لمشاكل التسجيل ودخول المنتدى يرجى مراسلتنا على الايميل [email protected]





العودة   منتديات ليلاس > القصص والروايات > قصص من وحي قلم الاعضاء > ارشيف خاص بالقصص غير المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية


الوصل لذه والهجر دار الأيتام وانا يتيم الوصل ليتك كفلته

السلام عليكم ورحمة الله وبركاته هاذي روايتي الأولى واتمنى تنال اعجاب الجميع الوصل لذه والهجر دار الأيتام وانا يتيم الوصل ليتك كفلته البارت الأول 16/11/2014

موضوع مغلق
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 16-11-14, 11:56 PM   المشاركة رقم: 1
المعلومات
الكاتب:
اللقب:

البيانات
التسجيل: Nov 2014
العضوية: 283821
المشاركات: 4
الجنس أنثى
معدل التقييم: سنيورينا عضو بحاجه الى تحسين وضعه
نقاط التقييم: 11

االدولة
البلدUnited Arab Emirates
 
مدونتي

 

الإتصالات
الحالة:
سنيورينا غير متواجد حالياً
وسائل الإتصال:

المنتدى : ارشيف خاص بالقصص غير المكتمله
افتراضي الوصل لذه والهجر دار الأيتام وانا يتيم الوصل ليتك كفلته

 

السلام عليكم ورحمة الله وبركاته

هاذي روايتي الأولى واتمنى تنال اعجاب الجميع

الوصل لذه والهجر دار الأيتام وانا يتيم الوصل ليتك كفلته

البارت الأول

16/11/2014

.


.




يمشي في هالشوارع ولا يدري وين يروح ولا شو يسوي يمشي وهو يطلب العون من الله سبحانه وتعالى، مشى لين وصل بيت عمه ناصر ( ابو نورة ) دخل المجلس والقى السلام . .

حمد: عمي ابويه تعبان وحالته الله اعلم بها، طالبنك مصاريف الدواء بس . . ابويه يمكن يروح من يدينا * حمد يركع على ريوله وهو يبكي*
ابوسلطان: ماعليك منه يا ناصر يمثل عليك، يبا الفلوس بيسير يشتري له عدة المداويخ . . تحمل تعطيه خاف على ولد اخوك ..
ابو نورة: قم ياصبي تبا الفلوس عشان كذا ! رح ولا عاد ترد تطلب فلوس عنديه حق هالشغلات ..
حمد: ماعليه ياعمي انا دخلت وطلبتك لكن رديتني و ما بسامحك لو صار شي على ابويه

.
.

طلع حمد مظلوم من مجلس عمه ناصر بعد مارده ولا رضى يساعده . . وصل البيت وشاف هند اخته تبكي على باب البيت . .
حمد: هند شو صاررر ياهند شسالفه لايكون ابويه شي صار له ؟؟؟؟؟
هند وهي تبكي : حمدددد ابوووويه يا حمد ابوووووويه
حمد وعيونه متسعه من الصدمة : لا تقولين دخيلج لا تقووولين . . وركض داخل البيت وشاف اللي ما كان يريد يشوفه او يتخيله يصير في حياته، مسؤولية كبيرة الحين على اكتاف حمد امه واخته الصغيره هند اللي توها كملت 13 سنة ..اعلن وفاة ابو حمد وحضر العزاء ابو نورة وهو نادم على اللحظة اللي رد ولد اخوه فيها تندم على اللحظة اللي بعد ما انعم الله عليه بالحلال والمال نسى اخوه اللي رباه وكبره وصار على ماصار عليه .. سنوات قليلة وتوفت ام نورة زوجته اللي تركت له بنت من نفس عمر هند ( نورة) ..

.
.

بعد 10 سنين !!!!!!!!!

علي : اجتماع توقيع مشروع الانابيب بيكون باجر انشاءالله
حمد: خلاص تمام و شو صار على الجمعية . . قطع كلام حمد صوت التلفون ........
حمد : الوووو
: السلام عليكم
حمد: وعليكم السلام والرحمه، تفضل منو ؟
: شحالك ياولدي عساك طيب ؟
حمد: بخير الله يعافيك، آمر ؟
: انا عمك ناصر يا حمد .. حمد توه بيسكر التلفون كمل ابو نورة كلامه : دخيييييلك ياولدي لا تسكر انا تعبان والله بياخذ امانته في اي لحظة، طلبتك طلبتك يا ولد سعيد ماتردنيه ..
حمد: لا تييب طاري ابويه ع لسانك
ابو نورة ( وهو مستانس شوي ان حمد اول مره يطول في الكلام معاه ومايسكر التلفون ع طول ): ياولدي طالبنك تمر عليه البيت اليوم عندي كلمتين لك . .
حمد: هه ماشي كلام ينقال بينا
ابو نورة: دخيلك ياولدي خلني اقول هالكلمتين قبل لا ياخذ الله امانته
حمد: مابقولك ابشر بس هب انا اللي ارد حد طالبنيه هاذي تربية الوالد الله يرحمه . .
ابونورة: والنعم في تربيته بوعسكور الله يرحمه
حمد: بخطف عليك يوم افضى وبوسلطان ماريد اقابله عندك
ابونورة: انشاءالله، مع السسسلامة

.
.

في المساء

حمد يدخل بيت عمه والذكريات تمر في باله ذكريات عمرها 10 سنين كان عمره 18 سنة . . حرك راسه وكمل طريقه ما يريد يتذكر هذا اليوم . .

