كاتب الموضوع :
انيقه !
المنتدى :
القصص المكتمله
رد: رواية / واكتشفت اني لقيطه للكاتبه صرخة المشتاقه
|$[ البآرت العاشر الجزء الثاني ]$|
لا مستحيل تصدق ..!
مو معقوووله ..!!
مو معقول يكون آرثر ..!!
فقالت بمنتهى الألم والهمس: آرثر ..
طالع فيها ذاك الشخص اللي كان هو نفسه آرثر بفرحه ..
كان وده يشوفها ..
وفعلا شافها ..
اختفت ابتسامته بألم ولف ودخل داخل من دون لا يرد عليها ..
طالعت فيه وهو يدخل وهي على نفس صدمتها ..
ماهي قادره تصدق ..
ماهي قادره تستوعب ..
دخلت وراه وهي تقول: آرثر منو سوى فيك جذي ..؟! آرثر ياوبني ..
مشي وجلس فوق الكنبه وهو يتألم من كل انحاء جسمه ..
وقفت قدامه وهي تطالع فيه بعيون حزينه جدا لحالته ..
كان متغير 180 درجه ..
مو هو آرثر اللي تعرفه ..
رفع راسه وطالع فيها فتره طويله بعدين قال: كانت امنيتي اني اشوفج .. بس ما كنت ابيج تشوفيني ..
دمعت عيونها وقالت: ليش ..؟! ليش انت جذي ..؟! آرثر انت تعبان صح ..؟!
آرثر بألم: هههه .. ياليت تعبان .. ياليييت ..
حس بالدموع تتجمع في عينه بس قاوم وقال بصوت ضعيف: حصدت اللي زرعته .. إيه استاهل ..
اسيل: شتقصد ..؟!
قبض إيده وضربها على صدره وهو يقول بقهر: إيــــدز .. انا مصاب بالإيدز يا اسيل .. عارفه شنو يعني إيـــــــــدز .. يعني الموووت .. انا حأموت ياليوم او باجر او بعده ..
وحط راسه بين كفه وهو يحبس دموعه لا تنزل ..
رجل اسيل ما قدرت تشيلها وجلست عالارض من الصدمه اللي سمعتها ..
نزلت دموعها انهار وعيونها معلقه على آرثر ..
كل جسمه جروح وآثار حمرا ..
عيونه صايره ذبلانه وصفرا ..
من تحت عيونه مسود ووجهه كله ذبلاان ..
شعره منكوش وكأنه له سنه ما مشطه ..
اسيل وهي تبكي: جذاب .. انت جذاب .. انت مو مريض ..
وصرخت: انـــــــــت جـــــــــذاب جــــــــــــــذاب جــــــــــــــــــذاب ..
وحطت إيدها على وجهها وبكت ..
مو معقول الكلام اللي يقوله ..!!
هذا يعني انه راح يموت ويتركها ..!
هزت راسها بقوه من طاري الموت وهي تقول: ماراح تمووت .. ماراااح تمـــــــــوووت ..
وكملت بكاء وهي تصارخ وترفض الكلام اللي تسمعه ..
شلون راح تتقبل حكاية انها بتعيش بدونه ..؟!
يكفي .. يكفي انها لقيطه ..
رفع راسه يطالع فيها ..
فقام بالصعوبه من فوق الكنبه لأن المرض كان في آخر مراحله ..
هو عنده من زمان بس الاعراض ما ظهرت بشده إلا من قبل عشر ايام ..
وما عرف ان عنده إيدز إلا قبل عشر ايام ..
كان دايما يجيه صداع وخمول بس ما كان مهتم لأنه ما جاء في باله كذا ..
مشي خطوتين ناحية اسيل بس رجله خانته وطاح عالارض ..
قامت اسيل عنده بسرعه وقالت بخوف: آرثر .. آرثر انت بخير ..؟!
جلس وهو مغمض عيونه بقووه من الألم وقال: بخير بخير ..
