بسم الله الرحمن الرحيم
السلام عليكم ورحمة الله وبركاته
ماشاء الله تبارك الله
ولاحول ولاقوة إلا بالله



البارت السادس والعشرون


ماتؤمن به،
يختلف عمّا تشعر به،
يختلف عمّا تقوله،
يختلف عمّا تعتقده،
يختلف عمّا تريده، يختلف عمّا تتمناه،
يختلف عمّا أنت بحاجة إليه.

~ رشاد حسن ~



____________




سمعت صوت المفاتيح
فاستعدلت في جلوسها وعندما دخل لم يقفل الباب خلفه
بل وقف في مكانه وقال -: تعالي
هنا الجازي شعرت بأن قلبها توقف عن النبض
تقدّم جواد لتدخل هي خلفه بتردد وبصوت ناعم -:
السلام عليكم
جواد مسك يدها واقفل الباب خلفه ووقف امام الجازي -:
لمن كلمتها عنك اصرّت انها تشوفك
الجازي اتسعت عيناها .. هي الفتاة نفسها !
ابتسمت وهي تتأملها -: ماشاء الله زي ماوصفك جواد بالضبط
يعني الصراحة انا غرت وكذا
بغرابة -: غرتي !!
جواد -: اووه صح نسيت اعرفكن على بعض
وهو يشير الى الجازي وكانت نظراته موجهه نحو ملاك -:
الجازي زوجتي الأولى
واشار لملاك وهو ينظر للجازي .. ملاك زوجتي الثانية
الجازي بصدمة -: زوجــــــتــك !!
ابتسم بسعة -: ايه ، وشد بيديّ ملاك اكثر
ملاك نظرت للأسفل وهي تمثل دور الفتاة الحيية من زوجها
الجازي كانت تراقب بهدوء وتشعر بأن شيئاً ما سينفجر للحظة
لكنها اخذت نفساً عميقاً وصمتت لعشر ثواني
لتبتسم بسكينة -: مبروك عليكم وهذا من حقك
والحين اعذروني بروح انام خذو راحتكم البيت بيتكم
ذهبت بخطوات هادئة للغرفة واقفلت الباب بالمفتاح ولكن دون صوت
حتى لاتشعرهما بشيء ..
حينما اتجهت للسرير شهقت بقوة وانفجرت تبكي بصمت ..
في جهة جواد وملاك ..
بقهر -: ماهقيت هالبرود والله
برحمة -: حرام جواد يصير نتراجع ترا هالملاك مايستاهل
-: تخسين ماكون ولد ابوي ان رجعت في كلامي
بعدين انتِ شايفة ردة فعلها ..
هزت رأسها بـ لا -: مادري متى بتفهمونا يا الرجال
اوك انا بروح الحين وانت روح الغرفة وشوف وضعها
-: يختي ماكنت ابي الخطة تصير كذا
-: لا تبي الصراحة انت ماشي صح واذا تبي تفهم كلامي الحقها الغرفة .. يلا انا بروح الحين تامرني على شيء
-: لا ياقلبي انتبهي لنفسك ولا اقولك انا بوصلك
-: لا ماعليك انت روح للحلوة اللي داخل تراني ماني بزر
-: بس ولو ...
قاطعته -: قسم بالله اعرف اسطوانتك .. نيويورك كبيرة وتخوف
وفيها قطاع طرق ومدري وشو .. يابابا الحين نهار
محد بيقرب صوبي
ضحك -: اوك حبيبتي انتبهي لنفسك
قبل ان تذهب قبلته بخده -: المرة الجاية بسويها قدام الحلوة ، وغمزت
ضحك بصخب -: اسمها الجازي مي الحلوة
وهي متجهة نحو الباب -: اصف ما رأت عيني لا اكثر
يلا باي ، وهي تشير بيدها
تنهد -: في حفظ الرحمن ..
اقترب من باب الغرفة كان سيفتحه ولكن تراجع
سمع صوت شهيق ويبدو ان هذا الشهيق يعود لبكاء مرير
فتح عينيه في ذهول .. هل تقصدين يا ملاك انها ....







