كاتب الموضوع :
موزه
المنتدى :
القصص المكتمله
لتأخر ناقلة القصة يتم اكمال نقلها
**********************
::الجزء الرابع::
خلود_السلام عليكم
فرح_وعليكم السلام، حمدالله على السلامه، بدري، ويعني اللي يسافر يقفل جواله
خلود_بسم الله علي أول قولي لي وش أخبارك وش أخبار الشله شوفي أمس وصلت واليوم أول وحده كلمتها أنت عشان تدرين انك غاليه عندي
فرح_غاليه إيه صدقت، تلقينك من اللقافه ماقدرتي تصبرين تبين تعرفين وش صار بغيابك
خلود_أقول أنا غلطانه اني داقه عليك مع السلامه
فرح_بكيفك ماراح تعرفين الخبر اللي بمليون دولار
خلود_صدق فيه أخبار يله قولي بسرعه
فرح_تدرين انه فاتك نص عمرك
خلود_ليه وش صار؟
فرح_أمنيه تزوجت مليونير
خلود_لا والله مامداني قبل شهر مسافره متى تزوجت
فرح _مو هي انخطبت وتملكت وأمس كان زواجها كله في هالشهر
خلود_تتكلمين جد
فرح_إيه أكيد
خلود_غريبه وافقت مو كانت تقول لازم تكمل دراستها أول ومن وين جاها هالمليونير وليه بهالسرعه وإيش صار على سالم أقولك قولي لي السالفه من أولها لآخرها
فرح_السالفه ان وحده من زبونات أخت أمنيه أخطبتها لواحد تعرفه وأمنيه اضطرت توافق عليه عشان تفتك من سالم
خلود_يعني هي مو راضيه على هالزواج؟
فرح_لا ومستغربه وش معنى هي بالذات خطبوها وليش ماأخذ وحده يعرفها أو من مستواه وتبين الصدق معها حق شوفي وشلون مستعجلين على الزواج وهو ماطلب يشوفها ولا كلمها
خلود_ياعمري ياأمنيه كنت أتمنى تاخذ واحد يعرف قيمتها ومن يدري يمكن اللي أخذته يقدرها
فرح_إنشاءالله
خلود_تصدقين ماأدري أفرحلها أو أزعل عشانها
فرح_لاتخافين على أمنيه تعرفينها مو مهتمه بشي ومو داريه عن الدنيا مثل ماتقول دايما هي تعلمت تكيف نفسها بأي وضع
دخل سلطان وشاف أمنيه جالسه عند التلفزيون جاء وجلس جنبها إتفاجأت هي ألتفتت عليه وشافت معاه كيس رفعت نظرها له
سلطان_جبتلك جوال من اليوم ورايح بتحتاجينه
أمنيه_ماله داعي قلتلك ماأحتاجه
سلطان_وأنا قلت بتحتاجينه
مسك يدها وحط فيها الجوال
سلطان_تعرفين تستعملينه
أمنيه_إيه
لكن سلطان استمر يطالعها كانت قريبه حيل منه نفسه يعرف هالهدؤ وش وراه خصل من شعرها كانت طايحه على وجهها نظرتها عيونها أول مره ينتبه لشكلها كانت رموشها طويله وكثيفه عطرها كان هادئ يشبهها لو ماكان يحب لميس وش كان بيحس اتجاهها أتفاجأ وين راحت أفكاره هذا من أول يوم فكر كذا...
سلطان بعصبيه_قومي كلمي أهلك تطمني عليهم
أمنيه_زين فك يدي
انتبه سلطان انه للحين ماسك يدها من يوم حط فيها الجوال كان شاد عليها بقوه تركها بسرعه وقام عنها ودخل غرفته
أما أمنيه فظلت مكانها تفكر(غريبه وش صار له اليوم! أمس يصرخ علي ومايبيني واليوم يكلمني عادي وش غيره؟لايروح تفكيرك ياأمنيه بعيد أكيد بيعاملني بإحترام أنا زوجته ومو ذنبي إن كان مايبيني لكن مدري ليه أحس لو يعاملني مثل امس أريح هو نفسه مارتاح يوم شاف إنه كلمني عادي هو مايبي يخون حبيبته وأنا مو لازم أتعود على أحد أعرف إنه بيتركني صح هو أول شخص يمر بحياتي بس ضروري مايكون له أي تأثير عليها ) وراحت لغرفتها تكلم أختها..
أمنيه_السلام عليكم
أم ياسر_وعليكم السلام!أمنيه!
أمنيه_ماسرع نسيتي صوتي
أم ياسر_أهلين وش أخبارك
أمنيه_الحمدلله وش أخبارك وأخبار ابوياسر وياسر وسندس وسيف
أم ياسر_اللي يسمعك يقول لك شهر ماشفتيهم بعد أمس كنت معهم
أمنيه_والله أحس من سنه ماشفتكم
أم ياسر_المهم أنت وش أخبارك
أمنيه_تطمني أنا بخير
أم ياسر_متى بتسافرون ووين ؟
أمنيه_ماراح نسافر سلطان مشغول قوليلي سندس عندك أبي أكلمها
أم ياسر_نايمه
أمنيه_سلمي عليها أكلمها بعدين إيه صح ترى هذا جوالي سجليه عندك
أم ياسر_زين وخلينا نشوفك يله مع السلامه
أمنيه_مع السلامه
سلطان كان يفكر(جلستنا هنا مالها داعي ماأقدر أطلع وأخليها هنا ومو معقول أجلس معها كل هالوقت بنروح لفيلتنا أحسن عشان أروح لشغلي وأنا مرتاح)
فكر إنه يرسل للميس
[أهلين لميس حبيت أتطمن عليك كيف حالك اللحين بالي مشغول عليك]
أنتظر شوي بعدين جاه مسج [أنا بخير دامك معي]
طلب الغداء وراح يقول لأمنيه طق عليها الباب ولاردت طق بقوه أفتحت وهي تربط شعرها وعيونها ناعسه من النوم
أمنيه_نعم
سلطان_نعم الله عليك الغداء يالأميره النائمه
ماتدري ليه تحس انه يكلمها باستهزاء أما هو فمايدري ليه قالها كذا...وهم يتغدون
سلطان_غيرت رأيي بنروح اليوم للفيلا
هزت راسها بمعنى إيه
وكملوا الغداء وهم ساكتين بعدها راحت أمنيه تسكر شنطتها ثم راحوا لفيلتهم...
دخلت أمنيه الفيلا وهي مو مصدقه انها لحالها بتعيش بمكان هالكبر عرفها سلطان علي الخدامات وكانوا ثلاثه إضافه للطباخه طلع معها فوق عشان تشوف غرفةالنوم
سلطان_أنت نامي هنا أنا بنام بالغرفه الثانيه
وكالعاده هزت راسها بدون أي رد...
بعد يومين عرفت أمنيه ليش كان مستعجل انه يروح للفيلا عشان يفتك منها كانت تصحى تقولها الخدامه إنه طلع بدري ويرجع وقت الغداء ويتغدون وهم ساكتين إلا إذا سألها أي أسئله روتينيه أهلي اتصلوا محتاجه شي وغيره ويروح ينام والعصر يشرب الشاهي بمكتبه اللي في البيت بعدها يطلع وتنام وهو مارجع
على هالحال مر عليهم شهر خلاله زارت أمنيه أختها كم مره وهي تبين لها إنها مرتاحه بالحيل مع سلطان وأهله وكانت نص كذبه لأنها صدق ارتاحت مع أهل سلطان أمه كانت تعاملها بطيبه أما أبوه فكان يعاملها ويهتم فيها كأنها بنته وجدته تعلقت فيها أمنيه بالحيل بقى أخته اللي تسمع عنها ولاشافتها كانت مسافره مع خالتها وبناتها اللي عرفت انهن خوات سلطان بالرضاع سمعت إن دلال قريبه مره من سلطان وتسآلت إن كانت تعرف إنه مايبي هالزواج أكيد عشان كذا ماحضرت ملكته...
اليوم الجمعه وبكره كان السبت أول يوم في السنه الجديده...
في بيت أم خالد\\لأول مره وبعد إقناع طويل من خالد رضى نواف ينزل يتغدى معهم من يوم رجع وعرف خبر وفاة أبوه وهو حابس نفسه بغرفته مايطلع ولا يكلم أحد حتى قبل ثلاث أسابيع يوم بدأ يشتغل بالمستشفى مع إن نفسيته تحسنت شوي إلا إنه كان من المستشفى لغرفته حتى أهله مايجلس معهم مايقدر يتخيل البيت من غير أبوه لكن اليوم عشان يفرح أمه قرر إنه ينزل يتغدى معهم..وعلى الغداء
خالد_خير فجر ليش ماده البوز شبرين؟
فجر بملل_يعني ماتدري إن اليوم الجمعه
نواف مستغرب_وإذا الجمعه ليش تزعلين!
أم خالد_عشان بكره تبدأ الدراسه مدري ليه ماطلعت عليك شاطره
فجر_بسم الله علي تبيني أصير ممله!
خالد_انتبه يانواف ترى فجر تقريبا ماتعرفك لازم تحسن صورتك عندها
فجر_ماراح يتغير فيه شي هو دايما كذا ممل
نواف انصدم من كلامها
أم خالد_فجر وش هالكلام!
فجر_دلال اللي تقول انه وجوده ماراح يقدم ولايأخر
خالد_ههههه ياحليلك يادلال حتى نواف ماسلم منك
أم خالد_فجر أنت ماتستحين أنا أعرف شغلي معك
نواف_وهي وش ذنبها صغيره وماتعرف.. الخطأ على اللي وصلت لهالعمر وعقلها ماكبر معها
أم خالد_أنت ماتعرف دلال هي دايما تمزح وهالخبله صدقت
أم خالد طالعت فجر بنظرة تهديد عشان ماتتكلم،أما نواف فكان معصب وده يقوم عن الغداء لكن ماحب إنه يقوم وهو أول مره ينزل ياكل معهم ويعرف ان أمه بتهاوش فجر لأنها بتحطها هي السبب يكفي إنها من زمان انضربت ودلال كانت السبب تذكر ذاك اليوم اللي رجع فيه وشاف غرفته مقلوبه فوق تحت أوراقه ملخصاته كتبه كل شي على الأرض ماكان في البيت أحد يشكون انه سوى كذا غير فجر اللي كان عمرها ست سنين للحين يتذكر وشلون كانت تصيح وأمه تضربها وأخذته ذكرياته لذاك اليوم اللي طول هالسنين ماقدر ينساه يوم حفلة نجاحه من الثانويه هو وسلطان سأله عمه أبو سلطان عن سلطان وقاله إنه من شوي شافه رايح للحديقه اللي ورى البيت فطلب منه يروح يناديه نواف كان منحرج الحديقه قريبه عند مدخل الحريم وخاف إن وحده منهن تكون طالعه برى عشان كذا مشى بهدؤ عشان إذا سمع أي صوت يرجع ومثل ماتوقع سمع صوت وحده تكلم سلطان كان بيرجع لكنه سمع اسمه وسمع إن دلال هي اللي دخلت غرفته وقلبتها فوق تحت والأكثر من كل هذا سمعها وشلون خلته مثل الغبي يحبها قدام كل البنات سمع صوتها لكن ماشاف شكلها وظل صوتها وكلامها يرن في اذنه كل هالسنين
المغرب في بيت أبوسلطان\\ دلال وأمها كانوا يسولفون دلال أمس في الليل وصلت وتوها تصحى وجلست تقول لأمها عن سفرتهم بعدين سألتها
دلال_وسلطان وش أخباره مع زوجته؟
أم سلطان_والله مدري
دلال_وشلون كل هالمده مازاروكم!
