كاتب الموضوع :
brune
المنتدى :
القصص المكتمله
فجر قررت تبتعد شوي عن جو الربشه وتختلي مع اوراقها في جو صافي وهادي
في جو مافيه غيرها هي وارواقها..
كانت تبتسم للسماء والهواء والرمل..كل شي كانت تطيح عينها عليه..كانت تبتسم له بفرحه..وحتى نست انها جايه عشان تكتب بجو هادي مع هالتأمل..!!
كانت تحس بسعاده غير طبيعيه..كانت تحس بالحريه والعظمه وهي بعيده عن كل شي وجالسه بمرتفع عالي..وكأن هالكون كله بقبضة ايدها..كانت تحس انها اسيرة احزانها واليوم انكسر قيدها وهي تشوف عظمة الخالق في مخلوقاته..كانت تتأمل بهدوء ولسانها ماينطق الا"بسبحان الله"
وتوها هاللحظه استنتجت شي عظيـم وكبير..
اذا ضاقت بك الدنيا من كل جانب..وحسيت انك مهموم ومكروب..روح لأخر مدى.. روح لأرض الله الوسيعه..واختلي دقايق لوحدك..تأمل السماء كيف هي بعيده..تأمل الأرض كيف هي مستويه.. شوف البحر والمس الرمل ..ومتع نظرك بـ العشب كيف ينبت بصحراء جافه..ناظر الجبل كيف هوثابت وشامخ..
وبتعرف انك صغير..ذليل..ومالك االا ربك اللي خالقك..
ياهي هالدنيا صغيره..واحنا نجري ورى ملاذاتنا..
ياهي همومنا تافهه واحنا اللي كنا نكبرها بأفكارنا..
الله اكبر ..الله اكبر..
لين متى بتظل الأحزان جاثمه في قلوبنا..!!
الله اكبر والنسيان كان رحمه واحنا اللي ماأستغلينا هالنعمه..
الله اكبر فوق كل شي..الله اكبر وقادر على كل شي..
---------------------
كانوا يفطرون بهدوء..والنوم مسيطر على عيون يوسف..امس سهر لحد الفجر وهو بمرسمه ولمن شاف انه اللوحه مو مخلصه..قرر ينام عشان دوامه..وبالصبح ماقام الا بعد ضربات من لؤي على خده..ولأنه يوسف يكره هالحركه قام بسرعه وهو يتأفف..ومعصب على لؤي وحركاته اللي مو في وقتها..!!
"تصدق..لما اشوف الدكتور سمير كيف هو مكرس حياته بشغله والموسيقى..استغرب.."
كان يوسف يشرب حليبه ولمن سمع كلام لؤي حط الكوب بالطاوله\غريب سؤالك..!!
لؤي\انا قصدي..على العز اللي هو فيه..والثوره الكبيره اللي كل مالها وتزيد لازال يشتغل..واللي بمثله ممكن يكرسه حياته بمظاهر خداعه وحفلات واجتماعات..!!
يوسف\تصدق عاد...مره هو قالي انه يحب شغله كثير..ولو يقدر ياخذ غير الدكتوراه كان خذها..واللي عرفته منه انه ماكانت له تجاره كبيره سابقا..كل هذا كان وارثه من اهله..لأنه كان وحيد والدينه..ومن سابع المستحيلات انه يترك شغله..
لؤي\لكن هو مومحتاج لعوار الراس ولا للفلوس..
يوسف\وانت وش اللي حارك..الرجال عملي..وبعدين لاتنسى انه وحيد..يعني مافي شي ممكن يضيع وقت فراغه..!!
لؤي\على قولتك..وانا ايش اللي حارني..!!
يوسف\انا هالرجل ممتن له كثير..ومو عارف كيف ارد جمايله علي..
لؤي\هو مايبي غير سعادتك يايوسف..قبل ماتتعرف عليه..كان كثير يعجب بلوحاتك..ويوم كنت اتكلم عنك عنده عجب بشخصيتك قبل مايشوفك..
ابتسم يوسف وسرح وهو يتذكر كيف بداية تعارفه مع الدكتور سمير..يتذكر يوم شافه حس بشي غريب وقوي يجذبه له..وكأنه يعرفه من سنين مو يوم..!!
لؤي\يوسف..
رفع يوسف عينه له..وهو ينتظره يكمل
لؤي ماعرف كيف يبدى...لكن هالسؤال كثير محيره وتاعبه..ووده لو يلقى اجابه لتساؤلاته
لؤي\تتوقع الدكتور سمير جاد بكلامه..!!
عقد حواجبه يوسف \مافهمت..!
لؤي\انا قصدي...هل هو قادر يرجعك..
يوسف رد بسرعه\اولا قول يرجعنــا اوكي..
لؤي تضايق لأنه يعرف انا هالشي شبه المستحيل
يوسف\وانا سبق وقلت يالؤي ماراح ارجع بلادي الا ورجلي على رجلك..والا نسيت..!
لؤي تحسف انه فتح الموضوع..لكن لين متى الصمت..!!الوقت يمر..وهو كل ماله ويحس بالحزن اكثر..
لؤي\لا مانسيت..
يوسف\شوف لؤي..انا واثق بالدكتور سمير..وهو الأمل الوحيد عندي..واذا ماقدر.. وخذ نفس طويل...فالله كاتب لنا على شتى محاولاتنا ..انا نظل بهالغربه ونموت فيها..!!
كلام يوسف كان قاســي..وبنفس الوقت واقعــي..وهم مايقدرون ينكرون هالحقيقه.