*






في وقت سابق ..
بعد ان اخذ منها الأخبار -:
اسمعيني جايك بفكرة اليمة وبعدها اضمن لك تخلعينه
بهدوء -: وش هي الفكرة
سرد لها خطته ليتفاجأ من ردها ..
-: والقرض هذا ليش ؟ مو اظن وراك زواج
كان المفروض ماتطلعه لو ايش ماصار الا للزواج
بغضب -: مالك شغل وعساني ماتزوجت
ذا جزاتي مضحي بنفسي علشانك
-: ياسلطان انا ماقلت شيء وصدقني اللي يهمني انك تتزوج
وانا ماعليه .. صمتت قليلاً لتردف .. ربنا يعوضني
-: هذي اللي بتطلعني عن طوري هالحينه
-: سلطان صلّ على النبي
-: اللهم صلّ وسلم عليه
-: اوك خذ نفس وروق
اخذ نفس -: اوكي اخذنا وروقنا هاه وش عندك
بتردد -: احم يعني انا آآ خلاص راضية اكمل مع صقر
و.....
قاطعها سلطان -: كــــــيــــــــــــــف !!
اغمضت عينيها -: اللي سمعت وان شاء الله بزوركم قريب
يعني صقر تغيّر في معاملته وصار احسن سبحان الله
ربي حنن قلبه وهداه ..
هز رجله بتوتر وجده يراقب مايحدث بهدوء
-: اممم وان شاء الله بطلع جوال ورقم خاص فيني واقدر اتواصل معكم و...
-: بس خلاص لاتكملي
-: سلـ..
قاطعها -: حياتك وانتِ حر فيها وللمرة الأخيرة اقولها لك
لاتجيني في يوم وتقولين صقر ظلمني طلقوني منه
نزلت دمعه منها -: لا لاتخاف ان شاء الله مراح اقول
والحين عن اذنك سلم لي ع الكل و و انتبه لنفسك
اقفلت دون ان تسمع رده ..
وانفجرت تبكي كان هذا قرارها من البداية ورسالة ماجد ووقوفه هو ومؤيد في صفها جعلها تقتنع بفكرة قرارها
وبما انها ضحت فهي ستكمل إلى النهاية مشوار تضحيتها
ولا تريد ان تُتعب اهلها ..
طرق الباب اجابت بصوت منخفض -: مين !
-: انا ماجد
-: وش تبي
-: يعني بآكلك انا الله يهديك .. افتحي نسيتي ان جوالي عندك
-: طيب اوكي تعال من الحوش وبنزله لك من السلة
-: انا لله .. اقولك افتحي يابنت
ذهبت للباب وفتحته ومدت له الجوال ولكنه لم يأخذه بل دخل
وهو يقفل الباب خلفه قال -: جايب لك اشياء حلوة ابي
اعرف ليه هـ العناد
ورفع نظره لها ليسقط الكيس من يديه -: تبكين !!
مسحت دموعها وابتسمت بألم -: لا
-: وعيونك الشاحبة ووجهك ؟
ضحكت -: عادي اشياء ماتهم احد ..
ماجد اقترب منها -: عبير ! ايش اللي مايهم احد
قسم بالله انك تهميني بحجم السما والأرض الا اكثر
الحين ابي افهم ليه تبكين ! ، ياليتني ماعطيتك الجوال وتكلمي اهلك
ان كان هذا الشيء بيخليك تبكين
حركت رأسها يمنة ويسرة -: انا مابكيت علشاني كلمتهم
-: اجل !
رفعت كتوفها -: يمكن لأني فكرت اجلس هنا طول حياتي
ماجد لم يصدق ماقالت -: بتجلسين هنا ؟ في بيتنا !!
ابتسمت والدموع تكوي خدها -: اي
احتضنها بقوة وهو متجاهل دموعها التي اضعفته -: صدقيني دامني حي راح اساعدك باللي تبين فيه
من صدمتها تجمد جسدها ليشعر ماجد بنفسه
وابتعد عنها -: آآ آسف بس تحمست شوي
بحياء غطت بيديها على وجهها -: لا تتهور مرة ثانية
وبحزم نظرت له .. عاد انا مو اختك ترا انا زوجة ابوك
ضحك وحك خده -: شسوي يعني اخ مايبي اخته تروح من عنده
مسحت دموعها التي تسقط -: خلاص ارتاح اختك بتجلس عندك
وعقبال ما يجي مؤيد ياارب
-: ماعليك فترة بسيطة وتعدي بإذن الله
-: ان شاء الله .. المهم دامك قلت بتساعدني
عندي كم شيء ابيك تكلم ابوك فيه ولا اقولك قوله اليوم يجيني
بضيق -: اوكي اللي تامرين فيه ، ونظر للكيس
هذي من السوبر ماركت خذيها وابيك تاكلين زين
-: ماشاء الله اظن خذيت لي السوبر كامل !






*








في إحدى مقاهي نيويورك المعروفة والتي هي على شارع التايمز
كان يراقب قهوته التي لم يشربها بعد
لونها الداكن .. والدخان الي ينبعث منها .. وهو يعلم رغم جمالها إلا انها مُرّة ، تماماً كحياته رغم جمال ايامه إلا انها مُرّةً دونها
ابتسم .. لو كان شخصاً غيري لكان نساها ولكنها لم تكن انثى عادية
ولم اكن عاشقاً عادي ..
غاص بذكرياته للخلف ..
كانا يلتقيان في مكانهما السري او بالأصح كان هو
الذي يزورها في مكانها المفضل ..
تذكر ذلك اليوم الذي يعده من اجمل الايام
لأنها لم تعارضه في شيء واخيراً قد تجاوبت معه
...
استرق النظر اليها -: متى قلتِ يوم ميلادك ؟
كانت تبصر للسماء ببصيرتها وهي مغمضة العينين
-: يوم 15 من هالشهر يعني بكرة وانت يوم 16 مو ؟
بسرور -: وعارفة يوم ميلادي متى !
بعدم اهتمام -: سمعت البنات يتكلمون حول هالموضوع
بإحباط -: اهاا
وصمتا ...
لتتحدث هي -: اممم تعرف متى آخر مرة سويت عيد ميلاد
-: متى ؟
-: لمن كنت بكندا يعني قبل ثلاث سنين بالتمام
-: يعني ودك يسوون لك الحين ؟
ببرود -: لا مايهمني اصلاً آخر شيء افكر فيه هالأعياد
-: ايه اصلاً كلها امور بدعية وحرام عيد الميلاد
-: اعرف بس لمن كنا بكندا كانوا جيرانا يسوون
لي فما حبينا نكسر بخاطرهم ..
-: طيب لو عطيتك انا هدية بتاخذيها ومراح تكسري بخاطري صح
التفتت له وهو ارتبك -: يعني ترا ما اقصد شيء
فاجئته ببتسامتها -: اوك وانا انتظرها
اتسعت ابتسامته بعدم تصديق -: صدق بتقبلينها
-: بقبلها لأني اكبر منك بيوم
-: ياشيخة ترا انا اكبر منك بسنة
وانتشرا ضحكهما بين ذرات الهواء ..
وتلاشت صورتها من مخيلته ....
وهو يتذكر هديته لها في اليوم الثاني
كان عطره المفضل وحينما اعطاها اصرّ عليها ان تفتحه امامه
وحينما فتحته اخذه من يدها وعطّرها به
عفست انفها -: العطر قوي ! .. لا تقول رجالي
ضحك -: ايه
-: ليش !
همس -: علشان يعرفون انك على ذمة عاشق
لم تسمعه .. -: وش قلت ؟
تراجع -: لا ولاشيء ع العموم ترا صح صرتي عشرين سنة لكن كأنك بنت 15 سنة ..

.....

ضحك سعود مع نفسه واصبح ينعتها بالجنون
.. ربنا سامحنا كنا مبتدعين لأشياء كثيرة
ياليت لو الزمن يرجع لكان عطيتها العطر بعيد صحيح
مو علشان يوم ميلادها حتى لو كانت نيتي لا تمس يوم الميلاد بصلة
وانما اتخذت يوم ميلادها حجةً حتى لاترفض ..
تغيّر الحال كثيراً ياحسناتي لقد اصبحنا بعد تفلتنا منضبطين
انتِ لو تريْن الآن لم يعد أي شيء في الماضي حاضراً
حتى ان الجميع التزم بالحجاب ! ..
وانتِ ماهو حالك !؟
تذكر عينا زوجة جواد وكيف انها بعثرته
حدث نفسه قائلاً .. اووه صح كيف راحت عن بالي
زوجته بالتحضيري مما يعني بأن عمرها 19
فهل يصغر المرء يوماً !! ..
اذاً بهذا سأنفي وجودها في زوجته ..






*






في عصر اليوم التالي ..

ربطت حذائها وبدأت تجري ببطء في الفناء الخلفي لبيتهم
وتوقفت وهي تلتقط انفاسها .. اخذت نفساً عميقاً حتى لا تتعب جنينها معها واستراحت قليلاً لتواصل الجري ..
كانت وهي تجري تفكر كيف بأن الايام تركض سريعاً
بالأمس كانت في اول شهور حملها والآن اصبحت في شهرها السابع
بقيَ لها شهران فقط ...
نظرت لبروز بطنها -: ماعليك يابابا تحملت الكثير وبقى القليل
لا تعلم لمَ اتى في بالها سامي ..
خيالها انطلق دون اذنها ..
تخيلي يا امجاد حين ولادتك وانتِ دون زوج
وطفلك عندما يخرج يبحث في جميع الوجوه عن رائحة ابيه
فلا يجد الا ام ضعيفة خارت قواها حين المخاض !
ينتظر سماع الأذان من فم ابيه فلا يلقى الا خيباته
سوى انه كان يسمع قصصاً عن ابيه
وكنتِ نادراً ماتحكي عنه لديه
قطعت خيالاتها -: سامحني يا حبيبي مراح تخرج
مثل الباقي على ماما وبابا
توقفت .. واخذت نفساً مرة اخرى وابتسمت لبطنها وحادثت طفلها حقاً وكأنه يسمعها وهذه عادتها منذ ان شعرت بنبض يشاركها في جسدها
-: تعرف للحين متحيّرة وش اسميك
ابي اسميك سعود وودي اسميك مسفر بأبوي وودي اسمك محمد بجدي
امممم وودي اسميك عبدالله بجدك يعني الصراحة مرة متحيرة
انت وش حاب اسميك عاد لو ماعجبتك هالاسماء انت آمرني وتدلل
رن هاتفها من جيبها رفعته لتقرأ " عمتي الغالية " عقّدت حاجبيها
وقالت -: عساه خير .. وردت
هلا اميمتي ..
-: ياهلا بنيتي اخبارك وعلومك
جلست على الارض الزراعية وساقيها ممتدة للأمام -: الحمدلله يمه انتِ طمنيني عنك
ووش حال عمي عبدالله ووسومة ولمو
ان شاء الله طيبين
-: الحمدلله الكل بأفضل حال .. عاد بغيت اسألك
متى زيارتك الجاية للدكتورة
-: اممم اليوم
-: اجل بسير معك واتطمن عليك وعلى حال حفيدنا الغالي
-: تامريني يا الغالية اوك انا بأمر لك
بتردد -: سامي يبي يودينا هو علشان يتطمن على ولده
بانفعال -: لا يا اميمتي اعذريني مع سامي ماني صاعدة
-: اسمعيني ياقلبي لعل وعسى ربي يآلف بين القلوب
-: ماني محللة له علشان اطلع معه
-: بس انتِ ام ولده الحين ومافيها شيء ان رحتي معه
لا وبعد انا معكم وبعدين تعالي نسيتي انه لو نوى
بترجيعك صرتي محلله له
زاد انفعالها -: جعلني ما اصير
زفرت بضيق وهي تستغفر -: وش هالكلام يا امجاد استغفري ربك
بهدوء -: استغفر الله .. المهم يمه انا اللي بمر لك ...
لم تكمل لأنها سمعت صوته وهو يحادث والدته
-: يمه اذا عيّت ترا مو بكيفها اذا ماصعدت معي ذا شيء راجع لها
اما انها تعيي اني اروح المستشفى وقت الزيارة واتطمن على ولدي هذا شيء مهو بكيفها ابد ...
-: يمه علامك انت شاد وهي شادة يعني مافي احد فيكم بيتنازل
امجاد قاطعتها بضيق -: خلاص يمه اذا يبي يجي بكيفه
عاد هذا ولده بعد ..

بسم الله الرحمن الرحيم
السلام عليكم ورحمة الله وبركاته
ماشاء الله تبارك الله
ولاحول ولاقوة إلا بالله



البارت الثامن والعشرون



أنا .. لا أحد !
وأنت،
من تكون ؟
هل أنت أيضاً ، ” لا أحد ” ؟
وإذاً ..
فثمة إثنان منا،
إياك أن تخبر أحدا!
وإلا ..
ألقوا بنا في المنفى !

~ إيميلي ديكينسون ~






__________________







الخوف والقلق يسيطر عليها وليس هي فقط بل التي في جانبها آشد خوفاً
وضعت الجوال جانباً -: مايرد !
تنهدت والاحمرار يكسو معالم وجهها -: اكيد مراح يرد
لكن عندي فكرة بتصل من جوالي هو مايعرفه
حضنت يدا الهنوف -: تكفييين يانوفا جربي
شدت على يد اختها اكثر ثم ابعدت يديها لتأخذ جوالها من الطاولة
ثم اخذت رقم محمد من هاتف نوف ..
بعد عدة دقائق
رد -: آلو
.... من الخوف والارتباك لم تجب
-: مين معي ؟
بلعثمة -: ء ء د د دكتور اخبار ابوي تكفى لاتكذب بشيء
تنهد -: مابه الا الخير
بكت -: دكتور تكفى قول الصدق حنا مانبي منك تكذب علينا
-: يابنتي اقولك بخير عطوه دم والحمدلله
بفرحة -: يعني حي !!
ابتسم -: ايه الحمدلله لكن محتاج يرتاح الحين
انتن تطمنّ عليه وادعين له هو محتاج لدعاكن بعد
تهلل وجه الهنوف وتبدلت الوانه الى الفرحة والسرور
وانهت المكالمة لتلف على نوف
واحتضنتها بقوة -: نوفي الحمدلله بابا بخير
اتسعت عيناها -: يعني ما مات !
-: لا الحمدلله عطوه دم ويقول الدكتور محمد انه بس محتاج للراحة
ابتعدت عن حضن اختها -: اجل يلا رحنا له المستشفى
-: خير خير انتِ أي مستشفى واي بطيخ اصلاً مين بيودينا
بألا مبالاة -: تاكسي
اتسعت عينيها وشهقت -: لا والله !
-: اي والله اهم شيء نروح
-: لا معليش انتِ مجنونة مع احترامي الشديد بعدين انا مستحيل اطلع من دون اذن سطام وهذا ان وافق اصلاً كذا ولا كذا روحتنا لأبوي مراح تفيده بشيء مالنا الا الدعاء له هذا اللي بيفيده ..








*








وضعت يديها على خدها تتأمل البوكيه التي وضعته على التسريحة
من اين هو ياترى ؟
ومن هذا الرجل الذي بتلك المواصفات
ولو علم الجميع ماذا سيحصل !
بل انا ما الذي سأفعله فأنا لا اعلم احداً بهذه الهيئة
شعرت بأن الخوف بدأ يتسلق حائط قلبها وحتى اخترق الهدف
.. كيف عرف منزلي ! .. وكيف سمحت له الجرأة بأن يتعدى على حدوده
وبكل اريحية يعطي الحارس ليقول له اوصله إلى فتاة في هذا المنزل تدعى امجاد .. سألت زوجة الحارس .. مِن مَن !
قالت " شابٌ ابيض شعره اشقر مليحُ الوجه لايبدو على هندابه انه غنيّ ! "
فسألت وماهي سيارته قالت " ونيت " وما لوحتها
قالت " لا اعلم "
من انت .. هل اسميك لا احد لكي اريح نفسي !
اغمضت عينيها عندما شعرت بألم يغتالها في بطنها
-: آآآآه خلاص ياولد يكفي اللي فيني مكفيني
الله يصرفك عني يا انت ..
آآووه تذكرت سالفة البطاقة البيضا .. وش قصده فيها !؟
ما اعرف احد يسويها الا واحد ومستحيل يكون هو هه هه طبعاً بعد اللي صار بالمستشفى مستحيل .....








*







في اليوم التالي ..
في العصر ............

تتحدث مع والدتها
-: علامك ماتردين بيتك
-: وش ابي فيه برد للشقا خن اجلس لي هنا فترة نقاهة
بنبرة -: أي شقا عاد مابه شقا الا هنا اركدي يابنيتي
وردي لبيتك ولاتخلين جابر يطير من يدينك
كانت ستتكلم ولكن احدهم دخل إليهما
وقد كان اخيها جلس امامها وهو ينظر لها دون كلام ..
نظرت له -: خير علامك تناظر لي كذا
بتردد -: آآآ يعني العنود مانيب عارف وش اقول
-: قول وش وراك
-: جابر ..آآآ
باهتمام -: وش فيه جابر
-: في المستشفى امس نزف واجد وعاد مادري يمكن حالته خطيرة
بصدمة -: ويشششششششش ، ووضعت يديها على وجهها تبكي
والدتها -: وش فيك ياوليدي علامك خرعت بنيتي
خلاص يا العنود مابه الا الخير .. وضربت ابنها على كتفه
وتعرفين اخوك يحب يكبر الامور ..
ركضت لغرفتها واقفلت الباب لتنهض والدتها -: شفت الحين عاجبك وش سويت في اختك ..
-: وش سويت يعني جزاتي اعلمها عن رجلها عساهم بالطقاق عاد
ضربته مرة اخرى على كتفه -: مصروف اليوم مافي
-: يمماااه وش ذا
تجاهلته وهمّت باللحاق بـ ابنتها ، طرقت عليها الباب
العنود بصراخ -: ما ابي احد ما ابي
بحزم -: مهو منجدك ترا انا امك
بعد عدة ثواني فتحت لها الباب ودخلت امها
-: ماهقيتك تعلقتي فيه !
فجأة انفجرت ضاحكة -: يمه حرام عليك صدقتي تمثيلي
كنت امثل قبال ولدك هذا علشان مايشك
تدرين فيني من وقت تزوجته وانا انتظر لحظة موته
بنبرة -: اييه بعد علبالي
-: ايه يمه تذكرت ابي اقوي السحر
-: وش له تقوينه خلاص الادمي بيموت يقولك حالته خطيرة
-: اممم ابي سحر خلاص يفنيه ماني قادرة انتظر الورث
لين ربي يقبض روحه .. !






*







صب لها بعضاً من القهوة -: وبس ..
اخذت منه الفنجال وقالت بأسى -: وعلى قلبي هالمسكينة
ياليت ابوكم ذا يتقي الله فيها متى راح يتعلم من اغلاطه ؟.. مدري !
-: مادري عنه والله اهم شيء انه جاها الافراج وانتهت مدة العقاب
مؤيد -: اشوه مابغينا
نظر له برجاء -: ماودك ترجع
-: نووب الحمدلله جداً مرتاح عند اميمتي الغالية ..
قطعت حديثه اخته ميعاد التي دخلت وهي تقول بغضب -:
يمممه معاذ معيي عليّ العب معه بلاستيشن والمصيبة ان الشريط حقي
والدتها لم تعطها اهتماماً بالغاً بل تحدثت لولديها -:
ايه وهو الصادق اخوك علامك ماترد ع الاقل لو ماجد مهو في
انت تكون مع البنية واذا انت منت في ماجد يكون لمها
وقفت امامها -: يممه اقولك معاذ معيي عليّ العب بالبلاستيشن
يتحكم فيه كأنه هو اللي اشتراه وهو اصلاً حقي
ماجد -: ابي اعرف ذي بنت ولا ولد وبزر ولا وحدة صار عمرها 15 ؟!
ضحك الجميع ...
اما هي فضربت رجلها الارض ووضعت يديها على خصرها -:
خير خير يا ابو العشريني انتا ترا وانت بعد كل ماكبرت عقلك يصغر
يعني مهو انا لحالي بعدين هه هه يحصلك وحدة
جامعه كل الاعمار والاجناس
ماجد لأمه -: اعوذ بالله بنتك كلتني بقشوري
ضحكت -: انت اللي رحت لها
-: توبة معدني واصلها ..
ميعاد رفعت حاجبها -: وش اللي منت واصلني تراني اختك
والدته -: وعلشانها اختك ياماجد يلا روح حل المشكله بينها وبين معاذ
وضع يده على صدره -: انا !! ماحصلتي الا انا
لا خلي مؤيد حلال المشاكل ..
مؤيد -: امي قالت ماجد مهو بمؤيد
نظر لوالدته لتقول -: ايه انا قلت انت
تنهد ونهض ونظر لـ ميعاد -: امشي يابزر
وتعداها لتقلده هي بصوت ساخر -: امشي يابزر
اعادت صوتها .. سمعناك ياكبير ، وذهبت خلفه
مؤيد بضحكة -: لابنتك ذي منتهية
-: آآآخ تعبتني معها احسني اربي ولد مهو بنت
-: ماتنلام البنت الوحيدة بين ثلاث اولاد
بعدين شكلك خلاص تبرمجتي على تربية الاولاد
قسم بالله مستحيل تكون ذي بنت
نظرت له والدته بتلك النظرة -: وش قصدك متبرمجة هاه !
ترا اختك تركيبتها من الله كذا عاد وش دخلني فيها
-: ع العموم خليها تتغطى من العيال مرة مطيحة الميانة معهم
ضحكت بخجل -: تراها توها
شتت نظراته -: ولو اقلها تسوي حدود بينها وبينهم
حتى لو كانت تعتبرهم اخوانها
-: ان شاء الله .. الا تعال نسيتني وش كنت بقول
-: ويش
-: مادري نسيت
-: قولي لا اله الا الله
-: لا اله الا الله .. استغفر الله استغفر الله يارب وش كنت بقول
ايه ايه تذكرت ..
شوف يامؤيد لاتفهمني غلط ولاتفهم اني ما ابيك عندي بالعكس انت على عيني وراسي بس عبير كاسرة خاطري
وتدري فيني اثق فيك اكثر من ماجد .. ماجد توه صغير على حمل مسؤولية زي كذا لكن انت قدها وقدود ..
نظر لها -: وابوي ! والاهانة اللي هاني اياها
وضعت يدها على يده بحنان -: ماعليه امسحها بوجهي
علشان خاطري رد البيت موعلشان شيء علشان عبير
ادري فيك انت كفو اكثر من ماجد
تنهد ....
-: قلت لك علشاني ..
صوت صراخ .. وضعت الام يدها على قلبها
هاااو وش فيه
ابتسم -: بلاه باقي ماتعودتي على اصوات عيالك
نهضت -: مو قلت لك انت كفو اكثر منه هذا هو اسمع
صوته يصارخ معهم ..
ضحك .. وحينها ذهبت والدته إلى الصالة الخارجية ترى ما امرهم
ومؤيد بدأ يفكر في حديث والدته بهدوء ..
بعد ذلك خطرت في باله فكرة .. اخذ ذلك الجوال من جيبه
الذي اصلحه بعد حطامه ..
وفتحه وعندما فتح الواتس كان يقول " اتوقعها حظرتني "
دخل على رقمها الوحيد في هذا الهاتف
وجدها متصلة ! ..
هنا كانت الصدمة ، خابت توقعاته ولم تحظره
هذا يعني بأنها كانت ومازالت في انتظاره ....







*






اغرق نفسه عطراً .. وارتدى معطف البهجة
ورتب حرير الشوق الذي فوق رأسه وبعضاً منه في وجهه
نظرت له بغبن ولكن حاولت قدر الامكان ان تتجاهل تصرفاته
كان يدندن ويغني اغانٍ قديمة شعبية
كانت تتمنى ان تسأله هل هذا كله من اجلها ام لا !
ولكن اختارت الصمت رفيقاً لها ..

....


عادت إلى الواقع على صوت دارين المتمللة
فهن في الكلاس منتظرات الدكتور
-: لكن شو هلأ ماعم تحكوا
الجازي نظرت لها -: آآ مافي شيء
رزان -: يخي طفشش حتى السوالف صارت طفش
بعد ذلك دخل الدكتور ووضع كتابه على الطاولة -:
اليوم سنكمل الدرس السابق ..
في جهة اخرى ..
دخلوا المكتبة وجلسوا بها يكملون بحثهم الأخير
سعود نهض " يحوس " بين الكتب
-: شباب بقولكم شيء خطير
نايف -: ادري فيك خطير يعني شيء سامج
-: لا والله هالمرة صدق
سعود -: الله يستر تكلم ياخوي
-: الصراحة اخوكم في الله ثنّى
سعود سقط الكتاب من يديه وجاء في باله شيءٌ واحد " وهي ! "
نايف -: وش اللي ثنيت ؟ ومن ذي اللي تزوجتها
سعود -: انت صاحي خير تبي وجع راس لنفسك
يلا يلا وانتو تمشون حالكم على وحدة بعد ثنتين الله يستر
جواد -: طيب وحدة عجبتني وعجبتني اخلاقها يعني اخذها بالحرام
خلاص خذيتها بالحلال وانتهينا
نايف -: ليه هي عندنا بالجامعة ؟
-: ايه بس لاتتعبون انفسكم تدورون عليها تدرون فيني غيور درجة اولى
نايف بضحكة -: وحد قالك تتزوج بنت معنا بالجامعة يا اخ !
نظر له بتلك النظرة التي الجمته ..
سعود ظلّ ساكناً يفكر ويشعر ان كيانه تبعثر واختلط فيما بينه
ولايعلم ماهية هذا الشعور ! ولمَ يأتيه الآن بالتحديد






*







بعد ما انتهى وقت صلاة المغرب

-: كـــــــــــيـــــــــــــــــــف !!!
-: قصري صوتك ياقليلة الحيا خلاص جدك قرر وانتهى الموضوع
-: وليه حنا ماعندنا رأي تسألونا
-: والله الرجال وموافق وش تبين بعد
-: اجل وانا !!!
نظرت لها -: انتِ عارفة من زمان ان هاليوم كان بيجي
وكان راح يجي في أي وقت دامك محجورة له
كبتت غضبها -: يمه تدرين فيني ابي اكمل دراستي وبعدها يصير خير
-: هاو وش دخل الدراسة بالزواج بالعكس سلطان يعين ويعاون الله يحفظه
بغضب -: انتو ماتفهمون ماتفهمون اصلاً ..
ولفت ذاهبة لغرفتها تحت صدمة ميادة لأول مرة شيلاء تحادثها بهذا الاسلوب ، لكن لا تلومها فقد كانت صدمة بالنسبة لها
وهي التي تظن ان لا زواج الآن
في الاعلى صفدت الباب بقوة وجلست على سريرها تهز رجلها
وتستغفر الله بصوت عالٍ حتى هدأت ..
لا اعلم كيف يفكر هؤلاء .. هو ليس الأمر واني لا اريد سلطان
بل انا لا اريد الزواج بحد ذاته ، فأنا لا اصلح له
ولا هو يصلح لي
فأنا لا اجيد التعامل مع الذكور ولاسيما سلطان الذي يستفزني في كل حين
اخشى ان لا اكمل يومان الا وانا في بيت اهلي ..
ضحكت .. حقاً اني بلهاء لا اصلح للزواج
كنت اريد بعد دراستي حتى اوزن الامور واكرس حياتي لهذه الحياة الأخرى التي لا افقه منها شيئاً
لست انا التي تستطيع ان تحمل مثل هذه المسؤولية العظيمة على كاهلها
واكثر مايضايقني ان رأيي هنا مضطهد
كامرأة ثكلى فقدت حبيباً اثناء الحرب وعدها بأن يأتي بعد انتهائها
كي يخطبها ولكنه لم يعد ولم يوفي بالعهد .. !
آآآآآآآآآآآآآآه يا إلهي ساعدني
وقدم لي مافيه خيرٌ لي ولديني
دخلت مجدلين وهي تنطنط -: جاء العيد جاء العيد يلا نلبس ثوب جديد
رفعت حاجبها -: نعم ! والمطلوب
-: يخي افرحي انا فرحانه لك
-: ما ابي افرح وش رايك
تجاهلتها وهي تغني -: مباركين عرس الاثنين .. ليلة ربيع عين وقمره
تكتفت وهي تحاول ضبط اعصابها ..
واكملت بتلحين -: سلطان بتزوج شيلة وشيلة بتتزوج سلطان
كيف تجي واللهِ مادري سبحان الله اللي جمعهم
غضبت اكثر عندما نادتها " شيلة " -: مجييييييييييييييييييييد !







*








ملامحه المرهقه عذبتها هي والتي في جانبها
وجهه الشاحب وجسده النحيل هذا كله نتائج مرضه الذي اخفوه سرًّا عنه
الهنوف اتكأت على خدها -: آآآه ياليتني مكانك يايبه
همست لها اختها والدموع تخنقها -: مالنا الا نراقبه بهدوء وندعي له
-: اححم الحين على سالفة فلوس المستشفى صادق بابا !
انا ماصدقته اليوم لمن قال الصبح
-: والله مالنا الا اننا نتطرق للورث تدرين المبلغ مو هين
الله يهديه الدكتور محمد ماجابنا الا ذا المستشفى
بسخرية -: عباله حنا مثلهم نطيّر الفلوس وين مانبي
بحدة -: نوفااا هو ماسوى شيء غلط الدكتور متعامل مع ذا المستشفى هو وعايلته كلها فأكيد بجيب ابونا محل كويس يعني الله يجزيه خير
تخصرت -: والفلوس ان شاء الله
-: خلاص حنا قلنا من الورث
بتنهيدة حزن -: وماتذكرين ماما ايش قالت ولا تذكرين حنا
وش اتفقنا عليه !

.. في الامس استيقظ جابر واليوم اتين ابنتيه بكل شغف
وفي جوفهما مشاعر لم تلقى طريقاً معبداً بعد شتاتها
لم تقصر الخالة فتحية بشيء فقد اوصلتهما هي وابنها عوض حتى المشفى
واعدّت حليباً وتمراً لجابر ..

طق طق طق
تحرك رمشي جابر وبصرت عينيه الغرفة وبالتحديد اتجاه الباب
الهنوف -: ايه منو !
-: انا محمد
تغطيّن الاثنتين وذهبت الهنوف تفتح له وتنحت عن الباب
ليدخل هو -: ماشاء الله لا اليوم وجهك احسن من امس بكثير
بصوت مرهق -: الحمدلله
نوف التفتت له ولم تعلم بأنه استيقظ -: صحيت !!
-: ايه يابنيتي
محمد اقترب من رأسه وقبل ان يتحدث اشار له جابر بيده
-: تعبتك معي ياوليدي جزاك ربي الجنة
-: افاا ياعمي انت بمقام ابوي
-: وايه على دفع الجناح ..
قاطعه -: لا خلاص على حسابي
قال بعصبية وقد اجهد نفسه بالحديث -: وششششووووله
والله ماتدفع شيء
-: عمي خلاص انتهى الموضوع ولاتحلف
-: والله ان دفعت اني لا اقوم الحين من هالمكان
اتسعت عينيه -: وش تقوم ياعمي مابينا حلفان وحساب
-: اجل خذ فلوسك وحطها بمخباتك اشوه لك من هالخبال اللي مسويه
ضحك وقال لكي ينهي الموضوع -: ان شاء الله
وقال في نفسه " اصلاً دفعنا وانتهينا "
نوف ابتسمت وقالت للهنوف -: يافديت عفة وعزة نفس ابوي
ابتسمت بسعه -: الله يحفظه لنا
-: امين
احتد صوت جابر وحطّ جناح الجد على جنباته -:
محمد ياوليدي ابيك بكلمة رآس
وينظر لابنتيه فتخرجان بهدوء .... !





- يتبع