اسيل: روح .. روح تعالج برى .. مـ مرضك مـ مو خطير ..
فتح عيونه وطالع فيها بعدين ابتسم بحنان: الحمد لله ان امنيتي الاولى تحققت وشفتج قبل لا اموت ..
اسيل بصراخ: لاااا آرثـــــــر لا تقول هالكـــلام .. انت ما راح تمـــــــــــووت ما راح تمــــوووت ..
ابتسم وهو يطالع فيها بعدين قال: اسيل اعذريني لأني ما ارد على اتصالاتج .. كنت ابيج تنسيني وتكرهيني عشان ما يأثر عليج موتي ..
اسيل: آرثر انت ليه تقول جذي .. انت ما راح تموت .. لا تقول هالحجي .. لا تقوله ..
ابتسم بعدين قال: انتي ليه ييتي هني ..؟!
نزلت راسها وقالت بإنكسار: لأنه مالي احد بالدنيا غيرك .. ما عندي اهل ابدا ..
استغرب من كلامها وقال: اسيل شتقصدين ..؟!
فقالت ودموها تنزل: لا .. اسمي مو اسيل .. انا ما عندي اسم اصلا .. وحده مجهوله الاسم والهويه والاصل ..
آرثر بخوف: اسيل خوفتيني شسالفه ..؟!
انفجرت بالبكاء وقالت: انا لقيطـــــــــه لقيييـــــــــطه ..
انصصدددم آرثر من كلامها وقال: لا مستحيل .. شنو يعني انتي لقيطه ..؟!
ما جاوبته اسيل واستمرت بالبكاء ..
هذه هي أول مره تبكي بصوت مسموع من يوم ما اكتشفت انها لقيطه ..
بكت وبكت .. يمكن البكاء والشكوى للناس تخفف من حالتها ..
بس هي لقيطه .. تتوقعون البكى يخفف من مصيبتها ..؟؟؟!!
انكسر قلب آرثر عليها وحاول بالصعوبه يقرب منها ..
مسح على شعرها وقال بحنان: اسيل بسج صياح .. المفروض ما تبجين جذي ..
اسيل بإنفعال: شلوون ما تبيني ابجي ..؟! انا لقيييــــــطه .. فاهم شنو يعني لققيييطه ..؟! يعني ابوي وامي رموني في الشارع .. يعني اهلـــــي ما يبـــــــــوني .. يعنــــــي انا انسانه منبوووذه من المجتمع .. انا مو انســـــــــانه .. انا وحده قذذذره ومقزززه .. اكرههــــــــــــــــــم ..
آرثر: اسيل لا .. لا تقولي على نفسج جذي .. انتي مو مقززه ولا قذره .. انتي انسااانه .. انتي مثلي تماما .. هذا ابتلاء من رب العالمين ولازم تصبرين وتكملين حياتج عاادي ..
اسيل بضعف: اكمل حياتي عادي ..!!! انت تمزح صح ..؟! لا اكيد تتغشمر .. شلون اكمل حياتي وانا بدون اصـــــــل ..؟! انا بدون اي اصل او هويه او قبيله .. انا وحده حققققيره بنضر المجتمع ..
ارتجفت شفتها وكملت: ابي افهم .. انا شسويت لهم ..؟! انا شذنبي عشان يقطوني بالشارع ..؟! انا في إيش غلطت ..؟! والله اني طفله وما ساويت فيهم شي .. طيب حتى لو غلطت .. اضربوني .. حتى لو تذبحوني عادي .. بس لا ترموني جذي .. لا تعيشوني بذا اللقلب .. حـ ـ ــرام عليـ ـكـ ـم ..
وحطت إيدها على وجهها وبكت بألم وقهر وتعب من هالواقع ..
سكت آرثر شوي بعدين قال: خلاص يا اسيل اهدي .. لا تكوني ضعيفه جذي .. انا اعرف انج وحده قويه وما يهمها شي ..