أم سلطان_إلا سلطان يمر علي تقريبا كل يوم وأحيانا يجيبها عندنا لكنه ينزلها ويروح لشغله ماعمري شفتهم مع بعض وإذا سألته عن حاله يقول الحمدلله وهي باين عليها إنها مرتاحه ومبسوطه
فكرت دلال(مستحيل يكون سلطان نسى لميس واقتنع بزواجه بهالسرعه)
دلال_وزوجته كلميني عنها
أم سلطان_البنت حلوه وهاديه وأخلاقها عاليه وثقيله مو أي شي يهزها أبوك حبها بالحيل وجدتك كل ماعرفت انها عندنا على طول تجي
جتهم الخدامه_مدام السواق جاء
دلال_على وين؟
أم سلطان_جارتنا أم ابراهيم مسويه عملية الزايده وبروح أزورها
دلال_نسيت أسألك خالتي أم خالد ماسافرت
أم سلطان_لا بس فجر راحت عند عماتها أسبوعين
طلعت أم سلطان ودلال دقت على سلطان وقالت له يترك كل اللي عنده ويجي،بعد ماجاء وسلم عليها عطته تقرير مفصل عن سفرتها لين حست ان راسه انفجر
دلال_وتوته توته خلصت الحتوته،صح نسيت انتظر شوي
وراحت فوق بعد شوي نزلت ومعها كيس فيها هديه طالع في الكيس
سلطان_هذي صوغتي من السفر
دلال_لاهذي هدية الزواج
طالعها بإستغراب ولوم
سلطان_كأنك ناسيه وشلون صار هالزواج!
دلال_لكنك تزوجت
سلطان_مؤقتا لحد ماأحاول أرجع الأمور لحالها بين ابوي وابولميس،لميس يادلال ولا نسيتيها؟
دلال_وزوجتك؟
سلطان_تدري
دلال تشهق_قلت لها انك كنت تحب وحده
سلطان_قلت إني للحين أحب وحده
دلال وهي منصدمه من كلامه_وقلت لها إنك بتطلقها
سلطان انتبه لنفسه هو وش يقول وشاف نظرات دلال المصدومه ماحب يكون بعيونها ظالم وندم إنه قال لها هالكلام
سلطان_لا إلى وقتها الله يحلها
دلال_بس أنت جرحتها ياسلطان هي وش ذنبها ماعمرك سويتها أنت دايما كنت تراعي مشاعر الناس
سلطان_ماقدرت أكذب عليها كانت بتحس بعدم اهتمامي بعدين لاتزعلين عليها هي مااهتمت بالكلام اللي قلته كثر ماأنتي اهتميتي اعتقد انها بحياتها ماحست بأي مشاعر أنا أشك إنها تحس من الأساس أو فيه شي يهمها أنا تأخرت على عمر بروح له تبين شي
دلال_سلامتك
طلع سلطان و رجع يفكر بالسؤال اللي دايما يخطر على باله ليه أمنيه مو مهتمه باللي قاله وراضيه بهالحال!
أما دلال فكانت تفكر هي بعد في أمنيه تذكرت طول سفرتهم كلام خالتها ونجلاء عنها قالوا إنها مو من مستوانا وانها آخذته طمع لين قربت تكرهها من كلامهم ابتسمت يوم تذكرت نور الوحيده اللي تحب هالعروس قبل ماتشوفها ومهما كانت المهم ماتكون لميس لكن أمها تمدح في البنت وتقول إن أبوها وجدتها تعلقوا فيها بسرعه وكلام سلطان زاد فضولها ماقدرت تصبر أكثر من كذا ضروري تعرف مين تطلع أمنيه؟ وشكلها؟ وشخصيتها؟
صح إن الساعه عشر وبكره أول أيام الدراسه وأكيد تكون مشغوله لأنها تدرس بس يمكن ماهي رايحه بكره وقررت تروح تعطيها هديتها وتتعرف عليها،أخذت رقمها من أمها ودقت عليها...
دلال_السلام عليكم
أمنيه_وعليكم السلام،مين معي
دلال_أولا مبروك ثانيا أنا تقريبا نص ساعه وأكون عندك ثالثا والأهم أنا دلال أخت سلطان
أمنيه_أهلين دلال الله يبارك فيك وحياك الله
دلال_يعني مو مشغوله
أمنيه_لا أبدا أنتظرك
سكرت أمنيه وراحت تلبس وهي تفكر(باين من كلامها إنها طيبه مثل أهلها ولا طيبه مؤقته مثل أخوها اللي اللحين يستخسر الكلام فيني وإذا جلس هالكم دقيقه معي أحس انه مخنوق ومايصدق يطلع)
وصلت دلال وبعد ماسلمت عليها وعطتها هديتها جلسوا يسولفون عن كل شي وتعشوا مع بعض وبعد العشاء كملوا سوالفهم...
أمنيه_أنت تخرجتي من أي كليه؟
دلال_فنون جميله
أمنيه_يالله أحب الرسم بس ماأعرف أرسم ولاشجره
دلال_ههههه وأنتي؟
أمنيه_رياض أطفال وهذي آخر سنه
دلال_يااااه تأخرت الساعه وحده أنت بتداومين بكره
أمنيه_إيه
دلال_مافيه دراسه أول يوم لاتروحين عشان ماأحس إني سهرتك وماخليتك تنامين
أمنيه_مو كله دراسه بس من زمان عن الشله ومتفقين كلنا نروح بكره،وش رايك تجين معي بكره ماعندنا محاضرات
دلال_تصدقين فكره حلوه لأني شبعانه نوم وأكيد بمل الصبح لحالي راح أمر عليك بكره
أمنيه_بتروحين والوقت متأخر مع السواق كلمي سلطان يجي يوديك
دلال_لاشكله مشغول ولا كان
رجع للبيت بعدين الخدامه معي بس لاتعلمين سلطان
راحت دلال وطلعت أمنيه فوق ومانامت لحد ماكلمت دلال وتطمنت انها وصلت،دلال دخلت ورمت نفسها على السرير تفكر(خساره كنت أتمنى انها طلعت مثل ماقالت خالتي ونجلاء عشان ماأحس اننا ظلمناها ولاأحس بقسوة سلطان عليها لكنها طلعت غير دخلت قلبي أول ماشفتها أول مره أحس إني أرتاح مع أحد كذا مع إنها ماتشبهني بشي بالعكس هي غير عني لكن من ردها علي أحس انها فاهمتني إيه ياأمنيه بعدني ماعرفت عنك كثير والأيام بتعرفني واللي بعرفه يابيقربني منك يابيبعدني ولو نظرتي ماخابت فأنا أتوقع إننا نقرب من بعض أكثر)
::الجزء الخامس::
يوم السبت الصبح في بيت سلطان\\سلطان كان جالس في غرفة الطعام جت الخدامه وحطت الفطور وهو يفطر سمعها تنزل مع الدرج استغرب وش مصحيها دخلت عليه وتفاجأ يوم شافها لابسه تنوره جنز وبلوزه وردي كانت فاكه شعرها ومجعدته ومكياجها الوردي مخليها روعه كان شكلها غير كل يوم كان يشوفها بجلابيه خفيفه ورافعه شعرها حتى يوم كان يوديها لأهله كان يجي وهي لابسه عباياتها هذا إذا ماكان السواق هو اللي موديها كان قرب ينسى هالاحساس اللي تثيره فيه أو اللي كان يغيب عن البيت عشان يتجنبه...
أمنيه تفاجأت انه للحين فيه
أمنيه_صباح الخير
سلطان_صباح النور، وش عندك لابسه على هالصبح
أمنيه_بروح للكليه
سلطان_الكليه! أنت للحين تدرسين!!
أمنيه_مادريت إن شكلي عجوز!
سلطان ابتسم_لا مو قصدي بس توقعتك تخرجتي
أمنيه_هذي آخر سنه
سلطان_أي كليه؟
أمنيه_رياض أطفال
سلطان_وش معنى أخترتي هالقسم؟
أمنيه طالعته بنظره غريبه مافهمها_كذا
سلطان_يعني مو حب واهتمام بالأطفال
أمنيه من غير نفس_مافيه أحد يكره الأطفال
سلطان استغرب من لهجتها اللي تغيرت فجأه
دق جوالها وردت بإبتسامه أول مره يشوفها على وجهها طبعا وليه بتبسم له
أمنيه_أهلين صباح النور.......
خلاص أنا جاهزه..........
إذا وصلتي عطيني دقه وأطلع
......مع السلامه
سلطان عصب مين هذي اللي بتمرها وليه ماتروح مع السواق والخدامه مثل ماتروح معهم لأهلها ومن اللي بيوديهم وبدون لاتقوله
سلطان_مافيه روحه اليوم للكليه
أمنيه ببرود عصب سلطان زياده_وليه؟
سلطان_عشان قبل ماتتفقين مع صديقتك تمرك تعرفين إن عندك زوج تسألينه قبل
أمنيه_ زوجي! اللي توه يعرف إني للحين أدرس! زوجي اللي أنتظرته أمس للساعه ثلاث عشان أقوله إن أخته زارتني ولكنه ماجاء!زوجي اللي لو كان انتظر شوي كان قلتله إن دلال هي اللي بتمرني وتروح معي للكليه!بس ماكنت أظن هالشيء يهمه أو يفرق معه
دقت دلال
أمنيه_اللحين تسمح لي أروح؟
طالعها سلطان ويوم ما رد عليها تركته وطلعت
سلطان غمض عيونه(يالله لو هي كلمتين معها أحس اني متضايق وتعبان كأن لي ساعات وأنا أكلمها) تذكر شكلها تغير لهجتها معه فجأه تكرهه؟أو مو هامها؟أو وش شعورها اتجاهه؟واللي محيره ليه رضت بهالوضع؟
(دلال أمس كانت هنا! جتها بعد ماطلعت منها كان الوقت متأخر! وليه تروح معها الجامعه وهي توها عارفتها!)
في السياره أمنيه كانت تفكر باللي قال لها سلطان(والله مغرور اللحين بعد الكلام اللي قاله لي ليلة زواجي بدون لايهتم بمشاعري وله شهر مايكلمني يجي اليوم ويسولف عادي بأي قسم؟ليه أخترتيه؟وأنا كلي مو هامته وليت لو جاوبت يعجبه مثل يوم كنا في الفندق يوم عطاني الجوال ماحبيت أقوم عنه بسرعه عشان ماأجرحه آخرتها يعصب علي كأني أنا اللي راميه نفسي عليه! لا الأريح لي وله إننا مانتكلم مع بعض أبدا كذا،أحسن)قالت آخر كلمه بصوت عالي وبعصبيه من غير ماتحس
دلال_ياساتر ليه معصبه على هالصبح؟
أمنيه_على ناس عجزت أفهم وش يبون
دلال_سلطان؟
أمنيه_وليه توقعتيه سلطان؟
دلال_يعني من بتشوفين بهالصبح غير سلطان لمحت سيارته
أمنيه_عصب على باله بروح مع وحده من صديقاتي
دلال_يمكن يغار
أمنيه ماردت عليها وتسآلت معقوله دلال ماتعرف عن سالفة اللي يحبها!
وصلوا الكليه وراحوا للشله اللي كانت عشر بنات أول ماشافوا أمنيه بدوا يزغرطون
أمنيه_بس فضحتوني بتخلوني أحس إني تزوجت صدق
فرح_أجل أنت متزوجه تمثيل ماعرفتينا
أمنيه_دلال حماتي أخت سلطان
بعد ماسلموا عليها البنات جلسوا يسولفون ويضحكون
عبير_اللحين أمنيه اتزوجت وخلود ورنا تملكوا ومها انخطبت وأنا للحين ماشفت ظل رجل عند الباب والله شكلي بأعنس
رنا_لاتزعلين دلال أكبر منك ومو مخطوبه
دلال_لا حبيبتي أنا عريسي موجود متى ما نويت أتزوجه قلت لأمه تعالي اخطبيني
عبير_ياسلام أنت اللي بتقولين لها تجي تخطبك
دلال_طبعا العريس مايفوت
أمنيه_ومين سعيد الحظ؟
دلال_واحد فيه كل المواصفات رجل أعمال وقلبه طيب ووسيم وشخصيه كل شي تتمنونه فيه بس له عيب وحيد
عبير_بعد كل هالمواصفات مابقاله عيوب
دلال_لا عيبه أخوه
ضحكوا عليها البنات
عبير_ولا يهمك أنا أتزوج أخوه وأريحك منه
دلال_لا الله لايبليك ذاك البلا
أمنيه_أنت صادقه أو تمزحين عن مين تتكلمين؟
دلال_عن بطلي اللي كان يدافع عني أيام الطفوله عن خلوووودي
أمنيه_ولد أم خالد!