ابو نورة ( وهو مستلقي على سريره): يا مرحبا يا الله حييييه حمد بن سعيد قرب قرب
حمد ( وهو واقف): قريب
ابونورة : مابتيلس ياولدي
حمد (وهو عيونه تدور في الغرفة ): مستعيل
ابونورة: ماعليه انا ما بأخرك، انا ياولدي ناديتك اليوم اريد اطلب منك السماح، ياولدي انا كم يوم واغيب عن هالدنيا ياولدي كل لحظة مرت علي من يوم وفاة اخوي كانت كلها ندم وحزن
حمد ( يقطع كلام عمه ): انته الحين قايل لي تعال عشان هالكلام اللي ما بيودي ولا بييب، والسماح قايل لك من عشر سنين مابسامحك لو شو مايصير . . حمد وقف وعطى عمه ظهره بيطلع
ابونورة: ياحمد دخيلك دخيلك لاتروح
طلعت نورة في هاللحظة : انته شو قلب عليك ابويه من يوم توفى عميه وهو كله حزن وهم ماشفت حاله من 10 سنين حاله نفس ماهو، اذا الله سبحانه يسامح العبد انته منو عشان ماتسامح، حرام عليك اللي تسويه في ابويه . . نورة تكمل وهي تبكي . . انا متأكدة لو عمي سعيد حي ماكان .........
حمد بغصصه ( يقطع كلام نورة ): اييييه انتي منووووووو عشان تقولين لو ابوووك حي، ابويه ماكانت حالته بتسوء لو ابوج ماردنيه قبل عشر سنين . . حمد بيكمل لكن من الغصصه اللي فيه ما قدر
نورة: انته انسان ايمانك ضعيف، ابوك توفى لأن الله كاتب له يموت ما مات عشان ابوي ماعطاك فلوس للدواء ابوووووك مكتوب له يموت في هاليوم من طلع ع هالدنيا ومنو انته عشان تعترض على أمر الله وتحمل ابويه مسؤولية موت ابوك ..
ابو نورة: ياحمد انا مستعد اسوي اي شي اي شي يرضيك بس سامحني ياولدي خلني اموت وانا مرتاح
طلع حمد وهووو خانقتنه العبرة يتذكر شكل ابوووه يوم مات وهو يوصيه على عمه قبل امه واخته . . ليش يا ابويه ليش هو في المقام الأول عندك بعد ماسوا اللي سواه فييييييك ... لييييييييييييش ؟؟؟؟؟؟؟؟

.
.
بعد يومين

حمد طلع من بيتهم وهو مقتنع بالقرار اللي اتخذه ولا يهمه شو بتكون نتائج هالقرار ولا ردة فعل امه واخته يوم يسمعون باللي سواه . .

حمد: السلام عليكم
ابو نورة : وعليكم السلام يا مرحبا ب حمد انا ادري انك بتسامحني دريت انك بترد مايهون عليك عمك اخو ابوك . .
حمد: خلنا من الكلام اللي ماله لزوم . . اظني ماسمعت غلط اخر مره ييتك هنيه قلت بتسوي اللي اريده عشان اسامحك
ابونورة: ابشر بسعدك اللي تباه بسويه
حمد (يطلع تلفونه ويتصل على محمد ): وصلتوا ؟
محمد: هيه نعم، عند باب البيت
حمد: ادخلوا يالله
ابونورة: منو معاك يا حمد
حمد: الحين بتعرف

.
.
بعد شهر
بيت بونورة . .

سلطان: ابويه الرياييل يسألون العزاء وين بيكون ؟
بوسلطان: في بيتنا انشاءالله، انا بنادي نورة و بنروح هناك . . في هاللحظه دخل حمد وهو يقول: نورة انا بشلها معايه .
سلطان: ويييين راييح انته داخل البيت نورة بتروح معانا بيتنا
بوسلطان: نورة بتروح معايه انا خالها محرمها عقب ابوها
طلع حمد ورقة وتركها ع الطاولة ودخل عند نورة :اجهزي بسرعه واطلعي برا اترياج، ولا اقولج البسي عباتج واطلعي . .
نورة وهي تبكي : انشاءالله
طلع حمد وسلطان يتذمر عند ابوه : كيييييف ياخذها وانا قايل حق بو نورة اني اريدهاااااا
بوسلطان: بونورة ماعطاك اياها، قالك البنيه لها عيال عم اذا رخصوها يصير خير
حمد يركب السيارة وعلى ويهه ابتسامة قهرت سلطان . .

.
.
حمد: أمييييي هنددددددد وينكن
هند وهي طالعه من غرفة أمها : هلا حمد .. شافت البنت اللي واقفة وراء حمد وهي مستغربه منو هاذي
ام حمد واللي طلعت وراء بنتها ( شافت البنت وعرفتها): يا هلا يا مرحبا ب نورة نورتي البيت
حمد وهو مستغرب من امه كيف تعرفها : هاذي نورة بنت عمي ناصر ملجت عليها ويبتها الحين بعد ماتوفى ابوها
ام حمد وهي منقهره من اسلوب ولدها : الساعه المباركه يوم نورة حرمة ولدي، قربي فديتج
حمد: هند شليها ووديها غرفة الضيوف اللي تحت
بعد ماراحت نورة وهي مانطقت بحرف مع هند . . حمد: أمي انا يبتها هنيه بس ماريد اشوف ويها ولا اريد المحها حتى، قوليلها تيلس في غرفتها ولا تطلع منها . . ولا بيصير شي ما يعجبها
ام حمد وهي رايحه صوب غرفة نورة : انته تدري ان اللي تسويه ظلم في حقها بس انشاءالله اللي تريده بيصير

.
.

مرت الأيام والحال نفسه عند نورة ما تطلع من غرفتها ولا تشوف حد غير ام حمد وأحيانا هند لأنها مشغولة مع الدراسة و الخدامة اللي تييب لها الأكل . .

طق طق طق
هند: نوورة
نورة: تفضلي هند دخلي
هند: هااااااااااي، اخباارج شو تسوين
نورة: كم مره قلت لج سلمي بعدين قولي هااااي كيفج
هند وهي تضحك وترجع تسكر الباب وتفتحه: السسسلام عليكم ورحمة الله وبركاته وصباح الخير
نورة: ههههههه وعليكم السلام ورحمة الله وبركاته وصباح النور ، الحين انتي رقم 1
هند: ههههههه انزيييين شتسوين
نورة بنظرة حزينة: ولا شي
هند وهي تدور في الغرفة: ياخي انا انسانه مايعجبني الظلم بس شي يتعلق ب حمد ماقدر، بس تدريييييين اقدر اسوووي شي المهم تطلعين برا هالغرفة لو شوي..
نورة: ههههههه حماسج هذا ع الفاضي انا بكمل شهر وانا هالغرفة ماطلعت منها
هند: هه هه هه دنتي مابتعرفيش هند
نورة: فديييتج خلاص اموري طيبة الحين تعودت
هند استسلمت للأمر الواقع: اممممم انزين دقايق بروح بسرعه وبرجع
نورة باستغراب : وييين رايحة تعالي سولفي شوي

