كاتب الموضوع :
عذبة التجريح
المنتدى :
الارشيف
صحت شهد من نومها قبل أذان العصر وقامت بسرعة توضت وصلت الظهر قبل لايأذن العصر.. وكانت تحس ابثقل في راسها.. لفت راسها على الكومودينة صوب السرير وشافت العصير محطوط ومغطى خذته واشربت منه رشفتين وهدته..
شهد خلال اربعة ايام اللي طافوا ماطب بمعدتها غير الماي والعصير.. مع إن دايماً يرسلون لها مع العصير شوربة علشان تتغذى بس اهي خلقة ماتاكل شي وعلى ادنات الدون تنسد نفسها عن الأكل وكانت الشوربة مثل ماتصعد لها فوق ينزلونها مثل ماهي بدون ماتقربها.. وكانت مرات تشرب العصير وماتكملة بعد..
اذن العصر وقامت تصلي.. وبعد ما قضت ( خلصت ) شهد من صلاتها وردت تنسدح مرة ثانية.. وبعد نص ساعة دشت عليها أم خليفة.. واهيه من بعد الصفعة أول مرة تصعد لها وتشوفها لأن عيالها وريلها كانوا يمنعونها عشان ماتشوف شكل شهد واتخرع عليها.. بس الحين ولله الحمد شهد وايد احسن والورم كان بسيط والزروقه خفت من خدها.. وشهد قامت تقدر تتكلم مو مثل أول يومين..
أم خليفة دشت ووراها الخدامة بإيدها صينية فيها شوربة خضار وفلية سمك مقلي أم خليفة مسويته متعمدة علشان شهد تأكله مع بطاطا مخبوزة بالفرن مثل ماتعشقها شهد وعصير.. حطتهم الخدامة على الطاولة الطويلة اللي عند القنفة واطلعت.. وأم خليفة راحت واقعدت على السرير يم شهد.. وتبوس راسها وتمسح عليه..
أم خليفة بصوت واطي : شهد.. شهد..!!
شهد صحت على صوت أم خليفة الحنون واقعدت بكل لهفه على حيلها علشان تشوف أمها واللي صارها جمن يوم وهي فاقدتها.. ولمت امها طيبة واهي تحط راسها على كتفها..
أم خليفة عيونها غورقت بالدموع وقالت بصوت ملهوف : اشلونج الحين يُمه إن شاء الله طيبة..؟؟
شهد بكل لهفه ودلع وتحاول تخلي صوتها طبيعي لأن البحة اخنقتها من اللهفة على أمها : الحمد لله انا ابخير يُمه.. بس الشوق ذبحني وميته على حضنج..
أم خليفة : سامحيني يابنتي انا كل ماييت بطلع لج.. امنعوني العيال وابوج وقالوا لي تعبانة وماخذه برد لاتعديج.. واهي بخير بس كله نايمة من الدوا اللي معطينج ياه..!!
شهد : إيي يُمه الدوا ذبحني كله نايمة ودايخة وراسي دومه اثقيل..
( وطت شهد من نبرة صوتها شوي وقالت بترجي لأم خليفة ) : يُمه الله يخليج خليني انام على ريولج مشتاقة لريحتج يالغالية..
أم خليفة وعيونها تدمع من لهفتها على بنتها.. واشلون اقدروا يحرمونها هالجم يوم ومايخلونها تشوف شهد اللي تربت على إيدها وكبرت وصارت عروس جدام نظرها.. وقالت لشهد بنبرة حانية : قومي يُمه بالأول أكلي لج لقمة.. وعقب بحطج بحضني..
شهد وتحط راسها على صدر أم خليفة وتقول : مالي نفس آكل شي..
أم خليفة بعتاب : ليش يايُمه تسوين بروحج جذي والله موزين.. انتي لازم تاكلين عشان تتقوين وتصيرين زينه..
شهد : يُمه والله مالي نفس وماني يوعانه.. وأنا مومتعمدة هالشي..
أم خليفة ترفع راس شهد من على صدرها وتمسكة بين إيدينها علشان تملي نظرها منها.. وتحاول تخوف شهد بالكلام علشان تاكل : مصارينج بتيبس عليج وانتي كله شبعانه.. هذي حاله بالله عليج..!!
قومي يُمه قومي أكليلج لقمة ترى والله رَيْلِجْ اهو اللي قايل خلوها تاكل زين لأن عندج نقص.. وبعدين خالتج منيرة أم ريلج بتيي اليوم وبتشوفج.. قومي يابنتي الله يرضى عليج واكلي لج لقمة ترمين فيها عظمج اللي طلع.. وشوفي شكلج واشلون غادية..!! لونج أصفر وويهج باهت.. وعيونج غايره وضلوعج بارزة لي برة من كثر الضعف.. وانتي دايخة من قل الأكل.. وصارلج اربعت ايام والزاد مادش فبطنج..!!
شهد تلم أم خليفة وترد تحط راسها مرة ثانية على صدرها وتقول عشان تغير موضوع الأكل : يُمه الله يخليج انا يوعانة حنان وحضن ولمة على الصدر..
أم خليفة من سمعت جذي لمعت عينها.. والإبتسامة شقة ويهها وقالت بمكر : ههههههههههههه.. عندج زوجج وتطلبين مني حنان وحضن..!!
وزوجج شخانته كل يوم عندج وماتلقين أحن منه عليج.. ولا ادفى حضن منه.. وصدره يحتويج ومن شوقه يلمج..!!