دلال_ إيه نعم وفيه غيره
أمنيه_بس هو ماعنده أخو غير الدكتور أظن اسمه نواف
عبير_ياسلام دكتور تكفين دلال أبيه
دلال_أقولك هذا آفه تقولين أبيه
أمنيه_لكن خالتي وعمي يمدحون فيه
دلال_أوووف اتركونا منه هذا اللي ناقص أسولف عنه سكروا الموضوع ترى من جد أكرهه
البنات يوم شافوا دلال عصبت ماحبوا يضايقونها وغيروا السالفه...
رجعوا من الكليه وهم في الطريق
امنيه-دلال انت صدق تحبين خالد؟؟
دلال- لا امزح انا من كنت صغيره وانا اقوله ترى اذا كبرت باتزوجك وهو يقول الله يعينني بس انا وحتى سلطان نعتبره اخونا الكبير انا للحين ماستحي اكلمه واسلم عليه
امنيه-شكل علاقتكم بام خالد وعيالها قويه
دلال-نعتبر اهل او اكثر
امنيه-ونواف صدق تكرهينه ولا مزح بعد
دلال-لاهذا عاد صدق حرام عليك مايكفي هالشمس والحر بعد تبينا نتكلم عنه
امنيه حست ان دلال ماتبي تعلمها ليش تكرهه اكيد لسى ماوثقت فيها عشان تقولها اسرارها,,وصلت امنيه للبيت والخدامه قالت إن سلطان اتصل وقال ماراح يجي على الغداء،تغدت أمنيه ونامت ويوم قامت العصر راحت لأختها ولا رجعت للبيت إلا بعد المغرب راحت لغرفتها وبدلت ملابسها ولبست برمودا ورديه وبلوزه بيضاء وفيهارسمات بالوردي وبعد العشاء وكالعاده طلعت في الحديقه كانت الساعه 11وهي ماتنام إلا 12 ولاتدري سلطان متى يرجع؟
لكن سلطان اليوم رجع بدري كان يبي يكلمها دخل البيت ولقاه فاضي توقع إنها نامت راح للمطبخ وشاف الخدامه...
سلطان_المدام نامت؟
الخدامه_لا في الحديقه
أمنيه كانت جالسه على العشب وتاركه الكراسي وتكلم دلال جاء سلطان وهي كانت معطيته ظهرها ولاشافته
أمنيه_هههههه تسوينها ماأستغرب
سلطان سرح في شعرها الأسود اللي أنتثر على ظهرها وغطى أكتافها في حياته ماشاف مثل سواد شعرها وكثافته ونعومته
سلطان_مساء الخير
شهقت أمنيه وطاح الجوال من يدها وفزت بسرعه ماكانت مستوعبه مين صاحب الصوت ولا توقعت إنه يجي بدري ألتفتت عليه وطاح شعرها غطى نص ملامحها وقفت تطالعه وعيونها مفتوحه على آخرها كان قلبها بيوقف
أما سلطان يوم شافها قلبه بدأ يدق بقوه كانت عيونه ثابته على ملامحها شعرها انتبه للبسها وعرف انها ماتلبس ذيك الجلابيات إلا عشانه موجود انحرجت أمنيه من نظراته
أمنيه_مما..ما.توقعتك تجي-شهقت-دلال
أمنيه أخذت جوالها من على الأرض وكلمت دلال اللي انهبلت ماعرفت وش صارلها
أمنيه_ألو دلال
دلال_زين تذكرتيني!خوفتيني وش صار فيك؟
أمنيه_ماصار شي بس.. سلطان.. لقيته فجأه وراي..و
دلال_ههههه وكل هذا تستوعبين الموقف! زين مع السلامه
أمنيه_مع السلامه
سلطان كان للحين واقف بمكانه ويطالعها...
أمنيه_وش فيك؟
سلطان_ مافيني شي بس جيت بدري أبي أتكلم معك
أمنيه فكرت(معقوله بيطلقني!يمكن رجعت علاقة أبوها وعمي)
أمنيه_خلاص روح بدل ملابسك وأنا انتظرك هنا، تعشيت؟
سلطان_إيه، ببدل وأجيك
راح سلطان وأمنيه تذكرت لبسها انحرجت إنه شافها كذا فكرت تروح تغير ملابسها بس حست إنها مالها داعي هو شافها وخلاص، رجع سلطان وجلس على الكرسي وأمنيه جالسه على الأرض
سلطان_تعالي أجلسي
أمنيه_هذا أنا جالسه
سلطان_ياتجين تجلسين على الكرسي يا أنا أجلس على الأرض
الكرسي الثاني كان قريب منه تخيلته يكلمها وهو بهالقرب منها!!
أمنيه_أنا أحب أجلس على الأرض
سلطان عرف إنها ماتبي تقرب منه لأنه انتبه عليها يوم تطالع الكرسي القريب منه وتكشر
حب يقهرها على الأقل يرد على الطريقه اللي كلمته فيها الصبح فقام وجلس قريب منها نزلت عيونها وبدت تلعب بشعرها...
أمنيه_وش الكلام اللي تبي تقوله؟
سلطان_فيه سؤال محيرني لكن أتمنى إنك تجاوبيني بصراحه
أمنيه_وش السؤال؟
سلطان_أنت مغصوبه على الزواج؟
أمنيه_لا
سلطان_كنت تحبين أحد؟
أمنيه رفعت راسها وطالعته بحقد لكن فجأه راحت هالنظره ورجع البرود وابتسمت
أمنيه_وإذا كنت أحب واحد ناوي تخطبه لي بعد ماتطلقني
سلطان عصب عليها ومسكها مع يدها بقوه وقف ووقفها معه كان قريب منها بالحيل وحست من صوت أنفاسه إنه قهرته لكن يستاهل مثل ماجرحها لازم تجرحه
سلطان_وش قلتي؟؟
أمنيه رفعت عيونها له بتحد مع إنها كانت ميته خوف
أمنيه_اللي سمعته
سلطان_مسكها بقوه مع كل يدينها لين حس ان عظامه بتتكسر
سلطان_جاوبيني إيه أو لا
أمنيه صرخت_لالا
تركها وطاحت على الأرض توقعها تصيح لكنها رفعت عيونها له بذيك النظره البارده اللي يكرهها
سلطان_ليش وافقت على الزواج؟؟
أمنيه_وليه أرفض مو أنت لقطه لوحده مثلي
نزل سلطان ومسكها مع يدها وقومها سحبها وجلسها على الكرسي وجلس قبالها
سلطان_أمنيه جاوبيني بصراحه أنا جيت اليوم بدري عشان أعرف وأرتاح من الحيره أنت ليش مو هامك اللي قلته والوضع اللي حطيتك فيه ياإما انك تحبين أحد وارتحتي اني بأطلقك أو إن كل اللي همك الفلوس
أمنيه_بس هذي اقتراحاتك ولافيه شي ثاني وأنت ترشح أي سبب؟
سلطان_أنا أبي أعرف السبب اللي عندك وماراح أتركك الليله لين ما أعرفه
أمنيه_تطمن على كرامتك وعلى فلوسك اللي خلاني أوافق عليك مو من الأسباب اللي قلتها ولا يهمك تعرفه
سلطان_قلتلك إني بأعرفه اليوم يعني بأعرفه وكان ما عندك شي خايفه منه ليه ماتقولين لي
أمنيه_لأن كان عندي خيارين لازم أختار واحد منهم واخترتك أنت
سلطان_آآه وممكن أعرف من الخيار الثاني؟وليه كان ضروري تختارين واحد مننا
أمنيه_سالم ولد جيراننا كان له فلوس عند أبوياسر وطلبني للزواج مقابل هالفلوس ولا بيسجن أبوياسر لأنه ماكان معه المبلغ اللي طالبه سالم ويوم خطبتني أنا رجعت له فلوسه من مهري وأظن هالشيء مايضايقك واللحين أرتحت؟
سلطان_لا أبي أعرف ليه ماكنتي تبين سالم وليه اخترتي أحد ماتعرفينه عليه
أمنيه_لأن الكل يعرف إنه راعي سفر وبنات
سلطان_لكن أنت كان كل اللي يهمك من الزواج تسديد دين زوج أختك وسددتيه من مهرك ليش للحين قابله على نفسك هالوضع؟
أمنيه_أنا عارفه إنك بتطلقني لكن إني أرجع مطلقه بعد أيام من زواجي ماشوف إن أختي وزوجها يستاهلون اني أسويها فيهم مثل ماأنت وافقت على هالزواج خايف على أبوك أنا بعد باستمر فيه لأن عندي أهل أخاف على زعلهم
سلطان_تضحين بنفسك عشان أختك ليه ماعندك أحلام مثل باقي البنات ماتفكرين انك تتزوجين عشان تبنين حياة خاصه فيك بدال ما أنت جالسه عندهم؟
أمنيه_أعتقد هالسؤال أقدر ماأجاوب عليه بعد إذنك يعني لأنه مايخصك لامن قريب ولا بعيد،إذا خلص الإستجواب أقدر أروح أنام؟
سلطان_أمنيه أنااا...
أمنيه قامت ومشت عنه لكنها وقفت بدون ماتلتفت عليه
أمنيه_تدري ياسلطان إنه رغم قساوة الكلام اللي قلته لي ليلة الزواج إلا إني عذرتك ولا لحظه لمتك عليه لكن الليله هذي بس حسيت إني أكرهك
وراحت تركض لغرفتها
سلطان بدأ يراجع الكلام اللي قاله لها عرف إنه غلطان لكن كان لازم يعرف ليه وافقت بس كان يقدر يسألها بطريقه أحسن من كذا طلع جواله وبدأ يقرأ رسايل لميس طول الفتره اللي راحت لكن هالمره الرسايل ماطلعته من حالته (كل شي مع لميس سهل رغم كل اللي صار ليه مع أمنيه كل شي يتعقد معقوله احساسي بالذنب هو اللي مو مخليني أقدر أتكلم معها بشكل طبيعي وحنا أصلا نقدر نتكلم طبيعي وحنا بوضع مو طبيعي)
من بكره على الفطور انتظرها لكنها مانزلت ويوم تأخرت عرف إنها ماراح تروح للكليه راح للشركه وأمنيه كانت واقفه عند الشباك شافته وهو يطلع
تحملني وأنا اللي..
من خطاك ما وسعني بال~
وأجاملك وأنا جرحي..
على أطراف الهوى خافي~
كتمت الجرح ياقلبي..
وصبرت على الغربال~
ودي لو يوم أرتاح..
كافي من الجرح كافي~
ألا ياعين لا تبكين..
على منهو علي يختال~
حسافه دمعك الوافي..