دخلت هند غرفة نورة وهي شاله بوكس كبير . . وعلى وجهها ابتسامة كبيرة
نورة: شو هذا
هند: هذا اللي بيسلينا . . هند وهي تطلع كرتون صغير: هاذي الله يسلمج مونوبولي وهاي لعبة ورقة وهاذي كم دفتر وقلم بنلعب كم لعبة . . رفعت راسها والابتسامة شاقه ويهها وتكمل: ودقايق وبيوصل الأكل تعرفين ما يحلى الجو الا بالأكل
نورة: ههههههه

.
.
في نفس الوقت اللي يلعبون فيه هند ونورة، نزل حمد من ع الدرج وهو يسحب شنطته ..
حمد: صباح الخير الوالدة
ام حمد: صباح النور والسرور، على وين بوشهاب
حمد: عندي كم شغله في البحرين يومين وبرد مابطول
ام حمد: طرش حد يخلص لك هالشغله لاتروح انته
حمد: لا فديتج ماقدر لازم اروح ومابطول يومين بالكثير وبرجع انشاءالله
ام حمد وهي تفكر سفرة حمد بتكون فرصة لنورة عشان تطلع برا الغرفة: الله يحفظك ياولدي شغلك لازم تخلصه وحتى لو كم يوم مب مشكلة المهم ماوصيك على عمرك
حمد وهو مستغرب من رأي امه اللي تغير فجأة: انشاءالله، مع السلامة

.
.
ام حمد: هند يا هند
اضطرت ام حمد تروح بنفسها لغرفة نورة لأن هند ماترد عليها دقت الباب ودخلت ام حمد وتشوف هند نايمة ع الكرسي . .
نورة : ههههه تعبت وقالت مافيها تروح لغرفتها تنام ونامت هنيه
ام حمد: هالبنت كسولة
نورة: بس قلبها مافي اطيب عنه
ام حمد وهي تقول في نفسها مافي اطيب عنج يا نورة بعد ماشفتي هالمعاملة كلها من ولدي وبعدج ساكته
نورة استغربت من سكوت ام حمد فجأة: امي حياج يلسي
هند قامت على صوت امها ونورة: يووووه ليش الواحد مايقدر ينام في حجرته مرتاح
ام حمد: حجرتج بعد هههههه قبل شوي واعيه انتي ماتشبعين؟؟؟
هند: شسوي هاذي نورة تعبتني لأني خسرت خلتني انظف معاها
ام حمد: انتي نظفتي ... وتلف على نورة: يا ليتج ناديتيني يا نورة اشوفها وهي تنظف هههههه اكيد دمرت ما نظفت
نورة: هههههه لاماشاءالله عليها هند
ام حمد: يوووه هند نستني شو كنت اريد اقول
نورة: انشاءالله خيير
ام حمد وهي تبتسم: خيير فديتج، حمد سافر البحرين وقلت فرصة نورة تطلع شوي . . شرايكم تطلعون تتسوقون ولا تتمشون انتي وهند ؟
هند: صددددددددق امي واااو وأخيرا انا وانتي بنطلع مع بعض يالله قووومي بسرعه اجهزي
نورة ماكانت متوقعه انها في يوم بتطلع ولا بتشوف الناس من بعد الحكم بالسجن عليها من حمد ... : امممم محتاجة شوي ملابس ومستحضرات بس انا ماقدر اطلع هند انا بعطيج فلوس وانتي روحي
هند: لا تفوتين هالفرصه نوووورة قوومي اجهزي يالله بليييييز
ام حمد: نورة حبيبتي روحي مع هند وخذي كل شي تحتاجينه وحمد ما بيعرف أبدا هو سافر خلاص وبيرجع بعد يومين
نورة: امي انا ما اخاف من حمد بس هو زوجي وانا ماقدر اطلع بدون اذنه
ام حمد وهي تشوف نورة اللي كبرت في عينها بعد هالكلمتين: صدقتي يا بنتي بس اللي يسويه حمد مايرضي الله ولو طلعتي مابيصير شي
نورة: لا يا أمي ماقدر . . وهي تلف على هند وتطلب منها تأخذ لها الأغراض اللي تحتاجها
ام حمد: ما دام ما رضيتي تطلعين مع هند تعالي بنطلع شوي نتمشى في الحديقة قبل لايأذن الظهر
نورة : يالله
.
.
نورة خلت ام حمد قاعده ع الطاوله تتقهوى وراحت تمشي في الحديقة . . تذكرت حديقتها الصغيره في بيتهم وكيف كانت مهتمه فيها وفي زراعتها ومساعدة ابوها لها . . دمعت عيونها لما تذكرت ابوها : الله يرحمك يا نظر عيني يا ابووووووي . . راحت نورة تمشي مع ام حمد بين الزراعة حتى اذن الظهر ودخلوا البيت ..

ام حمد: نورة هند وصلت ولالا ؟
نورة: هيه وصلت راحت تبدل ملابسها شوي وتنزل
ام حمد: زين لأن الغداء جاهز
هند وهي نازله ع الدرج: اسمع اسمي شو تقولون عني
نورة: هههههه ماشي يالله تعالي بسرعه بموت من الجووع

هند وهي تشوف امها ونورة يتغدون بهدوء ، لفت راسها وهي تفكر ..تدور طريقة تنهي العذاب اللي تعانيه نورة.........


انشاءالله تعجب الجميع، واتريا ردودكم وبعدها انزل البارت الثاني انشاءالله ..

 
 

 

عرض البوم صور سنيورينا  

قديم 17-11-14, 06:24 PM   المشاركة رقم: 2
المعلومات
الكاتب:
اللقب:

البيانات
التسجيل: Nov 2014
العضوية: 283821
المشاركات: 4
الجنس أنثى
معدل التقييم: سنيورينا عضو بحاجه الى تحسين وضعه
نقاط التقييم: 11

االدولة
البلدUnited Arab Emirates
 
مدونتي

 

الإتصالات
الحالة:
سنيورينا غير متواجد حالياً
وسائل الإتصال:

كاتب الموضوع : سنيورينا المنتدى : ارشيف خاص بالقصص غير المكتمله
افتراضي رد: الوصل لذه والهجر دار الأيتام وانا يتيم الوصل ليتك كفلته

 