شهد وجهها صار طماطة من الحيا ومصدومة من كلام أمها أول مرة تكلمها بهالطريقة وتسمع منها هالحجي..!!
شهد : أأأأوووووه يُمــــه.. شهالكلام الله يهديج..!!
( وكملت بدلع ).. وبعدين انا حضنج ما ابدله بأي حضن.. ومابي غيرج يلمني ويحضني..!!
( ودفنت ويهها بصدر أم خليفة من الحيا )..
أم خليفة تلمها على صدرها وتكمل بتطفر شهد : وعيل المسكين فهد ذابح عمره ومتحمل كل ماييه منج.. وآخر شي تعافين حضنه..!!
( نزلت أم خليفة راسها تطل على ويهه شهد اللي لامتها على صدرها وتكمل ) : أقول قومي لاايي ابوج ويسمعج ومايحتاي أقولج شيصير.. قومي وأكلي لج لقمة عن خاطري يُمه.. والا تبين حضني وخاطري عايفته ( رافضته )..؟؟
شهد : خاطرج عندي بالكون يُمه.. أبيع الدنيا وأشتري رضاج يابعد عمري.. وأنا باكل بس عشانج يالغالية..
قامت أم خليفة ومعاها شهد وقعدوا على القنفة الطويلة اللي بغرفة شهد.. أم خليفة قعدت على يسار شهد.. وشهد كانت بنص القنفة.. وحاولت تاكل لها لقمتين وحست بالغثى وشبعت لأن المغذي يسد النفس ويملى المعدة..!!
شهد مكشرة وعافسه ويهها وبتعبير المستلغث وتقول وهي حاطه إيدها على بطنها وتمسح عليه.. وتقول بصوت الشبعان الممتلي معدته من كثر الأكل : بسي يُمه والله شبعت.. ماقدر آكل أكثر من جذي..
شاهين واهو داش على شهد وسمع كلامها مع أمه.. قال بنبرة جدية وصارمة : لا والله ماتقومين إلا وانتي ماكله اللي بالصينية كله.. وفهد موصيني عليج اليوم لازم تاكلين.. وموزين تتمين عايشة بس على الماي والعصير..
أم خليفة : تعال يُمه اغصبها انا ماني قادرة عليها.. كلت لها لقمة وتقول شبعت.. واهي الزاد من ايام مادش فبطنها.. والله احترت معها..!!
شهد واحتدت بكلامها شوي : انتوا علامكم انا ماني ياهل.. آكل على قد معدتي وإذا يعت..
شاهين واهو يقعد على يمين شهد ويقلد صوتها : ماني ياهل وآكل على قد معدتي ..... ( وكمل بستهزاء ) وإذا يعت.. وانتي اليوع مايعرف دربه ناحيتج.. بالله متى تاكلين إذا طول وقتج شبعانة وماتحسين باليوع..؟؟!!!!!!!!
شهد طفرت من الموضوع : أأأووووههههه ترى والله مالي خلق اسمع الموال الأبدي يزن على راسي دوم.. انتوا ماتحسون فيني ماأقدر آآآآكــل أكثر من جذية..!!
شاهين بتحدي وعصبية : لاااا تقدرين.. والحين بتاكلين.. وإن ماطعتي بتنغصبين.. يالله جدامي كملي أكلج دام النفس عليج طبية..!!
شهد وعنادها اشتغل : مـابـي مـاراح آكــل..
وحاولت تقوم من مكانها بس شاهين رد تلها ( جرها، شدها، سحبها ) من وسطها وخلاها ترد تقعد.. وتم محاوط وسطها بإيده عشان ماتقدر تقوم.. واهو معصب عليها : اشوف وشلون بتقومين بدون ماتكملين أكلج..!!
شهد والضيقة مرتسمة على ويهها وقلّتْ صبرها.. وتحاول تفك إيد شاهين من وسطها.. وماهي قادره عليه لأنه شاد عليها واهي مافيها قوة.. عصبت وقالت بصوت عالي : شاهين الله يخليك وخر عني ترى والله مالي خلقك..
شاهين وبتحدي أكبر : ماني موخر عنج وبشوف شبتسوين..!!
شهد نفذ صبرها : يُـمه الله يخليج قوليله ترى ماني قادرة اتحمل أكثر..
أم خليفة بصبر وصوت هادي : شاهين خلها يُمه على هواها.. واهي بتاكل عقب إن شاء الله..
شاهين بستهزاء وعصبية : بتـــاكل عقــــــب...!!!..
بتاكل عقب شنو يُمه واهي الزاد على قولتج ماطب ابطنها من ايام.. يعني ننطرها لين تطيح علينا وتيبس مصارينها وتموت..!!
شهد بستهزاء : لا تخاف مصاريني ماراح تيبس مع الدوا اللي ولد عمك معطينياه.. والمغذي تارس معدتي وساد نفسي بالمرة..
شاهين : والله الدوا والمغذي لو مانحط عليج.. جان من زمان مصلين عليج..
أم خليفة ابخرعه وعصبت على شاهين وردت عليه بحمق : إسم الله عليها من الموت.. وانت اشحقة تفاول على اختك بالموت..!!
شاهين : لأنه إذا ماكلت ماراح يتم بجسمها شي.. وانتي شوفيها اتقولها مومياء يلد ( جلد ) على عظم.. وإن ماغصبناها على الأكل.. واكلت مثل الناس عدل.. فهد حالف ليوكلها عن طريق الأنابيب بالغصب..
شهد وعيونها تبطلت من الخرعة.. وعصبت : واهو شكو فيني.. انا حره آكل وقت ماأبي.. وماله شغل يتدخل بأموري وبصحتي..!!
