لمشاكل التسجيل ودخول المنتدى يرجى مراسلتنا على الايميل liilasvb3@gmail.com






العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 23-09-18, 07:42 AM   المشاركة رقم: 181
المعلومات
الكاتب:
اللقب:
مشرفة قصص من وحي قلم الاعضاء
قارئة مميزة


البيانات
التسجيل: Jul 2014
العضوية: 271387
المشاركات: 11,160
الجنس أنثى
معدل التقييم: bluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميع
نقاط التقييم: 13814

االدولة
البلدJordan
 
مدونتي

 

الإتصالات
الحالة:
bluemay غير متواجد حالياً
وسائل الإتصال:

كاتب الموضوع : نبض افكاري المنتدى : القصص المكتمله
افتراضي رد: غار الغرام / روايتي الثالثة

 
دعوه لزيارة موضوعي

ههههههههه

إي بالله انه بردت حرتي فيها ...

تستاهل حلا ، اللي من ايدو الله يزيدو.


روعة يا نبض كل ما لك عم بتبهرينا بإبداعك


متشوووووقة للقادم


مرور سريع اعذرينا

لكِ ودي

 
 

 

عرض البوم صور bluemay   رد مع اقتباس
قديم 26-09-18, 05:40 PM   المشاركة رقم: 182
المعلومات
الكاتب:
اللقب:

البيانات
التسجيل: Feb 2018
العضوية: 328754
المشاركات: 161
الجنس أنثى
معدل التقييم: نبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدا
نقاط التقييم: 563

االدولة
البلدSaudiArabia
 
مدونتي

 

الإتصالات
الحالة:
نبض افكاري غير متواجد حالياً
وسائل الإتصال:

كاتب الموضوع : نبض افكاري المنتدى : القصص المكتمله
افتراضي رد: غار الغرام / روايتي الثالثة

 
دعوه لزيارة موضوعي

مساء الخير

اولا اشكركم على تفاعلكم وسعيده بردودكم الجميله وتأكدو ان كل رد له مكانته وتقديره عندي

واسفه اذا ماقدرت ارد عليكم وحده وحده

ثانيا
بغيت اخذ رايكم في شي
انا افكر اغير يوم نشر البارت من يوم السبت ليوم الجمعه ويصير يوم الجمعه هو اليوم الثابت لتنزيل البارت بس ماني متأكده اذا بيكون انسب لي من يوم السبت عموما حابه اجرب الجمعه كم اسبوع واشوف الوضع انتم وش رايكم ايش اكثر يوم مناسب لكم الجمعه والا السبت

 
 

 

عرض البوم صور نبض افكاري   رد مع اقتباس
قديم 28-09-18, 02:58 AM   المشاركة رقم: 183
المعلومات
الكاتب:
اللقب:
قارئة مميزة


البيانات
التسجيل: Apr 2008
العضوية: 72508
المشاركات: 273
الجنس أنثى
معدل التقييم: فتاة طيبة عضو سيصبح مشهورا قريبا جدافتاة طيبة عضو سيصبح مشهورا قريبا جدافتاة طيبة عضو سيصبح مشهورا قريبا جدافتاة طيبة عضو سيصبح مشهورا قريبا جدافتاة طيبة عضو سيصبح مشهورا قريبا جدافتاة طيبة عضو سيصبح مشهورا قريبا جدا
نقاط التقييم: 511

االدولة
البلدSaudiArabia
 
مدونتي

 

الإتصالات
الحالة:
فتاة طيبة غير متواجد حالياً
وسائل الإتصال:

كاتب الموضوع : نبض افكاري المنتدى : القصص المكتمله
افتراضي رد: غار الغرام / روايتي الثالثة

 

اليوم اللي يناسبك يانبض واللي ماتكوني مضغوطة فيه عادي مايفرق الجمعة عن السبت

 
 

 

عرض البوم صور فتاة طيبة   رد مع اقتباس
قديم 28-09-18, 09:30 PM   المشاركة رقم: 184
المعلومات
الكاتب:
اللقب:

البيانات
التسجيل: Feb 2018
العضوية: 328754
المشاركات: 161
الجنس أنثى
معدل التقييم: نبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدانبض افكاري عضو سيصبح مشهورا قريبا جدا
نقاط التقييم: 563

االدولة
البلدSaudiArabia
 
مدونتي

 

الإتصالات
الحالة:
نبض افكاري غير متواجد حالياً
وسائل الإتصال:

كاتب الموضوع : نبض افكاري المنتدى : القصص المكتمله
افتراضي رد: غار الغرام / روايتي الثالثة

 
دعوه لزيارة موضوعي

البارت الثالث والثلاثين





نايمه في امان الله فجأه حست بالحافها ينشال من فوقها بعنف وبصرخه صمت اذنها : قومي على حيلك اشوف !