البارت الثاني

ام حمد ترتب حجابها بعد ماخلصت صلاة في الوقت اللي دخلت عليها هند وجلست على الكرسي وهي تفكر وتلف على امها : امي انتي اكيد مب راضيه على اللي يسويه حمد في نورة
ام حمد: لا والله يا بنتي مب راضيه بس تعرفين اخوج وكيف راسه يابس ومستحيل يغير رايه، محمل هالبنت ذنب مالها به
هند: امي اريدج تكلمينه يوم يرجع طلبي منه يخلي نورة تطلع برا الغرفه حتى لو في البيت بس متأكدة مابيرد لج هالطلب لأنه بسيط ..
ام حمد: المشكلة ماعطاني فرصة اتكلم قالي لا تتدخلون بيني انا وزوجتي
هند: امي عشان هالبنت المسكينه اللي مالها ذنب كلميه
ام حمد: انشاءالله ويارب يقتنع ويغير رايه

.
.
بعد يومين
حمد: حياك سيف ادخل محد غريب . . وقف حمد فجأة وحط يده على سيف عشان مايدخل حمرت عيون حمد من العصبية بعد ما شاف نورة طالعة من الصالة
نورة وقفت مكانها من الصدمة ماتوقعت حمد يرجع اليوم المفروض باجر ليش اليوم !!!!!!! هند وهي تضحك بصوت عالي وطالعه من الصالة وتكلم نورة: بسم الله ليش جيه متنحه هههههههه شفتي جني ولفت الناحية اللي تطلع فيها نورة وانصدمت ب حمد والعصبية اللي مبينه على وجههه اهتزت هند من الخوف وسحبت نورة من يدها و ودتها غرفتها . .
ام حمد: مرحبا مرحبا ب حمد وسيف قربوا قربوا
سيف: المرحب باقي عمتيه شحالج عساج طيبه
ام حمد وهي تشوف حمد كيف يحرك ريله ع الأرض من العصبية: بخييير بشوفتكم يعلني افداك
سيف حس ان حمد فيه شي وما حب يتدخل: يالله اسمحولنا عيل، شي تأمرون
ام حمد: وين ياولدي بتتقهوى وبتتعشى عندنا
سيف: ماتقصرين يعلني افداج تعبان من السفر ومالي خاطر على العيشة ومتقهوين في الطيارة بخطف عليكم عقب انشاءالله
ام حمد: عيل مسموح فديتك الله الله في عمرك الله يحفظك
سيف وهو يحب راس عمته: يالله فداعة الله

.
.
بعد ما طلع سيف ام حمد تدعي الله أن الامور تمر بسلام
حمد بعصبية: هنددددد هندددددد
هند طلعت بسرعه من غرفة نورة وتركض ناحية حمد: ه هل هلا هلااا
حمد: روحي ناديليه هاذي اللي ما تتسمى
هند: منووو
حمد ويرفع عيونه ناحية هند وبعصبية: هنندددد
هند: انشاءالله انشاءالله

طلعت نورة مع هند وكلهن يمشن بخوف صوب الصالة
نورة وعيونها تدمع: الله يخليج يا هند بيذبحنيه احس ماريد ماريد اخاف اخاف
هند: بيذبحنا انا وانتي لو مارحنا

حمد بعصبية: انا ما قلتلج لا تطلعين من الغرفة
نورة: .........
حمد يصااااارخ: رددددي يوم بكلمج
ام حمد: نورة هند روحن غرفكن
حمد وهو يطالع امه بس مستحيل يكسر كلامها: فارقي قبل لا اذبحج
ام حمد: ياولدي نورة انا قلتلها تطلع من غرفتها الله يوم القيامة بيسألني عنها هاذي يتيمة ونحن لازم نهتم فيها وانتي شوف معاملتك لها ولا حتى معاملة خدم اللي تسويه في بنت عمك مايرضي الله ورسوله وانا واختك نريد نبري ذمتنا يوم القيامة قدام رب العالمين يوم بيسألنا شو شسويتن يوم شفتن هالظلم يستوي قدامكن . .
حمد بغصصه: يا امي هاذي بنت عمي ناصر لا هي ولا ابوها يستحقون يعيشون حياة عدلة بعد ما كانوا سبب في موت ابويه
ام حمد: انت تحمل عمك المسؤولية لأنه ما عطاك فلوس بس البنت خبرني شو ذنبها في هذا كله
حمد : ذنبها انها بنته
ام حمد: انا يا ولدي طالبتنك خلها تطلع من هالغرفة انا دائما يالسه بروحي بس في هاليومين طلعت و ونستني وسولفت معايه وتتريق وتتغدا معايه حد اسولف عليه ويرد عليه انته واختك واحد في الشغل و وهيه في الجامعة ماعندي الا هيه تسولف عليه
حمد: ابشري يا ام حمد عشانج والله اسوي اللي تبينه، موافق انها تطلع من غرفتها بس في حدود البيت
ام حمد: الله يرضى عليك
حمد: بس مادام انا موجود ماريد اشوفها قداميه خبريها، ولا اقولج انا بخبرها . . قام من مكانه ومشى تجاه غرفة نورة
ام حمد: الله يهديييييك

فتح حمد الباب بقوووة وطاحت عينه عليها يالسه على الكرسي وتبكي سكر الباب وتقدم صوبها انتبهت نورة على صوت الباب ورفعت عيونها شافته قدامها تقدم منها ومسك شعرها بقوة زاد من بكاء نورة
حمد: هالمرة طوفتلج اياها بس عشان الوالدة، بس مره ثانيه والله ثم والله اذا كسرتي كلاميه بتشوفين شي مايعجبج
نورة وهي تبكي من قوة شده لشعرها: ا ان انش انشاءالله
حمد فر نورة ع الكرسي وقبل لا يطلع: امي طلبتني انج تطلعين من الغرفه ومابا اكسر خاطرها عشانج بس اذا انا موجود في البيت ماريد اشوف ويهج ولا المحج حتى . . طاااااااااااااااااخ سكر حمد الباب وراه بقوة خلت نورة بعدها تيلس على الأرض وتبكي وتطلب العون من الله :يارب عوونك يارررب، وييينك يا ابويه وييينك ليش خليتنيه ورحت ليييش خليتنيه عند انسان مافي قلبه ذرة رحمة يا ليتك ما رديته قبل عشر سنيين يا ليتك مارديته كان عشنا بخيييير انا وانته يا ابوووووي نامت نورة بعد مابكت طول الليل . .

على الرغم من موافقة حمد بس نورة ماطلعت من غرفتها ثلاث أيام تخاف تطلع وتشوفه قدامها . .: اتم محبوسه في الغرفه ولا اطلع واشوفه بالغلط و يتعكر مزاجي ولا يشوفني ويذبحني . .

.
.
ام حمد: نورة حبيبتي قومي بنطلع نيلس في الحديقة . . لا حظت ام حمد الخوف على وجه نورة وحبت تطمئنها
ام حمد: لا تخافين حمد مب موجود قبل شوي طلع ومابيرجع لين فليل
نورة: عيل يالله طلعنا
نورة: امي عادي اطلب منج طلب ؟
ام حمد: تفضلي فديتج فالج طيب باللي تبينه
نورة وهي تبتسم: فالج ما يخيب، شفت مساحة صغيرة في طرف البيت وماتبين للناس واريد ازرع فيها
ام حمد: ابشري البيت كله تحت امرج وين تبين تزرعين ازرعي
نورة وهي تحضن ام حمد: فديت روحج ماتقصرين

. . كانت نورة تطلع كل يوم اذا حمد ماكان موجود وتنشغل بالزراعة

هند: نورة ياخي انتي انسانه فاضيه تيلسين تزرعين نادي العمال وبيزرعولج اللي تبينه ولا ورحي المشتل واشتري زراعة جاهزة وازرعيها ليش تعبلين على عمرج
نورة: انسانه فاضيه يابتها امج سمتها هند، بدال ماتيلسين تزنيين ع راسي تعالي وساعديني
هند وهي تقوم من مكانها: لا حبيتي يرحم والديج هالشغلات ابعديها عني ههههههه انا انسانه تشرف بس ما تشتغل
نورة: ههههههه عشان تعرفين ان مامنج فايدة
هند: ههههههههه وجودي في حياتج يكفيج
نورة: تلايطي احسن لج هههههههه
نورة: هند شوفي هذاك الطرف بزرع ع الأطراف الورد اللي رويتج و من وراء بزرع نعناع يعني نستفيد منه بعد، شرايج ؟
حمد ياي ناحية نورة: هه والله زين ع الأقل طلعتج من الغرفة شغلتج شوي، لو ادري ما حبستج وخليتج تكرفين نفس العمال
نورة بشهقة : انتتتتت من وين طلعت
حمد وهو يعطي نورة ظهره رايح البيت: ادخلي البيت من وراء ما اريد اشوف ويهج في الصالة
نورة بحقد وصوت خفيف: اكرررهكك، يارب عجل في اليوم اللي بفتك منه يارررب
حمد: ميت عليج يعني انا ، مالج مفر بخليج معلقه طول عمرج
يلست نورة ع الكرسي اللي في طرف الحديقة وسندت راسها ع طرف الكرسي ورفعت راسها للسماء: ليتك شليتني معاك يا ابويه . . غفت نورة ع الكرسي وماحست بنفسها الا وهي نايمة

.
.
هند: الله يارب ينزل مطر باجر وما اروح الدوام
ام حمد: الله يسمع منج يا بنتي ويسقينا من امطار الرحمه اليوم
هند: لا امي ادعي حق باجر ينزل المطر الحين فليل حتى لو نزل المطر ما بنقدر نروح المزرعه نستانس بالمطر ام حمد: هههه انشاءالله
هند: الا وين نورة من شردت عنها في الحديقة ورحت ادرس ماشفتها
ام حمد: شردتي عنها ليش؟
هند: تريد تخليني ازرع وانا شردت هههههه تعرفيني ما احب العباله وايد
ام حمد: الله يهديج، اظني دخلت من وراء وراحت غرفتها لأن حمد كان هنيه
هند: انا بروح اشوفها
طق طق طق طق
هند وهي تصارخ عشان امها تسمعها: امي ماترد عليه
ام حمد: فديتها اكيد تعبت ورقدت بس لا تزعجينها، تعالي هاتي الشال ذبحني البرد
هند وهي تمشي ناحية امها: هيه والله اليوم برد
حمد وهو داخل البيت: سالخيررر
ام حمد وهند: سالنور
حمد يقرب ويحب راس امه: علووم الوالدة
ام حمد: علوم طيبه، انته علومك هالأيام مانشوفك مره
حمد: هههه يعلني افداج كنت مشغول والله . . وهو يطالع هند بنظرة خبيثة ويبتسم
هند: بسم الله ليش جيه تطالع
حمد وهو يلف على امه ويبتسم: اميه اكيد كلمتج حرمة خالي سهيل اليوم
ام حمد: هييه نعم وانا قلتلها الساعة المباركة بطالع اخوها وبردلكم خبر
حمد: هيه وانا كلمنيه سيف اليوم، هااه هند شرايج
هند وهي تبدل في القنوات: هاه يا حمد رايي في شو
حمد: ايللسسسي عدل يوم بتكلميني
هند وهي تعدل يلستها بخوف: رايي صح كل شي صح اللي تباه
حمد: ههههههههههههههه متأكدة
هند وهي ماتدري شسالفه: قلتلك صح
حمد: خلاص عيل انا بكلم سيف الحين بقوله موافقين عليك، ويحددون الخطبة
هند وهي تلف على امها واخوها: شووووووو
حمد: هاااه توج متأكده وصح ههههههه
هند بخجل : انا ماعرف شو تقول، بروح ارقد
حمد: اونه ماعرف شو تقول ههههههه رقاد العافيه
ام حمد: عيل ببشر ام سيف وبروح ارقد انا بعد بنش من الصبح ابا اروح سوق الخضره
حمد وهو يحب راس امه : تصبحين على خير

الكل راح غرفته عشان ينام، الا نورة اللي توها حست انها نايمة في الحديقة وقامت راحت البيت
نورة: يا الله انا كيف ماحسيت بالبرد . . دخلت غرفتها وبدلت ملابسها وطلعت صوب المطبخ تريد تاكل شي بعدين تاخذ لها حبتين بندول عشان تخف الحرارة اللي خذتها من البرد . . حمد حس بالملل وقرر يطلع يروح عند الشباب بس وهو نازل سمع صوت في المطبخ ومشى بالخفيف ناحية المطبخ . . دخل وشاف نورة اللي مدت يدها على طاولة المطبخ ورقدت والأكل نفس ماهو قريب منها . .