الدكتور سمير اخر امل عندهم بعد الله سبحانه..واللي مكتوب بيكون..سواء بوجود هألأمل او بدونه..!
-----------------
فتحت عيونها فجأه وهي تصرخ بــ لاااااااا وهي تحاول تبعد صورة تركي اللي شافته بالحلم من بالها..
كانت تحسه كابوس..مو حلم..!!كان وجهه اسود وكأنه طالع من نار مارحمته وشوهت وجهه..كان شكله بشع
ويفطر القلب..وبصعوبه ميزته..ماكان يتكلم بالحلم وهي حست انه لسانها ثقيل..كان يناظرها بنظره حزينه ويحاول يمسك ايدها..ويوم قربت منه و مسكت ايده اختفى.. غمضت عيونها وفتحتها بسرعه ..وطلع مره ثانيه لها بالحلم..لكنه عطاها ظهره..ومشى..وكأنه مــوادع وبيفارق دنيــاه
صرخــت بداخلها لكن هالصرخه ماسمعها تركــي..وكمل طريقه لمن اختفــى فجأه مثل ماظهر فجأه..
وقامت مفزوعه من نومها..وشافت نفسها بالمرايه..واستغربت..هي نامت بدون ماتحس..ونومة الكرسي اتعبتها..قامت بسرعه وشافت النهار طلع..التفت للساعه ولقتها 12..تقريبا نامت 11 ساعه متواصله بدون ماتحس بنفسها..وهذ اول مره تسويها..!!
دخلت بسرعه الحمام وتوضت وصلت الصلوات اللي فاتتها..ويوم خلصت تذكرت تركي..!!
وطلعت للصاله..ومالقت احد..!!معقوله لحد اللحين جاء..!!او انه جاء وطلع كالعاده..!!بس اللحين الظهر..مو من عوايده يطلع هالوقت...واصلا انا ماحسيت فيه لو دخل الغرفه..
دخلت الغرفه مره ثانيه..ولقت السرير على ماهو مرتب وواضح انه محد نام فيه..!!
ياربي شلون..!!هو وينه..!!يمكن بات بره..!!بس ليش..!!
هذه اول مره يسويها..!!
تذكرت الحلم اللي شافته وخافت اكثر..وبدت تهوجس وتفكر..وكل ألأفكار الشينه تركزت في بالها..!
وعلى طول مسكت التلفون ودقت على جواله..وتفاجأت يوم حصلته مقفل..!!
دقت مره ثانيه وثالثه ورابعه لمن اتعبت..والرد نفسه..!!رمت التلفون وجلست على السرير وهي تحاول تقوي نفسها وتذكر الله..
فكرت انها تتنظر كم ساعه..يمكن يجي او تسمع خبر..!!
مالها غير الأنتظــار..
------------
تكذب على نفسها اذا قالت ماوحشها..وتكذب على نفسها اكثر اذا قالت انها ماحبته..!!
شنوا تحبه..!!هي ماتحبه..!!هي معجب فيه..معجبه بشخصيته..!!معجبه بأسلوبه وخفة دمه..
معجبه بروحه وبساطته وتواضعه..!!معجبه بحنيته وحبه لأهله..
بس هي ماتحبه..هي معجبه فيه..!والله كلامك غريب ياراوين..مره تقولين انك معجبه..ومرات تقولين تحبينه..!!
ارجوك...اصفي على كلمه..واعترفي بالحقيقه..الحب مو حرااام..!!
لكن ليش مو مبين..!!كل الشباب شافتهم الاهو.
ليش مختفي..!!..ماله صوت..!!
معقوله ماجاء..!!
كيف تعرف انه ماجاء..!!لازم تتأكد..!!وليش تتأكد..بتموت قهر اذا عرفت انه ماجاء,,,!!
بس هي تعرف انه مايفوت هالطلعات,,,!!
ليتها كانت بالرياض..على ألأقل بتحس بصوته موجود...وبتسمع اخباره مع ياسر اخوها..!!
طلعت بره الخميه لوحدها..تبي تتنفس هواء,,تبيه يدخل لحنجرتها..ويبرد على روحها اللي تفيض حراره..حست بأمها تناديها..لفت وجهها ولقتها قريبه من سيارة ابوها وتتكلم بالتلفون..
قربت منها..لمن وصلت لها..وشافتها مرتبكه وتلفت يمين ويسار وهي ترص على التلفون اللي بايدها..
راوين\وش فيك يمه..!!
نور\اكلم اخوك..ومايرد
راوين\منوا...ياسر..!!
نور وهي تناظر عيون بنتها\تركي..ولدي تركي..
ظحكت راوين..ماتدري ليش ظحكت..لكن الموقف كان مظحك ويعيد نفسه مثل كل مره..
هذه امها اللي تدور على رضى ولدها...وهذا اخوها اللي مو مفتكر بامه..
وهناك ابوها جالس ويضحك..مو داري عن النار اللي بجوف امها..
هذه الدنيا..فرح والم..لكن ألألم صار لايطــاق..!!
هي اصلا مو من حقها تفكر بنفسها..!!هي معجبه وهألأعجاب ماراح يكبر..ولايتغير..!
راوين خذت نفس وتكلمت\يمه..
نور\نعم
راوين\لاتعبين نفسك..ماراح يرد عليك..ومشت وتركت امها لوحدها..ليتها ماطلعت بره الخيمه ..لأنه مزاجها تعكر على شخص مايستاهل لاالتقدير ولا الأحترام..ولا حتى اللي يسمونه حب ..حب اخوي فطري..