فزت جالسه برعب : وش صار وش فيه
غرس يده في جذور شعرها وسحبها فوق بعنف
وقامت واقفه على ركبها وهي باقي على سريرها
وبكت بروعه ووجع واهي تمسك ايدين صقر تحاول تفكها من شعرها : اي اي خالي عورتني... عورتني
تكفى فكني ...
صقر نفضها بقهر : انفكت ارقبتك اي والله وش الصوره الي مرسلتها الي ياحيوانه
حلا تبكي بانهيار ووجهها غرقان دموع : اي صوره واي خرابيط فكني يعور
صقر نفظها مره ثانيه بعنف واهو يرفع وجهها له ويحط جواله قدام عيونها : الصوره هذي وش قصتها قبل افصل راسك عن جسدك ....
وبصرخه : انطقي
حلا برعب ومن بين بكاها وشهقاتها : باسل وبروق تعرفهم انت وشوله تنشدني
صقر رجع الجوال في جيبه ومسك فكها بيده اليسار
وشعرها في يده اليمين وصار يضغط على فكها بقوه : بتعلميني وش قصة الصوره والا اذبحك الحين ومحد حولك
حلا انرعبت غير الوجع الفظيع الي تحس فيه في فكها ومنابت شعرها الي تتوقع انها انقشعت من مكانها : والاشي والاشي مافيه قصه
صقر استغل رعبها علشان يعرف منها الحقيقه قبل يسوي اي شي يخسر معه بروق نزل يده من فكها لرقبتها وبتهديد : بتقولين وش جاب بروق عند باسل ووش كانو يقولون والااخنقك الحين لين تفطسين في يدي
قاله وضغط بشويش على حنجرتها
وزاغ عقلها من الخوف : باسل قالها البزر عيونه صفرا وبعدين بروق راحت تشوف عيونه وقالت مافيه شي
صقر ضغط ضغطه ثانيه على حنجرتها كتهديد : وليش يطالع فيها كذا
حلا واهي خلاص استسلمت وتملكها الرعب
: والله انها الصوره طلعت كذا بس ماكان يطالع صدق بس ناظر فيها يقولها عن البزر وانا صورت
صقر نفظها من يده وصفقها كف : لايالحقيره وش رايك اوريها الصوره هي وباسل
حلا طاحت على سريرها واهي تبكي بقوه وضامه وجهها بين كفوفها بوجع ماقدرت تستحمل الألم الي في وجهها وانكبت دافنه وجهها في مخدتها ولمى قال بوري بروق وباسل الصوره انرعبت من قلب انقزت معتدله في جلستها واهي تمسك في يدين صقر وتترجاه : لا تكفى خالي الله يخليك كله والاالمتوحشه بروق انت ماتعرفها والله انها تذبحني والاهمها تكفى ياخالي طلبتك لاتوريها
صقر بقهر ووده لو يذبحها من جد شاف جوالها على
الدرج الي جنب سريرها خمه من فوق الدرج واصفقه في صدرها وبصرخه : افتحيه اشوف
حلا خمت مكان الضربه بوجع واهي تعيش ابشع
كابوس شافته في حياتها ....صرخ عليها صقر مره ثانيه : قلت افتحيه
افتحته واهي منهاره بكى اخذه منها ودخل على الصور فرها يدور اذا لبروق صور عندها او لا مالقى الا الصوره الي ارسلتها له حذفها وراح للواتس اب
حذف الصوره من المحادثه ورجع يخم حلا بشعرها
ونفظها بعنف : ارسلتي الصوره لاحد غيري
اصرخت بوجع ورعب : لا لا بس انت
شد على شعرها مره ثانيه : ياويلك ياحلا لو تصورين بروق مره ثانيه والاتعرضينها بشي تسمعين ..
وبصراخ : تراك ماتسوين معها اشعره في عيني وتراني اذبحك لعيونها فتجنبيها وتجنبيني معها احسلك
حلا بانهيار : توبه توبه ماصورها والا اتدخل فيها
صقر نفضها مره ثانيه : والصوره ذي ماسمع عنها والاحرف واحد وكلام طالع نازل منا منا اذبحك فاهمه

حلا واهي حاسه انها قاعده تموت والاعمرها تعرضت للعنف والضرب ..تكلمت برعب :فاهمه والله فاهمه
نفضها من يده بقهر وقرف ورفع جوالها قدام عيونها يوريها اياه ثم رفع يده وطبق فيه الجدار
بقوته كلها ....واستدار طالع من عندها تذكر الصوره
الي في جواله طلعه من مخباه افتحه وحذف الصوره واهو يحمد ربه انه شاف حلا قبل يقابل بروق لوكان سئلها عن الصوره كان قاطعته عمرها كله على شكه فيها ...



حلا ماصدقت انه طلع من عندها ارفعت صوتها تبكي وادفنت وجهها في مخدتها تبكي بقهر وحرقه وكره لبروق الي يوم قالت بتنتقم منها انقلب كل شي على راسها ارفعت يدها تفرك فروة راسها الي تألمها بشده صقر المتوحش قطع شعرها ....اشهقت من بين دموعها واهمست لنفسها : يارب مايقول للمتوحشه بروق والاباسل والله انهم يذبحوني


صقر نزل مع الدرج واهو مغبون من الي صار بغت تضيع سمعة بروق بتفاهتها وقل عقلها ....
تذكر سياف الي ينتظره في المجلس وقف في نص الدرج ياخذ نفس عميق ويزفره ..يحاول يهدي نفسه مايبي سياف يشك في شي ...رتب نفسه وكمل ينزل مع الدرج شاف غنى
طالعه من المطبخ ببجامتها وشكلها توها صاحيه
ناداها سلم عليها وقالها تجيبله ماء ...راحت غنى
تركض للمطبخ جابت له مويه شرب وخلص وسكر علبة المويه وخلاها في يده وانحنى لغنى :افطرتي
غنى انبسطت انه سولف معها : ايه توني اكلت
صقر بابتسامه واهو بدى يستعيد هدؤه بعد ماعرف سالفة الصوره : طيب روحي غيري ملابسك
عشان تروحين لبابا معنا
غنى انبسطت وراحت تركض للخادمه تسئلها وش تلبس والخادمه امسكتها بيدها واصعدت معها تطلع لها ملابس ...
صقر دخل المجلس ورمى نفسه على الكنب بتعب
سياف استغرب من حاله : وش فيك كانك طالع من معركه
صقر مسح على وجهه بكفه بضيق : هاوشت الخبله حلا على اهمالها لأمها
سياف كشر بكره لها : امحق حلا مفارقها الحلا
وبحقد : يافرقى الزول اي والله ياهالي تسدح لاشغل والامشغله وبروق تكد على امها
صقر ابتسم بسخريه لو تدري وشهي مسويه لبرقك
وسرح ......طيب والنظره الي شفتها بعيني حتى لو كان يسئل عن البزر على قولتها ....يمكن من تأثير الصوره ياما طلعت الصور شي غير الشي .....اخ بس لو ماحذفت الصوره كان واجهت فيها باسل .....لا الافضل اسكر موضوع الصوره نهائي حتى مايصير اي شوشره حوالين بروق ....بس ماعليه ياباسل خل بس اعرف انك تحوم حولها ان مادفنتك بيدي ماكون صقر ....
طلعه من سرحانه صوت سياف : انت كلمت عمتي
صقر خبط جبهته متذكر : ياويلي من زعلها ....اشغلتني بروق الله يصلحها بجيتها الوجعانه ذي ونسيت جواهر انت كلمتها
سياف ببرود : همانا جينا خلاص لاشفتها باركت لها وانتهى الموضوع
صقر طلع جواله ودق على جواهر
ردت : الله حي الصقر الي ماغير يحلق حولنا
صقر توهق مبين عليها زعلانه : اول شي السلام عليكم
جواهر : الله حيه وعليكم السلام
صقر : مبروك ماجاتس يام باسل
جواهر : الله يبارك فيك
صقر : وشلونك وشلون صحتك عساك طويبه
جواهر : الحمدلله بخير
سياف رفع صوته يسمعها : الحمد لله على السلامه ياعمه
جواهر اسمعته : الي يصيح وراك وش يقول
صقر : يتحمد لتس بالسلامه
جواهر : الله يسلمك ويسلمه مير الولد انخطبله بنجوزه وانتم توكم تباركون
صقر ضحك : هههههه يعني بتفهمينا انا اخر ناس كلمو
جواهر : اجل فيها شكه من امس والتلفون ماسكت لا من اهلي والامن اهل طارق وكل من كلمني نشدني عنك صقر ماكلم ؟!
صقر بضحكه : هههه لاحول من القافه وهم وش دخلهم كلمت والا
جواهر بجديه : يشتكون منك اخوانك انت وسياف يقولون يمر يومين وثلاثه ماكلمو
صقر تضايق مايحب العتب وعنده مكالماتهم لاهلم كافيه : يومين ماهيب شي وش بيتغير في يومين
جواهر باستطراد : يقولون جاين لجده ماشاء الله وشلون طرالك تزورني
صقر طفش من المجاملات شق القربه : جيت اخذ بروق الي اخذينها تخدمون فيها وبنتكم طول الجدار موفرينها ل الدلع
جواهر بزعل وتوها تنتبه انها فتحت العيون على بنتها : ياوجه الله متكاثرن علي نفعة بنية اوخيي وقت مرضي وحاجتي والاماعلاكم مني
صقر بصدق : لاوالله علينا منتس ولانا بمخلينتس مير اهلتس لهم بيوت ورا ماجيتي في بيت جاسر والافي بيت احد اخوانتس الاخرين وبيحطونك في عيونهم ولحد مقصر ...اما انتس تاخذين بروق وبنتك تسدح ماعندها ماتلهابه لاوالله بنيتنا ماهيب خدامه ل ال جويعد
جواهر حزت في نفسها الكلمه : انا بنتكم يال ماجد
ماني من ال جويعد وبروق مكانها وسط عيني وما مداراتها الي بمنزلتن من قدرها شي ويومني ماجيتكم من زود مابي من وجع ممنوعتن من السفر
صقر باقتناع بكل الي قاعد يسويه : المهم انا جاي اخذتس انتي وياها وهذا انتي ولدتي وماعاد فيه شي يمنعك من السفر
جواهر بزعل : ماني برايحتن معك
صقر بنفزه : بتروحين غصب وكلامي مع طارق مهوب معك ......