حمد: اييييه انتي شو تسوين هنيه
نورة ماترد عليه
حمد: يا بنت اكلمج قوووومي . . قرب منها حمد ويحركها بس ماشي فايده ماترد عليه شافها محمره وحط يده على راسها وحس بالحرارة المرتفعه
حمد يحرك نورة عشان تقوم وفي الأخير حست عليه وقامت
نورة بصوت نايم ومب مستوعبه منو تكلم: شووو والله تعبانه ابا انام شوي
حمد اول مره يشوف هالمنظر قدامه ومب عارف شو يسوي: يااخي قوومي ، انزين خذتي دواء ولالا، روحي غرفتج انزين
نورة وهي تحاول تستوعب صوت الشخص اللي يكلمها: ماحصلت كلت بندول بس تعبانه خلوني انام
حمد وهو يحك راسه: يا هووووه شالحل معاها هاذي
نورة وهي توها تستوعب ان الشخص اللي قدامها هو حمد، فزززت من مكانهاا على طوول: شسسسالفه ؟؟؟
حمد: السالفه عندج راقده هنيه ليييش؟
نورة: كنت يوعانه وادور دواء للحرارة
حمد وهو يلف ناحية الأكل اللي نفس ماهو ويرجع يشوفها: انزين
. .
نورة وهي تترياه يتحرك عشان تمر تروح غرفتها: شوي
حمد اللي كان يفكر انتبه لها: شوو
نورة: اريد امر
حمد: حد ماسكنج
نورة: مسكر الدرب
حمد اتجاهلها وطلع من المطبخ ومسك تلفونه يتصل على ربيعه محمد: الووو هلا بو جسيم علومك
محمد: طيبه علومك . . معرس وداق الحين شسالفتك انته
حمد: ههههههه وين دارك بيي صوبك
محمد: تعال يالس في الميلس
حمد: تمام برايك
.
.

 
 

 

عرض البوم صور سنيورينا  
قديم 17-11-14, 10:50 PM   المشاركة رقم: 3
المعلومات
الكاتب:
اللقب:

البيانات
التسجيل: Nov 2014
العضوية: 283821
المشاركات: 4
الجنس أنثى
معدل التقييم: سنيورينا عضو بحاجه الى تحسين وضعه
نقاط التقييم: 11

االدولة
البلدUnited Arab Emirates
 
مدونتي

 

الإتصالات
الحالة:
سنيورينا غير متواجد حالياً
وسائل الإتصال:

كاتب الموضوع : سنيورينا المنتدى : ارشيف خاص بالقصص غير المكتمله
افتراضي رد: الوصل لذه والهجر دار الأيتام وانا يتيم الوصل ليتك كفلته

 

البارت الثالث

في الصباح

نورة: صباح الخير
ام حمد: صباح النور والسرور
نورة: شو اصبحتي اليوم؟
ام حمد: بخير لو ما ذا الخدامه دوم يا بنتي اعلمها كيف تغلى القهوه وتسويها لكن مامنها فايدة دوم تحرق القهوة
نورة: ههههه يعلني افداج هاذيلا شو عرفهن بالقهوه . . بقوم الحين بسوي لج قهوه هب طايعه تشربين قهوه من يد غيري عقبها
ام حمد: يا سسسلام من مدحها هب قايله لا
نورة: دقايق بس
ام حمد: انزين تريقي يعلني افداج اول
نورة: بنتريق رباعه انا وهند بروح اسوي القهوه لين تنزل
هند: انا وصلت وبتريق عنج
ام حمد: ماشي ريوق لين اتيي نورة
هند: اميييييي عاااد الله يخليج بموت من اليوع انا
نورة: ههههههه انزين لا تصيحين خلاص
هند: لعيون الأكل ابكي واغني وارقص المهم اكل
نورة: الله يعطيج العقل بس هههههه
هند وهي تسوي عمرها تبكي : امي طالعي حرمة ولدج اهى اهى
ام حمد ونورة كلمة هند صدمتهم . . نورة: دقايق وبرد
ام حمد تقرص هند بعد ماراحت نورة: انتي كيف تقولين حرمة ولدج . . الله يهديه ذا الولد اللي مايدري ب حرمته وحارمنها من كل شي
هند بحزن: الله يكون في عونها انا لو مكانها كان ينيت محبوسه من شهر في نفس البيت
ام حمد: الله المستعان
حمد وهو نازل من الدرج: السلام عليكم
ام حمد وهند : وعليكم السلام
هند: لو طارين المليون
حمد: الله عليج يا بنت سعيد الحين المليون احسن من شوفتيه
ام حمد: لاااا والله يعله يبطي مااوصل كانه بيسدنا عن شوفتك
حمد: يعلني افدا خشمج
هند: اسسمع هذا بس لو مليون ينزل الحين من الدري بدالك الله يعلم وين داريه
حمد: صه لا اسمع لج حس ياللي ما تستحين . .
ام حمد وهي تكلم حمد اللي قام من مكانه رايح برا: ويين ياولديه ماتريقت
حمد: برد فديتج بس بشغل السيارة وبرد
دخلت نورة في نفس الوقت اللي طلع فيه حمد....: وهاذي القهوه ووصلت . . وتصب على ام حمد
ام حمد: انا اشهد انها قهوة مظبوطه . . نورة فديتج حطيلي القهوه عدالي انا بروحيه بصب ايلسي تريقي مع هند
حمد: اميييه . . سكت اول ما شاف نورة
نورة اول ماشافته ييت بتقوم بتدخل داخل
ام حمد: ايلسي فديت روحج وين بتسيرين . . حمد يعلني افداك تعال ايلس عدالي بصب عليك من ذا القهوه المظبوطه
نورة استغربت سكوت حمد بعد ما شافها هنيه
حمد: اييه تعالي امسكي الدله عن اميه
نورة: عطيني عنج اميه . . خذت نورة الدلة وصبت على حمد وامه وهند تشوفها وهي تقول الله يصبرج بس
حمد: منو مسوي القهوه ؟؟؟
ام حمد: بتبطي ذا الغلامة ماسوتها، هاذي نوره يعلني ما خلا منها مسويتنها
حمد بعد ماسمع اسم نورة وهي اللي مسويه القهوه . . خذ الفنيال وجب القهوه في الماي ورفع عيونه ناحية نورة يكلمها: هاي قهوه هاي سوداء عنبوه غيييرج . . خذي الدلة وفارقي عن قداميه
نورة خذت الدلة وابتسمت ابتسامه قهرت حمد...: ايييييه انتي ليش تضحكين
ام حمد: ياولديه استهد بالله من دخلت وانته شاب ضو ع البنيه خلها في حاله دخيلك
حمد: هند قومي بتلقين ملف ازرق في السيارة هاتيه
يابت هند الملف وطلع حمد كم ورقة من الملف واشر على نورة عشان تقرب ..: تعالي وقعي هنيه
نورة: شو هذا ؟
حمد: وانتي شدخلج شو هذا . . وقعي وعن الحشره
نورة: مابوقع اريد اعرف شو هاذي الاوراق
حمد عطى نورة نظرة خلتها تمسك الاوراق غصب وتوقعها . . ...: يوم اقولج سوي الحايه تسوينها وانتي ساكته
نورة وهي دموعها تنزل وراء بعض : ا ان انش انشاءالله
ام حمد: شو اللي خليتها توقع عليه يا حمد
حمد وهو يرجع على وراء ويبتسم: هذا توكيل على حلالها واوله البيت . . لقيت له شراي بيشوفه باكر
نورة على طول رفعت عيونها تشوف حمد: لااااا انته كيف تخلينيه اوقع على توكيل بيتنا ما ببيعه ريحة اميه وابويه فيييه . . نورة وهي صياحها يزيد ... : حرااام علييييييييك لا تبيعه الا البيت عندك المزرعه عندك باقي الحلال بيعه لكن البيت لا دخيييلك . . يلست نورة ع الارض وهي تصيييح : ل لا ا تب تبيع بي بيت بينا