هزت راسها وهي تقول: لا .. لا تقول اسيل .. انا اسمي مو اسيل .. اكره هالاسم .. اكرهــــــــــــــــــه ..
آرثر: اوكي خلاص بس اهدي .. ما يصـ .... آآآآه ..
تألم بقوه من جسمه فطالعت فيه بخوف وقالت: آرثر شفيك ..؟؟!!
عض على شفته وهو مغمض عيونه وقال بتعب: انـ ـا بـ ـخيـ ـر ..
اسيل بخوف: لا .. لا انت مو بخير .. انت تعبان وايد ..
آرثر بإبتسامه: اكيد تعبان وايد .. مو انا مريض بإلإيدز ..
هزت راسها بقوه وهي تقول بإستنكار: لا تقول جذي .. لا تقوووول .. انت ما عندك الإيدز .. ما عننننددددك ..
ابتسم بهدوء فقالت: وين امك .. لازم اناديها عشان تشوفك ..
طالع فيها وقال: امنيتي الاولى هي اني اشوفج .. وامنيتي الاخيره هي اني اشوف اخوي ..
اسيل: شتقصد ..؟!
آرثر: امي في المستشفى تولد ولاده مبكره .. يااارب اشوفه قبل لا اموت ..
اسيل: تولد ..؟!
هز راسه وكمل بإبتسامه: بتييب ولد وبتسميه رايد ..
شوي خنقته العبره وقال: كنت ابي اكبره على إيدي انا .. كنت ابي اصير له الابو والاخو والام .. كنت ابي اسعده بكل الطرق .. كنت ابي اساعده في كل شي يحتاجه .. كنت ناوي اخلي كل مصاريفه علي .. المصاريف الشخصيه والدراسه والزواج وكل شي .. كنت ما ابيه يحتاج لأحد وانا مويود ..
كمل بألم: وركزي على كلمة "كنت" .. اللحين ما راح اشتري له شي .. ما راح اصير له الاب والاخ والام .. ما راح اساعده اذا احتاج مساعده .. ما راح اقدر اسعده ابدا .. لأني بموووت ..
هزت راسها بصدمه وهي تقول: لا .. لا ما .. ما راح تموت ..
هزته بقوه وهي تقول بصراخ: ما راااح تمــــــوت .. لا تييب طاري المــــوت يا آرثر لا تييبــــــــــــــه ..
بغى يتكلم بس ما قدر ..
حس بغصه وحشرجه بحلقه وكأن روحه قاربت تطلع ..
طاح جسمه عالارض فخافت اسيل وقالت وهي تهزه: آرثـــر .. آرثــــر .. آرثــــــر قووم .. آرثــــــــــر تسمعني ..؟!
فتح عيونه بتعب وقال: ابي اشوفه .. ابي اشوف رايد قبل لا اموت ..
اسيل بخوف: بتشوفه .. صدقني بتشوفه .. امك اللحين يايه بس انت لا تمووت .. فاهم لا تموووووت ..
ازداد نفسه وازداد الألم في حلقه وبدأت الرؤيه تتشوش قدامه ..
حاول يتكلم وقال: اسيل .. انا .. انا .. اسف .. اذا غلطت .. بحقج .. سامحيني ..
بكت وهي تقول: لا تقول جذي لا تقول ..
آرثر بتعب: لا تبجين .. مابي اشوف دموعج .. ابيج تبتسمين .. قبل لا .. اموت ..
اسيل بصراخ: مـــــاراااح تمـــــوووت ما تفهــــــــــم ..؟!
آرثر: آآآآآآآآآآآآآآه ..
اطلق صرخة ألم من حلقه ..
خلاص روحه بدت تطلع من مكانها وتطلع لخالقها ..
اسيل بهمس: آرثر .. آرثر ..
انفتح باب البيت في هاللحضه ودخلت الأم وهي شايله ولدها في لحاف ابيض ..
وقفت مصدوومه وهي تشوف ولدها طايح هناك وجنبه بنت ..