شاهين : والله فهد رَيّلج.. يعني ولي أمرج.. ويقدر يسوي أكثر من جذيه.. بس أهوه محترمج ومقدرج..
شهد واعصابها ثايرة بس موقادرة تصرخ واتعبر عن شعورها.. بسبب الضعف اللي فيها وثقل راسها.. فمالقت لها منفذ غير بدموعها.. وقطت ( رمت ) نفسها ابحضن أم خليفة تبجي من القهر....
ياربي عليك يافهد.. انا ماني عارفة واشلون اتصرف معاك أو انتقم منك.. ابي الفكة منك ومن تحكمك فيني.. بس ماني عارفة اشلون......!!
ولا تهقى إني راح اضعف بيوم واخضع لك.. واخليك تتحكم فيني مثل ماتبي.. لااااااا حامض على بوزك..
وأبوي غصبني على هالزواج.. وأنا بغصبك على الطلاق..
وانا بسايرك الحين بس جدام الأهل وأمثل الموافقة.. ولكن بتشوف اللي بييك مني عقب يالعتوي..
انا ماني قادرة اتصرف معاك براحتي.. ابوي وكل اخواني واقفين معاك ضدي.. حتى امي طيبة ابصفك..
وانا بروحي بويهك.. وراح أكون ضدك واحارب كل ماايي منك.. واوريك منهي شــهـــد......
أم خليفة واهيه حاضنه شهد وتمسح على راسها وتهديها : بسج يُمه قطعتي قلبي من كثر البجي.. ذكري الله.......
ووجهت أم خليفة كلامها لشاهين : انت روح يُمه وخلني مع اختك.. وإن شاء الله يصير خير..
شاهين يبرر موقفه واهو مقهور : يُمه انا خايف عليها وابي مصلحتها..
أم خليفة : مايخالف يُمه وشهد تدري بهالشي.. وخلها الحين وبعدين بتاكل..
قام شاهين وطلع من الغرفة معصب وضايقة فيه الوسيعة من حالة اخته واعنادها.. وراح غرفته وسيده كلم فهد على الموبايل وخبره باللي صار.. وفهد استحمق بس خشها بنفسه وقاله خلها على راحتها واليوم بييها ولي تصرف ثاني معاها..
وشهد من كثر البجي اتعبت ونامت ابحضن ام خليفة على القنفة اللي بغرفتها.. وقامت أم خليفة نادت شاهين يشيلها ويحطها بسريرها اريح لها..
:
:
:
:
:
:
بعد صلاة العشاء
في بيت بوخليفة
وصل فهد مع امه لبيت عمه بوخليفة من بعد اصرار والحاح من أم فهد انها بتروح عندهم وانها أم المعرس فلازم اهيه اللي تروح لبيت أهل االعروس.. ومنهي العروس..؟؟ هي شهد حبيبت أم فهد..
فهد خبر امه بأن شهد تعبانه شويه بس ماقالها على موقفها منه ورفضها له.. ولا قال لها عن وايد شغلات اصدرت عن شهد.. غير إن شهد درت عنه إنه دكتور جراح.. وماقالها عن اللي استوى عليها من اعرفت ولا عن ردت فعلها.. يكفي إن امه تعبانه ويزيد عليها بالهم.. وبعدين شهد تحب امه وايد وتحترمها وتدري عن حالتها الصحية وانها ماتستحمل أي خبر يكدرها أو يصدمها.. واهو عارف ومتأكد بأن شهد ماراح تقهر امه أو تبين أي شي جدامها وتكدرها.. لأنها تعز وتحب امه وايد وأهي بمثابة أمها.. وام فهد من كانت شهد صغيرة واهيه كله عندها وتدللها.. يعني حب متبادل مابين الثنتين..
أم خليفة والفرحة باينة بعيونها : حيا الله من يانا.. تو مانور البيت يوخيتي.. هلا ومرحبا..
أم فهد فرحتها ماتقل عن فرحة أم خليفة وبنفس النبرة ترد : الله يحييج ياأم خليفة ويسلمج.. والبيت منور بأهله.. ويعله دوم منور فيكم يابعد عمري..
وسلموا على بعض بالأحضان لأنهم من زمان ماتشاوفوا..
أم خليفة بعد مادنق فهد وباسها على راسها : ها فهد اشلونك يُمه..
فهد : هلا يُمه انا بخير مادمتوا بخير وراضين عنا..
أم خليفة : الله يرضى عليك دنيا وآخرة يابعد عمري والله..
وكانو الأهل مجتمعين كلهم ومستانسين بلمتهم مع الغالية أم فهد واللي هي بمقام أمهم الثانية ومرت عمهم.. بس اليمعة كان ناقصها شهد..
والأخيرة من عنادها وقل اكلها كله دايخة ونايمة ومافيها حيل تقوم.. وطبعاً هذا كان نوع من انواع الهروب من ناحيتها.. عشان ماتواجه اهلها وخصوصاً الكبار.. وكان ايضاً نوع من الأحتجاج من ناحية شهد على وضعها اللي انجبرت فيه بزواجها من ولد عمها فهد.. بالأصح نوع من أنواع التمرد على الواقع من القطوة المتمردة.. وهالتمرد غير مقصود من قبلها.. ولكن مرات عقل الباطن يسير الإنسان لعمل أشياء اهو مايقصدها.. وشهد عقلها الباطن أهو اللي دوم يعطيها الإشاراة بأنها شبعانه ومنسده نفسها عن الأكل..!!
فهد دخل عند الرياييل بالدوانية.. وسلم على عمه وعيال عمه والأهل.. وراح سيده عند شاهين لأنه منقهر من شهد واللي سوته اليوم عقب ماكلمه شاهين وخبره باللي صار بالتفصيل.. وخذا الأذن من عمه عشان يصعد فوق ويشوف شهد.. وطلع لها فوق واهو معصب عليها من عنادها.. دق باب الغرفة طبعاً كالمعتاد لاجواب.. فتح الباب ودخل عليها وشافها قاعده تصلي.. سكر الباب من وراه وراح قعد على سريرها ينطرها تخلص.. وشهد من شمت ريحت العود والبخور والخلطة العجيبة والمميزة.. اعرفت إن فهد دخل عندها.. ارتجفت وانتفض قلبها من الخوف لأنها داريه بأن السوسة شاهين خبره بكل شي بالتفصيل الممل.. فقعدت اتماطل وتطول بصلاتها قد ماتقدر.. وفهد من شافها طولت زيادة عن اللزوم قام من على السرير وتوجه ناحيتها وقعد على القنفة القريبة منها وتم يطالعها.. واهي حاسه وعارفة باللي يسويه وقلبها زاد بنبضاته من الخوف بس ماكو فايدة.. تمت مكابرة ومعاندة حتى شعورها وطنشته..
فهد قال بصوت واطي بس مسموع وبتهديد : الفرض والسنة وخلصتيها.. وشفعتي وزدتي خير وبركة..
( غير نبرة صوته لنبرة التهديد وقال ) : خلصي اعطيج بس توترين وماامهلج عقب.. راح اشيلج من السيادة ( سجادة الصلاة ) وانتي عارفة إني أقدر اسويها.. يالله حدج خمس دقايق ماكو غيرهم..
وتم يناظرها ويحسب لها الوقت.. لين اعرفت انه ماكو فايدة ووترت وخلصت.. فصخت ثوب الصلاة وشالته مع السيادة وحطتهم بالدرج.. وقلبها يدق بسرعة.. وتوجهت وهي مرتبكة ناحية غرفة الملابس.. عرف فهد بللي في بالها وناويه عليه.. وقام لها سيده وبسرعة تلها وشالها واهو بقرارة نفسه ميت من الضحك عليها.. بس مابين لها ردت فعله وسوى نفسه انه معصب وحمقان..
فهد : الظاهر بالبيت عندي راح الغي كل المفاتيح واخلي البيبان هدد بدون قفل.. عشان ماتنحاشين وتنخشين يالجبانة..
شهد تحاول اتملص من ايد فهد عشان تبعد عنه وتنحاش : والله لي ييت عندك تصرف في بيتك مثل ماتبي.. وهذا الشي ماراح يصير ولاتحلم فيه..
فهد نزل شهد وقعدها على السرير وقعد يمها على يمينها ولازق فيها كنوع من فرض السيطرة والوجود عليها وقال بكل برود : ليش ماراح يصير واحلم فيه.. وانتي الخميس الياي عندي وتحت تصرفي بالكامل.. ومتفق مع عمي على هالشي..؟؟
شهد اشهقت من اسمعت كلام فهد وبطلت اعيونها على حدهم : لاااااا.. لااااا.. انت تجذب علي.. واصلاً انا موموافقه على هاالشي.. وبعدين ابوي ماقال أي شي ولا فتح الموضوع بالأساس..!!!!
فهد وبكل برود واستهزاء : الحين بس اخلص واعطيج أخر جرعة من الدوا راح تنزلين معاي.. لأن أمي ياية على شانج.. وبيخبرونج تحت كل شي يامرتي العنيدة.. آه آســف قصدي يامـــرتي العتيدة..
شهد بعصبية وعناد : ماني مرتك.. وماني نازلة تحت.. وماني ماخذه دواك الخايس..
فهد حاول يمسك نفسه ويخلي قناع الجدية والعصبية على ويهه.. بس ماقدر يمسك نفسه من الضحك على ردها : ههاههاههاههاههاههههههههههههههههههههههههههه..
دواي الخايـــس..!!
هههههههههههههههههههههههههههه..
دواي الخايس على قولتج راح تاخذينه غصبن عنج والحين لأنه آخر جرعة.. وانتي مرتي غصبن عليج ولاتخليني آخذج الحين غصب.. وهالشي من حقي محد بيعترض..
شهد والخوف خذا كل العقل منها وخلى التهور يحكم لسانها.. وردت بسرعة بدون ماتثمن الكلمة : اتـخـسـى تمد إيدك علـي وماتقــدر.. وانا مابيــك اكرهــك وماأحبــك.. وانت منت جاد باللي تقوله بس بتخرعني.. ولكن على منو ياروح امـــــك..؟؟
فهد عقد نونته وقام يطالعها بكل عصبية وكان شكله صج يخوف.. وكلمها بعصبية وصوت عالي شوي : انتي مَحّدْ لجم لسانج وتمردج..!!
وماتعرفين تحترمين احد..!!
وانا ماراح ارد عليج الحين.. يوم الخميس الياي بيكون ردي عليج كافي ووافي يـــازوجـتــــي..
( شدد على الكلمة الأخيرة )
وقام سيده بدون مايعطيها أي مجال دزها بالعدال على كتوفها وسدحها.. وعدل وضعها على السرير عشان تكون بوضع استلقاء تام.. وركب المغذي على العامود ووصله بالأبرة المثبته بإيدها.. وحقن الدوا بكيس المغذي.. وتم قاعد يمها ومواجهها على السرير بس علشان يقهرها بسبت الكلام اللي ماثمنته وتم لين خلص المغذي بعد نصف ساعة.. قام ارفعه وفكه وشال الأبرة من إيدها وحط لها بلاستر لازق.. وقام فحص إذنها وشاف إن العصب ولله الحمد طاب.. يعني مثل ماقرر الجرعة اللي عطاها ياه كانت آخر جرعة من الدوا.. وطلع المرهم ولف ويهها ناحيته وشهد امغمضه عيونها عشان ماتشوفه.. وحطلها الكريم.. وقالها بصوت صارم يهددها فيه..
فهد : سمعيني زين إذا سمعت إنج ترفضين الأكل وماتاكلين زين.. راح آخذج عندي البيت من باجر وأوكلج على طريقتي الخاصة.. واللي ماراح تعجبج لأنها تألم وماأعتقد إنج راح تحبينها.. وإذا بتعرفين شنهي الطريقة..!!
( كمل يشرحه لها الطريقة علشان يخوفها )
هذي الطريقة نتبعها مع العنوديين اللي مثلج ويرفضون الأكل.. نمد لهم انبوب من فتحت الخشم ليمن البلعوم ونحط فيه الأكل ونخليه لين يوصل للمعدة.. وبهالطريقة يكون العنودي خذى وجبته كامله.. وتكون هذي الوجبة معجونه وناعمة علشان تمر من خلال الأنبوب.. وإذا تعجبج هالطريقة من باجر راح اتبعها معاج..!!
تمت شهد ساكته وتطالعه بكل عيونها مثل الطفل البريء وماهي قادره ترد عليه من خوفها.. لأنها أول مرة تشوف فهد معصب بهالطريقة ويهددها بتباع طريقة مقرفة ومؤلمة للأكل..
وقام فهد قفا عنها ( عطاها ظهره ) وبيطلع برة الغرفة وبينزل تحت.. وقبل مايطلع قال لها بصوت الواثق والصريح واللي مايقبل النقاش نفس طريقة أبوها ليبغى يعطي القرار والأمر الواضح واللي مافيه رجعه..
فهد : عندج من عقب باجر الأثنين.. راح اييب لج المهر.. واكلم منى تطلعين معاها السوق وتتجهزين باللي تبين.. ويوم الخميس موالياي اللي عقبه بعد صلاة العشاء انا ياي آخذج ونروح بيتنا.. وتكونين جاهزة..
وهــــذا أمــــــــر..
(( وقال الكلمة الأخيرة بصوت واضح ويخرق القلب والعقل ))..
طلع فهد وسكر باب الغرفة من وراه.. وترك شهد تستوعب اللي قاله على كيفها ومهلها.. واهو متأكد بأن معاملته اليديه معاها راح تزرع الخوف بقلبها.. وراح تزيد بكرهه بس ماباليد حيلة..
ونزل تحت عشان يتفق مع منى تودي شهد من عقب باجر السوق تتجهز.. لإنه متفق مع عمه على هالشي فكان يتحرك بكل ثقة وحرية.. وبعدين خبر منى بأن شهد تعبانة ولازم تريح وتنام وماتنزل لأن الدوا راح يدوخها اشوي.. وعقب ماتصحى يسون لها شي خفيف تاكله بدون عصاير.. ويغصبونها على الأكل وإن ماطاعت ينادونه واهوه يتصرف معاها.. لأنه طلع عندها فقر حاد بالدم بنتيجة بعض الفحوصات والبعض الثاني إلى الآن ماطلعت النتيجة وراح تاخذ لها أسبوع على ماتطلع.. وطلع فهد وراح الدوانية عند الرياييل.. واتفق مع شاهين ينزل جنطة العدة والعامود الحامل من غرفة شهد عشان يردهم فهد وياه.. وقاله على التهديد اللي هدد فيه شهد.. عشان يكون ماشي معاه بالخطة ويخلونها تخاف وتاكل..!!
بس تهقون هالشي بينفع مع القطوة المتمردة..!!
الله العالم هالقطوة شبتسوي وشبيطلع من تحت راسها..!!
وعقب ماخلصوا العائلة من العشاء وكلن تجهز بيرد لبيته لإن باجر وراهم قعدة من الصبح عشان دواماتهم ودوامات العيال بالمدارس.. كلم فهد وأكد على عمه بالأتفاق على يوم الخميس اللي عقب الياي..
وبوخليفة خبر الكل بهالشي.. وباركو مقدماً للمعرس..
وكلم فهد أخوه خالد عشان يسمح لمنى تاخذ شهد السوق.. وطبعاً بدون ماياخذ الأذن فخالد موافق.. لأنه راح تكون الفرحة فرحتين عند خالد.. المعرس أخوه والعروس شهــد بنت عمه وبحسبة أخته وبنته المدللـه واللي يحبها ويعزها من محبة أخوة بالرضاعة وصديقة مشاري الله يرحمه..
وقبل لايطلع فهد من بيت عمه مع أمه.. اكد على شاهين وعبدالله بأنهم يغصبون شهد على الأكل.. وخبرهم بالنتايج الأولية لفحص الدم.. وقالهم يحطون بالهم عليها.. ووصى أم خليفة بعد مع انه مافي داعي للتوصية.. بس كان قلقان على شهد.. ويبي يتطمن عليها.........
ياناس فهموه هذا موضعف... لااااااا.. هذا اسمى انواع الحب والتضحية.. حتى لو شهد اجرحته ابصدها وكلامها.. واهو شد عليها وتحداها.. بس قلبه مايطاوعه بأذية توأم روحه وبلسم اجراحه.. مع انه جروحه كلها من ناحيتها.. الله يعينك يافهد..
:
:
:
:
:
يوم الأثنين
1 / 3 / 2004
بعد يومين من زيارة أم فهد لبيت بوخليفة.. وبصباح يوم الأثنين وعلى الساعة 10:00 صباحاً.. منى دقت تلفون على بيت أبوها تكلم امها وتسألها عن شهد وصحتها.. وسولفت مع امها وعقب سكرت.. ودقت على موبايل شهد عشان تشوفها وتقرر معاها اليوم شبيسون..
شهد صحت من عز النوم على صوت الموبايل المزعج..
شهد بعصبية وبصوت عالي : نعــــم..!!
منى : هههههههههههههه.. انتي عمرج ماتغيرين طبعج.. الناس تقول السلام عليكم.. ألـو.. صباح الخير.. هلا ومرحبا.. وانتي تطفشين الواحد وتوقفين قلبه بنعــــم..!! الله يغربل ابليسج ياشهود..
شهد بطفش : أأوووههه مْوَيْنَه شتبين داقة علي من الفزعة ( أول الفجر )..؟؟
منى بستهزاء : فزعة بعينج يالخايسة من النوم.. قومـي الناس قايلة ( عز الظهر ) وحضرتج عيونج متروسة غمص وعاضة على المخدة ولامتها..
شهد : منووووه لاتلوعين جبدي من الصبح وتو الناس على القايلة.. واشتبين داقة وامس طول اليوم مناشبتني انتي واخوانج وملوعين جبدي بالأكل.. جني خروف العيد قاعدين تسمنونه..
منى افقعت من الضحك على تشبيه شهد وحبت تغيضها.. قالت : هاههاههاههاههاهههههههههههههههههههههههههههههههههههه..
والله تشبيهج حلو بس المشكلة ماراح توصلين لمرحلة خروف العيد.. لأن حدج راح تصيرين ماي الذهب خروف الشريب بزة..
( الشريب بزة هو مسلسل كويتي من بطولة حياة الفهد.. ماي الذهب خروف بزة وكان جلد على عظم )
وردت اضحكت بصوت عالي : هههههههههههههههههههههههههههههههههههههههههههههههههه..
شهد ودها تاخذ منى بهاللحظة وتكفخها.. قالت بغيض : والله الخروف انتي واعيالج يانعية ( يانعجة ) أم عنبر.. واشتبين داقة علي يننتيني..؟؟ بنام حرام عليكم والله العظيم مانمت البارح..
منى بستهزاء : بالله وين بتنامين البارح وانتي طول الأيام اللي فاتت كله اشخري ( تشخر في النوم ) ونايمة..!!
شهد بعصبية : وليش من قالج إني نايمة ابرضاي.. والدوا اللي سقاني ياه فهيدان دوخني وخلاني نايمة طول الوقت.. وسد جبدي..
منى بكل برود واستهزاء : وعلى طاري فهيدان يامرت فهيدان.. ريلج أول البارح اموصيني آخذج وياي السوق تتشرين واتجهزين يالعروسة..
شهد وزادت حدة عصبيتها : ومن قالج إني بروح السوق ياماما.. وانتي تدرين إني ما أواطن طبت السوق والتسوق..
وبعدين تعــــالـــــــي اشوفكم قام تتخذون إنتي وفهيدان قرارت عني ولا جني موجودة..!!
منى ببرود : وانتي تعطين الواحد ريج حلو علشان ياخذ رايج بشي..؟؟ دومج معصبه ورافضه كل شي ايي من صوب فهد..!!
شهد : والله لو كان اللي مايتسمى واحد يستاهل جان قلنا أوكي.. بس اهو مايستاهل اتعنى حقه.. ويكفي انه قصاب جذاب ومغصوبه عليه..
أأأأأأأأأوووووووففففففففففف والله قهــــرررررررررر..
( قالت آخر جمله بكل حرقه وقهر )..
منى انصدمت من رد شهد.. قالت بنبرة جدية : والله فهد يستاهل كل الخير.. بس انتي عاصبة عيونج ومضيعة طريجج.. وإلا فهد ألف من تتمناه.. بس هو شاريج وبعيونه مخليج.. وانتي للأسف بايعته بأرخص الأثمان.. والله ياشهد خيرتج بتندمين على كل اللي سويتيه فيه.. وحرام عليج.. وصدقيني ياشهد إن استمريتي تعاملينه بجفاف وتصدين عنه راح تخسرينه.. ولي فات الفوت ماينفع الصوت..!!
شهد : انا أول شي ماني من الألف اللي يتمنونه.. وبعدين انا مغصوبه عليه.. ويكفي انه خش عني حقيقته وجذب علي.. واهو يدري اني ما أواطن اللي من طينته ووظيفته التعيسة..
منى بعصبية : انتي تظلمينه ياشهد والله حرام عليج.. وفهد يوم صمم ياخذج عشان يحميج ويداريج.. وانتي شفتي شللي حصل من أقرب الناس لج يوم باعوج وقفوا عنج واهملوج.. ويوم ساءت حالتج بعد الحادث.. ماارحموج وبأبشع الكلمات اوصفوج.. وآخر شي فضلوا عليج وحده خايسة من طينتهم.. وتافه مثلهم ومافي داعي أذكرج باللي صار..!!
شهد انصدمت من رد منى عليها وافتحت جرح كبيـــــر معمر ولايمكن يندمل.. شهد ودموعها انزلت من جرح اقرب الناس لها خالتها نورية أخت امها.. وولدها التافه عصام.. حتى ماكلف خاطره يزورها بالمستشفى ويواسيها بمحنتها.. وشهد تكدرت أكثر من قبل.. يعني كافي عليها نفسيتها والخوف من الياي بعد ماهددها فهد.. وتيي منى وتذكرها بالماضي الحزين.. آآآآهههه الله المعين..
شهد بصوت مكسور وفيه البحة من تغير نبرة صوتها وخانقتها العبرة : منى انا بخليج بروح الحمام.. وبعدين اكلمج..!!
منى درت انها كسرت بخاطر اختها.. بس والله غصباً عنها.. لأن شهد اقهرتها بكلامها وهجومها على فهد.. وفهد موبس ولد عمها لاااا فهد بحسبت أخوها.. وغير هالشي الكل يشهد بأخلاقه ونبله وحبه لشهد حب ماينوصف.. من ايام الطفولة.. واهو يعشق شهد ومايرضى عليها.. ومايرضى أحد يطفرها أو يزعلها غيره لإنه يعرف اشلون يراضيها.. واهوه اساساً يستانس لما تتعافر معاه وتتصارع مرات.. حب فهد لشهد حب نادر.. والله يهديج ياشهد..
سكرت شهد من منى واهيه تبجي بكل حرقه وقهر.. وذكريات الماضي ترجع لها وكأنها احصلت بالأمس..
:
:
:
:
نورية خالة شهد راحت المستشفى تزور بنت أختها شهد عقب ما وصلها خبر إن شهد استفاقت من الغيبوبة.. يعني بعد شهرين تقريبا من يوم الحادث المشئوم.. وشهد ماكانت بكامل وعيها إلى الآن.. ولا تدري عن بتر ذراعها اليمين بسبب الأدوية والمهدئات.. فما كانت بكامل قوتها لأنها أستفاقت من غيبوبتها من وقت قصير جداً ومازالت ضعيفة.. وعلى طول يعطونها المنوم والمهدئ..
دخلت نورية على شهد.. وكانت حزتها بروحها وماعندها أحد من أهلها.. وتوها صاحية من النوم..
نورية : الحمد لله على سلامتج ياشهد.. والله وانكسر قلبي عليج يابنت أختي.. ومت من الحرة باللي سوه فيج.. حسبي الله عليهم مالقوا غيرج يقصون ايده بالغلط..
شهد ما استوعبت اللي قالته خالتها بنفس اللحظة.. وقامت تطالعها واهي ساكته..!!
شهد : !!!!!!!!!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!!!!!!!!!!!!!!!!!
نورية : إيـــهه يابعد عمري منصدمة لأن إيدج قصوها بالغلط.. وادفنوج بالحيا..
شهد والصدمة شلتها من عرفت بالحقيقة.. وبصوت ضعيف ومهزوز : ............. أأ... أأن... مو.. معقــ........
لفت شهد راسها على إيدها اللي ماتحس فيها ولا بوجودها.. وشالت قناع الأكسجين عن ويهها.. ارفعت اللحاف اللي مغطيها..
وكانت الدنيا مازالت تفتر فيها.. ومن شافت إيدها المبتوره انصدمت بالكامل..!!
شهد والصدمة شاله عقلها : اشــ....... لـ.. لـون.. وليـــ....ش..!!
نورية طقت على صدرها منصدمة : ويـــهه وأنتي ليمن الحين مادريتي عن إيدج المبتـــوره..!!
عيل شبتسوين لما تدرين إنج ابسط الأشياء ماراح تقدرين تقومين فيها..؟؟!!
شهد واهيه تحاول جاهدة بأن تاخذ نفس وماهي قادره لأنها تبجي من الصدمة بالحقيقة والألم النفسي والقهر باللي حصل من الخطأ الطبي..
شهد : .....................................
.............................................
.............................................
نورية وبصوت عالي كريهه : إيـــــهه بس الله يعينج.. والله يعين عصام بعد عمري واشلون بيتصرف.. وانتي حتى ملابسج ماتقدرين تلبسينهم..
شهد خلاص ماقدرت تستحمل أكثر وانهارت من البجي.. بس للأسف حزتها مافي أحد يمها غير خالتها..
آآآآآآآآآآآآآآآآآآههههههههه ياجرح طعني ومن أقرب الناس مني..
آآآآآآآآآآآآآآآآآهههههههههههه ياخبر من أخت أمي أحرقتني..
آآآآآآآآآآآآآآآآآهههههههههه ياضياع الدنيا ومن نشدني..
آآآآآآآههههههههههه ياطعنة بخفوقي والجرح مزقني..
آآآآآآآآآههههههههه يايد مبتوره من جراح ظلمني..
آآآآهههه ياغيبت العقل وين بلقى اللي يلمني..!!
نورية : بس ياشهد لاتقطعين قلبي بالبجي.. واللي راح ماراح يرجع بالبجي.. بس انتي لازم تفكرين عدل.. لأن الحين انتي منتي مثل قبل ويمكن إذا تزوجتي ويبتي عيال وهذا إن قدرتي.. حتى شيلتهم وتربيتهم ماراح تقدرين عليها.. واشلون تطبخين لهم ولريلج.. واشلون ابترضعينهم وتبدلين لهم ثيابهم.. واشلون بتسبحينهم.. والله بلوه والله يعينك ياعصام يايُمه..
واهني دخل بوضاري ومرته وشافوها واسمعوا آخر كلامها مع شهد.. وقام بوضاري والنار تسعر بيوفه من فعايل أم عصام.. وبدون مقدمات وبدون مايتحسب على فعايله لما يفقد اعصابه.. وبدون مايحط في باله العيب والحرام.. تل ( سحب ) أم عصام من عباتها وجرها لبرة الغرفة وصرخ عليها : إنتي بأي حق تكلمين البنت بهالطريقة..!!
وشنو قلتي لها واللي خليتيها منهار جذي..!!
أم عصام والخوف بويهها وقامت تبولع بريجها وقالت : أنا ماأدري إن شهد تجهل أمر إيدها المبتوره..!!
بوضاري واهو يشوف الدكاترة داشين مع الممرضات عند إخته ركض بعد مانادتهم زوجته لشهد.. كان وده يذبح أم عصام حزتها.. وقال لها بصوت عالي : ويوم دريتي إنها ماعندها علم.. اشلون طاوعتج نفسج تكلمينها بهالأسلوب الحقيــــــر..!!
إنتي ماعندج دم..!!
إنتي وحده معدومة الضميــــر..
إنسانه مريضة نفسيا وحقوده.. طلعي بره وإن شفت رقعت ويهج أهني ماتلومين إلا نفسج..!!
نورية بعصبية : واي اشفيك علي انا صاجة ماقلت إلا الحقيقة افتح عيون شهد عليها..
بوضاري وخلاص بدى يفصل : انتي تفتحين عيون شهد على حقيقة شنو..؟؟..
انتي مابقلبج رحمة على بنت أختج..؟؟
انتي من شنو مصنوعة..؟؟
انتي وحده تافه ولاأشوف رقعت ويهج اهني مرة ثانية.. وإن صاب شهد شي وربي اللي خلقني ماتلومين إلا نفسج..
نورية ماتت من الخوف من تهديد بوضاري لها.. وكان بوضاري إذا عصب مايعرف اللي جدامه مستعد يذبحها بهذاك الوقت.. وقامت سيده طلعت من المستشفى ومن عقبها.. شهد انصابت بانهيار عصبي حاد وتمت تتعالج منه فترة طويلة.. واللي زاد الطين بلة إن عصام التافة اللي مايا حتى على باله يزور شهد بالمستشفى ويطل عليها قام طلقها بعد شهر من استفاقتها من الغيبوبة.. وتزوج وحدة ثانية بنفس الأسبوع.. وكانوا خاشين هالأمور عن شهد لأن حالتها وصحتها ماتستحمل.. وشهد بعد ماتحسنت حالتها وصارت أحسن.. من درت بهالشي افقدت ثقتها بكل الناس.. وانعزلت عنهم.. وحتى الوزارة اللي تشتغل فيها شهد.. وكانت مهندسة كهربائية.. قام ابوها قدم لها على التقاعد الطبي.. ووافق عليه المجلس الطبي العام بعد ماقدم لهم جميع التقارير الطبية..
وشهد اقطعت جميع اتصالاتها حتى بصديقاتها المقربات.. مع انهم كانوا وايد ويحبونها.. لأن شهد كانت محبوبه من الجميع.. والكل كان يتمنى قربها.. بس اهي خلاص تغيرت وماعادت تثق بأي أحد لامن قريب ولا من غريب..
وحتى أقرب إنسانة لها وصديقتها من أيام الدراسة فاطمة اقطعتها.. مع إن فاطمة المسكينة حاولت وحاولت كثير بأنها تاخذ أخبار شهد.. ولكن ماكو فايدة.. لأن شهد كانت محطمة بالكامل..
بس اهلها المقربين منها استمروا معاها وكانوا يستحملون منها كل شي.. لأنهم عارفين باللي صار لها.. وخصوصاً كلام نورية اللي يسم البدن.. لأنه نورية انشرت بين الأهل قصص عن شهد وعن عجزها وجنونها.. وانها ماتصلح للزواج واهي خلاص بحكم المعقدين.. ومرضى النفسيين.. ودمرت علاقة شهد بأهل أمها جميعهم.. ماعدى منيرة أم فهد.. اهيه الوحيده اللي باقية على علاقتها قوية جداً من أهل امها الله يرحمها.. وكل هذا سوته نورية بس علشان تبرر انفصال ولدها عن شهد.. وطبعاً بالجذب والإفتراء..
:: ::
:: ::
:: ::
:: ::
:: ::
:: ::
نامت شهد على ذكرياتها المؤلمة والمريرة.. ودموعها مغرقة المخدة ومبللتها.. آآآآآههههههه ياشهد والله وكسرتي قلبي الله يعينج.. ويهديج إن شاء الله.. ادعوا معاي الله يخليكم ترى اهي طيبة ومحتاجة لدعائكم..
:
:
:
:
:
:
:
:
ماهي توقعاتكم للبارت القادم.............؟؟!!
بنتظار ردودكم الغالية.......!!!!
لكم خالص حبي وتقديري
أختكم ومحبتكم
عذبة التجريح
|
11-03-08, 08:40 AM
الروايه حماس أنتظر بشوق الفصل الثاني أستمري كثير أستمتعت فيها على فكره أنا لم أقرألكي من قبل لذا أعذيني لاني ماعرفت وين وقع الخطاء في السابق بس حلو أنك خذيتي برأى الاخوات وعرفتي ليس المهم أين الخطاء المهم أن تدركه فتصلحه هيه نحن في أنتظار البقيه
جديد مواضيع قسم الارشيف
العرض العادي