حمد: بعدج ماشفتي شي
هند: حمددد حرام علييييك
حمد يصارخ على هند: انتيييي لا تتدخلييييييييين . . طلع وسكر الباب وراه وترك نورة اللي تبكي في حضن ام حمد وتترجاها تكلمه ما يبيع بيتهم . . لكن ام حمد تدري مافي فايده من ولدها عنيد وراسه يابس واللي يريده بيسويه ..
قامت نورة من مكانها ودخلت غرفتها وتغطت باللحاف وهي تبكي وذكرياتها في بيتهم تمر في بالها . .

قبل سنتين
نورة: ابويه طالع بس باقي هاذاك الطرف وبتستوي حديقتي احلى حديقة
ابونورة: هههه يا سلام عليج احلى حديقة مره وحدة
نورة: هيييييه وحتى اتوقع بتكون من احلى المعالم في الدولة
ابونورة: هههههههه وشو بتسمينها
نورة: امممم بسميها طالع عمرك حديقة السعادة
ابونورة: اسم جميل بس ليش السعادة ؟
نورة وهي تنزل عيونها تحت: على اسم امي الله يرحمها ( سعاده)
ابونورة: هههههه اللي يسمع كلامج الحين يقول هاذي بزر عمرها 12 ولا 13
نورة: ابوييه تشجيع لو سمحت هههههه
ابونورة: فاالج طيب . . ويقوم يساعدها

رجعت نورة من ذكرياتها مع ابوها المرحوم . . واستمرت في الصياااح لين غفت عينها . .

مرت الأيام ونورة تتجنب تشوف حمد عشان مايجرحها اكثر اللي سواه تشوفه يكفي وزيادة . . خطبة هند تحدت بعد فترة قريبة بعد موافقتها والكل فرح لها وتمنى لها التوفيق ..
.
.
ام حمد: والله يا ختيه ملج عليها ويابها البيت عقب ماتوفى ابوها ولا ودنا نحن بحفلة عودة وعرس لكن الله ماكتب ام راشد (اخت ام حمد) اللي ساكنه في قطر: ماعليه الف مبروك والله يوفقهم ويهنيهم، عسى البنت حلوه وفنانه
ام حمد: ماشاءالله عليها خيرة البنات مابنحصل احسن منها
ام راشد: هذا النصيب يا ختيه، عيل حمد عقب ما فسخ الخطوبه ماتوقعنا يعرس عقبها بس الله كاتب له
ام حمد وهي مستحيه من اختها: هيه والله يا ام راشد هذا النصيب
ام راشد: يالله عيل شي تأمرين يعلني افداج
ام حمد: سلامتج فديت روحج سلمي ع بو راشد والبنات
ام راشد: سلامن يوصل، يالله فداعة الله
ام حمد: في حفظ الكريم

