أهلا عزيزتي خطوات وردة ...

حياج...

هي تقريبا كل يوم أثنين ... لكن تغير بين فترة وفترة ..ابتدأت كل سبت .. ثم تغيرت إلى أيام غير محددة وحاليا على الأثنين..

ومشكورة على تفاعلك مع الرواية ..

يسلمو Electron ع النقل الحلو

^__^

آسفة .... خطوات ورد .... عندي مشاكل مع المودم ...

الفصل السابع الجزء 6

******

ـ اعجبج الفندق ؟
كانت الريم في قمة التعب ـ يجنن يا عجووب الغرف وايد فخمه وأعجبتني الثريات والسقف العالي .. وا و و .. بس من هذا اللي استقبلنا في المطار ؟

معجبة ـ هذا كان يشتغل مع فايز في مكتبه في لندن .. اللي فهمته من ناصر انه استقال من شغله وجا فتح مكتب هنا ..ولما عرف انه فايز بيي نيويورك عرض مساعداته ..بيوفر لنا سائق خاص من مكتبه ...

الريم ـ فيه الخير والله .. ابي أنام .. تصبحين على خيـر ..
معجبه ـ وأنا مكسره .. ناصر وفايز دخلوا غرفهم بينامون ...
الريم ــ بس تخرعت صج من اجراءاتهم في المطار كأنا ارهابيه ..

معجبه ــ ايه .. شيء طبيعي بعد احدعش سبتمر .. يله نامي انا قفلت ..


لفت الريم على جنب . تمت تتذكر ملامح فايز لما جا يفتشها المسؤوول .. حسته عصب وايد .. لكن ناصر ذكي وطلب وحده .. وشرح له انهم محافظين .. عجبها واايد غيرته .. كبر في عينها وايد ..

*********
مر يومين والريم على أعصابها
ــ معجبة متى بنشوف عايض ؟
معجبةــ مدري .. بس تونا وصلنا ..
الريم ـ بس ماطلعنا من الفندق للمطعم ...ونرجع الغرفة ..حتى فايز وناصر ماشفناهم الا حزة الاكل بس ..
تمت معجبة تمشط شعرها ـ لاتخافين .. هم الحين أكيد يدورون عايض .. عشان جي مانشوفهم ..
الريم ـ بس على الغدا سمعت فايز يتكلم عن وال ستريت .. هذا مكانه؟
معجبه ـ لا .. هذا شغل طبعا ....طبعا اذا سمعتي وال ستريت اعرفي انه بزنس ..
رن تلفون الغرفة ارفعته معجبة ..
ــ ألو
ناصرـ مساء الخيـر ..
معجبة ـ مساء النور .. شخبـاركـ .. ؟
ناصر ـ الحمدالله شلونج أنتي ؟؟ ..
معجبة ـ للحين فارق التوقيت مصدعني .. مب مستوعبة ان الساعه الحين ست المسا .. أحس انه الفجر .. فايز معاك ؟
ناصر ـ لا مب معاي .. سلامتج يا حبيبتي .. ان شاء الله بتتعودين .. عازمج على العشا ..
التفت معجبة للريم ـ ها ؟ عشـا شنو ؟
ناصر ـ عازمج على العشـا والسلام ..
طالعت الريم خالتها اللي كانت تطالعها وتحاتي وقالت لها بهمس ـ بطلب عشا روحي مع ريلج ..
معجبة ـ اوك بس خليني اجهز عمري
ناصر ـ بمرج بعد عشرين .. باي .
معجبة ـ ان شاء الله .. باي ..
التفت معجبة للريم ـ شلون بخليج بروحج ؟
الريم ـ عادي .. متعوده ..
معجبة ـ شبتسوين يالسه بروحج ؟
الريم ـ لاتخافين علي .. أنا يايبه سي دي معاي .. بحطه وأقرأ مجلات ..
معجبة ـ كلها انجليزي ..
الريم ـ خالتي بقى لج 18 دقيقة .. يدوب تجهزين عمرج ..
معجبة ـأنا جاهزة ..
اوقفت معجبة والبست بدلتها وعباتها فوقها ..وبعدين ضبطت حجابها ..
الريم ـ مابتحطين شدو ولا مكياج ؟
معجبة ـ لا طبعا .. هنا حدج قلوس محايد ومسكره ..
الريم ـ ليش ؟
معجبة ـ حبيبتي احنا في امريكا مب في الخليج .. هنا أي لون أو مكياج صارخ تحطينه لويهج بيكون دعوة للرجال انهم يتحرشون فيج..
الريم ـ معقوله ؟
طلعت معجبة المسكرة والقلوس البيج و حطتهم باحتراف ... ــ معقول ونص ..شوفي الفندق خمس نجوم وآمن تماما .. لاتتعشين بيب لج عشا معاي ..
الريم ـ لا لاتيبن شي .. بطلب سلطة وعصير برتقال .. لاتنسين عرسي مابقا له شي ..
معجبة ـ يا حبيبتي انتي جي تيننين .. ليش تبين تضعفين ؟
الريم ـ يا خالتي وزني سبعين .. أبي أوصل لستين أو على الاقل خمس وستين .. تماما مناسب لطولي ..
بعد لحظات انطق الباب ..
معجبة ـ مامداه تمر عشر دقايق .. شوفي أنا بمر تحت واطلب لج عشاج..
الريم ـ خالتي .. أعرف شلون أطلب عشا صار لي يومين أراقبج تطلبين الاكل ..

ابتسمت معجبة ـ عيل بروح .. باي ..
افتحت الباب كان ناصر ينطرها بره ..مد يده لها ومسكتها ـ اشتقت لج عجووب ..
معجبة ـ وأنا أكثر .. وين بنروح ؟
ناصر ـ بنآخذ تكسي وروح التايم سكوير .. نتمشى ونتعشى ..
معجبة ـ اوكي .. بحاتي الريم بس ..
ناصر ـ لاتحاتينها .. بيي فايز في أي لحظة و يعزمها على العشا ..
ابتسمت معجبة ـ ياخبيث .. يعني من تحت لتحت ؟
ناصر ـ بالعكس حبي , أنا أبي أيلس معاج بروحنا وانتي تستحين من فايز ..والريم تستحي مني .. خل نآخذ راحتنا وهم يرتاحون ..
********

بعد نص ساعه كانت الريم ترتب في أشياءها .. طق الباب اخترعت .. لكن هدى بالهالما جا صوت فايز
ـ الريم أنا فايز ..

ارتاحت .. حطت شيلة على راسها وافتحت الباب ..
كان فايز في قمة أناقته لابس بنطلون جينز وقميص أبيض وجاكيت أسود.. شكله كان مرتب وايد ..عارض خفيف بس مرتب ..
ـ ممكن أدخل ؟
خافت الريم في البداية لكنها هزت راسها باي ..
دخل وهو مستغرب ـ وين خالتج ؟
الريم ـ طلعت مع ريلها .
نزل فايز راسه ـ عيل بدلي ملابسج بنطلع ..
الريم ـ زين بس أنا طلبت العشا ...
فايز ـ خل يتركونه في اللوبي .. يلا بنطلع .بمرج بعد خمس دقايق ..
طلع والريم بسرعه طلعت ملابسها وبدلت والبست عباتها وشيلتها .. وحطت قلوس وردي خفيف ومسكرة ..واخذت شنطتها واطلعت ..
ـ آسفة أذا تأخرت ..
طالع لها فايز بنظرة غريبة ـ بالعكس ماتأخرتي .. يلا .. مد يده لها .مسكت يده وهي مستغربة ..
ـ وين بنروح ؟
فايز ـ اول شيء أحب أعتذر أنه هاليومين أهملناكم انتي ومعجبة .. بس مارتن الريال اللي استقبلنا في المطار سوى لنا عزيمه واستقبال .. واليوم أنا كنت مع ناصر ندور ..نشوف الاماكن اللي بنآخذكم لها ..
الريم ـ وين بنروح ؟
فايز ـ شوفي .. أمريكا كبيرة وايد .. بس اسبوعين مايمدون انا نروح لكل ولاية .. حجزنا رحلات
طيران داخلية لعدة أمان معروفة أذاا سعفنا الوقت في الاسبوع الياي نروح لها . ..
الريم ـ في شي يشغلك ؟
نزل فايز راسه انها فهمته .. شي اسعده .بس شلون ينقل لها المفاجأة ؟؟ .. طالع لها وكانت جميلة بشكل ساحر والبراءة في عيونها تخليه متردد ..
ــ الريم .. انا قبل لا ايي .. قلت لمارتن عن اخوج .. وهو ساعدني .. ودلني على تحري خاص .. وانا ماحجزت لنيويورك إلا بعد ماعرفت انه موجود في نيويورك ..
الريم بدت ترتجف اول ماانفتح المصعد ــ صج ؟ هو عايش ؟؟
فايز ـ ايه ..هو في ألباني .. اليوم أخذت عنوانه من التحري ..
الريم ـ شقال لك التحري ؟ .. شنو عن حياته ؟ ..
فايز ـمافي معلومات خاصه عنه .. ما أعرف السبب .. بس هو يشتغل لحساب شركة في وال ستريت ...
ادمعت عيونها ـ وحنا رايحين له ؟؟ ..
فايز ــ بكره بنروح ..
الريم ــ لا .. لازم نروح الحين ..
فايز ـ انزين .
حس فايز أنه بيندم على قراره هذا .. كان السواق اللي وفره له مارتن موجود وينطرهم .. قال له فايز انه يروح للعنوان اللي في الورقة اللي عطاه اياها مارتن
....

بعد مااوصل للعمارة ماكان في موقف للسيارة . ..
ــ الريم .. تعالي ..
طالع الورقة وخذها للطابق الرابع ..
ــ خلج عند المصعد ..
الريم ـ ليش ؟ .
فايز ـ بس خليج هنا ..
دخل فايز للكولودور وطق الباب على اول شقة جدامه ..
فتحت الباب وحده شقرا وكانت معصبة طلع وراها واحد معصب ..وتموا يشتمون بعض في الممر ..
انصدم فايز لايكون هذا عايض ؟؟ .. حس فايز بالندم إذا هذا عايض ؟ اشمئز من الريال اللي كان بدون فانيله ومعصب على الشقرا .. بعدين انتبه لفايز
ــ what ?
نطق فايز بصعوبة وقلبه يدق بقوة لايكون هالقليل الذوق والقذر هو عايض ؟؟
ــ عاا..يض .؟
قال الشاب ـ لا .. عايض في سيكشن بي ..
ودخل لشقته وصفق الباب وراه .. تنهد فايز بارتياح .. ياترى عايض بيكون أسوأ ولا أفضل ؟؟ .. طالع جنب المصاعد كانت الريم واقفه مكانها وهي ترتجف ..

طالع الدايركشن من جديد .. سكشن بي .. أخيرا لقاه .. قرب من الباب اللي عليه رقم الشقة 42 .. كانت العمارة جديدة .. وصبغها جديد و نظيفه .. طق الباب بتوتر.. وعينه على المصاعد يخاف تتهور الريم وتجي ..
فتح الباب شاب طويل لابس جينز وشيرت أسود وعلى راسه سماعه تلفون لاسلكية ..وفي يده زجاجة كولا
قال فايز قبل لايتكلم الشاب ـ السلام عليكم ..
الشاب ـ وعليكم السلام .؟ ..
فايز ـ عايض ؟؟ ..
رد الشاب ـ أي نعم .. أي خدمه ؟؟ ..

تنهد فايز بارتياح .. قالله بتوتر ـ عايض عبدالهادي ؟؟ ؟ ..
عقد عايض حواجبه مستغرب ـ أي نعم .؟ ومن حضرتك ؟
فايزـ انت بروحك في الشقة ؟
عصب عايض ـ ليش السؤال ؟
فايز ـ في رياييل داخل ؟
عايض ـ لاء .. تبي تدخل حياك .. بس اول منو انت ؟
فايز ـ لحظة بس .. خلك على الباب ..
ركض فايز للريم وأشر لها تجي .. كانت الريم مترددة وترتجف .. أول مااوصلت له مسك يدها وقرب من شقة عايض اللي من شاف الريم .. وعيونه تطالعها باستغراب ..
فايز ـ أنا فايز ريل اختك الريم ..
طاحت الزجاجه من يد عايض وانكسرت على الارض .. وارتسمت الصدمه على ملامحه الريم اللي تمت تبجي لين خذها في حضنه ..
فايز ـ حاسبوا من الزجاج ..
رفعها عايض ودخلها للبيت وهي لاوية عليه تبجي بقوة ..
وأخيرا لما تركها مد فايز يده وسلم عليه ..
فايز ـ عن اذنكم .. أنا بروح أشوف السايق لقى مكان للمواقف ولا لاء .. وبالمرة أييب عشا ..
طلع بسرعه قبل لا يعترضون حب يخصص لهم مساحه خاصة ..

عايض ـ وطلال ؟
قالت الريم وهي تحاول انها تمسح عبراتها ..
ـ مارضى عمي .. فتزوج بشمس ..
حست الريسم بصدمة عايض . لكنها كملت
ـ وتطلقوا بعدها بسته اشهر .. وطلال عطاك عمره من كم شهر ..

انصدم عايض أكثـر ـ شلوون ؟؟
الريم ـ بالسرطان ..
عايض ـالله يرحمه ..توه بأول شبابه .. ايلسي .. خبريني كل شيء .. شلونج ؟؟ ومن هذا فايز ؟؟ومتى جيتي لهنا ؟ وكم ولد عندكم ؟؟

كان لاف يده حولها كأنها بتشرد منه .. قالت وهي تحط راسه على صدره وتحس بأمان فقدته من زمان
ــ حنا مالجين بس .. يينا من يومين مع خالتي معجبة وريلها ا .. هو صديق ريل خالتي ..
عايض ـ تزوجت معجبة ؟
الريم ـ ايه .. بس بالسر .. زواج شرعي ومعلن .. بس مب في الدوحه ..
عايض ـ شلون ؟
الريم ـ ايه .. محد يدري في زواجها .. غيري وغير خالتي وجدي عيسى .. وابوي تزوج ..
عايض ـ عندنا اخوان ؟
الريم ـ لا ..بس بيصير .. هي حامل الحين ..
عايض ـ توقعته يتزوج بسرعه .. شلونج ؟ .. اشتقت لج واايد .. ماافكر الا فيج ..
الريم ـ واضح من اتصالاتك يالقاطع ؟.. اثنعش سنه وانت طنااش ..
عايض ــ وعدني طلال انه بيتزوجج .. الله يرحمه .. فقلت اكيد لاهية مع عيالها .. ماحطيت في بالي هالتغييرات ...
الريم ـ المسكين حاول .. لكن عمي سعد رفض .. وبعدها حول لشمس .. لكنهم ماتهنو .. ست اشهر وطلقها وبعدين اخذ ولدها من حضنها ..
عايض ـ كم عمره الحين هالولد ؟
الريم ـ اربع ..
عايض ـ شهور ؟
الريم :اطبعا لا .. اربع سنوات .. اقول لك من كم شهر مات طلال ..
عايض ـ أحس كأنه أمس .. ..لما تركتكم .. مااصدق ان كل السنوات مرت . .شلونه فايز معاج ؟
الريم ـ شكله طيب .. ارتحت له وايد .. وكافي انه نفذ شرطي اني اشوفك ..
عايض ـ شرطت عليه تشوفينني ؟
الريم ـ ايه .. لكن كنت مفترضة هالامر بعد الزواج .. لكنه يبيك تحضر عرسنا ..
باس راسها وفي عيونه دمعه .. حاول يمسكها لكنها طاحت ..
وبدون وعي تموا يبجوون ..



بعد ساعه رجع فايز مع العشا وهو مبتسم .. كانت خشومهم حمرا .. واشكالهم تكسر الخاطر .
فايز ـ طقيت الباب على الشقه اللي في السكشن أي ..وكنت بانهار وانا اشوف البلوند ليدي طالعه منها ..
ضحك عايض ــ ايه هذي شقة سلووم ... هو بحريني بس شعاره في الحياه
سلام عليها ما أحبت سلامنا
فإن كرهته فالسلام على اخرى


طالع فايز الشقة اللي كانت صغيرة عبارة عن صالة وغرفة نوم وحمام ومطبخ تحضيري مفتوح عالصالة .. كانت نظيفة وأثاثها مختار بذوق وعناية ..وجزء من الصالة كان عبارة عن مكتب عليه ثلاث أجهزة كمبيوتر .. .
فايز ـ ذوقك جميل ..
عايض ــ انا في هالشقة من سبع سنوات .. قبل كنت اعيش فس السكن الجامعي ..
فايز ـ جامعة ؟
عايض ـ ايه .. أول سنه ييت سكنت مع اسرة امريكيه عان احسن اللغة .. بعدين دخلت الجامعه على حسابي
واخترت هندسة الحاسب ..وتوفقت فيها الحمدالله .

فايز ــ جيد .. أي جامعه ؟
عايض ـ يال .. ابوي الله يخليه قبل لا اهاجر ضبط لي حسابات بنكية استعين فيها على العيشه هنا .. واشتغلت في بداياتي مترجم .. فكان المبلغ يسدد احتاجاتي اليومية في الجامعه .. والمبلغ اللي كان يحطه ابوي لي استغليته في اقساط الجامعه ..

الريم ـ كنت تكلم أبوي ؟؟
عايض ــ لا . .. لكن متى مااحتجت رحت للبنك وسحبت المبلغ ..
اعجب فايز بعصامية عايض ..
ــ ماتزوجت ؟؟
عايض ـ لا طبعا ..
فايز ـ ولا حبيت ؟؟
عايض ـ لا ..
فايز ـ معقولة ؟
عايض ــ تعقدت من كر ما ادقق في اعناق النساء هنا ..

ضحك فايز وعايض لكن الريم بقت مشدوهه ـ شتقصد ؟
فايز ـ يتأكد من تفاحة آدم ..
بطل فايز الأكياس ووجه الريم صار أحمر قاني من الاحراج .. وعايض مها أكثر وباس راسها ..
**********

ـ يماا . .. فصلوا النت ..
جوزة ـ انزين يما .. بقول لماجد يروح ويرده ..
شيخه ـ يما .. ماجد بيطول .. تعرفينه لين يلقى له ميه عذر .. تعالي معاي ونروح نرده وبالمره ادفع فواتير جوالي ..
ضحكت جوزة ـ ايه .. قصي علي وخليني ادفع فواتيرج ..
ابتسمت شيخه ـ من لي غيرج يا اجمل ام فالدنيا ؟؟

جوزة ـ أي كلي بعقلي حلاوة .. يلا .. الحين بس أطلع الكيكه من الفرن وبعدين البس وأيي ..
شيخه ـ بروح ألبس . وأشوف نوير يمكن تيي معانا ..هو السواق رجع السيارة ؟
جوزة ـ ايه .. صلحها ..

اركضت شيخه فوق .. مرت نوير ـ بروح أدفع فاتورة جوالي .. والنت مع امي ...
نوير ـ بروح وياكم ..
صافية ادخلت الغرفه ـ وأنا معاكم ..
استغربت نوير ـ مو عادتج ..
صافيه ـ ضايقه فيني الوسيعه .. يلا ببدل ثيابي ..

طلعت صافية والتفت شيخه لنوير ـ شفيها ؟
نوير ـ ما ادري .. يمكن سالفة استقالتها ؟
شيخه ـ ماادري .. وين حمود ؟
نوير ـ عند امه ..
شيخه ـ فديته خل ناخذه ..
نوير ـ مري شمسه وقولي لها ..

بعد ربع ساعه اطلعت جوزة من غرفتها ولقت الامه محتشره عند السيارة ..

جوزة ـ كل هذا ولع بكيوتل !
شمسه ـ بروح أدفع فواتيري ..
صافية ـ انا رايحه طماشه ماعندي شي أسويه ..
طالعت جوزة للجي اكس ..
ـ يلا عيل .. اركبوا بنمر كيوتل وبعدين نطلع .. بعشيكم على حسابي .. ادخلت وقفلت الباب .. وخلت الخدامه تروح لملحقها ..

نوير ـ وين ماجد ؟
جوزة ـ ماجد في سيلين مع احمد ..
شيخه ـ شيسوي هناك ؟ .. يمه كلميه خل يرجع ..
جوزة ـ شفيج يابنيتي ..
شيخه ـ يمه هالناس بايعه اعمارها .. خل ماجد يرجع مامداه توه مصلح سيارته ..
جوزة ـ لا يمه ماجد عاقل .. مايلعب مثلهم ..
شيخه ـ يمه ..
جوزة ـ شيخه .. لاتخرعيني ..
نوير ـ شيخه كل الشباب مطيحين في سيلين .. ماعندهم الا سيلين يستانسون فيها ..

سكتت شيخه وهي معصبه ..تدخلت شمس أخيرا
ـ يمه مايضير لو كلمناه وتطمنا عليه ..
جوزة ـ يا يمه خرعتوني .. توه راح من كم ساعه اخاف اكلمه واخرعه .

طلعت صافية تلفونها واتصلت فيه ..
ـ هلا ماجد .. شخبارك ؟ .. لا والله مافي شيء بس ماشفتك من أمس لما خذيتني المقابله .. ..ها .؟ .. لا ما اتصلو ... انت وينك الحين ؟ أحمد ؟ .. انزين .. تحمل بعمرك .. مع السلامه ..

صكت الجوال ـ هم في سيلين هو وأحمد مواعدين ربعهم .. بيتعشون هناك . ..

جوزة بدون وعي اضربت راس شيخه
ـ بس تخرعيني انتي وويهج ...
شيخه مدت برطمها ـ مافيها شي اخوي واحاتيه ..
ردت شيخه غشوتها على ويهها واركبوا السياره

نوير ـ شيخه ووجع ..ارجعي للكرسي اللي ورى ..
شيخه ـ اسمحي لي برستيجي مايسمح لي ..

نويرـ عيل بنظل حنا الخمسه مضغوطين ؟
جوزة ـ حمود حبيبي ايلس جدام .. وبعدين يانوير يات على شيخه هالمعصقله هي اللي بتضيق علينا ؟ كل وحده تحط ريل على ريل وبيكفينا المكان ..

شيخه بحسد ـ والسيد محمد مستأثر بالكرسي اللي جدام .بروحه ..الله يعيني على ريولي

شمس ـ شيوخ فجي عن ولدي ..
ابتسمت شيخه ..

بعد ربع ساعه انزلت جوزة وشمس ..
شيخه ـ استرش اوت استرش اوت .. آيييي .. أحس الدم وقف عن ريولي ..
نوير ـ ليش مانزلتي ؟
شيخه ـ بنزل الحين بس اضبط غشوتي .. ويمشي الدم في ريولي ..
انزلت شيخه ونزلت نوير ..
صافية ـ لحظة ..
التفتوا لها البنات .. ـ شفيج ؟
صافية ـ بتخلونيب مع السواق بروحي ؟ ..
شيخه ـ معاج محمد ..
صافية ـ لا ..وحده ترجع ..
نوير ـ أنا برد ..


اول ماتبي تدخل شيخه بغت تصطدم بواحد .. ارفع راسها .. وانصدمت ..همست بدون وعي ـ جاسم ؟ ..

طالعها جاسم منصدم .. كانت حاطه غشوتها زمايبين فيها شي .. ابتعد عن طريقها شوي

نادتها نوير ـ شيخه لاتنسين فاتورتي ..

ادخلت شيخه بسرعه وهي تلوم في عمرها .. ((ناديته جاسم ؟ ناجيته جاسم ؟ ليش من متى أنا اطيح معاه جي ؟؟ شبيقول عني ؟؟ والاخس نوير افضحتني .. ) )

قربت من شمس وهي مرتبكه ..
شمس ـ شفيج ؟
شيخه ـ هذا جاسم ..
طالعت له شمس بعصبيه ـ انزين واذا ؟؟ شفيج متخزبقه ؟
شيخه ـ مافي شي .. بروح السياره .. خذي ادفعي فاتورتي وفاتورة نوير ..

اطلعت شيخه للسيارة واوقفت منصدمه ..
ـ وين راحوا ؟
طلع جاسم وراها ـ شيخه ..
ارفعت جوالها واتصلت في نوير ـ وينكم ؟
نوير ـ بنجي الحين بيعبي بنزين وبنرجع ..

سكرت شيخه بربكه تبي ترجع لداخل ـ لو سمحت ..
جاسم حافظ على مسافه بينهم ـ شيخه ..
شيخه بدت ترتجف ـ ممكن تبعد عن طريقي ؟ ..
جاسم ـ شيخه .. فهميني ..
شيخه ـ انت كنت واضح من البدايه . مافي شيء بيننا .. فـ..لوسمحت أنا بدخل لمي داخل .. اندفعت شيخه ولفت حوله واركضت داخل .. امسكت بيدين شمسه .. وهي ترتجف ـ شمس أنا خايفه ..
شدت شمسه على ايدينها .. ـ خل نطلع .. أنا خلصت ..
طالعت لأمها اللي كانت تدفع الفواتير ..
ـ وأمي ؟
التفت شمس لأمها ـ يما بنطلع ..
جوزة ـ الحين بلحقكم ..
شيخه ـ أخاف يكون بره ..
شمس ـ ماعليج .. تعالي ..
اطلعت شمس وشيخه ـ وين السياره ؟
شيخه ـ بيعبون بنزين ويردون ..
اوقفوا ينطرون بره بعد دقايق يت جوزة ـ دفعت فواتير ماجد بالمره ...
وقف قلب شيخه فجأة وشهقت .. اقترب جاسم منهم
ـ السلام عليكم يا خالتي ..
استغربت جوزة والتفت لبنتها اللي شهقت وقالت باستغراب ـ وعليكم الســ...لا.م ...

جاسم ـ خالتي باختصار أنا شاري بنتج ..
انصدمت جوزة ـ شنو ؟
جاسم ـ أنا أبي أتزوج شيخه ..
حست شيخه أن الدنيا لفت فيها من نظرة أمها لها .. قالت شمس بعصبية ـ وحضرتك ياي تخطب في الشارع .. ؟ وللاسف أستاذ بالجامعه ومثقف ماتعرف الاصول؟؟ ..
جاسم ـ السموحه منكم والله .. بس مولاقي طريقه غير هذي ..والله قدركم أكبر .. وعلى عيني وعلى راسي .. و..
قاطعته شيخه ـ لاتحلم مجرد حلم أني بوافق ...
جاسم ـ شيخه أنا شاريج ! ..
طالعت له شيخه باحتقار ـ وأنا مستغنية ..
وراحت ناحية السيارة اللي وقفت ـ يلا يما ..
جوزة وقفت مصدومه ..
هدتها شمس ـ يمه . فديتج تعالي .. بالغصب تحركت جوزة وهي منصدمه .. اركبوا السيارة ..
جوزة ـ للبيت ..
نوير وصافيه ـ شنو ؟؟ .. ليش ؟؟؟ ..
جوزة ـ وصلوني البيت أنا وشيخه وشمس وروحوا اطلعوا وخذوا محمد للالعاب .. بنلحقكم بعدين طرشوا الدريول ..
استعادت جوزة تماسكها .. وأوا مااتوصلت البيت خلت نوير وصافيه يروحون وهم مستغربين .. دخلت للصالة .. وشيخه اللي كانت ماسكه عمرها انفجرت دموعها ..

جوزة ـ شالمسخره اللي صارت في نص الشارع ؟ .. منو هذا وشدراه أنج شيخه ؟؟

شمس ـ يمه هدي اعصابج .. أرجوج ..
جوزة ـ شمس .. شلون أهدي أعصابي ؟؟ شلون اهدي اعصابي بعد المسرحية اللي صارت ؟ ..
شيخه ـ يمه .. انا ماغلطت بشي .. هو دكتوري بالجامعه .. وكان يبي يخطبني .. وقال لي انه بيودي هله بس وحده الله يستر عليها قالت له سالفة خالتي .. فهو حقرني .. وأنا من يومها ..
عصبت جوزة وقالت بصوت عالي ـ أنتي رايحه الجامعه تدرسين ولاتسوين لي قصص عب وعشق وغرام ؟؟ بتفضحينا جدام الناس ؟؟
انهارت شيخه بالبجي ـ يمه والله ما سويت شي .. والله يمه ..
جوزة ـ أنتي ياشيخه ؟؟ فضحتيني .. فضحتيني ..
شمس ــ يمه شيخه ماسوت شي .. أنتي أدرى بشيخه .. مابتسوي الغلط .. هو اعجبته شيخه وقال لها بطرش هلي لج يوم الخميس . .. وبعدين وحده من البنات قالت له حجي الله يعلم عنه .. وجا وقال لشيخه انه مايتشرف فيها .. يمه شوفي الضحيه هنا .. شيخه اللي اهانها جدام البنات .. ولا شيخه ماقطت نفسها عليه ولا رخصت بعمرها .والمسخره اللي سواها اليوم بس لان شيخه تصده وماتعطيه وجه .. يمه لاتظلمينها والله انها مظلومه ..
سكتت جوزة ..المست المنطق في حجي شمس ..
ـ احلفي لي ياشيخه أنج ما غلطتي ..
بجت شيخه وامسكت يد امها ـ والله يمه والله اني ماسويت شي ينزل راس جدام الناس .. والله يايمه ..

مسحت جوزة على راسها وقالت لها تهديها
ــ يمه ارفعي راسج .. لاتبجين ..
شمس ـ وشالحل الحين ؟
جوزة طالعت لبنتها ـ انتي تبينه ؟
سكتت شيخه لدقايق ..
ـ اذا مااحترمني قبل الزواج ..شلون بيحترمني بعده ؟ . أبيه ؟؟ لا يمه .. الله الغني عنه وعن أمثاله ..

طالعت جوزة لعيون بنتها اللي كانت تتحاشى تلتقي بعيونها ..فعرفت ان شيخه تحب هالانسان رغم انها يالسه تكابر ..
قالت وهي تتنهد ـ اللي فيه الخير الله يكتبه ..
مسحت شيخه دموعها واركضت لغرفتها ..
شمس ـ ياقلبي عليها ..
جوزة ـ شكلها تحبه . .
شمس ـ بس الحب مب مقياس للكرامه ..واللي سواه اليوم مسخره ..
جوزة ـ بغى يوقف قلبي ياشمس .. ولماردت عليه .. قلت في السالفه مصيبه ..
شمس ـ سلامه قلبج يايمه .. بس كل السالفه انها تصده من فتره .. وحتى الامتحان ماحضرته .. واعطاها اعلى درجه .. ..بس هي ماراحت الجامعه ولا عبرته .. لاتخافين يايمه عليها .عندها كرامه ..

جوزة ـ بس النتيجه انها بتدمر نفسها .واعصابها ..
شمس ـ صدقيني .. بيتدمرون في الحالتين .. خليها على الاقل بكرامتها..وبعدها اللي يصير يصير ..


****

شيخه ماقدرت توقف دموعها امسكت الاب توب وفتحت ايميلها وكتبت رساله لايميله .

(( ماتوقعت الدناءة توصل فيك هالدرجه .. شالوقاحه منك أنك تسوي هالمسرحية في نص الشارع وجدام أمي ؟ أعتقد اني ذكرت لك ان امي مريضه بالقلب ياحقير شكنت ناوي ؟؟ ناوي تذبحها ؟؟ ماتوقعت اني بكرهك لهالدرجه .. اهنتني من قبل مرتين وهذي الثالثه ؟؟ الثالثه يا دكتور .. انا مب بنت شوارع عشان تخطبني في الشارع .. أنا تاج راسك يا .. دكتور . )) ..


طالعت أمر Send .. ترددت .. لكنها اضغطته ..

سكرت الاب توب وهي تمسح دموعها .. بعدها بدقايق .. طقت شمس الباب .. وأول مافتحت لها طاحت في حضنها وتمت تبجي بحرقه ..


تمت جوزة تتقلب مب قادرة تنام.. في شيء مقلقها .. تعوذت من الشيطان وقامت صلت لها ركعتين ..
في الطابق الثاني ..

فتحت نوير عيونها على التلفون ..
ــ ألو .. ها ماجد ؟؟
ــ نوير .. أنا أحمد .. بمر آخذكم .. . !!
نوير ـ شنو ؟؟ ..
أحمد ــ ماجد في المستشفى .. تعرض لحادث !!
طالعت نوير الساعه ــ حادث ؟؟ متى وشلون ؟؟
أحمد ـ مو وقته .. خبري امج ...
كانت الساعه 4 الفجر .. قامت نوير وهي تبجي طقت الباب على غرف خواتها بالدور ووقفت بالممر ..
طلعت شمس وصافية ..
ـ شفيج ؟؟ ..
كانت نوير ترتجف ـ ماجد .. مااا..جد سوى حادث .
انهارت صافيةو شمس اضربت على صدرها بقوة ـ كذاابه !نوير من قالج ؟؟
نوير ـ والله توه دق ولد احمد علي وخبرني .. بيمرني بعد شوي ..شلون اخبر امي ؟؟
طلعت شيخه ــ شفيكم شالحشره .؟
شمس ـ اخوج ..
شيخه طار النوم من عيونها وهي تشوف عيونهم اللي تبجي .. ــ شفيه ماجد ؟؟ شفيه ؟؟؟

تمت تبجي بدون وعي طمنتها صافية ـ ان شاء الله مافيه الا الخير .. هو سوى حادث ..
لحظات انهارت شيخه من البجي
شمس ـ شيخه لاتنهارين مو وقته .. ادعي له الله يلطف فيه ..

طلعت جوزة من غرفتها وهي متضايقه .. سمعت صوتهم .. للطابق الثاني وهي يدها على قلبها
ــ شفيه اخوكم ؟
نوير انهارت بالبجي
ـ ماادري يمه ..ولد عمي احمد كلمني وبيمرنا الحين .. بيآخذنا المستشفى !!
جوزة بدون وعي راحت غرفتها وطلعت عباتها والبستها وهي تمشي دموعها وتدعي
(( ياربي خله لخواته .. ياربي افديه بروحي .. يارب انت العالم .. يارب .. هو سندنا الوحيد .. يارب ..يالله .. يالله الطف فيه .. يالله الطف فيه )) ..


**************************