"الله يسامحك ياتركي ..الله يسامحك..حتى وانت بعيد معذبنا..."
دخلت الخيمه وشافت البنات مجتمعين بزاويه..وجلست جنبهم وهي تتصنع ألأبتسامه..
ومع الوقت دخلت بالسوالف وتناست همومها..وهي تضحك على سوالف جمانه وبنات عمها..!!
جمانه\بقول لكم شي بس لاتظحكون..!!
راوين\قولي ياقلبي...ياكثر ماتقولين..!!
جمانه\نفسي نركب سياره...ونفحط..وغمضت عيونها وهي تضحك على خبالها..
ابتسام\بس كذا ولايهمك..!!
خذت ابتسام تلفونها ودقت على الوليد..وبعدت شوي عن البنات وقالت له انهم يبون يتمشون شوي..
الوليد على طول ماصدق خبر..لبس كابه الأبيض وخذ نظارته وطلع ينتظرهم بره الخيام..
ابتسام قالت للبنات انه سلطان بيمشيهم وكذبت عليهم..وعلى طول وقفت جمانه ولبست عباتها..وراوين بالمثل..وطلعوا البنات بره مع ابتسام..
راوين لمحت الوليد يكلم سلطان وعزيز واقف وماسك ايد الوليد..قربت من جمانه وساسرتها\والله ومتغير ولد عمي ومحلو..حالق اللحيه ومطول الشعر..وظحكت باأذنها وهمست بصوت حاد..غيرته امريكا..!!
دزتها جمانه وهي معصبه.."قليلة ألأدب"
قربت منها مره ثانيه\قليل من عندكم حبي..
طنشتها جمانه ورفعت عينها ..تبي تشوف اللي شافته راوين..
"معقوله غيرته امريكا..!!معقوله البعد يغير..انا مااشوف اللي تشوفه راوين ماهمني لاشكله ولاجماله..!!..ابي اشوف الوليد اللي حبيته..!!ابي اشوفه بدون حواجز ولاقيود..ماأبي اصدق ظنوني..ولا امشي ورى اوهامي..
الوليد اقولها لك..وقدامـك..وحشتني يالوليد ..واكذب على نفسي اذا قلت اني مافقدتك."
الوليد حس باأنه احد يراقبه..رفع عينه من تحت النظاره..ولقى البنات..اول وحده عرفها من عباتها وكانت ابتسام..والثانيه عرفها على طول..هي اللي كانت تناظره ..جمانه.."اخيرا"
مسكت ابتسام ايد جمانه وراوين ومشتهم لسيارة سلطان ومروا قدام الشباب وكانوا قريبين منهم مايفضل بينهم غير سنتيمترات..وتوها جمانه تحس بنظارتها..نزلت عيونها بخجل..والوليد ماقدر الا انه يبتسم ابتسامه وسيعه كلها شوق."حست فيني ..اكيد حست فيني"....
ركبوا البنات السياره..وابتسام ركبت قدام وضربت هرن للوليد..اللي من سمعه مشى لهم هو وعزيز معاه وركب مكان السايق وهو يسلم..وسلطان تبعه وفتح الباب اللي قدام..
سلطان\خير انسه ابتسام..!!
ابتسام تفاجأت\سلطان بتروح..!!
سلطان\ليش...تركبون سيارتي وماتبوني اروح..!!..نزلي مصدقه نفسك انتي..!!
نزلت ابتسام وهي تتحرطم..كانت بتكذب على البنات..والكذبه صارت حقيقه وسلطان بيروح..
ركبت ورى..وهي تدز راوين اللي جلست بالوسط وعزيز جنبها..وجمانه بالجنب الثاني سايحه ورى الوليد وذايبه..
ابتسام\وسعوا مالت عليكم..
ظحكت راوين على خفيف\وليش معصبه..
ابتسام\ولاشي..
تكلم الوليد لأول مره\احرك..
دق تلفون سلطان هاللحظه..وكان الجد يوسف..
سلطان\الو..هلا يبــه..موجود..ان شاء الله جاي
الوليد\خير ان شاء الله..
سلطان فتح باب السياره ونزل\الظاهر من عين ابتسام..الوالد يبيني
ظحكت ابتسام بصوت عالي ومنرفز\فدييييييييت جدي...
سلطان\ مو لله فديت جدي...ووجهه كلامه للوليد..اذا خلصت بلحقكم انا والشباب..
الوليد\اوكي
نزلت ابتسام وركبت مكان سلطان وسكرت الباب..
ابتسام وهي تبتسم\اللحين اقدر اقولك حرك..!!
نقز عزيز قدام ورد وهوطاير من الفرحه\ايه بسرعه..بسرعه..
الوليد\لاحبيبي اجلس..ماينفع توقف..
ابتسام\تعال عزيز جنبي..
جمانه بصوت واطي\لاخليه جنبي..
سمعها الوليد لأنها قريبه كثير..وحرك السياره وهو يعيش لحظات حلوه يعرف انها ماراح تتكرر ..
باول الدقايق كان الوضع جدا هادي..
وابتسام هي الوحيده اللي كانت تفتح نقاشات مع البنات او الوليد..
الوليد كان سارح بفكره ويخطط كيف ممكن يحاكي جمانه..وجمانه احساسيها كانت متلخبطه وتحس بتشتت غريب..هي مو كذا مع الوليد ولاغيره..هي جريئه بتصرفاته وكلامها..لكن فترة الغياب احدثت ركود بين الطرفين..ومحد قادر يتقدم خطوه..
اما راوين فطبعها هاديه..فكانت طول الوقت مستمعه لسوالف ابتسام..واذا تكلمت فبصوت هادي وواطي..
ابتسام\الوليد..يالله عاد مانبي بس سرعه..نبي نشوف الرمل يوصل لفوق السياره..!!
ابتسم الوليد \انت ناويه على صرخه من سلطان..!!
ابتسام كتفت ايدينها وقالت\والله عاد كيفه..احنا جايين عشان نستانس..وبعدين البنات هم اللي يبون..
راوين\لاتحطينها علي..وبصوت هادي وماكر...هذه فكرة جمانه..
التفت جمانه لراوين بسرعه وخزتها بعينها اللي حمرت من القهر والعصبيه..
كان ودها تفعصها..وتذبحها على هالكلمه..ولو تقدر تموتها بعد..وقليل عليها؟؟
هي ماتدري وش سوت فيها..
احرجت قدام الوليد..وفشلتها..وش بيقول عنها اللحين..!!؟
ابتسم الوليد ورفع عينها للمرايه\حاظرين للطيبين..
ظحكت ابتسام بصوت عالي..وهي تقول بخاطرها"اخيرا نجحت الخطه"
مشى الوليد بالسياره لجبل كان عالي..وهو يزيد من السرعه..
وعزيز قام ينطنط في مكانه ويصفق..ويطالب من الوليد يسرع اكثر..
وابتسام ماوقفت ظحك..وبنفس الوقت كانت مستمتعه وهي تعرف انه جمانه صار وجهها نقطه اللحين..!!
فتح الوليد النوافذ كلها اللي قدام واللي ورى ودخل الهواء بالسياره..وشغل المسجل وكانت شريط حسين الجسمي..بلغ حبيبيك..
الجو كل ماله ويحلى..والوليد لعيون جمانه صار يفحط ..ويحرك السياره يمين ويسار..
عزيز\ههههههههههه وناسه ملاهي..حلو الوليد..
البنات حسوا انه بطنهم انفجر من كثر السرعه وحركة السياره من اليمين لليسار..وصاروا يضحكون بدون شعور...وحتى جمانه ظحكت غصبن عنها..لأنها فعلا ملاهي.لكن بالسياره..!!
الوليد\بنااااات تمسكوا اللحين..بننزل من الجبل..عزيز اجلس..
مسكته جمانه بتلقائيه وقربته جنبها...
نزل الوليد بسرعه جنونيه..وعزيز من فرحته قام من مكانه وطاح بقــوووووه على كتف جمانه اللي صرخت بدون شعور وهي تتألم..
وقف الوليد السياره وضرب بريك قووووي..وبدال ماعزيز يبعد عنها طاح عليها مره ثانيه..لكن هالمره كانت اقوى واسرررع..وصرخت جمانه باأعلى صوتها...
وكلهم التفتوا لها وهم مفزوعين..والوليد بتلقائيه ابعد عزيز عن حضنها وجابه قدام وهو يصرخ عليه..
الوليد بصوت عالي\..انــا قلت لك لاتتحرك من مكانك.. ياغبــي..
خاف عزيز..وجلس بحضن ابتسام وهي كاتم صياحه..
راوين\جمون..تعورتي حبيبتي..
جمانه كانت ساكته ودموعها بعيونها وتتألم وهي ماسكه كتفها وتلتوي بمكانها..
ابتسام\جمووون تكلمي الله يخليك..
لكن جمانه كانت ساكته..وكل مالها وتتألم اكثر..
نزلت ابتسام من السياره وفتحت الباب اللي جنب جمانه..ولقت عيونها مليانه دموع..خافت عليها..ومسكت كتفها..ويوم مسكتها جمانه صرخت\آآآآآآآآآآه لا
ابتسام خافت\ياربي يألمك..
الوليد كان جالس بمكانه ومو عارف كيف يتصرف..مايدري كيف طاوعهم..يحس بـتأنيب الضمير..ووده لو يشوفها ويهون عليها لكن موقادر..!!وبدون شعور قال
الوليد\ابتسام ركبي بسرعه..بنروح المستشفى..
تكلمت هالمره جمانه بصوت واطي..ومبحوح
جمانه\لا..اقدر اتحمل..رجعوني الله يخليكم..
راوين عصبت\كيف تتحملين..انتي مو قادره تحركينها..
جمانه وهي تمسك كتفها بشده\قلت لكم لا يعني لا..خلاص رجعونا للخيام..
ابتسام بصوت راجي\جمون سمعني حبيبتي..خلينا نوديك..احنا مو كثير بعيدين عن الخبر..خلينا نوديك.
جمانه بحده\شفيكم انتوا...لاتزيدوني..رجعوني وخلوني ارتاح..
جمانه كانت مصره لأنها اولا منحرجه وبتموت اللحين من ألأحراج..وغير كذا هي خايفه ..لكن تنكر هالشي..
الوليد تضايق بشده\اوكي ابتسام ..ركبي.. وبصوت عالي كمل....بنرجع..
وفعلا..رجعوا للخيام بخيبة امل واضحه بعيون الكل..والوليد جلس بسيارته و يراقب جمانه كيف تمشي وحاضنه ايدها بخوف..بمساعدة ابتسام وراوين اللي ظلوا معاها لمن جلسوها..والحمدلله انه الكل كان لاهي والخميه نوعا ما كبيره ومحد لاحظ شي..
اسدل الليل خيوطه وحلّ الظلام..وجمانه لازالت تتألم..لكن المها خف وماكان تأثيره كبير مثل السابق..
الوليد كان ايضا يحس بـتأنيب الضمير لأنه حتى هو تهور وزاد سرعة السياره
ظل طول النهار فكره مشغول..واكثر من مره دق لأبتسام يطمن عليها..وحاول كذا مره يعرض خداماته ويوصلهم المستشفى لكن ابتسام كانت عارفه انه جمانه مستحيل تروح سواء مع الوليد او غيره..
واللي استغربت منه اكثر..هدوء جمانه..وسرحانها الغريب..ماكانت معاهم ابـدا..وواضح انها تفكر بعمـق..
وكان شكلها يثير الضحك وهي ماسكه ايده بشده وتسرح لبعيد ومو حاسه باللي حولها..
ظحكت عليها ابتسام وردت على مكالمة الوليد الرابعه وعلى طول بدت بالكلام\خلاص والله هي زينه..حصــان..اصح مني ومنك..
ظحك الوليد بصوت واطي وقرب السماعه من اذنه\طيب يصلح اكلمها..!!
ابعدت ابتسام السماعه من اذنها..تبي تتأكد هذا الوليد او لا..!!
وسعت الوليد يناديها\وينكككك
عصبت ابتسام ورصت على اسنانها\اقول مو لأني صرت اخطط لك..تقوم تتهور وتخربط..
ابتسام الوليد وغمض عيونه..أكيد يخربط..نص ساعه..
عيونه ماذاقت النوم الا نص ساعه..وصابه ارق فظييييع..لكنه مو قادر ينام ويريح جسمه وهو يعرف انه هألأيام محسوبه عليه ومستحيل تتعوض..
وزين منه انه لحد الآن متهور وماطالب بالكثير..تتأفف بضيق ورجع يبتسم بضعف حيله\ابتــسام...وسكت..
كان بيقول لها حسي فيني شوي..لكنه سكت وكتم مشاعره اللي حسها تفيض من امس ..لا مو من امس..
من اول مادرى انه بيجتمع معها بمكان واحد..وهو يحس انه حبه يزيد ماينقص..
الوليد\اقول هي جنبك اللحين..
التفت ابتسام لجمانه وشافتها تناظر فيها..وعرفت انها تكلم الوليد
ابتسام\ايه جنبي...ولا..وانا لاصقه فيها بعد..
الوليد بتردد وخجل\اوكي..قولي لها..
ابتسام ابتسمت\شقول..وقربت جسمها اكثر لجمانه وكانها تحاول تقرب السماعه منها عشان تسمع
الوليد تشتت..وعصب ليش مايدري..!! وماقدر يقول شي\سلمي عليها...سلااااام وقفل الخط
ظحكت ابتسام بصوت عالي...والكل لاحظها..حطت ايدها على فمها والتفت لجمانه وحبتها على خدها
لمست جمانه خدها..وابتسمت على تصرف ابتسام\شفيك..
ابتسام\ههههههههههه ولاشي....بس يسلم عليك..
جمانه كانت تعرف انه الوليد لكنها استعبطت عشان تخبي احراجها\مين..
ابتسام رفعت حاجبها وناظرت جمانه...جمانه ماقدرت تناظر ابتسام..لفت وجهها الجهه الثانيه وهي تكتم ابتسامتها الخجوله..
جمانه كانت حاسه انه ابتسام تعرف امور كثيره عنها وعن الوليد وبالأخص امور تتعمق في علاقتها معاه وعن قرارها اللي اتخذته بدون محد يدري..لكن اللي جاهلته شلون عرفت وكيف..!!
يمكن تكون هذه احاسيس كاذبه..وناتجه من خجلها وخوفها ..كل شي جايز..لكن عدم رضاها بنفسها وبقراراتها الجريئه اللي اتخذتها..هو اللي مضايقها وموترها ومحسسها بتأنيب الضمير..وهذا شي طبيعي انه يحصل..حتى لو انها ضامنه انه بتكون للوليد..والكل يعرف انها له..لازم تخــاف..لازم!
-----------------
لأنها موقادره تستحمل تظل تنتظره..نزلت للرسبشن وسألت عنه..وحمدت ربها انه الموظف يتكلم انجليزي..لكنها مااستفادت شي لأنه ماكان يعرف أي خبر عنه ..وظلت تنتظره على مقاعد كانت قريبه من باب الفندق وتقدر تشوف اللي رايح واللي جاي..حست الوقت يمشي ببطء..والساعات كانت دهور قاسيه عليها..
ولمن ظلم الوقت..حست الدنيا كلها ظلمت بعيونها ووقفت ضدها...
فكرت انه تكلم اهلها...لكن ماعرفت وش تقول لهم..!!
زوجها ضايع..والا سكران..والا طلع.. ومارجع..!!
وبكذا اصرفت هالفكره من بالها واذا اتعقدت ألأمور وجاء الصبح بتكلمهم وبتكول امرها للله سبحانه..
عيونها كانت تنتقل من مكان لمكان..يمكن تلمحه وترتاح بشوفته..وتلفونها ماكان ينزل من اذنها وهي تحاول تتصل فيه كل دقيقه..
.حست بغربه فظيعه وهي تشوف جموع الناس اللي حولها وكلهم غرباء عنها..حست بالضعف وعدم ألأمان..ويمكن اللي يشوفها بهالوضع يعرف من ملامحها انها خايفه ومستوحشه المكان..!لكنها حاولت تنسى الخوف..وتذكر ربها بسرها..
وبلحظه حست بعيون تراقبها.. رفعت عينها وشافت عيون خبيثه بتاكلها اكل..وعلى طول وطت راسها وماقدرت ترفع عينها ولا حتى ترمش..ولاتتحرك من مكانها...
ظلت فتره طويله على هالحال..ومصدر حركتها الوحيده هي ايدها اللي ترتجف وهي تمسك غطاء راسها بقوه وكأنها تحتمي فيه وتهدي من روعها..ماعرفت شتسوي هي الغيبه اللي نزلت بمكان غريب عنها..ولازم تتحمل نتيجة افعالها..
لكن خلااااص الدموع خذت مجراها..والخوف كل ماله ويكبر ويزيد..وماكان بينها وبين الجنون الا شعره
كل شي اجتمع عليها..خوف..ورهبه..وعدم امان..و غياب تركي اللي كسرها..
كانت تتمنى تشوفه..كانت تتمنى تشوفه حتى لو كان عاصي وسكران..المهم انها تحس بالأمان بوجوده..
كانت دموعها تسيل..ومو قادره تمسحها. قرت المعوذات ثلاث مرات وكل مافيها يرجف ...ودعت ربها من كل قلبها بانه يحفظها من كل شر ويرد لها تركي سالم..دعته بروح ترتجيه وتطلب العون والثبات..وفجاه حست بقوه غريبه تحتويها..
وقررت تجازف وترفع عينها..
وابتسمت بين دموعها لمن شافت العيون اللي تناظرها اختفــت..وبسرعة البرق طلعت لغرفتها وتـاكدت انه الباب تقفل.. ولمن حست بألأمان سندت جسمها على الباب لمن طاحت على الأرض بدون ماتحس
وحست انه قلبها بيطلع من مكانه من كثر دقاته..وظحكت بدون شعور بين دموعها اللي ملى وجهها..ظحكت لأنه الله نجاها وحفظهـا..
كان املها بالله كبير....وسبحانه ماخيب ظنها..
المهم هي اللحين بالغرفه..يعني بأمان..لكنها خلاص ماعندها غير الحل الأخير..
لازم تكلم اهلها..هي اليوم تهورت يوم نزلت لوحدها..وماكانت قد هالخطوه الكبيره..واهلها اكيد بيتصرفون احسن منها..خذت تلفونها وقامت من الأرض وجلست على اقرب كرسي وقررت تدق على اخوها احمد..
وتوها بتدق الا سمعت باب الجناح ينفتح رفعت عينها وشافت وجهه تركي..حطت ايدينها على فمها من هول الصـدمه..مو مصدقه اللي تشوفه..
وصرخـــت..!
----------------
فجر تناظر راوين وتضحك..ومو قادره توقف ظحك..ماتوقعت راوين لهدرجه خوافه..تحسها طفله..صغيره..وموقادره تتعامل معها..
تقول لها مافي شي.انا ماشفت شي"..ورواين ترد عليها وتقول "والله شفته ليش ماتصدقيني.."
فجر\يعني شلون مو داخلين الخيمه..
راوين\لا مو داخلين..
فجر بهدوء\راويـــن..
راوين\انا الغبيه اللي قلت خلينا نطلع...اووف ليتني ماطلعت ونمت احسن لي..
فجر\طيب شلون يعني لين متى بنظل واقفين..
راوين بحيره\مــدري..
فجر وتناظر حولها\المشكله الكل نيام اللحين..ومحد بيحس فينا..وش الحل..!!
راوين وتمسك ايد فجر\فجر الله يخليك ادري انه مالك خلق..وودك تذبحيني اللحين..ومتحسفه انك طلعتي معي..لكن تكفيين..تكفيين لاتتركيني لوحدي...والله خايفه..قلبي يرجــف..
فجر استغربت من خوف راوين\بسم الله عليك حبيبتي..مستحيل اتركك..لكن وقفتنا بره غلط..ولو في شي قدام باب الخيمه كان وضح...
راوين بعصبيه\كيف يوضح وهو بدون...
فجر\وهو بدون ايش...!!
راوين قبل مايدخلون لباب الخميه..لقت شي غريب بدون ارجل..وهذا شي طبيبعي..هم بر..وهألشياء بيلقون منها كثير<<اسألوا المجربه الموقف
لكن من خوفها وصدمتها..ماعرفت تنطق..
راوين صوتها ضاع وهدى\ياربي فجر..مو قادره اقول..!
"أحــم"
تيبست راوين بمكانها يوم سمعت الصوت وصرخت\يمــه..فجر..لالالا
التفت فجر لورى وهي خايفه ..معقوله راوين صادقه..لكن راوين مسكت ايدها بكل قوتها وكانها تطلب منها انها ماتتحرك من مكانها..ولاتلتفت..
لكن فجر التفت و لقت رجال لابس بلوزه كحليه تميل للأسود وبرومودا اسود ولأن المكان مظلم..توقعت انه يكون جني ..ويوم ميزت الشكل اكثر..عرفته...وكتمت ظحكتها...
فجر\طـــلال..
يوم سمعت راوين اسم طلال...على طول التفت له..وشافته يقرب منهم..وغصبن عنها دمعت عيونها..
ماتدري هل هي راحه..او شي ثاني؟؟!
طلال\منوا..
فجر ابتسمت فجر بخجل\انا فجر..زين انك جيت..
طلال\خير ان شاء الله...
فجر\امم راوين خايفه وموقادره تدخل الخيمه..
يوم سمعت راوين اسمها..ظغطت على ايد فجر بشده..وماقدرت ترفع عيونها من الأرض.."هذه وقتك يافجر"
طلال عرف فجر من صوتها..لكن ماتوقع انه هذه راوين ابدا..
والراحه اللي حستها راوين..حس فيها طلال..
حاول قد مايقدر انه يكتم حبه..اللي حسه بيطلع من عيونه..وهدى صوته
طلال\ليش..في شي..!!
فجر ماعرفت شتقول\لا بس..شفنا شي قدام الباب..والمشكله ماعندنا تلفون عشان ندق على احد..
فجر ماتبي تحرج راوين اكثر..عشان كذا قالت بصيغة الجماعه..
طلال ابتسم..وماعرف كيف يتصرف..!
طلال\اوكي..وطلع التفون من جيبه..ومده لفجر...خذي كلمي أي احد يطلع لكم..
فجر بتلقائيه ردت\المصيبه هي مو اضيه تدخل..
راوين هنا ماتت حيا..وحلفت يمين ماترفع عينها لمن تبتعد عن عيون طلال..
طلال توه يفهم السالفه..وكان وده يضحك على راوين..
"فديت الخوافيـن والله"
طلال\طيب عندي حل..انا بروح معاكم..وان شاء الله ماراح يصير شي لكم..اتفقنا..
فجر التفت لرواين..وهمست باأذنها\ها شرايك..!!
راوين بهمس\مدري..
فجر\يعني شلون..!
طلال تدخلّ وكان يوجه كلامه لراوين بالذات\ثقي فينـي.. وحس انه زودها وارتبك..وعلى طول عدل موقفه وهو منحرج....ماراح امشي لمن ادخلكم..
سمعته راوين وتفاجأت..وحست بالحنان والحب بكلامته..وماتدري ليه قارنته بتركي اخوها. وشافت الفرق كبير..حتى مافي مجال للمقارنه..!!.صحيح انه هذا مو قته ابدا..لكن ماتدري ليه قارنت..!!
كل يوم تكتشف فيه شي جديد..وهذا الشي يخليها تغرق فيه اكثر..واكثـر..
فجر حست بشي غريب بكلام طلال..وتذكرت سالفة البحرين..يوم بكت راوين ومارضت تروح معاهم..وكيف تدخل سلطان..وخلاها توافق بالطيب...وابتسمت يوم اكتشتفت هالشي الخطير..
عيون طلال تفضحه...من هو صغير وهو عفوي بكلامته..ومحبوب عند الكل..
وهذا هو اليوم يفضح نفسه ويشهر بحبه العذري..
"الله يوفقهم"
بعد محاولات طويله من فجر...رضت تدخل راوين..وطلال وقف قدام باب الخميه..لكن لف وجهه عشان مايشوف اللي داخل..وكان شكله مضحك..لكن لعيون راوين..كل شي يهــون ويكــون..
راوين اول وحده دخلت ويوم مرت جنبه ..كانت قريبه منه كثير ووشوي وبتلصق فيه كان ودها تقول مشكور على كل شي..على مساعدتك وعلى حنانك..وحبــك...لكنها كتمت كل شي حتى انفاسها كتمتها وعاندتها...
اما...طلال..ماقدر يتحمل قربها وغمض عيونه وهو يحس بالخوف..اول مره يحس بالخوف..حس بالخوف لو ضاعـت منه..
وش بيكون حاله..!!..
وفجر على طول دخلت بعد راوين.. وهي تشكر طلال وتثنيه على موقفه..
بعد طلال عن خيمة الحريم..وهو يحس انه هالليله غريبه..جديده..
وماكان في باله الا شي واحد بس
"لين متى التأجيل"
الصعوبات اللي واجهتها غلا..اعطتها القوه..
فجر رجع يعلو ايمانها..وحست بحلاوته
طلال يغرق في بحر ماله نهايه
جمانه لازالت تحس بتأنيب الضمير
الوليد ينتهز الفرص لقربه من جمانه
يوسف اكّد لـ لؤي للمره الثانيه انه ماارح يرجع الا معاه
تركي رجع اخيرا..لكن رجع مع صدمه جديده افجعت غلا
امـــور لازالت في بدايتها..
انتظروني بالجزء الجاي مع نسمات ممكن تكون مريحه وممكن تكون بدون نهايه
الجزء السادس والثلاثون
احـبكـ..!..لاتقولــ شلون.. ؟
------------------
احبك لاتقول شلون..!احبك بجروحك والامك..وزلاتك..
احب الحب لعيونك..واحب الدنيا بوجودك
احبك لو تكون هاجر واحب وصلك بـ غيابك
احبك لوتكون ظالم..احبك لو تكون ساهي
تعذبني باأسلوبك..وتقتلني بأفعالك
تشتتني بعنادك..وتغربني بازمانك
تخليني كسير(ن) طير مجروحه جناحته
وتتوهني بدوامه مالها مرسى ولا آخر
تضيعني بغموضك وتأسرني بظنونك
تشوف الدم بعيوني
وتحس بالحسره بصدى صوتي
وبعد هذا..وبعد الكروب
بعد الآهات..والجروح
تنسيني انفاسي..وتلعب بي بحروفك
ترحم بي يامجنوني..ترحم بي ياوجداني
ترى قلبي وليد لـ حبك
وترى روحي وكل مافيني
اسيره لنفسك وملذاتك
ولو انسى..واقـوى
ولو ابعد..واتجافى
واكره الحب ..ودروبه..
بظل عاشقه لعيونك
احبك.. لاتقول شلون..!!