تهلينه على جافي~
رجع سلطان على وقت الغداء ولاشافها راح لغرفتها وطق الباب فتحت أمنيه الباب وتفاجأت يوم شافته
أمنيه_نعم
سلطان_ماتبين تتغدين؟
أمنيه_تغديت
سلطان_أمنيه أنا آسف على الكلام اللي قلته أمس
أمنيه_سلطان روح أتغدى
سلطان_مو قبل ماتقولين إنك سامحتيني
أمنيه_مو بهالسهوله أنسى اللي قلته لي
سلطان_تصدقيني لو قلت لك إني ماعمري فكرت باللي قلته وانه خطر على بالي لحظتها
أمنيه_سلطان أنت وش تبي مني؟
سلطان_أمنيه أنا بحياتي ماجرحت أحد عشان كذا أنا حاس بالذنب على الوضع اللي حطيتك فيه أنت ماتكلمتي ماصحتي ولا شكيتي وهالسكوت خنقني زياده ماأقدر أكلمك عادي وأنا عارف إني ظالمك وأنت مالك ذنب يمكن لهالسبب كنت أدور فيك غلط حتى أريح ضميري وأحس إنك مستفيده من هالوضع لكن مالقيت،فاهمتني؟
أمنيه_صدقني ياسلطان أنا مو مهتمه لهالوضع اللي أنا فيه أنا مو حاسه إنك ظالمني أنا بحياتي ماعرفت الفرحه عشان أقول إني فقدتها ولاعرفت الأمن والحنان حتى أفقدهم عمري ماحلمت بالحب لأني مابيوم شفته كل هالأشياء ماحتجتها بحياتي وعشت من غيرها وعارفه إني بأكمل حياتي بدونها لاتشغل تفكيرك فيني أنا هنا أو يوم كنت في بيت أختي وحتى إذا رجعتله بعد ماتطلقني كله عندي عادي مافيه شيء يفرح ولا فيه شيء يزعل ولابكسب ولا بأخسر كل اللي أتمناه منك ياسلطان تعاملني بإحترام الأيام اللي بنعيشها مع بعض
تركها سلطان وراح لغرفته كان يحسب بإعتذاره بيرتاح ماعرف إنه بيرجع بذنب أكبر على بالها إنها بكلامها ريحته ماتدري إنها زادت النار اللي في قلبه(ليه من كل البنات ماختاروا لي غيرك بس لو ماكنت أخذتها أنا كان بياخذها واحد مايستاهلها بعد يمكن حالها معي أرحم على الأقل إذا طلقتها تكمل حياتها أحسن ماتعيش مع أحد مايقدرها ولا ليه فضلتني عليه)
طلع العصر وقبل يروح للشركه
مر يسلم على أمه وراح لغرفة دلال عشان يسلم عليها
دلال_سلطان!!
وقامت تسلم عليه
سلطان_قلت أصير أحسن من اللي تمر البيت ولا تنزل تسلم
دلال_حرام عليك والله كنت متأخره على أمنيه،صح هي جايه معك؟
سلطان_لا،قولي لي أنت وش قصتك مع أمنيه اللي يشوفكم يقول من زمان تعرفون بعض مو قبل أمس عارفتها!
دلال_أنت متضايق إني أكلمها؟
سلطان_لا مستغرب وأسأل لأني ماتوقعت انكم تنسجمون مع بعض وبهالسرعه بعد
دلال_صح حنا مانشبه بعض أبد لكن تصدق إننا نفهم على بعض بسرعه بعدين أمنيه تدخل القلب بسرعه
سلطان_ماقالت لك شي عني
دلال_لا
سلطان_لميس وش أخبارك معها؟
دلال_ماكلمتها أنت ناسي ان أبوي حلف مانكلمهم
سلطان_نجلاء ماقالت شي عنها وأنتم مسافرين
دلال_تكلمها بس ماسألت
سلطان_وهي ماقالت شي عنها
دلال_بصراحه قالت لكن اعذرني ياسلطان ماقدر أكلم أمنيه ومن وراها أوصلك رسايل من لميس تقدر تسأل
نجلاء إذا بغيت تعرف شي
سلطان_بيومين عرفتيها وصارت عندك أهم مني
دلال_سلطان وش هالكلام! أنت اخوي الوحيد ومافيه أحد أهم منك لكن قول لي بصراحه أنت مو حاس إن أمنيه مظلومه باللي صار لها
سلطان يتنهد_عارف إني ظالمها لكن مو بيدي
دلال_سلطان أنت طول عمرك طيب وماتظلم أحد أنا أبيك تراعي مشاعر أمنيه مين عارف كم بيطول الوقت لين ترجع علاقتنا مع أهل لميس مو معقول كل هالوقت تحسس أمنيه إنك ماتبيها قرب منها أكثر يمكن.....
سلطان_يمكن أيش يادلال؟ أحبها! أنا مستحيل أنسى لميس أو أتخلى عنها أنا ما أكره أمنيه القدر جمعنا مع بعض وانظلمنا قلتلك هي مو مهتمه إني ما أحبها وأنا ماأقدر أحبها وكذا حنا متفاهمين وكل واحد راضي بحاله،مع السلامه
دلال بدت تفكر(غريبه أمنيه وشلون عادي عندها زوجها يحب وحده ثانيه نفسي أعرف وش شعورها الحقيقي ماسألت نفسها لو سلطان قدر يتزوج لميس وش بيصير لها معقوله يطلقها! وهو معقوله لميس وأبوها يوافقون عليه وهو متزوج!) عصبت دلال من اللي وصلت له مع إنها ماعرفت أمنيه إلا من يومين بس عرفت
إنها ماتستاهل اللي بيصير فيها وحست إن سلطان بعد طلع زعلان منها،اتصلت تشوف أخبار فجر مع المتوسطه مو ناقصها بعد فجر تزعل عليها لكن الصوت اللي رد عليها ما كان خالد وأعرفت انه أكيد نواف وكأنها ناقصه تسمع صوته...
نواف_نعم
دلال_روح نادي لي فجر
نواف_الناس تقول السلام عليكم أول
دلال_وأنا مابي أسلم عليك غصب ناقص تقول لي أسأل عن أخبارك بعد
نواف_لا تكفين لاتسلمين ولاتسألين شوي شوي على نفسك لاتحترقين
وترك السماعه وراح ينادي فجر،دلال كان صوتها ناعم وصغير عشان كذا حسبها وحده من صديقات أخته بالمدرسه
جت فجر وردت ونواف كان واقف بعيد عنها
فجر صرخت_دلال حمد الله على السلامه لو إني زعلانه أمي تقول وصلتم الخميس ولا تكلميني إلا الأحد!
نواف يوم سمع اسمها(دلال! بنت عمي أبوسلطان! أكيد عرفتني باين من اللهجه اللي
كلمتني فيها عمرها ماتكبر هالبنت ولاتتعدل..ماأطيقها)
::الجزء السادس::
سلطان طلع من بيت أهله وفكر يروح بيت خالته اللي هي أمه من الرضاع،دخل سلطان وسلم على خالته ونجلاء
سلطان_وين نور؟
نجلاء_اللحين أدق عليها وأقول لها انك فيه
أم ندى_وش اخبارك ياولدي مع هاللي آخذها
سلطان-الحمد لله
ام ندى-والله انا للحين ماني قادره ابلع هالزواج الله يسامحك يا ام خالد على كثر بنات الناس
مالقت غير هذي تبليك فيها
سلطان عصب من كلام خالته صح هو مايبي امنيه لكنها زوجته واللي يسبها كأنه يسبه
سلطان-يمه لاتنسين انها زوجتي واذا تكلمتي عليها كأنك تتكلمين علي
ام ندى-اعذرني ياولدي بس انت عارف رايي فيها وفي هالزواج بس عشان خاطرك باسكت واقوم اجيبلك القهوه
نجلاء-والله وصرت ماترضى عليها ياسلطان!!!
سلطان خاف ان نجلاء توصل كلامه للميس
سلطان-نجلاء انت ودلال بالذات عارفين انه مايهمني الا لميس بس مو حلوه اتكلم او اسمح لاحد انه يتكلم عنها
وهي زوجتي وانا ساكت اللي يمسها يمسني طول ماهي في بيتي
نجلاء بفرح-يعني بتطلقها؟؟
سلطان-بحاول ارجع العلاقه بين ابوي وابو لميس بعدها ادور لابوي اي سبب واطلقها لكن هالكلام مابي احد
يعرفه ولا دلال
نجلاء باستغراب-ليه دلال ماتعرف!!
سلطان-لان دلال راحمه امنيه وحاسه اننا ظلمناها ولا حبيت اقولها اني بطلقها هي تفاجأت من قسوتي
يوم عرفت اني قلت لامنيه اني احب وحده ثانيه
نجلاء-وانت قلت لزوجتك كذا!!!
سلطان-ايه
نجلاء-وش قالت؟؟
سلطان-عادي ماهتمت كثير
نجلاء-طبعا لانها ماخذتك طمع
سلطان-نجلاء وش قلت لك انا دامها زوجتي ما ارضى احد يتكلم عليها
دخلت عليهم نور وهي طايره من الفرحه وسلمت على سلطان وبدت تتلفت
سلطان-وش تدورين؟؟
نور-وين العروس!!!
سلطان-اي عروس!!
نور-زوجتك امنيه اموت واشوفها
سلطان-بتشوفينها الخميس امي بتسوي حفله يوم الخميس بالمزرعه عشان تتعرفون
عليها وتتعرف هي على العائله
نور-يووووه باصبر لين يوم الخميس
نجلاء-وليه كل ها لحماس مين بتشوفين يعني
طالعها سلطان لكن جوالها دق وراحت تكلم
نور-قولي سلطان حلوه امنيه
سلطان-يوم الخميس تشوفينها وتعرفين
نور-لاعطني تفاصيل ولا ترى باروح معك اللحين اشوفها
سلطان-ليه ماعندك دراسه بكره؟اقول انتبهي اول ثانوي صعبه مو مثل المتوسطه
نور-شوف اللي يصرف علشان ماروح معه
سلطان-ههههههه
نور-يله عاد قولي حلوه
سلطان-ايه حلوه
نور-وشعرها كيف شكله؟
سلطان-طويل لونه اسود مثل الكحل
نور-وملامحها كيف؟
سلطان سرح وتخيلها قدامه-مدري وشلون اوصفها تجذبك ملامحها خاصه عيونها ونظراتها فيه بملامحها شي غامض يغريك تكتشفينه
نور-يالله يعني تنفع بطلة روايه
سلطان رجع لنفسه-انت للحين تقرين هالروايات؟؟
رجعت خالته واسكتت نور لان امها بتعصب اذا سولفت عن زوجة سلطان لكن
نور عرفت اللي تبي اهم شي طلعت حلوه حتى سلطان كان سرحان وهو يوصفها
يعني بيحبها غصب ولا طيب بيحبها...
رجع سلطان البيت ومالقى امنيه قال يمكن نامت من بكره الصبح شافها
داخله عليه وهو يفطر
امنيه-صباح الخير
سلطان-صباح النور,,امي ماتصلت عليك امس
امنيه-لا ليش
سلطان-كنت عندها امس وقالت انها بتسوي لك حفله يوم الخميس عشان تتعرفين على
اهلنا
امنيه سرحت تفكر بالناس اللي جايين يشوفون زوجة سلطان واللي اكيد عارفين
مين هي ووش مستواها بالنسبه لهم تخيلت شكلها والانظار عليها وهي متأكده
انهم بينتقدونها اذا كان عمها ابوسلطان وخالتها وجدته طيبين اكيد مو كل
الناس مثلهم ودلال بتكون معها ولا تلهى مع معارفها يمكن زارتها وراحت
معها من باب الفضول او الملل معقوله تكون دلال كذا ولا هي ظالمتها
سلطان-انا نفسي اعرف انت تسرحين وين
رفعت عيونها له تطالعه وتفكر هذا زوجها اللي عمرها مافكرت فيه وكل مايطري
على بالها تحاول تنساه هي ماتعرف عنه شي وش يحب وش يكره مين يكون سلطان يعجبها او لا
سلطان ارتبك يوم شافها وشلون تطالعه مايدري وش تفكر فيه كانت نظرتها
مركزه عليه لكنها نظره حايره كأنها تدور على شي فيه
سلطان-امنيه وش فيك؟!
امنيه وكأنها تكلم نفسها-اشوفك احاول اعرف مين يكون زوجي
سلطان-بدري!!توك بتشوفين اللحين
امنيه-لا بس احاول اقيم نفسي قدامك واعرف اذا الناس بيستكثرونك علي
سلطان-مااعتقد يهمك رأي الناس فيك
امنيه-طبعا مايهمني لكني راح اشوف هالراي بعيونهم ويمكن اسمعه في كلامهم
وباكون مضطره اني اتحمله واتعامل معه,,مع السلامه تاخرت
سلطان-وين؟ ماافطرتي!!
امنيه-مو مهم افطر في الكليه
راحت امنيه وسلطان يفكر(هالبنت مو عاديه كل ما اجلس معها تطلع لي بشكل
غير انا اللي نفسي اعرف مين تكونين ياامنيه ووش نقطة ضعفك اللي تطلعك
من هالبرود وكيف هي الحياة اللي عشتيها وخلتك كذا)
في بيت ام خالد وقت المغرب\\\ ام سلطان ودلال عند المدخل..
ام سلطان-ام خالد عندها احد
الخدامه-فيه ام عبدالله
دلال- فيه احد من العيال
الخدامه-لا كلهم طلعوا
دلال-فجر وين؟
الخدامه-في غرفتها اللحين اناديها
دلال-لا لاتنادينها انا رايحه لها
ام سلطان-سلمي على خالتك اول
دلال-زين باروح انادي فجر واجي اسلم عليها
راحت دلال لغرفة فجر وطقت الباب
فجر-ادخل
دخلت دلال وتفاجأت فيها فجر
فجر-دلووووول!!
دلال-وش فيك كأن لك سنه مو شايفتني
فجر-والله احسها سنين
دلال-ياحياتي يافجوره عشان هالكلام ابطلعك اليوم مشوار يحبه قلبك
فجر-امي ماراح ترضى عشان بكره دراسه
دلال-مايهمك خلي خالتي علي,,الا قولي لي مين اللي عند خالتي الخدامه قالت
ام عبدالله بس وانا ماره من عند المجلس سمعت صوت بنت
فجر-هذي اكيد زهور
دلال- مين زهور؟؟
فجر-ماتعرفين زهور صار لها سبع شهور عايشه مع ام عبدالله
دلال-من زوجات عيالها؟
فجر-لا هذي بنت ولد عم ابوعبدالله
دلال-وليه جالسه عندهم؟؟
فجر-هي من قريه وما كان عندها غير امها وابوها وتوفوا بحادث سياره ومالها
اقارب غير ولد عم ابوها اللي هو ابوعبدالله وهو جابها تعيش معهم
دلال-يالله مسكينه
فجر بحزن-تدرين يادلال اني ارحمها كثير انا يوم توفى ابوي احس اني خسرت كل
شي وانا عندي امي واخواني وشلون تحس هي
دلال-الله كريم والحمدلله انها على الاقل لقت احد تجلس عنده ام عبدالله بعد ماتزوجوا
عيالها الثلاثه فضى عليها البيت واكيد بتفرح انه جاء احد يملي عليها البيت
فجر-ياحليلك يادلال وكأنك ماتعرفين ام عبدالله هي صح مو شريره لكن عيالها
ماكانت تدري عنهم ولاتهتم فيهم وهي من بيت الى بيت تبينها تدري عن هالمسكينه
انت لو تشوفين لبسها تدرين ان ام عبدالله عمرها ماودتها للسوق كل لبسها
تنانير سوداء وبلايز واسعه وطويله وكأنها تفصيل كلها الوان غامقه يكفي انها تلف على شعرها طرحه تخيلي!!
دلال-ولايهمك وش رايك نقولها تروح معنا السوق
فجر-وحنا بنروح السوق؟
دلال-ايه ناقصني كم غرض عشان حفلة يوم الخميس
فجر-اي حفله؟؟
دلال-الحفله اللي بتشوفين فيها زوجة سلطان
فجر-يالله نفسي اشوف بديلة لميس
دلال-يالله خلينا نروح نقول لخالتي اننا راحين
طعت فجر ودلال من الغرفه وهم يمشون بالممر سمعت فجر صوت التلفزيون العالي من
غرفه كان بابها مفتوح نصه
فجر-انتظري اسكر التلفزيون هذا نواف كالعاده طلع وخلاه مفتوح
دلال(لايكون على كثر عيوبه مايسمع بعد)جاها فضول تعرف شكل غرفته وتشوف
اذا كان ذوقه تغير او تعدل ودخلت ورى فجر,,شافت غرفته قمه في الاناقه والترتيب(هو كان مسافر اكيد هذا ذوق خالد)والتفتت على جدار كان من اوله
لآخره كله رفوف مليانه كتب(ايه هذا اللي يخصك من هالغرفه هالكتب اللي
تعيش عليهن اووف مادري وشلون يتحملهن منظرهن يجيب الاكتئاب يالله لو اسوي فيهن اللي سويته من سنين)كملت جولتها بغرفته وشافت على الجدار عند التسريحه
ورقه صفراء قديمه مرسوم فيها بنت لابسه بنطلون وشعرها منفوش وطاير
دلال-هههههه الله عليك يافجر صدق هديه روعه لكن ياخسارة دروس الرسم
اللي كنت اعطيها لك مافادتك كنت اظنك ترسمين احلى من كذا
فجر-هذي مو رسمتي نواف اللي راسمها من قبل ما يسافر وللحين محتفظ فيها
دلال-لاتقولين اكيد هذي فتاة احلامه تصدقين لايقين على بعض
فجر-لا مو فتاة احلامه الا عدوته حتى انه مسميها الجنيه تدرين كنت احسبه
يمزح لكنه مره قال لي ان هذي الجنيه ادخلت غرفته ولعبت باوراقه وكتبه
وبدال ماتستحي من اللي سوته راحت تفتخر فيه وانا كرهتها لانه يقول
ان امي ضربتني على بالها اني انا اللي خربت الغرفه
دلال-وانت مصدقه هالتخاريف الظاهر اخوك جن وقعد
وهم نازلين دلال كانت تفكر(معقوله يقصدني؟معقوله كان يعرف انه انا اللي سويت كذا؟وشلون ونا ماقلت لاحد غير سلطان ومستحيل يقول له!يمكن شافني
ذاك اليوم وانا اطلع من غرفته ولا الخدامه وقالت له!لكن هو وشلون يسمح
لنفسه يرسمني بهالطريقه لو ماكانت فجر معي كان قطعت الورقه)
دخلوا المجلس وسلمت دلال عليهم وتسأل عن اخبارهم ويسألونها عن خالتها وعن
السفر لكن زهور كانت بعالم ثاني(واخيرا شفتك يادلال كان نفسي اشوف اللي دايما ام خالد تجيب طاريها واللي فجر ماتتكلم الا عنها ياخوفي من اهميتك بهالبيت)
زهور كانت تحب خالد تعرف ان هالحب من طرف واحد لكن هالحب هو الشيء الوحيد اللي مالي قلبها وحياتها من بعد ابوها وامها تذكرت يوم شافته في عزاء ابوه
كانت راجعه للبيت يوم شافت ان ام عبدالله ناويه تجلس لنهاية العزاء اما هي فما قدرت تتحمل اكثر كل شي ذكرها بوفاة اهلها كانت تبي ترجع للبيت وتطلع الدموع اللي احرقت عيونها وهي تمشي سمعت فجر تصيح لحالها في الحديقه كانت بتروح لها لكن سمعت عندها صوت رجل طلت عليهم من ورى الجدار مو من عادتها انها تتسمع على احد لكن صوته شدها تعرف مين هالشخص شافت خالد وهو يضم فجر وسمعته يواسيها ويطلب منها تكون قويه كان يتكلم ويتكلم وزهور سرحانه معه ماتدري ليه حست كأن الكلام موجه لها يمكن لانها تمنت يوم وفاة اهلها ان احد يوقف بجنبها ويواسيها ويقويها بمثل هالكلام مسحت فجر دموعها ودخلت تصلي وتدعي لابوها بالرحمه مثل ماقالها خالد كانت زهور بتروح لكنها شافته وشلون تخلى عن كل القوه اللي كان متمسك فيها قدام اخته شافت انهياره حست بالقهر والحرمان بدموعه مافيه احد مثلها بيفهم احساسه لانها مرت فيه بكت معه بصمت ومن يومها بدأ اهتمامها فيه يزيد كان اول شخص غير اهلها تهتم فيه كانت مخلصه ثانوي بس مادخلت جامعه لان مافيه جامعه قريبه لقريتهم عشان كذا اشغلت كل وقتها بخالد شباك غرفتها كان يطل على باب شارعهم كانت تصحى الصبح تشوفه وهو رايح للشركه ولاتنام لين ماتشوفه رجع كانت تاخذ اخباره من ام خالد اذا راحت مع ام عبدالله عندهم لكن اللي خوفها اسم دلال اللي ماينقطع من البيت انتبهت لكلامهم ورجعت تشوف دلال...
دلال-لو اعرف ان فجر بتفقدني هالكثر كان غبت عنها من زمان عشان اعرف وش كثر تحبني
ام خالد-مو بس فجر كلنا فقدناك حتى خالد اللي مايجلس في البيت ولا ينتبه لشيء سأل عنك يقول من زمان ماتصلت
كتمت زهور شهقه كانت بتطلع منها(اللحين فهمت انا ليش مو مرتاحه لطاريك في هالبيت يادلال هذا اللي كنت خايفه منه طبعا انت انسب وحده تفكر فيها ام خالد لولدها,والله اني غبيه حتى لو ماكنت انت بتكون وحده غيرك ام خالد علاقاتها كثيره ويوم بتزوج ولدها بتدور على وحده تستاهله متعلمه انيقه ومن عايله معروفه تفيده ولا عمرها بتفكر فيني ولا حتى باخطر في بالها وحده ماكملت تعليمها ومن قريه ومالها اهل وحتى اللبس ماعرف البس)
دلال-زهور وين رحتي اكلمك؟
زهور وهي حاسه انها بتختنق-لاتعبانه شوي
دلال-انا وفجر رايحين السوق وش رايك تجين معنا
زهور-لا ما اقدر احس اني تعبانه
دلال-على راحتك وماتشوفين شر,,يله يافجر
ام عبدالله-وش فيك يازهور توك مافيك الا العافيه
زهور-مادري ياخاله حسيت بتعب فجأه
وكان هذا باين من ملامحها اللي تبدلت فجأه
ام خالد-نوديك للمستشفى؟
زهور-لا ماله داعي انا باروح البيت ارتاح
ام عبدالله-خلي الخدامه تروح معك عشان اذا احتجتي شي
راحت زهور للمطبخ تنادي الخدامه ..وعند باب المدخل وقفت دلال وفجر..
دلال-مادري ليه حسيت ان زهور مو طايقتني
فجر-لا هي طيبه مره وتنحب بس مادري وش فيها اليوم يمكن لانها تعبانه
دلال-يمكن
خالد كان راجع ياخذ اوراق محتاجها شاف فجر واقفه مع وحده بعبايتها توقع انها دلال وانحرج يمر من قدامهم وقرر انه يروح يدخل من باب المطبخ
فتح باب المطبخ ويوم كان بيدخل صرخت الخدامه عليه ورجع بسرعه وهو مايدري وش صار راحت له الخدامه تكلمه عند الباب
خالد-وش فيه ليه ماتبيني ادخل؟؟
الخدامه-بنت الجيران في المطبخ
خالد-مانتبهت لاحد ماشفتك الا انت وثلاث خدامات
زهور انصدمت وحست انها سمعت اليوم اللي يكفيها عشان يموت هالحب قبل لايشوف النور,,سمع خالد صوت خطوات سريعه طلت الخدامه مع الباب على المطبخ
الخدامه-خلاص راحت
خالد عرف انها سمعته وهي اللي ركضت بسرعه,حاول يتذكر اللي شافهم مانتبه للملامح بس كل اللي شافهم توقعهم خدم مايذكر لمح احد يحس انها بنت
خالد-مين البنت اللي كانت هنا؟؟
الخدامه-زهور قريبة ام عبدالله
تذكر كأنه سمع من امه شيء عن بنت جت من قريه اكيد هذي هي
زهور دخلت غرفتها ورمت نفسها على السرير وبدت تصيح بصوت عالي حست انها وحيده ويتيمه وانسرق منها الامل الوحيد اللي كان ينور ظلامها
أناآسفه,, لو غلط قلبي عليك
وقال أحبك
واعذرني,, لو قسى نبضي عليك
وردد اسمك
وسامحني,,اذا زلت عيوني وتمنت انها بهاللحظه تشوفك
ارحل عني بعيد ادري مايهمك
اتركني في مهب الريح اعاني
بين جرحين
جرح البعد عنك,,وجرح حبك
ليه يادمع الالم,,تقسى علي
ليه يانبض الوهم,,تخطي علي
وش ذنبي اللي بحقك ارتكبته
غير دمع بعادك اللي ذرفته
وكم ذكرتك في ظلام الليل
وكم نطرتك
لاني غصب عني وعنك,,احبك
::الجزء السابع::
في بيت ام خالد الساعه11 دخل نواف وشاف امه في الصاله...