جواهر انهت المكالمه واهي تناظر في بروق بتوجس :انتي شارهتن علي يوم اني طلبتك تساعديني
بروق ابتسمت لعمتها وقامت باست جبينها : لو مدري انك تعبانه صدق كان ماجيت ولو ابي اعيي عييت فلاتشيلين هم كلامهم وعمي اعرفه هو زعلان
علشان حلا نفس عمري ويبيها هي الي تقوم فيك
جواهر من داخلها اندمت انها اطلبت من بروق تجي تساعدها لان حال بنتها كان مستور ويوم جت بروق تقوم عليها تفتحت كل العيون على حلا وصار كل من يسئل ليش بروق موب حلا ؟!
تحس انها تسببت في ان بنتها تطيح من عيون خوالها وحتى عمامها الي كلهم صارو يعرفون ان بنت اخوها هي الي مرافقه معها في المستشفى
بس هي كان كل قصدها تشيل حمل تعبها عن اكتاف باسل الي مقطع عمره بين الشركه وبين الاهتمام بالكل ترحم باسل كثير لانه يشيل كل من طاح عليه والايشكي ....والمشكله ان الكل ماخذين
عنه فكره انه مستهتر ...كله من حركات المغازل الله يصلحه بس عويناته شوي زايغه والشركه مرات يسحب عليها بس بعذره طارق يطفش الي مايطفش واوامره ماتخلص ......انتبهت من سرحانها على صوت بروق
: عمه جوالك دق لين انقطع وراك سهيتي
جواهر :هاه لاهنيا ..من الي يدق تعبت من المكالمات من امس مارتحت كل ماحطيت جنبي برتاح دق
بروق اخذت جوال عمتها وسكرته : خلاص سكرته ارتاحي الحين قبل موعد الزياره خاصه انك بتطلعين بعدها على طول وترا لازم تروحين معنا ل الرياض
جواهر واهي تتعدل في سدحتها : كيف اروح ل الرياض وقصي يدرس
بروق : عمه محد مخليك تقعدين هنا لاابوي والاحتى عماني وانتي سمعتي بنفسك كل واحد يكلمك يقولك لازم تجين ل الرياض حتى عمات باسل متحمسات لشوفة يوسفاني من امس لليوم والواتس والسناب عند العايلتين برعايت يوسفاني
جواهر ابتسمت : ياملحه اي والله الا يوسف ذا مايقولون انه طليقك كيف سمى عليه باسل مايستاهل الاسم
بروق وسعت عيونها باستنكار : افا من الي مايستاهل هذا يوسف ال عامر على سن ورمح الا يستاهل ويستاهل ويستاهل
جواهر قاطعتها بضحكه : هههه كنك متحسفه على الطلاق
بروق بثقه : لاوالله موب متحسفه والاشي بس اقول الحق شوفي عمه الي ينتقص من قدر احد او يحط فيه مثالب ماهيب فيه بس عشانه يكرهه فهذا انسان ضعيف نظرته لنفسه مهزوزه او على الاقل انسان غير نزيه
يوسف كان يمشي في طريق غلط والحين صحح مساره وصار رجال كفو
جواهر ابتسمت لبروق : انا اشهد انك نزيهه ونفسك مافيه اصفى والااطيب منها




__________________

جالس على مكتبه فاتح لاب توبه ويبحث عن حجز
ل الرياض ويفاضل بين الايام في مخه بعد ماقرر يروح يزور افراد شلته من غير محد يعرف عنه بيقول بسافر لدوله خليجيه علشان محد يبلشه
بالاسئله والتحقيق والاحد يحاسبه ليه جيت الرياض والاجيتنا بيخلي زيارته خاصه بخوياه وبس حتى ممدوح مايقدر يقابله مع انه اكثر واحد مشتاق له بس دامه صار يماشي مشاري مايقدر
يشوفه ....