احبك بجروحك والامك..وزلاتك..! (وصيت)
دخل عليها وكل مافيه مكسر..راسه ملفوف بشاش ابيض...وخده متورم ومحمر..
وايده اليسرى مجبره..
ويوم سمع صرختها سند كل قوته على الباب وحس بالدوخه ترجع له..وهي ركظت له قبل مايطيح ويتعور...ودموعها تسبقها وتعبر عن كل لحظة حزن وضياع وعذاب وقلق وهو بعيد عنها..
مسكته من كتفه وصوتها ضايع وعيونها تنتقل لكل انحاء جسمه \تركــي..تركي....مين اللي سوى فيك كذا....تركي تسمعني..
حط ايدها اللي ماسكه كتفه وراه وقربها منه ومانطق الا بكلمه وحده\وديني الغرفه..
غلا انصاعت له على طول..وحاولت تعطيه كل قوتها..ومشوا بصعوبه لمن دخلوا الغرفه..سندته على السرير..وعدلت الغطاء وعلى طول حطت راسه على المخده....وهو بعد مقاومه قدر يستعدل بجلسته ويريح ظهره..
فصخت جزمته..وبدون قصد شدت على رجوله..وهو صرخ ..وعرفت انه تألم...التفت له..ولقته يضغط على شفايفه يقاوم الألم..وهو مغمض..
غطته بالفراش لحد خصره..وجلست جنبه..وهي ساكته..وتصيح بصمت وتمسح دموعها بايدها..تتألم لألمه..وتشد على اعصابها..اذا حسته يشد عشان يخفف اللي فيه..
ماتدري وش تسوي له عشان تريحه.. افكارها متلخبطه وعقلها تحسه مقفل..في بالها الف سؤال..لكن الزمت الصمت من الصدمه..وعلى كثر مافرحت بشوفته..على كثر ماأحزنت بسبب اللي تعرض له..وهي ضايعه ومو قادره حتى تساله..شفيه...!!ولاحتى تلمسه وتهون عليه..!!
هو صحيح قريب..مايفصلها بينه الا سنتيمترات..لكنه بعيد..بعيد بقلبه..وخفايا روحه..
حواجز كثيره انبنت بينهم وهو في بداية طريقهم..!!وكل الأسباب تعود له هو.. لوحده..!!
وحتى بمصيبته وبمرضه..ماعرفت تتصرف..وماقدرت الا تحظن ايدنيها وتضغط عليهم تعبير عن مايجول بخاطرها..!!..وتنتظر أي همسه...او حركه منه..
حرك تركي ايده وهو بنفس وضعيته ومغمض عيونه ..وقدر يمسك ايدها ويضمها لأيده\لاتصيحين..
غلا من اول ماتعانقت ايدها بأيده وحست بدفاها.. وسمعت انفاسه....وحست بالكلمه على شفاته ..شهقـت..وبدال ماتوقف بكاء..صاحت بشكل اقوى ومفجع..وكانها تنتظر اول كلمه او همسه منه..عشان تفرغ اللي بداخلها..
ماتدري تصيح عليها..او عليه..ماتدري هل كانت تنتظر هالكلمه..او أي مبادره منه..ماتدري هل لمست عطفه..او حست بدفا يده..
ماتدري ليش ضعفت قدامه..!!وهي اللي وعدت نفسها الف مره انها بتشيله من قلبها ..وبتحافظ على بقية كرامتها..
سمعها تركي..وجرها اكثر لمن طاحت بكتفه..وبدال ماتبتعد..وتحطمه مثل ماحطمها وكسر انوثتها..
بدال ماتجرحه مثل ماجرحها.. بدال ماتهينه بجفاها..مثل ماهانها..!!
تشبصت فيه اكثر واكثر..وكأنه هو الربان والسفينه وحبل النجاه وكل شي..
تمسكت فيه وهو الظالم وهي المظلومه..تمسكت فيه تبي الأمان تبي امل جديد وجبر للخاطر..تمسكت فيه بعد ماضيعها وشتتها وغربها..
تمسكت فيه وهي تقول كفايه ..حسي فيني..انا تعبانه
وبدال ماتسكت وتهدى ..صاحت من كل قلبها على كل اللي شافته منه..من جروح وعذاب وبعـد وانكســار..
كانت تشهق..وتقطع أي قلب قاسي..وهو حاس فيها..وحاس بـتأنيب الضمير..
يومين كان غايب عنها..يومين تركها..ضايعه بهالغربه..
حس انه ظالم..قسوته حطمتها..وذبحتها..
ماكان عنده شي يقوله..مافي أي كلمه او اعتذار ممكن يهون عليها..
ماتوقع يشوفها بهالحاله..وعلى طول تذكر امه..غلا تذكره بامه للمره ثانيه..
امه كانت تصيح عليه..وهو كان يقابلها بالصدود..امه كانت تحن له وتعطف عليه..وهو كان صخر مايلين..
كره هالأحساس ..كرهه..مايحب بيحس بالضعف ..مايحب يحنّ ويعبر عن اللي بداخله..
الضعف هو اللي دمره..وعلمه القسـوه..
لكن وش ذنب امه..وايش ذنب غلا اللي حس بحبها ودفاها بحظنه..وش ذنبها ياتركي..!
غمض عيونه وحاول يتناسى هالشعور العال على قلبه..
غمضها ونــام وهو يحس براحـه قليله وغلا بين احضانه..
غمض عيونه..وكانت هذه البدايــه..!
الكاتبه:"وصيت قلبي عليك"
|
28-05-07, 12:43 PM
جديد مواضيع قسم القصص المكتمله
العرض العادي
