عبدالرحمن: يعني شالسواه..
منى:سواة الله أبرك إحنا نصبر.. وانشالله تتحسن حالتها..
***
****
*****
((في شقـة فراس...))
,,كانت جالسه على طرف الكنبه وعيونها مليانه دموع ومي مصدقه الوضع اللي هي فيه..
,,مشى بهدوء وفصخ بشته وفرش سجادته وصلى ركعتين..
وبعدين قرب منها وحط يده على راسها وقال:
اللهم إني أسألك خير مافيها... وخير ماجبلت عليه..
وأعوذ بك من شرمافيها... وشر ماجبلت عليه..
,,,وباس جبينها ومسك يدها وجلس جنبها..
فراس:مبروك يا أبرار..
,,أبرار ساكته وترتجف وماسكه بين إيدينها مسكة الورد بأقوى ماعندها..
فراس: مصممه ماتسمعيني صوتك... يللاه مومشكله..
إشرايك تقومين تغيرين ملابسك.. وتجين عشان نتعشى...
,,أبرار على نفس الوضع..
حس فراس بتوتر أبرار الزايد وخوفها..وحب إنه يهديها..
مد يده بكل براءه ومسك كتفها بكل حنيه.. لكن أبرار ارتجفت ونفضت يده وبعدتها عن كتفها..
,,استغرب فراس وبلع ريقه وقال:
أبرار.. حبيبتي إهدي... خلاص قومي غيري فستانك وتعالي نتعشى..
أبرار بصوت مرتجف: مابي أتعشى..
فراس:بس أنا جوعان أهون عليك آكل لحالي؟؟
أبرار: فراس مابي آكل شي..
فراس: خلاص مومشكله إنتي روحي غيري وإذا جيتي يسير خير..
,,مشت أبرار ودخلت لداخل وهي ترتجف ومومصدقه إنها خلاص تزوجت فراس..
وميته خوف من اللي بيسير...
,,,,
,,,,
بعد مرور قرابة النص ساعه..
كان فراس قاعد بغرفة التلفزيون.. وحاط على طاولة التقديم صحون العشاء وحاط إيده على خده..
فراس:إنا لله هذي وينهي..
,,قام فراس وتوجه لغرفة النوم..
أول مادخل الغرفه إنصدم فراس..كانت أبرار نايمه عالسرير ومتلحفه..
ومعطيه ظهرها الباب ومغمضه عيونها بشده..
فراس: أبرااار.. الله يهديك نمتي..
الحين أنا قاعد يدي على خدي أستناك.. تروحين تغيرين فستانك..
وتنــــامين..
,,أبرار ماترد وترتجف ومغمضه عيونها بقوه..
فراس برجاء:يابنت الناس وشفيك خايفه مني...
والله ما أسوي فيك شي.. بس قومي تعشي وسولفي معي شوي..
,,,أبرار على حالها..
فراس: خلاص مومشكله..
اليوم براعيك وأخليك تنامين..
لكن بكره إنشالله إنك تسيرين أحسن وتجلسين معي وتسولفين..
طيب ياأبرار..خلاص اتفقنا..
,,,ويطلع فراس ويترك أبرار خايفه ومنهاره.. وتدعي على نفسها..
ومنتظره اللحظه الحاسمه للمصيبه اللي هي فيها....
***
****
*****
(في بيت أم عبدالرحمن..)
,,بغرفة أسيل...
أسماء: تكفين أسيـــل..
أسيل وعيونها مقفله:أسماء الله يخليك إطلعي وصكي اللمبه..والله مالي خلق..
أسماء:أسيل.. خلنا نروح نسهر مع عمتي رهف..
هي بعد ماعشت مشاري وقعدت شوي معاه إلين نام..طلعت فوق غرفتها وقالتلي تعالي عندي إنتي وأسيل إسهروا وسولفوا معي شوي..
أسيل: إسهري لحالك...ماأبي أشوف أحد..ابي أنام وبس..
,,تنهدت أسماء وطالعت بأسيل وقالت بنفسها:
مومعقول هذي أسيل..
تغيرت سايره إنسانه ثانيه...
,,وتقوم أسماء وتطفي اللمبات وتسكر الباب وتتوجه لغرفة رهف..
,,
,,دقت أسماء الباب..لكنها مالقت أي رد..
أسماء:معقوله رهف نامت؟؟
بس هي قالت ما رح أنام وبستناكم نسهر سوا..
,,رجعت دقت أسماء الباب وبهاللحظه فتحت رهف الباب..
أسماء بخوف:رهـــــف..
,,كانت رهف وجهها أحمر ودموعها مليه وجهها..
وأول مافتحت الباب طاحت عند عتبة الباب..
أسماء وهي تحاول تسند رهف وتقومها:
رهف وشفيــــــك؟؟
رهف وهي تتنفس بصعوبه وتبكي:
أسمـــــاء..الحقيني..نادي عمتي لطيفه..بمووووووت...
,,وتترك أسماء رهف مكان ماهي وتروح تنادي أمها وجدتها..
,,فزت لطيفة من نومها على صراخ أسماء,,وراحت بسرعه عند رهف ولحقتها منى..
لطيفه وهي تحط راس رهف على صدرها:
رهف.. وشفيك يمه..وشتحسين فيه..
رهف:الحقيني ياعمه بمووت..بمووت..تقلصات ذبحتني..موقادره استحملها..
منى:بسم الله عليك يارهف...عمه الظاهر إنها تبي تولـــد..
لطيفه:تولد وهي لسه بالثــــــــامن..
بسرعه يامنى..سنديها معي ونادي عبدالرحمن عشان نوديها المستشفى..
منى: طيب..
لطيفه: وانتي يا أسماء... انتبهوا لاحد منكم يصحي مشاري ويقوله..
خلوه إلين يصحى الظهر وأنا بكون فيه وأقوله..
أسماء: انشالله ياجده..
,,,ويجهز عبدالرحمن السياره وينطلقون للمستشفى..
****
*****
,,بالمستشفى..
,,,,الساعه 1 الفجر..
لطيفه: ها يا دكتوره بشري..
الدكتوره:هي من متى تحس بهالآلام هذي؟؟
لطيفه: والله يادكتوره إني مادري..ليه حالتها خطيره؟؟
الدكتوره: لاانشالله موخطيره..
بس الرحم عندها مفتوح ثلاثه سانتي..
بنعطيها فرصه ووقت يمكن تولد طبيعي.. إذا ماولدت طبيعي بنولدها قيصري..
,,الدكتوره تلتفت لعبدالرحمن وتقول: حضرتك زوجها؟؟
عبدالرحمن:لأ..أنا أخو زوجها وهذي أمي..
الدكتوره باستغراب:أجل وين زوجها؟؟ في إجراءات وأوراق لازم يوقع عليها..
لطيفه:زوجها سايرله حادث وماقدر يجيبها ...لكن بكره انشالله إذا قدر بيجي..
الدكتوره: الله يعطيكم العافيه وجوده ضروري..لازم على ولادتها يكون موجود..
وبالنسبه لكم تقدرون ترجعون البيت وترتاحون لأنه الوقت تأخر والظاهر بتطول إلين تولد وحرام نسهركم..وانشالله إذا ولدت بندق عليكم ونبشركم..
لطيفه: لا مانيبراجعه أبقعد عندها إلين تولد..
عبدالرحمن:يمه الله يهديك جلستك بالمستشفى مالها فايده وتعرفين جلسة المستشفيات إشلون متعبه.. وضروري ترجعين البيت عشان إذا صحى مشاري تكونين قدامه وتقولين له الخبر بنفسك..
لطيفه بعد ما اقتنعت بكلام عبدالرحمن: طيب دكتوره أبي أشوفها قبل ما أروح عشان أتطمن عليها وأطمنها..
الدكتوره: أكيد..تفضلي مع الممرضه وبتوديك الغرفه عندها..
,,,
,,,
,,كانت رهف متمدده عالسرير وميته خوف وتتنفس بصعوبه شديده ووجهها يتلوى من الألم وكل شوي تعض شفتها وتتأوه..
ويدها فيها مغذي ..حطوا لها الممرضات في محلول المغذي طلق صناعي عشان يساعدها ويعجل بالولاده..
,,دخلت لطيفه على رهف اللي كانت مغمضه عيونها وتتأوه..وناظرتلها بكل رحمه..
لطيفه وهي تقرب لرهف وتمسح على راسها بحنان:
رهف..
,,شهقت رهف وفتحت عيونها وأول ماشافت لطيفه إنهارت وبكت..
لطيفه:بسم الله عليك..لاتبكين يارهف..
يللاه شدي حيلك وتشجعي وأولدي وقوميلنا بالسلامه..
رهف وهي تبكي:عمــــه..بموت..
لطيفه:بسم الله عليك..رهف لاتجيبين سيرة الموت..
لاانتي أول وحده ولا آخر وحده تولد.. وكل الحريم هذي حالتهم..
رهف: تكفين ياعمه إدعيلي..
لطيفه:الله يقومك بالسلامه يارهف..لاتخافين..لاتخافين..
شوفي وانا أمك.. عبدالرحمن يقول نرجع البيت..لكني خلاص أبقعد معك إلين تولدين..
رهف:لا والله ياعمه.. والله لترجعين البيت وترتاحين..
[وتغمض عيونها] أنا شكلي مطوله..
لطيفه: لاخليني أجلس معك..
رهف:عمه تكفين..ما أبي أتعبك معي إرجعي البيت وارتاحي..
لطيفه: خلاص...أنا برجع البيت لأني أبي أكون جنب مشاري لاقام من نومه..
بس يا بنيتي ماتبين ندق على منيره ولا أبوك..
رهف وهي تمسح دموعها بألم: لايا عمه..حتى لوتدقين ما حد رح يهتم.. بس إذا ولدت خلي مشاري يدق على صالح ويقوله..
لطيفه:انشالله..
خلاص يمه أنابروح ..الله يهون عليك..ولاتخافين كل هالألم والخوف بيروح وتنسينه لاسار ولدك ولا بنتك بين إيدينك..
رهف بتردد: عمه..
لطيفه:لبيه يارهف..
رهف وهي تبكي: عمه...
إذا صارلي شي.. إنتبهي لولدي ياعمه.. أبيك تربينه نفس تربية أبوه وأعمامه..
لطيفه وعيونها مليانه دموع: إذكري الله يارهف لاتقولين هالحكي..
رهف: تكفين ياعمه إسمعيني..
أنا تشردت وذقت الويل بعد وفاة أمي ..مابي ولدي يعيش نفس مأساتي..
أبيه يعيش بحب أبوه وحبك وحب كل اللي حولينه..
ما أبيه يفقدني ويحس بالنقص..
لطيفه ودموعها تنزل غصبن عنها:يارهف وشهالكلام ..
ماحد مربي ولدك ولاحد منتبه له غيرك..
رهف:عمه..بطلبك طلب أخير..
لاصارلي شي.. لاتزوجين مشاري إلا برضاه..[وتشاهق رهف من البكي]
تكفين ياعمه تكفين.. لاتزوجين مشاري إلا البنت اللي يختارها ويطلبك تخطبينها..
,,وتقوم لطيفه من مكانها وتحضن رهف وتهديها وتودعها وتطلع لعبدالرحمن ويتوجهون للبيت..
وطول الطريق ولطيفه دموعها ماوقفت وقلبها قارصها من وصية رهف وكلامها وطول الوقت تدعي إن الله يستر..
***
****
19-06-08, 07:20 AM
<< حقك علي إن كنت زعلان للكاتبة : ما عاد بدري >>
جديد مواضيع قسم القصص المكتمله
العرض العادي