لف آرثر راسه بالصعوبه بس ما قدر يشوف احد لأن امه بعيده ..
مد إيده ناحيتها ..
يبي يشوفه ويمسكه ..
يبي يشوف اخوه الوحييد بعد 22 سنه ..
فهمت امه قصده وجت بسرعه عنده ..
"وما كل ما يقصده المرء يدركه"
طاحت إيد آرثر عالارض معلنه ان الجسد هذا .. قد فااارق الحياه ..
مــــــــــات وامنيته الاخيره ما تحققت ..
مــــــــــات قبل لا يشوف اخوه اللي دايم يتمناه يكون موجود ..
مــــــــــات آرثر وهو ماد إيده يحاول يمسك بأخوه رايد ..
طالعت اسيل في إيده بصدمه بعدين لفت تطالع في وجهه ..
فتره من الصمت تحاول تستوعب ..
الام جت ركض وحطت الولد على جنب وجلس جنب آرثر ..
هزته بقوه وهي تقول: آرثـــــر ولــــــــــدي آرثــــــــــر ..
بس لا مجيب ..!!!
فتأكدت الام ان ولدها ترك الدنيا وراح بدون رجعه ..!
بكت وحضنته بقوه وهي تشاهق بأسمه ..
هذا ولدها اللي عاش معها 22 سنه ..
مستحييل يتركها في اقل من 22 ثانيه ..!
هذا بجد شي كبير عليها ..
اما اسيل فما زالت على حالتها ..
تطالع فيهم بصدمه وعدم استيعاب ..
مو قادره تستوعب الموقف ابدا ..
لا ما راح تقدر ..
طعنه وحده بالقلب تكفي ..
مستحيل الشخص اللي كان هو الوحيد الباقي لها في العالم يروح ..!!
مستحييييل ..!!
انهارت وانفجرت بكى بعد ما استوعبت انه مات ..
انه مـــــات ومستحيـــــل يرجع ..
مسكته من بلوزته وهزت بعنف وهي تقول بإنفعال: آرثــــــــــــــــــــر قووووم يالأنـــــانـــــي .. لا تروح وتتركنـــــي يا آرثـــــر قووووووم .. جشـــــع وحققققير .. شلوووون قلبك طاوعك تتركني ..؟! انا قلت لك لا تموووت ما تفهــــــــــم ..؟! ليه ما تسمع كلامي ليـــــه ..؟! انانــــــــــي .. تحب نفسك وبس .. رحت لحالك وما اخذتني معاك .. انـــــانـــــــــــــــي ..
فكته وكملت بصراخ وبكى: اكرهــــــــــك .. كنت يايه عشان تساعدني بس انت ما ساعدتني .. اكرهـــــــــك .. اكرهـــــكم كلكم .. محد يبغاني في هالحياة .. كلكم ما تبوني .. اذا انتم ما تبوني حتى انا ما ابيكم ..
سكت شوي وكملت بهمس: انا ما ابيكم وانتم ما تبوني .. طيب وين اروح ..؟! مع منو اتكلم ..؟! محد بالدنيا يبيني عيل ليش اعييش ..؟!
لفت عيونها على آرثر شوي بعدين رمت نفسها بحضنه تشاهق وتقول: آرثر لا تتركني .. آرثر عفيه لا تخليني بروحي .. منو في هالدنيا بيتقبلني غيرك .. منو بيساعدني غيرك .. قووم ابي اسمع صوتك بس .. قووم وقول احبج بالتركي زي دايم .. آرثر انا احاجيييك قووووووم ..
وقعدت تبكي وتبكي ..
ابوها اللي رباها مااات ..
شوي واكتشفت انها لقيطه ..
واللحين آرثر مااات ..
شلوون حتقدر تتحمل ..؟!
املها الوحيد كان في آرثر بس .... مــــــــــات ..
