كاتب الموضوع :
فيتامين سي
المنتدى :
القصص المهجورة والغير مكتملة
رد: خريف الحب / للكاتبة خياله،،والخيل عشقي
الرياض، العاشره مساءً
رمت جوالها عالأرض بقوه وهي تصرخ بغيض من حياتها اللي اتحولت لسجن حقيقي ولفتره غير محدده، ظلت تصرخ بهستيريا وهي تسب في أبوها وأختها مها وبنات أعمامها وحده وحده وإنتهت بسيل دعوات محمله بكمية حقد وكره مو طبيعي واللي كانت من نصيب جوري.. إتصال صديقتها ذكرها بحبسها وبحالة الفقر المفاجئه اللي لقت نفسها فيها.
رمت نفسها عالسرير وذاكرتها ترجع لليوم اللي قررت تتمرد فيه على عقاب أبوها وتطلع من البيت من غير علمه....
وصلت المول وراحت الكافيه اللي كانت مواعده فيه صديقاتها اللي كانوا على شاكلتها، عبايات أقرب لفساتين السهره بموديلاتها الملونه والضيقه والشفافه في أجزاء كبيره منها.. وجوه كاشفه ومكياج كامل.. أجسام بتتمايل بإغراء مع طقطقة الكعوب الطويله على الأرضيه ورنين الأساور والخلاخيل اللي بتصدح مع كل خطوه.. غلاف مركز من العطور الباريسيه الساحره غمرت الكافيه بمجرد دخولهم وأسكرت عقول كل اللي فيه من روعتها. أتسمرت نظرات كل رواد الكافيه على شلة البنات اللي اتعالت أصواتهم بالضحك والمزح والجرسون يسجل طلباتهم، وبدأ مسلسل الغزل والمعاكسات الصريح والمبطن وكل شخص بيحاول يفوز بنظره أو كلمه منهم.
إبتسمت شذى بغرور وهي تشوف نظرات الإعجاب في عيون الرجال اللي أكلتها حرفياً وهم يتأملوها بنظرات ماكانت تجهل معناها ومررت أصابعها في تموجات شعرها الأحمر بدلال وإحساسها بأنوثتها بيزيد مع كل كلمة غزل بتسمعها خاصة بعد حبسها اللي حرمها من كل نشاطاتها اللي تحبها ومتعلقه فيها، وبعد ساعتين طلعوا من الكافيه وبدأو رحلة تسوقهم المعتاده اللي بيتخللها كثير من مطارادات الشباب اللي بيحاولوا يفوزوا بجوله تسوق معاهم وإذا كانوا محظوظين فجولتهم هتنتهي بعشاء وتبادل أرقامهم وبعدها تبدأ مرحلة المكالمات والمقابلات المعتاده.
دخلت فيكتوريا سيكريت وبعد ساعه من اللف كانت كعادتها محمله بأغراض مو محتاجه ثلاث أرباعها لكن برستيجها مايسمح لها بأقل من كذا قدام صديقاتها، طلعت بطاقتها وأعطتها للكاشير علشان تحاسب واتلهت في الكلام مع وحده من البنات قبل ماتلتفت للموظفه/وش قلتي!!
الموظفه بإرتباك/البطاقه مافيها رصيد .
سألتها/شلون مافيها رصيد.
ردت بتوتر/يعني رصيدها فاضي ..صفر..
طالعت في البنات اللي ركزوا عيونهم عليها بإستغراب وكل وحده تعلق بكلمه وبعصبيه/أنتي جنيتي شلون رصيدي صفر اتأكدي زين يالغبيه.
لفت الموظفه الجهاز قدامها بتردد/تقدري تتأكدي بنفسك.
عضت شفايفها بقوه وهي تشوف الصفر يتراقص بإستفزاز قدامها وطلعت بطايقه ثانيه وأعطتها الموظفه بعصبيه/أكيد في غلط ولازم اراجع البنك ، خذي هذي وفكيني.
جربتها الموظفه وطلع رصيدها صفر، شحب وجهها وهي تجرب كل بطايقها وتطلع بنفس النتيجه وبدأت كلمات المواساة المبطنه بسخريه تكثر بين البنات وكل وحده فيهم تعرض عليها تدفع قيمة مشترياتها،
فجأه لقت نفسها في ليموزين وفي طريقها للبيت، ماإنتبهت متى وكيف طلعت من المحل وكيف وصلت للشارع وركبت السياره كل اللي كانت تبغاه هو إنها تبعد عنهم علشان لايشوفوا ذلها وإهانتها قدامهم.
بعد ماوصلت أتسحبت لغرفتها وغيرت ملابسها وأخذت اللابتوب وبدأت تطلب أول شيئ وقعت عينها عليه عالنت ولما جات بتدفع طلع رصيدها غير كافي للدفع، طلعت من غرفتها وراحت بمكتب أبوها وجات أمها ومها على صراخها لما أخذت ثاني كف من أبوهاوماسمح لهم يدخلوا عليهم،صرخت ببكاء/يبه أنا شسويت لكل ذا، حرمنتي من الطلعه والحين أخذت كل فلوسي وبعد تمد يدك علي ليه يبه ليه؟
رد بغضب/بعدك ماشفتي شي، قولي وش اللي سويتيه ويدري عنه أبو بدر.
طالعت فيه بصدمه/سند!!!
مسكها من كتوفها وهزها بقوه/أيه سند، وش سويتي وسودتي وجهي فيه وخليتيه موبقادره يحكي عنه.. قولي قبل لا أدفنك بأرضك.
حاولت تفك نفسها وبصراخ/ماسويت شي هو قاعد يتبلى علي أنا ماسويت شي.
دفها عالأرض ورفسها في بطنها بقوه/يتبلى عليكي يالخايسه!شايفته فاضي وماوراه شي علشان يترك اللي وراه ويجيني علشان بزر مثلك..
شهقت بألم وحست الدنيا تدور فيها قبل ماتزحف على إيديها وتبعد عنه بخوف .
صرخت في أمها ومها علشان يدخلوا وتابع بعصبيه/لولا إنه حلف إن سواتك مو بكايده ولا كنت طلعت بروحك الحين.. لكن هو ما جاني إلا من شي كبير والله يستر منه، أنقلعي لابارك الله في الساعه اللي جبتك فيها كان بتسودي وجهي وتوطي رأسي بين الناس.. خذوها من وجهي لاأبتلي فيها الحين.
سندوها بشويش وطلعوها جناحها وبمجرد مادخلت صرخت فيهم وطردتهم برا وقفلت الباب بالمفتاح، هجمت على غرفة ملابسها ورمت كل اللي في دولايبها وكسرت عطورها وسط صراخها وبكاها وصوت أمها وأختها اللي يدقوا الباب برجاء علشان تفتح لهم.
دق الباب ورجعها للواقع قبل ماتدخل الشغاله الآسيويه بتردد/مدام أنتا في كويس.
ردت بعصبيه/أنقلعي برا.
دارت بتوتر ورجعت لها نفس الأفكار اللي شغلتها طول الفتره اللي فاتت، اللي قاله أبوها له معنى واحد وهو إن ديما أو ثريا حكوا لسند عن اللي صار في الإستراحه وأكيد عصب منها لإنها طنشت كلامه وقربت من رأس الحين جوري وأكيد هو وراء كل اللي صار لها.. صرخت بقهر من غبائها اللي خلاها تسمع كلام سلطان وفي الأخير ماطلعت بأي فايده وبعد زعلت سند منها وبدل ماتقرب منه بعدت أكثر.. أخذت نفس عميق وهي تفكر في طريقه تقدر تصلح فيها غلطها وتقربها من حلمها.
،
،
،
،
جده،التاسعه صباحاً
ردت بهدوء/السلام عليكم ورحمة الله وبركاته ..هلا بتول صباح الخير ياروحي
بتول بإبتسامه/وعليكم السلام والرحمه، صباح النور على عيونك الحلوه، حزري أنا وين.
ردت بتفكير/أممممم مو معقوله سافرتي طيارتكم مو المغرب؟
ردت بضحكه/عند بيتكم.
سابت اللي في يدها وبإستغراب/تتكلمي جد ولا تمزحي.
بتول بمرح/بتفتحين الباب ولا أرد بيتنا.
ردت بإبتسامه/ياويلك إن خرجت في الشمس ذي ومالقيتك مرزوعه عالباب.
قفلت وغسلت يدها ولبست شرشف الصلاه وراحت فتحت الباب واتخبت وراه وسمعت صوت رجال جنب الباب/أمسكي الباب زين وأنا بظل قريب وبس تخلصي دقي علي.. في امان الله.
بتول/مع السلامه.
دخلت بتول ومسكتها جوري وقفلت الباب وضمتها بحنان/وحشتيييني ياروحي أيش المفاجأت الحلوه ذي يابنت.
اتعلقت فيها بتول بشوق /وأنتي وحشتيييني أكثر علشان كذا جيت أشوفك.
شالت جوري نقابها وحوطت وجهها بكفوفها بحب/ياناس محلاكي صايره قمر ماشاء الله، ياسمين هتتجنن لما ترجع من المدرسه وتشوفك.
إبتسمت بخجل/ بس أنا موبمطوله هالكثر.
حطت ذراعها على كتفها ودفتها بشويش/خلينا ندخل من الشمس ونتفاهم جوا.
دخلوا البيت وجوري تهلي بها وجلسوا في الصاله وحطت لها عصير وحلويات من اللي كانت عاملتها وجلسوا يتكلموا ويمزحوا في كل شيئ وبعد ربع ساعه سألتها جوري بمرح/قولي أيش عندك ولاتستحي.
إبتسمت بتول/خالتي أنتي مايفوتك شي؟
ردت بحب/بحاول مافوت شي يخص اللي أحبهم ويلا قولي خير اللهم اجعله خير.
ردت بسرعه/إبي تجين معايا لندن.
طالعت فيها بعدم إستيعاب/أجي معاكي وين؟
كررت كلامها بإبتسامه/تجين معايا لندن وتكونين جنبي في عمليتي.
مسحت وجهها بكفوفها وأخذت نفس عميق وبهدوء/كان بودي أكون معاكي يابتول بس سامحيني ماأقدر.
طالعتها بصدمه/ليه خالتي وأنا قلت إنك موبرادتني.
مسكت يدها بحنان/ماعاش من يردك ياقلبي بس عن جد أنا مقدر أروح أي مكان الفتره ذي.
بتول بثقه/إذا في مشكله بابا رح يحلها بسرعه أنتي ماتعرفين بابا هو عنده حل لكل شي.
طالعت في بتول وهي تمدح في أبوها وبهدوء/الله لايحرمكم من بعض بس أنا مشكلتي محد يقدر يحلها غيري وعلشان كذا لازم أكون موجوده هنا وماأروح أي مكان.
أتغيرت ملامح بتول وبدأ كإنها رح تبكي/خالتي واللي يسلمك أنا حيل خايفه إني ماأرد مثل قبل.. خايفه أفتح عيني والقى السواد لافني مثل كل مره.. موبقادره أقول هالكلام لأبوي ولبدر لإنهم بعد خايفين مثلي وأم مثل البقيه ماعندي.
ماقدرت تكمل كلامها ونزلت دموعها بغزاره لما ضمتها جوري بقوه/حبيبتي لاتتشائمي وخلي إيمانك بالله أقوى من كذا وربنا هيعوض تعبك خير وهتشوفي.. وإن شاء الله هتكون إبتسامه بدر الحلوه ووجه أبوكي أول شي يستقبلك لما تفتحي عيونك.. أنتي بس قولي يارب.
شدت بتول إيديها على جوري برجاء/أنتي الوحيده اللي بكون معاها مرتاحه ومطمنه ووجودك بيحسسني إن كل شي هيكون بخير ومثل ماأبيه، تعالي معايا تكفين خالتي طل---
قاطعتها/لاتكلميني لإني هردك.
بعدتها عنها بشويش ورفعت رأسها وتابعت بحنان/بتول حبيبتي أنا حاسه فيكي بس لازم تفهمي إنك مو لوحدك أبوكي وأخوكي وجدتك وعمتك لايكونوا جنبك وكل أهلك قلوبهم معاكي، لكن في ناس محتاجين وجودي جنبهم ذي الفتره لإني العيله الوحيده اللي يعرفوها.. ناس مالهم من بعد الله غيري وإذا أتخليت عنهم رح يضيعوا يرضيكي ذا الشي.
هزت رأسها برفض/لا مايرضيني بس أنا ظنيت إنك تحبيني ورح توقفي جنبي.
ردت بهدوء/الحب مو كلام يابتول، الحب أفعال وإحساس مايتغير لمجرد إن اللي نحبه ماوافق مزاجنا أو جاء على طلبنا.. وإذا أنتي هتفكري كذا كل ما شخص رفض لك طلب هتلقي إنه مافي أحد يحبك لإنك مارح تتفقي مع كل الناس.
غطت وجهها بين إيديها بندم/والله موبقصدي بس أنا عن جد محتاجتك معايا.
نزلت إيديها ومسحت دموعها/وأنا هكون معاكي بقلبي وتفكيري، ماهوقف دعاء ليكي وهكلمك كل يوم.. والله يابتول لو بيدي أجي مارح أقصر بس حالتي مايعلم فيها إلا الله.
مسكت يدها وبتردد/خالتي أحكي لي وش فيكي وفضفضي لاتتمين كاتمه بقلبك.
ضمتها لصدرها وبهدوء/ربي يسعدك ويشفيكي حبيبتي، يكفيني كلامك ذا بس لاتشيلي هم ربي بيرزق كل واحد على نيته وربي عالم بنيتي وإن شاء الله هينصرني عليهم ويرد كيدهم في نحرهم.
ردت بقلق/خالتي مو فاهمه شي، من هم ذول اللي تحكين عنهم.
إتنهدت وبشرود/ذول ياقلبي وحوش مايخافوا الله وبيأذوا الناس اللي في حالهم ومالهم ظهر وعلشان كذا لازم أوقفهم عند حدهم قبل مايأذوها ويضيعوها زيهم.
بتول /خالتي كلامك يخوف.
وقفت ووقفتها معاها وبإبتسامه/سيبينا من السيره ذي وتعالي أفرجك بيتي وأسراري الصغيره
وبسرعه رجعت لضحكها وحركاتها وهي مصممه على اللي فكرت فيه طول الليل.
إنتهى البارت
اللهم أغفر لي هزلي وجدي وخطئي وعمدي وكل ذلك مني.. أستغفر الله وأتوب إليه
|
17-07-16, 10:59 PM
جديد مواضيع قسم القصص المهجورة والغير مكتملة
العرض العادي