دخل باسل المكتب وطبق الباب وراه مما خلى
يوسف يرفع راسه عن الاب توب بنرفزه :خير ياهمجي
باسل تقدم لمكتب يوسف جلس على طرفه : عاد نصيبك رماك في عامل مخازن صار لازم تتعود على الهمجيه
يوسف كشر واهو مستغرب من كلام باسل : اولا الهمجي همجي وين ماكان مالها دخل بنوع الشغل
وبعدين وش عامل المخازن ذي وقبل كل ذا دوك الملف ذا خلصه ماني رايق له

باسل اخذ الملف من يده ورماه عليه مره ثانيه
:ذا ياحبيبي شغل نائب المدير وانا والحمد الله
يادوب عامل مخازن على قد حالي يعني من اليوم بأنسدح وادلدل ارجولي وحضرتك بتكرف عني وعنك

يوسف وخر الملف على جنب وركز انتباهه مع باسل
: انت مصخن فيك شي وش سالفة المخازن ذي

باسل راح لمكتبه وجلس على كرسيه ومدد ارجوله قدامه واسترخى : الاستاذ طارق الله يطول بعمره
عيني عامل مخازن لمدة اسبوعين من ورى لماروه العفنه

يوسف احشرته الضحكه حاول يتجنبها بس ماقدر
وانفجر ضحك :ههههههههههههههههه تستاهل اجل قم تقلع عن مكتب نائب المدير لا اشكك قرار فصل

باسل اعتدل جالس : اي تكفى افصلني خلني اريح راسي من ذا الشركه بالمره

قطع عليهم طارق السوالف بدخوله مع الباب المشترك شاف باسل على مكتبه واسئله باستعجال
:خالك صقر وسياف وش عندهم جايين
باسل ناظر في ابوه باستغراب : مدري عنهم متى جو
يوسف يقاطعهم : جايين البارح في شقتهم
التفتو طارق وباسل على يوسف بتوجس
طارق :عسى ماضايقوك بشي
يوسف ابتسم : لا محد ضايقني اصلا الصباح تركت لهم الشقه وطلعت اخذتلي شقه في البرج القريب من الشركه
باسل ابتسم : اطلق مكان وانا خويك فيها
طارق التفت على باسل بعصبيه : والبيت وش خانته
باسل بزعل : والله ماخبر عامل المخازن يسكن مع مدير الشركه في نفس البيت
يوسف ضحك على مناقرهم :هههههه شكلي بصير عامل معك وخل المدير يبتلش بالاداره الحاله
باسل بوناسه : كفو ابوراشد
طارق ابتسم : لامبتلش والاشي الي بيبتلش انتم بس لاتنسون تزيتون شوشكم وتفرقونها على جنب
باسل ويوسف تخيلو المنظر :هههههههه
طارق تذكر صقر وسياف رجع يتكلم بجديه : باسل
دور مطعم عليه القيمه واحجز فيه دام امك ماهي في البيت بنغديهم برا
ثم التفت على يوسف : وانت يايوسف استلم مكاني
وعلى الغدا ابي اوصل القاك قدامي انت وياه موب اقعد انتظركم
يوسف : انا يادوب اخلص الشغل بقعد في الشركه
طارق بحزم :لاحق على الشركه والشغل ابي اوصل القاك قدامي
يوسف :ان شاء الله




____________


غنى ادخلت المجلس واهي مبسوطه انها بتروح مع صقر ل الشركه .....شافها سياف داخله وابتسم وناداها :بنت تعالي
غنى كشت منه لانه ماناداها باسمها فهمت انه مايعرفها كشرت في وجهه وراحت لصقر
صقر ضمها واهو يضحك على سياف :ههههه ياخي انت مدري وش علتك يوم البنات مايداننك
سياف ابتسم واهو يتذكر بنات العائله كلهن يخافن منه حتى رهف وبروق يحطن له القاب ..يعرفنه ابها بينهن كم مره سمعهن وطنش ...حس بوجع في قلبه على طاري بروق صارت قريبه منه حيل كل الي يفصله عنها ساعات كيف بيشوفها كيف بيتحمل قربها كيف بيصبر قلبه لايشق صدره ويحضنها
.....فز على صوت صقر : ياهوه وين سرحت
سياف : هاه ..معك معك
صقر : طارق بيجي هنا
سياف : لو رايحين له الشركه اصرف من القعده في البيت
صقر : انا فكرت في السالفه ولقيت انه نقعد هنا احسن علشان نقنعه انا ناخذ جواهر معنا ماتنتخلى هنيا واهي تعبانه كذا
سياف ببرود : ماهمتني جواهر دامها عند رجالها واعيالها هم المسؤلين عنها انا الي يهمني بروق وبس وماهي بقاعده عندهم اكثر مما اقعدت
صقر : هين بروق مالهم عليها شور بتمشي معي بطيب والابغصيب
سياف : قالت شي يوم قلت لها انا بناخذها
صقر : لا وش تبيها تقول هي داريه اني ماجيت الا علشان اخذها ولاني براجع من دونها
سياف : عمي جاسر ماكلمك
صقر : لا شكله لحد الحين مايدري انا جايين لجده
سياف : يمدي طارق علمه
صقر بعدم مبالاه : وخله يعلمه خير ياطير بيمنعني لاخذ بروق
سياف بجديه : يمنع بيدينه ورجلينه ماني بسياف ان مشيت واهي وراي
صقر لوى السانه داخل فمه وبنكاده : ماتقول مانك بخاطبها لو مايبقى من البنات الاهي خلاص وش عليك منها وش لاون قصبك
سياف كشر ورد بغيض واهو يحس بنار تحرق صدره
: حتى لو ماتزوجتها بتبقى بروق برقي
صقر : ماانصحك تقول هالكلام قدام جاسر ترا هالحليل الهويدي صكاته تروع
سياف انسدح على الكنب : جاسر ينغرون الناس بلينه لين يطلع وجهه الثاني ...بس اظمن لك ان هالوجه مايطلع علي
صقر : انا اهوجس ابه لادرى انا جايين ناخذ بروق والاعلمناه مالي خلق في مناطح جاسر والاحب ازعله مع ان ابوك الكبير بس عادي عندي يزعل هو والايزعل جاسر
سياف طلع مفاتيحه وحذف فيها صقر : ولد ابوي تبدي جويسر على عقيد ال ماجد كلهم
صقر تقدم بجسمه يحمي غنى الي جالسه جنبه من الجهه الثانيه وضرب المفتاح في كتفه خم كتفه يفركه : اح ...اسمه جاسر لاتصغره وبعدين انا صادق له هيبه على قو مرونته وتبسطه بس والله اني احسب احساب لخاطره اكثر من اي واحد غيره
سياف حط اذراعه على عيونه واهو منسدح على ظهره : لانك تعرف لاخسرته مانك لاقن احد يسد مكانه عمي جاسر اسلوبه غير عن كل اخوانه حتى ابوي يعزه بزياده خاصه لاضاق صدره مايرتاح الا عند جاسر
سمعو باب المدخل يفتح وفز سياف جالس وبتدى يتعدل في جلسته وصقر قام واقف واهو يشوف طارق داخل عليهم واهو يهلي ويرحب (وطارق له مكانته واحترامه عند كل ال ماجد )
وقف سياف وسلم على طارق من بعد صقر
واجلسو وطارق استاذن منهم ودخل يسوي قهوه
توه تذكر ان مافيه احد يسوي القهوه والاكان خلا باسل يجي معه يسوي القهوه عنه الخادمه حظرت الطوفريه وجهزت الفناجيل والكاسات وصحن التمر
خلص طارق مجهز القهوه والشاهي حطهن في الطوفريه وراح يقهوي انسباه ......وبعد جوله من السوالف وتبادل الاخبار ....صقر :جواهر متى بتطلع
من المستشفى
طارق : هي ماتحب المستشفى واليوم الصبح اطلبت من الدكتوره تكتب لها خروج وقالت انتظري لبكره وعيت تقعد تقول بطلع على مسؤليتي قالت اجل بعد موعد الزياره اجيك اكشف على الجرح ونغير له واكتبلك خروج
صقر : حلو اجل تراني باخذها معي ل الرياض مانا بمخلينها هنيا واهي تعبانه وبحاجة عنايه
طارق يدري ان جيت بروق ماهي عاجبتهم وحتى مايعقد الامور فضل انه يسمح لجواهر تروح عند اهلها عن طيب خاطر لانها تعبت كثير في حملها ومحتاجه وقت طويل لين تسترد عافيتها غير ان خواته ودهن بشوفة اولده وماكل وحده منهن تقدر تجي تزوره والوقت وقت مدارس
: ياجعلك سالم يابو ماجد ابد من يمي ماعندي مانع اخذها معك منها ترتاح ومنها تغير نفسيتها بعد طول الحكره على السرير والمنع من السفر
ان اقعدت بعد الوالده اهنيا انفطرت كبدها من الظيقه
صقر : زين وحنا مانبي منك غير قولت مسموحه
طارق : مسموحتين مير هي من يقنعها هالحين تلقاها شايلتن هم قصي ودراسته وليتها على قصي وتهون الا باسل كيف تروح وتتركه وراها
صقر ابتسم : ههههه مهوب هي وبس حتى انت ودك انها تروح وتخليلك باسل تستفرد فيه عاد ولدكم ذا ثقيل طينه
طارق جاء الكلام على هواه : ههههه لوهي علي اخذت نصيبها فيه مع نصيبي مير المشكله انها اكلتن قلبه وانا ساحبن علي ..وثقل الطينه ماتعداك
صقر بضحكه : ههههههه هذا واهو مايعصي لك امر
تقول ساحبن علي اجل بعذره لو يسحب عليك صدق ....