قامت ووقفت ومسحت دموعها بكف إيدها وقالت: ما راح ترد علي .. انا عارفه .. أنانـــــي .. اكـــــرهــــــــــك ..
وخرجت بسرعه من هالبيت وراحت تجري في هالشوارع اللي صارت بيتها الآن ..
من المؤسف انك تغمض عينيك ثم تفتحها فلا تجد إلا ذكريات من ناس احببتهم !!!
تعاود الذكرى مرة أخرى..
لتغمض عينيك وتفكر هل هذهـ حقيقة ام خيال هل أنا في حلم ام علم
لا ليس حلم بل كابوس أم أنه واقع لابد أن أتعايشه نعم واقع فراق حبيبك ...
نعم لن أراه مرة اخرى...
لن أجلس معه مرة اخرى...
لن أتحدث معه مرة أخرى...
لن أبحث عنه في الأماكن...
لأن الباقي بين هذه الجدران فقط ذكرياته...
ااه مأصعبك أيها القدر...
نعم اؤمن بك...
وأؤمن أن هذه الدنيا زائله...
لكن قلبي لايحتمل فراق من أحبب...
كل يوم أنام وأصحوا وأقول هذا حلم سآفيق منه...
لكن الواقع أنك رحلت وأني سأبقى منتظر لقائي بك ....
أشتقت لك يأغلى الناس ....
اشتقت أليك يأحب الناس,,
كم اتمنى أن الأيام أن تعود للوراء...
لمـــــآذآ !
لأخبرك كم أحببتك... وكم انـ فراقك صعب علي... كم أشتقت ألييك و لأحاديثك...
نعم أيها الفراق..:
أخذت من أحب امام عيني صرخت بكيت ناديت بأعلى الصوووت
لاترحل لاترحل أنطلقت من قلب مفجوووع على فراق حبيبه....
لكن لم يمنع فراقك كسر قلبي ...
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
في صباح الجمعه ..
كانت كل الاسره جالسه عالفطور يفطرون ..
لفت الام بنظرها في المكان بعدين تنهدت وقالت: كالعاده .. مقفله الباب على روحها وما اكلت ..
الاب: طيب وش فيها ..؟! من يوم ما رجعت قبل امس من الجامعه وهي قافله الباب .. ليش ..؟!
هزت الأم كتفها وقالت: مدري .. بنتك غيدا محد يعرف لها ..
محسن: ههههه يمكن تهاوشت مع واحد بس هو اللي تغلب عليها ..
معاذ: معاك حق .. هالبنت مشكلجيه درجه اولى ..
محسن: هههههههه لا لا قول هالولد مشكلجي درجه اولى ههههه ..
معاذ: ههههههههه ..
الام بعصبيه: بـــــــــس .. عيب تتكلموا عن اختكم جذي ..
طالع مازن فيها وقال: لا لا هذي معجزه .. لازم تنكتب بالتاريخ .. امي تدافع عن غيدا ..!! يا سبحان الله ..
الام: اسكت انت بعد ..
مازن: حاااضر ..
قامت الام وقالت: بطلع اشوف وش نهايتها معها ..
طلعت الدرج واتجهت لغرفة غيدا ..
فتحت الباب وشافت غيدا جالسه عالكرسي حق مكتبها ودافنه وجهها في إيدها ..
الام: غيدا انزلي وتغدي ..
غيدا بهدوء: مابي ..
الام: مو بكيفج .. انزلي ..
غيدا بنفس الهدوء: قلت مابي ..
الام: وانا قلت مو بكيفج .. انزلي كلي وغذي جسمج .. احنا مو فاضين نوديج المستشفى اذا مرضتي ..
رفعت غيدا راسها وكانت عيونها حمررررا وتحت عيونها هالات سودا خفيفه ..
لفت على امها وقالت بهدوء: ما راح اتعب .. واذا تعبت بروح للمستشفى بنفسي .. ما احتاج لأحد ..
لفت وطالعت في انعكاس صورتها على شاشة اللاب اللي عالمكتب وقالت بسرحان: ما احتاج لأحد .. بأعتمد على نفسي .. لأنو مالي غير نفسي .. الناس كلهم خونه .. كلهم ..
طالعت الام فيها فتره بعدين قالت بعصبيه: احسن .. عساك ما كليتي ..
خرجت وقفلت الباب وراها ..
غمضت غيدا عيونها وسندت راسها على إيدها ..
سمير .. سامي .. بشرى ..
كلهم حبتهم بس هم رفضوها ..
سمير كانت تكرهه من يوم وهي طفله بس هو كان يحبها ودايم يسكت عنها لمن تسبه ..
اول حب كان وهي في اولى جامعه .. كانت في كلاس سامي ومن هنا حبته في كل شي ..
تطور الحب مع انه كان يلعب عليها وما يدري انها تحبه بجد ..
بعد كم شهر خطبها سمير ووافقوا الاهل .. راحت لسامي تشتكي له ..
بس صدمتها كانت لمن قال انه ما كان يحبها ومن الافضل انهم يبتعدوا عشان تكمل حياتها ..
في ذاك الوقت انقتل حبها الاول وكرهته وتوها تعرف انها غلطت بحق سمير ..
تذكرت كل اللي صلحه سمير عشانها وخجلت من تصرفاتها وحبته ..
فعلا حبته لأنه انسان صبور وطيب ويحبها وساكت عنها عشانها ..
بس الصدمه الثانيه كانت ان سمير رفضها وفسخ الخطبه .. لأنه شافها وهي مع سامي تطلب منه يفكها من سمير ..
الحب اللي كان يحبها فيه تحول إلى كره ورفض تماما اي حوار معها ..
وهنا انقتل حبها الثاني .. مالها اي نصيب ابدا ..
وهنا تحولت إلى انسانه مسترجله وتتشبه بالرجال ..
اول كانت عربجيه بس اللحين صارت بويه ..
فكرت انها تجرب تجربه جديده ومختلفه عن التجارب اللي قبل ..
فألتجأت إلى الحب الحراااام وكالعاده فشلت ..
رفعت راسها وطالعت في شاشة اللاب وقالت: يعني شتبوني اسوي بنفسي ..؟! انا فاااشله في كل شي .. مافي شي صح بحياتي .. مليت طفشت زهقت .. خلااااص ابي ارتاااح ..
غمضت عيونها بقوه واسندت راسها ع إيدها ..
غيدا بهمس: اكرهج يا بنت الجلبه .. والله لأراويج يا بيشو انتي وسامي .. ججلاااب ..
ضغطت على اسنانها بحقد وقالت: ما اكون انا غيدا ان ما راويتكم .. اكرررههكككم ..
رفعت راسها وقامت من فوق الكرسي وفتحت دولابها ..
طلعت لها بنطلون ابيض وجاكيت رسمي اسود ..
فلبسته وهي تقول: لو قعدت هني اكثر من جذي رااح اختنق ..
اخذت جوالها ونزلت من الدرج ومرت من قدام غرفة الطعام ..
انتبه لها ابوها وقال: غيـــــــدا ويـــــن رايحـــــــــه ..؟!
وقفت وقالت: ابي اشم هوا ..
فخرجت من دون لا تسمع اي رد ..
طلعت برى البيت ومشيت عالرصيف .. ماتبي تركب اي سياره .. تبي تمشي وبس ..
كانت الشمس حاره شوي بس هي ما اهتمت .. لأن حرارة قلبها احر من هالشمس ..
كانت تفكر .. تفكر في بيشو وسامي ..
تكرههم وتبي تنتقم منهم اشر انتقام ..
غيدا: اوكي .. سامي عندي طريجه قاسيه عشان انتقم منه .. بفضح سالفته اللي مخبيها ..
فتذكرت شي حصل قبل اكثر من شهر ..
:::::::::::::::::::::::::::::::::::::::::::::::::: ::::::
في صباح هذا اليوم ركبت غيدا سيارتها واتجهت مباشره لقصر سامي ..
توها عرفت عنوانه وراح تروح له ..
صراحتا مافي بالها شي تسويه بس تبي تروح كذا لعانه عشان تنكد عليه ..
فعلا هي فاضيه وما عندها غيره تتسلى فيه ..
كلها ربع ساعه لين وصلت للموقع المطلوب ..
نزلت من السياره ووقفت قدام باب القصر تطالع فيه ..
دخلت داخل ساحة القصر فوقف واحد في وجهها وقال: لو سمحتي .. مين انتي وليه يايه هنا ..؟!
طالعت فيه وبعدته عن طريقها بلا مبالاه ودخلت القصر وقالت بصراخ: ســــــــــــــــــامـــــــــي ...
دخل هذاك الشخص بعصبيه وقال: الدخول هنا ممنوع فأطلعي بالطيب قبل لا اطلع بالغصب ..
طنشته غيدا وصرخت: ســـــــــامـــــــــي يالجبـــــــــان اطلـــــــــع ..
عصب الحارس وقال: راح استعمل معاج اسلوب ثاني ..
نزل مراد في هاللحضه من الدرج وهو يقول ببرود: شهالصراخ ..؟! احنا في قصر سلطان الراهي مو في مهرجان ..
الحارس: سيد مراد هالبنت دخلت لهنا بالقوه وانا حأطلعها اللحين ..
طالع مراد في غيدا اللي كانت واقفه بإستهتار ..
مراد: منو انتي ..؟!
غيدا: شدخلك ..؟! وين الجلب سامي ..؟!
رفع مراد حاجبه يطالع فيها وقال: الجلب ..؟! مو كأنك تسبين ولد الراهي ..
غيدا: اسبه واسب ابوه بعد .. وينه هالجبان الخواف ..؟!
غصب عنه ابتسم وقال: شكلج تكرهينه .. غريبه بنت تكره اكبر مغازلجي ..
غيدا: ماهي غريبه ولاشي .. لا تضيع الموضوع وقولي وين هالحقير سامي ..؟!
مراد: مو مويود .. خرج مع اصحابه ..
غيدا بحقد: روحه بلا رده .. اللحين شلون راح انكد عليه ..
طالع مراد فيها فتره طويله وقال بخبث: شكلج تكرهينه واايد وتبين تطينين عيشته صح ..؟!
طالعت فيه وقالت: طبعا ..
مراد بإبتسامه: اوكي .. راح اعطيج معلومه عنه جدا خطيره .. هالمعلومه راح تهزه هز ..
غيدا بإهتمام: وشهي ..؟!
:::::::::::::::::::::::::::::::::::::::::::::::::: ::::::
غيدا: وفعلا هالشي خطير وسكت فتره طويله عنه .. بس صدقني يا سامي اني راح انشر هالشي جدام طلاب الجامعه عشان يوضح وش هو قدرك جدامهم ..
حست براحه نفسيه لأنها راح تدمر حياته ..
إيه صايره شرسه جدا في تصرفاتها .. شوي وينعدم الضمير عندها ..
تذكرت سالفة بيشو وعصبت ..
ما تدري كيف تدمر هالبنت ..
صحيح كانت تحبها بس صارت تبي موتها ..
جلست على احد الكراسي اللي تكون بعض الاحيان في الارصفه الجانبيه ..
حطت رجل على رجل وطلع جوالها ..
شبكت السماعات في اذنها وشغلت لنفسها اغنيه اجنبيه راااايقه ..
اللي يشوفها يقول مجنونه ..
جالسه تحت الشمس وتتسمع اغاني ..
بس هي ما تهتم لأي شي ابدا ..
همها كله هو انها تدور طريقه تهدم فيها حياة بشرى ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
|
21-01-14, 04:10 PM
جديد مواضيع قسم القصص المكتمله
العرض العادي