نواف-السلام عليكم
ام خالد-وعليكم السلام والرحمه
نواف-وش اخبار الوالده
ام خالد-الحمدلله بخير وش اخبار المستشفى؟
نواف-كل شي تمام,يمه وين فجر لاتقولين عند الجيران بعد
ترى روحاتها زادت حشى تجلس في بيتهم اكثر ماتجلس في بيتنا يمه فجر صارت في المتوسطه يعني مو صغيره وجيرانا عيالهم كبار وانت وخالد تاركينها على كيفها
ام خالد-ياولدي جيرانا انا واثقه منهم ولا ماتطمنت اتركها عندهم كل هالوقت وش اسوي فيها تزعجني زهقانه ماعندي احد اتكلم معه ودلال ترجتني اخليها كل يوم تروح لهم كم ساعه
نواف بعصبيه-ودلال وش دخلها في الموضوع؟مالقيتي الا هذي تسألينها عن اللي يصلح واللي مايصلح
ام خالد باستغراب-نواف وش فيك!! دلال مثل بنتي وتعتبر فجر اختها واكثر ثنتينهم الله مارزقهم خوات بس عوضهم ببعض
نواف-والاخت دلال قالتلك ان فجر عادي تجلس لهالوقت عندهم وهي وراها بكره مدرسه
ام خالد-لااله الا الله ومين قالك ان اختك عندهم اللحين
نواف-فجر في غرفتها؟
ام خالد-لا راحت مع دلال السوق وبتتعشى عندها وترجع
نواف-الا هالوقت عاد وهي عندها دراسه ليه ماراحت الخميس
ام خالد-نواف الدراسه توها مابدت تنتضم
نواف-اللي مايتعود على الدراسه بأولها ماراح يتعود عليها ابدا وان كانت هذي من نصايح دلال خليها توفرها لنفسها
ام خالد-اللي يسمعك يقول هاللحين دلال ماتبي اختك تدرس
نواف-لا بس انا اعرف دراسة دلال وشلون ولا ظنيت انها تغيرت وماابي فجر تصير مثلها
وقام عن امه اللي ارتاحت لانه صدع راسها وهو مو راضي يقتنع الا باللي في راسه
يوم الثلاثاء العصر في بيت أم عبدالله\\راحت أم خالد لأن أم عبدالله كانت عازمه حريم الحاره وراحت معها فجر من الزهق لأن بنات الجيران اللي دائما تروح عندهم ما كانوا موجودين،بعد ماملت من سوالف الحريم سألت أم عبدالله...
فجر_خالتي أم عبدالله وين زهور؟
أم خالد_صح ماشفناها لا تكون للحين تعبانه!
أم عبدالله_لا مو تعبانه بس هي كذا قليل ماتطلع من غرفتها وأنا قلت أخليها على راحتها
أم خالد_بس مايصير كذا لازم تطلع وتشوف الناس بعدها صغيره على هالحبسه!
أم عبدالله_وش أسوي فيها بعدها متأثره من وفاة أهلها ومو متعوده على البيت
أم علي_وشلون بتنسى إذا كانت حابسه نفسها بين أربع جدران ومالها شغل غير تفكر في اللي راح
أم خالد_حاولي تقربين منها ياأم عبدالله وتعوضينها عن أمها
أم عبدالله_أنا ماالله رزقني بنات تعودت على طبع العيال مايبون لهم دلع ولا أنا عقب هالعمر فاضيه أدلع
طلعوا الحريم من سالفة زهور لسالفه ثانيه بدأوا يقارنون بين تربية البنات والأولاد وأيهم أحسن لكن فجر للحين تفكر في حال زهور ورحمتها هي من توفى أبوها وهي تهتم بأي أحد تسمع انه يتيم لأنها للحين تحس بالحرمان إذا فكرت في أبوها،قامت فجر بتطلع
فجر_خالتي أم عبدالله معليش أروح لزهور؟
أم عبدالله_روحي خلي الخدامه تطلعك لحجرتها
راحت فجر مع الخدامه وطقت باب الغرفه وسمعت زهور تقولها تدخل وادخلت،تفاجأت زهور يوم شافت فجر كانت متوقعه اللي تطق الخدامه حتى فجر تفاجأت يوم شافت زهور لابسه جلابيه حمراء وشايله الطرحه كان شعرها الأسود مطوي فوق راسها وباين انه طويل مره كان شكلها أحلى من دائما وكأنها أصغر بسنين كانت حلوه بس لبسها والطرحه اللي خرب عليها وخلاها أكبر من عمرها لمحت فجر بين يديها دفتر كانت تكتب فيه...
زهور_فجر!! أهلين تفضلي
فجر_جيت مع أمي لكن مليت من سوالف الحريم،كنت أدورك ليه مانزلتي؟ للحين تعبانه؟
زهور_لا مافيني شي بس أنا دائما أجلس في الغرفه حتى إني ماعرفت ان عندنا أحد
فجر_أجلس عندك عادي؟
زهور_أكيد، لكن قبل لازم اضيفك بأروح شوي وأرجعلك
زهور كانت فرحانه ان فجر دورتها وفقدتها على الأقل تجلس مع أحد قريب من خالد
يمكن تعرف عنه أكثر، أما فجر فكانت فرحانه إن زهور بتطلع من الغرفه عشان تعرف وش كانت تكتب...
فجر(والله انك طيبه يازهور وعلى نياتك تطلعين وتخلين دفترك بين يديني على بالك ماراح أشوف وش كنتي تكتبين) وفتحت الدفتر وقرت الصفحه اللي كان فيها القلم..
أكتب هوى قلبي على سود الأهداب..
وانقش على كفوفي غلاك وعذابي..
ياللي خذيت القلب مني بلا حساب..
وحطيت من دونه حرس وألف بابي..
في عالم عيونك سرى القلب مرتاب..
مثل حلم اللي بالقيض يطرد سرابي..
قلبي عابر سبيل في عالمك غاب..
غريبه بديارك وحبك عثابي..
ليتك تحس بقلب فيه الحب لك ذاب..
وليتك تعرف انك في العمر كل أحبابي..
(قصيدة حب!! هذا آخر شي توقعته! معقوله زهور تحب! ولا تكتب بدون سبب،ومين اللي يحبها أكيد كان في قريتهم بس ليه ماتزوجها؟ يمكن حب من طرف واحد)
رجعت الدفتر مكانه خافت تجي زهور..ورجعت زهور معها عصير وكيك
زهور_ذوقي الكيك اللي أنا مسويته وقوليلي رايك
فجر بعد ماذاقته_الله روعه شكلك فنانه في الطبخ
زهور_ماعندي شي يسليني غير الطبخ
فجر_شكلي بآخذ عندك دروس طبخ عشان أسويها لخالد و نواف يمكن تصير أنفع من دروس الرسم
زهور_أنت تاخذين دروس رسم؟
فجر_ايه مع دلال تعبت تعلمني وكل ماأروح لها ألعب في ألوانها بدون فايده لين فقدت الأمل إنها تطلعني فنانه
زهور_علاقتك بدلال قويه مره رغم فرق السن الكبير
فجر_تصدقين أنا ارتاح مع دلال وانبسط أكثر من إذا رحت عند بنات جيراننا اللي كبري ودلال أنا أحسها أختي مو بس هي حتى سلطان أخوها تدرين حنا كلنا مثل الأخوان دايما كنا نطلع ونروح ونسافر مع بعض حتى دلال دائما تكلم خالد عادي لأنهم يعتبرونه أخوهم الكبير من كانوا صغار الوحيد اللي بعيد عنهم نواف يمكن لأنه سافر وبعد دلال ماتطيقه ولا هو يطيقها بينهم تار من أيام الطفوله
لكن زهور ماكانت تسمع باقي الكلام لأنه وقف تفكيرها عند أهم كلمه، خالد يعتبرها أخته حتى هي تعتبره أخوها..
في بيت أم خالد\\ كان خالد جالس في الصاله ينتظر نواف بيروحون للشركه مع بعض..نواف من زمان ماشاف سلطان وأبوه وبيروح يسلم عليهم، نزل نواف...
خالد_بدري كل هذا تلبس أجل يوم زواجك وش بتسوي؟
نواف_مو قبل ماتتزوج أنت
خالد_يعني عندك استعداد!
نواف_تبي الصراحه ماعندي أي استعداد ولا خلق بعد
خالد_وين الوالده تسمع؟
رن التليفون وخالد كان أقرب له ورد...
خالد_نعم......
هلا والله حمدلله على السلامه
.......ايه والله فقدناك........
هههههه لا خلاص عرفنا قيمتك ثاني مره لاتطولين.....لا والله مو فيه رايحين للجيران .....مع السلامه
نواف كان يطالع بخالد مستغرب مين هذي اللي يسولف و يضحك معها أكيد وحده من عماته...
نواف_مين؟
خالد_هذي دلال كانت تبي فجر
نواف_دلال!!!
خالد_إيه دلال وش فيك مستغرب؟
نواف_لابس على هالميانه اللي تكلمها فيها توقعتها وحده من عماتي
خالد_نواف هذي بنت عمي أبوسلطان وأنا أعتبرها هي وسلطان أخواني
نواف_لا بس تفاجأت ماتوقعتها للحين تكلمك عادي
خالد_عشاننا كبرنا يعني! حنا بيننا عشره تصدق اني أستحي أسولف مع بنات عماني مثل ماأسولف مع دلال
نواف_الظاهر إنك للحين محامي الدفاع عنها
خالد_وأنت للحين عدوها الأول؟
نواف_يالله نمشي ترانا تأخرنا
نواف ما كان يبي يجاوب على خالد حتى لو كان سؤاله من باب المزح..لأنه مايقدر يقول انه للحين يكرهها وخاف خالد يضحك عليه انه على كبره للحين مايطيقها عشان أشياء سوتها من سنين..في السياره كمل نواف تفكيره(غريب مع اني أكرهك يادلال ولا يعجبني أي شي فيك إلا إن مافيه بنت غيرك أثرت في حياتي! وأي وحده تمر علي لازم أقارنها فيك! يمكن لأنك الصوره الوحيده والأخيره اللي أخذتها معي طول سنين غربتي) لكنه تأكد انها للحين ماتطيقه والدليل فرق مكالمتها معه و مكالمتها مع خالد...
مر يوم الأثنين والثلاثاء على سلطان وأمنيه بهدؤ، سلطان صار يتكلم معها عادي صح كانت مواضيع عامه وعاديه.. كانوا يتكلمون عن أي أحد إلا عن نفسهم واللي بينهم وكذا أريح من يوم قالت له إنها ماتحس انه ظلمها ولاتلومه على شيء قرر انه يقنع نفسه بكلامها ويتناسى أي شعور ثاني وإذا طلقها بيحاول يعوضها بأي شي حتى لو يكتب هالفيلا بإسمها..صح إنه أول مره يقسى على بنت كذا وهو اللي دائما يحس إن البنت لازم تعامل بإهتمام ورقه وهذا اللي كان يسويه دائما مع لميس ودلال وبنات خالته اللي بنفس الوقت خواته لكن أمنيه مو مثل ولا وحده فيهم..أمنيه حاله نادره، أول مره تمر عليه إنسانه يحس انها أكتفت بنفسها عن الناس.. إنسانه ماتعرف تحزن ولاتبي تفرح..إنسانه تعيش أي حال تنحط فيه ولاتحتاج لأحد.. بالمقابل يشوف لميس إنسانه أهلها عايشين عشانها وتدلعت وتحقق لها كل اللي تبيه شاف رسايلها أشعار أو كلام حس إنها إنسانه لها قلب يفرح ويزعل إنسانه ماتعيش بدون اللي يحبونها فرق بين الثنتين وحده عندها كل شي وتبيه و وحده ماعندها أي شي ومستغنيه عنه وعن الدنيا بكبرها...
يوم الأربعاء في الشركه\\ كان سلطان في مكتبه ودق جواله اتفاجأ يوم شاف رقم أمنيه(غريبه أمنيه تدق علي لايكون صار فيها شي!!!)
أمنيه_السلام عليكم
سلطان_وعليكم السلام
أمنيه_عمي عندنا في البيت وعزمته يتغدى معنا حاول تجي بدري
سلطان_ليش ابوي جاي؟
أمنيه_كان جايبلك أوراق يحسبك رجعت من الشركه
سلطان_خلاص أنا اللحين جاي
أمنيه_زين مع السلامه
سلطان_مع السلامه
وصل سلطان للبيت وشاف أبوه وأمنيه في الصاله...
سلطان_السلام عليكم
أمنيه وأبوسلطان_وعليكم السلام
أمنيه_دام سلطان جاء بأروح أجهز الغداء
على الغداء سلطان وأبوه كانوا يتكلمون عن الشركه ومشاريعهم وأمنيه ساكته وتسمعهم ألتفتت على سلطان تشوفه (نفسي أفهم شعوري اتجاهك! فيه شيء يشدني لك بس أحس بحاجز كبير بيننا حاجز يخليني أخاف منك أدري إني ماهميتك وإنك تتمنى تتخلص مني بسرعه وهذا اللي يقهرني أحس إني مفروضه عليك غصب وكلامك معي مجامله ياليتك ماتكلمني مثل قبل كان أريح لي)
ألتفت عليها سلطان وشافها تطالعه استغرب النظره اللي كانت في عيونها وصدت عنه بسرعه وبدت تتكلم مع عمها
يوم الخميس قبل العصر بدت تستعد أمنيه للحفله ماكانت مهتمه لها ولا ناويه تكشخ وتزين نفسها هي عارفه نظرتهم لها من اللحين وشلون بتكون فليش من البدايه تحاول إنها تعجبهم، وهي تطلع وش كانت ناويه تلبس لمحت التيور الغالي اللي أصرت عليها سندس تشريه كان روعه وفخم تذكرت يوم تلبسه عشان تشوفه أم ياسر وشلون انهبلوا عليها لدرجة إن ياسر يوم دخل عليهم ما عرفها على باله إن وحده عندهم كان لايق عليها لونه وموديله مطلع تناسق جسمها وطولها ماتدري ليه طرا عليها سلطان تخيلته لو يشوفها فيه وش بتكون ردة فعله خاصه لو حطت مكياج نفس اللي حطته يوم تجرب التيور هي نفسها استغربت من شكلها ولا عرفت نفسها وبسرعه قبل ماتغير رأيها لبسته وحطت مكياجها..لكن سلطان تأخر وهي تنتظره دق عليها وقال إنه تحت في السياره وقالها بسرعه تلبس عبايتها وتنزل حست بخيبة أمل بعدين فكرت (أحسن إنه ماشافني يعني وش كنت متوقعه منه؟)
في المزرعه\\كانت دلال وأمها وخالتها وبناتها وأم خالد جايين بدري يرتبون للحفله..دخلت عليهم أمنيه
أم ندى_ماشاءالله مين هاللي دخلت علينا؟
دلال ألتفتت تشوف عن مين تتكلم خالتها وشهقت_أمنيه!!!
خالتها يوم عرفت ان هذي زوجة سلطان استخسرت كلمتها اللي قالتها، قامت دلال بسرعه لأمنيه وسلمت عليها
دلال_واااو وش هالكشخه والله إني ماعرفتك تعالي أعرفك على العائله قبل يجون الناس
قربت أمنيه لهم وسلمت عليهم كلهم وباركوا لها أحد بنفس وأحد واضح إنه من غير نفس
جت وحده من الخدامات تقول إن وحده من عمات نجلاء وصلت وراحوا لها الحريم وجلسوا البنات...
دلال_وهاذي يانور زوجة سلطان اللي أزعجتينا تبين تشوفينها عساك أرتحت اللحين
نور_ايه ارتحت يوم عرفت ان سلطان ذوقه حلو ويعرف يختار
نجلاء_بس هو ما اختارها الحظ طيحها فيه
نور_أجل حظه أحلى من ذوقه يوم الله فكه من البقر وطيحه بالقمر
أمنيه_تسلمين يانور
نجلاء أرتفع ضعطها من نور وقررت انها تنتقم من أمنيه وتعرفها وضعها عشان ماتصدق نفسها بعد كلام نور...
دلال_قولي لي سلطان وش رايه بهالكشخه؟
أمنيه_ماشافها كان متأخر وما شفته إلا في السياره
دخلت ندى توها جايه وسلمت عليهم وحطتها أمنيه مع قائمة اللي يكلمونها من غير نفس وهم خالة سلطان وبناتها ماتدري وش معنى نور هي الوحيده اللي ماتكرهها من هالعائله، لميس بنت ندى لصقت في أمنيه تطالعها وتلعب في شعرها أخذتها أمنيه وباستها وحطتها في حضنها...
دلال_هههه شكلها معجبه فيك
تراها تحب في الشعر الطويل
نجلاء تطالع ندى بقهر_ندى عمتي فيه اخذي بنتك وروحي سلمي عليها
وفعلا قامت ندى وأخذت من أمنيه بنتها بقوه واطلعت بدون لاتقول ولا كلمه..دلال خافت ان نجلاء تقول شيء ثاني لأنه باين من عيونها إنها معصبه
دلال_حتى حنا تعالوا نطلع نسلم وبعد مايصير يجون الناس مايشوفون أحد يستقبلهم
وطلعوا البنات وفجر ونور جلسوا...
نور_وش رأيك والله أمنيه أحلى من لميسوه
فجر_أنت لو تشوفين قرد قلتي انه أحلى من لميس توك حطيتيها من البقر
نور_ههههه شفتي وجه نجلاء يوم قلت كذا بس قولي الصراحه أيهم أحلى
فجر_في الشكل لميس تجذب النظر أكثر لكن أمنيه تحسين انك تحبينها قبل تكلمينها
نور_روحي والله ماعندك سالفه إلا بالجزء الثاني من كلامك أنت وش عرفك بقصص الحب واحد مثل سلطان جذاب و غني وشخصيه وأهميه وكل بنت تتمناه المفروض مايحب وحده دلوعه ومغروره وتافهه مايهمها إلا شكلها ولبسها مثل لميس وحده تبيه بس عشان يهتم فيها ويدلعها لا عشان الروايه تكون صح لازم يآخذ وحده مثل أمنيه حلوه وطيبه وجمالها هادي وطبيعي ومثل ما أنتي حسيتي تحبينها عشان روحها مو شكلها
فجر_حشى حللتيهم تحليل زين مادام عندك هالخبره أبي آخذ رايك بقصة حب ماكتملت
نور بحماس_صدق قولي قولي وماراح أبخل عليك بخبرتي
فجر قالت لها عن زهور ووضعها والقصيده اللي كاتبتها...
فجر_شكلها تحب واحد في القريه اللي كانت فيها
نور_لا ما أتوقع
فجر_ليه!!
نور_لأن كلمات القصيده اللي قلتيها لي ما تطري أي فراق بالعكس هو قريب منها لكن مو حاس فيها بعدين أنت تقولين إن أبوعبدالله سألها عن الأرض اللي كانت لأبوها وعن بيتهم تبي تبيعهم ولا تأجرهم وقالت يبيعهم لأنها ماتبي ترجع هناك مره ثانيه يوم ماتوا أهلها لو كان اللي تحبه في قريتهم كان بقت هالأرض والبيت عشان ماتنقطع الصله بينهم
فجر_صح! والله إنك خطيره لكن من تتوقعين تحب؟عيال أم عبدالله كلهم متزوجين
نور_احتمال تكون تحب واحد منهم وعشانه متزوج تدري إن مالها أمل أو تكون تحب واحد من أقاربهم و مو قادره تلفت انتباهها له
فجر_يارب يحبها مثل ما تحبه أدعي معي
نور_لهالدرجه تحبينها!
فجر_ايه يكفي انها يتيمه ومابقى لها أحد في الدنيا وهي طيبه مره وحنونه وعلى نياتها
نور_هي معزومه في هالحفله؟
فجر_لا خساره اليوم زواج بنت أخت أم عبدالله وأكيد راحت معها
أكتملوا الناس المعزومين وكانوا أكثر من اللي توقعته أمنيه وعلى كبر المزرعه ماكان فيها مكان فاضي من الناس، جلست مع أم حمد تسولف لكن يوم جت أم ندى حست ان الجلسه صارت ممله وقامت عنهم راحت تدور دلال داخل لكنها صادفت نجلاء...
أمنيه_ما شفتي دلال؟
نجلاء_وش تبين فيها؟
أمنيه_من العصر ماشفتها مادري وين راحت؟
نجلاء_وأنت مافهمتي يعني
أمنيه بإستغراب_وش أفهم!!
نجلاء_واضحه هي تتهرب منك بس دلال طيبه وماتحب تجرح أحد تبينها تآخذك عند البنات اللي تعرفهم وتقول هذي مرة أخوي!ويسألون أنت مين وأهلك مين، إذا دلال كانت تكلمك وتزورك فذاك كان من باب الفضول والملل أو مثل ماتقول راحمتك وعشان خاطر أبوها لكن مو تصدقين نفسك وتلزقين فيها دلال تحب سلطان وتتمني سعادته اللي كلنا نعرف إنها مع لميس البنت اللي يحبها وصديقتنا اللي نعرفها من سنين واللي دلال بنفسها كانت المرسال بينهم واللي سلطان أصر يسمي بنت ندى عليها تبين دلال تبيع كل هذا وتحبك؟ أو حتى تهتم لك؟ أنت داخله حياتنا غلط والمفروض تحسين على دمك وتبعدين عننا ما سألتي نفسك ليه ما عزمت خالتي أختك على هالحفله لأنهم مايبون الفضيحه تكبر يكفي انهم بيتحملون يعرفون الناس عليك أنت لا تحسبين عشان لبستي وكشختي بتصيرين وحده مننا وإذا كانوا يجاملونك فأنا ما عندي استعداد أجامل و إن كان حتى زوجك نفسه ما يبيك وش مجلسك معه؟
أمنيه ببرود_تدرين يانجلاء اني معجبه بصراحتك أنا أفضل ان اللي يكرهني يقول لي في وجهي ولا يسوي نفسه طيب وهو مايطيقني تصدقين اني احترم هالشجاعه اللي فيك ودامك مو طايقتني وهالشعور متبادل ما أطول عليك عن اذنك
راحت أمنيه ونجلاء تستوعب كلامها(هذي لوح ما تحس! كل اللي قلته لها وتقولي أحترم صراحتك! لا وقوية عين تقولي بعد انها مو طايقتني! اللحين تأكدت انها أخذت سلطان طمع ومو مهتمه فيه)
في قسم الرجال كان خالد وسلطان و فواز واقفين مع بعض يسولفون ودق جوال فواز أبعد عنهم شوي لكنهم لاحظوا تغير ملامحه سمعوه يقول...
فواز_زين أهدي عشان أفهم وش تقولين؟
وصار يتلفت على الناس وكأنه يدور مكان بعيد عن الناس مشى من عند الشجر المكان اللي يودي لقسم الحريم عصب سلطان كان وده يروح يقول له يرجع بس ملامحه تدل ان الإتصال خاص وأكيد يبي يكلم بهدؤ واستحى انه يكلمه وفكر ان أكيد مافيه أحد من الحريم بتروح عند الأشجار لأنه مكان بعيد قليل أحد يمشي فيه...
فواز_قولي وش صار؟
دانه_أبوي رجع من السفر اليوم وتهاوش مع أمي وطلع وأمي في غرفتها ومو راضيه تفتح
فواز_خلاص أنا أدق أكلمها
دانه_جوالها عندي في الصاله من اليوم يدق ولا رضت تفتح تآخذه
فواز_زين خليها تهدى شوي وأنا أكلمها
دانه_وأنا وش يصبرني!
فواز_دانه الله يهديك اللي يسمعك يقول أول مره يتهاوشون ياما تهاوشوا ورجعوا تصالحوا
دانه_ ايه ياخالي بس احساسي يقولي إن هالمره غير وجه أبوي وهو طالع من البيت وزعل أمي وصياحها لهالدرجه و..وكان اللي سمعت
صح أظن أبوي متزوج
لكن فواز ما كان يسمعها كان سرحان باللي يشوفها قدامه حس انه يتخيل شاف في البنت اللي قدامه كل ما يتمناه رفعت عيونها له وشافها منصدمه من وجوده حس انها محرجه وخايفه وبالغصب قدر ينزل عيونه عنها مع انه كان وده تشبع عيونه من شوفتها شافها تركض يوم رفع راسه ماكان باقي من الحلم إلا ريحة عطرها الشيء اللي أثبتله إنها حقيقه مو خيال شاف ان شكله قرب من قسم الحريم وانحرج من نفسه كان بيرجع يوم شاف الجوال اللي في يده وتذكر بنت أخته...
فواز_دانه
دانه_خاااالي وين رحت!!
فواز_لا..أنا..تدرين أنا بأسافرلكم اليوم أنا اللحين في حفله بأطلع للبيت آخذ لي لبس وأمشي على طول بس اسمعي يادانه لاتقولين لأمي ولا لأماني شيء لين أجي وأعرف الموضوع
مشى فواز بسرعه حتى يبعد عن قسم الحريم وهو راجع شاف خالد اللي كان من أقرب أصدقاءه رغم ان فواز كان أصغر منه أما سلطان فكانت معرفته فيه معرفة عمل...
خالد_خير فواز شكلك تغير من جاك هالإتصال عسى ماشر؟
فواز_مشاكل أختي وزوجها كالعاده لازم أسافر لهم، وين سلطان أبي أتعذر منه لأني بأروح لهم اللحين
خالد_أهلك بيسافرون معك؟
فواز_لا ومابي أمي تعرف لأنها بتصر تروح معي وهي تعبانه ويمكن الموضوع مايسوى، وما عليك أمر ترجع أهلي مع أهلك
خالد_خلاص ولايهمك
فواز_أنا بأدق عليهم وأقول اني انشغلت وأعلمهم انك بترجعهم بأروح أكلم سلطان
خالد_تلقاه في المجلس
راح فواز للمجلس يدور سلطان لكنه مالقاه في هالوقت دقت عليه أخته أماني
فواز_عمرك طويل توي كنت بأدق عليك
أماني_ليه!
فواز_قولي أول أنت وش تبين؟
أماني_كنت بأقولك أمي تبي تتأخر شوي مو أول مايروح أحد تتصل علينا تقول يله
فواز_تآمر أم فواز ماطلبت أنا كنت بأدق عليك أقولك إن عندي شغل ضروري أسويه اللحين وقلت لخالد يوصلكم مع أهله، و..و..
أماني_تكلم فواز وش عندك؟
فواز_بصراحه أبي أكلفك بمهمه
أماني_وش هالمهمه؟
فواز_أنا كنت أكلم بالجوال وأبعدت عن زحمة الرجال ماعرفت إني قربت من قسم الحريم كنت متوقع فيه فاصل بينهم وشفت وحده كانت عند الشجر لحالها بصراحه دخلت قلبي أتوقع انها من أهل سلطان ماحد رايح لهالمكان إلا إن كان من أصحاب المزرعه أبيك تعرفين مين هي وتعرفين كل شي عنها أبي أخطبها
أماني_تخطبها! بهالسرعه
فواز_أقولك البنت مثل اللي تمنيتها ودخلت قلبي أهم شي عشان تعرفينها هي لابسه فيروزي وشعرها طويل و..
أماني_خلاص عرفتها قبل شوي لمحتها مع أم سلطان صح عليك أتوقع إنها وحده من بناتهم و...
سلطان اللي كان واقف قريب من فواز سمع كل كلامه تحرك من مكانه بسرعه قبل ينتبهله لأنه كان معصب ولا يبي يكلمه، كان قد قابل خالد وقاله ان فواز راح المجلس يدوره فراح له سلطان لكنه ماتوقع يسمع اللي أسمعه (مين هذي اللي شافها فواز؟ كم مره قلت إذا صار فيه رجال لا يروحون عند الشجر! وأنا ليش معصب يمكن ماتكون وحده من أهلي الحمد لله إني مسكت نفسي وماتهورت وكلمته، بعدين هو ماله ذنب اللي صار موقف عادي وفواز انسان محترم ما ينخاف منه والدليل انه على طول قال لأهله وفكر إنه يخطبها)
فواز طلع وشاف خالد...
خالد_جاك سلطان؟
فواز_لا دورته في المجلس مالقيته
خالد_الظاهر انكم صرتم مثل القطو والفار توي قلتله انك تبيه وراح يشوفك
فواز_ما صادفته المهم أنا تأخرت بأروح اللحين وأنت تعذر لي منه وترى قلت لأهلي يروحون معك، مع السلامه
خالد_مع السلامه
في الطريق فواز كان يفكر (ياترى وش صار هالمره؟ بينك وبين زوجك ياأم دانه والله مسكينه يادانه بنتهم الوحيده وبدال مايدلعونك أشغلوك بمشاكلهم) وراح تفكيره للبنت اللي شافها...
ياللي شربت من حلاك ولا رويتك..
أذكره ولا مليت منه ولا مللني..
شوف لي حل وش أسوي لا ظميتك..
وأنا شريتك ليش مادري يابعدهم لا تسألني..
صرت مالي علي الروح لين هويتك..
وكتبتك غلا لروحي ولو حبك قتلني..
انتهت الحفله وأمنيه ماشافت دلال وتأكدت إن نجلاء كانت صادقه وإلا وشلون عرفت إن سلطان مايبيها وكان هي تعرف فأكيد دلال بعد تعرف وهي تجبر بخاطرها يوم تعلق عليها بسلطان، بدأو الناس يروحون وآخر أحد راح كانت أم خالد وأم فواز مابقى في المزرعه غير أم سلطان وأم ندى اللي كانوا مقررين ينامون في المزرعه وأم حمد دخل سلطان بعد ماراح نواف وخالد عند أهله وقابل نور...
سلطان_نور! ماعرفتك قلت مين هالقمر اللي نسوه أهله عندنا
نور_القمر تلقاه داخل عند النافوره
سلطان_مين تقصدين؟
نور_نجمة الحفله روح سم عليها الناس بتحسدك على بختك اللي طيحك فيها
سلطان_أمنيه!
نور_ايه ياعيوني أمنيه روح ولا تخاف أنا ما بأخلي أحد يجيكم عشان يخلى لك الجو
ضحك سلطان على نور كان يعرف انها ماتحب لميس ولا يدري ليه وأكيد حبت أمنيه وفرحت بهالزواج ماحب يكسر بخاطرها وراح لأمنيه هذا السبب اللي أعترف فيه لنفسه لكن السبب اللي تجاهله هو إنه كان يبي يشوفها ويشوف القمر اللي تقول نور..
راح جهة النافوره اللي كانت في مدخل الحريم وبعيده عن مكان جلسة الحريم وشافها جالسه على طرفها ألتفتت يوم سمعت صوت مشي يقرب منها كان مذهول من اللي يشوفه كانت اليوم قمه في كل شيء..لمحت أمنية نظرة الإعجاب في عيونه لكن هالنظره ماطولت وتغيرت لنظره سوداء قاسيه مليانه قهر تفاجأت من هالتغيير وخافت، مسكها سلطان مع عضدها وصرخ عليها...
سلطان_فيه أحد غيرك لابس مثل هاللون؟؟
أمنيه مافهمت ليه يسأل و إيش يعصب في الموضوع إذا لبست فيروزي! لكن سلطان تذكر إن فواز قال شعرها طويل مو معقول فيه ثنتين نفس اللبس والشعر، شد على يدها بكل قوته وهو يقول والقهر فيه يزيد...
سلطان_أنت اللي شافك فواز وش وداك عند الشجر؟؟
أمنيه بخوف_ماعرفت إنها قريبه عند الرجال!
سلطان_ماتعرفين تسألين؟
أمنيه_وأنا لقيت أحد يكلمني عشان أسأل
سلطان_قولي لي كيف شافك؟
أمنيه_من بعيد وأول ماشافني نزل راسه وأنا رحت بسرعه
سلطان_والدليل على كلامك انه حفظ شكلك!
أمنيه_وش قصدك إني أكذب!!
سلطان_أمنيه انتبهي لتصرفاتك وأعرفي أنت من متزوجه واحترمي أسمي اللي عطيتك
أمنيه_أنا محترمتك شوف مين فينا اللي مايحترم الثاني تركته أمنيه وراحت بسرعه للغرفه اللي عرفت انها بتنام فيها وهي تفكر(وشلون عرف انه شافني؟ وإيش دراه إذا كان حفظ شكلي أو لا؟ قال ان أسمه فواز معقول يكون هو نفسه أخو البنت اللي جلست معها والوحيده اللي أرتحت لها؟ معقول يطلع أخو أماني!!)
دلال ونجلاء كانوا في المطبخ وشافوا أمنيه تمر بسرعه من عندهم نادتها دلال ولا ردت عليها استغربت دلال وراحت تشوفها أما نجلاء فراحت تدور يمكن تعرف سبب هالعصبيه وأول ماطلعت من الفيلا شافت من بعيد سلطان عند النافوره وقالت في نفسها(شكلهم متهاوشين يله أول الغيث قطره وإنشاءالله نفتك منك قريب) وراحت عند سلطان
نجلاء_وين سرحان؟
سلطان_هلا نجلاء وش أخبارك؟
نجلاء_أخباري كلها تمام بس أنت وش فيك شكلك متضايق؟
سلطان_لا مافيني شيء وين دلال؟
نجلاء_مادري يمكن مع أمنيه كل اليوم ماشفتها، سلطان ودي أقولك شيء بس ماودي أضايقك
سلطان_وش فيه تكلمي
نجلاء_أنت ماتلاحظ ان دلال وهي ما عرفت أمنيه إلا من أسبوع تعلقت فيها ونست كل شي نستني ونست لميس ونست انك مو مرتاح وصارت أمنيه عندها أهم مننا
سلطان_دلال مو قصدها كذا بس هي راحمتها وتشوف ان مالها ذنب باللي صار
نجلاء_والله هالأمنيه تلعب صح وأنتم مصدقينها
سلطان_وش تقصدين؟
نجلاء_أنت تقول انك قلت لأمنيه انك ماتبيها وتحب وحده ثانيه وبعد فتره بتطلقها وهي ما أهتمت لك، ما أستغربت ان وحده صغيره وحلوه ومتعلمه ترضى بهالوضع؟
سلطان_إلا وللحين مستغرب
نجلاء_أنا أقولك ليه، هي ذكيه عرفت انك مو مهتم فيها فحولت اهتمامها لأهلك في شهر واحد صارت خالتي تتضايق إن سمعت عنها كلمه وجدتك تموت فيها وأبوك اللي هو أهم شيء صار يعتبرها بنته ودلال في أسبوع صارت هي عندها أهم مني ماتقولي ياسلطان بعد كم شهر إذا جيت تطلقها وش بتقول لأهلك وهم يعتبرونها وحده منهم وكيف بتقنع أبوك بعد ما تطلقها يخطبلك لميس! هي ياتنتقم منك وبتصعب هالطلاق عليك ولا تخطط انها تحتفظ فيك مو بعيد كم يوم وتلقاها تحاول تلفت انتباهك لها مثل ماسوت معي اليوم جت عندي تتلصق وتسوي نفسها ضعيفه وراضيه بأي شي تبيني أعرفها على الناس ويوم ماعطيتها وجه راحت بنفسها تعرف الناس عليها وبكل فخر تقولهم انها زوجة سلطان بن حمد حتى دلال ماجلست معها وهي بس تفتر على الكل
انصدم سلطان من كلام نجلاء لكن كله كان صحيح هو بنفسه شاف وشلون أهله يهتمون فيها وهي بعد ماتنقطع عنهم ليش تهتم فيهم إذا كان زوجها مو هامها أبدا!
في الغرفه أمنيه كانت سرحانه وتفكر في كلام نجلاء وفي كلام سلطان(أنا ليه أتحمل كل هذا والطلاق صاير صاير ما يفرق اللحين عن بعدين)
|
12-12-07, 05:00 AM
جديد مواضيع قسم القصص المكتمله
العرض العادي