.. توها ام حمد مسكره الخط عن اختها ام راشد اتصلت عليها اختها ام سلمى
ام سلمى: السلام عليكم
ام حمد: وعليكم السلام يا مرحبا الساع بهل البر
ام سلمى وهي تضحك: ما بغيتوا تييون صوبنا
ام حمد: ودنا الساع والله لكن هند مشغوله مع هالدراسه وحمد في الدوام
ام سلمى: ماعليه الاجازة يايه انشاءالله، شحالكم انتوا ، شحال عروستكم عساها طيبه ؟
ام حمد: بخييير وسهاله فديتج، يسرج حالها بخيير
ام سلمى: يا حيكو، عيل يوم ان المعاريس في الدار قربوا صوبنا باكر العشاء عندنا حق حمد والعروس
ام حمد تخاف تتوهق مع حمد ومايوافق: ليش يا بنت الحلا تكلفين ع عمرج وتسوين عزيمة
ام سلمى : افااااا عليج هذا حمد الغالي يستاهل هو وحرمته
ام حمد وهي خلاص توهقت: فالج طيب باجر بنيي صوبكم انشاءالله
ام حمد سكرت الخط عن اختها وتفكر ماتدري كيف تقول حق حمد ونورة تعرف ان حمد مستحيل يوافق بس بتحاول معاه . .
هند دخلت على امها وشافتها سرحانه: امييه شبلاج في شو تفكرين
ام حمد: زيين ييتي، خالتج مسويه عزيمة باكر حق حمد ونورة
هند بصدمة: شووو حمد مستحيل يوافق يخلي نورة تروح هذا برا البيت مايخليها بيخليها تروح عزيمة بيت خالتيه و ع اساس انها عروس بعد
ام حمد: الله يستر من اخوج بس . . يارب انك تهديه وتلين راسه اليوم
خذت التلفون ام حمد واتصلت على حمد . ...: وين دارك
حمد: قريب، شوي وانا عند البيت . . شي تبين؟
ام حمد: هيه فديتك تعال غرفتيه من توصل
حمد: عسى ماشر
ام حمد: لالا ما من شر خالتك مسويه عزيمة باكر وكنت بخبرك واباك في حايه بعد
حمد: ايوواا، يالله شوي وانا عندج
ام حمد: مع السلامة . . الحين بيي تهقين بيطيع ؟
هند: والله يا اميه انتي ادرى بولدج . . انا ابصم بالعشر هب طايع
ام حمد وهي تفكر كيف تقنع ولدها تعرف ومتأكدة انه مابيوافق بس فشله في اختها اللي بتسوي عزيمة حق ولدها ونورة : يارب عونك
حمد دخل الغرفه وحط السفره على كتفه وانسدح ع ريول امه: لبيه الغاليه آمري
ام حمد: لبيتي في منى
حمد وهند: امييييين
ام حمد: خالتك دقت قبل شوي وتعزمنا باكر عشاء
حمد: بنروح لها انزين هاذيه العين
ام حمد:بس ياولديه هيه مسويه العزيمة وقالت حق حمد والعروس
حمد ماتوقع يسمع هالكلام وقام من مكانه ولف على امه: منو العروس لا يكون تقصد نورة بس هه، مستحيل اخليها تروح هاذي
ام حمد: بس ياولديه مايصير
حمد وهو ياخذ تلفون امه ويتصل على خالته: الوو مرحبا
ام سلمى : مرحباااا الساااع حي ذا الصوت
حمد: شحالج خالتيه
ام سلمى: بخيير الله يعافيك فديتك شحالك انته ربك بخير ؟
حمد: بخير مانشكي باس
ام سلمى: عشاك انته وحرمتك باكر عندنا ونرقبكم
حمد: يعلني افداج حرمتيه مابتروم اتيي بس اميه وهند بيبهن لج انشاءالله
ام سلمى: بنتك يا ابوووويه ، حرمتك بتيي العشاء مسواي لها وان مايت ترانيه بزعل عليك وانته تعرفها زعلتنا
حمد باستسلام: لا دخيلج لا تزعلين، بنيي انشاءالله
سكر حمد الخط عن خالته بعد ما خلصوا سوالف وقبل لا يتكلم ركضت هند ..: بروح اقول حق نورة ان بنروح باجر العين يااااااي
حمد وهو يقوم من مكانه: باجر بنروح وبنرد نفس اليوم مابنبات
ام حمد: انشاءالله، عيل انا بسير السوق الحين وبشل نوره وهند معايه
حمد: نورة مالها حايه تروح
ام حمد: يا ولديه البنت ماعندها ثياب وبنروح صوب العرب خلها بتاخذ لها كم حايه وبترد
حمد: اميه فديتج روحي انتي وهند ونوره برايها
هند وهي يايه من وراء حمد تغمز لأمها بقصد: اميه معاها حق يا حمد حرمتك تمثلنا الحين والعرب ينادونها حرمة حمد بن سعيد يعني لازم تكون بأحسن منظر عشان جيه خلها تروح معانا ومابنطول
حمد وهو طالع: قلت لا
هند : اووووف من ولدج ما في فايده معاه

بعد ماطلعت ام حمد وهند معاها السوق راحت نورة حديقتها ولبست غفازاتها ويلست تعدل في الزراعة طلع حمد وشافها هناك راح صوبها . .
حمد: يا نورة
نورة كانت مشغوله ولفت ع طول ناحية حمد..: لبيه
حمد شافها بس ماقدر يكمل كلامه . . شكلها كان غييير اليوم،،،، خصله من شعرها البني طلعت من طرف الشيلة وطايحة على ويها شكلها كان بريء جدا . . نورة استغربت ليش ساكت ومايتكلم استوعبت ان شعرها طالع على طول راحت تعدل الشيلة . . لف حمد عنها ورجع داخل البيت

حمد يكلم نفسه . . بسم الله ليش الحين انا رجعت يوووه نسيت اقولها اجهزي رجع مره ثانيه عندها
حمد: 5 دقايق واحصلج جاهزة عند الباب
نورة: وين بنروح
حمد قرب منها ناوي يمسكها من شعرها ويقولها يوم اقولج تسوين شي ما تسألين . . بس قرب منها وعيونه ماتحركت من عيونها يحاول يحرك عيونه بس مايقدر . . نورة خافت منه وعلى طول تحركت من قدامه ودخلت البيت جهزت وطلعت

 
 

 

عرض البوم صور سنيورينا  
قديم 20-11-14, 03:21 PM   المشاركة رقم: 4
المعلومات
الكاتب:
اللقب:

البيانات
التسجيل: Aug 2013
العضوية: 256322
المشاركات: 14
الجنس أنثى
معدل التقييم: نهاد حمزه عضو بحاجه الى تحسين وضعه
نقاط التقييم: 46

االدولة
البلدEgypt
 
مدونتي

 

الإتصالات
الحالة:
نهاد حمزه غير متواجد حالياً
وسائل الإتصال:

كاتب الموضوع : سنيورينا المنتدى : ارشيف خاص بالقصص غير المكتمله
افتراضي رد: الوصل لذه والهجر دار الأيتام وانا يتيم الوصل ليتك كفلته

 

السلام عليك حلوه حبيبتى كمليها عجبنى ان امه واخته واقفين معاهاواكيد اللى دى امه هيجيله يوم وقلبه يحن ويرجع عن حقده

 
 

 

عرض البوم صور نهاد حمزه  
قديم 12-08-15, 07:53 AM   المشاركة رقم: 5
المعلومات
الكاتب:
اللقب:
عضو فخري
قارئة مميزة


البيانات
التسجيل: Jul 2014
العضوية: 271387
المشاركات: 11,068
الجنس أنثى
معدل التقييم: bluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميعbluemay عضو مشهور للجميع
نقاط التقييم: 13794

االدولة
البلدJordan
 
مدونتي

 

الإتصالات
الحالة:
bluemay غير متواجد حالياً
وسائل الإتصال:

كاتب الموضوع : سنيورينا المنتدى : ارشيف خاص بالقصص غير المكتمله
افتراضي رد: الوصل لذه والهجر دار الأيتام وانا يتيم الوصل ليتك كفلته

 
دعوه لزيارة موضوعي

تغلق إلى حين عودة الكاتبة

 
 

 

عرض البوم صور bluemay  
موضوع مغلق

مواقع النشر (المفضلة)

الكلمات الدلالية (Tags)
آحبك, الأدباء, الوشم, يبدء, والهجر, وانا, كفلته
facebook



جديد مواضيع قسم ارشيف خاص بالقصص غير المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 03:57 PM.


مجلة الاميرات  | اية الكرسي mp3  | القران الكريم mp3  | الرقية الشرعية mp3  | شات جوال 

 



Powered by vBulletin® Version 3.8.11
Copyright ©2000 - 2019, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية