لمشاكل التسجيل ودخول المنتدى يرجى مراسلتنا على الايميل liilasvb3@gmail.com





العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 15-03-08, 02:59 PM   المشاركة رقم: 31
المعلومات
الكاتب:
اللقب:
ليلاس متالق


البيانات
التسجيل: Oct 2007
العضوية: 47930
المشاركات: 122
الجنس أنثى
معدل التقييم: moon_k عضو بحاجه الى تحسين وضعه
نقاط التقييم: 12

االدولة
البلدMorocco
 
مدونتي

 

الإتصالات
الحالة:
moon_k غير متواجد حالياً
وسائل الإتصال:

كاتب الموضوع : moon_k المنتدى : القصص المكتمله
افتراضي

 

(( الجزء الثامـــن عشر)

وفي اليوم الثاني كانت ملجة نوره .. اللي الكل كان ينتظر هالييوم لان نوره غاليه على الكل ..
ونوره وهند قامو من الصبح عشان الكوافيره اتي بيتهم ..

اما ساره فكانت في سابع نومه ...
والريم طبعا كالعاده لازم توعيها من الصبح ..
موبايل ساره يرن ..ساره بتعب : الو
الريم : هلا بربيعتي
ساره ما تقدر تفتح عيونها من التعب : ريمو انتي لازم تخربين عليه رقادي ..
الريم بابتسامه: طبعا لازم ..نذاله
ساره : توني اعرف ان النذاله بدمج .
الريم تضحك : هههههههههههههههههه .. اقول ساروه
ساره : خير
الريم : متى بتقومين عشان تروحين الصالون .
ساره : ليش اروح

الريم : ساره بلا عبط شو نسيتي ان اليوم ملجتج نوره .
ساره : لا طبعا مستحيل انسى ..بس انا بييب الكوافيره تسوي شعري والمكياج انا بسويه ..لان اليوم محد بيي بس بيناتنا يعني اهلنا .. واحب احط مكياج خفيف
الريم : زين وشعرج ؟ شو بتسوين فيه
ساره : بفتح شعري ..
الريم: وانا شو اسوي
ساره : افتحي شعرج ..احلى ..لان الملجه في البيت ..
الريم : خلاص اوكي ... بفتح شعري.
ساره : خلاص العصر تقريبا تعالي بيتنا .
الريم : خلاص اوكي ..اشوفج اليوم ان شاء الله ..

وبعد ما صكت الريم من عند ساره راحت ادور على فهد اخوها ..
الريم تدور على فهد: فهد فهد وينك
فهد توه قايم من النوم : خير يا الريم شو تبين من صباح الله خير ..
الريم رايحه عند اخوها بدلع : اقول اخويه ..
فهد : هالدلع معناتها تبين شي صح
الريم بابتسامه : طبعا .
فهد : بعد تعترفين ..زين شو تبين
الريم : اباك توصلني اليوم .ز
فهد :لا اليوم مب متفيج معزوم اليوم ويا الربع .
الريم بخبث : بس اليوم يوم مميز ..لان اللي بتكون هناك حبيبة القلب .
فهد اول ما سمع حبيبة القلب فتح عيونه وراح عند الريم :والله ساره بتكون هناك .
الريم : اعرف نقطة ضعفك
فهد يضحك : هههههههههههههه ان كيدهن لعظيم
الريم : ههههههههههههههههههه
فهد : زين وين تبين تروحين
الريم : الله يسلمك بروح عند ساره عشان ويا بعض نروح ملجة نوره
فهد تغيرت ملامحه : قصدج اخت خالد
الريم: فهد نوره ما يخصها بخالد ..ولا تربط كراهيتك لخالد بنوره .
فهد: ادري .. بس يوم سمعت نوره تذكرت خالد..
الريم : المهم بتوصلني .
فهد بابتسامة خبث: اي شي يتعلق بالهوى اللي اتنفسه اكيد بسوي ..
الريم : عسى الله لا يحرمك منها
فهد يرفع يدينه للسماء : آمييييييييييين


وبعد المغرب الكل كان كاشخ لهاليوم ..
ونوره كانت فرحانه لان اليوم بتشوف فارس احلامها بتشوف عبد الله وكانت صدق قمر ...لبست السماوي على التركوازي ..ورفعت شعرها السايح بطريقه حلوه .. وكان مكياجها ناعم لان الملجه بتكون عاديه ..

دخلت ساره والريم على نوره وهند ..
ساره والريم وهم فاتحين الباب : السلام عليكم
نوره صدت : وعليكم السلام ..
ساره رايحه تسلم على نوره : ماشاء الله عليج يا بنت خالتي طالعه قمر اليوم والفستان والمكياج لا يقين عليج ..
الريم بنظرة دلع : يا بخت اللي بياخذج .
نوره ويها احمر : تسلمون ..والله اخجلتوني ..
هند : وشو رايكم فيه
ساره : ايكد حلوه طالعه على اختج ..
نوره : وانتي بعد ياساره مه ان حاطه مكياج طبيعي وخفيف بس طالعه حلوه ماشاء االله عليج ..
_(( ساره كانت فاتحه شعرها العسلي ..وحاطه مكياج بسيط وردي على بنفسجي ..ولابسه بدله حلوه فيها تطريز بسيط بلون الوردي والبنفسجي..وكانت صدق حلوه)..

نوره تشوف الساعه ومتوتره ..
ساره : بلاج نوره ليش هالتوتر
نوره : امي بعد شويه بنزل ان شاء الله وخايفه
ساره : ليش خايفه اليوم مب زحمه بس بيناتنا يعني مب وايدين
الريم تغمز لنوره : لا هي خايفه ومتوتره لان بتشوف الحبيب اليوم.
نوره استحت ونزلت راسها وتلعب باصابعها : الريم بلا احراج ..
ساره : هيه صح نسيت ان هو بيي آخر ربع ساعه عشان ييلس ويا العروس ..
نوره : هي والله صدق متوتره كيف أيلس وياه والله فضيحه.
ساره : لا فضيحه ولا شي .. اصلا هو بيكون ريلج يعني حلال عليج تشوفينه وتيلسين وياه ..وخلا حلمج بيتحقق اخيرا ان شاء الله
نوره تقرى على عمرها اونها تخاف من الحسد .
ساره تضرب على كتف نوره : ايه ما بحسدج عفان الله ..
نوره والريم وهند : ههههههههههههههههههه

ومرت ملجة نوره اللي كانت بسيطه وحلوه بنفس الوقت والكل مدح جمالها ورقتها ..بس طبعا عيونهك كله على ساره لان هي اللي ماخذه الجمال بهاليوم ..والكل تمناها لاحد من اولادهم بس زعلو يوم عرفو انها مخطوبه
وخالد بعد ما عرف ان أغلبية الناس روحو البيت ..اتصل في نوره عشان يقولها خلا تروح الميلس لان عبد الله ريلها يبى يشوفها ..
نوره خايفه ويها محمر واقفه مكانها ..
ساره شافت توتر نوره وراحت عندها : نوره شو فيج ليش متوتره
نوره تبلع ريجها : ساره خالد متصل فيه توه ويقولي ان بعد الله يترياني بالميلس ولازم اقعد وياه ..
ساره بابتسامه : زين وشو المشكله ..من حقه يشوفج وييلس معاج
نوره : والله مستحيه وخايفه..اقول ساره هاتي العبايه والشيله بغطي شعري وجسمي ..
ساره فاتحه عيونها : اولا لبسج مب عاري وااايد ..ثانيا بلاج استخفيتي ..هذا استوى ريلج يعني حلال شو فيج ..
نوره : لا لا استحي ..زين على الاقل هاتي الشال بغطي كتفي ساره : على راحتج ...

وراحت نوره مع اخوها خالد الميلس عشان تشوف عبد الله اللي كانت معجبه فيه من زمان ..
عبد الله كان قاعد في الميلس ويتريه يشوف اللي دخلت خاطره ..
نوره وهي شوي بتصيح من الحياء ..الس الس الس السلام عليكم ..
عبد الله اول ما سمع هالصوت رفع راسه ولا يشوف حبيبته واللي حلم فيها بابتسامه تشرق على شفاته : وعليكم السلام ..
خالد : عن اذنكم عيل بخليكم على راحتكم.
نوره ماسكه كندورة خالد وبصوت واطي : وين بتروح تعال لا تخليني بروحي .
خالد يضحك : يالله باي
وطلع خالد اما نوره منزله راسها وميته من الحياء ..
عبد الله حس بفرحه كبيره لان واخيرا شاف نوره ..: نوره تفضلي قعدي ليش واقفه
نوره ما قدرت ترفع راسها : ها ..ممممم ..لا انا جذي مرتاحه
عبد الله : زين قعدي ..بتتعبين من الوقفه .تعالي قعدي ..
نوره قعدت بس بعيده شي عن عبد الله ..
عبد الله : شحالج يا نوره
نوره بخجل : الحمدلله بخير..
عبد الله ما يعرف شو يقول : زين شو اخبار الدوام
نوره : الحمد لله اوكي
عبد الله : مب في خاطرج تقولين شي يا نوره
نوره بعدها منزله راسها وقلبها يدق بسرعه من الخوف : لا سلامتك ..
عبد الله : طبعا اللي تبينه انا راح انفذه وابشري باللي تبينه ..
نوره : تسلم كلك ذوق ..
عبد الله ماسك البطاقه وراح عند نوره : تفضلي
نوره رفعت راسها وشافت بطاقه : شو هالبطاقه
عبد الله : رقمي مكتوب على هالبطاقه ..وانا اعرف رقمج .. عشان نكلم بعض ونفهم بعض قبل العرس ..
نوره ما قالت شي ولا خذت البطاقه ..
عبد الله : نوره خذي البطاقه ..نحن الحين كانا متزوجين يعني حلال اني اكلمج لأنا ملجنا يعني عادي اكلمج
نوره برقه خذت البطاقه ..
عبد الله : يالله عن اذنج ..الحين اترخص اوكي
نوره قامت من مكانها : خلاص على راحتك ..
عبد الله بابتسامه : مع السلامه يا نوره .. وان شاء الله بكلمج باقرب وقت ..
نوره بابتسامه رقيقه : مع السلامه يا عبد الله

بعد ماراح عبد الله وقفت نوره مكانها وماسكه البطاقه ومبتسمه .. لانها صدق حبت عبد الله من اول يوم شافته ومن شخصيته ..


راحت نوره الصاله وشافت اهلها ..
ام نوره راحت عند نوره وحضنتها : الف مبروك يا نوره وعسى الله يهنيج ..
نوره : الله يبارك فيج ..
خالد بعد راح عند نوره وباسها على خدها : الف مبروك يا اختي والله تستاهلين كل خير..
نوره : تسلم يا اخويه ..وعسى الله يسعدك ..
خالد : تسلمين يا اختي ..وترى اقولج ان عبد الله ونعم الريال وله شخصيه ..وبعد غاوي ماشاء الله عليه
نوره مستحيه : وطبعا اهم شي دينه واخلاقه ..
خالد : وجماله بعد ..انتو البنات اهم شي عندكم واحد حلو
..واخر شي تفكرون باخلاقه
نوره : هههههههههههههههههه .لا والله مب كل البنات نفس الشي .. بس يعني نحن نبى شخص بدينه واخلاقه ومره وحده يكون حلو
خالد : حشى يعني 3 اشياء مره وحده
نوره : زيادة الخير خيرين
خالد ونوره : ههههههههههههههههههه

/أما هند كانت فرحانه لاختها ..بس في بالها الحينه سالم ومشكلته وكيف تقنع اهلها فيه ...
وخالد كان يصد يمين ويسار وطبعا هو يدور على ساره ..لان ساره دايما اتم آخر شي ..
ام خالد لاحظت ان خالد يدور على حد: خالد بلاك يمه ادور على منو
خالد توتر : ها../ممممم...ولا حد
نوره تنغز اخوها : ولا حد ولا ادور على ساره .
خالد : لا طبعا وانا شو يخصني فيها
نوره : المهم اذا كنت ادور عليها ترى اقولك ان ساره راحت البيت
خالد : نوروه ..انتي ما تيوزين حتى في يوم ملجتج ..
نوره : هههههههههههههههههه


ساره وهي تسحي شعرها كانت متضايقه لانها كانت تفكر بخالد ..لان اليوم ما شافته .. بس بعد ابتسمت لانها تذكرت حركات نوره يوم خالد ناداها ..
ساره تكلم عمرها : صدق يا نوره راح أفقدج اذا تزوجتي ..

اما عبد الله فكان خاطره ان يكلم نوره بنفس اليوم ..بس لانه عرف ان نوره مستحيه وايد ويمكن تكون تعبانه فأجل مكالمته لنوره بيوم ثاني .. وطبعا هو كان فرحان اكثر من نوره ...لانه صدق كان معجب فيها
وفي اليوم الثاني الكل طبعا كان قاعد في الصاله الا هند ..لان هند كانت متضايقه بسالفة سالم وتحاتي كيف تقنع اهلها ..
ام خالد : نوره ..وين اختج
نوره : والله ما عرف يمكن نايمه
بو خالد : معقوله تنام لين ساعه 12 ..ثانيا خلا تقوم ما بقى على امتحاناتها الثانويه الا اسبوعين
ام خالد : هي والله عاد ان شاء الله تفرحنا بنسبه حلوه
خالد: هاي من صغرها ما تهتم بمذاكرتها ..ماعرف طالعه على منو
ام خالد : اقول نوره سيري شو اختج وينها ؟ ..
نوره : انا دقيت عليها الباب بس هي ما ردت عليه ..
خاالد : والله هند البارحه مب طبيعيه ..احس فيها شي
ام خالد : يمكن عشان اللي تقدم لها
خالد بعصبيه : واصلا ليش تفكر فيه ..هي ما تعرفه ..ثانيا سالم ما يشرف يكون اختي ..
نوره قامت من مكانها : انا بروح عندها ..
ام خالد : هي يمه شو في شو بلاها .


نوره راحت غرفة هند وشافتها ماسكه الكتاب بس سرحانه..
نوره: ماشاء الله الاخت ماسكه الكتاب وهي بعالم ثاني
هند صدت لاختها : ما اقدر اذاكر يا نوره
نوره استغربت وراحت يلست عند هند: ليش بلاج
هند: بقولج شي ..بس رجاء بلا محاظره ولا عصبيه
نوره : شو عندج
هند: انا ابي سالم وابي اتزوجه ..وموافقه عليه .
نوره فتحت عيونها: بس
هند : اعرف شو بتقولين بس هو مرمس بنات ..ادري هالش وهو اعتذر ووعدني ان ما يكلم غيري وبعدين وايد شباب مرمسين بنات يعني شو المشكله
نوره : بس هو معروف انه لعاب ويا البنات ومب مخلي وحده الا مكلمها ويمكن في شي ثاني ونحن ما نعرف
هند : لا ما في شي ثاني .. وهو بعد ما عرفني ودر الكل ..والدليل انه يباني
نوره : والله انج غبييه لانج تصدقينه
هند : هي اصدقه لاني احبه والله احبه ..واباه وراضيه فيه
نوره : والله بتندمين
هند :لا ما بندم صدقني ..( هند راحت تمسك ايدين نوره وتترجاها ) : الله يخليج يا نوره ساعديني
نوره مستغربه لاول مره تشوف هند بهالحاله ..لان هند معروفه بغرورها ..
هند والدمعه بعيونها: والله ما بنسى جميلج اذا ساعدتيني
نوره : في شو تبيني اساعدج
هند: حاولي تقنعين اهلي انهم يوافقون على سالم .
نوره : مينونه ..هم بيستغربون بيقولون ليش هي مصره عليه وبيعرفون ان بينكم علاقه من زمان
هند : لا بقول ان سالم اخو ربيعتي ..لان سالم عنده اخت ..وبقولهم ان محترم واي شي المهم اني آخذه ..
نوره : بس انا ما ابيج تاخذين سالم
هند : نوره انتي خذيتي الانسان اللي بخاطرج لاتحرميني من اني اخذ اللي اباه
نروه : بس انا ما خذيت عبد الله عن طريق المغازله والحرام
هند : المهم خذيتي اللي بخاطرج ..ترى اذا ما خذيت سالم ما باخذ غيره ..ولا بذاكر ولا شي ..
هند كسرت خاطر نوره ..لان اول مره تشوف هند بحالة حزن والدموع بعيونها وعرفت ان هند للاسف وقعت بحب الزائف لسالم .. بس هي حطت واحد بالميه ان يمكن سالم يكون كلامه صح ويتغير..
هند : بتكلمينهم صح ..بتساعديني صح
نوره : والله بحاول اني اكلمهم مع اني ضد هالفكره بس عشان خاطرج يا هند ..
هند وهي تمسح دموعها : تسلمين يا اختي ..ماتقصرين

وهند حست بالسعاده لان احد بيكون وياها لانها صدق متيمه في حب سالم وما تفكر تزوج غيره ..

هل نوره راح تقنع اهلها انهم يوافقون على سالم ؟؟
وشو اللي ينتظر ( ساره وخالد وفهد ومحمد والريم ونوره وعبد الله )

 
 

 

عرض البوم صور moon_k   رد مع اقتباس
قديم 15-03-08, 03:00 PM   المشاركة رقم: 32
المعلومات
الكاتب:
اللقب:
ليلاس متالق


البيانات
التسجيل: Oct 2007
العضوية: 47930
المشاركات: 122
الجنس أنثى
معدل التقييم: moon_k عضو بحاجه الى تحسين وضعه
نقاط التقييم: 12

االدولة
البلدMorocco
 
مدونتي

 

الإتصالات
الحالة:
moon_k غير متواجد حالياً
وسائل الإتصال:

كاتب الموضوع : moon_k المنتدى : القصص المكتمله
افتراضي

 

هند بعد اقناع نوره بانها تزوج سالم وحبها الكبير له .. فكرت نوره انها تساعد اختها مع انها مب مقتنعه في سالم .. بس قالت يمكن يتغير بعد الزواج ..راحت نوره عند اهلها في الصاله عشان تقنعهم ان هند تبى تزوج سالم ...

نوره وهي نازله في الصاله ..

ام خالد : ها نوره شو قالت هند ؟؟
نوره تشوف الكل وساكته ماتعرف كيف تبتدي
خالد مستغرب من سكوت نوره : بلاج نوره
نوره قعدت عندهم وخذت نفس ...
ابو خالد : بلاج بنتي تاخذين نفس ..
خالد : كانج بتدخلين على حرب
نوره : خالد انته دايما ويا تعليقاتك..
خالد يبتسم ...
ام خالد : انتو صدق متفيجين انا بسالفه وانتو بسالفه ثانيه ..نوره بلاها اختج .
نوره بعد ما خذت نفس:بصراحه هند ( ارتبكت ) هند تبى تزوج سالم وموافقه عليه ..
خالد معصب : والله شو اختج تنكت .. وهي ماتعرف انه راعي بنات ..
نوره : هي تعرف بس مقتنعه ان وايد شباب جذي وهي تقدر تغيره ..
ام خالد : بس مب كل الشباب يتغيرون
خالد : وهي ليش مصره عليه .. لا يكون تعرفه ..
نوره خافت على اختها وتبى تستر عليها : لا بلاك يا خالد ليش جذي شكاك ..
ام خالد : خالد يمه لا تفاول على اختك ..
خالد : ما ادري عنها ..اشوفها مهتمه ..
بو خالد : نوره سيري نادي اختج عشان نعرف السالفه منها ..
نوره : يمكن تستحي تنزل
خالد : خلا تستحي بعدين ..ازقريها الحينه ..
نوره : اوكي بروح عندها
لا

راحت نوره عند هند وقنعتها انها تنزل عشان مصلحتها ..وهند بعد تردد كبير وافقت انها تنزل لانها مستعده تسوي كل شي عشان سالم ..

هند راحت عندهم ومنزله راسها ..
خالد واقف مكانه وعاقد حواجبه من العصبيه : ها يا هند شو يقولون انج تبين سالم ..
هند تبلع ريجها من الخوف : هي موافقه عليه
ام خالد : بس يا بنتي انتي تعرفين ان سالم راعي بنات
هند : بس يمه ..وايد شباب جذي وبعد الزواج تغيرو
ابو خالد : وانتي شو ضمنج انه يتغير يا بنتي
هند : متاكده من هالشي .. وانا مرتاحتله
خالد : ليش لا يكون تعرفينه ولا عندج علاقه وياه من ورانا
هند قلبها يدق بسرعه خافت انها تنفضح : ها ..لا ..شو ..مستحيل
خالد : عيل شو عرفج فيه ..؟
هند : سالم اخو ربيعتي وهي تمدحه دوم وقالت انه تغير ويفكر يستقر ..

خاالد : اكيد ان ما بينكم علاقه ..ترى والله اذا عرفت ان بينكم حتى لو مكالمه والله لا ادفنج وانتي حيه

هند من الخوف راحت عند نوره : خالد شو فيك انا قلت لك الصراحه..
خالد : بس انا ما اتشرف يكون ريل اختي ..
هند بعصبيه : بس يا خالد انا اللي بتزوج وراضيه فيه وخلاص محد يخصه فيني ..
خالد : شو محد يخصه فيج شو انتي عايشه في امريكا ..
هند : يمه يبه .. قولوله اني راضيه فيه ..واذا ما خذته ما بذاكر للاممتحان وبرسب وما باكل شي..
خالد : لا تذاكرين انتي اللي بتفضحين عمرج .. وترى اصرارج لسالم يخليني اشك زياده..
ام خالد : بس اخاف تندمين يا بنتي ويبهدلج
هند : لا لا ما بيبهدلني ..ربيعتي قالت كل شي عنه
ابو خالد " طبعا يا هند اخته لازم بتستر على اخوها
خالد : ما بتاخذين سالم يعني ما بتاخذينه ..
هند والدموع بعيونه : اذا ما تزوجته ما بتزوج غيره وانا حره باللي اختاره ولا بذاكر ولا شي ..

وراحت هند وهي تصيح غرفتها والكل ما يعرف شو يقول وخالد مستغرب من هند وايد.

نوره : امي خلا على الاقل يكون بينهم خطبه ..ومن الملجه هي بتعرف عنه اشياء واذا ماصار نصيب نقدر ننهي علاقتهم
خالد : اقولج يا نوره هذا لعاب يعني يعرف كل البنات



نوره : زين يمكن يتغير ..وايد شباب كانو جذي
ام خالد : وانا اخاف هالشي يأثرفي دراستها وما ابي تفضحنا وترسب ..

خالد ماعرف شو يقول وسكت وراح غرفته ..


اما هند فتمت تصيح بغرفتها لانها ما تبى الا سالم ..وهي صدق فكرت انها ما تذاكر ولا تاكل شي الا يوم يوافقون طبعا تفكيرها لازال مثل اليهال ...

محمد وهو مايعرف كيف يقنع امه عشان يتزوج بالريم وهو صدق متعلق في الريم وايد وقرر انه يكلم امه للمره الثانيه عشان يقنعها انه ما يتزوج شيخه بنت عمه ..

محمد شاف امه قاعده في الميلس ترتب الاغراض عشان ضيوف بيونهم ..
محمد واقف عند الباب : يمه
الام قاعده ترتب الغنفات : هلا يمه
محمد والحزن بعيونه : يمكن اكلمج دقيقه
ام محمد : انته ما اتي الا يوم اكون مشغوله ..
محمد : امي بس دقيقه ..
ام محمد يلست على الغنفه : يالله يلسنا خير يا محمد شو عندك .؟
محمد يلس عند امه وهو يشوفها : امي بقولج شي بس لا تعصبين ولا شي انا ياي عشان اتفاهم وياج ..واهم شي عندي رضاج
ام محمد : قول اللي عند ك .. شو بلاك
محمد : امي انا مصر ابي الريم وما ابي بنت عمي ..لا تزوجيني غصب
ام محمد عصبت : انت قلت انك تبى رضايه صح
محمد " طبعا يا امي ..لان رضا الوالدين اهم من كل شي
الام : عيل انا اقولك انك ما بتاخذ الا شيخه وبلا فضايح يا محمد ..
محمد بعصبيه : يعني اذا البنت رفضتني عادي ما شي فضيحه بس انا اذا رفضتها فضيحه
ام محمد : هي طبعا فضيحه ..لاني انا اللي قلت انك حق بنتهم مب هم .. وهم بيقولون ليش انت غيرت رايك وبتفضحنا .وانت ما ترضى فضيحتي يا محمد ..
محمد : بس انا ما ابيها ولاأحبها
الام : هذا تفكير يهال ..اذا تزوجتها بتحبها لان الحب بعد الزواج يا ولدي
محمد : بس امايه فكري فيه
الام : صدقني اذا انا ماقلت لهم من زمان انك حق بنتهم ..كنت بوافق على الريم بعد ما اشوفها واعرف اصلها وفصلها بس خلاص قلت لهم يا محمد ..
محمد : بس..
الام : لا بس ولا شي خلاص انا قلت اللا عندي ولا تفاتحتي بهالسالفه مره ثانيه سمعت ..

محمد راح من عند امه وهو حاس باليأس والضيق ..وطبعا ما عنده الا ربيعه خالد عشان ينقذه من المشكله اللي فيه



محمد وهو متضايق :الو خالد
خالد وهو في السياره : هلا والله بو جاسم هلا بمحمد ..
محمد : خالد عندي مشكله ومتضايق..
خالد : انا من عرفتك وانت عندك مشاكل
محمد : خالد بلا مزح ..
خالد : والله من صوتك مبين صدق متضايق خير شو فيك
محمد " : كلمت الوالده مره ثانيه عن الريم
خالد : والله شو قالت ؟
محمد : رفضت وقالت ما يصير نحن نغير راينا .. لان فضيحه حقها ..
خالد : والله صدق مشكله ..؟
محمد : شو اسوي يا خالد
خالد : خذ بنت عمك يمكن تكون زينه وتنسيك الريم
محمد : انت وياي ولا ضدي
خالد : اكيد وياك بس شو اسوي مدام امك معانده
محمد : بس انا تعلقت في الريم وسمعت عنها كل خير وعايبني صفاتها واخلاقها خالد الله يخليك ساعدني
خالد : والله انا كاني مصلح اجتماعي اساعد الناس ولا أساعد عمري
محمد يضحك: هههههههههههههههههههههههه .. ضحكتني وانا متضايق
خالد : عسى الضحكه دوم ما تفارقك
محمد :تسلم حبيبي ..ها شو عندك حل
خالد قاعد يفكر ..
محمد : حشى مب تفكير ..اخاف قاعد تفكر تحل قضية فلسطين
خالد : ويا ويهك اسويلك خير وتستهبل عليه ..
محمد : ههههههههههههههههههه ..اسولف وياك
خالد بعد تفكير : ممممممممممممم ..عندي حل وحيد ..
محمد استانس والابتسامه على شفاته : والله شو قول بسرعه
خالد : الحل الله يسلمك ...انك تقول حق بنت عمك انك تبى تزوج وحده ثانيه لانك ما تحب تخدعها ..
محمد فاتح عيونه من الصدمه : خالد اخاف استويت مينون ولا شي .خالد : ليش انا شو قلت
محمد : شو تبى اجرح البنت حرام ..لاتنسىانها بنت عمي وما عليها قصور
خالد : والله يا حبيبي ما عندي الا هالحل ..انت لا تقولها بطريقه جارحه بين لها انك ما تحب تخدعها او انك تزوجها وقلبك مع وحده ثانيه وطبها هذا حرام وظلم انك تزوج انسانه وتفكيرك بانسانه ثانيه
محمد : اخاف اضايقها وثانيا انا ما عرف رقمها ..
خالد : والله تقدر تاخذ رقمها عن طريق اختك ولا امك بس بطريقه غير مباشره طبعا الاهم ان امك ماتعرف باللي يصير ويتحرون ان الرفض ياي من عندها ..وبهالطريقه راح يسهل عليك انك تزوج الريم ..شو رايك بتفكيري الحلو
محمد : والله تفكير اعتقد بييب لي المشاكل ..
خالد : وليش المشاكل
محمد : تخيل تقول للاهل اني رفضتها وامي اذا عرفت عادي ما ترضى عني ..ولا تكلمني
خالد : اولا البنت تستحي تقول ان الولد ما يباها لان تحس ان يقلل من مستواها ..ثانيا ما دام تقول ان بنت عمك انسانه فاهمه ومحترمه اكيد بتفهمك ..
محمد : والله ما دري احس انها صعبه
خالد : والله هالحل الوحيد الا عندي ..اختار يا تقولها نفس كلامي يا انك تودر الريم وتزوج بنت عمك
محمد : لا لا ما اقدر بدون الريم ..



خالد : عيل ما عندي الا هالحل وانت فكر بالسالفه
محمد :: بحاول افكر ..والله يسر اموري واحصل على رقممها وما أتبهدل
خالد : موفق يا محمد
محمد : تسلم ياخالد ..عسى الله يسعدك ويزيل همومك مثل ما حاولت تساعدني
خالد : لا شكر على واجب ..وانا ما سويت شي .. لو بايدي اسوي اكثر صدقني ما بقصر
محمد : عساني ما انحرم منك يا خالد ..ونعم الصديق
خالد : اوكي يا محمد انت فكر عدل .. وقولي شو راح تسوي
محمد : خلاص ان شاء الله وبصلي مره ثانيه استخاره ...
خالد: على خير ان شاء الله ..اوكي اخليك يالله مع في امان الله
محمد : في امان الرحمن ..


( محمد يفكر بكلام خالد مع انه يحس بالاحراج لشيخه بس ماعنده الا هالحل ويفكر اذا يقولها ولا لاء)




وساره وهي ترتب اغراضها عشان الدوام فجأه تذكرت ان ما بقى شي على ملجتها ويا فهد يعني تقريبا شهر ..وهي طبعا زعلانه ..لانها بتملج على فهد ..وقررت ان الملجه ما تكون طويله عشان تفتك بسرعه من الملجه وما تحب اطول زياده.. وهي طبعا لين الحينه تفكيرها وقلبها لخالد وبس ..وقررت ان الملجه تكون بس شهر وعلى طول العرس .. لان تعرف ان الملجه احلى ايام العمر

وهي ما تبى تكون وايد ويا فهد ..وعندها امل ان فهد يمل من تصرفاتها وينفصل عنها لان ساره مستحيل تبادله الحب ..


وعلى أذان العشاء ..ام خالد زعلانه ومتضايقه ..
نوره وهي تشوف امها بهالتوتر : يمه شو بلاج
ام خالد : هند لا فطرت ولا تغدت من الصبح وهي بهالحاله بدون اكل واقولها شو تبين على العشاء تقول ما ابي شي ..ماعرف شو اسوي في هالبنت والله اخاف انها تموت ..
نوره وهي رايحه عند امها : لا امايه.. لا تحاتين بس هي معانده لانها ما تبى الا سالم ..
ام خالد : من وين ياي هذا سالم وخلا بنتي بهالحال..والله اخاف مسويلها عمل
نوره : هههههههههههههه ..كل ما صار شي قلتو عمل او سحر او عين ..
ام خالد : عيل بلاها استخفت
نوره : خليها هي تبى تسوي اللي براسها ..بس الصراحه لاول مره اشوفها جاده بهالطريقه ..
ام خالد : يعني اذا ما خذت سالم بتذبح عمرها لا اكل ولا شي
نوره : والله ماعرف شو اقولج يا امايه
ام خالد : خلاص انا موافقه عليه بس خلا هي تاكل شي ..
نوره : وخالد وابوي
ام خالد : انا بقنعهم ..ما يصير هي تكون بهالحاله ..نوره يمه روحي كلميها وقولي الله كريم وان شاء الله اذا الله انهم يتزوجون راح يتزوجون


نوره : خلاص يا امايه على هواج بروح اكلمها


راحت نوره عند هند وهي تحاول تقنعها انها تاكل شي وتذاكر لان ما بقى الا اسبوعين على امتحاناتها ..

هند : ما ابي اذاكر ولا اكل شي ..خلا يوافقون على خطوبتي بعدين بتغير
نوره : كيف ؟؟ تنخطبين وعندج امتحانات
هند : خلا يوعدوني انهم يخطبوني بعد الامتحانات على طول حق سالم ويكلمونهم عشان أتاكد وبعدين برتاح وبكمل مذاكرتي ..
نوره : والله صدق انج عنيده
هند: هي عنيده .. وما ابي الا سالم ..صدقيني احس اني بعيش بعالم الحب والسعاده والهنا..
نوره تحرك راسها يمين ويسار : صدق انج مراهقه درجه اولى والله
هند : هي مراهقه وكل شي ..
نوره : خلاص انا بخليج على راحتج
هند ما قالت شي لانها معصبه ومعانده..

راحت نوره غرفتها وهي مسانده على السرير وسرحانه ولا موبايلها يرن ويوم تشوف رقم غريب ..
نوره مستغربه : الو
المتصل هو عبد الله :السلام عليكم
نوره : وعليكم السلام منو ؟؟
عبد الله : افا ما حفظتي رقمي في موبايلج ..
نوره مستغربه من الصوت : منو انت
عبد الله : انا اللي ملجت عليج من البارحه شو نسيتيني ..
نوره بكل رقه : عبد الله
عبد الله : هي عبد الله
نوره حست بسعاده وخجل بنفس الوقت وما قالت شي..
عبد الله : شو ما تعرفين رقمي ..مع اني عطيتج البطاقه
نوره : عندي البطاقه بس نسيت اخزن الرقم
عبد الله : المهم شو اخبارج يا نوره
نوره برقتها : الحمد لله يسرك الحال وانت شحالك؟
عبد الله : مدام سمعت صوتج انا بخير ..
نوره ويها احمر من كلام عبد الله ..
عبد الله : ممممممممممم بنتم ساكين جذي..
نوره : شو اللي بخاطرك قول ..
عبد الله يتنهد : ااااااااااااه ..اللي بخاطري وايد ..والاهم اللي ابيج تعرفينه انج دخلتي خاطري من اول ما شفتج بأدبج وبشخصيتج وبرقتج واكيد جمالج..\
نوره ميته من الحياء : تسلم
عبد الله : وطبعا بعد ما عجبتيني سألت عنج وايد والكل مدح باخلاقج ودينج وبشخصيتج .. والحمد لله حققت اللي في خاطري وخطبتج ..
نوره ما تقول شي .. تحس انها في حلم
عبد الله : وان شاء الله حياتنا يا نوره تكون بسعاده بسعاده..
نوره : ان شاء الله ..
عبد الله : وانتي مب في خاطرج تقولين شي ..ولا صح اكيد مستحيه ما تقدرين تقولين شي ..صح ؟
نوره : الصراحه اكيد مستحيه ومستحيه وايد
عبد الله : يا محلاته الحياء من البنت ..بس ان شاء الله بتتعودين عليه وبتقولين كل اللي بخاطرج ..
نوره : اكيد مع الايام كل شي بيتغير ..



عبد الله : وان شاء الله للاحسن يا نوره ..المهم اذا بغيتي مني اي شي انا حاضر..واتمنى تتصلين فيه باي وقت لانا خلاص نحن مالجين يعني حلال علينا نكلم بعض.. وكل اسبوع بنخلي يوم عشان نطلع على الاقل ساعه او ساعتين عشان نتعود على بعض اكثر..
نوره : ان شاء الله خير
عبد الله : اتمنى اني اقدر افرحج ..
نوره :الصراحه انا أكيده بهالشي (( بخاطرها تقول نوره انك فرحتني من اول ما خطبتني بس هي مستحيه ما تقدر تقوله ).
عبد الله : خلاص يا نوره اخليج الحينه .. اكيد عندج دوام ما ابي أأخرج واكيد راح نكون على اتصال دوووم ..اتفقنا
نوره : خلاص اتفقنا ..
عبد الله : يالله تصبحين على خير ..
نوره : وانته من اهله ..

بعد ما صكت نوره من عند عبد الله حطت موبايلها على صدرها وخذت نفس مع ابتسامه على شفاتها ومغمضه عيونها وحست ان احلامها كلها راح تتحقق ويا عبد الله ...وكانت صدق ميته من الوناسه ..وتمنت سعادتها تدوم ..

*****************************************
.. ( هل سعادة نوره راح تدوم ولا بيصير شي وبيمنع زواجهم))
( هل خالد واهله راح يرضون في سالم ولا بيعاندون ))
(( وساره كيف راح يكون مصيرها وتعاملها مع فهد ))
(( وخالد وفهد شو ينتظرهم))
(( ومحمد هل راح يكلم شيخه ويقنعها وهل راح يصير له مشاكل

 
 

 

عرض البوم صور moon_k   رد مع اقتباس
قديم 15-03-08, 03:01 PM   المشاركة رقم: 33
المعلومات
الكاتب:
اللقب:
ليلاس متالق


البيانات
التسجيل: Oct 2007
العضوية: 47930
المشاركات: 122
الجنس أنثى
معدل التقييم: moon_k عضو بحاجه الى تحسين وضعه
نقاط التقييم: 12

االدولة
البلدMorocco
 
مدونتي

 

الإتصالات
الحالة:
moon_k غير متواجد حالياً
وسائل الإتصال:

كاتب الموضوع : moon_k المنتدى : القصص المكتمله
افتراضي

 

الجزء 19
وبعد اتصال عبدالله لنوره وكانت طبعا المكالمه الاولى ..
نزلت نوره وهي طايره من الفرح عند امها عشان تسولف وياها وشافتها قاعده مع ابوها وخالد وتكلمهم بجديه ..
ام خالد : بس يا خالد لازم نحن نوافق عليه ..
خالد بعصبيه : بس ليش يا امايه نوافق على سالم بس عشان ان هند ما كلت علها ما كلت شي ..
ابو خالد : خالد هد اعصابك
خالد : والله يا بويه هاي هند مدلعينها وايد..
نوره نازله من فوق وشاركتهم القعده : خالد ..
خالد صد لنوره : نعم
نوره : شو رايك ياخالد نحن نوافق على خطوبة هند ..بس خطوبه يمكن تغير رايها بعدين ونحن بنسال عن الريال اكثر
خالد : بس انا سائل عنه يا نوره ..
ام خالد : زين نحن بنخلي خطوبتهم بعد امتحاناتها مثل ما وعدناها واذا كانت الملجه قربيه يكون احسن عشان هي بتعرف كيف صفاته وكلامه من هني بنعرف اذا هي مرتاحه ولا لاء..
نوره : واذا ماارتاحت بنخليهم ينفصلون قبل الزواج ..
خالد: شو الانفصال صارت لعبه عندكم
بو خالد : بس ما عندنا اقتراح ثاني
ام خالد بحنيه : خلا نوافق يا ولدي عشان تذاكر ترى ما بقى على امتحاناتها الا اسبوعين وبعدين هي بعدها صغيره ما تعرف شو تسوي ..
خالد : سوو اللي تبونه انا مالي خص .. واذا يت يوم من الايام تصيح وتشتكي انا اللي بتشمت فيها وبضربها بعد ..
نوره ماكانت راضيه في سالم بس كل اللي تسويه عشان اختها ..
ام خالد : روحي يا نوره قولي حق هند انا وافقنا وخطوبتها بعد امتحاناتها .ونحن بنتصل في امه باجر اذا الله احيانا
نوره : ان شاء الله امايه ..

راحت نوره عند هند عشان تبشرها بهالخبر اللي اكيد عندها احلى خبر..

نوره تدخل على غرفة هند بدون ما تدق الباب .
نوره بابتسامه : مفاجاه
هند من غير نفس وهي طايحه على السرير :ما سامعه ان من الاحترام ان الشخص قبل ما يدخل يدق الباب
نوره عقدت حواجبها فوق تحت : احمدي ربج يايبتلج احلى خبر بمليون درهم ..
هند بتعجب: صدق ولا تتغشمرين كعادتج
نوره بدلع : والله صدق
هند نقزت من على السرير وراحت عند نوره : شو بسرعه قولي ..
نوره : كم بتعطيني ..
هند : اول شي قولي الخبر واذا كان الخبر اللي في بالي بعطيج اللي تبينه
نوره : شو اللي في بالج
هند بابتسامه: لا تقولين خالد وابويه وافقو اني اتزوج من سالم
نوره بابتسامه حلوه : هي وافقو واخيرا اقنعناهم
هند من كثر الفرحه نقزت على اختها وتمت تحضنها وتصيح : مشكوره يا نوره عمري ماراح انسى خدمتج لي ..
نوره تمت مستغربه وهي خاضنه هند لان لاول مره هند تحضن نوره لان هند مب وايد وياها وعرفت ان هند صدق مستانسه ..
نوره : لا افا عليج انا ما اتمنى الا سعادتج ..بس اتمنى انج ما تندمين على ارتباطج في سالم
هند بابتسامه : لا مستحيل اندم ..بالعكس انا بتم سعيده لين اخر يوم بحياتي ..
نوره : ان شاء الله هاللي اتمناه ..
هند تتنهد: واخيرا الحينه اقدر اذاكر واكل اللي اباه والله ارتحت ..
نوره : يالله روحي عند امايه ترى قلبها متقطع عليج
هند : ان شاء الله الحينه بروح عندها ..

نوره تمت تشوف فرحة هند وتمت فرحانه بفرحت اختها بس بعدها خايفه على حياة هند..



وفي اليوم الثاني ..
اتصلت ام خالد بام سالم مثل ما وعدت هند على موافقتهم لولدهم وان الخطوبه بتكون بعد امتحاناتها اما الملجه بعدين بيحددون ..

واكيد خالد ماكان راضي عن هالشي بس عشان خاطر امه ولان شاف اصرار هند وما بغى يكبر السالفه ..خلا الايام تثبت كل شي ..


محمد اللي كان محتار وايد انه يتصل في بنت عمه شيخه ويقولها الصراحه واخيرا فكر ومالقى غير انه يتصل في شيخه ويصارحها مع انه مستحي وايد وخايف على مشاعرها بس ماعنده حل ثاني ..بس المشكله الحينه كيف اييب رقم شيخه من وين ..
وبعد تفكير طويل ما لقى الا انه ياخذ موبايل امه وحس ان اكيد امه عندها اغلبية ارقام العايله ..
ومحمد شاف امه في الصاله وفكر كيف ياخذ موبايلها ..
محمد رايح عند امه : امي
ام محمد تصد تشوف محمد : شو تبى يا محمد ؟
محمد بتردد ممممممممم ابي موبايلج
ام محمد استغربت اول مره يطلب محمد هالطلب: ليش وين موبايلك
محمد : موبايلي قطعو عشان جذي ابي اتصل في ربيعي ضروري
ام محمد : اكيد بيقطعونه من كثر ما تسولف على الموبايل ..
محمد : زين الله يخليج عطيني الموبايل بس دقيقه
ام محمد : روح غرفتي بتشوف حاطه موبايلي على المستوليت ..

محمد استانس وعلى طول راح خذ موبايل امه وبالدس طبعا راح يدور اسم شيخه وهو يدور بين مية رقم ..ولا اخيرا حصل رقم شيخه وحس ان قلبه يدق بسرعه من التوتر ..وعلى طول ياب موبايله وحفظ رقم شيخه ..

محمد استانس ان حصل رقم شيخه بدون تعب ولا شي ..وعلى طول اتصل في خالد عشان يخبره ..

 
 

 

عرض البوم صور moon_k   رد مع اقتباس
قديم 15-03-08, 03:02 PM   المشاركة رقم: 34
المعلومات
الكاتب:
اللقب:
ليلاس متالق


البيانات
التسجيل: Oct 2007
العضوية: 47930
المشاركات: 122
الجنس أنثى
معدل التقييم: moon_k عضو بحاجه الى تحسين وضعه
نقاط التقييم: 12

االدولة
البلدMorocco
 
مدونتي

 

الإتصالات
الحالة:
moon_k غير متواجد حالياً
وسائل الإتصال:

كاتب الموضوع : moon_k المنتدى : القصص المكتمله
افتراضي

 

محمد وهو يتصل في خالد: الو
خالد : هلا بو جاسم
محمد : شحالك يا الغالي
خالد : يسرك الحال وانت اخبارك
محمد : والله مستانس وايد
خالد : ان شاء الله دوم مب يوم بس شوسالفتك فرحنا وياك
محمد : واخيرا واخيرا يا خالد حصلت الرقم
خالد بعبط : شو حصلت رقم امير الامراء ولا رقم فرعون عشان تزوره
محمد : خااااااااااااالد بلا عبط
خالد يضحك : ههههههههه اسولف وياك ..شو حصلت رقم بنت عمك صح
محمد بفرح :هيه هيه واخيرا
خالد : الحين اللي يسمعك يقول انك خلاص بتخطب الريم مب كانك حصلت الرقم
محمد : ترى هاي اول مهمه
خالد: حشى حشى مهمه والله اخاف ناوي على جريمه
محمد : هههههههههههههههههه ..والله انت والعبط اخوان
خالد: هههههههههههههههههههههه
محمد : زين شو اسوي الحينه
خالد: شو تسوي اكيد تتصل فيها عيل ليش ماخذ الرقم عشان تخلي ببرواز..
محمد : وي استحي
خالد: محمد كون ريال وبلا سوالف بنات ( يقلد كلام محمد ) استحي
محمد : احس ان فضيحه
خالد : توكل على الله بعد شو بتسوي ماعندك حل ثاني
محمد : خلاص بتصل فيها الحينه احس الوقت مناسب ..لان العصر اكيد تكون في البيت
خالد: اوكي عيل اخليك تتصل فيها
محمد : ادعيلي
خالد بابتسامه: الله يوفقك يا محمد

محمد بعد ما صك من خالد حس بالارتباك كيف يفاتح شيخه بهالسالفه بس يوم تذكر الريم نسى توتره وقرر انه يتصل فيها ..

محمد مسك موبايله وحس انه مرتبك وايد وهو قاعد يتصل يبلع ريجه لانه حاس بالاحراج ..
شيخه كانت بغرفتها قاعده تذاكر لانها بالتقنيه ..شيخه شافت رقم غريب استغربت بس قالت اكيد حد من رباعتها متصل على تلفون ثاني ..
شيخه بتعجب : الو
محمد بارتباك : الو السلام عليكم
شيخه يوم سمعت صوت ريال استغربت : منو ويايه
محمد : انا محمد
شيخه : اي محمد
محمد : محمد ولو عمج ناصر ..
شيخه استغربت لان اول مره محمد يتصل فيها وحست بالاحرا ج.
محمد : شحالج يا بنت عمي
شيخه برقه وخجل : بخير يسرك الحال ( وبخاطرها مستغربه من اتصاله )
محمد مايعرف كيف يبتدي بالسالفه : اكيد طبعا مستغربه من اتصالي
شيخه : بصراحه هيه
محمد : ابي اقولج شي بصراحه تامه ..لاني من النوع الصريح بس اتمنى يا بنت عمي تفهميني وما تضايقين
شيخه استغربت من كلام محمد : خير يا محمد ؟
محمد مرتبك : اه ..مممم...ابي ابي اقول ..ممممممم
شيخه : شو فيك يا محمد قول اللي عندك
محمد : زين توعديني انج تفهميني وما تضايقين مني وهالشي يكون سر بيني وبينج .
شيخه رافعه حواجبها من كثر ما هي مستغربه : اكيد اوعدك
محمد : شيخه مثل ما تعرفين ان الاهل قايلين انا لبعض من صغرنا
شيخه مستحيه وما ردت .
محمد : وانا طبعا ما عندي ما نع اني ارتبط فيج لانج انسانه طيبه وخلوقه وما عليج كلام وكافي انج بنت عمي
شيخه مستغربه ومستحيه ويوها مثل الطماط
محمد : وانا كنت موافق عليج بس انا من مده قصيره شفت انسانه والصراحه عجبتني وايد وطبعا ما بينا علاقه لا والله بس انها عجبتني وايد والصراحه اباها
شيخه حست بالاهانه وبعصبيه : زين خذها وانا شو دخلني
محمد : المشكله يا شيخه ان امي ما تباني اخذ الا انتي... تقول ان فضيحه ارفضج لان امي اللي بغتج وقالت اذا الرفض ايي منها عادي بس مب مني .
شيخه منصدمه صح انها ما تكن لولد عمها باي حب لين الحينه بس مستغربه من جرأته .
محمد : لا تزعلين مني يا شيخه والله اني اعزج كاخت غاليه وانا ما يهون عليه اني اتزوج وانا افكر بانسانه ثانيه مثل باقي الشباب هالشي حرام وظلم والله ما يرضى عليه وانتي انسانه طيبه وما تستاهلين هالشي .
شيخه بحزن: والمطلوب مني
محمد : اللي اتمناه منج يا شيخه ان اذا اتقدمت ترفضيني .لان الرفض اذا ياي منج عادي بس ما يكون مني لان امي بتزعل عليه .
شيخه : بس شو سبب رفضي لك يا محمد لا تنسى انك ولد عمي .
محمد : مممممممممممممم قولي انج صليتي استخاره وما رتحتي او اي شي
شيخه : بس يا محمد اخاف امك تزعل عليه
محمد : لا امي مب من هالنوع اللي مل اول اللي يزعلون اذا ما صار نصيب لا عادي .
شيخه قاعده تفكر شو تقول لاهلها
محمد : شيخه
شيخه : نعم
محمد : اتمنى انج ما تزعلين مني
شيخه : لا يا محمد بالعكس انت صارحتني بالحقيقه قبل ما يصير اي شي احسن من باقي الشباب الا بعد عرسهم تشوفهم مع وحده ثانيه ويعترفون لزوجاتهم بانهم مغصوبين .
محمد : يعني مب زعلانه ولا متضايقه ..
شيخه : لا يا ولد عمي ..اسلوبك نبيل
محمد : والله طلعتي ونعم البنت..وعمري ماراح انسى جميلج يا شيخه
شيخه : لا افا عليك ..كافي انا اهل
محمد : تسلمين يا بنت عمي ..اوكي اخليج الحينه واسمحيلي مره ثانيه
شيخه : مسموح يالله في امان الله ..

محمد حس كان انجز شي كبير وحس بالراحه وتم مستانس ورافع ايده ويحمد ربه ان بنت عمه اتفهمته وان حل هالمشكله..وطبعا على طول اتصل في خالد وقاله وخالد فرحله وايد ..

اما شيخه فالبدايه اتضايقت لانه حست شوي بالاهانه بس تذكرت موقفه وصراحته وانه ما يحب يخدعها فعرفت ان هالشي خير لها وانه الله ماكاتب نصيب بينهم ..
وبعد مرور شهـــــــــــر..


وبعد شهر خلصت هند امتحانات الثانويه وكان يوم النتيجه اللي الكل كان ينتظرها ..

وهند كانت قاعده على الكمبيوتر تشوف نتيجتها وكانت خايفه.. ولا فجاه شافت النتيجه وتمت تصارخ ومستانسه وراحت على طول تحت عند اهلها اللي ينتظرون نتيجتها ..
هند تصارخ : امايه امااااااااااااااااااااااايه
الام : ها بشري شو ان شاء الله بيضتي ويهنا
هند وهي تغني وترقص
نوره : والله متفيجه الحينه قولي شو نتيجتج بعدين تخبلي
هند وهي تناقز : امي باركيلي نجحت نجحت
ام خالد : زين النتيجه كم نسبتج كم
هند : 72 ..
ام خالد يوم سمعت النسبه وقفت مكانها : شو 72 صدق طلعتي مسودة الويه فضحتينا
هند : والله اهم شي نجحت وافتكيت
نوره : والله وايد وايد عليج النسبه لانج ما كنتي تذاكرين
ام خالد : والله فضيحه اختج يابه في التسعينات وبنت خالتج وغيرج من الاهل وانتي
نوره تصد لامها :امايه هند من صغرها مب شاطره ولا تذاكر كل مره نسبتها في الستينات واحيانا الخمسينات بعد..
هند وهي مستانسه : هي والله يعني حمدي ربج هالمره اكثر ..
نوره : الحمد لله ما فضحتنا ورسبت
ام خالد : هي والله الحمد لله
هند : واخيرا خلصت الحينه بحرق كتبي بفتك منهم
نوره : حشى حشى مجرمه ما صدقتي انج خلصتي .
هند / اكره الدرااااااسه ..بروح ابشر ابويه واقوله خلا يجهزلي الهديه
نوره : شو طالبه الاخت
هند : طالبه طقم الماس يا اختي
نوره : بل مره وحده ..لوطلعتي الاولى بالدوله شو بتطلبين ..
هند : والله ما فكرت ( تصد لامها ) امايه ابي منج ممممممممممم اتيبيلي هديه ساعه ماركه وتكون الماس يعني اقل شي جيمتها 20 الف
ام خالد : اول مره اشوف وحده تختار الهديه .. ثانيا انا وابوج واحد
هند : لا في الهدايا مب واحد
نوره : ههههههههههههههههههههههه ..اللهم سكنهم في مساكنهم .
هند : شو تشوفيني مينونه ولا ينيه
نوره : ههههههههههههههههههه من زمان ..

خلصت هند امتحاناتها اللي الكل كان يتريه نجاحها ..وطبعا قررو ان الخطوبه تكون مده وبدون حفله ..وخلة الحفله والعزيمه في يوم ملجتها اللي لين الحينه مب محددين لانهم مشغولين بعرس نوره الا ما بقى على عرسها الا شهر ..


ساره اللي استوت انسانه ثانيه من بعد ما تركت خالد صارت ما تضحك الا نادر ولا تطلع من البيت .
.راحت تشوف تقويم التواريخ وبحزن تقول لنفسها : واخيرا ياهاليوم اللي ما اتمناه ..باجر بملج على فهد وماعرف كيف بتعامل وياه ..( تتنهد ) ااااااااااااه يا خالد .كل شي راح ..

وساره كانت تدمع لان يوم ملجتها قربت لان باجر بيكون يوم ملجتها ..
واما خالد فمايعرف ان باجر ( غدا ) يوم ملجة حبيبت القلب ..


**********************




* ما موقف خالد يوم بيعرف ان ملجة ساره قربت ؟

*وكيف بتمر ايام ملجة ساره ..سعيده ولا حزينه ؟

*وسالم وهند حياتهم كيف بتكون ؟ هل راح يتغير سالم ؟

*ام محمد هل راح تعرف ان محمد اتصل في شيخه ؟؟ وهل محمد راح ياخذ الريم ؟ ولا بيصير شي ثاني ؟

 
 

 

عرض البوم صور moon_k   رد مع اقتباس
قديم 15-03-08, 03:03 PM   المشاركة رقم: 35
المعلومات
الكاتب:
اللقب:
ليلاس متالق


البيانات
التسجيل: Oct 2007
العضوية: 47930
المشاركات: 122
الجنس أنثى
معدل التقييم: moon_k عضو بحاجه الى تحسين وضعه
نقاط التقييم: 12

االدولة
البلدMorocco
 
مدونتي

 

الإتصالات
الحالة:
moon_k غير متواجد حالياً
وسائل الإتصال:

كاتب الموضوع : moon_k المنتدى : القصص المكتمله
افتراضي

 

تكملة الجزء التاسع عشر

نفس يوم نتيجة هند واخبارها بالنجاح .. الكل كان مستانس الا ساره كانت غير لان باجر بيكون عقد قران ساره وقفهد يعني ملجتهم وطبعا لين الحينه خالد ما يعرف .

والكل كان يتكلم عن ملجة ساره ويفكرون شو يلبسون ..
نوره وهي قاعده : والله ما عرف شو البس باجر
الام تصد لنوره : والله يا بنتي البسي شي بسيط لان محد بيي غيرنا يعني بيناتنا .
هند : بس ليش ما خلت حفله عوده او على الاقل العزيمه اكبر مثل مجلتج يا نوره
نوره : لان ساره ما تبى هالشي لا تنسين انها مغصوبه على هالزواج
هند : والله هاي ساره صدق مينونه ..
الام مستغربه : ليش
هند : حد يشوف واحد بجمال فهد وشخصيته وما يتزوجه
نوره : ليش الاخت وين شايفتنه ؟
هند : مره فهد وصل الريم بيتنا يوم ملجتج انا بالصدفه شفته وهو بالسياره ..بس ماشاء الله عليه وسيم والله اني اول مره اشوف واحد بوسامته
نوره : عيل خذي احسن
هند بدلع : والله لو ياي قبل سالم كنت باخذه بس خلاص انا الحينه لانسان ثاني
نوره تسوي مالت بايدينها حق هند : مالت عليج اصلا منو قال هو بيودر ملكة جمال العالم وبياخذج.
هند باحتقار : منو ملكة جمال العالم ان شاء الله
نوره : بلا استعباط اكيد ساره ..
هند : عاد المبالغه مشكله
نوره : ومشكله اللي يغارون

هني خالد دش عليهم وهو مستانس ولا يعرف شو السالفه
خالد : السلام عليكم
الكل : وعليكم السلام
خالد سار صوب امه وباس فوق راسها : شحالج امايه عساج بخير
الام : بخير الله يسر حالك
هند وهي تشوف خالد:غريبه الاخ فرحان اليوم ..
خالد : وليش يعني ماافرح
هند متعرف ان خالد مايعرف بملجة ساره : لان باجر ملجة حبيبتك السابقه يعني تحريتك بتزعل .
خالد اول ما سمع ان باجر ملجة ساره وقف مكانه واستغرب.وصد لنوره بعصبيه : صدق يا نوره ان باجر ملجة ساره
نوره بخوف : هيه
خالد بعصبيه كبيره : وليش محد قالي
الام : الله يهديك ياخالد يعني اذا قلنالك شو بيتغير ..
خالد : حتى لو ما تغير شي اهم شي اعرف
خالد على طول طلع وهو معصب..
نوره لحقت وراه :خالد خالد
خالد وقف : نعم خير
نوره : وين بتروح
خالد : بروح عند ساره
نوره فتحت عيونها : عند ساره وليش ؟
خالد : هالشي ما يخص حد الا انا وساره ]

نوره : بس عيب تروح بيتنهم
خالد : ليش عيب شو نسيتي انها بنت خالتي ..
نوره : بس
خالد : عن اذنج باي

راح خالد عند ساره وهو معصب ومنقهر ..يمكن بملجتها حس بفقدانها للابد ..

نوره وهي زعلانه : الله يستر بس
هند : روحي اتصلي في ساره عشان تعرف ان خالد بيي
نوره : هي صح
نوره راحت تتصل على موبايل ساره بس موبايلها كان مغلق واتصلت على البيت بس محد يشيل..

خالد وصل بيت ساره وتردد بالدخول بس يوم تخيل ان ساره بتروح من ايده للابد قرر يدخل..

خالد دق الباب وهو مستحي لانه اول مره يدخل بيت خالته بدون اهله ..
وساره كانت بالصاله تشوف التلفزيون بس هي باخر عالم وسرحانه ..وسمعت صوت الباب نادت على خدامتها بس مافتحت لانها انشغلت فهي راحت تفتح الباب بعد ما غطت شعرها ..
وساره اول ما فتحت الباب فتحت عيونها وما قدرت تتكلم .
خالد يوم شاف ساره تذكر ايامهم وبابتسامه : شحالج يا ساره
ساره والحزن بعيونها وبخجل : الحمد لله بخير الله يسلمك ..تفضل ادخل .
دخل خالد وهو بالصاله يصد لساره : ساره وين امج
ساره : امي بغرفتها لحظه عشان اناديها .
خالد : لحظه يا ساره ..انا ابي اكلمج لو سمحتي بشي ضروري واستحي اقولها جدام امج ...
ساره استغربت من جرأة خالد اول مره اايي بروحه واول مره يقعد وياها بروحهم .
ساره : بس...
خالد : ما بطول وايد بس دقايق
ساره : تفضل اقعد .
خالد : لا انا مرتاح جذي..ساره
ساره وهي تستحي تشوفه : خير يا خالد
خالد : صح ان باجر يوم ملجتج
ساره بغصه وقهر : هيه للاسف
خالد : ساره امنعي هالشي الله يخليج فكري مره ثانيه
ساره فتحت عيونها : خالد ما اقدر وانت تعرف السبب وثانيا ما اقدر اغير شي خلاص باجر ملجتي ما اقدر ..
خالد: زين يا ساره مدام ان صعب عليج انج ترفضينه خلي هو يرفضج ويمل عشان تقدرين تنفصلين عنه بدون تهديدات
ساره مستغربه من كلام خالد : خالد شو قصدك وضح
خالد استحى يقول قصده :ساره بقولج شي بس اتمنى ما تزعلين وتفهيميني
ساره : قول اللي عندك ؟حيرتني يا خالد
خالد: سمعي يا ساره انا اعرف ان صعب عليج انج ترفضين هالزواج لان فهد ما بيودرج بحالج .. بس شورايج ان بعد زواجج او في ملجتج تعاملينه بجفاء وقسوه عشان روحه يمل منج وينفصل عنج وبهالطريقه اقدر اتزوج بدون اي مشاكل
ساره مستغربه : يعني تباني اطلق يا خالد معقوله

خالد : ما يهمني تطلقين ولا شي ..الاهم عندي انج تكونين لي
ساره : وانت بتاخذني بعد ما نفصل عنه ؟؟ معقوله
خالد : هي والله عادي عندي ..مع انها صعبه عليه بس عادي كل شي ..الاهم تكوننين لي بالنهايه ..ساره انتي ما تعرفين كيف انا احبج .ما تخيل وحده غيرج تكون زوحتي وشريكة حياتي ..ساره حبي لج من الصغر وكبر هالحب كل ما كبرت موافق على كل شي اهم شي تكونين لي
ساره : بس صعبه هو يودرني لانه يحبني
خالد : اذا شاف ان الحب مب متبادل اكيد بيودرج
ساره : بس شو بيقولون عني الناس اذا عرفو اني مطلقه
خالد : ما يخصج بالناس ..والناس يعرفون ان مب كل مطلقه الغلطه تكون منها..واهم شي حبنا يستمر يا ساره الله يخليج فكري
ساره استغربت من كلام خالد بس عرفت ان هالحل الوحيد عشان يستمرون ويابعض
ساره : الله كريم يا خالد واكيد ما اقدر اعامله بحب وحنان لانه مب هو اللي بقلبي
خالد : يعني اطمن انج ما بتحبينه
ساره : مستحيل احبه .. وانت تعرف السبب
خالد : اتمنى ايي هاليوم واشوفج ملكي
ساره بخاطرها ( واتمنى تكون ملكي يا خالد ).
خالد : بس اتمنى هالشي يكون بيني وبينج يا ساره
ساره : خلاص اوكي
خالد : يالله مع السلامه
خالد وهو يبى يطلع ساره نادته ..
ساره :خالد
خالد يصد لساره : نعم
ساره : يعني انت بتترياني
خالد بابتسامه : بترياج لآخر العمر
ساره ابتسمت واستحت

بعد ما طلع خالد حس بالراحه لانه كلم ساره وصارحها ...اما ساره فاستغربت من كلام خالد بس تعرف ان هالشي دليل على حب خالد الكبير لها عشان جذي قال هالكلام وهي اقتنعت بكلامه وقررت انها تحاول المستحيل عشان يمل فهد منها ..مع ان بقلبها ما شي غير الرحمه والحنان بس بتحاول تغير من طبعها عشان خالد


***********************************
واليوم الثاني الكل فرحان لان هاليوم هو ملجة ساره وفهد.. اما اللي متضايقين هم ساره وخالد ..وسعادة فهد غير بهاليوم كان صدق فرحان ..
فهد وهو واقف عند المنظره ومبتسم : الريم شو رايج بكشختي ووسامت اخوج
الريم : فديتك محد بيي بجمالك مسكت الكل .
فهد : صدق لهالدرجه انا حلو
الريم : اكيد طبعا حلو ..
فهد : والله يا ريم احس اني بموت من الفرحه واخيرا بملج على ساره وبقدر اكمها واطلع وياها ..كاني احلم
الريم بابتسامه كلها فرح : وعسى هالفرحه تدوم يا اخويه ..
فهد : تسلمين حبيبتي وعقبالج
الريم : استحت ..
ساره ونوره وهند قاعدين عند ساره فوق بعد ما راحت الكوافيره ..
ساره كانت احلى من الحلوين ..فستانها احمر على عنابي ويايبه شعرها على صوب مع ورده طبيعيه حمراء ومكياجها بسيط وكانت ملاك تاخذ العقل بس للاسف الحزن بملامحها .

نوره : ساره اليوم صايره قمر ماشاء الله .. اذا اليوم قمر ماعرف كيف بتطلع يوم عرسها
ساره بعالم ثاني..
نوره : اقول ساره
ساره سرحانه
نوره بصريخ : ساروووونه
ساره انتبهت : ها شو فيه
نوره : اللي ماخذ عقلج
ساره بحزن : اللي ماخذ عقلي بعيد
نوره : سارووه حبيبتي متى عرسج
ساره بعصبيه : اف لازم تذكريني
نوره غمزت لساره عشان تفهمها ان الريم موجوده ..
الريم حاولت اطنش ..
ساره : بعد عرسج بشهر
نوره : يعني باقي على عرسج شهرين ان شاء الله ..لان عرسي بعد شهر ..
ساره : هيه
الريم : يالله ساره ننزل لان اكيد فهد موجود ..
ساره ويها تغير : بس هو ياي عشان يوقع صح وانا بوقع وخلاص .
نوره : اي خلاص الله يهديج ..لازم يشوفج وتشوفينه وتيلسين وياه ولو دقايق..
ساره : ما ابي اشوفه ولا شي
الريم بحزن : ساره ما كنتي جذي شو فيج تغيرتي صرتي عصبيه مب انتي ساره اللي كلامج كلها حنيه وطيبه شو صار لج ؟
ساره : غير طبعي اخوج يا الريم غير كل شي فيني
الريم : عسى الله يهديج وربي يهنيكم
نوره ترفع ايدينها : امين

ام ساره نادتهم كلهم ؟؟

وهم نازلين والكل استانس وحطو اغاني وربشه مع ان محد كان ياي يعني بيناتهم مثل ما بغت ساره ..
والكل هنى ساره ..اما ساره فحست بالحزن اكثر لانها ملجة على فهد..
والكل قاعد ومستانس وفجاه يت ام ساره ونادت ساره ..
ام ساره ترمس ساره بصوت واطي : ساره يمه فهد يبى يشوفج
ساره : ما ابي اشوفه خلاص نحن ملجنا شو يبى
الام : ساره بلا عناد .. كل اللي يملجون يشوفون حريمهم ..دخلي ولو دقايق
ساره : ما بي والله ما ابي اشوفه
الام : دخلي يا ساره لاتفضحينا
ساره : زين ومنو داخل غيره
الام : محد طبعا قعدو على راحتكم خلاص حلال عليكم ترمسون بعض.
ساره : بس امي انا ما ابي ..
الام بعصبيه : ساروووه يالله دخلي
ساره بغضب: اف زين زين ..متى افتك منه

فهد قاعد في الميلس وهو ميت يبى يشوف ساره ..
ساره طبعا خذت الشال وخطت كتفها لانها تستحي .ومن غير نفس دخلت : السلام عليكم
فهد كان منزل راسه يوم سمع صوتها رفع راسه وشافها وما قدر ينزل عينه من حلاها ..
ساره انعجبت بملامج فهد لان اول مره تشوفه على قرب بس ما حست بحلاته ووسامته لان شخص ثاني بحياتها ..
ساره قعدت بس شوي بعيده عنه وما قالت شي ..
فهد كان سرحان فيها : ممممممم..شحالج ساره
ساره : الحمد لله بخير
فهد :مبروك يا ساره
ساره : الله يبارك فيك
فهد : عسى الله يسعدنا ونكون للابد ويا بعض حبايب
ساره ماقالت شي..
فهد حس بجفاء ساره بس طبعا ما يقدر يلومها ..
فهد : ساره اتمنى في يوم تفهين التعامل اللي تعاملت وياج بس تعرفين هذا لاني متيم فيج يا ساره
ساره شافته بنظرة حزن وعصبيه ..: فهد غير السالفه .
فهد : بس حبيت اوضحلج يا ساره اني احبج والله
ساره ما غيرتها هالكلمه وماقالت شي..
فهد : ساره يمكن اخذ رقمج
ساره بضحكة استهزاء : ليش تسال اكيد عندك
فهد حس بخجل : زين ابيج انتي تعطيني وبعطيج رقمي
ساره : انا باخذ من الريم وانت بعد خذ رقمي منها
فهد بكل ادب واحترام : يمكن اكلمج اليوم
ساره وقفت مكانها : اسمحلي ما اقدر اليوم اكلمك انا تعبانه وايد من الصبح قايمه عشان الكوافيره اقدر اكلمك يوم ثاني
فهد قام من مكانه وحس بالضيق من كلامها : خلاص على راحتج باجر ان شاءالله بكلمج .
ساره : اذا الله راد
فهد : عن اذنج يا ساره بترخص انا ..واعرفي ان اليوم احلى يوم عندي
ساره بخاطرها تقول ( واتعس يوم عندي والله لاني مب زوجة خالد).

فهد طلع من عندهم وتضايق وايد من كلام ساره بس فرحته بهاليوم خلته ينسى كل شي ..لان الاهم ان ساره ملكه وهو واثق انها بتتغير لانه يعرف قلب ساره بس اللي مايعرفه شو اللي مخططينه هي وخالد..


ساره بعد ما قعدت وياه وبعد ما الكل راح راحت غرفتها وادمعت وتذكرت كلام خالد ان لازم تكون قاسيه عشان ترجع لخالد اللي ماخذ قلبها واللي غيراخلاقها وصفاتها وطيبتها ..

اما خالد فما قدر ينام هاليوم لانه تخيل ان حد غيره يقدر يتغزل بساره وبجمالها وحس بالقهر والحزن ..

كيف بيكون ملجة ساره وفهد ؟
هل ساره راح تقدر تخلي فهد ينفصل عنها وترد لخالد ؟؟
وخالد هل راح ينتظرها للابد ولا بيتخل عنها وبيمل ؟
.
. الاحداث الحلوه والمثيره كلها بانتظاركم ..بس انتو تابعوني

 
 

 

عرض البوم صور moon_k   رد مع اقتباس
إضافة رد

مواقع النشر (المفضلة)

الكلمات الدلالية (Tags)
الكاتبة فاتنة دبي, روايات, قصة مجنون سارة, قصة حب
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 04:40 AM.


مجلة الاميرات 

 



Powered by vBulletin® Version 3.8.11
Copyright ©2000 - 2020, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية