نوف لبست لها بنطلون جينز وبلوزه كت بدون اكمام لونها برتقالي ... ماحطت مكياج ... بس استشورت شعرها اللي كان طايل شوي وصاير لي نص رقبتها بس طالع عليها احلا .... راحت بتاخذ عبايتها وشيلتها ... ومرت على غرفة نوره ... سلمت على بدور : يلا يالجياكر انا بروح ..... هدووووووووي عازمتني على العشاااااا . والله اني مهمه .
بدور : عشتوا جياكر بعينج ... يلا طسي خلينا نسولف على راحتنا .
نوف : مالت عليكم وعلى سوالفكم ... يلا باي .
نورة تبتسم : الحمدلله والشكر صج انها هبله .... بس ياحليلها ... معطيه جوو بالبيت .
بدور وهي تمسك ايد نورة : ماعلينا منها ... طمنيني عنج .
نورة : الحمدلله .
بدور تضغط على ايد نورة وعيونها بعيون نوره : متأكده انج بخير .
نورة نزلت راسها وكأن بدور حاسه فيها ... طالعت فوق : الله يرحمك يازياد .
بدور وبحنان كبير : نوره انتي شفتي شكلج ... شفتي شسويتي بحياتج ... ِشفتي شسويتي بأهلج .... الكل قعد يحاتيج .. ليش يانورة تبي تخسرين نفسج ... و تخسرين اهلج ... والله حرام اللي تسوينه فينا ؟؟ انا الحين قاعده معاج بس ما احس انج نورة بنت خالي اللي اعرفها ... اللي تربيت معاها ... احسج غريبه عني... وين نوره الاوليه اللي كله تضحك وتتغشمر ... وين نورة العصبيه ... اللي مايعجبها شي .
نورة منزله راسها واهي تسمع كلام بدور بس انطقت بصوت مبحوح : ماقدرت انساه .
بدور تحظن نوره : انا ما الومج يانوره ... ولا احد بيلومج ... بس هالدرب كلنا ماشين فيه ... زياد مات ... انتي ليش تموتين نفسج ... الكل محتار فيج ويلاحظج... حتى امي اليوم سألتني ... لاحظتج ... يانوره ياحياتي الحي ابقى من الميت ... عيشي حياتج .. والله حرام تسوين بنفسج جذيه
نورة ساكته وكانت بتتكلم بس شهد دخلت عليهم بأبتسامتها العريضه : طحت عليكم .......... وحشتوووووني .
بدور ونورة : اهليييييييييين ... حياج تعالي .
شهد ومعاها كيس كله حلويااااااات وككاوات مشكله ... بدور تضحك : ماتخلين سوالفج أبد .
شهد : خخخخخخخ تدرين ما اقدر استغني عنهم .. يلا حياكم " ألتفت حق نورة : ها نويره شلونج الحييييين .
نوره تبتسم : الحمدلله ماشي الحال .
شهد : عفيه نوره تعالي داومي والله ماله داعي قعدتج في البيت ... فاقدينج يالخايسه .
نوره : انا ماراح اداوم الا لما اسوي شي في بالي .
بدور وشهد بصوت واحد : شنو بتسوووين ؟
نورة : بعدين اقول لكم ... بس ابي افكر بالموضوع عدل اخاف اندم وبعدين عاد استشيركم .
شهد وكأنها تتذكر شي : ااااااييي نوره ... تعرفين بشار .. " وبصوت هادي " صديق زياد الله يرحمه ؟
نورة بأستغراب : أي اعرفه ... هذا رفيج زياد الروح بالروح اهو مشعل ... وهو الوحيد اللي يعرف عن علاقتنا ... ليش شفيه ؟
شهد تعدل شعرها وترجعه لورى : اليوم سأل عنج ... وقالي بعد شلون اقدر اوصل لها ؟
نورة مستغربه وعاقده حواجبها : شيبي فيني ؟؟؟
بدور : أي صح شيبي بنوره ؟؟
شهد : مادري والله بس يقول عنده امانه لج وحاب يوصلها.
نورة : أمانه لي .... " وبحزن " اخاف زياد موصيه على شي ؟
شهد : مادري كل شي جايز .
نورة : انزين ابي اوصله شلون ؟؟
بدور : يوم السبت تعالي داومي معاناااااااا ويمكن تشوفينه .
نورة : واذا ماكان مداوم .
شهد تطق على صدرها : افا عليييييييييييييييج ... عندي رقمه ومستعده ادق لج عليه .
بدور : ايا المعفنه ... مايطوفج شي ابد .
شهد تضحك : لالا تفهمين غلط والله عشان نوره اخذت رقمه اشفيج .
نوره : خلاص شهد انتي اتصلي عليه الجمعه واتفقي معاه يوم السبت الساعه 10 الصبح عند المكتبه اوكي .
شهد : اوكي .
تموا البنات يسولفون ويونسون نورة .... والحمدلله نورة حست انها احسن وبدت تبتسم وتضحك .. وتنسى للحظه الهم اللي ساكنها بوجود اقرب صديقاتها بدور وشهد ... اللي تحبهم ولاتقدر تستغني عنهم .

***

لولوة واهي تنطر نوف بالسياره ... قاعده تتحلطم : اففففففف هذي وينها الساعه صارت 6 وللحين ماوصلت .
ألمحت نوف قاعده تمشي بدلع وبمشيتها تقلد عارضات الازياء ... اركبت السياره ولولوه معصبه : اخاف صج بس ... لايكون مصدقه عمرج عارضة ازياء .
نوف تكمل دلعها : اوووووف ياربي من الغيره ما استحمل انا ... ليش كل هذا عشان حلوه واهبل وقمر .
لولوة تبتسم : اقول صكي حلجج وخلينا نمشي ... اتصلت علي هدى وانا قاصه عليها قلت دقيقه ونوصل عندج .
نوف تحط لها غلوس وهي تطالع المنظرة : ايييييي خليها تنطر شوراها يعني ... " وفجأة ضحكت نوف ضحكه هستيريه "
لولوه استغربت : اشفيج ياهبله ..... الحمدلله والشكر
نوف تضحك : ههههههههههههه قاعده اتخيل شكل هدى واهي معصبه ولا قاصين عليها بعد ههههههههههههههه .
أضحكت لولوة على ضحك نوف ... مع ان مافي شي يضحك هههههههههه بس عادي فصله 

واخيرا وصلوا .... نزلوا ... كانت هدى مجهزه خوش قعده للبنات ... وحاطه انواع الحلو والكيك والدونات وانواع العصاير ... اول ما دخلوا البنات شافوا الطاوله قامت نوف تصفر : احلى احلى كل هذا لي يسلام توني ادري اني مو هينه صراحه .
هدى تضحك : ههههههههههه انتي سلمي أول شي يالملقوفه وبعدين سمعينا اطراءج .
هدى سوت نفسها معصبه : ليش بالله متأخرين ... صج انكم ماتستحون ... الحين عازمتكم وحالتي حاله وحضرتكم جاييني اخر المغرب ... جان ماجيتوا وقعدتوا في البيت احسن بعد .
لولوة مصدقتها : يابعد عمري ياهدى ما احد اخرني الا هالنف نف .
نوف بدلع : والله اسفه .... تأخرت عشان قاعده اطلع اوراقي وأغراضي .
هدى وهي تغمز لنوف : أي ماعلينا .. عشان نوف بس بسامحج يالولو .
لولوه وهي تتخصر بشكل طفولي : عشتوا بعد تسامحيني عشان هالملقوفه والله هزلت صراحه .
أضحكوا البنات عليها ....تموا يسولفون .... واختاروا الجلسة الارضيه عشااااااان ياخذون راحتهم اكثر بالتمدد .... ضحك وسوالف نوف وغشمرتها اضافت للقعده روح وحيااااة وردوا وكأنهم أطفال ... يعني الجلسه حلوه وخصوصا لما يكون البيت مافيه احد ... يعني ياخذون حريتهم اكثر من ناحية الصووت والصراخ .
هدى تعتدل بقعدتها : اقول بنات والله فقدنا هالجلسه الحلوه ... شرايكم تنامون عندي ... باجر عطله وماعندكم عذر .
لولوة : انا عن نفسي صج ماقدر هدى .
نوف تلقفت : اييييييييي عشان دكتور القلب قايل لها لاتناميييييين برا البيت .
لولوه تدز نوف : وجع انشالله ... يالملقوفه .
هدى تضحك : احلاااااااا دكتور القلب قايل لج ... الظاهر خايف عليييييييييييييييييج مسكين مايدري انتي تخوفين ديره كامله هههههههههههههه
نوف تضحك بهستيريه : خخخخخخخخخخخخخخخخخخخخ هههههههههههههههههه حلوه حلوه هدى .
لولوه تمد بوزها بدلع : لا موبي ... ماقدر أعصي اوامره ... ياربي متى راح يرد باقي شهر اففففف ياطوله من شهر .
هدى أبتسمت : الله لايفرقكم انشالله وأنا عاذرتج ... " ألتفتت على نوف " نف نف شقلتي ... عشان نسهر ونسوي بحثج مع بعض .
نوف عجبتها الفكره : انا ماعندي مانع بس بدق على امي ... أخاف ما ترضى .
لولوة : لالا خالتي ماتقول شي .
هدى عطتها الموبايل : يلا دقي الحين وجدامي .
نوف خذت الموبايل ودقت على أمها : ألوووووو هلا يمه ... من بعد اذنج انا خاطري انام عند هدى عشان تسوي معاي البحث ... ومنها أغير جو ... ها يمه موافقه ؟
ام خالد : انا ماعندي مانع .... نامي واستانسي .
نوف ألتفتت على هدى : احم احم ... امي وافقت ... بس ماعندي ملابس .
هدى استانست : ماعليج ملابس بدور كلها تحت امرج .
لولوه وصل لها مسج من نواف
(( لو مات في وصلك رجا الشوف والصوت $$ مامات في قلبي غلاك ومكانك
وحشتيني ))
لولوة خدودها صاروا حمر ... أنتبهوا لها نوف وهدى ... واضحكوا ... نوف صفرت : يسلااااااااااااااام أموت انا على الكناري .. يارب ارزقنا يااااااااااارب .
لولوة وهي مستحيه : نوف وجع انزين .
هدى : خلونا نروح نقعد في الحديقه ... الجو حلو .
لولوة ونوف : اووووووكي يلا .

***
سارة خذت رقم موبايل نواف من منى ... والحين بهاللحظه هذي راح تبدي خطة منى .... اقعدت سارة على السرير ... واصابعها تضغط على رقم نواف ... تم يرن ويرن ولكن دون استجابه . سارة : هذا وينه ليش مايرد ... خل ادز له مسج .
اكتبت له مسج (( السلام عليكم ... عندي لك موضوع مهم يخصك ... أتمنى الاتصال بأقرب فرصه ))
أبتسمت وهي تدز المسج .... وبعدها اتصلت على رفيجها الجديد اللي تو متعرفه عليه .
ياترى شنو راح يصير ؟؟؟؟

***

حرك فيصل بسيارته ... يتمشى في شارع الخليج على أنغام أغنية راشد الماجد يسألوني ليه احبك .... وفكره شارد في لولوه ... يبتسم وهو يتذكرها .... يتذكر جمالها .. رقتها ... نعومتها ... شفايفها التوتيه .. خشمها الصغير ... جسمها المنيكان ... يااااااه كامله وما الكامل الا وجه الله .... لازم يتحرك ويكلم امها ... يبيها .... يعشقها ... ولا مره فكر في بنت بهالجديه هذي ... الا لولوه يفكر فيها بجديه ... دعى ربه ان تكون لولوه من نصيبه .... يازينه من نصيب .... عّلا على الاغنيه ويدندن مع صوت السندباد .... وتم يسووووووق بسرعه ... يحس انه فرحان .

***

أتصل طلال على هدى بخصوص موضوع فارس .... طالعت هدى الموبايل واستغربت ... البنات انتبهوا لها ... لولوه : اشفيج هدى ردي على التلفون .
هدى : هذا طلال متصل ... غريبه .؟
نوف كانت تاكل .. أول ما سمعت اسم طلال شرقت : كح كح كح
لولوه : اسم الله عليج ... اشفيج .
نوف عيونها مغرقه دموع من الشرقه : كح أبـ ي مـ ـ ا ي كح
على طول لولوه عطتها ماي ... هدى اطلبت منهم السكووت والهدوء عشان تتكلم مع طلال ... وبعد ست رنات واخيرا ردت بخوف : ألو هلا طلال .
طلال : واخيرا مابغيتي تردين هههههههههه . شلونج هدى عساج بخير ؟
هدى : الحمدلله تمام ... انت شلونك وشلون خالتي عساكم بخير .
طلال حاب يحرجها : بس تسألين عننا ... مانسيتي احد ؟
هدى بصوت حزين : وفارس .؟
طلال بجدية : هدى ... انا لازم اشوفج ... محتاج اتكلم معاج ؟.
هدى خافت ودقات قلبها تدق بسرعه : خالتي فيها شي ؟
طلال : لا ياهدى مو خالتج اللي فيها شي ... فارس اللي فيه ؟
هدى خافت على فارٍس : ليش اشفيييييييه قول لي ؟
طلال : مافيه شي بس انا لازم اشوفج ... ماينفع اقولج بالتلفون ... قولي لي متى حابه اشوفج ... ولا تدرين شلون ... بعزمج على ستار بكس الافنيوز باجر الصبح .؟ ها موافقه ؟
هدى : أوكي باجر الساعه 9 اكون عندك ... طلال سلم على خالتي امانه .
طلال بأبتسامه : انشالله يوصل ... لاتنسين باجر الصبح ... يلا فمان الله .
طول المكالمه ونوف عيونها على هدى .... ماتدري ليش نبضات قلبها تسارعت يوم اسمعت اسم طلال .
لولوة بفضول : اشفيه طلال شعنده .
هدى مستغربه : مادري يبيني بموضوع .... باجر الصبح مواعدني بستار بكس اللي بمجمع الافنيوز .
نوف : وانشالله بتروحين .
هدى : اكيييييييد بروح وانتي باخذج معااااااي .... عشان بشتري لي بلوزه وماعرف اختار ... ابي من ذوقج .
نوف بتهرب : لالا مابي اروح ... اخذي بدور ؟
هدى : انتي نسيتي ان خالد مايخلي بدور تطلع من البييييييييت ... لاتصيرين غثيثه .. باجر زهبي عمرج .
لولوة استأذنت عشان ترد البيت ... هدى : لا تو النااااااااااس قعدي .
لولوه : لا مابي ... اخاف ارد بروحي بالليل ... يلا انتبهي على نف نف ؟
نوف واهي تطق صدرها : افا عليييييييييج انا عن عشرة رجاجيل .
هدى اضحكت على نوف وطريقتها بالكلام حدها مصبنجيه (( عربجية )) .
لولوه وهي تضحك : يلا بنااااااااات باي .
هدى ونوف : باياااااات لولو .

***

قاعده في المجلس والنار قاعده تاكل قلبها ... مقهوره .... تحدد زواج ولدها احمد بعد شهر .... اكيد تبي تاخذه المسعده عساها ماتتهنى فيه .... منى شافت امها معصبه والشر يتطاير من عيونها : ها يمه اقدر اقول لج مبروك هههههههههههههههه
ام احمد تصرخ على منى : الله لايبارك فيج ولا في اخوج ولا فيكم كلكم .
منى بنرفزه : أعصابج شوي شوي علي ... انا شذنبي تصرخين علي ... حطي حرتج بولدج اللي تزوج من وراج .
أم احمد بعصبيه والشر يتطاير من عيونها : عساااااااااااه مايتهنى ... والله واللي خلق سبع اني ماراح اخليه يتهنى مع بنت الفقر .
منى تضحك بأستهزاء : اصلا خلاص تحدد زواجهم ... وبعدين شنو تبين تسوين مو ابوي منبهج انج ما تتعرضين لهم .؟؟
أم احمد بثقه : ومن قال اني بروح لهم واحوس عرسهم ... لا انا بحـضر العرس وبستقبل المعازيم ... وأم كاظم تسوي كل شي .
منى عقدت حواجبها بأستغراب : ومني ام كاظم هذي ؟
أم احمد بأبتسامه : أم كاظم مشعوذة وسحّارة .... بخليها تسوي سحر حق الشينة بنت الفقر ... عشان احمد يطلقها بليلتها .
منى أطلقت ضحكه عاليه : ههههههههههههههههههههههههههههههههههه يمه تفكيرج خطير ههههههههههههههههه .
أم احمد تتكلم بثقه : أنا ام احمد مايطوف علي شي ... واللي ابيه يمشي .
منى : الله وناسه يمه ودي أروح بيت مشعوذه ... بروح معاج .
أم احمد تمشي بكبرياء وهي تصعد الدرج : اذا رحت باخذج .
(( الله يعينج ياضحى على المصيبه هذي ))

حركت منى شعرها بدلع ... وقررت تدق على حبيبها المؤقت فواز تتسلى معاه وبصوت كله دلع مصطنع : الو هلا بقلبي فوفو ... اشتقتلك حبيبي .
فواز : هلا بهالصوت هلا بحبيبتي ودلوعتي .. انا اكثر .... جذي يالظالمه تخليني بروحي ولا تدقين علي ... ماتوقعتها منج ... هالدرجه أهون عليج .
منى : افففف ياقلبي والله ظروفي ماتسمح .
فواز برومانسيه : والله مقدر ظروفج ياقلبي ... بس انا مشتاقلج ... وودي بشوفج يالغاليه ... أبي اكحل عيوني بشوفتج .
منى تلعب بشعرها : انشالله بأقرب فرصه احاول اشوفك فيها .
فواز : في بارتي انا بسويه بشاليهنا ... تعالي اهناك ياقلبي .
منى بتردد : اممممممممممممممم ... مادري بشوف حسب ظروفي ياقلبي .
فواز : حبيبتي انا كل خميس بالشاليه ..... اتمنى تجين واكحل عيني فيج يابعد عمري .
منى استانست من الكلام اللي تسمعه : خلاص حبيبي اول ماتحصل لي فرصه أشوفك ... انا لازم اسكره الحين ... لأن ساره معاي خط ثاني .
فواز : اوكي ياقلبي انتبهي على نفسج ... تراج روح فواز .
منى : يابعد روحي يافوفو ... بايو .
سكرت منى وهي مستانسه من كلام فواز اللي يحسسها انها بنت وحلوه وواثقه من نفسها ... ردت على سارة بسرعه وهي تسمع اصوات وازعاج كأنها في حفله : ها سارونه بشري .
ساره تتكلم بصوت عاالي: اتصلت وما يرد علي .
منى ماتسمع من الازعاج : شنو ماسمعج عدل ازعاج عندج.
ساره : لحظه لحظه خل اطلع برا .
وقفت بتطلع ولا واحد مسكها من الخصر يبي يبوسها ... لكن ساره بدلع ابعدته وهي تضحك له ضحكه رايحه فيها (( ضحكه رقاصات ))
منى استغربت : ساره انتي وينج فيييييييه .
ساره : انا موجوده في بارتي خاص ... عجيب تمنيتج معاي منوووووه .
منى : انزين بعدين ... الحين بشريني شصار مع نواف .
ساره بملل : اتصلت عليه أكثر من مره بس مايرد ... حتى دزيت له مسج وماتصل ... شكله ثقيل ولد عمج .
منى مغتاضه : افففففففف والحين شنو الحل ... ساره عفيا لازم تحاولين تتصلين اكثر من مره .
ساره تبتسم ابتسامه خبيثه : افا علييييج حطيته في بالي والله ماخليه ... بس اتصدقين احس انه يحب لولوه ومستحيل يصدق فيها .
منى : شدعوا ساره ... انتي عليج اسلوب يقنع .... احنا بس خلينا نمشي بهالخطوه ...وبعدين نفكر بخطط ثانيه .
ساره : انزين خلاص ,,,,, انا بدق عليه اليوم بس ارد وبعدين اعطيج خبر ... يلا بروح للبارتي ... تأخرت عليهم .
منى : انزين يلا باي ولاتنسييييييييييين تتصلين علي أول بأول .
ساره : اوكي يلا باي .

***
وصل البيت .... وهو يحس بأحساس الحب ... معقوله الحب يخلي الحياة حلوه ... دخل البيت بهدوء وهو قاعد يغني بصوته الشجي " يسألوني ليه احبك ... حب ما حبه بشر " ... لقى أبوه وأمه قاعدين يتابعون الاخبار ... أنتبه له ابو ضاري وابتسم : حي الله الطربان ... شعندك تغني .
أم ضاري : عساني ما خلا من هالصوت ... عسالله يحفظك ياولدي ... ويفرحني فيك .
فيصل ابتسم وراح باس راس ابوه وراس أمه : انشالله قريب يايمه تفرحين فيني .
ام ضاري استانست من ولدها ... واخيرا قرر يتزوج : الله يبشرك بالخير ياولدي ... قلي منهي وانا اروح اخطبها لك .
أبو ضاري : أي يافيصل واخيرا قررت ... وترا العروس جاهزه ياولدي .
فيصل استغرب من ابوه : منو العروس .
أبو ضاري بفخر : بنت عمك صالح ... حنين .
فيصل توهق ومايدري شنو يرد على أبوه ... ولا يبي يغضب أبوه لان يدري اذا ابوه قال كلمه لازم يلتزم فيها .. من التوتر حط ايده بداخل شعره : اذا عزمت انشالله بقول لكم ... عن اذنكم .
صعد على طول لغرفته .. وانسدح على سريره ويطالع السقف بعيون كلها حزن.... لييييه يايبه تخرب جوي ... ليه تصدمني وانا كنت مستانس ... لييييييييييه حنين وقلبي مع لولوه .... مستحيل ياخذ غير لولوه اللي دخلت في باله ... وامتلكت قلبه واحساسه ومشاعره ... لولوه بإختصار هي حياته ... ولازم يلقى ويفكر في حل ... يقنع ابوه فيه .
غمض عيونه ... واستسلم للنوم

(( نبذه عن فيصل ... فيصل انسان حالم ورومانسي ..... عمره 24 سنه وهو موظف في الحرس الأميري ... عيونه عسليه لوزيه .. شعره كستنائي ... مو طويل حيل ... كان عريض الاكتاف ... كان له علاقات سابقه مع جميع اصناف البنات ... ومالقى البنت اللي يفكر فيها كزوجة ... بس شاف لولوه مره وحده حبها ويحس بمشاعر متضاربه لما بس يسمع صوتها او يطرون له اسمها ... هل راح يتحقق حلم فيصل !!!! ))

***
لولوة ردت البيت .... وطول ماردت ماقدرت تكلم نواف ... لان كل ماتتصل ... مايرد : أكيييييد بمؤتمر ومو فاضي ... فديت قلبه حبيبي .
غسلت وجهها وإلبست بجامتها .... وقررت تمر على نورة وتشوفها ... شافت نوره قاعده تكتب خواطر ... أبتسمت والحمدلله حاولت تشغل نفسها شوي بعيد عن زياد ... بس ماتدري ان هالخواطر كلها لزياد ... اطلعت بهدوء وماتبي تشغل نوره ... وقررت تروح لغرفة ضحى اللي لقت ضحى غرقانه في الحب مع أحمد ... ابتسمت لولوه ودعت الله ان لايغير عليهم .
وصكت الباب ,,, وراحت لمملكتها ... غرفتها ... قررت انها تريح وتنام .... ونامت ولا تدري عن باجر شنو راح يصير .
***
نواف اللي كان يومه حافل .... من مؤتمر ... إلى مستشفى ... ومن مستشفى إلى لجان طبيه ... يعني كان يومه متعب ... وصل للفندق وكان تعبان وراسه يعوره ... أخذ له حبة بندول ... واتجه للحمام ... وغسل وجهه ذو الملامح الحاده وبلل شعره الحرير اللي صار طال شويه بالماي ... وفتح قميصه وظهرت عظلات اكتافه وبطنه المقسم على الخفيف وظل عاري الصدر ... كان شكله خيااااااااااااالي ورجولي ويجنن .... توجه للسرير ... وانسدح عليه ... اخذ موبايله وشاف 3 مكالمات لم يرد عليها ومسج واحد .... بدون مايشوف الارقام والمسج ... اتصل على حبيبته لولوه ... ولكن دون استجابه .. وتأكد ان لولوه نايمه اكيد ... تحسس بإيده على الجهه الثانيه ... تمنى ان لولوه تكون موجوده فيه ... عشان يظمها حييييييل ويدفن راسه في صدرها ... لان محتاج يظمها ... محتاج لحنانها ... يبيها عنده .... متى ارجع الكويت واخطبج ... آآآآآه الله يصبرني على بعدج عني ... وش الدنيا عقب فرقاج يالولوه .
تذكر المسج ... وكان من رقم غريب ومكتوب فيه :
((السلام عليكم ... عندي لك موضوع مهم يخصك ... أتمنى الاتصال بأقرب فرصه ))

استغرب من الرقم الغريب ... وتم يتساءل بينه وبين نفسه ... ياترى منو وشهالموضوع المهم ؟؟؟ خل اتصل واشوف منو ... اتصل على الرقم وتم يرن .

ساره اللي كانت قاعده في بارتي ... وانواع الرقص والبنات مع الشباب والخرابيط اللي تصير ... شافت موبايله وكان رقم نواف .... ابتسمت وقالت لنفسها : أخيرا اتصل وينج يامنى هههههههه .... واطلعت برا الشاليه عشان تتكلم معاه بدون ازعاج ... نعمت صوتها ... وردت بصوتها الانثوي الساحر : ألو .
نواف بإستغراب بس شده الصوت الحلو : الو ... السلام عليكم ... أختي متصله ودازه لي مسج ... خير انشالله .
ساره تخبلت على صوته الثقيل والرجولي : وعليكم السلام ... أسفه على الازعاج دكتور نواف ... ادري ازعجتك ... واضحكت بضحكتها الانثويه الجذابه بصوت ناعم وخفيف .
نواف بلع ريقه و تعوذ من الشيطان : لا مافي ازعاج ... بس ماقلتي لي شنو الموضوع ... لأن انا مشغول ماقدر اطول بالموبايل عندي شغل .
ساره (( ياحلوه مستحي )) : اوكي ... اذا فضيت دق علي وانا اقول لك ... لان الموضوع يبيله وقت واخاف اعطلك .
نواف مصر انه يعرف الموضوع وبصوت حازم : لا لازم الحين تقولين لي ... مايخالف الشغل يتأخر .. يلا اسمعج تكلمي .
ساره وهي تقعد قبال البحر : طيب بقول لك الموضوع بس ابيك تسمعني للآخر ولاتقاطعني .
نواف متحمس يعرف : كلي آذان صاغيه .
ساره عدلت جلستها وقالت بثقه وبجديه : انا عارف انك انسان مستقيم وماشي سيده ... ماتحب تلف ولاتدور ... لكن سمعت انك تبي تتزوج وتخطب وحده اعتقد انها تقرب لك
" نواف استغرب شلون عرفت .. صج ماينخش شي بهالديره "
كملت ساره : هالانسانه هذي يانواف ماتصلح لك .
نواف بأستهزاء : ماتصلح لي شلون بالله .؟
ساره : استغفر الله ياربي مابي اتكلم في اعراض الناس .
نواف بدى صبره ينفذ : تكلمي بسرعه .
ساره (( فديته معصب هههه انطر علي والله لا اخليك تعوف لولوه )) : بقول لاني خايفه عليك والله وعلى سمعتك والله يسامحني ... لولوة كانت زميله لي ايام الجامعه .... وكنت حابه اني اكون صديقتها ... لكن في وحده من البنات قالت لي ان لولوه تطلع مع شباب وتستغل جمالها عشان يعطونها فلوس وتطوف محاظراتها ... لكن انا ماصدقتها ... الا يوم شفتها بعيني ... تطلع الصبح مع عيال الهاي هاي وترد الظهر ... تمويه عشان اهلها يدرون انها بالجامعه .
نواف حس برجفه ملت جسمه وحس قلبه شوي يطلع من هالكلام هذا وقال بعصبيه وصراخ : اكلي خراااا لولوه اشرف منج ومن امثالج وما اسمح لج تتكلمين عنها بهالطريقه هذي .
ساره بصوت عالي : شوف اصلا انا ماني مهتمه فيك ... ولا فيها ... بس حبيت اسوي خير فيك ... لانك ولد ناس ولا تستاهل انك توصخ نفسك مع وحده مرخصه عمرها عشان الفلوس ... واذا مو مصدقني انا مستعده اثبت لك ... واجيب لك الدليل بعد .
نواف حس راسه بينفجر من الكلام اللي يسمعه ... يحس الدم قاعد يضخ براسه أكتفى في ان يصرخ ويقول : لولوه اشرف منج .. وان شفتج اتصلتي برقمي مره ثانيه ماتلومين الا نفسج فاهمه .
وصك التلفون بوجهها ... مستحيل يصدق في لولوه ... لولوه طاهره وعفيفه ... ومو محتاجه تبيع نفسها عشان جم فلس .
سارة اكتبت له مسج وتبي تشككه اكثر .. وصله المسج وكان مكتوب فيه :
(( راح اثبتلك يانواف ... والدليل راح يكون موجود عندي .. انا اسفه اني ضايقتك ))
حذف نواف الموبايل لدرجة انه تكسر لأجزاء ... ومسك راسه ... والشكوك والظنون بدت تسري لعقله لكن يقول لنفسه : لاااااااااااااا لولوه مستحيل تسويها مستحيل ولا راح اصدق فيها .... لبس ملابسه بسرعه وطلع يتمشى يبي يشم هوااا يحس انه مخنوووووووق .
" الله يعينك يانواف بس اهم شي لاتصدق في لولوه "

***
في اليوم التالي .... الصبح ... وتحديدا الساعه 8 الصبح ... اقعدت هدى من النوم ... وقعدت نوف معاها عشان تتزهب وتروح لموعد طلال .... تريقوا البنات بروحهم لان ام بدر نايمه ... وبدور هم نايمه ... وبدر عنده دورة بالدوام وما يجي البيت ... هدى : نوفي يلا لبسي بسرعه عشان نلحق .
نوف وشعرها كشه صاير : هدى مابي اروح .. وديني بيت اهلي ... والله فشيله
هدى تتخصر : شنو شنو ... لا يبا تروحين غصب معاي .
نوف تتثاوب : والله ماله داعي .. احس وجودي غلط ... يمكن بيقولج موضوع خاص بينكم ... شكو ارز ويهي .
هدى وهي تسحبها من الكرسي : اقول امشي بلا قرقه ... خلصيني ربع ساعه وتكونين جاهزه .
خذت نوف من كبت بدور ... فستان حرير تايقر يوصل للركبه ... والبست تحته بنطلون جينز ... ومع شيله بيجيه ... حطت لها مسكره وغلوس عالسريع ... أما هدى أكتف في انها تلبس عبايه نظام مغربي مطرزه بلون فضي وملفع نفس نقشة التطريز ... وماحبت انها تحط مكياج جدام طلال لان فشله .... ألبست نظارتها الديور ... وانزلت تحت وشافت نوف جاهزه .. أبتسمت لنوف : ها سرقتيهم من بدور .
نوف اضحكت : ههههههههههههه امشي يامعوده قبل لاتقعد بدور وتسوي لي سالفه .
هدى وهي تطلع سويج السياره (( مفتاح السياره )) : يلا مشينا .