_______________


في المطعم جالسين يتغدون غنى وقصي معهم
وحلا بقت في البيت ولان طارق كان مع صقر وسياف طول الوقت ماشافها والايدري عن المناحه
الي هي عاشتها لاكثر من ساعتين وبعدها نامت
من كثرة البكاء والتعب ...سئل عنها الخادمه وقالت
انها قامت افطرت وارجعت تنام وفي الواقع هي مانزلت نهائي والخادمه ماشافتها ابد لاكنها صرفته على امل انها تتم نايمه وتفتك من اوامرها وعجرفتها ....

الاجواء على طاولت الغداء في المطعم كانت جميله وراقيه والجلسه كلها سوالف ووناسه
بعد ماخلصو متغدين وقامو يغسلون صقر اخذ باسل على جنب بيعرف لوين بيوصل
: اقدر اعرف وش بينك وبين بروق
باسل عقد حواجبه بغضب : وش قصدك
صقر بعصبيه : انا الي اسئل طول عمرك مسوي عمرك محامي الدفاع عنها وهالحين هي تزوجت يوسف وبعد اسبوعين بس تطلقت منه والحين هي هنا يازعم بتهتم بامك وش ورى ذا كله
باسل تملكه الغضب دفه وراه : وش تقول انت تشكك في انا وبروق صاحي انت للي تقوله بروق هذي اختي الي ماجابتها امي ومااسمح لك تنطق عليها بحرف
صقر قرب له مره ثانيه بعد مادفه ومد يده بيمسكه ببلوزته لاكن باسل صد يده بحركه سريعه ...تكلم صقر بغيض : بروق انا اعرفها زين وخابرها مهيب راعيت علوم ولفات بس انت مقدر اصفي النيه معك
باسل دخل ايدينه في جيوب بنطلونه ورفع اكتافه ونزلها بعدم اهتمام : مايهمني نيتك بشي عمرها لاصفت
صقر بغضب : باسل انا ماامزح معك تكلم قبل لاادخل جاسر وطارق في السالفه وتكبر
باسل زفر بضيق رافض مبداء انه يشك فيه ويقعد يبرر له ويشرح وفي نفس الوقت مايبي ابوه وخاله جاسر يتدخلون في السالفه يخاف يتسبب في شرخ علاقتهم ببعض
: قلت لك بروق اختي والاعمر علاقتي فيها تجاوزت الاخوه واذا على المحاماه على قولتك شي طبيعي ادافع عن اختي وماذكر اني تخليت عن حلا في يوم من الايام علشان تستغرب دفاعي عن بروق
كلامه كان مقنع بالنسبه لصقر خاصه ان رعد صديقه الخاص وفي نفس الوقت اقرب اخوان بروق لها ولو شك للحظه في نوايا باسل تجاه بروق مستحيل يسكت له ...وليش يروح بعيد بروق نفسها
ثقه ولايمكن تسمح لباسل يتجاوز حدود الاخوه معها تعوذ من ابليس واستدار بيترك باسل ويرجع للمجموعه لاكن باسل وقفه متجاوز الي صار بينهم : خالي اصبر ابيك
التفت عليه : خير وش بغيت
باسل بتردد : ابي اخطب رهف
صقر صغر عيونه فيه مستغرب انه يبي رهف واهم يضنون انه يبي بروق : ومن رادك لاتخطب
باسل بعصبيه : ومن غير العله سياف انت خابره مايواطني ابيك تقنعه يوافق على الخطبه قبل اتقدم رسمي
صقر ماعنده اعتراض على زواج باسل ورهف بس سياف صعب يقتنع بباسل : الفتره هذي لاتجيب طاري الخطبه بعدين انا اشوف موظوعك واعلمك وش يصير معي
باسل هز راسه بتأييد لكلامه : اعتمد عليك ياخال لاتخليني
صقر انقطع عنده الشك باليقين وتاكد ان باسل بالفعل يعد بروق اخت ثانيه له رفع يده وربت فيها على كتفه :اعتمد وان شاء الله خير

_____________




نادو على رقمها في انتظار الصيدليه وقامت لشباك الصيدلي تصرف اعلاج عمتها اخذت كيس الادويه
وراحت متجهه لغرفة عمتها ....
صقر وسياف ادخلو لغرفة جواهر مع اولى دقايق الزياره سلمو عليها وباركو لها واسئلوها عن بروق قالت لهم انها راحت تصرف لها ادويتها من الصيدليه اتجهو للباب بيطلعون يدورونها لاكن قطع تقدمهم دخول الممرضه تدف سرير المولود
صقر رجع مع الممرضه لداخل الغرفه واخذ يوسف
من سريره واهو سعيد بشوفته دخل طارق في نفس اللحظه الي شال فيها صقر يوسف ودخل معه في سوالف وتعليقات ...اما سياف طلع متجاهل كل شي يصير وراه في الغرفه الي طلع منها .....طلع وكل اهتمامه وتركيزه مع بروق ....مشتاق لها ....يحس بعطش عظيم في روحه لشوفتها لسماع صوتها ....وفي نفس الوقت موجوع منها
يحس انها اخذلته ....يحس انها اهانته بتخليها عنه
...يحس انها ارخصت حبه .....يحس انها غدرت فيه وطعنته في مقتل ...اخذ خطوات قليله في الممر القريب من غرفة عمته ثم حس فجأه بقلبه ينتفض بين ضلوعه رفع انظره وشافها تتقدم ناحيته بثقه
تقدم لها وفي كل خطوه يسكب مشاعره في قالب جليدي صلد ... لو احد غيرها اقفى عنه مستحيل يعطيه من اهتمامه لو نظره ...بس لانها هي مضطر يلتفت لها ...مستحيل يسمح لها تحط يدها على وجع قلبه لاكنه على الاقل راح يستفزها وياقف جبل شامخ في وجهها ...مايقدر يعاتبها ......بس يقدر يجادلها يحط العقبات في طريقها وينفس عن بعض وجعه منها وقف قدامها مباشره وعيونه على عيونها الي تتحرك في كل مكان بعيد عنه تكلم بجمود : وش صار على دراستك قدمتي على الجامعه والا ؟!

بروق اول ماشافته يمشي في الممر حست الاكسجين ينسحب من حولها .....وش بيقول لاشافها ...بيصرخ في وجهها ياخاينه ليه تركتيني
...بيرفع يده ويصفعها على وجهها لأول مره كتأديب على الي سوته !.....شدت طولها في استقامه وتقدمت له بتوصل لنهاية الوجع وتعرف
وش مصيرها معه ....وقفت قدامه واهي تشتت نظراتها بعيد عنه ماعندها اي جرئه على مواجهة عيونه بذات لاكن كلماته انزلت عليها مثل الصاعقه
بغرابتها وبعدها كل البعد عن موضوع زواجها من يوسف ....ايش يقصد من كلامه ذا ....اخذت نفس
عميق ...وازفرته تحاول تشجع نفسها تناظر في عيونه وتفهم وش يقصد بالضبط لاكن شجاعتها اخذلتها لاول مره وماقدرت الا انها تركز نظرها على صدره وتكلمت بصوت جاهدت انه يكون طبيعي

: باقي ماقدمت بقدم على السنه الجديده ان شاء الله
سياف بشي من العصبيه الي فلتت منه غصب :
ووش التخصص الي اخترتيه
بروق ردت بسرعه تبي تتخلص من الجحيم الي تعيشه بوجوده وتجاهله لكل ماصار ...كانت تظن انها عقبه صعب تجاوزها ...وشلون يسئلها عن دراستها في اول لقاء بينهم من بعد ماتجرأت وقصت الحبل الي يلفه حول ارقبتها ....يكون ماهتم بزواجها اساسا ...معقوله ؟! : مازلت افاضل بين الطب والقانون وعلوم الحاسب
سياف بعصبيه : انا الظاهر تركتلك الحبل لين حسبتي انه انفلت من يدي ماتدرين ان طرفه الاول في يدي هذي ورفع يده اليمين وطرفه الثاني في هذي ورفع يده اليسار .......اسمعيني زين تقدمين للجامعه الترم الثاني وعلى تخصص ادارت اعمال واذا فيك خير تخرجي بأقل من مرتبة الشرف لاولى

بروق ثارت كل دوافع التحدي عندها وارفعت راسها له بغضب وتحدي واول ماعلقت عيونها في عيونه احرقتها النظره المركبه الي شافتها فيها ..عتب ...غضب ....حنين .....واشيا ثانيه مافهمتها وحترقت اكثر من لمحت الوجع والحزن الي ظهرت في ملامح وجهه ...حست بخزي واهي تحس انها سبب الي هو فيه نزلت عيونها بسرعه وباستسلام اقصدت منه الاعتذار عن ذنبها المتعمد : ابشر
سياف انقهر عليها ومنها مايحب يشوفها مستسلمه كذا وكانها طالب بليد واقف قدام استاذه جز على اسنانه بغيض ونطق بقهر : بروق ناظري في عيوني
ناظري عيوني اشوف
بروق ارتجفت هذا الي كانت خايفه منه ارفعت راسها واصتدمت نظراتها في الظهر العريظ الي
دخل قدامها فجأه نطقت بفرح واهي تشبث بجاكيته بيدينها فانسحب معها مبتعد عن ظهره : بااااسل !!
باسل ابتسم بسخريه لمى اهتفت باسمه وكأنه يقول للواقف قدامه تتذكر !!
سياف احتدت نظراته لباسل بكره وغضب واصتبغت عيونه بلون الدم بعد ماطعنته بروق من جديد واهي تحتمي فيه استعرت نظرات الشر بينهم بصمت قال الكثير ! لحد مانهاها سياف بنظرة احتقار اخيره .....ماخلت لها بعد هذي عذر ...وماعلى راس المرجله مفاصل .....وقلبن يدعيه لذل يدوسه برجله ماهو برجل غيره ....صد وتحرك مبتعد بشموخ يليق فيه من غير مايلتفت وراه او يسمح لنظراته انها تسقط على ماهو اقل من رؤؤس البشر قدامه !

ماكانت خايفه على نفسها ابد واهي تحتمي بباسل كل خوفها كان على سياف ماتبيه يناظر في عيونها ويعرف انها اخذته غدر ماتبيه يعرف انها ماتزوجت يوسف الاعشان تبعد عنه ماتبيه يعرف انها ماكانت نزيهه معه واهي تتلون وتلف ودور عشان تتخلص منه ماتبيه يكتشف وش كثر هي قزمه وحقيره قدامه واهي تظربه من تحت الحزام !
وماكانت تدري ان طعناتها المسمومه زيد انغرست في قلبه واذبحته !

سياف دخل الاصنصير ونزل لدور الارضي ومنه تحرك طالع من المستشفى طلع من البوابه وشاف الحديقه الخارجيه المحيطه فيه وبدى يتمشى فيها ...نفس الشخص ونفس الهتاف المستبشر الي حفظه صم ومايدري كيف يطلع في وجهه لمى يكون في لحظه فاصله معها ....هذا هو سبب مشاكله مع بروق .....كل مره يتلقف ويسوي نفسه البطل المدافع عنها .....رغم انه طول عمره يحميها حتى من الاخطار المحتمله قبل لاتصير الاانه والامره حس انها تحمله اي شعور خاص ....هذي هي الحقيقه المره الي سكر عيونه عنها طول السنين الي فاتت ....كان يشوف عنادها له وتمردها عليه الي ماكان يسيطر على حالات ثورانه الا بكلمته السحريه بروق ناظري عيوني ...ولحد الحين مايدر وش السر في هالكلمه حتى تكبح جنون التمرد عندها وتخظعها لسلطته من جديد .........الي يقهر انها تعامل باسل على انه البطل المنقذ ومايدري لاي حد اوصلت في مشاعرها تجاهه !

بروق اول ماتجاوزها سياف تنهدت بارتياح بغت تكت عفشها كله ابعدت يدها عن جاكيت باسل بخجل هالحركه وهالنداء الي نادتبه باسل كان مقتطع من طفولتها حتى انه طلع معها تلقائي من غير تفكير وبتذكر لوضع باسل مع سياف تكلمت بشي من العصبيه بسب الوضع الصعب الي هي فيه : انت وش سويت خربت على عمرك
التفت عليها بابتسامة سخريه : لونك ماقعدتي تنتفظين قدامه مثل الحمامه الي مغرقها المطر كان ماتدخلت
بروق عقدت حواجبها :ليه انت من متى هنا
باسل هز اكتافه بعدم اهتمام : من اول ماوقفتي قدامه وماقدرت اروح واخليك معه الحالك قلت اراقب واشوف اذا احتجتيني اكون قريب منك
بروق حست بالذنب باسل بينحرم من رهف بسببها
:اسفه
باسل شاف اشكثر مضطربه وحالتها تحزن مد يده لها :هاتي كيس العلاج وروحي ارتاحي في الحديقه القريبه هنا لو شافوك كذا ماراح تخلصين من الاسئله
بروق عطته كيس العلاج وراحت للحديقه الداخليه
اليوم عدد المتواجدين في الحديقه كثير وصايره
شوي زحمه ...شافت مجموعة حريم جالسين على الثيل ومعهم قهوه يتقهوون ويسولفون وواظح انهم
طالعين هنا يغيرون جو مريظتهم عن الغرفه
جت قريب منهم واجلست على كرسي كانت تسحبه
حرمه وراها علشان تجلس عليه لاكن وحده ثانيه نادتها وراحت واتركته على دربها ......تحاول تذوب في التفاصيل الي حولها لعلها تنسى الي هي فيه بس غصب عنها ترجع لموقفها مع سياف .....ليه تكلم عن ادراستها هذا اكثر شي قاهرها وش معنى الدراسه بذات الي تكلم فيها الحين ...ووش يقصد من هالكلام ....ثم هو كان عنده اعتراضين في ادراستها انها ماتسافر والا تدخل تخصص مختلط بس بعمره ماحاول يجبرها على تخصص بعينه حتى رهف لمى منعها تدخل طب قال اختاري الي تبين بكيفك بس مايكون مختلط .....اجل ليه اختار لها ادارة اعمال وهالتخصص مافي حياتها كلها فكرة فيه او جاء على بالها تدخله ؟!

باسل دخل غرفة امه وسلم عليها وعطاها كيس اعلاجها التفت على صقر وابوه شافهم يسولفون ومندمجين مع بعض والاكنهم قضو الظهر كله مع بعض ....حمد ربه ان خواله كلهم يحترمون ابوه ويحبونه مايتخيل نفسه في عائله الاب يكره اهل زوجته ..والزوجه تكره اهل الزوج كان عنده زميل دراسه عائلته بهذا الشكل ويعاني معهم الامرين وفي النهايه قرر يبتعد عن الكل العمام والخوال
فز من هواجسه على صوت امه : بروق وين
ابتسم لها : اجلست في الاستراحه تقول تبي تشرب كوب قهوه
صقر رفع راسه اله : وسياف وين
باسل تحرك يم الباب : مدري بروح ادوره ....يمه اذا مارجعت اعرفي اني رحت لشركه يوسف هناك الحاله
طارق التفت عليه : لا ترجع من غير شر رح لشركه ساعد يوسف كثير عليه الشغل الحاله
باسل بضيق واوهو يفكر في الي صار مع سياف :طيب
جواهر اسئلت بسرعه قبل يطلع : حلا والصغار ليه ماجو معكم
باسل : قصي وغنى راحو مع يوسف لشركه وحلا في البيت
صقر كشر على طاري حلا وقام : انا بروح اشوف بروق
تركهم يتكلمون عن حلا وراح يدور بروق شافها جالسه على كرسي ورى مجموعة حريم وحاطه كوعها على فخذها ومريحه وجهها على كفها
قرب منها والاانتبهت له :بروق
ارفعت راسها بسرعه وشافت صقر فزت واقفه وقربت منه سلمت عليه ...صقر لاحظ صوتها متغير ومبين عليها مرتبكه : وش فيك
بروق :مافيني شي متى بنروح ل الرياض
صقر : بكره جواهر تبي تبات الليله مع اعيالها قبل لاتروح وتخليهم
بروق كان ودها لو يرجعون الحين : في اي وقت بنمشي
صقر : مدري لارجعنا للبيت حجزت




___________


باسل دخل المصعد واهو يفكر في انه يدور سياف ويحاول يشرح له موقفه من بروق ....اخذ وقته يقلب الفكره في راسه ....لاكنه في النهايه تراجع
سياف الحين في قمة غضبه واهو بعد مايتحمله
وممكن تقلب السالفه لهوشه بابسط مما يتصور
....في النهايه اتجه لسيارته بيروح لشركه يمدي
قصي وغنى طفشو يوسف



_____________________



انزلت من سيارة الاجره واهي تلتفت على خواتها الثنتين وبنت عمها الي انزلن بعدها والتفن حولها
علشان يمشون كمجموعه وحده اشرت لمستنقع مياه صغير يعترض طريقهن :هاه هذا اول الخير
انا مدري وشلون يجيلكم نفس تدخلون هالحي القديم الي يغم النفس
تكلمت بنت عمها بدفاع : هالحي القديم الي انتي قرفانه منه فيه افضل مجمع لفساتين السهره كل صديقاتي في الجامعه مايشترون الامنه
هاجر مشت مبتعده عن بقعة الماء بقرف واهي تشوف الشوارع كيف وصخه والبياعين منتشرين
ببسطاتهم على جوانب الطريق ارفعت راسها تناظر
البنايه الي زعمو لها انها افضل مجمع فساتين سهره بلونها الغامق :ماهقيت ورى هالغمته زين
البنات اسحبوها معهم رغم تذمرها وادخلو للمجمع
كان تقييمها الاول للمحلات انها نوعاما مقبوله وممكن تلقى فيها شي
البنات بمبالغه في المدح بعد ماطلعو من ثاني محل تفرجو عليه : شفتي يهبل ونفس الفساتين الي نلقاها عند المولات الكبيره موجوده عندهم
هاجر والسوق ماهو جاي على جوها : والله لو مخلينا نروح لواحد من معارضنا انه ابرك من ذا الحويس وبعدين تو منزلين بضاعتنا الجديده تهبل
وحده من البنات بسخريه : بالحيل يابنت طارق الجويعد قال معارضنا قال تراك يادوب موظفه عندهم
هاجر توقفت عن المشي ولفت مقابله للبنات
: والله عاد مجرد كوني موظفه عندهم يحسسني بالانتماء لشركه الي موفره لي وظيفه من امتع واجمل الوظايف وبراتب تحلمين تحصلين مثله عند غيرهم
بنت عمها امسكتها بيدها وجرتها معها : اسفين ياست الحسن والدلال وماننحرم من معارضكم
بس تعالي شوفي المحل ذاك البنات امس في الجامعه مالهم سيره الاهو يقولون جايب فساتين شي
راحن كلهن للمحل وادخلن فيه
هاجر ادخلت واهي تشوف مستوى الفساتين في هالمحل افخم من كل الي شافتهم قبل بس فيه احساس غريب وترها التفتت للجهه الثانيه من المحل واشهقت بصدمه !!



__________________


تم البارت الثالث والثلاثين


_____________________





*






*






*

 
 

 

عرض البوم صور نبض افكاري   رد مع اقتباس
قديم 30-09-18, 11:18 PM   المشاركة رقم: 185
المعلومات
الكاتب:
اللقب:

البيانات
التسجيل: Oct 2009
العضوية: 150743
المشاركات: 11
الجنس أنثى
معدل التقييم: صبح البنفسج عضو على طريق التحسين
نقاط التقييم: 52

االدولة
البلدSaudiArabia
 
مدونتي

 

الإتصالات
الحالة:
صبح البنفسج غير متواجد حالياً
وسائل الإتصال:

كاتب الموضوع : نبض افكاري المنتدى : القصص المكتمله
Flowers رد: غار الغرام / روايتي الثالثة

 

اول شي احب اهنيك عل هالروايه
تحفه جداااا من بدايتها شدتني وخلتني ماقدر اوقف الين وصلت لاخر بارت
بصراحه ماني عارفه كيف اعبر عن هالجمال
نبدا بشخصيته بروق .. اكثر شي حبيته فيها انه شخصيته قويه وماتخلي حقها لغييرها بس فيها شي مستفز ماني قادره احط يدي عليه احس شخصيتها مختلطه بين امها وابوها وسياف وسياف اخذ الجزء الاكبر من شخصيتها بس سبحان الله مايصير شي الا وفيه خير يعني ضياعها وانه يوسف لقاها كان فيه خير ليوسف
يوسف .. ضياعه كان بسبب الاهمال بس هذا شي مايبرر الاشياء اللي سواها ولا يبرر انه يعترف بشي ماسواه عشان يشوف انهم مايستحقون انهم يعرفون الحقيقه بس شخصيته حلوه وقويه بس كان يحتاج شي بسيط عشان يتعدل والحمدلله صارت شخصيته اجمل من اول وإن شاء الله مايرجع للضياع اللي كان فيه
خزام .. اكثر شخصيه مستفزه في هالروايه غثيييييث بشكل وش اللي مو حاط الرفض في باله وانا مانرفض وجالس يسوي حركات تقهر عشان ماتدخل التخصص اللي تبغاه ايش هذي الانانيه والنرجسيه اللي عنده مع انه حزني في بدايه الروايه لكن جدا استفزني في البارتات الاخيره زي خالته بالضبط
نجي للحب سياف والعشق سياف طب انا احب سياف مررررره واتمى يزيد ظهوره في البارتات الجايه صح انه عصبي بس الحب اعمى وهو حبه لبروق مخليه مايشوف من الدنيا شي الدنيا كانت كلها تدور حولها
اعجبني لقاءهم في المستشفى لولا ظهور باسل اللي خرب علي وعلى سياف ولا كان الخبله بروق كابه عفشها كله عنده هي تحبه بس مضايقها بتدخلاته الكثيره في حياتها اكثر من غيرها بصراحه ابغى يدخل بقوه في البارتات الجايه ويمسح باسل ويوسف ويفكنا منهم

اقتباس :-  
سحب يدها يقربها له اكثر : بروق ناظري في عيوني اشوف ..يالله ناظري في عيوني
حاولت تصد عنه يمين يسار لاكنه كرر عليها :ناظري في عيوني
ناظرت في عيونه واعتقادها انه صار يشوف كل شي سوته في عيونها

هنا لما بدت تتذكر سياف يف كان يعاملها
كانت تعتقد انه اذا شاف عيونها بيعرف كل شي صدقوني هذا حب بس هالخبله لسى ماتعرف تسبه وتدافع عنه من نفسها
بالنسبه لي اعتقادها لطيف جدا ومدامها للان تعتقد ذا الشي معناته للحين عارفه بداخل اعماقها انه سياف مسيطر عليها بس مو راضيه تعترف لنفسها
حبيت انه هو كمان عارفه تأثير الكلمه عليها اتمنى تصير بينهم مواقف كثير عشان نعرف كيف شخصيته الحقيقه بعيد عن العصبيه والزعل

احس هاجر ويوسف بيتزوجون مدري ليه

ننتظرك وننتظر الجمال اللي بتنزلينه

 
 

 

عرض البوم صور صبح البنفسج   رد مع اقتباس
إضافة رد

مواقع النشر (المفضلة)

الكلمات الدلالية (Tags)
الثالثة, الغرام, روايتي
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 02:44 AM.


مجلة الاميرات 

 



Powered by vBulletin® Version 3.8.11
Copyright ©2000 - 2021, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية